HMAR PASALTHA KEIVAWMHRANGA ZIAKTU- Isaac Zote 1- 207

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: HMAR PASALTHA KEIVAWMHRANGA ZIAKTU- Isaac Zote 1- 190

Unread post by Ngaia » September 14th, 2019, 8:51 pm

Bung - 200

A hmelah a hma aiin a thu tak tawh zawk a ni tih hriat tak maiin Tangkazawna bawk chuan,” Ka Pi, I rilru a thil awm tur chu kan hriatthiam pui lutuk che a. In chhungkaw dinhmun leh in khawsak dan zawng zawng pawh mite ka atangin engkim kan hre vek tawh a…

… Engkim hre vek chung pawhin kan lal fapa hian Buangpuii hi a iai miah lo a nia; khati lampangah khan chuan engmah vengthawng duh suh ang che..”thiam taka a han tih chuan Tuahhniangi chu muk taka inngaihtuah tih hriat tak hian a ngawi reng a.

Chumi zan a chin chu chung thian palite chu zantin mai hi khel lo hian Buangpuii te inah chuan an lawi lut ta tluk tluk mai a. Tuahhniangi chuan an inleng mitha fate chu tha tak tak a lo dawngsawngin a lo titipui vei luam thin a. Buangpuii erawh a thinlungah lal dang daih a awm miau tawh avangin a inleng tharte chu eng teh ualah mah a ngai hran lova. An biaknate lah a rul tawk lekin a chhang liam ve mai thin bawk.

Zan khat chu chutianga a fanu in an inlengte a be tha peih vak lo a ni tih Tuahhniangin a han hmuh chuan an inlengte haw hnu chuan a fanu chu kohin,” Buangpui…Khatiang khan mahni inlengte an dawngsawng ngai lo !! I â em mai nang zawng !! Hmeichhia zawk kan nih mai bakah hmeithai chhungkua ve mai kan nih hi !! Chu chu engtiklai mahin theihnghilh ngai suh ang che !!...

…A hmel a tha in palian tak a nih mai piah lamah hei a chezia leh awm dan velah pawh lal fapa Vanhawlha hi pa fel leh zaidam tak a nih hmel a; a thianten a chungchang an sawi dan atang pawhin tawng pawh hi tawng nachang hre lo lek lek khawp a mahni duh zawng pawh sawi tha ngam lo leh mi zakzum a nih hmel lehnghal a. Lo innei pawh ni ta ula I chungah a sual viau dawn em ni?...

…A thu hrimah, I nu ka nihna angin I rilru puthmang te chu ka hre chiang ve tawk che a. I thinlungah chuan Hranga bak tumah an awm lo tih te chu ka hre ve tho a. Mahse, hmeichhia te tan chuan khua in tlai luat a nei thei ngai a nia…

… Hranga chungchang sawi takah chuan, hmanni pawhin Zote khaw lam atanga kan khua a rawn zin mi thenkhat ka lo zawt a; Hranga chu khawchhak rama Lusei hnam ho chenna bakah Sihzang ah te, Guite leh Zou hnam chenna ah te leh Thado ho chenna ram thlengin a han zin a ni awm a…

…Hranga hi fel ka tiin thinlung tak pawhin ka ngaina ve em em a; engmah duh lohna ka nei hran lem lo !! Amaherawhchu, pasalthate an niin pasalthate chuan ral leh sa huaite an bei thin a ni si a…

… Tunah pawh a rawn haw har dan em em ngaihtuah hian sa leh ral lakah pialralah a lo lawi lut der tawh lovang tih tu pa in nge sawi thei? Tin la dam pawh ni ta tehreng se, mipa a ni ve miau a; a zin veivah velnaah te nula dang tawngin nupui dang a neihsan ta che te pawh a ni lovang tih va hriat ni hek suh…

…Tin, chutiang ka sawi ang chu engmah thleng lo pawh lo ni ta tehreng se.. Hei I hriat angin kei ngei pawh pasaltha nupui ka nih avanga kum naupangte a hmeithai ka ni a. Mi neinung fa kher lo pawh, mi naran mai mai pawh pasalah lo nei ni ta ilang chuan ka la hmeithai kher lo mai thei asin !! Ka tawrh ang bawk ka fanu in I rawn tuar leh tur hi ka ngai ngam mawlh lo a ni..” lungchhe lek lekin a han ti ve a.

A nu thusawi a han hre chiah chu Buangpuii chu hnuk ulh teuh chung hian,” Ni lo ka nu..!! Chutiang sawi tawh suh !! Ka awih thei lo !! Lo ngai reng rawh…U Hranga chu a rawn haw leh em em ang !! A thu min tiam tawhte ka bengah an la cham rengin engtiklai mahin ka la theihnghilh ngai lo asin !!...

… Chutiangin min kalsan ngawt thei lo…Engmah chutiang lam ka ngaithla duh tawh lo…” tia mittui tla zawih zawih leh lungchhe tak chungin an in chhung atanga tlan chhuah a,a thiannu Khuptlingi te in lam pan a rual a. Tuahhniangi pawh chuan a fanu in atanga tlan chhuak chu beidawng takin a thlir liam ringawt a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 14th, 2019, 8:52 pm

Bung – 201
Keivawmhranga, Phuaisabaka leh Khurluta ten Tlangkhua an chhuahsan fel hnu chuan Phuaisabaka chuan Keivawmhranga hnenah,” U Hrang, Lentlang han lawn chho law law ila; kan khaw pasalthate hian hahipin a chungchang buanzawlah te hian an sawi thin a; ka kal chak teh mai a nia.” a han tih chuan Keivawmhranga pawh chuan,” Ni e tiraw…
…Pasaltha tam tak lunglentu sa tinrengte lungrual taka an tualchaina ‘Buannel’ te pawh hmuh a chakawm a lawm le !! Nidangah lah henglai ramah te hian kan zin mai mai tawh lovin tlawhna hun remchang kan nei tawh mai awm si lova..” tia phur taka a rawn chhan let ve takah chuan an pathum chuan Pipute hun atang tawha a sakhming an sawi ban theih loh ‘Buannel ram dai’ an lo tih thin ngei mai chu han chuan chhuah an rilruk ta a.
An chhak lawk a ngaw dur khup mai, ni zung pawhin lei a chhun phak mang lohna hmun leh thingkung lian tak tak, han en reng reng pawh a upa tawh tak tak an ni tih hriat theih mai awmna hmun an han hmuh chuan chu hmun ngei mai chu an kal tumna chu a ni tih tu hrilh hriat hranpa ngai lovin Keivawmhranga, Phuaisabaka leh Khurluta te pawh chuan an hre nghal mai a.
Chunglai tlang leh mual velte chu mawi ti em em in sawi tur ber pawh haihchham hialin engemaw chen chu an han ding ren rawn a.
Reilote hnuah chuan Keivawmhranga chu han khuh kharhin,”Ti ru le thiante u…kal zel ila..” a han ti a. Ngawpui thim chhah khup mai an han lut chiah chu an pian a hnu lamah chuan engtiklai mah leh khawiah mah an la hmuh ngai loh thil chu an hmu ta !!
Chu ngaw chhungah zet chuan hawina lam lamah chuan ramsa chitin reng maite chu a zat pawh chhiar sen loh hial tur khawp a thahnem hi an lo tlim hmur mai a !! Keivawmhranga, Phuaisabaka leh Khurluta te chuan en bik tur ber pawh hre lo hial khawpin an thlir tlawk tlawk ringawt a ni ber mai !!
Ramsate lah chuan anmahni en rengtu chung mi pathumte chu hmu tho mahse an awm ve tih pawh an hre lo emaw tih mai tur hian engah mah an ngai duh lo lehnghal a. Keivawmhranga leh a thiante chuan chung ramsate ngampa lutuk chu mak an ti hial zawk mai !!
Namen lova phur fahran tih hriat tak leh nui deuh vur vur reng chung hian Phuaisabaka chuan a ken, Lalpa Hrihlera’n Keivawmhranga a pek ngei silai mawi tak chu han lek chhuak thuaiin,” Khawnge !!….theih chin chin han kap thlu pawp pawp mai ang aww…” a han ti a. An piah lawk a ramsa chitin reng lungrual taka leng za kah thluk zawt zawt mai tum a Phuaisabaka’n a han tin lai tak chuan a rin lawk miah loh thil a thleng ta tlat mai !!
Bung - 202
Chutia a silai ken hmeh puah a tum lai tak chuan a dawt lamah chuan thawklehkhatah Keivawmhranga ngei mai chuan rawn vuan chatin,” Ngawi teh Sabak…Hei hmanni lawk a i kah hlum sakhi sa pawh kan iptepui theuh puar lawih khawpin kan la ah hi maw !!
… Heng nungchate hlim tak leh inngeih taka an tualchai lai hi han tihbuai kher hi a tulna a awm lem lova; mawi leh hmuhnawm ti tak chungin i kalsan zawk ang u khai..” an pasaltha zah leh ngaihsan tak maiin a han tih takah chuan Phuaisabaka leh Khurluta chuan a ngaihna hre lo tak chung chuan ngawi rengin Keivawmhranga chu an zui ve leh mai bawk a.
Buannel ram atanga an chhuk thlak leh hnu chuan Phuaisabaka chu rawn tawngchhuakin,” U Hrang, min lo hrethiam la..Thil pakhat hriatthiam loh ka nei a. Khualkai pasaltha huaisen leh ropui tak; kan khuaah chauh pawh ni lo, tlang tin leh mual tin mai a mite zah rawn i ni a. Pasalthate chuan a tam thei ang ber sa tih hlum emaw kah hi an thil tum a ni mai lo em ni?” thil hrethiam lo tih hriat tak leh dilchhut tak hian a han ti a.
Keivawmhranga chuan nui sang chunga chu tlangval tuaitir chu han chhangin,” Kan mamawh pawh ni lem hlei lova ‘Ka thei e’ tih vang mai a nungchate laka kutthlak hi Pasaltha dik tak ziarang a nih ka hre ngai love. A tul a nih chuan tih hlum a, an sa te pawh kan ei chang chu a awm tehmeuh mai; chu chu ka sawisel ber hran lem lo…
… Amaherawhchu, heng ramsate hi keini mihringte ang tho a nunna neiin Khuanu in duh taka a siamte an ni ve a; an chunga duh ang thal a hleihluak taka chet hi Pasaltha dik tak khawsak dan tur niin ka ngai ve lem lo” a tih charh charh takah chuan Phuaisabaka leh Khurluta chu an ngawi reng a.
Phuaisabaka bawk chuan rawn zawt leh hramin,” U Hrang, I ngaihdan ang chu ka pian a hnu lamah tumah nei ka la hre ngai hauh lo mai ka ti !! Kei ngei pawh hi Tinhriama, a vanglai nan a na chuan pasaltha huaisen tia a miten an hriat ve ngat fapa ka ni a. Tin, kan khuaah ngei pawh pasaltha Kawlruna leh pasaltha Vawkbuala te an awm ve bawk a…
… Pasalthate chuan an bangah te sa lu an tar ter tuar thin te a ni ngai si a. A thu hrimin U Hrang..Thangchhuahpa nih a thih hnua Piarala faisa ring a len der der te hi i chak ve ngai lo em ni?” a han ti nawn leh ngat a.
Chutah zet chuan Keivawmhranga chu nau tak tak ang mai a a en Phuaisabaka’n dilchhut taka a zawhna zawhte chuan a nuih ti za tawh takzetin,” E khai…Sabak… Zote khuaa kan in te pawh I hmu ve reng tawh a ni lawm ni? Kan bangah sa lu ka tar ter tuar reng reng em ni?” nui hawk hawk pah hian a han ti a.
Chumi a sawi zawh chuan a thutak tawh a ni tih hriat tak mai a nui tawh lovin,” Thangchhuahpa nih hrim hrim hi engtiklai mahin ka thil tum pawimawh ber leh thlakhlelh ber a ni ngai hran love. Thih hnu piah lam te chu tu pa hriat va ni suh !! Keini te zawng mitthi khuaah pawh lawi vel mai mai mah ila pawi tihna em em ka nei hran lo; khawvela kan damlai a kan hmangaihte nen, thih hnu ram a awm ve te a nih ngai chuan, khawiah pawh cheng za vek thei ila, chu chu a pawimawh ka ti zawk e…
…Tin, mihring emaw sa pawh ni se, tihlum hnem thei ringawt hi pasaltha nihna a ni lova; dik lo ni a kan hriat eng ang dinhmunah pawh huaisen tak a dodal ngam a, dik ni a kan ngaih erawh eng thil hlauhawm pawh awm se, tim eih lova tan tlat ngamna hi Pasaltha dik tak zia chu a ni zawk…

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 14th, 2019, 8:52 pm

Bung – 203
… Pasaltha dik tak chuan mi thiltithei, hausa leh mithate chungah ringawt that a chhuah tur a ni lova; mi chhiate leh chanhai zawkte thlavang a hauh sakin a chhawmdawl zawk tur a ni ngai e…
… Chu chu engtiklai pawhin I hringnunah I hre reng thin dawn nia..” a han tih dap dap chuan Phuaisabaka leh Khurluta te chuan hei leh chen an zui tawh pasaltha chu an la hriatchian tawk lohzia an hrefiah thar chauh a, a hma ai mahin an ngaisangin an chung en sawt bawkin chutiang pasatha ropui zui thei a an awm ringawt pawh chu nihlawh an inti hle nghe nghe a.
Tlangkhua atanga an chhuah hnu a Buannel ram an han tlawh kual leh avanga tlema an tlai deuh tawh avangin a hma a an tum lawk anga ni tlak hma chuan Tiau lui an kan hman hmel ta loh tlat mai a. Chutia en lai a Tiau lui an kan hman ta lo rau rau a nih chuan Khurluta chuan Tiau lui chhak lawk a awm, Ngente hnam ho sak chhuah Ngente khuaa riah leh phawt mai chu a han rawt a.
Ngente khua hi an kalna tur Zote khua atanga hla tak a nih tawh lem loh avangin Keivawmhranga leh Phuaisabaka te chuan an lo pawmpui ve mai bawk a. Tichuan unau hmel hai hun awm velah chuan an thian pathum chuan Ngente khua, in sawmnga nufa vel chenna chu an lut ta rawih mai a ni.
Chu zan zet chu thla a chhuak hma in a eng tha em em mai a; nidanga khaw thim hun ti tih tawh mahse mihring hmel a la hmuh fiah theih deuh vek mai a. Ngente khua an han lut fel chiah tih ah chuan anmahni lam hawi zawnga rawn kal tlangval tuaitir pakhatin Keivawmhranga a han hmu chiah chu,” E heeuu…U Hranga a ni reng mai ka ti !!...
… Kan khua i rawn lawi lut chu a van lawmawm em? Min la hria ang e maw?” lawm hmel taka Phuaisabaka leh Khurluta chibai hmasa lawp lawp pah a a han tih chuan Keivawmhranga pawh chuan hawi hai ang reng tak chuan a lo chibai ve mai bawk a.
Keivawmhranga chuan a ngaihna hre lo taka han chhang vatin,” Ngawi teh thianpa, min lo hrethiam la.. Tun hma in inhriat tawhna kan nei em ni? In khuaah lah nidangah vawikhat mah ka la rawn zin ngai bawk si lova..” a han tih chuan chu tlangval tuaitir chu rawn nui var varin,” U Hranga chu min theihnghilh ta a ni maw?!! Aaaa..thil awm lo tak pawh a ni love…
… Kha mi tum khan kan hming theuhte pawh inhrilh hriat nachang kha kan hre lo hlawm hrim hrim a. Nang erawh Khualkai pasaltha lar tak I nih avangin keini tan hriat loh ngaihna I awm tlat si lova” a han ti leh te te a.
Chu tlangval tuaitir bawk chu rawn tawngchhuak lehin,” Ihh…min hre tawh lo pawh a ni mai thei a. Ka hming chu Lovata ka ni a. Tiau lui thlang lama awm Ngur khaw ho I rawn zui tum a, Tumpang I kah tuma Ngente khaw pasaltha Khuaihala rawn zuitute zingah khan ka tel ve alawm…
… Zan lamah pawh Tumpang chal sa thahnem tak mai kan rep ho nghe nghe kha..” a han tih takah chuan thawklehkhatah Keivawmhranga chuan engkim chu a hrethiam ta a. An zinna lama ngaihtuahna tam tak an sen avangin tunhma in Ngente ho nen an ramchhuahnaah an intawng tawh tih kha a lo manghilh daih a lo ni a.
Bung - 204
Keivawmhranga chu tlangval tuaitir thusawi chhan a han tum hma chiah chuan Lovata bawk chuan rawn chhunzawmin,” U Hrang..ti ru I inzui ang u hmiang !! U Khuaihala pawhin a hmu chak tawh ngawt ang che u..” tih leh amah ang bawk a tlangval tuaitir, a kum rualpui awm vel Phuaisabaka ban a nel taka pawh chu a rual ta a. Engmah sawi lem lo chuan ngawi rengin Pasaltha Khuaihala te in lam pan chuan an inzui chho ta tham tham a.
Pasaltha Khuaihala te in an han thleng chho, Khuaihala’n Keivawmhranga a han hmu chiah chu lawm em em a lo chibai ve lawm lawmin,” Nu-i, hei rawn kal thuai the khai !! Khawthlang lama cheng, ka sawi fo thin ‘Sapui Chaih Pasaltha’ an tih ngei mai chu kan inah a rawn chuang lut a nia…
… A ni hi awm lo se zawng kha Tiau lui dunga kan ramchhuah ni khan I pasal hian pialral a pan tawh tur kha a ni ngai a. Zanin chu hei tum loh takin khualtha chungchuang kan thleng dawn a nih hi maw !! Chaw te kha chhum belh thuai thuai rawh.” a han tih chel chul takah chuan Keivawmhranga leh a thiante pawh chu an hrilh hai lek lek zawk a.
Mawihnai taka hmun dang thlenna tur an zawn mai tur thu leh mikhual pathum zet thlen chu an tan a hautak palh hlauh dah ang e tia han hnial der an tum pawh chuan Khuaihala chuan ngaithla duh lo lui tlatin,” Ka inah ngei in thleng tur a ni !! Kan khuaa in awm chhung na na na chuan khawiah mah in thlen bo ka phal dawn lo a nia..
…Kha mi tum khan kha tumpang kawlhsen tak chungah khan rawn zuanglawn lo ni la chu, min phin darh vek awm asin !! I huaisenna leh I thil tih ropui takte kha hahipin kan khaw zawlbukah te ka sawi thin asin !! Kan khuaah ngat phei chuan hre lo che pawh an awm ka ring tawh lo hial nia..” hawihhawm taka a han tih chuan Keivawmhranga te pawh chuan hnial buai duh tawh bik lovin,” Chuti na na na chu kan thleng ta poh a niang chu…
…U Khuaihal, en teh hei, kan rawn zinna kawngah sakhi patuai tlu sual kan rawn hmu fuh hlauh pek a. A sa pawh kan rep teuh asin !!” a han tih chuan Pasaltha Khuaihala chuan lungawi lo der tih hriat tak hian rawn chhang letin,” ‘Sairal Buan Pasaltha’ meuh I ni tih chu hre tho ma hila;
… Tunge ka nih tih I theihnghilh bik ta em ni?!! Nangni anga pasaltha ropui ni ve lem lo mah ila, in thlen in pa hi Ngente khaw daingul, Ngente kaupeng Kawngte hnam pasaltha Khuaihala ka ni ngai e!! Khuaihala run insangah sarepin awm loh lai a nei ngai love” nui vur vur chunga a han tih takah chuan an iptepui a sakhi sarep an pai te chu an phawrh ngam ta bik lova.
Pasaltha Khuaihala nupuiin tui taka dawlrep nen a a sarep bai puar taka an han ei zawh chuan rei pawh titi hman meuh lovin Khuaihala’n an khaw zawlbuka a hruai chak em avang chuan Ngente khaw zawlbuk lam pan chuan an inzui chho ta a.
Zawlbuk an panna kawngah chuan nidanga an la hriat ngai reng reng loh chu an hre ta tlat mai le !! Chu thil chu eng dang nilovin aw am hriat tawh a zawnga a aw mawi, tliang leh felfai tha em em mai nalh taka lo zai hlarh hlarh ri hi a ni a. Chu zai ri an han hriat chuan an kawng kal lai chu Keivawmhranga, Phuaisabaka leh Khurluta te chu thawklehkhatah an ding chawt mai a.
An piah lawk a in tha vak lem lo, mi naran in ve mai tih hriat tak chhung atang chuan chu aw nalh danglam tak chu rawn chhuakin an han ngaihthlak chian nak chuan:

“Thing ang I tlu Sial ang I suak rawi,
Taubal ka sum thal tui ang nghak u…”

……mawi tak mai hian a rawn ti dap dap a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 14th, 2019, 8:52 pm

Bung - 205
Keivawmhranga chuan an zai hriat chungchang chu zawhfiah a tum a ni tih a hmuhhmaih loh avang chuan Pasaltha Khuaihala chu rawn tawngchhuak thuaiin,” Hmuaki a nih leh pek chu !! Nileng lenga a zai leh hla phuah hi a tuina lam a ni awm asin. An pa lah hian khap a hnek hian a tuipui zawk emaw tih mai tur hi a ni lehnghal a…
… Ti teh u…Zawlbuk lamah i chho zel ang u hmiang..” a han tih pawh chuan tlangval tuaitir Phuaisabaka chu la lungawi famkim zan lovin,” Ngawi lawk ru U Khuaihal, nangni chuan ngaiah in nei tawh a ni mai thei a. Mahse keini tan chuan hmun danga kan la hriat ngai miah loh thil thar a ni ve tlat mai a. A aw te lah chu a mawiin a fiah fai nalh em em mai si a…
… Keichu hetiang zaithiamte hi ka ngaihsan zawng tak an ni a. Reilote tal kan chibai zawk thei lawm ni?!” tia naupang chhia ang ziazanga a ngen takah chuan nui hawk hawk pahin Pasaltha Khuaihala chuan zai mawi tak rawn chhuahna lam chu a pan pui ta a.
“Kan lo lut thei ang em?” tia aw an hriatthan an khaw daingul Pasaltha Khuaihala aw ngei maiin a han tih chuan Hmuaki chu thawklehkhatah a zai tawp chat mai a. Chutianga zan zan a an in tlawm taka an khaw Pasaltha a rawn lenglut ta mai chu an ngaih te a tha lo rum rum zawk hial mai.
In chhunga an han luh fel hnu chuan Pasaltha Khuaihala chu rawn nui chhuak vur vurin,” Aaaa kan rawn len chhan chu eng dang a ni lova. Hei ka mikhual tha thlente hian Hmuaki hi zaithiam an ti em a !! Va chibai tal ang u hmiang tiin rawn len an ngen tlat pek a lawm maw le” a han tih takah chuan chulai boruak chu a hma aiin tlemin a zang sawt tawh a.
Hmuaki pasal ni awm tak chu rawn tawngchhuakin,” E khai…a va lawmawm ve !! Chutianga kan nu aw tial takte nalh min lo tihsak der ve chu !! Khawi lam khua atanga rawn zin nge in nih a?” thuhnuairawlh taka a han tih chuan Keivawmhranga chuan a zawhna chu rawn chhan a han tum zet na a; mahse amah aia dangnal zawk Pasaltha Khuaihala chu a chhan khalh leh hman tlat lo pek a.
Chu zawhna chu Pasaltha Khuaihala chhan chak zawng tak lo ni kherin,” ‘Rengpa Chawilung Chawi Pasaltha’ an tih thin emaw ‘Khaw Pum Buan Pasaltha’ an tih hi in lo hre ve tawh thin reng reng em?” a han ti hmasa te te a.
Amaherawhchu an hmel atang chuan chutiang hming awm reng reng chu an pian a hnu lamah an la hre ngai lo tih hriat tak mai an nupaa an in en he haw a han hmuh chuan Pasaltha Khuaihala bawk chuan,” Anih ‘Mura Kap Pasaltha’ an tih tal hi?” beidawng duh lawk lo chuan a han ti leh hram a.
Chu hming a han lam ri chiah chu a piah a nutling, tlem a ngo lam ,mahse dung lamah erawh vantlang aia tlem a hniam lam deuh chu rawn tawngchhuak zawkin,” Eeeee…chu hming chu kan khaw hlui, loh theih loh a kan rawn pemsan taka kan awm laiin ka hre thin tawh tak asin…
… Khawthlang lama cheng, Pasaltha hmingthang tak an kohna thin hming a ni tiraw kha ? ” tia a rawn chhawn ve takah chuan Pasaltha Khuaihala chuan rawn chhang chhunzawm zatin,”Chu mi chu tudang nilovin in hma a ding Pasaltha Keivawmhranga ngei hi a ni e..” chhuang tak maia a han tih hnu chuan Hmuaki leh a pasal chuan ngaisang tak maiin an rawn chibai ve a.
Bung – 206
Hmuaki bawk chuan rawn chhunzawm leh zatin,” Chutiang pasaltha ropui tak ten kei a kawngkara ka hlaphuah ve te mai mai a lo ngaihven duh hrim hrim pawh chu a va lawmawm tehlul em !! Nichin a ka hla sak kha chu hman zana kan inleng tlangval pahnih Tluruma leh Suakrawia te hming chawi a ka ninhleiin ka phuah mai mai a nih kha. Kan thenawmte'n anni pahnih hming kher hmang hi chuan hla a phuah rem thei tawh bik lovang min ti vei khanglang a...” nui vur vur pahin a han ti a.
Keivawmhranga chu rawn tawngchhuak ve in,” Aaa khai !! U Khuaihala thin tak hi chu !! I ti zahthlak thei em mai !! Min lo hrethiam la Pi Hmuak… Nichin khan in khaw hlui, in rawn pemsan tawh chungchang kha I sawi zuai a. Khawi khua atanga rawn pem nge in nih khawngaihin min hrilh thei em?” a han tih chuan Hmuaki chuan hnuk ulh lek lek a rawn chhangin,” Kan khaw hlui chu Chawnghawih khua niin khaw nuam tak niin a mi chengte pawh kan inlungrualin kan hlim thei hle thin a…
… Amaherawhchu thla li kal ta vel khan Hualngo hovin min rawn run thut mai a. Pasaltha leh tlangval ngah zawk na na na chu kan hneh ta ngang si lova. Engemaw ti ti in kan pa nen hian ramhnuaiah kan Lalpa Lalmanga hovin chhungkaw tlemte kan biru ta ringawt mai a; kan khua a cheng tam zawk chu Hualngo ho chuan salah an man ta hlawm si a…
… Ngai hle mah ila tun hma angin a nuam thei tak tak tawh dawn lo a ni tih hria in Ngente khaw lamah hian kan rawn pem ve ta rawih mai a ni” lungchhe taka a han tih chuan Keivawmhranga pawh chuan Khawchhak ram hla tak atanga an rawn zinna kawngah Chawnghawih khua chu an rawn kal tlang thute leh an hrehawm tawrh thinlung taka a hriatthiam pui thute Hmuaki te nupa chu a thiam ang tawkin a hrilh ve ta luam a. Chung a thusawite avang chuan Hmuaki te nupa pawh chuan Keivawmhranga chu a hma ai mahin an ngaina thar sawt bawk a
Hmuaki bawk chuan nui var var pah a rawn chhunzawm lehin,” Thudang a lai chuan, ka zai ri hria a rawn leng lut in ni bawk a. Hla phuah hi ka tuina lam tak a ni hrim hrim a. Hei Khualkai Pasaltha huaisen tak te I ni bawk a; I hmingthanna kumkhuaa a daih leh tawh loh nan leh thangtharte zel pawhin I ropuizia an hriat zel theih nan hla ka han phuah sak dawn che em ni ang?” fiamthu ti tak deuh a a han tih chuan Keivawmhranga chuan rang taka rawn chhang thuaiin,” Ngawi teh chu zawng.. !!...
… A tulin ka hre lem love !! Ropuina leh hmingthanna hi ka thil ngaihhlut leh um ber a ni hran love !! Keimah aia phuahchhan tur thil dang ropui leh pawimawh zawk tam tak a awm ka ring e…In khaw hlui I ngaihzia te han phuah zawk la ti nia…Hla phuah I thiam hmel si a, tlem a rilru lama no deuh phei chu a hmei a pa in luaithli an nul zawih zawih a nia ka rin ni !!” Phuaisabaka leh Khurluta lam en chuan nui vur vur chungin a han ti kher a.
Keivawmhranga thusawi chu Hmuaki bawk chuan rawn chhangin,” Kan Pa nen hian thil hluite chu ngaih rengin awmzia a nei tawh lo tih hria in tunah chuan kan inti lungleng duh tawh lova !! Hmathlir thar neiin nun thar a nun kan tum tawh zawk a ni. Kan khaw hlui ngaihna lam hla chu ka phuah duh tawh lova…
…Hei tunah chuan inhriat theuh angin Lal fel tak awpna khaw nuam tak Ngente khua in keini ang engmah ni lo chhungkua min lo tuamhlawm a ni a. Kan phu lo takzetin Ngente khua a cheng mipuite chungah hian kan lawm takzet asin. Ngente khaw tan hian tunah chuan ka phuah tawh zawk ang. In ngaithla duh nghal em?” nui hawk hawk pah a a han tih chuan chulai a awm zawng zawng chu an nui dar dar a.
Chutia an nuih lai mek chuan tlangval tuaitir Phuaisabaka pek chu rawn tawngchhuak hluaiin,”A va mak ve !! Chawplehchilhin I phuah thei nghal mai em ni? Han sa chhin teh a Ngente khaw tana I hla phuah thar chu !! Ka hre chak teh a nia..” a han tih chuan Keivawmhranga chuan rang taka rawn khap vatin,” Aaa khai !! Kan Sabaka lah pek thin hi a..!! Chutin a phuah nghal ngawt thei bik nang !! Bengsika ngaihtuah te a ngai ve bawk ang chu..” Hmuaki lam en pah chuan nui sukin a han ti a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 14th, 2019, 8:53 pm

Bung - 207
Mahse an hma a thu awrawl mawi tak nei nutling chuan thutak hmel taka rawn chhangin,” In ngaithla peih tak tak dawn em ni?” a rawn tih chuan Keivawmhranga chuan Hmuaki hmelah chuan a uang lo a ni tih chu a hrethiam nghal mai a. Hmuaki zawhna chu rang fahran mai hian Phuaisabaka leh Khurluta te pahnih chuan intiam rual ni awm taka rawn chhang rual thawtin,” Ngaithla peih e…Khawngaihin han sa la..” an rawn ti dun a.
Chuveleh chuan Hmuaki chuan a aw han thian karh karhin, a aw tliang leh fiak fai tha tak mai chuan –

” Kan Ngente khua, khaw-nun-nuama kha,
Thla ki fam hma’n ki nghilh rua lo ve !!
Ka tak fam se, ka zai fam lo se,
Thlang kawr mi lal chungah chuang rawh se…”

…….a han ti dap dap a; Keivawmhranga, Phuaisabaka leh Khurluta te chu a zai chuan a hnehin an suangtuahna te chu an phak ang tawkah an han len tir vel ruai a.
Engemaw chen titi lehin thu dang dangte an sawi leh hnu chuan Pasaltha Khuaihala ho chuan mikhual pathumte chu Ngente khaw zawlbuk lam panin an chho leh ta a. Kalkawngah chuan Keivawmhranga chuan Pasaltha Khuaihala hnenah,” Kha…In khuaah chuan thiam thil ropui tak nei, khawi atang mah a zir theih loh; Khuanu leng ngei atanga thilthlawnpek liau liau dawngtu in kawl mauh mai si a !! Hlate kha chawplehchilhin a phuah mai emaw lehnghal ni !! In khua chu in nihlawh teh e !!” a han ti a.
Pasaltha Khuaihala chuan Keivawmhranga chu rawn chhangin,” Chu zawng ka hre tawh lo le !! Hmuaki hi a hre chiangtu an thenawm te sawi dan phei chuan a awm mai mai laite, ei rawng a bawl laite, buh a den laite, buh a thap laite, tuikhura a insil laite emaw lo lama a feh laite emaw engtiklai mai pawh hian hla thar hi a phuah thei reng e an ti mauh mai a…
… Mi thenkhatte phei chuan khawi lai Huai engemaw tak zawl a nei hial a nih te an ringhlel rum rum lehnghal a. A hla phuahte lah hi a lar chakin kan khua a tleirawl leh rawlthar tam tak lawmah tak a tla hlauh zui a. Tin, nula leh tlangval tam tak pawhin a hla phuahte hi lo sa thei ve zel hlawmin, ‘Pi Hmuaki Zai’ tiin a hming an vuah a…
…a chang phei chuan zan thla eng hnuaia sak rual dual dualte hi an ching lehnghal a. Han tih vak ngaihna pawh kan hre lovin kan khaw tan hian thil tha a ni nge ni lo tih pawh han sawi fak theih lah ni hek suh !!...
… kan khaw nutling patling leh tlem a upa ho deuh phei chuan thangtharte hla rawn phuah ve zel tur a lo phuah zawh sak takngial dawn tiin an haw lek lek nghe nghe asin..” a han ti chuan Keivawmhranga nuih lam lamte pawh a ti za hle a.
Amaherawhchu chu thil sawitu Pasaltha Khuaihala awmna lam a va hawi phei nak chuan a hmel puthmang atang ringawt pawhin chu Pasaltha chu, chu thil a sawi lai chuan a fiamthu chhete lo a ni tih a han hmuh chuan Keivawmhranga nuihza lutuk chu a insum hram hram a.
Ngente zawlbuk an han thlen chhoh chuan Pasaltha Khuaihala chuan Ngente tlangvalte chu chumi zana an zawlbuka rawn lawilut pasatha hmingthang chu an hlauh lutuk palh a ven thawn avangin tunge a nih hrilh hre duh loh mahse zawlbawk an thlen hma a lo lawilut hmasa tlangval tuaitir Lovata’n mi zawng zawng a lo hrilh darh vek tawh avangin tuman “Sapui Chaih Pasaltha” chu buan en ah an en ngam tlat lo mai a; Phuaisabaka leh Khurluta erawh chumi zan zet chuan an rim hle thung.
A tuk zing tukthuan puar taka an ei kham hnu chuan Ngente Pasaltha Khuaihala te nupa leh tlangval tuaitir Lovata chu Keivawmhranga leh a thian pahnihte chu vai liamin rei tak an zin san tawh, Tiau lui thlang lama awm an chenna Zote khua ngei luh tum chuan an inzui ta bauh bauh a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)