PASALTHA SANGTUALA BY Vana Fanai (Completed)

[Ngaia]

sang.jpg (23.96 KiB) Viewed 49843 times

PASALTHA SANGTUALA ( Mampuia Pa)

Bung khatna

Kar loah buh seng alo hun a, hna hram thawkrual ni mah suhse, Sangtuala pawh a pa khawhar hnem tur chuan ram riak tur chuan a in siam ve zung zung a, a pa nen feh hmasa pawlah kalin, kawng thlanglam a thawm hriain Sangtuala chuan a sairukherh nen chuan a han veh hnai a, vawmthiang nupa chuan fah rah chu an lo vam dun pap pap mai niin, a fapa awmdan a hmuh chuan Pu, Tawnliana chuan thil felhlel a awm tih hriain in inringru tak chuan a fapa en na chu a pan tham tham a, a thil hmuh chuan a ti tang nghal kher mai a silai chu kah mai tur chuan a han siam nghal zung zung a, a thalthlah in pawi a hawllo a nih chuan a sawh khawk tur pawi zia hre chung chuan a fapa chu tawlhhnung turin a han mitmei zauh a,uluk tak chuan a silai chu a han lek kawh nghalin eng emaw thulh a hman atan a chempui tle vur mai chu lak awlsam tur chuan a han siam rem nghal a zat a.
A kah har chuan chung ramsa hnar fing takte chuan an rim hre dawn chiang sia, a lian zawk leh an mahni hnaihtu zawk chu a luah tak a han kap thuai mai a, savawm pawh chu a let nghal tawp a, silai mu dang thunna hun awm hek suh, a chempui chu a han phawrh nghal vat a, in ring tak chuan a ding ta teu mai a, a bul a a thian tla silai rik rual a hlawm tup Chu alo hmuh hmaih aw zawnglo, huk tuar tuar chungin pu, Tawna lam pan chuan a lim nghak zawk bawka,sa hrang tih takah a chakin a rang kher mai,pu Tawna bul chu a thleng ani chawp mai, savawmin a rawn bawh tur chu, savawm hmaiah tak sah tum chuan,a chempui chu a han vai fua mai a, a tum a fuh ta hauh lo,hrui hnawk a vai tel nimai in hria a, savawm chuan a ke hnunga ding chung chuan a rawn bawh ta thut mai, a tin hamna chu thisen a rawn hnam nghal tuam tuam a,rei tak tlin loh pawh awlzate chu tianga an in mal thlur lai chuan. Sangtuala chuan a chempui hmanthiam ngei mai chuan, savawm hmuiah chuan atha tawpin an sat nghek mai a, naupang tha mah nise, a sat na thawkhat a niang, savawm pawh a huk thawt mai a, a nati vir buai lai chuan Pu, Tawna chuan aluah a han chhipthlak nghek mai a, savawm pawh a te zuai ta raih mai a ni.
Chu tianga an pafa chauh a an buai tawp lam chuan tlangval feh kal hma dangte chuan an rawn pawh hman hram a, Pu, Tawna ban pawh a theih ang ang chuan an han buaipui nghal zung zung a,savawm tin hnu ringawt erawh zawng na lutuk a nih loh avang chuan buaipui ngai lutuk ani lo hlauh a,an buaina ber a reh chuan, tlangval phanchang tawh tak Hrangsua chuan thil thlendan vel a lo zawt a,an chamchin tlangpui Pu, Tawna'n a sawi zawh chuan,Hrangsua chuan Sangtuala Chu han fak mawlh mawlh in, mi dang pawh chuan an pawmtlang tih entirnan an lo bu tliar tliar a,thil nih phung an hriat hnu chuan,Hrangsua chuan tlangvalte hnenah chuan saruang Chu kawng a la chhuak tur chuan an tir nghal a, la chhuak a an han teh chuan sum nga zet chu an lo nI ve ve a, feh kawng kal thleng hmasa apiang chu Sangtuala te pafa chuan Sa chan ve tur chuan an lo sawm zel a,in thlahrunglo leh lawm tak chuan an chan ho ta dar dar a, an sa chan an zawh hnu a, vaibel pak talh talh pah chuan Val upa Duhliana chu lo ding chhuakin, Pu, Tawnliana te pafa tanrual dan leh huaisen zia te, Sangtuala pawh naupang nungchang tha, a hun a huaisen leh tlawmngai tak a nih dante, naupangte ni chunga a chhungkaw tan a nun a hlan ngam zia te, he tiang mi chu khua leh tui tan pawh chhenfakawm tak ala nih a duh sak thu sawi in, buh seng chawhmeh tui tak hlui tu pu, Tawnliana te pafa chungah lawmthu sawiin thlawhhma lam pan zai an siam ta a.
Thlen tlaiah chuan buh zemte kualin, Sangtuala te pafa pawn an buai nghal char char a, savawm sa chhum vil pah chuan zem pawh an kual zo ta thuai a,a la hmat deuh avangin sangtuala pa chuan "sangte, tui chawi pahin I in bual ang hmiang"tiin tuikhur lamah chuan an liam zui ta nghal deuh mai a, an tui dawh lai chuan Sangtea chuan,ka pa, khulaiah khuan kan kal lawk a nge tih leh liam chu a rual nghal a, a pa koh lehna pawh chhangta lem lo chuan reilo teah chak deuh chuan a rawn chho nghal mai a, a pa chuan, Sangte I va hmanhmawh ve eng hmuh tha nge I hmuh ti a alo fiamna chu, sakuh tui tlanna kawng bel deuh ka hmu ka zu tungthlun lawk a nge tih pah chuan thlam lam pan chu a rual nghal a, thangtung hrui fei tak chu keng chung chuan aliam thla nghal a..

[Ngaia]

BUNG HNIHNA
Zan riahte an ei kham chuan tih fel ngai Chu Sangtuala pawh chuan ati fel thuaiin, a pa chuan ram riahna a awm dan mawite, a nakin hnu zela pawimawh turte hrilh pah chuan vaibel chu a pak talh talh a,Sangte nang talh khuang kha han talh che a tih chuan talh khuang chu a han tuk nghal charh charh a, an ri te pawn lo chhawnin an han kuk zui rai rai hlawm a,thenkhat sakhi vun nei uangthuang fal deuh chuan khawrin au nan a hmangin an ri teng tung ta mai a, nula riahna thlam lam pan a,. meichher chi eng tung tung tung tawk lah bo lo, he hun hi hun hlimawm anih zia alang chiang hle ani.A ni tak a kum tluan a an thawh hahsa, seng khawm hun chu alo thleng ta reng mai ani.
Ram riak mahnisela, an ri te chuan Pu, Tawna te thlam chu panin thingpui fe kengin an rawn pan khawm a, hlim taka ti ti in, a kum leh lam a an ram bawh leh tur sep rawtui in an ri ve laih laih hlawm a, zan rei tak tak hma chuan an tin ta hlawm a, talh khuang ri nen, he tih lai chuan mi pangngai an tum mi tam zawk chuan ramlam hi an tam zawk reng ani, bel val vala val ngawt lo deuh riakte chu lo zai ta lawng lawng tawk lah bo lo, Naupang thawm awm ve lo chu khawchhung ai a a rehna a ni mai awm a mawi ani.
Pu, Tawna zing harh meuh chuan Sangtuala pawn tui um chu alo chawi ngah tawhin thlam tlaitlanah chuan kuh pui lian tha deuh chu alo dah tel ran mai a, Sangte, i va tho hma awm ve, tui ilo chawi ngah tawh elo tih pah a tho nghalin pawn ava dak chuan, sakuh ava hmuh chuan e hei iva hlawhtling ve tih pah chuan pawnlam chu a han pan nghal a, a lo luh chuan chaw bel in chhuang hmin tawh leh, chaw hmeh thing in chhuang so barh barh chu a han thlek zawk chuan a hlim hle mai a, thingpui a in zawh chuan, Sangte khaupui hrui didip kar ami kha han la la, sakuh hmul chu pawt ang aw, a pan a tih chuan a tho tharh a, liang hmawrah a keah thlungin sakuh hmul chu, chempui hnung lam chuan an han khawng kharh kharh chuan a fai thla deuh puk puk a,kar loah rawh zoin an chan fel ta mai a, a pumpui chu repin, savawm sa nen chuan rapah a tawt vangin, pawnah a repna an siam a, choak hlauh atan hrui khau chu sa rep chungah an han kual zawh chuan, tuk thuan chu an fak zui nghal a
Lang an lo thlen hma chuan Pu, Tawna te pafa pawhin buh chu an lo chhung vum ve thar tawh a ni,lang hma pawlah Pi, Chhuanthangi chu lo thlengin a pasal leh a fapa buh seng pah a hlim taka an bung dun chu a han thlir vang vang a.Sangte, in va seng tam tawhve lo chawl rih ru ,thingpui ka lo ti sa a nia ti a au lang lang chuan, hei kan dawrawn a khat tep lo thu thlandai rawh kan lo chho tep ti a chhawn thuaiin an,an tang dun hle a, buh vui dah pah chuan a nu thingpui tih lum chu an han dawm dun vang vang a.
Sangtuala'n a nu bul a thlen chuan, a u chanchin a zawt nghal var a, a that deuh tawh te, a nau in tho a chunga a hminglam a atah dan a han sawi chuan an hlim tlang hle a,nimin zing an feh kal sakah dan vel a hriat tirh a,an pafa a ngaihtuah dan a chu a han sawi siam siam a, a ni Sangtuala uang ta pheng chuan, zan lam a a pa hliam tui lum a an deh sak lai a te rindan te, tawngvaiin a nu a lam dan te, a han sawi chuan a Pu, Tawna nuihza han in sum tang mar vel chu an nufa chuan an lo nuih tlawrh tlawrh a,la nui reng chung chuan an pa savawm hamna han en tum tang deuh tun chuan an nuih ati za zual sauh nen, Sangtuala chuan "I nu lo thlen hunah chuan Ka nat . . . " a tih lai mek chuan, ngawi rawh naupang te te, chimawm lutuk a han tih pah chuan, an nu hmuh chian theih tur chuan a dar vel chu a han en tir a, ka tih reng kha tih pah chuan thlam namthlak a thut chu a rual nghal a,Pi chhuanthangin an pa hliam a en chian hnu chuan, pun tur ang pawhin a awmlo tih a hriat chuan a thawveng huai mai ani.
A ni reng lah taka, tunah pawh an fa hming koh pian tirha laihrui awrh chhuah vanga Laiawrha ti a a hming an phuah,zawlbuk kai rual ve tawh pawh a dam loh avangin buh luchuh ah pawh a bawksawp mek a ni si a, he tih rual an pa Pu, Tawna inhliam ang a thu a han hre leh nghal chu a zanmut pawh a tuilo reng a, an fapa Laiawrha damlo pawn a nu rilru hriatthiam pui takin feh tur khan a tur zawk hial reng a ni,a Fapa damlo ngawt hi nilo in, piang tawhlo tur a ngaih hnuah hmeichhe awmchhun ni turin, Zoliani tun a, kum thumna hmang mek ala awm bawk nen puitling rilru buai rapna tham chu a ni reng a ni, an khua ah hian thawkmawh pahmei leh hmeithai te chu pui thin mahsela, puih ngaia awm hi Pi, Chhuanthangi hian a duh bau lo a ni.
A hlauhthawn ang nilo a, a pasal a lo awm avang leh an fapa naupangte pawh zawmthaw lo leh thahnemngai tak a hnathawk a hmuh chuan a thla a muang zawk hle a ni,an chhungkua a hlim taka hna an thawh chhun zawm chuan tlai feh haw hun pawh alo hnai leh ta kuar mai a, feh haw hmasa ho pawh an lo kuk leh ta raih raih hlawmin, Pi Chhuanthangi pawh a insiam zui nghal nghal var a, savawm leh sakuh sa nen, sakuh pumpui pawh chu hawn nghalin hlim leh lawm takin an in vai liam ta
Buaina dang tawklo in buh pawh an seng zel a,thlawhhma zim deuhte phei chu an in seng zo tan ta, mi tam zawk etawh ni hnih/ni thum seng chauh an nei tawh tih chuan,zan khat Chu lenglen hun awm velah hian khawchhung lam atang chuan mei chher pathum hi a rawn phe thla zauh zauh mai a, thlam atang a hmu hmasa apiang mai chuan ngaih tha vaklo hian an lo thlir dauh dauh hlawm mai a, riak thlam hmasa berah eng chu reilo te dingin mei chher chu a rawn pun belh leh tak hnu phei chuan an ngaih thalo chu a zual sauh mai a ni.
Ram vachal thenkhatte phei chuan an silai chu kah tling el awl a sawhin, hman mai theih tur chuan an lo peih ru at hlawm mai a, an thlen tawp atang chuan meichher lo pung zelin meichher a tam tak em avang chuan an pan khawm ta hlawm a,an han thlenkhawm chuan zual ko lo kal niin tlai lam a, pu Chhawnmanga fapa feh haw alo la thlen loh thu te, kawng lakah sava veh a a pen thu a feh hawpui ten an sawi a, tun thleng a la haw lo chu lo lamah a kir anih takin tih thil a ngaihven an nih mai thu an sawi chuan thawm hre awm pawh an awm loh thu an sawi nak nak hlawm takah chuan a ngaihna an hrelo hlawm hle mai a, an kal chhan ber hriat an neih loh takah chuan chanchin ngai chang a haw rih phawt chu an ti ta hlawm a..

[Ngaia]

BUNG THUM - NA
chu tiang boruak teh nuaih an nih takah chuan,tlangval thenkhat pawh chuan chanchin ngaihvenin zualko alo kal tlangvalte chu an zui haw ve nghal a,ram lam a riakte pawh chu rilru betlo zetin an awm hlawm a,a tuk zing lam chanchin ngai chang ran chung chuan zan pawh chu an mu hlawm a,zing ah chuan khawlam chu an hawi sek hlawm mai a,eng dang tih thei neilo chu betlo zet chung chuan an buh seng chu an chhun zawm hlawm a,chhun chaw fak hun dawn chuan tlangval rualkhat chu thlawhhma lamah chuan an lo thleng thla ta a,chu tianga khaw lam atanga hmerhar lo lang chu an ngaihven in an pan khawm ta sup sup mai ani.
pu,Chawnmanga hi silai lek a,pasaltha nimah suh sela,pa seh hel leh ngawltawt zet mai niin,thangkhat liam ta ah khan PANGEN ram ti hial a an lo sawi thin chu ram thehah neihin,sih pui bul chu loah neiin .a vahlai a zawng lu ro awm chu han paihbo thin mahsela,a tukah a ngai a alo awm leh chu ngaitheilo in,a hal ral zui hmiah mai ani,chu a thil tih a vang chuan an chhungkaw chungah eng emaw thleng turin mi khawtlang chungah chuan thil eng emaw a thlen ringin an thlir ru thup mai ani,zanah chuan a mah a pahmei mai anih avang chuan meichher nen lo chu alo vat ta dah leh nghal rawl nen,an chhung chung a eng mah a thlen tak lohah chuan a khawtlang chuan mak pawh an ti viau reng ani.
chu tia tlangval zualko ten khua an thlen chuan leng hawn hun hma lam niin pu,Chawnmanga in chu an pan ding nghal a,an va thlen a,chanchinte an sawi chuan nu ber Pi,Laltawni chu a tap ta rawih rawih mai ani,chu tianga zan rei lam a nu chang tap rawl lo chhuak ta phut chu,thenawm khawveng hnaite tlan khawm vatin chanchin an hriat chuan an chek vang vang hlawm mai ani,chu tia an rik tak laih laih chuan mi dang lo pun belh zelin tlangvalte pawh an pung chak hle ani,
Rinmawia te thianho pawh lo thlengin rui deuh phet phut chuan pu,Chhawnmanga te chhung tan a ngaihthlak hrehawm tur tak chuan " upa duh loh thil tih chu a he ti reng ang chu,a tawpah khawtlang in ti buai leh a a zah pawh in zak na chai nge " a rawn tih tak phiar phiarah chuan an en deuh thup mai a,chu tiang tawngkam dengkhawng chu ,zualko a kal ve tlangval Thanmawia chu a ti tek ta chhak mai a.k'u ,Rinmawi,he buaina hi kan chingfel thei,he tiang a midangte mangan na belh chhan tum ang hrim a tawngkam cheh te chu a va tih chi loh ve,in sum teh khai,thinrim in sum tih hriat tak chung chuan arawn ti a,Rinmawia lah chuan la duh tawk ta mai lo chuan,a nin reng alawm hmanlai upa duh loh zawng luro paih mai nilo in,a han hal vei rawk ani kha,kan khaw chungah reu reu hian thilthalo a thlen hma a khua chhuah san tir daih ania ka duh a la ti tak deuh deuh a,
chu thu zet chuan,Thanmawia chu a ti thinrim ta tak zetin,Rinmawia tawng hre ho pawh an ngaihdan anilo tih hriat zet chuan an rum nghut hlawm a,he buaina hi i tello khan kan ching fel ang,i buaina a nilo haw daih rawh Thanmawia chuan a ti ram ta nghak mai a,Rinmawia lah chuan Nang naupangte te i va chaltlai reuh ve,aia upa pawh i zah miah lo a,nundan mawi kan zirtir hlek teh ang che tih leh Thanmawia lam pa chu a rualta nghal a,hmeichheho lah chuan kawng an lo kian dial dial a,a ni rui pawr lah chuan huai ta viau a in ngai chuan a pan thung thung a,Rinmawia bul a thlen hma chuan an khawnbawl fapa,ngawi chawi leh thinrim a,khaw hmulo tawi ve tak mai,Thawmvunga chu an in karah chuan a lo tlak khalh ta chat mai a,
Rinmawi,i khawsa zia hi ka va han kham ve,mangangte hmusittu chuan i phutawk lawm man i hmu chiang viau an tih leh a khabe kualah chuan a han lawk nghal bur mai a,a ni lah chuan chu tiang teh thun beisei heklo,kawng thlangah chuan a lum thla nghal bup bup mai a,kawr a thlen chuan thawm a reh nghal dak mai a,Lianmana chuan Rinmawia thiante melh pah chuan duhve in la awm em a han ti tuar mai a,an hruaitupa awm ta lo nen,an kawnbawl fapa mi zia an hre chiang nen,thehmeh ang hmiah an ni ta,mi dang an reh tak hnu chuan Lianmana chuan,a thi hruaite hnenah chuan in,pu Rinmawia khu hawpui nghal ula,ni dang ah midang a hmusit leh viau anih chuan,ka sial sual sawi ang tih lo hrilh ang che u,kal liam nghal ru,a han ti vin tuarh mai chu an hlau bawk a,an phe nghal suai mai ani.
Pu,chhawnmanga te chanchinpawh chuan Lal Thawmliana beng chu thlengin,thim chinah chuan an buai lai atang khan lo awm tawhin midang pawh chuan Lal lo thleng chu an lo hrelo alo ni,chu tianga buaina a reh hnu chuan lalpa Thawmliana chuan aw a han thian khurh khurh mai a,midangho pawh chuan chu aw chu an hriat than ani vangin an hawi nghal thup mai ani,Lalpa Thawmliana chuan Rinmawia thiante bulah chuan,a tuk zinga lal in a kal tur a chah zui nghalin,chhuanlam siam a an kal loh chuan a lawm loh tur zia chu a hrilh nghalin,zualko kalte chuan chanchin tlangpui chu an lalpa chu an hrilh leh nghal a,a han ngaihthlak zawh hnu chuan pu,Chhawnmanga hnenah chuan thlaphang lutuk lo tur leh an tlangval ten an hmuh leh ngei a rin thute chuana thlamuan thuaiin tlangval te hnenah chuan,a theih anga in siam a ram lam pan tur chuan val upa te hnenah chuan a han hrilh nghalin,an ni pawh chu lal in pan chuan an chho nghal a
An lalpa kal chak danah chuan a lawm loh zia chu a upa te chuan an hre chiang hle a,an ni pawh chu Rinmawia te chungah chuan an lawm lo hle mai a,thaw hlawp hlawp chuan lalin an han thlen chuan hmel nelawm loh zet mai chuan a upa te chu a han thlek kual hnu chuan,kan hmelchheho chu min va han ti zak ve,khang khan ani maw an lo nun hlawm,zahna pawh an va han neilo hlawm ve a han ti bul bul a,upa ho pawh chuan an lo ni e tliar tliar a,val upa Chawnthiaua chuan lalin a luh a han dil chuan,tlem chuan ahan in thing harh deuhin eng thu nge nita a han ti a,an remruat dan tlangpui chu an lal leh khawnbawlte a han hrilh chuan, tha an lo ti tlang viau a..

[Ngaia]

BUNG - LI NA
A bo tanna hi in atang mel hnih tha chauh anih avang in,val upa leh pasalthate chuan hnu hma hmuh theih angte chu uluk tak chuan an han bel chiang a,sial kawng tum niin hnu hma hmuh pawh a har hle ani,eng emaw chen ruahtui a tlak tawh loh avang leh naupang mai anih a vang chuan a sulhnu chhui pawh a har ngiang reng ani.
Tlangval thenkhatte chuan meipui lo chhepin a chheh vel chu a eng pup mai a,zan rei tan mahnisela midangte tanpui theitu an nih a vang chuan hrehawm ti hmel pu tu te hmelah mah a lang hauhlo ani,tha tho tak chuan an phe sung sung mai ani,hnu chhui ngawt chuan awm zia anei thuilo tih hria in a ram khawrh a khawrh chhuah vek mai tum chuan mei chher tur lo dap pawl te chuan raw pum lian pui pui mai chu meichher tur chuan an phel zung zung mai a,tlangvalte chu panga zel a then in,chanchin eng pawh a awm chuan an meipui chhehna hmun a thlen vat tur chuan an in chah fel thlap a,ngaw chhung lam pan chuan an darh ta sung sung mai a,Chunglian ti a au pah zauh zauh hmalam pan chuan an pan ta zel a.
Khua a var pawh chuan an mi zawn chu hmasawnna alang rih mai hauhlo,ni pawh alo chhuak sang ta hle tih chuan tlangvalte chuan in nghahkhawmna hmun chu an pan khawm zel a,an han thlenkim hnu chuan val upa Chawnthiaua chu lo ding chhuakin,hei kan thlen chinah chuan hmasawnna engmah alang rihlo chu ani a,mi nawlpui chu kan tin rih anga,chaw eikham ah a rang lamin Lal mualah kan kim leh vat dawn nia,sapui sulhnu alanglo niin alang a,thahnem ngai leh tlawmngai tak a hmabak kan hlen ngei a ngai ani,nang leh kei a vang hian mi dangte mittui chu alo hul dawn ani ti a tlangval tlawmngaite chunga lawmthu sawi pah chuan,fuihna thu chu a han sawi a,hmun nghak mi tlem a zang in dahin khaw lam pan chuan an liam ta suau a.
Zing khua var hlim chuan Lal Thawmliana chuan pu,Chawnmanga te in chu a zu thleng thla thuaiin chanchin thar awm rihlo mahsela,khuanun a hual a nga,dam te in alo haw maiang ti a hnem in,eng chanchin pawh lo thleng thut thei anih a vang chuan an in lam pan chuan a chho leh nghal var a,in a luh chuan Lalnu Thanthuami pawh chuan mei alo nun fel tawhin chaw bel alo chhuang kai mek a,an mibo chanchin pawh chu a lo zawt nghal thuai bawk a,chanchin an sawi mawlh mawlh lai chuan khawnbawlte pawh chu an lo lut khawm tak tak bawk a,upa te an lo thlen hnu chuan Lalpa Thawmliana chuan Rinmawia te chu eng tia han tih tur nge niang ti chuan a upa te chu a han rawn a,an han sawi khawm nak nak hnu chuan na tak a zilh phawt nisela,a hnu lama an nundan a zir a,phung velh tir hial pawh an pawi ti hauhlo ani.
Eng emaw sawi a an rik laih laih lai chuan,kai ten chu mihring rah tih hriat tak mai chuan a rawn ri deuh that a,rilru enghelh nei takah thu tih tak ah,an hawi rual dual a,Lalin a luh dil chuan a rawn zui nghal in, upa ten lo chhawn vata Rinmawia te thianho chu ti dui chuan an lo lut a,chu tia an lo beisei ruk te an lo lan chuan Lalpa Thawmliana mitmeng chu a thip sawt mai a,upa ten thutna turte an kawh hmuh ah pawh chuan an thu ngam lawklo a,aw nelawm loh zet hian Lalpan thu tura a han tih hnu chuan betlo zet chuan an thu ta tham a,thinrim in thup tih hriat zet in Lal Thawmnliana chuan ,an zan khawsak dan zahthlak dan te,thalai zu rui tu mah an awm loh laia an ni rui lungpuamin midangte natna belh chhah zawnga tawng an lo cheh khum chung changah chuan na tak chuan a han zilh a,upa te pawh chuan an lo tui hnih tliar tliar hlawm nen an kun lap hlawm mai a,Rinmawia mit meng erawh chu a in ti huaisar lui hle chuan an hre na a,an Lalpa ber thin ur an chawk bua ang tih hlauh vangin ngawih an chuh ta hlawm a,eng emaw a thleng nawn anih vaih chuan an chungah eng pawh thleng sela an cho chhuahah a ngaih tur a hrilh hnu chuan Lalin atang chuan an chhuak ta diah diah hlawm a,Rinmawia chuan kal pah chuan Thanmawia avanga chung thil chu an chunga thlengah ngaiin,a rem chang hmasa berah a thung rulh ngei tur thu sawiin a la phun zui bul bul reng mai a.
chaw ei kham hma lamah chuan Zadeng Lal Thawmliana in zathum khua tlangvalte chu,Lal mualah chuan an lo tlim ta hmur mai a,Lal upa te pawh chuan lal hnu chu lo dawlin,leihka pui tlangsangah chuan an rawn chuang chhuak ta khup mai a,Lalpa Thawmliana chuan,nangni mi chhuanawm thalai leh pa valai te vang hian he ka khua,in khua,Lungtan hi a la dingin ala awm ani,in tlawmngaihna te,in tha hnem ngaihna vangte in,khaw dang lakah pawh hmai uang takin kan la awm thei ani,he in nun ze mawi avang hian hnutiang hawilo in hmalam kan la pan zel ang tih ka ringin ka beisei tlat ani,vawiin ah pawh lo lam hna avangin mi tha hnem tak chu kan zingah an lo tel theilo chung pawh a,he tiang zat teh meuh mai lungngaite lungngaihna tawmpui a in han chhuak khawm hmu thei a ka awm hi kei in lalpa hian ka va han chhuang tak che u,in hmalam chu sut tlangin awm sela,hlawhtlinna nen lo haw mawlh ang che u ti in a thlah ta,an tih tur hlen tur chuan khaw pawn lam pa chuan an lian ta nguah nguah mai a,a khua leh tuite liam tur chu lal leh upa te chuan an thlir zui vang vang hlawm mai a.
An in nghahkhawmna hmun an thlen chuan,val upa leh tlem a phanchang deuhho chuan ro an han rel nak nak a,tlangvalte chu hmun hninah thenin hmun khat chuan zan lama an zawnna chu thual leh in,pangen ram thleng a kal tur chuan an ti a,hmun khat chu zan lam a an zawn lohna lam arbawh(thing chikhat,ar ngeng lam ang a lam rik tur) ram thleng a kal tur chuan an ti a,naurual chaw chhum rual a an in nghah khawmna hmu thleng leh hman tur chuan an han sem darh ta sang sang a,hnuai lam chauh en lo a ,an chunglam an hmuh theih chin chu uluk tak leh kim tak a en tur chuan a han chah nawn leh a,nula lam pawh chuan tlangval ram kal chau te chaw tur chu phur tak chuan an lo bawl in,zo tui thiang kek kawk te chu mauthei chuan an lo chawi ngah sa vek ani,chu tiang khawp a khaw in lungrual ta chu an awh awm chawk reng e.
Pi,Laltawni i pawh mahni ril a rah te ngei chu tiang a han awm ta chu chaw leh tui eng mah ei thei hek suh zan khat thilthuah a mit khurte chu a tla nghal dak mai a,hnem duh viau mahsela han hnem ngaihna vak awm heklo,an tha en tawp mai ani Pu,Chhawnmanga pawh pa sehhel tih takah eng mah sawilo chuan mahni thu a kal mailo chuan,mi dang ngaichang chung chuan a kal ve mawp mawp mai a,Tlangval ten lo chawl hahdam turin ti mahsela,a duh baulo mai a,zan lam a Rinmawia tawng a hriat kha chuan a run em em mai a,chempui nen a inhleh ral thak a duh hial reng a,an boruak tawnin a zir miau loh avangin zai a dawh mai mai chauhin,chu tih rual a an khua ten a thla vang an hauh danah chuan a thla a muang zawk hle ani.
Chhun chaw fak hunah pawh chu tu thawm mah an hriat mai loh avang chuan,an ngaih a tha hlawm mawlh tawhlo ani,ngaihthalo ru tak chuan thawm awmna hriat hmasak tum an ring an fan kual ruai mai ani,ngaw chhung lam a lutte pawh chuan thahnem ngai tak chuan an hmalam chu an pan sauh sauh mai a,mi dangte nghah duh lo chuan an phak tawk chuan tha hnem an ngai hle mai ani,a hlawp hlawp a in then sawm in hmu pha deuh vek a kal ta chu a ram chu an dai dar hneh viau reng a,ramsa han tlan chhe khut khut thawm pawh an hre awllo reng a,
Chu tianga chaw fak dawn thleng a beiseina han ti thar deuh awm pawh an hriat mai hlawm loh avang chuan an bei a dawng ru hlawm hle tawh mai a,tlawmngaihah Vanzema a thi tih ang deuh chuan tiam chin lam pan chuan an hman hleh hle ringawt mai a,Thanmawia te thianho pawh chuan kawrte chu thlengin a bulah chuan vang kung lian mar chho tung mai pa pawm dawn lai a lian chu an han thlek ha ha hnu chuan tui in a chaw fak nghal mai chu tha an an hriat avang chuan an han chawl khawmuang deuh a,chu tih lai chuan an chunglam atang chuan naupang ipte chu a rawn lengthla ta lang lang mai a,chu thil an han hmuh chuan an te deuh chul mai ani,an thawm hre phak tlangval dangte pawh chuan rawn bengvar nghalin an rawn thleng chawp ve nghal thuai reng a,an han en chian chuan an naupang zawn chu a kakpuiah chuan alo in zep tat mai chu niin,an bul hnai ami te chuan lo hre pungin an rawn pan khawm zel a,an mibo zawn an hmu chu an lawm tlang hle rualin chu vang kung mar teng tung,vawn chhan tur awm hauhlo a lawn chu hna huphurh awm tak ani leh ta tlat mai a.
Chungliana hnenah chuan thlaphanglo tur leh lo che sawn lo tur chuan an han tawng thlamuan a,an zinga thing thei awm deuh chu an han sawi khawmhnu chuan Hmingchhuana pa ria zeihzawih,phiar fat mai chuan ka han bei chhin phawt a nge a tih takah chuan ,a han in ruahman chhung chuan kawi hrui sei tha tak chu lo chhatin,a tawivawn in a lawn pui ta a,thing kung lah pa pawm tih ngam a lian anih a vang chuan a lawn pawh a awl hauhlo a ni,harsa tak chuan a kakpui chu a han thleng thei hram a,a han chawlh hahdam hnu chuan a kung rem chang laiah chuan a kawi hrui chu a han thlung a,chu hrui chu uai thlak nan an hmanga chhuk lam chu an awlsam ta phian a,an tum ber an hlawhtlin chuan chawte chu fakin Chungliana chu chhuan hnih lai chaw a ei loh avang chuan a ri a tam em em mai lainat tak leh duh sak tak chuan an chaw hmeh tha tha chu an vawm khawm sak a,zah pawh dawnlo chuan a ei bawrh bawrh mai ani..

[Ngaia]

BUNG NGÂ - NA
Chu tianga chhun chaw te an fak zawh hnu chuan,Lianmana chuan Chungliana a hnenah chuan a bo dan chanchin chu a han zawt a,a zah vang a sen deuh tan chu ,dawhthei tak chuan an lo nghakin zawl dawh leh lainatna mitmeng chu hre thiamin,tawng tlem a vanga aw tham chhel chhawl chuan,kha tia sava veh a ka peng kha,thing lian deuh bul atangin thawm a lo awm a,palian pui lo kalin min man a,changpat leh thil dang tawp deuh deuh min ei tir a tum chu ka duhlo a,eng mah min ei tir duhlo a,nangmah zawngtu ten an hmuh hma che a I tawng anih chuan I tan leh I chhungte tan a pawi ang min ti a,min kal pelh ka hlauh vangin ka ip te kha ka lo thlak a ni ti a sawi lai chuan,mak ti leh khawngaih hmel tak chuan an lo thlir thap a,an zinga pakhat chuan,a man tupa che chu khawi ah nge a awm tak ? a han tih chuan,min rawn hmuh rual khan a bo nghal daih a tih chuan Lianmana khawnbawl fapa chuan,chanchin tlangpui kan hre ta bawk a,kan thiante pawn chanchin an hre chak tawh ang tiin lam kal tur chuan rawlthar rual khat chu a tir nghal a,an ni pawh chuan an hnungah chuan zawi muangin an zui ve nghal a.
In nghahkhawmna hmun an va thlen chuan nula lam chuan zo tui thiang tha vek vawk chu an han sem nghal thuai hlawm a Pi,Thanmawii pawh a fapa chu lawm taka lo kuah chawt in, lawm avang a mittui nen Lal Thawmliana khua Lungtian boruak pawh a zang leh ta huai mai a,Pangen ram lam a kal te pawh lam kalte in tirin,khaw lam pawh lam kal chu an lo tir tawh a,a rualin a khaw luh tum an ni a,hmun nghakte chuan ,chanchin tlangpui an hriat chuan mak an ti tlang hle a,ngaihthalo ru fe fe tawk lah bo hek suh,tu mah chuan an ngaihthat lohna chu an ti lang duh chuang lo a,fiamthu thiamte chuan an zia chhuahin eng emaw chen fiamthu nen an lo rik hnu chuan Pangen lam ami te pawh chu an lo thleng ta a,hlim tak a an ei siam chu lawmna ruai a ngaiin hlim tak chuan an kil hlawm a,tlangvalte pawh chuan che tlem bik nih hlau chuan an phe suai suau a kar loah haw thei tur chuan an in peih ta thuai a,hlim tak chuan lungdawhah lo hmuak tu te nen chuan chanchin an han hrilh chuan lawm tak chuan mahni in lamah chuan an tin ta hlawm a
Buh seng zo lo pawh chu pei zawn lem lem hlawmin kar lo ah an pawltla ta reng mai a,kum dang zawng ai chuan chhungtin pawh an lawm hle ani,buh pawh zemah an khung kim ta,ram en tur a an tirhte pawh Lalpa Thawmliana hnenah thu an thlen chuan,ram theh chinah perh te tar chuan lo thlang tur chuan an fuan khawm leh ta lui lui hlawm a,a thlang tur chinin an thlan zawh chuan lo thlang hmasa tur pawh an ti fel a,an ram pawm en tur chuan chhung tin te in buat saihin an hman hleh leh ta,mi dangte puih hlau ta reng a khaw sa,ta chu mawng vamba ang mai chuan an phe leh ta a
Laiawrha pawh zawlbuk kai rual anih vang chuan a pa Pu, Tawnlianaa chu zuiin an lo pawm en chiang tur leh ram vak pah tur chuan lungdawh chu an pan hnak hnak a,an va thlen chuan an lo tlim hmur tawh a,ram thehho chuan thu sawi in an lo ri laih laih a,kal tur awm an kim hnu chuan an liam ta sung sung mai,mi duh am zual lo tha hlang pawm tumho chu an lawmlo ru hle mai a,mi pakhatin ram tha hlang neilo tur chuan an lo sat thiam viau reng ani,an lo pawm an han kawh hmuh chuan pachang in hmel sen duh mai tawh lah bo lo,in ngawihem biak lawng lawng ngaih chang awm mahsela,pam ham takte chu an zak ting mai avang chuan hnar hmu larh larh tawk pawh an awm nual mai reng a,ram theh hotu chuan he kan ram sah chungchang a lungawilo chu Lal inah kan sawi tawh ang a ti ta hmak mai a,tu mah chuan sawi sel en in an en ngam ta lo ani,lal hrawt duh vanga ti ni miau hek lo le
Pu Tawnliana pawhin a fapa chu thil hrilh hun lai ani tih a hriat vangin chu mi ni pawh chu a kalpui ani reng a,thawm dim dan leh sa mizia te chu hrilhin a "i kal phakna ah chuan mi fate pawh an kal pha tih hria la,mi dangte tih palh chu kum khua in an sawi a,sa kah erawh chu hun reilo te chhung ani " chu vang chuan sa kah chuan hun tlemte chauh kan nei tih hria in,thal thlah vawi khatna hi a pawimawh ani tih theih nghilh ngai suh ang che ti a a sawi chuan,ngaw ril lam pan chuan fimkhur tak chuan an kal a,a fapa chuan a pa tihdan chu rilru a vawn tum chuan a theih tawpin a uluk reng ani,ke artui lei raplo a kal chu a hah thlak dan a dang zar mai ani,a tih tirh chuan a harsa pawh ati viau a,a han rei deuh hnu chuan a ti ve thei ta viau reng a,mual thumna an chuan chhuah chuan,an thlanga sih lian vaklo an hmuh chu fimkhur tak chuan an han pan a,sakhi leh sanghal chuan an lo tlan ve viau a,chan dawn chuan lam a hla ang reng si a,reilo deuh chan a lo vah pah a chan a tan adah mai a ril ruk lai chuan mual leh lam a thawm ri set set chu hria in a Laiawrha chuan a pa awm dan atang chuan thawm dim a ngai tih a hre thiam nghal a,a pa en na lam chu a han en ngial pawh chuan engmah a hmu lo a,a thil hriat sualah a zirlai a chhunzawm tirah a ngaih lai chuan thawm ri set set chu a hre va ta a.
A pa chuan a mitmei chuan a lam a kal hnai tur chuan a siai zauh, thawm dim tak chuan a han hnaih ve nghal a,thingbul tan chhan chuan an thu dun ta ran mai a,sakhi tuai chu thing hnah phenah chuan a rawn lang ta zauh zauh a,a fapa kut a silai hmeh bel pah chuan,a hrei batah kap tur chuan a han hrilh nghal a,Laiawrha chuan huphur chak bawk si chuan a pa chu a han melh zauh a,a pa chuan a lo buk khum nghat hnu chuan sakhi lam chu uluk tak chuan a tin ve ta vang mai a,in chhungdung chen awm velah chuan sakhi chu thawm ngaithla chuan a han ding chawl dat in a hnar chu a len vat vat mai a,a fapa chuan kah na chang a hre dawn lo emaw a tih lai chuan silai chu a puak ta dur mai a,sakhi chu a zuang zawk a,a tlak hnu chuan a thlang a thing chu su dawtin a let nghal tawp a,a ke chu leng at at in a chatthla zui ta nghal a,Lawiawrha chuan phur tak chuan a sakah lam a tlan nghal a han tum nghal chu a pa chuan lo chelh vatin silai mu thun nghal tur chuan a han hrilh a,a fapa silai zen sawh lai chu uluk tak chuan a lo en kar a,rang tak chuan a sawh zo thuai a,in ring taka sakhi lam pan a a kal a hmuh chuan a lungawi ru hle mai a,Sa tlukna bul a thlen chuan alo thi chiang viau tawh a,a pa lam hawi pah chuan a thi tawh nui sang chung a a ti chu hmuhnawm ti tak chuan alo thlir vang vang mai a,an hlim dun a ni, fate hlawhtlinna hmu thei a a damkhua sei chu khua chungah lawmthu a sawi mawlh mawlh mai ani
Hlim tak chuan khaw lam pan chuan an haw ta thauh thauh mai a,kal lam ai chuan kal pawh a sawt hle aniang,an hriat mang loh lai chuan kawtchhuah lungdawh pawh an lo thleng ta reng mai a,a pa vaibel zuk chhung pawh chu a rei hle hian Laiawrha chuan a hre mai a,a fapa hmel atang chuan a hmanhmawh ru hle tih hria in Pu,Tawnliana chuan kal a han rawt chuan sakhi chu Laiawrha'n puak a tum lai chuan naupangho chu an lo khawm tiau tiau a,a zawnna siamin Pu,Tawnliana in lam pan chuan an ri phei laih laih mai a,kawt an thlen dawn chuan "sa lu a nuar " tih pah chuan an han in nawr laih laih a,chu thawm chuan in chhung a awm.Pi,Chhuanthangi chu a ko chhuak rang hle mai a,rei mawi tawk an han in nawr hnu chuan kaitenah an han keuh ta thak mai a,sakhi chu chan zuiin naupangho pawh chu sa hrang chu an hleh theuh a,hlim tak chuan in lam pan chuan an te teng tung mai ani.
Lal sa chhiah Pi,Chhuanthangi'n a han pek chuan,Lalpa chuan lawm tak chuan,in pa hi chu an kut a hmui mang e ti a a sawi lai chuan,an fa u ber Laiawrha kah ani tih a hrilh chuan Lalpa chuan ,e heu,ni khua alo rei ta ani maw,chu tiang rual fapa in lo neih,khua nun zah a ngai a nga,kan khaw muanna tur kan neih belh leh ta zu nia han nia,a tih chuan Pi,Chhuanthangi chuan ,e Lalpa kei ni fate ve zawng,thlamuan pui tham va ni suh,eng kim hi i zar kan zo mai chauh anih zawk hi tiin a baichhuan a lak lawh si a,tiin chhuah a rual nghal a,in a zu thlen chuan Laiawrha te pafa chuan sa pawh chhum tur lo ho chu an lo rep fel tawhin an lo in silfai mek hlawm a,an ti ti mawlh mawlh pah bawk a,a ruk chuan a nau lo chhuakbo daih chu Laiawrha chu a lawm lo ru hle mai a,chu tia an phul hlut lai chuan Sangtuala ram kal pawh chu kaiten alo chuang kai ve chiah mai a,a nau pen ri a hriat rual chuan Laiawrha pawh chuan kawngka lam chu hawiin a nau hmel a hmuh chuan , Sangte khaw nge i kal i va haw tlai ve,a lo ti var a,Sangtuala lah chuan chauh hmel zet chuan dai kan han vel mai mai a,rin aiin kan lo tlai a lawm le,hei in va hlawhtling ve Lal mual veng a mi pawn zanin chu lo leng rawhse a tih kha a han tih zawm nghal zat a,an pangber Zoliani chuan "a u,hmanni an thingphur haw pawn sunhlu min pek pahin i u min lo biak rawh " a tih kha a lo tih zawm ve zat chuan,upa ber nimahsela,beng sen tul chung chuan naupangte te in zaklo lutuk tih pah chuan zung tur chhuah chuan a chhuak ta nghal a...

[Ngaia]

BUNG RUK NA
Tlai an se zawngin sakhi ram tla an hmuh fuh a,batling fei a an khawh an chhui zui lai a Thanghnuna leh a hoten an sakhi hliam an chhu zui lai an lo tlak khalh dan leh an tih buai dan te,Thanghnuna nen an inmal beih dante,Thanghnun
a chu a thihruai Lawmzuala leh Lawmkima an lo pui a,ram kal puitlingin an thelh dante a sawi chuan a pa ngaihdan chu a nita hauhlo tih hriat deuh mai chuan a han thaw deuh sak mai a,an thusawi tawp lam hre hman Lawiawrha ngaihdan a nita hauhlo, rawlthar thisen lum tih takah a nauban a kaiin lo kal rawh thing kozawn pui I nei tih an hrelo a ni chu tih pah chuan pawn lam panpui rual mai a tum chu a pa chuan lo dangin. Mama he tiang teh thut a thinrim so hian rahtha a chhuah lo,engkim hi fim tak a ngaihtuah tur a ni ngai ti a a khap takah chuan,pa thu hnial thu awm suh a thu tau sawk sawk mai a
An nu pi,Chhuanthangi hnena chaw ei siam tur a a tih chuan, Zoliani chuan anu chu alo pui ve sauh sauh a,an boruak rit zualpui tih reh tum a ti ti dang a han vawrh chuan boruak chu a zang mawh khawp mai,a fapa te chu a rilru chhung chuan a thiam viau,an lam tang lutuk a lan erawh a duh hauh lo,chu tia an reh deuh thap lai chuan in awm em ti ri chuan pawn lam chu hawi deuh thapin pi,Chhuani chuan lo leng rawh ti chuan alo chhawn thuai a,veng chhak lam nu hmeltha a an sawi thin pi,Thanzaui chu alo lutin in va ei tlai ve,ruang nghak ang thap a in va reh ve tiin a rawn fiam lut bawrh bawrh a,Sangtea chu kha chaw I ei peih maw a han tih zawm nghal,nui sang chung chuan,peih tuk e a,lo ei ve rawh hei,ka u in vawiin chu sakhi alo kap hlauh a,a hran pa a in sawm mah har in,thleng kan lak kep ang che tih pah chuan a han tho nghal vat a,Sangte ei kham chiah a lo kal ka nia,vawiin I u Hmingliana te feh haw in,Thanghnuna te thian ho in an beihrawn che niin an sawi a,I lo sil awng viau em aw tiin chanchin ka rawn ngaihven a, I u te pawh in beng hrep lawm mi,chung a in beih rawn te chu tiin ka lo hau chiam pek a,engmawh an sawi zui duh tak loh avangin ka lo ngaihven ve che a ni a han tih chuan,nui sang chung chuan engmah a ni lo e,nunchan ken han zir satliah a nih kha a han tih chuan.Laiawrha a thinrim in up chu a chaw bar a kal lo sa nen a tho zui nghal tharh mai a
Pa ber chuan mipa fa chuan he tiang chu tawn chang a awm tur lah niin,he tiang tawngtu nih fo erawh khawtlangah thang a tha mawh tih hriat tur ania tiin a fate chu a han zilh pah a, thil eng emaw sawiin an ti ti hlut a,chaw ei kham naupang zan leng tur chuan Sangtuala pawh an lo sawm a,an zan tin danin zawlbuk lam chu an pan leh ta sang sang a,thing keuhlo an awm emaw ti a an zawh chuan an lo keuh kim thap a,fuihna thu eng emaw a sawi zawh chuan,Thanghnuna chu ko chhuakin an tlai lam chanchin chu a han zawt a,Thanghnuna chuan sakhi an hmuh thu leh a hnu lawka Sangtuala te chu lo kalin an lo hrilh ve a,an chuh hel vangin an mahni sa hliam anih thu an sawi a vang in tibuai ang chuan a han sawi par par mai a,a thiante pawh chuan lo tawmpui tih hriat chuan an lo but tliar tliar bawk nen,a sawi tun a sawi thiam bawk a,a pawmawm hle mai a
Sangtuala chu ko chhuak ve lehin ,Thanghnuna thusawi chu a dik em a tih pah in chik zeta en chung chuan,Sangte thu dik tak min han hrilh teh tih zawm nghal a,in atang a an chhuah dan chanchin chu tawi kim tak a sawiin,in awih lo a nih chuan naktuk zingah a hmuna kalin kan fiah thei ang a tih ve takah chuan tlangval ho pawh chuan tu nge dik zawh tih fiah nan rengah en ngei chu an tum ta a,Thanghnuna te thian ho pawh mi dang an beihrawn a vang chuan na tak chuan an zilh nghal bawk a, naupang ho pawh tin in ,an in fiam ri leh laih laih tawh a,Val upa Chawnthiaua chuan.Sangtuala mi zia kha ka rin zawng tak ani,a landan chuan mi dang han ti buai a chuh hel taka thil han ti awm a ka hmuh hauhlo chu tiin a thiante hnenah chuan a han ti charh char a,an khaw naupang hrang hrante chanchin sawi chuan an an ti ti laih laih a,chu tih lai chuan zawlbuk a lawi rawn dil thawm an hriat chuan,tha tak a lo chhawn thuai in,an khaw rawlthar Laiawrha leh a thinte pahnih an hmuh chuan lawilut tur chuan an han be nghal sawt sawt mai a,a rem laiah an mutbu te chu an han dah ve nghal sawt sawt a
Val upa chuan hei zanin chu infiam a ngai dawn a in theih tawp in chhuah dawn nia.ti chuan alo fuih sauh sauh mai a,tlangval lengte pawh lo haw tanin tlangval ten in tihhlimna tur an neih avang chuan then khat tawngkam a han vau lung lung tawk lah bo lo,dawih zep tan chuan an hu hang zo lo a zam pawh nise an mawh hran lo,tlangvalte an kim khat ta tih chuan a lai an chawk kaw ta nghal a,thawm chu a sa hulh hulh mai a rawlthar ten in pawhna leh nun an zirna anih avang chuan tu mah tha tawp chuan an tang tha duhlo a,rawltharte pawh chuan an huphurh ru hle a, tlangvalte lah chuan tawngkam chuan vau in,khawi nge kei man zawlbuk bang deng dawp khawpin kan bin a nge ti chuan buan hmasatu nih chu an han in chuh hlut hlawm a,val upa chuan khai le,han tan tawh ru le a ti ta a
Rawlthar zing a ria thel thawl pian dik thlerh thlawrh Duhtlema chuan khawi nge bul chu ken tan a nge, min fiamdan tawk erawh in thiam dawn nia ti chuan a puanven chu a han sawichhing nghal a,tlangval lam tang chuan fiamthu duh leh tlawmngai Thanmawia rawn pen chhuakin khawinge kei man tih pah chuan Duhtlema puanvenah chuan a rawn man nghal chat mai a,an han tang dun chu an hmuh nawm khawp mai,an zawlbuk kai tharte chu an zuam ang ngawtin an sawp thei dawn hauhlo tih chu an hre thiam tlang nghal mai a,Thanmawia pawh chu an tang deuh ngial a,tha tawp hmang duhlo tih takah a kang ta zawk hlauh a thawh hnihna an tan leh pawh chuan a ngai ang tho chuan a kang nawn leh ta a,e khai ka hnehlo a ni e tiin nui sang chung chuan thut hmun a pan san ta,an thawm chu a tha hup hup hle mai chak zawk chanchang chuan a hnenlo zawk tih hre mahsela,a rilru that zia hria chuan a ngaisang hle mai a,tlangval dang lo ding chhuak leh erawh chuan a theih tawp chhuah mahsela,an rawlthar chu a hneh lo chiang hle mai thung a,ka chau ta ti a thut hmun pan a tum chu Rinmawia chuan a ban a manin khawinge kei ve thung a,tiin Duhtlema in rin hma chuan zawlbuk bang deng dawp chuan an bin thuai mai a
Tlangvalho pawh lawmlo tih hriat tak chuan an thum huk mai a,Laiawrha thin chuan a tuar ta lo a chau tawh anih kha ka lo chhawk a nge tiin,a zawlbuk kaipui Duhtlema chu an kai tho nghalin lo va thu rawh a ti thum chhak mai a,Rinmawia lam pan pah chuan min dim deuh dawn nia a han ti tawngkam tha a,a mitmeng erawh a thip ram mai thung a,Rinmawia pawh chuan vawrh leh nghek tum chuan a lo in seh ruh hle thung mai a,an han in man chu tha tawp an chhuah tih hriat tak mai chuan zawlbuk pawh a su laih laih mai ani,Laiawrha thinur rukna chuan thahrui pek belhin Rinmawia chu a han chawi kang ta vuih mai a,a mi chawipa tlawmngai chuan ka hlahthlem tawh lo ang che a han ti loh loh pah chuan Laiawrha puanah chuan a han sawk nghal tawn maia,a dul vun a tham tel thawt bawk a,Laiawrha chuan a han tih dan vel avang chuan dimna nei hauhlo a bin ngei tum chuan a rilru chu a siam sauh sauh mai a,an han tan chu Rinmawia chuan khawi nge ka ni ve tawh ti chuan rawl chhuah meih chuan a han tang a,awm zia a neih thui loh zia an hmuh chuan mak ti tak chuan Laiawrha chu an thlir thap mai a,vawi hnih an han vir thuak thuak hnu chuan kei ve tawh aw tih pah chuan a dar chung a bin liam zawkin,zawlbuk bang chu a deng puar ta pawp mai a,Rinmawia tlawmngai thinrim che thei bawk silo a bul a thingbung a melh zauh zauh a hmuh chuan val upa Chawnthiaua chuan a tawk e,kan rawltharte pawh an chau lutuk a nge ti a lo tlak khalh takah chuan mutna chu an siam ta sang sang a
Rilru a ngaihtuhna hran theuh nei chung chuan mutna chu an siam ta a,Duhtlema chuan Laiawrha thahrui neih dan chu mak ati zawk hial a,a rualpui chauh ni si tiin,midang pawh chuan an rilru chuan mak an ti ru vek zawk a,chu tiang rual lek in chu ti tak mai a thahrui a nei chu an dahsang ru hle ani,a pa lah mi vantlang chauh a ni si a,Laiawrha erawh chuan zawlbuk an han kai ve thei chu a hlim ru hle thung a,mihring mize in an loh ziate a ngaihtuah kual chhung chuan khuan hmasa pawh alo thleng der mai a
A tuk zinga zawlbuk kawt a tawng thawm chuan Laiawrha muhil lai chu a kai harh ve ta hram in,a thiante pahnih pawh chuan an mutbu chu thawmdim tak chuan an lo tel fel mek a hmuh chuan rang tak a tho in a in tel fel ve nghal mawlh mawlh mai a,a va chhuah chuan a nau Sangtuala leh a thiante leh Thanghnuna thiante a hmuh chuan thilawm dan tur pawh a hrethiam nghal mai a,a nau chu ko in thil awmdan a han zawh chian chuan a thinrim nghal viau mai a,kal ve ngei pawh a tum ruh hle a ni.
Chanchin hrilh turin hmanhmawh tak chuan in lam a pan thuai a,chempui ak in zawlbuk chu pan leh nghal var a, tlangval kal turte an kim chuan Hnahthial ngaw chu an pan ta nghal a,a hmun hi dai hnai mai anih vangin an thleng thuai a,Thanghnuna te sawina hmun an han en chuan an ner sawk mai a,thil chiang tak chu an hre thiam nghal mai a,Sangtuala te sawina an han thlen a, an khawhna hmun an en chuan sawntlung pawngah chuan sakhi hmul chu lo tla nual a,sul pe thla zai chu zui zel a,in chhung dung chen awm ah chuan, batling fei thisen kai deuh nang pawh chu an hmu thla leh a, mual chu ram lamah pawm vetin khaw chhung lam chu a pan leh a,Thanghnuna ten an hmuhna chu an pawh chiah mai a,tlem an chhui leh chuan kawr kam zawl chhete ah chuan sakhi thawm hria lo ding sai dat dat chu hmuin tlangvalte chuan an khawng thlu ta vat a
Val upa Chhawnthiaua chuan Thanghnuna te thian ho chu rum ul a melh chung chuan,in han suak sual dan leh han verther dante,in pamham dan reng hian ngeng a chhun mai ka vaw hrep dawn che u a mawni le tih pah chuan a tin uaih mai a,tlangval ten lo chelh vatin e khai zah ngai rawh ti a an lo dan chuan zahpah nei maplo khan nizanah khan in daw par par mai leh nghal rawl nen in awmdan hi lal hnenah ka thlen ang an tih chuan,hlauthawng takin Lal hnen thlen lo tur chuan an han ngen a,tap pur chung a an ngen tak chiamah chuan,in mi ngen ang chuan tun tum chauh ka hre thiam ang che u,hnu leh a awm vaih chuan in nasa lo ang tiin a han vau zui hnu chuan sakhi chu an chan ta nghal a..