NGURLIANA(TIME TREE S2) Ch~1 By Humming Moon

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Lalmeiji Hriatpuii
Posts: 63
Joined: September 9th, 2022, 8:51 pm

NGURLIANA(TIME TREE S2) Ch~1 By Humming Moon

Unread post by Lalmeiji Hriatpuii » September 23rd, 2022, 6:45 pm

"Mawite..tuar hram hram rawh aw" ti a min lo fuih mawlh mawlh tu nurse hmeltha zet chu en in dam chhuah leh ngaihna ka tan a awm tawhlo tih ka hria,ka pum nat em avang a ka thlanfim tla zawih zawih chu a lo hru mawlh mawlh a,a mitmeng a min lainatna ka hmuh chuan chu chu a nemnghet bawk.




Kei hi Lalvulmawii ka ni a,kum 19 ka ni ka nu leh pa hi tunge an nih tih chu sawi loh an hmel takngial pawh ka hrelo.Fahrah in atang a seilian in kum 15 ka nih khan ka tlanchhuak a,mi inah awmpui in ka awm thin.Kum 3 zet mi awmpui a ka awm hnu ah restaurant pakhat ah hna thawk in keimah in In ka luah ve tawh a,chutia beiseina nen hmalam ka pan lai chuan ka pum na thin a nat zual zel avang a ka inentir chu pumpui cancer ka nei tih hmuhchhuah ani a,stage 4 a lo nih tawh avang leh in enkawlna tur pawisa ka neih loh avangin tuar tawp ka thlang a,in enkawl na tur pawh chu lo nei tehreng ila ka dam chhuak dawn lo tih ka chiang.






Fahrah in a ka seilen lai khan ka vui ngailo,nun hahthlak tak ka nei chung pawh in chulam thu reng reng ka chhak chhuak ngailo bawk mahse tunah beiseina sang tak nen hmalam hun ka thlir lai a ka thih tep tawh thu ka hre zet chuan min vit na in beidawnna hlir in ka khat a Pathian lakah pawh ka vui hle.





Ka pum na lutuk vang a tal pawh ka tal peih tawh loh lai chuan nurse hmeltha zet Kimkimi'n a kut nem thep a min vawnna chu melh in ka nui lui sak a "Ka kal tawh dawn" ka tih chuan a mittui a tla sawk a "Mawite...a na anih kha thlamuang tak in kal tawh mai rawh natna awm tawh loh na a i thlen hunah pawh min hrereng ang che aw...ka ngai viau ang che" a tih chuan ka mittui a tla zawih zawih mai.Ni e...thih hi ka hreh ani,dam ka la duh a,mi te ang a hlim tak a la nuih ve te pawh ka chak,ka vanglai pawh chen hmanlo a ka ral mai tur chuan ka thinlung a ti na takzet.




Ka taksa chuan ka thlarau a thlah riai riai tih ka hre thei "Mangtha aw..." ka tih rual in a thim riai riai a Kimkimi tap hlawp hlawp thawm chu a hla tawlh tawlh a a thim ta hmuk mai.




"Chemte...tho ta che..keizawng tawrh har ka ti emai" ti a nutling tap hlawp hlawp thawm avang chuan ka meng zawk a,ka thu chhuak nghal zawt bawk.Ka hawi kual a,a bang leh a chhuat dap In chhung ah ka lo mu reng a,ka bul vel ami te lah chuan min en phawk hru mai bawk si.An inthuam dan lah chu hmanlai mi an ang.





"Khawnge ka awm" tiin ka bul a nutling lo hnai ber chu ka zawt khawl a min chhang mai ta lo chuan ka ho hian min en reng a"Mawhh khawnge ka awm" vin zet in ka ti leh a "Tunge i nih khawnge Kimkimi kha a awm rawn kal tir ru" ka tih chuan an phun sar sar hlawm a "Saii eng i hria chu nimaw" rawn ti tu chu en in "Saii ka nilo Mawitei ka nih hi" ka lo ti let chu chek tlak tlak in "Bawlpu kha han ko thuai teh u" a ti tuar a.






Putar pakhat rawn kal in min en a tum chu "Min han khawih vaih teh i ril kha ka khei chhuah sak ang che" ka tih chuan min en hru mai.A kut rawn phar chhuak chu ka lo vai kian sak lawp a chutah "Tlangval te u in puih ka ngai e" a tih chuan tlangval pali rawn kal in min chelh thap a tal engang mah ila ka tal chhuak zo lo nasa "Zawng ho min thlah vat rawh u thih in duh ami a...hmelchhe ho" ti tuar tuar in ka theihtawp in ka tal a.





"Lalpa...a tlak na ah khan a thluak a sawh che a nih hi" a tih chuan min chelh tu te pawh in min thlah mai bawk.Kei in ka lo melh rum kual nasa hlawm mai,min hlau hle aniang chu an meng khup zal zal a





Lalpa a??? Enge a awmzia??? Ka tlan chhuak thut a ka thil hmuh chuan min ti hamhaih kher mai kei hi khawnge ka awm...Ka hmuh phak chin a in ding chu a chung di,a bang dap hlir khawlai ah vawk leh ar an tla nuai nuai a an inchei dan leh an khawsak phung ka hmuh atang a ka ngaihtuah vang vang hnu ah kei hi mumang ka nei anih ka ring ta.Mahse Hospital ah khan ka thi tih ka hrechiang si mak ti zet a ka hawi buai lai in min rawn man a inchhung ah min zawn lut leh ta.






Khumah chuan thu in he hmunah hian engtia awm ringawt nge ka nih ka ngaihtuah a,ka hawi chhuah leh meuh chuan inchhung a lo awm ve te pawh an lo chhuak diak tawh.A tha,chhuak vek teh se lung an ti zing mak tih hmel in min en tang hru hru hlawm mai bawk si.Ka thi a,ka men leh chuan helai hmunah hian ka lo awm tawp a,ka mumang ni thei chiah in ka hre silo.





He lai a ka harhchhuah atang a ni hnih zet a liam hnu pawh chuan ka awm ngawt dan ka la hre reng reng lo.An Lalfanu ah min ngai tlat a,dam lo kan na tiin artui an rawn dah khawm teuh mai lehnghal.Engkim mai chu a tak a ang em em mai bawk si.Chutia rilru buai tak a ka mut lai chuan pawn lam atang a eng danglam deuh phe zeuh zeuh ka hmuh chuan rang lutuk in ka pan a,pawn ka chhuah chuan putar pakhat lo ding reng ka hmu chu ka meng kawk mai a taksa chu éng sat in a lo nui var var a




"Tunge i nih" ka ti nghal tawl chu nui hak hak in "Nun thar pe tu che" a ti a a la nui sang reng "He hmun a hruai tu che hi ka ni,hun kawngka veng tu ka ni a,i thlah tu lak a ka thutiam avang a helai hmun a hruai che hi ka ni" a tih chuan ka bo hu mai "Eng thutiam maw tunge ka thlah tu chu" ka ti let chu nui hak hak in "Lalfanu Saichhingi taksa ah i awm mek a,ani kha kham a a tlak na ah thi in,a taksa ah ka dah ta che ani" a tih leh chuan ka thil ka man thiam ta.




"Hmanlai hunah mi dah amaw" ka tih chuan bu nghat in "Kha kha i taksa a ni tawh a,enkawl tha ang che min mamawh hunah chuan ka pu kha ka va ngai em han ti la ka rawn kal ang mahse hre rawh vawikhat chiah ka pui thei dawn che ania,i mangan tawp ah lo chuan min ko suh" tiin ka hmuh lai reng chuan a ral ta daih a.




Inchhung ah lut in ka mut a chhuak tawh der lo khua a var hnai tawh bawk a a vawt vur mai lehnghal puan sin tha sauh sauh in ka chung a thil thlen dan vel chu ka ngaihtuah kual a,ka lo muhil leh sek ka harh leh chuan ni a lo sang tawh kher mai.Tho chhuak vat in Lalnu in min lo nuih var var a Lalpa leh a khawnbawl te chu an lo titi bul bul hlawm bawk.Tukthuan kan ei kham ah tih tur awm lo lutuk chu tukverh ah dak in chunglam a sava thlawk te chu ka thlir veng veng a,thereng hram leh sava chiar nak nak chuan a chhan hriat miah loh in ka lung a ti leng veng veng mai.






Kar khat zet ka awm ve ta,Lalnu leh Lalpa pawh ka nu,ka pa tiin ka ko ve mai a,an ni lah chu an fanu an neihchhun kha emaw tiin min duat em em mai bawk si.Ka inthlahrung viau na in an fanu nih chu keipawh in ka duh ve tho Saichhingi tak tak kha ni lo mah ila ani chu a awm tawh chuang lo tiin ka in thiam chawp a.







Zanriah ei lai chuan "Hei..Saii Mimbung khaw Lalfapa khan a rawn beisei leh che a,engtin nge maw kan chhan dawn le...a beidawng duh mang silo a" a tih chuan "Ka pa pasal neih ka la duh hleinem" ti a ka chhan na chu a buk pui nghut a "Vawitam a hnar tawh chung pawnh a beidawn tum reng reng lo mai,keizawng a khawsa zia reng kha a chapo in makpa atan ka awt hauh lo" ka nu in a lo tih chuan ka nui sak a,hmanlai chanchin ka hriat ve ah chuan Lalfanu te chu an duh lo chung pawh Lalfapa te an neih tir thin kha ania,ka nu leh pa te erawh an ni ve lo anih hmel.





Ka pa in ka duh loh thu mawi hnai tak a a hrilh chuan a ang ta chiam chiam mai a "Nangni in Za hnih lek hian kei Mimbung khua in Za li nufa a Lal fapa Chungnunga hi min hnawl ngam a maw...He khua hi meivap ah ka chan tir dawn khawp" ti in a vin khur khur a "Ka Lal inah ngei mi zah pah lek lo a i tawng ngam chu le...ka tlangval te thu ka pek hma in chhuak rang rawh u" ti a ka pa in a vin tak tuar ah chuan an chhuak tau sawk sawk a,chhuat chu per chim a tum em mawni "I per chim ange" ka lo ti zauh chu in her in min rawn kawk a "Ka hmei atan ka nei khawp ang che" tiin a chhuak zui nghal hmak a.





An chhuak chu ka pa leh a khawnbawl te,pasaltha te ho an thu khawm a khaw ven dan tur sawi khawm in Mimbung lam in an rawn thawn thut pawh a lo in ven ve dan tur an rel a,keimah vang ani chu nuam ka ti vak lo khawp mai.





Zan thum na ka mutui lai chu silai puak zawt zawt thawm leh inhrosa thawm te chu mi kar a tap thawm ri nuaih nuaih ah chuan ka harh zawk a thil thleng chu ka hrechiang.Ka nu in chem min pe in,ip ah ba chhum hmin sa leh sarep a khung mawlh mawlh lai chuan ngawi reng in ka lo en tawp.Buhfai a khung leh hnu ah ka kut ah hmeh bel in "Tlan rawh" tih leh mi nam chhuah a rual a ka nu leh pa chu kuah in ka nunna atan ka tlan a tul ta.




Ramhnuai lam pan in ka theihtawp a chak chuan ka tlan char char a,min um ngei dawn tih ka hria ka mangang in ka hlau takzet.Rei pawh ka tlan hma in ka hnung lamah thawm a rawn awm a,silai a puah thuai rual in ka dar a thip zawk a lei ah ka bawk nghal thlawp mai "Ka pu..ka mamawh che min man dawn a nia" tia ka phun chhuah sep rual in ka hma ah putar kha a rawn ding a,ka dar a rawn khawih rual in khawi hmun nge pawh ka hriat loh ramhnuai ah kan lo awm daih a,min um tu te awm reng reng kha an awm tawhlo bawk.





"I him tawh e" tiin a nui leh sang tawh "he lai kawngah hian kal zel la,reilo te ah lo i pawh ang,kal tawh rawh le" a bo leh nghal daih nia...min han hruai law law se tha tur.





Ka hma a kawng ah chuan ka kal zel a,reilo te ah mi lo tih hriat zet buh kung hring nghulh mai ka hmu ta,hmanhmawh zet a pen in thlam lam ka pan a,ka dar silai a hmelchhe ho in min kah na atang chuan thisen a chhuak reng a,a na ngut ngut mai lehnghal.Ka lu hai riai riai chu in thing sawk sawk in ka theihtawp in ka pen chak sauh a,thlam kawngka lo in hawng sa lam chu pan in,ka hnaih viau tawh ah hmeichhe nui har har thawm ka hria a,ka tlu lut rawk mai.





Min hmu thut chu an hamhaih deuh nge tumah chet nachang pawh an hrelo "Tui ka lo in" ka tih chuan an phu suau a,hmeichhe lo awm chuan min rawn pan in min kai tho a,a mah ngheng tur chuan mipa khat lo awm ve nen chuan min siam rem zui.Mipa lo awm ve pakhat lian zet mai chuan tui min rawn pe in ka lo ban vat a chutia ka in tak ah chuan ka harh sawng sawng mai in ka hria.Min thut bial thap in "A dar ah hian an kap anih hi Ngurlian hmanhmawh teh" hmeichhia in a tih chuan tui minlo pe tu kha a che hrut a,min paw lawk in min chhuah pui a,kan liam pur pur nimai in ka hria.Kan hnung ah thlam a lo awm ve te chuan min zui nghal bawk a, min paw tu in min kal chak pui em vang chuan kan in hnaih lutuk lo thung.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)