MIHRÂNGVÃL TE SÛLHNÛ . By. Llpa rokhum 1 - 70

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

MIHRÂNGVÃL TE SÛLHNÛ . By. Llpa rokhum 1 - 70

Unread post by Ngaia » June 25th, 2017, 1:13 pm

TargetPreview.jpg
TargetPreview.jpg (32.93 KiB) Viewed 19150 times
MIHRANGVAL TE SULHNU
. By. Llpa rokhum

.
. Episode - 1
.
> Khawchhak lam kawl kilah van arawn vâr ruai ruai lai, Lêntlang leh Sahmulkâi Tlang vel pawh a rawn pâwt châk tawh lai chuan, Vahmui tlang kham ráng inchhawrdawh hnuaiah chuan, pasalțha pahnih leh rawlthar riâ sa pan lampang mitmeng fiah țha zet leh hmai sâwl rât te pathum chu an kal thauh thauh mai a.
Vahmui tlang ațanga Lofîng thum vela hla ngawpui pilril an luh hnu chuan, tlang lian lo tak, thing upa zet zet leh hnim leh țhângin a khuh hlim dap chu thlengin, chulai ngaw hnuai hmun pakhat mual pawng deuh euhah chuan an pathum chuan an ding țhap a.
.
Engemaw chen chulaia an chawlh vang vang hnu chuan pasalțha pakhat zawk chuan an rawlthar hruai chu fiah taka enin, "taite, i huaisenna leh rawlthar danglam bik i nihna hi kan Lal leh kan khaw mite lakah hian i lan tir a ngai a, chuvangin, rawlthartê ni mahla i kum phu loa i theihna i lantir hi kei leh Keikawla hian kan phût che ani tih i hre dawn nia" a han ti dam duai a.
.
chumi hnuah pasalțha Keikawla chu nui vur vur chunga rawn țawng velehin, "rawlthar pasalțha Zakulha i ni lawm ni!?, Lusei hnamte laka hriam leh tharum lek tu Halkhâ leh Thlânrawn ho lakah hian i tlawm dawn em ni!!?, i tlawm lul dawn lo tih i theihna hian han lan tir ta che. Țiau râl lehlama i pa leh i pi leh pute thlân leh ruhro pawh hauh ngam lo khawpa min phíngchil tute kha tute nge!!? chu pawh la duh tawk lova, i tlan chhiatna Țiau râl thlang lam thleng thlenga i unau Lusei hnamte thisen chhuah zui tute hi i hria a ni lawm ni!? Zakulha, mihuaisen hlauhna pianpui lo i nihna khan, i unaute thisen chhuak tireh tur hian a nawrin a phut che a ni tih hre reng ang che" tia a han fuih leh meuh phei chuan, Zakulha mitmeng fiah fim kâk mai chu thinrimna leh tumruhna chuan a rawn bual tlê zawr zawr tawh mai a.
.
Chutah, Hrumcheûva chuan rum taka rawn melh lehin, "taite, kan khaw chhak lamah Ni pawh a rawn mwm ta..i tih tur chu hlenin, rawlthar mihratkhawkheng i nihna chu lan tir rawh le" tih pahin a Savawm khup ruh Talhtum leh Thal chu Zakulha lamah chuan a han lek phei vû a.
.
Zakulha chuan Talhtum leh Thal leh Thalfang sawmhnih vel chu rang taka lo la-in, "u Cheû, u Kâwl min ngaihtuah suh ang che u, ka tum hi ka hlen hma chuan kan Vahmui tlang hi ka rawn kâi dawn lo" tih leh zei lutuk mai a, an thlang lam mual ruam râi thla dup lama lîm thlak chu a rual ta nghal a.
.
Zakulha a liam hnu chuan Hrumchéûva leh Keikawla te chu nui dun vur vur chunga inherin, tha tho leh Zakulha laka beiseina zawng zawng nghat chungin Vaihmui tlang lam chu an pan chho dun leh ta thauh thauh a.
.
Chumi tlai zet chu Lalpa Tãikherha leh a khaw mite chuan, an rawlthar Zakulha fiahna hlauhawm paltlang tura liam tâ mawlh ngaihtuah chuan an phili sek reng mai a.
Mahse, an pasalțha chhuan leh rinrawl Hrumcheûva leh Keikawla ten an rin em avang leh, a laka beiseina nasa tak an nghah tlat si avang chuan, Zakulha tan chuan Khuanu malsawmna dil sakin an phun leh sap sap țhin a.
.
Chutih laiin, mipui tam zawk lahin Zakulha chuan chu fiahna chu a paltlang theih an rin loh avangin, an pasalțhate pahnih thla chu an han haû leh tak an bawrh bawrh a.
Chutih laiin, Keikawla leh Hrumcheûva lahin Zakulha chungchanga an kâ âng duh loin, Zakulha mize ropui zet an hriat ruk kâr chuan tuna fiahna hi a hneh ngei dawn a ni tih an ring nghet bur mai a ni.
.
Zakulha chuan, a luhna ngawpui chu uluk taka chian zelin a mit țha zet leh a beng fing lutuk chu englai pawn a chawlh tir lo hle a. chutih lai chuan khua lah alo tlai tawhin, a lawn lehna tur hmabak tlang lian zet, a chhip lai taka ruam hniam duk leh thim deuh mûk tawh chu a awmna ațang chuan a chhoh thlir vang vang a. mahse, rei chawl lovin chu tlang pang innghahna lai taka zolui fim leh thiang vawt râih, hmar lam zawnga luang ri thla hâr hâr chu a luhchilh ta thuai a.
Lui tui fim vawt reih rawih a duhtawka a in hnu chuan, zei leh thaza zetin chulai tlang pang chu a lawn chho leh țan ta a ni.
.
Mahse, rawlthar huaisen leh mi pangngai aia chungnung, thâ ngah leh țuan rang a nihna chu chhawr țangkai chho zelin, a mah chauha ramhnuai ngawpui bêla a vahna hmun chu hlauh a hnekin nuam ati kher mai a.
.
Chutih laiin, a hma a tihtur rorum leh nunna chân hlauhawm zet mai chu hlen chhuak ngei turin a rilru a siam sauh sauh mai bawka.
.
Tlang chhip a lawn thlen dawn lai te chuan hah leh chauh pawh nei mang lovin, lungpui leh thing tlu luang chungah te chuan a per kai chho zat zat mai a, reilote ah a duhna hmun a thlen chhoh hnu chuan, riahna tur hmun rem lai zawn paha chu tlang ngawpui thing kar ațanga, Ni tla mek zung rawn lut dê thliah thluah chu melh leh zawkin, a chhak lawka lungpui lian leh upat tawh hmel zet zet pahnih, Patêk leh Lungsam hring nghulhin a bawm thim deuh ruih inkamkî hnuai, kaw thim map mai chu a pan chho leh ta a.
.
Chulai a han belhchian that that hnu chuan, riah nan chuan a remchang dawn hlea a hriat avangin pawn lama lung pakhat, lungthu tiat vel leng lawng inhung thlih thliah zinga pakhat chu va chawi nawlhin, lungpui hnuai rem laiah chuan a han nghat ta chawrh a.
Chumi hnuah, pawn lama mau ro leh thingțang tla vel chu va fawm khawm lehin, a pa chem thih san a rochun, khawi kipah pawh a pâi ve râng țhin chhuanawm loh zet chuan a sat chhum ta zung zung a.
.
A duh ang tawk te tea a tan nual hnu chuan mau pakhat chu uluk taka sui mumin, alaia a ulh tliah leh hnuah kûn ngar chungin a mau sui ulh chhum bung pahnih chu a nawt bu ta tlauh tlauh a.
Rei fê a nawh hnu chuan a nawhna lai chu a rawn mût khu ta hlat hlat a, chuveleh uluk zeta a khûkna lai chu chhem hauh hauh pahin a bula hnahthel ro chu a han țham khawma, chutah, a hmawlh chhem rawn lîng hlarh hlarh chu hnahthel karah chuan rawlh lut lehin, rei vaklo a chhem leh hâm hâm hnu chuan a rawn alh chhuak ta hlarh hlarh a.
.
Chutia mei a nun zawh hnu chuan a awmna ngawpui pawh chu alo thim deuh chhulh tawha, chuvang chuan muangchang tawh loin a Thalfàng panga chu thlang chhuak lehin, a Buk thlang lam tlang pang tlak lam chhawng lamah chuan a put thla zui ta a.
.
Lenglen hun pelh hnu awm hretah chuan Zakulha chuan a Buk chu thleng chho lehin, a Vahrit kah thlak chu a puah nghal sawk sawk a.
reiloteah hem hmin tura a siam hnu chuan a mei chhem chu a han chhawm țha leh sat sat a, chumi hnuah a rilru kawm chunga a tihtur te ngaihtuah chung zel chuan a Vahrit hem chu a tuai vir ta vat vat mai a.
Vahrit sá nen zanriah a khahchilh fel hnu chuan, a tawmna lungpui hnuai maia a mau tuium chu a han ban zauha, chumi hnuah lungmuang fahrana a lung chawi luh lukham chung chuan muzâl zui nghalin, a tuk lama a hun tawn tur ngaihtuah vang vang chung chuan reiloteah a muhil zui ta a ni.
.
Mahse, tuibur hmuamdâ vel chauh a chhin sek lai chuan, a tawmna lungpui chhak lawka hnahthel rawn ri țhuap țhuap chuan a hriatna țha zet chu rawn țhawngin, a mitmeng fiah kekáwk chu thawm awmna lamah chuan a han len chho nghal kiau mai a.
.
Chuta a thil han hmuh zet chuan, Zakulha chu lungawi lohna nasat zet a thinlungah rawn siam nghalin!, a riahna lungpui hnuai țawmpui tuma Savawm no hruai lai a note pakhat, khûp chen vel lai nitawh nena an rawn chhuk lai chu mei êng thlâr êng dul ruih hnuaiah chuan a han hmu chiang kher mai a.
Chutah zet zawng Zakulha chuan țul lo takah intihbuaina a chhuak dawn tih a hriat chian em avang chuan, a Thalfang pakhat chu a hruiah chuan hmet bet nghalin a Talhtum chu a kapkarah a han hnawl lut nghal zat bawk a.
Chutihlai chuan Savawm nufa lah chuan, an riah tumna chhungah rawlthar huaisenin a lo tawm khalh tawh tih hre bik hek lo le! Zakulha lahin chu mite Nufa vanga a Buk chu kian san duhna rilru chhetê pawh neih chu sawi loh, a mutui lai an rawn țhawng tho ringawt pawh chu lungawilo zeta lo melhin, a lo rum ngâl ngâl mai bawk a.
chutia alo in rin penpâwn tawh lai te chuan Savawmnu chuan a no mawnga nawr nûk nûk chung chuan, hmanhmawh tura tur niawm takin a han tep zui chup chup a, chumi hnu lawk chuan Zakulha tawmna lungpui hnuai chu mihring leh Savawm insual thawm, thûm dawp dawp leh hûk tuarh tuarh ri chuan a khah zui nghal buan buan mai a ni.
.
Zakulha chuan Savawmnu hnuaia a lu veng chunga tawm khawm chaih chung chuan, a bawp pahnih chuan Savawm kawngah chuan a kherh bet tlat mai a!, chutih laiin thinrim taka Savawmnu chuan Zakulha chu thin thlak tuma beiin, lungpui hnuaia hnahthel tla khawm darh chum chum khawp chuan a bei bawk a.
Zakulha lahin Savawm zakdawha a Thalfang lut chu dap fuha nawr luh thuk leh zual tumin a bei bawk! reife an innawr hnu chuan Savawmnu chuan pawn lamah a hnuk chhuak ta hlawl mai a.
.
Mahse, Buk tualah pawh chuan Zakulha chuan fing zet maia ding chhuak duh miah loin, a hnuai lam ațang chuan țan ala khawh mar pât mai a, chutia luhlul zeta Savawm zakdawha Thalfang lut man fuh tuma a beih lai chuan, Savawm chuan a meipui chheh te chu a hâi darh chum chum mai bawk a.
chutihlai chuan, a note chuan a Nu leh Zakulha insual lai chu hûk dap dap chunga lo tlan hualin, Zakulhan Savawmnu zakdawha a Thal lut a man fuh ruala, nâ zeta vih hrawk paha a kherh behna a thlah rual chuan, Savawmnu chu pâi chuan chuan chung leh a note pawh ngaih sak tawh loin thlang lamah chuan a hûk thla ta tuarh tuarh a.
.
Savawm nufa an țin hnu chuan Zakulha chuan, la lungawi lo zet chunga rûm ngâl ngâl paha a mei thingthu nung darh dê sup sup chu fawm khawmin, mei a chhem alh leh hnu chuan a dâr veilam saipir chen dawn vela hmun hniha lo kau hâk chu a han bih chianga, chumi hnuah a bula phelsêp pakhat chu uluk taka metin, a meh thlak phûai dip chu a dâr hliam laiah chuan a hnawh tawn tawn a.
.
A han mut fel leh meuh chuan a dar hliam chu a delh thîp vang vang mai a, mahse, a luhlul tawrhchhelna chuan a nâ chu ngaimawh lo zeta mutthilh san zui nghalin, buaina tawk lo ang maiin a mumang ramah a cheng zui ta vang vang a.
.
A tuk zing a han harh chuan a awmna ngaw hnuai chu la thim viau mahse, Zing Sava chiar noh noh te chuan kawlkilah Van a vâr tawh a ni tih Zakulha chu a hriatthiam tir nghal thuai a, chuvang chuan hmanhmawh zeta insiam nghalin, a Vahrit hem hmin la neih chhun êi chap chap chung chuan a awmna tlang dung tawp lam chu chhak lam hawiin a zawh leh ta ngat ngat a.
.
A mah zirtirtu pasalțha pahnih ten, an hrilh anga a thluak fim tak hmanga a kal avang chuan a pan lam hawi chu a tisual lo tih a hrethiam hle a, chuvang chuan, a tum dan leh a kal dan a dik reng theih chuan khawthim rual chuan 'mibik' a nih avanga a thâ leh țuan țha zet chuan a tum ram chu thlenpui theih ngei a beisei a ni.
.
A rin ang chiahin chawhma țha zet zawt a kal hnu chuan a awmna ram chu tlang lian leh ruam thûk tak tak awm tawh loin, phaizawl leh mual châm deuh pêput hlirin hmun tih mai chu a lo inpharh dêi dúai tawh a!.
Chutah zet phei chuan Zakulha chu a phûr tawhin, a hma ai chakin ram hmun rem ngawpui thelh hen hûn hnuaiah chuan a lîm zak zak mai a, mahse, ho têah a tum chu hlen lo thei dinhmuna ding a ni tih a inhriat avang leh chulai hmun chuan a tum hlen chu sawi loh, a nunna atan hlauhawm a keng tel tawh a ni tih a hriat chian avangin, a mit leh a beng chu a kal tawhna hmun dang zawng zawng aiin a hmang uluk hle tawh a.
.
A rin dan leh a hisap dan chiahin tlai lam hun, Ni pawh khawthlang lam a hriat mang loh tlang dung inchhuang chho paw reih ruih chung zawn, suk chen vela a din tlêt suar tawh lai chuan an tlan chhiat tirha râl lehlam an kâina hmun chiah, Țiau lui kam chu a thleng ta hlawl mai a ni!
Chutah zet phei chuan fimkhur leh uluk zeta a hriatna zawng zawng chu sáwr khawm leh zualin, khaw nghah thimna hmun tur melh chunga, ramthei leh hnah nêm ei tur dap pahin Țiau Luipui kam lehlam vel chu uluk takin a thlêk zauh zauh reng a.
.
Rei vaklo a vah kual hnu chuan, a awmna ațanga pen sawmli vela Saphu khûr hlui țhâng leh hnimin a bawh hnawn chap chhungah chuan a lût ta thân mai a.
Chutia lungmuang zeta a tawm fel theih takah chuan a ei tur neih ang ang chu muangchanga êiin, zân lo thleng tur chu a nghak ta vang vang a.
.
Khawthim rual chuan a tawmna ațanga chhuah nghal vat pah chuan, a Thalfang chu a Hruiah chuan a hmet bet vâ mai a.
Mahse, a ralmuang tawk nia a hriat avang chuan Țiau dâi dûl lai, an tlan chhiat tirha an kân na lai ngei pan chuan a chhuk ta thauh thauh a. Mahse, a zuk thlen thlâk chuan an tlan chhiat tirh lai aia tlema tui a lo tam tawh avangin, zei zeta a Thal hrui chu hmet pial euhin, a hrui chuan a ngulhah chuan Thalfang chu a vet bet ta țhap a, chumi hnuah a Talhtum nen chuan a kawngah hrui danga suih bet lehin Țiau luipui chu a hleuh phei ta pap pap mai a.


MIHRÂNGVÃL TE SÛLHNÛ
. By. Llpa rokhum

.
> Unauhmelhai hun thimhmûl chhulh laia khawthlang lam kawlkil Vangva tlangdung chhim leh hmar zawnga inkhawh thim mâr phei zui, Ni tlákna chung zawna chhum sên inkhachhuan vâm huamin țihbaiawm zeta Vangva tlang dung chung zâwn chanve hmawk a țhut sen rûm lai chuan, Khánțhiang tlang ațanga tlang lehlam êp chiah, Lasi te Lalnû Lengtinchhingi leh a ho ten Zotui thiang fím thiang kâk tlâna an taksa mawi tak duat taka an bual heuh heuhna țhin leh Sá chitin rêngte Inpui leh an thlamuanna tlâng an tih țhin, Sazakâi tlang ngawpui dûr thim mup-ah chuan, zan dang ang lo zeta thihna-in thlâ a zâr tlat avangin Sâ zawng leh Lasi Lalnu Lêngtinchhingi leh a hote chu thehmeh ang maiin an reh țhiap mai a.
.
Chutih lâi boruak uap leh thihna rim nâm, Sârthli thaw thûm kual ruih ruihin a tuam thâwt kual vûk vûk lai chuan, chu ngawpui Thing upa tak tak zâr kar hmun hrang hrang ațanga meichher rawn de leh zawk zawk țhin chu a lan chian țhin em em lai chuan, chulai ngawpui chhung ngei ațang chuan a khat tawkin Patling nâ tuar țê rawng rawng ri a rawn chhuak leh râwih râwih țhin bawk a.
.
Chu thâwm rapthlak leh bengverh zet chuan, Sazakâi tlang ngawpui Lengtinchhingi leh a naute, Sâ zawng zawngte inpui bawk thim mûk mai chu a luah nghet tlat mai a ni.
.
Sazâkâi tlang ngawpui thing upa tak tak leh ram hrui in phan ûai seng sung, ngawpui lei dûr leh hnawng nâl pulh țhâng leh perh ilo kar thim hnuaia Lusei pasalțha rual sawmnga chuang hret leh, Țiau râl lehlam Lêntlang ațang tawha Lusei ho rawn ûm thla tawhtu, Lusei hoin thlang an rawn tlâk phahna khawpa mi tawrawt, Halkhâ pasalțha rual sawmsarih chuang ten inthah hmasak ngei tuma an han inveh zet chu a rapthlakin, Sazakái tlang luahtu Lengtinchhingi leh a hote leh Sâ chitin reng te pawh an rehin tlang dang kâi ang maiin an mit țhiap mai reng a.
.
Lusei ho chu Pasalțha Hrûmcheuvan hoin, Halkhâ ho chu Pasalțha Thangpialan a ho ve thung a. Halkhâ ho hian Thlanrawn ho nen țangkawpin, Lusei ho zawng zawng Țiau kân rawk khawpa an rawn hnawl thlâk hnuah pawh an la lungawi ta chuang lova, Zawngte khua leh Khawlhring ho khua phei chu an suasam nasa hle a. he thâwm an hriat avang hian Lusei khaw tam zawk chuan an khua rauh sanin, apui-anawia Țiau an kân țawk țawk hnuah thlang an tla hlawm a, chumi hnuah Râl an hnai tawhlo nia hriain khaw tereuh te tea inbawk hrangin an ram thar chu an cheibawl ve ta a.

Mahse, heti chung pawh hian Halkhâ ho leh Thlanrawn ho hian Lusei ho hi la rawn ûm thla zelin, Lusei Lalte chu an chhiah khua a siam vek an tum avangin an dim lo hle a.

Lusei ho lah ralthuam țha chu sawi loh an Lal te leh Mi-awmthei deuh tih loh mimîr chuan Siapsuap leh Hnawkhâl an la inbel deuh vek avangin an khawsak a la hniamin Halkhâ leh Thlânrawn ho lakah chuan duap an la kâi hle a, chuvangin Silai pawh an la neih loh avang leh hriat pawh an la hriat ngai loh avang chuan, râl ațanga mi ti nâ thei chu Kawl ho Dâwi emaw an ti hmiah mai a, Halkhâ ho Silai hlau reng rengin an tlan chhe fâi duak duak mai a ni.
.
Mahse Sazakâi tlangah meuh hi chuan, Lusei thlang tla hnuhnung ho Halkhâ leh Thlanrawn ho hnuaia Chhiah khua nive duh lo, Lal Taikherha pasalțha huaisen Hrúmcheûva hoin lo dan an tum ve ta ngat a. mahse, perh pawh la zêp lo leh thlang tla hlim, khaw hmun pawh la tuk ve lo an nih avangin an tan chêt lâk a har hle a, chuvang chuan nunau tar chak lo naupang leh an Lal Tâikherha te chhungkua an thuhrûk te te hnuah Sazakâi tlang ngawdûr thim ruih hnuaiah hian, an ralthuam neih phâk ve tawk Fei, Thál leh Savawm ruh Talhtum nen lambun tumin an lo cháng ve tawp mai a ni.
.
Mahse, Lusei pasalțha Hrumcheûva hi a huaisen em avang leh pa luhlul ngawltawt tlat a nih avang hian a naute ho hi a fuih hneh hle a, hei vang hian Halkhâ pasalțha tawrawt leh nunrawng mianglo tiat zeta palian, Saingho Hnâr-beh béh vâr kual kulh mai leh mihring pawisak neilo, hmel nelawm loh zet mitmeng pawng hlet hlut, a Chhungpuinù mai pawh duhtawk lova Hmèi kâwi duah thei khawpa Halkhâ ho pasalțha ropui Thangpiala meuh paw'n Sazakâi tlang ngawpui thim mup hnuaiah hian a duh angin Lusei pasalțha Hrumcheûva leh a naute ho hi a phingchil thei tlat lo mai a ni.
.
A rin loh tawpin Hrumcheûva leh a hoten a khawma awm lova pakhat te tea an tla fâl an lo mal hmiah hmiah avang chuan, a huhoa innuai buaih buaih a duhna lak ata a tum dàn thlak a ngai tih a hriat chhuah meuh chuan a hote Lu sawm dawn a lo chân hman tlat mai a.
.
Mahse, a han insiam rem ve hnua tlema an han chet țhat chhoh ve takah chuan a phur surh surh hle a, chutih laiin Hrumcheûva leh a nau ten, meichher an rawn ken lanna lai an bawh apianga a hote zinga pakhat talin an lu an hloh hman ziah chu bumna a ni tih a hriat veleh a naute ho chu meichher a siam tir ve ta thuai a.
.
Chumi hnua meichher thup pah leh a khat tawka vai țek chhuai chhuai chunga Sazakái ngawpui hnuaia, Lusei ho leh Halkhâ pasalțha ho han in phil tawn țê ruaih ruaih mai tháwm chu an êp chiah tlang, Khanțhiang tlang ațang chuan a rapthlâk hlê reng a ni.
.
Hrumcheûva chuan Halkhâ hoin an bumna an hria tih a hriat hnu chuan a naute zing ami sawm dawn chu a chán ve ta tlat mai a, chuvangin ngaihtuahna thar a hman leh vat loh chuan, Halkhâ ho tán chuan an mahni țingmitna hun țha an siam sak vat dawn tih a hre thuai a.
rang takin a hote chu a hnungtawlh pui vat hnuah Ral ho awmna mual veilam țháng pik karah chuan a hûi lût ta diak a, chuta țang chuan Zawng ang maia thing lawn an thiamna chu hmang țangkai nghalin, a hote nen chuan ngawpui thing upa tak tak leh ramhrui uai seng sung karah chuan an lawn kâng chho ta diak a.
.
Chung lam ațanga Halkhâ pasalțha ho an han mál leh zet chu Thangpiala leh a hote chuan a ngaihna an hre lo hle tawh mai a, a khat tawka Fei leh Thalfang rawn thlawk vúng hlarh an meichhera an én fuh ve meuh chuan thil a pawi zo vek zel tawh mai a ni.
.
Chuvang chuan Thangpiala chuan a hote Lu a hloh leh tak nual avangin ngawpui thim chhah mup hnuaiah chuan a naute chu an meichher a han nawr hlum tir veleh hnuhnawh a, chumi hnua Lusei ho an chet theih tak bik vak loh avang chuan thim hnuaiah chuan thinrim taka inseh ruh khur ngut ngut chungin, ngawpui chu chhuah san rih phawt mai a rawt ta a.
mahse, éng awm lo chu achhapah ngawpui hnuai a lo ni kher bawk nen, dap chawp titiha an kal fê hnu pawh chuan ngawpui an pelh hleih theih loh avangin, an hma lawka ruam deuh laiah chuan khua nghah vâr mai a han rawt leh ta a. chulai ruam an luh rual chuan tlema a thlamuan deuh tawh avangin, a hote chu a theih ang anga chawl hahdam turin a han hrilh nghal a. mahse, Lusei ho chuan ram chin an hriat zawk a rin tlat avang chuan tumah muhil lo tura hrilhin, khawvár ruala chulai ngawpui chu chhuah san phawt a țul dawn a ni tih a hrilh nghal bawk a.
.
Hrumcheûva chuan Halkhâ ho reh ta diak chu ngaihțha zan lo tak chunga a ngaihchan deuh hnu chuan, a hote zinga pahnih chu lei lamah chhuk turin a han ti a.
chumite pahnihin thawm an han ngaihthlak leh fê hnu chuan an khêl an han beng țhak a, chuveleh thingzar leh hrui hnawk kar vela an țhiante tawm fâr chu an rawn chhuk ta sap sap a. lei an han thlen kim chuan Hrumcheûva chuan, fimkhur taka chêt a la țul dawn chauh a ni tih a sawi sup hnuah an vai chuan an thlang lam Khâm hnuai chu an pan thla ta țhâm țhâm a.
.
Mahse, mei pawh a chhem ngam-awm chiah lova an hriat avang chuan thimtham zingah chuan an țhu fár hlawm a, rei vak loah Hrumcheûva chuan a naute ho chu zawi sapa fuih leh paha an chet zel dan tur hrilh lehin, "khua hi kan nghak vár phawt anga naktuk thimțin rualin Ral ho chháwn kan bawh leh ang, an hnuhma thlauh kan dâwm zat zat zel loh chuan kan chanin maianchan pawh a tluk dawn lo tih kan hriat kha aw naute u, kan Halkha Pialdûlkhâka hian ka tum aiin kan tluang a rawn zawh thui tlat tawh!! kan Lal leh kan unaute tân keini hi chu Lusei khaw dang Lal ho angin kan tawlh ve hun hun dawn lo, an Kâwl dâwi (Silai) phiangsen vangin Țiau kân rawk khawpa an zài kan ngai tawh a hnù hmanah, Țiau ațanga râl lehlam zawng hi chu Lusei ho ram a ni ve tawh tur a ni, tu chi leh hnam Lal chhiah khua-ah mah keini hi chu kan tlu lût tur a ni lo" a la ti chheu chheu mai a.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2017, 1:13 pm

.MIHRANGVÁL TE SÛLHNÙ
. By. Llpa rokhum
.
. Episode - 2
.
> A tuk thimțin rual chuan Hrumcheùva leh a hote mi sawmli vel chuan an tawmna kham hnuai chu chhuah sanin, zan lama Thangpiala leh a hote nen an in mál philna hmun chu an hêl ta ngat ngat a. mahse, Sazakâi tlang ngawpui chhung hi a kawr duk avang leh Dûm thûk pui pui tlâk hlauhawm tak tak a tam avangin an fimkhur hle a, chutih laiin ngawpui pawn lam chu eng țan ruaih tawh mahse an chet tlatna ngawpui hnuai erawh hi chu ala thim vawt ruih mai a, Thangpiala leh a hote tawmna an hre bik lo nen, a hma zân ang thoin inmâl phîlna hun a thleng leh ngei dawn tih chu Hrumcheuva chuan a hre chiang viau a ni.
.
An tawmna piah deuh hlek, mual pawng iuh euh an luh hnu chuan tlak lam hawiin ruam thuk zawkah an tla thla leh ta a, chuta țanga an han hawi chhuah chhoh leh meuh chuan ngawpui chhung pawh chu a êng ruau țan tawh a.
.
Mahse, chu hun tak mai chu fimkhur theih tawp hun tur a ni tih Hrumcheûva chuan a hriat avangin a hote chu thawm dîm leh zual turin a han hrilh leh a, chutih rual chuan chak zawka ruam chhak lam pang chu pan chho zel tura hrilhin, chu lai ruam zawmtu mual pathum lungthû ang deuh hleka awm an chuan chhuah rual chuan Thangpiala leh a hote hnuhma chu an hmu fuh ta hram a.
.
Mahse, an zân lam hnû thlauh nge an mahni hi an lo veh lêt veleh tawh reng!? tih chu Hrumcheûva chuan a hriat bik loh avangin a hote zing ami sawmthum chu ami rin Lêngkhâra ho tirin, an dinglam pang zel an luhna hmasa ber mual pangpêr ah chuan a tir liam ta a, Chumi hnuah midang sawm nen chuan an hma lama mual lo pawng leh euh chu kâi pheiin, an awm mekna mual ațang chuan a hnuai ruam râi dupah chuan Lêngkhâra leh a hote nena intawk leh turin, thawm dím zetin an tla thla veleh ta thauh thauh a.
Mahse, pen sawmthum awm vela ruam an luh hma chuan, a râl lehlam ramhrui ûai sung kar ațang chuan Patling nâ tuar aû ruah ruah ri a rawn chhuak âwn ta ruaih ruaih mai a! chuveleh Hrumcheûva chuan a naute chu hlam sawm dan zela pahnih te tea insem dawrh nghal tura hrilhin, Sazakâi ngawpui duk thim mup hnuai chu Patling leh Patling, ngam leh ngam in phîl thawm chuan a luah khat leh ta mep mep mai a ni.
.
Lêngkhâra chuan, țhâng pik kara a naute zinga pahnih hrawk thler duai chunga an tâl mêl awrh awrh chu inseh ruh ngat ngat chungin, a piah deuh hlek lungpui phen ațang chuan a en tlawk tlawk a, midang ho zawng a sem darh tawh si avangin a tawmna ațanga put chhuah hun țha chu a zawn fe a ngai dawn tih a hre kar bawk a.
a naute pahnih la tâl char char thlang lama mihring awm te chuan an rawn hmu em!? tih ringawt chu a hisap nasa mai a, an mahni chu engzat nge an nih a hriat loh avang chuan a Thal a thlah mai ngam rih silo, chutih laiin a naute pahnih ruang chu pawh sawn theih hun remchang chân ngai bawk nen, Halkhâ Ral tawm ping tlat te lahin ruang chu an chawchah tih a hriat chian avang chuan, an hriat loha an mahni phîl hmasak phawt dan tur chu a ngaihtuah ta vang vang a.
.
Chutih lai chuan a duh loh dan berin a naute ruang rawn hlawm tuma Hrumcheûva naute zinga pahnih rawn tawlh phei hrat hrat a han hmuh meuh chuan a kut pahnih chuan ti rih lo turin a vai ta lauh lauh a, mahse, chumite pahnih chuan an rawn hmuh theih siloh avangin a duh ai hma-a che chhuakin, a awmna lungpui ațanga dawk chhuah zawk pah chuan a Thal fang pakhatna chu a thlah vung chhuk ta hlarh a, chumi rual chiaha a naute pahnih ruang awmna thlang lam țhâng pik kara Halkhâ-pa țe rawih rawih thawm a rawn chhuah rual chuan, ruang rawn hnuh sawn tum Hrumcheûva naute pahnih pawh chu rang takin an dinglam hrui zâm pik karah chuan an zuang lut ta nghal a.
.
Hrumcheûva chuan ruam zawm thla tu kawr thim thúk ang reng zet a zawh thlâk lai chuan, a dinglam hnung hret kawr kam lawka Patling țê țhawt thâwm lo chhuak ngaithla chuan a han ding dat a, tuibur hmuam dâ vel a ngaihthlak vang vang hnu chuan, a âi ring leh lungrun zeta Patling țê âwn ráwih a hriat leh rual chuan Ruh tliak ri tuarh leh tisa thûm dawp ri a han hre leh a. Chuveleh a bul kawr ko maia rawn thaw ri thla hrâwk hrâwk lam chu rang taka hawi chho nghalin, a awma Thalfang bur vû chung leh a Thalfang hmuamhma ațanga a thawk zawnga thisen rawn phuan chhuak bat bat, mal ruh tliak uâi hnuang chunga, țhang pik kara Halkhâ-pa rawn tawlh thla țawk țawk chu chiang zetin a han hmu nghal a.
.
Chuveleh Hrumcheûva chuan a rilru siam nghal vatin, chupa in a rawn hmuh hman chuan thawm a chhuah a hlauh avang leh, a thi dawn tho thoa a hriat avanga kut lo thlâk leh chu țula a hriat loh avangin a thlang lam kawr kawkel pùk laiah chuan a luh san ta vat a.
Rei vaklo a nghah leh hnu chuan zawimuanga chhuak lehin, a tawmna ațanga hlam nga vela thui a luh thlak leh laia a hma lam kawr chhung thoa engemaw phe vuaih a hmuh veleh chuan, rang lutukin a bula rawhung bul kawra rawn tawlh lut phenah chuan a lut ta zawk a.
.
Mahse, rei nghah ngai lo takin chu Halkhá-pa chu hawi zuk zuk chungin a rawn kûn chho ta dû dû a, chutah kawr chhuat remlo zeta hrui kal thla ruak pawt chunga, kawrkam a kâi chho tur a in rahkhalh lai tak chuan Hrumcheûva Thalfang chu vûng hlarh chunga chak zeta tlé thla zeuhin, chupa hrui vuan laklawhin zak kau hak khawpa bán phiar fat khawpa a țang lai zakdawh tak mai chu hâm hawng hawk khawpa a zuk verh rual chuan, an awmna kawr ruam thim mup mai chu Patling țe ruah ruah riin a luah khat leh ta a.
Chutihlai chuan, kawr râl lehlama țe thawm rawn chhuak zui zat chuan Hrumcheûva chu inrin tawk leh zualna rawn pek belh lehin, a mihring kah-pa 'aw' chhuah chûai raih tawh awmna a thlen thlak rual chuan, a Savawm khûp ruh Talhtum lian țha zet chuan chupa lu ruh chu dâm dawk khawpin a han hlap ri zui chawrh mai a.
.
Chumi hnuah chuan kawr chu thui vak lo a han zawh thla leh a, mahse kawr zawm thla tawpa a veilam kawi a thlen dawn chuan tlem ding leh detin, thawm a reh tak țhuap avang chuan kawr kam rem deuhlai a ding lamah chuan a per kai ta a.
Chutațang chuan bawkvâk titiha pen sawm vel a tawlh phei leh hnuah a piah maia țhang buk bawk țâwi luih chhungah chuan vak lut lehin, a naute ho thawm leh che vêl zawng kualin uluk takin a mit chu a lên kual ta thuak thuak a.
.
Mahse, an reh țhiap avang chuan Halkhâ Râl ho nen chuan an inhneih leh tawh hle a ni tih hrethiam nghal vatin, indona mualah kher chuan he hun reh hmuk mai hi hun hlauhawm ber lai a ni zawk tih a hrechiang hle a, chuvang chuan, a mah ngei pawh chu hun țihbâiawm leh pâltlang harsa zet laiah a ding ve ta tih a hriatthiam nghal vat rualin, 'hlek'ah a pang khawilai pawh chu Halkhâ ho Kawl Dâwi (Silai) hmang chuan tawrh zawh loh khawpa nâ-in khawi hmun ațang pawh chuan an rawn phîl thei reng tawh a ni tih a hre chiang viau bawk a ni.
Mahse, a Lusei hnam thin thawk laklawh tawh, a tawp thlenpui law law duhna chuan a rilruah a rawn chhu nawn leh tluk tluk tawh a, chuvang chuan helai thleng thlenga an la rawn ûm zui kher hi chuan, nakin thlenga in Chém-hârna ala hring chhuak dawn chauh a ni tih thlengin a ngaihtuah veng veng mai a ni.
.
Thangpiala chuan a hote chu a zau thei ang bera a sem darh tawh avangin, hmun hrang hrang ațanga nâ tuar thawm rawn ri leh rawng rawng țhin chu Lusei ho nge? an nih a hote zing ami? tih a ngaihtuah nasa tawh mai a, Silai lah țhuang lehlama Thlanrawn ho, Lusei Lal ngeng la chhuah ngam ho vau dâi tura nawr mek hoin fung thum lai an hawl tel daih avangin a mah chauh chuan a keng si a. Chuta chhapah, Lusei ho chu kah theih tura hmun rema thlêm chhuah theihin awm duh hek lo le! hetiang hun, inmâl-phîl a ngaih tawhna hmun thawm dim ngaihna hunah hi chuan, thawm chhuahna lai apiang chu Lusei ho chuan an rawn bitum fuh chat chat zel avang chuan hman chi nia a hriat loh avangin a hawl kual a hawl kual a ni ber a, chutih laiin a hote hûi khawm leh tùr chuan Lusei ho an tawlh hun nghah chu a ngai tawh bawk si!, a bul maia a puzawn bawk phêk reng nen chuan an inmelh an inmelh ringawt tawh mai a ni.
.
Chutia a ngaihtuahna senga lungpui keh kara a țhut kûn dû lai chuan a Puzawn chu rawn țe țhawtin, a han hawi phei vut laia a Puzawn bawk phêk lai mawngtama Thalfang bur ding ngar mai a hmuh rual chuan, Thalfang rawn kalna awm chu a mit chuan a han chhui kual rulh rulh a. Mahse, chutihlai tak chuan a bek thâwi sen phei duaih kawpa Thalfang dang rawn thlawk leh chu ngawi renga a kal zelna thlir liam chi a ni tawhlo viau tih a hriat rualin rang takin a tho nghal thuai a. a Puzawn awmna ava thlen phei veleh phun sup paha a Puzawn chu a dara kuahin, an thlang lam kawr duk dûr zetah chuan a zuan thlâk pui ta nghal vâwk a.
.
Chuveleh Lêngkhara chuan rang taka a awmna ațang chuan rawn zuang chhuakin, Thangpiala leh a Puzawn an zuan thlâkna kawr lam hawia a phêt thlák vuaih rual chuan a âwm veilam deuhah Fei a rawn inthiat lût pûlh ta mai a, chutih lai tak chuan Fei rawn thlawhna lamah chuan țe thawt thawmin rawn zui veleh nghalin, Halkhâ pasalțha pakhat hi a dula Thalfang bur vâ chungin a rawn pai chhuak chawn chawn mai bawk a. Mahse, chupa chuan tawrhchhel leh luhlul zeta Lêngkhâra hliam tuar tawlh sawn mek chu thihchilh tum tih hriat taka a pan luih țalh lai chuan, a bul lawk hnim kar ațang chuan Lusei pasalțha pakhat hi rawn dawk chhuak zawkin, chupa chuan Lêngkhâra bul lawk a thlen rual chuan, thisen per chuai leh Lu ruh keh rawp ri kara patling țe rawih rawih thawm chuan chu lai hmun chu a luah leh ta a.
.
Lêngkhâran lawm tak chunga a mah rawn thlâwp tu a țhianpa alo melh lai chuan, a țhianpa chuan rang taka țhâng pik karah chuan rawn hnûk lût thuaiin, a țhianpain a awma Fei bûr vuh phawi sak tuma a chelh rual chuan, hmun hrang hrang ațang chuan nâ tuar thawm ngaihnobei lo zet a rawn ri leh ta râih râih hlawm a. Chutah zet chuan Lêngkhâra leh Satinmana te chuan an lam chan nge țha ang, Halkhâ ho chan!? tih ringawt chu an ngaihtuahna ah arawn lut leh tawh tih an hmelah a lang chiang leh ta hle a. Chutih rual chuan he inmal-phîl na hian nileng leh zankhua a awh mai dawnin an hre ta a.
.
Mahse, chutia an buai dun nak nak lai chuan an piah lawk thing lian zet phen ațanga Thalfang rawn lawr chhuak zâl zâl chuan mitkhap kar lekah an awmna hmun chu rawn luhchilh nghal zawkin, Satinmana tlu zawi hnawk chu Lêngkhara chuan hnuh sawn tumin thei leh thei loin a pawt veleh ta thung a.
hmun him nia a hriat a hnuh thlen hnu chuan, Lêngkhâra chuan Satinmana nâk veilam ruh pahnih inkara Thalfang lut chu a han phawi sak a.
Mahse, Satinmana hliam ațanga thisen chu dan zawh rual a nih loh avang chuan rei vak loah a chat zui ta a, chu veleh Lêngkhâra chuan theih tawpa thapui sawm khawmin, a âwma Fei luhna thi far tlak tlak chung chuan an awmna piah, lungpui phen lam pan chuan a vak phei leh ta țawk țawk a.
.
Thangpiala chuan a Puzawn mawnga Thalfang a phawi sak hnu chuan an zuan thlakna kawr mawng lam chu pan thla zelin, an awmna piah muala perkai tuma an buai lai tak chuan a hote zing ami pahnih hian an rawn fin ve hlawl a, chumi hnua an vaia mual an perkai dial hnu chuan thinrim țeuh chungin Thangpiala chuan a hote pahnih chu midang awmna zawtin, chumite pahnihin an hriat ang ang an sawi lai chuan an chhak lawk ațang chuan an țhian dang panga an rawn lang leh ta hlawl a. Mahse, chumite pahnihin an chhan-na zet chuan Thangpiala chu ati beidawng chiangin, pakhat zawkin a vahna hmun hrang hranga an țhiante ruang a chhar ho Beng a hleh khawm a han phawrh zet phei chuan a meng sen rûm tawh mai a.
.
Mahse, tihngaihna awm hek lo le!! chutih laiin Khua lah chu a rawn hním leh țan tawh mai bawk nen, a vertherna rilru rawn chhuak thut chu thunun duh tawh loin, ngawpui hnuaia a hote la tâng chu nungdamin an awm emaw, an thi emaw pawh nise nghâk khawtlai loa khaw-ên lai ngeia an pakua chuan ngawpui chu chhuah san a rawt ta hmiah mai a.
.
Mahse a rilru erawh chuan heng Lusei an mahni lo êp ngam ve tute hi hun remchangah luh chhuah leh ngei duhna rilru ala put tlat avangin "tun țum chu kan chan a chhia a ni e!, keini ho hian chak thei ang berin kan khua kan pan anga, hun han kal deuh se pasalțha kan khawm leh ang. heng Lusei pawng laklawh ho hi kan țingmit hma chu ka mutui thei dawn lo" (an mahni țawng chuan) a ti bul búl mai a.
.
Mahse, a hote zinga pahnih chuan midang an ngaihtuah thu chu an sawi tak tlat avang chuan Thangpiala chuan thinrim leh inti hotu taka hrâwk zuiin, "anni chu an rawn inngaihtuah ve tawh mai a niang chu, ngawpui hnuai Ni zungin khûp a chhun hunah chhim lam mual kai vek tur tiin ka hrilh vek che u a ni lawm ni!?, chuta kim lo chu kan liam san mai a ngai tawh a nih hi, ka thupêk hnial thei tumah in awm lo" (an mahni țawng bawkin) a han ti leh ta khur khur a.
.
Chutah zet chuan chumite pahnih chuan an hotupa Thangpiala tawrawt zia leh a buluk zia an hriat chian tawh țhin avang leh, an Lal Tumtlira hnenah a hêk vaih chuan an chhungte nen lam an chimih duh mai dawn a ni tih an hriat avangin hreh tak chungin an hotupa chu an zui veleh ta hrâm a.
Mahse, an awmna mual an kal pelh hnu chuan Thangpiala Puzawn chu a bâi nasat tak riau avang chuan, an veilam lam tlang lian vaklo innghat to larh tál chu riah Buk sual nan thlen hman hram tuma kal nghal tura Thangpiala chuan rilru siam felin, Sazakâi ngawpui pan deuhna lai ațang chuan chhuakin chulai tlang te-vêuh chu an pan chho ta țhâm țhâm a.
.
Halkhâ pasalțha panga ngawt tlan chhia a hmuh hnû fê, Khawthim dawn thlenga a reh tlawk tlawk takah chuan Hrumcheûva chuan a tawmna bul lawk thinga thawm dim zeta lawn pah chuan, Halkhâ Ral ho nen an inphîl tawnna mual leh ruam vel chu uluk takin a han chuan vang vang a, chutia a han hawi velna ah chuan a hote zinga pathum, țhâng pik kara an lo la tawm fâr mai chu hmuin, anni pathum pawh chuan an hotupa chu an rawn hmu ve tih a zuk hre thei nghal mai a. Mahse, Halkhâ Ral ho hmel âwm reng reng a hmuh tak loh avang leh, a mah rawn veh tu áwm hmel a hmuh miah loh avang chuan Halkhâ ho chu an darh zo tawh a ni tih hrethiamin, muang fân râihin châng a han tum râih a.
.
A châng tum rîk a hoten an hriat veleh chuan, an tâwmna țheuh ațang chuan rawn chhuakin, an hotupa tawmna lam chu la fimkhur zetin an rawn pan khawm ta țham țham a.
.
An han inhmuh khawm hnu chuan an zinga pasarih chu an kim leh talo tih hriain, uluk leh thawm la dim chung renga a kim velo ho chu zawng kual turin Hrúmcheûva chuan a naute ho chu a han tir kual ta zung zung a. Khaw thim chhulh thlenga an han vah kual hnu chuan, a kim velo ho ruang leh hliam tuar chunga lo insaseng Lêngkhâra leh midang pahnih an chhar chhuak ta a, chumi hnuah Hrúmcheûva chuan ruahmanna thar hmang leh thuaiin, zan hmasa lama a hote ruang nen chuan an Chhip vun a hlep ta mial mial a.
.
Chumi hnuah muangchang tawh lo tura a naute ho chu hrilhin, Sazakâi tlang chhuah lam an Lal Taikherha leh Nunau, hmeichhia leh Tar ho an thuhrûkna hmun, Vahmui tlang khâm chhawrdawh pê iarh lam chu hliam tuar ho paw chung chuan panin, Sazakâi tlang ngawpui dâi thim mup tawh chu an chhuah san ta thuai thuai a.
.
Mahse, reiloteah khua chuan a rawn thim hnan avangin ngawpui pelh hnu lawk, Lo-fíng hnih vel an kal hnu chuan meichher siamin an han chawl leh rih a, chulai hmun ațanga an han chhuah leh hnu lawk erawh chuan, hliam tuar zinga pakhat chu a zi ár âr-a a chatthla ve leh ta mai a!, chuvang chuan ruang zawnna Hláng an siam buai leh chuan Ral ho chin an hre silo nen! an tum loh deuha an bîkbo hman loh palh hlauh rukna chu Hrumcheûva chuan a neih tak tlat avangin an han phûm fel leh ta law law a, chumi hnuah chak thei ang bera chhuak leh nghalin, Vahmûi tlang pan chuan an inchhir liam leh ta a.
.
Khabâwm Lal Tumtlira thinrim lutuk chuan a Banglaia a Chempui inthiat chu phawiin, a pasalțha chhuan em em Thangpiala leh a hote sawmsarih laiin, Lusei Lal Taikherha leh a khaw mite an ûmna ațanga a mah nen pakua chiah hima an rawn haw mek chu a lungawi thei lo a.
Mahse, Thangpiala leh a hote pariat hian khua an la rawn kâi loh avang leh, a unaupa Lal Ralchhêma khua a rawn chawlh haw'n paha an chanchin rawn hrilh tura Ralchhêma khaw tlangval rawn tir mai ala nih avangin, a thinrim chu ala insum viau zawk a.
Mahse, a rilruah Lusei ho chu engtikawng maha an laka pawng ngam tura a ruat loh avang leh, a pasalțha Thangpiala leh a khaw pasalțha rualte hian zuk that fai vek tura a dah ngheh bur avang hian Thangpiala chungah chuan hremna pek dan tur a ngahtuah vung vung mai a, chutih laiin, Lusei ho an hnawh kian tawh hoin an hlauh țhin em avangin, Taikherha khaw pasalțhate hi eng ang fakoa tawhkhirh nge an lo nih!? tih hrechiang tu, a pasalțha Thangpiala thu rawn thlen tur chu la ngaichang phawt turin a upate pawh chuan thu an rawn nasa hle a.
.
Chuvang chauh chuan, Lal Tumtlira hian Thangpiala leh a hote pasarihin, an khua an rawn kâi hun hi a thinbutut râwng zet thup hram hram chunga la nghakin, Thangpiala hi a insawi fihlim zawh loh vaih chuan, a chhungte nen lam thah mang phiar pawh alo chêt tawh dan enin, Lal Tumtlira hian a hreh dawn miah lo tih hi a upamin te hian an hre chiang viau a ni.
.
Lal Tumtlira chuan nasa zeta la inhrosak paha a upate chu melh kualin, Lusei ho laka tlawm tur a nih loh zia leh, Lal Taikherha Lu hian a hnen a thlen hma chu hun dangah nawr leh ngei ngei a tum thu ala sawi chhur chhur mai a, chutih lai chuan a upate pawh chuan dawhthei tak leh an Lal mizia chu an hriat țhan tawh a nih avanga a lungawina tur dap kuala an ngaihtuahna seng rû tak chungin, Lal Tumtlira thinrim, a chhuatlaia a vei tuak chhen chu a kalna lam apiangah an thlêk dual dual reng mai bawk a.
.
Mahse, pasalțha Thangpialan an khua a rawn kâi hunah erawh chuan, engang takin nge an Lal Tumtlira hian alo dawn sawn anga, engang takin nge an tlâwmna hi cho lêt leh tura Ral a rêl leh dawn!? tih chu an ngaituah tel pha hlawm hle a. Chuvangin, Lusei Lal Taikherha vang hian an chhiah khua Lusei Lal dangte hian hremna engemaw tak an tawrh phah ve an ring hlawm hle a ni.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2017, 1:14 pm

MIHRANGVÂL TE SULHNÛ
. By. Llpa rokhum
.
. Episode - 3
.
> Hrumcheûva leh a hoten Vahmui tlang kham pang inchhawrdawh kara an mite leh an Lal Tâikherha an thuhrûkna an thlen lai chuan, khawchhak lam kawlkil tawp ațang chuan Ván a rawn vâr țan ru rû tawh a.
.
An Lal Taikherha chuan an pasalțha rawn haw te chu lawm taka alo dawnsawn rualin, rawn haw ve talo pasalțha sawm chuang mah te avang chuan a ngui ruih mai a, mahse a mi leh sâte an hnam Lusei chhan nana an lu hlân tute hming chu chawimawina Nopui hlanna thinlung puin, chung thi tâte chhungte țheuh chu a thlahthlam dawn loh zia a chham chhuak hial a, chutih rualin, an thisen phuba la tura pasalțha rual Chak zawk din thar leh a tum thu chu a sawi zui nghal bawk a.
.
Hetihlai hian Lusei Lal Tâikherha leh a khuate hi khaw hmun la sât lo leh perh pawh la zep lo, an khaw hlui Țiau râl lehlam ațanga Halkhâ leh Thlânrawn Ralin an rawn ûm chhuah ata tawh ei leh in tur mumal nei lova khawsa mai leh, Puk leh hmun biru lai te bêla biru kuala ram thei leh hnah nêm ring chunga la tlan chhe zel an la nih avang hian, Nausen leh Naupang țhan țha vaklote chu an rawn tlanchhiatna kawngah hian an thi nual a.
.
Chutih laiin Halkhâ Ral hoin a inlan hmasa sa an thah hmiah hmiah zel avang leh, chawl lova an la ûm zel avang hian an tan Țiau rál thlang lam pawh hi duhang takin ala ralmuang chuang lo hle a, mahse tuna an tawm khawmna Vahmui tlang kham pang chhawrdawh kara Puk te hi chu a himin, an pasalțha Hrumcheûva leh a hoten an lo nawr lêt ngamna hian an Lal Taikherha leh a khaw mite hi thlamuangin a siam rei thei dawn em? tih chu an pasalțha hote kutah hian a innghat dawn ta a ni.
.
Lal Tâikherha leh a khaw mite hi an vaiin nunaute nen mi zahthum chuang an nive a, mahse kawngah engemaw zât an vahvaih tawhna ah Halkhâ Ral kutah an pasalțha țhenkhat leh tlangval tam zawk chuan an lu an hloh tawh a, chu mai bakah chetsual palh leh tlang hri avang ten an Naupang leh Nausen engemaw zât chu an thi tawh bawk a. mahse, heti chung hian tuna an tawm khawmna Vahmui tlang pang Puk vela la khawsa hi puitling zâ bawr vel leh naupang zá aia tlem deuh, an vaiin mi zâ sawmriat vel an la tling ve a. Mahse, tu chhungkua mah hi damkim an awm hlawm tawh mang loh avang hian, chhungkua te tea inbawk hrang ve thliah thliah chungin lusun chhungkua an ni deuh vak mai a.
.
Heti khawpa an rawn tlan chhiatna lama an inhloh nasat tawh avang hian, an Lal Tâikherha te chhungkua leh chhungkaw sawmhnih bawr vel chiah hi chhungkima la awm chhun an ni a, chutih laiin an kal leh zelna turah eng angin nge an támtâl zel dawn lah tu khâwkha hriat phâk va nisuh! tuna an tawm khawmna Vahmúi tlang lah him rih viau mahse Țiaú ațanga nikhat leh chawhmá kal vel chauha hla ala ni bawk nen, Halkhâ leh Thlânrawn Ral ho hmuh phâk lohna ram ril lut tur chuan, an hma ala thim map map viau a ni tih hi Lal Tâkherha leh a upa te hian an hre chiang hle a.
.
Mahse, Lusei Lal dang zawng zawng Halkhâ leh Thlânrawn ho lakah zâwr tawh mahse, Lal Tâikherha leh a pasalțha huaisen rual te hian 'Tlawm' an tum lo hle a ni.
.
Lal Tâikherha leh a upate, an pasalțha zawng zawng te chu Vahmui tlang khâm chhawrdawh hnuai mai, hmun rem deuh lai biru zetah chuan rorelin an țhu kual pât mai a, chutih lai chuan chhungtin Pa leh rawlthar te chuan Ram thei leh hnah nêm, thing pil ilo dap khawmin an awmna Vahmui tlang khám chung leh hnuai Ngawpui kar velah chuan an vak chhuak sap sap hlawm bawk a, mahse, an pasalțha ten fimkhur tura an chah reng țhin avang leh, mahnia vak thui lutuk lo tura an hrilh fo avangin pahnih pathum ten an inzui thliah thliah hlawm a.
.
Chutih laiin Nuho leh Nula, hmeichhe hoin mipa Naupangte nen țang hoin an awmna Puk vel chu thenfai hna an thawk ve reng bawk a. Mahse, an vahvaih țanna ata tawh chaw mumal leh ei tur pangngai hmu tawh lo an nih avangin an dawldang țan titih der tawh a, chuti chung pawh chuan awm mai mai leh mi tána phur rit nih chu tuman an tum bik lo hle a ni.
.
Mahse, Naupang chumchiap leh laihrûi la thar deuh te chuan, helai hmun hi ni hnih lek an awmna tur ala ni chung hian an ning leh tawh em em a, chutih laiin Nu nau âk bawr deuhte phei chu an buai a zualin, kalkawnga Nau lu thloh Nu țhenkhat Hnute țang, țâng lum bel tura an fate an hmehbel chang a tam țan tawh hle a! mahse, an Lusei nunzê mawi tak chu an ral tlanna khawi kipah pawh a hmei apa a an la chhawm nun zel avangin, theih tawpin an la inpui tlang zela, chuvang chuan helai hmun an han belh tirh ațang phei hi chuan chhungkaw lian tak ang maiin an khawsa ho a ni ber tawh a.
.
Nitin ei-in inang leh an awmna hmun inang, an khawsak phung inhmuh sak vek tawh an nihna te, tu mah eia in tam bik niloa inpe tawn liam liam țhin leh, induhsak taka puar rual khái taka an insiam țhinna te chuan inpumkhatna nasa tak a hrin chhuah sak nasa em em bawk a ni.
.
Lal Tâikherha leh a upate leh an pasalțhate rorel pawh an thu a inhmu tlangin, tuna an awmna Vahmui tlang Puk hi awm reng nan țha an tilo tlang vek a, mahse, helai ațang hian khawi lam panin nge an inkâwi chhuah leh anga, khawi lamah nge ram thei țam dawm tur an ei khawp a awm ang tih ngaihtuahin an buai ve map map hle a, chutih laiin an chhak lawkah Țiau ala luang tle ruih mai bawk si chuan, helai vela khaw hmun tur han sah ngawt mai chu Halkhá Ral ho laka mahni lu rawlhna hmun țha ah anla ngai lo thei siloa, chuvang chuan, a tuk Ván vâr ruala pasalțha paruk vel, an thlang lam ram chuan tura tirh chhuah leh phawt chu rel thluin, an thu rawn hawn a zira ral ho chhâwn nêmna tur hmun pana tlâk thlak zel chu țha berin an hre ta a.
.
Mahse, tuna an tawm khawmna ai thlang leh pilril zawkah te pawh hian, Lusei Lal dang Halkhâ leh Thlânrawn ho hnuaia kûn mek ten khua an sât nual tawh tih an hriat avangin, chung Lusei an hnampui ngei te pawh chu an tan chuan Ral vek anni tawh tih chu an hre chiang em em a.
Chuvang chuan, fimkhur tak leh tukkhum mit nei ang maia an hnampui Lal dang khuate lakah pawh an chet zat zat a ngaih dawn bakah, an mawng thlâu zawnga an inkâwi kual zel a ngai dawn a ni tih te nen lam an ngaihtuah hmasa diam a.
.
Chuvang chuan, Tumah Ral leh Sapui ilo laka lu chán tura inbarh tawh lova, an perh zehna tur an duh anga ralmuanna hmun leh ei in kawih khawm ve theihna tur hmun chu kim taka inkâwi thlen vek chu an tum ruh hle tawh a.
.
Mahse, pasalțha an ngah tawh loh avang erawh hi chuan Lal leh a upate chu an buai ruin, an zinga Rawlthar hmang chho țan mêk kum sawmpathum leh sawmpasarih inkar, Vaibel dáwn inlek phek vé țan uaih ûaih thei tawh chin rual ho chu pasalțha rothap nitura chher hriam vat an țul hle tih an hre chiang hle a.
.
Chûng ho chher hriam hnâ thawk tur chuan pasalțha Hrumcheûva leh Keikâwla chu an thlang chhuak ta a, anni pahnihin an duh ang taka an mipa Naupang rualte an chher chhoh theih phawt chuan, pasalțha rual tawhkhirh zet leh che fel rual an neih ngei Lal Tâikherha leh a upate chuan an ring em em a ni.
.
Mahse, ei leh in an duh ang hmu țha an nih tawh hlawm loh avang hian, an Mipa Naupang chher hriam tur ho pawh hi pian țha deuh leh dawk deuh thlan chhuah mai chu an Lal fing zet Tâikherha chuan rawt lehin, "kan mipa naupang Vaibel dáwn inlek phek țan ûaih ûaih thei chin zawng zawngte kan vaihma mai chuan țul loah kan buai phah êrh thei a, chuvangin kan rel tlan tawh angin Phar vûi tham lek pawh pasalțha kan neih belh leh chuan, kan nunaute dâido tur leh thlamuanpui tham kan nei leh ngei anga, chutih rualin, kan fate chher hriam dan tur kawngah chuan an mahni kaihruai tu tur, pasalțha Hrumcheûva leh Keikawla te hian a mawh thui tak inphur dawn a ni tih hria ula, zanin hian heng kan rawlthar chher hriam turte hi kan thlang chhuak nghal ang" a han ti thâwp sat a.
.
Mahse, upa pakhat chu rawn țawng chhuakin, "kan Lalpa in ka țawng lo pawmzam se...midang pawn min lo hrethiam hram ula, kan rawltharte chu an vaia khawm mai hi ațha lehsi lovang maw...!?a laklawha tlin talo chu chhawk țhen leh ta zawk ila tichuan, kan mihrâng leh huaisen tur chu kan malman fak fak thei zawkin ka va ring em..Lalpa" a han ti a.
.
Chutia a upate zingah pawh a rin pawl tak Laiapa in a rawn tih takah chuan Lal Tâikherha chuan an rel hmasak dan chu Laiapa rawt ang chuan her danglam leh hret rem an ti tlang em? tih midang ho zawng zawng chu zawtin a han rawn kual leh a.
Chuveleh midang zawng pawh chuan țha an tih thu an lo sawi ve sap sap hnu chuan an rorel chu ținin, an rorelna hmun, țhâng leh hrui zâmin a khuh thim chhalh hnuai lungpher hlam sawmthum bial vel inphah dap chu an thawh san ta sang sang a.
.
Vahmui tlang hnuai Lofing thum vela hla, ngawpui ruam biru zet chhung thim vawt ruih hnuaia Pasalțha hrátkhawkheng pahnih leh, rawlthar rual sawmthum vel ding tlar țhap te chuan chulai ngawpui hnuai nungchate thawm chhuah tur chu ti hlauin, an chung lama Sava chitin rak chil chêl thawm bak chu thawm dang hriat tur a awm lo hle a.
.
Helai hmunah hian eng vanga heng ho hi lokal khawm nge an nih? tih leh enge an tih dawn? tih chu an hotute pahnih chauh chuan an hriat avangin, Rawlthar țan tir leh a ai lian tawh deuhte chuan, an hotute pahnih chu uluk tak leh zawhna tam tak an neiru ve tih hriat tak hmel puin an thlir țhap mai a.
.
Mahse, an hotute pahnih hmela huaisenna leh tum ruhna lolang chhuak an hmuh rual chuan, chung rawltharte chuan thil ho mai mai avanga an pasalțha te pahnih hian, helai hi thlenpui an ni hauh dawn lo tih chu an hrethiam ve hle a. chuvang chuan an thu anga awm zel phawt tura an rilru chu siam ve deuh deuhin, an hotute pahnih rawn țawng chhuah hun tur chu an ngaichang ve țhap mai a ni.
.
Chutia an din ngawih țhap lai chuan, an hotu pakhat zawk pasalțha Hrumcheûva chu rawn țawng chhuakin, "rawlthar fel tak tak te u, kan khua Sialphêng ațanga Halkhá Ral hoin diriam taka min hnawh chhuah na chin hi ni tam ala liam loh avangin kan dinhmun hrethiam rual inni ve vek tawh a, chuta chhapah kalkawnga kan hun tawn leh lu leh fukê hloh kan tam zia pawh inhria, chumai nilovin, tun thlengin Halkhâ Ral ho phiar rûk leh ûmzui kan la nirenga! ei tur leh inhrãi puarna lah kan tan a buaithlak tawh zia inhre bawka, heng zawng zawng laka kan zalenna turin keini in pasalțha rualte mai hi kan tawk tawh lo, chuvangin in Lal, in Nu leh pa, in pi leh pù leh inthlah te zel tur tan nangni hi thih ngam lu pua insan mâr ve alo țul ta a ni.
Heng Halkha Ral thinthi leh chaw kawpuar hmua min awm tir duhlo tute vang hian, kan chhungte, inchhungte in Hnampuiten lu an hloh țeuh tawh tih hre reng chungin, kan thlang tlâkna kan ram chhung hi chu Hlakhá Ral ho lakah hian kan veng ve tawh tur a ni tih hre reng ula, Țiau ral thlang lam zawng hi chu kan Hnam Luseite tâ a ni tih hi Halkhâ leh Thlânrawn Ral ho lakah hian kan lo lan tir a ngai ta a, chuvang chuan kan Hnam leh kan ram chin hi humhalh turin, nangni hi zirtirna kanpe dawn cheu a, chhel tak leh pasalțha huaisen tawhkhirh nitura in inzirna hautak zet hi in pal tlang a ngai dawn a ni.
Chuti lova tumruhna nen in beih loh chuan kan Hnam Lusei hnam hi kan mang vek mai dawn a ni tih hre reng bawk ula, tuna kan Hnampui Lusei tam tak min țanpui duh lova min tlanchhiat san tute pawh tumah dim a ngai lo! heng ka sawi zawng zawng hi tun ațanga in dam chhungin in thinlungah khan pái reng tawh ang che u" tih pahin rum lutuk leh thinrim tih hriat zetin rawlthar ho chu a kâwk vû mai a.
.
Chutah zet chuan, chung rawlthar ding tlar țhâm te rilru chu nasa taka inlumletin, an pasalțha ngaihsan em emin, an thinlunga Halkhâ Ral ho huatna leh, an Lusei pui, an mahni phatsan tute huatna a han tuh zet chu a tum a țhelh lo chiang hle tih Hrumcheûva chuan a hre chiang thawkhat hle a.
.
Chuvang chuan lawm taka a țhianpa Keikawla lam chu hawi phei chunga nuih sak pahin, rawlthar ho chu sawmpanga ve ve in an thliar fel ta a.
.
Pasalțha hratkhawkheng, Hrumcheûva leh Keikawla ten an rawltharte an han hrual tak tak chu a ropui rep rep hle a! mahse, an rin loh takin an zinga pariat ngawt chhawk ngai khawpa an țuan a fum tak tlat avang chuan, rawlthar sawmhnih leh pahnihte chu hrual zawm zelin, an zinga chawrche bera an ngaih kum sawmpanga mi, Hmeithai fapa neih chhun Zakulha chu a huaisen falin Thal kah leh Fei khawh te chu a zei em em mai a! a kut thlâk lah a nâin, Savawm khûp ruh hmanga Kawrthindêng rah lian țha lenglawng, a han hlap darh chuai chuai mai țhin te chu pasalțha Hrumcheûva leh Keikawla te chuan mak an ti thei em em mai a ni.
.
Zakulha hi Lal Tâikherha khua Sialpheng rawlthar chhuak hlim a niin, Sialpheng khaw pa Sâ lu kuai thei ve tak Chhunrânga fapa neih chhun a ni a, mahse a pa Chhungrânga hian thlang an tlak hma lawk hian ngawr hri veiin a boral san a, chumi hnuah a Nu Khiangchêmi nen chauh hian khawsain, a pa pasalțha hriat hlawh khawpa hming chher lem lo chu mak tak maiin a rilru huaisenna chuan a tettê ațangin a khûm tlat mai a!!, chuvang chuan a pa in Sá lâk deuh ringawt hmanga a hming a chher ve laiin, a ni hi chuan Sâ leh ral lakah mi ropui niturin pasalțha te mizia huaisenna famkim a phawk tlat mai a ni.
.
Hei vang hian a pa Chhunrânga pawh hian a tu khawkha hriat lem lohin a rukin alo zirtir nasa fê tawh tih a rawn lang chhuak țan ta a, chutak mai chu pasalțha Hrumcheûva leh Keikawla pawh hian an hmu chhuak țan ta a ni.
.
Mahase, Zakulha hi mite aia pa lian leh țhan țha a nih loh chu thuhran, an rawlthar hrualte zingah pawh a chawrche leh dawldang, hmelah lah han ngaihnobeina reng reng neilo, hmai tlang hriam hret hràwt leh cher riâ țhâng a ni reuhin, a pian zia ah chuan kham khawp eia in lo tih a lang reng mai a.
.
Chuvang chuan han en mai phei chuan heti taka a kut thlák a nâ mai leh, a Fei khawh leh a Thalfang chhuah na lutuk hi Hrumcheúva leh Keikawla te chuan an mahni ai pawha khutthlak nâ hmuhin an hmu tlat mai a, chuvang chuan, a țhiante nena an inbuan tir chang pawhin a ruhno deuh a tum chang chuan a kê te chu anlo pheh sak țhin a.
.
Mahse, chuti chung pawh chuan Zakulha han tér pha leh, duh ang taka Zakulha tha thlawp zo chu a țhiante zingah chuan an hmu lo chho ta telh telh a, chutih laiin Zakulha chanchin hi an Lalpa Tâikherha bulah chuan la zêp tlat rihin, a mit hmuh lai ngeia Zakulha huaisenna leh luhlul tawrhchhelna chu la tih lan zawk atan an khek dun reuh reuh mai a ni.
.
Hrumcheûva leh Keikawla ten an rawlthar sawmhnih leh pahnihte an hrual dan chu Lal Tâikherha leh a upate chuan an fak hle a, mahse, a taka indona hmachhawn an la nih hlawm loh avangin, eng anga huaisen nge an nih tih leh, eng anga Hriam chelek thiam nge an nih dawn tih chu a takin anla fiah tak tak thei lo tih an hre chiang a.
.
Chutih laiin, chung rawlthar sawmhnihpahnih te fiahna hun hnuhnung chu a rawn thleng dawn hnai ta a, chu fiahna paltlang ngei erawh chu hmun ralți leh indona khirhkhan berah pawh, an pasalțha ralhrât te chhâwn an veng pha ngei turah an ngai tawh a.
chuvang chuan, tuna Hrumcheûva leh Keikawlan an hrual twhna ringawt pawh hian, an mahniah huaisenna tam tak a tuh nghet tawh a ni tih an hriat avangin tlangval naran aiin an chhawr tlak vek tawh tih an hre bawk a.
Hetihlai hian, an ram thlithlai tuten an tlâk thlâk zelna tur an rawn hual deuh tawh bawk nen, an awmna hmun Vahmui tlang pang Puk hi chhuah san an duh deuh țan tawh a, hei vang hian, an rawlthar te fiahna hun hnuhnung pawh hi a hma thei ang bera hun pek mai chu an ti thlù ta a ni.
.
Lal Tâikherha leh a upate chuan rorel lehin, an pasalțha Hrumcheûva leh Keikawla te chu an ko tel bawk a.
Lal Tâikherha chuan Hrumcheûva leh Keikawla te chu an rawltharte chanchin zawtin, an fiahna hnuhnung ber tur an ruahman dan te chu an han zawt a. Hrumcheûvan, Keikawla nena an ruahman dan a han sawi meuh chuan, Lal Tâikherha leh a upate chu an meng phawk nasain, "kan rawltharte fiah nan chuan a hman chi ang maw...!!?, tuna an rilru put dan leh an Hriam chelek dan hi rin tlak leh awm nawm puina thamah inla ruat chiah lo deuh nia ka hriat rualin, kei ngei pawh hian indona hmachhawn tur chuan an la duap deuhin ka ringa.
Mahse, nangni kan pasalțha te pahnihin ruahmanna țhatê in lo neih chu hlen chhuak turin an bei leh poh a niang chu...fiahna hnuhnung tur in ruahmanna hmasa kha kei leh kan upate hi chuan țha kan lo ti viau tawh a, kha hun kha an paltlang thei a nih chuan pasalțha awm nawm phahna tlak turah kan lo ruat hmin der tawh reng a, tuna in ruahmanna thar in rawn thlen leh zet hi chuan hlauh thawnna te pawh min neih tir titih deuh der mai a...,!! Mahse, nangni meuhin intih chuan kei leh kan upate hian kan hnial ngam hleiang...," Lal Tâikherha chuan a han ti dam duai a.
.
Chutah Hrumcheûva chu 'aw' then deuh khurh paha rawn țawng chhuakin, "Lalpa, tuna kan ruahmanna rawn thlen hi chu kan rawlthar pakhat fiah nan bika kan tih a ni e, a dang zawng hi chuan kan thu rawn thlen hmasak kha fiah nan paltlang tumin an bei anga, he rawlthar pakhat erawh hi chu i lakah ngei pawh kan la Uțawk tûr vawn rih dawna, nang pawn min hriat thiam hram ka ngen nghal a che" nui vur vur chungin a han ti a.
.
Chu thu an han hriat phei chuan Lal Tâikherha leh a upate chuan mak an tiin, chu rawlthar chu hriat an chak kher mai a. mahse, a pasalțha pahnihte chu ngaipawimawh der thiam takin "nangni meuhin inla thulkhung si chuan in duh ang chuan ni mawlh teh se" tih pahin Lal Tâikherha chuan a Vaibel chu vaihlo khêk tawh tih hriat takin a han híp deuh vâng vâng a.
.
Rawlthar rual hoin fiahna hnuhnung ber suala an han beih zân zet chuan, an chhungte țheuh chu an mangang titih lek lek hlawm a.
Mahse, an pasalțha pahnih Keikawla leh Hrumcheûva te chuan ngaihțha taka an awmna khâm hnuai chu pan thlain, an rawlthar rual mahni țheuha meichher pawh keng lova, ramhnuaia an vah darh tir chu khawfing chah hma a lolang hlek an awm thulha Thala lo kap zawt turin Lungpui chungah an chang dún rûn mai a.
.
Chutihlai chuan, an Lal Tâikherha leh a upate pawh ngaihțha zan lo taka zan rei tak thlenga pawngsen tlaivâr pawh huama inkawm khawmin, Puk chhung zau deuh laiah chuan mutchhuak si mutthilh theih inring bawk siloin an țhu kual pap reng mai bawk a.
.
An rawlthar fiahna sual mek chhungte țheuh erawh chu Puk pawn leh chhung vel chu kartawn chunga vei leh sap sap țhinin, Zakulha Nu Khiangchêmi pawh phak deuh chepchawpin Puk kil khatah a țhu khap ban chap chap mai a.
.
Chutihlai chuan, țhenkhat phei chuan an rawltharte fiahna chu an ngaihdan a nih em em loh thu, phun pui deuh sap sap paha Puk chhuat hmun țhenkhatah chuan mut hmun remin, an pasalțhate pahnih thil tihdan chu an dem deuh lek lek hlawm a.
.
Mahse, Hrumcheûva leh Keikawla te hian, an rawltharte thlithlai rù tûr leh Sapui leh Ral an tlak thulha rang taka pawh nghal turin, a ruka tlangval sawmhnih an tirh avangin chung ho mitmei dê pawh chu an hái dêr lui hmiah mai a, chuvang chuan, engti kawng mahin an chhungte lungawilo hmel avang chuan an thil tih chu țhulh phah an tum lo hle a ni.
.
Zankhua a an rawlthar rualte hmel an rawn lan tak loh hnu leh, a tuk ni chhuah hun țep tawh pawha anla reh dak fo avang chuan a tute pawh chu an phe sek tawh hlawm a, chutih laiin Hrumcheûva leh Keikawla lah an țhutna ngai lungpui chungah chuan tui taka la titi-in, an thlang lam râla tlang hrang hrang te chu an la kâwk kual zut zut reng mai bawk a.
.
Lalpa Tâikherha leh a upate teho lah an mangang țan tawh bawk! an ngaihdan sawi hreh si, awm nuam chiah siloin Puk chhungah chuan an vei tuak ve sek tawh mai a.
Mahse, tukțhuan rel hun awm vel dawnah chuan an awmna Vahmui tlang chung lam leh sir lam ațangte, an hnuai lam pang ngawpui ruam râi dup a țangte chuan rawlthar rual ho chu an rawn lang ta phak phak mai a!, reiloteah an awmna Puk chu a rawn lang hmasa te chuan rawn thleng khawmin, a hnung berah Zakulha chu a lua lei kai luai chungin an awmna Puk veilam, ngawpui hnuai thim mup ațang chuan a Hnâwkhâl ven dawm țât chung chuan a rawn țhen chhuak ve ta țhâ a.
.
Chuta an han inhmukhawm leh zet chu Hrumcheûva leh Keikawla te chuan nui vur vur chunga an naute ho chu an dara ben thak thak pahin, "tunah zet chuan kan tlang bâwh apiangah kan mite thlamuantu nih in tlin ta"! Hrumcheûva chuan a han ti a.
Chumi hnuah Puk chhungah chuan an vaia lut dialhin, an Lalpa Tâikherha leh a upate țhut khawmna ah chuan an țhu kual ve ta pât a.
.
Chutah Lal Tâikherha chuan lawm taka lo dawngsawngin "kan rawlthar chhuanawm te u...helai Puk thim hnuaia harsa tak leh ei mumal tur pawh hmu lova kan khawsak chin atâ, vawiin ni zet chuan hlim taka ka nuih lehna ni inrawn thlen ta e!, tun ațang chuan Halkhâ leh Thlânrawn Ral ho lakah nangni ho vang hian, Lusei chhâwn kan lek puk leh zual thei dawn tih ka hria a, chuvangin, helai kan chhuah san huna kan thlang lam tlang kan bawh hunah pawh Nunau leh Tar chak lo te, Hmeichhia leh Naupangte tana inhumhimna ni ngei turin ka beisei che u a ni" a han ti dam dup dup a.
.
Chumi hnuah pasalțha Keikawla chu zawi thawp deuh sata rawn țawng chhuak velehin, "tunah zet chuan kan zinga pakhat tih loh hi chu pasalțha a chhiar kan ni ta e" a rawn tih rual chuan mipui ho zawng zawng chu lo phawk deuh hrûin, rawlthar sawmhnih leh pahnih zinga pasalțha a la chhiar ve loh pakhat chu tunge ni ang!!? tih zawhna mitmei pu chunga thlirin Keikawla chu an thlir deuh țhup mai a.
.
Mahse, Keikawla chuan nui deuh hâi chunga mipui ho makti phawk hrâ hlawm chu rawn melh kualin, "helai Puk kan tawm khawmna hmun hian, pasalțha huaisen rawlthar heti zat a hrin chhuah te zingah hian, fiahna pal tlang nawn leh ngat tur kan hual a.
Mahse, he rawlthar hi a hun a rawn thlen hma chuan tuman kan hriat a rem rih dawn lo a ni" a ti ta deuh deuh mai si a.
Chutah zet phei chuan mipui ho chuan chu rawlthar chu hriat chak leh zual taka phun sup supin, rawlthar danglam chu tu tak niang maw!? tih inrin siaka an buai map map hlawm lai chuan, Lalpa Tâikherha chuan nui vur vur chungin, a khaw mite chu mahni ei tur vaia fimkhur taka vak chhuak tura hrilh pahin, an awm khawm chu a țin fel ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2017, 1:14 pm

.MIHRANGVAL TE SULHNU
. By. Llpa rokhum
.
. Episode - 4
.
> Khawchhak lam kawl kilah van arawn vâr ruai ruai lai, Lêntlang leh Sahmulkâi Tlang vel pawh a rawn pâwt châk tawh lai chuan, Vahmui tlang kham ráng inchhawrdawh hnuaiah chuan, pasalțha pahnih leh rawlthar riâ sa pan lampang mitmeng fiah țha zet leh hmai sâwl rât te pathum chu an kal thauh thauh mai a.
Vahmui tlang ațanga Lofîng thum vela hla ngawpui pilril an luh hnu chuan, tlang lian lo tak, thing upa zet zet leh hnim leh țhângin a khuh hlim dap chu thlengin, chulai ngaw hnuai hmun pakhat mual pawng deuh euhah chuan an pathum chuan an ding țhap a.
.
Engemaw chen chulaia an chawlh vang vang hnu chuan pasalțha pakhat zawk chuan an rawlthar hruai chu fiah taka enin, "taite, i huaisenna leh rawlthar danglam bik i nihna hi kan Lal leh kan khaw mite lakah hian i lan tir a ngai a, chuvangin, rawlthartê ni mahla i kum phu loa i theihna i lantir hi kei leh Keikawla hian kan phût che ani tih i hre dawn nia" a han ti dam duai a.
.
chumi hnuah pasalțha Keikawla chu nui vur vur chunga rawn țawng velehin, "rawlthar pasalțha Zakulha i ni lawm ni!?, Lusei hnamte laka hriam leh tharum lek tu Halkhâ leh Thlânrawn ho lakah hian i tlawm dawn em ni!!?, i tlawm lul dawn lo tih i theihna hian han lan tir ta che. Țiau râl lehlama i pa leh i pi leh pute thlân leh ruhro pawh hauh ngam lo khawpa min phíngchil tute kha tute nge!!? chu pawh la duh tawk lova, i tlan chhiatna Țiau râl thlang lam thleng thlenga i unau Lusei hnamte thisen chhuah zui tute hi i hria a ni lawm ni!? Zakulha, mihuaisen hlauhna pianpui lo i nihna khan, i unaute thisen chhuak tireh tur hian a nawrin a phut che a ni tih hre reng ang che" tia a han fuih leh meuh phei chuan, Zakulha mitmeng fiah fim kâk mai chu thinrimna leh tumruhna chuan a rawn bual tlê zawr zawr tawh mai a.
.
Chutah, Hrumcheûva chuan rum taka rawn melh lehin, "taite, kan khaw chhak lamah Ni pawh a rawn mwm ta..i tih tur chu hlenin, rawlthar mihratkhawkheng i nihna chu lan tir rawh le" tih pahin a Savawm khup ruh Talhtum leh Thal chu Zakulha lamah chuan a han lek phei vû a.
.
Zakulha chuan Talhtum leh Thal leh Thalfang sawmhnih vel chu rang taka lo la-in, "u Cheû, u Kâwl min ngaihtuah suh ang che u, ka tum hi ka hlen hma chuan kan Vahmui tlang hi ka rawn kâi dawn lo" tih leh zei lutuk mai a, an thlang lam mual ruam râi thla dup lama lîm thlak chu a rual ta nghal a.
.
Zakulha a liam hnu chuan Hrumchéûva leh Keikawla te chu nui dun vur vur chunga inherin, tha tho leh Zakulha laka beiseina zawng zawng nghat chungin Vaihmui tlang lam chu an pan chho dun leh ta thauh thauh a.
.
Chumi tlai zet chu Lalpa Tãikherha leh a khaw mite chuan, an rawlthar Zakulha fiahna hlauhawm paltlang tura liam tâ mawlh ngaihtuah chuan an phili sek reng mai a.
Mahse, an pasalțha chhuan leh rinrawl Hrumcheûva leh Keikawla ten an rin em avang leh, a laka beiseina nasa tak an nghah tlat si avang chuan, Zakulha tan chuan Khuanu malsawmna dil sakin an phun leh sap sap țhin a.
.
Chutih laiin, mipui tam zawk lahin Zakulha chuan chu fiahna chu a paltlang theih an rin loh avangin, an pasalțhate pahnih thla chu an han haû leh tak an bawrh bawrh a.
Chutih laiin, Keikawla leh Hrumcheûva lahin Zakulha chungchanga an kâ âng duh loin, Zakulha mize ropui zet an hriat ruk kâr chuan tuna fiahna hi a hneh ngei dawn a ni tih an ring nghet bur mai a ni.
.
Zakulha chuan, a luhna ngawpui chu uluk taka chian zelin a mit țha zet leh a beng fing lutuk chu englai pawn a chawlh tir lo hle a. chutih lai chuan khua lah alo tlai tawhin, a lawn lehna tur hmabak tlang lian zet, a chhip lai taka ruam hniam duk leh thim deuh mûk tawh chu a awmna ațang chuan a chhoh thlir vang vang a. mahse, rei chawl lovin chu tlang pang innghahna lai taka zolui fim leh thiang vawt râih, hmar lam zawnga luang ri thla hâr hâr chu a luhchilh ta thuai a.
Lui tui fim vawt reih rawih a duhtawka a in hnu chuan, zei leh thaza zetin chulai tlang pang chu a lawn chho leh țan ta a ni.
.
Mahse, rawlthar huaisen leh mi pangngai aia chungnung, thâ ngah leh țuan rang a nihna chu chhawr țangkai chho zelin, a mah chauha ramhnuai ngawpui bêla a vahna hmun chu hlauh a hnekin nuam ati kher mai a.
.
Chutih laiin, a hma a tihtur rorum leh nunna chân hlauhawm zet mai chu hlen chhuak ngei turin a rilru a siam sauh sauh mai bawka.
.
Tlang chhip a lawn thlen dawn lai te chuan hah leh chauh pawh nei mang lovin, lungpui leh thing tlu luang chungah te chuan a per kai chho zat zat mai a, reilote ah a duhna hmun a thlen chhoh hnu chuan, riahna tur hmun rem lai zawn paha chu tlang ngawpui thing kar ațanga, Ni tla mek zung rawn lut dê thliah thluah chu melh leh zawkin, a chhak lawka lungpui lian leh upat tawh hmel zet zet pahnih, Patêk leh Lungsam hring nghulhin a bawm thim deuh ruih inkamkî hnuai, kaw thim map mai chu a pan chho leh ta a.
.
Chulai a han belhchian that that hnu chuan, riah nan chuan a remchang dawn hlea a hriat avangin pawn lama lung pakhat, lungthu tiat vel leng lawng inhung thlih thliah zinga pakhat chu va chawi nawlhin, lungpui hnuai rem laiah chuan a han nghat ta chawrh a.
Chumi hnuah, pawn lama mau ro leh thingțang tla vel chu va fawm khawm lehin, a pa chem thih san a rochun, khawi kipah pawh a pâi ve râng țhin chhuanawm loh zet chuan a sat chhum ta zung zung a.
.
A duh ang tawk te tea a tan nual hnu chuan mau pakhat chu uluk taka sui mumin, alaia a ulh tliah leh hnuah kûn ngar chungin a mau sui ulh chhum bung pahnih chu a nawt bu ta tlauh tlauh a.
Rei fê a nawh hnu chuan a nawhna lai chu a rawn mût khu ta hlat hlat a, chuveleh uluk zeta a khûkna lai chu chhem hauh hauh pahin a bula hnahthel ro chu a han țham khawma, chutah, a hmawlh chhem rawn lîng hlarh hlarh chu hnahthel karah chuan rawlh lut lehin, rei vaklo a chhem leh hâm hâm hnu chuan a rawn alh chhuak ta hlarh hlarh a.
.
Chutia mei a nun zawh hnu chuan a awmna ngawpui pawh chu alo thim deuh chhulh tawha, chuvang chuan muangchang tawh loin a Thalfàng panga chu thlang chhuak lehin, a Buk thlang lam tlang pang tlak lam chhawng lamah chuan a put thla zui ta a.
.
Lenglen hun pelh hnu awm hretah chuan Zakulha chuan a Buk chu thleng chho lehin, a Vahrit kah thlak chu a puah nghal sawk sawk a.
reiloteah hem hmin tura a siam hnu chuan a mei chhem chu a han chhawm țha leh sat sat a, chumi hnuah a rilru kawm chunga a tihtur te ngaihtuah chung zel chuan a Vahrit hem chu a tuai vir ta vat vat mai a.
Vahrit sá nen zanriah a khahchilh fel hnu chuan, a tawmna lungpui hnuai maia a mau tuium chu a han ban zauha, chumi hnuah lungmuang fahrana a lung chawi luh lukham chung chuan muzâl zui nghalin, a tuk lama a hun tawn tur ngaihtuah vang vang chung chuan reiloteah a muhil zui ta a ni.
.
Mahse, tuibur hmuamdâ vel chauh a chhin sek lai chuan, a tawmna lungpui chhak lawka hnahthel rawn ri țhuap țhuap chuan a hriatna țha zet chu rawn țhawngin, a mitmeng fiah kekáwk chu thawm awmna lamah chuan a han len chho nghal kiau mai a.
.
Chuta a thil han hmuh zet chuan, Zakulha chu lungawi lohna nasat zet a thinlungah rawn siam nghalin!, a riahna lungpui hnuai țawmpui tuma Savawm no hruai lai a note pakhat, khûp chen vel lai nitawh nena an rawn chhuk lai chu mei êng thlâr êng dul ruih hnuaiah chuan a han hmu chiang kher mai a.
Chutah zet zawng Zakulha chuan țul lo takah intihbuaina a chhuak dawn tih a hriat chian em avang chuan, a Thalfang pakhat chu a hruiah chuan hmet bet nghalin a Talhtum chu a kapkarah a han hnawl lut nghal zat bawk a.
Chutihlai chuan Savawm nufa lah chuan, an riah tumna chhungah rawlthar huaisenin a lo tawm khalh tawh tih hre bik hek lo le! Zakulha lahin chu mite Nufa vanga a Buk chu kian san duhna rilru chhetê pawh neih chu sawi loh, a mutui lai an rawn țhawng tho ringawt pawh chu lungawilo zeta lo melhin, a lo rum ngâl ngâl mai bawk a.
chutia alo in rin penpâwn tawh lai te chuan Savawmnu chuan a no mawnga nawr nûk nûk chung chuan, hmanhmawh tura tur niawm takin a han tep zui chup chup a, chumi hnu lawk chuan Zakulha tawmna lungpui hnuai chu mihring leh Savawm insual thawm, thûm dawp dawp leh hûk tuarh tuarh ri chuan a khah zui nghal buan buan mai a ni.
.
Zakulha chuan Savawmnu hnuaia a lu veng chunga tawm khawm chaih chung chuan, a bawp pahnih chuan Savawm kawngah chuan a kherh bet tlat mai a!, chutih laiin thinrim taka Savawmnu chuan Zakulha chu thin thlak tuma beiin, lungpui hnuaia hnahthel tla khawm darh chum chum khawp chuan a bei bawk a.
Zakulha lahin Savawm zakdawha a Thalfang lut chu dap fuha nawr luh thuk leh zual tumin a bei bawk! reife an innawr hnu chuan Savawmnu chuan pawn lamah a hnuk chhuak ta hlawl mai a.
.
Mahse, Buk tualah pawh chuan Zakulha chuan fing zet maia ding chhuak duh miah loin, a hnuai lam ațang chuan țan ala khawh mar pât mai a, chutia luhlul zeta Savawm zakdawha Thalfang lut man fuh tuma a beih lai chuan, Savawm chuan a meipui chheh te chu a hâi darh chum chum mai bawk a.
chutihlai chuan, a note chuan a Nu leh Zakulha insual lai chu hûk dap dap chunga lo tlan hualin, Zakulhan Savawmnu zakdawha a Thal lut a man fuh ruala, nâ zeta vih hrawk paha a kherh behna a thlah rual chuan, Savawmnu chu pâi chuan chuan chung leh a note pawh ngaih sak tawh loin thlang lamah chuan a hûk thla ta tuarh tuarh a.
.
Savawm nufa an țin hnu chuan Zakulha chuan, la lungawi lo zet chunga rûm ngâl ngâl paha a mei thingthu nung darh dê sup sup chu fawm khawmin, mei a chhem alh leh hnu chuan a dâr veilam saipir chen dawn vela hmun hniha lo kau hâk chu a han bih chianga, chumi hnuah a bula phelsêp pakhat chu uluk taka metin, a meh thlak phûai dip chu a dâr hliam laiah chuan a hnawh tawn tawn a.
.
A han mut fel leh meuh chuan a dar hliam chu a delh thîp vang vang mai a, mahse, a luhlul tawrhchhelna chuan a nâ chu ngaimawh lo zeta mutthilh san zui nghalin, buaina tawk lo ang maiin a mumang ramah a cheng zui ta vang vang a.
.
A tuk zing a han harh chuan a awmna ngaw hnuai chu la thim viau mahse, Zing Sava chiar noh noh te chuan kawlkilah Van a vâr tawh a ni tih Zakulha chu a hriatthiam tir nghal thuai a, chuvang chuan hmanhmawh zeta insiam nghalin, a Vahrit hem hmin la neih chhun êi chap chap chung chuan a awmna tlang dung tawp lam chu chhak lam hawiin a zawh leh ta ngat ngat a.
.
A mah zirtirtu pasalțha pahnih ten, an hrilh anga a thluak fim tak hmanga a kal avang chuan a pan lam hawi chu a tisual lo tih a hrethiam hle a, chuvang chuan, a tum dan leh a kal dan a dik reng theih chuan khawthim rual chuan 'mibik' a nih avanga a thâ leh țuan țha zet chuan a tum ram chu thlenpui theih ngei a beisei a ni.
.
A rin ang chiahin chawhma țha zet zawt a kal hnu chuan a awmna ram chu tlang lian leh ruam thûk tak tak awm tawh loin, phaizawl leh mual châm deuh pêput hlirin hmun tih mai chu a lo inpharh dêi dúai tawh a!.
Chutah zet phei chuan Zakulha chu a phûr tawhin, a hma ai chakin ram hmun rem ngawpui thelh hen hûn hnuaiah chuan a lîm zak zak mai a, mahse, ho têah a tum chu hlen lo thei dinhmuna ding a ni tih a inhriat avang leh chulai hmun chuan a tum hlen chu sawi loh, a nunna atan hlauhawm a keng tel tawh a ni tih a hriat chian avangin, a mit leh a beng chu a kal tawhna hmun dang zawng zawng aiin a hmang uluk hle tawh a.
.
A rin dan leh a hisap dan chiahin tlai lam hun, Ni pawh khawthlang lam a hriat mang loh tlang dung inchhuang chho paw reih ruih chung zawn, suk chen vela a din tlêt suar tawh lai chuan an tlan chhiat tirha râl lehlam an kâina hmun chiah, Țiau lui kam chu a thleng ta hlawl mai a ni!
Chutah zet phei chuan fimkhur leh uluk zeta a hriatna zawng zawng chu sáwr khawm leh zualin, khaw nghah thimna hmun tur melh chunga, ramthei leh hnah nêm ei tur dap pahin Țiau Luipui kam lehlam vel chu uluk takin a thlêk zauh zauh reng a.
.
Rei vaklo a vah kual hnu chuan, a awmna ațanga pen sawmli vela Saphu khûr hlui țhâng leh hnimin a bawh hnawn chap chhungah chuan a lût ta thân mai a.
Chutia lungmuang zeta a tawm fel theih takah chuan a ei tur neih ang ang chu muangchanga êiin, zân lo thleng tur chu a nghak ta vang vang a.
.
Khawthim rual chuan a tawmna ațanga chhuah nghal vat pah chuan, a Thalfang chu a Hruiah chuan a hmet bet vâ mai a.
Mahse, a ralmuang tawk nia a hriat avang chuan Țiau dâi dûl lai, an tlan chhiat tirha an kân na lai ngei pan chuan a chhuk ta thauh thauh a. Mahse, a zuk thlen thlâk chuan an tlan chhiat tirh lai aia tlema tui a lo tam tawh avangin, zei zeta a Thal hrui chu hmet pial euhin, a hrui chuan a ngulhah chuan Thalfang chu a vet bet ta țhap a, chumi hnuah a Talhtum nen chuan a kawngah hrui danga suih bet lehin Țiau luipui chu a hleuh phei ta pap pap mai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2017, 1:29 pm

MIHRANGVAL TE SULHNÛ
. By. Llpa rokhum
.
. Episode - 5
.
. EPISODE - 4 RECAP
.
Rei vaklo a vah kual hnu chuan, a awmna ațanga pen sawmli vela Saphu khûr hlui țhâng leh hnimin a bawh hnawn chap chhungah chuan a lût ta thân mai a.
Chutia lungmuang zeta a tawm fel theih takah chuan a ei tur neih ang ang chu muangchanga êiin, zân lo thleng tur chu a nghak ta vang vang a.
.
Khawthim rual chuan a tawmna ațanga chhuah nghal vat pah chuan, a Thalfang chu a Hruiah chuan a hmet bet vâ mai a.
Mahse, a ralmuang tawk nia a hriat avang chuan Țiau dâi dûl lai, an tlan chhiat tirha an kân na lai ngei pan chuan a chhuk ta thauh thauh a. Mahse, a zuk thlen thlâk chuan an tlan chhiat tirh lai aia tlema tui a lo tam tawh avangin, zei zeta a Thal hrui chu hmet pial euhin, a hrui chuan a ngulhah chuan Thalfang chu a vet bet ta țhap a, chumi hnuah a Talhtum nen chuan a kawngah hrui danga suih bet lehin Țiau luipui chu a hleuh phei ta pap pap mai a.
.
> Arsi zâ tam êng dê sep septe chuan van dumpawl ruih chu rawn mâwi leh tawhin, van laizáwl zawn tak ațanga tlak lam hêr hretah chuan Thlâ pawh a Seki kual râih mai a, chutihlai chuan, chûng van sang mawitu leh inngeih zeta leng dial dial te mawina lawm niawm tak chuan, an pian tirh ata tawh zantin khel lova leilung âwitu.., ngawpui bâwmtu nungcha chitin reng te pawhin, theih tawpa uarin an 'aw' chi hrang hrang an neih tawk tawk tete chu țhahnemngai takin an chhuah ve tân tân hlawma.
.
Chu zan hun duhawm zet a a thlen lai chuan, Lusei rawlthar huaisen Zakulha erawh chu Țiau luipui kam leh lam, hnim leh Râiruang hmun karah chuan a tihtur pawimawh tak hlen chhuak tura a rilru siam sauh sauh chungin a pen lut thauh thauh mai a.
.
Țiau a hleuh kaina ațanga pen sawmthum vel a pen leh hnu chuan, a bula thing uipum rual velah chuan zei zeta lawnin, a ler a thlen veleh chuan a pianna ram Țiau luipui chhak tlang leh phai zawl inpawlh chúk, vân vârin a ên let dumpawl thim phei ruih chu a han thlir ta vang vang a. Mahse, a duh angin khua chu a chuan fiah tawk thei lova hriain, thui lote a chhuk hnu chuan a lawnna thingzar rawn hawlh zawm tu thing dang zarah chuan a pakâi phei ta a.
.
Chulai thing ler ațanga a han thlir leh vang vang hnu chuan, Țiau a kanna zawn tlang sang lo tak a pang awih hahdam hmel zeta inkhawh thla zui rawn chhun chiah tu, tlang tê zawk chhim zawnga inkhawh phei dâp, van lam êng thlâr chiaha a hmuh thim râih chu an khaw hlui tlang ep chiaha awm, Hrangsih tlang kha a ni tih a hre thei ta a ni.
.
A hmuh duh tak tlang a han hmuh hnu chuan Zakulha chuan muangchan hman a ni tawh lo tih hriain, a chhuk fel hnua lei a rah leh rual chuan a tlang chhinchhiah lan theihna tur hmun, a hma lawka tlang dung inkhawh chho champõ.. chu a pan ding ta vang vang a.
Chulai tlang bulțhut a han luh lai chuan a boruak pawh a lo dang tawh hle tih hrethiam chho zelin, Țiau chhak lam chu chhuna pál chhoh aiin zana mei dêt lova hrût chu a tan a him tawh zawk a ni tih a hriat chian avangin, a mit leh beng țha bîk zet chhawr țangkai chung chuan a thui thei ang ber kal hman tum zetin a tlan titih a ni ber tawh a.
.
Chutia a tlan deuh tauh tauh lai te chuan, a sir tawn tawn leh hma lamah te chuan Vahrit leh ramar zan riak, a hnahthel rah rik thawm hlaua thlawk chhuak leh phurh țhin te chu inhrai puar nan bawh zuia kah thlak châk hle țhin mahse, a tihtur chuan a ngaihtuahna zawng zawng a luah khah tlat tawh avangin, chumi zan ngei chuan an khaw hmun hlui lei chu rah hmana, a thil tihtur tih zawh vata chumi zan vêka lêt leha a tuk leilung lan chian hma a Țiau kân leh hman ngei tum chuan a rilru chu a siam san leh vat zel a.
.
Chutia chawl loa a kal ngat ngat hnu chuan a awm mekna tlang dung lian zet chu chuang chhuakin, tlang let liam chhak lam hawia liam thla leh nghalin an khaw hlui tlang hliahtu, Hrangsih tlang bulțhut a luh thlak leh lai chuan mei rim a hre ta tlat mai a!
Chutah zet chuan, fimkhur a ngai zual ta hle tih a chhung rila rawn turtu chuan a mahah rang taka rawn țhawng nghalin! pasalțha Hrumcheûva leh Keikawla ten 'Lusei Keitê' tia a hming an phuah sak Zakulha mitmeng chu a rawn de sar sar mai a.
.
A kê chu dim taka leiah chuan Keite ang maia nghat riai riaiin, a Hnar țha zet chuan mei rim rawn chhuahna lam chu a chhui nghal vang vang mai a.
Chutah, mei rim rawn chhuahna a chhui fuh hnu chuan muangchang leh kûn dah chunga a mit nautê danglam zet chu, a thinrim leh a fimkhur zual a pianga pasalțha Hrumcheûva leh Keikawla ten, 'Lusei Keite' tia an phuah chhanna pakhat, Keite in a Sâ pêl a seh dawn laia mit naute a ti lian ang maiin a rawn lian tle sar sar mai bawk a.
.
Chutah, mei rim rawn chhuahna a awmna thlang lam ruam lam chu pan thla zelin, pen sawmli vel âwrh a kal thlak hnu chuan a thlang lawk mual pawng bial deuh kalh, lai taka mei lo alh hlarh hlarh chu a zuk hmu ta a.
.
Mahse, Zakulha chuan a awmna ațanga ên chian tuma a han bih lai chuan, mei alh eng chin leh chin loh ațang chuan mipa pathum, han ên mai pawha Halkhâ ral tih hriat zet, an lu chhipa sâm zial tap maite chuan Sanghal bawp leh a dar vel pu chungin mei êng lam pan chuan an rawn inzui ta thliah thliah mai a.
.
Chuveleh Lusei Keite Zakulha chuan thawm chhuah hlek lo leh, rang zeta a piah veilama sawntlung pawng chu kun dah chunga pan phei nghalin, chumite pathumin an Sa kâh bawp vel meipui bula an keuh thûm dap dap lai chuan uluk zetin a lo melh kiau mai a.
Mahse, a tih tur ala hlen loh chu a hriat kar avangin a luh thlak lohna lam pang, Hrangsih tlang zopang chhoah chuan a tawlh bo san leh ta a.
.
Chutih lai erawh chuan, a rilruah chumite pathum chu ngaihtuah zuiin, a lêt lehna lam turah harsatna an siam palh vaih chuan a kawng an tih muan phah ngei dawn tih a hre chiang hle a.
Mahse, chu lam chu vei zui lo zeta a hma lam chu tha tho zeta pan zelin an khaw hlui ram tawh hliahtu, Hrangsih tlang chhip a chuan chhuah leh rual chuan, hmun tin mai chu hmuh hmaih neih tum lo niawm taka thlêk kualin, a hun chhinchhiahna van lam arsi dê tuarh zinga arsi pahnih êng bik tak Chawngmawii leh Hrangchhuana te thlir chhoh vang vang pah a, khaw thlang lam a melh leh zawk lai chuan, a awmna tlang thlang lama tlangdung lian zet chhim lam hawia inkhawh chho dum mûk mai chung lawka thla dê tir fu kual kalh pawh a lo âwn bâih tawh a.
.
Chutah zet chuan, Lusei Keitê Zakulha pawh chuan muangchang lo leh zuala a awmna tlang piah maia an khawhlui Sialpheng khaw ram tawh țhut hmun, Darkhâi tlang chung zawl var bial deuh kalh chu fiah lo zeta va hmu thei tawhin, a rilru chhung ril zeta a ngaihtuahna mitthla ah chuan a Pa Chhunrânga hmel chu a rawn lang ta iârh iârh a.

Mahse, Lusei Keitê Zakulha te ang thinlung chu lunglenna leh rilru no-na, mihring chaklote mizia chuan rei a chelh ve thei ngailo tih hriat zeta, a khawharna thinlung chu Zakulha chuan paihbo nghalin, a khaw ngainat Sialphêngah pawh thin thia awm tir duh lotû, Halkhâ leh Thlânrawn ral ho huatna chuan a thinlung chu a rawn bual so leh ta bulh bulh mai a ni.
Chuvang chuan, a rilruah Lusei ho laka Hlakhâ leh Thlânrawn ral ho an tlawm hun tur ngaihtuah zui vang vang chungin, Hrangsih tlang zopang thlâ chu a zawh thla leh ta ngat ngat mai a.
Reiloteah an khaw innghahna Darkhâi tlang bulțhut chu thleng thla leh nghalin, tha tho leh chak zetin tlang chung zawl, an khaw hlui râm rap tawh pan chuan a chho leh ta ngat ngat a.
.
Zakulhan an khaw hlui Sialphêng luh khân dâi hnâi a han thlen zet chuan, uluk zeta a mit chu khaw chhung lam hawia len hmasa leh tete-in, khaw tawn tirh, in kâng tlu sawp hlui tawh zet bulah chuan kun dah chunga din leh dat pahin a mit chu an veng, Lal in awmna țhin chuan hnuai lam Aitlâk veng lamah chuan a han len nghal chat a.
.
Mahse, thildang ngaihtuah hman a nilo tih a inhriat chhuah leh rual chuan an Lal, Lal Tâikherha in awmna lam chu fimkhur leh in kâng ram tawh hrul zela kal chunga pan pheiin, an Lal Tâikherha in, a chanve ai tam mah a sûtpui khalh chiaha kâng hêk huam, lo bawksawp rup kârah chuan a lût pil lut ta thuai a.
Mahse, an Lal sûtpui ban dinna zawn chiah lei chu Lal inchung tlûng kang bângin a khuh tlat avang chuan, a piah mai a an Lal Se huang hungna thing tuai kâng bung dung chen vela sei chu pawt phawiin, sûtpui ban dinna khuhtu tlûng hnuaiah chuan a han rawlh lut a.
Tuiburhmuamdâ vel a kar ngat ngat hnu chuan Sûtpui dinna zawn chu a duh ang takin a kar kaû thei ta a, chutah, tlûng rawn tla thla leh tur chu a bula thingfâk chuan do kâng lehin, an Lal Tâikherha Sûtpui dinna zawn lei chu a Chem chuan a cho ta ngat ngat mai a.
.
Mahse, lei chu inkâng meiin a ûr châr deuh avang chuan a thil zawn awmna lai chu a duh angin a cho thleng hlei thei ta tlat lo mai a! Mahse, Zakulha tan beidawnna khawp leh tih harsa tak a awm tehchiamlo tih ti lang chiangtu, a rilru luhlulna chuan nasa zawk leh tha tho zawka rawn tur lehin, a Chem chu a lei laih khuar lai taka a sawh phun rual deuh thaw chuan, a Talhtum chuan vawi hnih nâ zet zetin a Chem fawng hmawrah chuan a han sawh nghek ngeka.
Mahse, a Chem chu a la luh thûk hleih theih loh avang chuan a vawithum nan a tha tawpa chhu lehin, a Chem fawnga a chhut leh rual chiaha, a Chem a luh thlak thawih rual chiah chuan zawitein a lei laih khuar hnuai, a Chem zawnah tak chuan Thír inkhak ri a rawn ri ta bâl mai a!
.
Chuveleh Zakulha chuan phur tak leh rang zeta a Chem chu phawi nghalin, a Chem a chhut luhna lai Kawrawng hual chuan a cho kual ta zawt zawt a.
Chutah, a chawh kualna leivung a han hâi kian leh lai chuan hnuai lam lo kawrawng hiaû chu phûr taka zen thla nghalin, Hlum bel uipa puitling pum chhumna tawk vela lian chhunga an Lalpa Tâikherha Dâr khuangtê roh em em, 'Sialmân Dâr' Khotê tiat lêk lo inkhup tumpawn lo pawng parh lai tak chu a zuk dap fuh ta a ni.
.
Chutah zet chuan Lusei Keitê Zakulha chuan a tih tur a hlên ta....!!, tih inhre chhuak nghal chunga nui sakin, 'Sialman Dâr' awmna Hlum bel tlang kual chhilh tu leivung chu a han hâi kiang leh ta thuai thuai a. chumi hnuah, a chhunga 'Sialman Dár' lo inkhup, chung lam arsi leh khawvar lam khawfing chat tur rawn ințhamin a chhun khalh tlê vâr chu a chawi chhuak ta nawlh a!
.
A thil duh tak a lâk chhuah hnu chuan Zakulha chuan, hmanhmawh taka Sialman Dâr hlinna tlang kua-a hrui inthil lut chu a Hnawkhâl hrenna, a kawnga hruikhau invêt ah chuan țawn betin, a tira a luh pheina lam pana fimkhur zeta a lêt phei leh dân dân lai chuan, khaw chhak lam kil tawpah chuan van a rawn vâr râih tawh a.
.
Mahse, an khaw Lal upa pakhat in dinna țhin lei ût ruam a thlen lai chuan, an khaw tawntirh dâi, a luh chhohna laia meichher pahnih rawn alh chho hlat hlat chu hmuin, rang zetin a awmna piah mai in kâng bâng, luhkapui chhuat inkhawh âwn tlâih phenah chuan a per lut nghal nalh a.
Mahse, chumi hnu lawk chuan, a meichher hmuhna lamah chuan patling râk deuh țhat thawm rawn ri chhuak nghal țhawtin, chu patling 'aw' a hriat rual deuh thaw chuan a beng bul lawkah Thalfang a rawn thlawk tlang vung hlarh ta mai a!
.
Chuveleh Zakulha chuan an rawn hmu hman ngei a ni tih a hriat avangin, a Thalfang pakhat chu a hruia hmeh beh nghal chat pah chuan, a tawmna piah lawka thingâi chheh chim tawh kawkalh niaih lamah chuan a lum phei ta a, chutih lai chuan Ral ho chuan an meichher te chu nawr hlum tawhin, a tawmna hmasa lamah ringawt khan an Thalfang chu an la rawn thlah fur fur mai bawk a.
Chutia a awmna hmasa ringawt an rawn sâi ngat ngat lai chuan, Zakulha pawhin an rawn hmu tawh miah lo tih a hre thuai a, mahse, fimkhur taka a veh loh chuan, chumite chu a khing hneh lo palh thei a ni tih a hriat chian avangin engzat nge an nih? tih leh, an țanhmun siam dan chu a tan a hlauhawm phâ em!? tih chu en fiah hmasak a tum ta a.
.
Chutah a bawh phêkna chhak lawk, a naupan laia pawnto paha an țhutna țhin lungpui thlâm tiat dawn chu melh chho lehin, Thalfang pakhatin a tawmna hmasa bawk a rawn den leh lai chuan, chu lungpui chu bawk vak chungin a pan chho leh ta hriaû hriaû a.
Lungpui phen a han thlen chhoh chuan fimkhur zeta a lu chu lei hrulah dah hniamin, a mit țha zet chuan Ral ho tawmna lam chu a han bih phei khiaû mai a.
.
Mahse, mipahnih chiah ava hmuh te chuan an pahniha hnim buk pakhat bela an lo tawm dun avang chuan, hnim buk sir tawn tawna an lu leh Thalfang rawn lawr leh zawl zawl țhin chu chiang taka enin, a kah hmasak tur atana a thlan zawk, a awmna lam epa awm lu rawn lawr leh mek a tin lai chuan, a bul mai pen sawmthum vel leka in kâng bâng bang phena, pakhat lo tawm ping chal mai dul rawn lang kiar kâng chu a han hmu thut mai a.
.
Chuveleh Zakulha chuan, a hma lawka Hrangsih tlang bulțhuta Halkhâ ral a hmuhte kha an ni ngei ang tih ngaihtuah chhuak thut chunga, a tum chu thlak nghalin, chupa dul, a tawmna bang áwng kara rawn lang chu uluk taka tin chunga, a Thal ngul chu bial kûl pawp khawpa a kawih vang vang hnu chuan, thawk lak leh hak pahin a Thalfang chu a han thlah vung phei hlarh ta mai a le!
.
Halkhâpa in țe tuarh chunga a dula Thalfang thuk zeta rawn lût dawm chunga a țhingțhit khurh hlawk hlawk lai chuan, a țhiante pahnih chu phawk hrâ chunga rang taka an tawmna ațang chuan rawn tlan chhuakin, an țhianpa hliam tuar râk rawih rawih pana an tlan lai chuan pakhat zawk chu a hrawka Thalfang rawn lut leh thawih tuar lo chuan a tlu vir leh ta nawk mai a.
.
Chuveleh chuan pakhat zawk chuan Zakulha Thalfang rawn chhuahna a lo hmuh hman avang chuan, chak zetin Zakulha lam chu an mahni țawnga rak nawk nawk chung chuan a rawn pan ding ta nghal a.
Chutihlai chuan Zakulha pawhin, a Thalhruia thalfang a lo vuah leh mek chu a lo tin kawh leh hman tawh a, mahse, chupa awm zawn vela a Thalfang a thlah rual chiah chuan chupa chuan rawn bawhchilh hmanin, a rawn zuang tur kun hniam lai tak chu a vanneihpui ta tlat a ni tih hriat zeta, a lu thawi thuaka Zakulha Thalfang a thlawh tlang rual chuan Zakulha pawhin a Talhtum chu alo lek fel leh hman dêr tawh a.
.
Mahse, a Talhtum a lek ruala chupa chuan a rawn bawh thluk hman tawh si avang chuan, Zakulha chuan a Talhtum chu chupa lu chung lamah chuan vai tlang fuain, khaw râm dâi tâm awih tlân lam pan chuan an pahnih chuan an lum thla bian bian mai a.
Mahse, pen sawm dawn an lum thlak hnu chuan lung arbawm tiat vel hian a lo dang ta a, chutihlai chuan Zakulha chuan, chupa bawh behna lak ațanga tâl chhuah tum chuan hnuai lam ațang chuan a han rêk fuh ta a.
Mahse, chupa chuan Zakulha ban pakhat zawk chu a kut khinghniha elhin, Zakulha pumah chuan a khupin a chhuk do ta chawrh chawrh mai a, chutah zet chuan Zakulha pawhin thawk harsa a tiin chupa a rehna kut chu a zawi ta deuh tlat mai a.
.
Chutihlai tak chu Halkhâpa chuan hai bik hek lo le! Zakulhan a rehna a phih thlak sak lawp ruala, Zakulha ban pahnih a elh leh ngat ngat lai chuan, englai pwha rilru fim pu reng Lusei Keite Zakulha chuan a ban pahnih, Halkhapa-in a chelh beh tlat chu rang zeta phar kâk thutin, chutia Zakulhan a ban a phar kâk thut ruala Halkhâpan Zakulha banrêk a chelhna ve ve a man pial ta si, inring hman tawh loin, Zakulha awm zawna a lu a bûk dawrh rual chuan Zakulh lu chuan Halkhâpa hmai tak mai chu nâ lutuk maiin țê țhat khawpin a rawn tauh chho ri chawk mai a.
.
Chutah zet chuan Halkhâpa chuan a kut pahnih chuan a hnar thi puat puat mai chu hupin, chutia a nâ tuar inthlah zawi lai tak mai chu Zakulha chuan a zak pahnihah manin an thlang lam rawhung deng dawt khawp chuan a bin țe thla zui rawng rawng mai a.
Chutah, Lusei Keite thin thawk laklawh tawh chuan Halkhâpa chu ûmzui thla lehin, zi țhâl țhâl chunga Halkhâpa lo tho leh mek chu a dulah na lutuk maia a lua zuk sut țê leh tuarh pah chuan, a hnung lam lei charah chuan a bîn thum leh dawp mai a.
Mahse, Zakulhan an bin kan lawp hnua leia a tlâk leh rual chuan Halkhapa chuan, an lum thlakna lama Thalfang an thlauh pakhat chu chhar fuhin, Zakulhan rawn man leh tuma a rawn kun lai tak dâr pheng veilamah chuan, a Thalfang humna chin tlum thawih khawp chuan alo chum ta mai a!
.
Chuveleh Zakulha chuan, thinrim meng de sawr sawr chunga Halkhâpa-in a dâra Thalfang a rawn chum luh bur ngar chu phawi nghalin, Haklhâpa-in Zakulha thâ thlah zawk lai a dâra Thalfang lut a phawi buai lai hun thawl chuh a, a tlanchhe pai chawn chawn lai chu rang leh chak zetin a ûm leh ta a.
.
Mahse, chupa chu hliam tuar chunga tlan a nih tawh avang chuan, a ûm tu Lusei Keite thinrim țuan rang lutuk chuan rang taka nangching leh nghalin, Halkhâpa lu chhip sam ziala her mawp khawpa Zakulhan a han țhuai zet chu, puitlingin Naupang an nghaisâ ang maiin Halkhâpa chu lei charah chuan a thâl tawp mai a.
Chutah, lei chara Halkhâpa thal huang chu Zakulha chuan rang zeta bawh leh nghalin, Halkhâpa tho leh tur tlan chhiat tum leh mêk, banrêk vei lama rawn man bet chat tu kut chak zet chuan, na zeta a khabêa chu a kut lehlama a rawn man leh nghal zat rual chuan ring ruh tliak ri tuarh thwm chuan a zui nghal zat mai a ni.
.
Ring ruh tliak zawi hnuang chunga amah aia û hret âwm vela upa, lei chara Halkhâpa a leh reng lai chuan Zakulha chuan Ni rawn chhuak tur, khaw chhak lam kawlkila rawn sen paw ruih tawh chu a han hmu nghal a.
.
Chuveleh rang zeta an insualna velah chuan let phei lehin, an insualna lama helai a kal chhan 'Sialman Dâr' a kawnga a țawn behna a chah avanga a thlauh chu a han zawng hmasa ber a.
Mahse, zawn buai ngai lova an lum thlakna tawp lung arbwm tiat vela lian piah lawka Sialman Dâr lo inkhup thak chu rang taka chharin a kawngah chuan a han suih bet leh ta thuai thuai a, chumi hnuah a Thalfang leh a Ngul leh a Talhtum chu a han chhar khawm lehin, a Halkhâ ral thah ho ruang chu a mal tete-a an chhip sam zial țheuh chu an luvun chawpa hîk lehin a Thalfang pakhatah chuan a thil tlar ta dâl mai a!
.
Chumi hnuah chuan,! a dâr phêng veilam Thalfang luhna ațanga thisen thar lâm zet rawn baw leh zâih zâih țhin hup chung chuan, an khaw hlui dâi lam pan chuan rang takin a put bo ta a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 25th, 2017, 1:30 pm

MIHRANGVAL TE SULHNÛ
. By. Llpa rokhum
.
. Episode - 6
.
> Zakulha chuan ni rawn lang țan tawh chu atán a him loh phah thei hle tawh a ni tih a hriat avang chuan, hman hmawh takin an khaw hlui piah tlang, Hrangsih tlang bulțhut chu tukțhuan rel hun tala luh thlak hman a tum hle a.
.
Mahse, an khaw innghahna tlang pang a kal thlâk lai chuan a dâr nâ chuan a rawn țhoh deuh rûn tawh mai a! chuti chung chuan a tum anga kal luih chu tum zelin, Hrangsih tlang bulțhut a zuk thlen meuh chuan a chaû ve țan ta dér mai a!
mahse, a sâ himna tur hmun zawn leh a ngaih avang chuan a thlang lam ngawpui thim zawkah chuan a lut thla ta a.
.
Chutih lai chuan, a pum lam lahin pâi tur a mamawh tawh hle tih hriat tir nan a rawn ri kual râih râih tawh mai bawk a. Mahse, a duh ang hmun a hmuh hma chuan a sâ himna hmun tur chu a ngaih pawimawh rih zawk avangin, a theih anga biru chung leh fim taka meng kar chung chuan Hrangsih tlang luan hualtu lui lian ang reng zet, a kal lama a pawh chiah loh lamah chuan a kal kual ta a.
.
Rei vaklo hnuah chuan chu lui rawn fin tu, luite dam ang reng zet chu a han hmua, lui lian zawk kam vel chu a thelh deuh hlek avang chuan chu luite dung chho chu a pan leh ta zawk a.
Mahse, chu luite dung chho chu Hrangsih tlang hnuchhawn zawnga a hnar lam a inpawm vêt chhoh zel avang chuan, khawthlang lamah a inher liam thla dawnin a hre ta tlat a!
Chuvang chuan Țiau a kanna lai dâidûl kha a chhun pelh mai a hlauh tak deuh avang chuan, chu luite hnar lam chu thui tak zawh chho duh lovin, a awmna luite kam veilamah chuan a perkâi chho ta tharh a.
.
Chuta țang chuan chhim zawnga tlem tawlh lut phei lehin, a thlang lawka thing lian zet zung thlár pen sawm bial vel ngawta inphan ding țhuau karah chuan a lût ta a.
A duh ang hmun tak a hmuh takah chuan, mut vang vang phawta zan lama kal chhuah leh nghal tum chuan, thing zung thlâr hnuai kawm deuh hleka mut theihna leng tawk vel chu a han húi fai puat puat a.
.
Chumi zawhah chuan muangchanga chhuak lehin, a tawmna thing zung thlâr piah lawka changpui bul bâl rawn lang tut chu a va cho leh ta sawk sawk a, a duh tawka lian a chawh chhuah hnu chuan, Ni a rawn lan tawh avangin hmun hlâ vâh chi a ni tawh lo tih a hriat avangin a changpui bul bâl laih nen chuan a tawmna ah chuan lut lehin, a Chem chuan a han thêl kual leh ta sawk sawk a. chumi hnuah a pum ruak lutuk hnawh khah nan, changpui bul bâl chu kêih zui mial mialin, a pum dam raih khawpa tam a ei hnu chuan a rem dan danin a mu kawm ta châl mai a.
.
Nilenga a han mutthilh hnu, ni tlâk rual vela a rawn harh leh meuh chuan a thâ pawh alo zâ leh zak tawh a.
Mahse, a kal chhuah leh hma chuan a tawmna piah vel hmuntin chu uluk zeta a mit naute zau fiah kâk khawpa melh kual leh tete-in, thawm rivâ leh danglam, mei rim leh mihring sûlhnu âwm a hmuha a hriat tak loh avang chuan, rang takin a tawmna ațang chuan a per chhuak leh ta a.
.
Mahse, khua ala thim chian loh avang chuan kal lama a hrût loh lam, Hrangsih tlang tlâk dêng ngawpui hnuái lamah chuan tlang pang pawm vêt zawng chuan kal zelin, Hrangsih tlang châwi chhotû ngawpui hnuai mual zawl deuh dûrh leh thelh hunah chuan a pen lut thauh thauh a.
.
Mahse, chulai ngawpui hnuai mual zawl deuh dûrh chu a lei alo dûrin, țhâng leh perhtê zâm hnuai vela lei chunga hnahthêl tla tling tén tûn te chu a hûh dêp dùp mai a!
Chuvanga chuan Zakulha chuan, a kalna chu ngawpui hnuai hmun dang nen a inang lo a ti țan ta viau mai a!, mahse, a kal lama a hnû chhui let ai chuan Halkhâ ral lakah a him zawk dawn a ni tih a hriat avangin, a ngaihtuana chu a kal mêkna ngawpui hnuaiah chuan a dah chhunzawm ta tlat a.
.
Halkhâ pasalțha panga te chuan, an țhiante pahnih leh an hotupa Tlâkphunga fapa rawlthar te pathum Sanghal hnu chhuite in nghahna an thlen chuan, an Sâ rêp ûrna hnû, rawchang sawh phun thliah hnuaia thingthu nung lo la mût hlat hlat te chu an han bih thuak thuak hlawm a. Mahse, an mahni ber an awm loh diak avang chuan an, Hotupa Tlâkphunga chuan lungawi lo zeta a hnar ner suk sûk chung chuan an țawngin a han phun bûl bûl a.
.
Mahse, an zinga pakhat chuan an hotupa Tlâkphunga ngaih dan chu a nih a rin loh thu lo sawiin, an innghah khawmna tur Lusei ho khaw rám tawh Sialphêng chu pan chhoh phawt mai chu alo rawt a, chutih lai chuan, a hote zinga midang ho chuan meichher lo siam mawlh mawlhin, anni pangain an Tumpang hnu chhui bo ta daih chu a ui thu, an zinga pakhat chuan a rawn sawi ve leh ta bâi bâi a.
.
Halkhâ pasalțha rorum, pawisak nei lo leh nunrawng zet Tlâkphunga hi, Halhkhâ hnam ho Lal khaw hrang hrang zinga khaw lian deuh ber, Suakhliah in zali chuang ngawt khaw Pasalțha tawrawt zet mai ni a.
A mah hi palian leh pian țha zet a niin, a chhip kutphah beng vel bial chauha sam hram hrê hruâ a neih avang hian a chhip lai tak tih loh hi chu a kawlh mâm tle hlurh mai a! Hei hian a hmel leh a hmai bawr inrêl bawl dan vel chu a ti lang râpawmin, a sam neih chhun hram hrêû rû a kâwng thleng dawna sei chu ban puam tiat vela lianin a phiar viâl tup mai a!
.
A hmel lah naupang chumchiap leh rawlthar te thlenga an hlauh khawpa râpthlak zet niin, a rawlthar chhuah hlima a mah hringtû a pa ngei nena, a sual tawrawt lutuk avanga Chempui hmanga an insualna lamah, a hmui chung vei lam pang sir hi a hâ-uingho chung lam pang fangrâ tiat dawna invuah țial țhuk chu, a hâhni chawpa lang chho vek khawpin a hêk chho huam mai a! Chu sêr chuan a biang tan tlang chhoin, a mit veilam sír ah a kâl chho ruak mai a ni.
Chu mai niloin, a hmui leh biang sêr ringawt pawh chu râpawm tak a nih tawh laiin, a mit mú lian leh pawng hlut mai chu englai pawh hian a sen vâm huam reng mai bawk a, chu chuan a hnar bawng bial mûm túp leh a hmui líp hêk huam mai chu a thláwp rapawm thla hle a ni.
.
Mahse, a sual tawratna leh engmah pawisak a neih lohna hian, an Lal nunrawng lutuk Phawkțiala hi a ti lawm zawk tlat mai a! Chuvang chuan, an Lalpa Phawkțiala hian a fanu upa ber nupui atan a pe nghe nghe a! heng avang te hian Tlâkphunga hi a puzawn Lal Phawkțiala khua leh, Halkhâ hnam khaw dang ho zawng zawng zingah hian a hming a thang ber hial a.
.
Lusei ho ûm chhuahna leh thah chimih tumna ralrelna kawngah pawh hian, a puzawn Lal Phawkțiala nen hian a meizanghlap tur ber an ni tlat a ni!
Tiang chuan, an duh ang taka Halkhâ Lal dangte an hmin hnu chuan, Thlânrawn Lal leh an Pasalțha te sawm velehin, heng hnam kawlh leh duhâmna a khat te pahnih țang rual hian Lusei ho hi an phingchîl ta vak mai a! nunau leh tar chak lo, hmeichhia te thlengin an that buaih buaih mai kha a ni a. chutah, he buaina avang hian Lusei ho pawn thlang tlak phahin, Țiau an kân tlak phah hial hnuah pawh dim lo zetin an la ûm zui thla ta zel kha a ni a.
Mahse, Lal Tâikherha leh a khuate hi chu, Halkhâ pasalțha Thangpiala leh a ho ten bitumin tun hun hi an thleng ta a ni.
.
Hemi hma ni hnih kal ta ațang hian, Tlâkphunga leh a hote paruk leh a fapa upa ber te hian, Tumpang chal ki kual êng kûk mai chu Țiau kam thlengin an chhui a.
Mahse, Țiau luipui kam an thlen lai hian Tumpang hnu hian a leh bum deuh tlat avangin, a fapa leh a hote zinga pahnih chu hlawhchham thulhah tiin Sanghal pêlin a kal hran tir ta a.
Chumi hnuah, a mah leh a hote pali chuan Tumpang hnu chu chhui zawm zelin, an chhui țanna ațanga lo fing sarih dawn an chhui thlen hnuah, Tumpang hnu hi a arbâ chuk zual ta riau mai a!
Chuvang chuan beidawng deuh titih chunga a rorel chu a hote chuan zawmin, a fapa leh a hote pahnih nena an ințhen țanna hmun kha pawh tumin an lêt san ta a.
.
Mahse, lofing khat vel an lêt àwrh tihah chuan, Tumpang hnu chu an kal lohna lamah chuan alo khuar leh ta kulh kulh mai a! Chuvang chuan, chú Tumpang hnu bawk chu chhui zawm lehin, riah buk sual ngai khawpa ngawpui pilril ah Tumpang hnu chuan a hruai lût leh ta a.
.
Mahse, a tuka an han chhui zawm leh chuan, lofing hnih vela thui an chhui hnuah a hnu chu a bo ta hmiah mai a! Chutah zet chuan Tlâkphunga thinbuluk luhlulna chuan tlin tawh lovin, a fapa leh a hote pahnih an kal sanna hmun bawk kha an pawh hma chu chawl lova let ngat ngat chu a rawt ta bur mai a.
Zankhua leh a tuk nileng an kal hnuah unauhmelhai hun velah tuna an awmna hmun, a fapa leh a hote pahnih nena an ințhenna lai hi an pawh leh ta chiah a ni.
.
A hoten meichher an chhit kâi hnu chuan Tlâkphunga chuan hma hruaiin, Lusei ho khawhlui râm tawh, a fapa leh a hote pathum nena intawh kawm nan an ruat chu an pan chho ta a.
Mahse, Sialpheng khaw râm tawh an luh lai chuan meichher emaw, meipui chheh emaw an hmuh tak mai loh avang chuan, Tlâkphunga fapa hming leh midang hming in-auh chhawka âu lauh lauh chungin, Tlâkphunga leh a hote chu khaw hmun laili deuhah chuan an ding khawm țaih mai a.
.
Chutia ring tak taka an auh chiam hnu pawha anla reh țhap avang chuan, Tlâkphunga chu a meng dûr tawhin, a hote chu an meichher nena vak darh nghal tur chuan a vin țeng chhur chhur tawh mai a.
Tuiburhmuamdâ vel lai an zawn kual hlawm hnu chuan an zinga pakhat chuan Tlâkphunga chu rawn âuin, chupa awmna an va thlen chuan a hote zinga pakhat, a nghawnga Thalfang bûr tlang vû chu Tlâkphunga chuan thinrim khûr dur dur chung chuan a melh kur mai a.
Chupa nghawng ațanga thisen la rawn chhuak fap fap a han hmuh phei chuan a thinrim zualin, an chunga kutthlaktú chêt hun chu chupa thisen la khang lo lâr zet avang chuan ala rei lo tawp ang tih a man thiam nghal chat mai bawk a.
.
Chutihlai chuan, a hote zinga pakhat chuan In kâng râm tlu sawp tawh bang kâng bâng phena an țhianpa, a dula Thalfang lût tlum deuh hmak chu țê teng tung chunga rawn hnûk chhuak lehin, an vai chuan thinrim leh râk tuârh tuârh chungin an va tlan phei leh ta huk a.
.
Chutia a hote zinga pahnih ruang, an chhip sam zial inhlep kual lu ruh lang vâr pap mai Tlâkphungan a han hmuh zet chuan, chu thil titû chu khawi lam râl nge an nih ang!? tih leh a Fapa kha khawiah nge a awm ve ang!? tih ringawt mai chu ngaihtuaha khur hluk hluk chungin, a hote chu a sât lo chauh a ni tawh mai a.
.
Chutihlai chuan, a hote chuan ruang pakhat chu zawnin an ruang chhar hmasak zawk bulah chuan an han zalh fel a.
Chumi hnu chuan an vai chuan an hotupa Tlâkphunga fapa zawng chuan an buai leh ta a, mahse, a mah Tlâkphunga ngei chuan Sialphêng khaw dâi tlak lam deuhah chuan a fapa ruang chu zuk hmu chhuakin, a fapa ruang lo bawkkhup zawi reng, a ring ruh a tliak chiang hle a ni tih hriat zeta nghawng vun chuar tawm tûn khawpa, a luin a letling zawnga a hnung lam a rawn hawi meng kuaû ên chung chuan a âu ta ruah ruah mai a.
.
Chutah, a fapa lu chhip vun, a sam zialna chin chiah lo inhlep vâr hlâng mai a han hmuh leh meuh lai phei chuan, a Chempui chuan a kut chu a zai thi ta zar zar mai a! chutah a kut ațanga thisen rawn chhuak a fapa chala a zuk tih far karh karh lai chuan, a fapa phubâ chu lâk sak ngei tura a intiamna thu chu a sawi bul bul mai bawk a.
.
Chutihlai chuan, a hote chuan ți deuh dûka an hotupa chu rawn pan khawmin, an hotupa inhrosa zo rawn dak chhuak meng sen rûm leh hmai huh hnuang chuan, eng thu nge a rawn sawi dawn!? tih an ngaichang țhap mai a.
Mahse, an hotupa chu ngawi renga khur hluk hluk chunga a fapa ruang bula a țhingțhit tak reng avang chuan, an zinga pakhat chuan a hotupa dârah chuan a han khawih deuh dâ dâ a.
.
Chuveleh Tlâkphunga chuan chupa kut chu nâ zeta lo man paha țê tuarh khawpa herh sakin, "sa tlá sawng lai sut mar la" (he thil titû hi kan ûm nghal ang!) a rawn ti țêng chher chhuai mai a!
.
Chutia an hotupa in thu a rawn chhâk chhuah takah chuan, a hote chuan an hotupa thupek chu rang taka an zawm tih lan tir nana an lo rûm nghat rual chuan, Tlâkphunga chu tho nghal thurhin, Sialphêng khaw dâi lam pan chuan meichher pawh keng lovin a Chem lek kawh vû chung chuan a tlân ta luah luah mai a, chuveleh a hote pawh chuan an hotupa Tlâkphunga thinrim zia leh, a buluk zia chu hre reng chungin chak zetin meichher nen an um dê thla ta sap sap a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)