PASALTHA SANGTUALA BY Vana Fanai (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALTHA SANGTUALA BY Vana Fanai 1 - 137

Unread post by Ngaia » May 4th, 2018, 6:08 pm

PASÂLTHA SÂNGTUALA (Mampuia Pa)

BUNG – 138

Nimin 27 kha ka nupui Chhungtei Nohro piancham a ni a,a hun takah dah lut theilo mah ila. He thawnthu KA NUPUI DUHTAK PIANCHAM PHA PHAK PUALIN KA DAH E . . . .

. . . . . . . .

Zan riah chhum hun dawn chuan pi Chhuanthangi chuan Lal in chu a chhuah san a, a hawn kawngah chuan Lehlawn Lal Zamloa te chetdan chu mak ti tak chuan a ngaihtuah kawng tluan a, an pa arbawm tah a lo thu chuan an nu hmel phelh deuh phang leh mit sen ram a hmuh chuan eng emaw tak a thleng tih hria in ‘kha vawiin i leng chu i hawi her a va dang deuh ve, rawllai di i han tawng thar leh te a ni em lo maw ? tiin a lo fiam zauh a, a nupui chuan ‘kan tawng thar leh pawh a ni mah na, kha thenawm nuthlawi i rim hmasa leh ngei a niang maw ? patling a pumpa nileng a arbawm khawr pum hman lo che’ tiin a han fiam let ve zauh a, Ngiazoa te unau pawh thlantla phang leh hnap tawlh par chuan an lo in um lut a, pi Chhuanthangi bawh rawk pah chuan ‘ ka pi, khaw nge i len daih a, kan kawmthlang nu a lo leng a, ka pu nen an in zui chhuak daih a’ tiin vui hmel tak chuan an han sawi a, a pi chuan ‘I pu chu nui chungin a chhuak leh em ? a han ti a, an ni unau lah chuan phur fe chuan ‘ hlim deuhin a nui chhuak a, a chhuak tur pawh kawngka biangah a in tauh’ tiin Ngiazoa chu a nui tat tat a. Pu Tawnliana chuan ‘nangni unau hi daw thei lutuk, i pi bulah thu nilo sawi suh u’ tiin hnang chuan a han hawl a, an ni unau chu nui bawk bawk chung chuan an pi hnungah chuan an tawlh thuai a, chutia an nuih dar dar lai chuan an thenawm hmeithai chu lo lut in ‘nangni chhung chu in va nui nasa ve, ka u kan hnang hlaisa a zo a, khawinge hnang tlem min lo pe teh’ tiin pu Tawnliana chu a en hau a, pu Tawnliana chuan hawh awi i duh tawk va la tawh, hnangte chu kan neih ve zawng a lawm’ tiin Ngiazoa te unau chu a melh pah zak zak a, an ni unau lah chuan nui chung in kha maw ka tih reng kha tiin an lo nui tlar tlar a, an thenawm nu chuan hnang chu la in, Pângliani puan tah chu a han en a ‘Pangpuii mô a neitu hi chu an vannei dawn mang e aw, taima leh kut themthiam bawk si, kha engtik nge i zawh theih ang ? tiin a be luam a, Pângliani chuan naktuk lam chuan ka zo hman maiin ka ring, pasâl te zawng khawi a mi mah kan hmu ve ngut nang mawle, Zotei neih hnuah ka nei ang, charsut phawi ka duh’ tiin a nui hak hak a, an thenawm nu chuan nui hawk hawk in ‘nangni unau lah hi, fiamthu in duh lutuk in bulah chuan duhai ka rei ziah mai, khawnge ka zu chhuk a nge’ tiin a chhuak leh nghal a.

Ngiazoa chuan a pi hnenah chuan ‘kha kha a nia ka sawi chu, ka pu chuan a duhsak lutuk’ a han tih zawm leh a, pu Tawnliana chuan ‘nangni unau kha chhun chaw ei ula, leng teh u min ti changel hmun’ a ti nui sang a. Pi Chhuanthangi chuan ‘mawi a chaw chu ei ula, leng hauh suh u a arbawm tah saw chaw eikham ah in pui dawn nia’ a tih chuan chaw eikham hmasa nih tum chuan tui dehna chu an pan thuai a, chaw an ei lai chuan an thiante lo kalin, an ni unau pawh chu chawtlang nen chuan an tlan chhuak thuai a, an arpui nohruai chuan Ngiazoa nau chaw tlang chu chuk thlak sakin a lim zui pawp pawp a an ri teng tung a, pu Tawnliana chu chhuak vatin naupang tap pawm chung chuan, an arpui nohruai chu a pet leng lawp a, mau bung chuan a tin uaih a, a nupui chuan ‘khaih insum teh, a no han hruai tlei sela kan talh dawn nia’ a tih chuan, thinrim tak chuan ‘I no han thlei phawt la, nang hi chuan i hre khawp ang’ ti bal bal chung chuan sumhmun lamah chuan a pen lut a.Ngiazoa pa chuan chu tiang khawp a a fate chhanhauh sak tu chu lawm tak a nuih sakin thawmmawl do that chu an chhunzawm leh ta a.
Naupang an chhuah hnu chuan pi Chhuanthangi chuan Mama pa lo lut lawk teh tiin an pa chu a han ko a, eng thil nge ni ta, hmeichhe ho lah hian thusawi tur hi inhre thei khawp a tiin a phun sap a, an pa lungni lo deu chu haider in pi chhuanthangi chuan ‘Mama pa, vawiin a Lehlawn Lalnu thusawi chuan min thawng khawp a’ tiin, an fa laita chung a Lalnu Muanzoi thilsawi chu a han sawi a. a nupui thusawi chu nghun tak a ngaithla in, an nu thusawi zawh chuan a han ngawi vang vang a, hmel thu tak deuh chuan nang engnge i ngaihdan ni reng a tiin a zawh a, an nu chuan ngaihdan neih thiam a har khawp mai, dawisa kil za thei lah kan ni zeng a ni law, hetiang hi ka vawikhat tawn na a ni bawk nen, ngaihdan pawh ka nei thiam niau lo e tiin a phun sap sap a, a nih leh nang eng tiangin nge i ngaih ve reng a ? tiin an pa chu a han zawt a. Pu Tawnliana chuan ‘he mite nupa khawsak phung hi hriatthiam a har ka ti kher mai, inrem theih chhung zawng an tuang an tichhah in min hnung chhawn a, tun a tak a hetia an han khawsa zui hi khawngaih tur nge tih hriatthiam a har rum rum mai ka ti, tlang ngaih a mawi zawn lah an tum na hek lo, an duhna chauh um a nung an ni mai hian ka hre thin, i han sawidan hmang chuan, Lalnu chu khawngaih thlala ang reng viau mahse, an pa in la Lal lutuk leh chapô lutuk hian ngaih lam a ti tha hauh lo zu nia, a mah kan fapa ber hian engtin nge a ngaih tih hriat phawt a tha a nih chu’ tiin a han sawi zui a. midang awm loh lai chuh a sawi khawm an duh vang chuan, pu Tawnliana chuan a fate thawmmawl siam chu a ko nghal a.

Ngiazoa pa chuan ka pa engthil nge nita,a va pawimawh awm ve tiin a zawt a, lo thu phawt ula hei chhungkua in eng emaw sawi khawm lawk ila ka ti deuh a, zan lamah chuan inleng an awm leh awm si a, ti a pu Tawnlianan a chhan chuan eng emaw tak a thleng a nih an ring thiam nghal mai a. pa ber chuan hei i nu hnen ah Lalnu Muanzoin thu a lo chah a tiin an thu hriat thar chu a han sawi a,an ni chuang uluk tak chuan an lo ngaithla thap a, an rin loh lutuk a thil an hriat vang chuan an ni ho chu an in melh thap hlawm a, hetiang a thil a kal takah chuan ngun tak a chhungkua kan in rawn a ngai a ni, a tih chuan an ngawi thap a, pasâltha Sângtuala chuan a u te pahnih ngaihdan hriat duh chuan a han rawn a, an ni chuan keini ngaihdan hi a pawimawh ber lo, engkim tuartu chu nang i ni a, kan bulah nuam ti awm takin awm mah la, i khawharna leh lunglenna kan hnem zo tak tak chuang lo che a, puitling i ni ve tawh in ngaih dan i siam thiam a hun tawh a ni an tih chuan, an nau chuan chhuat chu a han melh vang vang a, a hlim hmel chu thinrimna chuan lo thlakin a mit pawh a sen leh ta râm a, aw vawt raih chuan ‘nangni ka harsat ber lai a hmangaihtu leh lainattu ka nei hi ka va lawm tak em, nangni hi awm lo ula tun ah pawh hian hrehawm takin ka vanruai awm si a, in mi hmangaih na vangin nun pawh thlamuang leh hahdam takin ka hmang thei a ni. Ka hlimna tur leh an fanu nun dan hmuh khum tu hi eng vang hian ka chhungte thlauhthla a ka pan chhan tur nita ang le, vawi tam an tan ka nun leh theihna ka hlan chung pawh in an chapô na bak engnge ka hlawh chuan ? ka pa ngei pawh a zahawm na hum duh vangin mualpho tawp a siam duh tu, Lehlawn Lal hi eng vang mahin ka pan hauh lo ang’ a ti thawp sat a, an nau chu lainat tak chuan an thlir thap a. Pu Tawnliana chuan ‘ka fapa i thu tlukna chu kan pawm pui a che, he i thu tlukna vang hian engpawh thleng dawn sela, huaisen takin kan paltlang ngei ang’ tiin a fapa chu thlawp tih hriat tak chuan a bu nghat ngaht a.

Chutia an thut ngawih thap lai chuan Pu Neihlaia chu a lo chuang lut hlawl a, a lo ral faneih ve tawp pasâltha Sângtuala te unau lo thu kun ngaih leh, lungngaihna thuk tak nen a lo thu kun reng a hmuh chuan a pan chhat chhat a. pu Neihlaia chuan pasâltha Sângtuala dar a chul hauh hauh pah chuan ‘ka fapa i hun tawn hrehawm tur zia ka hria e, chak tak leh huaisen takin he hun hi i paltlang ngei ang, hrehawm mahse chhel takin tuar hram hram la, hmeichhe pakhat leh thingpu khat an tia lawm, Sailo nula pakhat vang mai chuan in dawm kun mai hauh suh ang che, chan tawk khuarel a bo hlei long e’ tiin a hnem mawlh mawlh a. pasâltha Sângtuala chu a han ngawi vang vang a, Pu Neihlaia chu en in ‘ka pu ka lawm e, i mi duhsakna chu ka hre reng ang, ka mangan tawp lai tak pawhin min tan tlat tih hriat tluk a hlu a awm lo, chuvangin in mi duhsakna vang hian chakna tam tak min pe a ni, in zarah nun dan tha zawng ka hloh hauh lo ang, ka lawm lutuk e’ tiin a ngawi leh vang vang a. ‘ka fapa in unau zarah ka naute nupui te nufa chuan nun zalen leh thlamuan na nen hun an hmang tawh a sin, keini chungah chauh nilo hmun tin ah in thiltha tih vangin muanna a awm a, hei hi khuanun mihring a duan chhan a ni, in dam khua sei sela malin zawng zel che u rawhse’ tiin Pu Neihlaia chuan a han sawi leh dap dap a, Ngiazoa pa chuan ‘ni e ka nau, nang ni unau thiltih hi a va chuanawm tak em, keini chhung hian a takin in thatna chang in, kan fate pawhin hei nundan phung pangngai zawhin hun an hmang mek a, tu hriat a kan sawi nilo in in thiltih tawh ngawt pawh hi chapô pui tham zet zawng a ni e, chuvang chuan nang mahni a tha awm hi bosal mai loin in peipung zel tur a ni’ tiin an han tuihnih ve leh charh charh a.

Chutia upa ho an ti ti lai chuan Ngiazoa te unau leh an thiante chu an lo in um lut a, pasâltha Sângtuala chu an bawh rawk a ‘ ka u Sângte, lungdawh ah khuan mikhual an thu nghuk mai,an zingah chuan silai keng pawh an awm teuh a, an ni chu kan la hmuh ngai hauh loh te an ni’ tiin an thaw hlawp hlawp a, an thu hriat chu fiah turin hmanhmawh tak chuan lungdawh lamah chuan an tlan nghal a, an va thlen chuan Langleuh Lal fapa leh a thihruaite chuan vaibel an lo fawp talh talh a, an hmel chu a thupui fun hlawm khawp mai. Pasâltha Sângtuala chuan khualvalte chu inring tak chuan a pan hnai zel a, a hnungah chuan a u te pahnih chuan inring tak chuan an lo zui zel bawk a. Langleuh Lal fapa hnung a pasâltha chu lo pen chhuak in ‘pasâltha in dam zel maw ? kan rin leh beisei ai hma a in hmuh a ngai ta thut hi, keini ngei pawhin kan hrethiam lo kher mai, a tul nakah chuan tiin kan lo pan rawih mai che u a ni’ tiin a han sawi a. pasâltha Laiawrha chuan ‘engthil nge nita ngai le, kan buzawl a kan han in hmuh tak thut mai le ? tiin a han zawt a, thusawi tu tlangval chu a ngawi deuh vang vang a, thaw pui la hawk in ‘kha tia Sialai dai a tanga kan inthen hnu khan kan khua chu tluang takin kan thleng a, nangni nen a kan in tha then mai kha kan Lalpa chuan a hrethiam lo hle a, kan pasâltha leh a fapa ni bawk nen chuan an inhnial chho zel a, nangni ho in a unaupa in that leh him tak a in kal ta mai kha, a fapa hian nangni a hlau ah a puh lui tlat ta mai a, kan pasâltha lah chuan hlauh lam nilo in a pate ate chetdan chu a han sawi thin a, Lal chuan hrethiam duh hauh mai silo a, chung thil a vang chuan a fapa chu tuithlar in a hmuh leh chuan a thah ngei tur thu a sawi zui bur mai a, kan Lal fapa leh a nupui fanau te nen kan lo in kawi chhuak ta duah a, khawdang Lal min hum ngamtu kan hmuh zawh tak mai loh ah chuan, kawng dang awm ta ngang hek lo le, zah luatah ngawng a bung ngai nem maw tiin, Satlak khaw Lal belh tumin kan lo in chhir lut hlawl mai zawng a ni e, in khaw Lal in min hum theilo a nih tak leh, kan hma lamah kan kal zel mai a niang chu’ tiin an chin chu a han sawi a.

Lungdawh a nunau chau tih hriat tak a muthlu lawp lawp te an hmuh meuh chuan dawt an sawi an ring bik hauh loh, hmeichhe thenkhat phei chu an ke chu a vung lek luk bawk nen, an Lal fapa nupui ni a na sawi chu rinhlelh rual loh in a thuamah pawh chuan a hriat hliah hliah a, nau thla ngâ mi awm hi a paw hnar sak sak mai bawk a. Laiawrha chuan Ngiazoa pa chu melh in a ni chu a lo bu nghat a. chutia tuibur hmuamda dawn an din chuan Satlâk tlangval ram kalte chu an lo haw tan in, hmelhriat loh tlangval leh hmeichhia nen a lo thu nghuk an hmuh chuan, rinhlehna mit chuan melhin chik tak chuan an melh thap hlawm a. khual hmeichhe ho muthlu chu lo harhin an zak chu an kun lap hlawm a. lungdawh lam a tlangval te an tleh tak dul dul ah chuan, pasâltha leh val upa dang pawh an lo thleng ve thuai a, pasâltha Laiawrhan val upa Chhâwnthiaua te a hmuh chuan, chung khual chanchin chu a hrilh chuan. Lal fapa chu pan in ‘ e Lal fapa engpawhnise, lo kal ula zanin chu khuaah in riak reng reng dawn nia, Lal leh khawnbawlte pawh kan be tlang dawn nia, hei in hmeichhia te pawhin chawlh hahdam an mamawh tawh hi. Tlangvalte u, kan khual te thuam hi han chhawk ula, khawchhung ah i lut phawt ang u’ tiin a han sawi a, Satlâk valrual te chuan an phur chu chhawkin, naupang chau tak te chu an pawm chho ta law law a.

Lal mual an thlen chuan Satlâk khaw nunau te chuan an zui hul hul a, val upa chuan Lal inah chuan Lal fapa chu hruai lut nghal a, an mikhual te chin an hriat chuan Lalnu Thanthûami chuan tlangau pa chu khawnbawl upate ko tur chuan a tir a. khawnbawl upate an lo thlen kim a thu chiang an hriat chuan Lal in chu a reh ta thap a. Lalnu Thanthûami chuan ‘nangni ka khawnbawk upate u, kan mikhual te chungthu chu engtia han ngaihtuah chi nge ni ang le’ tiin a han rawn a, khawnbawl upate chu an ngawi thap hlawm a, thenkhat chuan ‘Langleuh Lal fapa hian hian dawtthu sawiin an khaw beihna remchang a zawng em mi ang ? chutiang thil chu lo nise heng nunau ho hi an râl man te an ni dawn nge niang ? an rilru chu zawhna hlirin a khat a. Lal fapa nupa a an sawi te chu lemchang an nih chuan an thiam hle ang tiin an ngaihtuah rauh rauh a, chutia khawnbawl upate an ngawih thap lai chuan, Langleuh Lal fapa chuan ‘pute u, in rilru tur awm pawh ka hriatpui che u in ka hria, in leido Lal fapa meuh khaw chhung lo lawi ta chu hriatthiam a har hle ang tih ka rin pui che u. Englekhawle, tun dinhmunah chuan kan hmeichhe lam hi changdang han kan thei kan ni rih lo a, ni hnih/thum emaw tal chawl hahdam ila kan kal leh mai a nge, min mikhual duh vangin kan lawm e’ tiin a han sawi zuai raih a.

Pu Tawnliana chuan ‘Lal fapa i han sawi takah chuan zep thu a cheng lo, he kan Satlâk khaw din tirh a tangin buaina in pha man deuh zut reng a, kan he tiang teh nuaih karah chuan fimkhur a ngai em a ni, in dinhmun han en hian dawtthu sawi chu in nih hmelh hauh loh mai, han cham deuh phawt ula i pa ngei pawhin mahni rilrah em zawng, kawihrui sahchah ang em chuan a ngailo turah ngai ila, a rilru a lam let duh ta lo a in duh a nih phawt chuan tha te te in kan awm ho mai turah ka ngai a, kan upate ngaih dan dan nise’ a ti dam thlap a. midangte pawh chuan kan upa sawi kha a dik khawp mai, thinrim lai chuan râl rawih tak kan nâp a, khuarei hian min phuar khawm leh thin ngai e, lungmuang takin mahni khaw thlengah in ngai ula, tha tak a in awm phawt chuan kan awm ho zel ang chu’ an lo ti tliar tliar a. Lalnu Thanthûami chuan ‘ka upate chângrel a sual ngai nem maw, tha tak a in awm duh phawt chuan, keini chuan lawm takin kan dawngsawng thei reng che u a nia, chutia kan rem tih tlan chuan engtin nge kan awm tir dan tur hi nita ang le ? tiin a khawnbawlte chu a han rawn a. Lal fapa te nupa chu tah hian in nghat mai sela, kei nin chhungkaw hnih emaw chu kan lo thleng a nge, Zoliani te unau in a tul hun chhung chu an lo awmpui che u nga’ tiin pu Tawnliana chuan a han sawi a, khawnbawl upate chuan mikhual an thlen theih zat tur leh thleng thei tur awmah chuan an sem sawm zo thuai a. Lal fapa chuan ‘nangni khua zet zawng, hmeichhe Lalna khua ti a han namnul mai mi in lo nilo tawp a nih hi, theilo zawkte in puihna hi khuanun malsawm duh zawng a niin, hualhim in veng zel mawlh che u rawhse, kan chung a in thatna hi thlan a ka liam thlengin ka theihnghilh tawh hauh loh ang’ lawm vang a mittui khap per chhak chung chuan a han ti a, phur leh tha tho tak chuan Lal sum hmunah chuan chhuakin a nupui leh fa sen te leh se enrual mipa naupang pakhat hian an lo zui lut a.

Lal inchhung an lo luh chuan hmeichhia chu baih saih saih in a kun ran a, Lalnu hei hi ka nupui Tlangkhumi a ni a, hei hi ka fa hming koh Sanglura, a nau hi Darthangi a ni e tiin a han hmelhriat tir a, Lalnu chuan ‘lo haw teh u, thlamuang takin awm ula, mahni in thlengah in ngai rawh u tiin Sanglura chu a han pawm a, khaw nge naute kha min lo pe la, tui hmunah sawn va in ti fai rawh khai, in thlahrung reng reng suh u’ tiin a lo be sauh sauh a. Tlangau pa chu Zoliani te ko tur chuan a chhuak a, an lo thlen chuan eirel chuan an phe nghal char char a, Lehlawn lalnu Muanzoin chuan fanu thiante a hmuh chuan a lunglen kai thoin mittui chu a hru fap fap a, khawnbawl upate chuan Lal fapa chu zu khawnpuiin an lo ti ti mam mam a, an vawikhat hmuhna ah lungmuang tak a Satlâk Lalnu bul a a fate tawlh hrat hrat a hmuh chuan, nangni ho zet zawng in rilru pawh a tha a ni ngei e, in bulah naupang reng an ngam râng mai’ Langleuh Lal fapa chuana lo ngaihtuah vang vang a. Ngiazoa te unau pawh Lal inchhungah chuan an lo lut a, pu Tawnliana chu bawh in ka pu, he naupang hi kan lenpui dawn tiin an phun sar sar a, khaw nge dangawm teh u, lenpui chi pawh a ni lo ang an kal chauh dawn dawn nen, sawlai sumhmunah sawn lo va in selem chauh tawh u tiin a tir a, Sanglura pawh chuan ti deuh dai chuan a zui chhuak a, tuibur hmuanda awmah chuan Lal sumhmun ah chuan naupang hlim nui dar dar thawm chu a lo chhuak a.

Eirel an zawh dawn chuan Pângliani chu thing seng tur chuan pawnah a chhuak a, sumhmun a thlen chuan ‘kha Ngiazo eng a tinge in insual insual suh u, in thlah rawh u an insual ngailo, tha tak a in kawm tur a lawm’ tih pah chuan naupang lo in kuah chat chat te chu a pawt then a, Ngiazoa sualpui chu a tap ta ar ar a. Pângliani chuan Mama lo kal teh a na em ? tiin a pawm a, naupang tap chu bang mai duh lo in tap chung chuan a hawng ta, Ngiazo eng a tinge in insual a, tumah hauh loh tur ka tih kha, min va ti zak ve he tiang a i awm chuan ka u Sângtea ka hrilh a nga, ka vuak tir ngei ngei ang che’ tiin a hau hlaih hlaih a. Buala chuan ‘ a u, Ngiazoa khan tihsual a neilo, mikhual naupang hi ka vel dawn che a ti reng a, kan dang char char a ngiazoa hmaiah a ben sak vangin an insual a nih kha, pa Sângtea bulah chuan engmah sawi suh’ tiin Pângliana chu a melh ve ran a, in thianpa thusawi hi a dik em, dawt a sawi lo maw ? tiin a zawt leh a, naupang dangte pawh chuan Buala khan dawt a sawi lo, kan vaiin kan hmu vek a lawm tiin naupangte chu an tang ve lan hlawm a, Pângliani chuan tun tum chauh chu ka ngai dam che a nga, in insual leh chuan ka u bulah ka sawi ngei ngei ang, tumah insual lo in inkawm dial dial tawh ang che u a tih lai mek chuan, veng chhar arpui no hruai ti a an sawi fiamthu thin, fate chhan ching leh inhauh pawisa lo zet mai Khualmawii chu a fapa kai chuan a lo kal hlawk hlawk a, a hmel chuan to haw tur a ang zaw ber mah a. Pângliani a hmuh rual chuan ‘nangnu kha lo kal teh, i va han zak theilo em em ve, naupang inhau satliah mai mai ah eng vang a lo inrawlh a, ka fapa hi kut lo thlak nge i nih, salam i chawi chiang khawp ang, nangni mi rethei leh hnuai hnung, zah loh vang a khaw eng hmu ve tan dek dek hian nuam leng chin tawk in neilo a nih hi, heng mikhual vakvai thisawn mai mai tlak lek te vang hian maw ka fapa chu kut i Io thlak khang lan ni, lo kal teh ka han sawp hrep teh ang che’ tiin Pângliani thing pawm Lal sumhmun a ding chu a chhipsam ah a man in a phih lawp lawp a.

Chutia nutling thinrim thawm lo chhuak thut leh Pângliani te ri an hriat vang chuan, Lehlawn Lalnu kawng khar biang a ding ve reng leh Zoliani chu an tlan chhuak vat a. a laizawn nu thar nutling in thinrim tha tawp a lo phih leng lawp lawp a hmuh chuan Zoliani chu a sâ ve ta phat mai le. Khualmawii bek sam ah chuan uai chat in a phih ve ta sawk sawk a, tharum ah hneh hek lo le, Khualmawii chu a let ve ta rawk rawk a, an thelh fel meuh chuan mittui tla pur chung chuan ‘nangni chhung kua zet zawng in rapthlak kher mai, in nuta te vangin mi zahpahna lah in nei hek lo, nangni Lal hrawtna hnuai ah hian kan awm rei tawh niau lo a nge, in chhungkua vangin Satlâk khua hi kan chhuahsan ang, zangkhua bungbu in ka fapa len hunah chuan in la hre ve khawp ang’ tiin a thinrim chu a rak tuar tuar a. chutia Lal in a nutling thinrim te tuar tuar ta chu thenawm hnai a mite pawh an lo pungkhawm thuai a, Zoliani nula zaidam leh tlawmngai thinrim theilo ti a an sawi thin, thinrim hmaisen teuh an hmuh chuan thil awmdan chu an rin zawn thiam mai a, Pângliani pawh zawimuang a tho in a tap faih faih a, Zoliani chu kuah hlawpin a tap ta hawm hawm a, zoliani chuan dar a chul hliau hliau pah chun ‘Pângpui a tawk e tap tawh suh, mipui an lo pung khawm zel mai si a,lo kal rawh i lut thuai teh ang’ tiin Lal in chhung lam ah chuan a kuah lut a.

Lalnu Thanthûami chuan ‘engthil nge ni ta Pi Khualmawi, nu châng tharum nen meuh in rik tak rum rum mai le, lungphu te lam lam in ti khawlo dawn a lawm le’ a han ti dam thlap a. Khualmawii chuan ‘I khawnbawl upa awmpui nu khan ka fapa kut a lo thlak a, ka thinrim in ka zilh hlek laiin kha hmeichhe rapthlak zet khan, kei a nu rual zet hi kut min lo thlak ngawt a nih kha, awi an han rapthlak zia em em kha sawi ngaihna pawh ka hre lo, ai upa zahna pawh an nei hek lo, hetiang hrim chuan keini ang mi rethei daikil kar a mi chu he khua ah hian kan awm ngam chai lo a nih hi, an va han rapthlak teh lul em’ tiin thawchham lek lek chuan a han sawi par par a. chu thu a hriat meuh chuan khawnbawl upa PuTawnliana chu a sa ve ta phat mai le ‘pi Khualmawi tu maw kan awmpui nu chu, kei leh ka chhungte bak ka inchhungah kan awm hauh lo a sin, ka fanu Pângliani i sawina a mi ? a ti chang ta rat a. Pi Khualmawii chuan ‘aw ni e, hmeichhe vakvai in awmpui nu Pângliani ngei kha mawle, ka fapa kut lo thlak tu chu, Zoliani lah nula pum pa khan, engkhaw sawi set set loin kut min thlak nghal ngawt a nih kha, i fanu kha lo zilh ve nila chuan kan buai hauh lo tur a nia, hriat loh awmpui mai mai vangin, kei khawtual nu pawh kut min thlak duh a nia’ tiin mittui tla pur chuan a han sawi zui a.

Lalnu Thanthûami chuan ‘pi Khualmawi, i thu duh dan barh barh chu pawi i sawi tlat mai a, Pângliani te nufa hi mikhual leh awmpui satliah an ni lo tih ka sawi chiang viau tawh a ni lawm mi ? engvang a an nunhlui chu sawichhuah sak lui tlat nge i han nih chu le, serh leh sang thuah in remna neiin hman ni lawkah hun kan hmang a, nang ngei pawhin ruai i theh ngei a nih kha, naktuk ni chhuah hma a inkâr thu in chingfel a nih loh chuan, in chhungkaw chungthu hi kei hian ka ngaihtuah ang, ka sumhmun ngeiah midang kut i thlak a, chu pawh naupang thu vang mai mai leh nghal’ a ti chang fak fak a. pi Khualmawii chuan ‘in he tih hi ka rinsa reng a, he khuaah hian retheite chu kan leng ve lo a nih hi, hawh Mamte i hawng ang khai, i tlangval hun ah zawng tiang hian tuman min ti bik tawh hauh lo ang’ tiin a fapa kai chuan a in her a. Lehlawn Lalnu Muanzoi chuan ‘Nangnu kha lo ding teh, i rapthlak in i daw thei kher mai, Pângpuii khan i fapa kha kut hmawr pawhin a tawk hauh lo e aw, khual naupang hi i fapa khan velh a tum a, an thelhna lamah Ngiazoa nen an insual phah a nih kha, nang nu ze chhe lutuk kha i fapa khan a lo chhun fuh hle a ni ngei kha, tufa pawh nisela an laizawn te kut an thlak lai chu an enliam i ring a maw ? nang a fapa dawt thu vangin, nang zahmawh than kin zet tawh in thu chiang hriat tum lo in kut i thawh nghal a ni a, i châwmnu zia kha paih bo hmak ang che, chutiang a nih loh chuan he khua a tang hian in chhuak vang vang ang hre reng rawh tu chung ah pawh pawi hawl zawng a thu i chhak chhuak a nih chuan, ka nau khua a tang hian ka chhuah tir nghal ang che, ka nau sawi tawh ang khan naktuk ni chhuah hmain ngaihdam dilin i sual kha sim nghal ngei ang che, tlangvalte hian an en zui reng dawn che tih hre reng ang che, ka hmuh phak loh ah thlawkbo rang rawh’ tiin a hau ta hrep a.

. . . . . . . . .

Zawlbukah chuan pasâltha leh val upate chu an thu thup a, Langleuh khaw lam enfiah tur a kal tur tlangval sawm emaw tal chu tirh nise tiin an sawi a, pasâltha Sângtuala te thianzaho erawh chu awl rih turin an ti a, a ni erawh chuan ‘ k’u Rinmawia hi lo chawl hahdam sela, midangte erawh chu a thazâ rual lek kan la ni bawk a, ram thar thlir chian pah in kan va kal leh mai ang chu’ a tih tak tlatah chuan an aw ta hram a, val upa Chhâwnthiaua chuan ‘zanriah bawl lai a thil thleng chungchang a Pi Khualmawii khawsa zia hian ka ngeng a chhun riau mai, eng avang a thu muhnu sawi chhuak chu ni maw, chanchin hrechiang deuh khan han sawi ula, ka hriat chin ah ngawt pawh hian an kaiten thiahsak tak ka nap e’ a ti rum ul a, pasâltha Lianmana chuan ‘kei pawh a khawsak phung an sawi khi ka hriat rukna a rei tawh a, hmanni khan an pa bulah pawh zilh turin ka hrilh tawh tak a sin, ka pa lo haw in a sawi dan atang khan tlangval te pawh hian zilh mai a tha in ka hria, naupang kar thu vang hian mi eng emaw zat a lo luhkhung tawh a, he tiang hrim chuan tiin an thenawm te pawh an phun thawm hi ka hriat rukna a rei tawh a, beng ka chhungawng hram hram chung hian, Lal in meuh pawh zah zo lo chu en liam mai hi a fuh berin ka hre hauh lo mai’ a ti ve leh bal bal a.

Pasâltha Laiawrha chuan ‘a eng a pawh nise han zilh hau deuh pawh a that teh lul nen, keini lah he tiang kan ni a, ka pa lah khawnbawl a lo ni ve tumhrang bawk si nen, tlang ngaih ah kan thangmawi lo lutuk dah a nge, he tiang a ni hrim chuan nakin lawh ah remchang dang a awm zawk ang . . . ‘ tiin a tang kawh ve lan a, pasâltha Sângtuala pawh chuan ‘ni e, khawtlang nun hi tlangvalte kutah awm mahse, tun hun a tan chuan kan insum rih hi a mawi rih ber dawn in ka hre tlat mai’ tiin a lo tuihnih ve bauh a, pasâltha Lianmana ngaihdan a ni ta aw zawng lo mai le, thinrim hnar dum dawt chuan ‘mai mai a, ven thawn nei in Satlâk valrualte kan kal ngailo, tu pawh ni raw sek sek awmsual bawl tawh phawt chu kan zilhhau ngei tur a ni, tu hlau mah hian thiltha hi ka la kalsan ngai aw kawng lo e’ tiin a tho thut a, pawn a rawlthar rual awm te chu a ko ta tuar tuar a, an ni pawh chu an lo tlankhawm thuai a ‘vengchhak a ancheh leh fa chhan ti na tak pi Khualmawii kaiten thiat ula, an arbawm han lum sak tawh u, a lo hau che u a nih chuan, pasâtha Lianmana thuin kan ti han ti ang che u, an buhpho ar in hnawh sak tur a nilo a, puih an ngaihna ah pawh tu man in pui tur a nilo, tun ah han kal nghal rawh u’ a han vin tuk a.

Rawlthar te chuan phur takin vengchhak chu an pan nghal a. kal pah chuan ‘hmanni ah a fapa khan min chhiatkhum a, a nu bulah min velh a tum tiin a la sawi zui a, a nun min liak hrep a lawm, zanin chu na takin che ang aw’ an ti lar lar a, chutia rawlthar rual kal thawm chu khawnbawl upa pahnih chuan hriain khap erawh an tum hauh lo, pi Khualmawii chet dan hian a rukin khawtlang a than ru tawh tlat a, rawlthar ten khawnbawl te bul an thlen chuan an tawng chu an tawp deuh chat hlawm a, khawnbawl pakhat chuan ‘naute u, khawi lam nge in kal dawn a, in va hmanhmawh hmel ve mawle ? tiin a lo be luam a. Thanchhinga chuan ‘ka pu, khawiah kal dawn lo e, khi laiah khian kan pasâltha leh va upaten min tir a, kan han kal lawk a nge’ tiin an pel viau a, khawnbawl upa pakhat chuan ‘hawh teh, kan rawltharte hi eng ang chiah in nge an khawsak i zui ru chin teh ang’ tiin pasâltha Lianmana pa chu a han bek bawrh sup a, thim tham lam chuh chuan a kal nghal zuk bawk a.

Rawltharte chu that ho tak chuan pi Khualmawii te kaiten chu an thehdarh ta thuai a, an lo rin lawk ang chiah chuan pi Khualmawii chu a lo teu chhuak rang ngang mai a, a ni thinur leh hmanhmawh khaw hmulo chuan kaiten phah awm lo chu hmu hman hek lo le, tukhum sawh dawp chuan a thal ta huang a, rawltharte chuan an lo nuih dar dar a. a na ti leh thinrim a han te meuh chu, tawngkam chhe pui pui chhak chhuak in a han tho tuih tuih a, rawlthar zam tha tak tak te chuan an arbawm chu lum in an haw haw laih laih a, arno te chiap leh arpui te nen, a neitu nu au tial leh rawlthar haw haw thawm nen vengchhak chu an ri ta luih luih a, a lung hmuh theih ang ang chuan a vawm fur fur a, thenawm in bang leh naupang a thliar lo an thum pawp pawp mai a, chutia nutling thinrim in a han vawm chuan rawlthar te chu thim zingah chuan an bi bo thuai a, tumah hmu lo chuan âng reng peih bik hek lo le, kal baih suih suih chung chuan arbawm khai in sumhmun ah a pilbo ve ta mai a.

Pi Khualmawii a lut fel chauh tih chuan rawlthar te chu inhnuai thim tham a tang chuan an lo vak chhuak a, an han ding khawm taih a, fimkhur tak chuan sumhmun chu an pan leh ta tham tham a, kawngkhar chu pawn lam ah thingfak in an do sauh sauh a, ar nohruai mai pawh nilo chuan an ar lawi tawhsa chu an hawl darh ta ur ur a, inchhung lamah chuan naupang hnung thum dawp leh tap ar ar chuan a zui a, nutling thinrim au thawm chu a lo chhuak leh ta, kawngkhar pawn lam a chhun kalh tlat chu a lo darh chuai a, pawnchhe paih ang mai chuan, in nei tu nu chu a rawn hlawm chhuak nawk a, rawlthar ho lah chu an til nghal hak a thenawm in hnuai thimah chuan an bo nghal duak a, pi Khualmawii tlu lo tho leh zet zawng a tawng hriat tur a ram a awm tawh lo. Kawlhawk chem barh ang nawk nawk chuan an ri leh ta rum rum a, khawnbawl upate pawh puan hmawr a seh chung chuan, Lal in lamah chuan an tlan ta chawn chawn a, Lal sumhmun an thlen chuan an nui tlu tawp tawp a.

Sumhmun a nui thawm lo chhuak thut chu phawk tak chuan an pan vat a, khawnbawl upa pahnih lo nui let tawp tawp an hmun chuan, an bengngawng nuih ve hau hlawm a, zawi muang a bawk vak lutin mei eng ah chuan thlan tla phung chuan an nui leh ta ngat ngat a,chutia an ngawih thap lai chuan pawn lam ah chuan, hmeichhe ang thawm chu a lo hnai zel a, an ni pahnih chu Lal khumah chuan an bawk vak lut fel awrh tih chuan, pi Khualmawii chu kiu leh khup pilh hrup chuan a lo âng lut bawrh bawrh a, a sam thlipui nuai hrep ang a thur bu chu a han tuai pial deuh a, Lalnu Thanthûami hnenah chuan ‘rawlthar ho khaw sak dan chu a han an pui chiam a, duh tawk a an hnu chuan a chhuak leh nghal vuai a. a chhuak fel chiah tih chuan khawnbawl upate chu an nui leh ta ngat ngat a, midangte chuan khawnbawl upate nuih chu hre thiam in eng khaw sawi theilo chuan an nui ve ta tiah tiah a.

An nuihza zualpui a reh chuan Lalnu Thanthûami chuan engthil nge in han nuih chiam a tiin khawnbawl te chu a zawt a, la nui pah pah chung chuan ‘zawlbuk bul atang a rawlthar ho an zui dan te, pi Khualmawii tluk dan leh a hnu zel a rawlthar ten an chhaih zui dan an han sawi meuh chuan, Lal inchhung a awm te chu an nui ve ta tlawrh tlawrh a, an nuihza zualpui a reh chuan, Lalnu Thanthuami chuan ‘kan thu dang a lai chuan, pi Khualmawii chungchang hi engtia han tih tur nge niang le, a khawsa zia ah chuan han en liam chi a ni hauh lo a, hun tiam chhung a an in sawi rem theilo a nih chuan Salâm chawitir ngei chi niin ka hria’ a ti charh charh a, khawnbawl upate pawh chuan ‘ni e hetiang hi chu kan en liam mai tur a ni lo ang, amah erawh chu kan khawnbawl upa hian, Lêi chhia ka ei duh lo tiin tan a khawh viau mai a ngem aw ? tiin an sawi mam mam a, pi Khualmawii awm dan chu sawiin an nui leh hak thin a, leng hawn ar a lo khuan chuan khawnbawl upate pawh an tin ta a, Langleuh Lal fapa te chhung pawh an thlenin ten an zir bawk a, in thlahrung loin an infiam bawrh bawrh hlawm a.


Lo tawk leh teh mai se, puilo thei viau a nih hi . . .

Pasâltha Sângtuala thawnthu pawh in zarah ka lo ziak thui ve ta viau a, thenkhat tan a ninawm lam te pawh a lo ni tawh zawk hialin ka ring, BUNG -140 ah chuan tawp mai ka rilruk a, nangni zarah he ti chen thleng ka ni a, in mi fuihna leh sawisel na tangkai tak tak te vanga he ti chen thleng thei ka ni a, in zavai chungah lawmthu ka sawi e.

Eng emaw rokhawlhna vangin ka lo dah zawm thei thinlo a, pawi ka tiin a hrehawm ka ti thin khawp mai,LAISUIH TUAHREM hi a lo har a ni e



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 7th, 2018, 6:47 pm

PASÂLTHA SÂNGTUALA (Mampuia Pa)
BUNG – 139
Sialai dai chu zanriah chhum hma lam mah ah chuan an
thleng a, buk sak buangbar an tum loh vang chuan eirel tur
Rinmawia te pahnih tih loh chu therhlo eng emaw zawng tur
chuan an chhuak leh ta dial a, Mualkunga chu pasâltha
Sângtuala chuan hruaiin mual eng emaw zah chu an kan tawh a,
an piah ngaw chamduai chu thlir vang vangin,nghalrual ngeng
thawt thawt thawm chu hriain pasâltha Sângtuala chuan ‘Kunga
kan hma a ram saw ngun takin thlir vang vang la, khawi laiah
sawn nge nghalrual saw tlak khalh rem ang’ tiin a han zawt a,
Mualkunga chuan sawlai a ruam insuih finna lai ah sawn a fuh
ka ring tiin an hma a ruam cham deuh dul chu a han kawk a,
pasâltha Sângtuala chuan ‘khi lai deuh thing hring bulah khian
chho zalin kal la, leipui fing khat awm i kal chho hnuah ding
lamah i phel leh zel a, ram awih deuh bul tanna laiah khian
sahnu i en a nga, nghalrualin a kân chho lo a nih chuan ram lang
thui deuh laiah chanhmun rem lang thui laiah i thu tawp dawn
nia, thawmdim tak leh hmanhmawh takin i kal dawn nia, tuibur
hmuanda awmah ka lo chhui dawn nia’ tiin a han hrilh a,
Mualkunga pawh chu kar lo ah a liam thuai a. Pasâltha Sângtuala chuan a silai chu a han endik zawh
chuan zawimuang in nghalrual awmna lam chu a pan ta a,
nghalrual sumnga awm pa ruk tha emaw vel hian hlai rah an lo
vam pawp pawp a, a khat tawk chuan an lo in nawr leh zawk
thin a. chutia nghalrual tla hmuhnawm ti tak a a thlir lai chuan a
dinna piah a thingtang tliak rap chu hriain a han en phei chuan,
keipui sumngâ awm hian nghalrual chu a lo veh ve dan dan chu
niin, thing tang tliak rap chu hriaiin sanghal chu an ding ngawi
thap hlawm a, keipui thing phen a ding pawh chu che changlo
chuan a ding ran a, hlauhawm hnai awm a an hriat loh chuan
nghalrual te chuan an zanriah kil chu an chhunzawm leh ta,
keipui pawh a hma ai a fimkhur chuan mei kawh vu chuan a
hma a mite zanriah a hman ngei tum chuan bawk phek ti tih
chuan a kal zawi zawi a. inchhung dung awmah chuan thalfang
khawh chhuah ang zawk chuan keipui chu a dawk chhuak ta
zawk a,nghalrual zing a pakhat chu a zuan let nghal tawp a, a
tuangchhah laiah sehin sanghal chu ngeng rawng rawng a,
pasâltha Sângtuala chuan kah tumin a silai chu a han lek kawh
zawk a, silai a hmehpuah dawn chuan a lo beisei hauh loh
chuan sanghal chuan keipui dul nemah chuan seh in a thing ve
ta bawrh bawrh a, keipui meuh pawh chuan chu sanghal chu tih
ngaihna hrelo in a zuang sawn dawrh a, keipuiin a sehna a thlah
veleh chuan sanghal chu a tlan liam nghal thuai a, keipui chuan
sanghal sehna a dulnem khap dawn lai thler chu a han liak lup
lup a, chutia keipui hliam in liah lai chuan silai a han puak dur a,
keipui hliam chuan silai rikna lam chu thlek dauh dauh in, rumchhur chhur chung chuan thawm awm lohna lamah chuan a in
thiar fihlim ta a.
Keipui liam hnu chuan pasâltha Sângtuala chuan silai rikna
lam chu zawimuang chuan a pan a, Mualkunga chuan sanghal
sumnga tur thau mum kang mai chu a lo thut pui ran a, zawn
buang bar ai chuan tiin pasâltha Sângtuala chuan sanghal chu
pu lawpin Mualkunga chuan a hnungah chuan a zui dat dat a, a
silai chhawk a tum chuan a ngailo râl ram a awm kan ni a, kan
chung ah engpawh thleng thei a nih vangin, nangin min ven a
ngai a ni a ti tlat bawk si a, buk thlen hma mual khat a la awm
chuan thingluang lo bawk zui chungah chuan sanghal chu nghat
in ‘ Kunga ti hian lo awm rawh aw, ka han in thiar lawk a nge’
tiin a pen san ta a, Mualkunga chuan pasâltha Sângtuala liam
hnu chuan sanghal chu put tum chuan a han in tintuah a,harsa
ti fe chuan an in nghahna chu thlen puiin Rinmawia te chuan an
lo chan nghal sawk sawk a, Thûamkunga chuan sakhi châl kitha
deuh hi a lo kap bawk a,zanriah hmeh a tan sakhi leh sanghal
kawchhung an chhum pawlh hluah a,chawhmeh an chuan kai
hnu pawh a pasâltha Sângtuala chu a lo lan mai loh vang chuan
Mualkunga chuan ka inthiar dawn tiin an inthen na lam chu a
pan ta a.
Vangpui nitla tur kawlsen phut te, ngawpui hring cham dur
mai te chuan pasâltha Sângtuala lunglen kai thoin, vaibel chu a
han phawrh a, zawimuang a siam kaiin a hmalam kham rang mawi tak te chu a thlir vang vang a. A mitthla ah Ngurpuii nen
an hlimlai nite lo langin a lungleng lutuk chuan engdang a
ngaihtuah thei hauh lo, chutia lungleng suangtuahna a kawm lai
chuan a dar a lo beng chu harh zawkin, Mualkunga banrek ah
man in a han phih thut a, a nghawngah rekin a han thingthit zui
tur a nau hmel a hmuh chian chuan, a kaitho vat a’ Kunga min
ngaidam rawh, tihnat ka tum hauh lo che a nia’ tiin thupha a
chawi mawlh mawlh a. Mualkunga chuan ‘ka u,min tihnat i tum
lo tih ka hria a lawm, i hun tawn a harsat dantur zia hrehawm
dan ka hria a lawm, a theih hram chuan in ngaihtuah harh deuh
la tha in ka hria’ Mualkunga chuan in thlahrung tak chuan a ti
sap sap a, pasâltha Sângtuala chuan a nau chu chik tak a en in
‘ka nau ka lawm e, râl ramah meuh pawh kha tianga kan awm
chuan rei kan awh lo ang tih hre reng awm tak ka nih vei nen, i
zarah ka harh ta hawk e’ tiin ngawi reng chuan an thiante
awmna hmun chu an thleng ta. Thûamkunga chuan ‘Sângek i bo
elaw, hmeichhe pakhat zun ngaiin kan pasâltha in nghahna he
tiang khawp a i han awngrawp ta mai chu ka va han run tak em,
khuanun min hualhim zel rawhse’ a han ti chiam a, pasâltha
Sângtuala chuan ‘ Thûamhnap, tuikhur kawng chhak a i tha
hnem ngai lai hmelchhiat zia kha hrelo turah min ngai elaw,
sawn man pawh min lo thing thuaiin ka ring e’ a han tih chuan
midang te chu an lo nui var var hlawm a, Thûamkunga chu tho
phatin ‘Nangte zit zet hi dawthei lutuk, khawnge lungleng reh
rawih khawpin ka han bin teh ang che’ tiin a han pan hnai nghal
a. Rinmawia chuan ‘a khaih a, leh ta mai mai thin hian insum
teh u, chute lo zawng vahrit biru ang chauh kan ni palh a nge’ a lo tih takah chuan , Thûamkunga chuan ‘I va han vannei tak em,
remchang hmasa berah ka bin tho tho ang che’ ti a nui var
chung chuan a thutna chu a pan leh ta.
Ni sukchen a la awm chuan Langleuh khua chu thingler a
tang chuan Satlâk valrual te an chuan far tawh a, Langleuh
khua chu in zahnih nufa zet an ni ve in mihring pawh an tam a
nih a rinawm, lo sul hawng chu an inzui duah duah reng a,
tlakdeng a nih vangin ni pawh a la lang sang luah bawk a,
naupangte pawh chu an vir nak nak hlawm a,pasâltha Sângtuala
chuan Mualkunga hnenah chuan kan hma saw ngun takin en la,
Langleuh khawchhung lut turin khawi lai khan nge hnai ber ang
? tiin a han zawt a, Mualkunga chuan a han thlir vang vang a
‘khu lai kan thlang ruam ah khuan chhuk ila, sawlai mual insuih
finna laiah sawn kal in mual dung lo khawhthla nak pek zawngin
tan chho ila, mual laiah liamin Langleuh khaw dai kan chuang
lut tawh ang’ tiin a han sawi a, buk nghat nghat pah chuan i
sawi dik hmel khawp mai, i mitthla ah cham tir la, zanin chu
Langleuh khua kan va dai lut dawn nia tiin thing a tang chuan
chhukin, meikhu langlo thei ang ber tur chuan eirel in an phe
leh sang sang a, Rinmawia bulah chuan a thiltum sawiin an
phun dun sap sap a. Rinmawia chuan ‘a hlauhawm lutuk lawng
maw, bakah eng thil emaw lo thleng palh sela kar zau luttuk ah
chuan kan in pui theilo ang, Langleuh khaw mihring chetphung
ah chuan an thlamuan hmel hle a, kan vai a kal kha a tha berin a
rinawm’ a tih deuh tak tlatah chuan a hnial duh ta bik lo a, sarep chu rawh lumin an chhu per sawk sawk a, chaw haitho
nen chuan an bar hawng hawng a, khaw thim tak tak hma a thui
thei ang ber thlen tum chuan hmanhmawh tak chuan an kal leh
ta sawk sawk a, Ngawpui hnuai chu a thim ta khawp mai.
Mualkunga chuan hma hruaiin a hriatna ring a kal chu dik lo
dawnah ngaiin a ding ta chat a, ‘ku Sângte, ka hrethiam ta mang
hauh lo mai, kan bo thui hmain tlawm han ngai leh mai teh’ tiin
a han melh a. pasâltha Sângtuala chuan ‘Kunga i hlauthawng
mai mai a nih kha, tlem han kal leh hlek la mual insuihfinna lai
kha i thleng mai ang, chuan chho zalin i kal leh zel angnga lo
fingkhat emaw velah chuan mei eng pawh i hmu thei tawh mai
ang’ a tih chuan a ni pawh chuan hma chu a hruai leh ta,
pasâltha sawi ang tak chuan tuibur hmuamda zet an kal leh
chuan Langleuh khaw meieng chu an hmu thei ta a.
Thutmuan ar a khuan chuan pasâltha Sângtuala chuan ‘ku
Rinmawi, i hoin helai a tang hian min lo veng ula, kei leh Kunga
hian Lalin kan zu bel bul a nge, Thûam thian leh Chunga ten
zawlbuk lo zu bel bul ve bawk sela, an ti ti kan hriat loh chuan
hetiang in kan taptal reng thei dawn silo a, a rang lam a
chinchang kan hriat hi a ngai in ka va hre ve’ tiin a sawi charh
charh a. Rinmawia chuan ‘ni e, nangin helai hi lo awmpui zawk
la, midangte kan zu kal zawk ang chu ka lo ti a sin, upa zawk ka
nih vang hian kawng engkim a min awl ziah hi a tha berin ka hre
lo, hman remchan loh thilah kan laktlak loh lutuk dawn tlat mai’
a han ti ve charh charh a, pasâltha Sângtuala chuan ‘I zarah engkim kan ti thei zawk a lawm, nang hi awmlo la chuan
engkhaw ruai ka nih loh zia chu ka hrechiang a sin, i ho a in
awm chuan engpawh thleng sela, lungmuang takin kan tawn
tlang ngei ang’ tiin iptepui chu zenin a chempui chu puan a han
ven hnan a, khai ule kan tlai hmain i kal ang ule’ tiin Mualkunga
nen chuan Lalin lam pan chuan an kal ta nghal a. Chungliana te
thian dun pawh khawchhung lamah pan chuan an liam ve nghal
a.
Lal in hnuai thim laiah chuan an thu dun ta ran a, Lal inah
chuan tumah an awm lo emaw tih tur chuan thawm chu a reh
kher mai. Hmeichhe aw hian ‘chutiang a ka fapa ngei pawh i
ralpui en dawn a nih chuan, he inchhung ah hian ka leng ve ta lo
a ni e, ka fapa leh tute kut thlak tur chuan ka ruang an rah
hmasak a ngai ngei ang, nang nen a kan in zawmna pawh zan in
li la hian ka ti tawpin, langleuh khua ka chhuahsan nghal ang’
tiin tah aw tiau chuan a han sawi a. Langleuh Lalpa chuan ‘I duh
nak chuan nang pawh kan râl en mai tur che a lawm, ka fate
pawhin min pawisak lohna chhan ber chu nang hi i lo nih ngei
hi, chhuak vang vang ang la naktuk khaw en rual chuan kan
hmuhna a piangah ka that tir ngei ang che, chhuak vang vang
rawh i hmel hi ka hmu peih tawh lo a, Satlâk khua chu pan ding
nal nal la meivap zingah inruang chu kan lo zawng dawn nia’ a
han ti vin tuar tuar a. mipa aw hian ‘ e khai, insum tlang deuh
teh u chhiat kan tawh a chung a, he tiang a kan inthen darh leh
nghalte chuan dinchan a har lulai dawn em mai, Lalnu nang pawh in bengdai la chhuak teh suh, in beng dai tlang teh u’ tiin
a han sawi a. Langleuh Lalpa chuan ‘nang kha lo ngawi
chipcham rawh,ka thu tlukna ngaitheilo chu tupawh niraw sek
sek ka dim dawn hauh lo, ka unaute thihna mausam tute chan
tur chu ka sahlam hi a ni mai, ka rawn loh a i lo tawng ve sek
vangin i khawnbawl nihna ka hlihsak a che, ka thatna hi min
nek nan hmang hauh suh ang che, nang pawh chhuak ve nghal
rawh’ a tih chuan Lal inchhung chu a reh ta thap a. mipa hnih an
chhuah hnu chuan Langleuh Lalpa chuan tlangau pa chu engthu
emaw hrilhin a phun sup sup a, tlangau pa chu zawlbuk lam ah
hmanhmawh tak chuan a liam ta dawr dawr a.
Langleuh lalnu chu a mah chauh chuan lungdawh lamah
chuan a liam a, meicher eng a liam fel chuan mipa rual khat hi
hmanhmawh tak chuan lungdawh lamah meicher nen chuan an
liam ve nghal a, pasâltha Sângtuala chu Mualkunga beng bulah
phun sap sap in, thawm nei hauh lo chuan Lal inhnuai chu a
chhuahsan ta zal zal a. Lungdawh a tang a mual thumna ah
chuan meichher chu a tek chhuaih chhuaih a, hmeichhe
mangang chu te thatin ngawpui lamah chuan meichher eng chu
a liam chhawm a. pasâltha Sângtuala chu hmanhmawh tak
chuan meichher eng a hmuhna lam pan chuan a tlan hlawk
hlawk a, meichher ek khawn thlakna eng atang chuan chhuiin
kawr chu lo fing khat zet a zawh hnuin chuan , thlang ah chuan
mipa phun bal bal leh hmeichhe ka hnawh ni awm tak han te
deuh that chu hriaiin hmanhmawh leh fimkhur tak chuan a pan zel a, a thilhmuh chuan pasâltha Sângtuala thinrim chu a kai tho
chiang kher mai, a chempui ven hnan chu phawrhin, a hma a
tlangval pangâ lo nui then sawng te chu a pan hnai thuai a.
Lalnu puanbih pawhthlak sak tum a lo kun mek pa chuan
‘nang nu hian i pasal bulah khan min sawihnawm ve khanglang
a, chu i thil tihsual chu tunah i rul dawn chiang khawp mai, i
chungah duhthal a che turin thuneihna kan nei a ni tih i hriat
hunah chuan, tu emaw ber hmei a awm i dil chung ngei ang’ tiin
Lalnu puan tlang vuan thu tawm chal chu an thlir thap a, an zing
a pakhat chuan ‘ku Laiphung, hetiang a Lalnu chung a khawsak
mai chu a hlauhawm viau long maw, Lalpa khian a rilru te a lam
let mai palh hlauh chuan a pawi viau a nge’ tiin a han sawi a.
Laiphunga chuan ‘eng hlauhawm nge i sawi chu le, kan tan a
hauhawm dawn tak leh khu lai khamah khan kan thlak daih a
nga ti nia, bakah Lal khian thu thu nge a la a i rin reng reng a, a
fapa meuh pawh zuah tum lo tu khian he hmeichhia a ma
dodaltu hi a ngaihven teuh awm lo e mai ‘ tiin a han sawi a,
Lalnu pawh chuan Laiphunga thusawi chu a dik dawn hle hian a
hria a, a beisei neih chhun chu khual a a fapa Langleuh pasâltha
chu a rilru chuan a lam mawlh mawlh a. a fapa awm lai a
Langleuh khaw dinhmun zahawm dan leh a mah ngei pawhin
nuam a tih thin ziate chu ngaihtuah in, a thinrim beidawng
lutuk chuan ‘Laiphung nang inla pasâltha leh a ruk a midangte
kher ching i nih zia chu engtik emaw chuan an la hre chhuak a
nga, chu mi hunah chuan nuam i sa lo viau ang, nang a hmaah hian ka tlawm ngailo ang, ka thawk feih feih chhung chuan i duh
ang hi tih hlawhtlin a ni ngailo ang’ tiin a han tawngkhum ve sak
sak a.
Chu tawngkam chuan a hma a mi thin terek chu kai thoin a
hmel chu khamhuai ang mai chuan a lo dur khup khup a,
thinrim hapui lang khawp chuan ‘nang hmeichhe tawngthei leh
chapô nu, tu hian nge kei hi mi dal thei lo thlir rawh le’ tiin
Lalnu lam pan chuan a pen chhuak nghal a. Lalnu bul a thleng
dawn chiah tih chuan a hnung a tang chuan ‘Langleuh Lalnu
khawih apiang chu mitthi an ni mai, thuawih tak khan ding
ngawi reng ula in pang a him a ni mai’ tih aw zawi sat chu hria
in, aw lo chhuahna lam chu an hawi rual thap a. An hma a
pasâltha diar khim vang leh mipa pian dik tak chempui hum a
nui deuh sang, mitmeng senram mai an hmuh meuh chuan
pasâltha Sângtuala tiin an phun sap hlawm a, an inkar lah hlam
khat emaw chauh a tla bawk nen, an hma a ding hmachhawn
zawng a inher rem pah chuan Laiphunga chuan ‘naua thang
that lak duh vangin a ni maw kan buzawl thleng a kan inring lo
lai min nangching tur a i lo thawhchhuah, an sawi ang a
pasâltha chu ni la mi inringlo lai chu i hmachhawn hauh lo ang’
tiin a hma a mi chhaih thinrim tum tak chuan a han tawng khum
a, pasâltha Sângtuala chuan ‘huaisen zia lantir nan a khawkhat
Lalnu, baihvai lai chuh a hmeichhe awmnem tih luih tumtu hian
khawi lam a huaisenna han sawi ngam ve che ni maw ? I insawi
ang a huaisen i nih ngai chuan ka la fiah khawp ang, ka duh hun ah ni thung rawhse, tunah chuan intepui kha fimkhur takin
thlauh rawh ule, hun ka ngah lo a nia min hnialbuai in awm a
nih chuan tumah ka dim dawn hauh lo che u a nia’ a han ti
chang bang a, nang kha i darah khan iptepui kha bat liam rawh
tunah tiin a hma a tlangval pakhat chu a hnaih sauh a, chu
tlangval chuan a sawi ang chuan tiin hnung lamah chuan a
tawlh thuai a. a hma a miin lehlam a hawi ni ah ngaiin
Laiphunga chuan a iptepui chu a zen thut a, chempui a phawrh
fel tep tih chuan pasâltha Sângtuala chu hmalam ah a tlan thut
a, a chempui fawng hnum hlarh chuan Laiphunga tukhum ah
chuan a han chhu chawrh a, Laiphunga chu awp rawkin engmah
hrelo chuan a hlawm ta reng a, an zui ber a tluk takah chuan
chung Langleuh tlangvalte chuan an hma a mi chu mak ti tak
chuan an melh thap a, an lam pan a pen hnai chuan an tawlh
hnung dual a, pasâltha Sângtuala chuan iptepui kha in thihpui
dawn nge in dah dawn a han ti zawi leh sap a, a thusawi chu
zawm hnuhnung nih hlau ang hrim chuan an paih thla thuai a,
in pasâltha hi tunah kuah ding ula, ka hrilhna ang zelah kal ang
che u, finrawlh chhuah in awm a nih chuan pialral ah ka thawn
nghal zel ang che u. ka pi khawngaihin min lo zui la engkim ka
hrilhfiah vek ang che, i fapa leh tute chu dam leh thlamuang
takin kan lo kal dawn chuan an awm tih zawng hi ka hrilh thei
rih che chu a ni mai tih pah chuan Langleuh Lalnu chu a then
khum sak a. Lehlawn Lalnu chuan a hma a tlangval naupang tak thih
hlau hauhlo a lo chhan tu chu, an khaw tlangvalte sawi dan
chuan Satlâk pasâltha a ni tih a hria a, a chetdan leh tawng
hmangah chuan misual ni theiin a ring lo chung chuan hriat
chian loh han zui ngawt chu tiin a ngaihtuahna ah chuan a awm
a, han zui lo ngawt dawn sela duhthlan tur dang a nei chuang lo
engpawh nise tiin ngawi reng chuan a zui ve ta ngawt a. A hma
a mite kalna tur a hrilh danah chuan Langleuh khaw ram pawh
hriat hmel a ti kher mai, khaw lu an thlen chuan zawi fiah tak
chuan a han faifuk raih a, thing phen atang chuan an lo chhawn
a an kal leh hlek chuan tlangval dang pali lai hian silai nen an lo
hmachhawn thap a, eng emaw sawi chuan an phun sap sap an
zui a ber chu hmanhmawh tak chuan thim zingah chuan a pilbo
zui leh ta a. Langleuh Lalnu bulah chuan tlangval pakhat lo
pheiin a lo nuih var var in ‘ka pi thlamuang takin awm tawh
rawh, kei hi Satlâk tlangval Rinmawia ka ni a,nichin a i lo zui kha
kan pasâltha Sângtuala a nih kha, eng emaw tih lawk tur a neih
vangin keini ho chuan kan lo va kal san rih lawk a nga, Sialai
ram saw a rang lam a kan pelh vat loh chuan eng emaw pawi a
awm palh thei a, meichher tello a kan kal a ngaih dawn vangin
min hrethiam dawn nia’ tiin a han be sarh sarh a, Rinmawia chu
a naute lam hawiin khang ho kha in phuar tha maw ? tiin a han
zawt nghal a. An in peih hnu chuan Rinmawia chuan hmahruaiin
Langleuh Lalnu chuan a dawt a Lenghawn ar a khuan chuan an zanriah ei na chu thlengin
mei eng langlo thei ang ber chuan mei chu an chhem a,
Langleuh Lalnu chuan ‘ Rinmawi engvang berin nge Langleuh
khua hi in lo pan chhan, an sawi dan chuan Satlâk Lalnu
Thanthûami hian heng lai a Lal hrawt duh niin an sawi a, a dik
reng em ? tiin a han zawt a. Rinmawia chuan Lalnu chu en vang
vangin ‘ka pi, chutiang a Lal hrawt duh vang a lo kal ni ila nang
hi kan chhan kher che a tul hauh lo a sin, kan zing a kan hruai
che vang hian kan khaw dinhmun chu a letin a hlauhawm zawk
daih a sin, i pasal hian tunah hian i chungah rilru hel pu rih
mahse, nupa nafam chu khawngaihna hian a liam san mai mai
hauh silo a. Tin, I fapa leh a hnungzuite pawh khual tha thlen in
kan thleng hial zawk a, heng zawng zawng hi sual rilru pu ni ila
nangni chhung hi kan hum him hauh lo ang che u, Nangni
chhung mai pawh nilo khawdang ho hian kan Satlâk khua hi in
humhim nan tak an lo hman ve thin a, chung a vang chuan an
khaw chungah hian hriam kan lek ngatw hauh lo a sin, kan
pasâlthate nungchang hian mangang hi a hip khawp a ni ber
zawk, zan in a I thil tawn ang chi kha Satlâk tlangvalte chuan
kan enliam ngawt ngai hauh lo a sin, kan tan erawh hnemhnan
na a awm chuang hauh lo a, he tiang a ka han sawi avang hian
midang hi in hnawk ka tihna erawh a ni hauh lo a nia, I rilru tih
nat ka tum a nilo tih min hriatsak hram ka beisei’ tiin a hmel
chu a thu tak ngal a Langleuh Lalnu chuan ‘khual thu kan lo hriat dan ka han
sawichhuak satlaih mai a nia, nangni pawh in riru tihnat ka tum
a ni hauh lo tih min hriatsak ka duh a nia. Ka fapa te chuan
Satlâk khua chu an lo lut tawh I ti maw ? tiin phur hmel tak
chuan a han zawt hau a. Rinmawia chuan ‘an li nga lai kan khua
ah an awm tawh awm e, kum a tlin hmain khuanu hualhim na
zarah in zangâ kan kai ve tep tawh a sin’ tiin hlim tak chuan a ti
ti ve barh barh a, chutia an ti ti mawlh mawlh lai chuan pasâltha
Sângtuala te pali chu thim zing atang chuan an lo chhuak hlawl
a, thaw pui lak ham ham pah chuan Thûamkunga chuan ‘Ku
Rinmawi, Langleuh pasâltha leh a naute bo thu chu an hre
chhuak rang khawp mai, an Lalnu awm lo erawh an pawisa vak
lo niin a lang, meikha ti mit teh u’ a han tih zawm zat a,
Langleuh Lalnu chuan phawk fe chuan ‘ eng in sawi na nge ni
ngai, heng mite awm loh thu hi an hria i tihna maw ? tiin
hlauhthawn hmel tak chuan a han zawt a. Thûamkunga chuan
‘Lalnu hlauthawng rih hauh suh, khuanu zar ah kan tan
hlauhthawn tur an awm pha lo e, kan in veng thei turah ka ngai’
tiin an hnu siam chawp chu nui huk huk chung chuan a han sawi
a, Langleuh Lalnu phaw chu ngaihngam tak chuan a khi ta var
var a.
Pasâltha Sângtuala chuan ‘Ku Rinmawi, kan tlu zal phawt
mai dawn a mi niang le, naktuk lamah kan chau lutuk pal hang
tih a hlauhawm deuh ve’ tiin a han rawn a, Rinmawia chuan ‘ni
e i tluzal phawt teh ang u, ka pi nang helai ah hian mu ta mai che i hreh em’ tiin a puan chu a han thehchhuah a,puan kawp
pakhat theuh an theh chhuah chuan mut nuam pangngai tak
chuan a mu thei ta, Lalnu chuan ‘hawh awi, hetiang em em a
ngai lo in hrehawm lutuk ang’ tiin an puan vawm chhuah chu
pek then tum mahse tumah chuan duh lo in, an tlu zal ta far
a,an mi mante chu phuar khawm in puankawp chu an vur ve
bawk a, favang boruak mah nise var lam boruak chu ngawpui
hnuai ah chuan a vawt deuh tâk a, Langleuh Lalnu a thaw ve
meuh chuan eirel chu an lo peih thlap tawh a, Satlâk tlangvalte
khawsa zia chu mak ti tak chuan a ngaihtuah rauh rauh a, an
sawi ang ngawt a nunchhe khua an lo ni lo tih chu Langleuh
Lalnu ngaihdan a ni
Laiphungan zing eng a Lalnu a han hmu leh chiah chu a
hmel a hrehawm tihna chu a khawngaih thlak zawk hial a,
tukthuan ei lai pawh chuan dakchhuak ngam loin a kun ran reng
a, Langleuh Lalnu pawh chuan eng dang sawi lo mahse a rilru
natna chu Laiphunga a en a piang chuan a zual tih hriat tak
chuan a hmaite chu a lo sen chhuak leh zak thin, Laiphunga
chuan Lal fapa Bungthanga hmuh mawlh mai chu a huphurh
kher mai, Lal fapa Bungthanga thinrim hlauhawm zia lah tu hrilh
hran ngailoin a hrechiang ber tu a ni bawk nen, a ngaihtuah
zawng ngawt pawh chuan a thlantui chu a chhuak leh bat bat
thin a, Lalnu ah ngaihdam han dil chi zia zang a nih loh zia lah a
hre reng bawk nen, a bul a mite lah dik ni a an hriat tan a thih hlau hauh lo an lo ni bawk nen, a tan chuan beisei tur a vang ta
kher mai.
Tluang tak a kalin Satlâk lungdawh ah chuan thu thap in
vaibel chu an fawp talh talh a, Satlâk pasâltha ten khua an lo
thleng tih chu Lalnu Thanthuami beng pawh a lo thleng ve ta a,
an zingah hmeichhia a tel an tih chuan eng boruak dang tak
tawng leh ang maw ? tiin a ngaihtuah rauh rauh a. Naupangho
thusawi dan a tang chuan a nu a nih ring in pasâltha
Bungthanga chu lungdawh lamah chuan a kal thuai a,
Lungdawh a a nu chau tak a thu leh an khawhlui tlangval pangâ
lai hnungkhirh a hmuh chuan a mak ti chu a han ding dat a, a nu
en in ‘ka nu engthil nge nita, he laiah kan in hmuh tak diah mai
le’ tiin a ka hau a. Langleuh Lalnu in a fapa a hmuh chuan insum
zo loin ‘ka fapa dam tak a ka hmu leh che chu ka va lawm tak
em, ka tute an dam tha em ? tiin mittui khap per chhak chhak
chuan a han zawt a, an that thu sawiin ‘ka nu, eng ti zai zia nge
he lamah I lo tih a’ tiin a hmelah chuan thinrimna chu a lo lang
in, Satlâk pasâlthate chu melh in ‘ ka nu hi engti zai zia a kal ve
ngawt nge a nih a, eng thil fello nge thleng a’ tiin a melh tur ta
hle a. pasâltha Sângtuala chuan vaibel fawp khu luih luih chung
chuan an va kaldan chanchin chu a han sawi a, Laiphunga te
khawsak dan erawh chu a sawi tel duh lo thung a, Lal fapa
Bungthanga chuan ‘ka pa chuan min thah a duh tih chu a dik
meuh maw, ka nu pawh a hnawt chhuak a maw ? tiin a ma hriat
tawk lek chuan a phun mawlh mawlh a. Langleuh Lalnu chuan ‘ka fapa i pa nen kan kar chu a tawp tawh a, engmah sawi zui
tur a awm tawh hauh lo, he mihring tenawm tak thil tih erawh
chu ka damchhung in mangchhia ang a ni tawh thung ang’ tiin
thinrim hmaisen teuh chuan Laiphunga chu kawk in a han sawi
fak fak a. Langleuh Lal fapa chuan ‘ka nu engthil nge ni a,
chutiang khawp thil thleng chu’ tiin a han zawt a, Lalnu chuan a
chung a thil thleng a sawi meuh chuan, Langleuh Lal fapa chuan
‘nang mi tenawm pa, ka nu chungah chutiang tak chuan a ni
maw I lo khawsak vei chu, rei I dam hauh lo ang maw’ tih leh
Laiphunga lam a tlan chu a rual ta nghal a. pasâltha Sângtuala
chuan ‘Lal fapa insum rawh, Satlâk khaw chhungah chuan Lalnu
Thanthuami chauh a ni thu tawp neitu chu, a ma thulo chuan
kut in thlakna a thleng tur a ni lo’ tiin Laiphunga hma ah chuan
a ding ta chaih a.
Lal fapa chuan ‘a ngam fa chuan min lo dang ula ti nia, ka
nu chung a chutiang khawp a che chu rei a dam tur a ni lo’ tiin a
han te tuar tuar a. pasaltha Sângtuala chuan ‘Lalnu Thanthâmi
ai a chungnung chu tu nge maw i han nih chu le, ka dang khawp
ang che’ tiin a vaibel chu a sirah chuan a han theh leng nawlh a.
Langleuh Lal fapa nen chuan an in hmachhawn ta ran a, Lal fapa
Bungthanga chuan ‘ pasâltha lo in thiar fihlim rawh, kutthlak
che ka duh lo a nia,ka kawng I dal tlat a nih erawh chuan ka
chhawnin a hem ngei ang che’ tiin a han vau a. pasâltha
Sângtuala chuan ‘ ka sawi tawh ang kha a ni mai, Satlâk ram ah
chuan Lalnu thu lo chuan engmah a thleng ngailo, chu kan in awpna bawhpelh tum tu chu tupawh nise,a duhang chuan ka
awm tir hauh lo ang’ tiin pasâltha Sângtuala chuan a han
chhang ram hmak a. Lal fapa Bungthanga chuan ‘min lo dan chu
han tum ta che, hrilh that theih loh chuan i tuar lah che’ tih pah
chuan pasâltha Sângtuala chu a han lawk nghak fua a.
A hma a mi mitmeng lo dang zawk a hmuh rual chuan
hnung lamah penkhat tawlh letin Lal fapa kuttum lawk bur lo
thlawk chu a kun hniam san zauh pah chuan, a kuttum chu a
han thlawhchhuah tir ve nhghal zawk a. Lal fapa Bungthang
khabe ruh chu ri sawkin a luhai chu a han in thing nar nar a.
pasâltha Sângtuala chuan ‘Lal fapa duh tawk rawh, he misual pa
hi kan ngaidam dawn tihna a ni chuang lo, Lalnu Thanthûami
thu tlukna tur a nih hi, chuvang chuan in bengdai la Lal rorelna
chu that akin lo nghak rawh’ tiin a han sawi dam thlap a. a
mitmeng erawh a sen leh ram tawh thung. Langleuh Lalnu
chuan hlauthawng tak chuan ‘ka fapa in bengdai rawh, heng
Satlâk pasâltha te hian thu dik a rorelna chu an hlen ngei ang,
tuman tharum thawh tawh suh u’ tiin a lo te ve tuar tuar a. a nu
thusawi chu hreawm pawh a langlo in ‘kha lo in veng rawh aw, I
han tlak law law teh ang aw’ tiin pasâltha Sângtuala chu a han
pan a, a thianten lo dan an tum chu dang lo tur a tiin an in melh
ding ta ngar a . . .
Pasâltha Sângtuala chuan ‘kan hmabak hlen chu i duh
chuan lo kal te che, tu mah an inrawlh hauh lo ang’ tiin a hma a mi chu a pan ta ngeuh ngeuh a, Lal fapa chuan thinrim hmel dur
khup chuan a hma a mi chu bawhin, a kuttum chu a thlawh
chhuak leh ta fua fua a. kuttum lo thlawk chhuak lo bum zauh
zauh pah chuan Satlâk pasaltha chuan a kuttum chu a
thlawhchhuak zauh zauh reng a, Langleuh Lal fapa chuan a
khawih fuh theih mai loh vang chuan a thinrim chu a zual kher
mai, in lawk lam a a chet fuh theih loh vang chuan a hma a mi
reh chauh vek tum chuan a han bawh leh thut a, an han in man
chu tharumah an in hneh tawkin an hmuhnawm dun kher mai,
an hmel erawh hmuh a in nawm hleih deuh mai pawh a. Lal
fapa chuan tha tawp chuan bei mahse a beihpui pa chu a pha lo
tih a hre thiam ta mai a, ‘kha kei mah Satlâk khaw tui liak ka ni
ngai e’ tiin pasâltha Sângtuala chu a han au thawt a, Langleuh
Lal fapa chu bin zawkin vut zingah chuan a tla khu luih a, a mu
zawi ta reng a Langleuh Lalnu chuan a fapa mu zawi der chu
mittui nen a pan in a han sawi a, thi ang mai a zawi reng chu a
tap ta rawih rawih a. pasâltha Sângtuala chuan pan hnaiin a han
khawih tur chu thinrim hmaisen teuh chuan ‘I va han duh tawk
har ve, ka fapa chu a chet theih tawh loh hi, kal vang vang rawh’
tiin Langleuh Lalnu chu a teu hlar a, pasâltha Sângtuala chuan
‘ka pi I fapa hi a na vak lo, a thidang mai chauh a nih hi,
khawnge dangawm teh, ka lo buaipui a nge’ tiin Langleuh Lalnu
thusawi chu ngaihaw duh lo chuan a han buaipui a, Lal fapa
Bungliana pawh reilo teah lo harh in, a lo harh chua pasâltha
Sângtuala chuan ‘Lal fapa i lo harh tawh maw ? tiin tha tak
chuan a lo bia a, Lal fapa chu thinrim tak chuan a han tho zawk
a. a han in hum sek leh chu dam thlap in ‘Lal fapa in thlah dul teh, tullo a buaina pumpelh hi hahdamna a ni ngai e, i duhdan
ngawt hian engmah a kal reng theilo, chuvangin in ngaihtuah
harh la tharum leh thu neihna ngawt hmachhuan tum suh,
chapo hian thatna engmah a neilo a nia’ a tic hang ta fak fak a.
Lal fapa Bungliana pawh chuan a han ngaihtuah chuan dik a tiin
a thinrimna chauh a ngaihtuah vanga buaina lian zawk a chhuah
teuh zia hria in, a han ngawi vang vang in ‘pasâltha min
ngaidam rawh, ka thinrimna vangin ka lo kal thui deuh a ni e’
tiin a thiltih chu tisual in ti takin a kun ngaih a, Lalnu chuan a
fapa chu hnaih in a pem a tang a thi lo chhuak chu a han hruk
sak thuak thuak a.
Pasâltha Sângtuala chuan ‘kan in hrethiam tlang a a
lawmawm e, Lalnu pawh in chawlh hahdam a mamawh tawh
ang, bakah kan dinhmun ngaihtuah hian kan hmalawkah buaina
in min hmuah hmel a, chinchang pawh kan pasâltha te hnen a
hrilh vat a ngai a ni’ tiin an mi mante nen chuan Satlâk khua chu
an lut ta dam dam a, Lal in an thlen a Langleuh Lalnun a tute a
hmuh chuan an hlim tlang kher mai. An pitu ho in lawm lai
chuan Lalnu leh midangte chu khun khan tak chuan an lo thu
bial laih thung a. Lalnu Thanthûamin

(A ziaktu hian internet chak tak a mamawh a ni)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 11th, 2018, 9:16 pm

PASÂLTHA SÂNGTUALA ( Mampuia Pa )

BUNG – 140

( Thiante u, in comentna ka han bih thuak thuak a, kei a ziak ve teh lul in han ui der ka hmuh hian, mahni insit tak chungin lo ziah zawm leh mai chu ka tum a. Mahni in tih lar tum a thu dang neiah min ngailo hram turin ka ngen duh che u . . .
Ka thawhthu ziah a vang hian in ah awm mah ila, chhungte biakna hun neilo a ka awm thin te hi patling awmdan tur a ni lo a, zanah mut rual lah a theih loh tluk a lo ni bawk nen. Tin, Internet hi a chhe lulai lutuk a, ziahsa ang pawh ka dah theih thin loh vangte hian, a zahthlak ka ti ve thin . . . .

Thawnthu ka ziak ve ang tih hi ka ringlo,thiam lah ka thiam na heklo, WRITER ka ni lo tih hre chung a min lo chhiar sak thin turin ka ngen nawn leh duh che u, ka hriatna zim ang chiah hian ka thu ziak pawh a dang thin in ka ring, ka tih dik tawk loh hi min hrilh turin ka phut tlat che u, kan dam a nga phak leh thiam tawk erawh chhuah zel ka tum e )

. . . . . . . . . .

Lalnu Thanthûami chuan thawm lo ri phei deuh hulh hulh hriain, leihkatlangsangah chuan a chuang chhuak thuai a, Langleuh Lal fapa hmai duk deuh thluah leh a bul a nu upa lam hmai fang tha deuh leh ngo lam pang deuh leh a bul a tlangval panga hnung khirh tlangval ten a khat tawk a an tum kat leh nawk thin te chu thlirin, chutiang takin tu chungah mah a tlangvalte che a la hmuh loh vang chuan mak ti ru tak chuan a thlir dauh dauh a, a tlangvalte chuan chhan tha tak a awm loh chuan tumah kut an thlak ngailo tih a hriat chuan, an thu a hriat chakna chu a zual sauh a. Lehlawn Lalnu pawh chuan Satlâk tlangvalte khawsa zia chu mak ti ru deuh tak chuan a thlir ve reng a, an mi man chung a kut an thlak awm a hriat loh teh reng nen, tun tum a an mi mante chung a an khawsa zia chu mak ti tak chuan a thlir ve reng a.

+ + + + +


Langleuh Lalnu chung a an khawsak dan an hriat chuan tlangvalte chuan, chung an mi mante chu an tum leh dawp thin a, val upate chuan khap lo ngat se zawng rei an daih hauh lo ang le, an mi man ten Satlâk tlangvalte khawsa zia an hmuh chuan beisei an nei chau ta khawp mai, thuhnu dawn lek lo a an lo chet tawhna chu, an inchhir in ban a pel vang vang kher mai, an tihsual man chu engtin tak rul ang maw ? tiin hlauthawng tak chuan an kal kun ran hlawm a. Lal mual an thlen chuan, Langleuh Lalnu chu Lal inah an hruai lut nghal a, a tu ten an pi an hmuh chuan pan vatin lungchim tak chuan an in kuah vawng vawng hlawm a. Lalnu Thanthûamin Langleuh khaw mite awmdan an hriat chuan a hmelah thinrim na lo langin, leihka tlangsangah chuan a khawnbawl te nen an chhuak nghal a ‘khawnge kan Langleuh suaksual ho chu, an hmel ka hmu duh e’ tiin a han au vin thak thak a, hlauthawng a hmel dang lap leh puantlang khur dar dar chuan, nunau hmaah tlangvalte chuan an mi mante chu an lo nawr chhuak nawk nawk a, tlangvalte chuan ‘Lalnu hetiang mi awmsual bawl hi chu dam ve tlak an nilo, kan kut ah dah mai rawh’ tiin an lo au noh noh a. Lalnu Thanthûami chuan kut a han phar a, Satlâk tlangval thinrim tak te pawh an reh ta thap a. Satlâk Lalnu chuan ‘nangni ho khan engnge thiamthu sawi tur in neih, tunah sawi rawh u’ tiin a han vin that that a. Langleuh pasâltha Laiphunga chuan ‘nangni khaw chhung a thilthleng pawh a ni lo a, in khaw chung a pawisai lah kan ni hek lo, inchungah thupha chawina tur ka neih pawh ka hre nek lo e, in ngam a nih chuan kan chungah kut han thlak ula, in Satlâk khua hian a hriat tur tak chu a hre khawp ang’ tiin a han vau let ve ngal ngal a, Satlâk tlangvalten Laiphunga thusawi an hriat chuan an thum huk a, hmalam pan tum chuan an phu suau a, an mi mante hma ah pasâltha leh val upate an din takah chuan an tawn lui ngam ta em lo a.

Lalnu Thanthûamin ‘hmeichhe chaklo zawk te humhim tur zawkin, an chung a awmsual in bawl chung pawhin pawi ka sawilo i la ti a maw, i nu chung a thleng nise i en liam bik ngut a maw chu ? I chaltlai kher mai, mipa dik tak chuan an ai a chaklo zawkte a humhim thin a ni ngai a, nang erawh chuan sual thup nan nunna hlu tak chung a zahngaih lam a lan loh a vangin, i chungah zahngaihna ka lan tir hlek lo ang, i sual man chu i pe ngei tur a ni, tlangval te u daipawnah chaih chhuak ula, tu tan mah a hnawk siam tawh ngailo turin va siam ang che u, an hmel pawh ka hmu peih niau lo e’ tiin inchhungah khawnbawl upate nen chuan an in zui lut ta hmak a. Langleuh Lal fapa in Satlâk Lalnu rorel dan a hriat chuan a hlim kher mai, tlangvalte chuan khaw pawnah an mi mante chu hruaiin an tleh chhuak ta hul hul a, val upa leh pasâltha te chuan tlangvalte chu nunaute hmuh loh a che tur leh, ruang chu thingphur hmeichhia te hmuh mai loh tur a dah tha tur chuan an chah a, Lal inchhung ah chuan an luhsan ta dial a. Langleuh khua ten Satlâk khaw run an tum tih an hriat chu ngaihtuah in, Satlâk Lal inah chuan ro pui relin an thu tak ngul hlawm a. zan lam a râl rel tha tur chuan khawnbawl upa te, val upa leh pasâltha te chu an tin ta rih a.

Pi Tawnliana chuan a fapa hnenah chuan ‘ Sângte, kan thu hriat kha a dik meuh maw, Langleuh Lalpa chuan a fapa leh nupui ngei chungah chuan hriam lek chu a duh meuh maw ? a va han mak ngai ve le’ tiin an thu hriat thar chu a han tuihnih bauh a, pasâltha Sângtuala chuan ‘kei pawh mak ka ti khawp a sin, mahni thisen a hrinte ai a mitthi dah pawimawh zawk ta tlat chu mak hi ka ti khawp mai’ tiin a pa thusawi chu a lo chhang tha ve mai a. pasâltha Sângtuala chuan ‘ka pa, pi Khualmawii te nen khan eng tin chiah nge in thu tawp nita ? tiin a han zawt a, a fapa melh zauh chung chuan ‘palai khan ngaihdam min dil nasa mai bakah, Pângpuii te nufa ngeiin an ngaihdam tak vangin kan inrem ta a nih kha, Lalnu in salâm chawi tur a tih erawh leichhe ei ka duhlo vangin ka la duh lo a, thu engpawh an nei leh a nih chuan Lalnu in Satlâk khua a tang a hnawhchhuah ah vau a, tun tum a tan chuan kan duh tawk rih a ni e, Khualmawii sawi chhuah takah chuan naupangte pawhin an do a, tukin khan ngaihdam an dil tak a sin’ tiin an khaw boruak chu a han hrilh a. pasâltha Sângtuala chu a han ngawi deuh vang vang a ‘ka pa, inrem tluk a awm loh rualin ka rilru a dam lo khawp mai, khuanu zarah khawtlang ah kan lo langsar ve deuh a, chuvangin tun tum chu ka ngawi deuh mai mai a, tu pawh tun hnu a tiang thil sawi leh an awm a nih chuan ka enliam tawh hauh lo ang’ tiin a phun ve sap sap a.

Ngiazoa te unau in an u an hmuh chuan a iptepui chu laksak a, a silai chu Ngiazoa an a han put sak chu a in tithei kher mai. A nau chu ka kâp dawn che tiin a han tin fiam a, pasâltha Sângtuala chuan ‘Ngiazo kha tiangin silai hmangin tumah fiam tawh hauh suh, silai hi infiam nan a hman chi pawh a ni hauh lo a nia, hre reng tawh ang che’ tiin a zilh hau a. a nau chuan 'i hi an hau a sin le' tiin a lo nuih kar kar a, in an va luh chuan Pângliani chuan lo be sawk sawk in a u ngheng rial chuan a thu a, Zoliani pawh an sir ah chuan thuin an infiam bawrh bawrh a, Ngiazoa te unau chuan an lo bawh chang chang bawk a, chutia hlim tak a an rik laih laih lai chuan Pu Neihlaia pawh a lo chuanglut ve zawk a, a farnu leh naupang ten an bawh chang chang chu nui vur vur chung a thlir, in nangte reuh hi chuan chhungkua hi i phuar khawm reuh mang e aw, fanu zawng nei ngat ila ka chhuah hauh lo ang che maw tiin a ngaihtuah rauh rauh a, a vaibel chu a tan khu tual tual in Pu Neihlaia chuan an va kalna chanchin te zawtin Langleuh Lalpa khawsa zia a hriat chuan mak a ti kher mai, chek tlak tlak chuan ‘ka fapa i han sawi dan hmang chuan, chu tluk a chhuanmang rorel a awm chuang lo a nih chu mawle,a va han mak ngai ve aw’ tih pah chuan zufang chu a tep pah chap chap a. eng emaw sawiin an phul zui leh luam a, zanriah ei a hun takah chuan a ni pawh chu a chhuak ve ta hram a. Pu Neihlaia hawn hnu chuan Langleuh Lalpa khawsa zia mak an tih zia chu an sawi zui sap sap a, Lal theuh theuh pawh an zia a dan zia an hriatchian phah kher mai.

Zanriah eikham chuan Satlâk Lal inah chuan khawnbawl upa leh khawtlang a mi pawimawhte chu an thu tlim leh hmur tawh a, Langleuh Lal khaw khawsa zia mak an tih zia chu an sawi mam mam hlawm a, Lalnu Thanthûami chuan ‘aw le, hei kan khaw boruak chu kan hre tlang vek a, he khua kan luah luh a tang rengin buaina a in pha man zar zar reng chu a nia, a mak in a hrehawm duh khawp mai. Thim ah eng a langfiah ang hian buaina kan tawh hian min phaurkhawm in, chakna thar min siam thin a, hei tak hi he kan khaw chakna thuruk pawh a ni reng a ni, kei hmeichhe tan chuan rilru putdan pawh thiam a har khawp mai, nangni hi awm hlauh lo ula chuan hrehawm tiin ka kun reng tawh awm si a, in zavai hian ka tan chuan in hlu tak zet a ni tiin a han ngawi deuh ran a. Langleuh lam thu chu kan pasâltha te a tangin kan hre chiang tawh a, engtia hma lak chi nge ni ang ? tiin a han râwn a. khawnbawl upate chuan ‘kan pasâltha leh val upa lam in hmalak dan tur ruahman te in nei tawh em ? tiin an han zawt a, val upa Chhâwnthiaua chuan ‘kan thu hriat dan a tang chuan Langleuh lam chuan min run ngei an tum tih kan hre chiang tawh a, hetia lo nghah ngawt mai chu thil tha ber niin a lang lo, kei ni lam ngaihdan chuan kan khaw ram chhung lo dai lut lo tur in, kawng lak a lambun mai hi tha berin kan hria, an pasâltha Laiphunga sawi dan in tlangval zathum bawr vel Langleuh ah an awm a, khaw venghim turin a lo berah sawm ngâ chu an awm ngei a nga, zahnih tha awrh chauh zawng huphurh awm ah kan ngai chiah lo, rem in tih chuan zan in li la hian ramri lam pan a kal mai a tha mai awm e, an in zawn buai chhung nen duh tawkin tan hmun kan lo siam thei turah kan ngai’ tiin a han chhang a. An han ngaihtuah chuan val upa sawi chu tha an ti khawp mai, khawchhung a silai thawm hriat chu pumpelh theih nise an duh ber pakhat a ni.

Thu mum an neih hnu chuan zawlbuk lamah an chhuak ta nghal a, Lal thu an hriat chuan Satlâk tlangvalte chu râl bawh a kal ve ngei tum chuan hmanhmawh tak chuan an hawng a, zanriak buhfai nen zawlbuk chu an pan khawm thuai a, an thlen kim chuan tlangval khawchhung veng tur chu harsa tak chuan an thliar thei hram a, val upa Chhâwnthiau te,pasaltha Phulliana leh pasâltha Lianmana chu khawchhung a awm tur chuan an hnawn thlu lui a, pasâltha Sukthanga ho chuan ramri lam pan a chhuak tur chuan Lal mualah chuan an ding ngir khup a, rawlthar Thanchhinga te thianzaho chuan râl bawh a kal ve chu an dil tlat mai a, an han thlem ngial pawh chuan, eirawngbawl ah tal tiin an dil lui tlat a, pasâltha Sângtuala chuan aw le, kan tlangvalte tha a zâ a nih chuan an kal ve mai tur a lawm . . . a tih takah chuan an ni thianzaho chu lawm in an zuang zawk zawk a. Lalnu Thanthûami chuan ‘nangni ka mi huaisen te u, kan khua leh a mi chengte tan hian in va han hlu tak em, khuanu hualin va kal ta ula dam takin lo kir leh ngei ang che u, nghakhlel takin kan lo thlir reng dawn che u nia, in tha hahna hian muanna a lo thlen tawh thin a, nunna hlu tak pe tute vangin muang leiin kan la awm theih phah a ni, hnehna nen lo kir leh ngei ang che u’ ti a thlah in, Satlâk mi hrang valrualte chu hmanhmawh takin an liam leh ta sung sung a.

Meichher nen a kal an nih bakah an ram hriat chian a kal an ni bawk a, an kal sawt kher mai, zanlai arkhuan meuh chuan ramri pawh an hnaih uar tawh a. Tui hmun an hmuh chuan a remchan dan ang chuan an tlu zal a, pasâltha Sângtuala chuan Thanchhinga te thianzaho râl hma a che tla lai chu a hmu chak khawp mai, naupang tha mai chauh an nih erawh chu a ngaihngam zan lo deuh a, silai a puah rual chuan kal lo turin ti eng ang mahse an khap theih a rin loh vang chuan, a ruk a veng tur insiam mai chu tha berin a hria a, var lamah chuan a muhil ve ta hram a. zing a thawh ve meuh chuan Thanchhianga te thianzaho chu eirel chuan an lo vir buai tawh kher mai, an kum ang ngawt a en chi an nih loh dan pawh a hrethiam nghal mai a, uluk tak a kaihhruai chuan naupangte in mihriat hlawh tak an ni ang tih pawh a ring thiam nghal a, mi dang lah thu mai duh bik hek suh, ngawpui chhung a lo en chuan eirel an peih der tawh a, an peih hnu chuan muangchang lo in an kil nghal a, pasâltha Sângtuala chuan ‘ka pa Thang, hmanhmawh thlak lutuk a nih loh bak ah, ngawpui hnuai mah nise vai kal huk ai chuan, lo fingkhat vel kal in thlau ila a that ka ring mang e aw’ tiin a han rawn a, a ni pawh chuan ‘a tha zawk mai thei a ni, kan rin bakin kan Langleuh lam pawh an lo hnai mai thei’ tiin a lo tuihnih ve sap a. Tukthuan eikham chuan einawi tifel chuan tlangvalte chu an phe suau suau in, karlo ah an ti fel thuai a, tlangval te chu hmun hnihah then in, pasâltha Sângtuala ho chuan hmahruai in tlangval zahve chu an liam ta duak a.

Nau riltam awmah chuan ramri kawr pawh an hnaih tawh kher mai, pasâltha Sângtuala Mualkunga hruai a kal chu Langleuh Lal fapa Bungthanga chuan a zui lui ve tlat in, an pathum chuan, ram ri kawr chu fimkhur tak chuan an zu pawh a, ngun tak a thawm an ngaihthlak lai chuan Tlangzawl ram lam a tang chuan thawm a lo awm a, an ngaihthlak chian chuan ramvak satliah ngawt zawng an ni lo tih an hre thiam a, hmanhmawh tak chuan an ram lamah chuan an in saseng thuai a, pasâltha Sângtuala chuan an muan sual teuh zia hriaiin, chutiang tak a an hnu an hmu rang chu mak a ti zawk hial a, thing phen atang chuan uluk tak chuan an bihthla reng a, an zingah chuan Langleuh Lalpa ngei a tel a ni tih a hriat hnu phei chuan mak a ti zual kher mai, ramri kawr lungpui chungah Langleuh Lalpa chu a han chuang kai a, tlangval te ngun tak a en kualin ‘nangni ka khuate u, kan hma lawkah khian Satlâk hmeichhe Lal hrawtna khua chu a awm a, hmai eng zah pahna neilo leh thangthat hlawh duhin tu khua a mi mai pawh an tlan khawm thin a, khaw lian leh ropui nih duh vangin engmah zawt si selo in an lo khaw mi tha chei mai thin, pasâltha pawh pahnih khat chu a nei ve awm e, an pasâltha neihchhun Sângtuala chu an sawi lar in tu dang mah in an hneh theih hauh loh ang zia in an chhuah a, chu mihring lukhai tu hnenah chuan dar khuang leh silai pakhat ka pe ang, pasâltha nihna leh khawnbawl nihna thlengin ka pe bawk ang. Tin, ka nupui leh fapa that tu hnenah pawh chutiang bawk chu ka ti ang, Satlâk khua chu mei vap ah kan chantir a nga, râl lak sum chu kan in zah semin, an hmeichhia te pawh in duh a thuin hmeiah leh nupui thleng pawhin in nei thei ang, tukthuan eirel ila kan eikham veleh Satlâk khua chu kan pan ding tawh dawn a ni, an zanriah kil laiin kan nangching thut a nga ,kan duh tawk a kan chet hnuah zawng tu khua mai pawh hian, Langleuh khua nge nge tiin a mimir hi mi chung a leng kan ni tawh mai dawn a ni, Lehchhuah khua pawh zan riah nan kan hmang nghal dawn nia, nula pahnih vel theuh chu hmeiah in nei thei ngei ang, kan hma a khuate hi hmeichhe tam na a ni tih theihnghilh lo bawk ula, khai ula tlangvalte u, tukthuan chu han siam ula kan hmabak phurawm tak chu i han hlen vat teh ang u’ tiin han sawi a, tlangval te pawhn hmei an neih theih dawn vang chauh pawh chuan phur takin an che nghal sung sung a.

Pasâltha Sângtuala chuan i duh leh rin ang ngawt a awlsam chuan i tal hauh lo ang ti a in sehruh teuh chuan, Mualkunga leh Langleuh Lal fapa chu a han zai zir zauh a, fimkhur tak chuan an chho ta tham tham a, Lal fapa Bungthanga chuan lung kuttum tia lai chu a rap lum palh ta hlauh a, tlangvalte pawh chuan thawm chu an khel tih hriat tak chuan an thum hak a. Mualkunga chu saza euh ang chuan vawithum a han euh that that a, tlangval pakhat chuan chu saza khang lang chu ka han sai lir tawl teh ang tiin a Satlâk lamah chuan a han chuang kai a. pakhat chuan ‘tlangval lo kal rih teh, tullo a thawm han neih kha a finthlak ber lo e’ tiin a lo khap a, Langleuh tlangval a let tak chuan chung mi pathum te chu an thaw huai a. hmunhim an thlen chuan Lal fapa chuan Mualkunga melh in ‘hmu lo che ila chu, saza a ni tiin ka tang huai khawp ang’ tiin a han then khum sak a, a thusawi zawh chuan Langleuh Lal fapa hmelah chuan rilru natna lian tak lo langin ‘piang tawh zingah chuan ka vanduai ber awm e, mahni hringtu pa ngeiin kan chung a kutthlak turin midang a tir a nia, hetiang tur hrep ai chuan lo pianglo zawk ila tha tur’ tiin a chek tlak tlak a.

Pasâltha Sângtuala chuan ‘Lal fapa beidawng lutuk mah che hun tha kan la nei chek ang chu, i pa chu hmaichhan ah kan be ve phawt ang chu mawle, a thisen zawmte chân la nâ lutuk hian rilru mumal a put tir theilo a nih hi, lungngai lutuk lo phawt teh’ tiin a han hnem a, Lal fapa chuan ‘min hnemna mah nise ka lawm e, kei pawh ka pa zia hi mak tihna tak chu ka nei, kan chhuah hlan hian a rilru sukthlek a dang thut mai a, tha lam thu reng a sawipui theih ta hauh lo hi mak ka ti khawp mai, chan tawk khuarel chu kan pawm mai a niang chu’ a han ti zuai raih a. pasâltha Sângtuala chuan chutiang khawp a rilru mak chu a vawikhat hriatna a nih vangin a thu hriat chu a ring lo hial reng a. An thiante an fin leh hnu chuan chanchin an han sawi a, an ni pawh chuan Langleuh Lalpa khawsa zia mawlh chu mak an tiin rin harsa an ti hlawm hle a. pasâltha Sukthanga chuan ‘chuti chu kawr an awm lai khuan kan zu hup barh mai dawn a mi niang’ tiin a naute chu a han rawn a. pasâltha Sângtuala chuan ‘a nuam kual zawngin kan che leh phawt ang chu maw le, lung sahbuak nen han ri leh rum rum ila, Chungeka thiam zawng pawh a niin, hun thawl zawk nen Langleuh ho chu an kir duh phah hlauh chuan a tha zawk daih ang chu maw’ tiin a nui pah huk huk a, Chunglianan Lung sahbuak sawi ri a hriat chuan a lo phur hle reng a, nui suk suk pah chuan ‘chutia kei a kar min han lam takah chuan hna chu tan ila ti nia, sawlai piah lamah sawn lunghmun chu ka hre tak a sin, kan tha hnem ang reng a kar lo ah kan in peih mai a nga, Thûamhnap hian kan awmna lam ah a lo hruai thei turah ngai ila’ tiin a tho nghal tharh a, a bul a thingro uipum tia lai chu pu nawlh in an piah mual khawhthla lamah chuan a kal nghal a.

Midang te pawh chuan an zui thuai in, tuibur hmuamda ah chuan an duh thalin an in peih tawh a. Thuamkunga pawh chuan silai enfel mawlh mawlh pah chuan. Langleuh khaw ho tukthuan eikham vaibel zu a ti ti barh barh te chu a pan tham tham a, Langleuh tlangval pakhat tawng paw hraw ber chu tin vang vangin a han sai lir tawl a, hmunhimah chuan a in saseng thuai a, thaw hlap hlap chuan an thiante bulah chuan a thu khi van a. Langleuh Lalpa chuan ‘naute u in, thian nunna la tu chu tu pawh ni raw sek sek, han phih chhuak vat teh u, a nungchung ngeiin ka ke bul rawn thlen ang che u’ tiin a au vin that that a. silai rikna lam chu au nawk nawk chuan an pan chho a, Satlâk ram lam a hnu pherh vung chu hmanhmawh tak chuan an chhui par par a, tlangval pakhat chuan ‘Satlâk ho an ni ngei ang maw ? silai pakhat bak an nei lo a nih dawn hi, ar zim takin i han zim phar tak tak teh ang aw’ ti a tawng lar lar chuan an chhak lam chu an melh zauh zauh a, mual khawhthla pawh leipui fing hnih zet an zawh ang tih chuan, Langleuh ho awmna chhak atang chuan thawm a lo chhuak thut a, an han en chho chuan lung arbawm tia tia chu a rawn lum thla sung sung a, an chhak a tang chuan mi pakhat hi ngaw khawk rum rum khawp chuan a lo nuih zui awr awr a, zanthim hnu chu ni sela tiril fan raih tur zawng a ni ngei ang le, nui thawm chu ngaihtuah hman lo chuan tlangval thekhat chu mual dung zui chuan an tlan thla ngawt a, tlangval pangâ zet chu lu per bawih chuan lung chuan a deng thal hual hlawm a. Langleuh tlangval zing a pakhat chuan ‘ thing phenah bel bul rawh u’ tiin a thiante chu a au tuar tuar a.

An rin loh lutuk thil an tawn vang chuan Langleuh tlangvalte chu an chi ai nuaih tawh a, lung lum in a pelh fel meuh chuan an darh nuai tawh a. chutia an chhak lam an bih dak dak lai chuan mau thalfang pangâ lo thlawkin, Langleuh tlangval pangâ lai chu ngawpui khawk rum rum chuan an te tuat tuar a, an thiante hliam puih tum tlangval che chhuak pathum te pawh chuan thal fang chu tawngin an let ve leh hlawl mai bawk a. Natuar thawm chauh lo chu thawm chu a reh duk a, Langleu tlangval pakhat chuan ‘in ngam a nih chuan lo chhuak ula, mipa fa takin min lo hmachhawn rawh u’ tiin a han au tuar tuar a, chu tlangval aw thangkhawk a reh rual chuan silai hi ngaw khawk rum rum chuan a han puak dur a, tlangval au lang lang chu natuar chuan a te zui rawng rawng a, chutia an duh duh an rawn thur chhuah thei vang chuan, Langleuh tlangvalte chu an zam tak zet tawh a, tu ber nge dawt leh ang ti ngawt chu an ngaih tuah a. Langleuh tlangval hotu chuan an chhaklam chu a han sai dur a pawi a hawllo chiang kher mai.

Langleuh tlangvalte u inpe mai rawh u, in Lalpa pawh kan kutah a awm tawh e tiin an tukthuan eina kawr atang chuan aw hi a lo chhuak lawng lawng a, Tlangzawl lam atang chuan an lal fapa Bungthuama aw ngei mai chuan ‘Langleuh khua te u, tun a in in pelo a nih chuan kan mangthak ang che u, in Lalpa pawh kan kutah a awm tawh a, kan thu in zawm lo a nih chuan kan nghak reng dawn lo che u a nia, in duh thlang rang rawh u’ tiin a rawn au ta leng leng a, an dinhmun chhiat zia hriain, tan zui reng ai chuan tiin an hmanrua chu tlangval thenkhat chuan an theh thla ta sap sap a. Langleuh tlangval hruaitu Darkuala chuan ‘ dawihzep hlawm lutuk mai che u hian, in va zahpui awm hlawm ve mawle zel zul hlawm mai che u, puan fen feng talk vek in ni’ tiina han au piap piap a. Lal fapa Bungthuama chuan ‘Darkuala at so hlek suh aw, dawhtheihna tlem kan la neih lai hian in pet ha mai rawh, i rilin râng a pu lo mai tur a nia’ tiin a han au ve lang lang a. Darkuala chuan ‘nang mahni khua leh hringtu pa ngei phatsan tu kha lo ngawi chipcham rawh, ka hmuh tur a i lo lan hunah i lu ka la ang’ tiin a han chhang teng chhuaih a, Lal fapa chuan ‘I tawng chuan sai ngâl a deng tliak e, ti khan lo awm rawh ka lo kal nghal e’ tiin a chhang a. Lal fapa chu Darkuala lamah chuan a kal nghal a. Tlangval tam zawk an inpek tak ah Satlâk tlangvalte chu an bih rukna hmun a tang chuan chhuakin, duh sela an chimih thak dawn a ni tih hriat tak chuan an Langleuh tlangvalte chuan an hmachhawn mekte chu an sawi ang a nunchhia an ni lo tih an hrethiam nghal a.

Lal fapa Bungthuama chuan Darkuala chu pan hnaiin a silai chu, Mualkunga kutah hmehbel ichawt a, chempui chu lekchhuak nghal in, thinrim tak a a pan hnaih lai chuan Darkuala chuan a bul a silai tun chuh thutin Lal fapa chu a sai nghal thawr a, Lal fapa chu a dar veilam a silai mu lut chuan a deng awp hnawk a, a fapa tlu a hmuh meuh chuan Langleuh Lalpa chu a fapa lamah a tlan thuai a. a fapa kut a vuan in ‘Mama i tha em, ka aw i hre thei em ? tiin hlauthawng tak chuan a fapa chu a kuah chung a, Lal fapa chuan na ti then chak chak chuan ‘ a nâ lo e khawnge dangawm teh, saw mi laktlak loh pa saw ka han dahtha teh ang’ tiin a han in beng kang tawk tawk a, pen khat a pen leh chiah chu pai nawk in a thidang zui ta a. Lal fapa tlu tur chu Mualkunga chuan lo chelh vatin a han mut rem a, Mualkunga lo hawichhuak leh hmel zet chu a hlauhawm kher mai, silai chu dah rawkin chempui nen Darkuala chu a pan ta ngeuh ngeuh a, Darkuala bul a thlen chuan Pasâltha Sukthanga leh Sângtuala te meuh pawh an ding ta chawih a.

Rawlthar Thanchhinga chuan chempui nen Darkuala chu a lo hmachhawn mek a, Mualkunga chuan ‘ka nau, kha chu ka chanpual a nih kha lo kal kiang rawh’ tih tuar pah chuan hma lamah chuan a tlan nghal zawk a. Thanchhinga chuan ‘min lo kian zawk teh, kan thil zir hi eng chiah nge ka thiam hriat ka duh a ni’ tiin hmalam chu a pan ta deuh deuh a, pasâltha Sângtuala chuan Thanchhinga in rintawk zia leh zam loh zia a hmuh chuan ‘Kunga kan nau kha lo kian phawt teh khai, kha pa khawsak dan ah kan nau khan a chingphar thei lutuk ang’ a lo tih chuan, Mualkunga chu chempui hum to chuang inring tak chuan a ding ve ta a. Thanchhinga chuan ‘kha lo inring rawh le, Lal fapa hmingin ka lo thawk chhuak e’ ti a au that chung chuan, a han tlan chhuak thut a, a chempui chu vai zawk zawkin Darkuala chu a tawlh hun hun a. Darkuala tawlh chuan lung palin a tlu tur chuan chempui chu a han vai ve leh zawk a, chempui lo khak per zauh pah chuan Thanchhinga chuan chempui chu a han vai chhuak ve leh zawk a. Darkuala mal dinglam chu nguntang chen chuan kak var haih a, a hliam chu melh in a thinrim leh mak ti bawk chu a then chak chak a, chempui a in hawlh thoin ‘naupang lo inring rawh aw, i duh tak tak elaw’ tih pah chuan Darkuala chuan a hma a rawlthar chu a bawh nghal rawk a, a beisei leh tum ang rawk chuan a sat fuh thei hauh lo. Satlâk tlangvalte chu an rawlthar fuihin an au teng tung a. Darkuala chu a hliam vang chuan che hleitheilo in thi a lo chhuak reng nen, a chau tan tih hriat tak chuan a hmel a dângin a tuan a fum zual kher mai. A hma a rawlthar lah chuan nuam a ti tawlh tawlh zawk ema tih tur chuan hmel hlim deuh sang a pu lawi a.

Pasâltha Sângtuala chuan ‘Thanchhing fimkhur rawh aw, tawngpawng basa ngam lutuk suh’ tiin a han au thawt thawt a, pasâltha aw a hriat chuan Thanchhinga pawh a fimkhur leh ta sawt a. Darkuala tlawmla leh na ti chuan a hma a rawlthar chu thah ngei tum chuan a bawh leh a, pasâltha Sângtuala chuan ‘Thanchhing kun hniam la, a taksa ding lamah luhchilh rawh’ tiin a han au tuarh a, pasâltha Sângtuala sawi ang chuan Thanchhinga chuan a han ti a. Darkuala chempui thlawk chhuak chuan Thanchhinga sam chhawlleng chu chhawk thawtin, tlangvalte chu an lo thum huk a, Darkuala tha pe na lutuk chu her lawihin, Thanchhinga chuan Darkuala ngawngah chuan a han sat zui awrh a, Darkuala chu rum kawk in a thingthi hnawk a, a hliam atang chuan thisen lo chhhuak sen zuaih zuaih in, thisen in a hma a mi a bualsen nguai takah chuan. Thanchhinga chu thisen thang nghur leh patling thi tur chalchang a hmuh chuan, a thau ah manin a khur dar dar a, a hmel chu hliampui taur ang mai chuan a da bai bawk a. pasâltha Sângtuala chu Thanchhinga lamah phei vatin a kuah hrang thuai a, vaibel a ham khum hnu chuan Thangchhinga pawh ngai a awh leh thuai a, a thah tak ruang chu a han melh leh nangin tlangvalten an lo senghawi tawh a, thawk ham ham pah chuan ‘pasâltha thangchhuah nih hi ka lo thlahlel thin a, tunah chuan ka chak ta rai mang hauh lo’ tiin a han phun sap sap a. buk nghat nghat pah chuan ‘ka nau nun hi a awlsam lo a sin, kan duh vang ni hauh lo sual deuh a nun ngaih chang te a awm a, hming langsar kan nih phei chuan duh phak chin a chet ngaih chang a tam thin khawp mai, nang pawh i kum phulo in i hming chu a langsar dawn tawh a, fimkhur takin hun hmang ang che, chhelam kawng i zawh chuan insiam that na hun a vang tawh thin a ni tih hria la, chapo na hian min hnuk hniam thin tih hriaiin fimkhur hle ang che, nun hi dai var tur tam tak a awm laiin, midangte chung a tanga in zir hian hahdamna tam tak min thlen thin, nang pawh i thil hmuh leh hriatte en liam mai lo in, nangma lam in enfiah nan hman tum thin ang che’ tiin a zilh malh malh a.

Langleuh Lalpa chuan a fapa chung a rilru a put dan chu a in hmuh chian chuan a hrehawm ti chu tukhum chulin a kun ran reng a, a ma tihsual vang a nunchan leh hliampui tuar a hmuh phei chuan a hrehawm tih chu a zual hle a. A nupui lah a chanchin hre leklo, a tawrhna ngawt a ngaihtuah vang a, mah hmangaihtu te a tihnat dan a hriat chuan a inchhir in van a tawng tak meuh a ni, a fapa neihchhun lah a dar a silai mu lawr vun vang chuan lo dam chhuak leh pawh nise, a kut chu a hmang leh thei a ngem tih lah hriat ni suh, a han in ngaihtuah chuan a thiltih sual chu siam leh rualah ngailo in a kun reng a. Lal fapa Bungthuama chu hmun rem ah zawn sawnin, a dar a silai mu tang lak chhuah tum chuan an han inrawn khawm a, zaichhuah sak mai chu an tum ta a. Langleuh Lalpa chuan a fapa Satlâk tlangvalten an buaipui lai chu a lo thlir ve reng a, an ni lah chuan hmu awm pawh a lang lo in, an buai ngai chuan an buai mawp mawp a. pasâltha Sukthanga chuan ka la ti ngailo nangin, khawnge ka han ti chhin a nge tiin chempui chuan hliam chu zai zau belh in harsa ti fe chuan silai mu tang an la chhuak thei hram a. silai mu tang an lak chhuah lai chuan Lal fapa Bungthuama chu lo rum chhuak kawk in, a tawngvai zui nawk nawk a, ka pa i pawi engnge ka sawi hlim tak a awmho a that tehlul nen tiin a riat zui nawk nawk a.

Langleuh Lalpa chu a fapa thlantui bual hluam a tawngvai bual bual bulah thingthi in ‘ka fapa kei i pa hi min ngaidam duh a nih ngai chuan, kan insuih khawm leh ngei ang, mahse i nu awmna ka hre hauh lo a sin, hei hi mihring nundan tur a ni hauh lo a, min ngaidam rawh u ka nupui leh fate u’ tiin mittui nen chuan a thu hnawk a. ruang chu kawrte ah zalh in Darkuala lu chu, Thanchhingan a ngen deuh tlat vang chuan hawn lo in an phum tel a. Langleuh Lalpa tih loh chu an phuar vek a, Lal fapa hliam chu Langleuh tlangvalte chuan zawn tum mahse, Satlâk tlangvalte chuan an phal hauh lo a. an râl man mi za chuang nen chuan Satlâk khua chu an pan ta dul dul a. Leng hawn ar a khuan chuan lungdawhah chuan thu chawlin, Bawlpu ko tur chuan ralveng tlangval pahnih chu an kal nghal a, Lal in chu pan in Langleuh Lal fapa khawsik hluah chu a tawngvai nawk nawk reng a. Langleuh Lalnu in a fapa awmdan a hmuh chuan hlauthawng tak chuan mittui nen khum mawngah chuan a thu tui hlap a, a pasal hlui nita a hmuh chuan a thinrim chu tho thut in a beksam ah chuan a uai chat a ‘nang mi tenawm pa, i suahsual vangin ka fapa hi a thi a nih vaih chuan i tuar ve khawp ang’ tiin, Langleuh Lalpa sam chu a phih dawrh dawrh a, nutling than kin in thinrim tha a han phih takah chuan Lalpa pawh chu mittui tla phung chuan a ding pawr chhur a.

Englai mah a hnial ngaml o tu in chuti tak a kut a thlak chu thinrim thutin, Lalnu chu a han beng let tawp a, a tlawh zui tur chu Pasâltha Sângtuala chuan ‘kan Lal chapo a chuan hmeichhia pawh a mipa ang maiin kut i han thlak vei chu’ tiin Langleuh Lalpa chu a chawi vawk a, Lal sumhmunah chuan a keuh ze ta awl awl a, a han ching zui tur chu val upa Chhâwnthiaua te chuan lo dangin an thelh thei ta hram a, val upa chuan ‘Lalpa engti zia a hmeichhiate i mipa khin vak chu le, bakah kan Lal inchhungah lehnghal i duh thal a chet i tum rawk a, tun hnu chuan fimkhur hle tawh ang che’ tiin a kam khat a, tlangvalte hnenah chuan Langleuh Lal hi pasâltha Lianmana te inah zu hruai thla tawh u, kan thu lo chuan khawiah mah a kal chhuak tur a ni lo, tlangval panga in veng ang che u tiin a han tir nghal a. Lalnu chuan val upa Chhawnthiaua chu kheuh hrangin ‘ka zawhna che kha min chhang tawh ta che, hun a liam zel a kan buaina lah a kiam chuang silo a, ka tan chuan a rit zozai ta em a ni’ tiin beisei tak chuan a melh chho ha a. val upa Chhâwnthiaua chu a han hawi kual thuak in tumah a hmuh loh a vang chuan ‘nang tluk a ka ngaihtuahna luahtu hi ka la tawng lo a sin, theih chu nise zanin li la hian nemrang puan bah pui che ka duh a ni’ tiin Lalnu chu a han kuah nawk a, Lalnu Thanthûami chuan ‘ka lawm lutuk e, tunah chuan ngaihngam takin zanmu ka chhing thei tawh ngei ang, palai chu a rang lamin lo tir la kan buaina hi min han phurh chhawk tawh teh aw, kei mah mai chuan ka phur zo ngang lo a ni e’ tiin val upa awmah chuan a hmai chu a phum kak a. Hmeichhe pangti lumin a nawk chuan val upa puanhnua thil pai chuan ngai theilo in, a puanven chu a do pawng ta ul a. Lalnu chuan ‘I nau chu a va ninhlei dawn ve mawle, he tiang hrim chuan ka tar hma awm e’ tiin val upa chu a fiam zauh a. val upa Chhâwnthuama chu zak tak chuan an piah tlang thlir vung vung a. ‘he tiang khuavang nula bulah te tu nge han awm mai mai thei a i rin, sam sei ka vawikhat kuahna chauh a ni leh nghal’ tiin a phun ve sup sup a,an piah a inchhuih khat thawm leh han phun nang nag an hriat chuan Lalnu Thanthûami chu inchhung lamah chuan a kal vat a. val upa en a han hawi let leh chu Langleuh Lalnu lo chhuak nen chuan an in tauh bawpin, an chal chu an chul dun vat vat a. Lalnu Thanthûami chuan ‘aw khaih ka tihpalh a nâ em ? tiin a hma a mi chu a vuan vat a. Langleuh Lanu chuan na lo e, ka lo hawi lo deuh a ni tiin an in nuih sak a, sumhmun ah chuan an in zui lut ta nghal a.

Pasâltha Sângtuala chuan nui rah rah a val upa thlek zauh pah chuan ‘aw hawi kan rawlthar lah ni rengin, khawvel hi a mawi thin teh e ti raw, thang vansang mawitu siar te pawh zanin chu a engmawi lamdang hle a nih hi maw’ tiin a ke zungpui chhuih chu a chul pah vat vat a. val upa chuan ‘ih engnge i tih a, i siar eng awmna chu a va hniam deh dawh ve’ tiin sumhmun thim ah chuan, chhan hman loh chuan a liam nghal a, then sak chung chuan ‘mo lawm zawng kan hlat tawh dawn hauh lo e, i inkhawl tam tawh bawk a a awm e’ tiin a ma hriat tawk chauh chuan a phun nui var var a. pasâltha Sângtualan inchhung a va luh chuan, val upa Chhâwnthuama chuan hnung lam chhawn chu a thu luiin deuh tlat a, val upa nungchang naupang ru tak chu Lalnu Thanthûami ngei pawh chuan a hlim pui ru kher mai. Pasâltha leh val upate khawnbawl te chuan an râl man te awmdan tur chu an han sawi thin a, tullo a nunna han lak sak ngawt chu an duh lo viau a, tha tak a awm an intiam a nih chuan chhuah vek mai an duh a, chutih rualin an khua chu thlawhhma neilo an nih vang chuan, langleuh tihsual manah buh phur sawmnga leh sepui chitha nufa telin pe mai tur in an ti a, Langleuh Lal chhungkaw thu hla erawh, an mahni in biak remna ni turin an rel thlu ta a. A tuk zing khawvar lam hnai thleng chuan Langleuh Lal fapa khawsik sang tak chu a tawngvai bawrh bawrh reng a, khawvar ar a khuan that that hnu chuan tha takin a muhil ve ta chauh a, a nupui leh Lalnu te pahnih bakah khawnbawl upate pawh chuan, Langleuh Lal fapa hliampui tuar chu an thut tlaivar pui thak a. tlangval te erawh chu an miman vengtu bak, mu tur a an tirh luih vang chuan hreh tak chuan an mu thung a.

Ni chhuah sarah chuan Langleuh Lal leh tlangval pangâ te chu Satlâk Lal inah chuan an thu kun ran a, Lalnu Thanthûami chuan mahni nupui leh fate ngei thisen chhuah a tum thu ah chuan Langleuh Lal chu na tak a zilh in, he tiang hriam a i khawsa dawn a nih chuan, Lal ni tlak i ni hauh lo a nia, mahni chhungkua mai bakah khawtlang thatna tur a thu tawp siam tur nih lai a, mahni thisen zawm te chung a duh ang a an chet loh vang mai a, thuchhe tawp siam mai chu Lal tha tih tur a nih loh dan te, a nupui chung a Laiphunga khawsak dan te chu na tak a zilh in, Langleuh Lalpa chu engmah sawi lo chuan a thu kun reng a. tuibur hmuanda vel a ngawih reng hnu chuan ‘ka chet dan hi Lal nitlak ka niin ka hrelo a, chuvang chuan ka fapa hian Lal nihna hi chelh mai sela, kei hi min ngaidam theilo a nih pawhin Langleuh khaw tan pawh a that zawk bakah, Lal zahawmna hi ka keng tlang zo lo a ni e, ka nupui pawh in kei mah vangin a lo tuar nasa em a, ka thiltih hi ngaihdam zia zang a ni lo e nang ni ho hi ka thu hretu in ni e, ka fapa Bungthuama hian rorelna chu chang sela, rem an tih leh in pakhat min sak sak mai tehse tiin a han sawi ve sap sap a. Lalnu Thanthûami chuan ‘chutiang thu chu in chhungkaw thu nisela, a hriat thuah chuan kan hriatpui ngei ang che u. a tu a pawh chuan Lal chu lo chelh ula tiin Satlâk khaw thu tlukna chu a hrilh ta vek a, in duh a nih chuan chaw eikham ah hian in khaw lam chu in pan thei ang. Hei erawh hre reng ula, kan khaw tan a pawi hawl zawng a in khawsa a nih vaih erawh chuan, kut tim hauh lo in kan rawn che ngei ang, he thu hi theihnghilh hauh suh ang che u’ tiin a han sawi a, Langleuh Lalnu chuan ‘kei chuan Langleuh khua a kir hi ka duh tawh hauh lo, ka himna ngaihtuah a lu zuar ngam khua hi chhuahsan ka tum lo, a maherawh chu ka fapa thutluk na ni rawhse, he pa ramhuai rilru pu nen a in suihzawm leh erawh chu ka duh tawh hauh lo’ tiin a han chhang fak fak a, tukthuan eikham chuan Langleuh tlangval tam zawk chu buhlu chuh tur chuan an haw ta a, Lalpa leh a thu hre tur tlangvalte erawh chu an awm thung a.

Lal fapa Bungthuama chu ni thum a vei leh chuan chhuat dungah chuan a vei peih tawh a, zanah chuan Satlâk khawnbawl te chu an kim thap a. Langleuh Lalpa chuan a thu tlukna leh Lalna chu a fapa kut a awm tur a nih dan te, rem an tih chuan in pakhat sak sak mai tur chuan a han sawi a. Lal fapa Bungthuama chuan engpawh nisela, ka nu berin a pawm theih loh che chuan kei hian hmehbel luih ka tum hauh lo.Tin, i mitmen lai a Lalna chhuhsak ang che a awm pawh ka duh hauh lo, he lai hmunah hian kei ni chhung chu kan awm rih mai a nge, dam takin kal ula hun han vei deuh sela khuanu zarah insuihkhawm lehna pawh a la thleng mahna a tih takah chuan Langleuh Lal pawh chuan sawi zui tur a nei ta lo. Tukthuan ei kham chuan Satlâk khua chu beidawng in an chhuah san ta a, Langleuh khua chu ngawi reng chuan an pan in, kawngah chuan tuman tawng zai chhat lo chuan an kal nawi nghiai hlawm a. A thiltih sualin a han vawm let chiah chu Langleuh Lal thawmna thin tak pawh chu a ngawi ta reng a.

Satlâk khuate pawh chu thlawhma nei ni mah suhse, tunah chuan meialh en zawng a hlauhawm ta rih loh a, Sialai khaw buh pawh seng mai tur chuan an in ruahman ta a. Ni hnih/khat chawlh hahdam a buhseng tur chhuah mai chu an rel thlu a, Langleuh lam in an hauh erawh chuan tha tak a thiar fihlim san mai tur chuan a Lalnu chuan a ti a. val upa Chhâwnthiaua chuan a thian leh naute chu Lalnu Thanthuami nen an kar thu chu hrilh turin ruahmanna chu a nei a, an ni ho chauh an awm fal chuan sawi ngam heklo ngawihchawih ah tlakin, a kut tin chu a lo seh leh nuap nuap thin a. An u zakzum thar ta riau chu fiam nan tak an hmang a, pasâltha Sângtuala chuan a han ngaihtuah chuan Lalnu Thanthûami nen an kar thuah ngaiin, an pahnih a an awm fal chuan ‘val upa i awmdan hi thup tum in awm mah la ka hrethiam reng a nia, hman zan a in kuah ka hmuh kha ka mitvai chu a ni hauh lo a nia’ tiin a han fiam zauh a. val upa chu hnuai lam bih chuan a ke zungpui chuan lei chu a thai nuap nuap a, hmaisen vek a lo hawi chhuakin ‘ih Sângte, nia Lalnu nen hian kan inhmel duh a, ih englo a nia’ tiin a tawng bah nuaih a. pasâltha Sângtuala chuan ‘eng a tinge i sawi that mai loh a, naupang chhia lah i ni tawh silo a, i nu pawhin mo tha chhawr te pawh a chak viau tawh ang chu, palai lam te hi a tirh chi mai lo maw ? tiin a han sawi zawm a. val upa chuan ‘nia chung thu chu a nia i hnen a sawi ka tum chu, hman zan khan palâi a rang lam a tir turin kan sawi a tunge tirh chi ang le ? tiin hnuailam bih chung chuan a han sawi ve sup sup a.

Pasâltha Sângtuala chuan ‘e a hma khan sawi daih tur a lawm, chung thiltha te chu kan phak tawkin kan bawh zui tur a lawm, ka pa awm remchan lai a nia kan han be nghal mai dawn a mi niang ? tiin a han rawn a. Val upa chuan ‘ih englo in ti mai ila, nangin ka nu hnenah engkim sawi vek phawt la, ka nu hi a lo hel deuh a nih pawhin nangin min kar sak mai a niang chu’ tiin a han sawi ve chuar chuar a. chute chu in inah chuan ka han kal nghal teh ang aw, chutiang tluk a thu lawmawm a awm chuang hleinem maw le, i nu pawhin i hlimna bak a duh loh vangin buai zawng chuan a kallo turah ngai ila’ tiin a han rawt a. I hman chuan tunah ka nu chu lo va ti ti pui la, zawlbukah ka lo nghak ang che’ tiin tha tho tak chuan zawlbuk lamah chuan a kal vawk vawk a. pasâltha Sângtualan val upate in a thlen chuan ‘ka fapa khawnge i u a awm, a arbawm tah a laklawh teh reng nen zo ang che aw ka ti mawlh mawlh a sin mawle, upat lamah hian a naupang chhe awm roh a, in bulah te hian mawng lang zuk zuk hian a nia a lâm a ka rin ni, tunlai phei chu han bia ila a ngawi run run a, thu inzawm lo pui pui hian min chhang leh nulh thin’ tiin a phun zui barh barh a. Pasâltha Sângtuala chuan buk nghat nghat pah chuan ‘â englo a nih dawn chu, vengthlang tleirawl nen an in zui nasa deuh a a zia a dang a nih dawn chu, monu zuanzang tak i nei ngei dawn e’ tiin a nui tat tat a. Val upa nu chuan ‘leh ta mai mai che hian, nang a u ve te hi chuan khawi lam a tleirawl te zawng va chhai lungleng suh, ti hian famô hmu hman lo hian min liam tirin a nia ka rin ni, ram lam bak hi a ngaihtuah thlengpha thlawt lo i u ve te hi zawngin’ tiin a nui zui hak hak a.

Pasâltha Sângtuala chuan ‘ka nu chhunruai, ka u chuan nupui neih a duh deuh a, i hnen a sawi mai a hreh deuh vangin ti hian ka lo kal tawp mai a sin’ tiin a han sawi a. val upa nu chuan ‘nangni ho lah hi in fiamthu hi take maw tiin min ti nghilh ruai thei e lawm le’ tiin a han sawi a. pasâltha Sângtuala a hmel thu tak ran a hmuh chuan ‘I hawiher ah chuan thu tak sawi te pawh i va ang ren rawn ve mawle, a tak han ni ve hlauh sela famô neih pawh hi ka thlahlel a sin maw aw’ tiin a hma a tlangval chu a melh kiau a. Pasâltha Sângtuala chuan ‘ka fiamthu lo a sin, palai chu a rang lam a tirh mai duhin i ngaihdan hriat a duh a ni’ tiin a han sawi leh sap sap a. Pi Chhunruaii chuan ‘I hmel leh hawiher ah chuan ti tak tak i va ang ve, min chhaihkual reng teh suh u, in ninawm zo zai lutuk’ tiin a hma a tlangval hmel tak deuh ran chu a melh vang vang a, a hmel a ti tak hmel a hmuh chuan ‘ka fapa i ti tak meuh maw ? ka va han lawm tak em’ tiin a mah chuan a phun mawlh mawlh a.

Pasâltha Sângtuala chuan ‘ka nu Chhunruai ti tak tak e mawle, ka u chuan kawppui tur tha deuh a hmuh a i bulah sawi a hreh viau a, nang leh kei chauh hi a hre awmchhun kan la ni nghe nghe’ tiin a hma a pitir elkun ve tawh hlim thei tak chu a melh ran a. Pi Chhunruaii chuan ‘chu tia i ti tak tak a nih chuan a va lawmawm ve, khual kai a kal ngai chu a ni em lawng chu maw ? tiin a ni pawh chu a thu sat sat a, pasâltha chuan ‘khual kai a kal chu a ngai mai thei le, chuan a ngailo mai thei bawk’ tiin a han sawi leh sap sap a. Pi Chhunruaii chuan nghakhlel tak chuan ‘ Sângte, tunge i u chuan a han chhai ve deuh a, min hrilh ve tawh la maw’ tiin hriat chak tak chuan a thut hnaih sauh sauh a. Pasâltha Sângtuala chuan ‘a nih leh tu a pawh nisela, mô a tan chuan I pawm ngat ang maw ‘ tiin a han sawi hmasa leh te te a, Pi Chhunruaii chuan ‘ka fapa in a duh a nih phawt chuan tupawh nise ka pawm khawp ang, an lo biakbum mai mai te a nih ngawt loh chuan’ tiin a chhang thuai a. Pasâltha chuan ‘chu tiang a i pawm dawn a nih phawt chuan a lawmawm lutuk a lawm, i famô tur chu kan Lalnu Thanthûami a ni e’ a tih chuan Pi Chhunruaii mak ti chu a meng bial ta kawl kawl a.

THU DIK CHU TLU MAHSE A THO LEH THIN . . .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 7:03 pm

PASÂLTHA SÂNGTUALA (Mampuia Pa )

BUNG - 141

Pi Chhunruaii mak ti lutuk chuan a hma a mi chu ngawi reng chuan melh reng in, a tawpah chuan ‘Sângte, i fiamthu a ni ti raw’ a ti thei hram a. pasâltha Sângtuala chuan ‘ka nu Chhunruai, Lal ni mahse hmeichhia tho a nia lawm. I fapa nen a innei tur an ni a, khawihmun ah pawh awm ula i fapa ai a thlannaawm zawk an awm chuang lo, chu chu Lalnu Thanthûami pawh hian a hai lo a, a rorelna tawmpui tur a tan a duh vang a thlang a ni ber asin, rosum nisela patung awh ngawih ngawih tham zet in nei a, in nawr luih vang a nei tur lah inni hek lo, mahni in kiltawih lutuk tur pawh a ni ngai lo e. keini a naute pawh kan awm a, lungngaih lutuk tur a awm in ka hre lo’ tiin a hnem ve malh malh a. Pi Chhunruaii chuan ‘hmeithai in ah Lalnu meuh chu a lawi ang maw ? thil thiang pawh va ni suh’ tiin a phun nang nang a. Pi Chhunruaii chu tap lamah phei in a tuibur chu a a han fawp hlat hlat a, hui pap chung chuan ‘Sângte, i u in chutiang a hmel duh a nei a nih chuan kan kal tlang mai tur chu a lawm, englekhawle, i pa inah a awm a ngem aw’ tiin a tho tharh a, ngawi reng chuan an in zui chhuak a. Pasâltha Sântuala chuan ‘ka nu Chhunruai, khu laiah khuan ka han peng lawk a nge aw, nichin ah kha chuan ka pa pawh a awm reng kha’ tiin a pen san a. zawlbuk a zu thlen chuan val upa Chhâwnthiaua chu pawn ah chhuak zukin, pasâltha Sângtuala pawh chu a chhuak ve nghal a. val upa Chhâwnthiaua chuan ‘ engnge chanchin, ka nu chu a thawng viau lo maw ? a han ti sur sur a, pasâltha Sângtuala chuan vaibel chu zawimuang chuan tan in an piah ngawpui chamduai chu a thlir vang vang a, vaibel khu chhem chhuah luai pah chuan ‘kan ram chin hi chu a va han mawi tak em ve aw, a luahtu lam kan tha fumfe lo mai pawh a’ tiin thu dang daih chu a han sawi a. val upa chuan ‘nangte reuh hian thil i va ti hnawk vek a ni reuh lo maw ? han sawi thuai thuai la mawle’ tiin a bul a mi chu a melh run a.

Pasâltha Sângtuala chuan ‘ti daih ila, kan nau Thanchhinga kha kan hawn hnu khan a chiang vaklo an tiin ka hre deuh a, nang i hrechiang deuh lo maw ? tiin a han zawt leh daih a. Val upa chuan ‘khanglang che chuan a, ka nu chuan engtin chiah maw a lo chhan che ? thu dang sawi kuallo khan min hrilh vat teh’ tiin a han zawt nawn leh a. pasâltha Sângtuala chuan ‘I va mak cheng chung ve maw le, thil nghah theih hi ching turin ka hrilh che kha’ tiin a han meng rang kual chiam a. val upa chuan ‘I va han ngeiawm tak em, khawnge i sawi dawn chiang khawp e; tih leh pasâltha Sângtuala chu bawhthlu rawkin a zak a han dek chu an ri ta rum rum a, zawlbuk chhung a mite chu an chhuak thuai a, nui uar uar chuan ‘ka sawi ang ka sawi ang, tho tawh rawh’ tiin pasâltha Sângtuala chu a te chul a. an thiante chuan eng thil maw sawi tur chu tiin an lo nuih sang hlawm a. nui sang chung chuan a han tho a in ben fai mawlh mawlh chung chuan ‘I nu chuan ,khaw khat Lalnu meuh chu kei ni hmeithai in a lawi chu a duh ka ring lo, ka fapa hi a mualpho na tur thilah a in barh lut ni berin ka hria’ tiin a tang deuh viau a. ka han sawi deuh hnu chuan ka pa hmu turin a kal ta a nih kha’ tiin a han sawi a, val upa chuan ‘min der mai chuan ka hre bik lo, hmeichhe zia hi ka hre lo riau a’ tiin a tukhum chu a chul nauh nauh a. Pasâltha Sângtuala chuan ‘val upa, ngaihngam takin awm rawh, theihtawp kan chhuah a nga, kan mualpho bik lo turah ngai ang, hman zan pawh khan han hnawl tur zia che chu a nih bik loh kha, a boruak tawn hi a hahthlak lutuk deuh em mai a, khaw ralmuang a rorel chu nisela a dan a dang mahna le’ tiin a hnem ve malh malh a. chutia an ti ti mawlh mawlh lai chuan, Ngiazoa chuan ‘ka u Sângte, ka pu in in pahnih khan lo kal lawk teh u a ti’ tiin a rawn nawk nghal chang chang a

Val upa Chhâwnthiaua chuan ‘ka nau, a va huphurh awm deuh ve mawle’ tiin Ngiazoa chu a vawr nalh nalh a. pasâltha Sângtuala chuan ‘buanhma a kherh ngawt hi a fuh lo fo a nia, hawh teh i va kal teh vat ang’ tiin huphurh ru tak chuan an in zui hnak hnak a. Ngiazoa chuan ‘ka u, saw ka thiante an lo kal a, ka leng nghal mai dawn aw’ tih leh tlan chu a rual nghal a, naupang ho chu tuikhur kawng lamah chuan an liam nghal duak a. sumhmun an va thlen chuan pasâltha Sângtuala chuan val upa chu fiam a chak ta thut a, kawngkhar in hawngah chuan val upa chu a nawr lut ta thut a, a ni zak lutuk chuan ‘chhe heu nangte reuh hi i duh tak tak elaw’ tih pah chuan pasâltha Sângtuala sahuat a zak ah chuan dek in an ri ta rum rum a. Pu Tawnliana chuan a fate infiam chu nui hau chung chuang ‘e khaih a, hetiang hrim a in awm chuan Satlâk tlangval mawng chu, khawdang te chuan an hmu vek tawh ngei dawn a nih hi’ tiin a nui tat tat a. Pi Chhuanthangi chuan ‘tawk rawh u, tlangval than kin zet tawh khatia rik rum rum mai chu a, a zia zanglo deuh e a’ tiin a lo khak fiam ve zauh a. val upa chuan zak sen tawn tawn in ‘I fapa awmhlei lutuk hi a lawm mawle, i pai laiin zawngsa i ei a ni ngei ngei ang’ tiin a lo chhang a. nui bawk bawk chuan thuthmun chu an rem ta a. Pu Tawnliana chuan ‘val upa, pehhel kuallo in chhungkaw thusawi in sawi mai ila, i nu hi in lo fiam leh nge ni, chawtak khukpui chi a ni em’ tiin a han zawt nghal chawt a. val upa chu chhuat bih chuan a thu kun ran a, chutia a ngawih reng lai chuan ‘ni ngei e mawle, a phur pheng in engmah sawi nachang a hrelo pek a ni hi’ pasâltha Sângtualan a lo tih chuan, val upa chuan ‘nang zawt zawt kha lo ngawi hmak rawh, engmah hrelo hian chawngphul ang mai hian lo phul hlut thin teh suh’ tiin a melh zui nghek a,

Val upa Chhâwnthiaua chuan ‘ih englo a nia, kan pahnih chuan kan in hawlo niin ka hria’ tiin a han sawi bah nuaih a. pu Tawnliana chuan ‘ chutia nangni ber inrem a in awm a nih chuan kan bawhzui mai dawn lawm mi ? tiin a han zawt leh a. val upa chuan ‘ ka nu thu a niang chu, a man rem a tih chuan a tha mai turah ka ngai’ tiin a chhang a. Pu Tawnliana chuan ‘kan hma hun chu a huphurh awm ren rawn kher mai, kan tawnah hian an nem duh a ngem aw ? tiin ahan ngawi zui deuh dat in ‘Chhâwna nu, kan naute hetiang an nih takah chuan theihtawpin kan bawhzui mai dawn lawm mi ? tiin a han zawt a. val upa nu chuan ‘nia kan fate ber an in duh chuan, tlawmlakah vanzema a thi an tia lawm le, theih tawpin kan bawh zui poh a niang chu, a nih leh tu nen nge palai chu in kal ang, eng hunah nge niang kan chewt chhuah ang’ tiin a han rawn nghal a. Pu Tawnliana chuan ‘Naktip mai hian Lianmana pa nen kan va kal a nga ni mai lawm, tlangval kalpui tur pawh ka ko dap mai dawn nia, khuanun zah a ngai em turah ngai ila, kan hmabak chu kan hlen zo em turah ngai ang aw’ tiin a han sawi dap dap a. eirel a hun chuan Pi Chhunruaii pawh rilru kimlo tak chuan a chhuak ve nghal zat a. Pu Tawnliana chuan ‘val upa i nu bulah ka sawi tlangduh lo nang in, tun tum kan thil chai tur chu ka huphurh khawp mai’ tiin a tuibur hmuan dak chu a han pik thawt a. Val upa Chhâwnthiaua chuan ‘a ni khawp mai, kan natna tur hi koah kan la ni a hriat chang ka ngah mai, zah kan phur ta a nih leh kan kun lap mai ang chu’ tiin a vaibel chu a han siam kaiin a fawp khu tual tual a. pu Tawnliana chuan ‘khawnge pasâltha Lianmana pa chu ka va zai chhin teh ang’ tiin a tho tharh a, Pu Tawnliana hmanhmawh tak a kal liam mek a hmuh chuan. Satlâk Lalnu chu a khi sak a, a ngaihtuahna kawm chuan a thu ta vang vang a.

. . . . . . .

Zan a Lal in a khawnbawl te chuan kai kim chuan Pu Tawnliana chuan ‘Naktip khian eng emaw chhungkaw thilah. Lehlawn han zin zawk kan ngai dawn a, a rem thei a ngem ? tiin Lalnu Thanthûami chu a han rawn a. Hmaisen tan tan chung chuan ‘Nangni meuh chhuah ngai ta chu a pawimawh tawp tur ah ngai ila, in thang reng a ngem ? tiin a han zawt khaw mawi a. zan hnih thum emaw chauh kan thang ang ti a a chhan chuan, khawnbawl upa dangte chuan an zin chhan chu hriat chak chuan han chhimbudawi kual mahse, engmah an hriat chhuah phah chuang hlei lo a. Eng emaw sawi chuan an ti ti laih laih lai chuan leng hawn âr chu a lo khuang ta chuah chuah a, khawnbawl upate pawh chu an tin ta a.

An chhuah hun tur an ruatah chuan pasâltha Sângtuala te thianzaho leh Pasâltha Phulliana te nen an vaiin mi sawm leh pangâ zet chuan Lehlawn khua chu an pan ta a. Tlangval tam zawk erawh chuan an kal chhan tak chu an hre hauh lo thung a. A tuk tlai ni tlak dawn suar suar ah chuan Lehlawn chu thlengin, Satlâk tlangvalte an hmuh chuan hlim takin an ri hlut hlawm a. Lehlawn Lalin Satlâk khawnbawl upate hmel a hmuh chuan hlim tak a lo dawngsawngin hahzu te chu an zuk tlang a, hmun hran a thlen an tum chu phallo in, khawnbawl upate chu Lehlawn Lal inah chuan an in nghat thung a, Lehlawn Lalnu Muanzoi chu Leihkatlangsangah thlifim dawng chuan a hawi vang vang a, a fanu chu a mitthla ah lo langin ‘ka nu, i va chau awm ve, i chamrei lutuk a ka lo ngai tawh che a sin’ ti a rawn bia hian a hre tlat a, a hnunglam chu hawiin tumah a hmuh tak loh chuan Lungchhe tak chuan a tap zawih zawih a, inchhung a lutin a fanu puan chu pawmin ‘Mambawih min lo ngai tawh a ni maw, kei pawhin ni khatte pawh ka theihnghilh ngai hauh lo che a sin’ tiin a in sut hlawp hlawp a. zanriah ei hun tlai lamah chuan chaw chu kilin, Lalnu Muanzoi chun an mikhualten hrehawm an ti ang tih hlau chuan a ti ti siam siam a. khawbawl upate pawh lo chuangkai thuaiin, mei engah chuan eng emaw sawiin an ti ti leh laih laih tawh a.

Thutmuan âr a khuan chuan Pu Tawnliana chuan ‘Lalpa, hei i zahngaihna dawnvan chaw pur tum in kan lo arkawt chhuah tawp mai a sin’ tiin val ua Chhâwnthiaua tan a Satlâk Lalnu Thanthûami an dilsak thu chu in thlahrung tak chuan a han sawi a. An rin loh lutuk lam thil an hriat chuan Lehlawn Lal in chhung chu a reh ta thap a. Lalpa Zamloa hlim hmel chu lo inthlak in ‘Nangni khaw hnamchawm tlangvalte chu in huai salh salh kher mai a, kan hun tawn hi a va mak thin teh lul em. Eng a pawh nise, naktuk lam hian khual lam a ka unaute an lo thleng dawn a, keini pawh kan lo in rawn nghal a nga ti nia’ tiin thinrim mitmeg sen rum chuan vaibel chu a fawp sek sek a. Lal Zamloa chuan ‘kan Satlâk lam khawnbawl upate pawh. Khual lam a ka unaute an lo thlen chuan in tan a hrehawm dah a nge, ka Khawnbawl te in lamah in sawn ula a nuam zawk a nge’ tiin a ngawi zui leh ta vung vung a. Lal Zamloa mizia dang ta thut vang chuan an ti ti pawh a zu ziin, an kal chauh chhuan lam chuan Satlâk khawnbawl te chu an inzui chhuak ta diah diah hlawm a.Lehlawn khawnbawl upa Zingtiana chuan ‘kan Lal thu thlah dan chu a va duhawm zan lo ve aw, thiltha zawk kan hmu turah ngai ila’ tiin a han sawi sap sap a, rilru enghelh neiin an thu tak run hlawm a. mutna an siam chuan rei menglo in, Khual khawnbawlte chu an mu deuh mai a, an kal chauh deuh vang chuan reilo teah an hnar ta bawrh bawrh a. tlangval lam te erawh chu nula lamah fiamthu nen an thum ham ham thung a.

Ni vanlaizawl a lo nih chuan lungdawh lam a tang chuan Lal thuam famkim a thuam leh tlangval za dawn te chu Lehlawn khua ah chuan an lo in zui lut duah duah a, an hawiher ah chuan, Lehlawn chu an hnuai chhiah tih tu man an hai hauh lo. Nula hmel keu deuh an hmuh chuan khual valte chu an inhrilh ru sur sur hlawm a, thlenin lam tur pan khual valte chu an liam ta sang sang a. khaw li vâl an awm a vang chuan zan lamah zawlbul chhuat chu a thum leh viau ang chu’ tiin chaw bar thawih thawih pah chuan ti ti dang leng leklo chuan sawi suah suah hlawm a. zanriah eikham chuan zawlbuk lam chu an pan nghal sung sung a, Lehlawn ah Satlâk pasaltha Sângtuala a awm tih an hriat chuan ,zan lam a fiam ngei tum chuan phaiphuk leh Thurpui khaw tlangvalte chu an in bek bawrh sar sar hlawm a. Mualpho theihtawp a siam ngei tum chuan an buanchak, thlahtu a tang reng a ramvachal chhungkua a tang a zi chhuak Saikianloa chu an fuih ru sauh sauh a. A nil ah thangthat lak duh a nung ta chu a lo phur pheng a. an Lal te mithmuh a khual kai pasâltha a vawrh thei a nih ngat chuan. Lal duhsakna a dawn tur zia pawh a hai lo, zanriah ei hma a tang chuan khiang rahro tla ang mai chuan ha hni dai duk chuan a khi sung reng a.

Phaiphuk Lal hnung zui zing ah Kawlzinga hawi vah vah an hmuh chuan eng emaw a thlen ringin, Satlâk tlangvalte chu an inring ru nghal thap a. Kawlzinga pawh chuan Satlâk khaw tlangval leh khawnbawl upate an awm tih a hriat chuan eng emaw tak tih tum chuan ruahmanna a siam nghal a. An khaw buanchak chu chaw eikham chuan ko hrangin a bek bawrh su su a, Phaiphuk buanchak Saikianloa hlim hmel an hmuh chuan a thiante pawh chu an lo bengngawng nuih ve hai hlawm a. Zawlbuk an thlen chuan Phaiphuk tlangvalte chu an leng halh vek hlawm in, mei nei tak chuan an tawng fak fak hlawm a, khawtual tlangval te chuan an chetdan chu an ngaihmawh tan ru kher mai. A ruk chuan val upate chuan an khap ru sek tawh a, pasâltha Sialliana chuan vaibel chu a han siam kai dawn a, a meiling chhuang tur chu khualval pakhat chuan a han sut lui deuh salh in, a bulah chuan a han thu zui a. ‘ka pu, in vanglai chuan in khaw chhuantawlawl chu i ni ve ngei ang, i pian hi a fuh riau mai a’ tiin a han hmer that that a, Pasâltha Sialliana chuan ‘a khaih a tlangval, kei ve te chu thiante hrul ah ka lo nui ve mai thei tawk chauh a lawm’ tiin a nui sang a. A bul a tlangval melhin ‘hei nang chu in khua ah chuan khualral tluk zet a thawm na i nih duh hmel mang e’ tiin a han fiam ve a. midangte an lo nuih hak hak tak chuan khualval tlangval chu a sen ta tal tal a. putar pakhat lo chuangkai chuan ‘kan tlangvalte hian khualval te infiam dawn lo a mi, kan vanglai chu ni ngat sela zawlbuk bang den nan ka hmang rum rum duh awm e a’ tiin a nui pah hak hak a. Phaiphuk tlangvalte chuan an buanchak chu tuman an hneh ringlo in ‘a ni dawn tak e a, khualvalte kan hrilh hai lutuk dawn a lawm, nula rim hma in a lai chawk kaw lawk ila maw, unau kan in pawh zual deuh ang chu’ tiin an han rawt a. Lehlawn val upa Zikpuia chuan ‘e a ni dawn tak e, lam a thui tham si a, inchauh ring in nak zan lam kan lo en zawn deuh a, nangni berin chau lo in tih chuan infiam chu kan tan mai tur a lawm, hawh u Zawlbuk lamah lawi lut ila a nawlpui lo deuh in nula rim nawm nan kan tan dawn em mi ? tiin a tho nghal uaih a.

Tlangval panga theuh chu thlang chhuak mai ila ti a an rik nuaih nuaih lai chuan, Lehlawn tlangau pa chu a lo thaw lut hlap hlap a, Lal Zamloan tlangval te chu zawlbuk a infiam mai loin Lal mual lamah zanin chu infiamna awm rawhse a ti tih a lo sawi tak chuan, tlangvalte chu lawm in an kuk ta rawih rawih a. pasâltha Sângtuala chuan a thiante hnenah ‘ min hrethiam ula, zanin chu awl ka duh a theih tawp in chhuah dawn a nia’ a tih chuan, midangte pawh chuan hrethiam takin an lo bu nghat nghat a. Satlâk tlangvalten Lal mual an thlen chuan favai an lo chhungvum hnur tawh a, naupang ho chu favai ah chuan an lo in bin zak zak hlawm a, putar te chuan khawi khua nge chak ber an rin chu thut hmun ah chuan an lo inhnial mam mam a, a pumraw that em avang chuan Phaiphuk khaw buan chak Saikianloa chak ber a ring an tam ber a, thenkhat chuan Satlâk pasâltha Sângtuala chu a chak ber an ring thung a. chutia mipui an rik mum mum lai chuan Lal Zamloa chu lukai chhah chuan a lo pen chhuak chhat chhat a. nunau melh kual fe hnu chuan ‘zanin kan infiam tur hi ka tan chuan a pawimawh khawp mai, ka fa neihchhun in min liam san hnu a kan in tihhlim na hmasa ber tur a ni a, a chak ber chuan tha thlawn a sen ka rem ti lo a. chuvang chuan zanin a chak ber chuan darkhuang a hlawh thei dawn a ni, infiam nih hre reng chungin hlim takin infiamna chu tan rawh ule’ tiin a han sawi a, tlangvalte chuan theih tawp chhuah chuan an thiam chitin hmang chuan infiamna mual chu mawiin an haw haw luih luih a. Thûamkunga, Chungliana leh rawlthar Thanchhinga chu a thlengsang pawlah tangin, an lo beisei ber Satlâk pasâltha Sângtuala tello chu hrethiam lo in, Lehlawn nunau chu an phun deuh ta mur mur a, Phaiphuk Buanchak chu chung tlangval zing a tang chuan khingpha an awm dawn lo tih an hre chiang tawh nen, an lawm a kim hauh lo mai a. Phaiphuk buanchak Saikianloa leh Thûamkunga chu a tawp khar tur an ni ta a.

Thâmkunga chuan a hma a mi chu huphurhna leh hlauhna chu a nei bik lo mahse, tharumah hnen ngang heklo Phaiphuk buanchak chuan, a phek phe len hlauh hlau a, phaiphuk Leh an sangawizawnpui tlangval te chu an hlim kher mai. Phaiphuk Lalpa chuan ‘khu pa khu a mi Satlâk pasaltha Sângtuala ti a an sawi ve fo chu, a va nep nem nun ve maw le’ tiin a tawng lung lung a. Lehlawn Lal Zamloa chuan ‘unaupa Satlâk khaw pasâltha chu ni lo e, eng a ti zia a tello chu ni ang maw’ tiin a chhang tha ve mai a. Phaiphuk Lalpa chuan ‘nangni hnamchawm pasâltha tih ve chuan, kan hu hang a zo lo te hi a lo ni reng a nge, ka buanchak khu a buan ngam lo a nih chuan pawnfen feng rawhse, han ko chhuak teh u, ka buanchak chu buan ngam dawn lo pawh nise, a hmel pawh ka hmu duh reng reng e’ a han ti lung lung a. Pu Tawnlianan chutiang tak a an pawisa lo a hmun chuan a laina deuh ta khawp mai. seki no khat puau zu tuitling chu a han thawk khat pawp a. lu kai a pai deuh chhah chuan ‘khawnge ka fapa chu kei mah ngei hian ka han ko a nge, pawnfen chu a feng lo turah ngai phawt ang’ a han ti lang lang a. Nunaute chuan Pu Tawnliana awki sang tak a thusawi an hriat chuan an reh ta thap a.

Ka fapa Sângtuala kha lo chhuak teh, hei kan khual Lal ropui te hian an hmu duh che a, Phaiphuk buanchak kha i buan ngamlo a nih chuan pawnfen feng turin an ti che a, kei i pa hmuh lai hian pawnfen chu i feng mai dawn em mi ? tiin a au ta leng leng a. chu tawngkam an hriat chuan Lehlawn Lal mual thawm chu a reh ta thup a, ka fapa hnamchawm i nih vangin em mi zan in hian mi buan a i chhuah ve loh, kei i pa hian ka nihna hi ka la zahpui ngai hauh lo a sin, tunah lo chhuak la Phaiphuk buanchak chu va buan rawh le, i hneh a nih ngat chuan kei i pa hian ka sechâl khua kan hawn tukah ka talh ang a, i hneh lo a nih erawh chuan silai fawngkhat Phaiphuk buanchak kha ka pe a nge a han tih zawm a. Chu tawngkam chuan pasâltha thinur na chu chawk thoin zawimuang chuan a thuthmun a tang chuan thoin a puan chu a han veng nghet sauh sauh a ‘ka pa, thu chung a zun chu ka la tum chhin ngailo a sin, ka theih tawp chu tlem hle mahse ka han chhuah ve a nge aw’ tiin buan tual chu a han rap lut nghal zat a.

Infiam na boruak chu a bo chiang ta kher mai le, inbuan turte pawh chuan an ti mai mai ta hauh lo. Phaiphuk buanchak chuan a hma a mi chu melh zam tum chuan a ahan melh rum viau a, pasâltha Sângtuala mitmeng sen ram a hmuh chian meuh chuan a meng khup ta zul zul a, Phaiphuk Lalpa chuan ‘ka buanchak Saikianlo, i hma a mi kha han bin hrep la, i bin hrep lawman ah silai ka pe ang che’ tiin a buanchak chu a han fuih ve lung lung a. tlangau pa chuan khai ule tunah tan rawh ule tiin a han au that that a, inbuan turte pawh chu an puantlangah chuan in man in, kha aw tang rawh aw tiin Phaiphuk buanchak chu a han te thawt a, tha tawp chhuah a an han tang chu chu favai chu a khu luai luai a. Pasâltha Sângtuala chu khup chen a han kang vaih a, Phaiphuk Lalpa chuan ‘ka buanchak Saikianlo, khang hnamchawm tlangval satliah ho kha chu dim reng reng suh, favai pel rawk khan bin che maw le’ tiin a nui huah huah a. a thawhhnihna an tan leh chiah chu pasâltha Sângtuala chuan ‘kha kei mah hnamchawm tlangval ka ni ngai e’ ti a au that that pah chuan,Phaiphuk buanchak nen chuan an han vir dun zak zak a, Phaiphuk buanchak chu a lei rohlu lang thuai khawp chuan a han lek kang vuh a, Phaiphuk buan chak lei rohlu hmu phak ho chu an nui dur dur a. A rin loh lutuk a thil lo thleng vang chuan Phaiphuk Lalpa chu a ka hau a.

Phaiphuk buanchak Saikianloa chuan thinrim aw khur dur dur in ‘tunah tang hle rawh aw, ka hlahthlem dawn tawh hauh lo che a nia’ a ti khur khur a, a hma lawk ah silai fawng hnih neih mai theih tur chân mai tur awm a han awm chuan a thin a ti rim hle, mawi leh mawilo pawh a thliar hrang thei meuh tawh lo a ni. Nui sang chung chuan ‘tang hle rawh aw, hnamchawm na ran hmaah i tlawm ngawt chuan i Lal khi a lawm hauh lo ang aw’ tiin a phun sap sap a. Chu tawng chuan Phaiphuk buanchak chu a ti tlawmngai in a hmel chu a dur chhuak ta khhup a, tlangau pan tan rawh u a tih rual chuan, Phaiphuk buanchak chu thinrim na than en chuan a han tang khur dur dur a, a beng sentul leh hmai dur khup chu Thûamkunga chuan ‘Chunghnap, sawng hmel ang neih mawlh saw a nia ka hlauh ni’ a han ti a, a bul a tlangval te chuan an lo hre pha chu niin an nui ta hluah hluah a, Phaiphuk tlangval ten chu thu an hriat ve meuh chuan an khaw buanchak hmel chu an han en chiang a, nui tha ngam lo chuan an khi sung hlawm a.

Phaiphuk buanchak a thiam zawng leh tlem hmang chuan tangin, pasâltha Sângtuala bin ngei tum in a vir nasa mai a. A sam thur bu ah chuan favai hram chu a par chhukin, a thlan vang chhuak vang chuan a taksa ah chuan favai chu a kai chhuak deuh thaw a. Hnar arh suk suk chuan tangin a then no bawk si a, Thûamkunga thusawi an ngaihtuah chhuah chuan Phaiphuk buan chak chu an thenkhum leh suk thin. Pasâltha Sângtuala chuan ‘khawnge kei ve tawh aw’ ti a au that in Phaiphuk buan chak chu a han vir pui zawk in ko liam zawk chuan a han bin a, buanzawl favai an chhun piah leichar ah chuan Saikianloa chu a mu zawi ta reng a, khualval te mak ti chu an ka hau hlawm a. chutia nunaute an ngawih thup lai chuan a vawrhbin pa bulah Satlâk tlangval chu kalin a han bawih sawm chuan midangte pawh chuan an lo pui ve ta a. an thilhmuh chu an bul a miten an hmu ve ta lo emaw tih tur chuan nunau leh tlangvalte chuan an in hrilh noh noh a. Phiaphuk buanchak chu a thiante chuan tuibur hmuanda zet an buaipui hnu chuan lo harh in, a thiante chuan a thlen in lamah chuan an kuah baih suih suih a. a lo beisei ang a thlen loh vang leh rui lung puam chu a thinrim a zual kaiin. Phaiphuk Lal Thangzuala chu thinrim chu a hmel dur khup chuan a thu tum vuau a.

Lehlawn tlangval te chu lawm in an khek tuar tuar a, Lehlawn Lalpa chuan pasâltha Sângtuala chu chawimawina nopui hlan in, tlangvalte chu nula rim tur chuan an darh zo ta a. Tlangvalte an liam zawh chuan Lal in chhung boruak chu a rit ru kher mai, an boruak thlir chuan Pu Tawnliana chuan an kalchhan han sawi leh chu a huphur sa nen, sawi lo a hawn daih mai chu a duh ru hial a. Lehlawn Lalpa chuan khual a unau te hnenah chuan Satlâk khawnbawl upate thu thlen chu a han sawi a, Satlâk khawnbawl upate huphurh lawk ang reng chuan khaw dang Lal pahinte hmel chu a dur nghal khup a, nui lui tih hriat tak chuan then sak in ‘Unaute u, kan hnamchawm daikil kar a mite hi an huangtau lulai deuh hle in ka hre mai ka ti, kan ram chhungah arhmai tia ram khawngaihna in kan luah hawh tir a, chu a chhap ah kan farnu leh an Lal nupui a tan an dil zui chu a nia, hrep hlawm tak chuan le’ tiin Phaiphuk Lalpa chu a han vin chhur chhur a. Pu Tawnlaina chuan ‘min hrethoam thin a a lawmawm thin khawp a sin, amaherawh chu kan naute kar a in hmel duhna awm hi khawngaihna nen a a min en rem sak hram turin kan han ngen ngawt mai che u a ni’ tiin zaidawh tak chuan a han ngen a.

Thurpui Lalpa Tualliana chuan thennnung chung in ‘Thangthar nun hrelo lutuk te hi an ngaihmawh awm riau hian ka hre thin, mahni phu tawk hrelo hian kei ber emaw tiin nun hi an hmang ve bar bar hlawm a. Keini Sailo Lal hnamte hian hnamchawm hma ah kan puanven hi ka phelh ang maw ? a va han mak ngai ta ve le, kan man ringawt pawh nei zo lo tur hian eng hmuh chuan lo in hmu hlawm ang maw, a thu hrim in kan thla zar hnuai a awm te hian kan khawngaihna hi min nawk nan an hmang ni ber hian ka hre ta ber mai a’ tiin zu tui tling seki no a mi chu a han dawt ri hlup a. Pasâltha Lianmana pa chuan ‘kan pi leh pu turte in ni a in lakah ngen ngawl chhuah in, in khawngaihna kan rawn ngen a ni e, kawng engkim ah min hre thiam a, kan chungah zah ngaiin ro tha min rel sak hram turin kan ngen tak zet che u a ni e, kan ngen n ate min hlawhtlin tir chuan man leh mual thuah zawng, tawlh kan tum bik hauh lo a nia, kan duh ber zawk chu hriatthiam na leh kan naute hlimna chauh hi a ni’ tiin a han tui hnih ve leh charh charh a. chutia khual Lal ten na tak tak a Satlâk khawnbawl upate an tawng khum lai chuan, Lehlawn Lalnu chu tap kilah chuan a lo phun ve bal bal a. Lal Zamloa chuan a nupui phun thawm chu ngaithla in an hunk al tawh a, Satlâk tlangvalten an puih nasat zia te, a mah ngei pawh an chhanchhuah fo zia te, a fanu Ngurpuii chung a an thatna te a ngaihtuah chuan engmah chu a sawi ve ngam ta lo a.

Lehlawn Lal Zamloa chuan ‘engpawh nise hetia palai hmelte kan hmuh takah chuan, a mah Thûamkungi pawh kan lo be reng reng a nga, ni nga a vei leh meuh chuan kan chin tur chu kan hrethei turah ngai ila, tunah erawh zawng englam kan hawi dawn kan hre thei lo a ni e’ tiin a sawi takah chuan, khual Lal pahnihte pawhin nuihzat hmel tak a melhin an lo buk khum nghat nghat a. Satlâk khawbawl upate chuan ‘a lawmawm lam kan hre turah ngaiin, keini pawh kan tin rih phawt a nge mangtha muttui ule’ tiin an tin ta thuai a, han ui der mahse a tuk lam a hawn rih an tum chhuanlam a hmangin an chhuak lui ta thuai a, khawnbawl upa pakhat chuan a mikhual te zuiin a chhuak ve ta nghal a

Lo tawk leh phawt tehse, a nih ang in ka lo nawr laim leh tawp e

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2018, 6:03 pm

PASÂLTHA SÂNGTUALA ( Mampuia Pa )

BUNG - 142

A tuk vartianah Satlâk khawho chuan Lehlawn chhuah san an tum lai chuan, Lehlawn Lalnu Muanzoi thlan kal haw chuan hmu a ko dingin an in be ding reng a. Satlâk khaw Lalnu chungchangah chuan theih tawp a chhuah tur thu hrilhin, ngaihngam tak a hawng turin a hrilh a, Satlâk tlangvalte chuan an kal chhan an hriat chuan mak tiin an meng bial kawl kawl hlawm a. khawnbawl upate chuan lawmthu hrilhin tha tak chuan an in thlah a, Lehlawn Lalpa chuan a nupuiin mittui hru zauh zauh a Satlâk khawho liam tur chu thlir ngawi rengin, chutiang khawp a a nupuiin a ngaina mai chu mak tiin a rilru pawh a khawih khawp mai, a nupui in a hmuh hma chuan in chhungah a luhsan ta a.

Lehlawn Lalnu in inchhung a va luh chuan an pa unau te chu an lo tho chhuakin, zu tuitling bawk chu an birh tan leh ta a. Phaiphuk Lal Thangzuala chuan ‘kan hnamchawm ho chu an hawng ta maw ? an han khawsak dan ka run lutuk hian mangtha reng min man tir theilo ka ti, zaklo hlawm lutuk’ tiin tlangau pa zu tuitling seki khat lung chu a han thawk khat pawp a, vaibel siam kai zui zatin ‘ka buanchak lah chu ka mit hmuh ngeiah rohlu lang tualin min han vawrh sak chu a nia, kha mihring Sângtuala zet kha zawng mi danglam tak niin ka hria, ka lu kai vangin ka hmu chianglo nge ? a nuih lai a mitmeng kha a sen vam ham mai niin ka hria ? tiin a han sawi a. Lal dang pahnihte chu ngawi vang vangin ‘ Saikianloa chetdan kha midang hma a ding ang ngawt zawng a nilo a ni’ tiin an han sawi chhun zawm a. Phaiphuk Lalpa chuan ‘Kan Satlâk khawho chu saingho dungchen phut ila an buai viau lawng maw ? pasâltha nei tha khua an inti bawk a tiin a han sawi chhuak zauh a. Thurpui Lalpa Tualliana chuan ‘ a lungthu kim zawngin nghalchang ngho sei lu ropui deuh ti ila, zukchal ki ropui tak chhawm tel sela, a hun tuk ila, an theih ka ringlo, kan man pangngai erawh bo chuang loin’ tiin a han nui vur vur a. an lu kai chuan an thusawi chu an hlimpui phian a. Lehlawn Lalpa chuan a rilru chuan ‘ram lamah chuan kan Satlâk khaw pasâltha te tluk tur an awm chuang hlei lawng e’ tiin a lo ngaihtuah rauh rauh a.

Tukthuan ei lai pawh chuan an la sawi chhunzawm in, Satlâk Lalnu ko tur a tlangval kaltur chu an lo mangnghilh vang in tlangval fehtur pangâ lai chu tlangau pa chuan a ko peng a. Lal Zamloa chuan Satlâk khaw lamah chuan a lo tir a. Lal tirhna vang chuan feh tur tlangvalte pawh chu hmanhmawh tak chuan Satlâk lamah chuan an liam nghal a. an hma a pasaltha Sângtuala te chu umphka ngei tum chuan an kal hlawk hlawk a. An tum ang tak chuan ni sukchen a la awm tih chuan an va um phak ve ta mai bawk a, Lehlawn tlangvalte chuan an kal chhan chu sawiin an Lal in Satlâk khaw Lalnu koh a han rawt chung chu an hriatthiam loh thu chu an sawi ve nang nang a, Lehlawn tlangvalte chuan an buhseng hun tawh mawlh chu lungkham in, a khat tawk chuan an sawi chhuak leh zauh zauh thin. Thûamkunga chuan sakhi châl ki tha deuh mai hi a lo paw hawng zan zan in, zanrih hmeh a tan chuan an buatsai tha thuai a.

Satlâk lam chuan an kal chhan chu engmah sawi duh biklo in ti ti dang chu sawiin an phul hlut a, chutia sa chân pah a an rik laih laih lai chuan silai hi a lo puak khawk raih raih a, a hnu deuh ah chuan vawikhat dang a han puak leh dur a. buk a awmte chu ngaihtha lo tak chuan an in melh kual zauh zauh tawh a, Thûamkunga chuan silai chuhin ‘khawnge ka va inthiar lawk teh ang’ tiin silai rikna lam pan chuan a kal nghal a. thui a kal hma chuan pasâltha Sângtuala aw chuan zukchal hlado chham chuan ngaw khawk ram ram chuan a han au vang vangin, silai chu a han kap puak leh raih raih a. an pasâltha chuan hlado a chham mai mai lo tih hria in, tlangvalte chu hmanhmaw tak chuan, an pasâltha aw chhuahna lamah chuan an kal nghal thuai a, Lehlawn tlangvalten zukchal ki hreu mawi leh ropui tak an hmuh chuan an bial nghal laih laih a. Lehlawn tlangval Pabuanga chuan ‘e he le, he zukchal kah tum hian vawi eng emaw zah chu kan ramchhuah phah tawh thin a, a ki hreu a mawi em avang hian Hreumawia tiin a hming pawh an phuah nghe nghe a sin, pasâltha meuh chuan reilo teah i zalh thei ta mai a lawm le, hetiang tluk a sazuk ki mawi leh ropui hi ka la hmu hauh lo’ tiin Zukchâl ki chu a zut hauh hauh a, chu zukchal chanchin chu sawi zawm in a sa barh barh a. Thûamkunga chuan zukchâl chung a ke hlangin vaibel chu a han siam kai a ‘he tiang tluk a zukchâl ki mawi chu ka la hmu hauh lo, hetiang a ki tha kâp tur chuan vengthlang nugthlawi hnute lian leh mal var, Chawngliani kar khat kawl ai pawhin ka duh sak mai’ tiin a khi van van a, midangte chuan nuih hau chuan ‘khawnge hetiang a sa ropui lu hi ka han tan teh ang’ tiin salu tan tu nih inchuh chuan an han in nawr fiam deuh rap rap a. Chungliana chuan ‘khawnge dangawm teh u, mahni thiam bak tih tum hi buaina a ni’ tiin a beng chu pawt mar in, a beng rual chuan a tan ta hmawk a, ‘Sânghnap, kha i sa nen buk lam lo va pan tawh’ tiin pasâltha Sângtuala chu a nuih var var a, a bawp leh dar phawkin a tai ah an tan leh hmawk a, rit el euh chuan an in nghahna lam pan chuan ngawpui thim tan hnuaiah chuan an kal ta hlawk hlawk a.

Satlâk khawnbawl upate chuan chutiang khawp a sazuk lu ropui an hmuh meuh chuan lawm in an khi var var a, zanriah eikham a chan mai an tih vang chuan vaibel chu an fawp hlap hlap hlawm a. zanriah eikham chuan sazuk sa chu chân in hlim tak chuan an ti ti mam mam hlawm a, a tuk lam a hmeh tur chu khawnbawl upate chuan lo vilin, an tlangvalte che zia zang vah leh lungrual tak a phe sang sangte chu nuih leh suk thin a, an vanglai liam tawh sawiin a tawp lamah chuan. Phaiphuk leh Thurpui khaw Lal te nungchang an helh dan chu zawi te te chuan an sawi dun sap sap a, pasâltha Sângtuala chung a an tawng dan a rilru dam loh thu chu Lianmana pa chuan a sawi zui sap sap a. pu Tawnliana chuan ‘khangte chu mipa fa chuan an hlawh tur a lawm, an duh ang tawk a tawng nuam tur an awm lo erawh kan vanneih na a lo ni e’ tiin a han tui hnih ve sap sap a. Tlangval ten sachan an zawh chuan fiamthu nen chuan an ri ham ham a. an duh ang tawk an rep hnu chuan tlangvalte pawh chu an mu ve ta a. Rei an mut hma chuan kawr thlang lam a tang chuan thla hi a lo ai chho tuar tuar a, zan reh lai a thla ai tuar tuar han hriat chu an ngaih a tha lo kher mai.

Tlangval thenkhat te chu buk bang kil ah chuan an tawm deuh thap a, thla ai chu lo hnai zelin an buk bul thing buk chu a nghing luai a, lung thil chuan buk chu a rawn vawm ta er er a. Sialai tlangvalten an thah tak tlangval Chawipuia aw ngei mai chu ngaw khawk rum rum chuan a han nui uar uar a, pasâltha Sângtuala leh Sialliana te, khawnbawl upa pahnihte chu buk pawnah chhuakin meipui thi thuap tawh chu an han vur eng hluah a. Chawipuia thla chuan a lei chu âwm chen lai a chhuah in, a bawp dinglam chu a thlawn hlawkin a pu ta vu vu a, buk chhung a tlangvalte chuan thing zar a chawipuia thla awmdan chu an hmuh ve avang chuan an te tuar tuar a, thlanfim chuan a bawh hlup hlawm a. Pasâltha Sângtuala chuan a silai chu a koki ah chhuangin ‘Chawipui, engti zia a kha tiang a min han rum thaih mai chu le, i tan theih tawk kan chhuah ve bawk a sin, kha tiang a min rum nek dawn a nih chuan ka duh hauh lo a nia aw’ tiin a silai cheng chu a han kau nghal zat a. Pu Tawnliana chuan a fapa chu khap in ‘Chawipui, kha tiang khan hringmi zingah in lan tur a ni hauh lo a sin, in thihna kha kan za vaiin kan tuar em em a, i chhungte ngei pawh vawiin thleng hian an mittui a la hul hauh lo a, an fapa in khawchhung muan nan nun a hlan tih hriaiin chhuang takin i hming an lam thin a, chu tih lai mekin nang erawh chuan nang mah lainat tute i rum thaih chu a ni a, i hming thatna zawng zawng thaichhiat tum ang ziain i khawsa hi, i laichin unaute chu zahna ruamah hruai i tum a mi ? hetiang hrim chuan i chhungte chuan mit pawh an meng ngam dawn hauh lo a nia, tu chungah mah hetiang chuan in lar tawh hauh lo ang che’ tiin a han au that that a. Chawipuia thla thing zar a bawp dinglam pu vu chu a ding ngawi run a, a thian hluite chu melh kualin hmel a inthiam loh hmel tak chuan a melh kual rulh rulh a, eng emaw sawi tum chuan a han ang zuau zuau a, a aw erawh chu tuman an hre thei hauh lo, a bawp thlawn chu a vuah nuap nuap a, a thiante chu Chawipuia chuan a han melh leh vung vung a, thawk leh khatah zuang vak in kawr ruam lam ah chuan a thlawk thla nul nul a, tuibur hmuanda zet an ngaihchan leh pawh chuan thawm chu a reh tak rengah chuan, meipui vur eng hluah in bukchhung ah chuan an lut leh ta dial a, an han mu leh chu an mut a chhuak lo tlang kher mai le . . .

Khawnbawl upate chuan tlangval te hnenah chuan ‘tlangval te u, kan thil hmuh kha tuman sawi chhuak lo ula a tha ang, chutiang a nih loh chuan Chawipuia chhungte tan chuan men ngaihna a awm lo a nga. Tin, hetiang thil thleng hi a awm zauh zauh fo thin a nia, rilru nâ tak a mi a boral chuan thusawi chhuahna tur an mamawh tiin upaten an lo sawi thin a, kan tlangval pawh a rilru a nâ hle tih lah a hriat a. In ngawi thei lo a tu emaw in a sawi chhuak a nih chuan, kan ram leh khawchhung muanna hi a bo zo dawn tih hria ula a tha a ang. Muanna duh a kan beihna hi a thlawn vek ang tih pawh a hlauhawm hlello e’ tiin thil kal hmang chu a han sawi dap dap a. Tlangval thenkhat chu muhil ngam tawh hek suh, an tlaivar ta thak a. Leilung a lang tan tih chuan pasâltha pahnih te chu an lo tho chhuak a, tlangvalte pawh chu zan khua a zung ngam lo an nih hlawm vang chuan thui kal hman lo chuan an bun hawk hawk hlawm a. Thûamkunga ngei pawh Chawipuia thla a hmuh meuh chuan a ngawi duk reng kha a ni. Eirel an zawh chuan hmanhmawh vaklo chuan Satlâk lam pan chuan an kal leh ta a.

Pasâltha Lianmana pa chuan lungdawh ah chuan silai chu vanlam a lekin zukchal hlado chham in silai chu a han kap puak dur a, midangte chuan an lo lawn ulh ulh a,reilo te ah Satlâk naupangte chu lungdawh lamah chuan, hnap puar pap pap chuan an lo tlan thleng thuai a. Naupangten zukchâl ki tha zet an hmuh chuan an bial laih laih a. Zukchal lu ropui deuh chu naupangte chuan pasâltha Sângtuala te in lamah chuan an zawn thla bung bung a. naupang thawm ri laih laih ah puitling te chu lo chhuakin, zukchal ki hreu mawi tak chu an lo chul lat lat a, an pasâltha te chu an duai loh zia hriain lawm in an khi var var hlam a. Pu Neihlaia’n chin a lo hriat chuan, zubel pu kul kang kang chuan Pu Tawnliana te sumhmun chu a chuang lut thuai a, Pi Chhuanthangi chuan nui sang chungin ‘ka pa hetiang te a ngai lo a sin le, kha a remchang laiah khan lo thu ve rih mai teh’ tiin a lo chhawn thuai a. Pângliani chuan sazuk ki zar mawi tak a hmuh chuan lawm takin a lo khi var var a, a phur lutuk chu tih ber tur hrelo chu a lo tei kual chhen a . . .

. . . . . . . . .

An zan thiltawn chu sawi chhuaklo tur chuan khawnbawl te chuan tlangvalte chu ngun tak chuan an chah na chungin, zan a zawlbuk an kai chuan Satlâk khaw chhungah chuan Chawipuia thlahrang a in lar tih chu an hre fur tawh a. naupangte pawh chu zan dang ang lo chuan zawlbuk meipui engah chuan an tap deuh chawt hlawm a, chutia an naute taulchai tha ngamlo chu val upate chuan engtia tih tur nge ni ang tiin an sawi sap sap hlawm a, khua rei deuh a nih loh chuan eng an ti theilo tih hriain an tha en rih tawp a. Val upa Chhâwnthiaua chuan Lalnu Thanthûami nen an kar thu a hriat chuan a in dawm kun vang vang a, engpawh niraw sek sek, a hma a thil lo thleng tur chu bawh tlang tur a ni tiin a in seh ruh sauh sauh a. pasâltha Sângtuala chuan ‘val upa, eng thil pawh lo phut sela kan tlan chhe tur a ni lo, a thahrui zawng chuan kan hnuai leng an ni phawt a, kan hma bak leh zelah pawh kan tangho zel a nga hneh tu kan ni zel ang, lungngai hauh suh’ tiin a fuih sauh sauh a. a thiante dang pawh chuan ‘kan Sailo Lal ve mai mai, kan vang a lang ropui hian min lo hmusit khanglang a, kan lakah eng an nih loh zia an hmuhna tur rengah, an thil phut ang zawng zawng chu kan khum ngei tur a ni, kan la thawk ve feih feih chhung chuan zam reng reng suh’ tiin an lo sawi pui a, a thiante chuan an thusawi tawh chu an tawlh ngailo tih hria in, val upa Chhâwnthiaua pawh ngaihngam tak chuan a thaw ta huai a. lawm luat a hnuk ulh teuh chuan ‘ka tan in inhuam na hi ka theihnghilh tawh ngai lo ang, a fapa lainat tu hetiang zat a nei tih ka pa khan hre ve sela, a va lawm dawn tak em tiin a mittui lo chhuak tur chu a khap per ta chhak chhak a.

A tuk lam a Lehlawn kal tur a nih a hriat chuan Lalnu Thanthûami chuan a khawnbawl upate chu a koh tir hlawm a, palai kal khawnbawl uapate a hmuh chuan Lalnu Thanthûami chu a sen deuh tal tal reng a. Lehlawn Lal in a chah vang a a tuk lam a chhuah an tum dan leh a rang lam a let a tum chu sawi, chutiang teh thut a hmanhmawh chu eng thil nge nita ngai’ tiin khawnbawl thenkhat chu an phawk hra hlawm a. tha lam thu a nih sawiin an lalnu hmel a vang chuan engmah an zawt zui ta bik lo a. A tuk lam kal tur an nih vang chuan khawnbawl upate pawh an tin thuai a, inleng te an tin hnu chuan Lalnu Thanthûami pawh a mu thuai a. Muhil thei mai lo in a hun kal dan chu ngun tak chuan a ngaihtuah rauh rauh a, a khawnbawl upate hawi her dang deuh a tang chuan thil awm dan awm tur pawh a ring thiam deuh mai a. A tuk lam an kal tur pawh a tlangvalte zingah chuan a tul thulh a mahni inveng thei tur that kal tur chuan a ruahman lawk a. Leilung lan chuan Lalnu chuan eirel chu a peih fel thlap tawh a, zawimuang chuan leihkatlangsangah chuan a han hawi vang vang a. Ngurpuii dinhmun te chu a rilru ah lo langin ‘nangni hian duh lo in ka duhthlanna hi kham dawn mah ula, ka tum nge ruh sa ruh’ tiin ngaihtuahna chu a siam fel ta a. zawimuang in chaw haitho chu a bar a, Pângpuii leh Zoliani pawh an lo tho chhuakin, tui chawi tur chuan an liam dun nghal thuai a.

Lehlawn kal turte pawh hma takah Lal mualah chuan an lo chuang chhuak thap a, Lalnu Thanthûamin a mah zui turte a hmuh chuan a thil awmdan a lo rin chu a dik ngeiah a ngai nghal hmiah a ni. Pasâltha Lianmana ho chuan a khaw tlangvalah pawh mi chung a leng deuh thalh vek mi sawm sarih tha lai mai chu, hmel tak nguk chuan an lo ding thup a, val upa Chhawnthiaua hmel hmuh beisei chuan Lalnu chuan a mit chu a len deuh nangin, a hmu mai lo chu a hrilhhai ru kher mai, thingkhawn phen a lo thlir reng tu erawh chuan Lalnu hmel chu chiang tak chuan a lo thlir reng thung a. Val upa Chhâwnthiaua chuan ‘eng vangin nge maw nang kher ka lo thlan che chu le, i nuta te lah chuan min lo iai ve tum hrang leh nghal a, i sakhmel leh pian zia erawh chu sawisel bo a ni lawi si, ka tan hian khuanu hian lo siam hlauh che sela ka ti kher mai’ tiin a ngaihtuah vang vang a. a hnung a thawm hria a han en chuan Thanchhinga chuan lo nuih var var in ‘ val upa i hman chuan biak lawk che ka va duh ve’ tiin a lo be sawk sawk a, val upa chuan ‘Chhinga engthil nge ni ta a, min biak te i duh ve tak mial a’ tiin a lo chhang thuai a. Thanchhinga chuan ‘eng dang nilo e, hei kan khaw dinhmun thlir hian thlawhhma neilo kan ni si a, Sialai buh kha kan va seng mai dawn lawm mi ? a han tih chuan. Val upa chuan ‘e a ni dawn tak maw, nang nge nge kan pasâltha te ka lo rawn a nga, chanchin chu kan inhrilh leh dawn nia, min hrilh hlauh a ka lawm e’ tiin zawlbuk lam pan chuan a liam nghal a.

Tlangval te chuan val upa Chhâwnthiaua hmanhmawh tak a lo kal dawr dawr an hmuh chuan, eng tak chu ni maw tiin an lo ngaihtuah rauh rauh hlawm a, Sialai khaw rauhsan buh seng lam a han sawi chuan an han sawi ho a, khawnbawl te rawn phawt nise, an nin rem an tih chuan a tuk lamah kal mai chu an rel ta a. khawnbawl te hmu tur chuan pasâltha leh val upate chu an chhuak a, an han sawi khawm nak nak chuan an khaw hma lam hun a tan tul a hria in, khaw veng tur tlangval zâ tal awm tur leh a kal te pawhin, khaw dangte nen a tualthu chhiat ai chuan lo hawn san mai tur chuan ngun tak chuan an chah a, a tuk lam a Sialai lam pan tur chuan an in buatsaih a. Pasâltha Sukthanga chuan ‘Val upa ngaih loh lamah ngailo la, nang ber lah changdang kan a chuang chhuak zia zang i ni hauh lo a, chuvangin kei leh pasâltha Sialliana ten kan tlangvalte chu kan va ho a nga. i ho in khawchhung hi in lo enkawl mai dawn nia’ a tih tak tlat ah chuan, val upa Chhâwnthiaua pawh chu harsa ti tak chuan a aw ta hram a. Sialai lamah chuan pasâltha Sukthanga leh Sialliana ho chuan buhseng tur chuan an chhuak ta sang sang a. khawnbawl upate chuan buaina chhuak lo tur in ngun tak chuan an hrilh nawn leh hnu chuan lungdawh lamah chuan an liam ta thluai thluai a.

. . . . . . . . . . .

Ramri kawr a riah chu an duh meuh loh vang chuan lo finghnih vel Lehlawn ram lamah chuan riah buk sualin, tlangvalte chu eirel chuan an phe sung sung a. Thûamkunga chuan ‘Sânghnap hman zan ang kha ka hlauh zawng tak a ni, tawng tawhlo hram ila ka ti kher mai’ tiin a sawi sur sur a, pasâltha Sângtuala pawh chuan ‘kei pawh nuam ka ti lo khawp mai, thiante thi tawh han tawn nawlh mai chu. Eng em kan ti lo turah ngai ila’ tiin a han tuihnih ve sap a. zan dang zawng ai chuan meipui tur thing pawh an fawm tam in, thingro chu an chhek vum hnuk a. Chungliana leh Mualkunga chuan sakhi pakhat ve ve kâp in, zanriah a tan a sa leh kawchhung chu an chhum hluah a. Lalnu hnung zuitu vengthlang nuthlawi lam thiam leh pumraw tha ngô suah mai chu, tlangval te chuan an thlek leh dauh dauh thin a. Lalnu a awm ve a vang chuan be tha ngam chiah lonangin, tlangvalte mit fukna ber chu, nuthlawi Hnunliani chu a ni, a nau chaw bawm kawh lah leh mawngbawr arh tha laih chuan chung Satlâk tlangval te mit chu a hip bet tlat emaw tih mai tur chuan an melh awl lo a. a ni nuthlawi fiamthu duh tih tak ah ‘Lalnu kan khaw tlangvalte hian an mamawh nei tur hian hma an la ngam hlawllo chu a ni e, ral thlir a lungawi tum mai lo hian bawh huam sela ni mai tur hi a nia’ tiin tlangval te chu a melh kual ralh ralh a. chutia a hmeichhia ber in a sawi takah chuan fiamthu eng emaw sawi chuan an nui ta dar dar a, buaina dang tawk lo chuan zan khua chuan an mu tlai var a. Thûamkunga chuan ‘Sânghnap, upate hian thil an lo chik mang e aw, hman zan khan Chawipuia thla lo kâp ta chiah la chuan a thi awm hauh silo a, tha te a upa thu kan zawm vang khan, kan him phah ta ni ber in ka hria’ tiin a han sawi sap sap a. pasâltha Sângtuala chuan engmah sawi zui duh lo in. khuan hmasa khuan hma a thing buk ri suau suau ri chu a sawi chhuak duh lo in ‘a ni khawp mai,kawng engkim ah upa thu chu a lo tha zel zawng a ni e’ tiin a han tuihnih ve charh charh a.

Lehlawn chu zanrih chhum hun tlai lam mah chuan thlengin, Phaiphuk leh Thurpui khuate chuan Satlâk tlangval te hawiher ngeng ngalh leh khual valte hmu awm pawh a awm duh lo an hmuh chuan, chung khaw hnih tlangval ngaih chu a tha lo in an ti ru nghal hra a. Satlâk pasâltha Sângtuala ai tawh khirh hmel tak tak lo kat nuk an hmuh chuan an rilru tur awm ngaihtuah in an ngaih a nuam lo hlawm kher mai. Lalnu Thnthûamin Lehlawn Lal in a thlen chuan Thurpui leh Phaiphuk Lal chuan rui meng sen rum chuang chuan ‘kan hnamchawm duh lai I chu a hmel leh pumrua hi chu a tha teh e’ tiin an lo then khum nung a. Lenlawn Lalnu Muanzoi chuan ‘nangni pahnih kha lo ngawi rih mai mai teh u aw, thil sawi hun leh sawichhuah dan mawi te hi hre rual chu in ni tawh a sin’ tiin a teu nghal hlar a. Phaiphuk Lal Thangzuala chuan ‘nang nu kha lo ngawi hmak rawh, hnam khat in kan duh ang chuan ro kan relin, kan infiam ang chu mawle’ tiin a han hrawk nghal khur khur a. Satlâk Lalnu Thanthûami chuan ‘a duh chu a sawi ang chu mawle, in thusawi tur kha duh tui deuh tawh teh u aw, mipa ang tak a in nghahna tlak a thusawi hi tum ula a lawmawm viau ang, ka u hian a inchhung ah chuan a duh chu a sawi thei ang chu mawle’ tiin a hma a mite pahnih chu a melh rum nghal al a.

Lehlawn Lalpa Zamloa chuan ‘e ka farnu in lo thleng thei maw, in chau viau em ? tiin an thusawi lai lak pen nan chuan a han nuih vur vur a. chutiang khawmp a an monu a tan vang chuan chung Lal pahnih te pawh chu lungawi zan lo chuan an then sawk sawk a. Lalnu Muanzoi lah lungawi zan lo chuan chuan dungah chuan a per charh charh a. Lehlawn Lal Zamloa chuan a nupui leh farnu mizia a hriatchian vang chuan a lo nuih tlawn hui thung a. Satlâk Lalnu a han thut hahdam chuan Lalnu Muanzoi chuan chaw ei chu a siam nghal a, an boruak rit ru tak a vang chuan an chaw ei pawh chu tumah tawng zai chhat lo chuan an ngawi ran hlawm a. chaw eikham vaibel an zuk lai chuan Lal Zamloa chuan ‘ka farnu, hei keini I nuta te kan kim laiin palai hmel kan hmu thut mai a, nang hian val upa Chhâwnthiaua chu I lo hmelduh ve reng nge, thildang awm te a awm em ? tiin a han zawt charh charh a. Lehlawn Lalnu chuan ‘hnuai lam melh ran chung chuan ‘ka dinhmun han thlir chuan, kawppui neih mai hi chu ka duh ang reng khawp mai’ tiin a han sawi ve sap a. Phaiphuk Lalpa chuan ‘kawppui i duh chu in din hmun thlir chuan a duhawm viau ang chu, kan dem hauh lo che a ni, a eng vang a hnamchawm pasal a nei tur a thu tlukna I han siam ngawt mai chu le, keini Lal chi te hi min ti mualpho tih I hria em, hnamchawm hma ah Sailo Lal hian puanven kan hlim ang maw ? a va na ngeih ngawih ve maw le’ tiin a melh ta khuih a. Lalnu Thanthûami chuan ‘a hnam zawngah chuan kan dang ngei a lawm, ka hun kal tawh a tang chuan innghah ngamna ka neih ngei a ngai thung si a ni’ tiin a chhang zawi leh sap a. Thurpui Lal Tualliana chuan ‘ keini Sailo hnam ai a innghah na tlak an awm hauh lo a sin, i han sawidan hmang ah chuan Sailo mipa neih tlak kan awm lo a va ni awm ve’ tiin a then zui nung a.

Lalnu Thanthûami chuan ‘chutiang in ka sawi lo a sin ka nuta te u, ka tan a rintlak ka sawina mai a nia’ tiin a han sawi zawi leh sap a. Phaiphuk Lal Thangzuala chuan ‘nang hmeichhe zak theilo I lo ni’ tiin thinrim mit sen rum chuan a tho nghal zak a. Satlâk Lalnu thu kun lap chu a chhim samah tham in ‘nang ang a mahni thu duh leh dik ni a in hria hi ka huat zawng tak an ni. i chalk lo ang’ tiin a rem lai laiah chuan a beng ta thuai thuai a, Lehlawn Lal Zamloa chua ‘e unaupa a tawk a tawk, thu ula tha takin I sawi tha teh ang u’ ti a te tuar tuar chuan a han thelh a, a duh ang a khawi theilo thinrim chuan ‘nang hmeichhe zak theilo lutuk mai, i khaw tlangvalte lahin min zah na hek lo’ ti a te tuar tuar a, Lal in a thinrim thawm leh Lalnu Muanzoi mangang te tuar tuar chu hria in, Satlâk tlangval te chu Lehlawn Lal in ah tlan lut a, an Lalnu Phaiphuk Lalpa in kut a thlak tih an hriat chuan an thinrim chu an sa ta zak mai le. Pasâltha Lianmana chuan ‘pu Thangzual Lal I nih vang chauhin tun tum chu kan ngaidam ang che, kan Lalnu hian thlavang hauh tu a nei tih hria la, vawikhat mah kut thlak tawh hauh suh ang che’ tiin thinrim hmai sen teuh chuan a vau ta chher chher a. Phaiphuk Lal Thangzuala chuan ‘nang ve khanglang khan min vau ve elaw, khawnge ka silai kha hnamchawm pakhat thah hi ka hreh hauh hlen nem mawle’ tiin a silai awmna lamah chuan a han pai phei chhurh chhurh a. Banglai a silai a la tur chu kut tha chak tak hian, a kutah man in ‘Lalpa insum teh aw, Lal I nihna hi zahawm takin lan tir ta che maw le,hetiang hrim chuan I farnu hmakhua pawh a tha lo zawngin a awm phah thei a nia, mipa takin rilru fim nen tlangvalte chu thunun tur a ni zawk ngai e’ tiin a han sawi dam thlap a. Lal Thangzuala chuan a rilru chuan Satlâk pasâltha chuan a sawi dik tih hre mahse, a rui lungpuam lak lawh chuan ‘naua nang ni hnamchawm hian Lal thisen kai ka zilh e I ti khang lang elaw, khaw nge min han thlah teh in lu hi ka han la nghat nghat mai teh ang’ tiin a te tuar tuar a.

Phaiphuk leh Thurpui tlangvalte pawh an lo thlengin, boruak thelh daih tum a hneh in ‘tu nge kan Lal kut thlak, nangni ho hi eng chhuang in nge, he tia Lal inchhung meuh ah pawh Lal kut in han thlak chu le’ tiin Satlâk tlangval te chu kut an thlak ta bawrh bawrh a. Phaiphuk Lal lah chuan ‘nangni khaw ho chuan ka tlangvalte hi in hneh chuang hlei lawng e’ tiin chapo tak chuan a han tawng lur lur a. Lalnu Thanthûami chuan ‘ka tlangvalte u, in theih ang khan che ve rawh ule, in cho chhuah hmasak a nih loh kha, a tul chen chen kan kal mai ang’ tiin a khaw tlangvalte chu thu a pe ve ta hmiah a. Chutia an Lalnun thu a pek takah chuan Satlâk tlangval te pawh chuan, khual valte chu an lawk ve ta chawrh chawrh mai a, kar loah chung khawhnih tlangvalte chu an thal ta phung a, Satlâk tlangval te thazâ lak lawh chuan ni leh thla kar a leng a in ngai, Lal chapo tak te pahnih chu Lehlawn Lal chhuatah chuan an vawrh hnang ta awl awl a, an tlakna a mawng sawh ze chu, an lei rohlu lang thuih chuan an vial ngawl ngawl ta mai a. Khual lam tlangvalte an tluk zawh takah chuan in beihna chu a tawp ta rih a, Lalnu Thanthûami chuan ‘ka khua te u, khang lai a hnawm hnawk kha pawnah dah chhuak teh u, ka mit an ti kham emai’ tiin thu a han pe zui zat a, Lehlawn Lal sumhmun ah chuan khaw hnih tlangval te chu dimna tel hauh lo chuan an thehchhuak dawt dawt a. Lehlawn tlangvalte chuan ‘heng khua te chu kan lo enkawl a nge, inchhung lamah lo va lut rawh u’ tiin Satlâk tlangvalte hnen ah chuan tiin, pasâltha te chu Lehlawn Lal inchhungah chuan an lut leh a, tlangval dang te erawh chu che mai thei tur chuan pawnah inring tak chuan an ding thap hlawm a. pasâltha Sângtuala chuan ‘ Lal Thangzual i tlangvalte hnenah sawn awm tha hle hle turin hrilh ang che, tun bak chu kan dim tawh hauh lo ang che u, thil pawi zawk a thlen hma hian i tlangvalte saw va hrilh rang rawh’ tiin a sawi dam thlap a. Mei eng a thusawi tu mitmeng a hmuh chuan chuan Lal Thangzuala chu meng khup lap in, sumhmunah dak chhuak in tha tak a awm tur chuan, khaw hnih tlangvalte chu a hrilh ta a.

Tharum lam a chutiang tak a an chungnung chu chung Lal pahnihte chuan mak an ti tawp thei lo a, an mit hmuhah an ai a tlem zawkin mitkhap kar awm lek a, a khaw tlangvalte an lawk thlu lai a hmuh chuan, an sawi ai a insum thei an nih zia a hriat chian phah in, a mawng sawhna chu a tuai vut vut reng a. Lalnu Thanthûami chuan ‘ka khaw tlangval te ka thlan chhan chu in hrethiam tawh ang chu ti raw ? ka tawrh ai tuar ngam tute bak a thlan naawm hi kei chuan ka hre lo, chuvang chuan kei chuan hnamchawm tlangval hi ka iai ve lo a ni’ tiin a hma a mite chu zahpah hauh lo chuan a tawngkhum ve ta sak sak a. Chung Sailo Lal pathum te chuan chhan ngaihna hrelo chuan chhuat chu an bih ngar hlawm a. Lalnu Thanthûami chuan ‘ka pasâltha te u, pawn ah min lo va nghak lawk teh u ka nuta te hi kan han ti ti pui lawk a nge, eng emaw a lo thleng leh a nih palh hlauh chuan tim hauh lo in a tul angin in che tawh dawn nia’ tiin awmze nei tak chuan, a hma a mite chu a han melh hrawk hlawm a. pasâltha Lianmana chuan ‘tlangvalte u Lalnu thu ang chuan i ti ang ule tiin a naute chu a han hrilh chuan an chhuak ta dial a. Tlangvalte chhuah hnu chuan Lalnu Muamzoi chuan ‘kan Sailo Lal ropui leh an khaw tlangval te chu an va han ropui riap riap ngai ve le, in chhuanawm hlawm khawp mai’ tih el in a han phun khum ve sak sak a. Phaiphuk leh Thurpui Lal pahnih te chuan chhang lo in chhuat bihin an ngawi ta reng a. Lehlawn Lal Zamloa chuan ‘unaute u, kan farnu sawi kha a dik a ni, ka fanu in min boral san a ka thil zir chhuah chu, engthil pawh nise tha tak a kan hman theih chuan a tawk mai, thiltha deuh pawh nise, hman theih loh chuan hlutna a nei chuanglo tih hi ka hre chiang hle a, chuvang chuan kan farnu pawh hian lungsi tak a a pawm thei dawn a nih chuan, kal tir mai hi a pawina ka hre hauh lo mai ka ti’ tiin a han sawi charh charh a. Reife an ngawih hnu chuan ‘kei chu ka la hmin thei chuang lo, Lal chi chuan Lal chi vek an nei ngei tur a ni, nang berin I tih tlat chuan kan Amen mai a niang chu. A maherawh eng thil pawh thleng sela, he hnamchawm pa a nei a nih chuan ka buaipui hauh lo ang, kan farnu zahawmna leh kan Lalna zahawm nan man leh mual erawh chu kan ti fel a niang chu’ tiin thinrim mit sen rum chuan Lal Thangzuala chuan a han sawi a, Thurpui Lal Tualliana pawh chuan ‘tun a ka unaupa thusawi kha ka tawmpui e, palai chu an lo kal leh a nih chuan a rang lamin sawi rem ila, keini pawh kan ropui thei ang turin kan in buatsaih a ngai ve ang chu’ tiin a han thle bak bak a. Lehlawn tlangau chuan zutui tling chu seki no chuan sem kual zak zak a, Thurpui Lal Tualliana chuan ‘remthu sawi kan rilruk a nih chuan, saingho dung chen leh zukchâl ki hreu mawi tak leh nghalchang ngha tha tak bakah, kan man pangngai tlai sawm nisela, an tlak theilo a nih tak leh kan in pawm theilo a ni mai lawm mi ? tiin a unaute chu a han thlek kual ha a, a unaute chuan an thli phut chu an tlin theih ringlo in, hlim tak chuan an khi sak sak hlawm a.

Lo tawk leh phawt tehse, a thui lutuk chuan in chhiar tha peih lo palh ang . .

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 22nd, 2018, 7:05 pm

PASÂLTHA SÂNGTUALA (Mampuia Pa )

BUNG - 143

( Curent leh Net vangin ka lo dah theilo a, rilru chu a hrehawm khawp mai. Min hrethiam thin tute in nih vangin ka hasatna ka han hrilh ve hrim hrim che u a ni e)


Recap

Thurpui Lal Tualliana chuan ‘remthu sawi kan rilruk a nih chuan, saingho dung chen leh zukchâl ki hreu mawi tak leh nghalchang ngha tha tak bakah, kan man pangngai tlai sawm nisela, an tlak theilo a nih tak leh kan in pawm theilo a ni mai lawm mi ? tiin a unaute chu a han thlek kual ha a, a unaute chuan an thli phut chu an tlin theih ringlo in, hlim tak chuan an khi sak sak hlawm a.

+ + + + + + +

Satlâk Lalnu chuan ‘ka pasâltha te u ngaihngam takin zu mu tawh u, eng emaw a thleng a nih chuan kan in hriattir dawn nia’ a tih tak chuan zawlbuk lam pan chuan an chhuk ta hul hul a, Phaiphuk leh Thurpui Tlangvalte chu ngawi reng chuan an kal ve mawp mawp a. Satlâk tlangvalte chu ngawi reng chuan an melh leh hrek hrek thin a, Satlâk tlangvalte lah chuan engmah a ngailo tih hriat tak chuan fiamthu sawiin an nui leh dar dar thin. Lehlawn zawlbuk chhung boruak up churh chu hrelo ang mai chuan, pasâltha Lianmana chuan ‘zanin chu han in nuai deuh a va chakawm ve maw le, ka infiam lohna hi a rei ta riau mai, ka tha a thum zo mai dawn ka ti’ tiin Lehlawn val upa chu a han melh a, Phaiphuk leh Thurpui tlangvalte chu hlauthawng tak a melh in ‘min hrethiam teh u, keini zawng han fiam tlak kan nih loh hi’ tiin an buanchak Saikianloa chuan a lo chhang thuai a. Pasâltha Lianmana chuan ‘aw hawi, kan naute lo kal hmasak tum kha chuan in tha a zâ hle a ni lawm mi ? tun a tak a insum theihna in va neih hmel ve’ tiin a melh thip rum a, an ngawih tak thapah chuan ‘Lehlawn in lo lawi luh tirh khan mi za tha lam mah in ni a, khawnge tlangval pangâ te hi an awm tak ? tiin a han zawt a, Phaiphuk buanchak Sailiana chuan a naute a en chuan, mi pangâ lai chu an kim lo tih chu a hre ve ta chauh a, a naute chu mitmei chuan a han zawt a, tlangval pakhat chuan ‘kan khawnbawl pakhatin khawi hmunah emaw a tir’ ti a a chhan chuan, zawlbuk chhung chu a reh ta thap a. Pasâltha Lianmana chuan ‘Naua eng tik hunah nge in thiante chu an chhuah, tu khawnbawl berin maw tir ?’ tiin a han zawt a, Pasâltha hmel chu hmuh a hrehawm tan kher mai.

Buanchak Saikianloa pawh chuan ‘ Lianup tu berin maw tir ? chiang deuh in han sawi che mawle’ tiin a ni pawh a ngaihdan ani chiah lo tih a aw chhuakah chuan a hriat theih ta hial a. Lianupa chuan ‘khawnbawl upa Kawlzingan nimin piah khan a tir a, a bak chu ka hre tawh bik lo’ tiin a han chhang zawi raih a. pasâltha Sângtuala chuan ‘in khawnbawl upa chuan buai a la kham lo hle mai maw ? eng emaw a thleng a nih phawt chuan tumah ka dim tawh hauh lo ang che u, ka sawi hi hre reng ang che u’ tiin a mit chu a sen leh ta ram a. Lehlawn val upa Hnempuia chuan ‘Pasâltha engthil nge ni ngai le, i va lawm loh hmel ve’ tiin a han zawt a. pasâltha Sângtuala chuan ‘lo nghak rawh u, naktuk lam chuan engkim a fiah tawh mai ang, kei ka mut a chhuak deuh a, kan val upa ten rem in tih chuan tluk zal mai ka va duh ve’ tiin a ham der bai bai a. pasâltha Lianmana chuan ‘kan thiante ber in infiam an peih loh chuan kan mu poh a niang chu’ tiin Pasâltha Sângtuala chu a zui chhuak ve nghal a, an tawng an hre phalo tih chuan ‘ ka nau, engthil nge buaina lo thleng tur i tih chu’ tiin a han bek bawrh sar sar a. an bulah tumah an awm lo tih a hriat chuan ‘ Lungtian Lalpa Thawmliana hi naktuk lam chuan a lo lawr tawh ngei ang, Lalnu Thanthûami nun chawk hnawk turin ruahman na a siam tlat in ka hria’ tiin a han phun sap sap a. pasâltha Laiawrha chu lo kal ve in, a nau thusawi tawp lam chu a hre hman vuai a. pasâltha Lianmana chuan ‘Lungtian Lal chu lo kal ngawt mahse, eng vak nge a lo tih theih chuan ang ? tiin a han zawt hâ a.

Pasâltha Sângtuala chuan ‘kan Lalte inthen dan hi, in ep lai ang a ngaih theih an nihna chen a awm a, Lungtian Lal Thawmliana hian lo ko leh sela, tlang ngaih ah chuan Lalnu zawk hi thiam lo thei a ni tlat a ni, a chhan pawh kum em a vei hma in kawppui dang neih a tum zawk si a, a nuta te rilru kawih zia hria in, Phaiphuk khawnbawl hian hma a la a ni’ a han tih chuan, a u te pahnih chu mak ti chuan an ka hau a. Pasâltha Lianmana chuan ‘chutiang zawng chuan ka lo ngaihtuah hauh lo a sin, Lalnu Thanthûami hian Lungtian Lal hi a hawi hmel tawh silo a’ tiin a han sawi ve leh sap sap a. pasâltha Laiawrha chuan ‘I han sawi takah chuan, vawikhat rik hlat chu a awm leh ngei dawn a nih chu, tlangval pakhat min hrilh dan chuan hmanni in inbuan tum a, Phaiphuk Lal fuih tu ber chu khawnbawl upa Kawlzinga niin a sawi a, in inbuan dawn pawh khan Saikianloa kha hneh lo ngat la chuan, dar khuang pek a tum niin min hrilhru tak a sin’ tiin a han phun ve leh sap sap a, pasâltha Sângtuala chuan ‘ku Lianman, nang eng emaw buai deuh kan tawh chuan, Phaiphuk khawnbawl bul hnaiah lo khawsa deuh chawt la, chutiang a nih loh chuan kan in veng zo lo ang tih a hlauhawm deuh e’ a ti a. Pasâltha Lianmana chuan ‘Laiawrha hian kan khawnbawl chu lo mitmei zawk rawhse, kei erawh chu a tul dan a che thei turin ka awm zawk a nge, chutiang a nih loh chuan in unau mal lak theihin in awm thei dawn tlat, Thûamkunga nen khawnbawl chu in lo ngaihven mai dawn nia, hawh ule i lut tawh ang u kan thiante ngaih a tha lo palh a nge’ a tih chuan ngawi reng chuan an lut ta a.

. . . . . . . . .

Lungtian Lal Thawmlianan a nupui hlui nita Thanthûami palai neih a hriat meuh chuan, a pawiti leh mak tihna chu a in chen nawk a. A thu ngawi ngul in vaibel chu a fawp khu tual tual a, zupui chu seki no chuan a thawk khat pup pup in a hmel chu hmuh a hrehawm sawt khawp mai, khualvalte chu melh in ‘in thu hriat hi a dik meuh maw ? han awm lungawi deuh sela, in suihkhawm leh zai kan la rel ang chu tih nak lai a, ka val upa hlui chuan maw ka nupui chu lo beisei a’ tiin a phun hluk hluk a. Khualval te chuan ‘ka pu, zan hmasa mai khan Satlâk khawnbawl pahnih an lo thleng a, chungte chuan Lehlawn Lal Zamloa inah palai an kal ngei a lawm, i awih duh loh chuan i thu a ni mai, kan tih theih tawk chu kan ti tawh khua lo var sela, kan chhuak leh nghal mai a nge’ tiin zu tuitling chu an tem hlek hlek a, Lungtian Lal chuan ‘engpawhnisela, zan in ka lo in ngaihtuah a nga, zing lamah kan in zai tha dawn nia’ tiin khualval te chu zawlbuk lamah chuan an chhuak ta nghal a. khawnbawl upate melhin ‘ka khaw vengtu satliah thin khan ka nupui min chuh pui a lo nih chu, ka lei rohlu chu Chhâwnthiaua chuan min chhuh sak hauh lo ang’ tiin chhuat dungah chuan a vei tuak chhen a. khawnbawl upate chuan ‘Lalpa hahdam rawh, khua lo var sela, Lehlawn lamah chuan kalin thil nihphung chu kan han thlen a nga, thil tha zawk a chhuak mai turah ngai ang’ an tih pawh chuan. Lal Thawmliana chuan a khawnbawl upate chu kut zulchal chuan iu in ‘nangni ho beng hawng lo lutuk vang hian a ni tun a kan thu hriat phahna chu, ka lunglen na leh khawharna chu min hriat sak duh lo a, kei Lalpa meuh ka lung a leng a nih chuan, hmeichhe lungnô zawk chu chiah sa a ni mai. Hmangaihtu pawh ka neilo a nih hi’ tiin a vin deuh that that a, khawnbawl upate chuan engmah sawi ngam tawh lo chuan Lal Thawmliana vei tuak sek chu an melh hrek hrek a. Khawnbawl upate chutiang chen a hawng lo chu ngaih thalo in, an nupui te chuan Lal sumhnun a tang chuan an bih thla dek dek a, an pasal te thu ngawi thap leh Lal thinrim vei tuak sek an hmuh chuan mak ti tak chuan an hawng zal zal hlawm a.

Zingtian sava a lo hram nak nak chuan, Lungtian khua chu buh deng thawm pawh a lo in chhawn ta tluar tluar a, khawnbawl upate chu insiam tur chuan an chhuak thuai a, khawnbawl thenkhat chu zawlbuk lamah kalin tlangval sawmngâ tha chu an insiam ve nghal sang sang bawk a, khawnbawl upa a chhoh leh hnu chuan. Mailiana chuan ‘kan Lalnu hlui chuan a thlangsual lo tawp ang, an inneih hun chuan kei pawh ka kal ve ngei ang’ tiin a bul a mi chu a han hrilhru sar sar a, a ni pawh chuan ‘kei pawh ka kal ve daih ang, kan Lalpa hi zawng a bilh a tho lo ang hial a ni tawh, Lungtian hian than lam ai chuan kiam lam kan lo pan zel nen, ka thu chu nise Satlâk a pem ve mai a nia ka duh ni’ tiin a lo sawi ve sap sap a. Phur ru tak chuan zanriak buhfai la tur chuan tlangvalte chu in lamah an liam thuai a, Lal chuan buaina siam sela engtiang chiah a awm tur nge ? tih chu Lungtian tlangvalte ngaihtuahna ti buai tu a ni. Tharum ah chuan an hneh dawn lo tih an hre chiang a, han tang duh lo sela an Lal thinrim dan tur an hmu tlang sa vek nen, an rilru chu a buai ru khawp mai.

Tluang tak a kalin a tuk naurual zanrih chhum hun chuan Lehlawn chu an thleng ta, Lungdawh a tang chuan khawchhung ah chuan an in zui lut dam dam a. Pasâltha Sângtuala chuan ‘Mailian, in dam maw ? tiin a lo hui zauh zauh a, Lal Thawmliana melh zauh zauh chuan ‘aw dam e, engnge he lam ah in tih’ tiin a pan thuai a. pasâltha Sângtuala chuan ‘I va han lian tawh ve, zan thimah chuan in hmu ila ka hel du du tawh dawn che a nih hi’ tiin a ban chu a hmer sak a. Mailiana chuan ‘Ku Sângte, tunah chuan puitling i ang ve tawh lutuk, ka ngai thin lutuk che a sin’ tiin an kal chhan chu a hrilh ru sar sar a. Buk nghat pah chuan ‘a lo nih tak chu mawle,thisen chak that lai chuan duh chin bak a tan ulh theih tih hria in fimkhur hle ang che’ tiin Lal mual pan chuan an in zui chho hnak hnak a. Mualkunga chuan a thian hlui a hmuh chuan a bul ah kal ve in. An ngaihvarungthawn chu in dem belin an nui dun bawk bawk a, chutia hlim tak a tlangval tuaitir nui hawk hawk te chu Lalnu Thanthûami chuan lainat ru tak chuan a thlir vang vang a. A pasal hlui Thawmliana mu thalo tih hriat deuh a hmel tla deuh dak te, mit bui duk dum raih a hmuh chuan khawngaih na chu a lo chhuak nghal zar a.

Lal Thawmliana chuan a nupui hlui tang dang bel mai tur ni a an sawi, a hmuh chuan khawdang a hawi thei meuh lo a ni. Lungtian Lal awmdan a hmuh chuan Kawlzinga chu lawm in a khi deuh sak sak a. Phaiphuk Lal chu pan in a han bekbawrh sar sar a, an farnu pasal hlui khawsa zia en in Lal Thangzuala pawh chu hlim hmel tak chuan a khi sak a. Laiawrha chuan Phaiphuk Lal leh khawnbawl khawsak dan a hmuh chuan a thinrim chu a sa deuh phat a, a thinrim chu thup hram hram in hmanrua an in chhawp em tih chu Thûamkunga nen chuan an mitmei ngun kher mai. Lungtian Lal Thawmliana chuan ‘i dam thin maw ? i tello chuan ka awm thei tawh thlawt lo a, nang hruai turin kan lo kal a sin, ka lo tih hrehawm tawhna che chu theihnghilhin lo hawng tawh mai rawh, nun thar i tan tha leh dawn nia, i tello chuan chhun leh zan hian awmzia a nei thui lo khawp mai, min ngaidam hram rawh’ tiin Lalnu Thathuami pawh melh tha ngam lo chuan hnuai lam chu a bih ran a. Lalnu Thanthuami chuan a pasal hlui mizia lo danglam tawh zia hria in, a khawngaih ru deuh khawp mai, ngawi reng in Lal Thawmliana chu a melh ding ran a. A farnu chu a haw leh duh dawn ah ngaiin ‘ka farnu ngun takin ngaihtuah la, mahni kawppui ten an tihsual hria a ngaihdam an dil chuan, ngaidam theitu nih a tha ngai e’ tiin Phaiphuk Lalpa Thangzuala chu a lo in rawlh zauh a.

Lungtian Lal Thawmliana chuan a nuta te tawng danah beiseina zual sawtin ‘I lo hawng a nih phawt chuan, Lungtian Lal thuneihna zawng zawng hi i kutah ka dah vek ang, i duh a piang ka tihsak zel ang che’ tiin zak hauh lo chuan a han sawi leh a. Lalnu Thanthuami a la ngawih tak reng vang leh, a nuta te tawng chu chawivawng in, a nupui hlui lamah chuan a han pen hnai a. an in karah tangphel bak a tla lo ang tih chuan Satlâk Lalnu Thanthûami chuan ‘tah khan ding rawh, tap chung a ka ngen lawm lawm lai che khan nupui dang, fa nei thei ka nei dawn i tih kha, i duh zawng chu lova pawm rawh, kei nen chuan a rem tawh lo a ni e, ka vaihvaih leh hrehawmna chuan khuanu zarah min kian san ve tawh dawn a, tunah chuan kei pawhin kawppui thar min hmangaih tu leh ka tan a engkim huamtu ka hmu tawh a, chuvangin hetiang zawng chuan vawikhat mah min be tawh suh, Lal ka nihna zawn a ka puih i mamawh a nih chuan ka lo in ngaihtuah ang’ a tih takah chuan. Lal Thawmliana chuan a hma a mi chu mak ti tak chuan a melh reng a.

Phaiphuk khawnbawl upa Kawlzinga chuan ‘Lalnu khawngaihin in ngaihtuah nawn leh la ka duh a ni, hetiang khawp a inchhir a ngen tu hawisan hi malin a zawng ngailo a nia, insiam theilo tu kan awm lo a, khaw khat Lal ve mauh in tlawm leh zah dawn lo a,a ngen che a nih chuan hun tha pe leh hram la a va tha awm ve. Lal chi chuan Lal ngei in neih hi duh thusam a ni ngai e’ tiin Phaiphuk Lalpa chu a melh pah rulh rulh a. Phaiphuk Lalpa Thangzuala chuan bu nghut nghut chung chuan ‘ka khawnbawl hi chu a felin, thu kal lam leh haw lam hi a man vat thin a nia, ka farnu nang pawh Lal ziding ngei chu zui la i tan leh kan zahawm nan a tha ber a ni’ tiin a lo tuihnih ve leh sup a. Thurpui Lalpa Tualliana chuan pawm pui tih hriat tak chuan a lo bu tlut tlut bawk a. A nuta te a lam an tang tih hriat chuan, Lungtian Lal Thawmliana chu a ngam pa sawt a. Satlâk Lalnu ban rek a pawtin ‘hawh i hawng tawh ang, man leh mual chu i nuta te lungawina ngei kan pek belh dawn nia’ tiin a han pawt nghal dawrh a. Lalnu Thanthûami chu te that in ‘tenawm pa min thlah rawh, in duh a nih chuan hengho nen innei rawh u, ka duh tak lo chu ka nei dawn lo’ tiin a ban chu a han thing sawk a. Lungtian Lal Thawmliana chuan Lalnu Thanthûami chu pawh chhuah tumin pawn lamah a hnuk nghal a.

Lalnu Thanthûami chuan thinrim tak chuan ‘min thlah rawh i va han zak theilo em em ve, nang nen hian in zawmna engnge kan neih,pasal nei mai tur ka nih hi’ tiin a te that that a. Lehlawn Lalnu Muanzoi chu thinrim hmaisen tan chuan tho zawkin, Lungtian Lal Thawmliana bek samah chuan uai nalh in ‘in va han zak theilo em em ve, khaw engpawh zah ve em em rawh, ka inchhung ah ti hian ka nau i ti ngam vei maw ? nuam i sa hlek lo ang’ tiin Lal Thawmliana chu a phih sawk sawk a, Lehlawn Lal Zamloa chuan ‘in va han ti mak deuh ve mawle, ka inchhung ah ka farnu duh lo chung chu i pawt lui ngam vei maw, i thlah loh chuan nuam i sa lo hle ang tiin, Lal Thawmliana chu a han tham ding zawk a. thinrim sehchilh rap rap in ‘Nang khaw khat Lal ve meuh hian phung i thlu lo kher mai ka ti, ka mit hmuh lai a i duhna i bawh dan huam huam ah hian, i zia awm tawk chu a lang chiang khawp mai’ tiin Lal Thawmliana chu a theh thal ta thak a. Phaiphuk khawnbawl Kawlzinga chuan ‘Lalpa in ngaihtuah chiang rawh aw, nupa te chu in hauh chang nei mah ila, rei lo te ah kan lungawi ve mai zel a ni ngai, i farnu pawh i thunun theilo a nih chuan i khua pawh i awp hneh meuh dawn a mi ? hmeichhe vui vaina chu men a thlak tawk neih loh chuan, zahna chiah a nia i la chan dawn ni’ tiin lainat awm tak chuan a han sawi leh charh charh a.

Pasâltha Laiawrha chuan ‘nang zet zawt kha lo ngawi chipcham rawh, mahni farnu te mittui nen a liam tir thei khawp a mi pam ham Lal Zamloa hi a ni ve lo a nia, mi kut a rawl kaw zen chin hi sim hmak ang che’ tiin hmaisen tul chuan a han sawi a, Phaiphuk khawnbawl Kawlzianga chuan a hma a mi a en chian chuan, chhan mi ah ruat lo in a thu tum hmuk a. Phaiphuk Lalpa Thangzuala chu chhan beisei tak chuan a melh zauh zauh a, Satlâk tlangvalte thinrim hlauhawm zia an hriat tawh a vang chuan, Lalnu Thanthûami chu an nawr lui ngam lo in Lehlawn Lal in chu a reh ta thap a. pasâltha Lianmana chu lo lutin Lungtian Lal Zamloa thu sawp nuaih chu a kai tho a, ngun tak a melh vang vang in ‘Lalpa eng ti tih a tun hun a Lehlawn i lo kal theih ngawt mai chu le’ tiin a mit ah tak chuan a melh ding ngar a. Lal Thawmliana chuan ‘Phaiphuk tlangval ten min lo hrilh a, tun mai khan an thusawi dik zia pawh ka hre fiah ta chiah bawk a. ka ngen chiam chuan min hriatthiam mai ka lo ring deuh a, hmangaihna huatna a in let thei an tih hi ka lo ring ngai lo a, ka hun kal tur hrelo in, ka chapô na chuan tun dinhmun hi min thlen ta a ni e’ tiin a kun ta nghaih , a khawnbawl leh tlangvalte hnenah chuan ‘lo kal rawh ule, phengphekhua kan tlai zo ta, hlim tak in awm mawlh rawhse’ tiin zawi muangin, Lehlawn lungdawh lamah chuan an in zui thla dam dam a.

Pasâltha Laiawrha chuan ‘Nangni unau zet chu in lo ropui rep rep khawp mai, in hmaichhan ah in farnu chu a pasal hluiin pawh chhuah tumin tha pui nen a beih laiin in enliam thei a nia. Lalnu Muanzoi awm lo sela in farnu chu mittui nen inthlah liam ngei dawn a ni. In farnu hi mahni ke a ding, in zali nufa chung a rorel a ni ve in, a pasâltha te ne pawh ek lo chungah rorel in in thu a, in hnam chapô pui takin “ni leh thla bak kan chungah a lenglo” tiin in iak ve fo a, nangni Lalna ti ropui tu chu in hmusit leh ngaihnepte an nih zia lah in hre duh na hek lo, Lalnu Thanthûami leh Lungtian Lal Thawmliana hian engnge in zawmna an neih ? zan khaw tairek a Lalnu Thanthûami’n hnawhchhuah a tawh lai khan, nangni hian in kutzung tang hmawr pawh hian in pui em ? Tun a tak a pasal a nihna chu in chawivawn sak viau na chhan hi engvang ber nge ? Lungtian Lal hian a nupui a ngai nisela, Satlâk khaw buaina ah hian a tlangvalte vawi eng zat chiah nge a lo tirh tawh ? Lalnu Thanthûami chanchin ngaihven hian vawikhat tal Satlâk khua hi a lo rap tawh em ? Satlâk khaw buaina a zankhat em pawh la pen chhuak lo hian, thuthmun ah in la fing leh fel takin in lo bu tlut tlut ngawt a. nangni hian nuta nihna hi in hlen chiah em ? zahna in nei a nih chuan zak hle rawh u’ tiin thinrim tak chuan a chilh ta hrep a.

Lehlawn Lalpa chuan Phaiphuk khawnbawl Kawlzinga chu thinrim tak chuan melh khuih in ‘nang khan eng thil nge i lo tih ve, kan buaina tur ngaihtuah hian mangkaw tha nen i lo tang vei maw ? hrep tak che chuan, kan chhungkaw buaina tur ngaihtuah tu hi ka khua ah i awm theilo ang, tunah chhuak nghal rawh’ tiin a vin that that a. An Lalpa chhan beisei tak chuan a han melh a, a ni chuan lehlam hawisan in a lu chu a han thing mut mut a. Phaiphuk buanchak chu ko in ‘ka khawnbawl upa Kawlzinga hi tlangval pangâ khan lo va hruai haw tawh u’ a tih takah chuan, hreh teh mahse Lehlawn khua chu ni sukchen a la awm tih chuan an chhuahsan ta hna hna a. Lalnu Thanthûami chuan ‘ka u ka lawm e, ka tan i in pekna hi ka hre reng tawh ang’ tiin a han sawi sap sap a. Lalnu Muanzoi chuan ‘ka fanu an nawr luih lai te khan lo thihchilh daih tur ka nih vei nen, tunah chuan ka mawhphurh na hi ka tlansan tawh dawn hauh lo’ tiin a lo chhang lawi rat a

. . . . . . . . . .

Pângliani zing buh dengin sumhmun a tlangval pangâ lo in zui a hmuh chuan te thawtin inchhung ah chuan a tlan lut zawk a, Ngiazoa pa chu Pângliani te thawmah chuan lo tho chhuakin, an khaw tlangval te a hmuh chuan ‘engthil nita le, zing thang thang ah ? tiin thutna chu a kawh hmuh thuai a. pasâltha Lianmana tirh chhan te an sawi lai chuan pu Tawnliana te nupa pawh an lo tho chhuak ve nghal a, tlangvalte thu ken a hriat chuan ‘chutiang a nih chuan lo va hahdam ula, khawnge kan upa in lam chu ka va kal ve nghal a nge, tukthuan ei kham hma lam ah kan chhuak vat dawn nia’ tiin a in phih faiin a chhuak ta nghal a. Pânglianin an khaw tlangvalte chu hnuai lam bih ran chuan ngaihdam a han dil khaw hnu a, tlangvalte chuan ‘Pângpui, kan thiam loh zawk a ni kha, ngawi rengin kan lo kal in kan ti hlauthawng che a min hrethiam zawk rawh’ tiin tlangvalte pawh chu an chhuak ve nghal a. Pângliani te thawm ah chuan thenawm khawveng te pawh an lo tlan khawm tak tak a, an khaw tlangvalte an ni tih an hriat chuan nui chung chuan an kal leh ta hlawm a.

. . . . . . . . . .

Satlâk khawnbawl upa leh an kaihhruai te chuan Lehlawn chu ni tlak dawn chuan an lawi lut leh ta a, zanriah eikham chuan pu Tawnliana te chuan Lehlawn Lal in chu an pan leh ta a. Lalnu Thanthûamin a khawnbawl upate a hmuh chuan a che pelh leh zauh thin a. Lalnu Muanzoi chuan ‘ka nau, zanin zet chu i naupang tha leh a ni hawt a lawm le’ a han tih chuan zak sen tal tal chuan ‘I zaklo theilo lutuk em mai’ tih pah chuan a sik hlak hlak a, nui var chung chuan Lalnu Muanzoi chuan ‘khaih a, khatiang te chuan ka rak vak mai dawn nia, hetiang a i hlim hmel ka hmuh lohna hi a rei tawh em a nia’ tiin a han fiam zui leh hram a. khawnge thenawm pi tar damlo ka han tlawh zawk a nge tiin Satlak Lalnu Thanthuami chu a chhuak zui zat a. Lal Zamloa chuan a farnu awmdan a hmuh chuan lainat na tak neiin ‘lo lungphang hauh suh aw, zanin hian remthu kan sawi khawp ang’ tiin a ngaihtuah zui vang vang a.

Lehlawn Lalpa Zamloa chuan Satlâk khawnbawl upate chu melh in ‘rin loh tak a zanin chu kan In hMuh tak nawlh mai chu, pawipang te a awm ta em mi ? tiin thu a han kam keu a. Pu Tawnliana chuan ‘pawipang chu awm dang lo e, kan thu ngai bawk kha kan lo kal chhan chu a ni e, kan naute chung chang kha rei han rial chiah ngai loin, tha lam a min remsak turin kan rawn mawm leh ngawt mai a ni, kan pute chuan kan zahna tur em chuan thu min pawhchah saklo turah kan ngai deuh ngawt a’ tiin a han sawi a. pasâltha Lianmana pa chuan ‘kan upa sawi ang khan, in khawngaihna beisei in zah luatah lu em a chhum lo e tiin kan lo mawm zawk mai a ni, nangni a nuta te awm lai a tha lam thu hawn ngei beiseiin a siruk lain kan lo thawk chhuak a ni’ tiin a lo tuihnih ve charh charh a. Thurpui Lal Tualliana chuan ‘keini farnu te zawng han neih tlak em a ni dawn a mi ? mipa chuan fa hi kan duh ber a ni deuh mai a, kan farnu lah hetiang han beisei theih niin a lang lo a, Zuntei nu siam ang chauh hi kan ni mai ang tih kan hlau deuh a ni’ tiin a han sawi ve dap dap a. Phaiphuk Lal Thangzuala chuan ‘ka unaupa sawi ang kha kan hlauhthawn chu a nia, kan farnu hian vawikhat a tihsual tawh vang hian kan venpui deuh a ni, a nih phung ang a in tuamhlawm thei a nih te chuan, keini a nuta te tan chuan chu tluk a thil duhawm a awm chuang lo, man leh mual lam erawh kan pun hle dawn a nia, kan farnu hi thisen pal em a nih loh bakah tlangchang Lal a ni ve bawk a’ tiin a hawi deuh larh a.

Pu Tawnliana chuan ‘man thu hlaah chuan in tih ang zawng chu i he loin kan pawm vek a nge, kan duh ber chu kan nau tan hian remthu min sawi sak ngei hi a ni’ tiin a lo inrawlh ve leh zauh a. Lehlawn Lal Zamloa chuan ‘man leh mual chu nangni khual lam khan han bi tuk ula’ tiin a han sawi ve bauh a. Thurpui Lal Tualliana chuan ‘kan sawi tak ang khan hnamchawm leh Lal kar a nih vangin man lam chu a tam khawp mai, Tlaisawm kan man pangngai bakah pasâltha nei tha khua in ni bawk a, Saingho dungchen ,zukchal ki ropui tak leh nghalchang ngho ngun tang chen nisela, ka han sawi tak te hi in ngaihtuah fel hma leh kan naute chu an in suih zawm hma a ni mai’ tiin zutui tling chu a han thawk khat pawp a. Satlâk khawnbawl upate chuan an thu chhak chhuah dan an hriat chuan an thin chu a sa ru zak a, Satlâk palai te hmel lo danglam deuh a hmuh chuan Thurpui Lalpa chuan nuam ti ru tak chuan a then sak sak a. Palai te chu an in melh he haw a, pasâltha Lianmana pa chuan ‘aw le, a lawmawm khawp mai, chutiang zah lek man in han chhiar chu kan tlangvalte kan han hrilh a nga an huphurh hauh lo ang, kan inpeih hunah man hlan chu Lehlawn Lalin ah hian kan lo dah tawp mai ang chu’ tiin Thurpui Lalpa chu a han melh deuh ralh a. A ni rui deuh tawh chuan ‘ni mai e, kan sawi ang zawng kha in tlak hunah kan farnu chu innei thei taw hang, ni lawm mi ? tiin a unau te chu a han melh kual a. Lehlawn Lalpa chuan ‘unaute u, kan farnu man chu kan ti lutuk deuh lo maw ? tlang hrim chuan min sel lutuk a nge’ tiin a unaute chu a han melh kual ralh ralh a. Phaiphuk Lalpa chuan ‘Lal tlangchang manah meuh chuan a tam lua lo turah ka ngai.Tin, kan mâkpa tur lah hnamchawm a kar a hmeithai fa alo ni kher bawk nen, an inhmeh tawk tiu teu viau zawk e’ a lo tih tak hmukah chuan, in hauh buai duh lo in Lehlawn Lal Zamloa chu a hawi tau hmawk hmawk a. pu Tawnliana chuan ‘khawnge a lawmawm hle em a, kan naute pawh in kan thu an hre chak taw hang, kan tin phawt tawh a nge, a rang lam a in buatsaih kan ngaih dawn a vangin khawvar rualin kan chhuak ve nghal mai ang, kan chung a in zahngaihna in lan tir a kan lawm lutuk e’ tiin an inzui chhuak ta dam dam a. Lehlawn khawnbawl Ziangtiana chuan ‘kan khawdang Lal pahnihte mai mai chu, an va han rapthlak em em ve mawle kha tiang a mi duhâm kha ka la hmu ngai hauh lo’ tiin a phun ve hlak hlak a. Satlâk khawnbawl upate chuan ‘kha tiang mai mai thil har lutuk a awm loh kha, kan tlangvalte chuan chona ah ngaiin lawm takin an pawm ngei ang’ tiin a han chhang a. ka lo ngaihruat dan ai a hma a kan ching fel thei chu a lawmawm hle mai. Kan Lal unaute an lo kal a tang chuan keini khawnbawl upate pawh Lal in kan chuang kai khat ta khawp mai, an tawng a chaltlai si a, kan Lal pawhin min hrethiam khawp mai’ tiin a sawi barh barh a.

Lo tawk phawt tehse, rilru a lut thei lo a. Ka lo heti leh rawih mai

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)