PASALTHA RALNÊKA

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Lawmsanga pa
Posts: 6
Joined: February 13th, 2022, 11:12 am

PASALTHA RALNÊKA

Unread post by Lawmsanga pa » February 23rd, 2022, 5:12 pm

Chapter_5


Tlangaupa lo lut tur luhkapui lo kân chiah chu Lalpa chuan Valupa ko turin an tir nghal zat a, tlangaupa pawh a hna tlin tih hriat taka awle tih leh vir vut rualin hmanhmawh zet hian pên chhuah rual nghal zatin kâr lovah Valupa leh tlangaupa chu an lo inzui lût thuai a. Valupa Bawnga chuan Lalpa pawipawng a awm ta em ni, kei ni ang te i Lal In ropuiah min han koh tâk mai tiin Lal In chhunga pen luh chu a rual nghal thuai a. Lalpa chuan pawipang awm lah love, hei kan Pasaltha mang bawhzui turin tlangval thenkhat sawmin kan ramchhung han fang thuak thuak u la tiin thu kan lo titlu rup mainih hi tihpahin Upa Ralchhawka mumang chu Valupa an hrilh pah thuak thuak bawka.


Chutah Valupa chuan ,a nihchu mawle chiti a nih zawngin a hma lama chhuah a ngai a nih chu, khawinge tlangval kaltur te ka lo zuk thâwt kual ange tiin Lal In chu a chhuahsan thuai a. Upa Ralchhawka chuan inthlahrung aw tih hriat tak hian, kan tlangval te chu anzuk hah thlawn mai mai ang ka ti a, a tih lai chuan Lalpa chuan lo tawngkhalh zatin , mai mai thin a tlangval chutin an chau chhe tak tak ngai hleinem, a reng reng thuah ramri chin a kan perhtâr te pawh a him em tih hriat hrim hrim pawh a tha e, an tih chuan Upa dang tepawh chuan lal thusawi chu an lo thlawp ve sap sap bawk a, Upa te tuibur hmuan da vel Lal ina an thut khawmuan leh hnuchuan Tûkthuan eu a lo hun tawh bawka, tukthuan kîl turin an haw ta thliai thliai a


Tukthuan eikham a ni a, Valupa leh tlangval thenkhat ramchin thlithlai tur te pawh lungdawhah vaibel pak khu laih laihin an thu vâng tawh a. Chutah Valupa chuan a vaibel chu han fâwp kawkin, kal isiam dawn ang aw tiin hma hruai a rual nghal zat a. Vaupui valrual te chuan Vaupui him nan an tum ram pan tur chuan pheikhai zangzet hian ram lam an pan ta vawk vawk a.


Chutih mêk lai chuan Ralneka te pawh Bawlpu te Ar khai thên nalh nalh chung hian an khaw kiang mai a Pûk biru zet mai, khawmi te pawn a awm tih an hriat meuh loh lam chu an kawng rûk a tang chuan an pan ve thâm thâm a. He pûk hi Ralnêka te dâi vâk velin tumloh deuh a an palchhuah kha a ni rêng a. Kal pah a ti ti ve nak nakin Rouka chuan Damkima te thian ho tihbuai a châk leh thu a rawn sawi ta zauh mai le. Ralneka hma hruai lai chu ding chatin Rouka chu an en he haw a, ngatinge hman hmanah i sawi loh lee, a pawi lo e kan la tlai lo tih leh Thangek Rouka nen khan min zui u la midang zawngin kan bukah khan Ar hi lo puah rawh u ti a a Ar khai lai chu pêk rualin kal a siam nghal thuai a.


Thangpuia leh Rouka chuan zui nghal thuaiin Damkima te thian ho zawh ngun bik kawng lam chu hmanhmawh zet hian an pan nghal dawr dawr a. Chutah hmahruai tu Ralnêka chu ding chaihin he tah hian a tha ang tih leh Apuin a zawh tawk lek tura Thirdeng a chhertir chempui a ma tawka hrian bak hlar mai chu phawrhi an kiang lawka Mualhawih kung ah chuan lawn an rual nghal zat a, chutah rei lo te ah Mualhawih zâr ngîl tha zet mai pachang hlam chen vel zet tur hi lo thlak thla in, inzo tih hriat tak hian tawlh thlak a rual nghal zat bawk a, a hnah leh a tang te chu hlâwi thawt thawtin a bula ding te chuan a tihtum an man pha lo tih hriat tak hian an en tawp rungawt. Chutah Thangpuia chuan an tihtur chu a zawt ta nge nge a.


Ralneka lah chuan nui var var chung hian , Ngalhem kan siam ang chu le, an tlanchak hlawm hawl hawl bawk a, engchen nge an pên theih kan en ang chu. Tihpah hian a tiang sah chu thingbulah a tawn pah mawlh mawl a. Thangpuia leh Roukan an tih tur an han hrezet chu an phûr ngang mai. An theih tawka ngheta an phuar hnu chuan thing chu an han pawt kûl pawp mai a, a hmawr chu ramhrui a tawnin, hrui chu sei deuh hlekin an zawm a hmunhim lai ni a an hriat ah chuan thing dangah an suih leh thlap a, Damkima te lo kal veleh hrui chu an sâtchat tawh mai dawn a ni.


An thang kam an zo ta, Ralneka chuan han en fel leh zung zungin, hrui an sahchah huna an thing kawih kûl invai kual lo dang thei tur âwm te chu hmuh har deuh tur hian an thianfai leh zung zung a, an inring ta kher mai. Tuibur hmuamda zet an thut hnu chuan Ralnêka beng chak zet mai chuan thawm a hreta, chule tih leh a chempui chu hûm ngheh a rual sauh sauh a. Thawm pawh lo hnai zelin an duhna hmun tak an lo thlen hma chuan thawm chu a ding ta tlat. An thangkam chu an hmu ta mai em ni le tiin hlauthawng thaw dêp dêp hian an inenkual hrek hrek a.


Khatia Damkima te ho Sava veh a kal ta khan Sava perhtur hmu mang lo hian kut ruaka haw ngawt aiah Zawlbuk thing keuhtur rawn puhaw nghalin Ralnêka te thangkam chu an lo hmu awzawng lo, khawchhung a hnai tawh bawk a, chawl khawmuangin an Vaibel paipawn ruk chu an lo infawh chhawk ve liam liam hi a lo ni a, ti ti te vawrh ve liam liamin Ralneka te thian ho chung chang ah an pakai zui thuai a. An zinga pakhat chuan Ralneka te an hmuh huna a tihdan tur zirin boruak techu a lo hnek ang thuak thuak a, an chhak lawkah Ralneka te an awm tih reng an hre lo. Ralneka te pawn an thusawi chu lo hrephain an awmhmunah an lo inhumruh ve nasa mai. Chutah le an nghahhleh leh mawng thlan dup a reife an thut chhan chu a lo thleng dawn ta. Damkima te thian ho pawh an thing putlai nen ring fe a lo tawng chho lâng lang hlawmin an hmazawnah enge lo thleng dawn tihreng an hre lo.


A duh na lai chin an lo thleng ta tih hriat tak hian Ralnêka chu a lu bu nghatin a chempui hriam ver vawr chuan an hrui thlun mar pang mai chu an chhawk zawk mai a, duhtawka an thing kawih kul chuan Vut tih leh phet phei zawk rualin hmahruai tu Damkima ngal char ah tak thingpil bei thawt khawpin an hêm tehreng anih kha, a ri pawn 'kawrh' a ti thei hial a. An reh nghal hmak mai, Ralneka ten a hem thelh ta mai emni awww, a ri kha chu a awm ngei mai si a ti a an lo inhrilh sa sa lai chuan amak a maka ring hian Damkima chu a tap ta ruah ruah mai le.


Khatia Damkima kallai thingin a inrin loh lai taka a ngalah a rawn hem khan a na ti lutuk chu a lo au chhuak mai thei lo hi a lo ni a. Leiah thu hnawkin a ngal chu hup tha ngam chiah si lo, hup lo thei bawk si lo a awmin, a nat luat vang chuan a luak te a chhuak ut ut hian a hre hial a. A thian ten lo kîl ve laih laihin tihngaih na vak an hre der bawk si lo, chutah le ring mangkheng hian an tap ta vak mai nih kha. Chu a tap ri chu a ni Ralneka te tan a rimawi danglam bik rawn chhuak râih râih kha ni. Ralneka te pawh nui sak sak chunga tawlh kîr zâl zâlin kawngruh pangai zawh detin an kawng rûkah chuan hlawhtling inti taka an bûk lam panin an kal nui ver ver reng a.


Damkima pawh a thiante rinchhan chung a kal bâi saih saihin a mit ah mittui a la tling pam a, (a na dâwn bawk em a ni) , a titu zawn chhuah a tûl vakna an hre lo ,a chhan chu Ralneka ruahmanna bâk a nih an ring lo bur. Bâi saih saih chunga kal ve bek bekin nidang chu nise kârlovah khu an lut daih tawh tur hi a ni a, mahse kal vawk vawk turin an hotupa Damkima ke a na miau mai a han kal chak chi an ni mawlh lo. Zawiawi a kal reng ta chuan tlailam eirêl hun velah khawchhung an lût ve hram a.


Ralneka te pawn an thing keuh tur pu far chung hian khawchhung an lo dâi lût ve mek bawk a, râl hla deuh taka Damkima te thian ho chu va hmuin Ralneka chuan a thiante chu an fuih pah sauh sauh a, "hlauh hlek loh tur, min hrechhuak chai lovang, min ringhlel a nih pawn ka kutah dah vek ru, ka chingfel vek mai ang" ti a hma hruaiin, a hmel ah zâmna a awm eih lo. Ralneka hi khaw chhungah na na na chuan Damkima te pawn an ti tha ngam vak lo, mitha fa niin a Pu a hmatheh thiam si, kut han thlak dawn se a tlanchhe hreh der bawk si lo, tlan pah hian a Pu koh ruah ruah a hrat bawk nen, an ti thangam vak tlat lo a ni.


Chutia Damkima te thian ho muang changa an kal bek bek chu karlovah an umpha thuai reng a. Chutah Ralneka chuan inchhuih lui tih hriat tak hian awhkhai tih leh a thing put lai theh tel zauh pah hian Damkima berkher chu an bawh phei rawk mai a. Damkima natuar , a ngal an tauh sak ang tih hlau bawk si chu a lo râk chiam leh nghal nen, naupang e ti lo chuan an ri ta rum rum mai le. An thawm hriain nu leh pa thenkhat inawm te chu an lo tlan chhuak thuai mai reng a. Chutah Ralneka chuan nu leh pa lo hnaimêk te hriat phak ngei tur chuan ," min ngaidam rawh, sawlai lungah sawn ka inchhuih palh a lawm le" tih pah hian Damkima ngal duk tluk mai chu an ben fâi sak kher zawng Damkima chu a sa tha teh e, "i ti lui i ti lui, ka ngal pawh hi nangmah vang a nih hi, i hre dawn khawp, Valupa ka hrilh khawp ang" tiin Ralneka chu a kawk ta sawk sawk mai, Ralneka lah chuan Damkima hriat tawk lek hian , " Kei aiin i tap ring" ti supin a tho nalh mai a, a zia lo hlemai a, i pa Bawlpu a nih tho kha maw i dam leh vat maiang ti a nui sawibâiin a thing Damkima te delh fuh ngei tura a tluk pah a a thehphei tâk chu la in, zawlbûk lam a pan ta vak vak a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)