PASALTHA SANGTUALA BY Vana Fanai (Completed)

[Ngaia]

PASALTHA SÂNGTUALA (Mampuia pa)

BUNG - 120

Naupangho chuan Saingho chu Lal mual lamah chuan zawn in Ngiazoa te unau chu in ti thuneiin naupangho chuan Ngiazo saingho hi ka lo khawih ve aw tiin an dil lem lem hlawm a,an ni unau chuan in tithei tak chuan zawn chu an lo phal in saingho hmaah chuan an kal a,an hnungah chuan an thiante chuan saingho zawn inchuh chuan an inhnial laih laih hlawm a,kawng bul a puitling te chu lo chhuakin saingho lian leh sei tha tak naupangho lo zawn chu thlek in,a thente phei chuan an han chul thuak thuak a,tu mai pawh chuan chutiang a saingho lian tha leh seiin an khua a lo deng chu an rin phak bak a nih vang chuan naupang hnungah chuan an zui hul hul a,tu kâh nge an tih chuan Ngiazoa te unau chuan an u kâh a nih thu chuan an lo chhangin Sângtuala nge nge tiin an hmuh hnu pawh nise hmuh leh ngei tum chuan an in pang aw zial tum tum a,fanu nula nei te lah chuan mâkpa a neih ngei tum in an lo nuih tlawn tha hlawm a,artui lo puanhnuai tawk lah bo lo Lal mual an thlen meuh chuan artui pawh iptepui chanve hmawk chu Sângtuala iptepuiah chuan a awm tawh a, Lal leihkatlangsang atang chuan Ngurpuii lah chuan a lo vei nuih saih saih a,thingkhawn bul atang chuan Bawlpu fanu leh a thiante chuan an lo thir reng bawk a Sângtuala pawh in melh lam tur hrelo chuan a kun deuh chal a.

Lalnu Thanthuami chuan a beisei loh lutuk a saingho lian leh seitha in a khua a lo deng chu chhuang tak a lek valh valh chung chuan ‘khai ule tu nge he kan ramsa ropui hnuk chhat tu hi,kan val upa duh tak Chhâwnthiaua khan a mi sawi dawn ? nunau te pawh in a chinchhuak in an hre chak ang tawh bawk a’ a han tiin a tawngkam hman chu hre chhuakin Lalnu Thanthûami chu a sen tan tan a,a nî zak sen deuh tal tal chu hrethiam in Ngurpuii pawh chu midang hmuh loh theih tur ang ber chuan a then ru sak sak a,val upa Chhawnthiaua meuh pawh chu tawngkam a vang chuan a ka hau a din reng vang chuan Rinmawia lo pen chhuak in,Satlak khua chuan mak ti tak chuan an thlir thup a ‘in beisei loh zawk ni mah ila,mit ngei a hmutu ka nih a vangin ka han sawi mai a nge, kan ramchhuak kha kan tum a fuh dawn lo ah ngaiin kan beidawng hman hial a,kut ruak a lo haw tur a kan in ngaih hnuah,zan thum tal riak leh mai ila kan tih avangin kei ni pali Sângtuala te,Chungliana leh Thuamkunga nen kan in zui a, tlangsang niin a thawt tan tih chuan Tlakal ngawpui chhung lei lam chu a la thim khup a,kan riahbuk atang a mual thum/li lai kan kan ang tih chuan,kan hma lawkah chuan hnah han in hlap ri suai kan hria a,ngawpui thing sang tak han hlap ri suai chu kan ngaih a tha loin kan han chian chuan sai pui leh tun a kan kâh tak hi kan hmu a,zen te kan sawh belh lai chuan kan rim a lo hria a ni chek a niang,chu,kan hawi chhuah leh meuh chuan inchhung dung let hnih tha emaw chauh kan karah chuan a lo tla in,saichâl chuan a nawn vai thuak thuak in min lo pan ngoh ngoh a,kan pasaltha Sângtuala silai chu puak dur in,sai chaldâr a thir lut vang chuan a kal lai pawh a tawp chawtin a nghing lawih a,keini pawh chuan kan han ruan ve nghalin saichâl chu a awp ta rup a,sâichal thawh tum a inleng vuat vuat lai chu kan pasâltha chuan hnaichilh in a beng kawm hrulah thluak pawh ngei tur chuan a han nawn leh zawt a.

Saichâl meuh pawh chuan a thluak pawh a silai mui lut chu dawllo in a ke chu a han leng leh uih uih in a zal ta a, keini chuan kan lawm em avangin sai thi tawh hnu chu kan han nawn leh a,beidawng tawh kan nih bakah kan rin loh lutuk a saingho khaw dangte khum lap tur kan hawn thei tur chu kan hlim tlang khawp mai,kan pasaltha Sangtual hi dam reng rawhse tiin a han au tial ruai ruai a,nunau te chu Sângtuala tiin an au rual ta dual dual a,Lalnu chuan Ngurpuii chu tir in khawnge ka kumthum zu kha seki khat lung khan han thâl teh khai,ka pasâltha chu nopui ka han leh ngat teh ang khawnge ka pasaltha Sângtuala chu lo chhuak tehse a han tih chuan nunau an reh leh ta thup a,a thiante phur pheng chuan Sângtuala kal kun ngaih chu zawn kang thut a,a ni inring lo lutuk phu nasa lutuk chuan a ban chu a han phar kual vak in,Thûamkunga leh Chungliana sam zialah chuan a tham a,ka sechal te u hmanhmawh teh u tiin a han phih dak awrh awrh a,Satlâk khawpui hlim thawm chu belrawh mualah chuan a thang khawk liam ta ruih ruih a,Ngurpuii chuan a ni chu seki khat pam a zui tuitling hlan pah chuan la rawh le duh tak a han ti zawi sap a,Lalnu Thanthuami zak chu a sen tawn tawn a,Sângtuala chu leikatlangsangah a thiante chuan nghat dawtin,Lalnu seki no chu a han dawm a mitsiai zauh pah chuan zu chu a han tem lep in ‘kan lalnu zu nge nge a thlum tui e,tep khatah pawh lu a kai ruai a lawm van pawh pit dawr tia lekin ka hmu’ tiin a han fak sak a,Lalnu chu seki pek kir a tum chuan a ban nghal zat a,Lalnu Thanthûami chuan khaih a hetiang thuar tham lek i in te chuan tu nge mâkpa ah duh ang che,han tlak pawp rawh khai,khuanu zar ah zu zawng Satlâk khua hian kan phang ngai hlei lawg e’ tiin in zo tur chuan a han nawr lui a,a dang zo dawn lo tih hriain hreh tak chuan seki khat kum thum zu chu a tlak ta pawp a,a in zawh meuh chuan a lu chu a vir nghal in a pai nghal chhah chhah a.Lalnu Thanthûami chuan midang te chu hah zu zuk in zupui tuitling chu tukhum sai dar dar chuan an dawt hlawm a,an duh tawk meuh chuan ramchhuak a kalho chu kal ngil thei a ram an awm tawh lo.An sa chanai pawh chu an tluk pui deuh rap rap hlawm a Mualkunga chuan Sângtuala chu chhawk in a ni pawh chuan lawm tak chuan a phur hnungah chuan a pai thla chhah chhah a,insum viau mahse a kal ngil thei hauh lo,sumhmunah chuan a let rawk a a hnar zui bar bar thawmah chuan a nu te chu chhuakin an zawn lut thuai a, khum ai ah mutin tui tak chuan Sângtuala chu a hnar zui barh barh a,salu lawm chu kawng kharah chuan an in sul zut zut bawk a.

Satlâk pasaltha te an liamhnu chuan Lalnu Thanthûami chuan a thusawi chu a han ngaihtuah letin a zak chu a sen tan tan reng a,a pasal Thawmliana chu a ngai ru khawp mai Lungtian khua an awm lai a Sângtualan saingho a hawn tum a an lawm laite chu hrechhuakin tum dang ang lo tak chuan Lalnu chuan zu chu a khawn sek a,khawnbawl te pawh chuan an Lalnu awmdan chu mak an ti ru deuh in Val upa Chhâwthiaua nen an karah awm a awm emaw chu aw an ti ru vang vang a,lo awm pawh nise tun an dem hran hauh lo a pasal in a tih dan hre tu te an ni a,zanlai arkhuan chuan khawnbawl te chu an tin in Ngurpuii muhil emaw a tih chu a Lalnu Thanthûami chuan a han thlek vang vang a,ka vahnu i pianphung leh hmel hi chu ka va han chhuang tak che em,tu pa emaw zawng i la ti vannei dawn mang e,khuanu zarah pasal fanau neiin hun hmang mawlh ang che’ tiin a vahnu sam chu a han chul sak hliau hliau a,Ngurpuii chu muhil harh hlim niawm tak chuan a han meng zawk a,a ni chu melhin ka ni i la mu na nge,i muhil thei lo a mi ? tiin a han zawt a, Lalnnu chuan muhil theilo lo e,ka khawnbawlte an haw chauh a hei kei pawh ka mu dawn e,mangtha muttui le tiin a mutna chu a pan san thuai a.

Ngurpuii chuan a ni kal chu thlirin a va zung a,a zun zawh chuan muhil mai loin a ni thusawi chu a ngaihtuah chhawm a,a ni vanduai zia te ngaihtuah in a pasal nen an karah fa piang sela an inthen mai chu a ring hauh lo,mi then khat chu fa neih loh vang a inthen an awm thu an sawi a hriat phei chuan,hmangaih vang a innei nge an nih hmeichhia chu fa nei tur a tan leh mipa rawngbawl tu atan chauh tih chu Ngurpuii chuan a ngaihtuah in a mut chhuak chu vawmbo ang hlauh niin,khuan hmasa pawh chuan a la meng ta reng a,pasal te han nei ve sela a pasal chuan a hmangaih vang in nge a neih ang,Lal fanu tlangchang tur a nih vang nge a hmel mawina vang tiin a ngaihtuah chhunzawm a,Lehlawn an chhuahsan dawn a Sângtuala nen an awmdan leh tun hun a Sângtuala a be fâl thei hauh lo te chu ngiahtuah kai zelin thinrim na thikna chu lo chhuakin a muhil thei ta hauh lo a, chutia a muhil theilo a mut men reng lai chuan khawvar ar chu a lo khuangin zing sava tlangau chinrang chu siahthing lerah a lo hrem leh lauh lauh in naupang pawh chu an lo ri leh nauh nauh tawh a,tui chawi tur chuan a in siam zuiin tuikhur lam pan chuan a liam zui nghal a,a hnung a hmanhmawh tak a pen thawm lo awm lam chu en in Ngurpuii chu a ding ta chawih a.

A rilru zawng zawng a a ngaihtuah thin Sângtuala ngei chu thal keng chuan a lo kal zan zan in a lo nuih var var a,a bul a lo thlen chuan mak ti tak chuan a lo en hau a,Sângtuala chuan nui sang chung chuan ‘Lal fanu i va han hma em em ve,i va mal ve nangmah in i inchawi thei dawn a mi hawh i hmanhmawh teh ang,midangte reu reu hian min lo hmu a nge’ tiin tuikhur lamah chuan an inzui thla dawr dawr a,a kut vawnna tal puh pah chuan,nang zawk chu i va han hma em em ve khawiah nge i kal dawn zing,thang thang ah a han ti ve thung a,Lal fanu leh pasâltha thangchhuah chu an in melh ta ran a ‘eng vangin nge lo len reng reng I tum loh a, chhuan lam fahrah te hmangin min hnar a ni ber in ka va hre ve,kei chuan ka engkim i tan ka hlan a,nang erawh chuan min hran san lui tlat bawk si a’ Ngurpuiin lungawi lo aw tak a a ti a, Sângtuala chuan ‘ka hlat lui che a ni hauh lo kan kar hi a zau em a ni,nang ai a thlakhlelh leh duh hi ka nei hauh lo,Lal fanu i nihna hian kar min dang a nih ber hi ‘ a han ti zuai raih a,an hnung a hmeichhe tuichawi tur tawng barh barh thawm lam chu melh zauh in,zanin chu kan lo chuangkai ngei ang tiin kawng thlangah chuan pengin a liam thuai a,Ngurpuii pawh chuan an dinhmun a ngaihtuah chuan hmeichhe tan hming hliau a awl zia hriaiin,Sângtuala in la hrnag lui pawh chu a hrethiam ve tan ta a,hmeichhe ngaihtuahna tawi tih takah a duh ang chuan han awm vaih sela,archuk tuilo khawp in tlang rel a phur dawn a ni tih a hriat chuan a harh zawk a.

Sângtuala pawh hmanhmawh tak chuan a kal zel a bel rawh mual lam chu panin a ngaihtuahna kawm chung chuan zawite chuan a kal zel a,arhmul tla dauh nuaih chu hmuin a piah deuh a thing awn remchang awmchen velah chuan inperh kaiin vaibel chu a han siam kai a,muangchang chuan a fawp vang vang in a khu chu a chhem leng cham cham a, Ngurpuii nen an kar thu chu ngun tak chuan a ngaihtuah in, an ni pahnih chu in duh viau mahse a pa hian a pawmzam thei a ngem ? tih chu ngaihtuah ngai tak a ni,a mah er tu an awm nge awmlo lah hriat va ni suh,engpawhnise a mah leh chhungkaw him zawk nan Lal fanu chu theihnghil tha zawk dawn a hria in harsa ti tak chuan thu tawp chu a siam ta,a han ngaihtuah thui chuan a fanu chungah tu in emaw tun a rilru a siam mek hi siam ve in a farnu tun a a rilru ang chiah hi thleng sela,a nau chuan tluk chhiat phah sela eng rilru nge a put ang tih a ngaihtuah chuan a hrehawm ti lutuk a mittui chu a lo hnam tiam tiam a,a khawhmuh chu a tawi tulh tulh in zing nichhuak lawm sava chiar nak nak leh sava nupa niawm tak hlim tak a in chhaih zar zar chu thlirin,theih nise Ngurpuii nen sava a chan a hlim tak a hun hman chu a chak rum rum a,

Chutia ngaihtuahna kawm a a thut ngawih reng lai chuan a thlang a hnim hrut thawm ri faih chu hriaiin a ngaihtuah na atang chuan harh thutin a han en thlak chuan, Ngharbawr thakin tawh hi thingbulah chuan a lo hawi vat vat a,vaibel rim hria chuan a hnar chu a lo len vat vat mai bawk a,fimkhur tak chuan a thlang a sava nupa inchhaih lai chu a thlir ve dauh dauh mai bawk a,Sangtuala chuan a thâl chu kah mai theih tur chuan fimkhur tak chuan lek chhuakin a inpeih fel chu ngharbawr chuan hmu fuh in a lo melh ve kar a,ngharbawr tlanchhe tur tak chu thâl fang chuan a len thla nawkin a thlang a phuanberh kungah chuan a kilh bet chat a,ngahrbawr na ti chu a te teng tung mai bawk a Sângtuala chu chhuk vatin ramsa na tuar a te tuar tuar chu a chempui hnung chuan a khawng pawp a, ngharbawr luruh chu keh rawpin a leng awrh in a zal ta a a mit sir chuan thil phe zawk chu hmuin a bawk nghal rawp a,a bawk fel chauh tih chuan thâlfang chu a lu chungah chuan a rawn ving thuak a,thâl fang lo chhuahna hmun atang chuan thawm lo awm in rawlthar aw pawr harh chuan,engtin nge ka thelh thei le tiin hleikapsen hlau tlan liamna chu a thlir vang vang a,hawh u ka thâlfang talk ha i va zawng teh ang u tiin a han sawi zawm a, reilo teah Thanchhinga chu a lo langin a hnungah chuan a thiante pathum chuan an lo zui a,a kap fuh lo mak an tih zia ngawt chu an rawn sawi phei mawlh mawlh a,Sângtuala chuan thalfang lek chhuah pah chuan naute u kan va in ti palh teuh ve tiin thalfang a lo bum dan a sawi chuan an hmel ah chuan pawi tihna chu a lo lang a,lei lam chu bih ran in Thanchhinga chuan pasâltha min ngaidam rawh i awm tih ka hriat loh vang a nia a han ti sap a,Sângtuala chuan ka nau ka hrethiam a lawm,min tum lo tih hi amaherawhchu tunhnu chuan fimkhur tawh ula kan hmanraw lek reng reng hi a lei bet zawng a lek loh chuan,kan tum loh deuh hian pawisawi a awl ngai a han ti dam thlap a.

A hma ni lawk a kut thlak hrep tu a nunna tan a hlauhawm tak a an ti chung pawh a thinrim hauh lo chu mak an tiin an hrethiam lo khawp mai,sanghar ruang thing a lo in kilhbet thlap lam a pen mek an pasâltha chu an thlir thap a an la din thap hlawm vang chuan Sângtuala chuan an rilru hre thiam in,a zing tho hma dai vel a nih mai thu sawiin sanghar a hmuh dan te sawiin a thalfang chu phawi a han phawi a, a hmawr a ngharbawr chu a lek larh larh a, Thanchhing in thiamloh duh suh u,kan duh vang ni hauh lo a pawisawi a awl ziate pawh in la tawng zel dawn a,kan thil tawn hi a tha lam a kan lak thiam zel a ngai a nia,khuanu zar ah in dam a sei a nga,nangni thianzaho vang hian kan khua chuan hmabak êng tak kan nei ngei ang,ka sawi tawh ang khan eng pawh ti dawn ula engnge a hnuah lo thleng dawn tih hi ngaihtuah hma sak tur a nia,hre reng ula in thiante pawh zirtir ang che u,kan thil tih reng reng hian engnge a thlen dawn tih ngaihtuah chung a nun kan hman a ngai a nia,kan tihsual hi insiam nan hmang ila midangte nun a thleng pawh,chutiang tho a kan nun a tha lam thu a kan lak chuan a tha ngai e a han ti dam leh thlap a,engtin nge awm in tum in la kal zel dawn nge ? a han tih chuan an ni thianzaho chuan,a la hma bawk a kan la vak kual leh deuh a nge tiin an chhan tak chuan a ni Sângtuala chu haw tur chuan a kal ta a.

Tukthuan eilai chuan a pa chu a ngawi ngal reng a vang chuan a hau vak dawn emaw tiin Sângtuala te unau chuan ngawi reng chuan chaw chu an bar mawlh mawlh a,Ngiazoa te unau erawh chu tuk dang zawng ai chuan an hlim in chaw eilai chuan an tawng ve sek a,a nu chuan chaw eilai in naupang an tawng sek ngailo ngawi reng khan puar tak in ei rawh u a tih takah chuan an ni unau pawh chuan ngawi reng a,chaw ei kham thuai in Ngiazoa te unau chu an thiante nen chuan an in zui chhuak leh ta dam dam a,tukthuan ei kham chuan pu,Tawnliana chuan ‘Sangte hei i nu leh i u te nen kan lo sawi dun a,kan Lal in khi hmeichhia chauh awmna tih takah sa lû lian tham hi a awm hauh lo in,khuavangin beng lo chhu chhet sela kan khua ai a psaltha nei tha khua hi kan velah an awm hauh lo a,sa leh râlah chuan kan chung a leng tur hi an awm bik na hek lo,chu mi a nih vang chuan kan Lalnu chawimawi nan leh kan Satlâk khaw ropui zual nan, saingho hi Lal inah dah mai ila kan lo ti a,engnge in unau khan in ngaihdan ? nu leh pa ni mah ila,nangmah ni rawn lo a thu han pawhchah hi a fel ber hauh lo a’ tiin a han sawi dam thlap a,a hau hrep dawn emaw tih lai a thildang a han sawi zawk chu Laiawrha te unau chu an thaw huai a,Laiawrha chuan ‘ka pa chu tiangte chu in rawn a ngai lo a sin,nangni nu leh pa leh unau te berin tha in tih chuan keini tan chuan han hnial thu a awm lo a,kan dam a nga hei ai a saingho tha te chu kan la leh mai tur lah niin,kan Lal in a ropui theihna tur a nih phawt chuan a tluk a hlu a awm chuang hauh lo’ a han ti a,Santuala pawh chu a lo bu nghat nghat a.

An rem ti tih a hriat chuan pu,Tawnliana chuan aw le, nangni a tha thaw tu berin rem in tih chuan a lawmawm a nih chu,kan Lalnu pawh a lawm viau ta ve ang engthil pawh ti dawn ila,chhungkua kan nih ang tak hian thil sawiho hi chin than a neih tur a ni,pa ber nih vang a kan thu a kal lutuk chuan a tha ngai lo tiin a han ngawi vang vang a,nizan lam a in awmdan chu in duhthu ni mah suh se tun hnuah chuan mahni in sa seng theilo khawp chuan engmah tawh suh ang che u,mi tam tak tluk chhiatna chu duhsakna an dawn hian kei ber emaw ti thei tiin an chapô thin,mi chapô te chuan rei an daih ngailo chuvangin kan zawh tawk kan hriat reng chuan mualphô leh hmingchhiat hi kan khum ngai lo tiin a fate chu a zilh zui a,chutia an ngawih thap lai chuan sum hmunah khuh thawm lo awm in,an kawngkhar tlengrelh chu a tawlh zal zal a, thenawm putar a vanglai a huaisen leh tlawmngai a sawi thin Neihlaia chu a lo chuangkai in kut khur dar dar hian a lo hawlin Sângtuala bulah chuan a han thu chat a,eng emaw sawi chuan an phul hlut a pu,Tawnliana chuan chhuah lawk a ngaih thu chu sawiin saingho puanhnuai tat tat chung chuan Lal in lam pan chuan a chhuak ta nghal a.

Pu,Neihlaia chuan khuanu venna zarah nangni unau in dam a,Satlâk khua chu khaw nazawng er phak rual loh kan lo ni hi a va lawmawm tak em,in dam a sei a nga kan khua hian pun lam kan pan zel turah ngai ila,in dinhmun ang thleng tur chuan vanneih tel a ngai a ni, chutih rual chuan thang that hlawh duh luat vang hian humsual dai thei a niin,thenkhat chu hmeichhe lam ah an hlei phah in chu an nunhlui vang chuan,khuarei ah inchin hle thin a ni,ka hriat ve phakah chuan nangni chu in la him rih niiin ka hria a ka lawm khawp mai tiin a han ngawi vang vang a,vaibel khu chhem chhuah luai pah chuan a han sawi zawm leh a,kan vanglai han in nang sela zawng in thlazar hnuaiah thang that zawng kan hlawh ve in rallu zawng kan khai ve nual ngei ang han ti chuar chuar a,putar hmelah chuan lungngaihna thuk tak lo langin tunah zawng kan he ti zo ta a nih hi a han ti chuai raih a,Laiawrha chuan an inleng putar melh chung chuan ‘ka pu min fak ar ek zo vek dawn a lawm le,in kawng sahsa ah par kan lo chhuah mai chauh zawk a nih hi awm lo ula chuan keini unau hi kan lo piang ve tawp nang,lo piang pawh ni teh reng ila,khawi khaw Lal sal ah kan awm mai tur lah niin’ a han ti a,an inleng putar mit a tang chuan mittui lo hnam in a han khap per chhak chhak a,an inleng putar mizia chu mak an tiin ngaihtha lo tak chuan an unau chuan an in melh zauh a,Laiawrha chuan ka pu engnge thil diklo nge awm khawngaih in inthlahrung hauh loin han sawi vek teh,tih theih kan neih ve zawngin i tan theihtawp kan chhuah ngei ang a han ti a, putar Sambuana chuan a mittui chu a thup seng ta lo,biang a mittui luang ngiai ngiai chung chuan an unau chuan a han melh vang vang a,ka lo beisei ruk ang chiah in ni a han ti a.

Min pui turin ka ti lui hauh lo che u a nia,amaherawh chu min puih theih hlauh chuan in chungah ka lawm hle ang a han ti leh bauh a,Sângtuala chuan ka pu khawngaihin i lungngaihna chu han sawi teh,ka u sawi ang khan tih theih kan neih chuan kan theih tawp kan chhuah ngei ang a han ti ve leh a,putar chuan a nih chuan inchung ah ka lawm e in ngaihdan in thlak leh a nih pawh in ka dem hauh lo ang che u,keini chhung vang a huat in kai leh in hminghliau lah ka duh na hek lo tiin a han sawi leh bauh a,aw thian kharh kharh in ‘ka fate u,Tlangzawl khua a ka nau fanu chu an khawnbawl upa fapa chuan neih luih a tum a,an ni hmeithai mai an ni nen an mangan thu chu nimin piah khan ka beng a lo thleng ve chauh a,ka hriat rual in kan Lalnu hnenah thlen hial ka rilruk rum rum rual in,keini chhungkua vang a Satlâk khua dinhmun hlauhawm tak a dah ka duh loh a vang in ka insum leh ta in in hnen ka lo pan ta zawk a ni,man leh mual lamah chuan an buai lo tih chu tlang hriat a ni a,an pasâltha nunrawng Darlaka chuan,ka nau nupui Tluanglehi hnenah a fanu chuan khawnbawl fapa a nei duh lo a nih chuan,hmei a neih a tum thu a lo chhakchhuak rawl nen,tuman an thlavang hauh ngam lo mai pawh ni lo in,an in bulhnai ah tak ngial pawh an kal ngam lo a,khua hi a va han varlo tak em tiin a mittui chu a biangah chuan a luang ta zawih zawih a.

An inleng pa thusawi leh mittui a hmuh meuh chuan pi,Chhuanthangi puantah lai chu tawp chatin a fapa te hnenah chuan ‘Mamte i pu chuan puih a ngai a nih chuan hawi san hauh suh ang che u’tiin hmeichhe tawng a mawilo chu a han chhak chhuak ve a, Laiawrha chuan ni e ka nu,theihtawp chu kan chhuah ngei ang tiin a nu chu a han thlek zawk a, pu Sambuana hnenah chuan ‘ka pu engtik hun ah nge inneih chu buatsaih an tum,an Lal chuan a khawnbawl te chet dan chu a en liam mai em mi.i fanu hming chu tunge ni reng a ? tiin a han zawt a,putar chuan ka hre thui hauh lo mai,in ramchhuah lo haw hma ni lawk khan ka hre ve chauh a,ka nau fanu chu Zauliani a ni a zualko tlangvalte sawi dan chuan,Tluanglehi te in chu chhun zan zawmin tlangval pa thum ten an thutchilh rawt a ni awm e,a kal hnai deuh te chu an lo vau zel mai a,ka nau thianpa chuan a rukin a fapa te chu a lo tir a ni awm e a tih chuan Laiawrha chuan ‘ka pu i mamngan na hrilh tlak a min ngaih a vangin kan lawm e,zan in ah kan thu tlukna chu kan lo hrih ngei ang che,thlamuang leh hahdam takin awm tawh rawh kan theih tawk in kan lo buaipui ang che’tiin a han chhang a, Ngiazoa nu chuan pu,Neihlaia chu zufang thlit in a ni chuan a han thawkkhat pawp a,min pui turin ka ngen lui hauh lo che u a nia,khuai bu a awm tih hriat a tawn luih chuan min seh nge nge thin a ni tih hria ula,in rilru lo thlak pawh ni ula ka dem hauh lo che u a nia,engpawhnise ka thawl ta huai mai,khawi nge ka va tin tawh a nge tiin a tho zui zat a,la thu rih tur a an sawmna chu chhuanlam siamin a chhuahsan ta rih a.

Pu Neihlaia chhuah hnu chuan an thilhriat chu an han sawi chuan a pa chu rawn phawt mai tha an tiin a tul chuan Lalnu Thanthuami beng pawh thleng sela tha zawk in an hre ta a,thil a kal fuh loh chun khua leh khua indo theih a nih vang chuan fimkhur tak a hma lak a ngai tih hriain a pa thu rawn lak phawt chu an tum a,Ngiazoa pa chu lo thu phei ve in a ni pawh chu a ngaihdan a nilo tih hriat tak chuan a meng rum khawp mai,rilru hmun khat sawi chhuak lo chuan an thu ngawi thap hlawm a,chhun chawfak hun chuan pu,Tawnliana pawh lo lutin a fate hmel a thinrim hmel a hmuh chuan an saingho vang ah ngaiin a thinrim ru nghal tun a,a chhungte melh kual pah chuan engthil nge ni ta in va ngawi teh thap ve tiin a han zawt a,Laiawrha te unau chuan Ngiazoa pa chu melh in pu,Neihlaia te chhung thiltawn a han hrilh chuan a ni pawh chu a ngawi ta ran in a melh ngai chu a melh reng a, tuibur hmuanda vel an ngawih thap hnu chuan pu,Tawnliana chuan englekhawle,a va han buaithlak teh nuaih ta ve maw le thenawm te lungngaih tawh lai a lo hriat loh der thu lah awm suh,val upate hrilh ula an ni ngaihdan pawh lak a tha a ang, an hmalak dan a zirin kan sawiho leh dawn nia tiin chawthing bel chu chawi thlain a ei ta nghal a,a ei tan chauh tih chuan Ngiazoa te unau chu lo lutin,an in selem chaih nuam an tih zia te chu an sawi bawrh bawrh a,an eikham chuan an thiante nen chuan an chhuak leh ta thuai a,pu Tawnliana pawh rei awm lo chuan Lal in lam a chuangkai tur chuan a chhuak leh ta a.

Laiawrha te unau chu chhuak ve nghal in an thiante bulah chuan an thu hriatthar chu an han sawi chuan an ni pawh chu an thinrim ve khawp mai,a theih ang a puih tum chuan rilru chu an siam ta nghal a chet lak dan tur chu an ruahman ta nghal a,an val upate chu thu engkim hrilh tum chuan an chhuak ta nghal a,zawlbuk ah chuan an lut khawm ta a,reilote ah val upa Chhawnthiaua te ho chu lo langin an rilru a vei chu sawiin an han ngaihtuah chuan tlangval Sawmngâ vel tal kal tha an ti a,Lalnu Thanthûami pawh hrih ngei chu tha an tiin a hrilh tur chuan val upa leh pasâltha te chu an chhuak ta a,Lalnu Thanthuami leh khawbawl te pawh an lo thu thap a,pasaltha leh val upate a hmuh chuan thutna lo kawh hmuh a,Lalnu che phelh leh zeuh thin chu a mah hre chiang tute chuan an hai hauh lo,khawnbawl pu,Tawnliana chuan ‘in va hlauhawm khup khup ve eng thlichhia in nge tun ang hun ah te lo chhem lut ve reng reng che u,pawipang te a awm ta a mi ?’ a han ti a.

Val upa Chhawnthiaua chuan pu,Neihlaia fanu chung a thil thleng leh Satlâk tlangval ten puih an tum thu chu sawi in, Tlangzawl khua chu a remchan chuan tlai lam a pan mai an tum thu a sawi chuan Satlâk Lal inchhung chu a reh ta thap a,Lalnu Thanthuami chuan a khawnbawl te melh kual pah chuan ‘kan thu hriat chuan min va han thawng teh reng ve maw le,engnge nangni in ngaihdan le’ tiin a khawnbawl te chu a han rawn a,khawnbawlte chu an ngawi deuh thap hlawm a an ngaihtuahna an sawr bing tih hriat tak chuan thawpui an la leh halh thin a,Ngurpuii leng lo haw chuan Lal inchhung a thu te hmel atang chuan an thupui vai an nei tih hriain tapchhak ah chuan a lo thu ngawi ran a,Sangtuala chu Ngurpuii bulah kalin ‘Lal fanu boruak a up emai he lamah hian i thu chawl teh ang tiin sumhmun lamah chuan an in zui chhuak a,Lal fanu a chhuah chuan khawnbawlte pawh chuan pu,Neihlaia harsatna tawh dan chu an han ngaihtuah chuan a vanglai tha leh zung an khaw himna atan a lo hman dan te ngaihtuah chuan han haider sak mai chu an hreh tlang si a,a theih dan ang a pui nise,a theih hram chuan tharum hmang lo hram tur leh a tul tawpah erawh chuan eng pawh ti mai tur chuan thu an ti tlu ta a.thumum an neih hnu chuan val upa leh pasâltha te chu an tin ta a,a kal tur insiam fel tur chuan an chhuak ta a.

Sângtuala chuan hun an ngah lo tih hriaiin ‘Ngurpui tukin a ka sawi tawh ang in ka duh che a,dinhmun in thlau hle lo ila chuan i kiang a hun hman reng hi ka duh thin a sin, nang zawng Lal fanu i ni a ka chungah rilru thalo pu awm in i pa hi lo fuih sela,ka nunna an lak em loh pawhin Satlâk khua atang hian min hnawt chhuak ngei ang,min lo zui lui in lo innei pawh ni ila damchhung in rilru nuam in hun kan hmang kher lo mai thei a ni,i theih chuan ka mitmei veng loin pasal neiin awm la ka dem hauh lo che,khiangawiin mual liam mah la ka theihna zawnah chuan ka pui reng ang che,hmeichhia zawng in vanglai a rei loin in vullai hi a liam thuai a,Lal fanu phei chuan inleng innei in pa ber rorelna hnuai a awm ngang in ni si a,min theihnghilh mai la i tan hian a that ber ka ring zawk a ni a han ti sap sap a,Ngurpuii pawh chuan thil a ngaihtuah chuan a mah avang a,a hmangaih Sângtuala te chhung nun hrehawm tak a awm tur chu a han ngaihtuah chuan hrehawm a ti khawp mai,an hun kal tawh a nunna chan huam a an lo chhanchhuah lai leh a pa Zamloan Sângtuala a tawngkhum dan te a ngaihtuah chuan a pa chuan a pawm zam mai mai in a ring bik hauh lo,a hmangaih chân tur ang a a ngaihtuah ringawt pawh chuan a ngaihtuahna a bing mup mup in â mai dawn te hian a in hre rum rum a.

A bul a pasâltha naupang te leh hmeltha tak nui deuh sang leh mitmeng a lungngaihna leh tawrhna chu a chhiar sak thei a,a bul a thlamuanna a lo neih phahna thin leh harsat na a tawh chang pawh a chak nan a lo hman thin chu a thlir vang vang in a mit atang chuan mittui chu a lo luang chhuak ngiai ngiai in a khaw hmuhte chu fiah lo ina vir muai muai a,Sângte nang in nupui i neih hma chuan kei chuan pasal ka nei dawn lo,ka pâ chuan a thu ka hnial vangin min tuithlar dawn pawh nisela pawi ka ti ther te lo,nangin min hnar a kawppui dang i nei a nih erawh chuan kei pawhin rilru dang ka pu chauh ang,chhawihfa chauhlo chuan min then lo ang, ka lo nghak reng ang che’tiin a kun ta daih a,Sângtuala chuan dimte a kuai dak in Ngurpuii mittui chu a han hruk sak a,inchhung lam thawm ngaithla in a han leh hawi zawk a,a hawi let chuan an mahni lo thlir reng tu Lehlawn Lalpa Zamloa thinrim mitmeng sen rum leh hmel dur khup mai chu hmu in,bul a Lal vengtu tlangval sawm dawn lo ding thap chu melh zawk a,a kut chu meiling khawih ang mai chuan rang takin a la zak a,bah nuaih hian Lalpa in lo kal a ni maw,in dam em ? a ti bah nawk a,

Lehlawn Lalpa Zamloa chuan thinrim aw chang khel khawl chuan ‘ka thu hriat hi a dik ngei a ni maw,kan nun in chhan a vang hian ka fanu chu i lo beisei reng a ni maw ? i va han zaktheilo ve,nang ang in la pasâltha ka khawngaihna vang a chenna nei mai mai hian ka hmuh laiin ka fanu chu i thlem ngam a ni maw, i hre khawp ang ka fanu hian Lal fapa tlangchang tur ngat pasalah a nei dawn a,vawikhat mah i hmu tawh tur a nilo tih hria ang che,khaw nge in Lalnu pawh hi a awm,a vahnu hi chhun engah pawh a veng zo lo a ni maw ? a han ti phiar phiar a,Lal Zamloa thinrim aw ah chuan Lal leh inchhung a awmho te chu an lo chhuak thuai a,Lalnu Thanthûami chuan ‘e ka u enga tinge i rawl a va han ring lawng lawng ve,lo lut ula tha te in i sawi tlang ang u,thil hriat fuh tawk loh i nei a niang e’ a han ti dam thlap a,a fanu kaih thawh lawp pah chuan kawngkhar chu a kal pel nghal thuak in,nang kha chu pawnah khan lo awm reng ang che,a ni kha kalsawn a tum chuan lo thal tawl ang che u tiin Sângtuala chu a han melh hrawk a,a tlangval hruaite chuan chet thawh mai an tum hauh lo,a mah Sângtuala huaisen leh remhriat avang a nungdam an nih zia an hai mawlh lo,a ruk tak chuan Sângtuala chu an Lal fanu pasal tur a tan an awt ru hle zawk a,an hmeltha dun in an pian a nalh dun bawk a Lalpa thinrim pawh chu awmlo an tiin thuhnu dawn lo ang ti ru hle zawk a ni.

Lalnu Thanthuami chuan zupui chu thlit in a nuta pa tawng chhuah nghak chuan a ngawi ran a,Lal Zamloa chuan zu chu tlak pawp in seki no chu bang den nan hman pahin ‘nang hi ka ring tawk che in ka fanu pawh i kutah ngaihngam takin ka dah a,hnamchawm pasaltha satliah kutah lo hlan i tum zawk nge,chhun khaw eng pawh zah zo loin i sumhmun ah a lo thlem ngam a ni a,i va han rintlak loh lulai ve maw le’ a han ti chang rat a.Lalnu Thanthuami chuan ‘ka u i hriatsual a niang lo in duh eng ang pawh nisela,inhmuh falna hun an nei hauh lo a sin vawin an lo kalna chhan pawh tiin pu,Neihlaia te buaina chu a han hrilh nghal a,zan lam a ram mut an tum dan nen lam chuan a hrilh a’ Lal Zamloa thinrim lak lawh chuan arte pawh a thih chuan chhuanlam awm loin a thi ngai a mi ? ,kei chauh hmutu ka ni lo a ka khuate pawn an hmu in ka thusawi hi an hre ve vek a ni,Lal fanu hian hnamchawm mai mai hi pasal ah a nei dawn lo.zan in la la hian khua hi kan chhuahsan dawn a,nangni dawtthu mai mai ka ngaithla dawn lo a ti ta bur a,khawnbawl pu,Tawnliana chu kawk in ‘i fapa nunna hi i hlut a ka ram atang a hnawhchhuah in duh a nih loh chuan,i fapa hi lo thunun ang che tun hnu a ka fanu bul a i fapa a kal tih ka hriat chuan,ka ram chhung dai leh ngai tawh lo turin ka hnawtchhuak ngei ang che u’a ti ta hmiah mai a,Sângtuala pa chuan ‘Lalpa min ngaidam rawh ka fapa chu ka lo hrih a nge,ka thusawi a pawm duh ta lo a nih tak leh kan chungah chuan i duh ang takin ro i rel dawn nia’ kun nghaih pah chuan a han ti a,Lal Zamloa chuan inchhung a mite en kual pah chuan ‘kan upa sawi chu in hria maw,patliang in kâ kan ang a nih chuan ka ti tlang ngei tur a ni’ a han ti a.

Lalnu Thanthûami chuan engpawhnisela zanin leh naktuk chu in cham dam phawt ang chu mawle,thinrim lai a thu pawh chah rum rum that loh zia min hrilh tawh thin ang khan,nang pawh in ngaihtuah chiang la a tha in ka hria,thinur na kan in hneh tir chuan a tha ngailo e’ a han ti a,tlangaupa hnenah chuan tlangval fatu tur zu ngaihtuah teh ka vawkpa sutnghak khu lo zu talh tawh u tiin tlangau chu a tir a,a pasâltha te hnenah chuan kan lo sawi tawh ang khan zan in a chhuak tur chuan lo in buatsaih ula,in hman ve leh Lal mual ah in lo chho dawn nia tiin a han sawi zawm a,Satlâk tlangval te chu ngawi reng a chhuakin an kal ta thuai a val upa chuan a nau hmelah chu en i a khawngaih khawp mai,a mah Lal fanu zawkin a ngaihzawn zia lah tlang hriat a niin kawng engkim a a han mawhpuh ngawt chu a thinrim pui khawp mai, zawlbuk ah kan in nghak khawm dawn nia tiin an in thendarh ta a,pasaltha Lianmana nen chuan val upa Chhawnthiaua chu an in bek bawrh sar sar in an buk nghat nghat hnu chuan an ni pawh chu an haw thuai a,chaw an bar zawh chuan zan riak buhfai leh zan puan ak chuan zawlbuk lamah chuan an kal leh thuai a,kal pah chuan tlangval kal ve tur a an duh te chu an hrih pah in zawlbuk lamah chuan an kal zel a.

Laiawrha chuan a nau chu a lainat kher mai ngawi reng chuan kal in,in thlen dawn chuan a nau banahchuan a han vuan a 'ka nau in thiam loh reng reng suh,thil kalhmang chu kan hria a lawm,a tul chuan Satlâk khua chu kan chhuahsan daih mai ang,Lal chapo hi ka huan zawng tak a nia kan vang a nungdam a nih dan lah a hre duh na hek lo' tiin a han phun barh barh a,Sângtuala chu ngawi reng chuan a lo bu nghat nghat a,hnuai lam bih ran chung chuan ka u pawi ka ti khawp mai,keimah vang a hrehawm leh zah in phur tur hi min hre thiam a ka lawm lutuk e a ti ve sap a,Laiawrha chuan hmanhmawh ang thil tihna a thiante nghah bik nih a tha ngai lo e tiin inchhung ah chuan a lut nghal a,chaw chu an bar mawlh mawlh a chaw ei pah chuan an thil tum leh Lalnu Thanthuami thu pawhchah dan chu a nu leh Ngiazoa pa chu a hrilh a,Ngiazoa pa pawh chu kal ve tur chuan a insiam nghal a,Laiawrha chuan Ngiazoa pa chu ko hrang in a nau leh Ngurpuii chung a thi kal hmang chu hrilh in,lo kalve lo mai rawh nang i awm chuan rilru a thil pakhat chauh ngaihtuah chungin kan awm theih phah a nga,chutiang a nih loh chuan Lal Zamloa kha a thinrim nasa mai si a,engnge kan chhung chungah thleng dawn lah kan hriat loh hi,a chhe ber lo tawk pawh ni ila,khuanu zarah pang damin kan lo haw leh em ang a,kei ni chuan kan lo zawng hmu leh vat dawn che u a lawm tiin eng emaw a thleng palh a nih chuan hman a chi an teng na hmun pan tur chuan an in chah a,Ngiazoa pa pawh chuan kal ve a tum chu a thulh a,Sângtuala chu lainat tak chuan a melh vang vang a,an insiam zawh chuan thlah tur chuan a chhuak ve nghal a an ni ho chauh an awm hnu chuan ‘Sângte in thiam loh reng reng suh,in va kalna turah pawh va fimkhur hle ang che pang damin lo hawn tum phawt mai ula, Lal chuan a rilru thlakin nangmah ni lo chuan awm theilo zawk ah a la tang mai thei a sin,hmeichhe pakhat vang chuan in dawm kun mai hauh suh ang che’ tiin a fuih ve mawlh mawlh a.

Lo tawk leh phawt teh se . . .I HAIHAWT CHUAN I THEIHNGHILH HMA IN ENGKIM TI THIN ANG CHE

[Ngaia]

PASÂLTHA SÂNGTUALA (Mampuia pa )

BUNG - 121

( ka chulmam hman lo dar 3;00 a lo hnai leh kuar ta si a,in chhiar mam a tan ka dah leh phawt mai,pai tur a ka tih pawh ka paih hman ta leh pak lo anih hi . . .)

Sângtuala chuan ka u ka lawm e,harsatna tawh lai a ngaihtuah tu neih hlut zia ka hriat chhuah phah a,tiin Ngurpuii chu a mah theihnghilh tur a hrilh dante,an thu inhmu rem loh lai a Lal Zamloa lo inrawlh dan te chu a sawi ta vek a, Lehlawn khua a an chetdan erawh a sawi tel duh lo thung, Sângtualan a sawi zawh chuan a lo nih tak chu a, engpawhnise tunah chuan engmah la sawi ve lo ila,a tul tawpah erawh chuan engkim sawi hun a la awm mai ang tiin zawlbuk an thlen chuan kal tur ho pawh an lo kim vek tawh a, Sângtuala chuan val upa Chhawnthiaua chu mitmei zauh in an in zui chhuak thuai a pu, Neihlaia a te in chu pan in,val upa Chhawnthiaua chuan rilru hahdam tak a awm tur leh a nau fanu chu an hawn ngei tur thu chuan a thlamuan a,chu thu an hriat chuan pu,Neihlaia te nupa chu insum theillo in an inhnit hlawp hlawp a,harsa ti tak chuan ‘Pu Vanan hualhim mawlh che u rawhse,ngaihngam leh hahdam takin kan lo awm tawh a nge tiin an in thlah ta,val upa chuan putar te nupa a hmuh chuan a rilru chu siam in a thinur na pawh a zual kher mai,an lak chhuah theih loh chuan nunna hial pawh chan mai a pawi ti hauh lo,ngawi reng chuan zawlbuk chu an thleng a, muang chang lo chuan Lal mual lam pan chuan an chho ta a, leihkatlangsangah chuan Satlâk Lalnu leh khawnbaw te chu an lo ding vang tawh a,an pasaltha te chu vanneihna nei tur a duhsakna hlan in an lo kir hma chu nghak hlel tak a an thlir reng tur thu sawiin,kal tur ho chu lungdawh lamah chuan an liam thuai a,an liam tur chuan Ngurpuii sam a hmai khuh deuh chung a lo thlir zui reng tu chu an melh ralh ralh in, Sângtuala chu lainat tak chuan an melh ralh ralh a Lungdawh an thlen chuan muangchang lo chuan an kal zel a.

An pasaltha Sângtuala chu mak ti leh ngaisang tak chuan an melh leh hrak hrak thin,nula lam a ngaihtuah an hriat loh lai a, Lal fanu tlangchang tur meuh a lo kherhthlu hman chu mak an ti kher mai, Chungliana chu insum zo ta hek lo le ‘Sânghnap,Lal fanu chu engtik laiin nge i lo kherh thluk hman reng reng a,ka neih tur a ka lo hual a niin min be tha teh hawrh thin em vang khan min ngaizawngah ka lo ngai ngawt a,nangmah vang teh hrawt hi lo ni lek in,ka duh ang hi i lo duh zel dawn a nih chuan ka la bin harh ngei ang che’ a tih chuan an nui ta hawk hawk a,Sângtual chuan ‘keiin ka kherh thlu reng reng hleinem maw le,ka zawlten min lo kherh thluk sak a,an zar ka zo mai a lawm a pa khan mâkpa atan min lo awt lo nasa a nih kha,kan haw leh hunah chuan nang Lalpa duh zwng tur deuh ah,a fanu chu kherh ve chhin reng teh, i dang nalah lal meuh pawh a tawlhthlu maiin ka ring e’ a tih ve chuan an nui hawk hawk a,thildang a pakai zelin an infiam leh ta bawrh bawrh a,zanriah na tur rem an hmuh chuan khua pawh a hnim ruih tawh a,chawhmeh tur therhlo zawngin an vak darh ta sang sang a.

Thûamkunga chuan a hma a ngawi reng a kal leh ngaituah bing nei tih hriat tak a kal ngawi reng a thianpa chu a khawngaih khawp mai,tih theih neise chuan a tih theih ang ang tih chu a in huam khawp mai,silai mu leng karah pawh hlauhna leh zam na nei ngailo leh thih hlau hauh lo a nui sang reng thin a han ngawi ran chu rilru na tak chuan a zui ngawi reng a,engmah sawi lo a an kal lai chu Sângtuala chu dingin Thûamkunga chu a han en a ‘thianpa ka hun tawn chu a va han zahthlak ngai ve, fapa chuan chhungkaw enkawl hi kan tih tur a niin buaina pawh kan hmet mit tur a ni ngai a,kei ve erawh chu ka chhungte zahna leh lungngaihna thlen tu mai ka nih tak hi’ a han ti chuai raih a,an piah lungpui kawh pah chuan tah sawn i thu chawl lawk teh ang,ka kam a chhe deuh tlat tiin a pan pheiin Sângtuala chuan ngawi reng chuan a zui a,vaibel chu an tan in ‘thianpa eng mah tihsual i nei hauh lo,hmangaihna leh in duhna hian tumah a thliar hauh lo,dai dan na chu mihring lam thliar chawp mai chauh a ni,tih tak em ah chuan Lal fanu mitmei hi tun kan hai hauh lo,a mah Lal Zamloa ngei pawh Lehlawn kan chhuah san dawn te chuan a hlim ah a tang a nih kha,tun a tak a a han hel vel kha,a duh zawng a hmuh vang mai chauh a nih thlengtlawr zuan ho hi ka huat zawng tak a ni,Lal an nihna ah kan zah der a ni mai a,eng emaw han tawk leh rawhse a hre khawp ang’ tiin a vaibel dawn chu a seh rap rap a.

A thianpa thusawi chu dik a tiin Lehchhuah khaw tlangval lak a an chhanchhuah lai kha chuan a ka pawh zen sela a seh lo ang tih an hre chiang hle a ni, tun a tak a thinrim tak tawngkhum leh hnawhchhuah hial a han vau mai chu Sângtuala pawh a lai a na kher mai,a huat viau dawn pawh chuan a hmangaih pa a ni si a,hetiang hma chhawn ai chuan mahni a râl za hmachhawn pawh a duh zawk a, pu,Neihlaia bul a alo sawi tawh chu hlen phawt a,an va kalna an zawh fel hun a ngaihtuah that atan tiin an va kalna turah chuan ngaihtuahna sawr bing tum chuan thildang a ngaihtuah lui a,a mitthla ah chuan a hmangaih Ngurpuii sam chhawlleng kar a beisei tak a melh lai chu a cham reng thung a,Thûam thian kan thiante khan chawhmeh an beisei ngei dawn si a, ngaihtuahna kawm hman kan nilo e tiin a silai chu a han endik a vaibel ek chhia khawngthla in an piah mual lam pan chuan an kal nghal a,kawr an thlen dawn chuan sakhi tuai hi a lo tlanchhuak zawkin a huk thawt a Sângtuala chuan a silai chu lek kawh zawkin a puak nghal dur a, Thûamkunga silai pawh puak dawtin,sakhi tlan lai chu a let nghal tawp a kawr kamah chuan a mu zawi hnawk a,hmanhmawh tak chuan zen chu an sawh leh thuai a,sakhi tuai ki leh beng inchen tawk lo let ngat an han en chian chuan a dar leh khelah chuan silai mu luhna chu a lo kaw pap a, Thûamkunga chuan iptepuiah ak in buk lam pan chuan an in zui leh hnak hnak a, silai ri chu an piah mualah chuan hriain thawm ngaichang chuan an han ding zawk a,kuk thawm an hriat lo vang chuan fimkhur thu ah silai rikna lam pan chuan an kal nghal a,an thawm hriat chu an han ngaihthlak chuan Chungliana aw chuan kan zawn zo mai ang chu maw a tih lang lang chu hriain,a va han rit ve mawle kan piah lamah sawn Thûamkunga te an kal a,kan kuk mai dawn a mi a han ti a, Rinmawia chuan kan theih chin tawk han pu phawt ila,kan theih tak loh leh tlai hmeh tawk tur kan hlep mai dawn nia a han tiin Sângtuala chuan a thianpa chu nghawk zauhin thing phenah chuan an tawlh lut thuai a.

Ngaw hnuai thim deuh ruih tawh ah chuan sanghal sum nga tha zet zawn a, Chungliana rit ti chu then nang chuan a lo kul thla kang kang a,an zawn an lo thlen chuan sadaiek rap pherhin Chungliana chu mawngsawh dawp chuan a tlu zawt a,a na tuar hmel han then kual vel chu insum theih hek lo le,Thûamkunga leh Sângtuala chu an nui tlu tawp tawp a,Chungliana na ti thinrim chuan a khawiphak ang chu la in a thiante nui let chu a vawm zawt zawt a, Rinmawia tak pawh chu insum theilo chuan dul dawm meuh chuan a nui ve hawk hawk a,a silai thlauh chhar in khanglang hlawm che u hian,thiante na tuar pawh in nuih duh a,in sual hlawm lutuk,in tih tih in lo ti teh u tiin buk lam pan chuan a kal tau nghawg nghawg a,a thinrim kal tau chuan an nuih ti za tual tualin a liam hnu pawh chuan an la nui bawk bawk a, Rinmawia chuan nui sang chung chuan ‘hawh u kan tlai lutuk a nge,insum deuh tawh teh u’tiin kal a rawt a,ngawpui chhung chu reilo teah a thim dawn tih an hriat avang chuan an ni pawh chu an kal nui hau hlawm a,buk an thlen chuan Chungliana chu a lo thu tum bar a,Chungliana hmel an hmuh chuan an nuihza kai chhuakin an nui leh ta char char a,a ngaihna hrelo chuan buk a awmte chu an lo bengngawng nuih ve hai hlawm a.an sazawn an keuh chuan dul dawm meuh chuan an nuih leh ta hawk hawk a,Chungliana chuan thing chu lain an ni pathum chu a hlap zawt zawt a,val upate chuan an han thleh in,a ngaihna an hre lo in a mi vuak a te lah chuan huat a hnekin an nui nasa tawlh tawlh a,val upa Chhâwnthiaua chuan a naute pali en tawn zauh zauh chung chuan engthil nge ni ngai le a han ti dam thlap a.

Chungliana chuan a thiante thinrim hmel tak a en chung chuan zaktheilo hlawm lutuk thiante na tuar pawh nuih duh che u a han ti a,thilawm dan chu an rinzawn thiam ta in an nui deuh tat tat hlawm a,Rinmawia chuan Chunga in hmu ve la i nui ve tho ang a tih chuan midangte pawh chu an then suk suk hlawm a,Rinmawia chuan nuihza in sum tum tak chuan val upa melh in ‘an sanghal kah dan leh rit an tih zia te, Chungliana tawlh thluk dan leh a natuar ner nasat thu a sawi meuh chuan midangte pawh chu an nui huk huk hlawm a,val upa chuan then suk suk chung chuan in ho em a nih tak chu thiante natuar innuih reng reng a,tiang hi ching tawh hauh suh ang che u a han ti liam puat a, leh lam hawi a then suk pah chuan ‘tlangval te u,nui tawh lo in zanriah hmeh tur a in duh zawk chân thuai teh u’a tih tak chuan,a hmin awl zawk tur a ngaih sakhi tûai chu chan in an chhuang kai thuai a, sanghal pawh chu chân in chaw ei an peih meuh chuan a sa pawh an rep fel ta.zanah chuan an hma lak dan turte sawiin an lo tih fo tawh angin kal hmasa pawlin siam nise,Tlangzawl khaw boruak thlithlai hmasak chu an ti tlu a, Laiawrha te thianzaho chu lam kal tur an ti a,Sângtuala chuan val upa naupang zawk kan awm lai a u te an kal chuan a va zahthlak awm ve,kei ni thianzaho hi kan va kal zawk a nge tiin a han hnial a,val upa chuan ‘kan ringlo che u a nilo ,engkimah kan hmachhuan ber in ni a,in hah em avang in lo hahchawl ula kan ti a ni’a han ti a, Rinmawia chuan val upa kan hah lo e kei ni hian kan va chian leh zawk a nge a tih ve tak chuan,val upa chu a han ngawi vang vang in a tawpah chuan hreh tak chuan a aw ta hram a,zan a lo rei tak chuan mutna pharhin an mu ta a.

A tuk zing hma tak a thoin tukthuan ei kham chuan an chhuak leh ta a, Sângtuala te thianzaho pawh hma hruaiin an kal zel a chhun chaw fak hun chuan tlangzawl ram pawh an dai lut tan ta a,chhun chaw pawh fak thuaiin vaibel an zuk zawh chuan kal leh thuaiin an fimkhur sawt khawp mai, hmanhmawh tak chuan an kal zel a,riahna tur rem tha puk lian tak an hmuin an belh chian chuan tui chawina pawh a awlsam in mautlawn tluk hnih awm ah chuan tui tling tha fe mai hi a awm a, puankawp pakhat dahin an kalsan leh nghal a,hmalam pan chuan an kal zel a,zanriah chhum hun chuan arkhuang pawh an hre pha ta a an thlang kawrah chuan tawng nak nak hi hriain fimkhur tak chuan tawng thawm awmna chu an pan thla tham tham a, rawlthar rual khat hi sangha mân in an hlim chu an ri teng tung a,chutia an thlir reng lai chuan an zing pakhat chu a han hawi chhuakin e khai kan thim ngei ang le, sangha chu la man zo lo mah ila i haw vat ang u,Lal Zauliana khan zanriah ei kham ah lal mualah kal vek turin a ti,a kallo chuan salam an chawi ang a tih kha.salam chawi ai chuan haw vat mai ang u a ti chul a,an zing a pakhat chuan ‘Lal Zauliana hi a sual khawp mai,thu hote te hmangin nunau hi min au chhuak a,khawdang Lal te hian tiang hian an ti ve vek a ngem ? a han ti a, an zing a hmeithai rai rual zet tawh chuan sangha an man bak ru tui rui a vir zak zak thlir pah chuan ‘kei pawh ka ning khawp mai,a pasâltha Darlaka thu thu hian ro a rel in min vaw vir reng ringawt a,hmeithai fanu Zauliani hmei a neih a duh vangin khawnbawl fapa Sialliana nen an in ti thiam lo an ti a,Sialliana lah khi mi huaisen tak a ni in khawnbawl fapa a lo ni bawk nen, pasaltha Darlaka khi ching hrep sela ka ti khawp mai, kan khaw chhung pawh kan zalen sawt tawh ang chu’ a han ti a,an thianpa khat chuan k’u Lairuma i sawi ngawt a i hre chiang a mi ? pasâltha Darlakan a hriat chuan a vel ngei ang che maw le a ti ve thung a,Lairuma chuan ‘ka hlau ther te lo e khi pa ve khi Lal Zauliana khian a hlauh em avang in huai ber thawk in a la thaw mai mai a ni,chapô si ka huat nak lai a,ka tlangval hun ah ka la sawphrep ang maw le’ a han ti leh bai bai a,an zing a pakhat chuan ‘hman ni zawlbuk bul a ka kal laiin,tlangval thenkhat chuan Zauliana khian hmeitha fanu khi a duh vang a neih a tum pawh a ni lo,pasaltha Darlaka chetdan a lawm loh vang a neih tum niin an sawi, khaw dang a pi,Tluanglehi chhung te Satlâk lam an hrilh a, chu thu chu Darlaka chuan lo hre leh in,Lalpa Zauliana a hrilh a zanin hian in chachhuah an tum a ni awm e, Satlâk pasâltha Sângtuala lo kal in,in hmachhawn sela ka ti khawp mai,Darlaka hi mualpho takin siam sela ka ti tak tak a ni,pi Tluanglehi te nufa khi ka khawngaih khawp mai,Satlâk khawho hi zanin a an lo thlen hman loh chuan khawnbawl fapa Sialliana chu a thi ngei ang a,a chhungte pawh Tlangzawl khua a tang an hnawtchhuak ang’ tiin tlangval ho in an sawi thawm ka hria a han tih zawm a.an insiam zawh chuan an hmanhmawh tak chuan an kal ta nghal a.

Naupangte an liam chuan Sângtuala te thianzaho chu an in melh thap hlawm a, naupangho thu sawi chu a dik duh hmel an tiin Thûamkunga te pathum chu an thiante awmna lamah chuan an kal in Sângtuala leh Rinmawia chu khaw lam pan chuan an kal ve bawk a,an thu hriatthar chu ngaihtuah in ngawi rengin an kal mawp mawp a, naupangte thawm hre phak a kal an nih vang chuan ni suk chen a nih chuan lungdawh pawh an hnaih in Tlangzawl khaw naupang ho pawh an in au nak nak in nu thenkhat chuan an vawk ko in ri rih an ti lauh lauh a,fimkhur tak chuan kalin khaw lanchian theihna lai tur a an rin chu an pan in,thingler atang chuan Tlangzawl khua chu ngun tak chuan an thlir ta a,in zahnih nufa vel an niin ran pawh an khaw phulo chuan an ngahin sial leh vawk chu an lo lawi tan tuk tuk a,Lal in atang chuan pa piantha tak hi lo chhuak in a hawi her atang chuan an pasaltha Darlaka ni ngeiin an ring a,a bulah chuan tlangval sawm tha zet hi an kal in a mah chu a thle ngoh ngoh bawk a,a pum rua pawh a tha in a hleitling zuah mai nen a,pasâltha diar a khim vang main a hmuhnawm letling zawk a,khaw hmawr lam pan chuan an kal zel a,in pakhat rawih deuh tawh zawn an thlen chuan a mah tia zet a lian pakhat lo chhuak in, an han in dinchilh ren rawn a an mi hmuh hmasak te chu letin thinrim tih hriat tak chuan a ban chu a phak kual zawk zawk a, an duh tawk a an chian hnu chuan thing atang chuan an chhuk a.

An chhuk fel chauh tih chuan an piah kawr kam lamah chuan thawm lo awmin a hma a an hmuh naupang panga te chuan an lo thlir ve thap in Lairuma ti a an koh chuan chempui lian telh tawlh hum chung chuan an lo pan hnai a, zamna tel hauh lo hian ‘pu te u,engnge he laiah hian in tih a, kan khua in va thlir nasa ve tiin a melh ran a,a thiante pawh chuan an chempui chu an hum ve far bawk a ‘kei hi Sângtuala Satlak khua ka ni a,ka bul a mi hi ka thianpa Rinmawia a ni, in hmanhmawh loh chuan thu tlem zawh lawk che u ka va duh ve’ a han ti dam thlap a,a iptepui atang chuan vaibel phawrh in a han siam kai zui zat a,vangkung thutna remchangah chuan thu in a silai chu a bulah chuan a han tung a,a hma a rawltharte chuan ngun tak a en in an lo hnaih zel a,hlam khat vel kar tla a ding in an in zarpharh ve tham a,min hlau suh u khu lai lui a in thil sawi kha kan hre vek a,kan thiante ang chiah ah ngaiin ti ti pui che u kan duh mai a ni,in duh loh chuan a pawi chuang lo,kan kal leh mai ang tiin Sângtuala chu a tho nghal uaih a,Tlangzawl rawlthar te chuan eng kan thusawi maw in hriat tiin rinhleh hmel tak chuan an en ha hlawm a,Sângtuala chuan ‘in pasâltha Darlaka leh Sialliana chanchin in sawi te pi,Tluanglehi te chanchin in sawi zawng zawng kha mawle tiin a chhang tha ve mai a,an thuruk an hriat theih dan te,a dar leh tawn a keipui tin hnu langkulh te,pasaltha diartial khim vang mai leh nui sâng an hmuh chuan an lo ral hriat thin an hma a mi chu pasaltha dik tak a ni tih an hre ve ta a.

Aw le,in duh chu min zawt ula tiin an hma a pasaltha diar khim vang chu ngaisang tih hriat tak chuan an melh thap a, Sângtuala chuan ‘in sawi dan hmang khan zanin ah chuan khawnbawl fap Sialliana te chungah chuan a thlen inring tak tak a mi’ tiin a han zawt nghal phawng a,an ni chu lo bu nghat nghat in tlangval pakhat in khawnbawl fapa Sialliana lam tang ah min sawm in min hrilh ngei a lawm,zanin hian thleng lo mahse engtik hun ah emaw chuan an la in hmachhawn ngei ang Lairuman a tih chuan an han ngawi deuh thap a,Sângtuala chuan a nih leh khawnbawl fapa Sialliana chu puih I tum reng em ? a han ti a, Lairuma chuan buk nghat pah chuan ka pui ngei ang,hman deuh khan ka u nula pakhat hi a nuate zing a pakhat in a lo pawt buai deuh a, ka thinrim hi a la reh hauh lo, Darlaka ka hmachhawn theihna tur a nih phawt chuan eng pawh ka ti ang a han ti rum al a, Sângtuala chuan i sawi dan hmangin Sialliana chu a dinhmun a hlauhawm si a,he lai hmuh ah hian hmuh ka duh thu min hrilh sak thei a ngem ? tu ma hriat loh in a mah chauh lo kal sela, midang mit a lak loh nan a han ti a,Lairuma chu a han ngawi vang vang in aw le,ka lo hrilh ngei ang a mahrawh chu kei pawh ka lo tel ve ngei ang tiin mahni inring tawk tak chuan a han sawi a,Sângtuala chuan a nih kan lo nghak reng ang che u, hmanhmawh ula mi mit la lo thei ang berin han awm rawh u,rinhleh kan nei a nih chuan min hmu lo ang,kan tan a hlauhawm zawng a in khasak dawn phawt chuan in khua hi ka hal ngei ang tiin a han sawi zawm a,a sawitu chuan a ti mai mai lo tih an hre chiang khawp mai,hmanhmawh tak chuan khaw chhung lam pan chuan an kal ta a.

Naupangho liam hnu chuan thingler ah bawk lawn leh in an thlir reng a,an ni pawh chu insem darh in Lairuma chu reilo teah eng emaw thil fun kengin a lo chhuak leh thuai a, khaw dai lam pan chuan a kal zelin a hma a mite inhnialna zawnah chuan kal in,reilo teah a mah chauh chuan a lo chhuak a,a hnu deuha chuan a hma a mi pakhat an hmuh kha a mah chauh a lo kal in,Daileng tur ang chuan dai lamah chuan a kal a,reilo teah Lairuma pawh a lo chhuak ve thuai a ngaihthat lohna awm an hmuh chuan Sângtuala pawh thing atang a chhuk a,Rinmawia erawh chuan khawchhung lam chu a la en ta reng a,a tul thulh a hman mai turin a silai pawh a en dik bawk a,reilo teah Lairuma te chu lo thlengin Sialliana nen chuan an inmelh ding dun nghal chat a. Sialliana chuan nangmah hi em mi pasâltha Sângtuala chu ka nau hian min hmu duh niin a sawi a a han ti hul hak a, Sângtuala chuan ‘kan nau bulah chuan pasâltha Sialliana hmuh ka duhthu chu ka sawi a,a mah chu i ni ngei ang chu maw’ a han tiin a, ‘Sialliana chu ka ni e,engthil nge ni min hmuh i duhna chhan chu,hun ka ngah lo a min hrethiam dawn nia’tiin hawihhawm tak chuan a han sawi zui a, Sângtuala pawh chuan an kal chhan pi,Tluanglehi te nufa an nih thu leh Satlâk lam a hruai an tum thu te,an mahni daltu awm lo a him tak a hruai an duh thu te chu a sawi ta vek a,Sialliana chu a ngawi deuh datin thaw pui a la halh a,buaina chhuak lo chuan in kal chu ka ring hauh lo thisen chu a luang ngei ang,in lo kal hlauh chu a tih zia hle mai puih kan ngaih lai tak a,nangni khua in lo kal hlauh leh nang ngei i lo kal thei chuan min ti thlamuang khawp mai, zanin chuan buaina eng emaw a chhuah chu ka ring a puih kan ngaih tak hlauh chuan nangni tluk a chhenfakawm an awm chuang lo a,engpawhnise kan boruak a zir nisela thisen chhuak kherlo pawh in inthil tum in tih hlawhtlin theih dan chu ka lo dap pui ang che u,kan awmdan chu min hmu reng tur ah ka ngai,a bak chu hun tawng a zir ni mai rawhse,khawnge kan pasâltha khualthang chu ka han chibai teh ang che a han ti a,Sângtuala chuan khawnge dikna tun nunna tur a mahni nunna leh chhungte pawh ngaihtuah theilo khawp nun neitu chu ka han chibai a nge tiin nghat tak chuan an in hmer ta vawng vawng a, pasaltha Sialliana chuan kan tin phawt a nge kan inhmu leh vat turah ngai ang tiin thimhmulah chuan an kalsan leh ta a.

Lenglen ar a lo khuan chuan val upa Chhâwnthiaua te chuan an lo fin chho tawh a, khawchhung lanchian theihna thingler ah chuan an lawn far hlawm a,Tlangzawl Lal mual lamah chuan a hlawp chuan an kal hul hul a,tlangval te chu hmun hnihah inthen in hmunkhat a mite chu an tlem zawk a, mei pui eng hnuaiah chuan Sângtuala chuan saw saw khawnbawl fapa Sialliana a nih saw tiin hmeichhe pahnih hma a inring tak a ding to chu a thiante chu a kawh hmu a,val upa chuan khai ula in hmanrua kha endik ula,kan thiante sawn puih an ngaih ka ring mang e tiin thingler a tang chuan a chhuk thuai a,satlâk valrualte chuan Tlangzawl khua chu pan in,Lalin hnung lam a tang chuan an pan ta tham tham a,thimtham lai zel chuh in an tawng an hriat theih chuan Satlâk valrualte chuan an hachang an thial rep rep hlawm a,an val upa chuan chet a lak loh avang chauh in an insum rih a.

Lal Zauliana chuan ‘heng hmeithai daikil kar a mi vang mai a ka khawchhung boruak muanawm lo awm hi ka rem ti hauh lo, chuvang chuan kan buaina ber Tluanglehi te nufa hi ka khua atang ka hnawt chhuak a,naktuk ni a liam rual a ka ram chhung a hmu leh hmasa ber chuan an duh ang takin an ti thei a,sal emaw râl man an sawngbawl ang pawh in ti thei ang’a han ti a,Sailian lo chhuak teh’ a han ti zawm zat a,khawnbawl fapa chu lo pen chhuakin Lal mual laiah chuan a ding to a,Lal Zauliana chuan ‘engvang in nge satlâk khawho hnenah ka thangchhiat na tur dawt thu i siam,sawng Satlâk khaw ho saw i engnge an nih a,kei Tlangzawl Lal hi min kalh ngam vei nge maw ? ,ka vang a nun nuam a awm mai mai hian ka thatna hi tiang hian maw min thungrulh dawn,i pa hi a khawnbawl nihna zan in li la hian ka hlih sak a,an ni chhung pawh hian naktuk ah ka khua hi an chhuah san tur a ni ’a han ti leh tun tun a,Sialliana chuan Lalpa i sawi ang chuan kan ti ngei ang,nang hian thu dik chu i hmuh kan luih tlat vang leh hmeithai chhantu neilo chung a thilthleng i hai luih vang hian i khua hi chhuahsan ka lo rilrik deuh tawh reng a ni, tun boruak chhuahna chhan pawh i hai lui tlat a ni,i hnawhchhuah tak hmeithai pi,Tluanglehi te nufa hian i tan buaina engnge an thlen reng reng,engvang a buai na chhuak nge a nih pawh i haider lui a nih hi,hetiang Lal hnuai a kun reng hi ka duh hauh lo a ti ve ta sak sak a.

Lal Zauliana lukai deuh tawh chu hma lamah a han pen chhat in kut khur ngar ngar chung chuan a han kawk vah a ‘nang naupang mai mai chu i va han chapô el awl ve mawle,tlangval te u a chapô na reh raih khawp khan han nghaisa teh u,a Lal zah loh a pawia zia han zirtir teh u’ a han ti leh tun tun a,pasâltha Darlaka chu lo penchhuak in ‘nang nu leh pa vang a mi chung a leng a in ngai mai mai hi,i chetdan ka kham na hi a rei tawh Lal zahna pawh neilo hi awmdan mawi ka han zirtir ang che,i khua i hmusit leh Satlâk tlangval i chhuan em em te lo thlen hunah meuh chuan i lung nuaih nuaih tawh ngei ang, an pasâlṭha Sângtuala saw i lo râl hlauh viau a niang nge, ka hma ah a din hunah meuh chuan, a nu puanhnuai a ni a chuh dâwn ni' tiin a lo pen chhuak chhur chhur a,an han in dinchilh chu an hmuhnawm khawp mai,nunau te chuan buaina a awm dawn tih hriaiin an tawlh let rawk rawk hlawm a,Darlaka chuan a naute hnenah lo chhuak ula nang mahni ti mualpho tu chu in lungawi zan khawpin han nghaisa teh ule a han ti lung lung a, Darlaka hnung zui tu te chu an in zarpharh in,Sialliana naute pawh chu tlem zawk mahse hlau hauh lo chuan an in zarpharh ve nghal zat a.

Sângtuala chu zawimuang leh fimkhur tak chuan lo pen chhuakin a hnungah chuan a thiante chuan an lo zui a,silai chu hman mai theih chuan an lek fur a,chutian hmelhriat loh tlangval an lo lang thut chu Darlaka leh a hnung zuitu te chuan mak ti tak leh thinrim tak chuan an melh kawk kawk a,Lal Zauliana te chuan ‘nangni hi tu thu a lo kal ngawt nge in nih that rawh u tiin a au tuar tuar a,Lal thinrim au tuar tuar chu te thawt in a rawn zawm a,lal Zauliana an en meuh chuan a hnungah chuan pasaltha tih hriat tak hian a chhipsamah tham in chempui chuan a lo tin run a ‘ka thu lo a in chet chuan in Lal hi lu neilo in kha laiah khan a lo chhuk ang’ a han ti zui a,a nghawng a chempui vawt raih in a rawn sik meuh chuan Lal Zauliana pawh a harh kawk in,a mah mi huaisen tak a ni lo nen a thlanfim chuan a rawn bual nghal zawih zawih a,aw khur dar dar chung hian i la hre khawp ang tu nge ka nih tih hi a han ti khur dar dar a,a mah mantu chuan kei hi Chhâwnthiaua ‘Satlâk khua ka ni ngai e, nang mahni khaw hmeithai te thlavang hauh duh lo leh an retheih mangan na denchhen a hmusit ching hi ka huat zawng tak i ni,I tawngkam fimkhur hle rawh,rethei te ti duhdah tu hian Satlâk valrual pawi an sawi tih I hriat hma in buh ban ram I pan lup lup tur a sin, ka thu lo a I lo tawng leh vaih chuan khung I tlangval te khu a mal mal in an thi ang’a ṭi ta hmiah a.

An rin loh lutuk a thil lo thleng vang chuan Darlaka leh a naute chu an in melh zak zak hlawm a,Sângtuala chuan aw zawi raih leh dam tak hian ‘pu a,nang nen hian vawi khat pawh kan la in hmuhhma hauh a min lo enghelh viau mai hi ka ngaithiam lo khawp mai,in Lal chuan i thu a kawi a ngil a zawm in, i suahsul leh awmherhna hi a lo hmuh kan a ni thei,i suahsual vang a hmeithai mangan na thawm chuan Satlâk chu a lo thleng a sin,hmeithai fanu hmei a tan i duh vang mai in khawnbawl leh a chhungte chu i hnawnchhuah tir dawn a maw,rei dam tlak i ni mawlh lo’ a han ti zawi sap a,meipui eng a Sângtuala mitmeng hmu phate chu hlauin an kim ki deuh chawih a,a hma a ding pasâltha Darlaka meuh pawh ngam loh chal a chilhnawm tih in hriain a hma a mi chu a melh tha ngam meuh lo,an pasaltha awmdan an hriat chuan a bul a mi huhang ngah tur zia chu ngaihtuah in mak an ti kher mai.Sialliana chu zawimuang a lo pheiin ‘pasâltha khaw nge dangawm teh hei chu ka chanpual a nih hi tiin Darlaka chu a rawn hmachhawn ta hmiah mai le.

Mal khaiah chuan a hnehdawn lo tih hriaiin Darliana chu a mangang ru ta hle mai a,a hma a lo tawng len em avang chuan dawih zawk ang a awm erawh a tum bik hauh lo,i arpachan lai kha nuam takin hmang rawh khai,rei a daih dawn lo a nia tiin a han nui lui uar uar a, Sialliana chuan ‘tunah hian nang nen a kan kar thu hi mipa takin kan sawifel dawn a ni,tumah an inrawh tur a ni lo mipa takin i theihna hi ka fiah dawn a ni’a ti bul hmak a,Sângtuala chu hnung lamah tawlh kirin a thiante Tlangzawl nunau te leh tlangvalte melh kualin ‘tunah hian dik takin he mite hi an in hmachhaw tur a ni,lo in rawlh emaw finrawl chhuah in awm vaih chuan kan dim dawn hauh lo che u a nia, midang zawng kha tawlh kiang rawh u thiante u,diklo tak a lo inrawh tum chu thal nghal tawl ang che u’ a han ti a,Sialliana chuan a chempui lian telh tawlh chu phawrh zui a,Sângtuala chu melh in ka lawm e tiin a han sawi zui sap a,inbei tur te chu mual laiah chuan an in hmachhawn ran in Darlaka chuan a chak zawk zawk lo tih hriat tak chuan a che chu a muang nghal a,nunau te chuan tu zawk tak chak zawk ang maw tiin an melh thap a.

Sialliana chuan kha pasâltha lo inring rawh le tiin a han vai nghal fua fua a,tawlh hrut hrut pah chuan chempui lo thlawk chu bum seng lo in a dar kak vang chuan chempui chu a thlaih bawl a,a kut dinglam chuan a ban hliam chu a han hup a,Darlaka ban hup chu ‘pasâltha i vun a pilh hlek chauh a nih kha i chempui kha chhar rawh pasâltha tak in le a han ti a,Darlaka chu chempui chhar tur awm tak chuan kun in vaivut tham in Sialliana mitah chuan a vawm ta thut a,a mit mim vang chuan Sialliana chu a in haibuai hle a,a beihpui pa tal buai lai chu Darliana chuan nui vur vur chung chuan hnaih in zak kau meuh chuan a han tin a ‘nang mi tlawltlaw hi buhban ramah ka han thawn teh ang che’a han ti a,a kut vai let tur tak chu kut tha chak tak hian lo man in a han phih thal thuai a,a tho tur a in beng kang chiah chu a khabe chu a ri bur in arsi leng chuai tih reh tum chuan a lu chu a thing nu nu a, Sângtuala chuan ‘ka mihring hmuh tawhah chuan i la tenawm ber hial awm e a tiin Darlaka chhip samah chuan a han len tho lawp in lei charah a vawrh thal tawp a,a mawng sawhna ti chu a eu ngawng ngawng a,a lo en tu te chu Darlaka chu nuih chuan an then thu hlawm a.

Sialliana mitmim a reh deuh chuan a thinrim chu khur dar dar in khawnge kan mi tenawmpa chu a han ti teng chhuaih a, piah deuh a Darlaka mawng ze tal thulh thulh chu ‘tenawmpa tho rawh kan hmabak chu i han hlen law law teh ang’ tiin Darlaka chempui let reng chu a han chhuih phei sak a,Lal Zauliana tang lutuk chuan ‘ka pasaltha tho la khang misual ho kha nuai bo thuai rawh,khawnbawl upa i ni ngei ang’ tiin a han au teng chhuah a,val upa chuan Lal Zauliana chu nam awp rawk pah chuan ka thulo chuan tawng suh ka ti che a ni lawm mi ? a han ti zui a,thinrim viau mahse a mah vuanbet tu chuan a dim falua lo tlat a ni.Darlaka che lo mu kak huang reng chu Sialliana chuan tho rawh ka nun dawn chuang reng reng lo che tiin a au that that a,Sialliana pa chuan ‘ka fapa a tawk e,mi ngamlo chung an nawr lui ngailo’ a lo ti a, Sângtuala chuan Tlangzawl khawho melh chung chuan ‘in pasâltha huaisen khaw sak dan chu in hmu a,in thlamuanpui meuh maw hmeithai leh khawchhung a nunau leh mi che theilo ti ngam tawk chauh a nih hi’ a tih chuan nunau te pawh chu an lo phun mur mur a,an in nghahna leh an en ber chu tiang tak a rintlak loh a lo ni tih an hriat chuan an hnual ru em em a.

Val upa Chhâwnthiaua chuan ‘i pasâltha rothap chet dan chu i hmu ta bawk a i chhuang bawk emaw chu,beihpui te chet theih loh lai a che ngam tawk a huaisen a lo ni kha,nang lah chuan hmeithai chhantu neilo lah chu i lo hnawt chhuak rawl nen’tiin a han tawng khum sak sak a,Lal Zauliana chuan a mithmuh a thilthleng a han ngaihtuah chuan a thil lo tih tawh chu a inchhir ru viau a,phengphehlep a khua a tlai zo tawh si,a chung a thil lo thleng tur chu a nghak ta ngawt a,val upa Chhâwnthiaua thu sawi ngawt nunau ten an ngaihven lai chuan Chungliana aw chuan ‘k’u Siallian i hnung a han ti tuarh a,Sialliana chu a thu hniam zawk in,a sam chhawlleng chempui hriamin a chhawk thawt rual chuan a chempui chu a han vai zawk a,thil rino chawk leh natuar te thawt chuan a zui a,silai puak nghal dur in natuar rum kawk chuan a zui a,silai a rik takah chuan nunau mangang chu an te tuar tuar a,mipa thinrim awrawl chu chhuakin a chempui in khak ri sawk te natuar rum vang vangte chuan Tlangzawl Lal mual chu a luah khat thuai a,tuibur hmuanda awmah chuan Sialliana naute leh Satlâk khaw tlangvalte chu Darlaka naute chuan khing zo hek lo an tlu zo a ni thaw thang mai a.

Sialliana pa khawnbawl upa Rumvunga chuan tlangvalte u zahngai rawh u tiin ban a phar a,Tlangzawl tlangval sawm thum chuang nunna nei lo leh hliam na tak tuar Lal mualah chuan an let phung a,val upa Chhâwnthiaua chuan Lal Zauliana chu a nghawng a chem a han zaithi sak ser ser a,i tlangvalte khuan awm sual an bawl leh a nih chuan Tlangzawl khua hian Lal dang an nei khawp a han ti sap a,Lal Zauliana chuan khua te u tha te te khan awm rawh u tiin a han au tial ruai a,an lal aw a hlauhthawna chu tun an hai lo,a bul a khawnbawl upa dingte chuan Lal nghawg atang a thisen lo chhuak tiam tiam an hmuh meuh chuan an dang sawp sawp hlawm a,an hlauhna chuan an lu kai chu ti reh in an meng fiah kawk kawk hlawm a,Sialliana pa chuan Lal Zauliana hnenah ‘Lalpa hun rei tak chu i thlazar hnuaiah lungmuang in kan lo awm tawh a,i lakah hian vui na tur engmah ka hre hauh lo i zarah nun nuam tak ka lo nei ve tawh a a lawmawm khawp mai,tunah chuan i thu angin kan chhuahsan tawh ang che u,zanin thil thleng hi chu kan thunun phak bak a ni a,kan inhre thiam a niang chu tiin a fapa nen chuan an inzui chhuak ta a.val upa Chhâwnthiaua chuan ‘Tlangzawl khua te u,kan hun hman dan hi kan duh dan a ni bik hauh lo tih min hriat sak ka duh a ni, in Lal rorel dik loh a vangin leh dikna hai lan a nih theih nan a che kan nih zia in hria e tiin an kal chhan chu sawiin pi,Tluanglehi te nufa an hruai tur thu te,hnu leh nei a Satlak khaw tan pawihawl zawng a eng emaw an ti a nih chuan an dim dawn loh ziate sawiin,an khaw silai chu an man sak tur thu leh Satlâk Lal hnen a ni sarih ral hma a zualko an kallo a nih chuan silai chu an neihhlen tur thu chu a sawi ta a.

Lal chuan thu eng emaw sawi tum chuan a ka chu a ang zuai a, val upa Chhâwnthiaua chuan Lal Zaulian engmah ka bulah sawi tum ting suh,Lal i nih vang chauh a tunah pawh nungdam i ni,mi tenawm nen engmah sawi tur kan nei lo tiin a naute hnenah chuan silai chu hawn vek tur chuan a hrilh a,hliam te nau neite chu an in buaipui zawh chuan dai pawn lam pan chuan an chhuak ta a,Sângtuala te thianzaho chu râl hnu dalin an tawi khaw muang a,khua atang him tawk an thlen chuan a mu tur chuan an in ruahman ta a, Sângtuala te thianzaho chuan râl veng a an dahte chu mu tur tir luiin,midangte an mut hnu chuan an chhak lam a meichher eng lo in zui thluah thluah chu an hmu a, meichher eng an hmuh chuan an thiante chu kai thoin tan hmun siam chuan an tawm thap a,an lo hnaih chuan khawnbawl fapa Sialliana chuan hma hruaiin a hnungah chuan nunau chuan an lo zui dam dam a, val upa Chhâwnthiaua chuan ‘kha khawi lam nge in pan dawn a, zan thim hnuai a nunau nen in han in kawi duah duah mai chu le’ a han ti a, khawnbawl upa Rumvunga chuan ‘kan han ngaihtuah in khua a awm luih hi kan tan a thaber in kan hre lo a,in khaw lam kan bel ang chu kan lo ti ngawt mai,in Lal in min pawm theih hlauh takin tiin beisei nei tak chuan val upa chu a melh hau a,val upa chuan mamngang a a mah beltu a hnar ngai lo,rotekawla sepa ang te an nih ngawt loh chuan, engpawh nise a mah pawh in bia a nga thil kalhmang tur chu a hriat mai ang ti a chhangin,hei zan a rei tawh bawk nen a nunau nen a in kawi duah in ni bawk a,lo tlu zal ve phawt mai teh u a tih chuan an ni pawh chu an mu ve ta a.tukthuan chu peih thuaiin an ei kham chuan an kal leh ta thuai a.

Naupang nen a in kawi duha an nih avang chuan Satlâk khua chu an ban hman dawn ta lo,zan lam a mu tha chu nise lenghawn rual chuan an lut hman tur hi a ni a,hmanhmawh tak a naupang han turh luih chu tha an tih loh avang chuan riah phawt mai chu an ti tlu ta a,zan riah an buatsaih lai chuan a then chuan chawhmeh lam an lo zawng a,hruizik te thangtung leh tumzik an hmuh teih ang chu khawn khawm a, Chungliana chua sakhi pui thau tha zet mai hi a kap a,naupang in sakhi an hmuh chuan hlim tak chuan an kil bial lai hlawm a, chutia hlim tak a an rik laih laih laia chuan Sângtuala chuan meichher eng panga lai hmanhmawh hmel tak a lo kal phe hlawk hlawk chu a hmu a,tau meichher chhi tih dawn chuan a la hma deuh bawk si a, meichher eng a en reng lai chuan a rilru ah Ngurpuii lo lang zawkin hlauhthawnna chuan a bawh hlup a,a tiril chu a khur ta der der a,tunhma in meichher eng a hmuh vang in engtin a awm a hre ngai lo,a awmdan chu mak a ti kher mai Thûamkunga chuan a thinpa khur zaih zaih leh lehlam hawi a ding khawng reng a hmuh chuan mak ti tak chuan a thianpa en na lam chu a han en a, meichher eng a hmuh chuan a ni pawh chu a ngaih a tha lo khawp mai,Sângtuala chuan silai chuh in meichher eng lam pan chuan thim zingah chuan a liam thuai a,a thiante pawh chuan zuiin ,meipui eng chu changel hnah chuan hliah in an thelh then thuai a,naupang leh hmeichhia chu hmun him lamah chuan hruaiin tlangval dangte chu thawm ngaithla chuan thingbul phenah chuan an tawm far a,Tuibur hmuamda awmah chuan tlangvbal rual chu lo langin buk atang a inchhung dung awmah chuan Rinmawia chuan kei mahni kan ni e, hlauhawm a hnai rih lo tiin a lo au lang lang a.

Zualko ten lalpa Zamloa leh a khua te chhiat tawh thu leh Lal fanu Ngurpuii chu tu ten emaw an man ngei an rin thu an han hriat meuh chuan,Satlâk valrual te chu an thinrim hlawm khawp mai,val upa Chhawnthiaua chuan ‘engpawh nisela chaw ei phawt ila tlangval sawmin kan naute hi lo riah pui mai in,midangte erawh chuan kan lal fanu Ngurpuii ngaihven a kal nghal kan ngai dawn anih chu a han ti dam thlap a,Sângtuala chuan a chung a thil thleng a ngaihtuah chuan a thin chua rim hle mai a,chaw ei lo a kal mai a duh rualin a thiante zai ngaih a ngai si a, val upa Thu hnial ngawt lah a tih chi hauh lo nen.a thiante pawh chuan lainat tak chuan an thianpa chu an melh thap a,Sângtuala nun an thir chuan chutiang lutuk a a vanduai chu an lai nat khawp mai,midangte tan a thim a var thlu loin nun a hmang a,misual pawh nise nun an sim theihna turin theih tawpin a thawk thin a ni si a,chaw ei an peih chuan an ei nghak thuai a Sângtuala chuan chaw chu a hming chauhin a ei a, midang te pawh chuan tamhnem chauh a eiin chaw an ei kham chuan,chaw thing chu lian tak a bawkin val upa chhawnthiaua ho chian meichher nen an chhuak ta thuai a
. . . . . . . . . . . .

Lehlawn Lalpa Zamloa chuan zanriah ei lo chuan zu chu a rui phutin a tawng chu a chaltlai tawlh tawlh a,Lalnu Thanthuami chuan chhan châk hle mahse a vahnu a ngaihtuah vang chuan a chhang duh lo mai chauh a ni,a tuk zingah chuan a tlangval te chu lo kalin, Lal Zamloa chuan tukthuan eilo a chhuak nghal mai tur chuan a hrilhna a,Lalnu Thanthuami chuan ‘ka u eng i ti zo ta nge maw chu le,mipa chauh hi em mi hmel duh zawng nei tur ni bik che u,kan nau pawh hnangvar a hlin ngai khawp a nih bik loh hi,hmel duh neih chu engnge sual a nih na, nuta te tih lungnih loh ka hlauh vang hian ka dawh hram hram che a chintawk nei ve rawh,tukthuan ei lo chuan ka vahnu hi ka chhuah hauh lo ang’a ti ram ve hmak mai le,a farnu chu a hriatchian em avang leh sailo Lal an zing chhuah ngai loh avang chuan pawi a ti teh chiam hauh lo,i tih tlat chuan tukthuan chu hma takah peih ula kan chhuak thuai ang a ti bung vut a, eirawngbawl buai lai chuan Ngurpuii chu inthup seng hek lo mittui chu a sur zung zung a,a ni chuan lainat tak chuan Ngurpuii kut chu a han chul sak hliau hliau ringawt thin,hmangaih in then nat zia a tak a tem tu Lalnu Thanthuami chuan a vahnu hrehawm tih tur zia chu hre chiang viau mahse,a unaupa thin butut nei chu a zia a hrechiang hle mai si a,chingal thenawm te dil tur chuan a tir in Ngurpuii chhuah hnu chuan ‘ka u,ril a rah pakhat chauh i nei chung hian mittui nen i kal tir ang maw,rosum lah i phak tawkah i ngah in pasâltha lah keini unau hian kan nghah na rawh e,ti chung a i fa neih chhun Ngurpuii hi mittui nen a kal luih tir i tum hi chu i khawsak phung hi mak ka ti khawp mai,hetiang ang a i fa neihchhun hi I kal luih tir a nih chuan ka hmel hmuh chu beisei hauh suh ang che,fa neilo ka nih vangin Ngurpuii chungah ka lo nem lutuk a ni thei,hmelduh zawng nei tur hian ka vahnu hian duhthlan na a nei tur a ni, tlangchang tur tho a ni a tun a a lungdum tu lah mi satliah a ni bik hek lo, chhungkaw dinhmun leh rosum ah lah vangtlang chunglam an ni a,ka vahnu hian a thlangsual in ka ring hauh lo,Sângtuala te unau hian ka mit tlun lohna an neih hi ka la hre ngai hauh lo’ tiin a han phun khum va sak,Lal Zamloa chuan nang hmeichhia hian engmah I hre hauh lo,I pasal pawh kha ti khawp khan I duh in I sawi mawi a,tunah eng dinhmun nge in thlen chu kan hria a ni lawm mi ? a han tih chuan Lalnu Thanthûami chuan mittui tling pam chung chuan ‘aw le i duhang chuan ti mawlh ang che,tu nge dik zawk chu kan la hria ang chu,kei erawh chu ka hmel hmuh min lo beisei hauh suh ang che’ mittui tla zawih zawih chuan tiin khumpui lamah chuan lut in a in hnit faih faih a,Ngurpuii thawm hriain a in hru hul sawk sawk a,an ni vah chuan an inthlek zawk a,tih duh nei ti thei silo a awm hrehawm zia chu Thanthûami chuan hriain a thinrim chu a puak keh lo chauh a ni, tukthuan an peih chuan phur lo tak chuan an siam a,nidang ang chu nise infiam in an nui leh hawk hawk tawh tur a ni a,tunah chuan an beisei loh lutuk boruak an tawn vang chuan tuman tawng zai an chhat thei hauh lo,Lal Zamloa awmdan avang chuan khawnbawl te pawh chuan Lal in a chuan kai an hreh em kher a, khawnbawl te chu na tak tak a a tawng khum reng a vang chuan chhuanlam siam in an kal kha a ni reng a.

Tukthuan ei kham chuan khawnbawl te pawh chuan Lal Zamloa chu hmuh hreh viau mahse Ngurpuii hmelhmu lo a a kal tur chu ngai ngam loin,an lo kun lun nghiai hlawm a khawngaihna hmel kun nghiai chuan Ngurpuii mittui chu ko chhuakin a mittui luanna vang chuan a mit chu a sen ram in a mittui luannna chu a thup seng ta hauh lo,tu mah tawngzai chhat thei lah an awm heklo chutiang tak a a fanu an ngaina chu Lal Zamloa pawh a ruk tak chuan a in thiamlo khawp mai,patling in a lo tiam tawh a,a thutiam ah chuan a ding tur a eng emaw vang a palai zak tak a siam chuan indo bak a thlen dawn hauh lo tih lah a hrechiang hle mai bawk si a,a fa neihchhun thu la lo a a lo kal thui lutuk chu a inchhir tawh khawp mai,chu a inthiam lohna tih lan hreh si chu thinrim lamah kalin pu,Tawnliana chu thinrim tak a melh tur khuih in ‘ka thusawi kha theihnghilh hauh suh ang che,i fapa chu i thunun theilo a nih vaih chuan thil thalo tak a thleng ngei ang’ tiin a han vau zui leh chhur a, pu,Tawnliana chuan ‘Lalpa ka theih tawp ka lo chhuah ngei ang,ngaihngam takin kal rawh u,harsa ti fe chuan a ti thei hram a a sawi zawh chuan Ngurpui hawh awi,kan in hmuh tawh loh takin hei hi kawl tha la,i mamawh na takah hmang ang che tiin thihna lian tha tak chu pe a,min hrethiam teh,kan nu nizan ah a khua a sik hluah mai a,bawlpu ka ko lawk teh ang,tluang takin in kal dawn nia tiin mittui khap per fak fak chung chuan a chhuak ta nghal a,sumhnun a thleng chiah tih chuan Ngurpuii chu a tlan chhuak thut a pu,Tawnliana dar bawh chuan rawl chhuah meuh chuan a tap ta rawih rawih mai a ‘ka pa he thu hi lo hre reng rawh ka hmangaih ka nei dawn lo anih chuan,he khawvel hi ka chhuahsan mai ang,Sângtea chu lo hrilh la kan inneih hma zan thleng ka lo nghak ang,min lo hruai lo anih chuan he khawvelah dam in min hmuh in beisei tawh suh ang che u’tiin a tap hawm hawm mai a,Lal Zamloan chu thu a hre chiah chu thinrim rawl surai chuan ‘nang mi zaktheilo nu,eng thu nge i sawi khanglan chu le,hetiang a awm tur hian ka zirtir che a mi,kei i pa hian thu tawp ka siam tawh a i zawm loh chuan inasa lo mai ang tiin a chhipsamah chuan a han thuai nghal nawk a.

Ngurpuii chu te thawt in ka pa Tawn min chhan rawh,awi a na lutuk tiin a te tuar tuar a,mi pawisawi hlau leh pa zaidam pu,Tawnliana thin chuan Lal Zamloa chetdan chu a palzam thei ta hauh lo mai le.Lal Zamloa banrekah chuan man in a han phih nghek a ‘i va han ti mah mah tawh ve mawle,nang Lal pakhat hlau hian meikhup in ka awm ang maw, ka thisen hi a thlawn chuan a luang hauh lo ang, mahni ril a rah ngei chhiahhlawh ang mai a cheibawl mihring hi ka hlau ther te hlei nem che' tih pah chuan Lal Zamloa chu a chawi kang zawk a, bang den nan chuan a hmang ta hmiah mai a,khaw nge a tawp in thleng law law teh ang tiin a han pan leh chu Lehlawn pasaltha Parpuia chuan silai chuan pu,Tawnliana awm a tin chuan a silai cheng chu a han kau zui zat a, i din loh chuan ka kap ang che a han ti tuar a,Lehlawn tlangval te pawh chuan an silai chu hman mai theih tur chuan an lek nghal far a, pasaltha Parpuia tuksam ah chuan kut tha chak tak chuan man in ‘i ngam anih chuan i silai chu han hmet puak chiah la,i lu hi ka chhawkhmawk a ni mai Pasaltha Lianmana chuan a han ti ve chher chher a,Parpuia chuan a mah tham tu chu a thlen in pasaltha Lianmana hlauh neih hauh lo leh mi dik,thinrim tawh chuan pawisak nei hauh lo a che duh a ni tih a hriat chuan a silai kau chu lei lam hawi tir in a lek hniam ruai ruai a,i la hre khawp ang a han ti zui sap a,chu tawngkam meinei tak chuan thu a sawi chak khawp mai,pasaltha Lianmana chuan nakin nghah a ngai hauh lo tunah kan sawi fel ngei tur a ni a ti ta hmiah mai a,Ngurpuii chuan boruak chu a thelh daih vat loh chuan thil tha lo zawk a chhuak dawn tih hriain ‘ ngawi tawh rawh u,tumah in in tina tur a ni lo,keimah vang a buaina chhuah ka duh hauh lo ania,Lehlawn lam pan in ka kal a nga tharum thawhna awm zui tur a ni lo’ a han tih chuan mipa thinrim a sen tul ho chu an ngawi thap hlawm a.

Pasâltha Lianmana chuan ‘Lal fanu i chungah eng thil thalo pawh ti an awm anih chuan,Satlak khua te chuan kan hriat rualin chu thil ti tu chu kan tawrh tir ve ngei ang,i sawi hreh a nih pawh in i chîn kan lo ngaichang reng dawn nia, kei ni Satlâk tlangval te chuan i hlimna hi kan duh ber a ni,puih i ngaih hun a piangah min han hriattir ang che, i duhlo chung tih luih tum te chu kan zuah hauh lo ang’ mei nei tak chuan a han ti a,Ngurpuii chuan ‘pasâltha ka lawm e,i thusawi chu ka hre reng a, ṭun ah chuan ka kal rih phawt a nge ka chin chu in hre zel ang tiin a ni lam hawiin an in kuah vawng vawng a.Lalnu Thanthûami chuan ‘Ngurpui kal tawh rawh u in tlai lutuk mai dawn,harsatna i nei a nih phawt chuan hetah i ni ka awm tih hre reng ang che aw, lungngai reng reng suh ka pasâltha te hian i tan engkim tih an huam a nia’ tiin hawi let map lo chuan inchhungah a lut ta nghal a,Lal Zamloa pawh samzial phelh phung leh thinrim hmaisen urh chuan a kal baih suih suih a,kut tuar tu mah nise chutiang tak a a fanu hmangaih leh duksak tu an awm tih a hriat chuan a lawm ru kher mai, Satlâk tlangvalte chu sakhi thingchunglawn chi an nih loh zia a hriat chian phah in,a khaw tlangval te zingah he tiang tak a tán nung hi a nei ve a ngem ? tiin a in ngaihtuah muk ta hle a.Lehlawn tlangval te chu an kal ngawi ngal hlawm in an hmelah chuan thinrimna chu langin ‘Lalpa nang meuh pawh zah loin kut an thlak che a ni a,Satlâk khua hi hnawtchhuak daih ila a ni mai’ tiin fiuhpawrh tum tak chuan an phun leh sap sap thin a,Lal chu ngawi rengin ‘kha tiang khawp a thih hlau lo a ka fanu min hmangaih pui tu ka nei kha ka lawm hle a sin,kut min thlak pawh kha an tih tur tak an ti ani ka fanu mah nise,thlavang hauh turin thisenah in zawmna kan nei miau a ni, nangni pawh in chungah ka lawm khawp mai ka tan in inpek na hi ka hre reng tawng ang’a tih takah chuan tlangval te chu an ngawi ta rauh rauh a.

Chutia ngawi reng a an kal chuan chhun chaw fak hun pawh a lo ni ta reng a,chaw fakna hmun rem an thlen dawn chuan thing phen aṭang silai a lo puak lawn dur dur a,Lehlawn pasaltha Parpuia chu tlu zawi hnawkin a bul a tlangval panga te pawh an let nghal tawl tawl a,lei an thlen chuan an nunna chuan a chhuahsan chiang hle tawh a ni,Lal Zamloa pawh chu a mal dinglam a silai mu lut vang chuan let tawp in,a khaw hmuh te chu a vir muai muai a ka fanu tlan rawh ti a au tuar tuar pah chuan a bul a silai chu chhar in an mahni lam pan a mi pa sarih lo kal lam hawi chuan a han hmet puak ve dur a, tlangval pakhat chu hlawm nawkin,silai lo puak leh chuan Lal Zamloa awm chu deng dawp in silai mu lut sa zawk vang chuan tlu tawp a,engmah hrelo chuan a hlawm nawk a tlangval pakhat chuan chempui phawrh in Lal chu a nghawng tan hmawk tum chuan a tin uaih a,an hruaitu pa chuan lo khap vatin,silai a lek vang chauh a kap ka ni tuman lal kut an thlak ngailo,Lal lu i lak vaih chuan kan khua hi khaw dang zawng ten tangrual in min run a phah ngei ang tiin a lo khap ta a.

Ngurpuii chuan tlangval pakhat hnenah ‘ti kha tlan vang vang la,min ngaihtuah hauh suh ang che Satlâk khua pan ding nal nal la kan chin hi va hril vat tawh an ni chuan min lo zawg hmu ngei ang,Sângtuala ka va han mamawh che ve,khawiah nge i awm daih le he laiah mangang takin ka awm a sin’ a han ti zuai raih a,tlangval chuan mak ti tak chuan lal fanu chu a melh reng a,Ngurpuii chuan a bulah midang an awm tih hre chhauk thut in a zak chu a sen tan tan a ‘khai tunah I kal daih tawh emaw tia’ a han ti ngawt a,tlangval chuan ‘lal fanu tlan zawk rawh a theih chen ka lo chelh khaw tlai nge’ a tih chuan,Ngurpuii chuan ka tlan hla thei dawn chuang lo hun kan neih lai hian tlan thuai zawk rawh,min ngaihtuah a nih chuan hmanhmawh takin tlan thuai rawh,lal fanu tirh I hnial dawn a mi ? a tih takah chuan tlangval chuan ‘Lal fanu lo fimkhur hle ang che,kan lo kir leh thuai ang tiin hman hmawh tak chuan a tlan nghal thuai a,a silai chu thukru in chempui nen chauh chuan a tlan ta zawk a,thing hmunah chuan dip daltu nei lo chuan a theih tawp a chak chuan a tlan zel a,a dang ro lutuk hnawn in tui a in zawk tih loh chuan a tlan zel a, naurual zanriah chhum hun chuan Satlâk lungdawh chu a thleng ta hram a,an lam pan a tlangval chau tih hriat tak lo tlan chu rawlthar te chuan lo thlir in,Lehlawn tlangval ani ti an hre thuai a,thal chu kah mai theih tur chuan an inring far hlawm a, an zing a pakhat chuan a hmanhmawh leh chauh danah sawn buaina an tawk a niang I lo nghak phawt teh zawk ang u,a ni chauh sawi chu kan hneh tho ang a tih chuan a thiante pawh chu an phur ta phian a.

Tlangval lo tlan an hmuh rual chuankhaw chhung lamah mi pakhat tirim ina ni chuan zawlbuk chu a thleng thuai a,mikhual pakhat chauh hmel tak lungdawh lam pan a lo tlan an hmuh thu an sawi chuan Satlâk tlangval te chu lungdawh lamah chuan an tlan thuai a, Pasaltha Lianmana ten lungdawh an thlen chuan mi pakhat hi rawlthar ho chuan an lo kil bial taih in chu pa chu a thaw huam huam a,pasaltha te a hmuh chuan ramri bul hnaiah min lam bun, lalpa a thi in ka hria Lal fanu an man tawh in ka ring tih chiah a sawi thei,rawlthar pakhat chu tui la tur chuan an tir thuai a,tui a in zawh chuan ‘chaw fak na tur kan zawn laiin silai a puak dur a,pasaltha Parpuia leh midang panga an tlu nghal a lalpa Zamloa pawh a tel,lal fanu chu ka hruai peng zawk na in a mah kalsan a zual ko kal turin min tir a,Sângtuala a ngaih zia pawh a sawi a ni’ a tih chuan thil awmdan chu an hrethiam ta lo chawl hahdam la I theih veleh lal in I pan dawn nia,kan han insiam a nge tiin tlangval te chu thinrim tak chuan an kal thuai a,lalnu thilawm dan an hrilh chuan ‘aw ka vahnu i lo hetih dawn vang emaw ni,I hreh chung chung an lo hrui haw kher che le,Sângtual ngurpuii chuan a harsat lai ber in a lam che a,nang lah hmun hranah i awm daih si a maw ‘ tiin lungchhe tak chuan a tap ta hawm hawm a,pasaltha Lianmana chuan englekhawle tlangval panga ten kan pasaltha rammu te in hmuh hma chu va zawng ula,Lal fanu chanchin hi va hrih thuai tawh u,mi za kal turin lo in buatsaih sela midang zawk chuan pasaltha Sukthanga ho in khua lo veng rawh se, râlveng in dah nghal vek bawk tur râl an lo kal a nih chuan tumah nungdam a chhuah loh tur,in lo man a nih pawh in thu zawhfiah hnuah that nghal vek ang che u a tih chuan a thinrim hmel chu a dur khup a,dawihzep deuh tan chuan a hmel chu en that ngam a ni meuh lo hmanhmawh tak chuan ram lam pan chuan tlangval za hruai in an liam ta a . . . .

Lo tawk leh phaw tehse,i thut reng nafam chuan i mu tlem viau ta ve ang

[Ngaia]

PASÂLTHA SÂNGTUALA ( Mampuia pa)

BUNG - 122

( Thawnthu hi dah ngawt mah ila,coment leh like tu tello chuan engnge hlutna a neih chuang le,in coment hian hlimna na sa tak min pe tih lo hre mawlh teh u,a nawlpui ka chhang lo che u erawh min hrethiam tur in ka ngen che u, nangni tello chuan ka thu ziak tlawm tak hian hlutna a neilo tih ka hria,nang nin min fuih lo ni ula tun chen hi ka ziak lo ang tih ka ching, ka tan in hlut zia in hriat loh ka hlau thin,in za vai chungah ka lawm e)

Pasaltha Lianmana te chu Puklian ngaw lam pan chuan hmanhmawh tak chuan an duk zur zur a,an hruaitu pa chu an phak meuh lo,pasaltha Lianmana chuan a nau Sângtuala a ngaihtuah chuan a chung a thil thleng chu pawi a tih pui khawp mai,a theihna leh theihna mi mangang te tan a hman dante,hrehawm pawisa hauh lo a hun a hman dan te ngaihtuah kai zelin khuanu meuh pawh hian a rel sual a mi ? tiin a ngaihtuah phah hial a,Puklian ngaw thim vawt ruih an thlen chuan sulhnu chhui pawh a har ta khawp mai,Lehlawn khaw lo bei tu te chu khua nge an nih a,engvang a lo bei ngawt nge an nih lah an hre hauh lo nen hnuchhui chuan an kal zel a,lehlawn ram ri pawh an lo hnaih viau tawh a,kawr an thlen dawn chuan thisen rim thangnghur chu hriaiin chu lam pan chuan an kal thuai a,Lal Zamloa chu thisen bawh nguai hian a lo let ngut a,a bulah chuan a tianghawl thin pawh chu a lo let ngat a,an han belh chian chuan a marphu chu a zakhnuai ah chuan a lo la awm in,a marphu pawh a muang khawp mai,pasâltha Lianmana chuan a naute chu ko in hmun remah an mut a,puankawp chu sin tir in an thiam ang tawk chuan an buaipui a,pasaltha Parpuia leh a naute mi pariat ruang lo let ngat chu hmu in,Ngurpuii leh midang pahnih te ruang erawh an zawn ngial pawhin an hmu zo ta hauh lo, thawm lah chu a reh in thli chu a thaw deuh fur fur mai a, ruang chu tih zat leh zanthim chu a ngainat awm loh kher mai tlangval naupang deuh te chu eng emaw deuhah an phawk leh deuh hra thin a.pasâltha Lianmana chuan zualko tirin Lehlawn lamah ah chuan Mualkunga te thianzaho chu meichher nen chuan an kal thuai a,Satlâk bawlpu hruai tur chuan tlangval pangâ te pawh an kal thuai a,mi dangte chuan meichher nen hnu hma chu han zawng ngial mahsela hma an sawn thei hauh lo.an rilru chuan Sângtuala chu awm sela aw an ti vang vang a.

Thisen rim hriaiin an piah thim chin ah chuan sakei chuan a lo vel tan ta tlat mai a,pasaltha Lianmana chuan a naute chu meipui chhep tur chuan a tir a,reilo teah meipui chu peih in,meipui a en takah chuan sakei thawm pawh a reh ta a,chutia mei an tuah chuan a boruak pawh lum in Lal Zamloa a marphu pawh lo lang fiah in ta deuh a,puan chuan lum takin an khuh hlun a,Satlâk khua a chet dan avang chuan tlangval te chuan an lainat falua hauh lo,puih ngai a nih vang chauh chuan an theih tawpin an pui mai chauh a ni, zanlai arkhuan hma deuh chuan Satlâk lam atang chuan meichher hi a lo eng phei thluah thluah a,meichher eng a lo hnaih chak dan ah an kal chak tih pawh a hriat a,pasaltha Lianmana chuan fimkhur thuah tlangvalte chu in ralring tur chuan tiin lo va fiah tur chuan mi panga chu tir a,an lo beisei lawk ang chuan,an pasaltha rammu te chu an lo lang thuai a, an zingah chuan Bawlpu lo telin Bawlpu chuan Lal Zamloa hliam chu a han en chiang a,mak ti tak chuan chek tlak tlakin a va han vannei teh lul em tiin a ma hriat tawk lek chuan a phun sap sap a,Lehlawn lam atang chuan meichher eng pawh a lo lang sap sap bawk a,reilo teah Lehlawn ho pawh lo thlengin an Bawlpu chuan Satlâk bawlpu chu puiin an thiam na zawg zawng chuan lal awm a silai mu chu lak chhuah tum chuan an bur nghal ngar ngar a,an beih fe hnu chuan silai mu tang chu phawrh sakin,a mal a silai mu tang pawh chu an lak chhuah sak a,an ramhmul damdawi te an hnawih zawh chuan thlantla phung chuan an ni pawh chuan vaibel chu an pak khu talh talh in,eng emaw sawi chuan an phun dun sap sap a,an vawikhat in hmuhna mah nise hlim tak chuan an nui dun hak hak a.

Sângtuala thinrim hmel chu a hlauhawm khawp mai,tu mah chuan an be tha ngam lo hial a,meipui engah chuan a mitmu chu a lang sen hlar in a hawi danah pawisak a nei tlem tih a hriat kher mai,Lal Zamloa engmah hrelo a mu zawi reng chu a han melh vang vang a,Laiawrha chuan a nau a dar a ben thak thak pah chuan ‘in ngaihtuah ngun la,thinrimna in hneh tir suh ang che thinrim lai hi mihring fimkhur ngaih zaul lai a ni tih theih nghailh suh ang che’ a han ti sap a,buk nghat pah chuan a u chu a han melh vang vang a,Sângtuala chuan lambun na lam a tlanchhuak tlangval pakhat chu ko in a ni chu a lo kal thuai a,in thlahrun hmel khawp mai,a lo thlen chuan ‘khawi hmun atang chiah in nge an lo kah che u,khawi hmun ah tak hian nge in awm ? ‘ a han ti dam thlap a,tawng dam viau mahse a mit meng erawh tlangval dawihzep deuh te chuan en tha ngam lo chuan an melh hrek hrek a,an dinna leh an lo kahna hmun te an en zawh chuan Sângtuala chu a han ngawi vang vang a,Laiawrha chuan ‘ a nih khawi hmun a tang chiah in nge Ngurpuii nen chuan in inthen’ a tih chuan a ni chuan,khi lamah tiin meichher nen chuan hma hruaiin a kal nghal a, Hrumhriau kung lian tak bulah chuan ‘tah hian ka ding a,a ni chu kha mi thing bulah khan thuin kal turin min tir a Sângtual ka mamawh lai che in khawiah nge i awm’ a tih zawh chuan kei chu kal tur chuan min tirin ka kalsan ta nghal a ni a tih chuan Sângtuala chu lainat tak chuan an melh thap a,a mittui lo hnam khap per sak sak pah chuan ‘khawi hmun pawh thleng ula,ka rawn zawng chhuak mawlh ang che u’ tiin Sângtuala chu a han phun sap a,Ngurpuii thutna an chuan a han ding deuh vang vang in lei lam chu ngun tak chuan a bih a,a mittui a vang chuan khua a hmu fiah theilo in a thinrim chuan chempui phawrh in a bul a thingtuai banpuam tia chu a chhawk hmawk a,Laiawrha chuan a nau chu kuah vatin a darah chuan a han beng thek thek a,khaw nge dangawm teh keiin ka lo en chin teh ang a tih takah chuan a u hnung ah chuan dingin an piah thim chin chu a han thlir vang vang a, Laiawrha chuan hnu chu uluk tak a chhui in sul chuan chhak lam chu a pan zel a,inchhung dung awmah chuan mual lai a tang a hnuin lo finin inchai nah nu chu a lo pe deuh han a, thingbulah chuan Thihna lian tha tak chu Laiawrha chuan hmuin a han en chian chuan thil awmdan chu a hrethiam ta a.

A thihna chhar chu ngawi rengin a nau chu pe in a ni chuan a hum vang vang a,a mittui chu dan rual loh chuan a biangah chuan a lo luang ta ngiai ngiai a,a kut chu hum khur zawih zawih in ha chang chu a thial rep rep a,Thûamkunga chuan a thianpa darah chuan kut nghatin a bu nghat nghat a,a mittui luang chu hru faiin a ni pawh chu a bu nghat nghat a,a bul a tlangvalte a en chuan an mittui chu a lo tling pam hlawm a,a mah lainat tute a hmuh chuan in tipachangin a han then khum sak a,a hmangaih hmuh let vat a duh a nih chuan hnuchhui hmanhmawh a ngai tih hria in,Thihna chu uluk tak a fun tha in iptepui ah chuan a dah a,thawpui a han la vang vang a.Laiawrha chu thlanglamah chuan chhukin meichher engah chuan hma lam pan chuan an kal ve bek bek zel a, Lehlawn ram lam pan chuan an kal zel a,hnu chhui tu te chuan mak an ti ru khawp mai.

Mawipuia chu Laiawrha bulah hnu chhui chuan a kun ve ngar ngar a,Lehlawn ram ri kawr an chhui thlen chuan mak an ti kher mai,Lehlawn khaw tlangvalte chuan an Lal chu hliamin a fanu chu an hrengbo ta mai em mi niang ? Satlak tlangvalte chuan Lehlawn tlangval te chu an ringhlel ru ta hle mai a,an hnu chu Lehlawn lam a kal tur an ngaih lai chuan an kaina hnu awm chu an hmu ta hauh lo a,kawr kam uluk tak chuan en mahse an kaina awm chu an hmu thei hauh lo chu mak an ti hle a,Lehlawn tlangvalte pawh chuan an khaw tlangval sual deuh awm chu an sawi deuh sap sap hman a, meichher fiah lo nen hma an sawn thei hauh lo a, Laiawrha chuan tu vak mah kal darh lo tur leh hnuhma ti reh lo zawng a awm khawm tur leh hnuchhui thiam deuh te chauh lo chu inthiar fihlim rih tur chuan a han hrih a,tlangval te pawh chu thuawih tak chuan an kal sawn hlawm a,Thihna an hmuhna atang chuan an han chhui tha leh a ngun tak chuan Laiawrha chuan a han en nawn leh chuan hnu thup tak a tlang pawm vet zawng a hnu kal chu a man fuh ta hlauh a,chho zal zawng zel a hnu a chho vang chuan rindan an nei thiam ta a.

Ngurpuii chu an pua a nih a ring ta ber a lo fing khat awm an chhui chuan kawr zai kal thla raih chu an chhui thleng a,chu kawr zai kam chu tlem a lei hnip deuhin hnu pawh a lang fiah ta deuh a,an hnu chhui lai chu kawr lung pui chung a lo chhuk hnu chuan fin in hnu chhui pawh a lang chiang ta khawp mai,ke arh deuh leh tawi hlai zet chu a lang fiah deuh tlat a,chu hnu chu ngun tak chuan an han en chuan thil rit deuh keng a ang khawp mai,lo fing hnih awm an chhui hnu chuan hmun khat laiah phei chuan hnim hi a lo pe deuh sal in,Ngurpuii bengbeh pakhat an chhar leh atang chuan an hnu chhui chu a dik tih hriai in hmanhmawh tak chuan an kal ta zel a,Sângtuala chuan Ngurpuii mangan dan tur leh chhantu ngai mangang tak a awm tur a ngaihtuah chuan a thinrim chu a puak keh lo chauh a ni,a mittui hru zauh zauh chung chuan a u hnung atang chuan an hmalam ngaw dur pui chu a thlir vang vang a,a ngaihtuahna kal bing lutuk ding reng chu Thûamkunga chuan nem zauh takah chuan a ngaihtuahna kal ding tak atang chuan harh zawk a inthiam loh tak chuan a then sak a.

Tlang an lawn liam chuan khawfing pawh chatin kawl pawh a lo eng tan ta a,an hnu zui chuan tlang dung zawhin ngaw ril lam chu a pan zel a,an hun hman rei ngaihtuah chuan an la kal tawi kher mai,lo fing hnih awm zet mual chu an zawh hnu chuan veilam mual in khawh thla chu zuiin khua pawh a eng ta uar a,ngawpui hnuai chu a la thim kher mai Laiawrha chuan hnu chu uluk tak chuan a chhui zar zar reng a,sava te pawh an lo chiar nak nak in vahrit riak pawh chu an thawng thlawk leh phurh phurh thin a,ngawpui hnuai a lo en takah chuan meichher chhit a ngai ta lo,an hnuchhui pawh an sawt ta sawt a,mual thum lai an kal hnu chuan meikhu rim hriaiin an fimkhur ta khawp mai,Laiawrha chuan a nau chu en in ‘lo in rawlh rih suh ang che,i u ka awm a min ring ngam tur a ni i hria em,hmelma beitur khawp in i tha rih lo ani’ a tih chuan a lo bu nghat nghat a Thûamkunga te ho hnenah chuan ‘in thianpa hi lo veng ang che u,ka nau himna leh lal fanu nunna hi in kutah a awm tih hria ang che u,Ngurpuii kan lak chhuah hma chuan chet kan thawh tur a ni lo’ tiin pasaltha phanchang deuh chin chu thlang chhuakin midang te chu tuibur hmuamda ngai chang a fimkhur tak a zui tur leh silai thawm an hria a nih pawh in tawng bawh lo tur chuan a chah ngun khawp mai.

Mual pawng an chuan chhuah chuan meikhu rim pawh a na zual sawt a,an piah mualah chuan buk hi a lo awm a a kawtah chuan meipui rem tawh chu a lo khu hlat hlat a, fimkhur tak chuan buk chu an hnaih zel lai chuan buk atang chuan pakhat hi lo chhuakin kawr lam pan chuan a lo chhuk a,kawr kamah chuan a hawi vual vual a,a puan chu a hlim kungin a daikal ta a,Laiawrha chuan a thiante chu mitmei zauhin chempui lek in an hma a ngaih tha tak a inthiar mek chu a veh thla ta tham tham a,a thiante chuan an buk lam chu uluk tak chuan an lo melh reng a,Laiawrha chuan fimkhur tak chuan a hnaih hriau hriau zel a,an inkar hlam khat emaw chauh a tla ang tih chuan thingtang tliak ri hriain,inthiar mek pa lo hawi chiah chu,Laiawrha chuan a han zuan nghal zawk a,hmun awih ah chuan an lum dun thial thial a, kawr an thlen chuan Laiawrha chuan chempui fawng chuan a han chhu chawrh a,a beihpui pa zawi hnawk chu a a puan chuan a phuar zui nghal bawk a.

Fimkhur tak chuan a thiante pawh chuan finthla in a silai chu lain an hnungah chuan Satlâk valrual te pawh an lo lawr tuam tuam a,an mi man chu Mawipuia kutah dahin buk chu kil tin atang a tin chuan an hual ta a,buk an hual fel chuan Laiawrha leh pasâltha Lianmana chuan buk chu an hnaih hret hret zel a,mautlawn tluk awm chauh an karah a tla ang tih chuan buk chhung a tang chuan mipa thum hi buk atang chuan lo chhuakin an hnungah chuan Ngurpuii pawh sam thur bam chuan a rawn chhuak a,a sam thur zualpui a chulmam chuan a hmai duk deuh char pawh a lang chiang ta khawp mai,a zung tur kal chu an zing a pakhat chuan ‘nang nu kha khawi a kal nge i tum,kan thulo chuan khawiah mah kal suh kan tih che kha’ tiin a han vin that that a,Ngurpuii chuan ‘ka daikal dawn mawle,nang ve kha hmeichhe chung ah chuan i huai pang pang hle mai, kan khaw tlangval te lo thlen hunah eng chiah nge i nih chu kan la hria ang chu, Sângtualan i chetdan a hriat hun ah chuan nuam i sa hlek lo ang maw’ tiin a han chhang let ve a,a mi chhan pa chuan ‘Sângtuala tih leh i kâ chu a in hmeh khawp mai,i sawi ang mi chu nise a rawn zawng hmu daih tawh ang che chu,tun ah chuan in khaw ho bulah a in hrosa kuk kuk ta ve ang chu,i tawng theih zia reng hi ka kham zo zai ta,hmeichhe te te nungchang hre lo lutuk zilh leh deuh hlek i duh a ni maw ?’ tiin a han pan a,an zing a pakhat chuan ‘Zaulian awm mai mai teh,hmeichhia chu lo rum ve mai mai ang hmiang, duhthusam chu kan nei vek alawm ‘ a lo tih takah chuan phun nang nang chung chuan bel chu a chhuang tau sawk sawk a.

Ngurpuii chu thing phenah chuan a hawi vang vang in ‘Sângte khawnge maw i awm le,min rawn zawng dawn lo em mi ‘ tiin a han phun sap sap a,Thûamkunga chuan lungte chuan Lal fanu chu a han vawm zauh in Ngurpuii chu a han hui zauh zauh a,a thil hmuh chu a mitvai emaw tiin a mit chu a nuai nawk nawk a,Sângtuala chuan Ngurpuii hmai duk char leh a mit bui deuh char chu a melh vang vang a,Ngurpuii chuan ‘ka lo beisei reng tawh che u a sin’ tiin a mah lo thlir rengtu lamah chuan a tlan thuai a,buk lam atang chuan silai lo puak durin Ngurpui chu te thawt in a tlan lai chu a pai nawk a,Sângtuala nak thawi chuan silai mu chu a in khawh phei zawk a,Ngurpuii tlu tur chu pawm nawlhin lungchim tak chuan a kuah vawng vawng a,Ngupuii chu zawi vekin engmah hrelo chuan a hmangaih chuan a han pawm vawng vawng a,silai chu kil tin atang chuan lo puak in,silai ri chuan chulai ngaw chu luah lanin patling natuar rum vawng vawng chu buk chhung atang chuan a lo chhuak a,buk pawn a mite chuan an rin loh lutuk a silai lo puak chu mit pawng zawrh zawrh chuan an melh kual hruk hruk a,pakhat chuan kan tlawm e min nun rawh u tiin a kut chu chung lamah chuan a phar chho thuai a.

Pasaltha Lianmana leh Laiawrha chuan an naute chu silai hmet puak tawh lo tur chuan an khap thuai a,buk chhung lam ah chuan na tuar rum thawm lo chhuakin,an hmanrua lo dah chhuak tur chuan tlangval pakhat zawk chu tir in a ni chuan silai pakua lai chu la chhuak thuai a,Laiawrha chu buk lamah chuan fimkhur tak chuan chho thuai in,buk chhung a han en chuan mi paruk lai chu lo let rum in thisen chuan a chiah sen nguai hlawm a,pasaltha Lianmana chuan buk pawn a pahnih te chu a lo hnungkhirh mek bawk a,hliam te chuan rei an daih dawn lo tih hriain ngaihtuah zui erawh a tum chuang hauh lo,pasaltha Lianmana chuan ‘khawi khua nge an nih,eng vang a lal fanu chu man ngawt nge an nih tih a zawh chuan Zauliana chuan ‘ Lal Pângliana khua Thluahpui an nih thu te,an khaw thenawm Sialai khua nen an in hal zia te,Sialai khaw Lal fapa Ngamliana tan Ngurpuii palai an tirh dan leh an inrem dan te,Sialai khua mô tur ru chhuak tur a Lal in a tirh dan chu a sawi ta vek a’ an thu hriat thar chu mak an tiin an thin a rim kher mai.

Ngurpuii chu silai mu chuan a hnute zawn ah thawiin a thi duh kher mai,thisen chhuak nasa vang chuan a dang bam in hmun remah mut in,thi ti tawp tur chuan vaihlo sehtui chu a hliamah chuan an bel a,reilo teah chuan thisen chhuak pawh a ziawm ta a,Ngurpuii lah chu harhchhuah tum lo ang hrim chuan a mu dang bai mai a,Sângtuala chuan vaibel siam kaiin a khu chuan Ngurpuii chu a chhem a,meikhu chu hâkin Ngurpuii chu a lo khuh kharh kharh,a lo harh chuan a mah lo en reng tu hnenah chuan ‘Sângte ka him tawh ti raw ? min kalsan tawh suh aw,ka hlau lutuk an sual si,min mân atang khan tlanchhuah ka tum ve sek nen,kut min thlak deuh reng a min lo zawng hmu vat lo ula,thih mai pawh ka hreh hauh lo‘ tiin a han phun zui sap sap a, Sângtuala chuan ‘i him tawh e, tawng tawh rih suh i theih chuan mutthilh tum ang che,i tan a thih ngam lu pu thiau in kan veng tawh che a thlamuang takin mu tawh rawh,tih lawk tur ka nei a ka lo kir leh thuai ang tiin an mi man awmna lam pan chuan a phei ta a.Ngurpuii chuan thei leh theilo chuan a melh zui tawk tawk a,Sângtuala chu Thûamkunga beng bulah eng emaw sawi chuan a phun sap sap a,Thûamkunga chu lo phei in saw laiah sawn hmunrem a awm a,Lal fanu tân pawh a nuam zawk ang,hawh u i zawnphei lawk ang tiin an piah tlangdung lam pan chuan an zawn ta a.

Pasaltha Lianmana chuan a thil hriat duh a hriat zawh chuan a thinrim chu a sen tul tawh a,Laiawrha chuan ‘in khaw in huat vang mai chuan pawisawi lo nunna chu in la a, hmeichhia chu in man ngawt a maw ? tiin a bengthal thuai a,Zauliana chuan in arpachan lai chuan in huai hmel hle mai maw,nuam in thai hauh lo ang in la hre dawn a lawm tiin thut chhuah pah chuan a vau chhar chhar a,chu vauna tawngkam an hriat chuan khaw hnih valrualte chu an thum hak a,a daikal lai an man pa pawh lo thlenchho puiin a ni pawh a lo harh tha hle tawh a,Thluahpui tlangval Zauliana phuarna hrui chu zaichah sak in Pasaltha Lianmana chuan ‘pawi in sawihnu pawhin ngaihdam dil tak a ruangin ka vau e te min han tih khang lan chu le,eng ang chiah a huaisen leh thei nge i nih chiah chu ka han fiah ngat ang’tiin a chempui chu a han zen nghal a,Laiawrha chuan ‘hei chu ka chan ka sahliam a nih hi’ tiin a rawn hma khal ta chat a,Zauliana chuan in pahnih khan min beihrawn mah ula ka hlau hauh lo che u’tiin a nui vei tha a.

Laiawrha chuan ‘khanglang che chuan kut lawng hian ka han hmachhawn teh ang che,i huaisen bawk a’tiin a hma ah chuan a ding ta a,Sângtuala chuan midang an la awm tho tih hriin an sirah chuan a lo ding ngawi reng a,Zauliana chuan chempui vilik zauh zauh pah chuan Laiawrha chu a pan in,a tlan thut pah chuan chempui chu a vai zawk zawk a,a rin leh beisei ang lo chuan a beih pa chu a sat fuh thei mai hauh lo,khaw hnih tlangval te tang lutuk lah chu awmhmun ah an lo ding khawng thap hlawm a.Zauliana chuan Laiawrha nghawng sah chhhawk hmawk tum chuan a vai leh nghek a, a ban chet rual chuan a Laiawrha chuan hnaih thut in a chem hum na ban rekah man thutin,a beihpui pa tha hmang chuan a han vawrh zui thut a,leichar ah chuan ek thawt khawp a in sawhin a chempui hum lai chu a chhuhsak in Zauliana nghawngah chuan sat nghek a, Zauliana hrawk chu ri bawrh bawrh a thisen chu a chhuak puat puat bawk a,a ke artui chu khawng dar dar in a han leng awrh awrh a a zawl hlen ta,Laiawrha chuan thaw la ham ham in a la dam te melh chuan ‘Lal fanu in man lai khan lainat na leh khawngaihna tello khan in man a,hmeichhe awmnem chungah kut in thlak a,keini pawh hian in nunna hi ka ui dawn hauh lo in huaisen na leh theihna chu tu ber hian nge lan tir leh dawn che u le ?’ a han tih chuan an mi man la damte chu hlauin an ding sai hlak hlak a,Sângtuala lo pen chhuakin ‘nangni pahnih khan in chempui kha la rawh u,kei min hneh a nih phawt chuan nungdam in Thluahpui khua in pan ang,min hneh lo emaw min bei duhlo a nih a nih chuan he lai hi in tawpna tur a ni’ a ti ta bur a, chu tlangval naupang tak pasâltha diar khim vang chuan a thusawi chu a ti mai mai lo tih lah a hriat si a,dam an duh chuan an hma a mi chu an hneh ngei a ngai tih an hre chiang ta kher mai .

Huphurh tak chuan chempui chu an khai zawi reng a pakhat chuan ‘nang hi lo hneh che pawh ni ila,i thiante hian min that tho ang chu’ tiin a chhang a,pasaltha Lianmana chuan ‘kan pasâltha sawi ang tak khan kan ti ngei ang,in hneh a nih phawt chuan nungdam in in chhuak ngei ang’ a tih takah chuan Thluahpui tlangval pawh an phur ta deuh a,an han in bekbawrh dun sar sar in Sângtuala hnung leh hma ah chuan helin an veh dun ta hriau hriau a,a hnung a mi chu tlan thut in a chempui chu a vai zawk a,Sângtuala chu kun zauhin chempui lo thlawk kun hniam san pah chuan hnung lam ah chuan a tawlh zawk a,a sam chhawlleng chu chempui hriam tak chuan chhawk thawt a,chempui in a taksa zawn a pelh rual chuan a chempui chu a vai ve zawkin Thluahpui tlangval chu te thawtin chempui chu a paih rawk a,a ril lo chhuak hup chuan a thingthi hnawk a mak ti tak a Sângtuala melh chung chuan a bawk hnawpin a chatthla zui ta a.

A thianpa tlu lai a hmuh chuan Thluahpui tlangval chu thinrim tak a te tuar chung chuan hmalam pan chuan a rawn dawk zawkin,a chempui chuan Sângtuala chu a han vawm thut a,chempui lo thlawk phei kun hnim san zauh pah chuan a thianpa chempui thlauh chhar lo ding chhuak chiah Thluahpui tlangval chu a zuan nghal zawk a,lei a thlen rual chuan a kun hniam nghal zawk pah chuan a han sat nghal sawk a,Thluahpui tlangval chuan chempui lo thlawk lo khak per zauh pah chuan a tawlh hnung zauh a, chempui chu a han vai ve nghal zawk a Sângtuala chuan lo khak per zauh pah chuan a hnaih chilh thuai a,a chempui chu a vai chhuak ve zawk in a beihpui pa dar veilam chu zungchal chen chuan a thler nghal hawk a,a hliam atang a thisen lo chhuak chu melh zawk pah chuan ngaih pawimawh hmel loh zet chuan a then sak a,thisen chuan a ban chu luan sen nghal zulin an in veh leh thauh thauh a,Sângtuala chuan a beihpui pa chu hnaih chilhin a sat zui mawlh mawlh a,a sattu thain a hnen em vang chuan in dang ve mahse a in dang seng ta lo,a tawlh hawn hawn lai chuan thing ding chu su chawrhin a rihna hloh ban phar zawk chu,nakruh pathum bung hmawk chuan Sângtuala chuan a han vai leh fua,a nâ ti kun hniam zawk chu a nghawng chu chhawk hmawk in,a daikal lai an man chu rum tak a melh chung chuan Sângtuala chuan a pan leh ta chher chher a,a ni hlau chuan zun fem thlauh zaih zaih chuan a ding khur zawih zawih a,Val upa Chhâwnthiaua chuan a nau chu chelh in ‘a tawk rih e,thisen a luan tam bakah a ni hi an khaw lamah chanchin hrilh tur in kan mamawh a ni’a tih tak ah chuan,i va han vannei tak em ka hmuh loh turah awm kum khua tawh ang che,chutiang a nih loh chuan a pawi viau ang tiin Sangtuala chu a phun sap a.

Val upa chuan an mi man melh rum ul chuan ‘in thil tih pawi zia mit ngei a hmu tu i ni a,tunah hian in khaw lamah kal vang vang la,in Lalpa Ngamliana chu lo va hrilh la,Lal Zamloa te chhung chung a a thil tih hi kan thungrul ngei dawn tih hrilh an che,kan hman remchan hmasak berah meivap a in khua chantir turin kan lo thawk chhuak dawn’ tih hrilh ang che, nang hi kan en zui reng dawn che a,kan khaw tan a hnawk thei tur zawng a i che a nih vaih chuan kan dim hauh dawn lo che a nia’ a tih chuan an man pa chuan lawm tak chuan ‘Lal Ngamliana chu ka lo hrilh ngei ang,tunhnu chuan in lakah hriam ka lek tawh hauh lo ang tiin,an nun vang chuan lawmthu chu a sawi mawlh mawlh a,zan riak buhfai leh mutbu leh a ma chempui nen chuan an chhuah ta a,a kal liam tak chuan mitthi chu kawr kamah dah khawm in,ramsa ten an hnuh darh mail oh nan thing leh lung a remchang a piang chuan an vawm khuh a,ruang an buaipui zawh chuan tukthuan bawlna tur zawng chuan an che nghal suau a, Ngurpuii chu hlang a zawn in eirawngbawlna hmun pan chuan an kal thuai a.

Ngurpuii pawh tunah chuan thlamuang tak chuan a mu siai siai a,tukthuan a tan buhhawp siam sakin Sângtuala chuan eitir in,a zahna leh lawmna chu a in chen hial a hlim tak midang mitmei vang tak chuan an innuih leh sak thin a,a hliam chu na ti awm vak pawh chuan a awm bik lo,tukthuan an ei kham chuan zawimuang chuan Ngurpuii zawn a, Thluaipui khua chu a rang thei ang a run ngei chu an tum ta, Lal fanu hliam tuar a awm ve a vang chuan sawi tha duh lo chuan an phun sap sap hlawm a,Ngurpuii chu a tawngvai niah niah thin a,Sângtuala hming chu lam chhuakin a te leh thawt thin,a khaw sik chu sang zelin tlangdung an chuan chhuah chuan a pang chu a sa tawh khawp mai,val upa in Bawlpu ko tur a tlangval a tirh te pawh chu an lo thleng a, Bawlpu chuan a pang sa luttuk tih daih nan tui vawt chuan a han dip a,a pang sa zualpui a reh deuh chuan silai mu thawi na chu a han en sak a,a lan dan chuan nat pui lutuk tur niin a hre lo,a taksa chau leh rilru na vang chuan a taksa in a tuar zual niin a lang,ramhmul damdawi a hnawih zawh chuan Lal Zamloa mutna lam ah chuan an zawn leh ta a, thui an kalpui hma chuan Ngurpuii chu a lo tawngvai in Sângte tih a sawi lai chu hrefiah viau mahse,a bak chu a riat zui nawk nawk leh ta a,Bawlpu chuan tlangvalte chu dintir in a han en chian leh chuan hliam chu thi thar emaw a awm chuang hauh lo,Bawlpu chuan Ngurpuii awmdan chu mak a tiin a ngaih a tha lo khawp mai,a pang lah chu a sa leh vur tawh bawk nen Sângtuala chuan Ngurpuii kut chul sak hliau hliau pah chuan ‘Ngurpui tang sauh sauh rawh aw,i tha leh mai ang thlaphang reng reng suh aw’ a ti lawi rat a.

A thiante lah chuan lainat tak chuan an melh thap a, Laiawrha chuan a nau dar a ben thak thak pah chuan lungngai lutuk suh,Ngurpuii chu a tha leh mai ang tiin a hnem a,Bawlpu chuan tlangvalte u a theih ang a hmanhmawh in kan innghah lawkna hmun i pan phawt teh ang u a ti a, Bawlpu hmel leh aw ka chhuak atang chuan tlangvalte pawh an ngaih thalo,a theih ang a hmanhmawh chuan an kal ta thuai a,Lal fanu a lo rum chhuah chuan an ding leh thap thin, ngaihtha lo tak chuan kal zelin Lal Zamloa mutna buk chu an theng ta a,a fanu engmah hrelo a tawngvai nawk nawk leh Sângtuala hming lam a hriat chuan Lal hmelah chuan hrehawm tihna leh pawi tihna chu a lang thei a,mittui khap per sak sak pah chuan a fanu a kut sa vur chu a han khawih a ‘Mambawih,min ngaidam rawh ka lo tisual a ni,i nakin hnu tur a tha ni a ka hriat ka lo um lutuk a ni min ngaidam rawh aw,i duhthlan tak pasal chu nei mawlh ang che fate hmakhua ngaih luatah khua ka lo hmu lo a ni e,Sângtual Ngurpuii kha uluk takin enkawl ang che aw’ tiin a mittui lo luangchhuak vang chuan lehlam hawi in a in sut ta faih faih a.Sângtuala chuan Lal Zamloa thusawi chu hreawm pawh a langlo chuan Ngurpuii chu a melh ngawi reng a,a vanduai theih zia a ngaihtuah chuan a mittui chu a dang thei hauh lo,Satlâk leh Lehlawn Bawlpu chuan an theihtawp chhuah chuan Lal fanu chu an buaipuiin hma a sawn thei hauh lo,zual lam a pan zel mai si a,hreh viau mahse Lal Zamloa hnenah chuan a fanu dinhmun chu hrilhin,hniam lam a pan thu Lal Zamloan a hriat chuan a inchhir lutuk chu a rum nghut a,a mittui chu dan rual loh chuan a biangah chuan a luang chhuak zung zung a,ram dai a fanu mal liam tir thei dinhmunah a ding tih hriain a mah chuan thu tawp a siam ngam ta lo,val upa leh pasaltha te chu ko thuai a.

Val upa Chhâwnthiaua chuan Lalpa engthil nge ni ta,min mamawhna i neih chuan sawi ta che a ti dam thlap a,Lal Zamloa chuan ‘ka fanu hian hniam lam a pan zel a nih hmel a, kan dinhmun thlirin ramdai a ka fa neihchhun han liam tir mai hi ka ngaingam lo a ni,a chheber pawh lo tawk dawn ila mahni inlum ngeiah engpawh tawk ila tih hi ka duh leh beisei neih chhun a ni ta,kan khaw lamah a rangthei ang ber a hawn ka duh a ni,ka lo tih dik lohna vang a ka chung a vanduai na lo thleng ka hmuh hian . . . tiin a hnukulh vang chuan engmah a sawi zawm thei ta lo,val upa chuan ‘Lalpa kan hma lam thil hi tun kan hre lawk bik hauh lo,thiltha leh dik ni a i hriat ang leh i fanu hmalam i hlir vang a ni a lawm,in thiam loh duh hauh suh’ tiin a hnem ve luam a,bawlpu te chuan an thiamna ang zawng chu an hman zawh tawh avang chuan tih theih nei lo beidawng zet chuan an thu ngawi ran reng a.val upa Chhâwnthiaua chuan ‘Lal duh ang ti tur leh Ngurpuii that leh thuai theih na a nih zawk beisei chuan Lal te pafa chu zawnin Lehlawn lam pan chuan an theih tawk a chak chuan an kal ta thuai a,a fanu awm dan chu hmuin a hrehawm ti chuan a mittui chu a hru fap fap kawng tluan a.

Lehlawn chu zanriah chhum hun tlai mah tawh chuan thleng in Lal inah chuan an zawt lut a,Lalnu Muanzoi’n a fanu engmah hrelo leh tawngvai a hmuh meuh chuan insum zo loin a tap rawih rawih a,Lal in a tap thawm lo awm hria Lehlawn khua te chu an lo kal khawm thuai a,an lal fanu pawisawilo leh ngilnei na tak tuar a awm mek chu an lainat khawp mai, Lal Zamloa chetdan chu mak tiin an phun sap sap hlawm a, pasâltha Sângtuala chu an khawngaih hlawm khawp mai, sumhmunah chuan a thu kun ran in vaibel chu a fawp mawlh mawlh a,ngaihtuahna kal ding tih hriat tak chuan a melh ding ngar reng a a thiante biakna pawh hre lo chuan a a ngawi ngal reng a,Lalnu Muanzoi chuan Sângtuala chu kaiin Ngurpuii bulah chuan a thut tir a,thlahlek tak chuan a thlir reng in a hmangaih engmah hrelo leh a khat tawk a a hming lam a phun sep sep thin chu mittui tling pam chuan a thlir reng a,Lal Zamloa chuan a thiltih sual pawizia hriaiin a hrehawm ti lutuk chu a thaw leh hawk thin,Bawlpu te chuan Sadawt chuan thawi mai sela tih an rawt chuan Lehlawn sadawt pawh a lo thleng thuai a,arpahluisen chuan thawiin a tuk lamah a la dam lo anih chuan ardum hlang a thawi leh tur tiin a ni pawh hawlo chuan khum ailam ah chuan a thu ve ran a,zanriah ei pawh a hun tawh in chaw ei tur an tin nual tawh a,Lalnu chuan Sângtuala chu chaw ei tur chuan sawm in a ni chuan i ei kham ah min lo chhawk dawn nia a tih tlat vang chuan Lalnu pawh chuan a ti lui duh ta bik lo a.

Lalnu chuan chaw a ei thuai a,Sângtuala duhlo chung chu chaw ei tur chuan a tir lui ve thung ,Sangtualan bar thum vel chauh a bar ang tih chuan,Lalnu Muanzoi chu lungchhe tak chuan a tap ta rawih rawih a,Sângtuala pawh tho vatin a hmangaih engmah hre tawhlo mu zawi hniang mai ruang chu a thlir ta vawng vawng a,Lalnu Muanzoi thinrim chu a fanu liam rual chuan puak keh ve ta a,a pasal mutna lamah chuan kalin ‘duham leh chapo pa,i thlengtlawrzuan vangin ka fanu chuan a hun loah min liam san tak saw i hlim thawh em ? keini chhungkua chauh pawh nilo i khaw himna tur a nunna meuh pawh hlut zolo theih tawp chhuah tu,i hmusit leh i huat em em Sangtuala chuan a tawp thlengin kan tan a thawk a sin,i fanu hlimna ai i ngaih pawimawh zawk ropui na chu khawiah nge a awm tak,ka thu kha tlem tal chuan lo awih ve nila chuan kan fanu hi hlim takin a la awm tur a nia, Ngurpui min ngaidam rawh aw,i nu hian ka chhanhauh ngam lo che a ni,nang ai a rosum duhtu bulah hian ka awm rei bik lo ang’ tiin a pasal chu a tah khum tlawk tlawk a.

Lal Zamloa hrehawm ti leh in thiamlo lutuk rilru na bawk si chu hrehawm ti tak chuan a lo thu chhuak a,a chet avang chuan a hliam atang chuan thi a lo hnam tuam tuam a,a mal a silai mu luhna vang chuan tho theilo in a khawnbawl pakhat chu a han hui a ‘ka damrei poh leh ka hrehawm tihna hian min hneh mai dawn a ni,ka nupui sawi kha a dik a, ka thiltih sual vangin ka fanu chuan min liamsan a ni,dam chakna leh duhna ka nei tawh lo, banglai a ka silai saw mi va lak teh’ a han ti a,khawnbawl chuan Lalpa in ngaihtuah harh teh i khua leh tuite hian kan la mamawh che a sin,i tello chuan Lehlawn khua hi engtin nge kan awm tak ang, hmeichhe rilru chen lek pu suh khai tiin a han zilh hauh a,i lak duh loh chuan keiman ka la mai tur lah niin tiin a han tho kang lui chu a kein zo loin a awp hnawk a,a mal leh awm atang chuan thisen thar lam chu a lo chhuak tuam tuam a, Bawlpu leh khawnbawl te chuan Lal thidang chu mut that tirin a hliam atang a thi chhuak tih tawp tum chuan an vir dun leh zak zak a,chhiat tawh bakah Lalnu thinrim chuan Lalin chhung boruak chu a ti rit khawp mai,mipui te lah chuan Lalnu Muanzoi lam chu an tang thup mai bawk nen,Lehlawn hmabak chu a thim kher mai le

Net that ve leh ka lo dah lut rawih mai e,Wasaap khawihna tawk chauh Net neih chuan duh ang a chet a har thin e

[Ngaia]

PASÂLTHA SÂNGTUALA ( Mampuia Pa)

BUNG – 123

Pasâltha Sângtuala nungchang leh khawsak dan ah chuan thlamuanna râl hmachhawn leh eng emaw thilah chuan an hmu na meuh mai,a kum naupanna chu hmangaihna kawng chuan langin a nun puitlin famkim bik loh zia chu a lang chiang khawp mai,a kum rualpui te chuan an khawngaih khawp mai ,a Lal Zamloa chu a ruk chuan an dem khawp mai,a rosum nise khaw dang Lal tam tak ten chilput a an thlir a ni a,Ngurpuii lah tlangchang tur ngei a lo ni bawk nen,an Lal rilru chu mak an tiin a mah an lainatna pawh a tlak phah rawk a ni,a khuate suk thlek chu Lal chuan hai bik mawlh heklo,a hrehawm tih chu a zualin a hliam ai chuan a khuate rilru put dan chuan a kam na zawk daih khawnbawlte chuan Zu chu an khawn liam liam a,Lal mual ah chuan Lehlawn leh Satlâk tlangval zawng chu an thu ngui nghuai hlawm a,a khat tawk chuan Lal inah chuan zu bel chu an pu lutin Lalnu Muanzoi lungchhia chu a tap bang theilo a, a hnu deuhah chuan Sângtuala rilru tawt lutuk chu a thiante nen chuan an lo chhuak a,thlaral lam pawh in thlahrun hmel tak chuan vanlaizawl lam pan chuan a lo eng sen phut a,zanlai ar khuan chuan lungdawh lam atang chuan lungchhe tak a tap hawm hawm thawm lo awm in,tlangval te chu thawm lam pan chuan an tlan thuai a . . .

Meichher engah hnuaiah chuan Satlâk khaw tlangval lo langin an hmel a thinrimna leh phuba lak duhna chu hmuh hmaih rual a nilo,râl hma a zungkhat la tawlh lo pawh nise Ngurpuii thihna chuan an mittui kai chhuakin an kun nghiai hlawm a,Zoliani te thianzaho leh Lalnu Thanthûami te chu an rawn tap phei zel a.Lal mual a lo nghak tute lah engmah sawi theilo chuan mittui hru zauh zauh in an lo ding kun lap hlawm a,Lehlawn lalnu Muanzoi chuan sumhmun ah lo hmuakin ‘Mambawih tho ta che,i ni leh thiante an lo thlen hi an bulah eng thu nge ka sawi tak ang,aw ka neihchhun i tello chuan eng nge damchhan ka neih tak le ? tiin a tap tlawk tlawk a, Ngurpuii hmai dâng lap leh mu zan lamah chuan Lalnu Thanthûami te chu pheiin an bawh thlawp a,Khumai lam a hliampui tuar mittui nen a let ve reng Lal Zamloa chu,Satlâk lalnu chuan pan in ‘ka u,nimin khan ka thu chu ngai nila chuan Ngurpuii hi kan zingah hlim takin a la awm ngei ang, hmeichhia kan nih vang mai leh ka pasal then vang chuan ka thu hi a diklo vek bik a maw ? ka pasâltha ten an thlah ang che ka tih tal kha lo pawm nila,ka vahnu hi kan zingah a la awm ngei awm si a,i fanu hi nangman thihna ah i hruai lut a nih hi,hei hi maw pa hmangaihna chu ni ngai le ? tiin a tah khum tlawk tlawk a,khawbawlte chuan thu awmzia an hriat chian chuan an Lalpa chu an dem ru ta kher mai,Satlâk khawnbawl Pu.Tawnliana chuan ‘engpawh nisela insum tlang deuh teh ang u,Lalpa pawhin a fanu tan tha tur ni a ngaih lam chu a tihsak a,vanduaina kan chungah a lo thleng a ni mai a,tupawh in kan Lal te hi lo thlah pawh nise vanduaina in thla a zar tawh chuan pumpelh thei a ni lo,chhiatna alo thlen hnu a ruang a kan in mawh puh a nih chuan,chhiatna zakhaw rawih kan tawngbaw pal hang nge’ a tih chuan khawnbawl dang te pawh chu an lo bu tliar tliar a.

An han ngaihtuah chuan Lalnu te pahnih chuan hliampui tuar a let mek Lal Zamloa chu an khawngaih ve ta deuh a,Lal Zamloa chuan Satlâk an chhuahsan dawn a thah daih a duh leh a tum hial,a hun a huat hlauh hauh lo a a thlavang hauhsak tu chu a ngaina ru ta hle a,a hma zawng kha chuan a khawnbawlte ngei pawh khan demna mitmeng an chhuah tawh a ni a,an mitmeng a a mah lainat na mitmeng lo lang tan chu a hai hauh lo,chutia an boruak tha tan mek chu a thamral ang tih hlau tak chuan Pu.Tawnliana chu lawm tak chuan a melh tawk tawk a, khuan hmasa ah pawh chuan Ngurpuii taksa chu a la khawng loin tui tak a mu chiah chiah chuan a la lang a,Sângtuala chuan a nau Zoliani chu a bek bawrh sar sar a,Zoliani chuan a u chu mak tih hmel tak chuan a melh hau a,a u lah chuan beisei a neih zia a mit mengah chuan lang nasa mai si a,ring vaklo chuan Zoliani chu Ngurpuii bulah chuan bawkin ‘Thian nu,ka thusawi hi i hria ti raw i bulah kan awm reng a nia,lo harh tawh ta che’ ti a phun sap sap in a taksa chu a han chul lawr a,Lalnu Thanthûami chuan beisei nei tak chuan mittui kar atang chuan Zoliani che chu a lo thlir a,Zolianin Ngurpuii zakhnuai a khawi chuan mak tih hmel tak chuan a hawi phawk ta hle a,a han khawih nawn leh chuan hlim tak chuan lo te thawtin ‘Thiannu tang sauh sauh rawh aw,i natna hi i hneh ngei a ngai a nia khawnge bawlpu te kha lo kal vat rawh u’tiin a te chul ta mai a,Bawlpu te pawh rang tak a lo thleng nghalin,Ngurpuii zak hnuai an khawih chuan an ni pawh chuan beisei nei tih an hmelah chuan a lang a, Sângtuala pawh insum theilo chuan thingthi rawpin a kut zawi ngiai vuan chuan ‘Ngurpui tang sauh sauh rawh,i tello chuan i nu leh i khua te hi engtin nge kan awm ang,kan la mamawh che a nia,nangmah mamawh tu i hawisan ngai loh kha’ tiin a phun ve sap sap a.

Lalnu Muanzoi chuan ‘Sângte,khawngaih takin Mambawihi kha min koh kir sak rawh,i aw zawng pialral atang pawhin a hre thei em em ang,min khawngaih hram rawh aw’ tiin mittui tla zawih zawih chuan a lo ngen ve mawlh mawlh a, Sângtuala chuan a kut vawn chu thlah lo in a hum ve ngat ngat a,Tuibur hmuamda awm zet an buaipui hnu chuan Ngurpuii chuan a kut hmawr chu lo chetin Sângtuala chuan a kut hnih chuan chelh thuai in ‘Ngurpui min hrethei ti raw,lo kir rawh kan la mamawh che a nia’ ti a phun sap sap a,a mittui chu a luang ngiai ngiai in a mittui far chuan Nurpuii mit chu far in,Nghurpuii chuan a mit chu a han nuai a,a hma a ki a hmuh chuan deuh tak chuan Sângte ka va ngai tak che em, min kalsan tawh suh,heng misualte lak atang hian min chhan rawh’ zawi te chuan a han ti sap sap a,Bawlpu te chuan hlim tak chuan Lal fanu hlau hauh suh aw i bul ah pasâltha huaisen hlauhneilo a awm a nia,nangmah veng turin khaw hnih valrualte an awm thup a nia tiin a han tawng thlamuan a.

Lal fanu a harhchhuak leh tih an hriat chuan tlangvalte chu lawm in an haw haw ruih ruih a,thawm nasa tak lo chhuak chu hlauin Ngurpuii chu chau tak chuan a han meng phawk viau a,a bul a mittui nen a lo thu thap a nu leh ni te,a thiante leh Sângtuala mittui nen a lo nui var var a hmuh chuan ‘ka mumang chu a ni em lo maw,eng thawm nge ni ta a va ri nasa hulh hulh ve’ a han ti a, Lehlawn Lalnu chuan ‘Mambawih,min kalsan dawn emaw tiin tlangvalte an lo pung khawm a,i that leh thu hria in lawm an au thawm a nih chu’ a han tih chuan,a han hawiin a khumah a mu tih a hriat chuan a ngaihna hre lo tih hriat tak chuan a nu chu a han melh a,khawnge ka pa a tih chuan khumai lam chu kawk in saw lai ah sawn a mu, hahdam rawh tunah chuan misual ho chu an awm tawh lo e a nuin a tih a bul vel a hawi chuan a mang lam a ni lo tih hriain lawman mittui chu a biangah chuan a lung ngiai ngiai a,a chauh em avang chuan Sângtual kut vuan chung chuan a muhil leh thuai a,Lalnu Muanzoi chuan Sângte ka lawm e,ka fanu min koh kir sak a tiin a darah chuan a han beng thak thak a.

Ngurpuii a mut leh takah chuan Sângtuala te thianzaho chu pawnah vaibel zu chuan an thu bawr taih a,an thianpa chu lawmpui tak chuan an melh thap hlawm a,Sângtuala chu ngawi ran in ‘thiante u,Ngurpuii lo dam leh chu ka lawm khawp mai lo dam tha leh thuai se tih pawh ka duh a,Lal Zamloa khawsa zia hian ka ngaih a ti tha thei lo a ni,ka natna tur ngaihtuah lo tu fanu neih ngawt hi ka tum lo,phu tawk leh min iai lo tu lam ka hawi mai hi,ka tan leh chhung kaw tan a tha ber tur a ni,ka chhungten ka vang a zahna an tuar hi ka paidai theilo ang, eng emaw hlekah pu leh mâkpa kar a chhe sam dawn riau in ka hria,a mah han dam chiang sela theih nghilh hi ka tan tha ber tur a ni,he thu hi tu hnenah mah chhuak rihlo sela ka duh a ni’a ti ta hmiah mai a,a thiante pawh chuan an thianpa hun kal tawh an hriat chuan awm an tih pui khawp mai,Thûamkunga chuan ‘i hlimna hi kan duh pui che,ngun takin ngaihtuah la thain ka hria’ a han ti ve bauh a, khaw var ar a khuan chiah chiah lai chuan Sângtuala chu Lalnu in a koh vang chuan inchhung lamah chuan an lut leh ta dial a.

Khua a var fel chuan Ngurpuii pawh chuan that lam pan in Zoliani te thianzaho chuan an thutchilh rawt a,Lal Zamloa pawh chuan a thiltih tawh vang a inchhirin Pu.Tawnliana chu ngaihdam dil duh chiahlo chuan thu pehhel deuh chuan a ti ti pui sek a,Sângtuala rilru her deuh chu a pa chuan a hai hauh lo, pawi tihna lah a nei hauh lo,a fapa hma hun a thlir chuan eng emaw buaina chuan a hmuak reng dawn a ni tih lah a hai hek lo a fapa chuan thutlukna dik siam thiam turah ngaiin a lo ngaichang ran reng a,ni thum an cham chuan Ngurpuii pawh duh tawkin nilum ai chuan a tei chhuak thei tawh a,Lal Zamloa pawh inchhung dungah chuan tiangpui nen a in hawl kal thei bawk a,kan lam an pan tak zelah chuan Pu.Tawnliana chuan chhuanlam siamin hawn zai a rel ta a,a fate erawh chu an duh a nih chuan la cham khawmuang tur chuan a ti thung a,an hawn ni tur a lo thlen chuan an khaw tlangval te pawh Lal mualah chuan an lo fuankhawm thap tawh a,Lalnu Thanthûami pawh zin bo reng chi a nih loh vang chuan hawng tur chuan a in buatsaih a,tlangval zingah chuan Sângtuala te thianzaho pawh an awm ve takah chuan Ngurpuii chu a lawmlo khawp mai,Lal Zamloa chuan lawmthu hrilhin Sângtuala te thianzaho chu cham tur chuan a han thlem a ‘Lalpa keini a kar min han ngen der chu kan lawm khawp mai,mipa hi chu eng emaw hlekah kan chhuak reng a, ka chhungte bulah pawh awm na hun nei manglo a chhuak bo reng ka nih vangin,ka nu pawhin min ngai ve tawh a,ni li/ngâ tal chhungkua ah hun hmang ve rih ila ka ti deuh a ni, kan dam a nga kan la in hmu fo ang chu’ a tih tak tlat ah chuan tih luih chu a ngam ta chiah lo a.

Lalnu Muanzoi chuan Sângtuala chu ngun tak a en in a lawm chiah lo tih a hrethiam thuai a,theih tawpin cham tur chuan thlem mahse an chelh tâng zo ta lo,Ngurpuii chuan mittui khap per sak sak pah chuan ‘Sângte,min hawn san ang maw ni hnih/thum tal chu min cham khaw muanpui turah ka lo ngai a,i tih tlat chuan i kal poh a niang chu’ a han ti ve nghat a Satlâk khaw haw tur boruak chu a rit ru kher mai,an awm rei chuan an boruak a rit tulh tulh dawn tih hriaiin Pu.Tawnliana chuan engpawh nise,hei kan dam a nga,khaw inhnaih te kan ni bawk a,inhmuh lam tal kan zin a ni mai ang chu tiin an in chibai tel tel a,lungdawh thleng chamtur ho leh Lehlawn tlangvalte chuan thlahin an in vailiam ta hlawm a,tluang tak a an kal chuan thimhmulah Satlâk an thleng thei ang tih hriain hlim tak chuan an ti ti barh barh a,Lalnu Thanthûami chuan Sângtuala chu remchang hmasa ber a ti ti pui ngei tum chuan a ngaihtuahna chu a siam sauh sauh a,chhun chaw fak hun tlai mah tawh ah chuan Satlâk ram chin pawh an dai lut a ni ruai tawh a,an silai man thar nen chuan Satlâk khaw tlangval te chuan silai an an hum kim thei thuak tawh dawn a ni,tun a Tlangzawl khaw silai an kawl lai chuan hming kim in silai chu an hum thei hial a,Lal nu chuan hetiang a hma an lakna hlawhtlin chhan chu Sângtuala te unau chu a pawimawh leh hnaikai tu ber an nih a hai hauh lo,chuvang tgak chuan Satlâk leh Lehlawn himna tur a tan bakah,a vahnu te kar a induhna lo awmsa chu timit lo a chhemalh zawk tur chuan rilru a siam sauh sauh a,silai awm lo pawh nisela,thâl an la hmang thiam viau zel leh nghal nen,an rawlthar te lah chu khawdang tlangval nazawng hneh chi an ni mai lo bawk a,hmeichhe Lalna khua a nih vang a lo nuthuri zuam ve ngawt ho chuan an chhiat phah zel a,engkim ah Satlâk Lalnu tih lungawi tum chuan sial,darkhuang leh eng emaw ro pe in palai an kal awllo reng a ni.

Hawn kawngah chuan Thûamkunga bawk chuan an buaina tawh dan chu fiamthu ah sawiin an nui leh hluah hluah tawh a,Lal leh khawnbawlte pawh chuan an tlangvalte fiamthu chu nuihpuiin hah hre lo leh hlim tak a khi sang chuan an nui kawngtluan a,Lungdawh an thlen chuan tlai deuh tawh mahse vaibel chu an han zu khawmuangin,Lalnu chu Pu.Tawnliana te in a zanriah ei ve tur chuan a peng ve a,Ngiazoa te unau chuan an u te chu lawm tak chuan an lo bawh châng châng a,a nu chuan khap mahse an pawisa chuang hauh lo hlim tak chuan an in keu pap pap a,Ngiazoa chuan a thil thiam thar ral beih chu a han entir a,a tih dik loh lai chu Sângtuala chuan lo hrilh in ti khan ti rawh,ti zawk khan tiin a lo hrilh a,Lalnu Thanthûami chuan Sângtuala chu naupang enkawlah pawh pa tam tak tluk loh a nih zia a hrechiang ta khawp mai.

Chaw ei kham chuan Lal in lamah chuan Pu.Tawnliana leh Lalnu chu an in zui chho a,khawnbawl te chuan zu fang chu an lo tep chap chap hlawm a,Ngurpuii lo dam leh tak vang chuan lawmthu te hrih in an ri laih laih a,lenghawn ar a khuan chuan khawnbawl te pawh an tin ta a,zan lam a mu tha lo tih tak Lalnu Thanthuami pawh a muhil thuai a,a mangah chuan a vahnu chu hmuin Ngurpuii chu ngaw hnuaiah hian a lo tei rak rak a,a thlante chu tlain tuiin tum a kal lai chuan kawr kam atang hian savawm lian mangkheng lo chhuakin Ngurpuii chu na lo seh kang vaw vaw a, Laiawrha leh pasalthate chuan Ngurpuii te thawm hriain hmanhmawh tak chuan an lo tlan ve tak tak a,savawm chu an han kap thin na ti awm pawh a awmlo chuan a Laiawrha te lam pan chuan a tlan thut a,a mah kâpte chu bawh phei rup in a beng leng lawp lawp hlawm a,savawm chuan reilo te chhung chuan Satlâk pasaltha te chu a thal phung a,savawm chu kawr dung zui chuan a liam nghal thuai a,a liam fel chauh tih chuan Sângtuala leh midang thahnem fe hi an lo chhuak duah duah a, a u te thidang let hlawm reng an hmuh chuan an bawihsawm thuai a,hlâng siamin an lo kalna lamah chuan an let leh ta,a pasâltha te chu Ngurpuii sa in a put liam na lam hrilh tum chuan a lo au tuar tuar a,an ni chuan hreawm pawh a lang lo chuan an liam leh ta mai a,rilru na tak chuan a lo au tuar tuar chu Pângliani chuan sawi harhin,Lalnu Thanthûami chu thlantla hluam chuan a thu chhuak hlawl a,a mumang a sawi chuan mak an ti dun kher mai.

Ni sarih lai a liam leh tak chuan Zoliani te pawh an lo hawng ve ta hram a,dam tlang tak a chhungkua an in hmuh khawm chu an hlim khawp mai,Ngurpuii pawh a that thu leh remchang hmasa ber a lo zin a tum thu te,Lal Zamloa pawh tiang tello a inchhung dung a a kal theih tawh thute, Sângtuala te thianzaho zan khat emaw tal riak tur a kal tur a Lal in a chah thu a sawi chuan,Sângtuala chuan ka kal hauh lo ang,saw mihring hmuh saw ka bat a ni lo a ti ta bur a,a hmel chu thinrim na chuan luah khat nghal a,a pa chuan ‘chutiang in Lal thu an hnial ngai lo i kal ngei tur a ni,thu chhia tha hre hmasa loin thu an pawtchat mai mai ngailo’ a ti dam thlap a,Sângtuala chuan ‘a ni nen sawn engnge buaina kan neih,a huatthu ka sawi pawh awm hauh lo in ti khawp khan a ti mualpho che a,a tan sawn nunna hi vawi tam kan lo thap unau tawh a,kan thiltih that hre duh hauh lo tu leh thlengtlawrzuan ho nen hian sawi tur kan neih ka hre hrep lo e,ka pa i thu hnial ka duh hauh ka kal loh vang a thinrim a nih pawh in a duh duh chu lal Zamloa chuan ti ang hmiang,pawi ka tither te lo e’a ti ta hmiah mai a,a fapa rilru putdan a hriat chuan awm a tihpui hle a,fate thinur lai a nawr vak a duh loh vang chuan remchang hmasa ber a sawi that puiah tiin a ngawih san ta a.

A farnu chuan a nuta pa chu mak a ti kher mai khatiang khawp a a damna tur a bei leh zah pawh dawn lo a mittui nen a thu tlaivar thak si,tun a tak a hêl leh chu mak a ti a ni, mak ti a meng phawk hra chung chuan ‘ka u,engvang a kha ti khawp a i beih tawh hnu a a nu leh pa pawhin rem an tiin a mah Ngurpuii ngei pawh in he thu i hriat hun hi a nghahhlelh teh reng nen,i chetdan hi ka hrethiam thei hauh lo’tiin a melh ta reng a, Sângtuala chuan a nau chu melh ding ngarin chutiang tak a thinrim hmel chu la hmu heklo a hlau hial a, Sângtuala chuan ‘ka nau ka thinrimna chhan chu i la hrethiam lo maw ? hmanni khan khatiang khawp khan min ti a,ka chan tur rengah ka dah a,ka pâ khan Lal Zamloa chung ah engnge tihsual a neih a,khatiang khawp khan pawisawi lo pawh thliar loin a duhna ti hlawhtling turin a ti duh a ni a,eng emaw hlek ah kei a vang a ka chhungte zawng zawng hmingchhiat theihna turah ka hnuk lut dawn hauh lo,ka tan hian nupui pakhat hmuh hi a har viau anih pawh in ka leng tul mai ang,ka duh ber chu in himna leh thlamuang tak a in khawsak hi a ni’ a tih chuan a nau chuan a nuta pa chu mak ti leh ngaisang tak chuan a melh ta reng a. a tawpah chuan ‘chutiang khawp chuan a ni maw min lo hmangaih ka u,keini pawh in i hlimna hi kan duhsak che a sin,kan khaw mi leh puih ngai i hmuh a piangte chu puiin,hah sawilo in hun i hmang a,hahdam takin awm ve tawh la ka va ti em’ tiin a chhang a,Ngiazoa pa chuan ka nau ka va han chhuang tak che em,i damkhua sei in i chhungte tan hian chhuan tham i va han ni tak em tiin a nau chu chhuang tak chuan a melh ve ta reng a.

An ngawihthap lai chuan sumhmunah chuan khuh kharh kharh thawm lo awm in val upa Chhâwnthiaua chu a lo lang zui zat a,pen luh pah chuan ‘in va reh teh thap ve khuavang kailai ang mai lah niin’ a rawn ti lut bawrh bawrh a,Zolianai chuan ‘ka laizawnnu hian inleng a lo nei reng a,chhandan tur kan han ngaihtuah a nia’ a han tih a,Pângliani chuan mawi a amah zawk hi a nia,palai lo tirh an tum a chhandan tur kan ngaihtuah lai tak a nia,khawnge mipa ho hian han rel teh u a rem lo zawng a chhan chuan tlanbo daih a tum leh nghal a,a khirh khawp mai a han tih chuan an nui ta ham ham a,val upa chuan Sângte,thaw a sâ deuh tlat mai,khu lamah khuan thu thlan dai ang u hmiang tiin leika lam ah chuan an in zui chhuak ta dial a.an thut fel chuan Laiawrha chuan val upa chu engthil teh thut nge ni ta i va hma ve tiin a han zawt a,a ni chuan kan naute chungthu hi ngun taka a ngaihtuah a ngai niin ka hria,kan thiante awm lai a sawi rem chiahlo ka rilru kap tu a awm deuh tlat a tiin a ngaihtuahna chu a sawi chhuak ta a,Laiawrha chuan ti khan lo sawi teh u,kan inthiar lawk a nge tiin a tho nghal uaih a Sângtuala chuan ka u awm ve ngei la ka duh a sin tiin ngen ngawl aw tak chuan a han ti a,a ni pawh chu thut leh ruai ruai pah chuan a nau chu ngun tak chuan a melh reng a.

Sângtuala chu ngawi deuh vang vang a ‘Ngurpuii hi hmeichhe fel leh in ngaitlawm tak a ni,a bul awm a piangte tan chuan ngaihawm tak a ni,ka tan a khuanu ruat erawh a ni thei lo,hmanni a pa khawsak dan ka ngaihtuah chian chuan eng pawh a chung ah thleng sela,ka chhungte himna a der thawng thei dawn tlat a,mipa chuan chhungte kan venghim tur a nih lai in,kei chuan hmeichhe pakhat vangin ka chhungte dinhmun hlauhawm takah ka dah dawn tlat a ni, chuvang chuan kiansan mai hi ka nakin hun a ka hlimna tur zawk niin ka hria,Lal Zamloa hian a tan kan thawhrimna hi a hmu duh dawn lo tlat,Lehchhuah khaw laka kan chhan tum pawh khan min mawhpuh tlat tawh nen,mihring in hmuh fuh tawh loh vaivek chuan eng emaw deuh ah kan in mawhpuh zel tlat a,ka bak chhe larna hian tu emaw chu a ko chhuak zel dawnin a lang a,chutih huan chu lo thleng palh sela . . .buaina zakhaw rawih kan thlen hma hian bansan hi ka tih mak mawh a ni’ a han ti zuai raih a,a thusawi tawp lamah chuan a rilru nat zia langin,a mittui chu a khap per chhak chhak a,a thusawi dik zia an hriat chuan a u te chu an ngawi dun reng a.

Val upa chuan ‘ka thisen zawmpui ang chiah a ka en vang che u a sawi ka ni a,kan hma hun thlir hian Lal Zamloa hian engthu emaw chu a neih vat ka ring a,ruahmanna lo siam lawk ka duh vang a ni e,nangni a in pawm tur ber a ten in duh loh chuan tu han nawrluih theih lah ni lo che u, engpawh nise thu ngaithla tu ngaihthlak nuam zawg a thusawi a pawi mawh fo a nia’ tiin thu dang sawiin,Sângtuala ngawi ran chu an melh leh ralh ralh thin a,an khawngaih dun khawp mai,a lungno zawng a thusawi an duh loh vang chuan eng mah an sawi chhunzawm duh chuang lo.a tuk lam chu in vah harh relin Tlangzawl khaw palai pawh an hmuh an ring ru tawh hle a,a tuk chuan an lo relho tawh ang chuan ramvâk tur chuan an in zui chhuak leh ta a,lungdawh an thlen chuan vaibel te zuin rengchal hram chuah chuah leh phengphehlep thawlk dam dam thlir chung chuan an infiam bawrh bawrh a , chutia an chawlh lai chuan kawlhawk rualkhat chuan Satlâk khaw chung chu an rawn vang tan a,an thlir reng lai chuan kawlhawk chu mu vanlai nupa in rawn bei thutin an rawn vir thla dun tawp tawp a.

Kawlhawk chu lian zawk mahse insual thiam zawk leh sahring ei zawk chu hneh heklo a te ruai ruai ta mai a,lungdawh thlang lawkah chuan lo tla in,reilo teah mu vanlai nupa chuan kawlhawk chu an chingchau ta der a,a bul a patling rual lo che suau hlau chuan an thlek in an piah vâng kung sang tak ler atang chuan an thlir dun ta reng a,Thûamkunga chuan ‘in va nghal dun e,mihring zah nachang pawh hrelo chu’ tih pah chuan mu vanlai pakhat chu a sai thla tawp a,pakhat hlau chu thlawkin val upa chuan muvanlai pakhat thlawk lai chu a han sai thla ve tawp a,Thûamkunga chu en in ‘Thûama kha tiangin mu vanlai nupa pakhat zawk chauh an that ngai lo,nupa tang thehna a thlen duh a sin,tun hnu chuan hre tawng ang che’ tiin a kam khat a,midangte pawh chuan a thusawi vang chuan val upa chu an melh thap a.

An tum hmun lam pan chuan rei chawllo chuan an kal ta sang sang a,fiamthu eng emaw sawi chuan an ri chul bawk a chhun chaw fak pah chuan kalna tur ram chu an sem felin,val upa chuan mahni kalna tur ram bak pello tur chuan a hrilh ngun khawp mai ‘nghalrual beihna ah hian mi tam tak an in ti palh tawh thin a,chuvang chuan in ramchan chhung a rinawm loh pawhin chhuak mai ula,in nghah khawmna tur hmun pan mai ang che u’ tiin tlangvalte chu a han hrilh nawn a,an chan ram lam pan chuan an kal darh ta sang sang a,thingsemim a tak bawk a nghalrual hnu chu hmun tinah chuan an hmu zel zul bawk a,Sângtuala chuan a chan ram chu uluk tak chuan fangin nghalrual tlat bak inchhung dung chenah chuan channa hmun rem fahkung rem takah chuan a thu ta ran a, Ngurpuii chu a mitthla ah chuan chamin a nui hmel te,a damlo hmai dang bam te chu a mitthla ah chuan a lo lang zut zut a, favang ni eng dul ruih leh rengchal hram chuah chuah chuan a lunglen a ti zual kher mai,an hlim lai ni te chu a bul atang chuan a chhui let niap niap a.

Ngaihtuah na kawm a a thut reng lai chuan a hnuai lamah chuan thawm lo awmin a han en chuan,sanghal a hmul rang la reh lo sawm dawn lai hian thingsemim chu an lo vam pap pap a,chung sanghal note hnuang chuan sumthum leh a ai a lian sumngâ vel bawr thau mum kang te chu an lo in lar tan ta a,fimkhur tak chuan duh thlangin sumngâ awm thau mun kang mai chu tinin a han kap dur a,sanghal chu zuang zawkin dung chen a sang ah chuan in vawrh zawkin a tlak leh chuan a ke chu a leng aih aih a,a zal hlen ta zen chu sawh leh thuaiin a sawh zawh chuan a piah mual atang chuan silai a puak dur a,sanghal pakhat chu ngeng rawng rawngin silai chu a han puak leh dur a, sanghal ngeng pawh a reh ta hmak a in an piah mual mawng ah chuan silai chu a han puak leh dur a,thawm chu a reh ta hmak a.piah mual atang chuan chang han tum raih hriain Sângtuala chuan a lo chhawn a, changtum thawm a reh fel chauh tih chuan silai chu a puak leh ta dur a,tumah chuan thawm neih zui ngam lo chuan chan hmunah chuan an thu leh ren rawn a.

Ni sa chuan tlangsang hmawr a chhun lai chuan mahni sakah theu chu lo paw chhuak in sanghal pa ngâ lai chu an mut ta phung a,val upa chuan pum zawn mai chu rawtin hmanhmawh tak chuan an kal ta thuai a,lungdawh an thlen chuan naupang tawngkam atang chuan Tlangzawl kha lam an lo thleng tih hriain,val upa chuan hlado chu chham vang vangin tlang chu an tlir ta dum dum a,sanghal sumngâ rual pum nga zet mai chu an rawn zawnin naupang chuan an lo zui dul dul a,val upa Chhâwnthiaua te in a chant um chuan an in lam pan chuan an ri phei luih luih a,Tlangzawl khawho chuan sanghal zawn a Satlâk pasaltha lo kal te chu an lo thlek dauh dauh a.

Lo tawk leh phawt tehse,dah loh ai ah ka la dah tawp mai

[Ngaia]

PASÂLTHA SÂNGTUALA ( Mampuia Pa )

BUNG – 124

Tlangzawl khaw lo pem lutte pawh chu an buaibut a talang in an lo ngaihven tawk lo tih an hriat chuan an in thiamlo zawk hle a,an zing a khawnbawl upa Rumvunga chu Lalnu chuan koh tirin an inkawm chiang ta hlawm a,an buai zual lai a nih vang a buaipui hman an nih loh zia te chu sawiin thupha a chawi luam a.pu Rumvunga pawhin a hriatthiam thu sawiin an buaina an chingfel thei a lawmpui ziate chu sawi in,Lal Zamloa te pafa chung a thilthleng pawi a tihzia te chu a sawi ve luam a,mah pa inngaitlawm mi niin midangte zai ngai chi a nih zia pawh an hre thuai a,Satlâk tlangvalte khawsa zia mawi a tih zia leh an dawhtheih zia te,chutiang a dawhthei an nih chhan pawh an Lal leh khawnbawlte a hmuh chuan thil mak a nih lo ziate chu sawiin an khaw in awpdan tha a tih ziate chu sawiin a fak luam a,an in tur pawh a rang lam a buaipui an tum thute chuan an inthlah ta a.

A tuk lam a chakrua la khawm tur chuan tlangau chuan vengtin suar tluanin a au lauh lauh a,zanriah ei kham chuan zawlbuk lamah an mikhual tlangvalte fiam tum ran chuan hma takah Satlâk valrualte chu an lawi ta thup a,Sângtuala pawh chu zawlbuk thim lamah chuan khual valte mizia zirin a thu ngawi reng a,khual lam pawh tharum lam a chaklo an nih vang chuan infiamna lam tal a chungnun tum chuan an in fuih lawk hle a,an zingah chuan pa santha tak leh nuih ngai mang hauhlo chu awm in,Tlangzawl khawho in nghahna a ni tih inhre tak chuan a hawi pawh chu a ni ngulh a,midangte chu a chungtlak ru hlawm khawp mai,val upate chuan ‘Satlâk valrual te u,kan unau te chu infiam ngam dawn em’ an tih chuan,tlangvalte chu ding rual thup in,kei man an ti rual dual a,val upa chuan ‘engpawh nise tlangval zawg zawngin kan fiam chuan an chau lutuk palh a nge,han in thlangchhuak ula infiam tih hre rengin rilru thianghlim takin infiam rawh u’ a tih takah chuan Satlâk tlangvalte chu an in thlang chhuakin an zingah chuan Thûamkunga pawh a tel a,a ni uang pheng chuan ‘khawnge kan khual unaute chu bawhbel kân zawk zawkin i han bin mai ang aw’ tiin fiamthu eng emaw sawiin zawlbuk boruak pawh a ri hulh hulh ta mai a.

Thûamkunga chuan kan zing a châklo ber Chungliana kha lo chhuak tehse ka zirtir ang kha a la thiam dawn emaw a han ti a,Chungliana pawh chu a lo chhuak tha ve mai a. Thûamek i pate a tihdan hi lo en kar la,i thiam ve mai ang tiin a puanven chu a veng tha sauh sauh a,Tlangzawl tlangval Puithanga lo chhuakin an han in man chat a,an han vir dun zak zak a,Chungliana chuan phawi kang vawk a Thûamek, en in min lo en maw ? kha kha tih dan mawi a nih kha tiin a then sang a,a thawh hnihna an tan leh chu Chungliana chu a kang ve ta lawp a,Thûamkunga chuan ka pate ka lo en reng che a nia a han tih chuan a entute chu an nui ta hluah hluah a, thawh thumna ah chuan an unau tluk ral a, Chungliana chuan e ka hneh lo che tiin tha tak chuan a han kai tho a,Puithanga pawh chuan ka hnenlo zawk che tiin a lo nui ve sang a,nui chung chuan thuthmun panin an in kuah phei dun ta a.

In tihhlim na mai chauh a ti an nih vang chuan tumah tha pui thawh an awm meuh lo,Tlangzawl lam chak leh an in nghah na Hauliana chuan a naute chu melh tur khuih in ‘in va dawihzep ve mawle,hetiang mai mai ah pawh tha in chhuah ngam na nge,khaw nge min lo en rawh u tiang a tih tur hi a lawm’ tiin a han pen chhuakin,zawlbuk laiah chuan a ding toh luahin a pian thain a sek phiar fut mai a,a han then var thu phei chu vawmpui no hruai a ang reng lah tak a,Thûamkunga chuan ‘vawmpui no hruai chu a va huk nasa dum dum ve,ka hlauh zawk tak a ni’ a han ti sap chu Hauliana chuan lo hre phak chu niin,thinrim tak a kawk vu in ‘nang pa kha lo kal teh,khawnge in chhuantawlawl Sângtuala pawh chu a tawm bo,he mi hnaisailo pa ka bin zawh hian lo chhuak rawhse,a thianpa hi a chhan ngam teh reng emaw’ a han tih kuk kuk chuan zawlbuk chhung chu a reh ta thap a,infiamna boruak chu lo in thlakin Satlâk valrualte chu an meng tal tap hlawm a,an pasâltha thlavang hauh tur chuan engkim peihin an ding nghal suau a.

Val upa Chhâwnthiaua chuan ‘thiana infiam kan nih ang takin rilru thianghlim leh tawngkam mawi hman hram tum teh aw’ a ti dam thlap a,a mitmeng erawh a nelawm loh sawt khawp mai,Tlangzawl val upa Lianmunga pawh chuan ‘Haulian infiam kan nih hi theihnghilh hauh suh,mawilo tak a tawp ka duh hauh lo a nia’ a han ti ve vat a,Tlangzawl val upa hmaizah vang chuan Satlâk khawho pawh an insum hram a.Hauliana chuan val upa tawng chu hreawm pawh a langlo chuan ‘naua khawnge lo kal teh inbuan ka han zirtir teh ang che,tawngkam mawi hmandan nen lam aw niang’ tiin Thûamkunga chu a kawk va a,Thûamkunga chu nui sang chung a lo pen chhuakin ‘u ten in tih tlat chuan kan in nuai viau mai tur lah niin’ tih pah chuan a puan chu a veng tha mawlh mawlh a,an han in dinchilh chu Thûamkunga chu a lang chik rat a,val upa Chhâwnthiaua chuan ‘infiam innih kha hre reng ang che u,mawilo leh thinrim khawp a tan siam loh tur a ni’ a ti dam thlap a,tunah tan rawh ule a han tih zawm a,in bei turte pawh chuan an ti mai mai ta hauh lo,tha pui chhuahin zawlbuk chhuat pawh an rahna lai chu a khuar zawt zawt a,Thûamkunga chu tang ve viau mahse tharum ah hneh ngang heklo le a kâng ta duai mai a,Hauliana chuan nghat tha mai lo chuan a han lek kawh vu vu a.

Thawh hnihna an tan leh chu tha tawp tak tak a tangin an hnung zâng ti hrawlte chu a pawng kual tawk tawk a,an han vir leh zauh zauh chu Thûamkunga chu kang zawkin zawlbuk bang thlang deng dawt chuan a hlawm hlawl a, Satlâk valrualte chu thum hukin an tho suau a,val upa Chhâwnthiaua chuan a naute chu a khap thuai a, Thûamkunga pawh thinrim hmeldur khup chuan a lo tho taih taih a,Sângtuala chuan a thianpa chu kai tho in zawlbuk lai lamah chuan a pen chhuak nghal a, Laiawrha chuan a nau dar a ben pah chuan kei mah le tiin a rawn pel nghal a,an han in dinchilh chu an intiat tawk khawp mai,Laiawrha chuan ‘naupang pawh i rualpui fiam a,theih tawp chhuah ang che ka dimdawn hlek lo che a nia Hauliana beng bulah chuan a han ti zawi sat a,Hauliana’n hma a mi a hmuh chian chuan ‘nang hi maw Sângtuala chu,an sawi ang ai daihin i lang hrâm mai ka ti,thehtawp chhuah ang che,pasâltha ral kai meuh a hmingthang mah nila ka dim dawn hauh lo che a nia’ a han ti ve chhur chhur a,an puanven kawgah chuan an in man nghet dun khawp mai.

Val upa Chhâwnthiaua chuan khai le tan ru a han ti fiak thak a,an han tang dun chu a châk zawk tur rinthiam a har khawp mai,an han vir dun zak zak a,Laiawrha ke chhesual chu khup chen chuan a han kâng zawk a ‘pasâltha i zam deuh nge Satlâk khaw ho hian thu in uar zawk,thapui pawh kan hmang hman nem maw’ Hauliana chuan a ti ham ham a, Laiawrha chuan kan ti ta vaivek bawk a i tan leh tawh ang aw tiin Hauliana puantlangah chuan a man leh chat a,khai le an tih chuan an han vir dun zak zak a,Laiawrha chuan a daikhal zawk zawk reng pawh chuan a lo in dai khalh ve reng bawk a,Hauliana in daikhalh leh tur ke chheh sual lai chu phawi kang thutin kawng chenah chuan Hauliana chuan a ke chu a leng vaih vaih ta mai a, zawlbuk chhuat a rah leh rual chuan Laiawrha tha thlah lai chawi thut tum in a ban a han mar leh thut a,Laiawrha pawh kâng hman uk mahse a han tang mar leh nghal a,an han vir zawk chu dimna tel hauh lo chuan ko liam zawk chuan a bin nawlh a,Hauliana chu zawlbuk bang chhak deng dawt chuan a tla zawi hnawk a,a luhai a han mu deuh vang vangin a hnu deuh chuan harsa ti tak chuan a lo thu chhuak tuih tuih a.

Tlangzawl val upa Lianmunga chuan Hauliana chu a hmaiah a beng chawrh chawrh a ‘engvang nge infiam tlak lo infiam na ah i tel ve,zahna thuah hnih kan sin tak hi,remthu sawi tur a kal kan ni tiin ka hrih mawlh mawlh che kha‘ tiin a beng leh tur chu,Satlâk val upate chuan thelh thuai a,val upa insum rawh khai,remna duh a in kal zia pawh kan hai lo e,mi pakhat vang chuan remna hi a khaihlak lo turah ngai ang tiin an lo khap thuai a.Haulian,val upa thu ngaichang che maw tharum hian thil a khairual tak tak ngailo tih hre rual chu i nih vei nen tiin an khak a,Hauliana ngawi run in zawlbuk chhuat chu a bih run a,a hmel ah chuan thinrimna nasa tak langin,a hmel lo chik tute chuan ngaihdan an nei thiam ta mai a,an infiamna tawp dan vang chuan Satlâk zawlbuk chu a reh thap a,val upa Chhâwnthiaua chuan tlangval te u,kan unau te chu nula rimpui in tum na nge ? a tih chuan,Satlâk tlangval te chuan tlangval te chu lenpui tur chuan an in tho ta sung sung a.Thûamkunga chuan ‘khawnge kan Chungeka hneh loh ngei mai kha,kan khaw nula fel leh hmeltha ber ka han rimpui teh ang tiin hlim tak chuan an nui chhuak ta ham ham a.

Rinzuali Bawlpu fanu mal hmeltha leh hawihawm,Lal fanu leh a lunglai luahtu Sângtuala te chanchin vang a mittui nen,a ruk a hun hmang mek an tlawh ngam meuh loh tlawhna hun tha ah ngaiin,mikhual te chu hman tangkai tum ru ran chuan Thûamkunga chuan ruahmanna chu a siam ta,Satlâk Bawlpu sumhmun ah chuan an ding thap a,hmuipui pu Thûamkunga chu hmatawngah dingin Puiliana chuan dawt in ,inchhung atang a lo lut rawh a tih chuan kawngkhar chu a han nem tleng ralh in,Puithanga in ringlo chu a kawngah man thutin a han theh lut thut a,Chungliana chuan tlangzawl tlangval Zuiliana chu theh lut ve rawk a,Rinzuali te nufa lah an rin loh lutuk a tlangval lo tlu lut rawk hlau chuan an te thawt a,Thuamkunga chuan Chungliana chu pawmin a han theh lut leh rawk bawk a,Sângtuala kawngah chuan man zui zatin a ni lah lo inring lawk a ni bawk a,Thûamkunga zawk chu kang vawh in a thiante lo tho chhuak mek delh rawk chuan a tlu thum leh dup bawk a, Thûamkunga chuan ‘ Sângtual min lo nghak rawh ka lo kal ve dawn ‘ ti a rawl tawp a a han au meuh chuan tlanna chi ni hek lo,zah vang a hmaisen tawn tâwn chung chuan a pen lut chhat chhat in ‘Rinzual,i inleng te chu an va mak pheng phung ve mu thlu sa in an lo kal a mi’ a han tih chuan an nui tha hlawm a.

Bawlpu lah a nupui te thawt vang chuan rap a thingfak lian tha tel tawl nen puantlang sawi tlai chuan a ding khur hlak hlak a,an pasâltha te an ni tih a hriat chuan ‘in va ho hlawm tak em,min ti phu nasa lutuk a lawm’tiin lehlam hawi chuan a khi suk suk a,thenawm khawveng te thawm hria a lo dak ten thil awmzia an hriat chuan Thûamkunga thin hi a ti a nui chung tha chung chuan an kir hlawm a,Tlangzawl tlangvalte zak lah chu an thu kun chal a,an thiante zak kun lap chu Thûamkunga chuan fiamthu a sawisa in a tawpah chuan ngawih reng chuan an rethei mai mai tih hriain,tlangzawl tlangvalte pawh chuan fiamthu a chhangin an nui dar dar hlawm a,chutia hlim tak a an ti ti lai chuan Sângtuala te pahnih chu an lo in melh leh zauh thin a,an mitmeng chuan en emaw sawi duh an nei tih lah Thûamkunga chuan a hai hauklo,hlim tak a an ti ti bawrh bwrh lai chuan leng hawn ar a lo khuang ta chuah chuah a,an luh tirh a hreawm ti khual valte pawh chu hlim tak chuan an nui chhuak ta bawk bawk a,Sângtuala te thianzaho fiamthu duh dan chu Puithanga te thian dun chuan an hre chiangin,an thian tharte chu an ngaina khawp mai,pasâltha khualthang ve meuh pawh chapô na tel hauh lo a nung ve tawp an hmuh chuan Sângtuala chu an ngaisang zual sawt a.

Zawlbuk an va thlen chuan val upate pawh hlim tak chuan an lo ti ti lat lat a,an naupan lai thute sawiin val upa Chhâwnthiaua chuan “ka pu min hrih dan chuan ‘tum khat chu Zawlpui khuaah kan Lal hnung zuiin ka kal ve a,zawlpui khua kan thlen zan chuan sa a tla a,veng hmawr a hmeithai vawkpa sut nghak chu keipui chuan thut muan ar khuan vel chuan a lo la a,kan han chhui chuan thui lo teah hian vawk ruang chu kan va hmu ta mai a,a nghawng atang chuan thi a lo far tluk tluk in vawk pawh chuan a ke a la leng uih uih a,val upa chuan kâr siam chilh mai a rawt a,kan in ruahman in chak la a kal tlangval pakhat chu te thawtin,keipui sum ngâ tha zet hian a lo bawh run a,keipui lah chu a rum hum hum nen naupang zawk te chu an til hak a,tlangval tam zawk an kal tak dualah chuan keini khualval te leh val upa lam tlemte chauh kan awm ta a,a mi seh lah chu chhan tlak ka awm e tiin a au chul bawk nen, chem tum nen chauh chuan kan hual thap a,chu keipui huai sar tak chu kan lamah chuan a lo zuang thut a,in sa sengna hun awm ta hek lo le,kan sah rawn ta zawt zawt a,kan sah lai chuan sakei chuan awi ka nu a na lutuk a han ti chu kan chempui sakei thisen a bual huh zuih khai zawi hnuang chuan kan in melh kual zak zak hlawm a,keipui zuang zawk kan piah khiangpui bul a tla chu a hmel lo in thlakin,Zawlpui tlangval tlawmngai tak chu lo ni reng in,a thih fel a kan sahna hnu kan han en chuan a nakte chu a thlek hne hnu a en a hrehawm khawp mai,khua kan va thlen chuan a chhungte hmel reng reng kan hmu zui ta lo,kan chamrei lo bawk nen kha mite chhung kha chu ka khawngaih khawp mai, an khua te pawh khan mak an tiin keimi a tan chuan an ui khawp mai’ tiin a han sawi chuan tlangval te chuan ngaihnawm an ti kher mai.

Satlâk lalin ah chuan Tlangzawl palai te chuan an thil tih sualah chuan pawi an tih thu te sawiin ngaihdam an dil mawlh mawlh reng a.pi Tluanglehi te nufa chuang a an thil tihsual pawi an tih zai te sawiin,khawnbawl upa Rumvunga leh a hnung zui tute chu Tlangzawl lama kir leh ngei tur chuan an thlem hlawm a.Pu,Rumvunga chuan ‘engpawh nise keini a kar a min han tah awh chu a zahawm khawp mai,nangni thatna zarah hun rei tak chu sem sem dam dam tiin hun kan lo hmang tawh a,tun ah chuan Satlâk khua hi kan awmna tur awm tak niin ka hria,lung loh ah la lo ula ka hun hnuhnung lam chu he laiah hian hmang turin rilru ka lo siam tawh a, ka duhthlan an min zah sak turin ka ngen duh che u a ni’ a tih tak tlat ah chuan.Tlangzawl lam kalte chu khawnbawl upa Rumvunga laka chuan an rilru a beidawng ta in an thlem lui ngam ta bik lo a,Lalnu Thanthûami hnenah chuan an khaw silai chu kir leh hram tur chuan an ngen ta zawk thung a.

An ngenna te chu ngaihtuah tur chuan Tlangzawl lam palai te chu pawnah chuan an ngaihtuah chhung awm tur chuan an chhuak ta dam dam a,tuibur hmuamda zet an nghah hnu chuan tlangau chuan khualte chu ko lutin,beisei nei tak chuan Lalnu Thanthûami chu an thlir thap a,Tlangzawl khawnbawl upa Chhunthanga chu ‘kan karah remna in duh a nih chuan,kei ni pawh remna hi kan duh reng fo a ni,a hnu lamah kan pawi hawl zawng a eng thil pawh in ti a nih erawh chuan,Satlâk khaw chhawn chuan a hem ngei ang che u,silai pangâ erawh chu kan hreng rih dawn a,buh thar phur sawmnga nen in silai chu in tlan thei thung ang,thu dang s in nawr leh erawh ka duh hauh lo a nia’ a tit a hmiah a,silai tam zawk an neih dawn tho bakah hun reilo teah an lak let theih dawn tho vang leh a bak nawr zui a duh tak loh ah chuan,lungsi zan lo chuan Lalnu Thanthûami sawi ang chuan an in rem ta a,silai chu an hawn dawn a la chhuak tur a an tih pawh chu an pawm in hlim tak chuan zu chu an khawn ho ta a,Tlangzawl Lalin dartumpawn a thawn chu bang laiah chuan an tar belh ta bawk a,saingho dung chen lai an hmuh chuan Tlangzawl khawnbawl te chuan an khua ah chu tiang a saingho sei tha leh lian chu awm ve tur chuan an duh ru khawp mai.

Zanlai arkhuan chuan khawnbawlte chuan an mikhual tur theuh chu hawpuiin hlim tak chuan an in zui dat dat hlawm a,a tuk lam a hawn leh nghal mai an tum vang chuan hma takah tukthuan chu an ei pui hlawm a,Lal mual chuan Tlangzawl khual valrual te chu an ding far hlawm a,naupang ho chuan hauliana kawk zauh zauh pah chuan ‘saw lai a dum deuh saw,nuzan a k’u Laiawrha vawrh hnang pa a nih saw’ an ti sap sap a,naupang tawng chu tlangvalte chuan an hre chung chuan hreawm pawh chuan an lang bik hauh lo.Lal in atang a silai an lo put chhuah lai chuan naupangte chuan Satlâk tlangval te huai zia chu an sawi lar lar hlawm a,naupang thenkhat chuan ‘tu khua mahin kan khaw tlangval hi an ngam hauh lo,k’u Sângtuala te unau hi an hnen hauh lo’ tit e chuan an sawi zawm zel a,naupang thusawi mah nise Hauliana thintim chu a chawk tho tawk viau reng a, silai sawmhni tha hret tur chauh an lo lak chhuah vang chuan Hauhnuna chuan’khawnge kan silai chu a kim law law in min pe ula mawle,he tiang chuan inreman tluantling a awm hauh lo ang,keini tlangvalte rilru hi a dam mai mai hauh lo ang’a tih chuan,Tlangzawl khawnbawl upa chuan ‘Haulian ngawi chip cham rawh,kan tan a tha ber tur a kan rel tawh a ni a,nangni tlangvalte chuan kan thu tlukna bak kan rawn che u a nih loh chuan in sawi ve mai mai tur a ni lo’a ti hmiah ta mai a,Hauliana chu ngawi rauh rauh in engmah a sawi zui ta bik lo,a hawi danah erawh chuan a thinrim zia hai theih a ni hauh lo.

Darlaka thihna vang a thinrim phubâ lak duh la ngam lo, Tlangzawl tlangvalte thla phen a chet thawh tum ran Hauliana chuan khua an pelh rual in a naute mi sawm vel nen rawl ral a cham hnukhawi tum chuan a rilru chu a siam sauh sauh in, a naute a bekbawrh chuan an lo bu nghat nghat hlawm a,an nungchang uluk tak a lo chiktu pasaltha Lianmana te chuan an lo rin ruk chu dik ngei turah ngaiin,Tlangzawl khualte zui tur chu siam in,zanthum riak buhfai nen val upa Chhâwnthiaua ho chuan khual valten khua an chhuahsan hma chuan dai lamah chuan an tawl liam thuai a,rei an nghah hma chuan tawng thawm lo awm in an awki san danah an thinrim khat tih hriat tak chuan an in vin leh that that thin a,Hauhnuna chuan ‘inrem chuan engmah an inhren sak pawh ka hre ngai lo e,hmeichhe rorelna khua tih awm tawk reng a ni,an pasâltha te an chet fuh vang maiin kan chungah an leng bik hauh lo,Satlâk khua ka hal hma chuan rilru hahdam takin ka awm hauh lo ang le’ a han ti vin that a,Tlangzawl val upa Lianmunga chuan ‘Hualian ngawi hmiah rawh,ka thin a rim ta deuh tlat mai,Satlâk khaw val rualte thatna zarah tunah pawh nungdamin mahni in lumah kan la awm a,kan buh leh rohlu engmah min laksak na heklo i mimal thil hi khawtlang ah lak luih tum hauh suh’ a ti ve thung a.

Hauliana chuan a nih chuan kan lo ramvak kawi nghal a nge,naktip maiah kan lo haw mai ang,tiin silai chu a naute nen an hming kim a puit tum chuan an laksak ta nghauh nghau a, Sângtuala te chuan Hauliana rilru chu mak an ti khawp mai tun tum hian buaina chhuak lo pawh nise,in ven reng an ngaidawn tih pawh an chiang ta khawp mai, Tlangzawl val upa Lianmunga chuan ‘tu mah ramchhuak tur emaw awm hnufual awm lo in, kan hawng rual vek tur a ni’ a tih zawm leh chuan Hauliana chuan ‘nang a thu hian ka awm reng hauh lo ang,puitling chu kan duh thalin kan awm tur a ni a han ti ve leh a,khawnbawl upa te pawh chuan Hauliana chu an khap liam liam in a,ni lah chuan a thil tum kal tlang pui tum chuan a hnial ve reng a, chhun chaw fakna rem an hmuh chuan chaw chu an fak ngawi ran hlawm a,chaw fak zo vaibel an zuk lai chuan ‘kan lo sawi lawk tawh ang khan keini thianzaho chu ramchhuahna hun a tlem tawh vangin,zan hnih/thum emaw chauh kan lo peng kawi lawk a nge’ mahni thuduh tih hriat tak chuan a han ti leh bul bul a,val upa Lianmunga chuan ‘tumah in kal peng tur a ni lo,mahni thu a awm tum tlat hi a tha ngailo,khua kan thlen hunah Lal pawhin buhseng chawhmeh zawnte chu a hnial tawp lo ang, chuvangin kan haw tlang ngei tur a ni’ a ti ve leh hmiah a.

Hauliana chuan ‘val upa ka zah khawp mai che,eng ti zia a kan sa zawng tur chu i phal tlat loh chu le,i ngam a nih chuan min dan han tum ta che’ tiin a mal cho ta chhur chhur a,rum tak a melh in Tlangzawl val upa chuan ‘ka dang khawp ang che,mi pakhat sual leh thu duh vang a kan Tlangzawl khua dinhmun hlauhawm a dah ka tum hauh lo,i ngam a ni chuan min han paltlang ta che’ tiin a cho let ta chher chher mai.khawnbawl up ate chuan ‘Haulian,val upa sawi ang chuan awm tur a ni ngai e, lungrual tak a awm zir tur hawng phawt ila,ramchhuah in duh a nih fam chuan Lalpa Zauliana pawhin a dang hauh lo ang che u tiin val upa thusawi chu an lo tui hnih ve a,Hauliana chuan a naute melh kual pah chuan ‘kan sawi tak tawk tawh in ka hria, kan tum tawh chu kan tum a ni mai,in duhna mualah kal ula,kei ni pawh ka duhna mual ah kan tuan mai tur lah niin’ a ti ta bur mai a.val upa Lianmunga chuan ‘Haulian i duh tak tak a ni maw, nizan a tang tawh in Tlangzawl hi din hmun hlauhawm takah i dah tawh in.i suahsual vangin inremna pawh kan nei lo thelh tawh a ni a,ai upa zahna nei hauhlo mai che ‘ tiin a hnaih chilh thut a,a bekbawr ah chuan a lawk ta bur a,a lawk fuh bawk a Hauliana chu leng lawpin a mu ta hle hle a,midang te melh pah chuan duh ve dang in la awm em a tih chuan an ngawi ta thap a.

Hauliana chu an han sawi nawk nawk mahse a mut zawi reng vang chuan khawnbawl te chuan an han bel chiangin, Hauliana chuan nunna a lo nei tawh hauh lo tih an hriat chuan val upa Lianmunga chuan pawi a tiin hrehawm a ti tih hriat tak chuan a hmai chu a dang deuh lap a,mittui hruk zauh zauh pah chuan ‘aw engvang kher nge maw ka lo insum loh chu le,kan vai a thatna ka duh luatah ka lo dai baw ta a nih hi’ a han ti zuai raih a,khawnbawl te chuan val upa in thiam loh vak tur a ni lo thil engkim hretu kan awm vek a.ti lo mah la kei ni hian kan ti tho ang ti a an hnem chuan a hrehawm ti chu a zia deuh sawt a, hlâng an siam zawh chuan zualko chu an in tir in an theih tawk a tak chuan Tlangzawl lam pan chuan an liam ta a.

Val upa Chhawnthiaua chuan Tlangzawl ho liam hnu chuan ‘hawh u le zawi awiin i zui zel teh ang u tiin zawimuang chuan an zui ta zel a,thawm hre phak chuan zui zelin lenglen hun chuan Tlangzawl dai pawh an thleng leh ta reng a,ruang zawn te chuan lal mual lam chu an pan hul hul a,Sângtuala Rinmawia leh Thûamkunga chuan chempui puan ven hnan in khaw chhung chu an lut ve zel a,Lal thingkhawn bul thim laic huh chuan an va ding in Tlangzawl Lal Zauliana chuan ‘kan beisei hauh loh ang tak kan khaw chungah thleng in,ka ai awh tur khawp a mi pawimawh chuan mi nunna chu a lak vangin naktuk khawvar hmain ka ram chhung a mah le a chhungten an chhuahsan ngei tur a ni,ruang thlak zawh atang chuan nang leh i chhungte chungah eng pawh thleng sela,ka mawhphurh a ni tawh lo ang a ti ta hmiah mai a,Tlangzawl nunau te bulah chuan ruang awm lai a val upa Lianmunga te chhung chung a kut thlaktu chu ka en liam hauh lo ang,kha chen kha ka khaw tan tha leh zung a lo seng tawh a,chu chu tu man theihnghilh hauh suh ang che u a tih takah chuan nunau te chu Hauliana te in lamah chuan an kal nghal dual a,val upa Lianmuang pawh chuan hrehawm ti tak chuan an in awmna lam chu a pan chhat chhat a,a ngaihtuahna a vak thui khawp mai tlangzawl lalpa chuan thangthat lak a duh dan leh a tanghma a hai dan chu a hai hauh lo,an buh hawpkhawp thar an lo in rin leh an lawman chu tunah chuan a kut a khawihb phak a nih lo zia hriaiin,a mittui chu a sur zung zung a.

Val upa Lianmunga chuan a han ngaihtuah chuan a chhung te him nan hmanhmawh a ngai tih hria in.in lam chu a pan thuai a chaw a bar sawk sawkin an mamawh tur bungraw tlem chu thulah chuan an nu chuan a lo hnawh khat diam tawh a, Hauliana te chhungkua an hung zia hriain an tan a himna awm chhun ni a a hriat Satlâk khaw lam pan tum chuan chhung kaw riat lai chu thutmuan ar khuan chuah chuah lai chuan lungdawh ah chuan an ding thap a,Lianmunga pa chuan ‘ka fapa engthil pawh lo thleng sela,pawi ti lutuk hauh suh ang che,mihring hian thiltha kan ti reng thei hauh lo a nia,engtik hunah pawh thihna hi kan chung a thleng their eng ani tih hria la,tunah pawh I khua hum him i duhna vang in vanduaina i chungah a thleng a ni mai a,pialral thleng in i pa nih ka zak hauh lo tih hria ang che,khai ule hman hmawh ang u le,kan muan chuan kan tan a pawi thei a nia’tiin a fapa ngaihtuahna kawm a ngawi reng chu melh in, hmanhmawh rawh le hunk an ngah lo tih hria la,i chhungkaw tan i huaisen na leh theihna chu han sawr chhuak tak tak teh le tiin a fapa chu a fuih sauh sauh a,Lianmuang chuan a pa chu a han melh vang vang a ‘ka pâ ,kei mah vangin hrehawm tam tak I tuar lai pawh a huaisen tur a min fuih avang in ka lawm e,nang ang pa ka nei hi chu engpawh ka chungah thleng dawn sela huaisen takin ka hmachhawn ngei ang’ tiin hmalam pan chuan a kal ta a,naupang se enrual pa thum leh thing nawi fawm rual pa thum leh tar chaklo lam nen chuan Ruang tlak hma a Satlâk khaw ram chuan luh hman chu a huphurh awm kher mawi le

Lo tawh phawt teh se,MZP bak ram humhalh ngam kan awm ta meuh lo chu a ni maw,vawiin a hnam dang kut tuar MIZO PASALTHA TE TAN he thawnthu hi ka hlan e

[Ngaia]

PASÂLTHA SÂNGTUALA (Mampuia pa )

BUNG – 125

( Kum thar tir atang khan kan nu hi a dam tha thei meuh lo a,12/3/2018 hian in entir tur a kal kan tum a,he thawnthu kal lai hi ka chhunzawm theih nhun tur ka hre lo,a rang lam a lo chhunzawm ka tum ang,tlawmngai a min chhiar sak thin tute min hriatthiamna ka ngen a)

. . . . . . .

Zanthim hnuai a kal an nih bakah naunawi a kal an nih vang chuan an kal sawt lo khawp mai,naupang ho chu reilo teah an mut a chhuakin thingte chu an su leh nawk thin, mutchhuak tawh leh hlau deuh nen an nih vang chuan naupang thenkhat chu an tap leh leh al al thin a,ramah naupang tah tur a ni lo,chawmnu in changpat a barh ang che tiin an han vau thlem a,naupang te pawh chu an bang ve leh mai in an in pal leh dawrh thin a,chutian mual thumna an chuang chhuak chuan zawl tlem lo awm ah hian mei hi a lo alh hlap hlap a,an hma a mei lo alh eng teng teng an hmuh chuan Lianmunga chuan a chhungte chu kalsan in mei eng hnungpuak a tlangval sawm dawn lo awm a hmuh chuan,silai chu hman mai theih tur chuan a siamrem thuai a,meilum hnungpuak te lah chuan hmu awm a lang lo chuan muk hmel tak chuan an lo ti ti sap sap a,val upa Lianmungan meilum lo ai te a hmuh chuan a mak ti chu a megphar awn awn a.

Val upa,he laiah eng thil nge in tih tiin a Luanmunga chuan a han zawt a,an mahni lo be tu chu melhin ‘eng ti danglo e,khua kan han chuan satliah mai mai a ni e,khawi lam nge in kal dawn in va zan ve maw le’ tiin a han zawt a,thu thup tit tet lo chuan,val upa Lianmunga chuan ‘kan chhun lam boruak kha in hre chawk a nga,kan boruak pawh in hre lawkin kan hmuh turin in lo awm a ni maw ? a han ti tawl a,val uap Chhâwnthiaua chuan ‘ni hran lo hran lo e,min mamawh tu erawh chu kan theih tawkin kan pui thin’ tiin a han chhang a,val upa Lianmaunga chuan ‘mangang in tlansan loh chuan min pui ngei chu a ngai dawn a nih chu tiin khua atang a an hnawhchhuah dan te chu zep nei hauh lo chuan a han sawi a,Satlâk khaw lam pan an nih dante chu a sawi ta vek a,in khua chuan min pawm thei loh a nih pawhin,hmun dang kan hmuh hma kan naute min lo mikhual sak thei ula’ tiin hnuai lam chu a bih ngar a,Val upa Chhâwnthiaua chuan ‘in harsat na chu a buaithlak a nih tak chu le.ka hriat theuh angin Lal thu hnuai a kun kan ni a,kan Lal hnenah thu kan then pui ang che u,a bak chu tih theih kan nei bik hauh lo’ tiin a chhang tha ve mai a,i chhungte chu ko chho che,thimhnuai a awm reng chu a hrehawm lutuk a nge a han tih zawm a,a ni dawn tak maw tiin kawr kam lam pan chuan a chhuk thuai in,reilo teah meichher nen chuan an lo pawh ta thuai a.

Val upa Lianmunga pa chuan an hma a Satlâk tlangvalte chu ngun tak chuan a thlek vang vang a,thawpui lak huai pah chuan ‘nangni ho kan hmu hlauh che u hi khuanu hian min la hualhim ngei a nih hi tiin thlamuan hmel tak chuan a then sang a,an bul a awmte an hriat meuh chuan Tlangzawl khua atang a hnawhchhuah te pawh chu an hmelah pawh thlamuan hmel tak chuan mei engah chuan an then sak sak hlawm a,val upa Chhâwthiaua chuan ‘ka pu,keini ho hian thawm mawi hi kan neih pawh kan lo hre ve hauh lo,min fak derna ah lawm tur a ni em pawh ka va hethiam lo ve, engpawh nise a rang lam a kal nghal chu a va tha awm ve, zan rei tak tak hma hian a theih ang kan kal phawt mai dawn a mi niang ? a han tih chuan,an ni pawh chuan tha in tih ang zelin kan kal a niang chu tiin an lo chhang thuai a,val upa Chhâwnthiaua chuan ‘Thûama leh Sângtea khan hnung han dawl ula,a theih ang ang in hnu lo thup ula midang zawng te khan naupang kha a theih ang angin pua ula’ a tih chuan tlangval te chuan naupang chu puain meichher engah chuan an kal ta a,reilo teah naupangte pawh an muhil a.hmeichhia leh târ chaklo an nih hlawm vang chuan an kal sawt lo kher mai,zanlai arkhuan dawn chuan val upa Chhâwnthiaua chuan hma hruaitu tlangval te chu mutna rem melh tur chuan hrilhin, Dumde ruang chen an kal chuan hmun zawl rem deuh mai hmuin mu tur chuan an in ruahman ta a,mutna an siam zawh hnu deuh chuan Sângtuala te thiandun chu an lo lang mai lo a,Laiawrha ngaihtha lo inthiar tur chhuanlam chuan kal a . . .

Sângtuala te chuan an mei chheh chu ti hlumin an hnu chu mual let liam pan chuan an siam chap a,hmanhmawh tak a kal ang chuan hnim te chu an thliak zauh zauh a,meichher ek pawh chu an nawr zel zul in tawlhthlukna hnu ni awm tak chu a khat tawk chuan an siam a,mual hnih lai an kal hnu chuan kawrte lung thelh hmun chu thlengin,sulhnu lang lo thei ang ber chuan letin,mual hnih lai an liam leh hnu chuan an chhak lam a meichher lo de thla sap sap chu an hmu ta tlat mai le, Sângtuala chuan ‘thianpa hmanhmawh a ngai kan thil tih chu a va sawt lo deuh ve,kan thiante a rang lam a kan hrilh vat a ngai a ni tiin meichher chu an timit in,hmanhmawh tak chuan an kal nghal thuai a kawr kap an kal chuan Thûamkunga chu tawlhthluin a lum bap bap a,nui kur kur chuan Thûam thian a nâ em a han tih chu ‘nui khanglang suh,mahni lo mah a thinrim nak lai a’ Thuaman a han tih chuan.Laiawrha chuan a silai lek thlak zal zal pah chuan he lamah tiin a han ko zauh a.

An lo thlen chuan meieng an hmu thu leh an kar a hlat vak loh thu sawiin,an thiante mutna lam pan chuan kal thuai a,an thil hmuh an sawi chuan hmeichhe ho chu an chiai nghal ti tih mai reng a,val upa Chhawnthiaua chuan Sângte engtia hmalak tur nge niang, zan thim a nih hnu hmanah hmeichhia leh naupang kan la ni nawk nen ? a ti a,Sângtuala chuan ‘ nangni ho hian nunau ho hi kal pui ula,kei nin an mahni hmu phak reng in kan lo zui thung ang,Tlangzawl Lal Zauliana thu kalhin an phubâ lak chak an lo kal chu niin,a theih hram chuan silai hmetpuak lo zawk a man kan tum dawn nia,ka pi engmah hlau suh u kan theih tawk kan chhuah zel ang thlamuang takin awm tawh u,ti khan kal ula kan val upa khan ram chin chu a hriat vek kha’ a tih chuan naupang mu chu an paw sawk sawk a,kal an siam zui ta a hmeichhe an liam hnu chuan an silai te chu endik in, meiling chu timit a meieng an hmuhna lam pan chuan an chho ve ta thung,ngawpui hnuai chu a vawt ruihin fimkhur tak chuan Sângtuala te thianzaho chu an chho ta tham tham a,lo fing thum zet an chho leh hnu chuan an chhak mual atang chuan meichher engpawh an hmu ta a,fimkhur tak chuan an hnaih chho zel a,tlangval sawm lai chu hmanhmawh tak chuan an lo kal thla hlawk hlawk a,an meichhemna hmun an thlen chuan an hnu siam chawp lamah chuan an peng ta dial a,an zing a pakhat chuan ‘eng ti zia a Lungtian lam pan chu ni maw,kan val upa Lianmunga kha a lo va mawl em em ve,Lungtian khuate chuan min dang ngam dawn hauh silo a’ a han ti a, a bul a mi chuan ‘eng a pawh nisela kan tan a awlsam zawk a ni mai a lawm,dar bu kan hlawh hma deuh dawn a ni mai’ tiin a chhang ve thung a,midangte pawh chu an hlim sawt in a lang Satlâk valrualte hmachhawn an hreh tih chu an tawng danah chuan an hre thiam mai a.

Thûamkunga chuan nui suk suk chung chuan an lo let leh hma viau ang chu a han ti a,midangte pawh chu an then sak hlawm a.Thûamkunga chuan kan thiante lo nghah pahin vaibel kan tan teh ang tiin meialh lang lo tur ber chuan a kut chuan a hup tat tat a,Sângtuala chuan vaibel ling khawn tlak sak pah chuan fimkhur ve deuh thin la maw,vaibel rim nat zia hre rual chu i nih tawh vei nen tiin a kamkhat hlak a,chutia an thut thap lai chuan kawr lam atang chuan meichher chu lo eng phei zelin tlangval pathum hi lei lam bih chuan an lo phei zel a,kawr kam lungthil hmun a hnuhma bo hmiah mak an tih zia chu an lo sawi phei pah zel a,Rinmawia bengbulah Sângtuala chu a han phun sap sap a,an piah a mite melh chung chuan Rinmawia chu a bu nghat nghat in,an thil tum chu an thinte chu a han hrilh chuan an ni tlangval ho chu an hlim ta kher mai,tanhmun siam chuan an thu rem thuai a,kut lawng in thing phen chuan an hma a sulhnu chhui a kun ngar ngar te chu an veh phei ta a,an chan tur theuh an in sem fel lai chuan thlanglam atang chuan meichher eng lo chhoin mi pali lai mai an lo chho belh leh a, finkhur tak chuan an tawlh liam leh thuai a thlanglam atang chuan hnu chu in hmu em ? tiin pakhat chu a rawn au lang lang a,an ni chuan hmu mai rih lo tiin an chhang thuai a,kawr lam a kalte pawh an lo chho leh thuaiin meichhemna hnu ah chuan an bawr khawm lat a,an hnu chhui an bo daih mak an tih zia chu an sawi khawm lat lat a,an zing a thunei ber chuan ‘hei khua a var hnai tawh bawk a,zing khua han var sela uluk zawkin kan chhui tha dawn nia,a thei thei chu mu halhchawl phawt ang u’ tiin an tlu zal tap hang hlawm a.

Khawfing chatin thim a tin tan ta a,Rinmawia chuan a naute chu inthiam fihlim rih tur chuan hrilhin an thawm hre pha zel chuan Satlâk lam pan chuan an kal zel a,tukthuan ei hun a nih chuan an hnung a zui tu te chu an hmanhmawh sawt tih hriat tak chuan an thawm pawh a hnai ta sawt a, Sângtuala chuan ‘k’u Rinmawi an hnungah i zui zawk teh ang u,vanduai palh a hlauhawm e,kan hma a mite chu an in vengthei turah ngai ila,eng emaw a thelng dawn a nih chuan an chet danah kan hre tho ang’ a tih chuan,a dik an tiin an hnu chu thupin an hnung a mite chu an zui ta zawk a, Tlangzawl khaw tlangvalte pakhat chuan ‘kei chu ka ngaih a tha mang ta hauh lo mai,val upa Lianmunga te hian puitu an neih ka ring tlat zu nia,an hnu lem siamtu kha tu emaw chu a ni ngei ang,kan in thlau hauh silo a,hnu lem siam hnu a kal chu nisela kan umpha daih tawh ngei ang ’ a tih chuan, midangte chu an lo ni e tliar tlair hlawm a,an hruaitu pa chuan ‘Laihnawk i zam ta deuh elaw,khang kan misual ho kha tun va pui hrep suh,kan um phak hunah chuan nuam an thai lo nasa ang chu’ tiin a han tawng phar phar a, Laihnawka chuan ‘k’u Tinduh zam hran lo e,an kal dan han chhut hian khan an he lutuk hi a mak ka ti deuh a ni,tlang khan tha lai zel leh a hnuk hnai berah zel Satglâk lam pan in an kal a nia, hetiang a nih hrim chuan Satlâk khaw ram chhungah bak kan in nang hmanin a rinawm loh ka ti deuh mai chauh a nia’ a han ti nem duai a.

Tinduha chuan ‘i han sawi takah chuan a ni khawp mai, eng a pawh nise kan va che lai tak min nang a nih loh chuan Satlâk khaw ho chuan min hre chhuak kher nang,min lo hrechhuak pawh nise eng vak nge pawi ang,kan khaw chhung kan in chingfel a ni mai a,an ngaihaw lui tlat a nih chuan kan nih nih kan ni mai tur lah niin,Satlâk khaw chetdan hi ka ngaihmawh na a rei riau tawh a sin,eng emaw deuh ah thangthat lak tum hian an che ziah leh nghal a,Lal dangte mitmei lah an veng na hek lo,an Sângtuala mawlh saw ania ka khin chak ni,hmanni an lo kal lai a ka awm lo mah pawi tih nak lai a,an sawi ang tak a huaisen a nih ka ring hauh lo zu nia’ tiin mahni inring tawk tak chuan a han sawi a.an mahni an pelh chuan zawi muang chuan zuiin an thu sawi a vang chuan Sângtuala pawh a sa zak a,an pawi a sawi a hriat loh pawh a tihnat an châk lutuk chu a hrethiam lo ru riau a, thangthat lak duh vangin eng thil mah a ti lo tih an hre duh lo tlat te chu mak a ti ru zawk hial a ni.

Satlâk ram pawh an lut a ni ruai tawh a,chutia fimkhur tak a an kal lai chuan,Satlâk ram lam atang chuan naupang pakhat chu a han tap al al in reilo teah chuan a bang ve leh mai bawk a,nau tap thawm an hriat chuan Tlangzawl tlangval te pawh chu tho thuaiin an silai chu an endik sap sap a,an in karah chuan mual hnih lo laim bak a tla bawk lo nen, Sângtuala chuan ‘ti khan fimkhur takin lo zui ula,kan thiante pawh dan ka han ngaihtuah a nge,ruang chaicheh thlak ila a tha be rang,a theih hram chuan kan ram chhung thleng kan thlem dawn nia’tiin an piah kawr lamah chuan a liam nghal zat a,Rinmawia chuan silai chu endik in hmanhmawh leh fimkhur tak chuan an hma a mite hmu phak tur chuan an kal chak ve sawt a,zing riltam leh ram chhengchhe tak kar a kal chu a in hmeh ber lo chiang khawp mai,an hma a mite pawh tuibur hmuamda velah chuan hmu phak in,insem darh in fimkhur tak chuan an hawi dak dak hlawm a.

Sângtuala pawh hmanhmawh tak chuan a kal zung zung a, silai a puah vaih chuan an in veng zo dawn lo tih hriain hmanhmawh tak chuan a kal zung zung a,lo finghnih zet a kal chuan Satlâk khaw ram pawh a lut fel tawh a,a u Laiawrha te hnu dal chu hmuin a han faifuk raih a,Laiawrha chuan lo chhawn thuaiin a nau a hmuh chuan thil awmdan a hrethiam nghal a,thiante chu inring tur chuan a han zai zir zui bawk zat bawk a,Laiawrha’n thil awm dan a hriat chuan Mualkunga chu tirin hmanhmaw tak chuan a ni pawh a liam thuai a, Mualkunga liam chuan an ni chu ramri kawr lam pan chuan an tawlh let thuai a,ramri thlenhma mualah chuan Tlangzawl tlangval te pawh an lo in zar pharh in fimkhur tak chuan an lo tawlh phei ve bek bek zel a.

Laiawrha chuan an thlang ruam a lo lawnchho mek Tlangzawl tlangval te chu au in ‘nangni kha eng ti tur a kan ram lo lut nge in nih,tu khaw tuiliak nge in nih reng a’ a han ti that that a,an rin loh lutuk a aw an hriat chuan Tlangzawl tlangval lo chho mekte chu an ding tlar thap hlawm a,aw an hriat lah chu a sawi tu hmuh tur a awm hauh lo nen hamhaih leh mak ti tak chuan an hawi kual zak zak a,tlangval dawihzep deuhte phei chu an hmai a dâng nghal lap nen.Tinduha chuan ‘tu nge maw i nih a lo in lan ta che,hmeichhia ang in thingphen atang chauh in a mi min vau ngam chu le ?’ a han ti ve chhar chhar a,thu a sawi zo chauh tih chuan an hma lawk inchhung dung let hnih awmah chuan pasâltha sa nghat tlet tlawt chu lo pen chhuakin ‘Laiawrha Satlâk Lalnu Thanthûami khaw tuiliak ka ni a,eng vangin nge kan ramchhung in lo dai luh ngawt a ? a han tih zawm a,an han in melh vang vangin Tinduna chuan ‘ Tlangzawl Lal Zauliana khau Tinliana ka ni e,kan sahliam hnu chhuiin kan lo lut a ni,sahliam chhui phallo khawp a uikawm leh in hung bing khaw Lal hnuai a awm in lo ni maw ? a han ti ve thung a,a thusawi pah chuan a silai hmawr chu a lek sang hret hret bawk a,Laiawrha sir atang chuan ‘i kut kha tlemin dah hla deuh rawh aw,ka silai hian puah a châk viau a nia ka sawi nawn dawn hauh lo tih hria ang che’ zawi sat a tih ri an hriat chuan aw lo chhuahna chu an hawi thap a,tlangval ria zeih zawih dar pharh leh kawng fet rat leh mal vawng laih,nui deuh sang an hmuh chuan Sângtuala ngei a ni tih hrilh nawn an ngai hauh lo,Tlangzawl tlangval te chu an hawi lawl lawl hlawm a,Sângtuala te thianzaho râl hrat zia leh an rem hriat zia lah an hre chiang hlawm hle si a.

Laiawrha chuan ‘eng tikah nge sa chu in hliam reng reng a,nimin ah nileng in he laiah hian kan tap ni leng zak tawh a silai ri kan va hre lo ve’ a han tih chuan tlangzawl tlangval te chuan an hruaitu Tinliana an en thap hlawm a, Tinliana chuan ‘kan silai ri in hriat loh vang chuan kan kap lo tih in hre chiang meuh a maw ? thangkhat lian lai ka lo ramvak ve tawh a,tiang mi dangte thawn ching hi ka la hre hauh lo,nangni hriat a insawi thiam hi ka tum hauh bawk, tunah kan let nghal dawn a nangni pawh in kan ram chhung hniak khat pawh lo dai hauh suh ang che u,chu tiang ni lo a kan ram in lo dai lut a nih vaih chuan kan karah zen khu a zam ngei ang’ a han ti ve leh ngat a,Laiawrha chuan ‘tlangzawl khua te u,chutiang a sa hnu chhui in nih ngei chuan keini pawh in kan chhui pui ngei ang che u,a nih loh a dawt in sawi a nih vah erawh chuan dawt sawi man in chawi ngei ang’ a tih takah chuan.Tinliana ruahman ang chuan thil a kal dawn lo tih hria in,Tlangzawl tlangvalte chu an zâm tan ta khawp mai,an hnung lamah chuan thawm lo awm in an han en chuan Satlâk tlangval panga lai hi silai hman mai inpeih tih hriat tak chuan an lo pen chhuak mek bawk nen,an chan chauh zia hriaiin Tlangzawl tlangval naupang deuh te phei chu an puan ven tlang chu a phe tan ta dar dar a,an hma a mite lah engzah chiah nge an hre mai bawk lo nen,an lo kal ta ngawt chu pawi an ti hnuhnawh khawp mai le, phengphekhua a tlai zo ta si a,an chan tawk khuarel chu an nghak ta thap a.

A naute hmel atang chuan tumah an che ngam dawn lo tih hriain a thinrim chu a thuahhnih khawp mai,mahni chauh in ngaihtuah tum chuan silai chuh thutin a han hmet puak dur a,Laiawrha bul a thing chu a khem hlawk a,an rin loh lutuk a silai puak chu hamhaih deuh in,an harh chhuah meuh chuan Tinliana chu inchhung dung chen lai a lo tlan hman tawh a ‘Sângtuala chuan tuman kap suh u ka um dawn e’ tiin Tinliana tlan liamna lamah chuan a tlan nghal zawk bawk a,Rinmawia leh Thûamkunga te pawh silai paih lawkin an tlan liam nghal bawk a,Rinmawia ten mautluk awm an tlan chuan an thlang zawlah chuan Sângtuala leh Tinliana lo in veh chu hmuin an ding chawt hlawm a,zawi a hnaih hret hretin inchhung dung awmah chuan ding thapin an thianpa a chetsual palh thulh a chet ve nghal tum chuan chempui chu an phawrh sap sap a,an hnung lamah chuan Chungliana leh val upa Chhâwnthiaua te chu an lo lang ve nghal zat in,val upa chuan ‘Sângte,dim hauh suh dawtsawi hmang te hi chu ren hauh lo tur, tumah lo inrawh hauh suh ang che’ a rawn ti thla leng leng nghal a,vaibel chu siamkaiin a fawp khu tual tual mai bawk a,an val upa mizai atang chuan a nau a rintawk zia langin,Tlangzawl tlangval an mante pawh chuan pasâltha in bei turte chu hmuhchian loh hlau chuan kawhdang an hawi thei hauh lo.

Tinliana chuan chempui vaichhuak in a han bawh thut a,lo tawlhnun zauh pahin chempui lo thlawk chu a lo kun hniam san a,Tinliana tang lutuk kechheh buai laklawh chu Sângtuala chuan a mawgah a han tlawh zui pawp a,a tlawhtu tha in a hneh em a vang chuan thingkung tauh rawk chuan a kat dawrh a ‘pasâltha thingkung a lawn i tum elaw,kha thing khan rah a neih hauh lo a nia’ Sângtuala’n a tih chuan, Tinliana in tauh na vang a hmui thi sung chung chuan lo hawiin ‘ve khangleng che chuan,khawnge ka han fik hmawk teh ang che’ tiin,thinrim luat vang a khaw hmulo chuan a a han vai leh pawp pawp a,chempui lo thlawk khak per zung zung pah chuan a tawlh kual zung zung a,Tinliana tlawmla chuan Sângtuala ke chheh sual nan fuh ngei tum chuan a han vai leh puat a,lo kun hniam pah chuan a tawlh hnai thut a,chempui in a pelh rual chuan a chempui chu a han vai ve fua a,Tinliana chu a te thawt a,a mawngtam kak var haih thi hnam tiam tiam hupin lei ah chuan a vial ngawl ngawl chuan a let tawp tawp a,beih zui tlak a ni lo tih hriaiin val upa chu en hau in a then khum sak a,lainat teh falua lo chuan Rinmawia te chuan Tinluaia chu an han tung tho hlawl a,an hnungklhir hnu chuan a hliamah chuan nauban kung chu chempui fawng a chhu sawm sawk sawk in,Tinliana hliamah chuan an han bel sak a a ma puantlang chu zai thler sakin a theih dan chuan tuam an tuam sak zawh euh chuan Tinliana chu a lo thi dang daih tawh a.

An hotupa ber engruai ani lo tih an hriat chuan Tlangzawl tlangval te chu an zam hle tih an hmelah chuana hriat a, val upa Chhâwnthiaua chuan ‘khai ule,engvang berin nge kan khaw ram hu in lo dai luh a,dawt sawi kuallo khan tha deuhin sawi teh u hun kan ngah lo a nia’ a ti dam thlap a,an ni chuan thudik sawi lo mahse an hre dawn tho tih hria in ‘Hauliana pa in val upa Lianmunga te um zui tur leh that chimit thak tur a a tirh zia te,lawmmanah darkhuang pakhat theuh pek a tiam dante an sawi chuan,val upa Chhâwnthiaua chuan ‘chu in rosum duh ang chauhin maw nunau pawisawilo chu in um zui a,dam tlak in ni mawlh lo’ a ti rum ta ul a,an nunna zuah hram tur a ngen in an mern pur hlawm a.val upa Chhâwnthiaua chuan ‘in va han suaksul tak em,in nunna in hlut ang bawk hian midangte nunna hi a hlu tih hre reng chung hian engvang a midangte nunna la tur a um zui nge in nih,in pawi engnge an sawi ? tih chuan Tlangzawl tlangval te chu dak chhuak ngamlo in an kun thap hlawm a,Laihnawka chuan ‘min ngaidam hram rawh u,kan lo tih sual a ni kan risum duh luat vangi khua kan lo hmu lo a,tunhnu chuan kan ti tawh hauh lo ang’ mittui far zawih zawih chuan a ti a,val upa chuan midangte chu rawn in,Lalnu Thanthuami hnen thlen phawt tha an tih vang chuan,hlâng siam in an râl mante chu an zawn tir a,val upa Lianmunga’n an khaw hlui tlangvalte a hmuh chuan a thinrim kher mai,an chaw fun chu thet in Sângtuala te thianzaho chuan an ei a,chaw an ei kham chuan Satlak khaw lam pan chuan an kal ta thuai a.

Satlâk an thlen chuan thutmuan ar a khuang that that tawh a,val upa Chhâwnthiaua te leh mikhual tlangval te an hmuh chuan Lal mual lam pan chuan an zui ta hul hul a,chanchin an hriat chuan Satlâk tlangval te thin chu a rim kher mai,kut ram zual te chuan Tlangzawl tlangvalte chu an lawk nual a,val upa in a khap chuan tuman kut chu an thlak ta lo Lal mual a inteah chuan an mi mante chu khung khawm in hliam chu bawlpu chuan a han en chuan buh seng zawh chuan a dam ve leh mai dawn hi tiin damdawi a han hnawih sak hnu chuan a tuam that sak leh ta a,Lalnu Thanthûami chuan Tlangzawl Lalpa hnenah a tuk lam a zualko kal tur chuan a tiin nunau te chu an tin ta a,val upa Lianmunga te leh an hnung zui tut e chu a tuk lam a chanchin sawi tha tur chuan an tin ta a,Sângtuala chu Lal Zamloa’n a hmuh duh thu Lalnu Thanthûamin a hrilh chuan chuan ‘ka chau deuh riau a,ka hahdam deuh hunah ka la hank al dawn nia’ti a chhangin Lal in chu an chhuahsan ta hlawm a, Laiawrha chuan Lal Zamloa thucah fo chu a han ngaihtuah chuan eng emaw pawi thui zawk a thlen ngei ringin a ngaih a nuam thei hauh lo,engpawhnise beng thar a la ngaihtuah chu tha in a hre ta a . . .

Lo tawk leh teh mai se,tunlai chu Bairabi lam ngawt ka rilru ah a awm a,thiam lo sa nak laiin rilru a lut thei der lo, awmhmunah thinrim leh rilru na takin ka thu reng ringawt a nih hi . . . . .