TAN TLANG LASI LEH PASALTHA THANGLIANA BY Zochhumpuii Pa (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: TAN TLANG LASI LEH PASALTHA THANGLIANA BY Zochhumpuii Pa 1 - 30

Unread post by Ngaia » September 28th, 2017, 9:31 pm

BUNG 30
Thansanga leh Lalhlupuii

Khua a han lut chu nula tlangval leh naupang an lo zi nuk nuk mai a. A tûk leh lawka lungphun tûr an lo zawn thleng chiah a lo ni a. Zawlbuk chhaka in sei ruih mai chu hai rual lohvin Vanghmun Lalpa in a ni tih a hre nghâl mai a. Luhkapuiah chuan Lalpa leh Upaho an lo ţhu khawm tal tal bawk a. Pitar ţhenkhatin ar an lo lawi mek a. Ţhenkhatin vawk chaw an lo pe ve mek bawk a.
Lal in lam pana Thansanga kal chu nula leh tlangvalho chuan an lo hmu duh hle mai a. Silai a pu a, a luah diar a khim bawk a. A iptepui ah bâkah a fungki chu a ak lang tel kher bawk a. Nulaho chuan mit tla dawnin an lo thlir a. Lalpa tualzawla nula lo awmho zingah chuan nula pian nalh zeih zawih, ngo vah mai a awm ve a. Chu nula chu a hmel a ţhain, a ţhianteho ai chuan a sang zaih mai a, han en reng reng hian mi khawsa thei fanu a ni tih a hriat hle a. Chu nula chuan Thansanga a han hmuh chuan a phu deuh zawk mai a. “Hetianga tlangval lian leh pian thiam, hmel ţha bawk si hi an awm thei dawn em ni?” a ti rilru hial a.
Thansanga chu lal luhkapuiah chuan a han chuangkai a, Lalpa chu a tu ber hi nge ni tih chu a hre thei nghâl mai a. Thansanga chuan, “Ka pu, hei i fapa lungphunnaah ka u Ramliana a lo kal thei lo va, a aiah ka lo kal a ni. Tin, i fapa hriat reng nân hei ka u chuan Darmang hi a rawn thawn che a,” a ti a, a darmang ah chu a han pe a. Vanghmun Lalpa chuan, ‘E, Ramliana pawh i pain a zirtir ngunin thu chhia thu ţha a hrilh ngun a, Lal fel leh rorel thiam, khua leh tuite hmangaih thiam tak a nih thute pawh ka lo hre ve ţhin asin. Hei, nang chuan i pa i chhûn hle mai a. I pa kha a vanglai chuan tlangval hmel ţha leh huaisen, chak bawk si a ni a. I pa thlah dik tak zawng i nih ngei hi,” a han ti a. Chutih lai chuan Thansanga a lo thlen tirha nula hmel ţha tak, sang zeih zawih kha luhkapuiah a lo chho vein a lo ding ve reng tawh a. Lalpa vek chuan, “Tlangval i la ni phawt ang a, tu nge i hming le?” a han ti a.
Thansanga chuan, ‘Ka pu ka hming chu Thansanga a ni a. Ni e, tlangval ka la ni e,” a ti a. Lalpa chuan, “E, a nih tak chu, Thansang, hei hi ka fanu a nih hi. A hming chu Lalhlupuii a ni a. An unau zinga a û ber a ni a. In inrual viau âwm mang e. Nang aia a naupan pawhin kum khat lo liamin a naupang lo vang. Ti rawh u, inchhûng lamah i lût ang u,” a ti a, an inzui lût ta hlawm a.
Lalhlupuii chuan Thansanga chu a en duh hle mai a. Chutiang tlangval lian leh hmel ţha, an han mikhual tûr chu a hlim hle mai a. Thansanga insilna tur te chu kawmchar leikapuiah a va siamsak sawk sawk a.
Thansanga chu a insil zawh chuan an han titî ho va. Lalpa chuan an khaw chanchinte a zawt a. Fel takin Thansanga chuan a chhang zel a. A han ţawng hmang fel fak maite leh a chêt vêl dânte chu Lalhlupuii chuan a lo chîk êm êm mai a. Hun rei lo te chhûngin Thansanga chuan a rilru a luah khat nghâl vek a ni ber mai. Rei fe an han titî hnu chuan Serhmun upa leh Ramliana nau lo thlen thute upaho hnenah chuan a hrilh a, “Lo leng leh ang che u, kan inkawm ho leh dawn nia, ka thla thum zû kan zu tlang ang chu le,” a ti a, an ţin darh ta a.
Chutia upaho an ţin hnu chuan Lalpa chuan, “Hlupui, chaw ei te pawh siam ula, hei Thansanga pawh a ril a ţâm tawh ang e,” a han ti a. Hlupuii chuan phûr fêin chaw ei chu a siam a, zanriah chu hlim takin an ei ta a.
Hlupuii hian nau pathum a nei a. A chhang upa pahnihte hi mipa, ralkai rual an tih ang chin hi an ni ve tawh mai a. A naupang ber hmeichhia chu a la tê deuh a, mahse fel ve tawh tak a ni a. An chaw ei lai chuan a u Hlupuii chu a melh zak zak reng a. Chutah, “Ka u, kan mikhual tlangval hi nei ta che,” a rawn ti phawng mai a. Lalhlupuii nu leh pa leh Serhmun lal upate chu an nuih a za hle a, an nui hawk hawk hlawm a. Hlupuii zak chu a sen awp awp a, mahse a rûk tak chuan a lawm hle a. Thansanga chuan chu hmeichhe naupang tê chu a han en a, a nuih a za ve hle mai a. Mami, i u-in min duh dawn em ni, chutia i tih rawk rawk?” a han ti fiamthu ve a.
Chu hmeichhe naupang lah chuan, “Aw a duh ang che, a en deuh reng mai che a, a duh che a niang,” a lo ti lehnghâl chu Hlupuii chu a zak hle mai a. “Mami, ţawng ţawng lo khân chaw kha ei mai mai rawh,” tiin a han khap a, a han mitmei ralh a. Ani lah chuan a u mitsiai dân chu a han zir ve leh nghâl mai pek a, an nui zo ta vek a. Lalpa chuan, “Mami hi chu a mak a nia. Mikhual zakzum deuh phei chu a tizak fo nia,” a ti a, a nui huk huk a.
Chaw an han ei kham chuan Hlupuii chuan thleng a han sengin hmun an phiat fai a. Chumi zawh chuan kawmchar lama Thansanga ţhutna lam chu a pan a. A bulah a va ţhu ve a. “Thansang, i puar meuh maw? I ei tlêm riauvin ka hria,” a rawn ti a. Thansanga chuan, “Ei tlem awzâwng lo mai, ka puar nâka lai a,” a lo ti ve mai a. Eng eng emaw sawia an titî lai chuan lal khawnbawl upaho an lo lut ta ţak ţak a. Tlangaupa pawh phûr fein a lo tel ve a. An lalpa chuan, “Khai le, tlangaupa, kan rapchunga ka thla thum zû khi han chawi thla la, han sawr teh le! Hei Serhmun upaho nên hian i han in teh ang u. Thansanga saw zawng tlangval a la ni a, Hlupuii nen sâwn lo inkawm rawh se,” a ti a. Tlangaupa chuan a zu sawr chu a han sem dan dan a. An han in tam deuh hnu phei chuan an hlim ta phian mai a, an ţawng lar lar mai a.
Thansanga leh Lalhlupuii inkawm pawh kawmchar leikapuiah an ţhu chhuak a. Zân thla êng thlir pahin an titî dûn a, an hlim hle mai a...Lalhlupuii chuan, “Thansang, in veng lamah chuan ţhian ţha tak tak, ngaih deuh deuh pawh i nei ang maw?” a han ti a. Thansanga rilruah chuan Roliana leh Denga an lo lang nghâl vat a. Thansanga chuan, “Nei ve e. Kawmngeih deuh deuh pahnih ka nei,” a han ti a. Lalhlupuii chu a phu deuh zawk hial a “Nei na’ng le,” tih a lo beisei a ni.
Mahse chutih ahnêkin, ‘Kawmngeih deuh deuh pahnih ka nei,’ a’n ti mai chuan a rilru a khei hle mai a. Ani lal fanuah pawh hmel ţhaa sawi a ni a. Hlupuii chuan an ngaihtuah leh a. ‘Thansanga hi Herhzawl lalpa unau a ni a. To pawh a to viau tak ang a, a hmel a ţhain, a pà si a. A...keini tân beisei phâk a ni lo a nih hi,” a ti rilru ta a. Lalhlupuii chuan, “Thansang, i mutna ka’n siam ang che. I duh hun hunah i mu dâwn nia, kei pawh ka mut a chhuak riau tawh mai,” a ti a. Thansanga mutna siam tûr chuan a tho ta a.
Hetih lai hian Lal leh Upaho chu zu no dawmin an la phûr dawn chauh mai a. Hlupuiin Thansanga mutna tûr a han siam zawh chuan, “Thansang, hei i mutna tûr pawh ka siam peih ta e. I duh hun hunah mu ang che, tui takin mu ang che. Kei pawh ka mu dawn,” a ti a, a mutsan ta daih mai a. Lalhlupuii awm dan chu Thansanga chuan mak a ti deuh a. A hma khân a hlim êm êm si a. Mahse an venga ţhian kawmngeih a neih leh neih loh a han zawh a, ‘Nei e, pahnih chu kawmngeih deuh deuh chu ka nei’ a han tih aţang khân a danglam ta daih mai a. Thansanga chuan a hre thiam ta a. Anin ţhian a tih leh Lalhlupuii’n ţhian a tih a lo inan loh vang a ni tih a hre chhuak ta a. A nui var var a. A mutna tûra Hlupuii’n a siamah chuan a mu ta a. Chhûn lamah a kal hah bawk a, a muhil nghâl vat mai a.
A mumangah chuan tlang lianpui pui mai pahnih hi ralkhat hla takah hian a lo lang a. Thansanga chuan a han thlir vêl a, mawi a ti êm êm a. A thlir reng lai chuan tlang pakhat zawk chu a lo hnai tial tialin a hria a. A bul lawkah chuan tlang lianpui mai a lo to ta lûr mai a. Chu tlang bulţhut vêl chu a rai dup a, pangpar mawi tak takte a vul chûk mai a. Chûng pangpar mawi tak takte a thlir kual vêl lai chuan chung pangpar buk kârah chuan Lal fanu Lalhlupuii chu hlim êm êmin, pangparte tawnin a lo vak kual a. Pangpar mawi tak takte chu a han thliak a. A han hawi kual a. Thansanga lam chu a rawn hawi a. Thansanga a rawn hmuh chuan, “Thansang, hei pangpar mawi tak tak ka thliak a, ka ta a nih ang hian, i tâna min duh chuan min rawn pan ta che,” ti chungin a kuta pangparte keng chungin a rawn ban a. Thansanga chuan a rilruin, ‘Hlupuii tluka hmel ţha hi tu nge awm ang? Chutia ka ta i nih theih dawn chuan ka rawn pan nãng che,’ ti chunga Hlupuii pan a tum lai chuan ralkhat hla deuha tlang lian tak pakhat zawk pawh chu a lo hnai ve leh ta kuar mai chu mak tiin a han thlir a. Chu tlang chungah chuan Galaxy, Lasi nula hmel ţha êm êm mai leh pian nalh êm êm mai chu a lo ding zaih mai a. Nui ver ver chungin, ‘Thansang, lal fanu Hlupuii tluka hmel ţha an awm lo vang i ti maw? Mahse tûna tân chuan la pan rih lo mai ta che. Hun i la ngah alâwm!
‘Sate pawh i la kâp duhin, thangchhuah te pawh i tum a ni lo’m ni? ‘In tawng leh ngei ang aw’ kan ti a ni lo’m ni kha? Ngaihzawngte i lo neih hun chuan kan inhmu thei dawn tawh si lo va. Ka ngai viau ţhin che asin! Kha, he pangpar hi la la, min rawn hre reng ang che,’ a ti a, a sama a pangpar tawn mawi êm êm chu Thansanga chu a han pe a. A lo kun pahte chuan a rim chu a nam tui chem chem mai a. Galaxy pian nalhzia leh a mitmeng mawizia Thansanga’n an hmuh chuan, ‘Galaxy, kei pawhin ka ngai ve ţhin hle che asin! Ni e, kan intawng leh ngei dawn nia,’ a han ti ve a. Galaxy chu a han nui ver ver a, a awmna tlang lian tak mai nên chuan a hla leh ta tawlh tawlh a. Chu tlang lian tak mai nên Galaxy chu an ral leh ta a. Tlang pakhat lian tak mai, a bula mi pawh chu a ral ve leh ta riai riai mai a.
Chhuata vei ri ţhep ţhep chuan Thansanga muhil pawh chu a rawn tiharh a. Ni a lo chhuak uar tawhin, tapchhakah chuan Lalpa leh a nupui leh tlangaupa an lo ţhu a. Chhuatah chuan Lalhlupuiin Serhmun Lal Upa mutna a lo thlep fel mêk a. Lal Upa pawh pawn aţangin a lo lût ve mêk bawk a.
Thansanga chuan a rilruin, ‘E thawh ka lo hai a ni maw, ni pawh a chhuak uar tawh alâwm le’ ti chungin thawh a han tum a. A kut ding lam chuan eng emaw kengin a inhria a, a han en chuan a phu zawk mai a. Pangpar sen mawi êm êm mai, a ţhian Lasi nula Galaxy Piannalhi tawn ţhin pangpar ngei mai chu a lo hûm reng mai a. A han hnîm a, a rim pawh a ni chiah mai! A mumang kha a han hre chhuak zawk mai a. A mumangah khan Galaxy khân a pangpar tawn lai kha a lo pe a ni a; mahse tûnah a takin pangpar sen mawi tak mai chu a hûm reng si. Galaxy chu a han ngaihtuah zêl a. An tui hleuh dun lai te, vaukama ruak deuhthawa a han ding zaih mai laite leh a mitmeng mawi tak mai....a lung a lêng ta êm êm mai a.
Hetih lai hian Hlupuii chuan Thansanga chu hlim taka nuih chungin, “Thansang, i harh tawh maw, i mu tui em?” a rawn ti a. Thansanga pangpar ken chu a rawn hmu a, “E, i pangpar ken chu a va mawi ve, khawimaw ka lo en chhin, hetianga pangpar mawi hi kan khua leh a vêlah ka la hmu lo,” a ti a. Chu pangpar chu Hlupuii chuan an hnîm a, “E khai, a rim a va han tui êm! Thansang ka lo nei teh ang, ka samah kan tawn teh ang,” a ti a, Thansanga chhân pawh nghak lovin a samah Hlupuii chuan a han tawn a.
Hetih rual hian hla takah kawlphê ni âwm tak hi a de zawr zawr mai a. Thansangan a’n thlir chuan Galaxy hmêl ngui nghiai mai leh a bianga mittui luang zawih zawih chu a va hmu a. Mahse kâr lovah Galaxy chu a ral leh ta mai a. Thansanga ngaih chu a ţha lo hle mai a. ‘Eng nge a awmzia ni ang aw?’ a ti rilru a. Hlupuii, lah chuan pangpar sen mawi tak mai chu a lo tawn vah tawh si a. A inhmeh viau mai lehnghâl a.
Thansanga chu a han tho ve a. Nilum ai pahin pawnah a han chhuak a. Zan lama a mumangte kha a rilruah a châm reng mai a. Zing a han harh a, pangpar a lo hûm reng te leh chu pangpar ken chu Hlupuiin a rawn la a, a han tawn veleha ralkhata kawlphe zawk zawk mai te, Galaxy ţap hmêl te kha a ngaihtuah reng mai a.
An veng lama hawn vat a, ramvah a duh ta hle mai a, mahse Lungphunna a tel tûr a ni a. A tûkleh lam chuan a hawn theih tawh mai ang tihte a ngaihtuah nauh nauh a. Galaxy lungngai hmêl leh mittui tla hmêl a hmuh khân a rilru a luah khat hle reng mai a. Chaw ei an peih hnu chuan Lalhlupuii chuan Thansanga chu chaw ei tûrin a rawn ko va. An inzui lût ta a.
Chaw ei lai chuan Hlupuii chuan, “Thansang, vawiin chu ka ţhiannu Rinite inah i va lêng ang hmiang! Chhang den te a tum a, kan va chhim ve dawn nia, tih tûr vak a awm lo bawk a,” a han ti a. Thansanga chuan, “Ni e a, chhang tih lampang chu ka tih theih zâwng tak alâwm! Fun thum vêl chu ka ei zo thei mai ang,” a han ti fiamthu a. Lalhlupuii nu (lalnu) hian Thansanga hi a chezia a en ngunin a fanu pasal atân a lo ît ru hle mai a. Thansanga hi a pa lianin, a hmêl a ţha si. Lal unaupa a lo ni bawk nên. Tichuan Hlupuii nu chuan, “Ni e, Thansang, tih tûr a awm loh hi, kan khua i fang vêl pah a ni bawk ang a. Mami nên chuan a ţhiannu Rinite inahte chuan va lêng rawh u. Kan khawtlang nun te, kan khaw chawi vêl ramte hi han thlir kual ve teh. A nuam ve viau a nia,” a lo ti a.
Hlupuii nau pek chuan, “Ni e, U Thansang, ka u nên chuan lêng vêl ula, i duh leh nupui ah i hawn nghâl dawn nia,” a lo ti ve a. An nui khiah khiah mai a. Chaw ei lai e ti lovin chaw ei zai pawh an rêl thei mang lo va. Hlupuii lah chu a zakin, a thin a rim bawk si. “Mami, i ţawng thei êm mai, ka vêl mai tûr che a nia,” a ti a. Thansanga a rawn en a. An han nui dûn leh rih a. An tukţhuan ei chu an hlim dar dar hle a ni.
Chhûn lamah chuan Hlupuii ţhiannu Rini-teinah Thansangate chu an va lêng a. Eng eng emaw sawiin an titî a, an hlim hle mai a. Rini chhang chhum a lo hmin chuan an ei hlawm a. Thansanga chuan ah khat a ei a. Hlupuii chuan, “Thansang, fûn hnih, fûn thum ka ei thei ang i ti a ni lo’m ni, i va’n ei tlêm si ve?” a han ti fiamthu a. Thansanga chuan, “E, ei thei e a, mahse tlai lamah âr in talh dawn a ni lo’m ni? Arsa ka ei tam thei na’ng,” a han ti fiamthu ve a, an nui ho dar dar a. Hlupuii chuan, “Âr i beisei deuh a ni maw? Sa rêp kan chhum ţeuh nã a, âr i duh te chuan kan talh dawn nia,” nui chungin a han ti a. Thansanga chuan, “A phût chhuah thil tawh êm mai, ka duh lo,” a han ti fiamthu ve leh a. An han inbiak dân vêl chu Rini chuan chîk fein a lo thlir a.
Tlai lamah chuan Thansanga leh Hlupuii chu an haw phei dûn leh ta a. Hlupuii chuan a nu hnenah, ‘Ka nu, kan mikhual tlangval hian âr a beisei deuh tlatin ka hria, âr min talhsak teh,” a ti a. Thansanga chu a zak angreng deuh nachungin, “Mawi nã ka pi, amahin arsa a châk vang zawk a nih kha, kei te chu sa rêp min chhumsak ţeuh tawh alâwm,” tiin a han fiamthu lêt ve leh a. Hlupuii nu chuan, “Thansang, i phût emaw, phût lo emaw, keini pawhin arsa te chu kan châk ve tho alâwm! Khawnge kan arpui tui lai kha ka va talh ang e,” tih leh pawnah buh hum ţhama chhuah a rual a. Âr a han ko khawm a, arpui tui lai hi chu chhum a tui ber mai,” a ti a. Âr chu a talh ta tak tak a. A han chhum a, anthûr rêp leh buh tlêm a thlâk bawk a.
Thansanga leh Hlupuii kha chu kawmchar leikapuiah an ţhu a. Thansanga chuan, “Hlupui, i ti zahthlâk riau mai. Âr kha ka beiseiin ka phût tak tak emaw i nu khân a ti a ni ang a!” a han ti a. Hlupuii chu a nui mai a. “Dik tak chuan, keiman âr chu ka talh duh che alâwm,” a han ti a. An ngawi dûn leh vang vang a. Nakinah chuan, Hlupuii chuan, “Tak tak a Thansang, han duhsak viau dawn che mah ila, in veng lamah ţhian ţha tak tak, hmel ţha tak tak pahnih i nei tlat si a, a ni lo’m ni?” a han ti a. Thansanga chuan, “Ţhian ţha tak tak pahnih chu nei e, mahse...” a sawi zawh hma chuan Hlupuii chu a tho tau ta hmak mai a, “A tawk e. I pangpar erawh kha chu ka nei ang. Saw, banga saw ka thiat a, a la vuai miah lo. Pangpar mawi danglam tak a nih saw, vuaiin a chul har viau. Pangpar dang chu ni se, a vuai daih tawh ang,” a han ti a.
Thansanga chuan, “Ngawi teh, Hlupui ka ţhian pahnihte chu...” a han ti a. Hlupuii chuan, “Thansang, sawi tam vak a ngai tawh lo ve. Ka hre thiam tho alâwm. Nangni ang tân chuan pahnih mai lo, panga, paruk pawh......,” a ti a, a luhsan ta daih mai a. Thansanga chu a beidawng angreng hle a; mahse a han ngaihtuah leh a. A mitthlaah Roliana leh Denga an lo lang a. A nuih a za ta êm êm mai a. Leikapuiah amahin a nui ta khiah khiah mai a. Thansanga nui thawm a hriat chuan Hlupuii chu a lo kal leh a. “Eng nge Thansanga i nuih a?” a rawn ti a. Thansanga chuan, “Eng mah a nia,” ti ringawtin a lo chhang a, a nui leh ta khiah khiah mai a. Hlupuii lah chuan, “Min nuihzat hle a ni maw?” a han ti a. Thansanga chuan, “Hlupui min ngaidam rawh. Nang ka nuih lo che a, thil dang daih ka ngaihtuah a, ka nui a ni,” a rawn ti a. Hlupuii chuan Thansanga chu a en vang vang a, a nui ve ta a.
A tûk khua a lo var chuan, a hmaa an lo zâwn tawh thlân lung lian tak chu tlangvalhovin thlanmualah zawn pheiin Lal fapa thlanah chuan an va phun ta a. In lamah sial leh vawk an lo talh a. Fatuho pawh an che sang sang a. Lal fapa lungphun nî a ni bawk a, khawtlangin awm ni an kham a. Zing chaw eikham chuan lal in lamah nu leh pa, pitar leh putar an rawn fuan khawm a. Hlupuii ţhiannu Rini pawh a lo tel phei ve a. Thansangateho nên an inkual an inkual a. An hlim tlang hle a. Lal leh upaho chuan titî pahin kawmchar leikapuiah zû te an in a.
An Lal fapa chanchinte an sawi a. Lalfapa, tûna a lung an phun hi Hlupuii chhang a ni a. A thihna hi kum 3 lai a ni tawh a. An Lalpa hian, “Ka fanu Hlupuii hi nula a nih hunah a lung hi ka phun chauh ang,” a ti rêng a. He a fapa a thih hian Hlupuii hi kum 15 a ni tawh a. Tûnah chuan kum 18, nulaa chhiar tûr a lo ni ve tawh a. Lal fanu ah chuan an khaw chheh vêl Lal fanute nêna han khaikhin pawhin, a hmel ţha lawr lak a ni.
Fatu hovin Lalnu hnenah chuan, “Ka pi, hei a tlai dawn mai a, ruai hi kan siam tawh mai dawn em ni?” tiin an rawn zawt a. Lalnu chuan, “E in duh hun hunah siam rawh u, fatu thu thu alâwm,” a lo ti a. Ruai chu an siam ta a.
Zan lam chuan paho ţhenkhat leh putar ţhenkhat chu Lalpa inah chuan an awm khawtlai a, an titî mar mar a. Hlupuiite erawh chu a ţhiannu Rini te, Thansangate nen kawmchar leikapuiah an inkawm a. Eng eng emaw sawiin an titî nak nak reng a. Chutia an titî pah chuan Hlupuii ţhiannu Rini chuan, “Thansang, naktuk chu a châm ve rih la,” a han ti chu Hlupuii chu a phu deuh zawk mai a. A lo ngaihtuah miah lo tak a.
Thansanga nên hian ni tin hlim takin an inkawm dawn emaw a tih laiin, haw mai tûr a ni tih a hre chhuak ta. A lo kal chhan ber, a nau lungphun lah chu an zo der tawh mai si! Hlauh thâwnnain a lo khat ta. A rilru hi a rin aia thûkin Thansanga hian a lo khawih reng tawh mai. Hlauthãwng tak chungin, “Thansang, naktukte chu hawn i tum mai dawn em ni? I la châm ve rih ang chu ti rawh? Kan inkawm nêl dawn chauh va, i haw mai te chuan. Kan lote pawh min va hmuhpui ve la; mahse tak taka, kei pawhin kan lo chu vawi hnih chauh ka la hmu a. Hmannîa ka nute va kal chuan ‘buh pawh a ţha ngei mai,’ an ti a. Kan lo bulah sunhlu tui deuh mai a rah ţeuh mai leh nghâl a ni awm e. Sakhi pawhin a tlân viau an ti a. Silai te i rawn keng si a. Chûngte chu va chang la, thlamah Rini nên kan lo nghâk ang che a, i sakhi kah sa pawh ei a châkawm alawm,” a han ti a.
Thil dang zawng ai chuan sakhi rah tlân han chàn chu Thansanga chuan a châk a. “A chàm te pawh la châm ila, in lo va hmuh pahin sakhi chu va chàn tûr a nih chu. Mahse nangni ang nulaina innghah chu a chi lo vang a. Kâp ta lo ila, a zahthlâk bâkah, zàn hawn te a ngai ang a, a hrehawm ang,” a han ti a. Hlupuii chuan, “Engah nge zàn hawn a hrehawm ang? Meichher kan chhi hawng mai dawn alâwm. Rini, i nute hrilh la, Thansanga sakhi chãng kan nghâk dawn ti ang che. Naktuk zing chaw eikhamah kan kal dawn nia,” a ti a. Rini pawhin, “Nia maw le,” a ti ve mai a. An lal fanu Hlupuiin a tih chuan a nute pawhin an hnial lo vang tih a hre nghâl si a.
Zan rei fe thleng an titî ho hnu chuan Thansanga leh Hlupuii chuan Rini chu an va thlah a, an hawn kawngah chuan Hlupuii chuan, “Thansang, vawt i ti em, hei ka puan bah hi sin rawh,” a ti a, pêk a han tum a. Thansanga chuan, “Mai mai a, vawt ka ti lo ve, nangmah khân sin rawh,” a ti a. Mahse Hlupuii chuan, “A nih hawh, inzawn tal ang,” a ti a, puan inzawn rial chuan an haw phei dûn ta a. Hlupuii hi Lal fanu a ni bawk a, a tlawntlai a ţhain, a lo sang fu mai a. Thansanga hi a pa lian hle a, a dar han pel pha chin nula chu sang ve thelh thawlh tak an ni! Hnai taka Hlupuii bula han kal chu a inthlahrung lek lek a. A rimte chu a tui hle mai nên. Hlupuii lah chuan eng mah ngaihsak âwm lo takin a titi phei bawrh bawrh a. In an han luh chuan an inlengte pawh an lo ţin zo tawh a. Serhmun Lal Upa mutna tur pawh a nuin a lo siamsak a, a lo mu tui hle tawh a. Hlupuii chuan Thansanga mutna tûr puante a han phahsak a, ani pawh mu tûrin a khum lamah a kal ve ta a.
A tûk zing chaw ei lai chuan Hlupuii chuan, “Ka nu, vawiin chu kan lovah hei Thansanga leh Rinite nên kan kal dawn. Vaua sunhlu kha sakhiin a tlân in ti a ni lawm ni kha? Thansanga hian a chãng dawn a. Rini nên thlâmah kan lo nghâk dawn. Kan lo hawn tlai pawhin min lo ngaihtuah suh u,” a han ti a. Lalpa chuan, “E Mami, mipa sa chãng te nulain an nghâk ngai em ni?” a han ti a, mahse Hlupuii nu chuan, “A Mami pa, an peih a thu a ni mai alâwm. Ani mikhual a ni a, kan lo pawh a hre dawn si lo va. Duh leh an va inkâwm hlim a ni mai a; tih tûr dang a awm azeng pawh ni hlei lo; va kal mai mai teh se. Sakhi a va kah hlauh phei chuan a tihzia dawn êm asin,” a lo ti ve a. Chutia a tih tâkah chuan Lalpa pawh chuan, “Ni e, in peiha thu a ni mai alâwm, mahse...” a han ti a, a nui huk huk a.
Chaw ei khamah chuan Rini pawh em nên a lo thleng phei a. Thansanga chuan silai a pu a, Hlupuiite ţhian dûn nên Hlupuiite lo lam an pan ta a. Anni ţhian dûn chuan êm an phur ve ve a. Hlupuii chuan chawfûn bâkah belin se sa hmin sa fûn a phur tel bawk a.
Hlupuii te lo an va thlen chuan Thansanga chuan Hlupuiite lo chu a’n thlir kual vel a. Buh vui pawh a ţhain an lo chu a lo zau hle mai a. “E khai, Hlupui in buh chu a ţha hle mai tak a. In lo a zau bawk si a. Buh in ngah viau dawn hi. In thlam lah a lian ţha êm êm mai si a,” a han ti a. Hlupuii chu a hlim hle a. Thlâm namthlâkte an han hawng a, an han chawl a. Thlifim a rawn thaw heuh heuh a. Buhte chu a kûr siau siau mai a. “Aw heng in lote hi Hlupui, nakin lawkah chuan chul ram a lo ni leh mai ang a. Vaţhute leh mimsirikût te an han hrâm hlãt hlãt ang a.
“Vawiin nî angte hi a la ngaihawm dawn mang e,” Rini chuan a han ti a. Hlupuii chuan, “Chu chiah chu, vawiin ni angte hi a lo her chhuak leh tawh âwm si lo va,” a han ti ve a. Rei fê an chawlh hnu chuan Hlupuii-te vaua sunhlu lo tûr chuan an kal ho ta a. A awmna chiah chu Hlupuii chuan a hre bik lo va. Mahse a nî sawi dânah an vau sir, kangţêk ding ro piah lawkah a nih thu a sawi a.
Chu lam chu an pan a. Kangţêk ding ro piah lawkah chuan sunhlu chu a lo awm ngei a. A rahte chu a lianin a lo rah hnem hle mai a. Thansanga chuan inptepui khatin a han lo va. A sunhlu lawh lai hian sunhlu bulah chuan chhâwlte sâtin anni thian dûn Rini leh Hlupuii chu an lo ţhu a. Thansanga a lo chhuk chuan thlâm lamah an phei ho leh ta a. Thlâm hnuaiah chuan sum leh suk an lo dah a. An sunhlu lawhte chu sumah chuan an zuk dêng a, chi leh hmarcha te an telh a. An han ei a, chhun chaw fak a lo hun chuan Hlupuii se sa ken chu an han chhuang sa leh a, an chawfûnte ţhetin chaw an han ei a. An chaw ei lai chuan Hlupuii chuan, “Thansang, sunhlu kha sakhi chuan a tlan em? A êk tharlâm deuh a kung bula mi kha kan hmu ve a. A chàn chi ang em?” a han ti a. Thansanga chuan a rilruin, “Hlupuiite ţhian dûn khân chhâwlte sâtin an ti pe nasa si a. A hlauh an siam a ni ber mai a. A bul velah chàn tûr dangte a awm a nih loh chuan....” tiin a ngaihtuah chhuak ta a.
Mihringte chu ramsa aiin kan fing zawk a. Tih dân kawng chu a awm tho vang ti rilru chungin, “Hlupui, kha sunhlu kha a tui zawk a, sakhi chuan a tlân ţhin hle a nih kha, a hniakte pawh a chiar dup kha,” a han ti a. Hlupuii leh Rini chuan, “Sakhi hniak ka hmuh âwm pawh ka hre lo,” an lo ti a.
Thansanga chu a nui mai a. Hlupuii chuan, “Thansang chutia sakhiin sunhlu a tlan viau chuan va chãng ang che, i rawn kâp êm êm ang. I sakhi kah sa pawh kan ei ve châk alâwm! Thlâmah hian kan lo nghâk reng dawn che nia. Keinin behlawi rah hawn tûr kan lo la ang a; i sakhi kah tûr nên, a nuam dawn mang e. Meichher pawh kan lo siam sa vek ang,” a han ti a. Rini chuan, “Sakhi chu a pumin kan hawn dawn nge, hetah thlâmah kan chan ang?” a han ti pek a. Thansanga nuih chu a za angreng hle a. Upate chuan chawhmeh zawn dawn emaw, ramvah dawn emaw hian, hlawhtling tur anga insawi hi an duh ngai lo va, inţawngpachhiat an hlau ţhin a, anni hmeichhe pahnihte chuan chutiang lam hre ve hek lo le, an duh ang angin an han puak phawng phawng mai a ni a; Thansanga pawh chuan a hre thiam mai a, a nuih erawh chu a za ru deuh.
Chaw an han ei kham chuan Thansanga chuan, “A nih Hlupui, Rini, sakhi chu ka va chãng ta’ng e,” a ti a, a kal ta a. Hlupuii chuan, “Thansang, han kâp ngei ngei rawh aw,” a la ti ta deuh deuh a. Thansanga chu a nui mai a. A rilru chuan, “Kha sunhlu bul kha chu sakhiin a lo thleng lo vang. A chhan chu Hlupuii leh Rini khân hnah chhawlte sâtin an ţhut bel hel hul a ni a. Hnah uai rim te, mihring rim te hi sakhi hnar fing tân chuan hriat awlsam lutuk a ni dawn a. Ralkhat aţangin a rawn hre mai dawn a. Engtin nge chuti a nih chuan ka tih tâk ang? Ka han hawi vêl khân sunhlu kung dang ka hmu si lo a ti rilru nauh nauh a.
A tawpah chuan, ‘Aw le, a kawng awm chhun chu sakhi lo kalna ţhin lam kha ngun takin en phei ila, sunhlu kûng bula hnahchhawl rim a hriat phâk lohna tûr vêl, a lo kalna tûr ngei a kal khân ţha laiah lo chãng ila. Chu chu a kawng awm chhun a ni mai. A lo kalna lo laia ka chàn phei chuan ka hlawhchham sa a ni mai. Mahse hei chauh hi a kawng awm chhun a ni si,’ tiin a ngaihtuah phei nauh nauh a. Sunhlu kung thlen hmaa kangţêk ding ro a va thlen chuan ani pawhin hnahchhawl uai rim chu a hre thei mai a. “Hm...he lam hawiin thli a rawn thaw tihna a nih hi. Heti a nih chuan sakhi chuan he an chhâwl thliahna uai rim chu a hre har deuh ang,” a ti a. Sunhlu bul aţang chuan sakhi lo kalna ţhin lam chu a hnu aţangin a han chhui phei a. Fing khat dawn a va chhui chuan Sakhi lo kal na chin chu a lo bel zualin a lo lian deuh a.
Thansanga chuan a rilruin, “Hei hi a khân pui inţanna a nih dawn hi. A lang thui thei lai leh a fai lai a ni bawk a. He lai bawrah hian chãng ila a ţhat dawn hi,” ti rilru chungin a chànna tûr thing remchang deuh a han melh a. A chhak lawk a, theipui kung âwn, a sûr chhak kâkpui chu sakhi chàn nân chuan rem hlein a hria a. Ţhutna a remchan bâkah, a sang ţha tawk bawk a. Tichuan chu theipui kung kakpui nuam laiah chuan sakhi chu a chãng ta a.
A han ţhu vang vang a, tlai lam zanriah chhum hun vêl chuan a piah lam deuhah chuan thehlei râlkhel chek hlak hlak a hre ta a. A silai chu kah mai theih tûrin a han inring ta rân a. Thehlei thawm chu a ri leh hlat ţhin a. A han reh leh deuh vang vang a. Chutah a piah hnai têah chepa chek hlak hlak a han hre leh a. Sakhi chal deuh a lo chhuak phei ta a. A rawn fimkhur hle mai a. Tawi tê a’n kal a, a han ding a, a han ngaithla leh vang vang ţhin a. Chutah tawitê a lo kal a, a han ding a, a beng a han tun leh hrak hrak ţhin a. Thansanga chuan a rilruin, “Sakhi chal tam tak ka kah tawhte kha hetianga fimkhur hi an ni deuh vek mai a. Sakhi hi an lo fimkhur hi mawle! Mi narân chinchâng hre lo tân phei chuan sakhi chal ngat kah hi har viau âwm pawh a ni rêng e,” a ti rilru a. Sakhi chuan a kah nuam tawk a lo thleng ta tih chuan Thansanga chuan a han tin a, a chaldârah tak a va kâp a. Sakhi chu alet tawp mai a, tho leh tur a awm tawh lo.
Silai a’n rik chuan Hlupuii leh Rini chuan, “I kâp thlu em?” an rawn ti a. Thansanga chu a nui tat tat a, ‘Rin loh taka ka’n hlawhtlinpui dawn chu. A lâwmawm hle e,’ a ti rilru a. A silai mute an thun leh tê tê a, a channa aţang chuan a lo chhuk a. A sakhi kah a va en chian chuan a lo thizal der tawh a. Tichuan thlâm lamah a pu phei ta a. Hetih lai pawh hian Hlupuii leh Rini chuan an la rawn au reng a. Thansanga chuan a rilruin, “Lo kâp ţhelh ta ila, a zahthlâk duh âwm mang e,” a ti rilru a. Thansanga vau aţanga Sakhi chal pu chunga a lo chhuak an han hmuh chuan Hlupuii leh Rini chu an ţê ring dûn kher mai. An hlim lutuk a, an au teng tung mai a. Thlam a lo thlen chuan Thansanga chuan thlam chhuatah chuan sakhi chu a han nghat a. An lâwm tlang kher mai.
Rini chuan a han kuai let a, a han en vêl a. Hetih lai hian Hlupuii chuan nui miah lovin Thansanga chu a lo en kal mai a. Thansanga chuan chutia Hlupuiin a lo en reng chu a han en ve a. Hemi hun tawi tê an inen chhûng hian an rilru chhûngril ve vein thil tam tak an sawi hman a ni.
Rini chuan, “Hlupui, Thansang, kan chan dawn nge, a pumin kan hawn ang?” a rawn ti a. Hlupuii chuan, “Thansang, engtin nge ni ang?” tiin a han zawt ve leh a. Thansanga chuan, “Chan sain hawn ila, a pawi hlei nêm. Ina han buaipui leh vêl ai chuan,” a ti a. Tichuan Thansanga chuan a kawchhung a phawrh a, a dar te, a bawp te a phawk hlawk hlawk a. A phurh awlsam thei ang tur berin a han chan a. Chutah Thansanga chuan fiamthu hian, “Rini, keia kâptu nih manah a kawchhûng leh a lu ka chang ang a, a bak zawng chu nangni ţhian dûnin in insem ang,” a han ti a.
Rini chuan, “A sa i chang ve lo anga maw?” a rawn ti a. Thansanga chuan, “A tui ber tur a kawchhung ka chang dawn alâwm. Chuvangin naktuk zing phei chu Hlupuii te inah a chek hawp tûrin chaw i rawn ei a ngai ang. Mizo dan a nih chu. Nula hruai chuan chaw eiah sawm ngei ngei tûr a ni a. Mahse hetah in ka neih ve loh avangin Hlupuiin a sawm dawn che a nih chu,” a ti a. A nui duh si lo va. A thu tak hmel hle mai si a. Hlupuii leh Rini chuan, “Chutiang chu Mizo dan, pi leh pu dân a nih chuan a ţha alâwm,” an ti a.
Thansanga vêk chuan fiam nuam dawn riauvin a hria a, “Hlupui, nang pawh Rini i sawm tur thu hi i nu leh pa i hrilh hauh tur a ni lo va, zingah ngawi rengin chaw i thlâk kêp ringawt ang a, mi dang hriat lohvin i va sawm mai tûr a ni. Tin, Rini pawh hetiang nikhua hi chuan tlawmngaih der a, ţan chi a ni lo a nia. Chuti lo zawng khuanu a lâwm lo vang e. Tin, ka la sawi hmaih chu, Hlupui, Rini i va sawm khan, in ina chaw a ei tur kha a chhungte hrilh miau loh tur a ni a, chu bâkah i rualin a lo kal tur a ni lo bawk. Chaw ei i siam ta maw tihah a lo lut anga ngawi rengin a rawn kil ve ringawt tur a ni. Chu, in hre chiang maw?” a han ti a. An âwih laklawh tawh si a le, Thansanga thu sawi apiang chu an âwih tih entir nan an lu an bu nghauh nghauh mai a. Tichuan hlim takin an haw ta a.
Kawtchhuah an thlen chuan Thansanga chuan, “A nih Hlupui, Rini, ka thusawi kha hre reng ula, upa dante hi hriat a ţha a nia,” a han ti leh a. An \hian dûn chuan an aw dun zel a. Tichuan Rini chu an in lamah a peng ta a. Thansanga leh Hlupuii pawh Hlupuii te inah an lut ve ta a. Hlupuii chuan, “Ka nu, min han chawi thlâk teh, sakhi sa kan rawn hawn a nia,” a ti hlut a. Kawmchar leikapuia upaho leh lalpa pawh chuan Hlupuii ţawng chu an lo hre pha vek a. An lo phei ve a. Thansanga chuan sakhi kaw chhung chu tuium hmun bulah a han phawrh a. Hlupuiin a sakhi sa phurh chu chhuatah a lo dah chhuak bawk a. Upaho chuan, “E, Hlupui, in va’n hlawhtling ve, Sakhi sa hawn hi nula tan chuan a har viau asin,” an lo ti fiamthu a. Kawmchar lamah an phei leh ta a. An phei dawn chuan upa pakhat chuan, “Tlangaupa, kha sakhi kawchhûng, a pumpuite kha lo su la, a chek te kha lo buaipui teh; tirawh Thansang, leikapui lamah hah zû rawn dawm ve rawh,” tiin a han sawm a. Lalpa pawh chuan, “Ni e, lo kal rawh, lo kal rawh,” a lo ti ve a. Lalpa vêk chuan, “Thansang, i sakhi sa chu sem dan i thiam hle mai, engtin nge i ngaihtuah chhuah thiam?” a ti a, a nui huk huk a.
Zanriah ei a lo hun chuan upa hote leh tlangaupa te pawh chu an haw ve ta a. “Kan lo lêng leh ang e,” tiin an ţin ta a. Zanriah eikham chuan Lal Upaho pawh an lo leng leh ţak ţak a. Thansanga leh Hlupuii chu kawmchar leikapuiah ţhuin an titî a, an hlim dûn khawp mai.
Rini pa chuan, “Rinbawih, engtin maw Thansanga sakhi kah in insem dân chu? Thansanga chuan a kawchhûng chauh a chang a, nangnin a sa insem ula, hei hi Mizo dân, pi leh pu dân a ti a maw?” a han ti a. A nui hak hak a. Rini chuan, “Nia, a sa tui lai ber ka chang a, a dang chu nangni ţhian dûnin in insem tûr a ni,’ a ti tlat mai a. Chuvang chuan a sa zawng chu kan insem mai,” a ti a. A pa chu a nuih a za viau nãa Thansanga fiamthu a ni tih a hriat avangin Rini ngaihţhat lohna tûr khawp chuan a nui duh lêm lo va.
Thansanga leh Lalhlupuii kha chu kawmchar leikapuiah inkawmin an hlim dûn hle a. Sakhi chek pawh a nuin a chhum hmin tawh a. A sa dang an chhum hran bawk a. Hlupuii nu chuan, “Mami, hei sa pawh ka chhum hmin vek tawh a, ka mutsan dawn a nia aw. I pu mutna pawh hei ka siam a, a mu tawh a. Nangni chu induh hun hunah mu ve mai ula. I pa pawh a mu tawh a, ka mutsan ve mai ang che u,” a ti a. Khum lam a pan ta a. Thansanga leh Hlupuii chu zan rei fe thleng an titî dûn a. Hlupuii chuan, “Thansang, la châm deuh rih ang che aw,” a ti sauh sauh a. Mahse Thansanga chuan, “Naktip chu ka hawn a ngai tawh. Ka u pawhin in lung inphun chanchin hi a hre châk hle tawh ang. A remchang hmasa berah ka lo zin leh zawk ang e,” a ti a. Hlupuii chuan, “Ni e, kan chelh reng thei lo che a. Mahse lo zin leh vat chu intiam la,” a ti a, Thansanga chuan, “I tih te chuan tiam e, ka lo zin leh vat ang,” a ti a. Inkawm kham lo hle mah se mut a hun tawh si a, mut zai an rel ta a.
A tûk zing khua a lo var chuan, hma takah Hlupuii chu a tho va, chaw a chhum hluai mai a. A nu a lo tho ve a. “Mami, tukin chu i va tho hma ve?” a rawn ti a. Hetih lai hian Thansanga pawh a lo harh tawh a. Mahse a tho chhuak lem lo va. Hlupuii chuan, “Sa chek kan nei sia, rawn ei ve châkte an awm takin ka ti. Tin, Thansanga hi vawiin bak chu a châm thei tawh dawn si lo va. Kan chawhlui kilho hnuhnung pawh a ni mai thei a. Rini te inah ka va kal lawk ang e,” a ti a, a chhuak ta a. Rini chaw eia a sawm tur thu a nu hnen pawha a sawi duh miah loh avang chuan Thansanga chuan a thusawi kha Hlupuii chuan a pawm hle niin a hria a, a nuih a za ru angreng hle a. Tin, a fiamthu kha anni ţhian dûn hian an hre thiam lo tak tak a ni tih a hre ta a. An la naupangin an rilru pawh a thinghlim dûn mang e aw,” a ti rilru a.
Nakin deuhvah chuan Hlupuii a lo hawng a. A nu chuan chaw ei pawh a lo peih diam tawh a. Hlupuiin chaw ei a siam dawn lai chuan Rini kha a lo lût ve a. Hlupuii chaw ei siam chu a rawn pui nghal sawt sawt a. Chutia Rinin chaw ei asiampui lai chuan Hlupuiin Rini kha chaw ei turin a sawm tih a nu chuan hre hek lo, ţawngkam ţha ang deuh ghian, “Rini, sakhi sa chu in nei ve tho nâ anga, mahse a chek in nei ve âwm si lo va, hetah ei ve nghâl ta mai che,” a han ti chu le, Thansanga pawh a lo tho chhuak ve mêk kha insûm thei hek lo, a nui ta char char mai a.
Chutah le, Thansanga chuan a lo bawlzan lek a ni tih an hriat chuan Rini leh Hlupuii chu an tlan phei lawk a, Thansanga chu an va chum rawn ta awk awk mai a. Lalnu khan, “Nangni pahnih kha, engtizia nge ni ta – Thansanga chu in va chum tak zawt zawt?” a lo ti a. Thansanga chuan, “Ka pi, Hlupuii-te ţhian dûn hi, an sual lutuk, min chum sil zo vek tawh alawm, eng nge an huat pawh ka hre lo ve,” nui chungin a ti a.
Rini chuan, “Amah hi alawm sual. Niminah ‘Mizo dân a tih loh leh pi leh pute tih dân a ni ngai,’ a ti zo vek a. Kan sa insem dante pawh ka pa hnenah ka han sawi a, a nuih a za lutuk a. Hei tunah pawh chaw ei turin Hlupuii hi in hriat hauh lohva min sawm turin a hrilh pek a; tin, kei lah chu ‘Inleng angin i lo kal ang a, chaw ei dawnah ngawi rengin i kil ve tur a ni; chuti lo chu khuanu a lungawi lo vang, vanduaina te pawh a tawh theih a nia,’ min ti a. Kan pahnih hian dawt vek min lo hrilh a nih chu; mi dang in ni phei sela chu ka zaha ka zah tur zia! Thansang, i va’n sual ve,” a ti a, a han chûm nawn leh rih ţhin a. Chaw ei dawna ruai chuan an vai nuih ta a. Thansanga chuan, “‘Mizo dân min hrilh rawh, in ti leh ţhin a, ka hrilh che u a nih kha. Ka hrilh dik lo che u em ni?” a la ti ta deuh deuh va. Chaw pawh ei hlei thei mang lo khawpin an han nui leh ta rih a.
Hlupuii nu chuan, “In chaw a dai zo dawn, i ei phawt ang u,” a ti a. Hlim takin chaw an ei ta a. Chaw ei lai chuan Rini chuan, “Vawiin chu puan vawn ka duh deuh va, niminah kan hah em a nakin chu in pahnihin, Thansang, Hlupuii nen lo leng phei ta che u,” a ti a. Chaw an ei khama an chaw eina an han tihfel zawh chuan muangchangin Rinite in lam chu an pan phei ta a.
Hemi ni hian Rini puantahna bulah Thansanga leh Hlupuii te chu nilêngin an awm ve a. An titî ho a, an hlim hle a. Tlai lam chuan Hlupuii leh Thansangate an haw phei dawn chuan Hlupuii chuan, “Rini, zanin chu lo lêng phei la, hei Thansanga hi naktukah a hawng mai dawn tawh si a, i rawn kawm hlim ve ang chu,” a han ti a. Rini chuan, “A ni viau a, mahse ka tibuai mai mai ang che u a!” a ti a, Hlupuii chu an melh deuh ralh a. Hlupuii chuan, “A...chutiang lam ngaihtuah suh. Lo kal ngei ngei ang che. I lo kal loh chuan ka rawn lam tho tho ang che,” a han ti a. Rini chuan, “Chutizawng mi rawn lam a ngai lo vang, ka lo kal mai ang; a nih chaw ei tui u le,” a ti a, an inţhen ta rih a.
Zanriah ei kham chuan Rini chu Hlupuiite inah chuan a lêng phei a. Kawmchar leikapuiah an titî ho leh a. Zan rei fe thleng chu fiamthu leh eng eng emaw sawiin an nui ho dar dar a. Rini chuan, “Thansang, i hawn hun chu kan ngai dawn mang che e, engtik nge i lo zin leh ang?” a han ti a. Thansanga chuan, “Ka hre lo le, hun remchang hmasa-ah ka lo zin leh thuai ang, in veng hi a nuam ka ti khawp mai. A damin han dam phawt ila, kan la inhmu leh thuai ang chu,” a ti a.
Hlupuii chuan, “Thansang i lo zin leh vat tûr a ni ang, chuti lo chu keimahni kan lo zin ang a, i zak viau mai tûr a nia,” a han ti fiamthu ve a, an nuiho dar dar a. Hlupuii han hlim hmel leh zan thla ênga a sam lang tle ziar maite chu a nalh hle mai a. Thansanga chuan Hlupuii sam chu a va khawih a, a han zût a, a nal siau mai a. Thansanga chuan, “Hlupui, i sam chu a va nãl siu siau ve, i su fai hle a ni maw?” a han ti a. Hlupuii chuan, “Su fai ve bawk e, naktuk i haw dawn si a, sam bal tak leh thur be bua han thlah che chu kan zak ve si a,” tih pahin a ţhiannu Rini chu a va sik a, an nui dûn har har a. Hetia hlim taka an inkawm chhûng hian zân a lo rei viau tawh mai a. Rini chuan, “E khai, kan meng rei tawh êm mai, tiru Hlupui, Thansanga nen min va thlah rawh u,” a ti ta hlut a. Tichuan Rini chu Thansanga leh Hlupuii chuan an in thleng an va thlah a, an hawnsan leh ta a.
An hawn kawngah chuan, Hlupuii chuan, “Thansang, inngaihawm dawn hle mai. Lo zin leh thei tak tak la ka ti ngawt mai. Mite pawh i rawn hre ve ţhin dawn nia,” a ti a. Thansanga chuan, “Engtin nge ka hriat loh theih ang che? In ţhian dûn hian in felin kawm in nuam a, in ngaihawm dûn dawn fu mai. Lo zin leh thuai pawh ka tum ang, a damin han dam phawt ila,” a ti a. Eng eng emaw sawia an titî lai chuan Hlupuiite kawtkai an thleng ta mai a. Kal kawng a tawi an ti dûn hle mai.
Thansanga mutna tûr chu nuam takin Hlupuii chuan a’n phah sak leh a. Chutah Hlupuii chuan, “Khai le, Thansang, tui takin mu rawh le. Naktûk i kalna tûr a hla si a. I muttui loh chuan i chau ang e. Kei pawh kan mu ve tawh ang e. Mangţha aw,” a ti a, a khum lam a pan ta a. Hlupuii han che zia leh a awka chuan Thansanga rilru chu a khawih viau mai a. A rin aiin Hlupuii hi a ngai dawnin a inhria a. Tichuan ngawi rengin a mu ve ta a.
A tûk zingah chuan Hlupuii chu a tho va, ei rawng a han bawl a. Thansanga pawh a lo tho ve a. Tapchhakah meilum aiin Hlupuii rawngbawl che vel chu a lo en reng a. Hlupuii chu a hlim loh hmel hlein an hria a, mahse intihlim lui tih hriat takin Thansanga chu a be sarh sarh reng a. Hlupuii naute, a nu leh pa an lo thawh meuh chuan Hlupuii chuan ei rawngbawl pawh a lo peih fel vek tawh a. Chutia a nute an lo thawh tâkah chuan Hlupuii chuan, “Ka nu hei Thansanga hawn a tum si a. Chaw kan ei hma mai dawn em ni ang?” a han ti a. Hlupuii nu chuan, “E ni e, i ei vat ang u. Thansanga kalna tûr kawng a hla si! Vawiin phei chuan an khua pawh a ban hman miah lo vang. Thansang, kalkawng chan ve velah riah bûk a awm an ti a. Chutiang rampalailengah a awm taktak em ni?” a han ti a. Thansanga chuan, “Awm e, ka lo kal lam pawhin ka rawn riak alâwm. Khual zinho sak a ni a. A riak apiangin an chei ţha zêl bawk a. Luite bulah a ni a, a remchang khawp mai,” a ti a.
Hlupuii nu chuan, “E, mahni chuan a va khawharthlâk duh dawn ve, i hlau lo’m ni?” a han ti a. Chutah zawng Lalpa, Hlupuii pa chu a lo nui ta huk huk a, “Mami nu, Thansangate angin hlauh an neih i ring em ni? A pa te, a pu teho aţanga mi huaisen pasalţha, hlauh hre lo an ni ka tih ţhin kha i hre tawh na nge? Thansanga pawh hian hlauh hi eng nge a awmzia pawh a hre lo vang. A rêng rêng thu-ah Mami nu tlangvalin hlauh an sawi ngaiin i ring em ni?” a ti a, a nui leh kuk kuk a. Hlupuii nu chu a hrilhhai hmel zawk a. Mahse Thansanga chuan, “E ka pi, hlauhte chu hlau e, mahse lo kal ka châk si a, ka lo kal châkna hian ka hlauhna a tinêp deuh chauh zawk alawm,” a ti a, a nui ve var var a.
Hlupuii chuan Thansanga chu chiang fein a lo en a. A rilruin, ‘A ni lah taka, Thansanga thlahtuteho hi mi huaisen leh pasalţha, ram lama thangchhuah khawpa pasalţha an ni a. Thansanga pawh hian hlauh a nei vak lo vang,’ a ti rilru ve nauh nauh va.
Hlupuiin chaw ei pawh a lo siam peih tawh a. Tukţhuan chu an kil ho ta a. Chaw ei lai chuan Hlupuii nu chuan, “Thansang lo zin leh vat ang che, Hlupuii leh Rini pawh hian an ngai viau ang che,” a ti a. Thansanga chuan, “Ni e, hun remchang hmasa berah ka lo zin leh ang e. In khua hi a nuam ka ti khawp mai,” a ti ve a. Lalpa pawh chuan, “Ni e, lo zin leh ang che. Tin, i u Ramliana pawh kha min han biak la, a darmang rawn thawn lah a ţha êm êm mai si a. A ti lawmawm hle mai. A rorel thiamzia pawh tîti lêngvãk aţangin ka lo hre ţhin a,” a han ti ve a.
Chaw ei kham chuan Thansanga chu a han insiam a. Hlupuii chuan Thansanga iptepuiah chuan chawfun leh artui hmin sa pum li a khungsak a. “Tirawh Thansang kawtchhuah thleng ka va thlah ang che,” a ti a. An chhuah dawn chuan Hlupuii nu leh pa leh Hlupuii naute chu a han chibai thliah thliah a. Thansanga leh Hlupuii chu kawtchhuah lamah an inzui phei ta a. Hlupuii chuan, “Thansang, en teh i pangpar hi a la vuai miah lo nia! A mak ngawt mai! A rim lah hi a tui ngaiin a la tui êm êm reng bawk si. A vuai hma chu ka tawn dawn a ni,” a ti a, a nui har har a. Chu pangpar sen a’n hmuh chuan Thansanga chuan Galaxy a hre chhuak zawk mai a. A rilru a rawn luah khat nghal chum chum a.
Kawt chhuahah chuan Thansanga leh Hlupuii chu an han inchibai a. Hlupuii chuan Thansanga chu a en ngam mang lo va, a mittui a parawl deuh va. “Thansang, dam takin aw, a theih chuan lo zin leh ang che,” a ti a. Thansanga kal chu a liam thlengin a thlir zui vawng vawng a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 29th, 2017, 6:40 pm

BUNG 31
Kawrnu a ţap
Ramhnuai deuh chin a thlen chuan Thansanga chu chak fein a kal a. Hlupuii chu a ngaihtuah pah ve reng a. Hlupuii leh Rini, a chunga an felzia leh Hlupuii nu leh pate zaidamzia te, an nelawmzia te a ngaihtuah nauh nauh a. Mahse a rilruah chuan Galaxy kha a châm reng mai a. Zânin kawng laka a riahnaah te a hmu leh mial ang em? Lo kalin a riahnaahte lo tel ve leh se, hlim taka inkawm a châkawm mang e, a ti rilru neuh neuh a. A mumangte kha a ngaihtuah chhuak zêl a. Tlang lian pui pui pahnih a hmuh a, a pakhat zawkah Hlupuii a awm a, a pakhat zawka Galaxy lo ding zah mai te. Tin, zinga a han thovin Galaxy pangpar sen tawn ţhin a lo ken reng mai te, khangte kha thil mak a ni! A mumangah pangpar a lo pe a, a han harh a, pangpar sen a mumanga Galaxy-in a lo pêk, a taka a lo hûm reng mai te nên kha. Chu mai ni lovin Hlupuiin a pangpar ken a rawn hmu a, a han tawn veleha kawl a rawn phe zawr zawr leh Galaxy - Lasi nula ţap hmêl a hmuhte kha eng nge a awmzia ni ang? Thil ţha lam nge thil ţha lo lam ni ang,” tihte a ngaihtuah nauh nauh va.
Tlai lam chuan luite bula riah bûk, a kal lama a riahna kha a va thleng leh ta a. Thansanga chuan a rilruin, “Zanin chu tah hian riak leh mai ila a ţha ang. Chaw chhum buai lah a ngai si lo va. Hlupuii chaw min fûn pawh ka la ei lo va. Zanriah atân hmang ila ni mai. Artuite pawh a dah tel nual kha maw le,” ti rilru chungin bûk chhûngah chuan a innghat ta a.
Bûk kawtah mei a han chhêm a, thing fawmsa lian fu fu awmte chu a han mût a. Zanriah ah Hlupuii chaw fûnsak kha a han ei a, a lo fûn lian deuh a niang, a ei sêng lo va. ‘A hin loh chuan naktuk zing pawh a la daih dawn hi,” a ti a, chutiang taka Hlupuiin a lo duhsak chu a lâwm hle a. Khuate a lo thim chuan tih tur dang awm hek lo, mut zai a han rel a. A puan a han phelh chuan a rim a lo tui chêk mai a, pangparsen mawi tak mai a kal lama Galaxy-in a pek kha a lo la awm reng chu niin, ‘Thansang, hei hi kawl ve la, min rawn hre reng ţhin dawn nia,’ a tihte kha a hre chhuak leh ta a. Mutna a han siam zawh chuan a han mu zãl a.
Mut pah chuan Galaxy pangpar pêk kha a han hnim leh vang vang a. Galaxy, Lasi nula hmelţha leh piannalh tak mai a ngaihna chu a lo zual ta tual tual mai a. Tûn hma a ram vah lai te, an pahniha hlim taka hun an hman ţhin lai zawng zawng te a han hre chhuak leh a, “Zânin te hian lo lang leh phut mai se a hlimawm âwm teh e,” a ti rilru a. A rilrua Galaxy beisei ru reng chung chuan a mutnaah chuan a let a let a. Mut pawh a muhil mai thei lo va, zanlai thleng chuan a meng reng a. Ngaw dur pui kârah chuan chingpirinu a hrâm leh hlût hlût ţhin a. Chûngte chuan Thansanga chu a timuhil thei lo zual a. Mahse khawvar lamah chuan a lo muhil sek niin, a han harh chuan khua a lo var tawh a.
Thansanga chu a han insiam a, an khaw lam panin a kal leh ta a. Kalkawngah chuan sa hnu thar tak tak, nghalrual kawng kânnate pawh a hmu a. Mahse han chhui a, han kah lam pawh a ngaihtuah thei lo. Lasi nula pian nalh Galaxy kha a rilruah a awm reng mai a. A mumangte a han hre chhuak leh a. A mumanga Hlupuiin amah pan tûra a sawm a, va pan a tum lai te, chutah Galaxy a lo lang a, ‘Thansang tûnah chuan ni rih lo ve. Hun ila ngah alâwm. Ram lama thangchhuah te i duhin, i tum a ni lâwm ni?” a rawn tih laite a han hre chhuak a. A mitthlaah chuan Galaxy chu a lang veng veng mai a. Hmâna an tuichen dun lai te leh a hnu a, an inhmuh leha ‘Intawng leh ngei ang aw’ an tih te kha a han hre chhuak leh a. Ngaw kara sava hram chiah chiahte chuan a lunglenna chu tizual sawtin a hria a, “Aw Galaxy, tûnah hian khawiah nge i awm le?” a ti chhuak ta phawng mai a. Mahse ngaw kara sava hrâm mai lo chu thâwm dang eng mah a awm lo. Galaxy, Lasi nula pian nalh tak mai, nuih duh êm êm mai chu a reh vawng vawng mai si a. Ni danga a ram vah ţhin a ang lo hle mai. A zin kawngah pawh a lo lang hlawl mai ţhin kha a ni a. Mahse tûnah chuan a thei reh takin a reh daih mai si a. A lung lên dân chu amah pawhin sawi ngaihna rêng a hre lo. A kal pah chuan ngaw chhûnga thing lian pui puite a en vel ruai a.
Thlang lam panga hmawng thing zar dû maia zawng ban noh nohte chu a han thlir a. An hlim hmel hlein a hria a. Mahse a ni zawng a hlim ve thei lo. Hlupuii chawfûn a ei bãng a ken pawh phelh leh chuang lovin a ak zêl a. Ril\am pawh a hre chang lo. Tlai lamah chuan an khua Herhzawl chu a thleng ta a. An in a han thlen chuan luhkapuiah a u Ramliana leh upaho an lo ţhu a.
Ramliana chuan, “E, Thansang, i lo hawng ta maw, i va hmang nuam em? Eng nge Vanghmun khua chu ang i tih?” a lo ti a. Thansanga chuan, “A nuam fu mai. Ka va kal chu an lalpa pawh a lâwm hle a. Darmang i thawn pawh kha a lâwm khawp mai. Lungphun nân chuan vawk leh sial an talh a. Lung pawh an phun lian khawp mai,” a ti a. In chhûngah a lût ta a.
A han insilfai zawh chuan a han ţhu chawl a. A u Ramliana fapa lian tawh tak chu a bulah a lo kal a, “Ka pate, tunlai chu kan khawdai, khulai lawkah khuan kawrnu a ţap vak vak reng mai. Kan zuk en ţhin a, mahse ka hmu thei si lo va. Upaho chuan ‘kawrnu chu thereng lian deuh alâwm,’ te an ti a. Nang i hmu tawh em?” a rawn ti a. Thansanga chuan, “Ka hmuh chiah chu ka hre lo va; mahse a hrâm chu ka hre tawh a. Ţap pawh a ang ve deuh rêng a ni,” a ti a.
Ramliana fapa chuan, “Kan hriat chu chutiang mai a ni lo. Ţap tak tak chiah a ni. Nula aw mawi deuh ţap vak vak ang mai a ni. Nimin piah, piah leh vêl aţang khân kan hre ţan chauh a. Pitar hre ve pawhin, “Chu kawrnu ţap chu a va lungchhe aw ngawih ngawih ve,” a ti a. A mak tak tak a ni. Kawrnu chu a lo ţah apiangin en in kan kal a. Mahse eng mah kan hmu ngai lo,” a ti a. Thansanga rilruah chuan a u fapa thusawi, “Nula aw mawi deuh ţap vak vak ang a ni,” a tih chuan ngaihtuahna a neih thuitir hle mai a.
Zanriah ei kham hnu pawh chuan Thansanga chuan lèn chhuah a tum lo va, zawlbûk lam pan lah a tum hek lo. A u Ramliana nupui hnenah chuan, “Ka u, mutna min siam mai teh, kan kal hah deuh a, mut vat ka duh a ni,” a ti a. A u Ramliana \hiannu chuan mutnate a han siam a, hma takin a mu ta a.
A mut pah chuan Galaxy kha a ngaihtuah neuh neuh reng a. “Hmana ka va hmuhna pûkahte khân va kal leh ila Galaxy chu ka va hmu leh mahna, ‘Rawn ramvâk leh vat rawh,’ a tih kha maw le, naktûk chu saw lai ngaw saw va fang leh ila Galaxy ka va hmu leh mial mahna. A ngaihawm êm mai. Ani pawhin min ngai ve viau tawh mai thei a ni,” a ti rilru nauh nauh a. Chhûn lamah a kal hah bawk a, kâr lovah a muhil ta a. A mu tui hle ni tûr a ni. A han harh meuh chuan ni a lo sâng fe tawh a. A han tho chu a u Ramliana chuan, “E Thansang, i lo harh tawh maw? I kawng kalnate a thuiin i hah bawk a niang, i mu tui êm mai. Hei chaw ei kan peih tawh asin. Chawte ei dawn tawh ila, Mama nu, chaw ei han siam ta che,” a han ti a. Thansanga chu ngawi rengin a lo tho va. Chaw chu a rawn kil ve a. An chaw ei lai chuan a u Ramliana chu a ramvah tum thu a han hrilh a. A u chuan, “I zin hawng chauh a ni a. I la chau lo’m ni?” a lo ti a. Thansanga chuan, “Chau lo ve a. Nizan ka mu tam a, ka harh leh vek tawh alawm. Hetiang kawng kal mai maiah tlangval a chauh theih dawn em ni?” a han ti a.
Chaw eikham chuan Thansanga chu ramvâk tûr chuan a insiam leh ta a. Zan thum riak tûr buhfai leh puanthuah, a fungki leh silai nen a inak chhuak leh ta a. A iptepui puar luah maiah chuan a chempui a thiat bawk a. An piah ngawdur lam chu a pan leh ta vang vang a. A rilruah chuan Galaxy, mitmengmawii leh hmelţha tak mai hmuh chu a châk ber a.
Chhûn chawfâk hun vêl chuan ngawpui chhah lai chu a lo thleng ta a. Tûn hmaa a sanghal kahna hmun a han thlen chuan chhak lampang chu a han hawi chho va. Hmawng zar dû mai leh a hnuaia pûk chu a han hmu leh a. A han hawi kual vêl a.
A ţhian Lasi nulate kha hmuh mai a inring a; mahse tu mah hmuh tûr an awm lo. Pûk chhûngahte khian Galaxy, Lasi nula Piannalhi khân a lo nghâk reng ang em? Beiseina nei chungin pûk lam chu Thansanga chuan a pan chho ta a. Pûk kotlang a han thlen lai chuan a chung lam chu thaw fua-in a hria a. Chu veleh hmawng zarah chuan kawrnu ţap ang chiah mai hi a hre ta a. Mihring ţap hi ang berin a hria a. Thansanga chuan a han ngaihthlâk chian phei chuan kawrnu ţap ang tak mai chuan Galaxy aw ang a ti êm êm mai a. Mahse a han thlêk ngial pawhin eng mah a hmu si lo. Pûkah chuan a han lût a. Pûk chu a lo fai han mai a. Galaxy rim kha a lo nam chêk chêk mai a. Pûk kila vaivutah chuan hniak tharlâm tak mai a lo awm leh nghâl a. Thansanga chuan a han en chiang a, Galaxy hniak a ni tih a hre nghâl mai a.
Tûn hma an thlang lam lawka lipuia tui an chèn dun laite leh vaukam vaivuta Galaxy hniak awm thliai mai a en vang vang laite a hre chhuak a. Galaxy, a ţhian Lasi nula hniak chu a hai lo vang! A rimtui tak mai lah a la nam chêk mai si! Tûn lawkah pawh a awm a ni tih chu a hre mai a. Mahse a chhuak bo lawk a ni mahna. Lo nghâk teh ang ti rilru chungin a innghat ta a. Mahse rin aiin a lo kal har ta si a. Thansanga chu pûk kotlangah a lo chhuak a, a han hawi vel a. “Galaxy khawnge i awm?” tiin a han au vak mai a. Chu veleh chuan a bul lawka hmawng zarah chuan kawrnu ţap ang bawk kha a hre leh ta a. Lungchhe taka ţap ngawih ngawih ang maiin a rawn ţap leh ta ngawih ngawih mai a. Thansanga chuan eng mah a hmu si lo. Mahse thawm awmna chu a chhak lawk hmawng zârah a ni si a. Mak a ti rilru khawp mai a. Beidawng angreng tak chuan luia tuichawi tûr chuan a chhuk ta a. Mauvin tui a zuk chawi a. Pûkah chuan ei rawngte a han bawl a. Chaw a han chhum hmin chuan a la hma viau mai a. Tlai chawhmeh atân sava kah tûr zawng teh ang ti rilru chungin lui hnar lam a zawh chho va.
Lui kam zawlah chuan vahritpa a va hmu a, a han kâp a. A va lâk chuan chu lai bul vêlah chuan Lasi nula Galaxy rim, rim tui deuh kha a hre leh ta a. Lungpher luikama lo awm chu a va en kher a. A chung chu a lo huh hlap mai a. A va pan hnai a, a han en chuan Galaxy hniak chiah kha a va hmu ta mai a. Mak a ti hle mai a. A hniak lah chu a la tharin tui te chu a lo luang ngiai mai si a. Thansanga chuan a rilruin Galaxy chu a la hla miah lo vang tia ngaihtuah chungin, “Galaxy, Galaxy,” tiin a han au leh a. Chu veleh a chhak lawkah chuan nula ţap faih faih thâwm a hre leh ta a. Mahse ngaw chu a thelh hun bawk si a. Tu mah hmuh tûr an awm si lo va. Nula ţap thawm erawh chu a hre tlat si a. Mak ti tak chung siin pûk lam a pan chhuksan leh ta a.
A vahrit kah chu a han puah a, a chhum ta a. Vahrit sa a han chhum hmin meuh chuan khaw thim a lo hnai tawh a. Tichuan zanriah ei zai a rêl ta a. Tûn hma chuan hlim takin Galaxy leh a ţhianteho nên he pûkah ngei hian chaw an ei ho ţhin kha a ni a. Tûnah chuan a reh ruai ta mai si a. Khawharthlâk a ti rilru hle a. Chaw a ei kham chuan a han mu zãl a. Tûn hma hunte ngaihtuahin, lunglêng takin a han hawi kual vêl a. Chutih lai chuan pawn lam aţang chuan mi lo kal thlarh thlarh thâwm a hre ta a. Thâwm a hriat chu pûkah chuan a lo lût ngei mai. A rawn ri lut thlap thlap a. A bul hnai riin a rawn thlen chuan pangpar rimtui tak rim ang kha a hre leh a. Galaxy pangparsen tawn ţhin ang rim kha a ni tlat mai. Thansanga chu a han hawi kual a. Tu mah hmuh tûr an awm si lo, mahse Galaxy rim chu a nam si. Thansanga chuan zawi têin, “Galaxy, khawnge i awm tâk?” a han ti a. Mahse a reh vawng vawng mai a. Chhângtu aw rêng a awm si lo. Thansanga chu a lung a lêng êm êm mai a. Galaxy rim chu a nam si a, mahse a hmel hmuh tûr a awm si lo. Thansanga lunglêng lutuk tihngaihna hre si lo chuan, “Galaxy, nang nên kan ţuanna mual zawngte ka rawn fang leh a, i hmel tawn tûr a awm si lo! I rauthla tal pawh rawn tir ta che!” a han ti ringawt a. Chutah zawng puk kilah chuan Galaxy aw ngei mai chu lungchhe êm êma ţap thawm a hre leh ta tlat mai! Mahse reilo têah a reh leh ta daih mai a. Pangpar rimtui tak mai a hriat pawh kha a reh nghal daih bawk a. Zan khuain eng thawm mah a hre ta lo. Zân rei fe thleng a meng a. A muhil ta a.
Zing a han harh chuan a bulah chuan pangpar tel mawi êm êm hi a lo awm ringawt mai a. A bula ţiauvutah chuan hmeichhe hniak a lo awm leh thliai mai bawk a. Thansanga chuan a han en chuan Galaxy hniak ngei a ni tih a hria a. A hmel a hmu thei si lo. A bul hnai lawkah chuan a awm ve rengin a hre si a. A lunglènna tizual tûr tingin pangpar rim tui deuh rim a nam leh chal chal ţhin si a. Thansanga lunglêng chuan ramsa han pel leh kah zai pawh a rel thei lo! A lung a lêng vawng vawng mai a ni. Hmana Galaxy nêna an tuichèn dunna lipui kha a zuk tlawh leh a. Vaukama Galaxy a han ding zah mai leh a han hawi riai riai mai lai te kha a mitthlaah a rawn lang leh iar iar a. Lunglêng takin vaukam chiaha lungpui chungah chuan a ţhu ta a.
Tun hma hun kal tawhte a han ngaihtuah a, lunglènna tûr hlir niin a hre mai a. Tichuan rei ngial a ţhut hnu chuan a riahna pûk lama chhoh leh a rilrûk ta a. Chutih lai chuan lipui chu a ri bãrh bãrh a, a lam panin a rawn val phei pap pap mai a. A bulah chuan nghatun nung hi a lo tãl bat bat mai a. Tu mah kengtu a hmu si lo. Boruakah a hma chiahah chuan a rawn awm ta a. Chu sangha chu a han dawm chiah chuan sangha chu a perh bat bat mai a. Hetih rual hian pangpar rim, rim tui tak bawk kha a hre leh ta a. Galaxy rim bawk kha a ni. Mahse a hmel a hmuh theih bawk si lo. Thansanga chuan a rilruin, “Sangha min rawn pe a nih dawn hi,” ti chungin pûk lam a pan chho leh ta a. Sangha chu a han chhûm a. Tukţhuan te a han ei a. Mahse a rilruah ramvah lam a lang lo. A riahna bûk bul vêl khâmte chu a han thlir kual a, khâm âwih tak leh hmâwng lian pui, âwn du mai a sava awm noh nohte chu a han thlir kual a. Mahse hemi tûk hian sava pakhat mah an hrâm miah lo va, a rehin a reh ruai mai a. Lunglêng takin Thansanga chu a han hawi vel ruai ruai ţhin. A ţhian Galaxy hmel hmuh tur rêng a awm si lo.
“Khamrâng a senvung maw i rûn lo belhna?
Hlimin lêngin va fang mah ila,
Rial ang a lo dai e, sirva lengten zai vâwr lo;
Hring ànká sakhmel tawn tûr awm si lo.,”
tia ngaihtuah chungin a mu ta a. Nilêngin pûkah chuan a mu a. Zanriah ei lovin zan lamah pawh tho chhuak lovin a mu ta veng veng mai a. Zing khua a lo var a, ni a lo chhuah chuan a rilruin, “Ka ţhian ngaih êm êm Galaxy hmêl hmuh tûr a awm si lo. Ka haw mai teh ang,” a ti rilru a. A insiam sawk sawk a, haw tûrin pûk a\ang chuan a chhuak ta a. Pûk aţanga a han chhuak chiah chu a thlang lamah chuan nghalchang lian tak mai hi a lo ding paw thur mai a. Chu pawh chu Thansanga chuan kah pawh tum lovin a kalsan ta mai a. Chu veleh chuan nula ţap thawm a hre leh ta a. Lungchhe êm êm ţah tak tê hian a ţap ngawih ngawih mai a. Thansanga chuan chu ţap ri lo chhuahna lai vêl chu a han en a, mahse tu mah hmuh tûr an awm si lo. A kal leh ta a. Nghalchang pawh chu a kal ve ta nul nul a.
A hawn kawngah te chuan Galaxy Piannalhi chu a hre veng veng mai a. Tûn hma hlim taka an fan dunna ţhinte chu a chul riai maiin a hre tawh a. Kawrnu \ap thawm ni âwm tak a hriatte leh Galaxy rim ni âwm tak mai rim tui chêk maite leh a hniak a hmuhte kha chu mak a ti hle bawk si a. A bula pangpar têl lo awm maite pawh kha mak a tiin Galaxy tih ngei a nih a ring si. Mahse a hmel hmuh tûr a awm si lo. Hmuh lah a hmuh theih hek lo. Ţap a hriatte pawh kha Galaxy aw ngei chu niin a hre bawk si. Engati nge Galaxy chu a bul hnaiah a awm reng si a, a rawn inlan duh loh? A chhan ţha tak chu a awm phawt ang, a ti rilru a.
Khaw dai a lo thlen chuan pangpar rim tui deuh rim bawk a hre leh ta a. Thansanga chu a han ding a, a hnâr a han lèn vêl a. Chutia a hawina lamah chuan sakhi chal a han hmu ta a. A rilruin hlawhchhama hawn ai chuan khi sakhi tal khi kâp ila, a ţhat dawn khi tihpahin a han kâp ţhuai mai a. Sakhi chu a let tawp mai a. Chu sakhi a han lak chuan chu sakhi lo tlûkna bul vêlah chuan pangpar rim tui êm êm mai rim chu a lo nam chuk chuk mai a. A rilruin Thansanga chuan, “Galaxy rim chiah a ni. He sakhi hi min rawn kahtir a nih dawn hi,” a ti a. Sakhi chu hawnpui ta a.
Kar khat lai chu Thansanga chu ram pawh kal lovin inah a tãp a. An piah ngaw durte chu a thlir kual vang vang ţhin a. Ngaw chhahpui puite leh tlang dum dur maite chuan a lung an tilêng hle mai a. Tûn hmaa a ţhian Galaxy nên an lo fan tawh ramte a lo ni a. Mahse a ram vah hnuhnun ber ţuma Galaxy a va hmu lo khân a ramvah châkna a tibo deuh tlat mai a. Ramvah leh pawh a phûr fahran lo a.
Tûk khat chu a u Ramliana fapa a lo tlân lût a. Tukţhuan ei kham chu a ni tawh a, “Ka pate, lo kal teh. Khu laiah khuan kawrnu a ţap ţhin kan tih kan tih kha a \ap leh tawh, khu lai hmawng zarah khuan ni ngeiin kan hria a. Mahse kawrnu chu kan hmu thei miah lo nia! Lo kal la, zuk en ve teh,” a rawn ti a. Thansanga chuan a u Ramliana fapa chu a zui chhuak ve ta a. An veng mawng lampanga hmawng thing zar dû mai kâkpui vêlah chuan kawrnu chu a lo ţap ngawih ngawih mai a. Han enin a hmuh theih si loh. Chu thereng, kawrnu ţap chuan mihring ţap aw a ang êm êm mai lah tak a. Thansanga chuan a u fapa hnenah chuan, “Ka han lawn ang a, ka han man ang e,” a ti a. Hmawng kungah chuan a lawn ta a. Hmawng zar, a kâkpui a han thlen chuan kawrnu ţap chu a tawp ta daih mai a. Mahse pangpar sen mawi êm êm mai tûn hmaa a ţhian Galaxy tawn ţhin ang chiah kha a lo awm a, a lo lang sen hlar mai a. Makti tak chungin Thansanga chuan lâk a han tum a, pangpar chu a bo ta daih mai a. Chûngte chu Thansanga chuan mak a ti deuh deuh mai a. A han chhuk leh tur chiah chu a rilruah Galaxy a rawn lang leh ta a.
“Thansang, khawnge i awm tâk?” rawn tiin a hria a. Galaxy, Lasi nula a ngaihna chu a lo zual leh ta hle mai a. Tichuan muang chângin a lo chhuk a, a u fapa chuan, “Ka pate, kawrnu chu i hmu em?” tiin a han zawt a. Thansanga chuan, “Bawiha, ka hmu lo, a lo thlâwk bo hman a ni,” a ti ve mai a.
In an han thleng leh chu Thansanga chu ramvak tûrin a insiam sawk sawk a. Zan riak buhfai nen, a silai leh fungki nen a thawk chhuak leh ta a. Hmana a sanghal kahna bul vêl bawr kha a han thleng leh ta a. Luia tuite chu a han in a, a han insil dai a. A rilruin pûkah bawk khian ka riak leh mai dawn em ni aw a ti rilru a. A rilru tak chuan tûn ţum chu Galaxy ka hmu mial mahna a ti rilru a. Tichuan pûka riak tûr chuan an in-ak chho ta a. Pûk chu a kal hmasak ţum ang lo takin a lo ţhing ţhiap tawh mai a. Maimawmril ten an lo bawh chiai mai a. Chûngte tak chuan a lunglênna an tizual telh telh mai a. Galaxy, Lasi nula pian nalh leh hmel ţha, hlim thei êm êm ţhin kha a hla tulh tulh maiin a hre ţan ta a. “In tawng leh ngei ang aw,” an ti si a. Mahse an inkar a hla tawlh tawlhin a hre si a. A sam sei leh ngil sang, tle siau mai te, a ha var ţhah mai leh a hmui sen ling hlar mai te, a mitmeng mawi êm êm te a hmu tawh ngai dawn lo em ni ang? “Mahse Galaxy intawng leh ngai dawn tawh lo mah ila, nghilh ni i awm tawh lo vang,” a ti chhuak ta phawng mai a. A bianga lum pap pap chu han khawih a, Thansanga chuan a mittui a lo tla a ni tih a hre ta a. “E Galaxy, ka lo ngai hle che a ni maw? Mipa biangah hian mittuite chu luang ve ngai tûrah ka lo ruat hlei nêm!” a han ti leh a.
Chutih lai chuan a thlang lampangah ri deuh rek rek awmin a hria a. A zuk hawi thla chu zukchal ki ţha deuh mai hi a lo kal bur bur mai a. A chungah chuan Lasi nula Varparhi, Maxy an tih mai ţhin kha a rawn chuang a, a rawn nui ver ver mai a.
A han nuih zâwnga a mit han meng tãl ralh ralh chu hmuhnawm khawpin a mawi a. A ţhiante pawhin ‘Maxy mengmawii’ an ti ţhin rêng a. Lasi nulaho zinga mitmeng mawi ber a sawi a ni hial reng a. A hmelte leh a piante lah a nalh zaih mai bawk nên. Sazuk chunga chuanga a han hawi kual riau riau mai chu, thil azawnga inhmeh tâwp a tling a ni!
Chutah Thansanga chu a rawn pan hnai zêl a, a thlang lawk aţang chuan a rawn en chho va, “Thansang, i lung a lêng hle a ni maw? Pasalţhate hi an mittui a tla zen zen lo va. I mittui hial te a tlâk ve tâk? Pasalţhate mittui meuh an tlâk hi chuan keiniho chuan kan ngai pawimawh thei ţhin hle asin, Ţãn khawpuiah kan awm lai a ni a. Kan lo hmu reng che a, kan hotunu Chawngtinlerin min rawn tir a ni. Nang leh Galaxy hi inhmu thei tawh lo tûra tih in ni a. Hei vang hian Galaxy pawh a ţap nasain, a khawngaihthlâk hle asin. A ngai êm êm mai che a. Mahse i hmuh theih tûra awm phalsak a ni tawh si lo. A puih theihna che, a tawp nân a ti a, sanghal kahtir che a tum a, i kâp duh bawk si lo va. Khângte hlei hlei khân a lung a tiche zual a, a ţap thawm pawh in hriat kha. Mahse daiah sakhi a rawn pe leh che a. I lo kâp hlauh a, Galaxy pawh tlêm chuan a rilru nâ pawh a ziaawm phah deuh a. Sakhi i va lâk dawn pawh khân Galaxy rim pawh i hriat kha.
“Tin, in veng mawnga ‘Kawrnu ţap’ in hriatte pawh kha Galaxy ţap vek a nih kha! Nangmah a hmu thei dawn tawh lo che tih a hriat avangin a ţap a nih kha. Nang pawh a hmuh theih lohna tûr chein a lakah thup i ni a. I ţawng ri te, i thâwmte chu a hre thei a, mahse a hmu thei bik lo che a ni. Keiniho chuan dân tam tak kan nei a. Tûna Galaxy leh nangma inkâra thil awm dân hi kan dân zinga pakhat, kan hotunuin a hman ve ţhin chu a ni. Inngai tawn hle mah ula, in inhmu thei lo ve ve a ni,” a han ti a. Thansanga chuan ngawi rengin, Maxy Varparhi chu a en reng mai a, chutah, “Engati nge kan inhmuh tawn phal loh a nih a? Galaxy tal pawhin min hmu thei lo a maw?” a han ti a.
Varparhi chuan, “E Thansang, a chhan ka sawi a thiang hlei nem! Tin, Galaxy-in a hmu thei lo che tih hi ringhlel suh. Nang pawhin i hmu thei lo ang hian a hmu thei bik tawh lo che a ni. Tûnah pawh hian Ţãn khawpui pûkah hmâna i lo kala, in riah dunnaah khân a tawm tlat a, a ţap a ţap mai a ni. Mahse thurûk ka hrilh ang che. Ramngaw dur pui pui leh ngaw dur chhah lai apiang hi fang la, in inhmuh theih lohna chhan i hmu chhuak mial mahna. Mahse chu pawh chu thil har tak a ni mai thei a ni.
“Tûna ka sawi hote pawh hi i hnena ka sawi thu hi kan hotunu chuan hria se, a duh lo viau ang. Kan dân kalh a ni si a. Mahse Galaxy hi ka ţhian a ni a, a rûka mi chah avangin ka hrilh mai che a nih chu. Aw le, ka kal leh tawh mai ang e. Galaxy chu i vanneih viau loh chuan i hmu thei tawh lo vang. Ani pawhin a hmu thei tawh lo vang che. Dam takin le, Thansang,” a han ti a. Chu veleh a sazuk chuanna chu a han zuang vak mai a, van lamah a Varparhi, Maxy an tih nen chuan an chho dûn ta par par mai a. Khawchhak lam panin an ral ta raih raih mai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 30th, 2017, 9:49 pm

BUNG 32
Khawzing - Pi pu chhuahtlang hlui
Thansanga chu beidawng takin a han hawi kual vêl a. A rilruin Galaxy chu a han hre leh vawng vawng mai a. Kumkhua atân vawi khat mah a han hmu tawh lo tûr chu nâ a ti hle a. In lama hawn pawh a châk ta lo. Tin, Varparhin Galaxy hmuh leh theih dân a han sawi lah kha eng mah chiang kuanga han tih tûr a sawi bawk si lo. A beidawng bawk si chu ram palailêngah chuan a vâk a vâk ta mai a. A thlen tawpna apiangah a riak a. Chawhmeh tûr remchang a hmuh apiang chu a kâp zêl bawk a. Ni tam fe ram palailênga a vah hnu chuan Dampa ngawpui chhah deuh mai a lo lût reng tawh mai a. A han fanna lamah chuan Theihai lui, Chakma- hovin ‘Am-suri’ an tih chu a lo thleng a. Tui te in-in, a han inbual fai a, a kam bawkah chuan a han vâk leh a. Tlang pãwng cham pût mai a han chuang kai a. Lungpher nuam deuh mai a lo awm a. A bulah chuan lung lian zet a lo inphun a. He lai hmun hi chu lui kam a hnai vak lovin, a hmun hi mual inkham deuh, a chhak lam leh thlang lam pawh han thlir theihna a lo ni a.
Mual inkhamphei deuh po mai, chhim leh hmar zâwnga inkham a ni a, Ngaw hnuai pawh a thelh nuam hle a. A chung lam ah chuan, hmawngthing lian zet mai a lo zar dû mai a. Sava an lo ri nak nak bawk a. A chau tawh bawk a, chu lungpherah chuan a han \hu a, lungphun ni âwm tak lian tak mai lo ding luah chu a han ngheng a, a iptepui nghatin, a silai chu, chu lungphunah chuan an tung a, a hah bawk a, kâr lovah chu lungphun ngheng reng chung chuan a muhil ta a.
A han hawi vêl a, a hma lawkah chuan in a lo pe ut mai a. In 100 khua zet a lo ni a. Mual ţha lai takah chuan Lal in a awm a, a bul lawkah zawlbûk, tlangvalho riah khawmna a awm bawk a. Chhûn lai a ni a, naupang inkhualtelem awm nauh nauhte leh, ţhenkhat sephûng laia tuthlawh nen lei an chek tãrh tãrh lai te leh ţhenkhat sephûng lo insîktir te chu a han hmu a. A naupan laite a han hre chhuak rum rum a. Dai vêla naupang lian tawh deuh hovin bûk an sa laite pawh chu a en reng a. An ri chìl chèl a. Khaw lam bawk chu a han hawi leh a. Naupang inkhuallem leh sephûng laiho bâkah pawl khatho kaihbu lo kaite leh kaihbu vir ngeih lai sedar-dawn thlenga kaihbû lo la lâwn a, lo insualtir mêk te, naupang ţhenkhat kalchhet sang pui puia lo kal mêkte a han hmuh belh a. “He khua chu eng khua nge maw ni le? Ka hmuh ka va la hre lo êm?” a ti rilru a. Pitar buh pho vêngte leh herhâwt lo her riai riaite chu a han hmu leh a. An herâwt rite chuan a lung a tileng hle mai a. Uleuh hrâm lauh lauh te pawh a han hre tel zêl a.
Thil eng eng emaw hriat chhuah tûr nei tlatin a inhria a. Mahse chutih lai chuan chung lamah muvanlaiin lunglêng âwm takin “Kaw lêk, kaw lêk” a rawn ti lauh lauh mai a. A lung a lo lêng ta êm êm mai a. Mahse a lunglênna chhan a hre thei si lo, “Hei hi em ni ‘khawtlang lunglên’ upaten an lo tih ţhin chu ni dawn aw?” a ti rilru a.
Chu khua chu tlai lam thlengin a thlir a. A lo ţhutna pawh chu a han en chiang leh a, kawtchhuah lungdawh a lo ni reng mai a. A bul vêl a thing inphun leh thing khamah te chuan sa lute, a lo intâr tlar ţhet ţhut mai a. Puan ţialte leh thangchhuah diar ţialte an lo zâr bawk a. “E khai! Hei khawthar an kai a nih hi! Tu tak an lalpa niin, eng nge a khaw hmingah an sak ang le?” a ti rilru a. Tlai lam chuan a awmna lamah naupang an lo phei dal dal a, an nute feh haw hmuak tûr an lo ni a. Chûng naupanghote chu a lo bia a, mahse tu man an chhâng lo va. A awm tih pawh an hriat hmêl loh va. Chutah naupangho chuan,
“Ka nu, ka pa, lo haw thuai thuai,
Tlangah ruahpui a sûr e,
Sakhi lam pêng rawn zawh la,
Lo zangphar der der ang che,
Chhingi a ţap e,
Rolênga a ţap e,
Ka mumang mang chu ni sela,
Ka zuk au na ral ral tûr a,”
an ti a, an au lauh lauh a. Chutah an nute feh haw chu an lo lang ta a. Hlim êm êmin an tlân a, an nute hnam hruiahte vuanin an inzui haw ta a. An nuten fanghma te, dawnfawh te, hmazil te an rawn hawn a. An hlim êm êm mai a. Ni tlâk suar suar chuan sial an lo hawng ve leh dum dum a. A hnung berah sechal ngêng ngulh maiin hnu a rawn dãl a. Zân lamah te chuan tlangvalho chuan nulate rimin an ri ham ham a. Mut hun a lo nih chuan tlangvalho chu zawlbuk lamah an haw leh ta sap sap a. Chu khaw awm dânte chu a ngaihtuah kual vang vang ţhin a. Chutih chhûng chuan khua a lo var leh ta reng mai a. Nula zing tui chawi te, zing buh deng inthum rawn dap dap thâwm te leh vawk rilţâm chaw ngêna ngêk ruai ruaite chu a han en kual a. Ni lo chhuak chu upahovin hnung puakin an ai a, an ramvah ţhin laite sawiin, vaibel an pak khu talh talh a. Chûng upahote pawh chu tu mah a hmuh ngai an ni hek lo. A va pan hnai a. Chûng upaho ţhu khawm hnenah chuan, “Pute u, hei eng khua nge ni a, tu nge in Lalpa?” a va ti a. Mahse anniho chuan anmahni a bia tih pawh an hre lo va, a awm ve tih pawh an hriat hmel loh va, mak a ti rilru ta khawp mai a. A piaha pitar vawk chaw pe chu a va pan leh a.
“Ka pi, hei eng khua nge?” a han ti leh a. Mahse a rawn bia tih pawh a hre lo va, a lam a rawn hawi pawhin a hmu lo a ni tih a chianna chu a hnung lama mi chu a va bia a, ani chu a hmuh kân daih mai a ni tih a hre leh ta a. Engti dân nge ni chu le tih pahin pitar vawk chaw pêk lai, vawk lian tak chu han khawih a tum a, a han khawih chuan eng mah khawih fuh tûr a awm si lo va. Mahse vawk chuan chaw a ei lai chu a hap hluih hluih mai si a. Tiang a la a vawk chu a han hawlh leh a. Mahse vawk han hawlh fuh tûr a awm si lo. Mak ti taka a din lai chuan a bulah chuan pa sek ţen ţawn, puan veng at mai, vaibel pet kawh va hi a lo ding reng mai a.
Chu pa chuan, “Tlangval, khâng i thil hmuh kha tûn hma thil a ni a. Heng i mi hmuhte pawh hi pi leh pu hmânlaia mite an ni a. Be mah la an chhâng thei lo che a. Hun kal tawh thil a nih hi. Khawzing khua a ni a. An khawthar kai tirh lai i hmu a nih hi. Khing puan, mangpuan te, diarţial inzâr te leh selu tlar tiar tuarte khi he khaw Pasalţha Rozingan a puteho hriat reng nâna a tihte an nih khi. Lungdawh leh lungphun khi chu Pu Dengruma, Lal Upa sûlhnu a ni a; en teh khu, Khawzing Pasalţha a lo kal e,” a han ti a. Thansanga’n an en chuan Khawzing Pasalţha chu a pa lian kher mai a. A tukkhumah a sam a zial ngoh mai a. Iptepui a ak a, thangchhuah diar ţial a khim a, silai a pu bawk a. A awmna lamah a lo kal ta a. A âwmte chu sakei hamna tih hriat reng rengin a ser ruak mai a. A pa lianin a huai hmel kher bawk a. A hnung lawkah chuan tlangval lian zet zawt, dar pharh hlai phak mai, âwm chhah telh tawlh tak mai, hmel ţha zet mai silai puin a lo kal leh a. Khawzing Pasalţha chuan Thansanga bul a lo thlen chuan a rawn nuih vur vur a. A ral leh ta daih mai a. A hnunga lo kal tlangval lian leh hmel ţha tak chu a han ding a. A iptepui aţang chuan thangchhuah diar tial a han la chhuak a, a han khim a. Thansanga chu a rawn pan ve leh ta a. Thansanga chuan a han en chian chuan a pa kha ang hlein a hria a. Mahse a lo hnaih chuan a banpuama ser ruak mai chu a han hmu ta a.
A pa kha chu a ser ve lo tih a hre chhuak nghâl a. Chutih lai chuan a bula pa sek ţen ţawn puan veng lo ding ve reng chuan, “Khai le, tlangval, khu khu Pasalţha Thangliana a nih khu. Nangmahni thlahtu che u a ni a. I pa pa a nih khu! A pa chu Lal Upa Dengruma hemi lungdawh dawhtu hi a ni. Khu khu i lo be thei ang. I hriat duh chu lo zawt rawh,” a ti a, a bo ve ta daih mai a.
Pasalţha Thangliana chu a bul a lo thlen chuan Thansanga chuan, “Ka pu, ka harsatna su kiang tûrin min pui thei ang em?” a lo ti ringawt mai a. Ani Pasalţha Thangliana chuan, “E! ka tupa, thei tuk e a, hei vang tak hian alâwm ka lo kal! I ţhian Lasi nula Galaxy chu kei pawhin ka hria alâwm. In inhmuh leh theih dân tûr i ngaihtuah a ni phawt ang a. Vanghmun khuaah va kal leh ta la. Hlupuiin banga a tar, pangpar sen mawi tak mai kha va la leh la. Tichuan hmana i sanghal kahna chhak lawka pûk, a bulah pawh hmâwng thing lian tak zâr dû mai awmna kha, tah khân han lût la, i pangpar lâk chu pûk kilah khân han theh phei la, tichuan thil chu a fel leh vek mai ang. A nih, dam takin aw, ka tupa, hmana kan khaw rauhsan, Khawzing khua i rawn hmu a nih hi,” a ti a, a ral ve ta daih mai a.
Thansanga muhil a han harh chuan lungpherah ţhuin lungphun lian deuh nghengin a lo muhil a ni tih a han hria a. A han zi mar vêl chuan a mumang kha a han hre chhuak leh uar uar mai a, chutah a han tho va, chu lai ram chu a han fang vêl a. An thlanlung tlu âwn bii bêite a han hmu a. He lai zawng khaw hlui a lo nih chiah hi. Pi pute sûlhnu zawng a lo ni ngei mai. Ka mumanga Pasalţha Thangliana ka han hmu leh, anin ‘Ka tupa, kei pawhin Galaxy chu ka hre ve alâwm, Vanghmunah va kal leh la, Hlupuii pangpar sen banga a tar kha va la rawh’ a tih te pawh chu thil mak tak a ni. Ka rilrua ka ngaihtuah, ka mangphan mai mai nge, ka tâna ţangkai tûr ni ang? Eng le khaw le, mumang mah ni se, a lo then dik tâk mialin,” ti-a ngaihtuah chungin Vanghmun lam chu pan a rilrûk ta a. Ni tam fe a kal hnuin Vanghmun khua chu a va lût hlawl mai a.
Lal in chu dîng fêin a han pan a. Lalpa leh upaho an lo awm a. Lalpa chuan, “E khai Thansang, i lo zin leh a ni maw?” an lo ti a. Thansanga chuan, “A..zin pawh ka ni chiah lo, ka ramvâk inkhuaah ka lo lût lawk a ni e. Khawnge Hlupuii te, ka piteho?” a han ti a. Lalpa chuan, “Lo lamah va kal ve mai mai ang an ti a, an kal ta a nih kha, tlangaupa hovin ârte an keng a, va intihlim ve rawh se kan ti a nih kha. Ina awm hi an ning ve bawk si a,” a han ti a.
Chutih lai chuan Thansanga han hawi vêl chuan banga pangpar sen mawi tak mai, Galaxy tawn ang kha a va hmu a, a va la a, “Ka pu, Hlupuiite an awm loh chuan ka kal leh mai ang e. Ramvâk laite ka ni bawk si a. Ni dangah ka lo zin dawn nia. Dam takin u le,” a ti a, a chhuak leh ta mai a. Lalpa chuan, “Thansang, i va hmanhmawh ve, hei zûte pawh hi han dawm ve la, i chhawlhãl viau lo’m ni?” a han ti a. Mahse Thansanga chuan, “Hah lo ve, ka kal leh rih mai ang e, dam takin u le,” a ti a, ramhnuai lamah a lût leh ta a.
Chu pangpar keng chuan Thansanga chu an veng lamah a kal ta vang vang a. A kal chak bawk a, an veng khawdai a thlen chuan ni pawh a la sang hle a. Tûn hma chuan nuamsain ni hnih kal ah an hmang ţhin kha a ni a, mahse kar lovah a thleng ta mai a! An khua pawh lût lovin, daiah a hêl a, an khaw piah ngaw durpui chu a pan leh ta vang vang a. Ni tlâk rualin hmâna a sanghal kahna hmun kha a thleng phei leh hman a ni. Heti taka kal chak mai hi, a hnua a han ngaihtuah leh pawhin Thansanga hian mak a ti a. Chawl muang lovin a riah ţhinna pûk chu a pan chho va. Hlupuiin pangpar hmana a lo laksak, banga a lo tar a va lak lêt leh chuan pûk kil chu a va vawm a.
Pangpar leia tla tûr chu kutphah mam mat mai nalh zet hian a lo dawng nalh mai a. Kutphah aţangin bân a lo lang zêl a, âwm bawr, ke, malpui, kãwng, chutah Lasi nula hmelţha êm êm mai, pian nalh zah mai Galaxy, a ţhian a ngaih êm êm mai chu a lo ding leh ta zaih mai a. Pangpar sen mawi tak mai keng vá chung chuan Thansanga chu a han en a. A han nui a. “Thansang, kan inhmu leh thei chu a va han lâwmawm êm!” tih leh rawn tlàn phei a rual a, an inpawm chawt mai a. Hlim takin an titî dûn ta melh melh a. Galaxy chuan, “Thansang, i hah hle a ni tih i taksa aţang hian ka hre mai. Ti rawh, ka malchungah hian i lu rawn nghat la, ka lo chûl muhil ang che. Tichuan i hahdam mai ang,” a han ti a. A hmelah chuan Galaxy chu a hlim a ni tih a hriat hluah hluah mai a.
A malchunga Thansanga mu chu dîm têin a han chûl a, a sam kârte chu a han \hâm nak nak a. A sam ngil siau maite chuan Thansanga nghawng leh khabete chu a hawlh siau siau a. Thansanga chu a hah bawka kâr lovah a muhil ta a. A muhil lai hmelte chu Galaxy chuan chiang êm êmin a han en a. Eng eng emaw a sawi siap siap a. Galaxy Piannalhi pawh a lungawi hmel hliah hliah mai.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 30th, 2017, 9:49 pm

BUNG 33
“Thlafam chan hma ngei hian,
Dâr ang intawng leh ang aw.”

Thansanga a han harh meuh chuan zing ni chhuak chuan an awmna pûk chu a rawn èn uar tawh a. Galaxy mal lukham chuan a lo la mu reng mai a. Galaxy chuan puante a lo sintir vek mai lo niin, “Thansang, i lo harh ta maw, i chau bawka i mu tui hle mai. Nizân khân Varparhi te pawh an lo lêng a, tûkin zing hian an lo kal leh dawn a. Chaw leh sa tui deuh an rawn keng dawn asin! Thansang kan inhmuh theih loh hun chhûng kha a rei ka ti hle mai, nang lah chuan a chhan i hre chhuak thei miah si lo va. Kan inhmu lo hlen mai ang tih ka hlauthãwng teh asin! Lal fanu Hlupuii khân ka pangpar kha lo tichhiain lo paih bo hman phei sela chu kan inhmu thei tawh ngai dawn miah lo va. Zâna i mumang lama ka pêk che, zinga i lo hûm khân mak i ti hle a. Mahse keiniho hi mumang leh a tak inzawma thil tih kan ching ţhin tih i la hre lo niin ka ring a. Ka pangpar pêk che Lal fanu Hlupuiin a lâka, a han tawn chiah khân kei chu i bul hnai aţang khân engin nge min khawih ta tih pawh hriat lohvin min pawt hrang nghâl lawp mai a.
“Min han khawihtu kha kawlphê anga rang leh chak a ni a. Kha pangpar kha ka thiltihtheihna leh i laka ka tlâktlum vena a ni a. Hlupuiin a han lâk aţang chiah khân ka be thei tawh lo che a, ka hmu thei tawh bawk lo che a. I thâwm te, i ţawng te chu ka hre thei si. Chuvang chuan ka ţap ka ţap mai a. In khaw daiahte pawh ka lo kal a, ka ţap ţhin asin. Naupangte an lo kal a, min rawn en ţhin a, mahse min hmu thei si lo va. ‘Kawrnu a ţap a nih chu’ an ti sap sap ţhin a. Mahse chûng naupangho pawh chu zah zo lovin ka ţap ta vak vak mai ţhin a ni.
“Tin, hmannia, pûka i lo kal kha i thâwmte ka hriain, i rim aţang pawhin nangmah i ni tih ka hria che a. Mahse a hrehawm ber chu ka hmu thei lo che a, tawh ka tum che pawhin ka tawk thei bawk si lo che a, chuvangin lungchhe takin hmawng zârah ka chho va, ka ţap ta ringawt mai a ni. Tin, luikama lungpherah ka awm laiin ka bul lawkah i lo kal thâwm ka hria a. Min rawn au va, mahse ka hmuh theih loh che avangin ka chhân che a thiang bawk si lo. Chu mai ni lovin i tân ka tih theih chhun tiin pûk bulah sanghal ka rawn khalh a, i lo kâp duh bawk si lo. Khângte pawh kha ka ţahna titamtu an ni zêl asin, mahse khaw daiah khân sakhi ka lo dah a, i lo kal dawn tih kha ka hre lawk a. I han kâp ta kha ka lâwm hle a. Nangmah hmu thei lo che mah ila, thil mak deuh chu i fungki kha ka hmu thei zêl zuk nia! A chhan chu kha fungki kha keini lasihote ta a ni a. I pa hnenah Khuavelchhingin a pêk a ni. Chuvangin kha fungki, hei tûna i ah hi chu kei chang lo pawhin kan hmu thei zêl a ni. Tin, mumanga Khawzing khaw hlui i hmuhte pawh kha han ngaihtuah kîr la, i mi hmuhte kha an hmêl lan dânte leh a khaw hmun hluite kha a dik a. Varparhi, Maxy min puihna avanga a hmuhtir che a ni a. Amah Maxy vang hian kan intawng leh thei ta a ni a. A chungah lâwm thu sawi kan ba nasa hle a ni. Ani nên hian kan inkawm ngeih zualin, kan inpui tawn ţhin a. Khi, amah pawh a lo kal alâwm,” a han ti a, a han kawk a. Khaw chhak lam aţangin Lasi nula pathum an lo thlâwk thla delh delh mai a. An bulah chuan an rawn ţum a.
A hmasa ber a ding chu Varparhi, Maxy an tih bawk kha a ni a. A rawn hawi phei chuan Thansanga chu a han en a, a han nui a. A hmel lah chu a lang thar sar mai a. A pian nalh leh hmel ţhat chu thu dang ni se, a mit meng mawi êm êm mai chuan Thansanga mit chu a la hle mai a. A han meng ralh ralh a, a han nui a. A háte chu tuikeplung ang maiin a var siau mai a, “Thansang, Galaxy nên hlim taka in inhmu leh thei hi kan lawmpui a che u. Tin, hei ka ţhiante pahnih hi i la hmu ngai lo mai thei a. Khawchhak tawp aţanga lo kal an ni a. Ka rawn hruai ve a ni. An hming chu hei ka bul hnaia mi hi Prixy a ni a, pakhat zawk hi Poxy a ni,” a han ti a. An hmel chuan Mizo lam an ang a. An sang dûn zalh mai a. Kum 17 emaw 18 emaw vel lek hmêl an pu a, an nui dûn var var a.
Thansanga chu a rawn ţhu chhuak ta a. “Varparh, i chungah Galaxy nên hian kan lâwm hle mai. Nangmah vangin kan inhmu leh thei a. Tin, i ţhiante pahnih Prixy leh Poxy ka hmu pawh ka lawm khawp mai,” a han ti a. Varparhi chuan, “Thansang, i ti lâwmawm e. Galaxy nên hi chuan kan inpui tawn fo ţhin rêng alâwm! Mahse Galaxy hi a vannei lutuk bik ţhin êm a,” tih pahin a bula Lasi nula nalh zet zet pahnih chu an melh kual vêl a. Hetia nui var var chunga Varparhi han meng kual relh relh mai mitmeng mawizia hi Thansanga chuan sawi fiah ngaihna a hre lo. ‘Ani tluka mit meng mawi hi awm thei tak ang maw?’ a ti rilru ringawt mai a ni.
Chutah Varparhi chuan, “Galaxy, hei ei tûr tui deuh ka rawn keng a, i ei ang u hmiang, Thansanga pawh a ril a ţâm viau tawh ang,” a han ti a. A bula Lasi nulate thil ken chu a la a, an han ţhet ta a. Sa leh buhchangrum bâkah thil tui tak tak, Thansanga’n a la ei ngai loh leh a hriat pawh a la hriat ngai lohte chu an rawn chhawp hnawk mai a. Thansanga chuan a han ei lawr \hin, tui a ti êm êm hlawm mai a. Lasi nulaho chuan an ei lawr zeuh zeuh chauh a. Thansanga erawh chuan a ei hnem hle mai a. A duh tawk a han ei hnu chuan a chauhna pawh a lo reh nghâl huai huai mai a.
Hemi ni hian hlim takin an inkawm ho va, tlai lamah erawh chuan Varparhi leh a ţhiante pahnih Prixy leh Poxy chu Ţãn tlang lamah an chho leh ta a. Galaxy leh Thansanga chu hlim taka inkawmin an nui dûn har har reng a. Zân rei fe thleng an titî a, an inkawm hnu chuan an mu ve ta a.
Zing khua a lo var chuan, Galaxy chuan, “Thansang, vawiin chu i hawn duh ka ring a. Ram i vahna hi thla khat lai a tling tawh tih i hria em? I u Ramliana pawhin a ngaihtuah viau tawh che a ni. In khuaah pawh an sawi deuh sap sap tawh a. Chuvangin i haw phawt a ţha ang. Ni thum vêl hnuah i lo kal leh zawk dawn nia. Eng sa nge i kah duh? Khu khu kâp mai ta che,” a ti a, pûk pawnah a han hruai chhuak chu sazuk ki ţha deuh mai a lo ding ho mai a. Thansanga chuan, “E a va han lian dawn ve!” tih leh kah a rual a. A chaldârah takah a zuk kap a, a let tawp mai a. Galaxy chuan, “I va kâp thiam ve, hawh ka chan pui ang che,” a ti a, an chan ta a.
An chan zawh chuan a sa tui lai an chhum a, bawmrang an kalh nghâl bawk a. Chaw ei kham chuan bawmrang lian zet zet pahnihah sa chu an beng khat tlat a. Galaxy chuan, “Thansang, pakhat ve vein kan phur ang a. In khawdai thleng ka han thlah ang che; ka’n tizãng leh ang e aw,” tih pahin bawmrang chu a han sawi a. An han phurh chuan a zãng leh ta duai mai a. Awlsam têin Thansanga pawhin a bawmrang chu a phur thei ta mai a, Galaxy nên chuan an inchhawm chho dûn leh ta a. An titî dûn mawlh mawlh a. Khaw bul hnai a lo thlen chuan a hmasa zawka kal Galaxy chu a lo hawi phei vat a. “Thansang, mi an lo kal a nia. Ti khân che lovin awm rawh, tichuan min hmu thei lo vang, ţawng pawh ţawng suh aw,” a ti a. Roliana leh Denga sakhi chãng tûr an lo ni a. An rawn titî dûn mawlh mawlh a. Denga chuan, “Kan ţhianpa Sanga ramvâk hi a rei ta viau mai a. Khuaah pawh an sawi an sawi ta mai. Eng nge kan Lalpa ngaih dân hi ni le?” a han ti a. Roliana chuan, “Ka pain a sawi dân chuan, ‘A u Ramliana chuan a ngaihtuah deuh nãin, eng vak a ti lo vang, a lo a hawng leh mai ang. Pasalţha te chu thla khat khat hi chaw lo pawhin an thang mai alâwm! Ka pu Thangliana pawh thla khat thang chang a ngah tih thute pawh ka hria a. Thansanga pawh hi ka pa leh ka pu chhûn awm chhun a ni a. A ngaihtuahawm lo vang,’ a ti ni âwm e,” a han ti a.
Denga chuan, “Ni e, ţhianpa Sanga zawng a rorum êm a, hlauh lah a nei hek lo. A lo haw vat tawh ang. Sa lu ţha tak a rawn hawn leh ngei ang,” a ti sauh sauh a. An kal liam hnu chuan Galaxy chuan, ‘Thansang, i ţhiante an nih kha, i be châk âwm mang e. Mahse zaninah in inkâwm thei tho dawn a. Sakhi chàn tum an nih kha. Khaw thim hmain a pachal ve ve an rawn kâp ang, ” a ti a, a nui sak a.
Khaw-dai an han thlen chuan an innghat ta a. Galaxy chuan, “Thansang, heti bâk hi chu ka lo kal tawh lo vang. Khu, in khua lah a lang uar tawh mai si a. Ram i rawn vah leh hun chu nghalchang lian deuh ka kahtir ang che. Hlim taka kan han inhmu leh thei te hi a lâwmawm mang e ti rawh? Khai le, hla do te i chham dawn lo’m ni? Han chham zo la, ka kal ve tawh ang chu,” a han ti a, a nui ver ver mai a.
Thansanga chuan Galaxy pian nalh tak mai chu a thlir vawng vawng mai a. A han kal mai tûr chu a ui si a. “Galaxy, zanin lamah lo leng ve la,” a han ti a. Galaxy chuan nui her her chungin, “Thansang, min sawm phawt chuan ka hnial ngam dawn em ni? Ka lo lêng ngei ang; a nih chaw ei tui aw,” a ti a, kal a han tum a. Mahse Thansanga chuan, “Ngawi rawh Hlado ka’n chham phawt ang a, i kal dawn nia,” a ti a. Hla do chu a han chham ta a.
“Zuksial e, phai kip tlantu, tlang tin kal mawi,
A ki \huamriat, thangkim rulbang a vial na maw,
Chungmuvanlai thangvânah hrâmin a leng nâ maw
Rawn lawi aw kan rûn a’n e, Rualin e a lu râk zût ulaw.”
Tah chuan Galaxy chuan a kalsan ta rih a. Galaxy phur chu nakina lâk ah tiin a hnutchhiah a, ama phur nên chuan khaw chhûng a lût ta a. A u Ramlianaten a hla do chham an lo hria a. Luhkapuiah an lo thlir ţhap a. “E Thansang, i lo haw ta maw? Kha, i zukchal kah chu a ki a va han ţha kher ve! Tûn ţum chu i thang rei bawk a, kan lo ngaihtuah lek lek tawh mai che a!” a han ti a. Thansanga chuan, “E...ka u, mipa ramvâkte chu inngaihtuah a ngai hlei nêm! Ka pu – Pasalţha Thangliana pawh thla khat te, thla hnih dawn te a thang bo chang a tam ţhin an ti a ni lo’m ni?” a han ti a. In chhûngah an inzui lût ta a. Upaho leh tlangaupa chuan a sa phurh an han chawi thlâk chu an ‘eih’ tuar mai a. Rit an ti hle mai. “Engtin nge hetianga rit te i rawn thlen theih?” an ti hial a. Thansanga chuan bawmrângin ka rawn chhêk a, kawtchhuahah pakhat ka la dah a, ka va la leh law law ang e,” a ti a, a kal leh ta a.
A lo hawn chuan an han nghat leh a. A hmaa mi ang bawkin a ritin a tam a. Mak an ti hle mai a. “Thansanga chakzia hi sawi fiah phâk pawh a nih loh hi,” an ti ta hial a ni!
Tlai ni tlâk hma chuan Denga leh Roliana ramvâk chu an lo hawng a. Sakhi chal an rawn ak hawng ve ve a. Luhkapuia Thansanga ding chu an rawn hmu a. “E khai ţhianpa Sang, i lo haw ta a ni maw? I va hlawhtling em?” an rawn ti a. Thansanga chuan, “Zukchal chu ka rawn kâp ve a. Kha, nangni kha a nih kha hlawhtling!” a lo ti a Anni ţhian dûn chuan, “E khai! Zukchal i kah chuan a lu rawn lawm a ngai a nih chu! Zânah kan lo lêng ang e! Sakhi sa pawh kan rawn hleh ang che,” an ti a.
Zan lam chuan Lal Upahovin zu bêl an rawn pu lût thliah thliah a. “Khawnge, Thansanga zukchal lu lâwm teh ang,” an rawn ti a. Denga leh Roliana pawh an lo kal a. Sakhi sa an rawn hleh ve ţeuh a, zu bêl an rawn pu lût ve bawk a. Thansanga sazuk kah ki chu an han hmuh chuan, “E heu khai, a va han chalin a ki chu a va han mawi chungchuang êm! A tluka ţha a vâng viau ang. A lu lawm pawh a phû e,” an ti a. Chutah Lalpa Ramliana chuan, “Khãwnge, Upaho leh Thansanga ţhianten zu bêl an rawn pu si a, Mama nu, ka’n do ve ang e. Ka thla thum zu bêl lian kha tlangaupa han chawi thlâktir teh. A hmahruai ah i han in phawt teh ang. Tlangaupa nang han sawr nghâl rawh aw,” a han ti a.
Tlangaupa chuan rapchunga zu bêl lian tak mai chu a han chawi thla a, a sawr a, a han sem a. Upaho chuan, “E khai, Lalpa zû nge nge, lu a kai nghâl chiai chiai mai alâwm le,” an ti a. An han in zêl a, an phûr ta viau mai a. Tuiûm khuang sawhin an han zai a, an han lâm ţan ta a. Tlangaupa chu phûr fêin a han phar dah dah mai a. Chutah Denga leh Roliana an han lâm ve a. Mute lei hrûtin hniam fê fêah an han lâm a. Denga phûr chuan, “Kha, dawhthlêng hnuaia chem kha lo dah sawn teh u. Ka chalin a rawn tauh palh ang e, hei hah hui hah, hah,” a han ti ţhat ţhat a. Salu lawm tûr an rawn luh belh zêl a, an lâmin chhuat an per ţhiai ţhiai tawh mai a.
“A va lum ve, khawinge pawn thlifim ka’n dawng teh ang,” tiin Thansanga chu kawmchar leikapuiah a va ding chhuak a. A ţhiante Denga leh Roliana pawh an lo chhuak ve a, an han ţhu chawl a. Arsi pe chuai maite thlirin zan thlifim tleh heuh heuh chu an han dawng vêl a. Denga chuan, “Ţhianpa Sang, i sa kah chu a ropui hle mai. A ki pawh a ţha nangiang mai e. I thang rei thei êm êm mai si a. I ngaihawm ţhin viau a nia. Vawiin kan sa chãng tûr kan kalna kawngah pawh i chanchin kan sawi thla nak nak asin,” a han ti a. Hetih lai hian Thansanga sirah chuan Lasi nula Galaxy kha nalh êm êma incheiin a lo ding zân mai a. Tharlám sar hian a hriat a. A sam ngil siau maiah chuan pangpar a tawn vah bawk a. A hmai êng paw phak mai te, a mit hmul dum raih mai te leh a han nuih záwnga a hauingho ţo thuah mawi tawk lek lo langte chu a tle var siau mai a. Thansanga chuan a fiah takin a hmu thei a. A ţhiante erawh chuan an hmu ve thei lo va.
Thansanga chuan fiamthu ni âwm takin, “In kal tûr kha ka hmu che u alâwm! Denga hi a kal hmasa a, Rolianan a zui che a. Sakhi chal in kâp ve ve dawn tih ka hre mai a. Ka chanchin in sawi pawh kha eng vak a nih loh kha. ‘A u Ramliana ngaih dân chuan a pu Pasalţha Thangliana pawh thla khat khat ramvâkin a bo fo va, a ngaihtuahawm lo vang,’ tih vêl a nih kha. Rolian, i pain a hrilh che a ni lo’m ni?” a han ti a. An meng phâwk dûn ta khawp mai a. “Engtin nge i hriat theih? Ngawi teh ţhianpa Sang, ram lamah hian ţhian ţha takte i lo chhar bik tawh a ni ang a. Min hrilh teh,” an ti ta a.
Thansangan Galaxy a’n en chuan a lo nui var var a. A lo bu nghauh nghauh a. Thansanga chuan, “Zêp lohvah chuan – chhar ve e. Amah chu in hmu duh em ni?” a han ti a. Galaxy chu hlim takin a lo nui a. Anni Denga leh Roliana chuan, ‘Tu maw kan hmuh duh ang, ram lama i ţhian chu maw? Engtin nge kan hmuh theih ang?” an han ti a. An ţhut hona hi kawmchar kawngkhar thlang lamah a ni a. In chhûng lam aţang chuan a lang thei lo rêng rêng a, chu bâkah Lal in hi a sei bawk nên. Tûna salu lawm ho lâmna hi tap bul lam daih a ni a. An rawn hmuh pha lo va, an ţawng pawh hi an rawn hre pha hek lo.
Thansanga chuan, “Galaxy, ka ţhiante hi inhmuhtir ve ta che, inhmêl-hriat pawh a ţha alâwm,” a han ti a. Chutah Roliana leh Denga chuan Thansanga bula nula pian nalh êm êm mai, sam dum hlep hlawp ngil siau mai, hmelţha êm êm mai lo ding zân chu an hmu ve ta mai a. Hetianga nula hmel ţha leh pian nalh la hmu ngai hek lo, an âng dûn ho mai a. Chutih lai chuan Lasi nula Galaxy chu a han nui sãih a. A nuih zâwnga a han thle bak mai te chu nalh an tiin, a pangpar tawnte chu inhmeh an ti êm êm mai a. Thlifim tleh kârah chuan a rim, rim tui tak maite chu a nam chem chem bawk a. A hnár ngul sang rât mai, nalh êm êm te, a mit hmul siam luih ang maia dum rãih mai te leh a mit meng fim kâk maite chu chiang takin an hmu thei a. A biangsum khuar mawi tawk tak leh a hmui sen vàm ham mai chu zân thimah pawh a lang fiah thei tho mai si a. A bul vêlte pawh chu a hmel ţhatna chuan èn deuh phûtin an hre hial a. Denga leh Roliana chuan ţawng ngaihna pawh an hre lo.
Chutah Galaxy chuan, “A nih Thansang, ka kalsan ang che u. I duh leh i ramvah leh hunah i ţhiante hi rawn hruai ve la. Denga, Rolian, in ţhian tûr Prixy leh Poxy pawh an awm tho alâwm. An fel asin!” a han ti a. Chutah Galaxy vêk chuan, “Hlim takin zaiin lâm rawh u, mut tui mang ţha u le,” a ti a, kawtchhuah lam panin a kal phei ta a. A han kal chuan lei a rap lo tlatin Denga leh Roliana chuan an hria a. Galaxy a kal liam hnu chuan Denga leh Roliana chu an thaw huai mai a. “E khai! A va han hmel ţha teh rêng êm! Hetianga nalh hi nula an lo awm thei a ni maw? Engtin nge kan hmingte a hriat theih le? Ţhianpa Sang, i hrilh em ni?” tiin an zawt a.
Thansanga chuan, “Hrilh awzâwng lo mai. An duh chuan an hre thei vek ang chu,” a ti ringawt a. Denga leh Roliana chu an in-en ho mai a. “Tu te nge Prixy leh Poxy chu aw? Nang, ţhianpa Sang, i hmu tawh em Prixy leh Poxy chu?” an ti a. Thansanga chuan, “Hmu tawh e. Khaw chhak tawp aţanga lo kal an ni a. An la naupan hmel khawp mai. Kum 18 bawr vêl hmel an pu a. An pian chu nalh tak a ni. An hmel ţhain an ngo bawk si a,” a han ti a.
Denga leh Roliana chuan, “ E chuti chu ţhianpa Sang, i ramvâk vat ang u,” an han ti ringawt a. Thansanga chu a nui hawk hawk a. Chutih lai chuan vân chhûm zing aţang chuan Arsi mawi deuh mai a rawn êng phât phât a. Thansanga’n a han en chian chuan Galaxy a lo ni reng mai a. Nui var var chungin bân a rawn vai lap lap a. “Thansang, mut tui mang ţha aw,” a rawn ti a. Thansanga pawh chuan a ţhiante mitmei pawh veng zo lovin,
“Galaxy, thlafam chan hma ngei hian
Dâr ang intawng leh ang aw,”
a ti lawm lawm a. Denga leh Roliana nêna an pathuma hmuh lai ngei chuan Galaxy chu a ral ta riai riai a.

A tawp ta.
www.storyfb.com mizo story thar englai pawhin chhiar tur a awm reng


WEbsite link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » April 28th, 2018, 3:02 pm

Ngaia wrote:
September 11th, 2017, 7:50 pm



TAN TLANG LASI LEH PASALTHA THANGLIANA

BY Zochhumpuii Pa



BUNG 18
Thangluran lungmawi a zawng

A tûk zing a han thawh chuan zan lama a mumanga Lasi tleirawl a hmuhte kha a hre chhuak a, a chem theihnghilh Lasi tleirawlin sumhmun bang chhaka a thiah thu leh, a bula pangpar mawi tak mai têl a dah thu a hrilh te kha a hre chhuak a. A iptepui a va dap a, chem chu a awm lo ngei a, pâwn a va chhuah chuan sumhmun bang chhak lamah chuan a chem chu a lo inthiat vah a, a chem thiahnaah chuan pangpar tel a lo inzep bawk a. Thanglura chuan mak a ti hle mai a.
A mumanga a thil hriat leh a taka inzawm leh ta tlat maite chuan a ngaihtuahna a ti thui leh ta hle mai a, a chem inthiat leh pangpar tel chu a han la a, pangpar pawh chu a mumanga Lasi tleirawl sawi ang ngeiin a pa thlana pangpar awm ang chiah kha a ni zêl mai si. Heti a nih chuan Lasi tleirawlin, “Thanglur, min puih ka ngai dawn a nia aw...” a tihte pawh kha, a tak a ni ngei ang. Eng kawngin nge ka puih a ngaih ang aw? tiin a inngaihtuah nauh nauh a. In chhûngah a lût leh ta a.
Sangpuii Serhmun khuaa an kal aţanga nithum ni chuan mikhual lo kal Sangpuii chuan thu a rawn chah a, “Ka Patea pawh a ţha lam zel a, a dam vat ang, ngaihtuahawm a ni tawh lo va, kan han zin tâkah chuan, ‘Karhnih vel tal châm ula, sialte kan talh dawn nia,’ an ti a, ka Patea dam veleh chu chu tih tûr a ni a, lo hawn mai ka duh viau nãin ka nu leh paten,‘Awm ve law law mai rawh, Rampuia lah a lian tawh a, ngaihtuah a ngai lo vang, a pite bulah a awm alâwm’ an ti tlat mai a, ka rawn châm deuh pawhin min lo hre thiam a niang chu,” tiin a rawn chah a. Thanglura chuan, “Chutia a Patea a ţhat zêl chuan a tihzia a nih chu, Rampuia nu chu châm rawh se, a zin chhuak khât bawk a, a âwm alâwm,” a ti a. A nu leh a pi pawhin Sangpuii cham rih chu an remti ve tho va.
Hemi zân hian Thanglura chu hma takah a mu a. A mumangah chuan Lasi tleirawl hmelţha-i kha a lo hmu leh a, ngui ruai mai hian a lo ţhu a, Thanglura chuan, “Engati nge i va ngui ve, puih theihna che ka nei em?” a lo ti a. Khuavelchhingi chu a lo hlim deuh a, “Thanglur, min puih duh chuan ka lawm hle ang, a nih min pui ang che aw? Thanglur, ka ngai ţhin êm che asin, min puih chuan kan pahnih atân bawk a ni tho dawn a. Tin, hmana ka sawm che ang khân kan awmna ţhin Ţãn khawpuite kan fang dûn leh thei dawn a. A hlimawm dawn êm asin! Min puihna tûr chu kar hnih ral hmaa kan hlawhtlin loh chuan Thanglur, nang nen hian kumkhuain kanin hmu leh thei dawn tawh lo va. Aw le, nakzanah zan tam fe riak tûr buhfai nên Dampa ngawpui lamah lo kal ta che. Ţhian i hruai thei lo ang a, he ka thusawi hi a dik a ni tih i hriatna tûr leh a pawimawhzia i hriatna tûr chu naktuk zingah in vengah mikhual lo kal i hmu ang a, chu chuan Dampa Ngawpui ah ramsial ki ţha deuh mai a awm thu a rawn sawi ang a, chu pa iptepui chu han en la, hmun khat chu a lo pawp ang a, i lo en chian chuan meisi tih pawp a ni tih i hria ang. Aw le, kan intawn leh hma chu dam takin aw,” a ti a, a ral leh ta daih mai a.
Thanglura a han harh chuan ni a lo chhuak tawh a. A han tho va pawn a va chhuah chuan veng hmawr lam aţanga mikhual lo kal a va hmu ta a. Chu mikhualpa chu a lo thlen phei chuan, “E, nang i ni maw Thanglur, i dam ţhin em? Tunlai chu Dampa Ngawpui tlangsang lai aţanga mual inkhawhthla ruam vûlah ramsial lian mangkhên, ki ţha deuh a awm an ti asin. Nangni ang pasalţha tân chuan a va beih chi hle ang,” a ti a. A thusawi lai chuan Thanglura chuan a iptepui ah chu a va en a, hmunkhatah chuan mei kan pawh pakhat a va hmu a, a mumanga a thil hmuhte leh Lasi tleirawl in, ‘Ka thu hrilh che hi a tak a ni’ a tihte kha a hre chhuak a. Thanglura chuan mikhualpa hnenah chuan, “Va kal tûr a nih chu, chutiang thute min hrilh chu a lawmawm hle mai, chawte rawn ei ve nghâl ta che,” tiin a sawm zui ve ta nghâl a.
Tukţhuan an ei lai chuan mikhualpa chu a ţawng duh hle mai a, a titî phûl hlut reng a. Thanglura erawh chuan mikhualpa thusawi pawh chu a hre mang lo va, a mumanga Lasi tleirawlin, ‘Thanglur, min pui ang che aw...kan pahnih atân a ni a, kan inhmuin kan inkawm leh thei dawn a, Dampa ngawpuiah lo kal ang che aw...’ a tihte kha a hre reng a. Mikhual pa lo kal a hmuh tûr a sawi lawk pawh a dik vek mai si a. Dampa ngawpui lam chu pan phawt mai ila a nih chu a ti rilru a. Tin, Lasi tleirawlin min puih nân kar hnih chiah hun i nei a tihte chu a hre chhuak a. Sangpuii pawh a Patea-te vengah karhnih a cham dawn bawk nen. A fapa Rampuia pawh a lo tlei tawhin a pite bulah a lo awm thei tho bawk a. Tichuan a nute hnenah chuan, “Ka nu, ka pi hei kan mikhualpa hian Dampa ngawpuiah ramsial ki \ha deuh mai awm thute a rawn sawi a. Vawiin chu kal ka lo rilrûk asin,” tih thu a hrilh ta a. Anni pawhin an lo remti a, “E, va kal rawh, Rampuia pawh a ngaihtuahawm lo vang. Tin, a nute pawh, an Patea’n ţhat lam a pan bawk nên, an lo haw vat ang chu, va kal rawh,” an ti a.
Tichuan chaw ei kham chuan Thanglura chu a insiam ta a. Zan tam tawk tla tur buhfai nen, zanriak puanthuah nen a silai nên a thawk chhuak ta a. A thangchhuah diar ţial a khim vàng bawk a, Dampa ngawdur lama kal tûr chuan a chhuak ta a. Hemi ni hian Dampa ngaw chu Thanglura hian a thleng hman lo va, ram palailêngah riah bûk chhe tê a zar a, hma takah a mu a. A mut pah chuan Khuavelchhingin pui tûra a sawm dânte leh eng ang kawnga puih tûr nge ni ang tihte a ngaihtuah neuh neuh va.
A mumangah chuan Dampa ngawdurpui maiah chuan a silai nên a lo vâk thauh thauh mai a, chutah ngawpui chhah laia thing lian pui tlu kar ruah bul chuan a mit a la ta tlat mai a, chu lam chu a pan phei ta a. Thing tlu kar bul a va thlen chuan Khuavelchhingi kha a lo awm reng mai a. Hlim êm êm maiin, “Thanglur, mi pui tûra i lo kal avangin kan lâwm êm mai, kan pahnih atân tak pawh a ţha a, taka kan inkawm leh theih nân te leh ka u Chawngtinleri hmar tawp lam ram aţanga a lo kir leh theih nân te a ni dâwn a. Mahse theihpatâwp i chhuah a ngai dawn a nia aw! I hlawhtlin chuan ramsial ki ţha deuh mai ka kahtir dâwn che nia! Tin, Ţãnkhawpui Lasiho pûk pawh kan tlawh dûn dawn nia,” a ti a.
Thanglura chuan chu Lasi tleirawl hmel ţha deuh mai han hlim hmêl chu hmuhnawm thama nalh niin a hria a. A pian nalh tak mai, inkhaithli zaih mai te, a mitmeng mawi tak mai te leh a nuih zâwnga a ha var ţhah mai te chu en liam mai chi zawng a ni lo rêng a ni. Pasalţha rilru pawh a tibuai ve thei ram ram fo rêng a ni. Thanglura chuan, “Eng kawngin nge puih i ţûl tak mai le? Min han hrilh teh! Ka tih theih zâwng a nih chuan phûr takin ka ti ang e,” a ti a.
Khuavelchhingi chuan, “Thanglur, mi huaisen, pasal\ha tân lo chuan han tih chi a ni lo va. Nang anga hlauh nei lo leh mi huaisen, pasal\ha tân lo chuan tih rual a ni lo. Aw le, i tih tûr chu ka han hrilh ang che. Naktukah Dampa ngaw i lo thlen hunah hnim inthliak i hmuh a piang lam rawn zui zêl la, sang takah, lu zawn vêl zêlah hnim chu a inthliak ang.
“Tichuan Dampa ngawdur chhah lai, tlang sang i kal liam ang a, mual inkhawhthla zui maiah i rawn her liam ang a. Hmun rai deuh i rawn thleng ang a, a bulah pawh luite a lo luang ri kar kar mai ang. Tah chuan bûk i khuar dawn nia. Thanglur, a pawi ka ti ngawt mai, tûn hma angin a takin ka rawn be thei tawh lo che a. Mumang lamah hlir kan inhmuin kan inkawm thei chauh ta mai si a. He lai i bûk khuarna tûr i lo thlen a, lo hmuh che pawh ka châk tehlul nên, mahse a theih rih si lo va; amaherawh chu min pui tûra ka tih che ‘chu chu’ i hlawhtlin chuan a takin kan la inhmu leh thei dawn a, chumi hun chu a nghahhlelhawm hle mai,” a ti a, a nui var var a.
Thanglura chuan, “I thil min tihtir tum chu hlawhtlin ngei kan tum ang chu,” a han ti ve a. Lasi tleirawl hmelţha-i chuan, “Thanglur, i hlawhtlin ka beisei e, i hlawhtlin chuan a hlimawm dawn êm asin, a nih ka kal leh rih tâ’ng e, chu Dampa ngaw i lo thlen chuan i lo kalna tûra i chhinchhiah tûr chu thing \ang inthliak ka sawi kha hre reng la, chu chu rawn chhuiin rawn zui zêl la, i riah bûk siamna tûr hmun ka tihah chuan i lo thleng mai ang. I bûk sakna tûr hmunah chuan lungphêk chungah pangpar mawi tak, i duh ţhin êm êm kha a lo awm mai ang. Chumi hmunah chuan riah bûk tûr chu sa ang che,” a ti a. Lasi tleirawltê chu a ral leh ta mai a. Thanglura a han harh chuan kawl a lo êng tawh a, a intel a, Dampa ngawdur lam pan tûr chuan a kal leh ta a.
Dampa ngaw a han thlen chuan ni a sang hle tawh a. Char thing âwn dû mai a han hmu a, a va hnaih chuan a bula thingţang chu lu zawn vêlah a lo in thliak thar sar mai a. A hnah pawh a la uai lovin a la thar sar a. Chumi piah lawka thing inthliak pawh chu a va hmu leh a, a va pan hnaih chuan a piah lawka inthliak chu a hmu zel a, awlsam takin a chhui par par a, Dampa ngawpui tlang sang lai a lo thleng ta a.
A han hawi vêl a, chu lai tlang sang lai aţanga mual inkhawhthla zui mai lama thingţang inthliak, a hnah pawh la uai lo chu a zuk hmu leh ta a. Chu lam chu a pan leh ta a. Chu lai hmun a zuk thlen chuan a thlang lama thing inthliak chu a zuk hmu leh ta a.
Tichuan awlsam takin a chhui thla leh ta zêl a, hmun zawl rai dup a zuk thleng ta a. Luite lo luang hak hak pawh a zuk hmu a. A han hawikual vêl a, a piahlawk hmunzawl nuam lai taka lungphek chunga pangpar lo awm chu a va hmu ta a. A va pan hnai a, chu pangpar chu hmana pûka Lasi tleirawl hmelţha kha a hre chhuak a. A bulah chuan awm ve ngeiin a hre hial a.
Bûk a han sak vêl lai pawh chuan a kalna apiangah a bul lâwkah awm ve tlatin a hria a. Thâwm ri deuh rak rak te, a chang chuan Lasi tleirawl nui ri ni âwm takte hriain a inhria a, mahse a hmêl a hmu thei si lo.
Tlai lamah chuan bûk pawh a peih fel ta a. Phulraw ûmin tui a han chawi nghâl a, zanriah tûr chawte a han chhum a, chutia chaw a villai chuan, “Thanglur, i hnunglam han en teh,” tih aw a hre tlat mai a, a han hawi chu vahrit pachal ding reng a va hmu ta a. Thanglura chuan chawhmeh atân a ţhat dawn saw ti chungin a silai chu a han la a, tin pawh a tin mang lo tih tûrah chuan a silai chu a puak ţhuai mai a. Vahrit pachal chu a let tawp mai a. Thanglura chuan a va chhar a, vahrit tlûkna bul a va thlen chuan thil rimtui tak mai rim a lo nam vang vang a, a hnar a han lèn chiang a, Lasi tleirawl hmelţhai-i rim ngei mai chu a lo nam châk mai a, mahse a hmêl hmuh tûr a awm si lo.
Thanglura chuan lunglenthlâk a ti rilru hle mai a. A vahrit kah thlûk a han chhar a, a han din chuan a han hawi kual vêl a, mahse Lasi tleirawl hmelţha-i chu hmuh tur a awm si lo, a rim erawh a nam tui châk mai si a. Lunglêng tak chung chuan a riah bûk lam chu a pan phei leh ta a. Hemi zân hian vahrit sa hmehin zanriah chu puar takin a ei a. A hah bawk a, hma takah a mu ta a.
A mumangah chuan Dampa ngawdur chhahzia leh sa tamzia chu mak tiin a lo thlir vawng vawng a. Chutah Lasi tleirawl Khuavelchhingi chu a hmaah a lo ding leh ta mai a.
A hmêl chu a thutak hle mai a. “Thanglur, i mi ţanpuina nghâkin ka awm reng a nia! Theihtâwp chhuah in huaisen takin min pui dawn nia, i tih tur chu ka han hrilh tawh ang che, ngun takin lo ngaithla ang che, i hlawhchham vaih chuan khawvelah hian kan intawng leh dawn lo a ni. Mahse i hlawhtlin erawh chuan mumang lam maiah ni lovin, a takin kan inkawm leh thei dâwn a, ka u pawh i zârah hmartâwp aţangin a lo haw ve leh thei tawh ang a. A lâwm dawn êm asin. |ãnkhawpui pawh kan fang dûn leh thei ang a, a nuam viau ang.
“Aw le, tûn hma lam chanchin aţangin ka han hrilh ţan tawh ang che. Tûna i riah bûk sakna hmun hi ţhangkhat lian lai ral taah khân Pasalţha Rozinga leh a hote, sairamchhuaka an kal ţuma an riah bûk sualna hmun chiah a ni a. Chuta kal tlangvalho zinga tel ve pakhat chu i pa, Pasalţha Thangliana an tih tâk hi a ni a, chutih lai chuan i pa chu ramvah a ţan ve chauh a ni a. Aw le, chumi ţum chuan i piah lamah sawn ‘SIH’ lian deuh mai a awm a, chu sih chu i pa ţhian pakhatin a sava vawm pahin a vawm palh a, chu chu Sihhuai chuan duh lovin i pate ţhian thlâ chu an man ta a. He Sihhuai hi Dampa ngawdur huai lalpa thuhnuaia awm, a hote zinga mi a ni a, chu Sih chhak lawka pûk chu an tawm bûk a ni bawk a. Pasalţha Rozingate tlangvalho (i pateho) chu, chu Sihhuai laka an ţhianpa thla ko tûra an va kal chuan an inbei nasa ta mai a. Hemi ţum hian ka u chu va kal lo phei se Pasalţha Rozinga leh a hote chu dam an awm lo vang. Nang pawh i awm dawn lo tihna a nih chu,” a han ti fiamthu zui a, a han nui sak a. Chu a thusawi chu Thanglura chuan a lo ngaithla ngun hle mai a. Tichuan Lasi tleirawl chuan a han sawi zawm zêl a. “Ka u chuan lungmawi thiltihtheihna a lo keng hlauhva, i pa Thangliana chu lungmawi chu a pe a, a hman dân tûrte rang taka hrilhin i pa chuan a ţhiante chu a han chhan ta a. Tichuan Dampa ngawdur huaite chu hnehin an ţhianpa pawh chu an chhan chhuak thei ta a ni.
“An inbei chu a nasa teh asin, ka han entir ang che! Thanglur, i pa hmel pawh i la hmu lo va, i hmu duh lawm ni?” a han ti a, a kut chu a han vai tle zawk mai a, Pûk lianpui a lo lang thut mai a. Chutah le! Mizo tlangval dik tak maite, chemtum leh silai kenga pûk chhûnga an vir thuak thuak chu Thanglura chuan a va hmu ta mai a. Pa lian tak mai, diar ţial khim, chem vai thuak thuak chuan Thanglura mit a la ta hle mai a, a nâk chu sakei hamna tih hriat tak hian a rin ruak mai a. A ser nasa hle mai a, tu nge ni ang le ti a Thanglura a ngaihtuahlai chuan Khuavelchhingi chuan, “Thanglur, saw saw Pasalţha Rozinga a nih saw, a pa lianin a huaisen teh asin,” a han ti a. Chutah a hnung lam aţanga tlangval lian zet zawt, hmel ţha tak mai, chak hmel tak mai leh huaisen hmel êm êm lo tlan phei thuak thuak chu Thanglura chuan a han hmu leh ta a, a hmel chu a pà-in a huaisen hmèl êm lah taka, a âwm lian tak mai leh a darpharh hlai darh mai te, a mit meng fim kâk maite chuan a huaisenzia a hril chiang hlein a hria a, a hma lama thil dum rèn rùn a vai pawp pawp maite chu Thanglura chuan a en reng mai a.
Chu tlangval han che vêl leh a han zuanzànzia te, a chakzia te a en reng lai chuan Lasi tleirawl chuan, “Thanglur, saw saw i pa a nih saw!” a han ti ta mai a. Thanglura chu phu zawkin a inhria a. Chu tlangval lian tak mai leh huaisen tak mai chu a pa a lo niang maw? ‘Ka pa chu ka va lo tluk âwm lo ve! Hmelţhatah te, huaisenah te, ţuanranah te ka tluk lo hle dawn a lo ni maw? Lasi nula Chawngtinleri te leh ka nu te, ka pu te khân i pa nên in inang,’ an tihte a han ngaihtuah chhuak a, ‘saw saw ka pa a nih a, amah anga lian leh hmelţha huaisen hmel chu ni ta tak tak ila, a va duhawm âwm êm!’ a ti rilru hial a. A thil ngaihtuah hria ni âwm takin Khuavelchhingi chuan, “Thanglur, i pa nên sawn len lamah te, hmelţhatah te in danglam lo teh asin!
“I biang ding lam ser chiah kha i danglamna a ni mai âwm e. Ţuan ţhatah pawh i duai bik miah lo,” a han ti a. Thanglura chuan ngun taka a thlir lai chuan a pa khuarkhuruma a tla lai chu a hmu ta mai a. Mahse rei lo têah a pa chu Lasi nula hmelţha deuhin lungmawi a pe lai chu a va hmu a; chu lungmawi kenga a pain Dampa ngawdur huai a chema a vai kiang duak duak lai a hmu leh ta a. Rei lo têah chuan a reh ta duak a. Chutah Lasi tleirawl chuan, “Thanglur, khatiang kha tûn hmaa i pa leh Dampa huaiho inbeih dân chu a ni a, i pa lungmawi ken êng phât kha i hmu a, kha kha kan thiltihtheihna a ni a, i pa khân an inbeihna pûkah khân a theihnghilh a, chu chu i lâk a ngai dawn a ni. I pa khawih hnuah tu man an la khawih lo va, i pa theihnghilh chu nang a fapa hian i lâk a ngai dawn ta a ni. Pûk awmna chu awlsam takin i hmu thei ang, en teh,” a han ti a; a kal dân tûr chu a han hmuhtir ruak mai a. Thanglura chuan a kal fo tawh ţhinna angin a hre nghal ta mai a ni.
Chutah Khuavelchhingi chuan, “Thanglur, inring dawn tawh ta che, khua pawh a var dawn ta a, huaisen takin bei ang che aw, lungmawi chu i kuta i lâk theih veleh pûk pawn lamah theh chhuak vat ang che,” a ti a. Lasi tleirawl tê chu a ral ta daih mai a. Thanglura mu a han harh chuan khua a lo var ţan tawh a. Thanglura chu a tho vat a, tukţhuan tûr a han buatsaih vat vat a, tichuan hma takin tukţhuan a ei ta a.
A mumang lam a, a hriat tawh angin pûk lam chu a pan ta a, a panna kawng awm dan pawh tleirawl hmelţha-i kawhhmuh ang chiah vek kha a lo ni a. Pûk thlen hmaa sih pawh chu a lo lian viau tak a, a bul vêla hnahthial hmun rai dup maite chu a lo hmuh fo leh hriat fo tawh ang mai niin a hria a, a chhak lam a han hawi chho va pûk pawh chu a han hmu ta mai a. A pan chho ta a, mahse thûk lo tê bâk chu lung chimin a lo hnawh rup mai a, chu pûka lût tûr chuan chung lung zawng zawng chu hai chhuah vek a ngai si a, lung tla rup mai lah chu a then phei chu a lianin a hrawl hle hlawm a. Sai padâwp tân pawh nawr sawn zawh rual an nih hmèl si loh. Thanglura chuan engtin tak ka ti ang maw tia a inngaihtuah lai chuan a bulah chuan mi lo kal thaw viai ang hi a hria a, mahse tu mah a hmu si lo. Mahse rim tui deuh mai a hre ta a, a thian Lasi tleirawl rim ngei mai kha a ni tlat mai! A hma lamah kalin a hria a.
Chutia a hma lam pûk a thlir lai chuan lung chim chu a fai ta duak mai a. Pûk chu a kaw thim ruih mai a, pûk tawp lama êng phât mai chu a va hmu ta a. Chutah Khuavelchhingi aw ngei mai chuan, “Thanglur, lungmawi saw va la vat rawh,” a rawn ti tuar hian a hria a. Eng mah ngaihtuah hman lovin Thanglura chu pûk chhûngah chuan a tlân lût zawk mai a. Chutia pûka a tlân lût chuan lungmawi lo êng phât mai chu a pan vat a, lâk a han tum chiah chu eng nge tih pawh hriat loh hian a rawn su sawk mai a. Thanglura pa lian leh chak tak mai pawh chu a per nawlh mai a, lung bang bulah chuan a let tawp mai a, a han tho mai dawn a, a khêl ruh chu a na hle mai a. Pûkte chu a vir muai muai hian a hre ta tlat mai a. Chutah pûk chhûng chu a ri ta mum mum mai a. A hma lamah te, a sirahte chuan thil dum lian pui pui mai vei zut zut hian a hmu ta a. Han thawh mai a tum a, mahse thawh mai a harsat hle a.
Chutih lai chuan a hma lam aţang chuan thil dum lian pui mai hi a rawn thlawk phei fua mai a, a lo thle hman hlauh va, a lu zawn lung bang chu a keh chhuai mai a. Thanglura chuan, “E heu, lung lian takin min deng a ni maw, khawnge keimah Thanglura, Pasalţha Thangliana fapa ka ni ngai lo’m ni!” a ti a. A silai chuan thil dum vâk zut zut a hmuh chu a han kâp dum mai a, chutah a taksa na êm êm leh rit churh maite chu zãng hawkin a hria a, thawh a han tum leh a, a tho thei ta a. Lungmawi bawk chu lâk tumin a han zuan phei leh a, chutak chu eng emaw hian a rawn hêm let leh tawp mai a, a han en chian chuan rûl lianzet mai a lo ni a.
Rul chuan a rawn zem ta chual chual mai a. Thanglura chuan a iptepuia chem chu a phawrh thei hrâm a, a ke lêr aţanga a kawng a rawn zem cho mup tawh mai a. Chutah le a chempui hriam tak mai chuan a zai ta nawk nawk mai a. Rûl chuan a zemna pawh chu a phelh ta zawt zawt mai a. Chutah pangang lianpui maiah a chang leh ta a, a thle buk buk mai a, Thanglura chu a rawn pan leh ta tur tur mai a. Chu tak chu Thanglura chuan a lo sât nghek mai a, chu veleh chuan palian tak tih hriat reng reng hi pûk chhûng khat rum rumin a ţê ta vawng vawng mai a. Thanglura chuan a silai tla chu a chhar vat a, a zên leh a mu rang takin a han thun leh a, chutih lai mêk chuan pûk tawp lam aţang chuan pa lian pui pui ni âwm hian an rawn pan tuau tuau mai a, pûk pawn lam aţangin an rawn pan bawk a, pûk pawn lam aţanga rawn pantuho chu an lang thei ruau ruau a, mihring ni âwm tak, mahse lu bung vek mai an lo ni a. Mahse an lu chu an lo khai fur mai a, chutah pûk chhûng lam a han hawi leh a, a rawn pantu zinga pakhat chu a hmu thei ve ta a. Pa lian êm êm mai, ţhen nûng mai, mitmu lian pui mai a lo ni a, a hmêl lan dânah chuan an hotupa ni ngeiin Thanglura chuan a ring a, a silai chuan kah tumin a han tin chu Thanglura chu lei a bet chawt khawpin thil lianpui hian a rawn delh thut ta mai a. Thawk pawh harsa khawpin a rit a, chutah an rawn zim ta huai huai mai a.
Thanglura chuan ţan a han lak viau pawhin chu thil ţhuttu chu a paih kiang thei lo va, chutah a silai tla chu a va ban a, a va dap fuh hlauh mai a, a khing khata silai chu kengin a ţhuttu chu a silai a chuktuahin a han kap thawr mai a, a ţhuttu leh a rawn zimtuho chu an kiang duakin a hria a, chutah pûk chu a chim ta ruih ruih mai a. Chutah Lasi tleirawl Khuavelchhingi aw chuan, “Thanglur, lungmawi kha rawn theh chhuak vat rawh,” a han ti a. Thanglura chuan rang takin lungmawi chu a la a, pûk pawn lamah a theh chhuak a, chutih lai a lung chim lo tla tûr inkau tuarte pawh chu rawn tla zui lovin a chawl ta ţhup mai a. Thanglura chu a bawkvâk chhuak thei hrâm a, a rilruin ‘tlêma tlêmah pûka lung chimin min delh hlum lo chauh alâwm le,’ a ti a.
Pûk pawn a va thlen chuan Lasi tleirawl hmel ţha êm êm mai Khuavelchhingi chu hlim êm êmin a lo ding a, a lo nui var var mai a. Chutah Thanglura chu a rawn pan a, a rawn kuah chawt mai a, “Thanglur, ka va han lâwm tak êm! Tûnah chuan mumang mai ni lovin a takin kan inhmu leh thei dawn ta. Aw...a va lâwmawm tak êm, mi huaisen leh tum ruh ni lo phei la chu, he lungmawi hi i la thei hauh lo vang, mahse tûnah zawng a fel ta vek e,” a han ti a. Thanglura chuan chu Lasi tleirawltê mai, amah kuah rengtu chu a han en a, a sam dum hlap mai leh ngil ţha tak maite leh a mit meng fiah kâk mai te, a mit hmul dum raih maite chu a hmel ţhatna tizualtu ni hluah hluahin a hria a.
Chutah Khuavelchhingi chuan Thanglura a pawm chu a thlah a, hlim taka nui chungin an piah lam chu a han en a, ring takin, “Ka u,” a han ti a, Lasi Lalnu Chawngtinleri a lo chhuak ta a. A u a lo thlen chuan a u hnenah chuan, “Ka u, kha le lungmawi chu,” a han ti a. Chutah le Chawngtinleri chuan hlim êm êma lungmawi hûm chungin, “Aw...Bawihi, ka va lâwm tak êm! Tûnah chuan Mizoram lamah ka awm ve thei leh dawn ta a nih hi. Hmar tâwp lam ram chu ka ning tawh êm a, ka va han lâwm tak êm!” a ti mawlh mawlh mai a.
Chutah Thanglura lam chu a rawn hawi a, a nau chu a han en leh a, “Awle, Bawihi, tun aţang chuan Thanglura nên chuan ţhian ţha tak niin, in inkawm leh thei tawh ang. Khawnge kei pawh tih tûr ka nei,” tiin a han zuang a, van boruakah a lêng ta delh delh mai a, kâr lovah a ral ta a. Hemi ni tlai lam aţang hian Sihzawl khuaa Pasalţha Thangliana thlana pangpar a vul nasa zual khuaa mite chuan an hria a; chu chu tûn thlengin titî-ah an la sawi zu nia!

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)