PASALTHA RALNÊKA

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Lawmsanga pa
Posts: 6
Joined: February 13th, 2022, 11:12 am

PASALTHA RALNÊKA

Unread post by Lawmsanga pa » February 22nd, 2022, 8:15 am

Chapter_4



A thian te inthlahrung ru tak chunga lo kal zum dâk dâk chu Ralneka chuan nui var var a lo hûi lauh lauhin " Intân kan tuar ve hlak a nihkha" ti a hawi valh valhin a thian te chu an en kual pah den den bawk a, Rouka chuan," i va han au ring thei ngai ve lee, tlangaupa aipawn i au ring daih zawk" tiin Thangpuia lah pek chuan ," kan hmelchhe ho chu an buai ve ang chu awww, keipawh miin min sawisak hunah ka tap ring ve ngawt ang, pang a him daih zawk" lo ti vein an han nui ho leh ham ham a.


Ralneka chuan a hmui leh hnar a tanga thi lo chhuak chu lo hru ve malh malhin bâi saih saih chung chuan khaw lam panin an inzui haw ve ta hnak hnak a. Ralneka bawk chuan kan thil tawn hi tumah hrilh loh tur, thiam loh kan chang leh dawn tho, phuba kan la ve khawpang tiin a thian te chu a fuih ve sauh sauh a. An phuba lak dan tur te sawi ho ve nak nakin Thangpuia pek chuan " an In bulah kan E dawn mi " an lo ti khauh mai chu an han nui leh rih a, Ralneka bawk chuan Thangek nang angin kan E ve reng thei hleinem, mawl teng tung lutuk, chu aichuan maw " tiin a ruahman na chu an hrilh sar sar a, fimkhur hle tur Upain Bang pawn Beng a nei an tihkha an ti tel zeuh chu Rouka chuan rang zet mai hian Bang a awm loh tawp hi Thing leh hnim vek a nih hi, tiin Ralneka chu a thlek ha ha a, Ralneka lah pek chuan Rouka mawnga pêt thlawrh pah hian Chhur hnuhnung leh... tiin an han nui ho leh ham ham a


Damkima te thian ho pawh chuan an thing lak sa chu put haw chi rual ni tawh hek lo le, thing dang zawngin hmanhmawh takin an liam ta dawr dawr kha a ni a. Ralneka tepawh nui ham ham chunga kal zelin kawtchhuah lungdawh ah an thu far tawh,chutah lungdawh bula an thing thuhruk chu phawrh chhuak sap sapin khawchhung lam an pan leh ta vak vak a, ngeiawm zet a hawi kual vah vahin an kal nghauh nghauh zel a, zawlbuk kawt an thlen chuan an thing telkhawm chu keuh sap sapin thâwk an la ham ham hlawm a, chutah Ralneka chu rawn ding chhuak thutin "Phuba" tih pah hian Bawlpu te In chu a kâwk ta vâng mai le.


In lam pana an haw tham tham lai chuan Bawlpu Lal In lam pan a kal chu an hmu ta, chutah Ralneka chuan tunah tih leh hawi zak zak chunga Bawlpu in lam pan chu a rual nghal zat a, an thleng têp tih chuan a thian te chu min lo veng ru tih leh Bawlpu te In chu pan rual nghalin an dâk lût dâk dâk a, vanneihthlak kan ti dawn nge tumah an lo awm lo hlauh, chutah Ralneka chu hmanhmawh zeta lut nghal zawkin Bawlpuin uluk taka a siam Damdawi mau bura a dah uluk taka a chhin thlap chu hawng zung zungin a chhûn fin rawk rawka, a duhtawk mai dawn emaw tih naklaiin tapvut chu thamin an thun leh kher pek a nih kha. A tihtur a zofel khat bawk a nuisang chunga hmanhmawh taka chhuak leh thuaiin mi hmuh hlau tak siin venghmawr lam an pan leh ta hal hal a.


Bawlpui pawh Lal In a tanga lo haw ve mekin In a lut tep tih chuan a nupui âng hlak hlak thawm a hre ta, annu lah a lo ângtui nasa mai. Bawlpu pawh lût nghal thuaiin ," ngati bawrh bawrh nge Taia nu, khatia Arngûm ang mai a mahni chauh pawh a i lo phun bawrh bawr mai le" an ti chuh, a chhânna a dawng rang kher mai. Nanglah hi Vawk ang mai ,awmna hmun a piang tihnawk vak zel mai, i damdawi te hi dahtha deuh rawh ka ti tuktin a, hmeichhe thu ka awih lo e, eke bale i ti khang lang a, hei thenawm te Arin a tih khawloh vek hi" tiin a lo chhang zek mai. Chutah Bawlpu chuan a damdawi siam te chu hmanhmawh zet a enfel thuai thuaiin a chek ta tlak tlak mai le.


Rum zeta lo hawi chhuakin, " khawia Ar mah khan mau bûr chhungah vut an thun thei hlei longe, mihring bâk va ni suh" tiin a thinrim chu a insehruh teuh mai. Inchhung dung ah veituak nghat nghatin " a tu fa lubawk nge ni ang aw" ti vang vangin pawn lam techu an thlir leh ngawt thin, tihngaihna awm tawh hek lo le phûr lo zet hian damdawi siamna hmanrua la turin ramlam a pan lehta nge nge a .


Chuta chin chu a damdawi siam sa te chu a bo loh leh tap mei ah a lo inrawlh thul, thinrimin han châng thin mah se a titu nen an inhman hleih bawk a, chân chhuah tik ni reng a nei thei lo, Bawlpui tihngaihna hre lo thinrim bawksi chuan ngaihtuahna tha lo tak neiin Tûr a siam a Bachhum ah tâtin dawhthleng ah a dah a, a chhuah san ta daih kha a ni a. Chu chu a ni Ralnekan Bawlpu te In atang a chhuah pah a a lâk, a thian te pawh pe phal lova amah chauhva a ei zawh tâk vek kha ni.


Khua a lo vâr a, Ralneka pawh hma taka thoin zan lamah a pum a na tih hriat lêk loh hian midangin a Sephung hual an laih khalh hlau tak hian a thian te sâwm tumin hnap dawk zawk zawkin a tlân bial mam mam a. Upa Ralchhawka pawh chhuak vutin Bawlpu te in lam a pan ding nghal nalh mai le.


Pu Damlian pawh Meilum lo kuanin Vaibel a lo zukhu hlat hlat a. Upa Ralchhawka chu ngawi reng a lo lûtin a hmelah erawh engmah chhiar tur a awm lo. Chutah Pu Damlian a chu din chilhin chiang zet a melh pah hian, dam dup vawt ru tak si hian, " Thisen" tiin a chhuak leh nghal daih mai si. Bawlpu lah hlauhnain a man a a tiril khûr ru nghal der derin a zunfêm a thlauh lo chauh chu a ni e.


Upa Ralchhawka pawh nui suk suk a Lal in lam panin Lal in ah chuan luh a dil nghal zat a. Lalnu chuan lo chhawn varin " E khai kan Pasaltha lah nireng chuan lo lût tawh lo lut tawh , hei ka tuibur al hian i kamchhiahan tlêng phawt mai teh" a lo ti zung zung a . Vaupui lalnu zet hi zawng mi han tihlawm a han biak tlangnel a thiamin khaw mipui te pawh hian an ngaina hle reng a. Upa Ralchhawka chuan Lalnu tuibur chu hmuam sakin an fak pah zauh bawka, chutah lalpa thutna kawhhmuh lam pan nghalin thut hmun a rem thuai a.


Lalpa chuan Upa Ralchhawka mitmeng a dik lo awm chu lo man thuaiin, Aw ka zang vah hian, " E khai kan Pasaltha chu zing thang thangah engthilin nge i awm tinuam lo le, khatia i mit meng nen lama chhiar theih a an awm tâk mai chu , nidangah lah harsatna tam tak kan lo hmachhawn tawh thin a khatiang mit meng i chhuah ka hrengai hek lo, engthil pawipang nge awm ta le? " , tiin thu pehhel lem lo hian a zâwt tlang nghal râwng mai reng a. Upa Ralchhawka chuan ekhai lalpa min ngai dam teh, eng pawipang mah a awm love, aaa.. nizan ka mang a fuh lo deuha ka lo ngaihtuah mûk deuh a nia nge, tiin ngaihdam a dil nghal zat bawk a


Lal Neihlai chuan Pasaltha te mumang hi ngaihthah mai mai chi a ni lo tih a hrechiang bawk a, a lo ngaipawimawh nasa mai. Chutia nang meuh awm ti nuam lo a, helai thleng thleng lo chuan kai tir tu chu min han kamkeu la maw le tiin titak hmel pu tak hian a nawr nghal chat reng a. Chutah Upa Ralchhawka chuan a tuibur hmuam pik puatin, aa... Lalpa ngaih han tih that loh vak tur chi chu a ni chuang law, ti a thuthmun siam rem sat sat pah hian , eng lo a nia Lalpa i vawkpui no chhiat kum kha i la hria emaw chu a tih lai chuan Upa thenkhat pawh an lo lut khat khat a.


Lal Neihlaia chuan Upa lo lût te chu thuthmun rem tur a tiin an thu haw lam kal lam chu Upa dangte an kamthawt zat bawk a, chutah lal vêk chuan Upa Ralchhawka chu a thusawi chhun zawm tura sawmin an beng an chhi uluk tlang hle. Upa Ralchhawka chuan muang ban cherh chawrh hian a thusawi chu a chhunzawm leh ta, " aaa thlasik a liam nual tawh a, kha kan Lalpa Vawk no chhiat kum kha ni tain ka hria, kan chikhur min chuhpui avanga Hrianghmun Pasaltha Hrângmana ka kut zâla tlu ta kha, Nizan ka mumangah ka hmu pek a. Kha Pasaltha phuba la tur khan Hrianghmun ho chuan kan khua hi an lo pan mup mup mai a, Pasaltha Hrangmana fapa ni ngei tur hian hma rawn hruaiin phuba lâk châk na mit meng a mitah ka hmuthei tlat a ni, tih theih ka nei si lo chu ka lo tâl nasa mai hi a lo ni a, Taipuia Pi in min lo sâwi harh ta hlauh zawk a" " Mangchhia mai mai mah nise mi vit na riau mai a hei Lal In ka pan ngawt mai nih hi" tiin a mumang chu an sawi chuar chuar a.


Lalpa chuan a Lu lo bunghat nghatin, "umm.. Kan Pasaltha zarah khuanu kan lamah ala tang a ni ngat mai, kan Pasaltha mumang chu ngaihthah chi va ni suh, engnge inngaih dan le tiin Upa ho chu an melh kual dan dan a. Chutah Upamin Pu Hawizaua a Lu a kelsam to vek tawh chu rawn tawngchhuakin , aaa.. ka ngaih dan hi a thaber chu ka ti chuang law, ti hian i ti dawn ang u hmiang" kha kan Pasaltha mumang kha nuih liam pui mai chi a ni lo tih kan hre tlang vek ang a, tûkthuan eikham ah hian kan tlangval te chin bih turin chhuak mai ta sela, a lo dik lo anih leh a lawmawm a ni maiah ka ngai e a" a rawn tih chuan Upa dang te pawn an pawmpui tih hriat tak hian an Lu an lo bu tliar tliar a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)