PASALTHA SANGTUALA BY Vana Fanai (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALTHA SANGTUALA BY Vana Fanai 1 - 179

Unread post by Ngaia » December 27th, 2018, 2:34 pm

PASÂLTHA SÂNGTUALA (Mampuia Pa)

BUNG – 179

Naurual zanriah chhum hunah chuan pasâltha Sângtuala chuan ‘khawnge Lal zu zet chuan min fan hneh ngang a nih hi, hnuai lam in a hre tlat mai kan inthiar a nge’ tiin a tho uaih a. A thiante chuan kei pawh kan inthiar ve a nge’ tiin an zui chhuak dam dam a, dai an thlen chuan ‘kan Rinzuali zet chuan eng rilru pu a i u chu nei nge a nih ang le’ tiin an thu far a. Pasâltha Sângtuala chuan ‘a hmangaih zawng tak a niang chu mawle’ tiin a nui var var a. Thûamkunga chuan ‘khati khawp a taksa leh chet ziaah pawh a ti langtu in tun a k’u Laiawrha a nei leh mai hi rilru tha tak pu chu a nih hmel loh, a khawsak dan ka hriat chinah pawh a mak tih ngawt mai tur a ni’ tiin mak an tih zia chu an sawi zui tliar tliar a. Mualkunga chuan ‘ku Sângte ngai haw lo la, nangmah tihnat a duh vang che hian ti hian che a ang riau mai ka ti’ tiin a lo tuihnih ve zauh a. An han ngaihtuah chuan dik dawn hle hian an hre ta a, an ngawih thap lai chuan ‘engpawhnisela, kan nunhlui chu tuman sawi chhuah loh theih hram kan tum dawn nia, a zahthlak teh nuaih emai’ tiin a thiante ngen a. Thûamkunga chuan ‘kei chu hauh hrep ka châk ber, kan u lah khan dawt a sawi hmel bawk si loh a’ tiin a han sawi a. Chungliana chuan ‘kei pawh hauh hrep tak a nia ka nap ni, a zaktheilo in a tuang a lo chhah reuh emai, khawtlangin a nundan kan hre vek a nia. Kan u pawh hian thil a dawn thuilo bawk a ni’ tiin a han sawi ve leh a. Thûamkunga chuan ‘kei chuan kan u hi ka dem hauh lo, a hmeichhei zawkin an duh phawt chuan mipate chu kan su ngauh ngauh mai tur a ni, lo su ngamlo sela kan u hi tuai leh pa theilo ah a chhuah lo ang tih rin a har zawk riau a ni, a naupan ngaihtuahin a awmherh reng mai’ tiin Rinzuali mak an tih zia mawlh chu an sawi bawrh bawrh a.

Chutia thinrim tak a an ti ti sap sap lai chuan naupang hlauthla bar te chuan chung Satlâk tlangvalte thusawi chu a ti tawp in, mangang au thawm awmna lamah chuan an tlan thuai a. Naupang authawm awmna an thlen chuan kawlkei ze tial ran mai hian naipang pakhat bawh ranin chu naupang hlau lutuk chu a lo thidangin a ban bul chu thisen chuan a lo bualsen nguai tawh a. Satlâk tlangvalte a hmuh chuan kawlkei chuan ngho ti langin a lo ngur chhar chhar a. Thûamkunga chuan ‘ thintim hrikthlakna tur a i han tang tur chu i inchhir hle ang, eng hmanrua mah thawhlo in kut lawngin i han chaih phar teh ang aw’ tiin a puanven chu a suih nghet mawlh mawlh a. Pasâltha Sângtuala chuan ‘mihring nunna pawh I zah loh vangin I chungah zah kan ngai dawn hlek lo a nia, kha lo inring rawh le’ tih pahin kawlkei chu a han zuan nghal a. Kawlkei chuan zuan sawn tumin a ding mar chiah tih chuan pasâltha Sângtuala chuan a meiah manin lei vuak nan chuan a hmang dawp a, kawlkei na ti chu te thawtin a mu zawi nghal hnawk a. Thûamkunga chuan ‘kha kei ve tawh aw’ tih pahin kawlkei lo hawi chhuak chiah chu a chhir leng lawp a, kawlkei chuan an piah a thingtuai chu tauh chawrhin a thaw hap hap a. Mualkunga chuan ‘ kha lo inring ru’ tih tuar pahin kawlkei chu thingbul atang chuan a chhir leng lawp a. Chungliana chuan kawlkei thawh tum inleng aih aih lai chu Thûamkinga lamah chhir leng ve lawpin an ding bial a, an chhuih te thawt thawt hlawm a. An chhak a thawm an hriat chuan an hawichhoh chuan Satlâk tlangvalte lo thlir thaptu Chekpui tlangval lo ding thap chu an hmu a. Thûamkunga chuan kawlkei thawhtum a in hai tiat tiat chhuih len lawp pahin ‘tun atan chuan duh tawk phawt ila, khawchhung lamah kan kengchho tel ve dawn nia’ tiin naupang hliam lamah chuan a thianpa puih tum chuan a phei thuai a. Pasâltha Sângtuala chuan ‘khawi u hmanhmawh a ngai a nia, hei naupang hliam a na reuh emai’ tih pahin naupang chu a pawm lawpin hmanhmawh takin lungdawh lamah chuan a chho thuai a.

Chekpui tlangvalte makti an hawi at hu lai chuan Mualkunga chuan ‘khawnge nang te reuh hian at I so pawlh a nge, tha takin awm la i pang a dam a ni mai’ tih pahin kawlkei tukah manin a han chawi vawk a. Kawlkei chu te thatin a tin hriam tak chuan Mualkunga kut leh a theih lai chu a ham sak a, Mualkunga taksa kawlkei in a hamna mal leh ban atang chuan thisen a lo chhuak zawih zawih a. Chunglianan keite che a hmuh chuan ‘a khanglang che chuan, ken that I duh loh chuan khawchhung thleng rawk kan chhir chho che a nga ti nia’ tiin kawlkei ngho lang vah a then chu a chhir leng lawp a. A thiante chuan lo pui vatin ‘kha kei ve tawh’ ti a au that thatin kawlkei chu lungdawh lamah chuan an chhir chho lawp lawp a. Chekpui tlangvalte pawh chuan kawlkeiin chet a thawh ngamlo tih an hriat chuan phur tak chuan ‘kha kei ve tawh’ tiin an lo chhir leng ve lawp lawp a. Lungdawh an thlen meuh chuan Kawlkei chu a thaw a zawi sawt kher mai. Thûamkunga chuan ‘nauchahaite, thuawh takin awm tawh ang che’ tih pahin kawlkei tukah manin Mualkunga chuan kawlkei meiah a lo vuan vat a, khawchhung lamah a chho pui ta vawk vawk a. Lal mual lam a thawm lo ri nawk nawk an hriat chuan tlangau pa chu leihkatlangsangah chhuakin Satlâk tlangvalten kawlkei zetial an lo khaichho a hmuh chuan ‘e he Lalpa lo chhuak vat teh u’ tiin a au teng chhuaih a. chutiang tak a tlangau pa au tial ruai chu ‘kan tlangau pa thin lah hi eng emaw hlekah I vawk ke tang chiau chul zel’ tih pahin khawnbawl upate nen chuan an chhuak thuai a. Lal mual a tlangvalten kawlkei an khai zawi reng an hmuh chuan ‘kha engti zai zia nge ni’ tiin Zinghne Lal Buktuala chuan a han zawt a. Chekpui tlanmgvalte chuan hre ber nih tumin an sawi noh noh a. Lal Buktuala chuan ‘khatia sawi nuaih nuiah lo khan tuemaw khan fel fai deuh han sawi teh u’ a tih lai chuan Pasâltha Laiawrha pawh a zawimuangin leihkatlangsangah chuan a lo chuang chhuak ve in ‘nangni thianzaho chu hmuh in nuam thin e’ tiin a ngaihtuah nauh nauh a. A thiante zing a a nau a hmuh loh vang chuan a mit chu a len ruai a, bawlpu nen a in zui a nau a hmuh chuan a thaw huai a, a nua taksa a thisen kai deuh luai a hmuh chuan ngaihtha lo deuh chuan a melh reng a.

Chekpui tlangval pakhat chu lo pen hnaiin ‘Lalpa kan khual tlangvalte hmelah chuan eng emaw tak vei an nei tih hriatin an tak ngal a, an buaina kan puih thei takin tiin lungdawh lamah kan zui ve ta zel a, an thusawi an muk hmel em vangin kan pawh duh lawk bik lo a, vaibel kan zuk laiin kan thlangah chuan naupang mangang rawl lo chhuakin kan khual valte chu chu lam pan chuan an tlan thuai a, keini pawh chuan kan um thla ve nghal nangin kan zu thlen ve meuh chuan pasâltha Sângtual chuan kawlkei hi a chhuih leng lawpin an ni thianzaho chuan an chhuih leng lawp lawp a. Kawlkei a chauh deuh hnu chuan pasâltha Sângtuala chu naupang hliam pawmin a lo chho a, keini chuan puih nachang pawh hrelo in hmuhnawm ti takin kan thlir reng a. Pasâltha Sângtuala liam hnu chuan a thiante chuan kawlkei chu an la chhuih dawp dawp reng a’ tiin a han chawi dat a. Mualkunga kawkin ‘Kunga hian kawlkei tuk a manin a tham kang chiah tih chuan a ban leh mal velah a ham sak a, chutia kawlkei a chet takah chuan an ni thianzaho chuan an chhuih leng leh ta lawp lawp a ni’ tiin Satlâk tlangvalte chet dan chu a han sawi a. chu tlangval thusawi hre phak chinte chuan makti takin Satlâk tlangval leh kawlkei chu an melh tawn sek a. Lal Bawktuala chuan ‘in thusawi chu rin a har rualin a mit a hmutu kan ni bawk sia’ tiin a hawi lawl lawl a. Chutia Lal mual a reh thup lai chuan kawlkei chu a rum ngal ngalin a piah lam a nunau ding khawp taih lam chu mei vai ngalh ngalh chuan a thlir ran a, ngho lang varhin a tlan chan chan a. Pasâltha Sângtuala chuan ‘nang te reuh chu I huai sar reuh hle mai, I duh tak tak elaw’ tih pahin a tlan zawk a, kawlkei kawngchen a zuang lai chu a pel leng lawp a. lei a thleng fel awrh tih chuan Satlâk tlangvla dangte chuan an chhir leng lawp lawpin khjawtual tlangvalte pawh chuan an chhir luai luai a, Lalin tlangvalte a khap meuh chuan kawlkei chuan nunna a nei tawh lo a. Lal Buktuala chuan ‘tlangvalte u, kan tanrual phawt chuan hlauhawm hi a awm hauh lo tih kan hriattharna lo ni mawlh tehse, kan hun tawn hi a tha lam zawng a hman kan thiam poh leh a nuam a ni mai’ tiin a tlangvalte chu a fuih sauh sauh a.

Ni sawm chuang zet an cham tawh vangin hliam tuarho pawh an dam tha tawh viau a, pasâltha Laiawrha chuan ‘ka pa Thang, tunah chuan keini pawh kan dam tha viau tawhin ka hria, nangni phei chu chhungte ngaihthat lohna that zet in riak chhuak tawh a, naktuk lam chuan hawn mai a vat ha tawh awm ve’ tiin a rawt a. Pasâltha Sukthanga chuan ‘a mai mai a, dam chiang vakin khua kan lawi ang chu, zan ngâ kan rih leh chuan a hma aiin tha zawk taw hang chu’ tiin a nui huai huai a. Pasâltha Laiawrha chuan ‘kan tha tawh alawm, naktuk lam hian chhuak tawh ila, duh leh kawngah kan muangchang deuh mai ta lawng’ tiin a han rawt ve leh a. Pasâltha Sukthanga chuan ‘nangni berin in huam chuan han cham reng pawh a tha ber chuang lo a, zanin Lal hrilh a ngai dawn a nih chu’ ti a tuihnihin vaibel chu an fawp dun talh talh a. Zanriah eikham a Satlâk tlangvalten an ruahmna dan an sawi chuan Lal leh khawnbawl upate chuan la cham rih chuan an chelh sap sap a. Satlâk tlangvalte chuan cham lam an hawi tak lohah chuan ui tak chuan inthlahna thu an sawi ve ta. Zanah chuan Chekpui Lal chuan Satlâk tlangvalte chu zu a zukin hlim takin an ti ti laih laih a, lenghawn ar a khuan chuan in ui tak chuan an tin ta hlawm a.

Tukthuan eikham chuan Lal chu tlawh kawi zawkin Lala chuan Satlak Lal tan ngaihhruina dar khuang pakhat thawnin remchang hmasa ber a intlawh tur a in sawm tawnin an in mangtha ta hlawm a. Satlâk tlangvalte chuan hlim takin Chekpui chu an chhuahsan ta a. An tluan chuan buhseng an hman dawn avangin an hlim pawh a zual khawp mai. Thûamkunga chuan a puan chu a nu leh farnute hmuh hlan a nghahhleh tawh thu chu a khat tawk chuan sawiin a thianten en an tum chuan a phal hauh thung lo a, tluang taka kalin zan ruk zet an thang hnu chuan Satlâk lungdawhah chuan vaibel chu an fawp khu talh talh a, hliamte pawh an tha tawhin pasâltha Laiawrha erawh a chhungril a khawsik awm chuan a tha a ti thum ru in a naute zingah chuan dam awm tak chuan a lang lui hram hram a. Chutia khua tluang tak a an thleng thei chu a lawm kher mai. Lal mualan thlen chuan Rinzuali pawh dul kawh lahin a kun deuh lap a, a pasâl a hmuh chuan mittui hru zauh zauhin a bulah chuan a kalin a phun sap sap a. Pasâltha Sângtuala a hmuh chuan hmulo derin a pasâl ngawt chu a vir cheng a, an khaw mimir chuan Rinzuali khawsa zia chu an khamin a pasal chuan hawnpui thuaise an ti ru hlawm khawp mai. Pasâltha Laiawrha pawh chuan a nupui kawhsak zia chu ngaimawh viau mahse a insum hram hram a, inlamah chuan an inzui hawng thuai a. Pu Tawnliana chuan a famô khawsa zia a hmuh chuan ‘ka fapa inngaihtuah chiang viau ang che aw’ tiin a rilru chuan a sawi mawlh mawlh a.

Pu Tawnlianan a fapa naupang zawk leh innghahna a hmuh meuh chuan a hmel a lawm zia chu hai rual a nilo, hlim tak chuan an in nuihin an pafa chuan an thu tlang chawt a, hahzu an zuk zawh chuan zan lam a Lalin lam a kal tur chuan an tin san ta. Pasâltha Sângtuala a nu leh farnuten an hmuh chuan an lawm lutuk chu an mittui a luang zawih zawih a. Pangpuii phei chu nuta nei ngailo tih takah a pianpui farnu ai chuan a ngai zaw mah ber emaw tih mai tur chuan a, pasâltha Sângtuala khup kuah chial chuan a thu a. Chutia thenawm a an rik deuh laih chuan pu Neihlaia te nupa leh khual a a nau nula te nufa an awmpui pawh chu an lo kal thuai a. Chutia dam tak a an inhmu chu an hlim ve khawp mai, an lungngaihna lak a an chhan chhuahna pawh a rein an taksa leh rilru hahdam a chinah chuan an taksa pawh a mawiin hmuh an nuam zuih tawh a ni. Pasâltha Sângtuala chuan a iptepui mawng a ah Thahru Lalin puan a pekte chu a nu leh farnute a han hmuh meuh zawng a mawi an tiin hmeichhe lam chuan an in bel nghal nawk nawk a. Chutiang a puanmawi an han nei bik chu Pangpuii leh Zoliani hlim lutuk chu an khek chul a, Pu Tawnliana chuan ‘e khai a, Zotei unau chu insum duh ula a vat ha awm ve’ tiin tap kil atang chuan a lo nuih suk suk a. Zolianai chuan ‘ka pa, hetiang a puan nalh hawn tur nuta neih chuan kan khek rawih rawih tur alawm, hetiang puan nalh hi vang deuh a nia, ka mawi em ka pa’ tiin a pa chu a kuah chung chung a. Pu Neihlaia pawh chuan ‘Zote insum hauh suh u, nangni ai a vannei hi an tam falua lo a nia, in va mawi tak em’ tiin a lo nui ve hawk hawk a. zanriah ei tlai lam mahah chuan zanriah eiin an an nui leh ta bawk bawk a. Pu Neihlaia te chhung pawh chuan ‘mo sual pakhat vangin chhungkua a lo kehchhe thei tih an sawi chu ka hre thin, tunah phei chuan a takin ka hmu leh zual a ni’ tiin a sawi charh charh a.

Zanriah an eikham chuan khual a kal tlangvalte chu an kim thap a, zan lam a puan tlangvalten an hawn nalh zia chuan Satlâk khua chu a deng chhuakin ‘lo kalve ila chuan ka lawmi pawh lung lawmin a nui var var ngei awm si a’ tiin tlangvalte chuan an ngaihtuah rauh rauh a. Khual kal tlangvalte an kim hnu pawh a pasâltha Laiawrha hmel langlo chu Lal chuan a han zawt chuan tumah chuan a chin an lo hre hauh lo a. Lal Chhawnthiaua chuan ‘tlangau pa nang tlawmngaiin kan pasâltha I zu ko lawk dawn mi ?’ tiin a han tir a, tlangau pa chu chhuak thuaiin midangte chu an lo ti ti laih laih a. Tlangau pa chu amah chauh chuan lo kalin ‘kan pasâltha chuan ka khua a nuam thei meuh lo a, Lal chuan min lo hrethiam hram rawhse’ a ti a rawn tih chuan a ruk chuan an ngaih a tha lo tlang hlawm kher mai. Lal Chhawnthiaua chuan ‘ka pasâltha hi a eng a ti chu nimaw a dam a tha theih hauhlo mai ka ti, engti zai zia chu ni maw’ tiin ngaihthat loh hmel tak chuan a han sawi charh charh a. Thûamkunga chuan ‘kan va kalna ah pasaâltha putar pakhat min hrilh dan chuan. Savawm mît hi tin reng damdawi a ni e a tia, kan u hian a ei ve tawh em le ?’ tiin a han sawi zauh a. Midangte chuan ‘a lo va mak awm ve mawle, savawm thau chuan sa leh hriak a lo kalpui chauh emaw ka tia, chutiang a nih hrim chuan chhin ve ngei tur a nih chu’ tiin an lo tuihnih hlawm a. Lal Chhawnthiaua chuan ‘ka tlangvalte chu dam a kan inhmuh loh mai kan hlauh ruk lai a, hetia dam tak a kan inhmu leh thei chu kan chungah khuanun zah a ngaiin a lawmawm kher mai, nakthai mai khian him taka inlo hawn lawmnan tlangruai siam ila kan ti a’ tiin khawnbawl upate nen chuan an ruahman dan chu an sawi a, khawnbawl upate pawh chuan an Lal thusawi an thlawp tih hriat tak chuan an lo bu nghat nghat hlawm a. Pasâltha Sângtuala chuan a u lo langlo leh a nupui(Rinzuali te chhung) khawsa zia a hriat tawh avangin a ngaihtuah ru khawp mai, Lalinah chuan rei awmlo in tlangvalte chu an chhuak thuai a. Pasâltha Sângtualate thianzaho chu ngawi rengin pasâltha Laiawrha te in lamah chuan an kal ngawi thap hlawm a, an thlen dawn chuan Rinzuali chuan ‘I mak ka ti khawp mai, mahni nupuite chhung chung a tlangvalte chetdan I hre vek chung a ngawi reng mai che hi, I khawsak dan hi ka hrethiam hauh lo mai che ka ti’ ti a thinrim tak a sawi an hriat chuan an ding thap hlawm a. Pasâltha Laiawrha chuan ‘ngawi mai mai teh i luruh hi a ring hrep lehnghal, I tawng hi thenawm te reu reu hian an hre palh a nge, thlavang hauh tlak a khawsa chu ni ula engvang tehlulin nge ka ngawih lem ang le, tawng thei hian min siam mawlh heklo che u’ tiin a chhang bul hmak a. Rinzuali chuan ‘kan mualphona chu i haider theih chuan nang pawh tun an ngaisang hauhlo ang che, mahnin nupuite chhung thlavang pawh hauh ngamlo pasâltha hming pu ve satliah chu i ropui lua lo khawp e’ tiin a tawng zui zat zat a.

Rinzuali chu a ngawi mai dawn emaw an tih chuan rin tak tak chuan a la ang zui barh barh a, pasâltha Laiawrha chuan ‘I va han ninawm zozai ve mawle, kei i pasal pawh damsam lo leh chau ngawih ngawihin ka rawn hawng thleng hlawt a, nangni chhungkaw khawsak thiam lohna thup mawi ngawt hi ka thupui ber a nih tur pawh ka hre nek lo e, ka kham lutuk che chhuak vang vang teh âng reng ringawt mai’ tiin thinrim tak chuan a hrawk ta khur khur a. Rinzuali chuan ‘ka chhuak reng ang, ka thlavang hauh ngamlo bulah chuan zankhat pawh ka awm duh hreplo e’ ti a ang hlawih hlawihin a chhuahsan ta a. Rinzuali hmuh hlauin thingkhawn phenah an tawm thuai a, a liam hnu chuan ‘kan u chu a damsam lo tak tak a niang a, hawh u i va lut thuai teh ang u’ Thûamkunga tiin chuan a kal nghal a. Pasâltha Sângtuala chuan ‘Thûam thian lo ding lawk teh aw, keini kan va luh ve chuan kan thang chhe lutuk dah a nge, ka nu te i hrilh thuai zawk teh ang u’ a tih chuan hmanhmawh ru tak chuan an kal thuai a. Pi Chhuanthangin thil awmdan a hriat chuan a han ngawi dat a, thawpui lak halh pahin ‘hawh teh, Pangpuii nu kan fapa chu I va tlawh teh ngawt ang, kan thenawm nu khiu hruai bawk ila’ a tih chuan an pahnih chuan an chhuak thuai a. Pi Chhuanthangi te chhuah hnu chuan an in a tlangval lengte chuan ‘kan bawlpu te chhhung zet chu an lo rapthlak kher mai, tuman nel ngam chi pawh an nilo a nih hi’ tiin an sawi zui sap sap a. Pasâltha Sângtuala chuan ‘nangni khawchin inhre deuh a, tunhnai hian savawm chhuah hnaihna inhre hlawm em ?’ tiin a han zawt a. Lawma chuan ‘tlai kan feh hawng khan kan ri pan an lo a mai sawvawmin a ei nasat thu a sawi a, maichi tur tak ngial pawh neih loh mai a hlauh thu a sawi tak kha, engti zai zia a han ngaihven nge i nih mai a, pasâltha chu in hriat teh zawng e’ tiin a lo chhang thuai a. Pasâltha Sângtuala chuan ‘chutiang lam pawh a nih chiahlo, kumin thawlhhma thatthu chu in sawi nasa sia, vawikhat pawh kan la hmulo nen hmuh a chakawm bawk em a ni’ tiin a thusawi chu a tlip var a. Tlangvalte an tawng leh hma chuan ‘Thûam thian a hian a lawmnu tlawh a duh deuh si a, kan chhuahsan mai teh ang che u’ tiin nui hawk hawk chuan an chhuahsan ta a.
Pi Chhuanthangin a fapa hmingkoh damlo hmaidang deuh bai leh mitkhur thuk deuh dakte, a kal zawng a tha khur ru der der a hmuh chuan a fapa chu a taksa a chaklo hle tih a hrethiam in nu hmangaihna chuan khaw dang a hawi thei ta meuh lo. Lianat takin ‘Mama khawnge in nu hi’ tiin a han zawt a, a ngawih deuh hnu chuan ‘a phun reng a, ka lo chauh deuh nen ka ning lutuk a hawng rawh ka ti a nih kha’ tiin a sawi ta hram a. Pi Chhuanthangi chuan ‘leh ta mai mai thin a, naupang zawk an nia dawh hram hram an ngai a sin, hmeichhiate chu kan phun hlawk hlawk thin a lawm’ tiin a fapa chu a han zilh hau a. Pasâltha Laiawrha chuan ‘ka nu phun satliah chu nise ka hrethiam alawm, thil diklo dik zawk niawm taka sawi reng kha ka kham em a ni, dik leh tha famkim kana wm loh rualin tantlak awm a ni ngai a, keini kan nih vnag ngawt hian mihring kan dik tihna a ni ngailo’ a tih takah chuan an ngawi ta thap a. Pu Neihlaia a nupui chuan ‘sawi ta daih ila, Sângtea puan lo hawn kha a mawi ka ti tak tak a ni, kan vanglai a pih ni ve ila ka mawipui ve viau ang chu’ tiin a sawi fiamthu zauh a. Hmeichhe ho chuan puan mawi an tih zia mawlh chu sawiin lenghawn ar a khuan chuan chuah chuah takah chuan pasâltha Laiawrha chuan ‘ka nu hawng tawh rawh u, hei zan pawh a rei dawn tawh hi’ tiin a han sawi a. Pangpuii nu chuan ‘Mama I taksa a chaklo emai mahni a riah emaw, zawlbuk lam panchi I nih loh hi kan bulah lo riak rawh’ tiin a han sawi a. tangve viau mahse Pu Neihlaia a nupui chuan ‘ilo kal duhloh leh kan riahpui mai ang che’ a tih takah chuan hreh hmel leh phur ru tak chuan a aw ta hram a.
A tukah chuan pasâltha Sângtuala chuan zan lam a an sawi savawm mît chu hmuh theih hram dan ngaihtuahin ramvak tur chuan a insiam ta malh malh a. Tukthuan eikham chuan a thiante chu silai nen an lo lut thulh thulh hlawm a, pasâltha Laiawrha kamthuah zo lo lut kal khur dar dar an hmuh chuan ‘ka u chu kha I van la thalo ve’ tiin an lo e thuai a. Nui lui hram hramin ‘ka tha lutuk alawm tukin ka leng tukthuan ka ei ve nghal a’ tiin a sawi zawi sap a. Anaute thianzaho in kawmngeih dan leh an in phatsan loh ziate a hmuh chuan a lawm kher mai. Pasâltha Sângtuala a insiam zawh chuan ram lam pan chuan infiam chul chungin an kal dal dal a. Lungdawhah chuan vaibel zu talh tlahin an zinbo hlan a zawlbuk kai thar Lairuma te thianzaho thâl nen a ramlam pan turn en chuan chawl tlangin an infiam bawrh bawrh a. Thûmkunga chuan an va zinna lam chu thiam tak a sawiin chung rawlthar rual chuan an bawr hnai telh tleh a, vawiin chu hmun dangh kallo ula kan vanneih loh ni a nih leh iptepui hul hakin kan hawng a nga ni mai lawm’ a han tih chuan an ni thianzaho chu an aw hreh deuh a, an sawm luih deuh tak hnu chuan an pasâlthate zing a khawsak an lo chak ruk san en, hlim tak chuan an in zui ta dam dam a. An ute fiamthu duhdan leh in ngam tlandan te chu an infiam danah an hrerthiam thuaiin an ni chu hahni daidukin an nui kawngtluan a. A khat tawk a an intlawh leh zawt thinte an hmuh chuan nui tha ngam loin an insumna lamah an pum chu a na thum tawh a, thlawhhma an thlen meuh chuan rawltharte chuan an ute chu an nel sauhin an nui leh hak thin a. Thlam tlaitlan a thuin vaibel chu an fawp khu tual tual a, vailam chu thlirin rengchal hram chuan an lung a lenin ngawpui hnuai vah theuh theuh chu an chak tawh kher mai. Chutian ramvahna tur an kawh kual zauh zau lai chuan fahkhung chu lo che luai luaiin savawm hian thing chu a lo thliak che luai luai a.

Thûamkunga chuan ‘chhe heu, vawiin chu kan tum a fuh dawn a van ang ve mawle’ tih pahin a silai chu a endik mawlh mawlh a. midangte pawh chuan an hmanrua chu endik thuai a. Fimkhur leh thawm dim tak chuan savawm lawnna thing awmna lam chu an pan zel a, an fimkhur viau emaw an tih chuan kah na tawk hla hret a nih lai chuan savawm chu thingler a tang chuan a tawlhthla puat a, ngawpui hnuaiah chuan a pilbo thuai a. An vehber a pilbo hnu chuan an inmelh thap a Pasâltha Sângtuala chuan ‘nangni kha lamah pahnih theuhin in zui ula’ tiin an kalna tur chu a hrilh thuai a, hmanhmawh takin an kalna tur lamah chuan an liam thuai a.
Chhun chawfak hun a thlen chuan savawm hnu thar an hmuh mai loh vangin an hrilhhai zawk hial a, Tlangval tam zawk an beidawn deuh hnu chuan silai hi a puak khawk raih raih a, silai ri thangkhawk a reh fel awrh tih chuan savawm thinrim huk ri chuan chulai vahbak ngaw chu a luah khat a. Vawmpui huk hul hulh karah Mualkunga aw chuan ‘k’u Thûamkung a mei kah thlah rawh’ tiin a lo au vau vau a. Thawm an hriatna lamah chuan an tlan thuai hlawm a, rawltharten vawmpui hukna hmun an thlen chuan an ute chetdan chu hmuhnawm ti takin kâ hau chuan an thlir ta dauh dauh a. Pasâltha Sângtuala chuan ‘thiante u zam hauh suh u, Satlâk valrualte kan ni ngai e’ tih pahin Mualkunga bawhthlu tawptu vawmpui meiah manin a phih her sawk a, vawmpui ângsen huam inher chiah chu a naknemah a tlawh huk ngahl tuar a, Chungliana chuan ‘tuman hriam lek hauh suh u’ ti a au that that pahin a iptepui chawp chuan a theh nghal rawk a, savawm hliam inher tur bawp veilamah manin a phih nghal sawk a. a rem dan dan chuan an khawih thum pawp pawpin savawm inher tur chu an phih leng lawp lawp mai bawk a. Rinmawia tawlhhnung tur chu thingtuai ah in su in vawmpui chuan a bawh let ngal rawk a, a ni chu hnuai lam atang chuan a lo in veng tang tang bawk nen an thawm chu a na rem rem kher mai. Lo kân a kal thawm hre hmasa apiangte pawh chu thawm awmna lama chuan an tlan liam thuai a, an tlangvalte chetdan an hmuh chuan puih mai nachang hreloin hmuhnawm ti tak chuan an thlir thup hlawm a. Savawm hliam chu a meiah pasâltha Sângtuala chuan phih tho lawpin ‘nangte reuh chuan i duh tak tak a ni maw’ tih pahin a hnuk huk dum dum a, a thiante chuan a remdan chuan an khawih thum dawp dawp nen, silai mu fuhna vang a chau tawh nen, savawm hliam chu tuibur hmuamda ah chuan an chaih hlum ta der a.

Pasâltha Lianmana chuan ‘kan tlangvalte chu an la pangngai reng e’ tiin a nuih sang a,Rinmawia chuan savawm hamna thi deuh tuam tuam melhin ‘kan zurui a chuan ka vunchhia a hai pilh khang khalan chu le’ tih pahin a chhir pawp a. An mahni lo thlir thaputte melhin ‘hei vawiin chu kan tum fuhni a ni bawk a, helaiah hian kan chan nghal mai dawn mi, thlam a rimchhe duh mai mai a lawm le’ tiin a han mitmei a. Pasâltha Lianmana chuan ‘pasâltha zarzo leh ila a nihlawh thlak a ni mai alawm, khawnge a sa ber min laksawk sia a channa tur lam chu ka lo buaipui a nge’ tiin an thlang a changel hmun chu a pan nghal a. Rawlthar Laituma te thianzaho chuan ‘pasâltha lo awm mai maiin, tihdan tur min lo hrilh rawh’ tih pahin an pel thuai a, changel hnan an lak chu hmunzawl laiah phahin pasâltha Lianmana chuan ‘khawnge a kawchhung kan hai a nge’ tiin rawltharte chu a tihdan chu hrilh pahin kar loah an hai zo thuai a, tumah awl bik duhlo in mi sawmngâ tha dawn chuan savawm chu reilo teah an chan zo thuaiin a mit pawh a lian kher mai. Savawm mît chu Thûamkunga chuan iptepui a hnawh pahin ‘khawnge a thatna ka hmuhchhuah hlauh chuan in vannai khawp ang’ ti a khik suk pahin thlam lamah chuan an chho thuai a. Rawlthar Lairuma te thianzaho chuan an u te huaisen zai leh an tanrual thiam zia mawlh chu hahip a sawiin an khi sang reng a. Chhun hmehah savawm sa leh maian hnah chhum pawlhin rawltharte chuan a tul chu an ti zung zung a, naurual zanriah chhum hunah chhunchaw chu fakin zawimuangin an in chhawm hawng ta dal dal hlawm a.

Thûamkunga savawm kah mît chu pasâltha Laiawrha chuan a a han ei chuan a khawsik benvawn neih chu a reh ta hlauh a, ninga a vei meuh chuan dam tha pangngai takin hun a hmangve thei ta. A taksa lam tha mahse a rilru chu a hrehawm ve thei khawp mai. A nupui lah chu hruai leh a duh tawh baulo a, a nupui chhungte lamhnai chuan ‘hetiang teh tawp tur a nilo a sin, hmeichhei leh palchhiah tih nak lain nangte phei chu a mah a naupang bawk si a, man leh mual em pawh pek hma a inthen leh te chu a mawi pawh a mawilo e a’ tiin thian takin an ti ti pui zauh zauh thin a. Anil ah chuan ‘in thusawi chu ka hai bik hauhlo, nunphung pangngaiin nung sela kohl oh thu awm tur a nilo ngei alawm, kan inneih hnu a kan inchhung a nundanah hian min lengdarh chiah a tum ni berin ka hria, amah vang a ka chhungte rilru natna hi ka enliam tawh dawn lo, kan fa chu kan enkawl mai ang’ tiin a chhan chuan tihngaihna hrelo in thudang an pakai leh nge nge thian. Rinzuali pa lah khatia a mah vang a leido nei tep leh tlangvalte hial ensan a nih takah chuan a bawlpu nihna chu hlihsakin a aiah Zahuata mi tlawmngai leh fiamthu duh, tihtawh lam atchilh tlut mai chu an dah in a ni chuan a hna a tlin ngaing mai bawk si a, Rinzualite chhungte hun reilo te chhungin an chetdan huatthlala tak vangin khawtlangin an en hniam dawrh mai si a, chu chuan inchhung khurah inhauhna titamin hlimthawm chu a reh ta raih a. Rinzuali chuan a hmingchhiatna rilru chhe tak a thungrulh a tum a leiah mualphona chiah a hlawhchhuak ta a ni.

Lo tawk leh phawt tehse

. . . . . +++++++ . . . . .



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 3rd, 2019, 8:36 pm

PASÂLTHA SÂNGTUALA (Mampuia Pa)

BUNG – 180

Buhseng a hun meuh chuan buaina leh harsatna dang tawklo in Satlâk khuate pawh hlim tak a inlawmin buh chu an seng a, nula tlangval tam leh taima khua tih takah a hlawp chuan buh chu an seng dual dual a. Lo zau chuan an zo duak duak a, chutiang a hlawp a hnathawhna ah chuan tumah muang bik nih tum loin an bul a mite ai chak zawk nih ngei tumin theih tawkin an inel ru tham a, chu nun chuan mahni inrin tawkna neih tirin thiante ai a chak zawk an nihna chuan chapo silo in an nun a vawngin, midang puih duhna an neih tiring chu nun chu pasâltha leh val upate, Lal leh khawnbawl upate chuan an hmuin an nula tlangvalte nun chuan thlamuanna neih tirin, Satlâk an luahluh tirh a buaina in phaman zat zatte chu sawiin Lalnu Thanthuami lo fel zia leh patlin ziate, a khawnbawl upa leh tlangvalte a hmanthiam zia si te sawiin thlaeng hnuaiah chuan Lal Chhawnthiaua leh a khawnbawl upate chu an ti ti in zanlai arkhuan thleng chuan an phul hlut thin a. An tlangvalte nun siamtu ber pasâltha Sângtuala te unau hming chu a ruk chuan an sawi bang theilo a ni. Satlâk khawtlangin a rual a buh seng a an ri hluai thin lo awt ve ngawih ngawihtu Rinzualite chhung chuan hrehawm an tiin thlahhma lah an lo la mang silo a, thenawmte buh sengna ah pur chaw in han feh dawn sela an inkiltawh vet um hrang bawk si a. An mang chu a ang ru kher mai, an chapo na chuan mihnuai a inphah chu duhlo na chuan thinrimna siamin pa ber chuan zu ngawt chu buaipuiin a thle bar reng a. Bawlpu hlui nita te chhung khawsa zia chuan Lal Chhawnthiaua leh a khawnbawl upate lu chu a tihai ru zawk hial a, remruatna han neihpui ngawt lah an duh bik silo a.
Pasâltha Laiawrhate lo lam chu zawh nan hman tumin val upa leh pasâlthate chuan ruahmanna an siamin, Lal leh khawnbawl upate uapna hnuaiah lo zawh runpui siam chu an tum a. Pasâltha leh val upate ruahman dan an hriat chuan an ni pawh chuan phur takin kal ngei tumin zan lamah pawh hlim tak chuan sawiin ti ti dang reng a leng lo, khawnbawl upate chuan an vanglai sawiin zanlai arkhuan chuan ui tak chungin an an tin ta hram a. A tukah chuan Lal Chhawnthiaua leh a khawnbawl upate chu lungdawh thleng hmasa pawl niin hlim tak a khi sangin an lo chhawn a, Lal leh khawnbawl upate lungdawh an awm thu chuan Satlâk khua chu fanchhuakin thleng tlai bik nih hlauin puantlang phe dawr dawrin an kal dawr dawr a. Pasâltha Sukthanga chuan ‘Khuanu zahngai leh malsawmna in Satlâk chuan a vanglai a tawngchho mek zel a, he hun a tha leh zung thawhve thei a kan awm hi kan vannei hle a ni, Satlâk khua a dinchhung chuan nang leh kei hi kan awm reng dawn a ni tih hre rengin kan nun theih tawpin i fimkhur reng ang aw, khai ule Satlâk zamlo khua kan ni ngai e’ tiin hmalam pan chuan a hank al a, nula tlangvalte chuan hlim tak a haw haw in lo lamah chuan an ri thla ta sung sung a. Kawngtluan chuan hlim takin an ri thla ta rum rum a. Lo an thlen chuan Satlâk thalaite chu hlim tak a khek rawih rawih chung chuan an hmabak hlen tum chuan an in lek chhuak ta a. Khawnbawl upa leh Lalte chuan awl mai tum loin buh parlak sa fasuarah chuan an lo chil su lawp lawp a, tlangvalte chuan Lal leh khawnbawl upate chu chhawk tum mahse an duh tlat loh vangin hlim tak chuan tlangvalte chuan an thlir ve ta ngawt a.

Lal Chhawnthiaua chuan chutia hna a thawk leh chu nuam a tiin tlangvalte mak tih khawp chuan a hmuhnawm kher mai. Lal leh khawnbawl upate chuan nui sang leh tha tho tak chuan buh chu an chil su laih laih reng a. Naurual zanriah chhum hun a zo thei an nih vang chuan ‘hei kan hma a laklawh si a, riltam chhe zual kana wm loh chuan kan zo law law mai dawn mi ?’ Lalin a tih chuan phur tak chuan an lo aw dualin zawh hma tum chuan thapui chhuah chuan an tang sauh sauh a, chutia tlangvalte an tan leh sauh chuan an hna pawh a hma ai chuan sawtin a kaw duai duai a, reilo teah zain buh ngah zual silai zawn in sawm chuang awmin, Satlâk khua an luah tirh a an thlawhhma lak hmasak ber a chutiang zat an neih vang chuan an hlim a zual a, Rinzuali te chhung tih loh chuan hawpkhawp nei vekin an ni erawh chu an pa ram lam kal hman a nih vak loh vang khan thlawhhma an la zau lo bawk a, chutia thlawhhma an zawh hma takah chuan chhunchaw fak a tlai deuh tawh vang chuan siam zuiin an ei zawh chuan hawn nan a la hma deuh bawk a. Lal Chhawnthiaua chu lo dingin hlim tih hriat tak chuan a khi sang a ‘kan khua hi khuanu hian min hualhimin muanna hnuaiah rahbi thar kai turin hma kan sawn mek a ni, tiang a kan awmna chhan chu kan in lungrualna rah liau liau a ni a, chu kan chakna ber chu tawp mai lo a zahawmna nen a kal tur chuan kan in duhsak tawn sauh sauh tur a ni, mahni tan a pawi tur a nih loh vang a thilthalo enliam chuan kan hun a thim thuai dawn tih hriain, tumai pawhin kan ko a tla tawh phawt chu hlen theuh kan tum zel dawn nia’ tiin a han sawi a. Chulai thlawhhma ruam khawk rum rum chuan an haw haw ruih ruih a, Lal chuan sawi zawmin ‘hei kan hna chu tluang takin kan zo ta der a, tunah chuan thil pakhat chiah kan bak ta a ni, tunah chuan kei ka ni inti chinte chu kan inbuan tur a ni’ a tih meuh chuan tlangvalte thaza leh lawm chu an inbin zawk zawk a. A intum awm deuh rawlthar atang tanin an in buan chho zel a, tlangval dangte chu infiamna a nih angin an in fiam deuh mai mai a. Chungliana leh Thûamkunga chu inbuan lehin Chungliana in thlahdah chu Thûamkunga chuan a bin zi zawt a, zi thalh thalhin Chungliana chun lo thoin Thûamkunga inrin hma chuan a bin zi ve leh zawt a, thawhthuimna an tan leh zet zawng tha tawpin an in bei leh ta. An ni pahnih chu an inhneh bawk a tlangvalte chuan an hual tuai tuai a, a tawpah chuan an unau tluk thak a, an chhunzawm leh tur chu Lal chuan ‘nangni pahnih ngawt zawng a hmuhnawm loh emai dawngawm teh u, khawnge nuam kan lo tawlve tawh a nge’ a tih takah chuan hreh takin buan mual chu an chhuahsan ta.

Lal Chhawnthiaua chuan ‘khawnge kan pasâltha Lianmana kha lo chhuak tehse, Lal buan tur nilo in thian a buan tih a hriat loh chuan a vanduai hle dawn a ni’ tiin a nui sang a. Pasâltha Lianmana pawh chuan ‘ni ang hmiang buan mualah zawng Lal an awm ngailo a lawm’ tiin puanven sawi nghet sauh sauhin a lo pen lut a, an mahni an in tia in an pumrua a tha bawk a chakzawk tur chu an in rin siak luih luih a. Thûamkunga chuan ‘khawnge lo tawlhhnung deuh teh u’ tiin tlangvalte chu thing tlawn lain a nawr hnung nawk nawk a, ring tak a au that thatin ‘tunah tan rawh u’ a tih chuan an ni pahnih pawh chu tha tawp a tangin an han in buan mai chu hmuhnawm tak a ni, Lal Chhawnthiaua chu a chak zawkah tangin pasâltha Sângtuala chuan an thiante infiam chu fasuar atang chuan vaibel fawp hlat hlat chung chuan a lo thlir vang vang a. Tlangvalte an infiam zawh chuan ‘nang kha lo kal teh thiante ralthlir hi ka duh zawng a ni hauh lo a nia’ tiin Lal chuan nui chungin Pasâltha Sângtuala chu a hui zauh zauh a. Nui var var chungin ‘kei chu in inbuan ka hmuh khan ka duh tawk viau asin’ tiin hreh hmel tak chuan buan mual lamah chuan a kal nui sang a. Thûamkunga chuan ‘Sânghnap, engvang a lo relhruk tum nge I nih, khaw maw I vaibel chu ka lo zuk chhawk rih ang che’ tih pahin a vaibel chu a pawh thlak sak lawp a. Lal Chhawnthiaua chuan ‘ka tlangvalte zingah min bei tawkin awm emaw tiin ka lo ngaihtuah rei tawh a, vawiin hi fiahna a ni tih hria ula a tha a nge’ tiin a puan chu a veng nget mawlh lawmh a. Pu Tawnliana chuan ‘ka fapa zam hlek suh, infiamna ah Lal leh khawnbawl upa an awm lo a nia’ tiin a fapa chu nui sang chungin a lo fuih a. Khawnbawl upa dangte pawh chuan ‘Sângte tang hle tak teh, kan Lal hian chak ber nih a hauh zawngin khual buanchak kan neih hunah kan zam ru lutuk palh a nge’ tiin an nui hau hlawm a. Lal Chhawnthuaia chuan ‘ka pasâltha I theihtawp han chhuah teh aw, ka in enfiah duh a nia’ tiin a fuih sauh sauh a. Pasâltha Sângtuala chuan ‘Lal meuhin chutiang a min tih chuan theihtawp chu kan chhuah poh a niang chu’ tiin a puan chu a veng nghat ve sauh sauh a. Lal chuan puantlang a tham pahin ‘ka nau vawiin hian Lal i buanlo tih hre nawn ang che aw’ tiin a han au leh that that a, buk nghat pahin ‘awle theihtawp in aw niang’ tiin Lal puan tlangah chuan a tham ve a. Thûamkunga chuan ‘tunah tan rawh ule’ ti thatin an ni chu an in elh ta zak zak a, an in daikhal in an thiam tin chu chhuahin an innawr zak zak rengin Lal chuan chianglo ruaiin a chawi kang zauh a.

Lal chuan ‘e heu kan pasâltha chuan tha a chhuah ngam na nge’ tiin a nau chu a au that that a. Nui var varin ‘kha chu aitechhin a nih kha, tanghle rawh’ tiin pasâltha Sângtuala chu a nui var var a. Thawhnihna an tan leh chu an thatawp an chhuah tih hriat tak chuan an hnungzang chu artui tia tia chuan a pawngkual zawt zawt a. Pasâltha Sângtuala chuan ‘kha aw i tang tak tak ang aw’ ti a au thatin Lal chu khup chen zet a chawi kang zawk a. Lal chuan ‘khawnge tui kha han la ula, ka nau hi ko chhuak zawkin kan bin teh ang’ tiin a then suk suk a, tui an in zawh chuan ‘vawiin zet zawng a van nuam tak em, khati lehchen kan lo insum tawh tih theihna hun kan nei a nia’ tih pahin buanmual chu a pan nghal a. Nui var varin ‘khawnge kan nau kha lo chhuak tehse, insumna nei hauhlo in thatawp chhuah ang aw’ tih pahin a ban chu a vai thuak thuak a. An han inman leh chu Lal chuan theih tawp chhuahin a thiam chitin chhuah nen chuan bei mahse a hma a tlangval naupang tak chu a chawi theih hauh lo, a tawpah chuan a kum tak zawk leh than hmang ngailo Lal chuan thaw hlawp hlawpin ‘kan vawiin hun hman chu tawk rawhse, kan nau hi kei ang duang khin chin a ni hauhlo theih tawp chhuah mah ila ka hah thlawn mai a ni’ tiin tui a chu a khiat khawlh khawlh a. Pasâltha Lianmana chuan ‘kei pawhin Lal hi ka hnehlo a nia, pumrua a midang chhingzo ni mah suhse a lo mak a ni’ tiin a ngaihtuah rauh rauh a. Khua a lo tlai chuan hawn zai an rel ta hlawm a, an Lal chakzia te chu sawiin Lal dangte nen in beihna pawh awm se a ngaihtuah awm loh zia an hriat chuan an thla a muang ru kher mai. Pasâltha Sângtuala chu a ni mak an tiin hawn kawng tluan chuan an ti ti tui ber a ni. Thûamkunga leh Chungliana inhneh tawk dante chu sawiin an ni pahnih chu remchang a chak zawk zawn ngei nise tiin val upate hnenah chuan an sawi zauh zauh hlawm a.

Buhseng zoin an beisei ang hawpkhawp an thar deuh vek vang chuan Satlâk khua chu an hlimin an lawm hlawm khawp mai, chutia mipui nawlpui an lawm lai chuan Rinzuali te chhung chuan pasâltha Laiawrha chu hmuin ‘hei thlawhhma in lak tirh lai khan kan fanu pawhin tha tak tak a thawhve tho a, buh thar hi a chanve tal chu kan nei tur a niang’ tiin Rinzuali nu chuan zak map lo in pasâltha Laiawrha chu zingah a va thawng a. Chu thu chuan pasâltha Laiawrha chu a ti thinrim zakin ‘nangni chhungkaw hrawkhrawl zia em em hi, mipa chu nila ka lawk thlu nghal taw pang che mawle, tunah chhuak rang mai rawh’ tiin a vin that that a. Pasâltha Laiawrha te thenawm a mite chuan chutia zing thang a thinrim thawmah chuan an kal vat a, thuawm zia an hriat chuan an thenawm te pawh chuan ‘in va han ti mak ve mawle, zahloh leh tanghma haiah chin tawk neih awm tak a nih vein en, zahna hi in bulah chuan a zak zawk ta ve ang a’ tiin an lo tih ve tak sap sapah chuan thinrim ang bawrh bawrhin a chhuahsan ta a. Pu Tawnlianan chu thu a hriat chuan a fapa chu koin ‘hei khuanu zarah keini chuan buh hawpkhawp chu kan nei reng alawm, kar a fa an awm chinah phei chuan thuchhia neih tur a nilo, kan dam a nga buhte chu a ai tam kan thar leh mai dawn alawm’ tiin a han sawi a. Thinrim tak a thaw hawkin ‘ka pa, khati lehchen kha kan fa lo piang tur vangin ka dawhin , ka farnu leh nagni ngei pawh in mittui a tla a nih kha, tunah chuan an duhang a awm tir ka tum hauhlo an duhang chu an hmu phiangsen hrep lo a nge’ tiin a vaibel dawn chu a seh rap rap a. Pu Tawnliana chuan ‘Rinzuali hi i duh tawhlo a nih tak zet chuan an phut ang chu kan pe mai tur a ni, khuanu malsawmna a ni zawk ngai e’ a tih tak tlatah chuan thinrim tak chuan ‘nang ka pa berin i tih tlat chuan i thu chu ka zawm a nge, khati lehchen kha rilru nâ in ka lo siam tawh si che u a’ a tih chuan, Pu Tawnliana chuan ‘tunah chuan ka fapa ka hmu kir leh ta, ka van lawm tak em’ tiin a ngawi ran a. A fapa melhin ‘Mama hetia in inthen leh takah chuan in saw luah reng a ngai ka van tilo ve, tlang ngaihah pawh a mawilo e a’ tiin a han sawi zui leh sap sap a. Pasâltha Sângtuala chuan ‘ka u kei pawh ka pa sawi ang chu nise a thain ka hria, kawppui nei a awm hran a nih hma chuan chhungkaw awm khawm tluk hi a awmin ka hrelo’ tiin a lo tuihnih ve zauh a. Pasâltha Laiawrha chuan ‘nia kei pawh nu leh pa hlat a awm hi tha ka ti bik hauh lo, mahse in saksa han dah tawp mai chu a va uihawm ve mawle’ tiin a lo chhang tha ve mai a. Pi Chhuanthangi chuan ‘tunah chuan kan chhungkua kan kim leh dawn ta e, ka va lawm tak em’ tiin a lo inrawlh ve zawk a. Pu Tawnliana chuan ‘zanin ah thawmhnaw chu in la mai dawn nia, keiin Lal leh khawnbawl upate ka lo hrilh dawn nia’ tiin a sawi charh charh a. Tukthuan chu hlim tak a kilin pu Tawnliana te chhung pawh tunah chuan an hlim tlang leh ta a.

Lalin bawlpu hluite awmdan a hriat chuan a thinrim chu a meng tal tapin a ngawi vang vang a, thinrim tak a thawk huai pahin ‘kan mihringte chu an va han tenawm famkim tak em, hetiang reng reng a mi hrawkhrawl hi ka la hrelo’ tiin a sawi zawi sup a. Lalnu Thanthuami pawh a thinrim ve khawp mai ‘hetiang khawp a mi pamham an ni tih hria ila, min lo zui malek tur a nia’ tiin a tawngchhuak ve ta hial a. Zan a khawnbawl upate an kim takah chuan pu Tawnliana chuan an chhungkaw thu tlukna chu sawiin a dam zawng a rilru pu tur chuan a thiante chu a ngen nghal bawk a. Lal Chhawnthiaua chuan ‘nangni chuan in ngaidam a ni thei, Lal ka nihna angin ka zilh hau ngei dawn a ni’ tiin a sawi zawi sap a, tlangau pa nang kan bawlpu hlui kha zu ko lawk teh tiin a sawi zui sap a. Bawlpu hlui nita chu lukai deuh phut chuan alo lut pai chhah chhah a, Lal hmel a thinrimna thuk tak a hmuh chuan a ruite chu rehin a dang a ro nghal huam huam a. Lal Chhawnthiaua chuan ‘khati chen ka bul hnai a i awm chhung zawng khan ilo inthup thei hle mai maw ? tunah chuan ka hredawn tan che niin ka hria i pawi khawih hnu hmanah tiang hian naupang engmah hrelo chu remchang a lak tumin i khawsa a nia, patling zahmawh thankin tih atan chuan a van zahthlak deuh ve, mihring rilru put dan hmang pawh a ni meuh maw ? kan tu lo piang hi malsawmna a ni a, nangni erawh chuan in sahmin tih puar nan hman in tum a nia, in bulah chuan zahna pawh a zak zawk ta ve ang’ tiin a hma a thu kun lap chu a chilh ta hrep a. Khawnbawl upate pawh chuan ‘Rinzuali pa in ngaihtuah chiang la a tha ang a, he tia naupang chhuanlam a hman ngawt mai zawng a zahthlak deuh lo maw ? kan tih awm tawk ti thin kan nia, nangni pawh inchin hre tan chuan mi hlauhawm in ni mai ang tih a va hlauhawm ve mawle’ tiin an lo tuihnih ve tliar tliar a.

Bawlpu hlui chu ngawi reng chuan a thu kun ngal reng a, a bengkawm lo sen deuh tal an hmuh chuan a rilru turawm pawh an hrethiam a. Thawpui lak halh pahin ‘dinhmun in a zir loh chuan duh ang hian a chet theih loh a nih hi, min ngaithiam hram teh u’ tiin a chhang zawi sap a. Lal Thawmliana chuan ‘in chet dan tenawm tak hi kan khawtlangin an chhawm ang tih ka hlau tak zet a ni, tunah hian ka khawnbawl upa leh a chhungte chuan engmah an sawi hauhlo, an fa lo piang tur tan chuan engkim an huam zawk em em a ni, tun hnuah engpawh thil thleng mak deuh innei leh a nih vaih chuan ka tih tur ka ti ngei ang, kawng engkimah fimkhur hle ang che u’ tiin a sawi zawi sup a. Thinur insum tih hriat takin ‘chhuak thuai mai teh i hmel ka hmu tui hrep lo e’ a han tih chuan bawlpu hlui chu kun ngal chungin Lalin atang chuan a chhuak ta zal zal a.


Kumhlui thlah nan aw, hun hlimawm tak hmang theuh turin duhsakna ka hlan a che u

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 5th, 2019, 5:22 pm

PASÂLTHA SÂNGTUALA (Mampuia Pa)

BUNG – 181

Satlâk khuate pawh chuan vahsan lak pawh an zo fel tawhin, furpui hma a buh thlen hman ngei tum chuan buh chhekin an phe leh ta sang sang a. Thawkmawh deuhte chuan Pasâltha Sângtualate thianzaho chu lawmah neihin a khawpum chuan an inlawm a ni leh ta hawt a, an ni thianzaho lah chu fiamthu duh tih takah nileng chuan an infiamna chu nuih puiin phur takin an thawk nileng mai thin a. Rawltharte chuan an pasâlthate mit lak tum ranin an theihna lantir ngei tumin an theih tawk an chhuah in an thawk ve tauh tauh a, an phurna chuan chakna pein tha tho tak chuan an thawk tauh tauh a, an beisei ai rangin buh chhek pawh an zo leh ta a. Chapchar awllen lai niin naupangte chuan an theih tawk thâng kamin ram lamah an liam dal dal zel a. Naupang thenkhat chuan aite khawrhin lui dungah chuan an ri rai rai zel a. Pasâltha Sângtuala te thianzaho pawh chuan ramchhuah tumin funpui an er tluk tluk a. Rinmawia chuan a nauteho a hmu leh thei leh an inzui leh thei chu a lawmin a hlim zia chu a naute pawh chuan an hai bik hauh lo. Thûamkunga chuan Chungliana chu fiam bawmah neihin a lunglen tur zia mawlh chuan a fiam thin, a ni Chungliana lunglen lah chu sawi lang hrehin a eng emaw deuh ah a teu hlar zel a, chutia a thinrim teu hlar chu Thûamkunga chuan fiam zawmin an in chai hi a ni thaw thang thin. Rinmawia chuan ‘Thûam thian insum ve deuh teh aw, kan thian a lungleng hi a awm viau a nia, hmeichhe ngaihtuah ngailo in a vawikhat ngaihtuahnaah tiang hian a awm a, fiam nan hmang mailo in kana wm zawk tur a ni ngai’ a tih takah chuan Thûamkunga chuan a fiam ngam ta lo a, Chungliana pawhin nuam a tiin a lunglen chu hnemin chutia thiante ngaihtuah bik nih duh lohna chuan Chungliana chu rilru lak penna tur ngaihtuah tirin a thiante hriat mang loh chuan an veng nula fel leh mawng zang Lawmkungi chu zingah a hmu ru zauh zauh a.

Satlâk khuate lungmuang leh thlamuang a an rik laih laih lai chuan zankhat chu an an khaw sial intawm sepui no nei thar chu lo hawng lo a, senô sen chuan pui dang hnute chu hnek tum mahse an lo duh loin an tauh leng lawp thin a. Tlai dang anglo takin ram lam hawi chuan an phawk hra hlawm a. Lal Chhawnthiaua chuan an se awmdan danglam tak chu hmuin a han bel chiang a, an sepui no chuan Lal chu pan chau chau in a puan chu tuihal tih hriat tak chuan a nul thuak thuak a, chu setê awm dan chuan Lal zaidam tak thin chu ti thawkin hmanhmawh takin inah a chho thuai a. Tlangau pa chu naupang koh tirin a ni pawh a lo thlengt huai a. Thaw hlawp hlawpin ‘Lalpa engthil nge nita’ tiin a hma a Lal silai enfel mawlh mawlh chu a han zawt a. Thinrim aw bul hmuk hian ‘kan seno nei thar kha a lo hawnglo a, a zawng tur tlangval sawm vel lo va hrilh teh’ tiin a sawi bul hmuk a. Tlangau pa chu hmanhmawh tak chuan chhuak thuaiin sehuang lam chu a melh thuak a, senô tuihal chuan sepui dang hnute in pe lai chu a lo thlir dauh dauh a. Chu sete chuan hnute hnek chak tih hriat takin a lei chuan a hmui chu a hawl kual zak zak a, chu sete awmdan hmutu tlangau pa pawh chu kal mai lo chuan a ding deuh reng a. Lal Chhawnthiauan tlangau pa ding a hmuh chuan ‘hmanhmawh t ache mawle’ tiin a lo hrawk tuar tuar a. Tlangau pa chuan puan tlang a mittui hruk zauh pahin ‘Lalpa ka kal nghal e’ tiin a chhang lawi rat a. Lalnu chuan a pasâl thinur dan a hmuh chuan ‘insum deuh la mawle, eng emaw deuh a thinrim rawl surai nen chuan zahawmna a kiam ngai e’ tiin a lo khak hlak a. Lal Chhawnthiaua chuan chhangloin ngawi rengin silai leh a mu chu en fel mawlh mawlhin ‘Mama pa i kalve her a ngai em mi ? kan tlangvalte hian an ching fel thei tho lo maw ? tiin a Lalnu Thanthûami chuan a sawi zawm a. La Chhawnthiaua chuan ‘kan tlangvalte chuan an chingfel thei ngei ang, ka chhuah vah lohna a rei tawh em a in palharh ka duh a ni’ a tih chuan Lalnu Thanthûami chuan ‘i tih tlat chuan va kal ve la ti nia, kan pasâlthate ho pawn nuam an ti phian mai tur asin’ tiin a pasâl lungawi chiah lo chu hrethiam takin a chhang tha ve mai bawk a. Sehuang en lo lut Lalnu Thanthûami pawh chuan senô khawsa zia a hmuh chuan ngawi rengin a mittui a hru zauh zauh a. A rilru chuan a fapa naupang chumchiam mai chu senô chan ang chan in a mittui chu a ko chhuak lo theilo a ni. A fapa tawng zirti mai chuan a nu mittui tla chu hmuin ngaihthalo zetin a nu chu a en hauin ‘nu engti nge i tah, i mitmim a mi ? tiin a han zawt zui a. Langleuh Lalnu hlui nita Buangthangi chuan Lal fapa naupang chum buang chu pawm sawn vatin ‘i nu khan a hmai va phih rawhse aw, hawh ka lo paw lum ang che’ tiin a puakpuan a chuh tharh a.

Tlanagvalten tlangau pa zawlbuk lam pan a hmanhmawh tak a kal an hmuh chuan an zui thla thuai a, tlangau pa thu ken an hriat chuan Satlâk tlangvalte chu hmanraw chuhin an tlan hawng thuai hlawm a, reilo teah hmanraw famkim nen an lo lang thuai a. Lal mual lam a tlangvalte kal thawm an hriat chuan thu bul hrelo pawh chuan hmanraw famkim nen an zui hul hul a, reilo teah Satlâk Lal mualah chuan tlangvalte chu an ding ther fur a, val upa leh pasâlthate chu Lalin ah chuan lutin leihkatlangsangah chuan Lal Chhawnthuaia chu iptepui leh silai nen a lo chhuak an hmuh chuan ‘eng tak chu thleng ang maw’ tiin an ngawi thup a. Lal chuan tlangvalte chu melhin ‘vawiin kan seno nei thar ram tla a lo hawnglo a, kut a tuar a nih a rinawm khawp mai, khawchin leh nau chin hriat a nilo ang in engnge kan tawh dawn tih lah hriat ni suh, mi tlem a zawngin kan ran sulk an zui dawn a, tlangval sawmhnih emaw han in thlang fel ula ka ho in kan thawk chhuak ang’ tiin a sawi hul hak a. Tlangvalte chuan kal theuh tumin ‘kei ka kal ang’ tiin an thum ta mur mur a, pasâltha Lianmana chuan ‘ka kawh loh zawng te kha chu tlawmngaiin khua ah chanchin ngaihvenin lo awm ula, râlveng indah pawh a suallo mai thei, fimkhur luat a awm lo e’ tiin pasâltha Sângtuala te thianzaho leh tlangval sawm dangte chu nah an kawk a. Rawlthar Rumliana te thianzaho chuan ‘pasâltha min ngaithiam la, inhnung kan lo zui ve ang kan thianzaho hian, kan ti khawmuang hauhlo ang che u’ tin an thianzaho chuan an lo pen chhuak nghalin thâl leh iptepui nen an lo pen chhuak a. Thanchhinga te thianzaho chun lo finve in chung rawltharte in zirna pek hun tak han hnial thlak thak chu hrehin pasâltha Lianmana chuan a mitmeiin Lal chu a han rawn a. Lal chuang chung rawltharte chu melh vang vangin a bu nghut a. Pasâltha Lianmana chuan ‘aw le kan naute tih loh kha chuan khaw venhim lam hi kan thawk tur a ni ang’ a tih takah chuan pasâltha leh val upate chuan tlangvalte chu an chan lam tur relin an râlveng tur pawh reilo teah an awm kim tat hap a. Satlâk tlangvalte khawsa zia Langleuh Lal fapa Buangthanga leh a khuaten an hmuh chuan an ngaisangin mak an ti zawk kher mai. Mahni chanpual hlen ngei tumin iptepui a bapui chhum hmin akin meichher nen Satlâk Lal Chhawnthiaua leh a pasâlthate chuan se tlatna lam chu panin zanriah ei hun dawnah chuan hmanhmawh takin an liam ta sung sung a.

An kal dawn a senô hnute tui ngai a tei tarh tarh mitthlain hmanhmawh leh thinur ru takin an liam a, ngawi reng a kalin se hnu chu an chhui let zar zar a. Mual eng emaw zat an kân hnu chuan phul rai hmun tlakna chu an thleng a, thal vaekchar lai tih takah sehnu a lan loh bakah khua a lo thim ti tih tawh bawk nen Lal Chhawnthiaua chuan ‘hetiang a nih chuan sehnu chhui a theih loh a ni tawh mai a, insem darh ila tumah tlat fal lutuk loh erawh tum tur a ni, thawm awmna lamah kan pan khawm dawn nia’ a tih chuan mi pathum a insem darhin an kal hrang ta hlawm a, tuibur hmuamda zet an vahdarh hnu chuan silai puak khawk raih raih hriain thawm awmna lam pan chuan an tlan khawm thuai a, ruam rai deuh an thlen dawn chuan sapui rum thawm chu Lal Chhawnthiaua te chuan hriain ‘tlangvaltu u zam hauh lo leh fimkhur takin aw’ ti a fuih that that pah chuan ruamah chuan tim hauh lo in an tlan thla nghal hlawk hlawk a. Inchhung tia vel Zawl kin tawpah sepui ruang chu a lo let ngat a, sepui ruang atang hlam khat emaw lekah chuan tlangval pathum in si thap hian chempui humin an lo ding khawp thap bawk a. Sapui leh mihring karah chuan hlamhnih lo liam a tla lo ang tih chuan inring takin an lo in melh thap a, chutia thawm dang lo awm chu keipui chuan ngaitheilo tih hriat tak chuan a hma ai mah a ring chuan a rum leh ta hem hem a. Sakei rumah chuan lei chu a nghawr dur dur hian a hriat hial a ni, dawihzep tan chuan zunfep thlauh fap fap thamna tlat a ni. Lal Chhawnthiaua chuan ‘tuman silai lek loh tur, a theih chuan kuttum ngatin kan chumhlum tur a ni’ tih pahin a silai chu a tung tha sawk sawk a, kut lawng chuan sakei rum hem hem lam chu a pan ta hmiah hmiah a. Satlâk tlangvate pawh chuan Lal in hliam a tuar ang tih hlauin Lal hma a din tum chuan an kal thuai hlawm a.

A lam pan a lo kalte chuan keipui thinrim a ti zual tih hriat tak chuan ring tak a huk thawt pahin keipui chuan a zuan nghal zawk a, a mi zuante chuan an vawikhat beihna ni miau heklo le, sir lam a awm sawn zauh pahin chempui chuan keipui zuang kang lai chu an sat thum dawp hlawm a. Keipui hliam thinur pawh a tawp khawk tih hriat takin mei vai zauh zauh pahin a rum hum hum reng a, keipui hliam chuan a hnung lam a hmawlhte tliak ri hlek hria a hawi zauh chuan a tlai tih hria a insiam rem tur chu thachak tak hian a phih huk tuar a. Keipui inher tur bekbawr ah chuan ke chang tak hian dimna tel hauhlo in a tlawh her sawkin keipui chu a huk thawt a, thing mal tia zet chu tlan hualin keipui mei chu nghet takin pasâltha Sângtuala leh Thûamkunga chuan an chelh bet a, keipui chuan tal chhuah ngei tumin a ban phak chin chu a hai khawk tawp tawp a. An bul vel a sava zan riakte pawh awm ngam loin an thlak darh ar ar a, Sapui thinrim huk dur dur leh patling infuih thawmin chulai ruam chu luahkhatin a khat tawk a thil thum dawp chuan a awm reng a. Lal Chhawnthiaua chuan ‘tu emaw khan a ke hma veilam kha lo vuan teh u’ tih tuar pahin sakei ke hma ding lamah chuan a man nghal chawt a. Keipui chuan Lal kut chu a lo ham thler ngal zawkin a ke hma chu pasâltha Laiawrha chuan a phih kak nghal rawkin, che theilo thinrim mitmeng sen rum chuan melh kualin a huk rum rum a. Lal Chhawnthiaua chuan ‘tlangvalte u dimna nei hauhlo khan lo tum dawt dawt rawh u, kan senô khawngaih thlakawm zia hre rengin aw’ tiin a fuih sauh sauh a. Chutia Lal a au hnu chuan Satlâk tlangvalte pawh lo thleng kimin a theih dan dan chuan an thâm pawp pawp a, sapui meuh pawh kar loah chauin tang leh tur awm tawhlo in a mu thaw suk suk ri ngawt a.

Lal Chhawnthiaua chuan kan sahliam hi a nungchung ngeiuin kan sawn hawng tur a ni tiin a han sawi a, tlangvalte chuan hlâng tur thingtuai satin karlo ah hlâng chu an peih thuai a, keipui hliam che theilo chu zawn sawnin an phuar ta mawlh mawlh a, Thûamkunga chuan ‘e he Lalpa, kan sahliam hian nô a hruai a va ni awm ve, a hnute tui a hawng thei tlat mai a’ tiin a sawi chul a, Sakei hnute an han sawr chuan a lo tang phian a lo ni a. Lal Chhawnthiaua pawh chuan ‘khai a a va zialo ve le, kan thinurna chauh hmuin kan lo che lutuk deuh emaw chu le’ tih chuar chuar pah in sakei hnute chu a sawr sak lehin ‘engtin nge kan tih tak ang le’ tiin a tlangvalte chu a melh hau a. Satlâk tlangvalte chuan ‘ramsa â an niin pawi an khawih an hrelo a ni a, chute a kar a nô hruai leh nghal chu a va mak ve aw’ tiin an lo chhawn ve tliar tliar a. Lal Chhawnthiaua chu ngawi vung vungin ‘kan sa hliam hi a la nung zo a ngem ? han en chiang teh reng ang u’ tih pahin sakei hliam chu an han bel chiang a, a nak a silai thawina deuh chauh chu hliam lang theiah a nei a lo ni a, Lal chuan ‘hetiang chauh a nih chuan a la dam zo mai turah ngai ila, kan senô chu kan la enkawl pui thei tho a lawm’ tiin sakei hliam chu chhuah a rawt a, an ngaihdan a dang hlawm kher mai, a tawpah chuan ‘Khuavangin beng lo chhu chhet sela, hetia kan duh a kan man mai theih a nih vang hian, kan pawi a lo sawi leh a nih ngat chuan kut kan sum tawh bik lo a nga ni mai, sapui chuan rilru pawh a nei an tia lawm’ a tih takah chuan sakei hlâng a an tawn beh tawh chu an din hual taih a. Lal Chhawnthiaua chuan ‘nang ramngaw Lal i ni e, kei pawh Satlâk Lal ka nih hi, ka thusawi ngun takin ngaithla la zawm ang che, kan pawi hawl zawngin awm tawh hauh suh, nang leh i note chuan mihring pawi in sawi tawh tur a nilo, tunah hian that akin kan chhuah leh dawn che a, ka khaw ram I chhuahsan loh pawhin ka kawng dalin awm tawh hauh suh ang che’ tiin sakei mit takah melhin mihring biak takin a be mawlh mawlh a, thu a sawi zawh chuan chempui chu lek chhuak furin ‘tunah kan chhuah dawn che a, that akin kal vang van gang che’ tiin a tlangvalte hnenah chhuah turin thu a pe a, keipui tawnna an phelh chuan keipui chu a bawk deuh vung vung a, a mah zam hauhlo a melh thaptute chu a melh kual zawh chuan zawi muangin a tho tuih tuih a, mei khup zaiin ngawah chuan zawimuangin a lut ta a, sakei liam hnu chuan sepui ruang chu bel chiangin a dar tlem bak a la ei lo a, an han sawi khawm hnu chuan sepui ruang chu zawn hawng nisela, sakei tan chuan a bawp lehlam chu dah mai an relin an hlâng siamah chuan sepui ruang chu zawnin khaw lam chu zawi muang chuan an pan ta a.

Kal pah chuan tlangvalte chuan an tihsual an hlauh zia chu an zawi mam mam hlawm a, Lal chuan pasâlthate hnenah chuan ‘ni sarih chu khua a nunau kal chhuak reng reng chu mipa silai kengin veng hrih sela, kan sapui chetdan ngaichang turin mi sawm chuang indah reng ila a tha a nge’ a tih chuan pasâlthate pawh chuan pawm tih hriat takin an lo bu tliar tliar a. Khawchhung a mi thenkhatin an Lal chetdan an hrit chuan ‘kan Lalpa pawh chuan engnge maw a hriat ni, that nghal mai tur a nia, hetiangte chuan mihringte pawh a bei duh tawh mai awm a sin’ tiin an Lal leh pasâlthate chetdan chu an sel bawrh bawrh a. Lalin a khuate thusawi a hriat chuan ngai haw biklo in ‘sakei chite mihring tan hian an tangkai fo an tih hi maw, kan tihsual hlauh chuan kan thang chu a chhe viau ang chu’ tiin a ngaihtuah rauh rauh a. Lalnu Thanthûami chuan ‘nang ka pasal berin ngun tak a I ngaihtuah hnu a thu tlukna chu a sual hauhin ka ringlo, khuavang pawhin mal minsawm zawk daih ang’ tiin a pasal chu ring tawk takin a sawi zui ve hmaih a. Khawnbawl upate chuan an Lalte nupa tanrual thiam zia chu an ngaisang kher mai . . .


Naktukah zawimuang deuhin ka lo dahang ka ti a, remchan lohna a awm dawn avangin ka lo dah thut zawk mai (Nimin thleng khan kum thar ruai kan la theh tih kan sawi hram a nge )

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 8th, 2019, 5:12 pm

PASÂLTHA SÂNGTUALA ( Mampuia pa )

BUNG – 182

( vawiin hi ka u min chhangtu Ruattei Fanai piancham phaphak a ni a, a piancham lawmpui nan he ka thawnthu hi ka hlan e.
Ka u, hlim takin hun hmang zella, i pasal leh fate tan nu tha leh entawn tlak ni turin duhsakna ka hlan a che, i dam khua sei sela. Hlimna chuan hmuak zel che rawhse)

Lal Chhawnthiaua chuan alo sawi tawh angin Satlâk khaw ram kal tawh phawt chu mipa silai kengte venna hnuaiah an kal vek a, mi thenkhat chuan an Lal khawsak dan chu an hrethiamlo, tullo a tha chuang senna a nih zia mawlh chu a sawi hlawm a. Pa tawng duh thenkhat phei chuan ‘kan Lal hian kan nunna ai sakei nunna a ngai pawimawah zawk a ni, hetiang tur a ni lo’ tiin an sawi nasa hle a, val upa leh pasâlthate chuan chutiang a tawng sum karlo te chu zawlbukah ko in ‘engti zia nge tiang a tawng incheh mai chu le, kan Lal hian kan zaivai ai hian a tuar ngam tih chu in hriat vek tawh kha mawle, kan pi/pu chenah sapui zahngaih theih zia leh mihring tan an tangkai thin zia an sawi pawhin hre thin a ni lawm mi ? khuanu zarah kan tum a lum kan hlen theih loh ala awm lo, keini a tha thawh tur zawk mahin pawi kan tih loh chuan ngawi renga lo ngawih mai tur a ni’ tiin an zilh hlawm a, chutia tlangvalten an zilh takah chuan zak kun lapin zawlbuk chu an chhuahsan zal zal hlawm a. A ni reng tak a Satlâk valrualte chuan tu chungah pawh zah an ngaiin hrumzial râl lak a an zahngaihna chuan rah tha chhuahin tun thleng hian muangleiin an awm phah reng a ni.

Lal chu chhuat bih chuan a thu kun run rengin inchhung a mite chu melh a ‘khawnge ka nau Sângtea te thianzaho hi han ko thuai teh u, an nin tih ngaihna an hriat loh chuan hreh viau mah ila hnute tui châk a thih hun nghah tir ngawt zawng ka lainat emai’ tiin a sawi hlut a. Pasâltha Lianmana chuan ‘khawnge kan naute chu keiman kan zawng a nge’ tiin a chhuak vut a, reilo teah pasâltha Lianmana te chu Lal inah an inzui lut thuai a. Lalin an lak a beisei an hriat chuan an ni thianzaho chu an in melh thap a, an ngawih thap hnu chuan ‘khawinge ka rilru ang put tir turin sehuang chu pan ila’ tiin Thûamkunga chu a chhhuak vut a. Lal inchhung a mite chuan ‘engtin tak ti ang maw’ tiin an zui chhuak ve thuai a, sehuang lamah meichher nen Thûamkunga chu a kal hlawk hlawk a. A thiante beng bulah chuan a phun sup sup a, hmanhmawh takin Lal in lamah chuan tlan chho vutin mauchang no nen nui var varin alo thleng leh thuai a, seno nei thar bawk chu tlawh thoin a hnute chu a han sawr sak a, sepui lah chuan hnute sawr chu duh loin a ke chu a leng leh zawk thin a. Thûamkunga chuan a thiante melhin ‘engti zia a min puih tumlo a min thlir thup le, ka bin hma che u hian min lo pui vat ru’ tiin a thiante chu a hrawk khar khar a. Chungliana chuan ‘puih phal chi ni heklo che, in hmuhnawm em alawm’ tiin an nuih hawk hawk a. Thûamkunga chuan ‘nangni pui ka ngai awkawng lo e’ tih pahin sepui ke leng uih uih reng chu ‘nang hmelchhe rimchhe nu, i duh emaw duhlo emaw ka duh chu ka ti hlawhtling reng reng’ tih pahin sepui chu a tlawh sawn dawrh a, sepui hlau tlan chuan Thûamkunga ke a han rah sak zet zawng an thawm a na ta rem rem kher mai. val upa ten khap lo sela sehuang chu a ruak chiang khawp ang le.

Khawnbawl upate chuan ‘engti zia nge mawle an puih loh chu le’ tiin an lo ngaihtuah rauh rauh a, chutia an thlir thap lai chuan ‘kha Thûam thian, in nu chuan a va dim fa lua lo che em’ ti a pasâltha Sângtualan a fiam chuan an nuih ta tiah tiah a, Chungliana chu midangte ai uar chuan lei beng meuh chuan a nui lui a. Thûamkunga chuan ‘hmelpawng min nuih el khanglang suh’ tih pahin Chungliana lei beng lai chu a su thlu tawp a. Chungliana lah chuan thawh mai tumlo in ‘awi sepui mutpui a tum a, sepui thinrimin a ke a rahsak’ tiin a hma ai nuihza niawm tak chuan leiah a nui vir tawp tawp a. Lal leh khawnbawl upate pawh chuan an ni thianzaho infiam chu nui tha duh chiah lo chuan puantlang sehin an an thi dir char char hlawm a. Senô hnute tui chak chuan Thûamkunga na ti puan chu a nawr chang chang a, Chungliana chuan ‘Thûamhnap kha i lei rohlu kha lo hnek tir teh’ a han tih chuan tumah insum thei awmlo chuan an nui hawk hawk a. Lal leh khawnbawl upate nui thawm an hriat chuan tlangvalte chu inthiam loh hmel takin an inmelh thap a. An nuihza zualpui a reh chuan ‘khawnge ka rilru ang kan put pui teh ang’ tiin pasâltha Sângtuala chuan sepui no thihsan piah deuh a an thlun chu panin ‘nangmah mamawh tu saw tanpui hram teh aw’ tiin a phun sap sap a, a thlunna phelhin piah deuh ah a thlung hrangin a hnute chu a han chul sak a. Sepui no thihsan chu a hnute a lo tâng kher mai a hmeh deuh chuan a chik that that a, pasâltha Sângtuala chuan seno panin a chawi nawlh a. A sepui thlun hnung lamah dahin ‘thuawih deuhin awm rawh aw’ tiin sepui mitah tak chuan a melh ran a. Seno lah chuan a hma a hnute tâng tak chu a han hne dawn a, sepui chuan a ke chu a lo leng deuh awrh vangin a pai nawk a, pasâltha Sângtuala chuan ‘tha deuhin awm rawh ka tih chu mawle, thu i awihloh chuan i na viau ang’ tih pahin sepui khelah a ben sak pawpin a piah deuh a seno chu a han hnuk hnai a. Sepui chuan a ke chu vawihnih a leng leh mahse a hma a mi mitmeng thinrim lo sen deuh ram chu a hreve a ni chek a niang chu, seno chuan a hnute chu a hnek sak ta dek dek a. Pasâltha Sângtuala chuan ‘ti khan i note thih ta aiah lo enkawl ang che’ tiin sepui chu be sap sap a, seno in hnute a hnek duh tawk chuan pasâltha Sângtuala chuan seno chu sepui awr hnuaiah dahin seno chuan nêl takin a nek talh talh a, sepui pawh chuan chu seno khawngaih thlak tak chu a dinhmun a hriatpui a ni chek a niang chu, tuibur hmuamda velah chuan hnim duk dukin a liak ve ta hlup hlup a.

Pasâltha Sângtuala chetdan hmute chuan mak ti takin sial pahnih in liak hlup hlupte hlim tak a melhin ‘tunah chuan thil mak dang kan hmu leh ta, hawh ule kan rilru kaptu ber a fel ta alawm’ tiin hlim tak chuan Lalin lamah chuan an in zui chho diah diah a. Pu Tawnliana chuan a fapa khawsak dan a hmuh chuan a hlim kher mai, rante meuh pawhin a thu an awih chu mak a ti khawp mai. Zan mut hmun a a nupui bul a sawi hlan a nghakhlel kher mai, khawnbawl upa dangte pawh chuan pu Tawnliana zâru cheng chu an hrethiam ru in an nuih ru sak sak a. An pasâltha khawsa zia chu an ni pawh chuan chhuang takin ‘kan pasâltha zet chu a khawsa zia hmuh a nuam thin e, khatiang kha chu ka lo beisei hauh lo a sin’ tiin an sawi zui laih laih a. Lal Chhawnthiaua pawh chuan ‘zanin ka thil hmuh hi ka awih theih lo a ni, ka mi huat deuh chuan han sawi sela ka beng thlu nghal tawp ngei ang’ tiin a phun zui sup sup a. Khawnbawl upate tin hnu chuan Lal chuan a khat tawkin senô chu a en zauh zauh reng a, sepui bula thlamuang tak a bawk a hmuh chuan hlim tak a nui suk sukin thawm neilo chuan a chhohsan leh thin a.

Sepui mizia hmuh chakin khawnbawl upa leh val upate, pasâlthate pawh chu se huang bulah chuan an thu tuk pum thapin ti ti eng emaw sawiin an ti ti laih laih a. Lal Chhawnthiaua chuan ‘khawnge kan sepui hian ka lung a ti dam em mai, chi kan liah teh ang’ tiin chi chu a khat tawkin a liah hoh hoh reng a, tukthuan ei a hun chuan an tin ta hlawm a. Lal chuan sapui en zui tur chuan pasâltha Sângtualate thianzaho leh pasâltha Lianmana te chu a hrilh a, an ni chuan tukthuan ei kham hlim chuan sepui ruang an va hmuhna lam chu panin sekei hnu chu chhuiin an kal hlawm a, sapui chuan se ngaw rillam chu panin mihring tan hlauhawm a chet tumin an hrelo a, chhun chaw fak hun chuan ‘kan sapui chuan zah a ngai dawn a nih hmel a, keini pawhin va bawh buai lutuk a tul ber lo e’ pasâltha Lianmanan a tih chuan sa lam beiseiin ramvah lam an hawi ta, pasâltha Lianmana chuan ‘kan sapui hi a mizia thlak thut thei a nih vangin tlai lam nawk lutuk loh a fuh a rinawm, chuvangin a hma lam a innghah pan kan tum dawn nia’ tiin a sawi zawh chuan an vak darh ta sang sang hlawm a. sakhi pahnih kâpin khaw thim hma chuan lungdawh ah an awm far tawh a, sial an hawn kim leh kim loh naupangte zawtin an hawng kim tih an hriat chuan an ni pawh chu zawimuangin an hawng ve ta a.

. . . . . & & & & & . . . . . .

Bawlpu hlui Lamawii (a hming ka hmu zo leh ta lo)te nupa chu uai thla lam niin an pa vang a hnathawk lo a awm thin a lo nih bakah, a mah thatchhe tak a lo ni bawk nen a fanu Rinzuali nau no pawm chu ngeih ta heklo, inchhungah nuam a awm reng thei ta lo chu na tak tak a inhauh chang an ngahin, Rinzuala chuan a pa hnenah ‘ka pa nu leh pa thlazar hnuai a awm an thlahlel thin a ni ngai a, kei erawh zawng nuhrawn sual tak hrawn ang hlauh ka ni a, tuk zan tha lah kan nei tlem narawh e. Tiang hriam chuan khawtlangah pawh kan thang chhe lutuk dawn a, ka fapa pawh lo thang lian mahse nungchang tha a neiin ka ring niau lo e, thisen a in zawm nafam chu kan in lainatna a bang chuang lo ang, kan in pawh khi a la ruak reng a, bawiha pa biain harsatna min thlen loh chuan kan indang mai a nge’ tiin mittui tla zawih zawihin a pa hnenah a sawi a. A nupui awmdan a hmuh ve reng a vang chuan tihngaihna dang hre bik heklo le, hrehawm ti tak a thawpui lak halh pahin ‘ka duh dan leh ngaihdan hian kal thei ila chuan tiang rilru in pu bik hauhlo ang le i nu hi a lo rapthlak em a ni, hreh viau mah ila nuam i tih zawk na turah chuan ka danglo mai ang che’ tiin a hrehawm ti lutuk chu a aw a lawi rut a. Chutia an pafa an ti ti lai chuan pi Lamawii chuan ‘nangni pafa chuan min lo rel leh pek ang chu maw, rapthlak pafa lutuk mai’ tiin a lo phun lut nghal bawrh bawrh a. Pi Lamawii melh hrawk pahin ‘I hetih vang hi alawm i fanu pawhin hmeithai a tum chu, insum tumlo hian awmhmun ah i phaihnah hriam hlar a, pasalte thu zawm sawi loh, keite hliam ang hlar i nihna hian engtikah emaw chuan a la vaw let khawp ang che’ tiin a vin that that a. A nupui Lamawii lah chuan ‘nang ber hian a lawm pa dinhmun i luah zawh loh vang a chhungkaw dinhmun hian kan lam pan loin kan awm reng ang chu’ tiin a vin zui that that a. A pa thinrim tho zawk chelhbeh pahin ‘ka pa insum rawh, chhungkaw dinhmun tiang a nih tawh hnuhmanah a zahthlak thuah hnih emai’ a tih takah chuan a thinur takin sumhmun lamah a chhuak tau ta daih a.

Rinzuali chuan a pasal hlui nita pasâltha Laiawrha chu a ruahmna dan a hrih chuan pasâltha Laiawrha pawh a buai deuh nak a, a fapa hmakhua tur a ngaihtuah chuan ‘a va zialo ve le aw, nang berin tha i tih chuan i hma hun alawm le’ tiin a ngawi rauh rauh a. Rinzuali chuan a lo beisei ruk a fapa vang a pasâltha Laiawrhan a fin duh a lo rin ruk chu beisei tur a awm lo tih a hriat chuan an inneih lai a lo awm thalo chu a inchhirin ban a pel tak meuh meuh a ni. Pasâltha Laiawrha chuan Rinzuali thilsawi a chhungte a hrilh chuan ‘Mama tlang takin sawi rawt ila, inkar a fa a lo awm tawh si avangte hian rilru tlang takin sawi la a tha hle mai’ tiin a han sawi charh charh a. Pasâltha Laiawrha chuan ‘dik tak chuan khatiang khawp khan kan chungah rilru thalo an pu a, tun a an dinhmun a that loh hnu a awm that tum te chu a rin leh duap emai, neih ngam chi ni chai heklo le, kan fa erawh pa ka nihna ang takin ka mawhphurh a ni e’ a ti a. Pu Tawnliana chuan ‘nupa kar thu chu ngun tak a ngaihtuah ngai a nia, kan thinurna dahtha a thil sawikhawm a ngai a ni. kan bulah duhlo ang a insawi a, an inhrik ang mai a in khawsa leh a nih chuan mit kan meng ngam dawnlo tih pawh hriat a tha ang, in duh reng chung kan pawh then pawh inni lo tih theihnghilh hauh suh ang che’ a pan a tih chuan pasâltha Laiawrha chuan, a chetdan a a chhungte lungdam loh zia leh nupa kar a inrawlh an hreh si ziate hriain a inthiamlo ru kher mai. A chhungte melh hrek hrek pahin ‘kan hun kal tawh ah khan in rilru tih natna tam tak ka nei tih ka hria, in natna ang kha thlennawn tir ka tum tawhlo a ni, nupa kar a hmangaihna leh thisen a in zawmna awmzia ka hre chiang tawh e, in rilru ka tihnat ang kha thlennawn tir ka tum tawh hauh lo’ tiin a han sawi sap sap a.

Pi Chhuanthangi chuan ‘Mama ka van lawm tak em, kawppui kan neih vang a chhungte thlauhthlak hi tih hauh loh tur a ni. Kan chhungkua kan dah pawimawh ber ang a, kan dinhmunin a zir loh chuan nu leh pa leh chhungte pawh enliamna chen kan neih a ngai, a tawpkhawk ah erawh chuan kan theihna kan ui tur a nilo’ tiin a lo tuihnih ve charh charh a. Pu Tawnliana chuan ‘hei kan fate ho hriat reng tur chu i nu sawi tawh ang khan, kan chhungkua hi kan ngai pawimawh ber tur a ni. Mi chungah englai pawhin rilru leh ngaihtuahna tha tak kan pu hmasa ber tur a ni, kan theihna leh thiamna hma chhuanin mi sakhi thinglawn arh reng tur a nilo, nun tlawm tak neih hian mi a hnehin, kan nakin hunah pawh malsawmna a chang thin a ni. Mi chung a rilru tha put loh chuan an lakah thla a ngam loin, kan lakah min muanna an hmu thin lo a ni, Khuanun zah ngai sela in damkhua a sei ang a, mahni inthiam lohna tur a khawsak chin loh tur a ni, mi pakhat awmherh vangin thlahte thleng a mi hmuh mawh nihna a ni tih theihnghilh hauh suh ang che u’ tiin a sawi charh charh a. Tlangval leng tur thawm alo awm takah chuan ‘khawnge Lal in lamah ka han chuang kai a nge’ tiin a chhuahsan ta nghal a.

Zawlbuk lam pan a an kal pah chuan ‘ka u, I chunga thilthleng hi pawi ka tih pui khawp mai che, Bawiha chu damte in lo seilian turah ngai ila, keini unau kan awm chhung chuan fahrah nun chu a tem hauh lo ang’ tiin a hnem sap sap a. Lawm tak a thawk huai pahin ‘ka nau zawk mah nila, u zawk ang maiin min hrethiam thin a ka lawm lutuk. Min bum chiang em a ni’ tiin a ngawi ta daih a. Thûamkunga te in an thlen chuan ‘ka u kan pensan lawk ang che aw’ tiin a pen san ta a. Pasâltha Sângtuala a thu fel chauh tihin Mualkunga pawh a lo thleng ve nghal a, thawk ham ham pahin a thiate chu a melh zauh zauh a ‘Rinzuali khan indan tumin Lal a bia a ni awm e’ tiin hrilh bik pawh neiloin a han sawi mawl tawp a. Thûamkunga chuan ‘engthil maw i sawi, engtin nge i hriat’ tiin mak ti tak chuan a melh hrawk a. Mualkunga lah chuan ‘khatin dawtsawi ang hrimin min melh vak kher lo la’ a tih mek laiin Rinmawia chu lo lutin a naute thusawi tawp lam chu a hre hman a, mak ti tak a melhin ‘Kunga eng thil maw han sawi chiang deuh teh khai’ tiin a zawt thuai a. Mualkunga chuan a hriat dante a sawi chuan ‘khai aw, a va mak ngai ve mawle, kan bawlpu hlui nupui chu alo rapthlak teh zawng a nih awm hi maw, mahni rilrah ngei pawh a han ngeihlo chu a nia, Rinzuali chu a khawngaih thlak kher mai’ tiin an sawi zui sap sap a. Pasâltha Sângtuala chhuan ‘a vanduai tak zet a ni, a ni ang kumte chu nu leh pa thlazar hnuaiah awm awm tak a nih vei nen’ tiin a lo tuihnih ve sap a. A thianten an melh danah an rilru awm hrethiamin ‘ka u chu a lo be tawh tho nangin, a tunhma khawsa zia vangin ka u chuan hruai leh lam a ngaihven vaklo, kan fa erawh chu theihtawpin kan buaipui ang’ tiin a lo sawi zawi sap a. A thiante pawh chuan ‘Rinzuali te reuh pawh a make m a lawm, han hruai leh ngam chi ni tawh chai heklo le’ tiin an lainat thu leh Rinzuali rilru sukthlek mak an tih zia an sawi sap sap a. Zawlbuk an va thlen chuan thu dang a leng vaklo, bawlpu hlui nitate chhung khawsa zia mawlh chu sawiin mak an tih zia mawlh chu an sawi sap sap hlawm. Pasâltha Sângtuala hmel an hmuh chuan thudang sawiin keipui thawm awm an hriat tawh loh vang a an lawm zia thu chu an sawi sap sap hlawm a. Nuapang thing nawi keuh lo an awm emaw tih an in zawh hnu chuan tlangvate chu nula rim turin an tei chhuak hlawm a.

. . . . . + + + + + . . . . .

Tunah chuan Satlâk tlangvalte thawm thangva chuan an khaw thenawm fan chuakin muang leiin an leng thei tawh a, furpui vawihnih a lo vei leh meuh chuan pasâltha Sângtuala te thianzaho pawh tlangval puitling tak nupui neih hun an ni ve tawh a. A farnu ten nupui nei tawh tur a an nawr lah chuan ‘nangni awm chhung chuan nupui neih ka hmanhmawh lo, hmeichhia chu insual si a’ tiin a farnu te chu a fiam let thin a. Pasâltha Lawiawrha fapa pawh a than a thain a nu bul ai mahin a nite bulah a tlei zawk a, hnute a nghei hnu phei chuan a nite chuan an awmpui deuh rawt a. Pu Tawnliana nupa chuan zanah an mut pui mai thin a, a mah fiam a nuamin a tahfei bawk nen, pasâltha Sângtuala chuan chempui lem suih sakin hun awl a neih apiang hian eng emaw hrilhin nunchan chu a zirtir thin a. Chung an nunchan in zirtir lai chuan pasâltha Sângtuala chuan fiah nan a bin lui thin, chutia a tluk lai chu bawh zuiin a ni chu alo in veng ve zat zat thin a. A hah deuh hnu chuan a pate chuan a malchungah chawiin thawnthu a hrilh a, reilo teah a muhil zui mai thin a. Hun a vei zel a pasâltha Sângtuala pawh chuan kawppui lam melh pawh a pawiin a hrelo a, a chhungte chuan an lo nawr ve fo bawk nen. An thianzaho an awm khawm tawh chuan nupui nei tur chuan an in kar fiam thin a. Thûamkunga chuan ‘k’u Rinmawi nupui hi nei vat la a tha ang, nangin i neih hma chuan kan tan neih thiang a ni silo, hetia a chi a kan pai reng mai chuan min la hnawh hlum mai dawn a nia’ tiin fiamthuin a nawr thin a, a ni Rinmawi lah chuan ‘a veleh rawk che hian, a kamna ber nangin nei la, kan la hmuh remchan hma chuan kan intawm a nga ni mai lawm’ a tih chuan an nui dar dar thin a. Nui suk sukin ‘chutia zun nan chauh hman in tum tlat a nih chuan, favang hunah ranngô chu zawng ila, bawp pali in mu hmak ila a nuam viau ang chu’ a ti a. Chungliana chuan ‘i nupui chu ka khawngaih lawk mang e aw, zawngte satel khal ang maiin i kuai thâl sek mai dawn a nia, a zan mu hmanlo zing buh deng pawh a mu thlu lawp lawpin a nia ka rin ni’ a tih chuan an nui tlawrh tlawrh thin a.

Vagpui lo her chhuakin rengchal pawhin an siah thing zar an bel leh ta, Satlâk khuate pawh an thlawh hma a thain hawpkhawp thar ngei turin chhungtin an in beisei theuh a. Thlawhhma lam favang ni tawh mahse thlifim in buh a chhem phe suai suaite chu hmuh nuam an tiin thlawhhma kan chuan an kal awllo a, mipa lam chuan buh seng chehmeh tur zawngin an in pu chhuak duah duah thin a. Tlai khat chu pasâltha Laiawrha te thianzaho ramvak chu thim hnu pawh chuan an lo hawng ta hauh lo, ngaihtha zanlo chuan pasâltha Sângtuala chuan lenchhuah pawh rilruk chiah lo chuan a u fapa chu nunchan zirtirin an ri leh dat dat tawh a. Pi Chhuanthangi chuan ‘Sângte i u te chu engti chen chen nge mawle an va lo hawng har ve, ngaihte lam a thalo mai dawn alawm le’ tiin a han sawi a, chutia a pin a sawi chuan mipa naupang chuan ‘ka pi, ka pate chu an riak dawn a niang, naktukah ka patea nen kan zu lam dawn nia’ tiin a pi mal chungah chuan a thu thaw hlap hlap a. A tupa thlantla hliam puan tlang a hruk pahin ‘nia naktuk zingah i patea nen i pate chu in zu lâm dawn nia, hawh ka lo paw tawh ang che’ a tih chuan ‘tlangval ka nih tawh hi, kei mahin ka mu dawn’ tiin khum lamah chuan a kal nalh nalh a. Pi Chhuanthangi chuan ‘Mamte lo kal la zung lawk rawh, I bulah ka lo mu a nga, thawnthu min hrilh dawn nia’ a tih chuan thu sawih takin pawnah an in zui chhuak a, naupang tih takah chhun lam a an in selem chaih vel sawiin a phul hlut a. An mut hnu chuan Zoliani chuan ‘ka u hei riah an tum em mi ? engmah lah in sawi tha duh lo a, mipa ho thin tak hi chu’ tiin a phun deuh hlak hlak a.

An inlengte chuan ‘chu kan pasâlthate chuan engmah an sawi lawk na nge’ tiin an zawt luam a, pasâltha Sângtuala chuan ‘mipa ram kalte chu zan thum a nijh hma chuan han ngaihtuah an ngai hleinem, thlawhhma lam a kal an nia lawm. Sa laklawh a nei a niang, ngaihtuah an ngailo mi pangâ lai an nih kha’ tiin a lo tawng khalh thuai a. Zolianite inleng tlangvalte pawh chuan ‘nia, mipa ramkalte chu zanthum riak pai kan nia lawm’ tiin fiamthu eng emaw sawiin an phul zui hlut a. Pasâltha Sângtuala chuan ‘khawnge Thûam thian zanin a lo lawr hauh lo a, ka va tlawh ve lawk a nge’ tiin chhuah tum chuan a ding uaih a. A u fapa chuan ‘ka patê, naktuk zing chu theihnghilh suh aw, thawh hma kan ngaih kha’ tiin a lo au lang lang a. Pasâltha Sângtuala chuan ‘aw le, hma takah lo tho ang che aw’ tiin a chhuahsan ta a. Tlangval inlengte chuan chu mipa naupang mahni tawk a chhungte ngaihtuah tak chu eng ang takin lo thang lian ang maw tiin an ngaihtuah zui map map a. Pasâltha khual kaiin uluk takin naupangte a nih lai atangin a zirtir tan a ni si a tiin an ngaihtuah zui nap nap a, fiamthu eng emaw an sawi leh chuan lenghawn ar a khuang ta al al a. Tlangvalte hawn hnu chuan ‘ka nu, ka u te hi hau deuh ula a tha ang, hetia engmah sawilo a riah ngawt mai te chu a’ tiin Zoliani leh Pângpuii chu an phun nang nang a. Pu Tawnliana leng hawng in a fate chanchin a hriat chuan a ni pawh chuan a ngaihtuah ru deuih hlek a, a fate hian engmah sawi lawklo in zan an riak bo ngailo a, Laiawrha phei chuan a fapa a ngaihtuahin riak lo zawng a khawsak tum tang tang a nih dante a ngaihtuah kai zel a. In ngaihtuah harhin ‘mipa fa an ni a, chutia zan khat avang mai a han buai chungte chu a tih zia lo emai tiin a tupa ngaih ngam tak a muhil sak sak chu a thlir vang vang a.

. . . . . + + + + + . . . . .

Pasâltha Lianmana chuan an savawm hnu chhui lai chu uluk tak chuan chhuiin mual eng emaw zah an chhui pawh chuan a thawm tak ngial pawh an hrelo chu a tlawmla kher mai, a thianten sa dang beih san an rawt chuan ‘e lo va bei chhun zawm ula, keiin kan sa chhuilai ka lo chhunzawm a nge’ tiin a chhang tha mai a. Pasâltha Laiawrha chuan ‘nangnin sa dang lo beih zawm ula, keinin kan lo chhui zui mai ang chu mawle, hei kan savawm hian kan mai reng a ei hnem tawh mai, a thau tawh viau ang chu’ tiin Mawipuia leh Sialliana te tih chuan an ni pawh chuan ‘nia, vanduai chuan kan sa hi hmulo palh ila, kan hlawhchham palh a hlauhawm a lawm’ tiin nghalrual hnu thar tha tak chu an chhui san ta a. Chhun chawfak hunah meuh pawh chuan thawm an la hrelo fo chu an ngaih a tha bik chiah tawh lo a, chhun chaw an fak kham chuan an piah mual ngâ laiah chuan silai puak khawk raih raih chu an hria a, an ngaihchan lai chuan vawi khat a han puak leh a, hmanhmawh takin silai rikna ni a an hriat lamah chuan an kal ta nghal a. A ngil thei ang ber a kal an nih vangin tuibur hmuamda velah chuan silai rikna ni a an hriat lai chu thlengin sul an hmuh mai loh vang chuan insem darhin an kal hlawm a. Mawipuia chuan savawm sul thar deuh leh mihring hnu chu hmuin hmanhmawh tak chuan a han chhuai a, savawm hnu chuan mual dung zawh thlain kawr kam a thlen dawn chuan a thlang a sawvawm sum ruk tha zet tur lo let ngut chu a hmuin, an thiante hmuh mai tum chuan a han sawi a. A hmuh mai loh vang chuan chang a tum raih a, tumah chhawn tu an awm mai loh vang chuan a ngaih thalo chuan a silai chu hman mai theih chuan a hum nghet sauh sauh a.

Savawm ruang bulah chuan inbeihna tih hriat tak hian hnim chu a bel hel hul bawk a, Mawipuia chuan a han ngaihtuah vang vang in savawm nen a inbei chu nisela an thawm an hriat loh reng a ring hauh lo. A rilruah ngaihthat lohna lo lut thutin thawm ngaithla chuan a ding hlek a, a chhak lam a hmanhmawh tak a kal thawm a hriat chuan uluk tak chuan a lo thlir reng a. val upa Sialliana leh an thian dangte chu an lo lanmg thuai a, an ni pawh chuan thil awmdan an hmuh chuan an ngaih a thalo kher mai. In rawn in an han phun sap sapin mihring hmanhmawh tak a kalna sul chhuiin fimkhur tak chuan an kal ta nghal a. Sul atang chuan mi sawm chuang lai tur an niin an rilru chu a vak thui kher mai. Kawrte tui luang her her chu hnu chuan a zawh thla zel a, inchhung dung let hnih an chhui hnu chuan thisen far an hmu ta a, ngawpui hnuai lei nem lai a nih vang chuan hmanhmawh tak a kal tih hriat takin an hnu pherh nasat danah an hmanhmawh hle tih an hrethiam mai bawk a. Mual hnih lai an chhui chuan Mawipuia chuan ‘val upa, kan mi umte hian min lo chan takin inchhung dung awmah in sem darh ila a tha lo maw’ tiin a han rawt a. Val upa Sialliana pawh chuan ‘a va tha awmve, keiin hnu hi kan chhui a nga min lo veng dawn nia’ tiin a silai chu a han endik nghal a. An silai an endik lai chuan ‘hei sul atang chuan kan pasâlthate pahnih hi an duhthu a kal an nih hmel loh a, kan nangching a nih pawhin a tawngpawng a silai kah nghal mai chu a him lo mai hmel a, silai lek kan fimkhur a ngai dawn a nih hi. Thâl kan thlah chuan kan tum tak a fuh ngei tur a ni’ tiin a han sawi leh sap sap a. Satlâk valte chu insem darhin an hma a mite umphak vat tum chuan kal an siam ve ta nghal a.

Lo tawk leh phawt tehse. Muttui mangtha ule

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 11th, 2019, 7:28 pm

PASÂLTHA SÂNGTUALA ( Mampuia pa )

BUNG – 183

( Edit lohin ka lo hnawh lut leh ngawt e, a chhiar mam thiam vanneih kan ti leh ngawt mai a niang chu )

Val upa Sialliana chuan hnu chu a chhui par par zel a, mual eng emaw zah a chhui hnu chuan ngawpui hnuaiah chuan khua pawh a thim chhalh tawh a, a hma kawr kawi chu inchânna rem tak niin a leh tawn a lungpui awm chu hnim chuan a bawh luk a. Val upa Sialliana chuan fimkhur takin a hma lungpui chu a pan zel a, lungpui a pelh dawn chuan thil che zeuh hmuin a melh chiang tur chu mi pakhat hian val upa Sialliana chu a bawh thlu tawpa, val upa thawh tum tang lai chu a tukah thing bung chuan a hnung a mi chuan a lo hlap chawrh a, a khaw hmuh a chu phe ruaiin an rawn hlap nawn leh chuan engmah hrelo in a zal ta raih a. Mawipuia ten an thlang kawr a thawm an hriat chuan fimkhur takin an pan thuai, an val upa let ngat an hmuh chuan fimkhurna hlohin hmanhmawh takin an kal thla bawrh bawrh a, an thlen dawn chuan Satlâk tlangvalte chu an mi hriat ngai loh chuan lo zuanin inring reng a lo awm zawk nafam chu reilo teah ding changin, Satlâk tlangvalte chu tang ve mahse reilo teah an tlu hlawm rum hlawm a. An mi chante an tluk zawh chuan zawimuangin vaibel chu an zu hlat hlatin an mi mante chu engtia tih tur nge tiin an inhnial laih laih a, chung khual tlangval hruaitu pakhat chuan ‘an zing a pakhat hi chhuah ila, heng Satlâk khuate hian silai fung sawm a tlan turin hrilh ila a that mai ka va ring ve’ tiin a ngaihdan a han sawi a. Miadangte chuan ‘heng Satlâk khuate hian an chung a kan thiltih hi an enliam ngawt dawn a mi, keini ai a khaw lian an niin an thinur lo thawk hi kan dawl meuh ang maw ? Hetia kut man kan nih hma hian hengho hi that vek ila an silai hi ngawi rengin kan nei ila kan fel thak zawng lawng maw ? an ti ve thung a, an hruaitu pa chuan ‘Satlâk tlangvalte chu lo thawk pawh nise in malbeih ah choin an pasâltha pathum kan dahthat hnu chuan mei khupin an hawng mai ang’ a tih tak tlatah chuan, midangte chuan ngaih ngamlo deuhin an aw ta hram a. An zing a hotu chuan ‘nangni Satlâk khuate hian in tîl tam vang mai hian mi zawng zawng hlauhah in lo in ngai rawk a nge, ka lo awm ve hmain Thluahpui Lal Ngamliana te chungah nuam inlo thai a ni awm a, in pasâltha chhuan vawrte pawh hei ka tawnah engmah an nih loh dan inhriat tak hi, tunah hian nang hi zualko ah kan ring dawn che a, heng kan mi mante khulh chhuah nan hian mi pakhatah silai fawng hnih vek a ngai tih hria ang che u, chuan tun hma a kan khaw pawi in lo khawih tawh manah silai fawng nga in chawi a nga, kan khaw silai in man tawh zawng pawh a bo a bâng awmlo in inlo kir leh ngei tur a ni’ tiin inti thunei tak chuan a han sawi zat zat a. Mawipuia chuan ‘mahni hming pawh sawi ngamlo hian i duh khua chu i inchhâl thei alawm, khawi khua pawh in chhawl la kan lo zawng chhuak khawp ang che’ tiin thinrim sehchilh rap rap chuan a chhang bung nghat a.

Tham lo tak a nuihin ‘ka hming chu in hre dawn khawp e, Raldawna Thluahpui khaw lo bel thar ka ni e, pawih râl meuh pawhin an nawk ngam loh ka nih hi, in pasâltha Sângtuala pawh lo kal tel ngei rawhse’ tiin a han sawi leh par par a. Mawipuia chuan ‘kan pasâltha chu a lo kal khawp ang, a khua leh tuite harsatna tawh laiin kut kuangkuahin a thlir ngailo, a hmaah chuan vawkek pawh i tluk lo a nge’ tiin a han chhang ve leh a. An mi man hmel a zamna awmlo leh thinrim hmel a hmuh chuan Raldawna thin chuan a tuar ta lo, thinrim tak a chek tlak tlak chungin ‘in pasâltha chhuanvawr hnenah chuan ka kut thlak nat zia ilo hrilh theihnan pawh i remchang dawn hle e’ tih pahin Mawipuia kut hnungkhirh chu pan hnaiin a kut ding lam chu a vai phe nghal zawk a. Mawipuia chu lo thlek sawn zeuh pahin hma lamah pen khat a tawlh hma hlek a, Raldawna kut vai na lutuk taksa rihna hloh kapah chuan a chhir nghal dawp a. Raldawna na ti chu thaw hawkin kawrte ah chuan a thingthi hnawk a, Mawipuia chuan dimna tel hauhlo chuan a hma a mi kha bawrah chuan a tlawh nghal pawp a. An mahni mantu ten an rin loh lutuk thil thleng an hmuh chuan an in melh thap a, Mawipuia chuan a mah hnaihtu kaihza ah chuan pet zuiin a pet pa chu a thlep hnawk a, kar lak awm hauhlo chuan a khup tawmin a hma a mi awmah chuan a su pawp a. Kut hnungkhirh anih vang chuan duh ang pawh a tal theilo a, Mawipuia hawi chhuak chiah chu kuttum hian a bekah lo deng dawtin a pai nghal dawt a. Mawipuia thinrim lutuk chuan ‘mipa in nih ngai chuan ka kut hi han phelh ula, i han innuai tak tak teh ang u’ a tih zawh chuan a taksa rem remah chuan a thum nghal dawp dawp a.

Mawipuia an khawih rawn an hmuh chuan Satlâk tlangvalte thinrim lutuk chu thuthmunah an kut phuarna phelh tumin an tal laih laih a. Mawipuia tlu an hmuh chuan thinrim takin ‘zawngchhe ho, in ngam a nih chuan min han phelh ula mipa takin i han innuai tak tak teh ang u’ tiin Satlâk valrualte chu kawrte khawk rawm rawm chuan an au that that a. Mawipuia chuan a kâ chhung a thisen chhak chhuah that that pahin ‘in duh tawkin kut chu min lo thlak teh u, rei indaih chuang lo ang’ tiin a phun ngal ngal a. Raldawna chuan kap hup zauh zauh chung chuan iptepui chu a han zen a ‘khawnge ilu kan la teh ang’ tiin Mawipuia chu a pan chhar chhar a. A hruai tlangval pakhat chuan ‘pasâltha insum deuh teh, thisen a luang a nih chuan kan ruahman a sukuk ang tih a hlauhawm a nia’ tiin a lo khap a. Raldawna chuan amah lo khap tu chu rum tak a melhin ‘Hmaitawn ka kawng ilo dal elaw’ tiin lungawi lo tih hriat tak chuan a han vau chhur chhur a. Hmingtawna chuan ‘dallo e, tun a thinrim tawp kan tih lan chuan kan tan a pawi ka hlau zawk a ni’ tiin a chhang zawia sap a. Raldawna chu a ngawi deuh vung vung a ‘aw le, he pa hi kan ramhlui khan thingah han phuar bet ula, a tal chah theih loh chuan a thi nghal a nga ni mai’ tiin a thinrim fe chuan chil a chhak thawt a. A naute remti chiah lo chung chu thingah phuarin ‘ti khan kha hrui chhete kha i tal chah theih loh chuan I thi puar luah a dawn a ni’ tiin a then khum nur a. Pasâltha Laiawarha chuan ‘hei nangpa khan i thiultih man hi ila rul dawn khawp mai, ka thawk ve chhung chuan remchang hmasa berah ka thungrul; ngei ang che’ tiin Raldawna chu a melh rum al a. Raldawna chuan ‘i theih chuan tih ngei i tum ve bawk ang chu mawle, tunah erawh kei hi a fawnglam chelhtu ka nih theihnghilh haiuh suh ang che’ tiin a then khum nung a. A naute hnenah chuan ‘khai ule, zawiawiin kan hma bak hlen turin kal i siam ang aw’ tiin a a sawi dam vei thluam a. Mawipuia chuan ‘la va kal ula, kan rawn zawng hmu leh ngei ang che u, chumi hunah chuan buh banah ka thawn ngei ang che u’ tiin a au zui hram a.

An thlunna kawihrui chu harsa fein Mawipuia chuan lenglen hun awmah chuan a tal chat thei hram a, an thlunna ban bilh hrua chu hmer zauh zauhin ‘zawngchhe pa, lo inring rawh ka lo kal dawn e’ tiin a iptepui lungpui chung a an dah chu a ban zui zat a. Kawrte chu kawihnih a zawh hnu chuan in ngaihtuah harhin chempui nen chauh bakah a ni riltam bawk sia chuan a thiante chhanchhuah ngaihna awm in a hrelo a, thinrim tak chuan thlawhma lam pan chuan a let leh ta zawk a. Zanlai arkhuan vel chuan thlawhhma chu thlengin thlam meieng a awm em tiin a melh kual a, tlam pakhat ah chuan meieng hmuin chu lam pan chuan chak takin a kal hnak hnak a. Thlam bul a thlen chuan aw a thian kharh kharh in thlam kawngkhar bul atang chuan ‘in awm em’ tiin Mawipuia chuan thlam kawng khar chu a khawng karh karh a. Thlam chhhung lamah chuan thawm lo awmin lo, aw then kharh kharh pahin ‘kei mah Mawipuia ka ni e’ tiin a han sawi leh lauh lauh a. Mawipuia beisei hauh loh Lairuma leh leh Thanchhinga te thianzaho Satlâk tlangvalte pawhin an lo enthlek ruk tawhte chuan an hmanraw lek farin an lo hmachhawn far a, a naute khawsak dan a hmuh chuan ‘e naute u, kei mah ka ni e, eng ti berin in in riah’ tiin thlam mei engah chuan a thu deuh hnawk a.

Chung rawltharte chuan Satlâk tlangvalah pawh tlawmngai leh chauh hrelo an tih khawp a mi tlawmngai han thu zawi hnawp an hmuh chuan ‘engthil nge nita, i van chauh hmel ve’ tiin phawk tak chuan an bial taih a. Mawipuia chuan chanchin tlangpui a sawi zawh chuan ‘naute u chawthing in neih chuan ka lo bar teh ang’ a tih chuan a thusawi ngaithlatute chu an che suau a, ngawi reng chuan chawhmeh thing chu an chhun sat pahin ‘Raldawna chuan a thiltih hi a hrechiang meuh maw, muang lei a kana wm lai min bawhbuai vangin a inchhir khawp ang’ tiin Lairuma leh Thanchhinga chu an phun bal bal a, an vaibel dawn chu an seh rap rap a. Mawipuia chuan ‘ti hian nangniho hian nangni hian khua han pan ula, chanchin kimchang zawlbukah han thlen tawh u, chuan min lo lam thla leh ngei ngei ang che u, kan hma bak hlen loh kan la nei a nia, Lal hnenah ka silai ka hmuh let hma silai min lo hawh sak nghal ang che u’ tiin thinrim hachang thial rap rap chuan a han sawi a. Rawlthar rualte chu insiam thuaiin khaw lamah zualkô turin Thanchhinga te pathum chu meichher nen an liam thuai a. An liam hnu chuan Mawipuia nak duk thluah chu tui lum chuan a duhlo chung an deh luih sak a, thinrim hachang thial rap rapin ‘lo ngawi tak rawh kana wm chhung chuan tu kut thlawn mah Satlâk khuate hian an tuar hauh lo ang, a letin an rul ngei tur a ni’ tiin rawlthar rualte chu an rum ngal ngal hlawm a. Lairuma thinur lutuk chuan kawngkhar biang chu a sat burin ‘chu ka thin chu a van ur tak em, tihian kan pasâlthate lo ngahk ula, ka lo zu in hmakhua a nge’ tiin a chempui iptepui a khungin meichher chu a lek nghal at a. A naute melhin ‘engthilah pawh tawk ila, val upa leh pasâlthate thu ngaichang lo chuan chet lak tur a ni ngailo’ a tih takah chuan chung rawlthar rualte pawh chu an thu sen tal hlawm a Mawipuia chuan ‘e khai naute u, thinur insum theih a tha ngai e, kei tak hian a nia hmuh chak hlawm tawh chu ni, min hnungkhilh lai min han ching khan ka thintawt lutuk hi ka puak keh lo chauh a ni’ tiin a vaibel dawn chu a she rap rap a.

….. ….. + + + + + ….. …

Zualkô ten zawlbuk an thlen a thu awmzia an rhiat chuan Satlâk tlangvalte chu an thinrim an so ta bulh a, pasâltha Sukthanga leh phullianate chuan ‘nang kha lamah’ tiin tlangval râlveng tur chu an tir zui nghal zat a. Lal inah pasâltha leh val upate chu an kal nghalin Lalin a tlangvalte chung a thil thleng a hriat chuan rum nghutin ‘Thluahpui khuate chuan an chan tur tak an chang ngei ang le’ tih nghut pahin khawnbawl upate an lo luh kim chuan rawlthar zualkô te chuan an thu ken chu an han sawi leh thuak a. Khawnbawl upate pawh an hmel hmuh a nuamlo kher mai, pu Tawnliana chuan a fapa upa zawk chin a hriat chuan a tupa chu a mitthlaah lo langin a thinrim chu a khur ta dar dar hial a. Khawnbawl upate ngaihdan Lalin a zawh chuan ‘an pawi kan sawi lohin an duh hunah min tibuai fo dawn a nih chuan kan tlangvalte hian chet dan an thiam a ngai ta deuh a ni, zaidawhin awmzia a neih loh chuan, a na thei ang berin kan chhang let tur lah niin’ an ti bung nghat hlawm a. Lal muala a tlangval thinrim thawmah chuan Satlâk khuate chu an lo chhuak khawm thuai a, an pasâltha chin an hriat chuan ‘kan tlangvalten zai an dawh lutuk a nih hi, keinin kan va chhawk ve tawh a nge’ tiin Satlâk vanglai pel tawhho chu inlam pan chuan an hawng ta dual a.

Hmanraw la vanglai pel tawh an lo kir leh chuan ‘tlangvalte u, tun tum chauh zawng kan lo chhawk ve tawh ang che u’ tiin an inhawr khawm tual tual a. Lal Chhawnthiaua chuan kut a phar du a, nunau thawm a reh chuan ngun takin a khuate chu Lal Chhawnthiaua chuan melhin ‘ka khuate u vawiin zet chu ka thin a khei hle mai, mi chungah that chhuahin kan theih tawkin kan chung a chhiat duhtute chungah kan che thin, heng kan thatna hhre duhlo khuate chuan an hriat tur an hriat a hun tawh a ni. Raldawna chuan Lal thu hmu pawh a ni kherlo mai thei, Lal leh khawnbawl upaten an hriatpui a nih erawh chuan a na thei ang berin kan thungrul ngei tur a ni, kan thalai lam chu kan awl mai dawn em mi ?’ tiin a thusawi tlang a khar ta a. Vanglai pel tawhte lah chuan ‘Lalpa tun tum chauh chu kan kutah dah hram rawh’ tiin an lo aurual thut thut a. Pasâltha Sukthanga lo pen chhuakin ‘kan val upa lam khan min lo hrethiam ula, nangni chu kan lo khek khal rih ang che u, kan Lal sawi tak ang khan kan theihtawkin khuanun min duanchhan ang tak ngilneihna in kan enkawl hram hram thin, kan pawi khawihte pawhin nun tha an zawhna hun kan siamin mi tam tak chuan nun tha an lo nei tawh a ni. Kan thatna chhe tak a min thungrul tetu chungah erawh chuan keipui hliam ang hlauh kan ni, chuvangin kan zahawm nan kan mi hmasate chu lo insum hram turin ka ngen che u a ni e’ a ti charh charh a. Lal chuan ban chu a phar leh du a ‘kan val upa lam khan kan tlangvalte ngenna kha zawm sak hram ang aw, kan tlangvalte che na tur theihtawpin kan dang thin a nih kha’ tiin a sawi charh charh a. Val upa lam chuan ‘Lalpa kan tlangvalte pawhin min ngaithiam hram rawhse, kan thin sa thutin thu ngaihthlak hrehawm kan lo chhakchhuak palh a ni e’ an ti a. Pasâltha Sukthanga chuan ‘kan hrethiam lutuk che u, thin a sat thut chuan duh lo hang zawng sawi chhuah pawh a awm reng a ni’ tiin tha tak a chhangin Lal Chhawnthiaua chuan ‘ka tlangvalte u mi za tha vel inthlang chhuak ula, midang zawng chuan khua hi venhim tur a niang, muang lei a kana wm ngaitheilo te chungah zahngaihna nei hauh suh ang che. Kan theih tak tih vang a kutthak hnawih erawh nunning zia a ni, he buaina hi ningâ chhung chin fel nan hun innei e, tunah kal nghal ula, ka tlangvalte chu him takin in lo hruai kir leh tur a ni’ tiin thinrim tak chuan a sawi bung vut a.

Lal Chhawnthiaua chu inchhungah lutin silai pakhat a rawn hum chhuak a ‘he silai hi Mawipuia chuan lo hmang rawhse, tluang takin va kal ula. Him takin lo kir leh ngei ang che u, in lo kir hma chuan nghakhlel takin kan lo thlir reng ang che u’ tiin a thlah ta. Tlangval kal turte chu harsa fe chuan an inthliar thei hram a, khuan hnhnung a khuan chuah chuah lai chuan Satlâk valrualte chuan lungdawh chu meichher nen an pan thla duah duah a. Pasâltha Sângtuala chuan a ngaihtuahin a thinur kher mai, ngawi reng chuan kalin Mawipuia te lo nghahna thlâm chu panin an va thlen chuan ‘ka nau, min hrethiam rawh aw, i u te chu ka chhan thei ta lo a ni e’ tiin in thlahrung tak chuan a lo ti a. Pasâltha Sângtuala chuan ‘mai mai a nang awm hlauhlo la chuan chin kan hre nang, fing takin tiang hian ruahmanna I siam hlauh a, ngaihthuahna fim takin thil kan ti thei zawk a lawm’ tiin a lo hnem thuai a. midangte pawh chuan ‘Mawipui inthiam lo hauh suh, atso in lo v ache la chuan thil pawi zawk a thleng thei asin, i ngaihtuahna alo puitling hlauh zawk a, a lawmawm lutuk’ tiin an lo hnem liam liam a. Mawipuia chuan an khuaten an demlo tih a hriat chuan a na tawrh pawh dam huaiin a hre hial a. An lo beih dan val an hriat chuan Satlâk tlangvalte thinur chuan ‘Raldawn lo inring rawh ula, hmeichhe hmuihmul thei kan lo kal e’ tiin an bul a thing bul chu an sat khem hlawk hlawk a. Pasâltha Sukthanga chuan ‘khai ula, hei thim tinin sualna tih tawpna hun kan neih tan tak hi’ ti a hmahruaiin ngawpui hnuaiah chuan an inzui thla thluah thluah a. Mawipuia chuan hma hruaiin savawm ruang an hmuh chuan ‘hei tukthuan hmeh atan a sat ha lai lai kha han la teh u’ pasâltha ten an tih chuan tlangvalte chu an che suai a, tlangvalte sa chan lai chuan pasâltha Sângtualate thianzaho chu kal hmasak tirin an inbeihna sul an hmuh chuan an thinur lutuk chu an chek tlak tlak a.

Chhim zawng a sul a kal chuan pasâltha Sângtualate chuan mual hnih lai an chhui zui a, meichher ek an hmuh chuan thui an kal ringlo in a hma ai fimkhur chuan thawm chhuah hauh lo chuan an chhui zel a. Mual eng emaw zah an chhui leh chuan kawrte ruam atang a meikhu lo zam chhuak raih chu an hmu ta. Pasâltha Sângtuala chuan mit senram a melh vang vangin ‘lo inring rawh u’ ti a phun sap in a silai chu a endik nghal mawlh mawlh a. An râlthuam an en dik zawh chuan fimkhur takin ruamah chuan an tawlh thla zal zal a, an kalna sul zawh duhlo in a ngil thei ang ber chuan panin buk lian tak pahnih lo dingin chhuahsan tawh tih hriat takin hmanhmawh tak a kalna sul chu an hmuin pasâltha Sângtuala tre thianzaho chu mak tiin an in melh thap a. Pasâltha Sukthanga ten an lo fin chuan an ni pawh mak tiin an kâ hau hlawm a. Sul chu hmun hnihah inthen in Satlâk khaw panna chuan mi eng emawzah chu an kal a, sul tlem zawk erawh chuan ding takin chhim lam hawiin hnu chu a pher veng vung hlawm a. Pasâltha Sukthanga chuan ‘engtin nge ni ang’ tiin a naute chu a melh kual dan dan a. Pasâltha Sângtuala chuan ‘khua chu a ngaihtuah awm loh a, ram kalte erawh an ngaihtuah awm dawn a nih hi, keini thianzaho hian helai sul hi kan zui a nga, ka pa Thang i hoin kan piah tlang dungah sawn chho ula, tlang khan thalai in thlen hunah sul zawng ula, mual an kan chhoh chuan ding lam a mual in khawh thla zui chho ula hnaite in khua chu in pawh thei mai ang, ka u te hi chu hengho hian an kal pui hmel si a kan va um zui mai dawn em mi ?’ tiin a han sawi sap a. Pasâltha Sukthanga chuan ‘aw le nangni va um vang vang ula, kan chan lam theuh kan chin fel hunah kan in tawk khawm leh a dawn nia’ tiin hmanhmawh takin an insem ta thuai a.

Pasâltha Sângtualate chu mi sawmthum tha zet niin hmanhmawh takin hma lam pan chuan kal thuai a, tukthuan ei hunah meuh chuan an thleng hla tawh khawp mai, ramri kawr pawh an hnaih uar tawh a. A rilru chuan ‘ramri kawr kan hman chu an tum hle mai maw, khaw hmun pawh thleng ula ka zawng chhuak tho ang che u’ tiin a in sehruh sauh sauh a. Ramri kawrah chuan eirel rawtin ‘ti khan lo rel ula, kan hma ka lo va chian a nge’ tiin a kal nghal a, Thûamkunga Chungliana Rinmawia leh Mualkunga chuan zuiin ‘kan lo kir vat ang tiin an liam nghal thuai a. Pasâltha Sângtuala chuan ‘thiante u lo va kir phawt teh u, kan thiante kan ti phawk lek a nge’ a tih tak tlatah chuan hreh deuhin an let san ta. Pasâltha Sângtuala sawi ang takin kal ve mai tum chuan an lo in ak fur reng a, Rinmawia chuan ‘thiante u, eirel thuai ang ule’ tiin a che nghal bawrh bawrh a. Savawm bawp chu chanin an chan theuh chu an ti sawk sawk a, meichhem chu a har ber a, thing a hnawngin mittui tling lung chuan an in chhem khu lut lut a. Thûamkunga chuan fiamthuin ‘tukin chu meichhem a har sia, buhfai hi kan hel bar mai dawn a mi’ tiin a ni hui a. Thihna lui ruam an zawh lai pawh a hlim tak a nui sang thei chu rawltharte chuan an ngiasang ru kher mai. Eirel an peih chuan pasâltha Sângtuala chu a lo lan mai loh vangin an han nghak deuh a, Thûamkunga chuan ‘engpawhnise siam san ila, kan eikham a alo lan loh chuan kan fun sak mai dawn nia’ a tih chuan tukthuan ei siam chuan an phe suau a. Tukthuan chu hmanhmawh tak chuan an bar zung zung a, bar ngâ emaw an bar hman tih chuan an piah ramri leh lamah chuan silai a puak khawk raih raih a.

Pasâltha Sângtuala chuan hnu chu hmanhmawh tak a chhuiin ram leilung enin ram rem chinah zawhin a kal khalh puat puat a, tuibur hmuamda lekah chuan mual thum lai chu a kan ta der a. An zan riahna sul atang chuan an inthlauh a ring hauh lo, a thiante awm kha chuan duh angin a kalchak theilo mai pawh a. Mual hnih tal kal leh teh ang tiin thawm neilo chuan a kal thauh thauh reng a. A beng leh mit a len ngun kher mai, ruam a thlen dawn chuan ngaihthat lohna neiin thawm ngun tak chuan ngaithlain a tawi muang hret a, a thlang ruamah chuan thing tang tliak rap hriain a thu hniam thuai a. Thawmdim tak chuan a veh hnai hriau hriau a, a thlang kawr kamah hian pa pakhat hi a lo inthiarin a lo kal mar tha phian leh nghal. Thawm dang a hriat loh chuan ‘he pa chu ramchhuak satliah emaw chu le’ tiin a ngaihtuah hman hial a, chutia a thlang a inthiar a melh pah chuan meikhu rim hriain a han en chian chuan an piah kawr a tang chuan mei khu a lo zam chiau chiai a, thawm nei hauhlo chuan a pan hnai thuai a. a thlen dawn chuan an piah tlang bawk atang chuan pakhat hian zawi deuh tak hian ‘Lengerh lo hmanhmawh rawh, Satlâk tlangvalte nghahchhuah i tum a mi’ tiin a lo au zarh zarh a. Lengerha chuan ‘ka pum a diklo lo va kal rawh’ tiin a lo chhang bul hmuk a, a thianpa liam hnu chuan ‘hetiang a hlau leh tur chuan ka thu in zawm mai tur a nia’ tiin a phun zui nang nang a. Lengerha inthiar zo ding char chuan a nghawng a thir vawt lo nawktu enchian chuan pasâltha Diar khim vang chu hmuin, a da leh tawn a sapui tin hnu lang kalh a hmuh chuan a ding khawng lah a. Zawi sap hian ‘thawm I chhuah chuan i nghawng ka fik nghal a ni mai’ a thawp sat a. Thusawitu mitmeng sen deuh ham a hmuh chuan a thauah manin a ding khur dar dar a.

Harsa tak a tawng khur dar darin ‘nang hi Satlâk pasâltha Sângtuala chu i ni em ?’ tiin a sawi thei hram a, buk nghat pahin ‘mi engzat nge innih’ tiin a han zawt leh sap a. Lengerha chuan ‘mi sawmnga zet kan ni’ a ti khur dat dat a, buk nghat nghat pahin ‘thawm dim takin kal ang che aw, in mi mante saw helai i rawn hruai thlen loh chuan mitthi i ni nghal mai’ tiin a sawi zawi sap a. Thusawi tu che zia a hmuh chuan a thauah manin a puan tlang chu a sai hlawk hlawk a, zawi sapin ‘ti khan inbukah sawn pheila, an inthiar duh thu sawiin in mi mante saw helaiah hian lo hruai ang che’ tiin a silai cheng chu a kai kau ang nghal bai a. Buk nghat ngahtin a kal tan chiah tih chuan ‘ding leh lawk teh, i hmel leh chet dan kha an rinhlelh loh nan vaibel kha tan phawt mai teh’ tiin a han hrilh leh chuan a ni chuan thusawih takin a ti mai bawk a. Zawi sap hian ‘tikhan fimkhur takin va kal tawh rawh, ka kâh thelh ngai hauh lo a nia’ tiin a sawi awi leh sap a. Lengerha chu zawimuang chuan eirelna lamah chuan kalin ‘Lengerha hmanhmawhna pian puilo mahla, tunah chuan hmanhmawh viau taw hang che’ tiin a vau chharh chhar a. Lengerha chuan ‘ka kua a khawh deuh a lawm, nizan kan sa ei kha ka ei fuh zat lo a niang’ tih pahin a mah tin rengtu lam chu a mit sir ralh ralh a. An mi mante a vaibel chu fawh lar tir dan danin an hotupa hnenah chuan ‘pasâltha kan mi mante hian inthiar an duh a nih hi, I bulah an sawi ngam lo a’ tiin a han sawi zat zat a. Raldawna chuan ‘khang mi tlawktlaw te chuan duh leh cheh mai mai ang hmiang’ tiin a chhang bung vut a. A hnu deuhah chuan ‘i peih leh va hruai la ti nia, tlangval pahnihte khan va pui teh u’ rawn hmanhmawh ang che u. midangte khan ei kan peih chuan lo ei ila a tha a nge, kan thiante pawh khan mi eng emaw zah an lo man turah ngai ila buhseng pui tur kan nei teuh turah ngai ang’ tiin a nui uar uar a.

Midangte pawh chuan ‘pasâltha ruahmanna nge nge a ropui e’ tiin an lo nuih pui ve tlawrh tlawrh a tukthuan chu eiin an infiam zui tlawrh tlawrh a. A u chuan thing phen a nau lo tawm khar chu hmuin ‘sawlai deuh ah sawn aw niang, chaw eina lamah a rim an hre palh a nge’ tiin midangte hlat zawng chuan a ti tip ah bawrh bawrh a. Thluahpui tlangvalte chuan chutia an man chung pawh a hlim tak a la ti ti bawrh bawrh thei chu an ngaisang ru hle zawk a. Hnialna awmlo an vai kal vang chuan pasâltha Sângtual chuan a silai chu thing bulah tungin a chempui chu a phawrh thuai a, a zawn an lo pelh chuan an zing a tlangval pakhat tukhumah chempui fawng chuan chhu chawrhin thawm hria an lo hawi chiah chu kar lak awm hauh lo chuan midang pahnite chu a chhu awp nghal rawk a. Lengerha chuan mitkhap kar leng a thawm chhuah hauhlo a che thei chu hmelma ni mahse hmuhnawm a ti zawk hial a. Pasâltha Laiawrha chuan Lengerha hrawkah rekin a phih kâng zawk a. Pasâltha Sângtuala chuan ‘ka u thlah rawh’ zawite a ti sapin Lengerha a chuan a hrawk vuanin a khur hlak hlak a.

Pasâltha Sângtuala chuan ‘mual lai zawnah sawn kal thuai ula, mual eng emaw zah ah sawn kan thianten min lo nghak, keiin hnung ka lo dawl a nge’ tiin a hrialh sap sap a. Lengerha melhin ‘a ni hi hruai tel rawh u, hmunhim ah a chungthu chu kan sawi dawn nia’ a tih chuan hmanhmhaw leh thawm dim takin Satlâk tlangvalte chu an liam thuai a. A ute an liam hnu chuan thawmdim takin a ni pawh chu a kal ve ta nghal a. Raldawna aw chuan ‘lo phei tawh rawh u’ tiin a naute chu a au lung lung a. Then sak sakin ‘I hriatchian hunah chuan i sa teh ang chu’ ti a ngaihtuahin a pilbo ve nghal a. Pasâltha Sângtuala chuan hnu thup hman a nih loh zia hriain inphen pah zelin a kal zel a. A hnung lamah chuan thawm lo awmin Raldawna aw chuan ‘hmanhmawh rawh u, kan man leh nghal tur a ni, Lengerha chuan nuam a sa lo hle ang’ tiin a naute chu a hrawk tuar tuar a. Amah chu a hnung berah kalin a naute hnufum deuh chu a chhir zawt zawt a, an thiante nen an karah mual ngâ emawl lai a la tla tih chuan a turtuin a tur hneh bawk a, an thawm a hre pha ta a. Pasâltha Sângtuala chuan lungpui hmeithai thlâm tia zet chu belin an hnung a mite chu lo nghak ta a. Mual lai an lo thlen chuan ‘tumah lo kal tawh suh u, kha lai thing lo pel hmasa ber chu pialralah ka thawn nghal ang’ tiin a au that that a. Lungpui phen a pasâltha Diar khim vang silai hmeh puah mai peih a lo tin tu chu tumah chuan tawn ngam loin an ding thap a. Raldawna chuan ‘engvangin nge mi pakhat hlau a mi heti zatin din thup a, va kal ula that rawh u’ tiin a naute chu a vin tuar tuar a. Pasâltha Sângtuala chuan ‘i ngam a nih chuan nangmah kha lo kal ta che, engvangin nge i ngam loh ti tur a midang i hnawn tlat chu le’ a tih chuan Raldawna chu a dingin a in ngaihtuah zawk a.

A naute hnenah chuan ‘sawpa thattu hnenah chuan ka silai pakhat zawk ka pe ang, va that ula, midangte kha va man leh thuai rawh u, Lal duhsakna in dawng ngei ang’ tiin a han fuih leh a. Lal duhsakna dawn a sawi takah chuan tlangvalte chuan an silai chu hman tumin an lek chhuak ta suai a. Pasâltha Sângtuala chuan ‘a ngam fa chuan in râlthuam kha leng ula, pialralah in thlawk lut khawp ang’ tiin a che hmasa a piang chu a han tin kual a, an ding leh ta thap a. Raldawna chuan ‘khawnge keiman aw niang, thangthat in lak theihnan hunt ha ka siam che u a, Lal hnenah in awmdan sawiin puanbih tir tur che u in ka hrilh ngei ang’ tih pahin a silai chu a lek vut a, a hmetpuak nghal dua a. Pasâltha Sângtuala thawi thuakin silai mu chu a ving thuak a, a naute karah zuang lut tur chu a han sai ve dawp a. Raldawna zuang lai chu awp hnawkin a dar a silai mu lut vang chuan a te thawt a, harsa ti fe chuan thing phenah a tawlh lut thuai a. Pasâltha Laiawrhan silai puak thawm a hriat chuan rum ngutin a bul a thing bung tâng phel chen lain a let leh vut a, a thiante chuan thing leh lung remchang chuhin an zui ve thuai a. Kawr an kai chuan pasâltha Sângtuala lungpui phen a zen lo sawh chat chat chu hmuin chu lamah chuan an tlan thuai a, thawm hria a lo hawi chhuah chuan a ute an ni tih hriain ‘lo let loh tawp tur alawm, kal leh thuai rawh u’ tiin lehlam chu a bih zauh zauh a. Zen a sawh zawh chuan silai chu lek kawhin a hmet puak zui thawrin na tuar te thawt chuan a zui nghal thawt a, Pasâltha Sângtuala chuan ‘kha ka u’ tih pahin silai leh fungki chu a hmeh bel thlawp a, chempui phawrhin a u zen sawh zawh chuan saw lai a saw tiin a kawh hmuh a, silai chu puak leh thawrin na tuar te ri chuan a zui that a. A u silai puah rual chuan lungpui phen atang chuan a tlan dawk zawkin a piah a silai hmawr lawh da da lamah chuan a tlan nghal zawk a, silai hmawr a lawr a phih zawk in mihring lo lum chhuak chu dimna tello chuan a sat zui charh a, patling hnukchat tur te zuai raih chuan zuiin silai chu a lekkawh nghal a, a dart hip zawk a lo kap thawitu ram lam pan a tlan mek chu a sai lir nghal tawl a.

Pasâltha Lianmana chuan ‘khawnge bei tak tak ang aw, Satlâk khaw valrual kan ni ngai e’ ti a au lauh lauh pahin a tlan dawk ve zawk a. Silai chu ngaw khawk rum rum chuan a puak zui tluar tluar a, pasâltha Lianmana tlan lai chu tlu zawi hnawkin a thing hmun chu a theihtawpin a vawm chhuak nghal zawk a, a hma a mi chempui nen a lo tlanchhuak mek awmah chuan a vawm thup dup a, a vawm fuh pa chu hreh takin awn ruai ruai a hlawm ve tawl a. Pasâltha Sângtuala chu thing phen pah zelin a hma a mite chu a zuan zawk zawk rengin a thlen chinah chuan na tuar te thawt chuan a zuiin hreh takin an thal hawl hawl hlawm a. Pasâltha Laiawrha chuan a thianpa Lianmana tlu leh a nau thing phen a pil bo a hmuh chuan silai chu a hmet puak dur a, râl bawka chuan a tlan ve ta nghal a. Chaw kaw puar eilo an nih vang chuan a duh angin a che rang theilo a, silai mu chuan a thawi thuak thuak rengin harsa takin thing bul chu a thleng a, a bul a chempui tla bal chhar zauh pahin a nau an bawr taihna lamah chuan a tlan nghal zawk a. Kha kei mah Sângtuala u Laiawrha ka ni ngai e, ka nau zam reng reng suh nuam thamin in nuai tak tak teh ang aw’ ti a au tuar pahin a hnaih hnaih chu a sat zui zawt zawt a. Pasâltha Sângtuala unau an hmachhawn tih an hriat chuan phurna chu a bo nghak duak a, an sawi ai mahin râl beih an thiam tih hriain an sah remlo zawng chuan an tawlh kual zung zung mai si a, an tawlh kual lah chuan an khawih phak a awmte chuan thihpui tham hliam an neih loh vek chuan, hliam na tak an nei zel mai a . . .

. . . . . .+ + + + + . . . . .

Silai thawm an hriat chuan Rinmawia chuan ‘chu le kan beisei ai kan hlawhtling hma dawn e, hmanhmawh rawh u’ tih pahin a tlan nghal zawk zawk a. Silai puak dur dur an hriat chuan an hmanhmawh zual sawt a, an piah tlang a patling thinrim in hrosa thawm leh thir in khak ri chhak chhak thawm an hriat chuan ‘kha kei mahni Satlâk valrualte kan ni ngai e, thiante u lo zam reng reng suh u, silai dah vek tur nuam thamin i han innuai tak tak teh ang aw’ tiin ngawpui khawk rum rum a auin a silai chu a theh leng lawp a. Pasâltha Laiawrha ban bul thi hnuang leh chau tih hriat tak a thaw hlawp hlawp lo hual mektu te chu a sat nghal bawrh bawrh a, Chungliana chuan ‘aw a va han nuam tak em, hetiang kan tih lohna pawh a rei ta’ ti a au lung lungin mihring tamna lam a piangah chuan tawlh kualin a chempui lian tha tak chu a vai thuak thuak reng a. An mahni zat deuh thaw lo thleng thar an awm tih hriain an hmelma te chu an tlan darh ta suai a. Pasâltha Laiawrha chuan ‘naute u tumah chhuah hauh suh u’ tiin a chau lutuk chu thing bul vuanin a thaw hlawi hlawi a. Tlangvalte tlan liam a hnu chuan a thianpa Lianmana a hmu lo chu a ngaih a tha lo kher mai. Hlauthawng tak a hawi kualin mihring tlu phung chu a melh kual thuak thuak a, a hmuh mai loh vang chuan chempui thihsen a bualsen nguai hum chung chuan a vei kual thuak thuak a. A nau tanhmun siamna lamah chuan pheiin a thianpa lo let hlawm reng chu hmuin a thut chilh vat a, a mal leh dar a silai mu luhna atang a thisen lo hnam tiam tiam chu a thiam ang chuan tuam sakin a ko pah mawlh mawlh a, chhangtu awmlo chu a mitthlah a nupui Hmingchhuangi leh a fapa lo langin hrehawm a ti kher mai. A thianpa harh mai theilo chu thutchilhin ‘thianpa harh teh, hetia i awm chuan a hrehawm ka ti em a sen, kal hman ila nilo a nia aw. I nupui leh faten an la mamawh che a nia’ tiin a be sup sup reng a.

Chutia a thianpa a thutchilh lai chuan râl um a lo kal te pawh lo kirin hliam te nau chu an nei nual hlawm a, an pasâltha hliampui tuar an hmuh chuan Satlâk tlangvalte chu an thin tho tharin ‘heng kan mi mante hi kan that vek mai dawn em mi ?’ tiin an melh rum nghal ul a. Tlangval thenkhat chuan chempui phawrhin ‘hetiang a misualte chu that nghal vek ila kan hahdam a ni mai’ an tih chuan an râl mante chu hlauin an ding sai dar dar a. Pasâltha Sângtuala chuan ‘thiante u insum rih ang u, kan Lalten an chungthu chu rel zawk sela a tha a nge, sual hle mahse nun duh a inpe nafam chu zahngai thei nih a tha ngai e’ a lo tih chuan hreh takin an tawlh kir san ta a. Pasâltha Laiawrha chuan ‘kan thianpa zawnna tur hlâng han siam thuai ula, zawn ngai dang kana wm a nih pawhin hlang chu kan siam zel tur lah niin’ a tih chuan tlangvalte chu hlâng siam chuan an phe nghal suai a. Tlangval hliam zawn ngai dang an awm tak lohah chuan pasâltha Lianmana chu zawnin an tukthuan eirelna chu an pan ta dam dam a.

. . . . . + + + + + . . . . .

Pasâltha Sângtuala sawi ang chuan an kal chho thuai a, mual insuihfin na laiah chuan hnu chu a chho ve zel a. Satlâk tlangvalte chuan an pasâltha ramchin hriat zia chu mak an ti zawk hial a. Pasâltha Sukthanga te chu hmanhmawh tak chuan kal zelin mual sarih zet an kan leh hnu chuan ni pawh a tlangsang ta viau a, ram kal an awm palh ang tih hlauin tukthuan eirel pawh ngaihsak loin hmanhmawh tak chuan an kal zung zung a. Khua a arkhuang pawh an ral hriat ta vau vau a, chutia an hah zualpui an din chawlh lai chuan an piah kawrah chuan khuh thawm lo awmin meikhu in kawrte a bawh chal chal chu an hmu ta, fimkhur tak chuan an insem darh nghal a. A naute melhin ‘ka chet chhuah hma chuan tumah che chhuak hauh suh ang che u’ tiin a hrilh zawh chuan hmalam panin an kal tat ham tham a. An hma a mite chu an chetdan ah thawm neilo mahse an thlamuan zia an hmuh chuan Satlâk tlangvalte chu an thinur khawp mai, muang lei a an awm lai thawn thut tum a chuti tak a an khaw daihnai a thlamuang a an che chu an run khawp mai, an vaiin mi sawmnga tha zet an ni ve a, zawite te chuan khua an hal dan tur sawiin an nui hak thin a. An duh tawk an chian hnu chuan a naute chu inring tur chuan zaiairin a hrilh a, an in ring tih a hriat chuan ‘nangni khan kan khua chu in hal ang maw, kan la damve chhung chuan Satlâk khua hi chuti mai a hal kan remti hauhlo’ tiin a au ta thut a.

An rin loh lutuk a aw an hriat chuan phawk takin an hawi dual a, tumah an hmuh loh vangin an hruaitu chuan ‘tunge maw thawm chhuah vak che chu le, ngawi rengin awm rawh’ tiin a hrawk khar khar a. Pasâltha Sukthanga chuan ‘ka ngawih chuan hei hi a tawng ang’ tih pahin a mah chhangtu chu a kap let tawl a. Pasâltha Sukthanga silai a puah rual chuan Satlâk tlangval dangte pawh chuan an silai chu an kap dur dur a. Chulai sihte ruam ti a Satlâk tlangvalten an sawi thianah chuan natuar thawm leh silai puak thawm chu a ri ta ulh ulh a. Thulhpui tlangval tam zawk an tluk chuan misangte chuan an lo kap let ve in thung bul chu an phen thuai a, tuibur hmuamda zet an in kah hnu chuan Thulhpui tlangvalte chu sawmhnih tha bak an awm tawhlo ang. Tlangval thenkhat chuan hmanrua an chuh hman lo vangin thing phenah an tawm tlawk tlawk a, an lu bul thing silai muin a den sawk chuan an te leh thawt thin, tlamngval thenkhat chuan an lo kal ta chu an inchhir kher mai, inchhirin awmzia a nei tawh hauh lo leh nghal. Chutia silai a rik dur dur chuan khaw lam atang chuan thawm lo awmin thing bul phen a Thulhpui tlangval dingte chu khaw lam atang a lo kalte chuan an sawi let ngahl tawl tawl a, tlangval sawm vel chuan hlau a tap pur chungin an in pe a, chungte pawh chu thah nghal vek thenkhat chuan duh mahse an in khap thuai a. An mmi mante atang chuan khaw lam chu a him tih hriain ram lam pan chuan tlangval za dawn te chu hmanhmawh takin an liam thuai a.

Lo tawk leh phawt tehse. Muttui mangtha ula

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 12th, 2019, 5:36 pm

PASÂLTHA SÂNGTUALA ( Mampuia pa )

BUNG – 184

( PASÂLTHA SÂNGTUALA thawhthu tawpna kan lo thleng ta, min chhiar sak thin tute chungah lawm thu ka sawi e, nangni zarah chauh a ni tiang ziak thei a ka awm ni, ka thiam lohna leh tlin lohna min hmuh kan sak thin hi ka van lawm tak em. In mi fuihna leh finchhuahna vang chauhin vawiin thleng thei ka ni.Tin, thawnthu a khaw hmingte, mihring hming leh hmun hming lo langte, chhe lam a min ngaihkawih sak lo turin ka ngen duh che u, in rilru a lo na anih chuan pawi ka tiin in mi hriatthiamna ka ngen e. Thawnthu a ni tih min hriatsak turin ka ngen nawn leh a che u . . . Ka thawnthu ziah min chhiar saktute chungah KA LAWM E )


Mi lu nen a hawng tur an nih vangin Satlâk tlangvalte chuan chin hrilh tur lam kal tirin, a nawlpui chu zawi muangin an râl man leh mi lu nen an tawi muang thung a. Raldawna hliampui tuar chu a rum leh vut vut thin a, Satlâk tlangvalte chuan ‘hei in pasâltha chhuanvawr chu a tuarchhel vut vut viau a lawm le’ tiin ngainep tih hriat tak chuan an râl mante chu an tih el hlawm a. Chutia Satlâk tlangvalten an tih chuan ‘ve khanglang hlawm che u hian, ka la that vek khawp ang che u, nangni Satlâk khua hi meivap ah ka chantir ngei ang’ tiin a lo an khum bawrh bawrh thin a. Pasâltha Laiawrha chuan ‘nang mi dawihzep kha ngawi chip cham rawh, naktukah naupangin se chaihin an chaih ngei ang che’ a tih chuan meng khup lupin a ngawi leh duk thin a. Mawipuia chuan ‘nimin kha chuan i hram nawm nen, hmeichhe nau nei ang mai a patling rum hlut hlutna tham anih loh kha’ a lo tih chuan lehlam hawiin a thinur leh na ti chu a then sawk sawk thin a. Raldawna chuan ‘nangni man nihai chuan thih ka duh zawk daih, khawnge silai kha min han pe teh u kan in kâp hlum law law teh ang’ tiin huaisen awm tak chuan Satlâk tlangvalte chu a melh ran a. Mawipuia chuan ‘i ngam tak meuh a nih chuan silai kher a ngai lo, kha kawihrui i ban a kha a awm reng a lawm’ tiin a chhang bul hmak a. Raldawna chuan a rin loh lutuk a an chhan vang chuan a ngawi ta hmak a. Thluahpui tlangval zing a Lengerha chu pasâltha Sângtuala thu angin an phuar ve lo a, a ni chu a thiante vaibel zuk tirtu leh tui intir tuah hmangin a thiante chuan a theih tawp a chhuah zia hriain an haw phal lo hial a.

Khua a thim chuan Satlâk tlangvalte chu lungdawhah meipui chhepin an thu nghuk a. pasâltha Sukthanga chuan
‘Val rual e, kan kalah khan, zingah khuanu a tap ai law,
Bahsam e, hiar kai le maw, leni e, mawi maw ka than hi e.
Arsi e, thlapa chawllaw, ralvawm arkhuanah e,
Zan thim e, zing hman seh law, kei chu rimnampa ka tlun e.
Kei chu e, mi that ing e, mualah thle lang ka duhin e,
Lu chung e, thlang vapual e, her law luai sawm ka samah e,
Kei chu e, ka senin sawnfual ka laihri ah nak e,
Pa vek vekah khan pa chu a hriau che kan awm e’ tiin bawhhla a han chham vang vang a, A chham zawh chuan silai mu ruak chu van vawr in a kâp dur a, midangte pawh chuan silai chu van vawr zawng chuan an kap ve un un a, Zawlbuk lam a mite chuan lo chhawnin Satlâk khua chu silai thawm kar a zai bung bung chuan luahin. Nula lam chuan arkezia tlangvalte ban tur buaisaihin an phi buai hlawm a. Nu chuan an faten mi fate ai an faten an keng chhe bik ang tih hlauin an fate arkezia siam lai chu thut chilhin ‘ti khan ti rawh, ti kha chuan a diklo’ tiin an lo hrilh zauh zauh reng a.

Zan khua chuan a khat tawkin silai chu a puak ulh ulh reng a, meipui chheh chu tlangvalte chuan lam hualin an haw haw luih luih a. Chutia Satlâk tlangvalte thaû khawk lai chu Thulhpui râl mante tan chuan thil hmuh hrehawm ber a tling hial awm e, a tuk lam chuan an tan engnge a her chhuah pui dawn an hre hauh silo a. An Lal fapaten Ngurpuii an man lai kha chuan an lu pawh an lâm duhlo kha a nia, chutia an va bawhbuai zet chu an tan a pawizia hriain an pasâltha Raldawna an huatna chu a zual kher mai, eng ang pawhin ngaihtuahin thinur mahse awmzia a neih loh zia an hre chiang kher mai. An thiante lubung lungdawh a an dah tlar bung an hmuh phei chuan an rilru beidawng lutuk chu an mittui a tla zawih zawih a. An rilru chu a beidawng tak zet a ni, an pasâltha Raldawna beidawng lah chuan a khat tawkin tawng chhe tak takin Satlâk tlangvalte chu a lo tawng ve ziah leh nghal a. Lengerha hlauthawng chuan ‘pasâltha hetiang kan nih tawh hnu hmanah tawng kam tal sum kar deuh la, kan vanneih chuan kan nung thei mai thei asin’ tiin a khak a. Raldawna lah chuan ‘hetia meikhup a kir leh ai chuan thih daih a tha zawk’ tiin a la tawng ta deuh deuh a. Pasâltha Laiawrha chuan ‘nangte reuh hian tawngkam feiki bar hlir a min chhun fak fak reng chu, ka va kham zo zai ta em’ tih pahin a Raldawna kha bawrah chuan a dawm zawt a, Raldawna chu ek thawtin lungdawhah chuan a mu zawi reng a. Thulhpui tlangvalte chuan ‘a chan tur tak a chang a ni’ tiin an lo melh thap a. Pasâltha Laiawrha thinur hmel an hmuh chuan ti dek a melh hrek hrek a. Khawvar tur leilung a lo lan chuan silai puak thawm chu a nasa sawt a, an râl mante chuan chu khawvar tur chu an huphurh kher mai, khua chu varlo tawp sela an ti kher mai.

Vartianah chuan thawm chu nasa sauhin ri thei tin reng nen Satlâk zawlbuk atang chuan an lo ri phei bung bung a, hlim thawm chu lo hnai zelin Lal Chhawnthiau chu a Lal thuam famkin nen lo kalin, pu Tawnliana erawh chu Thahru Lal in a thawn Lal thuam chuan a in thuam in nunau hmaah chuan an lam su nghalh nghalh a, an hnungah chuan nunau zawng zawng chuan lo zuiin an haw haw thawm pawh a nasa kher mai, an lo hnaih deuh deuh chuan Thulhpui râl an man te chuan lei chu a nghawrh dur dur hialin an hria a, an hlauthawng lutuk chuan zun fem an thlauh fap fap a. Nula te chuan an lawmpa chu arkezia banin hlim takin an in nuih var varin an in nawk salh salh hlawm a. Râl mante an hmuh chuan ‘ui ka ten lutuk, mi nun thalai hmu theilo ho hi’ tiin chil an chhak thawt thawt a. Chutiang a diriamna an hlawh dan atang chuan nun reng an beisei tawh hauhlo, hmeichhia in chutiang tak a an diriam chu an lai a nain an thinur hlawm khawp mai. An tih lan vaih chuan an chung a thleng tur an hriatchian em vangin tik pawh an ti ngam chai silo a, tlangval thenkhat lah chuan hmeichhe lam melh deuhte chu ‘in va kawlhrawng deuh ve mawle, ka lawmnu hi nang a melh phak a ni em mi’ tih pahin an chhuih leh pawp thin a. Pasâltha leh val upaten an khap vangin an khawih zui lo mai pawh a, Thulhpui tlangvalte chan chuan maian chan pawh a tluklo tih an hre chiang hlawm kher mai. Mipa naupang awm hlei thenkhat lah chuan chung râl man te chu lungin an vawm leh pawp thin, tlangval thenkhat chuan naupangte chu khap a hnehin an lo fuih sauh sauh a, naupangte chuan chutia an fuih chuan lung chharin an laiking ni lumai den pawp pawp a. Val upaten an khap chuan chung râlte chu an thaw huai a an mangan lai erawh a zual sauh thung. Mi lu chu hlâng a zawnin tlangvalte chuan zen lawng chuan an phuh dum thawt thawt a, Thulhpui tlangval la dam te chuan an thiante chutiang a lainatna tel hauh lo an sawisa lai an hmuh chuan an mittui chu dan rual lohin a lo hnam sawk sawk a.

Lal mual an thlen chuan râl an mante chu seluphan bulah chuan an thlung fur a, tlangval thenkhat chuan Lalpa hengho pawh hi hnawksak thei tawhlo in siam nghal mai ang u’ tiin chempui nen an ding tlar thup a, Lal Chhawnthiaua chuan an râl mante chu ngun tak a thlek vung a, an râl mante hlau chu puan tlang che dar dar chuan an ding khur dar dar hlawm a, lu thin mut mut pahin ‘an thiante hi chaih chhe deuh phawt ila, heng mite chungthu chu kan la ngaihtuah tha dawn nia’ a tih takah chuan an la him ta rih phawt a. Mipa nausen kum pawh la tlinglo te chu an pate chuan lo pawm pheiin chempui an kut a hmehbelin chung râllu chu an sah tir sak sak a, Thingnawi fawm rualte chuan an chempui lo hum chhuakin diriam takin mi lu chu an sat sak sak a, râllu chu hmuh tlak a awm meuh tawhlo thisen la awm ang chu sam la karah chuan a lo chhuak ve ngiai ngiai hlawm a. Tukthuan ei tur chuan Satlâk tlangvalte chu an tin ta, an râl man la damte chu Lal chuan chaw eitur chu khawn khawm tirin an ni chuan chaw chu an lem theih hauh lo, an thiante lu chu en in an ni pawh chuan an pumpelh bik a ngem tih ngawt ngaihtuahin chaw reng an lem thei hauh lo a ni. Tukthuan ei kham chuan nula tlangvalte chu an thuam neih that ber chuan an lo chhuak a, Pasâltha Sângtualate thianzaho chu thuam mawi dang lam takin belin an langsar nalh a. Thahru Lalte thuam chu a dangin a tâh a danglam em vang chuan pi Chhuanthangi te pawh chu nu dangte chuan an bawr lat lat a, Zoliani leh Pangpuii te unau pawh an thiante chuan an puan mawi danglam tak chu an bawr lat lat reng a, an ni chuan chutiang a khualthang kaite vang a an mawina chu hailo in a ruk chuan an nutate chu an chhuang ru khawp mai.

Lala Chhawnthiaua’n an mi mante a hmuh chuan thinrim takin ‘eng a vang chuan nge min rawn rumthaih zawng a in lo chet ngawt mai chu le, in eng pawi nge kan sawi ? tiin a melh tur khaih a. An râl mante chuan Lal hmel pawh en ngam lo kun chalin an ke zungpui hmawr chu an melh ran hlawm a. An chhan loh vang chuan ‘nangniho hi in tawng theilo a mi, nge in thiante in zui ve nghal dawn’ tiin a hrawk that that a. Lal thinur tawngkam an hriat chuan hlauthawng tak chuan an in melh thap a. Lengerha chuan ‘Lalpa kan pasâltha ten kan Lal kar luiin keini ho hian kan lo zui ta mai a ni, inkhaw chung a duh thal a kan chet theih phawt chuan kan khua chu hlauh rawn kan ni dawn in, in khaw ro thi leh dar tam kan lak bawk chuan kan Lal chu heng lai vel a Lal hausa ber a lo nih dawn bakah, kan khaw phuba chu kan la dawn a ni’ tiin a sawi khur dar dar a. Lal Chhawnthiaua chuan ‘nangni duham na vangin ka khuate nunna der thawng a alo awm, in Lal fapa leh in tlangvalte pawh Lal fanu pawisawilo an ruk vang a loh theih loh a kut thlak a nih zia pawh hre duh lo khawp a chapô leh duham maw inlo nih, in pamhamna hian chhiatna bak a thlen hlei lawng e, lo ngawi tak rawh u in chanvo tur lungngaihna chuan a lo zui ngei ang che u’ tiin a thinrim lutuk chu a biangte chu a lo pawng tawlh tawlh a. A vaibel dawn chu sehin ‘hengho hi engtin nge kan tih dawn le’ tiin a han au that that a. Tlangval thenkhat chuan ‘Lalpa kan chung a an duh chhiat ang chiahin he laiah hian nuai bo nghal ang aw’ ti a au in seluphan chu an pan ta hul hul a.

Pasâltha Sângtuala chuan ‘La ngawi rih lawk teh u, Lalpa hengho hian kan khawchhung an tih bawlhhlawh hi a tha dawn em mi ? an khawchhung ah ngei an nep zia a nulaten an hmuh theih nan ti hian chhuah ila, kan run ngei dawn tih an Lalte pawh lo va hrilh sela, heng mi tenawmho leh an khuate chu kan nuaibo vek zawk dawn em mi ?’ tiin Lal chu a en hauh a. Lal Chhawnthiaua chuan ‘tlangvalte u la ngawi lawk teh u, kan pasâltha sawi ang khan ti ila a that zawk ka va ring ve, hengho hian an thih tur hria hian hun hmang sela, an sual man phurin hrehawm takin hun lo hmang mawlh rawhse’ tiin a han sawi a. Tlangvalte en in ‘heng an thiante lu kan lâm hi entir phawt ila, an lu kan lam dan tur an hriat lawkna reng ah pawh’ tiin a han sawi a. Satlâk tlangvalte chu melhin ‘khawnge kan sadawt hi a awm lâm chu tan ila’ tiin a han sawi a. Sadawt chuan a hmanraw mamawh a khawm zawh chuan Lal inah chuan an lut dial a, Sadawt chu Lal leh khawnbawl upate , pasâltha leh val upate chuan an lo zui duah duah a. Sadawt chuan a thiam hla chham in mitthi kâ keu ângin artui chhum chu a hnawh lut a. milu lâm chu an tan ta, milu chu zen lawng chuan an phuh dun thawtin a khat tawk chuan chempui in an sat leh sawk thin. Ni vanlaizawl a thlen meuh chuan an milu lam chuan mihring hmel pawh a ang tawhlo hial a, An râl mante chuan an thiante hmel hmuh tlak tawh meuh lo khawp a diriamna an tawh lai an hmuh vang chuan tlangval dawih deuhte chu an thidang hial a. Thulhpui khua a Raldawna inla huaisen leh pasâltha ang ber a tawng pung pung meuh pawh chuan sawi tur neilo in a khâ a chih tlatin, hlauhna chuan manin a hmai chu na dang lupin a zun fep chu a thlauh zuih hial tawh a.

Lal Chhawnthiaua chu lukai chheh chhawh chuan an râl mante bulah chuan kalin ‘nangni mi pamham te u, tunah hian kan chhuah rih dawn che u a ni. Kal vang vang ula in Lalte hnenah chuan keini Satlâk tlangvalte hian kan lo run dawn che u a ni tih lo hria ang che u, tu chungah mah zah ngaihna kan lantir hauh lo ang, tunah ka hmuh phak lohah kal nghal rawh u’ tiin tlangvalte hnenah chuan chhuah turin a thu a pe a. An râl mante chuan lawm luat a chet sawnna chang hrelo in Lal Chhawnthiaua chu an melh thap a. Lalin ‘nangni hian in thiante in zui ve duh zawk a mi’ a tih chuan hlau hlawpin lungdawh lamah chuan an tlan dawr dawr a. Naupangte chuan ar um tak a um in lung leh an hmuh theih ang chharin an vawm pawp pawp a, hlau hlawpin Satlâk khua chu an chhuahsan ta a. Hliam vang a tlan ve theilo Raldawna chuan a naute tlan a hmuh chuan tawngkam chhe tin reng a ânchhe lawh bawrh bawrhin a au tuar tuar a. A bul a thing bung lain ‘a ngam chuan min lo hnaih teh u’ ti a in hrosa in a tiang chu a vai vut vut a. A ding nghet theilo che sawn deuh chuan naupang pakhat chu a hlap let tawp a, Raldawna chetdan hmu tlanmgvalte chuan bawr hukin an thelh fel meuh chuan Raldawna chu a lo thi chiang hle tawh a. Lal Chhawnthiaua chuan ‘a chetdan in a zir em a nih kha, misual pakhat a kiam belh a ni mai’ tiin a tlangvalte chu a hauh duh hauh lo. Tikhan ruang kha va senghawi ula a tha a nge’ a tih chuan ruang chu zawnin tlangvalte chu an kal hul hul a.Lal Chhawnthiaua chuan ‘tlangvalte u, kan lo sawi tawh angin naktuk hian funpui kan er dawn a, nizan lam mu mumal lo kan nih vangin hahchawl hma ila a tha ang, kal chhuah hun tur chu naktukah kan rel mai dawn nia’ a tih chuan an milu lâm chu lungdawhah tlangvalte chuan an tar zawh chuan an tin ta a. A tukah chuan tlangvalte chuan funpui erna tur hmanrua la khawmin an mahni tum a lum hlen ngei tumin an phe leh sung sung a.

. . . . . + + + + + . . . . .

Thulhpui tlangval tlanchhuakte chu hlau hlawpin eng emaw deuh an phawk takin an darh leh hak thin a, tu amah chu tawng zai chhat thei reng an awm lo. Kal lam a an hlim zia leh an ruahmanna te an ngaihtuahin tun a an nundan an khua Satlâk tlangvalten run an tum dante an ngaihtuah chuan sawi tur an hre lo a ni. An Lal thu pawisa lo a an kal ta chu an inchhirin ban a pel vang vang kher mai, Khua an va luh chuan huphurh takin Lalin chu an pan ding nghal a, an chin an hrilh chuan Lal leh khawnbawl upate chu chek vang vang hlawm a, hrehawm ti tak chuan sawi tur pawh an hre mai bik hauh lo. Lal leh khawnbawl upate chuan ‘a van pawi tak em, kan thu kha lo ngai ni ula chuan muangleiin kan awm ngei awm si a, Satlâk tlangvalte chuan an thusawi chu an hlen ngei awm si a, engtia tih tur chu ni ang maw’ tiin an thu kun lap hlawm a. A tawpah chuan ‘engpawhnisela he lai hmun hi a him tak lohah chuan kan nun theih nan kan thenawm Lal kan bel mai a niang chu, naktukah khua chhuahsan turin kan in buatsaih ang, tlangau pa nang zanin ah nunau lo au khawm ang che’ tiin Lal chuan a han sawi a. Zanriah eikham chuan an khaw tlangvalte chetdan an hriat vek tawh vangin Lal mualah chuan kun nghiai in nunaute chu an lo kal khawm a. Lal chuan thu pehhel kuallo in ‘hei kan khaw boruak chu kan hre tlang a, kan thu ngailo in kan tlangvalte chuan Satlâk khua an lo va thawng a ni, chuvangin Satlâ khuaten min lo nan chin hmain kan khua hi kan rauhsan mai a ngai a ni, nun hlut chuan naktukah khua chhuahsan vek tur a ni, in duh khua belin in awm thei ang’ a tih chuan tuman sawi tur an hre lo. Satlâk khaw run tum kal tlangval chhungte chuan hrehawm an ti zualin an naupan lai hun atang an luah ram chu an chhuahsan a lo tul ta a. Tumai pawh chu an lung a chhiain mittui nen ngawi rengin an tin thuai a, an bungraw neih ang chu thulah hnawhin an fate thil hrethiam lo chuan an chhungte bungraw siam chu a chhan an zawt sek hlawm a.

A tuk hma takah Thulhpui khuate chuan tukthuan chu hma takah eiin lungdawhah chuan an chhuak khawm a, an thlawhhma seng mai tawh tur lam chu mittui nen thlirin ‘a van pawi tak em, engti zai zia chu nge maw ngam loh chalah chil in lo va hnawm kher kher chu le’ tiin tarho chuan mittui nen tlangvalte chu melhin an mittui chu a far zung zung hlawm a. Lal chuan ‘khai ule, tunah chuan nun bul tan turin kan kal vat a ngai a ni, Satlâk khuaten min lo nang palh a nge’ a tih chuan mahni duhna lam pan chuan an kal ta hlawm a. Thulhpui khua chu duham na chuan a ti darh a, hmalam hun dawn leklo a hming lan duh vang mai a che te chuan zah leh mualphona chiah an chang ta. Thulhpui khua a cheng u leh naute chu tunah chuan an chhungte khua belin an darh ta hlawm a, Chhungkaw sawmhnih chuangte chuan thlamuang tak a awm beiseiin an do khua Satlâk ngei belh tumin an pan hlawm a, kal ve lo tur midangte chuan ‘kan hlauh ber maite belh tum tak tlat mai chu a van at thlak tak em, in harh chiang meuh maw’ tiin mak ti takin an melh hau a. An duhthlanna a nih vangin dan luih erawh an tum chuang bik lo, mahni seh seh mual hranah tiin an in then darhin ‘kan inhmu leh a ngem’ ti a ngaihtuahin an tum lam panin an inthen hlawm a.

. . . . . + + + + + . . . . .

Satlâk khuate pawhin an lo sawi lawk tawh angin Thulhpui khua run tur chuan tlangval za chuang mah chu rammu in an chhuak ta sung sung a, an thinur in pawisak an nei tlem kher mai. Tlangvalte chuan ‘kan Thulhpui khua chu rawh mam pak mai ang aw’ ti a infuih in an thinur na chuan tha pein leh tlangval chak tha the thaw an ni bawk nen an nikhat ban pawh a thui tham kher mai. Zan an riahna ah pawh râlveng in dahin chetsual an tum hauh lo, tluang tak a kalin Zan thum an riah chuan Thulhpui khua pawh an ral hmuh tawh a, khaw chung a mute arla vir sek an hmuh chuan ‘kan thulhpui khua chu an rauhsan a va ni awm ve’ tiin an thinur laklawh chuan pawi an ti zawk hial a. Pasâltha Sângtual chuan ‘thisen chhuah ngailo a an awm chu a lawmawm hle zawk a lawm, an khawngaih thlak zawk hle alawm le. Mi pamham te vangin an buzawl meuh pawh an luahlum thei ta lo chu a nia, an tan chuan a van a dawn tak em’ tiin vaibel a fawp hlat hlat a . . . .

Vawiin chanchin tha thlenna kum – 125 hmu thei a min hruai thlengtu PATHIAN hnenah lawmthu ka sawi a. Chanchintha vangin nunhlui thim chuan min kian san a, vawiin hian nang leh kei hian chanchin tha zar zoin khawvel dangte rualin kan nui a, Lei pang lehlam a mite nen kut kan beng rual ta chu a nih hi. Tiang zawng zawng hi LALPA PATHIAN MALSAWMNA a ni tih kan hriat nawn fo a va duhawm em. Nungdam a min dah tu PATHIAN duhdan in kan phak tawk theuh a hun hman hi kan bat a ni. Nang leh kei hi lei leh van palai kan ni si

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)