MIHRÂNGVÃL TE SÛLHNÛ . By. Llpa rokhum 1 - 70

[Ngaia]

Bung-53

Sawiluaia leh Kaptuaha te pahnih chuan an chet lak dan zawng zawng an han ngaihtuah chuan ralrel thiam leh hnu thup thiam an intiin, an hmeichhe thah ruangah Ral leh Sapui hnu hnutchhiah hlek lova Darkai khaw ho barakhaih nan leh an buai phili nana, Phanthing kaka a ruang zepa maksak zeta an che vel chu an intihtheihpui hle a.chu achhapah, an Lal Rumvuta fapa Satbilha chin an la hriat loh avang chuan, an hmeichhe thah tak chunga Ral kut hnu an hnutchhiah miah lo te chu a finthlak zia ngaihtuah kai leh zelin, "kha hmeichhe lu kha kan la anih chuan, Ral kut tuara tlu a ni tih hi Darkai ho chuan an hre ngei anga.chuti a nih vaih chuan ihe lova khaw dai khan zawng zawngah kulh thar siam lehin, kan Lal fapa chin biha khaw dai kan velna tur kawng hi an kit hnawk vek ngei bawk ang. mahse, kan fin khalh tak achhapah vawikhatah bumna valh thum lai kan suih a ni hawt e, kan ralrel kan thlak hlauh chu kan țum țhatna ai a ni teh chek dawn e" tih pah chuan Kaptuaha chuan Sawiluaia chu mei êng thlarah chuan a han țhen khum țha a.

An hotute pahnih titi chu midang zawng chuan ngai ropui zet chung leh tlukloh thlir taka lo thlir țhapin, an mi thahna lai mual vela an hotupa pakhat zawk Kaptuaha meitalh thlauh han zawng leh tura an mi ruat, an zinga tlangval huaisen deuh Lengchuha leh Dengluta te pahnih chu an buk thlang thim chin leh chin lohah chuan, an hotute thupek nghah pahin an insiam mial mial bawk a.

An hun ruat a han thlen chhoha ralveng tur an han inruat fel leh hnu chuan Kaptuaha chuan, din chhuah pah chuan a bula țhu Sawiluaia chu chhuk bih thlain, "Darkai ruang la ho pawh an țin fel tawh anga, Lengchuha leh Luta te nen kan thang hlan chuan muang takin lo mu hahchawl tawh u khai. kan thang rei ta deuh a nih pawhin, Darkai bihin kan chhir tlang ta ah ngai mai la, nakzan lam lam chu i chet thawh ve hun atan ka zuat dawn che nia. a khaukapa 'haw haw' lo zawnga a dawr te te a chet lak hi a fuh zia kan hre dawn chauh e" a han ti a.

Sawiluaia chuan a țhianpa rawtdan chu țha a tih thua lo chhang let thuaiin, "tunah zawng Darkai Lal leh a chhak pasalțha vakrawlai te chu kha hmeichhe ruang kan sawngbawl dan avang khan, tukkhum chhah hiatin an Lalmukhawihawi ta vel mai mai tawh ngei ang le! nakzan zanlai fima Darkai khaw han bih chu ka chak tawh kher mai e ka ti" tih pah chuan a milulakchem chu a han lek tle deuh zauh zauh a.

Zan a rei deuh tawh avang chuan Kaptuaha te pathum chu an thla a ngamin, an meichher kenah pawh chuan kawnga an mauro hmuh apiang chu an thawlh belh pah zung zung a,an hotupa Kaptuaha lah chuan a remruat dan zawng zawng chu hmahruai zel pah chuan Lengchuha leh Dengluta te pahnih chu intivei tak chunga hrilh kual velin, "Darkai khua chu kan hmeichhe ruang dahna ațang khan lofing thum vel awrha hla deuh chauh a ni tawh a. khalai ațanga kan ban thlen hunah chuan, Darkai tlangval ho chu sawi loha leng, an rawlthar lik-awr pawh la chat lo te chenin mangpui nen, an muhil phar huang hlawm tawh chek anga. chutih chhung chuan tual hrut kanin, an mualkil zawng zawng te Inhnuai kan luh kim vek anga. chhuat dap keu awngin, an bangpuiah kan Lal fapa Satbilha milulakchem a inthiah leh thiah loh kan bih kual zel dawn nia. keini pathum hi chuan kan Lal fapa milukchem chu kan hai ngailoh kha maw!? a khangah dar val kual a invuah tlet rãh kha. kha milulakchem kha tu pawhin kan hmu a nih chuan kan Lal fapa chu an that tawh emaw, an kutah ala tang emaw tihna ania'nga. muang lovin an Ral thah lu khaina hmun, kawtchhuah chhehvel kan dap nghal ang. kan Lal fapa lu tal kha âh haw'n ngei ka duh e" a han ti a.an hotupa thuchah chu Dengluta chuan a meichher ek nawr thlak pah chuan lo buk khum deuh nghatin, "kan țum thlah ala kaltluang zel teh chawk anga, kan ralrel bilh khawmna hun țha chu kan tawng chho mai dawnin a lawng e. kan Lal fapa chin kan bih fiah hnu lama kan chetphung kan chhuah nawn hnu lamah chuan, chhak pasalțha vakrawlai pahnih te fin kan chhilhbo hle a ni tih hi kan Lalpa chuan a hre ve tawhin a ralmuan phah ngei ang le" a han ti zawi sup a.

An miruang dahna Phanthing lan theihna ral kawrte kam an thlen chuan, an pathum chuan thawm ngaithla leh thil che bih kualin an han ding ngawi ta țhap a.mahse, Darkai khaw ruang la ho thawm awm leh an che vel awm an hmuh loh avang chuan an pathum chuan ngaihțha zeta inbe kual leh sur surin, "kan Darkai valho chu rinaiin an chet zam a țha daih mai e ka ti! kan mi thah ruang kha kan kalsan chauh tihah khan tuemaw chuan an hmu thuai tih alang ta reng mai e. nge ni, tun thlengin anla hmu lova a tlang pun lovin a laina hnai te'n a hnu anla zui zawk nia'ng? a chuti nise, a kalna chin thlang lam, tuna a ruang kan dahna lam khi an rawn tla thleng tawh ngei awm si a. naute u, pawngpaw pawh ngawt lovin, piah deuh ațang sawn i han bih nawn leh teh ang u khai" Kaptuaha chuan a han ti sur sur a.

An hotupa fimkhur thu kam chhuak avang chuan, Dengluta leh Lengchuha te pahnih chuan an meichher tel țhenkhat chu phawi țhenin, ral ațang pawha lang chiang lutuk lo tura alh te deuh turin an han ti thawl a.mahse, kawrte kana a piah lungkhawkrawk deuh kar ațanga uluk zawka an miruang dahna an han bih leh pawh chuan, leihrik tlak tliar tliar te thawm riva tih loh thawm dang chu theireh taka a reh țhiap avang chuan an hotupa ngaihțha hawivelin, a meichher thlara kik vun chunga anni pahnih a rawn melh tawn zuk zuk chu lungmuang zeta zui phei nghalin, miruang an dahna mual chu an pathum chuan ngawirengin an pan chho ta nghal a.

An han chuang kai hlawt tihah chuan an mi thah ruang an zehna Phanthing kakpui chu an Kaptuaha chuan uluk zetin a han thlir chho thuai a. mahse, ruang chu a hmuh tak loh avang chuan a meitalh tlakna lai niawma a hriat hmun țhenkhat chu meichher nen an pathum chuan bih kual nghalin, "ka rindan kawng khat zawk kha a dik e, ruang kha la thlain kan han pawh chhoh hma lawk khan Darkai khaw khan an zawhpui hman tlat mai ka ti"! Kaptuaha chuan a han ti sup a.

chuveleh Lengchuha chuan kik vun chunga an hotupa thusawi chu rawn tuihnih ve vatin, "cheka chekah Darkai val te nen chuan kan intawk lawi thial a nih hi le! Ral kut hnu lang talo chu, Darkai val te lu chu kan mi thah ruang chuan ava Thobențhelh luhai tir chai chai dawn kher ve e, ram mite kut tuar ngaiha an han ngai tur mit inhrilh phawk kual vel tur chu, tai tla dawna han nuih khum ka va chak kher ve maw" tih pah chuan a bul lawka an hotupa Kaptuaha kun du du lai chu a han țhen khum țhu a.

Chu hun mitkhapkar lek, Lengchuha nui huk thawm chhilh chiah mai chuan, an thlang lama hnahthel chu phut dawrh na tham khawpa ringa rawn ri suauin, chu thawm an hriat thut ruala phawk zet chunga Kaptuah leh Lengchuha te'n a rawn rikna lam an hawi thlak zawk lai chuan sang fe fe a hnahthelro leng chum chum mai chu mak ti zeta ding khawng reng chung leh, an lu chung lama an meichher lek chho meuh chuan an thlir ta renga.

chutia an thlir lai chuan hla fea patling țe thla ruaih ruaih ri chu an thlang kawrte dung ațang chuan rawn khawk chho zui rawi rawiin, theileh thei lova "chhan tlak ka la awm e" ti țial thla ruaih ruaih tu chu tu tak nia'ng maw!? tih melhin an han inmelh tawn zuk zuk a.mahse, rei inrawn tawn a ngaih loh zia chu Kaptuaha chuan rang taka hre chhuak vatin, "Luta, Denglut khawnge i awm"!!? a tih pah chuan an thlang lam leh sir vel chu a meichher chuan a ên kual ta zut zut a.

Chutia an hotupa phili leh che buai titih avang chuan Lengchuha chu rang taka rawn inthing harh ve vatin, a meichher paih vut pah chuan a Silai chu a tin kual ta ruai a. mahse, an hun tawn mak zet chuan Dengluta thawm chu a chhilhbo chiang tawhin, an thlang lama a au ri rawn chhuak pawh chu hriat zui tur a awm ta reng reng lo a.
an han inngaihtuah fim țhat leh hnua an beng an han chhit ngial hnu pawh chuan, Dengluta thawm riva chu an la hriat loh fo avang chuan Lengchuha chu a zam ru tawhin, "hotupa, rammi te pawi kan tawk ta nge ni lah kan hre tawh silo, chu achhapah, Luta thawm lah chuan min țhawng nawn ta silo! kan țhiante punin ka kal mai dawn em nia'ng"? a han ti phawk leh ta hru a.mahse, chutia Lengchuha zam 'aw' chhuah chu Kaptuaha chuan inpet fun chunga lo chhang thuaiin, "Luta hnuk liam tute hi a tute pawh chu lo nimahse, Rallusarih kuai tawh Vangmual khaw daido Ralbula fapa Kaptuaha hian an hnu hi ka zui dawn e, nauva min zui dawn nge min kir san dawn"!!? a ti khur ta hluk hluk mai a.

Zakulha nen an tawmna Bul zar ațanga rang lutuka zuan thlak paha, Mipathum zinga a tlafal hmasa ber hrawka a zuk rehpin sak hmak ruala, kawrte thuk zeta an tlak luh hnua a kereka man sak tlat chunga kawrte chhuat hnahthel tling khawm tentun chunga chak lutuka a hnuh thlak hrep, Pa hmai tluak deuh hret hrut a han reh hlum hnu lawk chuan Hrumcheuva chuan, a bul lawka sadaiek khawro a dap fuh chu a khup na vang vang laiah chuan a han bel hlawih hlawih a.chumi hnuah a veilam kawrte kamah chuan rang zeta perkai chhoin, ala bang mipahnih te awmna mual lam bawk kha khaw hmu fiahlo ruaih chung chuan a pan chho leh ta ngat a.

A thlen chhoh dawn chuan beng chhi ran chunga ding deuh detin, ala bang pahnih te chunga Zakulha chet la tur chu a ngaichang ta rih a.
mahse, rei a nghah hma chuan a awmna ațanga mautluk vel leka hla, minchhel ko sang zet ațang chuan țe ruaih ruaih chunga mipakhat rawn tla thum dup ri chu chiang zeta hre zui nghal zatin, ko hnuai a rawn thlen ruala a țe ri a tawp hmak rual chuan ko chhak lawk ațang chuan Silai a puak zui dur mai a.

Zakulha chuan a tawmna Bul zar hnuai zawna meichher pawh keng tawh lova fimkhur zet chunga rawn lut mek, a hnung zawka kal hrawk thler hawk khawpa a mau sui tawng chen vel, hriam zeta a sir tawn tawn sui sahthlau zaih hmanga a thlang minkoa tla thla hnawk khawpa a han thlawh fuh rual deuhthawa, a hnung lam hawia pakhat zawkin Silai a hmeh puah dur hnu chuan, thawm a ngaihchan leh hlek hnuah rang takin a tawmna Bul zar rawn hawlh zawm tu phulraw ler lamah chuan a pakai phei zalh mai a.

Lei a tleng thlak thlen hnu chuan ala bang pakhat awmna lam chu thawm chhuah hlek lo leh, mit naute bial val kalh khawpa meng fiah chunga chhui phei leh nghalin, thing lian zet zungthlar phena chupa lo tawmping mek, hmanhmawh zeta a Silai mu alo sawh chat chat lai, chiang zeta a darpheng dinglam chanve lo lawr hang mak mai chu nuih deuh sak pah chuan a han bih ta khiau a.

A khel veilama a thalfang thiah rah chu chupa darah chuan, na lutuk maia a lung luh zawnga tlang zawk khawpa han thiah luh zawt mai chu chak viau mahse, huai leh rammi te hnu niawm taka, Darkai Lal Keihranga leh a khuate lu tihai tura, intih finkhalh zeta Rualkapi ruang an sawngbawl vel dan kha ngaihtuah chhuak lehin, Rualkapi ruang an lak laia hnu zawnga haihchham zeta an tei suau suau laia a meitalhlung chhar, a ruka Hrumcheuva a hrilhruk zauh, chuta țanga ngaihdan fel tak siam ru duna Rualkapi sawisatu hi Huai leh Rammi nilovin, Ral anni tih an hriat chian avanga Meitalhlung zawnga an rawn let huna Huai cheta lehchet khum tuma, ding taka helai ngawpui hnuai hi pan leh nal nal an nih zia te, an zinga pakhat tal chu a nung chunga man hram tura Hrumcheuva nen an rel dun dan te chu ngaihtuah chhuak lehin, ngawirengin chupa chevel hmuh phak reng theihna hmun turah chuan a țhingțhi kun ta ran a.

Chutia thawm nei hlek lova a tawm vang vang lai chuan, a bitumpa chuan a naute pahnih mak tak maia rawn philbo hmak tu Huai lakah chuan, a sahimna tur tal a dap ve a ni tih hriat zet chunga a Silai chu rawn lek kual ruai ruaiin, a hnung pen sawmhnih vel leka hla, perh buk kara ngawi ran chunga a tawm lai chu chupa chuan a rawn hmulo tawp tih chu Zakulha chuan a hre chiang hle a.Chutia chupa chevel thlira a bih ran lai chuan a thlang lawk perh buk țawi zet kar ațanga, zawi thum deuh data Hrumcheuva khel rawn beng ri thak chu a beng țha zet chuan rang zeta lo man thuaiin, zawi tein a khel chu a han beng ve ta dat a.chuveleh a awmna hnung lam mual leh a awmna inkar kawrte, a tawmna ațanga mautluk vel leka hla ah chuan, thum zet leh zawi ril ruih maia patling phun deuh bul bul ri chuan a beng chu rawn luh zui zatin, chu thawm avanga tawmping deuh chul chunga a bitumpa buai phili a insiksawi lai tak chuan, a bul maiah chuan Hrumcheuva chu a rawn vak thleng hman ta var a.

An han inhmuh takah chuan inhrilh chawp leh chuan ngailo zeta ding lam leh veilamah chuan bawkvak chunga ințhen nghal phawkin, Zakulha chu chupa awmna ațanga mautlawn pawh tling mang lova hla, chupa tawmna ațanga dinglam hreta lungpui lian zet phenah chuan thawm nei hlek lovin a tawlh lut phei ta zauha. a han țhutmuan hlek hnu chuan a ep veilama Hrumcheuva insiamrem hun awm chu beng chhi kar chunga ngaichangin, a milulakchem chu a kawnga a hruikhau hrual hrenah chuan a thiat lut ta zalha a.

Ngawpui hnuai tihtakah hmun țhenkhata thingthlavar de zauh zauh tih loh hmuntin mai chu a thim zualin, pasalțha danglam bik Zakulha te Hrumcheuva te ang tan lo chuan, hmuntin mai chu mitvaia inpal buai theihna khawpa thim ani vek mai a. mahse, an mi vehpa chu an rinaiin a mit leh a beng a fing daih mai tih chu Hrumcheuva leh Zakulha te chuan an hre chiangin, a rilruah an chetdan phung chu Huai zia angah riak a ngaih tlat theih nana, an chetphung chhuah erawh chupa chuan a chet buai phah tawh hle tih chu an man chiang țan hle a. chuvang chuan Zakulha chuan a thil tum chu hlen ngei tuma insiam rem lehin, a ngawnga a ramhrui valhsa awrh, kutzungpui tiat vel hraw fip ral mai chu muangchangin a la thla ta a.

A han inpeihfel hnu chuan a khel chu zawi thum data beng ri deuh țhakin, a ben rik rual deuhthaw chuan Hrumcheuva awmna lam, chupa sir veilam mautluk khat țha lam hreta hla ațang chuan thum chher deuh duta Patling phun bul bul thawm a rawn chhuak zui ta zat a.

Chuveleh an bitumpa chu rak țhawt chunga a tawmna ațang chuan rawn zuang thovin, hmun tin mai tin kuala a thawk huam huam lai chuan a Silai ngul lek tle kual zawk zawk chu Zakulha chuan chiang zetin a en ran mai a. chumi hnuah muang deuh raiha a hrui valh hum lai chu lek kang hretin, a lam hawia chupa Silai ngul a rawn tlêt leh zauh rual chuan, fiah mang lova a tawmna thingzung thlar phen dinglam hreta chupa lu rawn lawr zauh zawnah chiah chuan, a hrui valh ken lai chu rang zetin a han theh kawh phei zalh mai a.

A hrui valhin chupa awmna a thleng phei nghal ruak ani tih a hriat rual chuan a hmawr lehlam, a kutveilama a veh mar țang chu nâ zeta phih zui nghal nghekin, a tawmna lungpui lam hawi chuan chak zetin a han pawt phei ta dawr dawr mai a.chutihlai chuan a mihring phih awhpa lah chu 'aw' chhuah thei silova hrawk ri burh burh chunga rawn tal phei buan buanin, amah phihâwk tu Huai luhlul leh che rawva zet chu hlauh namenlohin a hlau tih hriat zetin zun a cheh phei țhawt țhawt tawh mai a.

Zakulha chuan a mihring phihawhpa chu dim lo zeta a thim lam zela hnuh thlak pah chuan, a thlang lama kawrduk thuk zetah chuan chak zetin a pawt liam thla ta a.chuveleh Hrumcheuva chu a tawmna ațang chuan rang zeta rawn lim chhuak thla ve nghalin, Zakulha leh an mi manpa liam thlakna kawr hnar lamah chuan a zuang lut ta a.a thlang mai kawr thim thuk zet chhunga an mi manpa hlau thlabar rum ri hrawk hrawk lai chu thawm dim zet chunga veh pawh thlain, a kut chu kawr chhuat chirhdum vawt zetah chuan a han chiah nal leh te te a.chumi hnuah an mi manpa hmai chu khuap hlup khawpa zuk hup sak thutin, hneh takin kawr chhuatah chuan a bawkkhup zawnga a khupa țhingțhit beh zui nghal tlat pah chuan, a bengbulah chuan thum zetin a han phun khum ta bul bul mai a.

A hmai zawng zawng khuap pil pualh khawpa kut lian leh vawt thlur maiin a han hup bet zet chu Kaptuaha chuan a hlau zualin, tal chhuah tuma a huaisenna zawng zawng sawmkhawm chunga chu kut vawt zet a han dap fuh lai chuan, a hnungzanga hneh zeta delhbet tlat tu chuan a hma aiin a rawn delh nâ ta tulh tulh mai a.chu achhapah, amah sawisatu kut vawt leh nal pulh mai chu mihring kut nilovin Huai kut ngei a ni ang tih chu ring nghet sauhin, a nghawnga ramhrui la inzip tawt tlat mai chu phelh a han tum leh țawk țawka, chuveleh a hmai hup bet tlat tu chuan a hmai a huh (hup) beh sat tlatna chu thlah thut paha phun leh bul bul chunga a nghawng hrui valh chu na zeta rawn pawt tawt thutin! thaw la thei tawh manglo leh hlau thlabar zet chunga a awm lai chuan a beng ri hriatna chu a hla ta ruai ruai a.

An mi manpa hlau leh thawchham thidang zawi hnuang mai chu Zakulha leh Hrumcheuva te chuan, hneh zet leh dimlo zeta kawr kamah chuan hnuk chhovin, an chet thawh nawn leh dan tur hre reng chung chuan chupa chu tih harh tumin an han bawihsawm zui ta ngat ngat a.chupa thidang lah chu an beisei aiin a harh thei lovin, "thim țin hun kan lut lek lek ta mai e ka ti! a kawite tawmna hmun kan pawh vat angai e, ti tawh hepa hi i input chhawk mai teh ang khai, Huai pahnih lakah chuan a chhawn a ti khauh ngamlo achha a nih tawh hi, harh chhuah tikni a nei mai dawn love" tih pah chuan Hrumcheuva chuan an mi manpa chu a pu ta luah mai a.chuveleh Zakulha chuan kawrduk kam leh rawhung hnawng deuh laia, thingthlavar eng zual deuh deuh de thleh thluah chu fawm khawm zui ve nghal zatin, Rualkapi ruang an zehna Phanthing awmna mual, an piah chiah kawrte kam lehlamah chuan an kai phei ta nghal a.

Chulai muala reilote an han din dat hnu chuan an mi manpa leh a kawite rawn lan tirhna mual, an awmna ațanga tlakdeng mual thim thla ruih chu chak zeta pan thla dunin, an mi manpa chu an han input chhawk thla ta zak zak a.

Ngawpui hnuai tihtakah, an chet tlatna thim chhah tlat hnuaia thingthlavar eng fawm khawm pah zel chunga han kal chu an duh angin a sawt lo an ti dunin, meichher nena Ralho tawmna han zawn chu a finthlak loh zia an hre chiang si, chu achhapah, Ralho tawm khawmna hmun zawnga patling thidang input chhawk zak zak chunga kal an ni bawk nen, lofing hnih an han luh thlen meuh chuan chhak pasalțha hratkhawkheng te pahnih meuh pawh an zam a muang ve lek lek tawh a.mahse, an ralrel hlen ngei tumna chuan remhriatna thar leh tha thar rawn pekbelh zelin, thawk an han lak zawk lai chuan an bul vela thing mut rim rawn nam hâk chu Zakulha hnar fing zet chuan a man fuh ta chat mai a.

Ding vang vang chunga chiang zawka an hnar an han len kual dun vat vat hnu chuan an thlang lawk, an thlang lam mual ngawpui chhah leh thim zet lam chu hawi thla dun nghal thuaiin, "mei rim zam a inman zawm teh chek ang chu maw" tih leh chu lama liam thlak chu Zakulha chuan a rual ta nghal a.chutia an han rin chhui țan chauh tihah chuan, an beisei leh an rindan a dik zia chu mei rim inphaman thla ngat ngat avang chuan an hre chiang tawhin, thimțin zui tlang tur thlifim tleh dan inthlakin khawchhak hawia thaw heuh heuh chunga mei rim a rawn hruai tel vang vang chu awlsam takin an chhui thla ta a.

Lo fing khat pawh an kal hma chuan an beisei hmun chu rang taka zuk chhui lutin, ngawpui hnuai thim chhah mup na hmun mual pawng deuh darh chunga meivam lo ling hlerh hlerh chu mautluk vel leka hla, perh buk kar ațang chuan chiang zetin an va hmu ta a.

Hrumcheuva chuan a mihring put chu hmun rem deuhlaiah chuan awlsam zeta keuh hnawkin, "ti rawh khai, chet i la thuai teh ang. an buk chung ngawpui thing saw ka va bih fiah a nga, nangin kan Pasalțha thidang khai zo tawk tur hrui hi lo chhat rawh khai" zawi sapa tih leh Ralho buk lam hawia bawkvaka luh phei chu a rual ta nghal a.

Zakulha pawh chuan an hmanraw mamawh ang chu rang taka fawm khawm thuaiin, Hrumcheuva rawn let hun nghah pah chuan an mi manpa lu chu a hrui chhah thar hmawr valh chhungah chuan a rawlh lut ta a.

Hrumcheuva rawn let leh chuan an tawmna chu tlema tawlh thlan san deuh chu rawn rawtin, "ralveng pali lai an indah ve khiau mai e, thlang lam ațanga kan lehluh loh chuan kan chet lakna atana ka thlan, an buk zar khuh chiah tu Theitit kung saw kan lawn khung thei dawn tlat lo mei e" a han ti sap a.

An han tawlh thlan hret hnua Vangmual khaw ho buk tukna mual chhuah lam liam ațanga pakai chhoh nana Hrumcheuva'n alo hual lawk, Theitit kung uipum rual ai maha lian dinna an han thlen lai chuan, ralveng pali zinga pakhat chu an awmna lam ep zawng chuan a rawn inpaih ri ta sur sur a. chuveleh chupain hnahthelro a zun khum ri sur sur chu Hrumcheuva leh Zakulha te pahnih chuan rang taka remchangah lo la vatin, Theitit zam khuh lûk tu hrui zam hnahro inbawh luk mai chu an mi manpa dawm pah zel chung chuan an lawn pel thei ta a. chumi hnuah a kak rem deuh lai, lei ațanga ban phak loh tawk vela sangah chuan an mi manpa chu tla mai lo tura bang liamin, a ngawng an hlinna hrui hmawr lehlam chu Zakulha chuan a kerekah chuan a han suih bet a.an peihfel hnu chuan Theitit ler lamah chuan hmanhmawh zeta lawn chho leh nghalin, reiloah an pahnih chuan a ler chu an thleng chho ta a.

Ral hotute pahnihin inti ralrel fing zeta an naute hnena mei ti alh eng lova a vam chauh an zuah tir avang chuan, Hrumcheuva leh Zakulha te chu an chet awlsam phahin, an buk chung zawn chiaha an lawnna Theitit zar buk kar, ramhrui lian fe fe inzam phiar kalh țuakna hmun, lei ațanga mau tlawn zeta sang chu uluk zetin an han bih kual a,an duh ang taka an han bih fiah hnu chuan Hrumcheuva chu an țhutna zar ațang chuan thawm chhuah lek lova zar dangah pakai pheiin, Zakulha nen chuan hlamli vela inhlatin țanhmun an siam fel dun ta a.

Khawfing chah lek lek tawh laia an buk tuala ralvenga tei kual Vangmual rawlthar pali te chuan, an buk tukna mual chung thingzar leh ramhrui lian tak tak inpiar phui chuat mai kar awng van var thluah kar ațanga, thawklehkhata zawi thawp deuh suta Patling phun bul bul rawn ri ril thla bul bul mai chu an bih chho khur ta hlak hlak mai a.chutihlai chuan an meipui vam lah chu a êng nep tawhin, a ên phak chin hlam bial vel chauh tih loh chu thim vawt nguai mai chuan a tuam hneh em em mai bawk si.

An zinga pakhat chuan an meipui vam chu vur belah tuah êng hluah mai chu rawn rawtin, an thing fawmsa an han rawlh thuai thuai lai chuan an chung lam ațanga Patling phun ri pawh chu a thum zual ta kher mai a. chutah zet chuan an ni pali pawh chu an hmanhmawh tawhin, an zinga pakhat phei chu engmah tih nachang hre lovin a țhu khur hlawk hlawk tawh mai a.an thing fawmsa lah chu daizunin alo bawh hnawng tawh bawk nen, an zinga pakhat chuan beidawng zetin buk chhunga an hotupa Dengluta hnar bur bur lai chu va kaihthawh tumin a han ding ta țhal țhal a.

Chuveleh an buk chhak lam pik kar ațanga, ban phak loh tur tawk vela sanga, a nghawnga inawk tlat chung leh thaw ri hruih hruih chunga mi pakhat rawn tal then thla fuat fuat lai chu chianglo zet chuan an han hmu ta a! chu thil zet chuan rawlthar pali te chu a ti thlabarin, an buk lam hawi chuan an inhawr rak phei ta teng tung mai a.

Buk chhung an luh rual chuan an țhiante chu țe ruaih ruaih chunga bawh harhin, mang nei harh chiang manglo rak ri nen, an buk tual chung zawna inthen kual pup pup chung leh, thaw ri hruap hruap chunga mipakhat inkhai then kual vu vuin an meivam chung zawna a rawn then thlen apiang chuan, meivam ling thlarah chuan chupa hmel, meng pual ru chung leh chilphuan uai var duah chunga a hrawk ri buah buah țhin chuan an tiril chu luh chhuak hneh hlawm ta hle a.

A hote thlabar rak chuah chuah karah chuan, Dengluta chuan a Silai chu rawn lek chhuak chung chuan nasa taka inhrosak pahin an buk piah hmun hrang hramg chu a han tin kual thuak thuaka.mahse, amah ngei pawh chuan hlauh rukna ril zet a neiru a ni tih chu a mitmengah chuan a lang chiangin, thawklehkhata an chung thingzar kar thim muk mai ațanga hnahthelro a rawn sur thlak sup sup laia, nasa zeta thingzar hmuntin mai a chet rik suau suau lai meuh chuan, awmze neilo zetin a Silai chu a lek puak ta dur mai a.mahse, a Silai ri pawh chuan Huai ho chetphung chhuah rapthlak zet chu a vau dailo kher mai! hnahthel ala sur sung sung lai chuan, ban phak loh vela sanga an buk vel kual pup pupa mipakhat inkhai then ri buah buah mai chu an buk bawh thim mup tu ngawpui thingzar thim karah chuan chak zeta tawlh pil chho thutin! thawm zawng zawng chu vawilehkhatah a hân ta duak a.

An hnuai lama Vangmual khaw tlangval ho hlauhlawp inhawr thawm chu Zakulha leh Hrumcheuva te pahnih chuan fiah mang lova zuk bih khiauin, an hnuai thingzar hnawk kar, hnuai lam ațanga hmuh theih loh lai tur thim zinga an pawhbeh, an mi manpa inkhai tal fuat fuat lai nghawnga hrui invalh chu Zakulha chuan a ngawnga na zeta zuk tlawh nghek pah chuan, vawilehkhatah a thapui pawng țalh țalh khawpa nâin a han pawtmar zawt mai a.a duhtawk chin a pawh mar hnu chuan muangchanga a hrui pawh chu thlahdul thlain, a piah thingzar ațanga Hrumcheuva rawn vak phei mek chu alo nghak ta a.

Hrumcheuva a rawn thlen hnu chuan a mi thahpa lu zawn ramhrui zam inphan țuak kar chu Zakulha chuan zen thlain, a mi thahpa tukkhum sam zial chu a kutah chuan a han vet ta mial mial a,a han veh mar țang hnu chuan Hrumcheuva chuan chupa an awh tirna hrui chu a Chem chuan rawn zai chatin, a samzial rinchhan chuan Zakulha chuan a mi thahpa ruang chu a khai vir ta chawi chawi a.chumi hnu chuan an hnuai lam chu chiang zeta zuk bih dun lehin, Vangmual tlangval ho awm khawmuang țan mek chu an thlir ta rih a.

Rei an bih hma chuan inti huai chawp zet chunga meivam la nung ang ang chu vur belha, chhep êng tura an zinga pakhatin midang a hrilh kual thawm chu ngaichang leh hlekin, meipui an han nun țan chiah tihah chuan Hrumcheuva chuan, ramhrui pakhat chu an awmna leh a chhehvel thingzar zawng zawng che luih luih khawp leh, țhalin a hmehro hruizam kar vela hnahro tling khawm tla ur ur khawp chuan pawt che leh luai luaiin, chumi rual chiah chuan Zakulha chuan a kuta a mi thahpa sam a vehbeh tlat chu Vangmual khaw ho meipui chheh zawnah tak chuan, an meipui chheh alh țan mek deng darh chuaih khawp chuan a han thlah thla ta mai a.

[Ngaia]

Bung-54

An meipui chheh thingthu zawng zawng leh meisi leng darh chuaih khawpa, an buk khuh tu ngawpui chung lam ațanga engemaw rawn tla thum dup an țeh san huk hnu chuan, an hotupa Sawiluaia chuan a Silai lek kawh vu chung chuan a naute ho chu vin deuh taka fuihin, "tumah tlanchhe suh u khai, rammi te kut thawh hi khawfing chatin a hnawt țiau thuai dawn e.helai hmun hi an liamkawn alo nih dawn hi maw! thim han țin se mual dangah buk kan tuk dialh dawn nia" a han ti phawk hru a.

An hotupa thu rawn thawtin tlema rilru pangngai a han put tir hnu chuan, sa rawh rim hmui deuh chuk, an buk vela nam huam huam chu makti zet chunga an vai chuan an meipui rawn deng dawt tu chu hmu leh hmu lova va bih hnai hlawmin, meithingthu ling malpui rual lai tur lukham chunga sam leh vun mut sawr tluk tluk chunga an hotupa pakhat zawk, Kaptuaha lo thi phar huang mai chu an han hmu ta a.

An thil hmuh avang chuan Vangmual tlangval ho chu hlauhna nasa zet leh a hma ai zawnga zamna mak zet maiin rawn tuam nghalin, Kaptuaha ruang chu hmuh thianglo hmu ang hrimin an țeh san leh ta huk mai a.

chutah zet chuan an hotupa Sawiluaia meuh pawh a zam hle tawh ani tih hriat zet chunga ding khawng rengin, "naute u, rammi te chetphung meuh chuan kan ralrel an kham titih a ni ta der e! kan hun tawn hian kan țum thlah ati khawbaw zo ta si a.insiam ula, rang takin kan let angai e. țhian Kaptuaha ruang hi senghawi thuai ila, Lengchuha leh Dengluta te chin bih pah zelin Vangmual kan pan angai a ni. rammi te kut ai meuh zawngin hring mite chhawn hi a khauh tawk ngai love! țul lovah padarben tih tawk lek tiin i cho lui țalh lo te'ng u khai. an kuta kan vai mang țhak hma hian an ni nen hian kan Sawdawt thawi hmanga inremna sa-ui kan tan thuai a ngai e" a rawn ti hnual ta ruih a.

Khawfing a chat anih tawh mai avang chuan, chhak pasalțha hratkhawkheng pahnih te pawh thatho zeta an tawmna ngawpui thingzar kar ațang chuan, chhim ep ngawpui thingzar dangah pakai pheiin, chuta țang chuan an hnuai kham sang zet chung khuhtu ramhrui inphan karah chuan an pakai liam thla ta a.chuta țang chuan chak taka Darkai khaw lam pana khawchhak hawia kal nghalin, tukțhuan ei hma hretin khua chu an lut leh ta a.

Lal In an han luh chuan valupa Suakngenga leh Lal Keihranga leh Lal Taikherha te pathum lo titi lai chu hawihawm zeta Hrumcheuva chuan be nghal thuaiin, "tun țum chu sa tih tham kan rawn ak haw tawp lo mai e" a han ti a.

chuveleh valupa Suakngenga chuan Lal Keihranga leh Lal Taikherha te pahnih chu melh tawn deuh zak zak chunga Hrumcheuva thu rawn kamkeu chu lo chhang let thuaiin, "kan Lal te thu chhuak dai pial inti tak chunga, an hmai êng zah tak chungin in chet dan zepin thu in han khuh vei maw! pasalțha rothap pahnihte chhawn han tawng hmasatu nih chu Vangmual ho chuan an duh ikhaw hlawm lovang le. Rualkapi ruangin khua a kai tirh khan kan Lal te pahnih hi in chanchin kalo thawt lawk daih tawha, in chet thlah dan mawlh kha kan ngaithla chak tawh hlawm e" a han ti nui deuh țha a.

Hrumcheuva'n Zakulha nena an chet lak dan a han sawi lai zet chu Lal Taikherha leh Lal Keihranga te chuan ngaihthlak nuam an tiin, kil khatah hmarchuankite pawh alo hlim veng veng reng mai a.chutihlai chuan Zakulha pawhin Chawnglalpuii lawm hmel chu lo hmuh hmaih bik hek suh, mualkil te tukțhuan ei kham, Lalnu tuibur hmuam paha Lal In rawn kai tur an rawn luh deuh phak phak laia, valupa Suakngenga'n an In lama țukțhuan bar tura kal a hun thu a rawn sawi lai chuan a ngaihtuahna ata chu a harh ve leh ta chauh a.

Valupa Suakngenga hoa tukțhuan an ei lai chuan chaw eikham lama Ramhual hoa an kum thar thlawhhma thar kai tur ram țheh tur zaupui ram zuk bih a ngaih thu chu Suakngenga chuan muang deuh chuara rawn sawi chhuakin, "ral kan nawp dai tawh bawk nen, remna sa-ui tanin Vangmual Lal leh kan Lal te hi an inbe zui ngei turah ngai ila.
kumin kan ram țheh tur lam lamah khu chuan Thangchhuahna tur sa an kai kim țhin hle e an tih kha maw. 'Zawhzawzopa' nih tuma kan pasalțha te inel thawm han ngaihthlak ka va'n chak tawh tak em" tih pah chuan Hrumcheuva leh Zakulha te pahnih chu a han melh kik deuh van a.

Hrumcheuva chuan valupa Suakngenga'n fuih chophawkna kam a rawn keu hmuh zauh chu zawi deuh supa lo tuihnih vatin, "a khaih khah! khatia keini pahnih min thawt pah zauh kher chu! kei phei hichu Pawla'n mi sai chak ngawt tawh ang chu, ka vanneihnain min la khuap hrim hi ani hawt mai ah, chuti nilose vawi tam tluk na tham hun hlauhawm hi ka tawng tawh achha chu a nih hi maw" a han ti a.

Chutia a mi zah takte pahnih infiam bawrh bawrh chu Zakulha chuan ngawi reng chunga lo ngaithlain, "a tu zawk hian nge ni 'Vakulchang' tawn hmasa che u anga, a tu zawk hian nge ni 'Seluphan' zar hmasa zawk dawn che u tih hi ka ngaihtuah awl lo asin le" valupa Suakngena'n a rawn tih leh lai te chuan, a kuta aium sawh thak la kai liah zauh pah chuan a puar tawh thu sawi sap chungin Thlengpui chu Zakulha chuan a thawhsan ta a.
mahse, a tho fel hlawt tihah chuan valupa Suakngenga nupui Roțhiali leh an fanu neihchhun chu inkai chunga hmanhmawh zeta inchhungah chuan rawn tlan lut thuaiin, "chemteii pa, kan mitang a put chhuak e an tih chu! daiah tlangval hoin an um dur dur mai e" a rawn ti ta mai a.

Valupa Nupui Roțhiali thu rawn sawi zet chuan pasalțha pathum te chu a barakhaihin, "kan ral veh atalangin kan mitladah pa pawh kan lo ngaihtuah chang ngai hlei lova, mual tam a liam hma a nan hman a ngai e" tih leh Thlengpui thawh sana chak zeta tlan chhuah chu Hrumcheuva chuan a rual ta nghal a. chutihlai chuan Zakulha leh valupa Suakngenga te pahnih pawh luhkapui zuankhum zawk paha tlan liam zui nghalin, Satbilha an khungna khawdai chhim lama Tlakpuk tia an sawi țhin chu an pan ta a.

An va thlen chuan paho leh tlangval tam fe lo inhawr mup mup tawh chu anni pathum chuan thil awmdan va zawt thuaiin, puk tuala rawlthar pakhat ruang lo let reng mai chu phawk zetin an han thlir thuak a. chumi hnuah an sir lawka tlangval pakhat, mal hliam kaw duaih chunga changpui hnah chunga tlangval pahnihin anlo kuah tun ran mai chu an zinga pa pakhat chuan kawk va chunga thil awmdan zawt tura Hrumcheuva te pathum hnenah chuan lo hrilh thuaiin, chupa chuan meng dawih deuh dai chung chuan, "Ni chhuah hma deuh mai a Țialchhuma nena kan țhiante ven thlak tura kan kal ta kha kan va thleng hma viau a.kan han thlen hlawt ațang chuan muang lova che ngham ghuaiin, mitang chaw tur chu keiman ka ken avangin Țialchhuma chu ka Fei kenlai chu ka pe a, chutihlai chuan kan țhian zan lama mitang veng tute, Piangtuala leh Zakhenga te pawh chu khaw lam panin an kal liam chiaha.kan mitang chaw tur ka phawrh lai chuan, Țialchhuma chuan kan mitang kawngkhar thingtuai sawh karah chuan a chaw ei nan tiin hnahthial pakhat chu alo rawlh lut ve mek a. a chawfun ka thehluh hnu lawka ka zikmar lai chuan Țialchhuma chu Satbilha chuan tuisik lo dilin, chauh hmel zet chung chuan puk pang chhak lamah sawn a țhu ngui bur a.

Țialchhuma'n mautheia tuisik a han pek lai chuan thilmak tak mai hi alo thleng ta phut a, a hma lawka tha zawi uai tak anga lang si khan Țialchhuma kut chu Satbilha chuan rang taka lo man pah chuan, a Fei ken lai chu a phih thlak sak ta mai a! chuveleh kei chuan ka Chempui chu Satbilha lamah chuan vai phei nghalin, thingtuai kar ațanga a kut bawr fik sak hmawk tuma ka vai luh rual chuan rang takin ka malpuiah hian a Fei ken lai chuan min rawn chhun ta a ni.ka chet hleih theihloh chhung chuan Țialchhuma chu a bana la pawt bet tlat chunga bitum leh nghalin, a Fei ken lai bawk chuan a dulah a chhun leh ta mai a. Țialchhuma lah rawlthar tihtakah 'țuanasaruhkhel' țhan mawh bawh chhilh alo nibawk nen, Satbilha te anga nunrawng leh palian, vengkeltil mi â Valtuma te tiat zet mai tan chuan dawl kung țhuaia țhuai sawp nawk nawk tham lek alo nisi! tukțhuan puar delh rual hunah meuh kha chuan kan khaw chhim daiah hian a liam daih tawh mai ani" a han ti a.

Chupain Satbilha tlan chhuah dan a sawi zawh hnu hnua, Satbilha chu umzui tu an awm tawh thu leh a lehkhalh zawnga tlan ve a țul thu, pa pakhatin a rawn sawi mek lai chuan Hrumcheuva chuan, chupa hnenah chuan Satbilha liamna hmun tak chu rawn zawt nawn lehin, chupain Satbilha liamna lai a kawh hmuh lam hawi chuan Zakulha leh Suakngenga nen, an pathum chuan thaza zetin an tlan liam ta nghal a.

Satbilha chuan a tlan mekna ngawpui hnuai chu khawilai nge a hriat tawh loh avang chuan, a sir dinglama lungpui ko chungah chuan hawi zuk zuk chung chuan a perkai ta thurh a.mahse, chuta țanga a han thlir chuan ram chin a hriat loha leiah a dinhmun derthawn zia chu hre chhuak nghal vatin, a chhuah țanna chhim chhawng mual ațang khan khaw tlak lam dai tamah alo lehluh kual vak mai ani tih chu, a chhak lawka In țhenkhat lo lang ta tlat mai avang chuan a hre hnuhnawh ta a.chutah zet chuan chak thei ang bera khaw hlat zawnga tlan nghal thuai chu a țul hle tawh ani tih chu a hriat rual chuan, a awmna lungpui chung ațang chuan rang taka zuangthla nghalin, khaw tlakdeng mual ruam lam chu a pan ta thuai a.mahse, thui a tlan hma chuan a tlanna hmabak chiah mai a patling 'aw' țeng chhak mai rawn chhuak chu ding chawt chunga ngaithlain, "ding rawh, khawi hmunah mah hian i put bona tur khawpa zau awng a awm tawh love.

Darkai val te'n i dinna ațanga mautluk biala hla khan zawng zawng an hup phui vek e, i Fei kha i dah kian nghal loh zawngin nuam i sa lo viau ang le " a rawn ti ta mai a.
Chupa rawn vauna ngaihnobeilo zet avang chuan Satbilha chuan rang taka ruahmanna dang lo siam ve mekin, a sir tin ațanga Darkai tlangval ho rawn lawr țham țham lai chu meng khup lup chung chuan a melh kual rulh rulh mai a.chutia a melh kual vel lai chuan a hma zawn taka Hrumcheuva leh Zakulha rawn chhuak lai chu thinrim khur ngut ngut chunga thlir thla zui lehin, "Darkai val te lak ațang hian put bo tum buai duh ting suh khai, rawng taka thu i vuak thlukna i pa Lal Rumvuta khua Vangmual tual a nih tawh loh hi" tih paha Hrumcheuva rawn meng thip ram mai chu Satbilha chuan a haw zual hle a.mahse, chutia a thinrim em em lai pawh chuan pasalțha a nihna ze pakhat, chiai lova hmelma te hmachhawn a thiam tlatna chu rang taka tilang ve vatin, "Darkai dai pukah nisawm lova liam min khungbeh man hi chu nang leh i bula rawlthar vakrawlai te khan a lehza in inla rul ang.Vangmual Lal fapa, Satbilha pawi sawitu nih hi a pawina inla hre lo cha cha hle mai e" a ti ram ta hmuk a.

Hrumcheuva leh Satbilha te intauh lai thlir tu chu an rawn pung sawtin, an chhak mautluk hnih thum mai chu khaw dai a nih avang chuan Lal Keihranga leh Lal Taikherha te pawh an rawn lang thla ta hial a.mahse, rei an intauh hma chuan tlangval ho chuan Satbilha chu rang taka rawn bawhbet hukin, a kerek leh a kut phuar belhbawm chung chuan Lal mual lam hawiin an vawk zawn ta nul nul a.

Lal mualah pawh chuan Satbilha chuan a ngaihtuah rukna chu a tawp nan vawikhat ngaihtuah nawn lehin, Lal muala mipui an rawn pun khawm ruih ruih laia Lalpa Keihranga leh a mualkil te, Lalnu leh a Nupui atana hnehchhuh a tum, hmarchuankite te lo ding țhap lai chu huat hmel zetin a han melh tur khuih mai a.chumi hnuah a ngaihtuahna bilh fela hlen ngei tura a rilru a siam tawhna chu rawn au chhuah puiin, "Lal Keihranga hei hi lo hre rawh khai, chhak pasalțha tei kual mai mai te tlawn kuala an ni ho puihna avanga kan țamchhilh tha zawi lai remchangah la a, dawihzep taka min lehnawp man hi ila hmu chek ang.khawi tlang Lal hnuaiah mah kei leh ka pa Lal Rumvuta te hi kan kun ngai dawnlo. hetia Sapui zima min zim lo hian i pasalțha chhuan ve te chu hriam lekin rawn nawr lut ta che, min tam hneh avang hian Satbilha hi a zam ngai lovang" a ti ta kuk kuk mai a.

Satbilha au hla chu Lal Keihranga chuan a helhin, "nangni pafa tladah dawtbawl hi kei leh ka khua te hian kan kham ta e! i sangawizawnpui tlangau Pawngduma leh a makpa Lengkunga te pawh an Sialpatuai nen mitthi khuaah an inkaih liam tak kha maw!tlangval te u, in tih tihin rawn ti teh u khai.

Vangmual Lal verther Lal Rumvuta fapa mi depde lutuk Satbilha thu valh kual dan hian ka beng a luh kham ta e" tih vin țhak pah chuan Inchhungah a lut dawn ta mai a.

Lal Keihranga chezia chuan Satbilha thindip chu a vilh luh ngan nganin, "nang, Bungkhaw Lal Sialkaia sawn lubawk, a fa dang te hmeichhia hlir an nih avanga a tlang țhut zui ve ta mai mai kha! i u Dartuahi, ka pa Lal Rumvuta'n chhuahlam leh tlaklama ui thi hnuha a hnuh kawi hrep hnu, a ni ang chiah khan nang pawh hi chhak Lal tlaw Taikherha'n a hnuk kawi ta mai mai che a nih hi maw"! a rawn ti ta tuarh a.

An Lal Taikherha hming thleng thlenga thangchhiat tum zeta a rawn lam ri chho chiah leh, diriam zeta anni pahnih a rawn țhuai tel teh fo chuan Lusei pasalțha rothap pahnih te thin chu a rawn tisa rangin, sir khatah chuan Zakulha leh Hrumcheuva te chu Satbilha hmachhawn tu zawk nih tum chuan an innawr tawn ta nak nak mai a.chutihlai chuan Satbilha chuan a mit rang verther zet chu anni pahnih lamah chuan melh phei rulh rulhin, "ka thih dawn ro ro chuan tu emaw zawk zawk hi ka thih chilh dawn e" ti a, Zakulha emaw Hrumcheuva emaw thihchilh tum ru ran chunga a ruahman rukna a bilh fuh zia chu a hre chiang ta kher mai a. chutihlai chuan Lal Taikherha leh Lal Keihranga te lah an insehruh nasain, mipui thinrim phun luai luai pawh chu an thawm a țang tawh et et hle a.

Lal Taikherha chuan a pasalțha te cho tu 'aw' țeng zet leh a thusawi lai a rawn au chhuahpui leh țhin chu ngawireng leh meng rum ram chunga ngaithlain, Lal Keihranga chu a han melh phei a.

Lal Keihranga chuan Lal Taikherha mitthawt awmze nei zet chu rang taka lo man thiamin, "khua leh tui te u, he mihring depde zetin kan pasalțha rothap zet te a cho miau mai hi kan pasalțha tu emaw zawk zawk hian chhenglet se kan ti em"!? a han ti fiak ta țhak a.

Lalpa Keihranga zawhna chu mipui zawng zawng te chuan ban phar suau suau chunga rang zeta rawn chhangletin, "Lal duham Rumvuta fapa Satbilh hei hi lo hre rawh khai, ka farnu Dartuahi kha ka fanu chunga nang pawn tharum i thawh ang chiah hian, i pa khan a chungah mipa dik ze pu eih lovin hnehchhuhna thapui meuh a ruai ve a ni tih hi mitthi khua thlengin rawn theihnghilh tawh suh ang che.

ka fapa Kapvunga chunga i chet thawh pawh duhtawk lova, kei leh ka chhungkua min mal thlura ka u Dartuahi, mitthi tawh hnu hming thleng thlenga i rawn chham chhuah avang hian, kei leh ka khua te chungah pawi lian lehzual i khawih ta e.lo ngai rawh khai, nang hi damin i chhuak lova nga, chu achhpah, pipute dung ka thul thei talo ve, khawi tlang Lal chungah mah hriam an lek ngai love' tiin Lusei thlah tute chuan an tuchhuan te tan thu min chhiah kumkhua a. mahse min thlah tute'n min ngaidam rawhse, Lal Rumvuta chungah hian ka u Dartuahi phuba ka lam mawlh ang. rawlthar ka nih laia ka lo pai tawh ka u Dartuahi chunga i pa chet lak dan kha pipu te thu chhiah hian min dal țhin. tunah zawng min dal thei ta love" 'aw' khur hlawk hlawk khawpin a rawn ti leh ta a.

Chuti taka Lal Keihranga thinrim hmel leh a thinrim 'aw' chhuak chu a khaw mite leh a nupui fanau te takngial pawh chuan an la hmu ngai tlatlo!chuvang chuan pipu te thu chhiah pawh chu bawh kana Lal Rumvuta thisen chu a chhuah duh mai chu an ring nghet nghalin, Lal huaisen leh rothap Lal Taikherha meuh pawh chuan Lal Keihranga thulak chu meng rum zet chunga lo buk chhilh hmiahin, "ni rawhse Lalpa, hlei lenna chintawk awmlo lakah chuan kan thlah tute pawhin min ngaidam ngai e" a rawn ti ram ve ta hmak mai a.

Chutihlai chuan Satbilha pawh a thil tum ruk hlawhtling inti nen, nui lui uarh uarh chunga la inhrosa zelin, "a eng thu inthawt tawn chuan nge ni, Lal pahnih te chu satlaw ai uih zawn ang mai a in phun in phun tak chu!? in pasalțha te chu tumah ka hmaah an rawn ding ngam ta lo nge ni!? in dak kual in dak kual mai ka ti" a han ti leh a.chu thu a sawi zawh rual chuan Hrumcheuva chuan Zakulha chu melh leh zauhin, Lal Taikherha chu a han mit rawn leh a.

Hrumcheuva mit rawn de nawn leh chu Lal Taikherha chuan a hmuh hmaih lo a ni tih hriat zet chunga rawn melh let deuh ranin, "Darkai tualah pasalțha Satbilha chona chhang leta er ngam an awm love! lo chhuak ta che u, tunah tunah" ti a Satbilha a rawn au leh lai tak chuan, Lal Taikherha chuan Hrumcheuva hnenah chuan inmal beih chu rem tih a ni e' tih hriat tirna mitmei chu a chhuah ta a ni.

Darkai Lal Keihranga muala chhak pasalțha rothap, patawk zet pa vantlang aia lian hret, darpheng invuah nghet muk map mai Hrumcheuva leh pasalțha rawng zet, palian leh pian tawr zetzawt, a hmel en reng reng pawha mitmeng rawng zet Vangmual Lal Rumvuta fapa Satbilha te pahnih, inthah hmasak ngei tuma an han inveh zet chu khaw awmdan pawh chuan a tu emaw zawk zawk lu chu a sun lawk a nia'nge tih turin hnim lam a rawn pan ta ruai ruai mai a.

khawchhuah chhawng lam ațanga hnahthel ro leh mauhnah leng chum chum khawpa țhawngaleivir rawn inhawr phei tup tup te chuan, pasalțha pahnih inveh mek te chet tlatna tual a rawn luh lai te chuan an pahnih chuan vaivut khu kara an inveh chu an lang lo thuak thuak țhinin, thawklehkhatah an zawn ațang chuan țhawngaleivir chu van sang lamah a invawrh kang chho luah luah mai a! chutia vaivut leh hnahro nawi inkhachhuan vir luih luih a han invawrh san veleh chuan pasalțha pahnih te chu chiang zeta rawn lang dun lehin, an kut lehlama phaw keng chung leh an kut lehlama Milulakchem keng ve ve chunga an han inveh kun dah dah mai chu, Sialpakawlh inringtawk tak chunga an incho lai ang mai an ni hial a.

Hrumcheuva chuan Satbilha phaw ken dan chu a mit de rah khawpa chianga enin, Satbilha erawh chuan a milulakchem ngawt chu a rawn melh awl lo tih chu a hre chiang hle a.chutihlai chuan mipui te lah chu ka neilo ang maia lo ngawi țhuapin, pasalțha pumraw intiat leh kum pawh inrual zet inveh mek te chu mit tla dawn dawnin an thlir țhup mai bawk a.

Hrumcheuva chuan Satbilha phaw awng hun chu la nghak zel rihin, a nakpek veilam chu an her chilh phei țan ta a.mahse, chu hun tak chu Satbilha pawh chuan alo chan lai ani tih hriat zeta rawn bawh phei vatin, vir zawk pahin Hrumcheuva bek chu a rawn vai thawi fua mai a!chuveleh Hrumcheuva chuan Satbilha chem vai tlang petek chu rang zeta bawh zui ve nghalin, a phawin a hliah loh lai, a khup hnuai chin chhawk sak zawk tum chuan a chem chu a vai tle ta puat a.

Satbilha chuan a khup zawna Hrumcheuva chem rawn de puat chu rang taka lo zuan san ve thuaiin, "i țhelh e, i țhelh e! han tum țha leh ta che pasalțha vakvaipa" tih leh rang lutuka rawn bawh chilh chu rawn rual leh nghalin, Hrumcheuva insiamrem ding chhuak chiah nangchinga a chem a vai det puat rual chuan, an bul lawka lungtum chungah chuan thisen a per ta țhawt mai a.

Chuveleh mipui zawng zawng chu thum huk chunga insehruh nghal sup supin, Hrumcheuva khel veilam, a puan venna thler phei kawk ațanga a thisen lar zet rawn baw zawih zawih chu tumah chuan an hmuh hmaih hauh hlawm lo.

Satbilha chuan Hrumcheuva țuanfum ru tlat chu zuam zet chunga nanchin leh tuma veh phei lehin, rawn veh let paha sir zawnga a tawlh apianga a ke veilam a khai zawi deuh tlat țhin avang chuan, a khel chu a sah nat sak thawkhat hle a ni tih chu a hre riau tawh mai a.mahse, Hrumcheuva tan thinrim leh nâ tawrh avanga talbuai chu khawilam a ni tlat mai! Satbilha'n a nuthurizuam hle tawh a nih tih a hriat chian avang chuan a hma ai maha nâ tawh zawk anga a tha chu thlah zual leh deuhin, a khel hliam lai ațanga nal puat khawpa a thisen rawn chhuak chu a phaw kenna lam ban chuan zuk hrut thuakin, chutia fing zeta inchawchah nana a phaw dah awng lui lai tak chu Satbilha chuan a rawn bawh ta nghal ruak a. chutah chiah chuan Hrumcheuva chuan Satbilha'n a phaw awng lam, a nak veilama a chem rawn hlawi luh thawih tuma a rawn vai hniam phei lai tak chu rang zeta zuan paha a phaw chuan lo la leu zawkin, Satbilha'n a chem thunun zo lova a vai tlang lai tak chuan rang lutukin a chem chu a mal zawnah chuan rino chak khawpin a han vai tle ta puat mai a.

Chutah zet chuan mipui te thawm chu a rawn puk nasain, a mal veilam tihrawl, khap chen zeta a vang zawnga chhum pawrh tuam chunga Satbilh țhingțhi kun tluk tluk lai chu an 'haw haw' chhilh hluah hluah mai a.mahse, Satbilha chuan pasalțha tawrhchhel zet anihna chu rilru fim zet chunga rawn thawh chhuahpui lehin, a bawp veilam hnuk titih chung chuan hnung zawngin a tawlh ta hurh hurh a.

Hrumcheuva chuan chutia a tawlh lai chu muangchanga pan phei ve zelin, mipui te pawh chuan hmun kian paha lo tawlh kian sak duak duakin țeng fe fe in an lo au hulh hulh mai bawk a.a duhtawk a tawlh hnu chuan Satbilha chuan ding chunga Hrumcheuva chu lo nghakin, a chem lek kawh pah chung zela kun chunga inring zeta lo nghah pah chuan a phaw chu fimkhur zetin a hma lamah a rawn khuap phei ta a.

Hrumcheuva pawh chuan Satbilha chu a mah ang thova tawrhchhel leh luhlul a nih ve tho zia chu a hmuh chian a vang chuan fimkhur zet chunga rawn hnaih leh hriau hriauin, Satbilha chu a sir tawn tawn ațang chuan veh tawn zauh zauhin a phaw awng hun tur chu a ngaichang leh ta a.mahse, chutia a sir tawn tawna a veh tawn zauh zauh lai chuan a rinloh zeta Satbilha chu rawn che phutin, rang zeta a kapkar zawna rawn tleng luh paha a dawr zawna a chem a rawn vai chhoh puat lai chuan, rang taka sang zeta lo zuan kan zawk paha a chem chu a hnuai lamah chuan vai thlak alo rual zui ve ta puata, a vai rual chiaha ruh tliak tuarh ri leh patling țe țhawt ri chu mipui au ri chuan a rawn chhilh zui leh ta hluah hluah a.mahse, lei a zuk rah ruala a han dinmar leh rual chiaha, a hnung lam hlam thum vela hla a veivut khu luih luih kara Satbilha țhusawp nuaih lai rawn bawkkhup phei thlawp a hmuh rual chuan, vaivut la khu luih luih kara engemaw rawn de phei zawk a hmuh rual chuan a dar dinglam sa zawk chu thlek zawkin, a kutbawr veilam chhum hmawk avanga na ti lutuk leh che hlei thei tawh lo tih inhre chunga, engti kawng pawha khawih nat tum tawh chunga Hrumcheuva lam hawia a chem a rawn thlawh vak mai chu Satbilha chuan, Hrumcheuva chezia ava hmuh rual chuan tifuh a inti hman hial a.mahse, Hrumcheuva meuh chu chuti maia tlu chi alo nilo tih chu a bula a rawn din zui nghal mai avang chuan chiang zeta hre zui nghalin, a kutbawr chhumna banrek veilam chu țhingțhi chung chuan a hmer ngut ngut mai a.Chutia na tuara a țhen chawk chawk lai chuan Hrumcheuva chuan rawn kun chilhin, "tho ta che, min han hmachhawn leh ta che" a rawn ti zawi sap mai a.mahse, milulakchem huma țanhmun han siam leh tur chuan Satbilha chuan tha reng reng a nei tawh tlat lo, a mal thler pawrh tuam kara a tihrawl chhum rawn lang phu ut ut mai te chu hmai dang var pup chunga zuk bih lehin, thisen a hlauh hnem tawh lutuk avanga a tha khur hluk hluk mai te chu han din chhuah lehna tur khawp thahrui pai a ni tawh tlat lo!

Thawklehkhata Hrumcheuva milulakchem rawn thlawk puat chu mipui te chuan au hluah hluah chunga lo 'haw haw' chhilh lehin, vaivut kara a hmai van lam hawia thal var pup chunga lei chara Satbilha lu inchhawng vu chu mipui te chuan an rawn hnaih ta tuau tuau a.

[Ngaia]

Bung-55

Hrumcheuva'n Vangmual Lal fapa Satbilha a han tlawm zet chu mipui zawng zawng te chuan ngaisang zet chungin an 'haw haw' hluah hluah chhilh mai a. Chutihlai chuan Lal Taikherha leh Lal Keihranga te pawh chuan mual laia Hrumcheuva ding ran mai chu mipui kar ațang chuan hmuh tuma an țhuthmunah chuan dak zuau zuau chunga kik dun var varin, "Lal Rumvuta fapa Satbilha hi mal thlurah tuma'n an ter phak kala hre ngai lova. thlang kan tlak hma lawk hian, ka pa tlang Sialtuiah rawlthar mai niin khua ka awp a.chutihlai chuan, Hmar pasalțha hruanghrau na zet Darkawlha nen, Saisih Lal Ngurhlira tualah an inbitum lai kalo hmu tawh a ni. Saisih leh Vangmual khua te hi Chiseh khur inchuha rawlrala inphil tawn țhin an ni nghe nghe a. hun a han kal deuh tikah phei chuan mipa ral lu kuai rual chin deuh inphil mai pawh chu duhtawk ta lovin, nunau leh tar, hmeichhe awmnem thleng thleng chuan an inphil tawn ta hmiah hmiah ta mai a. chutah meuh chuan Saisih Lal Ngurhlira chuan an chetphung lak dan chu țha ti lovin, remna sa-ui tanpuiah Lal Rumvuta chu a sawm ta a.mahse, Lal Rumvuta chuan Saisih Lal palai tirh te chu melh pawh lo melh duh lovin, beidawnga let leh mai tuma Saisih mualkil pathum te'n a sumhmun an kan lai chu Lal Rumvuta chuan a pasalțha te lo chan ruk tirin, an pathum chuan a fapa Satbilha leh a kawite hian an lo kap țhu ta hnawk hnawk hlawm mai a!chumai chu duhtawk talo fovin, Saisih khua chu chumi zan la la chuan an mualkil an thah sak takte lu khai chung chuan a khaukapin an pan ta a.chumi tuk thimțin ruala Saisih Lal Ngurhlira tuala a mualkil te lu khai thi tluk tluk chung leh, thinrim rum ngul ngul chunga Satbilha lo ding run mai an han hmuh chuan khaw mipui tho hmasa leh a hmu apiang chu hlaua tlanchhe hlawmin, Lal In ațanga Saisih Lal Ngurhlira'n mipui te ralkhel thawm bih tuma a rawn pen chhuahlai tak chuan, a mi huat ber, Saisih Lal nguthlira'n a huaisen avanga khaw mi atana a chhiar tak hial, Hmar pasalțha Darkawlha a chona thu chu Satbilha chuan lo au pui nghalin, inmalbeihah a cho rual chuan a hneh tu zawk zawk chhiah khua ah a chaklo zawk khua te chu an kun ang tih thu chu a au pui nasa mai a.

Satbilha thulak dan chu pasalțha Darkawlha tan chuan, meikhup chunga nuihtlawn chi a ni miau silo.keini lah mualkil pali te nen, pasalțha paruk hruaia ka chhungpuinu hi biha Bunglian khua ațanga kan tlang, kan tlang ban hman tuma kal kan nih avangin, ka pa Sangawizawnpui' tiin Saisih Lal Ngurhlira khua a kan chawlh lai alo ni chiah si a.chuta Satbilha leh Darkawlha han inbitum zet chu a hmuh pawh a nuamlo hial a. chuta țang chuan Satbilha tha pek nat zia leh a chetphung khauh zia hi ka hre chiangin, kan pasalțha Hrumcheua laka a tlu ta mai kha awih a har lek lekin ka hre mai ka ti!chhak pasalțha rothap meuh lakah chuan Satbilha pawhin a duh angin a chetphung a bilh thei talo chu a nih kha le" rawn tih chhuah mawlh mawlh pah chuan Lal Keihranga chuan a piah lawka ding, Lal Taikherha chu a han thlek phei a.

Lal Keihranga ka ațanga chu thu mak leh kimchang zet a hriat rual chuan Lal Taikherha chuan, meng fiah deuh kawk chung leh hmui pet fan chunga Lal Keihranga chu rawn melh letin, "kha hmar pasalțha thâ khauh zet kha pasalțha Hrumcheuva pu, a nu nuța hi a ni e!chuti nilo se Satbilha hmachhawn tur khan tuma'n Zakulha hi an dang zo hauh lovang.

Satbilha hming kan hriat tirh a ta tawh kha Hrumcheuva leh Zakulha nen, kan pathum hian kan inthawt kual ru reng tawh a.Satbilha hian i pawi lo tawklo ta pawh nise, Hrumcheuva kutzalah hian Satbilha hi a tlu tho tho dawn tih hi ka chiang daih tawh ani" a rawn ti ta mai a.

Chutia Lal pahnih te an han titi thui chho viau chu mipui sahawk su dualh dualh te thawm pawh chuan an titi chu a bawh buai phah lo hle tih hriat zeta inmelh tawn dun ranin, "alo chuti teh daih ani maw!? he thil hi nang leh i pasalțha te kam hian min la keu hmuh miah silo, kan Ral nawp te anlo thuhmun reng anih tak chu" Lal Keihranga'n a rawn tih lai tak chuan, a țawng tawp lam rawn thlawp chiah chuan Lal Taikherha chuan a 'aw' chu rawn thian leh kharh kharhin, "tlakpuk chhung thingtuai sawh khung beh tlat chunga a tan lai pawh khan, ka pasalțha Hrumcheuva hian a kutzal ngeia a thih ngei dawn thu leh, a pu phuba chu a chungah chuan a innghat a ni tih thu hi Satbilha hnenah chuan fiah zeta lo hrilh lawk diam tawhin, amah veng tute hriat loh thu rum zet alo sawipui daih tawh a.

Chung thu hrilh tur chuan zan reiah vawi thum lai Satbilha chu alo va pawh tawhin, vengtu țhenkhat hi chuan Hrumcheuva hmel an hmuh thu leh, Satbilha chu han biak lawk a duhthu an hnenah a sawi țhin tih pawh an hrilh leh thei ngei ang che" a rawn ti leh ta a.Chuveleh Lal Keihranga chuan Lal Taikherha leh a pasalțha te pawi sawitu nih chu 'thihna' a nih zia leh, an ralrel bilh valh chhunga an hlin nih chu a duhawm loh zia a hre chiang zualin, "nang leh i pasalțha te chhawn ka lo thlawp hi, thlah tute malsawmna a ni hial ta ve ang ka ti! in ral nawp te lama țanhmun siam nih chu ka thil chak loh zawng tak a ni e" a rawn ti chhuak ta hial a.

Chutia tui zeta an titi dun mawlh mawlh lai chuan, an mit sira an hma maia Hrumcheuva rawn pen phei chhat chhat an va hmuh rual chuan an pahnih chuan an titi lai chu tawp chat chung leh, nui dun var chunga Hrumcheuva chu thlek phei thuaiin, Hrumcheuva'n a kut veilama Satbilha lu a khai vu lai chu ropui ti zet chung chuan an thlir ta reng a.

Hrumcheuva chuan Satbilha lu chu pahovin țhangte an lo dawh chawpah chuan muangchanga nghatin, a iptepui banna valupa Suakngenga In lam chu a pan ta a.Chuveleh țhalai leh mipui zawng zawng te chu an tihtur hrilhchawp ngailo zeta an mahni in lam țheuhah haw nghal duakin, chuta țanga reiloteah chuan Darkai Lal mual chu Satbilha lu lama pasalțha inhawtbuk te thlir tur chuan an rawn lawi khawm leh ta mup mup a.

Chutihlai chuan Lal pahnih leh mualkil te, Lalnu te pahnih leh Hmarchuankite te pawh Lal luhkapuiah rawn chuang chhuak tawhin, Vawkkawn veng lam ațanga Silai rawn thum phei dur dur leh pasalțha te rawn inhawtbuk phei mup mup lai chu an phei thlir țhup mai a.

An rawn hnaih viau tawhlai phei chuan mipui sahawk su dulh dulh te thawm chu a ring zual tawhin, chhak pasalțha Hrumcheuva chuan pasalțha te hma chu a rawn hruai ta ngei mai a.

Hrumcheuva chuan a puan tha ber arpuinawihhlawh (kawrtawnghak) chung leh fungki leh ipte te tak te paitung leh tawngkawla leh pailung dahkhawmna ak chung chuan, a ngenchi tawnah te chuan thlang an tlak hma, chhak tlanga an awm laia milu a khai tawh te lak ațanga pasalțha khaw dai do nihna alo hauh fo tawh avanga, nula te'n arkeziak an lo ban tawh zawng zawng roh taka alo vawn țhat ve hram hram te kha a ngai te a rawn inbel lehin, tuirual a rawn tawn nghauh mai bawk.

Chutihlai chuan Hrumcheuva leh pasalțha, thuam famkima inthuam hote tiropui zual tur atan chuan, an hnung maiah chuan nula sawm vel hi tuirual tawna arkeziak khimin puandum archempai chunga an hnunga lam ve tur chuan rawn kal thle ve hnalh hnalhin, mihrang hote an lam veleha sawi thlek tur ‘tuirial’ pakhat theuh an keng far bawk a.

Lal mual an rawn luh lai chuan mipui te thawm chuan a vanglai thleng chho nghalin, Farțuah leh vaube vul vanglai inpawlh ang chuk maia ropuia pasalțha rothap te infamna famkim rawng chi hrang hrangin Lal mual a han bawh vul chuk mai chu, ropui tihpiah lama thlir chung chuan an su dulh dulh tawh mai a.

An han inpeih hnu chuan mihrangval te chuan Satbilha lu chu muang deuh dalha kal hualin, Hrumcheuva ngei chuan 'malchaw' pe tur chuan Satbilha lu chu a hnaih phei ta a.Satbilha lu bul lawka a din vah hnu chuan a Artui chhum hmin áh lawksa diam chu rawn phawrh chhuakin, a chanve a han kaih thlak hmak hnu chuan a chanve la bang chu hmet sawmin Satbilha luah chuan a phul ta mial mial a. chumi hnuah Satbilha lu an dahna țhangte bula 'lampei' a chawțhing tlem an dah chu a kutveilam kher chuan zuk la lehin, Satbilha luah bawk chuan a phul leh ta a.chutia a phul pah chuan zawi thawp deuh sata ral lu riamna thu chu rawn chham chhuakin, "hei veilamin malchaw ka pe a che, lamthlang i rap anga lamchhak ka rap ang. i meithal chawi kha zawp sela, keia meithal chawi chu i thin leh lungah tla rawh se" a han ti a.

Chumi hnu chuan muangchanga rawn dak chhuakin, ring fiak vin deuh țhakin 'bawhhla' a han chham zui vang vanga. a chham zawh rual chuan van lam hawiin a Sailai zen sawh khahsa diam chu kap puak nghal durin, vawithum lai a kah dur dur hnu chuan darbu tum tu mi pathum te chuan 'tuvû' hluk hluk khawpin darkhuang leh darrithumrawn te chu an rawn tum țan ta a.chuveleh tumphit tum tute pathum leh khuang bengtu pathlawi Tuaklinga teho chuan an chan țheuh chu an rawn chheu chho ve ta bawk a.Chutah le, Darbu leh tumphit pathum te chuan, “Ral hawlna in dal e, ral sial hawlna in dal e,” ti a rawn tum țanin, Hrumcheuva leh mihrang pasalțha rual te chu thatho tak, mahse zawi hnalh siin an han kal kual țan leh ta.

Rei an han kal kual hma chuan Darbu vek chuan kalrem hla dang rawn nawr zawm leh nghalin, “Siakzapau thuam ang kan do, thlangpai thlunglu kan lam e,” a rawn ti leh ta vut vut mai a. ‘Ralin sial hawl na maw e, hawlna maw e, ral chalin sial hawlna maw e,” tih Darbu hlain rawn zui chho lehin, Tumphit pathum te chuan “Ral chalin sial hawl na maw phit; hawl na maw phit,” an han ti fawn khur kual ta hleuh hleuh mai a. Chuveleh chu Darbu hla kalrem chung chuan mihrangho chuan an ke ding lam chu vei lamah khauh ang reng zawi hnalh si a theh let ve lehin, chhak pasalțha rothap Hrumcheuva ho chuan 'mihrangval te kal rem ropui', a Raldo a hnehna ni a Kumpinuin a Sipai țha chungchuang Knight te chawimawi nana khuangpui leh Laipui, Tawtawrawt ri thum ber ber te nen, Baza kalremna an thawm chhuah ropuina leh chawimawina ai pawha lem bik chuanglo chu an tan ta a ni.

A rei deuh deuh va, Hrumcheuva leh a hote pawh an lam uar zual ta tulh tulha an ri ta vut vut mai a. chutihlai chuan an hnung lama Nula rual rawn lam te lah chuan an han intheh uar deuh changa, an puanbih kara an kețhiah thlawp chho ril zawk rawn êng leh zauh țhin te chu pawi tihna leh khawilai vawk kawngțum kar vel emawa, an ngaihvarungțhawn te sava veh turin an thing phur haw lam an nan fuh changa, Pawla sai hman loh nih tum ran chunga an kakpui han hnawn sak deuh zauh tuma an han keuh kak luih deuh huang huang chang pawha vawih tuarh tuarh khawpa anlo țang let ve ang maia an puan bih te chu siam țhat thuai thuaia han țan deuh țung țung chu tum tawh bik hek suh! a lo thlir tu putarte te te chen chuan "siali i chawnbanin ka vaibeldawn țan pek a ti nâ awi maw sî, i puanfem kha hnawl kiangin i kakpui thleng thlengin min thawt la chuan e, ka chhungpuinu khawivahlawi rang chu hawih te'n ka bel tawh lawng'nge" tih mena men phawk hra paha an puanven kar zen chung chuan an 'theisa-um' te chu an hum far tawh mai a.

Chutihlai chuan mipui zawng zawng lah chuan mit tla lek leka thlir chung leh au su dulh dulh chunga mihrangval te lam lai chu lo au țang zual zelin, mual laia Satbilha lu chu 'țawngriam' chi tinreng chhak chhuakin anlo riam bawk a.

chuveleh an au thawm karah chuan Silai hlo hlang sawh muk lo kap thum dum dum ri, pawr fe a chatlak lek lova inzawm pat reng chu a rawn pawr chho nasain, Satbilha ka chhung leh a lei te chu chung an Silai kah hlo phuhna avang chuan a tawm dum ten tun mai a.

Chutah, an khuangpu Pathlawi Tuaklinga chuan, thle deuh hâ chung leh rui meng phelh si deuh phan tawh chung chuan mual laia Belpuia an zu thlum țha zet hun êng kûk mai, a fê pawh kuttum tiat lek lang nal nal tawh chu a kutzungchal chuan kawk deuh vain, "mihrangval te u a thlum țha țha kha khiat tawh u khai, kan belhlai Lal Keihrang parzu kan tlan a lawm le" tih pah chuan a kik thlê zui van van mai bawk a.Chutia an khuangpu bengvar thu rawn chhuah thawm an hriat rual chuan, mipui te leh mihrangval te chuan Lal luhkapui lam chu thlir phei nghal dualhin, Hmarchuankite pawhin a mit fukna Zakulha chu a hawisan ve ta hrama.

Tah chiah chuan Lusei ho nunze mawi zet rawn lang chhuak, pasalțha huaisen dai lo do hmasa țhin tute chawimaina hun chuan an hun tawn mek chu rawn bilh mawi lehzualin, Lal Keihranga leh Lal Taikherha te pahnih chu an țhuthmun ațang chuan kechheh pai deuh há hâ tawh chunga rawn pen chhuakin, mual laia zubelpui inhung tling êng kuk mai chu an rawn pan phei dun ta chhat chhat a.

Chutah zet phei chuan mipui au su dul dul te thawm chu a rawn țang zual chho leh nghalin, an hun hmasa lama Lal tlang țhut tur nichung pawha pasalțha Rallu khai thei ngat an nih a hnu hmanah, Sialpa ngata Rallu ai tawh an nihna chu Lal pahnih te chuan rawn lan tirin, "lu chung e, thlang vapual e, her law luai samah e" ti dun vang vang chung chuan zubel chu an han thal hmasa ta ber a.an zuno ve ve an tlak hnu chuan zu chu an pahnih chuan thal leh nghalin, Hrumcheuva chu Lal Keihranga chuan a ko ta lauh lauh a.mahse, an chetphung lak dan avang chuan Hrumcheuva chu lamtual ațang chuan put chhuakin, mipui zingah chuan a relh pil ta daih mai a.chuveleh tlangval inhawr khawm te chuan rang taka va um zui nghalin, Lal pahnihte awmna ah chuan sep vuh vuh chungin an rawn zawn lut lui ta luih luih mai a.chuveleh Lal pahnih te chuan an zuno chu Hrumcheuva kutah chuan hlan nghalin, Lusei pasalțha nopui dawng tawh zawng zawng te'n anla tawn ngailoh, Lal pahnih te kut ațanga a ruala 'chawimawina nopuih' no hnih dawng thei awmchhun nihna chu a chang ta luah mai a ni.

Nileng țhaka Satbilha lu an han lam hnu chuan, khawthlang tlangdunga Ni liam tur zung inkhawh thlur sung mai chu Lal pahnih te chuan an han thlir deuh vut vut a. chumi hnu lawk chuan Lal Keihranga chuan Satbilha lu chu senghawi a hun thu rawn au puiin, mipui te'n Satbilha lu awmna lam an pan sung sung lai chuan hmeichhia, naupang leh tar te chu an țin țan ta a.

Satbilha lu chu tlak lama an vui hnuah Thingtuai banpuam tiat velah an tar dak vuha lungdawhah an sawh phun ta a. chumi hnu chuan Choak leh Mu te tlan ral turin kawtchhuah thingkung pakhat ‘Sahlam’ ah an khai ta a ni.Chumi zan zanriah ei kham hlawt ațang chuan Lal In thawm chu a țha leh tawhin, Lal pahnih te pawh an țawng thlah a nuam dun hle a.

Hrumcheuva lah zuno tawktu a ngah tawh avang chuan meng deuh sap tawh chunga nui leh var var țhinin, "tunah zawng Lalpa Keihranga zarah ka pu phuba pawh lam fel ve tawhin, Satbilha ruang pawh lei daiah ka chhilh fel ve ta e.ka phuloa liama țum khatah kan Lal pahnih te'n chawimawina Nopui min hlan ta hial mai kha ka Thlan thlengin ka chhawm tawh anga, Pialralah țhian Keikawla ka leh ngei ang" a han ti a.

chutia Keikawla hming a rawn lam ngat chu midang zawng chuan ngawi țhap chunga lo ngaithlain, "kan thinlungin Keikawla chu a hran san ngai lul lovanga, Lusei hnam te tana chhak nawrtu a nihna hi chawimawina nopuiin zui teh se'ng" rawn tih charh charh pah chuan Lal Keihranga chuan a zuno chu chung lamah a han lek chho va va a.chuveleh midang zawng chuan an zuno țheuh chu an chung lamah chuan rawn lek chho ve dialhin, pasalțha Keikawla hmingin an han intawk kual ta sap sap a.

Lenglen hun a han thleng chhova tlangval tam zawk pawh Zawlbuk ațangin meichher nen an rawn inchhi de sap sap tawh a.

Lal In pawh an titi a kairual țha bawk nen, naktip maia Lal Taikherha leh a mite inkhawr hrang tawh tur chungchang te nen an sawi kai ta zela.

Lal pahnih te chuan lawmthu te inhrilh tawnin, "naupang tualchai thawm nen lama inbengluh phak lek tura inhnaiha kan tlang țhut ve ve kan rem fel tur hi a thlamuanthlak ka tiin, Sapui leh Ral kut ilo pawh kan nawpza zel thei tur hian, chhulkhatkual ang mai min nih tir ta hialin ka hriat tak chu!

Lusei Lal dang belh tur haihchhama ka khua te nen kan vakvai lai minlo lainata kan chunga țhat i chhuah hi kan vanneihpui teh zawng a nih hi le, kan dam khawchhuah theih nana khuanu ruat ilo nihawt e" tih pah chuan Lal Taikherha chuan Lal Keihranga chu nui var chung chuan a han en phei a.

Lal Keihranga chuan Lal Taikherha lawmthu kam rawn chhuah chu zawi deuh sapa lo chhang ve vatin, "a khaih khah khah! kan lawmthu hi a inrul tawk thial a ni e, nang leh i mite hi awmlo ula chuan ka fapa thla kha a chawl ngai lovanga, chu achhapah, Vangmual ralho lakah khan kan Darkai khua hi khawram a changin, thansarah kan zam ral vek tawh ngei ang le.

Lalpa, kei aia kum chhir thui tawh i nihna hi chawi zuiin u zawk chan chang la, ram valh khat chhunga Lal unau, chhawn khauh taka inthlawp tlat te tiin, chhuan lo awm lehzel tur te pawhin kan hming hi rawn hrilhfak zui tawh teh se" a rawn ti ta charh charh a.Chumi hnu chuan mualkil te leh pasalțha rual zawng zawng te chuan Lal pahnih inkawm dun thusawi chu rawn buk chhilh zui sap sapin, an țawng nuam țan bawk nen, țawng hmasa nih leh thupui vaw kai hmasa tu nih chu kik van chung chuan an inchuh ta nak nak a.chutah chiah chuan Zakulha pawhin a thu vei veng veng țhin chu a dawng tu tur dik tak hnena, khunkhan zeta a hlan theihna hun țha chu a inhawng chho țan ta tih hrethiam nghalin, Zawlbukah a dumbawm a theihnghilh thu leh va la tura kal a duh thu Hrumcheuva bula sawi sap pah chuan, Lal In chu kun deuh da chung chuan a chhuahsan ta țham țham a.

Zawlbuk lam pana thui a kal hma chuan a veilam dai tam lam hawi chuan put thlain, mualkil Pengkuala In lam chu a lehpan phei ta zauh a.ava thlen chuan inchhunga Chawnglalpuii țhiannu Sialkungi'n amah chauha in nghah paha la alo kai dalh dalh lai chu nel zeta pawh nghalin, "chhe hei! i mal tlat lai ka'n bih fuh hlauh che chu ka vanneihna ai ni chek teh se'ng, tun țum chu kan sa chan kan hlah em tawhlo turah i ngai te'ng" a han ti lut var a.

Chuveleh Kungi chuan Zakulha chu nui var var chunga lo chhanglet ve varin, "ka pu te inah ka nu leh ka nau te pahnih an liam chiah kha i rawn tawk lai ta pek lo maw!? a ki hreu leh Ral lu chauh i kuai thlu țhin emaw tih laia, a lu mam lam lam i hawi ve țan riau hi zawng thup sen loh hun kan la nei ngei ang maw le!chu achhapah, nang nen kan inkawmngeih ta riau hi thup rih ila duh miau sia, ti tawh, ka lawm te an rawn inpal luh hmain Lalpuii chu iva hel leh teh poh ang hmiang" tih pah chuan a la kaih lai chu thawhsan pah chuan Hmui chu a han dah țha sawk sawk a.

Mualkil Dawla pa Inhnuai thlang lama Zakulha leh Hmarchuankite te țhu dun ran mai chu Thla êng chuan a chhun pha teuhin, an piah lawka Kel bawk khawm laih te bul lawka Papui inkhai phen lama phei chu Zakulha chuan a han rawt a. Chawnglalpuii lah chuan Zakulha rawtna chu han zawm ruak ruak mai chu a hreh vein, zak sen țan țan chung chuan che eih lovin ala kun tlat mai a.

Zakulha chuan Thla engah chuan pawn lam ațanga an lan mai chu a hlau bawk si, hmuiphun deuh sap sapa sawm nawn leh țhinin, Chawnglalpuii kun tlat lai kut dinglam chu dimtein a han vuan ta da da a.chuveleh Chawnglalpuii zak lutuk chuan lehlam hawi chunga a kutphah dinglam chuan a hmai chu hup vatin, Zakulha pawhna lamah chuan a han tawlh phei ve ta hret hreta.

A duhna hmun tak a thlenpui hnu chuan Zakulha chuan, a rilru zawng zawng chu chhungril khur titih deuh dat dat chung chuan zawi deuh sapa hrilh nghal sap sapin, "Kungi hnena ka ngaihvarungțhawn bih viau tawh che tih ka rawn hrilh tir che kha ila hria anga, khata țang kha chuan ka thinlung zawng zawng leh thisen luang lai te chen hian, i hming hi an lam fo țhin a sin Lalpui.a ni tel hian i zun phurh suai hian min zem na telh telhin, zaman hmawng ang min phuar tlat tawh a nih ber hi le!i biahthudi ngena hun ka chhir liam tawh hi engtia rei nge hre ve mah suh la, hawihten ka hmangaihna tlawm tak hi ilo pawm ve a nih ngai chuan, khi chhawrhthlapui hming khian rinawmna danglam ngailo tur chu ka tiam nâ'ng che" a han ti a.

Zakulha thudi hlan chu hmarchuankite chuan hnar har a tiin, chhandan erawh a haihchham hle tih chu a chezia a țang chuan a lang chiang hle a. chutihlaiin, a lo duh rukna rawn lian zual sawt sawt chuan a thinlung ril ber lai chu a rawn nawr na ve tawhin, lei la bih ran chung chuan a thaw dep dep tawh mai a.

Zakulha chuan chutia Chawnglalpuii ngawi dak mai chu muangchanga tawlh hnaih leh sauhin, dimtein a han kuah ta nge nge a.chuveleh Chawnglalpuii pawh chuan tim deuh tak chunga rawn kuah let vein, engmah la sawi ngam ve rihlo mahse, a chezia chuan hun rei tak ata tawh alo ngaih ruk ngawih ngawihna chu a lan tir ve ta a.

Chutah zet chuan Zakulha lawmna chu a sang zualin, hun rei tak hmuhfal tuma Kungi tira alo hel tawh, mahse hun remchan lohnain a bawh chhilh zel avanga beidawng lek leka a awm fo tawhna te chu ngaihtuah letin, Chawnglalpuii chu a han kuah nghet sauh sauh a.mahse, chutia a han kuah ngheh rual chuan an bul lawka Herawt hlui intung chu nghawk thlu palhin, ban thlang deng ri dawt khawpa chu Herawt a tluk thlak rual chuan inchhung lama a tunu awia zai diai diai lai, Dawla nu chuan chhuat chu rawn perh thum deuh dat dat pah chuan "khah khah, rangi i note laihrui kha i delh thlawn reu reu ang ka ti, che setsut reng suh khai" a rawn ti deuh țhat țhat mai a.

Chuveleh chuan Hmangaihna par thlum țha țha thliaka, lipui thuk lam lam pan mek Lusei Nula leh Tlangval duhawm tak te chuan phawk fuh hlau tak chunga Inhnuai chu kawng hran ve ve ațanga putbo sanin, inthlahlel teh mahse 'hun dangah khuanun rem min ruat sak leh mawlh sela, thlakipa danglam ngailo chhawrhthalpui ngei khian kan tiam thudi te hi min hriatpui mawlh se' ti a intiam tawn chung zelin an inthlah ta a.

[Ngaia]

Bung-56

A pasalțha rinpui pakhat Kaptuaha thlan țhut ni chhunlai taka, a mualkil te nena an han titi khawm zet chu Lal Rumvuta meuh pawh a țhu ngui lup tawh mai a.rei an țhut hma chuan a pasalțha khaw nghaka an dah ber țhin, tha uai lam tawh leh tumawng pawh beng hial tawh Rangzika leh Sawiluaia te pawh rawn thleng tawhin, "Lalpa, kan chhawn lek danin ram mite pawi a tawk ta a nia'nge tih hi Luaia nen hian kan pawm fel ta mai e. a chuti lo sela chuan, Sawiluaia leh a naute mi sawmnga dawn te zinga pakhat tal mit hian pasalțha Kaptuaha man tu tukkhum phe liam tal hi chu an hmu ngei ang le" Rangzika chuan a han ti a.

Pasalțha Rangzika kam chhuak chu Lal Rumvuta chuan awiha pawm fel ve tawhin, mualkil te'n Kaptuaha mi hruai te pahnih Lengchuha leh Dengluta te chin biha let leh tura tlangval engemaw zat tirh liam leh an rawn rawt pawh chuan a hnial ta riau mai a.rei iak an han sawiho hnu pawh chuan mualkil pakhat, Tlanga pa nen chuan țang dun tlatin, "pasalțha daido ni hial tura kan chher hriam mek, Lengchuha leh Luta te hi an thih an dam han bih pawh chu țha hle mahse, mipa inti ve ta na na na chuan an la dam anih nak nak chuan khua hi anla rawn inham kai leh mai turah ka ngai e.tlangval leh pasalțha tih tham alawi kan nei tawh silo che u a, ala bang zawng hi chu ram mite kuta barh luh lehzel che u hi ka remti tawh lo a ni e" tih pah chuan Lal Rumvuta chu a meng tur khuih tawh mai a.

Chutihlai chuan mipui zawng zawng leh tlangval la awm chhun te chu Lal mualah chuan rawn inhawtbuk luih luihin, an chaw mumal ei lo rei tawh lutuk zo lovin kawțhaloin a hmeh avanga an fa naupang te te leh tar chaklo te lu an phum ta fo mai te, purchawa tlang dang Lal te tlang kai an duh thu nen, tlangval leh pasalțha la awm ang ang te pawh Lengchuha leh Luta te pahnih zawnga tirh liam nghal an duh thu te chu an rawn aupui nuaih nuaih mai a.chu thawm a han hriat rual chuan Lal Rumvuta chuan a thu lak duhdan leh mipui te ngaihdan a inanglo tih chu hre thiam nghalin, a khaw mite nena an inkar chu a chhe chho ta tih chu a hre chiang ta hle a.mahse, a mualkil pakhat fing phakar zet Tlanga pa nena an sahimna tur anlo ruahman lawk diam tawh anga thulak zui zel chu tum lui tlatin, luhkapui sangah chuan mipui te zap dai tur leh thunun tur chuan a ding chhuak ta a.

Chutia an Lal rawn dak chhuak ta chu mipui te chuan a rin ang chiah chuan nasa zawka lo au khumin, thiam tak maia an hnena ngaihdam dil der vel chung chuan "ka vuavang te inbenbelna tlang, lungper tlang leh sialțum tlang lamah buh bal an hnianghnar tih ka hai hauh lova, chuvang chuan, kan tlangval tirh te rawn let leh hun tur chu vawiin thimchhilh hun hma lam lam hi a nitawh turah ka ngaih avangin, tumah țam chhilh buai hlauin i buai tawh lo te'ng u khai.kei In Lalpa hian engti kawng mahin ka thlahthlam dawn lo che u a, naktipah chuan Sialțum leh Lungper tlanga purchawa kal tur, kan khaw pa viak țha țha kan tir chhuak tawh dawn e" a han ti ta lung lung a.

Chutia a mite a han thawt vel takah chuan, mipui te thin tawt dai chho ta chu nuih ruk tut tut pahin inchhungah a luh san ta a.mahse, inchhung a han luh ruala a hnung maia mualkil pakhat rawn kai ve chiah, Khenga pa thu rawn sawi avang chuan an vai chuan phawk zeta inmelh kualin, "kan khaw țhenawm Puktlang khaw pa pahnih, thirdeng Ralchawla leh Thangbawnga te hi a khual a tualin kan hre chianga.hriam ilo chherna atan tia Țhi fanga Thirhlum thleng tur zawnga khel lova țhal khaw nawm apianga Lal tlang sarih te hrut kual reng renga tei kual an nih pawh kan hria alawm maw!? an sawi hi ka ringhlel ngam ta niau lo mai e ka ti! tun țum an thirhlum thleng tur zawng rawn haw lam pawh ka In bawk an rawn lawi haw leh ta ngei a,naktuk thimțin ruala kan khua hi chhuahsan leh mai an tum ani awm asin" a han ti charh charh a.

A mualkil Khenga pa mi sawi te chu tumah chuan hai hlawm hek suh! chu achhapah, Puktlang khaw Thirdeng Ralchawla chu pa khual bawm ak naran a nih loh zia an hre chiang lehzel nen, a dan pangngai te a tun țhal chho pawha hriam chher tur thirhlum zawnga khaw hrang hrang kaia, a makpa Thangbawnga nena an tei kual paha an thu rawn hriat pawh hi dawt mai chu a nih an ring talo tawp mai.

Lal Rumvuta chuan vin deuh țhut leh 'aw' khur hluk hluk chunga a sutban chu vuanin, "rang takin Khenga pa Inah chuan va kal ta la, Puktlang khaw thirdeng Ralchawla leh a makpa chu va ko vat teh khai! he thu meuh chuan ka hnuk ava luh na nghut nghut ta ve" tih pah chuan Tlangaupa chu a han melh tur ta khuih a.

Puktlang khaw thirdeng Ralchawla'n thil awmdan a han sawi fiah lehzual takah meuh chuan, Lal Rumvuta leh a mualkil te chu thinrim zet leh rilru buai zet chunga inhrosa hlawmin, "Pasalțha Satbilha lu chu Rallu lam uar zeta riam zuiin, khaw tlak lam mualah an vui ngei ani tih kan hria a.

chuvang chuan, keini putu pawhin Darkai ho Rallu lam inhawtbuk lai chu han pawh ngam hek lo i le! an thawm kan hriatna dai tawn tirh ațang chuan rang taka khua chu chhunpelhin, Vangmual hi chawl lek lovin kan rawn chhir zawn ta ngat ngat mai ani" a han ti leh a.

Lal Rumvuta chuan Puktlang khaw thirdeng Ralchawla thusawi chu rinhlel rual a nih loh zia chu chiang taka hre lehzualin, "Taitea thla chu kei leh a nu hian kan thlah angai ta mai maw!!? mualkil te u, insiam ula Darkai ho hian Chemhar chhuah tuma kan tlang an rawn kai hma hian rang takin Sialțum kan pan angai e" a ti khur ta hluk hluk mai a.

chuvelh a thu hriat avang chuan Lalnu chu a lo mangang tawhin a țap chhuak hawm hawm mai a.mahse, mulakil te ngei pawh chuan an hun tawn chu an Lal te pafa buluk leh suahsual vang vek anih zia chu an hre chiang hlawmin, mualkil Tlanga pa erawh chuan an Lal Rumvuta chu ala țan hle tih chu a hmelah chuan a lang chiang hle a. chuvang chuan Lal Rumvuta chu tawlh hnaih hrut paha hrilhru leh zukin, "mualkil dang te hnenah hian naktuk thimțin ruala khua hi chhuahsan vek tura mipui te hnena thawt kual turin chah la.chutih hlan chuan, kan tlangval la awm te leh pasalțha te hi Lal inah ko ila, chuta chinah chuan kan thu valh pawh zih dan kawng hi kan dap fu thei ngei ang" a han ti sup a.

Chu mualkil thu valh kual dan avang chuan Lal Rumvuta chuan meng tang hru chunga mualkil ho lam chu rawn melh kualin, "tunah meuh zawng kan Vangmual hi kan țau țeh san lo thei ta love! naktuk thimțin ruala ka vuavang Lal Chalruma tlang Sialțum kai tura kan inchhir chhuah a ngai e.he thu hi thawt kual turin zanin hian invaiin veng tin hrut ula.Lal In pawh rawn kai leh tawh lovin mipui te insingsa lai chu vil zui nghal tawh u khai" a ti ta a.

Chumi zan chuan Pasalțha thâ la khauh deuh Rangzika leh Sawiluaia te pahnih chuan, tlangval ho zinga chhawn khauh deuh tura an ngaih mi sawmhnih te chu Lal Rumvuta leh mualkil Tlanga pa te thu zuia Lal Ina ko khawmin, "le, kan Vangmual khaw dai hum tlat țhin tu tlangval te u, kan țum thlah lakdan fu lo avanga kan tlang kan rauh san rih tur hi pawi intih ve hle ka ringa.

kan thlah tute meuh pawhin, 'sawm thah ni ah pawh vawikhat lungngaih a awm chawk e' anlo ti mathlawn lovin, loh theih lohnain min ur thluk tak hrimah chuan ka vuavang Sialțum Lal Chalruma kan bel dawn ani.mahse, Sialțum ațang hian belrawhmualah Sangalkhawnghrangin kan inpu hrang leh tuai turah inngai ila, chumi hunah chuan ka fapa phuba hi Darkai khua te lakah hian kan lam leh ngei tur a ni" Lal Rumvuta chuan a han ti a.

An Lal thurawn keuh chu an thu lo hriat ruk tawh anih avang chuan, an vai chuan an remti tlang ani tih lantir nana lo buk chhilh nghal sap sapin, "tâmah tluk hlum leh țamchhawl ilo tawk thei kan nih dawn avangin, nangni ho hian nunau leh tar, hmeichhia te leh a khup uai apiang in thlawp zar zar anga.

Ni khatah kan ban hman lo anih pawhin, naktip behliangmun hunah chuan Sialțum tlang chu kan kai hman ngei ang" Lal Rumvuta vek chuan rawn tih leh pah chuan mualkil Tlanga pa chu thim chin lam ațang chuan a han kiai zuk a.

An duh ang chiaha Lal Rumvuta leh mualkil Tlanga pa te'n an pasalțha leh tlangval te an han hmin zawha an țin hnu chuan, Vangmual veng tin mai chu Darkai pasalțha te an rawn thawh thut hlaua tlanchhe tur insingsa thawm, an ro țha neih ve ang ang Thula khung khawm leh an ran te man khawm buaia buaiin an ri chil chel reng mai a.chuti taka an Lal thu keuh dan chawpchilh teh thut avanga buai ta na na na chu zan khaw thim pawh sawi theih nitawh hek suh! tualah te chuan an Vawkpui no hruai lai man tuma Pa țhenkhat hlawlhrawk nena tlan khu luih luih tawk lah bo lo!naupang te chen chuan mut zai rela chhing diak thei reng reng an awmlo mai a. ani lah taka an pasalțha rothap ber an thah tawh ber ahnu hmanah, Vangmual khua hi Darkai ho hian an rawn luhchilh dawn ngei nia a lan loh theih loh avang hian, an Lal Rumvuta hian a fapa sun mangan pawh sawi lova rang taka inkawi chhuah a rawt pawh hi a mawh love.mahse, he a ruahmanna phena a mualkil verther zet Tlanga pa nena an thuruk valh duhdan hi a khaw mite hian an hriat hun chuan engtin tak ngai ang maw!?

A tuk thimțin ruala an ro neih ve ang ang te phur bawr lik lek chunga mipui te'n Lal mual an rawn lawi khawm hat hat lai chuan, Lal Rumvuta te chhungkua leh mualkil te pawh an inpeih tawh hle a. tlangval leh rawlthar zawng zawng te chu pasalțha ho chuan leilung ala lan chian loh thu hrilh paha meichher chhi vek tura hrilh kual lehin, mipui te chu an Lal thupek angin țhuang li ah an țhen ta a.chumi hnuah țhuang tin chu rawlthar Ral pawh la nawp ngailo mi sawmhnih bawr vel zel te ho tirin, mualkil Tlanga pa te chhungkua tih chauh lo chu a mualkil dang zawng chu țhuang hrang hrangah Lal Rumvuta chuan a sem darh leh ta a. a duh ang taka mipui te a pasalțha te'n an țhen hran vek hnu chuan Lal Rumvuta chuan zawi supa a 'aw' chu rawn thianin, "kan hun tawn mekin kan Vangmual rauh san rih tura min nawr lui ta mai hi kan hamhaih tlang hle a ni tih a lang kelh mai a.chu achhapah, khan khata Sialțum kai vek tura inkawi chhuah dul dul hi Sapui leh Ral kut tawh palh iloah buai a zual duh zawk dawn riauin a rem țeuh lo viau mai a. khan hrang hrang ațanga kan luh loh chuan a huhoa inkawi huk hi chu thukhat vuak te pawh a har duhin, kan tlangval te'n an ven sen loha lo tla fal te kan awm ta dah dawnin a lang reng mai si, tar leh naunawi khup uai hma tur deuh te inchhui fuh a awlsam zawk dawn avangin hetiang hian țhuangli ah kan inkawi hrang dawna. tichuan, Țhuang tin ami te khan kan chhak Hruiduk tlang khi kan tin zawn țheuh anga, khilai tlangah khian zanin hi kan riak anga, khita țang khi chuan Sialțum chu chawhma chhir bak a nih tawh loh avangin a huhoin kan kal tawh dawn a ni" a han ti a.

A ruahmanna anga a khaw mite an liam hul hul tawh lai chuan zan lama a mi koh khawm te, tlangval sawmhnih an thlan chhuah te leh pasalțha ho zawng chu an chhungkua leh mualkil Tlanga pa te chhungkaw veng tur chuan a chelh ta hmiah mai a.chung ho lah chuan an Lal leh mualkil Tlanga pa te pahnih thu bilh valh dan chu hre hlawm hek suh! "ka unau Lal Chalruma khua Sialțum ațanga kan inbawk hran leh hunah chuan, nangni zawng hi mualkil leh ramhualah ka siam vek tawh dawn che u a, Vangmual tlanga mițha thli al liaka vengkeltila inbawk țhin kha kan khaw tharah chuan, mițha mualkil, Vanlungur khuangchawi thei parawn inlo nitawh ang" tih pah chuan a han khi sung a.

Mipui te an han liam fel duak hnu chuan Lal Rumvuta leh mualkil Tlanga pa te chhung bil chu chung ho venna hnuaiah chuan inkawi chhuak velehin, pasalțha Rangzika leh Sawiluaia te chu sulsu tu leh tlangval ho te thununa, an chunga hotu atan chuan Lal Rumvuta chuan a ruat zui zat bawk a.

Țhuang thumna te chu an naunawi bawk nen, ni tlak dawn ruaiah te chuan naupang hote chu an țap fap fap hlawm tawh mai a.chu achhapah, an mahni ho tura an mi ruat te lah chu rawltharah pawh kum la naupang tak tak an nih avang chuan, an kuta naunawi leh tar, hmeichhia te nen mi sawmruk lai awm te chu theihtawpa pui ve in, an hriam neih ve ang ang, Fei leh Thalngul te chu an lek ve far mai a.mual leh tlang an chhir liam ve nual tawh avang chuan an ban tum tlang, Hruiduk tlang chu an zinga mualkil upa pathum kal ve te chuan an kai hman an ring talo hle a.chuvang chuan an awm mekna ngawpui hnuaiah chuan riahbuk suala ramthei leh zungpil ilo zawna inhnawh puar mai chu an rawt ta a.

Mualkil upa pathum te rawtna an han hriat chuan rawlthar hote chuan rang taka buk hmun tur biha kal kual nghal thuai hlawmin, tlangteveuh hnuai mual pharh deuh derh dawrh leh zoluite luang dam zet awmna chu an bel tlang ta a.mahse, meipui te chhepa an han innghah fel hnu lawkah chuan, an thlang tlak lam, kawr duk thim thla zet ațanga patling 'aw' țeng fe maiin 'bawh hla' chham chunga a hote a fuih tuarh tuarh ri chu an vai mai chuan phawk zetin an ngaithla ți ta hra hlawm a.mahse, chu thawm chu mualkil te chuan khaw dang Pasalțha te inbitum tur ri niah riak ngaiin, "naute u, phili suh u khai, hla te khuaah an inum liam thuai anga tui takin kan mu siai siai dawn a nia" mualkil pakhat, Tawna pa chuan a rawn ti ta thuai a. mahse, chu 'bawh hla' chham ri chuan hlat lam a pan tlat lo! an mahni tawmna mual te zawn zawk chu rawn zawn chho hnai zelin, rei lovah mualkil Tawna pa ngei chu a hrawkbawka Thalfang inkilh tlang vuh chungin an meipui chheh bawh țek chhuaih khawp chuan a tlu ta hnawk mai a!

chuveleh an mahni vengtu rawlthar rual te chuan an theih ang anga nunau te chu tawm khawm tir ve in, lenglen hun thimchhilh chhulh tawh laia hriam lek chunga, meichher nena chulai hmuna nunau chau tak tak tawm khawm te rawn ral bawh tute chuan an nawp hneh ta biaih biaih kher mai!an hotupa Pate harh ver vawr leh sek phiar fetfawt, pavalai chauh ala ni tih hriat zet, pawisak neilo leh a pumrua phu lova 'aw' thum hniam chhar mai leh thinchhe zet chuan a 'bawh hla' chham chu chhunzawm zel chunga nunau ho chu rawn sam phei zelin, "Sialțum Sete kawlh keimah Vawmkaia fapa ral lu sarih khai Ralhnâwma ka ni ngai e. ral lu zuaha dama chhuah tu chu keiman an lu ka la ang" tia a hming chhal chung leh a hote fuihvau titih zel chung chuan a milulak chem chu nunau ho kar, an nghawng zawnah chuan a vai sen puat puat mai a! alo khing let tu, nunau hote veng tu rawlthar rual te lah chu pasalțha sawmthum chuang mah, kawlhsen leh che rang rual ho lakah chuan eng han nihek suh, chulai ngawpui hnuai chu patling leh hmeichhia, naupang leh tar te natuar țap ri te, ruh tliak ri leh inhrosa thawmin a khah khawk rawih rawih mai a.Chu inpawng samna hun chuan rei a daih lo kher mai, an hotupa Ralhnawma chuan a dinna hmuna thisen kawi zek zuk leh hliampui tuar nunau te rum chuah chuah lai chu rum em ema melh kualin, "meipui kha chhep eng thuai ula, an Thul leh puanbilh te kha dap filh pak teh u khai.

Vangmual ho hian ro țhate an hmuam țin țen hlawm tih chu an Lal ngei khan min hrilh tak kha maw" a ti thum ngal ngal mai a.

Thisen nena ruang let kawi zek zuk kar ațanga mualkil pakhat hliampui tuar la thaw feih feih chunga tlu reng Suaka pa chuan chupa thusawi chu rilru na zet chunga la hre reih ruaihin, ral hotupain a hming a chhal ruala a khaw hming a rawn lam rik kha an Lal Rumvuta vuavang, tuna belh tuma an pan mek Lal Chalruma khaw hming hi a ni tlat mai tih chu a hre chhuak ta a.

chutah chiah chuan theih tawpa rilru fim put tuma țang leh fat fatin, an Lal Rumvuta khan țhuangli a kal tura a țhen darh nachhan hi engvang nge tih chu a hre chhuak ta a.chutah, a hma zana an mite hnena an inkawi chhuah dan tur thawt kuala mualkil ho zawng zawng an chhuah laia, mualkil pakhat Tlanga pa an Lal Rumvuta'n a tir tel ve miahlo te kha a chhan engvang nge!? tih chu rang taka hre chhuakin, țhuang danga kal hote pawh khan engti kawng zawng mahin Hruiduk tlang chu zanin hian an kai dawnlo tih a hre chiang ta kher mai a.chuveleh thui pawh ngaihtuah zawm ngam tawh lova thaw faih faih chunga thle dang baiin, an Lal leh mualkil pakhat Tlanga pa te phiarrukna valh chu an mite nen chuan an dai per ta tih a hre chiang ta hle a.chu mai chu an Lal chuan ala duhtawk loh zia chu a rilruah chuan rang taka rawn lang leh zawkin, a khaw mite ro neih ang ang chu chhuh fai leng turin Sialțum pasalțha te hi alo chah ru tih te nen lam chuan a hre fiah ta kuarh mai a ni.

Sialțum pasalțha pawi zahlo zet Ralhnawma chuan a hote hnenah chuan, Vangmual khaw ho chu tlan chhuak an awm leh awm loh a han zawt vin țhat a.tumah chhuak an awm loh thu a ho te'n an rawn hrilh lai chuan, nunau la dam hram hram thisen nena inbual sen ngei nguai rum chuah chuah leh an nute ruang bawha nausen țap ngak ngak te chu thip zeta melh kual lehin, "nausen te kha khalai Khamah khan paih hlawm teh u, an chiar hiar rak ri kha ka beng hian a kham riau mai e! an thuam te kha in lip filh tawh hlawm maw? helai ruam hi chhuahsan a hun dawn dawn tawh e, hliam tuar te kha chu ti khan hnutchhiah ula thui an vak hlawm hlei lawng'nge" a han ti leh chhar chhar a. a duh anga a hote an han chet zawh hnu chuan, Vangmual ho neih Țhi leh Dar te chu a hote chuan Thul pakhatah khung khawma zawnin, chulai mual chu khawchhak hawiin an putbo san ta a.

A rawn harh leh hlawl rual chuan mualkil Suaka pa chuan thawm lo reh mit țhiap tawh chu thawlak hram hram pah chuan ngaithla kual vang vangin, a lu chu chau zet chung chuan a han kan hram hram a.mahse, nikhaw hre mang lova a leh tirha natuar rum chuah chuah thawm hriat tur leh natuar vial ngawlh ngawlh te kha hmuh tur reng reng lo awm tawh hlawm hek suh! meipui rem dul lam tawh thlar ațanga an lan danah pawh chuan an vai mai chuan an thi diak tawh ani tih a hre chiang hle a.

chuveleh a hriatna chu rang taka rawn fim leh zualin, a nupui fanaute kha khawnge an awm tak!? tih te, mualkil dang te leh rawlthar te kha khawnge an awm zawh tak? tih te chu a ngaihtuah chhuak ta uarh uarh a.mahse, a nupui thi turin thei leh thei lova a rawn au lawm lawm thawm chu a bengah chuan rawn ri nawn lehin, an țam dawmna tur purchawk tura Sialțum leh Lungpera a vuavang tlang țhut Lal te hnena, zualko tura an Lal Rumvuta mi tirh te an rawn let ta miah lo te kha heng phiarrukna valh hual chhung hian a phihawk phiarh tawh a ni tih te chu ngaihtuah kai zelin, an Lal leh mualkil Tlanga pa te phiarrukna zet chu rapthlak a ti kher mai a.ni hnih liam ta maia khualpang satliah pahnih an Lal Rumvuta'n alo thleng ngawt mai leh, khata pakhat zawk kha an mahni rawn ralbawh tute zinga an hotupa hi ni thana a hriat tlatna te chu a han chhui let leha.mahse, chung thil te chu ngaihtuaha indawm kun reng chu thil țha ber a nih loh zia chu hre chhuak lehin, a tlukna hmun ata chu thawh chhuaha a sahimna tur hmun, khawi Lal khua emaw kai tura kal chu a tih theih awmchhun a ni chauh tawh tih chu a ngaihtuah ta rauh rauh a.

A han thawh chhuah hram hnu chuan a thlang lam mual rem deuh tura a rin lam chu pan thlain, thim zingah chuan a kalna tur dap chawpin a kal ta a.mahse, a nak hliam kaw hung ațanga thisen rawn baw leh puat țhin avang chuan a tan thui tak han kal theih ngaihna awm hek lo! a thisen a buak apianga a chau nghulh țhin chu a awmna luite kam chhehrawp hnuaiah chuan a tlukpui leh ta nge nge a.chutia thaw hle hle chunga a bawhsawp (bawksawp) lai chuan a piah țhang pik kar ațanga Thingthlavar rawn de phei pawp pawp chu mak ti zet leh thei leh thei lova va melh țawk țawkin, thli thaw eih silova chutia Thingthlavar che ta zawk zawk mai chu a thihna tur ram mite hruai tu anih ngei a ring tawp tawh a.chuvang chuan, a rilru chau tawh zet chu intipachang lui hram hram chunga siam ve sauh sauhin, a bul lawka ram mite thawm rawn lut thleng chawpchilh mai pawh chu a mit leh sulh rual chuan a mang hriat ta ruai ruai a.

Suaka pa chuan a bul lawka mi pahnih te țawng ri chu hla deuh ruih chunga hre ruaih ruaihin, "hetiang hmunah pa upa lek lek tawh hliam tuara a han tlu reng mai hi a mak teh kher mai ka ti! mei kha i chhep eng thuai teh ang khai.kan Sa um thawm lah a thehmeh pil ta daih si a, kan Sa lak aiin min zui dawn talo riau mai e ka ti" pakhat chuan a han ti zawi sup a.chutia țawngkam tluang an rawlh tak tlat avang chuan mualkil Suaka pa chuan rammi an nilo tih rin hriat leh hnuhnawhin, an mei chheh ên thlarah chuan fiahlo zetin chu mite pahnih chu a han melh țawk țawk a.

Zakulha chuan an hliam chhar pa meng â ruaih mai chu hnai zeta zuk bihin, "rei a daih dawnin ka hre ta lo riau e ka ti! heng lai tlang Lal te hi tumah inchemhar chhuah duh khawpa inhal an awm kan hre silova,keini lahin kan ral nawp Vangmual khua kan tudai tawh si" tih paha a han thawh zui țalh țalh lai chuan, "Vangmual mualkil" tia sawi zawm leh hlei thei lovin hliam tuar mek chu a rawn phun ta sap a.

chuveleh Hrumcheuva chuan chupa hmui bulah chuan a beng chu zuk dawh hnai thuaiin, "eng maw i thusawi chu!? han sawi leh teh khai, engmah hlauh tur a awm love ka pu pachang takin han inthing harh la i sawi duh chu min han hrilh teh khai" tih pah chuan chupa lu chu a han sawi ta deuh nawk nawk a.

Rei deuh tak an han bawihsawm leh hnu chuan chupa chu tlema rawn kang leh deuhin, Vangmual mualkil anih thu leh a hming te, an Lal Rumvuta leh mualkil pakhat phiarrukna valhah a khaw pumin an awh tak thu te chu chauh luat avanga hmuiphun titih tawh chung chuan a rawn sawi ta a.chu thu an han hriat chuan Hrumcheuva leh Zakulha te chu phawk zeta inmelhin, Vangmual Lal te pafa duhamna leh an pawizah lohna hi an khua te hian an hre lo a ni e.tlang țhut Lal țhenkhat te hi chuan an khaw mițha fate Țhi leh bengbeh hi thu fahrah puah chawpa, chhuanlam dawrawm te te bilh khawmin an pawng chhuh ve fova.chung te avang chuan an Lal te Țhi leh Dar aia țha nei pa awmthei deuh te pawh hian, chung an Țhi an Dar te chu an Lal te hmuh leh hriatah an pho lang duh lo fova.mahse, an ro neih an hriat ruk erawh chuan an mite ngei pawh an losul haw lam te lo thah tira ral kuta thi thana than tirin, an ro zawng zawng hi an chhuh lui mai țhin.

Vangmual Lal ang em ema mahni khaw țhut ngei, a khaw puma phiarrua an ro zawng zawng chhuh luih duhna thinlung ang em erawh hi chu khawi Lal mah hian an put ka la hre ngai love"!! a rawn ti ta charh charh a.

Chutia Hrumcheuva a phun sap sap lai chuan Suaka pa chu rawn phun leh sap sapin, "Vala te u, țhuang thum dang te pawh kha kan Lal leh Tlanga pa phairrukna valh hian a phihawk phiar tawh ngei anga, mahse, an pawi zah lohna valha kan tluk hlum man hi chu thlawn lul suh se aw. kan Lal leh Tlanga pa te thil tih dan hrilh hian khawngaihin ka farnu Lungkulh Lalnu Darmani hnenah min han zualko sak hram ru aw" a rawn ti leh ta sap a.

Chuveleh Hrumcheuva chu rang taka ding chhuak hluaiin, "he phiarruka invalh hnawk dan hian, pawi a tawh thui hma hian kan la dang hman mahna, ka pu chung ho chu khawi lam ramah nge an tlak ila hre thei em le" ring leng lawngin a han ti leh a.mahse, Suaka pa hmui phun chu hriat hleih theih a ni mang tawh tlat lo! zawi em ema, an mahni rawn ralbawh tute hruai tu chu Ralhnawma a nih thu chu rawn sawi leh hramin, a lu chu a veilamah chuan a thle ta hnawp a.

[Ngaia]

Bung-57

Vangmual mualkil ruang lainatawm zet chu Zakulha chuan inpet fan chunga bih ran chung chuan, "kan ral nawp zâl tawhte an nih ahnu hmanah, an țamchhilh tha zawi lai hriam nena la nawp lui duh khawpa pawizahlo angah Vangmual Lalin min puhna hi pai daih a har hle mai maw" tih zawih sap pah chuan, Suaka pa sam ziala a dawhkilh inthiat tle va chu a han phawi zauha.

chutihlai chuan Hrumcheuva pawh chuan a Silai leh Fei chu hmanhmawh zeta lo khawm ve thuaiin, "Lal Rumvuta hian a pasalțha thâ khauh chin zawng a fapa telin kan tukzal tawh tih hi a hre chiang hle a. chuti chung chuan hriam leka naunawi leh hmeichhia, tar thlenga a khua kai chilha rawt duh khawpa mihring nun zah lovah min ngai hauh bawklo.mahse, a nunchhiatna valh chu a mualkil pakhat nen hian kai kul lui leh țalhin, a khaw mite hi chu an thang valhah chuan thiam zeta rawlh hlum phiarh dan an zawng leh ta a.a tawpah chuan Sialțum Lal bela an țam dawm tlan mai chu rawt chhuaka chhuanlamah hmangin, a khaw mi, naunawi leh tar, hmeichhia leh rawlthar te hi khaw thar sah puia, daido tur atana hman atan chuan an tlak dawn lo tih a hriat avangin an thang valh hnihna chu tuna kan hmuh ang hian an pawt zip leh ta a ni!chutah meuh pawh chuan saihlum pakhat lek chu sava phir thlak nan la hman zui dan tur an zawng leh ta a. a khua te ro zawng zawng hi Sialțum pasalțha te kut hmanga chhuh dan tur ruahman zui leh zatin, amah leh a mualkil pakhat, a phiarrukna valh pui te chhungkua chiah hian pang himin Sialțum an kai dawn ta a ni.

Lal Rumvuta hi a fin dan alo namai lovin, a fin chhawrna kawng erawh chu a pawi zahloh thlak hle mai e ka ti!ani ang renga Lusei Lal te zinga tladah hi ka la hre ngai love"! a rawn ti chhuak ta hial a.

Ngawpui hnuai thim zing kara chetla țhang tih takah, an mahni ur thlu tu pawhna chuan a pawt nâ bawk nen, mit meng fim kalh chung leh thingthlavar ban khawm pah zel chunga chhak pasalțha pahnih te, ngawpui hnuaia an han tlan ziaih ziaih mai chu ruam tin ațang te chuan Țaumeichherchhi te pawhin an ralbawh tur rem tihpui ve niawm takin an zui de sup sup mai a.

Lo fing khat tih mai mai te chu reilo te teah chhir liam zelin, chhan tlak an la awm mahna tih hlir mai chu an ngaihtuahna luah tu chu a ni tawh a.zan lah chu a kai vanglai chho tawhin, an chhak tlangdung chung hrula thla ral lam phel rawn mawm tat tawh te chu ngawpui pan deuh na lai ațang te chuan an han bih leh zawk țhin a.mahse, zan thim hnuai ani bawk nen, Sialțum pasalțha Ralhnâwma leh a hote hnu han pawh fak chu a har an ti dunin, an hma lam khawchhak zawn chiaha tlang lian leh dur thim mup mai chhip chu an zuan kai ta a.

Chu tlang chhipa an han din zawk lai chuan an mit chu uluk zeta len kualin, ruam leh an awmna tlangbul țhut te chu an mit tlin tawka hla an han thlir vang vang a.mahse, thawm riva leh meichher de ilo reng reng an mit chhui fuh theih mai loh avang chuan, Vangmual mualkil Suaka pa kawhna lam chu an bawh zawn talo emaw ti dun ta hialin, "kan ke chhir zawn lam hi a fu talo lah nge ni!?, kan ngaw hrut lah chu a reh tulh tulh mai si ah.

kan ralbawh tur te hian khan țha te an hre bik a ni chek ang ka ti!mahse, zan khat thilah Ralhnâwma leh a naute ho hian țhuang tina kal te hi an vai hma chu ka ring talo riau mai e.țhuang li te hi a hran țheuhva an veh ka ring ta riau mai e" a han ti zawi sap a.

chuveleh Zakulha pawh chuan Hrumcheuva thu rawn keu chhuah mek chu alo ngaihtuah ruk ve mek thu rawn sawi ve sapin, "Sialțum tlang hi tuma'n an kai tur a nilo.chuti lo chu Sialțumah hian Lal Rumvuta leh a unaupa Sialțum Lal te hian, Vangmual nunau te hi ral bawh taka bawhin an lu an lâm duh hial ta ve ang" a rawn ti ve vat a.Chulai tlang chhip ațanga an chhak lam hrut chhoh leh tuma tlang bul țhut ruam pana an han chhuah leh lai chuan, Zakulha chuan tlang pang chhim thâl lam chu han bih kual paha chhak zawnga tlang bul țhut her luh leh hram chu a han rawt a.

Hrumcheuva pawh chuan Zakulha rawtna chu a pawm a ni tih lan tir nana rawn thlawp nghal varin, Zakulha liamna lam, an awmna tlang chhip hnuai maia lung hmun deuh reuh, chhim chhawng lam chu chak zetin a luh pawh phei ve ta thuai a.mahse, chulai lung hmun an han luh țan lai chuan an awmna tlang lian zet pang liam, a bul țhut phai ruam lai tak tlangdeng lan phak vuaih vuaihna hmun, țhang pik zet kar ațanga meichher de zauh zauh chu Zakulha mit fim zet chuan zuk hmu thutin, "khaih khah! kan hmanhmawh atalangin kan mi chhui te chu kan lo lehliam san daih mai alo nih khu le" tih pah chuan meichher detna lam, an awmna tlang bul țhut tlakdeng ruam chu a Silai ngul chuan a han tin kawh zawn thla deuh va a.

Hrumcheuva chuan Zakulha kawhna zawn lam a han melh ve vat rual chuan rum deuh dat paha meng fim zual deuh kalhin, "Sialțum pasalțha Ralhnâwma, pasalțha te zia chhuah lo zeta nunau te laka hriam i lek man hi chu i thisen khan a rulh ngei angai ang" tih ram hmak pah chuan a Silai kawmrek chu a hmer na ta sauh a.chutihlai chuan meichher de pawh chu rawn lan belh zelin, hmun sawm laiah chuan a de ta nauh nauh a.chutah zet phei chuan chhak pasalțha rothap pahnih te chuan thatho zet chunga an hriam te chu tuai leh deuh vat vat țhinin, ngawpui thim hnuaia Silai kah det chu ralin an tawmna chin an bih fuh awl ting mai tih chu an hre chiang bawk nen, chu achhapah, an ral bawh tur te hi a ruala kal an nih bawk si avang chuan fing zeta nawp chu a țul hle dawn tih te thleng chuan inhrilh tawn sap sapin, Silai aiah an Thalngul chu ral ho bawh nan chuan an thlang ta ve ve a.

An awmna hmun ațanga an meichher hmuh kalna lam melh khalh par par chunga an ralbawh dan tur an rel fel hnu chuan, Hrumcheuva chuan chak zetin meichher det na hnung lam ruam chu a pan thla ta a.a liam hnu lawk chuan Zakulha pawh chuan meichher rawn det zelna tur hma lam niawma a rin lam, an awmna tlang bul țhut tawpa tlangteveuh pahnih inchhawng țhiang ral lam chu pan thla ve thuaiin, ngawpui hnuai thim kar awng laia thla ral lam zung inkhawh lut thlara a dar pheng hlai hlap mai, a tlan laia rawn lang phe leh vuaih vuaih țhin chu, an bitum tur te tan chuan a țihbaiawmin amah thlur tu nih chu a thlannahawm zawk zawk vaklo ang le!

Sialțum pasalțha Ralhnâwma leh a naute ho chu an titi phung leng lâk a tui tlangin, an hotupa ralrel dan chuan hun a duh rei ngai loh zia te chu an sawi sap sap hlawma.tunah hian, Ralhnâwma leh a kawi te hian Vangmual mi țhuang li a kal te zinga an chan tur lam țhuang hnih chu an bawh mih diak tawh avangin an khua Sialțum pana kal mek tawhin, țhuang lehlama kal, țhuang hnih dang te ralbawh tu tur, pasalțha Tawnzinga leh a hote pawh an chet fel diak tawh an ring țheuh a.

Sialțum In zahnih țha țhut vengvawng hi pasalțha ti a sawi tur tamna khua nilo mahse, an Lal Lalruma makpa te pahnih Ralhnâwma leh Tawnzinga te hi khual tual thang hat khawpa chhawn khauh leh, sa lu pawh la thei leh fal nalh khawpa Sialțum pasalțha ho zinga hming chher thei an ni a.Ralhnâwma hi pa lian tia sawi tur em nilo mahse, sawi tawhin a pian leh fuke a tawr chhah tap mai a.

Lal Chalruma hian fanu pahnih chiah a neih hnuah Lalnu chhul hi a îp zui ta tlat mai a!chuvang chuan, fapa tlang chang zui tur nei talo chu thupui zawnpui tlak, makpa huaisen leh a tlang țhut zui tlak tur ngei neih tuma a rilru chu Lalruma chuan siam sauh sauhin, Selian khaw Lal fapa chuam leh huaisen, chhungpuinu kakpui hnawna fa mawng pawh beng tawh Tawnzinga chu a tlang chang tur atan chuan a awt ru ta tlat mai a.

Tawnzinga chel kawih beha phih awh phet tum ta na na na chu, a kawi te nena a Sepui chi thlah tur, Se chi țha zawnga Sialțum an rawn kai ta hlauh chu Lal Chalruma chuan remchangah lo hmang vatin, a thla thum zu tak fir fe, a lung pawh inchiah ral raih tawh ngei hmang chuan lo hrai ruiin, a fanu upa zawk Tlangțhiangi chu Tawnzinga rui let reng vaibeldawn puar luah mai chungah chuan, a kawngtui a rawn pik liam pualh thlengin a Kelpui nu hur țhut tir ta vung mai a ni!

Chumi zinga Tawnzinga han harh chuan, a Vaibeldawna a kawngtui kai khir ro inphan deuh duah mai leh, a ir khuar lai taka hmeichhe sainghobeh lo let bal mai chu rang zeta bih tawn chhenin, "kan hnam hnahthlak Lal ziding fanu te laka vaibeldawn lo lek puka, an hnute deh țan na zuia an kakpui hnawn man chu Sial tuak thum leh Darbu sarih ka tuk e, chu achhapah, sawn an pai phah a nih phei chuan, Silai fung hnihin ngaihdam an dil bawk tur a ni e" tih paha khumpui ațanga Lal Chalruma rawn tho țuah țuah lai chu a bih ta kur mai a.

Lal Chalruma thu rawn lak chhilh bilh dan chu Tawnzinga chuan rang taka lo man thiam thuaiin, "a enga pawh chu nise, kan tlang kaiin Sial tuak i phut zat leh Darbu chu ka han khawm ve mauh ang khai" tiin an inthlah ta a.mahse, Tawnzinga'n an khua Selian a thlen leh ruala a pa Lal Darbêla hnena thil awmzia a han hrilh chuan, Lal Darbêla chuan Sialțum Lal Chalruma phut ang tihsak ai chuan a fapa chu Lal Chalruma makpa nitur chuan tir ta hlauhin, a chhungpuinu chu a sazumeidawh san tir ta a.chuta țanga hun reilo te ah chuan Tawnzinga leh Tlangțhiangi te chu innei zui nghalin, Lal Chalruma chuan a tlang țhut tur atan a fapa chu a it zia leh Sialțum lama kal tir tur chuan Selian Lal Darbêla chu a biak tlawn zur ta zut a.a tawpah chuan Lal Darbêla pawh chuan Lal Chalruma ngen ang chu tih sakin, "fapa pahnih kala nei tho bawk nen, Tawnzinga hi ka tlang chang tur fa u ber a nilo bawka i duh ang chuan ni ang hmiang.

Sialțum lamah chuan an ni nupa hi chu inbengbel tak teh se" tiin Tawnzinga te nupa chu a thlah fel ta der mai a.chumi hnu lawk chuan, a khaw pasalțha thawm na zet Ralhnâwma hi a fanu naupang zawk Tuakveli nen Lal Chalruma hian suihzawm ve lehin, heng pasalțha pahnih te thlukah hian inla chhawn khauh zetin a țhu thei ta a ni.

Ralhnâwma chuan a hote chu an thlang mual pharh deuh chu pan thla tura hrilhin, "thingchangvar hun kan luh hma ngei hian Hruiduk tlang kha kan luh hman ngei anga, tah chuan Lal Rumvuta leh a mi duh bikte chu kan han fin tawh turah ka ngai e.keini ho ai hian Tawnzinga leh a naute ho hian Hruiduk tlang hi an thleng hmasa ngei turah ka ngai bawk a.Kan rallak sum te hi Lal Rumvuta chuan kan sahmim puar khawp chu a hnawh țheuh turah i ngai te'ng u khai.tumah kut ruakin kan hawlo turah ka ngai e" tih pah chuan a hote, mi sawmthum te chu kik deuh hai chung chuan a han melh kual vel a.

Chutia an hotupa thu rawn keu an ngaihthlak nuih hui hlawm lai chuan an hnung lam, an kal pelh tawh țhang pik kar rawn ri suau leh a rik ruala thum dup ri chu an vai chuan lehhawi meuha bih letin, meichher pakhat an hnung deuha lo let ngat chu an chuan an melh phawk ta hru a.chuveleh an hotupa Ralhnawma chuan a hote chu pakhatin an kim ta lo tih chu rang taka hmu thiam nghal vatin, "țan hmun siam thuai rawh u khai!ralin min bawh e, ralin min bawh e.pakchheihkhâh! khawnge keimah Ralhnâwma, rallu sarih khai ka ni ngai e" tih zui tuarh tuarh pah chuan a meichher chu hla fea khawh ên puat pah chuan a Silai chu hmuntin maiah chuan a tin kual ta thuak thuak a.mahse, an meichher zawng zawng an han paih takah chuan tumah chuan Zakulha leh Hrumcheuva te ang mit dê danglam zet chu pu ve hlawm hek lo le!țhang leh perh buk bel chunga an mahni rawn luh khung tu ral che rang zet te hmuh tuma lu rawlh chhuak hmasa sa te nghawng chu Tlahthi hlai hlep hlawp, a tawn tawna hriam zeta sui hian rawn hlawi thler hawk hawk zelin, a hote rawn țe leh țhawt țhawt țhin chu Ralhnâwma chuan thinrim zetin a dap kual ta ruai mai a.

Hrumcheuva chuan a kal hnuhnung ber a hup pil tak a thah hnu chuan, ral hoin a thawm an hriat tawk vel tur nisi, mahse an kah hman loh tawk vel tura rang chuan chak zet zetin a tlan phe vuaih vuaih mai a.chutia Hrumcheuva phe leh vuaih țhin kah tuma ral hoin an ring an han fan apiang chuan, Zakulha chuan a kutphah thlawp zaih maia a Tlahthi hmeh beh zaih mai chu na fe fe a thlawh chhuak zelin, vawikhat te pawh a tum a hlah lo hle mai a.

A chuti ta reng renga an mahni rawn bawh tu te'n an sawisak takah chuan Ralhnâwma chuan ruahmanna dang neih thuai a țul zia chu hre chhuak thuaiin, "tawlh rawh u khai, kan thlang ruamah kan thlang ruamah khuan tawlh rawh u tunah" a ti leh ta tuarh tuarh a.mahse, chutia a ralrel a thlak ruala a au lai chuan a hote chu tumah vak thawm rawn nei an awm ta mang tlat lo!ala dam awm chhun pariat te zinga panga te'n an hotupa thu lak pawh ngaichang tawh lova, hlau hlawp zet chunga ramril zawk pana an tlan liam lai chuan mi pathum te chuan an hotupa tawmna chu an rawn luh fin thei ta hrama.chumi hnuah an vai chuan an thlang ruam lam chu pana chak taka put liam thlain, Hruiduk tlang bul țhut thleng rawkin an tlan ta a.

An thla a han muan deuh hnu chuan an hotupa Ralhnawma chuan kun ngal chunga a 'aw' rawn thian kharh kharhin, "khang ralho kha iva leh bawh teh angu khai, mah reng reng se, kan nauva te lu pawh kha an la bik tur ani lo.naute u min zui dawn nge daihzep chan changa meikhup hawin in haw zawk dawn"!? a rawn ti vin ta țhak a.a hote chuan an hotupa luhlul zia leh a thinrim hlauhawm zia chu hai hlawm hek suh, chak lo teh mahse an vai chuan an hotupa chu zui let leh diakin, "mipa leh arhluisenin dam rei vak kan tum ngai love, a țul leh meipui êng thlarah inhmai bih tawn chungin ralho nen hian kan inhlep ral țhak mai ta law'ng" tih pah chuan a limin a lim puat puat mai a.

A tu amah chuan an hotupa thlawp loh chu ngam tawh hlawk hek lo le, a tlan chak leh chak zeta tlan ve zelin, a tlan muan deuh leh an tha an han thlah ve deuh diak țhina.chutia an han muan chang chuan a hote chezia chu Ralhnawma chuan thinrim zet chunga lehhawi leh zauh țhinin, "ral hlauva bibo mi panga te kha ka hmuh leh hun hunah an ring ruh ka țhuai tliah sak ngei ang le!zan thim hnuai a nih tak avanga ral bawh hreh tak riau hlawm mai!ram mite pawi kan tawkah riak an inngai ta nge ni, Phung hlauh taka hlau chunga an phe bo ta mai kha ka huat zawng a tlingin ka pawi an tawk ta riau mai e" tih pah chuan a tlan chak leh ta telh telh mai a.mahse, lofing khat pawh an tlan hma chuan an hnu rawn bih zar zar tute nen chuan ngawpui hnuai hmun thelh zet mai hmunah chuan intawk ta sakin, an hma lawka mihring ruangam cher ria țhal mai, dar pharh pheng hlai hlap mai leh a bul maia chupa aia tlema dung hniam hret, sa mum ping khat tlat mai, a ria zawk aimaha mum lian tawr tap mai lo ding dun ran mai te chu ding țhap chung chuan Ralhnâwma leh a naute pathum chuan, an chung lam ngawpui thingzar awng kar ațanga, thla ral lam zung rawn lut thlur sung mai thlarah chuan an melh tawn ta zauh zauh a.

Ralhnawma chuan chu mite pahnih hmel chu bih fuh a han tum ngial pawh chuan, a tu emaw zawk zawk hmai tlang pawh chu hmu fiah thei hek lo! chu achhapah, Silai tin kawh chunga tlan ni talo chu a ke phah lam thlawp thla a, lei lam hawia a Silai ngul hmawr lam a chhuk hawl laia ding thut a ni bawk nen, vawilehkhata rang lutuka lek kawh thut paha hmet puak thut tura inpeihsa ran chung chuan, a cheng chu a kutzungchal chuan a hawl zauh zauh mai a.a naute pathum zinga pahnih te pawh chuan an hotupa rilru chu hre lawksa ni awm taka an Silai chengah chuan an taksa thlawpa la dah chung chuan an kut chu siam rem ru ve sauh sauhin, Silai keng lo ber erawh chuan a milulakchem chu a hum ruh ve sauh sauh bawk a.

Chutihlai chuan Zakulha leh Hrumcheuva te pawh chuan tum loh zeta an hma lama an ral um pali te rawn lang țhawt chu Silai hawl titih chunga tlan an nive tho bawk nen, an Silai chu tin kawh hman bik hek lo le! chu achhapah, ral putbo ho kha mi sawm lai anla tlinga an hriat tlat avang khan, heng mipali te an han hmuh rual hian khang ho kha an nih an ring mai bik lo nen, tlang dang khaw Lal pasalțha te Sa chhui ilo an lo ral palh mai ang tih hlauh deuh thutna an neih avanga an Thal an thlah ta mai lo chu chung ho an la him na chhan chu a ni tih an hriat rual chuan, chung ho chetphung chu an mit țha zet chuan a man fu ta thuai thova.mahse, an chet lak tlawlh țum chu Zakulha leh Hrumcheuva te chuan an tawng ve ta mauh a ni tih an hriat rual chuanan Silai cheng chu rang taka an kutzungchal chuan tin kawh thut paha hmeh puah nghal zawk inring zet chunga lo thlawp ve ve daih tawhin, miparuk te chu Sakhan ngawpui hnuai thim zet kar chung lam ngawpui inphiar phui mup kar awng ațanga thla zung rawn lut khawh sung hnuaiah chuan, a che muang muang 'Phungin seh' ti niawm taka mau tluk khat kar zetzawta inhlata dingin an inhmachhawn ta a ni.

Rei an inhmachhawn hma chuan a tu lam ve ve pawh chuan an hma a awm te chu thah ngei an ngai ani tih chu an hre chiang tawn tlang tawhin, an chezia chu khaw dang hawi lek lo chuan an inbih tawn ran hlawm mai a.

Ralhnâwma chuan 'aw' ki hniam chhei chhawia rawn rum nghat pah chuan, "nangni nen hian buaina kan nei love, eng vanga min rawn ralbawh ta ngawt nge in nih!? Sialțum pasalțha ral lu sarih khai tawh Ralhnâwma kawng hi tuma'n an la kit hnawk ngam ngai love" a han ti ram hmaka.mahse, chutia a zawhna chu chhanna engmah a dawn tak loh avang chuan thinrim zeta rum leh deuh ngal ngalin, "ka laka luhlul inchhuah man chu inrul mai a nia'ng chu" rawn tih leh pah chuan a ke chu a han sawn tawlh hreta. chutihlai chuan, an sir veilam pen sawm vel leka hla a kawr duk thim zet dung zuia, a hnar lam ațanga thli rawn tleh thla hum hum mai chuan, thih țih lo țhiau chung mi paruk te inhmachhawnna avang chuan Sarthli a rawn hruai tel țan ta a ni tih hriat zetin, kawr kam thing hrang hrang zar te chu a hrut thum kual hum hum reng mai a.mahse, chung Sarthli thawm na zet pawh chu miparuk te chuan buai phah nan leh khaw dang hawi sawn phah nan an hmang lo kher mai!an dinna ngawpui hnuai hnahthelro tling ten tun sang fe fe a leng darh ur ur khawpa an awmna mual Sarthliin a rawn luh rual chiah chuan, Sialțum pasalțha Ralhnâwma kut chu rang zetin a rawn phe chhuak ta zawk mai le!chuveleh Sakhan ngawpui hnuai hmun pakhat mual zawl deuh darh lai chu Silai hlo kang dê êng chuan chhun êng kual nghal pupin, chutia a ên Pup rual chiah chuan Silai panga te chu a rual deuhthawin an puak tuarh mai bawk a.

Zakulha chuan a Silai chu a ke bulah chuan rang zeta thlak thlâk vat pah chuan, Silai keng velo ber zawn alo chhinchhiah kar lam chu a milulak chem nen chuan bawh phei nghalin, leh pawh tih hmain patling na tuar țe ruah ruah thawmin Zakulha lim pheina lam chu a luah ta ruaih ruaih mai a.chupa chuan, a Chem ken lohna lam, a banrek chung chiaha bung thi puat puat mai chu a zakhnuaiah chuan rawlh chhoin, a chem chu a mah rawn sat tupa lamah chuan a pawng vai chiam chiam mai a.

Zakulha lah chuan meng de kalh chunga chupa chu veh kual zelin, "midang zawng hi thi vek tawh mahse, nang leh kei hian kan kar hi kan chinfel ala ngai e" tih pah chuan thinrim zetin a rum khum ngal ngal mai a.

Chuveleh chupa chuan a mah veh tu, a hmel hmuh theih loh khawpa thim hnuaia a kun dah dah lai chu bawh fuh tuma rawn dawk pheiin, Zakulha lo kun lai tak lu chungah chuan a Chem chu a thlawk tlang fua mai a.chulai tak chu Zakulha chuan rawn nangchingin, a Chem vai tlang intheh her deuh lawih lai chu Zakulha Chem rawn thlawk zawk avang chuan țe tuarh chungin leiah a tla hlawm ta nawk mai a.thawh leh tuma a insiam rem lai chuan Zakulha chu a bulah chuan lo ding leh hman reng tawhin, ban khing hnih bung nghut chunga thei leh thei lova chupa mawng tawlh țawk țawk lai chu a pen hnaih phei ve zel bawk a.

A han tawlh deuh fe hnu chuan Chupa chuan țawngkam tuitanglo zet zeta Zakulha chu rawn hram khumin, an pasalțha Ralhnâwm nena an thisen phuba chu pasalțha Tawnzinga'n a rawn lam ngei tur thu nen, anchhe kam tenawm zet zet nen a rak khum nasa mai a.mahse, Zakulha chuan chupa chuan a tana chhinchhiah kar tur hming leh khaw hming te ala rawn chham chhuah a rin avang chuan la veh țhaih phei zelin, "Sialțum leh Selian pasalțha infin khawm te kut chu inla tuar mawlh ang" a rawn tih leh lai tak chuan, Zakukha milulakchem chu chupa nghawng zawnah chuan a thlawk tle ta puat a.Chupa nghawng chhum ațanga thisen rawn chik zar zarin a tlukna hnuaia hnahthelro a dir khum rik tar tar lai chuan, Zakulha chuan Hrumcheuva nena an țan lakna hmun lam chu pan phei vatin, Hrumcheuva chu a han zawng ta thuak thuak a.mahse, rei a dap hma chuan a dinna thlang lawka Hrumcheuva lo let reng chu rang zeta zuk țhut chilhin, "tho teh khai, ral kuta hnuk thlah hman ila ni love" tih pah chuan Hrumcheuva lu chu a han sawi nawk nawk a.mahse, a harh tak mai loh avang chuan a nghawng marphu leh a zak vel chu Zakulha chuan dap leh thuak thuakin, Hrumcheuva mar lo la pangngai tlat mai chu mak ti zetin a han khawih nawn leha.Chuveleh Hrumcheuva chu rang zeta rawn țhu chhuak thutin, "a eng ka ti ta nge ni!? Sa kah thlak ang riaka ka han mut phar tak huang chu ni!kan ralbawh te kha an mit zo tawh nge kan in um leh dawn"!? tia Zakulha hnena zawhna pek nghal vat pah chuan a puanven te chu a han sawi țha ang nawk nawk a.

Zakulha chuan Hrumcheuva che buai vel chu lawm tak leh hmuhnawm ti zet chunga thim zingah chuan bih deuh ranin, "kan inkah thut rual khan Pialralah Pawla sai turin i liam ve ta mai emaw ka lo ti hman a sin le!ti teh, Sialțum pasalțha Ralhnâwma leh a kawi te hnuhma saw iva bih teh ang khai" tih pah chuan, an piah lam chu a pan phei ta thuai a.

Ralhnâwm leh a naute ho țan hmun lakna an han thlen chuan, ruang pali lo let kawkalh sawp nuaih mai chu hnai zet zetah Hrumcheuva leh Zakulha te chuan zuk bih chiangin, "meichher han la kai phawt ila, reilo te thawk i han la teh ang khai" tih pah chuan Hrumcheuva chuan an awmna mual chung lam chu a pan chho ta a.meichher an han nun hnua ruang an han en chian chuan, Sialțum pasalțha Ralhnâwma ruang chuan an mit chu ala bikin, a hrawkbawk thlawh darh vek khawpa Silai mu luhna pawrh turh mai ațang chuan thisen lar zet alo la baw fap fap mai bawk a.midang ruang te pawh chu rei han dampui chi a nih loh zia chu an hmu chiangin, "khatiang khawpa rang leh zam țha a chet ngaia ral kan hmachhawn kha ka la hre ngai love!kan vanneihnain min la chelh nge ni, kan bitum te hian min tin zawn ve hman manglo tih ka la ngaihtuah reng mai e ka ti" Hrumcheuva chuan a rawn ti chhuak ta phawng mai a.

Zakulha chuan Hrumcheuva makti hmel chu khik deuh sak paha a meichher thlarah chuan melh zauhin, "ralho te nena kan Silai puak kha chu a inthlawp rual thial a ni e" tih pah chuan a mit chu Hrumcheuva dar chung lamah chuan a fu ta chat a. mahse, chutia Zakulha mit a dar zawna fu ta reng mai chu Hrumcheuva chuan ngaipawimawh lo lui zet chunga lo kiai khum zauhin, "Silai lek ve lo ber kha kan mangnghilh ta dah mai ka ti!! ti teh a hnu i zui dawn teh vat ang khai" a rawn ti phawk ta deuh ha a.chuveleh Zakulha chuan Hrumcheuva chu kawih her zauh paha a dar hliam lai chu bih chian sak nghal pah chuan, "kha pa kha chu sawlaiah sawn a zal der tawh e, tunah rih chuan i hliam bak hi ngaihtuah lo teh khai, kan hmabak pawh tura kan la kal lehna tur hlat zawng lah kan hre tawh si lova" a han ti thuai a.

Hrumcheuva dar hliam chu rin aia alo thuk loh avang chuan Zakulha chu thawveng deuh huaiin, Ralhnâwma leh a kawi te zing ami tu ber emaw Silai mu chu Hrumcheuva chuan alo thih phah teuh zia chu a hre chiang hle a.chuvang chuan, Darkai an thlen leh hunah Hrumcheuva thla chu Arpui tui lai ngeia hual sakah tiam zui nghalin, Hrumcheuva bek duk tlak lai chu nuih var var pah chuan a han kawk va va a. Hrumcheuva lah chuan a bek vung duk tluk mai chu lo ngaipawimawh vak hek suh, "Silai mu hnawl meuh zawng pasalțha inti ve meuh tan pawh alo nâ phian zawng anih kha le!khatia ka tlukna lamah khan ka dinna bul maia lungtum kha ka zuk bekhem ta pek a ni awm a sin maw, chutia lungtum meuh sik keh tuma nawr ta nghek chu luhai leh nikhua hre mang lova vaibeldawn lang lek leka ka tluk phar chin rei zawng pawh kha ka hre ta mang lo ve a" tih pah chuan a rawn nui chhuak ta deuh dat a.

[Ngaia]

Bung-58

Țhuang khata kal, a bitum tur te a hmeh mih hnua an mi thah ruang, thisen kawi zekzuka nunau leh hmeichhia, tar leh pianțo fu manglo thlenga an thah te let phung mai chu meipui thlarah chuan melh kuau chung chuan Tawnzinga chuan aw' thawp thum deuh supa kal thuai chu a hote hriat vek tur chuan au lauh lauh chunga rawt nghalin, an tlakna mual chu her sanin an khaw ram chin rawn lut mek, țhuang lina te'n an rawn kai tur Mauthelh ngaw lam chu a hote nen chuan an pan zui leh ta thuai a.

Vangmual hoin an rawn thlen chin awlsam taka anlo hriat theih nana lo reh mih hmak hmak awlsamna tur lai hlir zawh tira, Lal Rumvuta'n khan hrang hran, Sialțum khaw ram luh awlsamna lai tur a rawn zawh tir hi Sialțum pasalțha te hian an chet awlsam phah hle a.chuvang chuan, tuna an la nawp hmabak pawh hi Tawnzinga hian awlsam zeta chin leh ngei tuma an rawn lanna lam tur, Mauthelh lam chu ding taka pan leh vat a nih avang hian, thimțin hma a inchinfel vek hmana Lal Rumvuta teho chu Hruiduk tlangah han pawh leh thuai chu a tum hle a.chuvang chuan a hote chu melh kual rulh rulh chunga fuih pah zelin, "ka nuphal pa Hnawma'n Hruiduk tlang min kai khalh a tum viau mai si a, ani hi zawng țuanah a rana rang nalaileng alo nibawk nen, mah reng rengse tunțum zawng kan khalh ve reng reng te'ng.naute u hmanhmawh te'ng u khai, kan Lalpa hahzu bel thlum zet kha kan kil hmasa lo hlauh dah ange" tih pah chuan țhang leh perh te chu a meichher ken vai țek chuai chuai chung chuan a tawn thla buan buan mai a.

An hotupa tlan thuak thuak chu a hote pawh chuan thatho zet chunga zui ve zelin, an Lalpa Chalruma duhsakna dawng phak ngei tura chet lak ngei chu an tum tlang hle a.mahse, țhuanglina te'n an rawn pal luh ngei ngei tur hmun Mauthelh ram an han luh lai chuan, ngawpui hnuai hmuntin mai chu theireh taka lo reh diakin, an mahni chauh chu mihring an awm emaw tihturin anlo reh duak mai a.hmuntin an han biha, kawr leh ruam an han thawt kual fe hnua thawm engmah an han hriat loh takah phei chuan Tawnzinga chu a mengrum tawhin, "heng ho hian kan chungtlak tur hi anlo hre lawk nge ni!? Mauthelh ngaw hi anla rawn hrut pawh lo zawk lahni ka hre talo riau e ka ti! Lal Rumvuta hian a ruahmanna bilhchhilh tawh hi a her danglam dawn ik silo.naute u, insem darh ula, Mauthelh ram bial chin zawng zawng hi bih filh pak te'ng u khai.
kan bih bial valh chhung ala zim anih awm hi maw" tih leh a hote kalna tur lam kawh kual chu a rual ta nghal zut zut a.

An hotupa rel ang chuan mipahnih zela inkawpa insem darhin, Mauthelh ngaw chu a țhut chin bih chhuah vek tum chuan an vak darh ta nghal a.mahse, chutia an bial an han zauh fe hnu pawh chuan tumah chuan thawm leh mei de chu hriain hmu hlawm hek lo le!an hotupa thinrim meng tang hru tawh chu khup deuh dai chunga kil bial laihin, "heng ho hi khawi lam ramah nge an tlak!? tih hi kan chhui fuh hma chuan tuma'n Sialțum kan kai lovang.

Mauthelh ngaw bial chin kan hup chhuak vek tawh chung pawha, heng ho thawm kan bih fuh theilo hi min ti ngawltawt tu ani ting mai e.meichher kha puah țha leh vek ula, helai ațang hian an rawn inkawi chhuah țanna Vangmual kan pan nghal ang.chutia kan lehchhui chung pawha kan la nanglo a nih fo chuan, Lal Rumvuta hi ka puzawn Lal Chalruma hma ah ngei ka chhal ang" a ti ram ta hmuk mai a.

Hrumcheuva chuan an tawmna puk chhunga nunau ho thawm chhuah leh țhat țhat țhin chu dam thlapa thawm neilo tura ava hrilh zauh hnu chuan, midang ho chu mei vam thlarah chuan melh kual lehin, "nangni tih loh țhuang thum dangte chu Sialțum ho hian an țingmit diak tawh ta ve ang!in nunna mawh hi kan țhian dun hian kan phur hauh lo.mahse, in Lal Rumvuta te pafa nun chhiat rah tun thlenga inchunga la tla zel hi kan en thei ta lova, chuvang chuan helai thleng thleng hian kan rawn chhui ta che u a ni.in Lal hian a fapa lu a hlauh hnuah pawh mualkil Tlanga pa nen an mite awhna tur thang an la valh duh zel mai zawng a nih hi"! a han ti leh a.

Mualkil pathum te chuan Hrumcheuva leh Zakulha te chu chiang zeta melh tawn chhenin, "a eng aiah nge kan Lal meuh chuan a mite thihna thang chu a valh duh lem ang le!? kan rawlthar te in phuarna hi phelh ula kan kal kalin kan kal ta mai zawk ange.nangni nena inkawi kual hi kan Lal pawi sawina lian tak a ni e" Khenga pa chuan a rawn ti leh ta a.

chutah zet chuan Hrumcheuva meuh pawhin meng sen deuh ram chunga Khenga pa chu melh tur ta deuh khâihin, "a chuti dawn amaw!? in nunna atana hun thang valh hlauhawm zet inpal lai kan rawn ûm pha leh hlauh che u hi bumna emaw ila ti cheu a maw!?, in rawlthar te hi phuar beha che thei lova sawngbawl hi kan chak hauh love.in duhlo chung helai pukah hian kan kawi lut lui che u a, hei hi kan țhian dun tan hian enge a țul chiamna chhan awm ang le? kan khaw mi in nilova, kan vuavang in ni nahek lo.mahse, pawi sawilo nunau te, tar leh hmeichhia te laka hriam lek tute thlah zalena, rampalailenga Lal verther leh a mualkil pakhat vanga thisen a luang mai hi pasalțha te tan chuan en mai mai a har a ni e. khawi khaw mi pawh niraw sek sek, hetiang lutuka a khaw mite chunga phiarrukna thang valh duh tu chetphung hi chu Hrumchevua leh Lusei Keite Zakulha te hian an ên liam mai ngai lovang" a ti ve ta ngat a.

Chuveleh Vangmual mualkil pathum te leh an rawlthar thlun beh reng mi sawmhnih te chu an meng phar nasa hlawmin, tumah chuan țawngzai rawn thawh nachang an hre ta mang hlawm lova.chu hun bawk chu Hrumcheuva chuan remchangah rawn hmang zui leh zatin, "in sa him nan tia kan rawn chhir pawha puih che u tuma kan tha lak inlo ep let hi kan hun khawhralna mai ani e.he pukah hian kawi lut lui lo che u ila chuan, Sialțum pasalțha te hriam intawk hial tawh ta ve ang.in Lal hian phiarrukna valhah ah a phih awk tawh che u tih hi fiahna in hmu duh kher a nih chuan" tih pah chuan Zakulha chu a han melh phei zauh a.Chuveleh Zakulha chuan a Sahmim-ip chu lo zen thuaiin, a kut a rawn phawi leh ruala a kutphah chunga Dawhkilh, a hmawr zum lampanga dar phek sin zet invet kual tle sat mai chu tu Dawhkilh nge a nih tih chu an hre chiang kher mai.

Hrumcheuva chuan mualkil Suaka pa Dawhkilh chu lek tle vat vatin, "mualkil Suaka pa dawhkilh hian, inchunga in Lal Rumvuta phiarrukna valh chu rinhlelh chi a nilo tih chu a hril turah ka ngai e. ani khan a hnuk a thlah hma khan Sialțum pasalțha Ralhnawma leh a kawi te'n hriam nena an țingmit thu leh thu dang tam tak min hrilha, he a thu hriat hi nangni leh țhuang danga kal te hian in hriat hman ngei hi a beisei a ni. mahse,a chuti lova, kan tha lak dal zawnga thu inla thlah lui duh tlat a nih zawngin, in thu lak duhdan zuia in inkawi hran hi rem kan ti e" tih pah chuan, an han pawh tirha an tha nei zawnga țanhmun lo siam ve tu, an mahni vengtu rawlthar sawmhnih te phuarna chu a sat chhum ta hmiah hmiah mai a.

Chutihlai tak chuan mualkil pakhat chuan dam zeta thu rawn keuin, "kan ral ep lai ni mah ula chhak pasalțha rothap te meuh chuan pasalțha zia in phawk fuh ngei e maw!? in hming avang hian kan Lal ralrel kha vawitam kan phet dangdam fo reng a ni.tunah zawng ral ațanga in ropuina hre mai lovin, a takin in hmai tlang kan hmu e.chu achhapah, kan Lal leh Tlanga pa te phiarrukna valha kan awk hlum diak tur pang hima min rawn chhan chhuak ta mai hi lawmthu sawi sen loh kan ba e" a rawn ti chhuak ta nge nge a.mualkil dang pahnih te pawh chuan Ruaia pa thu rawn lak dan chu an rilru inlamletna chiah anih thu chu rang taka rawn sawi ve in, "kan Lal kan rin luatah in tha kan lo ep let thial che u kha ngaihdam kan ngai e.min rawn pawh tirh lai kha chuan chhak pasalțha rothap, khawi tlang daido te mahin an tluk ngai loh te kha in ni ang tih ngaihna kan hre hauh lo mai e.in tha rawn lak dan erawh kha chu pasalțha naimailo te chet lak dan anih zia kha kan lo hre thiam rangin, thawm leh ruangam lan tir miah lova kan rawlthar sirtawng apiang in rawn hling fu chat chat zel mai kha kan hamhaih kher mai a.chumi hnuah tumah kutthlak lova rawn kai khawm chunga thuzam thlahpui tura min rawn sawm zawk ahnu hmanah, a ruka min veh reng tu Sialțum pasalțha te mit chhui hman lohna hmuna min kawi lut diak mai hi kan va vanneihpui kher ve e!țul lovah rei iak in thu keuh thlawp duh lova kan la fan kan fan mai te kha min ngaih huat phah em law'ng chu maw" Țhiala pa chuan a rawn ti charh charh a.

An thu a han inhmuh hnu chuan rawlthar te chuan Zakulha leh Hrumcheuva te chu an melh ru ngunin, chhak pasalțha hmingthang pahnih an han hmu ve ta chu an lawm ru ve hlawm hle a.

Suaka pa Dawhkilh an rawn phawrh hma leh an mahni an hriat hma te pawh khan, heng rawlthar ho phei hi chuan an thu sawi kha an hmel ațang ngawt pawh khan thudik anih zia chu an lo pawm thlap tawhin, mualkil te thu chai laia lo inrawlh erawh kha chu an ngam ngang hlawm lo alo ni a.mahse, a ruka an vai chuan lo inrawn ru ve thlap tawhin, an mualkil te'n an thu lak an thlawp duhlo tluan anih chuan tiin an thutawpah tal chuan tu emaw ber chu lo inrawlh ve mai chu anlo tum ve hle a ni.mahse, an mualkil te leh heng mi pahnih te an han inthurual thei ta hi lawm taka an pawm ve zia leh, țul lo zeta Darkai Lal laka a fanu a ngen luih ata tawh an Lal leh a fapa Satbilha te mize chhuah dan tenawm zet anlo kham ruk tawh zia chu Hrumcheuva hnenah chuan an zinga pakhat chuan rawn sawi vein, țhuang hrang hranga kal, a chhungte chu a ngaihtuah zia a rawn sawi chhuak tel te reuh a.mahse, chu a thusawi tawpna chu Hrumcheuva chuan ngawi renga lehlam hawi sanin, an mahni bak hi tumah an him tawh loh zia a rilrua a hriat chian zia chu a sawi chhuak duh ta lo a ni.

Nunau te chu tumah thawm chhuah lo tura thawt kual turin Hrumcheuva chuan rawlthar te chu a han hrilh a.chumi hnuah an mei chheh pawh chu vur belh tawh lo tura hrilh lehin, puk pawn lamah chuan ralveng atan mi sawm a han dah ta nghal a.a duh ang taka a rel fel hnu chuan puk chu him taka lo veng tura chah lehin, "tumah puk pawnah sawn vak chhuak lo turin hrilh ngun ula.kan rawn let leh hma chu nangni pawhin puk hi lo chhuah san suh ang che u" rawlthar ralveng hmasa tur te hnenah chuan a han ti a.chumi hnu chuan mualkil pathum te chu Zakulha nen chuan pan phei lehin, rei vaklo an han inbiak rawn kual hnuah chuan rawlthar ho zinga pakhat Zingluta chu hui hrang lehin puk chu an chhuah san ta a.

Hruiduk ngawpui chung thingzar leh hruizam awng kar ațanga thla ral lam zung rawn lut sung chuan ngil zeta ngaw hnuai lei a rawn chhun sung tawh avang chuan, chu hun chu zanlai pelh lek lek tawh hun anih zia chu a hril chiang hle tawh a.chutihlai chuan nungcha chitin te pawhin zing var tur rawn ințham chho hun, reilote a rawn inman kai tur chu lo hmuak lawka an aw' te chu a khat tawka rawn chhuah leh chiah chiah țhinin, Hruiduk tlang ep khamchhawrdawh pang chhengchhe zet zet kara Țaumeichherchhi inzui thliai thliai te pawhin ruam lam an pan țan ta a.mahse, chu hun reh zet laia chu ngawpui hnuaia riah hmun rem mek te zinga mipa ho zawng erawh chu chhin khat pawh la chhing lova meipui thlarah chuan la țhu bial laihin, "tun ang hun meithingthu vut dap tawhah pawh Sialțum pasalțha te, a tu amah anla rawn lawr lo tawp mai hi a eng vang tak chu nia'ng maw!?pasalțha tha khauh ven pawh nilova nunau inkawi lai hmeh mih chu pasalțha inti ve meuh tan chuan thil har va ni ük suh.

Sialțum pasalțha Ralhnawma leh Tawnzinga te hi pa rothap ve ve an nih zia lah ka chiang si, lenghawn hun pelh hial thlenga anla rawn lan loh hi chu ka ring lah lova sin le" tiin Lal Rumvuta chuan mualkil Tlanga pa chu midang hriat loh tur deuh chuan a han bekbawr sup a.

Tlanga pa lah chuan ngaihțhat hmel zet chunga Lal Rumvuta chu kik deuh hâi chunga lo phun khum ve zauhin, "heng kan pasalțha te hlin dan tur ngaihtuah hian Hruiduk tlang bulțhutah khuan an inhawtbuk mek tawh ngei ang, keini him piala kan awm angaih si avang hian an thal thlawk kan tawn palh an hlau dawn bawk si, kan thang valh tawpna ber tur dai awk tu turte chu heng kan pasalțha te hi an ni miau si a.min rawn țhawn hunah chuan, rang takin kan fanaute nen hian an awmna lam kan pan thuai a ngai dawn a ni.chuti lo chu Sialțum pasalțha te chet la kan ti țuanfum palh hlauh dah ange" a han ti a.
chuveleh Lal Rumvuta chuan chiang zawka an titi thlah dan tur chu ngaihtuah run chunga an bul maia ding, an mahni veng tu tlangval pali te chu ring deuh taka kalsawn tura hrilhin, chu mite an han kal kian hnu chuan an nupui fanau te mutna lam chu a han melh zuk zuk a.a rawn hawi let leh rual chuan meng zim deuh sun chunga Tlanga pa chu en pah chuan, "kan ralrel valh hnuhnung tur i han bilhchhilh dan hi a fuh teh kelh ngawt e ka ti! kan khaw tlangval leh pasalțha tu amah hian Sialțum pasalțha rothap Ralhnawma leh Tawnzinga te hmai tlang hi an la hre hauh silo.khawi khaw pasalțha te emaw anga inlan chunga min rawn luhchilh hunah chuan, pialral thleng rawk pawhin kan ralrel bilh tawpna thu hi tumah hian an rawn hre uk lo tawp ang le" a han ti kik leh ta vun vun a.

An titi tui atalangin khaw chin chu hre chang tawh hek lo le! kam keu la tui zet chunga an zu pai bel an han lem zawh leh ruala rui meng phelh phung tawh chunga khua an han hawi chhuah rual chuan, an bul maia tlangval lo ding Ruaivela chu meng nu dun phut chunga chhoh melh dunin, "Lalpa, thingchangvar hun kan hrut lut teuh ta hle e.kan khaw mite awm hmel leh an mei dê kan la mit chhui fuh thei ta tlat lo mai" Ruaivela'n a rawn tih ri pawh chu hre awm ang pawhin an awm lo hle a.mahse, vawihnih vawithum a han sawi nawn hnu chuan meng phawk dun hru chunga țhu ngil dun deuh zawkin, "chhe hei leh! kan Sialțum pasalțha ho hian kan thuchah hi an mangnghilh ta mai nge ni! an khan bih a fuh talo hlawm ni ang awh"!!? tia a beng bul maia Tlanga chu pa va hrilhruk sup pah chuan Lal Rumvuta chuan Ruaivela chu rum ûl a melh chhoin, "mangpui man nikhua an tawn chang pawha, veng mawng nuthlawi laka an chi bilh thlauh keu tham hial khawpa tam kawngtui thlauh rual nive tawh, rawlthar khup rang rual sawmhnih te'n hriam nen kan nunau hote chu an thlawp ve bawk a.engmah an ti lovang tih hi in bengah ka va thawt ngun ta ve maw!a pui a nawia inkawi ta na na na chu ruam chhengchhia leh zopang awiha han inawih liam chu an tan a har hle dawna.chuvang chuan an kaihza tha zawi tawh nen, inpal chak hlei theiloin Hruiduk ngaw hi anla rawn inchhir kai hlei thei lo a nih awm hi maw.thim han țin se, Ni lu te pawh han mawm se langin, a lu kimin an rawn lawi diak ngei ang" a han ti thâm deuh țuak a.

Ruaivela a han kal kian hnua tuiburhmuamda dawn an han ngawih ren rawn hnu pawh chuan, Lal Rumvuta leh Tlanga pa te chuan Sialțum pasalțha ho thawm awm chu la hre chuang hek lo le! an tlangval te nen chuan an mi nghah te chu an inan loh zia chu zawi supa sawi dun leh rihin, "thim han țin tak teh se'ng, Sialțum pasalțha te hi anla rawn lan loh fo chuan kan ralrel valh hi kan han sawn pelh hret anga, Sialțum tlangah kan tlangval te hi chu Khuangchawi Sial chaih takin Sialțum tlangval te'n chaih tak rawhse.chu thang valh tur chu ka lo ruahman leh kelh tawh e Lalpa" rawn tih sup pah chuan Lal Rumvuta chu Tlanga pa chuan a han melh zim leh deuh san mai a.

Chuveleh Lal Rumvuta chu tlir thum deuh duta rawn nui chhuakin, "nang nge nge hi zawng, ka mualkil dang te fin bilh phung hian an khalh hman meuh lo che a nih hi maw!i rel dan chu ka pawm hmin leh der tawh mai e, thimțin thlenga Sialțum pasalțha te hi an la rawn lan loh fo chuan, i rawt ang hian Sialțum chu kan tlangval te nen hian kan kai diak anga, hmun him min thlen tawh ahnu hmanah, Sialțum kan kai miau tawh chuan nang leh kei hian anni ho chu mamawhna nei tawh dawn hek lo i, Sialțum tlangval te'n an duhtawkin chaih tak teh se'ng" a rawn ti nui leh ta kur kur a.mahse, chutia a nuih buk deuh tlûih tlûih hnu lawka a han dah (dak) chhuah leh rual chiah chuan, an awmna chhim lam ep țhang buk thim phei mup kar ațanga thil enge maw rawn thlawk vung fua mai ri chu a beng chuan hre deuh vuaihin, chu thawm rawn thlawp chiah chuan rui meng phelh phung chunga a bula țhu Tlanga pa chu a rawn thaw ri hrûih mai a.

chuveleh Tlanga pa lam chu rang taka hawi nghal thuaiin, chuta a thil han hmuh meuh chuan Lal Rumvuta meuh pawh aw' takngial pawh chhuah thei lo khawpa hmet khawng nghalin Tlanga pa nghawng, a ruh thleng rawt khawpa lo thler duai mai chu an meipui rem tawh alh êng dul zet mai thlarah chuan a hmu chiang hle mai a.mahse, a thil hmuh rapthlak zet avang chuan Lal Rumvuta chu thisen suai chuan ala hmet khawng tlat mai si, Tlanga pa thisen chik puat puat chuan a Vakul chang tawn te chu rawn chik khum leh puat țhinin! reiloah Tlanga pa chu a bawkkhup zawngin a tlu ta thlawrh mai a.chuveleh aw' thâm chhul chunga Lal Rumvuta chu theilehthei lova rawn au chhuak rang deuh ruaihin, au pah chung zela an țhut hmun tlan san mai tuma a han thawh rual chuan leia hnahthel inchap zui chunga Tlanga pa thisen luang kawi zuih mai ah chuan a han tawlhthlu zui țhuai mai bawk a.

Lal Rumvuta thawm chu an mahni rawn hnaih deuh bera ding Sawiluaia chuan rang taka lo hriain, mualkil Tlanga pa leh Lal Rumvuta te țhutmuanna lam chu a rawn pan phei ta thuai a.a han thlen chuan leia an Lal lo tal kual meng â ruaih mai chu țhutchilha bawihsawm nghalin, "Lalpa, eng in ti ta nge ni khatia i khawsak tak chiam mai!? mei lah chu a vam chauh ani tawh mai bawk si" tih pah chuan Lal Rumvuta chu a han chelh ta vat a.chuveleh Lal Rumvuta chuan hlau thlabar leh mumal lo zet chunga invai buan buan chunga a kut chu rawn lek kangin, an piah maia mualkil Tlanga pa tlu hlawm reng lai chu a kawk khur ta hluk hluk a.

Sawiluaia chuan mei mit duk vam eng deuh ruaih thlara Tlanga pa bawksawp reng a va hmuh deuh ruaih rual chuan thil țha lo zetin an buk tual vel chu a rawn luh ta ani tih chu hrethiam nghal vatin, "țhian te u lo tlan teh u khai, kan khawsak phung pal a tluang dawn talo a ang ta riau mai e ka ti" a ti ta chul a.

Sawiluaia au ri an han hriat rual chuan ral venga an buk dai vel hruta mutchhuak tawh zet chunga tei kual mek midang zawng te chu rawn tlan khawm nghal sawk sawk hlawmin, Sawiluaia leh an Lal Rumvuta te pahnih lo inbawihsawm lai chu an rawn fin ta thuai a.chutih chhung chuan an thawm avanga Lalnu leh Tlanga pa nupui fanau rawn harh ve hlawl te pawh chu an lam pan chuan rawn tlan phei ve chung hlawmin, meipui an han nun hluah hnua Tlanga pa ruanga kutthlak na hnu an han hmuh zet chuan tumah chu zam ru lo an awm ta mang lova.mahse, chutia an zam ru ta deuh tlat chu pasalțha tih takah Sawiluaia leh Rangzika te pahnih chuan tumah buai lo tura rawn fuih hlawmin, "hetia kan mualkil chunga hriam rawn lek tute hi kan en liam hauh lovang" a han ti vin deuh țhat a.

Lal Rumvuta erawh chu mualkil Tlanga pa thih dan mak zet avang chuan a pasalțha te thlamuanna thu pawh chu ngaihsak tir hlei thei lovin, Tlanga pa nupui Zațhiali leh a fate țap fap fap lai chu a melh kur reng mai a.chutia an Lal Rumvuta la tang hru mai chu Rangzika chuan muang deuh chuara rawn biain, "Lalpa, thim hi la țin chiah lo mahse thingchangvar' hunin min nang titih chho mek tawh a. mahse, kan hun tawn lung deng na zet avang hian leilung lan kher nghak lova Sialțum pan mai hi a țha lawm ni kan ti ni.Sawiluaia ho hian mi panga hruai ula, ka hovin mi panga hruaiin kan mite kan han bih kual leh rih ang chu ka'n tih deuh a ni.
enge i ngaihdan le"? a han ti a.

Rangzika thurawn chu Lal Rumvuta chuan muang ban deuh chuara rawn chhang hramin, a rel ang ang chu a pawm thu leh mualkil Tlanga pa ruang chu Sialțum kaipui vat a țhat thu te, Sialțum pasalțha te khawm nghala Tlanga pa kutthlak tute luh chhuah tura a unaupa Lal Chalruma chu nawr nghal chuk chuk a duh thu te chu a rawn sawi ve ta a.mahse, a țawng tawp rual deuhthawa an buk chhak pik kar ațanga Silai tin kawh teu chunga mipakhat rawn zuang chhuak zawk maiin an Lal Rumvuta chaldar tak maia, a Silai ngul a rawn chuktuah rual chuan an vai chuan an Lal Rumvuta rawn thlur bing nalh tu, pa sa mum nelhnawlh leh mitmeng thip ram mai, a mah chauha rawn zuang chhuaka an zinga buaina rawn thlen tu a ni chung pawha zamna eih nei lo chu an vai chuan mak ti zeta en nghal țhapin, an Lal Rumvuta chu chupa chuan kah thluk tawp mai chu a hreh hauh lo a ni tih a hmela lang reng mai chu chiang zeta an hmuh tlat avanga an hriam lek ve ngam lo ding khawng reng lai chu chupa mitmeng rum zet chuan a chung tlak hneh hle a.

Chupa chuan zawi thawp deuh sapa Lal Rumvuta chu rawn vau nghalin "nang leh i mualkil Tlanga pa nena i khua te i chin kual dan hi i duhtawk tawh dawn nge? an nunna ngaipawimawh lo zetin phih awh hlum phiarh ila tum zel dawn"!? a han ti tawng mai a.chupa țawng meinei zet chu Sawiluaia thin tertet chuan alo ngai thei lovin, a khel sira lei lam hawia a Silai ken tun ran mai chu chuhna hun remchang a melh țan ta a.

Lal Rumvuta chuan chupa țawng chhal let dan tur chu rang zeta ngaihtuah chhuak nghalin, "nauchahai i hriam hi thlah dul thuai mai rawh khai, khawi tlang țhut Lal ve meuhin nge mahni mite awhna hrui valh duh ang le!?,a chuti a hnekin, kan puar kan fan tlanna tur hmun pana ka hova inkawi chhuakin, ka vuavang te tlang kai tumin helai thleng hi kan inchhir thleng a ni zawk e,a tufa zilhfuih dawng lo nge ni i nih teh chaia, kei Vangmual Lal meuh min han tauh ngam reng remg chu ni"!? a han ti ta chhur chhur a.

Chuveleh Hrumcheuva chuan a Silai ngul hmawr chu nawr nat sauh pah chuan chang fel fawla a aw' chu rawn chhuah lehin, "nang, Lal pawizahlo zet Lal Rumvuta leh i fapa mitladah zet Satbilha te hi ka hre lo che u in i ring em ni!?Darkai kawtchhuaha i fapa lu ka khai lai pawh khan inchhirna leh ro țha zui zawnga thu lak la tum chuang lek lovin, i khua te chungah hlei ilo la len ta dah fo a ni maw!?

Sialțuma kaia in rilfang țam hnawh puar chhuanlama siama i khua te pem pui i rawtna pawh kha bumna mai a ni lawm ni? țhuangli ah țhen darhin, țhuang tina kal te that mang vek tura i mi ruat, Sialțum pasalțha, nang leh i fapa te ze mil zet Ralhnawma leh Tawnzinga te khan i khua te chu an that mang țhelh tawh reng a sin!.I leido ni mah ila chhak pasalțha Hrumcheuva leh Lusei Keite Zakulha te hian i chetphung hi kan țha bih mai mai thei lo riau mai e" a ti leh ta phiar phiar mai a.

Chutah zet chuan Lal Rumvuta chuan a mualkil Tlanga pa nena an phiarruk thu bilh valh an hriat chian zia chu rang taka hre chhuak nghalin, a fapa lu khai tu Hrumcheuva, chhak pasalțha rothap zet a hma a ding teu mai chu haw em em mahse hlauh rukna ril zet a nei țan ta tlat a.mahse, a khaw pasalțha te lakah chuan theihtawpa insawi pial chu a țul tawpkhawk tawh ani tih chu hre rengin, "i dawt bawlah Lal Rumvuta hi ka tawlh liam hauh lovang tih hre rawh khai. chung thil valh kual tur khawpin ka khua te ka Ral melh ngai love" a han ti leh a.

Chutia a insawi fihlim tumna chuan Hrumcheuva thin chu a ti ngawltawt tawhin, a Silai cheng chu a kutzungchala thlawp pah chuan, a hma aia nain a ngul chu Lal Rumvuta chalah chuan a han nawr sawk mai a.

chuveleh Sawiluaia chuan alo tum ruk tak tihna hun remchang chu rawn chuhin, a Silai a vawnna kut chu rang zetin a rawn ti che ta tlat mai!mahse a Silai ngulin Hrumcheuva zawn a tin thlen hma chuan an chhak țhang pik thim zet ațanga Tlahthi hriam tawn hlai hlep hlawp rawn thlawk ri thla fua avang chuan Sawiluaia Silai chu a tum loh zeta puak nghal durin, a rak țhawt ruala a banrek a dawm kun nghal ngawih hnua a kut ațanga a Silai a tlak nawlh rual chuan an piah lawka ding tlangval pakhat chu khup dawm chungin alo țhingțhi sai ngar ngar mai a.chutah meuh chuan Hruiduk tlanga zan khaw tairek thlenga an khua te an nghah tawh hnu pawha an lo la lan chuan loh avanga ngaihțha tawhlo zet chunga an Lal leh mualkil Tlanga pa te khawsa zia lo ringhlel ru deuh țeuh tawh tu, Hrumcheuva leh an Lal Rumvuta intauh lai pawh ngaihtuahna ril zet nei chunga lo ngaichang ru kar tu pasalțha Rangzika chuan aw' vin deuh țhaka Sawiluaia chu rawn thlurin, "thudik kan hriat nan hun hi ren tur ani ngai a sin maw! i thal thlah ram lutuk pawina chu kan nauva'n a tawrh tak hi" a rawn ti ve ta a.

Sawiluaia banrek thler peh vung mai chu tlangval dang te chuan melh hrek hrek chunga hliam tuar an țhianpa chu bawihsawm san diakin, "kan thu inchuhah hian a fawng vuan tu nih țalh dan chu ila zawng dawn em? chuti anih chuan i khaw mi țhuang khata kal te veng tu pakhat rawlthar Zingluta hi damin ka kal tir i ring em"!? tih pah chuan Hrumcheuva chuan a kut chu a han hui ta zauha.

Chuveleh an chhak thim kar ațanga rawlthar pakhat leh Zakulha te rawn lang țhawt chu mak ti zeta an vai chuan thlir chho țhapin, Lal Rumvuta chu tlangval ho chuan an melh tur ta hlawm hle mai a.