MIHRÂNGVÃL TE SÛLHNÛ . By. Llpa rokhum 1 - 70

[Ngaia]

Bung- 41

Lusei pasalțha pahnih te'n Darkai khua an han luh zet chuan, khaw chhung reh lutuk leh mak tak maia a ngui ruai mai chu an ngaih a țhalo dun hle a. an pahnih chuan hmun biru deuh lai chuha kal zelin, Lal Keihranga In chu an pan phei țham țham zel a. mahse, Lal mual an han thlena kawmkar ațanga khaw chhung awmdan an han bih chian chuan, Lal in leh tual vel khâh deuh map khawpa mipui lo zi hut hut chu an han hmu ta a. chutah zet chuan Hrumcheûva chuan, a dara vawn din chat paha hmui phun supa Zakulha chu ding lawk tura hrilhin, "kan țum a țha dawnlo tawp mai e! Lal Keihranga leh a mite chetphung hian, ka ngaih ngaih an ti țhalo tawp mai ka ti. tun ang thimchhilh lenglen tlang thawt pelh tawh hun hnu lam lam a, a eng ti tiha Lal mual kila an fûk tak fur mai ni! titeh, Lal mualkil inhnuai lam pan sawn pût phei teh rawih ila, an thawm thawt vel dan saw i han kinganilumâi' teh chawm phawt teh ang. adik adawk thlûk hmasak hi a țha ngai e" a han ti sup sup a. mahse, mualkil upa sumhmun bang thlawpa an han țhut ngawih rân hnupawh chuan, tumah chuan anni pahnih chu an rawn uksak lem loh avang leh, Thla chhuak tir lam eng dul ruih hnuai, hmel hmai lan chian theih mang lohna hmun, sumhmun bang dithlifarfem hnuai thim deuha awm an ni bawk nen, tu amah chuan khawtual mi an nih leh nih loh pawh chu an rawn hre lem lova. chuvang chuan ngaihțha taka nghak ve rihin, Lal In chhung thu kal vel dan chu an âi hnai ve ta tiau tiauva.

An duh ang taka Lal In chhung thu kal vel an han hriat meuh chuan, an chhungril ațanga thinrimna ngawltawt rawn so bulh bulh mai chu tawrh har an ti dunin, "kan tlai ta deuh a ni maw"! Hrumcheûva chuan a han ti ta sup a. chuveleh Zakulha chuan thinrim 'aw' khur zawi deuh sapa lo chhang vatin, "an thu bul thum âi pha law lawi turin, Lal chhuat hi kan kâi ngei angai e" a rawn ti ve ta vat a. Zakulha rawtna chu Hrumcheûva chuan, lu buk deuh nghat paha țha a tih thu lo lantir ve nghalin, "Lalpa Keihranga hnenah khian, amah be duhin khual hnih ten mual an rawn kai e' tiin kam min va keû sak tawh. chung mite chu Lal Taikherha khaw mite an nih thu rawn sawi bawk la" tiin, a bula rawlthar lo ding ngawi reng lai chu a han kheuh zauh a. chuveleh rawlthar chuan mak tih hmel zeta Hrumcheûva chu rawn melhin, "kan Lalpa leh mualkil te lungzûr rorel lai han chhir pawh chu a va chakawm lo rua e" a han ti a. mahse, rawlthar kal hreh tawi hrut hrut chu Hrumcheûva chuan, rum deuh taka melh deuh hrâkin, "in Lalpa chu i pawh hreh deuh a nih leh, pathlang lama țhu, mualkil Kapchemipa saw va bekbawr ta mai che. ani paw'n min hâi lo turah ka ngai e" a han ti leh sup a.

Hrumcheûva'n rawlthar a tirh luh ațanga reilotêah chuan, mualkil Kapchemipa ngei chuan luhkapui chu rawn chuang chhuakin, mipui zing Lal luhkapui hnaih lam deuha Hrumcheûva lo dak deuh âr lai chu, Thlâ chhuak êng thlârah chuan a rawn hmu nghal thuai a. rang taka a kut chuan Hrumcheûva chu rawn hui nghalin, a hnunga amah rawn zui tu, tleirawl ria leh sa pan lam deuh, ban thâ phiar fetfawt leh hmai tlang hriam deuh hrâk chu, phawk deuh hrû chung chuan a rawn ên kâ haû mai a. Hrumcheûva lah chuan, Kapchemipa chezia chu ngaihsam ang reng zeta lo kiai khum sukin, ngawi rengin a mi hruai rawlthar chu Lal Ina lut tur chuan a han kheuh leh ta zauh a.

Hrumcheûva leh Zakulha te chu Lal Keihranga chuan alo en chikin, Hrumcheûva hnunga rawlthar hmai hriam hrekhrawk, a kum phu loha a hun tawn leh a khawsak danphung avanga lang upa lek lek, mahse han en chiana rawlthar mai ala ni tih hriat zet si leh thã phiar ngah fetfawt chu alo melh ngun hle a. mahse, a chezia avang chuan, Hrumcheûva chuan Lal Keihranga chu rang vuta be nghal varin, "Lalpa, hei ka hnung ami hi pasalțha Zakulha a ni e. in hun tawn mek bih tuma rawn let leh kan ni a, mahse, in chetphung hian i inchhung kâi ngei tur hian min nawr ta a ni ber a. in thu lut leh chhuak hi ngaih chian kan duh ta a ni e" a han ti a. Hrumcheûva țawng thlah avang chuan, Lal Keihranga leh mualkil te chu an thawm a reh zualin, "e khâi! chhak pasalțha rawlthar huaisen, Halkhâ pasalțha pawi zahlo zet leh rothap, Tlakphunga Sapui hnarbeh phawi sak tu meuhin ka chhuatpui a rawn rap ta hial e! Tlangaupa naktuk Sih ruam biha chhuah tum i nih avangin, i khumpui kai tura țin vat chu i duh tawh hle ang tih chu hre mah suh ila, min țin san hmain ka thla thum bilh ngei kha rawn țhet teh khâi, i puah fel hunah i duh hun hunah i haw thei tawh ang. an hming chiah kan hriat chhak pasalțha huaisen te tan hian, ka engmah ka ui dawn hleinem le, rawn țhu chawl ve phawt teh tak u. kan hun tawn avang hian, kei leh ka mualkil te, ka khaw mite chen pawh hian hawi ngaihna kan hre lo achhâ a ni ber riha, kan khaw hawi tawi atalangin pawn thimah inlo tâwi hlauh chu kan thiam loh liau liau a ni e" Lal Keihranga'n a rawn tih charh charh tih loh chu, țawngzai chhat leh han hawi harh an awm hlawm loin, tupawh mai chu lusun hlim hnuk ûai hmel an pu vek mai a. mahse, an vai mai chuan Zakulha chu a khat tawka rawn melh leh hrak hrak hlawm țhinin, an hmelah chuan ngaihsanna leh zah rukna an nei lian hlawm hle tih chu alang chiang hle thung a.

Tlangaupain Zupui a han țheh tak hnu erawh chuan, mualkil te leh Lal 'Vanlungûr' pha chin chu an hawiher a zangkhai țanin, a khat tawkin Zakulha leh Hrumcheûva te chu Zu no an han tawk leh laih laih țhin a. mahse, Hrumcheûva bawk chuan an inlawmna țawng chheh thlâh vel chu titi danga rawn bilh chhilhin, "lê! Lalpa, tunah chuan kan inhmâichian' leh zual ta bawk a. heti taka nang leh i mualkil te, i khaw mite thlenga in nguai ta mai hi a chhan kan hriat hi a rem ve țeuh em le"!? a han ti ta a. Hrumcheûva zawhna chu Lal Keihranga chuan, kâi meng hnual raih tawh chung chuan lo buk khum zauhin, a mualkil te zing ami, a mi rin ber Sawichhingapa chu a han melh ta chat a.

Sawichhingapa'n a bulthûm ațanga an hun tawn leh an tun hun thleng, kimchang leh hmaih nei map lova a han sawi meuh chuan, Lusei pasalțha pahnih te mitmeng chu a fim tawhin, Lal Inchhung an luh hma a pawn lam ațanga an thu hriat țhenkhat te avanga an thinrimna ai khan, an thu han hriat chian tak avang chuan an chhunglam ațanga rawn nawr tawt awp awp tu chuan, a rawn țhíng nâ zual ta hle mai a. chu achhapah, Lal fapa Kapvunga chunga thil thleng avang ngat phei chuan, Lusei pasalțha pahnih te chu tum thuhmun nei tih hriat zet chunga in ên dunin, Zakulha phei chu a rawn rûm chhuak ta hâp mai a. chutia rûm deuh halh pah chuan mualkil upa thusawi tawpna chu ngaihtuah nawn lehin, "Chhingapa kam keû kha kan thu nghah tawpna chu a ni ta mai si a! kan beiseina erawh chuan chaurauêk a thai titih tawh a ni ber e" Lal Keihranga'n a rawn tih chuai leh raih lai a, chiang zeta Lal Keihranga mitmeng dul ruih a han melh lai tak chuan, Lal Keihranga hnung hlâ deuh hleka tap mei êngin a ên chin leh chin lohva, khumpui kawm nghenga țhu, Lalnu Țhiangtuali dar chung lama hmeichhe hmai lo lang paw váh, a mit sira ava hmuh thuak chu Zakulha chuan a han en nawn leh ta ngat a.

Chuta a thil va hmuh chuan, Lusei Keité Zakulha chhungril chu a rawn luh nâ ta kher mai le! 'Hmartlang chuankitê' meuh chuan, mihring thinlung sak leh luhlul, hmeichhe ngaihven ngailo leh an 'mitngorâng' thlâh pawh hmaih luia, tukkhum chhah chhawn khum fo chunga vawitam dâi kan lui ngat ngat duh khawpa, ngawipawimawh lo zet chunga liam san țhin tu, Zakulha thinlung chu Chem lovin a rawn rûn ta hem hem mai! mualkil te leh Lal Keihranga te Hrumcheûva teho titi chhuah tui zet pawh chu, a khat tawka ngaihtuahna dang put san leh țhinin, thim chin leh chin loh lam khumpui kawma țhu, Lalnu dar liam phena tleirawl rawn hawi paw phiai bawk chu va melh leh țhinin, ani pawh chu Zakulha'n a va ên apiang chuan zak zetin a pil ve vat zel a. chutia a pil veleh chuan, midang ho titina lam chu rang taka hawi leh vat țhinin, a ngai ang bawk chuan chu tleirawl awmna zawn vela eng eng emaw, tungchaw leh banga tuthlawh ilo inthiat te chu Zakulha mit chuan a chhui phei leh nge nge zel tawh mai a, a mit chhui tawpna chu chu tleirawl hmai zawnah bawk chuan a tawp leh țhin lo thei tawh lo! Chawnglalpuii lah chuan, Zakulha hawi sawn chu rang taka bawhzui ve nghal zelin, a Nu dar phen ațang chuan chu rawlthar, hmelah leh pian ziaah țhatna leh ngaihawmna em em neilo, mahse, an inchhung a rawn rah tirh ațang tawha mak tak mai a alo zah ngawih ngawih, chhak rawlthar pasalțha Zakulha chu a rawn hawi rual chiah chuan, a nu dar phenah chuan zak lutuk chungin a bihruk san rang thei nasa mai bawk a.

Chung rawlthar leh tleirawl duhawm tak te chezia chu tumah lah chuan hre hlawm hek suh, Lal Keihranga leh a mualkil te chuan Hrumcheûva ho chuan, a fapa Kapvunga hnu chhui dan tur chu an rel fel titih ta a. an rel dan erawh chu vanneih thilah kan țum a fuh mahnâ, tih thu chiaha innghat a nih zia chu an hre chiang tlangin, a tuk thimțin ruala Lal Rumvuta khua Vangmual pana chhuak tur chuan, Lusei pasalțha pahnih te leh Lal Keihranga pasalțha pahnih, Kuailenga leh Laibawnga te chu an ruat fel ta a. mahse, Vangmual khua hi mipangngai ni khat kal a nih avangin, pasalțha pali te hi ni tlak hma ngeia thleng tura kal hram turin an rel bawk a. an tum dan chuan, a hma thei ang berah khua chu luh a, Lal Rumvuta In kai vata Kapvunga chu Sial leh Dar hmanga tlan chhuah dil hmasak phawt chu an tum ber chu a niin, chuta an tum anga Lal Rumvuta chuan alo remti hlauh a nih chuan, rei chawl lova let leh nghal vang vang chu an tum dan pakhat chu a ni leh a.

An duh ang taka pasalțha te chan țheuh tur an han ruat fel hnu chuan, Lal Keihranga te chhungkua leh mualkil te pawh an phur ve tawh hle a. a Se palian țha țha pathum leh a Darbuthumrawn roh em em pawh chu, a fapa tlan nan chuan Lal Keihranga chuan a ui lo hle a. chung a ro leh Sial te chu Lal Rumvuta pawh chuan alo iai phalin a ring biklo hle bawk a, chuta alo la sit țalh a nih pawhin a neih zawng zawng pawh a tahtawla sawi hmuh zel tura Hrumcheûva hnenah chuan hrilhin, "kan dam anga țhi leh dar, Sial leh ro dang te chu kan nei veleh mai anga. taitea tlan nan chuan, heng zawng zawng hi ka ui lul love" a ti sauh sauh mai a. chutia Lal Keihranga phur hmel an han hmuh chuan, mualkil zawng zawng te pawh chuan, a țul chuan an ro neih ang ang hmanga, an Lalpa Keihranga chu lo 'dõ' ve tura an inpeih thu rawn sawi ve sap sapin, lenglen Arin tlang a rawn thâwt thleng rawk mai chuan an titi a kal ta viau a. pawn lama mipui la tâp khawmuang te pawh chuan, an Lalpa leh mualkil te rorel dan chu hlim taka inhrilh tawn hlawmin, Lusei pasalțha pahnih te inpekna chu an ngaisang hle hlawm a. chu achhapah, Zakulha leh Hrumcheûva te an ni tih an han hriat tirh phei kha chuan, tupawh mai chuan an lakah beiseina anlo nei lian hle tih a rawn lang chiang ta hle a. chuvang chuan thlamuang tak chunga Lal mual chu țin san hlawmin, Hrumcheûva leh Zakulha te pawhin Valupa Suakngenga ho chuan, Zawlbuk chu an pan ve ta a.

Chutih lai vek chuan, Lungvawng ngawpui hnuai thim ruih maiah chuan, mipahnih hi meichher nen hmanhmawh zetin an kal phê dawr dawr mai bawk a. a khat tawka zolui luang an pawh leh zauh țhinah te chuan, an hmai leh ban, an taksa vela thlan huh hlap hlap țhin an han tuai leh pawk pawk țhin tih mai loh chu, chawl lovin an kal ngat ngat mai a. an hmanhmawh dan em em ațang chuan, helai ngawpui luta chawl mang lova an kal ngat ngat nachhan hi, eng vang nge!? tih chu an hre chiang dun hle tih a lang chiang hle a. mahse, chutiang reng renga hmanhmawha kal an nih avang chuan, Lungvawng ngawpui an han kal chhuah meuh chuan, a upa zawk, pate ping nilnel leh chhip sam kawlh deuh rît rêt, hmai puam deuh ilh êlh zawk chu a chau ta riau mai a. chuvang chuan, a patuai lu la zo zawk hnenah chuan reilotê chawlh rawt paha, a bul maia lungpui ngheng âwn deu tlâih chung chuan ding nghalin, "kan hlat lutuk tawhin ka hre love, tun anga chaka kan kal reng chuan, tukțhuan ei hun hnu lam, chawhma tir lamah chuan kan chhir pawh tawh thoin ka ringa, kan lehkhalh hman tawh tho tho ang tih ka chiang a ni" a han ti a.

A Puzawn hâh thaw deuh hlâi hlâi chu Lengkunga chuan, a meichher êng thlârah chuan va melh deuh rulhin, "kan kaina tur Vangmual khan hi helai ațang hian, engtia la luh zel ngai tur nge tih lah ka hre ta mang hauh lo mai e! i ngaih ang chuan, a chhuak hmasa ta na na na chuan, Vangmual chu kan kâi hma ngei ang le. mahse, anni kha an rawn kai ve hunah chuan rang taka kan bikbo a ngai ngei anga, chulo rengah kan pil chin hi a rei dawn riau mai a, Lal leh mualkil te rinhlelh kan hlawh ta dâh ang ka ti"! a han ti ve a.

A makpa thu rawn kamkeû chu pa ruh chang tawh zawk chuan rang deuh veta lo chhang lehin, "kan tan bikbo a har hlei law'nge, Thlâ vanglai Sih bih tura chhuak chu, tuma'n khawiah an va chu e khâ e tâk pawh va hre ûk suh i! an rorel hre chunga khumpui kai tura haw ka ni bawka, he lam lamah kan thang ta dâh a ni tih hi an hre lo bawk anga. chuvang chuan kan tlang kan kai lehna lam tur kha chu buaina tham a awm hlei law'nge. kan Lal Keihranga remtihna zui thlapa Sih biha kal ka ni miau a. naktuk zan leng hawn thawt rual paw'n khua chu kai leh mah ila buaina tham tur engmah a awm love" a rawn ti țhen leh ta hâih a.

A puzawn rawn țawng thlamuanna chu Lengkunga chuan, nui deuh țhû chunga lo buk chhilh ve leh nghut nghutin, inven nana a Silai ken chu a han thlêk thuak thuak a. an han thlandaih deuh tak hnu chuan a patling deuh zawk chuan, thawh deuh vet paha ruam lam chu pan thlâ leh țanin, hmar chhak lam hawi zel chuan an kal leh ta sawk sawk a.

An chhuah țanna ațanga lofing li nga vel an han chuan chhuah leh meuh chuan, khawchhak tlangdung lian zet, Tlangzo tlangdung chung zawna khaw êng rawn thâwt lawk, sen paw râih leh Tlangzo bul țhut vela țiauchhum insaseng țan mek paw ruai ruai mai chu, an awmna tlang teveûh chhip ațang chuan an han thlira. chu tlangdung leh an awmna inkar ral chhak lama, tlang hlawm fel nulh chu hawi chho leh hretin, thlâ tlâ pil lek lek tawh thlârah chuan, chu khaw Lal mual fai lai lang kalh pawh chu an han hmu ta a. chutah zet chuan, chu mite pahnih chu an phur dun tawhin, an thlang deuh lofing thum awm vela hla a kham inkhawh thui zet chung lam pang chu an pan thla dun leh ta a.

Mahse, chulai kham an han thlen hnua khaw rawn êng deuh uarh tawh kara, an kal tumna khaw lo lang chiang zet tawh thlir chunga an din leh det lai chuan, an thlang mai, an awmna kham tawp lama zolui luang her her kama, mi pali vel, an meipui chheh huala an lo țhu bial țaih lai chu an zuk hmu ta tlat mai a! chuveleh anni pahnih chu rang zeta an bul țhang buk karah chuan lut vatin, chung ho chu uluk zetin an han thlithlai thla leh ta rih a. mahse, chutia an han bih chian hnu chuan, a patling zawk chuan nui deuh hâih chunga a makpa chu rawn kheuhin, "ral' chu an ni dawn lo tawp e, khulaia pa cher ria lam deuh khu, Lal fapa Satbilha sangawizawnpui Lutruaia kha lo zuk ni renga! eng sâ tih tham tak chu chan ta mawlh mawlh hlawm chu nimaw!? ti teh i zuk pawh thuai teh zawk ang" a han ti a.

Lutruaia leh a țhian te an zuk pawh hnu chuan, anni ho chuan nui țhen deuh țhâ chunga lo dawngsawngin, "he Nghalmal hliam hi kan chhui laklawha, Thlâ kâi țhat lai a ni bawk nen, kan phur atalangin zan kan tumtawi țhak mai a nih hi! mahse, tun ang zan thimțin țan tawhah te, heng lai lai in rawn inchhir thlen tak mai! a eng thu chhia țhain nge lah rawn tir che u ka hre ta lo e â" an meipui chhem han vur belh zauh pah chuan, Lutruaia chuan a rawn ti phâwk ta deuh hrâ a. chuveleh a țawng chheh pangngai, rang leh 'aw' sin pial deuh râta a patling zawk chuan lo chhang thuaiin, "kan țum kan thlâh fuh dawnin ka hre ta lova, valh hnihna sut buai tum an awm ta tlat mâi! chhak pasalțha rothap zet pahnih, Zakulha leh Hrumcheûva ten kan Lal leh mualkil te thlawpin, ro hran an rek ta sia, arang arangin in tlang kan rawn bawh ta rawk rawk mai a ni ber e â. muang lova khua kan luh vat a ngai e" a rawn ti ta thuai a.

Lal Keihranga khaw tlangaupa Pawngduma thusawi chuan, Lutvela beng chu a luh ta zar zar kher mai! chu mai ni lovin, Hrumcheûva leh Zakulha te rothap zia an sawifo țhin lah a hre chiang hle bawk si. rang taka a țhiante chu insiam tura tur nghalin, "pu Duma chu i zam a țha narawh e! azan azan pawh sawi lova, i makpa nen meuh helai rawn lut khawpa kan Lal fapa tana i rinawmna hi a thlawn hauh lovang le. kan tana i thil tihte khan Sial nufa chu a man tawk e, i hlawh chu kan Lal fapa hnen ațang chuan i hmu mawlh ang, tiru le i liam vat teh ang u" tih pah chuan amah chuan hma a han hruai zui ta zat a. chutah zet chuan, Lal Keihranga khaw tlangaupa Pawngduma leh, a makpa Lengkunga te pahnih chu an hlim ru nasain, an Lal Keihranga phatsana, Satbilha'n an Lal fapa Kapvunga a phih âwh theih nana, Sial nufa hlawh tura a Dumbawm ruk chhuah sak tura a thlem hmin, Lal Keihranga khaw tlangaupa Pawngduma chu a khî ru deuh vân vân reng tawh mai a.

[Ngaia]

Bung-42

Khawchhak kawlkilah khawfing chat mek a rawn vâr deuh raih tawh lai, hmun țhenkhatah phei chuan leilung a lan deuh îarh tawh lai chuan, khawthlang lam hniam zetah chuan, Thlâ fêm țan tawh pil tur pawh ala bial paw phek mai a. chutihlai chuan Lal Keihranga khua Darkai valupa Suakngenga pawh, an khaw tlak lam dai thlir chungin Zawlbuk char lamah a ding tau mai a. chutia a din ngawih ran lai chuan, pasalțha Kuailenga pawh mit nuai deuh nap nap chunga Zawlbuk ațang chuan rawn chhuak vein, "kan țhiana te pahnih chu ilo la hmuak haw bik lo turah ka ngai e, thawh ka hai ta emaw ka ti mai a! kan pasalțha Laibawnga pawh a rawn thawk chhuak țep tawh anga, nizan Zawlbuk in rawn lawi tlan hnua, an chhir chhuak leh ta mai kha eng thu tak niang maw!? tiin ka lo ngaihtuah deuha. kan ralrel zuan zuina tur hun chu an rawn thlawp pha leh em ang chu â" a han ti a. Suakngenga chuan an pasalțha Kuailenga thu rawn kamkeû chu, rawn leh hawi vut paha lo chhang vatin, "a ni teh tak e maw, nizan khan kan Lal Keihranga kha Cheûva khan a bekbawr zauh tih thu a sawi a. Zawlbuk kan kai hnu khan, an Lal Taikherha leh an mite pawh kan khaw hnuai mai, Sialkal ngaw hnuaiah khuan an tâp tir rih thu leh, mipa awm ta manglo ta chu anni ho chu, khuaah an riah pil san theih loh thu te pawh kan Lal hnenah chuan a sawi tih min hrilh zauh a. chuvang chuan, Sialkal ngaw lam an pan ta a nih kha. chulo rengah, kan Lalpa hian Lal Taikherha leh a mite chu khua rawn kâipui turin a chah thu a sawi bawk tak khaw maw" a rawn ti ve var a.

Chutia valupa Suakngenga'n a rawn sawi zawh hnu lawk chuan, veng mawng lama mihring rawn inzui thliah thliah lai chu an pahnih chuan, fiah mang lova thlasik zingfim ințan mek leh khaw la thim chhelh chhawlh, țiau zam paw chêk karah chuan zuk thlêk rual thlá nghalin, an pahnih chuan chung ho thlir chung chuan an ngawi dun ta ran a. chutihlai chuan, chung mite pawh chu rawn hnai chho ve zelin, an hmatawng Hrumcheûva hmel chu anni pahnih chuan an zuk hmu fiah thei ta a. chuveleh an pahnih chuan Hrumcheûva teho lam pan chuan chhuak thlâ ve vatin, an zuk pawh ruala Hrumcheûva'n nui var chunga "kan rawn inkâwi kâi ta hram e, kan tlai chhe bik em lovang chu maw"? ti a alo biak vat lai te chuan, Lal Taikherha leh a mite chu Suakngenga leh Kuailenga te chuan, lainat zetin an melh leh zauh zauh țhin a. mahse, hun rei tak ramhnuaia tâp tawh ta na na na chu, khua an han luh leh meuh chuan, Lal Taikherha leh Lusei pasalțha pahnih te tih loh chu, tumah țawng zai rawn chhuah mai nachang pawh hre hlawm mang tawh hek suh! khaw mi tho hma zual kaițena zunram thiara rawn dak chhuak mek te nen chuan, phawk deuh hrâ chungin an inmelh hrak hrak hlawm mai a. chutih lai chuan, Lal Taikherha leh a pasalțha te pahnih leh an mahni rawn fin tute pahnih erawh chu, inhresâ ang maia an hma lamah chuan Lal mual lam pana la titi chho zelin, ngawi rengin anni ho pawh chuan an zui ve miah miah mai bawk a.

Lal mual an han thlen rual erawh chuan, mak ti zet chunga Lal kaițena mipathum lo ding vang mai te chu, an vai chuan phâwk zet chunga thlir chhoin, hemi ni zingah hian Lal Taikherha leh a mite hian a khua hi an rawn kâi dawn tih hi, Lal Keihranga hian Hrumcheûva kâ ațangin alo hresâ tawh alo ni a. chuvang chuan mualkil zinga a rin bik pahnih te nen hian Lal Taikherha teho hi zing ên hma ațanga lo nghak tawhin, "chhak Lal huaisen leh Lusei tlang te daido tu Lal Taikherha, nang leh i mite hi ka tlangah hian in mikhual lah lovê. ti teh ka inchhungah hian rawn tlu zâl la, hâhzu' ka lo zûk tak teh ang che" tih paha nui var chung chuan, Lal Keihranga chuan Lal Taikherha chu fiah zetin a rawn ên nghal chat a. Lal Keihranga țawngkam nelawm zet chuan Lal Taikherha chu a ti lawmin, "khâih khâh! Lalpa kei leh ka khaw mite tana i inphal zia hi, ka pasalțha pahnih te hian ka bengah an luh ngun teh e. Halkha leh Thlanrawn ralah ka mite lu khati zat kha ka hloh ta si a! chumi hnuah Lusei Lal te zingah nang chiah belhfakawm ka chhir pawh awmchhun ila ni e" lo tih ve vat pah chuan, tlangnel takin Lal Keihranga luhkapui chu a kâi chho ve ta a.

In chhung an han luh diak hnu chuan, Chawngpuii leh a nu pawh an lo tho ve tawhin, Lal Taikherha leh a mite, an vahvaihna khua sei zet tawh avanga an thuam țet hninghniang tawh leh, ei in mumal hmu ngailo tih hriat zeta an hmel pawr fip fep te chu an lo lainat em em a. chuvang chuan, hmeichhe ho tupawh mai chu an nufa chuan țha taka lo dawngsawngin, chu zingfim hun danglam zet chuan Lal Keihranga khua, Darkai vengtin mai chu a khâh rang ta kher mai a. vengtin ațang chuan, nu țhenkhat leh pa bengvar zual te chu Lal in pana rawn kal hlawmin, Lal Taikherha leh a mite chu unau inhmu ngailo lawm takin an rawn lawm liam liam hlawm a. mahse, chutia zing khaw vâr chhelh chhawlh tawh laia Lal Taikherha leh a khaw mite leh, Lal Keihranga leh a khaw mite an rik laih laih lai chuan, mi panga te erawh chuan inthurual zet chunga Zawlbuk lam chu panin, an hmabak tihtur inmung mek avang chuan, Zakulha meuh pawhin a thinlung Lalnu Chawngpuii pawh a melhthlâh hman ta lova. an han inpeih hnu chuan, Zawlbuka tlangval riak mahni in lam pawh la haw lem lova, Zawlbuk meipui aia lo la țhu zi hat hat te chu, pasalțha pali leh valupa Suakngenga teho chuan muangchanga chhuah sanin, "in khaw pasalțha pahnih te nen kan thang bo dawn si a, nang leh zelin kan chhawn i rawn thlawp chuan, Lalpa Keihranga a hrilhhâi lutuk dah hlauh ange! chu achhapah, kan hun tawn hi heti hi a ni si a. leido nei anga khawsak a ngaih tawh avangin, nang tal hi chuan khua hi i luah lum a ngai e, kan rawn inkâwi hnawk atalangin tum aiin kan chhuak tlâi lek lek tâ" valupa Suakngenga hnenah chuan Hrumcheûva chuan a han ti a. chutah meuh chuan, Suakngenga chuan Hrumcheûva chu hnial luih chi nia a hriat tawh loh avang chuan, khawdai an thlen chuan a han ding ta chat a. mahse, an liam hma chuan zawi thâwp deuh sat a zuk aû lehin, "in chhawn ven chak hle mah ila, i mi chah ang chuan khaw dai chu kanlo do ta nge. min rawn ngaihtuah suh ang che u" tiin a han chah lët ve leh a.

In tin mai a tukțhuan rela nuho buai phê sek nâkpêk zawnga lo țhu, paber vawt ti khabe khawng deuh dat dat chunga Vaibel pak laih laih te chu, thawklehkhatah vaibeldawn phe hlawk hlawk khawpa hmanhmawhin, Lal mual lam panin an tlan khawm hlak hlak hlawm a. chutih lai chuan an mahni ko khawm tu thawm rivâ chu veng hmawr lam thleng chuan darh zau zelin, chu thlasik zing ni chhuak hnung puak zawnga ding far chung chuan, Vangmual in zanga țha țhut bawr vel paho tam zawk chuan Lal mual ațang chuan, Lal In chhung thawm chu an ngaithlâ phawk hru hlawm a. Lal inchhung thawm lah a rawn puk sosang nasain, "Lal Keihranga'n ka kawng kih hnawk tumin, tlang dang pasalțha te a khawm a maw!? a fapa, a tlang chang tur hi ka sal tang a ni tih a hre reng si a. chu achhapah, a fanu hmarchuankitê' lah ka famo' tur, eng thu mahin a pawh chhiat theih tawh loh tur khawpa, ka thu valha âwk mek a ni si. chuti chung chuan kei hi min nâwp ngam ang maw" tih pah chuan Lal Rumvuta chuan a mualkil te chu a melh kual tûr khûih khûih hlawm mai a. mualkil te lah chuan, an Lal Rumvuta te pafa buluk zia chu an mahni zutzungchal an hriat chian tlukin an hre chiang si a! chu achhapah, an Lal hausakna par zu tlan tlang reng renga in hawt buk an lo ni kumkhua tawh bawk nen, tupawh mai chuan an tlawn rawn hi a ni hawt mai bawk si a. chuvang chuan a thlêkna lam lam chu mualkil te tan chuan, zawm nuam leh pawm duak duak awl tak a nih vek si avang chuan, an hun tawn mekah pawh chuan amah ai aia thinrim rimah an țang emaw tih mai tur an ni vek hlawm mai a. mualkil pakhat chu hâpui țhial rap chunga rawn țawng chhuakin, "Lalpa, a țul a nih chuan kan pasalțha te khawmin, funpui kan êr nghal mai ta lawng! Lusei Lal te zingah pawh zah kai leh khaw lian tlang țhut tu, Lal ropui Lal Rumvuta pawi tawh (tawk) pawina chu han hre chái chái teh se" a rawn ti rum deuh ngal ngal mai a.

Chutia Lal Rumvuta leh a mualkil te an inhrosak dum dum lai chuan, Lal Keihranga khaw tlangaupa Pawngduma leh a makpa Lengkunga te pahnih pawh chu, kil khatah an lo țhu kîk ru deuh hâih reng mai bawk a. mahse, Lal Rumvuta leh a mualkil te thu rel chhoh dan chuan, an ngaihtuah phak reng reng loh thil a áwn chho ta tlat mai! an Lal Kehranga fapa Kapvunga nunna chu an thil lo tih tawh avang chuan a derthawng țan ta tih chu, Lal Rumvuta fapa Satbilha thu rawn thlâh duh dan ațang chuan an hrethiam țan ta a. chutah zet chuan, an Lal Keihranga an phatsanna rah chhuah chu a duhawm loh zia an hre chiang tawhin, "kan leido te lakah zahngaihna lan tir a țul lovang ka pa, ka Hmarchuankitê nena kan 'khawnțhiang' pal chhe duh tu, Kapvunga hi kan mal hmasa ber tur a ni! malchaw' pein a lu hi ka lâm hma chuan, Darkai khaw run tur hian kei leh ka chekâwi te chuan funpui kan êr ve lovang" țeng chher chhuka Satbilha'n a rawn tih lai phei chuan an lo meng kâwk kâwk tawh mai a. mahse, an thil tih pawi lutuk chu siam țhat leh nan hun a awm tawh lo! se bo hnua sekawng khar zawng a sawt loh zia lah an hre chiang si, Satbilha rawtna lam âwn zawnga Lal Rumvuta leh mualkil ten, an ralrel an han sêp zui hmiah hmiah mai te chu ngaihthlak hrehawm an ti ta em em mai a.

Chutih laiin an thu tawp chu Lal Rumvuta chuan rawn chhilh zuiin, "kei leh ka mualkil te thu tawp hi tuman an kher danglam tawh tur a nilo. kan pasalțha zawng zawng te zinga kan chhuan ber, ka fapa taitea thu rawn kêu finthlak zet hi kan zui ang. Pawngduma sawi dan hmangah tunah hian, Lal Keihranga pasalțha te leh a chhak pasalțha te chuan, kan tlang an rawn pan mek tawh ngei anga, an rawn kâi hma ngei hian, kan chet thawhna hmasa ber tur hi kan bawh nghal tur a ni. chumi hnu lama kan hma lak zui dan tur chu ka fapa kutah hian ka dah e, chu chu kan ralrel thu chhilh bilh chu ni rawh se" tih pah chuan a fapa Satbilha chu a han melh ta rulh a. chutah zet chuan tlangaupa Pawngduma chu a huisenna zawng zawn nen rawn țawng chhuakin, "Lalpa, ka țawngin i pawi tawk lo hram se, kan Lal fapa hi a nunna meuh chu zuah hram turin ka ngen e" hlau khur hlak hlak chung chuan a rawn ti thâm ta chhal mai a. chuveleh Pawngduma lam chu an vai chuan meng rum ûl chunga hawi nghal țhupin, "nanga thu leh padarben thu hian, Lal Rumvuta chêl a luh lo tih hi hria la, in pafa hlawh tur kan pêk phal che bak aliama țîk țâk rawn ti leh ngam tur em i nih!? i thu hnû rawn puahpui hluai avanga, i kareh ka rêh zauh belh sak ták dah hlauh hma che hian, pawna senufa saw hruaiin dai pawn lamah inkâi chhuak tawh u" tih pah chuan Satbilha chuan, a makpa Lengkunga nen chuan a nam chhuak ta dawr dawr mai a. Satbilha thu chu anni pahnih chuan hnial ngam tawh hek lo le! pawn lama khaw paho lo fú țhup te lah chuan, kutthak hnawih nan an ît tlang hle tih lah an hmelah chuan a lang chiang hlawm bawk si! a rang aranga an Senufa hlawh chu kai chungin, Vangmual khaw tlakdeng dai pan chuan an inpawt bu thlâ ta laih laih a.

Tukțhuan ei kham fehrehsán hun velah chuan, Vangmual khaw veng tin chu an tlangaupa Rangdula chuan rawn hrût kualin, a kut pahnih chu khawr kum deuh tlân chung leh ding âwn ang tlêih tlâwih chung chuan, "khâih khâih, Lutthluaiipa veng khan in beng lo chhi ru khâi, nangni tlâk deng veng hi ka âu ri hrelo khawpa khawsak inchingin, eng thu keuh thu nge tiin min rawn luh chhuah leh luai luai țhin! tunah hian, Lal mualah apui anawiin lawi khawm tur a ni e. tumah dai kâna chhir chhuah loh tur, thu pawimawh tak kan Lal leh mualkil ten an thâwt dawn e" puam țelh țawlh leh thlûk deuh raih chuan a rawn ti ta âl âl a. chuveleh tlangval phawk zual țhenkhat te chaw ei kham, luhkapuia nilum ai paha lo la zi mar vel mek te chuan nui deuh van chunga tlangaupa chu rawn aû êlin, "chaw fun âh a ngai em"!? an rawn ti leh țhin a. chutia an rawn ti deuh fo mai chu tlangaupa Rangdula huat tawk lah alo tling! "tufâ luhrum kawlh nge maw i nih teh châi le!? mual hnih danah inri ang" ama hriat tawk leka tih zui hlak pah chuan, puan ven sâwi deuh tlân chung chuan veng dang panin a insawi liam leh ta lâih lâih a.

Tlangaupa tlang thawt avanga Lal mual an rawn lawi khawm hnu erawh chuan, tupawh mai chuan an leido neih thu, thu thințhawng zet mai chu an hre chiang tlang zual ta hle a. luhkapui tlang sanga an Lal Rumvuta te pafa ding dak luah te thu rawn sawi chu an vai chuan khûn khán zeta ngaithla zawm zelin, "kan 'sabiakpui' ti a kan chhal, tlang țhut Lal pahnih te min țan rual tir tu tur atana kan lo sawi hmin diam tawh leh, a fanu leh ka tlang chang tur ka fa rolum te 'suihkaihhlih' suih pui hmabaka kan thu vuak rempui tawh, Lal Keihranga leh a khua te run tur hian, naktip ah 'funpui' kan êr ngal chûk chûk ang" meng sen rum chunga rawn tih leh pah chuan, Lal Rumvuta chuan a Lal fei bil lam chu luhkapui phakrak ri tuârh khawp chuan a han sawh ngheng mai a! chuveleh mipui zawng zawng chu ring zeta rawn au nghal dur durin, an la aû hulh hulh lai chuan valupa Hrangvela, pa țha leh zam dam ni lemlo tak, mahse, an Lal Rumvuta fapa Satbilha tlawn peih zet leh, chumi avanga Satbilha duhsakna changa an valupa hmasa, pa țha zet Luaibûka nêk chhuaka a aiawh atana Lal Rumvuta te pafain valupa atana an ruat chu, Lal luhkapuiah chuan a han kâi chho ta tharh a. Satbilha bula a han din men kalh deuh râh hnu chuan, a ban chu mipui lamah chuan rawn phar chhuakin, "le! kan thu inbah hnawk dan chu kan Lalpa kâ ațangin kan hre ta a, engtik khawtikah mah Vangmual khua hian tlawm ni hmel a hmu tur a ni love. kan leido te lakah hian vawiin ni ngei hian Chemhar kan chhuah țan nghal dawn a, buaina ințanna hnukpui ber chhat turin kan Lal fapa, pasalțha rothap ber hi a rawn pen chhuak dawna. kan Lal fapa hratkhawkhen zia hi tupaw'n kan hmuh theih nan, kan leido khua Lal Keihranga leh a pasalțha te tlâk khalhin milu kan lam dawn e" a rawn ti ta a.

Valupa Hrangvela thu rawn kamkeû avang chuan mipui te chu an phâwk nasain, a tu lu chu kan lâm dawn chu ni maw!? tih melhin tupawh mai chu an inmelh hruk hruk hlawm mai a. mahse, reiloteah an thinlunga zawhna awm chhanna chuan Lal mual chu rawn luhchilh nghalin, mual sir chhim lam ațanga Lutruaia leh mipahnih rawn chhuak hlawl te zinga pakhat, ramhruia an hnungkhirh tlat, rawlthar vanglai hmang mek sang thlerh thlawrh leh hmel țha zet, a hawiher ațang reng renga Lal thisen kâi tih hriat zet chu an la hriat ngai reng reng loh a ni tlat mai! chu achhapah, chu rawlthar an sawngbawl dan ațang chuan, an leido Lal Keihranga vuavang a ni ang tih leh, chu rawlthar lu ngei chu an lâm dawn tih chu mipui zawng zawng chuan an hrethiam nghal ruak hlawm a. chu an thil hmuh leh an ngaihruatna avang chuan, hmeichhia leh naupang, tar lam leh pa awm nêm țhenkhat te thleng chuan an țîm ru nasa hlawmin, țhenkhat te phei chu an tlan haw chawn chawn hlawm a. mahse, Lal Rumvuta ve pafa leh mualkil te, mipui tam zawk te erawh chuan chu rawlthar chu diriam zet chunga lo melh hlawmin, mual lai chu zau peppawpin an han zuah kaw ta a.

Kapvunga lah chuan, Satbilha te pafa awm dan leh mipui te chetphung chu alo hrethiam lovin! "lungngai suh taite, kan makpa tur tehchâwk a nia i chungah kutthak an hnawih duh bik hauh lovang. chungah pu vana'n bawkkhupin a lo thlir reng țhin dawn che nia, kan thu a intawh fuh loh thulhah pawh rei táng lovin ka rawn tlan chhuak leh thuai ang che" ti a, a pa Lal Keihranga'n a kal dawna a thu chah te kha a hre chhuak vang vang a. chu a ngaihtuahna avang chuan a rilru chu rawn dam leh huaiin, ka pa hian min tlan chhuak tu tur a rawn tir anga, chuvang chuan, hetiang hian min khungna veng chhak tual lungpuk, a kawngka thingtuaia sawh kalh tlatna ațang khan min hruai chhuak ta a nih dawn hi' tih te chu ngaihtuah kai zelin, nuih var var pah chuan mipui karah chuan a mah rawn tlan chhuak tu, a pa mi rawn tirh te chu a zawng kual ve nasa mai a. mahse, chutia a melh kual ruai lai chuan a hnung lam ațanga rawn nem kat dawrh tu avang chuan, mual lai tak, mipuiin an zuah kuak zawl dup lamah chuan hnungkhirh chung chuan pái lut deuh khatkhatin, a hnung an khirh tlatna avang chuan, a tum loh zeta inpaih sual palhin mual laiah takah chuan a țhingțhi ta hnak a.

Chutia a han țhingțhit hnak hnua, a puan ven kara a bawp rawn lang vel insawi hliah hram hram chunga a han dah (dak) chhuah leh lai tak chuan, a hma chiaha milulak chem hum run chunga Satbilha lo ding chu la nui var chung chuan a han ên chho a. mahse, a chung lam Ni zung inkhawh êng suar thlâra Satbilha thinrim mitmeng sen huam mai a han hmuh chian rual chuan, thawklehkhatah a beiseina zawng zawng chuan ruahmualliam ang maia liam san nghal duakin, "i khua te nena leidoa min siam tu chu nang hi i ni. kan kar Chemhar pawh nang hian i tawk hmasa ber ang, malchaw barhin i lu kha Sahlamah ka tar hmasa ber anga, chu chuan i khua te nena kan inkarah leido bul chu a țan chhilh nghal bawk ang" Satbilha chuan a rawn ti thûm ta chhur chhur mai a.

Satbilha thusawi chu Kapvunga chuan kûn deuh ngâih chunga ngaihtuah zuiin, a hma lawka a beiseina leh tuna a hun tawn inpersan zia chu a hre chiang tawh hle a. mahse, a ngaihtuahna kawma a la kun reng lai chuan, a hma lam Lal luhkapuia ding Lal Rumvuta rawn țawng țeng chher chhuaih chuan, rang taka a ngaihtuahna atâ chu rawn țhawng harh lehin, a thawh chhuah țaih țaih lai te chuan "Darkai Lal fapa chuam, ka fapa pasalțha rothap lo cho tu chuan, eng hriam nge a thlan dawn tih han zawt teh u" a rawn ti veleh ta a. chutah zet chuan, Kapvunga chuan a dinhmun chu a duh emaw a duhlo emaw, pawm angai tho tho tih chu a hre chiang thawkhat ta! a mah rawn hruai tute zinga pakhat, Lutruaia'n diram nui keh sáwnga melh chunga Chem leh Fei keng chunga a rawn pan lai te chuan, Kapvunga chu a naupan zamna chuan a rawn man nasa tawh em em mai a. mahse, duhthlan tur awm miau hek lo le! "ka kut zala tlu lova i tho leh thei a nih ngai chuan, he khua hi pang himin i chhuahsan ang tih ka tiam a che" tih paha Satbilha thinrim rawn meng sen rûm chu ên țit deuh dai pah chuan, vanneih takah ka bei ngei ang che, chuti a nih loh chuan min that lui tho tho dawn si a' tih rilru pu chung chuan a infuih ve nasa mai a.

Lal Rumvuta tuala mipahnih, inthâh tuma inveh mek te chu an taksa intiat deuh ûaih mahse, pakhat zawk chetphung chu a naupang chhia telh telh mai a. chutahmah chuan han ên reng reng pawha, pasalțha chet phung dik tak mai a zamlo zeta che kual mek, pakhat zawk chuan a bitum rawltharte chu hlahthlem a tum hauhlo tih chu a lang chiangin, rawlthar zawkin awmze nei manglo zeta a Chem arawn vai leh fur fur țhin te chu, zei zet zetin alo zuan khum zalh zalh fo mai a. mahse, a naupang zawk chuan a bitumpa chezia chu tlema ngaihchan nachang hre ve zelin, Satbilha rawn chet hun tur nghak chung chuan Kapvunga chuan, Satbilha mitmeng sen vam huam mai chu a melh let ve ta khâih a. mahse, rei a nghah hma chuan Satbilha chu rawn vir thutin! Kapvunga nâk zawnah chuan a Chem chu a rawn vai thlawk tlê ta puat mai a. chuveleh Kapvunga chuan lo tawlh ve vat paha, a Chem chu Satbilha lamah chuan lo vai ve nghal vatin, a vai ruala a Chem leh Satbilha Chem innawt țêk chhuaih avang chuan, a kut ațang chuan a Chem chu a dawk chhuak ta nawl nawl mai a!. chuveleh Satbilha chuan a Chem vilik zui leh nghal zuaih zuaih pah chuan, "nauva, hriam keng lo ka bitum ngai love. i Chem saw va chhar ta che" a rawn ti thlêr vin tuarh mai a.

Kapvunga'n a Chem ava chhar leh hnua an han inveh leh lai te chuan, Satbilha chuan chet vena hun pek a tum tawh lo hle tih chu Kapvunga chuan a hrethiam ve ta a! Satbilha'n nâ zet zeta a rawn vai puat puat lai te chuan, a thâ tawp tak meuh meuh hmang chuan lo indang vein, pen sawm dawn hnung tawlh chunga alo inven ve țawk țawk hnu chuan, mipui an lo thûm huk ruala a awm zawna Satbilha Chem rawn thlawk leh puat chu Kapvunga chuan, a tum angin a veng zo ta ngang lo! Satbilha Chem alo dan tleû ruala a thâ a zawi tawh lutuk avang chuan, a Chem chu a lek khawng zo tawh silo, Satbilha Chem rawn tlang thla puat chuan, a tai veilam chu ril rawn tlâ chhuak hawk khawp chuan a rawn hlawi thleng ta hlauh mai a! chutah meuh chuan, Kapvunga chu leiah chuan a tai, a puan venna chung chiah thler thi puat puat lai dawm chung chuan țhingțhi hnawkin, a hma chiaha Chempuia thisen far tluk tluk chunga rawn ding leh nghal zat Satbilha chu, nâtuar khur zaih zaih chung chuan a han chhoh en țawk țawk a.

Kapvunga nâtuar khur zawih zawih mittui tling pam leh dul râih mai chu, Satbilha chuan diriam zeta lo nuihsawh zuiin, mipui sahawk tawh lo ri hulh hulh mai chu chapo zet chungin a han melh kual leh te te a. chumi hnuah Kapvunga lam bawk chu bih kun thlâ leh ngurin, "ka lak ațanga pang hima chhuak hi an awm ngai love, nang hi milu sawm ka khaina tur chiah i ni e" tih pah chuan a milulak Chem chu Kapvunga nghawng zawnah chuan, nâ zetin a han vai thlawk ta puat a. Kapvunga luin lei a den sen chuaih rual chuan a taksa pawh chu leiah chuan bawkkhup ve nghal hnawkin, a thih sual chalchang kut leh kê khur zawih zawih lai chu mipui zawng zawng chuan an rawn bial ta tuau tuau a. chutih lai chuan Satbilha lah chuan, Kapvunga lu chu hawi vulh vulh chunga khaiin "mihrangvalin ral lu ka lam dawn e, Vangmual pasalțha zawng zawng te û in thuam famkim nen rawn inlan ru le" tiin a au lung lung mai a. chuveleh Nula țhenkhat te chuan an Lal fapa chu ral that tih entirnan, Arkeziak țhahnem fe rawn ban sak hlawmin, Lutruaia chuan Silai zen sawhsâ a rawn pe nghal thuai bawk a. Lal Rumvuta pawh a nupui leh mualkil te nen, a fanu teho nen nui tlawrh tlawrh chunga luhkapuiah chuan an ban lo phar suau suau chunga lo auin, Silai kah paha Satbilha'n Bawh hla a han chham lai te chu chapopui zet chungin an lo thlir țhup hlawm a.

Chutih lai chuan, Lal Rumvuta khaw pasalțha kei ka ni inti chin zawng zawng te pawh chuan, an Lal fapa chu rang taka rawn zawm ve nghal vat hlawmin, Kapvunga lu chu Lal mual țhangteah chuan dahin a bulah chuan, lampeiah chawțhing tlem an han dah sak a. chutah Satbilha chuan, chawțhing chu a kutveilam ngeia keng chung chuan “Hei , mal chaw ka vei lamin ka pe a che,
Lamthlang I rap ang a,
Lamchho ka rap zel ang;
I meithal chawi kha zawp sela,Keia meithal chaw i thin leh lungah tla rawh se,” tih pahin, Kapvunga kâ-ah chuan chawțhing chu a han hnawh lut mawlh mawlh a. chutihlai chuan, khaw mipui haw ru tawh țhenkhat te pawh chu rawn pung khawm belh leh zelin, Darkai Lal fapa, rawlthar hmelțha leh pian nalh, an khawmi tupawhin an ngainat em em Kapvunga lu chu, Satbilha ho chuan an lam ta luih luih mai a! an duhtawk an ngah hnu, zanriah rel hun velah chuan, Kapvunga lu chu lungdawha Phan thingtuai an phun lawk Sahlamah chuan khaiin, naupang leh tar te, nula te chen chuan Kapvunga lu chu an thlir ta luih luih a.

Chutihlai chuan, Lusei pasalțha pahnih te leh Lal Keihranga pasalțha te paw'n Vangmual dai chu rawn kâi chho tawhin, an kal chhan ber Lal fapa Kapvunga lu lah chuan Sahlam alo mawi tawh tih an hre silo! Kapvunga chunga thil thleng hi heng pasalțha te hian an hriat hun chuan, engtin tak ngai ang maw!?

[Ngaia]

Bung- 43

Vangmual dai mai an thlen tawh avanga thlamuang deuh taka, Vaibel pak khaw muang talh talh chunga lungpui chunga tuiburhmuamdâ hnih lai tura rei, an han țhutchawlh hnu chuan, khawthlang lam tlang dung inkhawh zui chung zawn, Suk chen velah chuan Ni pawh a ding sen deuh râm tawh a. chutihlai chuan Laibawnga chuan, a Vaibel lu chu a kutzungpuia beng thih mawlh mawlh pah chuan, "le, naute u, Vangmual dai hnai kan kâi atalangin, a uih zawn ang vut vuta keartui mawng khawng zawt zawt khawpa hmanhmawha liam ta na na chu, kan thâ alo ûai tlang tawh deuh nge ni, kan lo țhu muang rei ta dawn dâh mai ka ti! ti teh u khua i kâi dialh tawh teh ang u khâi, Lal Rumvuta'n 'hahzú' min zûk turin min nghak reng tawh mahnâ. khaw ên lai hian nan hman i tum te'ng û" tih pah chuan, a țhutna ațang chuan a tho ta țual țual a. mahse, an han kal leh phat hnua chak deuh taka Hrumcheûva leh Zakulha te pahnihin hma hruai zat zat pah a, Kawtchhuah an han ral hmuh țan lai chuan, Hrumcheûva chuan khaw luh tirh Kawtchhuah zawna Phanthing leh thing țhenkhat in zar zawm hlim deuh dap, an hma râl lawka lang deuh dap chung lama Mu leh Choâk vir laih laih chu meng fiah nghal kâwk chung chuan Zakulha chu a han kawh hmuh a. Zakulha leh Hrumcheûva te pahnih ding reng mai chu Laibawnga leh Kuailenga, an hnung deuha rawn hûi chho deuh dap dap pawh chuan an rawn hmuh rual chuan, "a eng chu nge in thlir tak veng veng mâia?vengmawng nuthlawi kar lang hmu ang hrima, khatia thluk din meuha in din khawh teh taû chu!? kan chhak tlang pasalțha rothap te meuh pawh, Vangmual khaw lian Kawtchhuah meuh chuan in lung a kûai bet țan ti tih mai e lo maw"? rawn tih pah chuan pasalțha ûaithlâ lam tawh leh an zinga upa ber Laibawnga chuan, kal paha a Khuangruang bu sut darh, a mawngtam vela vak noh noh chu a rawn tuai chho pâwk pâwk a.

Chutia Laibawnga rawn țawng chhuak phat chu Kuailenga pawh chuan, rang taka Hrumcheûva leh Zakulha te pahnih awmna lam hawi phei ve deuh vut pah chuan lo tuihnih vein, "a val mawng tha țan lâ nâ rual zawk an la nia, veng mawng pa chhungpuinu dâi hnai thingâi thliak tur puan thlauh palh te pawh an tawng fuh a nih mahnâ le! an Vaibel țan la chhawn loh lam hawi khan kal tak teh khâi, Sateldumdâilu' ang vanga Vaibel dawn inlek phek lai inphâwk sak hi chu, nithum lai 'lampui chang khatah' inhmuamûp khum theihna tling a ni ve thei a nia" tih pah chuan Laibawnga chu a han kîai zui deuh rulh a. mahse, Zakulha leh Hrumcheûva te awmna an han thlen ve meuh hnua, Vangmual khaw Kawtchhuah chung zawn an han thlir ve takah chuan, an ngaihtuahna chhung ril zet ațanga rawn tur fan râih tu chuan mak tak maia rawn țhawngin, an pahnih chuan an khûr ru ti tih ta tlat mai a! Hrumcheûva te pahnih lah han ên phat paw'n an hmel chu alo dik lo nasain, Vangmual Kawtchhuah thingzar inzar zawm deuh pât chung zawn chu, khawthlang lama Ni tlâ mek zung inkhawh sen rûm thlarah chuan, mit la lêk lovin an vai chuan an thlir ta tlawk tlawk hlawm a.

Chutia tuiburhmuamdâ dawn an din ngawih deuh țhap hnu chuan, Hrumcheûva chuan muang deuh chalha țawngzai rawn chhatin, "kawtchhuah 'Sâhlam' bawm tute chet lâk phung chuan, ral lu a tlu ngei tih anti chiang e! Vangmual Lal Rumvuta hian leido a nei em ni dawn le"!? tiin a țhiante chu a han melh kual ta dan dan a. Laibawnga chuan, Hrumcheûva țawng rawn chhuah dan chu mak ti zeta lo chhang nghal thuaiin, "ka beng luh chinah Lal Rumvuta hian, leido a neih ka hre niau lo mai e! kan mit chhui hi a fuh chiah emaw tih hi fiah vat kan ngaiin ka hria. a saw ti teh nuaiha Mu leh Choâk lâwi khawm ta hut hut chu! Sahlam' hnuai perh kar velah saw'n, sâruang tlâ te hi a awm a ni zawk lo maw le!!? ti teh u iva pawh ta poh chhin teh ang u hmiang, kan chetphung erawh a hma ai khan i fimkhur tlang te'ng u" a rawn ti ve ta a.

Laibawnga rawt ang chuan, an vai chuan Kawtchhuah va pawh dan tur chu rel fel nghal thuai thuaiin, "a khaw kâi kawngțum dâpa vak phei lovin, țhuang hnihin inzâr teh ang u. Kawtchhuah saw a laiah pal lut lovin, a nâk tawn tawnah pawh phei ila. keini țhian dun he lamah, nangni țhiandun kha lamah. 'Sahlam' Phanthing leh Zuang zar te, Kawtchhuaha thing inzar reng reng saw a bul ațanga a ler thlengin, melh kân nei lovin kan bih fai kelh anga, chuta Milu kan hmuh chuan rang takin Kawtchhuahah sawn kan lawi khawm nghal anga, 'ral' kan nih loh zia leh khualțha' kan nih zia lan tirin, khaw ên lai ngei hian tlang kan tlir thuai a ngai tawh e" tiin Hrumcheûva chuan Zakulha chu a mah zui nghal tura hui zauh pah chuan, kawng sir veilamah chuan a lut thlâ ta vut a. Laibawnga leh Kuailenga te pahnih pawh, rang zeta dinglam liamah chuan lut thla ve nghalin, an hma lam mautluk sawmhnih dawn vela hla a inzar hlim deuh dap, Vangmual khaw Kawtchhuah chu an veh phei tlang ta a.

Zakulha chuan a mit țha zet chu Vangmual khaw Kawtchhuah sir, perh buk leh țhang kar velah chuan a lên nasa hle a. mahse, Sahlam hnuai, a awmna ațanga pen sawm chuang vel awrha hla, thlang lam leh an awmna sir velah chuan Ran thi ruang leh Satlaw ilo han hmuh tur a awm lo hle a. chutihlai chuan Hrumcheûva pawh thawm dim zeta kûn dâh chunga vak kualin, Kawtchhuah chhak lam ațang chuan Sahlam atana an hman țhin, Zuang leh Phanthing zar inzar zawm hlim dup lam chu a rawn pan ve mek bawk a. chutia thawm dim zeta an vah kual lai chuan, khaw chhung lam thawm pawh an hre chiangin, naupang chaw ei kham pawnto tur rak chil chel thawm te chu Zakulha leh Hrumcheûva te pahnih chuan an hre chiang tawh hle a. Laibawnga leh Kuailenga te paw'n Kawtchhuah chu an rawn hnaih chho ve tawhin, Saphukhur hlui ilo leh Changpui hung kar te chu an bih nasa dun hle a. mahse, an beisei leh an zawn chu an hmuh mai bik loh avang chuan, an chhak lawk hnim leh perh kar vela Hrumcheûva leh Zakulha te dar rawn lang phê leh zauh țhin, an awmna țhang buk kar vel ațanga an han hmuh leh zauh țhin chu muangchanga chhui zawn chho ve zelin, Kawtchhuah kawng chhuata lungphek phah hnum zet zet, rualrem ang reng zet zeta inphah phei zai zai te chu an han hnaih ta hle a.

Chutia Kawtchhuah kawng chhuak lek leka an vah kual lai chuan, Laibawnga chuan a țhut chawlh zawkna chung lampang, Changpui hnah hlai zet zet inchhuang chho tup chu a bula maute țangphel chen vel chuan a hnuai lam ațang chuan dim zeta han hawlh kiang deuh dâ dâin, a hawlhna ațanga chhak lam deuh, lei ațanga mautlawn chen dawna sang, Phanthing tlak lam zara milu lo inkhai vir deuh chai chai lai, a chhipsam zial hmawr lam thingzara lo inla vêt chai mai chu a han hmu ta thut mai a! chuveleh a thlang deuha Kuailenga kun dâ dâ lai chu rang taka hûi vat vatin, an pahnih chuan an chhak chung lam panga muangchanga milu inkhai vir riai riai lai chu an thlêk dun ran mai a. chutia an thlir dun reng lai chuan, Kuailenga chu hmui phun deuh supa rawn țawng chhuakin, "kan vahna a hniamin, chunglam bih turin din chhuah ngam a ni bawk silo. chu achhapah, kan chunglam hi țhang hnawk leh Changpui hnahin a bawh phui chûk bawk si a, hei vang hian milu hi kanlo mit chhui fu mai thei lo alo nih nâk hi le! Cheûva te țhiandun khi engtin nge kan thâwt hmuh ve theih tâk ang le"!? a han ti sup sup a.

Chutia a phun zawh rual deuhthaw chuan an piah sir deuh, an awmna ațanga ram lam ațang chuan Zakulha chu thawm chhuah eih lova rawn langin! a hnung lawkah chuan, Hrumcheûva pawh a rawn lang zui ve nghal zat bawk a. an han inhmuh kim hnua Kuailenga'n an chunglam a han kawh thuai lai chuan, Hrumcheûva chuan chu milu chu an hmuh avanga an mahni chu rawn pawh an nih thu chu, meng fiah zet chung chuan hmui phun sapin a rawn sawi ve ta vat a. mahse, chutia a rawn phun lêt deuh sap hnu lawka ngawi deuh țhap chunga an bih chhoh leh țhâm lai chuan, Hrumcheûva bawk chuan hmui phun zawi sapa țawng rawn chhuah leh hmasa berin, "chhak lam ațang khan, Changpui hnah vela thisen far khang tawh duk zet zet khi kan rawn hmu ta tlat mai a. chuta țanga a zawn kan han mit chhui chhoh zui takah chuan, milu khi kan chhui fu ta tlat a! kan chung lam inzar phui lutuk avang khian, kanlo chhui fu mai hlawm lo alo ni. heti a nih takah chuan, Lal Rumvuta hian 'leido' a nei ngei a ni tih a chiang e" a han ti zui leh deuh dap a.

Hrumcheûva țawng hmang chu Kuailenga leh Laibawnga te chuan an man thiam phalo țanin, "keini nen 'Chemhar' chhuah khawpin kan la inral silo! 'leido' chang thei dinhmunah erawh kan din theih nachen chu a awm mah e. mahse, keini ho lah 'remthu' âk chunga kal kan nisi, an leido ral ho lu-ah khi milu khi kan puh dawn a nih si chuan, a eng aiah nge lu khat chiah an khâi fâl teh nawlh si ang lê!? khi milu lah khi a biang leh khabe te, a hmui chen khian Mu leh Choâk ten an peh (pet, chuk) phuai fuap tawh ahnu hmanah, a mitmu thlengin an kher ruak liau tawh mai si a. a tu chu ni dawn ni maw!? 'ral' thâh sawngbawl taka bawl phu khawpa an laka chet thawh tu chu a ni phawt ang e" Laibawnga chuan a rawn ti chhuak ta phawng mai a. chutia Laibawnga'n rilru buai tih hriat zet chunga a sawi lai te chuan, Hrumcheûva chuan an chung lama milu chu lo la melh chho deuh ranin, a rilruah chuan Lal Keihranga fapa Kapvunga lu a nih a ring țan ta tlat mai a! chu a rinhlelhna chu a dik ngei a ni tih chu chutia ala melh chhoh ran lai chuan, rawn lang chiang leh zualin, a tukkhum sam, a lu lei bul reta Mu lian zet rawn ințham tang thurhin bungbu kûta kûn chunga, chu milu nghawng an tanna lai, a nghawng hnuai lama tisá leh vun rawn ûai deuh dûr, hnuai lam ațanga nghawng leh fan uak uak chunga a kher mawlh mawlh lai chuan, a kher duhthawh zual changa a ke a han țham nat zual chang apianga a ințham tanna kê bul, chu milu sam kar ațanga Lal fapa Kapvunga Dardawhkilh, Kapvunga a hmuh hmasak ber zana chiang zeta a hmuh ngei, rawn lawr tlê êng zauh zauh chu Hrumcheûva chuan a hâi ta lo tawp mai!

Laibawnga beng bulah chuan fiah zawi reih rawiha va phun sapin, "milu khi Lal fapa Kapvunga lu a ni e! eng ral leh Sapui pawhin min vêl mahse, kan lak thlaka a pa bulah kan haw'n pui ngei a ngai a ni. chutia kan tih hma chuan, Lal fapa rawlthar Kapvunga thlâ hi a mah that tu damlai thlâ huai hian a chelh bet tlat anga, helai ngawpui karah hian mangang takin a vak a vak ang. a pa bulah kan thlen hunah chauh a thlâ a muang dawn e, khua hi kan nghak thim leh hret anga, chumi hma chuan ram lamah tlem i tawlh angu, muang lovin" tih pah chuan an thlang lamah chuan a pût liam ta nghal thuai a.

Hrumcheûva rel anga an tawlh liam diak hnu chuan, an chêt lak zui dan tur chu rel zui paha an chawfun țhing lam tawh chu a theih ang anga bar tlang zui nghalin, Vangmual dâi deuh lawka khaw nghak an nih avang chuan, chawhmeh therhlo ilo pawh veh lo leh mei pawh chhuah lo chuan an tawm reh ta țhap a. thimchhilh hnu lawk chuan an vai chuan Kawtchhuah lam, Sahlam awmna lamah chuan fimkhur zet leh thin tawt bulh bulh chunga tawlh chho lehin, Lal fapa Kapvunga lu lainatawm zet chu Zakulha chuan a han lawn khung ta a. lei a rawn thlenpui hnu chuan an vai chuan ram lam pana chak zeta liam nghalin, an 'ralrelna' a rawlthar ber Zakulha rawtna chu an zui țan ta a. mahse, an tum dan taka che tura an infuih mek lai chuan, Hrumcheûva chuan rawtna thar rawn nei leh thutin, an thlang lawk zoluitê hnar kinah chuan chawlh lawk pahin, an Silai țheuhah chuan a mu chu an han sawh leh te te a. chumi hnuah an vai chuan meichher chhi chunga, Vangmual khaw țhut tlang tlâk lamah chuan, chak zeta chhim zawng deuha her liam lut thlâ nghal diakin, lenglenhun pelh ek ek awm velah chuan an tum hmun chu an thleng thlâ ta a ni.

Chhun lama an ral thlir ai ngawt chuan, Vangmual khua Lal Rumvuta khua te pawltlâk buh chhek mual chu alo remin, Chhek In tin mai chu a lian hlawm hle a. chuvang chuan, chhungkaw hnih thum vel te-in chhungkaw țhenkhat chuan, chhek In chu an ințawm hlawm a ni tih pawh an hrethiam mai bawk a. chu achhapah an duh dan chiah maiin, Chhek In tina buh an chhek vum reng reng chu tupawh mai chuan, In an la thlen kim lo nasa hlawm hle tih an han ên kual zung zung lai chuan an hre chiang hle nghe nghe a. chutah zet chuan, an ralrelna chu an bawh fuh dawn tih pawh an hre chiangin, chhek In za dawn awm thluah ah te chuan, mauro leh hnah ro an vawm khawm tlut tlut mai a. an duh anga tam an vawm khawm hnu chuan, an piah ral, lofing khat vela hla a Lo zaû hla deuh tuk ho chhek In ding khawm thliah chu an vai chuan pan phei leh diakin, chhek mual pakhat zawka chhek In an tih ang bawk khan, chhek In tina Buh vum chungah chuan, mauro leh hnah ro an han hnawh khat leh ta hung mai a. mahse, chhek mual hmasa leta tam kha chhek In alo awm avang chuan, an duh ang hun takah an hnawm chhek chu an zo hman dawn lova Hrumcheûva chuan hriaiin, "zan kan nghak rei dawn e. chhek mual tê zawk saw nang ni'n va châng ula, keini țhian dunin he lai chhekmual hi kan nghak thung ang e. kan rel ang kha zawm dial ila, tumah chet sual thianglo ni teh se! duhtawk kan ngah huna kan thawm thâwt riin khulai lui dung khu a luh thlaka, 'ral' hoin kan Thalfang thlâh an chhui dawn hriat palh chuan, rang takin chu lam pan chuan kan tawlh diak dawn nia, in thawm inthâwt hmuh duh dan erawh in pahnih ngaihdanah innghat se, kan inpeih tlan hunah ka rawn kûk anga chumi rual chuan mei kan chhuah zui dawn a nia" Laibawnga hnenah chuan a han ti a. Laibawnga pawh chuan, Hrumcheûva rawt dan chu buk deuh nghat paha chhek mual lehlam chu pan zui nghalin, a hnungah chuan Kuailenga pawh chuan a zui ve ta nghal thuai a.

Lal Rumvuta leh a mualkil te lengkhawm chu an thawm a țhain, chhun lama a fapa Satbilha chet dan vel chu Lal Rumvuta chuan, chhuang zetin a sawi lûr lûr reng mai a. a mualkil te lah chuan an Lal Rumvuta thusawi chu an lo lem tui thei hlawmin, "kan hun chhir a tlâ rual teh e maw, kumin zet chu kan Vangmual kan kâi tirh ata hi kan kum hmui kum ber a ni ta ve ang e! Sapui kan hnawt tawm hneh nen, ral kawih ngam kan ni lah bawk lo. Lal Keihranga leh a khua te hi chu 'ral' ti a chhal tham va ni hek suh! naktipah funpui kan han êr anga, 'hmarchuankitê' kan zuk hruai ni leh Darkai khaw ram ni chu a inkahpupchaw' nghal zâlh dawn si a leh. Lal Keihranga chu ka Lal sal a nih veleh a fapa luro nen sawn 'khawnțhiang' ka khawn dun tir dawn e" tih pah chuan, mengnû bulh chungin Lal Rumvuta chu a hawi kual lup lup reng mai a. chutia an Lal rawn țawng zawm deuh puat puat chu mualkil te chuan, rui țhen kîk deuh sawng chunga lo tuihnih zauh zauh hlawmin, "kan Lal nge nge chu i rorel thlâh hnuaia awm hi alo nuamin a thlamuan thlak ber e, i rawn kamkeû ang khan Buh Balah lah kan kut a hmuiin, kan veng mawng pa dulkhâk ring thlê zawi reng Lamleripa tak ngial pawhin, 'Silaizawn' dawn dawn a kuai chhuak e an tih chu! Darkai Lal Keihranga te ang Lal buchip, In zathum țhut ve laih laih tan zawng kan û' deuh ê" kîk thlê deuh hâih chung chuan mualkil Luaibelapa chuan a rawn ti ve thuai a. chutah zet phei chuan an hlimna chu an hlap puk zual nasain, tupawh mai chuan țawng an inchuh chho ta nak nak a.

Lal Rumvuta lah chuan chutia a mualkil te an hlim rui phur chu nasa zawka chawk phur chho zelin, "ka titi thlâh tui atalangin ka mualkil te lunglenna dawp dam tur lam lam ka lo mangnghilh e! tlangaupa nang kan pathlawi zai lam thiam Kuaivela zuk ko tak teh khâi, ka taitea ral lu lam thlawpin zan i han tum tawi teh ang u" kâi tawh tih hriat zeta buk tluk tluk pah chuan a rawn ti thâm ta chhûl mai a. tlangaupa Rangdula lahin an Lal Rumvuta rawtna chu lem nuam alo ti nasain, "zanin chu zu leh sâ tlan puar leh liak ila ni mai" tih rilruk paha nui rû deuh țhâ chung chuan, puanven sawi tlâih tlâih khawpa hmanhmawhin veng mawng lam chu a pan sawi ta tlân tlân a.

Pathlawi Kuaivela rawn lut khî kîk deuh van chu Lal Rumvuta ngei chuan, Seki êng kûk mai hmang chuan zupui no lo tawk nghal zatin, "ka chhuatpui hi rawn kâi tak teh khâi, kei leh ka mualkil te hian i tel lo chuan taitea rallu kawih thlawpa, zan tumtawi kan sak dawn riau e" alo ti sur sur a. chuveleh pathlawi Kuaivela chuan Lal Rumvuta zuno chu lem khat lema tawk let leh nghalin, tlangaupa Rangdula'n zuno dang a rawn pek chu a han tlâk chho ta deuh pap pap a. mualkil te lahin pathlawi Kuaivela zuno dawm lai chu lo tawk veleh zauh țhinin, pai deuh chhâ chhâ chung chuan Lal chhuatpui lai lam chu a rawn pan ta a. chutah a puanven chu sawi ang tlêih tlâwiha pawt chho lehin, a lamna tur atana an zuat, Lal Rumvuta chhuatpui tlê hluau maiah chuan a kê khâk ang tlêk tlâwk chu a han per țan ta a. chumi pah chuan a hla hrilh, an Lal Rumvuta a phuah chhilhna ngei mai chu rawn la chhoin,
"tlang zawngah Lal rumvut tlang, ka luah ning lo,
"thanlai a zau lur, alaiah laldang a ngur vung e,
"ami leng û in sel bik nem maw, Sialzâ hâwlpa kan belh lai,
"rumvut tlang dang ngur zawng te khumchhingpa."tiin, khawi nge thlang Lal ropui kan Lalpa parzu thlum kan dawn kham lah love, tap mei kha han chhawm belh ula, dawhthleng hnuaia Chemtum te kha bangpui lamah thiat kiang teh ûn, chutilo zawng kan hrût hniam luatah, luhrum zial filhin kuah haw kan ngai ta dâh ange" tih pah chuan, kil khata dul kiar kanga khuang pawm chunga țhu meng tlê deuh kar, an khuangpu pa hâng mêk mawk Velchuhapa chu, a hla hrilh la kâi tur chuan a han tur zui zat a. Velchuhapa-in muang fan kal deuh zâiha khuang a rawn tuk (ben) karh karh lai chuan, mualkil dang ho chuan tuium te chu lo sawhin, alaiah pathlawi Kuaivela chu zei fahran chuan a insawi hnâh hnâh ta mai a. a chang leh mute lei hruta hniam zet zeta kaihza tawm tâk tâk khawpa hniama kûn leh zâlh zâlh țhinin, rawn din chhuah leh deuh phat pah chuan, a bawp veilam chu zawi kal zâlh maiin a rawn thêh kual ta țhin a. chutia a bawp a rawn thêh deuh zâlh veleh chuan, Lal Rumvuta leh a mualkil te chuan phur leh mawng kân âwk âwk khawpa lo 'chheih' chhilh zui ta țhinin, a rei deuh hnu phei chuan chhuat su dulh dulh khawp chuan an per ta tluk tluk mai a.

Pathlawi Kuaivela lah rui lungpuam lungleng nen, a hla hrilh dang an han pakâi chhoh leh lai zet te phei chuan, a bei nasa tawh tlak tlak hle a. mahse, chutia an rik bung bung lai chuan, Zawlbuk lam thawm nasa zet chuan an zai lam tui lai chu rawn thawt tawp thutin, vengtin maia patling leh nutling au chuah chuah thawm chu, ngaihthlak chian tum chuan Lal Rumvuta ho chuan an chhuak pâi deuh chhû chhû hlawm a. chutihlai chuan, tlangval zawng zawng lah an khaw tlak deng lam veng mawng lam pan chuan hmanhmawh zeta tlêh thlâ dul dulin, an khaw tlak lam chung zawn êng sen phût mai chu Lal Rumvuta leh a mualkil te chuan an han hmu ve ta a.

Chutah zet chuan rui harh kâwk kâwk khawpa an vai mai chuan aû chhuak ve nghalin, "chhekmual a kang e, tlan ru tlan ru" ti a aû vo vo ri, hmuntin ațanga rawn chhuak chuah chuah chuan an beng chu a luh fiah ta kher mai a. chutihlai chuan, hmeichhia leh tar chaklo te, naupang chimchiap leh nutling ho te chu khur hlawk hlawk chunga Lal mualah chuan rawn tlan khawmin, tlangval te tlan liam zut zut lai chu țap chungin an thlir liam țawk țawk hlawm a. Satbilha pawh a inla huai pawlah telin a aihnahphahpui Lutruaia nen chuan, inhrosa kûk kûk chung chuan an liam ve ta thuai a.

Pasalțha pali te chuan, chhek In la kang lo te chu tlan zung zung paha dep kai zelin, an deh kim hnua an chan hmun atana an hual țheuha an han țhut fel diam hnu chuan, chhek In țhenkhat te chu an kang vung țha tawh hlerh hlerh hle a. Zakulha leh Hrumcheûva te pawh mautluk khat vela inkar dana hla, ngaw chin perh leh țhang buk karah chuan tawm ve ve in, an Thalngul leh Thalfang inchhawp ran chung chuan, an Silai chu hman hmasak atan tiin an tin kual deuh sek tawh mai a. mahse, an mi nghah te chu an beisei aia hmaah rawn thleng thlâin! Vangmual tlangval, mei ênga rawn lang hmasa pahnih te chu vir nawlh khawpin an hnung lamah an hlawm lêt nawk mai a!

Chutia an țhian te pahnih hlawm let nawlh chu midang te chuan hrethiam mai heklo le! chhek In zawng zawng kâng mau puak țuk țuk kara Silai ri chu tu tan han hriat hran theih ni hek suh, chu achhapah, an hamhaih atalangin ral' in an lo chan leh chan loh pawh tumah chuan ngaihtuah tawh hek lo le! chutia an țhian te pahnih tlu hlawm nawlh mai chu an zupui rui inpal hnawk tlu palh emaw tiin, tumah chuan an ngaihsak lem lo hle a. khawi 'ral' ho emaw hâl a ni ngei ang tih chu tumah chuan an hâi hlawm lo. mahse, chung ho chuan an lo chan ngam kher chu an ring lo hle tih chu an chezia ațang chuan a lang chiang hle a. mei țhelh ngawt chu an ngaihtuah hlawm tlat avang chuan, pasalțha pali te chuan an rel ho tawh angin, mei bawh hnai lo deuh, mei êng dulna laia awm apiang chu an lo mal nghauh nghauh mai a. mahse, chutia an han chêt rei tak deuh hnu chuan, Vangmual tlangval ho chuan an țhian te awm leh dul, an nghawng vela thalfang rawn bur leh chawt țhin chu, mei êngah chuan rawn hmu hlawmin hmun thim deuh lai zela an țhian te nâtuar vial ngawng ngawng leh, a țhen lo thi fel der hlawm chu mak ti zet chunga mei țhelh zel pah chuan an thlêk buai nasa hlawm ta mai a!

Chuveleh Hrumcheûva chuan, Vangmual tlangval hote chezia chu rang taka lo hmu thiam nghal thuaiin, an thlang lam liam ngawpui dâm lamah chuan a tawlh thlâ ta a. mahse, Zakulha ala rawn tawlh ve loh avang chuan ring deuh țhaka an tih țhin dan ngai bawka a khel chu beng ri deuh thlapin, Zakulha chuan a thlang lama Hrumcheûva khel ben rik deuh thlap chu rang zeta lo chhawn ve zat pah chuan, a Thalfang pakhat chu a han phawi leh hrama. a duh ang taka a tin kawh zaih hnu chuan, a chhak deuha tlangval pakhat rawn hawi thlâ lai lam hawi chuan a Thalfang chu thlah pheiin, a Thalfang thlawk vung phei hlarhin chupa zakdawh a verh țhingțhit deuh hnak rual deuhthaw chuan, rang zetin thlang lam ngawpui thim lamah chuan a zuang lut thla zui ta nghal a.

Vangmual khaw tlangval ho zawng zawngin an țhian țhenkhat ten 'ral' kut an tuar tih an han hriat meuh chuan, Satbilha chu a thin a rimin, chhek In kang êng dûl tawh hnu lama ruang leh hliam singsak paha, hamhâih zet chunga midang ho zawng an chet sup sup lai chuan, Silai leh Fei rawn thawh chhuahpui nachang hre ho, mi sawmthum vel te chu Chhekmual hrul ngawpui fêm chinah chuan a han sem darh tlai khawhnu ve bawk a. mahse, chung ho chuan eng vak an hmuh hlawm loh avang chuan meng sen rum ûl chunga inhrosa zui nghalin, "bumin kan han awm vei maw!? heng 'ral' ho hi khawi Lal khaw mi pawh nise ka Chem lakah pang himin an chhuak ngai lovang, hriam lek nachang hrelo hlir awm khawm em ni innih? tunge min zui zawn heng ho hi ka zawng dawn e" tih pah chuan, ngawpui ruam lam pan chuan a tlan thla ta mai a. mahse, Lutruaia leh pa țhenkhat thluak fim chin deuh te chuan, rang taka um thla ve nghal vatin hriam nei ve lo chunga 'ral' ho, engzat nge an nih pawh hriat loh ûm ngawt mai chu țha a an hriat loh thu te, hun leh awmah ralrelna fing zawk nena chung ho nawp chu a pawimawh zawk zia te, chuti lova ât thlak taka chan chhe zawk chan chang chunga bawh buan buan chu, hun țha tawng lova țul lo taka thih mai a hlauhawm zawk zia te chu hrilhin, theihtawpa an thlem hnuah an lêt pui thei ta hrama. mahse, an khaw tlangval hliam tuar mi sawm leh ruang sawmthum chuang a han hmuh leh hnu meuh chuan, Satbilha chu a thinrim thar lehin, "Darkai Lal Keihranga leh a chhak khual te thil tih a ni ngei ang" a rawn ti ram ta hmuk a.

[Ngaia]

Bung-44

Zan thim hnuaiah meichher dêt ngamawm rih tawh silo leh, an hrut ngai loh ruam, Vangmual khaw ho chhekmual hnuai ngawipui thim mûk tlat mai hnuai a, Lusei pasalțha pahnih Zakulha leh Hrumcheûva te an han vak kual chu a chang chuan an buai ve deuh that that țhinin, Thla fêm tawh êng dûl zet lah chuan, an tamtalna ngawpui hnuai ruam chu, an chung Vangmual khaw țhut hmun tlang lian zetin ala hliah mûk avang chuan ala rawn dâk thleng mai rih silo. chu achhapah, chhekmual lehlama țanhmun siam, pasalțha Laibawnga leh Kuailenga te pahnih thawm chu a rehin! an thlang ruam rawn pan ve mai tura an ngaih kha, ram chin an rawn hrût fu lo tih chu Hrumcheûva chuan a hrethiam țan ta tlat mai a. an han luh thuk poh leh ngawpui hnuai lah chu a thim chhah zualin, Dumde leng nuaih nuaih te chu an êng hmuh chhun chu a ni ta mai a. mahse, dap chawp ti tiha an luh thlakna luitê dum ti deuh chip chiapah chuan, Laibawnga te pahnih lo nghah leh hlek chu Hrumcheûva chuan rawt lehin, "a eng an ti tá nge ni!? kan channa chhekmual hnuai ruam tin zawn tura chah tâ na na na, thehmeh reh taka an la reh tlat mai hi mak ka ti ta deuh e. min ûm tute thawm awm kan hriat lem loh chuan meichher dêtin, kan mei dê ah Laibawnga leh Kuailenga te chuan min la rawn chhui fuh leh em ang chu a" a han ti sup a.

Zakulha chuan Hrumcheûva thusawi chu lo rum khum deuh nghatin, "i sawi ang khan, kan thlang ruam kha an pan ve ngei turah chuan ka ngai a. mahse, keini ai hian an lut hmasa nge an lut hnuhnung zawk? tih kan hre tawh silova. rei an pil bo em lo turah chuan ngai ngawt phawt teh ang" a rawn ti ve ta sap a. mahse, tuiburhmuamda hnih chhung awm vel ngawta rei an nghah hnu pawh chuan, Laibawng leh Kuailenga te pahnih thawm awm reng reng chu hriat tur avangin, ngawpui hrik te chiar tliar tliar ri leh an awmna lui te kam dum hmun hrang hranga, Uchang rawn tlak ri deuh tlak tlak țhin tih loh chu an bengah chuan thawm dang rivá avang telh telh mai a. an êng hmuh chhun lah Dumde rual thlawk dê nuaih nuaih bak chu êng dang a awm bawk silo, Lusei Keite Zakulha meuh pawhin, a mitnaute chu khaw hmuh chian tum reng reng chuan a len kual nasa hle a. chutia pasalțha danglam a nihna pakhat, a mitnaute fim danglam zet a han hman tak ngar ngarah chuan, Hrumcheûva hmuh theih piah lam hnim leh thil awm te chu chiang lutuk lova va hmuin, an awmna ațanga pen sawm dawn vela hla, luite kam lehlama thing ding ngil zet chu muangchangin a pan phei ta a. Zakulha kal thawm chu Hrumcheûva chuan hre hek suh! enge maw chen hnua a rawn let leh lai te chuan, a bul lawkah chuan Zakulha chu a la awm emaw tiin "kan tlâk thlakna ruam hi an rawn chhui fu ta lo tih a chiang e! engtin tak chuan kal ang maw"!? tiin alo la phun bal bal mai a. Zakulha chuan Hrumcheûva lo la titi chu 'aw' then kharh paha rawn pawt chatin, "theih tawpa sanga thing dang zara pakai zel chunga ka han chuan chhuah paw'n, helai ngawpui ruam hi ka ngaih aiin alo chhâh nek mai ka ti! khawiahmah mei dê leh thawm dang ka chhui fu chuang riau lo mai e" a han ti zawi ta sap a.

Chuveleh Hrumcheûva chuan mak ti zet chunga Zakulha 'aw' rawn chhuahna lam chu dap titih deuha hnaih pheiin, fiah mang lova a bula Zakulha lo țhu ran a hmuh ruaih rual chuan, "khaw chuanin ilo va tei hman a ni maw!? ka piah maiah ila țhu ah riak ka lo ngai a sin le! Aimitthlawn chu neptê, mit lova Nghadâh dap ang mai ka ang ta ber e. i rawn awm hnai ta deuha ka hmu phâ ruaih chauh che a nih tawh hi maw" a lo ti ve thuai a. Hrumcheûva țawng chu Zakulha chuan lo țawng chhilh deuh zauhin, an awmna ațanga an piah lam, Laibawnga leh Kuailenga te pahnih țan hmun siamna, chhekmual pakhawt zawk hnuai zawn mual ni thei awm bera a rin pan phei chu rawn rawtin, chulai an luh fuh theih chuan Laibawnga te kalna awm zawn pawh dap fuh theih a inrin thu chu a rawn sawi leh ta a. Hrumcheûva pawh chuan Zakulha rawtna chu lo thlawp ve thuaiin, "a ni teh tak dawn e â, ti teh i inpal phei leh ngawt dawn teh ang. ralho hian kan hnu an rawn zui nge zui lo tih pawh chuta țang chuan a chiang tawh ang a, ngaihțhat tham tura an reh chuan mei dêtin Laibawnga te hnu hi kan dap mai ta lawng" a rawn ti veleh a.

Chulam pana an kal lai chuan Hrumcheûva chu a inhai buai nasa leh tawhin, Zakulha erawh chu a Keite mit ang maia a mit naute dê țha zet avang chuan, harsa lutuk loin a kal thei zel rih a. mahse, Laibawnga leh Kuailenga te pahnih țanhmun siamna zawn, chhekmual hnuai ruam an han luh ruala, Thla fang ral tawh zetin an awmna ngawpui ruam a rawn chhun ên dul deuh ruih tawh hnu, phê deuh ruaiha ngawpui hnuai vel pawh a lan theih tawh pawh chuan, Laibawnga leh Kuailenga te thawm riva hriat tur leh mawng phê hmuh tur chu a awm lo hle a! chuvang chuan an mahni hnu zui awm thawm an awm leh awm loh chu uluk zeta ngaichang dun lehin, an ngaihțhat zan hnu chuan meichher puahin Laibawnga te pahnih hnu niawm zawng chuan an buai țan ta a.
.

Laibawnga leh Kuailenga te pahnih chuan an thlen chin ngawpui hnuai thim mûk tlat ațang chuan, an khaw ram lam hawi zawnga, ram chin chhui fuh chu harsa an ti tawhin, an awmna ngawpui chung lama Thla fem fang Seki êng dul raih mai chu, ngawpui chung thingzar awng ațang te chuan an han chhoh bih leh zauh țhin a. chutih laiin, an hmanhmawh atalangin Hrumcheûva leh Zakulha te pahnih țan hmun lam, chhekmual hnuai ruam lam kha pan lovin, khawchhak hawiin an lo her bawih tawh a ni tih lah chu hre hek lo le! "an tlâkna a thlang viau tawh turah ka ngai e, ralin kan hnu an rawn dawm lemlo bawka thimțin rual chuan kan innang fu mai ang chu maw" Laibawnga chuan a rawn ti sup sup a. Kuailenga pawh chuan Laibawnga rin dan chu a lo ngaihruat dan a nih thu chu rawn sawi vein, "kan Thla fang fêm dul lutuk khian, kan hma zawn hi a chhun lo nasa mai si a. hetia dap chawpa tei tei ai chuan meichher i puah mai teh ang, thimțin kan nghah chuan kan chhir pawh har lutuk dah zawk ange" a rawn ti ve bawk a. mahse, khaw thim chhah zet avanga an ngaihruat dana an kal dan fuh tawh loh zia chu, meichher an han dêt hnu chuan an hrethiam țanin, thlifim vawt reih rawhin khawchhak lam ațanga a rawn chhem tak her herah chuan, zanlai mangpui sual hun vanglai tak a ni tawh tih chu an hrethiam ta a. chutah, an awmna chu meichher êngah chuan uluk zeta bih kual dunin, ngawpui thing pakhata khaw chuana Kuailenga han lawn chuan, Hrumcheûva leh Zakulha te pahnih tlâk na lam tur, khawthlang lam zawn nia a hriat lama, tlang lian leh dum thim mup mai lo inkhawh, van var deuh ruaih thlara a han hmuh dûr mup mai chu mak ti zetin a thlir ta reng mai a!

Laibawnga chuan, Kuailenga rawn chhuk mek chu men phawk deuh hra paha ramchin awm dan chu lo zawt thuaiin, "tlak deng lamah riak kan ngaih, kan veilam ruam tawpah khuan, tlang lian zetin he ngawpui ruam hi a tan hmuk mai ka ti! engti tih tiha khi tlang khi chhunpelh nge kan nih ka hre ta lo tawp mai e" tih pah a phawk fêa meng deuh hrâ chung chuan, Laibawnga chu Kuailenga chuan a melh ta deuh kar mai a. Laibawnga lah chuan Kuailenga thu rawn sawi chu mak alo ti ve in, "chhê hêi! thim zing karah pawh mahni khaw ram zawh pelh ngai lo khawpa chhir kual vau vau thei khawpa, mual leh ruam hre chiang kan nihna chu, Vangmual ram chinah erawh chuan ava chhawr nahawm loh nasa ta deuh ve! patlinga pumpâ ruam leh tlangin min bum hmin dun ta der mai ka ti! Cheûva te pahnih tak pawh kha khawiah va inpal bo tak ang maw" a rawn ti chhuak ta hial a. Kuailenga chuan Laibawnga ngaihtuahna buai țawng rawn thlah chu, hawi kual deuh vat vat paha lo buk khum deuh nghat nghatin, a meichher êk chu a dinna bula lungpui pangah chuan a han hawlh țek chiaih chiaih a.

Chutia an bo tih an han hriat takah chuan, Sapui leh ral tawn palh ilo lakah chet inpeih tak chunga kal angai lehzual tawh tih chu an hrechiang dun tawhin, an Silai ngul te chu uluk zeta an hma lama tin kawh deuh paha hâwl kual zel chung chuan, Kuailenga sawi lam, tlak lam ruama tlang lian zet chu meichher nen chuan an pan thla ta ngawt mai a. mahse, thui an kal hma chuan a puan ven zawmna kar, a khel veilam rawn zâ țhuam țhuam țhin chu, Laibawnga chuan din dat paha a meichher chuan ên chunga zuk bih hnaiin, Lal fapa Kapvunga lu, a mit khur tawn tawna hruikhaua an thil tlang, a tlak bo palh hlau zeta a kawnga a taivawn chuan a kâ lo âng chap chap chung chuan, a khel veilam chu zâ țhuam țhuam khawp chuan duhthawh zetin alo liak hliam hliam mai a! Kapvunga lu awm dan chuan pasalțha Laibawnga meuh pawh chu ati ril a fan țhâm hnehin, khur ru dat dat chung chuan a hma lama kal Kuailenga chu a ûm ve leh ta thuai a. Kuailenga lah chuan a țhianpa Laibawnga chetphung chu hrethiam ve hek lo le! Laibawnga ngawichawi ta riau mai chu nawm lohna a nei ta emaw tiin, "kan lo inkal thlâu hman ti tih tih ka hre hauh lo mai e! i pang a nuamlo nge ni? i kê thlah a muang ta riau mai ka ti" tih pah chuan Laibawnga chu a han bih hnai vut a.

Chuveleh Laibawnga chuan nawm lohna a neih loh thu leh, a meichher êk nawr thlak paha a din lawk thu chu rawn sawi vatin, "kan tlang pawh tum bulțhut chu a luh khan a pik hrep mai e maw! a chhip kan chuan chhuah khi chuan, kan mei dêt hi Cheûva te țhiandun pawhin an rawn mit chhui fuh tawh em ang chu â" a han ti a. mahse, a țawng zawnga a 'aw' khur ru deuh dat dat țhin chu Kuailenga chuan rang taka lo man hmanin, "khaih khâh! i țawngchheh kal dik zan lo kha ka hâi lah lo ve. nawm lohna chu i nei a ni, kan thlen chinah hian riah buk i sual mai ang hmiang" a lo ti ta vat a. mahse, Kuailenga rawtna chu Laibawnga chuan tlawmngai zeta lo hnialin, "eng ka ti love, riahbuk kan sual chuan Cheûva te pahnih kan chhir pawh har zawk ang e" a ti tlat mai a. chuvang chuan Kuailenga pawh chuan Laibawnga țan khawh tlat chu, nawrlui lova an thlang lamah chuan tlâk thlak pui zelin, an lawn tumna tlang lian zet, an ral lehlam maia lo to lurh tawh chu, an awmna ngawpui fem perh leh rairuang buk hnawk nuaih kar ațang chuan, an va ral thlir pha ti tih ta ruaih a.

An meichher ken lai an han fawm belh hnua, chu tlang bulțhut an han pan thlak leh lai erawh chuan, an tum aia chu tlang țhut lai leh an awmna ngawpui inhnekna lai zawng zawng chu alo chheng chhiat avang chuan, an meichher te chu hrui zam leh perh ilo vel chuan a lo bat țek leh chuaih chuaih țhin a. chutih laiin a hnung zawka kal Laibawnga chu a buaina ngai bawk chuan rawn bawh buai leh tawhin, a khel sir rawn zâ țhuam țhuam avang chuan, a ti mur zawng zawng chu nasa zetin a rawn țim hîk leh chuaih chuaih tawh a. chu a thil tawn chu Kuaileng lah chuan hriatpui hek lo le! țhang leh perh zam hnawk neih nuaih kara meichher nen a kun luh kât kât lai te chuan, Laibawnga erawh chu amah tibuaitu Lal fapa Kapvunga lu chuan ala nâwp uar tak sauh sauh mai a! mahse, chu a thil tawn chu inti paukhauh sauh sauh chunga tuar lui zelin, Kuailenga'n an hma zawn pik awih liam thlâ vit vet a tawn thlak lai te chuan, Kapvunga lu chu sawi rem tumin țim ru deuh tak chung chuan a han dap ta a.

Chutia a han dap veleh chuan, Kapvunga lu chuan a kut zungchal chu rang lutuk mai a rawn hap thutin! dimna nei miah lo leh duhtawh zet chuan a țhial sak ta bawrh bawrh mai a. chutah zet chuan, Laibawnga hlau hlawp ta lutuk leh a nâ tuar phu zawk chuan inring hman lek lova, a hma lam hmun awih zet, Kuailenga kal thlâkna hnu hnahthel leh lei dur, daiin a bawh huh nâl pet puatah chuan chak zeta tawlh thlu thlâin, a tlukna lamah chuan a meichher chu a nawr țek chhuaiha a thim ta nghal hmuk mai bawk a. mahse, ding mai thei tawh hek suh! chutia thim zinga hlam nga vela thui a tawlh thlãk hnu chuan, a hma a kal Kuailenga chu meichher paih lawng lawng khawpa zuk delh tlu thla lehin, an pahnih chuan thim zingah chuan an inhai buai nasa ta hle a. chu achhapah, an tawlh thlâk dunna hmun țhang leh perh hnuai chu vawilehkhatah rawn awih bung lehzualin, boruak thaw vuaih vuaih țhin leh lei an tawk leh zauh țhin tih loh chu hriat mumal an nei ta lo tawp mai a. mahse, a rilru la fim zawk Kuailenga chuan a țhianpa Laibawnga chiai lai chu nghet zeta la pawm bet tlatin, a inleh thawk ruala a hmai vela tui vawt zet rawn intheh tuarh avang chuan, lengkirah an tla tih a hre thiam ta nghal a. chutia a rilru a rawn fim zauh rual deuhthaw chuan, lipui thûk zetah an pahnih chuan pil dun nghal bawrhin, an chung zawna Thla fem seki raih mai chu a inhai lân deuh lap lap laia, lipui pawn lama a han dah (dak) chhuah zauh zauh apiang chuan, chiang vak loin a han hmu leh zawk țhin a.

A theihtawpa a invai ngat ngat hnu chuan, harsa fea lipui pawn lam boruak chu a duh anga tam han hîp thei ta hramin, an tlakna lipui, Thla ral lam fem seki kual raih mai thlara, thlam ruk hmun tiat ngawta zau tling dum bial kulh mai chung zawng zawng chu melh kualin, Laibawnga awmna chin hmuh mai chu a han tum a. mahse, a tum ang ngawta Laibawnga chu a hmuh tak siloh avang chuan, a huaisenna zawng zawng chu theihtawpa sawm khawm chung chuan, lipui mawng lam dum thim kûk mai pan chuan rang zetin a liluh ta vang vang a.

A vanneih asiamin Laibawnga lo zal raih tawh chu a hnuai zawnah chiah chuan zuk țham fuhin, Thla êng dul ruih hnuaiah chuan vaukam chu a pawt thleng thei ta hram a. hâh hle mahse Laibawnga chu a bawihsawm zui vat loh chuan, reilotêah a zal hlen mai dawn a ni tih chu a hre chiang si! a zangthal zawnga a han mut rem tir hnu chuan, a awm nem nghek nghek pah chuan a khat tawkin a lu chu a han kaih kûn sak leh zauh țhin a. mahse, chutia hâh pawh sawi lova rei iak a han sawngbawl hnu pawh chuan, Laibawnga chu che chang eih lo leh thawk pawh thaw lo chuan, a mut ngaiin a mu thlê zawi reng tawh mai a. chutah zet chuan pasalțha Kuailenga meuh pawh chu zamna nasa zet chuan rawn man țim ur ur tawhin, "kan hun tawn teh hrep chuan, ka mang ava han ti-ang ta ve mawle, țhiana harh teh khâi thimțin hma ngeia he hmun hi kan pelh fel a ngai tawh e" tiin a mah chauh chuan a phun chhuak ta sap sap a. chutia hlauh leh manganna avanga rilru buai zeta a phun sap sap lai te chuan, a țhianpa mu zawi reng mai chu mitla lek lova melhin, Hrumcheûva leh Zakulha te pahnih tel lova, Laibawnga ruang a han vahpui tur te thleng chuan ngaihtuah chhuak hman vek tawha. mahse, chutia indawm kun reng ai chuan, chet dan tur ruahman vat chu a țul hle a ni tih chu hre chhuak thutin, meipui chheh hmasak phawta chumi bula Laibawnga chu mut fel tira, hnahthiala kaih khuh leh te te hnua an tawlh liamna lengkir chung lama, an Silai thlauh vel chu meichher nena han zawn leh phawt chu a rilruk ta a. mahse, beidawn nan tal Laibawnga chu han bawihsawm leh phawt chu thil dang a tihsan hma chuan tum leh phawtin, a awmah bawk chuan vawi sawm chuang ngawt a han nem leh nghauh nghauha. chutia a han beih leh fat fat hnu pawh chuan, Laibawnga lah a zal ngaiin ala zâl reng tho mai si! beidawng zet chunga a han thawh san dawn lai tak chuan, Laibawnga kêartui chu a rawn inkhawng ta dat dat a. chuveleh rang zeta țhutchilh leh nghalin, "țhiana țhiana harh teh harh teh khâi, pasalțha Zikbula fapa Laibawnga i ni lawm ni? țang fat fat la rawn harh vat teh khâi" tih pah chuan, a awm chu na fe fe chuan a han nem sak leh ta nghat nghat a. a vawinga nemna ah chuan Laibawnga chu ring rawn kân zawk khawpa rawn khuhin, a khuh pah chuan tui tam fê chu a kâ ațang chuan a rawn chhuak ta puat puat a. chuveleh Kuailenga lawm lutuk chuan 'aw' rawl ring fê chhuaha lo fuih vatin, inthing harh tur leh hahdam zawka thawk la tur chuan alo hrilh mawlh mawlh mai a.

Chutia Laibawnga a rawn harh leh takah chuan, tlem tal chawlhpui phawta chumi hnu lama, muang mara kalpui leh zawk chu a rilru chuan tumin, meipui chheh phawt mai chu a tum ta a. mahse, meipui chheh tur fawm khawm paha mau ro leh hnah ro ilo a han dap paha, a meitalh a han a han indap kual lai chuan, a Sahmim chhunga a meitalhlung âh chu an tawlhna lamah khan, alo tlâ bo tel ve daih mai tih chu a hre chhuak ta thuai a. chu achhapah, a bula kun lap chunga la țhu zawi deuh raih, Laibawnga lah chuan a awm a nem sak lai ata tawh kha, Lal fapa Kapvunga lu, a kawnga hruikhaua la insuih bet hram hram tih bak chu a Sahmim reng reng a âk tawh biklo tih a hre chiang si! lengkir kama țhut tlaivar ngawt mai bak chu tih theih an nei talo hle tih chu Kuailenga chuan a hre chiang ta hle a. mahse, chutia a ngaihtuahna kawma a ngawih deuh kar lai chuan, an piah hlam thum vela hla vaukam chhehrawp kara, thil enge maw tlê vat ava hmuh chu rang zeta pan phei thuaiin, lengkir lí ațanga a vah chhuahna lai chiaha, a suihbehna hrui chawpa a Chempui lo let bal mai chu Thla êng thlarah chuan a han hmu ta a. chutah, lawm zet chunga a Chempui chu chhar thuaiin, "kan vanneihnain min la thlâuh thla êm bik love! meipui kan chhep anga i pang vawt lutuk te kha duhtawkin i hem lum thuai dawn a nia" tih paha Laibawnga bula phei leh vat pah chuan, maute chang țha relrawl pahnih chu a han chhawk nghal hmawk hmawk a. chumi hnuah a maute chhawk nâ nâl chin chu hmu chiang mang lo chung chuan met leh thuak thuakin, țhahnem ngai zetin a maute mehfai pahnih chu a nawt ta sauh sauh a.

Chutia mei siam tuma a buai nak nak lai chuan Laibawnga chuan 'aw' thâm chhâl chunga țawng rawn thlâh peih ve leh tawhin, "chêka chêkah mihring ka tling lo țep chu a nih kha le! nang mah avanga nikhua hmu leh hram zawng ka ni hawt e" a rawn ti zawi ve ta raih a. chuveleh Kuailenga chuan, a mau nawh rawn mut ling chhema a kûn ngar ngar lai chu chawlh dat paha Laibawnga lam chu rawn melh pheiin, "ka beidawng hman achhâ chu a ni e! i ruang dâi pu chunga helai tlang han inawih liam chu huphurh namailoin kalo huphurh hman tawh a sin le. kei aiin i san a țha nêk bawk nen, thimțin hma a inawih hlat a har dan tur te nen lam ka lo ngaihtuah chhuak hman dap tawh hial a nia" tih paha kîk deuh van chung chuan a thil tih lai chu a chhunzawm leh ta malh malh a. mahse, Kuailenga'n mei a han chheh hnua an titi zui sap sap hnu pawh chuan, a thil tawn chu Laibawnga chuan la zep tlat rengin, a khel sira Kapvunga lu inkhai vâ mai chu mei êngah chuan a melh leh zauh zauh țhin a.

Laibawnga a hahdam tawk ta nia a hriat hnu chuan, Kuailenga chuan a tumdan ngai bawk kha ngaihtuah chhuak lehin, "tikhan lo țhu hahdam ta la, meichher nen hian kan tawlh liamna lengkir chung khi ka han chuan leh a nge. Sapui chil chhak phaka támtal kan ni bawk si a, Silai tel lova kal ngawt zawng a dik love. ka rawn lêt leh hunah chuan nang pawh ngai lo awh tawhin, helai hi kan chhir liam san leh thei tawh ngei ang" a han ti a. Kuailenga țawng rawn thlah chu rang vuta Laibawnga chuan lo chhangin, "a khaih kháih! ngai ka awh leh daih tawh alwm maw le, nangmah chauha i kal ai chuan, kan pahnihin i han kal teh zawk ang. mit pahnih chuan kan Silai hloh te chu kan hmu hma zawk ngei ang" tih pah chuan a rawn tho ve ta deuh vut a. mahse, Kuailenga chuan tlawmngai lo tura lo nawr lui zui zatin, "țhut dam i mamawh rih e, chutilo zawng kan kal lehna chin tur kan hre silova, thih sual chhuak hlim ila nih rih si kha. kan hnu hma a tawi em maia lengkir chung maiah bak khi chuan, kan Silai te kha an tlâ lo tawp ang, ti khan mei kha lo vil zawk teh khâi" tih pah chuan, a meichher ken lai nen chuan lengkir sir dinglam țhang hnawk lam chu a pan ta thuai a.

Lengkir hela a lawn ngat ngat lai te chuan, a ngaihțhatloh rukna chuan Kuailenga chu rawn man leh tawhin, Laibawnga chezia danglam ta riau leh a ngawi thei ta em em te chu mak ati telh telh mai a. chu achhapah, a mitmeng dul tak te kha a mitthla ah chuan rawn lang leh țhinin, Lengkir chung a han lawn chhuah hnu te chuan, a lo hruai ve ta mai lo kha a inchhir lek lek ta mai a. chuvang chuan, a Silai zawng pawh chu chak zet zeta vei zung zungin, a vanneih asiamin a Silai zawk chu Lengkir chung ațanga hlam ruk vela hla, thing lian zet zung thlâr kara alo inzep tang vâ chu a han hmu ta hlauh a. a Silai a chhar hnu chuan chak zeta an tawlhna hnu chhak lam chu dap chho lehin, thui ang reng fê chu engmah hmu lo chuan a thleng chho ta mai a. mahse, an tawlh liam țanna lai tal chu thlen chhoh tuma kal chho zelin, Lengkir hnuai lama Laibawnga a ngaigtuahna nen, Silai zawn hmuh duhna nen a rilru chu a buai ta map map hle a. chutia ngaihtuahna buai zet chunga a kal zel lai chuan, a hriat mang loh laiin an tawlh țanna lai tak chu han thleng chhoin, Laibawnga Silai awm reng reng chu a hmu chuang ta hlek lo mai a. mahse, a rilrua pawt tlat tu Laibawnga a ngaihtuahna avang chuan, Silai zawn zel duhna chu a rilruah chuan lang tawh lovin chak zetin a kir san leh ta nghal thuai a.

Chutia a let thlak leh hnu a Lengkir chung thlen hma, mautluk khat vel chauha hla ațanga lengkir lam hawia a tawlh par par lai chuan, patling țe âwn ruaih ruaih thawm, Lengkir hnuai ațanga rawn ri chho rawih rawih chu chiang zeta hre thutin! a kal chhohna Lengkir dinglam sir awih zetah chuan zuang leh tleng fawmin a lim thlâ ta pur pur mai a. mahse, Laibawnga awmna Lengkir hnuai a thlen meuh chuan, a meipui chheh zawng zawng kha hmun tinah chuan, a ling chauh hmuh tur awm tawh chunga lo darh dê sup supin! khawthlang lama Thla fem ral tawh tlâ tur her deuh bawih tawh êng dul ruaih hnuai, mau leh thing kara perh leh hrui hnawk inphan buk thim thla mup kar hnuai vela, Lengkir mawng lam hawia patling țe âwn thlâ ruah ruah mai chu, Laibawnga awrawl ngei a ni tih chu a zuk hre thei ta a.

Chutia Laibawnga mangang thlabar thawm aû ri a hriat fiah rual chuan, amah pawh chu hlauh rukna leh manganna, ala tawn ngai reng reng loh țim ruk tlatna chuan rawn man chawpchilh ve nghalin, Lengkir mawng lam hawi chuan a Silai tin kual zawk zawk chung chuan a kawh liam ve ta ngawt mai a. thui fe a tlan thlak hnu chuan, Laibawnga âû ri chu tlem tlema hnaih thla ve hret hretin, mautluk thum vela hla ațang chuan Labawnga hlau leh nâ tuar thaw ri hrawih hrawih lo chhuahna lai, luite kam hmun veng zet lai chu muangchang leh khur ru zaih zaih chung chuan a vêh thla ta a. a duhtawka hnai a zuk veh thlen hnu chuan, muangchang leh thawm dim zet chunga a hma hlam hnih vela hla a, lungpui to lurh chu bawk vak chunga pan thla lehin, chu lungpui phen ațanga a hnuai mai, Laibawnga thawm rawn chhuahna lai a han bih chian chuan, luite kam lungpher chunga Laibawnga lo tal fut fut lai chu chiang ang reng zetin, Thla êng thlarah chuan a zuk hmu ta a. mahse, Laibawnga khawih tu awm hmel, Sapui emaw ruangâm reng reng a hmuh siloh avang chuan, mak ti zet leh phawk tak chunga, a tawmna lungpui phen ațang chuan tlan thlak vat tuma pen chhuakin, pen hnih a pen ruala Laibawnga rawn țê ri leh țhawt a hriat rual chuan, din chawt pahin Laibawnga lam chu a han bih leh thuai a. mahse, chuta a thil va hmuh zet chuan Kuailenga chu engtinmah che chang theilo khawpa ding khawng tlat khawpa, a tiril zawng zawng nen lam chuan rawn țham khur hlawk hlawkin! Laibawnga'n a tlak bo hlau zeta a khel sir veilama a thlun beh, an Lal Keihranga fapa Kapvunga luin a khel sir tihrawl a lo dih sak mawlh mawlh lai chu, chiang zetin Thla êng thlarah chuan a zuk hmu ta thut mai a. chu achhapah, chutia a dihna hliam ațanga thisen rawn chhuak chu Kapvunga lu chuan, ri hruam hruam khawpa duhthawh zeta liak ri leh hliam hliam țhinin! a liah sen loh Laibawnga thisen luang liam te chu, lungpher chungah te chuan a luang kawi nguai tawh mai alo ni a.

Chutia a en reng lai chuan, a mah ngei pawh chu mumal nei mang lo khawpa bing deuh chuk chukin! a beng ri hriatna te chu a hla ta tawlh tawlh mai a. chuveleh theih tawpa inthin harh tuma a awm bawr te chu nâ zet zeta inchumin, a kê hmawr leh kut hmawr rawn vawt chho rawih rawih mai te chu theih tawpa tih reh tumin a han tiche lui hram hram a. mahse, chutia khawng ti tiha a awm tawh lai, nikhua hre mang tawh loa a awm laia a fukê tih chêt luih hram hram paha, inthin harh tuma a beih fat fat lai chuan, a thlang lam Laibawnga awmna ațanga 'awrawl' hrawl leh țeng thlêr duaih mai rawn râk khêk tuarh mai avang chuan, thei leh thei lova chulam hawi chuan dâk thla leh hramin, Kapvunga luin Laibawnga hliam lai alo dût dîr ngur ngur lai chu chiang zetin a zuk hmu leh ta nge nge a. chumi rual deuhthaw chuan vawilehkhatah a hriatna chu a hma aia pik zawka rawn mit leh sulhin! a țhutna lungpui phenah chuan, a bêk hêm zawngin a bawkkhup ta thlawrh mai a ni.

Hrumcheûva chuan, a bul thingzung thlâr panga a meichher êk han nawr țêk chhuaih pah chuan, a hma dinglam hreta Zakulha hâh țhu kun lap mai chu melh phei vutin, "ku Bawnga leh Lenga te hian, engvanga khawchhak lam pan tlat nge an nih tih hi ka man thiam talo tawp mai e! an hnu lah chu a pherh ngunin, an tlâkna hnu hma a bung ngun si a. hetia hnu thlauh zel zul e ti lova, mautluk dawn dawna hla a an hnu a zawm leh daih fo mai hi mak ka ti ta riau mai ka ti" a han ti a. Zakulha chuan Hrumcheûva thu rawn sawi lai chu meng dê deuh kalh chunga lo ênin, "thimțin hunin min thâwt țan chu a ni ta mai e, i sawi ang khan, hetia hnu bung rem rum zuia tei tei mai hi a pamhmai ka ti telh telh mai. mahse, helai tlang hi kan chuan chhuah huna a let liam bulțhut kan luh hun chuan, an hnu hma pawh hei ai chuan a hlawmin kan hmu fâi kelh thei tawh mahna le" a lo ti ve sap a.

Chuta țanga an han chhuah leh hnua, tlak lam hawia Laibawnga te pahnih hnu an han zui țan leh lai chuan, țhang leh perh hnuai, an tawlh țanna lai nâl leh awih zet chu chiang takin an han hmu ta a. chuveleh an pahnih chuan chak zeta Laibawnga leh Kuailenga te tawlhna hnu hma chu, a sir tawn tawnah zui thla nghal thuaiin, Thalngul leh a fang țhenkhat te chu an chhar thla ta zauh zauh a. mautluk hnih dawn an han chhui thlak hnu phei chuan, a piah deuh hlamnga vela țhangbuk hnuaia thil engemaw lo inkham tlê deuh ralh chu Zakulha mit țha zet chuan va chhui fuhin, a va bih chian chuan Silai ngul a ni tih ava hre ta hlauh mai a. Silai a chhar hnu chuan Hrumcheûva chu zawi sapa va âuin, "Sapui hnu hma lah awm lêk silovin, heti taka patling țhankin pahnih, pasalțha chhawn khauh an tleng nasa mai hi mak ka ti ta zual hle mâi" tih pah chuan a piah mautluk vela hla a, Hrumcheûva kun dâ dâ lai chu a va pawh phei ta thuai a. Hrumcheûva'n Zakulha leh a Silai chhar alo hmuh rual chuan a ngaihna hrelo zet chunga, Zakulha chu en nghal chat chung chuan lo ding nghal chawtin, "khaih khâh! rang taka kan liam nghal a ngai e, Sapui kut tawka hetia tleng fê hi an nilo tawp tih a chiang e! ti teh i hmanhmawh teh ang khâi" tih vut pah chuan an thlang lam liam thlâ ah chuan, meichher hawl țêk kual chhuaih chhuaih chung chuan a lim thlâ ta fur fur mai a. chuveleh Zakulha pawh chuan chak zeta zui thlâ ve nghal zatin, Lengkir sang lutuk tak mai ko chunga an din rual chat lai chuan, phawk zetin hnai set sawtah an in ên nghal chat mai bawk a. mahse, chu Lengkir ko sang lutuk mai chunga engmah sawilo ve vea an inmelh tawn deuh râm hnu chuan, an rilru ngaihtuahna inpawh zet avanga, an tih tur an mitmenga an inhrilh tawn chu a tu ve ve pawh chuan rang taka man thiam nghal ve ve in, Lengkir sir, an veilam chu rang zetin an pan phe dun nghal zauh mai a.

Lengkir hnuai lipui dum kûl mai, a chung lam ațanga tui rawn inkhawh per sî sung sung an zuk tlâk thlen hnu chuan, chu lipui kam hmun hul deuh lai hmun țhenkhat a, meithingthu la mût khu châl châl darh neih nûaih chu an han hmu ta a. chutah zet phei chuan an ngaih chu a țhalo dun tawhin, "rammi te kut thâk hnuhma" tiin Hrumcheûva chu a rawn phun chhuak ta sup a. chuveleh Zakulha pawh chuan, Hrumcheûva ngaihdan chiah chu a ngaihdan a nih zia lan tir nan a lu chu lo bu ve deuh nghatin, "rammi te hi pu Bawnga leh ku Lenga te hian an cho ta mai tihna nge ni anga, an tum loh puiin rammi te hian an pawt lui tihna ni zawk ang le"!? tih pah chuan, hnu hma zawn pah chuan Lengkir thlang lam, țiau dûr leh lung kuttum tiat awm vel leh a ai lian leh tê deuhte inchap cham thlâ deuh dap chu, a meichher lek hniam deuh dâ dâ pah chuan a zuk bih kual nasa mai a. chutia a vah kual lai chuan Hrumcheûva erawh chu beidawn rukna chuan rawn man țan deuhin, rammi te kut ațang chuan, Sadawt te thawi bawl hlanna te lova Laibawnga leh Kuailenga te pahnih chu han lak lêt chi ziazangah a ruat ta lo riau mai a. mahse, chutia buai ru tak chunga lipui kama a din khawh deuh tau lai chuan, "hê lama hi hnuhma pherh zet chu ka bih fuh e"! ti a, a thlang lam ațanga Zakulha rawn aû lauh ri chuan, a ngaihtuahna ata chu chiang zeta rawn țhawng harh zawkin, chulam pana a liam vut rual chuan van lam Thla fang liam tawh thim deuh ruih avanga, Arsi lo dê țhat tawh leh khawchhak kawlkil rawn vâr râih tawh chu a han thlêk tawn deuh zauh zauh a.

An kal thlakna Lengkir mawng chu a pik sawtin, an chung lama perh leh țhang ilo zam puk thim thla ruih avang chuan, an meichher ên phak chin pawh a tawi zual ta hle a. mahse, thui tak an kal hma chuan an hma hla vak lova lungpui lo to deuh vung hnuai, lei nena a inhnekna laia kephah hnuai lam lo lang berh deuh chap chu Zakulha chuan rang zeta pan thlain, a zuk thlen ruala a chupa lo khuh tu hnawl hnawk vel a han hai kian hnu chuan, a hmai lam chu a meichher chuan kun meuha ên chungin a han bih hnai ta a. chutia a bih chian rual chuan "ku Lenga zuk nireng che chuan e"! ti a phun deuh sapin, a bula Hrumcheûva rawn țhu hniam ve chiah chu zawn sawn pui atan chuan a han sawm nghal zat a.

Kuailenga an han mut țhat tir hnu chuan, an chhehvel reng reng chu hmanhmawh zeta bih kual nghal zung zungin, Kuailenga an hmuhna thlang lawk lungpher chunga, a zangthal zawnga Laibawnga lo tlu zawi reng mai chu Hrumcheûva chuan a zuk hmu leh ta mai a. chuveleh Zakulha chu rang taka ko thlain, Kuailenga an mut tirna lamah chuan Laibawnga chu Zakulha chuan a pawbahlât chho veleh ta a. chutia Laibawnga te țhiandun an hmuh hnu chuan, Lusei pasalțha pahnih te chu an ngaih a țha dun tawhin, Kuailenga chu reilotê an bawihsawm hnuah a rawn harh chhuak ta mai bawk a. mahse, a rawn harh rual chuan, rang taka Laibawnga chu meng â ruaih chunga aû nghalin, "thlaphang mahta che! in pahnihin kan țhutchilh tawh che u alawm. kha laia kha ku Bawnga pawh a mut mek kha" tih pah chuan, a meichher chuan Laibawnga chu Hrumcheûva chuan a han ên hnai thuai a.

Kuailenga'n Laibawnga a han hmuh chuan rang taka thawh thut pah a, Zakulha meichher chu lak sak vut paha Laibawnga lam chu pan thuaiin, Kapvunga lu leh a khaina lam, a khel veilam chu a meichher ken nen meuha hniam zeta zuk kûn pah chuan a han thlêk tawn ta vut vut a. chutia Kuailenga chê buai kual vel ta tlat chu Hrumcheûva leh Zakulha te pahnih chuan, mak ti zet leh meng phawk zet chunga lo thlirin, "helaiah tak hian, hliam nasa tak kha a tuar si a. tunah pang him pialin tui zetin a muhil bawrh bawrh bawk si! eng ka ti zo tâ nge ni, ka mitvai mai lah a nih silo"!? tih pah chuan Kuailenga chuan, Laibawnga khel veilam zawng zawng chu a han bih nawn leh run run a. mahse, chutia a bih buai viau lai chuan Hrumcheûva chu rawn inrawlh thuaiin, "ku Bawnga nena in thil tawn awm ang chu ka ngaihruat zui thei e, hmaih nei lovin in bo dan leh tun hun inkar in chhir thlen dan hi han sawi teh khâi" a han ti dam dap a.

Kuailenga'n, an chanchin engkim a sawi zawh hnu chuan, Hrumcheûva leh Zakulha te pahnih chuan Lal fapa Kapvunga lu chu uluk zeta bih dunin, Laibawnga kawnga a insuih behna chu Hrumcheûva chuan muangchangin a han phelh a. chumi hnuah hnahthial hnah chuan uluk zeta fun țha lehin, ama Sahmim-ip ah chuan uluk leh dím zetin a khung fel ta thek a. chutih lai chuan, Kuailenga leh Zakulha te pahnih chuan Laibawnga lo harh mek chu lo buaipuiin, hmai dang var pup leh meng â ruaih chunga tlan chhiat tuma a tal buan buan mai chu, an awmna ngawpui hnuai hnahthial hmunah chuan an buan dun tial tial mai a. chutia an buan lai chuan Hrumcheûva chuan vin deuh țhata Laibawnga chu rawn hauin, "țha te te khan awm ta mai che, i awmdan kha pasalțha Laibawnga chêt ze phung a ni love! Lal fapa Kapvunga lu a i luh tawh a hnu hmanah, a eng aiah nge kan pasalțha Laibawnga kha i han nâwp buai zui kher chu le! hringmi te leh Tulum te kâi duhna hmun a inthlawp thei ngai lo. țha te te in lai leh laiah ințhațhen teh ang, i kâina ruamah nang lut la, keini pawh kan kâina tlangah kan lawi zawk ang e" a han ti fiak ta țhak a.

Chutia Hrumcheûva rawn țawng khur deuh dat chu Zakulha chuan mak ti zeta lo melh deuh ranin, Kuailenga thusawi zawng zawng kha Tulum hnuhma vek alo ni tih chu a hrethiam ve ta chiah a. chutah zet chuan a chhung lam ațanga amah rawn nawr sâ but but tu avang chuan, a mitmeng chu dê fiah kalh khawpa rawn inthlakin, "ral anga luhrum zial pu chu nila, i fukê kim inhming kim khawpa tam, i luhrum zial chu ka hleh sak tawh ngei ang che" zawi ram deuh hmaka tih pah chuan Laibawnga chu a melh ta ran mai a. mahse, chutia a han tih veleh chuan Hrumcheûva bawk chuan a rilru fim zeta, Tulum leh rammi cho chu țanhmun phêt tawpah lo chuan tih mi a nih loh zia leh, pasalțha rothap meuh nimahse, a theih hram chuan an tluang bawh hnawk zawnga chêt luih țalh chu, pi leh pute duh zawng a nih loh zia te chu ngaihtuah chhuak hman vekin, "țawngkam țhain kan inkar hi pawt țhen hram teh se, kan inremna 'sa-uitan' nan chuan, khua kan kâi veleh pasalțha Laibawng hian Ardum in a sâ biak tlawn ngei ang che" a rawn ti thawp leh ta deuh sat a.

Chumi hnu chuan Laibawnga chu tlemin a rawn pangngai ta deuh a. mahse, a mitmeng sen rum leh la â ruaih mai chu Hrumcheûva te pathum chuan, ngaihțha chiah lo taka melh leh zauh hlawm țhinin, an chhak tlang chung zawna kawl rawn êng zau tawh zet chu, Hrumcheûva chuan a han thlir chho vang vang a. chumi hnuah Zakulha leh Kuailenga te pahnih chu zawi deuh sapa bekbawrin, khaw ên tak tak hma a chulai hmun chu a hla thei ang bera, kalsan hman ngei tura kal a țul thu chu a sawi zui ta nghal a. chutih pah chuan rang deuh vuta tho nghal thuaiin, hmahruai nghal zat pah chuan a meichher kenah chuan, a bul vela mauro tlu remchang a pawh khawm te chu a tel belhbawm pah mial mial bawk a. chutihlai chuan, Zakulha leh Kuailenga te pahnih pawh chuan, Laibawnga ngawi run mai chu thlem ti tiha kal tura tur ve nghalin, a hnungah chuan an pahnih chuan meichher nen an veng zui ta a.

Nilenga Changpui bulbal no leh ram thei an hmuh ang ang ei zel chunga an kal hnu, tlai Ni tlak liam ruaiah chuan Darkai khaw ram chin chu an thleng ta a. chutah, an thlen chin zoluitê fim thap kâk maia, insil daih paha an han țhut chawlh vang vang hnu chuan, Zakulha leh Kuailenga te pahnih chuan mauro fawm khawmin, meichher tur an han puah leh thuai thuai a. chutihlai chuan Hrumcheûva chuan, riahbuk sual khawtlai tawh lova khua kâi law law chu rawn rawtin, "kan kal lam ai chuan, ram chin kan chhir fuhlo atalangin Darkai khaw valh ram kan kâi tlai ta deuh e. mahse, tun anga kan kal zel chuan, lenghaw'n Arin tlang a thâwt hma hretin khua kan kâi hman thoin ka ring e. ku Bawnga lah tamtâla han muanpui chi a ni tawh silo! muang lova kal i han tum leh hram te'ng u" a han ti a.

Hrumcheûva rawt dan chu Zakulha leh Kuailenga te pahnih pawh chuan, țha an tih thu chu lo sawi ve varin, "hlawhtling khat viau mah ila, țhian ku Bawnga chhungpuinu ku Rualveli han hmuh chu ka hreh mang e â" Kuailenga chuan a rawn ti chhuak ta sap a. chutia Kuailenga rawn țawng chhuak sup chu, rawn leh hawi vut paha Hrumcheûva chuan rawn chhang vatin, "ku Bawnga hi tamtâl harh pui theih chu nise, tlawm mâkah a furpui her thleng rawk paw'n ngawpui hnuai kan belh pui ngei ang. tun dinhmunah erawh chuan, Sadawt leh a sâbiak te puihna a mamawh ber tawh e" a han ti thuai a.

An chawlhna hmun chhuah sana Darkái khaw țhut tlang leh an awmna inkara, tlang pahnih hêl ngai lo awm, a tlang hnai zawk an han hel lai chuan, Laibawnga chu a hél țan riau ta mai a. a mitmeng te chu a hma zawng aia rawn sen vâm zualin! a chilphuan te chu a rawn tlâ var buah buah ta mai a. chu achhapah, a kal țha hle hle lai chu khawng zeta ding thutin, a mitmeng pual rû mai te chu Kuailenga chuan a țih ru leh hle tawh a. mahse, Hrumcheûva chuan Laibawnga chu hnai set sawtah rawn din chilhin "a eng kan ti leh ta nge ni! țha te te in kan kêchheh min rualpui emaw tia. ti teh i kal leh tawh teh ang hmiang" tih pah chuan, Laibawnga ding khawng tlat mai chu a meichher ken loh na lam chuan a banah a han chelh a. mahse, kalpui tuma a han pawh deuh pawh chuan, Laibawnga chu a dinna lei nen chuan an inzawm ta mai emaw tihtur khawpa a ngheh tlat avang chuan, Hrumcheûva chuan ro hran rel mai chu țula hriain, rei vaklo chu rilru buai zet chung chuan a han ding kûn ta deuh ran a. chutia a rilru insual buai a inngaihtuah lai te chuan, Laibawnga chilphuan var behbuah rawn tlâ leh puat puat țhin chu Zakulha leh Kuailenga te chuan, hnah nêm deuh pawt khawma lo hrûk sak ve mekin, chutia an han hrûk sak leh mawlh mawlh lai tak chuan nasa zetin a rawn khûr ta chur chur mai a! chuveleh Hrumcheûva chuan 'aw' fiah kek kawka a ngaihtuahna chu rawn sawi chhuakin, "helaia țhian Lenga nena ku Bawnga lo awmpui nge i thlan dawn, zualkoa Darkai tlang han pawh le"!? tiin Zakulha chu a rawn mal melh ta râm mai a.

Hrumcheûva rawtna chu Zakulha chuan rang zeta lo chhangin, "kei ka kal a nge" rawn tih tawi deuh tak pah chuan, a Silai chu kal muan phah nâna hman a hlauh thu chu sawi zui leh nghal deuh nghatin, a Thalngul hrui kara a lu thun zauh pah chuan, Hrumcheûva khel sir, a kawng hruikhau hren kara Thalfang inthiat ther far mai chu pali panga vel a han pawh phawi sak zui zauh a. chutih lai chuan Kuailenga pawh rang deuh vuta rawn țawng deuh supin, "kei ka kal zawk teh ang khâi, a kum akhua a ka pal țhin kan khaw ramah hian, nang aiin pumpelh hnâi leh peng hrang hrang ka hre zawk ang e" tih pah chuan Zakulha chu kal khalh a han tum vut a. mahse, Zakulha țuan zawng han têr rual chi ni țhin heklo le! Kuailenga kal vut chu a puan venna, a kawng bawra a bilh chuar deuh țâtah tak chuan rang zeta lo man hmanin, "u Cheûva thlâ veng atan chuan, nang ngei hi ka ngaih ngam zân theihna tur i ni e" tih paha nuih zui deuh sak pah chuan, Kuailenga chu mawng kân deuh âk khawpin a han pawt lêt a. chuveleh Hrumcheûva chuan anni pahnih chu nui kîk deuh van chunga rawn ên pheiin, "Lusei Keitê țuan chuan i țuan a tluk thial tho awm e, tlawm maka lak lovah i ti teh zawk ang khâi" a rawn ti ta a. Hrumcheûva thu chu Kuailenga chuan hnial mi nia a hriat tak mang loh avang chuan, Zakulha chêt ran zia ngaihtuah zui vang vang chung chuan an inpawh buaina hmun ațang chuan, țhen țhâ chungin Laibawnga leh Hrumcheûva te pahnih awmna lam chu a pan phei ta a.

A duhtawk maia a mah chauha Lusei Keite han vak vel chu a phê chak par parin, a meichher ken te chu a kal chak em avang chuan phei zawngin a âlh hlerh hlerh reng mai a! chuvang chuan, Hrumcheûva te pathumin an lo nghahna tlang bul țhutin a zawm chho zel, tlang chhip sang ang reng zet pawh chu reilotêah kal pel thuaiin, Darkai khaw țhut tlang dawt chiaha, tlang pahnih inzawm pauh țhiang rial, tlang nupa an tih țhin te bulțhut ruam ngawpui chu a lut thlâ chu a ni ta mai a. mahse, chulai ruam kûam lei dûr hnawng nâl chiau deuh perpur a han luh lai chuan, a meichher êk chu din deuh dat paha a bul thing zung thlâr pheng hlai zetah chuan nawr thlâin, a han kal țan leh chiah laia a hma zawn, a kal lehna tur tlang nupa bulțhut chhak lam deuha mei dê zawk a hmuh ruala Silai puak ri dur a hriat rual chuan, a meichher ken chu hum khawm hman rual loh khawpa rangin a darh țek ta chuaih mai a!

Chuveleh Lusei Keité Zakulha ngaihtuahna chuan, a tih tur leh a awm dan tur chu rang lutuka ngaihtuah chhuak hman vekin, "mipa leh arhluisenin, dam ni chhiar rei kan tum vak hlei nem le"! a ma hriat tawk leka tih deuh nghat pah chuan, a mit țha zet chu dê kalh khawpin a meichher hmuhna zawn, a chhak lam tlang bul țhut lamah chuan a han lên chho khiau a. mahse, a dinna ngaiah chuan che lo chang lova la ding tlatin, a Thalngul lak thlâk zal zal pah chuan a kawnga a Thalfang thiah zinga pakhat chu a kutlehlam chuan, a han phawi pah zâl zâl bawk a. a Thal hruia a kutveilama a thalfang a han hmeh beh chat lai chuan, a chhak lawka mauro rawn ri deuh țhiap chu a beng țha zet chuan chiang zeta ngaithlâ leh rihin, chu ngawpui hnuai thim chhah tlat kara a mah rawn veh ve mek tu chu hriam thlâk hmasak a tum hle a. mahse, chutia a chhak thawm rawn chhuahna lai a ngaihchan kar lai chuan, a vei lam sir thlang lam deuha hnim kuangro rawn tliak ri țhak chu a beng chuan a hre fuh leh ta tlat mai a. chutah chiah chuan Lusei Keitê chuan, a mah veh tu chu pakhat chauh a nih loh zia chu man thiam thuaiin, a meichher avang khan a awmna lai chu an lo chhinchhiah hman a ni tih leh, a awmna lai chu țhuang hnih ațangin an rawn veh tih chu a man thiam thuai bawk a.

A ngaihtuahna fing zet chu Lusei Keitê chuan rang zeta rilru dang put san thuaiin, a Thalngul chu a lua thun zauh paha a dar hnung lama nawr liam zui zauh pah chuan, a kê bula lung mum deuh pel pawl kuttum tiat vel chu a Sahmimah chuan a han thun leh ta zauh a. chumi hnuah a awmna bul lawka Bul thing uipum rual vela lianah chuan chak zet leh thawm nei eih lova lawn chho zai zaiin, a lawn pah chuan a hnuai lam chu a hawi thlâ deuh thuak thuak reng bawk a. a duhtawka sang a han thlen hnu chuan, a zar rem deuh lai, a hnah chê nasa thei khawpa insawi lo tura a ngaihah chuan rem veng vawng taka inzep tang zui zatin, a thawm hriatna lam, a zawn chhak lam mautluk khat leh a chanve vela hla leh a thlang veilam, hnim kuangro tliak ri a hriatna lai, a hma lawka a dinna ațanga mautluk vel leka hla nia a hriat lam chu uluk zetin a chhuk melh ta ran mai a.

Chutia a bih kar lai chuan, a mi nghah te chuan rei nghah ngai lo taka thawm zawi zet rawn chhuah lehin, a thlang lama hnim kuangro rikna zawn zawk ațanga mau innawt ri deuh sât rawn ri chhuak a hriat rual chiah chuan, Lusei Keitê mit dê kalh mai chuan mipakhat, a awmna hlui, a lawnna thing hnuai ațanga hlam nga vel leka hla a, țhang buk phena mipakhat tawm kûn chal mai chu Changpui hnah inchhuang thuah tup kar ațang chuan a zuk hmu ta ruaih a. mahse, a chhak zawka awm chu uluk zeta melh chho chunga zawn san leh rih phawtin, che lo lekin a awm ngai chuan a han awm leh ta rân a. chutia a nghah deuh reng takah chuan, a beisei ang thawm rawn ri, perh hnah invaw ri deuh thlap chu rei vakloah chuan hre fuh lehin, chu thawm rawn chhuahna zawn, a chhak zawk ami awmna lai chu fiah zetin a chhinchhiah leh ta khiau a.

Chumi hnu chuan a duh ang taka muangchanga inher rem leh hretin, a Thal hruiah chuan a Thalfang chu a kutveilam zungpui leh zungchal chuan hmet betin, a ngul bial pawp khawp chuan a han kûai chik deuh țiah țiah. chuveleh a Thalngul kawih ri țhat țhat avang chuan a thlang lam ami, a zuk hmuh chian theih zawk chuan a Silai ngul chu, a awmna hlui thing hnuai lam hawi chuan rawn tin kawh chhoin, Lusei Keite chuan chupa zakdawh zawn siah, a Silai cheng kawih per a tumna lam kaû deuh hâk chu a chhuk tin ta râh mai a. chutah, a Thalngul chu tlema kuai nâ leh deuh salhin, a Thalfang chu nâ zetin chupa lam hawi chuan a thlâh vung ta hlarh mai a. chuveleh chupa awmna lam ațang chuan patling rûm ri rawn chhuak nghal datin! perh leh țhang kuang ro tliak ri deuh bâih leh nâ zeta thawk lâ hâwk ri chuan a rawn zui nghal zat bawk a. chuta chin chu eng thawm mah hriat tur awmlo khawpa reh zui nghal hmiahin, chupa tawmna lai vel ațanga lei hrik rawn hram chiah chiah chu Zakulha chuan a han ngaithla zui deuh vang vang a.

A tum tak a fuh tih a hriat rual chuan, Zakulha chuan chhak lam chu rang zeta bih chho leh nghal vatin, a țhianpa thawm chhuah dimlo lutuk avanga a chhak zawk ami phun ri deuh hluk chu, Zakulha beng țha zet chuan a bih chhoh rual chuan a han hre hman leh ta ngei a. mahse, chupa rawn phunna lai chu alo chhinchhiahna lai ai khan, hlam hnih awm vel ngawta a rawn hnaih tak avang chuan tlema nghak leh detin, chupa awmna lai awm vela a ngaih lai chu uluk zeta bih chung chuan a melh leh ta ran a. mahse, chupa chuan a ruangam hmuh tur a rawn tih lan duh tak miah loh avang leh, thawm hriat tur eih a rawn chhuah zui duh tak miah loh avang chuan, Lusei Keite chuan a ruahman dan pakhat zawk chu hman a țul ta a ni tih chu a hre chawpchilh ta vat a. chutah, muangchanga a Sahmim-ip chu zen deuh zâl zâlin, a lung âh kuttum tiat vela lian chu a han phawrh ta a. chumi hnu chuan a thawm hriatna zawn chu uluk zeta zuk bih lehin, a bih pah chuan a Thalngul chu a lung hûmna lam kutzungchal chuan a han kuai bet leh a. chutia kuai bet chung chuan a Thalfang chu a kutlehlam chuan a hruiah chuan hmet bet lehin, a lung hûm chu a awmna thing hnuai, hnahthial zawnah chuan a thlâk ri ta sat a. chuveleh a chhaka awm, a mi veh pa chuan rawn kûn lan deuh zawk paha a Silai chu rawn tin kawh thla zawkin, chu hun mitkhapkar rang lutuk tak chhung lekah chuan, Lusei Keite Thalfang chu nâ zetin chupa lam hawi chuan a thlâwk chhuak hman ta tlat mai le!

Chulai ruam chu patling nâ tuar țê âwn țhawt leh thaw bawrh bawrh ri chuan rawn luah khat nghalin! mau ro leh perh kuang ro tliak ri zui tuarh tuarh thawm chuan chhak lam a pan chho ta hret hret a. chuveleh Zakulha chu rang zeta thing ațang chuan tleng thlâ ve nghalin, chhak lam pana chupa hliam tuar vak chhoin mauro leh perh kuangro a bawh ri chho tuarh tuarh lai chu, a thawmah chuan chhui chho zelin a Thalngula a fang hmet bet chaih chung chuan a zui kûn chho dâh dâh mai a. mahse, a thim em avang chuan a khat tawka ding leh dát țhinin, tuiburhmuamdâ chanve vel a veh chhoh hnua, thil enge maw ri thûm deuh chawrh a hriat rual chuan, a chhak lawka kawrte kam fai laia lungtum lu tiat vel bula, a mi ûm pa lo tlu zâl reng chu fiah vak loin a han hmu ta a. chuveleh a Thalngul chu bial pawp khawpa kuai nghal zatin, chupa lam hawia tin kawh râh chung chuan a bul lawka țhang buk phenah chuan a han kûn lut zauh a. mahse, chutia a tin reng lai chuan chupa kê khawng thum tlat tlat lai chu chiang zeta han hmu lehin, mihring thi tur chalchang alo hmuh fo tawh ho ang chiah a, chupa chetze rawn chhuah lai chu muangchangin a pan chho ta a. a han thlen hnu chuan chupa hrawk sir veilam deuha a Thalfang lo bur tlang rung mai chu rang zeta pawt phawi deuh palhin, a phawi rual deuhthaw chuan, chupa hmai zawnah chuan hniam zetah a zuk bih chiang ta a. chutia a han en chian takah chuan, chupa bek dinglam hnuai lo dam deuh dâk leh, a tlukna bula lungtum pang chung lam dum deuh zûl chu fiahlo deuh ruaiha zuk hmu nghalin, a kutzungchal chuan lung chunga thil enge maw luang dum deuh zul chu a han khawih zauha. chutia a han khawih hnu chuan a kuta chu thil dum deuh rawn kai chu muangchanga hnim deuh vang vangin, chupa hliam tuar insaseng tum tlanchhia chuan, tluk paha chu lungah chuan a lu chu sawh palhin um hlat pawh ngai loin alo insawh hlum der mai a ni tih chu a hre chiang ta hle a.

Chulai hmun ațanga a han chhuah leh lai chuan, amah rawn veh tu, a thah tak te pahnih kha khawi Lal khaw mi nge an nih ang!? tih chu nasa zeta Zakulha chuan ngaihtuah zuin, Darkai khaw mi, Sa changa kal ram chin bo vak vel an nih palh chu a hlau deuh lek lek mai a. mahse, engmah fiah hmasa lova a meichher ken avang ngawt pawha mihring a ni tih hriat zet si, buaina an rawn thlan luih tlat avanga, an chunga Hriam a thlâh ta chu inthiam lohna nei duh bik tawh lo chunga rilru dang put san ve ngatin, a hma tihtur awm chu hlen vat tum chung chuan Tlang nupa pang awih ang reng zet, hmar lam ep ngawpui pan deuhna laiah chuan, thâ tho zet chungin a meichher phê hlap hlap khawpa chak chuan a tlan leh ta par par a..

[Ngaia]

Bung-45

Zan lama an chunga thil thleng avang chuan, Vangmual khaw Paho zawng zawng te chu zing Ni lan hma ațangin Lal mual an rawn lawi hut hut mai a. chutih lai chuan Lal Rumvuta leh mualkil te chuan, Paho te mangang pungkhawm chu Lal Inchhung ațang chuan, thawidam dan tur ngaihtuah chunga bih leh dûk dûk țhinin, "kan kum țhat kum chhir fuh tih nak nak alaiin, Buh Bal chhekmualin ral kut a tawk ta mauh mai si a! kan Vangmual khaw lian hei ang riang ruang min nâwp ngam tur khawpa pasalțha ngah khua, tlang hrang țhut khawi Lal mah kan nâkpek tawn tawnah an awm der silo. kan Buh thar lah atu amahin kan Buhzem kan la inthlen kim lo nasa mai si a! tu zemah mah khup thup khawpa tam Buh pawh va la awm hlawm suh. țampui țauțeh thlengin kan tawk mai ang tih pawh ka hlau hlel love ka ti Lalpa" mualkil pakhat chuan a rawn ti chhuak hlawl mai a. chupa thusawi chu mualkil dang zawng zawng leh Lal Rumvuta te chuan kun nguai chunga lo ngaithlain, Lal Rumvuta phei chu a thinrim hle tih a hmelah chuan a lang chiang hle a. mahse, a upa thu rawn sawi chu a dik zia a hre chiang si! Buh Bal ei tur in lama an seng thlen tawh ho chu rei rin tham a nih loh zia chu lo ngaihtuah ve in, "mah reng reng se, Vangmual khaw lian mipui tumah hian, khawi tlang țhut Lal hnenah mah kut khumin pûr kan chaw lovang. he'ng ralho kut hnu avang hian ka khua ațanga tlang dang Lal belh ruk tuma, a ruk arala chhuak reng reng chu tumah dim loh tur" a rawn ti nghut nghut mai a. an Lal thu lak dan chu mualkil țhenkhat te chuan, a laka tlaktlum zui zel duh vangin lo la thlawp lui țalh mahse, mualkil pali te chuan a rukin ngaihdan an siam ve mek bawk a. mahse, an ngaihdan chu a zam nêm thei ang bera rawn sawi thawi leh zauh țhin hlawmin, "khaw mipui tuma'n kan Lal meuh phatsana, tlang dang kai san chu an duh hauhin ka ring lah love. mahse, Khenga pa țawng rawn thâwt ang khan, kan Buh Bal chheksâ, tuna kan Zem leh pakila kan dah khawlsa hian rei tak min deihin, kan kum hmabak leh tur Buh Bal thar leh hun thlengin min ban kâipui theiin a rinawm silova! tunah lah khaw Paho te hmabak hre lawk lungngai an rawn inhawr chawpchilh mai bawk si, lung ava zing ta em ve maw le" mualkil pakhat chuan a rawn ti ve ta dap dap a.
.

Lal Rumvuta chuan, a khaw chhekmual kang avanga a mualkil te ngaihdan kal phir ta deuh tlat mai chu a hai lo chho țanin, Valupa Hrangvela leh a Pasalțha zawng zawng te chu ko turin tlangaupa chu a tir ta ngawt a. mahse, a Pasalțha te nen kokim taka an han rel leh pawh chuan, an thu rel chu a saisâ zual emaw tih tur khawpa nawi zual sauhin, 'Zawngte-theiphakhmuam' an ang țeuh tawh mai a. atawp lamah phei chuan, an hmabak thim ru deuh tlat mai chuan buaina nasa zawk a rawn thlen dawn tih chu an hrechiang zualin, "kan tlang kan țêh san emaw san lo emaw, a rang thei ang berin chhekmual suasam tute hi kan nâwp darh hmasa phawt tur a ni" țeng fêa Lal fapa Satbilha'n a rawn tih lai tak chuan, khawchhak kil tawpa Ni rawn chhuak tur sen râih hnuaia, pawn lama Paho pungkhawm te chu an rawn thûm ta deuh hâk a. chuta țanga rei lovah chuan Tlangval pakhat hian Lal luhka chu rawn rap ri deuh țhat țhatin, "Lalpa, thupuifun kam keû tur kenga rawn kai ka ni e" a rawn ti ta lauh lauh a. chu Tlangval rawn aû lauh lauh chu Lal Rumvuta chuan men phawk hru paha lo chhawnin, tlangaupa hnenah chuan chu Tlangval chu luh tir turin a han ti a. chu Tlangvalin a thu hriat a han sawi veleh chuan, Lal Rumvuta leh mualkil te, Pasalțha ho zawng zawng te chu an thinrim so nasa hlawmin, "Sa leh Mu, Choák te lâk emaw a ni mai law'ng maw!? tia ngaihtuah chunga, Sahlam hnuai bial lofing dawna hlá kan keû chhuah dap hnu pawhin, Sa hnu emaw tisa them tla leh thisen khâwn ilo far kan hmu miah silo! nimin lam Ni tlak hnu daih te pawh khan, kha milu kha Sahlamah ala inthen nalh nalh si" chu Tlangvalin a rawn tih leh lai chuan, "ka rin ang ngeiin Lal Keihranga fapa Kapvunga lu bo leh kan chhekmual kang hi, hmun khatah a inbilh khawm kelh e, a tu dang nilovin Lal Keihranga khaw mite leh a chhak khual te hnuhma hlir a ni. vawiinah ngei funpui i êr nghal angu khâi" Satbilha chuan a rawn ti thum chhur chhur mai a. Sagbilha ngaihdan chu mualkil te leh Pasalțha te chuan an pawm tlangin, "taitea thu rawn thlâh dan avang khan, Lal Keihranga leh a khaw mite chanvo tur chu ka bilh fel sak ta diam e! ka Pasalțha huaisen te u, țâmpui mitthi min chhilh hnan tir pawh pawisa lo khawpa, kan laka Lal Keihranga tlang țhut arhmaitia lek an rawn inlek puk ngam ta mai hi, kan tan chuan pa leh pa, vantlang hmuh laia Vaiza hrual fipa Vaibel theisa-um pahnih inthlun beh sak tlukin a zahthlak e ka ti! khawnge ka daido te kha in awm tak!? chêt la ta che u le" tiin Lal Rumvuta chuan, thiam zet maiin a Pasalțha te chu a rawn cho phawk ta a.

Lal Keihranga fuihpawrhna thu rawn kam keû zet chuan, a Pasalțha te leh mualkil te chu a chawk thâ tho nasain, "ka chhungpuinu Laiziki khawivahlawi a ûai lam lam tawh si a, patling Vaibel san pe nâ țang laklawh a do dai hlei thei tawh ló! in sal rawn kawi haw te zinga nuthlawi nauțamtlai la thên tham deuh te chu Hreipui fang khatin ka lo tlan ange" an pasalțha te hnena lo tih deuh chhen pah chuan, an tlangaupa Rangdula phur pheng chuan lo kík deuh hâi chungin a khel dum thâl mai chu a tuai deuh vat vat mai a. chutih lai chuan Lal Rumvuta chuan Valupa Hrangvela chu pawn lamah chuan tir chhuakin, khaw Paho te chu chanchin țha lam a thawt tur thu leh, Lal thupek anga an thawm chu zap dai hmasa tur chuan a tir ta a. Hrangvela'n Lal Rumvuta thu anga pawn lama Paho pungkhawm te a han zâh daih hnu chuan, Lal Rumvuta leh mualkil te chu intivei tak chunga luhkapuiah chuan rawn chhuakin, "khua leh tui chhungtin Paho te û, kei in Lalpa hian țampui tuar rilfang ûaia in kûn ka rem ti lah love, he dinhmuna min din tir tute hi fing takin kan chhui fu kelh tawh a. chuvang chuan, vawiin ni ațang ngei hian funpui êrin naktipah kan chhekmual hâl tu, kan leido te khua hi kan pan nghal ang. rammu thei chin zawng zawng te, tumah awl bik awm lova inkawi chhuah vek tur a ni ang" Lal Rumvuta'n an chung lama kut phar du chunga a rawn tih lai chuan, a khaw paho te chu a ngaihna hrelo zet leh an chhekmual hal sak tute chu, khawi Lal khua tak niang maw!? tih zawhna chu an hmela lang chung chuan an inmelh phawk nasa hlawm hle a. mahse, chutia an hawi phawk hau lai chu Lal Rumvuta chuan, muangchanga țawng rawn chhuah leh pah a rawn melh kual dun dunin, "kan chhekmual hâla, țampui mitthi tawk se ti niawm hrima min nawp tute hi a tu dang an ni love, kan Sabiakpui tia kan chhal, 'suihkaihhlih' suihpui atana kan bih mek, Darkai Lal Keihranga leh a khua te, a chhak khual te phiarrukna ngei a ni e! kan rel tawh dan zuiin dimna tel hauh lovin kan that mang vek tur a ni. Buh Bal erawh kan hâl sak lo anga, a bo abang awm lovin kan lak sak vek ang. tichuan tumah țam nâwp thulh hlau lovin kan kum leh thlawhma lak thlengin ralho Buh Bal faisa ringin kan khawsa tawh dawn a ni" a han ti leh a. chutah zet chuan, khaw Paho zawng zawng te chuan an Lal ralrel dan chu fing an tiin, zakkha nam huk huk khawpa inlek puk chungin an au rual ta dualh dualh a.

Lenglen hun pelh hret, Tlangval tam zawkin an Ngaihvarungțhawn te bang thlang ngheng chunga, țhiante darpheng phen ațanga an lungthlûk zanna khawpa an vei rûk, an Lawmnu te mitngo dê an ngaihchan ruk deuh kar hun a ni chho mek a. chutih lai chuan Lal In lam pawh an thawm a țhain, "kan pasalțha te remthu keng paw'n naktuk lam lamah chuan, taitea hruaiin kan tlang an rawn kâi leh tawh turah ngai ila. khawnge tlangaup, mualkil te an kim thawkhat ta bawka rappui sanga ka zupui bilh ngân khat kha rawn chawi thlâ teh khâi, kan pasalțha te hmuahna ni pahfawmin, taitea thla ilo hual lawk teh angu khâi" Lal Keihranga chuan a han ti dam dap a. Lal thu pek chu tlangaupa Pawngduma chuan phur zet chunga zawm nghal thuaiin, a rilru chhungril erawh chu hlauhna leh țitnain a khat nasa hle a. chu achhapah, Lal Rumvuta leh a fapa Satbilha ten, an Lal fapa Kapvunga thihna tur ngawt an ngaihtuah tih te kha a hre chhuak thar lehin, an Lal Keihranga thu rawn thlâh dan leh Lal Rumvuta te pafa thil tum inper san zia te chu, zubel a chawi țaih țaih lai te chuan a ngaihtuah nasa ta hle a. chuvang chuan, an Lal Keihranga beiseina chu beiseina thamral tur a nih zia chu a hre chiangin, Lal fapa Kapvunga awhna thang valh tute zinga alo tel ta kher kha a inchhir ru zual hle a. chutih laiin, an Sial nufa lah khua thlenpui ngam lova, rampalailenga a makpa Lengkunga nena an dah ngawt mai avang chuan Sapui kut laka chan mai hlauhna nen, Lal chhuatpui lai tlê hluaua zubel a han nghah lai te chuan a kut chu a khur ru ta dar dar mai a ni.

An Lalpa zupui bel an han thal deuh sap sap hnu chuan an titi chu a kal nuam chho țanin, "kan chhak Lal huaisen leh a pasalțha ten kan tlang an rawn kai hi kan sabiak te malsawmna ah riak ka ngai hial a! belrawhmualah' sangalkhawnghranga indan tir hial ka nâp titih a ni hawt mai e. kei leh ka khua te tana an inpekna hi engtik khawtikah mah ka nausam hauh lovang" tih pah chuan Lal Taikherha chu Lal Keihranga chuan a han melh nui vur vur a. chutia Lal Keihranga țawng dam zet leh a lawmthusawi hmel chu, Lal Taikherha pawh chuan dam depdawpa lo chhang ve varin, "khaih khâh khâh! Lusei Lal dang te bel ngam lova tamtâla ka khua te nena kan vakvai lai, ram hnim nem leh zungpil ringa, khawsak mumal chhep rem ve thei lova kan tal lai min chhar duh mai hi kan tan chuan lawmna thuk tak a ni e, tunah meuh zawng kan thlâ a ngam tawk tawhin, nang leh i mualkil te, i mite zar hliap hnuaiah hian kan him tawk a ni tih kan hre ta kêlh e" a rawn ti ve ta charh charh a. mualkil zawng zawng te chuan, Lal pahnih te țhu dun renrawn chunga an han inkawm lai chu nui kîk deuh van chunga lo thlir hlawmin, "chhak Lal ropui leh tlawm ngai lo Lalpa Taikherha, nang leh i pasalțha te huaisenna zar kan zo tih hi kan Lalpa leh keini ho hian kan hre chiang a ni. a dam kan hauh anga, kan Lalpa duh ang chiah khan belrawhmualah' kan khaw mi, nupa tuak thar Inhrang tuk mêk, a duh apiang te kâwiin kan khaw perah ila inbengbel ngeiin ka ring e, chu chu kan Lalpa lawmthu sawina a ni dawn a. kan Lalpa hi chu a thutiamah a ding fo țhin a nia" mualkil pakhat chuan a rawn ti ve thuai a.

Chutia a Pa leh a mualkil te, Lal Taikherha teho an inkawm tui em em lai chuan, Chawnglalpuii pawhin Lal Taikherha fanu hmeichhe naupang kum thum mi lek, a Nu Darlaii'n a chhawnchhaih nuih iarh iarh lai chu nui sen sen chungin alo thlir ve ran mai a. chutia thlir reng pah chuan, a ngaihtuahna te chu kawm zuiin, chhak pasalțha Zakulha bawk chu ngaihtuah leh chung chuan, Lal Taikherha fanu hmeichhe naupang duhawm zet, Ngurluahlali chu an fâ ni mai se" tih te thleng chuan a ngaihtuah ta hial a! mahse, chuti em em thlenga a ngaihtuah ve ngawt mai chu inthiam lohna nasa zet nei chunga, amah leh amah chu a ruka inhau leh hnuhawhin, "i ngaihtuahna leh i duhthusam te kha a hriatpui ve lo che" ti rilru mawlh mawlh chung chuan a kut zum sang mai te chu a hum ruh ta ngat ngat a.

Chutih lai, Hmarchuankitê meuh pawh Lusei Keite Zakulha laka a inngaihtuah buai hle lai chuan, a Pa teho titi pawh chu an thawm a țha zual chho tawhin, a tu pawh mai chuan nui deuh vân chungin țawng hmasa nih an inchuh deuh nak nak tawh mai a. a tawpah phei chuan mualkil te zinga pariat ngawt te chuan, Lal In chu pâi deuh chhâ chhâ chunga inchhuah chhawkin, an mahni zupui bilh bel chu an rawn input luh chhawk ta zut mai a. chutah meuh phei chuan Lal Taikherha leh Lal Keihranga te pahnih pawh chu, nui kîk deuh van chunga inmelh tawn leh zuk zuk țhinin, "kan mualkil te hialin zupuibel an thawh ta hial mai e! kan titi phunglêng a dam viau e maw, kut ni vangthlá thlen chang tih lovah, tun ang renga ka hlimin hâi hlim a tiat dawn dawn hi ka la hre ngai love ka ti! thimțin ban tlang țhaka, kan tlang kâi khanah taitea leh kan mihrat khawkheng te lo hmuah tak ka nap hial e" Lal Keihranga chuan a rawn ti chhuak ta hial a.

An Lal thu rawn sawi chu mualkil te chuan hlim tak leh zang vehvawha lo tuihnih ve tliar tliarin, "a țul leh i rawt ang chuan tlai kan var țhak mai ta law'ng, kan Lal fapa leh kan pasalțha te chu ramri kawnah kan hmuak ang chu le" tih pah chuan, mualkil pakhat Dawla pa chuan Lal Keihranga chu a han melh khi deuh san a. mahse, chutia tui zeta an titi lai chuan kawngka tlengrel chu muangchanga rawn insawn tawlh ri deuh râkin, Valupa Suakngenga rawn dâk lut hlawl lai chu an vai chuan an ên ta țhap a. Suakngenga lah chuan chutia an Lal leh mualkil te phawk deuh hrâ lai chu, inthiam lo zeta thu khûh zet chunga rawn biain, "in titi thlâh kal lai ka rawn chhilh hnual em lovang che u maw Lalpa,"!? a han ti dam dap a. chuveleh Suakngenga inthiam lo rawn hawi zum deuh dâk lai chu, Lal Keihranga chuan nelawm taka nui var chunga lo chhawn thuaiin, "tibuai lah love le! ti teh Sutpui lum laiah hian rawn țhu lut la, i hâh dawm nan zupui tuitling kha han thâl teh khâi" a han ti nui deuh vur a.

An Lalpa țawng thlâh dam zet chu Suakngenga chuan zah tak chunga lo chhang velehin, "Lalpa, chanchin rawn thlen tura lokal ka ni mah zawk a, a hminga Valupa ni ve na fam chu, ka țawngka thlâh dam thiam ve tawk hmang chunga, ka thu rawn sawi tur hian i pawi tawk lul lo se" a han ti leh a. Suakngenga thu rawn keû chhoh dan avang chuan, Lal Keihranga leh mualkil te chu an meng fiah chho tawhin, "a ni teh tak dawn e, i thupuifun rawn luhpui chu han țhet tak teh khâi, englai mahin nang hian ka pawi i tawk ngai dawn lo tih ka chiang e" Lal Keihranga chuan a han ti dam duai a.

Valupa Suakngenga'n, Zakulha thu rawn hawn a sawi lai chuan, chu a thu sawi chuan Lal Ina awm tupawh mai chu a barakhaih nasain, Lalnu Țhiangtuali leh a fanu Chawnglalpuii phei chu an tliak hnáwp hi a ni ta nghal mai a! chutih laiin Lal Keihranga meuh pawh chhuat biha kûn nghal hnawkin, "ka fapa Kapvung, pangdama i rawn lêt leh theih nan ka Dar ro engmah hi ka ui lova sin le aw! i chunga Lal Rumvuta te pafa chet thawh duh dan chuan, min va barakhaih ve maw"! tih pah chuan a inpet fan fan ta mai a. Lal Keihranga rilru nâ insum țang țang lai chu Lal Taikherha chuan, chiang tak leh meng rum âl chunga lo thlirin, "a tawk ta em em e! Lalpa, Vangmual Lal Rumvuta te pafain, i fanu hneh lâk an tum dan zawng zawng leh, i laka Chem sen pawh thawh hreh lova an chet dan engkim hi ka pasalțha Cheûva kâ ațangin ka hre fai kelh tawh a. mahse, ngawih chuhin a zâi zâp zawnga chet la tur lam zelin, ka pasalțha pahnih te hi ka chah țhin. tunah erawh chuan, chhak Lal Taikherha thin thleng hian Lal Rumvuta te pafa hian an dek ta e! nang tih loh, kan unau Lusei Lal zawng zawng ten an nêk an nêk per, Lal Taikherha leh a pasalțha te hi in kâina tlang, khaw thlang Lusei Lal te hian, engang chiaha rothap nge an nih chu an hriat a hun ta e" a rawn ti khur ram ta hmak mai a.

Lal Taikherha thinrim țawng chang fal mai chu, Lal Keihranga leh mualkil te chuan a tih mai mai loh zia an lo man chiangin, "ni lah love, nang leh i khaw mite thlenga kan buaina a hnuh luh che u hi ka duh lo ve" Lal Keihranga'n a rawn tih pawh chuan Lal Taikherha chu rawn rum leh deuh ngal ngalin, "i buaina chu ka buaina, i leido te chu ka leido te, eng thu lut chhuak mahin ka thutlukna hi a chhilh danglam ngai lovang" a rawn ti leh ta nghat nghat a. Lal Taikherha'n chutia a tih tak tlat avang chuan, mualkil te leh Lal Keihranga te chu an thlamuang ruin, "Lalpa, nang leh i pasalțha te hi kan ring tawk hle che u a, kan chhawn veng tura thu tlûkna i siam ta mai hi kan thlamuan phah teh e" mualkil pakhat chuan a rawn ti chhuak ta hial a. chutah Lal Taikherha chu kun deuh ngal chunga rawn țawng chhuak lehin, "Vangmual khaw chhekmual an hâl darh chuan, nghawng a nei dawn chai chai hle mai e, ka pasalțha te an ni na vang vangin Cheûva leh Zakulha te pahnih ralrel dan hichu a nghawng a nâ viau zel reng a ni" a rawn ti leh ta ngat a. chuveleh Lal Keihranga chuan, rang deuh vuta țawng chunga Lal Taikherha thu rawn sawi chhuah leh chu lo tuihnihin, "taitea luin kan tlang arawn lawi dawn thu ka han hriat khan, kan Valupa Suakngenga thu chang rawn lak leh kha kalo ngaithla hlei thei tawh lova! i thu rawn sawi chu Lal Rumvuta leh a khua te tan chuan a mi luh ava nâ dawn kher ve e! an Buh Bal an la thlen kim mang loh phei chuan țampuimitthi hial an tawng baw thei dawn a nih chu le" Lal Keihranga chuan a rawn ti hnuhnawh ta charh charh a. chutih lai chuan, Valupa Suakngenga thu rawn thlen tirh atâ tawh a mangang tawh teh reng nen, chutia țawng an han chhuah zui tak avang chuan tlangaupa Pawngduma chu alo buai ru nasa zualin, a thil tih pawinain a nghawng rapthlak tak mai avanga inchemharna a hring dawn ta tih a hriat rual chuan, a mah mai ni lovin, a chhungkua te thleng chuan ralho chuan an rawn dim tawh dawn miah lo tih thlengin a ngaihtuah nasa ta hle a.

Chumi tuk varțian lai taka Darkai tlangval ten, an Lal fapa Kapvunga lu leh pasalțha Laibawnga rilru buai an khua an rawn kâipui lai chuan, Darkai mipui zawng zawng te chu an chiai nasain, Lal fapa Kapvunga chu an sun nasa em em mai a. khaw chhung hmuntin mai chu thehmeh ang maia reh țhuapin, Lal Keihranga tual zawng zawng chu tumah la mu bik awm lovin an awh khat mup mai a. chutihlai chuan Lal Inchhung lama Lalnu leh Chawnglalpuii te nufa țap thawm chuan, mipui tupawh mai chu a ti ngui hlawmin, nu leh nula te phei chu a rukin an țap fap fap deuh vek mai a. chutia an rik luih luih lai chuan Zakulha leh Hrumcheûva te pahnih erawh chu, Valupa Suakngenga te nen an pathum chuan pût bo rihin, Zawlbuk charah ralrel ruahmanna hautak zet an neih huna, hneh awlsam theih tura ralho lo hmachhawn dan tur sawi khawmin khunkhan zetin an titi fal mek bawk a.

Khua a rawn ên hnu chuan, Lal fapa Kapvunga lu chu Lal 'Vanlungah' chuan, khaw mipui zawng zawng te chuan zah leh lainat zet chunga vui liamin, pasalțha Laibawnga pawh Sadawtin Ar dum thawina a hlan sak ta bawk a. chumi hnu chuan tlema rawn pangngai chho ve țanin, Kuailenga leh tlangval pathum vel te chuan, a chezia chu bihthlak pahin an awmchilh ta rih a.

Ni a rawn tlang san hnu chuan, Lal Keihranga In ah chuan Hrumcheûva leh Zakulha te, Darkai pasalțha zawng zawng te chu kim taka rawn lawi khawmin, mualkil te leh an Lal Keihranga ho chuan Vangmual pasalțha hote nena, an inchem chhuah huna an chet dan tur chu an rel ta mup mup mai a. mahse, pasalțha duh ang zat an neih loh avang leh Vangmual khaw lian zet, lungthu zat milu khai tawh ngawt pawh sawm chuang awmna khua lo nawr let dan turah chuan, an duh anga hman tlak tura țha a ralrel thiam chu har an ti tlangin, thumum nei hlei thei lova an riat nawi deuh tak tlat hnu chuan, Valupa Suakngenga chuan an Lal Keihranga chu a han bekbawr ta sap a.

Valupa thu keu hmuh zeuh chu Lal Keihranga chuan rang taka rawn thawh chhuahpuiin, "kan kâi khan leh kan khaw dâitam awmdan kan hre vek a, chuvang chuan thumum han keuh dan tur kan haihchham tlang a ni tih a lang reng tawh e! chutih laiin, rang taka chet kan lak a hun tawh si a. kan leido te lakah hian, pasalțha duh anga ngah tawk lo zawk khua kan ni lehzel bawk nen, mahse, chhak pasalțha rothap pahnih kan kawl tlat mai hi kan vanneihna ai a nia nge, pasalțha Cheûva leh Zakulha te hian, kan ralrel thu bilh khawm dan tur hi han ruahman mai teh sê, vawi tam ral chhawn nâwp tawh an nih avangin an ni nge nge tiin, an fin chhuahna kan ngaichang dawn a ni. chuvangin, an ni pahnih leh kan pasalțha Kuailenga teho kutah hian, kan ralrel thubilh felna mawh chu tlâ mai teh se" a rawn ti ta a.

[Ngaia]

Bung-46

Vangmual Lal Rumvuta pasalțha te'n, a rang thei ang bera an duhthala funpui an han êr zawh meuh chuan, tlai Ni tlak fel hnu apiang mai hian mualkil te leh khaw upa hote chuan, khawthlang tlangdung zawn chung lam chu uluk mangkhengin an thlir awl ta lova. chutia tlai tina an ti fo mai chu Satbilha lah chuan a tei thei tawh lovin, funpui an êr zawh ațanga a ninga ni tlai lama, Lal Rumvuta kawmchar mual pawng iuh euh laia awmtual mei hnungpuak far chunga mualkil upa te leh khaw upa ho, an dan pangngai te a Ni tlakna chung zawn thlira an fu far lai chu Zawlbuk pana kal pelh thuak pah chuan, rum fe fe in a melh tur khuih khuih mai a. Zawlbuk a han thlen hnua a sangawizawnpui Lutruaia leh Valupa Hrangvela te a han fin hnu phei chuan, an khaw upa hote leh a Pa mualkil te chezia a nin thu chu sawi chhuakin, "a țul nain min nang filh țhuh tawh tih hi tuman kan hai lo, khaw biha an dâk an dâk mai khu ka mit ti kham tu an chang ta riau e, a sarhu laia ral bawh hi chhawn a khauh duh zawkin, țan pêk nât dan tur pawh rel fel a nuam zawk fo tih hi Lalpa hi ka hrilh hre ngei ang maw le" a ti ngul ngul mai a.

Satbilha thu rawn chhak chhuah chu a nêm zawnga lo zah hram tuma Lutruaia leh Valupa Hrangvela te an insan mar lai tak chuan, bawhbel rawn bawh bûk liam deuh palh paha tlangaupa Rangdula rawn kîk deuh van chu, țawng zui leh ta lem lo chuan lo thlir phawk deuh hrâin, "e khâi, tlangval te u in titi paltluang ka rawn chhilh buai em lovang che u maw"!? tlangaupa chuan a han ti puam zui deuh țalh a. chuveleh, Valupa Hrangvela chuan an tlangaupa chu lo chhawn thuaiin, "a tu a mah ngawihvarungțhawn te tual hrûta mei deta liam kan la awm mang love, tun ang huna Zawlbuk rawn kâi ve ta chu, tlang thâwt hma a thu fun min țheh i tum teh chawk a nih ka ring a. chaw funin âk-in kan chhuak nghal mai dawn em ni"!? tih êl zui zauh pah chuan, tlangaupa Rangdula chu hmusit tih hriat zet chung chuan a han kiai khum zui deuh sawng a.

Chutia Valupa meuh ni ve siin hmusit deuh taka, a thu tawp a bilh liam deuh kher chu tlangaupa Rangdula chuan a haw ruin, Valupa phuahchawp ral luhrum pawh la kuai hlei lo, a eng aiah nge min han hmuhsit viau chu le'! tih rilru lo pu ve vat chung chuan, "zanriah puar kan delh rual chauh a nih hi maw! chawfun em chu kan mamawh rih lo turah i ngai phawt te'ng" tih pah chuan, tlangval dang zawlbuk meipui aia țhu bial luih te chu a han melh kual leh te te a. chutia a thu rawn ken sawi lova, thudang sawi nawi chunga a han che lui ve ngat lai chu Satbilha chuan alo ngaithei tawh lovin, "kha laiah khan tawlh kiang teh khâi, i thu rawn ken chu kam keû vat la lêt leh thuai zawk teh, tlumtherh rim te pawh i nam reuh e a" tih pah chuan tlangaupa Rangdula ding peu âl lai chu, râk țhawt khawpin a nâk nëmah a han sawh sak ta mai a. chuveleh tlangval ho zawng zawng chu nasa zeta rawn nui hluah hluahin, "kan pasalțha kut sawh chu i harh pui meuh emaw chu!? kan Lalpa leh mualkil te zupui nawi tlana i in hrai rui țawngvai kha chu, kan bengah hian rawn thawt tawh lo teh khâi" Lutruaia chuan a rawn ti ve ta deuh khâih khâih a.

Tlangaupa Rangdula chuan, chutia an hmusit hlawm êrh mai chu rilru nâ zet chunga ngawihpuiin, "Lalpa leh mualkil te'n, ralrel dan tur ruahmanna țha tê ngaihtuaha, Lal In lawi khawm turin pasalțha te han thawt kual tawh min ti a. a rang lama Lal In kâi turin ka rawn hrilh che u a ni e" a han ti a. tlangaupa kâ ațanga Lal thupek an han hriat rual chuan, Lutruaia leh Valupa Hrangvela te, "kei ka ni" inti deuh chin, rammu tura inlek phek chaka dâk dâk tawh tlangval țhenkhat te chu Satbilha ho chuan tho nghal suauin, Lal In lam pan chuan hawi pir zet chung leh, nidanga an kal dan aia huaisen tak anga lang thei ang ber tura kal deuh thâng thâng chung chuan, Zalbuk chu tlangval sawmli chuang ngawt mai chuan an chhuah san ta a.

Lal Rumvuta leh a mualkil te, a pasalțha te ralrel chu an thawm a puk țhain, "kan funpui êr pawh kan thual chhuak ta bawk a, Darkai khua chu kan nawp darh leuh tur a ni. mahse, kan rel tawh dan zuiin, an Buh Bal erawh tuman kan hâl tur a nilo. kum leh chhir thleng tura kan puar fân naturin, an Ran leh Buh Bal hi kan mamawh e, nak zan lam lamah chuan Thla dê hmel hmuh pawh kan beisei ta viau bawk a. fimkhur thulhah upa te thu hi zui hram hram a țha ngai e" tih pah chuan Lal Rumvuta chu a hawi vulh vulh mai a. mahse, a Pa thu lak dan chu Satbilha bawk chuan rang taka lo chhang thuaiin, "nak zan nghah leh rih hi kan khaw in tlai chhuah phahna mai a ni lo maw le!? thim han țin se, Darkai pana inchhir chhuah mai ka lo rilruk tawh a sin ka Pa" a han ti a. chutia an Lal leh a fapa thu inbât hnawk lek lek chu mualkil Kawlha pa chuan, a thu zâp zawnga rawn țawng chhilhin, "ni lah love taite, kan pi pu te hun bul lam ațanga an lo zui țhin tawh hun, rammut hun atana an hun chhiar țhin kumkhua tawh hi nausam ziazang a ni lah love! chuti lo zawng ral lu khai tura inngai chungin, mahni lu chânin ral khaw perah kan chhawn a ûai hlauh dah a nge. hetiang hun pawi tawk theiah kher hi zawng, fimkhurah fimkhur luat a awm ngai love" a rawn ti dam ta dap a.

An mualkil upa fing chin Kawlha pa thu rawn thlâh avang chuan, Lal Rumvuta leh a fapa Satbilha te inkar chu tlema rawn dâi chho lehin, an ralrel chu a kaltluang chho leh ta viau a. mahse, Satbilha erawh chuan an mualkil Kawlha pa thu sawi kha zahder tak chungin ngawihpui mahse, a tuk thim ruala an khaw upa leh mualkil te'n, an beisei leh an hun nghah an la nghak chhuak lo fo a nih chuan, ro hran reh ruka an pasalțha te leh tlangval rammu chin zawng chu, kâwi chhuah tawh ngei ngei a tum rilru tlat tawh mai a. mahse, chu a ruahman rukna chu an ralrel zawh huna, Zawlbuk an kâi tlan leh hnu lama sawi chhuah atan khêk rihin, a duh ang taka tlangval ho a hmin theih dan tur chu uluk zetin a ngaihtuah vung vung reng mai a. chutia an Lal fapa ngawih chuh ta riau chu mualkil te chuan, hlau deuh tak chunga rawn inbiak tlawn chhawk leh sap sap țhinin, "kan pasalțha rothap leh huaisen, Lal fapa Satbilha kutah hian ral khaw tuala kan chet lâk dan tur chu awm teh se. a ni ralrel fing tak hi vawi tam Sapui kan nawr lai pawhin kan him phah lel tawh țhin a, tunah pawh a thu thlâh zuia kan chhawn kan zâh a țul ber e" mualkil upa pakhat chuan a rawn ti ta lâng lâng a.

Chutia mualkil rawn țawng keu zeuhna thu chu an zavai chuan, nui deuh țhâ chunga lo tuihnih sap sapin, "kan khaw upa leh mualkil te hun nghah hian, nak zan thimchhilh hun hi a rawn thawt lang leh talo a nih pawhin, a zan a zana rammu tura chhuah mai hi kei țha ka ti e" kil khat ațanga rawn ti tupa lam chu, thawklehkhatah ngawih nghal duk pah chuan an hawi phei ta țhup a. chutia a lama an beng an rawn chhit lai ngei chuan, mualkil fing leh nakin lawka an Lalpa tlang țhut zui tawh mai tur a nih avanga, Lal mualkil la nih zui zel a khelh ruk char char avanga, an Lal fapa Satbilha thu thlawp tlat țhin tu Vanlengi pa chuan, ban chet chawta a thusawi chu rawn zawm zui leh zatin, "kan ralrel hi kan bawh zui vat loh chuan, kan chhawn a nem thuai dawn tih hi a hriat reng tawh mai e! kan chhekmual kang avanga ei in tur nei tawh lo, khaw mipui chhungkaw tam zawk te chu, Bahra leh hnah nem zungpil dapa nilenga tamtâla vak an kat nuk tawh e Lalpa" tih pah chuan, Lal Rumvuta chu meng tlê deuh kar chung chuan a melhbing ta kar mai a.

Mualkil Vanlengi pa thu rawn sawi zet chuan, mualkil dang te leh Lal Rumvuta teho chu a ti mangang ru nghal hle tih chu an hmelah chuan a lang chiang ta hle a. chuvang chuan Lal Rumvuta chuan rang taka a zan a zan chuan, a mualkil te chu a khaw In tin fang chhuak vek tur chuan tir chhuak nghal rum rumin, zan rei dawn dawn hnua mualkil te an rawn lawi kim leh hnua, khun khan taka an ralrel an han zawm leh lai te chuan, Satbilha chuan Vanlengi pa rawtna chu a duhdan a nih thu a sawi uar zual ta sek sek hle a. chu achhapah, mualkil te thu rawn hawn lah chu Lal Rumvuta tan chuan pawmzam a harin, "kan mualkil Vani pa sawi kha thudik a ni e Lalpa! an Buh Bal phurh hawn sa an tlan zawh nual tawh hlawm avangin, chhungtinah khamkhawp eia in reng reng an lo awm tawh hlei nem maw"! mualkil pakhatin a rawn tih lai tak chuan, pawn lam ațanga zanrei chho mek pawh sawi lova, thinrim âng thawm nena mipui te rawn inhawr luih luih thawm chuan, Lal Rumvuta In chhung chu a rawn luh ta chiah mai a.

Chuveleh Lal Rumvuta leh a mualkil te, a pasalțha te chuan an ralrel pawh chu rang taka bilh chhilh zui nghalin, a tuk thimțin ruala khaw upa te'n an khawchin an thlir leh huna, an hun duh dan a rawn inher chhuak leh talo a nih pawhin, chumi tuk leh thimțin ruala Darkai khaw pana rammu tura chhuah hram chu an ti tlu tlang ta a. chu an thu tlukna puang chhuak tur chuan, Lal Rumvuta leh a upa te chu luhkapui sangah chuan rawn chhuak zui nghalin, "khaw mipui te u, kan țam dawm puar fan hun chu kan ban phak leh thuai dawn e, kan pi pu te'n, huna țha leh him rammut hun atana a kum a khua a an lo nghah țhin, Thla dê tir rawn lan hun kan nghak atalangin, ei in tur tlachhama ram thei leh Bahra laia khawsa kan lo awm nual tawhin, Buh Bal la nei chhun chhun pawhin puar khawpa ei phal lovin, țam hnem tawk chauh kan bar hlawm tawh a ni tih hi kan hre ta si a! chuvang chuan, naktipah hian kan hun țha pawh nghak khawtlai tawh lovin, ral Buh Bal chhuhin kan pasalțha te an rammu chawpchilh thuai dawn e" Lal Rumvuta chuan a han ti a.

An Lalpa thu rawn kam keu avang chuan, khaw mipui rawn pungkhawm te chu la phun deuh mar mar chunga haw darh zui nghalin, lenghawnar rawn khuang zui thliai thliai chuan, Lal Ina ralrel la tâp khaw muang hote pawh chu a hnawt țin ta hlawm a. chutia an han țin darh hnu chuan, Lal Rumvuta chuan a fapa Satbilha Zawlbuk kâi tur chu chelh khawtlai hlekin, "mualkil te leh keini Lal chhungkua kan la puar liak lai hian, khaw mipui te hi țamchhilh hunin alo nang țan reng tawh mai tih hi kan va hre tlâi mah tawh ve maw! puar chanve pai hlir awm khawm kan lo ni reng mai e"! tih pah chuan Lal Keihranga chuan, a fapa Satbilha chu tap mei êng thlârah chuan a han melh deuh run a. Satbilha chuan a Pa thu rawn kam keû chu mûk zeta lo chhang let vatin, "ka tih reng kha maw! tun an rilrțam kawlh lai denchhen ngeia ral chhawn nâwp filh țhak hi ka duhdan a ni reng a sin ka pa. chuti nilo se, kan ralrel zuia liam vut kha ka rawt nawn chhen hauh lovang le. mahse, tunah chuan, ka tum ruk dan ka hrilh hriat fo tawh che kha i pawm ve ta a, hmarchuankitê tih loh hi chu Darkai khua hi a lu nungin tumah ka kal tir lovang" a rawn ti ta chhur chhur a.

Chumi tuk tlai thimchhilh ruala mualkil te leh khaw upa ho te'n, puithuna rilru leh tihtak zeta an khaw tlak lam, tlangdung inkhawh mar thlâ zui chung zawn, Ni tlakna zawn chho van lam an han thlir leh far lai chuan, an ralelna rawn hriatpuia rawn thlawp ve niawm taka, âwn deuh dâha Thla dê tir rawn lang Seki râih mai chu Ni tlakna van mawng la êng sen dûl ruih karah chuan, fiah mang lo takin an han hmu ta a. chutah zet chuan an vai mai chuan thâm deuh chhel chhawl leh khur deuh data aû chhuakin, "chhun Ni her vanglaiah Bawngpuiin kan tlang țhut chhuah sanin, ram lam panin a thlâ zap mah suh sela, kan Thla dê tirin ral bawh hun min rawn hrilhin kan hun nghah fák a rawn chhuahpui ta teh mial e! han chhoh thlir ve mah che u mawl e, hun duhawm leh țha a ni ngei e tih bilh chian nan, a ki veilamah milu a khâi tak vah khi maw" Putar pakhat chuan a rawn ti ta sar sar a. chuveleh midang zawng chuan Thla dê chu chiang lehzuala thlir chho leh țhapin, an duhthusam ang ngeiin Thla dê tir veilama Arsi pakhat lo dê vâ mai chu, an vai mai chuan kîk van chungin an thlir ta țhap a.

Lusei pasalțha rothap Hrumcheûva leh Zakulha te ralrel dan zuia, khaw dai chhuah lam ngawpui hnuaia mipui zawng zawng leh an Lal te chhungkua an thuhruk fel hnu chuan, tlangval sawmhnih te chu Lal leh mipui te veng tur chuan, țan hmun rem lai laiah an rem fel diam tawh a. mahse, chutia inring lawk zeta nisarih lai ngawpui hnuaia an tâp tawh avang chuan, nunau leh naupang chumchiap deuh te chuan an ning țan tawhin, Vangmual ho chu an rawn kâi dawn talo hial emaw an ti deuh tawh a. chuvang chuan, an relrelna meizanghlap tute pahnih, Hrumcheûva leh Zakulha te pawh mipui te lakah chuan an inthiam lo lek lek tawhin, a ni riatna tlai thimchhilh ruala pasalțha leh tlangval, thih ngam saka ral chhawn nêk ngam tur chin te nena, khua an han kai leh hnua Lal muala ding khawm chunga an țanhmun tur an inhrilh lai pawh chuan, "naktuk leh naktip thimțin ruala ral ho hi anla rawn lawr lo fo a nih chuan, khaw mipui te hi khua kan kâi pui leh mai an ngai dawn a. mahse, chuti a nih pawhin kan ralrel dan hi thlakin, khaw khan hmun hnih te hi tlaivarin kan inven chhawk anga. chumi hun laia ralho an rawn kâi a nih chuan, rang takin tlangval sawmhnih chuang kan ruat lawk te khuan, mipui te chu khua ațangin an kawi chhuak hman ngei tur a ni" Hrumcheûva chuan a han ti a. chutia a sawi zawh rual chuan, pasalțha pakhat Bawnglera chuan muang deuh chuara lo tuihnih va chuar chuarin, "Cheûva rel zui dan hi ka pawm mi tak a ni e kei zawng! zing hnih kan nghah leh hnu lam hi chu, khawsak ngaia kan khawsak leh ngei a ngai dawnin ka hria e, kan naupang te ning râk ri khu nuho tan thup sen a ni tawh lo riau a nia" a rawn ti ve boh a. mahse, chutia an ti ti nak nak lai chuan, pa valai țawng thâm deuh chhel chhawl pakhat hian an ti ti lai chu rawn pawt chatin, "ral leh keini tan rammut hun țha a inher ta tlat mai ka ti! Thla rawn dê chho khian milu a khai a, han thlir ve mah teh ûn, khi hun ngei khi ralho hian an rawn bawh lo a nih vaih chuan, a tu ve ve pawh vanduainain min chhilh ngei tawh ang le" a rawn ti ta mai a.

Chupa thu rawn kam keû avang chuan an vai mai chuan an phawk nasa hlawmin, tlangval la naupang zual te phei chu hlauh rukna leh zamna chuan a rawn man țan ta tlat mai a. mahse, an zinga naupang ber Zakulha meng rum dê sar mai an han hmuh chuan, engmah sawi ve lemlo mahse a zam ve loh zia chu an hmu thiam thuai hlawm a. chuvang chuan theihtawpa inti paukhauh țha ve leh hlawmin, an ral relna zuia che nghal tura Hrumcheûva'n a rawn tur fiak nghal țhak țhak bawhzui tur chuan, tuala an Vawkpa sutnghak thlun pasarih lai mai chu an han phet thlu ngêk ta ruai ruai mai a. rang zeta mipa țhe țhaw, rammut ngam chin țhah mi sawmkaw chuang hret an han chêt takah chuan, an Vawk puah pawh chu an peih fel hmain, pumkhat chu an mahni ei atana siam zui nghalin lenghawnar khuan lek lek tawh hnu chuan, dul chât meng dê tuarh khawpa puar êl êuhin an han ei ta phawt mai a. chumi hnu van a rawn var hma hret chuan, an Sâ chhum hmin belpui hmui khu vut vut mai chu, bel khat zel zawn chunga mi pathum zelin In tina chan insem țheuh chunga luhpui leh dan danin, In tina an Sa siam an sem chhuah dap hnu chuan Lal mualah chuan an rawn kai kim leh ta dialh a.

Mei chher a chhit ên ngamawm tawh loh avang chuan, ral do tur rawn lawi khawm leh te chu zawi thawp deuh sata țawng chunga Hrumcheûva chuan fuih leh sap sapin, "mi sawmnga kan ruat lawk te khan min zui ula, a dang zawng khan Zakulha leh Valupa Suakngenga te kha in zui nghal ang. tiru le! tumahin ho tute thu lova Thal thlah lovah kan tih kha maw" tih pah chuan khaw chhuah lam dai dep lawka, chiang taka khaw chhung lan theihna hmun mual pawng deuh, mau leh țhang hnawkin a bawh khuh lûkna hmun chu thim zingah chuan a pan chho ta vut a. chumi rual deuhthaw chuan Zakulha pawh chuan Valupa Suakngenga chu melh deuh zauhin, khaw tlak lam Lal veng hnuai Tualbuh veng lam chu a pan ve ta thauh thauh a. chutia an pawl te ve ve an han bik bo pui hnu chuan, khaw thlir tur atana awm zawk Hrumcheûva chuan a lo hual lawk tawh, an channa mual mau kara Zihnghal tuai chu lawn khung nghalin, hnuai lama a nau teho chu an Silai leh an Thalngul te chu, hman mai theih tura lek chhuak vek turin zawi sapin a zuk hrilh leh ta a. chutih lai chuan, Zakulha pawh chuan a hote chu mautluk vel zela hla a sem darh fel ve tawhin, Hrumcheûva teho aia Silai fung an chan tam zawk avang chuan, hlâh nei lova an Silai mu kap chhuak ngei tur leh, a hun hma chuan tuman Thal thlâh lo tur chuan a hote chu a han hrilh fuih leh ta hlawm a.

Khaw veng tur mi sawmnga dawn an hnutchhiah hnua Satbilha leh a hote rawn thawk chhuak chu an la țhahnemin, mi za leh sawmruk ngawt mai te chuan, an khaw nghâhna Darkai khaw țhut hmun chung lawk, Darkai khan rem zet lai ațang chuan an hnuai maia mautlawn tluk sawmthum awm vel leka hla a, thim zinga Darkai Lal mual lang var deuh rû chu thâ zâ zek zek chung chuan an inthlir chhawk chhen tawh mai a. Rawlthar rammut vawikhatna tur nitura kal ve te phei chu an phur zualin, an haw leh huna rallak Țhi leh Dar nen, Buh Bal ei sen loh nena an lawmnu te nena an intawh leh hun tur te chu an hisap nasa hlawm hle a. an zinga tel ve Pavalai țhenkhat te phei chuan, ral ho Buhzem chu an lâk hual a ni tih an țhian te'n an rawn hriat theih nan a, an chhin chhiahna atana Ar chang an vih phun tur thu te chu an țhian dang te hnenah chuan hrilh lawk hlawmin, an chhekmual thlenga luh chhuah law lawa, a bo a bang awm lova thiar fai sak kelh mai chu an tum hle a.

Chutia an chet dan tur leh an Rallak Buh Bal an hauh zui dan tur an inhrilh sap sap lai chuan, khawchhak kawl kilah chuan van rawn var țanin, Darkai khaw In țhenkhat te chu van var thlârah chuan a rawn lang țan ta ruaih a. Chutah meuh chuan Satbilha tha zâ pawh a vei kual chak tawhin, "le, pasalțha te u, tlemin khua khu han lang chiang leh deuh se, Satê anga thawm chhuah lova kê chheh thlâh thei, Rangkunga leh Bualhranga te pahnihin thang reilo thei ang berin khua khu an zuk bih hmasa anga, chumi hnuah a ram hawngin, a khaw pum khuan mihring zuah nei lovin kan hup chhilh nghal ang. keini țhian thum Lutruaia leh kan Valupa Hrangvela te chuan, Lal In khu bitum nghalin kan chhawn veng tura ka mi ruat, mi sawm te khan rang takin min zui nghal diak dawn nia. tumah nunau tar leh hmeichhia chenin zuah an ngai love" a rawn ti țeng chhur chhur tawh mai a. an hotupa thusawi chu an ngaihdan a ni tlangin, "țampuimitthi chhilh tir hial pawh hreh lova, kan chhekmual suasam tute hi țhangthar te sawi zui hat khawpa nasa a suasam tur a ni e, nau lai hrui awrh lai thlengin tan hmawk hmawk mai tur" Lutruaia chuan a rawn ti thawp ve sat mai bawk a.

Chutia an chetphung tur an inhrilh nawn leh lai chuan an hun tiam chu rawn thleng zui nghalin, Rangkunga leh Bualhranga te pahnih chu Darkai khaw rawn lang ruaih tawh zuk bih hmasa tur chuan Satbilha chuan a han tir ta a. an ni pahnih an liam hnu chuan midang zawng chu an Phaw leh Silai, an Thalngul leh Fei te chu en fel leh tura Satbilha chuan hrilh zui lehin, "Rangkunga te an rawn let hun hun kan Chem chhuah hun" tih pah chuan a Silai ngul chu a han bih leh ta vut vut a. mahse, inring phen phawna an tawm țhap lai, Satbilha'n kun du chunga hmun tina khaw lam pana tlan mai inpeih ât tawh chunga, a hote inring insang mar țeng țawng lai a fuih kual zut zut lai chuan, Rangkunga chu an thlang țhang buk kar ațang chuan rawn dâk chhuak hlawlin, "hotupa, veng tawn tirh In nga ngawt khu kan bih hman a, tumah reng reng la muhil emaw, tar leh naupang zing tho hma mei ai tap țhutchilh emaw, han mit chhui fuh tur reng an awm hauh lo mai ka ti! kan chêt thawh tur hre lawkin, ngaw tâmah an inkâwi fâi diak a nih ka ring ta hial mai e" a rawn ti phâwk ta hrá mai a.

Rangkunga thu rawn thlen avang chuan, Satbilha leh midang te chu an hawi phâwk nasain, "khuain min nghak lo. fehrehsân hun a ni zui thuai dawn e, rang takin mi sawmhnih hruai ula zuk bih țha leh rawh u" Satbilha chuan a han ti vin deuh tuarh a. chuveleh an zinga a tam zawk chuan, "kei ka kal ang e" an rawn ti rual ta deuh dualh a. mahse, Satbilha chuan mi sawmhnih te hming chu rawn lam zui nghalin, chung mite hruai chung chuan Rangkunga chu a pût liam zui leh ta a.

Chutia khua an zuk pawh leh ațanga tuiburhmumda khat dawna rei an thang țep tihah chuan, an zing pakhat chu rawn let lehin, "hotupa, khaw nghak tumah an awmin kan hre love! kan channa khaw kal khan kan luh hma lawk hian, Darkai Lal leh a khaw mite hian hmanhmawh baklengin an khua hi an rauh san niin kan hria" a rawn ti leh ta a. chuveleh Satbilha chu thinrim meng sen rum chunga lo rum nghutin, "a chuti nafam chu khua In zawng zawng khu zuk hâl darh vek ru le, chumi chhungin kei leh Lutruaia te hian mi sawmli hruaiin, khaw dai zawng zawng hi an hnu zawngin kan rawn dap ang" a ti țeng chher ta chhuaih a.
.

Khawfing chat kawl êng ruaih tawh hnuaia, aû hum hum chunga Khaw chhunga ral ho tlan lut ruih ruih lai chu, a tawmna Zihnghal ler ațang chuan Hrumcheûva chuan a zuk hmu chiangin, a ralrelna fuh chho țan zet chu a thawh lêt dan tur alo suangtuah lawk nasa tawh mai a. chutia a rilru a kawm lai ngei chuan a hisap lawk leh a duh ang chiah a, ralho chuan khaw chhung hmun tin mai chu luh thuk thlâ zelin, In hrang hrang an hâl hma chuan, a thleng hmasa apiang chuan Darkai khaw mite rauh san, an In chhung velah chuan Țhi leh Ro dang lak hmaih an nei dah law maw!? tih ngaihtuahna pu chunga thil hlu lak tur mena meng chungin, In tin mai chu an luh chhuah hmasa țan mek tih chu an che zia ațang chuan a zuk hmu chiang viau bawk a. chutia an chetphung thawh lai chu Hrumcheûva chuan kîk deuh van chunga la thlir rih zelin, hnuai lama a naute ho tawm kûn țhap lai chu fimkhur zual tur chuan a zuk aû zawi leh deuh sap a.

Vangmual tlangval te chuan, Darkai khaw mite tlan chhiat san an Ro Țhi leh Dar te chu In tinah chuan dap zelin, a veng venga In tina Vawksa thar lam rim nam vung vung mai an han hriat rual chuan, Lusei pasalțha pahnih leh Darkai pasalțha te'n an chhekmual an hâl filh sak leûh avanga, kar thum dawn an chaw kawpuar pai tur hmu mumal tawh lo pum leh an rilfang chu, chu Vawksa rim chuan a rawn fan kal ri ta rawih rawih hlawm mai a. a tawpah phei chuan an zinga tlangval pakhat chuan a luhna tapchala, mei thingthu khu deuh vat vat chung lama Bel inchhuang chu a luhna In a bih kual velna lamah chuan, ei tur a awm takin tih rilru pu chunga chhuah paha hawng hramin, chu Bel chhunga Vawksa lo inbeng mawm khat țan mai chu tifuh inti zet leh, duhthawh zet chuan a han hmawm ta bawrh bawrh mai a.

A duhtawk a ei hnu chuan a țhian te chu chhuah paha ko lauh lauhin, In chhunga Vawksa leh chaw țhing awm te chu ei bar ve tur chuan a han sawm a. mahse, chutia a aû lauh lauh lai chuan, a țhian dang te pawh chu In tin ațang chuan hmui mawm hmak chunga rawn dâk kîk ve deuh van hlawmin, an hotupa Satbilha hoa an țhian khaw dai vela thang mek te chu, lo khêk sak ve tur chuan In hrang hrang luhkapuia puar ding peû ûl chung leh, puar irh uk uk chung chuan an inhrilh kual nasa mai a. chumi hnu chuan In tin mai chu a veng venga hâl darh leuh tuma insem darh leh țanin, an luhna țheuha dap bang te chu meichher atan tiin dimna nei eih lo leh tha zâ zet chung chuan an pawt dawk zawk zawk hlawm a. mahse, chutia an insan phek lai chuan Lal mual chhak lama tlangval pakhat tlu hnawk chu, a bul hnaia lo awm a țhian pali te chuan rang taka bawihsawm nghal thuaiin, a ngaihna hrelo zet chunga an thlir laia, a kâ ațanga thisen lar zet a rawn phawn (phuan) chhuah bawrh bawrh lai chuan, chu mite zinga pahnih chu vawilehkhatah thi hlirin an rawn luak ve ta puat puat mai a!

Chutia an tâl buai țan chho lai chu Hrumcheûva chuan, nui deuh van chunga khaw chuan chhak dai mual Zihnghal ler ațang chuan lo la ngaichang zelin, "i hi le! Lusei pasalțha te ralrel a sual ta love, 'Hnamtúr' telh Sa hrang hmawm zawng khu chu inlek puk thei aram an awm dawn ta love" ama hriat tawk lek chuan a han ti sap mai a. chumi hnua a han hawi thlak leh lai phei chuan, ral ho chu an lo tlu tam tawhin, Lal muala pum dawm chunga kal pai țang țang te chu chiang fe fein an tlu thlawrh thlawrh hlawm mai a. chutah zet chuan Hrumcheûva chuan an chhekmual an hâl sak ațang tawha, an ei in hmu mumal lo tur rilțam thinrim rawn êr let tur lo hrâi hlum phiarh tura, Zakulha nena an lo hisap lawk ang ngeia an ralrelna an bawh fuh zia chu a hre chiang tawhin, Darkai tual zawng zawng deuhthaw chu thisen leh ral ho ruang hlir mai chuan a khah nulh tawh mai a. mahse, a hote chu tumah thawm chhuah lo tura la khap bet țhapin, ralho zinga ala dam awm chhun mi sawm vel, tualchara thi hlira luak bu bâwrh bâwrh chunga, chau zeta an inbeng kang hram hram lai chu mitla lek lo chuan a han bih leh ta ran mai a. mahse, chutia a bih lai chuan veng mawng In țhenkhat, an tluk zawi hma a ral hoin an dêhkâi hman rawn khu chho laih laih lai chu chiang zeta Hrumcheûva chuan zuk hmuin! in dang a kan kâi hma a zuk țhelh tur chuan, a hote zinga sawm vel nen chuan chak zet leh thinrim insehruh rap rap chung chuan an tlan thla ta a...