PASALTHA ROLIANA(Taitea) BY Hmangaih MT Chongthu 1 -46

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALTHA ROLIANA(Taitea) BY Hmangaih MT Chongthu 1 -40

Unread post by Ngaia » October 31st, 2017, 6:01 pm

PASALTHA ROLIANA (Taitea)
PHEK 41 NA.

By :- Hmangaih MT Chawngthu.

#Hei i chaw hi ei zo phawt rawh ti a, Sihpui khaw nu ten an fa te hnena an thu sawi chuan awmzia anei lo tlang kher mai. A thleng hnuhnung bik leh hmu hnuhnung bik nih hlau in an chaw ei lai chu an tlan san nawl nawl maia, an hmaa tlan te pal khuk, khawnglaia vaivutkhu leng chum chum pawh chu an pawisa tawh hek lo, anthian ten, nangaiin ka hmuhmasa zawk an tih khumang tih mawlh chu an hlauh ber ani. Kawtchhuah an tlan thlen ruala Sele lu lianzet mai, aki lehlam lehlama tawngchen zet tur zar duai mai an hmu hnu phei chuan an phur in, anthian larawn thleng ve lo te chu au in an te tengtung maia, an hlim zia chu hrilhfiah zawh rual ani lo. Mahse, chutia hlim zeta Sele lu ringawt ngaihtuaha an rik chelchul lai chuan, kawtchhuah lungdawh chunga thu, ankhaw tlangval Neihbawiha, ramchhuak zinga tel ve chuan mitmeng rang ruk chung leh meng kalh ru chung hian alo thlir reng ani tih an han hmu zet chu le, an hlau nasa ta maia. Tumah entha ngam leh abul hnaia kal ngam pawh awm lo in an ți hra maia, hlimtaka au ri nuaih nuiah thawm pawh chu hriat tur abar pawh a awm ta lo. Tlangval rual thenkhat anphur chhawk tura lo kal te chu rawnthleng zui ve nghal in, khawchhung lam pan in an kal zui ta nghala.

#Tlangval thenkhat in Lal sa tur, sarep bawmrang khat teh meuh phur chunga Lal in lam an pan lai in, Sele lu chu a kap tu valupa pu Dokhuma te in lam pan in Naupang rual chuan an lo zawn ve bawka. Hun reitak chhung Sahrang chu sawi loh, sa tenau takngial pawh Sihpui khua in an kah tawh ngai loh hnua, chutia, hlawhtling taka an pasaltha ram chhuak te an rawn hawng chu an lawm tlang kher mai. An ramchhuah na a an thil tawn te leh tum aia an thangrei tak chhan te chu, val upa pu Dokhuman Lal Sairuma hnena a sawi ang hian sawi chhawng ta mai ila atha ange..

#Khatia leilung lan ruala kan chhuak ta khan, Tumpang hnu thar an hmuhna hmun, Kharzawl khaw ho nena kan in rina bul Keisih ramngaw lam kan pan ding nghala, tlailam Ni tlatur pawh suk chen lek anih tawh ang tih tur ah kan tum ram chu thlengin, kawrte kam buk sak na hmun atana rem zet kan hmuh ah chuan bukte sa in kan in nghat fel ta a. Tlangval ten zanriah tur buatsaih leh thing muhtur te an buaipui lai in, chawhmeh tur remchang te melh pah leh sahnu thar awm leh awm loh en thlithlai pah in in kan pasaltha te nen kan chhuak zui nghala. Kei leh kan pasaltha Ralngama chuan Keisih awmna lam chu pan nghal in, ahmun kan va thlen chuan sahnu chu alo chiar dep dup mai, a hmun hma azau in tui hna lah atha, Sa tinreng in an chhawlhal thawidam nan an pan ni ber in alang. Tichuan ngun taka kan han biha Sih kan han kal hual tak ah chuan kan beisei ang ngei in, Tumpang chal ni ngei tur hnu, a rahna khuar pawh kut hniha hup tham zet tura lian chu a lo khuar kelh kulh maia, a hnu atanga alan dan chuan zinglam ah chu sih chu atlawh ngei ni in kan hria a, atuk lama beih zui atan kan haw san ta ani..

#A tawi zawngin kan sawi tawh mai ange.. zing khawvar rual in chawthing kan bar sawk sawka, tlangval pahnih buk nghak hnutchhiah in a dang zawng chuan Keisih lam chu kan pan ta nghal a. Keisih ka kan va thlen chuan kan sa duh leh kah tuma kan veh lai mek chuan, keini ai in minlo hmu hmasa zawk ani tehchek aniang chu, sihtui dai ri burh kan hriat ruala kan va hawi phei nak chuan, Sih khuap tu mual te zum pahnih inkara a ki inkheh fai thaua tawh leh hmuhnawm thama ki ropui nei tu Tumpang chal kal liam lai chu kan va hmu ta a. Tanhmun te siam rema kah na hman awm ta hek lo le, a hnu chu chhui in kan um zui ta ngat ngat maia, chu Tumpang chal lah chuan minti phur tawk leka mi siam lah athiam narawh, hlataka min kalsan duh mang si lo, kah dawna kah hleihtheih si loh hian kan hma lawk ah akal zela. Engemaw chang chuan hmuh phak mai ah te hian a kal ngauh ngauh mai thina, han kah na chi em lah chu ani lo in a sahuat ah te kan kap thei anih si loh chuan, kan chhaih kawlh ani lek fang dawn bawk nen..

#Chutiang reng renga kan in um kan in um tak ah chuan, a tuamai pawh chuan khaw hawi nachang kan lo hre hauh lo chu ni in, khua chuan ngawpui chhung ah min thimhnan ta der maia, kan kal na ram chin lah chu, kan sa um ringawta rilru kan pek atalangin ramchin en nachang reng reng kan lo hre lo bawk nen, khawilai hmun ah nge kan awma, khawi khawram chhung nge kan thlen tak tih pawh kan hre ta lo tawp mai ani. (Pi leh pu te khan an sawi fo thin.. heng ramsalian ho Tumpang leh Sai te hi an kal chak in, nikhat thilthu ah pawh ram hla tak tak an kal thleng hman thina, a hnu chhuia um tu ten an kal na chin an chhinchhiah na chang an hriat loh phei chuan, ramhnuai ngaw kar ah bo palh a awl em em ani, tiin an sawi thin..) Kan chawthing bawk te chu tan hnem ah bar in, chulai hmun ah chuan kan riak ta ngawt maia, atuk zing kan han tho chu, kan sa um chuan min lo kalsan hla lo tawp mai chu ni in, kan piah maia tlang pakhat ding, a mual intanna tlang bulthut zawn vel ah chuan, Ni chhuah sar ah a rawn kiu ta ruai ruai maia, engdang kan ngaihtuah chang leh ta lo..

#Chutiang reng renga hun kan hmana, kan sa kah tum kap thei mai si lo, beidawn lohna tur tawk vela athawm hriat tur awm reng chung si chuan, ni thum ngawt ram palaileng ah kan vak ta maia, theirah leh tumbu te, eitheih hnahnem eng eng te emaw nen kan pum pui chu hnawh puar in, buk kan chhuah san atanga ani li na tlai lam ah buk kan thleng leh thei ta hram ani.. Chutia buk kan thleng leh ta chu buk nghaka kan dah tlangval Ramrehloa hmel chu angui in, mut mu tuah ngai lo tih hriat zet hian a lo meng pawr fap maia. Achhan te kan zawha amah in asawi dan chuan, buk nghaka a awmpui athian pa Neihbawiha chuan buk bul kawrtea chakai chu man in, mei ah alo rawh ani awm e.. Chutia a rawh pah te chuan, ramhnuia chakai rawh hi atha lo, ramhuai in an ti buai duh te hi an ti thla zena, kei ka awih zawng ani ve lo tawp mai. Thil thleng tur chiang sa, engemaw hmehbel theih tur remchang alo awm tak vanga, puh kual vel mai mai kan ni in ka hria.. Tun ah hian Ramhuai in min tih buai an tum anih pawh in Chakai ka rawh leh rawh loh vang ni lo in, min tih buai an tum hrim hrim vang ah ka ngai ang, an ngam anih chuan mi rawn ti buai chauh teh se, an awmna puk thleng rawk in ka um ani mai, tiin a in hrosa ta mai ni awm tak ani.

#Chumi zan atang chuan Neihbawiha chu a buai tan ta a, a mah apa lian in a chak bawka, Ramrehloa tan engtia han tih theih ni si hek lo le, Ramrehloa nghawng ah te chuan reh sak in a lo in siamchhiat khum na sa mai thin hi ani awma. Chhun lam ah lah engmah hre lo ang mai in pangngai zet hian a awm ve leh mai zel bawka, Ramrehloa lah in a hlau tawlh tawlh mai bawk nen, kan thang bo chhung zawng chu chhin khat te pawh chhing ngam lo in hun a lo hmang ni awm tak ani.. Ramrehloa sawi ang ngei in Neihbawiha hian tibuai tu anei tih chu kan mit ngei in kan hmu in kan hre ve ta a, engtia han tih chi nge ni ang tih pawh a bangbo thlak ngei mai. Chung vel chu ania kan thil tawn dan tlang pui leh khawchhung lam ngaihtuah em em chung pawha kan rawn khawtlai tak chhan chu ni. Kan vanneih asiam in, beidawn tawh lam ah Sa therhlo engemaw tal kah tur te a awm lawm ni ti in Keisih chu buk kan thlen ni tlai ah ka va pan leha, tuna kan rawn hawn tak Sele hi atui dawt lai ka va nang hlauh maia, tlema tlem ah kut beng in kan rawn let lo hram ani e. Mit ngeia han hmuh tak ah chuan, a pui chuan a pa chal chu alo khan lo vet vet kher mai, kha Ramsial pachal kha chu han kap thei ni ila pialral lam thleng pawh in kan hming athang ve deuh tur, ati ta a. ( Tumpang leh Sele chungchang ah hian hriat dan leh pawm dan a in ang lo fur maia, he tah hi chuan keima rin dan leh u pa zawk te ka zawha min hrilh dan angin ka ziak ta mai ani e, hei hi adik ber e ka ti chuang lo, mahse, kei ma rindan leh pawm dan erawh ani thung.. Tumpang hi a pa sawi na, Sele hi a nu sawi na, a lam khawm nan Ramsial..)

#Val upa pu Dokhuman a sawi tak ang hi, an ramchhuah chanchin leh tum aia rei an thang nachhan chu a lo ni ta a, khaw lama mi te awm ti nuamlo rum rum khawp in thang rei mahse, Tlanglian khua te run tura an hun ruat thlen hma a an rawn thleng ve leh ta hlawl chuan, Sihpui khaw mipui te awm pawh ati nuam leh deuh in an thaw huai mai ani. Chutih lai in buk nghaka an dah tlangval pahnih te erawh, an chung ah eng harsatna nge thleng zel dawn tih sawilawk theih ani tlat lo mai. Tlangval pakhat zawk Ramrehloa chu, a buk nghahpui pa in tihthaih paha a lo in siamchhiat khum vel thin chu a lo hlau ngang nitur ani, In athlen rual rual chuan akhua chu sik zui nghal in a mu hlawm reng maia. Zan mu loa rei tak hun alo hman na chuan a taksa a ti chau zual deuh pawh ani mai thei e. Mahse, Ramrehloa dinhmun ai ngawt chuan Neihbawiha dinhmun chu tha lo ve leh chhawng tak ani, In an thlen zan atang chuan vengtu awm loa kalsan ngam pawh hi ani tawh reng reng lo maia, a chet dan leh khawsak dan chu amak in, tibuai tu leh chenchilh tlat tu awm ang mai hian, a mah chu a in be mawlh mawlh maia, midang in biak an tum lah anbiakna hre awm pawh in a awm der bawk si lo, a khawsak dan chu mak tak ani ringawt mai ani.

#Chutia Ramchhuak te an rawn thlen fel tak ah chuan, Roliana pawh chuan hmanhmawh taka zanriah te bar zawk zawk in, duhtawk angah hnu chuan leikapui lam chu apan leh ta hriha. Leikapui ah chuan ngawi renga ding in, athian te hnenah chuan engtin nge sawi ila tha ang aw, tih te chu angaihtuah rauh rauha. A rindan tak ah phei chuan, ani rinthu thil mai chu athian te pawh hian chawtak khuk in an lo khuk pui duh pawh abeisei ngam chiah bik lo ani. Rinthu mai leh finfiahna awm lo, tunge chutianga mahni khua lo phatsan tu chu tih pawh hriat loh leh rinhlelh kai deuh takngial pawh atua mah awm bawk si lo chu, Roliana tan pawh abangbo thlak viau ngei ang le. Thudang chu thudang ah lo dah hrih i la, Roliana ngaihdan ang hian mahni khaw phatsan tu chu lo awm ta pawh nise, engtin nge azawn chhuah anga, engtin nge ahriat theih tak ang tih chu ngaihtuah tham tak ani hrim hrim mai.

#Chutia a ngaihtuah na zawng zawng hmanga thil nithei awm leh achhan nithei awma lang te suangtuah na hmanga a chhut kual vel lai chuan, Sihpui naupang tirhkah rual lek lek te chuan, an chhungte ramchhuak sarep rawn hawn chu phur taka thenawm khawveng te sem kual in, nuam ti em em hian an tlan kual zak zak hlawma. Keinin tawngkam satliah maia kan hman "Sem sem dam dam, Ei bil thi thi thi," tih chu an ni chun asawia sawi mai duh tawk lo in, atak in an nun pui thin. Thil pek pe tu nih hlim awm zia leh pe thei tu din hmuna din ropuina chu an fate te hnen ah ataka zir tir in an kawh hmuha, an puitlin thleng pawha chu nunze mawi tak chu an chhawm theih nan an fate thisenzam ah an than hnan tir thin ani.

#Rolianan eng eng te emaw ngaihtuaha a din ngawih reng lai chuan, hmeichhe tleirawl Zakunga nau chuan khoa a sarep chawi chu Roliana te inchhung ah luh pui in sarep tam tham fe mai chu arawn pe a. Lawmthu lo hrilh mawlh mawlh tu te thusawi pawh chu ngaithla muang chang lo chuan rang tak in atlan chhuak leh nghal a, lawmthu sawina tawngkam dawn belh teh chiam tul in ahre lem lo, a thil vapek a te chu an lawm em em dawn tih ahriat sa miau avang in chu chu a thinlung hlimna thlen tur in tawk ati em em ani. Chutia in atanga achhuah leh rual chuan leikapui chunga ding Roliana hnen ah chuan, ka u Rolian, ka u Zakungan kan in ah mi rawn sawm la, pu Dokhuma sa lu va lawmsak ve ang hmiang ati, tiin ahrilh ta a.

#Pu Dokhuma te in ah chuan patling rual chu salu lawm in an ri bung bung maia, then khat in an zu bilh thlum tha zet zet chu an rawn pu lut bawk. Zan tairek thak thlenga titikhawchang sawia an inkawm ho hnu leh Tumpangchal ki ropui lutuk nei chanchin sawia an phul hlut hnu chuan an tin darh ta hlawma. Roliana erawh chuan hun an ngah tawh loh tawh zia chu hria in, midang haw rem hun chu a lo nghak ve ngat ngat maia, athian te ramchhuak chau lak ah pawh chuan a in thlahrung zo tawh hek lo. A thiante pahnih pawh chuan, chutiang taka Roalianan angaih pawihmawh leh arilru ti nuamlo tu chu holam taka lo ngaihsak ngawt chi ani lo tih chu an hai bik reng reng lo. Pu Dokhuma chuan Rolian inthlahrung mahta che, kan chau emaw i tia nge, chauhna tham engmah kan ti reng reng hlei nem, atul anih chuan zankhua pawh in kan meng mai ang chu, engthil nge chutiang taka i rilru lo kap tu chu han sawi ta che, a lo ti ve bawka.

#Roliana chuan, thildang sawi hmasa ta lo chuan laiphir dawtsei tha zet mai leh chempui hlaitha hlephlawp aneih thar thu chu athian te chu hrilh hmasa te te in, an khaw thir deng pu Neihțiala chunga alawm zia te chu an sawi hmasa leh riha, chu thu an hriat chuan athian te pahnih pawh chu an hlim kher mai, hmuh hlan an nghah hlelh thu leh hman chhin an chak thu te chu an sawi chula. Tichuan Roliana chuan, thildang chu dah tha in a rilru leh aawm ti nuam thei reng reng lo tu chu a sawi tan ta a.

#Pu Do, nguntaka ka ngaihtuah in vanneih vang ringawta Tlanglian khua te khan kan pasathate kha rawn hmufuh an nih hi ka ring thei tlat lo. Kan pasaltha te bihrukna kha hre sa ni lo se, engvang in nge khalai khamko chung sang zet ah khan an pasatha te kha engvanga lo bihruk tir nge an nih tak ang. Kan inbeihna ah khan chak loh palh pawha silai hmeh puah inring sa hrim ni se, khalai khamko chung aia hnai zawk leh bihrukna remchang pawh tha tak tak awm na ah khan engvang in nge an bihruk zawk loh..? Pu Do, ngun taka ngaihtuah chuan thil mak tak ani in ka hria, min rawn kap tu pawh kha a bihrukna hnai deuh chu nise, a duhna lai tak ah mi rawn kap in, kei pawh hi tun ah hian tawng tur ka awm tawh hauh lo ang. Tin, Tlanglian khua te khan kan in beih hma kha chuan min zuam in, engtia tih tham ah tehchiam min ngia lem lo tih chu an khawsak dan leh tawngkam an thlahdah dan ah a chiang em ema, chutiang khawpa mi zuam si chuan engvanga kha lai khamko sang zet ah khan tanhmun lo siam ru nge an nih a, kan pasaltha te bih ruk na lai duhtawka an kah theih ngei na tur hmun ah khan engtia tan hmun lo thlang fel sa thei nge an nih tih hi ngaihtuah tham atling asin.. Chung zawng zawng aia min la ti buai tu zawk chu heihi ani, ka rin dan anga Tlanglian lam lo pui ru tu leh kei ni lam min phatsan ru tu hi an lo awm palh anih vaih chuan, tun kum thum kal ta a Tlanglian khaw ho laka in chan ang tho kha tuna kan chan tur hi ani ang. Kei hi mahni khua phatsan tu te avanga chhungkaw mumal leh ka khua tia sawitur pawh nei tawh lo, ramhnuaia hun reitak lo vakvai tawh ka nih avang in heng thil te hi ka ngaihtuah lo thei lo ani, ati ta a.

#Rolianan angaihdan mai ni lo, thil nithei awma lang te chiang taka asawi tak ah chuan, pu Dokhuma te pahnih pawh chuan han hnialna tur awm reng an hre lo. Chumai ni lo in, ngaihtuah na chang pawh an hriat loh leh vanneih sahtliah vang maia an lo ngaih liam ve ngawt chuan, engthil emawtak fawmkem tel anei thei ani tih an hriat chian tak ah chuan, Roliana chu mak ti zeta en in an hawi ka hau ringawt maia, Roliana fin zia leh thil a chhut thiam zia chu mak an ti kher mai. Rolian, i thu sawi ah hian hnial na tur che ka hre lo mai ni lo in, i sawi zawng zawng hi a dik ngei pawh ka ring hlel lo e, mahse, ka rilru ti buai tu chu he khaw mi tute pawh hian, chutiang ti duh tur awm leh rinhlelh kai awm deuh pakhat te pawh sawitur kan hre lo hi ani, pu Dokhuma chuan ati thawp sata. Zakunga pawh chu angawi mai mai thei bik lo, thianpa, i thluak chanve angtal thluak te hi han nei ve in, i ngaihtuah chanve ang lek tal pawh ngaihtuah ngaihtuah na te han nei ve ni ila, tlemin i tan pawh ka tangkai deuh tur anih vei nen. Hei, Tlanglian khawho run tura kan hun tiam lah chu nitam a awm bar tawh der mai si loa, engtin nge maw kan tih tak ang le. I thluak tlemazawng tal kha han hman belh leh hlek la, chutianga kan khua phatsan tu te chu an lo awm tak tak te anih vaih chuan, i rekchhuak thei mai lawng maw. An lo awm lo hlauh anih leh avanneih thlak ani maia, mahse, i rin anga an lo awm palh hlauh te ani vaih zawng in kan chan tur chu a ropui lo hle ang le, ati ve ta hial a.

#Roliana chuan athiante lam en chung chuan, hei vang hi alawm hmeichhe tlangval hmangaihtawh laileng ang maia inrawn thlenhlan ka nghah hlelh em em ni. Thil engmah chiang si lo, rinthu mai a thil ti tur chuan mualpho lah ahlauhawm in, tute mai pawh hi nangni anga rinngam leh mualpho atul hun ah pawh min phatsan lo tur tumah thian ka neih ka hre si lo a, tin, thurawn te min pea, tihdan thazawk te min hrilh thei tur chu nangni bak an awm lah ka hre hek lo, chuvang chuan in rawn hawn hun hi ka lo nghak ngawt ngawt mai che u anih hi, tiin an hrilh ve leha. Pu Dokhuma chu a in ngaihtuah muk kher mai, chutah muangchanga rawn hawi chhuak in, Rolian, Nu ho zinga sazu zawn tum nen a beidawn thlak dan a inang reng in ka hre maia, thurawn tha zawk han phuhchhuah tur reng ka hre lo mai ka ti, engpawh ni se, Tlanglian khaw run tur chuan fimkhurtaka kan chet chhuah chu angai ngei dawn anih hi, tiin angaihna ahre lo takzet ani tih chu ahmel ah alang chhuak thei hiala. Chutah, Zakunga chu rawnin rawlh ve leh thuai in, kei chu ngaihdan ka nei... Ka ngaihdan ah chuan kan thiana thluak hian misual te man chhuak tur tawka finna chu anei ve tih ka hre chiang khawp mai, tul atih dan ang ang in ruahman na siam se, kei hi engtik lai pawha che chhuak tur in ka in peih e, ati ta a. Chu tawngkam cham Roliana rilru chu ahneh kher mai le, chutiang taka amaha rinna nghat ngam tu leh atana in pe zo thian anei chu alawm in angaihtuahna thelng mai chuan phur na asim thar sak ni hian ahre hiala. Tichuan athian te chu hlim zeta en in, thiantha tak leh rinngam ka nei che u hi ka lawm tak zet ani, in mi beisei ang ngei chuan ruhmanna pawh siam ka tum ngei ang, zan in ah mut hmun ah ngaihtuahna te han hmang leh deuh ila, ruahmanna rintlak deuh te chu kan zam chhuak thei mial mahna, zan pawh arei ta e, tirawh Zakung Zawlbuk lam i han pan ve tawh ang hmiang, pu Do, nang chu in lamah hian riak rawh, i nupui fanau te pawh in an thlahlel ve em em tawh ang che. Tul leh pawimawh bik te a awm anih lem loh chuan zawlbuk lama riah hi chu ngai pawimawh lutuk duh tawh teh suh khai, kei ni i thainte pahnih hian i ai chu kan awh zo kher lo pawh ani thei e, mahse, buaina em kan tawk bik kher nang, tia duhsak an inhlan hnu chuan an in mangtha zui ta a.

#Roliana chu khua avar fel awrh chauh tihah tho chhuak in, inlama hawng tur chuan zawlbuk bawhbel chu a bawhliam meka. Chutih lai chuan Zakunga chuan meng phelh phang chunga Roliana hnung chu rawn zui nghal in, Roliana hnen ah chuan, thianpa, nizan lam chu enge kan an tak le, ruahmanna engemaw tal ngaihtuah chhuah te i nei mial lo maw..? Keia thluak neih ve hi zawng in tihngaihna ngang ahre lo chu ani e, zankhaw tairek thak thlenga ka ngaihtuah fe hnu pawh in, i sawi chin bak kha chu penkhat leka hma han sawn pui ngaihna ka hre hlawl lo ani e, ati bawrh bawrh maia. Roliana chuan Zakuanga mit meng atang chuan a in sawi asawi ang ngei in mutmu atuah mumal lo tih chu ahre thiam nghal maia. Zawlbuk te an pelh fel tak hnu chuan, Zakunga hnen ah Roliana chuan thianpa, ruahman na beitham zet leh themhlem tak chu ka zam chhuak ve ngei chu ania lawm, mahse, duhthu chu asam lo kher mai. Amaherawh chu a aia ruahmanna tha zawk kan hriat miau si loh chuan, ruahmanna themhlem tak pawh nise, kan arkhawthim dai pui mai angai dawn anih hi, engpawh nise, pu Dokhuma te in i pan phawt mai teh ang, tia hrilh in pu Dokhuma te in lam bawk chu an pan dun leh ta a.

#Pasaltha nupui tihtak ah, pu Dokhuma te in Roliana te pahnih in an thlen meuh chuan pu Dokhuma nupui chuan buh alo deng tlut tlut tawha. Zingkar kara Roliana te thiandun hmel a hmuh chuan phawk hmel zeta lo en in, nangni pahnih chu enge in hriata, tun ang zing zing ah te in rawn kal teh tlat chu le. In thianpa ve lah chu a la mutui viau nge maw ni, thawm aneih awm pawh ka la hrehauh lo tiin a lo be nghal bawrh bawrha. Roliana chuan, a..eng kan hria pawh nihran lo e, tihtur hresi lo in kan thohma satliah ve mai anih hi. Chutia aniber a la thawh si loh chuan kan kal leh phawt mai ange, tiin a chhang zui ve nghala. Mahse, inchhung lam atang in pu Dokhuma aw chuan, tih tur dang te in hriat chuan loh chuan rawn thu muang ve hrih ta ula, hei ka tho tawh alawm arawn tita a.

#Inchhung lama thutna te an remfel hnu chuan, Zakungan pu Dokhuma hnen ah chuan, pu Do, hei kan thiana hian engemaw ruahman na aneih te asawi duh anih hmel a, zingkar karah kan rawn thawng tho ngawt mai che anih hi, mut pawh i kham hman meuh lo ang ka ti, tiin an kal chhan chu an sawia. Pu Dokhuma chuan, maimai thina harh reng chungin ka mu lui mai mai zawk alawm, thanghnih lai tuitaka han mut vang vang hi chuan mut hi kan kham hnawk mai ania. Chu Rolian, eng ruahman na nge i neih tak le, kan hun la neih te han chhut hi chuan muangchang hman kan ni tawh hauh lo ania, atih zawm nghal zata. Roliana pawh chuan, pu Dokhuma sawi anga hun anngah tawh loh zia chu ahai bik lo, chuvang tak chuan ani zingkar kar ah pu Dokhuma te in pan arawt chung reng ni. Tichuan athiante lam hawi pah chuan, ruahmana ropui tak zawng ani hauh lo maia, mahse, a aia tha han rawt chhuah tur ka hriat bik miau loh avang in, kan hriat ang chhun chhun hi hman tangkai kan tum mai aniang chu. Ka ruahman ruk dan chuan hetiang deuh hian ti ila tha in ka hria a, nangni pahnih hian zanintlai losul hawnhun vel bawr ah kawt chhuaha kal ten in thusawi an hriat theih dan tur lo ruahman ula, in thusawi hre tura in thlan tur pawh tlema mi te aia thil hrethei riau ang chi leh ngawichawi tehchiam lo, thil engpawh hria se hmui chip thei miah lo ang chi ningei se la, tichuan in mi thlan in ahriat theih ngei tur chuan, kan khua hian phatsan tu kan lo nei ru reng te hi ani lo maw le, Roliana hian alo hre ru leh khiau tawh lo maw... Naktuk zing Ni chhuak kawlkila aliam leh hma ngei in thilsual ti tu chu hrem in awm ngei se atha ang, tiin in sawi dawn nia. Ka hming sawilang tura kan duh chhan che u chu, kan thil tihah hian kan hlawh tling lo emaw, rinthu mai buaipui emaw kan lo nih hlauh pawh in, a amwhphur tu tur leh hming hliau tur chu kei mah ka ni mai dawna, kan zavaia hmingchhiat kher ai chuan pakhat chauh hmingchhiat chu athazawk ngei ang.. Tin, rinthu sawi angleka in sawi lan hi atawk viau in ka ring, a chhan chu, mi aia thil hrethei nih duh leh thu zep thei reng reng lo te hi ' khual thuthang leh arpanchuk chu apung tual tual ' tih thumal dikzia lan tir tu te an ni miau a. Chumai bakah, hetiang te anih chuan Lal beng pawh athleng thuai in arinawma, midang va hrilh pawh ni lemlo, titi khawchang sawi paha mahni rinthu lo sawi ve satliah mai kha in nih dawn avang in, Lal hnen ah pawh phat nathu sawi aharsa vak in arinawm loh, ati ta.

#Pu Dokhuma chuan, Roliana lu ruh chhunga athluak chu hmuh chhin a chak ta hial emaw tih mai tur hian, chiang em em maia Roliana chu en in, khawdang hawi lek lo chuan athlek vawng vawng maia, Roliana ngaihtuahna leh remruatna fing lutuk chu mak ati hle tih ahmel ah chuan alang chhuak thei hial mai. Chutah muang ban chata rawn tawng chhuak in.. Chutichuan, titia kan rinthu sawi satliah ve mai mai chuan khua athlen rual rual in, Tlanglian khua te nena inbeihna ah khan, mahni khua phatsana hmelma lam lo tan tu an awma, a mah pawh Rolianan hre chhuak tawh in, naktuk khawvar rual in Lal tualzawl ah a lu tan tur, tiin kan thusawi chu an her danglam hman ngei ang maw...tia zawt titih deuh mitmenga Roliana chu melh chung in, Rolian, i rin anga khaw phatsan chingte an lo awm hlauh anih chuan, zanriah pawh an ei fumfe lo tawp ang le, atih zawm nghal zata. Roliana pawh chuan, nie pu Do, chutiang ang athlen ngei chu ka beisei, alo ti awlsam ve hmiah a. An sira thu Zakunga chuan angaihna hriat loh hmel zeta alu hiat nauh nauh chung chuan, a nih leh chutiang chu lo ni ta se, kan misual a chuan a mah leh amah rawn in pe in, thiltisual ti tu chu kei mah ngei hi ka ni e, min ngaidam rawh u, arawn ti dawn tihna em ni tiin athian te pahnih chu a en hehaw a. Roliana chuan nui var var chung hian, anih leh thiltisual ti tu chu nanghi lo ni ta la, engtin nge i tiha i rin. Mahni khua phatsan tu te chunga an tihdan chu i hre veka, ngaihdam dil in awmzia aneih lem loh zia pawh i hai kher nang. Chutiang chu thil nihdan anih si chuan aruka khua chhuahsan i tum ngei ang tiraw, tiin an zawta. Zakunga chuan ama chal ben fawk fawk pah chuan, ummm...adik adik, helai a thluak ngaihtuahna tawi zia tak hi chu aw. Rolian i sawi dik chiah, thilsual ti tu chu lo nita ila i sawi ang chiah hian kei pawh in ka ti ngei ang le, tia chhang in. A sawi zawh rual rual chuan, tichuan zan ah kan lo chhang ru anga kan man mai dawn tihna ani ang maw, atih zawm nghal zata.

#Roliana chuan, chu chu ka ruahman dan chu ania lawm, mahse, chuti maia awlsam chu ani hauh lo ang. Pu Do, kei zawlbuk ah nuamsa taka ka mut der der lai in, Zakunga nen zanin chu pawn khawvawt ah in thut tlaivar angai dawn ta anih hi. Kei hi zawlbuka ka awm loh chuan, kan misual zawn lai hian afimkhur phah in kawngdang azawh phah daih theia, engmah hre lo leh ngaihsak lo ang taka zawlbuka kei ka lo awm chuan, kan misual zawn lai hian zanthimtham kar ah ramhnuai hnawk kar a kal ai in kawtchhuah kawng zawh athlan zawk ngei ka ring. Mahse, rinthu mai kan lo buaipui lek te anih erawh zawngin, inlak ah hian a inthlahrun awm duh hle ngei ang le, tiin angaihdan te chu ahrilh ta a. Pu Dokhuma chuan, chungmai mai te zawng i ngaihtuahna atang khan paih daih rawh, kan beisei ang alo ni talo anih leh ngaingam tak in Tlanglian khua kan pan thei dawn tihna ani maia, thih leh dam inkar anih angin, hunlo deuha thih ai chuan zankhat mut loh mai mai te chu ka thlang daih zawk, a lo ti ve thunga. Zakunga lah chuan, Zankhat mut loh tih vel mai mai te chu ahmeh azir in chawei ti tui tawk lek alawm, ka pi in ati, tia lo tuihnih ve nghal zat a. Tichuan, tlai lam atanga che tan tura ruahman na te an siam fel hnu chuan, Roliana leh Zakunga chu tukthuan ei tur in an tin zui ve ta a.

#An bihrukna lungpui phen atanga an khawlam luhna kawng in zam kawi raih nguntaka thlir pah chuan, a bula lungpui nghenga thu valupa pu Dokhuma chu bia in, Zakunga chu zawite te hian aphun ser sera. Pu Do, kan thiana thiltih hi enge i ngaihdan chiah ni ve reng reng le, thil tak tak ni thei awm in i hre ve reng reng em, tiin a han zawt a. Pu Dokhuma chuan, engvang in nge maw thil tak tak ni theia ka ngaih loh tehlul ang le, hetiang Roliana te ang mi piang danglam bik hi sawi tur an awm ve fo thin asin, thil lo thlengtur lo hriat lawk theih na te hi an nei emaw tih mai tur hian, an mahni ah hian thawk tu engemaw a awm tlat thina, chu thil chu an hman thiam hlauh chuan thihna tam tak an pumpelh phah thin ani. Tin, an rilrua an vei ngut ngut leh ningeia an hriat te lah hi alo dik leh tlat mai thin, tun ah pawh hian kan lo rin ngai reng reng loh leh kan beisei ngai reng reng loh thil kan tawn ngei ka ring tlat ani. Kan lo tawngta lo anih leh a tha hlei hlei ani maia, finfiah tum chuang si lo, rilru nuam chuang bawk si loa awm reng ai chuan hetia tih mai hi afinthlak zawk hle in ka hria, tiin alo chhang thuai a. Zakunga pawh chuan, pu Do, i ngaihdan chu ka tawm zawng tak ani, kan thiana hi thil ho mai mai buaipuia phe ruai chi ni in ka hre lo, tuna athil han ruahman dan te lah hi, amawlmang in aropui hle lawisi chu anih hi, kei a thluak hi chuan hetiang ang ruahman na ngaihtuah chhuah hi chu hlat dehdawh tak ani ringawt. Tuna kan lo chan na hmun te hi, kei ka lo ngaih ve dan mai ah chuan, kawt chhuah maia lo biru tur ah ka lo in ngai ngawta, Rolianan, Sihpui khaw chawi vel tu kham hian kawtchhuah lo lam zawng hi a chanve deuh hmawk atuam a, khua atanga chhuak ru tur an awm anih pawh in, kawtchhuah lam hi an pan ngei ngei angai ang, mahse, kham tawp chin ramhnuai hi kawtchhuah hel na tham zet rampharh a ala awm avangin, kawtchhuah maia lo chan chu afuh lo ang, chutih lai in zanthim hnuai ah ramhnuai hnimhnawk kara kal chu kal asawt dawn loh avang in, kawtchhuah awmna zawn an hel hnu ah kawng pangngai ah an rawn chuan chhuah ngei arin awm, ti a asawi meuh kha chuan kei a ngaihtuah ve na kha chu ani ngaihtuahna lak ah chuan naupang inkhualtelem na ang chauh ani tih ka hre chiang kher asin ti a sawi zui in, Roliana finzia leh thil angaihtuah kim zia chu tluk lo a in ti kher mai.

#Pu Dokhuma chuan ania sin, Roliana hian thil angaihtuah kim in a thil chhutlawk hi a sual lo khawp in ka hria. Kan 9Lal in zanriah eikham ruala min koh nghal mai theih dan ah, kan thu sawi khan khua afan rang hle tih achianga. Lal hnen ah, thil awmve thei tak ani tih titi phunglenga kan sawi mai chauh ania, mi thusawi bak bak lo sawi belh hrat deuh an awm anih ngei dawn chu tia kan han sawi a, Lal in, alo nih chu maw le, naktuk lam ah khaw mipui te hi koh khawm ila, mipui ti phawklek leh ti chiai zawnga tawngkam thlahdah ching hi zilh deuh an ngai ani, ati meuh kha chuan, Roliana ruahmanna that zia leh fin zia chu achiang khawp mai. Ka bula asawi fo thin thil pakhat chu, hmelma te hneh nana hmanraw tha ber chu ruahmanna tha neih hi ani tih hi ani, alo ti ve bawka.

#Thla ral tur pawh seki ang maia kual raih in, Sihpui khaw thlang lam chung zawn vansang ah chuan pachhait hmel fahran in a la de ve va va a. A tihtheih chhun chu tlem hle tawh mahse, thimchhah zualpui hnawt bo tur tawk chakna chu a maha a la awm ve tih hriat tak in, pu Dokhuma te pahnih chuan an hma a Sihpui panna kawng in zam raih chu fiahlo ruai in an hmu theia. Chutih lai in khawvar hun pawh ahnai tawh tih hai rual loh hian, an chhehvela rannung hram chiah chiah thawm pawh chu hriat tur awm lo in a reh thiap tawh a. Khawvar hnaih lama chaw zawng chi, Sazu te leh ramsa tenau thenkhat ramtla in hnahthel ro an rap ri leh rak rak thin tih mai loh chu thawm hriat tur pawh a awm tawh lo. Zakunga chuan meng sisap chung hian khua avar har tawh dawn lo tawp mai, kan in chang chhuak dawn lo a niange. Engpawh nise, buaihrep ai chuan atha zawk ah ngai tawh mai teh ang, beidawn hmel zet chuan ati chuai raiha. Pu Dokhuma chuan, Zakung beidawng mai mahta che, khua pawh ala var em loh hi tiin a lo hnem thuaia. Tichuan beiseina chaurau tak nen chuan an han thu leh ang renrawna, thawm danglam hriat tur erawh chu an la nei chuang lo. Mahse, tuibur hmuamda chen zet tur an thut a, an thinlung ah pawh beiseina aia beisei loh na athan len zawk mek lai chuan, an hma lawka mipa naupang leh hmeichhe naupang tawng thawm chu chianglo ruai in an hre ta tlat mai le. Pu Dokhuma te pahnih chu mak ti zet in an han in en ang hehawa, an rin dan leh beisei ang ani ta lo tawp tih an hmel leh mitmeng ah chuan ahriat thieha, Ramhuai emaw Rammi emaw an nih te chu an ring deuh rum rum zawk ani. Mahse, an hma lawka mipa naupang aw in, ka nu zanthim lai lai in khawiah nge kan kal dawna atih ri leh i pu te khua ah kan kal dawn, i pu dam lo in ahmu chak cheua tia nupakhat in a chhan na aw, beidawn na leh hlauhna aw in apwlh ri chu chiang zet in an hre ta. Chutah an thil hriat chu an beng chhe ri mai ani lo tih tichiang tur in, tlangval aw ngei mai chuan Mambawih, ramhnuai ah naupang chu tawng vak vak tur ani ngai lo, Laiking in chil a chhak duh, arawn ti ve leh a. Chu tlangval aw chu an han hriat meuh chuan, pu Dokhuma te chuan tute nge an nih tih chu an hre chiang ta kher mai le. Tlanglian khua te nen an in beih tuma an pa ber in athih san tak, tuikhur venga hmeithai chhung kua te an ni tih chu an hai ta lo. Tlangval aw an hriat pawh, hmeithai fa te zinga a upa ber, tlangval hmeltha zet mai leh pian thiam tak, mi pawisawi ngai lo leh nuntluang em em Khawkunga ani tlat mai.

#An bihrukna zawn an rawn thlen tak ah chuan pu Dokhuma te pawh chuan an hmu chiang thei ta, a tlangval ber in ipte pui puar mangkheng a ah te, Nu ber in dawrawna eng engemaw a phur bawr luk te, a fa nu, nula tan uaih uaih tawh in Thul phur bawr luk chunga, ngawi renga akal lai te leh an naupang pahnih in puan tumtel niawm tak an hnunga an paw bawk ve lah te chuan pu Dokhuma te pahnih ngaihtuah na chu ati thui kher mai. Thil tisual ti tu leh khaw phatsan tu ni theia an rin loh na te chu, an khawsak dan leh an in phurh bawr em em dan te chuan pu Dokhuma te tana rinhlelh loh theihloh ah chan tir in, pu te khuaa zin tur satliah ngawt an nih chu an ring thei tlat lo ani. Chutah ding tura hrilh an nih laia, an hmela hlauh na leh manganna lo lang te, an aw chhauak reng reng ah thilsual ti tu in phatmarna zawng ang mai an aw ri te hriat tur a awm tak nuk ah chuan, pu te khua a zintum mai kan ni e tih in awm zia anei ta tlat lo. Kei ni hnen ah ni lo in, Lal hnen ah in duh ang in phatna thu te chu in la sawi zawk dawn nia tih chu thutawp ani ta.

#Zingkhua a var fel awrh chauh a la nina in Roliana chuan leikapui chung ah a silai chu a hru fai leh hauh hauh tawha, a rilru chuan, ka pu khan Ral i do emaw Sahrang i bei emaw pawh ani thei, i silai hman tur chu i dam leh thih hril tu ani tih hre reng la, uluk tak in enkawl thin ang che. A puak loa tih te hi a awm tur ani lo, silai zen thatak in i pho tang thin tur ani, ti in min hrilh thin kha ania, u luk taka enkawl mai bak ah rang taka amu thun theih te pawh hi thil tangkai tak chu ani ngei ang, tia ngaihtuah neuh neuh pah chuan khaw kawt chhuah lam chu a melh leh zauh thin a. Chtah rawn phun zui sap in, pu Doa te pahnih chu an hlawhtling ta lo em ni dawn le, keimah vangin zan khawvawt ah an thu tlaivar ta ngawt chu ani sia, a va in thlahrun awm duh dawn ve maw le, an hmel hmuh leh pawh a chakawm dawn hauh loh mai ka ti, ati sap sapa. Chutia rilru nuam lo zet leh athiante laka inthlahrung rilru zeta athut reng lai chuan, khaw tawntirh lam thawm ri deuh hut hut thawm chu hria in, chumi lam pana mi thenkhat tlan lai pawh chu ahmu zui ta nghala. A beiseina chuan beisei viau mahse, a rinna a tlem tham deuh vang erawh chuan chu thil chu athiante hlawhtling thawm ni hlauh se, ti in duhthu chu a lo sam mawlh mawlha.

#Zing ni chhuak chuan thingler sang deuh te chhun thawi den den in, Sihpui khaw In chunga daitla te achhun khuk vut vut tak ah chuan, Roliana pawh in a beisei ang ngei in thil athleng ta ani tih te chu ahre ve tawha. A siali chu hman hmawh taka inchhung ah tlan luh pui in atung tha te tea, a iptepui, a chempui thar hlaitha hlep hlawp inthun sa chu ak in Lal in lam pan chuan phur zet in atlan liam ve ta nghala. Mahse, Lal kawt zawl athlena mipui pungkhawm in an dinhual luih kara athil va hmuh erawh mak ati in, a beisei ang ani lo kher mai le. A beisei lo zet thil ahmuh tak ah chuan athiante pahnih awmna lam chu apan thuaia, athiante bul athlen rual rual chuan, pu Do, hei engthil nge nita ngai le, tiin maktih hmel zet chuan azawt nghala. Pu Dokhuma chuan phur zet mai hian, ka thian i luruh chhunga i thluak hnathawh chu athlawn lo e. I thang kam per in athum in arut ta anih hi, alo ti nghal zung zunga. A thum in i ti em ni pu Do, an zavai chuan ani thei lo an zinga pakhat chauh hi ani tur ani, mahse..! Mahse,chu enge, thildiklo a awm em ni, Roliana en chung chuan pu Dokhuma chuan alo ti thuaia. Pu Do, a hmel ah sawn hetianga sualduh tur leh rilru thalo pu duh hmel ka hmu tlat lo ani, Roliana chuan alo ti ve thunga. Chuzawng ngaihdan tlanglawn tak ani ang chu, mahse, thil nitheiloa kan ngaih te hi a lo ni leh tlat thin si chu anih hi, vawikhat pawh Chaichim in Keipui a mutpui tih thu an sawi ka hre tawh tlat ani, tiin a lo hnial ve thunga. Chuthu kher kher chuan an thusawi ngaithla a lo ding ngawi reng Zakunga beng chu a lo hawlh za ve leh thung, thenthu chunga rawn hawi chhuak in, pu Do, engtin maw i tiha. Chaichim in Keipui amutpui amaw, a lo ti nghal vara. Chuzawng i suangtuah dan azir in anuihzat thlak in anuihzat thlak loh thei ang chu, Keipui Nilum ai muthlu lai chu chaichim in a hmu fuha, Keipui thlahlim daihlim lai chu bel in abul ah a lo mu ve te pawh ani ang chu, tia Zaliana zawhna a chhan rual chuan, an lam pana lo kal Lal Sairuma lo dawngsawng tur chuan a in her rem nghala.

#Lal Sairuman an bul arawn thlen chuan, an lo rin lawk ang ngei in Dokhum, hei enge thil awmzia hi. Nizan ah kha chuan, thil nithei awma kan rin titi phunglenga kan sawi satliah mai mai ani e, in ti nikhan ka lo hria a. Hethil ti tur hian Lal meuh pawh bum tel a lo ngai tihna em ni dawn le, ti in arawn zawt ta mai renga. Chhan mai ngaihna hre loa pu Dokhuma leh Zakunga an ngawih reng lai chuan, Lalpa pu Doa leh Zakunga hian thil nithei awma an rin, Lal hnena thlen tham em ni si lo leh afinfiahna awm bawk si lo chu, Sihpui khaw tan thahnem ngai taka bei zui in, mutmu pawh tuah loa zankhua a an beih hnu ah, nizan lama titi phungleng satliah mai kha tun ah chuan thudik ah an chan tir ta anih hi, tiin Roliana chuan alo chhang thuaia. Lal Sairuma pawh chuan han lungawi loh na chhan tur ahmu ta bik lo ania nge, ekhai...chutizawk chu alo ni maw, Dokhum, Zakung in chung ah ka lawm e, he khaw tana mi chhuanawm tak ni zel ang che u, tiin an mi man te awmna lam chu a pansan ta a.

#Roliana hmel lo danglam ta em em mai chu tu mahin an hmu kher awm lo e, mipui chulai hmuna awm te mit chu an miman an sawisak mek Khawkunga chungah ah afuk thup vang in. An zinga tlangval awm chhun Khawkunga mit ko leh biang vel te chu thuzawt tute ben na avang chuan abui deuh luk tawha, chuti chung chuan an hriat duh thil eng mah zawh chhuah an la nei chuang lo. Mipui in hmuhnawm thlir taka Khawkunga an sawisa lai chu an thlir lai in, Roliana erawh chuan an Nu kuah chunga hlau thlabara ip chawih chawih, naupang pahnih te chu a lo en renga, an u Khawkunga an sawisa lai pawh en ngam lo leh tap ri ngam bawk si loa an in hnit hlawp hlawp lai te, hlauh luat vanga an ding khur zawih zawih lai te chu hmuh hreawm ati kher mai. A mitthla ah naupang mai an nih laia anau nen, mite tihduhdah tuara hun an hman thin lai te chu lo lang in, chu mipa naupang leh hmeichhe naupang thlabar taka awm mek te chu a thinlung ah khawngaih na leh lainatna anei ta tlat mai.

#Hmai vung bur khawpa an sawisak hnu pawha athil tih la zep tlat Khawkunga bul ah Roliana chu rawn phei in, ching zeta melh pah chua Khawkung ka mit ah tak hian en rawh, mipa i ni lawm ni engvang in nge i chhung te hi thlabar taka i siam reng ni. Thil i lo ti sual anih pawh in i thil tihsual man chu huaisen tak in i hmachhawn in i tuar ngam tur ani, chu chu mipa diktak te tih dan tur ani. Nang hi ka hre chiang em em che a, chhan thatak awm lo chuan heng thil hi i ti hauh lo ang tih ka hria, tun ah hian min hrilh rawh, henghi engvanga ti nge i nih tiin a zawt ta a. Roliana thu sawi chuan a thinlung afan hneh kher mai, Roliana mit ah tak chuan ngaisang leh zah tak chunga en in, Rolian, hengho hian min vaw hlum thak pawh ni se, an hma ah hian thu kamkhat pawh ka chhak chhuak lo ang. Mahse, i hnen ah hi chuan sawitur ka ngah khawp mai, ngun tak in lo ngaithla la, ka sawizawh hun ah i duh leh ka nghawng hi i tan dawn nia, ati ta a. Chutia an mi man ber atawng tak ah chuan, mipui phun mur mur ri leh bengchheng te chu a reh nghal duak maia, a thusawi tur hriat ve loh mawlh chu an hlauh ber ani ta. Khawkunga chuan, Tlanglian pasaltha ten thingluang zawha inbeih hun tur an rawn hrilh tuma an let leh lam khawkar kawng ah lo chang in, Sihpui pasaltha te thil tum leh, chang ru tu tur indah an tum chungchang a lo hrilh ruk dan te chu a sawi ta a, heng thil thalo tak ka tih chhan chu tia sawi zawm leh nghal in, Lalkhawnbawl leh upa fa te ho chu a kawk vah mai a. Chutah athu sawi chu chhunzawm zel in, an khaw nula zing ah pawh zahpui awm loh tak nen an in hmel duh chungchang te, mahse, Lalkhawnbawlmin fa pa in a lo ngaihzawn ve vanga an ni ho chu in thurual in chu nula hma ah chuan zak taka an lo siam thin vang leh hmusit leh diriam tak taka an lo tawng khum thin vanga, a rilru na in chung thil sual chu tita anih thu chu asawi ta a. A tawp nan ti ni awm taka Roliana chu chiang zeta en leh in, Rolian he thil thalo tak hi ka duh vang renga ti ka ni bik lo tih min lo hriat sak dawn nia, tun ah chuan i remhriat na leh finna vang in ka thilsual tih te hriat chhuah alo ni ta a, ka tuhrah seng tur in tun ah hian thitur in ka in peih e. Hmeithai fa mai mai tia min sawi hi chu ka ka la pawm thei, mahse, hmuhsitna leh in diriamna tenawm tak hi ka phur zo bik lo ani e ati ta a.

#Rolianan ngawi renga atawlh hlat san laia, mipui phun rik mur mur dan atang leh an au hla atang chuan chu tlangval khawngaihthlak thusawi chuan mipuite thinlung ahneh zo lo mai ni lo in, a mah vanga mithenkhat in thihna hial an tawh phah chu achunga mipui thinrim na chu anasa hle tih hai rual ani lo, kha mitenawm kha that nghal ula, a chhung te pawh hi tu mah zuah suh u, tih chu mipui au hla ani ta. Rolianan atawlh hlat san rual rual chuan, Lal khawnbawlmin fapa Zakulha chu rawn pen chhuak ve nghal in, nang Hmeithai fa ve mai mai hian mipui hma ah min sawi chhia ngam ani maw, nangang Hmeithai satliah fa hi ka hlauh che i ring em ni tih leh ahmaia hnek chu arual ta nghala. Zakulha hnekna avanga atlu rawn tho chhuak leh chu ahnar atang in thisen a far chhuak zawih zawih maia, mipui te lah chuan an lo hawhaw khum vei rawl nen, Zakulha pawh a in la huai kher mai. Intithei zet chung in hnek hlawm tawp tum chuan apan hnai leh nghala, mahse, akut alek kan ruala an in kara lo tla zep Roliana thinrim mitmeng nelawm lo zet an hmuh thut chu atawp chiang kher mai le.

#Roliana chuan thu kamkhat mah chhakchhuak lo mahse, Khawliana lam ah atang ani tih chu mia nileng lo tan chuan thilchiang ani ta. Chutia Roliana an che ta mai chu, mipui lam chuan an hrethiam lo kher mai le, thenkhat thinrim alo kaltluang laklawh tawh bawk nen, aduh anih chuan amah pawh kha that nghal rawh u tih thawm chu arawn ri chhuak tan leh ta. Chutia mipui in athil tih an thlawp lo tih Zakulhan ahriat tak ah chuan, a lo hlauh rilruk na te chu dah tha in, Rolian, thih i duh loh chuan ka kawng min dal suh, he sawnchhe pa hi ka that dawn khawp mai tih leh hnek chu arual leh ta nghala. Mahse, a tum ang ngawt in thil akal bik lo, Rolianan akut vai alo danper sak ruala nazeta ahmaia aben na avang chuan pai chawn chawn chunga hnung tawlh in, pen nga tur zet ahnungtawlh hnu chuan aluhai chu atlu zui ta a. Chutah zet zawng mipui thinrim au nuaih nuaih chu thehhmeh ang mai in an reh nghal thup maia, tawng hmasa ber nih an chak lo tlang hle ni in alang.

#Chutiang te anih tak nuaih ah chuan, Zakulha pa Lal khawnbawlmin, Pu Dokhuma leh Zakunga te chu Roliana bul ah an rawn ding rual thawta, Zakulha pa in thinrim mengsen ruma Roliana amelh lai in, pu Dokhuma ve thung chuan Rolian engthil nge i tih tak mai le. Dinhmun hlauhawm tak ah i in dintir anih hi, i thil tih hi ti dik ah i in ngai em ni, ati ngjal bawrh bawrha. Roliana hmel leh mitmeng chu a rum tha el el kher mai, pu Do, ka thil tih hi ti dik ah min ngai nge ngai lo, ram deuh hmak chuan alo zawt ve thunga. Pu Dokhuma rilru chu abaui kher mai, aw nem deuh zawk hian, Rolian, min hual vel tu mipui te hi han en ta che, kan lama tang awm hmel pu i hmu em ni... i thil tih hi chawlhsan vat rawh tiin an hrilh leh a. Pu Do, kei chu Roliana kania, ka pu Vawmsata tan chuan Taitea ka ni, ka ke hi hmalama ka pen tawh chuan, ka hma ah khuarkhurum lo awm mahse, ka kal tlang lui hram thin. Ka dinna hi lei anchhe dawng pawh lo nise ka tawlhsawn chuang lo ang, nang pawh in mipui te rilru ang i puta, hmeithai fa te an diriam tluk chauha min diriam ve i duh anih chuan, min tawlh hlat san ta che, ka thlazar na lam ah tawhsual te i lo tawk ve hlauh palh ange, ati chang ta fak maia. Pu Dokhuma tan sawi leh chuan tur a awm ta lo, Roliana thusawi chu thutawp ani tih lah hairual ani si lo, a mitmeng nelawm loh tak te leh athisenzam rawn pawng țual țual te lah chuan athinrimna in a vawrtawp athleng mek tih ati chiang em em mai ani. Pu Dokhuma chuan a thian duhtak leh ami rinem em chu, atanna dik lo ni in hre mahse phatsan atum ta bik lo. Zakunga erawh mi maktak zawng ani chiang mai, athianpa tanna chu adik nge dik lo tih lam pawh angaihtuah lo, engvanga hetia Roliana hi che ta mai nge tih phei chu ahriat loh zawng tak ani. Mahse, ring fek fawk leh chang faka Roliana chu bia in, Rolian kei chuan i hnena ka lo in tiam tawh angin ka tawlh hlat san dawn lo che, i duh dan ang thlap in che rawh alo ti ve hmiah thunga. Chutah zet chuan mipui lam pawh in pawngtawng basangam ngawt chi leh pawngpaw chil rawn ngawt chi an ni lo tih chu an hre chiang ta kher mai.

#Mahse, Lal khawnbawl min erawh in athinrimna apai dai thei tlat lo, thinrim mengsen rum chunga Roliana chu rawn hmachhawn in,

"Rolian, he i thil tih ah hian ngaihdam min dil lo anih chuan, dam in ka chhuah lo ang che"...

He ka thil tih ah hian ngaihdam dil leh tuma ti ka nih i lo ring anih chuan i ring sual hle ta ve ang...

"Chuti anih si chuan, henghi engvanga ti nge inih",.

Engvangti nge ka nih i rin..

"Keia rinthu i hriat atulna a awm em ni, ka zawhna che chu min chhang thuai la i tan athat zawk ka ring"..

Chuti anih chuan ka zawhna hi min chhang hmasa ta che, he laia hmeithai fa tia i fa ten an hmuh sit hi, engvanga hmeithai fa lo nita nge anih...Roliana mitmeng leh tawng ri chu a nelawm loh kher mai.

"Nang ang sawn lubawk satliah, aia upa te zahna tlachham mihring hian zawhna ka zawt e te min ti amaw, he khua hi dam in i chhuah san tawp lo ang ".. Lal khawnbawl chuan atih khum ve ta hmiah mai a. Chu tawng kam sawnlubawk tih ri chuan Roliana a deng na kher mai.

Kha tiang tawngkam dukdak lo ringawt zirtirna i lo pek thin vang kha ani ngei ang maw, i fa te pawh in tawngkam chhia bak phuhchhuah tur an hriat loh ni .. He i fapa laktlak loh zet hi zirtirna tha pe in kawng dik lo kawhhmuh thin ni la chu heng thil hi ka tih angai lo tur, atih khum ta hmiah mai a. Lal khawnbawl chuan chuti taka hmuhsita tawngkhum tu an tawng ta chu, a thusawi tum pawh sawi hlei thei lo chuan a kut zungchala Roliana chu kawk in a dingkhur ngawt ngawt maia. Roliana lah chuan engteh vak a ngai lo tih hriat zet chuan, an mahni lo thlir reng tu, Lal Sairuma lam chu hawi san in, Lalpa tun ah hian i khaw phatsan tu lam ah ka tang ta si a, engtia mi tih nge i tum le, ti in an zawt zui nghal a.

#Chu zawhna chuan Lal Sairuma rilru chu ati buai kher mai, Roliana chu khua atangin hnawt chhuak ta se, Tlanglian khaw ho laka a khaw dinhmun tur lah chu angaite bawk ani leh ang tih ahlau si, han ngaidam dawn ngawt se, mipui tam zawk lungawi lo in asiam ngei dawn tih lah ahai der mai si lo.. Ngun fea a in ngaihtuah hnu chuan, Roliana chan lo zawng leh akhaw mipui te rilru tina lo zawnga thil tihdan kawng khat chiah awm in ahre ta. Muangchanga mipui lam chu hawi kual in, aw le, ka khua leh tui duhtak te u, vawinni a kan thil tawn hi kei ni khua in kan la tawn ngai loh leh kan chunga thleng tur pawha kan duh ngai loh thil ani a, kei mah maia thutlukna han siam ngawt chu tha in ka hre lo. Tunah hian Roliana hian sawi tur aneih chuan sawina hu siam sak ila, a sawitur te asawi zawh hun ah, mipui ten tul leh tha in tih angin rorel na chu achung ah in lek thei ang, ati ta a.

#Lapa thusawi na hun min siam sak avangin i chungah lawmthu ka sawi e, tia bul tan in Roliana chuan, aw le, Sihpui khua te u tun ah hian thutam ka sawi lo ang, ngun tak in lo ngaithla ang che u. He mahni khua phatsan tu hi thiam ka chan tir ani lo, mahse, thilsual ti tura nawr lui tu in, mahni dik lohna hai dera diriam taka a nghaisa zui hi ka pawmzam ve thei lo ani. Nak tuk ah ani emaw, naktip ah ani emaw, engtik ni ah emaw chuan hekhaw tan hian nangni pawh in ral in la bei leh ngei ang. Chutih hun ah chuan mahni khaw tana nunna hlan tu fa te chu, in hmangaih em em in fa duhlai te pawh ni se, hmeithai fa te tia hmuhsit zui leh diriam taka chhaih nawmnah zui an ni tawh ang...ati ta a. Roliana thu sawi chuan an thin lung chu afan hneh kher mai le, thinrim na mitmeng nenna lo thlir a, hmusit taka lo en tu te pawh chuan, an entha ngam tawh hek lo, hnuai lam bih in an kun ngar ngar tawh maia. An zavai mai chuan, Roliana thusawi dik zia chu hai hek lo, Mahni khaw chhan nan theihtawp chhuaha nunna hlan tu fa ten, hmeithai fa mai mai ti a deuhsawh leh hmusit an hlawh zel dawn chuan tunge ral do tura pen chhuak duh ta ang. Roliana chuan, Lal Sairuma hnen ah chuan Lalpa, tun ah chuan ka sawi duh ka sawizo ta bawka nang leh i khaw mipui ten rem in ti anih chuan khua hi kan chhuah san tawh ange, ati ta a.

#Roliana thusawi ahriat ruala Lal Sairuma mangang hmel chu a khawngaih thlak letling zawk hial mai, Lal khawnbawl min pawh abang bik lo, zaktak chung leh inthiam lo zet chunga Roliana chu rawn pan in, Rolian i chunga tawngkam natak ka hman te avang khan min ngaidam ang che, he khua hi nangin i chhuahsan ai chuan kei leh kanupui fanau ten kan chhuah san zawk ange. He Sihpui khaw tan hian, kei ai in a let tamtak in i tangkai zawk tih ka hria, ati ta a. Roliana pawh chuan, ka pu, ka ngaihdam i ngai hlei nem. Thinrim lai te chuan tu te pawh in tawngkam dengkhawng tak tak kan hmang vek alawm, kei mah zawk hi i hnena ngaihdam dil tur che ka ni zawk e. Kan Lal leh mipui ten rem an tih chuan, kei pawh in hekhua hi chhuahsan ka duh bik hlei nem, ati ve ta a. Lal Sairuma rilru mangang zeta awm tawh pawh chu Roliana thu sawi hnuhnung ber chuan ati lawm in, arawn nui chhuak leh thei ta. Lal Sairuma mai ni lo khaw mipui te chuan Roliana fin zia leh dikna angaihnat zia an hriat chuan, ngaihdam chu sawi loh Sihpui khua a chhuahsan palh ang tih mawlh chu hlau in, ngaihdam an dil mawlh mawlh mai ani. Pu Dokhuma meuh pawh in, Rolian ka hre chiang tawk hle che ah ka lo in ngai thin a, mahse, tuntuma i thil tihdan zet chuan ka lo la hriat chian tawk loh zia che min hriat chhuah tir chiang kher mai. I tanhmun kha pialtlep chunga lei pan te in phah, ruah sur in anan huh vanga nal em em ang maia tanhmun derthawng leh rinawm loh ni in ka lo ngai asin. Mahse, lungpui lian tak chunga hmawngzung in phan tlat anga rinawm alo ni zawk si a, tiin inthiam lo hmel zet chuan asawi ve ta a.

#Rolianan asarep ah chu Khawkunga pek pah in, Khawkunga nu hnen ah chuan, ka pi, he lai thleng hi ka thlah mai ang che u. Ka thu ang chu nise, Sihpui khua chhuah san kher lo in awm ula tha tur ania, mahse, intana anawm loh in hlauh miau si chuan keia tih luih theih lah in ni bawk si lo, dam tak in kal ta ula, a pu te khua ah chuan naupang ho hi hlim tak in han hruai thleng ngei ang che tiin, Sihpui khaw mipui te leh Lal hnena angen sak vanga an nunna an zuah tak Khawkunga Nu hnen ah chuan ati ta a. Khawkunga nu chuan mintui luang ngiai ngiai chunga lo en let in, Rolian, i hnenah lawmthu sawi thaim lo mah ila, he duhsak na hi ka hlan ang che, khuanun veng in hual him che sela i dam khua lo sei mawlh rawh se, Sa leh Ral ah Khuavang ten malsawm che in buh leh bal ah mi te aiin malsawm na dawng tam la, nupui thatak nei in fanau ah malsawmna dawng bawk la, mi ropui tak lo ni ang che. A tawp ber nan mi rethei leh chanhai te tan in nghah na tlak leh belh tlak i nih zel theih nan malsawm in awm bawk ang che, ati ta a. Chutaing taka duhsakna in hlan chu Roliana chuan hre ngai lo mahse, thinlung leh tihtak zeta malsawmna dilsak tu duhsakna hlan chu athlawn in atham ral bik lo ang tih chu arin dan ani. Khawkunga nau nula tan ve tawh pawh chuan Thul phur bawr luk chung a Roliana chu en in, a mittui tlingpam khap per sak sak pah chuan, ku Rolian, i chunga kan lawm na hi engtin mah kan rul thei dawn si loa, minlo hrethiam hram hram mai dawn nia aw alo ti ve bawka, abianga amittui luanna hnuhma la rangriai a hmuh zet chuan khawngaih vang in Roliana pawh in tawng har ati ve kher mai. Thildang zawng zawng aia Rolianan hmuh hreawm atih leh a lainat em em chu an mipa naupang leh hmeichhe naupang in, an zawh awm tawk te puan tumtel paw chunga an nu hnunga thlantla hliam a an tlan ve dat dat chu ani. Roliana chuan enreng hreawm atih vang chuan khawdang hawisan in Khawkunga lam chu ahawi san ta a.

#Khawkunga hnen ah chuan, Khawkung, thil kal tawh chu thil kal tawh ani a, engmah hriat reng pawh ka duh lo e, mahse, thil pakhat zawh duh che ka nei. Tlanglian khaw ho hnen ah thla det tirh atanga zanthum na ah an khaw run tur in kan kal dawn tih thu hi i hrilh ngei ka ringa, dawtsawi miah lo in min chhang ang che, tiin Roliana chuan a zawt a. Khawkunga chuan in thiam loh hmel zeta Roliana chu en in, hreh zet chuang chuan Tlanglian khaw ho hnena engkim a hrilh vek thu leh, Tlanglian khaw pasaltha ten a ramriah na ah an kalh chilha engmah a sawi duh loh chuan a hma a athil lo tihsual tawh te Sihpui khaw ho hnena sawi chhuah ah an vau avanga hrilh ta anih thu te chu Roliana hnen ah chuan sawi in, Sihpui khaw tana pawi akhawih nasat em avang chuan Roliana hnen ah chuan ngaihdam adil zui nghal mawlh mawlh bawka. Roliana chuan, Khawkung inthiam lo viau duh suh, an thu hriat hmang vek in tlanglian ho chu kan bum anga tinia, an tum dan leh beisei ang chuan ka chet tir loh teh ang chu, thilsual titura an nawr luih che zar ah Tlanglian khaw ho chuan an thih phah teuh dawn ta anih hi, ati awl sam maia. Khawkunga erawh in angaihna ahre thiam lo kher mai, mahse, Rolianan engemaw chang chuan thil hriat tam loh te hi himna ani ve thin ania, ati tak ah chuan zawhzui zel chi ani lo tih hria in ngawih achuh ta zawk a.

#An sawitur te an sawi zawh tak ah chuan, Roliana hnen ah Khawkunga chuan, Rolian khawchhak ram lam te fanga i la rawn kal ve te anih chuan, kan la in hmu leh ngei ang, chutih hun ah chuan i tana tihsak theih che ka neih phawt chuan i tan engpawh tih ka huam reng ang tiin, Damtak in le tia ban an in vai hnu chuan an in kalsan ve ta a. Roliana chuan, a kalsan tak naupang te chu ngaihtuah zui duh lo lui in, Tlanglian khaw ho beih dan tur chu a suangtuah neuh neuha, ruahman na chi hrang hrang arilrua a zam kual ve hnu chuan, tha ber tur nia ahriat chu thlang chhuak leh in, a hun athleng ta, Tlanglian khua te u lo inring ang che u, "TAITEA A RAWN KAL DAWN E " tia phun sap sap in, Sihpui khaw lam pan chuan akal liam ve ta a.

( Mihring te hi kan hmel a in an loh ang bawk in, kan duh zawng leh tha tih zawng te hi a in ang lo a. A then in a hmelchhe emai ka duh lo an tih lai in, hmelchhe mah se a fel chuan ka duh tawk ti an lo awm ve bawk. Chutiang rilru pu, duhdan inang lo leh tha tih zawng in ang lo in pawlh sawp nuk kar ah hian, mi in sati hlang lo chu ka ei duh lo an tih hi kan duh zawng alo nih ve loh avanga sawi sel ngawt tur ani lo, chutiang bawk in Sati hlang chauh ei duh te pawn, a ruh bawk leh a behbawm tui ti taka ei tu te hi min sawisel thei bik ngawt dawn em ni..:-D :-D )



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 11:01 pm

PASALTHA ROLIANA ( Taitea)
PHEK 42 NA.

BY :- Hmangaih MT Chawngthu.

( Phunnawi loa lo la nghak ve fan fan tu te tan ka rawn dah ve leh e. Hun duh anga ka neih theih loh avang in, beisei pawh a phak dawn lo tih min lo hriatsak sa ula. Tin, tumah chhiar tur in ka phut in ka ti lui hauhlo cheu tih minlo hriat sak ula, phunnawi leh sawisel miah loa nghak fan fan tu te tan liau liau ani e. )

#Thlamang zan tih takah Sihpui khua pawh zandang ang lo takin thawm hriattur awm lo in areh riaia, naupang pawnto thawm ri chelchul pawh in adaih rei bik chuang lo. Vanchungsang lam ah erawh an ropuina te hliahkhuh saka dipdal thin tu thlaeng awm ta lo chu, an huntha neih bawhpelh hlau niawm hrim in arsi te chu mawi zet mai in an phe neuh neuh hlawma. An mawi na leh ropuiba te faka, hla sak sak tu tur nei lo in, thlaeng lawma akelrawl akelrawla zaithin te leh an hmangaih lengi te țang belh pawh thla hlel zo loa awfawn thangkhawk raihraih khawpa leikapui chungsanga tlangval thlaeng lawma zai ri ten lo awi ve lo mahse, an tana hun leh hmun ruat ah chuan vuina reng reng nei loa rawn in lanin, vanlaizawl ah chuan Khiangte zawngzim pawh an intlar kual leh țhap tawha. Engtak chu zim chhuak ang maw tia khawchhak lam atanga meng de sep sep chunga Siruk in a lo thlir lai in, a piah mai ah chuan hawkdak bik ni awm fahran hian Chhohreivung lah chu a lo in chhawng vu mai bawk nen. Zangkhua meuh pawh a bang thei bik lo, hmu ve hman lo nih hlau awm hrim in hmar lam ramri hrul tlang dum ruih chung ah chuan a khaw tawn tirh lam chu a rawn nawr chhuak ve tan mek bawka. Chutih lai in Dingdi puan tah erawh in apuantah na bul maia Sikawikap lai pawh chu ngaihsak hman lek lo in apuan tah lai ngawt chu a lo buaipui ve thunga, khawdang hawi hman ah a in ngai ngang lo ni in alang. An hming ațang renga a upa ber ni mai awm a lang Pu kulathang pawh khawthlang lam dep, sahnu tamna lai nia ahriat na hmun ningei tur ah chuan a lo kul ve pan pan thunga, per thelh atum chu arinawm bik hauh loh ani.. Chutia pu Kulathang meuh pawh in perthelh tum reng reng loa a kul pan pan reng lai chuan, Sihpui Lal Sairuma in ah pawh Lal leh Lalkhawnbawl te, pasaltha te leh valupa te chuan Tlanglian khaw chunga phuba lak dan tur ruahman na te nei in thang an lo kam ve mek bawka.

#Mahse, Lal Sairuma leh a ho te chuan beng sik meuha in ngaihtuah in an remhriat na te thawh khawm ve bawk mahse, ruahman na tihtlak leh thu rolum mumal an nei thei chuang tlat lo. An hmel nguntaka en tu tan chuan hairual loh hian, an thinlung in phurna ape lo a, mawlh tu engemaw nei ang mai in an mitmeng lah chu a phawk deuh hra hian an hriat hlawma, hlauhthawn na leh ngaihthat loh na in an taksa chu aluah khat ani tih lah hai rual ani lo. Nie, mipangngai tan chuan ngaihtha taka awm pawh thil har ani ngei ang le, chutiang taka Sihpui khawtlang rorel tu te tizam tu chu engdang ni lo in, Tlanglian ho hmachhawn tura an hmachhuan leh rinrawl ber Roliana chu Khawkunga te chhungkua thlaha a kal ta kha ni hnih aliam hnu ah pawh Sihpui khua ah a la rawn let tlat lo ani. Chutih mek lai in Rolianan Khawkunga te chhung kua thlah tura akal ni vek chuan, khaw kawtchhuah hnaih lama awm pu Tawnțhiaua pa, kum upa ve lam tawh pawh chu chin hriat loh in alo bo pil ve hmiah mai bawk nen, an thiltawn mek chuan an ngaih atițha lo in an awm anuam chiah lo ani. Chutah chu putar chu a bo tuk atang in khawtlang in an zawng țan nghal a, mahse, nihnih an zawn hnu ah pawh a mah emaw aruang emaw hmuh chu sawi loh, ahnuhma leh chetsualna awm reng reng pawh hmuh an nei lo. Pu Tawnțhiaua pa hi upa ve lam tawh ni mahse, tar chak lo tia sawi tur chi ala ni lo, daihnai leh khawi maw lai lai ah te beai leh sahdal thang te kam in a chhuak nitin țhina, a mah ala chak vak in engemaw ho tea chesuala tlu hlum mai tur chi pawh ni in a la lang bik lo ani. Chung thil te chu Sihpui khua in an tawn tak ah chuan, ngaihdan leh rindan atam in mahni rinthu huai tak taka lo sawia lo au chhuah pui tawk lah an bo lo. Mi tam zawk te rin dan chuan Roliana chuan țul leh pawimawh thil engemaw atawn vanga khawimaw laia vak kual hrih anih an ring bera, chuti maia thi tur chuan tumah in an ring lo ani. Chutih lai in Khawliana khan engtin emaw bum in a that ania nge titawk leh Khawliana nau tleirawl te nen khan an in hmel duh anga, a zui ve ta te pawh ani mahna tia zeldin thu fahrah te te lo auchhuah pui tawk an awm bawk. Chung ho ai maha rilru thalo pu tu te pawh chu lo la awm ve zel in, Roliana sawi chhiat na hun remchang an han hmu chu an intitheih pui hial zawk emaw tih tur in, ka rin ang chiah ani a saseh hun alo thlena Tlanglian khua run dawn meuh chuan hnawh bo pawh ngai lo in amahin atlan bo mai alawm, vaupung tina satliah ve ringawt, engtihna mah alo nih bik tawp loh hi, tiin Ar chuktuilo ah an chhuah ve hmiah mai thung a. ( Mi rilru chhe pumi reng reng hi mi khawngaih thlakawm an nia, an thinlung hian huat tur leh thinrimna tur hi a hmu tam bik in, an mahni leh an mahni hi lungngaihna khur ah an in hnuklut fo țhin reng ani.) An putar bo ta erawh a chhan puhtur hre chiah lo mahse, ngaihdan maksak zet zet nei pawl an lo awm ve zel tho, chung ngaihdan maksak puipui nei tu te chuan, Khawmu chawi bo bak ani lo ange, Roliana ber awm tawh si lo chu, Sihpui khaw chenchilh tu huai te kha an rawn let leh anga, an la bo ta tihna ani mai, tiin an ngaihdan leh rindan chu an lo sawi chhuak ve mek bawk a. Han ngaihtuah chian chuan zeldin thubawl rau rau ah pawh, thil awihawm ve tak nih theihna lai a awm ve tho mai.

#Chung chu an thil tawn mek anih avang in, Lal inchhunga rorel mek te pawh chuan rorel thiam ahar an ti in, ruahman na siam pawh thiam har an ti hlawm hle vek maia an ngaihdan lah a inper san, an zinga țhenkhat chuan ahma ațanga an lo ruahman lawk tawh ang in, thla det țan ațanga azanthumna zana Tlanglian khaw ho luhchhuah leh run chu kaltlang pui an duh laiin, țhenkhat thung erawh chuan tun thlenga thawm riva engmah pawh nei ngam lo a tawmim ta reng chu, an mi zuam ang ngawt kan nih loh zia an hre chiang anga, kei nin kan han tibuai hmasa leh te anih loh chuan, chechhuak hmasa zawka țan an tum lo te pawh ani thei vebawk. Chuvang chuan nunna in chan zawnga chet chhuah fo ai chuan, kan boruak awm dan te thlir in nghak leh ta hrih ila, a țul anih leh inremna saui pawh kan tanpui mai tur alawm, an ti ve bawk. Lal Sairuma tan pawh thu lai lak leh pawm zawk tur hriat thiam pawh ahar ngang mai. Chutah Lal Sairuma chuan ngun taka thil an ngaihtuah chuan Roliana awm lo chu pawi ati in, kum lam ah naupang zawk ni mahse, a fin zia leh a ruahman na te pawm nahawm tak anih țhin zia te chu angaihtuah a, Roliana a awm loh meuh chuan Sihpui khua chu engtehual an lo nih loh zia ahre chhuak vawng vawng maia, a upa te leh pasaltha te meuh pawh chu zah zo lo in, tun hun kher khera kan Roliana an bo ngawt mai hi chu a pawi mangtak e, ati chhuak ta hial a.

#Lal Sairuma leh a upa te, Sihpui pasaltha te leh valupa ten Tlanglian khaw beih dan tur rela Lal in a an kal khawm zan hi Rolianan, Khawkunga te thlaha achhuah ni ațanga chhiar in a ni hnihna leh zanhnihna chiah ani a, khawtlang anga han zawn nghal rum rum nan a la hma deuh mai bak ah, pasaltha khawi iloa chhuakvak nafam chuan engemaw laklawh nate anei anga a la rawn let lo mai mai aniange, tihte an rilrua a awm bawk avang chuan zawn mai chi ah an la ngai lo ani. Mahse, Roliana chung te leh a țhiante pahnih pu Dokhuma leh Zakunga te rilru erawh anuam lo in, an ngaih chu angam thei tlat lo. Pu Dokhuma leh Zakunga chuan tuma hriat loh in aruk te hian, midang in putar bo an zawnlai chuan Roliana zawng in an lo buai ru ve hle maia, a kal na awm deuh nia an rin ramhnuai ngawchhung ah te chuan zawng in an pahnih chuan an vak dun rak raka, mahse, nilenga an vah kual hnu pawh chuan Roliana hnuhma awm reng reng hmuh an nei chuang lo. Ramkal pangngai pawh ni lo mi pemtur thlaha chhuak satliah ve mai mai, chutia arawn hawng lo ngawt mai chuan an țhiandun ngaihchu atitha thei ngang lo ani.

#Chu zan rehruih mai leh arsi phe neuh neuh hnuaia Lal Sairuma leh ațhuihhruai ten, thu tlukna leh ruahman na mumal siam hleithei loa hun an hman lai leh rorel titawpa hunrem chang nghak leh hrih tura an țindarh mek lai chuan, an rilru tinuam lo em em tu, adam nge athi tawh tih pawh an hriat loh leh ațhian te pahnih in, engthil duhawm loh emaw tak atawk palh te anih ringa thlaphang rilru tak chunga an zawn mek Roliana chu, Fanai Lal Hrangkhupa khaw kawtchhuah lungdawh chungah dingin, a ipte puia Sihpui khaw putar lu leh midang pahnih beng ahleh sak, hnahthial hnaha afun ak chung in adinna lungdawh chung ațang chuan Sihpui khaw awmna lam nia ahriat, ngaw thim chhah zet lam chu thlir in ahawi vauh vauha. A hmel leh mitmeng ah te chuan zamna leh hlauhna te hmuhtur awm lo mahse, a thinrim na avanga amitmeng thip tak erawh chu hmuhhmaih rual ani lo. Chuzan thim zet hnuai ah chuan a hmaa ngaw dur pui pui leh tlang dung inkhawh thlur sengsung te, kawrruam thuk tak tak te hmachhawn tura pen luh chu thil chakawm tak zawng ani hauh lo mai, mahse, muang chang hman ani lo. Englai pawh in Hrangkhupa khaw pasaltha te chuan an rawn umzui thei reng ani tih ahriat mai bak ah, Sihpui khua athleng vat lo anih chuan, Sihpui khaw pasaltha te leh tlangval rual te chungah thil duhawm lo tak athleng thei reng ani tih pawh ahai lo. An ruahman na leh Tlanglian khua te run tura an kal hun tur thlengin, Tlanglian khaw pasaltha ten an hre vek tawh ani tih lah a mah Roliana bak hre tu an awm si lo. An ruahman na te Tlanglian khua ten an hre vek tawh ani tih hre lo a Sihpui pasaltha te an thawk chhuak anih vaih phei chuan, an chan tur chu ngaihtuah phak baka rapthlak ani ngei dawn tih te chu Roliana chuan a hai reng reng lo. Engpawh nise, chulai hmun ah chuan ding muang reng thei ani lo, a hnung lam ah Hrangkhupa pasaltha te an rawn lang talo anih pawh in, Sihpui khaw tlangval ten nunna an chan hma ngeia Sihpui khua chu athlen hman angai ani. Tichuan le, khuangchawithla a ințan mek ani tih leh thlasik in a rim achhuah țan tawh ani tih puangzar tu Vabak thirchher ri chhar chhar ngaithla pah reng chung chuan ngawpui thimzet lam chu Roliana chuan apan ta a.

#Hetia Rolianan, engvanga Fanai Lal Hrangkhupa khua hi rawn thleng ngawt mai nge anih tih leh, Sihpui khaw miten engvanga he lai hmun thleng thleng kal nge anih tih an hriat pui miah loh na chhan hi, Rolianan nihnih kal ta a athil tawn ațang khan han chhui let leh ta i la. Khatia Khawkunga te athlah zo Sihpui khaw pana alet san leh ta khan, a chunga Tlanglian khaw ho chet dan zawng zawng te chu abul te atanga chhui kir leh in, khawngaihna leh lainatna a chunga an lan tir ngai loh zia te chu a ngaihtuah neuh neuha. Chutah an thiltum leh ruahman na te Tlanglian khaw pasaltha ho in an hre ru reng ani tih te an ngaihtuah phei chuan athin te chu arim thar leh in, Tlanglian khaw ho laka phuba lak chu a chak zek zek mai ani. Mahse, chutia thinrim zeta ain ngaihtuah lai chuan, a mit thla ah mipa naupang leh hmeichhe naupang, thlan in an chalhsam a chiah zawr hnep leh puan tumtel niawm tak paw chunga Nisa hnuai ah chauh hmel zeta an kal hnak hnak lai chu anrawn lang leh a. Hriat chhuah fo aduh loh vanga thildang ngaihtuah hram hram anih laia, naupang pahnih bawk amitthla an rawn lang leh țhin chu Roliana chuan hreawm ati in, hriat chhuah fo chu aduh lo kher mai. Mahse, mihring te hian kan hriat chhuah fo duh loh leh mitthla a hmuhnawn fo atan pawha kan duh loh thil bawk hi kan thinlung luah tu an ni leh si țhin. Roliana hian thildang vanga khang naupang pahnih te kha ngaihtuah nawn fo duhlo ani lo, an tan tihtheih aneih loh vang leh akhawngaih em vang chauha hriatchhuah fo duhlo mai chauh ani.

#Chutia engeng emaw ngaihtuaha khawlam pana akal mek lai chuan, a ma hming ngeia rawn au tu aw ahre ta tlat mai. Chu aw rawn chhuah na lam chu rang zeta hawi in, aw rawn chhuah na chu a zawh hmabak kawng ko chhak lam, tlangpahnih in kar ruam ațanga rawn chhuak ngei ni chuan ahria a, tin, amah rawn koh tu aw pawh chu pa upa lam aw ni ngei in ahre bawk ani. A mah rawn koh tu chuan arawn koh nawn le mai ring in, a hmalama tlang pahnih inkar ruam lam hawi chuan an ding deuh vang vanga, mahse, amah rawn koh tu aw emaw, thawmdang hrim hrim pawh hriat zui tur a awm ta reng reng lo. Chutia a ma hming ngeia anrawn koh hnua thawm an reh zui leh ta vang vang si chu Roliana ngaih atha ta lo tawp mai, chhan leh vang awm lo in patling meuh in rampalaileng ah an rawn auh ngawt chu aring thei lo ani. Tin, amah rawn koh tu aw ri ațang mai pawh chuan, fiamthua rawn au fiam mai mai an ni lo tih pawh ahre chiang in, thawm hriat zui tur awm loa areh tak hmiah ah phei chuan, Ramhuai emaw thla emaw an nih loh rau rau chuan, tuemaw tawhsual tawk an awm ngei in aring nghet ta tlata. Arilru te te chuan Ramhuai anni emaw, Thla anni emaw pawh nise, țanpui mahmawh awm ziazanga min koh ta nafam chu kalsan ngawt achi loh ang tih leh aw lo chhuahna nia ahriat lam pan chu arual ta nghala.

#Ruam awmna lai chu kar loah Roliana chuan thleng chho thuai in engthil emaw tak hmuh inring leh beisei rilru deuh chung chuan an vak kual thuak thuaka, chuti mai chuan eng thil danglam tehchiam mah hmuh anei mai lo. Mahse, ruam chhunga kawrte awmna lam pana akal lai chuan abeisei loh zet thil ahmu ta tlat mai le, rang zeta athil hmuh awmna lam ah chuan tlan nghal in, lu nei lo ruang pakhat lehrengna kawrte chhung ah chuan azuang lut ta nghala. Chu ruang, lubunga let reng chu a nghawng an tan na alarei lo hle ani tih hriat zet hian, a nghawng an sahchhumna ațang chuan thisen te chu ala chik tur tur thei hial a, mahse, tute nge anghawng tansak tute chu tih hriat tuma an hawi vel ruai pawh in Roliana chuan tualthat tu te chu ahmu hman ta chuang lo. Roliana chuan chu lubunga let reng chu tunge anih hriat tum in nguntak in an ena, mahse, ahmel ber hmuhtur awmta si lo chu tunge anih tih ahre thei mai lo. Chutih rual in tunge anih tih hrelo mahse, a taksa tuamtu avun te an zur tawh dan ațang chuan chu mitthi ruang let reng chu putar lam ani ngei tih ahre thiam nghala. Aniang putar, engmah tithei tawh lo in chutia rampalaileng ah chhantu pawh neiloa sawisak an tawk leh alu hial laksak antawk chu a lainat in akhawngaih kher mai. Tin, a mah rawn koh tu ngei kha ani tih te an ngaihtuah let phei chuan, chhantu mahmawh ngawihngawiha awm in, beisei tur tumah an awmlo tih hre reng chung pawha chhan tu tur atana aduh em em amah Roliana hming ngei lama rawn au ani teh chu ring in, a lainat na leh khawngaih na chu azual em em mai a. A rilru chuan Tlanglian khawho thah anih chu ringnghal in Roliana chu athinrim ta kher mai. Putar engmah tithei lo leh pawisawi lo thah ngawt chu a ngaihdan ani lo in, engchena hla pawh tlan chhe tawh mah ula, himna zawngin khawi khua ah pawh lut rawhu, he putar inthah lu hi ka laklet hma loh chuan ka umzui zel che u anga, ka kir san tawp lo ang che u, Roliana chuan ati chang ta fak mai.

#Roliana hian he putar thih chhan leh a mah that tutena an thah chhan dik tak hi hre ta ngat se, he putar thi ta alainatna leh amah thattu te chunga athinrimna hi alet tamtak in anasa ngei ang le. Chu putar khawngaihthlak chuan engmah tihtheih aneih loh zia chu ahai hauh lo, ahnunglam ațanga anghawnga rawn man tu in kal tura anawr na lam lam chu pai dawt dawt chunga pan ve zel in, thachak zet hmanga amah nawr kal tu in anawr kal na lam lama kal ve zel chu atana tihtur awmchhun ani tih pawh ahre chiang ngang mai. Midang te tana anthawm hriat harsatna lai tur leh rawn hmuhmai harsatna lai tur kawrte awmna an thlen tak ah chuan, anghawnga mansak tu pawh chuan akut hrawl zet mai chu la sawn in, an zawhna țhataka chhang tur chuan a vauzui nghala. He putar man tu te hi mipahnih ni in, khawilam ațanga rawnlang ngawt nge an tih chu he putar pawh hian ahre bik hauh lo.

#Putar nghawnga man saktu lo zawk chuan, a chempui lekkan uaih uaih pah chuan, putar inihvang ngawt hian ka that hreh reng reng lo che tih hria la, ka zawhna hi țhatak in min chhang ang che. Tlanglian khaw pasaltha te suat tu Roliana in tih hi tunah hian khawiah nge a awma, khawi ah nge kan hmuh theih ang tih chiang tak in min hrilh ta che, chuan heihi hre bawk la, kei ni hian Rokiana in tih chu kan hmuh na hmun hmun ah kan that nghal dawn ani tih hi hre bawk ang che, tiin ngeiawm fe a nuih pah chuan an zawta. Chu putar chuan thinrim zeta melh let pah chuan, Roliana vengtu ka ni em ni, engvang in nge ani awmna te chu min zawh, nangni ang tho hian ke te anei ve a khawi khawi ah te emaw chuan akal ve bawk ang chu, in hmu duha in that ngam tak tak anih leh khawchhung ah te va zawng ta ula tinia, tiin zamloh hmel zet chuan a chhang ve ta a. An rin leh beisei ang lo zeta chhanna an dawng ta chuan chung misual pahnih te thin chu ati rim kher mai, a nghawnga mansak tu leh a palian zawk ni bawk chuan, a chempui chu putar nghawnga chuktuah nghal in, nang putar laktlak loh nghawng tan nan chuan he ka chempui hi duhai in ahriam lam mah mah ani tih hria ang che. Khatianga thamlo zeta min țawngkhum leh anih chuan kei pawh in ka hrilh nawn tawh bik lo ang che, tunah hian khawi ah nge in mihringa chu akala khawi ah nge kan hmuh theih ang tih chu han sawi ta che, tia zawh pah chuan chuan an vau zui ve leha. Mahse, chu vauna chuan chu putar chu atizam aw zawng lo mai, a mah mantu te chu ngeiawm zeta nuih let pah chuan, naute u inrawn kal na lam ah kir leh ta ula, helai hmun hi chhuahsan in inkhaw lam ah haw leh vang vang rawh u. Ka thusawi chu in awihlo anih chuan, innupui fanau ten chawm leh hrai tu an nei lo mai palh ange, in mi zawn lai hi nangni ang putar pakhat pawh vauzam theilo tan chuan, beih chi ziazang ani lo tih hria ula. A chempui hrawl zeta in ringruh a sah chhum sak hma che u hian inthiar fihlim vat mai rawh u, ati ta hmiah mai a. Chutia an beisei loh ang hlira chhan na an dawng ta chuan chu misual pahnih te thin chu ati rim in an chempui te chu an lek kang uaih uaih tawh maia, mahse, putara lah chuan hlaulo zet hian, induh anih te chuan min that ta mai u la tinia, kumtam dam pawh ka tum tawh chuang hlei nem, chuvang chuan Roliana awmna chu ka hrilh che u ring duh suh u. Mahse, kei anga thih in hreh lo anih erawh chuan, tunah hian Roliana chu ka aw hre phak ah a awm ngei ang tih ka hria, a chhan chu pasaltha diktak te chuan khawihmun ah pawh, an mahni mamawha țanpui ngai an awm reng rengin, an țanpuina mamawha au tute aw hrephak in an lo awm leh nge nge țhin. Amah chu in hmu duha in that ngam tak tak dawn anih chuan, ka han koh sak dawn che u emni ang, tiin hmuhsit hmel fe chuan an nuih khum leha. He putar hian a nunna humhim a duh vanga hetianga sawi hi ani hauh lo, Roliana angaihsan vang leh ani lak ah chuan heng misual pahnih mai mai te hi chu eng an nidawn lo tih arin tlat vang zawk ani. Chutia hmusit taka chhan na leh nuihsawh na putar hnen ațanga an dawn leh tak ah chuan, a pate zawka thinrim na chuan avawrtawp thleng in ngaihtuahna fim pawh ahmang thei ta lo, putar hmuia chempuia nawr sawk pah chuan, i duh chuan tunah hian pasaltha nia i lo ngaihve chu han au ta che, chhan tu tur che awm lo lek a ka chin phar hnu ah a lu ka lo la ange, ati ta tun tun maia. Putara lah chuan engkhaw sawi set set lo chuan Rolian tiin a au zui ve ngheng mai bawka, mahse, au nawn leh tur a awm ta lo, lu per nawlh khawpa amah mantu palian zawk an anghawnga asah sak tak ah chuan, a lu tel lo in kawrte chhung ah chuan atla lut ta a. Chutah putar nghawng chhawk sak tu bawk chuan rum zeta ațhian pa chu melh in, i thluak ah khan engthil nge awm, Roliana chu hetia koha rawn kal mai tur ah i ring reng reng em ni. I thluak te kha hmang ve deuh ta che, tun ah chuan kan thawm hre phaka mual mual pawh an awm tawh ngei ang, khaw lam ah let leh phawt ila thathar in kan thawk chhuak leh zawk dawn nia, tiin a putar sah hlum lu chu chhar in ramhnuai ngaw chhah lam pan chuan an in zui liam leh ta ani.

#Roliana pawh chuan, chu putar ruang chu ramsa ten an ei mai loh nan, lungphek te chhar khawm in putar ruang delh beh nan chuan ahmang ta a. A duh ang te atih fel hnu chuan putara that tu te hnu chhui chu ațan ta nghala, thuitak chu putar lubung ațanga thisen far ningei tur leia lo far leh zauh țhin avang chuan, Rolian atan hnuchhui chu thilhar tehchiam ani lo. Mahse, an kal thui tawlh tawlha thisen far hmuhtur pawh akaht ve tial tiala, mual lian zet pakhat kal pela ruam thuk lam an pan leh meuh chuan thisen far hmuhtur alawi anei ta lo. Engemaw chen chu ami um te hnim pal thluk leh sul hawi zawng ațang chuan an hnu chu a la chhui ve thei zela, engemaw chang chuan sadaiek an rah pherh hnu te chu ahmu ve leh zauh țhin bawk. Mahse, chutia hnuai lam bih reng chunga kal chu sawt hek lo, Roliana chuan ngaihtuah na thar anei ta, rang zetin a hma lawka kawr ruam tui luan na ningeia ahriat lam pan chuan ahnuchhui lai pawh chhuizui lem lo chuan akal ta nghala. Arin leh beisei ang ngei in chulai kawr ruam kam vel leinem lai ah chuan ami um te rahna ke thla chu chiang zet in ahmu thei ta, ngun taka chung ke hnu te chu en in, mipahnih an ni tih leh pakhat zawk chu palian tawk tak leh khansang thatak ani ang tih chu ahre thiam nghala. Pakhat zawk rahna hnu zel rapa an pen chhin erawh chuan, chu pa ke pen zau zawng chu a ma ke pen zauzawng ai in azim deuh zawk tih leh, a ke rahna thla chu ama ke thla ai in ate deuh zawk ani tih chu hre thiam in, chupa chuan pumrua ah leh san lam ah a chen in atiat dawn lo tih pawh ahrethiam nghal bawk ani. Hetianga hmelma te pianhmang awmang hriat theih hi thil pawimawh tawpkhawk ani tih Roliana hian ahre chiang em ema, hmelhriat loh leh hmuh ngailoh khua ah, tu emaw a la hriat ngai reng reng loh pawh zawng dawn se, apianhmang awmang ahriat lawk theih chuan atan zawn a awlsam phah em em dawn ani tih ahai hauh lo.

#Ni in khawthlang lam ah aherliam sana, khua pawh in thimlam apan meuh chuan Roliana pawh athleng thui ta kher mai, tlang leh mual engzah nge aherliam sana kawrruam engzah nge akal kai tih pawh ahre tawh hek lo. Mahse, tlang leh mual engzah chiah nge aher liam san tawh tih hre lo mahse, Roliana thluak chuan, Tlanglian khaw lam pan lo in, Sihpui khua ațanga chhim chhak lam pan in an kal mek ani tih erawh ahai hauh lo. Chutia a rin loh lam hlir an han pan ta mai chu Roliana chuan mak ati in, angaihna ahre lo kher mai. Ama lo rindan leh suangtuah dan chuan Tlanglian khaw thleng rawk in an in um ngei alo rin teh lul nen, tun ah chuan Sihpui khua ațanga nihnih zet kal, fanai Lal Hrangkhupa khawlam pan in an kal mek ani tih chu ahrethiam țan ta ani. Zanthim leh ngawchhah hnuai ah chetchhuah ngaihna awm hek lo le, Roliana chuan kawrkam vela tumbu khai leng, kal paha apwh thlak te chu a pumpui ruak lutuk tur hnawhkhah nana hmang in, thingzar rinawm deuh leh tlak mai theihloh na tur ah chuan țhumu chungin khawvar anghak ta a.

#A ni hnih nana hmelma te hnu chhui a țan leh chauh tih chuan, a hnuchui lai chu keipui hnu ahmuh tak ah chuan keipui in alo tlak khalh ani tih chu hre thiam in, Roliana chu alungawi lo kher mai. Tun ah chuan hnuailam bih ngai bawk, Keipui laka in ven ngai bawk, a tan hmanhmawh taka kal zung zung chi ani tawh lo tih chu achiang thawkhat viau ani. Roliana chuan ami um te chu khua an luh hmaa umphak hman a in beisei na chu atlem tawh kher mai. Mahse, khua an luh hman avanga let san erawh atum in atum chhin reng reng lo, a thihdawn ruaia ahming lam tu putar khawngaihthlak zet lu telloa, Sihpui khua a let leh chu Roliana chuan atum lo mai nilo in thil zahthlak ber ah angai tawp mai ani.

#Chawfak hun zet ami umlai te hnu achhui leh tak ah chuan, vanneih thlak zet in Roliana chuan ami um lai te tlankhalh theihna hun remchang ahmu ta hlauh mai le, mhase, thil awlai tak chu ani lo mai thei. Chutia ralkhat ațanga Hrangkhupa khaw lan theihna hmun achhui thlen tak ah chuan, a hnuchhui lai chuan tlangdung lam zawh lo in, a din mekna tlang leh Hrangkhupa khaw inkar ruam thuk leh zauzet lam chu an pan ani tih chu chiang tak in ahmu theia. Engvanga ahnuchhui lai te chuan tlangdung lam chu zawhlo nge an nih tih pawh chu rinthiam ahar teh chiam lo, tlandung an zawh tawp na ațang chuan kham chhengchhe tak tak chu ințan ve nghal in, kal awlsam tak zawng ani dawn lo tawp tih pawh chu han en mai pawh chuan ahriat theiha, mahse, ami um lai te chu khua an luh hma ngeia umphak aduh anih si chuan, Roliana tan duhthlan tur dang a awm chuang lo. Chutah le, pasaltha țuanrang leh chak em em, hlauh nei bawk si lo Roliana chu, Sathar patuai ai pawh in anep bik chuang lo ange tihtur khawp chuan, lungpui leh kham chhawr dawh ah te chuan azuangkai zawk zawk maia, Sihpui khaw mi thattu te chunga phupa alak theihna tur anih dawn phawt chuan, engmah indal tir atum lo. Chutah vanneih thlak zet mai hian, tlangdung chhengchhe tak tak karlak ah chuan hmun remtha zet zet leh thui fe fe chu alo awm ve zel mai chu ni in, tlema achhengchhe lai deuh ah te chuan han muang ve deuh țhin mahse, hmun rem chin athlen apiang mai chuan chak fe fe hian Roliana chu atlan dawk pur pur zel maia. Atawp atawp ah chuan tlangdung rem chin leh Hrangkhupa khaw awmna tlangdung sang chho euh euh ințan na lai chu athleng thei ta. A kut hnung lam chuan a chal vela thlantui rawn luang thla mek te chu hruk zauh zauh pah in Roliana chuan Ni tla tur suk chen leka lo la in khai ve luang luang lam chu an thlir a, lungawi hmel fahran hian ka tlai chhiat lutuk loh ngei ka bei sei tia phun sap in, kawtchhuah lam pan chuan akal ta nghala.

#Favang awllen hmangțan an ni bawka, nunau fehhawng hmuh tur pawh an vang in, tlangval leh pa ho țhenkhat ramvak haw deuh chauh mai chu chulai kawtchhuah rawn paltlang tu te chu an ni hriha. Roliana chuan kawtchhuah lungdawh zawn, ko chunga hnimbuk phen ațang chuan nguntaka lo thlir in, ami um lai te chu an ni hlawm lo tih chu arin hriat theia. A mi um lai te kha an rawn kal phawt chuan hai theih a in ring lo, pakhat zawk chu palian leh khansang țhatak anih lai in, pakhat zawk erawh chu pa pangngai ve mai leh lian lem lo tak ani ngei ang tih chu arin hriat thei tlat ani. Tuibur hmuamda chen zet tur ațhut leh hnu chuan, tlangval nge pa tih pawh ahriat loh, hleitling țha zet leh inthazawh hmel fahran mai pakhat chuan Sakhi chal ki hreu bam tawh hi arawn paw zan zan maia, hmel pawh ahlim hmel sang sang kher mai.

#Khua pawh in thimlam apan ta, a mi chan te lah chuan an la rawn lang der mai si lo, Roliana chuan kawngdang an zawh anih te chu an ring rum rum țhin, mahse, kawtchhuah pal tlang loa an kal chu aring chiah si lo. Chuti chu nise, chulai hmun chu thlen khalh in an lo kal liam daihtawh tihna em ni ang, chu erawh thil theih ani lo. Roliana chuan kawrruam thuk tak leh tlang dung thui zawng te chu mitthla nawn leh in, engtiang chiaha in thui hleih nge ni ang tihte chu a rilru chuan achhut neuh neuha, kawrruam thuk tak aia achanve vel ngawt tura hnai zawk ah, hmanhmawh taka tlan chunga kal chu kawrruam zawh tute chuan an thlen khalh hman aring lem lo. Mahse, thil chhut hmaih anei ani tih chu a in hrechhuak ta, a hnuchhui lai apensan dawn khan a mi um te nen khan engtiang chiaha inhlat nge an nih tih chu alo chhut hauh lo. Chutah nguntaka an ngaihtuah nawn leh hnu chuan, a..chuti em em a in hlat chu kan ni thei lo, hmun khat ah khan an hnim rahthluk rawn tho leh țial țial lai kha ka hmu tlat mai, a enga pawh chu nise, khawthim chian thleng in nghak phawt ila, chuta an la rawn lang lo fo anih chuan khawchhung lam ah kan in chhuahchhal thung dawn mai aniang chu, Sihpui khaw chunga pawikhawih hlauhawm zia ka hriat tir hma leh kan putara lu ka laklet hma loh chuan ka kir san tawp lo ang, tiin angaihtuah ta a.

#Mahse, a mi um lai te chuan khawchhung lam ah mipui hmuh laia in chhuahchhalh chu an zuam lo te pawh aniange, Rolianan a rilru a siam fel hman awrh tih chuan kawtchhuah ah chuan an rawn lang ve ta hlawl mai le. Roliana lo suangtuah lawk ang ngei chuan chumi te pahnih lah chu an in len hleih in han en mai chuan pafa nimai awm hi an nia. Roliana chuan ami um lai te ngei an ni tih chu hre nghal in a palian zawk iptepui ah lai chu an thlek nghal vata. Chu paliana ipte pui puar dan ațang chuan engthil nge achhung ah chuan awma, enge a ah tih pawh zawh kher ngai lo in ahre chiang em em mai ani. Roliana chuan a silai dawtphir chu a sir thing kak ah tung in, a chempui hlaitha hlephlawp leh hriam zet mai chu a ipte pui ațanga phawrh chhuak nghal in, a bihrukna zawn an rawn thlen hun chu alo nghak ran maia. Chumi te pahnih lah chuan changru tu an nei reng ani tih hre hek lo le, thlamuang fahranin kawtchhuah lungdawh chung ah chuan ding in thlifim an han dawng khawmuang leh riha. Chutia an din lai chuan a palian lo zawk chuan, hei ral lu hawn ve ta lem chu bawhhla te pawh han chham ve la mawle. Kan thah tum ber lah that lo in kan let leh ta ngawt mai sia, min tir tu ber kan Lal khawnbawl hnen ah pawh kan phat thiam deuh angai dawn anih hi. Roliana an tih chu han hmuh ve a, lu uai hnawp khawpa anghawnga sah ka chak teh lul vei nen, tiin a bula ding palian zet chu an hrilha. Chu paliana chuan ner nawng nawng chunga lo melh in, i mawl vang leh i thluak thawl vang chauh alawm, Roliana pawh that hman loa kan let leh ni. Khatiang putar tlaktlailo zet fin pawh kha i chelh lo anih chuan, Roliana hming te chu lam ve chhen lo mai teh, kha putar khan Roliana a koh tak tak i iring reng reng em ni, ral in kan man tih midang hriat tur atum vang chauh anih kha. Tun ațang chuan Roliana chu ka kut ah dah hmiah la, a hming takngial pawh lam ve tawh reng reng suh ang che, atih khum ta zek maia. Chutah a ipte pui ațanga putar lu bung țham chhuah pah chuan, kha i duh leh bawhhla chu chham ta che, hetiang mihring pawh nilo lu hi bawhhla ka chham khum duh te chu ring reng reng suh, khualkai hat khawpa hming nei te lu chauh ani, kei Lianțhiaua hian bawhhla ka chham khum țhinni, tiin chapo zet chuan an hrilh nawn leha.

#An thusawi lo ngaithla reng tu Roliana thinin atuar ta lo, an thusawi ațang chuan putar an thah chhan chu amah vang ani tih te, a mah thah tuma Sihpui khawdai thlenga lo kal an ni tih leh anmahni tir tu pawh Hrangkhupa khawnbawl te zinga mi tu emaw ber an ni tih te chu Roliana chuan ahre thiam ta. An țawngkam chapo tak leh tham lo zet zeta an țawngkhum te chu Roliana chuan angaithla peih ta ngang lo, in hnen ațanga ka hriat duh tam tak chu min hrilh tawh bawka, tun ah chuan asawia sawi ringawt lo in chempui nen ve thung aw, tih leh a bihruk na ko ațanga zuanthlak chu arual ta nghala. Hrangkhupa khaw pasaltha te pahnih chuan, chutia an mithah tum ahmel pawh hmu hman loa an let san leh tak ngei mai in alo chang rureng ani tih an hriat meuh chuan, an mak ti chu an mengphawk nasa ta maia. An siali chuh nachang lah an hre hek lo, silai chuh pawh nise, a cheng an kau chhung leh an tin kan chhung in Roliana chuan duhtawk in asat hman dawn tho tih an chhut phak ve te pawh ani mahna. Roliana lah chuan zamna chhete pawh tel lo hian, nangni hi maw Hrangkhupa pasaltha a in chhal ve te chu, khatia dingzum reng lo khan Sihpui pasaltha hi rawn hmachhawn ta che u, tia vau pah chuan, tunge ka nghawng hi ka lu uaihnawp khawpa sah chak tu kha, rawnkal ula mi rawn sat ta che u. Putar che thei lo hmachhawn bak ngam innei lo em ni, tia thinrim zeta hrilh pah chuan a chempui chu a hum nghet sauh sauh mai. Chutah pasalțha Lianțhiaua lo zawk chuan, ngawi teh tlangval, tunge maw i nih chiah le. Roliana ni in i inchhal ve ngawt tak na a, Roliana chu i ni tak zet a maw. Engvanga helai hmuna lo awm nge i nih, thih i la duh lo anih chuan kalkiang thuai mai rawh, tiin arawn chhang ve ta a. Roliana lah chuan, Roliana ka ni emaw nilo emaw, ka tan engmah danglam na a awm chuang lo, nangni anga mahni sapel lai an hmel pawh hmuloa let san ngawt chi ka ni lo tih hria ula, ka lo kal chhan ka tih zawh hun ah helai hmun hi ka chhuah san chauh ang, atih khum ta hmiah maia. Tlangval, i thusawi chu i um pha lo ang tih ka hlauh pui hle mai che, enge helaia i lo kal chhan chu ni reng reng tia Lianțhiauan tham lo zeta azawh na chu, e le, putar pawisawi lo leh chethei lo that tu te chunga phuba la tur leh putar nghawng an chhawk sak ang chiaha, an nghawng chhawk sak ve tur in he lai ah hian ka lo kal ani. Pasaltha ah in inngai ve te anih chuan mirawn hmachhawn ta che u, min hmachhawn ngam lo anih pawh in ka that tho tho ang che u, atih khum leh ta hmiah mai a. Hrangkhupa khaw pasaltha te tan pawh sawitur dang aawm ta lo, an hmachhawn duh emaw duhlo emaw, an hma a zamna chhete pawh nei lo a ding, a thusawi tawh reng reng ataka hlenchuak țhin Roliana chuan, engti kawng mahin kalsan atum lo tih an hriat tak ah chuan an chempui chu phawrh chhuak in, Roliana hmachhawn zawng chuan an rawn ding ta nghala.

#Ngeiawm zeta nuih khum pah in Lianțhiaua chuan, naupang luhlul tak i ni, i luhlul man chu kan hmuh tir ang che, tiin a pan hnai hruau hruau maia. Roliana lah chu a zam lo nasa mai, kei ai in lian in sang zawk mahse, ka tan sahfuh na lai tur atam ting tihna animai tia ngaih tuah in, rangtaka che thei tur chuan a ke chheh te chu a siam rem pah zela. Chutah le amit sira a melh ruk reng, a veilam sir ațanga rawn veh tu pate zawka chuan a chempuia rawn vai ph in arawn zuan ta thut mai le, mahse, hmelma te ahmachhawn laia fimkhurna tlachham ngai lo leh inthlahdah ngai lo Roliana chu a sat fuh lo chiang kher mai, a rawn sat fuh lo mai pawh ani lo, amah zawk chu leichar ah chuan ril tla pur in a tla thum țawk maia, tho chhuak leh tura beisei chi ani tawh lo. Thei leh thei loa Roliana chu rawn melh țawk țawk in, a nak thler duaih ațanga aril rawn chhuak pur chu an melh zui leh zawka, chutah mak ti zeta meng rang ruai chung chuan nikhaw hre lo in a awm zui ta nghal a.

#Lianțhiau a chuan Roliana chetran zia ahmuh meuh chuan mak ati in, chu a tlangval hmachhawn mek chu zuamsual awl tak tur ani tih chu ahrethiam ve ta. Fimkhur zeta rawn bei ve nghal in a ban sei zet leh chempui sei zet chuan Roliana chu arawn vai țhelh thuak thuak ta maia, Rolian chu cherang in ațuan chu țha viau lo phei se zawng, chu pasalțha Lianțhiaua chuan a sat bung remrum tawh ngei in arin awm, mahse, hmelma te chet tumdan lo chhut lawk thiam tak leh țuanrang em em bawk si Roliana te ang duhthala sat fuh tur chuan, Lianțhiaua te ang țuan chuan ala phak lo deuh ni in alang. Chutah Roliana chuan, nang ang mihring putar che theilo nghawng sahbun na tawk lek țuan nei hnen ah hian, hun pe reng hman ka ni lo e, i nghawng kha lo veng țha ang che tih leh Lianțhiaua lama tlan phei chu arual ta nghala. Lianțhiaua pawh chu a lo awm mai mai bik lo, Roliana rawn tlan phei lai sat pha tur awm tawk vela a in ngaih rual chiah chuan, Roliana nghawnga chhawk ngei tum in a chempui chu na fe mai hian alo vai pawp maia, a tha neih zawng zawng sawmkhawm ani bawka vai pawh avai na ngiang mai. Mahse, a sah tum a sat fuh lo ani tih a in hriat ruala, a ke chheh siam rem paha a chempui vai tlang, vai let leh atum chu atali lutuk ta. Roliana chempui hlaitha zet leh hriam em em mai lah chuan ani nghawng te ang lek lek chu alo chawk zo nasamai chu ni in, a ban phak rual loh tura alu aper hran nawlh tak ah chuan, a thah tak putara ang mai in nghawng bung hmuar chung chuan a tlu zui ve ta ani. Roliana chuan Lianțhiaua chem vai phak chin chu alo tehru ran mai chu ni in, khatia Lianțhiaua lama atlan ta thut kha Lianțhiauan alo sah phak loh tur tawk chiah ah ding thut in, Lianțhiaua chem vai lak lawh tawh si , atum sat fuh leh si lo chemvai tlang ke chheh buai lai chu rangzeta zuan in, nghawng chhawk zawk khawp chuan a sat ta ani.

( Hemi chin ah hian ka rek bung leh phawt mai teh ang, dar 11 ațanga ral venga din ka ngai dawn sia, ka mit a hah riau mai. A nex tur kan tichhuak leh thei te anih leh atir lama kan sawi tak, ngawpui thimruih lama aluh tak hma a athil tawn, kan la sawi kim hman loh te hi a nex ah kan tel tawh mai dawn nia. Tin, Daikalin bang nghenga, muthlu lawp lawp chunga ziah chu, eng thuropui leh ngaihnawm tehchiam mah a awm tur ah min lo beisei sak lo ula, phunnawi lo leh sawisel miah loa lo nghak ve fan fan te tan tiin ka rawn dah ve hram hram ani e.)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 19th, 2017, 10:02 pm

PASALTHA ROLIANA ( Taitea )

PHEK 43 NA.

BY :- Hmangaih MT Chawngthu.

#Boruak thiangkuk hnuaia thlifim dawn vang vang pah in Roliana chuan, chunglama arsi rawn de țan sep sep te chu a thlira. Chutia arsi te an rawn inlar leh țan tak ah chuan, Sihpui khua achhuahsan ațanga a ni hnih na chu hmang zo in, zan hun a hmang țan leh mek ani tih chu a in hrethiam nghala. Chutih rual in, aduh khawp pai tur ahmuh loh vanga, apumpui thinrim inhrosa thawm hriat tur a awm fo tak ah phei chuan, apumpui țanghma ngai zawnga a chet chhuah thuai ațul tawh hle ani tih pawh ahai hek lo.

#Khawthim tur ințham, la eng deuh riairuai hnuai ah si chuan, a mi thahtak te ruang athawlh luhna hruizambuk lam thlek vang vang pah in Roliana chu a in ngaihtuah nasa maia. A hmaa alo rinlawk ang ngei in Tlanglian khua te nena an buaina chuan zung kaih țanin, azung peng te chu an ațaidarh țan mek nihian ahria a. Thu maia sawifel ngaihna awm tawh lo, a ruhno no in nek chhuah hun tur chu banphak ang leka hnai ah, ruahthimpui hawng tur in țham tluk zeta rapthlak in a in mun vel mek ni hian ahre bawka. Chuti anih si chuan, hmelmate kuta awm anaute chhanchhuah atum pawh chu engtin nge atih tak ang le, a duh leh cho vang ni hauh lo in, aduh leh beisei loh buaina chuan tha thlah hman lek lo in anangching zut zut reng ani mai si a. Rilru hah hmel zet chuan an thaw hawk a, enge tihhmasaka tihhmasak loh tur tih pawh hriatthiam har ati kher mai. Chutah a beidawn tawpa a mitthla a lo lang țhin, finna tinreng zirtira, pasalțha nitura anun kaihraui tu a pu, pu Vawmsata ngei mai chu amitthla ah rawn lang leh in, an in bul chuktuah huan an tihfai dun țuma a pu in, Taite, hnim leh hlo țhenkhat te hi chu tihian ritthlu mia mai mah ila apawi lem lo, mahse, hnimhlingnei ho erawh hi chu azung nen pawhphawi ngei ngei tur an ni ngai, azung nena kan pawt phawi lo anih chuan, angaite bawk in, mi chhun nat inpeihsa at hian an rawn chawrchhuak leh thuai mai țhin, tia asawi chu abeng ah chuan chiangzet mai hian arawn ri nawn leha.

#A pu Vawmsatan thu tamtak ahrilh zingah, chu thu ber kher chu engvanga abeng ah chuan rawn ri nawn leh nge anih tih chu ahrethiam mai lo. Hun harsa leh hreawm tinreng alo paltlang tawha, chung harsatna leh hreawmna te paltlang tura chakna pe țhintu leh, tumruhna pe țhin tu chu, a mah kaihruai tu a pu thusawi athinlunga cham reng te chu an nih tih chu ahai hauh lo, a harsatna tawh mil zel in a pu thusawi athinlunga cham reng te chu abengah arawn richhuak mai țhin ni hian ahria a, chung apu thusawi leh zirtirna pek țhin te chuan, ahun tak ah finna leh remhriat nate, huaisenna leh tawrhchhel nate nei tur in afuih in atichak țhin ani tih pawh Roliana chuan a hai hauh lo. Chutah, apu thusawi abenga rawn ri nawn leh chu, ngunzeta a ngaihtuah vang vang hnu chuan, hnimhlingnei chungchang ringawt a hrilh emaw atih kha, hnimhlingnei chungchang ringawt alo ni lo tawp tih chu ahre chiang ta kher mai. A tana mihlauhawm leh thah tumtlat tu te chu a bulpui leh zung chawpa apwt phawi lo anih chuan, hun remchang zawngin an veh ru reng anga, a tan thlamuang taka nun hman chu thilhar tak ani ngei ang tih chu ahre thiam ta. A hunlaia pasaltha huaisen leh fing, hmelma te beih kawnga ralrel thiam chungchuang pu Vawmsata chuan, Roliana kawng la rawn zawh tur chu a lo hmulawk thui in, a thil latawn tur leh hmachhawn tur thleng chuan alo hrelawk vek emaw tih mai tur hi ani a, fingtak leh huaisen taka engkim ahmachhawn theih nan, Roliana thinlung chu alo buatsaih lawk diam ningei in alang.

#Chutiang te anih tak si ah chuan, a pumpui țanghma angaih vang chauh pawh niloa, Hrangkhupa khuaa luh chu atana thiltih makmawh ani tih Roliana chuan hrethiam nghal in, tunge a mah thattura khang pasalțha pahnih te kha rawn tir, engvanga ani chu thah duh ve nawt nge anih tih chu, Roliana thil hriat duh chu ani ta. Chutianga amah thah duh tu leh engavanga thah duh ve ngawt nge anih tihte Roliana hian ahriat theih phawt chuan, kawng tamtak ah atan in ven aawlsam phah in beihlet an țul hun ah pawh, aler ațanga thuai hmasak te te ngai lo in, akungpui chawpa pawh phawi atih awlsam phah ngei ang.

#Roliana chuan, a mi thah tak te beng ahleh sak leh an silai alak sak te, putar lubung, rimtui tawh manglo zet te chu fimkhur taka hnimkar ah thuk ru in, an in beihna a thisen baw nuaih te pawh chu kawngdunga vaivut te rutkhawm in a phul bawka. A duh ang thlapa engkim atiha, an inbeihna hnuhma te athup fel hnu chuan, Ngaihtuahna dingtak pu chung leh engeng te emaw suangtuah chung in Hrangkhupa khaw lam chu apan ta ani. Roliana hian, Sihpui putar that tute lu hi hawn duh viau mahse, Ramhnuai ngaw kar ah, kawng mumal pawh awm bawk si lo. Chuachhap ah, silai pahnih ngawt aneihbelh ta bawk nen, putara lu hawn tel ngai bawk si chu, atan a hautak lutuk dawna hria in, an lu ai ah anbeng hleha hawn chu atum ta mai ni in alang.

#Hrangkhupa khua luh tuma a inbuatsaih tak ah chuan Roliana rilru ah thiltam tak alo langa, buaina hian min rawn zawng nge nia, kei mah hian buaina hi ka zawng zawk nita mai le..! Min thah tum tu ten, ka beih hmasak pawh nghak loa min thah antum miau si chuan, ankawng lo dai khalh mai loh chu enge tihtur ka neih chuan. Engkim anih tur ang anih hnua ruahman na țhapui pui duan in sawngsawhlawt na aneih chuan si loh chuan, mahni remhriat dan dan in kan che mai aniang chu. Rocham, Chhingpui min lo nghak hram hram mai teh u, kei in u hian englai mah in ka theihnghilh ngai reng reng lo cheu tih in lo hre reng dawn nia, tiin Roliana chu a phun sapa.

#A rilru tak chuan a naute chhanchhuak tura kal Roliana hian aduh em em tawha, mahse, nguntaka thil chhut mi Roliana chuan, a kal hlan in Sihpui khua in engbuai na nge an lo tawh ang, Tlanglian khaw pasaltha te fin an chelh lo anih phei chuan, ka in tihtur aneih loh chu thuhran, ka khua tia sawitur a la neih ve hram hram Sihpui khua pawh chu meivap mai a lo chang zo emaw anianga. Chuachhap ah amah hringtu a pa, taksa bawrhsawm zeta la dampui ve țawk țawk tu lah chu, ral laka inthiar fihlim zung zung tur in achak tawk tawh bawk si lo nen, a naute chhanchhuak tura akal hlana Tlanglian khaw ho in Sihpui an run anih vaih chuan, a pa chu dam in achhuak hauh lo ang tih Roliana chuan a hre chiang em em bawk ani. Chuti anih si chuan Roliana chuan enge atih tak ang..? Roliana duhdan leh tum dan chu hei hi ani, Tlanglian khua te chu Sihpui khua run thei lo tura siam hmasaka, anau te achhanchhuah hun ah pawh, hlimtak leh zalen taka ahruai haw theihna tur hmun, Sihpui khaw himna ngaihpawimawh hmasak chu Roliana tum leh duhdan chu ani. Helai taka Roliana rilru put hmang hi chu, Lal Isuan, " intan hmunsiam in ka kal dawn e, tin, intan hmun ka han siam chuan ka lo kir leh anga, ka hnen ah ka la ang che u, ka awmna ah nangni pawh inawm theih nan ", atih nen hian a zulkhat viau awm asin. Nie, a nau te ahruai hawn na tur hmun lo buat saih hmasak chu Roliana tan thiltih hmasak awm pawh ani ve reng reng tho mai.

#Mahse, Roliana ruahman na hi akal fuh vek kher angem tih chu rinthiam harsa tak ani ta. Chutia ruahman na leh tum mumal tak neia ahmahun tur asuangtuah mek lai chuan, Tawnzing khaw mipui te chuan an Lalfapa nupui neih hun tur nghakhlel taka an lo thlir, khuangchawi thla chu alo thleng ta ani tih hria in, an lo inbuatsaih ve mup mup mai bawka. An Lapa lah chuan, a fapa naupangber leh aduat ber nupui nei tur chu ruai nen ropui taka lawmsak alo tum ve bawk. An Lal fapa nupuia tur lah chu tudang ni lo in, tlangval tamtak leh khawdang lal fapa te meuh pawh in Sal anih vanga an iai leh hmuhsit phal loh khawpa hmelțha leh duhawm, Chhingpuii ani tlat mai le.

#Chhingpuii chuan, tuemaw chu beisei tur a awm lo tih hrereng chungin abeiseia, chu a beisei na chu țhenkhat tan, thihpui tham khawpa dawrawm leh chaurau nimahse, athinlunga hmangaihna chuan, chu beiseina dawrawm leh chaurau tak chu chelhding in, a hmangaih lo lan hun tur chu alo thlir ve hram hram țhin. Mahse, achunga thunei tu thu chu hnialtheih anei si lo, achunga thil lo thleng pawh chu atan sawisel thiang ani hek lo. Ni e, engmah sawisel theih anei lo SAL ani miau alawm.

#Chuti anih si chuan, Roliana beisei leh ruahman na te chuan awmzia anei lo in, athlawn in athamral mai dawn tihna emni ta ang le. Naupang mai an nih lai ațanga hmelțha atih em em, an unaua rethei tak leh mite hmuhsit tuar reng renga anawm lai pawha phatsan ve ngailo tu Chhingpuii chu, Roliana thinlung ah chuan engangtak in nge hriatreng aniha, engtiang chiaha thuk leh zau nge athinlung hmun chu aluah sak tih tumah in ansawi thei lo. Mahse, Roliana erawh chuan hei hi ahre chiang khawp mai, anau Rochami nen khawhar leh hreawm titaka hun an hman laia, an hnen rawnpana țhian duhawm nita Chhingpuii chuan, athinlung chhung ah nghet taka bu khuar in, vanneihna ten an phatsana, harsatna tinreng ten an atlakbuak lai pawh khan, phatsan ve hauh lo in athinlung chu a chenchilh reng ani tih ahai reng reng lo. Sala man tu ten, țiaului pana tleirawl hmelțha leh duhawm, ahmelțhat na chauh lo chu amah ah lungawina reng reng hmuh tur awm lo leh phurna reng reng pawh nei loa an chhawm liam, Rolianan rilru na em ema athlir liam tak kha, chu a thinlung luahtu Chhingpuii ngei chu ani.

#Chhingpuii nen chuan, naupang mai an la nih vang leh nula leh tlangval te inhmangaihna awmzia an la hriatthiam loh vang chauha, an thinlunga in duhtawnna te, țha intihtawnna te leh inhmangaih tawnna inphum ru reng te chu, hre thiam lo leh sawichhuak thiam lo mai chauh an ni. Mahse, hun a liama, Rolianan tlangval awmzia te ahriat chhoh ve tak ah chuan, athinlunga thu inthup hmangaihna chu hrethiam chho ve zel in, amah athanlen chhoh ang zelin chu hmangaihna pawh chu ațhanglian ve zel ani tih pawh ahre chiang em em tawh a, hlimtaka alo kawm țhin Chhingpuii chuan, athinlung khawimaw lai ah chuan nghet taka bu khuar in, englai mah in achhuah san ngai hek lo. Angaihtuah na mitthla ah te chuan Chhingpuii chu ahmu fo a, hmelma te kuta lungngai em ema a awm lai hmel te chu hmu in, Chhingpui, chheltak in Rochami nen khan lo tuar fan fan ula, hmelma te kut ațanga chhanchhuak tur cheu in ka rawn kal thuai ang. Chutih hun ah chuan, lungaih vanga i mittui tla te kha athlawn in an luangral lo anga, tumah in antih hreawm nawn leh che pawh ka phal tawh hek lo ang, tiin anau Rochami leh Chhingpuii te a chhanchhuah theih hun tur chu Roliana chuan a suang tuah in duhthu a sam ve fo țhin ani.

#Chutiang chu Roliana ngaihdan leh Chhingpuii chunga arilru put hmang ni mahse, Tuanzing khaw lam ah engthil nge thlenga, a thinlunga ahmangaih ruk em em Chhingpuii chuang ah chuan engthil te nge thleng mek tih hre ve hek lo le, a hmangaih Chhingpuii leh anau Rochami te him taka ahruai chhuaha, hlimtaka Sihpui khua athlen pui theih dan tur te chu suang tuah chung in, chumi atan a aruahman na te tibuaithei tur nia ahriat zawn hmuh tum chuan, Hrangkhupa khawlam chu a pan ve mek bawk a. Chutiang chu thil nihdan leh awmdan anih tak si ah chuan, mutmu pawh tuah mumal hman lo leh hahthikula abeihna chu engmah lo mai ah chang in, he lei anchhe dawng ah hian athlawn in aluangral mai dawn ta em ni ang le. Chhingpuii laka ahmangih na te chu engmah lo mai ah chang in, a beisei na leh duhthu a lo sam ve țhin te chu van boruak sang ah te khian thamral mahse, a farnu chhanchhuah leh a Nu phuba lak tur a la nei ve alawm, Roliana thawhrim na leh hreawm tawrhna chu athlawna luanral tir Khuanu pawh in aphal bik tawp lo ang.

#Hrangkhupa khaw luh hma kawrte tui, thiang țha zet chu Roliana chuan in khawlh khawlh in, a chhawlhal zualpui leh apum ruak lutuk pawh chu zia deuh huai in ahria a, aduhtawk a in zawh hnu chuan athlansa zual pui leh ataksa a thisen kai te tleuha silfai nghal thuak thuak in. Engtinnge min that tura pasaltha te rawn tir tu chu ka zawn chhuah anga, engvanga min thah duh ngawt nge anih tih ka hriat chhuah theih tak ang, tih te chu ngaihtuah pah neuh neuh chung in Hrangkhupa khua ah chuan apen lut ta a.

#Thlamang zan nimah se, khua athiang in chunglam ah arsi a lo pe ve un bawk nen, Fanai Lal, Hrangkhupa khawthleng leh pianhmang te, akhaw len zawng leh zauzawng te chu Roliana chuan arin hriat thei reiruaia, khaw te leh intlem zawkzawk an ni lo tih te leh tlangchung hmunrem leh nuamtaka chu khua chu din ani tih pawh ahre thei nghal ani. Naupang pawnto tur insawm khawm, in au rinak nak kar ah chuan Roliana pawh in, vengtawntirha in chhete te, ding ve thlihthliah zinga in nga vel akal pelh hnu chuan, in pakhat kawt zawla putar lo ding chu hmu in apan ta nghala. Chu putar hnen ah chuan Tlanglian khua anih thu leh, a ramvah na lam ah eng eng te emaw tawnga ankhua rawn vak thleng ta anih thu te ahrilh hnu chuan, chu putar nen chuan inchhung lam ah anin zui lut ta a.

#Roliana chuan thlenin tur adil sual lo khawp mai. Chu inchhung ah chuan, nula upa ve lam tawh, hmel ngawr ngawr ah chuan duhthu han sam thui vak ngaihna awm bik lo, nupuia neih tum tan pawh a chak hmele tih mai loh chu chhuanlam tur dang van hmel zet leh tlangval pakhat, putara tu te chu lo awm in, an nu leh pa te erawh, naupang nawi nen buh veng in thlawhhma riah chilha an awmbo lai alo ni a, Roliana tan pawh in thlahrun ana lo deuh ngei ang. An pu ber erawh han en mai pawhin tar tak zawng ala ni hauh lo tih ahriat a, a tihrawl leh a vun zur ve lam tawhin atuam a ruhrel te chu an liantha in, a vanglai chuan tawh khirh ve tak ani ang tih chu ahriat theiha, a awm leh mal vela ser inrin ruak te pawh chuan, avanglai hun chu pasaltha nunchan zir nan alo hmang ve hle tawh ani tih pawh Roliana tan thil rin harsa ani lo. Roliana rin ang ngei in chu putar chu, vanglai sawi hat tham nei, pasaltha tlawmngai leh dikna ngaina mi ni in, mi rilru puthmang pawh chhut thiam tak ani. Chutiang mi anih avang chuan, inchhung enga Roliana hmel leh pianhmang te ahmuhchiana, Roliana chezia leh țawng hmang te an hriat hnu phei chuan, Roliana chu mipangngai mai mai ani lo tih te, dikna ngaina leh thinnel tak, apawngapuia mi te chunga kut thlak ngawt ngai lo mi anih chu aringthiam nghal maia. Ahmel ngainat awm leh pa hrak mai te, a mitmeng ngaihla tak kara hlauhna leh zam hmel hmuhtur awm reng reng lo te chuan, chawp leh chilh in chu pasaltha hranghlui lunglen na chu a kaithoa, engamah hma in Roliana chu angaina nghal em em ringawt mai ani. Chutiang bawk in atu te pahnih pawh chuan an mikhual tlangval chu, misual leh awmtha duhlo, hmeichhia leh tar chaklo te pawh zuah loa lu lak tur zawnga vak mai mai mihring ani lo tih chu an ringthiam ve mai bawk ani.

#Rolianan chaw te a eipuar ve tak ah chuan, titi pui thla hlel hmel zeta lo nghak tu putara nen chuan titi khawchang te chu an sawidun ta a. Putara chuan, Tlangliankhua maw ka ni i tih kha, tia bul țan in, Roliana chuan rang deuh mai hian, aw ni e, Tlanglian khaw hlun chu ni lemlo mah i la, ka khua tia chhal ngam tur chu ka ni ve tawh alawm, engpawh nise, in khua ah hian Tlanglian lam khaw chhuak chu awm tawkte pawh an lo awm ve mial lo maw, tiin a chhang thuaia. Putara chuan ngawilawk teh, kan khua ah hian Tlanglian lam khaw chhuak pakhat chu hriat ka nei ve awm asin maw, amah chu kan lal khawnbawl nupui ani nghe nghea, khualkai meuha pasal nei thei chu ahmel pawh pangngai veh vawh tak ani, tute emaw kamliam ațanga ka hriat dan phei chuan, Tlanglian lal khawnbawl min farnu ani awm asin, tun ah zawng an lo upa ve ta bawk nen, an hmel te pawh achuai zo ve ta anih saw. Kei lah hi mi bengtla lo tih tak ah, an chanchin te pawh mi sawi ka hriat chhawn tih mai loh chu hriat alawi pawh ka nei bar lo e. Mi neinung chhungkua te hi zawng keini ang rual tan, han biak lumlama han len pawh ngawt te hi alo nuamlo tumhrang ve bawk si nen, miten an sawi hi kan hriat ve chhun te chu an nih mai mai hi maw, tiin a hriat ang ang te chu ahrilh ta hlawma.

#Putara thu sawi lo ngaithla tu Roliana chuan arilru te te in, tunah chuan ka hriat duh zawng zawng chu ka hre kim ta e. Tlanglian khua tia kan in chhal ve ngawt pawh ka tisual lo khawp alawm, tia ngaihtuah rauh rauh chung chuan, ka pu, chutiang khawpa nula hmelțha, khual kai tham meuh te chu kei nupui ah nei ve ta ngat ila, ka han duat dantur zia chu a hlim na leh lungawina tur zawng reng rengin ka phi ruai thei hial ang chu maw le. Chutiang ang nupuia nei ve ta lem tih lungawina chang pawh hrelo an nih chuan an rilru akalkhat ve hle tihna ani ngei ang, tiin putara thusawi chu alo tuihnih thuaia. Putara lah chuan nui kak kak chung hian, maimai țhina, nangni ang tan te chuan khualkai te chu sawi loh, tuipuiral kai khawpa nula hmelțha i la nei ang chu, mahse, kan lal khawnbawl ang em chuan nupui te thu thua awm chu i tum em lo ang chu maw, tiin an fiam zuia.

#Putara chhanna tawite chuan, Roliana beisei leh hriat duh chu afun kim chiang ta kher mai, chu khawnbawl ngei chu amah that tura pasaltha pahnih tir tu chu ani tih leh, a nupui, khualkai hat khawpa hmelțha tia putara sawi chu, Tlanglian lal khawnbawlmin, Riliana pa farnu ani tih chu sawinawn ngailo chiang ani ta. Chutiang chu thil awmdan anih si chuan, nupui te thuzawm nuam ti em em lal khawnbawl tan chuan, a nupuia nuța te mualpho taka siam tu leh an fapa Riliana thihna a mawhphur tu nia ngaih theih, Roliana that tura tute emaw tirh chu thiltih makmawh ani ngei ang le. A mi tirha te tan lah, lal beng fah zawnga thusawi thiam tak khawnbawl in, Sumdengzu dawng thei tura asawipui dawn miau chuan, hnailphal chi rual lah ani si lo. Roliana chu an thaw deuh hawka, a thinrimna chu putar hmuha tih lan loh hram tum chuan a in thunun hram hrama, mahse, thil nithei tur awm te suangtuah khawma, an chuktuah khawm vel chhung chuan alo ngawi rei deuh nitur ani, putara chuan mak tihhmel zet hian alo thlir vauh vauh mai chu ni in. Inthiam loh hmel zet hian Roliana chuan, ka pu, i rilrua i ngaihtuah leh i suangtuah mek kha adik ani, atira i hnena ka sawi ang kha ni lo in, ramvak satliah leh kawngbo satliah ngawt chu ka ni lo alawm, ati ta ngawt maia. An titi dun mawlh mawlh laia a ngawi vang vang ringawt pawh, putara tan thilmak anih tawh teh reng nen, a ngaihtuah lai mek leh arilru diktak arawnsawi sak leh lek phei chu, putara tan mak tihloh rual ani ta lo. A hma a tlangval thu awndiai chu, a țih thar ta thut nge, angaihna thar ta thut zawk tih pawh hriat theih loh khawpa mitmeng buai nuaih chung in putara chuan, tlangval mihring pangngai nge i nih a, thlarau zawk i nih pawh ka chiang ngam ta meuh lo e a, engtin nge ka thil ngaihtuah lai mek kha i lo hriat theih teh tlat chu le, tiin azawt ka hau maia. Roliana chuan nelawm fahrana nuih var var pah hian, ekhai ka pu, chu i thil ngaihtuah lai chu ka rawn ringdik tihna em ni, rinthu ka rawn sawi ve deuh mai mai chauh ania sin, nguntaka min en chunga i mit mendan in thlak kual vel leh, ka ke ler ațanga ka chhip thlenga min han en vel te, chutih paha sawlaia ka silai tun i va thlek leh zauh zauh țhin te khan, i hnena ka thusawi kha i ring tawk zo lo deuh ni in ka ngaihtuahna hi arawn hriat tir ve tlat alawm, ati ta a.

#Putaran sawimai tur pawh hre loa mak tih hmel zet leh ka hau chunga ala thlir reng lai chuan, ka pu, lal khawnbawl i sawia chu tunge maw ahming ni reng reng le, i hnena ka sawi tak ang khan, kei hi ramvak kawngbo satliah ka nih tak si loh ah chuan, in lal khawnbawl chu hmaichhana hmuha hanbiak lumlam ve te pawh ka duh viau maia, engtin emaw min rawn hmutura koh kal dan te hi ihre mial lo maw, an in lamah te va kal chilh dawn ngawt ila, zanthim hnuai ah hmelhriat loh va lan teh thut chu an lo ralkhel lutuk ang tih te ahlauhawm deuh in kan ring sia, a mah zawk in min rawn hmu ta mai se, atana thuchah pawimawh kengtu in, hei leh chen hi ka rawn pan ta bawka, he lai inkar hnai te hi chu arawn kal ve thei tawh em ang chu maw, Roliana chuan ati ta a. Roliana thiltihdan leh thusawi reng reng chu putara tan chuan thilmak ani zo vek tawh maia, pasalțha huaisen leh fing, mi rilru puthmang pawh hre ve theia in ngai țhin khan, a hmaa tlangval thu, mitmeng fim tak mai leh zahawm ruk na riau nei chu, arilru puthmang leh ngaihtuah na chu ahriat thiam phakbak ani tih a hrechiang in avanglai hun pawha atlukloh tawp tur mihring ani tih chu ahre chiang ta khawp mai, chutih rual erawh chuan a ham tlangval țhu chu ngaihnat ruk na riau chu anei tlat lawi si ani. Chutah, putara chuan, va koh ringawt chu thilhar pawh ani nang, mahse, chhan tha ve deuh te a awm anih ngawt loh chuan koh kal chu ahar deu mai thei, a lo ti ve thunga. Phur hmel fahran in Roliana chuan, ka pu, koh chhan lam ah chuan buaina tur a awm lo ang, va koh tu in khawnbawl pa hnen ah chuan, Sihpui khaw lama i mi tirh te khan, tu emaw i hnena thu thlen tur anrawn tira, thuruk tuma hriat ve chi loh anih avang in, an mi rawn tirh chun, chulai hmun ah chuan anghak mek che, tiin he lai hmun hi rawn kawh hmuh mai se, phunghmu ansawi tluk zeta rang in arawn kal thuai mai ang, ati ta a.

#Pasaltha nunzia lo hre chiang em em tawh tu putara chuan, thu in zawh chianna hun ani lo tih leh țul atih hun ah chu tlangval chuan atana hriat tur tul atih chin chu ala hrilh ve mai dawn ani tih chu hria in, thudang sawi tawh lo chuan, a tunu, kawmchar lama lakai paha lo thu ngawi ve reng chu au in, Mambawih, khawnge kan Liancheua kha aawm ni, tiin atupa tlangval awmna chu an zawta. Atu nu chuan, nichin deuh khan ka pubte chu an inkawm tui hmel emai țhiante in ah ka va chuangkai ve lawk ange, ka rawn haw leh thuai ang tiin achhuak bo lawk anih kha, tiin alo chhanga. Putara chuan, lehta mai mai țhin hian, hei kan pasalțha hi, nakin ah zawlbuk lama ahruai te pawh angai dawn asin, rawn hawng hmasa lo in zawlbuk lam ah te hian alo tlang leh ngawt ange, chutia ka mi tirh tum ber a awm si loh chuan, keimah ngei hian kan khawnbawl chu ka va koh ange, tiin ațhut na ațang chuan ading chhuak ta nghala. Roliana chuan, ka pu, pasalțha tia chhal tur khawp in engmah tih pawh kan la neih ve loh hi, tunge tia a lo zawt che anih pawn Zaliana ani e, i ti mai dawn nia, tiin an hrilh leh hrama. Putara lah chuan, Zaliana a ni, Roliana ka ni e pawh ti la, kei hi chuan ka awih tho ang, tia nui sun sun chung chuan a chhuak ta nghala.

#Roliana rin ang ngei chuan ami nghah te chu nghahrei an ngai lo kher mai, a thlenin putar leh lal khawnbawl, Kapțhianga te chu kawngkhar ah chuan rawnin zui lut in, lal khawnbawl chu achezia leh amitmeng ațang rengin angaih ațha zan lo tih chu ahriat theiha. Chutah putara chuan, Zalian keini tana hriat ve chi loh te insawi duh tak in, tikhan kan khawnbawl nen hian lo inkawm teh u, kan Liancheua chu ațhiante in ah ka va en ange, zawlbuk lam ah te akal pui loh che chuan, mahni a han lawiluh ngawt pawh anuam nang, tiin a chhuah san leh ta nghala. Roliana chuan, amah that tura pasalțha te rawn tir tu chu chiang zeta en in, a hmel hmuh ringawt pawh chu thinrim pui tham ni hian ahria a, chutiang mihring nena titi khawchang sawia thut dun reng chu athlahlel tehchiam lo nitur ani, pehhel kual hamsa te te lo chuan, ka pu, nangmah hi maw inih a, pu Kapțhianga chu. Nihnih kalta mai khan Sihpui khaw ram lam hnaih ah ka Sanghal kah hlim hnu ka chhui lai in, nangma mi tirh te ni awm tak pasalțha pahnih, pakhat chu palian leh sangtha tak, pakhat zawk erawh chu kei aia khan hniam deuh hret tur nen kan in hmu hlawl maia. An taksa leh hmai vel te chu nasataka sawisak tih hriat reng reng hian avung in an aduk cherchur mai bawka, engthil nge an tawn tih ka zawh hma hauh in an mahni zawk chuan, an chanchin leh thil tawn dan te chu min hrilh in, i hnena thu thlen tur hian min ngena. Patling leh patling chutiang teh hrepa khawngaiha țanpui tura min ngen tak si ah chuan, hnial chi nia hre lo in, i hnena an thuchah te thlensak tur chuan in khua hi ka rawn pan ta vang vang mai ani, tiin athusawi chu a han țana.

#Lal khawnbawl mitmeng chu adanglam chak kher mai, engmah sawi lo mahse, a kuthmawr khur dar dar chuan, thinrim na te, mak tihna te leh hlauhthawnna te chu athinlung ah an in pawlhsawp nuaih ani tih chu arin thiam theiha. Hmundang leh hundang ah, thuhran sawia inbia chu ni se, chu lal khawnbawl Kapțhianga chuan anihna te hrereng in, zahpah lo leh chaldelh deuh takin a țawngkhum fak fak ngei tur hi ania le. Mahse, ahmaa țhu tlangval lianțha zet mai in, chapo na tel miah si lo leh amitmenga zam hmel reng reng hmuhtur awm loa, a thusawi tur nia ahriat te pehhel hlek loa an sawi fak fak mai chuan, chu khawnbawl mahnintawka chapo ve zet mai pawh chu, sawitur hre lo lek in ațhut ngawih tir reng mai ani. Chutah Roliana chuan sawizawm leh in, i mi tirh te chuan, tunchin ah reng reng Roliana lam hawia ke pen tawh lo tur in an duh che a, chuti anihnloh chuan a tir tu mai nilo, i khaw tlangval tamtak ten an tawrh mai bak ah, pawisawilo nunau te thleng in an tawrh phah an hlau hle ani. Tuma hnena sawi lo tura min ngen angin, tunah hian he thu hi i hnen ah bak ka la sawi chhuak lo tih hria la, an duh ang chu zawmsak ngei la ațha in ka hria. Tunah hian i mi tirh te erawh chu ramhla tak an thleng tawh ngei in ka ringa, i duhthusam ang te titheiloa an hlawhchham tak si ah chuan, i hmel hmuh an hreh hle ni ngei tur ani, he khuaa rawn let tawh lo a khawdang hlatak pan an tum ani awm e. An sawi zel dan phei chuan, a mah thah tuma bei ni mahse, an mi thahtuma chuan an nunna em chu laksak duh lo in, a kal tir lehta mai ani awm asin. Nie, kei pawh hian Roliana chanchin chu ka hre ve khawp mai, mi in an bei hmasa te anih ngawt loh chuan, apawngatak in tumah abei hmasa ngawt ngai lo, a țul tawp teh anih ngawt loh chuan mi nunna laksak phei chu aduh ngai lo. Mahse, aduh loh dana nawrlui tu an awm erawh chuan, an beisei loh lam ațangin an hrawkhrui achhah sak țhin, Roliana thah tuma veh chu Keipui hliam hnuchhui ai in ahlauhawm zawk tia an lo sawi țhin hi dawt ani reng reng lo. Ka thusawi hi i ring lo emaw, thah duh hrim hrim vanga i ke i pen lui zel emaw anih chuan, i rin loh leh beisei aia rang in a thur chhuak ngei ang che. Ka pu, chu zawng chu i hnena sawi tura i mi tirh ten min chah leh, i hmakhua ka ngaih vanga ka sawi belh duh te chu an ni e. Ka thusawi te kha huat thu ah la lo la, kei pawh Roliana hmelma, Tlanglian khaw mi tho ka ni a, chuti chung chuan Roliana hi dik lo tak in ache ngai lo a, apawng atakin mi athat mai mai ngai lo tih hi ka hre chiang em em ani, a ti ta a. Hetia amah thah duhtu chungah engmah ti loa, vauna thu an chhak chhuak ringawt mai hi hriat thiam ahar deuh mai thei, mahse, Roliana hian a hlauh vang leh athinrim loh vang ani reng reng lo, afarnu Rochami te kha angaihtuah em em tawha, ahmelma te chunga chemsen a lek reng chuan anaute chhanchhuak tura thawhchhuah hun nei thei dawna in hre lo in, tawngkama hmanga vaubeh hi atum hrih mai chauh ani.

#Chutai Rolianan aduh angte a sawi tak ah chuan, chu khawnbawl chu Roliana lam hawi in an țhen lui ve hram hram a, a thinlung lam erawh anui lo chiang kher mai. Chutah Roliana hnen ah chuan, tlangval i chung ah ka lawme, kei mah vang in i hah hle mai leh nghala azialo Ka ti tak zet zet ani. Tin, i thusawi te pawh kha pawmtlak tak ni in ka hria, tiin a thinlung hlaua khur ru der der chu lanchhuah tir hlau tak chung chuan lawmthu te chu ahrilh ve ta a. Chutih rual erawh chuan, a maha bet tlat ngaihtuahna țhalo hman ching anihna chu rawn lang chhuak leh in arilru chuan, engtik ni ah emaw chuan he khua a pasalțha zawng zawng te hi ka la tir chhuak ngei ang, tia ngaihtuah in. Chu khawnbawl, an lal rilru hneh theih na tur thil eng eng emaw, ngaihtuah chhuah lama tuanțha zet mai chuan ngaihtuah chhunzawm zel in, khatiang mihring laktlak loh lutuk te chu rawn haw tawh malek se ani mai alawm, tlema an thang rei deuh hun ah Roliana thah angin lal hnen ah ka sawi then anga, phuba lak chak in kan pasalțha te chu an phu sek tawh mai dawn ani, tia ngaihtuah in a rilru hah zual pui pawh chu reh deuh huai chuan ahre ta a. Chutah Roliana hnen ah chuan, tlangval hei Liancheua te putu pawh an rawn hawng ta bawka, ka ținsan phawt mai ang che u, he khua ah hian buaina emaw harsatna emaw i tawk anih phawt chuan min rawn pan ngei dawn nia, tiin a chhuak ta nghal a.

#Putara chuan, Roliana bula țhuthmun rawn rem leh pah chuan, in duh ang te in lo sawi hman meuh maw, a hmel ațang mai chuan thu lawmawm tak dawng chu a ang zan lo anih kha. Engpawh nise, ramhnuai hei leh chen paltlanga rawnkal tur te chuan țhiante pawh rawn hruai ve tur che anih vei nen, kan lal khawnbawl kha alawmloh zawng thu i hrilh te anih lek phei chuan, he khua hi itan ahim lutuk lo maithei asin, tiin arilru anuam zan lo ani tih hriat tak hian an sawia. Roliana lah chuan, ka pu min ngaihtuah lutuk duh suh, țhian te chu ka rawn hruai ve bawk alawm, tiin alo chhang thuaia, mak tih hmel zeta Roliana en pah in putara chuan, țhian ka rawn hruai e a, khawnge i țhian rawn hruaia pawh chu a awm reng renga, tiin alo zawt let thuaia. Roliana chuan ka pu, ka țhian rawnhruaia awmna chu i hre duh anih chuan, i hriat fiah theih dan tur in kan hrilh ang che, chu ka țhiana chu englai maha min thlahthlam ngai lo tu leh ka kal na apianga min zui tu ania, tun ah hian he kathinlung chhung ah hian ani chu a awm mek ani, a hmingah pawh kei chuan harsatna tiin ka vuaha. Naupang tualchai rual lek ka nih lai ațanga tun hun thleng hian chu harsatna chuan min zui in min thlahthlam ngai lo. Mahse, amah avang chuan chhelna te, huaisenna te leh finna tam tak ka chhar in ka neih phaha, ka tan chuan țhiantha tluk zeta hlu anita ani, tiin ahrilh fiah ta a.

#Putara chuan engang pawh in a hmaa tlangval thu chu chik in chhut chhut mahse, engang mihring nge aniha engtiang chiaha huaisen leh ropui nge tihte, engtiang chiah nge arilru puthmang ni ta ang tih te chu a chutchhuak in a hrefiah zo ngai dawnlo ani tih chu a in hre chiang ta khawp mai. Chutah akut pahnih han nuai hlawm nawk nawk pah chuan, mi huaisen leh dikna ngaina, pasalțha fing leh chak bawksi tia an sawi Roliana nen hian inin tluk thial ta ve in ania ka rin tak ber mai che ni, ati ta ngawta. Rolian lah chuan, nuih deuh sun sun pah chuan, maimai țhina, Roliana te chu keini tluk chi ziazang pawh va ni nghal lo chuan. Amah erawh chu, kei ni tluk rual loh ni mahse, a chanchin chu an lo sawiuar ve deuh te pawh ava ang ve, kei pawh hian ka hmu ve fo tawha, chutiang taka pasaltha dangte chunga leng tur bik chu ni in ka hre lo, " khualthuthang leh arpan chuk chu apung tual tual e," tia an sawi țhin hi adik anih ngei dawn chu, tiin an chhanga, putara lah a dang mai duh bik lo, nih chu ani mai thei e, mahse, " pan lo ah tho afungai lo " tih țawngkam te pawh a awm ve bawk alawm, tiin alo hnial ve thunga.

#Lenghawn ar khuan hun te ahnaih tak ah chuan, Roliana leh Liancheua te pawh chuan zawlbuk lam chu an pan ve ta a. Zawlbuk an va thlen chuan, valupa te leh zawlbuk meilum chhim tu pa tling rual țhenkhat te chu an lo titi barh barh hlawma, chutah Roliana te pahnih rawn kal an hmuh chuan hawihhawm taka lo chhawn in, Roliana chu tunge aniha, tukhua ațanga rawnkal nge anih tih te chu lo zawt in, thutna tur te chu an lo kawhhmuh thuaia, Rolianan an ahming chu Zaliana anih thu leh Lal Rivunga khua Tlanglian ațanga rawn kal anih thu te a achhan hnu chuan, val upa pakhat chuan, a enga pawh chu nise, thawk te la in han chawl hahdam ve phawt la, kan naute ho nula rim an rawn haw hun chuan inbuan ah an rawn cho ngei dawn che sia, i tan lo chawlh hahdam te pawh ațul ngei ang. Kei ni khua hi chuan, kan mikhual tlangval te kan zinga an tlangnel thuai theih nan, tupawh helai ah hian rawn mikhual se, kan lo infiam pui ngei ngei țhin. Chuchu kan tihve dan ani miau maia, nang pawh in infiamna a ngai in kan naute chu i lo buanfiam ve an ngai dawn anih chu, mahse, i hmel leh pumrua han en reng reng hian kan naute zingah han chai tawk awm deuh che anawm lo ang tih pawh ka hlau zawk khawp mai a, ati taa.

#Roliana chuan, chungthil chu thlengtur sa reng ah ngai in, khawtin tihdan ani tih chu ahre sa renga. Chuvang chuan phat der kual pawh tum bik chuang lo. Inbuan lai entur nei dawna an in hriat tak ah chuan, zawlbuk meilum chhima paho thukhawm pawh chuan haw mai ta bik lo chuan an lo ngaak ve țhap hlawma. Chutah Roliana chuan, amah buan inpeih sa ata zawlbuk chhuat laia ding chu pan in, nuih var var chung chuan, khawnge keimah Lal Rivunga khua Zaliana ka ni ngaie, tih pah chuan a va din chilh ve ta a. Khawlian pangngai ve tak anih avang chuan tlangval rual pawh an țhahnem in zawlbuk ah chuan an khat huang maia, an mikhual pa leh an khaw tlangval inbuan lai chu hmuhnawm titaka thlir in an ri luih luih mai ani. Chutah an rin loh zawk an khaw tlangval chuan mikhual tlangval chu achawi kang ta tlat mai le, an mikhual tlangval chu apian adik in chak hmel hle chuan an lo hre hlawma, mahse, chiangtak in khawtual tlangval chuan achawi kang miau mai si. Chutah ațum hnih nan țan an han la thar leh, mikhual tlangvala pawh chu ațang nasa ve hle chuan ahriat mai, mahse, inbuan thiam lutuk lo nia hriat theih tur chuan, a che chu akhawr ru riau hian ahriat a, țan erawh ațang nasa ve ngang mai. Mahse, ake a chhep sual zauh mai ale, a tumpuipa khawtual tlangval chuan aphawikang leh ta vawk mai le, zawlbuk thawm pawh ațha in aring ngang mai. Roliana chuan nuivar var chung chuan, ka ke kan sual hlauh chu le, phawikan ve ngei che ka tum teh lul nen, ka hneh ta ngang lo che ani e, ati ta a. A buanpui pa pawh chuan, ekhai min hlahthlem mai mai anih kha, thahrui ah chuan ka khan lo deuh che ni in ka hria, mahse, i kechheh a buai leh zauh țhin khan i duh angin a chet tir thei lo che anih kah, tiin țhatak chuan alo chhang ve bawka. Chutah pakhat lek buana duhtawk tir chu an tum awzawng lo mai, an khuaa buan chak em em pawh nilo in chutia an tlawm ngawt mai chu, mikhual tlangval buan châk chu an rawn in lar ta sup sup maia, Roliana lah in ka chau tawh e, min hrethiam tawh mai teh u tih atum bik der lo, a mah chai tuma rawn ding apiang mai chu, thatho hmel zet in alo kuah ve chat zel mai bawka. Chuti chung chuan hneh alawi chu anei chuang der lo, lo thlir tu te chuan fiamthu nan taka lo hmang in, inbuan zir nan atha khawp alawm, a peih peih khan buan mai teh u. Ahmel ena inbuan thiam ve te pawh a an teh lul nen, tha athawh ve ngial pawh in engtihna mah ani lo ve, tiin an lo nuih hluah hluah maia.

#Chutah, rei tawk fang an in buan hnu chuan, an khua in buan chaka an neih, piantha zet mai leh thahrui ngah hmel zet chu rawn dingchhuak in, naute u, buan buan duh teh suh u, kan mikhual tlangval hian afiam kual in ahlahthlem vel mai mai che u anih hi, kei hian khawtual mi te hlahthlem awmzia chu kan zirtir ange, tih leh rawn pen chhuah chu arual ta nghala. Roliana chuan, chutia in buan thiam lo ang taka alang der ani tih rawn hriat sak thei tu chu, inbuan thiamtak leh tawnhriat ngah tak ani ang tih chu aring thiam ve nghal mai bawka, tlema thapui thawh ve deuh pawh angi ngei dawn tih ahai lo.

#Tlangval te chuan an khaw inbuan chak chu hmun lo kian in, Roliana nen chuan an in kuah bet ta ran mai la, Roliana rinlawk ang ngei in, chu buanchaka chuan dim atum reng reng lo tih hriat zet mai hian, Roliana puan ven arawn man pah chuan, a vun tlema zawng chu an hmer tel deuh saka, chutah Roliana inrin hman hma chuan zawlbuk chhuata tla thum dawp khawp in avawrh ta ngheng maia, Roliana meuh pawh atho zi ve țalh țalh mai ani. An mahni lo thlir tu te lah chauan, an khaw buan chak chet dan chu dem ahnek in an lo au hlauh hluah maia, thenkhat in a aia chiang in vawrh rawh tia an lo au lai in, țhenkhat lah chuan i la dim mah mah anih kha an lo ti ve bawk. Chutah, Roliana rawn dingchhuak leh chuan nui hmel la pu tho mahse, phuba lak ngei chu atum ruh kher mai le, tham lo zeta lo thlir tu lam chu pan phei leh nghal in, nghet tlet tlawt chuan a kuah ta chat maia, chet sual nawn leh chu atum lo chiang kher mai. Chutah Rolianan ava kuah leh chiah tih chuan, a buanpui pa chuan ahma aia chianga hnung lama vawrh tum chuan an phih leh ngheng maia, mahse, ahma a ding chu a phih nghing zo țawk chu ani ta mai si. Mak ti zet chunga chet dan tur ngaihtuah leh ngahla in, mikhual tlangval inrin loh lai deuh leh ke chheh rem lo deuh lai nia a hriat ah chuan, ahma aia na zawk mah tur leh vawrhkan ngei tawh inring chuan an phih leh ngheng maia, mahse, awmzia anei ta chuang lo. Phawikan tumtu tluk zet in anmahni lo thlir tu te pawh chuan mak an lo ti ve bawka, ahma lawka duh duh huna an phawikan mai mai theih ni si, tun ataka an khaw buan chak ber pawn an phawi kang zo ta tlat lo mai chu, mak tih vanga angphuau chung chuan an lo thlir ngawi thup ringawt tawh maia. Khaw buan chaka lah chuan athiamthil chihrang hrang hmang chuan an bei ngial țhin, Roliana lah chu a lo in daikhalh zung zung zel mai si, a rem hriat na leh thiamthil zawng zawng hmanga abeih ngial hnu pawh chuan, mak tihna bak hlawh chhuah anei thei ta chuang lo.

#Chutah le, Rolianan zawlbuk nghing lawih lawih khawp in thapui a thawh ve ta, a mi buana lah in tlawm zawka țan chu a lo hreh ve tumhrang bawk nen, a hma in alo țawng lian ve lak lawh tawh bawk si nen. An mah ni anpian ațha in, thahrui an ngah dun bawk nen, chak pawh an chaa dun nangiang mai, thatawp chhuaha an han in nawr tak tak mai chu le, zawlbuk chhuat atana rawpuichang an phah, hruipui hnanga hmer beh vek pawh in adawl lo mai palh ang tih hlauhawm tak ani, an rah na lai apiang mai chu, akul pawp pawp ni hian ahriat tawh maia, lo thlirtu te lah thawm chhuah ngam reng an awm taw lo, thaw dep dep chunga lo thlir in, hmuhnawm an tihna leh an khaw buan chak atlawm palh mai ang tih an hlauh na chu ain zat thial awm asin. Rei ngial an in nawr hnu chuan, phuba lak na hun țha Rolianan ahmu ta, atumpui pa ke chheh sual zauh lai chu nangching in, hnung lama awn thut pah chuan, a mah avawrh aia chiang tur leh zawlbuk bang deng dawt khawp chuan avawrh ta ngheng mai le.

#Tute mai pawh chu mak tih luat vanga țawng zai rel mai thei pawh awm lo in, ka hau chung chuan an in en hehaw hlawma, an mikuual tlangval, nuihzata fiamthu thawh nana hmang tu te leh, duh duha khai phar thei emaw an in tih vanga ngainep zeta lo au nawmnah tu te chu, thehhmeh an sawi ang chauh an ni ta, an thil hmuh chu awih loh han tum viau dawn mahse, mahni maia hmu leh hria ni hek lo le, an lo ngaihnep ve ngawt mikhual tlangval chuan, fiamthu thawhna ang leka ngai in alo buan fiam vel mai mai ani tih chu hrethiam nghal in, an ni tana cho rual loh val ani tih chu hrilh nawn an ngai lo chiang kher mai.

#Zanlai ar an khuang țan tih chuan, Roliana mu chu aharh hlawl maia, engthil emaw ti harh tu awm tlata hria in che lo chuan an ngaithla vang vanga, chutah amah ti harh tu chu engthil nge anih tih ahre ta. A bula mu tlangval chuan a naka rawn kheuh zauh pah in, Roliana hriat tur tawk lek te hian, zan lai lai ah te zun an chhuak tlat mai țhin hi chu a buaithlak țhin mange, tia phun sap chung chuan atho țuah țuaha, bawhbel lam pan chuan akal ta a. Roliana chuan engvang ngawta rawn tiharh kher nge anih tih chu ahrethiam lo kher mai, atho a anih te chu an ring dawn rum ruma, mahse, tho a anih chu aring chiah bawk si lo. Engpawh chu nise, chhan enge maw tak chu a awm tur ani, engmah chhan awm loa mi mutui lai kheuh harh ngawt thu va awm nghal lo chuan, tih leh amah kheuh harhtu tlangval, zunram thiar chhuanlama chhuak ta chu zui chhuah Roliana chuan arual ve ta nghala. Arin hlelh ruk ang ngei in, ami zui chhuah pa dinna zawlbuk kawt zawl tawp chin a va thlen hma deuh chuan, chu tlangval chuan akut in a lo hui mawlh mawlh maia. Chutah Rolianan akiang ava thlen rual rual chuan, țhainpa tunge i nih ka hre ngai lo che, mahse, i taksa hi leidaia zalha i thlarau pialral lama umliam mai atan chuan i ui awm lutuk ka ti deuh ani. Zanina kan khaw buanchak mualpho taka i siam avang khan, kan Lal te leh pasalțha ho in i tan, duhawmna reng reng nei lo rorelna an kal pui mek ani. Naktuk zing khawvar thleng hun i nei, ka thu hi awih la tun ah hian he khua hi chhuah san nghal rawh, kei pawh helaia ding reng hman ka ni lo, tu emaw in minrawn hmu hlauh anih chuan, ka chan tur pawh i chantur nen thuhmun reng ani ang. Mihuaisen leh tlawmngai tak i ni tih ka hria, tunah hian beihlet duhna rilru pawh i pu ngei ang, mahse, mi sawm that in nangpawh thi ve ta tho la, enge awmzia awm chuang ang ni, tun ah chuan ka sawitur ang ka sawi zo ta, i ngaihdan dan ni rawh se, tiin zawlbuk ah chuan aluh san ta a.

#Roliana ngaihtuahna te chu an tawi tuk tawh maia, mi pa ve lem hlauh neia tlanchhia han nih chu a tlawmla ngang mai, a ngam chuan min bei rawh se, thih hlau lo țheuh țheuh kan in sat bung remrum dawn tihna ani mai alawm tite chuan an ngaihtuaha. Mahse, a nau Rochami leh Chhingpuii te a mitthla a an rawn lan tak ah chuan, phiar ruk in aawm mek ani tih hrilh tu tlangval thu sawi chu dik tihna chen anei ta, chulai hmun ah chuan misawm lai pawh lo thihchilh thei se, enge atana țangkai na tur leh hlawkna tur awm chuang, a pu Vawmsata thu sawi țhin te chu hre chhuak leh in, tlanchhiat hun a awma beih hun pawh aawm, mia ang maia dinna ngaia din reng vang in hlawkna kan hmuh phah kher lo, pasațha diktak chuan tlanchhiat hun leh beihhun ahre tur ani, tia alo hrilh țhin chu a hre thiam ve ta.

#A thlenin putaran, engtizia nge nita ngai tunang zan zan ah te tia a zawhna chu, ka pu, tlanchhiat hun a awma, beihhun pawh a awm, tia hmana ka pu in min hrilh țhin kha, tun ah hian dik riaua hriatna ka nei ta tlat alwm le. Apawi khawp mai, engkim chiang tak in ka la hrilh ang che ka lo tih rilruk lai in, tlanchhiat hun dik tak tia ka pu in min hrilh țhin kha, tun ah hian alo thleng ta miau mai si a, i hnen ah engmah hrilh fiahna hun ka nei dawn ta lo anih hi. Mahse, ka pu, engtik ni ah emawchuan he khua hi ka rawn rap leh ngei dawna, engkim mai hi chiang tak in ka la hrilh vek ngei ang che, tiin a iptepui leh silai te chu la in kawngkhar ah chuan achhuak ta nghal a. Putara chuan, rangtaka rawn umzui in, Zalian lo dik lawk teh, i tan zanthim hnuaia ngawkara kal ahar awm sia, hei meichher tur ka siamsa hi keng rawh, tiin sumhmun banga mauphelsep telhnih țawnsa diama athiah chu la thla in ape ta a. Putaran damtakin le tia a thlah na chu, nangpawh ka pu, damtakin lo awm ang che tia chhang let in kawtchhuah lam chu apan san ta a.

#Chu zan chu, Sihpui khaw lal leh ațhuihhruai ten thutlukna mumal pawh siam hleithei loa, ro anrel zan chiah kha ani a, Rolianan kawtchhuah lungdawh athlen chuan, a mithah tak te ruang athuhruk sa chu hnukchhuak leh in, awlsam taka hmuh mai mai theih loh na tur hmun, nghardai hlingbawn bukzet hnuai ah chuan athawlh lut ta thunga, ngunfe an zawnga nghardai bawn hnuaia an vak lut te anih ngawt loh chuan, chuti maia awlsam chuan an hmu chhuak kher in arin awm loh ani. A duhang te atih fel hnu chuan, amithah te beng ahleh sak, hnahthial hnaha afun leh Sihpui khaw putar lubung athuhruk te chu phawrh chhuak in a iptepui ah chuan akhung nghala, chutah, lungdawha ding chunga a in ngaihtuah leh vang vang hnu chuan, Sihpui khua arang thei ang bera thlen thuai chu thilțul tak ani tih te chu ngaihtuah in, Sihpui khaw pan tur chuan ahmaa ngawthim chhah zet lam pan chuan akal ta ani.

#An khaw thiltawn mek avang chuan Sihpui khaw mipui te chuan, thinthia mut pawh har anti hle mai, khua avar hma hauh ațang in, khua chu var thuai thuai se ti niawm tak hian, mahni muthmun țheuh ah chuan anin let anin let tawha, chutaa khawvar hun nghak hlel taka mahni khum lai zawla an in leh tawn chhen lai leh khawfing in chah atum țan mek tih lai tak chuan, kawt chhuah lama bawhhla chham vang vang ri leh bawhhla chham ri areh rual chiaha silai puak ri dur thawm chu an hre ta. Bawhhla chham tu lah chu, a aw ri ațang mai pawh chuan tunge ani tih Sihpui khaw mipui te chuan an hai lo nasa mai si. Chutih lai taka Sihpui khaw mipui te hlim na chu engang taka nasa ni ang maw....???

*Nex episod ka ziak leh thei angem tih inhre lo mah ila, thunawi kan nei ve lawk teh ang.. Mi thuziah sa ngaihnawm titaka lo chhiar ve țhin, like leh comment erawh.pe duh miah lo te hi, kan ram hruaatu țhenkhat, eiruk ching te nen hian huangkhata khung chi an ni in ka hria a, Chutih rual erawh chuan, keima story bik ah hian han sawi ta ila, kei hi chuan mite anga ka ziah ve hman loh avang leh post ka siam regu theih loh avang hian, tute mah hi ka story like leh comment pe tur in ka phut ngai lem lo, mahse, like leh comment pek tlaka ngai ten, like min pek saka, comment na țha tak tak leh fuihna thu țha tak tak te min pek țhin vanga tun hun thlenga, la ziak ve thei hram hram hram kanih erawh chu phat ka tum hauh lo thung.

Tin, tlawmngaia comment min pek sak țhin tu te hi tlemin inin thlahrung deuh emaw ni chu aw, ka ti deuha, inrilrua in ngaihdan diktak te hi han phawrh chhuak ve ta ula, a ngaihnawm hle mai, ti satliah ngawt lo in, sawisel ngailai leh diklo lai nia in hriat te a awm chuan, inthlahrung lo leh sawi hreh lo tur in kan ngen duh che u ani e. Dik leh țha zawk nia in hriat te min hrilh duh si loh chuan, katan hmasawn ahar emai.. Taitea story min chhiar saka, like leh comment hlu tak tak min pek sak țhin tute in zavaia chung ah lawmthu ka sawi mawlh mawlh e.. ( edit na hun a awm țhin lo. )

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 1st, 2017, 6:37 pm

PASALȚHA ROLIANA (Taitea)

PHEK 44 NA.

BY :- Hmangaih MT Chawngthu.

#Khawchhak kawlkil a eng uaua, leilung pawh rawn lang țan in, zanlama chawzawng chi leh hram chi chiapcha te pawh in ngawih an chuh ve ta. Chutih mek lai chuan, thim lal tirhkoh te zinga tel ve hiala mawi, zanthim pawh in dang zo lo a ngawpui chhah tak tak rawn paltlang tu tlangval pianțha tak mai leh darpharh hlai hlephlawp chuan, kawtchhuah lungdawh chung ah țhuthmun rem in, khawchhung panna kawng langthei tawp lam chu beisei nei tih hriat zet hian amelh leh zauh țhina. Ahmel pawr fap leh a mitmeng dul hnak dan ațang mai pawh chuan, achau rimtawng tawh in mutmu tuah mumal lo in hunrei tak chu a awm tawh ngei ang tih hai rual ani lo. Tu emaw, a lam pana rawn tlan, ke pen ri tlat tlat thawm ahriat rual chuan a mit ko chu chhin ak in, ahma lama khawchhung panna kawng in zam raih chu an thlir thuai a, Uipui vuakțhelh tlukzeta, chak mangkhenga a lam pana rawn tlan chu tunge anih tih hre nghal in, nuisuk chung hian ' țhiana leh, ka hmelma ni in, ka um lai nita la, umphak i van huphurh awm duhdawn vemawle, ' tiin, a țhianpa alam pana rawn tlan mek chu a lo nuih var vara.

#Zakungan kawtchhuah arawn thlen chuan, țhianpa, pulhhri tlanchhiatsan an sawi ang mai lah ni che, Phungpuinu i hmu chu ani em lo maw, chuti fakauha hmanhmawha i rawn tlan chiam mai le, i țha amaw, tiin lungdawh chunga țhu Roliana chuan alo zawt thuaia. Zakunga hmel chu, engthil te nge angaihtuah tih hre tur in chhuidawn thiam ahar kher mai, lawmna te, mak tihna te leh ngaihțhat loh na te chu a in pawlhsawp nuaih ni ber hian ahriat a. Chutah, Roliana chiang zeta melh pah chuan, țhianpa, pulhhri tlanchhiat sana rawn tlan zawng ka ni lo alawm, nangmah zawk hi pulhhri in aman ta che emaw tiin, iptepui leng vawn vawn khawp in ka rawn tlan mai asin, hei ihmel han en mai erawh chuan, pulhhri vanga thi mai tur chu ila an loh hi. Mahse, i hmel pawr dan em em leh i mitmeng chaurau lutuk erawh, ngaihțhat loh pui thama mawi anih hi maw le, tia chhan pah chuan, 'țhiante thlima vah bo san pawh i lo thiam khawp mai, nangmah zawng reng reng hian tlang leh mual, kawrdung chen in kan suartluan ang tihte hi ngaihtuah nachang i hre ve reng reng emaw chu,' tiin, vui aw titih chuan an sawi zawma. Roliana chuan, țhianpa min ngaihtuah zia chu sawi lo mahla, i hmel leh mitmeng ațang khan alang chiang viau in ka hria, hun hlutna leh pawimawhna te hrethiam lo tawk vela fing lo ni hlauh ila chuan, ka kal bo tur thu, rawnhrilh tur che in emaw, ka ruala kal ve nghal tura rawn sawm tur che in ka rawn zawng hmasa ngei tur che hi ania. Mahse, putar pawisawi lo leh engmah titheilo nunna laksak tute hnuhma, herlum ngaihna awmlo khawp in ațhing hman ang tih hlauhthawnna in min nawr ta si a, kei mah vanga in buai dantur te pawh hre rengin, ka pawi sa zo lo ani ta ber e, tiin, putara that tute hnu chhuia a liam tak dan leh Fanai lal Hrangkhupa khaw thlenga aum zui tak dan te chu ahrilh ta a. A duh ang te asawi zawh hnu chuan, a mithah te siali a laksak chu lek kang in, Zakung i duh zawk zawk hi thlang rawh, i tan leh kan pumdeng pa tana ka rawn hawn sak che u anih hi, tiin Zakunga chu aduh zawk an thlan tira. Zakunga hlimhmel leh a mitmenga lawmna lo lang chhuak chu Roliana chuan ahmuhhmaih lo chiang kher mai, chuti taka țhiante hliman thlen tu ani chu, amah tak pawh chu ahlim veng veng mai ani.

#Zakungan Roliana thusawi te angaihthlak zawha engvanga bo vang vang mai nge anih tihte ahriata, siali meuh arawn hawn sak ani tih te ahriat tak ah chuan, a vui hmui leh hmel tum vuau te pawh chu rawn pangngai leh in, ngaisang leh tluklo in tih hmel zet hian Roliana chu a en tlawk tlawk maia. Chutah inthiam loh hmel zet hian, ' țhianpa, Roliana i ni tih leh, Roliana chu pasalțh huaisen leh tlawmngai, engmah lo maimaia hun khawhral ngai lo ani tih, ațhian te meuh pawh in kan lo theihnghilh leh țhin hi chu kan thiam loh tak meuh meuh ani e. Ka țhian, mi ropui tak zawng i lo ni ngei mai, mahse, kan putara that tute i nghaisa lai leh, Hrangkhupa khaw buanchak nena in in bei lai ka hmu ve ta lo erawh, dam chhung in ka ui chatuan dawn ta anih hi,' a ti taa.

#Chutia an țhianduna hlim taka chanchin te an in hrilh mawlh mawlh lai chuan, Zakunga rawn tlansan tak khaw mipui te pawh chu rawn tlan thleng ve țan in, reilo te chhung in khaw kawtchhuah ah chuan Roliana bawhla chham ri hria a rawn tlankhawm te chu an tlim ta hmur maia, an hmel ațang mai pawh chuan, Roliana an ngaihtuah zia leh damtaka an hmuh leh avanga an lawm zia chu hai rual ani lo. An zing ah chuan abik taka Roliana ngaihtuah em em tu leh, Roliana zawng reng renga ramhnuai ngawkar hmuntin lo hrut kual tu, valupa pu Dokhuma pawh chu rawn tel ve in Roliana leh Zakunga lo dingdun lam chu arawn pan nghal thuai a. Ankiang arawnthlen chuan hlimhmel zeta Roliana chu en in, Rolian damtaka i rawn kir leh chu alawmawm ka van ti em, nangmah zawng reng reng in Zakunga nen hian kiltin kiltang kan lo hrut kual ve e kan tia, ihmel hmuh chu sawi loh i hnuhma takngial pawh hmuh kan neih reng reng loh chu maw le. Engti tiha thangbo ta mai nge maw i niha, bawhhla te kha irawn chham tak mai le. Hei i hmel ațang mai pawh hian, chawlh hahdam i mamawh tak zet anih hi, tia rawn bia in, amitmenga mak tihna lo lang chhuak te pawh chu hmuh hmaih rual ani lo.

#Pu Dokhuma chauh chu, angaihna hre lo leh maktih hmel zeta Roliana thlir tu chu ni lo in, a chanchin ahrilh tawh Zakunga tih loh midang zawng chu, angaihna hre lo leh Roliana bo tak chhan hre chaka mak tih hmel zeta thlir tu te chu an ni. Lal Sairuma meuh pawh in, a khua venghim tura ami rin ber leh aruktaka khawdang lak ah pawh alo chhuan ruk em em Roliana chu, leikapui tlangsang ațanga lo nghah ngawt zawng thei ngang bik hek lo le, a lalpuan chu adar ah bat in, muzuk fei hawl chungchuan akhawnbawl te nen mipui hnung ah an rawn thleng ve hlawl mai bawka. Khaw mipui te chu sawi loh, lal ber thlenga Roliana aw an hriat vanga an rawn tlankhawm ta mai chuan, Sihpui khua in Roliana an ngaihtuah zia leh an thlakhlelh zia te, a chunga rinna an lo nghah nasat zia te thleng mai chuan atichiang hle awm e.

#Chutia lal meuh arawn thlen tak ah chuan, Roliana pawh in a bo chhunga a chanchin tlangpui chu lal leh mipui te hma ah chuan sawi in, tumah chanchin hrilh hman loa hmelma te uma athangbo ta mai leh, a mah avanga mipuite rilru nuam loa an lo awm avang te chuan ngaihdam a dil nghala. A duh ang te asawizawh hnu chuan, a iptepuia putar lubung leh putara that tute beng a ah chu phawrh in, lal leh mipui te chu ahmuh tir ta nghal a. Lal leh mipui ten Roliana kal bo chhan an han hriat chian meuh chuan, Roliana an ngaihsan na chu azual in, a chet dan chu ropui an ti kher mai. Chutih rual chuan an khaw putar that tu te chung ah chuan an thinrim tlang in, phuba latu nih chu an chak tlang em em vek mai ani. Tichuan putara ruang hlawm tur a tlangval te chu intir liam nghal in, lal Sairuma leh aho te nen, Roliana chuan khaw chhung lam chu apan ve ta a.

#Chutih mek lai chuan Tlanglian khaw lam pawh an awm maimai bik hauh lo mai le. An sangawizawnpui khua, Hmunzawl ațanga pasalțha rothap leh pawisak nei lo, hmelma te chunga zahngaihna lan tir awmzia hre hlek lo an chah chu, athuihhruai pasalțha pathum te nen varțian ah Tlanglian khua rawn lut in, an rawn thlen rual rual chuan Lal Rivunga chuan, akhawnbawl upa te, apasalțha te leh valupa te chu a koh khawm nghal a. Tichuan, Tlanglian khaw chheh vela an mahni do ngam tur awmchhun leh khaw len lam ah pawh, Tlanglian khaw el phak ve deuh nia an hriat Sihpui khaw beih dan tur chu an rel zui ta nghala.

#Chutia an mahni pui tutur pasalțha rothap leh ralrel thiam zet mai, mi tamtak in ahming ringawt pawh an khurh pui țhin, lamțanga an han nei ta chu, an thu pawh arum țha al al hlawm kher mai le. Diktak chuan, Tlanglian khua te hian țanpui tu leh kaihruai tu țha tel lo chuan, Sihpui pasalțha te hmachhawn chu tunhma ang ngawt chuan an zuam tawh lo ni in ahriata. Roliana an kut ațanga atlanchhuah leh hnu phei kha chuan, Sihpui khaw haldarh vek chu chak rilru viau țhin mahse, an thinlung ah hlauh rukna an neih tlat tawh avang in, Sihpui khaw pasalțha te hmachhawn chu an chak teh chiam lo ni in alang. Chutih rual erawh chuan, Sihpui khua chu an haldarh vek lo emaw, che theiloa an siam emaw anih ngawt loh chuan, engtik ah emaw Sihpui khua zawk chuan an la chingchau anga, an thu hnuai ah an la khun ngei dawn nia inhria in, ngaihțha tak leh thlamuang taka awm chu har an ti em em lawi si. Chutiang te anih avang chuan, chutia țanpui tu leh kaihruai tu tur pasațha hlauhawm zet an han nei ta chu, an rorel thu pawh arum in, Sihpui pasalțha te leh tlangval rual te chunga zahngaihna lan tir pawh chu an tum lo nasa mai ani.

#Hmunzawl pasalțha, Tlanglian khua te chhan tura lo kal hi pasalțha Hauțhuama ni in, khualkhaw hla tak tak thlenga pasațha hlauhawm tia mite hriat ania, a hmingthan phu lo in hmel lam ah erawh malsawmna adawng chaurau ve hle thung mai. A rilru țhat loh ang anga ahmel ah pawh ațhalai zawn fe ngai, chhiat belh leh tur chuang ka hmel ah hian a awmlo bawka, enge katan hlauh tur awm chuang, tih rilru pu duh mai awm taka mawi hi ani a. Amah a palian in, a darpharh hlaițha tak mai leh atihrawl phiarfuat mai te, ahmel țihbaiawm tak mai te chu tlangval tamtak tan tlanchhiat san vang vang tham ani hrim mai. Tin, a mah ahuaisen leh chak ang bawk hian, hmelma beih leh ralrel kawng ah pawh athluak ațha in fing em em maia. Hmunzawl lal pawh in achhuang nangiang mai, Tlanglian khua țanpui tura tirh chhuah pawh hi Hmulnzawl lal chuan rem ati lo in, tawhsual atawh palh ahlau em em maia. Mahse, ațhian tha leh sangawi zawnpui, lal Rivungan angenngawl em avanga ui bet ngam lo ani. Chutihlai in, Hauțhuama chak zawng tak mai leh phur zawngtak mai alo ni bawk nen, pasalțha fing leh remhria, țanpuingai tupawh tlanchhiat san loa țanpui duh zel mi, mihuaisen leh chak tia mite hriat tura hming rawn chher thar, miten a chanchin an sawi apianga fakna thu an sawitel țhin Roliana chu, ahmachhawn chak zawng tak mai ni in, ahming thanna hliahkhuh thei tu tur nia angaih Roliana thah tum chuan, an lal remti lo chung chu dil luiin arawn thawk chhuak ta ani.

#Pasalțha Hauțhuama chuan, Sihpui khua leh Roliana chungchanga ahriat duh ang te ahriat hnuchuan, chapo hmel zeta hawi valh valh chung hian, ' Chutianga Sihpui pasalțha te thuruk kan hriat tawh ber chuan, Sihpui khaw pasalțha te leh an tlangval te chu kan tan, belchhunga sa ang chauh anni tihna anih chu. Inthlauk te kha hmang in ngaihtuahna te kha han hmang ve chhin ula, buaina tur dang awm in in hria em, Tlanglian khua rawnrun tur chuan, an tum hun aia nikhata hma in an rawn chhuah ngei angia, khawen lai chuan min rawn bei duh dawn lo tih pawh thil chiangsa ani. Chuti anih chuan, khawvar rual chuha min beih chu antan pawh thilțha ber leh ruahmanna fing ber ani ngei ang, tin, chutianga minrawn luhchhuah tum an nih phawt chuan, Tlanglian ramchhung khawimaw lai ah hian, khua ațanga hla lutuk lo ah anrawnin chhek hmasak phawt ațul dawn tihna ania, chu chu kei ni tan vanneihna tur ani dawnta tihna anih chu, ' tiin lal Rivunga leh a roreltute melh kual pah chuan an sawia. Lal khawnbawlmin, Riliana pa chuan phurzet mai hian, chu Hauțhuam, awlsam tea kan thah chimih theih chu i ring tak meuh amaw, rin aiin an pasalțha Roliana saw fing thiam ve tak mai ania, belchhungsa hi ei hman lo in kan daibaw palh ang tih chu hlauhawm ve tak tho chu ani, fimkhurtaka kan beih ațha ang, alo ti ve thunga. A rilru chhungril ah chuan aphur in, Hauțhuama ho chuan Sipui khaw ho chu that chimit vek sela, a fapa Riliana thah sak tu phei kha chu bung sawm lai ah chhuah se, tih chu aduh dan ani.


#Khawnbawlmin zawhna chu, Hauțhuama chuan chhang nghal in, ka pu, kei hi pasalțha Hauțhuama kani ngai e, belchhungsa daibaw khawpa tlaw leh ngaihtuahna neilo ka nih ka hre lo. Thil pakhat chiah min han hrilh teh u, Sihpui pasalțha te thuruk in hria tih hi, Sihpui pasalțha te zing ah hria an awm em ? tih pah chuan lal inchhunga țhu ho chu an melh kuala. Chutah, Tlanglian khaw pasalțha pakhat chuan rawn chhang thuai in, tumah hria an awm lo ang tih ka sawi ngam e, an thuruk zawt chhuak tu pawh kei mah ngei hi ka ni, an thuruk mi hrilh tu tlangval lah chu, thingluang zawha kan inbeih tuma an khaw pasalțha te chet tumdan min hrilh ru tu tho kha ania, ka thil hriat duh te min hrilh lo anih chuan, a hma a an khua alo phatsan tawh dan zawng zawng, sihpui pasalțha te hriat ah ka puangzar ang, tiin kan vau mai chu, a hlau teh mai asin. An pasalțha ten an hria ang tih keinin kan hlauh ai maha nasa in, an khaw pasalțha te hriat chu ahlau fe zawka, chuvang chuan tu hnen ah mah asawi chhuak tawp lo ang, tiin alo chhang thuaia. Ngeiawm zeta nuih huah huah pah in Hauțhuama chuan, chuti anihahnu ngaihtuahna dang senbelh kan ngai tawp lo tihna anih chu, Lalpa ruahmanna kan siam thei ani mai lawmni, tia zawh pah in lal Rivunga lam chu an hawia. A hmel ațang chuan, che fuh dawn riaua in hria in, awlsam te a Sihpui tlangval rualte thah chimih leh ahmuh hma hauh ațanga a er ruk em em, Roliana thah na hunțha nei thei dawna in hria in aphur hle ani tih hai rual ani lo.

#Lal Rivunga chuan, e le, a ngena kan ngen chhuah, pasalțha hmingthang i awm alawm, ruahmanna siam theia i in ngaih hunhun kha kei ni nghah chu ani mai e, inthlahrung hauh lo leh i duh ang thlap in ruahman na chu han siam ta che. Kei nina kan duh ber chu, Sihpui khaw ho te umdarh leh thah chimih ani mai e, tia hrilh in, Sihpui khua an hnehtheihna tur anih dawn phawt chuan, engang pawh in che se, pawitihna anei lo tih ahriat kher mai. Chutah pasalțha Hauțhuama chuan, chuti anih chuan ka duhdan leh ngaihdan kan sawi ange, " Sihpui pasalțha te chuan an thuruk, keini lamin kan hre ru ani tih an hriat loh phawt chuan, an ruahman sa angthlapa chet rawn thawh an tum ngei dawna, chumi hun atan chuan thlamuang takin kan lo inbuatsaih lawk thei tihna anih chu. Tin, anrawn chet hun nghah thlen nan ninga zet kan la nei tihna ani a, chumi hma zawng chu, kan tlangval te hi Sihpui khua ațanga Tlanglian rawn panna khan țha leh remchang lai ah te ralvenga in dah ațha ang, a chhan chu Sihpui pasalțha ten, engemaw thulha thilhriat ruk kan nei tih an hriat chhuah hlauh chuan, an hun tiam hma in an rawn che chhuak duh ngei in arinawma, an rawn che chhuak thut anih pawha kan lo inrinlawk theih nan ralveng in dah ngei ațha ang. An hun tiam hma a hmuhtur an awm lo anih erawh chuan, engmah hriat an neilo tihna ani maia, an hun tiam anga an rawn kal hun ah, thlamuang tak leh hlauhthawnna tel miah lo in, belchhungsa ah an ni chu kan lo chan tir mai dawn ani. An huntiam ni alo thlen hun ah chuan ralveng pawh uluk deuh zawk in kan in dah anga, Tlanglian ramchhung khawi lai ah nge innghahkhawm an tum tih kan hre tur ani, innghahkhawm an tumna te kan hriat theih phawt chuan, zan thim hnuai ah fimkhur taka pan in awlsam te in kan chimih tawh mai dawn ani. Ralveng an lo in dah anih pawh in buaina tur a awm lo, au hman lek lo in an ringruh ka țhuai chhum sak mai dawn ani. Tin, an khua hal darh sak kan duh anih pawh in, ka țhuihhruai te zinga pahnih hian Sihpui khaw lam kal tur chu an ho thei ang, an pasalțha te leh tlangval rual te an chhuah fai vek dawn avang in, khaw vengtu tur indah pawh nise, tamtham tak leh buaipui tham vak an in dah chu arinawm loh a, chet ti khawlhkham tham pawh an awm ar inawm hek loh. Chuvang chuan, hei aia hun țha hi Sihpui khaw ho beih nan leh chetthawh na atana hun țha in hmu leh tawh kher lo ang, " ati ta a.

#Chutia ngaihtuahna fing tak mai leh ruahmanna pawmnahawm zet mai an ngaihthlak tak ah chuan, Lal Rivunga leh midang te ai mah in, lal khawnbawlmin, Riliana pa chu ahlim in, Sihpui pasalțha te leh tlangval rual te chu an hun tawp athleng ngei dawn nia ngai in a lawm fal bik hle ni hian ahriat a. Engthawl hmel fahrana aw then kharh kharh pah chuan, kei zawng, kan pasalțha remruat na chu ka pawm pui in, ka lungdum zawng tak mai ani ka ti. Kan pasalțha nge nge remruat dan pawh i lo thiam narawh e, hmelma te hnehthei tur chuan huaisen taka beih ringawt atawk lo, remruatna țha leh fing taka chetthawh hi thil pawimawh hmasa ber chu ani reng ani. Tin, țha i tih ang ngei in, an khua chawpa haldarh vek chu kei pawh ka duhthusam ani, engtikah mah Tlanglian khaw tai zawnga chet an thawh leh ngai tawhloh natur in kan siam law law tur ani. Tin, hei hi atawpnan kan sawi leh hram teh ang, duhtawka in sawisaka in chin hrep hnu ah, ka tlawm e tia banphar an awm anih pawh in, an chungah zahngaihna lan tir tur leh, that loa annunna zuah sak tur che u in, tuman thu an pelo che u tih hria ula, ahminga Sihpuikhua ni tawh phawt chu tumah zuah hlek suh ang che u, ati ta a.

#Lal Rivunga meuh pawh lawm in anui khi vun vun tawh mai le. Sihpui khaw lam lah in chutiang tak in an hmelma te zing ah pasalțha rothap leh hlauhawm, ralrel thiam em em atel ang tih ring dawn hek lo, chu ruahman na chu Tlanglian lam tan chuan a ngaihțhat thlak hliah hliah mai renga, lungawi taka pasalțha Hauțhuama ruahman na leh remruat na chu pawm tlang in, Sihpui khua luhchhuaha, haldarh thleng mai chuan ruahmanna te chu siam leh in, an duhang thala ruahman na an siam hnu chuan, tukțhuan ei tur leh Sihpui khaw valrualte rawn chet chhuah hun nghak tur chuan an țin darh ta ani.

Chutiang taka ruahmanna țha nei tu te leh, thah chimih ngei tuma lo nghak mek tu te chu, Rolianan engtia hmachhawn nge atum tih leh Sihpui valrual te chu hnehna achan pui zo angem, tih chu ngaihtuah tham tak ani ta. Amah Roliana ngei pawh chu, Hmunzawl pasalțha chhuanvawr, ahming an hriat ringawt pawha mitamtak in an hlauh, pasalțha huaisen leh ralrelthiam tia miten an sawițhin lak ah chuan, naupang sawngnawi ang chauh ni in tlawmzawk ah ațang dawn nge, a finna leh remhriat na chuan, an hmelma te ruahman na chu lehthal in engmah lo ah achantir zawk dawn tih pawh rinthiam har tak ani.

#Fehrehsan hun zet anih tak ah chuan, Roliana muhil lai pawh chu rawn harh ve hlawl in a tho chhuak nghal thuia, chhuatlaia la kaia lo thu mek Lianpuii hnen ah chuan, ' Lianpui, atlai tawh viau em, mutmu ka tuah lohna arei ta deuh aniang ka mu tui kher mai, khawiah nge midang an awm,' tiin an zawta. Lianpuii chuan, tlai lutuk lo e, fehrehsan hun vel chauh ala ni, midang ho chu mitthi in lam ah an kal hlawma, keimahin in ka lo nghah pui che anih hi, tiin a chhanga. Roliana chuan, chu kan putara ruang chu an rawn zawn thleng tawh tihna em ni tiin a zawt zui leh nghal a. An la rawn thlenpui lo aniang, a rimchhe deuh tawh sia, khua ah rawn zawnlut lo in khawdaia phum nghal mai atum ni in ka hria, tia lianpuiin a chhan pah chuan, chaw ei kan siam ang che aw, tukțhuan kan ei lai in i la mutui sia, ka nu in kaihthawh che aphal loa, a rawn harh hun hun ah abar ve mai ang ati tlat che sia, ka kai tho duh ta lo che anih kha, tih leh chawei siam sak chu arual nghala. Roliana chuan, apawi loh chu, tunah chuan mut chhuak zualpui pawh areh ta bawka, chaw te eipuar leh i la daivel hrut pah in kan vak harh lawk teh ang, tiin Lianpuii chawei siam chu akil zui nghala. Mak tih hmel zeta a u Roliana melh pah in Lianpuii chuan, ku Rolian, tunah i rawn thleng ve chauha, ngatinge vahchhuah leh nghal te i tuma, mitthi in lam ah te pawh han kal itum lo tihna emni.? Kan khaw mipui ten an ngaihtuah teh lul che nen, vak bo reng lo hian in lam ah te hian tawm ve mai mai hrihla, nangmah pawh hian chawlh hahdam te pawh i mamawh ve em em lo em ni, a lo ti ve thunga. Roliana lah chuan, Lianpuii thusawi chu ngaihpawimawh loh hmel zeta nuih sun sun pah chuan, chu Lianpui kan khaw mipui te chauh in min lo ngaihtuaha, nang chuan min lo ngaihtuah ve miah lo tihna ani maw, tia fiam in, Lianpui, kei chu huai leh thla te nen, ramhnuaia khawsa ho tura duan ang mai hi ka nia, ramhnuai hi ka ngaina in, thlithaw in hnahthel achhem phe siau siau lai thlir chunga thlifim ka dawn vang vang loh hi chuan, ka hah hi adam tak tak thei țhin lo. Mitthi in lam ah pawh chuan ka kal hrih lo zawk mai teh ang, tihtur pawimawh dang atam riau in ka hria, tiin a chaw ei lai chu abar zui mawlh mawlha, a chawei lai pawh chu ei zo thuai in khawdai vel hrut kual tum chuan a in siam zui ta nghala. Chutah, Roliana chhuah tum insiam zo hnen ah Lianpuii chuan, anih leh ku Rolian, engmah sawi lawk lo in rei deuh deuh thangbo tawh suh ang che aw, i awm loh rei chuan ngaihtuah i na duh țhin emai, tuna i awmloh chhung ringawt pawh khan, keimah chauh ni lo, kanu leh pa te pawh tumah muhil thei aram kan awm hlei nem, chhuah luih țalh i tum anih pawh in rawn hawng tlai tawh reng reng suh ang che, tiin an hrilha. Roliana chuan, min ngaihtuah lutuk anih chu Lianpui, mipa ram kal te chuan laklawh chang te pawh kan nei ve țhin alawm, mahse, vawinni chu hma deuh ah rawn hawn ka tum dawn nia, tia Lianpuii chu htilh in, a chhuak zui ta nghala.


#Chutia hun te an hmana, putara ruang buaipui leh phuma Sihpui khaw mipui te an buai lai chuan, an ni hman mek pawh chu aliam leh ta, chutah Thlade tir pawh khaw thim chian hma hauh chuan khawthlang kawlkil hnaih lam ah rawnin lar zui ve nghal in, he deuh bam chung chuan a eng kual raiha. Chu thla de chuan Sihpui pasalțha te chu an hun ruat thlen nan zanhnih chauh a awm tawh thu rawn hriat tir in, Sihpui pasalțha te pawh chuan an hun tiam chu alo thleng ta ani tih an hrethiam ve nghala. Mahse, Tlanglian lam in ruahmanna tha tak leh remruatna fing tak nen an lo nghah reng tawh lai in, Sihpui lam erawh chuan ruahman na mumal an la nei tlat lo. Chutih rual erawh chuan, Rilrua an beisei ngam loh, mahse, an nghah ruk lawisi Roliana ber arawn thleng ta bawka, Sihpui pasalțha te leh tlangval rual te ngaih chu ațha tawk viau ni in alang.

#Naupang pawnto thawm areh țana, lenghawn ar khuan hun pawh ahnai ta, chutihmek lai chuan mualveng nula hmelțha leh fel zet mai chuan, a inleng te pahnih haw mai tuma tho uaih tawh chu melh tawn zak zak chung in Zakunga hnen ah chuan, ku Zakung, lenghawn ar pawh a la khuang em hleinem maw, mawnga hawlh tu awm ang hrima in thawh uaih mai le. Nge ni a, țhenkhat inleng țin hun nghah nan inrawn chuangkai satliah ve mai mai chauh zawk ni. La țhumuang ve hrih rawhu tia han uider ve dawn cheu lah hian, i țhiana lah hi, kei ni in ang ah te chuan hnambei thei ngang hek lo le, Lalfanu Sailopuii te in ah chuan va chuankai pui leh ta poh che, a lo nghakhlel vaiu tawh ang che u, tiin Zakunga bula ding kal mai in peih tawh chu an melh zui ralha. Zakunga chuan, maimai țhina, nangni in lo te chu chuankai na mai tur pawh kan hriat ve tawp loh hi maw, inleng i neih loh tum te hi kan han chang ve țhin tak na in, theipui hnuaia Sakhi rahtlan chan ang mai lah ni, chanchhuah hun awmthei reng reng lo mai. Duhthusam ang te chu ni se, he laia sihtui thiang tak awm hi, Ramsa dang ten a awm tih rawn hre ve reng reng lo se, kei ni țhiandun chquh hian zantin rawn birh tlut tlut i la tih hi asin kan duhthusam chu ni, tiin a lo chhang ve thuaia. Mahse, chu nula duhawm leh mitmeng fiah tha zet mai chu, chutia țawngka a tlawm ngawt chi ani bik lo, a duhawmna ti famkim tura a hmaa ding tlangval pahnih te nuih seih pah chuan, ku Zakung, chu chu maw in duhthusam chu, chuti anih si chuan, sihtui tlan tu sa dang te chu Keipui in um darh in, chu sih chu a mah in apumbilh thin e, an tih țhin kha maw. I kianga ding hi chung Keipui te ai pawha chak leh hlauhawm chu ani lawm ni, awmze nei fe chuan an ti let ve saka. Chutah zet chuan Zakunga tawngkam thiamna in adaih ta lo, a lu thak lo pui hiah pah chuan a ahawi ahawi ta maia, chutah abula ding Roliana chuan, nuihzat rilru tak chung hian, umm..ka lo in rawlh ve lawk teh ang, zanin chu nula duhawm zet mai in Sapui riltam pahnih atlawm nimai teh se. Mahse, an ram chin venga sadang te um darh tur in an rawn lang leh thuai dawna, lo fimkhur hle ang che, tiin an nuih let ve a. Chutah tlema thutak deuh zawk hian, zanin chu min hriatthiam mai kan ngai anih hi, vawin lam ah kan khaw chawivel tu kham bang ho hi engtiang chiaha sang te nge an nih tih hriat tum in ka fang kual e katia, rinai in tha an lo heh hrep mai chu ni in, tlangval pumpa kan chau chhe der mai anih hi. Zanin chu lenghawn ar khuan pawh kan nghak zo lo ni mai rawh se, ati ta a.

#Rolian, Parliani zet hi chu ahmel athat tluk zetin fin pawh afing ani e, a rilru achak in tawnghmang lah athiam narawh, tlangvala pumpa sawitur haihchham in kan hawi fawk fawk maizawng anih kha. Khatiang hmeichhia kha chu chithlah nan pawh a iai awm loh hle ta ve ang. A mitmei leh țawnghmang atang rengin, i tana sapel hautak tak zawng ani dawn lo tih achiang viau in ka hria, i lungdum zawng te anih hlauh chuan, țhiante tana palai hna chu ka thawk hreh hauh lo ania, tiin zawlbuk pana an kal pah chuan Zakunga chuan Roliana chu an hrilha. Roliana chuan, ngawiteh Zakung lenpui tura minsawm tu zawk i ni sia, i sa chan lai lo kah khalh ngawt che chu adik thei si nang. Nula duhawm leh mawng zang tak zawng ani ngei e, nangman i duh phawt chuan i tan kan kherh thlu ngei tur ani, alo ti ve thunga. Zakunga chuan, khaih khaih.. kei ni ang dinhmun chu sawi loh, hmel chhuan tlak nei ve si lo tan chuan, tum chhin ngawt pawh chu ka duh tawk atling viau in ka hria. An ni ang, khawkhat ah pawh zahkai chin, hmelțha bawk si, kei ni hmeitha fa ina lo rimthluk tum ve te chu, zawhdawra suktin nen danglam na a awm tawp nang, chulo reng ah amitmei atang reng in i lak ah chuan, sa chan chhuah awlsam ber te zing ami ani ang tih lah hai rual ani si lo, a nu leh pa te tan lah makpa atana hnar phal rual loh tur i lo ni bawk si nen, kawng awlsam zawk zawh mai hi keini țhiandun tan hian afinthlak i ti ve lo maw. Kei ni ang duang te hi chuan neih atan han dil ve ngawt pawh ni i la, i laka an tihdan tur, awnem tak maia, dan chu dan ani ve maia, mahse, Sepui in tlin ngang loh pawh in Sepui ai ah tuthlawh pawh kan pawm mai aniang chu, a innei tura te an induh chuan atawk mai, tia an chhan na tur che kha, kei ni lak ah hi chuan, kan fanu hi Zakunga chuan a nei duh tak zet anih chuan, Sepui nohruai leh țhihna fawng khat rawn tlin phawt ula, chumi hnu ah thathar in kan ngaihtuah țha leh dawn nia, tih țawngkam chu kan dawn tur chiangsa ani a, chuvang chuan kawng awlsam zawk zawh chu kei chuan ka thlang in, chu kawng chu kan zawh ngei tur ani, tiin an hnial ve leh a.

#Zawlbuk lam pana kal dun pah chung zel in Roliana chuan, Zakung, Parliani hi i duha, nupuia neih i hnial lo tak zet anih chuan, kei hi i țhian ka nih angin min vengthawng suh ang che, hmeichhe duhawm leh fel tak ani tih chu ka hai bik hauh lo, mahse, ka dinhmun engkim hretu i nia, ngawpilril leh ramhnuia ngawkar, tute mah in an la tlawhpawh ngai loh hmuna ka vahvaih lai khan, ka Nu that tu te leh kan chhungkaw chung harsatna thlentu laka phuba ka lak hma loh chuan, khawihmun ah pawh awm se ka zawng chhuak anga, an phutawk hremna ka pe ngei ang tiin, thu ka lo tiam tawha, tin, ka thutiam hi ka hlen hma loh chuan, nupui takngial pawh ka nei hek lo ang, tiin chhia ka chham tawh ani, chuvang chuan hahdam taka ka chawlh theih hma loh chu thildang ngaihtuah thei ka ni lo, tiin ahrilh ta a. A tawngka chhuak ațang reng chuan athusawi chu asawi mai mai lo ani tih leh, a thinlung ah chuan thinrimna mei mit thei lo chu, a alh hlet hlet reng ani tih hai rual ani lo. Roliana bawk chu rawn țawng chhuak leh in, Zakung, man leh mual chungchang ah phei chuan an duh zah zah phut ang hmiang, i hmeichhe duh ber i neihtheih na tur anih dawn phawt chuan, i thian leh i unau ka nih angin ngawi reng in ka thlir dawn lo che tih hria la, țhihna khokhat an phut che anih leh dawrawn khat kan pe anga, dawrawn khat an phut anih leh dawrthum kan pe anga ti nia. Aman ah chuan eng pawh phut in, engzah atam pawh ngen se, hmeichhe fel leh khawsak tha chu, chung zawng zawng aia hlu leh ropui chu anni tih kan hai bik hlei nem tiraw, aman atana an nget let hnih zet pawh kan pek belh duh hial zawk ang chu, ati ta a.

#Zawlbuk an thlen dawn ruai chuan, an piah mual atanga tlangval natuar rumri lo chhuak chu hria in dingchung chuan an han ngaihthla duna, chutah Zakunga chuan, Neihbawiha anih ngei chu, a dinhmun atha lo sawt riau in ka hria, upa lam deuh te phei chuan huai in athla an man sak ngei ni in an sawia, engemaw chang chuan chianglo ruaia rawn țawng chhuak in, an ramchhuah na hmun leh, a chakai man na kawrte dung zawhkual vel niawm tak ten a in sawi țhin ani awm e. Engemaw changa anatuar han țhen kual vel leh han in siamchhe vel țhin phei hi chu, thil hmuh nuam zawk zawk chu ani lo țhin khawp mai, hetiang anih chhoh zel chuan athla koh tura kal ala țul ngei dawn niin alang tiin, Neihbawiha nat zual thu chu Roliana chu an hrilha. Roliana chuan, chuti chu ka awm loh chhung in alo nazual hle mai tihna ani maw, athla koh sak tur chuan kal tum te an awm tawh reng reng em, tiin an zawta, Zakunga chuan, chutianga kal tum awm an awm pawh ka la hre hauh lo mai, engemaw chang hi chuan, keimah hian ka zuk koh sak dawn emni ang le, titen kan ngaihtuah ve bawk țhina, mahse, rilrua athawhdan anep deuh nge, a saseh tak tak hun tur ka huphurh zawk tih pawh ka hre thiam lo, hei tun thleng hi chuan ka la kal ta bik lo chu anih hi, ati ta a. Roliana chuan, thla koh chungchang apu in ahrilh țhin te chu ahre chhuak uaih uaih maia, ngaihang ngawta awlsam leh pawngpaw zuam ngawt chi ani dawn lo tih te chu ahre chiang khawp mai. Zakunga hnen ah chuan, thla koh ber kher hi chu ka la tawn ngai loh thil ani tlat maia, atul ta anih leh hriatna ti tam tu ah keimah ka la kal dawn nia, titeh a la hma bawka i va tlawh ve reng reng teh ang, ati ta a.

#Chutah, Neihbawiha te in lam pana kal an tum mek lai chuan, tlangaupa chu thaw hlawp hlawp chunga rawn tlan thleng in, Rolian, khawnge maw in vah teh chiam ni le, nangmahni zawng reng reng in ka ah, thaw pawh aleng dawn hleinem maw, tia rawn bia in thawk lak pah chuan an chawl leh rih a. Roliana chuan, khawi dang lem ah mah vak bo lo ve, tihtur kan hriat loh alei ah hmeithai nu kan rim e kan tia, pathlawi zânghang ho in min luahlan leh ta sia, lenghawn ar khuan pawh nghak zo lo in kan ținsan ta anih hi, tiin a lo chhang thuai a. A nih, tun ah khawilam a kal nge in tum tia tlangaupa zawhna chu Zakunga chuan, mut bo nan ala hma deuh sia Neihbawiha a na zual deuh nge mawni va menpui ve teh ang kan ti mai mai mawle, tiin a lo chhang ve thunga. Chutah tlangau pa chuan, Lalpa in Tlanglian khaw chungchanga rorelna nei tur in a koh che u a, ka zawng buai atalang che u in khua pawh atlai zo der anih hi, hmundang pan khawmuang tawh lo in rawn kal nghal mai ula avan țha awm ve, tia hrilh in a tlanlet san leh ta nghala.

#Zakunga chuan, kan nula biangnoi zar ah, Tlanglian lam reng reng ka lo ngaihtuah chang tawh hlei nem le, ahmel hmuh chak viau mah ila , mahni chauha lawiluh te chu ka ngam teuh mai si loa, chuvang ania ka rawn sawm tak ngawt mai che ni, keimah vang in i chungah lal alungawi lo palh ang tih pawh hlauhawm tak ani, inthiam loh hmel zet chuan ahan tia. Mahse, Roliana chuan, maimai thina, țhian leh țhian inkar ah khati teh chiama inthiam loh tur ani ngai hleinem, zingah Sihpui khua ka rawn thlenga, chhunlam ah daivel hrut in ka vak chhuak zui leh bawk nen, kan lal thu pawh engmah ka lo hre ve lo zawk anih chu, engmah hre lo ta nafam chu min thinrim khum ngawt thu, lal tan pawh a awm bik tawp nang, tiin an hnema. Chutah Zakunga chuan, a hmaa an rorel chungchang te leh thu rolum mumal pawh nei lo a, atlachawpa rel atan an tih tak thu te leh, țhenkhat phei chuan inremna siam pui an duh thu an sawi te chu Roliana hnena sawi pah chuan, Roliana ngaihdan te chu an zawt nghala. Roliana chuan, ngawiteh Zalian, kei ni aia tawnhriat ngah leh ngaihtuahna pawh puitling zawk an nia, țha an tih ang chu ațha ah kei chuan ka ngai maia, an rel ang ang chu ka pawmpui vek mai ani. Puitling rorelna kara keini ang naupang lo inrawlh ve chhen pawh hi, ka nuam tihzawng ani chiah lo, tiin a chhanga. Zakunga chuan, dik phei zawng adik na meuh mai, mahse, Tlanglian khaw chungchang ah kher hi chuan, nang aia ruahmanna siamthiam leh rin tlak tur ka hre bik hauh lo mai, kan lal in, i rawnthlen rual ruala Tlanglian khaw chungchang ngaihtuah tura min kohkhawm nghal rum rum chhan te hi, engdang vang ni lo in, i ngaihdan hriat aduh vang leh ruahmanna feltak siamtura aduh vang che ani ti hi phat rual awm in ka hre lo. Chuvang chuan i ngaihdan diktak leh țha i tih ang chu tumah hmaizah lo in i sawi tur ani, hetia ngaihdan leh tumdan mumal pawh neiloa kan awm reng te chuan, Tlanglian ho in min rawn run thut pawh nise, engtin nge Sihpui khua hi kan humhim theih tehlul ang ni, alo ti ve thunga. Zakunga thusawi chu Roliana pawh in dik ati kher mai, rualu te leh lal khawnbawl te meuh pawh in ngaihdan fumfe an neih theih si loh chuan, ka duhdan leh țha nia ka hriat te chu ka sawichhuak mai tur ani, tia ngaih tuah in, Zakung i thu min rawn chu adik khawp mai, titeh i hmanhmawh deuh teh ang, kan lal te ngaih alo țhalo palh ange ati ta a.

#Pu Dokhuman, amak ngawt asin, engtin nge rinhlelh ngaihna lam lam te ahriat zawk ni, chu mai pawh chu anilo, tunge thilsual titu chu tih pawh kan hriat loh leh rinhlelh tur awmang takngial pawh kan hriat loh manchhuak tura, ngaihtuah na fing zet mai an hmang te kha ania mak ka tih hlei hlei chu ni, akum naupan ang ngawta en chi ani reng reng lo. Țiau lui atanga helai hmun thleng tura arawn paltlang ramngaw te hi, pasaltha tam takte pawh in an paltlang mai mai ngam loh tur ni hial in asin ka hriat ni, tia a thusawi chu atawp lam hre reiruai hman in, Roliana te țhiandun chu Lal inchhung ah chuan an rawn penlut ve chiah a. Midang in ngawithapa an lo thlir lai in Lal Sairuma chuan, ekhai..kha, in rawn lang ve thei maw, tlangau pa in a hmuzo lo cheu aniange kan lo ti hman hial asin. Kha khalai ah khan thutna te kha han rem ve tawh u tia lo chhawn pah chuan, Rolian, zanina ka han koh tir chuk chuk nachhan che chu i lo hriat tawh kan ring deuha, tukinah i rawnthleng chuah anina in, Tlanglian khua run tura kan huntiam chu kan thleng chawpchilh chu ani tawh mai sia, i chauh tur pawh dawn phal lo in, ka han kohkhawm tir ta mai cheu ani. Engpawh nise, kan thu hmasa lam ah te kan lo sawi nual tawha, hetia Tlanglian khaw ho an reh vung vung mai hi, keini nena in do hi an zuam chiah lo niten kan ngai deuha, chuvang chuan inremna siam pui tura palai intirh leh mai te pawh ahming chuan kan lo rawt fiam chhina. Mahse, inremna siampui ngawt pawh chu țhenkhat ngaih ațha chuang si lo nen, thu rolum mumal pawh nei thei lo in i rawn lan hun kan lo nghak ngawt mai ania, hei, kan beisei ang ngei in nang i rawn thleng ta bawk nen, kan hun tiam thlen hmaa ruahman na mumal tak kan neih theih nan, tunah hian i ngaihdan diktak inthlahrung hauh lo in han sawi la ațha ange, ati ta a.

#Chutai lal meuh in atih tak ah chuan, angaihdan te chu Roliana chuan sawi ve nghal in, " lalpa, ka ngaihdan diktak in hre duh anih chuan, Tlanglian khawho nena inremna siam tum hian awmzia aneih ka ring lo, Tun thlenga thawm an la rawn neih loh chhan pawh hi, engdang vang ni lo in, Sihpui tlangval rual te, awlsam te a atam thei ang ber an thah theih hun an nghah vang mai ni in ka hria. A enga pawh chu nise, kei ni hian kan duh emaw duh lo emaw, inremna kan siampui emaw siampui lo emaw kan beih let ațul hun athleng tho tho dawna, chuvang chuan a kakpuia dan beh kan nih hma a thawhchhuah mai hi, afinthlak ber in kei ka ring deuh ani," tiin angaihdan chu an sawia.

#Lal Sairuma leh Lal inchhunga awm ve dang te pawh chuan, Roliana ngaihdan chu pawm awm an ti in nguntaka an ngaihtuah chuan, Tlanglian khua te nena inremna siam tum chu thachuang sen na mai ni chuan an hre ta hlawma. Chutih lai chuan, Roliana thusawi nguntaka lo ngaithla tu pasaltha pakhat chu rawn țawng chhuak ve in, Rolian, tun maia i sawi zawh tak ah khan, thil engmaw hriat thiam loh ka nei tlat mai, Tlanglian khua te chuan, awlsam te a min thah theih dan tur ruahman na an siam tih engtin nge i hriat theih, tin, chutiang ti tura hun remchang chu, tun ah hian an nghak mek ni in engtin nge i rin theih, tiin arawn zawt a. Chuthu kher kher chu midang te pawh chuan an lo hre chak nangiang mai, Lal inchuhunga awm zawng zawng te mit chu Roliana chung ah chun afu ta țhup mai a. Chytah Roliana chuan thu rawnzawt tu lam chu muangchanga en in, Tlanglian khua in, chutiang chuan ruahmanna an siam ngei e ka ti hauh lo, mahse, chutiang chuan ruahman na ansiam lo anih vek pawh in, an ruahman na siam chu chu thil nen chuan a in zul viau in ka ring. A chhan chu, Tlanglian khua te beih hun tura kan hun lo rut lawk hi, Tlanglian khua ten an hriat ruk miau vang ani. Chuvang chuan, kan thuruk hre ru tute thuruk kan hre ve lo emaw, chet an thawh dan tur kan chhut pui phak lo emaw anih vaih chuan, kei ni hi chu an tan, belchhunga sa ang chauh kan ni tihna ani ang, tiin a chhang ta a. Roliana thusawi hre tu, Lal inchhunga awm zawng zawng te chu an phu dual ni mai hian ahriat a, Roliana thusawi chu mak an ti in, a ngaihna an hre lo tlang kher mai. Chuaia mak an la tih zawk chu, Tlanglian khaw ho chuan engtin nge an thuruk chu an lo hriata, Roliana chuan, Tlanglian khaw ho in Sihpui pasalțha te thuruk leh thiltum an hre ru ani tih engtin nge ahriat tih chu, lal inchhunga awm ho mak tih leh angaihna an hriat loh chu ani. Lal Sairuma chuan ang deuh phuau chunga Rolian chu zawt in, Tlanglian khaw ho in an ruahman na te leh an chet tumdan te chu engtia hre thei nge an nih tih leh, chungchu Tkanglian khaw ho in an hre ru ngei ani tih engtin nge i hriat tih chu Roliana chu an zawt a. Roliana pawh chun tawifel taka lal zawhna chu chhang in, khua ațanga an hnawhchhuah tak Khawkunga chu Tlanglian khaw ho hnena thuruk hrilh ru tu anih dan leh, amah Khawkunga ngei in athil tih dan zawng zawng chu a ma hnena a hrilh leh tak vek thu Roliana chuan a sawi chhuak ta a. Chutah zet zawng, Sihpui khaw Lal leh ațhuihhruai te ngaihtuahna abuai ta map map kher mai. chutiang ang taka Tlanglian khaw ho in engkim an lo hre ru anih si chuan, Tlanglian khua bei tura an kal hun ah, Tlanglian khua te chuan an lo chang ru ngei dawn tih chu, sawi kher ngaialo chiang sa ani ta.

#Lal Sairuma chu rumngal ngal chunga rawn țawng chhuak in, kan Khawkunga zet chuan min va tibuai kher ve le, damin lo chhuah malek i la tha tur ania. Tunah zawng ruahmanna thazawk kan siam thuai angai ta tihna anih chu, kan hun tiam sawn hma nge țha anga, thawhchhuah tlai deuh tha zawk dawn tihpawh hriatthaim ahar ta hle mai tiin, amitmei chuan a upa te leh pasaltha ho chu an rawna. Lal khawnbawl te leh pasaltha ho pawh chuan, Lapa i sawi tak ang chuan, ahun kan sawnhma anih loh pawh in kan thawh chhuah tlai deuh angai ngei dawn tih chu achiang viau mai, kan hun tiam ni Tlanglian lam in an hriat miau tawh si chuan kal luih chi ni in alang lo, kan tlangval te kan in hlauh hnem lutuk palh ange, tiin Lal thusawi chu an tawmpui tlang tih hriat takin an ngaihdan te chu an sawi hlawma. Chutih rual erawh chuan, anhun tiam sawn hma emaw, sawntlai chungchang ah emaw chuan ngaihdan siamthiam har an la ti fo mai.

#Lal Sairuma chuan, a hu chungchang ah ngaihdan kan siam thei lo anih chuan, ka ngaihdan hi țha kan ti tlang mai emaw chu, tun ah hian kan hun ruat thlen hma in ni hnih kan la nei ani a, kan tum hun aia nikhata hma in che chhuak ta mai ila, Tlanglian lam inrin hman hma in kan nangching thei mai in ka ring deuhe a, tiin rawtna chu an siama. Lal khawnbawl te leh pasalțha ho pawh chuan an lal Sairuma rawt na chu țha dawn riau a hria in, lalpa i rawtna chu a sual kher in arin awm loh, Tlanglian pasalțha te lah in an thu hriat ruk anga kan thawh chhuah ring in, kan tum hun hma a kan thawh chhuah thut chu ring dawn hek lo, ruahmanna fingtak ani ngei ang, an lo ti hlawma. Mahse, Roliana chuan an lal rawtna chu arawn hnial ta tlat mai le, lal Sairuma hnen ah chuan, lalpa, i rawtna chu thil pawm nahawm tak anih rual in, ahun sawn hma leh tlai in awm zia anei vak in ka ring lo, kan hmelma te hi kei mahni ang a ngaihtuahna te seng ve tho tur ah ngai ta ila, tun hun ni hnihkhat lek awm tawh ah hian, ralveng te in dah in an in ring lawk hle tawhtur ah ngai ta ila, kan tan chetsual ahlauhawm viau zawk mai thei ani, tiin arawn chhang ta a. Lal Sairuma chuan, angaihna hriat loh hmel zeta en chung chuan, anih leh engtik ni chu nge chetchhuah hun atana țhaber nia i rin chu ni ta le, tiin an zawt zui nghala. Roliana chuan engtin tak chhang ang maw tia lal inchhunga awm ho in an thlir thup lai chuan, a hma a sawi tu ten chetchhuah hun atana an duh loh ber leh, chetchhuah na chi nia an ngaih loh ni ber mai, a tir ațanga an lo tumlawk leh an hun lo ruat lawk ni ngei maia chet chhuah chu, Roliana chuan athlang ta mauh mai le, atu a te mai pawh chuan, Roliana ngaihtuahna leh tumdan chu hriat pui ve hek lo le, pasațha fing leh remhre ve ve in, ruahmanna hran ve ve nei in, hun leh ni thuhmun thlang in, an tum pui te ve ve hneh tum in ruahmanna an siam dawn chu ani ta a. Tu ruahman na nge țha a fing zawk tih chu ahriat ngei ang le.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 7:08 pm

PASALȚHA ROLIANA ( Taitea )

PHEK 45 NA.

By : - Hmangaih MT Chawngthu.

#Zakunga chuan, abula țhu valupa pu Dokhuma chu va bekbawr ru sar sar in, pu Do, kan țhiana chet tum dan leh ruahman na te hi, hriatthiam ahar ka ti țhin mang tak e. Kan hmelma ten, kan chetchhuah tum dan leh ahuntur lama an hriat ruk vek thu asawi zo chauh a, chumi Ni ngeia chet chhuah chu ațha ber ange an tizui leh hmiah mai chu ania, kei zawng chumi Ni kher khera chet chhuah chu a țhat ber na tur ka hriat loh ang bawk in, ka huphurh zawng tak ani tlat mai a, tiin an hrilh rua. Pu Dokhuma hmel pawh athutak nangiang mai, ngun zet leh engemaw ngaihtuah a, inchung ditip leh liang vel te amelh kual ruai hnu chuan, Zakung, engemaw kan sawi chuan ang le, kan țhiana hian, thil ho te nia kan ngaih te hmang in, thil ropui tak tak alo ti fo tawh tih hriatsak tu chu nang leh kei hi kan ni miau sia, a finna leh remhriat na te hi kei ni lo suangtuah ve phak rual lah ani hek lo. Engpawh nise, a ni aia remruatna leh ruahhman na țha zawk kan hria te anih chuan si loh chuan, țha atih ang te leh aduh angte pawmpui mai hi afinthlak ber in ka ring, tiin alo chhang ve thunga.

#Lal inchhunga awm midang ho te pawh chu, an nuih a za lo tlang in, Roliana thu sawi chuan an ngaihtuahna atibuai tlang hle ani tih chu an hmel landan aṭang chuan hai rual ani lo. Lal Sairuma chuan akhawnbawl te leh apasalṭha te melhkual pah chuan, Roliana hmel chu chik zet mai hian an melha. Chutah, Roliana thusawi chuan a duhthu a sam zan lo tih hriat zet hian, Rolian, i thusawi chu i chiang chiah amaw, hmelma ten min lo chang ru ngei dawn tih chu mia nileng lo tan pawh hai rual lah awm lo, engtia tih nge maw i tum reng reng le, tiin an zawt nawn leh a. Roliana chuan, Lalpa kan tum aia hma in thawk chhuak ta pawh ni ila, min changru reng lo ang tih kan sawi thei chuang em ni.? Chuvang chuan, kan thuruk leh tumdan te an hre ru tih hre lo ang hmiaha kan chet chhuah phawt chuan, ngaihṭha tak in an awm ngei dawna, chu chu kan chan aṭhat theihna tura kan hmanraw neihchhun chu ni in alang. Ngun tak in kan hmelma te chet dan tur han ngaihtuah chhin ta ila, Sihpui leh Tlanglian inkar hlat zawng chu kan hre veka, duh hun huna han kala, han run ngawt phak an ni lo tih chu kan hre tlang ṭheuh awm e, tin, kei ni ang bawk in Tlanglian lam pawh in chu chu an hre lawk ve bawk tur ani. Chuti anih si chuan, an mut reh lai leh an inrin loh lai chuha beih tum tan chuan, an khua aṭanga langthei lo tur leh hnai si ah, aruka kan in chhek lawk hmasak ngei angai tihna ani ta a, chu chu hmelma lam in an lo hre lawk lo anih chuan thil harsa lah ani hek lo. Mahse, chu kan thil tum chu hmelma lam in an lo hriat ruk tak si ah chuan, hmelma te kan beih leta kan hneh theih natur awm chhun chu, hmelma ten eng ruahman na nge an neih ang tih chhut thiam pui na chiah, kan hneh let theihna awm chhun ani. Chuti anih chuan, kei ni hi Tlanglian khaw pasalṭha te ni ta zawk i la, engtin nge ruahman na kan siam tak ang le.? ati ta a. Roliana chuan athusawi lai han chawlh zawk pah chuan, Lal inchhunga awm te chu an melh kual hlawma, ṭhenkhat chuan, engemaw chu an hrethiam ṭan ruai ruia ni in alang, mahse, ṭhenkhat ve thung chuan, kan hmelma te ruahman na pawh chu engemaw chen lo ngaihruat thiam ta pawh ni ila, engtin nge maw kan tih chuan ang le, engkim hresa veka min lo chang tur an nih si chuan, kan tan chet ngaihna a awm chuang in alang lo, an lo ti ve bawka.

#Lal Sairuma chu rawn ṭawngchhuak ve leh in, Rolian, tuna i thu sawi tak te kha, a sawi tu nang ni kher kher lo la chu, pawm leh hriatthiam har ka la ti fan in ka ring, mahse, ruahman na ṭha nei tu hneh tur chuan, chu mihring aia ruahman na ṭha zawk nei tu nih angai tih erawh ka hria e. Tuna i han sawi ên tak aṭang a, kei in a ka lo chhut ve dan leh ka lo suangtuah rilruk ve dan kan sawi chhin ange, kei ni hi Tlanglian khua te kan lo ni ta a, kan hmelma ten min run tum in kan daihnai ah awmhmun an rawn khuar dawn tih ka lo hre ru bawk a, chuti anih chuan, ralveng te in dah in an ruahman na te hriat ka tum tur ani ang, tichuan, kan khua rawn pan an tum na kawng kan hriat rual rual in, pasalṭha te leh tlangval rual te intir chhuak nghal in, chankhan ṭha lai leh lambun na tur hmun remchang lai ah lo chang ru in, pakhat te pawh zuah lo in kan that mang vek mai ang chu, ati ta a. Chutah, Lal Sairuma bawk chuan, Rolian, he hi i sawi ên sa aṭanga ka ngaihtuah phak chin chu ani, a bak leh zel chu engtia ruahman na neih nge i tum tak.? tiin an zawt zui nghal a. Khawnbawl te leh pasalṭha dang te pawh chuan, lalpa, chuaia ruahman na ṭha, lo neih lawk sa chu ahar viau ta ve ang, hmelma ten min rawn pan dawn tih leh an kawng rawn zawh tur ber kan hriat tawh miau chuan, hmun rem laia lo chan ruk a lo nuai hrep mai chu, tute pawh in an tih dantur ani vek ngei ang, chu chu Tlanglian khaw ho lak a, kei ni Sihpui khua tena kan hmabak mek chu ni in alang, pumpelh na kawng ṭha deuh Roliana hian ahre ru te anih chuan, tlem in kan chan chu aṭha deuh mai thei, an lo ti ve bawka. An rilru chhungril tak ah chuan, an ngaih chu angam zan lo ni in alang.

#Nuih var var pah in Roliana chuan, Lalpa, i suangtuah dan aia ṭha chuan Tlanglian khaw ho pawh in ruahman na chu an siam bik kher lo mai thei, mahse, hmelma te hi engmi pawh ni in, tu te pawh nise, â taka che tura dah nghal ngawt lo in, fing thei ang bera chet thawh tura kan suangtuah lawk hma sak a ṭul chang a awm fo ṭhin. Chuti anih chuan, kawng lak ah min lo chang ru in, min lo bei ngawt nita se, min that chimit vek tur chuan min beih ve fe kan ngai dawn tihna ani a, an ni lam pawh an in hlauh ve fe angai ngei ang le. Chuvang chuan, Tlanglian pasalṭha te zing ah, tlema thluak hman nachang hria an lo awm hlauh anih chuan, an khaw daia in chhek khawl leh bihruk kan tum na hmun hriat an tum ngei tur ani, tin, chulai hmuna min beih chu an thlang ngei bawk ang, Tlanglian pasalṭha te khi mi â awmkhawm an nih ngawt loh chuan, chutiang chuan chet an thawh ngei ang tih ka sawi ngam ngat mai. Mahse, i mi zawhna erawh, tun maia chhanna han pek che chu ahar ka ti deuh mange, thil reng reng hi ruahmanna lo siam lawk theih thil a awm lai in, ṭhen khat hi chu, ruahman na siam lawk hleih theih loh leh a tlachawpa ngaihtuah na sen ngai thil te hi a awm ve bawk a, chung chu kan thil tawn azir zel in a danglam ve bawk ṭhin ani. Chutih rual erawh chuan, Tlanglian khaw ho ngaihṭha taka kan awm tir theih nan leh, an ruahman na ang ngeia an chet theih nan remchang siamsak in, kan hun ruat ni ah ngei kan che chhuak tur ani. Tichuan, ngaihṭha tak in kan siam te te anga, an duh anga an chet hnu ah, an mahni awh let na tur thang kan lo kam ve tawh mai dawn ani, mahse, engtiang in nge thang kan lo kam ang tih erawh, kan thiltawn azira kan ngaihtuah chawp angai thung dawn tihna anih ber mai chu, ati ta a.

#Roliana thusawi ngaihthla tu te chu an thaw hawk hlawma, Roliana thusawi chu hnial tum leh sawisel tum reng an awm lo, sawisel ngaihna an hriat loh vang te pawh ani mahna. Zakunga chuan, pu Dokhuma buk khum zauh pah chuan, pu Do, i sawi dik khawp mai, an ti zawi sap a, pu Dokhuma pawh chuan, ani dawn reng asin, miin an remhriatna leh ngaihtuah na zawng zawng senga thil an tih lai in, ngaihtuah na chhe te pawh hmang thiam lo leh hmang peih lo tena lo sawisel ngawt hi adik lo reng ani. Kan ṭhiana thil sawi hi adik zia i hre thiam em, hmelma te hneh nana thil pawimawh ber chu, hmelma te chet tumdan lo suangtawh lawk thiam hi ani chiah reng ani, tiin, Roliana ngaih san hmel zet chuan alo chhanga. Midang te mitmeng aṭang reng pawh chun, Roliana an ngaihsan na leh tluk lo an in tihna chu hmuh hmaih rual ani lo.

#Chutah, lal khawnbawlmin chu rawn ṭawngchhuak ve leh in, Rolian, a ngaihtuah dan dan te pawh i thiam mange ka ti, thil nithei awma i rin te, i han sawi tak tak phei hi chuan, ni theilo tura kan ngaih te thleng thleng hian adik thlup zel mai zawng ani si a, tuna i han sawi tak te pawh kha, kei hi chuan hnialna lai tur che ka hre lo mai pawh ni lo in, ka pawm leh zawm zawng tak ani tlat mai. Chutih rual erawh chuan, i thil tum hi Nghalpui bu tawndarh tum nen a in ang dawn riau in ka hre maia, i hnungzui tur tlangval huaisen te hi kan in hmu zo ngut ange maw chu le, tiin zawhna an siam ve thunga. Rolianan chhan tuma a ka a an lai tak chuan, Roliana hnung zui ngam chu he ta hi ka awm e, kan pahnih chauha pawh ni dawn ila, Roliana atel chhung chuan ka tlan chhe lo ang, tiin Zakunga chuan rang fahran in alo chhan khalh a. Chutah, lal inchunga pasalṭha awm ve dang te pawh chuan, Tlanglian khua an nih chhung chuan, Keipui hliam tuar tluka hlauhawm pawh nise, tumah kan tlan chhe lo ang, Sihpui khaw hming an sawi zawng ringawt pawha an khurh hial na tur khawp in kan che law law aniang chu, an lo ti ve bawka. Lal Sairuma pawh ahlim kher mai, a pasalṭha te chu en kual in, aw le, tun ah chuan Tlanglian khaw ho run tur in kan in peih ta ani lawm ni. Tun ah ka khua leh tui te hian, hei hi hre reng tur in ka duh che u ani, in rem na leh zahngaihna dila, an lal Rivunga hma a ka kun lai khan, hmuhsitna leh deuhsawhna bak hlawh chhuah ka nei lo anih kha. Kei ni, Sihpui khua te hi tham lo taka min ṭawng khum in, duh hun huna nghaisak leh hneh theih ah min ngaia, kan lak ah hian enge an tihtheih tih chu, tun ah hian kan hriat tir ngei tur ani, a ti ve ta a.

#Mahse, Sihpui lal leh pasalṭha te mai bak ah Roliana ngei pawh in, an beih tur Tlanglian khaw chung chang ah hian hriat hmaih an nei ve tho mai, chu an thil hriat hmaih chu Tlanglian pasalṭha te zing ah Hmunzawl pasalṭha pali ngawt an tel tih leh, chung zing ah chuan pasalṭha hlauhawm fing zet mai leh ralrel thiam, pasalṭha Hauṭhuama atel ve tih chu ani. Lehlam in, engkim hre lawk sa leh ruahmanna ṭhatak nen an lo nghah lai in, Sihpui lam erawh in an tawn chawp anga chet lak an tum ani ta ber a, a che sual zawk a an ṭang ta anih pawh in thil awihawm loh tawp chu ani bik hauh lo ang le.

#Favang zing nichhuak chu Sihpui khaw mipui te rilru ṭawmpui ang hrim in a eng dul riai a. Dithlifarfem aṭanga daifim far fap fap te lah chu, alungkuai zawnga lo thlir tu tan chuan an pasalṭha rammua kal tur te thlir tu, nula leh nu ṭhenkhat mittui anbianga luang ngiai ngiai nen chuan a inchawih hle ta ve ang. Nie, nu ṭhenkhat tan an fapa te, nula ṭhenkhat tan lah an lawmpa te leh aruk taka an lo hmangaih ve ngawih ngawih te an ni in, dam in an lo hawng leh ang nge, damchhunga in hmu leh ngai tawhlo tur in piallei dai ah an zal hlen dawn tih lah hriat ani silo. Mittui nena thlahliam tawk an lo awm anih pawh in an mawh bik lo e.

#Tichuan le, Roliana duhthusam ang leh an lo ruat lawk ni ngei ah, lal Sairuman fuihna thu leh mahni khaw chhan tura huaisen taka penchhuak a tlangval rual te hnena lawm thu asawi hnu chuan, ngawpui hnuai nizung thlursung kar ah Sihpui val rual te chu, Tlanglian khaw lam pan tur in an ram inrina luipui lam pan chuan an thelh thla ta sung sung maia, an raldo hmanraw famkim nena in thuam in, silai nei in silai an puta, ṭhenkhat in muzuk fei leh fei kibar an hawl ther fur mai bawk, an ipte puia an chempui ah te lah chu hmanchhin kher lo pawha ahriam tawk hle ani tih hairual loh in, Ṭhanghnah nem fik hmawk hmawk thei tur khawpa an tahhriam sa diam ani bawk. Chutiang taka hmelma te beitura in peih, zamna leh hlauhna aia thinrimna in anthinlung aluah nasat zawk Sihpui valrual te hmachhawn tu nih chu thil chakawm tak zawng ani hauh lo ang le.

#Anhma hruai tu Roliana pawh, Vawmpuino lak tum ang mai tunṭum zet chu athawk rip nasa mai. A silai dawtphir mai bak ah, a thal hmanthiam nena thawk chhuak in, a thalfang ken dan te lah chu remchang lah ahre narawh. Rawpum liantha zet mai chu tawng chen zet tur ah tan in, arih lutuk loh nan pan zet mai in athela, a chhunga athalfang rawlh luh awlsam taka atlak mai loh nan a raw thel pan chhung ah chuan, changel zungzabeng vela chhah tur chu a kawtawp ah nawr lut leh in, chu a changel nawr luh ah chuan athalfang chu azuk vitbur fur maia, hmanhmawh thil thu ah phawi a awlsam in, atan chet vel pawh atih awlsam phah dawn hle ani.

#Hmanhmawh taka kal ta fam chu kar lo ah luipui awmna pawh chu an thlengthla thuai a, luikam fai lai thlen hma ngaw hnuai ah chuan ding khawm in, Roliana chuan anzinga a rual u ber, pasalṭha Hnuhliana hnen ah chuan, pu Hnuhlian hei ramri kan kan dawn chu ani ta a, tun hi sawitur ṭul ang ang te sawina hun ani in ka hria tiin an rawna. Pasalṭha Hnuhliana chuan, rualu zawk anih na anga Rolianan zahder na alan tir chu hre thiam nghal in tlangvalrual te hnen ah chuan, awle, hei tunah chuan Tlanglian ram chhung kan dailut tawh dawna, ṭul lo leh pawimawh ni lem lo ah chuan tumah in bengchheng siam loh hram tum ila aṭha ange. Tin, kei hi akum lam ah rual u zawk ni mah i la, kei aia hruaitu nih tlin zawk Roliana leh kan lalfapa Khawliana duh ang zela chet thawh tur in kan pasalṭha te leh tlangval rual te ka ngen nghal che u ani e, ati ta a. Lalfapa Khawliana chu rawn ṭawngchhuak ve thuai in, Sihpui khaw pasalṭha te leh tlangval rual te u, tun ah hian kei hi lalfapa ka nih vanga ka chung ah zahna in lan tir ka phut lo che u a, engkima hruaitu nih tling Roliana thu ang zela chet thawh tur in ka inpeih e, tiin, Roliana remruat anga chet thawh a in huam thu chu arawn au chhuah pui ve nghala. An lalfapa leh pu Hnuhliana thu sawi chu midang te pawh chuan ṭawmpui tih hriat taka lo bu nghauh nghauh in, Roliana thupek nghak chuan Roliana chu an thlir ṭhap hlawma.

#Roliana chuan tlawmngaih chhuaha hruiatu nih inhnawn khawtlai hun ani lo tih hria in, athupek nghaka amah thlir tu Sihpui pasalṭha rual te hnen ah chuan aruahman na te leh duhdan te chu sawi nghal in, awle, tunah hian tukṭhuan ei hun zet ani tawha, thim chhiat hmaa Tlanglian khaw dai, kan thlen hman ngei angai dawna, tunah hian kawng pangngai ah ni lo, Tlanglian khaw hnaih na lai ber tin zawn in kan kal aṭul dawn ani. Kan hmazawn Tlanglian khaw ram lama tlang pahnih dingdun saw tun ah hian kan pan anga, sawmi piah mual letliam lam saw, tunhma deuha Tlanglian khaw ho in lo atana an bawh ram nia sawi ani a, fehkawng hlui zawh tur pawh a awm ngei arinawm. Chu kawnghlui chu zawha hmanhmawh taka kan kal chuan khawthim hma in kan tum ram chu kan thleng hman tur ah ngai ila aṭha ang.

#Mahse, thilpakhat hriatngai awm chu, kan hmelma te hian min changru reng lo ang tih sawi lawk theih anih loh avang in, a ruala in zui duah duah chu ahim lo mai thei. Chuvang chuan, mipahnih zela inkawp in inhnaih lutuk lo, inhlat lutuk si lo ṭawng inhrephak tur tawk zel in kan in zui tur ani ang. Kan pasalṭha pu Hnuhliana leh kan lalfapa in hnung rawn dawl ula, kei in hma ka hruai ang. Aw le, hun kan khawhral tam lutuk zawngin kan tumram kan ban hman lo palh ange, tuman bengchheng siam lo in achakthei ang bera kal kan tum dawn nia, tiin hmahruai tur chuan apen chhuak ta nghal a.

#Chutia zamna leh hlauhna nei hlek lo hruai tu an nei leh midangte fuih ringawt duh tawk loa hmahruaitu a ṭangngam an han nei chu, Sihpui valrual te thinlung ah nasataka thusawi in an phur tlang kher mai. Lalfapa Khawliana meuh pawh rawn ṭawng chhuak in, Rolian i huaisenna leh tlawnngaihna hi Sihpui khaw tan malsawmna ni mawlh rawhse. Mahse, kei hi hnungdawl tu ah chuan ka ṭang thei bik lo ang, lalfapa ka nih angin hma hruai tu tur ka ni, kan pahnih in hma kan hruai ang. Engkima hlauhawm hmachhawn tua ṭan tir reng bik che hi ka duh hauh lo, tiin Roliana chu arawn umzui ve nghala. Roliana ruala hmahruaia kal lo tum rilru reng Zakunga chu lo in rawlh thuai in, ngawiteh lalfapa hruaitu nihna Roliana kut ah in hlan tawh si chuan, athu pek pawh kan zawm tlang tur ani dawn lawm ni. Tin, Lalfapa i nihna anga en lo tur che in min hrilh hlawm tawh khan ka hria a, tun ah lalfapa i nihna changchawia hmahruai tua ṭan i tum leh anih si chuan, nangmah ngei in i thupek i bawhchhia tihna ani ang. Chuvang chuan Roliana duh ang ngei in i khaw tlangval rual te hnung hi rawn dawl la, kei hian Roliana kaihza ka lo veng ange. Lalfapa, henghi ka zah loh vang che a sawi ka ni lo tih min hriat sak la, Sihpui khaw tan ka tihve theih tawk anih vang chauha sawi ka ni e, ati ta a.

#Chutiang taka a khaw tana in pe, lalfapa Khawliana'n ahmuh chuan thinrim chu sawi loh athinlung tak chuan alawma, anni aia athawhhlawk bik chuan loh tur zia te chu ngaihtuah in, Roliana duh dan ang chuan pasalṭha Hnuhliana nen ahnung bera kal tur chuan an ding dun ta a.

#Tlanglian ram chhung an dai luh aṭang chuan Roliana chu afimkhur zual in, amit fing tak chuan kiltin chu amelh pah zela, hmuhmaih neih atum loh hmel kher mai. Chutah ahnunga kal Zakunga chu zawitea bia in, ṭhianpa i duh chuan ṭawngkam pawh i lo thiam kha maw le, kan lalfapa meuh pawh sawitur hre lo in a hawi lawl lawl mai alawm, tiin an fiama. Zakunga chuan nui ṭha chung chuan, engaiah nge ka chanvo mi chuh pui te a tum ve ngawt reng ni, i hma lam hi chu tu chanphak ni lo mahse, i hnung hi chu ka chanpual ve ani tlat alawm tia chhan pah chuan, tlema thutak deuh zawk hian. Ṭhianpa kan thudanga laichuan thil zawhduh che ka nei, pu Dokuma khan kal ve achak teh lul nen engvanga remti lo tlat nge i nih, nangman i hnial luih tlat avang khan atih lui ngam loh mai bak ah, kan lal pawh khan i thu zawm tur khan alo ti ve ta bawk si nen, he lama rawnkal ve kha chu a chak hle in ka hria. Tin, Tlanglian khua meuh bei tura mi zarual chauh kal ila i tih kha mak ka lo ti deuha, mahse, nang berin atawk i tih miau si chuan tumah in hnial en ah an en bawk si lo chea, mak ka lo ti rilru khawp che asin, tiin athil hriatthiam loh te chu an zawt a.

#Roliana chuan zawite bawk hian, ṭhianpa ngaihtuah tur atam khawp mai, tute emaw lak ah chuan intivei nih te pawh ka hlawh hial mai thei, mahse, hmannia kan thiltawn aṭang khan fimkhur theih tawpa fimkhur aṭul ni in ka hre si. Pu Dokhuma'n khaw chhung lam lo veng se ka tihna chhan pawh, ani anga rintlak leh hmelma ten khua an rawn beih thut pawha tlangval rual te lo kilkawi thei tur ber nia ka hriat vang ani. Kan putar that tute ka umzui ka rawn let leh ni a khaw hual vel tu khampang vel ka fan ṭum khan, kan khaw hualvel tu chhuahchhawng kham kar ah kawng biru zet mai lo awmreng chu ka hmu chhuak hlauh maia, tlangval thalai tan kal harsa lo tak tur ani leh nghal, kan khaw phatsan tu Khawkunga khan chulai kawng ruk chu lo hre ru in Tlanglian pasalṭha te hnen ah alo hrilh ru nge hrilh ru lo tih lah hriat ni si hek lo le, fimkhur angai in thu hriat apiang puanzar hun ani der bawk si lo nen, pu Dokhuma hnen ah aruk in ka hrilh ta a. Chuvang chu ania, engkima kan rin ngam tur pu Dokhuma'n khua lo awplum se kan tih na chhan chu ni.

#Tin, Tlanglian khaw bei tura raldo thei zawngzawng thawhchhuah vek hi thil ṭha ber nidawna ka hriat loh vang ania, aṭhenazar chauh thawh chuah ni se kan tih tlat chhan chu ni, Tlanglian lam hian finkherek chhuah in kan thangbo hlan a khua an lo luh chilh vaih zawng in, pitar, putar leh nunau chen in an zuah lo emaw kha ania nga, khua an hal fai vek phei chuan khua tia sawi tur pawh kan nei lo maitur asin. Anmahni bei tura kan thawh chhuah hun tur engkim hresa an nih avang hian an tan ruahmanna siam a awlsam in, an tan chet lak a awlsam phah em em dawn tih lah hairual ani si lo, tiin pu Dokhuma leh tlangvalrual ṭhahnem tak khawchhung veng him tura hnutchhiah aduh chhan te chu ahrilh ta a.

#Ni in vanlaizawl athlebg ṭan mek tih chuan, Sihpui pasalṭha rual te pawh in Tlanglian ram chhung an dailut thuk hle tawha. Roliana sawi lawk anga fehkawnghlui chu zawh in, kal pangngai mai pawh ni lo tlan deuh titih in hmanhmawh tak chuan hmalam an pan zel a. An hma hruai tu Roliana pawh afimkhur zual in amit pawh alen ngun kher mai. Tuibur hmuanda zet tur an kal leh hnu chuan thinghmun thelh, ngawchhung thui tak tak hmuh theih na hmun chu anthleng ta a, chulai hmun kawng aṭanga pen sawmhnih vel tur ah chuan lungpui pakhat a awm bawka. Chu lungpui awmna zawn an kal lai chuan, a hnunga kal Zakunga hnen ah ringdeuh fe mai hian Roliana chuan, Zakung, kan hnunga mi te saw tihian han hrilh teh. Tlanglian khaw hnuai lawk ah mualpathum kar cheh in hmun remṭha zet mai leh biru zet mai, kawrte tui awm na hmun a awma, chulai hmun ah chuan riahbuk sual in khua kan nghak var anga, khawvar rual in Tlanglian khaw bei tur in kan thawk chhuak ang tiin hrilh rawh, tichuan mahni hnunga mi te ṭheuh hrilh chhawng tur in i hrilh nghal bawk dawn nia, ahan ti a.

#Zakunga mak ti leh angaihna hre lo hmel chu hmuhnawm tham atling hial mai, Roliana chuan engthil nge angaihtuaha engvanga chutia ringzeta rawn be ta mai nge anih tih chu hriat a chak kher mai. Mahse, hnunglam a rawn hawi miau loh avang in Roliana'n enge angaihtuah tih hriat theih ani si lo, ahma zawng pawha thawm bengchheng chhuah lo tur leh fimkhur tura midang te hrilh tu, aṭawng chhuah chhun ah pawh midang hriat hlau niawm hrima zawite tea ṭawng ṭhin kha ani a. Tunah lem thu pawimawh leh thupngai ber thil nia lang, inthlahrung lo lek a an atlangau pui leh si chu Zakunga tan pawh mak tih loh rual ani lo reng ani. Chutah Zakunga chuan, ṭhianpa enge thil awmzia, tiin inthlahrun hmel zet chuan an zawta, Roliana chuan tlema a awki ti hniam leh deuh in, ṭhianpa, zawhna aawm chuan chhanna pawh aawm tur ah ngai rawh. Ramsa leh Sava te meuh pawh in ahun leh hmun hria a aw an chhuah ṭhin anih si chuan, i ṭhiana pawh hian a hun leh hmun nia ahriat ah aw achhuah ve ah ngai mai la i ringsual hauh lo ang. Tun ah chuan hruaitu ka nih angin ka thupek che ang chuan ti vat mai rawh tiin, Zakunga hmuh loh lama nuih ruk var var pah chuan an hrilh nawn leh a. Roliana mize hre chiangtu Zakunga chuan, aṭhiana chu zawhna zawhzui zel hun ani lo tih hria in Roliana sawi ang chuan an hnunga rawn kal ve mek tu te chu ahrilh ta zawka.

#Chulai lungpui awmna aṭanga mual thahnem zet an kal liam leh hnu chuan, kawrruam biru lai ah Sihpui pasalṭha rual te chu chawl in, an chawfun te chu an bar mawlh mawlh hlawma. Hunrei pawh chawl khawmuang lo chuan kal zai rel leh nghal in, an kal ṭan leh mek tih in Zakunga bawk chuan, ṭhianpa tun hi zawhna in zawh hun ani mial lo maw tiin, inthlahrun hmel zet chuan Roliana chu an zawt leh a. Roliana chuan awlsam zet hian, ṭhianpa tun tak hi chu zawhna inzawh hun ni lo in chhanna in pek hun ni tawh zawk in ka hria, nichina khatiang thil titura ka han tih ngawt chhan che kha chu kawngsir lungpui dinhliah tu thing banpuar tiat lek te kha, a kung phu lo a azar leh hnah te kha aṭawi buk vang ania. Kha thingbuk khan kan thil tih tum hi hre ve reng reng se ka tih vang ani ber e, tiin a hrilh ta a. Roliana thu sawi chu Zakunga chuan ahre thiam lo kher mai, mak tih hmel zet a Roliana chu en in, ṭhianpa engthil nge maw i sawi le, chu thingbuk chu engvanga hrilh hriat duh kher nge i nih tiin an zawt nawn leh a. Roliana chuan, kha thingbuk phen ah khan enge awma i rin.? Kha thingkung, akung phu lo a zar leh hnah buk zet phen ah khan Zawngte khawhar ringawt chu abiru in i ring bik lo ang chu tiraw, tichuan engvanga khang thil kha tihtir che nge ka nih tih pawh i chhut thiam ve tawh ang chu, tiin angawih san ta a.

#Roliana chhandan aṭang in zawhzui zel chi ni a alantak loh ah chuan Zakunga chu a in ngaihtuah buai nasa maia. Roliana sawi thingbuk phen ah chuan tuemaw chu an biru ngei anih si chuan, chutiang hmun pilril zet ah chuan tunge lo biru reng reng ang le, an hmelma te lam an nih ngawt loh chuan tudang mah ni thei in Zakunga chuan ahre lo. Chuti anih si chuan Roliana chuan an chet tum dan zawng zawng te engvanga hriat tir duh nge anih, Zakunga'n a ngaihtuah na ahman nasat poh leh a rilru chu abuai tawlh tawlh ta maia, atawp ah phei chuan angaihtuah zui duh lo in aṭul hun ah chuan ka la hre chhawm ve mai ang chu tiin thildang angaihtuah san ta a.

#Khawthlang lam ah Ni pawh in liam zai rel in, suk chen lek ah chuan a la in khai ve nul nula. Chutih mek lai chuan Tlanglian lal Rivunga in ah chuan, tlangval pahnih hi hmanhmawh zeta tlan lut a, Lal Rivunga hnen ah chuan an thu hriat te chu an hrilh nghal in, Lalpa kan thil hriat leh lo rinlawk chu adik ngei e, Sihpui khaw tlangval rual mi za rual vel zet tur chu, thingsengaw lam aṭanga rawn lut in kan mi man tlanchhuak leh ta Roliana an tih khan arawn ho a, kan lo rin ang em ema mifing tak pawh ni in alang lo. Ralram ah akal mek tih a in hre lo nge, thawm dim nachang lah ahre hek lo. Kan bihrukna zawna an kal pelh lai te chuan ahnunga kal pakhat chu ring zet zeta bia in kan khaw chuanhnuai, mualṭhuam ram kan tih kawrte ruam ah khuan riahbuk suala khawvar ruala minrawn beih an tum thu te chu hrilh in, a thusawi ngaithla ru tu an awm ang tih reng aring phak lo ni in alang, tiin an thil hmuh leh hriat te chu lal Sairuma hnen ah chuan an hrilh ta a. Lal inchhunga awm lal leh a upa te, tin, pasalṭha Hauṭhuama leh pasalṭha dang ten chu thu an han hria chu, thinrimna ai mah in an hmel ah chuan hlimhmel alang tam zawk ni mai hian ahriat a. Chutah, lal Rivunga chuan phur zet mai hian, tlangaupa ka rappuichungsanga zubel kha han chawi thla la kan tlangval te hi han intir ta che. Tunah chuan kan hmelma te chu belchhung sa ang chauh an ni tihna ani tawh mai lawm ni, tiin hlimhmel zet mai hian chhuatlai ah chuan avei nghauh nghuah maia. Pasalṭha Hauṭhuama chuan nui vur vur chunga lo chhang in, Lalpa ka kut ah engkim dah mai rawh, ahminga Sihpui khua ni tawh phawt chu dam in ka chhuah lo ang, alo ti ve bawka. Lal inchhunga awm tu te mai pawh chu an thuhriat avang chuan an phur tlang in, Sihpui pasalṭha te beih dan tur ṭha nia an hriat te chu ansawi nasa maia. An pasalṭha ṭhenkhat, Sihpui khaw bei tura an tirh tak chungchang te chu sawi kai zel in, akhua chawp in rawn hal fai vek law law se buaina akiang ani mai tiin, an khaw chheh vela an mahni do ngam tu awm chhun Sihpui khaw chung ah chuan zahngaihna lantir ṭul an ti lo tlang kher mai.

#Tichuan le, khuate rawntlai zel in Zanlai ar khuang ri areh fel meuh chuan, pasalṭha Hauṭhuama leh Tlanglian khaw tlangvalrual ṭhahnem fe mai chuan, Sihpui pasalṭha te riahbuk chu an hnaih hle tawha, an meipui chheh te pawh ral aṭanga rawn hmu in an thing tuah te chu lo rem tawh mahse, a ling sen vam huam mai chu ral aṭang pawh in lang chiang thawkhat viau mai. Mahse, chulai ruam thim zet ên tur chuan mei ling vam satliah ringawt chu atawk zo lo tih hriat tak in Sihpui pasalṭha te chhawlbuk zar pawh chu a hmuh theih reiruai chauha. Nguntaka an han thlir vel hnu pawh chuan chiangtaka thil han hmuh theih erawh an nei thei chuang lo. Tichuan le, meiling vam êng reiruai hnuai ah chuan Tlanglian pasalṭha rual te chu an hruaitu pasalṭha Hauṭhuama ho in, fimkhur leh thawmdim zet mai chuan Sihpui pasalṭha te riahbuk pan in, ruamchhung ah chuan an rawn tawlh lut ta ṭhem ṭhem mai a. Sihpui pasalṭha te lah an hmelma ten an rawn luhchilha an riahbuk an rawn hual mek lai pawh chuan, thehhmeh an sawi ang hrim in thawm pawh nei lo chuan an la reh ṭhiap reng mai si, an rawn kal na lam a hla in an chau rimtawng an lo muhil zo ta mai em ni ang le.

#Chutia an mi beihtur te ber rehṭhiap mai leh thawm riva takngial pawh chhuah ta lo chu, tifuh dawn hle a inhria in Tlanglian pasalṭha rual te chu an phur ngang maia. Chutah an duhanaga ṭanhmun te an siama Sihpui pasalṭha te riahbuk an hual fel hnu chuan an hruai tu ber pasalṭha Hauṭhuama chu ring zeta rawn au in, Sihpui tlangval te u, Tlanglian mihrang valrual kan rawn thlenge, tho thuai rawh u, in ngamloh kei pui in cho sual leh ta e, tia au in. Tlanglian mihrang valrual te u tumah zuahlo in that vek rawh u le, tia au zawm in a silai chu ahmet puak zui nghala. Chutia an hotu ber silai a puah tak ah chuan midang te pawh chuan an silai chu hmet puak ve nghal in, Sihpui pasalṭha te riahbuk chu hawhaw chung chuan an kahrawn ta ruih ruih mai a, ngawchhung reh ruih hnuaia tlangval zarual zet mai hawhaw thawm leh silaipuak ri chu arapthlak in a thawm aring kher mai.

#Silai puak ri areh rual chuan pasalṭha Hauṭhuama chu rawn au zui nghal in, Tlanglian pasalṭha te u mi rawn zui rawh u le, tumah dam in an chhuak tur ani lo, mahni hmazawn ah ṭheuh khan tlan lut ula, tumah dim reng reng suh u tia au pah chuan, a chempui chu hum in Sihpui pasalṭha ho buk lam pan chuan atlan zui nghala, midang te pawh chuan an hotu thupek chu rangtaka zawm in hawhaw hluah hluah chung chuan an hmazawn ṭheuha chhawlbuk chu an bawh zui ve bawka. Mahse, antum leh beisei angin thil athleng ta awzawng lo mai le, mak tih vanga meng zau kawk kawk chung chuan Sihpui pasalṭha te buk kiang ah chuan an hawi â ruai ta maia. An thilhmuh chu atak ngei ani tih ringhlel zet chung in, mak tih hmel zet chuan buk ruak bawk chu an han bih nawn leh ṭhin, mahse, Sihpui pasalṭha te chu dam in emaw thi in emaw buk chhung ah chuan hmuh an nei chuang si lo. Chutia mak ti tak leh angaihna hriat loh hmel zeta an hawi phawk hru lai chuan, aw nelawm lo leh chang fak mai hian ' ekhai, Tlanglian pasalṭha te chu in keipui bu luhchhuah tum chu in rin alo ang meuh nange maw, in va hawi phawk nasa ve..! Tunṭum chu in aia huai leh fing Keipui bu luhchhuah in tum ni in ka hria, keini Sihpui valrual te hi chuan kan ngam loh buzawla tei luh chu a finthlak loh zia kan hria a kan ching ve ngai lo asin. Mahse, kan luh chilh tawh vek vek erawh, tumah dam in kan chhuah ngai lo. Tun ah hian dam in la duh anih chuan hun ka pe ang che u, rangtak in tlan haw ta ula, Sipui khaw do tur in in ke kha aphut pawh rawn phut chhin eih tawh suh ang che u. Chuti anih loh chuan inkhua chawp in ka halral vek ang che u,' tia vau na aw changfak mai chu an hre ta.

#Aw rawn chhuahna lam chu rang zet in an hawi rual ṭhup maia, chutah an mahni rawn vau tu lungpui chunga ding tu emaw chu va hmu in, meivam eng reiruai ah chuan tunge aniha, engtiang chiaha thinrim in nge an mahni chu ahmachhawn tih erawh an hre lo. Chutah zet chuan pasalṭha fing leh hlauhawm tia mi ten an lo sawiṭhin, pasalṭha Hauṭhuama chuan hmelma te bum in an awm ani tih chu ahre chiang ta kher mai, thinrim zet chuan a hachang chu aṭhial ri rawp rawp mai a, mahse, chutichung chuan tlawm zawka ṭan emaw hmelma te kuta in pek emaw chu atum awzawng lo. Lungpui chunga ding chu vin zeta au in, nang sawnlubawk satliah kha tunge maw i niha mite i rawn vau ve ngam chu le, mi dawihzep anga khalai hmuna ding reng lo khan, i ngam anih chuan kei pasalṭha Hauṭhuama, Hmunzawl keipui hi mirawn hmachhawn ta che, tiin zam lo tih hriat zet a cho in, a aw chu aring ṭha kher mai. Lungpui chunga ding Sihpui pasalṭha chhanna an hmuh hma chuan, Tlanglian pasalṭha pakhat chuan rangzet hian, kei man kan hmachhawn ange, Ramhuai ani emaw mihring ani emaw kan ram chhunga min luhchilha min vau tu hi tupawh nirawh se, damin ka chhuah hauh lo ang tiin, chempui vilik chung chuan atlan dawk phei ta zawk maia. Mahse, thui atlan hman lo chiang kher asin, a nghawnga thalfang rawn bur chawt mai chu mak ti zeta dawm in aṭhingṭhi hnawk maia, natuar tih hriat zeta thawri zui nghal bawrh bawrh in lei char ah chuan atlu sawp ta nuaih mai le. He pasalṭha hian angaihtuahna te hman nachang hria in, a mi beih tum hi Sihpui khaw chhanchhuak tura khuanu ruat, ruahman na fel tak tel lo a hmelma te bei ngai lo leh hmelma ahmachhawn laia fimkhurna tlachham ngai lo Roliana ani ngei ang tih ngaihtuah nachang hria in, fimkhur nachang te hria ni se zawng, tlem in a dam rei deuh mahna le.

#A rin loh angtaka thil a thlen tak si ah chuan, awmze neiloa hun khawhral na hun ani lo tih Roliana chuan hrethiam nghal in, an awmna kawrruam khawk rum rum khawp chuan, Sihpui pasalṭha te u kan chunga zahngaihna lantir tum lo tu te chunga zahngiahna lan tir tum hian sawtna anei lo tih hria ula, tun ah in silai te kha hmet puak rawh u le, tiin. Tlanglian pasalṭha te lo kal hun nghaka, ruam hual vela a bihruk tir Sihpui pasalṭha te chu thu pe in, a mah pawh chu rangtaka lungpui chung aṭanga zuang thla in ṭanhmun a siam ve nghala. Tichuan le, an chunga zahngaihna leh lainatna lan tir tum reng reng loa an buk rawn kah rawn nghek tu Tlanglian pasalṭha te chu, dim baksak lo in Sihpui pasalṭha te chuan an kah rawn ve ta hmiah hmiah mai a. Chutiang tak in bum in an awm ang tih leh chang ru tu an awm ang tih, Tlanglian lam te suangtuah na chuan suangtuah phak hek lo le, ṭanhmun siama lo in semdarh na chang leh an silai kah ruah thun khah leh nachang an lo hre hauh lo mai chu ni in. Ṭanhmun ṭhatak siama lo chang ru tu Sihpui pasalṭha ten dimdawihna tel hlek lo a an han kah rawn zet chu, Tlanglian pasalṭha te chu an hek ṭha hiau hiau kher mai le. A rual in anzinga a zatve dawn zet chu an dinna ah chuan tlu nghal in, silai mu den fuh loh ho te pawh chu an talbuai nasa maia, an hmelma te beilet tura an hruaitu pasalṭha Hauṭhuma au tuarh tuarh ri pawh chuan awmzia anei thui lo kher mai.

#Sihpui pasalṭha lam pawh chuan, an siali vawikhat ṭheuh an hmeh puah tak ah chuan, Tlanglian pasalṭha an kahhlum ban te chempui nena pawmchilh mai chu an tuhtheih awmchhun ani ta. Mahse, Roliana chuan meipui alh pawh ni lo aling vam êng ringawt hnuaia hmelma te, a huho a pawm chilh ngawt chu thil hlauhawm tak ani in, mahni leh mahni in ral palh pawh thil awl tak ani ngei dawn tih chu hria in, Sihpui pasalṭha te chu an silaimu kah ruah te thuna thupek an hmuh hma zawng an awmna ngaia awm reng tura hrilh in. A bula awm Zakunga hnen ah chuan, Zakung tun ah hian kei mah in kan hmelma te hi ka luh chilh dawna, tumah silai lo hmehpuah tir suh ang che. Mahni hmazawn ṭheuh ṭhatak in lo ven tir la pakhat mah lo tlanchhuah tir suh ang che u, kan zavaia kan pawmchilh zawng in keimahni leh keimahni kan in sam chiam lo ang tih pawh sawi theih ani tlat lo. Chuvangchuan keimah in ka va luhchilh anga ka silai hi i lo kawl ṭha dawn nia tiin, Zakunga thusawi ve pawh ngaithla ta lo chuan thimzing ah apil bo zui nghal a. Tichuan le, Tlanglian pasalṭha ho talbuailai chu na tuar tih hriat zeta rak tuarh tuarh chung in lei char ah chuan an let ta hlawl hlawl maia, Roliana lah chuan dimna tel hlek lo in thalfang tlum zawt zawt khawp chuan a kap zui miah miah mai bawk, a thalfang ah zawng zawng a kah zawh rual chuan a chempui hrawl zet chu phawrh ve leh thung in, kha le keimah Roliana ka rawn kal e, min hmachhawn ngam chuan min lo hmachhawn rawh ule tia hming chhal in, Tlanglian pasalṭha awmna a tlan luh chu arual leh nghala. Chutah zet chuan an ngam loh chal ah chil an hnawm tih an in hre chiang ta kher mai, chulai ruam chu na tuar rum ri leh thisen rim in akhat zo ani ta ngawt maia. Ṭhenkhat tlan chhuah tum te lah chu, Sihpui pasalṭha te bihrukna zawn an thlen rual apiang mai chuan, Sihpui pasalṭha te chuan an lo sat let tawp tawp zel mai bawk si nen, Tlanglian pasalṭha te tan chet leh ngaihna a awm ta lo.

#Mahse, Roliana chuan a la duhkhawp awzawng lo mai, Tlanglian pasalṭha tlandarh te hnen ah chuan, tunah hian dam la thlahlel te in awm anih chuan helai meipui chhehna lam ah hian rawn pen chhuak ula, meipui hi thingro vur belh in rawn tuah eng rawh u, tichuan, in nunna ka zuah ang. Mahse, nichina min cho tu Hmunzawl khaw Keipui in ti erawh kha chu i lu kha hawn ka duh dawn avang in, i la dam anih ngai chuan midawihzep te anga biru reng lo in rawn pen chhuak la, Keipui i nih leh nihloh chu kei Roliana hian ka lo fiah ange. Tunah hian ila dama i rawn chhuak ngam lo anih pawh in, zingkhua alo var anga ka that tho tho ang che. Tin, tumah in helai ruam hi tlanchhuahsan tum suh ang che u, Sihpui pasalṭha te helai ruam hual chhuak hian an awm vek tih hria ula, ka thu in zawm chiah hi intan dam khawchhuahna awm chhun ani tih hria ang che u, ati ta a.

#Roliana sawi chu thudik ani, chulai mual pathum kar cheh ruam zim te chu aruka tlan san tur in Sihpui pasalṭha te hmuh loha tlan chhuah ngaihna awm tlat lo, Roliana thu chu dam la duh tan zawm loh theih anih tak si loh ah chuan, hneh loh tur tih hriat reng laka luhlul chhuah in awmzia anei dawn chuang lo tih hria in, Tlanglian pasalṭha te chu an bihrukna aṭanga rawn chhuak in meipui chhehna lam chu an rawn pan khawm ta a. Chutia an rawn chhuah khawm tak ah chuan, Sihpui pasalṭha te thah bang chu mi sawmhnih ṭha lek chauh mai hi an lo ni tawha, an zinga ṭhenkhat lah chu hliam tuar te an ni zui bawk nen, Sihpui pasalṭha te laka han ṭang leh tur chuang an lo awm tawh reng reng lo alo ani.

#Tichuan le, meipui te an chheh en ṭhat leh tak ah chuan, pasalṭha Hauṭhuama ngei mai chu mei êng chimchin aṭanga rawn pen chhuak in, chempui hum run chunga Roliana rawn pan phei pah chuan, nangkha maw Roliana ka ruahman na zawng zawng engmah lo a chan tir tu chu, i che ropui khawp mai. Mahse, tunah chuan inbumna tel lo in kan ti tawh aniang chu tiraw, mipa i nih ngai chuan mipa tak in min rawn hmachhawn ta che, tiin arawn cho ta a. Roliana chuan ngaihnep hmel zet hian, thimzing ah hmelma te hmachhawn ngam lo in i biru ṭhin tih lo hre lawk ni ila chu, in rawn thlen hma khan mei eng ti thim lo in, meipui eng hnuai ah ka lo hmuak tur che hi ania. Khawnge kan meipui chheh te hi ala eng tawk lo i lo tih palh tak in kan vur belh ange tiin, thingro te chu meipui ah chuan an theh luh belh a. Chutitaka Roliana'n an ngaihnep leh ahlauh loh zia pasalṭha Hauṭhuama'n an hmu chu a thin arim zual kher mai. Chutah Roliana bawk chuan, tunah hian mipa diktak i hmachhawn dawn tih hria la, a chak lo zawk ah ka ṭang emaw, i lu kha ka la thei lo emaw anih ngat chuan, helai hmun hi him tak in i chhuahsan thei ang. Mahse, chak zawka i ṭan chu beisei duh chuang suh, i hma a ding hi Roliana ani tlat mai, tiin a ke chheh chu asiam rem zui ve nghala.

#Chutih mek lai chuan Sihpui pasalṭha te pawh, Roliana leh pasalṭha Hauṭhuama in bei tur chu hmuh loh hlau a ruam chhung ah chuan rawn lut in, mei eng chimchin ah chuan an rawn dinhual ta ṭhup maia. Roliana hmachhawn mek chu, Roliana ai maha lian zawk leh thahrui pawh ngah hmel zawk ani tih te an hmuh tak ah chuan, Roliana chu a chak lo zawk ah aṭang palh tak tak mai ang tih chu an hlau kher mai. Mahse, Roliana hma ah chuan, pasalṭha huaisen leh ṭuanrang tia mite sawi ṭhin chu, ahuaisen tawk lo in aṭuan arang tawk lo tlat mai le. Rolianan angaihnep zia leh a hlauh loh zia ahmuh chuan, mak tihna leh hlauhna athinlung ah anei ta tlat maia, midang a beih ang ngawta awlsam chuan Roliana chu abei thei tlat lo. Chutah a huaisen na te sawm khawma an bawh phei leh chu Roliana chuan awlsam zeta lo bum in, a nghawng ah tak mai lu per nawlh khawp chuan a lo sah sak tak ale, Hmunzawl keipui tia in chhal pasalṭha Hauṭhuama kaihza tha chuan, a maha ding turin chak na a reng anei ta lo.

( Awle, chhungkaw lam ah chhiatna leh harsat na neuh2te kan tawh avang in, story lam ah rilru ka pe thei meuh loa, chuvang chuan christmas presend tura ka lo in sawibat ve pawh, tum ang hun ah ka dah thei ta siloa, a in thlahrunawm kher mai. Engtin tin emaw, phuailuai deuh taka type in dah loh ai ah ka rawn post ve leh hram ani e. Tin, Story hi ka rawn chhunzawm theih ka in ring chiah tawh loa, ka rawn chhunzawm thei ta lo anih pawh in min lo hrethiam hram tur in members te ka rawn ngen nghal bawk che u ani e.)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 7:09 pm

PASALṬHA ROLIANA (Taitea)

PHEK 46 NA.

By :- Hmangaih MT Chawngthu.


#Hnehna chang pasalṭha rual hlim authawm arik dur dur lai chuan, a dara rawn vuan tu lam chu Roliana chuan an hawia, a dara rawn vuantu Sihpui lal fapa Khawliana hmel thutak zet kara hlimna leh lawmna rawn zam chhuak chu ahmuhhmaih lo chiang kher mai, amah chu tihlawm aduh vanga rawn nuih tlawn leh rawn nuih satliah lah ani hek lo. Khawliana chuan, Roliana thiltih ropui tak changtu anih vanga hlimna leh lawmna athinlunga awm te a thup zawh loh avanga hmel hlim tak pu chung in Roliana hnen ah chuan, "Rolian, ka ṭawngkam thiamna te hian daih ni se zawng, i thiltih ropui tak hi mizawng zawng hriat a puan hial ania ka chak ni, pasalṭha ropui tak zawng i lo ni e. I ruahmanna fin zia leh ropui zia hi i hmu duh em ? Hei, han en vel ta che, Sihpui tlangval te zing ah thi leh hliam chu sawi loh, buhfang tiat lek pem nei pawh kan awm loh hi. Ka pa in, Roliana thu thu ni rawh se ti a thutlukna asiam lai khan, ka rilru tak chuan pawmpui har kati in tunhma zawnga i chet tawh dan te hre tu ni mah ila, kan ruahman na zawng zawng hre tu te, an buzawla luhchilh em tur chuan i remhriat na leh finna te hi ka la ringhlel fan kha ania, mahse, tunah zawng ka pa in i chunga rinna anghah ngam na chhan chu chiang tak in ka hre ta e. Rolian, i chungah Sihpui khua leh lal chhungkua te hian bat kan ngah ta kher mai," ati ta a. Khawliana mitmeng ah chuan Roliana chu angaisang in a chhuang takzet ani tih hai rual ani lo.

#Roliana chuan mak tih hmel zeta men kual der vel pah chuan, Khawlian nangni lal chhungkua te leh Sihpui khua te hian min en hrangin mikhual ang lek ah min lo ngai ani tih hi hre daih tawh tur ka nih vei nen, ngaihtuahna aneih tlem thlak ngawt mai tiraw, tiin fiamthu titak deuh chuan an ṭawngkhum zauha. Khawliana chu akawchhung ah Tulum alut ta emaw tih mai tur chuan ameng rang nasa ta maia, ahmel aṭang ngawt pawh chuan hlauhthawn na leh mak tihna ten athinlung chu an hual hneh hle ani tih chu hai rual ani lo. Thinrim vanga aw khur dar dar chung chuan, Rolian, lal chhungkua leh ka khaw mipui te zing ah chutianga lo ngai tu che leh ṭawng khum tu che an awm anih ngai chuan, chumi chu eng mi pawh nirawh se aphu tawk hremna ka pe ngei ang. Rolian, Sihpui khaw mi ni lo leh mikhual ang chauha lo ngai tu che chu tu ber hi nge ni a, chutianga lo ṭawngkhum tu che chu tunge annih khawngaih in min hrilh ta che, tiin azawt zui nghal a. Roliana'n a zawhna dawn chu chhanga kan lal fapa Khawliana hian maw le, tia a chhan na chuan Khawliana chu ati phu chiang ngang mai. Angaihna hre lo leh mak tih hmel zeta, kei hian chung thu chu ka sawi amaw tia aphun mawlh mawlh lai chuan, lal fapa i thusawi tur te ngun taka ngaihtuah hmasa in fimkhur tak in thu sawi ṭhin ang che. Kei hi ka lo in ngaih dan chuan, mahni khaw chhan nan leh venhim nan a bei tu ah ka lo in ngai ve ṭhin a, he ka khaw neih chhun, Sihpui khua leh a chhunga cheng nunau te hi an him theihna tur anih dawn phawt chuan, ka nunna hial pawh hi chan ka huam ṭhin asin. Chuvang chuan lal chhungkua leh Sihpui khaw mipui ten ka lak ah hian bat in neih awm reng ka hre lo, tun aṭang chuan mahni khaw tana bei tu ah min ngaih tawh ngei ka beisei. Chuti niloa lawmruai anghrima in inngaih a, ka laka bat nei anga in inngaih tlat dawn chuan, kei hian Sihpui khaw mi nihna chanvo ka nei lo tihna ani ang. Chuti anih si chuan, kei mikhual vakvai satliah mai hian hawn na tur leh a khaw mi a min pawm thei tu tur khawikhua emaw zawng tura ka chhuah ngei chu angai leh dawn tihna ani mai, tiin Roliana chuan Khawkunga hnen ah chuan asawi ta a.

#Roliana en vawng vawng tu Khawkunga ngaihtuahna chu a kal thui kher mai, phutlet neilo tlawmngaihna, inngaihtlawmna nunpui chunga chapo pui tham thilṭha tih ṭhulh chuang si lo, nun itawm leh thlakhlelh awm tak nei chunga mahni khaw tana nunna chan pawisa chuang lo. Rolian miropui takzawng i van ni tehlul êm, kei lal fapa meuh pawh hian Sihpui khaw tana i ṭhahnemngaihna rilru zah ve chauh pawh ka pu phak lo anih hi, tiin a rilru chuan asawi mawlh mawlh maia. Chutah Roliana hnen ah chuan, Rolian nanganga thluakṭha leh fing chuan ka thu thlûk hmang kha chu i hre thiam in, kei ni hian mikhual ang leka kan ngaih loh zia che pawh i hriat ngei ka ring e. Mahse, i thusawi tak te avang khan Sihpui khaw tana ṭhahnem ngaihna kawng ah, ka tluk loh zia che ka hre chiang ta kher mai. Rolian Sihpui khua hi chhuahsan i tum lui tlat anih chuan hei hi hria la ka duh, naupang te leh pitar putar ten i dar ah vuan in an mittui a far ngei anga, chung an mittui far te chuan Sihpui khaw chhuahsan tura i tha chak nate chu chiahzawp in, chung mittui hlutna leh ropuina reng reng nei lo, mahse, i phurh zawh rual loh tura rit si chuan hmalam pan thei lo tur in a uai bet ngei ang che, tin, nangmah vanga thlamuang taka khumlaizawl bel ṭhin te mittui in afar huh, kawnglaia vaivut te chu i ke chheh nana hman zui zel harsa tiin kir zai i rel ngei ang le, ati ta a.

#Chutih mek lai chuan Zakunga'n an ni chu rawn pan ve leh in, pasalṭha Hauṭhuama lubung rawn khai then nawlh nawlh pah chuan, ṭhianpa i ral lu hawn tur pawh chhar sak zel i ngai dawn tihna em ni, a chhar chhar neih ah ka tianga ka hawn sak daih mai tur che asin. Mi in pasalṭha Hauṭhuama that tu chu Zakunga ani, a lu rawnhawn tu pawh amahngei ani e an ti anga i hawi i hawi mai asin, tiin arawn fiam pah mawlh mawlh bawka. Roliana lah chuan awlsam zet hian, chuti anih ahnu ṭhiante tana thilṭha ti kan ni dawn tihna ani maia, hawnkawng ah lah ka zan phah deuhdawn tihna alo ni bawk nen, i duh phawt chuan i neih ka phal ni rawh se. Kei chuan miin ansawi ropui chawp vanga mi ropui nih hlawh ai chuan, Roliana nih hi ka duh tawk e, tiin nui var var chung chuan alo chhang ve nghala. Zakunga chuan tlema thutak deuh zawk hian, ṭhianpa ka tana i thiltih ṭha tih te chu atam tawk tawh bawk alawm hei hi chu i chanpual liau liau anih hi, chubak ah mi ral thah sa lu lo hawn ve ngawt zawng khua ah kan hawi ngam nang le. Kha a lu len teh lul nen thluak angah vak lo aniang a zang emai, dawtchawi ang chauh alwm maw le anih, i rih phah vak dawn loh hi, tiin Roliana iptepui ah chuan ahnawh luh sak ta nghala. Chutah an piah maia lo ding tlangval pakhat chuan, Zakunga chu lo fiam zui ve nghal in, Zakung, hei kei ni chuan rallu khaihawn tur kan ngah nasa mai sia, nanglah chuan mahni thah nilo mi thahsa ral lu hawn chu ka hreh e i ti vel bawk sia, heng kan mithah te ho zing ah lah hian khawi ber hinge i thah ni a, khawi hi nge midang thah tih i thlir hrang thei awm tawp si loa, nangzawng kut ruaka i hawn angaidawn a van nih mai hmel ve. Kut ruak ngawta hawn i hreh tak viau leh i ngaihtuahana i hman ve deuh angai dawn tihna anih hmel khawp mai, tiin arawn fiama.

#Zakunga chuan chu tlangval rawn fiamna chu hre thiam nghal in, mai maia kutruaka ka hawn duh i ring ami, i sawi tur i sawi zawh hma khan ngaihtuahna te chu ka hmang fel dimdiam tawh alawm, khawnge mahni thah tih hriat chian ngei lu chu hawn i han tum ang hmiang, tiin an mi man te lam chu chempui vilik zauh zauh chung chuan apan phei ta maia. An miman te chuan an hlau nasa ta mai le, hmel dang sawp sawp chunga lo thlir in an khur ru der der maia. Chutah tlangval chhuak zetzawt chauh, hlauh vanga khurru der der a lo thlir rengtu chhipsam ah chuan ṭham in, he lu hi hawn atan chuan aṭhat mai dawn hi a, ral lu hawn tur mai mai atan chuan duhtui vak ngai pawn ka hre lo e tih leh chu tlangval lu kawihkun chu arual nghala. An mi man dang te lah chuan ṭik pawh ti ngam tawh hek suh, chu tlangval hlau lutuk lah chuan zun cheh ṭhawt ṭhawt chung leh ṭah aw ṭuau chunga anunna zuah sak tur a ngen in akhur hlawk hlawk maia. Zakunga pawh chuan tlangval chhip sama a ṭham na chu thlah in, " nangni ho hian hei hi hre reng ang che u, inkhaw pawisawi tu pawh ni lo, ka pa sahliam um lai chu dawta puhin in pasalṭha ten zahngaihna tel hlek lo in an lo thata, chuvang chuan in chunga zahngaihna lantir hi ka chak em em ani hran bik lo tih hria ang che u. Tunhnu ah Sihpui khaw lam hawi in ke inrawn pen leh ani emaw, Sihpui khaw mi tu chung ah pawh kut in thlak leh anih vaih zawng in, in chungah hian zahngaihna ka lan tir leh ngai tawh lo ang, " tiin a kal sawn ta nghal a.

#Khua pawh in var lam ahnaih tak ah chuan Sihpui pasalṭha te chuan, an mi thah tak te silai leh hmanraw dang te chu chhar khawm in, an mi lu hawn tur te chu an khai fur mai bawka. Chutah pasalṭha Hnuhliana hnen ah Roliana chuan, pu Hnuhlian, Khawliana nen hian kan tlangval te hi khawlam pan in lo zuk ho thla leh phawt mai ula, kei in mi sawm vel hruai in heng kan mi man te hi khua ah kan han dah ange. Tin, khawvar chian hma chu meichher nena kal angaih dawn avangin in hmanhmawh thei kher in arinawm loh a, mahse, leilung in hmuh chian theih deuh hun ah chuan muangchang lutuk suh ang che u, khaw lama ralveng tura kan dah te puih an ngaih palh tak hlauh in. Tichuan khua in thlen hun ah heng kan rallak silai leh hmanraw dang te hi chu lal hnen ah thlen ta mai ula aṭha mai ang a, tiin an rawna. Pasalṭha Hnuhliana pawh chuan, nangber in aṭha ang i tih chuan aṭha ani mai. Ni e, khawlama kan ralveng te pawh an ngaihtuah awm viau mai, helaia awm khawmuan reng pawh hian awmzia aneih tawh chuan loh hi tia a chhan pah chuan, Khawlian kal kan in peih kim tawh chuan, tlangval te khan meichher kha han chhi kai se, kan kal nghal mai dawn em ni ang, tiin an zawt zui ve leh nghal a. Mahse, Khawliana chuan khawlama haw hmasa a ṭan chu alo tum bik awzawng lo mai, pu Hnuhliana te hnen ah chuan tunṭum chu min hrethiam mai teh u, Tlanglian lal, Rivunga hmel ka hmuh phawt loh chuan haw mai thei ka ni lo a ti ta tlat maia. Chutia lal fapa meuh in min hrethiam mai teh u atih tak si ah chuan han tihluih vak chi ni hek lo le, pu Hnuhliana leh tlangval rual te chuan, Roliana leh Zakunga, tlangval sawm rual zet leh Khawliana te chu kal san in Sihpui khawlam an pan san ta a.

#Chutia an ṭhiante an kal liam tak ah chuan Roliana pawh in chulai hmun chhuahsan chu rawt ve nghal in Khawliana hnen ah chuan, Khawlian keini pawh kan hman tlan chuan kal chhuak nghal mai i la, hun khawhral tam lo zawnga kan chet aṭha ange a, heng kan Tlanglian pasalṭha te hi an lal hnen a han hlan pah in, minrawn tibuai tawh lo tur in hrilh i la. Tichuan khaw lam kan pan zui ve leh mai dawn nia, khawvar rual a kan kir leh hman te anih chuan thim chhiat hma in Sihpui pawh kan lut leh hman em ang chu maw, tiin an rawna. Khawliana pawh chuan i tihdan dan ani mai e, tia lo chhang in Tlanglian lam pan tur chuan an chhuak zui ve ta nghala. Indona muala hruaitu nih tling leh huaisen Sihpui khua in Roliana an neih miau avang in, rual u zawk pawn kei hi upa zawk ka ni e an ti lo a, lal in kei hi lal ka nia ka ruahman leh duhdan in kan kal ang ati chuang hek lo. Lal fapa pawn lal fapa anihna dah ṭha in, a aia hruaitu nih tling zawk Roliana thu chu lungawi taka pawm in azawm mai ani. Hei hi hmelma te laka Sihpui khaw dinchan na thuruk chu ani, mite hmuha ropui leh thunei nih duh vanga mahni nihna chapopui tu in a nihna chapopuia, a aia remhre zawk te remhriat na arah beh chhung chuan, chu thuneihna chapopui tu chuan athuneihna ram chu tlukchhiatna kawng azawhpui mek tihna ani ang.

#Roliana te chuan Tlanglian khaw kawtchhuah pawh an hnaih ta hle mai a, Roliana bula kal Zakunga chuan arilrua athil ngaihtuah te chu upbet zo lo in, ṭhianpa, hengho hi tihian lal Rivunga hnen ah hlan in kan let leh tawp mai dawn tihna em ni.? tiin an zawt. Roliana chuan nih mai loh nak ah, engtia han tih vak ngaihna awm tawh chuang hek lo le, miin ka tlawme an tih hnu a kut han in thlak zui zel thu lah aawm siloa, tiin alo chhanga. Zakunga chuan, a..ka sawi tum tak zawk chu heng kan mi man te hi ni lo in, an lal zawk ania kan tih ni. Engtin emaw tal a suahsual man hmuhtir ve chu aphu ani lawm ni, a nunna la kher lo pawh in tlemtala zilh ve deuh chu aṭha in ka hria, alo ti ve thunga. Khawliana pawh chuan Zakunga thu chu rawnṭawm pui ve nghal in, Zakungan angaihdan asawi chhuah tak ah chuan kei pawh chu chu ka lo ngaihtuah mek leh ka duh dan chu ani, Roliana thu hnial ka hreh vang chauha sawi chhuak lo mai ka nia. Sihpui khua leh Ka pa hmusit taka ṭawngkhum tu, ka pa in tlawmzawk ah ṭanga inremna sawipui atum pawh a duhlo tu lal Rivunga hian, aphu tawka zilhna dawn ve chu aphu ani, a lo ti ve bawka. Roliana chuan a ṭhiante pahnih hnen ah damthlup hian, a khaw pasalṭha hei zah hi kan thahsak tawha, hei ngawt pawh hi aphu tawk hremna atan chuan atling tawh mai lawng maw.? Tlanglian khua hian nimina an dinhmun kha phak leh tur chuan kum tam annghah angai tawh ngei ang. Chumai ani lo, chak lo zawk leh tlawmzawk a ṭang te diriam zui chin hi a malsawm ngai lo tih hriat aṭha, tiin a hnial ve thunga. Khawliana te pahnih chuan hnial vak ngaihna hre ta hek lo le engmah sawi zui lo tawh lem lo chuan an ngawi zui ve ta a. Chutia aṭhiante pahnih in ngawih an chuh tak ah chuan Roliana chuan mahni thu ringawt kal tlang pui ṭhin chu nuam ati chiah bik lo nitur ani Khawliana tepahnih hnen ah chuan, anih leh hetihian ti ila ṭha in ti angem, "Tlanglian khaw mipui zawng zawng ka koh khawm anga, akhaw mipui te hma ah zah vanga kun tlawk tlawk tur in kan han siam dawn emi ni ang, lal meuh kut thlak chu thil tih chi anih dawn loh mai bak ah arem dawn hauh lo ania," a ti ta a.

#Zakunga chuan phur zet mai hian chu chu alawm ka duhthusam chu, kan lal hnung zuia kan kal ṭum kha tunthleng hian ka la theihnghilh thei lo, thuhnuairawlh tak a kan lal in, "keima thiamloh ani e, min ngaidam ula inrem tak in i awm ang u," ti a angen lai khan, hmusit leh elhsen tih hriat zeta Rivunga nui hmel kha ka ngaihtuah chhuah apiang in ka thin hi ala rim ṭhin asin. Tunah chuan Sihpui khua leh kan lal hmusit a vanvadak meuha nuih khum tu kha, zahna in aring pawh kun sak in a keṭhiah tuihnai lo zet melha a kun nileng ṭhak hun athleng ve ta e, tiin Zakunga hmela hlimna leh phurna lo lang chhuak chu hmuhhmaih rual ani lo. Khawliana pawh aphur hle ani tih ahmel aṭang chuan ahriat kher mai, Zakunga'n athusawi tur te a sawi zawh rual rual chuan, lal ania kut chu kan thlak lo ang. Mahse, a chapo angngawta lal ropui anih loh zia chu ahre ngei tur ani tiin, engtin nge ti i la ṭha ang tih rawt tur erawh hre chuang si lo chuan aphur em em ringawt maia ani. Chutah Khawliana bawk chuan mahse, mipui chu engtin nge i koh khawm tak ang, an pasalṭha te leh tlangval te hnungkhirh chunga khua kan luh pui lai min hmuh rual rual in, ral an lo kal e, tiin an au ngei dawna. Ral bei thei ho an chhuah bo lai alo ni bawk nen, khawdai lam pan in an tlanbo vek mai lo ang maw.? kei ni pathum leh kan tlangval sawmrual lek te hi chuan Tlanglian khua meuh chu kan hual hneh awm tawp si lo a, tiin zawt titih in athil angaihtuah te chu an sawi a. Roliana chuan, chutia an tlanbo vek i hlauh leh an khua lut lo in kawtchhuah ah kan koh khawm vek anga, kan tan pawh aawlsam zawk in hun kan khawhral tlem deuh dawn tihna ani mai alawm, tiin a lo chhanga. Khawliana chuan angaihna hriat loh hmel zet a Roliana chu ka hau chunga en in, chuti anih chuan khua ah chuan tunge va lut in mipui te chu va koh khawm ta ang, chutingawta anrawn kal khawm duh chu i ring reng reng ami.? tiin an zawt leh a. Zakunga chuan rang zeta lo chhan khalh in, lal fapa kan bula kal hi Roliana anih hi Roliana, "chutichuan kan ti anga animai" atih tawh chuan ruahmanna asiam fel diam tawh ah ngai hmiah rawh, tiin a lo hrilh thuai a. Khawliana pawh in zawh leh tur chuang hre tawh lo in, engtin tak tih tum chu nimaw tia rilru ngaihtuah zui neuh neuh chung chuan ngawi reng in akal zui ve leh ta a.

#Chunglama arsi lan dan pawh akhat ṭan in, kawlkil chhaklam ênuau dan aṭang chuan khawfing pawh in chah atum ṭan tih ahriat theiha. Roliana chuan, kar lo ah leilung rawn lang ṭan in khua avar tawh mai dawn tih hria in, Sihpui tlangval te chu an tihtur te an hrilh zung zunga. Chutah aduh ang te asawi zawh hnu chuan an miman Tlanglian pasalṭha te zinga rawlring ber tura angaih chu kai hrang in, kawtchhuah lungdawh chung ah khawlam hawia chuan an din tir te te a, tun ah i theih tawpa ringin bawhhla chham rawh le, ati ta a. Roliana, mi zaidam leh ze damthlup mai chu a zaidam angngawta palzam leh athu hnial chi ani lo tih hai hek lo le, engvanga chutia tih tir nge anih tih pawh zawt lem lo chuan khawchhung mi te hriat theih ngei tura ring in chu pasalṭha chuan bawhhla chu a chham ta vang vang maia. Bawhhla achham zawh rual chiah chuan, Sihpui pasalṭha te chuan silairi inphaman tawk vel tur chuan vanlam hawi in an silai te chu an lo kap puak ve thunga.

#Chutah khua pawh rawn eng ve ṭan nghal in, Khua arawn ên tak ah chuan Roliana hrilh lawk ang in Sihpui tlangval ho chuan, an meichher ken te chu ti mit in kawngkam hnimbuk kar ah chuan an silai ken nen chuan an lut bo ta nghala. Roliana chuan an mi man te hnen ah chuan zaidam aw zet hian, tunah hian inkhaw mipui te chu kawtchhuah lam pan hian anrawn tlan mek in ka ring. Kawhmawh bawlzawng leh luhlul chhuah zawnga in chet loh hram ka beisei, kei hi Roliana ka nih angin min hmachhawn tu te min hmachhawn dan azir zela che ṭhin ka ni tih hria ula. Dam in la thlahlel anih chuan helai hmun ah hian ngawireng in ṭhu ang che u, mipui te zing ah tu pawh min bei zawnga chet thawh tum anawm phawt chuan, Sihpui tlangval ten tiangu tia min ngen ka khap daih tak kha thar thawh leh in, in khua hi ka halfai vek dawn tih hria ang che u, chet thawhtum an awm phawt chuan khap daih in lo tum tur ani ang, tiin ahrilh ta a. Roliana aw chhuak chu zaidam in a awki sang lo mahse, Tlanglian pasalṭha te chuan palzam mai mai chi ani lo tih an hre chiang khawp mai. Tlanglian pasalṭha te hian tun hi Roliana an vawikhat hmuhna ani reng reng lo, eng mihring nge aniha, engtiang taka huaisen leh hlauhawm nge tih hre tur in Roliana hi an hmu hnem in achanchin an hre hnem tawk viau tawh ani.

#Roliana rin leh beisei chu a sual lo chiang kher mai, Tlanglian khaw in tin te chu an khaw chuanhnuaia silai ri dum dum an hriat aṭang khan tho chhuak in mei an nuna, mut leh zai pawh rel lo in anpasalṭha ten engtik ah nge kawtchhuah ah bawhhla an rawn chham anga, silai an lawn ang tih ngaichang in an lo nghak ṭhap tawha. An nula te lah chuan an pasalṭha te leh an lawmpa te ban atan arkeziak an lo buatsaih rawl nen. Lal Rivunga leh a upa te pawh lal In chhuatlai ah zubel hung in, Sihpui khua leh lal Sairuma an hmuhsit na thu fahrah te te hmang chuan zan an lo tumtawi ve mek bawk a. Ralkhata silai puak ri dum dum an hriat tak ah phei chuan Lal Rivunga chu a uang kher mai le, kan pasalṭha te hnen ah khan a chithlah tur pahnih khat tal chu zuah ang che u ka lo tita loa âw, Sihpui khua chuan chithlah tu tur an nei tawhlo mai ang tih ka van hlau tak em tiin, anui khi vun vun reng maia, a upa te ho lah chuan hapui tawp lang dawn dawn a lo nuih pui in an ṭhenṭhu reng mai bawka, Sihpuikhua hmuhsit nan leh diriam nan hun rei an nei tawh lo tih reng an dawn phak lo. Lal Rivunga leh a upa te mai ni lo, Tlanglian khaw mipui te hian an pasalṭha te atlawmzawka an ṭan chu an ring lo mai ni lo in, thil thleng thei ah an ngai lo tawp mai ani, engkim hre sa a Sihpui pasalṭha te bei tur an nih miaua avang in hetiang rilru an lo pu pawh hi an thiamawm ve tho mai. Mahse, khawfing chat chuan an beisei na te chu chah pui in zingkhaw êng chuan an hlimna derdep zet chu a um ṭiau sak tawh dawn si, Tlanglian khua te hian ngaihtuah kim loh an nei ani, an hmuhsit em em Sihpui khua in Roliana an nei ani tih hi.

#Diriamna leh ṭawng chhe tinreng an phuh chhuahna dangro hnawn tur a, lal leh upa te zubel inbirh chhawk zut pawh pasalṭha Lianirha bawhla chham thawm leh silai lawn ri an hriat meuh chuan, an zubel kawihbuk tawn sek ang mai chuan an mahni zawk chu an bu luk luk tawh maia. Pasalṭha bawhhlachham thawm areh rual deuhthawa tlangaupa rawn lut pawh chuan, awki hniam leh zaidawh taka lo chhawn na awka adawng ta lo tawp mai. Awki sang leh chang fekfawk hian lal Rivunga chuan, "tlangaupa i varawn tek lut har ve, Rappuichungsanga ka zubel lianber khi chawithla la, fenthlir nen kawtchhuah lam pan in tlanliam nghal rawh," tiin alo hrilh nghala. Zu bel pu bawr luk chunga tlangaupa a tlanliam hnu chuan, lal leh a upa te rui phur pawh lal in ah chuan tawm reng thei hek lo le, kawtchhuah lam pan chuan an tlanliam zui ve ta nghal a.

#Tlanglian khaw mipui te tan bawhhla chham ri lah chu rinhlelh rual loha chiang an pasalṭha Lianirha aw ngei mai ani miau si ale, khawfing a chaha leilung alan rual chuan tuium leh zu bel nen kawtchhuah lam pan chuan phur fahran mai hian an tlan khawm ta dur dur maia. Mahse, an phur ang ngawt ani ta awzawng lo mai, kawtchhuah a an thil va hmuh chuan a barakhaih chiang in, an phur na leh thatho na te chu vawilehkhata vawmbo ang hlauh ani ta. Mohruai tur ang maia an hlim hmel te lah chu mitthi sun zo hlim ang chauh hi an ni tawha, an tan sawi leh tur chuang awm tawh hek lo le, kawt chhuah ah chuan engthil nge thleng tih leh enginnge lo hmuak dawn tih hre lek lo a kawtchhuah lam rawn pan ve mek an lal Rivunga leh a upa te chu an lo thlir ngawi ṭhuap ringawt mai ani.

#Chutah, lal thuam famkim nen meuha in thuam lal Rivunga'n a pasalṭha sawmhnih zet mai an kut hnungkhirh chunga kawtchhuaha lo ṭhu leh anmahni lo dinchilh tu Roliana te pathum an hmu thut chu le, mengbial kawk kawk chung chuan a ahwi phawk nasa ta maia. Ahmel ah chuan thinrimna in nge hmun chang hnem zawka, mak tihna in tih pawh hriatthiam har tak ani. Chutah le thinrim engphiara Roliana te chu ankhum in, Sihpui khua leh lal Sairuma hming lam tel meuha anchhia lawh pah chuan, nangni hi ka chhuah hauh lo ang che u, ati ta khur khur mai a. Roliana lah chuan ngaih pawhmawh loh hmel zet hian, chu nang Tlanglian lal Rivunga hian kei ni hi min chhuah kher kan ngai tihna alo ni maw ? Hei, han en la, chhuah ngaizawk chu i pasalṭha te hi an va nih hmel si ve ! Tlanglian lal i nih ang in heng zawng zawng chunga mawhphur tu hi i ni a, kan lal Sairuma leh Sihpui khaw chunga i anchhe lawhna zawng zawng ah khan, tunah hian ngaihdam i dil nghal lo anih chuan heng i pasalṭha te hian an lu tel lo in Tlanglian khua an lut ang. Tin, he lai hmuna awm reng tur hian hun ka nei rei lo tih hria la, i pasalṭha te nunna hi hlut nachang te i hre ve anih ngai chuan ka sawi ang chuan ti vat la aṭhat ka ring tih pah chuan, a mah hnaihber tu an miman chhipsama ṭhama kawihkun leh a nghawnga chempui chuktuah chu arual ta nghal a. Chuti taka thamlo tu leh zahlo taka ṭawngkhum tu lal Rivunga'n an tawng ta chu thinrim luat vangin a hmai te chu asen ṭawn ṭawn maia. Mipui ho lah chuan an pasalṭha te chu Roliana chuan a that duh tak tak mai ang tih hlau in mangang zet hian an lo ṭe tuarh tuarh mai bawk a. Roliana lah chuan thip zeta lal Rivunga melh in, " aw le, i pasalṭha te nunna hi i lo hlut vak lo ni in alanga, an lal mah in chutia an nunna hi i hlut sak si loh chuan, kei ni tan pawh ṭangkaina an neih awm ka hre bik lo e," tih pah chuan a chempui chu alek kang ta uaih maia.

#Mipui mangang ṭe tuarh tuarh kar aṭang chuan patling ṭhankinzet tawh pakhat hi chempui hum chunga rawn pen chhuak in, khawnge Tlanglian khua leh lal meuh thamlo taka ṭawngkhum tu chu. Hei, mipa kan la awm ve alawm kei mah hian kan hmachhawn teh ang che, tiin Roliana chu arawn pan phei nghala. Mahse, Roliana te awmna athlen hman hma chuan, bawhhla chhamtu an khaw pasalṭha Lianirha chu kut hnungkhirh chunga rawn zuangtho ve nghal in Roliana te rawn beih tum tu chu alo dang thuaia. Chupa lah chuan thinrim zeta Lianirha chu en in, "Lianirh, thih i duh anih loh chuan lo kiang rawh, he mihring chapo zet hi kan that ange," tiin thinrim fe mai chuan amelh run maia. Hlauthawng tih hriat zet in Lianirha chuan, pu Kapluai, i tan insum aṭhat zawk ka ring, i hma a dinghi Roliana ani tlat mai alo ti ve thunga. Pu Kapluaia lah chuan Lianirh, kei hi thurawn i pek rual em ka nih. He mihring hi Roliana ani emaw nilo emaw ka hlau themte hlei nem. Entache, nunau thlabara an awm hi hmuh nuam i ti em ni lo kiang teh, tiin pu Kapluaia chuan Lianirha chu namsawn mai ahan tuma.

#Mahse, Lianirha chuan lo dang lui in, pu Kapluai ngaithla teh, tuna heng nunau thlabar hmel hi nge thlir hreawma i rin, i in ban kangbang mut khuvung vung lai leh nunau rilṭama an ṭap lai thlir ? Tunah hian Sihpui pasalṭha ten min hual in, hmuntin aṭang hian silaiin min tin reng tih hre ta che, a ti ta a. Lianirha thusawi chuan pu Kapluaia mai ni lo, lal Rivunga leh a khaw mipui te chu ati phu chiang in hlauhna in anthau ah amana an khur chhe lo chauh hi ani tawh maia. Pu Kapluaia lah in luhlul chhuahngam tawh bik hek suh, sawi leh chuan tur pawh hre lo chuan adinna ngai ah adingzum reng tawh maia, chutia ading ngawi reng lai chu Roliana chuan rawn vau zui leh hram in, " ka pu upa zawk i nih na ka zah viau mai a, mahse, i laka ṭawngkam hawihhawm hmang thei lo tura min nawr luih tak si ah chuan hei hi kan hrilh ang che. Tunah hian ka duhkhawp ral lu hawn tur ka neih tawh avang in adang hawn belh kher hi ṭul ka ti lem lo tih hria la. Mahse, ka nu in ka iptepui hi Sakhipachal pawh leng ngei tura min ṭhuisak anih avang in, i lu tiat lek lek kha chu hnawh lut tur in he ka ipte pui ah hian hmun awl a la tam tih hria ang che. Chutiang anga tih kher chu ṭul ka tih loh ang bawka ṭul i ti lo ve anih chuan, tunah khan i dinna ngai ah let leh la aṭhat ka ring, " tiin ahrilh zui nghal a.

#Roliana bawk chuan lal Rivunga hnen ah chuan, duh aiin hun kan khawhral hnem ta in ka hria, ka sawi ang chuan i ti dawn nge kei hian ka tihtur ka tih tawh zawk dawn, tiin an vau nawn leh a. Chutah zet chuan Rivunga tan duhthlan tur dang awm chuang ta hek lo le, a khaw mipui te hma ah chuan zah vanga sen awp awp chung leh hreh zet chung chuan " keima thiam loh liau liau ani e, Sihpui khua leh in lal hnenah ngaihdam ka dil e," ati ta a, a aw chhuak ah chuan phur hmel hmuh tur a awm lo chiang kher mai. Chu thumal kher kher sawi chu lal Rivunga te ang lal ropui leh thil titheia in ngai, chapo em em bawksi tan chuan thih tluk zeta sawi chak awm loh thil ani ngei ang le, mahse, sawilo theilo dinhmun ah Roliana chuan a dintir miau si. Tichuan le, "Lal Rivunga, Sihpuikhua hmusita vanlam hawi meuha nuih khum tu chu, a tan khaweng leh a khaw mipui te hmel hmuh ringawt pawh thil zahthlak an chan zawh tak si avang in a ke zungpui tin, Sephung kawr anga pumṭhu mai melh chunga a dinkun tlawk tlawk hun chu atawng ve ta ani."

#Chutia an tum ber an hlawhtlin tak ah chuan Zakunga leh Khawliana chuan an mi man te kut an phuarna chu zaichah sak in chulaihmun chhuahsan tur chuan an in buatsaih ta nghala. Chutah Roliana chu rawn ṭawngchhuak leh in, " lal Rivung hei hi hre reng ang che, tunah hian lal i nihna ka zah vang chauha chhuah che ka ni tih hria la, a hnu leh a awm anih ngai chuan lal i nihna hi ka hre lo der ve tawh ang. Tin, hei hi ka hre reng tih nang leh i khua te hian lo hre bawk ang che u, Tlanglian khua hian ka thi tur chalchang lai leh ka thisen lei a luangral lai hmu chak a, ka nghawng tan tura rip chhunga min khung lai kha ka theihnghilh ngai lo tih hi. Nangni hian heihi min hriat pui em, khatih lai khan sala min mantu te kut aṭanga tlan chhuak in, ngawpui durkhup leh sahrang hlauhawm tak tak kar ah nitam ka vakvai a, khawvawt laka in tuamlumna tur leh ruahsur laka invenna tur neih engmah ka nei lo. Zan alo thlen in puk leh thingzar te bel in khawvar hun ka nghak ṭhin a, khua alo var in ngawkara vahvaih bawk ka hmabak leh ṭhin. Khatihlai khan chhungte tia sawi tur leh khua tia sawitur pawh ka nei hek lo, ka neih chhun chu kan khua min hal sak tu ten sala an hruailiam tak ka nau hmeichhe naupang te chiah kha ani. Tichuan manganna leh beidawnna vawrtawp in ka thinlunga bu an khuar mek lai in, in pasalṭha te ramvak thawm kha ka hre ta a, ka thinlunga beidawn na te chu vawilehkhata lak kiana awm in,thatho leh phur em em in in pasalṭha te thawm rawnchhuah na lam pan chuan ka tlan ta a, an awmna ka thlenhma rei lo te chhung kha chu ka hlim in ka phur teh asin. Mahse, ka hlimna chuan adaihrei ta lo, anni chuan Sihpui pasalṭha, sahliam um lai beihrawna an that lai ka lo hmuh avanga hmelma en a min en in, he Tlanglian khua ah hian mipui hmuh laia thah atan tiin min rawn hnuk lut ta anih kha. Chutihlai chuan lal leh a upa te hma ah ka thusawi chu dawt ah puh ni in, thi tura min duh tu, ka nu that tu leh mahni khua phatsana hmeichhia leh naupang pawisawi lo tam tak thihna thlen tura mahni khua hal darh tir tu dawt thu phuahchawp chu thudik ah an pawm ta zawka. Tichuan ka nghawng tan tur a ro min relsak in bawmchhung ah min khung ta anih kha. Nangni midangte lainatna tlachham khua hian hei hi hre rawh u, khaw in halsak rapthlak zia leh naupang mangang te ṭap thawp ngaihthlak hreawm zia hre tu leh lo tuar tawh tu kanih vang chauh in, vawinni hian inkhua hi ka hal sak lo ang che u. Mahse, Sihpui khaw bei tura in lal in mi arawn tir leh anih ngai chuan, Nu ho khan in fate hruai in he khua hi in lo tlanchhuah san thuai dawn nia," a ti ta a.

#Roliana thusawi ngaithla tu Tlanglian mipui te rilru chu mak tihna leh amah lainatna in akhat ta ani bera, a mah an hlauh vanga kimki chawihchawiha lo thlir tu te mit ah chuan lainatna mittui chu lo luangchhuak ve thung in, nu leh nula ho chuan an mittui te chu an lo hru fap fap hlawm a, an hmelma hlauhawm bera an ngaih chu hlauh en in an en thei tawh hek lo. Ṭhenkhat lah chuan, kha tleirawl kan pasalṭha panga zet hmaivung bura sawisa tu leh thah tura bawmchhunga kan khung tak kha amah Roliana hi maw lo ni a, a va han pawi em ! a thusawi te kha awih in ṭhatak in khua ah khan lo awm tir hle hle i la chuan, khawikhua te tan maha cho rual loh kan ni mai tur, an ti vawng vawng maia. Mahse, Tlanglian mipuite chuan duhthu chu duhai in an sam tlai ta deuh ani e, Roliana kal liam tur lainatbleh uitaka thlirliam chu an tihtheih tawk ani ta.

#Sihpui khaw pasalṭha leh tlangval te chuan kawngkama tumbu khaileng te chu pawt thla in, ṭamhnem atan tlanpah te chuan an keih bawrh bawrh maia. Chawlh khawmuan pawh nei lo a an tlan ṭauh ṭauh hnu leh hnung lama zui tu tlangval ṭhenkhat in, kan Roliana hian chauh te hi ahre ve lo tihna emaw ni le, tia Roliana mak an tih zia an sawi mawlh mawlh hnu chuan Sihpui khawdai chu thleng ve hram in, khua pawh chu athim ruai tawha. Khawdai vela an khaw pasalṭha te leh Tlanglian pasalṭha te in beihna hnuhma te chu khawthim chhulh hnuai ah chuan thlir thuak thuak in khawchhung chu an lut ve ta a.

#An pasalṭha te rammu an zavai maia him taka an rawn kir leh thei mai chu Sihpui khawtlang mak tih atlinga, khawchhung inbeihna lam ah nunna chan tawk awm mahse, Tlanglian khaw tlawmtu zawk an nih avang chuan Sihpui khawtlang lawmna chu nasatak ani tho mai. Tin, Tlanglian pasalṭha te awlsam taka bum tu Roliana fin na leh remhriat na chu mitin mai chuan titi ber ah nei in, Roliana fakna chu akhaw khah in akhat tak meuh meuha. An tlangval te ho lah chuan Roliana ho a ral beih tur anih dawn phawt chuan khawikhua pawh ni in, enganga hlauhawm pawh ni se hlauh chu sawi loh an zuam em em vek tawh mai ani. Tin, lal Sairuma pawh alawm thlungang nitur ani, vaibel pak khuk tual tual paha Tlanglian pasalṭha te lu a kawt zawl thingdawh chunga intlar bung mai chu thlir in, " tunah zet chuan, ansawi lal Rivung meuh pawh Sihpui pasalṭha te thinur tuar lo in, a lalin ropui zet chhung ah rilru kawrawng zeta ṭhu in a in sawh a insawh ngei ang le. Lal Rivung, ṭhate te a remthu sawipui ka tum lai che khan ka thusawi kha ngaithla duh ni la, heng i pasalṭha te lu hian ka kawtlai an mawi kher hi aṭul lo tur. Mahse, i chapo na leh mi hnuaichhiah i chin na chu nang leh i khua te hian in tuar ta anih hi, " tiin a pasalṭha te chhuang tak chung leh lal Rivunga diriam zet chung chuan ahawi valh valh mai ani.

#Mahse, chutia Sihpui khaw mipuite lawm avanga an rik hulh hulh lai chuan, Roliana erawh athu hriat chuan ati thinrim in, thildang reng reng arilru ah chuan aluat thei tawh lo. Sihpui khua aṭanga hnawhchhuah anih ṭuma let leh tura thlem tu leh engpawh i chungah thleng se i lam ah kan ṭang tlat ang ti tu valupa pu Hrangkaia chu, tlanglian khua te nen an in beihna ah vanduai zing ah ṭang in tlangval pakhat nen hmelma ten an lu an lo lak sak daih mai chu ni in, Roliana chuan vanduai zingah lo ṭanga lo thi ringawt chu nise ahre thiam deuh ngei ang. Mahse, a lu laksaka an lo hawn bo kher chu a ngaihdan ani lo in athin arim em em mai ani. Khatihhun laia Roliana Sihpui khuaa hruai kir leh tu te kha valupa pahnih pu Dokhuma leh tuna hmelma ten alu an laksak tak pu Hrangkaia te hi an nia. Amah pu Hrangkaia hi tlema upat lama nupui nei chauh anih avang in, tlaikhawhnu ah chhangchhiat berh in ananga, lo lam hnathawh ah a pahmei bawk nen Roliana leh pu Dokhuma te in kawp chho ta zel pawh aduhangin atelpui hman ta lo ani. Chungchu thilawmdan nimahse Roliana rilru ah chuan adanglam chuanglo a, Sihpuikhua a let leh tura an sawm laia atana a inhuam zia kha Roliana tan theihnghilh rual ani lo.

#Zawlbuka pu Dokhuma leh aṭhian te pahnih Roliana leh Zakunga te damtaka an han in hmukhawm leh chu an hlim hle maia, Zakunga chuan midangin asawitur ṭha zawng zawng an sawikhalh zo palh ang tih hlau niawm hrim hian Tlanglian pasalṭha te nen an in beih dan chu sawi in, Roliana fin an chelh loh vanga awlsam zeta an tuk zal dan te leh lal Rivunga a khaw mipui te hmaa zaktak a Roliana'n a siam dan te chu phur zet mai hian pu Dokhuma chu ahrilh mawlh mawlh maia. Pu Dokhuma lah chuan, Rolian khaw venghim tura mi tam zawk hnutchhiah nachang i lo hre kher kher kha chu a vanneihthlak tak zet zet mai, rinphak baka tam an rawn thawkchhuak teh reng a. Tlema tlem ah khua kan chan lo chauh chu ani mai e a, a bei hmasa tu zawk leh an inrin hma nang ching tu zawk ah kan ṭang mai pawha, chuti chu ni lo se mihring pawh kan inhlauh hnem hle ta ve ang. An ni lah khan khaw venghim tham mihring kan awm an ring lo ani tehchek anga, han fimkhur ve deuh eih pawh an nei hek lo, kan silai vawikhat han hmehpuah mai ah pawh an zinga azat ve ṭhelh anniang chu vawilehkhat ah an hlawm tawl taal maia. Keini tan lah silaimu thun leh na hun hman awm tawh bik hek suh, an talbuailai chu remchang ah hmanga bawhzui in chemsen nen kan han sam tak tak mai ale, Tlanglian pasalṭha huaisen in ti te chu an ṭe rawng rawng mai asin, tiin khawlama an chet dan chu phurzet mai chuan an sawi be a.

#Chutia mahni vei zawng zawng leh phur zawng zawng an sawi tak ah chuan Roliana pawh rawn ṭawngchhuak ve in, pu Do, kei chu thildang reng in ka rilru aluah thei lo. Kan valupa pu Hrangkaia lu la tu te chu ka umzui ngei dawn ani, ani leh kan tlangval pakhat lu la tu te niawma an sawi te kha Tlanglian khaw pasalṭha te zing ah ka hmuh ngai awm pawh ka hre lo ti tawk an awm nual avang in kei chuan Hmunzawl lam aṭanga pasalṭha Hauṭhuama hnung raanzui tu te an nih ngei ka ringa. Naktukzing khua lo var teh se, an khaw thleng rawk in ania ka um dawn ni ati chheu chheu maia. Pu Dokhuma chuan rangtaka lo chhang in, ngawiteh Rolian hah te pawh i hah ve em em bawk lawm ni, mihring te hian chawlhhahdam kan mamawh ve bawk tih hriat tur ania, tiin alo khapa. Roliana lah chuan ni e, chawlhhun a awma thawhhun pawh a awm, a thawhhun laia kan chawlh veng veng si chuan Roliana pawh a Roliana thei si nang, bakah kei ni ang ṭhalai te hi chu ṭhangkhat tui taka kan mut te chuan hah adam hman vek alawm, alo ti sam eta.

#Ngawiteh Rolian naktuk i tan vahchhuah arem loh na tur a awm tak e a, lal in milu lam tur atih tak kha maw le, tiin pu Dokhuna lah beidawng duh bik hek suh. Mahse, Roliana chuan pu Do, kei hian thil zawng zawng ka fawmkem thei bik nemmaw, tharum thawh lamah kei in ṭan ka lo la anga, lam tih vel chu midang kut ah dah ve tawh i la aṭha ange. Lal hnen a min phatsak tu tur hmuipui pu kan nei bawk che a, lal lungawina tawk chu i sawi leh thei mai in ka ring, an ti leh hram a. Chhan vak ngaihna ahriat tak loh ah chuan, a ṭha e, i lak ah hi chuan hmuipuipu zawk pawh kan dang zel mai zawng anih hi. Engpawh nise, i lak ah chuan lal meuh pawh athinrim phal bik tawp nang, tih pah chuan Zakunga hi hruai ve la aṭha ang, pu Dokhuma chuan an tih zawm nghala. Zakunga chuan rang zeta Roliana chu lo chhan khalh in, Sihpui Sechal hian amei tel lo in khua achhuahsan ngawt thei lo ang, a lo ti ve nghal zat a. Tichuan engemaw chen Hmunzawl khaw chanchin leh a pan na kawng te pu Dokhuma'n a hrilh leh hnu chuan mutzai an rel ve ta a.

#Roliana te ṭhiandun hnuchhui pawh in mual an vet liam hnem thawkhat viau tawh maia, a hmasazawka kal Roliana tan lah an hnuchhuinlai chu hnuchhui harsa lo tak mai ni in ngawhnuai lei dura an ke rahna thla lang te chu, Roliana te ang hnuchhui thiam lutuk chuan tlan pah pawn a chhui thei hial ang tih tur hi ani a. An hnim pal tluk leh Sadaiek rah pherh aṭang te chuan an kalna lam chu a chhui zung zung mai ani. Chaw fak hun te alo nih a Ni avanlaizawl meuh chuan, Tlanglian khua nena an in rina luipui kan in, Tlanglian khua aṭanga chhim thlanglam hret ngaw dur khup chhung ah chuan an vak lut hman der tawha. Roliana chuan ahnunga um ṭauh ṭauh tu Zakunga hnen ah chuan, ṭhianpa ka hnuk chau viau lo che maw, thawk han lak zawk te i duh em ? tiin an zawta. Zakunga chuan nui var var chunga lo chhang in, kaih em ka la ngai lo chu ania lawm ṭhianpa, i theih ang tawka hmanhmawh khan han kal zel phawt mai teh, tiin alo chhanga. Roliana pawh chuan nuih suk suk pah hian, chutia kaih em i la ngaih loh chuan hahkhat chu i han kal leh phawt ang hmiang, kawrte tui awmna kan thlen hun hun ah chaw kan fak dawn nia, tia hrilh in hmalam pan chuan akal zui leh ta a.

#Chawfak chhung reilote an chawlh bak chawlh khawmuan pawh neiloa an kal nilen ṭhak hnu chuan Tlanglian khaw ram chin pawh an pel fel hman der a, Hmunzawl khaw ram an thlenna tura daidang tu chu Lusei lal Ralbilha khaw ram chauh chu ani ta. An mi um te lah hian an hnu hi thup vak ngai an ti lo nge, hmanhmawh phelenga an tlanchhiat vang tih hriat ni lo mahse, Roliana te ṭhiandun tan erawh vanneihna an hnutchhiah hi ani ngawta. Han muangchan phah na chhan tur khawpa hnuchhui harsa lai Roliana te hian an hnutchhiah tlat lo ani. Chutia khua te tlailam alo niha, khawthim te alo hnaih tak ah chuan riahna hmun tur ṭhalai deuh, kawrte tui awmna bul ah chuan an in nghat ta a. An in nghah fel a an dangro zual hnawn tura tui te an in leh hnu chuan, "Zakung, tah hian mei lo nun la, zanriah hmeh atan Vahrit ramtla man tur ka va zawng ange," tiin Roliana chuan Zakunga chu an hrilha. Zakunga pawh chuan, nia maw le va kal chhuak tak teh i rawn man ṭeuh dawn nia tiin alo fiamthu ve hluta.

#Roliana chuan rawhung ahmuh ve leh chuan thawmchhuah tam lo thei ang ber tura sat in, chu araw sah hmang chuan phuahchawp deuh tak hian thal a han siam a. Thil han tih pui nan tak taka hmantlak chu ni lem lo mahse, a hmun leh ram in azir a Ramar leh Vahrit chu chulai ram ah chuan an lo tam nasa mai chu ni in. Roliana pawh chuan harsa lo tak hian Vahrit pahnih chu a kap thlu ve mai bawka, ti chuan Zakunga awmna lam ah chuan alet leh ta nghal a.


#Chutia arin loh tak leh fiamthu mai mai emaw atih laia Roliana'n awlsam te maia Vahrit pahnih ngawt mai arawn ak haw chu Zakunga chuan mak ati in a lawm khawp maia, Rolian, i fiamthu mai mai emaw tih laia engtin nge maw i va man theih mai le ? ti a zawh pah in Zakunga bawk chuan, tihian apahnih hian kan hemhmin anga naktuk lam chawhmeh tur kan nei nghal tihna ani mai, tiin phur zet chuan an hmul te chu apawt nghal sawk sawka. Roliana chuan, Zakunga zawhna chhang ni pah fawm han fiam zui in, Zakung kei hian ka ti ang ka tih tawh chu ka ti ngei ngei ṭhin tih i hriat kha. Kutlawnga han man em chu, "em em a " min ti ang tih ka hlau deuh sia. He rawchang hi thalfang tiat leka suih zum in, Vahrit rual ramtla zinga athau tur deuh thlang in ka va chhun tlu hmiah hmiah mai alawm ahan tih khuma, Zakunga Vahrit hmul pawt lai pawh za lo zet chuan aṭhen ve suk suka. Chutah Roliana chuan thutak deuh zawk hian, Zakung zanin chu kan chhaka Hmawng kung ah khian kan riah angaih hmel riau in ka hria, a zar awmna lai khi aṭawi ṭha bawka hahdam tak chuan amut theih mai ka ring. kan hma lawk ah sawn Keipui pahnih hnu ningei tur ka hmu tlat mai, kan mi um lai te hi min lo tlakkhalh hman anih te ka ring deuh rum rum maia. Mahse, fimkhur thuhla ah zanin chu thingzara riah mai afinthlak in ka ring, tiin a Keipui hnu va hmuh thu chu ahrilh ta a.

#Roliana te pahnih in Vahrit sa hemhmin leh an chawfun te puar eleuha an ei hnu chuan, Roliana sawi angin Hmawngzara riah chu an tum ta a. Chutah Roliana chuan, hrui kha chhat duham deuh rawh, i mang a chhe ve thei ṭhin si a i inphuar beh deuh angi in ka ring. Chuti ni lo a, zanlai ah hmawng zar aṭanga i tlak zawng in ka rawn chhar peih dawn miah lo che ania, ti a fiam in. Kei hi chu thingzara riak ṭhang ngang kha ka nia, ka muthilh tui deuh pawh in ka tla ve ngai hauh lo zu nia, atih zawm nghal zat a.

#Zakunga'n aduhkhawp hrui achhah zawh hnu chuan Hmawngkunga ah lawn kai nghal in, a kakpui an thlen hnu chuan thingbuk a hnah leh zar te zual an thel fai hreubum chu an lawnna hnu Hmawngkung ah chuan aletling zawnga phuar bet in, ngaihṭha tak chung chuan titi khawchang te sawi in an ṭhu dun ta a. Chutah Roliana chuan aw zangkhai vah hian, "Zakung, tun ah chuan Tlanglian khua ber che theilo in kan siam ta bawka, ka lo nghah hlelh em em ṭhin ka naute chhan chhuak tura ka kal ahun ve ta ni in ka hria. Tuna kan thil tih lai hi han zo fel i la, buh seng a lo hun chho leh chiah bawk anga, buh te kan seng zawha pawl kan tlak fel rual rual in, khawchhak lam Phungpui ho tihṭhaiha ka Nu phupa la tur leh ka naute chhanchhuak tur in ka liam chho ve nghal ang, tiin Zakunga chu an hrilha. Zakunga pawh chuan phur fe mai hian, chu hun chu alawm kei pawh in ka lo nghahhlelh em em ṭhin chu, a hun te lo thleng se la i rual in ka kal ve ngei ang. Rolian, hei hi hre reng rawh, i ruala ka kal ve lohna tur in chhuanlam engmah siam suh ang che, a lo ti ve thunga.

#Roliana chuan chutimaia awlsam in aṭhian Zakunga hian phatsan atum dawn lo tih chu ahre chiang khawp mai. Mahse, chhungkaw enkawltu leh chawm tu, anau te lah ama thlazar hnuaia la teihawi kual vel mai mai rual lek an nih chu Roliana chuan hre reng in, Zakung...ka tan chuan i nunna hial pawh i hlan ngam ang tih ka hria, mahss, nguntaka ngaihtuahngai thil aawm ni in ka hria a. Engtianga rei nge hun kahman dawna ka thang dawn tih sawilawk theih ani lo, ngaw chhah tak tak leh ruam thum tak tak te paltlang angai a, kawnglak ah ringawt pawh hun tam fe khawhral angai dawn ani. Chuvang chuan, chhung te enkawl tu ber ka i kal bo ve daih zawng in, i nu leh i unau te an khua ahar lutuk anga sin. Bakah ka awm loh chhung in ka chhungte lo chhawmdawl tur in nanglo chu rinngam ka nei dawn lo a, ngaihngam taka chhungte ka kalsan theih nan nang hi chu khua ah i lo awm angai ani, tiin Zakunga chu an hniala. Roliana thusawi chu Zakunga pawh chuan dik ati kher mai, chutih rual in Roliana chu han hnial vak dawn pawh ni se, ahnial pui tur chu ahre chiang in engti kawng mah in ahnial hneh dawn chuang lo tih chu hre chiang em em ani. Chutah a rilru ngaihtuah in, "ṭhianpa i sawi chu a dik teh meuh mai, mahse, ka tana i thil lo tih tawh te avang pawh hian, Ralrama mahnia kal tir che hi ka chhia leh ṭha hriat na hian a pawmpui thei chuang lo ang. Engtiang pawh in min dan tum mahla ka zui tho tho ang che," tiin angaihtuah na chu asiam fel ta a. Chutah Zakunga bawk chuan, ṭhianpa tun ah chuan ka hnial peih hrih lo che, kan chhungte lo chhawmdawl tur chuan pu Dokhuma a awm alawm, chumai ni lo in Sihpuikhua hian i zar ah ṭanpui ngai te ṭanpuia, chhawmdawl ngai te chhawmdawl nachang kan hre tawha, chuvang chuan ngaihṭhat loh na tur a awm lo. Engpawh sawi la ka ngaithla dawn tawh hrih lo ka zui tho tho dawn che, chu chu thutawp ani mai e, ati ta ngawta.

#Roliana pawh chuan han sawi leh zel chu a chak vak bik lo nitur ani, thudang ah pak kai in a nau Rochami leh Chhingpuii a hmuh chak tawh zia thu te. An unau tana Chhingpuii hlut zia leh tleirawl tituai apu chhoh ṭan hmelṭha atih zia thu te chu sawi in, tleirawl an hre ve dawn ṭan mek tih ah hmelma ten sala an hruai tak thu te leh a tleirawl lai hmel pu reng chunga aṭhang lian chho zel anih ngai chuan hmel zahpui awm loh tak pu anih ngei arin thu te chu sawi kai ta zel a. Chutah Zakunga chuan athu sawi lai chu lo pawtchat in chuvang chu ani maw ṭhianpa, vawikhat pu Dokhuma ho a kan in hnial fiam laia, Nupui atan chuan khualkai khawpa hmelṭha mai nilo, tuipuiral kai khawpa hmel ṭha leh lal fapa te meuh pawh ina an hel rawn luai luai khawpa hmel ṭha ka la nei ang i tih chhan kha, i fiamthu mai mai emaw ka lo tia fiamthu chhan ṭhadeuh i lo nei reng tihna ani maw, tiin an zawt a. Roliana chuan ngawiteh ṭhianpa, khatihlai kha chuan fiamthua sawi mai mai zawng ka nia lawm. Mahse, mak deuh mai chu kha thu ka sawi zawh rual khan ka mitthla ah hian Chhingpuii arawn lang teh tlat anih chu mawle. Ṭhianpa, a hmel i hmuh ve hun ah chuan, lal fanu mitmei pawh hre thiam lo anga min ngaihna hi, enge a chhan i hre thiam tawh ngei ang, ati ta a.

#Chutia Roliana te ṭhiandun an ti ti mawlh mawlh lai chuan, an piah ral maia thing leh mau tlu ri rum rum thawm chuan hria in thawm lo chhuahna lam hawi chuan an ṭhu ngawi dun ta kar maia. Chutah thing leh mau tlu ri ruah ruah kar ah chuan hawhaw thawm te pawh hre tel zel in, an lam ber hriattur awm si lo a in au lawng lawng thawm te pawh chu an hre tel ta nuk maia. Thawk han lak deuh huai pah hian Roliana chuan, chu ngei chu anih chu ka pu in Ramhuai lo vat thawm tia asawi ṭhin kha, an ṭhahnem hmel der der hle mai a. Hetianga thing leh mau an kihtluk chiam pawh hian khawen ah va en i la engmah thing leh mau tlu a awm ngai lo e, an tia lawm tiin Zakunga chu an hrilha. Zakunga pawh chuan ani tak anga, an han ṭang hmel em em mai lehnghala an zingah tel ve ta i la anuam phian lawng maw, ral ami te pawh an in au ve nasa anih awm chu, alo ti ve bawka. Roliana chuan, Zakung titeh thawh kan hai palh ange, zan lama thawk chi chuan lo thawk mai mai sela, a thawk lo chi ho lo mu hahdam ve thung i la ani mai e, atih tak hnu chuan Ramhuai lo vat thawm ngaithla pah chuan muthilh zai an rel ta a.

#Zingkhua alo vara chawhnu tlangher zet an mi um te hnu an chhui leh tak ah chuan Roliana te pahnih pawh in Hmunzawl ram chin an dailut ṭan ta der maia, Roliana chu afimkhur zual in Keipui pahnih hnulian zet in an hnuchhui lai an lo tlak khalh tak ah phei chuan a mit mai ni lo, abeng te chu a chhi ngun em em tawha. A hnunga zuitu Zakunga pawh chu fimkhur tura hrilh mawlh mawlh in, Zakung i rahna tur ai in kan hmalam leh kan sir vel hi bih uluk zawk ang che. Kei chuan kan hnuchhui lai bih pah zela ka kal angai tih hria la fimkhur tak in minrawn zui ang che, tiin an chet fimkhur leh fimkhur loh chu an tan thih leh dam inkar anih zia ahai lo chiang khawp mai.

#Tlai ni tla tur pawh suk chen lek ani ta, chutih mek lai chuan an hmalam mual let liam maia silai pahnih puak rual ṭhawt leh Keipui thinrim in hrosa huk dum dum thawm chu Roliana te chuan an hre ta le. Roliana te ṭhiandun tan an hma a mualpawng liam mai ah chuan engthil nge thleng tih hrilhfiah kher an ngai lo, an mi um lai te leh an hnuchhui mek lo chhui ve tu Keipui pahnih te chu an in nghirngho mek ani tih chu hairual ani lo. Chutah Roliana chu an kal hmabak mualpawng awm na lam ah chuan hmanhmawh zet hian a tlan phei nghal a. Mualpawng a va chuan chhuah chuan adinna mualpawng hnuai mai, mualpawng aṭanga awihtlan in ruamzawl chhete a zuk suihfin na laia Keipui hrawl zet pahnih in an mi umlai te dangchepa an lo zuan tur chiah chu a zuk hmu hmana. Roliana tan engeng emaw ngaihtuah kual hman ani lo, a silai kaw phir chu a kaw pahnih chuan puak sen nghal zuaih maia an mi umlai te zuan tu Keipui pahnih chu a silai hmawr aṭanga thirmum sa vervawr thlawk chhuak chuan deng vir nawk in, lei char ah chuan an tla thum ṭawk mai ani.

#Chuhun reilo te chhung chu areilo lulai em maia, Roliana chet vel dan pawh chu hrilhfiah harsa tak ani. A silai kawphir kha khawilam nge a hmehpuah hmasak zawk tih leh duhangthala silai lek kawhna hun nei si lo khan, Keipui zuanglai pahnih engtin nge aruala a kah fuh ve ve theih tih chu hriat thiam har tak mai niin a mah pawh zawt ta i la, "ka hre hman bik awzawng lo mai, pakhat zawk ka kah rual khan engtik lai in nge ka tin sawn hman tih reng ka hre lo, " a tih ve ngei in arin awm. A hmun an zu thlen tak ah chuan le, an mi umlai pakhat zawk dar ah Keipui chuan alo hap hman hram nitur ani, Keipui ngho luna aṭanga thisen lo chhuak chu akut hniha hup in alo mu hlawm reng mai chu ni in, mahse, thihpui tham leh chetpui theihloh khawpa na chuan alo hap hman bik lo. Khatia Keipui in arawn hap chiah kha Roliana silai mu rawn thlawk chuan chupa beng chhe te chu taithler tel hlek in a dara rawn hap tu Keipui chu a hnawl thla rawp mai hi a ni awma, tlema tlem ah Keipui leh Roliana silai munlak ah anunna achan lo hram chauh alo ni. Pakhat zawk erawh himdam pial in an chhan hman hram a, mahse, a hlau thlu ngang aning chu chet pawh che sawn thei lo chuan adinna ngai ah ding in a khur hlawk hlawk maia. Chutia an mi um te ber pakhat bawihsawm ngai, pakhat lah hlauh luat vanga dingkhur hlawk hlawk bawk si chu Roliana te pahnih tan pawh han tih leh vak ngaihna awm chuang hek lo le, ṭhate te chuan an bawihsawm ta ringawt mai ani.

#Tlema an rawn ṭhata ngaihtuahna pangngai an rawn hman leh theih tak ah chuan, chumite pahnih chuan Roliana te ṭhiandun hnen ah chuan ngaihdam an dil nasa ta maia, Chheham meuha thu te an tiam tak ah chuan Roliana leh Zakunga te chuan an ngaihdam thu chu an hrilh ve ta nge nge a. Roliana te ṭhiandun hian hliamtuar chung leh hlau thlabar a awm lai chunga phuba han lak zui zel chu nuam an ti bik chiah lo ni in alang. Chutia ngaihdam na thu te an hriat tak ah chuan, Hmunzawl pasalṭha pahnih chu an lawm em em maia, khua ahlat tawh loh thu te chu sawi in, Keipui in a sehhliam zawk chuan, " inrawn kal na lama han let leh tur in khua atlai tawh nasa mai si a. Hetia ramhnuaia chawkawpuar hmu lo leh riah na tur mumal awm lo a hun hman ngawt zawng adik lo e, kan nunna chhanchhuak tu te in nih ang in zanin chu kan in ah zanriah in kil ve ngei tur ani. Tin, in hlauhthawn deuh leh in hming leh khua te kan zep anga, heng in khawmi te lu kan lak pawh hi dai ah thuk ru in, zing khawvara in let hun ah in la leh mai dawn nia," tiin a thlem nasa ta maia. An hmel ah chuan an nunna an chhanchhuah sak vang leh hmelma an ni chung pawha phuba ai ah ngaihdam na an la lan tir duh fo avang chuan an lawm hle ni in alang.

#Patling meuh in chutia theihtawp chhuaha an sawm tak chiam ah chuan Roliana pawh in hnial zui zel chi ni in ahre ta loa. Anih leh le pu te u in thu ang chuan ni se la, in khua ah chuan kan rawn zui lut ve ang che u. Inhmel aṭang hian kan chung ah in lawm ve tak tak ni in ka hria a, chuvang chuan kan tana thilṭhalo in ngaihtuah pawh ka ring lem lo e. Mahse, chutiang ni lo a phiarrukna rilru tenawmtak in lo pu anih hlauh zawng in, kei hi Roliana ka nih angin in rin phak rual loha nasa in ka che ang tih in hre sa dawn nia, tin, tupawh in an zawt che u anih chuan inkhaw ṭhenawm Ralbilha khaw tlangval te an ni e, in ti mai dawn nia atita a. An mi chhanchhuah te pawh chuan Roliana vaukhan na te chu an hre thiam em em a, pasalṭha hmingthang leh hlauhawm tan chuan engtik lai pawha fimkhur angaih tur zia chu an hai bik lo. Roliana hnen ah pawh chuan engkim an hriatthiam thu te chu sawi ve leh in, kan nunna min chhanchhuah sak tu te lak ah hian, engthil pawi mah kan ti lo ang tih hi ring hram rawh u, an tih tak ah chuan Roliana pawh chuan, chuti anih chuan engkim aṭha vek tur ah ngai ang, heilai hmuna awmreng pawh hi ahim in ka hre lo, Khang keipui hliam te kha an rawn let leh hlauh zawng in an thinrim kan tuar tawh lo ang, tiin kal arawt ta a. Mahse, an mi chhanchuah hliam tuar lo zawk chuan, thildang chu thuhran ni se, kei hi chuan khang Keipui pahnih te kha an rawn let ka ring tawh lo, he lai awihpanga an tlanliam tur kha ka hmu chiang ve khawp maia, tlan pangngaia tlan pawh an ni lo, a zuan in an zuang thla ṭawk ṭawk ani ber mai, i silai mu in adengfuh hle ni in alang, tiin Roliana silai kahthiam zia leh ṭuanran dan mak atih zia thu chu asawi zui nghal bawrh bawrha.

#Buaina leh harsatna tawk lem lo in Roliana te ṭhiandun pawh chuan, Hmunzawl khaw Zawlbuk chu zanriah te an eikham hnu chuan an pan ve chhat chhata. An rin ai tak in khawchhung tlangval te pawh an lo sual lem lo a, tihbuai tum leh thamlo taka lo chhaih vel tu pawh an tawng lem lo. Tichuan Zawlbuk an thlen tak ah chuan zawlbuk bawhbel chu bawh kai in inthlahrung lutuk lo chuan anhan lawilut ve ta a. Thlasik rimte a nam ṭan tawh bawk nen zawlbuk chhung ah chuan Zawlbuk mei ai in patlingrual leh valupa te chu, engeng emaw titi khawchang sawi in an lo ṭhu kual put maia, zawlbuk chhuatlai ah lah tlangvalrual ṭhahnem zet mai hi, an zanriah ei pumpuar delh thep tum niawm hrim hian an lo bawk phek thlur hlawm bawka. Chutia mikhual tharlam rawn lawilut ve ta chu Valupa te chuan lo hmuhhmaih hek lo, hawihhawm taka lo chhawn in chanchin te chu an lo zawt vel luam bawka. Chutah valupa pakhat chu khuh kharh khrah chunga rawn ṭawng chhuak in, "aw le, zanin chu hei khual tlangval pali ngawt mai khawhnih aṭangin kan nei hlauh mai a, a van neih thlak in hetianghun hi kan tawn zen zen loh thil ani bawk nen. Zanin chu tumah lenchhuah loh ah kan ti mai aninag chu, tin, kan tlangval khual te pawh hian henghi chu khawtina an tih dan leh nangni pawn in lo tawn fo tawh ani ngei anga, lunglo ah in la bik em lo ang chu maw. Kan tlangval te zing ah khualkaithama buanchak hi kan la ngah tawk lo viau maia, in zirtir deuh te pawh an ngai mai thei ani. Tichuan, tumah thinrim lo leh infiamna a ngai in zanin chu hlim tak in hun hman kan tum dawn nia," ati ta a.

#Roliana tan avawikhat tawnna leh thilthar ani lem lo, a mi beihte tha ngah ang ang tawk zela beih dan chu athiam in chak lo zawka ṭan ai ah tiin abeih te chu a hneh hram hram chauh hi ani zel maia. Zakunga erawh a ṭang ṭha duh in nuam ati ngang maia, khawtual leh mikhual pawh asawi hrang chuang lo, ahneh zawng deuh te chu a vawrh nawlh nawlh maia, hnehloh deuh atawna an vawrh ve ṭum lah in thinrim chu sawi loh anui var var thei zel maia, khaw tual tlangval te pawh in amizia chu an lawm in achungah thinrimna tilang pawh an awm bik lo. Chutah le, khawtual tlangval te leh pa ho hmuh chak ber mai, mikhual zinga pianṭha leh chakhmel zet mai pahnih te in beih hun chu athleng ve ta, Roliana beih tur mikhual tlangval chu Roliana angmaia pianṭha leh tihrawl ngah ve bawk hi ania. An han in kuah te reng reng pawh chu a khawng hian akhawng tlat maia, inbuanna tualzawl hi chu ka lalram ani e, ti thei khawp hiala mawi ani. Mahse, a tum pui tur Roliana pawh hi ṭangphut phut si lo, chaklo zawka ṭan tum na reng reng nei bawk si lo, chauh hre lo ang maia atwp ṭhak thlenga ṭang thei ani ve bawka, chuvang chuan chak zawk tur lo rinlawk chu har tak tur ani. Tichuan le, mikhual tlangval mahni tawka chak in ti ve ve, hnehloh la tawng lo ve ve te chu thapui chhuah meuh in an han in nawr ta a le, zawlbuk te chu a nghin hian anghing lawih lawih tawh maia. Reitawkngial an in beih hnu pawh chuan chak zawk an la awm thei chuang lo.

#Chutah an in vawnna te siamṭha a thawk te la in an han ding chawl hriha, duh anga thawk te an lak leh hnu chuan angaite bawk chuan an in kuah leh ta chat mai le, mahse, Roliana bengbula kun hnaih pah in zawite hian, Roliana beih pui pa chuan, "ṭhiana, nanghi Roliana i ni em ? Roliana i lo nih hlauh chuan thu pawimawhtak hrilhtur che ka nei e, " a ti ta maia. Roliana chu amengphawk chiang kher mai, a mi beih laia chu khawilam mi nge aniha khawikhua nge anih tih pawh ahre hauh si lo. Chutia angaihtuahna hmundang ah lakpena a awm lai chu, abeihpui pa chuan remchang ah hmang in sang vak lo a chawikan pah chuan a nghat leh thuaia. Chutah Roliana hriat tham lek hian hun kan nei tam lo tiin a phun zui sap a, chu thu asawi zawh rual chuan, " aw le, pu te u ka ṭhiana hian min hlahthlem ta bawka, kan duhtawk tawh mai ange, tha alawi kan pu tawh hlei nem maw le," a ti ta a.


#Roliana chuan Zakunga chu bekbawr ru zauh in zawlbuk kawtzawl tawpa an mahni nghaka lo ding, mikhual tlangval awmna lam pan chuan an chhuak ve ta nghal a. Chu mikhual tlangval bul an va thlen chuan zawisap hian Roliana chuan, " ṭhiana tunge i niha, eng thu pawimawh nge min hrilh tur i neih, " tiin a zawt ta nghala. Chu mikhual tlangval chuan, kei hi chu min hre kher lo ang, mahse, Roliana i nih chuan, pu Khamliana chu i hriat ngei ka ring. Kei hi a fapa upa zawk ka ni e, ati ta a. Pu khamliana hming lamrik an hre zet chu mak tih vang in Roliana chu amengbial kawk kawk maia. Chutah hlauhthawn hmel zet hian, nanghi pu Khamliana fapa i nih chuan engthil pawimawh nge nita ngai le. Hei leh chen rawn kal ta vang vang mai che chu, ngaih atha lo tawp mai ka ti, pu Khamliana chu a dam ṭha amaw.? tiin a zawt zui nghala.

#Pu Khamliana fapa chuan, ka pa chu a dam ṭha alawm. Mahse, nanghi a ngaihtuah ṭhin khawp mai che. Tin, nang zawng tura kan rawn kal tak chhan chu, ka pa bula i sawi fo ṭhin kha i la hria anga, "hun remchang ka hmuh ve leh an ni chhanchhuak tur hian ka rawn let leh ngei ang," ti a chhanchhuah i tum Chhingpuii zawk kha, kan khaw lal fapa in nupui a neih atum ta mai si a, mi hriat hlau tak chunga kan in ah rawn kal in, ka pa kiang ah lungchhe tak in a ṭap ṭhin a sin. Ka pa chuan a theih ang tawk tawka lo thlamuan in, i rawn lan thuai arin thu te chu a lo hrilh ve ṭhin a. Mahse, nanglah chu nghah chhuah tur reng reng i awm thei ta bawk si lo, ka pa beidawng chuan nangmah zawng tur hian mi rawn tir ta ngawt mai ani. Chhingpuii chu kan rual a rawn hruai te pawh kan han rilruk thut thut ṭhin a, mahse, kan khaw pasalṭha te laka kan him zawh kan ring si lo, chumai ni lo in man chhuah in awm ta i la, keini chhungkaw chan tur chu rapthlak tak ani dawn bawk si. Kei ni tlangval ṭhalai chauh hi atuar tur ni dawn i la azia tak ala awm tur hi ania, mahse, ka pa tak ngial pawh an hmaih dawn der si lo. Chuvang chuan, i awmna khua pawh hre lawk lo in kan rawn rin zawng tawp mai che ani.

#Mahse, Rolian kei ni hi i ngaihdam kan ngai ta anih hi, khaw tam tak ah nagmah zawng hian kan vak kual tawh. Nangmah zawng reng renga hun kan hman chhung in, kan lal fapa leh Chhingpuii in neih hun tura an hun ruat pawh tun ah chuan aliam ta si anih hi, ati chuai raih maia. Chu thu Roliana'n an hre zet chu ṭawngchhuak mai tur pawh awm lo chuan angawi vang vang maia, reitawk fang angawih hnu chuan harsa ti tak a rawn ṭawng chhuak in, ṭhiana nangni tan inthiam loh na tur a awm lo e. Hei leh chen kei min zawnga ka tana in inpek na hi engtik ah mah ka theih nghilh leh tawh ngai lo ang, ati chhuak thei ta hram a. Zakunga chuan Roliana rilru nat tur zia chu hriat thiam pui in, a mah zawk chuan ṭawng achuh ta nghala. Chutah, pu Khamliana fapa hnen ah chuan, engtin nge maw Roliana pawh hi in rawn hriat theih mai zawk chu le, ka ṭhiana vang hian in rawn hah hrep chu ani awm sia, in ti ropui in inlak ah lawmthu sawi mawlh mawlh kan ba anih ber chu alo ti ve a. Pu khamlian fapa chuan mai mai ṭhina, ṭhianṭha kar ah lawmthu sawi kher angai hlei nem, ni e, kan mi zawn ber hi amah han hmuh tak ah chuan hriat alo har vak lo anih hi. Ka pa khan tihian min chah a, "tunah chuan Roliana chu tlangval lianṭha zet zawt leh ruakhau tak ani tawh anga, pasalṭha hmingthang leh ropui tak ani tawh ngei bawk in ka ring. Chuvang chuan a mah in hmuh hun chuan tumah zawh hran ngai lo in a mah ani tih in ringthiam nghal mai in ka ringa, pasalṭha hmingthang leh ropui tak te hi chuan hmelma leh er tu an ngah ṭhin avang in fimkhur tak in zawng ula, minazawng hnen ah a chanchun zawt hauh suh ang che u," tiin min chah a. Ka pa sawi ang tak chuan hei amah kan han hmuh tak ah chuan Roliana ngei anih ka ring thiam nghal mai chu anih hi, mahse, fimkhur tura ka pa in min chah nasat em avang in kan in hmuhar ta deuh anih hi apawi ngawt mai, ati ta a.

#Roliana chu harsa ti taka rawn ṭawng chuak ve leh in, ṭhiana nangni tan in thiam loh na tur a awm lo ka tih tawh kha, in theih tawk chhuah in hei leh chen hi inrawn kal tawha inthiam loh na tur pakhat mah in nei lo. Kei mah zawk hi ahma a rawn kal daih tawh tur ka nih vei nen ka mawhphurh na ka hlen zo ta lo ani e, tiin a hmel aṭang ringawt pawh chuan a in thiam loh zia chu hai rual ani lo. Zakunga chu lo inrawlh ve leh thuai in, Rolian, chuti ngawt in ngai teh suh, buaina in tha thlah hman lek lo a asiam vang zawk che alawm. Sihpui khua i rawn luh aṭanga tun thleng hian engtik lai in nge hahdam taka chawlh i neih, i thawh rim zia leh hah zia chu kei i ṭhian hian ka hria alawm. He thil ah hi chuan tuman thiamloh na in nei in alang lo, chuvang chuan khuanu rorel ah kan ngaih mai aṭha ber ang, ati ta a.

#Zingkhua alo var chuan Roliana leh Zakunga chuan pu Hrangkaia leh tlangval pakhat lu ak chung chuan Sihpui khawlam an pan leh ta a, Roliana chu aṭawng tlem in a rilru chu a kal ding hle maia. Hmawng zara an riah naleh Zakunga hnena chhingpuii chungchang hlim zet maia ahrilh na hmun an kal pelh lai te chuan, Chhingpuii mangang hmel ringawt mai chu amitthla ah chuan lo lang in, chhan chhuak tura a kal hun beisei taka alo thlir laia a pasal neih hun in anang ching mangang vel tur te chu a suangtuah a, Chhingpuii chhan chhuak tura akal hman ta lo chu a rilru a na vawng vawng kher mai. Zakunga pawh chuan Roliana rilru nat dan tur te chu ngaih tuah in a khaw ngaih em em maia, ahma ni maia anau te chhan chhuak tura akal thei tawh tur thu sawi laia ahlim dan te kha angaih tuah phei chuan, Roliana a khawngaih vang in amittui te chu a tla lo chauh ani ber mai. Chutah Roliana chuan aw dam thlap mai hian ṭhianpa, Khuanu rorel chu kei ni dan theih ni lo mahse, phuba ka lak na tur chu a dal chuang lo ang. Ka nu phuba la tur leh Rochami chhanchhuak tur in pawl kan tlak rual in ka chhuak nghal anga, eng buaina pawh tawk i la hmalam pan ka ṭhulh tawh lo ang, ati ta a.###

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)