HNAMCHAWM PASALȚHA KAPHLEIA BY Nghaka Chelsea (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

HNAMCHAWM PASALȚHA KAPHLEIA BY Nghaka Chelsea (Completed)

Unread post by Ngaia » July 10th, 2017, 9:06 pm

HNAMCHAWM PASALȚHA KAPHLEIA.jpg
HNAMCHAWM PASALȚHA KAPHLEIA.jpg (47.08 KiB) Viewed 30685 times
HNAMCHAWM PASALȚHA KAPHLEIA

EPISODE - 1

Lal Ngurliana khua, Bûkpui hi khawlian tak niin, in pawh zathum vel ni a inchhal ngat an ni ve a, Lalpa Ngurliana hi Sailo lal niin, Lal rorel thiam tak mai ani a, chuvangte pawh chu ani mahna ankhaw țhenawm ațang chuan "Bûkpui" khua ah chuan pêm lut tawk hi an awm deuh reng mai nghe nghe a. Lal Ngurliana hi Lal ropui tak anih chu thu khat, a larna ti belhchhahtu ber mai leh ankhaw țhenawmte pawhin a an sawi huai huai mai chu, Lal fanu Ngursangi hmelțhat zia mawlh mai chu mitin hrilhfak atlingin, Khaw țhenawmte leh khawtual lam a zawlbûk ah techuan tlangvalte leh pa titi thiamte chuan, Lal fanu Ngursangi chu khumpui kaipui an chak thu mawlh maite chu an lo seprawtui nasa mai țhin a. Amit meng pâw râm mai leh aheh sen vâm chek mai, ahan nuih zawnga, abiang leh lam leh lama biangsum mawitak mai lo lang te, a awm bawr pauh lah mai leh amal mul nalh em em maite chu, mipa kei kani in ti tawh chin tan chuan han hnar phal chi zia zang ni heklo le? Lal fanu "Ngursangi' han hmu tawh hi chu, ahmei apa hian an thlir zui vawng vawng mai țhin reng ani.

.
Lalpa Ngurliana pawh hian a fanu chu achhuang'in a țhenawm Lalte bulah pawh hian, ahmai hi a uan phah ve hle țhin reng a, Mahse, chu a fanu achhuan em em leh alo uan pui ve em em mai chuan, tu fa nge tih pawh hriat loh chu a pai ta tlat maile, Lal Ngurliana chuan chutia a fanu achhuan em em leh hmelțha tawpthang ti a an lo sawi huai huai mai a râi ani tih ahan hriat meuh chuan," athinrim chu apuak keh lo chauh chu ani mai a, mipuite pawh chuan an lal fanu pum a naute awm chu, tu fa nge ni ta ang le? tiin akhaw mipuite chu Lal fanu Ngursangi fa paina pâ hriatchak chuan zawlbûk ah leh khaw lai titi ber chu ani ta mai a, Lal Ngurliana chuan afanu naupaina hriat ngei tum chuan afanu hnenah chuan," "Mami, hetia i fa paina pa ber pawh keini i nu leh pate hian kan hriat loh techuan thildik ani ngai lo e, tupawh chu lo nise, i hmangaih anih phawt chuan i duh tak chu i nei em em ang tiin," a fanu fa paina hriat ngei tum chuan, Aw dam thluam mai chuan ahan ti a, Lalnu Rosangpuii pawh chuan, "Mami, engmah hlauh thawn tur a awm hleinem, "hei, i pa pawn țha deuh a atih lai che hian" tunge i fa paina pa chu han ni reng reng le? chu ahan ti ve bawk a. Lal fanu Ngursangi chuan a pa hmaisen tawn ahlauh em avanga sawi ngamlo kha ani a, mahse, chutia a nu leh pa kâ ațanga ankanêm dîai mai ahan dawn takah chuan a fa paina chu a nu leh pa bulah chuan hreh tak chung leh nakin lawka ala lan chhuah dawn tho avang chuan ahan hrilh ve ta a.

.
A fanu naupaina Lal Ngurliana-n ahan hriat meuh chuan, thinrim luat avang chuan a mengsen ta râm maile, a fanu alo chhuan ve em em leh alo uanpui ve ber mai, chutia akhaw daifêm, pasalțha satliah ve mai leh hnamchâwm mai mai laka fa alo pai chu, Sailo lal chhungkua tih hmingchhiatna ani tiin, a ngaithiam ta hauh lo mai a, a fanu chhipsama han țham lawp pah chuan a phih tho dawrh mai a, thimrim hachang ahan țhial ta rap rap mai a, Sailo lal in ah hian, Hnamchawm naute pian ka remti lo tih hria ang che tiin, a fanu Ngursangi chu ahan hnuk ta dawr dawr mai a, Lalnu Rosangpuii chuan, Lalpa chu zahngai hram tur chuan ahan ngen lawm lawm mai bawk a, Lal fapa Ngurthanglura leh upate pawh chuan, Lalpa in fanu chu akhawih na lutuk tur chu an lo dang ve țawk țawk mai bawk a, Lal Ngurliana thinrim khaw hmu tawh lo chuan, tuna chinah he in chhungah hian, he mihûrnu țan zawnga thusawi emaw ahming lam ri leh chu tupawh ni ula? He ka lal in ațang leh ka khua leh tui ațang kan mihûrnu rual hian in chuak thei ang ahan ti a, a fanu in a pa khawngaihna lo dil lawm lawm lai chu, pâwn lamah chuan ahnûk chhuak ta dawr dawr a, chutia lal in a patling thinrim tak thâwm leh hmeichhe mangang âu țe chelchul ri avang chuan, țhenawm khawvengte chuan, engthil nge nita? tiin' lal mualah chuan an rawn chhuak khawm ta dul dul a.

.
Lalpa țawngkam ațang leh Lal fanu hmui ațanga thisen lo chhuak zawih zawih mai leh lo tlu bawksawp niaih mai mipui'in an han hmuh chuan engthil nge thleng chu an hrethiam nghal ta vek a, lal fanu fa paina pa pawh chu tumah zawh buai an ngai ta lo, nu țhenkhatte chuan, an lal fanu chu anlo khawngaih hle mai a, en pawh en țha ngam abar an awm lo a, chutah mipui kar ațang chuan, Lal Ngurliana pasalțha sawm lai maite chuan, ankhaw pasalțha hmelțha leh tlawm ngai em em mai, ankhaw mipui tam zawkin a anlo ngainat rawn, pasalțha Kapvunga leh a nu leh pa bakah a farnu neih chhun techu hnungkhirh chung chuan lal in tualah chuan an rawn phih ta dawr dawr mai a.

.
Ni e.. pasalțha Kapvunga hi tlak lam venga awm an ni a, Bûkpui khua ah hian pasalțha tamtak awmin, chung zingah chuan, pasalțha Kapvunga hi tumah han têr pha hi an awm meuh lo a, sâ alak theih mai bakah ahuaisen'in, ankhaw pasalțha chhuanvawr ber mai ani ve a, mahse, an michhiat zia hi ahrechiang'in a inngaitlawm em em mai țhin a, ahmelțhat mai piah lamah, pachhia leh hmeithaite hi a ngaihsak em em mai bawk a, ankhaw pasalțha leh innghahna nive ta fam chu, lal in ah pawh hian achuangkâi ve ta fo mai a, chu anun tlawm tak mai leh midangte tana inpe zo em em leh nulate ngaihzawn rawn pasalțha chu, an lal fanu hmelțha eltiang, Ngursangi pawh chuan alo hmuh hmaih lo nasa mai hi ani a, chutia lal in chuangkâi ve ta reng nana na chu, lal fanu chuan ankhaw pasalțha hmelțha leh tlawmngai chu mitmei alo hmuh ta fo mai a, atir ah chuan Kapvunga chuan.. phulo a in tih em avang leh ani hnamchawm tlangval ve mai maiin, Sailo lal fanu lo chhai tum ve ngawt chu ngaihtuah pawh angaihtuah ngam lo ani a, mahse Lal fanu chuan pasalțha Kapvunga hmai hma ngei ah chuan ahmangaih thute hial chu ahan hrilh ta rawih mai ale, mipa fa ve na fam chu chutia lal fanu hmelțha eltiang amah ahmangaih thu ahan sawi ta maichu, mihring vemai tan chuan ngaihtuahna fim putte pawh ahar ani ve ta chek ang chu le? mi zawng zawng hmelțha tih leh ani pawhin a hmelțha alo tih ruk em em mai chu, a mipa ni ve ta fam chuan, chutiang taka hmeichhe hmelțha leh duhawm na akhat chu ahnar phal ta bik silo a le, an chhungkaw thihna tur ani tih hre ngat sela chuan lal fanu kha hmangaihna thu kha lo tiampui lo tur hi ania le, tunah zawng atlai zo ta.

.
Bûkpui pasalțhate lah chu, an hmingțhatna tur zawng zawng luah lântu, an pasalțha an êr em em mai leh engtin maha an tluk theih bawk siloh hremna han pek vel chu anlo phur hle mai a, Lal Ngurliana chu thinrim Aw țeng chhuai chuan," nang hi maw ka lalna zah lo a ka lal in chhung ti bawrh bangtu hnamchawm chu? I thiltih man chu nang leh i chhungte hian in hmu mawlh ang tiin, abul a ding pasalțha "Sawiluaia, chu chem han pe tur chuan ati a.. chutah, pasalțha Kapvunga chuan, Lalpa hrem ngai an awm anih chuan kei hi thil tisualtu chu kani e, khawngaihin, lal fanu chungah leh ka chhungte chungah hi chuan zahngai hram rawh' tiin alo ngen lawm lawm a, lal fanu pawh chuan, Kapa, kei i fanu hian ani thil tisualtu chu ni, engkim ah khan ka thiam loh vek ani a, i fanu hi hremna hmu tlak leh i lalna ti bawrhbangtu chu kani e, an ni khan engmah tihsual an neilo ani tiin, țap lawm lawm chuan alo ngen a, mahse Lal thinrim chuan athiltum erawh țhulh atum lo hle a, an thilsawi hrelo ang mai chuan, Lal ropui leh rorel thiam ni țhin chuan, Kapvunga nghawng ah chuan achem chu achuktuah ta rân maile.

.
Lal fanu chu abianga mittui luang zawih zawih chuan arawn hawichhuak țawk țawk a... ahmangaih leh pawisawilo achhungte amah avanga thi mai tur han hmuh chu, Lal fanu tan chuan chu aîa thinlung kehsawmna tur dang a awm tawh kher lo ang le, Aw sai hlak hlak leh khur deuh bep bep chuan, Û "Kap, khawngaihin min ngaidam hram rawh aw? Kapi, kapu, Sente, nangni pawn min ngaidam hram dawn ania aw? harsa ti tak leh țah Aw țuau chuan ahan ti thei hram a, ankhaw pasalțha Kapvunga leh achhungte chuan Sailo lal pawi ansawi avang chuan an nunna an chan ta. Mipuite chuan chulai' lal in tuala thil rapthlak tak thleng chu engmah tih theih reng neilo chuan, mittui tla țeuh chung chuan anlo thlir reng ringawt mai a, Lal Ngurliana chuan a fanu Ngursangi chu, a in chhung ațang leh akhua leh tui ațanga chhuak tur chuan ahan ti zui nghal bawk a...

Story pic phal taka hman min phalsaktu, #Thazela_Hmar* chungah ka lawm takzet zet e



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2017, 9:07 pm

HNAMCHAWM PASALȚHA KAPHLEIA

EPISODE - 2

Bûkpui khawchhung chu an pasalțha chhuanvawr leh a chhungkaw chunga thil thleng chuan a țhawn em avang chuan, tumah chuan han chet chhuah zai reng rel loin," thehmeh ang mai chuan areh hian areh țhiap mai a, khatiang em em a an Lalpa rawvâ tak mai ahan che duh mai leh a Fanu raipuar țeuh tawh mai chunga zahngaihna chhete mah ahan neilo leh zelte chu mak an tiin' tun ang tlai khawthim dawn rûaia, a Fanu chhuak tura ahan ti maichu, anlo hrethiam loin," Lalpa chu nunrawng anlo ti hle hlawm a, hetiang khawp hian ani maw hnam hnuaihnung zawkte alo hmuhsit le?" tiin," Bûkzo khaw mipuite chu an in zawt ta sap sap mai a, chutah, Lal fanu chuan, thei leh thei lo hian ahmangaih "Kapvunga, ruang chu arawn pan ang țawk țawk a, abiang ațang chuan mitui dan rual loh chuan a sur zung zung mai bawk a...Lal fanu in ahmangaih em em.. "Kapvunga, lû nei tawh lo let bal mai chu ațah hawm hawm mai a, mipuite chuan an Lalpa an hlauh em avangin tumah han che chhuak ngam eih an awm lova, akhaw pasalțhate pawh chuan an lalpa chet duh dan leh Kapvunga chhungte thleng thlenga ahan vai hma phiar mai chu, anlo rin phakbak anih mai bakah, Lal fanu chhuak tura ahan ti leh zel maite chu, mak an tiin" apasalțhate pawh ati hrilhhai hle nghe nghe a, Upate leh pasalțhate chuan, Lalpa thinrim chu a nasat em avang chuan, loin rawlh ve na chi rual ni a an hriat loh avangin... ngawi reng chuan, ankhaw pasalțha leh achhungte chunga thil thleng leh a Fanu chunga arorelna chu anlo thlir tawp mai a. Mipuite chuan an lal fanu khawngaih thlak chu," mittui tla pur chuan anlo thlir ve țhiap mai bawk a.

.
Chutah, Lalpa Ngurliana chuan, kan mihûrnu chuan ka thusawi kha i hre lo em ni? Hekhua hi chhuahsan nghal rawh tiin ahan âu țeng leh ta chhuai chhuai mai a, inchhung lamah chuan lut zuiin," a upate pawh chuan an zui ve ta nghal a.. chutia a fanu ahmangaih leh a engkim ni țhin, ațhenawm khua zawng zawngte bulah pawh alo chhuan ve em em mai chu, vawikhat thil a tihsual avangin A pa hmangaihna chu adawng zota lo, ropui duh avang leh hmingțhat duh luat avang chuan, chu alal inchhung ațanga hnawhchhuah mai chu duh tawk loin" akhua leh tui leh aramchhung chu vawite khat mah rawn dâi leh tawh lo tur chuan ahan ti ta chu ani si a le, ani hmeichhe awmnêm leh derdep ve mai tan chuan, zan khawthim ah chuan engtin tak hun han hmang ang maw? Mipa fâ tan pawh chutiang thlasik khaw vawt tak, zanthim hnuaiah leh nghal, ramsa țihbaiawm tak tak karah chuan engtin han damchhuak thei tak ang mawle? A panna tur lam ber pawh hrelo chuan ahan tho chhuak ta țham țham a.. ahmangaih a nu in alo auh lawm lawmna lam chu a va hawi țawk țawk a.. Lalnu Rosangpuii pawh chuan mittui tla țeuh chung chuan, Lalpa thupek pawh pawisa hleithei lo chuan.. a fanu chu rawn pan'in arawn kuah ta vawng vawng mai a, an han țap dun leh hawm hawm mai bawk a, Lal Fanu Ngursangi chuan, "Kanu" ka kal tawh ange.. "Kapa, khan khatiang khawp khan ani maw? hnamchawm leh mi hnuaihnung zawkte alo hmuhsit le? I Fanu hian thil ka tisual ngei tih chu ka pawm asin! Mahse, tinge pawisawilote chungah leh zel khan khatiang thil kha atih tak mai le? "Kanu, nang tal hi chuan min ngaidam hram rawh aw? tiin" a kâ ațanga thisen chhuak ahan hruk pah chuan a inhnit feih feih a.. Chuzawng, nu hmangaihna beng ațanga hriat atan chuan a va han nâ tehlul em! "Bawihte....ahan țap hawm hawm a..a fanu hmabak tur pawh ngaihtuah ngamlo in, lei ah chuan ahan bawk thlawp a.. a, anih lah taka, a fanu keh thei dawma alo dawm leh aduat em em mai chu.. nu hmangaihna chuan a ngaidam'in, chunnu thinlung chu a va han kehchhe chiang em! saisen tet ațanga akhaw eng lo hmuh ve na, a in leh akhua leh tui atualchaina ah ngei chuan chenve phalsak ani ta silo.

.
Mipuite chuan ngawi reng chuan anlo thlir țhapa.. Lalpa chu inchhung lamah chuan alo in hrosa leh kuk kuk mai bawk nen," eng thu tam sawina hun a awm ta lo.. Lalnu Rosangpuii chuan, a Fanu kaltur pawh thlah theilo chuan alo țhusawp nuaih tawh mai a.. Lal Fanu chuan, khawilam nge apan ang tih pawh hre lemlo in" tlai khawthim dawn ruai chuan, ahmangaih achhungkua leh akhua leh tuite chu kumkhua atan a mangțha tawh tur chuan kawtchhuah lam pan chuan akal ta chhat chhat mai a.

.
Mipuite chuan, mittui tla zawih zawih chuan an Lal Fanu an vangkhaw mawitu leh hmelțhatna zawng zawng neitu ti a anlo sawi huai huai kal liam turchu anlo thlir țhap mai a.. Lal Fapa Ngurthanglura chuan, chutia a farnu ahan kal liam mai tur chu rawn um zuiin," a farnu kutah chuan rawn vuan'in a hma ah chuan arawn țhingțhi veta hnawk mai a.. "Mami, ațawng zawng pawh chuan a rilru chu ana hle ani tih hriat chuan ahan'in pet fan fan a.. Ka farnu neihchhun heti mai hian maw kan in țhen dawn le? Khuanu chuan hualhim mawlh che rawhse.. i tan engthil mah ka tihsak theih loh che avang hian i Û hi min ngaidam hram rawh aw?" tiin, ahan țap chhuak veta rawih rawih mai a.. Lal Fanu Ngursangi erawh chuan, a Û biakna pawh chu hrelo ang mai chuan amelh ngai chu alo melh tlawk tlawk mai a.. a thinlung hliama awm chu kaihharh zawh rual ani tlat lo. Lal Fapa pawh chuan a farnu hnenah chuan athil rawn ken.. puana atuam chu akutah chuan hlan'in, a farnu kal liam turchu a thlir zui vawng vawng a "Mami, khuanu'n zah angai anga damin kan la inhmu leh ngei dawn ania aw?" chu ahan ti chuai raih a.. Bûkpui vangkhaw mawitu Lal fanu Ngursangi chu a kal liam ta.

.
Lal fanu chu ahma lawk a ngawpui thim chhahmup mai leh zanthim țihbaiawm zet mai ințham mêkna lam pan chuan a kal ta țauh țauh mai a.. Mahse chung hlauhawm na erawh chuan, chu Lal fanu thinlung nâ avanga kehsawm tawh ah chuan hmun reng chang loin" rilru chi aî tak leh mu leh mal pawh neilo chuan akal mawp mawp mai a.. ahma ah chuan engthil pawh lo thlengin, a tun dinhmun nen hi chuan, han thih ve daih mai nen pawh, thlan tur lem chuang awmin ahrelo a, atan hlauh'in awmzia nei miau hek lo le.. hmalam chu a pan ta zel a.. zan khawthim chuan arawn tuam ta mup mup mai a.. thlasik khawvawt vîntuk mai chuan, Lal fanu taksa no tak leh ahehsen vâmham maite chu zahngaihna reng neilo chuan arawn hmet khawng ta țhawt țhawt mai a, ngawpui chhung thim chhah tak hnuaiah chuan, kalkawng dik azawha nge zawh lo tih pawh hre lemlo chuan, anaupai hrâm tawh tak nen chuan akal pai chawn chawn mai a.. adang ro hnawnna tur tui tak ngial pawh neilo Lal fanu mihring ve mai chakna chuan atlin ta biklo..

.
A awmna ruam zau tak leh ramsate tualchaina hmun" rannung tinrengte'n riahrun an remna ngawpui thim chhah zet hnuaiah chuan a țhu ta hnawk mai a.. han tho chhuak leh turin chakna anei ta tlat lo.. Lal in lum nuam tak leh nu leh pa thlazar hnuaia ngaihngam taka mutmu tuah țhin kha, chulai ngawpui țihbaiawm tak hnuaiah chuan engmah hrezui loin a muhil ta bawrh bawrh mai a.. zing sava chiar nak nak ri ah chuan Lal fanu Ngursangi pawh chu rawn harh vein," chulai ngawpui chhung chu zing Ni chhuak chuan rawn ém in, thinghnah kar ațang chuan, nî zûng chu arawn'in kap thlur leh sung tawh mai hi alo ni a..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2017, 9:08 pm

HNAMCHAWM PASALȚHA KAPHLEIA

EPISODE - 3

Lal fanu Ngursangi chu thlasik khawvawt vintûk mai chuan, a taksa dawrâwm ve tak mai chu, zahngaihna tel hlek lo chuan alo hmet khawng lo chauh mai hi ani a.. ataksa achauh em avang leh thlasik khawvâwt lutuk hnuaiah chuan han chet vel chu harsa ati hle a, ahun tawn mêk leh a nimin hun tawnte chu ahan ngaihtuah chhuak leh nghal uar uar a, amah avanga a hmangaih em em Kapvunga leh achhungte, a pa in a lainatna leh khawngaihna tel map lova an lû ahan tan sak phiar phiar laite chu mitthla ah lo langin, abiang ațang chuan mittui chu alo luangchhuak leh ngiai ngiai tawh a, ahmangaih a nu leh a Û in țap hawm hawm chunga an thlah laite, ankhaw mipuite'n mittui nena an lo vailiam laite chu a han mitthla leh zut zut mai bawk a, chung thilte ahan ngaihtuah chuan thih ve daih maite chu a duh rum rum mai a, Mahse, apum chhunga ahmangaih Kapvunga nen an fa lo piang tura tan chuan dam khawchhuah ngei ka tum tur ani, tiin' a inti fuih mawlh mawlh a.
.
Ni alo tlangsan deuh chuan, khawvawt lutuk pawh arawn zia awm hnu chuan, zawimuang chuan ahan tho chhuak a.. tui hâl avanga adângro lutuk hnâwnna tur leh apum ruak lutuk hnawh khahna tur azawn thuai angai ani tih chu ahrethiam vat a, chu thil chu ati vat lo anih vaih chuan, ataksa leh anaute pai chuan atuar hle dawn ani tih chu ahmu tlang nghal thuai a.. a Û in akal dawn a athil ken tir, puan a atuam țhat thân maichu ahan phelh a, chumi chhungah chuan, bahra chhum tamtawk leh sakhi sa rep chu alo awm țeuh mai a.. chung bakah athuam hnaw tlem azawng leh amêi nunna tur "piallung, thleng chuan a Û chuan alo dah thân mai hi ani a.. Mahse, adângro hnâwnna tur tui a awm loh avang chuan, tui ngaihtuah tur chuan ahan tho chhuak ta țham țham a.

.
Chutah, Lal fanu chuan a awmna hmun chu ahan bêlchianga, kawng pangai azawh tawh lo ani tih chu a hre thiam nghal thuai a.. a awmna hmun chu thing lian pui pui, upate'n Chhura rual rual an tih ang hmun chu lo ni in, ngawpui țihbaiawm tak hnuaiah chuan alo awm reng mai hi ani a, Mahse, chung hlauhawm te chuan, Lal fanu thinlungah chuan hmun reng achang lo a, adâng hnâwnna tur tui a mamawh tawh ém avang chuan, a awmna hmun ațang chuan tui han awmna tur awm anga angaihna hmun chu ahan melh vel ngial a.. Mahse, chu hmunah chuan, tui han hmuh tur reng a awm lo a.. ahmuh chhun zîng dâi tla hnahthel chunga lo tling pâm maite chu ahmuh tawk ani a, chûngte chu a dângro lutuk tur hnâwn nan chuan hmangin," Sakhi sâ rêp leh Bahra hmang chuan apum ruak lutuk tur chu ahan hnawh khat a, Kapvunga nena an fa lo piang tur chuan, amahah chuan chakna thar pe in, akawng hlauh tawh hmuh leh tum chuan, a bianga mittui luang zawih zawih chuan achhuak leh ta hna hna a.

.
Lal fanu hmelțha eltiang leh amahah chuan mawina zawng zawng a awm emaw tih mai tur khawpa duhawm, mi zawng zawng ngainat rawn, khualtual thang hat khawpa hmelțha sawi hlawh ni țhin kha, tunah chuan ramsa țihbaiawm tak takte bak thlirtu anei tawh lo a, a dam khawchhuak ang nge dam khawchhuak lo ang tih pawh angaihtuah hek lo, a harsatna tawh mêk chuan amahah chuan dam khawchhuah duhna ape a, Hnam hnuaihnung zawkte tih retheih an ni țhin chuan athinglung a tinâ a, a rilru nâ chuan, chona thar nei leh tura chakna ape a, kawng lakah eitur ahmuh ang ang chu a kawruak hnawh khah nan chuan hmangin, ataksa in atlin tawp chin chinah chuan, chhun ani emaw zan ani emaw tah chuan amu mai țhin a, ramsate pawh chuan chu hmeichhe khawngaih thlak chungah chuan zah an ngai ani ve chêk ang, tihnat tum ahnêkin," khawngaih thla la tak chuan an lo thlir liam ve dauh dauh mai ani.

.
Lal fanu'in in achhuahsan-na pawh ani nithumna lai alo liam ve ta reng mai a, Bûkpui lal in chhung lamah ve thung chuan, Lalnu Rosangpuii chu mû leh mal pawh nei loin a fanu ngai chuan alo țap kauh kauh reng a.. chunnu tan chuan chu aîa han nat leh ngaihna a awm tawh kher lo ang le? Lalpa Ngurliana lah chuan, kan mihûrnu kha i zui ve duh anih nghal loh chuan, kha i mit ațanga mittui kha ka dah bo nghal ang che? A lo ti vei khur khur reng a, Bûkpui Lalpa chu, a fanu ahnawhchhuah ațang khan hnam hnuaihnung zawkte chu an chêp tial emaw tih theih tur chuan, a rorelna ah chuan alangchhuak mêk zel bawk a.. a pasalțha țhenkhatte leh mi awmthei deuh tan chuan nuam tawlna hun ani hawt mai a, Mahse, chu khua chuan kawng dik ata hruai bo in an awm mêk ani tih an hre lo a, mahni mihring puite tih duh dahna chuan rah duhawm lo tak achhuah ang tih an hre miau lo ani. Bûkpui khua chu eng chen tak ding thei tak ang maw?

.
Ngawpui chhung lamah ve thung chuan, Lal fanu Ngursangi pawh ahma ang ngawt chuan achak hleithei ta bik lo, khaw hmuh theihna a awm beisei chuan, a awmna ațanga tlangpawng lam panin, awih bak-bahai ah chuan harsa ti tak chuan alawn chho leh a, chumi thui lote lawn tur pawh chuan vawi tamtak achawl nghe nghe a, a ei tur neih a ei zawh tawh avang chuan, hnim hnah ringawt chu a in hnangfâkna awm chhun chu ani ta ringawt mai si a, a taksa lah alo chak lo ve tial tial bawk si nen chuan, Lal fanu Ngursangi tan chuan han dam khawchhuah chu thil huphurhawm tak ani ta, chutia mualpawng ahan lawn chhuaha ahan hawivel chuan, a awm na ațanga amit tlin tawk chu ahan thlir vang vang a, Mahse, khua han hmuh tur reng chu aw loin, mual lian pui pui leh cham deiduai mai, thing lian tak takin a abawh khah luk bak chu engmah ahmu lo a, tunah zet chuan abeidawng ve ta tak tak ta! A dinna hmun ah chuan ahan țhu hnawk a, "U Kap, ka tlin dawn ta lo, i awmna hmun ațang khan min lo thlir ve reng ani tiraw? Naute ka hrinsak thei ta lo che anih pawhin, nang chuan min hre thiam em em ang tih ka ring asin, tiin' Aw pawh chhuah hleithei lo chuan ahan țap leh rawih rawih a.. Ni chu vanlaizawl ah tak chuan afû vung mai a, Lal fanu tawrhna chu ahriatpui ve ni awm fahran chuan, chu thil thleng chu hmu ngam lo in, chhûm dum karah chuan atawlh lut ta zul zul a, Lal fanu pawh atheihna zawng zawng sawm khawm chuan ahan tho chhuak leh a, azawh lam tur ber pawh hre lo chuan, ngawpui dur khup lam pan chuan a kalpai leh ta khat khat a.

.
Lal fanu Ngursangi mû ahan harh chuan, nî pawh tlângah chuan alo herliam dawn suar suar tawh a, a awmna hmun ahan en chian nak chuan, pûk lian tak khâm chhawrdawh hnuaia lo kaw hun mai bulah chuan alo mû reng mai chu ni in, zawimuang chuan pûk chhung lamah chuan atawlh phei ta hnû hnu a, maktak mai chuan chulai pûk chhung chu tawp lamah chuan tui chu alo luang her her mai hi a ani a, pûk chhung chu alum nuamin, han chet velna pawh arem ang reng hle a, Lal fanu Ngursangi chuan tuite chu ahan dawt khawlh khawlh a, khawvawt tih zia awm nan tiin," bûk sir vela a thingnawi lak khawm hmang chuan, mêi chu han nun ta hlat hlat a, Lal fanu pawh a taksa chau lutuk avang chuan alo chhing leh siar siar tawh a, Mahse, Lal fanu Ngursangi chu a thâwm hriat chuan a ti harh chiang ngei maile, Keipui lian em em mai, pi leh pute'n Sâi râl an lo tih țhin ang ngei mai chuan, engvanga ka bul zawl lo luah ngawt nge i nih tiin, in hrosa kuk kuk chung chuan Lal fanu Ngursangi chu arawn melh ta run maile, Lal fanu Ngursangi chuan, hlau leh khur der der, Aw sai deuh hlat hlat chuan, zahngai zahngai tiin, Keipui lamah chuan a va hawi țawk țawk a, tunah chuan Lal fanu Ngursangi pawh chuan ahun tawp chu athleng ve ngei turah angai ve ta! A hmangaih em em a nu chu angai vawng vawng a, a û leh ahmangaih Kapvunga hming chu a lam awllo bawk a, Mahse, Lal fanu rin leh beisei lutuk loh chuan, Chu Keipui chuan chu hmeichhe khawngaih thlak leh raipuar che hleithei lo leh nghal, ani ram pasalțha ve meuh in chutiang han tihnat chu alo tum bik awzawng lo mai a, Keipui chuan, Lal fanu mêi lo tuahna bul ahan thlen chuan, a bawk ta hle hle mai a, Lal fanu erawh thih loh reng a in rin tawh loh kha ani a, chutia abul zawn a Keipui thâwm areh tak daih avang chuan, hlau leh khur der der chuan, apuan a alo in hupna ațang chuan Keipui chu arawn bih ta dêk dek a, Mahse, abul lawk, hlam vel awrh ani ang tih ah chuan, Keipui chuan amah tihnat tum hmel pawh pulo chuan, Keipui lo bawk hle hle chu a va hmu a, Lal fanu chu athaw huai thei a, a taksa chau lutuk avang chuan, engmah chu hre zui tawh lo chuan, a chhing zui leh ta nghal a.

.
Zing sava chiar nak nak leh therêng hram rál ralte chuan, Lal fanu tui taka mû chu rawn kâi harhin, Lal fanu rawn tho chhuak chuan, Keipui awm leh awm loh chu ahan en thuai a, Mahse, Keipui chu hmuh tur reng alo awm tawh lo a, Lal fanu Ngursangi chuan, ahun tawn mêk chu ahan ngaihtuah chuan mak ati hle mai a, Keipui hlauhawm zia chu ahriat chian ve em avang leh Keipui pûk chhung ngei mai a him dam tak mai a ahan awmte chu, awih harsa ati zawk hial a, Mahse, nung damin ala awm tlat si ani. Pûk chhunga tui luang her her chu ahan dawt leh khelh khelh a.. Mahse, a rilțamna chhawk tur erawh chuan, eng thil emaw tak a ei angaia, chumi a eitur zawng tur erawh chuan a taksa chuan, chakna anei tawh lo a, a ke vûng leh pilh pheng phung maite chuan, a taksa chu akalpui zo tawh meuh lo ani si a le..? Engtin tak han awm zel ang maw..??

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2017, 9:08 pm

HNAMCHAWM PASALȚHA KAPHLEIA

EPISODE - 4

Chutah, a awmna hmun ațang chuan, mêi han nun leh tuma a inher mêk lai chuan, Keipui thâwm chu ahre leh ta tlat maile..? Pûk luhka lam ahan en nâk chuan, Keipui lian em em mai chu, a Sakhi seh hlum sa, zotak mai a rawn sehkawh vah chung chuan, Lal fanu Ngursangi chu alo thlir leh reng tawh mai hi ani a, Lal fanu Ngursangi'n chu thil a va hmu thut mai chu, a awmna hmunah chuan ading khawng reng ringawt mai a, Mahse, Lal fanu Ngursangi chu inngaihtuah chhuak vatin, nizan lamah khan he Keipui hian, ka taksa kha pawtsawm vek thei kha ani a, Mahse, ka chungah khan eng thil mah ati lo kha ani a, ani hian, min tinâ duh ni sela chuan, tunah hian khaw êng hmu tur ka awm tawh hauh awm silo a, tunah hian ka tan duhthlan tur a awm tawh chuang lo e," tiin, thihna hmachhawn inhuam rân chung chuan, amut hmun lamah chuan, khur deuh dar dar chuan atawlh phei leh ta hraih hraih a, chu Keipui chuan, Lal fanu chevel chu, mitkhap lek lo chuan alo thlir reng a, chutia Lal fanu ahan chetsawn takah chuan, a sâ seh chu, pûk kô tlangah chuan țhut puiin, Lal fanu chu ngaihsak hmêl pawh pu zui lo chuan, a Sakhi sa rawn hawn chu a țhei ri ta bup bup a.

.
Lal fanu Ngursangi pawh chuan, chutia Keipui'n, achungah engmah ahan ti lo leh ta chu, khuanû hian ka chungah zah angai ani ange? he hmunah hian, kapa'n a duh loh leh a hmuhsit em em, a Lal inchhung ah pawh piang tlak a angaih loh Hnanchawm fa ti a asawi chu, khuanu'n ka naute hrinna hmun atan min ruatsak ani mahna, tiin' a in hnêm mawlh mawlh a, an vangkhaw sumtual chu ahan mitthla a, anu amah hmangaih em em tu chu ngaihtuahin, "Kanu, i fanu hi min han ngaihtuah suh ang che aw? Damin kan la inhmu leh ngei dawn ania ahan ti thâm țîak a. Keipui'n, Sakhi sa tui ti hmel tak mai a ahan țhei bawrh bawrh lai chu, hmuhnawm ti tak chuan alo thlir dauh dauh a, aril ațam ve tawh êm avang chuan, chu Keipui'n Sakhi sa tui ti tak a a ei lai chu, va eipui ve tak maite chu anap rum rum a, chutia mittla lek lo a Keipui sa ei alo en chu, chu Keipui pawh chuan alo hmuh hmaih lo nasa mai a, nakin deuh ah chuan, chu Keipui chu arawn tho thurh mai a, Lal fanu lam chu rawn melh zuk zukin, Lal fanu pawh, chutia Keipui arawn thawh tak thurh avang chuan, aphu ve deuh zuk nghe nghe a, Chu Sakei, upate'n Sâi râl an lo tih țhin ngei mai chuan, Lal fanu lam pan chuan, a sa ei lai bawp rawn seh kawh vah chuan, Lal fanu, amah lo thlir reng tu lam chu arawn pan ta thauh thauh maile. Lal fanu chuan, amah rawn pantu chu en pawh en ngam lo chuan, alo inhup chawn chawn mai a, chutia Keipui pawh en ngam lo a alo awm lai chuan, Keipui'n țangphel velin, arawn hnaih ang tawh ang? tih velah chuan, Keipui chu ahan rum deuh ngul ngul a, Keipui let leh thâwm Lal fanu'n ahan hriat leh chuan, a in lû khuhna ațang chuan arawn dak chhuak leh dê de a, Lal fanu chuan, ake bul mai a Sakhi bawp lo awm reng mai chu ahan hmu a.. Sakei awmna lam chu ahan en leh dek dek a, chu Sakei pawh chuan, athil khel ngai chu alo khel leh nuap nuap tawh a, Lal fanu chuan thil awmzia ahan hriat chuan, lawm luat avang chuan amittui chu arawn hnâm ta țiam țiam a, "Keipui, han enpah chuan, kei, hmeichhe țawmkâi lo a an ngaih, ka inchhung leh khua leh tui a awm tlak pawha an ngaih loh chu, nang hian min lo khawngawih avangin, ka lawm e aw? tiin, chu Keipui chu ahan be mawlh mawlh a.

.
Lal fanu Ngursangi chu, thi mai tawh tura inngai kha ani a, thil maktak mai chu thlengin, chu Keipui nen chuan, pûk pakhat ah chuan an chêng dun ta reng mai chu ani a, Chu Keipui chuan, a sa seh apiang chu, chu Lal fanu baihvâi leh apûk rawm țawmpuitu chu, a sa țha lai chu ahleh ve ta ziah mai a, Lal fanu Ngursangi pawh, thla ahan vei leh meuh chuan, a taksa nâ zawng zawng chu adam fel ti tih ta der mai bawk a, a nau hrin hun pawh alo hnai ve ta tial tial a, thingnawi tuah turte chu la in, eitur ahmuh ang ang chu ahan dap khawm bawk a, Keipui thlazar hnuaiah chuan lungmuang tak leh a in hnangfakna tur pawh tlachham bik lo chuan, chu Keipui nen chuan khawhar inhnem tawn ni ve mai awm chuan, thla thum dawn chu an lo khawsa ve ta reng maile.

.
Ramtuk thla ahan nih meuh chuan, thlasik boruak vawt lutuk pawh a ziaawm chho ve ta zel a, zan boruak thiang kuk mai kara, arsi lo pe ún maite chu, Lal fanu Ngursangi lunglen ti zualtu ni in, a hmangaih Kapvunga nen an hun hman dun laite chu ahan ngaihtuah a, A hringtupa ngei mai in a, ahmangaih em em mi zawng zawng hmuha athat laite ahan ngaihtuah chang chuan, thinrim luat avang chuan arûm leh kâwk kâwk țhin a, Kapvunga nen a an fa lo piang tur chu, eng ang mi pawh nise.? hmangaih leh duat takin, kei hian ka enkawl seilian dawn ani," tiin' duhthu alo sam ve rauh rauh a, chumi zân tui tak mai a ahan mû chu, zing khawvar hma deuh, Thingchangvar an tih ang hun velah chuan, Lal fanu Ngursangi pum chu arawn na ta riai riai maile, chu pûk chhung chu hmeichhe nauvei rum der der leh puitu ngaia chiau vawng vawng ri chuan akhat chu ani ta ber mai a, Lal fanu nauvei natuar han hnem theitu awm chhun, Keipui lah chu pûk chhungah chuan nau lopiang tur chu hre ve niâwm fahrán chuan, rum ngul ngul chung chuan alo vei tawn sek mai bawk a.

.
Zîng ni chhuak lâwm a chulai ngawpui chhunga, tûktin a thâwm chhuah țhin nungcha tinreng maite chuan... Chulai ngawpui chhunga hringmi zinga mi bîk lopiang tur chu, anhre ve ani chêk ang chu , chumi tuk chuan thâwm reng reng an chhuah lo a, areh hian areh țhiap mai a, Lal fanu nauvei chau tawh tak, han rum deuh kawk kawk bak chu chulai velah chuan hriat tur reng a awm lo a.. Tukțhuan ei hun vel alo nih chuan, Lal fanu Ngursangi chuan, theihtawp chhuaha san ahan pek leh vak chuan, a naupai chu chau tak chung chuan ahring chhuak ve thei ta hram a, chulai pûk chhung ațang chuan, naute chu arawn țap ta raih raih maile. Chutih rual chiah chuan, Keipui chu, Aw râwl tawp tawp chuan ahan hahum dum dum mai, ngawpui chhung lamah pawh chuan, savate leh rannung tinreng mai chu, chumi rual vek chuan, ngawpui chhung khawk rum rum khawp chuan an lo ri nghal chuah chuah mai bawk a, hmeichhe khawngaih thlak chu, Khuanu'n, a fa lopiang enkawl thei tura chakna chu pe in, Lal fanu Ngursangi chuan, ahmangaih Kapvunga nena an fa lopiang chu, harsa ti taka rawn tho in, a kut ngei chuan ahan pawm a, a fa lopiang chu mipa ani tih ahan hmuh chuan, lawm avanga bianga mittui luang țeuh chung chuan, "U Kap, i awmna hmun ațang khan min lo thlir ve reng ani tiraw? I fapa hian i hnung arawn la zui anga, nang leh i chhungte phuba chu an rawn la la ngei ang..? A hmingah pawh i hming chawi ngei in, "Kaphleia, tih ani ang," tiin, ahmangaih kalta chu abe mawlh mawlh a.

.
Chu pûk khawhar takah chuan, Lal fanu Ngursangite nufa leh an dam khawchhuan nana Khuanu'n an mahni veng him tura adah," Keipui chu an khawsa ho ta zel a, Kaphleia pawh, thil delh loh lung delh lo nita fam chu, thingnawi fawm rual ahan nih meub chuan, alo lian ve uaih tawh mai a, ram theirah leh hnim hringte chu angeih ani chek ang chu, a nu chu achen ti tih der tawh mai a, a nu chuan, a fapa bulah chuan mihring nunphung a fapa tana la pawimawh tura ahriat ang ang chu ahrilh țhin a. Kaphleia pawh chuan a nu thusawi chu ngun tak chuan alo ngaithla a, an mahni nilo mihring an awm ani tih ahan hriatte chuan hmuh pawh achak țhin hle nghe nghe a.. A hringtupa chanchin leh a pi leh a putêa chanchin a nu'n ahan hrilh changa a nu mit ațanga mittui lo luangchhuak zawih zawihte chu, thil awmzia ahriat hunah chuan engtin tak han ngai ve ang maw?

.
Kaphleia pawh ngawpui chhung han chetvel chu nuam ati in, a nu in a thiam ang tawk tawk a ahrilh, chu a hmang țangkai hle a, savate chu a awk thei in, hmawlh zûm fêi anga han hman a, han vilîk velte chu ahnehsawh em em mai bawk a.. Keipui chu ațhian neih chhun anih mai avang chuan angaina in, Keipui sâpelna ah te chuan azui ve ta fo mai a, Lal fanu Ngursangi chuan a fapa chu alo ngaihtuah țhin hle mai a, Mahse, chung thil chu, a fapa hma lam hun atana thil pawimawh tawp anih avang leh ani hmeichhia ringawt chuan, eng han hrilh theih bar aneih siloh avang chuan, a fapate kal liam tur chu alo thlir tawp mai țhin a, chu Keipui pawh chuan, Chu naupang, amah ngaina em em tu chu, tihnat en ah pawh en lo in, ramsa hlauhawm tak tak lak ațang chuan a veng tlat zawk a, an pahnih a sa an han pêldun tawh hi chuan, kut ruaka hanlet hi chu annei ngai meuh lo ani..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2017, 9:08 pm

HNAMCHAWM PASALȚHA KAPHLEIA

EPISODE - 5

Thim rorelna chuan, Kaphleiate nufa awmna ngawpui chhung chu arawn tuam leh mup mup tawh mai a, pûk chhunga mêi âlh teng teng hnuaiah chuan, Lal fanu Ngursangi chuan a fapa Kaphleia hnenah chuan, " Taite hei nangpawh, thingnawi fawm rual ilo ni ve ta reng mai a, helai hmunah hian awm reng thei kan ni lo a, he hmun hi kan chhuahsan angaih hun ala awm ngei dawn ani.. kan thuam neih chhun ang ang pawh alo chúl lam tawh bawk nen, nangpawh chutiang tur chuan i rilru alo inbuatsaih ve ngai dawn ani" a han ti charh charh a... Kaphleia chuan, "Kanu, khawi lam nge kan pan dawn a? Keimahni ang mihringpuite bulah chuan ka awm chak tawh lutuk asin! Engtikah nge kan kal ang tiin a nu biakna chu phûr tak leh Aw zangkhai vah chuan alo chhang thuai a.
.
Ngursangi pawh chuan, "Taite khawi lam hi nge kan pan ang tih ka hre rih lo a.. ka awmna hmun ațanga khaw hnai ber kan zawng tawp mai dawn ani.. ka thil hrilh zawng zawng che kha i hre reng dawn ania" kan mihring puite zingah chuan fel tak tak an awm laiin, mi fel lo pawh tamtak an awm a, keini phei hi chu," Pa nei tawh lo kan nih avang hian min hmusit tak tak pawh an awm dawn a.. nang pawhin chung mite chu dawh thei tak a i en an ngai dawn ani.. khawtin hian lal an nei vek țhin a, chu an Lalpa ber chuan keini nufa hi akhawchhunga awm min phalsak chauhin chutah chuan kan awm ve thei chauh ang, "a han ti a. Thil tamtak an in hrilh leh hnu chuan mutzâi an rel leh ta rih a.

.
Zing ni chhuak chu tukdang ang bawk chuan a sa leh vawl vawl hle mai a, Ngawpui chhung hmuntin mai ațang chuan, Rengchal chu an hram chiah chiah mai a, hramthiam va tinrengte leh nungcha chi hrang hrangte awrâwl chuan, chu ngawpui chhung chu rawn luah khat leh tawhin, " Kaphleia pawh a thang en tur chuan, a hma lawk rûam lam pan chuan a kal leh thauh thauh tawh a, rûam ațanga tlang dung lo inkhawh champût, a awmna rûam rawn sawhtu lamah chuan pakâi pheiin, a hmawlh hman thiam em em.. hlam chen vela sei, ahmawr zum chu a han vilik theuh theuh mai a, a hnungah chuan englai maha phatsan ngailo tu, ațhian țha ber leh aneih chhun Keipui chuan arawn zui ve zel bawk a, thang chu a en phei ta zel a, akhat tawk chuan, vahrit, vahlah leh varungte chu alo âwk ve le zeuh zeuh a, thang ahan en zawh meuh chuan, tuma hrilh loh leh kawhhmuh nilo ama remhriatna hmanga a thangkam ngei ah chuan, vahrit, varung leh vahlah, an vai chuan sawm chuang lai mai chu a âwk leh der mai a, a sava awh ho chu, an kê ah hrui chuan a han thlung khawm a, hlawhtling in ti tak chuan, atiang ken ah chuan kawtin bûk lamah chuan alet leh ta thauh thauh a.

.
Chutih mêk lai chuan, Kaphleia te nufa awmna ngawpui ațanga nihnih kal vel zetah chuan, Lal Dokulha lalna Zopui khua in zahnih vel ni a inchhal chu awmin, Lal Dokulha hi Ralte lal niin, Lal rorel thiam tak mai ani a, an pasalțha chhuanvawr ber leh khualkâi phak awm chhun ni bawk, pasalțha Hrangvela thihna pawh kum lai alo vei ve ta reng mai a, pasalțha Hrangvela hi, Pi Sawiveli leh Pu Hrangthangate inkara lopiang niin, an fa neih chhun ani a, tlangval hmelțha tak leh kum tlemte ni chunga thangchhuah thei ngat ani ve a, a pa Hrangthanga hi a hun laia pasalțha tak mai ni ve in, Hrangvela hian a pa chu kawng engkimah chuan arawn chhun fuh em em mai a, ramsa lak theih kawngah te huaisen lamahte chuan, reilote ah chuan a pa chu arawn phawk zo hle mai ta reng a, Lal Dokulha pawh hian a pasalțha chu a chhuang ve hle nghe nghe a, ankhaw mipuite pawh chuan an pasalțha chu an chhuangin, nulate phei chuan, an pasalțha hmelțha leh huaisen mitlun tum reng reng chuan an lo hmanhlel ve bawk a, Mahse, chu thil ngaithei lotu leh itsik tu chu akhaw pasalțhate zingah chuan an awm ve ta tlat mai, ani chu Lal khawnbawl fapa Rumvunga niin, ani leh a hote hian, ankhaw pasalțha chu ramvah pui ah sawmin, Hrangvela lah chuan a thihna tura tih reng hrelo chuan, Rumvungate țhian ho sawmna chu phur tak chuan alo pawmsak a, chumi țuma an ramvak chu, pasalțha Hrangvela tawpna lo thlenna chu ani ta ani.

.
Rumvunga hote pahnih chu khuaah rawn hawngin, an pasalțha chu khâm sâng tak ațang che sualin a boral ani tiin thu an rawn hawn ta mai a, Lal leh upate'n chung thil an han hriat chuan khawchhunga tlangval awm ang ang chu ko khawmin, Rumvungate'n an pasalțha ruang an lo lakchhuahna hmun lamah chuan an liam zui ve ta nghal a, Chumi ni chu Zopui khua chu an pasalțha thihna avang chuan angui nghiai mai a, tumah chuan an pasalțha thihna ah chuan Rumvunga leh ațhiante chu han rinhlelh nachang an hrelo nge? Mi țha fa anih avangin an ngawih bopui tih lah hriat va ni suh, chumi ni ațang chuan Hrangthangate nupa pawh an fapa thihna avang chuam hlimni hmel reng reng an nei tawh lo a, ahma a khawsak pangai tak ni țhin kha, tunah chuan an hnathawh aharsa in, anlo tar ve tawh bawk a, a eitur chu an hmuve țawk țawk ani ta ber mai ani.

.
Zopui khua pawh hnuhpui lak hun alo nih chuan, țhenkhat thawk thei deuh chhungkua chuan a hlo thlawh chu an lo zo leh deuh fur tawh a, Hrangthangate nupa pawh, an hlo thlawh hmabak tlemte chu riah chilh in, an lo bei ve ve bek bek mai bawk a. Ngawpui chhung lamah ve thung chuan, Kaphleiate nufa kal liam tur chu, Keipui chuan alo thlir zui vawng vawng a, " Lal fanu Ngursangi chuan, Keipui mit tak a en chung leh mittui parawl kiang kiang chung chuan, chu Keipui hnenah chuan lawmthu a han sawi mawlh mawlh a, Keipui pawh chuan ahre thiam ve ani chek ang chu alo hahum vei kuk kuk a, chutah, Kaphleia chuan, ka țhian, nang hmu leh tur che hian ka lo let leh ngei ang" chu chu ka tiam che ani.. kan la intawng leh ngei dawn ania tiin" an liam zui ta nghal a, Keipui pawh chuan, ațhian hringmite chu he hmunah hian an rawn let leh dawn tawh lo ani tih hriain, chu ngawpui khawk rum rum chuan ahan hahum vei ruai ruai a, hringmi ațhiante hmu leh ngai tawh lo tur chuan, pûk khawhar tak lamah chuan alet leh ta hnu hnu a.

.
Kaphleia te nufa kalchhuak ta pawh, anpiah mual pangper lam chu zawh phei zelin, Kaphleia chu aphur thauh thauh hle mai a, rawlthar thazat lai alo ni vei nen, a kal vei arh arh a, an mahni mihring puite bula an han khawsa tawh tur chuan ati hlim ve hle ni tur ani.. an hmabak thil lo thleng tur hre thiam phave lo nana na chu aphur hle mai a, a nu Ngursangi erawh chu alo in ngaihtuah nasa hle thung a, khawi lam hi nge kan pan anga..? Kan kawng zawh hian tu khua nge hnaih ber ang tiin alo in ngaihtuah neuh neuh a, an duhthusam angin khua pawh lo hmufuh nita se.. chu Khawlal chuan an ni nufa chu alo pawm duh lo mai ang tihte chu a hlau hle mai a, Mahse, eng han tih theih awm chuang heklo le, a fapa phur tak leh hlim hmel taka kal chu thlir pahin a kalve ta țauh țauh a.

.
Chutah, Kaphleia te nufa pawh zankhat ramhnuaia hun an hman leh hnu chuan, an hma lawk a mual lian tak leh lo pharh duai awmna lam chu panin an kal leh hnak hnak a, Kaphleia chuan a nu chu kal hmasak tirin, an han chawl veleh zeuh zeuh țhin bawk a, an hma a mual lo awm an han chuang chhuak chiah tih ah chuan, " Zopui khaw ho thlawh hma chu an râl lawkah chuan alo inpharh ta duai maile. Chutah, Kaphleia chuan chu thil chu la hmu ngai ve heklo le.. "Kanu, saw saw eng thil nge ni a? Sawtah sawn thing kung reng reng han hmuh tur pawh awm loin, hnim tawi te te bak zuk awm hauh lo a, " chu ahan ti a. Kaphleia'n a nu lam a va hawi nak chuan, a nu Ngursangi biang ațang chuan mittui chu dan rual loh chuan alo luangchhuak a, a fapa in a zawhna pawh chu a chhang maithei lo nghe nghe a, Kaphleia chuan a nu chu va pan nghal vatin, "Kanu, engti zia a i țah maile.? I duh loh zawng sawi ka nei em ni? engmah ka hrelo atin ani.. min ngaidam rawh aw? A lo ti thuai a.

.
Chutah, Ngursangi chuan, "Taite, engmah tihsual i nei hleinem.. min ngaidam rawh aw? Saw lai thlawh hma ka han hmuh sawn, I nu hi ka rilru alo no leh țhin alawm mawle.. "Taite, sawtiang ang ah sawn alawm thlai rah chi hrang hrang te kan thar țhina, kan chaw ei țhin ber buh kan chînna hmun anih saw..a han ti a. An han ngawi deuh vang vang hnu chuan, "Taite, i kal tawh ang le ahan tih chuan, Kaphleia chuan, "Kanu, i hun kal tawh ah chuan, hun hreawm tak tak i tawng ani tiraw? A rawn ti ta khauh mai a.. Ngursangi chuan a thil tawn rapthlak tak tak chu a fap chuan hre rih lo se aduh avangin, a fapa hnenah chuan harsa ti tak leh ahmui pet fan fan chung chuan, "Taite, ka hrilh ang che kha ani mai, Kanu leh Kapa thu ka awih loh avangin min hnawtchhuak a, Mahse, chu chu keima thiam loh vek ani e " tiin ahan chhang thei hram a, a fapa hian a pa thih dan rapthlak tak kha la hrelo sela a duh vang ani.

.
Mahse, chu thil chu, naupang fing bik leh mibik ni tura khuanú'n alo duan, Kaphleia chuan a nu mitmeng ahmuh ațang chuan engkim chu ahmuh hmaih lo chiang kher maile, "Kanu, lo ngawi tak rawh.. I fapa hi ka la tlangval ve dawn alawm.. i chunga hetiang tak a hreawm na nasa tak thlentu che hi chu, nuamsa takin an awm rei tawh bik hauh lo ang le..? I fapa Kaphleia hi tunge anih an la hre dawn khawp mai " tiin, in sehruh țeuh chung chuan a hachang chu alo țhial ta rep rep maile.

.
Ni pawh alo chawhnu her bawih tawh mai a, Ngursangite nufa pawh chu, thlawh hma awmna lam pan chuan an inzui leh ta hnak hnak a, chutia ngawi reng a an kal lai chuan anpiah lawk kawrte lo awmna lam ațang chuan, hmeichhe Aw chuan minpui ruuuu, minpui rawh uuu...tiin' arawn âu ta lawm lawm mai a. Chutih rual vek chuan Savawm âu ruah ruah mai chuan hmeichhe âu thâwm chu arawn zui ta nghal mai a.. Kaphleia chuan a nu bulah chuan a thil ken lai țhenkhat chu dahin, chu aw lo chhuahna lamah chuan atiang hman thiam em em mai nen chuan aduk phei ta nghal a, a nu Ngursangi chuan a fapa chu han dan atum deuh kha ani a.. Mahse, adan a han dan hman rual loh leh biak pawh biak hman loh chuan Kaphleia chu atlan phei ta nghal kha ani a.

.
Kaphleia'n hmeichhe aw lo chhuahna hmun a va thlen chuan, athil hmuh chuan ati ding chiang ve hle mai a, kawrte chhung zau lem lo tak mai ah hian, Savawm sumnga vela lian chuan pitar pakhat, kopang lama puk chhete awmah chuan lo tawmin, a Savawm hlau lutuk chu alo ding sai hlak hlak mai a, Savawm chuan chu pitar chu alo ban zuai zuai tawh mai a, chu veleh Kaphleia chu, chu Savawm lo ding uau uau lamah chuan, a tiang hlam chen vela sei, ahmawr nitin mai a lungpui chunga alo tah hriam hriau hriau țhin ngei mai chuan, zamna chhete mah awm hauh lo chuan, ahan lek kawh phei vah mai a, Savawm'in chutia hnung lama thâwm lo awm ta chu enge ti a arawn hawi leh chiah tih ah chuan, Kaphleia tiang zum tak mai chu, chu Savawm rawn ding uau uau mai hrawkah tak chuan alut ta hrawih mai a, Mahse, chutiang mai a han thi tur ala ni biklo tlat, Kaphleia chuan atiang chu rang lutuk chuan ahan pawtdawk leh hrawk mai a, Savawm thinrim chu a in hrosa nasa kher maile.

.
Kaphleia chuan a tiang ahan phawi rual chiah chuan, chu Savawm na ti lutuk tal vel chu. a duhna tak a chhun tum chuan a in siamrem leh ta nghal thuai a, chutih lai chuan, chu pitar pasal niâwm tak chu, chulai hmunah chuan arawn thleng ve ta chiah mai a, chutia rawltharte in a, Savawm sumnga zet hlauhna chhete mah neilo a alo hmachhawn ahan hmuh chuan, chu putar chu chet mai nachang pawh hrelo chuan, chu rawlthar'in a Savawm hnehsawh tak mai a alo chaih vel chu, pui tange pawh tilo chuan alo thlir dauh dauh ringawt mai a, Mahse, chu putar pawh chu rawn harhchhuak vatin, a nupui kilkhat a hlau thlabar tak a awm chu, hmun him lamah chuan ahruai ta vat a, Kaphleia pawh chuan, a Sawvawm sualpui chu alo ching chau titih ve der mai bawk a...

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2017, 9:09 pm

HNAMCHAWM PASALȚHA KAPHLEIA

EPISODE - 6

Episode - 5 Recap : Mahse, chu putar pawh chu rawn harhchhuak vatin, a nupui kilkhat a hlau thlabar tak a awm chu, hmun him lamah chuan ahruai ta vat a, Kaphleia pawh chuan, a Sawvawm sualpui chu alo ching chau titih ve der mai bawk a.

Chutah, Sawvawm chuan, a theihna zawng zawng rawm sawm khawm lehin, chu hringmi rawlthar a taksa hmun hrang hranga hliam saktu chu arawn pan leh ta hriau hriau a.. rawlthar Kaphleia pawh chuan inring rân chuan, chu Savawm chu alo hmachhawn leh vâng tawh mai a. Chutah, an awmna hmun khawk rum rum khawp chuan, " silai chu arawn puak ta țhuai maile, Savawm chu a awmna hmunah chuan abawk nghal rawp mai a.. Kaphleia pawh chu silai thâwm ah chuan aphu ve deuh zuk nghe nghe a, a thil hriat ngai loh lutuk anih avang chuan, phâwk deuh hrû chuan Silai rawn rikna lamah chuan amit chu ahan len nghal thuai a, "putar pakhat silai kaw hmawr ațanga thil rawn khu chhuak hlet hlet a va hmuh chuan, chu putar thiltih chu ani tih chu a hrethiam ta mai a, chu Savawm zakdawh takah chuan, ngen mû chuan fuh in, ngen mû luhna hnuhma chu apawrh turh mai a, chu Savawm chu aleng awrh awrh a, a zal zui ta nghal a.

.
Khatia silai ahan rik tak țhuai avang khan, Ngursangi pawh a fapa awmna lama rawn tlan lawm lawm pah chuan, "Taite...taite, i țha em? Khawnge i awm..? tiin, thlaphâng aw tih hriat tak leh aw țial ruan chung chuan arawn âu ta chûl mai a, putar te nupa lah chuan, Savawm lak a a nupui lo chhantu, rawlthar huaisen hlauhna apianpui velo emaw tih mai tur khawpa an mahni hmachhawn zawnga lo dingkak hah mai lam chu thlir in, a thawmhnaw țet hnenghnuang mai leh an mahni makti hmel taka arawn en mêktu chu, chu putar chuan biak alo tum lai mêk niin, chutia nutling mangang aw alo chhuah takah chuan, aw lo chhuahna lam chu an han hawi vat a.

.
Chuta an thil hmuh chuan, chu putar nupa chu ati hrilhhai'in an mengphar awn awn mai a, Nu, la valai tak mai, athuam inbel țet hnuang mai leh asam bawrchhawr zet mai nen a rawn tlan hnuang hnuang mai an han hmu zet mai chu, khawdang hawisawn nachang reng hrelo chuan anlo thlir dauh dauh mai a, Mahse, chu putar chuan thil awmzia chu rawn man thiam vatin, hemite nufa hian harsatna namên lo an tawk ani tih hriain, alo be nghal thuai a, "Ê Mami, i fapa chu engtin mah a awm love.. "hei, i fapa hian he Savawm lak ațang hian ka nupui thi mai tur angaih chu, ama nunna thâp tak meuh meuh in alo chhan asin! fapa huaisen tak i nei ani tiin alo chhawn thuai a, "Kaphleia, pawh chuan a nu lam chu pan vatin, "Ka nu, i fapa hi engtin mah ka awm hleinem, he ramsa hlauhawm tak lak ațang hian ka him tawh e.. ka pu sawn athat tawh alawm tihpah chuan, " ahmangaih a nu in amah angaihtuah luat avanga hlau leh khur der der a lo ding chu ahan kuah nghal vat a.

.
Chutah, putar chu Ngursangite nufa awmna ah chuan rawn phei vatin, "Mami, fapa huaisen tak i nei ani.. "Vala, i huaisenin i nu tan chuan fapa țhatak i va han ni dawn tehlul em! Engtin nge kan han koh ang che le? a han ti a, "Kaphleia chuan, "Ka pu, ka hming chu Kaphleia ani e.. ka huaisen vanga hmachhawn pawh ka nih chiah bikloh kha.. Ka pi kha tihnat atum a ka hriat avang leh khatiang tak khan, kha ramsa kha ahlauhawm ang tih ka hriat loh avang chauh lo bei ka nia, khatia min rawn beih atum takah chuan, beilet lo theilo dinhmun a ka din zawk vang ani e " tiin inngaitlawm tak chuan alo chhang thuai a, chu putar chuan, nang hi zawng naupang dang i ang lo hle mai maw?? I in ngaitlawm thiamin, i piante leh i rilru puthmang chu a pasalțha nunzia râih mai ka ti.. Ka fapa Hrangvela kha min ti hrechhuak vawng vawng mai a, ahan ti deuh sup a.

.
Ngursangite nufa pawh chuan, chu mite nupa chu hlauhawm an nilo ani tih hriain, Nugursangi chuan an harsatna an tawh dan tlangpuite leh an mahni pui theitu tur mi an zawn mêk thu chu hrilhin, Bûkpui khua ațanga lo kal an nih thu leh kal kawngah rei tak kan thâng tawh thute chu, putarte nupa bulah chuan ahan sawi siam siam a, Mahse, hnawhchhuah an nih dan pawh thiam tak a sawiin, thu khuh thei ang ber chuan, an harsatna tawh dan chu ahan sawi ta zung zung a, "chutih lai chuan, pitarte chuan ngun tak a lo ngaithla in, tun maiah khan thihna a hmachhawn ani tih reng pawh hre tawh loin, Ngursangi thilsawi lai chuan amittui alo luang zawih zawih a, Ngursangi'n an thiltawn ahan sawi zawh meuh chuan, putar pawh chu ahan ngawi vang vang a, Ngursangite nufa chu ahan entawn vei zak zak bawk a.

.
Chutah, putar chuan, "Mami, kei hi Hrangthanga ka ni a, i fapa'n arawn chhan tak pitar saw ka nupui niin, ani saw Sawiveli ani e, "tiin, an fapa an chân tawh thute chu hrilhin, kan khua hi Zopui khua niin, in zahnih vel kan ni ve a, In duh anih phawt chuan kan in ah in tan hmun a awm reng e, kei ni nupa chauh hi kan ni mai a, kan khua ahar țhin khawp asin. Kan Lalpa hi lal fel tak ani a, ani pawhin a lo khawngaih thei em em ang che u.. vawiin hian kan hlo thlawh kan zo ve a, hâwn tumin kan lo inbuatsaih mêk a, in hriat ang khan kan nu tui chawitur Savawm nen khan an intawng ta hlauh mai kha ani a, i fapa awmlo selang chuan tunah hian ka nupui nen hian damin kan kir leh hauh lo ang le..? tiin " Kaphleia, hnenah chuan lawm thute chu ahan hrilh leh ang mawlh mawlh a.. chutia lawm thute a han sawi luam hnu chuan, Ngursangi hmingte chu zawtin, in duh ang angin min ko thei ang, "Vala, tan saw chuan min pû tur kan ni a, nang chuan i duh anih chuan, Ka nu, Ka pa, ti pawhin min ko thei vek ania, "tiin, biak tlangnêl tum pah ni fawmin a han be vei luam a, Chutah, hawh teh u..? Thlam lamah in thlakna tur pawh a awm kha i phei phawt teh ang u..? Nakinah kan Savawm sa hi chu kan va la leh mai dawn ania ahan tih zawh chuan, amah chuan hma hruaiin a kal ta nghal a.

.
Ngursangi pawhin, chumite nupa chu ahan hmuh phat ațang khan, aruk tak chuan a ngaina nghal em em mai a, ahmangaih em em a nu leh a û chu ahrechhuak nghal uar uar mai reng a, Mahse, tunah chuan chutiang han ngaihtuahna hun ani rih lo tlat, pi Sawiveli chuan duat tak chuan, "Bawihi, ka hmuh che hian, fanu thar ka nei nimai hian kan hriat pek chu le.. in lainatawm nufa hle mai tiin alo be vei siam siam bawk a, Kaphleia chuan, "Ka nu, kan zung khawmuang lawk ange ka rawn um nghal ang che u tihpah chuan, a nu te an kal liamta maw..? tihah chuan, Savawm sumnga vel zet alian chu, kopang lamah chuan aput rem thei tur chuan ahan hnuk hrut hrut a, put rema ahan siam hnu chuan ahan pu ta nawlh mai a, rawlthar thaza rual leh mibik tih takah hnehsawh zet mai chuan, a nute kalna lamah chuan, an Savawm thah chu akalpui ve nghal vawk vawk mai bawk a.

.
Ngursangi pawh chuan, chumite nupa bulah chuan lawm thute chu sawi mawlh mawlhin, an mahni duh ang ngeiin, nu leh pa atana pawm tur chuan, arilru pawh lo siam ve nghalin, a fapa chu mihring bula khawsa țhang lo anih avanga hriatthiam angaih nasat tur thute chu ahrilh ve ta nghal bawk a, pu Hrangthangate nupa pawh chuan an hrethiam hle nghe nghe a, pu Hrangthanga phei hi chuan rin rûk dan alo nei khiau tawh zawk a, hemite nufa hi ramhnuaiah kum enge maw ti chhung chu an khawsa tawh ani tih leh Ngursangi hmun leh hmuna ahan hmuh khan, nu hmelțha tak ani tih chu phat rual ani lo tlat, khami avang khan rindan alo nei diam tawh mai hi ani a, alo rin lawkdan chu tam takah chuan dik mahse, hemite nufa hian, alo rin phakbak bakin an tuar ani tih erawh ahre tello ani.

.
Ngursangi'n a thuamte athlak mêk lai chuan, thlam kawmchar lama thil rawn ri deuh dawp thâwm chuan, Pu Hrangthanga chu a tlanchhuak nghal vat a, chuta a thil va hmuh chuan ati phu zawk thei nghe nghe a, Savawm sumnga vel zet alian chu rawlthar Kaphleia chuan arawn pu thleng chu niin, Chutah, pu Hrangthanga chu ahan chek tlak tlak a, "Vala, i va han chak ngai ve mawle..? hetiangte chu pa narân pawhin an zawh loh tur ani asin! alo ti thuai a," Kaphleia pawh chuan, rit ti hmelpawh pulo leh hlim hmel sarh chuan, "Ka pu, ni e, nakin a va lak leh kha buaithlak mai maiin ka hria a, ka rawn thlen thei țawk ani e " ti a han chhan pah chuan, "Ka pu, hei hi ami in chenna chu tiin, " thlâm chu ahan kawk va va a, pu Hrangthanga chuan, chu rawlthar chu lo thlir dauh dauh pah chuan, "Vala, hei hi chu kan chenna chu nilah love.. kan thlawhhma enkawl tur hian ramriahte angaih țhin avang leh chawlh hahdamna tura kan hman țhin anih hi, tiin alo chhang ve nghal thuai a.

.
Chhun chawte chu chhum lehin, Kaphleia tan chuan chutiang chaw la ei ngai heklo le.. tui a tiin, a ei hnem narawh e, an zavaia puar el euh a an ei hnu chuan, an Savawm chan darh sa chu, an mahni phurh theih tawk țheuh phur tur chuan an hanin buatsaih ta sang sang a, " Kaphleia chuan, adar pahnih leh abawp pahnih chu aphuar hrang ve vein, vâu a athingtuai va lak hmang chuan akawt ta nawlh mai a, pu Hrangthangate nupa in, "Vala, arit lutuk ang, phurh tura lawi pawh kan neive dawn hleinem.. dah țhen rawh an han tih pawh chuan, Ê, Ka pi, Ka pu , ka thlen ve thei em em ang.. thildang phurh tur ala tam kha alo ti liam vei puat a, Ngursangi pawh chuan, "Taite, khatia naupan laia rit lak lutuk kha chu ațhalo asin! i țhante pawh atih țhut phah thei ania.. alo ti ve bawk a, Mahse, Kaphleia'n rit kalo ti ta deuh anih chuan kawng lakah pawh kanin chhawk thei alawm atih tlat avang chuan, mahni phur țheuh phur chung chuan, Zopui khawlam pan chuan an kal ta chhet chhet hlawm a.

.
Kal kawngah chuan eng eng emaw sawiin, an inpawh tlang nghal hle mai a, pu Hrangthanga chuan Kaphleia han chevel chu hmuhnawm ati in, achak dan em em maite chu mak ati hle nghe nghe a, losûl hawn hun hma a hawng anni bawk a, nî tlanga țang tawng chen vel ala awm tihah chuan, Kawtchhuah chu an thleng chu ani der ta mai a, Chutah, pu Hrangthanga chuan, "Khaile, in țhu chawl lawk ang u hmiang.. Savawm sumnga lai hawn ve ta nafam chu ngawi reng a khawchhung luh zawng thildik ani ngai love, " tiin, anphur chu an han nghat ta tliar tliar a, Chutah, pu Hrangthanga chuan, a Chênrâng chu chung lama han lek vah chung chuan..

Chhiman e, a lo thawk e,
Thanghniang fur fang a tlantu e;
Vawmphuai e, siahtung ning law kan than e,
Ka run i rial hlah law..

Tiin, a han chham vang vang a, silai chu a puak ta dur mai a, Kaphleia tan chuan chu thil chu a vawikhat hriatna ani bawk a, a makti chu alo khi ver ver mai a, Chutah, khawchhunga naupang tualchaite chuan, chutia hlado chham thâwm an han hriat chuan, kawtchhuah lam pan chuan, an rawn riat ta nak nak a.

.
Chutihmêk lai chuan, Zopui lal in chhung lamah ve thung chuan, Lal leh a khawbawlte tlai lam zû chu anlo khiat leh khalh khalh tawh a, an kâi țha chherh chhawrh tlang hle nghe nghe a, chutia hlim tak a an lo nuih bawk bawk lai a, hlado chham vang vang thâwm fiahlo ruai chuan an hre hlawm a, chu hlado chhamtu chu tunge ni ta ang le? tiin, an pasalțha zinga tu emaw ber hming chu lamin, an rin thu chu an lo sawi liam liam hlawm a, Chutah, an zinga Upa pakhat chuan, tunge ringdik kan ti ta sa sa, arpa chhiarkhuan ngat inchawipui ngam che ule..? A han ti chiah mai chu, an rui phur tawh tlang bawk a, Chutah, Upa Vungluaia chuan, a fapa Rumvunga ramvak hlawhtling anih leh ngei ring chuan, keizawng Arpa chhiarkhuan tih velchu anêp ka ti tlat mai ka ti.. ka Vawkpa sut nghak chawipui ngamte hi in awm mial lo maw..? arawn ti ta chheu mai a, Chuveleh, Lalpa ho ho chuan, ngam tuk e a, i fapa anih loh chuan i vawkpa sut nghak chu i chawi anga, i fapa a lo nih tak chuan, Kei, in Lalpa Dokulha hian ka vawkpa khu ka chawi ange a han ti chiah mai chu, lal in chhung chu hlim âu thâwm chuan ari ta luih luih mai a, Chutah, Lalpa chuan, " khaile, tlangâu pa, nangin kawtchhuah hlado rawn chhamtu chu tunge anih zuk chian vat tawh khai" a han tih chuan, tlangâu pa "Luaithanga, pawh chuan engkhaw dang sawilo chuan, kawtchhuah lamah chuan aliam zui ve ta nghal a.

.
Kaphleia'n chung naupang han hmu chu hmuhnawm a tiin, a hlim hle mai a, khawchhung an han luh zel chuan, kawt laia mipa naupangin kâwi anlo hnâwk laite, hmeichhe naupang in kawibah te, nula țhenkhat buh lo deng awrh awrhin, naupang țhenkhat chuan, kha.. a lu lamah i awm a meihawl a chan daih kha ti a an Sephûng lai lo in hâu ngal ngal maite chu, Kaphleia tan chuan nitla van vaduaia han thlir tham an tling na meuh mai, tleirawl țhenkhat lah chuan, chutia mikhual rawlthar hmelțha tak an han hmuh chuan, an lo indem fiam vel a, țhenkhat an lo lâi kual vei bawk nen, chumi ni zet chu Kaphleia tan chuan, thil hlimawm ber a va ni chiang em!

.
Pu Hrangthangate in an han thlen chuan, naupang ho leh țhenawm khawvengte nen chuan an ri laih laih a, chutia nutling leh rawlthar rawn telve chu an lo hmu duh hle mai a, pi Sawiveli leh Ngursangi chuan ei an han rel nghal zung zung a, Hrangthangate putu pawhin sa chu lo chan zo ve thuai in, sachhiah turte chu ahan dah hrang thliat thliat a, pu Hrangthanga chuan Lal sachhiah kengin, Ngursangite nufa chanchin thlen thuai tur chuan lal in chu a han chuangkâi ta vat a.
.
Lal in a han thlen chuan, lal leh upate pawh an lo la awm țhap mai a, pu Hrangthanga chuan, Ngursangite nufa nen a an intawn dante leh arawn hruai tak dante chu a han sawi ta vek a, Lal Dokulha leh upate chuan ngun tak chuan lo ngaithla a, Ngursangite nufa thil tawn chu mak an ti tlang hle a, Chutah, Lal Dokulha chuan, Awle, engpawh nise nang kan pasalțha chhuanvawr ber mai pa i ni a, nangin i in a awm tura i lak theihte chuan chu tluka an ni nufa tana thil lawmawm chu a awm kherlo ang.. Mahse, ka khua leh tuia khawsa tawh tur an nih avangin, ka upate nen hian an ni nufa hmel chu kan va hmu duhve awm ve " tlangâu pa nang i zuk tlawmngai dawn ami niang ahan tih rual chuan, tlangâu pa chu, Ngursangite nufa ko tur chuan aliam zui leh ta nghal a, tlangâu pa thang hlan chuan, hlado chham chungchang vela an in chawidan velte chu sawi chhuakin an ri leh dar dar hlawm a.

.
Lal leh upate'n, Ngursangi kâ ațanga thil engkim an han hriat meuh chuan, Lalpa Dokulha chuan, " Bûkpui khua ațangin himdam takin in rawn thleng thei ani a, khuavang lasite'n an veng tlat che u ani ngei ang le..? Tunah chuan ka khua leh tui in ni tawh e.. thlamuang takin hekhua ah hian in awm dawn ania.. tiin, an in thlah ta a.

Awle duh tawk phawt ila.. Ka pa damloh avangin story hi ka chhunzawm lawk thei lova in mi hriatthiamna ka han dil nghal bawk a, min lo țawngțaipui tute zawng zawng chungah khan kan lawm hle ani tih min lo hriatsak ka duh a, min lo țawngțaipui leh zel turin ka han sawm bawk che u ani e.. a lo phuai luai deuh anih pawhin min lo hrethiam dawn ania.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)