PASALTHA RALNÊKA

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Lawmsanga pa
Posts: 6
Joined: February 13th, 2022, 11:12 am

PASALTHA RALNÊKA

Unread post by Lawmsanga pa » February 17th, 2022, 7:36 pm

Chapter_2

. ✍️_Lawmsanga Pa




Chutia Pi Lianpuii leh Bawlpu hmanhmawh taka an kal dawr dawr lai chuan Têk ring taka rawn tlain Pu Damliana chuan ," Eu! " tih leh a hma a kal Pi Lianpuii chu eng sawi set set lo hian bawh phei an rual ngawt pek a, Pi Lianpuii lah hlauh thawnnain a la tuam nat em avang chuan lo inring hman mawlh hek lo le, Upa Ralchhawka tual ah chuan an ri phei ta khut khut mai a.


Berh pheng phunga Upa Ralchhawka In ah chuan tlan lût rawk rawkin an thil hmuh chuan a ti ding dun chiang kher mai. Upa Ralchhawka a Silai nena a tupa bula lo thukhur mai an hmuh chuan a ti hamhaih dunin a ngaihna an hre lo dun kher mai ( A vanglai nuna tualthah hre lo zia, a phumbo tawh emaw a tih chu a lo chhuak leh a ni ngat mai) . Chutia a monu leh Bawlpu thawm a hriat veleh Upa Ralchhawka chuan hmanhmawh taka lo lut an Bawlpu lamah a chengrâng chu rangtak mai a her phei zawkin kut khûr eih lo hian a lo tin khawh ngar mai hi a lo ni a, chang khel khawl hian " A dam chhuak lo a nih zawngin" tih chauh sawiin a Sikai a lek hniam ruai ruai a.


Pi Saitluangi a nulat lai pawh a Sailo Ngurpui fanu hmeltha, khualtual thang pha ngat , nula harh vang leh Lu zo veh vawh, mahni inring tawk ve tak nithun, rîkrum thil a lo thlen pawh a chi-ai ve mai mai ngai lo ze diktak chu lo chhuakin an pa a tupa ngaihtuah na avanga rilru mumal pu meuh lo chu rangtaka rawn din hliah thuaiin, " Awi a zia lo thin emai..hawh Pu Damlian lo lut rawh" tiin Bawlpui luhkapuia hlauh thawn hmel taka lo ding zum reng chu lo chhawn thuai thuaiin an tupa Ralneka nat dan chu a lo hrilh thuai thuai a.


Bawlpu pawh chuan muangchan a hun lo tih hriain Ralneka lo mu kawm chal mai chu thlek thuak thuakin Ralneka pum nat chhan chu thup tum tak hian, " A... Pu Ral , hlauhthawn tur engmah a awm love, fûr lai ngang a nia naupang â ta chuan eitur an hmuh ang ang hi an hmawm chawt mai thin a, intupa pawh hi ka damdawi siam hi kan pe mah nanga karlovah a dam viah maiang" tih pah hian tlai lama a damdawi siam rûk Tûr thahna chu Ralneka an tulh pah zauh zauh bawk a. Chutia a duh tawk a tulh tawh hnu chuan Aw han then khurh khurh pah hian Ummm... ti kha chuan reilote han nghak det i la i dam vat mai ang, a reng reng thuah pum q nat hian pang veilam delh hian han mu kawm deuh ila, dîmtê hian kan pumna lai hi han chûl heuh heuh i la, pumna satliah hi chu a zia duh khawp a nia, tih pah hian Ralneka pum chu an zût pah hluau hluau a.


Titi hrang hrang te vawrh kualin, an khua Vaupui ropui tawh zia leh hma a sawn tawh zia te, an lalpa Neihlaia rorel thiam zia piah lamah an pasaltha Khawnbawl Upa nibawk Pu Ralchhawka thluak fing lutuk chu an khuain a chhawr zia te chu Bawlpu Pu Damliana chuan Vaibel pak khûk tual tual pah hian a sawi chuar chuar a.


Vaupui khua hi khaw lian leh ropui tak han tih tur chu a ni lo nain, In 150 an inchhâl ve a, mahse han tih tak takah chuan In 100 pawh an tling meuh lo ( an arbawm te nena chhiar chuan In 150 chu qn tling ve mahna le.) . Khaw mipui te pheikhai a rual tlangin an inlungrual hle a, a maherawh chu an khaw thleng hi a rem loin lawiluh nuam li zet mai a nithung. He khua hi tkang chung zawl tiila Lalmual bak hi chu zawl han tih tur a awm meuh lo. Luhkhan hi hmun hnih ah chiah awmin tlaklam luhkhan hi an zawh tam ber a ni a, chutianga an zawh tam ber ni mahse kawtchhuah lungdawh pelh chiah thui vak lo a tang hian zawh a nuam loin thing leh hnim to lo hiang fîng hnih chen dawn lai hi a filh thla rul mai a, hmelma leh râl tan pawh han bihrûk emaw han tawm bo na tur âwm ang hi a vang hle a. Chhim lam luhkhan vethung erawh hi chu a mual a rem deuh zawkin zawh pawh a nuam zawk viau tak nangin zawh an awm ngai meuh lo. A chhan ber chu he luhkhan hian nunna a lak hnem tawh em vang a ni a, An lal Neihlaia pawh hian chhim lam luhkhan hi zawh a khap hial reng a ni.


He luhkhan ah hian engdang awm lovin Kawrpui thuk zet mai, a mawng lung ti rep rup, tlak palh chuan a lo berah ramtuileilohna khawpa thuk hi a awm roh a. Pa ho tlawmngaiin a kal kaina tur thing han dawh kai thin mahse a ko lei chu nghet loin a bal huk ta thin a, chuvang chuan mi tam tak an tlak phahin nunna chân an tam tawh hle reng a ni. Chu achhapah a ko vel ah hian Di leh hrui zam chi atamin, hnaitak a tang lo phei chuan Kawrpui a ni tih hriat a har hle a, naupang sava veh pawh an tla fo thin reng a ni. Chutiang taka taka khaw thleng rem lo ni mah se an Tui tlan atha in a mi cheng te pawh an Ti a nungin an dawn ngauh mai a, khawdang an ngai bik reng reng lo. He an khawhmun rem lo zet a vang hian Vaupui khua chu Râl leh Sapui ilo lakah an him phah phian a, Lal Neihlaia pawh hian khawdang chungtlak nan leh uan khum nan a hmang fo reng a ni.


Rei tawk fang a thut hnu chuan Ruah tla pawh a lo zia tawhin Ralneka pawh a pumna chuan a kiansan tawh tih hriat tak mai hian a lo muhil sak sak a, chutah Pu Damliana chuan han din hluai pah hian, " Eng inti tawh lovang chumaw... thlamuang tak khan awm phawt mai tawh un" tih pah hian luhkapui lam pan chu a rual nghal zat a, Pi Saitluangi chuan han chelh der ve viau mahse a awm a nuam thei tlat lo a ni, A chhan pawh Ralneka nat chhan an zawt ang tih a hlau ru tlat. Chutia Bawlpu a din tak hluai ah chuan Upa Ralchhawka pawh rawn harh chhuak thuaiin ngaihdam te an han indil leh hnuhnawh a. Tha taka inthlahin Pu Damliana chuan an In lam chu tluk sual hlau tak hian a pan phei boh boh a.


Chutia bawlpu haw ta chu a ngaihtuahna a kal thuiin a inngaihtuah mûk hle mai, Ramhnim leh thil zung chi hrang hrang damdawi a tana a siam vek tawh , hman theih mai a a dah tawh , a awm loh lai a thil dang eng eng emaw nena lo in chawhpawlh nuaih thin chu naupang an nih ngei ringin, a ti tu manchhuah ngei a duh aleiah Tûr chak vak lo siamin Bachhum ah tatin naupang annih chuan an ei ngei ringin dawhthlengah a dah ta kha a ni a. A tu nau pawn ei se an pum a na anga an chhung ten amah bawk chu rawn koin , a Tûr thahna siam chu a intir mai dawn a ni. ( He Bawlpu ruahmanna hi atan chuan ho hle mahse, pawi nasa tak a thlen theih mai bakah a dâwntawi thlakin ruahmanna atthlak tak a ni reng a ni.)


Amaherawh chu, a pawi taber chu naupangah pawh Khawnbawl Upa , a vanglai a Pasaltha, mi nunna tam tak lo chhat tawh tu, a mah ngeipawn a vanglai a heiat chian em em tupa berkherin a thangkam a daiper ta chu a ni si a leh. Hriatchhuah a nih a Lalbeng a thleng a nih ngat zawngin a hmabak tur awm ang chu a suangtuah thiam nghal ruak mai a, tin Lalbeng thleng lo mahse Upa Ralchhawka pasaltha kum uaithla tawh ,mahse thluak fim tak pu reng hian a hriat chhuah a ngawirenga a en liam mai chu a ring hauh lo. Ruah tlak zawh hlim, boruak vawt vur hnuaia kal nimahse thlan fîm chuan Pu Damliana chu a bual leh pap pap thin.


Ni e, Ralneka hi an khua Vaupui khua ah na na na chuan naupang thlasik tum ruk lek paltlang tawh ni mahse a rualpui te ah han tia pha hi an awm meuh lo a, a Puin a duat bawk a, Sial an ngah nen Se hnute leh eitur tui tha tha a chawm seilen a nih vang pawh a ni mahna le. A pu mit ah phei chuan thil a tisual ve thei lo hi a ni ber a, chung te a vang pawh chu ni hmiang Ralnêka hi a chapoin mi han tihbuai leh thilruk mai te, mi Archhiar a Artui han tham mai te hi a hreh lo mai ni loin a nuam tih ber te zing a mi a ni tlat pek a. Mitha fa zawng naupang dang ten bechhe ngam mawlh hek lo le, a ai a nau deuh leh a ai a thlasik tum 3 tum 4 paltlang tawh te chen hian athuhnuaia dah theih hi a nei nual reng a, kuttang hnih zât dawnlai mai inkawm khawmin hmeithai fa leh an aia chak lo zawkte tihduhdah a kut han thlak mai te hi an hreh eih lo .


A mah lah hi a lian thur maiah, aia u leh puitling thleng hian han hnial tîmna na a nei eih bawk si lo, a vopung a na hrep mai lehnghal, tlakdeng mual lamah phei chuan nuchang inhauh pui loh chu hmeithai Pi Nemthangi chiah zu han nei lo a mawle. Han tivak dawn se a Pu Upa nihna leh Pasaltha nihna a hre si, a tawngka chhuak reng rengah hian " Ka Pu a ni ve mai" a ti nileng hi a ni hrim a, nu tam tak pawh hian tih ngaihna vak hre hek lo le" Nau sual" tih leh In chhung lama pen tauh luh san ta sawk sawk hi an awm tuktin a ni hawt ee .


Amah han ngamtlak deuh tuten Upa Ralchhawka bula a tupa chanchin an han sawi lah hian Upa Ralchhawka chuan, " A lo nimaw.... ka Taipuia chuan mi a lo inhauh pui thiam ve tawh a nih chu, thil a ru uk lovang e, ruk ruk ngai lovin kan nei ve îm êm e" hi a ti damthluam zel bawk si. Hmangaih te thil tih engkim mai hi hmangaihtu mitah chuan a lo mawiin enliam a lo awl zel zawng a lo ni e.


( Ka hmanhmawh vak dawn lo a nia... Inngaih dan leh fuihna kha min khilai hreh lo u la awww.. Tin ka vawikhat ziahna a nia hriat loh ka ngahin, thu puitling lo leh âwm lo deuh deuh pawh a tam ka ring e , typing leh upload chungchangah pawh ka la bo hle a nia, min finchhuah zel teh un..... )



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)