PASALTHA RALNÊKA

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Lawmsanga pa
Posts: 6
Joined: February 13th, 2022, 11:12 am

PASALTHA RALNÊKA

Unread post by Lawmsanga pa » February 18th, 2022, 9:12 pm

Chapter_3

✍️_Lawmsanga Pa


Chutia inhauh pui nei reng ta nafam chu Ralneka chuan amah hawtu leh ngaithei lo tu a rualpui leh puitling zingah pawh a nei nual reng a. Chung zingah chuan an khaw Bawlpu fapa Damkima hi Ralnêka hian a mil lo leh zuala, a chhan pawh Damkima hi Lalmual a naupang an rualpui tamzawk hian amah Ralneka ai hian an ngaisangin a bula awm an thlang zawk fo thin. Ni, Ralneka hi naupang chimawm leh intihbuai hrât viau ni mah se a tak takah chuan a dawih ru riau mai a, a thian ti ila a mah tlawn tu te an ni zawk mah ang chu, chung ho chu hmatheh ah hmangin a kaikuang ber hi a him leh lel mai thin a. Damkima te nen pawh hian intibuai fovin a tlawm zawk leh a chan chhe zawkah an tang fo thin.


Tumkhat pawh Damkima te thian hoin Zawlbûk a an thing keuh tur an sahkhawl sa, têlfel sa thlapa an dahthat chu Ralnêka te thian ho Sava veh haw lam chuan an hmuchhuak peka, chutah Ralneka chuan nuih var var pah hian an zîng a Mawng lama malsawmna dawng ber Thangpuia, a ek ngah vanga Thangêk tia an kohfiam thin (Thangpui, Sava veh ang emaw Sephûng lâi ang emaw ti a an han sawm châng a piang a," kan E lawk " ti hmasa ngei ngei) chu an hûi zauh zauh a, chutah Ralneka chuan," Thangêk , tunah hian i E thei ang tiraw" an ti sup a. Thangpuia lahpek chuan " Thei eee" tihleh san a rual nghal ta mai. Chutah le a pumchhunga awm zawng zawng a sang chhuak ta emaw tih mai tur hian Ralneka duhthusâm anga tam chu an sangchhuak hnawk maiah, an thian dang te lah chuan lo uak tuar tuarh pah hian Thangek khawi a mi vak vak nge tia kâwkin an lo nuih tlawrh tlawrh a.


Chutah Ralneka chuan thawmdim deuh ru.... tih pah a han hûi zauh zauhin an thianpa Thangpuia ek din hual tir papin, a remruatna a thian te bual an sawi chuan a nui nghal hak mai ah, an phûr tlang tawh ngei mai. Chutah le, an bul vêla thingtang techu thliakin an hûm far mai ah, Ralneka chuan tuman sawi chhuah loh tur, zêp tlat tur tih pah hian Thangpuia Ek patling thankin ek zahzet a mawi, lo vûm thâr mai ah chuan a hmawlh ken lai hawlh tlum thawihin an pir tâwn a, Damkima te thing dahthat na lam chu a pan pui ta hmiah mai le,chutah midang chuan uak that that chunga an hmawlh ken laia lo pir ve sap sapin Ralnêka tih ang chuan Damkima te thing têl ah chuan hlauthawng ru tak si, thahnem ngâi ru tak si chuan Thangpuia ek, zîng lama an zawngtah mu hmeh, a pumpuiin a thialchip zo lo tih hriat tak mai, la khu vung vung mai chu an han tât pherh kual ta tehrêng a leee. A tîr lamah chuan an ngawi ngal maia, marawh chu Ralneka berin uak kharh pah a a uih luutuukkk a rawn tih tâkah chuan e tumah insûm thei awm tawh lovin an uak ta tluar tluar hlawm a. Chutah Thangpuia phûr phêng chuan ka la E thei tih pah a Damkima thing têl an thutchilh hmiah mai zawng an zavai mai chuan an nui tlawrh tlawrh a.


Chutia hlim taka an nuih tlawrh tlawrh lai chuan an chhak Mau tlûk 10 vel zet a hla a tang chuan ," Tute nge kan thing khawih" tih thawm lo chhuak thutin pakhat mai an ni lo tih hriat tak thäwm hi a rawn ri thla ta buan buan mai le. Chutah le Ralneka beng fing zet mai chuan an thawm chu lo man nghal chatin , "Tlân ang" tih leh tlan an rual nghal zat a, midang ho pawh thlanglam awihah chuan an liamthla nghal suau a. Mahse Ralneka an hawi lêt chuan Thangpuia lo thutui lak lawh , thawm ngaihsak lêk lova maimichhing duar duar chunga lo sang nui vur vur a hmuh chuan tlan let leh vatin, Thangpuia san pe mêk chu a bânah lain thlanglam awih ah chuan a tawlh liam thlâk pui hrawt hrawt a. Thangpuia lah chuan engmah lo hre ve hek lo le, " enge engnge .. ka mawng ka mawng" tiin Ralneka hnunga tawlh thla zawt zawtin engmah hre lo hian a lo hlauthawng ve em em ringawt a.


Chutia hmanhmawh tak a hmun rem lo leh rampalai lênga tlan ta vak vak chu an hah tlang bawk a niang' i châwl ang u' tih pawh ngai lo hian an ding rual thap a. An zinga a fiamthu duh ber Rouka chuan Thangpuia Ek uih zia kha an rawn ti zeuh zawng, hlauh neia tlanchhia an ni tih lam reng hrechang tawh lo hian an han nui tha leh ang tlawrh tlawrh a. Khatia Damkima te thian hoin nimin lama an thing dahthat la tura an kal khan Ralneka te thian ho thawm an thing dahthat na lama an han hre thut chu a engamah hma hian an sa nghal phat maia, ralkhat atangin thinrim aw rawl an rawn chhuah ta kha a ni a. Hmanhmawh taka tlan hlawk hlawkin an thing dahna hmun an han thlen chuan mihring hmuh tur reng reng an lo awm tawh lo. Mahse enge lo thleng ta.. a thleng thla hmasa a piang uak tuarh tuarhin thinrim vanga hmai sen tan tan chunga kan Râldawiha te ho bawk maw, an chak lo khawp ang tih leh an tlan na lama dawk thla ve nghal puat puatin an tlanchak dan ah an thin a rim tlangin umphak a nawp hrep an tum tih a hriat kher mai.


Damkima te thian ho hi Ralneka te aia Û deuh hlek an ni a, Ralneka te thian ho ngawt aichuan a tlan pawh an tlan sâwt viau renga. Chutianga umphak ngei tuma theihtawp a tlan ta ngat ngat chuan karlovah Ralneka te thawm chu an hrethuai renga.Ralneka te pawn chutia thawm dim lo taka rawn tlan buan buan ri chu an man rang kher mai. Chutah le Ralneka chuan Damkima ten an rawn nangching a nih vaih zawngin a thian te piah lamah a mah pawh chu nidang angin a him bîk thei tawh dawn lo a ni tih a hre chiang tlat, hman hmawh taka ruahman na siam zung zungin , ' tlan darh ang tih leh a him ber tur lam ni a a rin lam a tlan tuma a insiam rem lai tak chuan , Aw han thian kharh thawm hi a hre ta. Hmanhmawh tak a chu aw lo chhuah na lama hawi rual nghal thawtin, an mi hmuh a vang chuan an beisei a bo nghal rawih rawih mai. An mi hmuh chu tudang ni lovin nichin lawk a an mi tihbuai Damkima Pa Bawlpu Pu Damliana a lo ni renga.


Pu Damliana chuan rum zeta melh pah hian ," mi pawi in khawih leh ta a ni maw ." tih paha an lam pana pen phei pâwk pâwkin chiang zet mai hian a melh kual den dena, Pu Damliana hian Ralneka te tlanchhiat chhan hi rin dan a nei a, chu a rin dan chu a dik ngei pawh a ring, chuvanga lo tih khawtlai tum pawh chu a ni renga. Chutah Ralneka chuan Bawlpu chu chiang zeta en kal chung hian ," Kan Bawlpu lah ni rengin, kiangteh " an tingawt pek a(he nau hian aia upa te hi zahna a nei teh chiam lo, a apa Pu Sialmana pawh hian a zilh tamna pawh a ni rêng a) chutah le Bawlpu chu a mengling ta hlar mai le, " Nauhâi leh... han sawi nawn leh teh" tih pah hian Ralneka beksam ah thâmin an khâi zui lawp mai chuh, a khâi na bawk a niang Ralneka chuan Pu Damliana chu a chen thuak mai a.


Na tih luat vanga then chak chakin tah mai chu a tum bîk awzawng lo, Pu Damliana hian tih khawtlai a tum ni hian Ralneka chuan a hretlat a, tâl pît a Damkima te lo thlen hma ngeia lo relhrûk bo hman a tum ngat a ni. Mahse atum angin thil a kal ta lo, Damkima te thian ho chu karloah thaw huam huam chunga lo thleng chawpchilh ve nghalin Ralneka chu an rawn tinzawn nghal chat a ( Damkima hian Ralneka ruahman na a ni tih a hrechiang eem a ni) . Pu Damliana chuan a fapa Damkima chu a mitsîr sân khum zeuhin " Ekhai Taia, angnge thil awmzia ? Inngeih tlang taka inkawm tur a ni ngai e" tih leh kalsan arual ta daih mai a.. Chauta tang chuan a ni Ralneka hian an Bawlpu Pu Damliana hi a huat tak em em ni.


Ralneka chuan an Bawlpu kal kiang nalh chu rum tak hian an melh zui râm ram a, Damkima te thian ho hi anni aia u deuh hlir an ni bawk nen Ralneka hian beilet ve pawh nise an hneh dawn chuangin a hre lo nain a kawtawp ah an tang tih hriain tlanchhiat a tum bik tawh lo. Chutah le ring taka auin tunah tih leh Damkima te thian ho chu bawh phei an rual nghal pawp mai a, mahse thilpawi tak a thleng tlat, chutia Ralnekan tunah ti a ring taka a au chu a thian te chuan tlanchhia ang a ti leh dawn emaw tiin rang tak mai hian hmunhim lam ni a an ngaih lam ah theuh an tlan darh ta huk mai le, chu chu Ralneka hian hretawh hek lo le Damkima te thian ho inrin loh lai ni a ngaiin a bawh phei ta kha a ni reng a. A hmai chu ri no nghal chawkin a thal chiang kher mai. Damkim te inring lo lai ni a angaih chu a ngaihdan mai a ni, an lo inring nasa mai.


Chutah Ralneka chuan rangtaka thawh chhuah leh mai a han tum ngawt, an hawi chhuah nâk chuan Khawvel hi Ke hlirin a khat emaw tih mai tur hian a hawina lam apiang ah Ke bâl zet zet mai hian a hmai ah te, a hnunglam leh a hmalam arem lai laiah an rawn tlawh ta zawt zawt mai , thochhuak tur pawn hun a awm thlawt lo, a chhir tu te lah chuan thahnem an ngai tlang phian lehnghal. Nidanga a hmatheh thin a thian te lahin chhan ngam tawh bik hek lo, hladeuh hlek atangin an lo thlir nham tâwk a ni mai a. Chutah le tihngaihna thlawt awm tawh hek lo le, Ralneka chu a rîl a tla ta emaw tihmai tur hian an tap tak tak mai nih kha,( Ralneka hian kan hneh dawn lo a nih chuan han tap vak mai i la pang a him hma nge nge tih hi a thupui pakhat a ni ve hrim hrim a) a tap ring bawk a niang, kutthlak tute pawh chu an tâwp hlawl hlawl mai a, chuti em ema ringa a tap thei chu mak an ti a ni . Ralneka lah a thi thei mai ang tih hlauhawm khawp hian a tap uarin lei chârah chuan a let kual vel a, kut an thlak tawh loh vang nihmiang a uar ang tulh tulh a. Chuti taka tap nasa chu han khawih zui chi ni tawh hek lo le Damkima te thian ho chuan " Nêp lutuk, tap ring ropui si" tih pah a chil chhak thawt thawtin an kian san ve mai bawk a.


Chutia an kiang ta chu Ralneka chuan a kut kâr a tanga lo melh kawrin a la tap uar nasa mai, an kal liam tamaw tih veleh rawn thuchhuak hlawlin " a va na hiai hiai ve le..., hmelho inla hre ve khawp ang" tiin an inhrosa ve kûk kûk.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)