MIHRÂNGVÃL TE SÛLHNÛ . By. Llpa rokhum 1 - 70

[Ngaia]

Bung-65

Ramtuk thla tih takah Thingzawl khaw mite pawh Vahsan la a apa chhuaka chap zar tura an input luh nitin tawh avangin Lalnu Chhingpuii leh mualkil te, an pasalțha te ralrel ruk dan te chu mi nazawng chuan an hre ve hauh lova.chu achhapah, Lungpher mualkil Țiali pa an khung bo thu te phei chu khaw mite chuan an hriat chu Lalnu Chhingpuii leh mualkil te chuan an hlau zualin, Valupa Țialchhuma leh Pasalțha zam țha zet Bukluaia te pahnih chuan a ruk te in an tlangval rin zawng te an ven tir zak zak mai ani..

Sawi tawh angin khatia Darkai laka Chem har chhuah tura Lungpher Lal Darlula leh a unau te'n ral an rel ru a ni tih an hriat rual khan, Darkai hi chhak pasalțha Hrumcheuva leh Zakulha te'n an Lal Taikherha hoa an belh Lal ani tih an hriat chian tawh avangin Thingzawl Lalnu Chhingpuii leh a pasalțha te hian he indona ah hian a inrawlh velo thei dawn talo tih an hre chiang nghal hle a.he an thu hriat hi tuna Lungpher mualkil an kawl mek kâ ațanga an hriat hi alo ni lehzel bawk nen, rinhlel rual lohva hetia mualkil meuh kâ ațanga an han dawn bawhzui hian Lungpher Lal Darlula leh a unau Lal pathum te lakah hian ral hlauhawm lutuk an ni ru ta khiau mai a ni..

Chutihlaiin, Lungpher Lal Darlula hian Thingzawl Lal Khamruma hi a thi tawh tih leh a aiah a farnu fa Darchhingpuii hi a țhu tawh tih hi hre hek lo le! a chutih tawh nak naka laiin, Lal Khamruma tlang chang zuitu Chhingpuii hi a leido khaw pasalțha te zinga a tana mi hlauhawm lutuk pahnih Hrumcheuva leh Zakulha te nena an inzawmna thuk zia phei hi chu a hrelo chhah leh zualin, a unau te nena ralrel tura intawh khawm an tum avanga a unaupa Sialțum Lal Chalruma khaw kai tura a kawi te nena an inkawi liam, Sialțum khan laklawh a luh tawh laia a mualkil hruai pakhat Țiali pa kaw zût zawi tawh zet mai ngaihțha zeta Lal Khamruma khua Thingzawla a tir lut hi a pawi zia a hre pha hauh si lo,he a thil tihsual lian zet hian eng pawi nge ala tawh chhoh zel dawn tih lah chu hre phalo zeta a mualkil Țiali pa chu a damlo an lo enkawl harh tawh a hnu hmanah, Thingzawl Lal Khamruma chu kan tibuai ta lutuk dah ange, ka mualkil thlah tura a tlangval te a rawn tirh leh zel zawngin Nilu mawm kan thlir ngam tawh lovin kan meng ngam dawn love" tiin a pasalțha mawng phêt rang zet Ngharreka leh tlangval pahnih te chu Thingzawla a mualkil Țiali pa lam turin a tir ta reng kha ani a.mahse, a pasalțha Ngharreka leh a tlangval hruai pahnih te pawh hi tunah hian engtin nge an khawsak tak!? tih hi Lalnu Chhingpuii leh mualkil te, pasalțha te chiah hian chiang taka hriain, Lungpher Lal Darlula hian Darkai ngawt melh chunga a ralrel a bilh nghut nghut lai hian a tlang chhak lawk ațanga amah rawn veh tu ral, Hrumcheuva leh Zakulha te pahnih rawn thlawp ru khiau tu hi a ralrel valh ah hian a hual lut tel lo nasa hle mai si.chutih laiin, buaina mak zet a tawh mek lah hi a ralnêk khaw pasalțha hlauhawm zet Hrumcheuva leh Zakulha te ral nawp thâ lâk valh pawh per a ni tih lah a hre der bawk silo!Ram mite kut thlak an tuarah riak la ngai nghet tlatin, Sialțumah a unau Lal Chalruma pasalțha te a chah khawm sauh sauh zawk kha a ni a..

Tukțhuan ei kham chuan Lalnu Chhingpuii chuan a nu Roluti leh a țhiannu, an țhenawma mualkil pakhat nupui te chu a Pawnpui puah lai puah zawh sak tura ngenin, "ka nu, ni Khawlvungi te in lam lamah ka Pawnpui hi pu phei ila'ngin, kan In zawng mualkil te lawi hmun tih takah Vaibel ek a tla nasa thei si a.ka La chawnsa var țha țha a ung zo zel si!ti tawh, chhun lam mualkil te an rawn lan leh hma ngei hian i inpu phei daih teh ang" tih dam thlap pah chuan a Pawnpui puah lai put tum chuan a han inpawt buai laih laih a.chutia a fanu khawsa buai laih laih lai chu Lalnu Roluti chuan enchimloh duat em ema lo thlir nui var varin, "a ni dawn teh tak e maw, han inti nula viau țhin mah la ka tan hi chuan Naute duhawm tak ang hi i ni reng mai dawn anih hi maw!fate hi chu hmuh puitlin inlo har teh e maw, Pawnpui hial i han puah ve pawh hi i puitlin ka rin loh teh reng nen tunah meuh zawng a tlang kan thual mam thei titih dawn ta der a nih hi.ka Naute hi ilo hram ve dawn dawn tawh a nih awm hi maw, ti tak teh khai i ni Vungi te In lam chu i han pan teh tak ang khai, kan mam theih tawk kan han mam anga, chutih chhungin mualkil te tuibur al beisei lo lawi lut chu iva chiauau leh mai a nia'ng chu" rawn tih ve vat pah chuan Chhingpuii inpawm bawr laih lai chu la nui san san chung chuan a han pui ta thuai a..

Mualkil te In an han luh hnu chuan Chhingpuii chuan mualkil nupui pi Vungi hnenah chuan, nui san san chunga a nu nena a Pawnpui puah zawhpui tura a ngen thu chu sawi leh sar sarin, a mawi tawk a han țhut ve vang hnu chuan a Nu hriat loh tura an mualkil te nena an ralrel zawm leh vat tur chuan an In chu a pan san leh ta a.

Chhingpuii hian mualkil te nena an ralrel hi a nu hi hriat tir vek a duh loh nachhan hi a rilru a hah a hlauh vang ani a.a bikin, Lungpher mualkil an khung bo a ni tih phei hi chu a nu hian a hriat a hlau zualin, Darkai thlawp zawngin hriam an lek ve dawn ani tih hi chu tlang takin a hrilh a.hemi piah lama an ralnawp valh dan erawh hi chu an mualkil te nen hian fim taka inrawn tlang chunga hriat tir loh hi rawt thluin, rilru hahdam taka a Nu siam a duh lutukna avang zawkin tunah pawh hian mualkil te nena an ralrel thu ai pha lo tur hian a Pawnpui puah hi chhuan lamah a hmang ta a ni.hetia an mualkil pakhat Nupui nena tihtur a tuk sak apiang hian ralrelin mualkil te nen an hmanhlel ve thei hle a.chuvang chuan, tun țumah pawh hian hemi ni chhunlai taka an ralrel thu chai tur hi bilh fel tawh tura a hma ni a anlo rel tawh avang hian, nidanga a tih țhin dan bawkin hetiang hian anu hi țhenawmah a thlah fel leh ta a ni.

Chhingpuii'n an In a thlen leh lai chuan mualkil panga leh an tlangau ruat thar Liantawia te chu an lo lawi lut der tawh a. Chhingpuii chuan an kawngka biang a kan rual chuan mualkil te chu nui seih seih chunga hawihhawm zeta be nghal thuai thuaiin, mualkil te pawh chuan an Lalnu chu hawlo zetin an lo chhawn tliar tliar a.mahse, an Lal hi hmeichhia ah pawh nula vanglai hmang chho mek, nunze mawi em em leh hmeichhe nu hnephnawp anih avang te hian Lal inah hian zubelin hmun a chang lo hle a.hei vang hian mualkil te rorel pawh hi a fim țhinin a lungleng zualin an rorel zawh lamah mualkil Buala pa inah zubel chu an pu lut ve mai țhin a ni..

Chutia an han inchhawn liam liam lai chuan Valupa Țialchhuma leh Bukluai te pawh pasalțha daido dang pali te nen an rawn kun lut dâ dâ hlawma.rei lovah chuan mualkil dang pakua te pawh rawn inzui lut ve leh thuaiin, Lalnu Chhingpuii hmaah chuan vaibel pak laih laih chungin khunkhan zetin an țhu thiat ta far a.chutia an kim ta maw tih a han hmuh hnu chuan Lalnu Chhingpuii chuan valupa Țialchhuma chu dam raiha melh pheiin, "ku Cheuva te hnena kan rallak rel dan zualko tura kan tlangval tirh te chuan kan tlang an rawn chhir kai leh tawh a ni awm a.a eng thu nge an rawn bilh haw tih chu kan zavai hriat atan hian han sawi ta che" a han ti a.

Țialchhuma chuan an Lalnu chu rang deuh vet vawta lo buk khum zauhin, "ni hnih lai an han thang hnu pawh khan, ralrel thu âk tih takah tam lak khua chhir luh ngam nita lo chu kawng an bo nasa mai a ni awm a!an tum loh achhain, an vah hrep hnuah Sialțum dai an chhir pawh ta dah a ni awm asin maw.nu pahnih thintuluang kar lai an han hmuh te chu fimkhur zeta khawi khaw mi nge an nih thu an han zawh chuan, anni chuan Sialțum khua an nih thu an sawi ta mai a.a chutih nak nakalaiin, nu pakhat zawk chuan chutia kan ralnawp te khua an lo lut țep tih a han hriat ruala, a rawlthar ber Lawisata Uipui hur serh hmu ang maia heh thlah duai khawpa a phawk ta hrû chu ngaihțhalo zeta lo mitchhui fu hmanin, khawi Lal țhut khua nge an nih? tih a rawn zawt let zui ta mai bawk si chu chhan pawh chhang lovin an liam san ta thuai a.an han chuti ta chu, Darkai khan pawh chu an tan han zawh ngam nitawh hek suh, hmanhmawh zeta kan tlang lam pana rawn let vatin, ram chin bih an tlak sual nasa ta lutuk chu thawh hnihna atan Darkai khan chin hre zawk deuh te nen, khawi khaw Lal tlang mah chhir pawh tawh lo tura liam țhat leh mai kan rilruk tlang ta deuh anih kha maw" a han ti a..

Valupa Țialchhuma'n chu thu a han sawi fiah zawh hnu chuan, an vai chuan Darkai lam pana an mi tirh tur chu an hming lam meuhva thlang chhuak țha lehin, pasalțha pakhat Zikbawnga chuan "ka hovin kan kal ange, a tu a te mah kha han dem chi zawng an nih hmel silo.an thu kenin a zir ema Lal dang tlang chhir pawh ngam a nih miau loh avangin, ram chin hre zul lo tan chuan Darkai tlang chu kai fuh a har dawn teh tak e" tiin a rual a kal ve tur tlangval pahnih an han ruat fel zui ta a.chutia an han rel fel tak hnu chuan Lalnu Chhingpuii bawk chuan thu dang rawn la kai zui lehin, Lungpher mualkil Țiali pa an khung bo rawn lam tura Lal Darlula'n a pasalțha pakhat leh tlangval pahnih a rawn tirh te khan khua an chhuahsan tawh em? tih chu an thlen in mualkil Pengsata pa chu zawt veleh thungin, "anni pathum kha chu kan daido Bukluaia leh Chhunlûta, Vawmâia te kutah hian kan dah ta mai kha a nia" tih paha an ni pathum lam hawi zui zat pah chuan, "hmunte mual leh helna an thlen hun chuan mualkawnah khua an chuan ngei ang" a han ti leh a..

Mualkil Pengsâta pa chuan an Lalnu thu rawn lak chu muang deuh churha lo chhang ve thuaiin, "an tlangval pakhat kha an rawn kal kawngah a ke a bilh sil deuh ani awm a, khavang khan, Lal Saibela khua Panglian khua chu chawhma țha chhir zet chauh ani tawh tho bawk nen, tlai nemah kan pan zawk ta'nge tiin an hotupa Ngharreka khan thu a bilh tak kha maw.a thu valh dan ka hriat avang khan kan pasalțha pathum te pawh hi ka tupa tira Ngharreka thu vuak thluk chu hrilh hre nghalin, kan ralrel an rawn ai khawmuang leh ta zawk anih hi'' tih pah chuan Bukluaia te pathum chu mualkil Pengsâta pa chuan a han melh kual dan dan a..

Chutia an thu lo inthawt kual dan a han hriat chuan Lalnu Chhingpuii chuan nui san san chunga a mualkil te chu a 'aw' nem nu hnap mai chuan an remchang lak dan a țha a tih thu chu rawn sawi velehin, "kan mualkilin khatia taitea a rawn tirh lai khan, Chhunlûta hi chu a rawn in âk luah tawh mai a.keilah tukțhuan ka la si puar ve îk silo, Bukluaia insiam zo tual rawn chhir khu phei laih laih lai thlir chung chuan, chaw helh ûl ûl chungin Chhunlûta nen, taitea thu rawn ken chu kan ngaithla ta kha ania.ni e, a sawi ang khan, ni her lam lama inkawi chhuak tur ta fam chu tiin, kan ralrel kan rawn ai tlai khawnnu leh ta ani e" rawn tih charh charh pah chuan Vawmáia chuan Lalnu Chhingpuii chu a han melh zauh zauh a..Chumi hnu chuan an ralrel valh hnihna tur chu chai chho lehin, valh khatna chu an pasalțha pathum te kutah chuan an han dah nawn leh a.tlangaupa Liantawia pawhin a tihtur chu lu zo zet chunga buaipui zui ve nghalin, mualkil Pengsâta pa In lam chu Lal luhkapui ațang chuan ding kawh lan chungin a thlir ta ran mai a.chutihlai chuan an ralrel valh hihna an kai chhoh pui mek pawh chu reilote ah rel fel leh nghal vatin, Sialmual ram Kham kara Lungpher mualkil an khungbeh Țiali pa an thuhrukna sawn tur chuan valupa Țialchhuma leh pasalțha Zikbawnga chu an liam zui ta a..

Chhunlai a han ni chhohva Ni pawh vanlaizawlah a din sat vawl vawl tawh lai chuan, mualkil Pengsâta pa Lal in kai haw pawh chhuatlaiah chhuat dap tah kar awng ațanga thlifim rawn lut hnung delhin a mițha mualkil vawkpa sutnghak buh bal kham thal huang mai a.chutia an thlen in pa bawk zal lai chu Lungpher pasalțha Ngharreka leh a kawi te pahnih chuan, a bul chhuata khup tun rana țhu bial laih chung chuan meng tlê râ chunga titi phungleng lak kai chhoh puiin, "lal Saibela khaw Bawlpu chuan kan mualkil chu alo thawi harh tawh turah ngai ila'ngin, muangleia khaw dang tlanga tâp reng hman kan ni silova, in Bawlpu lo boral ta mai chu a pawi lehzelin, kan mualkil tana theihtawp inlo chhuah ta fo hi kan Lal Darlula chu a lawm viau ang le!a sangawizawnpui' tihtakah in Lal hmasa Lal Khamruma kha kan Lal hian a ring tawk hle a.a chutih avang chuan kan mualkil pawh khaw danga kaipui talovin, Thingzawl hi a rawn kai tir ta kha a ni a.chu achhapah, in Bawlpu thlan inlo țhut chung pawhin, tlawmngaih chhuahin in tlangval te'n Lal Saibela khua thlengin in han kaipui ta dâh nen, ek tui nena inchiah kawi zek zuk si kha khawih țihna in nei hlek lo hi kan lawm zet zet e" tih charh charh pah chuan Ngharreka chuan an thlen in pa chu lawmthu a han hrilh sap sap a.mualkil Pengsâta pa chuan chutia Ngharreka lawmthu rawn keu chhuah chu nui kîk deuh hâi chunga an Lal te ve ve avanga țhatna a inlawm tawn tur an nih thu leh, an mualkil laka khawngaihna anlo lan tir chu thil man man tham a nih loh zia te chu rawn tuihnih zui ve in, "in Lal leh kan lal te chu 'Dawisakilza' thei an nih reng reng ahnu hmanah, kan Lal chu a fanuin thlak tawh mahse kan țhat kan chhiat te chu in Lal leh a khua te nen hian indawm tawna intuarpui tawn tur alawm kan nih le.ni e, khatia kan Bawlpu ber, in mualkil lo thawi harh tu tur ber a lo awm tak silohah khan, kan țhenawm Lal Saibela khua, Panglian Bawlpu pan pui thuai kha kan tihtur hmasa ani tih kha hai chi a ni tawh îk lo mai tih chu in mualkil Țiali pa hmelah khan a lang reng tawh mai si a.a biang te kha a thawp chakin, a bengkawm te kha pa mit fim deuh chuan an bih tlang thei rû rû mai awm mang e tih tur khawp khan a var pap tawh mai bawk si a.chu achhapah, a 'aw' lah Arte pul thi tur chiap ri aipawhin a thâm zawi tawh bawk si! a Pa kap nam rual meuh si a khati teh hrepa kaw zut tuar chu hnuk thlah tlang mai a awlsam tawh lutuk dawn e tiin, Lal Saibela Bawlpu panpui turin kan tlangval te kha kan ko khawm ta chuk chuk ani ber e" a han ti a..Chutia an titi tui lai chuan Ngharreka kawi pakhat zawk chuan luhkapuia va dah vauh vauh pah chuan an hotupa la titi sar sar lai chu rawn ko deuh lauhin, "Panglian khaw khan chu luh pawh a hun tawh mai law'ng maw?ni pawh vanlaizawlah a her lei deuh ta e" tih pah chuan inchhungah chuan a rawn lut kûn ta dâ dâ a.

chuveleh Ngharreka chuan chupa chu phawk hrâ chunga lo en thuaiin, "kan thu vuak a rual atalangin, khaw her chin pawh ka lo bih ta pek lah love ka ti!ti teh tak u, insiam ila Panglian khaw khan chu i han zawh dawn tak ang u hmiang" tih leh thawh chu rual zui nghalin, an thlen in pa, mualkil Penglûta pa chu kîk van chungin lawmthu a han hrilh leh a.chumi hnu chuan an vai chuan inpeihsa ata luhka lam chu pan phei țham țhamin, mualkil Penglûta pa chuan pawn thleng va thlah pah chuan an chhak lawk Lal in kaițena tlangaupa Liantawia rawn meng tlê thla kar lai chu a han mitmei zui zauh a..

An mualkil Penglûta pa mitthawt chu tlangau Liantawia chuan alo hailo kher mai!.Ngharreka leh a kawi te'n veng chung lam an hrut chhoh lai chuan rang taka pasalțha Chhunlûta in lamah kaihza mawng khawng tlat tlat khawpa chaka tlan phei nal nalin, Ngharreka te pathumin khua an chhuahsan chauh tihah chuan Thingzawl pasalțha pathum te chuan Silai pu nghauh chung leh an puanven veh behna, an kawnga hruikhau invet kuala an khel thlawp zaih maia milulakchem inthiat tlê râh chung chuan Lal mual chu an rawn tan tlang zui ve chiah bawk a..

Thingzawl pasalțha pathum Bukluaia, Chhunlûta leh Vawmâia te chuan an ral veh mek te chu ram chin hrelo zawk anni tih an hriat chian avang chuan, khaw thim hma a hmeh mih hman chu an tum hle a.chuvang chuan Ngharreka te pathumin khua an chuan ngei na tur lam, mualkawn lam ngawpui chu a hnai zawng zela pan thla zelin, mualkawn thlen hma ngaw dur thim ruih mai chu hma takah an luh pawh thla ta a.chutah chuan Ngharreka te pathum an rawn lanna lam tur, mualkawn chhak kawrte hnar lam hawi chuan an Silai te chu hmun hrang țheuhah chuan țanhmun la chunga rem zeta chhuang far hlawmin, ngawpui hrik hram chuah chuah thawm chu ngawi rengin an ngaithla ta a.mahse, rei deuh tak an nghah hnu pawh chuan Ngharreka leh a kawite thawm chu mualkawn ngawpui hnuaiah chuan hriat tur a awm ta tlat lo!an ralrel chu a tlawlh dawn ta mai emaw a tih tawh thu chu Vawmâia chuan a tawmna ațanga rawn vah chhuah pah chuan rawn sawi deuh supin, a piah lawk mautluk tling mang lova hla a, khan lehlama Bukluaia Silai chhuang tlê rang lai chu a han fin phei a..

. An han inrawn hnu chuan an thlang maia țanhmun la, Chhunlûta chu muangchanga zuk fin velehin, an han inhmuh khawm țham hnu chuan hmuntemual lam hrût mai a duh thu chu Vawmâia chuan a han sawi leh a.mahse, khua an chhuahsanna lai leh mualkawn hi a inzawn tlat chu sawiloh, Lal Saibela khua Panglian lam khan chu helam hi ani e tiin Ngharreka te pathum hnenah khan an kawh hmuh a ni tih kha an hre chiang țheuh si!thawk rawn lak deuh hak pah chuan Bukluaia chuan zawi sapa a ngaihdan rawn sawi lehin, "hmuntemual khan an zawh anih hrim chuan mualkawn hi an rawn luh pawh ngei anga, an rawn luh rualin khua pawh an chian ngei turah ka ngai e.mahse, tun thlenga mualkawn an rawn pawh ta lo hi ngaih an ti hai chhalh mai e ka ti!kan țan hmun țheuhah khan tuiburnmuamda chhung nghak leh hlek ila, chuta anla rawn lan loh fo chuan hmuntemualah kan han bih mai ta law'ng" tih pah chuan a țanhmun hlui lam bawk chu a pan phei leh ta dâ dâ a..

An țanhmun țheuh an han luh leh hnua Bukluaia rawt anga tuiburhmuamda an han nghah leh hnu pawh chuan, an beisei thawm chu an la hre ta mai chuang tlat lo!Vawmâia bawk chuan a țanhmun chu chhuahsana a țhiante chu rawn fin thlak leh chu tum lehin, a hma lama a Silai tin kawh tau chung chuan a thlang lam, a tawmna ep pen sawmthum vela hla a Chhunlûta tawmna lam chu a pan thla leh ta nge nge a.mahse, Chhunlûta tawmna a han luhpawh hma, Chhunlûta tawmna ațanga pen nga vel awrh a thlen ruala a han din mar deuh zauh rual chuan, an chhak ngawpui thim zual zet laia lungpui lian zet bawk vung phen ațang chuan Silai hmawr a rawn dê ta zawk mai a!chumi rual chiah chuan Vawmâia chu țhu zawi nghal hnawkin, Bukluaia leh Chhunlûta te pahnih chuan chutia an chhak lawk ațanga Silai rawn ri ta mai leh, Vawmâia țhingțhi zui hnawk mai chu angaihna an hre lovin Vawmâia tlukna lai pawh tum chuan fimkhur zetin an țanhmun ve ve ațang chuan an vak chhuak rang kher mai a.mahse, Vawmâia bul an han thlen hnu chuan Vawmâia chu biak tlak alo awm mang tawh tlat lo!a thlukvum tak maia Silai mu luhna kaw phur mai chu Bukluaia chuan a kut chuan huh (hup) pin tuma ban nghal thuaiin, chutia a zuk hup lai chuan Vawmâia chuan an chhak lungpui lam chu theileh thei lovin a țhian te pahnih chu a han kawhhmuh țawk țawk a.chuveleh, Chhunlûta leh Bukluaia te pahnih chuan chu lungpui lam hawi chuan an Silai ngul chu lek chho nghalin, an han tin zawn rual deuhthawa an Silai a puah rual nghal tuarh thlawp deuhthaw chuan lungpui pang lehlam ațang chuan Silai a rawn dê ve zuaih mai a bawk a..

Chuveleh lungpui phen ațang chuan mipakhat hi rawn lum chhuak nawlhin, thlang lam țhangbuk awih zet karah chuan thisen bual zuih chungin a rawn lum zawi thla hnuang mai a.chutia a rawn lum lai chuan Bukluaia te pahnih chuan an țanhmun chu lungpui phen ațang chuan rawn sai leh mai a awl hle dawn tih chu hre khiau chunga Vawmâia ruang chu an thlang lam minko ah chuan zuan thlakpui thuaiin, chulai minko hniam lai ațang chuan an chung lama ral țanhmun chu an han bih leh ta dâ dâ a.mahse, min koa an zuan thlak hnu chuan ralho chu thehmeh ang maiin an reh zui ta tlat mai si!ral ho țanhmun lungpui thlam pahnih tiat dawna lian chu minko hniam lai ațang chuan fimkhur zeta han inbih chhawk leh zauh zauh țhinin, rei iak an han tawm hnu pawh chuan thawm engmah an hre tawh reng reng lo mai a.mahse, chu hun reh deuh duk chu reilote ah an tawmna minko chung lawka perh kuang rawn tliak ri sat chuan hun ralțitawm zetah rawn chantir zui leh zatin, "minko a kan zuan luh lai khan ralho hi lungpui phen ațang khian an rawn tla thla ve tlat ta mai ka ti" ti a Bukluaia rawn phun sap ri chu Chhunlûta bengah chuan a ring viau ang le..

An hun ngah chu an tum anga a awm tak loh avang chuan pasalțha pahnih te chuan ral han rel țhat chu harsa an ti tawhin, chulai minko thlang lama an țhianpa ruang nen han liam thlak chu thihna anih zia chu an hre chiang tawh si.an tawmna thlang lam zawng zawng mautluk nga awm vel zeta thui hi hnahthial hmun anih avangin an tan țanhmun siam lehna tur a kaw tawh hlawl silo!phen tur leh chuang awm tawh talo chu, an chet chhuah vaih chuan an chung lama ralho chuan duhtawkin an rawn sai tawh mai dawn ani tih chu an hre chiang ta hle a.tah chiah chuan an hun tawn chuan an pasalțha nihna ngawltawt zet chu rawn cho chhuakin, "kha lamah khan nang chhuak chho la'ngin, helamah kei ka chhuak chho anga.sir leh sir ațangin Ngharreka khi i han sai chilh teh ang khai, pahnih pawh la nimahse, a rualin kan tluk chilh hman tho ang. kan khalh loh hlauh luatah țhian Vawmâia rawn che chhuak kha mualkawn an rawn luh rual khan anlo hmu hman ani tih a chiang kelh e" rawn tih thawp sat pah chuan Chhunlûta chuan ralho chu thihchilh law law tur chuan a țhianpa chu a han sawm ta nge nge a..

A țhianpa rawtna lo chu kawng dang thlan tur a awm chuanglo tih a hriat chian avang chuan Bukluaia pawh chuan, kík van chunga Chhunlûta rawtna chu lo bukchhilh zui zauhin, an sir lam ve ve pan chuan thawm dim zet chungin an ințhen ta phawk a.an duhna lai an thlen ve ve hnu chuan ko chung lama vah chhuahna tur remchang lai ringawt chu bawh nghal mai lovin, an vah chhuah ruala Silai hmeh puah nghal theih natur lai rem zawk tur chu an dap dun nasa mai a.mahse, an duhna hmun tak ve ve an han hmuh hnu a vah chhuah paha Silai hmeh puah nghal inring zeta an thâ an sawm khawm sauh sauh lai chuan, an chung lam ralho țanhmun lakna lai awm zawn chhak deuhsi ațang chuan vawilehkhatah Silai rawn puak ri durin, an thlang ngawpui lam pana Silai puak thawm a khawk thlak ruih ruih lai chuan patling nâtuar thawm a rawn rak chuai zui rawih rawih mai bawk a!chuveleh Bukluaia leh Chhunlûta te pahnih chuan fimkhur zeta thawm rawn chhuahna lam chu nghawng fan uak uak chunga bih chhoin, ko an han bih khum rual chuan an ral veh mek zinga pakhat an hotupa Ngharreka leh Rawlthar sang zeih zawih, awm bawr khin țha nelhnawlh tak mai te lo indinchilh ran lai chu an han hmu ta thut mai a.chutah chiang zawka bih dun lehin, an han hmuh chian viau hnu chuan Ngharreka biang tawn tawn, a khabe ruh inchuktuahna thleng rawka a khabe thapui nen lama chat bal thla vek khawpa alo thler peh vung mai chu chiang zetin an han hmu leh a. chutihlai chuan a hmachhawn mek rawlthar inkhai thli zaih mai chuan rum khum ngal ngal chunga Ngharreka chu melh ranin, a hliam ațanga thisen rawn baw puat puat te chuan Ngharreka awm zawng zawng chu a bawh sen nguai tawh mai alo ni a..Chuveleh chu rawlhthar, an mahni rawn thlawp tu pian zia chu mit tla lek leka fimkhur nachang pawh hre tawh mang lova an pahnih chuan an awm hmun ațang ve ve chuan bih ngar ngarin, chu rawlthar a han thlek sawn zauh rual chuan Zakulha biang veilam ser riah chu Chhunlûta chuan a hmu ta a ni.

Zakulha chuan Ngharreka thisen chhuak nasa lutuk tawh ding khur hlak hlak lai chu fim zeta melh ranin, thlahthi hriam zeta a khabe a thlawh bal sak chu Ngharreka chuan a milulakchem a ken lohna lam chuan nâ ti zet chungin a han khawih leh ta zauh a.chuveleh Zakulha chuan Ngharreka chu pan phei thuaiin, Ngharreka pawh chuan Zakulha chet rawn la lai chu a Chem chuan alo vai ve zuaih zuaih mai a.mahse, a hliampui tawrh avanga a zuai mek zel chuan reiloteah a mit chu rawn thim pui zuiin, Zakulha milulakchemin a hrawk a rawn vai awng hawk rual chuan paih ang thlawrhin leiah chuan a tlu ta thlawrh mai a.chutah meuh zawng Zakulha hma a ding atan meuh chuan a kumin chaldelh zawk fe mahse Ngharreka țuan chu ala no hle a ni tih chu a rawn lang chiangin, a thi tur tal mêl awrh awrh lai chu Zakulha chuan a milulakchema thisen la far kauh kauh melh zauh pah chuan a han țhutchilh zui rap a.chuveleh a piah lawk țhangbuk kar ațang chuan Hrumcheuva leh Sawiluaia te pahnih chu nui deuh țha chunga rawn vak chhuakin, "pakhat ka sai thluk tawh ahnu, kha pa kha chu i bitum a tan ka khek sak ang che ka tih reng kha maw.khawnge Thingzawl pasalțha Chhunlûta leh a kawi te kha an awm tak le!?rang takin an liamna lai kha ti teh khai i han bih teh ang khai" tih paha Sawiluaia chu nawr kal deuh datin Chhunlûta leh Bukluaia te pahnih an liamna lai chu an zuk thleng thla nghal ruak a..

Ngharreka hmachhawn tu kha Zakulha ani tih te chu Chhunlûta chuan alo hre tawh bawk nen, Hrumcheuva țawng rawn chhuah chu rang taka lo chhawn thuaiin, "he lama hi kan awm e, Cheuva leh Zakulha te meuh zawng hun liamin min la hai tir em love" ti a rawn au lauh lauh chung chuan a awmna ațang chuan a rawn vak chhuak ta thuai a..

An han inhmuh khawm meuh chuan an vai mai chuan țawng hmasa nih inchuh deuh rap rap chunga infiam zui bawrh bawrhin, "kan Lalnu Chhingpuii hova kan khua in rawn kai lai khan, in hmel leh pianzia hi ka mitthla ah a reh ngai hauh love, mah reng rengse, a eng titihin nge ni ka hming leh ka hmai tlang hi nanga pawh chuan ilo hriat hman kelh tak ni"!? tia zawhna siam vat chung chuan Chhunlûta chuan Hrumcheuva chu a han en deuh ran a.

Hrumcheuva chuan amah mai nilo, a țhianpa Vawmâia leh Bukluaia te pahnih hmel nen lam chuan a la theihnghilh bik loh thu te chu rawn sawi ve vatin, "khaw khat daido meuh te zawng inzui tam hman lo mah ila ka hriat rengna hian he ngawpui hnuaiah pawh hian a hlauh hauh lo che u ani e, Vawmâia tlu lai kha khilai kawrte kam țhang hmun kar kan rawn chuan chhuah lai tak khian kan rawn mit chhui fu ta tlat mai a!chuveleh rang taka nagmahni rawn ralnawp tute chet lakna lai hi kan pathum hian zawng ve nghalin, kan han bih fuh rual chuan Bukluaia nena khalai min ko hnuaia Vawmâia in pu thla lai kha ka rawn hmu zui ta mai che u a.chutah meuh zawng, chet kan lakdan tur chu reilote inrawn khawm lehin, khatia in tawm pil rual khan in ralnawp te pahnih lah hi an tawmna lungpui phen ațang khian an rawn zuang chhuak chawpchilh ta mai bawk nen! kan han nghah hret hnuah pakhat zawk, in rawn lawr hun changa a Silaia intawmna lai tin reng chunga a țanhmun la lai hi rawn sai thluin, pakhat zawk kha chu Zakulha chanah ka pa pek ta mai a.

chuveleh Zakulha chuan a bitum pa hi han kap mai talo chuan a tlahthi chu Silai aiah ruai ta zawkin, a bitum pain kan awmna lam a rawn tin tau lai chuan a kareh hi a khabe bal vek khawpin a zuk vawm thler sak zui mai bawk a.chuta chin chu a bitum pa hian a hliampui tawrh chu buaipui zuiin, a Silai a paih per palh chu a hliam buaipui pah chuan a han dap leha. mahse, chutia a inhai buai lai chu kan Lusei Keite hian a zuk țum chilh zui ta mai a nih hi maw" tiin an rawn inrawlh dan zawng zawng chu fiah zetin a hrilh ta a.chumi hnu chuan Vawmâia ruang chu Hrumcheuva chuan lainat tih hriat zeta bih leh deuh ranin, Lungpher ram chin ațanga an chhuah laia ram chin an bo deuh tlat thu leh an tum pawh ni mang lova helai ngaw an rawn vah luh tak thu te chu zawi deuh raihin a han sawi leh ta a..

[Ngaia]

Bung-66

Thimchhilh inman kai hun chho chhulh tawh anih avangin, Thingzawl Sial pa ngeng hmahruai pawhin khaw daiah a kawi te a hruai lut nguah nguah tawh a.chutihlai chuan pasalțha panga te pawhin ruang pakhat zawn nawlh nawlh chunga khua rawn kai ve mekin, Lal mual an thlen dawn chuan khaw mipui țhenkhat te pawh an rawn inhawr khawm viau tawh a.

Lal muala an han innghah hnu phei chuan mualkil țhenkhat Lal ina lawi tawh te pawh an vaia rawn dak chhuakin, Bukluaia chuan Lal In chu kai chho vatin thil awm dan chu Lalnu leh mualkil te chu a han hrilh thuai a..

Chuveleh Chhingpuii te nufa pawh rang taka pawn lamah rawn tlan chhuakin, an khaw pasalțha te zinga Hrumcheuva leh Zakulha te pahnih leh an zinga miapakhat, mipanaupang sephung lai rual vel paw chunga alo ding ran lai chu nui var var chungin Lalnu Chhingpuii chuan a rawn hui zauh zauh a.mahse, chhak pasalțha Hrumcheuva meuh pawh Chhingpuii lakah chuan nasa zeta zam ru leh tawhin, ngawi renga ala din tak tlatah chuan "Lalnu duhsakna chu kan zui dawn nge? Sialțum lam khan kan awn leh zawk dawn"? ti a Zakulha'n zawi sapa a rawn râwn zauh lai te chuan a la ding khawng reng mai a.chutihlai chuan Bukluaia leh pasalțha dang te lah chuan Hrumcheuva hun tawn chu hrethiam hlawm hek suh!

Valupa Țialchhuma rawn tlan thleng hlim hlawl chu Bukluaia chuan an chanchin lo hrilh ve leh thuaiin, an inrin hman hmain Hrumcheuva te pathum chu Lal Inah chuan an pawt lut ta laih laih a..

Chhingpuii'n mei eng thlarah Hrumcheuva te pathum melh ralh ralh paha an mipanaupang rawn puak chanchin a zawh lai chuan pawn lama Vawmaia ruang senghawi pawl te thawm pawh an ri nauh nauh tawh a.

Chhingpuii chuan mipa naupang chanchin chu chiang leh zuala Hrumcheuva hnenah chuan zawt zui zelin, "khawi Lal khua ațanga inrawn hruai tak maw !? tiin, mual laia ka rawn hmuh rual che u khan he zawhna hi ka rilruah a riak titih nghal tlat ani ber e" a han ti a.

Chhingpuii zawhna chu bah deuh naka Hrumcheuva chuan rawn chhang lawi deuh ratin, chutia a chhan karlakah chuan an zinga pakhat chu pasalțha Sawiluaia anih thu leh mipa naupang chu Lungpher Lal Tupa a nih thu te a han sawi a. chumi hnu chuan an ralnawp dan zawng zawng te chu fiah deuh taka sawi kai chho zelin, he an ral bawh chet thawh lak nachhan hi Vangmual Lal Lal Rumvuta bul țan ani tih te thlengin a sawi fai ta leng a. chutah zet chuan Chhingpuii leh a pasalțha te, mualkil te chuan Hrumcheuva leh Zakulha te ralrel a fin zia chu meng fiah kawk kawk hlawm chunga ngaithla hlawmin, "kan pasalțha te chêt hmun lak tlawlh palh inrawn thlawp a leiah tun hun hi kan thleng a.a chut nilose pasalțha pawh va vanneih reng bik thu awm suh!kan pasalțha pathum te hi an vaiin Ngharreka khan a hup filh țhelh anih kha le!

Lungpher Lal Darlula leh a unau te hian, Darkai run ralrel an tuk tlut tlut mai tih hi a mualkil kâ ațangin kan hre tlat mai a.chuta chin chu Darkai thlawp tura funpui êr ve thuai hi kan tihmakmawh ani tih kan hre thuai a.

Darkai lama lamkal kan rawn tirhte an kawngbo atalangin, thawh hnihna rawn tirh leh kan tum lai tak ani a.mahse, a chutihlai chuan Lal Darlula pasalțha Ngharreka khan an mualkil ngaihvenin kan khaw dai a rawn kai leh ta si a!kan ralrel a pelh lek lek laiin khuavang te'n kan ram valh ngaw chinah an rawn dah che u a nia nge" ti a Chhingpuii'n an ralrel tlangpui a han sawi leh hnu chuan, an hma lak dan zawng zawng chu inpawh tlang takin an sawi ho ta a..Zan a han rei chhova Hrumcheuva te țhiandun pawh Zawlbuk lamah valupa Țialchhuma hoa an kai hnu chuan, Lal Darlula tupa Khawzaliana chu a tuk lama a chungchang rel fel sak tura ti tlu tlangin mualkil Luaikunga pa In lamah an paw phei ta a.

Zawlbuk lawi an kim tawh bawka tlangval zawng zawng te chuan Zakulha leh Hrumcheuva te pahnih chu anlo en duh hlawmin, an vai mai chuan tluk loh enin anlo en țhap mai a.mahse, an chin țhan tawh tualval buan hun chu an hmabak ani tih chu tlangval zawng zawng te chuan hre ru khiauin, an khaw buan chak, awm tut khat tlat mai leh palian mum nalh mai Tlangvela chu valupa Țialchhuma chuan melh zauh pah chuan, "chhak pasalțha meuh te chu awlsam taka han phawi kan mai chu a tu amah hian kan thei ngut ang emaw chu!mahreng rengse, kan tlang rawn kai khualval te chu buan lova thlir liam bik ngawt thu va awm ûk suh khai.

Thingzawl Setê Vela hi tu zawkin nge han chai dawn che u le"!? tih pah chuan a naupang zawk Zakulha chu a han melh kîk van a.. Chutihlai chuan Tlangvela pawh nui deuh hâi chunga rawn inlek phek chhovin, "khual tual valah pawh chhak pasalțha rorum te meuh zawng kei hian ka elh zawi hlei law'ng e, nakruh pelh phung khawp chuan min keuh bik em lovang chu maw" hawihawm taka rawn tih pah chuan mepui êng lai chu a rawn pan phei a.chuveleh Hrumcheuva chuan Zakulha chu nui var chunga mitmei ve thuaiin, "Lusei te dan chu dan țha ani ngai e.a kalhkim nan valupa Țiala chotuahna chu i han zui ve teh poh ang hmiang.marawh chu, mawi takin aw nia'ng" a rawn ti zui sap bawk a..

Zakulha leh Tlangvela te inchai chu an inhlahthlem thiam dunin, achang phei chuan hnuai lama țan an inchuh emaw tih mai turin an inpawt lui nasa ngat ngat țhin hle a.chuti reng renga inpawhna an han lantir chu tlangval dang te chuan 'haw haw' chunga lo au chhilh hulh hulhin, an thapui pe chu valupa Țialchhuma chuan a hmu chak ta riau mai a.mahse, a ngaihtuahna chu a mawilo zawnga fuihpawrh na thu chhak chhuah nan hmang mai lovin, "kan nauva te pahnih hi an thâ lak i han fiah teh ang khai!an chhul tawn keu kum a inang thial awm bawk nen, an thâ pek a in-elh tawk em tih hi fiah ka duh e.rem i ti ve emaw chu"!? tih pah chuan Hrumcheuva chu a han bekbawr sap a.

Hrumcheuva chuan valupa Țialchhuma thu rawn sawi zauh chu nuih deuh sak paha lo buk khum zauhin, "i rawtna chu han zui ta pauh che, nangin an tha pek koh chhuah sak dan chu i hre zawk ang e" tia lo chhang thuaiin, valupa Țialchhuma'n Zakulha leh Tlangvela te țang tak tak lai a hmuh chak lutuk avanga fuih țan dan tur zawnga a phe zui zat lai chu nui var chungin a thlir zui ta reng a..

Valupa Țialchhuma chuan Zakulha leh Tlangvela te pahnih chu an thâ tak tak hmuh ngei tuma an țan dan tur zawng zelin, pathlawi fiamthu thiam zet Laikunga chu a han bekbawr ta zauh a.chuveleh Laikunga chuan phur zeta Zakulha leh Tlangvela te inchai lai chu rawn pan thuaiin, an pahniha tlan hel pap pap pah chuan an puanven kar chu tlan pah chuan a zen ta zauh zauh mai a.mahse, chutia an kap a han khawih sak zauh zauh hnuah pawh chuan anni pahnih chuan an thâ pek lai bak la chhuah duh chuang hek lo le!chak zawka tlan hual lehin, "pakchhaih khah! khaw khat Sete kawlh ve ve, tu vaibeldawn tak maw lian lian!a chaklo zawk zawk chu vengmawng nuthlawi kakpui kai ching kawngtui thlauh thâ zawi niraw pip" tih paha an Vaibel theisaum chu rawn man sak thut thut țhinin, chuta chinah chiah chuan, a ruka vengmawng nuthlawi lo rim ching tha zawi nih chu anni pahnih chuan an duh talo kher mai!reiloteah nasa zeta innuai chho zui nghalin, Thingzawl khaw Zawlbuk chhuat rawchang dap kalh phui mup mai chu a sukin a su kul ta dulh dulh mai a..An chutih tawh hnu pawh chuan Laikunga chuan nasa zawka fuih so leh sauh sauhin, tlangval 'haw haw' thawm nen, Zawlbuk bang hmun hrang hrang te chu mi-anglo dul tiat tiatin pawn lamah a rawn puar pawp pawp tawh mai a.

Zakulha chuan a bitum pa chuan thâ lamah pawh a khan titih thial thial ani tih chu a man chiang tawhin, Tlangvela anga thâ nei hi a ralnawp tawhte ah pawh ala hmachhawn lo tih a hre tawh riau mai a.chuvang chuan, a thâ fei zawk zawk chu an dingchang dawn tih ngaihtuah pha ranin, Tlangvela chu a thapui nen meuh a țang ru tawh ani tih pawh a man viau tawha.chuvang chuan, a rilru chu uluk zeta hmang chho zui nghalin, Tlangvel'an vawrh tuma a rawn man rual chuan tlema lo kun zauhin, a sir veilamah a per kual phei ta nalh a.chuveleh Tlangvela chuan a hma aia a tumdan rawn bawh fuh ngei tuma țan rawn la lehin, Zakulha chuan Zawlbuk bang chhak lam hret chu Tlangvela melh ran chung chuan a han pan leh hret a.a duhna hmun tak a thlen hnu chuan nui sang chunga ding kak deuh tâiin, Tkangvela rawn thawh leh hun chu a nghak ta a..

Tlangvela chuan chutia Zakulha'n a rawn bawh hmasa ta mailo chu tlemin a thâpui a chawlhpui deuh ania nge tia ngaiin, chutia a thapui a thlah lai tak niawma a rin chu rang mangkengin, a thapui a rawn lak ve hma a keuh tum chuan a bawh phei ta zuaih mai a.mahse, chutia alo hisap rukna chu a tihsual zia chiang zeta rawn lang nghalin, Zakulha a han nangching chiah tihah chuan Zakulha chu rang em ema lo kun thutin, chutia a kun ruala ava bawh tleu puat rual chiah chuan Zakulha chuan hnuai lam ațang chuan Zawlbuk bang chhak lam deng dawp khawp chuan a rawn leh vawrh kang ta vawh mai a..

Chutah zet zawng Tlangvela meuh pawh a tlakna lamah chuan a hnang nasain, Zawlbuk bang deng dawt dawt khawpa vawithum ve ve an invawrh tawn zak zak hnuah a vawili nan Zakulha chuan a si li phurh ta ani tih chu Tlangvela chuan a in hre chiang hle a.mahse, a tha zawi hmasa sa chu a ruk a rala vengmawng nuthlawi kakpui lo tal nâl țhintu leh chu avanga thâ zawi hma zawka puh anni ngei dawn tih a hre tawh bawk si.la hnang ul ul chung chuan Zakulha țanhmun lo rem fel leh der tawh lai chu hmachhawn phei lehin, a si bat rulh ngei tum chuan a nawr phei leh ta a.chuveleh Zakulha chuan Tlangvela rawn intin puk phei lai chu rang lutuka lo zuan thutin, a nanchin rual chuan a bawp pahnih chuan a kawngah chep bet nghal chatin chutih rual deuhthaw chuan Tlangvela kapkarah chuan a taksa zawng chu intheh luh nghal zuaih pah chuan, a bawp pahnih chuan Tlangvela chu a kawng țan chhan chuan a han kherh bawkkhup zui nghal țhuai mai a.chuta țanga Tlangvela rawn tho leh chuan a Hnar thi zawih zawih lai chu nui lui van chunga rawn hup nghalin, Zakulha'n a kherh bawhkhup țhuai na lama Zawlbuk chhuata a hnar a zuk sawh thi zawih zawih mai chu a si hnih phurhna leh a tlawmna a ni tih chu a rawn sawi chhuak ta a.chuveleh tlangval zawng zawng te au dur dur thawm chu thawklehkhatah reh nghal duakin, "ka tum loh a leiah țhiante thisen a chhuah tak chu!min ngaidam rawh khai, ka tumpui tawh zawng zawngah i thâ ala khauh ber mai e" ti a nui țha chunga Zakulha rawn phun zui ve sap chu nasa zeta au thawmin a zui leh ta hulh hulh a..Chumi tuk tukțhuan ei khama Lalnu Chhingpuii hoa ral an han rel leh zet chu tual pasalțha te leh Hrumcheuva te țhiandun thu chu a inhmu fuh chhoin, vahsan lak zawh hna awlah a thâ hlawm tur zawka an ngaih tawh Lal Chalruma khua Sialțum chu Darkai khua te'n luh chhuah sela, chutih chhung chuan Thingzawl khuain Lal Darlula khua Lungpher khanah an Silai anlo chhuang khat veka anga.

Sialțum khua te pui tura Lungpher ațanga Sialțum an rawn luhna tur khanah anlo chang thung ang,tichuan, Darkai ho chuan an duhtawka an chet hnuah Lungpher lam an rawn hawi zawm nghal zat anga.

Thingzawl khaw ho țanhmun an rawn fin hnu ah Lungpher chu an khawhnih infinin an luh chhuah tawh ang' tih chu an ralrel bilh chhilhna chu a ni ta a.hetia an chan ve ve tur an sawi fel hnu hian an rallak insem dan tur chu fel taka rel fel nghal vekin, Sialțum khua te ro leh țhi Darkai hoin an lak chu an chan ni nghal sela.

Lungpher khua te hnen ațanga an rallak te erawh chu an khawhnih infin khawmin luh chhuah tawh mahse, Thingzawl khua te'n a bo abang awm lovin an rût thung ang' tiin an rel fel leh ta ani..

Chutia engkim an han rel fel hnu chuan Hrumcheuva chuan mualkil Luaikunga pa chu be rawn deuh zauhin, "kan ralnawp hmabak ala in ûr puk dawn chauh nen, taitea hi tam han hrûtpui fo atan chuan a lainatawm ta riu e ka ti! a nungchang lah a zalin, ral leh Sapui tawh palh thulhah pawh kan veng ber lo thei tawh lo achha ani tawh a. chuvang chuan kan chet lak a tih țhuanawp mai hi ka hlauthawng ru deuh țhinin, nangin him takin lo kawl rih phawt la'ngin a pu te'n an rawn ngaihsak zui loh a leh keiin ka rawn lam leh mai a ta law'ng, a pum ilo hrai man chu rallak țhiin emaw darin emaw ka leh na'ng che" tiin Lungpher Lal tupa Khawzaliana chu mualkil Luaikunga pa hnenah chuan lo awmpui rih turin a han ngen a.chutia Hrumcheuva ngenna chu mualkil Luaikunga pa chuan rang taka lo rem tih sakin, "ani teh tak e maw, Sephung lai rual lek mah nise a Nu ngaiin thingchangvar hun chho velah a insut ru ve fap fap țhin e tih mai loh hi chu a fel reuh phian ania. mahse, hetia a țap lai hi han phawk ila a kutzungpui a fawp vata a mu ngawi veleh hle hle mai țhin a.chaw a ei lahin a inthlahrung thei em em mai bawk si!naupang mak reuh deuh mai i nih reuh hi maw ka ti ka ti mai e.rawn ngaihtuah duh ûk suh khai, a rilfang hnawh puar man zawng ka phut lul love" a rawn ti ta charh charh a..

Zan lamah chuan Hrumcheuva te pathum chuan Lal In chu Valupa Țialchhuma hoa kai leh diakin, mualkil dang te nen Chhingpuii te nufa nen an titi a kai rual leh ta viau a.mahse, chutihlai chuan a hun hnuhnung chu pasalțha rothap Hrumcheuva chuan engangin nge a hman țangkai dawn tih lam chu ngaihtuah kai chho țanin, a tuk varțiana Zakulha nen Sawiluaia nen Sialțum khua te laka rawlrala che turin an chhuah leh tawh dawn avangin a hun neih chu beitham a ti hle tawh a.chutihlaiin, Chhingpuii lahin a rawn awn ve em emin a hre țeuh bawk silo.hun rei tak alo vei tawh chu luh pawhna hun a melh ru ve nasa hle a.chutia an țhianpa thu vei nei chu Zakulha leh Sawiluaia te lah chuan an hre thiam mawlh bawk silo!

valupa Țialchhuma erawh chuan a țhianpa Hrumcheuva mize zal raih mai chu chinfelpui dan tur ngawt lo dap ru ve in, Chhingpuii Nu hoa mualkil te leh pasalțha ho an titi laih laih lai chuan a tui a hâl thu sawi zauh pahin pathlang thim lama tuium hunna chu a han pan thla a.tuium a han lek kan lai chuan a tuium vawnna chu hmet pial deuh palhin, tuium thlauh a hlauh lutukna lamah chuan a kut lehlama a fenthlir ken chu a han thlauh keh ta rap rap a.chuveleh Chhingpuii chu fenthlir thar nen rang zeta rawn kal thuaiin, "ku Țiala chu zupui i rui ta nge ni! khatia i rik tak khut khut chu" ti a nui san san chung chuan Țialchhuma țhutsawp deuh nulhna bulah chuan kûn dâ chungin fenthlir keh chu a han chhar khawm a.chuveleh valupa Țialchhuma hmui chu Chhingpuii dar chung lawkah chuan midang zawng te hriat loh tawk lek chuan phe deuh zauhin, chutia a han phun sup hnu chuan Chhingpuii chu ngawi renga buk zauh pah chuan fenthlir keh keng țan chungin sumhmun lamah a phei ta a.reiloteah rawn lut leh thuaiin fenthlir keh a zuk chhar khawm lai ai chuan a ngawichawi zui ta riau a.mahse, mualkil te chuan an Lalnu mize inthlak deuh tlat chu an hriatpui hauh lo tih hriat zeta an vai chuan tui zeta titi la vawrh zui zelin, lenghawn-arin khua a rawn thawt thliai thliai thleng chuan Chhingpuii nu ho chuan khunkhan zetin anla titi sar sar hlawm a..

Zan a han rei chhova, thla hnu nawi lam Seki raih pawh vanlaizawlah a invawrh kual raih tawh a.chutihlai chuan Zawlbuk pawh hnar ri nen, a khat tawka puitling țhankin ngum khi tawh tih hriat zet hapui țhial leh buk buk țhin ri nen, pathlawi zang hang Laikunga zanlai chho pawhin a chin țhan dan zetin a hmui chhah zet chu chilthli per sung sung khawpin a rawn ham phe leh hlurh hlurh tawh a.chuveleh Zawlbuk pathlang lama mu, pathlawi ve bawk Chhingbawnga pawhin an zan tin danin Laikunga hmui ham ri thlurh thlurh chu rang taka thlang lam ațang chuan rawn do chho zui ve nghalin, hmui kûm phat phat chung chuan a hnar zawnga a dang chung lama a lei bet leh țhin chu Laikunga hmui ham phe hlurh hlurh ri chawih zet chuan a rawn tlak rik chhilh leh tlak tlak tawh a..

Chutah chiah chuan valupa Țialchhuma chuan an pathlawi pahnih te'n an zantin danin zanlai dar an rawn khawng ri leh tawh ani tih chu hrethiam thuain, thawmdim zetin Zawlbuk Bawhbel lam hnaiha Hrumcheuva mutna lam pan chuan a vak phei ta hriau hriau a.a va thlen chuan Hrumcheuva lah alo la muhil lo nasa mai tih chu rang taka hre thuaiin, an pahnih chuan Zawlbuk Bawhbel chu an han bawh liam ta thuai a.
pawn an han thlen hnu erawh chuan harsatna lian tak an tawk ta!

Hrumcheuva chuan amah chauha kal turah alo inngai hauh lo mai le!khur titih chung chuan valupa Țialchhuma chu kal ve mai tura sawm leh țhinin, Țialchhuma lahin mipahnih te inkar sawifel tu tur nia a inhriat loh thu sawiin a țang nasa mai bawk si.an han inhnial rei tak deuh hnu phei chuan Hrumcheuva meuh pawh a vawikhat nan titau deuh run chunga Zawlbuk bawhbel lamah vak let phei lehin, Țialchhuma lahin Zawlbuka a țhianpa vah luh tum lai chu pawh chhuah leh tumin a bei nasa ta mai a.chutia an inchei lai chuan thawm dim angai bawk nen, Țialchhuma chuan Hrumcheuva beng bulah chuan thu awmze nei zet sawi zui sapin, a thu sawi avang chuan Hrumcheuva chu a tang ta hrû mai a.chumi hnu chuan an pahnih chuan Lal mual lam chu pan thla dunin Lalnu Chhingpuii te luhkapui ban bul lawkah chuan mi pahnih te chu an kun dun ta dû a..

Tuiburhmuamda chanve vel tura rei ngawi renga an din dun hnu chuan Lal sumhmun chhuat chu zawi te in a rawn ri ta țhiap țhiap a.chuveleh an buaina ngai bawkah mipahnih te chu buai leh nghalin, pakhatin luhkapui ban vuana pakhat zawk țang țung mai chu pawh kal tumin a bei lah ta fuat fuat mai le!chutia pakhatin a pawh lai chuan pakhat lah chuan luhkapui ban chu thlah a hnekin nghet zawka dawm sauh sauhin, a pawt tupain thâ a han thlah zeuh karlakah chuan a kephah arh zet chuan luhkapui ban chu ala han kherh bet zui ta deuh deuh lehnghal a.chutah meuh zawng valupa Țialchhuma tihngaihna hre tawh lo chuan, luhkapui ban kuah run chunga a ke lama la kherh nghet sauh sauh tu Hrumcheuva chu zawi sapa zunram thiar lawk a duh thu hrilh ngawtin, mualkil pakhat sumhmun thim lam ațangin Zalbuk a pan chhoh san ta tho a.

Țialchhuma a han pil hnu chuan Hrumcheuva chuan alo zui ta mai lo kha inchhir zet chunga Lal sumhmun lam chu melh chho rulh rulhin, "ral hmatawngah lu sawm khai thei khawpin ka hming chher tawh mah ila, a bahsam sei chi nawp leh a khawivahlawi hrût lamah zawng Hrumcheuva pawh ka 'cheu' hlei theilo anih hi maw, saphu te chuan kawr an nei Hrumcheuva erawh chuan kawr anei velo, theih nise saphu te anga mahni kawra luh pil daih mai ka nuam mang e" tiin a ngaihtuah ta rum rum a,a chutih lai lai chuan Lal sumhmun bang phen ațang chuan, zawi muanga hmai fang duhawm lutuk tak mai rawn lawr dâk dâk lai chu Hrumcheuva chuan chiang zeta han hmu thutin, a tukkhum te chu a hik chuaih chuaihin a hre ta mai a.reiloteah a lu te chu rawn hai deuh muai muaiin, a taksa pum mai chu a rawn lum chhuak pup pup mai bawk a.mahse, a tan han tlanchhiatna chi a ni tawh mawlh silo.hmanlai huna Lusei Lal chi te nihna alo san veng veng zia hi heti khawpa hnamchawm tlangval ten, Lal thisen kai nula te an lo zah leh an chhai phak rual lohva anlo ngai tlat țhin hian a hril chiang hle mai! hei vang hian Lal thisen kai Nula te hian hnamchawm tlangval an hmangaih tlat chuan an mahni zawkin hreh ve chung chungin hma an lak hmasak angai ve fova.chutak chu Lalnu Chhingpuii pawh hian Hrumcheuva leh valupa Țialchhuma te inchai lai khan lo man thiam hman vekin, a mah zawk chu luhkapuiah chuan muangchangin a rawn chhuak ta hnap hnap a..

Sialțum Lal Inchhung chu an Lal Chalruma inhrosa thawm chuan a luah khat hneh hle a,a han inhrosak rei deuh hnu phei chuan a banglaia milulakchem inthiat tle vur mai chu ri ziau puat khawpa nâ a phawi chhuakin, "ka tlangah ral ka rel laiin Darkai Lal Keihranga'n ka luh khalh e min ti vei maw!!?

. Lal Keihranga, lo ngai reng rawh khai, ka makpa Hnawma phuba chu ka la rawn lam tho tho dawn e, huai hote chet thawh lak dan chhuahin ka unau Lal Darlula lakah hlei i lo len man chu i thisen ngei khan i rul ang" tih khur khur pah chuan a Chem ken lai chu a mualkil te lu chungah chuan a vai leu puat puat mai a.a duhtawk a han ngah hnu chuan a makpa pasalțha tawrawt em em mai, Lal Darlula pasalțha te laka Huai chet dan va thlithaia lo haw leh hlim hlawt Tawnzinga lam chu hawi lehin, "nang nge nge zawng ka u Lal darlula pasalțha te mit fin i khalh nge nge e.nang meuh zawngin huai hote kut thawh leh mihring hnu chu i thliar fel hle mai e maw" tih pah chuan a makpa Ralzinga chu zuno tawk tum chuan zubel chu a pan ta chhur chhur a.

chutihlai chuan Ralzinga chuan Lal Darlula pasalțha te laka chet la tute chu Darkai ho an nih loh chuan khawi khaw pasalțha te mah an nih a rin loh thu rawn sawi leh bul bulin, "kan pu tupa pu bo tute leh khang mite kha thuhmun an ni e.a chutih nak nakah chuan, kan pu Lal Rumvuta laka chet thawh tute leh tuna Lal Darlula chunga chet la tute hi thuhmun an niin, chhak Lal Taikherha pasalțha te kha an ni ang tih hi ka chhui zawn titih thei e" a han ti leh a.

Chu thu meuh chuan Lal Chalruma thin chu ati tawt thar lehin, ral bawh han rawt nghal ngawt dawn se a u Lal Darlula chuan pasalțha thâ khauh tih tham anei tawh manglo tih a hre tawh bawk si.

Lal Rumvuta lah kutbenga rawn inkawi lut anih zia lah a hre chiang si. chu achhapah, Darkai khua te hi Thingzawl khua te'n an rawn thlawp mek tawh ani tih hi hre lehzel phei sela chuan, an ralrel an bawh fuh loh zia hi a hre chiang viau ang le.mahse, a hriat loh lama an unau thum chan chauh tawh zia hi engmah a hriat loh avangin an upa ber Lal Darlula pasalțha te tel lo pawh hian Darkai khua hi a hmeh mih mai theih la ring ru deuh chunga ralrel țhat leh chu rawn rawt chhuak leh ngatin, "kan tupa taitea chin hi kan bih leh thuak anga.mahse, kan hmu emaw hmu lo emaw ni thum bak kan dap lovanga, a lehpek hun chu Darkai lam hawiin kan rammu tawh ang" tih pah chuan a makpa Ralzinga bawk chu a han melh leh kuau a.chutia an Lalpa 'aw' ki rawn thlak ta deuh chu țih deuh taka la ngawi țhap mualkil te chuan lo buk chhilh tliar tliar chunga ralrel thu thar dang chu rawn lakai chho țanin, lenghawn-ar a khuan hnu lawk chuan Lal In chu an țin san ta a.

[Ngaia]

Bung-67

Thingzawl khua a Ni hnih an han cham khawmuan hnu chuan Hrumcheuva te pathum pawhin an ralrel bawh tura Darkai lam pan pawh an inpeih leh ta at at hle e.abikin Chhingpuii nena an inkar an suih fel tawh avangin Hrumcheuva meuh pawh a hawina lam apiangah a kîk ru deuh sak sak reng tawh mai a.mahse, heti khawp hian a thinlung Lalnu Chhingpuii lakah hian tla tlum tawh mahse, a khat tawka a thinlung rawn luh sa leh phat phat țhin tu, Setlak ngaw' a thil thleng avang khan engtiangin nge a rilru a siam dawn tihah chuan a ngaihtuahna te chu buai leh deuh that that țhinin, an han chhuah dawn ni meuh chuan varțianah Lalnu Chhingpuii te nufa hmu tur chuan tuma hmuh lohin Lal In a kai ta nge nge a.

Kawngka a a han dah luh rual chuan Chhingpuii'n thuk mei alo nun kât kât lai chu lai deuh țut, mahse hlim ru zet si a a 'aw' chu then khum deuh kharh kharhin, "tuk zing țhang țhangah hei ka rawn kai hlawl mai e!awmlo ngena rawn kaiah min ngai suh la'ngin, phawk loh tur tur phawkah ka inngai love" hawihhawm takin a han ti a.

Hrumcheuva rawn phun lut sap chu Chhingpuii chuan tu 'aw' nge alo hai lo hle tih hriat zeta nui san san chunga rang zeta rawn hawi chhuak thuaiin, "nizan lam lam khan thimțin zuia liam i rawt chuk si, tun ang hunah i hmel hmuh kalo inring tawh îk lo a sin le!a eng thu bilh kengin nge i tum dan i rawn thlak thut mai chu"!? ti a zawhna pek zui zat pah chuan a sam chhawl leng tle sar mai chu a kut zum sal mai chuan a han huih kiang thuai a.chuveleh Hrumcheuva chuan Chhingpuii hmel chu chiang zeta melh deuh ranin, a nu leh amah chu a kal hma a hmuh leh lawk a duh thu sawi leh zauh pah chuan, rilru pangkhing tih hriat zet leh vei nei tih hriat zetin a han thaw deuh huai a.Chhingpuii chuan Hrumcheuva awm dan chu rang taka lo man thiam thuaiin, "i thu lak dan chu hre uk rihlo mah ila, i hmelah i ngaihtuahna a inhnuk hnawk deuh tih ka chhiar thei mai e,ka nu pawh a rawn harh țep tawh ang.hawh awi, ka tuibur al hi han hmuam tawh khai" tih pah chuan 'hâite' (tuibur dahna, tuithawl chikhat, tereuhte kuttum tiat vel, tle deuh hlarh) chu Hrumcheuva lamah chuan a han lek va a.

Chutia tubur an ințheh lai vel chuan Lalnu Roluti pawh khum-ai lam ațang chuan rawn innuai phei nauh nauhin, Hrumcheuva chu thawhphan pawh nei lovin a rawn chhawn nghal sawk sawk a.chutia Lalnu Roluti rawn țawng sar sar chu Hrumcheuva chuan zah thiam tak chunga eng thu emaw sawipui lawk a duh thua lo chhang ve thuaiin, "thimțin zuia liam ka han ti thlu viau na chungin, ka thu bilh khat thawt hmuh lo che a inchhir liam mai zawng ka ngaih a ngam leh ta zan lo mai a.rem i tih chuan ka thu keu hmuh tur che hi min ngaihthlak sak thei dah law'm maw" a han ti leh a.

Chutia Hrumcheuva'n thu pawimawh a sawipui a duh tih a han hriat chuan Lalnu Roluti chuan Chhingpuii chu kawmchhaka an thing-ai chheh chhep țha tur chuan tir nghalin, Hrumcheuva chu khumpui kawm biru lamah a hui phei ta a.an han inmelh tawn deuh ran lai chuan a thu keu hmuh tur chu enge a nih reng tih zawhna chu Lalnu Roluti chuan Hrumcheuva chu zawt nghal thuaiin, "Chhingpuii pa Lal Khamruma pasalțha te zinga ami pakhat, pasalțha Suakvela kha a hmai tlang nen lam ila mitthla thiamin ka ringa.pasalțha Suakvela kha Lal Saiphunga khua Mualtlangah kaiin, kan Lal Taikherha leh kan mite hnu kan chhuina lamah a țawngka kan dawng ta a. chuta țang chuan a thu min bilh ruk chu tun thlenga mutmawh hnarmawhah nei zui zelin, kei leh Zakulha te hian englai mahin pasalțha Suakvela thu min bilh ruk hi kan hran san ngai lo ani ber e" ti a a bul lam ațanga a țan chhoh hnuah hun rei tak ata tawh a thu vei chu Lalnu Roluti hnenah chuan tiang hian Hrumcheuva chuan a han sawi sawi ta a.

Suakvela chuan a thusawi lai chu rawn sawi zawm lehin; zanlai furchhe fem airuah baw hawkin Setlak ruam a bawh churh churh lai chuan, chu ngawpui hnuai luite kam thim ruih hnuaia, changpui hna sawh hliah hual pap chhung mei êng thlarah chuan, Lal Taikherha te Nupa leh hmeichhe sawm te chu an lu a thikhar kai khawn ih-iah chung leh phuar khawng tlat chunga, an phuar behna thing ngheng chuan ding kun nghiaiin, an mahni vengtu Rawlthar pathum te chu an hnung lama thingtuaia an darpheng thlawpa phuar kap phar dârh chung chuan, Pasalțha tawrawt leh nunrawng zet Kapluia hmaah chuan an țhingțhi țhap mai a. chutih lai chuan, kiltin mai chu Kapluia hote, mi sawmhnih dawn chuan Fei leh silai nen veng phui vekin, Lal Taikherha mite zing ami, naupang pathum te hnuh țé rawng rawng pah chuan an hotupa inhrosa lai chu ngawi rengin an thlir țhap mai bawk a.

Kapluia chuan la inhrosak reng paha Lal Taikherha chu pan pheiin, "thlang kan tlak khalh hnu lawk che khan, i 'Sialman dar' nen khan thlang i rawn tlâ ve thial e tih hi ka hai love. i lawina tlang chhui ru reng renga hmanhlel hian, chhungpuinu te mawng hnawn zai pawh ka chhah lohna a rei ta e! i Pasalțha Cheûva leh Kawla te chu thla ngamna tlak an awm tawh hlei lawng e, Halkha leh Thlanrawn hoin an luhrum an kêk filh pak tawh ngei ang le! i 'Sialman dar' i phum rukna chu min chhir pawh pui la, nang leh i khaw mite hi kan Lal ropui leh țha zet hnenah, him takin ka kâwi thleng ngei ang che u" thlem titih, vau titih chung chuan a han ti zawi sup a.

Kapluia thupui thlan kam keu chhen mai chuan Lal Taikherha chu a ti ngawltawt leh tawhin, "i thil tih hi in Lal Khamruma chuan a hriatpui meuh che maw!?, Lal Khamruma chu Lal țha leh nun tluang nia ka hriat țhin si ni! ka khua te hian Lal Khamruma hi hre hlawm mah suhse, kei chuan a chanchin hi ka hre nual e. a zepui thlakin nang hi ka 'Sialman dar' min chhuh turin alo tir ru reng che a maw"!? thinrim leh mak tihna hmel pu nasa zet chung chuan Lal Taikherha chuan a rawn ti ve ta hrâk a. mahse Kapluia chuan, Lal Taikherha țawng chu hrelo ang mai a lo nuih liamin, "tu thu pek leh tirh ka nih hi sawi hluah a ngai tawh lo-ve, i awih leh awih loh chu i thu a ni e. vawikhat chiah ka zawt leh ang che, i 'Sialman dar' chu kawnge a awm"? a han ti vin leh ta tuarh mai a. mahse, Lal Taikherha chu fiah taka meng kalh chunga rawn dak chhuak lehin, Thingzawl Lal Khamruma leh a Pasalțha verther Kapluia chuan engti kawng maha a 'Sialman dar' chu an hmuh dawn loh thu rawn sawi lehin, a thu tawp nan chuan, dawihzep taka tlawm ai chuan thih a thlan zawk thu chu a rawn sawi nawn leh ta a.

Chutah zet chuan, Kapluia thinrim tertet chuan a tlin ta ngang lo! Lal Taikherha te nupa leh hmeichhe ho veng tu Rawlthar rual te an phuar behna lamah chuan rang taka tlan pheiin, a Milulak chem chu Rawlthar pathum zangphar dâr chunga an phuar, luikam dum chiau perpur chunga an țhingțhit tlar tir te nghawng zawnah chuan a vai sen ta puat puat mai a! chutah meuh chuan, hmeichhe ho chu an lo țê nasain, an mahni venga hah leh rilțam pawh sawilo leh, zan mut muan hun pawh nei lova englai pawha hlim hmel la pu sang reng thei te lu bung nuaih leh, thisen luang nguah nguah chunga an thihsual tal fat fat lai chu țap leh tal chungin an hawi sawn san țawk țawk hlawm a.

Chutihlai chuan Kapluia lah chuan, a milulak chem chu thisen dir tluk tluk chunga la lek vu chung chuan, "naute u, i chhir liam teh ang u khai, chhak Lal tlawm Taikherha leh a hmei kawi te hi chu, Sapui leh Rammi te tha zât chhawn lekah tlu hlum phiar teh se'ng" tih pah chuan meichher a siam zui ta mial mial a. an hotupa thu pek avang chuan an vai chuan meichher chu rawn puah ve sap sapin, an inpeih hnu chuan Lal Taikherha te nupa leh a khaw mite chu an liam san ta diak a. mahse, thui an kal hma chuan, an zinga pakhat Suakvela chuan an hotupa Kapluia chu ko pengin, "ti khan lo han kal ta ula, kei zawng kan kalsan tak hmeichhia leh naupang te kha ka thlah ve thei ngang love! a țul leh an bulah ka tap ve mai ta law'ng" a rawn ti chhuak ta phawng mai a! Suakvela thu rawn sawi chuan Kapluia chu a ti thinrimin, "a chuti zawng chuan maw kei hi min phatsan dawn a!!?, țhianțha tiin, hei leh chen hi Aikhat hnah kan phah dun tawh a ni lawm ni? a tu ber khan nge ni i chhungpuinu kakpui lo hnualsuat tir hman che chu ni"!? tih pah chuan Suakvela nghawng leh a milulak Chem zangkul chu a chuktuah ta run mai a.

Suakvela leh an hotupa innawr nawk nawk lai chu midang te chuan țhelh tuma rawn zimin, thulai lak dan tur an zawng nasa hlawm mai a. Suakvela lah diau tawh bik hek suh! Kapluia'n a nghawnga thisen far zawih zawih khawpa, a Chem a nawr tawlh țan lai te chuan a milulak Chem chu hnuai lamah alo hum ruh ve țalh țalh mai a. mahse, țul lo taka Kapluia laka thih ngawt ai chuan, dam khaw chhuah phawta Lal Taikherha leh a khaw mite hnu chu chhui zui leh chu țhain a hre ta a. chuvang chuan, Kapluia lakah chuan a 'tlawm' thu chu rawn sawi chhuakin, rilru pangkhing zet chung chuan an zingah chuan a kal ve leh ta zawk a. mahse, an khua Thingzawl an thlen hma zawng chuan Kapluia leh midang zawng te chuan, rum zet zeta melh paha vau zui chhar chhar hlawmin! Lal Taikherha leh a khaw mite chunga an chet dan chu a dam chhung zawnga tu hnenahmah sawi lo turin an vau nasa hle a. chu achhapah, a sawi chhuak tih an hriat vaih chuan, amah mai nilo a nupui leh a fate, a nu leh pate thlenga an thah vek tur thu chu an chham awl lo bawk a. Suakvela pawh chuan an vauna chu an ti duh tak tak mai dawn tih a hriat chian avang chuan, rilru pangkhing zet chungin a ngawih san ta hrama a. mahse, chuti chung pawh chuan Kapluia chuan ala duhtawk mai tlat lo! chhe chham meuha tiam tura Suakvela chu nawr lehin, a chan chhe zawk Suakvela chuan harsa ti zet chung chuan Kapluia leh midang te lakah chuan chhia chu a chham ta nge nge a.

Chuta țanga thla tam a liam hma chuan Suakvela chuan Kapluia leh midang te vauna thu dawn zui reng chu nuam a tih sen tak loh avang chuan, a ruka a chhungte chu kawi chhuak vekin, Lal Saiphunga khua Mualtlang chu a kaipui ta diak a. mahse, an kaina khua Lal Saiphunga khua a In an han khawr pum fel ve hnu ațanga reiloteah chuan, Lal Saiphunga Sal te chhungkua, Lal Saiphunga hmei Nuthlai Dawni te Loa chhungkua a khawsa chawt mai te chu Lal Taikherha te nupa leh an Fanu te kha an lo nireng mai tih chu a hre chhuak ta a! chutah zet phei chuan, a thutiam kha sawi chhuah loha, kâ neilo anga khawsak tlang zel chu tum leh ta zawkin, mualkil leh Pa awmthei ho pawh chuan Lal Taikherha khaw mi, hmeichhe ho pawh kha sal chhawrin an lo chhawr fai diak a ni tih chu a hre leh ta zel a ni.

Hrumcheûva leh Zakulha te chu Pu Suakvela thu rawn sawi chipchiar zawk chuan a ti nâ zualin, Chhingpuii pu Thingzawl Lal thi tawh Khamruma chu a khaw mi ten a chanchin an sawi dan leh pu Suakvela'n a sawi dan chu inpersan an ti ta hle mai a! chu achhapah, an Lal Taikherha leh an khaw mite laka Chemhar len tu alo ni tlat mai te chu nâ an ti zualin, an mak ti lutuk chu an 'chék' dun tlawk tlawk mai a. Hrumcheûva phei chuan a tuar nâ zualin "aw Chhingpui, Lal țha leh zaidam nia kan hriat, i Pu Lal Khamruma leh a Pasalțha Kapluia vangin 'Leido' kan chang dawn ta maw!?, i lenna tlang kai leh hun chuan, darbiahnem banin, ka lairil luah tu ka thudi khawl khawm te hi i tawnah ka ka hlan nang che tiin ka tiam tawh si a. mahse, biahnem thudi aiah 'Chemhar' kan chhuah dawn tak si a maw Chhingpui" a ti rilru ta vawng vawng mai a. tumah lah chuan Hrumcheûva thinlung rum ri chu an hre ve mawlh silo! Lusei Pasalțha rothap Hrumcheûva meuh pawh, 'Hmangaihna duhawm leh mawi tak, hring fate zawm tu duhawm ber leh Milulak Chem zangkul inkarah dingin, hawina lam tur hre tawh lo khawpa mangangin a 'hui' ta pap pap a.

Hrumcheuva'n a pasal Lal Khamruma damlaia an pasalțha daido, an kutke ber pakhat, a chin bih fuh zui tur awm lek lova a chhungte nena bo ta diak Suakvela thusawi a han sawi chhawn zawh rual chuan Lalnu Roluti chu mittui far zawih zawih chunga kûn nghal hnâwpin, "Chemteii pa, i chhungpuinu fin hian i rorel ka bilh fel ve phak lul tawh love maw!kan pasalțha Kapluia i rin luatah pasalțha Suakvela kanlo chan reng mai e maw!chu achhapah, pialral min kai san ni thleng khan tuna ka thu hriat hi i hre lo chu ani si a amw"!!!ti a rawn chham chhuakin a țap ta zawih zawih mai a.

Chutah meuh chuan Hrumcheuva chu a ngaihna hrelo zeta meng phawk deuh runin, Lalnu Roluti la țap fap fap lai melh zauh pah chuan a rilrua zawhna rawn lut zut zut chu khunkhan zetin a han ngaihtuah țha leh a.mahse, chutia a ngaihtuahna a kawm lai tak chuan Lalnu Roluti chuan 'aw' la lawi deuh rat chunga thil awmdan chu rawn sawi fiah leh vatin, "cheka chekah, thu valh man fu chat lovin chhak pasalțha te nen kan lo inhmelmak hman lek lek anih hi le" ti a bul rawn țan lehin, an pasalțha daido ber Kapluia kha Lusei Lal Taikherha leh a kawi te vakvai hruai chhuak tura a pasal Lal Khamruma'n a tirh thu te.a kaihza veng tu atan pasalțha Suakvela leh tlangval engemaw zat an tirh tel thu te nen, Kapluia rawn let leh khan Lal Taikherha leh a kawi te chu an chin a bih fuh loh thu leh beidawnga a rawn let leh thu a sawi ta mai tih te chu a sawi chhuak ta vek a.chutia a pasalțha rin berin a sawi tak si ah chuan, Lal țha leh ngil Lal Khamruma chuan Kapluia thusawi chu ihe lova a pawm tak mai thu leh Lusei Lal tlang dang țhut tu emaw talin Lal Taikherha leh a kawi te chu lo tuam hlawm tura a duh thu tal ala chhak chhuah thu te sawi chho zelin, a hnu lawka Kapluia ruala a tirh ve, pasalțha Suakvela leh a chhungte pem bo ta daih erawh chu a pasal Lal Khamruma khan a ngaih thiam theih loh thu nen, a daido meuh Sualkvela kha pembo daih duh khawpa a laka thil diklo atih loh zia a sawi fo thu te chu a sawi ta vek a.

Chutah zet chuan Lalnu Roluti leh Hrumcheuva te chuan an thu kal dan zawng zawng chu chiang zeta hre chhuakin, pasalțha Kapluia khan Lal Khamruma chu phatsanin Lal Taikherha leh a kawi te vakvai lai lainat taka a khua a hruai tura a tirh lai khan Lal Taikherha chu Kapluia khan ralnawp takin a nawp ta zawk hlauh tih leh, a ro neih țha ber 'Sialman-dar' chhuh luih tumin țan a la ta hlauh tihte nen lam an hre ta vek a.chu achhapah, Thingzawl pasalțha te zinga a rothap ber leh hruanghrau nâ ber nge nge Kapluia chuan pasalțha Suakvela pawh kha vau bet zui zelin, Thingzawl a awm khaw nuamlo zeta awm reng ai chuan tiin a sawi ang ngeiin Mualtlang Lal Saiphunga a bel ta ani tih te chu an hre chiang ta hle a.

Chutia an thu bul leh bal an han inchhui hmuh dun hnu chuan Lalnu Roluti leh Hrumcheuva te chu inpawh zeta inkawm zui zelin, "sual chu bilh bo hlen theih a ni ngai love Lalnu, chu achhapah, thaba leh saihlum a nget thei lo ang bawkin, an phuba kan lam sak hma chuan kan Lalpa veng tu kan rawlthar pathum te thlâ hi pialral kawngah ți zetin anla tâp ngei dawn tih hi a chiang ta kelh a.mahse, pasalțha verther zet Kapluia hnuk hrulah hian i inrawlh velo ani tih hi i khaw mite hian an hriat a ngai e" a han ti a.mahse, chutia ama hming chhiat theihna tur laka veng zet chunga Hrumcheuva thu rawn lak dan chu Lalnu Roluti chuan alo la thu tak viau mai tih chu a rawn chhan let danah chuan chiang taka rawn lang nghal thuaiin, "pialral a kai ni thlenga dawt valha ka pasal phih-awk tu Kapluia dawt bawl hi tlang ka than tir ngei ang a,a hnuk erawh i tih tihin ti la, a thisen mawh pawh ama chungah tla rawhse. ma,rawh chu Kapluia hi a kum alo chal ve deuh dawn tawh nen, hun enge maw ti ațang khan 'ngawr' hriin a bawh țan tlat mai a.kei lahin ka pasal damlai ata tawh kan daido tiin, a khat tawkin pasalțha bawksawp ta na na na chu ka kàn awl lova.chuvang chuan, ka sawi tawh ang khan ka tih tur ka hlen bak a hnu lam chu i kutah awm teh se'ng" a rawn ti leh ta a.

Chutihlai tak chuan Chhingpuii chuan kawngkapui cha 'aw' then zauh paha rawn sawn tawlhin, a nu leh Hrumcheiva te titi thu kal mek hre pha deuh ruaih chuan a rawn dak lut hman hlauh mai a.mahse, Lalnu Roluti chuan engkim hrilh mai chu țha a a hriat tho avang chuan Chhingpuii chu lo hui thuaiin, thil awm dan zawng zawng chu a hrilh fai ta leng a.anu thu hrilh avang chuan Chhingpuii chuan an In chara mualkil In pakhat, Hrangkunga pa In chu pan thuaiin a ruk deuh hlekin mualkil chu a han ko thuai a.chumi hnu, Nilu pawh a rawn mawm țan uk uk tawh tiah chuan mualkil dang zawng zawng te pawh chu kim taka Lal in rawn kai thuaiin, Hrumcheuva leh Lalnu Roluti te pahnih thu chhui fuh tak chu an zavai chuan a chin fel dan tur an ngaihtuah ho ta a.mahse, Hrumcheuva te țhian thum an in-ah liam ni tur alo nitawh bawk nen, an thu chai chu rang taka chai fel thuai angai tih chu an vaia an hriat tlan țheuh avang chuan, thunawi leh i neilovin tukțhuan bar hun hma chuan ruahmanna fel tak an siam fel ta thuai a.

An tum lawk ang ngeiin, Hrumcheuva leh Zakulha leh Sawiluaia te pathum chuan tukțhuan bar zawh veleh chuan Thingzawl chu chhuah sanin, khaw chhuah chhawng dai hmar lam hret chu an pan ta thuai a.mahse, dai tam chin an han pelh fel hnu lawk chuan khaw hmar zawng chuan an vai chuan kual lut thla lehin, hmar lam khaw daidoa inkhawr, pasalțha Kapluia kawmkar lamah chuan an pathum chuan an her lut ta a.dai an luh tak tak hma chuan hmun biru lai deuhah an vai chuan khua nghak leh hretin, Hrumcheuva chuan a tih tur hlen tur chu chiang zawkin Zakulha leh Sawiluaia te chu a han hrilh leh te te a.chumi hnuah a milulakchem tih loh, a Silai leh a Thalngul te chu Sawiluaia kutah chuan dah lehin khaw chhak lama Ni invawrh kang luah tawh chu an tawmna țhangbuk kar ațang chuan a han bih deuh ran a.

Tuiburhmuamda hnih dawn an han țhut ngawih țhap hnu chuan Thingzawl khaw thawm pawh a reh chho țan tawhin, fehrehsan hun an lut chho țan ta tih chu pasalțha pathum te chuan an hre thiam thuai a.chuveleh Hrumcheuva chuan a tihtur chu hlen tura an tawmna chu chhuah sanin, Zakulha leh Sawiluaia te hnenah chuan a tihtur chu a chinfel vat tur thu a han hrilh zui sap bawk a.

Hrumcheuva chuan a chhak lawka pasalțha In tih hriat zet, In lian zet leh a sumhmun velah pawh Salu chitin inthiat ther fûk mai chu kun deuh dâ chung chuan a pan chho hriau hriau zel a.fehrehsan lai tihtakah, a han thlen chhoh chuan a beisei ang ngeiin chu In bul vel lo reh dak chu remchangah hmang pah zelin, kawngkapui hnum hluau mai chu zawtein a han nawr tleng ta zal zal a.inchhung thim ruih mai a han rah rual chuan inchhung hmun tin mai chu uluk zeta melh kual nghal vat vatin, midang an awm leh awm loh te chu a han ngaichang rih a.mahse, ram tuk țul vanglai tihtakah chu ina cheng te chu chhungkaw tam lemlo anlo nibawk nen, fehrehsan hun a chang khiau chu tifuh a inti hle a.a duhtawk a han ngaihchan hnu chuan khumai lam chu a mit chuan ding taka melh phei țanin, din deuh dat pahin a milulakchem chu a kawng hruikhau veh kual ațang chuan a han phawi ta zal zal a.chumi hnuah a hma aia chak zawka khumpui lam chu pan leh nghal thuaiin, bang lam hawia pa pakhat lo mu, a pa rual lek lek vel tur, tar chhia tia han chhal tur aia la valai si, hrisel țha sela chuan Sapui pawh zang veh vawha la hmachhawn thei tur rual vel, pawnpui zial chhunga alo thaw deuh halh halh lai chu a han bih hnai ta a.

Pasalțha ral hrat tihtakah, Kapluia chuan a mah rawn hnaih tu hlauhawm lo thleng mek chu a ngaihtuahna mit ațang chuan chiang zetin alo man fu ve khiau tho mai!a hrawk hnawk zet chu theih tawpa then tuma insan mar pah chuan a lu chung maia hlauhawm rawn hnai zel chu thei leh thei lova hmuh tuma rawn inletin, a hmai zawn chiah mai ami hriat ngai miah loh, amah lo melh reng tu, han en mai pawha pasalțha rothap tih hriat zet, kum lamah pawh naupang chhe tala tal rual nitawh chiahlo tur hmel, fim zeta lo meng dê kalh mai chu a han hmu ta a.

Chuveleh a khum hnuai lam chu rang taka ban thla nghal thuaiin, a khum hnuaia a Fei rawlh chu phawi vat tum chuan a han țang nghal at a.mahse, chutia a han ban ruala hneh zeta a kut rawn elh sak tu chu a mah la melh reng tu chu ani tih a hre chiang hle bawk a.chutihlai chuan a hrawk rawn hnawk zual thut avang chuan thisen chhak per sak sak khawpa rawn khuh chhuakin, a ngawr hri vei nghawng avanga a chauh ngawih ngawihna chu a rawn lang chhuak nghal thuai a.mahse, chuti chung pawh chuan a ban elh sak tlat tu chuan a hmela huatna nasa zet rawn lang chhuak chunga amah chu rawn melh thip zual sauhin, "se-tlâk ngawah khan, Lal Taikherha kawi te zinga rawlthar pathum te kha i Lal Khamruma phatsanin an lu i lak sak amaw!?pasalțha daido inti ve lem, vertherna i inbual ât tir man chu i rulh turin i chanvoah ka bilh fel diam tawh e" a rawn ti chang fal ta mai a.

Chu thu zet chuan Thingzawl pasalțha Kapluia chêl chu a luh nâ ngang mai le!
thei leh thei lova a lu rawn tun hram hram pah chuan tham chhâl chunga rawn țawng chhuakin, "ngawi teh nauva, i mi vau hi Lal Khamruma thla thum bilh zubel tlanga dâk pha ngat, nopui dawma tlang tlir nawn awn awn thei khawp leh seluphan zar thei khawpa ral lu kuai tam tawh, Kaplukhaia ka ni tih hi hai mawlh suh khai.ka khumbet zal atalangin, ka thâ pekna lam lam i han dal ngam chu!mah reng rengse, Lal Taikherha laka Chemsen len tura min tur tu kha kan Lal Khamruma ngei a nihsi kha, a engti tiha a thu vuvûk la pawr zawnga min rawn vau tak ngal ngal chu" a han ti ve ta chhar chhar a.chutah chiah chuan Hrumcheuva thin chu a rawn so nasa zualin, "in Lal Khamruma thupek chu a valh sir lamah i beng per anih zawk kha le!

Lal Taikherha 'sialmandar' kha khaw hawi lo zetin i chuh ani lawm ni khah!i ro awh chilpût luatah i chilthli perin pasalțha Suakvela thin a dek țang ta viau a nih ngei si kha le" tih chang leh rât pah chuan Kapluia chu a pawnpui chhanah chuan a awm vun tel tâwk khawpa nâ a zuk sawh sakin, "pasalțha Suakvela nun khua pawh i phingchil khawloh zawh sak vek tawh hi!i chanvo tura ka valh hi pawh chip hnan lo che chuan i sumhmun saw ka kalhlen dawn lo.kan rawlthar pathum te thlarau khan i hnuk thlah lai an thlir duh e" a rawn ti thawp leh sat ta mai a.

Chutah zet chuan Kapluia chuan țan hmun han sawh ngheh leh ngaihna a hriat tawh loh avang chuan, thinrim khur dat dat chungin Hrumcheuva chu a han melh tur khaih a.chutihlai chuan Hrumcheuva lah chuan thinrim meng sen ram chung chuan alo melh ve bawk, a sual thu zeh bo avang chuan pang himin rei a mu tawh dawnlo tih te chu Kapluia chuan a ngaihtuah kai nghal kuarh kuarh tawh mai a.mahse, nasa zeta phatmarna tur a han ngaihtuah kual ngial pawh chuan phat leh chuanna tur a hriat tawh hlawl loh avangin chu pasalțha zam lo zet hmaah chuan khup deuh dai chunga rawn rum chhuak deuh dat datin, rawn intun chhuah țaih țaih pah chuan khumpui kawm chhak lam banga a milulakchem thiah tle var mai chu a han melh leh hram a.

chutihlai tak chuan Hrumcheuva chuan hnai zeta rawn bih paha thawp ril reih rawiha thu pakhat rawn lakai lehin, "i lakah zahngaihna pakhat chiah ka lan tir thei e.khumbet tha chaua nâ i nih avang hian, Lal muala inbitumpui tura hnuh chhuah tlakah ka ruat lo che. mahse, i verther zakkep hi Lalnu Roluti te nufa leh mualkil te hian an hre vek tawh si a! Lal mualah zanin tlai hian an chaih dawn che a, chu i chanvo tur chu tuma'n an tih nep sak thei lo che. i Lal i phatsan rah hi naghmah ngei hian i seng filh pak dawn tih hi ka chiang e. i duh i thlang thei ang, ka kutzala thih nge i duh tlang chaih hlum!? hei bak hi i lakah zahngaihna ka pe thei lo che" a han ti ta a.

chuveleh Kapluia chuan ngaihtuah buai lo zeta a duh chu rawn thlang fel thuaiin, "daido pasalțha ve meuh tlang chil rawn nih chu ka tan a thang tlawm thlak lua dawn e.
ka ruang daiin ral ena en a hlawha 'sahlam' a mawi zawngin 'thihthiap' ven loh pasalțha thla zawng Sapuiin a vel duh ahnu hmanah, ka ruang dai thlengin min khel filh hlauh dah ang e.mi hrang thiha thih chu ka tan a thlannahawm zawk a, i chem zalah ka tlu zawk tang e nauva" a rawn ti ta nge nge a.

Chuveleh Hrumcheuva chuan hun a ngah tawh lo tih chu hre chhuak zawk chung chuan, a milulakchem hriam zet chu khumpui kawma Kapluia țhu to larh nghawng zawnah chuan nâ zeta vai thlawk zui nghal puatin, ama Inchhung thim ruih hnuai chhuatlai ngeia Kapluia thih sual, a thisen nena intal kawih sen zek zuk chunga ala leng aih aih lai chu melh zauh pah chuan, pathlang lam fenthlir let bal lam pana a lu hlang lum thla liau liau lai chu Hrumcheuva chuan a milulakchem chuan tuidehna chhuat awngah chuan a tlak thlak palh hlau zet chunga hawlh din chaih pah chuan, a samzial hmawr lamah chuan a han khai zui va va a. chumi hnuah a luchhip vun chu zei zeta hlep zui nghal hlawihin sumhmun lam chu chak zeta pan pheiin dai lamah a pût bo zui ta a.

[Ngaia]

Bung-68

Chawhnu her nisa pawr lum huam huam pawh a dul chho țan tawh tihah chuan, veng mawng hmeithai Luti thing fawm tur dai hrut chuan pasalțha Kapluia inhnuaia thisen baw zeih zuih mai chu khur zawih zawih chung chuan a han bih hnai dak dak a.a han hawi zauh deuh hnu phei chuan chhuat kar awng ațanga thisen la rawn hnam țem țuam leh, chung chhuat awng dap kar hmun hrang hrang ațanga thikhar khang tawh rawn uai thla fan deh duah te chu chiang zeta hmu zui nghalin, "ral ral ral" ti a țe tung chungin Lal mual lam panin a phe phei dawr dawr mai a.

Pi Luti au ri hria, hna rum la a vahsan la theilo khaw nghak, tar leh hmeichhia leh naupang te chuan rang taka Lal mual chu rawn pan hlawmin, a thil hmuh avanga a thisuk zawi zui tlat chu thu zawh chian tura tih harh tum chuan a rawn thleng hmasa apiang te chuan pi Luti chu an han bawihsawm nghal sap sap a.rei an bawihsawm hma chuan pi Luti pawh chu rawn pangngai chho ve lehin, Thingzawl pasalțha daido Kapluia inhnuaia a thil hmuh zawng zawng leh dap chhuat kar vela thisen a hmuh thu te chu a rawn sawi thei ta a.chuveleh Pi Luti thil sawi hria apiang chu rang taka pasalțha Kapluia in lam chu pana tlan liam nghal zut zut hlawmin, an zuk thlen chuan a ruanga kut thlakna hnuhma lo lang avang chuan tupawh chuan pasalțha Kapluia chu ral kutah a tlu a ni tih chu an hre thiam nghal mai a.mahse, pasalțha Kapluia chu khawi khaw ral chem tawka tlu nge a nih ang!? tihah chuan an vai chuan buai hlawmin, upa lam deuh te chuan an theih ang angin Kapluia ruang chu an han senghawi a.chumi hnuah Lal leh mualkil te hnena thil awm dan chiang zawka hrilh tura naupang fel tawh deuh te chu tir lehin, Kapluia chu ral kuta tlu ngei ani tih te chu chiang taka hrilh turin an chah zui ta a.

Lalnu Roluti'n pasalțha Kapluia chanchin chiang zawk alo hriat chuan, tlangaupa Liantawia chu a mualkil te ko khawm tura tir nghalin, mualkil te'n Lalnu kohna ngaipawimawha Lal In an rawn kai kim hnu chuan pasalțha Kapluia chunga thil thleng chu phuba lakna a ni tih thu chu alo sawi nghal a.chuveleh mualkil te pawh chuan, pasalțha Hrumcheuva chuan Kapluia chu tlang chil tir lova a that ta zawk chu zahngaihna a lan tir hle zawk ani tih te chu rawn sawi ve liam liamin, "khaw daido meuh te hi zawngin an Lal te phatsan zawnga hem har lak hi thiang lovah an ngai a ni ngai a, kan pasalțha Kapa chu Lalpa Khamruma thla chuan lo ngaidam mawlh teh se'ng.

Cheuva zahngaihna azarah, a hming chhiat thupin a awm dawn ta zawk anih chu le" rawn tih sap pah chuan mualkil Hrangkunga pa chuan a vaibel ek chu chhuat awngah chuan a han thai thla zauh zauh a.mualkil dang te pawh chuan Hrangkunga pa thu rawn lak chu lo tuihnih tliar tliar chunga lo buk chhilh ve dialh hlawmin, "kan thu bilh thup hi pasalțha Kapluia chhungte hi kan thawt hmuhin, a nupui fanau te pawh hi khua ațang hian kan hnawt bo mai dawn em nia'ng!?

Lalpa chunga a pawi tawh avang hian, kan hriat loh lam ațangin chhak pasalțha te hian kan Thingzawl anlo hrut ram țhelh achha alo ni mai si a"!! ti a mualkil Bawnga pa rawn zawhna erawh chu mualkil dang leh Lalnu Roluti te chuan chhan har an ti hle a.chutihlai chuan, Chhingpuii lahin ngaihtuah ding a nei tih hriat zet chunga pawn lam chu thlir dauh dauh chunga an mualkil te leh a nu te thurel chu ngawi renga lo ngaithlain, tun țum atan hi chuan a nu thu lak dan chiah a ngaichang a ni tih a tilang chiang hle a.chuvang chuan, mualkil te pawh chuan pasalțha Kapluia chung thu ah hi chuan Lalnu Roluti zawk chu thu keuhpuiah rawn tlang zel rihin, "nilu han liam sela, thim chhilh chhoah Kapluia nupui leh a fapa hi Lal ina kai turin ko ila'ngin, chutah chuan an laka nangni mualkil te nena zahngaihna kan lan tir san theih ber hi kan thawt hmuh mai a nia'ng chu.ka pasal leh Lal Taikherha te lakah khan a nupui fanau te hi chuan pawi an tawh (tawk/khawih) ve loh avangin, zakhamna' thu hi anni lakah hi chuan i han zui hram teh ang u khai" ti a Lalnu Roluti'n an thurel a rawn thual mam leh hnu chuan titi dang vawrhin rilru zangkhai takin an inkawm zui ta hlawm a.

Lenglen hun a han ni chhova, pasalțha Kapluia chunga thil thlen dan chuan Thingzawl khua pawh a chiah hne hle a.mahse, chutihlai chuan pasalțha zawng zawng leh tlangval te, Lalnu te nufa leh mualkil te chu an hamhaih ve tlat lo!valupa Țialchhuma leh pasalțha Bukluaia te, pasalțha Chhunluta te phei chu Kapluia in lama kai lova Lal ina rawn lawi lut hmasa zawkin, mualkil te nen kim takin an Lalnu hova an thu chai tur ngaihtuah reng chung chuan an țhu ngir khap mai a.

An thu hmasa lamah chuan Lungpher mualkil, Țiala pa chungchang, valupa Țialchhuma'n a rawn put luh chu chai ho hmasain, an thuhrukna hmasa țang khan Changpui kham hnuaiah an sawn thu te, rawn sawi paha hetia ven leh hrai kawpa a lu nunga khung reng ai chuan thah mai hi a țha zawk angem!? tih thu valupa Țialchhuma'n Lalnu leh mualkil te melh rawn kar chunga a rawn sawi lai chuan, pasalțha țhenkhat te chuan ral nawp hun an luh chhoh zui dawn dawn tawh avangin hetia rampalailenga chaw pe tur leh a chin biha vil buai reng ai chuan thah mai țha an tih thu te chu an rawn sawi ta tliar tliar a.an rawtna chu khunkhan zawka an han chai hnu chuan, Lalnu Roluti chuan thu tawpna ah mualkil te thu chu Lungpher mualkik Țiala pa chungchangah chuan a lak dawn thu rawn sawi chhuakin, "Lal Darlula hian chemteii hoa inlo rel thluk tawh a hnua chemteii ka ațanga ka hriat leh tak, a pasalțha chin bo hmak te avang khan, a mualkil hi rawn ngaihsak leha pasalțha dang rawn tirh leh hi a ngam tawh lo niin a lang riau tawh a.hei vang hian, kan chawchah valh khatna kha chu Lal Darlula hian a dai per tawh ngei ani tih kan hre khiau tawh a.a chuti nafam chu, khutia rampalailenga zuk vil reng khu kan tlangval te pawh funpui er buaia buai a hun chho dawn dawn tawh nen, țul lovah hna dang kan phiar belh ani hawt mai a.chuvang chuan, Lungpher mualkil hi kan mualkil te hian in tih tihin ti tawh u" a rawn ti ta a.

Chutia Lalnu Roluti'n an thu bilh tawpna tur an kuta a rawn dah tak hnu chuan mualkil leh pasalțha te chu rang taka inrawn kual nghalin, Lal Darlula laka an duh ang taka an chawchah hnuah an beisei ang ngeia a pasalțha Ngharreka leh a kawi te a rawn tirh hnua, chu hun ngeiah chuan anni ho chu chhak pasalțha te puihna azarah anlo thah tawh avangin, Lal Darlula hian pasalțha dang chu a rawn tir nawn talo reng a. hei vang hian an chawchah ber Lungpher mualkil Țiali pa hi țul lovah an tan hna dang siam sak tu mai a nih tawh avangin thah mai chu an rel thlu ta a.chu an thu tlukna chu a tuk thimțin ruala hlen tura kal turin valupa Țialchhuma leh tlangval pathum ruat zui nghalin, an thurel hung khatna chu rual takin an chai thlu ta a.

Chumi hnu chuan an thu chai ho leh tur lamah chuan an rilru chu pe chho lehin, tlangaupa Liantawia chu Lalnu Roluti chuan Kapluia nupui Veli leh a fapa rawlthar hlim hlawt Manțhianga te ko turin a tir ta a.anni nufa an rawn thlen hnu chuan Lalnu Roluti chuan thu kalpui rawn lakai zui zatin, "Lal Khamruma dam lai khan, i pasal hming hi kawng engkimah a lam awl lo ani tih hi kan zavai hian kan hai lova.mahse, a khati chung khan i pasal hian Lal Khamruma thu zui lai kha hrulhtun dang lo hreuh sanin!

Setlak ngawah Lal Taikherha hnenah a 'sialman dar' lo ngenin a kawi te nen alo sam chiam mai a!kha thu kha nang leh i fapa te hian inhriatpui em"!? a han ti ta a.Veli te nufa chuan an Lalnu zawhna chu angaihna hrelo zet leh hawihai zet chunga ngawi rengin, "i pasal Chem chhuah avang khan kan Thingzawl hi cheka chekah kan vai mang țhelh a sin le!a hun takah thu dik hi hre talo ila chuan, khawram' kan chang tawh ngei ang" Lalnu chuan a han ti leh a.

Chutah meuh phei chuan Kapluia nupui chu hlauhthawnna nasa zetin a rawn man nasa tawhin, a fapa Manțhianga hawihai lai chu mittui hnam deuh par chung chuan a han melh leh ringawt țhin a.chutihlai chuan Lalnu chuan rilru nat hmel zeta a thu sawi lai chu rawn chhunzawm lehin,"pasalțha Kapluia kha kan pasalțha rinpui ber ani a sin le!khatihlaia a kawi te pawh kha thim han țin se Lal inah ngei hian kan chhal let vek dawn a ni.marawh chu, i pasal tih loh midang kha chuan pawi eng tham an tawk lo ni'n ka hria a.an hotupa thupek ang anga awm mai an nih avangin, an chungah chemhar kan la lo mai a ni.

Lal Taikherha pasalțha te khan, an Lal chunga kut hnawih tute chu nasa taka rawn chhui zelin, kan Thingzawlah hian an hnu an rawn bih tawp ta chiah mai si a.mahse, an nak pekah Lungpher leh Sialțum khua te lakah keinin kan lo thlawp mek lai anih avangin, kan chungah zahngaihna an lan tir mai chauh a lo ni.pasalțha Kapluia lu erawh chu kei leh mualkil te hian kan veng thei ta bik lova, Lal Taikherha pawi a tawh bak ahnu hmanah, Lal Khamruma pawi a tawk tel kher bawk nen, kan pasalțha țhenkhat te phei hi chuan a nupui fanau te nen lam hian chil filh țhak che u an duh ut ut tawh laiin, i pasal lu chiah an lak hnuah lungawiin chhak pasalțha te kha an liam thei hram chauh a ni.hei chauh hi inchungah zahngaihna ka lantir anga, khuaah hian inla awm ve duh anih chuan inthlah te thlengin an pu Kapluia vertherna hi an rawn zui tawh tur ani love" tiin a chin chhuakin a sawi fai ta leng a.

Khawchhak lam tlang dungah nilu pawh a rawn mawm tle suar tawha, nungcha chitin pawhin an ze pangngai chhuahin zing boruak fim zet chu hip pahin, an 'aw' rawl tawp tawp chu an chhuah leh chuah chuah tawh a.abikin Sava chi hrang hrang te chuan an rah tlan vanglai chho, thing rah chi hrang hrang te awmna mual pana inzui chhuah chu an phur zual bik emaw tih mai tura hmanhlelin, chhim tlang teveuh pahnih inkar khar phui map khawpa Vahui rual tam fe rawn inzar pharh thla mek te pawh chuan ngaw dur țha fe fe te chu an rawn thlawh hêl dualh dualh mai a.an tum ngaw an han luh chilha an reh tak duak hnu chuan, nizung kar ațanga Kawlhawk nupa, rak duarh duarh chunga rawn inzui leh mek te pawh chuan thing rah tlan mek tawh tu Sava chi hrang hrang te chuan an tlan zawh khalh ang tih hlau niawm taka an ngawng sei zet chu fan uak uak chunga rawn bir thla ve duai duaiin, Sialțum Lal Chalruma Se tlat ram an tih, ngaw dur țha zet, Sialțum ațanga lofing hnih vel leka hla Sih nung zet awmna ngaw, thing rah chitin awmna, pasalțha rothap zet zet pathum te'n țanhmun lak an tumna Sesih ngawpui chu an rawn țum lut ve ta a.

Zakulha chuan an tawmna buk lam chu a khel veilama Thalngul hrawl zet thiat uai zan chung leh, a kut lehlama Vahrit pachal khai zan chung chuan a pan zan zan mai a.mahse, ral veh an nih avangin sa veh buk tuk ang ngawta an buk hi ualau taka tuk an nih loh avangin, a biru thei ang ber zela an buk, chu ngawpui hnuai lengkir hnuai lungpui lian zet zet țhang leh perhin a khuh phui tlat awmna lam chu fimkhur zeta pan chho zelin, a han thlen chuan Sawiluaia pawhin mei alo nun hlap hlap tawh a.

Vahrit an han hem hmin hnu erawh chuan an mei chheh chu rang taka changpui hnaha khuh hlum leh diakin, an pum an han hnawh puar te te hnu chuan an chet dan tur chu an pathum chuan an rel tlang ta a.

Hrumcheuva chuan a rilru fim zet chu fing zeta rawn hmang lehin, a ralrel thiam bik tlatna chu reilo te ah a rawn lang chhuak leh ta nge nge a.mahse, an han ngaihtuah nawn leh apiang chuan an ralrel lakna atana an ruahman chu an tlak fuh lo palh mai ang tih chu an hlau leh deuh that that țhinin, nilu a rawn invawrh kan deuh hnua Se rual thawm anla hre talo fo chu an beidawng ve ta lek lek mai a.chutihlaiin, an tapna ram chin vel reng reng chu khua ațanga a hlat tawh loh avang chuan fimkhur theihtawpa chet lak alo ngai tawh bawk nen, fehrehsan dawn dawn tawhah pawh thawm anla hriat fuh hleih theih loh avang chuan tumțum chu Hrumcheuva ralrel meuh pawh an zui fu dawn lo ani mai awm mang e" tih chu Zakulha rilruah pawh a rawn lut ve ta hial a.chuvang chuan Zakulha chuan an tawmna ngawpui chhak khaw ep lam chu han chuan a duh thu Hrumcheuva hnenah chuan hrilh zauhin, "khilai vang thing ziding ațang khian helai ngawa Sial rual rawn luhna țum hi ka han bih teh ang khai" tih pah chuan a Thal ngul nen a put chho ta nghal a.

Chutia khua a han chuan chhuah hnu rei vak loah chuan a chhak lama hai rual lohva a khaw chhehvelin an sawi luih luih țhin, Sialțum Lal Chalruma Se pa lian hmingthangpui, Tumpang chi thlah a ki veilam phir tle eng zum vur mai leh lian em em mai rawn phit thla dut dut thawm chu Zakulha beng chuan rang zeta lo chhui fu vatin, reilo te ah chu Se palian chu Se dang hruai duah duah chungin a rawn lang mum zui nghal kung mai a.
chutah chiah chuan Zakulha chuan, Sialțum khaw țhenawm Khiangzawl khua te khan Lal Chalruma Se thlah ngaw an hrilh hi anlo hrilh dik ngei ani tih chu chiang zeta hre chhuakin, thaza zet chungin an buk lam chu a pan thla ta thuai a.

Zakulha thu rawn hawn chuan Hrumcheuva leh Sawiluaia te chu a ti thatho dunin, Lal Chalruma leh a khua te Sial rual zawng zawngin an tawmna chhak lawk ngawpui hnuaia Sih nung zet an tlan lai chu thaza zet chung chuan an han inbih chhawk sek tawh mai a.mahse, an hun ruat tak alo thlen hma chuan ngawpui hmun hrang hranga an țanhmun lakna tur hmun te chu thawm nei hlek lova bih kual char char hlawmin, tlai nem hun a rawn ințan lai chuan Zakulha chuan a tihtur atana tuk bik ti tur chuan an chhak lawka Sih chu a pan chho ta a.mahse, khua ațanga thawm hriat theiha chet a rem loh avang chuan Silai hman chi a nilo tih chu hre ran chunga a thalfang duh ber ber pathum leh a milulak chem te chauh chu vah chhuahpui lehin, Hrumcheuva leh Sawiluaia te pahnih pawh chuan an țan hmun lo melh lawk lam ațang chuan Sih chu a sir lam ve ve mautluk sawm dawna hla ațangin an veh chho mek bawk a.

Zakulha'n Sih bul a han thlen chuan Lal Chalruma Sepalian ngei chuan thawm ngaithla chunga a rual dang te chu veng chunga Sih chu lo vel kual deuh nghut nghutin, haw a duh dawn dawn tawh tih chu a chezia ațang chuan a hriat hle a.chutah, Zakulha chuan a tawmna țhang pik chu velamah tlema inher san deuh nghatin, a chhak lawka Lal Chalruma sekiphir lian zet hawi vual vual lai zakdawh zawn tak chu a thalfang sei zehzawh chuan a han tin zawn ta vah a.a duh ang taka ngila a tin hnu chuan a thalngul hrawl zet chu Sakuh thangngul kûl tiat dawna bial pum khawpa kuai fan zuiin, ri ziau puat khawpa nâ in a han thlah zui ta a.chuveleh Lal Chalruma Se palian chuan sang zeta zuang nghal fur furin, a zakdawha thalfang hrawl zet bur vu chung chuan Se rual dang te chu a tawn darh ta ur ur mai a.

Zakulha lahin chuti khawpa a lim buai chung pawh chuan a tum chu rawn hlah duh tawh bik hek suh!a thalfang chu Sih hela tlan zuaih zuaih chung chuan Lal Chalruma Se palian lim puat puat lai ham zawnah te chuan rawn thiat chat chat zelin, a thalfang pathum a han kah chhuah hnu chuan Se palian pawh chu Sih ațanga mau tluk sawm dawna hla, lungpui pahnih inkara a lu phum kuk chung chuan a ding bungbu kut mai a.

Chutihlai chuan Hrumcheuva leh Sawiluaia te pahnih pawhin an tihtur chu thaza zet chunga lo hlen ve mekin, Se dang zawng zawng chu Chhehkhang nen lei hrulhah an hlawi darh ur ur mai bawk a.mahse, Sialțum khaw khan lam pan zawng zela khalh lui deuhin, an duhtawka Sialțum khaw lam pana Se rual an han hnawh liam duak hnu chuan an piah deuha Zakulha'n Lal Chalruma Sekiphir palian, thah ngei tuma a milulakchem nen alo veh phei lai chu kik dun van chung leh hah thaw hlai hlai chung chuan an thlir ta reng a.

Zakulha chuan a Se palian veh lai chu țhen țha chunga a duhtawka hnaia a han din chilh hnu chuan, a thapui chu thawk lak deuh hak pah chuan sawm khawm nghal thutin, vawilehkhatah Se palianin a rawn bin let hman rual loh khawpa chak leh rangin a milulakchem vai puat pah chuan a han tlan pel fua mai a.chuveleh Se palian chu țe awn ruah ruah chunga țhingțhi nghal hnawkin, a kaihza tha dinglam chat pawrh tuam avang chuan hreh zet chungin a bawk ta rup mai a.mahse, chuti chung pawh chuan a mah bei tu chuan a la duhtawk tlat lo.chilthli uai duah leh meng sen rum chunga thawh tuma a inleng leh fuat fuat lai chuan, a bul maia Zakulha rawn tlan thleng zui leh zat lai chu a taksa khawimaw lai bera a ki chu lut thawih khawpa lo phin tuma alo thlek zui ve fur fur lai chuan sang zetah Zakulha chu zuang thutin, Se palianin a lu a rawlh luhna lungpui chung lamah chuan vir kai zawkin chuta țanga zuan thlak leh nghal zat pah chuan, hnuai lam hawiin a milulakchem chu a han chhuk vai ta vak mai a!chutah zet chuan Lal Chalruma Sekiphir meuh pawhin a mah nghaisa tu tha pek chu a tuar ta ngang lo tih hriat zeta a ring ruh tliak thlep nuaih mai chu bawksawp pui zui nghal rupin, a tlukna leiah chuan a thisen te chu a inhawrh luang ri ta bawrh bawrh a.

Zakulha hah thaw ham ham lai chu Hrumcheuva leh Sawiluaia te pahnih chuan rang taka pan pheiin, "Sialțum Se hrang an tih leh lusei keite han innawp zet chu, kan thlir zawh rualin thomitchhaih sawm chuangin kan mit a lo kam hman reng mai ka ti!lungpui chunga i zuan kai hma khan, i nak veilam kha a rawn rin thawi hman ve thuak che tih ka hai hauh love, khaw'maw, i han en teh ang khai" tih pah chuan Hrumcheuva chuan Zakulha nak veilam chu a han bih hnai a.a sawi ang chiahin Zakulha nak chu a vunpui tlang țep chuan lo inrin kal deuh raihin, a thisen lo hnam ve țiam chu nui van chung chuan Zakulha chuan a chil chu a han hnawm thuak a.chutih pah chuan a ngaigtuahna lam chu sawikai zui daihin, "ka ril a ruak riau mai ka ti, thim chhilh hmain i han inhnawh hmasa leh te te te'ng u khai" tih pah chuan an buk lam chu a pan thla ta thuai a.a hnunga zui ve nghal pah chuan Hrumcheuva leh Sawiluaia te pahnih chuan la nui keh dun hai chung chuan, Zakulha leh Lal Chalruma Se palian ngeng lutuk mai insual hmuhnawm an tih zia chu la phunpui zui dun sap sapin, an buk an han thlen dialh hnu chuan zing lama an Vahrit hemin a daih sen tawh loh avangin an sarep la neih ang ang chu mei pawh nun tawh lemlo chuan an kaih ta mial mial a.

An han kham fel chuan khua pawh a tlai tawh bawk nen, Hrumchueva chuan an hun bawh mek chu dai pial hlek lova bawh fu chat chat tura Zakulha leh Sawiluaia te chu fuih lehin, "tunah meuh zawng, Lal Chalruma chuan a Sekiphir haw ve talo chu a țhut san mai mai lo turah ka ngai e.

Se rual te khan reilo teah Sialțum dai kai chhovin, thim chhilh rual deuhthaw hian sehuang an bel tawh ngei dawn a.chutah chiah chuan Lal Chalruma chuan a Se palian kim talo hi ranga taka hre thuaiin, Sialțum khaw pasalțha leh tlangval "kei ka ni" inti chin, kawngtui thlauh keu rual chin tawh zawng zawng te leh an khaw pathlawi zanghang mawng hlui tawh tak tak te chenin Sesih ngawpui hi an rawn luh pawh huk ngei anga, an chutih veleh keinin kan ralrel bilh khiau hi a valh thumna thlengin kan han pawt per thuai anga, tu ruh chang chang kan ti tawh mai a nia'ng chu" a rawn ti thawp ta sat a.

Zanriah ei kham, Ni pawh khawthlangah a liam pil ruai ruai tawh lai chuan veng mawng naupang rual te pawnto tur rak chil chel lai pawh an nu te'n aw' țial ruaih ruaih khawpin an rawn ko lauh lauh hlawm a.chutia an rik chil chel hlawm lai chuan an Lalpa leh mualkil te Se rual rawn haw pawh an dan pangai te a an khaw dai țum ațang chuan rawn inzui lutin, naupang hote chuan hmuhnawm an tih ban ngai loh, an Lal Chalruma Sekhiphir ngei chu hmuh tumin an han inhawr khawm leh laih laih a.mahse, Se rual hma hruaiah chuan a pui leh a patuai lam deuh hlir te chu rawn lang hmasain, a tawp lama a palian dang te zingah pawh chuan an Lal Charuma Se palian chu a rawn lang ta hlek lo mai a.chutah meuh chuan naupang țhenkhat te chuan an Lal Se palian a awm ve loh thu chu zawi te te a sawi sap sap hlawmin, a veng veng chuan Se rual haw dum dum te chu puitling nen naupang nen, tar thlengin Lal mual lamah an zui chho ta dul dul mai a.

Chutia thawm rawn puk ta hluai chu Lal Chalruma leh a mualkil te thimhlim zu khawn țan chiah te lah chuan meng phelh phung chung leh tang hru chunga ngaithlain, "a eng chu an ti hlawm chu ni maw!?

Lal mual pana rawn riat nawk nawk ho chu tlangaupa va thlithlai teh khai" Lal Chalruma chuan a han ti chhur chhur a.mahse, chumi hnu lawka tlangaupa rawn let lehin a thu rawn sawi chu Lal Chalruma chelah chuan a lut ta ngen ngen hle mai!"lalpa, i Sekiphir a rawn haw ve lo tih hria apiang an rawn pung khawm a ni e" ti a tlangaupain a han sawi fiah deuh hnu phei chuan Lal Chalruma ho chuan mualkil te chu an chhuak ta huk a.

Lal Chalruma'n Se dang zinga a Sekiphir lian leh huai em em mai, a hmingthanpui ngei mai chu Se dang zingah chuan a lo awm ve lo tih a han fiah hnu phei chuan nasa zeta a thinrimna chu rawn so nghalin, "ka khaw mi an ni emaw, Sapui a ni emaw, ka Sekiphir lo khawih tute hi chu pialral thleng rawkin ka um ang.nang kha, ka bahzarah i lo la lalmukhawi hawi mai mai ngam e lo maw!?

sukte parual uih zawn aia chaka tlanin ka makpa Ralzinga va ko tawh.kei leh ka mualkil te ningnawiah i intlan bil mawt ringawt mai, i vun rang zet kha ka pawh lih hma hian tlan thuai teh" tih pah chuan tlangaupa chu a luhkapui ațang chuan lal mual lei charah chuan a theh hang zui thla nawlh mai a.mipui te lah chuan an Lal thinrim ang buan buan mai chu ți duka thlir țhuapin, "ka khaw tual mi kut tuara ka Sekiphir hi tlu anih vaih zawngin, invai hian nangmahni in țheuhvah ka hal khung ang che u" a ti leh ta phiar phiar mai a.chutah meuh phei chuan mipui te chu mahni awm hmun hmunah chuan hlau zet chunga ding khawng far hlawmin, mualkil te thleng thleng chuan mipui te chu an vau tuarh tuarh tawh mai a.

A pasalțha leh a makpa nibawk Ralzinga a rawn thlen hnu chuan Lal Chalruma chuan a Sekiphir a rawn haw veloh thu chu thinrim țeuh chunga lo hrilhin, Ralzinga pawh chu a so bat bat hle a.mahse, eng vanga a puzawn Sekiphir chu rawn haw ve talo nge anih tih chu angaihna hrelo zet chunga ngaihtuah kualin, "Sapui lakah pawh ka pu Sekhiphir hi tlawm tur ani îk lo mai e, tlangaupa rang takin Zawlbuk han hrut thuai la, nula rima tlangval ho an chhuah duak hma ngei hian hriam nen Lal mual rawn kai vek turin han thawt vat teh khai.zanlai pawh nise, Lalpa Se tlat mual Sesih ngaw leh a chhehvel zawng zawng khu kan chil chhuak dap tur a ni" a ti ta khur khur a.

[Ngaia]

Bung-69

Sialțum pasalțha pawi zahlo leh luhlul, a thinbutut a chhuah tawh chuan ri so buan buan mai țhin Tawnzinga leh pasalțha dang panga te'n, khaw nghak pawl pawh indah mang lova reh deuh duak khawpa thinrim zet chunga tlangval rual za dawn hruai a an Lalpa Chalruma sekiphir zawng tura a se tlat mual, sesih ngaw leh a chhehvel dap tura a zan a zana meichher lek de fur chunga khua an chhuahsan lai chuan zan pawh a rei dawn dawn tawhin, nilu lan țhak thleng pawha a puzawn sekiphir zawn chu Tawnzinga chuan a tum ruh hle a ni tih chu a hmel rum ûl ațang chuan a hriat hle a.dai an han pelh rual rual chuan kangțhai kau leh thakpui par te chu Tawnzinga chuan thliak leh zuah zauh țhinin, Tlangval kal muang deuh niawma a hriat te chu an mawnga hlap eu leh awrh awrh țhin pah chuan, "a tha lak muang muang ka chhawnin hem rawh ei!pakchhaih khah, keimah Zingthinkheia, sa leh rala sai ngailoin mual ka rawn vel e" a ti ngul ngul fo mai a.

Chutia Tawnzinga a han rum ngul ngul veleh chuan tlangval hote zinga rawlthar chhuak hlim, mangpui man nikhua zan apianga an mangpui zul zuia pawnpui hnuaia kawngli phu ve at at khawpa chhungte hriat hlau bawksi, mahse inla kawngtui thlauh keu ve thei tawh zet chunga an mangpui man avanga an vaibeldawn satel dumdai lu ang auha lo dâk at at tawh phih-țêk ve chhek chhek rual tawh te chen chuan, Tawnzinga'n kangțhai kaua a hlap nih chu hlau zetin an țil leh ar ar țhin a.an chutih hram hram lai pawh chuan Tawnzinga lah chuan a meichher thlara meng sen rum chung chuan a tlan hnuhnung hnung chu dim map lova la hlap eu zawt zawt zelin, rei lovah an Lalpa se tlat mual chu an thleng ta mai reng a.mahse, hnuhma zawng zawng rei iak an han dap pawh chuan mihring hnu reng reng a lan loh avang leh, a kawmkar ber thleng pawha se hnu hlir an hmuh avang chuan Tawnzinga leh pasalțha zual deuh te chu an meng phawk nasain, "a khawi pawh chu se hnu bakin va khah suh!sapui suaiah kan Lalpa sekiphir hi a tlu han ti dawn ila, sapui hnu lah a lang nek si lo!heng se hnu te lah hi ram lam lam pana hnu hma thlauh a awm lo lehzel nen, hlauhawm enge maw chu an hniak pherh dan veng vung ațang hi chuan an hmu ngei tih lah a chiang kelh si!a mual dap hian Pangmual khaw ram valh thleng rawkin kan dap mai dawn em nia'ng" rawn tih charh charh pah chuan pasalțha pakhat Zaluta chuan Tawnzinga chu a han melh dê deuh kar a.

Chutia Tawnzinga leh Zaluta te inrawn mek chu pasalțha dang leh tlangval dang zawng zawng te chuan rawn pan khawm thuaiin, an thlang luite kam thelh deuh laiah chuan inkawi thlain rorelin an țhu ta nghuk a.chutia an hma lak zui dan tur an han rel lai chuan zan lah chu a rei chakin, an chung ngawpui kar awnga thlafang fem rawn invawrh kang chho mek, se ki raih lo lang leh hmuntin maia nungcha zanlai tlak ri tlak tlak ri te chuan rawlthar zual deuh te phei chu a ti mutchhuak lek lek tawh a.mahse, Tawnzinga luhlulna leh a thin so bulh bulh mai chuan a puzawn sekhiphir chhui zui a duhna chu chung tlangval țhenkhat te zam muang chho țan mek te melh kual rulh rulh chung chuan vin deuh tuka rawn chham chhuak lehin, "a tu a mah hian kan duh kan hmuh hma hi chuan khua kan kai tur a nilo.in meichher te kha tel belh ula, mual hi dap thla rawh khai.nilu a rawn mawm hma chuan he lai luite kam dul hi a tu a mahin inrawn chhir pawh tur a ni lovang" tih pah chuan a Silai pu chung chuan a thlang lam țhang pik chu a tawn thla nghal set set mai a.

Zan thim hnuaia Tawnzinga leh a hote, meichher nena an tawmna ruam thlang lama an inkawi de thla chuah chuah lai chu pasalțha pathum te chuan meng dê kalh chunga melh thlain, "kan țum lak a fu dawnah ngai ila, Sesih ngaw kuam pelha Sasaw hmun an luh meuh khu zawngin keini hi chu Sialțum daiah kan inchhep kai tawh thial ang le!

Lal Chalruma leh a makpa Tawnzinga te ralrel thubilh meuh chu kan chaih kawi leh ta dawn dawn e" tih pah chuan Hrumcheuva chuan Zakulha leh Sawiluaia te chu kik van chung chuan a han melh deuh san a.chuveleh Zakulha leh Sawiluaia te pawh chuan an țum tlak khalh hun tur mawlh chu rawn sawi dun veleh sar sarin, "thla femin vanlai a rawn ban kai ta e!ti rawh u khai, kan Sialțum Lal tuangchhah chu i han khel filh dawn tawh te'ng u.Pasalțha Tawnzinga leh a hote khu zawng ti khuan zankhuain lo inpal hnawk teh se'ng" Hrumcheuva'n a rawn tih thawp leh deuh sat lai phei chuan Zakulha chu a tha a zâ thawkhat leh hle tawh a ni tih a chezia ah chuan a lang chiang leh tawh hle a.

Sawiluaia lahin a milulakchem dap hlai hlephlawp chu a kutzungpui chuan lo zut ve hauh hauhin, "daido meuh atana chhiar tlak nive dawn dawn khawpa ka rallu khai zat chhiar tham a lo nive dawn dawn ta hial mai hi in hnung ka zui rah liau liau a ni e!a chuti nisuhse engtik khawtikahmah kei hian ral sam ka kuai ve hleilawng e" rawn tih charh charh pah chuan, Hrumcheuva leh Zakulha te a lo zui chu a inchhir loh zia leh anni zarah chuan a hming a chher ve tak tak dawn ta nia a hriat hial thu te chu a rawn sawi chhuak ta hial a.

An tawmna an han chhuahsan meuh chuan an duhthusam chiahin thla fem seki raih pawh an chung vanzawlah chuan a invawrh kai chiang tawhin, Hrumcheuva chuan an chhak lofing sarih vel leka hla a tlang lian zet bawk dur vung chunga thla fem tawh zet thlara fiah mang lova Sialțum khaw lang deuh iarh chu fim zetin a han thlir chho leh vang vang a.a duhtawk a han thlek hnu chuan a naute pahnih chu fimkhur taka chet la tura fuih lehin, "Tawnzinga leh a kawi te hian Sesih ngawah bum chhuakin, an thang hlanin an khawdai kan kai khalh tih hi an hriat hmain kan chet lak kan bilh fel hman diam tawh turah ngai ila.kan rel tawh ang khan, khilai Tawitaw rah tla mu Sa-in an hmuam pil ro tawh khi kalpah chho lawk ilangin, țhalvaekchar lai tla țang et awt a nih awm kha maw! khua ațnga kan kawh chhuah leh lamah erawh chuan he lam lamah khua khi liam san tawh lovin, chhak khan rem lo lai zelah Tawnzinga leh a hote hi a sibih kan lo chhuah khalh hman zel tur a ni.tuma'n kan hnu thlauhin hliam kan tawk tur a ni lo tih kha hre reng ila, a hun takah Tawnzinga leh a hote chu kan ko haw ang" a han ti leh a.

Hrumcheuva ralrel meuh zawng Zakulha leh Sawiluaia te pahnih chuan finthlak anti leh tawhin, he a ralrel hi an bawh fuh vaih zawngin a hnu lamah chuan Lal Chalruma leh a unaute thâ lak hi a zawi hle tawh dawn tih an hre chiang hle a.mahse, an tum dan hi hlen tur chuan an mawhphurhna hlen tur țheuh chu hma hautak zet leh huaisen ngai zet a ni tak meuh meuh tih chu an hre chiangin, "Sawia'n khawdai chhak lam khan lo bih ngat ngatin kan chet lak lehna tur rem lai tur zawng zawng lo hrut hmasa sela, chumi hnuah kan inthawt dan ngai bawk kha a hriat hma chu khaw lu hmawrah minlo nghak ang" tia a ralrel lak zel dan tur Hrumcheuva'n a rawn sawi leh nghat nghat lai chuan Zakulha chuan chak zawka kal rawn rawt zui ve zatin, "kan hun tiam kan bilh kai lo dah ang ka ti!kan luhna khan hian Sialțum a zawh lo tlat mai" tih pah chuan a sir velamah chuan an khan zawhlai chu a per phei san ta daih a.chutia Zakulha per sawn ta thauh chu Hrumcheuva chuan an hma lam bih deuh zauh paha khik deuh sak pah chuan Sawiluaia chu Zakulha kalna lama kal tur chuan hrilh zui deuh sapin, "lusei keite mit dê meuh zawngin Sialțum khaw țhut khan leh khan lo chu a lo melh fu chat chat e!kan hma lam khu kan bawh luh zawngin, he ngawpui hnuaiah bawk hian thlang lam ațangin kanlo lehluh leh dawn alo nih tak khu le" a rawn ti zawi zui leh sap a.

Pasalțha ah pawh hlauhawmna, ralțitna leh buainain a lo hrual fip hrep tawh leh ngawdur pui puiah lo tamtal hrep tawh an nihna te chu reiloteah rawn lang leh thuaiin, an duh ang taka chaka tuiburhmuamda thum țha zet an han kal meuh chuan, Sialțum dai tlak lam veng hmawr tlangsam leh perh kar Vawk țum kaw deuh sel sul hnuaiah chuan an pathum chuan an kai kim ta țhap a.chutihlai tak chuan khaw chhunga zanlai ar khuang thawm pawhin pasalțha pathum te beng chu a rawn luh zui zat bawk nen, Hrumcheuva chuan Sawiluaia chu fim zeta bih hnaiin, "khaw chuan hnuai chhak lamah khuan dai hrut zelin liam ta la, khaw hmawr In ațanga i theih chena hla khan awm thei lai zawng zawng khu lo bih ang che" tih pah chuan Zakulha chu melh zui leh zatin, thawm chhuah nachi a nih dawn loh avanga Silai aiah Thal leh Milulakchem ve ve chu ken a han rawt zui a.

Zakulha pawh chuan a rawtna chu alo ngaihtuah ve mek thua rawn chhang vatin, Sawiluaia liam lai an thlir dun leh zauh hnu lawkah chuan pasalțha rothap pahnih te chu an tihtur ti turin Sialțum khaw daiah chuan Milulakchem nen an inlar ta a ni.

Hrumcheuva leh Zakulha te chuan Sialțum Lal In chu in hrang hrang phen zel chung chuan pan phei zelin, reiloteah Lal Chalruma sumhmun thim laiah chuan an tawmping dun ta ran mai a.mahse, chutia sumhmun an han kai rual chuan an ruahmanna ti sukuk thei thil dang an tawk palh thei tih chu Archhiar rawn țuk leh deuh hluk țhin avang chuan pasalțha pahnih te chuan an hre chiangin, "kei ka lut anga nangin kawngkapui hi lo din khalh rawh khai" tia Zakulha phun sap chu Hrumcheuva chuan a remti tih hriat zeta che nghal thuaiin, kawngkapui biang thlang lamah chuan a milulakchem lek tle vur chung chuan a tawlh phei nghal zauh a.chutih chhung chuan Zakulha pawhin Lal Chalruma sutpui chu inchhung thim zet karah chuan a mit dê țha zet hmang chuan va thleng hman tawhin, khumpui lam ațanga Lal Chalruma hnar tum ri deuh hruk hruk ri chu chiang zeta melh reng pah chuan a han bih zui zat a.mahse, chu hun fimkhur ngai zet laiah chuan Zakulha duh dan ang ngawt chuan a hma hun chu a rawn inluh fuh bik leh ta tlat lo mai!Lal Chalruma mutna zawn ațanga mihring lu rawn lawr chho riai riai lai chu Zakulha mit țha zet chuan fiah manglo zeta va chhui fuhin, chutih rual chiah chuan Lal Chalruma hnar ri pawh chu a tawp deuh chut bawk a.

chuveleh Zakulha chuan chu lu rawn lawr mek chuan thawm a rawn neih hman vaih chuan Lal In huala awm mualkil zawng zawng te chu an rawn inhawr luih hman tawh dawn tih chu chiang zeta ngaihtuah hman vekin, a Milulakchem chu chu lu rawn lawr mek lam hawi chuan nâ taka vai phei mai inpeih zetin a han insangmar țan ta a.mahse, chu a thu tlukna chu a bawh fuh dawn nge dawn lo tih a han ngaihtuah leh zawk rual chuan, a bitum tur chu Lal Chalruma a lo nih palh hlauh zawngin Lal thisen leh nunna meuh zahlo pasalțha ti a sawi zui a hlawh dawn tih te chu ngaihtuah leh thuakin, rilru fim zet pu chungin keite in a sa veh dingdihlipa a veh ang maia kechhip chauha chhuat rap chung chuan a tawlh sawn san ta hlek a.chutihlai tak chuan lu rawn lawr pawh chu ngaihțhat hmel zeta tlum thla lehin, Lal Chalruma hnar ri bawk chuan inchhung chu a luah leh ta kuk kuk a.

Zakulha chuan tlem a han nghah leh hlek hnu chuan a tum dan ngai bawk chu hlen tawh ngei tuma che chhuak lehin, khumpui lam bawk chu fim zetin a han melh hnai phei leh ta a.mahse, a hma lawka a chet la tur rawn bawh buaitu bawk khan chiang fe a rawn nang leh ta tlatin, tunțum zet zawng chu lu rawn lawr chhen mai chu Lal Chalruma ber a la hnar tak tlat avang chuan midang anni tih chu Zakulha chuan a hre ta thuai a.chutah chiah chuan chu lu rawn lawr da da chu tupawh nise a zuan chat chu a ngai ngei tawh a ni tih chu rang taka hrethiam nghalin, tlemin khumpui mawng lamah chuan a han tawlh phei hret a.chumi hnuah a Milulakchem chu a kawng zawnah nâ taka vai inpeih at chunga lek kawh chhuak zuiin, chutih rual deuhthaw chuan a Milulakchem chu chu lu rawn lawrna zawn, Lal Chalruma mutna khum zawn phei lamah chuan a vai thlawk phei zui ta fua mai a.chuveleh eng emaw rino chawk riin Lal Chalruma inchhung chu luah nghal zawkin, thisen chhuak bawrh bawrh ri karah chhuatlaia thil engemaw tla thum zui nghal dawt riin a zui zat bawk a.

Zakulha chuan a milu chhawk zawk mai chu ngaihsak zui lo zeta Lal Chalruma hnar thawm rawn chhuahna zawn lam chu bawhzui nghal vatin, Lal Chalruma rawn harh hlawl chuan thim zing ațanga hneh zeta a kâ hup sak tlat chunga amah țhutbet tlat tu chu rammi emaw tiin a mangang hle a.chet sawn tuma a han thlek dawn lah chuan a hrawka thil enge maw hriam em em mai rawn tai zâ leh chuaih țhin tu chuan, chu aia nasa zawka a tal vaih chuan a hrawk hrui te chu a khei chhuak hneh hle dawn tih chu a hre chiang si!a kut veilam chuan a bula a hmei tharlam nuthlawi ûm thawh hlim Țhiangkhawli mu lai, thawm nei ve hauh lo leh la mu tui zet niawma a ngaih chu dap țawk țawkin, Țhiangkhâwli mutna zawn lo hûh zûih mai leh ban deuh chuap mai a han dap fuh rual chuan thisen tharlam hu rim rawn nam nghal huam huam mai chu a hnar chuan a hre chiang ta hle a.chutah zet chuan Lal Chalruma chuan engkim a hre thiam ta tih hriat zeta khur nghal zawih zawihin, "thawm i thawt vaih zawngin i lu hi ka la ang" a beng bul cheta rawn tih zawih sap paha a Lal In kawngkapui pana phih phei zui nghal lawp tu chu thim zingah chuan tunge a nih a hre lo chiang hle a.kawngkapui a phih thlen dawn chuan amah man tu chuan hnang hlaina phuai tumtelin a ka chu rawn țawn phui sak leh zui nghalin, sumhmun an thlen lai chuan amah hruai tupa chu pa pakhatin a rawn fin zui zat bawk a.

Hrumcheuva chuan Zakulha leh Lal Chalruma te rawn inpawt chhuak dat dat lai chu an kalna tur lam lo kawhhmuh thuaiin, Zakulha'n mipakhat a thah thu a hrilh zauh hnu chuan "a chuti a nih hrim zawngin, țhal thlifim thawin a thisen rim chu khua a thawt khah nghal thuai ang le! kan ralrel ka han sawn pelh hret anga, Lal Rumvuta In luh chhuah thuai angai ta e. chumi hnu lam lamah chak takin ka rawn ban fu leh thuai dawn che u nia" tih pah chuan chak zawkin Lal Chalruma chu a nawr ta dawt dawt a. veng lu chhak lam engemaw chen thleng a han ven deuh hnu chuan Lal In lam bawk chu a pan san lehin thim lam hrut pah zel chung chuan Hrumcheuva chuan Lal mual chu a zuk pawh leh ta a.
reilote a han ngaihchan leh det hnu chuan Zakulha te pahnih inpawt liam chu nghak leh detin, mualkil In hrang hrang zingah chuan Vangmual Lal Rumvuta In niawm ber tur chu a bih kual nasa ta mai a.mahse, hun an ngah tawh loh zia chu fim zeta hre rengin, an ralrel valh pakhat chu an pawt per fuh dawn ta biklo tih chu a hrethiam țanin, Lal Rumvuta In niawm ber tur chu a malman fak thei talo tawp mai a. chutihlai chuan Lal In thlang lam In pakhat kaițena pa pakhat zun ram thiar rawn indin deuh at at lai lah chuan ngaihțhat lohna a nei a ni tih chu a hawi herah chuan a zuk man thiam zui riau bawk si! chupa rilru chu rang taka hruai pen vata chutih chhunga khua chu Zakulha te liamna lam hawi chuan bikbo san thuai chu a țul hle tawh a ni tih a hre chhuak rang kher mai a.a rilru a han sawr deuh ngat ngat hnu chuan Hrumcheuva fin nge nge zawngin ruahmanna pakhat rawn paw chhuak thuaiin, mualkil pakhat tuala Arbawm hlui lo awm chu khaiin Lal Inchhungah chuan a lut ta zauh a.inchhung a han rah rual chuan khumpui lama Zakulha mi thah, Lal Chalruma hmei ruang chu rang taka dap nghalin, Țhiangkhâwli lu chu Arbawmah chuan a han vawm lut vat a.chumi hnuah Arbawm chawp chuan Lal luhkapui thlang lamah chuan inkhai chhuakin, veng mawng tlak lam hawi chuan Arbawm chu lum thlain Arbawmin chupa rawn chhuahna In bang chhak a zuk den dap rual chuan hmanhmawh zetin Zakulha te liamna lam chu a pan chho veleh ta nghal a.

Khaw hmawr an han thlen chuan Zakulha chuan a khel chu thum tlir deuh data beng țhak țhakin, a piah maia rang taka rawn ri tlir ve dat chu Sawiluaia a ni tawh ngei tih a hailo kher mai a.an han infin hnu chuan Hrumcheuva pawh rawn thleng ve thuaiin, Lal Rumvuta chuan an thang valh a dai ve hman tak loh thu leh, an chet lak tawhah a meizanghlap tu ber Lal Chalruma an ru chhuak ta tho chu an țum lak fuh natur zawk a nia nge' tih chu a naute pahnih chu hrilh zui sapin, khaw chuan hnuai chhak lam dai tam hmun chhengchhe zet zet lam pan chuan Lal Chalruma chu an pawt liam ta a,tawm nana Sawiluaia'n alo melh lawk an han thlen chuan thingchangvar hun a pelh lek lek tawh a ni tih chu Hrumcheuva chuan a hre thiam mai a.chuvang chuan an chet lak thawh hnihna tur chu ti țan nghal tura insang mar leh nghal thuaiin, a sahmima tawitaw mu pil ro țha zet zet a ah khawm raih chu a han phawrh sawk sawk a.an hotupa che zia an han hmuh chuan Zakulha te pahnih pawh chuan an bul vela changpui hnah an hmuh ang ang chu pawh khawm vat pah chuan, mei nunna tur mau ro țha deuh te chu an han fawm thuai a.an mei nun chu changpui hnah chuan phui zeta an sawh hliah te te hnu chuan an tawitaw mu ro âh țheuh chu meiah chuan an han vawm lut nghal hmiah hmiah a.a rawn alh kai țha țan ta maw tihah chuan a ban thâ chak ber leh tha zâ ber Zakulha chuan a kutphahah chuan Changpui hnah thler tet deuh hlek chu phah dep dawpin, tawitaw mu alh hlap hlap lai te chu a changpui hnah ken chungah chuan hmawlhte in a thai lut mial mial mai a.a duhtawk a han ngah hnu chuan Changpui hnah chuan tawitawmu alh lai thi lo tawk vel tur chuan hmer khawmin an chhak lam, khawdai hnaih lam chu a pan chho ta thauh thauh mai a.

In rawn thlang ta ber ațanga mau tluk khat vela hnai a han thlen hnu chuan Changpui hnaha a tawitawmu ro alh hlap hlap lai, a fun khawm chu a hmawr leh hmawrah a kutdinglam chuan țham khawmin, khaw chhung lam hawi chuan tawitawmu ling vâm țha hemhawm te chu a han vawm darh dê chho ta chuah chuah mai a!Chuta țanga a let leh hnu reiloteah chuan Sialțum chhuah chhawng lam chung zawn chu rawn êng sen kulhin, mumal nei lo leka khaw chhunga mipui rak nuaih nuaih ri chu an awmna ațang chuan an hre chiang ta hle a.

A In rawn deng thum dup tu Arbawm chhunga thisen bual sen zuih chunga milu lo inkhung reng mai chu nasa zeta rak chunga Pu Thawmvela chuan Arbawm chawp chuan khai kualin, a țhenawm zawng zawng te nen chuan en chian tumin an kil luih luih mai a.mahse, zanlai pelh lam tawh thim tlat mai a nih avang chuan chu lu bung chu tu a nih an hriat theih loh avang chuan pa țhenkhat te chuan hmanhmawh zeta meichher va chhi țha leh hlawmin, an han en chian nak chuan an Lal Chalruma hmei Țhiangkhâwli, a nupui meuh pawh a tlan dat dat phah țhinna nu lu kha a lo nireng mai a!chutah zet chuan hlauhlawp zet chunga inhawr khawmin, chutia an buai lai chuan chhuah lam veng hmawr liam dâpa In tam fe ațanga a ruala kangmei rawn chhuak, vung zeta a rawn inhlap êng zuaih zuaih mai chu an han hmu zui ta mai a.chutah zet chuan Sialțum mipui te chu nasa zeta philiin a khaw dai tam lam panin an tlan chhe ta sung sung mai a.kangmei lo chhuahna lam, khaw chhuah chhawng lam chu hmun chhengchhia leh kai rem lo a ni tih chu mipui te chuan an hriat chian avangin chhim chhawng lam deuh zel chu pan chho hlawmin, mipa ral kai thei awma ngaih, khawdaia rawn lawr hmasa apiang chu pasalțha pathum te chuan thim zing ațang chuan thalfangin an lo thil ta chat chat mai a.

Sialțum khaw mite chuan Hrumcheuva leh Zakulha te ralrel thiam leh fin lutukna chu an tuar țan ta!an pasalțha Tawnzinga leh a hote an han khalh fal te te hnua an laka an han che tak tak chu a rapthlak ta hle mai a.chu achhapah, an chiai lutukna avang chuan mipa hriam lek nachang hre hmasa te lah a tlu hmasa sa ah țang zelin, an hmaah chuan pasalțha pathum te chu an rawn inlan duh hlek bawk silo!thim zing thingzar buk kar ațang leh lungpui phen kar ațanga thalfang rawn thlawk chhuak leh zawk zawk țhin te chuan tawrh zawh rual loh khawpin an tum an rawn hlah duh mang bawk silo, mipui mangang rak chuah chuah te chu an khaw kang êng sen phût karah chuan inpal buai nuaih nuaih chunga tawlh let sung sungin, mipa tih tham leh hma hruai tur an awm mang ta hlek lo mai a.chutah em chuan Hrumcheuva chuan nunau leh tar, hmeichhia te lakah chuan hriam thawh lo tura a naute pahnih chu hrilh thuai pah chuan khua chu chiang zeta thlir zui nghalin, "ral kai thei tura ngaih chin chu an tlu fai titih ta e! khaw kang êng khu Tawnzinga leh a kawi te khan an rawn thlek fu ve tawh ngei anga.a țhuang hnihna atan, a tha khauh zawk a hote nena an rawn let hun kan nghak tawh ang" a han ti deuh nghat a.

Tawnzinga chuan a luh thlakna lai bih duk duk pah chuan a meichher chu a han hawl leh thuak thuak a.mahse, eng hnu leh thawm mah a hriat chuan loh avang chuan insehruh deuh țun chunga a tlakna mual chhak lama a hote rak nuaih nuaih thawm chu ngaithla zuiin, engmah tiloa a hote rak mai mai chu a haw em em mai a.mahse, chutia a hote laka a thinrimna leih buak chaka a inpeh (pet) fun tawh lai chuan tlangval pakhat leh Pasalțha pakhat hian a chhak lawk ațang chuan țial deuh ruaih ruaih khawpa rawn auin, an khaw zawnah êng sen phût an hmuh thu leh chu êng chu a pawr chak hle tih te chu an rawn hrilh ta mai a.

Chu thu zet chuan Tawnzinga chu a luh nâ ngun ngun hle tih chu a hmelah chuan rawn lang chhuak nghalin, chu mite pawh tuma a chhoh thuai thuai lai chuan an khaw zawn chiah mai a mei êng sen huam mai lo ding chho luah chu a hmu chiang ve ta kher mai a.chutah zet chuan rangtaka an innghahkawmna lama a hote rak luai luai chu enge a chhan!? tih a hriat chian avang chuan chu lam pan chuan chak zeta tlan chho nghalin, a han thlen chuan pasalțha dang te chu a ko khawm ta thuai a.chumi hnuah muang lova khaw lam pan chu an vai chuan rawt thlu thuaiin, hmanhmawh em emin an khaw khan hnai thei ber tur lamah chuan an liam zui ta a.

[Ngaia]

Bung-70

Sialțum khaw chhuah chhawng thler ațanga Lal mual thleng rawk mai a In kang bang mut hmui vung vung chuan khaw chung zawn boruak hmun tin mai chu a bawh chuk mai a.dai tama mipui tawm bo te lah tumah khaw kai leh mai ngam awm tawh hek suh!van sang zet khah hmuk khawpa an khaw kang khu parchhuang var luih mai, an khaw chhak tlangdung phen ațanga nizung rawn lutin a chhun var hluk mai chu ngam leh ngam lovin an thlir dak uak uak hlawm a.chutihlai chuan an thlang lawka patling rawn inhawr thawm rawn ri țhat țhat chu mipui te chuan phawk hru chunga bih thla nghal țhupin, an pasalțha rothpa zet Tawnzinga leh a hote, thinrim țeuh chunga an Lalpa Chalruma Sekiphir zawnga an tap bo lo kir leh mek te chu an zuk hmu thei ta a.

Tawnzinga leh a kawi te chuan an khaw dai tama mipui hlau thlabar lo inhawr bawr luih mai an han hmuh phei chuan an thinrim a zualin, nilu rawn mawm lek lek hun tawhah pawh an khua kai ngam lova an mite hnawt țiau tu chu huai ani emaw ral an ni emaw fuke chhum buaih pawh huama bawh an tum ruh hle tih chu an hmelah chuan a lang chiang hlawm hle a.mahse, an han infin fel hnua Tawnzinga'n a nupui fanaute a han hmuh kim hnu chuan upa deuh te chuan Tawnzinga leh a hote inhrosa țhat țhat lai chu kut phar meuhva zah daih tumin, "kan khaw luh khan chhimah khian ralho hriam tawk kan khaw paho leh tlangval khaw nghak chhun chhun te chu an sawp nulh mai e!kan ral tawh te hi an hriam lek zam a țhain, an bawh tawh an hlah hlek lo mai a.chu achhapah, kan Lal hmel lah hmuh tur a awm loh chu thu hran, khawfingchah hma lawk khan tlakdeng pa Vela khan Khawli lu a chhar ta dah nen!kan Lalpa tapna chin hria reng reng pawh kan awm tak loh chu" rawn tih charh charh pah chuan pa upa zet tawh Pu Rangkunga chuan Tawnzinga chu a han melh khup deuh lap a.

Tawnzinga chuan pu Rangkunga thusawi chu a la nâin, hmun hrang hranga mipui tawm ngawi țhuap lai chu phun bul bul chung chuan a han melh kual dun dun a.a tawpah chuan a mi zawn tak an Lal Chalruma unaupa Vangmual Lal Rumvuta chu va mitchhui fuhin, muangchanga pan chhut chhut pah chuan a hote chu mipui te veng țha tur chuan a han chah zui nghal a.

Lal Rumvuta leh Tawnzinga te titi chu an thu a inhmu harin, "kan Lalpa bona chin hi i hre ik lo a maw!?a nakpekah i inkhawr ve miau si a, thawm riva i hre uk lo hi chu ava inphatmar thlak tum zia ve maw" tih pah chuan Lal Rumvuta chu rum deuh ulin a han melh leh kuau a.Lal Rumvuta lah chuan chutia Tawnzinga'n a dawp ta deuh tlat chu diau duh hlek lo chung chuan lo chhangin, a unaupa awm talo chu a khaw țhut zui chan chang tur awma awm zui deuh riau chung chuan, "a tu khawkhain nge mahni thisen zuipui te ralah barh duh ang le!mah reng rengse, a eng kan ang talo a nih leh ralrel tur chu a lu nungin kan la awm ve a lawm hei" rawn tih chuar chuar pah chuan Lal Chalruma tap chin leh thawm a hriat loh thu chu chiang takin a han sawi ve leh a.chutia an hun tawnah thu mum man fak a neih loh zia Lal Rumvuta'n a sawi lai te chuan Tawnzinga chu a inlekpuk nasa zualin, Lal Rumvuta mit taka en sak chunga a han zawh nawn pawh chuan Rumvuta chuan a thusawi ngai bak a sawi chuan loh a vang chuan dawt a sawi lo tih chu a man thiam ta tlat a.chuvang chuan a rilru chu Tawnzinga chuan fim zawka hmang țha lehin, "kan Lalpa chin ka chik lutukna lamah i lakah țawng mawi hawih kalo rawlh lo lek lek mai e ka ti!kan Lalnu chu a tlanna lamah sil awng deuhin, khulaiah khuan ka chhungpuinu leh nu țhenkhat te'n an bawihsawm mek a.kan Lal te nupa hi an tual thu chhe lak lai a lo nibawk nen, a hmei Khawli khasa zia a hmu kham deuhin ka in lamah kan Lalnu chu a rawn insuan lai a lo ni hlauha, chuti nilo se ani pawh khu a khuangcherbo ve hmiah ngei ang" a rawn ti ram leh ta hmuk a.

Ni a han kan deuh hnu chuan Tawnzinga chuan khaw upa ho chu a han rawn kual a, chumi hnu chuan ral an hnaih leh hnaih loh chu biha dai hmuntin chu hrut tura a hote chu tir liam zui nghalin, tukțhuan rel hun dawnah chuan khua chu pasalțha dang te nen mipui te veng chung zel chuan an kai ta nge nge a.mahse, khaw chhung in chu a zatve aia tam alo kan chhiat avang chuan a rem dan dana inlawi fin mai chu țha a hriain, in neilo chhung tam zawk te chuan an chipui te in țheuh chu an bel ta hlawm a.chumi hnu chuan khaw chhim chhawng lama zan lama ralin an lo thah, paho leh tlangval țhenkhat te ruang sawmthum dawn chu hlawm tura inthawt kual lehin, Tawnzinga ho chuan chhim chhawng khaw kai tirh lam chu an hrut chho ta a.

Tawnzinga'n khaw nghak awm chhun leh paho țhenkhat ruang lo let phengphung a han hmuh meuh chuan, a hma zawng aia a thin rawn so chu thunun thei lovin, "heng ral kut tawk te phuba hi ka lam hma loh chuan ka dawhkilh hian ka luhrum a kai leh tawh ngai lovang" tih leh a Milulakchem fawng vawn chu a rual ta thur thur mai a.chutih pah chuan a rilru chu nasa zeta kawm kualin, a țhutna lungpui chunga thinso khur ngut ngut chung chuan chuti taka an khaw rawn suasam tute chu khawi Lal khaw pasalțha te nitak maw!?tih hlir mai chu a ngaihtuah nasa hle a.

Darkai khaw ho tihah han puh thlu dawn se, anni chu pasalțha heti chiama chet la tur khawpa huaisen leh relrel thiam an awmin a hre silo.chutih rualin anni lo chu Chem chhuah duh tur khawp ralveh lai an neiin a hre bawk silo. chhak pasalțha pahnih te chet thawh a ni tih a hriat loh lutukna chuan eng pawi nge Sialțum khaw ho lakah hian a la khawih zel dawn tih chu a ngaihtuahna ah chuan a lang pha lo hle mai bawk si!chu achhapah, chhak pasalțha te hi ala hriat ngai loh an nihna avang hian an chanchin a puzawn te ka ațanga a dawn pawh kha awihna nei hlek lova lo ngaithla liam fo a nihna te avang khan, heng pawi an chunga rawn thleng ta hi Darkai khaw ho tihah a puh hlei thei meuh lo reng a.hetih lai hian a hriat chhuah hun turah khua a tlai hman tawh hle dawn tih te phei chu hisap pha lo zet chungin, an khaw chunga hetia hriam rawn lek vak tute hi a mualboin a bo telh telh mai a ni.

Pi pu te'n vanduaina hi a mal malin a rawn thleng mai lo fova, a rawn buak tawh laklawh hi zawngin a huhoin a rawn inphaman zur zut duh hle țhin tih chu Sialțum khaw ho chuan an nei zota emaw tih turin, chumi tlai bakchhelen hun ațang chuan Sapui huin dai a rawn vel zui thur thur mai a!chutah meuh zawng pasalțha daido panga te chuan an ral kut tawrh pawh chu thual țha zui hlei thei lova an chet zui chu a ngai a ni tih hrethiamin, Lal mualah chuan nunau leh tar, hmeichhia te chu an hruai khawm ringawt mai a.mahse, chu hun țihbaiawm zetah pawh chuan pasalțha Tawnzinga chuan rilru fim pu lui tlat zelin, "nizan lama hriam nena min hrut tu ralho te hi chu hla te khuaah an bibo tawh tih hi khawdai hrut chhuak vek tawh tu kan tlangval te ka ațangin kan hre kuarh tawh a.a chutihlaiin, ralho mei chhuahah In leh chhek in hloh ta kan tam si! a țam dawm ngai apiang kan indawm buai atalangin, kan unau te thisen chhim thlera baw kawih zek zuk saw kan hai phum hman loh a leiah Sapuiin an thisen rim lo hriain, beisei leh phut neiin dai a rawn vel ta mai si" ti a bul rawn țanin, an khaw upa te leh mualkil te nen, Lal Rumvuta ho chuan Lal Chalruma luhkapui ațang chuan Sapui an zim dan turah khan țha tur lai ngaihtuahin ro an rel ta chuk chuk a.chutia an ralțit zia an han sawi chhuah takah chuan mipui te lah chu an thlabar a zualin, meichher leh hriam nena an mahni veng tu, an khaw tlangval te chu rin zawh har an ti ru hlawm hle a.mahse, chu an hlauh rukna chu an pasalțha daido panga te țawng thlamuanna chuan tlema rawn ti ziaawm leh deuhin, "tumah thin dip ți takin awm suh u khai!pasalțha Zinga leh a hote'n khua kan rawn kai dawn ani tih an hriat meuh kha zawngin ralho pawh baklengin an pil diak tawh a.a chuti nafam chu he Sapui pawh hian Sialțum pasalțha te hi meikhupin a kian san ve ngei ang le.chet kan han la anga, thindamin mutmu kan tuah ngei ang tih hi i ring tlat ang u khai" ti a pasalțha Chalsuaka'n pasalțha dang te țawng thlamuanna a rawn thual leh hnuah phei chuan, mipui tam zawk te chu an thla a muang tak zet ta a ni tih an cheziaah chuan a lang chiang viau tawh a.mahse, an mahni vel reng tu Sapui hnungah hian pasalțha rothap, an ralrel valh an pawh zih fel hma chu hnungtawlh ngailo Hrumcheuva leh Zakulha te'n an la vel reng tho a ni tih hi Sialțum mipui te hian hre tase engtin tak ngai ang maw!?

Tawnzinga leh a hote, Sapui nawr tura meichher leh hriam chitin nen an inhawr lai te chuan, mihuaisen ti a fakna thawm chu mipui hote zing ațang chuan hriat hmaih chi rual loha ringa auin a rawn ri chhuak ta mam mam mai a ni.

Pasalțha pathum te chuan thimhlim khaw dul chu belin thingzungpil hnip leh hnah nem deuh te chu pum hnawh nan an han hmang thuai thuai a.chumi hnuah Lal Chalruma an dahna lung kar kawkel zet, Sialțum khaw chhuah chhawng lam, khua ațanga lofing hnih vela hla, hmun chhengchhe zet lamah chuan lawi lut leh diakin, an han chawlh hlek hnu chuan Zakulha chuan khaw dai hnai deuhah fehrehsan vel lai khan thawm a hriat thu leh, hmun țhenkhatah vaibel ek tla leh mihring ke rah pialna hnu a hmuh nual thu a rawn sawi chhuak ta a.chu thu chuan Hrumcheuva beng chu a luh fiah hle tih hriat zetin Zakulha leh Sawiluaia te en tawn zauh zauh chung chuan, "Tawnzinga hi ka rin ai daihin a dawn a thui tlat mai ka ti!khatia khua kan nawp zawh hnu lawk khan kan beisei anga khua luh pawh hmasa mai lovin, ral chin bih hmasain daitamah a kawi te a tir darh hmasa te te tih a chiang ta reng mai e.keini tan a chana chan chhuah chi zia zang alo ni ik lo a nih chu le!hetiang ral kut tawh thut thulhah hi chuan khaw bih hmasak hi pawimawh tawpkhawk a ni reng a, a thinbutut so suaiah rilru mumal pu lova khua a rawn kai chilh mai kha ka han beisei zet kha a ni a.kha vanga kan chet lakna hmun rem țha leh tura hrilh che u kha ka nirenga, mahse beidawngin ngawpilah kan tawlh luh phah ta reng alo nih kha le" tih pah chuan Hrumcheuva chuan Tawnzinga fin chu anlo chet sual phah țhelh a ni tihte chu a ngaihtuah kai hman kuarh a.

An hotupa ngaihtuahna chu Sawiluaia leh Zakulha te chuan reiloteah rawn man pha ve thuaiin, "cheka chekah khaw chhung lam biha kan la tap lai khan, kan hnung lam ațangin Sialțum khaw ho hian minlo sai tlu țhelh alo nih tak kha le" tia Sawiluaia rawn phun zui ve sap chu Hrumcheuva bawk chuan rawn sawi zawm velehin, "tun țum zet zawng Cheuva ral rel sualah kan va tlu hlum phiarh teuh cha cha ve le!huaisen rah avanga him kan nita ik lo mai e, khuavang te'n min ven zar kan zoa kan him phah pial a ni tih hi zep thu cheng suh khai, keinin khaw chhung ngawt kan melh laiin Tawnzinga leh a hote'n kan tawmna thingzar kar min sai chilhin, an Silai muin kan dawr a thlawh țet peh veng vung lo chauh alo nih kha le" rawn tih leh sup pah chuan Zakulha chu fim zetin a han melh phei leh deuh ran a.chu an hriat loh hlana an dinhmun lo hlauhawm zet chu an han ngaihtuah chian chuan an nuih a za lo tlangin, tun ang renga an ral bawh te laka an chet sual teuh chu anla tawng ngailo tih chu Hrumcheuva chuan a hre chiang zual hle a.chuvang chuan, hemi zan pawh hian fimkhur zual zeta chet lak chu a pawimawh hle dawn ani tih chu ngaihtuah țha leh thuaiin, "khatia daitam an hrut hnua min bih fuh loh takah chuan, nizana kan chet la kha kan duhtawk mai emaw tiin hlate khua kan kai daih tawh ang tih hi Tawnzinga hian a ring ngei anga, chutah chiah chuan mipui te pawh thla ngam taka khawsak la turin a chah ngei ang le! thlafang hi rawn mawm sela'ngin, thingthu mih hun bawhin khua khi kan hrut leh dawn a nia" a han ti thawp leh sat a.

Chutia pasalțha pathum te'n zawi sapa ral an rel sap sap lai chuan Lal Chalruma chau muthlu lup lup lai chu rawn harhin, "a tu te chu ni che u maw!?
he lai tama min khung beh ngawt mai chu.

Sialțum Lal Chalruma hian pasalțha tih tham a neilo emaw inti a nia nge!ral vak mai mai te laka zam tur hi ka ni hlek lo a nia" a rawn ti ta nghut nghut a.chutia an thulak lai pawtchat tu Lal Chalruma chu Hrumcheuva chuan kun du chunga va pan phei thuaiin, "Lal ti a inchhal ngam tur em i nih chai chu le!nang leh i unaupa Vangmual Lal te chaih chhuak tura rawn kal kan nihna chu hlen chhuakin, zanin hian i unaupa hi kan hnuk chhuak leh dawn tih hi hre khiau teh khai.țul lo takah inchemharna ah rawn inbarh lutin, Vangmual Lal chu i lo vuipui a Darkai Lal pahnih te lakah Chem chhuah turin thu i lo tiampui a ni lawm ni khah!?ngawi tak rawh khai, Darkai Lal pahnih te hmaah i la insawi fiah ngei ang" ti a rum khum ngul ngul pah chuan, rum zetin Lal Chalruma chu a han melh hrawk mai a.chupa mitmei rum leh thip zet chu Lal Chalruma chuan an meichheh ling vam sen huam thlarah chuan alo hmu chiang kher mai, chupa hmel rorum leh thinbutut țawng ram hmak avang chuan a chhungril rawn khur chhuak nghal zawih zawih chu thup tuma insangmar ru țeuhin, "Sialțum pasalțha te chuan, an Lal hnu hi an la rawn zui fu thuai ang" 'aw' tham deuh țuaka rawn tih leh hram pah chuan mit khup dui chungin a Lal puan silh, zan lama dim lo zeta pasalțha pathum te'n an hnuhna lama thler hniang hnuang tawh chu a sam ta nuap nuap a.

Hrumcheuva chuan chutia țawng a rawn la leh hram chu chhang duh tawh loin, a naute pahnih awmna lamah chuan tawlh chhuah san pah chuan an tawmna lung hmun kham titih chung lam chu a han thlir pah vang vang a.

Hrumcheuva'n chutia an tawmna lung hmun titih leh kham inkhawh zawm thlira thlifim a han dawn vang vang lai chuan, an chung lofing khat niawm vela hla, khaw chhung lam ep ațang chuan mihring rawl rawn au thla chuah chuah ri a hre ta thut a.chuveleh a naute pahnih chu rang taka au thuaiin, "kan Lal tang kha va phuar nghet thuai ula'ngin, kan chhak thawm riva avang khian a hun lovah kan chet chhuah a ngaih phah dawn ta e! kan mei rim hi thli chhiain khua alo han thawt thleng nge ni!?, kan tawmna zawn hi an rawn luh fuh vaih zawngin kan Lal tang pawh hi an rawn la bo ngei ang le. a chuti a nih leh a hnuhnung hnung chu kan sai chilh tawh mai aniang chu" tih pah chuan a bula changel kung mal rual dawn chu kuai thlep nghal thuaiin an meichheh vam lai chu a sawr khum ta mial mial a.chutia an hotupa che thut mai chu Zakulha leh Sawiluaia te pahnih chuan phu deuh zawk chunga an tihtur chu ti nghal thuaiin, "i thu rawn lak bawhzui tur chuan i han inlek phek tak ang hmiang, nangni ku Luaia nen kha lam ațang khan rawn hrut ula, keiin he lam ațangin ka rawn nawr ta nge" tih leh an thlang lama zuan thlak chu Zakulha chuan a rual ta nghal a.

Zakulha chuan a chhak mual chhengchhe zet kar ațanga meichher rawn dê thla chuah chuah chu a mit țha zet chuan melh khiauin, a piah Khiang kung awn zetah chuan a tlan lawn ta thuai a.chutihlai chuan a chhak lama au thawm leh meichher pawh chu an rawn hnai thla tawhin, thawm chhuah loh a ngaih zia hre reng chung chuan a Silai aiah a Thalngul bawk chu a han pawt dawk leh ta zal zal a.mahse, an rawn hnaih hle hnu pawh chuan a mihring zuk hmuh theih te reng reng chuan an tawmna hlui lam kha an melh hlek lo mai tih chu a zuk hmu chiangin, Sialțum ho hi an thâ lak chauh lai bawhin khaw dang pasalțha te'n an luhkhung ta mai em niang!? tih te chu a ngaihtuah ta rum rum a.chu a rin dan pakhat chu a hnuai lawk lawka thawm dim em em chunga Sialțum tlangval pali panga vel zi leh țhal țhal țhin te chuan a tichiang zual hleah Zakulha chuan ngaiin, ama hriat tawk leka phun sap pah chuan an inralnawpna hun zet chu a hlauhawm zual ta hlein inral melh țhah, pawl thum an han inveh tur chu chet ran a ngai takzet dawn ta tih a hre chiang ta hle a.mahse, a bul țan nan a hnuai mau tluk hnih vel leka hla a Sialțum tlangval a zuk hmuh ruaih ruaih țhin te chu hmeh mih hmasak phawta, chumi hnuah an rawn țau țeh thlak huk nachhan, an khaw luhchilh tu ralho te chu rilru fim zawk hmang chunga veh zui nghal zat chu a chet dan hmasa ber tur atan chuan thlang fel vatin, a tawmna thingzar uipum rual vela țhingțhi chung chuan a Thalngul zau pep pawp chu a han kuai chik ta țiah țiah a.mahse, a thalfang a han thlah dawn chiah tihah chuan, chumi te awmna chhak lawk ațang chuan meichher pakhat hi rawn thlawk țek thla chuaiin!chutih rual chiah chuan patling nâ tuar tih hriat zet hi a chiau țial zui ta ruaih ruaih a!chuveleh Zakulha chuan a Thalngul chu tlema thlah dul leh hlekin, hnuai lama Sialțum khaw tlangval ho phe buai ri nghal sun sun chu a han bih thla leh thuai a.chutah chiah chuan, chu mite chhak lawka patling nâ tuar la rum ri hruk hruk thawm lo chhuah lehna lamah chuan meichher pakhat hi rawn thlawk êng thla leh puatin, chumi rual chiah chuan patling rum vawng vawngna lam ațang chuan, Keipui țhankin lian lutuk mai hi meichher rawn thlawk thla puat êng thlarah chuan rawn lang zuaihin a tawmna hnuai thlang lawkah chuan a rawn dawk thla puat mai a.chuveleh chhak lama mihring thawm rawn țeh thla zui leh nghal huk thawm chuan patling tlukna lai, țhang leh perh ro inphan khah tlatna hmun awih zet chu an rawn luh pawh tawh a ni tih hriat zeta meichher tam zawk rawn dê nghal chuah chuahin, "Kawla lo thlaphang suh khai! hei i awmna kan rawn bih fuh reng tawh e.khawnge kan duhlian țawng thiam mang lova chu i han zui thuai teh angu khai, Sialțum val, Sa leh ralah kan sai ngai love" tih țeng chhak chhak paha pa pakhat, a meichher thlara a rawn meng dê kar lai chu Zakulha chuan a zuk hmu chiang ta hle a.

Chutah meuh chuan Sialțum ho buaina chu ral nilovin Sapui zim buaia buai an ni tih chu Zakulha chuan a hre chiang ta viau a.chu hun remchang zet chu chet lak nana hman dan tur chu ngaihtuah zui nghalin, Hrumcheuva leh Sawiluaia te țan lakna awm laia a ngaih lam chu a han bih phei a.mahse, an ni pahnih pawhin Sialțum ho chezia chu an bih ve reng ang tih leh, Sapui suaiah Sialțum ho chu an che buai ve hle tihte nen lam chuan an hre tawh turah ngaiin, a tawmna hnuai deuh mai a hliam tawk buaipuia Sialțum ho inhawr khawm laih lai chu a han bih thla leh rih a.fiah zet zeta an meichher thlara a zuk hmuh leh zauh țhin te chu Zakulha chuan sai thluk tawp tawp mai chu a chak țhinin, a zuk sai vaih erawh chuan meichher an lek fur avangin a Thalfang chu an hmu vatin an meichher paihin an țeh nghal vek dawn tih a hre chiang si.chutih lai chuan, chung ho inhawrna piah muala chung ho aia tam zawk tih hriat zet tur patling thawm nâ zawk rawn inhrosa phei leh hulh hulh thawm chu Zakulha chuan mak ti zeta ngaithla leh rihin, chung ho thawm erawh chu mual hla lam panin an ri phei chuah chuah mai a.chutia Sialțum ho an khawsa ta tlat mai chuan Zakulha meuh pawh chu a ti hamhaih lek lek a ni ta!hliam zawnna tur hlang buaipuia a hnuai lawka patling leh tlangval sawmhnih chuang mah inhawr laih laih bawk te chu bih thla lehin, chutia a han bih khiau lai chuan a tawmna thlang hmun awih zet laia Lungpui pakhat chunga eng sa emaw rawn per kai thurh mai chu fiah mang lo zetin a zuk hmu ta ruaih a.chumi rual deuhthaw chuan chhak deuh hlek ațanga eng thawm emaw rawn ri thla fua chu Zakulha chuan hre zui leh zatin, a hnuai lawka Sialțum ho hliam buaipui tute zinga pakhat chu thlang lamah țe țhawt chungin a leng thla nawlh mai a.chuveleh a hma lawka a thlang lama a sa hmuh kha ziau țuk țuk khawpa rawn rum nghal dur durin, a thal a thlah zui ve nghal rual chuan a mi seh rawn vel leh ngat tu Sapui rum leh patling nâ tuar țe ri nen, chulai hmun awih tlan zet chu thawm țihbaiawm zet chuan a khah ta chuah chuah mai a.

Zakulha chuan chutia an talbuai lai chu remchangah la ve thuaiin, reiloteah a hma lawka thlang lam hawia mi pakhat tlu țe thla țhawt kha Hrumcheuva leh Sawiluaia te Thalfang tuar a ni tih chu a man thiam nghal thuai bawk a. chutah meuh zawng Sialțum tlangval te chu thim zingah chuan an indap buai nasain, an chhak lam ațanga rawn nawr thla tu chu Keipui kha a ni tawh lo tawp tih chu an thlang lama a rum ri an hriat tlat avamg chuan an chiang viau tawh tih an chezia ah chuan a lang chiang tawh hle a.chutihlai chuan țhenkhat te chuan an sa himna lam hlir chu ngaihtuah chung chuan a thim a thim chuan indap chunga an awm khawmna lai chu tlan chhiat san hlawmin, țhuang lehlama an țhian te liamna awm chu an rin zawn phei ta buan buan hlawm a.mahse, an hnung lawka chet rawnla mek ral thaza zek zek te lakah chuan an tlu tam telh telhin, chutia an invai buai lai chuan an zinga pakhat chu Keipui chuan la in țe awn ruah ruah chungin thlang lamah a zuan thlakpui ta vawn vawn mai a.

Chutihlai chuan Zakulha chuan a lawnna thing zar hrang hrangah chuan hrui zam hnawk nuai te chu rinchhan pah zel chung chuan midang ho chu sai tlu hnawk hnawk zelin, chung ho hnung lawka Hrumcheuva leh Sawiluaia te pahnih thawm ri san san pawh chu a zuk hre chiang hle a.mahse, zan thim a nih bakah an chetna rem lo lutuk avang chuan an vai chuan thalfang hlah lova hmeh mih chu Zakulha chuan a theih dawn loh tih chu a hre chiang hle a.chuvang chuan Hrumcheuva leh Sawiluaia te tlan liam tur chu a khel ben rik khum țhak țhakin, Hrumcheuva chuan Zakulha thawm rawn thawt chu man thiam thuai chung chuan a piah maia Sawiluaia tlan lai chu a khel chu chiang mang lova va bih pah chuan a han ben thum khum ve leh ta dat dat a.

Zakulha chuan a pakaina thing chu a chhuk san hnu chuan Hrumcheuva leh Sawiluaia te chu a han pawh thuai a.chumi hnu chuan an pathum chuan mual lehlama țhuang danga Sapui rawn hual tute chu luhchilh leh tura veh phei lehin, Sapuiin a lak ve hman lohna zel ațanga chet an la chu an țum fuhna pakhat anih zia chu Hrumcheuva chuan a rawn sawi chhuak charh charh a.mahse, chutia an han kal țan deuh chauh tihah chuan ruam thuk zet hian an kal mekna mual chu lo tan hmukin, an hnuai ruam rai dam thla deuh duaia Sapui leh patling inhrosa ri lo inep khawk rum rum thawm chu an han hre ta a.chuveleh pasalțha pathum te chuan fimkhur zeta chulai ruam lam chu pan thla ve zatin, an zuk hnaih viau tawh hnu chuan hmun hrang hranga mihring tlan lim puat puat leh meichher thlara Keipui lim sen puat puat chu an lo hnaih chilh hle tawh tih an hre ta thuai a. chet lak dan tur an han siam lai chuan Keipui chu pakhat mai nilovin pahnih anni tih chu Hrumcheuva chuan a hre nghal mai bawk nen, Zakulha hnenah chuan "ral hnih hmachhawn tur kan ni tih kan chiang turah ka ngai e" a han ti zawi sap a.chuveleh Zakulha pawh chuan Hrumcheuva'n chet hun tiam a ințan thu a rawn sawi chu khik deuh sak paha lo buk khum zauhin, "Luaia nen hian chung lam ațang khian min lo veng ula, keiin Tawnzinga leh a kawi te saw Sapui hâ ziau chhun pelh chung zelin ka va nawp teh ang khai" a han ti a.

Hrumcheuva chuan Zakulha rawtna chu zui a hreh hle tih chu a chezia ah chuan a tilang chiang hle a.mahse, Zakukha'n hual hrul chung lam thingzar kar ațanga lo chan chu an chet fuh pui theih hlauh chuan, reilote ah Tawnzinga leh a hote chu an che zuai mai dawn tih chu a hre chiang si, chutihlaiin Sapui leh ral inkara tlakzeh chu thil hlauhawm tawp a ni tih te chu a hre chiang thawkhat hle bawk a.mahse, tihdan dang a han zawn fe pawh chuan an piah mual lam pan chuan ralho leh Sapui pahnih te chu an inzim hla tulh tulh mai bawk si, an mahni hnaih thei ang ber chuan sawn luh ve phawt a chuta țanga chan khan lo siam mai chu rawn rawt lehin, "sawlai mual ruam an luh hma sawn va veh hnai ila'ngin, khan țha kan hmuh veleh i rawt ang chuan nangin Sapui țan lakna lo lam ațang sawn i rawn hual chhuak poh a niang chu, Silai erawh hmang lo ila, chuti lo zawng Sapui nen an inkarah kan inrawlh tih an chhui zawn thiam thuai anga, kan thang valh tlawlhah keimahni kan awk ta dah a nge" tih pah chuan Hrumcheuva chuan hma lam chu a pan ta vut a.

Sialțum ho leh Sapui inzim thawm chu a țha hulh hulhin, Sialțum ho pawh ral kut an tuar hlim nen thin so bulh bulh chungin Sapui lakah chuan tlawm an tum lo hle tih a hriat hle a.mahse, zan thim hnuai a ni bawk nen, ngawpui kara Sapui pahnih hliam tuar tawh han hual pin chu a har an ti tlang hle a ni tih chu an chezia ațang chuan a lang hle a. chutih karah pasalțha rothap zet zet pathumin anni ho chu an rawn nang mek a ni tih chu hre tase Tawnzinga chuan Keipui pahnih te chu tawlh sawn san a rawt ngei ang le! an luh chilh hmasak tlan darh ta te khan Tawnzinga teho an lo zuk pawh hman lo chu pasalțha pathum te tan chuan an vanneihna kawng khat a rawn inhawng leh ta!

Hrumcheuva leh Sawiluaia te chuan an chhak mual te veuh bulțhut maia hmawng lian zet zar, ramhrui nena a inzar thim phei mup mai chu lawn khungin, chak zet zetin an phe vuaih vuaih tawh mai a.

chutihlai chuan Zakulha pawh chuan Sialțum ho leh Keipui pahnih hliam tuar tawh te inzimna mual thlang lam chu chak zeta pan thlain, chhim liam lam ațanga hriam lak țan chu a tum ta a.mahse, a helna lam chu țhangpik leh perh hnawk a tam avang chuan a duh anga a kal chak theih loh avang chuan a bial zim deuh zawnga peng lut hretin, Sialțum hoin Silai chhuang meuhva an chan mek Sapui hliam tuar pahnih te tawmna, thingbul lian zet tlukar kul khun hnuai țhangpik chhah zetin naurual thlam pali tiat zeta lian tura a khuh phui mup chu mau tluk vel lek tura hnai ațang chuan a pel thei ta hram a.hetih lai hian Sialțum ho hi Sapui men ngawtin meng lo tase Zakulha pût liam lai hi an hmu hman thial awm e.mahse, Sapui mena meng ta na na na hlawm chu Sialțum ho chuan țhangpik kar ngawt an buaipui chu an vanduaina ai tur ni zui nghalin, Sapui pahnih te tawmna ațanga veilam thlang lam hret, mautluk hnih dawna hla a thing tuai kak kara Silai chhuang chunga pa pakhat tawm ping chal mai chu Zakulha chuan tin zawn hmasa berin, a ke hnuai maia thingtuai banpuam tiat vel chu thawm nei manglo hlekin lei ațanga ban vela sangah chuan a han chhawk zawk a.chumi hnuah a bul lam lei seh dawnah chuan zum leh chuan ngailo tura sahthlau zuih ral raih khawpa chhawk leh zawkin, chupa chhak lawka mipakhat Silai chhuang ve mek chu a han melh deuh zauh bawk a.chutah, a Thalfang pakhat chu a kawng hruikhau hren ațang chuan muangchanga phawi chhuakin, bial pawp khawpin a Thalngul chu a han kuai ta a.chumi hnu chuan ri deuh sat khawpa thawk la lehin, a Thalngul chu a thlang zawka țan la pa zawnah chuan a han thlah thla ta zawk mai a.chuveleh chupa țe țhawt ri chu a chhak lawka a țhianpa chuan zuk bih thla thuaiin, chutia a bih thlak rual chiah chuan Zakulha chuan a ban chu nâ zetin a han vai zui fua mai bawk a.chupa chuan a ham hawng hawk khawpa a awma thingtuai rawn inphun lut ngur mai chu thaw ri hrawk hrawk chung chuan a dawm khur ngat ngat mai a.au han tum sateh mahse a awm chhung lam kam tawt tlat tu avang chuan 'aw' a chhuah hleithei tawh bawk silo!a thlang lama a țhianpa thi tur tal ri sat sat thawm chu thim zingah chuan la hre pha ruaih ruaih chung chuan ani pawh chu a zal zui ta a.

Tawnzinga chuan thlang lama awm te leh chhak lam deuha țanhmun siam te chu au tawn lehin, an meichher te chu tel belh sauh sauh zel turin a han hrilh hlawm a.mahse, chutih lai chuan chhak deuha rawlthar pakhat rawn țe chhuak țhawt avamg chuan an vai chuan chiai nghal titihin, a meichher keng apiang te chu Thalfangin a rawn deng tlu ta hnawk hnawk mai a.chutah meuh zawng Tawnzinga leh pasalțha panga te chuan an hun tawn chu an rin phak baka thil lo thleng chuan a rawn bawh khawlo vek dawn ani tih chu hrethiam thuaiin, Sapui pahnih te tawmna chu hmar lam mualah tawlh sawn san turin an nau te chu an han au ta tuarh tuarh a.chu thupek tak mai chu pasalțha pathum te lo chan ruk khiau chu a ni ta!

Sapui pahnih te tawmna mual hmar lama an han tlan luh rual chuan patling nâ tuar țe rawng rawng ri nen, ruh tliak tuarh tuarh ri nen chulai ruam zawng zawng chu chu thawm rapthlak zet chuan rawn luah nghal vekin, meichher la keng êng apiang te chu Hrumcheuva leh Sawiluaia te pahnih chuan an chhak mau tluk khat pawh tling mag loa hla, hrui zam inphan phui tlat kar hmun hrang hrang ațang chuan an rawn thil chat chat mai a.chutih lai chuan Zakulha pawh chuan a chet lak chu chak zawka bawh zui zelin, a thim lam bela tlan darh apiang te chu a mit tle țha zet hmang chuan theih tawpa chianga melh kar chung chuan chak zet zeta tlan khalh pahin a Milulakchem chuan a vai țhu hnawk hnawk mai bawk a.

Chuti khawpa thim zingah pawh che nâ thei ralho chu Tawnzinga leh pasalțha dang te chuan mak anti țanin, "keimah Zingthinkheia bitum ngam tunge awm che u!?
khatia thim zing ațanga min țhawng lo khan, a ngam chu rawn inlar ta che u" tih kuk kuk pah chuan Tawnzinga chuan hmun tin mai chu hawi kual ruai ruai chungin a tlan hual thuak thuak mai a.chutihlai chuan pasalțha dang te pawh chuan an hotupa thu lak dan chu rawn zawm ve vatin, an Silai te chu natuar thawm an hriatna lam apiangah chuan an tin kual nasa mai bawk a.mahse, an ral beih mek te hmel chu tumah chuan an chhui fu mai thei silo!

Tawnzinga chuan a thlang lawka rawlthar pakhat a lam pana rawn tlan mek a zuk hmuh zuaih ruala, mipakhat chupa rawn tlanna tlan khalh zawnga rawn phe vuaih chu chiang lo zeta zuk hmuin, mitkhapkar lek chhunga chupa a liam rual chuan amah rawn pan mek tu rawlthar chu leiah chuan alo let hlawm reng tawh mai a.chutah meuh phei chuan Tawnzinga thin chu a so nasa zualin, "he lamah kei ka awm e, rawn tlan khawm ula mual khat ațangin kan tha lak țan khauh tir a ngai e" ti a au țial ruaih ruaih chung chuan pasalțha dang te chu a han ko zui tuarh tuarh a.