VANGPUI KEITE, LALCHUNGLURA By Sangpuia khawlhring 1-31

[Ngaia]

VANGPUI KEITE LALCHUNGLURA. ZIAKTU K VANSANGPUIA ( sangpuia khawlhring) EPISOD 18

Episod 17 Recap. Chutih lai chuan Rengkai khawnbawl leh Zehtlang khawnbawl te pawh lo thleng in an rawn in rawlh thuai a, Engtak thleng zel ang maw.

Rengkai lam hian an lal fapa vang in an khawnbawl hi zahlo viau mahse, Zehtlang khawnbawl te an tel ve avang chuan an ngawi zui ve mai a, An hmel landan ah erawh an lung a damlo in a remchan hun a chet mai duh hmel pu leh la phun nang nang chuan an tin ve ta hram a. Chulai a kalkhawm ho chu kal darh in nula in a lenluh leh pawh a rem tawh chiahloh avang chuan a then in zawlbuk lam an pan a, Thenkhat in mahni in lam pan bawk in a kawp a kal chuan Rengkai lal fapa te chet dan chu an lawm vak loh thu an sawi zui sap sap hlawm a.

An buaina kha engdang a nilo a, Rengkai lal fapa te leh Sihruam tlangval thenkhat lenna in ang in an inkar a in ngeihloh na awmsa kha an lal fapa tawngkam chaltlai tak atang a rawn in tan chhuak a ni a, Chutah a thinrim zawk zawk ah tang in khatiang boruak kha an thleng ta mai a ni awm e. A pasaltha chhuan tawlawl hi tuman an tukzal theih a ringlo a, Chumi zan an kal ta pawh chuan fuihpawrh sauh sauh in a tuk lam a ana thei ang ber a che tur in ala fah zui tak ang mawlh mawlh a.

Lal chuan boruak awmzia hre chiang tur in tlangau alo tir a, Mahse Tawnvela te nen chuan in zui chho in anni thianho pawh in thil thlen dan chu sawi zung zung in an lalpa pawh a rum nghut nghut mai. Sangtawna Vangpui lal chu rawn tawng chhuak in, Kan Rengkai lal fapa chuan a pasaltha chu a va han chhuang deuh ve mawle. Ngawi tak rawh ka u. I fapa hma ah hian dawl zawr in a ala zawr ang ti nia ti in a fapa a rintawk zia chu a rawn chham chhuak zeuh a, Zehtlang lalpa pawh rawn tawngchhuak ve in, Ka pasaltha Tawnvela pawh a khing pha lo ange. Hei, Sihruam lalpa hian buanchak a rawn hruai a, Kan vawrh tir hrep anga nimai lawm ti a nui huah huah in zu chu a semkual tir leh der tawh a, Hetiang mize pu anih vang hian a lawm an ngainat thin reng ni.

Zan a ral a, Khuarel ang a zingkhua lo var in kawl a lo eng tan ta iar mai a, Eirel hun a pel deuh ta maw tih ah chuan tlangau chu rawn au lauh lauh in a thu rawn puan chuan naupang mai nilo in puitling thleng chuan a ti helhawlh zo vek tih chu an hawiher atang hairual a ni lo e. Khaih khaih khaih, Lo ngaithla vek rawh u khai. Zehtlang lalpa khuangchawi lawmna tur a tan a intihsiakna chu vawin atang a tan tur a ni a, Tukthuan eikham ah lal mual ah kalkhawm vek tur a ni e. Chumi hunah chuan vawin ni a in fiamna kan neih tur te sawi a ni anga, Khualkhua atang a lokal te pawh kim tak a rawn thawkchhuak a khaw ai awh theuh tur a beisei in ni ti in thler tinah chuan a rawn puang lauh lauh a, Naupang chanpual pawh a bo dawnlo tih hria in chawei puar hmanlo chu sawiloh, Chawei hmanlo a tlan chhuak an tam kher mai.

Tukthuan eikham tirh atang chuan lalmual an pankhawm sung sung tawh a, Khawhran a tang a lokal ho pawh mahni khaw bil deuh a dingkhawm tel tel in Sihruam leh Rengkai ho pawh an in melh no lemlo khawp mai. Mipui an pungkhawm tawh ang tih hun vel ah chuan lal pathum te leh lal fapa te chu rawn chhuak ho in an rawn dingtlar tham a, khaw hrang hrang Khawnbawl te chuan an hnunglam atang a lo tawiawm in anlo dinhual tiau hlawm bawk a.

Zehtlang lalpa chu zahawm deuh leh puithu zet a rawn dingchhuak in, Awle. Vawin ni hian khaw hrang pali atang in ka khuangchawi min lawmpui tur leh min hriatpui tur a rawn tel te ka chibai vek che u a, He hun ah hian a buai zawng leh in hmelmak zawng a che lo in a inrem leh infiamna rilru pu chung te, Khaw aiawh rilru thianghlim pu chung a in awm vek ka duh in ka ngen nghal a che u. Khaw hrang aiawh lal te leh khawnbawl ten kan in fiamna tur leh kan in fiam dan tur kan rel ho a, Kan tlangau hi ka lalram aiawh a thu puangtu anih ang in han puang rawh se a tih zawh chuan a ding to lurh mai a, Tlangau pa rawn chhuak chu a zuih ve rat hian a hriat theih hial a ni.

Aw rawl ring leh fiah tha zet hian a rawn au zui nghal thuai a, Zehtlang lal ropui khuangchawi lawmna hi ni thum kan nei anga, Vawin atang hian infiamna nei tan in a nili ni ah erawh ruai ropui nen kan tin tawh ang. Vawin hian naupang lam atang a infiamna bul tan in a dawt ah khawtin huap in elna kan nei chhunzawm zel anga, Lawmman hi lal tin te remtih tlan ang in sial leh dar ani ang. Vawin a kan infiamna tur te chu, Naupang lam ah in suknawr leh in buan te a ni anga, Hmeichhe naupang in kawibah leh in hruizuan a ni ang. Puitling lam in kan chhunzawm anga, Vawin hian fei khawh leh silai kah in kan in el anga, Mau lawn leh khawtin aiawh in hruipawh ani ang. khaw aiawh chakber hian sial leh dar an dawn zel dawn avang in theihtawp chhuah theuh tur in in lal te theuh in an beisei a che u rawn ti dap dap in a thusawi a tih tawp rual chuan an hawhaw zui dar dar a, Ti chuan lal mual chu mawi zui nghal in naupang lam te chuan bul an rawn tan zui ta nghal a.

Naupang infiam chu lo au phur in an ri zui laih laih a, Chhun chawfak hun hma deuh a zo fel in a chak lam chu an thawm a tha hlawm thin kher mai. Tunah chuan puitling lam chan a ni ve tawh thung a, Mipui te pawh rawn punkhawm belh in an khaw aiawh tur theuh te tan ru tham chuan mahni khaw bil te te a ding in an bial taih hlawm a. A hmasa in lal mual ah chuan raw kung lian leh rintlak zet mai an phun ngir zur mai a, a lawnsang thei ber tur hriatthiam a har na chhan chu chu mau chu Savawm hriak a chulh vek a ni. Khawli ai awh tur te chu rawn dingchhuak tham tham in an hmazawn ah chuan mau a in phun far hlawm a, Tel ngam an awm tamloh avang leh khaw aiawh a telloh an duh bikloh avang in an kim hram a ni ber e.

Tlangau pa in khaile a tih rual chuan an han dung bawh chho zat zat hlawm a, A then chu pit thla leh in an talbuai lutuk hlawm chu mipui in lo lawm ve thung in an ri dur dur hlawm a, A bik in Zehtlang aiawh a tel an fiamthu thiam mawlh chu ani. Bawp kual teng tawng a lawn in a kapzut chho vei zai zai thin a, Mahse a kut nal leh tha hah in a tlinloh chian ah chuan tawlh thlak pangai a tawlh ta mailo chuan in siam chhe pah leh maksak zet a tawlhthla kual vel in lei a thlen rual chuan a zuang leh arh arh bawk thin nen. Mipui a ti hlim in a in elpui te tha a ti thum zo a ni ta ve ang. Tumah in chutiang mautlawn nal chu lawn chhuak zo lo in an beidawn san ta vek hlawm a ni.

Lawmman dawng tur an awm tak loh ah chuan a dawt leh tur an tan zui nghal thuai a, In hruipawh ah chuan panga theuh ni in ramhrui lian tha tel tawl chu hmang in an in fuih sauh sauh a, in tumtur te chu hmawlhte hmang a han pawt in boruak liam zawng in Rengkai leh Sihruam an in tum dawn ta tlat mai. Zehtlang leh vangpui an in tum ve thung anga, A chak zawk zawk in pawt leh in a mihring an in thlak pawh phalsak an ni a, Zehtlang leh Vangpui te chuan hma rawn tan in lal unau khua ani bawk nen an tang dun hlawm kher mai a, Mahse Rivunga leh chhawna ho meuh zawng Zehtlang lam in fuihna in a tlin ta biklo ani ange, Thawh thum ah thawh hnih chak in Vangpui lam chan a tha ta hram a ni.

Tunah chuan Sihruam leh Rengkai in pawh hun a thleng ve ta a, Tunhma atang a an khaw boruak lo hre sa leh zan liam ta mai a an boruak nen chuan an hmu chak theuh hlawm a, Anni khawhnih pawh in fuih nasa in chaklo zawk nih an tumlo dun kher mai. Sihruam lamah chuan an buanchak in hma rawn hruai in an rawn chhuak diah diah a, Rengkai lam ah an pasaltha Thanruma ho a lo chhuak in an rawn mengrum nghal ram mai bawk nen. Ramhrui fei tak leh liantha zet chuan an in pawhna hi dawl pawh nise, Mihring kam zawk hian an dawl zo meuh a nge maw.

Khaw hnih te in ring penpawn a an din thap hnu chuan tlangau a rawn chhuak a, Hrui lai ah vuan in a han thlek tawn ve ve a, Tunah le ti in a mah persawn nghal nalh in mipui lam anlo ri zui nghal hluah hluah bawk a. Khaw pahnih te chu tan namen lo a tang in an rak teng tung mai a, Mahse Sihruam buanchak leh palian in hma a hruai vang nge ni Sihruam lam chuan hnuk tawlh hret hret in an inkar rin chu an hnuk thleng dawn ta ruai mai a, Rengkai lal fapa chu tawngkam chhe tinreng a lo au in an khaw ho chu a vin tuar tuar a, Khatiang kan khaw hnuichhiah leh min ngamlo tu lak ah khan in tlawm tur anilo. Thanrum i tha chhmuah ta che rawn ti in a au teng tung tawh mai a, Mahse a au hla chuan tha a pek belh lemlo ani mahna. Sihrum ho chuan an rin chin pel rawk khawp chuan an hnuk kal ta hun hun tho a.

Thawh hnihna an tan leh hma chuan an han chawl hlek a, Sihruam lam chu zawi leh damdap a in fuih in an in fah malh malh a, Rengkai lam erawh chu anhla tinreng nen an lal fapa chuan an khum in a khaw mi te chuan khua an hawi ngam meuhlo chu a ni. Lal sangtawna chuan chu lal fapa chu han khak hial a duh a, Mahse Zehtlang lalpa a au zawk chuan an khua te a fuih in a hau ani ve mai a, Enliam mai mai teh khai a tih avang chuan a in sum hram hram a ni e.

Thawh hnihna an tan leh dawn chuan mipui pawh an reh thiap a, An hrui vawn tur theuh an vawn kim a an in rin hnu chuan tlangau a au that a, Theihtawp chhuah a in pawt zui in Rengkai lal fapa an hla chuan a mi te tha a lo pe tehreng nge ni, Sihruam ho chu an tawlh hawn hawn mai a, Mipui mak ti leh Rengkai lal fapa au thawm nen a rik hian an ri zui ta luih luih a. Thawh hnihna ah chuan Sihruam ho chu tang vr hman leklo a siam in Rengkai lam an chunhnung ve ta larh thung a, An lal fapa pawh a hawi pir in a tawng a lian tha leh twh hle a ni.

Hun reilo te chawl in an rawn chhuak leh tham tham a, Thanruma rawn chhuak tur chu an lal fapa chuan eng emaw hrilh in a han bekbawr sar sar a, Thanruma pawh bu nghauh nghauh in a hlim hmel vur vur kher mai. Mahni tamhmun siamrem dun in tlangau a au rual chuan an han au rual that that a, Sihruam lam chuan pawt tawlh hret hret in an rin chin an thleng teuh ta hle tih ah chuan Rengkai lal fapa chu a rawn au lung lung a, Ka thusawi kha hrereng ula, In lawmman tur nen khan a rawn tih rual chuan Thanruma leh a ho te pawh in thathar chhuah a bei let in Sihruam lam chu an tawl ve ta zawt zawt mai le. Mipui lam chuan Sihruam buanchak avang khan Sihruam lam an chak an ring vek kha ani a, Mahse an beisei loh ang tak in Rengkai lam chuan rin chel pel rawk a hnuk in an chakna hlimthawm leh an lal fapa tawnglian thawm chu rapthlak a ni ta thung.

Sihruam khaw tan Rengkai hi hmachhawn mai mak chi a ni hleinem ti a inla vung zet a vei thuak thuak in an khaw aiawh te chu a fak kur hluah a, A mizia hre sa leh la hrelo te tan pawh a ei awmloh zet a tawngkam cheh reng in a in sawilian kher mai. Mipui zingah chuan nula pahnih hian an thiante anlo hrilhru sa sa a, Vangpui ho hi an te zawk na in chak sela ka ti zawk daih tih leh. Chunglura te an chak vaih chuan ka hlim viau ang ti in Zehtlang nula hmeltha pahnih chuan an thiani te anlo bekbawr ve sar sar thung a.

Rei mawi tawk an chawlh hnu chuan tlangau in Rengkai ho chu an in peih tawh em tih a va zawt a, Rengkai lal fapa chuan ring lenglawng hian Rengkai tha a zuai ve ngailo e. Tu khua pawh hmachhawn tur in kan tha a za em em zawk mawle a rawn tih chuan khawdang ho chu nersak in Vangpui ho phei chu an thin a khei zar mai le.

Ti chuan Vangpui leh Rengkai ho chu in hmachhawn in hrui an vuan thap hlawm a, Vangpui ho ai mah chuan Tawnvela chu alo tang emaw tih mai tur in a awm hle hle theilo hial a ni. Tlangau au zawh rual Chuan Thanruma chu Sihruam ai a zuam zawk tih hriatreng hian a lo au a, Kha keimah Thanruma. Rengkai pasaltha Sihruam ho mah in an hneh loh chu Vangpui tan dan chi ka nilo e ti in a hote a rawn fuih pah chuan a tumpui te au el zet hian a rawn ti lung lung a, Chu zet chuan Vangpui keite thin thawk a cho chhuak ta tlat mai.

Vangpui lal Sangtawna fapa ka ni e. Vangpui kan zam ngailo ti a awrawl chhuah in a thiante pawh an rawn au nghal tliar tliar a, Rengkai ho tan a pawi ber chu, chu chu ani. Vangpui lal fapa chu Vangpui keite ti a an ralhriat vek a ni a, Mahse an beisei dan ah palian leh pasaltha tak tur a an ngaih tlat avang in an hma a ding hi anlo zuam en ve ngawt kha a ni. Mahse chu keite ngei mai chu an hma ah ding in a pa hming leh an khaw hming a chhal tak ah chuan an tha te chu a zuai ru ta hlawm nge ni a, Vangpui tha an hnehlo zawk tih pawh hriat loh chuan an tawlh dawt dawt a, Rin pel rawk a rawn dawk in vangpui lam tha pe laklawh chu an leh tluk phawk phawk hial mai.

Chu thil thleng avang chuan Vangpui ho ai mah in Sihruam an hlim zawk emaw tih mai tur in an thawm an rawn chhuah hmasa ber a, Phuba la ta ah riak in ngai in an au thawm chu mi zarual thawm nen a danglam bik hauhlo ang. Rengkai lal leh an pasaltha Thanruma erawh in mak tih luat vang a sawi tur hrelo in an hawi hu hu a, Tawnvel a chuan a sir kil a tang a lo en in a lo nuih sung thung a. Hnunglam asabarh an sawi chu nep te a nih kha mawle ti a phun bal bal in Rengkai lal fapa chu a nuihsawh hmel kher a sin le.

Thawh hnihna an tan leh pawh chuan an lal fapa in fuih in hrawk teh mahse, Vangpui lal fapa Vangpui keite chuan an rilru a hneh ta nge ni a, An tha a chuai ve tawh hrim hrim tih hriat ni suh. Tang leh tur chuang awmlo hian an tawlh hawn hawn mai a, Mipui in an rinloh zawk chak ta chu lawm a rawn bawh in an rawn rik nuai nuai na kar ah chuan Rengkai lal fapa in a khaw mi te a hrawk thawm chu a ri ve chang chanh chauh a ni ber e. hei mah mah ai te chhinna a ni a, Thildang ah chuan tanrual nilo in mal beih a ngai tawh ngei dawn bawk si . Sihruam lam in an chaklohna thungrulh ngei an tum ruh bur tawh a, Zehtlang lah in a khaw neitu chakloh an duh tawh hauh silo. Rengkai lal fapa hi a hawi pir zel thei angem kan hria ang chu.

Infiamna dawt leh atan chuan feikhawh a ni a, Hetah erawh hi chuan Rengkai fei hmangthiam hmingthang hi tuman an tluk a rinawm loh. Thosi thlawk lai pawh a khawh fuh thei e ti a lo hmingthang hat thin anih vang in an lal fapa pawh in nuam a ti leh thar riau tawh thung. Wait for 19

Ka buai ve deuh a, Zantin awllo a dah ka duh avang leh sunday zan ka awl thin avang in a tawi deuh anih pawh in ti in kalo dah hram ani e. minlo hrethiam dawn nia.

[Ngaia]

VANGPUI KEITE LALCHUNGLURA. ZIAKTU K VANSANGPUIA ( sangpuia khawlhring) EPISOD 19

Episod 18 Recap. Infiamna dawt leh atan chuan fei khawh a ni a, Hetah erawh hi chuan Rengkai fei hmangthiam hmingthang hi tuman an tluk a rinawm loh. Thosi thlawk lai pawh a khawh fuh thei e ti hial a lo hmingthang hat thin a nih avang in an lal fapa pawh in nuam a ti thar leh riau tawh thung.

Vangpui lam chuan telloh ai ah ti in Rivunga chu an han thawh a, Rengkai lam atang chuan an fei khawh thiam pawh rawn chhuak in a hawi deuh vah reng a, Zehtlang atang in rawlthar pakhat rawn tel ve in Sihruam lam atang chuan zawlbuk kai rual ni awmlo khawp a hmel naupang an rawn teltir thung. Chutiang a hmuh hnu phei chuan Rengkai lal fapa chu a phur in an khaw thiam puipa chu tumah reng a tluk tu tur a hmu lo a, An chak ngei tur ah ngai in a tawng lian lurh lurh khawp mai.

An dinna tur hmun ah chuan an ding tlar zui tham a, An hmalam hlam sawmhnih velah chuan thingtuai pakhat in phun theuh in chu chu an khawh dawn a ni. Mipui lam chuan Rengkai pa lakah an mit an lasawn hleithei lo a, Tlangau in khawh rawh u le a rawn tih rual chuan Rengkai pa pawh in ngaihsak manglo zet a khawh in khawdang a hawisan nghal hmak mai a, Mahse a tum a thelh lo tih chu mipui thum huk dan ah chuan a hriat ta tho mai. Rivunga ve thung erawh chu a tumloh zawk fuh tep in an nui zui dar dar a, Amah lah chuan zak talo chuan ka tum ka hai a lawm mawle. Tho mit chhaih takngial pawh ka hlah ngailo a sin mawle ti kual vel in a phar chiam chiam a, Mipui ho lawm lutuk chu an khek rawih rawih mai.

Zehtlang pasaltha pawh mi namai anih loh zia lo lang ve in a fei chuan thingtuai chu a chhun kau tiar mai a, Mahse chu ai a mak leh mipui mi la tu chu Sihruam rawlthar thiltih zawk chu a ni. A fei chu a bur hian a bur kawhva mai a, Thingtuai lai tak ah ni lehnghal in a mah lah chuan a uksak vak hmel bawk silo nen. Sihruam lalpa chuan Zehtlang lal chu rawn hrilh su su in, Khu nau khu karlo ah ka khaw daingul leh chhak nawr tu tur ala ni dawn in ka hre tlat mai a, Chuvang a tun tum ah pawh hian lo hruai ve ka ni hial a sin. Lo chik ve mah teh ti in chhuan hmel zet chuan a thlir dauh dauh a, A hmel pawh a hlim sung sung khawp mai.

Tunah chuan thingtuai nilo in mau an hmang ve thung dawn a, Ke zungpui rual lek hi dah leh in a lang chang chang a ni deuh ber mai e. Tlangau chuan in peih tur a hrilh in a mah pawh a in ring phan mai a, Tunah le ti a au in an pathum chuan an fei chu a thlawk chhuak zui nghal fua fua a, Mipui hlimthawm in rawn chhilh zui in Fei pahnih chu mau ek keh hah in anlo bur va va e. Tawnvela meuh pawh in tuntum chu a tum a hlah ve ta tlat mai a, Ekhai kan tar ta ani ange. Ka tlukloh te bulah kalo tel hmingchhe ve lek ani ti a inthlahrung tak in a thiante lam a pan ve thuai a, Rengkai lal fapa leh an fei hmangthiam chuan mak tih deuh erawh an nei. Eng titih a chu rawlthar chuan a tum rawn fuh ve zel chu nge anih a, Tu mihring teh hrep nge anih tih chu an rilru luah tu ber a ni tlat tawh.

Anni ai mah a makti tu chu an khaw ho leh mipui chu an ni. A tir atang khan Rivunga ang deuh a fiamthu titih leh telloh ai ah an rawn tir anih an ring kha ani a, Mahse Rengkai thiam puipa ang mai chuan a tum a la hlah duh bik der silo. Tum dang ah pawh hetiang bak hi an pel ngailo a, A chhan chu hetiang hunah hi chuan Rengkai pa bak an din chan tawh ngailoh avang in a bak anlo ruahman hauh lo mai si a. Tlangau chuan lal te lam chu en in a han rawn a, Lal te pawh in tih leh mai dan tur an hre tawh mai biklo chu a ni.

Rengkai lal fapa chuan an thiam puipa chu a han bekbawr sar sar a, Chupa pawh chu lo bu nghat nghat in an lal te lam hawi chuan a han phar chhuak zui nghal zat a. Lalpa te u. Khawngaih in rawtna ka siam thei angem ti in mipui pawh an reh diak a, Lal te chu in rawnkual in Zehtlang lalpa chu a bu nghut a, Chutah Rengkai pa chuan a ruahman dan chu a rawn sawi ta a ni. A rawtna hretu te chu lo phun mur mur in lal ho pawh in an remtih loh hmel kher mai a, Chutiang a mihring nunna thap tur em chuan he in elna hi a pawimawh tawklo in an hria. Mau an phunna piah hlam sawm ah chuan mihring an ding anga, An lu chung ah thil keng in chu chu an khawh dawn a ni.

Zehtlang lalpa in rem tilo zet a rawn dinchhuah a rum lai tak chuan, Sihruam rawlthar chuan ban a rawn phar zui ve va mai a, Lalpa in a buk khum nghat hnu chuan a rawn tawngchhuak zui ve nghal zat bawk a. Kapu. I lalna ropui hmingchawi leh kan lal ropui hmingchawi in Rengkai ho duhdan kha ka pawm a, Rem i tih chuan khatiang ngei a in el kha ka duh ve a ni tih ka rawn sawi e a tih chuan an reh zui tlawk tlawk a, Mipui mak tihna let in an lal te chuan mak an ti awm e. Chu nau chu en thup in an rindan an in sawi siak luih luih a, Chutih lai chuan Vangpui keite ngei mai chuan ban a rawn phar ve ta tlat mai.

Zehtlang lalpa dingchhuak tur pawh thu leh uaih in a fapa chu a en reng ringawt a, Mahse a hriat chian em em chu a fapa hi thil tullo ah chuan a in rawlh dawnlo tih hi a ni. Lalpa in thusawi tur a a buk khum hnu chuan Chunglura chu a rawn pen chhuak chhat chhat a, Zehtlang lal zahawm leh ka pa hmingchhal in ka sawi duh a, Tun a rawtna awm kha kei chuan pawmpui ka duh ani. Chumi ti nghet tur chuan keimah ngei hi Sihruam rawlthar hma ah ka ding dawn e a rawn tih chuan an reh zui diak a, Chunglura leh chu rawlthar chu melh kawp zawk zawk in Rengkai ho pawh in an thil rawt chu an ti sual mai angem tih an ngaituah rum rum tawh mai.

Chutia a ni ber in a rawn tih tak ah chuan an lal te pawh chuan anlo remti ve mai bawk a, In elna satliah nilo in nunna chan theihna tur hial anih avang erawh chuan an hma a ding tur hmuh a har phian ang. Rengkai lal fapa chuan a mi hruaite zing ami pakhat chu hlau chung chung a tir lui in a dintir ve thuai a, Fanghma tuai pakhat lian lemlo zet chu a lai ah bung in an chhip ah ve ve chuan an dah vang mai a, Chu chu anni chuan rawn khawh fuh an tum dawn ani.

Mipui te chu thaw tha ngamlo leh hmuhchian loh hlau si, En tha ngam meuh bawk silo chuan an ngawi thuap mai a, Rengkai lam a fanghma chhipchhuan tu erawh a hlau tih hriat zet a ding in a hmai a dang lap lap a, Lal fapa thu nilo sela chuan a hnial chiang ngawt ta ve ang. Mahse a khur chhe bik emlo a, Chunglura erawh in a hma a ding chu a rintawk mai bak ah amah a huaisenna awm chuan hlauhna chhete mah a neih tirlo a, Kan in peih e ti lauh in a ding khawt lah mai.

Fei khawh tur te pawh in fimkhur angai ani tih hria in an in ring dun pen pawn hle mai a, Tlangau in an in peih tawh tih a hriat chuan tunah le ti in mipui chu a thaw hawk hlawm a, Fei pahnih pawh boruak su phei in a thlawng ving dun ta hlerh hlerh mai. Chunglura lu chung a fanghma chu len thla lawp in a piah ami erawh in a thawi fua thung a, Mipui ten hlauhawm a pel tih an hriat mai bak ah thil theih ni a an hriat loh chu an mit ngei a an hmuh avang chuan an ri zui dur dur a, Sihruam rawlthar chu a khua te pawh in an pawh hleihtheih loh a vawrkang in an mak tih zia chu an in sawi siak uih luih ani e.

Sihruam lalpa pawh hlim zet a rawn ding in a au lung lung a, Ka khaw ti hmingtha tu i nih bak ah thil mak i tih avang in ka sepui ka pe ang che a rawn tih zui tak ah phei chuan anlo lawmpui in anlo haw haw ta hluah hluah hlawm a. Tun tum chu Rengkai lal fapa pawh a ka an hup ta emaw tih mai tur in sawitur hrelo chuan a hawi ve rulh rulh a, A fei khawhthiam chu rum zet a melh leh thin in ani erawh leilam a lo bih ngar thung a. Chunglura leh a thinte pawh rawn kal hnai in chu rawlthar chu an rawn chibai ve lawp lawp a, I thiam hle mai ti in a nihna tak ah chuan phul ve hlut lo mahse mak chu an ti ve tho hlawm.

Rivunga chuan a thiante bulah chuan he nau hi kan khua a awm atan ka duh hle mai ka ti. Eng kan ni biklo na in kaihhruai ka chak hle mai a rawn tih chuan anlo aw dial a, Tawnvela pawh in chu tho chu a ni alo ngaihtuah ve ni. Mipui hlimthawm a reh deuh hnu chuan infiamna dang an tan leh dawn ta a, Tunah chuan khaw aiawh tur te pawh rawn chhuak tham tham in khawtin atang in pathum theuh an tel dawn ani. Rengkai lal fapa meuh pawh rawn tel ve in a hawi lian viau mai a, Inrin tawk hmel zet a a che vel chu Rivunga chuan lo nuih put put in, Sawpa sawn hringnun hi nuam alo ti ber mai anih saw mawle. Zahluat avang a hnarsen tawn tawn in a awm rei theilo em mai a tih meuh chuan a thiante pawh anlo khi ve sak sak hlawm.

Khuangchawi thei lal meuh chuan lawmman pawh a siamtha in a renlo heuh heuh kher mai a, Lawmman dawngtu tan chuan hlimpui viau tham ani reng a ni. Sial leh dar neih harzia chu tlang hriat ani a, Chuti chng chuan an lawmman atan an phal miau si. Thi leh dar ngah te hi mi awmthei tih an ni a, Sial leh ran ngah pawh chuti tho. In eltur te an dinkhawm thap lai chuan sihruam lalpa chuan an lal a bekbawr leh sur sur a, Zehtlang lalpa in rem a tihpui tih a hriat rual chuan rawn dingchhuak in mipui nunau chanvo lam a rawn puang ve ta thung. Vawin hian ruai kan buatsaih lo ang kan ti na in, Mipui te tan an chanvo ve tur in ruai kan theh anga, Hemi ni atan a kan rawn kaih ka sial lian kha talh tur ani a rawn tih chuan an au dur dur a, Ni a tlangsan deuh tawh avang in a phusa tur pawl chu an phe zui nghal zat hlawm a.

Tlailam ruai theh tur nen an boruak a nuam leh ta hulh hulh kher mai a, Silai kap tur te pawh an khaw ho in lo au phur in an ding tlar tham hlawm a. ramhrui sei tak tlangban ang deuh a thlung in chutah chuan hnang in mai an khai far a, Chu chu an kah tur ani. Hla tawk tak ah ding in mai pawh chu a lang chik rat thei a, In ring penpawn a tanhmun siam in an mit an siai ta sang mai. Darkhuang a rawn tuvu hlurh hlurh rual chuan chengrang a au nghal tuar tuar a, Mai in then phe hlawp hlawp leh lo keh sung mai in lo hmachhawn in mi sawm pahnih zing ah chuan paruk an tla fel der tlat.

A tling te chu in lawmpui in an rawn chibai liam liam a, Rengkai lal fapa pawh la tel ve in a tawng lian thur thur thin hle a ni. A dawt atan a tlangval ho in an khai chu fanghma a ni a, Mai lak ah kha chuan te tha van van tak hi a ni tawh. An kahna ngai atang a kap leh dawn in an in tlar leh tham mai a, Darkhuang a rawn rik rual chuan chulao hmun chu zen khu in bawh chum chum in fanghma intar chu pahnih an hek lawih a, Rinloh tak in Rengkai lal fapa leh Tawnvela chiah in an tum an fuh tlat mai.

Rengkai lal fapa chu a nui uar uar a, Puitling infiamna ah naupang in rawn tel hnem ka ti reng a ni ti in a hawi vawlh vawlh a, Tawnvela erawh ngawi reng a a silai sawh in chu nau tawngkam thlahdah lutuk chu a kham ta kher mai. Tlangval pahnih chuan an kah tur an va buaipui leh zung zung a, Tuntum chu fanghma nilo in samtawk an khai ta ve ve mai a, Chu em zawng tu zawk zawk pawn an kah fuh a rinawm tawhlo hle mai.

Zehtlang lal chu a rawn au lung lung a, Ka daingul leh ka kulhpui kha i lal leh i chhung leh khat ten kan en che a, I khua in nangmah ah rinna kan nghat e a rawn tih lai chuan Tawnvela chu hawikual in a thiante pahnih lo nui sang leh a chhungte'n beiseina nen anlo thlir thap ahmuh chuan a thinlung ah thu a sawi ril kher mai. Tlangau chuan in in ring em a rawn ti lauh lauh a, Hetah hi chuan a rual a kap lo in an in chhawk dawn ani. Hmawlhte thlan tir in a tawi zawk in a kap hnuhnung anga, A sei in a kap hmasa ang ti in an han pawt ta ngei a, Tawnvela kah hmasak tur ni in Rengkai lal fapa chuan a dawt ah a kap ve thung ang.

Tawnvela chu rawn ding chhuak in uluk zet a mit siai vang vang chuan a tin ngar ngar a, Arpui thlawk dawr khawp a ring in a silai chu puak in an thil khai lam an hawi rual thup a, Chu samtawk chu ngenmu in a deng tih hriat zet hian a kuang an khaina bul mai ah chuan hek in a kuang a in then lauh lauh mai. Mipui hlim lutuk chu au khawk rum rum in an sahawk nuai nuai a, Zehtlang lalpa hlei hlei chu hlim in a zu in phuh thawt chuan a au tehreng a nih kha. Chunglura leh Rivunga pawh lo khek ve rawih in an hlim takzet tih a hriat a, Tawnvela chhungte chuan an pa ber chu chhuang tak a en in nuam anlo ti veng veng thung. Chutih lai chuan Rengkai lal fapa chu rawn tawng chhuak in, A thiam zawk awmlai a tihfuh palh lo lawm chiam mai chu aw rawn ti in a thusawi hre ho chu an sa phat hman a, Ni e. Ala kap ve ngei dawn a a fuh ve thei ani tih hria in hmun an kian ta hlawm zawk a.

Tlangau pa ka in peih e. Khawnge ni Zehtlang lalpa sial chu kai haw bur bur ila animai a lawm ti a tawng zuah zuah in a ding vei lurh a, Ti chuan inring tak a silai lek kang in a mit a siai zui ve ta sung a. Chengrau a kiu dur a, Samtawk erawh boruak ah ala in khai vu mai si. Mi thenkhat anlo la nui zui leh ta nghal bawk nen. A zak ve nge pawh hriat ni suh a hawi hu hu a, A sam a tuai nawk nawk a a kahthelh chu a va en leh thin a. Tawnvela chu rawn kalhnai in a bula mi te hriat ngei tur a rawn tawng chhuak in, A themthiam zawk hian a hlah palh ani ngei ang, Vawikhat kap leh sela a kah fuh phawt chuan ka lawmman dawn tur ka pe ange a la rawn ti zui nen. mipui lam in i kap leh ngam em an rawn tih tak luai luai ah chuan ka kap ngam khawp mai ti in a silai chu a sawh tau ngheng ngheng tawh mai.

Tawnvela chu ring lenglawng a rawn au in, Kan pasaltha a thiam ber mai hian a mit a tho mitchhaih vang in a thelh hlauh mai a, A kah leh ka remtih sak bak ah a kap fuh a nih chuan ka lawmman tur ai ka hlan ang tih min hriatpui rawh u. Kan lal zahawm tak hian ka ngenna min pawmsak hram se ka va ti em a rawn ti liah liah a, Lalpa hian Tawnvela hi a hriatchian em avang in a lo pawmpui hmiah mai bawk a. Tlangau chu rawn au chhuak in, Mipui khan i zim buai lutuk lo teh ang u rawn ti in an kiang duak a, Ani pawh uluk mangkheng a silai tin in a siai ngar ngar hnu ah a han hmetpuak dur mai ah. Mahse chu samtawk chuan tlak zai reng rello in a la in khai lauh laub ta fo mai. Mipui lah lo nui hluah hluah in anlo au dur dur a, Rivunga phei chuan uar fal in a nui nasa ngei mai.

Chunglura chu rawn kalhnai in Rengkai lal fapa hriat tawk lek hian, Puitling thiltih ah naupang an tawng vak vak ngailo ti a kalsan leh in a nuih zui sak a, Tuntum chu Rengkai lal fapa meuh pawh a zah luat ah a meng khup ve lup lup e. Wait for 20

Ka tleirawl lai khan ka luck thei a sin aw, Ka thianten ngaihzawng an neih dawn reng reng hian puarak ah ka tang lo ngailo.

[Ngaia]

VANGPUI KEITE LALCHUNGLURA. ZIAKTU K VANSANGPUIA ( sangpuia khawlhring) EPISOD 20.

Episod 19 Recap Chunglura chu rawn kalhnai in Rengkai lal fapa hriat tawk lek hian, Puitling thiltihna ah naupang an tawng vak vak ngailo ti a kalsan leh in a nuih zui sak a, Tuntum chu Rengkai lal fapa meuh pawh a zah luat ah a mengkhup ve lup lup e.

Mipui chu ringtak a au in Tawnvela chu an zawn luih luih a, Zehtlang lal leh Sihruam lal te, Vangpui lal te chuan zu no lo lek kang in lawmpuina an rawn ti lang liam liam a, Ruai anla peih chiahloh avang in naupang inbuan tir in an ri zui ta laih laih a. Tawnvela chu a thiante nen an in lamah hah chawl in hah zu an zuk laih laih a, U vela nge nge chu tluk loh rim i nam ngei mai. Khatiang te chuan tiau kam atang a tiau ral a mi pawh i sai nalh nalh thei dawn nih kha ti in Chunglura chuan a thinlung tak chuan a fak mawlh mawlh a, Rivung a pawh lo ngawi mai mai biklo in a ze ngai a rawn chhuak zui leh der tawh a, Ekhai lura i hrelo lutuk. U vela te chuan thehlei tlanlai pawh tinkawh miahlo in a thur nalh nalh thei mawle rawn ti in an vai nuih leh zo ta.

Ruitheh an peih thu puang in nula ho in chaw an rawn khawn zar zar a, Tawnvela te inpawh tlangval pahnih zarah nula ho in an rawn khawn sek hlawm a, Tawnvela nupui lah chuan lokal zel rawhse. Makpa khual khung kan nei anga nimai ti a lo fiam in anni pawh an nui dar dar hlawm. Puar pengpawng a ruai an theh zawh chuan zawlbuk an kai sap sap a, Thenkhat erawh lengi te in lama lut nghal in an hun an am tlang a ni ber e. A tuk lama intihsiakna tur te chu sawi ho in an ri laih laih hlawm a, A tuk ah enge an tih dawn tih tak hrelo in an rindan an sawi zui sap sap bawk. Inbuan a tel tawh angem. Nge ni a thingluang chu a in beih. Tu nge kutthlak na ber tih an zawng dawn nge ni a, Engtak ti ang maw ti a sawi in infiamna tin a chak tur a an rin te pawh a in anglo nuk e.

Lal inah pawh upa ho leh lalte chuan zu khawn ho in a tuk lam a an hun hmandan tur an rel laih laih a, A tawp kharni atan a n ruahman sa erawh puan nghal loh nise ti in an thawm pawh a tha tlang e. Rivunga chuan len a rawt sek tawh a, A thiante lah chuan hrelo ang mai a titi san in an hrelo der tlat mai bawk si. A mawng za lutuk tawh leh insum zolo chu a ding chhuak hluai a, Nangni nupui nei tawh leh hmeichhe ngaihsak reng reng lo bula ka awm rei poh leh ka len tar hun a chiang ting mai dawn nih hi. Ka kal a nia tih leh thawh a rual zui zat a, Mahse amah hre chiang em em tu te bulah chuan a thusawi hian awmzia a nei mawlh lo a, A mah mai a a len ngam dawnloh zia leh khawlai ah a lo in sawh tau nghawng nghawng dawn tih hre tu tan chuan an nuih a za tulh tulh thung.

Rivunga chhuah atang a tuibur hmuamda awm velah chuan an tei chhuak chhat chhat a, An rin ang ngei in Rivunga chu kawtlai ah lo tei fua fua in a lo in sawh sawk sawk lai an hmu meuh chu an in sum zolo dun nasa mai le. E khai. Nang chu i lenna tur i thleng daih tawh ang tih nak lai chuan ti in an nui vak vak a, Rivunga lah in anlo chhuak ta lawm si leh a len duh hun a an lenpui loh thinrim nen a lo tum bur mai thung a. Anni pahnih lah chuan duhtawk ta mailo chuan an han runluih kual zui zat mai a, U Vel. Zanin chu Rualchhingi i rim teh ang u aan ti zet chu Rivunga a rawn teu nasa kher a sin le.

Rualchhingi Rualchhingi sawi a ngailo. Kan lenna ngai ah kan leng ang rawn ti nghut in a la tei vut vut a, Tawnvela rawn tawng zawm ve in, Vunga, Nang chu i duh i tawng tawh a, I thianpa hi kan lenpui ve a ngai a sin a rawn tih phei chuan a lim lo chauh chu a ni e. Kha pa kha maw. Hmeichhia hi enga tan mah a tilo a, Kan khua ah pawh khuavang lal fanu ni awm tak khawnbawl fanu kan nei a, Mitmei mai nilo in mit tung zawrh zawrh a a melh pawn a ngaihven chuang hleinem. Enge zanin atak a Rualchhing rim a ngaihna chhan rawn ti thur thur in a thalengi tawnah chuan alo uai takzet anih hmel.

A thiante chuan fiamzui duh tawhlo in an nui san san a, E khai. kan pasaltha hian len duhna a nei a nih chuan kan kalpui mai ta lawng. Mahse zanin chu chet chhiat awih loh kan ti anga, Ngawih reng awiloh kan ti tawh ang. Anih loh chuan zandang ah kan leng tawhlo ang an tih meuh chuan Rivung hlim hmel chu hmuh a nuam siah siah kher mai. Hmanni zan te kha chu ka talbuai laklawh mai mai anih kha. Zanin chu ka che na viau ang ti in a in hrosa kuk kuk a, A thiante erawh in an a mizia tur an hriat lawk miau avang chuan anlo nuih tet tet a.

Upa ber chanchang in Tawnvela chuan thu tawp a rawn siam thuai a, Awle. Engpawh nise zanin chu Rivunga pual in kan leng phawt anga, Nakzan lamah Rualchhingi chu kan rim mai ta lawng ti a a rawn tawngchhuak meuh chu Rivunga chuan a bawp pali a khai lo chauh chu a ni e. Ti chuan vengthlang lam pan a kal tham tham in an tum hmun an thleng thuai a, Rivunga lut chak leh zak bawk si hmel chu hmuhnawm tak hi a ni ringawt mai. Tawnvela chuan hma hruai in a han khuh khar khar a, Hmeithai fanu hmeltha pawh in lo chhawn in chu run chu an dai lut leh ta poh chu a ni a.

Inleng pawh lo em leh thap tawh in anlo ri laih laih a, Zanin chu Sihruam val leh Zehtlang val, Rengkai tlangval leh Vangpui ho in pawlh nuai in an ri ho dar dar a, A kal hma a phul hlut leh thawm bengchheng ber Rivunga erawh chu a ka an hup sak ta emaw tih tur a ngawi kur in a mit chuan an rawlthar chu a zai vei rulh rulh roh a. Chutia hlimtlang tak a an awm lai chuan an duhloh ber thil a rawn thleng ta tlat mai le. Rengkai lam mikhual te chuan hah zu anlo zuk hnem deuh nge ni a, An tum reng vang zawk pawh hriat ni suh. Sihruam ho nen chuan an boruak thalo in an in hnial tan chu a ni der mai a, Rengkai lam a tang a pakhat a put chhuah zeuh tak ah phei chuan an boruak tur chu a chiang ta viau awm e.

Tawnvela a in rawlh chuan an reh zui diak a, Mahse thildang lo thleng chuan boruak a ti punlun leh ta thung a. Mi pakhat put chhuak khan an lal fapa leh an pasaltha te alo va ko chu ni in, An lal fapa leh an pasaltha rawn thlen meuh chuan Rengkai lam chu an pawngpawrh in an thawm a ring leh ta viau mai a, Tawnvela leh Rivunga te, Chunglura te chuan thil awmdan an hrethiam in an lawmlo kher mai le. wait for 21

Kala buai ve viau zel e. Rawng hnawih leh inchhung khur buaipui a hun ka hman avang in kala talbuai a, Ka chawl a zan ka awl anih pawh in min hrethiam teh u. Rawng takngial pawh kala hnawih zo silo a. nileng mai bak ah zankhua tlinglo deuh a ka buai ve avang in minlo hrethiam dawn nia.

[Ngaia]

VANGPUI KEITE LALCHUNGLURA. ZIAKTU K VANSANGPUIA ( sangpuia khawlhring) EPISOD 21.

Episod 20 Recap. Tawnvela a in rawlh hnu chuan an reh zui diak a, Mahse thildang lo thleng chuan boruak a rawn ti punlun leh ta thung. mi pakhat put chhuak khan an lal fapa leh an pasaltha te alo va ko chu ni in, An lal fapa leh pasaltha an rawn thlen meuh chuan Rengkai lam chu an pawngpawrh in an thawm a ring leh ta viau mai a, Tawnvela leh Rivunga te, Chunglura te chuan thil awmdan hria in an lawmlo kher mai le.

Tu in maw Rengkai tlangval te lo ti buai a min hlaulo tu chu. Sihruam khua te hian min zuam mah mah ta ani e rawn ti lung lung in an pasaltha chu a rawn pawr nghal em em mai a. Tawnvela chuan rum zet a lo melh in, Buaina a awmlo a, Inhnialna satliah ve mai ani e. Ban kanlo phar tawh a, Buaina ti punlun zawng in awm tumlo hram teh u ti in a tawng erawh ala dam dap thung . Rengkai lal fapa chu rawn in rawlh ve in, Zehtlang pasaltha khan minlo hrethiam sela, Hei chu Sihruam lam nen a kan buaina anih avang in kan han vawrh hrep law law ange. An ngamloh chalah chil an hnawm ngun ta bawk a, An phu tawk hi hmu mawlh teh se ti in a pasaltha hnunglam a tang chuan a rawn tawng zar zar a, Chunglura ngaihdan a ni tawh hauhlo.

Pasaltha leh val u meuh in ban phar in duhtawk teh u an ti lawm lawm a, Ai u te zahna chang hre leklo a tawngkam i cheh reng maile. Awle. Sihruam tlangval khan i thiante va ko ve la, Rengkai lam pawh in ko kim rawh u . Ngam leh ngam, Cho leh cho chu zanin ah sawifelna hun kan pe ang che u a rawn ti ve ta sak mai.

Tawnvela leh Rivunga pawh in sawi mai tur an hrelo a, Rengkai lam lah chuti bawk. Sihruam tlangval lah chu an thu awi in a kal chhuak zui nalh a, Rengkai pasaltha leh an lal fapa pawh an in rawn sur sur reng a. Chutiang teh nuai a nih tak ah chuan anlo pungkhawm tam zel a, Zehtlang ho te pawh rawn pung zel in Sihruam leh Rengkai ho chu an in ep that hlawm a, Zehtlang ho chuan kil bial in enge lo thleng ang tih an nghak ta thap mai.

Sihruam ho chu an rawn thleng ta ngei a, An khaw buanchak mai bak ah an lalpa ho meuh in a ni anlo lan ni. An mahni va hruaitu tlangval khan thil awmdan a lo hrilh tawh hlawm avang chuan an rawn mengrum hlawm viau bawk a, Rengkai lam chu ngamloh chala chilhnawm tu ang mai in an in telkhawm chu an zum dak mai. Sihruam lalpa chu a rawn tawngchhuak zui thuai a, Tu in maw ka khua leh tui hmusit a lo thamlo em em tu chu. Zai kan dawh a vang leh rem kan duh avang hian kan dawi ta tihna anilo a, Chakai mah a kawtawp ah a tang anih chuan khaw te zawk leh lu nung tlem zawk pawh ni ila ka tawlh hlek hleinem. Zanin hian Zehtlang pasaltha leh Vangpui lam hi kan thu hretu ni sela, Min hmusit a min tawngkhum tu te khua kha in ngam ngam kan ngam in kan cho e. Inbuan in ti emaw, Thingluanh zawh in ti anih pawh in kan hniallo a, Infiamni nghak kherlo a chinfel a ngai anih pawh in kan hrehlo e a rawn ti ram hmak mai a, Boruak chu a reh chiang khawp mai.

Chutih lai chuan Zehtlang lam pawh in an lal hnen ah boruak anlo han hriattir ve tawh a, Zehtlang lal leh Vangpui lalpa chu a khawnbawl te nen rawn lang zui ve nghal in an rawn thlen hnu phei chuan boruak a reh in an ngaichang thuap hlawm a, Zehtlang lal chuan thu awmzia zawt in an buaina bul a hriat hnu pawh chuan a hmel a ti danglam chuang miahlo thung a. E khai Khuangchawi tur a ka khualtha sawmte vek in ni a, Ka khua leh tui ka ram chhung a in awmlai chuan inrem tak a awm ka duh e. Ka khaw ram chin in pelh hnu a in khaw hnih inkar chu kei a lo sawi tur a awmlo a, Zanin chu i in bengdai tlang teh ang u a rawn tih chuan Rengkai lam chu an thaw huai in a rinawm.

Mahse, chutia an thlavang hauh deuh leh boruak veng thei awm an awm tak ah chuan, Rengkai lal fapa bawk chu a mizia a rawn lang leh nghal zat mai a, Mi te thlazar hnuai a pawr leh vaupung na thin a nihna chu rawn lantir zui in, Zehtlang lalpa thu anih vang in kan ngawi mai ange. Mahse Sihruam ho khan lo hria ula, Ka pasaltha hmachhawn ngam in awmlo tih chu tlang hriat ani e rawn ti thar leh in a rawl a lian leh tawh hle mai a, Chu erawh chu a tawngsual tih reng a hre silo.

Sihruam buanchak chu a rawn pen chhuak zui zat a, Ani hi tunhma thingluang zawh a Rengkai pasaltha hnehlo tu ani a, Inbuan ah erawh a hneh thung. Chumi vang chuan a tlawm ta ah ngai in an zuam viau mai kha ani a, Mahse pasaltha te hi tawlh hun leh bawh hun a awm tih hre tur a ngaih an ni tlat. Nang, Rengkai lal fapa chapo khan lo hre rawh. In khaw pasaltha kha cho chikim in ka cho a, Hun hmalam ang ngawt khan engkim a awm reng theilo tih hre rawh u. Chinfel nghal in duh anih chuan ka in peih e a rawn ti ram ve hmak mai a, An lalpa pawh in khap duhlo leh a nih ang ang huam in a lo ngawi ve hmiah bawk.

Rengkai pasaltha a rawn tawng chhuah hma chiah chuan Chunglura chu rawn pen chhuak in a lai ah tak chuan a rawn ding vang mai a, Zehtlang lal in thu tawp a siam tawh a, Tunah chuan engmah a thlenglo ang. Naktuk ah khua a var anga, Tu khua nge chak a tu khua nge huai ber chu hun in a hril ang chu rawn ti fiah fak in a in ring tawk hle tih chu a hmel landan ah hairual a nilo a, A bulah chuan a mah thlawp tur in Rivunga leh Tawnvela chu an rawn ding dun nghal zat bawk a.

Tumah rawn tawng leh inrawlh an awm tak loh ah chuan an tin zui pheuh pheuh a, Reilo te ah kal darh vek in an rem ve ta duak e. Tawnvela te thianho chu an in lam pan in an phei zui tham tham a, An boruak tawn chu an ning tawh in an lal te hian eng emaw ber rawn ti se an ti tlang kher mai. Mahse pasaltha leh lal fapa mah nise lal rorelna ah an tel lemloh avang in an thu a awm silo a, A nghah lamah an ram tan mai a ngai a ni.

Tuk dang ang tho in khua a var ta ngei a, Tlangau in lalmual ah tukthuan eikham ah kim tur a rawn puan lai chuan anlo ngawi tlang thap hlawm. Tukthuan eikham chuan lal mual ah an kal khawm sap sap a, A kal thei chin an kim ta ang maw tih chinah chuan lal pathum leh khawnbawl te chu rawn chhuak in an rawn ding pauh ul hlawm a, Mipui chuan an thu leh hla ngaichang leh vawin lam a infiamna tur ngaichang in anlo reh thiap thung a.

Zehtlang lalpa chu zahawm tak a rawn ding in a rawn khuh khak khak a, Awle, Ka khua leh tui leh ka lalram thenawm te u. Ka khuangchawi avang a in riahrun nuam in belhsan hial in helai hmun inlo thleng a, Ka lawm in ka khualtha in ni. Nizan lam khan lal te leh khawnbawl te nen ro kan rel a, Kan tlangau hian kan thurel han puang teh se ti in leihka tlangsang ah chuan a ding to lurh a, A landan zahawmna chu hmuhhmaih rual a nilo.

Tlangau chu a rawn ding chhuak zui nghal var a, Kan lalpa sawi ang khan in fiamna hlimawm leh nuam tak in hun kan hmang anga, Tlailam ah ruai kan theh leh bawk ang. Chumi thu hre tu mipui chuan kut an lo beng dar dar a. Vawiin ni a kan in fiamna tur chu heihi a ni anga, Tu khua leh tui nge kutthlak na ber kan zawng hmasa ber anga, A dawt ah in hraisui pawh a ni ang. Zanriah ei hma chuan kan duhdan in kanlo lam in hun kanlo hmang anga, Zanah erawh lal mual ah inbuan ropui kan en ang a han tih meuh chuan an thawm mitdel te hriat khawp in a rik hian a ri hluah hluah tawh mai.

Ni e, Inbuan hi an hmuh chak em em a ni a, Thingluang chung a khawmhma chem nen a inbeih tluk zet in an nghakhlel a ni. Tu khua nge buan chak ber anga, Tunge khual thang ta ang. Sihruam buanchak nge ni a, Zehtlang pasaltha zawk. Nge ni a Vangpui keite hian a tum phak angem tih chu an nghahhlelh a ni pha tlat. .

Kut thlak na an zawnna ah hian sawntlung lei sawhban an hmang tlangpui a, Naupang ho lak khawm tir in an sawh muk tan a, Chhah tak a bel in an in sah siak thin a ni. He thil hi an ngai thutak in mi chak leh chungnung zawn nan a an hman pakhat a ni a, Hetiang hun a a sat thuk thei ber te hi chu pa vantlang chunglam an nih bak ah pasaltha kai meuh an nih thin a vang in a zah pawh an zah viau zel a.

Tlang rindan ah chuan Sihruam buanchak palian chuan rin a kai ber a, Mahse Zehtlang leh Rengkai lam hian enge an chet dan tur hriat a ni biklo. Chu mai anilo a, Vangpui keite hi a palian lemlo na in a thinlung len zia an lo hmu chiang tawh a, A tam zawk rindan inkalh nuai chu a mak hranlo e.

Mipui an tindarh hnu chuan mahni ngaihdan leh rindan sawi in an ri zui laih laih a, Infiamna a tak hmuh anih hma chuan engmah a hriat theih siloh a. Chumi fiah tur chuan an kalkhawm leh thuai a, Lal mual ah pawh sawntlung lei ban sawh ban diktak chu anlo dah vum hnur tawh bawk a.

Mahni khaw aiawh tur theuh te chu rawn dingtlar tham in, An pumraw ngaituah chuan a chak tur a hriat ruai ruai e. wait for 22.

Kala buai tluang ve zel a, A sei lemlo na in dah loh tawp ai ah kalo dah ve hram thin ani. In mi hriatthiamna ka ngen e.

[Ngaia]

VANGPUI KEITE LALCHUNGLURA. ZIAKTU K VANSANGPUIA ( sangpuia khawlhring) EPISOD 22

Episod 21 Recap. Mahni khaw aiawh tur te chu rawn dingtlar tham in, An pumrua ngaihtuah chuan a chak tur a hriat ruai ruai e.

Khaw neitu an nih avang mai bak ah a bul tantu an nih ang in Zehtlang lam chu an rawn in ring zui zat a, Tawnvela leh an khaw thirdeng chu a ban tha chak a vang in an rawn ding thiang ral mai a, Mipui chuan an che tha tawklo ang tih hlau reng reng leh hmuh chak deuh chuan anlo thlir ta thup mai le. Zehtlang lalpa chu rawn au lung lung in, Ka pasaltha leh ka thirdeng pa chak te kha inlo zam mai ange. Tawnvela khan a vawmpui sahhlum thapui kha chhuah sela, Ka thirdeng khan a thirling den kawih sawk sawkna ban kha han hmang teh se ti in thuthmun a rem thuai a, Lal dang te leh khawnbawl ho pawh a bulah anlo thu zui tliar tliar hlawm.

Tawnvel chuan zak kau hawk a chempui lek kang in a tha tawp a chhuah tih hriat zet chuan a han sat thla zui sawk a, Chempui in sawntlung char lam a zuk denna chu kak thla duai in chem chu thui fe a lut thla a, Mahse a tawp pawh nilo in a chanve pawh a sat thleng zo biklo chu a ni. Pa vantlang chunglam theih bak zet in a sat tih chu a lang reng a, Mahse a sat leh tu tur ho an palen hlawm em avang chuan a dinhmun a chiang biklo.

An sawntlung hi sawifiah lawk ila, Khawtin chawilung a in anglo ang bawk in, An khua in kutthlak na zawk an zwwnna hmanrua hi a in anglo. Sawntlung leinem a tam thei ang ber la khawm in arbawm ai mah a lian in an tengkhang tlat a, A char tep ani tih tur khawp a sak a an sawh meuh chuan chem a lut thuk pawh in a hriam in a ngam meuhlo thin. Tunah pawh hian chutiang chu sat in a chanve sahthlen a har bak ah a chem huam bak a lian a nih ang in tha chak a ngai em em a, Hreipui a cheh meuh pawh a dawl nek thin reng a.

Mipui lam in kut lo beng dar dar in anlo au hluah hluah a, Zehtlang pasaltha anih kha ti in a sah nat zia chu an chhuang hle hlawm. Tunah chuan Rengkai lam sah ve hun a ni ta a, Rengkai chhuanvawr chu rawn chhuak in a in vai vut vut a, A thil sahtur te chu han bel thut thut in a nui ang tak vur vur bawk a. Lal fapa pawh in a pasaltha chu rawn fuih in, I chak a nih phawt chuan thiltha tak ka tihsak ang che. Theihtawp chhuah rawh ti a rawn au in an khaw pasaltha ai a chak tur zawk reng an awm a ring leh tawh pek lo.

Rengkai pasaltha chu awrawl chhuah meuh a au in a han sat thla fua mai a, Mahse a rin leh beisei ang a lo nemlo in a chem chuan kua a hreuh thuk bik hranlo kher mai. Tawnvela nen chuan an sah nat dan a in ang reng mai a, Palen ringawt hi tha ngah na a lo ni biklo emni dawn ni. A sah rual a an lal fapa lo au chul leh lo sahawk chiam chu a reh zui hmak a, Thereng vuakthlak an sawi chu nep te a ni ta.

Mak ti zet a a thil sah chu bel leh vut vut thin in a lu a hiat turh turh a, A rinang a nilo lutuk chu a zah pawh a zak hmanlo chu a ni e. Zehtlang lalpa lah chu nui huau huau chung a rawn tawng chhuak in, Kha. Rengkai lam chuan sah dan tawk in va thiam ve mawle. Khaw neitu te milpui tawk a thiltih in thiam riau mai rawn ti zui in a nui huau huau reng bawk a.

Sihruam lam chu rawn pen chhuak ve leh nghal in, A sat tu tur palen dan leh pumraw that zia ngaihtuah chuan a tawp thleng a a sah theih hial an ring a, Ngaihdan in anglo zet a lo in hnial in an rin an fan awk awk hlawm. An lalpa in a lo buk khum nghat hnu chuan a tha tawp tih hriat zet a rawn vaithla ve in a kak thla duai a, Hei zet erawh chuan tharum ah ahneh bawk nen a chanve a pel thla hawk mai le. Mipui te pawh rawn haw haw dur dur in an rawn bih chiang sap sap a, A sah chen sat tur hi chuan beih fet a ngai tawh ang.

Vangpui lam atang in Rivunga chu a rawn chhuak zui ve thauh thauh a, A mit chuan tleitiri zawng pah zel in a hmuh velah a hawisawn leh ang zuk thin lawi nen. A thiante chuan thil awmdan hria in anlo au der chiam a, Tleitiri pawh in thinlung a duhsakna nen a lo melh si leh sap thin. Thinlung lalnu te hma ah chakloh a mawilo tih a hriat bak ah, Chak ber nihna hlut zia a hre chiang a. A mawngkaw thang zawng zawng nen a a han sat ve meuh chu mipui pawh an e ve dual mai. Ni e, A pumraw ngaihtuah chuan a chuti teh chiam biklo a, Mahse a thinlung hnathawktu that dan hre velo tan chuan a sat na lam mah mah a ni e. Sihruam buanchak sah chen zet chu rawn sat ve in a phawi zawng a a kar zeuh bawk nen. Mite rin hlawhlo ber chuan mak tih leh en rawn a hlawh ta ngei e. Lawm tak leh hlim zet a tleitiri melh pah chuan a han nui vei tuih tuih a, A kalna enloh luat ah a thiante bawh rawk a a han in chhuih mai chu thawm a tha hum hum teh a sin aw.

Mipui hlimthawm a reh hnu chuan Zehtlang thirdeng chu a rawn pen chhuak ve boh boh a, A thir chherna banbul lian tel tawl leh a kut bawr hrawl hruap mai avang chuan a chung ah an mit a fu thup tawh a, A chem lah chu a ma duhthusam ang thlap a a chher ni in a hrawl hriau hriau kher mai bawk a. An khaw mipui te chuan lo au luih luih in anlo fuih sup sup a, A ni pawh in a nupui fanau te tan ti in a theihtawp chuan a han sat thla ngheng mai chuh. Rivunga leh Sihruam buanchak sah thlen chin chu a pel thla dawk mai a, A mawng a hnaih thla ther ther kher a sin.

Zehtlang lal meuh pawh hlim lutuk a rawn dingchhuak in a rawn ri zui hlut a, Mipui hlim kar a a nupui fanau te hmel hlim a va hmuh chuan a nui ve var var bawk. Lalpa in ka sepui chu i chan ngei ka ring tlat a ni a rawn tih zui phei chuan a thinlung a hlim hle a, Mahse a hnung ah sat tur dang anla awm ve miau a vang in a ngaih erawh ala ngam bik zan lo e. Rengkai lam aiawh pakhat alo chhuak zui ve leh a, An lal fapa fuihna thu leh tawngkam hman erawh in mi beng a verh viau thung.

Muka. I chak anih ngat chuan ka khawilo kalna a ka hnungdawl tu ber i ni tawh anga, Kan khaw pasaltha leh daingul nihna i nei hmiah ang. Hetiang ang mihring midang vang a zam thin ang hian awm ve hlek suh ti in an khaw pasaltha chu a melh rulh rulh a, An khaw pasaltha thinrim leh zak si chu a thu kun chal thung a. Ni e. Lal fapa chu nilo sela chuan a nghawng ah a lu hi a in vuau tawh hauhlo anga, Ani hmachhawn ngam hi Rengkai in an kawl heklo.

Muka an tih chu rawn phei thur thur in palen zawng ah chuan an pasaltha tiat dawn a ni ve a, Mahse tharum a nei em tih erawh a rawn lang thuai dawn e. Mipui reh duk karah chuan an lal fapa duhsakna dawn ngei tum in a han in kau penpawn a, Rum hawk khawp a sat in a chem chu a pil thuih mai. Mahse mipui te leh amah pawh in a mak an tih tur khawp in a chem chuan a hreuh thuklo a, A hma a sat ho te sahna pakhat mah a tluk heklo. An lal fapa in hetiang ang mihring hmantlak loh hlir hian animaw min zui le, Ka zin leh hun chuan ka thlang fimkhur tawh ang a rawn tih ri te chuan a hma lawk a lawmman a beiseina chu a chhilh chiang hle a, Zahna nen a thiante lam pan in an lal fapa mengtur ngun mai chu melh pawh a melh ngam tawhlo. An lal fapa lah chuti lek a an tlawm tur chu tuar thiamlo in a ang tun tun a, Rengkai lam ho chu ngawireng a ding in an zum zal hlawm.

Rengkai lal fapa ang thawm ngaithla tur a kalkhawm an nilo a, Infiamna kallai anih ang in a dawt a sat leh tur Sihruam lam atang chuan palian lemlo mahse taksa nghet tlet tlawt chu a rawn kal ve thuai a, Ani hi Sihruam buanchak pahnihna ni in en a a lenloh ang ai hian tha a nei nek thung. An buanchak sah chen tal a sat tur ani ti a infuih mawlh mawlh in a chem chu a hum nghet sauh sauh a, Hnar vang hawk a thaw la in a sat thla ve ta fua e. Mipui lam lo hawhaw dar dar in an han enchian chuan a lo sat thuk nek mai a, Mahse ani meuh pawh in Zehtlang thirdeng chu a tluk ta biklo a ni.

Thirdeng nupui te pawh in anpa sah chen a sat an awm ang tih hlau a thaw dep dep a lo en kha an ni a, An thil hmuh avang a lawm tih hriat zet hian an nufa ho chuan anlo dingkhawm rial hlawm a. Tunah chuan Vangpui lam chiah sat tur an awm tawh a, A pumrua ah nise a te ber anih avang in an beisei sang lemlo maithei. Mahse ani hi Vangpui keite Lalchunglura a ni miau mai a, Enge a an kan hre ngei ang.

Inring tak a ding in a kut ah a chil a chhak pharh pharh a, Inring tawk zet a ding kak hah in a pa lam chu a han melh zak a, A pa pawh in lu lo bukkhum nghat in a fapa chu a ringtawk hle a ni. Zehtlang khawnbawl fanu hmeltha chu a lo thaw dep dep a, A rilru chuan beisei sanglo mahse a duhsakna erawh chu tlangval tan chuan a hlan fel hmiah thung. Thawm reh thiap karah chuan a chem lek kang in a zak a kau hawk a, A chem vaithlak rual deuh thaw chuan thirdeng nupui leh a fa te va hmu in a tha pek a zuai zo ta. Chumi te nufa ho in an pa leh amah an melh chhawk zak zak leh an hmel a hlauhthawnna awm kha a hmu hman vek a, Anni tan a dar leh sial hlutdan tur lah a hai heklo. A awmdan hmutu mipui an thum huk lai chuan a chem chuan sawntlung chu a ek thla zar zar a, Mahse thirdeng pa sah chen chu sat zolo in a hnaih ber tu erawh a ni ta.

A thian ten mak tih hmel zet a an rawn en a hmuh chuan a nuisak a, Amit in thirdeng nupui te kam chu zai ralh in a thiante va hawi ve lai chuan an hlim lutuk chu anlo inkuah khawm tal tal a, Chu ai a hnehna ropui chu a awm hauhlo tih hretu pasaltha pahnih te pawh thinlung tak a hlim in an thianpa mizia chu an hrechiang dawn chauh ani. A sah chen rawn entu mipui chu an ri zui luai luai a, Thapui thlah thut a chem thlak anih zia an hai loh avang in a tha kha thlah lo sela chuan thil thlengtur an hre vek si.

Thirdeng pa pawh in thil thlendan a hmu chiang ina lo hrethiam ve vek a, Vangpui keite tih awm tak ilo ni e. I zarah ka nupui fanau hlimna a thleng a, Ka mualphona tur leh an beisei bo tur a reh ta e. I hming hi ka thlah te thleng in an theihnghilh tawhlo anga, Katan phei chuan ka chhungte hlimna avang a ropuina chan huam mihring hi ka thinlung ah a nung reng tawh ang ti a lo phun sep sep in a chhungte chu hlim tak in a pan zui ve ta a.

Arpui lungchhia sanghar lunglawm tih zawng zawng chu a thleng dik a ni ber e. Zehtlang nula pakhat chuan thil nihna diktak hrelo in pawi a lo ti vawng vawng a, An khua chuan chak ber nihna chang mahse a hlim a kim ve mawlhlo. He tlangval hi an runah vawikhat te pawh alo la lawi chhin eih lo a, Chuti chung chuan duhsakna tinreng nen a thinlung ah bu a khuar nghet tulh tulh thung . Ani chauh hi lunglawm kimlo ani lo a, Rengkai lam hlei hlei chuan hreawm an ti awm e. Vawiin ni ah hian hlimna leh inchhuanna tur reng an nei lo a, Midang te hlimna tawmpui ve theilo an lal fapa ngat phei chu a tum vuau mai.

Nachin mai a an pasaltha leh buanchak a lo diriam kha a inchhir hman ve hial tawh a, Zanin ah inbuan ala awm dawn bak ah tunah in saihrui pawh ala awm leh dawn avang in a thapui a chhuah duhlo ang tih te chu a hlau ve deuh rum rum mai. Tin a tuk leh lamah Thingluang zawh a inbeih a thlen vaih phei chuan a ropui hun tur ni a hria in an khaw pasaltha hi thingluang zawh ah chuan helai velah tuma tlukloh a ni ve tlat si a.

Chhunchawlh nei in mahni in lam leh thlenin lam an pan sang sang a, Bal leh pangbal te ei in infiamna chungchang an sawi zui tlangpui bawk. Vangpui keite chet dan kha mak an ti vek a, An khaw thirdeng chak zia erawh an sawihmaih phal biklo. Zehtlang lal leh a khawnbawl te, Khawdang lal leh a khawnbawl te chuan Vangpui lal fapa chetdan chu an sawi zui liam liam a, Chhan enge maw tak a awm ring in an rindan erawh a in ang hlawmlo. Thenkhat in a ban a dawk palh emaw, Harsatna thut a nei anih an ring a, A then rindan erawh a ni biklo. In saihrui pawh ah la hmabak avang chuan naupang ho in an nghakhlel tawh kher mai a, Heihi a hmuhnawm in an tal khuk rum rum bak ah an tluk nawk nawk thin avang te pawh a ni mahna. Inbuan nen an ngaihsan dan a danglam teh chiam lo.

Ni in vanlaizawl a pel deuh tih chuan anlo kalkhawm leh sang ang a, Har mei khu leh sa rim nam chuk chuk nen. Naupang ho vawk phing pet a lo tal pawl leh nula ho biang tai tiktek a lal mual an mawi hmuh chu a nuam khawp ang. Lal leh khawnbawl te pawh rawn thleng tawh in infiamna tan tur in an in peih leh ta der mai. Khawtin aiawh tur te chu an rawn chhuak sap sap a, In hraisui pawh hi khaw thenkhat tihdan a in ang lo a, Thenkhat chuan inhliam leh intihpalh ven thu ah a in pawt tur te kawng ah hling in an tihtir mai a, Thenkhat erawh in an nghawng ah bat in an kapkar ah lalut in an in pawt tiang tiang tawh mai thin. Tuntum ah pawh hian nghawng ah ngei bat a in pawt tur an ni.

Vangpui lam chuan an khaw aiawh a la ding ve miahlo an rawn dinchhuah tir a, Pa bem leiluai leh tawr tha zet mai chu rawn kal bung bung in a mah en chuan mak lam a kal mah mah zawk. Tawng li sawhmuk ni awm tak hi a ni a, mahse a telna tur atan chuan amah ang chu an tha viau in a rinawm lawi si.

Vangpui leh Sihruam an in hnuk anga, Rengkai leh Zehtlang te in tum leh in a chak zawk zawk chu an in tum leh mai dawn a ni. Tlangval pahnih in lo buaipui in an nghawng ah chuan an bahtir dun thuai a, Lehlam in hawisan tawn in an in ring dun ta kher mai le. Sihruam lam atang hian an buanchak palian a chu a ding to luah mai a, Tlangau in hruai lai tak ah vuan in an in peih tih a hriat chuan a han to che ta zauh a, Chutah haw haw leh theihtawp chhuah in an tawng dun ta thial thial mai le.

Sihruam lam chuan hnuk kal deuh dawt dawt in an mau kham a hnuk thleng tep a, Mipui ho au thawm ah chuan Vangpui pa chu rawn tang thar in se patuai ang mai chuan a tumpui pa chu a hnuk let zui ve ta hawn hawn a. Hmuhnawm ti leh awrawl tawp tawp a lo au in an ri hut hut a, Lal leh a khawnbawlte thlirna dal khawp khawp te chuan anlo ding leh tuau tuau mai thin. Chunglura chuan an khaw pa chu han au lauh lauh in, E khai i sial kaih tur in a nghak che nia a rawn ti meuh chu a tang mar pung pung mai a, Palian zawk chu hnuk kal dawt dawt in an mau kham pel rawk a hnuk in a mah lah chu a thaw vei ang hluam hluam a.

Thawh thum ah thawh hnih chak zawk zawk chu a dingchang tur an ni a, Tuibur hmuamda vel an hah chawlh hnu chuan rawn dingchhuak leh in an khaw mi te ve ve chuan anlo fuih thar sauh sauh a, Sihruam buanchak pawh in tlawm a tum tawh loh hmel viau e. An tan hmun te siam rem a in peih in an han che dun leh chu an tanhmun a khawk tawp tawp mai a, Mipui hmuhnawm ti lah chu an ri teng tung mai bawk a.

Vangpui pa chu a tha a phur laklawh nge ni a, A pian ken ang hian a chak ru riau zawk tih pawh hriat ni suh. A mah ang tiat leh amah ai sang zawk chu tha pe mumal hman leklo chuan a hnuk kal leh dawt dawt a, An mau kham pel dawr a a hnuh bak ah a hnuk thal huang mai a, Mipui chuan lawmna kut beng in an aupui dur dur hlawm a. Lal te meuh pawh hlim a rawn au lung lung in Vangpui mi chak chu an bawr luih luih hlawm.

Tunah Rengkai leh zehtlang an in pawt ve anga, Zanah inbuan ropui a thleng ang. wait for 23

Ka buai tih sawi ziah hi a nuam biklo a, Chutih rual in min indan tur leh min pui tur a ka phut lo ang bawk che u hian, Ka buaina leh ka ziah sei hman bikloh zia min hriatthiam sak erawh ka ngen leh e. A tawi ti ti chu setana pawl hahahhaha

[Ngaia]

VANGPUI KEITE LALCHUNGLURA. ZIAKTU K VANSANGPUIA ( sangpuia khawlhring) EPISOD 23

Episod 22 Recap Tunah Rengkai leh Zehtlang an in pawt ve anga, Zanah inbuan ropui a thleng ang.

Rengkai leh Zehtlang in hruipawh chu Rengkai lam an chak ta zawk hlauh mai a, Ti chuan Vangpui leh Rengkai chu in tum tur in an in ring ta ran mai a. Lal fapa pawh in a pasaltha chu fak leh hluam hluam in a mizia a thlak ve phian a, Tunah vanduai mah la zanah leh naktuk lamah i i che tha dawn a lawm ti in a tawngkam chhuak ni awmlo tak hian a ti ve surh surh roh a.

Mahse Rengkai khual meuh pawh in Vangpui tawr tha chu a khan ta biklo a, Vangpui lam in lawmman la in tlailam ruai chu puar el euh in a kil ta zawk a. Zanriah ei lai atang tawh in Rivunga chu a za leh chuk tawh a, Mahse zanin chu a za hlawhtling dawnlo a nih hmel. A thiante hian changdang kan zai anlo rel diam tawh a, A thiante hnung a zui dawn nge a mal tlat ang tih chu ngaituah tham fe a ni.

Zanin chu ti a a rawn rik hlut chuan anlo nuih dun tha mai a, A thiante mizia hre chiang tawh tan chuan thil awmdan hairual a ni talo. Mahni hmasial ngawr ngawr a nilo a, Inbuan lai vela a thiante chetla hmuh a duh ve bawk nen. Lengi run kai meuh chu a remlo a, Mahse zanriah eikham leh zanlam inbuan karlak ah chuan an nuthai tur te run lawi hun an nei mauh si a. Ni e, Vawitam mitmei a lo hmuh tawh bak ah beiseina nen a lo thlirtu an pan ve a ngai tawh dawn in a lang e.

Tlailam zanriah eikham ah chuan ala hma bawk nen an tei siau siau a, Lengi leh vala te pawh an khaw tlang ah leng in lenlai an chen a ni e. Mahse Rualchhingi erawh rilru khingbai tak a riahrun bel in sekrek a khawih neuh neuh a, An khaw chhak tlang a lenpui a sawmtu a hmai hauhlo. An luhka rawn ri rak chu beiseina nei tawhlo a thlir in a alo chhawn ve ngei a, Mahse an khartung rawn namtawlh a an run lawi te chu tu te nge ni ta le.

A rinloh leh beisei loh lutuk hmel a hmuh chuan lo tawng mai nachang pawh a hrelo a, Tawnvela chuan tawngkhalh zung zung in nula fing tih tak ah a in siamrem thuai reng a. Thinlung hlim veng veng a lo kawm in a lo be siam siam a, Tawnvela hian rim tur ti tlat lo sela chuan Chunglura hian len a ti lemlo. A chhan pawh an khaw khawnbawl fanu khuavang note ni awm tak khan a rilru a luah fo thin a, Eng biahthu mah la hlanlo in la thlunglo mahse a rilru a pe deuh emni a tih theih tlat a ni.

Rei pawh anla thu hmanlo tih ah chuan tlangval dang anlo kal ve sap sap a, Mahni in lama zanriah ei ngailo leh tih ngai awmlo a, Zanlam inbuan en chiah hmabak an nih tawh avang in an leng khawthawng tlang hlawm a ni. Chutih lai chuan tlangau alo lang ve hlawl mai a, E khai ka rindan chiah a nimai ka ti. Kan khaw nula hmeltha leh rualkawm thiam hi tumah in rimloh in an chhuah ngailo a nia rawn ti lut bawrh bawrh in a nui huah huah a, Rualchhing zak sen tan tan hmelthat zia chu hmuhnawm a tling awm e. Pa Suaka te mai mai thin hi aw,, Khual val an awm ve si a, Kan phuloh a min fak te chuan an khaw lam ah an nula te nuih a za lutuk a nge tih pah chuan Chunglura chu a han zai ralh mai a, Lengi i tawn ah ka uai zo ta tih mai awl tur zet hi chu a ni e.

Tlangau chuan Chunglura leh Rivunga te chu rawn ko in, Vangpui lalpa in a hmu duh che u a rawn tih chuan anni thiandun pawh an tho thuai a, Tawnvela ber pawh chu rawn dingchhuak ve in a patling ber maltlat zawng a diklo e ti in an chhuak ho ta dial a. An lenna nula chu hmeichhe a a nilo a, Sumhmun ar lawitur chhuanlam a rawn thlah in Chunglura thlawp zaih chuan a rawn ding a, A hma a kal hriat tham lek a zawi leh fiah hian he thu hi a rawn sawi ta ani. Mahni khaw tan chu a na nameuh mai a, Mahse chak tur a kan duh te tan erawh kan tang ruh viau zel. Tu emaw chuan ka thusawi hi hria in ka hming in rawn bei hram teh se ti in inchhung leh pawnlam mi tan a rinhlelh awm hauhlo chuan a kalkiang zui thuai a, Chunglura pawh hlim tak a nui sak in a thiante chu a zui ve ta nghal a.

A thiante leh tlangau a um phak chuan anlo nuih tha hlawm a, Anih lah a ngaihna hrelo zet a nui ve tawp in lalin lam chu an pan tham tham a, Tawnvela chu koh a nih veloh avang in an in lamah peng in ani pawh in tlangval te fuih tur a zawlbuk lawi angai ve tho mai. Lalin an thlen chuan anlo la ri laih laih a, Mahse Vangpui lalpa erawh leihka pui lamah lo thu chhuak in a fapa te chuan an pan thuai a, A pa chuan lo be lemlo chuan an khaw lam chu a thlir vang vang bawk a. Rivunga hian lalpa hi a nel in a thian tluk in a fiam ngam a, Lalpa pawh in a fapa thian anih bak ah a ngainat ve avang hian an in be bawrh bawrh thin. Kha, lalpa chu i lungleng tawh a nimaw ti a nui vur vur in a bulah chuan thutna an rem a, Lalpa pawh lo khi ve tui tui in a ni deuh tawh in ka hria alo ti tha ve mai bawk a.

Thuthmun te rem fel ve in an titi laih laih laih a, Vangpui lalpa vungtawna chu aw thian kharh kharh leh thutak zawk a rawn tawngchhuak in, Heile, Kan hma ah kan khaw hmingthat theihna tur leh leido thleng a ti tim thei tur kan hmachhawn dawn a, Inbuan mai bak ah khawmhma chem hmang a in beihna ah hian in theihtawp chhuah ula ka ti takzet ani. Rivunga hi ka ringtawk in ka thlamuanpui em em a, Chuvang a heta i rual a kal ve pawh ani bawk. Chutih rual in ka fapa pawh a hming a khualkai i ni ve ta der mai a, Zanin leh naktuk a in chet dan hian kan khaw hmalam hi thui tak a hril theih dawn avang in theihtawp chhuah tawh ula ka duh ani. Vawin lama ka u te khua i hlahthlem kha ka hailo a, Ka lawm in ka chhuang em em bawk che. Chutih rual chuan kan hmabak infiamna awm tur ah erawh in thatawp in chhuah ka beisei ani tih lo hre rawh u a han ti charh charh a, Chunglura te thiandun pawh an ngawi ran mai.

Rivunga zawk chu rawn tawngchhuak in, Kapa,(lalpa hi kapa ti in a ko ve thin bawk) Keini a kar a kan laka rinna i nghat hi kan lawm em em a, Chutih rual in i mit kan tlunglo ang tih kan hlau hlello e. Engpawh nise, Kan theihtawk bak kan chhuah in kan tang anga, Kan khawtan leh keimahni tan kan bei ngei ang. Khawdang lak a tlawm leh hnuaihnung zawk ang a lan hi kan duh bik hauhlo a, I lalram tih hmingchhiat leh kan khaw ti hminghliau zawng a chet kan tum hauhlo e a rawn tih chuan lalpa pawh a bu ve nghut nghut e.

Chutia an in kawm mawlh mawlh lai chuan tlangau alo au lauh lauh a, Lalmual pankhawm tur leh naupang ho te chu thingnawi rawn keng a, Favai chhung tur a au in thler tin a fang zui nghal zung zung bawk a. A au zwh hma hma chuan a au thawm hre hmasa tu naupang te chu an tlanchhuak sung sung a, Naupang mai nilo in nula leh tlangval pawh in kalrual a an khaw aiawh tu te tan pah a lengi te bula thut tum in an hmanhlel zui nghal hlawm bawk .

Karlo ah lalmual chu mipui rawn pungkhawm in an khat zui nghal thuai a, Hmunthum ngawt ah mei chhep in mipui tan a sa lo leh hmuhchian theih tawk tur chuan an vur reng a, Khaw pali te pawh chu mahni tanhmun tur ah awmkhawm in khawtuak ho pawh in an lo hual tiai tiai bawk a. Zanin chu an hmuh chak leh an rilru a zawhna awm te chhanna an hmuh hun tur a ni a, Mitin mai chu an nghakhlel in an phur tlang em em tih a lang reng a, Mahni khua theuh tanna rilru bak ah mahni khua lo te pawh an lo tan fir fer awm e.

Lal leh upa te an rawn thlen a, Fuihna thu leh dan leh dun te an sawi chian hnu chuan an thutna tur an luah thap a, Tlangau pawh zu thli reng reng a buai in a vir vat vat bawk a. Intum tur te chu an rawn chhuak sap sap a, Khawtin aiawh te chu pahnih theuh a rawn chhuak in Vangpui chu an te fal leh nalh tawh a, A pumraw lianzawk Rivunga pawh a chik rawt tho mai. Lal hmachhawn zawng a rawn ding in an rawn chibai siau a, Chutah tlangau hmawlh ken chu pawt in a sei leh sei, A tawi leh tawi an in tum dawn a ni. Sihruam leh Vangpui an in pawt fuh a, Rengkai leh Zehtlang in pawt fuh in mipui chu an haw haw zui nghal dur dur hlawm e.

Intum hmasa tur te chu pawt fel leh in, Rengkai leh Zehtlang an ti hmasa ber dawn a, Zawlbuk inbuan ang mai mai a nih dawnloh avang in an khaw aiawh a a chak chak te thlangchhuak anni bawk a, Khawtin te chu an ri hluah hluah a ni ber e. Zehtlang buanchak chu rawn chhuak in a ding kak tau mai a, Rengkai buanchak dawttu pawh rawn chhuak ve in an in hmachhawn zui chu a ni ta mai. Tlangau chuan an in ring em tih a fiah zet hnu chuan a ahan au that a, An puan tlang ve ve a in chelh in an in elh zui ta nghal ngian ngian mai.

Rengkai pa chuan hnehsawh zet a phawi in a chawi zui vaw vaw a, Mipui leh Rengkai lal fapa thawm that dan chu pui tak ani. Thawh thumna thleng pawh a a hneh takloh ah chua Rengkai chu an chak ta phawt mai a, Tunah chuan Vangpui leh Sihruam chet ve a hun ta e. Rivunga chu lo chhuak in a thianpa a nuih sak a, A lai tak ah chuan ding in an lalpa melh zauh pah chuan a han nui var var a, Sihruam buanchak pahnihna pawh rawn chhuak in a tawr tha zet chu a rawn phei pui muah muah bawk a.

Pasaltha leh mi huaisen te hian palian leh satha an hlau ngawt lo a, An tha a chhuah theih chhung chuan a tak ramah tlawm an tum ngailo. Rivunga pawh hian a tumpui hi a tiatlo tih a in hre chiang a, Mahse tinther tiat pawh a hlauhna leh zamna a neihloh mai bak ah an lalpa hnen a a sawi ang ngei a tha tawp chhuah a tum ve tlat.

An puanven ah in chelh in an tha a mar dun nghal at a, Mipui thawm reh duk karah chuan an lungphu ri chu a hriat theih hial in a hriat mai. Tunah le tih thawm a awm rual chuan an tang dun nghal phat a, Mahse Sihruam pa chu thapui thawh thut ah chuan alo chak nangiang mai ni in, Rivung a chu chawi in a lek kawh vu vu a, Nghat duh silo leh bin duh silo chuan a virkual tir ruai ruai a, Mipui thawm chu a tha hum hum kher a sin.

An in nghat fel chu Rivunga ngaihdan a nilo kher mai a, Inbuan thiam leh chak ni a in hre ve a ni a, Chulai kar a chutiang a sawisak a tawk chu a lawm hauhlo. Mahse a tumpui pa beihdan tur a hriat chhuah mai bak ah phuba lak dan tur thleng in a hrethiam nghal vek a, Thawh hnihna ah chuan chetsual a tum tawhlo kher mai. In panhnai a in pawmchilh in an puan tlang an in vawnsak ran a, Tlangau au rual chuan a hma ang tho a chawi leh tum a thapui a rawn thawh tur chiah chu dai khalh in amah ah chuan a in kherhbet zui zat a, A tumpui pa chuan a chawi lui anih chuan amah zawk chu chhuat deng a tlu tur a nih in hria in a tang na ngam ta haub lo mai le. Chuti lai remchang chu la in a ke chuan lei ah a in khawt thut in a tumpui pa chu a pir zui nghal vawk a, A ni lo in ringlo leh tharumah a hneh ve tho avang in a mah a tih ang chiah chuan lei silo leh bin bawk silo chuan a virkual pui ve ta reuh a nih kha.

A hma a thil thleng lo hmu tawh tu mipui chu a rik hian an ri hut hut a, Tleitir chuan a thiannu chu lo sik neuh neuh in a lo hlim em em bawk. Vangpui lalpa pawh khi suk in a fapa thianpa a rintawkna chu a ti sual dawnlo tih a hria a, Rilru thlamuang zet a en in a zu no chu a in seki van van e. Sihruam pa chuan lei a deh hnu pawh chuan lawmlo tih hriat zet a hawi vual vual in a tum sen tul mai a, A thawh thumna ah chuan a tumpuipa chu leichar thleng rawk a den a tum khawp e. Mahse a tum a hlawhtling a ngemaw.

Rangtak a in pan leh in an in vuan dun leh ran a, An mitmei a no lo dun hle tawh a, An hmabak ah chuan an khaw aiawh an nihna a lang dawn reng bawk a.

Tunah chuan in ring penpawn leh inhnehtawk thial an ni a, A chak zawk zawk chu hnehna changtu leh khaw chawimawitu an nih tawh mai dawn avang chuan an fimkhur dun takzet tawh. Tharum ah lah an in chawi dan leh an in tih dan ah an theihna an in hre chiang ve ve tawh a, Fimkhur tluk chu a awmlo reng a ni.

Puan tlang phelh hawk khawp a in pawm in an tha a khur dun nghal der der a, Tlangau awrawl chhuah rual chuan an thatawp chhuah in an taksa te chu a mar puar nghal pengpung a, Mipui pawh in thawm chhuah lo in thaw dep dep a lo en in a chak tur zawk an hre thiam mawlh lo. Kha le keimah Sihruam buanchak ka ni ngai e ti a rawn au chuan boruak a ti thawl hawk a, Mahse chu au thawm chuan eng thlenpui lo in a tumpui pa chu a chawikan phah bik hauhlo. Rivunga chuan a tumpui pa tharum neih dan a hriat chian em avang chuan fimkhur a ngai tih a hria a, Vangvat ang mai a bet leh savawm ang mai a nawr si chuan remchang a hmu ta hram e.

Sihruam pa in a tha tawp chhuah a a zuai rual chiah chuan rawn ti ve phut in a tumpui pa chu a bin phar huang mai a, A lawmna leh a lo entu tleitiri lawmna bak ah mipui hlimthawm that zia chu rapthlak khawp ani. Zehtlang lalpa leh Vangpui lalpa meuh pawh rawn dingchhuak in an rawn au hluai a, Mahse lal an nihna hria in an thu ve leh mai bawk a.

Mipui sahawk leh boruak a reh meuh chuan Rivunga pawh anlo vawr lauh lauh hlawm a, Sihruam buanchak ber erawh ala nui sang thung. A tan chuan an khaw buanchak pahnihna tumtawk chu a nep tih a hria a, Hlauhthawnna nei miahlo chuan a lo hawi valh valh thung a.

Tunah chuan Zehtlang leh Rengkai in hmachhawn a lo hun leh der tawh a, Rengkai lal fapa hlimdan ah chuan a mi te a ringtawk ve tawh hle tih a hriat e.. Sihruam lam atang in pakhat ala dam a, Rengkai erawh pahnih anla dam thung. vangpui pahnih anla dam a, Zehtlang pakhat nen. Tu khua nge chak ber in hlenchhuak thei ta ang le.

Ti chuan Zehtlang leh rengkai bawk in tum leh in a dawt ah Vangpui leh Sihruam an in tum leh anga, Chuta an chak dan a zir in an in tumkual tawh ang chu. Wait for 24

An in buan thleng har, Chuti khati lo ti lo ula. tuntum chu muangmar in aw. chu bak ah ka hun neihloh azar ah episod a tam phah ani e.