PASALTHA SANGTUALA BY Vana Fanai (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALTHA SANGTUALA BY Vana Fanai 1 - 131

Unread post by Ngaia » April 16th, 2018, 10:10 pm

PASÂLTHA SÂNGTUALA ( Mampuia pa )

BUNG - 132

Chutia hlim tak a Chhippheng khua an rik mup mup lai chuan,daihmawr hmeithai vawk chaw pe tur chhukin lungdawh a tlangval panga khaw en thla niawm tak an hmuh thu sawiin, a thusawi tu chu a ding khur dat dat a, pasâltha Sângtuala te chu thu thar an hriat chian tur chuan an liam thuai a, val upa Chhâwnthiaua chuan khaw venghim turin hmunthum ah tlangval te chu sem darh in, a ma hoin tlangval zahnih dawn lungdawh lamah an kal a a, tuikhur kawng lamah pasâltha Sukthanga ho in mi sawm sarih te chu an tlan liam thuai a, tlak lam ah chuan Laiawrha hoin tlangval za chuang an liam bawk a, Chhippheng valte erawh chu râl an dan zawh loh thulh a nunau te hmunhim a la chhuak tu atan an dah thung a, râl an ni ngei tih an fiah hma a thâl thlah lo tur chuan an hruaitu te chuan an chah ngun kher mai le. Chutia pasâltha rualte chetla chu hmuhnawm ti leh hlau bawk si chuan nunau chuan bang awng a tang chuan an thlir far hlawm a.

Pasâltha Sângtuala te chu fimkhur tak chuan lungdawh thlangah chuan an liam thuai a, sulhnu thar chu an chhui thla pah zel a, lo fingkhat zet an chhui thlen dawn chuan tlangval za dawn lai tur lo ding tlim hmur mai chu an hmu a, Tuklawn pasaltha Bilhluaian Chhippheng khua an luh chhuah dan tur uluk tak a sawi lai chu an hmu ta a, an thusawi hriatchian tum chuan an han ngaithla chiang , Satlâk pasâltha pui tur te an ni tih an hriat chuan an thawhuai hlawm a, pasâltha Sângtuala chuan aw thian kharh kharh in, a tawmna thingphen atang chuan a pen chhuak ta a, Tuklawn pasaltha Bilhluaian a hma a mi a hmuh chian chuan ‘e Sangte nang lah ni reng che in, in chin engnge nita zel, nang mahni pui turin kan lo kal a’ tiin a be nghal bawrh bawrh a, pasâltha Sângtuala chuan a hma a mite chu a melh vang vang a, nui sang in kan rin phak bakin thil a kal tluang a tiin an chanchin tlangpui chu a han hrilh a, pasâltha Sângtuala thusawi ngun tak a an ngaihthlak hnu chuan an ni pawh chu an thaw huai a, pasâltha Bilhluaia chuan ‘chutiang a nih zawngin a lawmawm nasa a nih chu, satuihâng leh lengi nui ri nen, zanin chu kan hmang ral dawn zu nia. Hawh u naute u, Chhippheng lengi te chu i han keuh pawp pawp ang u,zan in hun hman tha fal in awm a, chawi ngai chu ka chawi ang ’ tiin a han sawi zui a, phur tak chuan lungdawh lamah chuan an kal ta a.

Zanriah ei hun dawn a Tuklawn valrual, râlthuam famkim nen a Chhippheng lawi lut mup mup chu, nunau te chuan an zim tuai tuai a, Chhippheng Lal Dengkhuaian an khaw boruak a hriat chian chuan mak tiin a ka hau a, a rilru pawh a vak thui khawm mai. Satlâk valrualte chuan an thlenchin a piang ah thiltha an ti a ni tih pawh a hrethiam ta a, pasâltha Bilhluaia chu ko in an kal chhan chu a zawt chiang a, Tuklawn pasâltha Bilhluaia chuan ‘Lehchhuah leh Tuklawn khaw tlangval Satlâk run tur a an kal atang chuan sawi tan in, Lehchhuah khaw ho nen an buai zui tak dan te, thi tur dinhmun atang Satlâk valrual ten an chhanchhuah tak thu te sawiin,Lungtian leh Dakluh khua an chinfel dan te chu tawikim tak chuan a han sawi a. Chhippheng Lal Dengkhuaia chuan a lo nih tak chu maw, kan unau te hian thiltha tam tak min zirtir a nih ngei hi, khuanu malsawm tlak in an nun an hmang a, nunrawn na lam leh nun uchuak hi an chetna hnuah hian a awm hauh lo a, an chemhar khau te ngei chungah pawh zaidawh tak in thil an ti a, an fakawm khawp mai, nengni pawh lungmuang takin awm ula, zanin pawh hlim takin kan chai ho dawn nia, tu khaw Lal tlangvalte hian nge lam thiam ber kan en ang chu tiin a nui huah huah a, tlangau pa fatu lam khan chaw han chhumbelh sela, chumi chhung chuan nunau in lo ei sela a tha a nge a ti zui lung lung a.

Nunau zanriah hlim tak a an ei hawng hawnh lai chuan, khaw hrang hrang val upa leh pasaltha te erawh chu. Chhippheng vkhaw Lal leihkapui ah chuan thuin, zu khawn in hlim tak chuan an thum leh ham ham thin a, Lal pahnihte pawh chuan in ti Lal loin an bul a tlangval nen chuan an infiam bawrh bawrh hlawm a, tlangau pa rui lungpuam chuan ni tla tur chu thlir vung vung in, a mittui chu a khap per chhak chhak a, chutia a tlangau pa hawi ta vung vung chu Lal Dengkhuaia chuan ‘ Zikliani pa chu duh loh rai ang mai a i din tum hmuk tak mai chu, engti zai zia nge ni ta mai le ?’ tiin a han chhaih fiam a. Tlangau pa chuan biang a mittui luang zawih zawih chung chuan. Lalpa zan in tlai zet zawng lunghlui a va leng tak em, tiamthu tham ral ngaiin biangah chhing mittui a luang e’ a han ti lawi rut a, Laiawrha chuan ‘ Chulhnu nunhlui in thinlai a thawng e, biah thu kan thlun lah nunhlui liam in a fam pui nem maw, tap in au mah ila kir an rello, nunhlui ngaiin thlafam chang mah ila, kan tawng tawh lawng puan ang chulhnu nunhlui, theih changse auh kir ka nuam, zamual liam hnu nunhlui, i tangnem bel a riahrun rem ka nuam e’ tiin a han chham dap dap a, val upa Chhawnthiaua chuan a thluk siam in zai a hruai ta luah luah a, tun hma zawng a a zai an hriat ngai loh, chutiang tak a aw tha lo nei reng chu Satlâk khua te chuan mak an ti zawk hial a, tlangau pa lah chu mittui leh hnap tui nen a insut tui pur chung chuan a sawt kat zauh zauh a.

Val upa Chhawnthiaua chuan ‘An nem lungrun, a tha ngurpui tawnah puan ang chul tawh mah la, kei a riang tawnah i hlui mawlh lo, i zunzam in tanglaiah min zem, tha leng dang tawn ah chhuihthangvala ka buai nem maw, mi tawn a puan ang chul tawh hnu kei a riang tawnah, tuâi ang tharin i parvul chiai e, a mi lengten min sello u kei ka lung lawmna, tha dang lungrun i zun chhawl min ban ka phur zo dawn nem maw, kei rai rah val hi samang min then lul suh, chhim thlipui iang in i chinlai lenrual te hrâng mahse,hallo ten i lengdun zel ang hringchan chhung chuan’ tiin a han hril chhunzawm lauh lauh a, chu hla an sak leh meuh chuan nula leh tlangval te chu Lal mual ah chuan an lo su ve dual dual a, seki leh darbu kim chu tumin a mual sukin an su ta dul dul a,naupangte pawh nula tlangval thlafem ah chuan an su ve laih laih a, chaw an chhum hmin tawh vang chuan ui tak chung chuan, chaw ei chu an siam ta hlawm a, Lal chuan zanriah ei khamah kan chai leh ang, tumah mahni in lamah hawn loh tur a ni e tiin a au lauh lauh a, ruai an peih chuan an kil zui ta, ruai ningnawi an tih fel chuan Lal mualah chuan nula leh tlangvalte chu an in tlar thup in an chai ta mup mup a, thâl thli in kawtthler vaivut a a len khu luih luih ang maiin Chhippheng Lal mual chu a khu ta luih luih a.

Khua in a thim hnan takah chuan tin mai loin Zawlbuk lam ah chuan an ri thla leh ta bung bung a, Zawlbuk meipui eng dul ruih hnuaiah chuan a tar a zurin an chheih leh ta dual dual a, vanglai liam hnu thar thawh leh in, tar thenkhat lâm nasa lutuk chau te chu thu chung a ban vaiin a la chheih that that hlawm a, chutiang khawp a hlimna chu Chhippheng khaw dintirh atang in a la awm ngai lo, Lal Dengkhuaia hlim leh nuam ti lutuk chuan khual valte chu, a tuk lam a la cham hahdam tur chuan a han ngen leh a, tlangval thaza ngaihtuahna tawi deuhte lawm sakhai niin an lo aw rual dual dual a, val upa leh phanchang deuh te erawh chuan hlimhlawp zawng a kal chu tha an ti meuh lo, an boruak tawn thlirin khaw lamah an mahni lo ngaihven rengtu an awm vang chuan an rilru a phir deuh tlat a, muanna hlut zia hriatna tur atan erawh chuan pawi an teh chiam ta lo a.

Zan lai âr a lo khuan tak chuah chuah ah chuan Lal Dengkhuaia chuan ‘tlangval te u, naktuk lamah kan la chhunzawm dawn tho a, zanin atan chuan i duhtawk rih phawt ang u, kan unau kal chau tak tak te pawh kan ngaihtuah a ngai a hlimna hi duh viau mah ila, a chintawk kan hriat a tha ngai e’ tiin mu tur chuan an tin ta, tar lâm chau thenkhat erawh chu tlangvalte chuan an va thlah a, hmuntin ah hlim thawm chu awm in nula te chu tlangval te chuan an thlah hlawm a, chu tiang a hlim tak a an awm lai chuan tlak deng lamah chuan vawk chu a rawn ngek ta rawng rawng a, hmeichhe mangau hian sa a tla e tiin a rawn au vau vau mai bawk a, chu mangang rawl chhuahna lamah chuan tlangvalte chu an hmanrua nen chuan an tleh ta dul dul a, satlakna hmun tlangval nawlpuiin an thlen chuan dai lam ngaw ah chuan meichher eng chu a lo awm nual tawh a, inchhung dung chen awm an thlen chuan sapui in hrosa thawm chu ngaw lam atang chuan a lo chhuak ta hem hem a, thawm an hriat chuan tlangval thenkhat chu an tim ta hlawm a, ngaw hnuai a meichher eng chu inchhung dung chen velah chuan a in sem darh ta bawk a, Chhippheng khawnbawl up ate chuan ‘tlangval te u fimkhur rawh u,nunna chan te kan awm palh a nge aw’ tiin an au lauh lauh reng a. Khawnbawl upate an au lauh lauh lai chuan ngaw chhung lam atang chuan sapui thawm pawh a na ta kher mai, rawlthar thenkhatte chu sapui thawmah chuan an tawlh kir rawk rawk bawk a, sapui awmna lamah chuan tlangvalte chu meichher nen an liam hul hul zel a, tlangvalte an thlen tam tak hnu chuan haw haw thawm chuan sapui rawl meuh pawh a hliah ta, chulai ruam a tlangvalte chu Laiawrha tiin an au rual ta thup thup a.

Nunau te pawh chu tlangval thawm awmna lamah chuan an pungkhawm thuai a, ngaw kar atang chuan tlangval haw haw thawm chu lo chhuakin meichher chu a tek sawk sawk reng a, meichher laiah chuan hlang pahnih zawn tlangvalte chu an kal a, sapui bulah chuan tlangval pakhat hi a thu kun lap a tu tak chu ni maw tiin nunau te chuan sapui bul a tlangval hmuh chian tum chuan an thlek dauh dauh hlawm a, nula lam phei chuan an thlek nasa kher mai,Lal mual lamah chuan pheiin sapui hlâng nen chuan an haw haw phei luih luih a, Lal pahnihte leikatlangsang ah chuan an lo ding dun rual a, an hnungah chuan Lal fanu pahnih te pawh chu an lo ding dun ve ran a, khawbual Lal fanu Darlianin hlâng chung a tlangval hang ngaihno bei, sa in phut tawk tak a hmuh chian meuh chuan khawdang a hawi thei meuh lo, a thiannu awmdan danglam ta thut chu chu nghawk zauh pah in, Lianmawii chuan ‘thiannu khuavang tlangval hmu ang mai lah ni che in’ tiin a han fiam zauh a, . Zak sen tawl tawl chung chuan lei chhuah zukin. Lianmawii darah chuan a han ben sak thawr in ‘i chhe zawt zawt e, Mualkunga silai dawn lai a i hmel kha tun an hai bik emaw chu’ a han ti let ve sak a.

Buichhia laihloh in a in puang tih angin Lianmawii chu a ngawi ta rauh rauh a, an ni thian dun an ngawih dun ran lai chuan mual lam atang chuan hmeichhe hlau thawm chu a lo chhuak thut a, an keipui zawn hnungin lei an dehrual chuan a lo zuang zawk chu niin, a zawn tu tlangval te pawh chu an let hawl hawl a, pasâltha Sângtuala te thianza ho in sapui hlang an chawi kan hnu chuan keipui thinrim chu a huk dum dum a, keipui in a mei chuan vaivut chu a han hlap khu luai luai a, nunau chu an tawlhkiang dual dual a, Satlâk valrual te erawh chuan sapui hlâng chu an vuan thup thung a, nula lak a lan huaisen duhin, khawdang tlangvalte pawh chuan hlâng chu an lo chelh pui thuai a. Lal in chanchin sawi tur a sawm ang chuan Chhippheng tlangval Kapkhauaia chu leihkatlangsangah chuan a han chuang chho a, Lal hma a thusawi ngailo tih takah a puan tlang chu a phe hlap hlap a. zam luat vang a aw lawi rat chuan ‘nula lam thlah a tlangval tam zawk an hmanhlelh lai khan, mi tlem a zawngte chuan fiamthu nen meipui kan lam hual hlawm a, tuibur hmuanda awmah chuan hmeichhe mangang au rawl chu hriain, mamngang au thaw lo chhuahna lamah chuan hmanhmawh takin, Satlâk khaw pasâltha leh val upate nen chuan kan tlan thuai a, pasâltha Sângtuala te thianzaho pawh an lo thleng ve nghal a, muangchang loin sapui hnu chu kan chhui nghal a, thing hmun kan luh dawn lai chuan tlangval thenkhat pawh an lo thleng ve tan bawk a, Satlâk val upa leh pasâltha ten hma hruaiin, sapui hnu chu an chhui ta zel a, vawk ruang chu thing hmun kan luh atang a mau tlawn tluk hnih awmah chuan a lo la tal uih uih a, a hrawk a sapui sehna atang chuan thisen chu a lo la chhuak tuam tuam nen, sapui rim thang nghur nen uak a pawt in hmulthi a ding uaih uaih a, sa ruang ber kan hmuh takah chuan let mai ang tih rawt ka tum lai chuan, kan thlang batling hung bul mai atang chuan sapui mit chu a rawn de thiang rual a, a ang sen huam mai bawk nen ka hlau lutuk chu ka thauah man in ka che thei ta hauh lo a, pasâltha Sângtuala chuan min nam tawlh in hmun himah chuan min din tir thuai a, Satlâk valrualte chuan sapui chu an hual tan ta a.

Mak ti leh hlauthawng tak chuan thingphen atang chuan ka thlir ta reng, pasâltha Laiawrha chu sapui hmazawn ah tak chuan kutlawng in a ding ran a, midangte chuan an rawn hual hnai zel a,a hma a mihringte khawsa zia chu tuar theilo in a hma pasâltha Laiawrha chu a zuan ta thut a, a zuan thlu ngei turah ngaiin ka maimit chhing tawp a, sapui huk tuar ka hriat a ka han en nak chuan, pasâltha Sângtuala chuan sapui meiah chuan a lo chaih a, pasâltha Laiawrha chuan sapui ke hmaah chuan man in a lo pawt ngar ngar bawk a. sapui thinrim chethei silo chu a hma ai mah a ring chuan a huk dur dur mai a, lei te chu a nghing dur dur hialin ka hria. Tlangval dangte chuan a rem laiah chuan an chelh ta fur a, a lo thlengthar apiang te chuan lo pui zelin, sapui meuh pawh che theilo chuan leiah chuan an keuh thal ta der a, sapui ber a chet theih tak loh ah chuan tlangval te chu an haw haw dur dur a, sapui chu phuar in a bak chu hei kan hmuh ang hian a awm ta ni, pasâltha Laiawrha erawh keipuiin a ban puam a ham avangin a inhliam deuh a ni’ tiin a han sawi a. Kapphunga thusawi an hriat chuan khawdang tlangvalte chuan mak ti tak chuan Satlâk valrual te chu an melh ta thup a.

Lal Dengkhuaia chuan pasâltha Laiawrha chu lo kal tehse a tih chuan, ban tuam bur chuan a chho ta hnak hnak a Lal Dengkhuaia chuan ‘khaw nge, kan tlangval huaisen chuan huaisen chawimawi na chu han dawm ta che’ tiin seki no chu a han pe a, a ni chuan ‘Lalpa kei chu a hming tumtu mai chauh ka ni, ka thiante dang hi he nopui dawngtur zawk an ni’ tiin tang mahse, Lal kut a zu chu ban in a han tem zui ta tho a Laiawrha mizia chu a thiante chuan mak an ti ru hle a,Laiawrhan lungdawh lam Lal a kawhhmuh lai an hmuh chuan, Laiawrha kawhna lam an thlir chuan midangte pawh chuan meichher eng chu an thlir ve ta thup a, Chhippheng tlangval ten Lal leh khawnbawlte lam ngawt an melh ngawih thup lai chuan, meichher eng chuan Chhippheng lungdawh chu a lo tyhleng der tawh a, daihmawr in zawn an thlen chuan meichher pakhat chu tek chhuaih in ‘Liana tho rawh, hei kan thleng tawh a nia’ ti a mipa aw chau takin a tih an hriat chuan , Sângtuala leh tlangval eng emaw zah chu meichher eng awmna lamah chuan an kal thuai a, an zu thlen chuan tlangval pahnih lo inkuah tho mek chu an zu hmu a, tlangval tlu zawk chu an zawn chho thuai a, pakhat zawk chu tlangval pahnih chuan an kuah chho ve bawk a. chutia boruak dangin a lo den takah chuan Lal Dengkhuaia chu silai nen mual ah chhukin, sapui hnuk chu a chhat ta a, a lo kir leh chuan tlangval pahnih te chu tuisik an lo in tir mek a.

Khawbual Lal Tuanpara chuan tlangval pahnih a hmuh chian chuan a hmelah thlaphanna lo langin , a khaw tlangval te chu a melh tawn sek in ‘ Khuanglian eng thil nge ni ta, tha lam thu em mi ?’ tiin a zawt thuai a, Khawbual Lal fanu Darliani hmel pawh chu a dang nghal sawp sawp a, Lal Tuanpara hmai pawh en lo chuan a kun zui ngaih in ‘Lalpa min ngaidam rawh, khua chu kan veng him zo ta lo a ni, losul haw hun tlai mah tawhah chuan meikhu nasa tak kan hmuh vangin, kan sachan na atangin hmanhmawh phelengin kan tlan haw thuai a, khua kan hnaih chuan kan khaw in zawng zawng chu, ban thenkhat kang bang lo mut khu vung vung bak chu a a lo kang filh thulh tawh a, kan han belhchian chuan hrumzial ngumkhak pasâltha tam tak in, nunau an lo chhawm chhuak duah duah chu kan hmu a, nunau te kan ngaihtuah vangin kahchilh mi ah kan ngai lo in, he lamah kan lo tlan ta vang vang a ni ’ mittui luang zawih zawih chuan a han ti a, Lal Tuanpara chuan ‘ an zingah chuan ka nupui a tel ve em, ka khua chu an rauh thak a mi han sawi chiang teh ‘ tiin a thingthi nghal hnawk a, Chhippheng Lal chuan lo chelhin ,unaupa lo in bengdai rih teh tiin a lo hnem a, Lal Dengkhuaia chuan ‘tlangval khawi lam nge an pan hmel rin dan te i nei em ?’ tiin a han zawt a, Khawbual pasâltha Khuangliana chuan ‘rinthiam a har khawp mai, kan ram hmar lam pan in an kal a, khaw dang pawh lo a hawn tlang an tum pawh a ni mai thei, kan ram hmar lamah chuan khawdang pawh lo in duh lamah an tla thei tlat a ni, hmar chhak lam an pan chuan, Lungtian leh a chhehvel khua pawh an hrut pah thei tho mai, an duh a nih phawt chuan tiin’ a han sawi a, Khuangliana thusawi atang chuan Satlâk khua leh a chhehvel chu him a rai an awm lo tih an hriat chuan, chu thu hria tlangvalte chu an in sehruh nghal in, hmanrawh chuh chuan an phe nghal suai a.

Lal pahnihte pawh chu an thu hriatthar vang chuan an buai kher mai, pasâltha leh val upate chu rawn tha an tiin, an ni ngaihdan a kal mai chu an rel a, tlangvalte pawh reilo teah an lo thleng thuai a, chung Lal pahninte thu ngaichang chuan an ding ngir khup a, an pasâltha leh val upate chu Lal inah chuan an lut khawm thuai bawk a, reilo teah Chhippheng Lal leihka-tlangsangah chuan an lo in zui chhuak leh thuai a, Satlâk val upa Chhâwnthiaua chuan ‘ tlangval te u,kan beisei loh lam atangin chhiat thu kan hria a, mahni khaw lam theuh pan mai hi kan tih tur awmchhun niin a lang a, kan dam a sei a nga hun thawl tha zawk khaunun min siam turah ngai ila, vanduai na dang a thlen hma in mahni khua theuh kan venhim a ngai a, kan hma zawn theuh ah huaisen leh rinawm takin kan awm theuh tur a ni, keini Satlâk khua te chuan Kan unaute chu kan theih tawkin kan va buai pui thung dawn a. Thawlhhma neilo khua kan nih vangin buaipui tur dang kan neilo bawk nen, khaw dangte erawh chu buh seng lam in buatsaih a ngai dawn bawk a, tlawm a la loin haw thuai ula, kan chin erawh chu kan inhre tawn zel turah ngai ang’ tiin a han sawi zawm a.

Tuklawn pasaltha Bilhluaia chuan an khaw tlangvalte chu din hran puiin, haw mai tur leh Lal hnenah pawh engkim hrilh tur a chah in, tlangvalte chuan haw bik nih chu an duhlo nasa mai a, an in tirh luih fe hnu chuan zualko a kal tur pangâ chu an inhmu tawk ta chauh a, pasâltha Sângtuala a ho a râl bawh chu an thlang zawk vek a ni. Khaw dang te pawh chu tlangval zualko tur chauh an in hmu zo hlawm a, an dinhmun an hriat chuan val upa Chhâwnthiaua chuan ‘Tlangvalte u tlawmngai ula,mi sawm tal kha zualko ah kal rawh u, a lo berah mi za dawn thaw nen tum loh deuh a in tawhsualah pawh in him deuh ang’ a tih tak ah chuan hreh tak chuan tlangval sawm deuh chauh chu an khaw lamah chuan an liam ta hram a, zualko turte an liam chuan tlangval râl bawh thei tur mi zali dawn an lo la ni a, Chhipzawl tlangvalte chu khawchhung veng tur chuan pasâltha Laiawrha ho a awm tur chuan an rel thlu leh ta, a ni pawh chu tang viau mahse a ban sapui hliamna vang chuan a tang zo ta lo a. Lal fanu Darliani chuan pasâltha Sângtuala chu pan in ‘pasâltha ka nu leh kan khua te chu him akin min lakchhuah sak leh ngri ang ti raw ‘ tiin hmel dang bai leh ngenngawl tak chuan a han ti a,chutiang a beisei an neih te tan a theihtawp chhuah ngei tum chuan ‘ka theihtawp ka chhuah ngei ang,ngaihngam takin lo awm rawh u, nangmahni in lo tla fal hauh suh ang che u, pasâltha te thu in lo ngaichang dawn nia, dam takin in inhmu leh ngei ang tih ka beisei’ tiin pasâltha Sângtuala te chu Khawbual lam pan chuan an liam ta dam dam a.

Lo tawk leh phawt tehse , ka theih tawk min hriatthiam thin vangin ka lawm e.
Like leh coment tute in zavai chungah lawmthu ka sawi mawlh mawlh e



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 16th, 2018, 10:10 pm

PASÂLTHA SÂNGTUALA ( Mampuia pa )

BUNG – 133

Pu HZ.Lalrinfela Assistant Jailor ... District jail Aizawl a awm mek... Birthday pual in ka lo dah e, a hun tak a ka dah thei lo pawi ka tih zia min hriat sak ka beisei ( Dt 8/4/2015 nimin tlai 3 ; 00 – 2:00 AM Thleng dah luh tumin ka bei a, tih ngaihna a awm ngang lo a ni e, ka lo he ti thei ṭawk e)

. . . . . .


Vartianah chuan Khawbual lungdawh thlengin,ran enkawl tu neilo te chu khaw kang filh vekah chuan an tei suau suau a, ran in mihring an hmuh chuan an lo pan huang huang hlawm a, pasâltha ho pawh chuan rante chu an khawngaih hlawm khawp mai, mûte arla chu chunglamah chuan a lo vir sek a, chung ran te chu khawngaih viau mahse thil pawimawh zawk hlen ngai an neih vang chuan, hreh tak chuan sul zuiin an liam san ta a,an thil hmuh chuan thinrimna chhung a mei lam alh hlep hlep chu meipuiah chantir a. tumah tawng zai chhat lo chuan an rilru a phuba lak châkna chuan a birh ta tluk tluk a.

Tukthuan ei hunah chuan an zan riahna hmun kawrte thuk ruam rem zet chu an thleng a, nunau nen a inkawi duah an nih vang chuan an kal sawt vaklo tih a hriat khawp mai. Zan mu mumal lo a kal an nih vang leh an mi zuite chu an umphak thuai an rin vang chuan. Tukthuan rel phawt mai chu an duh ta a, eirelna hmun rem an hmuh chuan tlangvalte chuan mei nun in an vi r buai char char hlawm a. Pasâltha Sângtuala chuan val upa, hetia kan chawlhchhung hian kan hmalam ka lo han chian teh reng ang, tukthuan ei ka lo tlai ta nih leh min lo fun mai dawn nia tiin a tho nghal uaih a, a thiante chuan keini pawh kan lo kal ve a nge, kan vai a kal ngawt ai chuan thawm pawh a dim theih zawk ang tiin an thianzaho chuan an kal ta a, a ram awmdan thlirin an hnu zel a zuilo chuan khan rem zawh in an kal zung zung a, tlang insuihfin na lai a sul an thlir chuan an kawng zawh lai a sual lo tih an hrethiam mai a, ruam thum lai an kan hnu chuan an thlangah chuan thawm an hre ta a, fimkhur tak chuan an veh thla ta a.

Pasâltha Sângtuala thinrim hmel an hmuh meuh chuan a thiante chu an tawlhlet dawrh a, naupang se enrual mahni pawh in veng theilo ram dai ngawpui hnuai a lo in kai chu thinrim leh mak ti chuan an thlir ta tlawk tlawk a. Naupangte chuan an hma a patling an hmuh chuan ding thapin thenkhat te chu an tap nghal a, Rinmawia chuan ‘ naute u min hlau suh u, nangmah ni chhanchhuak tur a lo kal kan nia, tunah chuan engmah hlau tawh suh u’ tiin a hnaih a, naupangte pawh chuan an hma a tlangval satha telh tawlh chu hnaihin, an hmelah chuan thlamuanna chu a lo lang a, nau nawite chu a theih ang ang chuan an pawm nawk nawk a, chutia naupang buaipui a a thiante an buai lai chuan pasâltha Sângtuala chu thlang lamah chuan a liam puat a, a thian ten mak ti tak a an thlir thlak chuan thil awmdan an hre thiam in, naupang te chu thingphenah chuan dah thuai a, kan lo kir hma chuan khawiah mah lo kal suh ang che u tiin, an ni pawh chu thlang lamah chuan an liam nghal thuai a, chutiang tak a hmanhmawh a an mi hmuh te an liam chu mak ti tak chuan an liamna lam chu naupangte chuan an thlir thap hlawm a.

A thianten naupang an buaipui lai chuan an thlang a, hrumzial pahnih thing phen a lo phe zauh zauh a hmuh chuan pasâltha Sângtuala thinrim chu engmah pawisak nei lo chuan a tlan thla nghal zawk a, silai a hman chuan Khawbual nunau te tan a pawi thei dawn tih hriain, chempui phawrh in silai chu theh rawk a, a thawm hria a lo hawi chhuak hrumzial pakhat chu lu phel phawk chuan a han sat lir nghal tawl a, a thianpa chu te nawk nawkin a silai put chuh chuan a tal ve phat a, silai a lek kawh fel chiah tih chuan, pasâltha Sângtuala chempui hriam ver vawr chuan a hrawk chu a rawn tai thler nghal hawk a, a hrawk chu ri bawrh bawrh in a khur nghal char char a, a ke chu a leng awrh awrh in a zal ta raih a, pasâltha Sângtuala chuan ‘ nangni duham leh nunrawng te u, in tan chuan he lei hi awm rengna tur a ni lo, mahni ai chaklo zawk hnuaichhiah chingte tan khuanu a duan a nilo, in thiante pawh in an rawn zui vat ang che u’ tiin a phun sap sap a, hrumzial pahnih ruang chu lang mai theilo tur chuan an thukru thuai a, a taksa a thisen kaite a tihfai zawh chuan, Khawbual naupang an dahna lamah chuan an chho leh thuai a, naupangte chuan an mahni chhanhim tute chu an hmelhriat nimah suhse an nel thuai a, naupang pakhat chuan in thlahrung tak chuan ‘ ka pu ka ril a tam e, ka nu bulah ka awm duh ‘ tiin a men zui par a, Rinmawia chuan ‘ E mami ramhnuai ah nula an tap ngailo, phungpuiin changpat a barh palh ang che, nakinah kan thiante an lo thlen hunah chaw an lo pai teuh dawn a, puak takin in ei dawn nia, hawh u helai a lo nghak ringawt loin chaw awmna lam i pan phawt ang u’ tiin naupang te chu an pua a, tlem a lian deuh te chu kaiin an let pui ta a.

Mualhnih an chuanchhuah dawn chuan val upa Chhâwnthiaua te chu tawkin, an rin loh lutuk a naupang kawi duah a lo kal an hmuh chuan mak ti tak chuan an ding ka hau a, naupangte chanchin chu hrilhin, mahni pawh in veng theilo an lo umzui tih an hriat chuan, Satlâk leh an thurual pui valrualte thinrim chu an thum huk a, Hrumzial pahnih an pasâltha in a dah tha tih an hriat chuan chhuang tak chuan an nuih var var a, naupang riltam chuan naupang ei a mawilo khawp a tam chaw chu eiin, an ei kham chuan tlangval sawmhnih in chung naupangte chu lo awmpui tur leh a theih dan ang a khaw lam pan pui tur chuan an tir liam nghal a, tlangval zathum chuang the thaw chu hnuchhui chuan an kal zel a. mi pahnih an thah sak an hriahchhuah hma a umphak ngei tum chuan fimkhur leh hmanhmawh tak chuan an umzui ta char char a, mual li lai an kân leh hnu chuan, chhun chawfak hun a lo ni der tawh a, an thlang ruam ah chuan mipa rawl vin khur khur chu hria in, hmeichhe pakhat chu thinrim tak chuan a te that that a,mipa ho chu an nui ta dur dur a, mipa nui karah chuan hmeichhe pakhat hi lungchhe tak chuan a tap ta rawng rawng a.

Hmeichhe tap thawm hria val upa Chhâwnthiaua chuan chumi ruam hual tur chuan a naute chu a tir nghal thuai a, pasâltha Sângtuala te thianzaho eh tlangval sawmnga tha mah te chuan luhchhuah tum chuan thawm awmna lam chu fimkhur tak chuan an vehthla ta tham tham a, hrumzial ho chu an tawng chuan an rak zat zat reng a, an nui leh hluah hluah thin, fimkhur tak a an hnaih thlak lai chuan Khawbual Lalnu chuan vin that hian ‘ Tenawm pa, thlah vat rawh kan tlangval ten min lo um phak hunah chuan inchâk lo ang’ ti a te that that in, mihring taksa hlap ri chawrh leh tlu ri thlawrh chuan a zui zat a, mipa thinrim thawm chu a thum huk a, hmeichhe hlauthawng te thawt leh tlanthawm chuan a zui nghal zat a, pasâltha Sângtuala te tawmna lungpui lam pan chuan tlan thawm chu a lo hnai zel a, hlam khat emaw chauh an karah a tla tih chuan, hmeichhe te thawt leh tlu thum dawp thawm chu an hria a, hrumzial pangâ lai chuan Khawbual Lalnu Thawmzingi chu an han phih tho lawp a, an zing a pakhat chuan Lalnu hmaiah chuan a beng thuai a, Lalnu chu lungpui bulah mai chuan a hlawm nghal nawlh in a in sut faih faih a, hrumzial ho chu an tawng chuan an han inbe zawkin an zing a pakhat chuan, Lalnu Thawmzingi tlu lai puan tlangah chuan man in a han phih thut a, Lalnu chu te thawtin a puan tlang chu a kut hnih chuan a chelh ve tang a, nui huah huah chung chuan hrumzial pa chuan a pan hnai zel a, Lalnu Thawmzingi chuan a theih ang in a tawlh hlatsan tawk tawk thung a.

Hrumzial pa lah chuan a thiltum tih hlawhtlin ngei tum chuan, Lalnu Thawmzingi nuih sung chung a hnaih leh lai chuan pasâltha Sângtuala chu lungpui phen atang chuan a lo dawk chhuak zawk a, a chempui hum tle vur chu a phe nghal zawkin, hrumzial pa luruh phelphawk chuan a han sat lir nghal tawl a, an rinloh lutuk a thil lo thlengah chuan chetna chang hre mai lo chuan an thianpa lu phel phawk chu an melh ta tlawk tlawk a, hun reilo te an hamhaih zawk chu an tan chuan a pawi ta, pasâltha Sângtuala chu hma lamah chuan a dawk phei zawkin a chempui chu a han vai zawk zawk a, an ni pali chu an thal nghal zawih zawih a, Hrumzialho an tluk zawh chuan an bul vel chu a han en kual a, midang an hmuh mai loh vang chuan lungpui phen lamah chuan a let thuai a, Lalnu hmui kak thi deuh zaih zaih atang chuan thisen chu a lo chhuak ngiai ngiai a, pasâltha Sângtuala chuan ‘ Lalnu duhlo chung khawih ang tak khan lo te zeuh zeuh rawh, K’u Rinmawi leh Chungliana tih loh te chuan hmalam pan vat ang u, nunau zingah zuan luh dan kan tum ang, hun a awmlo an ngaihthat loh hmain hawh u thuai vat’ tiin a silai chu a endik nghal mawlh mawlh a, Val upa Chhâwnthiaua chuan ‘kan pasâltha sawi ang chuan kal nghal ang u, a theih ang zel a inveng tawn in theihtawp chhuah ang aw,Satlâk valrualte kan ni ngai e’ tih chuan an pen chhuak nghal a.

Lalnu pawh chu duhloh chung khawih ang tak chuan a khat tawk chuan a lo te that that reng a, hrumzial ho chuan eng emaw sawi chuan an nui thum leh huk thin, nunau awmna lam atang chuan hmeichhe mangang rawl chu a lo chhuak leh a, chulai ruam khawk rum rum a chengrang lunglian a rawn au meuh chuan, nunau zing a tang a Khawbual nula pawhchhuah tum a hrumzial pakhat tang tung tung chu hlawm nawlh a, silai dang pawh chu a rawn puak ta dur dur a, silai puah apiang chuan hrumzial pakhat chu te thawtin an thal nghal awrh awrh hlawm a, pasâltha Sângtuala chu ngaw khawk rum rum khawp a ring a au ‘ khawnge i bei tak tak teh ang aw, tuman silai hman tawh lo tur, kan in râl palh a nge’ ti a au lauh lauh pah chuan, chempui chu a dinglam a hum in silai chu a veilam in a hum thung a, hrumzial pasâltha karah chuan a leu zek zekin a sat lir nghal tawl tawl a, a hnung a mite pawh chuan an pasâltha kaihza vengin an rawn au chhuak ta hum hum a, inbeihna chu an tan ta, hrumzial thenkhat chuan silai chuan an lo sai ve pawp pawp in, khaw hrang hrang insuihfin tlangvalte pawh an thal ve tawp tawp a, patling thinrim chemsen lek a thisen chhuak zuaih zuaih an hmuh meuh chuan, nunau te hlauin an te teng tung a, an mipa man phuarna hrui an zaichah sak te chuan an hmanrawh hmuh theih ang ang chharin an mahni mantu te chu an bei ve nghal zel a, phuba lak duhna thinlung nei zawk, Satlâk valrualte kaihhruai chu reilote ah chuan an chungnung chho hret hret a, hrumzial la damchhun mi sawm tha emaw chauh chu an hual bet ta ran a.

Val upa Chhâwnthiaua chuan 'tlangval te u nungdamin tumah chhuah hlek loh tur, muanglei a min siam theilo tute an nih hre reng ula, Lalnu meuh pawh zah lo tu kan khual duhawm loh te chu tunah i chimih thak ang ule’ ti a, a naute fuih pah chuan hmalam pan chuan a che chhuak leh ta, hrumzial tlangvalte zing a feipui hmang chuan inbeih a thiamin a hmanrua chu a hmang thiam kher mai, tlangval panga lai chu reilo teah hliampui tuar in an let ta tawl a, pasâltha Sângtuala chuan midangte chu tawp tur a hrilhin, chu mi dehkhirh pa chu a hmachhawn ta, Thûamkunga chuan zen chu sawh sawk sawk a, a sawh zawh chuan silai cheng kau zui rap in ‘Sanghnap,khawnge dangawm teh, he mi tlawktlaw hi ka han sai lir tawl teh ang’ tiin a tin ta chheu mai a, pasâltha Sângtuala chuan khap in,hei chu ka chanpual a nih hi a tih tak tlat ah chuan hreh tak chuan a silai kausa chu a lek hniam ta ruai ruai a. hrumzial la dam ho pawh chu an tawlhhnung ve bawk a, an pasâltha te pahnih chu an melh tawn zauh zauh reng a.

An hmanraw in seihleih zia hria in, pasâltha Sângtuala chuan fei hawlh thui zawng ngaihtuah ran chung chuan a hnaih ta hreuh hreuh a, hrumzial pasâltha chuan a hma a pasâltha diarkhim vang chu a fei chuan a han chhun zawk zawk a, lo dan leu zauh zauh pah chuan a hnaihchilh thut thut a, chu hrumzial pasâltha chuan tawlh hnun pah chuan a fei thisen kai nuai chu a vai zawk zawk reng a, pasâltha Sângtuala meuh pawh a in veng seng ta bik lo a, a dar chu saipir chen chuan a kak haih a thisen chu a lo chhuak ta zaih zaih a, a beihpui pa hliam a hmuh meuh chuan hrumzial pasâltha chu a khi suk a, phur tak chuan hnaihchilh in a fei chu a han hawlh chhuak leh zawk zawk a, a beisei ang chuan engmah chu a thleng ta mai bik lo. Hrumzial pa chuan feipui chu a vai leh pawp pawp a, a hma a mi chuan lo khak per zauh pah chuan hnaichilh thut in a chempui chu vai ve zawk a, hrumzial pa chu te thawtin a mal chu a kak ve ta haih a, a mal kak chu melhin a baih aih aih a, hrumzial pasâltha chuan fei vai chhuah leh tum ang tak chuan a khawh chhuak ta thut a, Thûamkunga chu tê thawt in a silai chu a lek leh at a.

Fei thlawk khak per zauh pah chuan hmalam ah chuan pasâltha Sângtuala chu dawk zawkin,hrumzial pasaltha chem lekchhuak mek chu a vai nghal pawp a, hrumzial pasâltha chuan chem lo thlawk chu khak per in a tawlh nghal dawrh a, a mal hliam vang chuan dingnghet theilo in a tawlh khat khat a, a rihna hloh lai nang chingin a chempui chu a han vaichhuak zawk a, hrumzial pasâltha chuan chempui chu lo dangve mahse, thahruiah pha ngang hek lo a chempui hum chu a leng lawp a, pasâltha Sângtuala chuan chempui chu a han vai leh pawp a, hrumzial pasaltha lu chu a ringah chuan a uai hnawk in, thisen a rawn chik chhuak zuaih zuaih a, an pasâltha in nghahna a tluk takah chuan an hmelah chuan an zam tih a hriat ta khawp mai, Chûngliana chuan silai dahin a chempui chu a han lek chhuak a, hrumzial tlangvalte chu lo tangve mahse hlau leh zam chung a tang an nih vang chuan an tlu zawih zawih a, val upa Chhâwnthiaua chuan ‘Nau te u, thu zawhfiah tur pahni tal kha zuah rawh u aw’ tiin a au tuar tuar a.

Nunaute chuan an khaw tlangval te kaihruaitu Satlâk tlangvalte chu lawmthu an hrilh mawlh mawlh a, Tuklawn pasâltha Bilhluaia chuan Satlâk tlangvalte bul a râl bawh chu nuam a ti khawp mai, fanau neite chuan an zalen takah chuan an fate ngaihtuah chuan, thildang an rilrua ah a lang thei meuh lo, an fate chu sa kut a thi turah ngaiin an tap rawih rawih hlawm a, an fate him thu an hriat meuh chuan lungngaih mittui chu lawmna mittui in thlakin, an mahni chhanchhuak tu leh an tan a thih ngam lu pu a bei tute chu, zah dawnlo chuan an kuah chung chung hlawm a, nu leh fa kar a hmangaihna chu tlangval te chuan an hriatchian phah kher mai, an pasal te pawh chuan an nupui te khawsak dan chu an tha en mai a, an buaina a reh fel meuh chuan ni chu a thlengher bawih tawh a, hliam leh ruang zawnna tur hlâng siam in an phe leh sang sang a, an siam zawh chuan naupangte rilru baihvaih dan tur ngaihtuah in hmanhmawh tak chuan Khawbual lamah chuan an kal ta, thlaphang leh lungchhe tak a mittui nen tha thum tak a an kal tawhna chu, tha tho leh hmanhmaw tak chuan an kal ta zung zung a, pasâltha Sângtuala te chuan hmahruaiin khan hnai ber zelah chuan an kalpui a, hmeichhe lam hmanhmawh chuan khualval te chuan ram chin hrelo a kalpuiah ngaiin an phun sap sap hlawm a, mipa ramvachal ve lemlo te erawh chuan Satlâk pasâltha chu ring tawk tak chuan ngaihtha tak in an zui hmiah hmiah thung a.

Rilru enghelh nei a kal an nih vang chuan tumah han ti ti an awm hauh lo, a khat tawk a an in be zeuh tih loh chu an ngawi reng chuan an kal tauh tauh hlawm a, ngawpui hnuai a thim chhalh tawh tih chuan, zan an riahna hmun chu an thleng ta reng a, chulai ruam an luh dawn chuan Chungliana te chuan lo tiding in an thiante an ni tih an hriat chuan, an ni naupang veng tur a awm te pawh chu an lo chhuak sap sap hlawm a, nufa thi tur a kalsan a in ngai an han in hmu leh chiah chu, lawm vangin an in tah khum rawih rawih a. val upa Chhâwnthiaua chuan Nunau chaw kawpuar pawh ei lo a han kalpui chiam chu tha tilo in, tlangvalte chu eirel tur chuan a tir a, tui leh thing an eirelna tur an lak ngah chuan hmeichhe lam chuan, an tan a beitute chet phallo in ei chu an rel lui ta a, val upa Chhâwnthiaua chuan hmeichhia te rilru tur a dawn pui vang chuan a khap duh ta bik lo a, tlangval te chuan ramhnuai mahni se, hmeichhe eirel chu an lo thlir ve thap hlawm a, eirel an peih chuan muangchang loin zanrih chu an ei nghal, lungngai leh mittui nen a zan hun an lo hman tawhna ah chuan hlim tak chuan an che sawk sawk hlawm a, nula hmeifai deuh te erawh chuan an hrumzial thu zawhfiah tur a mante chu an chhir leh awk thin, Khawbual mipa te pawh chuan, chung an sal mante chu khawih chakin an in hum ruh rauh rauh hlawm a, pasâltha an nun thap meuh a beitute thu ngailo a chet an ngam loh vang chauh chuan kut an thlak ve lo mai chauh a ni. An mit chu fei nisela chuan hrumzial an man pahnihte chu an chik hrup ta ve ang . . .

Zan riah eikham chuan Khawbual khaw pan chuan an chhuak leh ta a, lungdawh an thlen chuan zanlai ar chu a khuang al al tawh a, Khawbual khaw kang dum huam an hmuh chuan nu thenkhat chu an tap rawih rawih hlawm a, an kal chau tlang bawk a, a remchan dan chuan an tlu zal tawp hlawm a, zanah chuan râlveng hran in dah lo chuan an hnar bawrh bawrh hlawm a, khawvar rual chuan naupangte chu harhin an thawm ah chuan tlangvalte chu an tho sap sap a. val upa Chhâwnthiaua chuan Chhippheng lam ah zualko tirin, tukthuan eikham chuan an ni pawh chu an kal ta vang vang hlawm a, tlangval dangte chu thlanlai chuan an virbuai leh ta char char a, ruang an phum zawh chuan, in din thar leh na tur chakrua la tur chuan an phe leh ta sung sung a, hmeichhe lam pawh chu an tih theih tawk inchung tur di sat chuan an buai ve mam mam hlawm a, zanriah bawl hunah chuan chak tur thing tuai pawh a vum hnuk tawh a, Chhippheng tlangval te chu buh hum phurin an lo in zui duah duah bawk a, Lal mual ah chuan a chhunna tur zem kualin an chhung khawm ruih a, chawl khawmuang lo chuan Chhippheng tlangvalte chuan in rel chu an lo tan a, thimhmul bâkchhelen hunah meuh chuan in sawm chuang lai chu an din hman ta reng a, in a han din leh takah chuan naupangte pawh chu an infiam leh nak nak a, thawm eng emaw deuh ah erawh chuan an phawk hra thung a.

Khawbual khaw tlangval leh nunaute chuan pasâltha Sângtuala leh hrumzial pasâltha inbei hmuhnawm an tih zia ngawt chu hahip in an sawi a, unau thawhthu hriat a dang tih ang nawkin, hmuchiang in ti te thusawi chu a dang nawk a, Lal fanu Darliani chuan pasâltha Sângtuala chu zanriah eikham chuan meipui hnungpuak pah ar ar pah chuan, a nu an chhanchhuah sak vang chuan lawmthu a hrilh a, a tan tih sak theih a nei a nih chuan engkim a huam thu sawi in awmze nei tak chuan a sir ralh a, pasâltha Sângtuala chuan ‘ Lal fanu, midang te vang chauh a thang that hlawh ve chauh ka nia sin, kei mahin engmah tih ka nei hauh lo, kan zavai tan tlan vang chauh a hlawntling kan ni e,heng tlangval tlawmngai leh huaisen tak takte vang chauh hian a sin,tun hun a kan la in hmuh theih’ tiin Lal fanu mitmeng chu a haider sak luih ta tlat a, Mualkunga leh Chhippheng Lal fanu Lianmawii pawh chu in haw lo tih hriat tak chuan an in det zak zak reng a, pasâltha Sângtuala chuan a nau hlimna a hmuh chuan a lawmpui rualin a khawngaih lawk khawp mai, an thlen thui hma a eng emaw tih a ngai tih hriaiin, a nau chu inthiar tur chhuanlam chuan a hruai hrang ta a.

Mualkunga chu a khi sang reng in a tan chuan khawvel hi a parmawi a ni, a thil hmuh reng reng chu siamthar ang diak vek a ni mai, Mualkunga chuan hlim tak a khi sang chung chuan k’u Sângte, ih englo hrilh tur che ka nei a sin tiin lungte chu a chhuih lir bap bap a, han sawi la engthil nge ni ta tiin vanlam chu a han thlir chho vang vang a, thlade tir seki van chu thlirin pasâltha Sângtuala a chu a thaw ham ham a, Mualkunga pawh chuan thlade tir thlir dauh dauh pah chuan ‘khi thla de chu a va mawi danglam tak em, khi ai a mawi leh duhawm zawk ka lungphu ti danglam vek thei khawp a duhawm leh hmeltha nunnem ka hmu a, min iai bik lo a sin’ tiin a vaibel khu chu a han chhem leng dalh dalh a, pasâltha Sângtuala chuan ‘Chhippheng Lal fanu tlumber Lianmani kha maw ? ka lo hre ve a sin, chuvang tak chuan a lawm zan in a ka sawmna chhan che chu, Lal chhungkaw ze chhia leh chapo ru tak te, vantlang zing a hmingtha leh in phenna tling ringawt in, Lal a hmin zawh loh zia sawiin, Lehlawn khaw Lal Zamloan a tawng khum dan zawng zawng leh a pa ngei pawh mualpho tak in mi zing a siam dan te sawiin, an kal thui hma a rilru sawh sawn tur chuan duhsak tak chuan a hrilh malh malh a’ a mah hmangaihna aw ka chu Mualkunga chuan a hrethiam khawp mai, Lal fanu Lianmawii chuan a thinlung a luah nasat tawh zia hriat tak chuan Mualkunga hmel chu a thim ta khap a, pasâltha Sângtuala chuan a nau chu a khawngaih ru khawp mai, a hunlai a hrilh a nih loh chuan a hnu lam tur thim zia a nau chuan a hre lo tih a hmu chiang kher mai.

Pasâltha Sângtuala chuan a nau chu lainat tak a melh vang vang in ‘ka nau,ka thilsawi hi tun a tan chuan a na ang tih ka ring, mipa takin Lal fanu chu theihnghilh ang che’ tiin a fuih leh mawlh mawlh a, Mualkunga chu a han ngawi vang vanga, rilru tawt tih hriat tak chuan ‘ka u, i thusawi hi tun a atan chuan a na rih em a, ka theih ang tawkin Lal fanu chu ka inthiar fihlim san a nge, kei fahrah tan chuan an sang lu deuh a ni, mahni dinhmun theihnghilh rawk khawpin ka lo kal hman tep a lawm, engkim tha tak a min hrilh avangin ka lawm e’ harsa ti tak chuan a ti chuai raih a, pasâltha Sângtuala chuan ‘ ka thusawi i hriatthiam vangin ka lawm e, khuanu zar ah tum tawk leng zawng an bo lawng e, i hmel a lungngaihna kha a theih chenah thup tum ang che aw, hmeichhe pakhat leh thing pu khat chu kan vai biklo turah ngai ang’ tiin Thuamkunga darah chuan a ben sak thap thap a, ngawi reng in meipui chhehna lam pan chuan an in zui a, Lal fanu Lianmawiin Mualkunga a hmuh chuan a tlangvalte fiamthu thawh a nui saih saih pah chuan a lo det sak sak a, a ni Mualkunga kun deuh chal leh ngawichawi ta riau chu a hmuh hmaih hauh lo. Lianmawii chuan hun remchang chu zawn vat tumin, Mualkunga chu a dawnlung ruk hrilh ngei tum chuan hun fal a neihpui theih dan tur ngawt chu a ngaihtuah ta tluk tluk a.

Ni sarih lai Khawbual khua an cham hnu chuan in te pawh an din thar zo leh ta, zan lamah chuan Khawbual khaw mipa ho chu pasâltha Sângtuala te chuan râlbeih an zirtir zan tin a, an ni pawh chuan râl beih chu an thiam ve ta khawp mai, Satlâk khaw tlangvalte chu an hrechiang deuh deuh a, khawdang tlangvalte chuan an chung en tawlh tawlh thung a, tlawmngaih leh huaisen na lam ah te, ai upa zahna lam ah te pawh chuan khaw dang tan chuan an ni khum chu van a lawn tum ang chauh niin an hre ta hial a, an hliamte pawh tunah chuan dam kim tawhin mahni khaw lam a hawn zai an rel ta a, an hawn dawn zan chuan Khawbual Lalpa Tuanpara chuan mittui far zawih zawih a lawmthu sawiin, an puihna zawng zawngah chuan lawmthu sawiin, khaw hrang hrang ho khawm tu Sâtlak khaw chungah chuan lawmthu chu uar tak chuan a sawi a, an Lal te tan darkhuang chu a thawn theuh a, a lawmthu sawina chu beitham mahse laksak hram tur a, a tahawh chuan an ni pawh chuan lawm takin, Lal thilpek chu an la ta hram a, a tuk lamah chuan Khawbual chu an chhuahsan dawn ta, an thian thenkhat mualliam ta te vang chuan khaw lawi luh chu an hreh ru viau a, Khawbual khua te chuan an mahni chhanchhuak tute chu a bobang awm hauh lo chuan lungdawh thleng a thlahin, mittui nen a lawmthu sawiin an vai liam ta a, tlangval tuaitir râl vawikhat bawhna a tel te tan phei chuan an nun bul tan dan chu duhthusam a ni chiang kher mai, hnehna nen an vangkhua an lawi thei dawn a, an tan chuan chutiang bak a duhthusam a awm chuang lo, pheikhai zang vah chuan an kal a, an râlthuam man chu in zah semin, silai pawh khaw tin chuan sawmhnih tha lam mah chuan an hung hawng hlawm a, an Lal te hmuh hlan chu an nghakhlel kher mai, sawmthah ni ah vaikhat lungngaih a awm tih chu tawng in, an thian famchang ta te erawh an rilru ah an cham reng thung, tumah chuan thu lungchhiat sawi chhuah erawh an duh bik hauh lo thung a.

Satlâk an thlen chuan Lalnu Thanthuami chuan vawk leh sial talh in an hnehna chu a lawm sak a, khual tlangval te erawh chu buh luchuh a hun tan tawh vang chuan, a tuk lamah chuan an khaw lam pan chuan an chhuak leh ta, remchang hmasa ber a in tlawh leh tur chuan an in mangtha ta hlawm a, thihna ruam zawh hnu an han in then darh chu an khua pawh a har ru kher mai, tukthuan ei turin Lalnu Thanthûami chuan pasâltha Sângtuala chu koh tirin a ni chuan a hreh ru kher mai, Lal kohna hnial erawh chu a tum biklo. Pasâltha Sângtualan Lal in a thlen chuan khawnbawl upate chu an tin ta, val upa Chhawnthiaua pawh a lo thleng ve nghal a, a mi sawmte an lo thlen chuan chaw ei siam in, eng emaw sawi chuan Lalnu Thanthûami chu a ti ti siam siam a, hlim tak chuan tukthuan an eikham hnu chuan zufâng dawm chung chuan an thu bial taih a, Lalnu Thanthûami chuan ‘khuanu zarah mi tam zawk chu him takin in lo hawng a a lawmawm khawp mai, puih ngailo a kan la awm chhan chu nang ni tlawmngai te vang a ni a, pi/pu chen a kan nunmawi hi chhawmnung zel turin ka duh che u a ni, nangni vang hian thangthat he Satlak khua hian a lo hlawh tawh a, chhehvel khaw tan pawh huphurh awm tak kan ni ta, in ngaltha hahna ah lawmthu ka sawi tak meuh meuh a ni, a hming a Lal dinhmun han luah ve takah chuan a lawmawm leh zual a’ tiin a han ngawi dat a,zufâng chu a han tem hlek a.

Ka vahnu awmdan hi in la hrelo a ni mai thei a,thilsawi nuam erawh a ni thung hauh lo tiin hnuai lam bih chuan a kun ran a, Lalnu thusawi ngaithla tute chu an in melh zawk a, hlauthawng tak chuan ‘Lalnu engtin chiah maw Ngurpuii chu a awm ‘ tiin an zawt rual thawt a, Lalnu chuan pasâltha Sângtuala melh vang vang in ‘ka vahnu taksa hliam tawrh chu a dam ngei a, a rilru erawh a dam ve ta lo a ni, ka nuta pa chetdan chuan a rilru lamah a thalo lam a thawkin rilru na vangin, mi pangngai a pha zan lo a ni, hmangaihna chu nat puiin a khum a chhuah san thei ta meuh lo a, khum a chhuah san lah chuan ven ngai a ni ta tlat a, Ngurpuii chuan Sângtuala hming chu a nat lai atang chuan a lam chamchi a, a pa lah chuan a fanu in a duhna lam a bawhtlang tumna lam ah a puh sak hmiah mai bawk si a, Bawlpu chuan ka nuta pa bulah chuan sawi thin mahsela, a fanu duhna lama tangah Bawlpu pawh chu puhin a hau zui hrep a, Bawlpu thinrim chuan i fanu chungah hian mawhphur ang che a tiin Lal chu a chhang ve ta hial a, a lang lam hliam chu dam tawh mahse Ngurpuii chu a ngawi tlat mai a, a inthiar duh chang chuan ngawi rengin a kal a, nula pangngai tih duh loh ang chuan a inthiar mai thin, a tir lamah chuan a pa chuan kut a thlak thin a, ni li/nga a liam meuh chuan Ngurpuii chu a mah chuan a phun mawlh mawlh thin a, a bul hnai a an kal hnaih erawh chuan a ngawi daih thung a, ni sarih a vei meuh chuan Ngurpuii awmdan chu mi pangngai nun a phalo tih a pa ngei pawh chuan a hrethiam tan ta, zanlaiah te chuan a mah chuan a phun mawlh mawlh thin a, a zan mu lai hi ‘ Sângte min lo nghak rawh, ka pa awm loh hunah ka lo kal mai ang’ ti tein a lo te chhuak thut thin’ tiin a puan hmawr chuan a hmai chu a hup in lungchhe tak chuan Lalnu Thanthûami chu a in hnit hlawp hlawp a.

Pasâltha Sângtuala chu a thu hriat chuan a thawng kher mai, a mah vang a chu tiang khawp a tuar nasa tu an awm tih a hriat chuan pawi a tiin hrehawm a ti kher mai, thaw pui chu la hawk in, a mittui chu a khap per chhak chhak a, Lehlawn Lal in khawhnih tlangvalte infiamna tur a buatsaih chhan awm te rindan neiin , Lalpa Zamloa huatna chu chhung lamah chuan a so ta balh balh a, chutiang a fate awm tawh pawh a luhlul chhuah tlat chu mak a tiin, chutiang khawp a mihring chapô chu rapthlak a ti hial a, nunna chhan nan chuan nu leh pa chu an phe dawr dawr a ni ngai a, a thinlung luahtu chu a rang thei ang ber a hmuh tum chuan a rilru siam in , Lalnu chu tiang a nih chuan Ngurpuii hmu tur chuan ka han kal ve teh reng ang, tih theih nei dawn lo mah ila tiin a tho nghal a, val upa Chhâwnthiaua pawh chuan thawh pah in ‘ Lalnu min hrethiam la, kan pasâltha chu ka han zui ve a nge tih pah chuan pawn lam pan tum chuan a in her nghal a, Lalnu chuan ‘ka lo rin lawk ang chiah, in inpeih hun ah min lo sawm dawn nia, kei pawh ka lo kal ve duh e’ tiin an in thlah ta a, a inleng te an chhuah chuan Lalnu chuan inchhung tihfel ngai ti fel zung zungin a insiam nghal thuai a . . .


Lo tawk phawt tehse ka theih ta, coment leh like tute chungah lawmthu ka sawi e

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 16th, 2018, 10:11 pm

PASÂLTHA SÂNGTUALA ( Mampuia pa )

BUNG – 134

Tlangau pa chu hmanhmawh tak a lo lutin ‘engti zai zia nge ni ta, kan pasaltha chu a va lung nih loh hmel ve’ tiin Lalnu Thanthûami chu a rawn zawt luam a, Lalnu chuan ‘eng ni dang lo e, ka vahnu Ngurpuii damsam lo leh thut ni awm in zualko hmel kan hmuh takah chuan Lehlawn lam kal kan ngai dawn a, ka khawnbawl te min han koh sak ta che’ tiin a lo chhawn thuai a, tlangau pa pawh hmanhmawh pheleng a chhuakin khawnbawl upate in chu a luhchhuak thuai a, an ni pawh chu an lo lang nghal thuai hlawm a, chanchin hriat chian chak chuan Lalnu chu an thlir thap a. Lalnu Thanthûami chuan ‘ka upate u, ka vahnu dam lohna hi rilru lam nâ a nih vangin a tlangthang lo zawng hlir in kan kalpui lui a, in hnenah tak ngial pawh sawi lo in ka up bet tang tang a, zepnak loh ah chuan, ka pasâltha Sângtuala chungah hian a pa rilru a sak tlat a, khual kai a khuandim a tirh liam ngei tumin thu a thlung lui tlat mai si a, a fanu chuan a tawrhphah ta a ni e,mihring kan in chân pawhin ka ring niau lo e, Ngurpuii chu tunah chuan mi â a ni hawt tawh a, ka unaupa lah chuan a rilru sawh sawn a tum chuang bau lo nen, kan chhungkaw boruak chu rit tak a ni’ tiin a hui pap pap a. ‘zanthum riak emaw chauh in Lehlawn khua han tlawh ila tiin ruahmanna kan lo siam a, ka awm loh chhung chu khua hi tlawmngaiin in lo enkawl leh mai a niang chu, nangni in awm chuan ngaihngam takin ka awm thei thin si a’ tiin a mittui a khap per chhak chhak a.

An thu hriat chuan a barakhaih em vang chuan Satlâk khawnbawl upate chu an ngawi thap a, Pu Tawnliana chuan ‘a va han pawi lungrun tak em, Ngurpuii chu kan chân mai ang tih a hlauhawm khawp mai, kan zing atang hian pahnih emaw tal chuan lo zui ve che ila tha ka va ti ve aw’ tiin a ngawi ta daih a, pasâltha Lianmana pa chuan ‘kei ka kal a nge, Laiawrha pa nang atan chuan kal a rem tuai lo deuh si a, khawchhung hi in lo uap mai a niang chu’ a han ti charh charh a, Thûamkunga pa chuan ‘in kaihza ka rawn veng ve a nge, kan tlai hmain kal vat ila a tha a nge’ tiin khawnbawl upa pahnih te chu an in zui chhuak ta nghal a. Pu Tawnliana chuan ‘Lalnu min hrethiam a niang chu, kan fate taksa chu thunun thei mah ila, an rilru erawh kan hneh thei lo chu a nih hi, hetiang hi a thleng ang tih hria ila Satlâk hi kei ni chhung hian kan lawi hauh lo tur a nia, Ngurpuii min ngaidam rawh aw’ tiin hnuailam chu a bih ran a. Lalnu Thanthûami chuan ‘ Laiawrha pa, tu thiam loh mah a ni lo e, hmangaihna hian thliar bik a neilo a, kan mihring ngaihdan mai hian dai dan kan siam lui mai vang chauh a heng thil hi lo thleng a nih hi, ka pasâltha Sângtuala tluk a mâkpa awhawm hi van hnuaiah hian an vang ve viau ang, Ngurpuii pawh hian a thlangsual hauh lo . . . engpawhnise, he lai a thu sawi vak leh mahni kan lo inthiam loh hian sawtna pawh a neih loh hi, kan han kal a nga, kan tha tlang turah ngai ang u’ tiin a han sawi ve dap dap a. Lal te an la ti ti lai chuan val upa Chhâwnthiaua leh pasâltha Lianmana chu an lo inzui lut a . . .

Rilru a veinei sawi chhuak lo chuan an thu tak run hlawm a, khawnbawl upa kal ve tur te an lo thlen chuan hmanhmawh tak chuan an chhuak nghal a a, tlangvalte sawmnga tha lam mah te chuan lungdawh ah chuan an lo nghak thap tawh bawk a. tum dang ang lo tak chuan an kal ngawi nghial hlawm a, Mualkunga chuan Chhippeng Lal fanu Lianmawii chungchang a duhsak tak a thu hrilhtu pasâltha Sângtuala chu a lainat kher mai, bulah chuan ngawi rengin a kal in, Mualkunga rilru chu a vakthui kher mai, chhungkaw dinhmun ah pawh zahawm tham an nih vei nen a ni tluk a mâkpa thlan naawm zawk an van awm vei nen, Lal Zamloa chuan eng vang a pasâltha Sângtuala chu hnawl lui tlat nge a nih ang le tiin a lo ngaihtuah ve nasa mai a, tlangval dangte pawh chuan Mualkunga ngaihtuah ang chiah chu an ngaihtuah na a ni, Satlâk khaw daingul han hmakhalh thein tur awm chu an hre bik tlat lo a ni, Lehlawn Lal Zamloa chuan eng tak chu ngaihtuah ang maw tiin an ngaihtuah nasa hlawm kher mai. Engpawhnise, Lal fanu zawk chu a bul tan tu a nih zia an hriain, an pasâltha in an nun leh khua ngei pawh a lo chhan chhuah sak tawh thin a ni si a, chung thil an ngaihtuah phei chuan Lal Zamloa chu an haw ru tham hlawm a, eng emaw zawng a thu kal fuhlo a awm a nih chuan tiin an rilru pawh an siam sauh sauh a.

. . . . . . .

Lenghawn ar a khuan chuah chuah lai chuan Ngurpuii chu fiah tak hian a lo tawng chhuak in ‘ Sângte in lo va thleng tlaive, ka ngai tawh lutuk che a sin’ tiin a han tawng lauh lauh a, a bul a thu a nu chuan ‘Mamte engmaw i sawi , Sângtea te chu an lo thleng tep tawh ang, nula pumpa in phihfai loin in i mu reng ringawt a, tho la va in ti fai tawh ‘ tiin mittui nen chuan a thu tui par reng a, Sialai Lal fapa Ngamliana chuan Ngurpuii chu in ti ta takin ‘ Ngurpui duh i nei a mi, mamawh i nei a nih chuan sawi hreh hauh suh aw,i tan kei leh ka tlangvalte kana wm reng a nia’ a han ti thur thur a, Ngurpuii chu tui deuh awm hian a mu zawi leh ta reng a, Bawlpu chuan Lal fapa khawngaihin lo awm sawn rih teh , kan damlo hi biak buai vak a rem rih lo a nia a han tih chuan, Ngamliana chuan ‘ka nupui tur damlo chu a engvang in maw ka kalsan ngawt ang, kha lai atang khan lo buaipui tha hle hle la ti nia’ a ti hlur a, Lalnu chuan ‘i nupui tur a nih tun kan hai hleinem mawle, a buaipui thiam chu lo kian tha hle hle la ti nia’ tiin Ngamliana chu a melh ta kal a, Lalnu thinrim hmel a hmuh chuan ‘ ka pi, lungloh ah la lo hram teh Ngurpuii hi ka ngaihtuah em vang a nia, i huatthu sawi ka tum hauh lo a nia’ tih pah chuan Bawlpu chu mitmu rang lang khawp chuan a han melh tur khui a, hreh tak chuan an piah ah chuan a thu ve ta hram a, Bawlpu chuan a thiam tawk chuan a han buaipui mahse that lam a pan thei meuh lo.

A fanu awmdan vang a in thiam loh chuan Lal Zamloa chu zu ah tuanin a rui chhu reng a, a nupui lah chuan a pasal awmdan chu hua in biak pawh a be ngai meuh lo, khawnbawl upate chuan Lal Zamloa chu a fanu pasal neih chu thul leh mai tur a an sawipui chuan, Lal chuan a vin hrep mai thin vang chua tumah chuan an sawipui ngam tawh lo a, Sialai Lal fapa lah chuan thang that lak tum tak chuan eng emaw deuh ah a che thur thur reng a, a tawngkam chuan khawnbawl upate chu ngaitheilo tih hriat tak chuan a khak fak fak reng a, pasâltha Sângtuala chu Lehlawn khawnbawl te chuan an ngai vang vang hle mai a, a ni chu lo kal thei sela chu mikhual chimawm chu engtin emaw tih dan a hriat an ring ru tlat a, Lal hriat loh chuan khawnbawl upa leh tlangvalte chuan an Lal makpa tur khawsa zia chu an sawi ru fo a, pasaltha Sangtuala chu a ruk a chah mai chu an duh ta hial a, Satlâk lalnu chu a rukin an chah a lo ni a.

Lehlawn khaw nula tlangvalte chuan Lal fanu Ngurpuiin hniam lam a pan tih an hriat chuan, Lal mualah chuan an bawr khawm tuih a, nula tlangval awmkhawm mahnise tu mah bengchheng an awm hauh lo, Lal Zamloa khawsak phung mak an tih zia leh Sialai khaw Lal fapa khawsak phung an huat zia chu an sawp sap sap a, Sialai Lal fapa hnungzui pasâltha Hrangzika an tih phei chu an haw zual khawp mai. Lehlawn nula a chhawnchhaih dan chu tlangval te chuan ngaimawh viau tawh a, Lal mitmei an ven vang chuan an la insum hram hram hlawm chauh a ni, hun remchang a awm vaih chuan dim an tum lo khawp mai. Chutia Lal mual an thut thup lai chuan lungdawh lam a tang chuan meichher hi a lo de thluah thluah a, an rilru chuan pasâltha Sângtuala te ni hlauh sela aw tiin an ngaihtuah rauh rauh hlawm a, tlangval ten meichher lo chhite an hmuh chian chuan an hlim lutuk chuan bawp chu beng thleng thleng chuan an khai zawk zawk hlawm a, thawm erawh an chhuah ngam thung lo. Lehlawn tlangvalte awmdan atang chuan Lalnu chuan thil awmdan awm chu hrethiam in, eng emaw tak buaina awm a ring nghet ta bur a

Pasâltha Sângtuala pawh chuan tlangvalte en dan a tang chuan eng emaw a thlen ringin a in sang phek ru nghal at a. Lal Sumhmun an thlen chuan Lalnu Thanthûami te hmakhalh chuan tlangval pakhat hi a lo ding chat a, chu pa chuan in ti thunei tak aw hian ‘khawi khua te nge in nih a, Lal fanu kan tur a lo kal in niang chu maw ? tiin din sawn tum hauh lo chuan a lo melh khuih a, Lalnu Thanthûami chuan ‘dangawm teh ka lo lut ve lawk a nge ‘ tiin tawngkam pangngai tak chuan a chhang a, chupa chuan ‘aw ka zawhna chu min chhang tha ve mai la ti nia, khawi khua te nge in nih ? tiin awki sang ang reng tak chuan a han chhang a. pasaltha Sângtuala ngaihdan a ni ta hauh lo, rilru tawt sa a kal an ni nen ‘thiana kalsawn rang rawh, eng ti tur a kal kan nih chu i hnen a kan sawi kher a ngailo e’ a ti dam thlap a, Lalnu Thanthûami kal pelh pah chuan ‘ Lalnu dangawm teh, he pa hian nunphung tha zawh a duh lo a lo nih dawn hi’ tiin a rawn pel nghal thuak a, tim eih lo chuan a han su per nghal nawlh a, inchhung ah chuan pasâltha Sângtuala chu a pen lut nghal var a.

A mah rawn su per nawlhtu chu thinrim tak a melh khuih in ‘nang khual val mawl satliah hian,Sialai Lal fapa Lehlawn Lal mâkpa ni mai tur zawhna i chhang lo vei ang maw, i duh tak tak elaw’ tiin a kut chu a lek uaih a. a hma a mitmeng a hmuh chian meuh chuan Lal fapa chu kut lek uaih chuan a ding zum ta reng, Lal Zamloa chuan Sialai Lal fapa Ngamliana aw ki sang vin tuk lam chu hawiin, engthil nge ni ta tiin a han hawi phei a, a farnu a hmuh chuan ‘e ka farnu lah ni reng in, kan chanchin hria a lo kal inni phawt ang maw ? tiin a thle bar bar a. Lal fapa Ngamliana chuan ‘ Satlâk khaw mi leh sa innih vangin tun tum chu ka ngaidam ang che, i chet dan i fimkhur hle erawh a ngai ang’ tiin pasâltha Sângtuala chu a han vau zui hram a, thinrim mitmeng sen ram chuan melh in ‘i ngaihdam ka ngailo, fimkhur hle zawk ang che, Lalnu hi vawikhat pawh i melh he leh a nih vaih chuan i nasa lo hle ang’ tiin a hma a mi mit tak a melh in a chhang chang fal a , a cho loh val a tawng tih hria in a in nghahna Hrangzika chu a melh kual ruai a, a hmuh tak mai loh ah chuan hreh takin khumai lamah chuan a thu ta ruai ruai a. Satlâk valrual te chu inchhungah chuan an lo in zui lut ta thluah thluah a.

Nunna neilo awm tak a mu dângbai leh heh hil bal mai te, engmah hre lo tih hriat a kut vai leh zauh thin te Lalnu Thanthûamin a hmuh chuan a insum zo lo in, ‘Ngurpui ka va lainat tak che em, hetiang khawp hian a ni maw i lo tawrh, eng vangin nge min hril ve loh a, harsatna i tawh chuan min hrilh turin ka chah che a ni lawm mi Ngurpui’ tiin a tap ta tlawk tlawk a, a pasal leh khual valte chetdan a thin tawt lutuk tawh chu insum theilo in, Lehlawn Lalnu chu a tap ve ta a ‘ Ngurpui i ni te chu an lo thleng tawh asin, i mangan na chu hrilh vek tawh rawh, kei hian pui theilo che mah ila, Satlâk tlangval te chuan i tan engkim tih an huam a ni lawm mi ? hei i bul ah an awm tawh a sin, i mangan na zawng zawng chu hrilh rawh le’ tiin a tap ve rawih rawih a, Ngurpuii nu tah hla chuan an chanchin hria te chu a vel a ni ber, pasâltha Sângtuala chuan Ngurpuii kut hmawr chelhin ‘ Ngurpui lo harh teh, min kalsan suh aw i tello chuan nun hian awmzia a nei lo a sin’ tiin zawi te te chuan a be sap sap reng a, an Lal fanu nunnem leh zaidam thifahnukchat a awm tawh hnu pawh a, rilru sawhsawn duhlo leh zu ngawt buaipui tu Lal Zamloa an huatna chu a so sang deuh deuh zel a, Lal Zamloa vang a Sialai khaw tlangval ten an chungtlak nate chu Lehlawn tlangvalte chuan an la na thar khawp mai.

Ngurpuii chu chauh tak hian a rawn meng siar siar a, a bul a mite en kualin ka nu ka ril a tam lutuk tiin zawite in a han sawi a, a nu chuan Mamte lo nghak lawk rawh aw, chawhmeh ka han tisa lawk a nge tiin a tho nghal thuai a, an nupui tha tho leh hmanhmawh tak phe zung zung a huh chuan, Lal Zamloa chuan, engnge i tih dawn i va hmanhmawh hmel ve a lo ti khur khur a, Ngurpuii awmdan a hriat chuan a ni pawh hmanhmawh tak chuan a pai phei tuang tuang a, pasâltha Sângtualan a fanu kut chelh a hlim tak a an innuih lai a hmuh meuh chuan ding chawt in ‘nang zaktheilo nu, kei i pa hi min bum theih i ring a maw, i zahtheih loh luatah i lo na der lek chu niin, min tih zah dan reng hi i va chaklo rua em’ tiin a fanu kut a man in a phih ta lawp a, Ngurpuii kut ruh chu a ri bap a, Ngurpuii chu zawite in a han te zui that a, khum atang a tla chu pasâltha Sângtuala chuan lo dawm in a pawm kang nawlh a. Lal Zamloan a han phih leh tur chu a, val upa Chhâwnthiaua chuan lo chelhin Lalpa a tawk tawh e, i fanu hi tharum hmang a nawr chi a la ni lo e a han ti dam thlap a.

Lal Zamloa thinrim te ri an hriat chuan Sialai khaw pasâltha Hrangzika chu lo kal thawr thawr a, val upa Chhâwnthiaua tuk sam a tham sak in a han phih dak awrh a ‘Lal kut i thlak vei maw i va han zak theilo em em ve’ tiin beng chilh rawp chuan a han chum a, val upa pawh a awp hnawk in a tukhum a ri leh bur a, val upa chu engmah hrelo chuan chhuatah chuan a let hlawm ta reng a. Laiawrhan khualval che lai a hmuh chuan a dawk chhuak zawk a, Sialai pasâltha Hrangzika lo hawi chhuak chiah chu a khabe kualah chuan a han lawk bur a, bang deng rawk chuan a leng phei dawrh a, Mualkunga leh Thûamkunga te ho pawh lo dawk zawkin, Sialai khaw pasaltha chu an ching ta nawk nawk a, an thelh fel mauh chuan a hmai chu a duk thluah a, a hmui leh hnar atang chuan thisen chu a hnam tiam tiam a, chu tia an rik tak luih ah chuan Lehlawn tlangval te chuan an mahni chung tlak tu, khual tlangval an hmuh theih ang chu an vaihma ta hmiah hmiah a, tlangval thinrim te chu patling deuh te chuan thelh in, an thelh fel meuh chuan khualval te chu mahni a ding thei a ram an awm lo, an Lal an zah vang mai a him an nih an hriat meuh chuan an harh tlai thelh a ni.

Lal Zamloa fuih tum tak chuan ‘E he, Lal inchhung meuh pawh zah lo in buaina insiam vei maw, in va han zak theilo lulai ve maw le, in chaklo khawp ang’ tiin Sialai Lal fapa chu a au tun tun a, pasâltha Lianmana chuan ‘buaina ti alh tu chu nang hi i ni, val upa khan Lal kha tha takin a chelh satliah a, i pasâltha khan kut a va thlak a nih kha, chu thilah chuan Sâtlak te hian mawhphurhna kan nei maw, engthil maw kan hriat tur chu ? kan lo thlen tirh atangin kan Lalnu chung a i chetdan kha tun kan hai hauh lo, buai i duh a nih hrim chuan lo kal teh’ tiin a tuk samah tham in pawn lam a hnuhchhuah tum chuan a phih leng nghal dawrh a, mi dawihzep leh vaupung ti na tak Sialai Lal fapa chuan, Lehlawn Lal kawng khar biang vuanin a tang nasa mai a, Lehlawn tlangvalte chuan chu Lal fapa chimawm zet chu pawh chhuah tum chuan a rem lai laiah chuan an lo piai liam liam hlawm a, a tan tak tlatah chuan a remlai laiah chuan an chhir zawt zawt a, pasâltha Lianmana chuan thil a fel dawnlo tiin inchhung lamah Sialai Lal fapa chu a nawr lut ta zawk a.

Tlangvalte an rik luih luih lai chuan pasâltha Sângtuala chuan a hmangaih Ngurpuii chu a lo au ve mawlh mawlh eng a, Ngurpuii thaw chu a zawi telh telh in pasâltha Sângtuala chuan hlauthawng tak chuan ‘ka pi, Ngurpuii awmdan a tha lo a nia’ tiin biang a mittui luang nguai nguai chuan khum ah chuan a han mut a, pasâltha Sângtuala chuan Ngurpuii chu a ko mawlh mawlh reng a, a thaw khat tial tial a hmun chuan a kut ah chuan chelhin ‘Ngurpui tang fan fan rawh aw, i dam ve leh kan innei dawn nia, tuman min dang thei hauh lo ang Ngurpui min kalsan suh aw’ tiin a mittui chu a far zawih zawih reng a, Bawlpu chuan a thiam tawk chuan a buaipui mawlh mawlh reng bawk a, thlantla phung leh beidawng tak chuan a bul a pasâltha chu melhin ‘mihring kan inchan zo in ka ring lo ti khan a kut ah khan chelh la, lo ko mawlh mawlh mai rawh aw’ a ti zawi sap a. Ngurpui chu fiah tak hian a lo meng kawk a, pasâltha chuan hlim tak chuan a lo nuih in ‘ka tih reng kha, he natna hi i hneh dawn a lawm, i dam ve leh tu ma pawh then rual loh in kan innei ngei ang’ mittui luang zawih zawih chuan a han ti a, eng emaw sawi in Ngurpuii chu a phun sap sap a.

Bawlpu chuan kun hniam tur a zaizir in pasâltha Sangtuala chu a kun hniam thuai a, fiah leh zawite hian ‘Sângte min ngaidam rawh ka tlin tawh ngang lo a ni e, ka kalsan hnu che chuan kawppui lo nei la hlim takin siam ngei ang che aw, pialrâl ah chuan kan innei tawh thung dawn nia, hlim takin lo awm la hringlang tlang a tangin ka lo thlir thin dawn che nia, min han hrechhuak ve thin dawn nia ka hmangaih’ ti a sawi in, a thawchham chuan a ka chu a han ang leh chap chap a, a kut chu khumah chuan a nghat riai riai a, pasâltha Sângtuala chuan ‘Ngurpui min kalsan suh aw, i tello chuan dam ka zuam lo a sin lo kir leh rawh’ mittui luang zawih zawih chuan a han ti a, a hmangaih aw pawh chuan Ngurpuii chu a ko kir zo ta lo,rihsang kaiin pialral lam pan chuan Ngurpuii rauthla chuan a taksa chu a chhuah san ta, Lalnu te pahnih chu an hmangaih a liam meuh chuan insum zo lo in rawl tawp chuan an tap ta tuar tuar a, Lehlawn Lalnu chuan a fa neih chhuh hun lo tak a a chan ta mai chu tuar thiamlo in, Lalnu chu a tap hnang ta hial a. khumpui lamah chuan an zawn phei thuai a ,hun eng emaw chen an buaipui chuan a ni pawh a lo harh ve leh ta, a fanu a hmuh mai loh vang chuan a tho nghal thuai a, a pasal lo thu sawp nuaih a hmuh chuan Ngurpuii nu thinrim chu a alh chhuak phat a, a kut zungtang chuan a iu ren rawn a ‘Nang kha tho la, ka fanu ruang saw va en teh, vanglai hmang hmanlo in a liam tak saw, nang chapo leh hrawkhrawl pa, i duh ang ngawt a kallo tur a ka ngen lai che khan ka thu chu ngai ve ni la, tun ah hian Mamtei hi thlamuang takin kan zingah a la awm tur a nia, ka fanu damlai khan a thlavang tak ngial pawh ka hauh ngam lo a nia, eng nu nge maw ka lo nih chu le ? kut thlak kha i duh ti raw, lo kal la i duh tawkin va nghaisa ta che ‘ tiin a thinrim lutuk chu a khur zawih zawih a.

Lal Zamloa chu chechang lo chuan a thu kun ngur reng a, ka thusawi chu i hrelo a mi tenawm pa tih leh a theih dan dan chuan kut chu a thlak ta bawrh bawrh a, Sialai Lal fapa chuan ‘ka pi, Ngurpuii kha Satlâk ho dawi vang a kha tia awm kha a niang, Satlâk khua an lo thlen ve leh a khatia a awm thei kha mihring tih theih a ni hauh lo, ka pasâltha te ka chah a nga, Satlâk khua chu kan hal darh leu mai tur lah niin, Ngurpuii hi awm tawh lo mahse, kei ka dam chhung chuan Lehlawn khua chu ka peizawn ang che u, lungngai duh reng reng suh u, tu khaw hnuaiah mah in kun hauh lo ang’ a han ti leh zut zut a. Dawi hmang khua a puh chiah chu Lal nu Thanthûami chuan a lo ngai thei bau lo mai chu niin ‘Nang pui zet zut kha, engvang chuan nge ka vahnu chungah chuan dawi kan hman teh lul ang le, tu ber hian nge ka khua te zingah dawi chu lo hmang reng reng a, i sawi chian loh chuan ka lawm lo hle ang’ tiin a tho chhuak ve nghal tharh a.

Pasâltha Sângtuala pawh lo tho in ngawi reng chuan Sialai Lal fapa chu a pan ding nalh a, zawi sup hian ‘ dawithiam ah min puh a maw, nang mi tenawm tawng thlah dah vang hian a ni lawm mi Ngurpuii chu a liam tak, lo inring rawh le’ tih pah chuan a kut chu a thlawk chhuak nghal fua a. Lal fapa Ngamliana tawng tum ang zuai lai khabe ruh chu a ri sawk a, puan chhe paih ang dawrh chuan leng lawp in,Lal char ban deng dawp a in tauh bur a, a lu hai pai deuh chhah chu pasâltha Sângtuala chuan hnaih chilh leh in a kut chu thlawkchhuah leh zawkin. Sialai Lal fapa ha hmai pathum chu a leng chhuak thawt a, a han ching zui leh tur chu val upa Chhâwnthiaua chuan dangin ‘ka nau, in ngaihtuah harh rawh, Ngurpuii thlarau pawh a zahawm lutuk a lawm le, buaina duh ngailo a nih hi’ tiin a khap ta, pasâltha Sângtuala chuan in thiam loh tak chuan a hmangaih mutna lam chu a pan ta hna hna a.

Lo tawk phawt tehse , Net that laiin ka han dan leh thut mai teh ang. Rilru a lut theilo tlat mai . . .chhiar tu ten thawnthu a nihna min hriat sak reng ka duh, tlem a u chuak deuh a nih pawhin . . .

Like leh Coment tu te chungah lawmthu ka sawi mawlh mawlh e, Nangni vang a he tiang thleng thei ka ni si a

Lo tawk phawt tehse , Net that laiin ka han dan leh thut mai tEhe ang. Rilru a lut theilo tlat mai . . .chhiar tuten thawnthu a nihna min hriat sak reng ka duh, tlem a u chuak deuh a nih pawhin . . .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 16th, 2018, 10:11 pm

PASÂLTHA SÂNGTUALA ( Mampuia Pa )

BUNG – 135

Lehlawn Lalnu Muanzoi thinrim chuan a pasal chu kawk in ‘nang Sailo Lal, ni leh thla bak kan chungah an lenglo ti a rum dur dur thin, khua leh tui te vui vaina hi engtia rei nge i haider dawn, he khual tar phunchiar ang mai a tawng thei hi i chhuah tir a hun ta khawp mai, ka fanu pawh khan a ruang kil tur tak ngial pawh in a duh ka ring niau lo e, he tiang khawp hian kan khawnbawl te pawh a chungtlak in, kan tlangvalte pawhin an ngaithei lo a ni a, he mihring hi he inchhung ah a la awm dawn a nih chuan, ka fanu ruang hi Satlâk khaw lam ah ka phum ang, a dam lai mahin a thlavang ka hauh ngam lo a, he mihring pawh ni meuh lo neih luih tir i tum vang a nun chan a nih hnu hman ah, a hmel hi ka hmu tui niau lo e’ a ti ta sak sak a. Sialai Lal fapa chuan chhan tum in a ka chu a ang zuai a, pasâltha Sângtuala hmel thinrim vang a dur khap leh mitmeng sen vam ham a hmuh meuh chuan a tawng chhuak ngam ta lo, beisei nei tak chuan Lal Zamloa chu a thlek dauh dauh a, a rinchhan ber a lah chu thu a kun lup reng a.

Lal fapa Ngamliana chuan Lehlawn Lal thu sawp nuaih chu pan in, lainat hmel tak chuan ‘ka pu, tho rawh Lal meuh chhuat lai a thut reng a mawi lo e’ tiin a zak ah chuan a han pawt a. Lal Zamloa chuan ‘Tlangval khawngaih in min tawk hauh suh aw, ka nupui thusawi kha i hre chawk a nga min lo va in thiar fihlimsan tawh rawh u, ka thu duh luat ah ka fanu chu ka chan tawh a, ka khua leh nupui te rilru natna thlen nawn ka duh tawh lo e, i pa hnenah chuan ka fanu chungah he tiang hi a lo thlen takah chuan ral emaw ka ngai lo tih min lo hrilh sak la, a bik takin i hmel hmuh nawn hi ka duh tawh lo tih hi nang pawh in lo hria ang che’ a ti ram ta hmak a. Lal fapa chuan ‘I fanu thih na hi ka tuar lo bik nem maw, Ngurpuii awm tawh mah suh se, he khua chu ka kutah a awm zui mai turah ka ngai a, nang leh ka pi in awm loh hnu chuan ka lo thut zui mai turah ka ngai a sin, i mâkpa ang tluk tho ka ni tawh a lawm’ a han ti leh zat zat a, chu thu Lal Zamloan a hre meuh chu a hmel a thinrim na vang chuan hmuh a hremawm zawk hian a, a nghawng a thisen zam te chu lo pawng tawlh tawlh a, Sialai Lal fapa chu a melh khui a, a thinrim lutuk chu a tawng chhuak thei lawk lo nghe nghe in ‘ka fanu ruang awm lai a tharum thawh ka duh loh vang chauh in, nang leh i tlangvalte nunna hi ka zuah ang, nang ang a hrawkhrawl hi ka la hmu ngai lo, engvang chuan nge maw ka fanu chu i nupui tur a ka lo rem tih reng reng chu le, he tiang hi i ni tih lo hre hma ila chuan, ka fanu hi kan zingah a la awm ngei awm si a, ka khua hi chhuah san rang rawh u, in hmel hmuh pawh hi ka duh tawh hrep lo a’ a ti ta piap piap a.

A rin loh lutuk thu hria Lal fapa Ngamliana chu a phawk hru a, Lal Zamloa chu thlek vung vungin kut an thlak mai dawn loh vang a inla huaisen thar in ‘nangni khawho awm dan chu in va han kawikawlawm hlawm ngai ve maw le, rem thu kan sawi vek hnuah ka nupui tur thi ruang pawh ka thlah liam in phal o vei maw ? lo ngai tak rawh u in hre khawp ang, insiam rawh ule i chhuak ang u, thisen min chhuah man pawh in rul khawp ang’ tiin a naute nen chuan an inzui chhuak ta a. Lehlawn tlangvalte chuan han chil zui chak chuan an lo zim hnai deuh tuau tuau a, ruang awmlai a nih vang chuan kut chu an in thlak ta em lo, thunun tu awmlo tlangval ten an zui meuh chu an hlauthawng tlang bawk a niang, muang bik nih hlau chuan an tlan thaw thang a ni mai e, tum dang a in la ngeng leh hnuaichhiah tak a an lo hmuh hnuaih luih tlangval te chu an lo hlau khawp mai, lungdawh an thlen chuan Lehlawn tlangval pakhat chuan ‘nangni kha ding teh u, a han ti teng chhuaih a’ chu aw teng chhuaih an hriat chuan Sialai tlangval te chu an in melh kual zuk zuk a, Lal fapa ber chu thawk lehkhat ah tlan thut a, Lal fapa ber tlan ta chu tlangval dangte chu ngalhmul bari then phawk phawk in an lim ve ta zzuai zuai a, lungdawh thlang ngaw ah chuan an ri thla sung sung a, Lal fapa ber chu a fual ta pur pur a, Lehlawn tlangval te zing a tel ve Thuamkûnga chuan lung arbawm tia tia chu an lum thlak hnan ta hmiah hmiah a, tlangval ten phur tak chuan an pui thuai a, ngaw hnuai chu tlangval mangang au rawl leh lung lum thawm chuan a ri ta rum rum a, tlangval ten an mahni nuthuri zuam tute chung a chutia an han ti thei chu lawm in an au hluah hluah a, an rilru natna chu a dam deuh huai a, lung awmsa a zawh chuan lungdawh lung te chu phawk hlawk in an lum rum rum reng a.

Chutia Sialai Lal fapa te liam hnu lawk a tlangval haw haw thawm lo chhuak vang chuan, val upa leh pasâltha te chu lungdawh lam ah chuan an liam suau a, lungdawh a tlangval ten tha hnem ngai tak a lung an lo lum an hmuh chuan mak ti tak chuan a chhan an han zawt a, Lehlawn tlangvalte chuan ‘tha tak a thlahna thusawi kan tum laiin, eng sawi set set lo in an tlan ngawt a, ai kal ah heng lung te hi kan hmang ta mai a ni e’ tiin nui sang chung chuan a han sawi a. val upa Chhâwnthiauan Thûamkunga te thianzaho thlantla phung a lo vir zak zak a hmuh meuh chuan, thil awmdan tur awm hrethiam in thim lam hawi chuan a then sak sak a, pasâltha Sângtuala thinrim vang a hmel dur khap thin chu, a thiante khawsa zia a hmuh meuh chuan a then ve sak sak a. zan thim hnuai a lung lum hlauhawm zia hrethiam thiau ho chuan an tlangvalte chu hau mai loin, meichher eng a Lehlawn lungdawh an han hmuh chian meuh chuan a chanve tha lam mah chu a lo hek huau tawh a, val upate an ngawih thap lai chuan ‘thiante u, a nih leh kan tin san phawt ang che u, tluang deuhin in kal dawn nia’ Thûamkungan a han ti zui lung lung a, hawh u i chho tawh ang u, kan thiante pawh an liam tawh hi ‘ tiin puan tlang a kut hru mawlh mawlh chung chuan khawchhung lamah chuan a chho nghal nulh a, midang te pawh chuan an zuichho ta hul hul a, tlangval nawlpui an liam hnu chuan val upa leh pasâltha te pawh chuan tih theih nei chuang tawh hek lo, an nau te chu nui tuh tuh chung chuan an zui chho ve ta a. Lehlawn Lal in a thil awm dan an hriat chuan ‘chawh tak rawhse kei tak emaw an in ti hlawm a, tu emaw chhuang a min han nuthuri zuam ve ngawt a’ tiin an tlangval te khawsa zia chu tun an dem hauh lo. Pasâltha Sângtuala chu ngawi reng in Ngurpuii mutna bulah chuan thu kun reng a, Lal Zamloa inchhir leh a fa neih chhun, a lo chuan ruk em em chutia a han liam thut mai chu pawi a tiin, a hrehawm ti lutuk chu mi â ang mai chuan a thu kun run reng a, a fanu ruang chu a khat tawk chuan a thlir leh ngawih ngawih thin a.

Satlâk lam zualkô tur chuan tlangval pangâ tirin chung tlangval te chu, khuan hnuhnung khuan rual chuan an chhuak nghal a, an zingah chuan Mualkunga pawh telin a silai thar nen chuan a in hawl chhuak ve a, Lal fanu chu zan hnih la men pui tur a nih vang chuan a let lam chu hmanhmawh lutuk lo tur chuan val upate chuan an chah a, lungdawh ah chuan vaibel tan in hmanhmawh tak chuan an liam zui ta thuai a, tlangval chak tha the thaw hmanhmawh tak a kal an nih vang chuan tukthuan ei hun chuan ramri kawrah chuan eirel in an phe sang sang hlawm a. Lal Zamloa riru mak an tih zia ngawt chu an sawi bang theilo a, a hma khati chenah pawh a fanu chu pasaltha Sangtuala vang a nung a nih zia tun an hai lo chung a, tuahrem zai rello zawng leh a himna te hnuchhawn zawng ngawt a han khawsa mai chu an hriatthiam lo zia te, Ngurpuii an ui zia leh an pasaltha nen chuan runhmun leng dun sela, a kawm in a zir em vang a an fate hmelthat an rin thu te chu an sawi bawrh bawrh reng a.

Lehlawn lungdawh a tang a an tlan liam lungtum lian tak takin a um zui hnu chuan. Thing phenah dingin Sialai tlangvalte chu an him hram hlawm a, tlangval pa thum te erawh zawng lung lum them in an ngal a den thawi vangin an kal baih saih saih a, an chung a an chetdan chu thinrim tak chuan kal pah chuan an sawi bal bal hlawm a, meichher an chhit ngam loh vang leh, kawng an pawh ngam lawk lawh vang chuan Sialai tlangval te chu an pem hne hnu tawh a, dumde ruangchen an kal hnu chuan, kawng ruh pawh in thinrim tih ngaihna hrelo chuan, phuba lak ngei an tum thu sawiin an in hrosa tan tan hlawm a, chutia an phun bal bal lai chuan meichhe lo in zum chu hmu a, hmanhmawh tak chuan kawng chhak rem laiah chuan an tawlh liam thuai a, tuibur hmuamda zet an thut hnu chuan, Satlâk tlangval pangâ hian hmanhmawh tak chuan an lo pel a, Sialai tlangval te chuan kah thal nghal mai tum chuan an silai chu an lek a, an pasâltha Hrangzika chuan khap in an pelh fel hnu chuan ‘ engvang a lo khap ngawt nge i nih chu le, kei berin ka khap loh chuan eng vang a lo inrawlh ngam nge i nih’ a han ti khur khur a, pasaltha Hrangzika chuan ‘he laiah hian silai han hmet puak ngat ila, Satlâk leh Lehlawn tlangval te an lo chim thla huk ngei ang, engtin nge kan dan zawh ang le tlangval tlemte pawh kan ngam lo a nia, huai hun hriat a ngai ngâi e’ a tih chuan an ni pawh chuan thil awmdan an hre thiam ta, meichher chu mualkhat kar tla chuan an zui zel a, tuk thuan ei rel lai nanchin tum chuan an zui zel a, an tum lawk ang chuan eirel an buai lai chuan an veh hnai ta tham tham a. An thlang a eirel a pah a ti ti khawm mek te chu an tin far tawh a, Satlâk tlangval pathum te chu mei vil pah chuan an ti ti sap sap hlawm a, Lehlawn Lalpa Zamloa khawsa zia mak an tih ziate, Lalnu Muanzoi an khawngaih si ziate sawiin an thian chawhmeh la a thang mek te liamna lam chu an melh leh zauh zauh thin.

Mualkunga chuan ngaihthat lohna lian tak a neih vang chuan, chawhmeh zawn chhuanlam in thawm chu ngun tak chuan a ngaithla pah zel a, a rilru chuan pasâltha Sângtuala chu awm sela tiin a ngaihtuah pah rauh rauh a, a ngaithat lohna belhchhah chuan a piah mualah chuan lung thil chu a lum ar ar a, chu lung thil lumna chu fimkhur tak chuan a hnaih phei hret hret zel a, a han nghah leh deuh hnu chuan mihring thla lang zauh zauh chu thing phen ah chuan a hmu ta a, a han chhiar chuan tlangval sawm thum dawn hi an lo ni a, a ngaihtuah chuan chutiang a mihring awm thei tur chu pahnih an awm Sialai leh Ngiazoa pa te lo veh tute, chung thil ngaihtuah rauh rauh pah chuan a mi hmuhte chu a hnaih hret hret zel a, a hmuh chian hnu chuan a thinrim chu a sen tan tan a, an mahni ai a tam dai leh râlthuam nei ngah zawk han kah ngawt mai chu sawngsawhlawt na awm dawn a hrelo in, chung Sialai khaw hmuh loh chuan a thiante eirel na hmun chu a pan thla ta a, a thiante lah chuan ngaihthat lohna nei hauh lo chuan an lo thu bial taih a, Mualkunga rilru chu a buai kher mai, a va in lan chuan an lo kap ngeiin a ring si a, a hnaih leh chuan an chhak a mite chuan an lo hmu thei tawh dawn si, thing phen a tang chuan a kut chu a vai zauh zauh a, a thiante chuan an lo hmu thei mai bawk silo, rilru buai tak chuan a hawi vat vat reng a, lung artui tia chu chhar in a thiante awmna lam chu a han vawm a, lung tla ri hria chuan an hawi phawk hu hu a, a han vawm leh a lung tlakna lam ngawt chu melhin an la tawng pah reng a. Mualkunga chuan auh mai tur em mi ti a a ngaihtuah lai chuan a chhak ah chuan thing tang tliak rap hria in a en thuai a, Sialai tlangval pahnih hi fimkhur tak hian an lo kal dan dan a, Mualkunga chuan hup barh an tum zia chu a hrethiam ta a, a silai chu a han lek kawh vah a, uluk tak a tin a chhak a mi te pawh chuan, an thlang kawr chu an tin rual ta thawt a, pakhat chuan silai chu a han kau zui rap a, Mualkunga silai chu puak dawtin na tuar te thawt chuan a zui zat a, a thlang kawr atang chuan silai a rawn puak ve dur bawk a, Mualkunga hmuh pakhat zawk chu a thal hawl mai bawk a, silai puah rual chuan chhak lam atang chuan a rawn puak ve dur dur a, Satlâk tlangval pathum te pawh awp rawkin an te thawt a, Lal fapa chuan ‘tumah chhuah hauh suh u,khu ta mite pawh khu zu that vat rawh u’ tiin a tlangvalte chu a fuih tuat tuar reng a, Mualkunga chu kawrah chu tlan pheiin, Sialai tlangval silai pahnih chu a la vat a, a han tlan leh chiah chu silai a lo puak leh dur dur a, a dar leh mal chu sâ zawkin a pai chawn chawn a, hrui zamah in pal thlu tawp in kawrah chuan a lum lut hlawl a, silai chu a lo puak leh dur dur a, silai mu chuan thing hawng chu a fuh per chhuaih chhuaih a, Mualkunga chu tlu hlauh lo sela chu kawrte ah chuan a tlu hlen ve ngei ang le, a chhak a hmahmawh tak a lo chhuk mek tlangval pakhat chu Mualkunga chuan a han sai lir leh tawl a, silai pakhat chu lain an piah a,Sialai tlangval pakhat inchhung let hnih awm a lo dak mek chu a han sai lir leh tawl a, a thianpa silai chu a han puak ve leh dur a, natuar te tuar ri chuan a lo zui leh nghal zat a, Mualkunga chuan ‘ Phunga nang kan khaw lam ah tlang vang vang la, kei erawh chuan Lehlawn lam ka pan a nge, hmun khat a kan tlan zawngin vanduai palh a hlauhawm si a, kan thiante erawh zawng kan chhan thei lo a ni e, Sialai khaw ho an ni tih hi kan khua ten an hriat ngei a ngai a ni, min lo zui nghal rawh tiin kawr chu an zawh thla nghal a,ding lamah khuan sakhan remchang deuh a awm a, hmanhmawh rawh hun kan nghah lo a nia, tlawm lak vangin eng mah ti hauh suh ang che, heng mite hian kan khua pawh an hal duh mai thei a nia, chuvang chuan a theih dan dan in relhruk san hram hram ang che, kal ang le’ tiin hma hruaiin a kal nghal a.

Satlâk tlangval te chuan silai kah an thiam em vang chuan an basangam ngawt ngam lo a, fimkhur tak chuan an hnaih hret hret hlawm, Lal fapa Ngamliana chuan a tlangvalte fuih in hmunhim a tang chuan a te tuar tuar reng a, Mualkunga te pahnih pawh sakhan an thlen chuan an inthen ta, Sialai pasâltha Hrangzika chuan Satlâk tlangvalte zia a hre chiang deuh deuh a, an hmel en ai a zirtirna dawng tha an nih zia pawh a hre chiang ta kher mai, Satlâk khaw ho chuan an thil tih an hriat chhuah ngei ring in, him tak a khua a thleng leh thei a nih ngat chuan a rang lam a sialai khaw chhuah san ngei tum chuan rilru chu a siam sauh sauh a. Kawr kam lungah chuan thisen chu a kai leh zauh thin vang chuan an hliam ngei tih a hre thiam mai a, kawr kawi hnih an zawh hnu chuan hnu chu a in then ta, hnu pakhat zawk chu a lang chiang viau a, pakhat erawh chu a thisen far lo chu chhui a har in hnu a thup thiam em vang chuan ramvachal tak ani tih pawh a hre thiam mai a, kawr hnih an kan leh hnu chuan saza hnu hi a lo thar surh a, chu sa hnu thar karah chuan a hnu chu an hloh ta daih a, chu tia hnu chhui a an buai lai an piah mual a tang chuan silai hi a han puak dur a, puitling hliam chu a han te thawt a silai vawi khat a puak leh dur a thawm chu a reh ta thap a.

Silai puak dur a hriat chuan Mualkunga ngaihtha lo lutuk chu let tum chuan a han kal deuh at at a, an in tam hleih zia hriaiin rilru hrehawm ti tak chuan Lehlawn lam pan chuan a kal leh ta tauh tauh a, a hliam a tang a thisen chhuak deuh reng vang te, a riltam leh tui hal nen Mualkunga chu a chau tawh kher mai, a thinrim leh rilru natna chuan chakna a pe a, a ngaihtuah na ah chuan Phunga chu hliam tuar leh puih ngai tak ang a suangtuah in a thinrim lutuk chu a puak keh lo chauh hial a, eng vangin nge kan lo kal tlan mai loh aw tiin a ngaihtuah vang vang a, thil a nih tur ang a ni tawh tih hria in hmanhmaw tak chuan a kal tauh tauh reng a, hliam tuar riltam dangchar a kal chu a sawt lo khawp mai a, ni thlangher bawih chuan Lehlawn lungdawh chu a thleng ta hlawl a, a chau lutuk chu a thu hnawk a, zo thlifim in a chhem hauh hauh chuan a rilru pawh tlemin a harh ve leh ta deuh a, Mualkunga chu thawt tum chuan a han che sawn dawn a a tho mai thei ta hauh lo a, thlantla phung a a beihhnu chuan a han ding thei hram a, hlam khat emaw chauh a kal hman tih chuan a mitvai vang chuan a khawhmuh chu thim in, mi tawng niawm tak chu a mang hriat ruai a ,a mit sulh a engmah hrelo chuan a tlu zawi ta hnawk a.

. . . . . . . .

Naupangten tlangval chau tak pakhat, Lehlawn lungdawh a mu an hmun thu an hriat chuan tlangval ngaihtha lo sa a awm te chu chu lam pan chuan an tlan thuai a, Mualkunga thlanfim in a bual zuih leh dar leh mal hliam a thisen fim tak lo chhuak zaih zaih an hmuh chuan thil awmdan chu an rin zawn thiam ta a, hmanhmawh tak chuan Lal mual lamah chuan an zawn chho thuai a, bawlpu chuan a hliam chu tihfai sakin ramhmul damdawi chu hliamah chuan a hnawih mawlh mawlh a. Mualkunga chu lo phun sep sep in ka dang a ro lutuk tui in tur ka duh a rawn tih chuan, bawlpu chuan tui chu a lam in tlangval te chuan tui chu an lo la thuai a, Bawlpu chuan tui tlem chu Mualkunga hmui ro tak ah chuan a han far sak a, tui an peh hnu reilo teah chuan a ni pawh a lo harh ta a, val upa a hmuh chuan thaw mai tum chuan a han in beng kang dawn a, Bawlpu chuan lo nem mu vatin ‘tlangval mu rih rawh, i chet chuan i tan a pawi zawk dawn a nia, i duh zawng chu ti khan sawi rawh’ a tih takah chuan a ni pawh chu a mu ta hle hle a. Val upa Chhâwnthiaua chuan Mualkunga chu hnaih in ‘ eng thil nge thleng, khawnge i thiante an awm’ tiin mitmeng nelawm lo zet chuan melh in a zawt a, mittui khap per chhak chhak chung chuan khua an chhuahsan atang chuan thil awmdan chu a sawi zar zar a, thu a sawi lai chuan tui chu a khat tawk chuan an tulh pah zauh zauh a, Satlâk valrualten an thiante chin an hriat meuh chuan an thinrim hmel chu hai rual a ni lo, ruang bul a thu Lalnu Thanthûami chu ko chhuakin, a tlangvalte chin a hriat chuan Lalnu hmel chu a thinrim ta kher mai.

A hma a val upa melh in ‘tunah ka tlangvalte ruang chu zu la ula, ka vahnu ruang awm lai chuan buaina dang ka duh lo, ruang thlak hnuah erawh chuan ka tlangvalte thisen phuba chu kan la ngei ang, Sialai khua chu kan hal fai pak in, ka tlangval te nunna la tute lu in ka seluphan a mawi ngei tur a ni, an tawrhna hi ka thlir liam hlek lo ang, ka vahnu chu naktip lam a thlah liam tur a nih vangin helam chu a veng thei tawk awm sela, midang zawngte chuan ruang chu khua thlen ang che u. kan kawngdal te chu thianfai ula, tumah dim hauh suh ang che u’ tiin a tlangval hliam awmna lamah chuan a phei a, Mualkungan Lal nu a hmuh chuan ‘ Lalnu kan in veng zo lo a ni e, min hrethiam dawn nia’ tiin a mittui chu a hru zauh zauh a. Lalnu chuan ‘ Mualkung thiam lohna engmah i neilo e, in din hmun thlir in i lo tal pit thei zawk hi a ropui lutuk, hahdam takin lo awm la in thiam lo reng reng suh ang che, khaw nge huaisen chawimawi na nopui hi han dawm rawh le’ tiin, Lehlawn tlangau kut atang chuan seki no chu la in Mualkunga hliam pawnpui tangkham a lo thu mu chu a han leh a. Mualkunga lawm leh mak ti chuan Lalnu chu a melh tlawk tlawk a, val upa ten la tur a an tih chuan hreh tak chuan a ban hram a, a ni hmeithai fa a kar a vanneih vang a nungdam a awm leh nghal tan chuan a tluk a hlimawm a awm chuang hauh lo, Lehlawn nula te chuan tlangval sawm thum dawn thaw hma atang a relhchhuak thei, tlangval chhuak zawt Mualkunga nopui dawng lai chu hlim hmel tak chuan an lo thlir thap a.

Sialai tlangvalte chetdan a hriat chuan Lehlawn Lal Zamloa chu a ngawi ngul rengin a rilru awm hriat a har khawp mai, Lalnu te pahnih erawh chu an rilru a na zualin an chhiat tawh chung a chutiang khawp an chung a chhiatna duhtu khaw chungah chuan na tak a chet ngei tum chuan an rilru an siam sauh sauh a, Sialai Lal fapa leh a thihruaite chet dan hria Lehlawn khuate chuan Satlâk valrual te er let leh tur chu an lo huphurh pui kher mai, an chemhar khua an nih loh vang chuan an lawm hle zawk a. chu tia nunau thinrim an phun mur mur lai chuan Satlâk tlangvalte chu an lo rinlawk ang ngei chuan pasâltha Sângtuala ho chuan an lo thawk chhuak ta rup mai le, ni dang a nelawm tak hmel chu bo in naupangho phei chu an til hak a, val upa Chhâwnthiaua chuan ‘Lalnu kan naute ruang hlawm tur chuan kan chhuak a nia’ a ti hul hak a, Lalnu Thanthûami chuan ‘ tlaung takin va kal ula, in kawng dal tu chu va dim hauh suh ang che, he laiah ka vahnu ruang in a lo nghak reng che u tih hriaiin, râl hnu erawh lo va chhui zui rih lo ang che u, kal tawh rawh u, in thiante khua a har tawh lutuk ang’ tiin a thlah ta.

Lal Zamloa chu zawimuang in Lal mualah chuan a lo pen chhuak chhat chhat a, a hnungah chuan khawnbawl te chuan lo zuiin an karah hlamkhat lo liam a tla lo ang tih chuan a han ding chut a, mi nung aw pawh ang lo hial khawp a hniam ruih chuan ‘tlangvalte u, ka thil tihsual hi a va nasa em min ngaidam turin ka beisei lo che u, ka suahsualna leh chapô na vang hian kan fa mal chu a fâm ta, ka thiltihsual rah chu kei mah chauh nilo in, pawisawilo tlangval ten an tuar tel leh zel zawng ka lai hi a nâ tak zet a ni, in lo thlen rualin ka fanu chu kan zalh fel a nga, ka hoin Sialai khua chu kan rawh fai vek tur a ni, kal tawh rawh u, in thian ten an lo beisei reng tawh che u a nia’ tiin a thlah ve ta. Lal Zamloa khawsa zia an huat tawh nak lai a, chutiang thu a sawi leh zel chu tlangval thenkhat chu an hmelah chuan a thinrim hmel khawp mai, val upa Chhâwnthiaua chuan ‘Lalpa kan thian ram dai a bawihsawm tu neilo te chu kan zu ngaihven a nge, kan chung a pawisawi te hma khua thuah chuan mi dangte inrawlh kan rem ti hauh lo, i in huamna erawh a lawmawm e’ tiin tlangval te chu melhin ‘hawh u le, kan thiante chu i pan ang u le’ tiin thinrim tak chuan ramri kawr lam pan chuan an tlan liam ta a.

. . . . . . .

Mualkunga nen an inthen hnu chuan Phunga pawh a theih ang a fimkhur leh hmanhmawh chuan a kal zel a, mual ngâ lai a kan hnu chuan tui tling hi a hmu fuh hlauh a, lawm tak chuan a in nghal bawrh bawrh a, tui a in zawh chuan a silai chu a han endik nghal a, a kal tan leh chauh tih chuan a awmna chhakah chuan thing tang tliak rak chu hria in a han ngaihthlak chuan thawmdim tak a kal thawm chu a hre ta, a mangang ta kher mai, a rilru chuan pasâltha Sângtuala chu hrechhuak in, a ni chu awm sela Sialai ho chuan an um tawp awm silo a tiin a ngaihtuah nap nap reng a, a tam thei ang ber thihpui tum chuan a in sang mar sauh sauh a, a chhak a mite pawh chu fimkhur tak chuan an kal dan dan zel a, lungpui thlam tia dawn ah chuan fimkhur tak chuan lawn in uluk tak chuan an thlek kual dak dak a, Phunga insiam rem che hlek chu pakhat chuan hmu in a silai chu a lek nghal zawk a, an hmu tih a hriat chuan a ni chuan a silai lekkawh sa chu a hmetpuak ta dur a, tangval pakhat chu a hlawm thla nawlh a, a silai pakhat zawk chuh in a han tin leh vang vangin a hmet puak leh dur a, a kah pa chu ek thawt in lungpui atang chuan a hlawm thla ve leh nawlh a, zen chu sawh leh vatin a mi kah te en chuan an lo thi chiang hle tawh a, a bulhnai chu enkual in hlauhawm an hnai mailo tih hria in, a kah hlum tak te silai chu a khawm thuai a, hmanhmawh tak chuan khaw lam pan chuan a kal leh ta sawk sawk a, a ram hriatna a thlen chuan kal pawh a sawt ta khawp mai. Ni thlang her bawih ah chuan Satlâk lungdawh chu a thleng ta hlawl a, lungdawh ah chuan pasâltha Sukthanga ho chuan tlangvalte chu an lo bawrkhawm tuai hlawm a, Phunga silai pangâ lai mai nen a lo in ak bawr tuai mai an hmuh chuan an pan hnai thuai a, Phunga chau leh riltam chu thu hnawkin a thaw hlap hlap a, pasâltha chuan tlangval pakhat chu tui la tur chuan tirin Phunga chuan tui chu a han in khawlh khawlh a, a tawng theih hnu chuan ‘ ramri kawr a eirel a an buai lai Sialai Lal fapa leh a thihruai ten an lo kah thu te, Mualkunga nen pahnih an kah thluk thu te, an inthen hnu a tlangval pahnih a kah hlum leh thu te chu sawi in’ a thusawi ngaithla tute chuan Phunga chu makti leh ngaisang tak chuan an melh thap a, pasâltha Sukthanga chuan ‘ka hlauh ruk ang ngei a nih chu, tlangval sawmngâ in min zui ula, midang zawngte chu khaw veng him tur a awm tur leh, dai hnai a kal te lam tur chuan an phe ta sung sung a, pu Tawnlianan Sialai khaw Lal fapa te chetdan a hriat meuh chuan a ni pawh chu a thinrim zia hai rual a ni lo. Chutiang khawp an buai chak chuan an duhang chu an hmu khawp ang le, kan pasaltha sawi ang khan tlangval te khan râlven hna thawk ula, lungdawh lam kha val upa Sialliana ho in awm ula, tlak lamah pasâltha Pulliana ho in tan khawh bawk sela kan khaw pawikhawih tum awm in hmuh chuan tumah dim hauh suh an che u, khual dangte pawh lo lang thut thei an nih erawh hre reng ang che u, tlangval sawmngâ vel kha Lal mual tan hmun rem hnaivai tur ah awm ula a tha a nge’ a tih chuan, tlangvalte pawh chu an in sem darh thuai a, tlangau chuan râl an hnaih thu leh mahni a tla fal lo tur chuan a au lauh lauh bawk a, Satlâk valrual te chu an rintawk rualin an pasâltha khualthang te awmlo erawh chuan an lung a muan meuh lo a ni.

Pasâltha Sukthanga ho in Lehlawn ramri lam pan chuan an liam nghal sual a, Ngurpuii ruang chung a chutiang tak a buaina an siam chu an run em em mai a, Sialai tlangval te chu nang hman in han in sah sawk sawk mai chu an duh zawk vek a, thiante ai hnufum nih hlau chuan an dawk zawt zawt hlawm a, kawng chanve vel an thlen chuan sazâ phawk in, kham hmun awih tenah chuan a ri thla rum rum in a euh nghak that that a, karlo ah ramri kawr chu an thleng ta mai a, an zu thlen chuan pasâltha Sângtuala te unau leh val upa Chhâwnthiaua chuan an thiante lubung taksa chu an lo kil bial taih a. pasâltha Sukthanga ten an naute ruang an hmuh meuh chuan an thinrim han in hrosa thawm zet chu a hlauhawm bawk a niang, chulai hmunah chuan thlithaw tak ngail pawh chu a reh thap a, Lehlawn lam a tanga tlangval lo kal te an lo thleng zel a, an thinrim lutuk chuan an bul vel thing leh mau te chu an sat thlu eng duai duai a.

Tlangval te chuan Sialai tlangval te um zui nghal tum chuan an in pangaw zial tup tup a,Val upa Chhâwnthiaua chuan ‘naute u, kan unau te taksa hian leidai a dek rei lua ta e, hlâng han siam ula khaw lamah ka hawn pui vat tur a ni. Kan unaute kan vui zawh ah Lehlawnah kal leh in Ngurpuii kan thlah liam leh hnuah phuba la turin, Sialai kan pan tawh ang, chumi hunah chuan kan thinur na berhbu kan leihbaw tawh tur a ni, ruang hlawmtu neilo leh buaipui tu neilo ang mai a kan unau ruang hian an in deng rang rawhse’ a tih takah chuan, tlangvalte chu hlâng siam chuan an phe nghal suau a kar loah hlâng chu an peih thuai a, Satlâk khaw pan in an kal nghal a. an tlangval ruang lunei lo ten khua a den meuh chuan a tar a zurin, Satlâk khua chu thimrim in an rum ngal ngal hlawm a. rawlthar Thanchhinga te thianzaho chuan val upa Chhâwnthiaua chu râl bawh an dil ve chawt a, val upa chuan ‘ Chhinga in huaisen na leh inpek na hi kan hre reng tawh ang, tlangval ho khawchhung veng tur khawp hi kan in hmu zolo ang tih a hlauhawm zawk hial a, nangni khawchhung a in awm chuan rilru hahdam in kan awm thei zawk ang, tlawmngai in in thianzaho hian kan Satlâk khaw tan hmun lo nghak zawk mai ula, nangni in awm chuan ngaih ngam takin râl kan bawh thei zawk ang’ a han tih chuan, an mahni an rin tawkna rawl lo chhuak an hriah chuan hlim tak chuan val upa chu a kian san ta a, a thiante bulah chuan eng emaw sawiin hlim tak leh mahni inring tawk tak chuan an khi sang hlawm a, Val upa Chhâwnthiaua chuan chung rawlthar te huaisen na leh in pekna a hmuh chuan Satlâk khaw tan thlamuan thlak a ti kher mai.

Ruang chu puandum a khuh in Satlâk khaw mihring chu mittui nen an meng tui hlap hlawm a. tlangvalte chuan chaw an bar sawk sawk a, eikham hmasa a piang chu thlan lamah chuan an liam nghal zel a, an thiante chu ui viau mahse ruang chu thlah liam a, phuba lak hun bak suangtuah an nei hauh lo, thutmuan ar a khuan meuh chuan thlan chu an peih at tawh a, thlan lam an peih chuan thinrim leh rilru na tak chuan an thiahte chu an vuiliam ta, ruang a liam chuan Lal mualah Satlak khua chu an pung khawm ta vek a, khawnbawl upa Tawnliana chu Lal mual ah pen chhuakin ‘Satlâk khaw tan a pasâltha nun chan te hi kan zingah chawimawi in awm rawhse, an thisen phuba chuan tunah pawh min au lawm lawm a, nangni Satlâk tlangvalte hian in unau pawisawi lo chung a kutthlak tute hi in umzui ngam dawn nge hmeichhe pawnfen in feng dawn ? Satlak khaw chung a kutthlak pawi zia an hriat theih nan kan che tawh tur a, nunna hlutzia hriain heichen zai kan dawh tawh, hmeichhe Lalna khua kan nih vang hian nge, min nuthuri zuam in kan thatna chu tharum zawng hian min thung rul chamchi hlawm a ka kham zo zai ta, tun tum chu ka hoin kan thawk chhuak ang, ka hnung zui ngam in awm chuan tunah lo pen chhuak rawh ule’ tiin chempui tle vur chu chung lamah a han lek chho a, Satlâk tlangval te chuan thinrim rawl tawp chhuah in hmalam ah chuan an lo pen dual a.

Satlâk tlangvalte chuan an thiante chu ui tak chung leh thinrim tak chuan thlan lamah chuan an zawn in, a tar a zur in thlanmual lamah chuan an liam ta duak a. ruang an vur zawh chuan Lal mualah tlangval te chu ralthuam nen chuan an ding ther fur hlawm a, tlangval te chu an thiante phuba lak ngei tum an nih vang chuan khaw vengtur tlangval awm tur chu an in hmu zo lo ta tlat a, khaw veng tur awm lo a chhuah fai vek lah tha an ti lo in,Sialai khua mai nilo in hrumzial ho lah englai pawh a lang thei an lo ni bawk nen Satlâk val upa leh pasâlthate pawh an lu a hai ta khawp mai, val upate luhai na chu lusun chhungte hnemtu tha tak a ni thung. An mahni vang a thihna hlim kawr ruam zawh tum mek te tluk hnemtu tha leh hmuh nuam chu a awm chuang hauh lo

Lo tawk leh thut tehse, Net a that loh vangin ka che thei thlawt lo, ka tih thei tawk tlem zia ka in hriat hian pawi ka ti hle e.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 19th, 2018, 8:08 pm

PASÂLTHA SÂNGTUALA ( Mampuia Pa )

BUNG – 136

Chhiar tur ti tam tuah aw

Pu Tawnliana chuan ‘tlangval te u, in tlawmngaihna a chhuanawm tak zet e, hetia kan rei zawh poh leh kan hmelma te an chak a ni mai, chu vangin tlangvalte kha hmun thum ah insem ula ka mit hi tuam in tlangval pakhat in min tuai vir in, ka kawh fuh tlangval hlawm te chu khaw veng him turin an awm ang’ a tih chuan tlangval te chu phur tak chuan an aw rual dual a, Val upa leh pasâltha te chuan tlangval te chu kawk then phawk phawk in hmun thumah chuan an sem ta, pasâltha Sukthanga lo pen chhuakin, khawnbawl upa pu Tawnliana mit chu uluk tak chuan a han tuam a, tlangval hlawm khat ai awh chuan an en dik a, an pawm thlap hnu chuan a han tuai vir map map a, Satlak khawpui chu haw haw thawm in a ri hluah hluah a khawnbawl luhai chu a han pai chhah chhah a, tlangval ding khawm laita ber chu a han kawk fuh a, tlangvalte chu an sirah chuan an bet fai duak a, a kawh fuh tlangval dinna ruak ta duak chu hawihai tak chuan an thlir thap ringawt a, khawnbawl upate chuan an tlangval ten khaw chhan nan nun an thap ngam zia an hriat phah deuh deuh a, an tlangvalte khawsa zia chu an lawm kher mai, an lawmna belhchhah turin rawlthar rualte chu tlangval rual zianga râl bawh tum a in zep an hmuh phei chuan an lawm a zual khawp mai.

A vawi hnih na ah chuan hrui thlungin tlangval te chu an thlun hual pup a, khawnbawl upa chu an han tuai vir leh map map a, an chhuah chuan a han pai leh chhah chhah a tlangval ding khawm sir dinglam a mite chu a han kawk fuh leh chat a, tlangval ten an thiante fin leh an tum chu, tlangvalte chuan kut suih a dingin, an thiante an kar a tlan luh tum te chu dang in an lut thei ta lo, val upaten an han nam hrang a ,tlangval an in thliar hran chuan, tlangval râl run tur an zingah chuan rawlthar eng emaw zah lo in zep ru chu an han thliar leh a, chung rawltharte ai awh tum chuan tlangval thenkhat chuan han sawi ngial mahse, val upate chuan tlangvalte chu an dang thei ta hram a.

Pasâltha Sukthanga leh val upa Lianmunga chu khaw chhung lam venghim tur chuan an hnawn thlu thei hram a, pasâltha Sukthanga chuan ‘val upa, min duhsakna hi a lawmawm rualin, ka tan zahthlakna chen a awm tlat a ni, eng emaw thil kan lo tawng leh a nih chuan khawchhung lam a awm tur chuan min tih tawh loh hram ka beisei, he ti hrim chuan ka tha a thum mai dah a nge’ tiin a phun ve hlak a, a thiante chuan ‘e nang ber i awm chuan, kei nin khawchhung lam ngaihtuah hauh lo in râl kan bawh theih phah thin a, kan hma hunah chuan i ho ngeiin râl chu kan bawh ngei ang’ an ti tlair tliar a. khawnbawl upa Tawnliana chu silai nen Satlâk valrualte zingah chuan a lo pen chhuak ve chhak chhak a, tlangvalte chuan theih tawp chuan kallo turin thlem mahse a ni chuan ‘tlangvalte u, tun tum chauh zawng in hnung ka zui a nge, ka ti buai hauh lo ang che u, kan tlangvalte chetdan pawh ka hmu chiang duh e’ a tih tak tlat ah chuan, hreh tak chuan an aw ta hram a, kal turte an in peih meuh chuan lenghawn ar a khuang chuah chuah tawh a, khawnbawl upa Pu Tawnliana chuan ‘tlangval te u. Engpawhnise, chau lutuk a râl bawh chuan chetsual a awm thei ngai e, zanin khua ah kan riak a nga, naktuk khuantevik ah kan chhuak mai dawn nia, tunah chuan râlveng turte tih loh chu i mu phawt ang u’ a tih chuan tlangvalte pawh an chau khat bawk a, i he lo chuan zawlbuk lam chu an pan ta a. An tum lawk ang chuan Satlâk chu vartian ah chhuah sanin, tukthuan ei hun chuan ramri kawrah ei relin, Satlâk valrual te chu an phe sup sup a, tukthuan an ei fel chuan uluk takin lungpui chung rem lai ah chuan mi pathum eitur siam in, an siam zawh chuan an kal san ta a.

Lehlawn chu chhun chawfak hunah thlengin Ngurpuii thlan lai chuan tlangval te chu an liam nghal suau a, Ngurpuin a kalsan dawn tak tak ta tih an hriat chuan, Lalnu pahnihte chu an tap bang theilo a, an mahni ang a lenglai fa chân tawh te chuan, an chan natzia hriain an tah pui hawm hawm a, mi chhe ber a tang a khawnbawl upate thleng a pangngai tak a chhawnchhaih tu, an Lal fanu nunnem leh zaidam vanduai chungchuang tak thlah nan chuan tumah chuan an mittui chu an ui lo, an puan thulkhung phawrhin puan pawh a dawng hnem na rawh e, chung thil chu Lalnu te mittui ko chhuak tu ah tang in,chaw kawpuar ei theilo leh thinrimna dang in a tlakbuak vang chuan an tap chau ta hial a, thlan an peih chuan ui tak chungin thlan lamah chuan tlangvalte chuan mittui nen Ngurpuii ruang chu zawn in,pasaltha Sangtuala chuan insum har a ti kher mai. Sailo Lal fanu hmeltha leh nunnem, mite ngainat rawn leh a bul a an awm nin theih loh tlangvalte ngaihzawn rawn, a pa Lal Zamloa pawhin a chuan luat leh chapô vang a, an beisei loh lamah chuan an thlam liam ta, a mah Ngurpuii leh a nu an khawngaih rual a, Lehlawn nunaute ti thinrim tu Lal Zamloa ngei pawh chu lungchhe van kai a tap in, rawl chhuah meuh chuan a tap kawng tluan a . . .

Ni leh thla kar a leng a in ngai leh midang hnuaichhiah ru tak thle ngulh ngulh thin, a fanu chung a a khawsak dan leh a mâkpa hual khawsa zia a hai der luih vang a lainat tu a neih loh zia, Lal Zamloa chuan a in hre chiang ta khawp mai, sebo hnu a se kawngkhar tih a neih zawh zia pawh tu hrilh a ngai hran lo. A fanu ruang an zalh fel chuan a hrehawm ti leh pawi ti chu tap kilah thlan tla hluam chuan a thu a, zan riah kil pawh tum lo chuan a thu kun ngul reng a, zanriah eikham chuan Satlâk val upa te, pasaltha leh khawnbawl te chu Lehlawn Lal in ah chuan an lo lut khawm tak tak a, Lalnu Thanthuami hnenah chuan an thiante phuba la tur a chhuah nghal mai an tum thu an lo thlen a, Lalnu Thanthûami chuan ‘ kan tlangval fam tate ka ngaih pawimawh lohna nilo in, hei zan eng emaw chhung chu in mu fumfe tawh lo a, hlawhtling tur chuan ngaihtuahna fim neih a ngai a, zan in chauh chu han hahchawl ula, nak tuk khawvar ah Sialai khua chu pan mai a that zawk ka va ring ve ’ ti a an sawi mawlh mawlh lai chuan, pawn lamah chuan tlangval rual thawm ri khup khup thawm hria in an phawk hra hlawm a, Lungtian tlangval te an ni tih an hriah chuan mak ti tak chuan Lalnu Thanthûami te chuan an lo melh thap a, Lungtian tlangval chuan Sialai Lal fapa ten mi lu an hawn thu te, an laina hnai khua an pun thu te, Lal Thawmlianan Satlâk khua pui tur a a tirh thu leh , Chhippheng tlangval ten ramri kawr a an lo nghak mek thu chu a sawi zar zar a. Lalnu Thathûami chuan ‘chu Sialai Lal chuan rem thu sawi a tum lo chiang maw ? khaw eng zah nge in chah khawm theih hmel’ tiin a han zawt a, khaw hnih/thum chu an in chah khawm thei mahna, buh lu chuh a hun dawn tawh bakah, kan hriat dan chuan an Lal chah then khat te chuan an thu kalpui dan ah puih an tum chiah lo a ni awm e’ tiin a chhang a.

Lungtian tlangval te thusawi an hriat chuan Lal Zamloa chu lo in rawlhin ‘ chutiang a buai duh nafam chu, Sialai khua chu kan rawh mam puk tur lah niin’ a han ti ve bauh a. val upa Lianmana chuan lalnu en in ‘englekhawle, i sawi tawh ang khan zan in chu mu phawt ila, naktukah kan thiante chu fin in Sialai khua chu kan pan ding tawh mai ang chu’ tiin a han rawt a, Lalnu Thanthûami chuan ‘ Satlâk kan luah luh a tangin buaina hlir mai kan tawng chho malh malh a, tlangvalte pawh in chau tawh viau ang, chuvang chuan mu rang ula a tha ang’ a tih chuan tlangvalte pawh zawlbuk lamah chuan an kal ta sung sung a, reilo teah tlangvalte chu an hnar bawrh bawrh a, pasaltha Sângtuala erawh chu muhil theilo in a mu meng kar reng a, Ngurpuii a hmuh hmasak ber ni hlauthawng tak a thing hniam te a lo bet tai te, a hnu a an inhmel duh chhoh dan te chu a mal te chuan ngaihtuah in. Lal fanu ni chung a kut palh a tawh theih ziate chu a ngaihtuah kai zel a, chutia hun liam tawh a ngaihtuah tak zel chuan, Satlâk Bawlpu fanu mal hmeltha leh fel, Ngurpuii nen an in chulnel tak vang a, a lo theihnghilh deuh tawh, an tlawh hnuhnun ber tum a mut tlem vang a mit dum kual raih chu a mitthlah chiang tak chuan a lo lang uaih uaih a, Ngurpuii lo lan hma an hlim dun thin dan te, an thiahzaho an run an kai thin lai a a hlim theih zia te, a hmuh hnuhnun ber tum ah erawh tun hma ang a, nula zam tha leh hlim thei ang a nih phak tawh loh dan te a ngaihtuah chuan, a mah chu mawhphurtu a ni mai a ngem ? tiin a ngauhtuah kual nasa mai a, chutia a ngaihtuahna a kawm lai chuan a muhil ve ta hram a, a mang ah chuan Ngurpuii hmu in,kawr ral a tang hian an lo in thlir reng a, Ngurpuii pan tum a kal hnaih dawn lai chuan thlipui lo thawk thut in, Ngurpuii chu a lo len bo daih a, mangang tak chuan Ngurpuii chu a lo au vak vak a, a dinna thlang ruam ah chuan hmeichhe mangang au thawm hria, Ngurpui ti a au chung chuan kawr lam pan kal chiah tih chu, tu emaw hian a lo sawi harh a, a men chuan a u Laiawrha chuan ‘ i tha maw, eng tin nge i awm ? tiin lainat hmel tak chuan a lo melh vang vang a, mittui hruk zauh pah chuan a that thu sawiin puan chuan a in builukhup nghal daih a, Laiawrha chu zung in a mu ve leh nghal mai a.

Thim tinin khawfing pawh a lo chah chuan zawlbuk tlangvalte chu an la hnar bur bur a, pasâltha Sângtuala chu thawmdim tak chuan tho tham tham in, thlanmual lam ah chuan a liam zui a, Laiawrha chuan a nau thawmdim tak a tho chu zuiin thlanmual lamah an in zui phei zel a. Laiawrha’n Ngurpuii thlan a hmuh chuan, hmeichhe pahnih bul a ding a nau kun ran chu a hmu a, a han en chian chuan Lalnu te pahnih an ni tih a hriat chuan let leh mai tum chuan a in her chiah tih chuan a mah lo thlir rengtu, Lal Zamloa chu a hmu thut a, pasâltha Laiawrha pawh a phu chiang khawp mai, Lal Zamloa chu zan mu lo tih hriat tak chuan a meng phelh phang a, Lal Zamloa chuan ngawi reng in Laiawrha chu a kal pel nghal thuak a. thinur ru hle mahse Lal meuh chu biak loh a hreh deuh vangin ‘ Lalpa khawnge i kal dawn, zing thang thang ah’ tiin a be hram a, Lal Zamloa chu ding deuh dat in ngawi reng chuan a pel ta mai a, pasâltha Laiawrha pawh chuan kal mai a tum lai chuan thlanah a nau a awm ve tih hria in, ngawireng chuan Lal chu a zui let ve ta zawk a.

Thlan ah chuan mi pangâ te chu ngawi reng chuan an in melh thap a, Lehlawn Lalnu Muanzoi chuan a pasal chu melh in ‘ he tah engnge i lo tih ve’ lungawilo zet chuan a ti hul hak a, Lal Zamloa chuan mittui khap per chhak chhak chungin, a nupui chu a hnaih hret a ‘min ngaidam rawh, ka fanu ve tho a nia sin, hetia min liam san thut hi hrehawm ka ti hle a, heng thil zawng zawng thlen chhan chu ka chapô leh sual vang a nih ka hai lo a, rem i tih chuan kan pasâltha Sângtuala hian Mami hmun awh in lo awm sela, a in ang tak a khawsa in, nupui pawh a duhang zawng neiin min awmpui sela ka ti a, kan awm loh hnuah pawh Lehlawn khua hi awp zui turin ka duh a ni, a ni a awm chuan Mami kha ka bul a awm ang ah riak ka ngai a, ka tihsual chu siam tha zo lo mah ila, ka rilru damna tur talin he ka thil sawi hi rem ti hram rawh’ tiin a nupui chu beisei nei tak chuan a melh tlawk tlawk a.

An rin loh lutuk thil a sawi vang chuan a hma a mite pawh chu an ka hau hlawm, Lalnu Muanzoi chuan ‘ I khuate lak a thangthat lak duhin heng thil hi i ruahman ti raw ? nang ang a mi tenawm hi ka la hmu hauh lo, i fanu ruang chungah chu tiang i suahsual rilru i han sawi a nia, Sailo hnam ziding Lal chi leh mi chung a leng, mi dangte thiltih chung a in la fing leh rem hria, i vawikhat sawi tu hnial theih loh a i ngaih vang a rawt na siam i ni leh ngei ang maw ?’ tiin Lalnu Muanzoi thinrim lutuk chu tawng chhun zawm theilo in a khur zawih zawih a. Satlâk Lalnu Thanthûami chuan ‘ka u insum deuh teh, nang a duhna lam ringawt um a thil sawi leh ngaihdan sawi hi ching thin teh suh, tlangngaih dan pawh dawn ve thin tur a ni ngai’ tiin a lo khak ve hlak a, khua lo en takah chuan pasâltha Sângtuala chuan, Lal Zamloa khawsa zia a huatsa nak lai a, a chung thu a thu tawp a lo siam ngawt chu hre thiam lo in ‘ Lalnu kan kal tawh a nge, lo hawn leh vat kan tum dawn nia’ tiin an unau chuan zawlbuk lam pan chuan an in zui phei hnak hnak a. pasâltha Laiawrha chuan ‘kan Lehlawn Lal Zamloa mai mai thin hi, eng puiah hian nge maw a in ngaih chu ni, ran tlukah pawh hian min ngai lo ni berin ka hria’ thinrim seh chilh rap rap chuan a han ti a.

Zawlbuk an thlen chuan midangte pawh an lo tho deuh vek tawh a, an insiam zawh chuan Lal mualah chuan an kal nghal a. tlangval te an din thup lai chuan, Lehlawn Lal leh Satlâk Lalnu te chu thlan lam atang chuan an lo thleng ve nghal a, Lanu Thathûami chuan ‘nangni tlangval te u, kan dinhmun leh nih phung hretute in ni a, in tih tur chu tluang takin khuanu hualin va hlen ngei ang che u, in lo kir hma loh zawng nghakhlel takin kan lo thlir reng dawn che u niai’ tiin a han sawi a, Lehlawn Lalpa zamloa chu râlthuam famkim nen a lo in pu bawr ve lak an hmuh chuan, tlangvalte chuan mak ti tak chuan an lo thlir thap a, an dan theih tak loh ah chuan Lal Zamloa chu tlangval te zing ah chuan a kal ve ta a. Satlâk valrual leh an kaihhruai ten rawmri kawr an thlen chuan Chhippheng valrual za nufa tha lam mah te chu chu eirel chuan an lo vir buai zak zak a, an thlen kim chuan tlangval za li dawn thaw an ni reng a, thlengthar ten tukthuan an eikham chuan, khan remchang leh hnai berah chuan an kal ta hul hul a. naurual zanrih chhum hunah chuan Sialai khua pawh an hnaih ta kher mai, an lo tih thin dan in Sialai khaw enfel tur chuan, pasâltha Sângtuala te thianzaho chu an kal leh ta, vaibel benghnih an zuk zawh chuan Rinmawia te ho chu an lo lawr leh ta tham tham a, pasâltha Sângtuala leh Thûamkunga erawh an lo lang ve lo a, pasâltha Laiawrha chuan hlauthawng ru tak chuan chin a zawt thuai a, a nau thuchah a hriat chuan a ni chu a ngawi ta rauh rauh a. val upa leh pasâltha chuan khawnbawl upa leh Lehlawn Lal Zamloa chu rawn in, thu mum an neih hnu chuan ‘ tlangval te u, kan pasâltha chuan Sialai khaw tan pui turte an lo thlen hma a khawchhung lak mai a that a ring a, râl bawh thei turin kan in ruahman vek ang, helai hmunah hian Satlâk khawnbawl leh Lehlawn Lal hi tlangval sawmthum velin pasâltha Phulliana ho in in lo awmpui a nga, kan lo koh hunah che u Sialai chu in lo lut mai ang’ a han ti dam thlap a

Fimkhur tak chuan Sialai khawchhung reh duk lam pan chuan an kal zel a, pasâltha Sângtuala ten an lo nghahna an thlen chuan silai chu an endik nghal mawlh mawlh a, chutia an hmarua an en dik lai chuan, Sialai lungdawh lam ah chuan thawm lo awm in an ngaihthlak chian chuan, Sialai khual tha tlangval za chuang mah tur te nen chuan hlim takin an ti ti bawrh bawrh a, an thusawi dan atang chuan an innel hmel kher mai a, a khat tawk chuan an thûm leh hak thin, khual valten vaibel an zuk zawh chuan khawchhung lamah chuan an in zui chho dam dam a, an tum loh a thil a kal takah chuan eirel phawt chu tha in an hre ta a, pasâltha Sângtuala chuan thimhlim a khawchhung luh a, Lal fapa Ngamliana chu ruk chhuah dan ngaihtuah mai chu tha dawn hle hian a hria a. val upa Chhâwnthiaua chuan ‘thil tha tak chu a ni, mahse a hlauhawm lutuk, khawdang tlangval nghah mek an neih tho vangin zan lam ah luh chhuah mai zawk ang u’ a han ti a. pasâltha Sângtuala chuan ‘val upa i rawt ang chu tha ka tih rualin, ka ruahman ang chu han bawh chhin phawt ila, kan hlawhchham tak leh kan bawh thei tho a, Lal fapa kan ruk chhuah theih chuan Sialai khua chu a buai nawk a nga, chu an buaibut lai chuan kan bawh huk mai ang chu’ a han ti ve leh bauh a, val upa Chhâwnthiaua chuan a nau chu a han thlek vang vang a ‘ka nau, i beisei ang chu ti chin reng reng ula, han fimkhur hle ang che u, tullo a nunna hloh hi pumpelh hram kan tum dawn nia’ a han ti ve leh bauh bauh a, an chaw thing fun chu pasâltha Sângtuala te thianzaho chuan an bar hawng hawng a, an bar zawh chuan vaibel zuin an han tawi khaw muang leh te te a, thinhlim bakchhe lenrual chuan Sialai khaw chhung ah chuan an lut tham tham hlawm a, chempui puan hnuai thap chuan tlang nel takin, Lal mual lamah chuan an chho thauh thauh a.

Khualval te chuan khawtual tlangvalah ngaiin pasâltha Sângtuala te thianzaho chu an nuih liam mai a, Lal mual an thlen chuan, Lal in atang in tlangval rual khat lo chhuak an hmu a, an zingah chuan Lal fapa telin eng emaw sawi chuan a kut chu a lek zauh zauh reng a, in tawp chu pelin inthiar tur chuan dai bulah chuan an in sem darh sang sang, vawkpui no hruai chuan ruai a awm dawn tih hriain, chung tlangval pangâ te chu an zui nghal dam dam a, thing buk phen atang chuan ‘vawk chhia kal nghal rawh, i va han nghal reuh ve maw le’ ti leh thil thum pawp chu lo awm in vawk chu an ngek that that a, vawkpui chuan a no ngeng na lam chu hawk dut dut chuan pan in an ri teng tung hlawm a, chutia an rik nawl nawl lai chuan, pasâltha Sângtuala te chuan an chanpual tur te awmna lam chu fimkur tak chuan an pan dân dân hlawm a. Lal fapa Ngamliana chuan vawkpui chu vawm thum dawp pah chuan, anchhia chu a lawh pah barh barh a, thil thum deuh dawp chu awmin vawkpui chu ngeng thawt a, an pian lamah chuan a ri phei sun sun in thawm chu a reh nghal dak a, vawk no ten an pui tlan liamna lam pan a an ngek hraih hrah lai chuan, thing ri suau chu awm in thawm chu a reh ta thap a, pasâltha Sângtuala chu a han faifuk raih a, midang ten an lo chhawn tliar tliar takah chuan aw a han thian leh kharh kharh a, an mi mante theuh pu chuan hmanhmawh tak chuan an thiante nghahna lama ah chuan an kal thuai a.

An lam pan ruang pu ni awm tak lo in zui an hmuh chuan, Satlâk valrual te chu an inring khar hlawm a, an thiante an ni tih an hriat chuan an pui thuai a, Sialai Lal fapa chu tui chuan an theh that that hnu chuan a lo harh ta a. Lal fapa Ngamliana lo harh chuan a hrawk chu a dawm chut a, harsa ti tak chuan thaw hawk in a bul a mite hnen ah chuan ‘tu nge kha ti tak a min han rek che u, a chak lo khawp ang’ tiin a thaw hrawih hrawih a, Lal fapa in a hma a mite a hmuh chian meuh chuan, a mak ti chu a mek kawk kawk a ‘nang nangni in ni maw ? nangni khua hi in châklo ang, kan that vek che u a nga, in hmeichhia te chu kan sâl an ni kum khua tawh ang’ tiin a vau chhar chhar a, Lehlawn Lal Zamloa chuan ‘nang vawkpui ai pawh a tlaktlai loh hian ka vau e te min tia law, a nung chung in ka hlep ral thak dawn che, in khua te an lo thlen meuh chuan ruh hlang i ni hman tawh ang’ tiin chempui hriam tle vur chu a rawn lek chhuak nghal zat a. Lal fapa hlau lutuk au chhuah tum in sang ping chu, val upa Chhâwnthiaua chuan a kâ hup in ‘naua ngawi chipcham rawh aw, nang ang mi hnawksak thawnbo hi thil harsa a ni miah lo a nia, i ka ka hupna hi ka thlah dawn a, i au chhuak a nih vaih chuan buh ban ramah ka thawn nghal ang che, theihnnghilh hauh suh ang che’ tiin Lal fapa Ngamliana beng bulah chuan a phun sap sap a, thuawih loh chu tih theih a neilo tih hria in thinrim tak chuan a thu sen tal a.

Lal Zamloa chuan ‘khawnge min lo dang teh suh u, he mi hnaisailo taksa hi ka han chan darh leuh mai teh ang’ tiin tlangval a mah chelh bet tute kut atang a tal chhuah tum chuan a leng vuat vuat reng a. pasâltha Laiawrha chuan Lalpa insum hram hram teh aw, chutiang a nih loh chuan kan zavai tan hian a pawi hle mai tur a sin, in ngaihtuah harh teh tiin a phun sap sap a. Lal Zamloa chuan ‘he mihring dam ve chhung chuan ka in thiam lohna hi a reh dawn lo, khawngaih in min chelh lo hram teh u’ tiin a la tak fat fat reng a. Pasâltha Laiawrha chuan ‘Lalpa he tiang chuan kan in dawh reng thei hauh lo ang, bengchheng siam lo in awm hle hle rih rawh, a hunah chuan he pa chu i la dah tha mawlh ang, dawhtheih na nei ve rawh ‘ tiin Lal Zamloa chu a han hrawm deuh salh a, Lal Zamloa chu ngawi reng chuan a ding tlawn ve zuah a. Val upa chuan kan Lal leh khawnbawl upate leh kan mi mante hi hmunhim lamah kal pui ula, midang te erawh chu inchhung dung chen vel a in hlatin mi pathum theuh zel a in sem darh ula, heng kan mi man zawng a kal darh te a theih ang a phil zel tur a ni, an tlem deuh hun ah kan bawh huk dawn nia tiin a han sawi a, tlangval sawm ngâ te an kal hnu chuan mi dang te pawh chu an in semdarh ta a. Lenglen ar a khuan chuah chuah lai chuan, Sialai khaw chhung ah chuan tlangval au noh noh ri chu lo chhuak a, meichher eng chu a awm noh noh a, Lal fapa te in thiarna hmun a tang chuan meichher eng chu insem darh in an vak darh sung sung a, ngawril lam pan chuan an thian bote chu an au chuah chuah hlawm a.

Tlangval pangâ te chuan an thiante bo ringawt mak an tih thu sawiin, a khat tawk chuan an thiante chu an au pah reng a, meichher engah chuan Thûamkunga te sul thar chu hmuin en chian tum chuan lei chu ngun tak chuan an bih a, chutia uluk tak a an bih lai chuan Thûamkunga, Chungliana leh Rinmawia chuan chung tlangval pangâ te chu an zuan thut a, an chempui hum chu an vai zawk zawk a,khual val hamhaih a an din zawk lai chuan an thal zo thuai, chung ruang pangâ te chu hmuh mai theih lo tur chuan an dah fel thuai a, thim zingah chuan an ni chu an pilbo zui nghal a, Sialai leh an thurual pui tlangval te chu an hek ham ham khawp mai, chutia an râl tlangval tam tak an dah that a, hmanrua te an khawm zel lai chuan meichher eng pawh a tlem tawh khawp mai, meichher eng tlem ta riau chu khualval lam chuan an hrethiam a ni chek a niang chu, an in au ta chuah chuah a. chutia Sialai val in au khawm an hriat chuan Satlâk valrualte chuan thim thamah chuan an hnaih ru hret hret a, meichher eng a tlangval rorel khawm mek te chu an lang sar khawp mai, val upa chuan ‘Nangni Sialai tlangval te u, in in pe dawn nge kan chimih thak dawn che u’ tiin thim tham a tang chuan a au lauh lauh a, Sialai tlangval te chu an han in rawn khawm a, Sialai leh an sangawi zawnpui tlangval kei ka ni in ti chin chuan, silai lek khawh in aw chhuahna lam chu an sâi ta dur dur a, silai a puah tak chuan Satlâk tlangval te pawh chuan an kâp let ve ta dur dur a, meichher eng a awm Sialai tlangval te chu an let tawp tawp a, silai rik dan a tang chuan hualbeh an ni tih a hre thiam thuai a.

Tlangval zahve dawn thaw an tlu ta a, silai chu a han puak leh dur dur a, sialai lâm tlangval te pawh him pangngai chu mi sawmthum tha lo liam an ni tawh lo ang tih an in hriat chuan, Sialai tlangval te chuan râlthuam paihin an in pe ta, nun duh a in pe nafam chu tumah kut an thlak zui ta lo, Sialai tlangval te chu hnungkhirh in khawchhung lam pan chuan an chho ta. Lehlawn Lal Zamloa chu tlangval te karah chuan a kal ve hnak hnak zel a, ni dang a dak deuh lah a kal thin tun tumah chuan Lal Zamloa chu a kun deuh nghulh reng a, a hmelah chuan rilru natna thuk tak a lang a, zan mu thalo tih hriat tak chuan a meng thial urh bawk a, tlangval râlveng a awm te chuan Lal fapa Ngamliana aw an hriat chuan, an hmanrua chu an dah thla a, râlveng tlangval te chu khual valte chuan hnung khirh leh in, Sialai khaw lal mual lam pan chuan an kal zel a, nunau te chuan an tlangval te an che fuh emaw tiin bang awng a tang chuan an lo bih far hlawm a, an thlen chin in awm a piang chu an khawm chho miah miah zel a.

Sialai lal lukai chheh chhawh chuan mipui thawm lo chho a hriat chuan, a seki no chu thawkkhat pawp in ‘kan khaw tlangval te chuan râl eng zat tak lo hawn ang maw ? râl tam deuh lo man sela, buh seng tur kan ngah in lam hla neih kum a ni bawk nen, sâl nen a han rik lui lui pawh a chakawm a lawm le, tlangau pa, nang sâl eng zat nge i duh, kan tlangval ten khawchhung an luhchhuah hun ah hmei lam te i duh a ngem ? i chhungpui nu pawh a vuai sawng ve tawh si a’ tiin a nui huk huk a, tlangau pa phur pheng lah chuan ‘Lalpa rem i ti chuan,nula falu tawn loh han chhuk birh tlauh tlauh chu a chakawm thlawt a lawm le, chhungpui nu lah hi thikthu a chhe vei tuk roh a, mi hipna hi a nei mang ta hauh lo, khumpui puankawp thar hnuai ah, um rawng thar a chukchu dak ang vang a mu hnar so bawrh bawrh han hmuh hi chuan, chhir len lawp mai ka nap thin e, tam tawk ah a tui tih ang hun thlen hma chuan, thenawm nuthlawi mitthla in kan sum tlai var thak thin zu nia’ a han tih chuan, Sialai Lal leh khawnbawl te chu chhuatah chuan an nui lum tawp tawp a . . .

Chutia Sialai Lal leh khawnbawlte an nuih tlawrh tlawrh lai chuan, Lal fapa chuan ‘ka pa lo dak lawk teh u, hmanhmawh in’ tiin a rawn au lar lar a, Sialai Lalpa Zamana chu a khawnbawl te chuan nui tha chung chuan an zui chhuak dam dam a, tlangval tam ngaihtuah chuan meichher eng chu a tam lo hle lawi a, chutia an ding thim deuh khup chu Sialai Lal Zamana chuan ‘tlangau pa, ka tlangval te hi ka hmu thei mang hauh lo mai ka ti, Sialai khua hian ka mual en khawp meichher hi kan nei zo lo a niang maw ? khualval leh khawtual hre hrang theilo a kan awm chuan,kan thang mawilo lutuk dah a nge, meipui chheh tur tak ngial pawh kan nei lo a nih chuan, kan khawtlang in awpna hi a lo va tla chhe tawh awm ve’ a han ti lar lar a, tlangau pa in her chiah chu, an bul lawk a tang chuan ‘ ti khan ding hle hle rawh, ka thu i zawm loh chuan naktuk khawvar i hmu tawh hauh lo ang’ tih pah chuan tha chak tak hian, tlangau pa tuk samah chuan a rawn phih leng dawrh a, khawnbawl upate chuan an sir a pa piantha tak leh a hnung a mi pasâltha tih hriat tak te chu an melh thap a, tlangau pa pawh harsa ti tak chuan a rawn tho taih taih a, chhan beisei tak chuan Lal Zamana chu a thlek hâ a.

Sialai Lal Zamana chuan ‘ a tu phiangsen nge maw i han nih teh chai a, ka mit hmuh a ka tlangau kut han thlak khanglang che chu, i lu khan ka sahlam a mawi chiang khawp ang’ tiin inchhung a luh tum chuan a han pen nghal a, pen thum a pen hman tih chuan ‘ khanglang zawk che chuan, ka thu lo in khawiah nge kal i tum a, lo let nghal rawh’ tiin a bek samah chuan a han phih nghek a, Lal Zamana na ti chu te that in, lal a lo hrawtna thinah chuan a let nghal tawl a, Lal Zamana thinrim lutuk chu te tuar tuarin, a ding leh tur chu a nghawng ah chuan thir vawt ngiai hian a rawn nawk ran a, thu hle hle rawh i inhliam palh a nge a rawn ti vawt raih a, Lal Zamana chu thinrim luat vang a tawng theilo chuan a thu sawp nuaih a, a mah tin tu chuan Thûama meichher pakhat kha han chhi rawh khai, Sialai Lal in khua a hmu theilo e tiin thu a han pe zui zat a, meichher pakhat pu in tlangval pakhat chu a kal hrang a, mual kil in pakha chu dep kai in reilo teah mei chu lo alh hluah a, Lal mual chu a rawn en ta hluah a, in kang engah chuan Lal thuam inbel pakhat hi a lo ding kun raihin a hmel chu thinrim vang chuan a dur khup a, Sialai Lal Zamana chu a lo melh tur khuih chu niin . . .

In kang vang chuan nunau hlau mangang chu an te tuar tuar a, nunau mangang a hmuh meuh chuan Lal Zamana leh a khawnbawl te chu an mangang ta kher mai, an rui pawh an harhfim nghal awk awk a, Sialai Lal hnenah chuan ‘kei hi Satlâk val upa Chhâwnthiaua ka ni e, hei hi kan khawnbawl upa niin a bul a mi hi Lehlawn Lal Zamloa a nih hi, kan lo kal chhan chu in hre vek bawk a, kan lusun mangan na den chhen a kan chung a chemhar in len hmasak vang leh dawt thu hmang a i thiante nen min chimih thak in tumna rah chu tunah hian in rul vek dawn a ni’ tiin Sialai Lal Zamana chu a melh tur khuih a, Lal Zamloa chu zawi muang a lo pen chhuak in chempui chu a rawn phawrh chhauak nghal a, Lal leh Lal in bul kan tan tur a ni, ka fanu kan sun lai a Satlâk tlangvalte chung a kut thlak tu ten nang hi an lo zui bawk ang che, Lal i nih ang takin sul i su ngei tur a ni, mei kha han tuah en belh ula chuti lo zawng, kan Sialai Lal hian khua a hmu fiah lo palh a nge’ tiin Lal Zamloa chu mual laiah chuan a tawlh liam nghal a, thinrim hmel dur khuih leh kâng thli in siam in a sam a han len nghau nghuau chu hmuithla te pawh a ang rum rum hial a, thinrim aw teng chhuah chuan ‘Zaman lo chhuk rawng rawh, i lo kal loh chuan ka hal khung tho tho ang che’ a han ti khur khur a.

Hreh teh mahse Lehlawn Lal chuan a thusawi a ti hreh dawn lo tih a hriat vang chuan, banglai a chempui Satlâk val upa in a theh thlak lamah chuan a chhuk ve ta hnu hnu a. Sialai Lal fapa chuan ‘ka pa kha kut hmawr pawh a in khawih vaih chuan in châk lo ang’ tiin a han au that that a, pasâltha Sângtuala chuan ‘ nang mi dawihzep hian engtin nge i tih chuan ang, ngawi chipchap mai rawh’ tih pah chuan beng hup thawk chuan a beng thal nghal thuai a, te chul chung chuan Lal fapa chu a vial ngawl ngawl a, a chhipsam a tham thawh lawp pah chuan ti khan ngawi rengin lo awm rawh, nang hian i pa chu i zui har tawp lo ang a han ti zui sap a, Lal fapa Ngamliana chu beng hup chuan a ding ngawi ta reng a. Lal pahnih te chu in kâng eng ah chuan an in veh ta thauh thauh a, thinrimna na a khat leh pumraw tha zawk, Lal Zamloa chuan Lal Zamana chu a han sat pawp pawp a, tharum hmang ngailo tih takah an che chu an khawr dun hle a, an Lal te fuih in tlangvalte chu an lo te tuar tuar hlawm a, in beite aiin an tang emaw tih tur chuan tlangval te an ti ring a, a bawhtu zawk ni mahse Lal Zamloa thinrim lutuk chuan fimkhurna hloh in, Lal Zamana chempui lo thlawk chuan a nak dinglam chu saipir chen lai chuan a hliam ta a, Lal fapa Ngamlianan a pa chan tha zawk turah ngaiin ‘ka pa tang rawh, kha tiang mi mawl leh mahni thu duh satliah kha dim reng reng suh, a lu khan i sah lam saw va cheimawi rawh’ tiin a lo au tuar tuar a.

Pasâltha Sângtuala chuan ‘Lalpa i thinrimna dah thain rilru fim nen bawh rawh, i kut veilam leh ke kha hmang tangkai tawh ang che’ tiin a lo fuih ve bawk a, Lal Zamana chuan khi sung chung in’ kan Lehlawn Lal nep lutuk chuan, ka khaw boruak i zolo a niang maw ?Lehlawn pawh hmeichhe hnuai a awm kum khua turin ka han siam law law a nge, kha lo inring rawh le’ tiin phur fe chuan a bawh ve ta thung a, chempui pawh a in khak tek chhak chhak reng a, kal chau leh hliam tuar zawk Lal Zamloa chu a tawlh zawkah a tang ve ta thung a, tuibur hmuanda an han in nawr dun zak zak a, an chau chu ding in an thaw huam huam a, pasâltha Sângtuala chuan Lal Zamloa chu tuisik in tir in, Lal Zamloan tui a in lai chuan a bengbulah eng emaw sawiin a phun sap sap a, tui in pah chuan a ni pawh a bu nghat nghat a, Sialai Lal pawh tui a han in tir ve nghal a, tui an in zawh chuan an ni chu an in veh leh ta, Sialai Lal Zamana chuan ‘nang vau pung lian, i fanu tlaktlai loh zet chu va zui lup lup rawh khai, i nupui chu ka hmeiah ka lo kawl tel dawn nia’ ti a au that that pah chuan chempui chu a vai leh zawk zawk a, Lal zamloa chu a tawlh hnung harh harh a, chempui lo thlawk kun hniam san zauh pah chuan pen khatin a hnaichilh thut a, chho zawngin a chempui chu a vai nghal zawk a.

Lal Zamana chu te thawtin a ril lo tawlh chhuak mek kut hnih a hup in a thingthi hnawk a, a na ti lutuk then sawk sawk in a thlanfim chuan a bual khat nghal vek a. Lal Zamloa chuan ‘hringlang tlang a tangin i nupui ka dungbawh lai chu lo thlir ang che’ tih pah chuan chempui chu a han vai zawk a, Sialai Lal Zamana nghawng ah chuan a han sat nghek a, ring a lu uai hnawp leh ril pawm tun chuan a let tawp a, a nghawng a tang chuan thisen chu rawn chik zawih zawih a, nunau in chutia an Lal thisen bawh nuaih a tlu sawp nuaih an hmuh chuan an te tuar tuar a, Sialai Lalnu pawh ni khaw hrelo chuan a let nghal hnawk bawk a. chutia a pa tlu a hmuh chuan Lal fapa Ngamliana chu a pa chempui thlauh lamah chuan tlan thut in a chhar thuai a, a hma a Lal Zamloa thaw hlawp hlawp a ding chu a sat nghal pawp a, Lal Zamloa chuan chempui lo thlawk chu lo dang ve mahse, a sattu tha in a hneh em vang chuan a darah chuan chempui chu bet rawk a, a dar chu khap zet chuan a kak nghal haih a, hreh tak chuan tual lei charah chuan a hlawm nghal hnawk a, Lal fap Ngamlianan Lal Zamloa sah nawn tum chempui a lek lai chuan, a khabe kual chu ri sawkin a leng nghal lawp a, lei a thleng chiah chu pasâltha Sângtuala chuan dimna tel hauh lo chuan, a hmai ah chuan a han tum nghak sawk a, thut zuiin a lawk ta mawlh mawlh a.

Chutia Lal fapa che chhuak vang chuan Satlâk tlangval leh an sangawizawnpui khuate chuan, an hma a tlangval te chu an sam ta hmiah hmiah a, tlangval te an tluk zawh chuan Thûamkunga chuan ‘tunah khaw pum hal fai vek ang aw’ a tih chuan Satlâk valrual te chuan meichher chu an nawr kai sawt sawt a, in chu a hma tiam chuan an hal ta hmiah hmiah a, reilo te ah Sialai khua chu meikhu in bawhin thawk pawh a har ta hial a, naupang leh tar chaklo te chu khaulvalte chuan hmunhim lam ah an thiar chhuak a, Lal Zamloa hliam chu Sialai bawlpu chuan a theih ang chuan a buaipui a, a ni pawh rei vak loah chuan a lo harh chhuak ve ta a, Sialai khaw chin a hriat chuan ‘tlangvalte u, an Lal te khawsa zia en chuan thil pawi a ni hauh lo, heng nunau te nun kal tur erawh a hrehawm viau dawn anih hi’ a ti zuai raih a, an in nghanna te an liam takah chuan puitling rilru fim chinte chu an tap hlawp hlawp hlawm a.

pasâltha Sângtuala chuan ‘khua chu reilo teah a var tawh mai dawn a, kan hriat ang a thil a kal a nih chuan Sialai puih tum khaw khat te chu an lo kal ngeiin a rin awm a, chu mite lo barakhaih tur chuan an in buatsaih a tha ang a’ tiin a han sawi a, val upa leh pasâltha te an in rawn chuan nunau te chu hmun himah dah phawt mai tha an tiin tlangval te chuan lungdawh thlang hmun rem ah tanhmun siam mai tur chuan an in ruahman ta, nau nawite chu hmun himah an sawn thuai a, silai an neih belh te chu zen chu an sawh thuai a, an duh tawk a tanhmun an siam chuan ngaw hnuai chu a la thim khup a, che lo a an awm reng takah chuan tlangval thenkhat te chu an muthlu lawk lawk a.


Net vangin ka lo dah theilo a, in mi hriatthiam na ka ngen tak meuh e, ka ngaih pawimawh loh vang che u a ni lo nia . . .

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 23rd, 2018, 8:29 am

PASÂLTHA SÂNGTUALA (Mampuia Pa )

BBUNG -137


Chu tia Satlâk leh an sangawizawnpui tlangvalte an mut thluk reh thap lai chuan,Sialai vawk te chuan dai velah in hnang fakna zawngin an tla sap sap a, chutia vawk tla kual zak zak vawk note ho chu an teh hak a, nghalchang rum ngul ngul chu a lo chhuak ta a. pasâltha Sângtuala chuan fimkhur tak chuan nghalchang thawm chhuahna chu a bih dak dak a, Thûamkunga chu hui zauhin a ni pawh chuan fimkhur tak chuan a thianpa bul chu thleng in a thianpa enna lam chu a en ve ta, nghalchang chuan vawkpui hur chu a rim alo ni a, vawkpui pawh chuan ram vawkpa lianpui chu zo tak chuan a ding vung vung a. chu vawkpui rimtu nghalchang chu a ngho a thain a lian bawk si a, Thûamkunga kâh chak lutuk chuan a tin zuau zuau a, a kah mai hlau chuan pasâltha Sângtuala chuan khap in hmuhnawm ti tak chuan an thlir dun reng a, vawk pahnih te lungrual a an in bawh rual lai chuan nghalchang chu a tep chup chup a, vawkpui chung a tang chuan a chhuk thut a, hawk hruih in ngaw chhah lamah chuan a liam thla nghal vuai a, nghalchang chuan hlauh a nei tih hriain uluk tak a thawm ngaithla in pasâltha Sângtuala chu a han awm a, Thuam thian, kan thiante khu thawmnei hauhlo in zu kai tho thuai rawh, inleng kan nei dawn e, nang pawh fimkhur hle ang che’ tiin a tir a, nghalchang a liam deuh awrh tih chuan tlangval rual lo langin pasâltha tih hriat tak chuan hma hruaiin a silai chu hman mai theih chuan a lek hniam ruai a.

Thûamkunga lu lang zawk chu a lo hmu hman chu niin silai chu a han lek kawh nghal auh a, a cheng a kau dawn chiah tih chuan pasâltha Sângtuala chuan ‘ kâp hlek suh, i chet leh chuan i thluak bur kha ka phin darh vek a ni mai’ tih pah chuan silai kausa tin kawh vah chung chuan a ding chhuak nghal zawk a. an tum loh tak a thawngtu an awm vang chuan lo thleng thar tlangval te chu an ding thap hlawm a. chung pasâltha pahnihte chu an mit tak a in en kalin mihrinna chak zawk nih ngei tum chuan an in melh ding ngal a, Mualkunga chuan ‘nang kha silai kha khawih hlek suh, nangni nen a buaina hran hrai a nei kan nih loh vang chauh a zen khu la zamlo a nih chauh hi’ tih pah chuan tlangval lo thlengthar hnung lam a pakhat chu a tin ve nghal rap a. val upa Chhânthiaua leh pasâltha Laiawrha te pawh an lo chhuak ve nghal zat a, val upa chuan ‘thiante u, khawi lam pan tur nge in nih a, kan inhmuh dan chu a duhawm loh kher mai a, insum tlang ila tha te te in i sawiho teh ang u’ a ti dam thlup a, khualval hruaitu pasâltha chuan an hma a mite chuan an mahni an hlauh vang a zaidawh an ni hran lo tih pawh a hrechiang kher mai, hmelma tlangval ding thup pawh hmulo ang mai a, an tapchhakzawl chet hmiah hmiah dan ah an hma a mite tawhkhirh dan tur pawh a hrethiam mai a.

Kei hi Satlâk val upa Chhâwnthiaua ka ni a, eng emaw pawimawh awm in he laiah hian kan la tap tal a ni e tiin tawngkam pangngai tak chuan a han sawi zui a. khual pasâltha chuan ‘kei hi Langleuh Lal fapa leh pasâltha Bungthanga ka ni a, Sialai khaw Lal in Satlâk khua te nen buaina an neih vangin min chah a, hei kan lo thleng ve rawih a nih hi, kan tlai niin a lang’ tiin mitmeng a thinrim hmuh hmaih theih hauh loh chuan a han sawi a, Sialai khaw kang dum huam thlirin ‘nang ni khua te chuan hei nunau te pawh in rem thak mai a ni maw’ hmeichhia leh tar chaklo zawk chungah pawh kut in tim lo niin lang’ hmusit hmel tak chuan a han ti zui leh sak sak a. val upa Chhâwnthiaua chuan ‘an pawi kan sawi loh chung a, kan chung a kut za tak chungah chuan kut kan sum bik hauh lo’ tiin val upa Chhâwnthiaua mitmeng pawh a nelawm loh sawt kher mai. Chutia an in biak lai chuan ngawpui lam atang chuan naupang pakhat chu a lo tap ar ar a, khualvalte chu an phu suau a val upa chuan ‘tharum hmang a chet tum hauh suh ang che u, kan hual vek tawh che u a nia, kei ni Satlâk khaw tlangvalte hi thisen chhuah chak a za zek zek kan ni hauh lo, min nawr luih erawh chuan pawisak kan nei hauh lo thung’ tiin chet mai in peih chuan a ding kak hah a, khual valten an thlang ngawpui an en chian chuan an hma a mi chuan dawt a sawilo tih an hre chiang ta kher mai, Langleuh tlangvalte chuan pasâltha Bungthanga chu an melh thap a, a ni chuan zawi muang chuan lu a han thing mat mat a, val upa Chhâwnthiaua chuan a lawmawm e, thiante u tha te te a sawi hi a finthlak reng a ni tiin tlangval pakhat chu ko in eng emaw sawi chuan a beng bulah chuan a han phun sap sap a, chu tlangval chu ngawpui hnuaiah chuan a pilbo zui vat a,Sialai bawlpu leh Lalnu chuan tlangval chu an lo zui a.

Langleuh pasâltha Bungthangan Sialai Lalnu Buangthangi a hmuh chuan mak a tih hmel khawp mai, Lalnu chuan ‘ e Buangpuia in lo lang thei maw ? nizan ah i pate a chu a liam ta a nih kha, lo thleng hman ula chuan khati mai khan i patea chu a liam awm tawp silo a’ tiin a in sut ta hlawm hlawm a. Sialai Lalnu thusawi a hriat chuan Langleuh pasâltha Bungthanga hmel chu a dur ta khup a, thinrim sehchilh rap rap chuan ‘ka patea that tu chu rei a dam hauh lo ang, Lal meuh pawh zah lo a kut thlak tu chu tu nge ni reng reng chu, engzah pawh ni ula kan that mângthak ang che u’ tiin a han vin that that a. val upa Chhâwnthiaua chuan ‘kan khaw Lal Zamloan a that a nih kha, chu pawh mal beih in dik tak a a thah a ni e, kan Lal chung a kut thlak i tum a nih zawngin , Sialai khaw Lal vua leh vangte chu an tlem pharh dawn a nih chu’ a ti chang ve bang a, pasâltha Sângtuala chu val upa hma ah chuan a ding vang a, a mitmeng a thinrim na thuk tak awm vang chuan a mit chu a sen vam ham a, khualval dawihzep deuhte chuan melh tha ngam lo in an kun zal hlawm a, thinrim sa nak lai a a naute kun ngiai a hmuh chuan Langleuh pasâltha Bungthanga thinrim chu a zual sawt a, a hma a ding pasâltha diar khim vang dar leh tawn a sapui tin hnu lang vang chu pasâltha Sângtuala ngei a ni ang tih a ring thiam nghal a, chik tak chuan a melh deuh reng bawk a. Val upa Chhâwnthiaua melh in ‘in sulhnu thup Pawh in thiam awm hle mai, Lehlawn Lal chu khawi ah va kal uk suh, hmanni lawkah a fa neihchhun a sun hlim chauh a ni a’ ti a sawi pah chuan hma lamah chuan pen khat a han tawlh hma a, val upa Chhâwnthiaua chuan ‘naua, i hawiher leh tawng danah hian buaina zawng hrim hrim i ang riau mai ka ti, eng vangin nang a hma mai maiah hian dawt ka han sawi lem ang le’ a ti chang rut in a hmel pawh a dur khup tawh a.

Satlâk valrualte thinrim nat zia tem tawh Sialai Lalnu leh Bawlpu chu an ti deuh dai tawh a, mittui nen a la in sut hlap hlap chungin ‘Buangpui Satlâk tlangvalte hian dawt an sawi lo a sin, i patea a han tluk chiah khan i nau Ngamlianan Lehlawn Lal chu kut a thlak zui nghe nghe a sin’ tiin an khaw boruak chu a han sawi par par a. Sialai Lalnu thusawi chu mak ti tak chuan khual valte chuan an lo ngaithla thap a, Bungthanga chuan ‘eng a pawh nisela, chakai pawh a kawtawp ah a tang an tia lawm, khawchhung a min luhkhung fam chuan tupawh kan tang ve bawk ang chu maw’ a han ti leh a. pasâltha Sângtuala chuan ‘i thu sukthlek danah chuan Lal fanu thihna denchhen a, Sialai tlangval te chet dan sawi mawi tum i va ang ve maw le’ a lo ti ve bauh a, Langleuh pasâltha leh Satlâk pasâltha khualthang chu an in melh bing leh ta vang a, boruak a thisen rim hria chuan ngawpui chhung chu a reh thup tawh a, hleikapsen nupa chuan an hnuai a tlangval rual in ep thut te chu mak leh hmuhnawm tih hmel tak chuan thing kak kar a tang chuan an melh ve kar a, Langleuh pasaltha Bungthanga chuan ‘ hmangaihte then nat zia leh hrehawm zia i hrelo a ni chek ang maw ? i kum leh pumrua ngaihtuahin i fingvar lo kher mai’ tiin a then zui sak a, chu tawngkam chuan Satlâk tlangval te chu a ti thinrim kher mai, pasâltha Sângtuala chuan Chutiang khawp a i hmangaih a nih chuan duh leh hring langtlang ah va zui lup lup la ti nia a han ti zawi sap a.

Bawlpu chuan pasâltha thinrim boruak uap churh zo loin puan tlang khur hlak hlak chuan a ding zum za a, Langleuh pasâltha Bungthanga chuan ‘khaw nge in Lal tlaktlailo zet chu a awm a, ka Patea chu nawr luiin a khua pawh in han halsak vei maw, an thisen chuan min au lawm lawm a sin’ tiin a thisen zam te chu a lo pawng tawlh tawlh a, pasâltha Sângtuala chuan ‘kan Lal i hmuh hmain kei min paltlang phawt a ngai ang, buaina zawng a khawsak ching in ni ve reng reng dawn a nih hi’ tiin a silai chu a u kutah chuan a hmeh bel thlawp a, chempui chu a han phawrh zui zat a, pasâltha Sângtuala mit meng vam ham a melh reng chuan ‘ I patea te pafa i han hmuh hunah chuan an suahsual vang a nun chan ta pawisawilo Lal fanu Ngurpuii leh Satlâk tlangvalte hnanah ngaihdam lo dil ngei rawhse, hrilh theihnghilh hauh suh ang che’ a han ti châng rat a, chu thu chuan a hma a Langleuh pasâltha chu mak tihna neih tirin, a hmelah chuan zawhna a lo lang a ‘I thusawi danah chuan thiam zawk ni awm a in ngaihna i nei a maw ? a ti hau a, val upa Chhâwnthiaua chuan thudik i hre duh a maw ? ngun takin lo ngaithla la, Satlâk khua hian kan tih tur ti mai kan nih zia pawh i hre thiam mai ang tiin, Lehlawn Lal fanu Ngurzuali (Ngurpuii ti hlir in ka sawi zui zel ang) leh pasâltha Sângtuala in hmel duh dan te, chutia hnamchawm tlangval lak a Lal fanu tlangchang tur liam tir duh lo in ngaihtuah buai lai tak a, Sialai Lal fapa palai an hmuh dante, Lal Zamloan aw a lo pawh mai tak thu te, Satlâk khua atang Lal Zamloan Ngurpuii a hruai hawn luih dan te, Thluahpui pasâltha ten Lehlawn Lal Zamloa te haw lam an lo lambun a Ngurpuii an man dan te, Satlâk tlangval ten an va chhanchhuah leh dan te, Ngurpuii Sialai Lal fapa a neih duh loh vanga zawltlingvawnnat a nih dante, a fanu awmdan vang a inneih thulh a sawi lai a,inneih an thulh a nih chuan Sialai Lal fapa Ngamlianan indo a Lal Zamloa a vau dan te, Sialai Lal fapa leh a thi hruaite Lehlawn khua an va chetdan ngeiawm dan te, Satlâk Lalnu chung a Ngamliana khawsa zia mawi loh dante, Ngurpuii thi zualko kal tlangval eirel lai an kah dan leh, tlangval pathum that a an lu râl lulak ang tak a an cheibawl thu leh sahlam a an tar dan te, Lal Zamloa leh Sialai Lal in mal beih dante, Lal fapa Ngamlianan Lehlawn Lal a beih zui dan te, an thinrim an duhai nâ an chet dan chu tawikim tak chuan a han sawi a. Langleuh pasâltha Bungthanga chuan Sialai Lalnu Buangthangi melhin ‘ka nu Buang, heng khualvalte thusawi hi a dik em ? thu dik tak min han hrilh teh, ka unau te chuan mi lu chu an rawn hawn ngei em ? tiin a han zawt a. Sialai Lalnu Buangthangi chu ke zungpui bih chuan a kun ran a, a thu hriat thar a chhuidawn chuan, Satlâk val upa chuan a phuahchawp kual a sawi a ang lo a tiin a fapa zia a ngaihtuah chuan a dik duh hmel hle in a hria a, a fapa te chu an chet dik loh vangin heng khuate hian phuba an la ta mai em mi ? tiin a ngaihtuahna chu a kal ding kher mai, Langleuh pasâltha Bungthanga chuan a zawh na chhang lo a kun reng Lalnu melh chuan ‘ ka nute ka unaupa te chuan milu chu an lo hawn reng a mi ? tiin a han vin deuh thak a, Lalnu Buangthangi chuan a mah melh rengtu chu en in a lu chu a han bu ta nghat a.

Langleuh pasâltha chuan val upa Chhâwnthiaua chu melh vang vang in ‘I thusawi hi a dik niin ka ngai ta deuh a, ka patea te chetdan ka han ngaihtuah hian in chetdan chu ka dem hauh lo che u, kei pawh ni ila ka tih ve tur tho a ni, chuvang chuan tun tum a tan chuan kan in tha then phawt ang, boruak dangin min deng a nih erawh chuan kan la in hmu leh turah ngai ila, amaherawh chu Sialai khaw nunau te erawh chu an duh thu a an zui che u a nih loh chuan in chhuah zalen tur a ni ang’ tiin a han sawi a, pasâltha Sângtuala chuan ‘englekhawle, kan mi mante chung thu chu kan Lalpa Zamloa thu a ni, kei nin thu kan nei hauh lo’ a lo tih takah chuan an boruak chu a tang leh at a, a ma kum rualpui hmangaihna vang a nun hreawm dan tur a hriatpui vang leh a chung a awmsual bawl tlat tu lak a chutiang khawp a rinawm a hmuh chuan mak ti tak chuan a melh ta tlawk tlawk a, lung loh a la mai bik lo chuan ‘I sawi dikin ka hria, in Lal chu biak ka va duh ve khawiah nge ka hmuh theih ang ? tiin Langleuh Lal fapa chuan a chhang tha ve mai a. pasâltha Sângtuala meuh pawhin a hma a ni chu ngaisang leh mak ti tak chuan a melh ve reng a, Sialai Lal fapa nen chuan an dan dang a ti kher mai, nge tum dang neiin Lal Zamloa chung ah hun remchang a zawng zawk ? tiin a ngaihtuah buai ta nak mai le. A hma a mi en chuan ‘pasâltha ngaihtha takin awm rawh, pawi khawih tum ka ni dang lo a nia, thinchhe viau mah ila thisen chhuah châk hian ka za zek lo a sin’ tiin a sawi sap sap a.

Val upa Chhâwnthiaua te chu an in melh thap hlawm a, thudik hre duh nafam chu hun pek ngei tum in an chawlhna lamah chuan. Langleuh tlangval panga hruaiin, Satlâk pasâltha te chu an kal ta a, Sialai Lalnu chu kawng tluan chuan a ngawi ran reng a. Lal Zamloa dar leh nak tuam bur chung a vaibel fawp khu luai luai an va hmuh chuan. Satlâk tlangvalte chuan dawt an sawilo tih hriain, Sialai naupangte pawh chu ngaihngam tak chuan an vir that that hlawm a. an Lal unaupa fapa an hmuh chuan puitling te chuan an lo hnaih tiau tiau a, Langleuh Lal Fapa chuan Lehlawn Lal Zamloa hnenah chuan a mah a hmuh chhan chu a han hrilh a, Lal Zamloa pawh chuan ‘tlangval a lawmawm khawp mai, tharum ngawt a thil sawifel kan tum chuan buaina bak a paw chhuak lo, nang ang kum lekin he tia puitling tak a thil i ti hi ka lawm khawp mai, i sawi ang chuan heng Sialai khua te hi awm mawlh rawhse, he ta kan lakna chhan pawh eng emaw thulh a silai mu an dawn kan hlauh vang a nia, an mahni duhthlan na a ni e’ a ti a. Langleuh Lal Fapa chuan ‘ka lawm e, Lalpa a tir kha chuan engmah ka hrelo a, ka hriat chu chhiatna chauh kha a ni mai, thil awmdan ka hriat chian hian a pawihawl zawng a che hmasa kan ni miau mai si a, a pawi teh zawng a ni e, thil a nih tur ang a ni zo tawh a tuar zawk ni mah ila, kan tihsual man tel kan ni mai sawi thui tur a awm pawh in ka hre lo, nang pawh tha takin lo dam zel ang che, in chhungkua hian kei ni vang hian in tuar nasa hle a lo ni a, kan chet dik lohna te min hriat sak reng lo la, tha lam thu a kan in pawhna he thli thleng hi lo ni mawlh tehse, tih tur kan la nei nual a keini pawh kan let tawh a nge, tluang takin in kal dawn nia’ a ti a. Lal Zamloa chuan ‘ Tlangval nangmah ah hian zir tur ka va ngah tak em, in hma hunah khuanun veng zel che u rawhse, hei hi i pa hnenah inrem kan duh a ni tih hriat nan min lo pek sak dawn nia, hun thawl zawkah kan la ti ti dun ngei ka beisei, min lo la tlawh ve ngei dawn nia’ tiin an in mangtha ta a.

An Lal fapa chu an rinai a thangrei vang chuan Langleuh tlangvalte chu an dak sek hlawm a, an ngaihtha lo viau mahse an thlang a mite chu engzah chiah nge an nih, an hriat loh vang chuan chet an thawh ngam mai si lo a, ngaih ngamlo tak chuan an in melh kual leh ngawt thin. An mangan hnu fe ah chuan Lal fapa Bungthanga te chu hlim tak a ti ti barh barh chung chuan an lo let a, Langleuh tlangval pakhat chuan silai a lo ah belh a, nunau te pawh chu an lo kal ve hal hal a, mipa awmlo a khaw han luah chu ngam ngang heklo Langleuh Lal belh mai tum chuan thu an ti tlu ta a, Langleuh an pan hma a ruang phum fel an la ngaih vang hmanhmawh tak chuan an che sawk sawk a. val upa Chhâwnthiaua chuan ‘naute u, hei eng emaw chen chu kan la thleng hman ngei ang, kan thiante lu hi kan thang rei zawh poh leh a rim a nâ mai dawn a, chuvang chuan muanglei a han awm zia kan ni lo e, insiam ula i kal ang ule’ a tih chuan Sâtlak tlangvalte chu an lo chhuak ngahl suau a, an in nghah khawmna lam pan chuan an kal ta a, Lal Zamloa pawh a fanu thihna a rilru hah mai bakah, hliampui a han tuar zui chu a chau kher mai, hlâng chungah chuan a muhil ta bawrh bawrh a.

Buaina dang tawk lo chuan Lehlawn khua chu an thleng a, chawl khaw muanglo chuan Satlak tlangvalte chuan an khua chu an pan ding nghal a, an thiante lu in Satlâk a den chuan mittui a luang nasa kher mai, an rim a chhiat tawh em vang chuan an phum fel thuai a. Ni sarih a vei chuan Satlâk Lalnu Thanthuami te pawh an lo let ta a, an zingah chuan an beisei hauh lo in Lehlawn Lalnu Muanzoi lo tel ve chu mak an ti zawk kher mai. Satlâk Lal in a a fanu Ngurpuii thuam hak thin a hmuh chuan, hmeichhe lungnô tih takah a tap hawm hawm a, Zoliani te thianho chu a ngaina em em mai bawk a, a hmuh loh rei deuh chuan tlangau pa chuan a ko leh nge nge thin, chu tiang tak a Lalnu lungleng chu an lainat in, Satlâk khaw tar ho chuan, Lalnu Muanzoi khawhar hnem tum chuan Lal in khat chuan an chuang kai tuih reng a.

Chutia Lal fanu ber a awm tak loh ah chuan bawlpu fanu mal hmeltha leh fel chuan a tan a hun tha inher ah ngaiin ngaih ngam tak chuan rilru pawh a siam ve leh tan ta, a rilru hlimna chu a taksa ah langin a che vel pawh a zâng ta vah mai a, a nu leh pa chuan an fanu zia lo zangkhai leh ta chu an lawm ah tlain an nupa chuan an sawi dun sap sap a. Lalnu Muanzoi pawh Satlâk ah chuan ni sawm tha chuang zet a lo cham ve reng a, nu ber awm loh reng chu fel ber a hrelo in hawn zai chu a rel dawn ta. A hawn hma chuan Sângtuala nu chu leng ah sawmin, an fate vang chuan an thu pawh a rual viau a, eng emaw sawi chuan an phulhlut reng a, Lehlawn Lalnu chuan an in leng nu chu thu tak deuh chuan a en in ‘Laiawrha nu, mihring lamah chuan in kungkaihna nei mah suh i, kan fate kar thu chu tlang hriat a ni a, ka pasal thu duh leh chapô na vangin a hun lo takah kan fa neihchhun chuan min liam san a, hetiang kan lo nih takah chuan in huatthu chang lo sela, in fapa naupang zawk hian min lo awmpui thei mai lawm mi ? ka pasal then mai duh khawp a rilru ka put chang a min beng dai tu chu kan pasâltha hi a ni thin a sin, Mambawihi khan engpawh tawk sela “Sangte engtin nge ni dawn” tiin a phun sap thin a . . . chutiang khawp a ka fanu in a ngainat chu ka tan chuan han en hrang zia ka ni lo, chuvangin min khawngaih la hun eng emaw ti chen chu min lo awmpui ve hram sela’ tiin a han ngen a, a thusawi tawp lam phei chu tap insum a nih vang chuan hriat a har hle tawh a. A rin loh lutuk thil a han tawng chu, Pi Chhuanthangi chu a kâ hau a chhan ngaihna mai hrelo chuan a han ngawi vang vang a, Lalnu Muanzoi lah mittui leh hnap tui nen a insut tui hliam hliam tawh si a. Aw thian kharh kharh in pi Chhuanthangi chuan ‘Lalnu kei ni fa engmah nilo te chu tiang tak a min han ngainat sak chu a lawmawm in a zahthlak zawk hle mai, i dinhmun ka hriatthiam pui rual che in, heng thu hi chhungkua a lungrualna lo chuan tih mi ah ka ngai lo, chhungkua kan lo in rawn ve phawt a nge’ tiin a han chhang a. Satlâk Lalnu Thanthûami chuan ‘nia engthil pawh nisela, ngun tak a thiltih hi a tha ngai e, Laiawrha nu nangni pawh kan dinhmun min hriatthiam pui a ngaihtuahna min sen pui turin ngaihtuahna min sen theih chuan a lawmawm viau ang, kan nawr lui hauh lo che u tih erawh min hriat sak ka duh a ni’ a han ti ve charh charh a.

Laisuih tuahrem hi a lo har a nih e, a nih ang hian lo ni hlawp tehse .

Ruah a sur chuan lei chung van hnuai a huh fo thin . BUAINA CHU TAWNG THIN MAHNA, ZAM MAILO IN HMACHHAWN THIN ANG CHE, DAWIHZEP TE TAN HLAWHTLINNA A AWM NGAI LO . . .

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)