VANGPUI KEITE, LALCHUNGLURA By Sangpuia khawlhring 1-31

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: VANGPUI KEITE,LALCHUNGLURA.. ZIAKTU K VANSANGPUIA. (Sangpuia khawlhring). EPISOD 1-5

Unread post by Ngaia » October 16th, 2017, 7:28 pm

VANGPUI KEITE, LALCHUNGLURA. ZIAKTU K VANSANGPUIA. ( Sangpuia khawlhring ) EPISOD 6.

Episod 5 Recap. Chu sa thawm chu rawn hnai zel in a rawn pawh tep a, Mahse tibuai tu awm tih hriat zet hian a hram hrawk hnu ah chuan thinrim zet a in hrosa in a kalsawn ta tih chu a thawm atang a hriat mai e.

Chunglura chu fimkhur leh tha thlah hlek lo in a han sangmar a, Ko pang ah chuan in ham chhuak in a thianpa chu a au zui nghal thuaina, Mahse a thianpa chuan rawn au ve chiah in a ngaituah awmloh thu leh rawn lawnkaina tur a zawn mek thu rawn a rawn sawi chuan a hahdam ve huai huai mai.

An buk an pelhna a la hla tehchiam lo kha ani a, Mahse di hmun leh tlangsam buk a tam a vang in eng sa nge rawn bei a, Rawn ti thlabar tu a hre hman hauhlo a, Thawm nei hleklo a a rawn che thut mai leh a tuan that dan en chuan sa tenau mai chu a nih a ring silo.

A thianpa lo nghah pah chuan a han hawi kual a, A rinloh leh beisei loh tak a hmu leh ta e. A piah mai ah chuan keite lian zet zet pahnih hi anlo bawk dun rial a, Hah hmel tak a thaw dun hlap hlap leh ang hlawi hlawi in anlo hawi phei a an sa beih tlanchhiatna lam chu an thlir dun rauh rauh bawk a.

A ngaihna hrelo leh lawm ru ang reng tak chuan a en dun zauh zauh a, Mahse a thianpa a rawn vah chhuah dawn chuan kalsawn ve leh in an pilbo zui thuai a, A kalna apiang ah an veng in an awmpui zel tawh dawn tihna emni le.

A thianpa rawn vakchhuak chu a rawn thaw hluam hluam a, Ekhai thian a. Tlem a tlem ah lawmnu te kanva mangtha teuh ve le ti a fiamthu rawn thawh pah in a rawn nui var var a, Heihi a ni a thianpa a ngainat chhan chu. Hun harsa leh hreawm ah pawh a thim zawng a thlirlo a, A eng zawng leh a zangkhai zawng a a tawngchhuak thei zel hian a ti chak thin a ni.

Thiana, Khang te chu aite chhinna tur ang lek a nia, I la thutak hma mah mah lo maw ti a lo fiamlet in a silai te chu a tuai fai pawk pawk a, Eng sa nge maw ni teh hrep chu le. Khawnge i han chhui zui dawn teh ang tih leh thawh chhuah chu rual zui nghal in sa hnu chhui a tan zui nghal chu a ni der mai.

Rivunga chu la thaw huam huam chung a rawn tho chhuak in a rawn zui ve mai a, Thiana eng sa nge maw ni reng reng le. Khati teh chiam a a rawn chet le ti a phun nang nang in a taksa bal te chu a tuaifai pah mawlh mawlh bawk a.

An sa hnu chhui chu a lang thei mang hauhlo a, Mahse Chunglura tan chuan vanneihna ni a in hawng leh ta. Chu sa hnu chu keite hniak in bawh in an chhui ve zel a, Keite hniak chu ruahsur hnuai a vawkhniak ang mai a chiang in a hmu thei thung si.

Chawhma zet an kal hnu pawh chuan anla pawh theilo a, Mahse vanneih thlak tak in an lui kanna tur ah chuan thisen far tlem chu an hmu nawlh mai a, A hma zawng khan engtin nge chu thisen chu an hmuh loh theih a, Engtin nge a thup theih tih erawh hriat phak bak a ni ta.

An chawfun te chu thet in an bar nel nual a, Zo tui thiang chu dawt khawlh khawlh in an in phih harh sawng sawng a, Kal zai an rel leh ta.

An sa pelh lai chuan a hniak leh a hnu a thup lo tial tial a, Mahse fimkhur a ngai tulh tulh thung tih erawh an hai lo dun hle. A chhan pawh engdang nilo in a hniak thup zolo a a khawsa anih chuan a hliam in a ti buai tawh hle tihna a ni a, Chuti anih chuan a hma let a kawlh in a thinrim taw dawn tihna ani thung si a.

Thawmdim leh fimkhur tak a kal zel in an hma lawk ah chuan an sa pelh pawh a awm tawh tih an hria a, Chunglura beng chuan an hma lawk a thli thaw in a rawn beng thil che vel thawm a hriat chuan a thianpa chu kuaiher sawk in a sir lamah a theh per dawr a, Chutiang em em a tha chak leh rang chu Rivunga chuan a hre ngai hauhlo. Khatia a thianp a thehper lawp rual khan a mah pawh persawn nawlh in an mahni rawn beitu lak ah chuan an him hman hram chu a ni e.

Chu ramsial lian leh thothang tha thin tak chuan a mah peltu te a beihna lam ah a rinloh tak in keite nupa kut a tuar a, Pakhat in a dul ham thler in pakhat in a nghawng a seh hman a, Mahse a thintlak hnu khan rawn beizui lo in a in saseng thei hram kha a ni a, A tir ah a hliam kha na lua lo mahse a mah an rawn chhuizui reng bak ah a hliam chu a zual in thisen a hloh nasa tial tial a, Hetia umzui reng a ni hi a lawmlo in a nih tue ang nih mai duh tawh in a rawn beilet ta hial reng a ni e.

Rangtak a in her leh in Chunglura chu a rawn thlur bing a, Mahse A hliam te belhchhah tur in rawlthar ngenmu chuan a chaldam ah tak rawn deng in a nghing lawih a, Tha khur dur dur leh a hliam chu pal daih tum lui tih hriat zet hian a pen buk buk a, Mahse a hliam neih sa tawh te bak ah a thisen hloh nasat em a vang chuan a khur dur dur a, Pen hnihkhat pen leh buk buk in a tlu meng ta kur mai a ni.

Rivunga rawn tho chhuak chu a kuk rawih rawih a, A thianpa pawh ngaihsak leklo chuan a thianpa sakah mawlh chu a ni a buaipui ni. A thianpa hian sakhi te chu a kap ve fo tawh a, Mahse sa lian pel a anla chhuah loh bak ah an vawikhat ramvahna ah pawh ramsial ngei mai chu a thal ta chu a ni a, A kap tu ai mah pawh in a lawm zawk in a hriat.

Chunglura chu rawn tho chhuak in a thianpa hlim chu a rawn khap thuai a, Lawm pa. Ngenmu khat chaub dawng a ni a, A la hlauhawm phaklo mawle. Nang lah hi i sahawl chiam zel mai a ti in a sa kah thluk chu melh reng chung in a silai a sawh chat chat a, A mit sir chuan an chhak lawk a lungpui sir atang a rawn thlir reng tu keite pahnih chu a hmuh hmaih hauh thunglo.

Chumi zan a an riahbuk boruak chu a zangkhai in an ri laih laih a, Sa repna tuahthing te chu an chhawm hneh mah mah emaw tih mai tur a ni. Zing khawvar dawn hnaih thleng chuan zunram thiar a piang in am chhawm zel a, Zankhat thilthu ah sarep pangai tluk thawthang in an ur hman chu a ni e.

Chumi tuk tukthuan ei hun velah chuan Vangpui khawdai ah chuan khawilam khualtha nge khual chhia tih hriat loh pali te chu an rawn lang tham tham a, Hetiang hun a khua rawn lut tur chuan khaw kar kawng ah zan an riak ngei ang tih chu hai rual a nilo. Khawchhung rawnlut in lal in an pan ding nalh hlawm a, Khaw mipui feh kaltur leh alo hmu tu te chuan an en duh in an hmel a tang chuan thu tha keng ang lo riau hian an hre hlawm a.

Lal in ah lut in an pilbo thuai a, Mahse tuibur hmuam da pawh tlinglo ah chuan Vangpui lal in atang chuan patling thinrim rawl rawn chhuak in an ri nuai nuai a, Khaw mipui la awm te chu rawn tlan khawm in an lal tualzawl ah chuan an pungkhawm ta laih laih a, Tlangval te an kalbo vek vang erawh chuan an tlem rem rawm hle thung.

Rang tak in ka lal in leh ka khua hi chhuahsan ula, Palai chung ah kut thlakloh tur tih chu zawmlo in lal nep tak chu ni ila chuam dam in in chhuak hauhlo ang. Ka khua leh tui ah leh ka lalim rawn dai in in duhdan a ro rawn rel in tum ngam vei a ni maw. ka pasaltha te ka chhawm chhuah tir hma che u hian a rang a rang in chhuak nghal rawh u ti tawn tawn in Vangpui lal zaidam thinrim thawm an hre ve ta tlat mai.

An khual te chu an diau bik vaklo nge ni a, An lalpa hi an rawm zah vaklo zawk. E khai. In za nufa lek in chutiang chuan kan lal thu leh hla ilo hnar in ilo chhang amaw. I thu tlukna hian i khaw chhiatna a thlen a nih pawh in i mawh a ni e. Kawlhawk khua kan ni ngai e ti in an rawn chhuak tau hmak hmak a, Mipui te chu ngai pawimawh lo zet a kalpel in an thinrimna chu an ang chhuak pah tawn tawn bawk a.

A lu nung tamlam nih vang a mi sa kahsa chhuhsak duh khawp a pasaltha neilo leh themtlaw te chuan enga ti nge a tirh chhuah ve ni. He an thil tih avang leh an lalpa tawngkam avang hian inchhir in ban a la chen ngei ang le ti in chu khua chu a ranglam in an chhuahsan thuai a, Khawnbawlte hmaizah lo phei sela chuan an pasaltha hruai pahnih te chuan chet zui hial an duh ta ve ang.

Chu thil thlen a ni tuk tlailam ah chuan Kawlhawk lalin ah chuan khawnbawl leh lal te chu zu no dawm in an thu thap hlawm a, Tun tlai hi an palai te hmel rawn lan leh hun tur anih avang leh dawih aw an hriat hun tur a an ngaih avang a lo awmkhawm a an lalpa fak leh an khaw dahsan tum a kalkhawm an ni mah zawk. Palaite pawh chu an beisei ang ngei a rawn lang in an rawn lut thliai thliai a, Lalpa chuan lo chhawn in tlangaupa chuan hah zu a lo zuk thuai thuai hlawm a.

Kawlhawk lalpa chuan a khawnbawl leh pasaltha te chu rawn bia in, Chu, Kan khawper tiat lek awp ve tu lal chuan engtin nge a lo dawnsawn hlawm che u a. Kawlhawk khua te thin an ti damlo tih an hriat chuan hlau in anlo pha nasa viau lo maw ti in beisei lawk dan neisa ran chuan a han zawt a, Chu chu chulai a upa dang ho beisei leh rindan pawh a ni ve tho mai.

Palai a kal te zing a phanchang leh upa ber chuan a zu no chu a han thawk khap puap a, Ummm tuntum chu lalpa zu mah nise min chhawk mang hleklo mai. Kan palai na leh kan thu hawn in a zirlo deuh a ni fa hmiang a han tih chuan a lo awm te chu an phawk hru a, Lalpa hlei hlei chu mak ti leh chutiang thu beisei lo ber zing a mi a ni awm e.

Ka khawnbawl thusawi chu ka hresual ta emni aw" Eng thu leh hla hawn a rawn lungnilo nge maw in nih ngai chu le. Vangpui lal te thu rolum chu hriat a va chakawm ve ti in a khawnbawl te chu a han melhkual a, Khawnbawl te pawh chuan an lalpa ngaihdan tawm zet hian anlo tuihnih tliar tliar ve bawk a.

Palai te zing a hotu ber chu rawn tawngchhuak in, Lalpa i thu min chah ang kha va sawi in zai kan va dawh viau a, Mahse Vangpui lal saw a kawchhung ah tulum a lut a nih loh ngat zawng in kan khua hi a lo hmusit in alo thamlo viau a ni ange. Kan lalpa thu a ni e kan tih hnu a a mi chhanna phei kha chu i hriat ve a tan a mawilo ang ti in leiko deuh tak leh a lungawi lohna thawidam tum ran chuan a han sawi kual vel a, Kawlhawk lal thin chu khei in a rilru butut na a cho chhuah sak chiang kher a sin.

E he heu, In thu leh hla rawn hawn chu a bo bang awmlo a hriat vek ka duh a, Ka lalna tlang leh ka hming ngainep tu chuan a thusawi pawizia a hriat meuh chuan khua a tlai tawh ang. Dokhara pa engkim mai chu a bulbal atang in han sawi teh ti in a rawn ri nghal tun tun a, Dokhara pa duhdan tak hun chu a rawn her chhuak ta a ni.

Lalpa, I thu min kentir ang kha va sawi in kan va tlangnel viau a, Mahse kan chhanna dawn erawh zawng in kan ngen chhun in an khua a tang hial in min hnawtchhuak ta anih hi. In lalpa chu rawn hrilh ula, Ka khua leh tuite hi ka enkawl tha in ka hre chiang a, Anlo haw hma chuan thu tlukna ka siam theilo min tih khum a, I rilru aawm leh thildang te kan sawi hnu pawh a min pawmsak lo in, In lal chu lo hrilh ula, Ka ramchin rawn dai in rawn tei tir tawh suh se. Tun chinah ka ram chin rawn dai an awm leh anih chuan, Sa mai nilo in milu ngei kan la tawh ang a ti e a han tih chuan anlo ngawi thap a, Mak an ti lutuk chuan sawi tur an hrelo a ni mahna.

Dawtsawi lam ah chuan a ber a ni ang tihtur in a sawi bawk a, Lalpa thinrimna chu a puak keh chiang hle bawk. Vangpui saw kan leido khua ah ka puang a, Rammu tur a in buatsaih nghal tur a ti rum ta ul mai. Wait for episod 7

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 16th, 2017, 10:50 pm

VANGPUI KEITE, LALCHUNGLURA. ZIAKTU K VANSANGPUIA. ( Sangpuia khawlhring ) EPISOD 7

Episod 6 Recap. Dawt sawilam ah chuan a lar ber a ni ang tih tur in a sawi bawk a, Lalpa thinrimna chu a ti puak keh chiang hle bawk. Vangpui saw kan leido khua ah ka puang a, Rammu tur a in buatsaih nghal tur a ri rum ta ul mai.

Chu thu chuan upa ho chu a thawng in a ngaituahna fing deuh te duhdan chu a ni hauhlo a, Mahse tun dinhmun ah chuan lalpa thinurna belhchhah zawng a lo hnialkalh hun anilo tih hria in an ngawi ta ringawt hlawm a.

Chhawna ho a ramvak te buk tual chu hlim thawm namen lo in luah in an ri luih luih a, Chu rawlthar chu lal fapa a nihna ang a fak chawp nilo in a thil tih a vang in an fak mawlh mawlh hlawm. Ramsial kap ti a sawi mai tur hi an tamlo in vanneih thu hla ani a, Pasaltha nazawng in an kap meuhlo. Vawikhat ramchhuahna pangai a kap thei awmchhun a ni hial ta ve ang.

Zanriah chu a sa hrang hrang te nen chuan puar el euh in an kil a, A ruh tlingkhawm pawh an buk a tang a hla fe ah keite ho tan an dah vum hnuk mai bawk.

An saruh in chuh thawm chu an ral hriat deuh a, Buk lam a mi te erawh dulhmul khat phuar a awm in an hlim hle a, Hetih lai hian Vangpui lalin lam ah chuan ralpui an phiar a, An mikhual dawnsawn dan leh an thu in bah dan ah khan eng emaw tak thleng ngei dawn a hria in an lo in rinlawk ngei a ngai dawn a, A nihna tak ah phei chuan an khua hian beih tawk thut sela, An chan hian maian chan pawh a tluk dawnlo tih pawh an chiang bawk.

Khawnbawl te an kim hnu chuan lalpa chuan ala hre velo te hnen ah chuan thu hmawr an hawng a, Heile kan boruak chu heti hi a ni ta a, Kan tlangvalte ramchhuak hi kohkir mai tur emni ang ti in ka rilru ah a awm deuh a mahse ralkhel leh rilru nuamlo deuh in an rawn tlan haw ang tih ka hlau deuh bawk nen. Kokir lo in anlo haw hun tur kanlo sakuh ser nghah ngawt mai chuan phengphe khua kan tlai zo ang tih hlauhna nen. Thu mum neih har ka ti riau mai a, Ka upa te ho hian enge jn ngaihdan leh duhdan ni ve le a han ti dap dap a, A vaibel chu a pak zui tual tual a.

Khawnbawl upa ho pawh chuan ngaihdan han sawi mai chu harsa an ti tlang hle mai a, An lalpa sawirik tak ang khan a eng zawk zawk emaw chu thleng thut thei dinhmun ah ding in an chan a chau viau thei tlat mai a, Thu leh hla vaitu nih chu an hreh tlang ru viau a ni.

Sawimunga pa chu muang ban cherh chawrh hian a rawn tawng chhuak a, Lalpa. Leido hi reitak kanlo nei tawhlo in nunphung pangai in kan lo awm rei tawh a, Chumi avang erawh chuan kan nei ngailo ang tih theih lah ni hek suh. Kan duhdan leh ngaihdan ni sela kan thlang hauhlo anga,Amah erawh chu a tulna in min ur thlu ta anih te chuan tlan chhiat theih pawh va ni suh. Kei zawng ka vanglai ka hmangliam chu ani tawh mai a, Vangpui vanglai a tlangval te kha ka ngai thin a sin a han ti charh charh a, A rilru awn lam chu a hriat theih rei ruai e.

Midangte pawh in rawn tuihnih ve tliar tliar in an duhloh tak thil mah nise an ko a a tlak miau chuan midang ko a bah ngawt theih a ni silo a, Cho chhuak tu nilo mahse in venna erawh an ngaituah a an mamwh a ni miau a tin ni.

A khawnbawl te thusawi a ngaihthlak den den hnu chuan lalpa chuan thu tlukna chu siam in, Awle. Kei hi Sairuma thlah hnuhnung ka ni a, Ka pi leh pu hunlai ata tawh tu lak ah mah kanla tlan in kanla tawlh lo. Leido nei tur in tha kan chhuah hmasa lo anga, A mah erawh chu min do tu an awm anih chuan kan do let ve mai tur lah ni a ti in an in hmuhkhawm thu chu an khaikhawm ta ani. Hmalak dan tur leh inven dan tur te sawi ho nghal in an tlangval te erawh koh haw loh mai nise an ti tlang ta phawt chu a nia.

Zing khua a lo var a, Lal tual ah chuan vangpui tlangval awm chhun chhun te chu an pungkhawm a,, Pa ho nen an thawh chhuah pawh in an tlem rem rawm hle mai. Lalpa chuan lal leika tlangsang atang in thu a han sawi a, Awle ka khua leh tui te u. Inzar ah lalna tlang chang in khaw nuam leh hlim tak kan ni thin a, Mahse tun a ka thusawi tur hian a ti hnual ang che u tih ka hlau hlello e a han ti te te a, Hmeichhe ho pawh mahni a fehlo tur leh' Mipa venna hnuai a daihnai pawh vak a, Fehkawng pawh a huho a zawh hram hram tur a chah in an khaw boruak chu a sawi fiah ta a.

Chu thu chuan an boruak chu a chhem danglam nghal a, Chu mai nilo in ralven buk sak a an khaw dai a theih ang ang hung hna thawh an tum avang in tlangval awmchhun leh pa ho chuan chak an lam a ngai a, Nu ho leh nula ho lah feh ngam biklo in an vai buai ta luai luai hlawm ta zawk.

Chunglura te ramchhuak haw ni tur a lo thleng a, Khaw chhung lamah eng boruak nge awm a, Eng ang chiah in nge harsatna an tawh chu hre heklo le. Phur tak leh mahni lawmnu te hmuh nghakhlel reng reng in an vir chuk hlawm a, Sarep hawn tur lah an ngah na rawh e.

Chhawna chuan rawlthar ho chu hma hruaitir in a ni in hnung a dawl a, Lenlai chen a tual an chaina vangkhua ah ngei chuan lawilut tur in an chhuak ta sang sang a, Mahni in lam pan an ni bawk nen an tha a tho tlang in an phur tlang hle hlawm tih chu an ke chheh zangkhai dan ah chuan a hriat viau mai.

Chunglura leh Rivunga te pawh an phurlo bik a nilo a, Mahse chulai ngaw an chhuahsan dawn chuan Chunglura chu engtin emaw tak awm in a thiante hmuh veloh a inlar keite ho chu a melh ru zauh zauh a, Engtin emaw tak hian awm a in hria in a lung lam lam a leng ni hial in a hria.

Ni e. He ngawpui leh a chhung a awmte fiah a a rilru luahtu chingfel tur hian a la kal leh anga, A nu chanchin a la hriatloh leh a pa chanchin ala hriat ngailoh thleng in a hre chhuak vek tur a ni. Chawhnu tlangher dawn ah chuan luite kamah chawl in an thlan an ti dai a, Chunglura chuan in phihfai pah in luite hnar lam chu a zawh chho zai zai a, Thawm ri a hriat thut avang chuan fimkhur zet a thu hniam in thawm rawn chhuahna lam chu a melh ta khiau mai.

Chu thawm chu rawn hnai zel in a mah rawn pan zawng nilo in a mah kalpel tur zawng hian a rawn ri zel a, Sa emaw mi emaw an ni thei tih hria in a bul a lungpui phen ah chuan tlumlut vat in enge a nih chu a lo thlir ta ani. Patling pakhat leh amah ai a rual u deuh tur hian rawn kalpel in an thawm pawh an dim lutuk lo a, Tute khua nge an nih anga, Enge helai ah an tih ang. An in cheina leh an hmanrua en chuan sapel ramvak mai mai chu an anglo deuh hian a hria a, Rawlral a che tur te pawh an ang thei dawn dawn a hria in khawilam nge an pan tih chu a thlir zui reng a, Chutah harh chhuak thut in chulam pan a kal te chuan an khua bak ah pawh hauhlo ang tih a hre chhuak ta thut mai le.

Engtin nge a tih tak ang. zui ru in va ti buai ta ngawt sela, Palai a kal tur emaw. Chhan dang vang a kal pawh an ni thei a, Anih loh leh a rinhlelhna hi dik ta se, An khua chuan leido an neih ngailoh avang a thlamuang a an awm chhung in pakhat lek pawh khan meivap ah a chantir thei dawn si. Engpawh nise a thiante bul a kir leh phawt a, Bal upa te hnen a thil awmdan sawi hmasak chu tha a hria in an kalliam chian hnu chuan rangtak in a let ta thuai thuai a, Anni ho pawh chuan kalzai rel leh tum in bul an lo in tan mek hlawm a.

Chhawna chu han ko hrang deuh in a thil hmuh ang ang chu a han hrilh zung zung a, Chhawna leh val upa pakhat zawk in a thusawi uluk tak a an ngaihthlak chuan rilru siamthiam har an ti dun viau mai a, An rilru a buai dun phat phat hle mai. Engpawh nise mahni khaw lam pan kan ni a, Kal zel phawt mai teh ang u. Kan khua lak a rawlral a che duh tur ang kan neih ka hre hauhlo mai ka ti an tih tak ah chuan kal zai rel in midang kal ta te chu an um ve leh ta a ni.

Lo fing khat vel zet an kal tawh ang tih ah chuan val upa Chhawna chu rawn harh chhuak thut ni awm hian a ding chut a, Chunglur. Nichin a i mi hmuhte kha keikham lehliam lam atang a rawn kal an ni i ti ti raw ti in a han zawt ang he haw a, Chunglura'n a rawn chhan chuan thil ngaituah muk ni awm tak a mengzim in a han thle bak bak a, Ka ngaih a thalo tawp mai ka ti. I sanghal kahni a kan mi hmachhawn pa kha Zingchhuana ani a, Kha pa khan a lak a i tawngkam leh chetdan kha a theihnghilh in a paidam mai mai hauhlo ang tih ka hre chiang.

Chutiang chu lo ni ta se, An lal hnen ah dawt thu hrilh in khawhnih in hmelmakna khawp chu a siam thei hrim hrim ang. I mi hmuh te lokalna lam kha an khaw kawng lam a ni a, Palai a kal tur nise chutiang lek chu an kal a rinawm siloh ti in a han chek hlak hlak a, Tlangval ho chu ko khawm zui nghal in an sanghal hawnni atang a sawifiah in vawin ni thleng a Lalchunglura thil hmuh te. A rindan leh zeldin dan te chu sawi in an ngaih a thalo tlang ta hle hlawm.

Ro an han rel leh lailawk a, Tlangval ngalchak deuh deuh pali vel in umzui a, Enge an tih tum leh an chetdan thlithlai mai chu tha a hria in an han in rawnkhawm zung zung a, A tawp ah chuan amah val upa Chhawna leh Chunglura te' Rivunga leh Hrangluaia te ko ah chuan tla in midang zawng te pawh an theih ang a rang a rawn umzui tur a in ti in an phur te chu an han sem darh leh rih a,Ti chuan chengrang pahnih keng leh chemsen keng pahnih nen chuan an liam zui ve ta nghal a.

Chulai ruam chu an mahni chauh in an luahlo a, Mi pahnih kal hmasa te te bak ah khan an hnung fe ah chuan mi sawm rual zet hi ralthuam famkim nen anla rawn thawk chhuak ve mek zel a, Chung ho rawn kaihruai tu chu tudang nilo in Kawlhawk pasaltha Zingchhuana ngei a ni e.

Khaw nawt a thawk chhuaklo in a ma duhthlan a rawn hruai chhuak a, An tum dan chuan khua rawn hal a, Kha tleirawl leh a thiante kha rawn chimih vek an duh a, An buk hlui lam pawh en thlithlai tu tir in anlo liam.hman avang in khaw lam an pan chauh zawk a ni ber.

Zingchhuana pawisawi tu chuan a let leh lam a tuar ngam tur a ni a, Hnunglam atang kah mai pawh a hreh tlat silo. Wait for eps 8

Ka hma hleithei lo

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 19th, 2017, 9:04 pm

VANGPUI KEITE, LALCHUNGLURA. ZIAKTU K VANSANGPUIA. ( Sangpuia khawlhring ) EPISOD 8.

Episod 7 Recap. Zingchhuana pawisawi th chuan a let lehlam a tuar ngam tur a ni a, Hnunglam atang a kah mai pawh hrehlo mihring a ni tlat si a.

Chhawna ho te pawh chu hmanhmawh leh fimkhur tak in an kal zar zar a hah sawina hun a nilo a, Sawi thei pawh an an ni bawklo. An khua chu meivap a chantir an tumlo in an duhlo tlang vek a, An lawmnu te bak ah an chhungte thlaphang mangang hmel tur an mitthla ringawt pawh chuan an tha ti chak belh in chauhan hre phallo a ni ber e.

Tlailam lenkawl a her hniam ruai ruai a, Hemi zan hi chuan tumah in khua an lut hman dawnlo ve ve. Mahse An hma a kal te chu an hmanhmawh zual nge ni a,Anthawm hria in an bibo ta zawk hriat loh hian an nang har ta riau mai a, An ngaih te pawh a thalo lek lek tawh hial a ni.

Mahse beidawnglo a um ta nge nge chuan an thawm hrelo mahse an hnu tharlam chu an hmu thuai a, Tun a tang a lofing khat pawh kal ngai tawhlo in an in nangching ngei ang. Anni pawh chuan chulai luite chu in chiah thlan daih nan a hmang in ro an han rel tha leh a, An mi um te hi nang ching ta se, Engtiang a tih tur nge ni anga, Thalfangthlah hnan tur nge lal hnen a hawn zawk tur tih te chu sawi khawm leh in an han rawt nak nak a, A tawp ah chuan a nungchung ngei a man a lal hnen a thlen chu an ti thlu tlang ta hlawm a.

Thawmdim leh fimkhur tak si, Hmanhmawh ru tak chung a kal zel in an mi um te chu an hnaih tial tial a, An tum dan chuan an riahbuk sualna a nanchin an duh zawk. Khua te chho in anni pawh an han thu khawmuang a, Thingler ah lawn in an piah hnaivai ah meichhem eng an zawng ta zung zung a, An rin leh beisei ang ngei in an awmna atang a hla vaklo ah chuan an hmu ta ngei e.

Rivunga chu rawn chhuk in a thil hmuh leh a hmuhna hmun te chu a han sawi zung zung a, Meichher chhi ngam tawh heklo. Thimtham ah chuan eng an hmuhna lam ni a an rin chu an pan phei ta tham tham hlawm a, Engtiang chiah in nge an in nan chin ang tih chu sawilawk theih pawh va ni suh.

Chumi te riahbuk an hnaih deuh hnu chuan an in be thawm pawh an hre thei a, Mahse an khaw lam chanchin engmah an sawiloh bak ah an tan a pawimawh thei tur thil sawi an neih mailoh avang chuan an mahni chetla hmu pha tur chuan an biru thap a, Chumi te pahnih erawh chuan an mahni hual vel tu an awm tih hre leklo in an buk kawt a mei an chhem chu ai in an thu dun a, Eng emaw neuh neuh sawi in an ralmuang dun hle.

Nakin ah chuan a naupang zawk chu rawn tawng chhuak leh in, Kan kalna tur ah chuan pasaltha tumah an awm dawnlo bawk a, Nuam thal in kan che thei ang chu mawle. Kan pasaltha chhuanvawr hian remti in phal phei sela chuan kan pahnih chauh pawh in kan hal darh vek thei ngei ang chu a rawn ti chhuak hlawl mai a, Chutiang thu ngaichang a thim zing a lo awm reng te beng chu a verh nghal zar mai .

A upa zawk pawh chu lungni vaklo hmel tak leh lawm famkim chiahlo tih hriat zet hian a rawn tawng chhuak ve nung nung a, Kan lalpa hian Zingchhuana a ti tuah hum mai pawh hi ka kham zozai tawh ani. Amah mai chuan engmah a ti theilo a, Tunah pawh kan pahnih chet chhuah zarzo in hmingthat a chang leh anga, Amah leh a vuavang te thleng hian ka kham zo vek tawh a nia rawn ti ve in an khaw pasaltha lakah chuan an lawm a kim chiahlo dun hle tih pawh an titi atang chuan a hriat theih mai e.

Chhawna chuan Chunglura chu a han bekbawr sar sar a, Hemi te pahnih hi la chimbuai rihlo ila, An thu leh hla hi a tam thei ang ber hria in an mahni hi kan hmang tangkai thei ngei in ka ring a ni. Ngaichang phawt ila a tha ang a han tih chuan alo pawm hle mai a, Ama ngaihdan pawh a ni chiah ve tho mai.

Chumi te pahnih titi chu an ngaithla zel a, Chuta tang chuan Lalchunglura chuan ngaihdan hrang a rawn nei thut a, Chhawna bulah chuan hrilh in a ngaihdan a han zawt a, Ani pawh chuan tha ti in a lo pawmpui ve tak avang chuan a remruat ang chuan an kal dawn ta a ni.

Zingchhuana te riahbuk lamah pawh chuan an ri liai liai a, Zingchhuana chuan thupui vai in a remruat dan te chu a sawi zuah zuah a, Kha rawlthar a thiante zar a chengrang min lek khum tu kha a lu ka la dawn a ni ti a in hrosa kuk kuk in a thusawi avang chuan an hlauh lehzual phah in a huaisen an tihna a zual kher mai.

Vangpui khua kan hal hunah chaun an nula hmeltha te kha in duh duh in man anga, Sal atan a in hawn pawh kan lalpa in a phal avang in in vanneihna ni a in hawng dawn ani. Hmei atan kawl in ram ah in dah anga, In duh leh chak hun a piang ah zawlpuan in phahtir tawh mai dawn a ni ti in a naute ho chu a fuih phur sauh sauh a, Chutiang lam boruak thlir chuan an za ru thum hlawm a ni ber e.

Chhawna te kalsan tak an thiante pawh chuan a remna lai ah riahbuk sual ve in an thiante chanchin chu an sep laih laih a, Chunglura chanchin te sawikai in mak an tih zia leh a tlangval hun ah chuan an khua a Muan tur zia te sawi in an rinna an nghat deuh nghal vek tih chu an titi atang a hriat theih reng mai.

Vangpui thlen hma buk a mi pahnih thu te chuan thawm an hre rual thawih a, Rangtak a silai la chhuak in a thim lai chu an tin kual ruai a, Aw rawn chhuahna lam chu tin dun leh in an in ring kher mai. Chu aw chuan tute nge in nih a, Vangpui khua leh tui in ni em a rawn tih chuan an in melh dun ralh ralh a, Palhat zawk chuan rawn chhang thuai in, Vamgpui khua leh tui kan ni e. Tunge i nih a rawn in lan ta che ti in a han au let ve a, Mahse an chhanna dawn chuan thihna rim a keng tel ta tlat mai.

Ka hmelma leh ka khaw huat em em mi leh sa in nih avang in thi tur in lo in peih rawh u le.Tu zawk nge mual liam hmasa dawn che u tih tawngkam an hriat chuan an phawk dun in an tiril ah chuan hlauhna in bu a rawn khuar a, An chhangsual tih in hria in an in lamlet chiang kher a sin.

A upa zawk chu rawn tang chhuak thuai in, Tute nge in nih kan hre hauhlo a, Mahse kan chhanna hmasa kha chu kan tihsual ni teh se. Vangpui khua hal a bei tur a tirh kan ni a, Keini thiandun hi a hmahruai a lo enthla tur kan ni e. Kawlhawk lal mi leh sa te kan ni a, Pasaltha Zingchhuana lamtang kan ni e. In ralsai lo in i sawifel tlang ang u a rawn ti khur dar dar a, Chunglura thinrim chu in sehruh ru nauh nauh in a ruk tak erawh chuan a thinlung a hlim thung si.

Verther chhuah reng reng suh u. Chengrang kaw dum in a tin reng che u a, Tun maiah khan Vangpui khua leh tui in nih zia in sawi zo chiah a, Tun a tak a han phat leh tur chhan a awmlo. Thi tur in in peih rawh u a han ti chhar chhar a, Mi pahnih zing a pakhat a naupang zawk chu rawn in rawlh thuai in, kan ti takzet ania. Keini hi Vangpui khua leh tui bei tur a kal kan ni a, Kawlhawk pasaltha Zingchhuana tirh kan ni e. Naktuk lamah min rawn fin in kan enthlak dan a zir in kan che dawn a, Runlui lehluan loh tur hming in chhia kan chham e a rawn ti zung zung a, An mahni lo enthla a lo chik rengtu midang ho thin pawh a sa ve zak mai.

Chunglura chu pen chhuak in mei eng chin ah chuan a han in lar a, Chhechham meuh a thusawi in nih avang in ka pawm e. Mahse haw leh ta ula, In pasaltha hnen ah chuan heihi va thlen ang che u. Vangpui khua hian Tlangsam lalpa pawi an sawi a, A pasaltha tir in khua chu a hal ta e in han ti dawn nia ti in a rawn ding kak tah a, A mah an hmuh meuh chuan a thusawi leh pumrua te, A hmel te chu in persan ti in an ringhlel rum rum hial a ni.

Chuta hmel leh taksa rawn inlar chuan pasaltha hmel a pulo a, A pumraw landan ah lah tawhkhirh hmel a pu heklo. Rawlthar chhuak tir leh zanthim hlau hmel lek rual a ni a, A hma a a thusawi te kha hrelo phei sela chuan an nuihzat duh hial ta ve ang. Hmaichhan ah chuan an in en ren rawn a, Mahse zam hmel leh danglam hmel a put loh bak ah a mah a in rintawkna chu an hmuhhmaih thei biklo a, Engpawh nise rawn thu phawt teh khai. Thil i sawiho ang u ti in an sawm ta a ni.

Meilum hmatawn chuan an thu bial laih a, An zing a phanchang ber chuan thubul han tan in, Engvang a inkhua nen chuan in hal nge in nih a, A reng reng thu ah mahni chauh a rawn thawk chhuak mai nge maw i nih chiah le ti in a han zawt dil chhut deuh a, Heihi chu a lo rinsa anih ang in a chhanna tur pawh a in buatsaih lawk diam e.

Chu rawlthar chu thinrim zet hian a in seh ruh tlawk tlawk a, ka farnu neihchhun pawngsual a, Kan lalpa sechal kap zui tute an ni a, Ha ai ah ha, Mit ai ah mit tih hi kan lalpa duhdan a ni. Phuba lak duhna a ka khahliam em avang in ka dilna te min pawmsak a, An khua hal tur in ka rawn thawk chhuak ta anih hi. Ka ko a tla chu ka hlenlo ngailo e a han ti ram hmarh hmarh a, Chumi te pahnih pawh chuan enliam mai mai mi a nilo tih chu an hmuh dan ve tho a ni.

Thil hrang hrang sawiho in an in hrilh a, A tawp ah chuan chu rawlthar duhdan leh ngaihdan chu tha zawk a hria in an pawmtlang thei ta hram a. Chu rawlthar chu mikhual ang in chu khua ah chuan a lut anga, Anni in daipawn ah lo nghak in chanchin a rawn hrilh zel anga, An thiante lo thlen hunah an che thut tawh mai dawn a ni.

Zan te a rei tak avang in mutzai an han rel a, Chhawna te pawh chuan khawvawt pawisa theilo in buk bulah chuan riahrun an rem ve a, Nunna thap a kal chhuak ta an thianpa chu an ven reng a ngai bawk nen.

Lal chunglura mu chu mak tak mai hian a mutui em em mai a, Tawnmang ramah lut in a thil vei chuan a rawn chenchilh zui ta lehnghal vei nen. A mumang ah chuan a nu chu hmu in thlabar em em hian alo teikual a, Ramsa hlauhawm tak tak in lo hual vel in a mangang hmel pawh a hmu chiang hle.

Harh chhuak thut in a han ngaituah vang vanga a, He thil a fel hunah chuan a nu chanchin hrechiang a chhui tur in a kal chhuak ngei tur ani ti a in fuih sauh sauh in muthilh leh tum chuan a in let thawk a, Reilo te ah a muhil zui ve leh mai bawk.

Zingkhua alo var a, Chulai a riak pathum re chu hma tak ah tho in an in siam zung zung a, An tukthuan te kil in kal zai an rel leh ta a ni. Vangpui khua run a hal darh tur in. wait for episod 9

Ka phak ang tawk hi min pawmsak hram zel teh u.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 20th, 2017, 11:02 pm

VANGPUI KEITE, LALCHUNGLURA. ZIAKTU K VANSANGPUIA. ( Sangpuia khawlhring ) EPISOD 9.
www.storyfb.com mizo story thar englai pawhin chhiar tur a awm reng

Episod 8 Recap. Zingkhua alo var a, Chulai hmun a riak pathum te chu hma tak ah tho in an in siam zung zung a, Tukthuan te kil in kal zai an rel leh ta e. Vangpui khua run a, Hal darh vek tur in.

Ni tla vanvuai a an kal chuan an duh hunah thleng in an enthla thei tawh anga, Naktuk lamah chuan an thiante pawh in rawn zawm ve in hmingthatna leh ropuina nen an haw thei ngei anga, Nula hmeltha tak tak te chu sal atan a kai haw in an hlawhtlinna an lawm tawh mai dawn a ni.

Ni tlak dawn hnaih ah chuan Vangpui khua chu an hmu phak ta ngei a, Nizan lam a an mi tawnthar chu chinchang hre zawk a nih avang in khaw chhung a lut anga, Anni chuan a lo sawina hmun rem lai ah lo nghak in a thu rawn thlen a zir leh an thiante rawn thlen hun a zir in an che tawh mai dawn a ni.

An mahni zuiru rengtu te pathum pawh chuan an rawn en zui ve zel a, Chunglura remruat dan an hriatloh avang in an en zui ve zel rih phawt kha ania, An khua a lan a an khawsir a hmun an sual lai te chu en in, Chunglura'n khua a pan tak ah chuan anni pawh in peng lehlam atang in an pan zui ve ta nghal bawk a.

Chunglura chuan an in pawh lawi hmasa lo in lal im a pan ding nghal chat a, A thian thar te khan anlo enzui ve reng a rin avang leh lal hnen a sawi tur a pawimawh em vang a ni ber e. Lalin a thlen chuan mikhual ang in luh a han dil a, Chhanna ahmuh hnu chuan lal inah lut in a hmel an hmuh chuan mak an ti tlang hle mai a, Lal fapa in lal in a luh a dil a, Chumai nilo in an ramvahna atang a amah berkher a rawn lang nawlh chuan an ngaih a ti thalo tlang hle mai.

Zanriah ei hun dawn ah chuan Lalchunglura chu chawthing leh chawhmeh thing nen daipawn lam pan in a chhuak ru zal zal a, A piah thim chinah chuan a u leh a zui ber thin Chhawna pawh chuan lo nghak in an pilbo zui dun thuai a, An thiante lo nghahna lamah chuan kal thuai thuai in an thlen dawn chuan Chhawna chu peng in a lo veng dawn a ni.

Chunglura'n an in tiamna hmun a va thlen chuan anlo awm mailo a, Mahse a mah chunglura ngei a ni tih an hriat hnu ah rawn chhuak in a chawfun ken te chu la zet hian an laksak a,Engtin nge hetiang te i tih theih zawk. Fimkhur hle rawh aw. Naktuk ah chuan kan thiante pawh anlo thleng tawh anga, I duh ang tak a chetna hun i nei ngei ang ti in an han fah ve malh malh a, Chunglura rilru erawh a dang daih thung.

Ni e, Naktuk ah chuan ka duh ang tak a chetna hun chu ka nei tawh ngei anga, Nangni hian tunge ka nih in hre tawh ngei ang ti a in sehruh rauh rauh in a kut a hum fan fan mai.

A thiante hnen ah chuan ka haw leh tawh ange. dai kal tur ang a insawi a rawn chhuak ka ni a, Ka rei lutuk zawng in min lo ringhlel dah ange a tih chuan anlo pawmpui hle a, An tan a hun remchang siam tur a thian an tawng chu an lawm hle tih pawh a hriat bawk.

Chunglura kalliam hnu chuan an thil ei te chu puar pui ul khawp nilo mahse an lawmzia an sawi dun mawlh mawlh a, A upa zawk chuan kan nau a hi, A hmel en hian a tumruh zia a lang reng mai si a, Kei chuan an khaw hmelma nih ka duh hauhlo mai ti in chu rawlthar hmel chu a han suangtuah zui vang vang a, Tu emaw nni nen in ang riau a hria in a hriat hnu te pawh ang lek lek in a hria a, Mahse tunge tih erawh a hre chhuak zo silo.

Zan ah chuan lalin ah ro an rel laih laih a, An hmelma te rawn chet dan tur leh an rawn chet hun tur an hre lawk tawh a, Chuvang in zualko tir in Chhawna ho a ramchhuak te kha lo va hmuah ruk nise, Naktuk zan lam a tan an in buatsaih theih nan ti in an rel zawh chuan a kal tur chu an han thlang fel a, Rivunga leh tlangval pakhat chu kal in anlo haw kawng tur ah chuan anlo va hmuak dawn a ni.

Rivunga te leh ramchhuak ho an in hmuh chuan mak pawh an ti tawhlo a, A chhan chu rinhlelhna avang a midang um tur a kal hrang an ni a , An rinhlelhna a lo dik ta chuan an thin a ti rim in hah pawh sawilo a chet chhuah leh nghal mai pawh an hnial hauhlo..

Zingkhua a lo var a, Vangpui khua chu a hma ang bawk a reh in mihring veivak an tlem leh hle a. An khua rawn enthla tu te pawh chuan thil danglam hmulo in an rilru a muang dun charh thung. Vawin lamah an thianten rawn fin in zanin lamah chuan an tum ang in an che thei tawh anga, Milu nen an khua ah ropui tak in an lut tawh ang.

Chunglura pawh in chawthing leh ba ne te rawn keng leh in fehreh san hun velah ah rawn kal ve leh thei hram e. Ka thlenin te feh kal rem hun ka nghak a, Lal upa kawm ka duh thu chhuanlam in ka fehpui ve talo mai a rawn ti bawrh bawrh a, Anni pahnih riltam chuan a thusawi pawh hre changlo in a thil rawn ken ang ang te chu an keih dun bawrh bawrh thung.

In thiante rawn thlen hunah chuan a ranglam in lo in peih vek tawh ula, Sawng mi tenawm ho bulah sawn mikhual ang a awm reng ka ning tawh takzet ani. Zanriah eikham ah mi pakhat rawn tir ula, Chu chuan in thil tumdan leh chetdan tur min rawn hrilh rawhse. Kei in khawchhung lam atang in tan kalo khawh anga, Hnunglam leh hmalam atang kan nawr chuan an talbuai vat mai ang ti in fing tak in rem a han ruatpui a, Anni pahnih pawh chuan tha an ti in an rilrem zawng tak a ni.

Chulai atang a ahaw hnu chuan khawnbawl upa inah a lut a, A chhan pawh an khua chuan enthlak an hlawh tawh miau avang in lal in a in hmukhawm a kal huk kha a chi lemloh avang in a ruk te te a kal in khawnbawl in ah an kal khawm hlawm a ni.

Lal leh midang te chuan a thu rawn hawn chu anlo nghak thap a, Chunglura chuan thil awmdan te sawi zung zung in anlo in buatsaih ve theih dan tur te chu a han sawilang zui nghal a, Uluk tak a ngaituah in a tha pawh an ti tlang viau mai.

Chawhnu tlang her ah chuan Vangpui khaw dai hnai ah chuan Zingchhuana pawl te chu a ruk te in anlo tleng khawm sang sang a, Alo awm hmasa te hnen atang a an thu hriat nen phei chuan an hlawhtlinna lawm hun an thlir thap ani ber.

Zingchhuana chuan a mi tirh te thusawi chu mak a ti deuh hlek a, Engvang a chu rawlthar chuan anni chu rawn thu rualpui a rawn tanpui nge nih anga, An tan a thang emni zawk ang. A pianzia leh a hmel landan an sawi hmang ah chuan a mihriat hnu ang dawn riau in a hre bawk sia. Ngaihtha zanlo leh ringlo thei silo chuan zan chu an nghak thim ta phawt chu a ni.

Zan a lo ni a, Zanriah eikham velah chuan Lalchunglura chu an in tiamna ah a awm vang tawh a, Tuibur hmuamda vel a nghak ang tih ah chuan thawm hria in a han in ring deuh a, Mahse a mi nghah te ngei an ni tih a hriat hnu chuan in thlahdul in an thuruk ken te chu a ngaihthlak sak zawh hnu chuan fimkhur tak a in then leh in mahni seh seh mual hran ah an ti leh rih dawn a ni.

Chunglura chuan lalin a pan thuai a, Lalin leh a vel ah chuan tlangval te chu an biru thim them a, Inchhung lamah khawnbawl leh lal te nen rorel in Chunglura thusawi chu an ngaithla thap a, Anni ai mah chuan pasaltha leh val upa kut ah a ralrel tak chu an dah ta zawk a.

Zawlbuk ah an lawilo a, Lal in bathlar thimlai ah chuan dingkhawm in rem an han ruat sap sap a, Chhawna leh Chunglura te remruat dan chu a in zul a vang in an pawmtlang ta ani. Tunah chuan a hun a thleng dawn ta, Tunge chantha chang anga, Tu khua te nge lu hloh zawk ang tih chu hun in a hril ang chu.

Chhawna ho in silai keng ho zawng chu an chhuak sang sang a, Chengrang chawi velo pahnih pawh an zing ah an tel ve bawk. Hetia an tawmbuk a va luh chhuah a va hual an tum chhan hi engdang nilo in khawchhawng ah nunau in silaimu lenglak an tawn loh nan leh an thlabar loh nan te, Awlsam zawk a an in man theih nan a ni ber.

Fimkhur leh thawmdim em em chuan an veh hnai them them a, Anni pawh in khawdai hnai a awm an nih ang in mei an chhem ngamlo a, Mahse an awmhmun hre chiang a bel sa an nih avang in an tan chet a har lemlo. In semdarh sang sang in an awmna lai tur an thlen theuh awm an nghak a, Thla eng kar ah chuan mihring veivak leh tawngthaam te chu an hria in an hual zim zel a, Chutah ring fahran a au in an hmazawn a mi theuh te chu an sai thal ta nghauh nghauh mai le.

Kawlhawk pasaltha te chuan chutiang thil chu lo beisei heklo le. Chutia an rawn beih thut ah chuan chiai in an darh suau a, Thenkhat silai chuh tum te chu awm hmun ah leng awrh khawp a chiang in an rawn sai thlu a, Mahse silai thawm a reh rual chuan an zing ah Zingchhuana a tello tih pawh an hre tawn nghal ve ve e.

Zingchhuana ngaih tha theilo kha a tei a tei a, Inthiar pah a amah ngei in khua va en thlithlai hial a duh tak avang in a hote chu a relhruk san a, A silai kenglo in a chem nen chiah kal in an buk piah deuh ah chuan a in thiar mek lai in mihring thawm a hriat rual chuan an thla pawh a hmu zui ta mai reng a.

Zawite a phun sap in a thinrim ha chang a thial rap rap a, Tlem a tlem ah minlo hup mit barh lo chauh a lawm mawle ti a phun nang nang in a silai a kenglo chu in chhir hnuhnawh viau mahse tih ngaihna awm tawh heklo. Zingchhuana ka ni ngai e. Ka chemsen nen pawh ka tlan ngailo ti in an buk rawn hualtu te chu hnunglam atang a rawn veh let ve zel kha a ni a, Anni lah in thawm chh hre deuh mahse an thiante dang thawm ah ngai in anlo ngai thupui vaklo kha a nia.

Silai a rikrual chiah khan Zingchhuana chemsen pawh a rawn thawk chhuak zawk a, Vangpui rawlthar silai keng velo pakhat chu thawm nei hman leklo a chhawk in a lu a tla hrang zui nghal nawlh a, Pakhat ti a phun zui sup in midang te tan chuan a aw lianpui chu a chhuah zui ta.

Chunglura chuan Zingchhuana a tello tih chu a hre thiam mai a, A chhan pawh engdang nilo in chutiang ah chuan a chiai ve dawnloh bak ah a ngenmu a rawn sur let tir ve ngei a ring a, Mahse a rawl leh a hlimthla takngial pawh a hmuh loh avang in a relh ru nge an hual tello tih chu a ngaituah vang vang mai. Chutih lai tak chuan a mi zawnpa ngei chu rawn au in a aw a rawn chhuah a, Khaile. Kawlhawk pasaltha te khan beilet rawh ule. Silai fung tam an kenglo a, Keimah Zingchhuana ngei hian hma ka hruai e tih leh rawn zuan chhuah a rual zui a, Chu awrawl avang leh a rawn fuihtu avang chuan anni ho chiai leh talbuai pawh chu insiam tha in an hmazawn ah chuan an zuang ta phawk phawk hlawm a.

Ngenmu sawh na hun a awm tawhlo a, Chhawna pawh in awrawl rawn chhuah zui ve in, Vangpui kan ni e. Khawnge ni a ruk a ral a min chimih tumtu te chu i chimih thak ang aw ti in a mah rawn bawhtu chu a vai zui pawp mai a, In phek nuai a nih ang in a tumah chuan silai an lek hleithei tawhlo.

Chunglura pawh chu keite ang mai a zuanzang leh rang zet hian a hma zawn ah a per thla thauh a, Palian lam leh sa tha lenlawn zet mai in a fei hmang a a rawn chhun chu lo bum in a lum tawp tawp a, Rangtak a tho chhuak in a dinhmun a siamrem hman chauh tih ah chuan chupa chuan a rawn bawhzui ve leh nghal zat bawk a.

A chem chu rang lutuk in vai chhuak lo sela chuan chupa fei hmawr chu a hrawk ah in thil tlang in a bur ngur tawh ngei ang. Mahse a tuan thatna leh a mit finna chuan chhan in chupa fei chu a chhawk hmawk a, Rawn chhun nawn leh a tumlai chu bawhphei in a chhip ah tak mai chuan a han chhuk sah ngheng mai a leh. Thisen leh thluak per chuai khawp a a sah meuh chuan a ding khur dur dur a, Nunna nei tawhlo tih hriat zet hian a sawp thla ta nul mai a ni.

A hual tu an nih avang leh a thalfang thlah hmasa tu an nih ang in an chan chu a tha zawk tih a chiang reng a, Chu pa a kih thluk zawh a a va hawi phei chuan a mi zawn tak pawh a hmu ta ngei e. Thimtham zing a an awm rei tawh avang leh thla eng chuan san lam a pan ve zel avang in an in hmu thei vek tawh a, Khuangchawi thla eng tih tak ah unau hmelhai tluk deuh thaw in a eng reng lah tak a.

Chhawna leh Zingchhuana te chu anlo in tuk zawt zawt a, Mahse mahni tawk a thei in ti ve ve an ni bawk a an la hliam meuhlo a nih hmel. Tharum ah Chhawna chuan a hnehloh zawk miau avang in a chan chu a chau tan deuh tih pawh hairual a nilo a, Chuta kar ah lung a pal avang in a han kat dawt dawt a, Chulai tak chuan Zingchhuana chuan a tha tawp tak meuh hian a rawn vai zui ta bawk. Chhawna tan chuan lo in venna hun a awm tawhlo a, Lo in veng pawh ni sela a veng seng kher lo ang.

Zingchhuana chem in Chhawna dar a sah thlen hma chuan khawilam chem nge hriat loh hian a rawn vai per sawk a, Tlem tlem ah Vangpui val upa leh pasaltha chuan fam a lawilo chauh zawng a ni. Chu chem rawn len tu chu tunge a nih tih chu Zingchhuana chuan a han en vat a, Chutah chuan thinrimna leh huatna a khat in an chhia nen a rawn veh zui nghal thum thum bawk.

Chu rawlthar chu rawn tawngchhuak in, U Chhawn. Hei chu ka chanpual tur a ni e. Mahni sakah nilo pawh chuh duh khawp a finrawl chhuah thin te hi ka ngaina ngailo ti in pheichheh zang tak chuan a kal kual thauh thauh a, Chhawna pawh in sawi mai tur leh tih mai tur hrelo chuan a thlir ve tawp mai a ni.

Pasaltha nun ka han temtir ang che aw. Vanglai hmanglo a fam atan chuan i pamhmai lua dawn mang e ti a Zingchhuana rum ngul ngul chu ngai pawimawh lo zet hian a nuih sak a. A chem chu a hum nghet zual sauh bawk a. wait for 10

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 21st, 2017, 9:25 pm

VANGPUI KEITE, LALCHUNGLURA. ZIAKTU K VANSANGPUIA. ( Sangpuia khawlhring ) EPISOD 10

Episod 9 Recap... Pasaltha nun ka han temtir ang che aw. Vanglai hmanglo a fam atan chuan i pamhmai lua dawn mang e ti a Zingchhuana rum ngul ngul chu ngai pawimawh lo zet hian a nuih sak a, A chem erawh a hum nghet zual sauh thung.

Hnah hlui chu hnah thar in a thlak thin tih leh zuan phei a rual a, A che vel rang lutuk leh in thazo lutuk chu a tumpui pa tan pawh beisei phak bak anih piahlam ah alo in ring tha thum hman meuhlo a, Chunglura chen rawn len phei chu lo dang ve bawk mahse a tuan in a hneh em avang in a dang kim hman talo.

A ban bul chu sa zawk in a thler nghal hawk a, Pawi tawk tham em em chu nilo mahse a chet a ti bahlah ngei in a rinawm. Thinrim hmaisen leh in sehruh teuh hian a rawn vailet ve a, Kha le. Zingchhuana hem thlak hi dawng rawh ti in a rawn chhuk sah nghek a, Mi naran tan chuan awp rawp rawp tham takzet zet a na a ni reng bawk. A mit chak tak khan a rawn vai chhuak tur kha a hmuh hman miau a vang in a mah chu a sir lamah a per thauh a, A chem erawh in ven nan a lek tleu ve thuai a, Zingchhuana chem in a chem a rawn sat chu a kak hlawk thei hial ania.

Amah pawh in a rin phak bak a na a a sat thei chuan phurna thar pe in Zingchhuana pawh a tha a tho sawt a, Midang ho chu in bei mumal tawhlo in Vangpui ho in an awp bet chu a ni ber tawh e.

Naupang kut thlak hi i dawl em ang chu maw tih leh zuan chhuah rual in a chem chu a han vai der a, Mahni in ven tum a lo in dang mek chem ah chuan va khak zeuh in a tum tak erawh chu a nak thawl ah chuan a va tlawh sak zawt a, Thawm ri dang awmlo sela chuan a nakruh tliak ri chu a hriat theih ngei ang le.

Na tih lutuk avang a rak chhuat thawt in a nak a dawm ngawih ngawih a, Verther lutuk tih pah chuan a tha tawp in a rawn vai a, Chunglura chu lo kun hniam in a mal ruh chhum hmawk khawp chuan a han chhuk hlawi leh siah mai a, Tunah chuan Kawlhawk pasaltha hmingthang chu hnahthar in a thlak ta e. Hreh zet a tlu awn ruai ruai in huatna a khat mitmeng chuan a rawn melh tawk tawk a, A hnuk chat nghal mailo chu a tan chuan a pawi ber chu a ni.

Vangpui tlangval ho chu anlo au dar dar a, Chhawna pawh in a nau leh lal fapa ni bawk chu chhuang tak a melh in, Tunah chuan hnungzui tu tur nilo in, Hnungzui tur ka nei ta e. Phira i thlarau chu a hahdam tawh ngei ka beisei ti in a han dingchhuak a, Alo hah hman hle tih a hre chiah nghe nghe.

A mah ai a upa deuh vek an nina, Mahse a chet dan leh a tawngkam te an hmu in an hre zo chiaj ani a, Tumah in a naupanna chu an ngainep tawh hauhlo ang. Zingchhuana chu a ka atang a thisen chhuak in a khuh bawrh bawrh a, Pasaltha ka ni i inti ve ngai anih chuan ka lu hi la ta che. Nge ni a, Lu khat lek pawh la lo hian i hming chherna i vanneih pui dawn a rawn ti tham tuak a, Midang te chuan Chunglura chet zui dan tur chu anlo thlir thap thung a.

Ngawi reng a rawn phei in a mi sahthluk pa chu a en vang vang a, Keite in a sa seh a eilo ngailo ti in timna leh hrehna nei miahlo chuan a nghawng ah chuan a han sak siah mai a, Lei rem a sat ani bawk a a lu chu a lir hrang nghal nawlh mai. A hrawk a tang chuan thisen rawn chik chhuat zuai zuai in a taksa chu a leng dawt dawt a, Mahse rei riallo in pialral ah a hnuk chhattu rawngbawl sak hun nghak tur in a liam zui ta a ni.

A chet dan chu rapawm leh mak tih hial tur ni mahse, A mak na ber chu a tunhma mizia nen a in persan lutuk ber mai chu a ni. Rawlthar ze zawi leh tawng tamlo a nih bak ah a lalna leh a tha chakna hmachhuan chi a ni ngailo a, Midangte tanpui a mite khawngaih chi anih ang in tun mai a khawngaihna nei hauhlo ang a a che thei lai kha amak ber tur chu a ni si. Mahse dam chhuak tur chuan a tul ve miau a lawm le.

Thinrimna mitmeng nen a la meng sen ram chungchuan a thiante leh an val upa chu a en thuai a, Midang te hi engtin nge ni ang. Helai hmunah hian kan zalh vek mai dawn emni ti in rawt pah fawm in a han zawt a, An mi man pathum te hmel chu a thlabar kher a sin.

Chhawna pawh chuan chhan mai ngaihna a hrelo a, Mahse lal hnen ah thlen phawt ila, Lal in zawhna te pawh a nei duh ka ring e ti a thu tawp rawn siam tak ah chuan an pawmtlang thap a, Ramhrui a phuar in an mi thah te lu chu an la , Mi lu lawmna ropui tak an nei ngei dawn e.

Khawdai ah chuan an dingtlar them thawm a, Chhawna chuan a naute chu a han dintlar tir a, Hnehna hlado chham a tumlai tak chuan thildang in a rawn bawhbuai ta hlauh mai. An awmna atang a hla vaklo an khawdai ah vek chuan hlado chham thawm rawn chhuak in silai a rawn ri nghal dum mai a, Chutah midang te pawh in rawn chhawn in an rawn ri zui ulh ulh a, Chulai tak chuan lal inah chuan an khaw rawlthar chu lut in an ramchhuak hlawhtlin thu a rawn thlen ve nghal bawk a.

Lal leh upa te chu an hrilhhai tlang hle mai a, Lehlam ah an khaw tan a rammu an awm a, Chin hriat ala nihloh lai in an khaw tan tho ti a nunchan zir te chuan hlawhtlinna hlado an rawn chham ta mai si a, Engtiang a chhan a dawnsawn tur nge tih pawh an hre mumal theilo a ni.

Mahse an ngaituahna a buai reilo a, Chutia an in biak lai vel chuan hlado chham thawm dang rawn awm in tlang tlir ri in a rawn zui a, Lal te chu hlim zet a awm in khawtual a vengtu tur an tih tlangval te hnen ah chuan chhawn let tur in an ti ve thei ta ani. Ramchhuak ho chuan a ngaihna hrelo in an khaw kawt ah ngei mai chuan hmunhnih atang in hlado an chham a, Mahse pakhat chu ramchhuak ho chham ani a, Pakhat erawh rammu ho chham a ni thung si. An khaw boruak leh thil tawn la hrelo an nih ang in an hrilhhai pawh hi a a mwhlo e.

Chhawna chuan an nau pakhat chu a tir thuai a, An khaw valrual ramchhuak ho chu an hrilhhai dawn tih hria in chanchin hrilh tur in a kaltir a, Anni lam pawh in thil awmzia hriat tum in mi an rawn tir ve ta bawk . Chanchin an in hriat pawh hnu leh an lalte an biak tir hnu chuan hmunkhat ah in fin in khua an nghak tlaivar anga, A khat tawk a silai inchhawn in a tuk lamah ropui tak a khua lut in an lawmnu ten fenthlir in zufang leh zo tuithiang an tulh anga, Arke ziak te lo ban in a ruk in an in melh relh relh ang.

Khawnbawl fanu tleirawl ngo vingveng leh hmaifang fel zet mai. A naupan lai atang reng a mahni inlum luah hmanlo khawp a nula ho in an duh rawn leh upa hnanghlai thin te takngial pawh in an awm nilen theih thin kha a tel ngei anga, A mit dinglam bul a khuavang awm chu a zahna vang a a men set set hunah a lang chiang sawt anga, Chu chuan a hmelthatna belhchhah in an melh ru leh sap sap dawn tih pawh an hre lawk a, Mahse he nau te hian tunge a ngaihmelh a, Tunge a vei tih erawh an hre mai silo ang.

Khua alo var a, Haw haw hluah hluah leh hlim thawm a khat in an in lawmlut a, An beisei ang ngei in nula ho in hahzu lo zuk in tuisik anlo sem mawlh mawlh a, Arkeziak ban pah a in melh relh relh in a hma zan lawk a an lungngaihna te chu chhembo ang duak a ni tawh.

Chutah an rinlawk leh beisei em em chu alo thleng a, Vanchung nula thla neilo ang mai tleirawl chu a thiante nen rawn kal ve in a thlenna zawn mipa chu an mit a tung zo leh ta emaw tih mai tur hian an an meng leh hlawm a, Chhawna leh Chunglura erawh chuan kilkhat atang a lo thlir in anlo nui dun var var a, Sailo ngurpui kan lal lai. Lei chung a leng kan ni e ti ni awm hrim a in zo vah a mawngbawr sawi lai lai a a kal chu patling ho mit hlei hlei a pual ang tih hlauhawm a ni.

Lal mual ah chuan pungkhawm in an sa kah lu chu an hung dun ruau a, Pakhat chu Lalchunglura ramsial kah kha ni in, Pakhat erawh Lianzika pawl te sai padawp kah a ni thung. A piah ah chuan milu chu an hung thut a, Naupang ten hlauh en ah enlo in chutiang an hawn theih hun chu an thlir a, Hmeichhe naupang in hlau hauhlo in chutiang hawn thei chu pasal atan neih ngei an tum thung.

A tuk lamah chuan milu lam in an nileng a, Kawlhawk ho erawh in an pasaltha rammu te chanchin ngaichang in an lalin an mawi thap a, Lalpa leh khawnbawl te rindan chuan a tuk lamah emaw vawin tlailam emaw hi an thawm hriat hun tur a an ngaih deuh chu a ni.

Zanin tlai atan chuan eng thawm mah an ka hre rihlo a, An tum ang in tluanglo mahse a tuk lam ah tal chuan tlang tlir thawm a awm ring in an la hlim ham ham hle a, Upa te lakah chuan lalpa pawh a thaw lian leh tawh in a zu rui chu a rak leh pung pung tawh a, An khaw bul vel zing a khaw lian teuh ber Vangpui pawh in an zat loh em avang leh pasaltha an in neih that hleih em vang a thaw lian leh inla vung pawh a ni thin reng a.

Vangpui lalpa ber in an miman te chu a tlangval te kut a a dah tak avang in zawlbuk ah an thlung a, Zanah chuan tumah len zai rello in val upa ho te nen thu an zawh dawn a vang in an kal khawm tak tak hlawm a. Chutih hun lai chuan lal inah pawh khawnbawl te chu chuangkai sap sap in Lalchunglura zanriah kil an nang hman hial a ni.

Vangpui zawlbuk ah chuan tlangval ho chu an pungkhawm tuk tuk a, Tlangval chauh nilo in pa leh pa upa lam thleng a kal khawm in a patung zawng chuan an hmel an lan a ni ber. An mi man te chu a lai ah dah in an pathum chuan an thut tlar tir tham a, An hmel en reng reng pawh in an zam in an hlauthawng takzet tih chu a hriat reng mai.

A kal tur awm ang an kim ta maw tih ah chuan val upa te zing ah pawh a val upa leh chhawng chuan zawhna a han zawt tan a, Tlangval hawklak leh pawr zual chuan thawm rawn chhuah zui in, A chhan loh chuan a lu tan tur. Thudik a sawi chuan zahngaihna lantir tur ti in anlo phun rual dual dual a, Dawt sawi chu a har ve tawh khawp ang le.

Mahse pathum an ni a, Zanriah eilai a an kalsan vek hlan khan eng thu ngr anlo in fah a, Engtin nge an in fuih tih chu hriat ni suh. Zawhna an zawh te chu an chhang tha duh ta hauh lo mai a, Tlangval thenkhat thinrim in piai hlak an tun lah in val upa kar ah chuan an che ngam tak tak bawk silo. An duh an zawt chhuaklo in an beidawng tlang deuh chu a ni e.

Chutih lai tak chuan zawlbuk kaiten chu a rawn ri a, Chumi hnu reilo te ah chuan bawhbel chu rawn bawh liam in Lalchunglura leh Rivunga te pahnih chu an rawn lut ve a, An miman te hnunglam ah chuan thut hmun rem in an boruak vel chu anlo thlir dun ve ran a, An boruak atang chuan an mi man te chu an tawng in an sawi mai dawnlo tih pawh an hrethiam nghal mai bawk. Mahse, Val upa te thu leh hla chu ngaihchan phawt tha a hria in ngaichang dun ta ran mai..

Chhawna chuan a ngaite bawk in zawhna a han zawt leh a, Mahse an chhanna dawn chu a la ngai reng tho mai. Heng mi te hian thih an hlaulo nge ni a, An luhlul in an tihmawh ve hrim hrim zawk tih pawh a hriat tawh nek lo e.

Chumi te pathum luhlul leh tawngmawh ta lutuk chuan zawlbuk tlangval thin tertek a kai chhuak a, Ekhai. Kan val u te zahlo leh min hlau hauhlo a an awm hi kan paldai thei talo e. Piai hlek an ngai a nih hi tih leh rawn thawh chhuah an rual a, Val upa te pawh in dan buai tumlo in an mi man te tawng duh theih nan an lo enliam ve tawp tawh mai. Tlangval ho chuan dimna leh insumkarna nei hleklo in an han khawih ta hlawm a, Mahse an na tuar an rum leh hak thin bak chu engmah sawi reng an tumlo.

An khawih na lutuk anga, Chhanna pe theilo leh nikhaw hrelo in an siam palh ang tih hlau in tlangval ho chu an han khap dai leh te te a, Val u te thu zah thiam tak a thuthmun pan leh in an thinrim chu an in sehruh bap bap hlawm. Chhawna chuan zawhna a han zawt leh a, Mahse a chhanna dawn leh an boruak chu a ngai reng mai. Natuar a rum leh engmah sawi tumlo a hawisan tu bak a tawnglo a, Thawh lawk a chemsen han len mai a chakna chu a in sum hram hram a ni ber e.

Lianzika chu rawn in rawlh ve in, Awle. Tha te te in kan zawt che u a, Engmah ka sawi duhlo a ka sawi dawnlo in ti vei maw. Kan lal fapa aL thleng tawh bawk a, Ani hian zawt che u in a duhdan in chinglet che u rawh se. Inlak ah hian ka kut ka sil e tih leh a kil lam pansan a rual a, Midang ho te chu an lo ngawi in an lal fapa rawn che chhuak tur chu an ngaichang ta thap hlawm.

An mitang te pawh chh tl in an zam ta deuh tih chu an mitmeng ah chuan a hriattheih a, A chhan pawh engdang vang nilo in lal fapa meuh in zawhna a zawt a, An chhang duhlo a nih chuan thihna nen an in zawm thei tih an hre chiang a, Sal lak a lal fapa chetdan chu tuman an sawisel ngam in an dal dawnlo tih pawhan hailo. Mahse anlo in fuih tawh na leh anlo sawilawk tawh ang in tumah chuan tawng hmasa ber nih an tum hauh lo a, Anni in an hlauh ber leh an lak a thu zawt tur a an duhlo ber chu an lalpa leh an lal fapa re, An khawnbawl leh val upa te nilo in an khaw pasaltha that tu rawlthar kha nilo se an duh ber mai.

An hnunglam atang chuan lal fapa pen thawm chu a rawn ri ohei tham tham a, An kut ah in chelh in an in hum ruh sauh sauh a, Lal fapa pawh nise engmah a zawt chhuak bik hauh tur a nilo ti ni awm hrim hian an in thurual pet pet hlawm. Val upa pakhat chu rawn tawng chhuak in, Mei kha han chhawm eng teh u. Hmel in hmu tawnlo a in zawh chu a lo chiang famkim lo ange a han tih chuan thingnawi chu an vur belh hluai a, Karlo ah rawn eng ut in zawlbuk chhung pawh a lang chiang kim ta hle mai.

Pen thawm chu a rawn hnai zel a, Mei eng ah chuan an langchianh tlang bawk a an hma a rawn ding chu tunge anih an hailo tlang kher a sin. Lal fapa chu an hlaulo a, Mahse an pasaltha that tu khawngaihna tlachham leh thisen ngam zet erawh kha chu an teih hle si. Chuan tun an hma rawn ding hi tudang nilo in Vangpui lal fapa leh an hlauh em em rawlthar kha a ni tlat mai si a, An kut in vawnna te chu thlah in a tu ber hi nge thi hmasa ang tih chu an rilru luahtu a ni ta.

Lalchunglura chu an miman te hma ah chuan a han thu a, A hmel erawh zaidam leh ngilneihna a khat a ni lawi si. Mahse chutiang hmel pu reng chung chuan a nih kha an pasaltha pawh kha a thah ni. Awle. Zawhna ka zawt dawn che u a, In chhang duhlo a nih chuan in pasaltha chhuanvawr hnung zui ve nghal zel tur khan inlo in peih lawk sa dawn nia. Lawmpa. Ka chem kha min han ban sak mai teh a han ti zui zat a, Rei riallo in Rivunga chuan a thianpa chem chu thisen kai tawh hleklo leh tah hriam thar diai ani tih hriat zet hi a rawn chhawp sak thuai a, Zawhna hun chu a in tan ta e.

Engvang a kan khua rawn run nge in nih a, Enge in tumdan diktak sawi ang che u. Dawt ka ngaina lo a, Insum ka tum heklo ti in a hma zawn a mi chu a han melh tur khai mai a, A kut chuan muangchang in a chemhriam zet fawng lam chu vuan pah in a hum ruh salh mai a, A hma a chuan a chetdan chu mitmei ru ralh ralh in a zawt tu chu a en leh ralh thin a, Dawt sawi ngamlo leh chhanglo ngamlo in a aw lawi leh tial zet chuan a rawn chhang ta ngei e.

Kan pasaltha chhuanvawr ramchhuak a tang a in tan a ni a Kan hriat dan leh kan lalpa hnen a a sawi dan chuan, A sakah sa chu Vangpui ho ramchhuak in rawn hneh chhuh in a lunung tamzawk anih na hmachhuan in an vau a, Tharum ah leh huaisenna ah hneh mahse a silai fung tamzawk an nih avang leh a mah chu pakhat lek a nih avang in a rawn hawsan ta ani awm e.

A lungawilo in phuba lak ngei a duh a, A mah vaubet tu te chu mi sawm lai chu nilo sela chuan a bei lui ngei ang. Kan lalpa chuan a pasaltha chhuanvawr leh a khaw in nghahna ber lungawilo chu lo vuipui in a thinrim pui hle a, A pasaltha tih thinrim leh lung nihloh hlau in kan rawn che chhuak ta a ni e. Kan tum dan leh kan pasaltha sawi dawn chuan inkhua hal a hmeichhe ho hi sal a man kan tum,Min dal tur leh min dang ngam tur chu in khua ah hian an awmlo in mipa awmchhun pawh an vak chhual vek ti in kan hre nghe nghe, Mahse khulai hmun a kan in beih a kan pasaltha i thah chiah khan a thusawi chu a tak anilo tih kan hria a, Kan kal chhan pawh hi a tak a nilo thei tih kan ngaituah hial a ni ti in Lalchunglura kut che vel chu a en ran a, A rawn chhawk ve hmawk mai ang tih chu a hlauh ber a ni tawh zawk.

Zawlbuka a mi te chuan makti zet hian anlo thlir a, An mak tih ber chu engdang nilo in an zawhna chhang duhlo a, Sawisak dawl em em si. rawlthar zawhna chhang a hlau ta em em chu an ni. A chhan chu engdang vang a nilo a, Zawlbuk a mi tamzawk te hian Lalchunglura chet dan anla hmu velo tlat a tin ni.. Wait for 11

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 23rd, 2017, 10:16 pm

VANGPUI KEITE, LALCHUNGLURA. ZIAKTU K VANSANGPUIA. ( Sangpuia khawlhring ) EPISOD 11
www.storyfb.com mizo story thar englai pawhin chhiar tur a awm reng

Episod 10 Recap. Zawlbuk chhung a awm te chuan mak ti deuh hian anlo thlir a, An mak tih ber chu engdang nilo in an zawhna chhang duh lo a sawisak dawl em em si. Rawlthar pakhat zawhna chhang a an hlau em em chu a ni. A chhan chu engdang vang a nilo a, Zawlbuk a mi tamzawk te hian Lalchunglura chet dan anla hmu velo tlat a tin ni.

An mi man te in puanna chu lal hnen ah an thlen tir thuai a, Lal leh khawnbawl te thu tlukna ngaichang in an nghak thap hlawm. Hun rei an nghak lo a, Lal leh khawnbawl te pawh chuan thu rawn peih vat in an rawn kentir thuai a, Mitang te kha a tuk ah himdam tak a chhuah vek tur an ni e. An lal hnen ah thu an thlen anga, Tun hnu ah Vangpui lam hawi hian a hmanrua a lek tawh tur a nilo a, Leido neih kan duh heklo. Mahse kan duhloh dan a min nawrlui tlat tu lak ah chuan kan khua hi kan tangrual in kan theihtawp kan chhuah zel dawn a, Vangpui hian pasaltha a nei tih lo hre rawhse tih chu an thu rawn ken a nih tak avang in an zalen dawn ta a ni.

Tlangval thaza ho chuan han piai hlak chu an chak tlang tih a hriat reng a, Mahse lalpa thu chhuak a nih bak ah a fapa a awm ve miau a vang in an palzam ngamlo a Chunglura hi awm ve talo pawh nise an ti lui kherlo ang.

Nula rimtur a chhuak in an kal darh sang sang a, An mi tang te erawh a tuk lam a chhuak chauh tur an nih ang in zanriah an hlui a, An ei zawh ah nghet tak a phuar leh rih in zawlbuk lawilut thin upa leh midang dang te chuan an enliam rih phawt chu a ni e.

Tlangval leng haw a piang chuan an phuarna chu ala nghet tha em tih an rawn en zel a, Anni taksa chau leh phuar beh. Mutmu tuah lo a thu tung tlaivar tur tan chuan a ninawm ve duh ngei ang. Sawisel thei leh sawisel ngam dinhmun ah an ding mawlh silo a.

Lenghnar ar khuan atang pawh in rei iak a liam leh tawh a, Zawlbuk kai ho pawh an hnar ring in vengthlang nu pi Thiaui vawkpui ang tluk tluk an ni leh tawh. Chutih lai chuan zawlbuk kawt thla eng chhun chin ah chuan hlimthla a rawn hnai zel a, Zawlbuk thawm ngaithla in dithli farfem ah chuan a han ding vang vang phawt a, A ngaih a la ngam zanlo nge ni zawlbuk hnuai ah chuan lut in a han ngaithla chiang leh te te phawt a.

Tuibur hmuamda zet a nghah hnu chuan ngaihtha a haw in an chenna a pan vang vang a, In chhung ah chuan a fanu chuan lo nghak in a pa thu tlukna a lo chang reng thung. Mampui. Tlangval ho chu an mu nghet tawh in ka hria a, Mahse hun enge maw ti chen han nghak leh ila, I nuta pa chu i va chhuah dawn nia. Hetia thamral mai tur zawng a ni lullo e. Kan khua hi kan hmangaih talo tihna a nilo a, Mahse an miman saw i nuta neih chhun a nih saw ti in a fanu chu a fah malh malh a, Mei pawh tuah ngam tawh chuanglo in an chhungkua chuan thimzing ah an thu tlang thap hlawm.

Khua leh khua in run leh leido a in puan mai mai kha a awl riau mai a,Mahse khaw thenawm a chhungte nei leh an thisem zawm ngei aqm te tan chuan a hreawm in a vanneihthlak phian thin. Khaw hal tur ah pawh an chhungten an rawk rawlruk fo a,An miman te lah a chhuah tu hriat loh in an chhuak fo mai bawk. Hemi te chhung hian lal leh a khawnbawl thurel an hrelo a, An mitang te chu a tuk lam a lutan tur ah riak ngai in an ngai ngamlo a ni ber. Lal thu chhuah hria nise la zawng heti hian an che biklo tur.

Ngawi reng a thu in zanlai ar khuan thleng chuan an thu dun tlawk tlawk a, Ar a khuang ta maw tih ah chuan an pafa a chhuak in fimkhur leh hlauhthawnna a khat in zawlbuk an pan dum tham tham a, Zawlbuk kawt an thlen chuan an thlan a tla dun phung thei hial a ni.

Tunah khan a awlsam zawk an zawh chhuak lek a ni a, A lehpek a an tih tur phei chu an ti tlang zo meuh a nge maw le. A pa tling zawk chu pawn lam ah tang in a hawi kual ruai ruai a, Tleirawl te erawh chu thawmdim thei ang ber a zawlbuk kaiten chu lawn in a kal them them a, Bawhbel chu a bawhliam ta e.

An mitang te chu zawlbuk thuk bulah chuan an thu tlar tham a, Tlangval leh pa ho riak chu chhuat ah mu tlar dal in a then chu an mangchhe lutuk avang in an ku kalh phung a, Vawkpui ang mai a hnar kuk kuk tawk lah bo lo.

Zawlbuk chhuat a mu ho chu a en kual dek dek a, Zawlbuk mei pawh a a rem tawh in a ling set set chauh tawh a, Tumah han harh awm ang an awmlo. Dap chhuat ah chuan dimte a kal in an mitang te chu a pan hnai them them a, A pa khan zawlbuk a lawiluh khan a unaupa chu a sir ber dinglam ah an phuar bet a ti a nih kha mawle.

An mitang te awmna a thlen chuan a sir ber chu a han sawi ne ne a, Thu chung a mu leh rilru muanglo a mu tih tak ah rang tak a lo harh in tunge a mah rawn ti harh tu chu hrelo mahse mipa a nilo tih chu a hria.

Ka pa in va chhuah rawh min ti ti in a chem ken chuan an phuarna chu a zaichat thuai a, A che tla rawn hmutu an awm em tih ngaichang a hawi in tumah an harhlo ni a hria in a chem ken chu a pe zui nghal a, Kapa in khua hi chu hal lo sela, A thui thei ang ber kal thuai thuai rawhse. I nu hnen ah tute nge kan nih tih ila zawt dawn nia a ti e ti in thawm dim tak chuan a kal zui leh mai a, Mitang pa chu a ngaihna hrelo leh an tihderna a ni angem ti in a chechang duh mailo a, Mahse a chhuahtu ber pawh chu a kalbo fel daih tawh ang tih ah chuan thawm dim tak a tho chhuak them them in a thiante chu phelh ve a han rilruk zet a mahse an man leh phah ang tih hlau in an harh hlau tak in a kalsan ta zawk.

Lalchunglura chuan a tir atang khan engkim a lo hmu in a hre vek a, Mahse thil awm zel dan tur leh an miman pa chet zui zel dan tur a hriat chak avang a harh duhlo leh a chhuahtu te hriat chian a duh avang in a nghar mut char char kha a ni.

Mitang pa chuan thawm a dim bawk a, Bawhbel a bawh liam hnu ah pawh kaiten a rap ri rek tih mailoh chu eng thawm mah a chhuah lo. Chunglura chu keite ang mai a thawm neilo in a tho chhuak zui zat a, Khua hi hallo hram rawhse an ti mawh kha. Khua chu hal a tum angem ? Nge ni a, An sawi ang a tlan liam in a nu hnen ah chuan a va zawt zawk ang.

Mikhualpa khan silai leh hmanrua takngial pawh a chuhlo kha a ni a, Bawhbel a bawh liam rual chuan a mit fing zet chuan vengthlang hmeithai te in sir a hlimthla liam tur chu a hmu vuai a, Thawm dim leh rang lutuk a zui ve in a helna tur pawh a hria e.

An vangkhua a ni a, A naupan lai atang tawh a alo chet na leh daikil kar a lo hrut chhuahna ani a, Kawlhawk tlangval satliah ai chuan kalkhan chu a hre zawk ngei tur chu a ni reng a lawm. Rangtak a liam in tuikhur kawngah chuan a lim thla zar zar a, Thimtham ah pawh a mit chuan a kalna tur leh a rah tur a hmaih hauh lo.

Tuikhur kawng ah chuan chhuak in a mi um chu a kal liam tawh em ti in a hnu a en vat a, A rin leh beisei ang ngei in a hmakhalh hman tih pawh a hria. Lo thleng ta se engtin nge a tih anga, A man leh dawn nge ni. Tha te te in a haw tlang tir anga, A tuk lamah a thianten phatsantu ti in an chhuahchhal hun a nghak zawk dawn.

Engpawh nise, Khua a halloh a pawi a khawih lo anih chuan haw tir ve mai chu tha in a hria a, A tuk lam a chhuah tur tho an nih ang in a pawilo mahna. Mahse khaw chhung mite chuan tunge chhuahtu ti in an in zawt kual ngei anga, Mahse a la tangkai zawk dawn a a rin avang chuan a rilru a siamfel ta zawk a.

Mitang pa chu hmanhmawh zet hian a lo kal hlawk hlawk a, Hnunglam en zawk zawk pah chuan an khaw lam chu a pan zel a, Pawikhawih lam chu a rilru ah a lan loh hmel khawp e. Wait for 12

Zanin chu hun ka nei tamlo tlat

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)