MIHRÂNGVÃL TE SÛLHNÛ . By. Llpa rokhum 1 - 70

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: MIHRÂNGVÃL TE SÛLHNÛ . By. Llpa rokhum 1 - 34

Unread post by Ngaia » June 23rd, 2018, 7:58 pm

Bung-35

Mualtlang khua in zathum țha țhu zet zawta, Nuthlawi fa mawng hul tawh kawi tlawng-awl ațanga, falu âk loa kir leh te leh nula lengrei deuh leh Tleirawl țhan thi pal tir, chhul keû thei tawh tih hriatna rim chhuah ve thei tawh chin te. Pathlawi zanghâng kut ni vangthla lo thlen apianga, lawipahur rim chhuah hak hak khawpa bawp la theh kual peih chin leh, Val lengrei, mawngtam vela hnuhsâr thak hiah punna hnu ser dê deuh tuarh tawh khawpa mawng hlui, mangpui man tukzing apianga Tap kawm bela, Tap chal luah ûng deuh khak reng țhin tu, Saum bur melh run chunga, Ranngo zawnga khual tlang chhir thlen hluai mai duh thar deuh ut ut țhin ațanga, Rawlthar puanhnuai thangțung Vaibel rawng vet chhuak thei rual zawng zawng te chu, an Lal Saiphunga tualah chuan an inhawr khawm luih luih mai a.

Tukțhuan ei kham hlim a nih avangin Ni pawh ala her sang lutuk lovin, naupang rual zing leng kham lo ho paw'n, hnap nen inchiahpiah eng pitpiat chungin, chawtlang leh Maite pum chhum an la rawn kham chhuah pui kiar kang hlawm a. chutih laiin, veng tina Vawkpui no chawm huamhap fal deuh te paw'n, veng dang Vawkpui khalh hman ngei tura, hman hmawh tak chunga, a chaw ei kham tlan hmasa ek tharlam nang hmasa tu nih tuma, an no tla fal deuh te aûh ruaih ruaih pahin dai lam an pan hlawk hlawk hlawm bawk a. mahse, an dan pangngai angin ran leh naupang te chu khawsa mahse, an hun tawn mek hrethiam pha chin tan chuan, rilru hahna leh lungkham neia hmel hlim lo chhuahna hun a nilo tih chu tupaw'n an hre chiang hle a. chuvang chuan, nu leh pa, atar azur zawng zawng te pawh, an Lal Saiphunga muala țhalai rual inhawr khawm thlir chung chuan, an zuangpar tla thar keh deuh hâih hlawm vek mai a ni.

An kim tawk ta nia an han inhriat hnu chuan, Mualkil Luaiapa chuan an tlangaupa, patling pangngai thin chen leka tawi, Lal leh mualkil te ei nawi tlana in ei in bial mawm deuh hman Taibawnga chu koin, Veng mawng lam an kim tawh leh tawh loh te, khual ko lamkal an liam tawh leh tawh loh te a han zawt sur sur a. Tlangaupa Taibawnga'n, an mualkil zawhna a chhan kîk deuh van lai chuan, Valupa Ralkunga chu țhen deuh țhâ chunga rawn ding chhuakin, "kan tlang hlui rauh sana kan perh zehna tlang thar, kan Mualtlang khua kan lawi ațang hian, kan tlangin hunpui kan tawng leh dawn ta a ni tih chu, kan Lal muala mi heti zat kan rawn lawi khawm takah hian a lang chiang a. mahse, sahawk lam lama kan phusak lutuk chuan, kan tih tur hi kan inzawhzo lo dah ange. tupawh fimkhur taka chein, mahnia tlat fala, Sapui chil chhak phaka țuan lak lohah kan ti a niang chu" a rawn ti ta dap dap a.

An Valupa 'zilhfuihna' an han hriat veleh chuan, mipui te chu nasa zeta rawn auin, "Mualtlang Val leh Lâ zawng te hnâ lak leh Ral nêk a sawn duai tur a ni. kan chungah khawi Tlang Lal mahin chhawn an lek love" Valupa Ralkunga'n a rawn tih leh lauh lauh lai phei chuan an au nasa zualin, an Lal Saiphunga meuh pawh a luhkapui tlangsangah, hâpui lang khawpin alo kêh deuh hûih mai a. mipui te lahin an Lal Saiphunga țhen țhu chu nui van chunga rawn thlir hlawmin, Valupa Ralkunga chuan, Lal Saiphunga chu a rawn mitmei zui ta zauh a.

Mipui thawm a han reh deuh hnu chuan, Lal Saiphunga chuan, țawng muang ban deuh chiar chuar chunga thu bul rawn la kâi chhoin, "kan Valupain a rawn thawt lawk tawh ang khan, kan tlang Mualbuh kan kâi achin hi malah kan tluang ta hle a. a dam lah kan hauh tluang, laihrui thar deuh leh Tar kun thâ zawi tlemtê te lu tih loh, khawiah tu lu mah kan va phum lova. kan tui tlan leh kan ram lakin maltluang min chhir rem tir tih loh rual va ni hek suh! chu achhapah, keini pafa meuh pawh Sial huang zauh reng rengin, Sihdai kan pal liam chhen tuktin a. chungah pu vana'n, kan Sabiak te alo thlawp teh chawk a ni tih tupa hai chi a ni nahek lo. khual koh te lam hialin tlangphal Sial ka talh anga, 'Khuang' ka chawi dawn e. tlai leh puar lovin tufa mah ka thlah lovang che u" tiin 'Sathing zar' tur Nula Tlangval te chu a han melh kual rulh rulh a.

Chumi ni tlai lama, Lal Saiphunga tuala 'Sathing' zâr țhalai an han phe suau suau mai chu an hlim tlangin, a inti thinrim teuh ber te paw'n "tawlh deuh teh aw...lalțhian, ka Chem har pek perin a deng palh ang che tih ka hlau" an inti țawk chauh mai a. chutih laiin, kil thlang lam kawmkar dithlifarfem zar hnuaiah lah, Rawlthar leh Tlangval la tuai deuh te chu, Pathlawi Raltuma hoa ri dur durin, Bawk tlang Nuthlawi khawivahlawi a man fuh thu leh, hnahthial hmun luhpuia a sawm zui thu te. a hma lak laklawh lai mawngtama, Thosi an inhawr khawm tak luih luih avanga, a mawng thak tuar zo lovin a mawngtam beng ri țhuai țhuai chunga, thawh hnih lak theih na turah thawh khata a tlir zawh tak mai thu te chu, keh deuh hâih chung chuan a sawi zawm leh ta nghal zat a. Raltuma thupui kam keû meuh chuan, Rawlthar leh Tlangval te chu a ti nui nasa ta der der hle a. a tawp lamah phei chuan, an Mualkil țhenkhat te nen lam chuan Raltuma titi kotlang chu rawn belin, zanriah ei hun thleng chuan an la ri dur dur ta mai a.

Thimhlim Bakchhelen hun alo nih chuan, Lal Saiphunga leh Mualkil te chuan Lal Inah zu in khawmin, an Khuangchawi hun ințan mek chu an chen țan ta a. Lenglen hun a han pelh chhoh țanah meuh phei chuan an tui tlang tawhin, "Lalpa, kan Sabiak a tluang tehchawk e maw. i pa Lal Ngurvunga aiawha a tlang i țhut achinah, i pualin 'Thangchhuah pa" i ni tawh dwn e. I Sialin 'khua' a bia anga i Vawkpain 'Sa' a bia anga, chu achhapah 'Zau' i dawh dawn ta bawk a. Pialralah faisâ nena leng, 'Zawhzawzo pa' Sih nau anga duat rawn i ni tawh dawn bik a le, i 'Bahzâr' hrulah i mualkil te hian i chhawn kan thlawp zo tawh lawng che tih pawh ka hlau hlel love"! Mualkil pakhat, Lutipa chuan a rawn ti chhuak ta sar sar a. chu țawngkam huat thu la lo zet chuan, Lal leh Mualkil dang te chu rawn chawk tho lehzualin, "khaih khah! Lutipa țhin hi, nangni tel lovin ka rorelin tufa chêl mah va ziat ûk suh. ka chhawn lo dawm zel lo ula he kan Mualtlangah hian, In zathum țhut țha zet kan lawi khawm nang maw, a dam kan hauh zel anga, Thangchhuah sual rual hlirin ka mual in kil a nia" tih pahin Lal Saiphunga chu a rawn nui ta kur kur a.

Zan a han rei chho țan ta tihah chuan, Nula leh Tlangval zawng zawng te chu Lal Inah chuan rawn kai belh velehin, Lal Saiphunga chhuatpui dungah chuan, alaiah lamna tur zuah kuain tlar hnihin an han țhu phei zui ta mai a. chu hun ngei mai chu, La leh Val, Ngaihvarungțhawn ruk nei te tan chuan, hun thlakhlelh awm ber, an 'D' ruk te 'Chawi' theihna hun țha a ni tá. mahse, mi baka chet thawha Satel dumdai lu ang maia, țhian te thlâ thimah mahni Ngaihvarungțhawn te mawng hnawng tin ru tau chunga, aruk arala Vaibel lo lek phek na chi a nilo. La leh Val zawng te chu akawp kawpa inpawmin, Tlangval țhuthluang deuh dap te bawp inkau karah chuan, Nula ho chu an țhu ta far mai a. chutah le! Pathlawi fiamthu thiam leh zai thiam, Raltuma rui meng phî deuh sât tawh chuan, Lal chhuatpui tawn tawna Nula leh Tlangval te inchawi far mai inkar alai awl lai chu rawn pan pheiin, "khawnge, kan Lalpa chhuatpui rem kan nghawr chim thei emaw chu, tlangah kan Mualtlang chhingzo khawpa kâi nuam va awm suh! Dawhthleng hnuaia in Chempui dah te kha, Bangpui lamah khan han thiat kiang teh ûn, chutilo zawng ka luhrumin chhuatpui a hrût nuam love. Awiapa, i chawmkhuang kha han tin teu tau la,
"A khi tlangah zukchal hawl na maw e,
"A ki hreu hruauin ka char bang mawi riang ruang se, chheih khah.
"Lal lai thang Mualtlang Phungsai Sial a khum ne maw,
"Ami zaleng khum tu thanlai a sai lul love.
I han ti teh ang aw" din buk deuh lâk lâk pah chuan a rawn ti ta a.
Pathawi Raltuma hla lak an han sâk zet chuan, an thawm a puak țhain, alaiah Raltuma chu zei leh lungrun fahranin a intheh hlâh hlâh ta mai a. an hla sak an han hrut zawh chhoh dawn veleh chuan, Raltuma bawk chuan hla dang rawn hril zawm leh nghal zatin,
"Tualah Mualtlang tual a nuam lûr e,
"Alaiah Laldâng, Phungsai a ngur veng vung,
"Tlang dang belh lai ka nuam nem maw,
"Mualtlang ngur belh ka nuam kei zawng, chheih khah, hah hâ hah hah chhâh. tih pahin a rawn Mute lei hrut phei leh ta hnâh hnâh mai a. a han kûn hniam zual changa a han intheh kar lakah chuan, thawklehkhatah din mar deuh zat paha, Khuang tuk ri rem zet mai a, a khel chu ring fefe a beng ri leh deuh țhak țhak țhinin, a ben rual deuhthaw chuan a ben lohna lam kê phah khâk deuh tlâk chu, kual nalh zet zetin a han thêh chhuak pah deuh zak zak țhin bawk a. chutah le, tuiburhmuamdâ dawn chutia an han zai dap dap hnu chuan, an Valupa Ralkunga chuan rui meng dê deuh phalh tawh chunga a 'aw' chu kut khawr meuh chunga rawn thianin, "khai le, 'Hâr a so e, in Nula ngaih kha inchawi thlak tawh ru le. kan mangpuiah zulin min zui dah ange" a rawn ti ta a. chuveleh Nula ho chuan, an mahni chawitu te țheuh chu thawh san sap sapin, an mahni chawitu Tlangval te dawt chiah veilama, Tlangval dang țhu ve te bawp thluang karah chuan an han țhu leh ta sap sap a.

Chumi zan hlim taka an han hman liam hnu chuan, a tuk van rawn var chuan Lal Saiphunga 'Khuangchawi' hlimna vawrtawpna ni tur chu rawn ên puiin, zingvarțian ațang chuan Lal Saiphunga tual leh In velah chuan, atar azur, alian atein an phu lui lui tawh mai a. an 'Sadawt' tar zur zet tawh Țialchuha pawh a phar kual nasain, 'Hnuaite' leh 'Hnuaipui' tana inthawina hlanin a phe vat vat reng mai bawk a. Lal Inchhung pathlang lamah lah Lalnu Chawngtuali leh, Mualkil Nupui țhenkhat te chuan, a hma fê ațanga an lo bilh lawk 'Sumdeng zu' 'Ngan' sarih lai an lo bilh lawk chu an lo sem nasa mai bawk a. chutih laiin, Naupang leh Tlangval chak deuh ten, an Lalpa Sial palian thluk vum țha ther thawr chu, ni chhuah rual chuan rawn kai hawin, tual zawng zawng Țawngaleivir insiam hut hut khawpa khû nasa chuan, an han chaih ta luih luih mai a! chutia an Se chaih lai chu mipui te chuan, ropui ti tak leh hmunawm ti taka haw haw' chunga lo thlirin, an Se chaih hâh lutukin amah chaih tute sik tuma tal ve fuat fuat chung zela, chilthli dir zawih zawih chunga, a țê âwn ruah ruah țhin te chu an lo âu uar zual țhin hle a.

An duhtawk an han chaih kual hnu chuan, Sial chu Lal Saiphunga tual 'Seluphan' ah chuan thlungin, Lal Saiphunga chuan a Lal Fei lian țha teltawl chuan, a zakdawhah tak a han chhun thi ta sar sar a. chutah zet phei chuan, mipui zawng zawng chu an sahawk nasa zualin, Sial dang lo talh pawl leh Vawkpasutnghak lo khawng ngek ruai ruai pawl te chu, an in hauh ve berah pawh "tawlh deuh teh aw" tih paha hahni vawt thlur khawpa innuih tawnin, Pa leh Pa an in piai suau suau lo chauh vek hlawm tawh mai a. Sial leh Vawk tlu tur zat an han vuak thluk zawha, Lal Saiphunga Luhka sei put mai chunga, thlur sawm dawna in tlar put chunga Sa chhum tur an han sah lai zet phei chuan, an Sâ sah zawnga an Chem vai dar phe suau suau mai chu, kawrte kam Hnahthial hmun, Țotê thliin a chhem let tawn suau suau ang mai a ni hial a. Nula leh Tleirawl rual te lah tui chawi leh tufâ te vil buaia buaiin, an kal lam leh haw lam chu an insul zut mai bawk a. Tualah naupang zawng zawng lah an tlangphal sâ ei tur phur pheng nen, naupang țhenkhat te phei chuan, ei hnem loh hlauin tukțhuan lo nghei lawk an tum hial a. chutih laiin, Tlangval zawng zawng lah Chawngnu leh Chawngpa zawnna tur Hlang siama lo buaiin, mahni tih tur țheuh chu tirh ngai lovin an bur pui luih luih hlawm a. chutia an buai luih luih lai chuan Ni pawh alo sang tawhin, Tukțhuan ei alo hun chho ta a. mahse, a inchhawk zela Tukțhuan eia in haw chhawkin, an han ei kham fel hlawm hnu chuan, Lal mual tlakdeng mawi hmawk khawpa thui chuan 'Hâr' an han so phul ta bulh bulh mai a.

Chutih lai chuan, Vengmawng lam ațanga khual koh te tlang thawt thawm Silai lawn ri chuan, Lal muala mipui ri luih luih te beng chu rawn luh thutin, Khual lama rawn lam chho hnâh hnâh chung chuan "Puan min ban u aw, Puan min ban u aw" an rawn ti chho ta lauh lauh hlawm a. chuveleh Lalnu leh Mualkil upa Nupui te, Nuthlawi leh Naupang te chuan Khualkoh ho chu zuk hmuakin, Khual puan chu an han pe ta sap sap a. Mikhual sawmthum chuang mah ten, Lal mual an rawn thlen hnu chuan an hun ropui hman tur chu tual mite nen chuan, Zufang hawp chunga sep zui ho nghalin, an han thlan daih deuh hnu chuan, Lal Saiphunga chuan In chhungah a hui lut ta diak a.

Mahse, Lal Saiphunga'n a In chhung a han rah rual chuan, a Lal Sutpui vuan ran chunga a Lal Sal Taikherha nupui, Darlaii lo țhu dangbai mai chu a han hmu ta a. a mihring hmuh chuan, Lal Saiphunga chu a ti thinrimin "he nu hi tunge rawn hruai lut!? Ka 'Chawngchen' vanglai thla er chhoh laiin, Sal hmel ka hmu duh lo ka tih kha. rang takin hnuk chhuak rawh u" a ti vin ta khur khur mai a. mahse, Lal Saiphunga țawng chuan, a ti zam hauh lo tih hriat zet chunga Lalnu Darlaii chuan, Lal Saiphunga chu rawn melhin, "i hnam pui te phat sana, ral ho chhawn thlawp reng renga i hmanhlel a hnu hmanah!, i unau Lusei te laka, Thlanrawn leh Halkhâ ral an duap hnu pawha Chem ila len duh fo hian, Lal Taikherha Pasalțha te thindip i tawng nâ mah mah tawh e! ral ho kut hmanga mahni unaute ro chhuh tu, i inchhek ropuina hi i kutzala i kawih a ni love" a rawn ti ta phiarh phiarh mai a. Lalnu Darlaii țawng zet chuan Lal Saiphunga chu a ti thinrim zualin, Ka Sal Taikherha Nupui hi hnuk chhuak rawh u ka ti a ni lawm ni" tih pahin, Banglaia a Fei thiah rung mai chu a han phawi ri ziau hrawk mai a. mahse, Mualkil ho chu rang taka rawn tlan khawm nghalin, Lal Saiphunga chuan, a hmei Nuthlawi pakhat te Lo a, a Pasal Lal Taikherha leh a Fanu te nen, hna thawk tura nam liam tura Mualkil te hnenah chuan hrilhin, Tlangval țhenkhat ten Lalnu Darlaii an pawh chhuah lai chuan, Chawngchen chhung chu khua kai tir tawh lo turin, Tlangval te chu a han chah zui khur khur a. Mahse, Lal Saiphunga hian, a Khual koh te zinga lo tel ve, mi pahnih te hi tute nge an nih!?? a hre hauh lo mai le!



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 23rd, 2018, 7:58 pm

Bung-36

Lal Saiphunga thupek avanga Lal Taikherha nupui an hnuh liam lai chuan, Lal Saiphunga chuan a Khualkoh ho chu, a Inchhunga lut tur chuan hui vutin, "kan chhak Lal tlawm Taikherha chhungpuinu teh hrep chuh!, zupui rui ang mai a a han râk teh chûl chu e"!! a han ti zui sup a. midang zawng Lal In chhunga an luh deuh sap sap lai chuan, an Lalnu Darlaii an hnuk liam lai chu Hrumcheûva leh Zakulha te chuan, an hmel la thup hram hram chunga lainat zeta la thlirin, an thin tawt zet chuan an chhung ril tak ațang chuan, a rawn nawr sâ bulh bulh mai a. mahse, âtthlak taka chet lakna chi a nilo tih an hriat chian avang chuan, midang hmuha an mitmei chu chhuah an tum lo hle a. chutihlai chuan, Lal Saiphunga lah inla ngeng zeta hawi vulh vulhin, a Khualkoh khaw thum Pasalțha te zinga pakhat, Sialhmur khaw Pasalțha Ralruna chu bekbawrin, "hei le! ka Sechhun khuangchawi chhim tura ka khualkoh, ka khaw nâk hêm min do pui țang țang tu Pasalțhate chu, ka 'aihnahphahpui' in Lal te aiawhin in rawn tel țheuh tih ka hre ta bawk a. in Lal chhungkua leh in khua leh tui te chu, tlang hri leh Sapui hâ ziaû ilo lakah in him a lawm maw!? vawiin chu zu leh sá hnianghnarin kan chawi zâ tlang a niang chu. in thlá rawn veng tute erawh, hmaihma chhawna titi ka thlahpui tawh an vang pharh mai e" tih pahin Tlangaupa Taibawnga hnenah chuan, a rappui sang zubel chu chawi thla a, Khualkoh ho chu thal kual sak turin a han tur zui zat a.

Lal Saiphunga zawhna chu Ralruna chuan nui var chunga lo chhangin, khawdang Pasalțha te hnenah chuan an kaihza veng tute țheuh chu, Lal Saiphunga hnenah chuan kamkeu turin a han hnawn zauh hlawm a. khaw dang Pasalțha ten, Lal Saiphunga hnena an thlaveng te an han inhmelhriat tir zawh hnu chuan, Sialhmur Pasalțha Ralruna bawk chuan a tawp rawn khar lehin, a mi hruai te chu a an hming lam chungin a han kawk kual zat zat a. atawp berna ah chuan, Lusei Lal thlangtlâ hoin an la hmuh ngai loh, Pasalțha dangte anga khaw chhung leh Sapui laka hming chher khawpa, mipui mimir hmuh leh beng luh khawpa la thang velo, mahse, an hriat lohna lama Lusei ho chhawn venga Halkhâ leh Thlanrawn ho nêk dai țhak tu, an hming chauh an hriat țhin chhak tlang Pasalțha rothap pahnih, Hrumcheûva leh Zakulha te pahnih hming inphuah chawp chu rawn lamin, "anni hi chhak tlang ațanga 'ranngo' bih a kan tlang rawn kai an ni a. (Zakulha chu kawkin) hei hi ka Pu Fapa Hrangruma a nia, (Hrumcheûva chu kawk lehin) hei hi an khaw Pathlawi mawng zo Ralsuaka a ni e. ka sawi tawh ang khan, Ranngo bih paha Bellam zuara kan tlang rawn kâi an ni a, mahse, i Khuangchawi tur thawm thawt beng luh zet an han hriat khan, i Lalna tlang ropui chuan ve chakna nen, thlang khua zawng zawngin an hrilhfak i thlathum zu, a taifê ngawt pawh khuangtum tiat leka leng nal nal ngei mai kha an khiat chak ve ta riau a. i thlâ vengah Lal Saiphunga chhuatpui kan kai ve mahnâ tiin, ka pheikhai an chhiar ta mauh mai sia, a chuti na na na chu thlang Lal ropui Lal Saiphunga pawi kan tawk em bik nang tiin, i tlang kan rawn inchhawm kai ta mauh mai nih hi" a han ti ta a.

Ralruna țawngkam khawifung zu chawi zet chuan, Lal Saiphunga chu ati lawmin, "khaih khah khah! keia Lalna tlang ve meuh hi zawng, pahmeipa țul pawh va tiat ûk suh. i kawi te lakah chuan, Bawm-ak khual thu thang kan chang zo mai ang ka ti! mahse, a chuti nâfam chu kan neih loh thleng thleng paw'n kan lo țang ve tawh mai a niang chu" a thu khuhna phena chapona inphum ru reng chung leh, a zuno chawi lai tlak leh pup pah chuan, Lal Saiphunga chuan a rawn ti nui vun vun mai a. Lal Saiphunga lawm hmel an han hmuh chuan, Hrumcheûva leh Ralruna te pahnih chu awmzê nei zeta inmelhin, an ruahman rukna a hlawhtlin zia chu an hre chiang dun hle a. mahse, Lal Saiphunga chu thu zai zap zawnga nêk hmasak phawta, thu nemin a tlin loh thulhah chauh Chem thawh tura an lo rel dun tawh avang chuan, hun țha melh ruk pah ran chungin titi dang an han vawrh pui țan ta a.

Ni a han vanlaizawl țan chhoh lai chuan, mipui zawng zawng chu Lal mualah chuan an rawn lawi khawm ta ruih ruih a. Nula Tlangval zawng zawng lah inkaihkuah dul chunga, mual lai awh hmuk khawpa chaiin, hnung zawng leh hma zawngin kê an theh rual dual dual mai a. Tufa mawng zang rual lah harso liam zap leh, mei zang nêm tur venga buai reng renga hmanhlelin, an sâ chhum hû rim chuan Mualtlang khua chu, kawmkar zawng zawng nen lam chuan a ûr nam vung vung mai a. chutih karah Nula leh Nuthlawi țhenkhat te chuan, a khat tawka Zu tuitling êng kulh mai chu Seki a thâl chhuakin, an duhsak zawng te chu an han tulh leh zauh zauh hlawm bawk a. mahse, chutiang khawpa zu leh sâ chena hlima lam ni hlawm mahse, tumah chu rui chhia leh mi baka nungchang chhuah an awm miah thung lova.

Chutiang reng renga an han Chai mup mup lai chuan, khua pawh alo tlai lam tawhin, an mual lam tui aleiah khaw chin pawh an lo hai hial hlawm a! chutichung pawh chuan, atu amah chuan, mual lai chu chhuah sana chawlh zai rel hlawm hek suh, an Tlangaupain ruai țheh peih a nih tawh thu au pui a, rui dingawn deuh tlâih tawh chunga a rawn aû lauh lauh hnu a, khua an han hawi meuh chuan, Ni pawh khawthlang lamah alo her bawih tawh mai a. chutah le, khuangchawi sâ ngei mai chu apui anawi chuan țheh zui nghalin, Lal mualah chuan an phu leh ta luih luih mai a. Tufa (Fatu)te lahin mipui ruai țheh tute chu, tlai puar lo bik an awm palh hlau zet chunga, ngawrh zet mai a vil vat vat hlawmin, "Savei la chawi lo in awm em"? tiin an aû lauh lauh hlawm a.

An han kham fel hnu chuan, khaw mipui te hun nghahhlelh ber pakhat chu rawn thleng chho zui lehin, Khuang chawi tu Lal Saiphunga te chhungkua chu Hlangah an han sep țan ta vuh vuh a. mual sirah rei tawk fang an han sep kualpui hnu chuan, alai lamah luhpui lehin, mual khu rum rum khawp chuan an han sep uar chho zual sauh sauh a. chutia mual laia an han sep veleh chuan, Hrumcheûva leh Ralruna te chuan, an ruahman rukna hun chu alo thleng ta tih hriain, an bul lawka ding ngawi ran mai Zakulha chu, Hrumcheûva chuan a han nghawk ta zauh a.

Chuveleh Lusei Keite Zakulha chuan, Hrumcheûva leh Ralruna te pahnih chezia chu rang zeta lo man thiam nghal varin, Lal Saiphunga te chhungkua, mipuiin uar zeta an sep luih luihna lam chu a pan ta thuai a. chutihlai tak chuan Lalnu Chawngtuali chuan mipui lamah chuan, Țhifang chi hrang hrang chu a rawn vawrh ur ur mai a. chuveleh mipui te chuan, Chawngnu Țhifang rawn vawrh chu chan ngei tuma inchuh nghalin, vaivut khu ding luih khawp chuan an han innek ta mai a! chumi zawh hnuah Lal Saiphunga chu rawn che velehin, fakthing bung lian țha tep tawp, tawng chen vela sei chu a lu chung lamah a han vai kual ta thuak thuak a. chutih pah chuan nui vur vur chunga rawn au lauh lauhin, "khua leh tui te u, he fakthing bung chang tu chuan ka Silai fung khat in pu haw thei ang" a rawn ti ta lung lung a.

Lal Saiphunga au ri chu Zakulha bengah chuan a fiah țha bik ngei ang le! Hlang chunga Lal Saiphunga ding dak vuah chu, a mit dê kalh khawp chuan thlir chhoin, a lu chung lama a fakthing bung vai thlawh kual lauh lauh lai, a vawn behna kutzungpui leh zungchal chu a en ngar mai a. chutihlai chuan, mual laia Lalnu Țhifang chuha Nuho leh Nula, a thlawi thlenga phu luih luih pawh chu inthiarfihlim tawhin, Lal Saiphunga chetphung leh a thu rawn sawiah chuan, hmeichhe awmnem inrawlh nachi a nilo tih an hre chiang hle a. chu achhapah Mipa kei ka ni inti tan lo chuan, fakthing bung (Silai aiah thingfak sui mam, tawng chen vela sei an vawr țhin a ni) inchuha mual laia han innuai mai chu tel ve na chi a nih loh zia leh, pa awm nem deuh tan phei chuan, thih mai theihna a nih zia chu tupawh chuan an hre chiang hle a. chuvang chuan hmeichhia mai nilo, Rawlthar la tuai deuh leh Pa lî nem deuh tawh, mahni chhungpuinu te zing tuk ei rel phurna khawp pawha, khumpui laia an mawng hnawn zantin peih tawh mang lo te chu, mual sirah an chhuak sung sung mai bawk a. mahse, chu hun ngei mai chu Khuangchawi hun ti ropui tu pakhat leh, mipui zawng zawngin an thlir chak, Chawngpa hausak zia pho lanna hun ropui ber a ni lawi si.

"Kei zawng ka thâpuiin rual a nawp nuam love" ti ho zawngin mual an han chhuah san hnua, "mipa leh mipa, Vaibel lu keh pawp pawp khawp paw'n i han innuai ang hmiang" tih paha, mahni puan ven sawi nghet sauh sauh ngam chin, mi sawmnga vel an han din tak fur hnu chuan, mual sira mipui au ri chu a ring ta der der hle a. an zingah hian, Lal Saiphunga Pasalțha daido ho pawh ding kim țhupin, a huaisen leh phawkphawhraw zual, mi pangngai ai chung lama lian, Keipuiin a ben thawina avanga hnar tengeng veilam hêk deuh huau, Hrangthûra leh englai pawha a aihnahphahpui, a mah ang vela lian leh tukkhum chhah meng mung, khabe kual lian ber bur Kaptawna te pahnih chu, Silai leh Sialpa chang ngei tura mipui te rin lawk an ni nghe nghe a.

Lal Saiphunga pawh Hlang hmawr lam deuhah rawn lawn hmawr deuhin, fakthing bung (Silai) inchuh tur Tlangval huaisen leh Pasalțha ho, a lu chung lama a fakthing bung vai kual rawn chhoh bih țhup tute chu a han melh kual leh ta dun dun a. mipui ho lahin nasa zawka an Lal chevel chu rawn au phur chho zelin, Darbu tum pawl lahin "chhim bu leh peng peng intu intu, a lu lam kawng a lu lam kawng, chhimbu leh chhim bâ bu nen" tih Darbu hla chu anlo tum ri bung bung mai a. a karlakah Darkhuang leh Khuang pu ten an rawn râwn bawk. Silai lawn ri nen an ri leh ta hulh hulh mai a.

Lal Saiphunga chuan, a fakthing bung chuh tum Tlangval leh Pasalțha ding khawm te a han melh kual thuak hnu chuan, a laitâ vela Rawlthar ria sa pan deuh thlip thlep, han en mai pawha zan tam riak chhir chhuahpui loh ve hmel zet, a khualkoh te zing ami Sialhmur khaw Pasalțha Ralruna khual kawite zinga pakhat hmel chu, phawk hruin a han melh bing ta deuh run a. chutia Lal Saiphunga'n a rawn melh bik ta riau chu, Zakulha lah chuan eng hêhû-ah lo ngai bik hek suh! Lal Saiphunga mita amah rin lohna leh hmuhsitna zam tel tlat chu, nui var chungin alo 'Lalmukhawihawi' khum vel ve ta ngat a.

Mual sira kutkuangkuah chunga lo ding, Hrumcheûva lahin Zakulha leh Lal Saiphunga inmelh tawn vel chu, kîk deuh van chunga lo thlirin, a bula ding Ralruna'n, "i nauva chu a thil tih tur i tuk sak hi a chhir tlang thei meuh ang maw!? ruh pelh nuaih hian, mual sirah kan inpaw chhuak mai dah ang ka ti"! a beng bula hlauhawng 'aw' thâwp deuh sat chunga a rawn tih lai te chuan, "khaih khah khah! hlau 'aw' chhuah nan chuan ala hma deuh e. mah reng reng se, thawh khatna tal chu han tlak ve reng reng teh se" alo ti duh lek fang a. chutihlai chuan, mipui te rin kai Hrangthura leh Kaptawna te lah chu an lo inlek puk nasa dunin, an zinga khual Rawlthar tel ve, an Lal Saiphunga'n a melh rulh rulh Zakulha chu, en pawh an en ve lem hlei lova.

Lal Saiphunga chuan, Zakulha a melhna lak ata a mit chu la sawnin, fakthing bung chu a vawrh dawn tak tak ta tih hriat zetin chung lamah a ban pahnih chu a han phar chho ta dû a. chumi rual chiah chuan, Hlang hnuai lama Tlangval thazâ rual țhețhaw te pawh chu, inring zet chunga ding kun nghal deuh țhapin, Dar tum ri leh Mipui thawm a rin vanglai tak mai chuan, Lal Saiphunga chuan a fakthing bung kenna lam ban chu a han vai kual țan ta a. chutah le! a vawithum vai kualna ah chiah chuan, fakthing bung chu van lam hawi zawng chuan thlah chhoin, ding taka van sang lam pana fakthing bung vir chho tap tap lai chu, mipui zawng zawng chuan 'haw hawa thlir chungin an zuang suau suau mai a.

Fakthing bungin a vawrh tu thâ pek tawka sang a han thlen chhoh hnu chuan, la inlet vir tap tap chunga rawn let thlâ lehin, a tlakna zawn tur awm lai, an mahni rinna zawn țheuh changa, Lal Saiphunga'n a vawrh chhoh ruala, hnuai lama vaivut khu ding luah luah khawpa lo innawr buai tawh, Tlangval thâza rual te chuan an kut chu, chung lamah midang nena innawr paha lo phar chho zuau zuau hlawmin, mahni hming inchhal ri leh ruh pelh tuarh tuarh ri te chu a inpawlh ta ngei mai le! thing bung rawn tlâ zel chuan, Saiphunga Pasalțha Kaptawna zawn chu a rawn tin zawn ta! chuveleh an vai mai chuan, Kaptawna țanhmun chu chuh buai nghalin, Pahmeipa Thlam tiat tiatin an bial khu phei mup mup mai a. mahse, chutihlai chuan, Zakulha chu an bial pawn lamah chuan put chhuak zauhin, bial chhung ațanga thingbung lo man chat tu kut chu, rang zeta bial chhunga zuan luh leh nghal zat pah chuan, nâ zetin a han beng per ta zauh mai a!

Chuveleh, thingbung chu an lu chung lam hlam khat vela sang, an bial khawmna ațanga mau tlukhat leh a chenve vela hla lamah chuan per pheiin, darh nghal suau pahin thingbung perna lamah chuan, an bial khu phei leh ta mep mep mai a. mahse, ava bawh fuh hmasa ber tu 'uk' țhawt thawm a reh rual chuan, thingbung chu mual sir tlak deng In pakhat bang lam hawi chuan per thla lehin! chu lam hawia an han bial thlâ leh zet phei chu an thawm a ropui tawh ngang mai le. chutih laiin, an thingbung inchuhna lama khawi lai lai ruh emaw a pelh avanga, mawng tawlh chunga mual rawn chhuah san tawk lah bo lo!l thingbung tlakna In dap bang te chu chho zawng leh phei zawng te, thlang lam hawi zawng te-a a tlawn tlawna rawn inkhawh chhuak nghal fur furin, Saiphunga Pasalțha Hrangthura leh Zakulha ten, a hmawr tawn tawna vuan ran chunga an bial khawmna ațanga inphih thlak sak tuma, thingbung inchuh chunga an rawn lim chhuah dun puat puat lai chuan, midang zawng chuan an hnungah an rawn um khu chho leh ta luih luih maia.

Chutihlai chuan, mipui thawm lahin a vawrtawp rawn thleng chhoin, chutiang ang reng renga thingbung inchuhna ropui chu la hmu hlawm hek lo le! thingbung awmna lam apiangah chuan, an mit zawng zawng chu fu khawm zelin, 'e! e! e!' tih pahin an thlê rual dual dual hlawm mai a. chutih laiin, Zakulha leh Hrangthura te pahnih pawh, midang bawh fuh loh natur lam zela, thingbung inchuh chunga lim kual reng renga buai an ni bawk nen, alo rei deuh hnu chuan an thâin a tlin seng ta bik lova. chu hun chu verther zet chunga Hrangthura chuan rawn bawhchilhin, a sir lehlama Zakulha tlan lai chu 'uk' țhawt khawpin, a nâk nemah a han nghawk ta ngheng mai a! chutah zet chuan, Zakulha meuh paw'n kun deuh ngawih khawpa a thâ chu thlah zawkin, a thingbung vawnna kut erawh a thlah duh chuang hauh lo mai a. mahse, chutia an thâ thlah hlek chhung chuan, midang zawng zawng chuan rawn nangchingin, khu luih luih khawp chuan an han bial leh ta nge nge a. mahse, Lusei Keitê Zakulha finna chuan, chu hun pawimawh zet chu rang taka hmang țangkaiin, midangin an rawn bawh huk ruala, Hrangthura tlu tur chu rang zeta tluk khalh paha phih sawk pah chuan, ri no chawk khawpa nâ-in a khabe ah tak, a han nghawk sak ve ta țhuai mai a. Zakulha kut thlak nâ zet zawng, a hmel alo zuam ang ngawt chu alo nilo a nia nge! lei chhak thi zûl chunga a tluk thlawrh ruala, midangin an rawn bawh nghal ruih ruih lai chuan, ui teh mahse a kutah thingbung kha alo awm tawh tlat lo! thei leh thei lova midang hnuai ațanga a thlek chhuah țuk țuk lai chuan, a hnuai lama tu emaw bawk phek reng chu, a kap kar lamah chuan a put chhuak ta daih mai a. thlan tui nal per pur nena inchiah piah an nih vek tawh avangin, a hnuai lam ațanga put chhuak ta chu man beh chi ziazang a ni tawh lo. chu achhapah, vaivut khu karah chupa chu tunge a nih!? tih pawh tumah chuan hre tawh hlawm hek suh! mipui au ri leh Darbu tum bung bung ri kar laka, Khuang leh Silai lawn ulh ulh ri inpawlh ruih ruih karah chuan, vaivut khu rum rum khawpa thingbung inchuh ho an bial khawmna ațanga, mau tluk vela hla, Lal mual chhak lamah chuan, tu emaw chu vaivut khu karah ban phar chunga dingin a rawn lang ta a.

Chuveleh mipui zawng zawng chuan, chupa lam chu thlek nghal dualhin, chupa kutdinglam hmawra thingbung lo lawr pir vah mai chu, phawk hruin an en ta țhup hlawm a. mahse, chupa chu a hmai leh taksa vel zawng zawngah, a thlan tuiin a hip khawm vaivutin a bawh khah tlat avang chuan, tu ber nge a nih tih chu tumah chuan an hre mai thei ta lova. chuvang chuan, mipui ho leh Chhepchher khawng ri ho thawm chu thawklehkhatah han duakin!, thingbung dap fuh tuma a sir lawka la bial luih luih ho pawh chu, berh phung chungin an rawn tho ta sap sap a. mahse, chutia thawm a han hân duak lai chuan, mual sir ațanga Pa pakhat rawn au chhuak lauh lauh chuan, thingbung chang tu chu tunge a nih tih chu mi zawng zawng hriatah chuan rawn puang chhuakin, "ka khual kawi te zing ami, Pasalțha Hrangruma a ni e" Ralruna chuan a rawn ti ta lar lar a.

Chuveleh mipui zawng zawng chu a hma ai a nasa a rawn au chhuakin, Pa chinchang hre chin, thingbung an inchuh laia Zakulha chezia lo en thla tute phei chuan, a chet dan phung rang lutuk leh an Pasalțha Hrangthura chunga, a kutthlak nâ zet kha an lo hmu chiang hlawm bawk nen, an ngaisang ru ta viau mai a. mahse, Zakulha chanvo chu Hrangthura chuan a pawmzam mai thei tlat lo! a khawbê vela chilthli hnâng luang thi zul chung chuan, thip zetin Zakulha chu a melh run mai a. chutihlai chuan Hrumcheûva chuan, Zakulha leh Hrangthura innawp dan chu alo hmuh hmaih hauh bik lo, an inkar thu chu hun leh awm hmasak berah, tu emaw zawk zawk chuan, Pialral paltluang chhir tlang raih pawh țih lo khawpin, tih tawp an duh mai tawh dawn tih alo man pha khiau mai a ni.

Mipui la au dur dur chu Lal Saiphunga chuan rawn zap daiin, a Silai pu haw tu tur chu khual val Hrangruma (Zakulha) a nih thu chu, a Pasalțha rual te melh zuk zuk pah chuan a rawn puang ta nge nge a. chumi zawh hnu chuan, hruihrual tawng chen vel rawn lek chhuak zui zatin, "le, khua leh tui te u, he Sehrui chang tu apiang chuan, ka Se palian ki kheh tawh saw in kai hawng thei ang. kei ka ni' ti ngam apiang chu mualah hian rawn insehmur leh ru le! Vaibel țhankin chin zawng chu tel thiang a ni e" a han ti thawp leh ta sut a.

Lal Saiphunga'n, Hlang chung ațanga chu thu a rawn sawi zawh rual chuan, Lusei Pasalțha pahnih leh Ralruna te pathum, nui var chunga an ding khawm chu awmze nei zeta inmelh kualin, "keia tha thawh ve hun, Se hrui ka chan veleh chuan, kan ruamhmanna hi kan hlen ngei dawn e" Hrumcheûva chuan a rawn ti ta sap a. chuveleh Zakulha leh Ralruna te pahnih chuan, "kei pawh le" an rawn ti rual ve nghal țhawt a. mahse, Hrumcheûva chuan anni pahnih chu, an ruahman tawh anga lo awm tura hrilh pah a, che tur an nih loh thu chu rawn sawi nawn leh ngatin, "kan vaia kan chet huk chuan, Lal Saiphunga leh a mualkil te, a Pasalțha te rinhlelh kan kai hlauh dah a nge" men fiah deuh kalh pah chuan a rawn ti ta a. chuveleh Zakulha chuan, Hrumcheûva mizia alo hriat chian tawh em avang chuan, a thu chu hnial luih buangbar chi a nih loh zia chu, Ralruna chu hrilh zawih deuh sap pahin a han kuai hrang ta nghal a.

Mual lai, mipuiin Hlang an sep vuh vuhna bula Se hrui inchuh tur an han punkhawm leh meuh chuan, Pa san țha pui pui leh Tlangval pian țha pui pui te chu, an rawn ding ngir leh ta khup mai a. a hma lawka Silai chan tuma thingfak bung inchuha tel tawh, hliam nâ leh ruh pelh la nei velo te pawh chuan, Se hrui chu chan tawh ngei tumin, an puan ven an rawn sawi chhing leh ta sup sup a. chutah le! Lal Saiphunga chuan Se hrui chu sang zeta vawrh chho lehin, Pa pui pui leh Tlangval zawng zawng chuan, bek thlan hluam hluam khawpin an han inchuh khu leh ta luih luih mai a.

Mual sir ațanga lo thir tu mipui te thawm lah a țha, Vaibel țhankin leh țhankin, mual phut dup khawp chuan an han innawr sai leh ta ngar ngar hlawm a. Hrumchêuva pawh a țang nasain, a țumhnihna atana rawn tel leh ngat, Mualtlang Pasalțha thawm nâ Kaptawna leh Pa pathum vel nen, Sehrui chu chelh hoin an inpawt nasa mai a. chutihlai chuan, midang zawng chuan an chung lamah rawn bawh hukin! Pa pakhat puan ven chu an inhai buaina lamah chuan, a leng thlâ nawlh ta mai a! chuveleh mipui te chu nui hluah hluah chunga rawn au puk zualin, midangin a puan leh vaivut an chil sawp velna kara, a puan zawng chunga Vaibel dawn phê lauh lauh chung leh, a Patling țhankin ngum khi paw hrat hnuai lama, a uih fun leh a ek chhe hnawl kaw kotlang hual tu thangțung țang kawp sûr dum thla suau mai chu, vantlang hmuhah a pho chhuak hi a ni hawt tawh mai a.

Chutia mipui nui hluah hluah lam chu, Se hrui inchuh tute erawh chuan bengarawngah an khung hman ve lo. Se hrui la chelh fan tu, Hrumcheûva leh Kaptawna te chu an țanna a hnuai sawt ta hle a. chutah zet chuan Hrumcheûva chuan, chung lam ațanga rawn bawh thuah zel tute lakah chuan, hliampui nâ zet tawrh mai a hlauhawm țan tih a hrethiam ta! rang zeta Se hrui chu thlah zawk pahin, Pa pakhat kap kar ațanga put chhuah chu a tum ta a. mahse, a duh angin a tal chhuak thei ta mai lo tawp mai a! chu achhapah a laka an chet thawh dan ațang chuan, an zinga khualval tel ve chu an hre tawh riau nitur a ni! tumah chuan an dim lo lehzual tih chu a man thiam țan ta a. chuvang chuan ani pawh chuan, lang mang lo ațanga chet thawh chu a rilru chuan tum zui ve nghalin, a tal chhuah tum țan lâ lai, nâ zet zeta rawn chhuk nawr nghek nghek tu Vaibel lu phir țhawih mai chu, zun fep thlauh tuarh khawpa nâ-in a han sawh sak ta tâwk mai a.

Chutah zet chuan, chupa chu țê țhawt chunga midang hnungzangah chuan bawk zawi hnawkin, chupa rawn inrawlh luhna awlah chuan rang zetin a tawlh chhuak thei ta a. mahse, bial pawn lam a han vah thlen chuan, Se hrui chu tu berin nge chelh tih a zuk hmu thei tawh bik silo! chiang zeta meng dê kalh chung chuan, Patling țhankin inbawh bial luih luih te hnuai lam chu bih kun dah chungin, a veh hual ta pap pap mai a. mahse, rei a bih kual hma chuan, chung lam ațanga a lu lei bilh zawnga inrawlh lut, sawhthing thlar ang maia kêțang pharh țhaw țhaw khawpa țang, Pa pakhat chuan Se hrui chu rawn pawt dawt chho zawtin! a Se hrui nena tlan chhuah tuma a rawn tho chiah chu, Hrumcheûva chuan ke vanvawr suau khawpin a han keuh ta mai a. chupain lei a den khuk luih rual chuan, a kut veilama a Se hrui hum chu Hrumcheûva chuan, vaivut khu zing chûk karah chuan, midang hmuh hman mang loh khawpa rang zeta phih thlak sak nghal lawpin, tuma um phak rual loh khawpa chaka tlan chungin Lal mual chu a han hel pui ta pap pap a.

Chutia tuiburhmuamdâ chanve dawn, midang chuh buai loha a ken theih takah chuan, mipui mak ti leh lo 'e!' dual dual tute chuan, an Lal Saiphunga rawn che chhuak mek chu thlir zui nghal țhupin, Se hrui chang tu an awm e' tih hriat tir nâna a ban a rawn phar chhuak mek chu, 'haw hawin' an lo thawm chhilh ta hulh hulh a. mahse, Lal Saiphunga hmelah chuan, Sial leh Silai chang tute pahnih chu khualkoh zinga, Pasalțha pakhat kaihza veng tute an ni ta tlat mai chu, a lungthlu zan lo tih alang ru riau mai a. mahse, tuma sawisel theih loh khawpa chiang a ni tlat si! mual sir chhim lama Ralruna leh a kaihza veng tute pahnih, Zakulha leh Hrumcheûva te, Ralruna khual kawi dang mi panga te inhawr khawm nui var lai chu, hlang chung ațang chuan a va melh ta deuh khûih khûih a.

Chumi zan, bakchhelenhun vel laia Ralruna leh a Khual kawi ten Zawlbuk an han kai ve lai chuan, Tualval zawng zawng te chuan an lo en duh hlawmin, Sialhmur khaw Pasalțha Ralruna kaihza rawn veng tute zinga pahnih, Hrangruma (Zakulha) leh Ralsuaka (Hrumcheûva) te chet ran zia leh, an pianphung ên aia an chak zia chu anlo sep rawtui laih laih hlawm a. chutia Tualval ten, khualkoh zing ami an tluk loh te chanchin an sep chhen mai chu, Hrangthura leh Kaptawna te chuan an ngaithei loin, tlai lama an Silai leh Sial chuhna lama la sil țhum chung chuan, kilkhatah an lo ner nasa dun hle a.

An chutih tawh nak alaiin, Ralruna teho rawn țhu muang chu Valupa Ralkunga lah chuan, nui deuh van chunga lo chhawnin, "kan Lalpa Chawngchen țiak ni zet chu mit leh beng a tlai narawh e! Chawngpain Sehrui leh Fakthing bung a vawr lai hi țum thum kalo hmu ve tawh a. mahse, vawiin anga ropui leh mit beng fah kha ka la tawng ngai lo-ve! i chekawi zinga pahnih te chetphung kha, khual bawm âk mawng pâw naran chezia a ni tlat lo"!? ti a dawp titih chung leh Zakulha leh Hrumcheûva te pahnih melh pah chuan, Ralruna chu alo hui ta zauh zauh a. mahse, a beisei anga Ralruna chuan chhang ta mai lo chuan, "an thâ pek a fu laklawha, vanneihnain a zawng a ni fahmiang! khawiah Sapui mei an chaih thu va hre ûk hlawm suh i, Ranngo pawh kâwi haw lo leh, a ngai ngaia Bellam âk a an tlang leh kai ai chuan, Silai leh Sialpa kî kheh tawh nena an khawdai chhir luh chu, an tan nikang lâ par kêh taka kêh nilenna tham a ni ngei ang le" tiin, a khual kâwi Zakulha leh Hrumcheûva te chu, Bellam zuara an khua kai ve satliah ang lekah a han chhuah leh ta then a.

Chutia Ralruna'n, an ruahmanna ang chiah bakah thiam tak mai a, bumna tlem tlem a han rawlh ta vel chu Hrumcheûva leh Zakulha te chuan, inmelh ru zauh chunga lo tuihnih ve-in "Hrangruma (Zakulha) Pa leh Ralruna Nu te hi chhul khat keû an nih zarzoin, Khangpui tlang ațanga inchhir chhuakin kan Bellam zawrh nen, Pasalțha Runa te sut hi kan vuan ve chawt mai a. chuta țanga kan tluang zawh kal zel chuan, kan phu loh 'vanneihna' kan chhir pawh ta hlawl mai a ni ber e"! Hrumcheûva chuan Padarben hawi ang hru hrua hawi kual chung leh, kík vun chunga Ralkunga melh zuk zuk pah chuan a rawn ti ta a.

Chutia an titi ngaithla chunga midang zawng an ngawih țhap lai chuan, Hrangthura chuan rawn din chhuah paha anni ho chu rawn panin, "fakthing bung kan chelh dun lai khan, ka rin ang lo takin i thâ pek a nâ riau a! a thawh hnihna chu Zawlbuk chhuat zawla tlakah kalo hual der a nia! țum khat nâ reng reng chu ka han vawrh teh ang che" a khabea a nghawk sakna hre reng chunga rawn tih pah chuan, Zakulha țhu lai chu rawn bitum chat pahin, a puan ven, a kawnga a bilh vial tap lai tak chu a rawn țham sak nghal tawk mai a!
Zakulha lah chuan, Hrangthura chet dan teh thut chu a ngaihna hrelo zet chunga lo thlek deuh hâ in, "ka tlawm e, ka tlawm e, nang meuh han têr pha tur em ka ni ve lo-ve" a han ti sap a. mahse, Zakulha țawngkam tlawm zet chuan, Hrangthura thindip chu a do sâ ting mai tih hriat zet chunga, a hma aia rawn pawr lehzual sauhin, Zakulha chu Zawlbuk chhuat lai awl zau lamah chuan a hnuk phei lui ta hawn hawn mai a! chutah zet chuan Zakulha chuan, Hrangthura khap daih tuma Valupa Ralkunga leh, Tlangval dang rawn inrawlh te pawh chu hmuh kan lui ve tawhin, meng dê kalh chung chuan Hrumcheûva chu a han mitmei ta a.

Hrumcheûva chuan, Zakulha mitmei chu alo hailo chiang kher mai! Zakulha'n a rawn melh rual deuhthaw chuan, rang zeta a lu chu lo bu nghal zauhin, Zakulha chuan Hrangthura puan ven chu a han țham let ve ta chat a. chuveleh Tlangval zawng zawng chuan, an khaw Pasalțha hruanghrau nâ leh buan chak, Hrangthura leh Zakulha te in bitum chu kil bial nghalin, chak zawk nih tuma an innuai nghal miah miah mai chu, hmuhnawm ti lutukin an din hual ta huang mai a.

Zakulha chuan, rilru fim tak pu chunga Hrangthura chu veh thlem kualin, thâpui pek hun tur zawn pah chuan Hrangthura thinrim thâpui thawh chevel chu, zei zet zetin alo dang let zalh zalh mai a! chutih laiin, a duh anga a khawih thei ta silo chu, thinrimna ngawltawt zet chuan Hrangthura chu nawr so sang chho zelin, Zakulha chu a tukkhum sam zialah țham sakin a han pawt sawk sawk ta mai a! chutah zet chuan Zakulha pawhin chetphung pangngai bak sawn chho ve tawhin, Hrangthura'n a tukkhum samzial a țhamna lam banrek chu, nâ zeta hmer pah chuan a han leh herh sak ve ta a. chuveleh Hrangthura chuan, a ban nâ ta lutuk chu loh theih loha thlah nghalin, a kut lehlama Zakulha puanvena a dawmna pawh chu a han thlah nghal a. mahse a thlah rual chuan, Zakulha chu rek zui leh nghalin! Valupa Ralkunga leh Ralruna te chuan, Hrangthura chet dan avang chuan rawn pawh țhen an tum ta nghal a. harsa fea an han pawh țhen hnu chuan, atu amah inbin theilo anga lang ta chu, Valupa Ralkunga chuan "khai le! in in-êk tawk thial a ni e, in chak ve ve e. tunah chuan thu khat vuain ti ti i han vawr leh tawh ang u hmiang" a han ti a.

Mahse, chu hun karlak awl zeuh chu Hrangthura chuan chuh thutin! tuah mai tur atana Zawlbuk Tap chala an thingfak chheh zinga pakhat, banpuam tiat el awl chu rawn han ban zawk paha, Zakulha lamah chuan rawn vai thla nghalin, Zakulha țhu tur puan ven sawi țha sat sat lai chu, a darpheng dinglam hnung lamah chuan, tuma dan hman loh khawpa rang chuan a rawn hlap țhu ta hnawk mai a! chutah zet chuan, Lusei Keite zia a rawn chhuak ta! Tlangval ho lah chuan, Hrangthura chet dan em em chu 'lutuk' an ti ve ta tih hriat zetin, tuma'n an buaina chu țhelh an tum tawh bik ta lo. Zakulha țhu hnawk a rawn thawh leh nghal zawk rual chuan, Hrangthura chu eû nghal zawkin, Zawlbuk bang thlang lam deng ri tuarh khawp chuan a vir thla nawlh mai a. chu mai chu ala tawk lo hle tih hriat zeta Zakulha chuan, Hrangthura rawn tho zi țhul țhul lai chu zuk nangching leh nghal zatin, Hrangthura zawna a kun zawk ruala, Patling țê țhawt thawm an hriat rual deuhthaw chuan, Zawlbuk meipui chheh alh lai tak maiah chuan Hrangthura chu a rawn tlâ thum leh ta dup mai a!, chuveleh Zawlbuk chhung chu thim nghal hmukin, hmuntin mai chu meisi hlirin a dê khat ta chum chum mai a!

Chuveleh Tlangval ho chu buai phili zual nghalin, "Lusei Keite, zahngai tawh" ti a Hrumcheûva rawn țawng thawp sat avang chuan, Hrangthura chu a him ta hram a. mahse, an han bawihsawm dawn lai, mei an han nun leh laia, Tap zawla Hrangthura nâ tuar thawh tuma alo zik țulh țulh lai chuan, a bul hnai set sawtah chuan Zakulha chu alo ding leh hman reng tawh mai a! chutah zet phei chuan, Tlangval ho chuan Zakulha chet ran dan em em leh, a kutthlak nâ lutuk mai chu mak an ti zualin, an buaina a reh hnua an han țhutmuan leh hnu thleng chuan, Zakulha chu an melh hrek hrek hlawm tawh mai a. an hun tawn avang erawh chuan, tumah chu sahawk vak hlawm tawh hek suh! lenglen hun pelh deuh fe tawha, Valupa Ralkunga hoa Venglu lam Nuthlawi rim tura, Ralruna leh Hrumcheûva leh Zakulha te pali an chhuah lai chuan, Bawhbel pawna Hrangthura lo ding khawr deuh hlau mai chu, an ni pali chuan mak ti zetin an han melh hlawm a. mahse, Hrangthura chuan midang ho chu kal pelin, "i lakah chetphung mawi hawih lo zet ka rawlh avang khan, i mi ngaihdam ka ngai e" tiin Zakulha chu a han din chilh a. chuveleh Zakulha chuan, ngaihdam dil a țul loh thu chu Hrangthura hnenah chuan lo sawi ve nghal vat pah chuan, a chunga a chet dan avang khan ngaihdam a lo dil let ve ta var a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2018, 6:13 pm

Bung-37

A tuk varțian ațang chuan, Lal Saiphunga leh a mualkil te chuan zan lama an Chawngchen țiak, kham lo taka Zu leh Savei nen, an Pathlawi zaithiam Raltuma ko meuha, zai leh lama an la thlah chu chhunzawm lehin, Tuium sawh ri leh Khuang tuk kauh kauh ri chuan, Lal Saiphunga inchhung chu ala luah tukpum mai a. chutih lai chuan, Khualkoh ho leh Tlangval țhenkhat te chuan, Lal Saiphunga In chu pan sap sapin, chhak lam tlang chung zawn tawng chen vela sanga, Ni chhuak a rawn kan vuah tawh lai pawh chuan, Lal inchhung thawm pawh chu ala țang ang reng hle a. mipui ho pawh a tho hmasa apiang Lal tualah chuan rawn lawi khawm zelin, an Chawngchen nawi thian pawl leh Thangchhuahpa, Lal Saiphunga 'zau' dawh sak tura phe buai pawl chu an inpel leh ta suau mai a.

Tukțhuan rel hun chhoah chuan, Lal Saiphunga leh a mualkil te chu a luhkapui zauah chuan, rui phi deuh phalh chunga rawn chuang chhuakin, mipui lo zi hut hut lamah chuan Lal Saiphunga chuan a ban a rawn phawr ta du a. chuveleh mipui te chuan, an Lal chezia chu chawlh nghal țhup paha rawn ngaichang nghal vekin, "khua leh tui te u, ka khuangchawi Saveichawi leh Zupui no chawiah kan tlai kan puar rual emaw chu le"? a han ti thawp deuh sut a. mipui te chuan, an Lal zawhna chu hmun hrang hrang ațang chuan lo chhangin, "kan puar kan tlai e, Thangchhuah Chawngpa leh Chawngnu te chuan, an tu leh fate nen 'ngalfimin' dam ni chhiar rawh se" an lo ti tliar tliar hlawm a.

A khua te țawngkam mawihawih zet chuan, Lal Saiphunga chu a ti lawmin, Lalnu Chawngtuali leh a Fapa Rawlthar, Saivuta leh a fanu hmeichhe naupang Tlangchhingi te chu a han ko chhuak ve ta nghe nghe a. chutia an chhungkim meuha, an mualkil te nena a luhkapui sanga an rawn inlan ta țhap mai chu, mipui lah chuan anlo lawm thiamin, khualkoh ho pawh chuan, Lal Saiphunga chu fing an ti ru ve hlawm hle a. chutah, Lal Saiphunga chuan, muang deuh chuar chunga a kut chu rawn phar chhuak lehin, "in țhat zar zovin, Thang ka chhuah a ni zawk zawmah e. hun a liam zel, kan khualkoh ho pawh an tlang hawia inchhir chhuah an duh dawn dawn tawh a nge, kan chawngchen țiak kan ui atalangin, ka chhuatpui kan lo la sûkchilh tui nasa mai si a, kan Sehrui leh fakthingbung chang tu, khualkoh Rawlthar Hrangruma leh Ralsuaka te pawh, kan Chawngchen țiak thawm thawt hian alo ti 'lungzûr' (lunghnur) hman hlauh dah ang e, Tlangaupa, Rappui chung sang, Lalnu Êmpai kara ka Silai rawlh kha rawn phawi teh khâi" a han ti ta a.

Chuveleh Zakulha chuan, a piah deuha ding Hrumcheûva leh Ralruna te chu, hmui pet fan chunga va thlek zawkin, an ruahmanna hmawr bawkna tur hun rawn thleng mek chu, Lal Saiphunga leh a khaw mi zawng zawng te hmuh laia hlen chhuah chu, a țul dawn ta tih a hre chiang ta hle a. chu achhapah, chu hun reilote chhung chuan, a rilru ngaihtuahna te chu chak taka vak kual hman vekin, Lal Saiphunga inchhung ațanga, an Tlangaupa Taibawnga'n, Silai ngul tlê nalh zet a rawn put chhuah zan zan lai te chuan, insangmar țeuh chungin Lal Saiphunga chu alo ral melh ran mai a.

Tlangaupa-in Lal Saiphunga kuta Silai a pek lai te chuan, Ralruna phei chu alo khur titih tawhin!, an ruahman ruk hlen chhuah natur atana, a bi tawp inchhawng chu an kah fuh loh vaih chuan, mitkhapkar lekah an chhehvela mipui zawng zawng chu, 'ral' an chang nghal duak anga, chutah meuh chuan, eng anga Pasalțha rothap tan pawh put chhuah nahman awmlo khawpa rangin, bawp thlawn nuaih khawpin chung ho chuan, an nghaisa tawh mai dawn a ni tih chu a hre chiang hle a. mahse, chutia a rilru kawma a buai titih lai, Lal Saiphunga'n Zakulha lam hawia Silai a lek kawh vâ lai chuan, englai pawha rilru fim kar reng țhin Hrumcheûva chu rawn inrawlhin, "Lalpa, i pawi ka tawk em lo turah in ngai ila! rem i tih chuan inchhung lamah, thu khó khuh bilhpui lawk che ka duh deuh e" a rawn ti ta a.

Hrumcheûva thu rawn sawi avang chuan, Lal Saiphunga leh mualkil te chu an phawk nasain, mipui zawng zawng lah chu angaihna hrelo zetin, an Pawih kawngbo din tau hlawm a. mahse, Lal Saiphunga chuan, Hrumcheûva chu kîk deuh vun chunga rawn hûiin, "a khual a tual thuchhia țha ngaihchan a ni ngai e, a eng thu chuan nge ni, ka mualkil te thlaua min kuai hrang tura nawr che chu ni"!? tih pahin, a Silai ken lai hawl chung chuan inchhungah chuan a lut ta a. chuveleh Hrumcheûva chuan, Lal Saiphunga chu rang zeta zuilut nghalin, pawn lama awm, mualkil te leh mipui zawng zawng chuan, inchhung chu an inbih chhawk sek hlawm a.

Lal Saiphunga chuan Hrumcheûva chu chiang taka melhin, eng thu nge sawipui a duh tak tih chu a han zawt leh deuh nghut a. Hrumcheûva chuan muang deuh chetchawta, a 'aw' chu then kharh kharh paha thubul chu rawn keuin, "Lalpa, hun enge maw chen kal ta ah khan, i tlang hi Nupa tuak khat leh țhanthi pal chin hmeichhe tlemtê leh naupang pathumin an rawn kai a. chung mite chu Halkha leh Thlanawn ral vanga, mahni tlang chhir chhuah sana, Lusei Lal dangte thlazar hnuaia bik tum te an ni! mahse, an beisei anga Lusei Lal ten an lo tih țhat tak siloh ah chuan, tukzan tam vaka ngawpui leh ruam bela, Halkhâ leh Thlanrawn ral chhawn neka hmanhlel, Lusei Pasalțha pathum te zinga pahnih chuan, an chhawn pekna mual ațanga Țiau kan rawk khawpa, Halkha leh Thlanrawn ral an nawr tawm hnuah, chung ho chu zawn chhuah leh tumin, thlang lam Lusei Lal hrang hrang te țhut tlang, an rawn chhir kai leh ta par par a. atwp atawpah chung, ho hnu chu i țhut tlangah hian chhak Pasalțha pahnih te chuan rawn chhui lutin! chung Pasalțha pahnih te chu kei leh ka țhianpa kha kan ni a. Rawlthar Hrangruma, i fakthing bung chang tu ngei kha, Lusei Keite Zakulha, Halkha Pasalțha rothap Tlakphunga hnarbeh phawi sak tu ngei kha a ni e! kei hi amah chher chhuak tu leh a aihnahphahpui' Pasalțha Hrumcheûva ka ni. Keikawla erawh chuan, kan chhawn thlawp tluan thei ve ta lovin, Lusei hnam te tan a lu a hlan ta e" a han ti thawp ta sat a.

Chung thu a sawi laia Hrumcheûva hmel rawn hriam pâ hrak mai chu, Lal Saiphunga tan chuan lo dawn sawn ahar hle ang le! a mak ti lutuk leh a zam lutuk chu a țhu khawng reng ta mai a. Hrumcheûva lah chuan, thudang sawia rawn thawt chu tum tawh bik rih hek suh, hnai setsawtah chuan an inmelh tawn ta deuh reng mai. mahse, Lal Saiphunga chuan inthunun lui hram hram chunga 'aw ka' rawn chhuah lehin, "i thu rawn kamkeu avang chuan, ka rilru a dangam hauhin ring suh! Mualtlang Lal Saiphunga hi, khual thu zuia chhawn nêm mi a ni love. Zakulha leh Hrumcheûva te inni ngei e' tih fiahna pawh tu fa lu bawkin nge rawn tlang thawt sak tehchai ang che u" la ringhlel zet chung chuan a han ti ta khur khur a. chuveleh Hrumcheûva chuan, pawn lama Zakulha ding tau lai chu ring lenglawnga va koin, "thu nem zawngin kan thu hi i chai fel teh zawk ang. kan Lal Taikherha te nupa leh kan mite te tlan nan hian, i Sehrui leh Fakthing bung hi kan ban let a che! thu nêm leh Lusei tlangtina awm te dan zui țhin hmanga, kan Lal leh kan unaute 'tlan' chhuah duh avanga, Sehrui leh fakthing bung pawh kha thâpui nena thih huama chuh kan ni e" a han ti veleh ngat a. Hrumcheûva thu sawi tawp lam ai pha thuak vel chuan, Zakulha leh mualkil ngaih țhalo zual pathum vel chu rawn lut deuh hâkin, inchhunga Lal Saiphunga leh Hrumcheûva te lo inmelh tawn run mai chu, kâ deuh hau chungin anni ho chuan an rawn țhutchilh ta hlawm a.

Enge maw chen an ngawih leh deuh țhap hnu chuan, Lal Saiphunga bawk chuan a mualkil te chu, melh rulh rulh paha țawngka rawn chhuah hmasa berin, "hei le! thuhretu an awm ta țiai e, Pasalțha Runa kaihzaveng Suaka hian, he Rawlthar fakthing bung chang tu hi Zakulha a ni a. kei hi Hrumcheûva ka ni e tiin, ka chhak Lal tlawm sal Taikherha leh a khaw mite min dil tak mauh chu! archil zat lek fiahna" a tih ruala, sawi zawm lova a tawp hmuk rual chuan, Zakulha kutveilam ațanga, an țih ngawih ngawih țhin Halkha Pasalțha rothap leh nunrawng, Tlakphunga 'hnarbeh' Keipui țhankin ngho rawn lawr tlê vur mai chu, khur titih chung chuan a melh ta reng mai a.

Mualkil pathum te lah an zam chhia chu a ni nghal mai bawk nen! an hmuh fo țhin Tlakphunga hnarbeh, a bul lama inker khuar bial pap leh, a dawh (dawk/phawi) loh nana hmawlhte leng vel tura inverh kaw pam mai chu hai hlawm mawlh heklo le! "Lalpa, thu nemin kan thu hi chhilh mawlh teh se! kan Lal leh kan mite chu min pe la. Sehrui leh fakthing bung chu kan hnutchhiah nange" rawn tih nawn leh ngat pah chuan, a Sahmim-ip chhunga Sehrui chu phawrhin, chhuatah chuan Hrumcheûva chuan a han theh thla ta a. chutih lai chuan, Zakulha pawh chuan a thingbung zakzeh țât chu, chhuatah bawk chuan rawn theh thla ve ngalin, "chemhar chhuah kher kan ngen love Lalpa" a rawn ti ve ta sap a. chutih lai chuan, pawn lama mipui leh khualkoh ho te, Lal Saiphunga nupui leh a fate lah thawm ngaichanga nasa zeta lo phili tawhin, inchhung lam thu kal vel dan puang chhuak tura, Lal Saiphunga rawn lan hun chu anlo nghakhlel hle tawh a. mahse, an thu kal dan leh thil thleng chu tlang than chi a ni silo! mualkil upa pu Țhiauva chuan, mipui te chu tukțhuan ei a haw țheuh turin a rawn hrilh ta ngawt mai a.

Mipui an țin darh hnua, tukțhuan ei țhulh deuhthaw khawpa, Lal Saiphunga leh a mualkil ten Hrumcheûva leh Zakulha te pahnih nena, an thu kal zel an han chai hnu chuan, Lal Saiphunga leh a mualkil te chu an zak ta em em mai a. chu achhapah, an hming chauh an lo hriat țhin, Zakulha leh Hrumcheûva te chu an ngai ropui zualin, mualkil zawng zawng te chuan, Halkhâ leh Thlanrawn ho an nawp darh dan chu an inzawh chhawk sek reng mai a. mahse, Tukțhuan ei khama, Lal Saiphunga ina an han lawi khawm leh hnua, Mualtlang Lal Saiphunga leh a khualkoh te zinga pahnih te thu kal vel ai tuma, Lal luhkapui rawn kai ve Pa pakhat pu Suakvela thu sawi avang chuan, an Lal Taikherha te chhungkua leh, an ruala hmeichhe tlan ve mi sawm te chanchin an hriat ruala, an chanchin tumahin an hriat ve loh, an Țhian Rawlthar pasalțha pathum te chanchin chu hre chhuakin, Lusei Pasalțha rothap pahnih te chu an lawm a kim ta tlat lo! Lal Taikherha te chhungkua leh an mite bula an tirh liam, eng hun pawha theih tawpa an chhawn veng tur atana an tih, chung Rawlthar pathum te chanchin, alo hre tu awm chhun pu Suakvela thusawi avang chuan, an zawi deuh hnawk hial mai a ni.

Suakvela chuan a thusawi lai chu rawn sawi zawm lehin; zanlai furchhe fem airuah baw hawkin Setlak ruam a bawh churh churh lai chuan, chu ngawpui hnuai luite kam thim ruih hnuaia, changpui hna sawh hliah hual pap chhunga, mei êng thlarah chuan, Lal Taikherha te Nupa leh hmeichhe sawm te chu, an lu a thikhar kai khawn ih-iah chung leh phuar khawng tlat chunga, an phuar behna thing ngheng chuan ding kun nghiaiin, an mahni vengtu Rawlthar pathum te chu, an hnung lama thingtuaia an darpheng thlawpa phuar kap phar dârh chung chuan, Pasalțha tawrawt leh nunrawng zet, Kapluia hmaah chuan an țhingțhi țhap mai a. chutih lai chuan, kiltin mai chu Kapluia hote, mi sawmhnih dawn chuan Fei leh silai nen veng phui vekin, Lal Taikherha mite zing ami, naupang pathum te hnuh țé rawng rawng pah chuan, an hotupa inhrosa lai chu ngawi rengin an thlir țhap mai bawk a.

Kapluia chuan la inhrosak reng paha Lal Taikherha chu pan pheiin, "thlang kan tlak khalh hnu lawk che khan, i 'Sialman dar' nen khan thlang i rawn tlâ ve vat tih ka hai lo. i lawina tlang chhui ru reng renga hmanhlel hian, chhungpuinu te mawng hnawn zai pawh ka chhah lohna a rei ta e! i Pasalțha Cheûva leh Kawla te chu, thla ngamna tlak an awm tawh hlei lawng e, Halkha leh Thlanrawn hoin an luhrum an kêk filh pak tawh ngei ang le! i 'Sialman dar' i phum rukna chu min chhir pawh pui la, nang leh i khaw mite hi kan Lal ropui leh țha zet hnenah, him takin ka kâwi thleng ngei ang che u" thlem titih, vau titih chung chuan a han ti zawi sup a.

Kapluia thupui thlan kam keu chhen mai chuan, Lal Taikherha chu a ti ngawltawt leh tawhin, "i thil tih hi in Lal Khamruma chuan a hriatpui meuh che maw!?, Lal Khamruma chu Lal țha leh nun tluang nia ka hriat țhin si ni! ka khua te hian Lal Khamruma hi hre hlawm mah suhse, kei chuan a chanchin hi ka hre nual e. a zepui thlakin nang hi ka 'Sialman dar' la turin alo tir ru reng che a maw"!? thinrim leh mak tihna hmel pu nasa zet chung chuan, Lal Taikherha chuan a rawn ti ve ta hrâk a. mahse Kapluia chuan, Lal Taikherha țawng chu hrelo ang mai a lo nuih liamin, "tu thu pek leh tirh ka nih hi sawi hluah a ngai tawh lo-ve, i awih leh awih loh chu i thu a ni e. vawikhat chiah ka zawt leh ang che, i 'Sialman dar' chu kawnge a awm"? a han ti vin leh ta tuarh mai a. mahse, Lal Taikherha chu fiah taka meng kalh chunga rawn dak chhuak lehin, Thingzawl Lal Khamruma leh a Pasalțha verther Kapluia chuan, engti kawng maha a 'Sialman dar' chu an hmuh dawn loh thu rawn sawi lehin, a thu tawp nan chuan, dawihzep taka tlawm ai chuan thih a thlan zawk thu chu a rawn sawi nawn leh ta a.

Chutah zet chuan, Kapluia thinrim tertet chuan a tlin ta ngang lo! Lal Taikherha te nupa leh hmeichhe ho veng tu, Rawlthar rual awmna lamah chuan rang taka tlan pheiin, a Milulak chem chu Rawlthar pathum zangphar dâr chunga an phuar, luikam dum chiau perpur chunga an țhingțhit tlar tir te nghawng zawnah chuan a vai sen ta puat puat mai a! chutah meuh chuan, hmeichhe ho chu an lo țê nasain, an mahni venga hah leh rilțam pawh sawilo leh, zan mut muan hun pawh nei lova englai pawha, hlim hmel la pu sang reng thei te lu bung nuaih leh, thisen luang nguah nguah chunga an thihsual tal fat fat lai chu, țap leh tal chungin an hawi sawn san țawk țawk hlawm mai a.

Kapluia lahin, a Lulak chem chu thisen dir tluk tluk chunga la lek vu chung chuan, "naute u, i chhir liam teh ang u, chhak Lal tlawm Taikherha leh a hmei kawi te hi chu, Sapui leh Rammi te thazât chhawn lekah tlu hlum phiar teh se" tih pahin meichher a siam zui ta mial mial a. an hotupa thu pek avang chuan, an vai chuan meichher chu rawn puah ve sap sapin, an inpeih hnu chuan, Lal Taikherha te nupa leh a khaw mite chu an liam san ta diak a. mahse, thui an kal hma chuan, an zinga pakhat Suakvela chuan an hotupa Kapluia chu ko pengin, "ti khan lo han kal ta ula, kei zawng kan kalsan tak hmeichhia leh naupang te kha ka thlah ve thei ngang love! a țul leh an bulah ka tap ve mai ta lawng" a rawn ti chhuak ta phawng mai a! Suakvela thu rawn sawi chuan Kapluia chu a ti thinrimin, "a chuti zawng chuan maw kei hi min phatsan dawn a!!?, țhianțha tiin, hei leh chen hi Aikhat hnah kan phah dun tawh a ni lawm ni? a tu ber khan nge ni i chhungpuinu kakpui lo hnualsuat tir hman che chu ni"!? tih pahin, Suakvela nghawng leh a milulak Chem zangkul chu a chuktuah ta run mai a.

Suakvela leh an hotupa innawr nawk nawk lai chu midang chuan, țhelh tuma rawn zimin, thulai lak dan tur an zawng nasa hlawm mai a. Suakvela lah diau tawh bik hek suh! Kapluia'n, a nghawnga thisen far zawih zawih khawpa, a Chem a nawr tawlh țan lai te chuan, a milulak Chem chu hnuai lamah alo hum ruh ve țalh țalh mai a. mahse, țul lo taka Kapluia laka thih ngawt ai chuan, dam khaw chhuah phawta Lal Taikherha leh a khaw mite hnu chu, chhui zui leh chu țhain a hre ta a. chuvang chuan, Kapluia lakah chuan a 'tlawm' thu chu rawn sawi chhuakin, rilru pangkhing zet chung chuan, an zingah chuan a kal ve leh ta zawk a. mahse, an khua Thingzawl an thlen hma zawng chuan, Kapluia leh midang zawng chuan, rum zet zeta melh paha vau zui chhar chhar hlawmin! Lal Taikherha leh a khaw mite chunga an chet dan chu, a dam chhung zawnga tu hnenahmah sawi lo turin an vau nasa hle a. chu achhapah, a sawi chhuak tih an hriat vaih chuan, amah mai nilo a nupui leh a fate, a nu leh pate thlenga an thah vek tur thu chu an chham awl lo bawk a. Suakvela pawh chuan, an vauna chu an ti duh tak tak mai dawn tih a hriat chian avang chuan, rilru pangkhing zet chungin a ngawih san ta hrama a. mahse, Kapluia chuan ala duhtawk mai tlat lo! chhe chham meuha tiam tura Suakvela chu nawr lehin, a chan chhe zawk Suakvela chuan harsa ti zet chung chuan, Kapluia leh midang te lakah chuan chhia chu a chham ta nge nge a.

Chuta țanga thla tam a liam hma chuan, Suakvela chuan Kapluia leh midang te vauna thu, dawn zui reng chu nuam a tih sen tak loh avang chuan, a ruka a chhungte chu kawi chhuak vekin, Lal Saiphunga khua Mualtlang chu a kaipui ta diak a. mahse, an kaina khua Lal Saiphunga khua a, In an han khawr pum fel ve hnu ațanga reiloteah chuan, Lal Saiphunga Sal te chhungkua, Lal Saiphunga hmei Nuthlai Dawni te Loa, chhungkua a khawsa chawt mai te chu, Lal Taikherha te nupa leh an Fanu te kha an lo nireng mai tih chu a hre chhuak ta a! chutah zet phei chuan, a thutiam kha sawi chhuah loha, kâ neilo anga khawsak tlang zel chu tum leh ta zawkin, mualkil leh Pa awmthei ho pawh chuan Lal Taikherha khaw mi, hmeichhe ho pawh kha, sal chhawrin an lo chhawr fai diak a ni tih chu a hre leh ta zel a ni.

Hrumcheûva leh Zakulha te chu, Pu Suakvela thu rawn sawi chipchiar zawk chuan a ti nâ zualin, Chhingpuii pu Thingzawl Lal thi tawh Khamruma chu, a khaw mi ten a chanchin an sawi dan leh pu Suakvela'n a sawi dan chu inpersan an ti hle ta mai a! chu achhapah, an Lal Taikherha leh an khaw mite laka Chemhar len tu alo ni tlat mai te chu, nâ an ti zualin an mak ti lutuk chu an 'chék' dun tlawk tlawk mai a. Hrumcheûva phei chuan a tuar nâ zualin "aw Chhingpui, Lal țha leh zaidam nia kan hriat, i Pu Lal Khamruma leh a Pasalțha Kapluia vangin 'Leido' kan chang dawn ta maw!?, i lenna tlang kai leh hun chuan, darbiahnem banin, ka lairil luah tu ka thudi khawl khawm te hi, i tawnah ka ka hlan nang che tiin ka tiam tawh si a. mahse, biahnem thudi aiah 'Chemhar' kan chhuah dawn tak si a maw Chhingpui" a ti rilru ta vawng vawng mai a. tumah lah chuan, Hrumcheûva thinlung rum ri chu an hre ve mawlh silo! Lusei Pasalțha rothap Hrumcheûva meuh pawh, 'Hmangaihna duhawm leh mawi tak, hring fate zawm tu duhawm ber leh Milulak Chem zangkul inkarah dingin, hawina lam tur hre tawh lo khawpa mangangin a 'hui' ta pap pap a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2018, 6:13 pm

Bung-38

Behliangmun hun khawthlang lam her hreta Ni a din nghauh lai chuan, Pawltlak thla chawhnu lam a nih tawh avangin, khua pawh a vawt riau tawh a. chutih lai chuan Tar chaklo deuh, hnâ rum la lova awmtual til hnuka Empai hnang leh Khô tah pah a, an tû te (Naupang) awma titi phung leng vawrha, khabê inkhawng ri tlak tlak khawpa inkawm tui, Putar rual khat te chu Ni lum hnungpuakin lungdawhah an țhu thiat far hlawm a. an naupang awm te lah chuan, an pute ho inkawm titi chuan, eng thupui nge an khel tih ngaihtuah lek lova țê chilchelin, a khat mawi tawk vel chuan, chung putar țhenkhat te chuan, chung naupang zing ami chu man beh tal luih bat bat pahin, an hnap te chu an han sawh sak leh tâwk țhin bawk a.

Chutihlai chuan, Padarben pu Khualnêka pawh vengmawng lam ațanga, a puanven ham khawm țat chunga hawlhrawk lek chunga, khu rum rum khawpa rawn lim chhovin, a hma lawkah chuan Vawkpui hmui zum zet hi, êk kai lei luai chungin a rawn tlan phe chho hlak hlak mai bawk a. chuveleh naupang ho lah chuan, pu Khualnêka leh Vawkpui in um chu aû chul chunga zuk zim thlain, Lal mual lam pana pu Kualnêka leh Vawkpui in um khu phei luih luih chu an zui phei hûl hûl mai a. Lal mual an han in um thlen chuan, Vawkpui chu an Lal In hnuaiah chuan, luh tumin a insawi kawi ta zuka. chutia a insawina lamah chuan, Lalpa Se huang ațanga thingtuai rawn inrawlh chhuak chu pal pialin, a mah um tu pu Khualnêka a hlauh avanga, uk deuh țhawt chung chuan rang lutukin a han tho leh ta a. mahse chu hun țha ngei mai chu Khualnêka duhthusam alo ni si! thinrim mengsen ping nal chung chuan, a hawlhrawk ken lai chu zakkha nam huk khawpin, a lu chung lamah a han lek chho zui zat a. chutah, a ke bul lawka Vawkpui tlu tho leh tlan țan chiah chu, lei dep zawk khawpa nâin a han hlap ngêk tuarh ta mai a!

A Vawkpui hlapin, dai lam pana la uk țhawt țhawt chunga a liam san lai, Vawkpui thawm a han reh rual chuan, Lal In kawngkapui tlengrel hrawl leh hnum țha hen hawn chu, muangchanga rawn insawn tawlhin, Padarben pu Khualnêka meuh pawh, an Lalpa luhkapuia a thil han hmuh avang chuan, a ma mawngtam sawk tawn tawn chung chuan a ding phawk hrâ ta mai a. naupang ho zawng zawng lah chuan, pu Khualnêka thil thlir lai chu hmuh hmaih bik hek suh, a hmu tawh apiangin an thlir nawn loh phal ngailoh, Tleirawl inphut mawi leh vun no paw phek mai, hleitling mawi tawk tak leh sambu nalh hnelh hnawlh, a mitmeng lah a nungchang ang chiah mai a mawi leh pawisawilo hmel, a hmai bawr inremkhawm reng reng a fuh tih loh phal rual lohva inchawih, a hmui nalh leh sen nung vam hiam mai dinglam chung, a hmui tlangkawm si lek leka khuavang chhinchhiah dum val kalh mai, a pian lah a fêk lai tur fêk rât mai leh a vâwng lai tur vawng lah, a khual a tualvala Zawlbuk leh țhutmuan titi luah țhin tu, 'Hmartlang chuankitê' an tih huai huai țhin, an khua Darkai Lalpa Keihranga fanu neih chhun, Chawnglalpuii lo ding nú zâm mai chu an thlir dâk ve far mai a.

Chawnglalpuii chuan, naupang ho chu nui sen sen chunga rawn biain, "taitea te u, nangni lah lo nireng che u in! pu Nêka ho hian kha Vawkpui kha in zim em ni le"!? 'aw' ngaihnobei zetin a rawn ti ta a. chuveleh pu Khualnêka lah chu alo zak tumhrang, naupang hoin Lal fanu chhang tu tur inhnawna, a ruka an insih kual nauh nauh lai te chuan, "ka ka ka! nilo nia kei chu" tih paha a hawlhrawk ken theh thlak vat pah chuan, "nangmahni ho chhepchhawp vang, ngahnge in rawn inhawr vet tei ni"!? tih pahin, naupang ho chu Lal fanu hmuh lohna lam tur hawi chung chuan, a melh rum âl âl mai a. naupang ho lah chuan, pu Khualnêka lungawilo dirdin vel chu hrethiam hlawm hek lo le! an zinga pakhat chuan, "ih ih, a phing ka hauh aw a pu Nêk" midang kar ațang chuan ala rawn ti ta hram a.

Chuveleh Lal fanu chu ri deuh hawk khawpa rawn nuiin, pu Nêka'n sawi tur hre tawhlo lai laklawh tawh chunga "kan Lalpa chu a dam a lawm maw"? a rawn tih ve leh ngawt lai phei chuan, Lal fanu chu a nui nasa ta har har hle a. mahse, chumi hnu lawka pu Khualnêka leh naupang hote an kal liam sap sap lai chuan, Chawnglalpuii chu a thinlug țahna lungchhia chuan, rawn ralchilh leh nghalin, a mitmeng mawi zetah chuan, a mittui fim tlê kalh mai chu a rawn tling khat leh piau tawh a. chuveleh mi hmuh hlau tak chunga a mittui chu hru sawk sawkin "tualah tu hraidawntuai te chu an nui hiau e, kei ka chan tawk lungloh 'di' zui a thlangkhuandîma len, ka zuapa thanlai chunga leng, Lal Rumvuta chhawn min zahdaih sak thei awm che u maw"!? tih pah chuan, an luhkapuiah chuan a țhingțhi ta hnawk mai a!

A fanu duatlai leh a enchim phal mawlh loh, rilru hrehawm lutuk țhingțhi hnawk chu, Lalnu Țhiangtuali chuan lainat zet chunga rawn pawmin, "lenrual te u, ka Chawngpuii hi lo sel lo u aw! ka hraichawi nau ang țap e zawlloh 'di' Chemhar ka dang zo silo" tiin a rawn țap chhuak ve ta hial a. chuveleh inchhung lam ațang chuan, Lal Keihranga chuan aw' dam duaia a nupui leh a fanu te chu rawn koin, "Kapvunga nu, Chemteii kha rawn luhpui teh khâi. kan tum loh hun inher hi kan phingchil danglam thei tak silo a leh! mite fak derna nêm 'Hmartlang chuankitê' tia, ka Chawngpuii hming lem an lo sawi teh fo pawh hi kan chhungkaw tan chuan, nun hman nawm loh phahna alo nih lek hi lê"! tih pah chuan a mualkil pahnih, a rin bik leh a thu lakna ber pahnih, inchhung lama a titi pui mek te chu a han melh ngui ruih a. an Lal hmel ngui zet chuan, mualkil pahnih te chu ati mangang zualin, Lalnu Țhiangtuali leh Chawnglalpuii te nufa an rawn luh lai chuan, "kan Lalpa sawi ang khan, hmelțhatna leh nunzê mawi inkawp, nula te entawn leh tlangval te thlir nin loh nih pawh hi, alo dawngsawng tute ngaihdan a zirin, kumkhaw nun pal nawm lohna alo thlen thei reng mai dawn zawng alo nih hi! Lalpa i thu rawn keû khan ka ngaihtuahna a hruai riau ta mai e â" Tualzingipa chuan a rawn ti charh charh a.

Tualzingipa thu sawi chu, mualkil pakhat zawk Sawichhingapa chuan lo tuihnih velehin, "dawino' chhuiin kan sâbiak pui dawisâ kilzâ thei tiin, Vangmual Lal Rumvuta chuan kan Chawngpuii chu a rawn pawng ngen ta tlat mai si a!. lentlâk kan lo rualpui duhlo a nih chuan, Chemhar chhuahah min vau bet bawk si! kan Chawngpuii lo pawh tlang dang Lal fanu, an dawisâ kilpui theih tur an ngir ve țhiap tih chu a hâi mawlhin ka ring lo. a eng anchhia nge ni kan tawh tak ni!? ti hialin ka ngaihtuah ta hial mai e! tunah pawh Satbilha leh a kâwi te chuan, kan tlang kaiin dâi an rawn hrut thiak tawhin ka ring a ni" tih pah a, a tar puan bah a khupa suih țhat malh malh pah chuan, a Vaibel êk chu a kutzungchal chuan a han thai thlâ niap niap a. a mualkil rinpui deuh bik, Tualzingipa leh Sawichhingapa te pahnih titi chu Lal Keihranga chuan, a fanu leh a nupui te pahnih, khumâi kawma țhu kun nghiai mai te melh zauh pah chuan lo zawm velehin, Lal Rumvuta fapa Satbilha'n, a Pa vertherna leh an khaw len chhuanga, tih luihna hmanga sir thlûk luih tuma an nêk mek, a fanu Chawnglalpuii bih hmasak tuma, a kâwi (țhuihruai) te nena Chawnglalpuii rim tura, an khua rawn kâi an tum dan vel chu rawn sawi velehin, thimchhilh rual chuan dâi an rawn kai a rin tawh thu chu a rawn sawi veleh a.

Chutia Lal Keihranga leh a mualkil upa pahnih te phur lo zeta an titi lai chuan, khua pawh a rawn tlai lam leh tawhin, Lalnu Țhiangtuali paw'n hmel ngui nghiai chungin zanriah a rel țan ta a. chutihlai chuan, Lal fapa tlangval pian țha nelh nawlh Kapvunga, Chawnglalpuii ú Sakhi chan tum Silai lam tura lo haw chu, a nu chuan bak deuh hlaka lo biain, a farnu biha an khaw rawn kâi tum, Satbilha leh a kâwi te lo nghak thleng ve phawt turin a han ti a. mahse, Kapvunga chuan a nu chu khup deuh zal chunga melhin, "țhian Zinga ten min nghak tawh si a, rei kan thang hleiang. mah reng reng sê, Satbilha leh a kâwi te hmel hmuh pawh ka nuam zat love" ti a lo chhan pah chuan, a pa leh mualkil te chu a han melh kual thuak a. mahse, a pa pawh chuan zawi deuh supa kal lo tura rawn tive lehin, a farnu chungchanga thu kal lam haw lam chu, lo hre ve vek se a duh thu a rawn sawi ve ta a.

A pa thu lak dan avang chuan Kapvunga chu a hmin lo zualin, a farnu Chawngpuii pawng lâk tum, Satbilha hmel chu a hmu chaklo hle tih a hmelah chuan, a lang chhuak titih ta hial a. mahse, a pa Lal Keihranga ang chiaha pa zam dam thluam mai leh, an khaw mi tupawhin an ngainat khawpa rilru țha, nu leh pa te thulâk hnial ngailo a nihna chu rawn lang chhuak lehin, phunnawina nei eih lovin a pa leh an mualkil te titi-na bulah chuan a tâp ta nge nge a. chutih lai chuan, mualkil dang te pawh Lal inah chuan rawn kai belh zelin, Satbilha leh a kâwi te lo dawngsawnga, an Lal Keihranga te pafa thlâvenga lo inchhawp tur chuan, an rawn inpeih thawkhat hlawm hle tawh a.

An han kim deuh țhepțhawp hnu lawk, zanriah ei hun hma deuh si-ah chuan, vengmawng lama tlang tlir thawm chuan, Lal In chhung chu rawn luh thleng nghalin, "chu eng thawm nge nita!? khualpang zin satliah chu an nih awm loh chu maw, nang tlangaupa zuk bih chiang teh khâi, Satbilha leh a kâwi te an va ni mai awm em" tih pahin Lal Keihranga chu a rawn hawi kâ deuh haú a.

Vangmual Lal Rumvuta fapa ruh chang tawh zet Satbilha leh a ho ten, Lal Keihranga khua Darkai veng mawng an rawn hrut chho zet chu, an thawm an hlap puk nasain, an hma rawn hruai tu, palian leh hang mek muk, hmai tluak hrêt hrût leh meng pawng hlet hlut, a luhrum zial kual chhuak deuhthaw khawpa, dawhkilh thiat ther fûk mai leh, Fei lian țha teltawl hawl chunga Silai ngul dum tlê zerzawr hnung âh (ak) deuh râh mai chu, tu hai rual lohin Vangmual Lal Rumvuta fapa chuam, 'Hmarchuankitê' Chawnglalpuii pasal tur Satbilha a ni tih a hriat hle a.

Khua a tlai lam tawh avang leh zanriah ei a hun hnaih tawh avangin, khaw mipui tupawh mai chu in lama an haw khawm vanglai a ni bawk nen, Satbilha leh a kâwi, a khaw val leh pasalțha hming chher chin mi sawmhnih ten, an thuam famkim nena ngampa leh tual mite hnuaichhiah zet chunga, veng mawng ațanga an khaw tual an rawn suar tluan lai chu, kawngka leh luhka ațang chuan lo thlirin, kal paha an Fei hmawr bil lam an sawh ri chhak chhak mai te chu, tual mite bengah chuan a ri fiah hlawm hle a. an kalpah chuan Satbilha hote lah chuan, an Silai te chu van lam hawia kap deuh chhen rengin, Lal mual lam chu an vai chuan an Sepangeng pan nghut nghut hlawm mai a. chutih lai chuan, pa bengvar deuh te chuan anni ho chu hnung deuh fê ațanga ți deuh dai chunga zui thliah thliahin, a benghawng lo zual deuh te chuan, chung hoin an khua an rawn kâi nachhan chu engtak niang maw!? ti a midang te chu zawt kualin an phun ru sap sap hlawm a.

Satbilha leh a kâwi ten Lal mual an han thlen chuan, an hotupa Satbilha thu pek zawmin Lal Keihranga luhkapui chu an din hual ta nghal tuau a. chumi hnuah inchhung lam hawi chuan Satbilha chuan, țeng zeta a 'aw' chu kut khawr kum meuh chunga thian hrûkin, "khual țha kan rawn lawi dawn e, Satbilha leh a kâwi te chhawl a hâl e" a han ti a. chuveleh Lal Keihranga leh mualkil pali te chu, luhkapuiah chuan rawn chuang chhuakin, "Lal fapa meuh chu hnar mi i ni lah love, ka chhuatpui rawn luah tak rawh khâi" harsâ ti zet chunga nui lui hram hram chung chuan, Lal Keihranga chuan a rawn ti ta a.

Lal Keihranga'n a lo dawnsawn dan chu Satbilha chuan, kîk deuh vun chunga a țhianpa melh rulh pah chuan lo buk khum zukin, a kâwi te chu tuala lo awm tura mitmei pah chuan, a țhianpa chu luhkapui kâi tur chuan a han mitmei leh zuk a. Lal Keihranga chhuatpuia an han țhut țhep țhawp hnu chuan, khumpui kawm bela a nupui tur, 'Hmarchuankitê' Chawnglalpuii lo țhu hnâp mai chu Satbilha chuan tawrh har a tiin, Lalnu zufang rawn suah pawh chu alo hmu mai mang lo tawp mai a! Lal Keihranga leh mualkil ten, an chhungrila phur lo zet chunga, lawm leh hlim tak anga lang chunga an biak sap sap lai te chuan, Chawngpuii lam ngawt chu hawi leh țhinin, Chawngpuii chawn var leh mâm zet, a tual puan kar ațanga rawn lang no sar mai te chu, Vaibel dawn puam țawlh țawlh chung chuan a thlêk chhen reng mai a.

Chutia Chawngpuii chunga Satbilha mit rang fu chhen mai chu, Chawngpuii ú Kapvunga chuan alo ngaithei loin, kilkhatah a hmui alo pet fan fan mai bawk a. mualkil Sawichhingapa pawh chuan, Kapvunga chezia chu hai bik hek lo le! a zaidam thin thawk a chhuah vaih chuan, Satbilha chu a cho phawk palh mai ang tih chu alo hlau ta hial a. chuvang chuan, Satbilha chu nui lui hram hram chunga melh zauh pah chuan, "kan thu vuak dan pal a tluang turah ngai ila, 'Arzangtuak' talha suihkaihhlih hmabaka valh mek kan ni tawh a. Chawngpuii pa pawh 'tlai' (Sial puitlinglo, mo man atana an pek țhin hi 'tlai' an ti a, Lal fanu man hi 'tlai sawm' a ni țhin) sawm hui nghakin a țhu muang ve ta e. man leh mual in rawn khung hun tur chu, Palai ten kan tlang an rawn kai hunah Chawngpuii pa te nen rem teh seng" a han ti charh charh a. enge maw chen an inkawm ho hnu chuan, Satbilha leh a kâwi te chu mulkil ho chuan hruai darhin, zanriah hnu lama Chawngpuii rim paha Lal in a kai leh vat tur thu chu, Satbilha chuan Lal Keihranga hnenah chuan nui vûn chunga sawiin, a hnudalah a Vaibel dawn țang laklawh tawh hup bet chunga, sawi deuh luiha kal khawr deuh tlûn tlûn chung chuan, Sawichhingpa chu a zui haw ve ta hram a.

Thimchilh țan chho, lenglen thimhmul zin țan chhoh lai a nih tawh avangin, Lusei Pasalțha pahnih te chuan an Lal Taikherha te chhungkua leh, an khaw mite, hmeichhe puitling sawm leh naupang pathum te chu, an chhak ngaw fim hmel zetah chuan luhpuia, chuta riah hmun hâwl fai pui mai chu an rilruk dun ta a. mahse, an pahnih thu tluk danah chuan, an Lal Taikherha ngaihdan chu a ni ve a ngem? tih thuah chuan buai dunin, thlang deuh hleka rawn hûi chho dap dap, Lal Taikherha chu an lo nghak dun ta a.

An lo nghahna an rawn thlen kim hnu chuan, Hrumcheûva chuan Lal Taikherha chu khunkhan taka lo be rawn nghalin, "Lalpa, kan pal theih tawka thui chu kan kai ta e, thimchilh kal harsa hunin min nang ta reng mai e, khilai tlang khi zawiin kai chho ila. riah hmun hawl ta mai ila tiin kan lo rel deuh a, enge i ngaihdan le"? a han ti a. Lal Taikherha chuan, Hrumcheûva ngaihdan chu a țawmpui thu rawn sawi nghalin, "kan theih tawk chu kan pal liam tawk tawh alawm, kan hmeichhia te pawh an thâ a zuai tawh tak ange" a rawn ti ve thuai a.

An riah hmun sual duhna hmun an han thlen erawh chuan, an vai chuan mak ti tak chunga an ral hnai zet, tlang bial mep mawp chung lam deuha mei lo dê chiah chiah chu thlirin, thlifim thawt zawng te chuan naupang tualchai ri nak nak te chu an hre ta vuaih vuaih a! chutia an ral lehlam thlir pah chung zela, an riah hmun tur hawl faia meichher nen an buai laih laih lai chuan, an chhak tlang dung ațanga Thlâ rawn chhuak mek bial êng pup mai chuan, meidê an hmuhna lam chu reilotêah rawn chhun fiah leh zualin, chu hmun chu khawi Lal țhut khua emaw a ni tih a hriat ta hle a. chu achhapah, Thlâ êng chuan chu khua In țhenkhat te chu, chiang taka rawn chhun lang thlih thliahin, mual sang lai hmun zawl deuh dûrh laia In lian deuh bik chu, Lal In a ni tih pawh Zakulha leh Hrumcheûva te chuan an hre chiang ta hle a.

An khaw hmuh avang chuan, Lal Taikherha leh Hrumcheûva leh Zakulha te pathum chu inrawn tlang lehin, zanrei ala nih chuan loh avangin chu khua chu kâi mai an rawt tlang ta a. mahse, hmeichhe ho chu khaw kai tura an inhuam leh huam loh chu zawt hmasa leh te te-in, an bul lawka khaw awm reng si dâi tama riah ngawt ai chuan, chu khua chu kâi mai an duh thu chu hmeichhe ho chuan, an lo sawi ve ta tliar tliar a. a chuti na na na chu an pheikhai a rual tlang ta bawk nen, 'ral' an nih loh zia tilang chiang thei ang ber tura, hmuh hmaih rual loh tur atana meichher alh lian țha tur, Zakulha'n a puah tel lian elh awlh keng alh pup chung chuan, chu khaw kai khan zawh chuan an inzui ta thliai thliai a.

Ral ațanga an han thlir aia khaw dai an thlen hma tak avang chuan, Lal Taikherha chuan lamkal hmasa atan Hrumcheûva chu, khuaah chuan tir lut hmasain, Hrumcheûva chuan khaw chuan chung lam, Lal mual lam chu meichher nen chuan a pan eng chho ta tang tang a. a kal pah chuan a ngaihtuahna chu kawm chhoin, dai ah ralveng an awm loh avang leh kulh ilo ruangam takngial pawh a awm loh avang chuan, chu khua chu an ralmuang hle a ni tih te chu a ngaihtuah kai ta zel a. mahse, Lal mual a thlen ruala Lal In chhung thawm a han hriat rual chuan, pen khat pawh sawn leh tawh lova ding nghal chawtin, "naktuk ni ûai lam, behliangmun hun thlawpa inchhir liam ka duh a. chumi hma fehrehsan hun zui chuan, Chawngpuii nen hian, 'khawnțhiang' khawn dun a, thutiam insuih tawn ka phût tlat e" tih ri, 'aw' vin lek lek leh inti thu nei aw puam țeng chhur chu, a bengah chuan a rawn lut fiah kher mai a.

Chutih lai tak chuan, tualval pahnih hi a lam pan chuan rawn kal pheiin, Hrumcheûva chuan an hmai chhawn loh lam chu a han thlêk thuai a. mahse, thui an kalpelh hma chuan pakhat zawk chuan, a țhianpa chu kheuh zuk paha pawt lêt lehin, a meichher ken chu a hma zawnah chuan, lekkawh alh hlap hlap chungin Hrumcheûva chu an rawn pan leh ta ngat a. an rawn thlen chuan pakhat zawk chuan "khah khah! khawi lam khual nge i nih le!, kan Lal makpa hual Vangmual Lal fapa kâwi te zing ami chu i nilo phawt e" tih pahin a rawn din chilh ta sat mai a. mahse, a meichher êng a rawn lek hnaih ruala, meichher êng thlâra amah rawn melh ve khâih tu, Hrumcheûva mitmeng hriam hrek hrawk a han hmuh rual chuan, a țhianpa chu mitmei nghalin, a rawn hawi let leh ruala "ral ka nilove" Hrumcheûva'n a rawn tih ri chu haider luih chi a nilo tih an hre chiang dun ta hle a. chuvang chuan, an hun tawn țang ru zet chu an țhian dun chuan zap dai nghal thuaiin, "eng ti tih tiha thimchhilh tawh hnua kan tlang rawn kai nge i nih le!? i Lal belh laka pawi tawh (khawih) vanga tlan chu i ni em lovang chu maw" pakhat zawk chuan rawn ti dam ta dap a.

Hrumcheûva chuan chupa zawhna chu țha taka chhangin, an chanchin tlangpui chu a han hrilh ta thuak thuak a. a thusawi tih tawp nan chuan, an khaw hming leh an Lal hming chu zawtin, an Lal chu biak a duh avanga Lal mual chu rawn lut ta mai a nih thu chu a han sawi a. tlangval pahnih te chuan, Hrumcheûva zawhna chu țha taka chhang let velehin, an khaw hming leh an Lal hming te, a thawm hriat chu an Lal makpa hual Satbilha leh, an Lal leh a mualkil te titi thawm a nih thu te chu an sawi ve ta a. chuveleh Hrumcheûva ngaihtuahna chu thui tak thlenga vak kual nghalin, tuna a kaina khua hi Zuanghmun Lal Khawdala'n, a fanu 'hmartlang chuankitê' an tih huai huai khawpa hmelțha, a fapa Ralngenga tana a biak, mahse Vangmual Lal Rumvuta'n a fapa Satbilha tana a Keipui sa hauh sak leh tak avanga, lungzur leh mangang zeta awm ta, Lal Keihranga khua kha a ni tih a ngaihtuah chhuak ta thuai a.

Chutia a ngaihtuahna kawma a ngawih reng lai chuan, a bul a mite pahnih lah chuan ngaihțhalo zet chunga lo en dun ranin, "eng thu ngaihtuahin nge maw khatia i ngawi i dawh tak reng mai le"!? pakhat zawk chuan a rawn ti leh ta a. chuveleh rang deuh vata Hrumcheûva chuan lo chhangin, "in Lal hi tunah ka hmu duh e, khawngaihin min va thawt lawk sak thei dah lawm maw țhian te u" a han ti thuai a. anni pahnih pawh chuan, Hrumcheûva chu engemaw tak avanga a țawngki chu thlak a nih ringin, rang takin Lal In lam chu an pan ta thuai a.

Hrumcheûva'n Lal Keihranga chhuatpui a han rah meuh chuan, Lal Keihranga in chhunga lo awm zawng zawng te chu an phawk hlawm hle a. Satbilha ngat phei chuan alo melh tur zualin, an hun tawn mek rawn chawk buai tu, chu tlangval ruh chang ve tawh lam deuh, amah ang rual vel tur rawn petek lut ve ngawt mai chu, mualkil te bulah chuan tunge a nih tih chu a zawt ru ta deuh sup a. mahse, a hming leh khawi Lal khaw mi nge a nih tih chu tumah chuan chhang thei bik heklo le! Hrumcheûva'n Lal Keihranga hnena a hming leh Zakulha hming la thup chung si a, an chanchin a sawi lai chuan, Satbilha leh a țhianpa Lutruaia te chu an chhuak tau ta nge nge a. mahse, kawngka an han kan dawn meuh chuan, Satbilha chuan meng sen rum chunga Hrumcheûva chu rawn melh lehin, "naktuk Chawngpuii nen 'khawnțhiang' kan khawn hunah chuan, a khual a tual val pawh rawn lawi ve leh ang che u" tih paha khumpui kawma țhu Chawnglalpuii chu nui sung chunga va melhin, "țhutmuan thu pawh kan la chhilh fel hlei nem maw, rawn let leh mai teh ûn" Lalnu'n a rawn tih lai te chuan, "a khâi, Zawlbuk lam lam kai te pawh a chakawm tawh e, i zingkar tuibur thlawr fim beiseiin zing fimah ka rawn kai leh zawk ta nge, mangțha țha u le" tih pah a, a Vaibel dawn țhai rik deuh rap pah chuan, Lutruaia chu kheuh zukin pawn lamah chuan Lal Keihranga'n, țin rihlo tura a rawn auh veleh na pawh chu hrelo ang maiin an pil ta vut a.

A duhdan tak mai a, Satbilha inla puk vel a hnawh haw hnu chuan Hrumcheûva chuan, Lal Keihranga leh mulkil te chu a hming leh Zakulha hming chu hrilh tlang nghalin, an buaina zawng zawng chu a lo hriat daih tawh thu te chu a sawi ta a. Hrumcheûva thu rawn sawi chuan, Lal Keihranga leh a mualkil te, Lalnu Chawngpuii te chu a țhawng nasain, an hming chauh an lo hriat ve țhin, Hrumcheûva chu ngaihsanna leh fakna thu an fah liam liam hlawm a. mahse, Hrumcheûva chuan inngaitlawm tak chunga an thil lo tih te kha, an huaisen bik vanga ti an nih loh zia sawia lo chhang let vat zelin, an Lal Taikherha hoa an khua chu kai phawt mai chu Lal Keihranga hnenah chuan a han dil a. Lal Keihranga chuan nui vur vur chunga lo chhang let thuaiin, "zanin ngei hian, in Lalpa Lal Taikherha ho chuan ka khua in rawn kai ngei tur a ni. Lusei Lal te zinga Lal huasen ber ti a kalo ral chhal țhin, Thlanrawn leh Halkha ral nêk ngat ngat tu Lal Takherha tan, ka tlang hi khualpang zin anga inthlahrunna hmun tur a ni love" a han ti a. mahse, Hrumcheûva chuan Satbilha leh a țhianpa chhuak ta kha, enge maw ti taka la ngaihtuah zuiin, a chhungril zet ațanga enge maw rawn thleng mai tur awm anga a hriat tlatna chuan, nidanga hlauhawm an tawh dawn apianga, a rawn mawlh angin a rawn mawlh leh ta tlat mai a. chuvang chuan, Lal Keihranga leh a mualkil te remruat dan pawh chu, hawihhawm leh inngaitlawm zet chunga lo hnial thlain, khaw ên hun nghah law law a zan hun chu tihbuai loh a duh zawk thu chu a sawi ta tlat mai a. chutih lai chuan, Chawngpuii pawh mei êng chhawna rawn hawi phei ve-in, Hrumcheûva'n a han hmuh zet chuan, 'hmar tlang chuankitê' tih loh phal chi a nih loh zia chu a hre chiang ve ta hle a. mahse, Chawngpuii hmela lungngaihna zam raih mai chu chiang taka va hmuin, engti kawng zawng pawhin Chawngpuii leh Satbilha te inneihna tur chu țhulh tir a duh phah ve ta hle mai a.

Enge maw chen an titi ho hnu chuan, an ruahman dan chu a zawh theih ta loh tih chu Hrumcheûva chuan a hre chiang tawh hle a. chuvang chuan, Lal Keihranga leh a muakil te duhdan hrang hrang pawh chu, hawihawm tak chunga hnial zelin, pawn lama enge maw tak mawlh tu awm tlat chu, hmachawn tur chuan a inpuahchah ru ta sauh sauh a. chutia a țang ru țalh țalh reng mai chu, Lal Keihranga leh a mualkil te chuan hre ve hek lo le! ngaisang leh duhsak zet chung leh, an hun tawn rit zet theihnghilh lui hram hram chunga, an Lal Taikherha chanchin leh Thlanrawn leh Halkha ral an nawp dan chanchin te zawta, thudang leng lek lova țawng an inchuh nak nak lai te chuan, pawn lam ngawt ngaihtuaha nui var chunga an titi chu Hrumcheûva chuan lo zawm ve zelin, chu a ngaihtuahna luah khat tlat tu, thawklehkhata pawn lam thlâ êng rawn dul ruai ruai lai chu kawngkapui dap kalh awng ațang chuan a thlir phei leh ta zauh a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 26th, 2018, 7:38 pm

Bung-39

Hrumcheûva thang rei ta lutuk chuan, Lusei Keite Zakulha ngaih chu ati țha ta tlat lo! Lal Taikherha hnenah chuan muangchanga kal pheiin, "Lalpa, u Cheuva thangchin hi ka ngaihhai nge lah ni, a rawn let hun tura ka riruat nen a inpelin ka hre ta lo riau mai ka ti! saw khaw Lal leh a mite saw an thu lak a dik talo nge ni, ngaihven turin ka va kal ta nge" a han ti a. Zakulha thusawi chu Lal Taikherha ngaihtuahna a riak mek alo nive chiah mai a, chuvang chuan, ani pawh chuan Zakulha thu sawi chu rang taka lo remtih sakin "va kal tak teh khâi, kan hun tawn leh kan awmdan hi a inthlawp tawh silova, mipa tukchhuak nithum leh zanthum an thang hma chu ngaihven mi an nilove' tih ngaihdan pawh rawlh hleih theih a ni tawh lo a nih hi. kan hawi na lam apiangah 'ral palh' tawk mai thei dinhmunah kan ding ta si a" alo ti thuai a.

Thla a san tawh avang leh alanga chet lak tuma, ngaihdan leh ruahman dan fumfê tak neia chhuak a nih tawh loh avang chuan, meichher keng lova fimkhur taka khua va bih chu a țul tawh tih Zakulha chuan a hrechiang hle a. enge a hmaah chuan a tawh dawn tih leh, Hrumcheûva chu chu khua chuan, engtin tak nge an lo dawnsawn tih te lah a hre pha tawh silo. mahse, a rilru chhungril taka Hrumcheûva thangchin leh a rawn let hun tur atana, fim taka alo ngaihtuah fel thlap tawh hun inphaman talo lutuk avang chuan, enge maw tak ngaihțhat lohna ril zet chuan, a chhung lam thûk zet chu a mawlh tlat mai si a. chuvang chuan, hun duhawmlo zet a thlen dawn apianga, ngawltawt tlat anga a awm țhinna chuan a rawn țham nâ zual leh tawhin, Lusei Keite' ti a, a hming a chher phah hialna zia, thâ zâ zet chung leh fimkhur theih tawp chung si a, a hma hun duhawm lo tak rawn thleng tur a hmachhawn țhinna zê pui chu, a cheziaah chuan rawn lang leh tawhin, a mit naute rawn lian val tlê kalh chung chuan, a kechhip chu mihring te kal dan pangngai ni miah lovin, leiah a han rap hmasa leh ta dâ dâ mai a! chutiang hlira a kal avang chuan, dai kawmkar hnahthel ro mawih tawh zet zet leh, hnim kuang ilo tliak awlsam zet zet te chu thawm chhuah eih lova paltlang thuaiin, Silai aia ken atana a thlan tak, a Thalngul chu a pang thlawp zaih chuan a han lek chhuak ta a.

Mahse, Thlâ eng pê ut mai avang chuan, chiang taka tupawn an lo hmuh theih tawh a rin avang chuan, a thim lam zel chu a bel pah zel bawk a. lenglen hun pelh lam tawh nimahse, Hrumcheûva ber a reh tlat mai avang chuan, fimkhur taka chet lak a țul reng a ni tih chu a hre fiah khiau reng mai a. mahse Thla a ên uarh avang chuan, a duh ang taka kawmkara pût kual vel chu harsa a tih phahin, Lal mual lam chu in hrang hrang hnuaia pût zeuh zeuh chung chuan a pan chho ta hret hret a. Lal mual a thlen ruala Lal inhnuaia vah luh nghal zawk pah a, inchhung lam thawm a han ngaihchan deuh pawh chuan, Lal chhungkua chu an mu reh titih tawh tih a hre ta tlat mai a! chutah zet chuan, Hrumcheûva chu khawnge a awm ang tih chu fim zeta ngaihtuah nghalin, an awmna rawn pawh leh hmasa te te lo chuan, Zawlbuk lah a kai dawn silo tih te thleng chuan, a ngaihtuah chhuak ta zung zung a.

Chutah zet chuan, Lusei Keite meuh pawh tum mumal nei thei lovin a hawihai ve ta! veng mawng lama 'thizun' rawn thizûn hnai telh telh mai te chuan, a ngaih chu a ti țhalo zualin, a mit fiah zet chu hmuntin maiah chuan a len kual nasa tawh mai a. mahse, a beisei Hrumcheûva emaw, mihring ruangam hrim hrim chu khawiahmah chuan, hmuh tur leh malman fak tur a hmu bawk silo! Thla vanlaizawl mek diar khim kual pup mai te chuan, a ngaihtuahna chu a hruai thui ta hle a.

Chutia vawihnih lai tuibur hmuam dâkna tur khawpa rei a han tawm ngawih deuh ran hnu chuan, Lal mualkil tih hriat zeta in lian, a tawmna Lal In hnuai piah lawka bawk deuh vang lam chu pan pheiin, chu in hnuai ațanga chu khaw veng chhak lam hrut tura pût chhoh leh chu a rilruk ta a. mahse, chu mualkil In hnuai a han luh ruala, a awmna ațanga chhak lam deuha Zawlbuk bawk lurh hnuai, bawhbel zawn hnuai chiaha, enge maw phe zeuh chu a mit țha zet chuan a han chhui fuh ta chat mai a! chuveleh a chhung lam ațanga rawn nawr tawt ap ap tu, a thisen kal vel rawn ti țang țalh țalh tu chuan, a hma ai nasa a rawn tur zual sauhin! Zawlbuk hnuai chu a mit țha zet chuan a melh chho ta ran mai a.

A thil nghah chu rei rial a ngailo kher mai, Zawlbuk hnuai hmar lam êpah chuan mipakhat hi rawn lawr chhuakin! a piah lawk In pakhat hnuaiah chuan a pût bo zui ta mai a. chupa luhna biha uluk zeta a thlir vang vang lai chuan Zakulha chuan, Lal In hnuai bawk chu pan phei lehin, chuta țanga chu pa luhna In hnuai chu leh luh chilh chu a rilruk ta a. mahse, chutia a ngaihtuahna siam chunga, Lal In hnuai pan tuma a inher hrat lai chuan, Zawlbuk bawhbela enge maw phê leh zauh chuan a mit chu alo lakawi rang leh kher mai a! a lo hisap lawk loh thil mak zet chu țhut hniam leh vat pah a thlir leh rihin, thawm chhuah hlau tih hriat zet chunga Zawlbuk bawhbel rawn bawh kan zal zal tu chu, ami zawn a nilo tawp tih chu a hre chiang leh ta hle a.

Chupa rawn chhuah fel hnu lawk chuan, a khat tawka Zawlbuk bawhbel chu a hriat ngailoh hlir mai chuan, thawmdim em em chunga rawn bawh liam leh zauh țhinin! a hmuh hmasak ber nen khan, mipa sawmpariat chiah chiah anni tih chu a hre chiang viau bawk a. chutah zet chuan, alo rin lawk ang ngeiin buaina chuan a rawn nang dawn ta tih chu a hre thiam lehzual ta kher mai a. mahse, Lusei Keite Zakulha meuh chu, zan thim emaw Thlâ eng emaw chhun a ni emaw, eng hunah pawh 'ral' nena intawhchilh thut thut theih reng na hmuna, hauisenna leh inrintawkna pu fim kar reng chunga lo tâp țhang a ni tawh tlat! khang a hun tawn tawh hautak zet zet te khan rang taka inrintawkna rawn pe nawn lehin, a hriat loh ral, mi sawmpariat te nena an inkarah chuan, chu khaw mipui te hriat loh tur khawpa, thawm chhuah lova 'inmalphilna' dar chu a thinlungah chuan khawn rikin a rawn awm ta chiah a ni.

Zakulha chuan, bawhbel bawhkana rawn chhuak te tawlh luhna In țheuh chu chhinchhiahin, midang rawn chhuak an awm leh dawn nge dawnlo tih chu a han nghak leh det a. mahse, engemaw chen a ngah leh hnu pawh chuan, midang rawn chhuak chu an awm ta miah lova. chuvang chuan, a ngaihtuahna chu mi sawmpariat te-ah khan sawrbing leh nghalin, inmalphilna atana a thawm chhuah lo ber tura a ngaih, Lal Saiphunga kut ațanga an Lal Taikherha an hruai chhuah leh ni chiah a, Lal Taikherha'n a Pa mihrat khawkheng Thingzalh Lal Ralhulha milulak Chem danglam zet, englai pawha roh zeta a kawl țhat tlat țhin, duhsak taka a hnena a hlan tak, pasalțha dang te milulak chem anglo zeta, a hnungzang tâi kûl pawng lai vel taka a mei zum leh hriam zet, kutzungchal chen vela sei leh kutzunghnih bawk vela hlai, a fawng lam hawi zawnga a tak thlawp chiaha țo kuai phei van mai chu, a thlun behna hruikhau hrual fip rel rawl, a puanven bilhna hnuai chiaha a thlun beh ațang chuan a han phawi ta zal zal a.

Chumi hnuah, a ruahmanna chu hlen nghal tura insangmar nghalin, Lal In zawn phei zawn zela In dang intlar phei hnuai zelah chuan a pût phei ta zauh zauh a. a duh ang taka hla a thlen hnu chuan, hmar lam daifem ațang chuan chhak zawnga inher chho hretin, a mi hriat loh te tawmna thler chho Zawlbuk zawn chho chu, chhim zawngin a luhchhuah chho țan ta a. a luh țanna ațanga in hnihna hnuai a han luh rual chuan, a luh chhoh na zawn chu lei si deuhthawa kun hniam chungin a han bih chhoa. mahse, ami zawn te chu theireh taka reh diakin, Zawlbukah an lut fai leh diak tawh a nih te a ring ta deuh hial a. mahse, a ngaihdan chu a awmna In hnuai thlang lama, a tawlh deuh zauh rual chuan rawn harh leh zawkin, a luh lehna tur hmabak chiah in hnuaia, a mah hnung chhawn zawnga mipakhat lo țhu tawmchal mai chu chiang zetin a han hmu ta a. chuveleh a awmna in hnuai Tap awmna zawn lamah chuan rang taka tawlh chhoin, chupa awmna in hnuai lam chu, leia tleng titih chunga tawlh phei chungin a pan phei ta a.

Chupa awmna in hnuai a han luh rual chuan, in hnuaia papui chhe inhung pakhat phenah chuan, thawm dim zetin a han tawlh lut nghal a. chupa lah chuan, thawm chhuah miah lova amah rawn veh tu chu hre hek lo le! papui kar ațanga Zakulha a phet (phê) chhuah zawk rual chuan, patling thaw deuh hâwk ri leh leichar thum deuh dat ri chuan, chu in hnuai chu mitkhap kar chhung lek rawn luahin! a hrawk thler hawng huau ațanga, a hrawkhrawl chhum hmawr var pak mai, lehlam lehlam la phu at at chunga a mutzál reng lai chuan, a hmabak in dang hnuai chu Zakulha chuan, chiang zetin alo melh phei leh ran tawh a. mahse, thui a melh kual hma chuan, a tawmna chhak In hnuaia mipahnih lo tawm te kê chu, lei hawlh thleng deuhthawa chu In bang dap lawr thlâ hnuai lam ațang chuan han hmu lehin, chu mite pahnih chu thawm dim zet chungin thlang lamah a tawlh thlak san ta rih a. chutia tawlh pah zel chuan,

Thla êng hnim ruihin a ên fuh loh na lam zel chu bel thlâ zelin, Zawlbuk thlang chiaha In te fel deuh ren rawn, bepui zamin a khuh deuh lâk hnuai thim raih chu a vak thleng ta a.

Reilotê a han chawlh deuh dat hnu chuan, ami phil mek te hmuh loh na lam tur ațanga, fimkhur tak chunga pawh dan tur chu ngaihtuah leh ngat ngatin, a piah hlam hnih vela hla a tualpuk ding țawi laih lam pan chuan, rang zetin a vak phei leh ta a. mahse, chu Tualpuk a vah luh rual chuan, chu Tualpuk hnuaia mipakhat lo tawm ve reng mai chu a hmu hnai ta kher mai a! chupa lah chuan, a rin loh lutuka lo dawngsawngin, "fimkhur ta che maw! kan mi veh pa hi mit pali nei ang maiin a khawsak hi! i lo hmu ve pek nange" hmui phuna tih pah chuan a kun hniam leh ta zuk a. chuveleh Zakulha chuan, a lu chu rang zeta chupa hmai chhawn loh lam zawng chuan thlê nghal vatin, "khawi laiah khian nge a tâp tâk"!? hmui phun vekin a han ti sap a. chupa chuan Zakulha zawhna chu, a bih ngai bih chho run chung chuan rawn chhang lehin, "Zawlbuk hmar nâk pêk In hnuaiah khian a lutin ka hria" a rawn ti leh ta sup a. chuveleh Zakulha chuan, an mi hual pa chu Hrumcheûva bak a nih a ring ta lo tawp mai le! chutah a ngaihtuahna chu sawr zim zelin, Zawlbuk bawhbel hnuaia a mi hmuh hmasak ber pawh kha, Hrumcheûva bik bo tum pût chhuak a ni ang tih chu a man thiam ta! a tute chu nge an nih a, heti taka Hrumcheûva lo hual bet tlat tute chu nita anga!? an eng pawi nge a ni hian alo tawh tak mai! tih hlir mai chu a ngaihtuah nasa ta hle a. mahse, tu te pawh nise Hrumcheûva lo dang bet tute chu atan 'ral' diktak an ni ve nghal tih chu, a ngaihdan lian tak a nih avangin zei zeta chet la zui nghalin, chupa kâ chu nghet zeta huh (hup) sak nghal hmiah pah chuan, a kut dinglam chuan chupa lu chu, nghet zetin a han kuai bet nghal hmiah mai a. chuveleh chupa chuan, a bul ami chêt dan chu mak ti zeta meng pual rulh rulh chung leh, tal fuat fuat chunga tal chhuah tuma theihtawpa țan rawn lâ ve nghalin, a bawkkhup zawnga a kawnga, a kaihza dinglama kherh beh tlat pah chuan, a darpheng lai takah chuan nâ zetin a khup chuan, Zakulha chuan a han țhingțhit awp rawp mai a. chutia a awp thlak hnawk rual chiaha a hnang zui awl awl lai chuan, nâ zeta a lu chu Zakulha chuan țhuai sak zui leh nghal zatin, a thih sual keartui lei khawng thum tlat tlat lai chu, rang takin a han țhut bet zui leh ta zat a.

Chupa a zal fel hnu chuan, chupain a sawi, Zawlbuk hmar lam chiaha, In hnuai thim lam chu Zakulha chuan chiang zeta melh chho leh nghalin, Hrumcheûva chu han pawh tur nge la nghah rih tur nita ang, tih ngaihtuah chuan a buai ta tlat mai a. a han pawh ngawt chuan, 'ral' menin Hrumcheûva chu alo meng tawh dawn si! nâ zeta intawh palh theihna hun chuan an inkar chu a dang tlat mai si a. mahse, an in man fuh vat loh chuan, hoteah inhai palh lah a hlauhawm tawh zia chu a hre khiau reng mai bawk nen, a rilru siam nan erawh hun reilotê chiah a ngaihtuahna chu hmang leh thuaiin, Zawlbuk thlang chiaha In pakhat hnuaiah chuan a han tawlh lut chho ta a. mahse, chu In hnuaia a luh rual chiah chuan, a piah chiah In hnuaia mipakhat rawn tawlh lut phe ve zawk chuan, amah chu a rawn hmu ta hlauh tih chu a hre chiangin, veh tu a nei nghal tih chu a man thiam chawpchilh nghal vat bawk a. chuvang chuan, chupa rawn hmuh theih loh na lam tur, a awmna In dap bang rawn inrawlh tlang thlâ phen lamah chuan pût chho nghal thuaiin, a țhut fel rual chiah chuan a khel chu vawihnih a han beng ri ta thlap thlap a.

A thlang lawk In hnuaia mipakhat rawn vak lut zo chiahin, zawi tlir deuh dat a thawm a rawn chhuah dan chu Hrumcheûva chuan, meng phawk deuh zawk chunga rang zeta lo chhang let ve nghal zatin, a khel chu zawitein a han beng tlir ve ta dat mai a. chuveleh a thlang ami chuan, a țum hnihna atan a tih dan chiah bawk chuan thawm chu rawn chhuah tlir ve leh datin, a thlang ami chu Lusei Keite Zakulha a ni tih chu a hre chiang ta hle a. chutah zet chuan a tawm hmunah chuan, a milulak Chem hum ngheh salh pah chuan nui deuh sakin, a rilru chhungril zetah chuan a han infuih ru leh ta sauh sauh a.

Zakulha a rawn lan ve takah chuan Hrumcheûva chuan, a awmna hmar lam liama mipahnih vak thlâ te kha, chhuih zui tura a rilru chu siam nghalin, Zakulha awmna lama vah thlak phawt chu a tum ta a. chuvang chuan, a tawmna In hnuai thlang lamah chuan thawm dim zet chunga tawlh thlâin, sutban bula vawk chawthleng hlui let bâl mai phenah chuan a bawk zan mai a. mahse, chuta reilotê thawm ngaithla a, a han chawlh det hnu lawka Zakulha tawmna lam pana, tawlh thla tura a han thawh leh țham țham lai chuan, a tawmna In dapbang rawn ûai thla tliak ri țhat chuan, a beng chu rang taka rawn luh nghalin, chu lam en tuma a han hawi rual chiah chuan, a bek chu thil enge maw hian nâ zetin a rawn su thawi fua mai a! chuveleh Hrumcheûva chuan, rang zeta chu talhtum rawn vai tu chu lo pawmchilh ve nghalin, amah țhutbet tlat tu kut chu a han chhoh elh let ta ngat ngat mai a. mahse, chupa thâpui chu a rin aia a fei avang chuan, Hrumcheûva meuh paw'n chupa chu a hneh dawn loin a hre țan ve ta hial a. chu achhapah, a țan hmun chu a rem lo bawk nen, chupa chuan chhuk zawnga a ban chu rawn leh êlh let sak thutin! a talhtum thlah leh a nghawnga rawn reh chu a rual ta mai a. chutah zet phei chuan Hrumcheûva chuan, a chan chhiat lehzual zia chu a hre chiang leh zualin, hnuai lam ațanga a nâk nem lai taka rawn do tlat tu vawk chawthleng chhia leh, chung lam ațanga țhut bet tlat chunga amah rawn rek tu avang chuan, a khaw hmuh te chu a fiah lo țan ta tlat mai a. chutih laiin, chu In neitupa lah chuan, harh chiang mang lo leh hâpui țhial ri bup bup chung chuan, "vawk, vawk, khâh khâh' tih pah chuan, in chhung lam ațang chuan dap bang te chu a rawn beng thûm leh dat dat țhina. chupa lah chuan dimna chhetê mah neilova, a lu chu leiah chuan rawn sawh sak zui chawrh chawrhin, nikhaw hre mang lovin a zal zui ta hnawk mai a.

A hmai rawn vawt chuaih chuaih chu Hrumcheûva chuan, țhut chhuah hlawl paha a kut chuan hûi nghal pâwk pâwkin, Zoluitê tui fim leh vawt zet, a bul mai a luang ri kar kar kam chhak lawka, an Lal Taikherha leh midang ho zawng lo țhu khawm laih chu, phawk zetin a han thlek chho thuai a. chumi hnuah a bul lawka Zakulha lo nui var mai chu fiah taka ên leh thuaiin, "zing țhang țhangah ka hetih tak mai mai chu e!? kan awmna hi khawi ngawpui fim hnuai nge nita mai"? tiin Zakulha chu a zawt phawk ta hle mai a. chuveleh Zakulha chuan, thil awmzia zawng zawng chu kim taka sawi nghalin, Lal Taikherha ho meuh chuan, chulai ngaw hnuai zoluite kam vawt raih maiah chuan, Zakulha thusawi chu an ngaithla ta țhap a. a thusawi tawp nan chuan, Hrumcheûva lo rêkhlum hman țep tu a thah dan chu rawn sawi lehin, Hrumcheûva pawh chuan Zakulha țawng tawp lam chu rawn țawng thlawp pah a, nui var chunga rawn țawng chhuah pah chuan, "tlema tlemah ka zál hlen țep chu a nih kha le! min rawn fin hma lawk khan, an zinga pali kha chu ka lo tukzâl hman hram a. mahse min rawn thlâwp vat lo la chuan, Pialral ka chhir thleng thuak tawh mahná" Zakulha lam hawi vut pah chuan a han ti a. chuveleh an vai mai chuan, Zakulha leh Hrumcheûva te pahnih chu ngaisang leh lawm takin an fak leh ta liam liam a.

Darkai Lal mual chu zing fir ațanga Satbilha inhrosa thawm chuan rawn luah khatin, mual veng thler In hrang hrang hnuai ațanga, thisen nena inchiah piah kawi zêk zûk chunga an chhar, a kâwi te zing ami pasarih te ruang chu Lal mualah chuan an mut tlar țhap mai a. Lal Keihranga leh mualkil hote lah chuan engmah hre ve hek suh! zan lama thil thleng avang chuan, Lal Rumvuta pawi an tawk ngei dawn a ni tih chu an hre chiang hle a. Satbilha lah chuan, țeng fe fea aû chunga, Lal Keihranga leh mualkil te chu melh kualin, "nizan lamah i khaw tlangval te hi he thil ti tur hian, zanlaiah i chhuah a ni e. kei leh ka kâwi te phiar ru tur hian, eng ang fakauva Lal ngeng nge i nih tih chu kan la fiah ang chu" tih pahin Lal Keihranga chu a han melh bing zui ta khûih khûih a. mahse, Satbilha hian, zan lama a hote hnena that tura a tih, Lal Keihranga tlang rawn kai ve mikhualpa kutah khan a kâwi te chu tlu an ni tih chu a hre chiangin, chu thudik erawh chu a sawi chhuah vaih chuan, amah leh a kâwi te mawng chu a hlim dawn tih chu a hre ru khiu a. chu achhapah, chu khual laka chuti taka an tlawm ta mai chu, Lal Keihranga leh a khuate chuan an hriat vaih chuan, engahmah an ngai tawh mag dawnlo a ni tih thleng chuan, a ngaihtuah fel vek tawh bawk a. chuvang chuan, verther zeta ruahmanna dang siam nghal vatin, a kâwi te ruang a hmuh tirh atâ kha tualval te thil tihah, chung thil te chu a puh fai leng mai a. chumai chu la duhtawk leh talo foin, tualval te chu an Lal Keihranga'n a fuih pawrh avanga, an chunga chu tianga che ah chuan ala puh zui leh ta zel a ni.

Satbilha thinrim sosang zel chuan, Lal Keihranga leh a khaw mipui a hria apiang te mak tih chu a hlawh nasa hle a. mahse, Satbilha chu meng sen rum chunga inlek puk zual sauhin, "Lal Keihrang, i makpa hual chunga Chem i len duh mai hi, nang leh i khua te hian in tawrh phah ang tih pawh ka hlau hlel ta love! Chawngpuii nena kan 'khawnțhiang' khawn tur thlenga min buaichilh hi ilo tum ru reng a ni maw!? hei hi lo hre rawh. behliangmun hun alo thlen hma ngei hian, i fanu Chawnglalpuii hruai chung hian, i khua hi ka chhir liam san ngei ang" a rawn ti leh ta phiarh phiarh mai a.

Chutah meuh chuan, Lal Keihranga fapa Kapvunga pawh rawn inrawlh ve tawhin, "ka pa leh kan khua te hian, i pawi engmah kan tawk love! inneihna pawh Lusei Lal te tihdan bak pelin, kan kalpuiin chet kan lâ ngai lovang" a rawn ti chang ve ta fal mai a. chutah zet phei chuan Satbilha chu a sâ zualin, Kapvunga chu a Silai chuan a tin ta run mai a. mahse, mualkil upa Sawichhingapa chuan muang dam dapa thulai rawn chhuahin, "taitea te u i ngawi tawh teh ang u, kan thu hi tlang hrang Lal ten an hriat hlauh chuan, nupa inpum lo tur tuahrem tum angah min chan tir hlauh dawn e. kan chunga thil rawn thlen dan erawh hi chu amakin, 'leido' neiloa khawsa Darkai khua te hi he thil hian min țhawng ta hle a. mahse, he thil avang hian, nangni leh keini hi inchemchhuah tur kan nilo tih erawh chu ka chiang a ni. he thil titu hi țang hoa chhui chhuak tur kan ni zawk e" a rawn ti ta a. Lal Keihranga pawh chuan, Satbilha țawngkam thlah duhdan avanga, luhkapuia Lalnu leh a fanu te hlau khur zawih zawih chu melh dul raih chung chuan, "kan beisei loh lutuka thil lo thleng thut mai hi a mak teh zawng a ni e. he thil titu hi ka khaw val te an nilo tih hi ka chianga, chuvangin, fim taka kan ngaihtuahna kan hman tlan zawk a țhain ka hria e" tih pahin Satbilha lam chu a han hawi phei zui zauh a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 27th, 2018, 8:19 pm

Bung-40

Lal Keihranga leh mualkil Sawichhingapa te thu rawn lak dan nêm zawk avang chuan, Satbilha pawh chuan tlema a 'awki' chu rawn hniam ve deuhin, "ka kâwi te chunga, heti chiama bumna chhuaha, Zawlbuk ațanga a mal te te a ko chhuaka lo nghaisâ zui tute hichu ka chhuah hauh bik dawn lo. he thil titu hi zanin hian kan fiah tur a ni, a țul a nih leh zan tam riakin i khua leh a chhehvel hi, he thil titu zawng hian ka hrût chhuak dap ang" rawn tih leh khur khur pah chuan, Lal Keihranga chu rum zetin a han melh leh ta run mai a. Satbilha thu rawn lak duh dan chu, Lal Keihranga leh a mualkil te chuan hriatthiam harsa an tiin, a thu leh hla zawmlo ngam bawk silo chunga, a thu vuak kual dan han thlawp vel chu an chak lo tlang hle a. mahse, a duh ang an tihsak loh chuan, an tana mi hlauhawm ber a nih theih zia chu an hre chiang si! a mizê mak leh tawrhhlelhawm zet chu kham tawh zet chung chuan, an sepuiruahtawrh leh rih phawt chu a ngai dawn tâ tih an hre chiang hle a. chutia Satbilha a nem tak deuh hnu chuan, Lal Keihranga chuan mipui te chu țin darh tura hrilhin, Satbilha chu tukțhuan ei kham lama a In kai tur chuan a han hrilh ta a.

Tukțhuan an han ei kham hnua puar delh rual paha, a thlen In pa mualkil Sawichhingapa nena an titi lai chuan, Satbilha chuan inthiar a duh thu chu thawh deuh hluai paha rawn sawiin, Sawichhinganu te nufazâ thingâi fawm tur chhuak mek chu a zui chhuak ta nulh a. pawn an han thlen chuan, Sawichhinganu hnenah chuan Satbilha chuan, mawng zâk zâ hma chi a nih thu leh, dâikawm ril deuh laia inthiar a duh thu chu sawiin, mualkil pakhat, a kâwi te zinga a rin bik leh englai pawha a kaihza veng tu nireng țhin, Lutruaia thlenna In Kapchemipa kawmhlang, hnim leh țhang pik chhãhna lam chu pan thlain, pik kar luh pah chuan a Vaibel chu a han pak khu tual tual a.

A luh thlak țanna ațanga pen sawmnga vela thui a kal thlak hnu chuan, lungpui thlam tiat dawn laia lian, țhang leh perhtê hnawk velin a khuh deuh luihna hmun chu thleng thlâin, chu lai hmun chu Lutruaia'n inhmuhna hmun tur atana a hrilh kha a ni tih a hre nghal mai a. chu lungpui phena a luh hnu chuan a Vaibel chu rang taka beng mit nghalin, reilotêah Lutruai pawh a rawn thleng thlâ ve nghal mai bawk a. chumi hnuah an pahnih chuan, an tawmna bul leh ral hla deuh hlek thleng chuan, uluk zeta thawm leh mihring che vel ilo zawnga bih kual lehin, an ngaih a țhat tawk hnu chuan Satbilha chuan a ruahmanna chu a kam keû țan ta sup sup a. mahse, chu phiar rukna hautak zet hlen chhuah a harsat dan tur chu Lutruaia chuan lo sawi ve in, "hnamtur' chu zawng turin midang ho ka tir thoa, i rawtna hi chu thang hnihna atan dah mai zawk ila a țha mai lo maw"!? a han ti a. mahse, Satbilha chuan Lutruaia rawtna chu zawi supa hnial velehin, "valh khatna a dai pelh hlauh thulhah, i rawtna hi chu hmang teh zawk ang. ka pa leh kan mualkil te mit hmuh lai ngeia Chawngpuii nuța Kapvunga lu hi lak sak ka duh a ni! 'hnamtur' laka a thih chuan, keini lo chu rinhlelh tur kan awm dawn lova, chuti a nih chuan, kan thubuai inbat hnawk mek hi mipui te hmaah a chunga tlâ angin a lang lo bawk ang, he thubuai hi a chunga tlak luih tira thah hrim hrim duh vangah kan chhuak ta dâh lel mai ang" a han ti leh a.

Lutruaia chuan, Satbilha duh ang chu hnial leh dan tur a haihchham tak deuh avang chuan, an rawt dan dang, Satbilha duh ang chiaha an tih hlawhtlin dan tur kawnga thil țangkai tur chu sawi kai zelin, fehrehsan hun dawn tawhah chuan an tawmna lungpui chu, kawng hran ve ve ațanga chhuah sanin, Satbilha chuan a thlen in pa Sawichhingapa In chu a pan leh ta vut a.

In chhung a han luh chuan, Sawichhingapa chuan Lal In kai pui tura lo nghak reng tawhin, "kan Lal makpa hual chu, kan tukțhuan Saum tho thar bai khan, i kua a zût zawi ta mai che emaw ka lo ti hman hial zuk nia! mualkil dang ten Lal In an kai kim khat tawh sia, ti teh i han lawi ve tawh teh ang hmiang. kan Lalpa hrilh kan ti hai lutuk palh ta dah ange" alo ti thuai a. chuveleh rang deuh vuta lo buk nghut pah chuan Satbilha chuan, "ni lah love, pa țuan zâl tih takah, ka inpaih chhuak țuan hi a muang zual thei riauva. chu achhapah, Vawkpui țhum phê sek veng paha rei iak khawsak hi ka ching zui nen, ka tlanna lamah lah khan, țhum thum ngawt mai an lo innawr buai mek chu niin! tlema tlemah Vaibel dawn ka hlauh lo chauh chu a ni e, ti teh Lal In chu i han chhir kâi ve leh ta pauh ang hmiang. kan țum tlâk fuh loh aleiah, ro hran reh (rek) leh angai mai ang tih pawh ka hlau hlel love" tih pah chuan a rawn nui ta deuh sung a.

Lal In an han luh chuan mualkil te chu an lo kim thawkhat tawhin, Chawngpuii leh a țhiannu Kapchemi te lo țhu dun ran mai chu Satbilha chuan a han kiai zuk zuk a. chuveleh Chawngpuii chuan rang taka Chemi chu kai tho vatin, "tirawh țhiani, kan Se tlatna muala zihnghal tuai tlu rua kha i zuk êk ang" tih pah chuan, rappui chung sanga Paikawng chu a han ban ta thuai a. mahse, a inphurh chhuah rual chuan Satbilha chuan 'aw' vin țeng deuh chhura rawn auin, "khawi lam lamah mah chhuak lah love maw, kan inhualna 'khawnțhiang' khawn hmasa zet lova i kal chu ava rem teh țeuh awm lo ve" a rawn ti ta khuih khuih mai a. Satbilha țawng vin hluk ri chuan, Lal Keihranga leh mualkil te titi lai chu a chhat chiang kher mai a! an vai chuan, Satbilha leh Chawngpuii te inmelh tawn ran mai chu rawn en țhapin, "ka thu kam keû chuan, i chêl a luh meuh emaw chu!? i pa mualkil te awm kim lai ngei hian, 'khawnțhiang' chu i han khawn teh ang hmiang" Satbilha'n a rawn tih leh lai phei chuan, an vai mai chuan an chhungril thinrimna chu a tawtin a rawn tawt ap ap hlawm mai a. mahse, an tan eng han tih ngam zia zang a ni silo. Chawngpuii chu lainat em emin an thlir ngawi reng hlawm ringawt mai a. chutihlai chuan Chemi lah chuan, Satbilha thinrim hmel insehruh sen țul mai chu a lo hlau tawhin, "țhiani, ka kal mai tange, thingâi chu ka inchhep ngah tawh thoin ka hria" tih pah chuan kawngkapui lam chu a pan ta rawk rawk a.

A țhiannu Chemi tlan chhuak ta daih chu Chawngpuii chuan, mittui tling piau chunga ngawirenga thlir zuiin, a nu leh a pa te, a nuța Kapvunga leh a pa mualkil te chu, a mah chhan tura eng thu emaw tak an rawn sawi ve beisei em em chungin a han en kual a. mahse, a beisei chhanna chu tu kâ ațang mah chuan a rawn chhuak ta silo! muangchanga Rapchunga a Paikawng a han thawlh leh hnu chuan, a nu țhutna khumpui pan chuan a let phei leh ta hnâk hnak a. chuveleh Satbilha chuan, nuih deuh suk paha Lal Keihranga chu rawn melhin, "Lalpa, ka beisei chu i hria a lawm maw? kan tih tur țul ang ang chu bawh fel thuai thuai a țha e" a rawn ti leh ta a. Lal Keihranga chuan, Satbilha thil phut tih sak phawt mai chu a țhat a rin avang chuan, Lalnu Țhiangtuali lam chu hawi pheiin, "Taitea nu, 'khawnțhiang' chu han puah fel ta che. kan mualkil te awm kim lai a ni bawk a, thu hriatpuitu atan anni tluka thlan nahawm ka hmu chuang lah love" a rilru chhungrila lungngai ru zet chung chuan a han ti thei ta hrám a. Lal Keihranga thu pek chu Lalnu chuan hnial thei mawlh hek lo le! a fanu, 'hmartlang chuankitê' an tih huai huai khawpa hmelțha, nungchang mawi leh mite pawi sawi ngai reng reng lo khawpa nunem leh, a neih loh ai chuan, Chemhar chhuaha thah chimih phah vek pawh țih lo khawpa, a fanu hnêhchhuh tum mek tu Satbilha te pahnih tana, 'he nula leh tlangval te hian, an inhmangaih em avangin pum khat niha fanau mal chawia inneih ngei an duh a. chu an duhna chu keini a nu leh pa te leh, helaia lo awm ve, mit ngeia an mahni hmu tute pawh hian an hriatpui vek a. chuvang chuan, pumkhat anni ngei dawn a ni tih lan tir nan, kei a nu ngei hian 'khawnțhiang' khawn dun tirin, helaia lo awm ve zawng zawng te nen hian kan hriatpui e' tih lan tirna tur 'khawnțhiang' tur Zubel a han chawi zet chu a mittui a luang zawih zawih mai a. mahse, theihtawpa insum hram hram chunga a thil tihlai chu chhunzawm zelin, chhuatlaia a Zubel hun khuangtuamna hnahthiala, zu khawnna maute chang tliang relrawl pahnih a thiah (thiat/vit) luh țhiang ral en ran chung chuan, khumpui kawma țhu, a fanu Chawnglalpuii chu a pan phei ta a.

Lalnu Țhiangtuali'n, Chawngpuii a rawn kaih phei lai chuan Satbilha chu alo zauthau nasa tawhin, lo tawlh deuh hûrh hûrh pah chuan, a bul chhuat, Chawngpuii țhutna tur atana a tih chu alo huai fai deuh vut vut a. chutihlai chuan Lal Keihranga meuh pawh a rilru a nâ takzet ta tih hriat zeta kun ruiin, mualkil te pawh chu țawng zai rel thei reng an awm ta lova. Kapvunga erawh chuan, a farnu mittui tling kalh leh chhan beisei em em chunga a hawi ruai ruai lai chu, hmui pet fan leh meng fiah kâk chunga lo thlirin, a kut chuan, a hnung bang thlang lama a Pu milulak Chem inthiat tlê rang mai chu a ban ru ta dâ dâ mai a! chutia aruka Kapvunga chêt thawh tum insang mar ru lai chu, sumhmuna Lutruaia lo tawm ru khiau chuan uluk zeta lo enin, Satbilha rawtna thang khatnaah chuan Kapvunga chu a âwk ngei dawn tih a hre chiang ta hle a.

Chawngpuii a han țhut fel meuh chuan, Lal Keihranga leh mualkil te chuan thaw dep dep chunga lo thlirin, Lalnu pawh a dinna ngaiah khur dat dat chungin a ding zum dai tawh mai a. Satbilha lah chuan nui sung chunga Chawngpuii chu lo melh rulh rulhin, a hmui buruh lian zet chu 'khawnțhiang'ah chuan a han vuah ta chut a. mahse, chutia Zu a han khawn hnu pawha Chawngpuii la țhu ngawi reng chu, thinrim zet chunga melh tur khûihin, Kapvunga va melh zuk pah chuan "lung min rualpui dawn lawm ni" tih pahin Chawngpuii chu a melh leh ta run mai a. Satbilha thinrim hmel chuan, Chawngpuii chu a duh lohna lamah ngei chuan nawr luiin, a mittui rawn far fap fap hrûk zauh pah chuan 'khawnțhiang' pakhat zawk chu fawh tumin a han kun ve ta a. chutah chiah chuan, Satbilha duhthusam leh a phiarrukna thang chu rawn per chiahin, Kapvunga chu a Pu miluk Chem vilik chung chuan a rawn thawk phei ta nghal a. mahse, Kapvunga'n Satbilha nghawnga Chempui a chuktuah rual rual chiaha, mualkil te leh Lal Keihranga te ho an rik deuh huk rual chuan, sumhmuna biru Lutruaia chu rang taka aû țhat țhat chunga rawn zuang lut nghalin, "hei ngei hi 'ral' ena min ên tu chu a ni e Lalpa! huatna neilo se, i fanu leh kan Lal fapa induh lai hi lulak Chem thawh meuhin a nawr buai lo ang le! kan rinhlelh rûk i fapa Kapvunga ngei chu, kan mite chunga Chemhar chhuah tu kha a ni tih kan fin fiah tá e! hei baka liam, fin fiahna dang ila hmuh duh chuan, kan kâwi te zinga pakhat ruang bula he Dumbawm lo awm hi tu ta nge!? tih chu nang ngei hian i hre ngei ang le" tih pah a, Silaia Kapvunga rawn tin chilh nghal chung chuan, Kapvunga Dumbawm chu a sahmim ațang chuan a rawn phawrh ta a.

Thil awmdan chuan Lal Keihranga leh a mualkil te chu a ti hrilhhaiin, "taite hei eng thil nge nita ngai!? I Dumbawm leh i chet thawh dan chuan min va țhawng ve le"!? tih chuai raih pah chuan, a fapa Kapvunga chu a han melh kawk a. mahse, Kapvunga chuan thinrim meng sen ram chunga Satbilha hrawk leh a Chem la chuktuah reng chung chuan, "kan thu pal kual dan hi ka hre thiam tawh lo ka pa" a han ti chang deuh fal a. chuveleh Satbilha chuan nui sung chunga Lal Keihranga chu melh pheiin, "i fapa chetphung hi han zâp kiang phawt la mawle, chutilo zawng ka chhawn hêm tuar zo loin, thansarah a zam phah palh hlauh dah a nge" tih pah chuan, Chawngpuii leh Lalnu inkuah khur zawih zawih lai chu a han melh pah deuh rulh a. chutia Satbilha'n a rawn vau rual chuan, mualkil pakhat chuan Kapvunga dar chu rawn vuanin, "taite zahngai tawh, kan buaina hi thua chinfel i tum hram teh ang khâi" a rawn ti ta a.

Kapvunga'n a Chem a lakthlak lai te chuan, Satbilha leh Lutruaia te chu an inmit thâwt dun nasain, Lal Keihranga leh a mualkil te'n thu țha sawipui tuma an han nawr ve fat fat chung pawh chuan, "ka kâwi te phila, khaw êng pawh zah lova ka chung leh zela Chemhar chhuah tum tu chu keia chin fel rual a ni ta love. kan Lusei dan zam zawh chung a, kan 'sabiakpui' ngei hruai tuma Chawngpuii ka rawn rimna thu ah hian, inral Chem chhuah duhna khawpa huatna che u ka nei lo. țha takin tluang khat kan pal ho emaw tih laia, kei leh ka kâwi te chunga i fapa chet dan hi ka tan a nâin, ka pa Lal Rumvuta leh a mualkil ten an rel fel a ngai dawn ta a nih hi. keia thu ah chuan, ka unaupa nitura ka ngaih ruat diam tawh i fapa hi ngaihdam ka duh hle a. mahse, ka rel fel theih piah lam a ni ta e" tiin Satbilha chuan, Kapvunga chu a kuai bet tlat tawh mai a! chuvang chuan, Lal Keihranga leh a mualkil te țanhmun chu zawi zawia phêt telh telhin, Satbilha chuan, Lal Keihranga leh a mualkil te chu a duh lam hawi hawin, a ram chang Vahrit thingbul lim nghek nghek hi a ni tawh ber mai a! chutih lai chuan Kapvunga chuan, verther zeta an bumna chu hâchang țhial rap rap chunga lo tuarin, "dawta min puhna hi thudikin ala rawn zui ve ngei ang! tuk zing Zawlbuk ațanga ka haw khan, ka Dumbawm kha Zawlbukah ka hloh ta emaw ka ti reng a ni" a han ti a. mahse, a thiam thu sawi chuan Satbilha beng chu a luh tehchiam lo kher mai! "kan buai atalangin, thubuai chai fel tur hawnin ka pa chhuatpui ka chhir luh a ngai dawn ta a nih hi. Kapvunga hi hruaiin kan tlang ka han kâi leh pauh anga, ka pa pawh a dam zawnga rel turin theih tawp ka han chhuah ve ange" tih pahin, Kapvunga țawng chu a rawn țawngchhilh hmiah hmiah mai a.

Chutah zet phei chuan Lal Keihranga leh mualkil te chuan, sawi tur leh hma lak chhuah dan tur engmah hre tawh lovin, "ka makpa atana ka zuat i nih avangin, nang chiah hian ka fapa thubuai hi i zâp nêm thei e. dam takin ka tlang hi a rawn kai leh ngei ang tih min tiam dawn lawm ni"? Satbilha hnenah chuan a han ti a. mahse, Satbilha chuan, a pa rorelna hnuaia Kapvunga chu tlu lut tur a nih tawh thu leh, theihtawp a chhuah tur thu erawh chu rawn sawi nawn nui leh sungin, "Chawngpuii kan rawn lam rualin kan rawn hruai let ve mahnâ le, ka pa ngaihdan erawh hre mah suh ila, theihtawp ka chhuah dawn a ni tih erawh chu inlo hre reng dawn nia, heti kan nih takah chuan 'behliangmunhun' hi chuan kan khaw lam panin inchhir chhuak ila ka tia. a hma lamah i tlang hi kan rawn kai leh ngei turah ngai phawt te'ng u" a han ti leh a.

Chumi ni tlai lama Satbilha leh a kâwi te chhuak tur chu, khaw mipui zawng zawng leh Lal Keihranga leh a mualkil te, Lalnu Țhiangtuali leh a fanu Chawngpuii te chuan ngawi renga thlirin, khaw dai an han thlen zet chuan 'sal' ang mai a, a nghawng leh a kuta hruihruala an thlun, Satbilha kâwi te zinga mi pahnihin dim lo zeta an kaih, Satbilha'n Chawngpuii a hneh lâkna dal thei tu tur awm chhun niawma a ngaih leh, thâh ngei a duh avanga a thubuai sawifel sak tur denchhena an hruai tel ve Lal Keihranga fapa Kapvunga chu, a nu, Lalnu Țhiangtuali leh a farnu Chawngpuii te chuan țap zawih zawih chungin an aû lawm lawm mai a. Khaw mipui te lah bang bik hek suh! an Lal fapa an ngainat em em țhin leh an chhuan em em țhin, phiarrukna avanga a han liam vung vung mai chu mak tihna leh lungchhe zeta thlir hlawmin, a tam zawk chuan dama a rawn let rin lohna nen, an Lal fapa neihchhun chu thi tur thlah takin an thlah tlat mai a. mahse, chu an rilru chu Lal chhungkua leh mualkil te hriatah chuan theih tawpa thup țheuhin, Satbilha leh a kâwi te an liam hnua an mahni In țheuha an han haw darh lai te chuan, khaw mipui te chu lusun ang maiin mahni In țheuhah an tawm zui tlat hlawm mai a ni.

Chumi ni tlai ni tlak lai vel chuan, Sialkal ngawpui dai duk hnuaia khunkhan zeta mi pathum titi te chu an mûk hlawm hle a. an zinga upa ber chuan an thu khel lai chu titi danga rawn țawng khuhin "Lal Keihranga leh a khua te chu, Satbilha leh a kâwi te chhuah hma ngeia in han kâi leh ngei ava țul awm em, chuti a nih loh chuan, Lal fanu chu a him tawp lovang le! Lusei leh Lusei kar thu chhia rawlh pawisak lohna hian, a tlang tlangin chi leh chi inrawt buaih buaihna ala thlen ngei ang le" a han ti chuai raih a. chuveleh a bula mi chuan lo tuihnih ve varin, "Lalpa, i rawt dan chu keini pahnih hian kan pawm e. tuna kan tâpna hi Lal Keihranga khua Darkai țhut chhuah lam a ni a. kan chhak mai khi khawdai a ni mai e, zanin chu thimchilh țan ațangin kâi nghal mai ila. Lal In kawmkarah zan kan nghak tlai mai ta lawng" tih pah chuan a naupang ber chu a han melh deuh rulh a. chuveleh Zakulha chuan, Hrumcheûva rawn meng deuh rulh chu nui var chunga lo melh tur lui deuh khâihin, "vawk chawthleng chu zan tumtawi nan chuan, hman kan tum tawhlo turah ngai ila, chutilo zawng Satbilha'n kan luhrum a hlep filh pak dah a nge" a rawn ti nui ta var var mai a.

Zakulha thu rawn lak dan zet chuan an vai mai chuan ngaihtuahna inang put tirin, hâ lang țhâ chungin an han inmelh kual leh ta te te a. mahse, chutia an kîk deuh var hlawm lai chuan an awmna hnuai țhang pik kar ațanga hmeichhe 'aw' rawn chhuak zawi sap avang chuan, an vai chuan chu lam pan chuan chhuk thla dialhin, an zuk thlen chuan Sakhi sâ hem hmin nen zanriah chu an kil tlang ta a. an han kham fel hnu chuan, an tawm khawmna lungpui insir khup kar awng zual lai te chu Zakulha leh Hrumcheûva te chuan, Changpui hnah leh hnim zam țawi deuh te pawt khawmin an han sawh hnawh țha leh deuh thuai thuai a. chumi hnuah alai taka an meipui chheh chu alh pep pawpa vur belhin, an Thal leh milulak chem te chu an han en fel leh ta zung zung a. an inpeihfel hnu chuan an Silai pahnih leh, ral kut ațanga an lak sak Silai dang pakhat ah chuan, a mu chu țhahnem țha êl âwla sawh leh vekin, hmeichhe ho zinga a hrap zual pali te chu inven nan an ken tir ta a. mahse, an han chhuah dawn tak takah chuan Hrumcheûva chuan, chung hmeichhe pali te chu chiang fiah kâka en kual lehin, "kan lo let leh hma chuan, tumah lo muhil lo ula. thawm emaw Sapui rim emaw in hria a nih pawhin, buaina siam tuma buk tual penthum chin an rawn lut a nih loh chuan, tuman thal lo thlâh suh ang che u. mahse, ka sawi anga hnai an rawn lawi lui tlat a nih chuan, țhiante thal thlâh zuia thindîp phut buaia buaia, hawina lam apianga hawl ve ngawt loh tur. uluk takin mahni thal thlâh kawng tur hisap fel hmasak diam zel tur a ni ngai e" a han ti ta charh charh a.

Bakchhelen hun a han pel chho a, Darkai khaw chhung hmuntin mai chu mitthi sun ang maiin a ngui ruai mai a. mitin mai chuan, an Lal fapa Kapvunga liam ta chu an ngaihtuahin, Lal Keihranga In chu khawhar In ang maiin an rawn kai khawm laih laih mai a. a bikin Lalnu leh a fanu Chawngpuii te chu an mangang zualin, khumpui kawmah midang hriat hlau zet chung chuan an insut leh faih faih țhin a. mualkil te leh mipui, an kawt thlenga rawn kai te lah chuan, tihsak leh han hnem dan țha an hriat chu sawiloh, Lal chhungkua te ang chiah chuan an tuarin an ngui nghiai hlawm vek mai a..

Lal Keihranga pawh an hun tawn chuan a ti hnual nasain, țawngzai reng chhat thei loin chhuatlai chu a bih ngawi vung vung reng mai a. a ngaihtuahna te chu a kal thuiin, Satbilha mizia a hriat chian tluk zet chuan a pa Lal Rumvuta mizia lah a hrechiang si! engti kawng mahin a fapa chu țha taka an rawn chhuah chu a ring lo hle a. chu achhapah, Chawngpuii pawh rawn lak luih tho tho chu an tum ngei dawn a ni tih te, an duh anga an lo dawnsawn loh chuan, Chemhar an chhuah mai dawn a ni tihte chu a ngaihtuah nasa hle a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)