PASALTHA SANGTUALA BY Vana Fanai (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALTHA SANGTUALA BY Vana Fanai 1 - 125

Unread post by Ngaia » April 4th, 2018, 8:23 pm

PASALTHA SANGTUALA (Mampuia Pa)

BUNG - 126

zanriah eikham thut mar pah chuan Laiawrha chuan ‘Sângte,Lal Zamloa hian eng emaw sawipui che a tum ngei in a lang a,keini lam lah hian chhuanlam kan siam reng mai hi a dik ber pawh in ka hre seng ta lo,phungbawm sawm la Lehlawn Lal thu leh hla chu ngaihthlak hi a tha berin ka hre ta zawk mai,Zawnga hmai mah zah a nâ an tia,eng thu leh hla nge a neih tih hriat hnuah engkim hi ngaihtuah leh mai chi niin ka va han hre ve’ a han ti sap sap a,a u duhsakna aw ka chu hrethiam in ‘nang in thu haw lam leh kal lam i hre zawk a, tha i tih chuan naktip mai khian han kal ila a va tha mai awm ve,zanthum riak ramchhuak ang in kal mai ila a va tha awm ve’ a han ti a,Laiawrha chuan kan khawtlang in harsatna dang kan tawnglo a nih chuan han kal rang ula a that dawn chu,ka pa te chu ka lo hrilh mai dawn nia’ ti a an la ti ti lai mek chuan ,Thûamkunga te ho chu lo langin an infiam leh ta bawrh bawrh a,Sangtuala a in peih chuan nui bawk bawk chuan zawlbuk chu an pan ta dam dam a.

Satlâk naupangte chuan thiam zirtir tute an hmuh chuan hlim tak a nuih in an kil bial taih hlawm a,Thûamkunga chuan an naute chu fuih phurin an hmasawnna chu hmuhtir ngei tur chuan an han inbei chu an kum phu lo chuan an hmuhnawm kher mai,an kalbo hlan chuan chawllo in uluk tak a zirtir an ni tih pawh an hriat khawp mai,pasâltha te chuan an tihdik tawk loh chu an lo hrilh leh zauh thin a,thâl kah lah pawh chu hma an sawn dan an hmuh chuan Sângtuala te chu an hlim khawp mai,pasâltha ten fuihna thu an sawi zawh chuan Satlâk naute pawh hlim tak leh mahni tawk a inring tawk tak chuan an kal dar leh ta sang sang a,Thûamkunga chuan khua kan awm lai chuan siali te run kai zai rel hi a va tha ve tiin an in zui chhuak leh ta dam dam a,bawlpu fanu Rinzuali te inah chuan chuangkaiin hlim tak chuan an ti ti bawrh bawrh hlawm,Sângtuala chuan zan thum emaw chauh ramchhuah chu a rawt a,a thiante pawh chuan zalen tak a ramchhuah chu an châk sakhai hlawm vang chuan an in rawt phur a,a tuk lam a chhuah mai chu an rawt thlui ta a,Rinzuali chuan nangni thian ho hi chu in mak thin teh e aw,in bulah nangmahni ngaitu awm reng pawh thlahlel lo in ram lam ngawt in sawi a,in lunglen zo tur chuan a ngurpui nun neih a ngai dawn a nih hi tiin awmze nei tak chuan a han ti a, Thûamkunga chuan ‘keini lungmawl chu in runah zantin lawi in,i anka nem min chhawn mah la,i lunglai ah thaval dang tui furtui ang an lian,pal ang kan dang zo lo i hringchan sakhmel dar ang kan tawng erawh kan hlimna par lawm kim tu, thaval dang tawnah khiang min awih san tho tur mahni la,nang ngaih kan bang dawn nem maw’ ti a chhang in,khaw nge zanin chu kan Bawlpu in i han chuan thlu rawk mai ang aw tiin a thluk chu a siam nawk nawk a,a mah vek chuan hrilin zai a hruai nghal a Chungliana chu thoin a han mute leihrut hah hah in a chheih that that bawk a,Rinzuali la kai lai chu kawitho luiin an vir dun ta zak zak a,a lenghawn ar a khuan chuan khamlo tak chuan an in muttui mangtha ta a.

Hawn kawngah pawh chuan an la chheih pah that that a,zawlbuk meilum ai a lo ti ti te pawh chuan chheih tih ngawt a an mahni lam hual tu te chu zawmin,mutna siam a buai mekte lo chhuak chuan an zawm ve thuai a,an chheih rual thup thup a zawlbuk a chheih tih ngawt a tlangval au rual dual dual ngawt chu thenawm pa ho chuan an han thlek a, meipui lam hual a chheih chheih ti ngawt a lo lam kualte chu nuih kur kur chuan an fin ve zel a,a lo thleng hmasa apiang te chu lo pawt lam ve zelin,an chhei ri pawh a ring tual tual a, zawlbuk lam a chheih chheih tih ngawt a thawm lo awm chu Lal in a tang chuan hriaiin,Lalnu chuan tlangaupa chu a enfiah ur chuan a tir thuai a,mak ti leh phawk tak chuan an lo nghak thap a,an mi tirh lah chu reh hmakin tlangval au zing a tlangau pa chheih lauh lauh an hriat hnu phei chuan an mak tih chu a zual tawlh tawlh a,Lanu chu thoin khawnge kei mah ngeiin ka zu fiah ngat teh ang tiin a chhuak nghal tharh a, khawnbawlte pawh chuan zui chhuakin an zu thlen chuan tlangau pa chu a phusa berah tangin mawg lang zawk zawk chuan meipui bulah chuan a lo zuang zak zak a.

Mak ti leh nui sang chung a an thlir reng lai tlangau pa’n a hmuh thut chuan,Lalnu pawi pang a awm lo lo kal ve mai rawh chheih chheih tiin a la zuang zak zak a,Lalnun a thlir tih an hriat chuan tlangvalte chu an ding thap a,Lalnu chu hmanhmawh tak chuan tlangvalte bula kalin chheih chheih a han tih ve mauh chuan tlangval te chuan phur tak leh a hma ai a uar chuan an au tuar tuar ta mai a,val upa Chhâwnthiaua zuang nasa lutuk chuan,Lalnu chu a pal pel nawk a Lalnu phar nawk nawk tlu mai tur a in ngai tawh chu,kut tha chak tak hian pawm nawlhin,Lal nu hlau mitchhing a men meuh chuan a hmai bul lawk a pawi ti tak a lo thlir rengtu,val upa Chhâwnthiaua chu a han hmuh thut chu a phu zawk a,an in melh ta reng a,val upa chuan i na em Lalnu ka tihpalh lutuk min ngaidam rawh tiin a phun sap sap a, Lalnu chuan ‘val upa i va han chak em em ve,kan khaw tlangval te hian an lo chhun che a nih ngei dawn hi,hlauh neilo hmeltha nunnem an lo nih chhan chu’ tiin a han chhang ve sap a,an bul lawk a khuh kharh thawm an hriat chuan,val upa chuan Lalnu chu nghat vatin zak hmaisen tal chuan aw lo chhuahna lam chu hawiin an mahni lo nuih var vartu Laiawrha chu hmuin an piah a tlangval chheih rual dual dual lam pan chuan Lalnu chu a kal thuai a,Lalnu liam hnu chuan val upa chuan a kut chu a han melh vung vung a,Laiawrha chuan nui sang chung chuang val upa a liam tawh tiin a han fiam zauh a,val upa chuan kuttum hmuhin i kam tam vaih chuan i chaklo ang tiin Laiawrha chu a nek per lawp a,zanlai ar a lo khuan chuan Lalnu chuan kan hlim viau nangin thenawm khawvengte an zahawm lutuk dawn e tiin mut chu rawtin an tin ta hlawm a.

Laiawrha chuan val upa Chhawnthiaua relhru zal zal chu zuiin a mi zui pawh chu a fimkur khawp mai,Lal mual lam pan chuan thim lai zel chuh chuan a kal zel a,Lal sumhmun a thlen chuan inhnuaiah Laiawrha chu a tawlh lutin thil lo thleng tur hriat chak chuan uluk tak chuan ke pen thawm tawpna zawnah chuan a han ding vang vang a,Lalnu Thanthûami thusawi a hriat meuh chuan Laiawrha mak ti chu a ding khawg lah a,val upa in a chhanna hriat châk chuan a beng chu uluk tak chuan a ngaithla a,a lawm leh mak ti bawk si chu a mah chuan thim hnuaiah chuan a ding khi sak sak a,a rilru chuan val upa aw ti mai rawh he Satlâk khua hian a mamawh che a ni a lo ti rilru ve mawh mawlh a.

Val upa Chhawnthiaua chuan a thu hriat chu a mâng emaw tiin a kut chu a han sik chhin a,a mang a ni lo tih a hriat chuan Lalnu lam a pen hnai hretin ‘nang ang a ka ngaihtuahna la hi ka la hre hauh lo,Lal i nih vang hian engmah sawi thei ka ni silo a,Lal nilo la chuan hman hmanah ka nei tawh ngei ang che,min der chu a ni em lo maw ?’ a han ti zawi sap a,ka thusawi vang a hmeichhe chaklo ang a min ngai a nih chuan i thu nisela, hun eng emaw ti atang tawh khan ka ngaihtuahna hi i luah tawh a, Satlâk khua hi hmeichhe Lalna hnuai ah chuan a kal reng thei hauh lo tih hria in ngun takin in ngaihtuah la,tlangval hnahkhat tan nuthlawi neih a zahthlakna a awm tih ka hria la,kei hi min lo hnawl a nih pawhin kan zanin thu hi chu thlanah liampui ang che’ a ti a,ni sarih in ngaihtuah la i thu tlukna chu min hrilh ngei ka phut a ni,nang nen hian nupa kan nih chuan Satlâk khua hi ka nuta hian a din reng a rem ti lo mai thei,chung thleng chuan ngaihtuah la,thil namai a ni lo tih hriain in ngaihtuah ngun ang che,tunah kal tawh rawh le he thu hi a chhuak a nih chuan vanduaina in a zui ngei ang’ a han ti zawm a,val upa Chhâwnthiaua chu tawi khawmuang lo chuan a chhuak ta nghal a.

. . . . . . . . . . . .

Lal inah chuan an mi mante chungthu chu ngaihtuah in an mûk hlawm khawp mai,Tinliana khawsak phung chuan an thin a khei khawp mai,Tlangzawl Lal Zauliana khawsa zia hriatchian duhin thil awmdan chu hrilhhriat phawt nise,a khawsak dan atang chuan awmdan tur chu a la hril ang chu tiin ngaihdan chu an neih tawp a,tunhnu a Satlâk khaw ram chhungah tu chung pawh a pawikhawih tawh lo tur chuan na tak a hrilh ngei tur chuan thu an ti tlu in,an val upa Lianmunga te chhung chu um zui tawhlo tur leh an ni chhung chung a pawi khawih chu satlâk khaw pawi khawih an nih thu hrilh hre tur chuan palai tir tur chuan an rel thlu ta a,Satlâk lal thu chhuak an hriat chuan val upa Lianmunga leh an mahni zuitu te chu an hlim ta khawp mai, pu,Rumvunga a chu khawnbawl upa ni mahse a nungchang la en zui rih an duh vang chuan mi pangngai ang tak ni tur chuan an dah ta rih a.

Sângtuala te thianzaho pawh vartianah thoin inlam pan chuan an kal thuai a,chaw thing an bar zawh chuan lungdawh lamah an liam thuai a,naupang zing sava veh tur te chuan an zui dal dal bawk a,pasâltha Lianman chuan vaibel fawp khu luai luai chung chuan a lo nghak ran tawh a,an ni pawh chuan vaibel siam kaiin an zuk zawh chuan Tlangzawl khaw pan chuan an kal ding ta vang vang a,an mahni chak tha the thaw an ni bawk a,an kal sawt tlang khawp mai.Tin, Tlangzaw Lal thu chhuak an hriat chuan a ti hmanhmaw ru zual bawk a,ruang thlak zawh a thil thalo zawk thleng thei a nih hria in zanriah chhum hun hma a Tlagzawl thlen hman ngei tum chuan an kal sauh sauh a . . .

A tuk hma takah thoin val upa Chhâwnthiaua chu a haw ding nalh a,Sângtuala te thiazaho hmel a hmulo chu mak a ti deuh nangin a rilru a thil dang a vang chuan haw ding nalhin, a nu tar elkun ve tan tawh leh hlim thei tak chuan a fapa mut tlem vang a mit sen deuh ram chu melh vang vangin ‘Mamte engthil nge i va ngaihtuah muk awm ve,zan mumang lo khawp a i han vei chu ni,kan khua hian buaina kan tawng leh dawn te a ni lo maw ? a lo ti bawrh bawrh a,val upa chuan ‘eng dang awm lo e ka nu nizan ka mu tlem ve satliah deuh mai mai a ni e,boruak tha lolut tur ka helhhawlh deuh a ni’ tiin a nui var var a.Pi Chhunruaii chuan a fapa chu en in hlim tak a nuih sang chung chuan ‘chu mô ka nei dawn i tihna a ni maw, khual kal a kal tur chuan i nu hi ka chak tawh lo a,khawtual a mite hi i hmu zo ve em ang chu maw ? tiin an nufa chuan an infiam bawrh bawrh a,tukthuan ei chu siamin tumbu leh sarep bai pawlh leh sakhi sarep chhut sawm chu a han chhawp a,ti tak deuh zawk chuan ‘mamte hei tunah chuan kei chu upa lam ka ni ve tawh in,ka rualpui te chuan tuhmel an hmu deuh vek tawh a,nang lah val upa lam i lo ni ve tawh nen,tuhmel hmulo a mualliam mai pawh a hlauhawm ta,i vanglai hi a rei tawh dawn lo a,fate i ngaihtuah leh uap lum theih hun tur thlirin nupui a chhia a tha hi ngaihtuah ve a hun tawh viau a ni’ a han ti keuh keuh a,a nu dinhmun a ngaihtuah chuan awm a tih puiin a rualawhna pawh a hrethiam khawp mai,ti tak deuh chuan ‘ka nu,kei pawh ka lo ngaihtuah deuh mai mai a,vahsan lak zawh lam khi chuan kan phu tawk awm deuh mi kan hmute anih chuan nei mai ila ka lo ti deuh a,kan khua pawh muangleiin kan leng ve tan tawh nen, khuanu zarah hun chu a la in her chhuak ve mai turah ngai ila, mô pawh i nei ve ngei turah ngai ang,vawiin chu arbawm tur raw put kan tum deuh a tiin a han sawi zawm a, a nu chuan ‘nia kan khua pawh muanglei a awm zel turah ngai ila khuanu zarah kan him tlang zel ang,a ranglam a mô neih ngei chu ka duh a nia inchhung chet pawh kan harsat tan tawh a nih hi,mô chu a rang thei ang berin min neih sak ngei tur a ni,hei i han sawi takah chuan kan arbawm pawh a tha lo in,kar leh mai a no hruai mai tur ka ârla pawh a awm a,arbawm tur chu va pu tak tawh u, in buai a talangin engmah han ngaihtuahna khua a kaw si lo a,hun awlah chuan tiang hi pawimawh a ni’ tiin an chaw ei hmun chu a han ti fel a,val upa chuan lo puiin an infiam pah bawrh bawrh a,a fapa a awm loh chuan pi,Chhunruaii hi a khua a har thin reng a ni.

Pi,Chhunruaii te nufa an infiam bawrh bawh lai chuan Mawipuia lo lutin an ri hlut a,an inpeih chuan lungdawh lam pan chuan an kal ta a,Lal mual an peilh dawn chuan Lalnu Thanthuami leihkatlangsang a lo hawi vang vang chu an hmu a,val upa Chhâwnthiaua a hmuh chuan nui sak chung chuan leh lam hawiin a pilbo thuai a,Mawipuia chuan fiamthu in ‘nang zawng Satlâk Lal ah i la thu ngei dawn e’ a han tih chuan val upa chu a sen ve tawl tawl a,nang mai mai hi i fiamthu hi midang te reu reu hian an hre palh a nge aw tiin a han khak fiam ve a, naupang selam chaih chu an rawn ri phei laih laih in selem a chang chuan a kai tute chu a han si let tawp tawp a,naupang infiam chu en in an nui leh hak thin a, naupang chaklo deuh pakhat chuan ‘kei hi pasâltha Sângtuala ka nih hi,sechâl ngam chi ka ni lo’a tih chuan selem a châng pawh chuan thuawih tak chuan chu naupang hmaah chuan a kal tha ve mai a,rualpui zing a fing tak a awm chu an nuih ta huk huk a.

Lungdawh an thlen chuan Laiawrha te chuan an lo nghak thap tawh a,pasâltha leh val upa rual han fuankhawm thup chu an nula thingphur tur te chuan an thlamuan pui khawp mai,khua lawi hnuhnung ber Tlangzawl val upa Lianmunga lah chu a pumrua leh pianah chuan a zahpuiawm loh kher bawk a,nula thenkhat lah chuan an lo be tha hlawm viau mai a,tun an dem hran chuang lo,chutia hlim tak a an rik hlut lai chuan Lehlawn lam atang chuan tlangval pathum hi lo langin,val upa Chhâwnthiaua leh tlangval dangte chu nêl tak a chibai in an Lal chhungkaw chung a vanduaina thleng ah, Lal Zamloa chuan thlahualna a neih dawn vangin a farnu chu a lo sawm a lo ni a,chu hun ah chuan Satlâk leh Lehlawn tlangvalte chuan infiamna runpui nei a,a ti tha berin silai pakhat hlawh tur an nih thute sawiin kal ngei tur leh,a hun pawh Satlak khua te hman hun en a ruahman tur a nih thu an sawi chuan an ni pawh chuan hlim takin kal ngei an tum thu chuan an chhang hlawm a,lungdawh a tlangval te chu tirin Lal in lamah chuan khual valte chu an hruai ta a.

Raw putna lam tur pan chuan val upa Chhâwnthiaua chuan hma hruaiin an ti ti bawrh bawrh hlawm a,raw thing pum lian tha leh nikum tuai ho chu thlangin an sat a,a dil an paih zawh chuan vaibel te zu in Laiawrha bulah chuan val upa chuan ‘ni zan khan thil mak deuh ka tawng a tiin Lalnu Thanthûami rilru leh a mah a beiusei dante chu sawiin Laiawrha chuan mak ti awm tak chuan ‘nangpui roh hi i fiamthu hian lei a kuai run a lawm le,tiang zawng kher hian i la fiamthu ngai hauh silo a’ tiin a han chhimbudawi a,val upa Chhâwnthiaua chuan ‘kei tak hian mak ka ti a sin,Lal a nih vang ni hauh lo hian a mimal nun ah chuan han iaina tur awm ka hre hauh lo a,Sailo rilru in duhna leh chapô na hian buai na zakhawrawih min hruai lut mai a ngem aw ? a han ti vang vang a,Ngiazoa pa chu lo thlengin,thlan tla phang chuan an bulah chuan a lo thu ve a.

Ngiazoa pa chuan nangni pahnih chu in va mûk hmel ve mawle,ka rawn ti buai che u a va ang ve maw le a han ti a,val upa Chhawnthiaua chuan tibuai lo e,nangni pahnih hi ka thu hre turin ka duh che u a ni,mahnni a thu pawhchah dan pawh ka thiam lo tiin zan lam a Lalnu thusawi chu a han sawi chhawng a, Ngiazoa pa chu a thu ngawi ran a,aw a han thian kharh a ‘in thilsawi chu a mak tih zawngah chuan mak tih tur a ni a,leh lamah chuan Lalnu pawh mihring ve tho a nih vangin duhzawng thlan leh neih chu a tha a lawm,chutiang a thu a thlah ngam a nih chuan bawhpelh lo la a that ka ring,ka hmuh tan tirh atang a lainat na leh hmangaihna ngah tak a ni,keini hmelhriat loh pawh min tuam hlawm danah hian hmeichhe rilru puitling tak a niin ka hria,nei ngei la Satlâk khaw tan pawh hian a tha hle ang,nang tluk a Lal dinhmun luah tlak an awm chuang bik hauh lo,he thil hria hian Lalnu pawh hian a thlang che a ni phawt tur ah ngai ila nang leh he Satlâk khaw tan tha tur a khuanu ruat ah ka ngai deuh’ a han tih chuan an ngawi thap hlawm a,pasâltha Sukthanga pawh lo chhuakin a rawn nui chhuak var var a,midang te an lo chhuah kim chuan zawi muang chuan chhoin Lal Zamloa hun ruat thlen hma in sak chu rawt tha an ti tlangin zan lamah Lal sawi pui tur chuan val upa Chhawnthiaua leh pasâltha Sukthanga chu kal tur chuan an ti a.in an thlen chuan hnang chu hlai nghalin arbawm pahnih chu chaw ei hma chuan val upa chuan a tah zo a,bawm thumna erawh chu zingkar a chhunzawm tur chuan a dah ran bawk a.

Chaw eikham chuan pasâltha Sukthanga fapa chu lo kalin an vawk chet sual thu sawiin,midang phungbawm lo sawm mai tur chuan a ti a lo ni a,rilru a nui var var chung chuan ‘ngaihtha takin i pa chu lo awm rawhse,zanah thil awmdan chu kan lo hrilh leh ang ti a chah in Laiawrha te inah chuan a kal thuai a,thil awmdan a sawi chuan Laiawrha pawh insiam thuaiin a hman chuan an chhuak ta a,Laiawrha chuan ‘val upa,zanin hian hun a awm phawt chuan Lalnu chu thu tawp hrilh mai la,kan khaw tan hian hna i thawk tha zawk ngei ang,nangmah in hmu hniam hauh suh ang che,theihtawp kan chhuah tlâng a nga kan mualpho lo turah ka ngai’ tiin a fuih sauh sauh a,an han thlen chuan khawnbawl tumah an lo awm lo in tlangau pa chu sumhmunah an tawk a,mikhual te ko tur chuan a ni chu a chhuak thuai a,chu hunawl chhete chu hman tangkai tir tum ran chuan Laiawrha chuan zui lutin a dumbawm a theihnghilh thu sawiin a chhuak leh thuai a.

An han ngawi dun ren rawn a val upa Chhâwnthiaua chuan ih Lalnu i buai em englo a nia a han ti bah nuaih a, nuihza insum tih hriat tak chuan buailo e engnge ni han sawi ta che,ka lo ngai reng che tiin a han chhang a,a huaisen na zawg zawng sawm khawm in val upa chuan ‘ nizan i thil sawi kha i fiamthu a ni em ? harsa ti fe chuan a ti thei hram a,a mit a chiang tak a en kal chung chuan ‘ka fiamthu hauh lo a sin, ka rilru zawng zawg a sawi ka ni,i rilru chu engpawhnise min hrilh tur ah ka ngai che a,eng thil pawh min hrilh la lawm takin ka pawm ngei ang,Lal ka nihna vang a nawr lui che ka ni lo a nia’ tiin a han phun sap sap a,val upa Chhâwnthiaua chuan ‘chutiang rilru chu i pu a nih ngat chuan kei pawh in i sawmna chu lawm takin ka pawm e,a bak thil kal dan tur erawh ka hre hauh lo mai’tiin Lalnu chu a thlir ve vang vang a,chutia an ngawih dun lai chuan sumhmunah thawm lo awm in Laiawrha chu a lo khuh lut kharh khar a,a thianpa hmel a hmuh chuan an kar thuah an inrem tih hria in a hlim ru kher mai.

Lalnu chuan Laiawrha chu en in ‘hei kan vanduai a kal kan ti dawn nge kan buaina chuan liam lam pan mai lo hian min tlak buak deuh par par a ni mai a,i naute pawh ka ngaihtuah ru ang reng khawp mai,kan buaina hi reh tawh hram sela ka ti tawh khawp mai’ tiin a lo be bawrh bawrh a. Laiawrha pawh chuan ‘kei pawh buaina hi reh tawhse ka ti khawp mai,nunau reng hian buaina chhuak hi an tuar mai,tih theih neilo chung hian awmhmunah hian kan lo tang tung reng a’ tiin a lo tuihnih ve a,chutia an ti ti bwrh bawrh lai chuan khawnbawl upa te pawh an lo chuangkai tan in,an val upa leh pasâltha an hmuh chuan engthil nge nita,kan tlangval lam hian eng emaw hriat ruk in nei ta hlawm em mi ? in tuan a va tha ve tiin an lo be nghal bawrh bawrh hlawm a, val upa Chhâwnthiaua chuan ‘Lehlawn lam kal an hmuh thu leh Lal Zamloa thuchah an hriat thu te sawiin,Tlangzawl lam pem lutte insak hnu leh Tlangzawl lam kalna awmdan a zir a Lehlawn kal an pawitih loh thu te,val upa leh pasâltha te duh dan a nih thu a sawi chuan,Lehlawn lamkal tlangvalte pawh an lo chuang kai ve ta bawk a,an thu hawlam leh kallam ngaichang chuan an thu ngawi kar a.

Khawnbawlte pawh chuan ‘nia thiltha leh tihawm tak a nih chu,keini pawhin in ngaihdan chu kan hriat duh a niin koh buai ngailo a in lo kal hlauh chu a lawmawm hle mai tiin Lalnu chu khawnbawl te chuan an melh thap a,Lalnu chuan ka nuta te chu kan ngai pawimawh khawp mai,kan pasâltha te lo haw phawt loh chuan kan chin tur kan hre hauh lo a,kan theih hun min nghak a nih fam chuan,ka tlangvalten thu chu an lo hrilh mai ang che u,kan hman hun tur tiin Tlangzawl lam a lam kal an tirh te chanchin chu chiang tak a hrilhin Lehlawn tlangval te pawh chuan hrethiam takin ‘in mi chah ang tak chuan kan han hrilh ngei ang,kan lo ngaichang reng ang che u’tiin zawlbuk lamah an chhuk san ta a,an mi tangte veng turin tlangval te siam fel tur leh râlveng tur ti fel tur chuan val upa an chhuak ve ta nghal a,tlangau hmangin a tuk lam a in chhungkaw riat luah tur chakrua la tur chuan veng tinah chuan tlang an au tir a,tunah chuan Satlak khua pawh in zali nufa tha lam hret niin tlangval te mai bakah an rawlthar te chu ral hmachhawn tlak khawm a thiamna nei an niin a tak a an chet hun hmu chak chuan val upa leh pasâltha te chu an phi ru sek tawh hial a ni.

Khawnbawl upate an ti ti barh barh lai chuan Lalnu Thanthûami chu ngaihtuah nei tih hriat tak chuan a lo ngawi leh vang vang thin a,Lalnu khawsa zia dangta deuh chu an ngaihtuah in an khaw ngaih ru hlawm khawp mai,Lungtian an chhuahsan atang chuan buaian chu a in pha man char char ta mai si a,hmeichhe awmnem tan chuan a hrehawm hle ang tih hriatthiam puiin pu,Tawnliana chuan ‘Lalnu i pawi ka sawi chuan min ngaihdam la,i zarah hun eng emaw ti chu kan lo awm ve leh reng ta mai a,kan khaw dintirh a ta buaina hi a in pha man chho char char a i lu pawh a hai ang tih lah a hriat, keini upate hian eng kan sut kuak pui thei hauh lo mai che a ni si a’ tiin a ngawi ta daih a,khawnbawl upa dangte leh Lalnu ngei pawh chuan pu,Tawnliana chu an melh thap a,a ni lah chu ngaihtuah ding tih hriat tak a a ke zungpui melh ran chuan a kun ran a,Lalnu chuan ‘Laiawrha pa engthu nge sawi i tum ber le,tim hauh loin sawi vek rawh thu tha ni a kan hriat sawi khawm hian hma lam hun atan a kan nundan tur a tha lamah min hruai ngai e’ a han ti charh charh a,khawnbawl dangte pawh chu an lo bu tliar tlair hlawm a.

Pu,Tawnliana chuan thawpui a han la halh a ‘chutia i huat dawn loh chuan ka han sawi zawm a nge,kan boruak thlir hian i tan a lo samkhai zawkna a nih beiseiin kawppui lam hi ngaihven la a tha lawng maw ? pasal thlazar hnuaiah chuan engpawh tawng ila thlamuan na hi a awm chawk a, nang hi ka duhkhawp lo che chu a ni chuang hauh lo a nia’ tiin a han sawi charh charh a, a tum loh lam lutuk a sawi vang chuan,Lalnu chu a ngawi ta rauh rauh a,Lalnu a ngawih tak daihah chuan pu,Tawnliana chuan pawi tih hmel tak chuan a han thlek vang vang a,Lalnu chuan ‘ka upa te u,in mi duhsak na ah ka lawm e tlang ngaih a mawi hi kan zawn a ngai deuh niin ka hria,in sawi chu a dik khawp mai buaina chhuah chuan nunau tam zawk tan chuan hmeichhia chuan muanna hi kan pe lo deuh thin a’ tiin a ngawi ta daih a,khawnbawl dangte pawh chuan ‘Lalnu kan duhkhawp loh lam che a ni hauh lo a nia,kan hun kal tawh chhui kir hian i tan a lo sam khai zawk kan beisei vang a nia,kan mitmei ven vang hian thil tha hi I lo bawh pelh ang tih kan hlauh pui che a nia,mahni ril a rah te hi an hlu chawk thin a’ tiin an han sawi pui chuan dik a ti khawp mai,Lalnu Thanthûami chuan ‘ka upa te nge nge he tiang khawp hian min duhsak in min ngaihtuah a,ka lawm khawp mai in thurawn tha tak hi ka hre reng a nge ka lawm lutuk e’ tiin a hmel hlim na chu tun an hai hauh lo,zan chu hlim tak chuan an tling tla leh ta a.

Lo tawk leh phawt tehse,rilru a lut thei tawk a ni e



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:24 pm

PASALTHA SANGTUALA (Mampuia Pa)

BUNG – 127

( A hnua a pic ka rawn dah tel hi tlangval huaisen tlanchhiat duh loh vang a,Assam silai mu in a fuh tak MI HUAISEN tak mai Tv,Ricky a ni a,nimin lamah kan va tlawh ve zawk a,remchang min siam sak hlauh a ti hian thla te min lak pui duh hlauh a vannei ka in ti khawp mai.

Ram leh hnam tan a kut tuarte tan he thawnthu hi ka hlan e,an hnung zui tur hian thalai te hian eng tin nge kan chhan dawn le.I RAM LEH HNAM IN A MAMAWH CHE,ENGTIN NGE KAN CHHAN DAWN ? NANG LEH KEI HIAN MAWHPHURHNA KAN NEI . ). .

Pasâltha Lianmana te chuan Tlangzawl khua chu an tum lawk ang tak chuan zanriah chhumhun hma lamah chuan lungdawhah chuan vaibel an fawp khu hlat hlat a,chutia an thut lai chuan tlangval rual khat zanriak puan nen a hmanhmawh tak a ram lam pan a lo kal dam dam te chuan,lungdawh a khual val rualkhat lo thu thap leh lo ti ti bawrh bawrh an hmuh chuan an lo meng tur nghal kher mai, Satlâk tlangval te an ni tih an hriat chuan a let leh tur an hriat lawk bakah,an zingah pasâltha Sângtuala a tel tih an hriat chuan an thinrim hmelsen chu an thup ta deuh a,eng ti tur a lo kal nge an nih te zawtin an ding thap hlawm a,pasâltha Lianmana chuan,Lalnu Thanthûami thuchah chu hrihin an hma a mite chu chik tak chuan a melh ran a,an thu hriat thar chuan Tlangzawl tlangvalte chu a ti hrilhhai in an mitmeng a thinrimna lo lang chu tun an hai loin,a tul thut a che mai thei tur chuan an inring ru that hlawm a.

Tlangzawl tlangval zing a an hotu pa Tlangmawia chuan ‘eng thil pawh nise,kan pawikhawih a nih ang takin val upa Lianmunga chu kan kutah min hlan ula buaina neilo in kan inrem a ni mai a lawm,chutiang a kan kut a in hlan lo a nih erawh chuan kan buai zui dawn zu nia’ a han tih chuan an boruak chu a tang ta at mai a,pasâltha Lianmana chu zawi muang chuan a tho tham tham in ‘chutia kan khaw beltu chung a kut thlak in tum tlat a nih chuan thu tha kan va sawi thei awm lo ve,val upa Lianmunga chung a kut thlak in tum tlat si chuan kei ni chuan kan tha en hauh lo ang che u,min paltlang a ngai ngei ang ’ a ti ta chheu chheu a,Tlangmawia chuan kan hma a ding lui tlat chu ka phul pal mai ta lawng tiin a chempui chu a phawrh zui zat a,Tlangmawia che zia an hmuh meuh chuan Satlâk valrual te pawh ding suau in kei man tiin an chempui chu an phawrh ta fur a,a naute chu khap in pasâltha Lianmana chuan ‘hei chu ka chanpual a ni,tumah lo inrawh suh u’ a tih tak tlatah chuan,midangte chu tawlh kiang in a tul thut a che thei tur chuan an chempui chu an hum far hlawm a,Tlangzawl tlangval te chuan an hma a dingte khawsa zia an hmuh chuan an hlau ru ta deuh in,lang lo ah chuan engzah tak awm ang maw tiin ngaw lam chu an thlir awl lo a,tlangval pakhat phei chuan an hruai tupa chu hrilhru sur sur in,Tlangmawia’n dawihzep pa ngawi chipcham rawh,i lo sawi tur a awm lo a tih tak tuarah chuan ngaihtha lo tak a hawi kual zauh zauh pah chuan ngaihtha zanlo chuan a tawlh hnung ta a.

Inbei turte chuan dingchang zawk nih ngei tum chuan an in veh ta thaut thaut a,Tlangmawia chuan a hma a mi sah fuh ngei tum a chempui zak kau meuh a a tin lai chuan, Tlangzawl Lalpa chuan tawp vat rawh u eng vang a ka thu lo a hriam lo lek ngawt nge innih chu le a han ti vin thak a,aw lo chhuahna lam an en chuan Lal leh khawnbawl te chu puantlang phe dawr dawr chuan an lo tlan hlawk hlawk a, Tlangzawl Lalpa Zauliana chu thaw hlawp hlawp a lo thlengin mikhual zawkte chu kawk in ‘tu khua nge innih a ka khaw chhung a hriam in lek ngawt chu le,eng thil nge ni reng reng’ tiin a thaw hlap hlap a,Pasâltha Lianmana chuan ‘Lalpa kei hi Lianmana Satlâk khua ka ni a, in khaw tan a kan Lal thuchah lo keng ka ni e,tiin midangte pawh chu a han sawi dan dan a’ pasâltha Sângtuala hming an sawi meuh chuan an piah a pasaltha diar tial khim vang leh chempui hum chung a lo nui sang an hmuh chuan Tlangzawl khua te chu an ngawi thap hlawm a.

Tlangzawl Lalpa Zauliana’n a khua ten a thupek pawisa lo a chet an thawh dan a hriat chuan a thinrim chu hmel dur khup a,chu a chhap ah,Satlâk Lal thuchah a hriat meuh chuan a thinrim na leh pawi tihna chu a hmelah chuan a chhiar theih in,khawnbawl te pawh chuan an khaw pawi khawih an hriat chuan pawi an ti tih hriat tak chuan an chek tlawk tlawk hlawm a,Lal Zauliana chuan ‘engpawh nisela hahzu zuk pahin thil awmdan kan sawi dawn nia,nangni pawh chutiang thu in hriat tawh chuan kan val upate chu um zui tawh suh u a tawk tawh e’ tiin hawh u i kir leh vek ang u a ti a,Tlangmawia chuan ‘a eng ai ah chuan nge maw ka han kal that ngawt ang,kan khawchhung ngeiah hriam min lek khum a ni a,a khamphei a he pa hi a hawn loh chuan kei hi Tlangmawia ka ni lo ang’ a ti piap piap a,Tlangzawl Lalpa Zauliana chuan ‘khanglang che chuan eng a vang a ka thu hnial che chu ni maw,i thinrimna vang maiin ka khaw himna hi derthawngah dah ka tum hauh lo tih hria ang che’ a ti ve ta thak a,Tlangmawia chuan Lal thusawi pawisa lo zet chuan pasâltha Lianmana chempui a kawk in ‘nang nen khan hmabak kan nei a kan zo ngei tur a ni’ a tih zawm zat a.

Pasâltha Lianmana chuan ‘ni tuk e a,tumah lo inrawh hauh suh ang che u,in lo inrawlh chuan a pawi khawp ang’ tiin chempui fawng a chil chhak phawrh phawrh a, Tlangmawia chu a pan ta chher chher a,Sângtuala chuan ‘a ngam fa chu lo inrawlh ang che u,tha te a sawi fel tum pawh a kei tak emaw ti tlat mai che u’ tiin midangte chu tawlhhla tur chuan a nam leng ta lawp lawp a,pasâltha Lianmana chuan Tlangmawia chu pan hnaiin chempui chu a vai nghal pawp pawp a,a thinrim na in a urthlu bawk a Tlangmawia chuan a khan lo kher mai,a tawlh han han reng a,a theih tawk chuan in veng mahse a in veng seng ta lo,a chempui hum lai chu a per nawlh a chempui lo thlawk leh chuan Tlangmawia nghawng chu fuh sawkin a lu chu a uai nghal hnawk a,thisen chu chik zuaih zuaih in a tal khur chawrh chawrh a in han leng leh awrh a a zal hlen ta raih a,Sângtuala chu tlan zawk in Pasâltha Lianmana hnung a tlangval pakhat chempui vai zawk chu a han sat lir tawl a,a bul a chempui zak kau meuh a lo lek kang mek chu a tlawh thlu tawp a,tlangval pakhat zawk chu a han chip thlak leh nghal zat a,Thûamkunga te pawh lo tlanin Tlangzawl tlangval te chu an kuk thlu zawih zawih a, pasâltha Lianmana dar zungchal chen lai a kak thisen in a bual sen nguai chu an han buaipui a,Sângtuala Thûamkunga leh Chungliana chuan an silai kausa chuan Tlangzawl Lalpa leh khawnbawl te chu an tin thap a,an mitmeng a tang chuan pawisak an neitlem tih a hriat in,silai hmehpuah chu an châk zawk ni hian a hriat zaw mah tawh a.

Lal Zauliana chuan kut phar chhuah pah chuan ‘khawngaih in min kâp suh u,thil chu ka siam tha leh vek ang’ tiin Tlangzawl tlangvalte chu an hmanrua dah tur chuan a vin tuar tuar a,an hma a mite hawiher an hmuh chuan an râlthuam chu an paih sap sap a,Sângtuala chuan ‘k’u Lianman a na em,hengho hi engtin nge kan tih dawn ? a han ti chang rat a,a hliam chu thlek zawkin ‘chaw ei ti tui tawk pawh a nih loh hi,khawnge kan Tlangzawl Lalpa kha’ tih pah chuan hnaih chilhin ‘nang khaw khat Lal ve lem chuan i khua te zah tlak a nun pawh i thei meuh lo chu a ni ngei ang maw ? tih pah chuan a mit chuan a melh tur khuih a,Lal Zauliana chu hnuai lam bih chuan a kun chal a, thlantui vang a hmai mawm hmarh chuan thawpui la halh in ‘ka theih tawp chu ka chhuah ve bawk a sin,hetiang hi ka duh dan lah a ni hek lo, heng mite hian kei mi pawisa loin an duh ang takin thu an lo vai tlang ve a ni e,val upa Lianmuanga te chhung ka hnawhchhuah chhan pawh ka khaw chhung a thisen a luan ka hlauh vang a ni a,tunah lah ka beisei loh leh duh hauh loh hun kan tawng mek a ni si a,eng kan ti zo te nge maw ni dawn ni ? tiin a thlan chu a hru fai pawk a,engpawh nisela ka bawlpu in inhliam chu a enkawl ang che u tiin Lal in lam a kal tur chuan a han sawm a,khawbawl upate pawh chuan Lal sawmna chu ngaih pawimawh sak hram tur chuan an ngen ve hlawm a,pasâltha Lianmana chuan a naute chu rawn in an sawi khawm hnu chuan,khawchhung luh chu fel dawn in an hre ta lo a,pasâltha Lianmana chuan ‘Lalpa min hrethiam la, kan duh loh thil chu kan chungah a thleng ta reng chu a nia, kei ni hi kan lo kal leh zel a nih chuan buana zakhawrawih kan paw chhuak thei tlat a ni,kan Lalnu Thanthûami chuan a khaw ramchhung a buaina chinfel hi a ma hriatpuina tello chuan a rem ti hauh lo a, khawchhung himna ti derthawng thei tur lah a duh na hek lo,kan tun boruak an hriat hun ah kan tlangvalte kan thunun zo lo a nih chuan kan thiam loh ah kan ngaih hauh dawnlo a nia.Tin, tun a heng mite silai hi kan hawn dawn a,min um zui a nih vaih chuan kan lo kir leh ngei ang kan tih tur chu in hre mai ang’ tiin silai chu a naute chu khawm tur chuan a hrilh nghal a,Lal chhanna pawh nghak lo chuan ngaw ah chuan an pil bo thuai a.

Satlâk valrual te an liam chuan Tlangzawl tlangvalte chu an phun ta noh noh a,mi tlemte in an khawdaiah an thiante an nunna an la in,an silai lah an khawm sak hmiah mai a ni si a,mi tlemte chauh pawh ngam lo khua nih chu an tlawmngai in an lung a dam thei ta lo,a khawpum chuan tawrh phah dawn mahsela pasâltha Sângtuala te chu um zui ngei an tum ta a,an zan mu nanchin ngei tum chuan tlangval sawmthum tha zet in telin an Lal te remti lo chung chu kal lui tur chuan an insiam lui ta a,an chhuah dawn chuan Tlangzawl Lalpa Zauliana chuan ‘Lal thu meuh pawh zahlo a in paltlang luihna mawh chu nangni ho hian in phur ngei ang lo ngai reng ang che u’ tiin thinrim tak chuan a vaibel dawn chu a seh rep rep a,tlangal te pawh hmanhmawh tak chuan Satlak tlangvalte liam na lamah chuan an liam ta thuai a.

Sângtuala chuan a han ngaihtuah in Tlangzawl tlangval te chuan an umzui ringin mual an chuan liam chuan ‘k’u Lianman ka ngaih a tha thei hauh lo,Tlangzawl lamah khian let chho ila thim hma zawng chu an zia a thlir teh reng ang u, chanchin eng emaw kan hriat loh tak leh zawiin kan inchhawp thla mai tur lah niin’ a han ti a,midangte pawh chuan a dik dawn hle hian an hria a,thawm nei hauh lo chuan sulhnu langlo thei ang ber chuan an let leh ta a,tuibur hmuamda awmah chuan Lal Zauliana thinrim beidawng aw lo chhuak vau vau an hriat takah chuan a thiante chuan pasâltha Sângtuala chu ngaisang tak chuan an melh ta thap a,an thlangah chuan tlangval sawmthum dawn chu hmanhmaw tak chuan Satlâk tlangvalte liamna hnuah chuan an liam thuai a, thawm pawh an dim ve khawp mai an zingah chuan pasâltha ralhrat an awm lo tih hriat tak chuan an bawr khawm leh lat lat a,an rindan chu zuiin hma lam pan chuan an kal zel a.

An hma a mite thawm hrepha zel chuan zuiin a hma a val upa Chhâwnthiaua ho a mei an chhemna lam a sul chu zuiin an meichhemna hmun hlui an thlen chuan inhnial thawm lo awm in thenkhat chuan kir leh an duh ta hial a,thenkhat thung chuan ramri kawr a chan mai an rawt a,hnuchhui hi a pawimawh ber lo ramri ah an in thlahdah lai nangching turin kal ila ti a rawt pawl te chuan an thiante chu an hmin thei ta hram a,hmanhmawh tak chuan an sulhnu hlui zawh chuan an kal zel a,khawfing chah chuan ramri chu thlengin an han sawi khawm a Satlâk ramchhung lam a tanhmun siam chu an rawt leh ta a,an zing a hotu chanchang deuh pakhat ‘kan Satlâk khaw ho chuan an ramchhung kan dai hi an ring hauh lo a nga,an in thlahdah lai takin kan thawngthut dawn a ni,kan ramri ah chuan keini ai a ralhrat an nih vang hian chet fuh loh palh a hlauhawm deuh si a,an pasâltha khualthang kan dahthat chuan Tlangzawl tlangvalte hi min zuam tawh hauh lo ang’a han tih chuan an ni pawh chuan an han ngaihtuah chuan tha an ti khawp mai,fimkhur tak chuan inchhung dung awmah chuan Tlangzawl lam hawi chuan an in semdarh ta far hlawm a,an rilru chuan Sângtuala dahthat ber chu an tum ran hlawm a,a ni ang pasâltha khualkai meuh an dah that chuan Tlangzawl khua te chu tu khua mah chuan an khin ngam an ring tawh lo a ni,rilru hlim tak chuan an thu nui var hlawm a.

Tlangzawl tlangval rawtna an hriat chuan a fing an ti ve khawp mai,hrelawk sa lo sela chu an chetsual dan tur an hriat chuan an ngaisang letling hial a,chu rawtna neitu pa chu a theih hram chuan a nungchung a man tur chuan an ti a, pasâltha Lianmana chuan engtia tih chi nge ni dawn ? tiin a naute chu a han rawn a,Chungliana chuan kan chhak lawkah khian lung hmun a awm a,a lungpawh arbawm tia tia niin lum khum ka châk khawp mai a tih chuan Mualkunga leh Thûamkunga phur zawng tak a lo ni a,nui sang chung chuan ‘Chunghnap,i thil sawi chu i chiang meuh maw ? lung sahbuak siam in hrui sei deuh in he lai a tang hian han ti chim ila,Tlangzawl tlangval satha tak tak han tlan vel pawh hmuh a chakawm a lawm le tiin a nui sung a,nui sang chung chuan Chungliana chu zuiin Tlangzawl tlangval te chhak lamah chuan an tawlh liam ta zal zal a,Chungliana sawi ang tak chuan lung arbawm tia tia chu a lo let phung a,a chaihna hruitur kawi hrui sei deuh mai chu Thûamkunga chuan hmu fuh in a thawmchhuah hlau tak chuan a chhat thei hram a, a hmawr lam duh tawk a thui chhat tur chuan thing ler ah chuan lawn in a duh tawk a chuan a chhat a,a zawmna tur a chhah leh hnu chuan lungawi tak chuan a han khi suk a,an duh tawk a an siam hnu chuan Tlangzawl ram lamah chuan phei leh in tanhmun chu an siam leh a,Thûamkunga chuan pasâltha Lianmana a buk nghat chuan a hrui hmawrh chelh chu a han phih nghek a,Lung arbawm tia tia chu a lum thla ta rum rum a.

An chhak lam a tang a lunglum thawm hria an hawi chhoh meuh chuan Tlangzawl tlangval te chu an te teng tung hmanhmawh tak chuan an ram lamah chuan an tlan ta sung sung a,tlangval sawm chuang chuan hliampui tuarin an then chawk chawk hlawm a,an chhak lam a thawm chhuahna lamah chuan tlangzawl tlangval pakhat chu chho in kawihrui hmawr chu a lo chhui let zar zar a,Thûamkunga chuan ramri kawr lung ah hrui hmawr chu a tawn in a pilbo thuai a,thawm a awm zui tak lohah chuan an thiante hliam tuar chu buaipuiin an ram lamah chuan an in thiar phei thuai a,tlangval pahnih phei chu an chatthla nghal a,chutia an din khawp thap lai chuan pasâltha Lianmana chu silai chengkau hum chung chuan a lo pen chhuak a,a piah ah chuan pasâltha diar khim vah chung chuan Sângtuala pawh a lo pen chhuak a,an hmelah chuan dawhtheihna an nei tam falua lo tih a hriat khawp mai, aw nelawm loh zet hian pasaltha Lianmana chuan ‘in râlthuam kha dah thla vek rawh u,vawi thum thleng ka chhiar dawn’ tiin silai lekkawh in Tlangzawl tlangvalte chu a tin nghal a,dawihzep deuh te chuan an hmanrua dah hnuhnun hlau chuan an silai leh chempui chu an thehthla sap sap a,tlangval pathum te erawh chuan an silai chu lek kawh thutin a cheng an kau fel chauh tih chuan silai a lo puak dawp dawp a,chung tlangval pathum te chu an tlu zawi hnawk a,nunna nei tawhlo tih hriat tak chuan leichar ah chuan an mu zawi ta reng a,Sângtuala chuan chempui lek chhuakin Tlangzawl tlangval ding khawm thap te chu a pan hnai a,tlangval te chu an tawlh hnung dual in an râlthuam paih thlak chu a khawm zung zung a,Satlâk tlangvalte chu an han in rawn khawm a,ei rawngbawl chuan Thûamkunga te ho chu an che zung zung a,an chungah eng tak thleng ang maw tiin Tlangzawl tlangval te chu an lo phun sap sap hlawm a.

Tukthuan an peih chuan an bar mawlh mawlh a,an bar zawh chuan an mi mante chu an ei tir ve nghal a tlangval pangâ te chu hlang siam sakin ruang pakhat zawn in Tlangzawl lamah chuan an haw nghal nalh a,midangte erawh chu tingmit in Satlâk khaw lamah chuan an kawi ta duah duah a,an hnungah chuan zawite te a phun sap sapin pasâltha Lianmana leh Sângtuala chu an phun dun sap sap a,mual hnih lai an kan hnu chuan an mi mante chu dintir in ‘engpawh nise,kan unaute in nihna a bang chuang lo,chuvang chauh chuan tunah hian kan chhuah rih ang che u,mahse kan lo thawk tha leh ngei ang,chu mi hunah chuan kan dim dawn hauh lo ang che u,in chungah eng pawh thleng sela min dem hauh suh ang che u,tunah kir leh ta ula in thiante khu zu buaipui tawh u,ka sawi tawh ang khan kan lo thawk leh ngei ngei dawn tih erawh theihnghilh hauh suh ang che u’tiin Tlangzawlho chu chempui pakhat nen an thian hliamte awmna lamah chuan an kal tir in,an ni chu hmanhmawh lo tak chuan an khaw lam pan chuan an kal zel a.

Lungdawh chu unau hmelhaiah thlengin râlveng an dah ten pasâltha Lianmana dar hliam an hmuh chuan an thinrim chu an rawl a ring ta khawp mai,lungdawh lam a thawm deuh hlat chu beng dawh a awm Satlâk tlangval te chuan hriain an lo tlan khawm thuai a,thil an hriat chian chuan rawlthar thisen lum ho phei chuan an hmuh theih ang chu an a ri ta sawk sawk mai a, pasâltha lianmana chuan han khap tum mahse a khap thei mai hauh lo,tlangzawl tlangval an man an dahna lam ah chuan Satlak rawlthar leh tlangval thenkhat chu an tlan ta huk mai a,chung tlangvalte dang tur chuan Sângtuala te thianzaho pawh chu an tlan ve thuai a,an khaw tlangval lo tlan hum hum thawmah chuan Lal mual lamah chuan an lo tlan chhuak ve ta hum hum zel a,an mahni lo tlanpel tu Sangtuala te thainzaho chu mipui ep zawng chuan ding,a tul a che chhuak mai thei tur chuan an hmanrua pawh lek mai inpeih chuan an din tlar thap a,an mahni ep zawng a an khaw in nghahna te lo ding an hmuh chuan tlangval leh rawltharte chu an ding thap a.

Lalnu Thanthuami leh khawnbawlte pawh leihkatlangsang ah chuan an lo dak far in,an tlangvalte che zia chu mak ti tak chuan an thlir ve ta thap a,mipui ep zawng a Sangtuala te thianzaho ding an hmuh phei chuan an mak ti chu a zual kher mai,tlangval te an din chuan Sângtuala chuan zawi fiah fek fawk chuan ‘nangni kan khaw tlangval chhuanawm tak tak te u,in huaisenna leh inpekna ka hmuh hian ka thlamuang khawp mai,kan pasâltha chung a kutthlak tu hi ka ngaidam kum khua dawnlo tih in hriat ka duh a,tun hun a kut thlak in tum mekte erawh chuan tun thilah hian in rawlhna an nei ve lo a,pawisawilo chung a kut thlak hi a rem kan ti thei hauh lo,misual chu tumah kan dim ngai bawk hek lo inngaihtuah chiang deuh ang u,pawisawilo kut kan thlak ngawt chuan kan khua leh kan Lal ngei pawh a hming chhe lutuk a nge,keini hi Lalnu hming mawina leh chhiatna keng tu kan nih hre rengin ngaihtuahna fim hmang hram turin ka ngen duh che u a ni’ a ti a,val upa leh pasaltha dangte an lo thlengin thu awmazia an hriat chuan an ni pawh an thinrim chu an hmel a dur ta khup mai a,Satlâk tlangvalte chu en in ‘naute u kan pasâltha hian a sawi dik chiah a ni,he lai a mite hi chu kan pawisawi tur khawpin an che chhuak rih lo e,remna palai meuh pawh kut thlak duh tu Tlangzawl khua chu engtia tih tur nge tih kan Lal te kan han sawi pui phawt a nga,zawlbuk lamah kan thu lo ngaichang mai ru,heng kan mi mante hi chu theihnghilh rih ang u tiin an han sawi a, tlangvalte chuan val upa tlangzawl khua chu va run mai kan duh thu lo hrilh mawl ang che u,kan lo insiam in zawlbukah chhuah hun tur nghakin kan lo awm khawm dawn tiin Lal hnenah chuan lo thlen ang che u ti a lo au noh noh in, tlangval pakhat chuan mipui aw chhilh thak khawp a ring chuan 'tunah in siam ula,in pasâltha thlavang in hauh ngam a nih chuan tuibur hmuamda ah zawlbuk lo kai ngei ang che u,a lo kai ngamlo te chuan puanfen feng nghal ang che u' a han ti lauh lauh a,chu aw chhilh chuan satlâk tlangvalte chuan kei ka kal ang tiin thinrim awrawl chuan khawchhung fanchhuakin an thinrim chu an ri ta hulh hulh mai a,Tlangzawl tlangval tangte chuan dam a chhuah inring mawlh hek lo le, engtik ah nge ka thih ang tih ngaih tuah chuan an khung khawmna bukteah chuan an thu khur dar dar hlawm a.

Satlak Lal inah chuan khawnbawl te chu an awm deuh vek a,khawnbawl pahnih te erawh an la kim lo,Lal nu chuan tlangaupa chu khawnbawl te ko tur chuan a tir nghal a,tlangau pa lo let chuan 'Lalnu kan tlangval te khu rei kan chelhtheih ka ring lo,zawlbukah an inhrosa nasa in a thente chuan kal an rawt hial a,tlangval tu mai pawh chuan Lal leh khawnbawl ten a nem zawgin sawi hamse,palai em kut an thlak vangin an khaw pum a kan hal lo a nih vek chuan Tlangzawl khaw chanve tal hal ngei tur a ni'tiin an in sawh nasa khawp mai,a thleng hnuhnung a piang an thinrim zawk lehnghal a khu tiang hrim a kan tlangvalte thinur ka la hmu ngai hauh lo' tiin thaw hlap hlap chung chuan a han sawi a. Lalnu Thanthuami chuan 'ka tlangvalte hi an thinrim khat khawp asin,kan reman tur a thu pawh ngaithla duhlo in chemsen min lek khum a ka dawh dwan hauh lo,an thiltih sual man chu an hmu ngei tur a ni nunna hlut zia leh buaina pumpelh that zia hriain ka theihtawk chuan chu kawng chu ka zawh a,ka chaklohna ah ngaiin ti hian min chhang vei maw, ka pasaltha thisen chu an rul mawlh ang' tiin a thinrim lutuk chu a mittui chu a khap per chhak chhak a.

khawnbawlte pawh chuan chutiang khawp a an Lalnu thinrim chu la hmu bawk heklo le,khawnbawl upa Lianmana pa chuan 'Lalnu khawngaihin min hrethiam la,Tlangzawl Lal duhdan a che an nih loh zia pawh kan hre chiang tho bawk a. Tin,a tuartu hi ka fapa a lo ni kher bawk nen,a nun chan zawk pawh Tlangzawl khuate an la ni leh zel a,keini chu khuanu zar ah kan dam a nga,reilo teah kan tha leh mai dawn a lawm, Tlangzawl Lal thu i ngaichang phawt teh ang u'tiin a han rawt a,khawnbawl dangte pawh chuan 'chutiang a kan upa in a tih theih chuan tun tum chauh chu Tlangzawl Lal thu chu kan ngaichang mai dawn a mi' tiin an lo tui hnih va sap sap a, Lalnu Thanthuami chuan thinrim mitsen ram chuan a khawnbawl leh val upate leh pasalthate chu a han melh vang vang a 'tunah chuan ka dawh dawn reng reng lo,ka pasaltha te thlavang ka hauh ngam loh chuan kei hi Lal ni tlak ka ni lo a ni,Tlangzawlah chuan va kal ula remna duh lo na fam chu in duh tawkin va che rawh u,an khua saw hal fai vek mah ula pawi ka ti ther te lo,chung ka sawi ang in ti thei dawnlo a nih chuan kei mah ngei ka thawk chhuak ang' a ti ta hmiah mai a, val upa te pawh chuan 'zual ko emaw palai chung a hriam lek hi ka la hre ngai hauh lo,an ni erawh chuan min kan nundan kalh thakin kan chungah chet an thawh a,in nawr luih ngailo a he tiang a i mite i hum halh hi kan lawm e' a tih lai mek chuan Mualkunga chu hmanhmawh tak chuan lo thaw lut hlap hlap in 'Lalnu kan tlangval te chu kan dang zo lo engtin nge ni dawn ? tiin a melh kual nghal ruai a,Lalnu chuan 'va kal ula Tlngzawl khua chu va suasam rawh u,in duh thalin va cherawh u' a lo tih chuan.Mualkunga chu lawm a khi sang chuan pasaltha te chu melh in hmanhmawh tak chuan Lungdawh lamah chuan an liam ve nghal thuai a.

Lungdawh ah chuan a hnu fum pawl chu hmuin val upa Chhawnthiaua chuan ding vek tur chuan ko in,an val upa rawl an hriat chuan an lo let in tlangvalte chu an lo phun nang nang hlawm a,an lo let kim hnu chuan 'engvang a Lal thu lo a lo kal ngawt nge in nih chu le,in va huai hlawm ve mawle Lal ai a thunei in awm a mi,nge hmeichhia a nih vang zawkin in pal lui zawk,ai upa zahna in va nei lo lulai ve maw le,in himna ngaihtuah theilo khawpin Lal hi a awm tawh reng em ? tu thu berin nge in lo kal ve thawt thawt hlawm a' a han tih meuh chuan Satlak tlangvalte chu an reh ta thap a,an ngawih tak thapah chuan val upa chuan sawi zawmin 'mi kawipa hnih pa thum vangin tunah pawh tiang thil tih ngai hi a ni a,tun hnuah chuan nangni hian Lal leh val upa leh pasaltha thu lo chuan hma in la tawh tur a ni lo,thinrimna in hneh tirte hian thui an thleng ngai lo' a han tih chuan Satlak val rualte chu an ngawi thap a,tunah hian vai kal ngai leh kalna chi a ni lo,kan vai hian kal vek ila,tunge kan khawchhung lo veng him ta ang a han tih zawm leh chuan an thiltih sual chu an hre chiang ta tawlh tawlh a.tlangvalte chu an meng hnuai ta raih a.

Lalnu chuan kan pasaltha chung a an lo chet danah a lawm loh em avangin Tlangzawl khua va tlawh ngei chu a rem ti a,an tihsual chung a hreman chu lek ngei pawh a duh dan ani,chutih rual chuan tumah u chuak tak a chet loh tur,hmeichhia leh tar chaklo leh naupang chungah te a u chuak tak in tumah chet loh tur, tu nge kal tur pawh kan ti fel tur a ni a han tih chuan tlangval te chu kei mah ti chuan an au rual dual a,Sangtuala te thianzaho chu awl tur chuan ti luiin pasaltha Phulliana,Laiawrha Sukthanga leh a mah chu kal tur a in ruatin tlangval mi sawm sarih chu an in thlang chhuak leh a,midangte erawh chu remchang hmasa ber a kal ve tur chuan an in ti fel thei ta hram a,kal tur an in thlan chhuah chhung pawh a rei em vang chuan thutmuan ar khuan rual chuan lungdawh chu an chhuah san thei ta hram a,kal ve theilo tur te chu ralveng an dah hlawm a . . .

Lo tawk leh phaw tehse,ka hman tawk leh theih tawk a ni e

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:24 pm

PASÂLṬHA SÂNGTUALA (Mampuia Pa)

BUNG - 128


Tlangzawl tlangval ten Lal mual an thlen chuan nunau chu an lo pung khawm thuai a, Lal Zauliana bulah chuan a lei kuai zawng a sawiin 'Satlâk tlangval te chuan an ram chhungah an rin loh lai nang ching thutin an kah thu te, Tlangzawl khúa pawh a rang lam a run ngei an tum thu te sawiin, an laina khawdang Lalte pun mai tur chuan Lal Zauliana chu an fuih sauh sauh a' an thu hreve nunau te chu an mangang in an phi ruai ta mai a, Lal Zauliana rilru pawh a buai ta nak mai le, Satlâk khaw tlangval te chuan an thu an hlen ngei ṭhin tih a hre chiang hle bawk nen. Ruang chu an inlam a zawn thla mai tur a hrilhin, khawnbawl te nen chuan inchhung lam chu an pan ta thuai a, ngaihtuah bing tih hriat tak chuan an ṭhu kun ngal hlawm a, Lal Zauliana chuan a ṭhian ṭha khuate pun mai chu a duh viau laiin, a bul thumah chuan an thiam loh tih a hre reng a, Satlâk khua hi lo run in lo chiming țhak thei pawh nise, Lehlawn Lal Zamloa hian ṭhian ṭha leh a mah lainat tu a ngah mai si a, chung a ngaihtuah chuan Satlâk khua chu in punkhawm a run thut duhin finrawl chhuah a, remchang lâk ngei tum chuan, Satlâk lam a kal tur chuan a tlai a tlai chuan an in buatsaih ta a, khawnbawl te an lo thlen a kal an tum lai chuan, nunau thawm lo hnai zel chuan Tlangzawl khaw Lal mualah chuan a lo hnai zel a, Tlangzawl tlangval ten man a an sawi, an tlangval ruang zawn a lo kirte an hmuh chuan Lal Zauliana pawh a buai ta nak mai le, a ngaihna hre lo zet chuan a en hau a, an Lal hmel a zawhna an hmuh chuan chung tlangval lo thleng thar te chu an kun ngaih hlawm a.

Lal Zauliana chuan inchhung lamah hruai lutin thu awm zia a zawt hlawm a.
Tlangzawl tlangval haw hnuhnung te chuan thu dik sawiin, Satlâk tlangval ten an bum let dan an sawi ta vek a, Lal leh khawnbawl upate chuan an chanchin chu ngaihnawm ti tak chuan an lo ngaithla a, an sawi zawh chuan an ngawi ṭhap hlawm a, ngaihtuahna dang a neih tâk vang chuan,
Lal chuan 'awle nangni ka tlangval ten kan thangtlawm lutuk tur in venna hi ka theihnghilh tawh hauh lo ang, in ṭhiante thisen lah a thlawnin a luang bawk hek lo ang, tunah chuan kan thang mawilo lutuk dâwn vangin remthu sawi turin kan chhuak phawt a nga, remchang hmasa berah kan che chhuak leh ang, he thu erawh nunau in a hun hma chuan an hre tur a ni lo, in buatsaih nâ ṭha kan mamawh dâwn a, in theih chinah lo in hmakhawsuih ang che u' a han ti a, thusawi chu a rilru sawi chhuak tih hriat tak chuan a tak ngul a, in ṭhiante ruang pawh an chhungten an ngai tawh an haw pui rang rawh ule tiin a thlah ta a.

An tlangvalte chhuah hnu chuan khawnbawl upate chuan. Lal chu melh in 'Lalpa nichin a i thusawi kha i ti tak tak em mi,Engtia hmalak nge i tum ? tiin an zawt a, Lal Zauliana chuan ' tum e mawle, hmeichhe khúa pawh kan ngam loh chuan a zahthlak dawn läwm mi ? tunah chuan kan thangchhe lutuk dâwn a, buh seng zawh lam kan ṭhawng thut tur lah niin' a han ti fak fak a, seki khat lung zupui tui tling chu thawkkhat pawp pah chuan pawn lam chu a melh vung vung in, hawh ule i kal tawh ang u le, zan riak chhuak meuh a thawhchhuah lohna pawh a rei ta e tiin a han tho chhuak ṭuih ṭuih a, khawnbawl upa te chuan zuiin an mahni lo nghak reng tu, tlangval sàwm hnih dâwn te chu an fin phei ta a. Tlangzawl Lal ngaihdan chuan khawnbawl upate ngaih chu a ti ṭha lo khawp mai, pi/pu chen a thianglo an tih ṭhin palai chung a kut an thlak hnu hmanah a ai ṭhalo zawk tih tum chu an ngaih a ngam thei lo a ni , ni sukchen a la awm tih chuan lungdawh chhuahsan in, ngawpui chhah tak hnuai chu an dai lut ta a.

. . . . .

Satlâk valrual te chu thinrimna vang chuan ngawi reng a kalin, phuba lâk châkna chuan a pawt hneh bawk nen an kal sawt khawp mai, thingsemim chu an hmawm pah zauh zauh hlawm a, nghalrual hnu chu hmun tinah awmin, savawm hnu lian leh thar tak tâk chu a awm thluah bawk a, thimchian hma a eirel tur chuan Val upa chuan tlangval te hrilh in, tui hmun ṭha deuh an hmuh chuan, tlangvalte chu an phe nghal suau suau a, eirel lo te chuan mei chher siam in an che zung zung hlawm a, kar loah eirel pawh peih in muangchang lo chuan an kil nghal a, kham hnuhnung nih hlau chuan tlangval te chu an tho thuai a, val upa ten vaibel an zuk lai chuan châw eina ningnawi chu an seng fel nghal sawk sawk, an val upa leh pasâlṭha te chu ngaichang in an chet phung chu an mitmei ran a, meichher an chhit kai chuan val upa Chhâwnṭhiaua chuan hmahruaiin Tlangzawl lam pan chuan kal an siam leh ta.

Thutmuan ar khuan hun awmah chuan Tlangzawl lam aṭang a meichher eng lo in zui dam dam chu hmù in, an meichher chu an timit thuai a, an silai en dik nghal in an khaw in nghahna te chetzia chu an thlir ta ṭhap a, an hruai tute inrawn chhung a lo din muan pawh. Satlâk tlangval te chuan a rei an ti khawp mai, an zâ sek hlawm a pasâlṭha Sukthânga chuan 'naute u kan hma hun a kan tawn tur ka hre hauh lo a, kan Satlâk khua leh tui tán theih tawp chhuah tlâng turin ka ngen nawn leh duh che u a ni, zam a khur tur leh kut tim turte in lo awm a nih chuan, kan ram lamah sawn tunah kir nghal ula, chutiang a nih loh chuan thih leh ruam khatah, dam leh tlâng khatah kan ti ho a niang chu, râl hmaah hleihluak tâk a chet erawh mâl in a zawng ngailo tih hria ula, chak tur chuan engpawh tih mai tur a ni, fumkhur nâ thlahthlam ngai suh ang che u, Satlâk khua leh Lalnu Thanṭhûami tán' tiin tlangval te a han fuih hnu chuan hmahruaiin, tlangval te chu hmun thum ah ṭhen in, tlangval sàwm thum dâwn thaw hruaiin hma a hruai ta nghal a, inchhung dung let hnih zeta in hlatin val upa Chhãwnṭhiaua chuan tlangval sàwm hnih ṭha lam mah hruaiin a zui ve nghalin, Laiawrha chuan tlangval sawmthum dâwn thaw hruai chuan hnung a dawl thung a.

Pasâlṭha Sukthânga te chuan mual thum lai an kan leh hnu chuan an thlang ruam a Tlangzawl Lal leh a ṭhihruai te lo chho dam dam chu an lo tin fur a, a man thâl a thlah hma chuan tumah chet thawh lo tur chuan a naute chu a hrilh ngun khawp mai, an tum loh deuh a Lal leh khawnbawl te an hmuh chuan, Satlâk tlangval te chu an lunghnur ru khawp mai, han in nuai rep repna tur mawlh chu awm sela tiin an lo ngaihtuah ran hlawm a.

An ṭhianten Satlâk tlangval te an lo fin chuan, tlangvalte chu an ner nawk nawk hlawm a. Tlangzawl Lal te pawh an lo thleng chho ta in, hmun zawl ah chuan thawpui chu an la ham ham hlawm a, kal thui lua lo mahse chhuak vak ngailo tih takah. Tlangzawl Lal Zauliana chu a thlan chuan a bual zuih a, puan tlâng chuan a hmai chu hru pawh pawkin, a khaw lam chu a han thlir vang vang a, zu in nasa tih takah zu rim chu a nam leh huk thin, tunah chuan an mu dâwn tawh ang chu maw ti a phun sup in, Lal chuan 'zanin chu helai ah hian kan mu phawt mai dâwn nia, Ram ri lah a hla tawh law, naktuk chhun laiah Satlâk khua chu kan thleng hman mai tur ah ka ngai deuh' tih pah chuan thing bul ngheng chuan a ṭhu hnawk a, an Lal chau tawh hmaisen deuh ṭul chu thlirin Tlangzawl khaw ho chu an ding ṭhap a, an khaw ram chhung ala nih vang chuan an che pawh an la thlamuang rih viau mai bawk a.

Tlangzawl tlangval te meipui chheh a lo alh ṭan lai chuan, Laiawrha leh val upa chu an han in bekbawrh sar sar a, an naute an fân kual lai chuan. Tlangzawl lam aṭang chuan meichher in zui hi alo kal leh ta duah duah a, chutia meichher lo in zui duah duah an hmuh chuan, Satlâk valrual te pawh a ngaihna hrelo leh mak ti tak chuan an hawi hau a, an mahni la in lan rihlo a thil hriat chian phawt ṭum chuan Satlâk lam chu ṭanhmun an siam sauh sauh mai bawk a, meipui eng a awm Tlangzawl khaw ho hlei hlei chu a mâk tiin meichher eng chu an thlir ṭhap a. Tlangval te chuan an silai endik in ṭanhmun rem chuh chuan an ding far mai bawk a, meichher eng lo hnai zel ah chuan pasâlṭha tih hriat tak leh mahni inring tawk tak, a hawiher ah pawh midangte chungtlak ching tih hriat tak, Dengkhuaia pasâlṭha, hrohrang nâ leh thinawrh zet mai Saithanga (a pu saingho kah len hming chawi a an sak) chu lo thlengin, Tlangzawl Lal Zauliana leh khawnbawl upate chu a han melh kual a, a naute chu a hnungah a ṭul thulh a che mai thei tur chuan an ding ṭhap bawk a.

Saithanga chuan 'Lalpa nang leh i khawnbawl upate meuh helai ramdai ah ka han hmuh che u chu, a va han pawimawh ta awm ve' tiin a han be luam a, Lal Zauliana chuan a hma a mi, mizia hre tak chung chuan 'Satlâk khaw tlangval ramvak chu ka khaw ram chhung a lut in, ka tlangval te nen thu bahsual an nei a, Satlâk khúa te chuan bei thut in, silai leh ka tlangval sàwm lai mai chu min man sak zui a, khaw in thenawm mai, sâ leh dosi kar pawh a in pui tawn tur kan nih hriain, zai ka dawh hram hram a, chinchang zawt chiang tur a ka tirh tlangval te chu kut an lo thlakin, an ram chhung an dai leh a nih chuan khaw runah hial an lo vau zui ta dah a, hmeichhe Lal nâ khúa tih takah, duai zawk chan ka la châng a ni e, ka tlangval te han la chhuak kim ngat ila, kan khu luai ngei ang' thinrim hmel tak chuan a han ti a.

Lal Zauliana thu an hriat chuan tlangval lo thleng thar te chu an rum ngal ngal hlawm a, kei chhippheng Lal Dengkhuaia pasâlṭha Saithanga hian Satlâk khua chu ka hâl darh ngei ang, ka laina hnai that tu lo hum tu khúa hi ka dim hauh lo ang, chhantu neih vang a in la pasâlṭha an Sângtuala lu ka khai hun ah meuh chuan, an mipa te pawh in bawk khup in chibai mi buk ngei ang tiin a in hrosa tun tun a, a hmel vawikhat pawh hmuh hma a, chu tiang khawp a a nau chung a kut zà a hmuh meuh chuan Laiawrha chu a sâ zak mai le, thinrim tak a silai lek kawh vah in hmalam pan chuan a pen chhuak a . . .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:25 pm

PASÂLṬHA SÂNGTUALA (Mampuia Pa)

BUNG - 129

Val upa Chhâwnṭhiaua chuan Laiawrha chu lo man bet in, in bengdai tur chuan a hrilh sar sar a, pasâlṭha Sukthânga chuan khawfing chat mêk hnuaiah chuan Satlâk ram lamah a duhlo chung Laiawrha chu an hruai lui ta a, a thinrim lutuk chuan hachang chu a ṭhial bap bap reng a, ramri kawr an thlen chuan, zo tuithiang vawt ver vawr an han dut khalh khalh hnu chuan, Laiawrha pawh a in ngaihtuah harh ta deuh a, chutiang khawp a anau chung a kut zà chu chhuah a tum hauh lo, ngawpui hnuai chu la thimruih mahse vàn lâm chu a eng uau tawh a, an ram lam an dai luh chuan thing phen aṭang chuan pasâlṭha Sângtuala chu lo pen chhuak in, an hma a mi an hmuh chian chuan mâk tiin an meng phar awn awn a. A kal chhante a sawi chuan pasâlṭha Sukthânga läwm leh mâk ti chu a ṭhen sak a, khawhnih tlangval te lo nghahna lamah chuan pheiin, tlangvalte chu Chhippheng pasâlṭha Saithanga ṭawng leh an khaw lam pan tum an nih dante an hriat chuan an thinrim chu an thum hak hlawm a, pasâlṭha Sãngtuala chu an melh ṭhap hlawm a, chutiang tâk a kut zà a nih ngai chuan tih tur kan nei zu nia a han ti châng rat a. Ṭhûamkunga chuan 'a va lawmawm dâwn ve, thazâ zualpui chu a reh thei ngei dâwn e, ka ngen mu hi chhuah châkin a tal sek tawh reng a' tiin a han khi

Pasalṭha Sukthânga chuan chulai hmun a lo nghak tur a hrilh hnu chuan, ramri kawr lamah chuan an in zui thlà ta nghal a,kawr kamah chuan val upa te hmanhmawh tâk a lo kal chu a an tawk a, kawr aṭang a inchhung let hnih awmah chuan ṭan hmun siam in kawr lam chu an tin ta far a, Thûamkunga chuan khawhnih tlangval an mahni puitu te chu a lo sem darh in, tlangval zathum dâwn ṭhaw chuan inring tâk chuan Satlâk khaw pan tu te chu an lo nghak ta ran a, tuibur hmuamda awmah chuan tlangval zà dâwn te chuan Satlâk ramri kawr lo thleng in, zawimuangin kawr chu an lo kân ṭan ta a, an duh chen an lo thleng ta tih chuan. Val upa Chhâwnṭhiaua chu lo pen chhuak in 'nangni kha tu khúa leh tui te nge in nih, rãl run tur ang hrim a in va che chhuak hma ve' tiin a han vin deuh ṭhak ṭhak a, an rin loh lutuk a aw an hriat chuan, tlangval te chu an ding ṭhap hlawm in, aw lo chhuak nâ chu an en ṭhap hlawm a, an hma a pa sanṭha tak chu an thlir ṭhap hlawm a. Pasâlṭha Saithanga chu chiai hauhlo in 'a tu chu nge maw i nih a, min lo hrawk nghal ngawt chu le, ka duhna hmun a piangah ka kal ang chu, i bulah ka in sawifiah a ṭul nâ ka hre hauh lo mai, tu nge i nih reng a' a han ti ve lang lang a, a veilam thing phen aṭang chuan, tlangval sâ in phut ṭha leh pian dik zaih mai, pasâlṭha diar khim vang chu lo pen chhuak in 'kan ram chhungah i duh thal a nuam i thai ngawt tur a nilo, ṭha tâk a awm tur nilo tán Satlâk ram chhung chuan luh a remlo ang, i kut kha dah hla nghal rawh, chutiang a nih loh chuan tukṭhuan ei hma in pawlan a sâi mai tur che a nia' a han tih zawm a, leh lam sir aṭang chuan 'thuawih hi dam reina a nia' tih ri lo chhuah leh phei chuan, hual beh an ni tih hrilh leh chuan an ngai ta lo.

Pasâlṭha Saithanga chuan an tlem zawk vang a vauzam tumah puhin, a naute chu a han buk khum zauh in tunah tih leh silai lek kawh thutin a hmet puak nghal dur a, Val upa Chhâwnṭhiaua beng bukah silai mu a ving nghal fur a, silai chu hmun tin aṭang a puak ta emaw tih tur chuan, Tlaizawng ngaw khawk chuan silai chu a in lawn ta ulh ulh a, Pachang thi tur rawl leh nâ ti chiau vawng vawng te, mahni hming chhal lauh lauh ri pawlh nuk chuan ngaw chhung chu a fan chhuak thuai a, sava zanriak te chu hlau in an thlawk darh ur ur a, zen khu zam chuan ramri kawr chu a bawh var nghal chuk bawk nen, ngawpui hnuai chu thisen chuan a bawh sen nguai bawk a, a rapthlak kher mai le, Chhipzawl pasâlṭha Saithanga chuan an chan chauh zia hriain, tawlh kir tur chuan a nau te chu a vin tuar tuar a, ngawpui hnuai mah nise khawvar zel vang chuan an langsar hle hlawm tawh a, Chhipzawl tlangval in saseng tur chu pasâlṭha Sangtuala chuan a Sai let tawp a, a bul a tlangval tal khur char char, mitmu rang lang vek leh thisen bual zuih a hmuh meuh chuan, Satlâk valrual chuan an mang ṭhak mai dâwn a ni tih a hrethiam ta, ngaihdan siam a hun tih hria a ngaihtuah buai lai ta khawp mai le.

Val upa Chhâwnṭhiaua chuan 'nangni ho kha in inpe dâwn nge kan mangṭhak dâwn che u' tiin a han au lang lang a, chutia an reh ṭhap lai chuan silai hi a lo puak leh dur a, Chhipzawl khaw tlangval pakhat insiam rem lai chu vir nawrk in a thawri bawrh bawrh in a khur char char a, a han thaw leh hrawih in nunna nei tawh lo tih hriat tak chuan a mu zawi ta der a, pasâlṭha Saithanga chuan duhthlan tur dâng an neih loh zia hriain, hreh tâk chuan an tlawm thu sawiin a silai theh chhuak in a bân a phar ta a, a naute pawh chuan an pasâlṭha tih ang chuan râlthuam paih in a an in pe ta, tlangval sawmhnih ṭha lam chu lo ding chhuak in midang erawh hliam buaipui ngai mi sàwm ṭha lam an ni a, pasâlṭha Sukthânga chuan a naute dinhmun a hriat chuan dam thlakhlelh nâ a nei ta lo, thangṭhat a lo lâk tawh te chu Satlâk khaw hmaah chuan engmah a nih loh zia hriain, a thinrim chu a meng tal tap tap a, a lo tih fo tawh angin hun remchang chu a melh ta ran a.

Chhipzawl tlangval an hnung khirh zawh chuan, Satlâk val upa chuan a naute dinhmun zawtin, hliam buaipui ngai an neilo tih a hriat hnu chuan, Chhipzawl pasâlṭha Saithanga chu a han pan hnai a, a naute hnenah chuan an phurna zai chat tur a a tirh hnu chuan 'nang hian kan khaw haldarh kha i tum maw, Satlâk khúa hi chutiang mai mai in haldarh chi a ni hauh hleinem maw, tunah chuan thlah zalên i ni ta a, Satlâk khaw chhiatna thlen i la duh a nih chuan kha ta kha i hmanrua a la awm e tiin a chô ta chher chher mai le, ruahman na ah a phalo tih a hria, chutiang khawp a a mah hlau lo tu chu a tawn vawikhatna a nih bakah, a hma a ding a en chuan hlauhna tâk a nei tlat mai a, a mah pawh mâk a in ti zawk hial a, pasâlṭha Saithanga ding zum reng leh a hma a mi hmel dur khup an thlir tawn reng lai chu, Val upa lo dangawm teh he mihring hi ka chanpual a nih hi, tu a nih ka hriat ve hma a ka lukhai châk a ram he ti leh chen lo kal nafam chuan a tum ti hlawhtling turin han bei ang hmiang tih pah in pasâlṭha Sângtuala chu a lo pen chhuak thauh thauh a.

A hma a mi ngawt ai chuan, a landan ah a zuamawm zawk vang chuan 'nang hi maw Sângtuala an tih chu, nang zawng hian ram he ti chen hi ka lo kal tawh a sin, tiin a iptepui let ngat lamah chuan pheiin a chempui lian ṭha telh tawlh chu a han lek chhuak nghal a, a hma a tlangval naupang lam in phut tawk tâk, leh in ring tawk tâk pian dik thlap mai a han en chian meuh chuan, a lo zuam ang ngawt a ni lo tih a hrethiam ta a, nui deuh säng mahse a mitmeng senram leh huhang nat zia a hriat meuh chuan, pasâlṭha a in chhal meuh chu a thau ah man in a chempui hum lai chu a khur ta der der mai le, Chhipzawl khuate chuan an pasâlṭha awmdan chu mak ti tak chuan an thlir ta ṭhap a, pasâlṭha Saithanga meuh pawh in a hma a mi vang a a khur hial mai chu mâk a in ti hle a, a thinrim nâ chawh chhuah tum chuan a mah chu a han in seh ruh sauh sauh a.

Pasâlṭha Sângtuala chuan a hma a mi chu a mit tâk a melh in 'pasâlṭha i zam ta deuh elaw, ram dai a ilo zalna ti hlawhtling tur chuan ka lo nghak reng che a nia' a han ti vawt raih a, a hma a mi chuan chet zai rello chuan a ding reng a, pasâlṭha Sângtuala chuan a hma a mi hnaih zelin,chet zai rello chuan a lo melh tlawk tlawk ringawt a, beng hup thawk chuan a han beng hawi sawk a, beng kiu rum rum chuan lo hawi in, pasâlṭha Saithanga chuan chempui chu a han vai nghal fua a, Satlâk lam tlangval te chu an ṭe dual a, an pasâlṭha chu an chân ngei turah ngaiin an thum huk a.

A hma a mi mitmeng danglam thut leh kut vai a hmuh chuan, pasâlṭha Sângtuala chu pen khat a tawlh hma zawkin, pasâlṭha Saithanga chu a dar chung lam a bin liam in, bân ruh ri rawp chuan a kut chu a han herh sak nghek a, kar awmlo chuan a chempui chu a vai zawk a, pasâlṭha Saithanga chu ring uai hnawp leh kiu ruh pawng pur in, lei charah chuan a tal khur char char a, an rin loh lutuk a thil thleng vang chuan, khaw li tlangval te chuan kâ hau chuan pasâlṭha Sangtuala chu an thlir ṭhap a, Chhipzawl tlangval te pawh chuan an hma a tlangval naupang tak, pasâlṭha diar khim vang chu an lo ral hriat ai a hlauhawm leh hmachhawn a hlauhawm zia chu an hre chiang ta, tu emaw khabe sep thiam deuh ten an seprawtui chawp mai a nilo tih an hriat meuh chuan, mak ti chuan an thlir ṭhap hlawm a, mak ti leh ngaisang tâk a an thlir ṭhap lai chuan in pasâlṭha kaiza veng ngam in la awm em tih pah chuan, an mi man te chu a han melh kual a, tumah han khing ngam an awm tâk loh chuan an piah lamah chuan vaibel chu a fawp ta vang vang a.

Val upa Chhâwnṭhiaua chuan Chhipzawl tlangval te hnenah chuan eng vang a Satlâk khua chu run tum nge an nih leh tu thu a hmala nge an nih a chu a zawt a, Chhipzawl tlangval pakhat chuan 'Tlangzawl khawnbawl upa in a fapa nunna la tu chung a phuba laksak tur a tirh thu leh lawmman ṭha tak a tawkdarh thu te, an mi um chu Satlâk khua bel a nih vang te, Lal Zauliana thusawi a tlangval te a lâk chhuah hnu a, run zui a Satlâk khaw haldarh vek an tum thu zia' te chu a sawi ta vek a, thisen lum lai a chutiang thu an hre thar leh chuan khaw thum tlangval te chu an sâ ta zak mai le, Lehlawn tlangval pakhat chuan 'Mai mai chuan le, Satlâk khúa hi Lehlawn khaw Lal in a ram chhung a duh tak a a dintir a ni a, hmeichhe khúa a nih vang mai hian maw an chung a chemhar in len tâk mai le, Tlangzawl leh chhippheng khúa chu hal darh vek ang aw' a han tih chuan, tlangval thinrim aw rawl chuan Tlaizawng ngaw chu a khawk ta rum rum a, an hma a tlangval an man te chilhlum nghal an tum chu pasâlṭha Sângtuala te chuan heng mite chu zualko atan kan la duh ang tiin an dang ta a, an pasâlṭha leh val upate chuan khap ngial mahse Tlangzawl khaw lam pan chuan an tleh ta hum hum a, tih ngaihna awm ta heklo le, tlangval thinrim che nâ lutuk tur dan tum chuan an hnungah chuan an zui ve ta ngawt a.

Val upa leh pasâlṭha ten Tlangzawl lungdawh an thlen chuan meikhu chu hmun tinah a lo zam chuai chuai tawh a, Tlangzawl tlangval ṭhenkhat ruang chu nunna nei tawh lo tih hriat tak chuan, kawtthler ah chuan an let thluah bawk a, nunau leh Lal Zauliana te chu mual tawpah chuan an lo khalh khawm ṭhat bawk nen, naupang leh hmeichhe te chu an men ṭuau hlawm a, pasâlṭha leh val upate hmel an hmuh chuan beisei nâ an neih vangin, Tlangzawl nunau leh Lal te chuan an melh ṭhap a, Tlangzawl khúa pawh a zahve lai a kang zo ta vek a. Val upa Chhâwnṭhiaua chuan in la dingte chu kang lo a ṭhelh tur chuan tlangval te chu thu a han pek chuan, tlangval te chuan reilo teah in kang chu ṭhelh zo thuain, tlangval te an lo kir leh chuan val upa chuan tukṭhuan buatsaih tur chuan a hrilh a, tlangval te pawh thuawih tâk chuan eirel chuan an che leh nghal suau suau a.

Tlangzawl Lal Zauliana leh khawnbawl upate hnenah 'Satlâk khaw chung a thleng tur a i duh ang chu, i khaw chungah a thleng ta zawk a nih hi' val upa Chhâwnṭhiaua chuan a han tih khum sak sak a, Chhippheng khaw tlangval te chuan Khawnbawl upa in thu a than dante, Tlangzawl Lal Zauliana leh an pasâlṭha Saithanga te in biak dan a sawi meuh chuan. An chung a thil thleng a mawhphurhna tu an khaw Lal Zauliana chungah chuan an phun ta noh noh a. A thiltih hai lan sak a nih meuh chuan Lal chu thinrim na leh huatna vang chuan a hmel chu a dur khup a, insiam ṭhat a hnek in a tih sual hai langtu. Val upa Chhâwnṭhiaua chu tih hlum tumin thingfak chuh in a vai ta fur fur a, Lal a nih vang a kut thlak duhlo in val upa chuan thingfak lo thlawk chu a tawlh kiansan hram hram zel a, khawnbawl upate chuan ṭhelh tumin an han khap ṭhin a sawt lo kher mai, Lal Zauliana hmel hlauhawm leh thingfak lek hlau chuan nunau te chu an ṭe teng tung a, Lal Zauliana thinrim khaw hmù lo chuan a hma a mi vuak fuh ngei tum chuan a han vai leh pawp a, val upa lo tawlh sawn leh vang chuan a ṭum loh zawk, a bul a hmeichhe naupang se enrual luah chuan hlap fuhin, chu hmeichhe naupang chu a hlawm ta nawlh mai le.

Chu a thil tih sual vang chuan naupang nu chu ṭap tuar tuar in, chemte a nâ em a va pawi tâk em, ka fanu tho rawh tiin a ṭap ta vawng vawng a, chu hmeichhe ṭap rawl hliah chuan thinrim aw rawl a lo chhuak a, Lal Zauliana thingfak vai leh chiah chu a, thal hual khawp chu a bekah kuttum hian a rawn deng sawk a, a luhai in thing harh lai chu Tlangzawl nunau te chuan an Lal Zauliana chu an chil rawn ta luih luih a, Satlâk val upa leh pasâlṭha ten an ṭhelh fel meuh chuan chhan tlak a awm ta lo, nang a duham leh suahsualna vang a Tlangval tawrhna hi a nâsa zo zai ta, nang leh i chhungte hian he khaw ram hi chhuahsan rang rawh u, Lal dang kan thlang tawh dâwn tiin Lalpa Zauliana nupui leh fate chu ân chhia am lawh bawrh bawrh hlawm a, Lal meuh pawh an zuah loh vang chuan Tlangzawl khawnbawl upate pawh an hlauthawng chu puantlang phe hlak hlak chuan an ding khur dár dár hlawm a

Lo tawk thut tehse, Net neih lai ka lo chuh leh thut e, ka chilmam hman lo a, lo chhiarmam leh mai teh u

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:25 pm

PASALTHA SANGTUALA ( Mampuia Pa )

BUNG - 130

Tlangzawl Lal a thih takah chuan a nupui leh te chu an tap ta rawih rawih a,an khua atang a chhuak tur an nih tak zelah chuan , Lal nupui chuan a tuar thiam lo zual kher mai, mittui sung zung zung chung chuan ‘nangni tlangzawl khua te u, in Lal Zauliana hi mi famkim a ni biklo tih chu kei tluk a hrechiang an awm biklo, in tan theihtawp a chhuah thin a ni lo em mi ? in thatna tur ngaihtuah hian a thim a var thlulo in a hmanhlelh ve bawk a sin,tunah pawh in zalenna atan a theih tawk a chhuah vang zawk a nunchan hi a ni a sin’ a han tih chuan nunau thinsa tak a dingte chu an ngawi thap a, a vanglai chuan pa piantha tak a ni ang tih hriat tak, barchhawr tak chu Tlangzawl Lalnu hmachhawn chuan a han ding a ‘Lalnu i pasal kha kan Lal a ni a,kan tan chuan ngaihtuahna tam tak chu a seng ngei ang, thal hnih liam ta a sechal in neih dan kha rorel dan dik a ni em, vengthlang parawl leh khawnbawl upa vawkpui nohruai inchuh tum a,i pasal rorel dan kha a dik chiah maw ? kan pasaltha leh khaw tan a chhenfakawm nitur te sapui hnu mak tak a thi fo,an enliam dan atang hian kan tan a ngaihtuahna seng i ti maw, Tinghmun sih kam kan neih tum a, ka fapa boral ta chung a an rorel dante kha inchung a thleng nise,in lawm bik chiah a ngem ? ka fapa lu phumna a nih vang mai a. Tlangzawl khua a la cheng ka ni, ka vang a in nunnawm tawhna min thungrulh dan hi,tun ah pu VANAN a thungrul ta che u a nih hi, vawiin pawh hian a suahsual rah tuar a,hmeithai engzah chiah nge awm, i hriat duh chuan kawt lai a ruang saw va en ta che, tha te a sawi mai theih mi kut a rulkaw zen ching a nih vang a tuartu te saw’ tiin thinrim khur zawih zawih chuan a han chhan ve meuh chuan, Lalnu Chawiliani te nufa chu an kut ta lap a.

Pasaltha Sângtuala chuan mipui thinrim ri nuaih nuaih karah chuan a bul a nu upa lam chu,ka pi tun a thusawi zo chiah kha tu nge ni ? tiin a han zawt a,chu pitar chuan ‘kan khaw daingul ni thin, pasâltha Thanseia a nih saw .Thâl thum vei tawhah khan a fapa tlangval ti a chhiar ngam tawh, kan khaw innghahna tur ti a kan en chu,an ramchhuahna lamah sapui nen an in nang fuh tiin an lo zawn hawng a,a hliam chu mi nazawng hmuh an phallo in,a pa erawh zawng dang thei heklo le,a hliam an en nak chuan chempui hnu a lang thluah mai a,a mah lah an nghalchâng hliam umna lamah a mawng tamah silai mu a dawn avangin, kuttual leichham a lo ni tawh nen, chumi tum chuan kan buai nasa teuh khawp a sin,a fapa boral atang chuan a inti fai ngai tawh lo in a ngawi ta reng mai a, an vanduai a siamin fur liamta mai khan,a nupui kawr kan tur che sualin a khup kep a sawh keh hlauh mai a,ram lam a chhuak chi zia zang ni heklo le . . . tiin hnuai lam bih chuan a ngawi ta daih a,a bul a mi a ngawi ta daih chu a thlekin,a mittui chu a puantlang bal ve tak chuan a lo hru zauh zauh a, pasâltha Thanseia theih lai kha chuan hmeithai mah ni ila,kan rap hi sarep hian a kiansan ngailo a sin tiin a in sut ta hlap hlap a. pasâltha Sângtuala chuan a bul a nu thlek vang vang chuan ‘ka pi,i thilsawi chuan min khawih hle mai a , engtin nge pasâltha Thanseia nupui chu a awm tak a, tunge ei zawng ta ? a han tih chuan, mitsen ram chuan a bul a pasâltha diar khim vang chu melh ve zawk in ‘kei leh ka fate pahnih in kan theih ang ang in kan kep in, kan theih angin kan pui thin a, tlawmngaiin tang thin mahse buhfai leh chaw hmeh ka neih ang te chu ka pe lui zel bawk a, chutiang a that kan chhuah na chuan,kan pasâltha chu a ti zak in, kei ngei pawh min hmuh hreh chang a nei zauh zauh a, tlawmngai viau mahse thei ngang heklo le , kan inpui chho ve naw naw thin’ a ni a han ti zuai raih a, pasaltha Sângtuala chuan ‘hetiang a vanduaina an tawh hian. Tlangzawl Lal chuan a hawisan ta mai em mi ?’ tiin a han zawt leh a,mittui hru keuh keuh hmel chu lo inthlakin, thinrim hmel chu a dur nghal khai a ‘in puih i tia law, Lal leh khawnbawl te chuan an vanduaina chu nuihza siam nan an hmang mah mawle !! zaklo hlawm lutuk’ tiin thinrim tak chuan khawnbawl upate, hlau a ding sai dar dar ho chu kut humruh chu a han vai khum a.

Tlangzawl nunau zing atang chuan khualval hruaitute chu kal hrang in an rawn hlawm a,Chhipzawl khua chu ban hman mai a nih vang chuan, tukthuan ei kham a faihthiah nghal tur a pan nghal mai tur chuan an ti tlu ta, an pasâltha te thuchhuak an hriat chuan , khualvalte lawm chu an haw haw ta hum hum a, Chhipzawl tlangval inpe dam tha pangngai pathum te chu an chin an Lal hnen a thlen tur chuan an tir a,tlangval dangte chu chawfun nen an thian hliamte buaipui tur chuan Tlaizawng ngaw lamah chuan an let tir bawk a,chempui leh silai pakhat in venna tur bak chu an pe lo thung a, tukthuan an eikham chuan Tlangzawl nunau eitur chu an siam sak ve nghal bawk a, khawnbawl upate in vang vung a midangte thin ti na thin tute erawh nunau hrul ah, inthlahrun hmel tak chuan an in bawrkhawm lat thung a, mipui chung a kha tak a an rorel chu engtin nge nunau te chuan an thungrulh dawn lah an hre hauh silo,an theih lai a pamham leh tawrh hrehawm tak tak a rorelna an lo kalpui chu an inchhir ta kher mai, khualvalte chu awm reng sela tiin an ti ti sap sap a, nunau in tukthuan an ei kham chuan ningnawi chu khualvalte chuan an tihfel sak ta sawk sawk . .

Khualvalte inpeih kal tur chuan an in ruahman tan ta a, tlangval thalai thlanlai tur pawh awm ta lo chu, Tlangzawl khawho chu an buaina nak mai le, pasâltha Thanseia chu lo pen chhuakin, val upa Chhâwnthiaua hnenah chuan ‘kan khaw boruak hetiang a nih takah chuan,tlawmngaih chhuah hram teh u, thlanlaih pangngai han beisei ngam chu kan ni hauh lo nang a, kan unaute ruang em pawh han buaipui thei kan nilo hi a zahthlak in, hmelma tanpuina dil phei chu a tlawm thlak kher a sin,in tlangval te hian thlan tal chu min laihsak hram sela’ tiin a han ngen a, chu thu chuan tlangval te chu an buai ta map mai le, thenkhat chuan ‘an sualna chuan a umpha a ni mai a, an duh leh khamah lum mai ang hmiang, thu tha ai a thalo lam duh nafam chuan tuar mai rawhse’ ti a lo tawng lawng lawng tawk lah an awm nawk a, an thiltawn ngaihtuah chuan khualvalte pawh demawm an ni hran lo, an hruaitu ten ngawi tur a an tih chuan tlangvalte pawh chu an ding ngawi thap hlawm a. Tlangzawl khaw din hmun an han ngaihtuah chuan an lainat hlawm khawp mai. Tlangval thlanlai tur sawmnga the thaw te chu thlang chhuak in, pasâltha Phulliana ho in hnu an lo dawl a nga, ruang thlak zawh ah an thiante chu an umzui thung dawn a ni.

An tum lam pan chuan an inthen ta,tunah chuan Tlangzawl khua chu mahni a ding thei a ni ta lo. Lal rorel dik loh chu a khua a tuarin Tlangzawl khua chu a lo rausan dawn ta a, pitar/putar te chuan an panlai hun leh chhungkim lai an han dawn kir thin a,an mittui chu an dang zo lo in an puan tlang chu mittui an hrukna chu a huh hlap hlawm tawh a, Satlâk khaw lam chu a mawhphur tu chu an ni na meuh mai, zaidawh tak a an palai na lo dawnsawn sak loh vang leh,an chung a chhiatna zawn sak tlat tu. Lal leh khawnbawl upate chu mawhphur tu an nihzia hriai in, an piah a awmkhawm khawnbawl chhungte chu an phun khum ta noh noh hlawm a, an phun thawm chu thinrimna thawmah lo changin ,hmeichhia leh tar awmkhawm mah nise, thingfak leh an hmuh theih ang hmanrua chuh chuan, khawnbawl te chhung awmkhawm chu an pan ta hlawm a, nunau thinrim pawisak neilo chu tuar ngamlo in,thlanmual lamah chuan an te phei ta teng tung hlawm a .

Hlauhlawp a te thawm leh hmeichhe thinrim thawm an hriat chuan, pasâltha Phulliana ho chuan an hmarua chuh chuan an tlan thuai a, thil awmdan an hmuh chuan an hmanrua dah in, khawnbawl upa leh Tlangzawl nunau thingfak lek fur inkarah chuan an tla zep thuai a, pasâltha Phulliana chuan ‘unau te u, khawngaih takin insum tawh teh u, hetiang khawp hian in khua a saisawp tawh a, nungdam a awmte tal hi in hlawmkhawm tum zawk tawh u,ngun takin ngaihtuah ho zawk teh u’ a tih chuan,pi tar pakhat chuan ‘thiltha hengho lak atang a beisei ai chuan, Chawmnu lak atangin thiltha beisei a hahdam thlak zawk, zualko chung a kutthlak tur pawh an dang duh lo, chu thil vang chiah chuan a ni kan khaw chung a thiltha lo a lo thlen tak ni, keini an khua te hi an mahni vang hian hniam lam kan pan zel zawk a,thiltha duh tute chu hnawmhne ang mai a laktlak loh ang in an chhuah a, an thu hnialkalh ang deuh a lang tawh lah, sapui kut mak takah an thi zel a nih hi, kan chung a an rorel dan hi kan kham zo tawh a ni, kan chhungte thlarau pawh an ni damchhung hi chuan a chawl thei ngut pawh in a rinawm loh, tun hun hi kan khawchhung inchin felna tur a khuanu ruat dik tak chu a ni’ a han ti a, a hnung lam a nunau te pawh chuan a dik chiah, chuvang chuan kan chhungte thisen phubâ kan lak theih nan khawngaih in mit min lo chhinsan teh u tiin an lo ngen zui ta zel a.

Khawnbawl upa chhungte leh Tlangzawl Lal nupui te chuan an thuhriat vang chuan hlauin an dang sawp sawp hlawm a,an thu hriat thar vang chuan pasâltha Phulliana meuh pawh in tawng ngaihna reng reng hre ta lo. Engpawhnise,in khawchhung in relbawlna lam a inrawlh ka duh hauh lo a, kan awm lai chuan thisen chhuah a awm ka rem ti hauh lo a nia,in tan buaina siam ka duh lo a,ka thusawi erawh min ngaih pawimawh sak ka phut tlat a ni, chutiang a nih loh chuan ka duh lo zawng tak a ka chet a ngai ngei ang tih, chuan nunau te pawh chuan,ni e i sawi ang chuan i awm chhung chuan keini pawh kan insum a nge tiin khawchhung lam pan chuan nunau chu an tawlh kiang ta a,khawnbawl upa leh Lal chhungte chuan an Lalna chu tawp theilo turah ngai in, an hnu dawn lo lek a an lo chettawh dante an ngaihtuah chuan an pawiti chuan ban a pel vawng vawng a ni, nunau an tin hnu chuan, pasâltha Phulliana chuan ‘engtia khawsak nge in tum, in nunau te lah chuan an ngaihdam hmel silo che u a’ tiin Tlangzawl Lal rimnam ho chu a han zawt a, duhthlan tur nei heklo le, hreh teh mahse an nun humhim nan thlanmual atang chuan ngawpui lamah chuan an pil bo ta zal zal a, an liam hnu chuan pasâltha Phulliana chuan a naute hneah chuan ‘kha in mithmuh ngeiah entirna tha tak chhawpchhuah in a awm a, nangni ho pawh mi chung a uchuak tak a chet that loh zia inhre ta a, in ngaihtuah ngun hle ang che u’ tiin a naute chu a han fuih a, a naute pawh chuan an thil hmuh vang chuan rilru thar puin, an pasâltha leh val upate fakawm zia an hriat chuan an zah phah sawt a. thlan chu an laih zawm leh ta, an thiante chungah engpawh thlengthei tih hriain, puih hman ngei tum chuan thlan chu an lai zung zung a, ramsa in an hai chhuak thei tawh long tih chuan. Ruang phum tur chuan an thiar leh zung zung a, an zawh fel meuh chuan ni pawh a vanlaizawl dawrh tawh a, hmanhmawh tak chuan Chhipzawl khaw lam pan chuan an liam ve ta thuai a.

. . . . . . . . .

Zanriah chhum hun tlai lam mahah chuan Chhipzawl khua chu thing ler atang chuan an chûan far hlawm a, a khaw thleng chu a rem in, chhuah chhawng in zahnih nufa zet tur hi a ni ve a, a khaw len ngaihtuah in mihring an tlem niin alang nge an tlangval te thu thleng vang chuan buai tumin an tawm im zawk ngaihtuah thiam a har khawp mai,pasâltha Sângtuala chuan val upa hnen ah chuan ‘khua kan va chian hmasa dawn em niang ? thawm inhria a nih chuan chetdan tur in hre mai ang chu’ a han ti a, a ni pawh chuan rem tiin an thianzaho chu fimkhur tak chuan, Chhipzawl khua chu an pan ta tham tham a, mual hnih lai an kan hnu chuan khua pawh an hnaih in vawk ngeng rawng rawng pawh an hre tawh a, kawr lam a thawm an hriat chuan an dingthap hlawm a, vawmpui in hrosa thawm leh hmeichhe mangang te thawm chu lo chhuakin, engtia tih tur nge niang tiin an han in melh thap hlawm a, hmeichhe mangang hmu a han inthiar fihlim san ngawt chu ni theiin an hre lo a, kawr lamah chuan Satlâk valrualte chu an tleh thla ta sung sung a.

Vawmpui than kin zet tawh chuan hmeichhe tlan lai chu a kut hma chuan a thai thlu tawp in, hmeichhia chu a te thawt in a thidang zui ta a, seh tum a kun tak chu pasâltha Sângtuala chuan vawmpui chu a tlawh leng dawrh a, vawmpui thinrim chuan a hma a mi chu bawhthluk tawp tum chuan a ke hnung chuan a ding urh urh a,Thûam thian hmeichhia kha la sawn vat rawh tih tuar pah chuan,iptepui zen zawkin a hma a vawmpui ang sen huam chu a hmachhawn ta ran a, Chungliana chuan ‘tuman silai lek suh u aw, nuam thamin i han fiam tak tak teh ang u’ tiin a silai chu a theh rawk a, chempui chu a han lekchhuak ve nghal a, Rinmawia chuan ‘ti tak tak ang aw,a va han nuam dawn tak em, chempui pawh hmang lo ila kutlawng ngat in aw niang ‘ tiin iptepui chawp chuan a sir ah a theh nghal rawk a, vawmpui meiah chuan a chaih huk ta dum dum mai le, a rem lai laiah chuan an lawk pawp pawp a,pakhat han bawhthlu mahse an chaih phar lawp lawp ta mai a, vampui thinrim a duhthal a tal hmanlo chu a huk dur dur reng a. tlangval chak tha the thaw duh thal a kut an han thlak meuh chu hliam tuar lo mawhse, vawmpui pawh chu chau in a ang hlui tawh a, a chilphuan chu a thaw puar pawp pawp tawh a, Sangtuala chuan a meiah man fuhin kawrte ah chuan a len lut lawp a, a hnungah a han tum zui leh chu kawrte ah chuan a in zep ta tawt a.

Savawm huk tuar tuar leh hmeichhe mangang au rawl hriain, Chhipzawl tlangval te pawh an lo tlan thuai a,belrawh mual a vawmpui thinrim huk tuar tuar lam chu an pan zel a, kawrkam zawl zimte a khual tlangval ten vawmpui thakin zet tawh an lo chaih phar an hmuh chuan, puih mai tum lo chuan hmuhnawm ti tak chuan an thlir thap hlawm a,an zing a pasaltha diar khim vang mai in, thazo leh tak a vawmpui chhir leng lawp lawp tu chu, tu dang nilo in Satlâk pasâltha Sângtuala ngei a nih ring in, a chanchin an sawi thin chu dawtthu mai a nilo tih an hriatchian phah ta khawp mai. An thlang kawr kam thing hniamte a lawn Lal fanu pawh chuan, chung khualvalte chu mak ti leh huaisen ti tak chuan a thlir ngawih ngawih a, a tang lutuk chuan a thing vawn chu a lo hum khur ve zawih zawih hial a, vawmpui kawr a an tum luh zawk lai a hmuh chuan. A thing lawnna atang a chhukin a thiannu chu a bawihsawm zui ta nghal a. An lal fanu te thiandun chu Chhipzawl tlangvalte chuan pawh vatin an piah a khualval te che zia chu an thlir pah zauh zauh a.

Pasâltha Sângtuala chuan hrui chhatin,Rinmawia chuan thingtuai chawnpuar tia zet chu a sat ve nghal zat bawk a, vawmpui lo tho chhuak tur chu Chungliana , Thûamkunga leh Mualkuanga te chuan kha kei ve tawh tiin, vawmpui hnungah chuan an lo tum chhawk zawt zawt a,vawmpui pawh chuan a chet a piang a an tum fo chu a hrethiam a ni chek ang chu, thawh tum tawh lo chuan kawrte an chuan a bawk ta hle hle a, hrui leh thing an peih hnu chuan pasâltha Sângtuala chuan vawmpui bawk lai beng pahnih ah chuan a han phin tho zawk a, vawmpui tho tur chu a ke hnungah Rinmawia chuan man in a han phih thal pawp a,a ke hmalam chu midangte chuan manin, Mualkunga chuan thing chu vawmpui kap karah chuan a han rawlh a, an duh tawk a an phuar zawh chuan, an chhak a tlangval sawmdawn an mahni lo thlir thap tute an melh ta thap a, an bul a nula lo awm ve te chuan hlim tak chuan an lo nuih saih a.

Lo tawk leh thut tehse,ka ziak thui taw hem mai . . . ha haa

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:26 pm

PASÂLTHA SÂNGTUALA ( Mampuia Pa )

BUNG - 131

Darpui harh teh tiin a thiannu chu a sawi lawp lawp a, Chhippheng khaw tlangvalte chuan lo puiin an han bawr lat lat hnu chuan, Darpuii pawh lo harhin hlauh hmel tak chuan a hawi kual chung a, an piah a tlangval rualkhat vawmpui lo phuar mawlh mawlh a hmuh chuan mak ti tak chuan a melh ta tlawk tlawk a, a dar vawmpui hamna thler atang a thisen lo chhuak dang tur a vaibel ek an hnawih sak pawh hre chang lek lo chuan an piah a tlangval che mawlh mawlh lam ngawt chu a melh reng a, hliamte an tuam zawh chuan chhippheng tlangval te pawh chuan khualval te chu an thlir ta thap a, an hmanrua te an lak fel chuan an mahni lo thlir thap tute chu pan in, an chin chu zawtin an nui hau hlawm a.

Chhippheng Lal fanu chuan ‘thiante u,tu khaw tui liak nge innih, kan nunna min chhanhim sak vangin in chungah kan lawm lutuk, kan khaw lamah min lo zui ula ka pa pawhin lawmthu a hrilh duh ngei ang che u, kei hi Chhipzawl Lal fanu tlum ber Lianmawii ka ni a, ka thiannu hi Khawbual Lal fanu mal Darliani a nih hi’ tiin a han in hmelhriat tir a, Chhipzawl tlangvalte pawh chuan khualvalte chu ‘nang ni thianzaho zet zawng in va ropui tak em, in chetdan hi mit ngeiin hmulo ila ka awih hauhlo tur a nia in tih ni, nang hi Satlâk pasâltha Sângtuala chu i ni ngei ang maw ? kei Chhipzawl pasâltha Tlangbawnga ka ni e, kan lo beisei reng tawh che u asin, haw u kan Lal pawh in a lo beisei reng tawh che u nia’ a lo tih ve tak ah chuan, an ni pawh chuan Chhipzawl tlangval vawmpui nunglai zawn te hnungah chuan zawi muang chuan an zui ve ta zel a.

. . . . . . .

Laiawrha chuan a naute chu a ngaihtuah kher mai, zualko tlangval an tirhte khan an Lal hnen a thu an thlen dan lah an hre lo a, an vanduai palh a hlau chuan vaibel chu a fawp khu tual tual reng a, val upa Chhâwntiaua chuan Laiawrha chu ‘i va ngaihtuah muk awm ve,hahdam takin awm teh khai kan naute zawng ngaihtuah awm an ni hauh lo a nia, duhai an va che na ang tih ka hlau zawk asin, tunlai chu Sângtea pawh hian eng emaw vei deuh a nei niin ka hria, a mah a pasâltha zia awm hian a la chelh mai chauh niin ka hmu deuh tlat, kan Lal chapô fanu Ngurpuii vang kha ni berin ka hria’ tiin a phun sap sap a, Laiawrha pawh chuan ‘hmangaihna hi a thalo zawng in a kal thei dawn hle in ka hria, hei vang hian a nia ka nau hi ka ngaihtuah tak deuh ni, kum lam a naupang hi chu an naupan na hi a lang leh thin’ tiin an ti ti sap sap a, Lehlawn Lal Zamloan a fanu thlahual chhuan lam hian eng emaw rilru verther tak te hi a lo pu reng te a ni lo maw ka ti rum rum thin val upa Chhâwnthiauan a tih lai chuan, an naute liamna lam atang chuan vawmpui thinrim huk dur dur chu an hre ta thut a, val upa leh pasâltha te chu tho thuaiin, hmanhmawh leh fimkhur tak chuan an liam nghal thuai a, tlangvalte pawh chuan an hruai tute kaihza veng tur chuan an liam thuai a.

Vawmpui thawm chhuahna mual an thlen chuan an thlang kawr a nula hleitling leh ngo vuah mai,hlauh luat vang a dang lap mai chu an zu hmu a, hmeichhe pakhat tlu zawi ngat hma a Sângtuala chempui nen a ding tau mai te, Thûamkungan hmanhmawh tak a nula hmun him lam a pawm dawr dawr te chu an zu hmu a, Laiawrha tlan tum chu val upa chuan pawt ding chawtin, an piah mual a tlangval sawm dawn hmanhmawh tak a lo tlan chu a han kawh hmuh chuan, Laiawrha chuan a silai chu a lek kawh nghal at a, khawthum tlangvalte pawh chuan an silai chuan an thlang a tlangvalte chu an tin ta fur a, Chhippheng tlangvalte an din takah chuan, val upa chuan a naute chu khap in an thiante leh Chhippheng tlangvalte chu an en tawn zak zak a.

An thian ten kut lawng a vawmpui an huallai chu chhuang tak leh tang tak chuan an thlir thap a, val upa chuan tumah in lan lo tur chuan a naute chu a hrilh ngun hle bawk a, vawmpui an chaihphar lai an hmuh meuh chuan an lawm lutuk chu thawm chhuah hlau tak chuan thingphen ah chuan an lam vir chai chai hlawm a, vawmpui Chungliana te pathumin an in tum chhawk lai an hmuh chuan hlim tak a then sang chung chuan an ding thap hlawm a, chhippheng tlangvalte nen an in hma chhawn erawh chuan, silai hmawr chu thingphenah chuan a lawr fur a, an nui tlang an hmuh tak ah chuan an thawhuai hlawm in, khawchhung lam pan a an in zui an hmuh erawh chuan an ngaih a ti tha lo kher mai. Laiawrah phei chu a insum zo lo thelh a, val upa Chhâwnthiaua chuan ‘thian a, kan naute hian an tan a hlauhawm chu an hre turah ngai ang,an hnungah kan veng dawn nia’ tiin an hnungah chuan an zui ta zel a, Sângtuala chempui nen leihkatlangsang atang a zuangthla n hmuh chuan fimkhur tak chuan an veh hnai thuai a.

. . . . . . .

Sângtuala ten lungdawh an thlen chuan Chhipzawl tlangval te pawh an lo chhuak ve tak tak hlawm a, vawmpui nunglai zawn an thian lo phul phei bawrh bawrhte chu an lo fin a, an ni lah chuan Satlâk khaw pasâltha ten vawmpui an beih dan chu hahip in an sawi pah bawrh bawrh a, an hnung a ngawi reng a lo kal te chu an melh hrek hrek hlawm a, Lal mual an then chuan Chhipzawl Lal leh Khawbual khaw Lal te pawh leihkatlangsang ah, Lal thuam famkim nen an lo ding dun rual a, an mahni an hleitling dun bawk a an hmuhnawm kher mai. Vawmpui than kin sumruk tha mah tur him pual an zawn hawi hruk hruk chu, naupante chuan hlauin an nute puantlang vuan in an thlir thap a, tlangvalte thusawi an hriat chuan khual val panga te chu mak ti leh ngaisang tak chuan an melh leh hrek hrek thin, an lo thawnthu hriat thin pasâltha Sângtuala ngei a tak a an hmuh chuan, nula lam phei chuan an thlir leh zauh zauh thin a, an nula ten khualvalte an melh dan chu, khawchhung tlangval thenkhat ngaihmawh tawk a tling reng a, an Lal fanu an lo ngaihzawn ruk te chhan tu an ni tih an hriat phei chuan, tlangval thenkhat chuan an helh zual kher mai. Lal Dengkhuaia mitmei an ven vang in engmah an ti ngam lo mai chauh a ni.

Khaw hnih Lal ten an fate chin an hriat chuan Chhipzawl Lal chuan banglai a silai chu a chuh nghal var a, Khawbual Lal Tuanpara pawh chuan silai chuh ve nghal zat bawk a, an pahnih chuan vawmpui awmna lamah chuan kal in silai hawrchilh chuan an han kap dur a, vawmpui pawh a lu a silai mu sa tha zet in riahrun a rem chu tuar loin a tawm tawn in a zal ta raih a. khual valte hnenah chuan a mah zui tur chuan hrilh in, Lal inchhung lamah chuan an in zui chho ta dam dam a, leihkatlangsang an chuan chhuah leh chuan chuan Lal Dengkhuaia chuan ‘tlangval te u, in chungah kan lawm khawp mai, tu khua nge in nih , eng ti tur a lo kalte nge in nih ? tiin a han zawt a, nunau te chuan khual valte thusawi hrelo bik nih hlau chuan an reh ta thap a, Rinmawia chu lo pen chhuak in ‘keini thianzaho hi Satlâk khua, Lalnu Thanthûami khaw tui liak te kan ni a, hmanni deuh khan Tlangzawl khua atang a val upa Lianmunga pawi khawih, an hnawhchhuah leh nunau eng emaw zatin Satlâk khua an belh dan te, Lalnu Thanthûamin lainat a a tuamhlawm tak thu te,chu thilthleng Tlangzawl Lal Zauliana hnen a thlen tur a kal te zualko chung a hriam an lo lek dante, a hnu lam a zualkô haw lam an um zui zel thute, Tlangzawl Lalin Chhipzawl pasâltha Saithanga leh tlangvalte a fuihpawrh dante, Satlâk khaw ram chhung Chhipzawl pasâltha Saithanga leh a nauten an dai luh dante, an ni ho erawh an thah mang thelh thute, an pasâltha Saithanga leh a naute chetdan ah. Lalnu Thanthûami lawm loh dan te, an pasaltha chetdan chu Lalpa Dengkhuaian a hriat pui leh pui loh hre tur a lo kal kan ni e’ tiin a thusawi tlang chu a kawm ta a.

Rinmawia thusawi chu uluk takin Lal pahnihte chuan ngaithla in, an hmel landan chu a in thlak sek vang chuan, a tul thul a che mai thei tur chuan Sângtuala te thianzaho pawh an inring kher mai, Engpawh thleng sela, hmachhawn thei tur chuan Chhippheng tlangvalte chetdan chu uluk tak chuan an thlir kual reng a, tlangval sawmdawn te khawsak phungah chuan an buai ringin. Sângtuala chuan chung tlangvalte chet phung chu a melh deuh reng a, Chhipzawl Lal chuan ‘in lo kal chhan chu engpawhnise, kan fate chung a in thiltih hi thlan ka liam thlengin ka theihnghilh tawh hauh lo ang, hmelma te ramchhung ah pawh mahni sa himna ai a, theilo zawk leh mangang in puih duh dan ah hian, misual chu inni hauhlo ang tih ka ring, in huaisen na ka hmuh hian huaisen lawman ka nopui chu in tan ka hlan e, in lo kal chhan ka pasaltha Saithanga leh a thianten in khaw ramchhung a an chetdan erawh ka duh dan a ni hauhlo tih lo hria ula, an thisen chu zah viau mah ila, phubâ lak lam hi ka ngaihven leh duhzawng a nilo, an lo rammu dawn tih ka hriat khan ka tlangvalte ka um tir a, ka thuzawm lo a kal lui a buaina zawng an nih vang in, tikhan an vanduaina leh an chung thu chu tawp tawh rawhse a ti ta hmiah mai a.

Ka khaw tlangvalte pawh khan lo hre rawh u,vawiin hian ka pasâltha thlavang hauh ngam lo ka ni lo, a ni ka chân hi ka khaw tan pawh thil pawi tak a nih dan chu inhre vek e, Lal pawi sa lo a kal lui a nih vang leh buaina lak a khaw hum him a hnek a,buaina a hruai luh a tum tlat vang hian, an kar thu chu he lai hmunah hian tawp rawhse, ka khaw himna ti bahlah zawng a hma la chu tupawh niraw sek sek, an chungchang thu chu na tak a ngaihtuah a ni zel ang, heng kan satlâk khaw unau te chung a buaina siam chu ka en liam dawn hauh lo che u a nia, remna ti chhe zawng a tumah che lo turin ka duh che u a ni, kan fanu te thlahual na leh ka pasâltha te thlaihchhiahna naktuk hian kan nei ang, khaw thum valrualte tan intih hlimna ka buatsaih dawn a ni, ka tawng tam in ka dang a ro ta huam huam mai, ka nôpui min han dawm sak phawt teh u, hlim takin i awmho zel tawh ang u a tiin, nopui chu an lamah chuan a lek phei nghal a, nopui dawm hmasa tur chu an in hnawn leh ta a, Lal pahnihte chung khualvalte mize mawi tak chu hlim tak chuan an lo thlir dun reng a, chutia khualvalte nopui dawm tur a an in hnawn lai chuan. Chhippheng tlangval, pasâltha Saithanga hruai thin chu lo pen chhuakin, chempui vai zoh zoh pah chuan Lal mual lai lam ah chuan a ding toh luah a, ‘nangni ho khan kan pasaltha chu in lo that vei maw, khalai a pasâltha diar khim atang khan ka that tan in,a mal te te in ka chansawm vek dawn che u a ni’ tiin a ang tun tun a.

Sângtuala chuan ‘k’u Rinmawi, hmanhmawh rawh Lal duh sakna dawng lo a awm reng tur a nilo, chu tih turin min hmuak a nia’ a han ti sap a, a mah lah chu a nui deuh sang in a mitmeng erawh a sen leh râm tawh a, aw lo chhuahna lam Lal pahnih ten an en chuan an hmel chu a dur nghal khuih a. Lal Dengkhuaia chuan rawl vin thak hian ‘vawmphung ngawi rengin haw nghal rawh, mi pahnih/thum kawihkawlawm vang a ka khua dinhmun hlauhawm a dah ka duh lo tiin ka sawi a ni lawm mi ? kei i Lal hi min hnialkalh in, nunau dinhmun hlauhawm tak i dah vei ang maw, nuam i sa hleklo ang maw’ tiin a han hrawk nghal khur khur a. Vawmphunga chuan ‘nang khawkhat Lal ve meuh hian i khaw dai ngul thihna pawh i en liam ang maw ? i chhung te an him chuan en liam kha i tan chuan a har lo a ni mai thei, kei erawh chuan kan pasâltha thlarau hi muang tak a chawlh theih nan, Satlâk khua saw ka haldarh leu dawn a ni, Satlâk ka haldarh hma chuan ka hahdam dawn lo, nang pa kha helai ah hian lo chhuk rawh, mi pa fa takin min hmachhawn ngam dawn nge, puanfen i feng zawk dawn ? tiin Sângtuala chu a chempui hmawr chuan a han kawk sai dat dat a.

Rinmawia chuan Lal Dengkhuaia kut atang a seki zu nô la in a han tem hlek a, Sânngtuala zu leh in chempui chu a han zen nghal zat a, chempui a phawrh tur chu a kut a lo chelh in ‘khu chu ka chanpual a ni, a mi duh chu kei a lawm ka nih’ tiin a mit sen ram chuan a han siai zauh a, Chhippheng Lal zu chu tem hlek in Lal hnenah chuan ‘Lalpa min ngaithiam a niang chu, ka mipatna thleng a min cho talh chuan ka hmachhawn lo thei lo a ni, naktuk i hun ruat bawhpelh ngailo tur tawk chauh in a nia ka chet dawn ni’ tiin chempui nen chuan, leihkatlangsang atang chuan Lal mualah chuan a zuangthla zui zat a, a hma a ding Vawmphungan a hmuh chian meuh chuan,a duhai a kal thui tih a hrethiam ta chauh a, a hmel en ai daih a huhang ngah leh uap na a hmachhawn meuh chuan, a chempui hum lai chu a khai zawi hnawk thei hial a, nui sang leh thinrim mitmeng sen ram a melh in ‘thiana i duh chu han ti hlawhtling ta che, i hun a in tan e’ zawi fiah tak chuan a han ti zui chhak a. A in hrosak nasat tawh vang chuan pasâltha Vawmphunga chuan hnung tawlh thei a nih tawh loh zia hriain, phur teh chiam lo chuan a hma a pasâltha naupang tak chu a veh hnai ta chhur chhur a. a rin loh lai ni a a ngaihah chuan hmalam ah tlan thut in chempui chu a han vai tle zawk a, an pasâltha Vawmphunga chuan a sat fuh ngei turah ngaiin, Chhippheng nula te chu an te thawt hlawm a, Lal fanu pahnih te ngei pawh insum hman lo chuan an hmelhriat loh tlangval tan chuan an te ve tuar a.

A hma lawk a mi chu a rinai tak chuan a tuan a tha in, hun pawh a thlang thiam kher mai. Chempui lo thlawk kun hniam san zauh pah chuan pasâltha Sângtuala chu lei hrulah chuan a lei zek a, tha tawp a chempui vai a inher lawp pasâltha Vawmphunga mawngah chuan a han tlawh zui zawt a, pai uan uan in hreh tak chuan Lal thingkhawn ban su chawrh in, lei ah a rohlu lang haih chuan a thal ta hual a, hmeichhe lam chu an lo nuih deuh hak a, hmeichhe lam hawi chuan chempui chu a han vai zawk a, he mi tlaktlai loh pa ka dah that hunah tun a nui te kha ka rawn dap chhuak ngei ang che u,mikhual in chhiatna duh tu tan in maw in lo te vel , in châk lo ang tiin a han ang leh tun tun a, pasâltha Vawmphunga naute chuan an hotupa chu lo fuih in an lo au tuar tuar reng a, inbeihna chu a tawp thuai loh chuan buaina dang a chhuak thei tih hriain. Sângtuala chuan a hnaihchilh ve ta thung a, a hma a mi chuan a hmui thi chu chhak sen thawtin anchhia lawh bawrh bawrh pah chuan a rawn bawh phei leh rawk a, chempui lo thlawk phei leh chu lo lak leu zauh pah chuan, pasâltha Sângtuala chuan a hnaihchilh thut a, chempui fawng hnum hlarh chuan a han chhu zui chawrh chu, pasâltha Vawmphunga chu a let tawp a , a thidang zui ta nghal a, pasâltha Vawmphunga naute zing a pakhat chuan silai chu a han lek kawh ve zat a, a hnung lam atang chuan ‘i silai kha thlauh vat rawh,i lubur kha ka phin darh i duh a nih lo chuan’ tiin a rawn vau ta chher chher a.

Hnung lam an hawi meuh chuan tlangval rual hian an lo tin fur hlawm a, eng emaw palh a thlen vaih chuan a tuar tur zawk an nih tur zia pawh an hre chiang ta khawp mai, a silai ken chu a sa emaw tih tur khawp a rang chuan, chu tlangval chuan a silai lekkawh mek chu a paih thuai a, naupang thuawih tak ang chuan kut kuangkuah in a ding ta vang vang a, Laiawrha chu lo pen chhuakin a nau chu a inhliam leh hliam loh a han zawt a, nui sang chuan a that thu sawiin an chin a hrilh chuan a silai chu lek thla thuai a, Chhippheng Lal Dengkhuaia chu val upa Chhâwnthiaua leh pasâltha Sukthanga te nen chuan an pan hnai ta a, Chhippheng khaw silai chu an khawm sak nghal thuai a, Lal leihkatlangsang ah chuan an chuangkai zui nghal a, val upa Chhâwnthiaua chuan an khawchhung a an chuan luh danah chuan thupha chawi luam in, remna duh a kal an nih dan te chu sawiin an in chibai ta a, Chhippheng Lal Dengkhuaia pawh chuan ‘a tlangvalte awmdan a lawm biklo dante sawiin, Satlâk khua ten tharum hman tum ngawt lo a, remna an zawn danah chuan lawmthu a hrilh ve luam a, inpawh tlang tak chuan remthu an sawi thei chu nunau ho lawmah tlain an thawhuai hlawm a, Chhippheng Lal Dengkhuaia chuan zu te zukin hlim tak chuan an ti ti bawrh bawrh a, Sângtuala inbeih thiam an tih ziate chu sawiin, a tuk lam an ruahman, Lal fanu te thlahualna hmang ve tur chuan an sawm a, Lal sawmna chu val upa leh pasaltha te chuan sawiho in, hahchawlh pawi an tih loh vang leh remthu an sawi tak nemngheh na atan te, tlangvalte nun zalenna boruak muanawm zia hriatna atan hman an duh vangin hman ngei chu an duh a.

Chhippheng pasâltha Vawmphunga pawh bengkawm pawng ul chuan an in lamah an kuah phei a, Lal Dengkhuaia chuan a pasâltha Vawmphunga chu 'Lal thu pawisa lo a a chet vang chuan na tak a zilh in, salâm chawi tur chuan a ti a,tun hnu a eng thil pawh Lal leh khawnbawlte thu pawisa lo a, a kalh leh a nih chuan, khua atang a hnawchhuah an nih tur hrilhin, meng kun lap chuan an kuah haw ta hnu hnu a, pasâltha Sângtuala naupang te lak a chutiang tak a thangtlawm chu a rilru a na ngei mai, malkhai ah a hneh dawn lo tih a hrechiang si a, remchang hmasa ber erawh zawn ngei a tum ran thung, a hmel a thinrim dur khuih vang chuan a naute chuan an melh hrek hrek ngam chauh a, pasâltha Sângtual mizia chu an ngaisang ta kher mai, mi tam tak nise mi lu khai tam duhin,pasâltha Vawmphunga lu chu an khai duh ngei ang tih hrechiang hle si a, zaidawh tak a nun hman chuan, chhungkaw hlimna leh khaw tan boruak muanawm theih dan chu an hriatchian phah kher mai. An nun kal turah pawh ngaihtuahna an neih thui phah kher mai, an pasâltha tuk zaltu chu belhchian ngei tum chuan an rilru chu an siam ru saih saih a.

Zan riah eikham chuan khaw ruk valrualte chu zawlbuk chhung a an len loh vang chuan, tualah meipui chu an chhep hluah a,Thûamkunga bawk chuan bawrtu a ngah leh ber a hlim tak chuan an thum leh ham ham thin, a hnu deuh chuan tawngkam mai lo chuan zawlbuk chhungah chuan an invawrh thum ta tawk tawk a, tlangvalte chu an ri ta hulh hulh a, pawn lam a meipui hnung puak a thute pawh chu thu reng theilo chuan zawlbuk chhung lamah chuan an inhnawh lut ta tawk tawk hlawm a,Thûamkunga chuan pumrua tiat tawk deuh chu ‘nang kha lo chhuak rawh, nang zawk kha’ tiin a au lauh lauh reng a, val upa Chhâwnthiaua chuan tlangval te u, khual valte kha in nula te in rimpui ngam dawn na nge, inbuan te chu naktuk lamah Lal mualah in chhunzawm mai dawn nia a tih chuan, khualval te chuan ni dawn tak e, nangni khua hian nula hmuh tlak innei a nih ngai chuan min chuankai pui ngei tur a ni an ti sap sap a, Chhippheng tlangvalte chuan ‘ni tuk e a, nangni khual valte hian kan nula te inhmuh hun ah meuh chuan hawn nachang inhriat pawh kan ring hauh lo a nia, hawh u le i chhuak tak teh ang u’ tiin tlangval rualte chuan a hlawp hlawp chuan Chhippheng kawtthler chu an hrut ta dul dul a. val upa leh pasâltha te erawh chu Lal sawmna ang chuan Lal in lamah an chuangkai thung a, Lal fanu te erawh tlangval ten pawh ngam heklo le, an in bul hnai a nula dangte nui awr awr chu ngaithla pah chuan, chhun lam a an mahni lo chhan tu Satlâk khaw tlangvalte chu sawi chhuakin , vawmpui sa chhum so bat bat pah chuan an ti ti dun sap sap a, Dar thian vawiin i thihdan lai a pawmtu che tlangval mawlh kha a ni tha ka tih ni, ka mitthla ah a cham tlat nia mawle, ka la hlauhthawn vang nge ni dawn ni, mit ka chin deuh chuan sam leng suau khawp a a tlanpui dawr dawr lai che ka hmu tlat thin’ a han ti sap sap a, Darthuami chuan ‘chutiang chuan min pawm tak tak a mi, nula pumpa tlangvalin min han pawm nul nul chu a va zahthlak ve’ tiin a phun sap sap a, chutia nula te an ti ti sap sap lai chuan, Lal pahnih rui lungpuam chuan hla hrilin an chheih ta dut dut a, khual pasâltha te pawh chu lu kai chhalh an nih tak hnu chuan an su ve ta lawih lawih a, pasâltha Vawmphunga pawh lu pawng bur chuan a thu tum lauh lauh reng a, zu a han lem ve tak nual vang leh a thiante chheih that that takah chuan tui vaklo chuan a ni pawh chuan zawmin, an lam rei tak deuh hnu chuan a ni pawh chuan thinrim theihnghil thak chuan a chheih ve ta lauh lauh a.

Pu Chhingtawia chuan a inchhung khat tlat a tlangval thu khat hmurte en kualin ‘khawnge zanin chu tlangval lam in tha hnem ang reng a,hnam eng zah chiah nge innih han inchhiar teh u, hnam sawm in tling reng emaw chu’ a tih chuan, Chhippheng tlangval Chhawnkima chuan,khawnge keiin ka han chhiar teh ang tiin a han chhiar nghal a,tuibur hmuamda zet a chhiar hnu chuan ‘ka pu Chhing, zan in zet chu i va han ropui tak em, Hnam sawm leh hnam hnih zet kan ni e’ tiin hlim tak chuan a sawi lar lar a.Pu Chhingtawia chuan ‘englekhawle, a va han lawmawm ve, keini in a kar a inleng chutiang zah ka nei chu hawh awi u’ tiin zubel chu rappui chung sang atang chuan a han lek thla thuai a, zu tuitling eng khat pup mai an hmuh chuan, tlangvalte chu an phur ta kher mai, zu khawn tur chuan an in buatsaih in an peih chuan Chhawnkima chuan ‘khawnge kan pasâltha khual kai Sângtuala kha lo chhuak tehse, zu hi han khawn hmasa ber la, kei nin i hnung kan lo zui nang nge’ a han ti lar lar a, a thiante chuan kan pasaltha chu han chhuak vat che le, kan dang a ro zo tawh in, tawng pawh kan harsat a nih tawh hi maw’ tiin an lo nawr ve hlawm a, tan reng chi ah ngai in, pasaltha Sangtuala chu a lo pen chhuak ve ta a, kei ai a khawn hmasa tur vek innih vei nen, in ti zahthlak e tih nang nang pah chuan,tukhum sai ngar ngar chuan zu chu a han fawp a, an han fawh liam liam hnu chuan, zu chuan tlangval eng emaw zah chu a daih ta lo a,Pu Chhingtawia chuan ‘naute u thlaphang reng reng suh ang che u, khuanu zarah zu te zawng ka phang hauh lo a nia, mawng lam hre lek lo khawpin aw niang’ tiin zubel pahnih chu a rawn phih chhuak leh ta nawlh a, tlangval zukhawn tawh lu kai chhalh tawh te chu lawm in an lo nui hluah hluah hlawm a, Pu Chhingtawia lah fiamthu duh mi a ni kher bawk nen, an luruh a ring sawt ta kher mai le.

Lal in lam a chheih that that thawm chuan Thûamkunga uan tha pui ti chhuakin, an lenna nula chu melh vung vung in ‘a thapar tawnglo hian chhuihthangvala ar ang ka vai bil lawng e, i sakhmel darang ka tawng har hi khuanu duansual em mi ? ngaih lungrun i zun chhawl min ban hi hringchan chhung hian ka bang dawn nem maw, thaval dang tawnah khiangawi chuan min liam san lul suh, Riangval hian ka tuar zo lawng e’ ti a thluk a han siam chawp a in, an chheih ve ta that that a, pasaltha Sângtuala chuan ‘a tha ngurpui zun zam lairilah ai ang a cham, zaman hmawngthing iangin tangah min zem, samang then hnu di zun ngaih puan ang ka bang dawn nem maw, tha lengdang tawn ah parang vul hian ka mawi lo, zamual liam in nuthai chang in khiangawi mah la, thlafam chang siang ka lawi hma chuan, lungruk ah nghilhni ka nei dawn nem maw, biahzai nem kan tiam thudi chul mai lo in, mawiten khuanu hualin leng zel la, vang khaw mawiin’ tiin a han hril ve a, Thûamkunga chuan a thluk siam chawpin a han sawt kat darh darh a.

Pasaltha Sângtuala mitchhing a lam kual durh durh chu, meichher eng fiah lo tak hmang tangkaiin,Thuamkunga chuan a ke ah a han thai ru zauh a, Sângtuala chu inring hman heklo le, bek sawh chawrh chuan a tlu hlawm tawl a. Thûamkunga chuan ‘ka hlauh an reng a maw, i chhungte chuan min huatphah lawng maw, i tha em thianpa ? ‘ tih pah chuan a kuah tho thuai a, an nula rim lah chuan pasâltha khual kai pha ngat, a ruk a buaipui ngai ang a lang chu mak ti chuan a melh leh zauih zauih thin a. an lenna pa pu chhingtawia erawh chuan Thûamkunga khawsak phung chu ngun tak a en in, an thiandun infiam dan chu tapchhak kil thim atang chuan a lo nuih suk suk a, Satlâk pasâltha meuh pawh chutiang a an fiam ngam a nih chuan tiin a lo ngaihtuah daih a, tlangvalte phur lutuk te chuan thiante ai hniam a hrut ngei tum chuan an mute lei hrut dah dah hlawm a. Pu Chhingtawia chuan a inchhung a khual kai pasâltha chuang kai chu inchhuang ru tak chuan, khumai a thu a nupui chu a melh leh hrek hrek thin, in su lawih lawih khawp a tlangvalte sawt chheih that that chu insum zo ta lo chuan puanven sawi chhingin a tho ve ta nge nge, a nupui Pi Chuailoi chuan chuan ‘ Sangtei pa thu mai mai teh khai, patling awm hian awm ve tawh teh’ tiin a lo khak zauh a, pu Chhingtawia thu leh tur chu Thûamkunga chuan kai in ‘In run chhungah hlim lai par kan tlan, i tello chuan khualvalte lunglawm a kim lo, i sulhnu leh kut chhuak par ang kan tlan, lungmuang a min siam vang hian ngalfim in dam reng rawh ‘ ti a hla thu a chham meuh chuan, Pu Chhingtawia pawh a su ve ta lawih lawih a, a fanu Sangtei chuan nui chung hian ka pa thin lah hi tiin a lo nui ve hai a.

Pu Chhingtawia chu a nupui kawk vah chuan a han ding kawi taih a, ‘ Hringchan chhung a ka mawina leh ka lunglai luah tu ka thai Chuailo,ka tan i damkhua sei sela hringchan chhung in hallo ten i lengdun zel ang, hringlang tlang a pawh suihlung rualin pialral i pan dun ang’ tiin a han hril lauh lauh a, an lenna pa ber in a zawm ve takah chuan tlangval te phur lutuk chu khanchhuk thawi thuak thuak chuan an zuang ta zawk zawk a, in chu a chim mai dawn a alan takah chuan Sângtuala chuan a thianpa chu mitmei zauhin ,Thûamkunga chuan Pu Chhingtawia chu kaiin sumhmunah chuan an in zui chhuak ta, tlangvalte chuan zui ve in, Pu Chhingtawia te kawtzawl ah chuan an chheih ta dual dual a, hmundang a leng tlangvalte chuan chutia an thiante chheih dual dual chu zawm in. Chhippheng leh khual valte pawh an lo kal ve zel a, a hmunah chuan leng ta heklo le. Pu Chhingtawia chuan hmahruai in zawlbuk lam pan chuan an zaithla ta tuar tuar mai a, Lal mual an zu thlen chuan Lal pahnihte chu kai chhelhchhawlh chuan an kawng kham zawng chuan an lo mute lei hrut dah dah a, tlangvalte chuan zawmin, meipui pawh an chhep eng hluah a, Lal in atang chuan zu bel chu an pu chhuak leh zauh thin a, thenawm hnai pa phawk deuh te pawh chu zubel pu in an lo tel ve zel a, a khat tawk chuan zu chu seki no chuan an thal leh zawk thin, zan a rei tulh tulh a, Lal mual thawm pawh a tha telh telh thung a, khuan hmasa a khuan phei chuan tar lungleng mu theilo te chuan lo zawm in a mipa puitling chin chu an kim a ni hawt tawh mai.

Khawfing chat in khua pawh a lo eng ta uau in reilo teah chuan khua pawh a lo var zui ta, naupangte pawh chu sava veh lam buaipui lo chuan, Lal mualah chuan an fuankhawm thuai thap hlawm a, sechal an talh tur chu sehuang atang chuan an kai chhuak ta ruau ruau a, sechal ki eng pup chu naupang te chuan an ui thu chu an sawi sap sap hlawm a, Lal Dengkhuaia a rui lungpuam chuan ‘nangni tlangvalte u, ka sechal hi fiam ngam in awm em, a hnehthei in awm a nih phawt chuan ka silai pakhat ka pe ang che u’ a han tih chuan. tlangvalte chuan silai awt viau mahse sechal meuh han khin chu an zuam meuh hlawm lo thung a, Satlâk pasâltha Sângtualan a hneh ang tih leh a hneh lo ang tih chuan tlangval te chu an inhnial ta mum mum mai a, chutiang a tlangval an inhnial lai chuan, Chhippheng pasâltha Vawmphunga chu lo pen chhuakin ‘khawnge Lal silai chu ka han hlawh a nga a ni mai a lawm, Lalpa i thu chu i zuk mai lawng maw ? ‘ tiin a han tawng lung lung a, Lal Dengkhuaia chuan ‘ka thu hi ka la zuk ngailo, ka sechal hi i hneh thei a nih ngat chuan silai ka pek bakah i salâm chawi tur pawh ka ngaidam ang che, heng nunau lo pungkhawm te hi ka thu hre tu ni rawhse’ a han tih chuan nunau te chu an reh ta thup a.

Pasâltha Vawmphunga chuan puanven sawichhing chuan sechâl chu a pan hnai a, sechal lu lek vut vut ki ah chuan man in an han innawr chu an inhneh tawk kher mai, an han innawr rei deuh erawh chuan, sechâl chu mei ti kawh vu chuan a han tang tak tak meuh chu, pasâltha Vawmphunga chu a tawlh ta hawn hawn a, reilo teah a che chhe dawn tih hriai in tlangval sawm lai chu, sechâl thlunna hrui lamah chuan kal vatin an pawt ding ta a, thaw huam huam chung chuan pasâltha Vawmphunga chuan tlangvalte chu melh dur khui in ‘engvang a lo pawtsawn ngawt nge maw in nih hlawm chu le, thapui ka la chhuah hleinem, lo inrawlh tawh hauh suh ang che u’ a tih tak hlurah chuan, tlangvalte chu an kalsawn ta zal zal a , tui a lem zawh chuan sechâl ki ah chuan a man leh ta chat a, nunau te chuan hlauthawng ru tak chuan an lo melh thup hlawm a, an han innawr leh chu an tang dun ta khawp mai, sechâl pawh mei kawh vu khawp chuan a han tang leh a, a tha nem zawk pasâltha Vawmphunga chu a tawlh leh ta han han a, theih tawp chhuah chuan pasâltha Vawmphunga chu han tang ve mahse awmzia a nei thulo khawp mai, sechâl chu a han zuang zawk in, a ki a han lek kual zawk a, pasâltha Vawmphunga dar dinglam chu khap khat tha lam mah a kak nghal hai a, a dar hliam atang chuan thisen chu a rawn luangchhuak nghal zaih zaih a.

Satlâk valrual te chu an thum huk a, sechâl lamah chuan an tlan ta huk a, sechâl in ki lei huh a vai tur tak chu pasâltha Sângtuala chuan man hmanin a han phih nghek a, sechâl chuan mengsen rum in a ki a man tu chu a han nawr nghal zawk a, ‘Thûam thian la sawn nghal rawh,hmanhmawh in’ a han ti tuar a, sechâl ki hnih a man in a tha tawp chuan a han tang chu a hnung zangah chuan artui pum tia tia chuan a pawng tawk tawk a, sechâl pawh chu a ding ta chawt a ek cheh phung khawp a sechâl atan pawh chuan a ding sai ta hluk hluk a, sechâl thinrim chu a hnar phit dut dut in a mei chu vai kual zawk zawk reng a, tuibur hmuamda zet an din khurh dar dar chuan ‘kha keimah Sângtuala, Lalnu Thanthûami khaw tuiliak ka ni ngai e’ ti a au that that in a kun hniam deuh a, a han tang leh nghek chu sechal chu a thal ta hual a, thawh tum chuan a ke chu leng vuat vuat mahse, a man tu chuan a hneh em avang chuan a awn ta rawng rawng a, sechâl awn rawng rawng chu mipui hlim haw haw chuan luah lan in ,pasaltha Sângtuala hming chuan Chhippheng khua chu a luah khat mup mup a, Sangtuala chu thlanfim bual huh zuih chuan a han tho a, sechâl pawh a lo thove nghal vut in, a ki chu a han thing nawr nawr a, sechâl mit tak a melh kal chung chuan, ding hle hle rawh paasaltha Sangtualan han ti sap a, a cho loh val chu thlir doh doh in sechâl pawh a ding ta vung vung a, tlangval te chuan Sângtuala chu silai a hlawh tak vang leh sechâl meuh a herh thluk vang chuan lawmin an vawrh ta nawlh nawlh a, pasâltha Sângtualan lei a rah meuh chuan Lal pahnih te hmaah chuan a ding ta vang a.

Chhippheng Lal Dengkhuaia chuan ‘nang meuh zawng mi danglam tak i ni e, i chanchin ka lo ral hriat pawh an uar lu hauh lo tih ka mit ngei in ka hmu ta e, nang leh i thiante hian ka khua in lo kai a nih phawt chuan nuamsa takin ka siam ngei ang che u, i pa pawh khawnbawlah ka dah ngei ang, in chet phungah mihring nunna in zah dante hi pasâltha dik tak zia a ni,i dam khua sei mawlh rawhse, hawh awi i lawmman tur chuan a hmuak a che’ tiin silai chu a han pe a,pasâltha Sângtuala chuan ‘Lalpa min hrethiam rawh, lawmman duh vang a khang thil ti ka ni lo, puih ngai ka hmuh vang chauh a ti ka ni e, kha chu pasâltha Vawmphunga chanpual a ni e’ a tih chuan a lo hlir tu te mak ti chu an ka hau hlawm a, pasâltha Vawmphunga pawh a naute kuah chung chuan a rawn baih phei suih suih a, Pasâltha i ta tur dik tak a ni e, nang ang reng a mi danglam hi ka la tawng ngailo, i chung a ka lo chet tawh danah khan min ngaidam dawn nia, harsatna i neih phawt chuan min han hrilh ve ngei ang che, i tan theih tawp ka chhuah ngei ang’ tiin a kut chu a rawn phar chhuak a, hlim tak chuan an in chibai ta a.

Lal Dengkhuaia chuan ‘pasaltha he lawman hi sechâl keuh thlu thei tu hnen a pek tur a nih ang takin i ta tur dik tak a ni e, hawh awi la rawh’ a tih tak tlatah chuan Sângtuala chuan lawmthu sawi chuan a la ta a,Mualkunga hmeithai fapa sek phiar fat leh tlangval tuaitir te chu, Sângtuala chuan ko chhuakin ‘ ka nau he hmanrua hi la la,tangkai takin hmang ang che’ tiin a kutah chuan a han hmeh bel ta chawt a, Mualkunga lawm lutuk leh mak ti chu a ka hau a, val upa Chhâwnthiaua chuan 'tlangval lawm takin nei rawh, a neitu tur dik tak i ni e’ a rawn tih ve tak ah chuan Mualkunga chuan a lo awh ruk ngawih ngawih, a rin loh lutuk a a han nei ve ta chu a lawm kher mai, chu pawh a mi ngaihsan a hnung a lo zui thin ngei kut atang a ni leh nghal, lawm vang a mittui luang zawih zawih chung chuan ‘ka lawm e, pasâltha i kaihza vengin ka damchhung hun ka hmang ngei ang’ tiin a sawi thei hram a, a bak chu a hrawk a hnawhtu vang chuan a sawi zawm thei ta lo, khual valte pawh chuan Satlâk khaw tlangvalte in duh sakna an hmuh chuan, an rilru khawih tih hriat tak chuan an reh thup reng a, Mualkunga lawm lutuk chuan mittui hruk zauh zauh pah chuan‘pasâltha Sângtuala dam reng rawhse’ a han ti tial ruai a, Chhippheng khua te chu lawm in an haw haw leh ta ruih ruih a. Lal chuan tlangau hnenah chuan, fatu te hnenah ran talh tawh tur a hrilh tur chuan a han tir a, tlangau pan Lal thu a sawi lai chuan khawnbawl upate chuan an vawk la tur chuan an lo hrilh tliar tliar bawk a, silai chu Lal mualah chuan a puak thum dawp dawp a, naupang saphing inchuh thawm chu an ri laih laih bawk a, Chhippheng khua chu hlim thawmin a khat ta, khual valte chuan nula tuichawi chu an zui thluah thluah bawk a.

Chungliana leh Mualkunga pawh chuan zanlam a an nula rim Sangpuii te thiandun chu an zui ve hnak hnak a, Lal fanu te pahnih chhawm in, Sângtuala pawh tuikhur lamah chuan a kal ve a, fiamthu eng eng emaw sawiin an nui leh hak hak thin a, Thuamkunga leh Rinmawia pawh chuan lo fin pheiin ‘Sânghnap, i va han duhâm thin ve maw le, khawnge dangawm teh, min dip zawng a i khawsak vaih chuan ka bin tuk pum thak mai ang che ’ tiin Lal fanu Lianmawii chu a han nul thawi thuak a, Rinmawia chu melh in ‘kha k’u Rinmawi,Lal fanu pakhat zawk kha lo nei ve tawp rawh’ a han ti zui a, Lal fanu te chuan an thianzaho in pawh zia an hriat tawh vang chuan ngai haw bik lo in an nui ve hawk hawk a, Chungliana te haw lam an tawh chuan Chungliana chuan ‘Thuamek, mahni phu tawk bul a khawsa turin ka hrilh thin che a ni lawm mi, a tawpah i tap leh pur mai tur a sin’ tih pah chuan kawngthlangah a nek thla nghal nawlh mai a, Thûamkunga chuan ‘chhe hei,ka nau chahai te chuan bual a duh leh ta mi ? khawnge ka han bin tukpum thak law law teh ang che’ tiin Chungliana chu a han kuah nghal chat a, an inchai chu a ni nghal ta a, tu zawk mah chan tha awm lo chuan an ding khur dun ngar ngar a, an lei rah lah a khawk tawp tawp bawk nen, tlangval dang tuichawi te chuan Satlâk tlangval te in keuh tum chu an lo hual hnaiin,an haw haw ta luih luih a ,a thleng hnu hnung a piang chu an au ring hlawm nen, tuikhur kawng lam ah chuan tlangval thawmna tak lo chhuak vang chuan tlangvalte chu an liam zung zung a, tlangval lo bawr lut te chu an keu thla tawt tawt hlawm, mi pahnih lo in nawr ngat ngat te an hmuh chuan, phur tak chuan an lo fuih ve tuar tuar nghal a, Thûamkunga ke rahsual chu Chungliana chuan chawi kang in, tlangval ding khawm den nan chuan a hmang ta hmiah mai a, Thuamkunga chuan a thawh rual chuan a bul a ding Chhippheng tlangval chu man lawk in kawng thlangah chuan a theh thla ta hmiah mai a, an ni khua lah chuan e heu tiin an thianpa chu chhan in Thuamkunga chu an bawh ta huk a.

Sânghnap min pui ru tiin Thûamkunga chu a han te tuar tuar a, Chungliana chuan a mah hnaih tu khawdang tlangval te chu kawng thlangah chuan a theh thla hmiah hmiah a, chutia tlangval te in pang aw zial tup tup ah chuan Rinmawia leh Sângtuala te chuan, Lal fanu te chu chawi lawkin kawng chhakah chuan an hlang thuai a, an thiante innuai thelh tur chuan an phei nghal thuai bawk a, a tawk ti a an au lai chu Khawbual tlangval pathuam lai chuan Sângtuala chu an lo bawh rawn ta, kawng dang awm ta heklo le an ni pathum chu kawng thlangah a theh liam thuai a, tlangval tha za tih takah a hmuh hmasak a piang te chu kawng thlang ah a vawrh thla ve ta pawp pawp a. Thuamkunga chu a bawp pahnih ah Chhippheng tlangval pahnihte chuan chaih in, a in vawn tan na kut chu tlangval pahnih hian phelh tum in an lo vir buai nasa mai a, Thuamkunga chu a puanven a lo phelh nuaih tawh nen nuih sang chuan,Thuamek tang ta che tih pah chuan, a kut phelh tum a kun mekte chu a han vawrh thla nghal in, a bawp mantu te pawh chu a han vaihma nghal a, Thuamkunga chuan puan veng tha mawlh mawlh pah chuan, tha a va heh ve tiin a then sak a, Lungtian leh Lehlawn tlangvalte pawh an lo thlen belh zel a, an lo thlen kim meuh chuan, khaw hnih tlangval te chuan hnen ngang heklo le, kawng thlang ah chuan an liam zo ta a, lo chhuah tum hmasa apiangte chu an lo zubel lum hmiah hmiah a, Thuamkunga nuam ti leh phur lutuk chuan kawng thlang a tlangvalte chu en in ‘ kha nangni ho chu, in va awm thlang ve’ a han ti lang lang a, midang te chu an lo nui ham ham bawk a.

Laiawrha leh val upate an lo thlen a, thil awmdan an hriat chuan an nui ve ta hawk hawk a,val upa chuan in tina an awm leh awm loh te zawt in, an awm lo tih an hriat chuan kawngthlang pe hun atang chuan tlangval te chu an lo vak chhuak sap sap a, an o chhuah kim chuan hlim tak chuan an in chibai nak nak , vaibel te chu an fawp talh talh a, pasâltha Sângtuala chak zia mawlh chu an hrilh fak chu a ni leh ta, a ni chuan 'nangni ho chuan mi in fak mawi thin kher mai,min hlahthlem vang mai chauh a lang mawi ka ni e' tiin a then sak a, Lal nula te chu hawh u i kal tawh ang ule tiin Tuikhur lamah chuan an in zui leh ta hnak hnak a, an liam hnu chuan chutiang tak a mihring chak chu mak an tih zia mawlh chu an sawi zui mawlh mawlh a, Sângtuala ten ran talh na an thlen chuan, tlangvalte thusawi an hre tawh tih hriat tak chuan an lo melh thap hlawm a, chhun lamah chuan Khawbual Lal Tuanpara chuan infiamna a ti tha ber hnen ah silai pakhat a phal thu leh Chhippheng khaw Lal in lawmman a siam darkhuang chu lak ngei tum chuan tlangvalte chu an in buatsaih hlawm a, tukthuan ei kham chuan Lal mualah chuan Chhippheng khua te chu nunau nen chuan an kim ta thup a, naupang thenkhat te chuan kei pasâltha Sângtuala tiin an thiante chu, inchai na tur a favai chhunvumah chuan an theh phar nak nak a, naupang tah belh deuhte chu an tap rang rang bawk a, tlangvalte chuan an theihna lantir ngei tum chuan an rilru chu an siam sauh sauh a.

Tlangvalte an lo kim chuan Lal Dengkhuaia chuan ‘vawiin a kan infiam na ah hian tumah thinrim loh tur a ni, buaina chawk chhuak tu chuan a phu tawk hremna a hmu ngei ang, a ti tha berin silai a dawng a nga, a dawttu in darkhuang a dawng bawk ang, infiam na tur chu inbuan leh silai kah a ni ang, heng infiamna pahnih a ti tha ber in silai a dawng ang, a dawttu in darkhuang a dawng bawk ang. Khai ule, infiam tur tlangvalte chu he lamah hian phei rawh ule’ a tih chuan, tlangval zahve ai tha mahte chu an phei ta huk a. tlangau pa chu lo chhuakin tlangvalte chu an inbuan tan nak nak a, Satlâk khawho chu khawdang tlangvalte chuan an hnen meuh hlawm lo, an mahni chakna piah lamah an rilru huai na chuan puiin, chu an rilru chuan chakna a pe tel tlat a ni, an ti chho nek nek a Thûamkunga leh Chungliana chuan inbuan a chak ber nihna chu an zawng dawn ta, chak ber zawnna nei tur te an lo pen chhuah chuan nunau te chu an haw haw dur dur a, Chungliana chuan ‘Thûamhnap, tukin ang chiah khan ka vawrh leh dawn che a ni, favai bar hawng khawp a nunau hma a in chhak i duh loh chuan min buan hmingchhe lo mai rawh’ tiin a han vau chhar chhar a, a ni Thûamkunga lah chuan ‘ka hlahthlem che vangin i chapo khanglang elaw, he lai hmunah hian thian dun a awm theih loh tih hre reng la, ka khawngaihna sang ber in,favai tamna laiah ka vawrh ang che’ a ti ve thung a.

Favai an chhunbelh zawh chuan tlangau pa chuan tunah in bei rawh ule tiin a han au that, an puan tlangah in man in an han tang tak tak chu, favai chu a khu luih luih a, tuibru hmuamda zet an vir zak zak hnu chuan, Chungliana chu a faivai khu piah chuan a rawn per chhuak ta nawlh a, rang tak a thoin favai khu karah chuan a zuang lut leh thuai a, a hma ai mah chuan khu chu a nasa in mihring chu an lang ta hauh lo mai a, Thûamkunga chu a lo per chhuak ve ta nawlh a. tlangau pa chuan tawp tur chuan a au tuar tuar mahse, a thu an ngaih loh vang chuan a ni pawh chu favai khu chhungah chuan a zuang lut ve ta rawk a, tlangau pa chu lo te tuar tuar ta mai a, mipui te mak ti chu an phawk hru hlawm a, Lal te pahnih leh pasâltha leh val upate pawh chu thu hle hle theilo chuan leikatlangsangah chuan an ding thup hlawm a, chutia an thlir thap lai chuan an pathum chuan an lo chhuak rual thawt a, tlangau pa chu zawi muang in kawng dawm chung hian a lo tho bai saih saih a, inbuan a te pahnih lah chu an mitmim nuai chuan an buai char char a, then nawng chung chuan tlangaupa chu Lal te dinna lamah chuan a baih chho saih saih a.

Lal Dengkhuaia chuan ‘eng ti zai zia nge, i va han te na sa rei ruai ve’ tiin tlangau pa chu a han zawt a, a ni lah chuan then nung chung hian ‘Lalpa ka inbuan hmuh tawh a chuan a la rapthlak ber, a rem lai lai ah an in hnek pawp pawp a, an in tlawh bawrh bawrh a, eng tin nge dam tak a an lo chhuah theih zawk pawh ka hre hrep lo e, min han hnek rawn mai chu engtin nge ka la dam pawh ka hre thei nek lo e’ tiin a lu leh a taksa a khawih theih chin chu a han chul thuak thuak a, tlangau pa thusawi an hriat meuh chuan, tu mah insum thei an awm hauh lo, an vai mai chuan tlangau pa en chuan dul dawm meuh chuan an nui ta char char hlawm a, inbuan te pahnih an en chian chuan an lo duk thluah in, an taksa te chu a sen thleh thluah mai a, tlangau pa chuan dawt a sawi lo tih an hre thiam ta a, an mitmim a reh deuh chuan Lal Dengkhuaia lam en chuan an chak zawk thu chu an rawl tawp chuan an sawi dun a, Lal te pahnih meuh pawh chuan chu mite pahnih en chuan an nui ta tlawrh tlawrh reng a.

Engmah sawi theilo a an nuih khurh char char hnu chuan hnu chuan, Lal Dengkhuaia chuan ‘inbuan tur kan tia ni lawm mi, eng vang a in lawk nge maw innih reng le ?’ a tih chuan a han zawt a, Thûamkunga chuan ‘ he mihring laktlak loh lutuk vang hi a lawm mawle, min tihdan ang in ka tih loh chuan ka tuar lutuk dawn a sin’ tiin a chhang a, Chungliana chuan ‘mawi a Lalpa, he pa hian min paih chhuak a ka lut chiah kha min lo lawk nghal a, tichuan a remchan dan ang in ka thawk chhuak ve ta zawk a nih kha ‘ tiin a chhang ve thung a, an chetdan lah tun hmu heklo, an insawi thiam dun nasa mai si a, Lal te pahnih chu an han inrawn hnu chuan favai awm lohna a innuai tha mai tur chuan an rel ta, tlangau pa chuan inchhung dung a din hlatin tunah tan rawh u a han ti vin that a, an puantlang ah in man in an vir duh zak zak a, tumah in chawi kang thei lo chuan an unau tluk ta thak a, lei an deh rual chuan a remdan chuan an in tlawh in an in chum leh ta zawt zawt a, Lal pahnih te chuan tawp tur chuan an han vin that that a, an ni chu tawpin a mah hi a lawm tiin an in kawk leh ta, an han thawh fel chuan tu hmelah mah chuan thinrim na hmuh tur awm lo chuan an nui sang lawi si a, Lal te pahnih pawh chuan an ni thiandun chu tih vak ngaihna hrelo chuan, engpawhnisela a remchan dan ang a chhunzawm leh tur in an tawp tir ta rih a, an beisei ber Sângtuala che lai an hmuh loh vang chuan an lawm a kim ta hauh lo mai pawh a.

Silai kah chu tan tur chuan an ti ta zawk a, kah tur an siam zawh chuan tlangval silai nei te chu an kim deuh thap a, pasâltha Sângtuala erawh chu a tel ve duh lo a, Lal ten tel tur a an tih lui takah chuan i he lo chuan a tel ve ta a, pensawm nga danah kah tur an dah chu tlangval za chuang chuan an la fuh a, pen sawm sarih atang a an kah leh chuan mi sawm nga tha lam mah dawn lai chu kap fuh an la awm a,pen za dan atang erawh chuan mi sawmhnih tha chauh an awn tawh a, Mualkunga pawh a silai thar nen chuan a la tling ve ran a,a kum zawng a chhut chuan Mualkunga chu lawmman dawng awm tak a ni tawh a, pen za sawmhnih atang chuan an han kap leh a, pasâltha Sângtuala chuan kap hmasa berin tawng khat dawn chuan a thelh ta ,a silai tin dan uluk tak a en tute chuan duh sela chu a la kah thelh lo ang tih ang chiang tlang khawp mai. Chungliana ,Thuamkunga leh Mualkunga te chuan an thawi theuh a, midqng zawngte chuan an kah thelh hlawm a, an silai mu denna atang chuan tumah a chuti bik tih tur tumah an awm loh vang chuan, kap tha leh tur chuan an ti ta a, uluk tak chuan an han kap tha leh chu Mualkunga chuan saipir dawn chuan a thelh ta hlauh a, Chungliana chuan a han kap ve leh in a thawi leh faih thung a, Thûamkunga chuan han kap ve leh in a thelh ve leh a, Chungliana chuan a thawi faih vang chuan pakhatna dinhmun a hauh ta a . . .

Lo tawk leh phawt tehse ,he ti zawng hi a ni e, ISUA THAWHLEHNA HI NAGNG LEH KEI A TAN A NI A,A NUNNA TAWMPUI TURIN,DAMCHHUNG IN I THAWK ZEL ANG U,

I PUMPUI CHAUH NGAIHTUAH A HNA I THAWH RENG CHUAN REI I DAIH DAWN CHUANG LO, I RAM LEH HANM TAN I THEIH TAWK CHHUAH LA,A SIAMTU CHE THEIHNGHILH NGAI SUH ANG CHE

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)