HNAMCHAWM PASALȚHA KAPHLEIA BY Nghaka Chelsea (Completed)

[Ngaia]

HNAMCHAWM PASALȚHA KAPHLEIA

By. Nghaka Chelsea.

EPISODE - 19

Episode - 18 Recap : Mitthi khua-ah pawh i hming lam chung chuan ka kalna tur kawng chu ka vâi bik tawp lo ang le " a han ti a. A zâl zui ta nghal ta riai riai a. Kaphleia chuan Rumvunga kut chu a han hmer vawng vawng a.
.
Kaphleia pawh a khap per ve ta sak sak mai le. Chutah Kaphleia chu rawn ding chhuakin, thinrim hachang țhial rap rap chuan, "U Vung, i thisen hi a thlawnin a luang ral hauh lo ang tih ka tiam a che. I nupui hmeithaia siamtu leh i fate fahraha siamtu Lal hi tupawh nirawhse, a tih loh tawp tur a ti ani. Kapvunga fapa Kaphleia hian ka tiam a che, i phuba chu ka la rawn la mawlh ang " a han ti ta khawl khawl mai a.
.
Mipuite chuan Kaphleia thinrimzia chu hmu in, chutiang taka a khua leh tuite hmangaihtu chu mitin te mit fûkna ani a, a thinrim mitmeng ringawt pawh pasalțha râlhrat ni ve lem lo tan chuan khurh zawih zawihna tham ani ta ve ang " tih tur khawpa hmuh nuam lo ni in, hmelma tan chuan en hreawm tur pawh ani reng ani. Mahse, chu rawlthar chu an hmachhawn tur râl ni loin, an mahni venghimtu tur leh Zopui khaw innghahna tur ani hlauh chu, Zopui khaw mite tan chuan hahdam sawng sawng na tham a va ni chiang em! Kaphleia hi rawlthar zaidam tak ti a sawi mah nise, a tih tawh loh leh thil diklo ti a ahriatte chungah erawh tumah han hmai zah em em hi a nei hran lo a, chuti tih loh, aia upate zah kawngah na na na hi chuan, ani tluka aia u zawkte han zahthiam hi an awm bik lo a, Val upate leh rual u zawkte'n an fak ber pawh ani. Mahse, Tun țum erawh Kaphleia chu a lawm lo hle ani tih ahmel ațang chuan hmuh theih tlat mai le.
.
Chutah, Kaphleia țhiante pawh chu Kaphleia bulah chuan an rawn ding ve nghal thuai bawk a, Rumvunga nupui fanaute leh lainat tute tih loh, Lal leh mipuite chu Kaphleia thinrim kâmchhuak chângin an lo reh țhiap tawh mai a. Chutah Kaphleia chu thinrim hachang țhial rap rapa mipui lam chu rawn melhin, " Zopui khua hi in zahnih zet kan ni ve ani lawmni? Ani chiah hi maw mipa awm chhun chu, pawnfên feng vek tlak in ni e. Ani khan hliam tuar chungin a khua leh tui tan a nun thâpin hmelmate alo hmachhawn a, khatih lai khan khawiah nge in awm zawh tak le " tiin, a sawia mawi a nih leh nih loh pawh ngaihtuah tawh lo chuan a han âng ta phiar phiar mai a.
.
Chuzawng Zopui khua-a mipa kei ka ni inti ve țhin te tan chuan khaw êng han hmuh ngamna chi ani mawlh lo. An hma a rawlthar mit takah pawh chuan en ngam loin lei lam chu an bih deuh ngur hlawm a. Chutia mipuite ngawi renga an dinlai chuan pa upa tawh tak hi tiang hawl chunga rawltharte awmna lam chu rawn panin, Kaphleia hma-ah tak chuan rawn dingin Kaphleia chu a han en váng váng a, "Taite, i pa Kapvunga chu tunge a nih ka hre lo a, i pa khan fapa huaisen tak leh a khua leh tuite tana a nun hial pawh hlan ngam fapa a nei ani tih hi han hriain han hmu ve ningat sela chuan a va lawm dawn em! Tunah chuan kan lo upa ve ta, I vanglai hun ka hmu ve hman lo tur chu pawi ka ti hle mai " a han ti chuai raih a.
.
Chutah Kaphleia chuan, "Ka pu, i sawi anga mi huaisen zawng ka ni love. Mahse, Ka u Hrangvela leh Ka pa Kapvunga khan minlo thlir ve reng ani tih ka hria a sin! Hmeithai leh pachhiate hmusita, ka khua leh tuite chunga diklo taka kutthlak tute hma a ding turin min duh tih ka hria ani. Midik lote avanga ka khua leh tuite'n an tuar hi ka phal dawn lova, ka dama ka thawk țek țek chhung chuan, heng ka khua leh tuite chunga rorelna dik a awm theih nan leh. Sa leh râl laka venghim tur hian engpawh hmachhawn ka inhuam a sin! Ka nunna hi dikna avanga a lo fâmta a nih pawhin ka pawiti therte love " a han ti ta chher chher mai le.
.
Chuveleh mipuite chu an thûm deuh hak hlawm a, hmelma la dam awm chhun te pawh chuan, an hruaitupa leh an lal fapa Kharchina thattu Rawlthar chu mi namai a nih lohzia chu an hre chiang tawh hle a, zamna leh khurhna chhete mah a han nei miah lote chu mak an tiin, an pasalțha pahnih te nun chhahsaktu chu thinphu dep dep chuan an lo thlir a. Kaphleia nu Ngursangi ngei pawh a fapa chetdan chuan a barakhaih'in, a fapa'n a pa hmingchhal ngeia chhia a han chham a han hmuh phei kha chuan, lawm luat avanga awm ngaihna pawh hre loin, a hmangaih Kapvunga leh a fapa hming lam chung chuan a loin sut hlap hlap reng a.
.
Lalpa Dokulha meuh pawh mittui parawl kúanga Kaphleia awmna lam chu rawn panin, "Vala, tunah chuan nang hi ka khaw pasalțha diktak chu i ni e, Mikhualte thlavâng pawh hauh ngam lo lal dawihzep tak Zopui khua hian in nei ani. Kei hi ka khua leh tuite tan hian Lal ni tlak pawh ka ni lo ani. A khua leh tui pawh venghim zo lo chu pawnfen feng vek tlak kan ni e " tiin, a han țhingțhi deuh rawp mai a.
.
Chungthil Zopui khaw val rualte'n an han hmuh leh meuh chuan, thinrim avanga hachang țhial rap rap chung chuan an kut an lo hum ruh ve ta sauh sauh mai le. Chutah, Kaphleia chuan Lalpa Dokulha hnenah chuan, "Lalpa, I hmangaih i khua leh tuite hian i ngaihdam kan ngai tak meuh meuh zawk a sin! Lal ropui tak i ni e, i mite hriatthiamna ngah tak i nih mai piah lamah, I mite venhim i duh avanga khatianga ruahman-na siam ta kha i ni tih ka hria a sin. Nang tluka Lal țha leh khua leh tuite hmangaih hi an awm kher lovang. Keini nufa ngei pawh i khua leh tuiah min lo pawm a nih kha.. khami avang khan lawmthu ka han hrilh leh duh che ani. Tunah chuan puitling ti a chhiar theih ka lo ni ve dawn ta reng mai! Zopui khaw valrualte u? Kan pasalțha thisen hi a thlawn in inluan ral tir mai dawn em ni le? l fanu, i fapa te'n an dem lutuk hma che hian mi tenawm ho chu i va tlawm ang u hmiang " tiin, Zopui khawchhung khâwk rum rum chuan a rawn âu ta mai a le.
.
Chuveleh Zopui khaw val rualte chu a rik hian an ri ta chuah chuah mai a, an pasalțha thihna chu an dawihzep luat avanga thleng ta ah ngaiin, in thiam lohna chuan an khat a, pasalțha Rumvunga phuba lak duhna chuan an khat a, an hmangaihte pawh venghim zo lo an nihna chu Rawlthar Kaphleia sawina êng ațanga inhre chhuak nghal uar uar in, hunrei tak a ta an lo hlauh tawh, an tu leh fate tan chuan huaisenna thar chu annei let leh thei dawn ta! An hma-ah chuan engpawh thleng se hmachhawn turin an inpeih at tawh a ni hriat tak chuan an hmelah pawh a hmuh theih a. An thinrim âurâwl ringawt pawh hmelmate tan chuan rapthlak tak a va ni teh lul em!!
.
Zopui khawchhung chu lawm âurâwl leh thinrim inhrosa chuan a khat ani ber a. Lalpa Dokulha pawh a țhingțhitna ațang chuan rawn tho chhuakin, Upa hote nen chuan ankhaw tlangval rualte dikna duha thisen chaka tuihâl te che vel chu lawm avanga mittui tla kûang kûang chuan an lo thlir ve a, Mipui lam pawh pasalțha Rumvunga an sûn mêk ani tih hre lek lo chuan an lo sahâwk ve bawk a.
.
Chutah, Lalpa Dokulha chuan a bân rawn phar chhuakin, chuveleh mipui chu an reh nghal duk a, mipuite chuan "Kaphleia hmachhawn zawng taka an Lalpa a lo ding rân mai lam chu thlir in, a awka chhuak chu an lo chang țhap hlawm a. Chutah Lalpa chuan Kaphleia mit taka en chung chuan, "Kaphlei, ka khua leh tui a tan hian vawiin hian ka lawmlut nawn leh a che! I khua leh tui i hmangaih avang leh hmelma lak ațanga min chhanhim leh avang hian ka va'n lawm tehlul em! Tuna a thlavâng i hauh mêk pasalțha kha ka khaw pasalțha huaisen ti a kan lo muanpui ve țhin ber kha ani.
.
Mahse ani khan thil tenawm tak tiin, i chungah ngei pawh thil dik lo tak a ti ani a, itsikna avangin i thihna turin a phiar-rû che tih pawh i hre reng a, kha ti chunga ila ngaidam thei cheu kha mak ka tih êm êm a, ani nunna pawh kha ka zuah phah ta reng ani. Tunah chuan kha i ngaihdamna ropui tak rahchhuak kha ka hmu ta! Kha i ngaihdama avang khan vawiin-ah pawh a khua leh tui tana a nun hlân duhna hial khawp pasalțha huaisen a rawn nita! Zopui khaw tan hian kha tluka thil ropui kha a awm lo a sin. Heng zawng zawng hi nangmah avang chauh thleng thei ani e. Nang ang reng reng a huaisen leh, hlauhna pianpui ve lo mihring hi an awm thei ngai hiang ka lo ring ngai lo a, ka pian ahnu lamah pawh ka la hmu hek lo. A khua leh tui tana nun hlântu Pasalțha chawimawi tlak a nih ang ngeiin, kan pasalțha mual liamta sunna hun pawh nithum chhung ani tur ani ang " a han ti Chutah le, Kaphleia'n thildang engmah a sawi ve hma chuan, Zopui khaw val rualte chuan Rawlthar huaisen chu engkhaw sawi set set lo chuan an chawikâng lawk a, Kaphleia hming lam chunga haw haw hluah hluahin an zawn ta dawr dawr mai a, Kaphleia țhiante pawh lo kuah lawp lawpa chibaitu lah an tam narawh e.. Kaphleia lah chu zah namên lo chuan a lo zak a, chutia a khawnawta maia a hming an han lam chu awm ngaihna a hre bar lo chu ani e. Chumi ni zet Zopui khaw tan mêllung pawimawh tak a va ni dawn chiang em! Zopui khua-a thil thleng mêk chuan, akhaw mipuite sukthlek chu engtiang takin her danglam chho zel tak ang maw? hmelmate hmachhawn tak tak turin chawrno thei tak maw le?
.
Bawmzo khaw Lalpa Tinkhara'n a pasalțhate leh a fapa chu Zopui khaw kutah a thi ani tih han hre ngat sela chuan a awm mai mai bik tawp lo ang. Bawmzo pasalțha râlhrat leh mite țihkhâi êm êm, a thlen chin apiangah thihna in thla a zara, kawtthlerah pawisawilo thisen aluang zeih zuih țhin ti a an lo sawi, pasalțha Tlanzoa'n chung thil zawng zawng ahriat hunah phei chuan, Zopui khua-in an lo rindan leh beisei ang ngawt chuan thil a kal bik hauh lo ang le.
.
Ni pawh chawhnu thlang her hret ani ta! Lalpa Dokulha chu a lal in luhkapui dawhsan ah chuan rawn dingin, tlangval țhenkhatte chuan an pasalțha mual liamta Rumvunga Ruang chu an in lam an lo panpui ve mêk bawk a, akhaw buaina rawn irh chhuahna chhan bulpui ber, Hriliana leh a chhungte chu ko chho in, a khaw mipuite hnenah thil thlendan kimchang chu a chepakâi ațang chuan a han hrilh ta vek a, mipuite'n thil thlendan an han hriat chian meuh chuan, Hrilliana leh a chhungte chu an lainat hle nghe nghe a, an buaina bulpui ber Siamliani ngat phei chu a hmelțhat em avang chuan en a hlawhin, tlangvalte tan chuan thlir nin har tak a va ni em! Hetiang taka hmeichhe hmelțha chu tu emaw tan chuan buaina tham a tling reng a ni ti tawk pawl pawh an kát nuk reng ani.
.
Chutah, Upa Thanghrima pawh rawn dingchhuak ve in, Lal leh mipuite hnenah chuan a unaupa te chhungkaw chunga an țhatna avang leh an khua leh tui ni tura an pawm tak avanga a lawmzia thu chu rawn sawi in, an chhungkua avanga an pasalțha in nunna a chân avanga pawi a tih thu te chu a han sawi a. Hrilliana pawh chuan Lal leh mipuite hnenah chuan thupha chawina thu chu thiam tak chuan a rawn sawi ve bawk a. Siamliani te chhungkua pawh tunah chuan Zopui khaw mi leh sa ti a chhiar an lo ni ve ta bawk a, tunah chuan Siamliani te chhungkaw buaina chu Zopui khaw tan ngawih bopui mai mai theih ani ta bik tlat lo.
.
Hmelma an mante chu tlangval țhenkhatte chuan rawn phihchhuak in, Bawmzo pasalțha an thah takte ruang chu dim baksaklo chuan lal in kawt hmun rem laiah chuan an rawn hnûk dawr dawr mai bawk a. Chutah, Lalpa Dokulha chuan Kaphleia leh a fapa chu han melh zeuh pah chuan, "ka pasalțhate u, in mi thah lû hi rawn la ta che u le.. tichuan pialrâlah inrawng an bawl kumkhua tawh dawn zuk nia " a han ti a.
.
Chutah, Zopui khaw mipuite chu an lo zi hulh hulh tawh a, Kaphleia te țhian dun lamah chuan an mit a fu țhap hlawm a, Mahse, Kaphleia leh Lal fapa Dosanga chu an dinna hmunah chuan an ding reng thunga, chutia mipui nawlpui hmuh laia rawvâ taka han che chhuaktu nih chu thih hrehin an lo hreh hi ani a. Mahse, an chet lak hun chu Zopui khaw mipuite chuan an lo nghak țhap mai bawk si a, chutah Val upa an bul hnaia lo awm te chuan, E khai, " pasalțha huaisen te u, mi zawng zawngin kan thlir reng che u a nia, in tihtur chu va hlenchhuak vat tawh u khai " an lo ti sek mai bawk a.
.
Kaphleia te țhian dûn pawh chuan an hmabaka thil awm chu an tih ngei tur ani tih hria in, an iptepui ațang chuan an Chemtum ah chu an han phawrhchhuak țham țham a, a ti hmasatu zawk nih chu an hreh leh ta tlat! Chu thil chu an mahni lo thlir rengtu mipuite mak tih a hlawh in, khatiang khawpa hmelmate hmaa zamna leh khurhna chhete mah neilo kha, Kaphleia te țhian dun chu an khur ta tlat mai le. Mahse, Kaphleia'n Dosanga a va en nak chuan, ani chu alo ding sai hlat hlat tawh mai chu niin, chet a la hmasa lo a nih chuan a țhianpa chu a che hmasa dawn lo ani tih a hre chiang hle a, chutah Kaphleia chu a mi thahte ruang awmna lamah chuan muangchâng chuan a han pen ta chhat chhat a.
.
Chutah le, mite hlauh rawn leh a khaw chheh velte pawhin a apawisawi an hlauh em em Lal Tinkhara Pasalțha chhuanvawr leh a fapa duat em em, ka innghahna ti a a lo chhuan ve em em țhin lu chu, an taksa nena inzawm leh tawh ngailo tur chuan a Chempui lian țha telh tawlh chuan a han tan ta hmawk mai a, Lal fapa Dosanga pawh chuan a mi thah tak lû chu a rawn la ve ta nghal bawk a. Mipui thâwm pawh a țha dar dar kher mai.
.
Mahse, Hetih rual hian Zopui khua hian hmabak hautak zawk an hmachhawn an la ngai dawn thung a, hmelma an mante chu an nunna zuaha la hren rih tur chuan Lalpa chuan a han ti a. Zopui khua chu hmeichhe pakhat vangin Bawmzo khua nen Leido khua an nih phah chu ani si a le. Bawmzo khua hneh tur chuan khawdang puihna an dil ngei a ngai emaw ani anga, an ni'n an lo pui duh lo a nih phei chuan, an pasalțha phuba lak chu sawi loh, an buaina hnarkaitu ber Siamliani leh a chhungte bakah, an khaw mi leh sate chuan an tuar dawn ani tih pawh Lal leh upate hian an hre vek a.
.
Mahse, pawisawilote na tuar tira, an theihna hmanga mi hnuaichhiah ching leh hmeichhia pawh kutthlak hreh lo Lal rawvâ tak mai chu hremna pek ngei chu an duh a, mahse an tan chuan Bawmzo khua chu han cho phak rual niin an hre lova. Kaphleia leh a țhiante lah râl han do tak tak turin in nghahna tlakah an la ruat thei silo. An rilru tak chuan an mangang ru hle a, Mahse, duhthlan tur dang a awm miau silo a le.. Bawmzo khua lo hmachhawn tura in buatsaih chu an tih theih awm chhun chu ani ta!
.
Mipui zi nuaih nuaih karah chuan naupang pakhat chuan Kaphleia chu a rawn pawm ta chat mai a, Kaphleia'n chu naupang tunge a nih a hre mai tlat lo, mahse ngunthluk zawk a a han en chuan a hre thei ta! Chu naupang chu tudang ni loin, hmelțha eltiang Siamliani nau Rokhuma, hmelma ho in a dimbaksakloa kawtlaia an lo theh phar kha ani tih a hre thuai a, Chutah, chu mipa naupang fel tak chuan, "Ka û, ka lawm e aw " a rawn ti reuh a. Kaphleia kianga awm ve a țhiante leh mi țhenkhatte pawh chuan chu thil chu lo hmu ve in, Kaphleia pawh chuan chu naupang lainatawm tak chu a lo kuah let ve bawk a, Siamliani chuan a hma mai a Kaphleia'n a nau duat tak maia a lo kuah vawng vawng chu a mitmeng paw râm mai leh pawisawilo zet chuan a lo thlir ve dauh dauh mai bawk a, theih nise an nunna chhan himtu rawlthar huaisen leh hmelțha em em mai chu han pawm leh vawng vawng chu a pawiti lo tawp ang le. Kaphleia pawh chuan chu tleirawl hmelțha em em mai in a lo thlir reng chu a hmuh hmaih bik hauh lo.
.
Tichuan le, Lalpa Dokulha leh a upate chu an hanin rawn khawm nak nak a, mipuite chu zanriah eirel hun a nih tawh avang leh an pasalțha mual liamta te in lama kal a ngaih avang chuan an țin darh hlawm a, Kaphleia leh a țhiante l erawh Lalpa in awm rih tura a ngen avang chuan an awm ve ta rih a, (mahse rorelna ah erawh telh an la ni rih lo) Kaphleia nu leh a pi leh pute pawh chuan an fapa duat em em chu an țin san ta rih a, Lal leh upate'n rorelna ah chuan Siamliani pa pawh teltir ve in, Siamliani pa Hrilliana thusawi chuan an beng a verh hle nghe nghe a, hma lakdan turah an buai ta nak mai le.
.
Zopui khaw buaina ber chu râldo turin an tlangval zawng zawng kalchhuah a rem lo tur hi ani. Bawmzo khua nen Leido khua an nih hma hian Suakzawl khaw do mai thei turin an lo inbuatsaih ru reng tawh ani a, Hrilliana khaw hlui, (an rawn chhuahsan tak) "Hrangkai" khua, Lal Rumliana lalna khua hi in za nufa lek an ni a, Lal Tinkhara hian a fapate'n an thil duh an hmulo ani tih leh Hriliana te chhungkua chu an lo tlanbo ani tih a hriat vaih chuan, Lal Tinkhara hi Lal Rumliana leh a khuate chunagah hian a lawm dawn hauh lo a, Hrangkai khaw chungah chuan engtiang takin nge a chet ang tih chu ngaihtuah ngam pawh va nisuh. Hetia a fapate an reh vang vang takah phei chuan, Hrangkai khua chu an zawnna hmasaber tur ani tih chu a chiang bai mai a, pawisawilo tam takin an tuar ngei dawn tihpawh an hmu chiang hle ani.
.
Zopui Lal in chhung chu buaina chinfel a nih avanga an hlim teh lul nen, Hrangkai khua a nunaute leh pawisawilote 'n an tawrh tur chu hre rengin, a chhanchhuah hnathawk tura hmalak thuai dan kawng chu an dap a ngai leh ta! Tichuan le, tawkfang an han ngaihtuaha thil hrang hrang an thlir hnu chuan, thu tlukna chu an siam thei ta hram a. An pasalțha sunna hun pawh chu nithum chhung kha an han ti tak na in, an hun tawnin a zir miau loh avang chuan a ruang ni bak chu a kûang an âwm leh thei dawn ta lo a, tlangâu pa Luaithanga chuan an pasalțha țhenkhatte leh Val upate chu hmanhmawh tak chuan a han ko khawm leh chung chunga, Kaphleia leh a țhiante pawh an ni ho zingah chuan koh an ni ve nghe nghe ani.
.
Chutah, pasalțhate leh Val upate chu Lalpa chuan thil awmzia leh thil thleng thei chu alo hrilh zung zungin, thu tlukna an lo siamdan te chu a han hriattir hlawm a, an thusawi zawng zawng chu Kaphleia chuan ngun takin a lo ngaithla a, Bawmzo Lalpa Tinkhara chet duh dan zawng zawng a hriat meuh phei chuan a puak keh lo chauh chu ani ber a, chutah Val upate'n tlangval sawmnga Hrangkai khua țanpui tura kal tur zingah chuan Kaphleia leh a țhiante hming lamrik ani ve ta hlauh mai chu, an ni rawlthar leh tawn hriat neilo na na na chu an lo phur na ngiang mai chu niin, an awm hmunah an lo khi var var mai a, Mahse, Lalpa chuan a fapate kalve chu a remti ta hauh lo, an ni hi chu khaw hmun nghakah lo țang zawk rawhse, zawlbûk em pawh an la kai lova, mi karah nundan pawh an thiam lo ang " tiin, a remti ta tlat lo.

[Ngaia]

HNAMCHAWM PASALȚHA KAPHLEIA

By. Nghaka Chelsea.

EPISODE - 20

Chutia pasalțhate leh Val upate beisei loh lutuk a Lalpa a rawn țawng avang chuan Lal in chhung chu a reh țhiap mai a, Val upate leh pasalțhate lo ngaihdan chuan, Kaphleia chu râl hmachhawn tura tawnhriat la neilo mah nise, Zopui pasalțha kei ka ni lo inti ve țhinte chuan Kaphleia chu eng kawngah mah an tluklo a ni tih an hre chiang hle a, Rawlthar chauh mah nise a thiltih avang leh a huaisen zia an lo hmuh fo tawh avangin an chung en lo thei lo a, tunah pawh hian amah vang chauh a hmelmate laka ding khawchhuak leh thei chauh an nih pawh a hmu chiang bertute vek an ni.
.
Chutah, Kaphleia'n upate leh pasalțhate chezia a han hmuh chuan, Lalpa hnenah chuan thusawi ve chu a rawn dil ta khauh mai le. Lal in chhunga awmte chuan aw lo chhuahna lam chu an thlir nghal țhap mai reng a, Chutah Lalpa Dokulha pawh chuan, "Vala, ka pasalțha huaisen leh in nghahna tur i ni tih chu phat rual ani love, i huaisenna leh i theihna pawh vawi tamtak i khua leh tui te'n kan hmu ta! Tunah pawh hian kalve pawh ni ula ngaihtuah awmin in awm hauh lo ang tih pawh ka hria, mahse kan zavaia kalvek theih a ni lova, khaw hmun nghak tawk kan awm a ngaih vang a nia " tiin, Kaphleia sawitur hresa ang mai chuan a han ti a.
.
Mahse, chuzawng Kaphleia sawi tum ber erawh a ni tlat lo! Chutah, Kaphleia chuan, Lal leh upate'n an han sawi hmang ațang chuan ngaihdan dang a lo nei tlat mai pek a, ani naupang mai ngaihdan chu upa ho kara han âu chhuahpui chi ah a ruat lo a, Mahse, an rorelna zawng zawng ngaihthlak ațang chuan a sawi chhuah ngei a ngaiin a hre si a, chuvanga thusawi rawn dilve pawh a ni reng ani.
.
Tichuan, Lal leh upate bakah, pasalțhate leh Val upate'n Kaphleia ngaihdan leh țha ni a ahriat an han ngaihthlak hnu chuan, Lalpa Dokulha leh in chhunga awm te chu an hmaa Rawlthar thusawi chuan an beng a fahin, finthlak dawn hle in a hre nghe nghe a, Lal in chhunga awmte chu an ri leh mam mam hlawm a. Chutianga ruahmanna fing leh țha rawn ngaihtuah chhuaktu chu ngaihsân hmelpu taka en chungin, an lû chu an han bu deuh nghat nghat hlawm a.
.
Chutia Lal in lama hmelmate hmachhawn dantur ruahmanna siama an lo rik laih laih lai chuan, Kaphleiate in lamah pawh an fapate rorelnaa telh ve an nih avang chuan an lo buai ve hle mai a, Kaphleia țhiante pahnih, Lawmsanga nu leh Ramzaua nu chu Kaphleiate in ah chuan an fapate chanchin ngaichâng chuan an lo țhu țhapa, Leido khaw hnih lai nei an nih tawh avangin, Lalpa chuan, an fapa zawlbûk pawh lakâi lo chu râl hmachhawn turin atir ve mai ang tih an hlau a ni. Kaphleia nu Ngursangi pawh awm hle hle thei lo chuan chhuat dungah chuan a lo tei sek mai bawk a, a fapa lo puitlin tak avanga a lawmna chu, lungngaihna chuan a rawn nang ching zui chu a ni hawt a, a fapa chu râl kutah a thi mai ang tih hlauhna chuan a khat ani ber mai.
.
Chutah, Pu Hrangthanga chuan, "E khai, engah nge in lungngaih ni! Eng anga râl hlauhawm hmachhawn pawh ngai se, in fapate chu ngaihtuahawm an ni tawh love, engpawh thleng se Khuanu'n zah a ngai dawn alawm, dikna hmachhuana fehchhuakte chu a veng a ni ngai e " an lo tih țhin kha. An khua leh tui chhan nan râl lû tam tak khai hawng chungin an rawn let leh dawn a sin " a lo ti vei dap dap a. Pi Sawiveli pawh chuan a pasal thusawi chu lo tui hnih ve vatin, "Bawihi te u, nangni chu in vannei teh e, khua leh tui venghim thei tur fapa tlangval in nei a lawm hle tache u le.. a thu hansawi zawng chuan ngaihtuah chhuah a nei a ni tih hriat taka thâwk chu han la vang vangin, a fapa Hrangvela hming chu ama hriat tawk leka rawn lamin, a han phun deuh sap a.
.
Chutah, Lal in lamah pawh an hmalak zeldan tur pawh siam fel a ni ta ve chiah bawk a, Siamliani pa sawi hmangin muang chânna chi a ni tlat lo! Lal Tinkhara chuan Hrangkai khua chu fapa nupui tur thukrû leh tlanbo tirah a puh dawn mai bakah, a fapate awmna chin pawh sawi thei lo an nih avang ringawt pawhin a hâl darh vek duh dawn a ni tih chu, Pu Hrilliana sawi hmang ațang chuan Kaphleia'n ahriat chian em avangin, hetia han hmanhmawh ta chung chung hi an ni a, pawisawilote'n an tawrh ai chuan an pasalțha ruang thlak pawh nghak khaw muang lova, a tukzing khawvar ruala tlangval sawm in Hrangkai khua chu pan nghal tur chuan an han ti thlu ta rum rum a.
.
Hrangkai khua hi patling chakvak tak tan pawh ni thum kal zet a ni ve a, Lal Tinkhara leh a hote Hrangkai khua-a an chet tak tak hmaa Lalpa Rumliana bula engkim va hriattir hmasakber chu an thiltum tur chu a ni a, Chumi a zira khaw mipuite pawh hmun him lama hruai tur leh tur loh chu an hre chauh dawn a ni. Heng zawng zawng hi Kaphleia ruahmanna leh duh dan vek a ni a, ruahmanna hmasa-ah kha chuan an pasalțha vuiliam zawh lama kal chauh a nih dawn avangin an thiltum ber, nuanau pawisawilote an chhan hman loh kha a hlauhawm a, bakah a nawlpuia kal nghal vek kha chuan kalkawngah an muang erh ang tih a hlauh thawn pakhat vang a ni. Lal leh upate pawhin Kaphleia thusawi chu chîk taka an ngaihtuah hnu in, Hrangkai khaw mite chhan hman loh chu thil ni thei a nih tlat a vangin tun hi an thleng ta a ni.
.
Tunah chuan he ruahman anga an kal thei a nih ngat chuan, a hma aia let tam takin kawng a awlsam phah dawn a, engkim fel taka an tihna enghnuai ațangin hma an la tawh mai dawn a ni. Pasalțha dangte pawh thlan țhutnaa awm khaw muang tawh lo in, midang sawmnga vel chuan an țhiante pui turin an va fin veleh thuai thei dawn a ni. Bawmzo khua leh Hrangkai khua hi khaw in țhenawm mai an nih avangin, Chu thil chu Kaphleia hian hre chiangin, an thiltum ber leh duh ber an ti hlawhtling thei lo ang tih a hlauh luat vanga rorelna-ah pawh rawn insum duh ta biklo kha a ni a, khatiang taka ahmanhmawhna rahchhuak kha Hrangkai khaw mipuite hian têl thei tak maw le?
.
Chutah, Lalpa Dokulha pawhin a ruahmanna a thlak leh a ngai ta tlat mai le, Kaphleiate țhian ho kha kal lo turin a han ti zet na in, Mahse, engkim ruahmanna siamtu leh ka pasalțha ti hiala alo koh tawh, mibîk leh khuavângte fa chûam chu hmaih theih ani ta tlat lo, Kaphleia a tel chuan a țhiante pawh hmaih chi an ni biklo tlat, tichuan le, a vawikhatna atan râl hmachhawn turin an fenchhuah phalsak an ni ta! Val upa Satliana'n an ni ho chu a kai hruai dawn a, an ni pali bakah, bakah, pasalțha panga dang an kal tel bawk dawn a ni. Kaphleia țhiante chu an hlim kher mai a, râl hmachhawn tur an nih lam ngaihtuah aiin, an țhianpa kianga an kalve thei tur mawlh mai chu an lawm tawk a tling hliah hliah mai a ni.
.
Chutia a tukzing mai a kaltur an nih avang chuan Kaphleia leh a țhiante chu insiam tur chuan an chhuak zui ve ta nghal a, Lalnu Sawithangi erawh a pasal thu tlukna avang chuan a lung dam ve thei ta tlat lo! Rila rah fate ngaihtuahna chu a lo na ngang a niang, "Taite, nang chu kalve lul suh aw, Lal Tinkhara pasalțha hmachhawn chu thihna an ti a sin " tiin, Dosanga insiam tur chu a bân ah chuan a lo man ang țawk țawk a, Lalpa chuan, "E khai, Sangtei nu, fapa tlangval leh râl lû pawh la thei i nei tawh tih hre tache le.. Kaphleia kiangah chuan ka fapa kha engtin mah a awm hauh lo ang tih ka hria a ni " a rawn ti a. Lalnu meuh pawh Kaphleia hming chuan a thlamuan pui ve ta deuh a ni chêk ang chu, "Taite, va fimkhur hle ang che u aw, ka fapa neih chhun i nih kha " han tihpah chuan a fapa thil ken turte chu a han dap pui ta zung zunga, upa țhenkhat lo awm ve te chuan, heti khawp hian a ni maw kan Lalpa hian Kaphleia hi a lo rin le " anti hial reng a ni.
.
Chutah, tlangâu pa Luaithanga chuan, Lal leh upate thu chhuak chu mi zawng zawng hriattur chuan kawtthler tinah chuan a han âu ta lauh lauh a, chutia khawdang pui tura an pasalțhate fehchhuak tur zinga Kaphleia leh a țhiante hming an han lam ri ve chu makti fe fe pawl an awm laiin, țhenkhat chuan an ni hi chu che chhuak ngei ngei tur an ni reng a ni ti tawk an lo awm bawk a, Kaphleia leh a țhiante hi zawlbûk pawh la kâi lo an nih avang hian, âwm lo ti a lo sawi tute pawh dem ngawt theih an ni biklo a, Ngursangi pawh lungthlu lo zet chuan a fapa ken tur pawimawh chu a lo siamsak ve malh malh a, Pu Hrangthanga lahin a tupa chu lo zilh lehin, aia û zawkte zâi ngai taka awm tur leh midang tana harsatna siamtu lek phei chu thil zahthlak tawp a nih thu te chu a lo hrilh malh malh bawk a, Ngursangi lah chu enge a ngaihtuah tih pawh hriat loh chuan a thilti chu a buai nuaih hi a ni ber a, a fapa neih chhun chu râl rama kal tur êm atan chuan a ngai ngam ngang lote pawh a ni mahna le, Mahse, Kaphleia chuan a nu awmdan chu alo hmuh hmaih lo nasa mai chu niin, "Ka nu, i fapa hi min ngaihtuah hle a ni tiraw? Ka pa kha a khua leh tuite hmangaiha veng him țhintu pasalțha i ti a ni lawm ni? Kei hian Ka pa hnung chu ka zui i duh lo em ni " a han ti a.
.
Chutah, Ngursangi chuan, "Taite, pa tello a ka chawi seilen i ni a, nang hi awm ta lo la i nu hi engtin nge ka awm tak ang le " tiin, Kaphleia kuah chung chuan a inhnit ta feih feih mai a, Mahse, Pi Sawiveli chu lo inrawlh vatin, "E khai, mai mai a, ka tupa duat chu engtin mah a awm dawn hleinem! A khua leh tui venghim tur leh pawosawilote chhanchhuak turin alawm a kaldawn le.. I hmangaih tluk zet khan a sin kan hmangaih ve tho ni.. khatiang te chuan kan fapa pawh rilru thlamuang takin kan kaltir thei nang le " a rawn ti ta vat a. Kaphleia pawh chuan a nu chu a thiam ang tawk a hnêm in, zanriah eitur chuan an in buatsaih zui ta nghal a.
.
Engkim peih fel a ni ta! Chuzan chu Kaphleia leh a țhiante tan chuan a zan rei ber țum a ni hial awm e, an hmabâka chu huphurhawm tak mah nise, an tan chuan thil thar a nih mai piah lamah, khual khua-a an zin ho vawikhatna tur a nih avang leh khua leh tui tana an thawh chhuahna hmasaber tur a ni tlat! An zavai mai chuan an helh hawlh tlang bawk a niang, mutmû tuah thei abar pawh an awm lo a, khum laizawlah chuan an let zankhua țhak chu a ni ber e. Mahse, heng Rawltharte hian hriat loh an nei a ni, engtiang takin nge buaina an tawh dawn tih hria ni ngat sela chuan heti tak hian an helh hawlh lo tur.
.
Khawfing a lo chata, var ar a khuang thliai thliai ta maw " tih ah chuan, Kaphleia leh a țhiante pawh kawtchhuah lam panin pheikhâi zang vah chuan an kal ta thauh thauh mai le, pasalțha ramchhuak turte chu an chhungte țheuh chuan rawn thlah in, Lal leh upa țhenkhatte pawh an zingah chuan rawn tel ve in, an fapate chu an rawn thlah ve bawk a. Chutah le, sawm ve loh Zopui nula hmelțha Thanpuii leh a pa unaupa fanu Siamliani an lo lang ve ta tlat mai le, Kaphleia țhiante chuan chung nula hmelțha pa hnihte chu an lo thlir rang kher mai, Kaphleia erawh nula pahnihte hnungchhawn zawngin a lo awm thunga, Chutia tleirawl hmelțha eltiang leh khuavângte'n an duh ang thlapa an duan nimai awma mawi leh, a pheichheh mawi tak leh a malno pawisawilo zet rawn lang haih haih chunga Kawtchhuah lam Siamliani'n a rawn pan an han hmu zet zawng, Rawlthar rual tan chuan mit laksawn nachang hriat mai te pawh a har a ni mahna, mitkhap leklo chuan an lo thlir dauh dauh a.
.
Chutah, Siamliani'n an hmaa Rawltharte'n an lo thlir reng a han hmuh chuan, a zak lutuk chu a sen țan țan thei hial a, zah luat avang chuan a û Thanpuii bula let leh a duhthu a sawi hman țhelh tawh a, Mahse, a mi hmuh duh ber leh, a nunna chhanhim saktu, a vawikhat hmuhna ațanga a mipa ngainat ber leh thilai luahtu mit leh a mit chu an intawng ta siah mai le, Siamliani chuan a rilru ti paukhauh in, a û Thanpuii'n Kaphleia kiang a thlen dawn chuan a zui ve ta zel a.
.
Chutia beisei loh lutuk thil Kaphleia'n a han hmuh chuan, hlauh vang ni hauh lo chuan a lungphu chu a insai ta dup dup ta mai le. Chu achhapah Kaphleia chu ankhaw nula hmelțha Thanpuii chuan an lama kaltur chuan a rawn la hui zui leh ta nghal. Midang an lo rik laih laih lai chuan, Kaphleia țhiante lah chu thil awmzia hrethiam tak chuan an lo țhen țhâ hlawm a, Kaphleia lah chu a lâi chhe ti tih chu a ni ber a, Kaphleia'n a țhiante hmel a han en chuan, chung nula pahnihte lokal chu a țhiante chuan an lo hmu daih tawh a ni tih chu hrethiam nghal in, a țhiante'n engmah an hrilh ve loh avanga a țhiante rum deuh taka va melh chung chuan, nula pahnihte rawn huina lamah chuan zak sen țan țan leh a kê pên bah niaih chung chuan Kaphleia chu pai phei ta khet khet a.
.
Chu thil Thanpuii'n a han hmuh chuan nuih insum tak chuan a hmui chu a lo pet fan fan a, Kaphleia nu Ngursangi pawhin chu thil chu a lo hmuh hmaih lo nasa mai, Chutah, Siamliani chuan a huaisenna zawng zawng sawm khawm in, Kaphlei hnenah chuan, "U Kap, hei, i thil pâi tur ka rawn ken ve che a, tiin, a puanhnuai ațang chuan thil fûn lian tawk chu a rawn lek chhuakin, Kaphleia hmelah tak pawh chuan a en țha ngam lo a, Siamliani hian Kaphleia a lo duh rilruk vanga hetianga thilti hi a ni bik lo a, an chhungkaw tana a thiltih zozai avang leh midang tam tak tana a nun hial pawh hlan hreh lo pasalțha chungah hian lawmthu sawi ve a duh mai a ni a, tunah pawh damin an rawn hawng ang nge tih pawh hriat lohin ke an penchhuak leh dawn a, chutiang a nih avang chuan zak chung chung leh hreh tak chungin he thil hi a ti a ni.
.
Kaphleia pawh sawitur a vân kher mai, "ka lawm e aw, tih zawng chu chhanna awm chhun a ni a, Chutah, Siamliani chuan aw zawi thâwp sât hian, "U Kap, dam takin in lo kir leh ngei dawn a nia aw " a han ti thâm deuh țiak a. Chu thil kher chu mite tan chuan zawiin fiah lo viau mahse, Kaphleia tan chuan beng bula Darkhuang vuak ri ang mai a ring a ni lawi si, Chutah Kaphleia chuan, "Siamte, dam takin ka rawn let leh ngei ang tih ka tiam a che, Mahse, ka thangbo chen tur erawh ka sawi thei lo! Ka țhiante ruala ka rawn let ve lo a nih pawhin min lo ngaihtuah suh ang che " a han ti ve ta salh mai le.
.
Chung tleirawl pahnihte tan chuan in kawmna hun a awm ta lo. Kal turte chu an inpeih tawh avang chuan Kaphleia pawh a țhiante awmna lam chu a fin phei ve ta nghal thuai a, pasalțha rammu tura chhuak ta te chu an kal liam thleng chuan an chhungte chuan an bân an lo vai lap lap reng a, Siamliani te pahnih pawh chuan pasalțhate kal liam thleng chuan an thlir zui vawng vawng mai bawk a, Val upa Satliana chuan hma hruaiin, khaw ên laia a hla thei ang ber thlen hman chu an tum ber a ni.
.
Chutia kawng an han kalțan, thui pawh an kal hma ațang chuan Kaphleia țhiante chuan Kaphleia chu an chhaih zui ta nghal bawrh bawrh a, Mahse, chu thil chu Kaphleia lo rin lawkdan chiah chu niin, ti ti dangah chuan a pakâi lui ta tlat a, Kaphleia chuan Siamliani chu hmelțha a ti lo a ni biklo a, Mahse, Siamliani chu an khua-ah pawh mi awmthei Upa Thanghrima unaupa fanu a nih mai bakah, Siamliani pa pawh hi Hrangkai Lal Upamin a ni tih chu a hre ve khiau a, khatianga an inbiakna vel bak kha engmah thlei zui turah a ruat ngam lo a, Siamliani chu a tan chuan thingzar sang taka theirah lawh phak rual loh ah angai hmiah a, Siamliani'n engthil chiah nge a pek tih pawh ațhiante avang chuan an la en duh rih lo a ni.
.
Val upa Satliana ho chuan an hma lawka Saiseh Ngawpui dur khup, an mahni ep zawnga lo pharh cham duai mai awmna lam pan chuan an kal ta țauh țauh a, Val upa Satliana chu a pasalțha hruaite leh a Rawlthar hruaite chu a han en țhin a, phur tak leh tha tho tak maia an han kal țauh țauh mai a han hmuh chuan thlamuan pui hle nghe nghe a, a bîk takin ankhaw pasalțha tuaitir Kaphleia chevel chuan a ti lawmin, a kianga hun a hmang thei turte chu a rûk tak chuan alawm zawmaha, zawlbûk thingnawi fawmrual an nih ațanga a lo enthlak tawh leh huaisen ti a alo hriat kha a ni ve reng reng a, heti taka a khua leh tuite leh an Lalpa rin a lo hlawh pawh hi a phu ve rengah a ngai hmiah mai a ni.
.
Chutia hah leh chauh pawh sawiloa fehrehsan hun vel thlenga chawl miah lo a an kal hnu chuan, Saiseh Ngawpui pawh an lut țan ti tih der tawh a, he ngawpui chhung hi a zau hle a, mak tak maiin he ngawpui chhung hi thing a ding khat vek e tilo chuan, lei hmuh tur hi a awm bar lo a, a awmchhun pawh a chhengchhe lai deuh hlek leh kawr thuk tak tak hi a ni deuh vek a, a bak zawng chu lung pher hlai tak tak hi a inphah chhuak a ni hawt mai a, chuvanga helai ram pawh hi leipui atan țheh ngailo an ni a. Ngawpui chhung lungpher hlai zet chunga tui rawn luang her her chu an dangro hnawn nan chuan hmangin, tui chu tui ti takin an han dawt khalh khalh a, chulai hmunah chuan tukțhuan pawh chu an han bar ta nghal a.
.
Chaw an han eikhama, an chaw eina hmun hma vel chu upate chet ngailo chuan Kaphleiate chuan an han tifai leh zung zung a, rual û zawkte chuan Vaibel chu an lo pak khu leh talh talh tawh a, Kaphleia paw'n Zopui tleirawl hmelțha eltiang in tuibûr âl tui tak a râwlrûk chu kil khatah chuan lo hmuam vei țalh țalh a, Vaihlo tam tham tak hi a lo fûn tel bawk a, a petu in a zir bawk aniang, phuloh lengah ruat mahse, Kaphleia thinlung erawh a va hlim si em!
.
Hmabâk thui tak kaltur an la neih avang leh, chu Ngaw chhhung chu khaw en țhat lai ngeia chhuahsan hman hram an duh avangin, tawi khawmuang lo chuan an kal leh ta nghal char char a, kalkawng a mumal lo in, Silai leh thildang phur chung chuan an kal sawt lutuk thei lo a, Mahse, tumah han chhawmdawl ngai an awm loh bakah, țhalai țhehțhawh thaza rual kal na na na chu kal pawh an kal sawt par par e, tlang ațang ni tawngchen vel a la awm tih ah chuan Saiseh ngawpui chhung chu a chhuahsan thei ta hram a. Mahse, Val upa Satliana hian thilhriat loh pakhat a nei tlat mai a, Saiseh Ngawpui chhung ai pawha riahna atana thlanawm lo zawk "Huailiamkâwn" chu an chhuahsan hman dawn ta tlat lo mai le.

[Ngaia]

_HNAMCHAWM PASALȚHA KAPHLEIA_

_By. Nghaka Chelsea._

_EPISODE - 21_

_Episode - 20 recap : Húailiamkâwn chu an chhuahsan hman dawn ta tlat lo._
.
_Saiseh Ngawpui hi tunhma chuan heti taka chhengchhia leh rualremlo hi a ni ngai biklo a, hetia lung lo intiang erh urhte hian thawnthu thui tak a nei ve țeuh maia, tunhma chuan heng lung lian tak tak te hi a awm ngai biklo ni âwm tak a ni. Thil chinchang inti hre deuh leh pa upa lamte sawidan chuan, he hmunah hian tunhma daih tawh khan Lasi ho leh Húai mite indona rapthlak tak alo thleng tawh niin an sawi a, he indona rapthlak tak thlengah hian Lasi ho chuan hnehna an chang nghe nghe a ni áwm e, Mahse, hemi țum hian Húai Lalpa fapa chu a vanduai zingah ațangin a nun achân hlauh mai pek a, chumi avang chuan Húai Lalpa chu a thinrim êm ém maia, Lasi ho laka phuba lakdan ringawt ngaihtuah chuan a hman hlel chu a ni ta ber a, a tawp atawpah chuan Lasi buaina thlen thei tur khawpa thiltih theihna chu rawn hmuchhuak in, Lasi ho awm hmun khuarna ah chuan lut ru in, buaina an va thlen leh ta fó maia, Lasi ho pawh, chutia an mite anbo tak fô avang leh a tih ngaihna tak anhriat loh avang chuan, hmakhawsang ata an lo tualchaina hmun "Saiseh Ngawpui" chu an lo chhuahsan a ngaih phah ta nge nge a. Mahse, an chhuahsan dawn hian Ngawpui chhung chu túma luah tlak loh tur chuan an súasam ta vak mai a ni, an lo ti a._
.
_Hûai ho in tuna awm hmun an khuarna hi Lasi ho nena an indo țuma an bikbona hmun ni a sawi a ni a, Lasi ho in hnehna an han chan khan Húai ho chu an ûm vak mai a, Mahse, thil maktak mai chu thlengin, Húai ho in tuna a hmingput chhan Húailiamkâwn an thleng chiah tihah hian, Húai ho chu hnu chhui tur leh thâwm rivâ pawh hriat eih tur awm lo chuan anbo daih mai zela, Lasi ho chuan chu thil chu hriat chhuah ngei tum chuan anbei ve ngial țhin a, Mahse, Húai ho thiltih theihna hman chu anhre chhuak zo ta biklo a niang, Húailiamkâwn hmun ațang hian beidawng takin an kír leh țhin a ni. Mi hrang hrang sawidan erawh a in ang lo hle a. Mahse, an thilsawi zawng zawng khaikhâwm tu ber leh mite țihkhâi ber chu, Húailiamkâwn riak pasalțha țhahnem tak chu tun thleng hian an la hawng loa, a hawng awm chhunte pawh biaktlak in an awmzui tawh ngailo an lo ti țhin._
.
_Saiseh Ngawpui hi Zopui khaw ramchin chiaha awm a ni a, hetiang rammite indona rapthlak tak thlenna hmuna riah hi rúal û zawkte khan an lo duhlo nasa mai hi a ni a, chuvanga Saiseh Ngawpui pawh hmanhmawh baklenga chhuahsan hram tuma kal kha an ni reng a ni. Mahse, heng pasalțhate hian hriat loh an nei tlat mai le, an hmanhmawh luat avangin pumpelh thei ang berin kawng an zawh a, an hmabâk lawk a Ngawpui thim chhah mup mai lo awm chu pi leh pute'n leh an lo țih êm ém leh kum enge maw zat an lo tlawhserh tawh Húailiamkâwn a ni tih reng an hrelo a ni. Khuangphah khaw ramchin ah chuan pasalțhate chuan an hmaah enge lo thleng dawn tih reng hrelo chuan ankal ta țauh țauh mai le._
.
_Chutah, Val upa Satliana chuan a naute hnenah chuan, "naute u, kan hma lawka Ngawpui chhungah sawn riahbûk sualna hmun remchang kan melhpah a ngai tawh a nia aw, tlai lutuka riahbûk sual zawng a fello e, khaw ên laia khawsak relfel thuai hi a țha ngai e " tiin, vaibel han pak khu talh talh pah chuan hma chu a han hruai zela, Ngawpui chhung pawh an rinâi tak chuan a hmun chu a remin alo nuam phian mai a. Rengchal hram rál rál leh Chhimbuk hram dút dút bak chu ri hriat tur avang hle a, thui pawh an kal hma chuan riahbûk sualna rem zet mai chu anhmu ta nghal mai a, Luite tui thianghlim zet lo lúan hèr herna kíangah chuan riahbûk kháwr tur chuan an thil phurhte chu an han nghat ta sàng sang hlawm a. Ngawpui chhung chu a dai nuam bawk a an han țhu thlan dai te te a, Kaphleia leh ațhiante tan chuan engkim mai chu thil thar vek mai a ni a, Mahse, zirtirna țha tak tak an nu leh pate ațanga dawng vek an ni a, tihtur han hrilhchawp ngai tumah an awm lova, bûk sakna tur hmanrua la tur chuan an Chemtum nen chuan an chhuak zui nghal ta sang sàng hlawm a._
.
_Ngawpui chhunga riahbûk sual hi a namai lo hle a, chak-khai han dap zung zung tur hi aváng țhin hle a, Mahse, Zopui pasalțhate hian riahbûk tur an thlanna hmun ațanga lung vawmphak maia "Raw hung" awm chu hre khiau in, Kaphleiate țhian pali leh pasalțha dang pahnihte hian khawthim hma ngeia riahbûk peih fel hman tuma raw awmna lam pan vat an ni a, Val upa Satliana leh midang pathumte chuan riahbûk tur hmun hma vel chu an lo ti fel ve mêk bawk a. Chutia an tihtur țulte ti a anbuai nak nak lai leh Kaphleia leh a țhiante'n raw awmna hmun anlut țan ta maw " tih ah chuan, anpiah lawk Kawrpui rúam thûk tak awmna lam ațang chuan, awrâwl rapthlak zet mai a rawn chhuak ta thut mai a le. Ram vachal leh pasalțha nilem lo tan chuan chet han lak zui ngamna chi a a ni mawlh lo. Ngawpui chhung khawk rum rum chuan Nutling chu arawn nui khek uarh uarh a, Patling thinrim inhrosa kûk kuk thâwm chuan rawnzui nghal in, enge ansawi erawh hriat theih abar awmlo thung a, a chânga patling aw fiahlo rûai mai țanpuina ngén âu aw ni âwm tak hriat tur a awm vei bawk nen._
.
_Zopui pasalțhate leh rawlthar țhenkhatte ke pên chu a tawp chiang kher mai, an dinna hmunah chuan khur zawih zawihin an inmelh ang hrû hrú hlawm a, Kaphleia pawh thil thleng avang chuan phu ve deuh zuk a, a ding ve deuh det nghe nghe a, Mahse Kaphleia chu chutiang thil mai maia zâm chhe tura khuanu'n a nun alo zuahsak a ni ve tlat lo, thlahtu mihuaisen chhuntur neițha na nâ na chu mibîk a nihna a rawn langchhuak leh ta! A țhiante hlau thlabâr tak leh khur zawih zawiha awmtirtu chu tute nge an nih a ? Engvanga Hringmite rawn tibuai ngawt nge an nih tih chu Kaphleia chuan a hre mai lo. Mahse, an pawisawi pawh awmlo leh mi awm mai mai chuti fakauva rawn rûmțhaih chiam tute chungah chuan a lungni ta bik hauh lo, a țul anih phawt chuan chung mite lo hmachhawn tura inpeihsa at chuan a insiamrem ang sauh sauh a, Chemtum lian țha telh tawlh tak hûm chung chuan a ding kâk hah ta mai le._
.
_Mahse le.. maktak mai chuan thâwm nasa tak leh rapthlak zet mai chu thawklehkhat'an a rawn reh ta duk mai a, a reh dan lah chu a reh chiang êm êm mai leh nghal a, chu Ngawpui chhung zau takah chuan thli reng reng pawh a thaw lo emaw tih tur hi a ni a, chungte hlei hlei chuan Kaphleia kalpuite ngaih a ti țhalo tulh tulh emaw tih mai tur chuan an bul vel chu an melhkual hruk hruk hlawm a, Val upa Satliana leh a țhiante pathum pawh engtik laiin nge Kaphleiate kiang an rawn thlen tihpawh hriat loh in, Kaphleiate kiangah chuan an lo ding ve reng tawh mai hi a ni a, thâwm han reh leh tak daih avang chuan Val upa Satliana chu inthiamlo hmel tak leh a hruaitu berin chutia a naute pawh thlamuan zo lo a han ni chu a zak hnuhnawh leh hle a ni tih a hmel ațang chuan a hriat theih a, mahse khatiang taka thâwm rapthlak leh âw țihbâiawm kha la tawng ngai bik heklo le, tu han dem viau theih va ni bik suh._
.
_Chutia an awmdan pawh theihnghilh țhak khawpa an awm chu Kaphleia thilsat rí ah chuan rawn harhchhuak in, thâwm awmna lamah an mit chu anlên rang kher mai, chutah an țhianpa Kaphleia'n a raw sahthluk sa alo tan nghauh nghauh tawh mai chu niin, pui tange pawh tilo chuan an lo thlir tawp mai a, tu mai pawh chu thil thleng chuan a barakhaih hle a ni tih hairual a ni lo. Kaphleia pawh chuan a țhiante awmdan chu a hmuh hmaih lo chiang kher mai! Mahse engmah hrelo ang chuan a awm miah miah a, Val upa Satliana leh midangte chuan an rilru tak chuan Kaphleia huaisen an tiin, ani ang Rawlthar chauh leh nghalin hlau ti hmel pawh a han pu eih lo chu mak an tihna ti zualtu a ni a, Kaphleia chu an ni han tluk phak rual a nilo tih chu pasalțhate leh Kaphleia țhiante chuan an hre chiang hle a, Zopui khaw pasalțha tuaitir kianga hun an hmang thei anni chu an inchhir lo hle nghe nghe a ni. Thâwm ríva hriattur awm ta lo chu Dosangate ho pawh an țhianpa pui tur chuan an rawn che chhuak ve vata, Mahse, an chezia ațang chuan tu mai pawh chu Ngawpui chhunga thil thleng avang chuan an tlangnêl lem lo hle a ni tih erawh ahmuh theih a, zanriak tur an nih an han ngaihtuah ngat phei chuan, chulai hmuna riah chu an chak zek zek fahran lo khawp ang le?_
.
_Chutah, Val upa Satliana chuan thil hriatchhuah a nei ta tlat mai le. Chu an awm mêkna Ngawpui chu a hming a lo hriat țhan tawh êm êm țhin leh mite țih rûk êm em Húailiamkâwn chu a hre chhuak ta zawk mai le. A lungphu chu a sai ta dut dut mai a, chu Ngawpui chhungah chuan damin an chhuak leh thei in a ring lo a ni. Tunah chuan chu Ngawpui chhuahsan tur chuan an tlai lutuk tawh a ni tih pawh a hre chiang bertu a ni a, a mitthla ah chuan a nupui fanaute chu an rawn lang nghal uar uar a, Mahse a nau hruaite hnenah erawh engmah a sawichhuak duh lem lova, kan nih nih kan ni mai talâwng " tiin, bûk tur a naute'n phurlo zet leh ți dêk chunga an sa chu a pui ve ta thuai thuai a
.
_Kaphleia țhiante pawh han titi mai tur a vâng bawk a niang ngawi reng chuan an thiltih lai chu an ti mawp mawpa, "Val upa Satliana chuan a naute hnenah chuan, "Naute u, Rammite chu anpawi kan sawi a nih loh chuan Hringmite chungah engtin mah an che ngailo e a han ti dap dap a, hlauhawm an nih loh thu te chuan a han hnêm ve bawk a, mahse a hnêmtu ber leh an innghahna ni tura an lo beisei țawngkam chu an a thlamuan pui zo tlat lo. Zâm hmelpu ve lo leh an zinga huaisen ber Kaphleia lah chuan a țhiante chu hnêm tange pawh tilo in, bûk kiang vela thingro zan muh tur chu phur tak leh tha tho tak chuan a rawn pawm khawm țun țun a, engmah sawilo chuan a ngawi tlat mai bawk si, Dosangate ho hi chuan Kaphleia chu vawi tamtak an lo zui tawh a avang leh a huaisen zia pawh vawi duailo an lo hmuh țhin avangin an hahdam deuh a, Mahse, Húai ho chanchin chu an pi leh pute ațang an lo hriat ve fo tawh avang chuan a rûk tak chuan an zâm hle a, Chutah le.. Kaphleia chu tui chawi tura kal a han tum rawk a le.. Val upa Satliana pasalțha pakhat tih loh chu an ding ta suau mai a, Kaphleia ai ai chuan tui chawi tura kal chu an chuh-helh emaw tih mai tur an ni a, chu thil chuan Húailiamkâwn Ngawpui chhunga thil thleng chu a hrilhfiah chiang ber áwm e._
.
_Chutah zet chuan Kaphleia pawh a rawn țawngchhuak ve ta! "Țhiante u, eng chu nge in han hlauh chu ni le? Hringmi Pasalțha, Sâ leh râl hmaa zâm ngailo kan ni lawm ni kha? Húai ho vau zâm theih mai mai thinlung kha paih bo rawh u. Ka pu thil minhrilh kha a thleng dik a nih ngat chuan khang Húai ho kha an rawn let leh ngei dawn a, He Ngawpui chhung hi an chenna a ni a, chuti mai chuan an ngawi hlenlo tawp ang. Tun ang mai maia inlo awm a nih vaih chuan damin kan chhuak hauh lo ang le, Mahse rilru huaisen tak leh zâmna tel hauh loa kan lo hmachhawna kan țangrual anih ngat chuan Hringmite hian enge kan tih theih tih kan hriattir thei dawn a sin, tunah hian in nupui, in fapa, in û, in naute, i nu leh i pate venghim tur leh pawisawilote'n hlim taka tual an chai ve theihna turin kan lo penchhuak a ni lawm ni? A lu thing deuh nar nar chung chuan, "Húai ho chu rawn let leh mawlh teh se, an duh chu kei hian ka pe dawn alawm " han tihpah chuann tui awmna lam pan chuan a kal ta daih a._
.
Chutia Húailiamkâwn Ngawpui chhunga Zopui pasalțhate'n hmabâk kô tak leh kan thi ang nge kan dam ang tih rilru pú a an buai mêk lai chuan, Bawmzo Lal in ah ve thung chuan Lal Tinkhara leh a upate chu an lo inhrosa vei tan tân a._

_Duhtawk phawt ang aw.. Kaphleia Story hi ka ziah zawh hun law law ah kan rawn post mai dawn emaw ni ka ti deuh a, Tunlai ka damțhat loh bakah, Mizo țawng ka thiam lo lutuk hian ziah chhunzawm zel pawh ka inthlahrung ve deuh tawh a, a chhiartu in țhahnem ve țhin a ni tih ka hriat in ka lawm hle a, chutih rual erawh chuan ka thuziakte hi han belhchian vak tlak a ni lo tih inhriat ka duh. Lehkhabute chhuah ula mi nuihzat chuti khati tih vela mi rawnti țhin tute ka chhanna che u chu.. Lehkhabu ah chhuah ka tum lo hrim hrim a, chutiang tur khawpin min lo beisei sang suh u.. hei hi ka chhanna che u a ni e, inzir chawpa ziak ka ni a, thurâwn leh a dikzawk inhrilh hi ka haw ve ngailo a nia, in thurâwnte avang hian hma ka sawn zawka ka lawm em em a ni tih min lo hriatsak ka duh a, Mahse thil pakhat inhriat tura ka duh chu, thawnthu kaldan hi chu a ziaktu ngaihdan dan a ni tih min lo hriatsak ve mai mai dawn a nia, Kan pi pute nundan persan lutuk thil erawh tih ka tum lo, a hunlai mil chuan ziah hram hram ka tum ve a nia._

[Ngaia]

HNAMCHAWM PASALȚHA KAPHLEIA

By. Nghaka Chelsea.

EPISODE - 22_

_Episode - 21 Recap: Bawmzo Lal inah ve thung chuan Lal Tinkhara leh a upate chu an lo inhrosa vei tân tân a._
.
_Lal Tinkhara chuan Hrangkai khaw lal Rumliana mi tirh pathum te chu chiang fahràna en dân dânin, “In Lalpa Rumliana chuan dawt chu a sawi êm lo ang chu maw? Kei hi Bawmzo lal Tinkhara ka ni ngai e. Dâwt min hrilh a nih vaih chuan Hrangkai khua chu a ding rei hauh lo ang le" a han ti nghal khùr khúr mai a. Chuveleh Hrangkai khua ațanga lamkal rawn kalte zinga phanchang hmel ber chuan lal Tinkhara chu rawn chhâng thuaiin, "Lalpa, kan thu rawn thlente hi thu dik vek a ni. Kan Upa min Hrilliana fanu-in i fapa pasal tura a duh loh avanga khua chu chhuahsan an ni ngei a ni tih hi a hriatpuitute zinga mi ka ni e" tiin Lal Tinkhara pawisawi hlau tak leh țih dêk chuan a rawn ti a._
.
_Chutah, Lal Tinkhara chuan chu mikhualpa hnenah chuan, "Nau-a, ka fapa makpaa lo hnartute chhungkua chuan Zopui khua maw an pan i tih kha? Lal Tinkhara hmelma lo hûmtu Lal chuan a tih loh tawp tur a ti a ni. Chu khaw lal chuan a thiltih man chu a la hmu mawlh ang. Tlangâupa, ka pasalțhate zuk âu khawm thuai tawh khai" a han tih zawm zat a._
.
_Lal Rumliana mi tirhte chu be chhunzawm leh nghalin, “Ka fapa te chu Zopui khaw lam panin an chhuak ngei a ni tih chu in chiang em?" a han ti vin leh tuar a. Lamkal zinga pakhat chuan aw lâwi deuh țuau leh zawi thâwp sât hian, "Lalpa, Zopui khua tih bak hriat kan nei lo, chutah chuan a unaupa pawh a awm a, Zopui khua chu in zahnih vel an ni tih hi kan hriat leh theih awm chhun chu a ni rih a. An Lal hming tak ngial pawh kan hre lo a ni. I fapate chuan chulai hmun chu an pan ngei dawn thu kan Lalpa hnenah chuan an sawi ngei e" a rawn ti a. Chutih lâi mêk chuan Bawmzo pasalțha râlhrat Tlanzoa leh tlangaûpa chu an rawn inzui lut ve nghal a._
.
_Bawmzo pasalțha dangte pawh an rawn thleng khawm ta țak țak a. Hrangkai khaw lamkalte thusawi bawhzui thuai chu an thu tlukna chu a ni ta! Lalpa Tinkhara hian a fapa Kharchina mizia hi a hre chiang em em a, buaina an tawh ngei chu a ring nghet bur mai a ni. Chu chu Lal Tinkhara Upate leh pasalțhate rin dan chiah pawh a ni a. Tichuan, Lal chapo thinlung chu lailanin a awm leh ta! A pasalțhate theihna chu hre rânin a thu tlukna pawh rapthlak tak a ni a, a țawngka chhuak chuan pawisawi lo thisen luanna tur a kâwk leh ta rân mai. Bawmzo pasalțha zahnih rual zet chu a tûka Zopui khaw lam pan tur chuan an inbuatsaih ta nghal mup mup mai a. Lal Tinkhara hian a fapa leh a pasalțhate chanchin va chian hmasak kher pawh hi țul a ti hran lo va, ani ngaih danah chuan a hmelma lo humtu Lal chu a khua chawpa rûn tur tih hi a thu tlukna a ni tawp mai a ni._
.
_Húailiamkâwn Ngaw pui chhung lamah pawh Val upa Satliana ho chuan an lo buai ve hle a, Kaphleia chu rawlthar chauh la ni mah se, an zingah chuan hruaitu ber chan a chang lo thei ta lo. Val upa Satliana leh pasalțha dangte tan paw'n Kaphleia chu han chung en loh theih ni hek lo le, Kaphleia rawtna ang ang chu an um e a ngai tawh a. Kaphleia chuan a țhiante rilru put hmang a hriat chian êm avang leh Ngaw pui chhung chu han riahna chi ziazâng a ni lo tih hriain, chumi zân lâ lá chuan Ngaw pui chu chhuahsan tur a ti mauh mai si a le. Meichher tur chu Val upa Satliana ho chuan an buatsaih ta nghal mawp mawp a. Ngaw pui chhung chu a thim rûai chu a ni tawh si. Ngaw pui chhuahsan tur chuan zankhua deuh thawa an kal a țul ngei dawn a, an hmaah eng nge lo thleng dawn pawh hriat va ni suh, rei lo teah chuan an inpeih ta thuai a. Ngaw pui țihbaiawm tak chu damin chhuahsan thei tak ang maw le?_
.
_Zopui khua leh a chhehvel khuate'n an lo tlawh serh êm êm leh pasalțhate ngei pawhin tlawh pawh tinah pawh an lo tin ngai tawh loh Ngaw pui chhungah chuan Zopui khaw innghahna la ni mai tur rawltharte leh pasalțhate chu mêichher êng hnuaiah chuan an tum ram panin hmanhmawh takin an chhuak ve ta. Val upa Satliana chuan hma a han hruai a, an theih ang tawka chak chuan Zopui pasalțhate chu an kal mawp mawp mai a ni. Kaphleia chu a hnung dawltu-ah țangin thil eng pawh an chungah lo thleng se, chumi lo hmachhawn mai thei tura inring tak chuan an kal a, tunah chuan khua pawh a thim chiang ta kher mai._
.
_Chu ngaw pui chhung chu lian leh zâu tak ni mah se, thâwm rivâ han hriat éih tur pawh a awm lo va, pasalțhate tan chuan ngaih han tih țhatna chi rual a ni tlat lo. Ngaw pui chhung chu eng tiang taka zau nge a nih lah an hre der mai bawk si lo a. Zanriah ei lo an la ni bawk nen, pum ruak chunga ngaw pui chhuahsan chu thil awl âi tak zawng a ni hauh lo ang.; mahse, an hun tawnin a zir miau si lo a le. Buaina eng mah tawk loa thui fê an kal hnu chuan khuavângte fa chûam leh mi bîk Kaphleia chuan a țhiante hriat ve loh thil a hre ta tlat. Chu a thil hriat chu an piah lawk rûam ațanga lo chhuak niin, chu’ng mite thâwm chu tlai lama anmahni rawn rûm țhaihtute thâwm a ni tih chu hai rual loh chuan a hre ta tlat mai le. Chutah, Kaphleia chu a han ding det a, a beng chu a han chhi deuh vâng vâng a, chutia thil hriat chian tuma khuavângte fa chuam meuhin thâwm a han ngaihthlak chuan thil hriat chu a nei leh ta ngei a._
.
_Zopui pasalțhate leh Kaphleia țhiante erawh chuan eng mah hriat an la nei ve lem lo a, Kaphleia hma chiaha kal Ramzaua erawh chuan an țhianpa Kaphleia'n a zui tawh lo a ni tih a hriat avang chuan ding zui ve nghalin, "|hianpa, eng thil nge ni ta?" tiin Kaphleia lam chu a rawn pan nghal thuai a. Mi dangte paw'n Ramzaua aw an hriat rual chuan ding ve nghalin Kaphleia leh Ramzaua awmna lamah chuan an rawn tlan ve vat a. A hmasa bera kal Val upa Satliana'n Kaphleia te awmna a thleng fel ve chiah tihah chuan Ngaw pui chhung chu thil rim chhe tak leh thâng hûam hûam hian a rawn luah khat chu a ni ber a. Chutah le, Ngaw pui chhung thing ding lian tak tak leh thing dingte pawh Upate'n Chhura rûal rûal tia an lo sawi țhin kîang vêl chu mihring mitmû han tih dawna lian si, ramsa an ni ang han tih dawn lahin chutiang êm êma tam chu thil ni thei a ni bawk si lo, mitmu dum lian zet zet chu an meng tle ang sawr sawr a, an khap ang fuk fuk mai leh nghal. Zan thim hnuaiah chuan chu thil chu Zopui pasalțhate tan chuan han hmuh hmaih chi rual a ni mawlh lo._
.
_Chutah, Val upa Satliana chuan âw rawn thian deuh kharh kharhin, "Khai le! Zopui pasalțhate u, inring rawh u le. Kan Húai tenawm ho chuan an duh an la hmu lo a ni chêk ang maw? Zopui pasalțha, sa leh râl hmaa zâm ngai lo kan ni tih kan hriattir a hun ta a ni lo’m ni? Zanin hian heng ho kuta kan thi ringawt a nih chuan kan hmangaih khua leh tui chu engtikah mah kan venghim thei ngai dawn lo a, a hmabâk chu nang leh keia kutah hian a awm a ni; mahse, Húai tenawmho mai mai hlaua kan khûr a nih chuan Zopui hmabak chu a rapthlak khawp ang" a han tih pah chuan a mêichher ken chu a dah lawk a, silai chêng chu a han kâu deuh rap a._
.
_Kaphleia pawh a awmnaah chuan țan hmun tur a lo rem sauh sauh a, mi dang erawh chu Ngaw pui chhung thil thleng avang chuan an lo zâm chhe hman țhelh tawh hi a ni a; mahse, an kianga pasalțha tuai tir Kaphleia a awm avang leh Val upa thusawi chuan tiharhin Zopui pasalțhate chuan thih leh rûam khatah, dam leh tlang khatah tih rilru pu chuan an hrîamte leh Silai chu an rawn lek chhuak ve bawk a. Húai ho chu engtia lo hmachhawn tur nge tih pawh hre lo leh beih mi an nih leh nih loh pawh ngaihtuah lovin, Silai kah inring tak chuan an awm hmun țheuh ah chuan an awm ta rân a._
.
_Mahse, Zopui pasalțhate beisei angin thil a kal ta tlat lo. Thawklehkhatah chuan Zopui pasalțhate awmna chu nasa tak mai chuan lung țhil chuan an rawn vawm ta chîam mai a le, chu mai chu an la duhtawk lo. Ngaw pui chhung hmun tin mai ațang chuan lung tum lian zet zet chuan an rawn deng ta țhuai țhuai mai a, an meichher lah chu chhem hlumtu an awm a ni tih hriat tak chuan a thi vek mai bawk nen, Zopui pasalțhate tan chetlak ngaihna a awm ta lo. Val upa Satliana ho chuan kan thi ngei dawn a nih hi tiin an lo khur zawih zawih tawh mai a, tunah chuan an kîangah pasalțha tuaitir Kaphleia awm ve a ni tih pawh an hre chang tawh lo a. An thlamuanpui zo tawh hek lo. Chutah Zopui pasalțhate zinga pahnih chu Hûaiho lung tum an dawng fuh nge, eng berin nge lo khawih tih pawh hriat lohin an awmna ațanga hlam sawm vel zetah chuan a lêng dawrh mai a. Mihring mangang na tuar țe râwng ráwng, țanpuitu âu lawm lawm aw chuan a zui nghal bawk a. Chutih rual chuan Ngawpui chhung chu patling thinrim inhrosa kûk kûk leh nui khêk uarh uarh chuan a rawn zui nghal zatin, Ngawpui chhung hmun tin chu mihring vei vak inpêl sûau sûau chuan a khat a ni ber a. Chutah chiah chuan a ni, Hûai hoin an ngam loh Hrîngmite zingah a lo awm ve reng a ni tih an hriat dawn ni._
.
_Zopui pasalțha natuar țe thla váwn váwn âu thâwm pakhat zawk chuan pasal tuaitir Kaphleia beng chu a verh ta zâr mai, chu âw chu Kaphleia tan chuan han hái chi rual a ni mawlh lo, an khaw pasalțha Rumvunga nena buaina an neih țuma a tan țhian rinawm a nih zia tilangtu leh Rumvunga nunna hial pawh lak hrehlo khawpa silai hial rawn chelektu mangang âu aw chu tunge hâi thei ang le._
.
_Mihring natuar țe váwn váwn awmna lamah chuan Kaphleia chu rang mangkheng chuan silai leh a mi lúlâk chem hum chungin thim zingah chuan a phîn thla ve nghal thuai a, Kaphleia dawh theihna pawh a tawpkhâwk a thleng ta tak zet zet ta! Thinrim hachang țhial ràp ráp chung chuan, "țhiante u, lo lungphâng reng reng suh u, chhan tur che'u in ka lo kal e, "Húai tenawm ho, ka țhiante chungah khan kut inthlak leh a nih vaih chuan nuamsa-in in awm bîk hauh lo ang tih ka tiam a che u. Khatia mi dawihzep anga biru reng lo khan min han hmachhawn ta che u. Keimah Hnamchawm tlangvâl Kaphleia, sa leh râl hmaa zâm ngailo ka nih hi " a han ti ve ta khàwl khàwl mai a._
.
_Mahse, heng Húai ho hi chuti mai a váu zâm mai mai chi an ni bik hauh lo. Hringmite hi khuanu'n a bîka a siam leh vohbîk chu an ni na meuh mai, Húai ho ngei pawh hian chu thil chu an hre chiang hle a, pasalțha huaisen leh khuavângte duhsakna dawng pha chin ngat phei chu an hre chiang leh zualin, zah pawh an zah hle nghe nghe a. Húai ho-in Kaphleia âw an han hriat khan mi dawihzep âw a ni lo tihpawh an hre chiang êm êm a ni. Mahse, an lo induhtawk vena leh ngawpui chhung neitu an nihna avang chuan chuti mai a han tlâwm erawh an tum báu lo thung. Chutah le, a hma aía nasa zawk leh rapthlak zawk chuan an rawn che leh ta!_
.
_Ngawpui chhung hmuntin mai chu patling aw thûm rapthlak tak tak thinrim inhrosa chuan a khâwk rùm rúm a, Ngaw chhung chu a nghín hian a nghing dùr dúr emaw tih mai tur hian a awm a, Zopui pasalțha pahnihte lah chu Kaphleia dinna thlang lawkah chuan țanpuitu an lo âu véi rûai rûai mai bawk nen, chung mite țanpui tur chuan mihuaisen tan lo chuan tum ve ngawt chi a ni mawlh lo. Mahse, chung thâwm rapthlak tak takte chuan Kaphleia ah chuan awmzia reng reng annei lova, hlauh a hnêkin Kaphleia chu a thinrim êm êm zawk a ni. Chutah, ngawpui thim chhah tak hnuaiah chuan thâwm engmah hre lo ang maiin a țhiante puih ngai awmna lam chu a pan nghal thuai a._
.
_Val upa Satliana leh midangte lah chu hlauh luat avangin an lo khur hlawk hlawk a, Kaphleia huaisen zia an hmuh chuan mak an tih a zualin, țhiante chhan nan chuan hlauh chu sawi loh, a nunna hial pawh a hlan phal ang tih tur a ni si a. Hetiang tak hian a ni maw Kaphleia hi a lo huaisen le? " tiin an lo ngaihtuah ràuh ráuh a. Húai ho lah chu an kîang vêlah chuan an lo inhrosa nasa tawh mai a, eng harsatna nge an rawn thlen leh dawn tih pawh hriat va ni suh._

Zanin chu a thui viau lo, Mizo țawng hi a dik thei ang bera hman ka duh avang hian ka ziah tawh ho ka edit țha nasa a, a thui thei tawh dawn lo a nih ber chu, regular deuh a tih erawh ka tum thung. Fuihna leh thurawn ka pawm vek a nia, sel ngai a awm paw'n sel miah miah mai tur.

[Ngaia]

HNAMCHAWM PASALȚHA KAPHLEIA

By. Nghaka Chelsea.

EPISODE - 23

Episode - 22 Recap : Húai ho lah chu an kîang vêlah chuan an lo inhrosa nasa tawh mai a, eng harsatna nge an rawn thlen leh dawn tih pawh hriat va ni suh.
.
Húai ho-in nasa taka an rikrâp chung pawhin, Kaphleia erawh a buai phah éih lo thung a, chu chu Húai lalpa'n a hmuh chuan a thinrim chu a rim êm êm tawh mai a, a inhrosa nasa tawh kher mai. Kaphleia chu engtin emaw taka hneh ngei chu an tum nghet bur mai a ni. Chutah, val upa Satlianate chuan lung hmanga beihna namên lo chu antawk leh ta! Tunah zet chuan an hruaitupa Satliana leh mi țhenkhatte chu an zâmin, a khur hluk hluk tawh a. Kaphleia'n an țhiante pahnih pui tura a kal chu puih tum ve a hnêkin, an mahni pui turin Kaphleia chu an âu ta chûl mai zawk a.
.
Chutia an buai lái mêk chuan Dosanga chu a rawn țe tuárh tuárh ta mai a le, min pui r'u.. min pui r'u, a na lutuk.. a na lutuk, min tih hlum antum a nia" tiin thei leh theilo chuan a rawn âu țâwk țâwk a, âw chu Kaphleiate awmna ruam rawn sawhtu tlang lamah chuan a phei zel a, Kaphleia chuan, "țhianpa, lo țang fàn fán rawh aw, ka rawn zawng hmu ngei ang che " tiin a âu zui làwm láwm a, húai ho chuan a duhlo chung an hnûk lui ngei a ni tih chu Dosanga aw ațang chuan a hriat theih a ni.
.
Kaphleia hian hetih lai hian pasalțha pakhat zawk, húai ho-in kut an thlak ve tho awmna chu a zuk thleng tawh a, ngawpui thimchhah tak hnuaiah chuan chetvêl pawh a awlâi lo hle a, Mahse, khuavãngte fachûam tan erawh han buai lutukna tur erawh a tling lem lo a ni. Pasalțha pakhat chu a lo bawihsawm mêk lai a ni nghe nghe a, Mahse chutia beisei loh thil a țhiante chunga a han thleng leh chuan Kaphleia thinrim ati zualin, a so bulh bulh hi a ni bera, a țhianpa a ngaihtuah êm êm rualin, a țhiante dang han thlah thlam chu thiltih chi niin a hre bawk si lo. A taksa chu thlan chuan a bual khat zèih zúih tawh mai a, a rilru hah leh buai nak alai chuan húai ho lah chu a kíang vêlah chuan an lo véi chhên mai bawk nen. Kaphleia rilru pawh a buai ve ta máp mai le.
.
Chutah le, Kaphleia beng bulah tak chuan patling aw lian zet mai, aw râwl ring êm êm, hetiang khawpa aw rapthlak leh ring hi Kaphleia beng leh a thiante hian an la hre kher lo ang tih tur chu a rawn inhrosa véi tùn tún a. Kaphleia tan ngat phei chuan a thaw rimchhe tak leh a aw râwl ring tak chu a kumkhaw hrilhfâk a tling ta ve ang tih tur a ni a, chuthil avang chuan Kaphleia chu a buai chhe therte lova, inthamlohna lian takah ngaiin, a huat ber thil a ni ta tlat, rang lutuka a silai chéng chu han káu nghal rápin, a silai chu a han hmetpuak nghal țhuai mai a, chuveleh patling na tuar țe váwn váwn leh chîau vâwng vâwng ri chuan ngawpui chhung chu a khat nghal a, thinrim inhrosa-a âng bùan búan ri chuan a zui nghal bawk a.
.
Chutah, Kaphleia chu ring taka rawn âu chhuakin, "khai le, Zopui pasalțhate u, húai tenawm ho hlauh avangin khur mah ta che u, Zopui pasalțha kan ni lawm ni kha? In țhianpa húai ho kutah a awm mêk a ni tih hria ula, i puihna nghakin a awm mêk a ni. Húai ho chu i han hmachhawn tak tak ang u hmiang, " tiin a rawn âu țeng chhùai chhúai tawh mai a, Kaphleia chu a aw ațang ringawt pawh chuan a thinrim hle a ni tih a țhiante pawh chuan an hre chiang hle a ni.
.
Chuveleh ngawpui chhung thing dingte chu kihthlûk ri ang mai chuan a ri rùah rúah a, thingzarte chu auh ri tuarh tuarhin, thli lah chu nasa mangkheng chuan a rawn thaw vûk vûk mai bawk a, Mahse, Zopui pasalțhate chu chung thâwm bengchheng leh rapthlak tak takte chuan harsatna lutuk a siam ta lo! Kaphleia thusawi chuan an thinlungah bû a khuar hman tlat tawh, Zopui pasalțhate silai chu a rawn puak ve ta țhuai țhuai mai le, val upa Satliana âw ngei chuan, "khai aw, Zopui pasalțha sa leh râl hmaa zâm ngailo kan nih kha, i han che tak tak ang hmiang. Thih leh ruam khatah, dam leh tlang khatah kan ti a ni lawmni kha?" a rawn ti ve ta lauh lauh mai le.
.
Ngawpui thimchhah tak hnuaia Zopui pasalțhate pawisak nei tawh lo inhrosa thâwm zet zawng a na ngîang mai! Lasi ho pawhin-a an ngam loh húai ho chu Zopui pasalțha lakah chuan an tawlh ta dùl dúl mai a, ngawpui chhung thâwm maksak leh rapthlak tak tak chu thawklehkhatah maktak mai chuan reh nghal dúk a, Lawmsanga leh Ramzaua chuan mêichher chhi kâi nghal thuaiin, patling na tuar rum kâwk kâwk awmna lam pan chuan an tlan thla vat a. Val upa Satlianate ho pawh chuan mêi chu an depkâi zui ve nghal bawk a.
.
Khati khawpa thâwm rapthlak a han reh ta daih chu mak an tiin, húai ho lak ațanga nung dama an chhuak thei chu awih harsa an ti hle nghe nghe a, an kíanga awm ve pasalțha tuaitir Kaphleia avang chauha dam khawchhuak thei anni tih an hre chiang hle a, khatiang êm êm a mihring huaisen kha an la hmu ngailo a ni. Tichuan anni ho pawh chu Kaphleiate awmna lamah chuan an chhuk ve nghal thuai a. Khati khawpa beih leh vàwm tawk si kha, ngawpui chhungah chuan lung an mahni han vawmna âwm hnúhma hmuh tur reng reng a awm lova, mak tihna hlir chuan an khat a ni ber a, an thinlunga zawhna chhiarsenloh inzawt chung leh, beih antawk leh mai ang tih hlauhthawnna avanga fimkhur tak leh leh ți dêk chuan an kal țhêm țhêm hlawm a.
.
Val upa Satlianate'n Kaphleiate awmna hmun an zuk thlen ve meuh chuan an țhianpa chu nikhawhreloin a lo awm tawh a, a lo thaw chè ché tawh mai a, Lawmsanga leh Ramzaua chuan tih harh tumin theihtawp chhuahin an lo buaipui a, Kaphleia erawh a lo awm tawh lo thung. Mahse, Kaphleia chu khawiah nge a awm a, engnge a tih erawh zawh buai ngai lo chuan an hrethiam nghal vek a ni.
.
Zopui pasalțha nikhawhreloa awm chu mêichher êng hnuaiah chuan mutin, hliam hnúhma a awm leh awm loh hre turin an han belchiang nghal vat vat a, mahse hliam erawh han hmuh mai tur a awm lem lo. Hmun rem lamah chuan zâwn chhoin, an buai màm màm kher mai le, Kaphleia chhuak ta chu an ngaihtuah hle a, mêichher nen a rang a rang-a Lal fapa Dosanga aw lo chhuahna ruam lama tlanchhuak leh nghal kha a ni a, Dosanga lah chu a thâwm hriat tur pawh awmlo chuan a reh vûng vûng mai bawk si.
.
A bik takin Lawmsanga leh Ramzaua chuan an țhiante pahnih chu an ngaihtuah hle a, damin an rawn kir leh lo ang tih mawlh mai chu an hlau a ni. Val upa Satliana leh midangte ngaihdan chiah pawh a lo ni a, Kaphleia lah chu han auh phak rual a ni tawh silo.
.
Thâwm hriat tur awm ta lo chuan an thlâ a ti muang deuh a, chet kháwr lutuk awm lovin a țul țul chu an ti ho màwp máwp a, chulâi hmun ațanga Kaphleiate lo let leh hun pawh lo nghah mai ni se " tih chu val upa Satliana'n țha a a hriat avang leh, midang ho ngaihdan a lo nih ve tho avang chuan mêipui chu an chhep ta hluah mai a, țhenkhat'in damlo an lo buaipui ve bawk a.
.
Chutih mêk lai, zanlai ar a khuang àl ál tawh tih ah chuan, Hrangkai khaw lal Rumliana in-ah chuan an lo buai ve hle a, Lal Rumliana hian a upa kalchhuak ta Hrillianate chhungkua chu a theihnghilh ngai lova, a dikna chanvô a hmuh let leh theihna turin nasa takin a lo bei let ngar ngar zawk a ni. Lal Rumliana hian Zopui khua hi khual thuthang ațangin a lo hre ve fô tawh țhin a, a upamin kal chhuakta te khan a unaupate khua Zopui a pan ngei dawn a ni tih chu a lo hmu lâwk khiau a, a duhthusam thil chu a thleng ta ngei reng a ni. Lal Tinkhara rorelna chu țhiaha a awm theih nan engkim ruahmanna siamin, Lal Tinkhara hnena lamkal tirta vat a.
.
Lamkal tura a mi tirhte hnenah ngei pawh khan sawi tura a duh bak engmah a hrilh duh lo a ni. Hrangkai khua hian an upamin ngainat ber leh, pachhia leh hmeithaite hmangaiha tuam hlawm țhintu harsatna tawh chu ngawih bopui mai mai an tum lo nasa mai le, he mi avanga tun hun thleng thleng a lo la buai hi an ni rêng a ni.
.
Bawmzo lal Tinkhara rorel dan chu an lo kham tawh ngâng mai hi a ni a, mahse Lal Tinkhara thu an zawm a ngai țhin si. In za nufa tan chauh chuan Lal Tinkhara khua, in zali vel zet khua chu han do phak rual a ni mawlh silo. Lal Rumliana hian Zopui khua chu khaw in lungrual tak an ni tih a hriat avang leh in zahnih vel zet anni tih chu hre rânin, tun țum tluka hun remchang hi awm theiin a hre lo a ni. Chuvanga Lal Tinkhara fapa leh a pasalțhate kalchhuak ta pawh zui ruk tir kha a ni a, Lal fapa Kharchinate rawn let tur an awm tak lo-ah chuan, Lal Rumliana chuan heti zawng hian hma a lo la nghal ta vat mai a ni. Lal Rumliana thil hriat leh pakhat chu, Zopui khaw rûn tumtu lal pakhat mah hlawhtling an la awm lo a ni tih hi.
.
Tichuan Lal Rumliana chuan a khaw tlangval sawm sarih vel zet chu Zopui khaw pan ve nghal thei tura lo inpeih tur chuan a ti ta a, Lal Tinkhara pasalțhate chuan Zopui khua chu an pan ngeia a rin vang a ni. A lamkal tirhte thu pawh nghak buangbar loin, Lal Tinkhara pasalțhate'n a khua chu an rawn kalpah ngei dawn tih hre rânin, Lal Tinkhara pasalțhate'n a khua an chhuahsan ruala a khaw tlangvalte chu pumpelh kawng lama Zopui khaw pan nghal vat tur chuan a han ti a. Harsatna an tawh dawn leh dawn loh pawh a ngaihtuah hek lo. A duh ber chu dikna in rorêl sela, mitin hi zalên tak leh hlim takin an awm se tih hi a ni. Lal Rumliana hian Bawmzo khua-a lamkal a tirh rual hian, Zopui khaw lamah pawh mi a lo va tir ve bawk a.
.
Zopui khua zîng ni chhuak chu a țáng nghal deuh át mai a, Kaphleia nu Ngursangi chu a fapate'n in an chhuahsan tuk ațang chuan a damlo chiam mai a, zanah lah mumâng mak tak tak mai neiin, khawsik sâng tak a neih avangin a mu tui laite chu rawn âu leh vak vak mai țhin a, țhenawm khawvengte paw'n an khua leh tui chhana, a nunna hial pawh a khua leh tui tana hlan hreh lotu, Kaphleia nu damlohna chu hriain, an rawn lut khawm deuh țak țak reng a, zan mén a ngaih țhin avangin nula tlangvalte chu in mén chhâwk a ngai hial țhin a, mahse tumah phunnawi leh hreh hmelpu an awm lova, a khua leh tui hmangaih avanga a nu damlo pawh enkawl hman lo Kaphleia ai chu an lo awh vek mai a ni.
.
Chutia Kaphleia nu a dam theih tak loh avang chuan Pu Hrangthangate nupa chuan an fanu tan chuan inthawina hlan ngei țhain an hria a, Bawlpû pawh chuan Kaphleia nu tinatu chu tui-huai a nih loh paw'n, ramhuai ni ngei chuan a ring a, chutiang a nih avang chuan a pahniha inthawina hlan mai chu Bawlpû chuan ti thluin, arnu leh arpa hmang chuan inthawina chu puithiam chuan chumi ni là lá chuan a hlan ta nghal a. Mahse, Ngursangi ah chuan danglamna êm êm erawh a thlen lem lo.
.
Ngursangi damlohna chuan Lalpa Dokulha pawh a awm hle hle tir thei bik lova, a fapa țhianpa nu a nih chu thu khat, a khaw pasalțha chhuanvawr ni țan chho mêk Kaphleia nu a ni tlat a ni. Lalpa Dokulha pawh a lal in chhuahsanin Pu Hrangthangate in ah chuan a khât tawk chuan a lut deuh reng mai a ni. Hmelțhatna zawng zawng neitu ni mai âwm a mawi leh, khuanu duhsakna dawngtu Siamliani pawh zah a sawi hleithei bik lo. A nun chhansak-a, a chhungkua nunna petu pasalțha tana a tih theih tawk tihsak ve tumin, a û Thanpuii nen chuan a țul țul ti turin Kaphleiate in lamah chuan an lo tâp ve châwt mai a.
.
Zopui khua hian an hma lawkah engtiang taka buaina nasa nge an tawh dawn tih an hre lo a, tuna hlim taka nui bàwk báwk mi țhenkhatte hi chuan khawvel êng an hmu leh tawh ngai dawn lo a ni tih lah an hre hek lo. Leido nei an nih avangin râlveng chu an dah ve a, Mahse, an hmachhawn turte hi an lo dang thei ngei ang tih erawh hriat a ni lo.

[Ngaia]

Episode 24
Bawmzo pasalțha zahnih rúal zet chuan Zopui khua chu an rawn pan mêk si a le. Val upa Satlianate ho pawh an buai tak zet tawh a, an țhian damlo lah chu a chau tial tial emaw tih mai tur a ni a, fehrehsan hun vel a ni tawh ang tih ah chuan Kaphleiate zawng tura chhuakte chu an rawn beidawng haw bawk nen, Kaphleia chuan Dosanga chu a hmu zo ta lo a nih chu an ringa, mahse, chu thil chu lo ni pawh ni se, engvanga tun chèn chén Kaphleia chu rawn la let lo nge ni ang? " tih chu an buaina ber chu a ni..
Kaphleia chu an han au vei ngîal țhin a. A chhanna an hmuh awm chhun chu sava chiar nak nak leh dawlrem hram ràl rál bak ri hriattur a awm lova, damlo lah chu a khat tawkin a rawn phunchhuak nìap níap a, a châng leh rei tak tak chu thaw chhuak hleithei loin a awm bawk țhin a, val upa Satliana tan pawh hma han lak mai dan tur pawh thil har ve tak tur chu a ni. Mahse, chutia han awm reng thei anni si lova, damlo chu enkawlna pek vat a nih loh chuan, thih hmabâk a ni tih a chiang si a, thu tlukna harsa tak chu siam a ngai ta!.
Kaphleiate chu ngaihtuah hle mah se, an dinhmunin a zir miau silo a le, an awmna hmun ațang ni khat leh chawhma vel kalah chuan Ngurthanglura khua "Darzo" chu awmin, chu lal hnena țanpuina va dil mai chu țhain an hria a, Ramzaua leh Lawmsanga chuan an țhiante telloa han kal chu an hreh hle a, mahse damlo chu a zual zel bawk si, mihringah an in chán zo lo ang tih an hlau bawk nen,Tichuan le damlo zâwnna tur hlâng chu an siam ta mawp mawp a, khawngaih an va dilna-ah chuan an hlawhtling ngei ang ngem tih pawh hriat va ni suh. Darzo khaw lalpa'n a lo khawngaih thei hlauh a nih chuan, damlo chu hnutchhiah rih a, mi pahnih chuan Hrangkai khaw lal hnena an thu kén thlen tur chuan an ti bawk a, a bak midang pangate chu Kaphleiate zawng tura a rang thei ang bera let leh tur chuan an ti ta a..
Zopui khaw Lalpa leh a upate'n an hlauh thâwn ang êm êm in thil a kal dawn si lova le, Hrangkai khaw lalpa Rumliana ruahmanna hre ngat sela chuan hetiang buaina zawng zawng hi antawk lo tur. Lal Rumliana hi mi â lo tak niin, a khua leh tuite hmangaih thiam êm êm mai a ni a, Lal Tinkhara mizia hre chiang bertute zinga mi a ni nghe nghe a, Lal Tinkhara rilru tur âwm ang hi chu a lo hre lawksa vek a ni..
Lal Rumliana hian duh sela'ng chuan a upamin Hrillianate khan a khua an chhuahsan hma khan Lal Tinkhara kutah a mite sa him nan a pe thei reng a ni. Mahse, a upaminte chhungkua pawisawilo tuar tir chu a tum báu lo a, Lal Rumliana hian tum a neih ruk tlat avangin venthâwn thilah " tiin engmah a sawi duh lo mai zawk a ni. Lal Tinkhara hian Siamlianite chhungkua chu a tlanchhuah tirah a puh ang tih chu Lal Rumliana thil hlauh ber a ni a, pawisak neilo Lal Tinkhara chuan a khua chu a hâl duh leh maia a rin vanga hma lo lak khalh ta vak mai a ni. Zopui khua-a a lamkal tirhte chu hlawhtling ngeiin a ring a, a chhan pawh a upamin a rin êm êm te chhugkua an awm ve vang a ni..
Zopui pasalțhate pawh kawng lakah zankhat riakin, a tuk lenglên ar khùan hun velah chuan Darzo khua chu an lut ve thei ta hram a, Darzo Lalpa Ngurthanglura leh a upate'n Zopui pasalțhate harsatna tawh dan an han hriat chuan an ká háu hlawm a, a chhan chu huailiamkawn ngawpui chhunga thil thleng mak tak an hriat leh vang a ni. Huailiamkawn chanchin chu nula tlangval thlenga an lo hriat a ni a, mahse Darzo khua an kâi hnu hi chuan he ngawpui hian chanchin a neih belh zui an hre tawh lo..
Lalpa Ngurthanglura chu lal ngilnei tak mai a ni a, damlo chuan enkawlna a hmuh thuai a ngai a ni tih hriain, Bawlpû chu a kohtir ta thuai a, Bawlpû pawh chu rawn thleng chhawm nghalin, damlo chu a buaipui ta nghal vat a, val upa Satlianate pawh chuan harsatna an tawh dan kimchang deuh zawk chu sawiin, an țhiante pahnihte ngawpui chhunga an hlauh tak dante chu an hrilh ta vek a. An kal chhan tak erawh sawi lan a rem loh avangin an sawichhuak duh ta lova..
Darzo khua hi khaw lian lo tak a nih ve avang hian râl lakah pawh hian an fimkhur țhin ve hle a, Mahse, mikhualte harsatna tawh dan leh damlo an han hmuh ațang chuan, Lalpa Ngurthanglura chuan dâwt an sawilo a ni tih a hre thei a, a mikhualte chu an ril a țam tawh hle dawn a ni tih hriain, eitur chu a upate ho in ațang chuan an han kháwn dìat díat a, chawhmeh awm ang angte nen chuan zanriah chu an kil ta hlawm a..
Chutih lai chuan Darzo khaw lal leh a upate chu loin be râwnin, huailiamkawn chanchin chuan an beng a verh hle a, eng ti tiha mite tlawhserh leh tlawhpawh duh lohna hmuna rawn kal mai nge an nih?" tih chu an thil hriat duh a ni a, an mikhualte chu la zawh leh ngei chu an tum a. Val upa Satliana khan thil zawng zawng sawi duh loh chhan a lo nei ve bawk a, Darzo khua leh Bawmzo khua hi khaw inhlat an ni lova, Darzo khua hian Bawmzo lal hi râl laka an him theih nan, remna an lo siam reng thei tih a vênthâwn vanga sawi duh ta lo kha a ni..
Kaphleia țhiante pahnih, Lawmsanga leh Ramzaua chu an țhiante an ngaihtuah avangin, chaw kawpuar paw'n an ei hleithei meuh lo a, an țhiante ringawt chuan an rilru a luah tawh a, tunah phei buaina an tawh ațang a zan thumna tur a ni tawh leh nghal, an rilru chu a hmanhmawh tawh tak zet zet a, mahse an duh angin thil a kal ngawt thei silo. Zanriahte an han eikham chuan ti ti na hun chu lal leh upate nen chuan an nei leh a, lal leh upate han ti ti vêl ațang chuan Lal Tinkhara khua nen chuan an inhnim hnai lem lo a ni tih an hre thei ta a, val upa Satlianate pawh an hah a dam ta hûai a..
Lalpa Ngurthanglura hian Zopui khaw chanchin leh an Lalpa Dokulha hming chu a lo hre ve fo tawh țhin a. Lal fel tak a ni tih chu a hriatdan pawh a ni. Damlo chu Bawlpû leh Lawmsangate țhian dûn chuan an lo buaipui ve ngàr ngár bawk a, tlem chuan hma a rawn sâwn hret hret ni chuan a lang a, chutia eng eng emaw sawia tawkfang an tì tí hnu chuan, lenghnar ar a lo khùan ta thlìai thlíai a, upate paw'n ținzái an relsan ve ta nge nge a, Lalpa Ngurthanglura chuan a mikhualte chungah chuan țhat a lo chhuah hle a, zawlbuk pan buai lo mai tur leh a in a riak ve mai tur chuan a ti nghal bawk a, an duh chèn chén an chám chu phalsakin, damlo pawh an țhiante zawng tura an vaia an kal duh a nih phawt chuan, theih tawp chhuaha lo enkawl-sak chu a tiam bawk a, mahse chu erawh in thu thu a ni e " a han ti dam dap a..
Zopui pasalțhate hnenah chuan huailiamkawn lama let tawh loh mai chu țha-a a hriat thute chu hrilhin, an țhiante pawh nung dama an hmuh a beisei tawh loh thu a hrilh bawk a. Mahse an kallui duh a nih tlat chuan engmah buaina a awm loh thu chu sawiin, ka khua leh tui ațang erawh tuman an han zui thei che u an awm dawn lo a ni, " tiin inthiamlo hmel tak chuan a han ti chuai raih a..
Val upa Satliana leh a țhiante chuan, Ê, Lalpa, hei bak bak i lakah hian enge kan han beisei teh lul ang ni?" Lal ngilnei tak i ni e, i mi puihna zawng zawng zawng hian kan lawm tawh tak zet a ni. I ngilneihna avang hian engtikah mah kan theihnghilh tawh ngai dawn lo che a, Kan țhiante chu an thi emaw an dam emaw zawng turin kan kal ngei a țul dawn a, Kan rawn kir ta lo a nih paw'n i thiam loh a ni lo e, Mahse kan lo kir ta lo a nih chuan, kan chanchin hi kan Lalpa hnenah khawngaihin min lo thlensak hram dawn a nia " tiin kal ngei an tum thu chu Lalpa Ngurthanglura hnenah chuan an hrilh a..
Lalpa pawh a han ngawi vâng vâng a, a lu chu han bu deuh nghát nghát bawk a, "Pu te u, Zopui khaw lal chu a vannei teh e maw, nangni ang mi huaisen chu in mite chuan an thlamuan pui hle dawn che'u a nih hi, pasalțha dik tak chu in ni ngei mai, in duh ang ngei chuan in kal mawlh a ni ang chu, In țhianpa hi chu rawn ngaihtuah reng reng suh u, In va kalna ah chuan khuanu'n vengin hualhmin che'u sela, in țhiante nen chuan dam takin in rawn kir leh dawn nia " a han ti a..
Val upa Satliana chuan, "Lalpa, i duhsakna avangin kan lawm e, Mahse, i sawi ang a mi huaisen erawh tumah kan awmlo a ni. A khua leh tui hmangaiha, a țhiante tana a nun hial pawh hlan duhtu chu huailiamkawn ngawpui chhungah kan puihna nghakin a awm mêk a sin! Amah avang chauh a inhnen pawh hi rawn thleng thei kan ni a, tunah hian ani chuan kan thlah thlam ngai dawn lo a ni. " tiin a lo chhâng thuai a..
Lal Ngurthanglura chuan val upa Satliana thusawi chu ngaihtuah chhunzawmin, chutiang taka pasalțha huaisen leh țhiante tana inpe zo chu hmuh ve a chak hle a, mahse engmah chu a sawi chhunzawm ta lem lova. Zopui pasalțhate chu a tuk khawvar ruala huailiamkawn ngawpui lam pan tura inbuatsaih in, Lalpa Ngurthanglura hnenah chuan an lawmzia thu chu sawi leh mawlh mawlhin, mut zai an rel ve ta a..
Lalpa Ngurthanglura hian huailiamkawna bo mêk zinga pakhat zawk, a țhiante leh a khua leh tui tana inpe zo tak pasalțha chu, a farnu neih chhun leh a hmangaih êm êm Ngursangi fapa a ni tih han hre ngat sela chuan, a zawng tur hian a khaw náwta thawh chhuah hial pawh duh ngei ang le. Mahse, kha a farnu khawngaih thlak kha chu he khawvelah hian a awm ve paw'n a ring tawh lo a ni a, a khua leh tuite nunna thâp tur êm chuan huailiamkawna awm mêkte hi a hre chianglo êm a tin a ni..
Huailiamkawn ngawpui thim chhah zet leh khaw vawt tak chuan, Kaphleiate țhian dun pawh zahngaihna tel máp lo chuan a rawn tuam leh mép mêp tawh a. Kaphleia pawh a țhianpa han paw turin tha a nei meuh tawh lo a, Chaw kawpuar eitur hmu lo na nâ na chu a chau ve tawh hle mai a, a țhianpa damlo dim ngai paw chung chuan kal sâwt a har hle a, chu achhapah ankawng zawh chu a dik em, "tih hriat a ni bawk silo..
Kaphleia chu a mangang ru hle a, mahse a țhianpa erawh engmah a hrilh duh loa, pûk chhetê ah chuan innghatin, Kaphleia chuan mêi chu a han vûr belh sauh sauh a, Dosanga pawh zia-awm lam a pan ve hret hreta, mahse, hma erawh a sâwn chaklo hle thung a, Dosanga hian buaina an tawh țantirh bak kha engmah hriat mumal a nei tawh lo a, Mahse, buaina antawh țan dan erawh a la hre chiang hle a, an țhiante dang chanchin chu hriat chak hle mah se, țawng a la harsat avang chuan hriat chu a tum buai duh ta lo a, a kianga awm a țhianpa a hmuh chuan a thla a muang êm êm mai a ni.
Kaphleia chuan a țhiante chu a ngaihtuah hle a, an thi nge an dam tih pawh a hre zui ta lo kha a ni a, Lo la dam nita hlawm se engvanga an ni chu rawn zawng lo nge an nih ang? Nge an țhiante chuan Hrangkai khaw lam an pan zawk? Mahse, damlo kha engtin nge ni ta zel ang le, "tiin a ngaihtuah neuh neuh reng a..
An kawng zawh lai lah chuan khawi hmun nge a thlendawn tih lah a hre der mai silo. Buaina an tawh zan khan engtiang chiaha thui nge a kal tih chu a han ngaihtuah ngial a, mahse a hre thei tawh tlat lo. A tukah khan ni leng deuh tháwin ngawpui chhungah a țhianpa zawng khan a vak kual leh kha a ni a, Dosanga a hmuhna pûk ațang khan pan lam tur ber hre lo khan a an in pu chhuak ta kha a ni a.