HMAR PASALTHA KEIVAWMHRANGA ZIAKTU- Isaac Zote 1- 207

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: HMAR PASALTHA KEIVAWMHRANGA ZIAKTU- Isaac Zote 1- 128

Unread post by Ngaia » February 8th, 2018, 7:19 pm

Bung - 156

… Hun tiam chhunga an rawn let leh lo a nih chuan in duh dan dan a min hremin in lung a awi thei mawlh lo a nih leh ka lu hial pawh in la mai dawn nia. Amaherawhchu, Khurluta chungah erawh kut in thlak ve miah lo tur a ni thung ang. Chu chu i pawm thei ang em?” a han tih chuan mak ti tak leh ngaihsan hmel em em mai hian Vumkhankhaia chuan Keivawmhranga chu a rawn en a.

Vumkhankhaia chuan,” Rawn let leh lo ta se, nangman hremna chu I tuar ngam chiah ang maw? I tang leh viau si ang e..” a han ti leh kher chu Keivawmhranga chuan a ning lek lek tawh a ni tih hriat tak hian,” Saithlunga fapa, Pasaltha Keivawmhranga ka ni ngai e. Vawikhat ka thu sawi tawh chu ka thlak thleng leh tawh ngai lo..” Vumkhankhaia a mit taka en siah paha a han tih chuan chu pasaltha chu mi namai a ni lo tih hrethiamin Vumkhankhaia pawh chuan a zawt nawn ngam leh ta bik lova.

Keivawmhranga’n a duh a sawi zawh hnu chuan Vumkhankhaia chu Singhauha awmna lamah chuan va hawi phei lehin,’ Ni engzah chhung nge in rawn thang?” a han tih chuan Singhauha chuan,” Kan rawn kal chhung tak chu ni thum ang vel a ni a. Tin, kawng lakah Seipui khuaah kan rawn lut hmasa a…

… Amaherawhchu, kan rawn let leh lam chu kutruakin kan rawn kal tawh dawn loh mai bakah I thil phutte Sihzang him taka rawn thlenpui tur chuan tlangval engemaw zah ka rawn hruai belh an ngai bawk dawn a ni a…Chuvang chuan hun min pek belh deuh chu a ngai ang…:” tia a chhan ve takah chuan Vumkhankhaia chu reilote inngaihtuah vang vanga rawn tawngchhuak lehin,” Aw le, ni sarih chhung chiah chiah hun in nei ang. A ni sarihna ni tlak fel hma ngeiin Sihzang khuaah hian in rawn lut leh hman tur a ni.” a ti ta a.

Chutia an inbiak fel hnu chuan a tuk zing tukthuan ei khamah chuan hma takah Singhauha te chu Zote khaw lam panin an chhuak leh ta a. Phuaisabaka chuan Keivawmhranga bula awm ve zawk chu duh eng ang mahse Keivawmhranga chuan Singhauha te ruala kal ve zawk tura a tih tak tlat avang chuan a hnial zui duh ta bik lo ani.

Singhauha te thang bo chhung zawng chu Keivawmhranga leh Khurluta te chu Vumkhankhaia inah chuan an mikhual angin an thleng ve ta char char ringawt mai a. A ni rukna zanah chuan zanriah an han kil ho lai chuan Vumkhankhaia chuan Keivawmhranga lama hawi pah chuan nui suk chung hian,” I thiante chuan an phatsan tawh che a ni mai lo maw..?! An rawn lan pawh hi kei zawng ka ring tawh chiah hlei nem..” a han ti a.

Keivawmhranga erawh chuan chhangin” Patlingin kan rawn let leh ngei ang an ti alawm. Patlingin vawikhat an sawi tawh chu an ti ngei tur niin kei pawhin ka ring ngam ve tur a ni bawk. Naktuk ni tlak hma thleng hun a la awm e…” a hmelah zamna emaw hlauhna chhete mah nei lova a han tih chuan Vumkhankhaia chuan a rilru te te in,” Pasaltha dik tak zawng i lo nih ngei dawn hi..!!” a ti rauh rauh a.

Zanriah an han ei kham chu pawn lam atang chuan Vumkhankhaia ina luh rawn diltu an rawn awm ta tlat mai a. Lut tura an han tih chuan pa pakhat, pa te ve lampang deuh hi rawn lutin Vumkhankhaia te inchhunga awm zawng zawng chu rang takin a han melh kual deuh hrak hrak a, a melh kual zawh chuan a aw han thian kharhin,” In zingah hian ‘Sapui Chaih Pasaltha’ an tih chu tu ber hi nge ni?” a han ti a.

Vumkhankhaia’n Keivawmhranga awmna zawn a han kawh chuan inlengpa chuan Keivawmhranga chu rawn chibai mawlh mawlhin,” Ka hming chu Siantuang a ni a; Zou hnam kaupeng Manlun ho lalna Tonzang khaw Val upa ka ni a. Sihzangah hian ka rawn zin remchan lai tak niin he khua ah hian ‘Sapui Chaih Pasaltha a awm mek e..’ an tih thawm ka hriat avangin ka rawn zawng chhuak che a ni. Kan khua hian i tanpuina kan mamawh takzet a, a remlohna te a awm lo a nih chuan khawngaih a rawn zin turin zah pawh sawi lovin ka rawn ngen ve tawp mai che a ni e..” a ti ta mai a.

Keivawmhranga chuan Tonzang khaw Val Upa Siantuanga chu chhangin,” Ka pu, Kei tehlul hian tanpui theihna che u ka nei te a nih ngai chuan ka hreh reng reng lova. Amaherawhchu, tunah tak hi chuan buaina la chin fel loh kan la nei mek si a. Naktuk maiah hian kan chinfel theih leh theih loh tur chu a hriat tawh dawn a…

Bung - 157

… He buaina hi ka beisei ang a tha taka kan chingfel thei te a nih chuan min ngenna pawh chu kan la ngaihtuah dawn nia…” tha taka a han tih chuan Siantuang pawh chuan Keivawmhranga chu a lo nghah tur thu leh a tul chen chen Sihzangah chuan a la cham theih thu a chhang ve in Vumkhankhaia in atang chuan a chhuak leh ta a.

A tukah chuan chawhnu tlang her thleng chu tumah an rawn la lang lova. Khurluta phei chu lo mangang tawh takzetin a thlanfimin a bual zawih zawih reng mai a. Losul haw hun awm vel a rawn nih leh meuh erawh chuan Sihzang khaw dai lam atang chuan Sial lian tha tawk tak pathum chu Zote tlangval engemaw zah chuan rawn khalh lutin Sihzang naupang se en rual awm vel chuan hmuhnawm ti taka thlirin an zui dul dul mai a.

A thil phutte kim takin an rawn thlenpui a ni tih a han hmuh chuan Vumkhankhaia pawh chuan lawm taka lo dawngsawngin Singhauha leh Ngaichingi te chu ropui takin a inneih tir ta a. Hlim leh lawm taka an inneih hnu chuan Singhauha te nupa leh Zote khua atanga rawn kal ho zawng chuan Zote khaw lam pan chuan an let leh ta a; Keivawmhranga, Phuaisabaka leh Khurluta erawh chuan Siantuanga ngenna angin Tonzang khaw lam pan zai an rel ta a ni.

Suantak a thlahte Sihzanga atanga chhuakin khaw lian leh ropui tak, a vang zawng ringawt pawh inpharh duai mai an din a. Chu khua chu “Khawvaiphei” tiin (vai – vang zawng) he khua atanga an chhuah hnu hian hming thar neiin “Vaiphei” hnam ho tih an lo ni ta a ni. Chuvang chuan Zahmuaka thlah Lal chi te pawh an thlahtu bul han chhui tak tak chuan Paite ho nilovin tuna Vaiphei kan tih ho hi an lo ni reng zawk a ni.

Suantaka fate- Ngengu, Neilut, Daitawng leh Vanglawk te chu he mi hnu hian khaw dang dang heng – Thuantakzang, Ngatan, Sialpam, Sachih, Bawngnawi, Nathel, Kalzang, Phaipi, Hiangpek, Haimual, Tualmu leh a dang dangah te an inzarpharh a. Khawvaiphei an awm hnu a an khaw awmna lian leh pawimawh ber erawh Phaiza a ni thung.

Suantak thlah atanga chhuak tho Tukgek thlahte chu Phaiza khua atang hian chhuakin Gawng phairuamah an inbengbel a. Hun a lo kal zel a Gawng chu “Gang” rawn tiin a hnu zelah phei chuan Tukgek thlahte hi hnam hran anga rawn dingin “Gangte hnam” an rawn inti ve leh ta hial a ni.

Vaiphei tawng leh Gangte tawng hi tun thleng hian G- group tawng ho bikah rau rau pawh tawng inhnaih ber te zinga mi an la ni.

Tukgek hian fapa pathum a nei a – Thanglun, Hilkheng leh Thangzawm. Thangzawm hi a naupang ber mah ni se Gangte hnam zingah hian a hnu zelah phei chuan a thahnem ber an rawn ni chho ta a ni. Gang rama an awm hnu hian Gangte ho chu khaw dang dang heng - Anpak , Letchong, Zungpi, Laitui leh a dang dangah te an inzarpharh ve ta a ni.

[ Gangte ho hi hnam tlemte an nih chhan chungchang hi thawnthu ngaihnawm tak leh engemaw zawng tak phei chuan lungchhiatthlak emaw nuihzatthlak lek lek a awm a. An pi leh puten thurochhiah an inhlan chhawn danah chuan a tir chuan Gangte ho hi hnam thahnem tak an ni ve thin a. An hnam hian Gang phairuama an awm lai chuan rul lianpui mai hi an pathian bik atan an be thin a.

Chu Rulpui chuan mal pawh a sawm nasa thin niin an sawi. Amaherawhchu, hun a lo kal zel a, Gangte ho chuan an pathian biakna kawngah chuan inthlah dah hret hretin zawi zawiin “Ni pathian” an be ta zawk a. Amah betuten an phatsan avang chuan chu Rulpui chu thinrim em em in Gangte ho chu a dawi â ta vek mai a.

Tlang kara ruam chunga chhum var inpharh phei duai mai chu tui anga hleuh theih ring tlatin pakhat khat chuan tlang chip atang chuan an zuangthla ta hlawm a. A hleuh theih loh a ni tih an han hriatchhuah meuh chuan tlemte bak nung dam an awm tawh lo a ni awm e. He thil thleng hi “Meizap” (chhum hleuh) tiin he mi tum a thil thleng hi tun thleng hian fiamthu deuh reuh hian a chanchin an la sawi fo thin a ni. ]

Zote khua an thlen thlak hnu chuan Singhauha leh Ngaichingi te chuan fapa duhawm tak mai an nei a. Singhauha chuan a fapa a lo pian chuan,” A nu, nupui atan ka neih avang leh a man a tam em avangin ka neih zawng zawng an thamral zova, chuvang chuan ka fapa hming pawh ‘Neithama’ ni rawh se..” a ti ta a. Tun thlengin Neitham thlahte hi Zote hnam ho zingah hian an la awm reng a; a thlahte zingah an thlahtu bul Neithama pu chhungte lam bel a kal ta te erawh Vaiphei hnam ang a khawsa in tun thlengin Vaiphei tawng an hmang ta thung a ni.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 1:15 pm

Bung – 158

Keivawmhranga, Siantuang, Phuaisabaka leh Khurluta te chu hma takah chhuakin Zou hnam kaupeng Manlun ho lalna Tonzang khaw lam pan chuan an inzui chhuak nak nak a; Keivawmhranga leh Siantuang te chu a hmaah kalin an hnung deuh hret ah Phuaisabaka leh Khurluta chuan an rawn zui ve zel a.

Chutia ngawi renga an kal lai chuan Khurluta chu a kalpui Phuaisabaka hriat phak tawk lek a zawite a rawn tawng sapin,” Sabak, Hman zan khan Keivawmhranga kha ka hnial duh chiah lo na a, Tonzang lam pan hi a finthlak chiah em maw ni le? Eng buaina chiah nge Tonzangho hian an tawh kan hre bawk si lova; kan thil hriatchian loh a va inbarh luh ngawt hi a tha em aw ka ti deuh a…

… U Singhauha nupui tur chungchang chingfel tur a Sihzang khua a rawn kal kha kan ni a; tha tak a kan thil tumah kan hlawhtlin takah chuan kan khaw lam pan a haw mai kha a tha ber zawk lo maw?..” Tonzang khua a kal chu a ruk takin a huphurh a ni tih hriat tak maiin leh Phuaisabaka ngaihdan hre chak tak chuan a han ti a.

Chutia Khurluta’n a han sawi chuan Phuaisabaka chu nui sakin,” U Lut, kan kalpuipa hi eng ang mize pu nge a nih i la hre nang e? U Hranga hi mitin ngaihsan em em mai leh pasaltha ropui tia miin hahip a an sawi thin nachhan chu eng dang vang nilovin a tanpuina diltu apiangte chu tumah a thlahthlamin a hnar ngai loh vang a ni a…

… Tin, a thisenah hian hlauhna leh zamna te hian hmun an chang ve ngai hek lo. Chuvang chuan lungngai mah ta che…U Hranga kan hnenah a awm chhung chuan eng thil tha lo mah kan chungah a thleng lovang..” a tih ve takah chuan Khurluta pawh chuan chu tlangval tuaitir thusawi chu pawm vek lem lo mahse a hnial zui duh ta bik lova.

Chutia an kal mek lai chuan Keivawmhranga chu Phuaisabaka leh Khurluta te lama rawn leh hawiin,” Sabaka leh Luta kha…rawn kal chak ve deuh ula. Hei kan kalpuipa nen hian an tawng ka thiam loh avangin kan inbe hlei thei bawk si lova. Kan kalna tur chanchin tlem a zawng zawh ka duh bawk si avangin Luta khan khawngaihin kan tawngte min han leh sak dawn em maw ni le?” hawihhawm taka a han tih chuan Sabaka leh Khurluta te pawh chu kal chak zual sauhin an hma a mi pahnih kalte chu an va pawh phei ve ta a.

Khurluta a bula a awm hnu chuan Keivawmhranga chuan a aw han thian karhin,” Pu Siantuang… Hman zana kan thlenna in a i rawn len zan khan thu chiang zawk ka zawt fiah hman chiah lo che a. Eng ti tur a kal nge kan nih a, in khua chuan eng buaina nge a tawh chiang takin a rem chuan min han hrilh tawh ta che..” a han tih zawh chuan Keivawmhranga thusawi chu Khurluta chuan hnehsawh em em mai hian a lo letling zung zung a.

Siantuanga pawh rawn tawngchhuak ve in,”A ni tak asin maw le..Thil awm dan chiang zawk mumal taka han inhrilhna hman pawh kan la nei meuh lova. A hma a ka sawi tawh ang khan Tonzang khua a awm ka niin Tonzang khaw Val Upa ka ni nghe nghe a; Zou hnam kaupeng Phiamphu hnam ka ni. Tonzang khua leh a chhehvel hi Zou hnam kaupeng Manlun ho lalna niin kan khua ah pawh hian Manlun lal fel tak mai Lamthianmang a lal mek a…

…Manlun lalte hi mahni tawk a lal chak tak ni hlawm mahse kan piah lawk a awm, Manlun lalho aia khaw awp leh khua-leh-tui nei ngah zawk Guite lalho hian leido chu ni chiah lo mah ila min nek reng maiin remchang engemaw hlekah hian chhuanlam eng eng emaw vangin min bei zeuh zeuh fo reng mai a…

… Hmanni deuh lawk a kan Lal fapa Lunkhokam leh a thiante khaw danga zin pawh vanduaithlak tak mai a kawng bo palhin tumloh deuh maiin Vangteh ram chinah an lo va lut palh a ni awm a. Chutia an va lut sual palh chu Vangteh khaw tlangval hovin lo nangchingin Kan lal fapa tih loh chu that vekin Lunkhokam erawh salah an man thung a.

… Vangteh khaw awptu Guite lalpa Gendong hi lal thiltithei leh ropui tak niin a khua leh khua zawng a inbeih a ralah chuan kan hneh a rinawm si lova. Palaite tir a vawi tam kan lalpa fapa hi min pe let tura kan ngen hnu pawhin Vangteh khaw lal chapo tak mai chuan luhlul chhuah tlatin kan mi tirh apiang mai chu a lo vau let hrep zawk mai thin si a. Tih ngaihna tak pawh kan hre tawh lo a nih hi maw ..” beidawn hmel tak chuan a ti chuai raih mai a.

Bung - 159

[ Guite ho (a then chuan Vuite emaw Nguite an ti bawk) hian G-group hnam nawlpui ho Ciimnuai a an chen lai ata tawh lal ropui tak tak nei thin in anmahni pawh “Nampi” (hnampui) inti ngat kha an ni a. An lal ropui hmasa ber chu Tonlun (Tonmang an tih bawk) a ni a. Guite ho hian mak tak maiin an thlahtu hi Ni (Sun) khi a ni an ti ve tlat mai a. An hnam hming rawn chhuah dan pawh “Gui” (Ni zung) tih thumal hi niin an sawi thin.

Heng hunlai hian Guite lalho chuan khaw tam tak heng – tunhma a Ciimnuai khaw awmna thin bul Saizang, Tuilu, Teizang, Lousau,Tualphai, Kaptel,Tawizawi,Khumtlang, Vangteh, Lamzang leh khaw dang dangah te ro an rel a. Teddim leh Mualpi ah erawh hetih hunlai hian Guite ho an la kai lo.

Heng khuate a Guite hovin ro an rel lai hian tuna Paite hnam peng ang a kan hriat lar tam tak - Hauzel, Tonsing, Haulai, Phaipi, Khuptong (Mizoramah chuan Khupchawng kan ti), Vualnam (Gualnam an ti thin bawk), Naulak, Shoute, Tangpua, Langel, Suante, Hangzo, Laingek, Thawmte, Tombing, leh a dang dangte hi Guite lal hnuaiah awmin “Guite hnam ho” ti a hriat tlanglawn mai an ni thin.

Guite ho awmna atanga hmar lamah erawh Zou hnam ho awmin Zou chipeng Manlun leh Mantuang ho an lal a. Manlun hnam hian abikin an unau dangte aia lal ngah zawkin heng – Tonzang, Khuangnung, Haidawi, Thangkhal,Tawtak,Khawdai, Vanglai, Kahgen, Mongken, Tualmei, Bungzang, Gamngai, Tungkua leh khaw dang dangah te an lal a.

Khuangnung khua atang hian Zou hnam thenkhat chu chhim lamah kalchhuakin Simte an inti a. Simte ho hian Khuangnung tawng hmangin an chungah hian Ngaihte chipeng zinga upa ber, Thangsing hnam ho chuan lalna an chang ve thung a ni. ]

Tonzang khaw lam pan a an kal zel chu tlai thawkhat tak tawh ah hian khua an lut ve tawk a. Keivawmhranga te thian za ho pathum chu Tonzang Val Upa Siantuanga inah chuan thlengin zanriah ei khamah chuan khawiah mah kal kawipui lovin Siantuang chuan Tonzang khaw lalpa, Lamthianmanga inah chuan Keivawmhranga te chu a luh pui nghal rawih mai a. Lalpa Lamthianmang chu a khawnbawl upate leh a pasalthate nen lo awmin muk em em mai hian an lo ti titi tlang hlawm a.

Manlun Lalpa Lamthianmanga’n Val Upa Siantuang a han hmuh chiah chuan,” E khai…midang daih emaw in nih dawn ka lo ti a !! Tudang nilovin ka Val Upa Siantuang a ni reng mai ka ti !! Sihzang khuaah I zin emaw ka ti a. Hawh..!! ka zu thlum tha mi hi han dawn ve teh khai !! Kalkawng laka i hahna zawng zawng te pawh kha a dam mahna !!” mawi hnai taka a inlengte chu lo dawngsawngin a han ti a. A hmelah erawh lungngaihna ruk engemaw tak a nei tih erawh tu tan mah hai rual a ni lo thung !!

Lalpa Lamthianmang chuan chu zana a in a rawn chuangkai te chu uluk taka thlek kual velin,” Kha… khawi lam mi nge ni ngai? I mikhualte em ni? An zinga pakhat phei kha chu a palian in a hmel te pawh a va tha ve maw le !! Mitha fa an niang maw..” tia Keivawmhranga te chungchang a han zawh chuan Siantuang chuan an lalpa chu rang taka chhangin,” Lalpa, zanin a i in a ka rawn hruai luh hi tudang nilovin khawthlang lama Pasaltha ropui leh lar tak mai, ‘Sapui Chaih Pasaltha’ an tih ngei chu a nih hi. Sihzanga ka zinna ah, Sihzang khawnbawl upa Vumkhankhai a inah an lo thleng mek a; kan khua in buaina kan tawh thu te hrilhin a tanpuina ka rawn ngen chawt mai a ni..” thiam tak maiin a han ti dap dap a.

Lalpa Lamthianmang chuan Siantuang chu rawn chhang leh in,”A nih tak chu maw le !! Min lo ngaidam ula…I sawi pasaltha hming chu vawikhat mah a hriat phei chu ka lo la hre ngai hauh lova. Amaherawhchu, hetiang dinhmun manganthlak a kan din laia kan hmelma ni lova min tanpui duhna thinlung nen a rawn kal chu tupawh ni se, khualtha an niin kan khuaah hian engtiklai pawhin an leng reng a ni..” tiin tha takin a inlengte chu Lalpa chuan a lo chiau-au ve a.

Lawm takin a mikhualte an lalpa chuan a lo dawngsawng a ni tih Val Upa Siantuanga’n a han hriat chuan,” A ni ngawt taka sin Lalpa..He khualkai pasatha hmingthang tak hian i fapa Lunkhokam chu min chhanchhuah sak ka rilru chhungril takin ka beisei tlat nia..” a han ti chu Siantuang chuan a thil sawi chu a sawi zo hman lo mai ang tih hlauhawm khawp a rang hian an sir lawk a Tonzang khaw daingul, Pasaltha Phungkhenpao kam nam deuh tawh chu vawilehkhata rawn te chhuak thawtin,” U Siantuang… Zou ho hi dawihzep tak hnam kan niin kan lal fapa hi khaw dang tlangval min chhanchhuah sak kher hi kan ngai ta em ni?..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 1:16 pm

Bung = 160

… Nge Tonzang khua hian pasaltha tumah, mahni khua-leh-tuite chhan ngam a nei ta lo zawk? Eng ang fakau a nepin nge he khaw tlangvalte hi min hmuh tehlul ni? Kei Zou hnam kaupeng, Tungnung hnam pasaltha hian midang tanpuina hi engtikah mah ka pawm aw kawng ngai lovang !! ” aw vin tak leh mahni aia upa zawk te pawh zah pah na chang hre zo tawh lo tih hriat tak mai hian a rawn ti a. Chutia thinrim taka Phungkhenpao a rawn tawngchhuah takah chuan chulaia Lalpa ina awm Khawnbawl upate zawng zawng chu an ngawi thap mai a. An zinga pakhat te mah tawng ngam reng reng an awm lo !!

[Thil pakhat mak thawkhat ve tak mai chu Zohnahthlak chi peng hrang hrangte hi eng Hnam huang chhungah chiah hian nge khung luh tur an nih tih hi chiang taka sawi fak hi an harsa em em mai a. An khawsakna leh an chhehvela hnam awm te a zirin thenkhat hi chu thliarhran an ni a tih theih hial awm e.

Guite chi pengte hi tuna Paite hnam kan tih te zingah hian a nawlpui chu awm mahse Thado ho chuan Guite hi an chi peng zinga upa ber ang a chhal ve tlatin tun thleng hian Guite zingah Thado hnam anga awm an awm ve nual tho mai a. Tin, Hnamte ho te pawh hi Mizoramah chuan Lusei hnam zinga awm angin emaw a hranpa a Hnamte hnam tawp ang a ding ang te in sawi a ni thin tak na in, Hmar hnam zingah chuan Thiak ho hnuaia rin luh an ni ve tlat mai a. Chutiang chiah chuan Varte chi peng te pawh hi Hmar Lawitlang hnam anga hriat ni thin mahse Paite zinga awm Varte thenkhat chu “Valte” in tiin Paite angin an awm ve tlat mai.

Kan unau G-groups hnam ho zingah phei chuan hetianga awmna leh phuarkhawmtu inpelhsawlh hi an awm nual mai a. Hei hi heng G-groups hnam hrang hrangte group dang aia an inhnaih bik vang te pawh a ni ang e. Entirnan, nichina kan sawi Guite ho bakah Hangsing ho te hi Paite leh Thado ah an awm ve ve a; Samte ho hi Zou leh Paite zingah an awm bawk a; Ngaihte hi Zou, Simte leh Paite ah an awm vek a; Changsan ho (Khongsai chhunga mi) erawh Hmar leh Thado tawng hmang zingah te an awm a; Neihsial ho ngat phei chu Vaiphei, Gangte, Paite, Zou, Thado etc zingah an chenna a zir a awmin hnam hrang hrang angin Neihsial chi peng theuh theuh pawh an inchhal thin a ni.

Hetianga kan hnam ho khaikhawmtu buai nuaih mai avang hian a eng hi nge dik ber a, a eng hi nge dik lo tih tu tan mah chiang taka va sawi theih a ni tawh lova. Hei hian Zohnahthlak hnamte hi inhnaih tak kan nih hlawmzia leh tunhma kan pi leh pute hunah khan tunlaia a hnam leh hnam ang zawnga inhmuh thiam loh lek lek kan chin thin ang chi te hi an nei ve ngai lem lo tih a ti chiang thawkhat viau a. An awmna a zir leh an chhehvel hnamte a zirin a tam zawk kha chuan tawng te pawh an lo hmang ni maiin a lang a.

Heng atangte ringawt pawh hian chhul khat kual vek kan nihzia leh tumah in en hrang emaw inti hrang thei bik kan nih lohzia chiang takin a lang thei awm e. ]

Chutia an ngawih thiap lai chuan muang changa Lalpa Lamthianmang chu rawn tawngchhuakin,” Khai…Phungkhenpao…I rilru natna leh i tlawmngaihna chu hriatthiam pui viau che mah ila. Lo inbeng dai hram teh khai !! He kan buaina leh kan manganna hi keimahni a chinfel theih tawh chu ni se la, a hma pawh khan kan chingfel daih tawh dawn lovem ni?...

…Hei tun thlengin ka fapa, ka hmangaih leh ka thlakhlelh em em Lunkhokam chu Guite lal Gendonga kutah a la awm chu a nih si hi maw !! Chu thu chu hreh viau mah ila kan pawm thiam erawh a ngai ve tlat si a ni !! He pasaltha phei hi chu ama tan a hlawkna awm miah lo leh a buaina pawh ni miah lovah a rawn inbarh lut hlauh zawk a ni si a !! He mi chungchangah hian keimahni chauh a tih theih fumfe kan neih mumal tak si lovah chuan midang chunga kan rinna leh beiseina han nghah ve mai pawh chu a tlawm thlak viau dawn chuang em ni? “ …an lalpa meuhin a han tih chuan la lungawi lo viau mahse Pasaltha Phungkhenpao pawh chuan ngawih a chuh ve ta zawk a.

Chutia tumah tawng leh ngam an awm tawh lo a ni tih a hriat veleh chuan Keivawmhranga chuan a bul a ding Khurluta chu a han kheuh zeuh a; Khurluta pawh chuan chutia Keivawmhranga’n a rawn kheuh nachhan chu hrethiamin a tawng lehlin sak tur chuan a lo inring ve nghal mai bawk a. Keivawmhranga chu Lalpa Lamthianmang lam hawi chuan,” Anih Lalpa rem i tih chuan thil pakhat ka lo zawt teh ang che khawngaihin? Guite Lalpa Gendong chuan tun thlengin I fapa tlanchhuahnan chuan phut engmah a la nei lovem ni?” dilchhut takin a han ti a.

Bung - 161

Lalpa Lamthianmang chuan aw fiah fel fai tha tak mai a rawn chhangin,” Tumpang sial pachal lian tha tak mai ka nei a. A lenzia mai bakah a ki sei zawng ringawt pawh hi hmuhnawm tham a tling ve hial a. He ka sechal hi ka chhuangin helai chhehvel khuate ah ngat phei hi chuan a hre lo mang pawh an awm lo hial a. Tin, he tumpang sial hi ka ngainatna chhan em em mai pawh eng dang vang nilovin mak tak mai a mihringte lakah a zaidam em em na leh tun thleng pawh a tuma tan hnawksak a la nih ngai lohna te hi a ni a; sechal lian leh chak tak a ni e ti lo chuan awlsam taka kaih mai theih a ni te hi ka chhuan zualna a ni nghe nghe.

… A neitupa hi Manlun hnam ka nih avang hian ka sial pawh chu ‘Manlun Sial’ tiin ka khua leh a chhehvel khuate ah hi chuan an hre ve mai thin a….

…Tin, hetih lai mek chuan, Lal Gendonga hian tumpang sial lian tak, a chapo pui em em mai hi a nei ve bawk a. An khua mai bakah a chheh vel ram zawng zawngah chuan “Guite Sial” tia a hriat lar a ni a. Hmanni deuh khan chung kan sechal pahnihte chu kan khaw pahnih inkara awm chikhur a an chi tlan tum chu intawngin an lo insi chiam mai a ni awm a. A hnu a thu ka hriat leh danin chumi ni a chu chikhur a chi phur tum thenkhat chuan an insi lai chu hmuhnawm ti takin ral atangin an lo thlir a ni awm e…

…..Nimahsela, vanneiha siamin an insik tan hun hi a tlai deuh tawh avangin hemi tum hian a vawrtawp thleng hman ta lovin an nunna hial tan a pawi a thlen hma in khua in a thim hnan ta a ni awm a. An inbei lai mit ngei a hmutu thenkhat sawi dan phei chuan heng sial pahnihte hi inhnehtawk viauin a chak zawk emaw tlema a chantha zawk deuh anga han sawi tur pawh an la awm lo ve ve a nih hmel a.

Chu an inbeih dan leh ka tumpang sechal chhuan em em chungchang chu Lal Gendonga beng a thleng ve a ni teh chek ang chu hei ka fapa Lunkhokam a tlanchhuahnan pawh thil dang engmah ngiat lovin chu ka tumpang sechal chhuanvawr kher kher mai chu a rawn ngen tlat mai a nih si hi maw…” a ti dul raih a.

[ Tumhma chuan an sial vulhte hi dai velah te an tlat tir mai thin a. Chutianga an sial vulh zinga sepui hur thenkhat chu ramhnuaia Tumpang chalin lo pawlin chutianga thlahpawlh fa chu an hring ve fo thin a. Heng Tumpang leh sepui thlahpawlh te hi “Tumpang sial” ti a hriat an ni thin a ni.]

Lalpa Lamthianmanga thusawi a han hre chiah chu a thusawi pawh ngaihtuah chiang hman mang lovin Keivawmhranga chuan,” Chuti a nih si te chuan Lalpa, engnge buaina awm? Ran chu ran an ni a, mihring erawh mihring an ni ngai a ni lawm ni? I sechal chu chhuang viau mah la i fapa meuh tlanchhuahnan te chuan uihawm lua a awm thei dawn chuang em ni?” a han ti thawr mai a.

Keivawmhranga’n Manlun Lalpa zawhna a han zawt phawng mai chu thinrim hmel fahran a Tonzang pasaltha Phungkhenpao an rawn vin tuarh a tum lai tak chuan Lalpa Lamthianmang bawk chuan zaidam taka rawn chhang lehin,” Ni lo !!…Pasaltha….Thil awm dan i hrethiam lo a ni. He ka sechal duh tak mai hi ka ui vang a ni reng reng lo !! Ka fapa tlanchhuahnan a nih phawt chuan ka sechal chu sawi loh ka neih zawng zawng pawh hi ka ui mawlh lo asin !!

…Mahse Guite Lalpa Gendonga mizia leh rilru puthmang hi tunhma atangin ka hrechiang a. A thlahtu Guite lalho hi lal ropui leh fel tak tak ni thin mahse he lal zet erawh hi zawng lal chapo leh dinhmun thaa a dinna tur a nih phawt chuan nidangah pawh dawtsawi mai pawh hreh lo leh mahni thutiam meuh ah pawh dinngheh tum lem lo a ni a…

…. Ka sechal pawh hi a kutah chuan va hlan pawh ni ringawt mah ila a intiam ang chuan ka fapa Lunkhokam hi a chhuah zalen kher ang em tih chu zawhna lian tak a la ni tho a ni…” beidawn hmel tak chuan a ti chuai raih a; chutia Lalpa chuan a han sawifiah meuh chuan Keivawmhranga pawh chuan thil awm dan chu kimchang takin a hre fiah ve ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 1:16 pm

Bung - 162

Muk taka thil ngaihtuah tih hriat tak hian Keivawmhranga chu a han ngawi vang vang phawt a; a hnu deuhah chuan Lalpa lam hawi a rawn hawichhuak lehin,”A nih tak chu maw le Lalpa. Thil awm dan chu ka hrethiam e. Engpawh ni se, tun dinhmunah zawng a chan chhe zawk kan nih si avangin rem i ti a nih zawngin Guite Lalpa duh dan leh phut dan ang chuan i sechal nen Vangteh khaw lam chu pan phawt mai tha in ka hria a…

… Nimahsela hetia kan va kal hian tlangval tam lutuk erawh kal lo ta ila a tha awm e; chuti lo zawng an khua va bei tum angah te pawh min lo ngai palh thei tlat mai a, engamah hma hauhin in khaw pahnih inkar hi a punlun zual palh hlauh thei tlat a ni…

….An khua kan va thleng phawt ang a, i fapa pawh chu a dam in a hrisel ngei em tih te pawh kan va finfiah ve hrim hrim ang a, Guite lalpa chuan phut belh a lo nei a nih pawhin zawimuangin kan ngaihtuah tha leh zawk dawn nia…” tia felfai taka ruahmanna a han siam chuan Tonzang khaw khawnbawl upate chu an hma a ding pasaltha chu fing leh remhria an ti hle mai a; Keivawmhranga remruatna chu a rilrem zawng tak a ni tih hriat tak maiin Manlun Lalpa Lamthianmang pawh chuan a lu a lo bu ve nghut nghut bawk a.

Keivawmhranga ruahmanna ang chuan a tukah chuan chhuah zai an rel ta a. Val Upa Siantuang leh Tonzang khawnbawl upate chuan thil duhawm lo zawk a thleng palh thei a ni tia kal ve phal lo viau mahse Manlun Lalpa chuan,”ka fapa duh tak chhanchhuak tur chuan keimah ngei ka kal ve tur a ni…” a tih ve tlat si avang chuan Guite Lalpa Gendonga mizia an hriatchian avanga hlauthawnpui viau mahse an hnial ngam ta lova.

Tichuan Keivawmhranga bakah Manlun lalpa Lamthianmang, Phuaisabaka, Khurluta, Val Upa Siantuang, Pasaltha Phungkhenpao leh Tonzang tlangval pali dang chu ‘Manlun Sial’ nen chuan Vangteh khaw lam panin an chhuak ta a.

Kalkawnga an kal pah chuan pasaltha Phungkhenpao chuan tumah tawng ve lo turin leh inbiakna tul chu a kut a nghat vek mai turin khaw thlang lam ram atanga rawn kal Keivawmhranga thiante chu vau ti tih chuan a han hrilh pung pung a; a khawsakzia chuan Val Upa Siantuanga mit chu ti kham thin viau mahse lalpa Lamthianmanga’n a duhsak miau avanga khak hreh thinin a en liam chang hi a tam zawk fo mai a.

Khaw inhlat tak an ni lem lo bawk a, tukthuan ei khama an chhuak chu losul haw hun awm velah chuan Vangteh dawhlungte chu an thleng fel chu a ni deuh der mai a. An khaw mi pawh nilo, khaw dang mi sial lian tak mai kai an khawchhunga rawn lut leh an zingah chuan a incheina atanga ringawt pawh khaw khat Lal ni awm tak tel ve an han hmuh chuan a hmu hmasa apiang mai te chuan hmuhnawm leh mak tih inkawpin an thlir dauh dauh mai a. Keivawmhranga thiante leh Tonzang ho erawh kawng lakah tumah bia in emaw khawiah mah peng kawi lovin Vangteh Lalmual lam chu an pan ding nghal vang vang thung a.

Chutah le !! Lalmual an han thleng fel, an se kaih pawh an thlung fel hman tawk tih ah chuan anmahni rawn hmutu tlangval zinga pakhat chuan khaw dang atanga an khua a tlangval rual rawn lut chu Tonzang khaw mi an ni tih hrechhuak thutin Vangteh tlangvalho chu Lalmuala pungkhawm tur chuan mangang aw tak chuan a han au ta tuarh tuarh mai a le !! Keivawmhranga leh Tonzangho tum ang chuan thil a kal tluan hmel ta lo kher mai !!

Vangteh tlangval pakhat chutia a han au tak vak maiah chuan reilote ah Vangteh tlangval thahnem tak chu lalmualah rang taka rawn pungkhawmin an rawn haw haw phei dur dur mai a. Chung tlangval pungkhawmte zinga mi tlem a phanchang deuh tawh chuan,” Man vek rawh u..tumah chhuah su… Che thei lovin kan phuarhlawm vek dawn nia…” tiin a au chel chul ta mai le !!

Val Upa Siantuanga’n beidawng tak mai a,” Ngawi teh u..Thil awm dan in hrethiam lo a ni. Buaina zawng a rawn kal kan ni lo a nia. Buaina chinfel duh a rawn kal kan ni zawk e…” tia eng anga hrilhfiah a han tum pawh chuan awmzia reng a nei tawh mawlh si lo !!

Bung - 163

Vangteh tlangval rual thahnem tak chuan rawn man chu an tum dawn tho tho tih hmu thiamin Keivawmhranga chuan rang takin,” Lalpa kha veng rawh u…An khawihna palh hlauh dah ang e. Tin, anmahniin hriamhrei an rawn hmang hmasa te a nih ngawt loh chuan in chempuite kha chu lo la dahtha rih ang che u... ” a han ti chhuak ve tuarh a; chuveleh Keivawmhranga thiante leh Tonzang ho chuan an lalpa chu an din hual ve ta a.

Vangteh tlangval thahnem tak chuan an khua a rawn lut te chu rawn nangchingin Tonzang tlangval pali ‘Manlun Sial’ buaipui tura an hruai deuh te chu an rawn hnek nghal siah siah ringawt mai a. Chutia Vangteh tlangval hovin an thiante an rawn khawih a hmuh chiah chuan Keivawmhranga dinna lam chu Phuaisabaka chuan a tul ang a chetlak ve phalna va la ni awm hrim chuan a va en phei zauh a.

Phuaisabaka mitmeng a zawhna awm chu Keivawmhranga pawh chuan hrethiam nghalin a lu a lo bu ve zeuh a; a pasaltha ngaihsan leh zah em em maiin a duh ang thal a chet phalna a pe tih a han hmuh chuan lawm avanga nui var varin Phuaisabaka chuan ama hriat phak tawh leh hian,” Tun tum chu kan zinna a fuh bawk a; a nuam dangdai dawn riau mai ka ti…” zawite in a ti sap a.

Vangteh tlangval rual chuan Tonzang tlangval pali ‘Manlun sial’ buaipui tura an hruai bik deuh te chu dimna tel hauhlova rawn bei hmasa in Vangteh tlangval paruk vel chuan chung Tonzang tlangval pali te chu an rawn tlawm ti tih ta mai a !! Chutia a naute dinhmun chhe zawka an ding tih a hmuh chuan Val Upa Siantuang chuan rang taka va tanpui a tum lai mek chuan Vangteh tlangval tuaitir pahnih hian an rawn zuan rual thut si a le !! Chung tlangvalte lakah chuan tlem a kum lama lo upa ve deuh hlek tawh Val Upa Siantuang chuan chona a hmachhawn ve ta tlat mai !!

Mahse !! Siantuang hian a fel leh a remhriat avang ringawt a khaw khat val upa ni thei a ni bik lo tih hi chumi ni chuan Vangteh tlangvalho chu zirtir a tum ruh khawp mai… Chutia Vangteh tlangval tuaitir pahnihin an rawn zuan thut chu rang taka lo bum zawkin chiang em em mai hian pakhat a khabe ah dawmin pakhat a nak nemah tak a lo tlawh siah mai a !! Chumi ni chuan an mi beih pa chu mi naran mai mai a ni lo tih chu a hranpa a hrilh hriat an ngai lo kher mai !!

A rualin an rawn tleh phei ta dul dul mai si a, rilru fim tak hmang a chet han lak chu a har ta viau mai le. Vangteh tlangval sa tha nelh nawlh pathum hian vawilehkhatah Pasaltha Phungkhenpao pawh an rawn zuan ve ta thut mai a. Pasaltha Phungkhenpao lah a lo duai bik lo nasa in pasaltha thinchhia tih takah,” E e eee….Chutianga min han beihrawn vel khanglan chuh!!” Kha keimah Pasaltha Phungkhenpao…ka rawn che tak tak dawn e..” tih pah chuan amah rawn beitu tlangval pathumte chu a theh vir nawk nawk hlawm mai a.

Khurluta pawh amah rawn bawhtu tlangval pakhat nen chuan an intum tawk viau mai a. Chutih lai mek chuan Vangteh tlangval pathum vel chuan a hmel a la naupan mai vanga an zuam em em, Tonzang khua atanga rawn kal ve, vawikhat mah a hmel erawh an la hmuh ngai loh tlangval tuaitir Phuaisabaka chu an rawn bawh vei rawk a.

Phuaisabaka erawh chuan nui sak chungin,” He hun hi alawm ka nghahhlelh em em !! Khawnge I han ti tak tak teh ang aw…” tih pah chuan a rawn hnaih hmasa sa chu a lo hnek thlu hmiah hmiah mai a. An hma a ding tlangval tuaitir chu an rin ang lek a nep chu a lo ni aw kawng lo mai le !!

Phuaisabaka’n amah rawn beitu tlangval piantha tak tak pathum awlsam leh hnehsawh em em mai a a han tukdawl hnu chuan “U Hranga hian engzah chiah nge a tuk thluk ve tawh ang le?” tia a rilru a ngaihtuah ni awm hrimin rang takin a pasaltha ngaihsan em em awmna lam chu a va hawi phei a.

Chuta a thil va hmuh chu mak a ti kher mai !! Chutia an inbeih chhung hun reilote karah chuan Keivawmhranga chuan tlangval pasarih zet mai chu lo tlawm tawhin a dinna chheh vel lei charah chuan an let pheng phung hlawm mai a. A thil hmuh chu awih lo lek lekin Phuaisabaka chu khi sukin a lu a thing ringawt mai a…A chang hi chuan hringfa a ni ve lo emaw tih mai tur hi a ni thin !!

Chutia Phuaisabaka a va hawi phei lai tak chuan Keivawmhranga pawh chu Phuaisabaka dinna lam chu vawilehkhata rawn hawi phei thutin,” Lalpa mawlh kha…veng tha rawh u aw…An khawih na palh hlauh dah ang e..” ngaihven tih hriat tak mai a han ti a. Chutia Keivawmhranga’n a han tih veleh chuan Tonzang Lalpa Lamthianmang chu a hma aia uluk zawkin an hual tha leh a; Vangteh tlangvalho lah an pung tual tual emaw tih mai turin chhum lo chat lovin an rawn lang zel mai si a !!

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 1:16 pm

Bung - 164

An hmazawn ami theuh bei a an buai luai luai lai chuan thawklehkhatah aw vin tha khelh khawlh leh thunei tih hriat tak mai hian,”A tawk e…Engatinge chutianga in buai tak chiam mai le ?? Duhtawk teh u khai…” a rawn ti thum bul bul mai a. Chu aw an han hriat zet chuan Vangteh tlangvalho zawng zawng leh Tonzang lam atanga kalte chu inthurual vek emaw tih mai tur hian che lovin an ding rual thap mai a.

Thunei tak tih hriat fahran mai aw bawk chuan,” Lamthianmang…engnge thil awmzia ni ngai? Ka khua ah buaina i rawn siam em ni?” vin tak maia a han tih chuan Tonzang lalpa Lamthianmang pawh chuan fiah tha kelh kawlh a chhang let ve in,” Buaina siam tum a rawn kal kan ni love Lalpa Gendong…

..I ngenna ang ngei khan hei ka fapa Lunkhokam tlanchhuah nan ka tumpang sial pawh ka rawn kai ngei e..” tia a han chhan chuan thinrim tih hriat tak mai hian Guite Lalpa Gendong chuan Lamthianmang thusawi lai chu rawn pawt chatin,” I tumpang sial pawh rawn kai eng ang mah la; I fapa hi ka kut a awm a ni a, ka chhuah tir phal leh phal loh chu ka thu thu a ni..” a han tih chuan Guite Lalpa chhang ngam chu tumah an awm ta lova.

Guite Lalpa Gendong bawk chuan chhunzawmin,” A thu hrimin, buaina siam tuma rawn kal kan ni lo” inti siin engatinge I tlangvalte dinna bul velah khan ka tlangvalte let pheng phung a ka hmuh ni?? Ka khawchhungah hian mi zawng zawng hmuh a min rawn cho chhuah tum chu in ni lo maw? Kha an zinga pakhat bulah phei kha chuan pasarih lai a vai thlu tihna em ni? Kha pa kha tunge maw a nih reng reng le? Vawikhat mah helai tlangdung velah ka la hmuh ngai pawh ka hre bawk si lova…” tawngkam ngaihno bei lo tak mai chuan a han ti a.

Lalpa Lamthianmang chuan rang taka Guite Lalpa chu chhangin,” I hma a tlangval ding hi tudang nilovin, Tiau lui thlang lam ram a khualkai pasaltha hmingthang em em mai, Zote khaw pasaltha ‘Keivawmhranga’ an tih chu a ni ngai e..” a han tih chuan Guite Lalpa chuan a ngaihna hre lo takin a bul vela ding a khawnbawl upate lam chu a han hawi kual vulh vulh phawt a…

… A khawnbawl upate mitmeng atang chuan chu pasaltha hming chu vawikhat mah an la hre ngai bik lo a ni tih a han hmuh chuan nuih za miah lo tih hriat tak mai a rawn nui chhuak lui vakin Lalpa Gendong chuan,” Chutiang hming phiangsen chu hriat pawh ka lo hre ngai teh hrep love….

…. Nge pasaltha hming ni awm tak phuahchawp kha tlangval kha rawn put tirin min rawn vau zam i tum zawk?? Chutiang a lo nih ngai chuan ka hlau ther te lo che u a nia.” a ti ta siah siah mai a. Tumah aw chhuah zui ngam reng an awm lo !! Chutia Lal muala pungkhawm Vangteh leh Tonzang tlangval rualte an ngawih thap lai chuan Vangteh ho zinga ding ve, la pa valai ang reng tak pakhat chuan a aw rawn thian ri kharhin,” Min lo ngaidam hram la Lalpa...Rem i tih chuan khawngaihin ka lo inrawlh ve lawk ang e..

Nichina Tonzang Lalpa in a sawi kha, uluk taka ka han ngaihtuah let hian chu hming chu khawthlang lam ka zin lai khan ka hre tawh tlatin ka hria a ni. Dawt hulhual a sawi pawh a lo ni lem lo mai thei bawk e..” a rawn tih ve tak tlatah chuan Guite Lalpa pawh chu thinrim viau mahse a inbengdai leh ta hram hram a.

Guite Lalpa chu a khua-leh-tuite zinga aw rawn chhuah ve pa pakhat lam chu hawi thuaiin,” Chuti em ni Nenggou?? I chiang meuh maw? Vangteh khaw Val Upa meuhin chutia i sawi a nih si chuan kan awih mai a niang chu !!” a han tih chuan Val Upa Nenggou chu rang taka a hma a ding tlangval lian tha zet zawt leh hmeltha tak, a biang dinglama sapui tin hriam takin a hamna ni awm tak ser nei lam chu rawn hawiin,” Tlangval, I hmai a ser awm dan atang khan, khawthlang lama a sakhming an lam fo thin, “Sairal Buan Pasaltha” an tih kha i ni em le?...

… Rengpa Zamthatvunga, Lawipa an tih bawk lalna khua, Chawnchhim tlangval pumpui zan khat lek chhunga bin vek thei a an sawi thin kha?..” a awki atang ringawt pawh a thudik hre chak tih hriat tak mai hian a han zawt a; Keivawmhranga pawh chuan amah zawhna zawttu chu a mitah tak chiang kelh kawlh a lo en rengin “Chumi chu ka ni love..” tia a chhan lem loh avang chuan chulaia awm Vangteh khaw ho chuan tawngka in sawi kher lo mahse, an Val Upa sawi pasaltha ropui ngei mai chu an hma a ding tlangval hmeltha leh pian thiam zet mai chuan a inchhal a ni tih chu an hmuh hmaih hauh lo mai a.

Bung - 165

A hmelah zamna emaw hlauhthawnna chhete mah a awm eih lo a ni tih a han hmuh chuan Guite Lalpa chu rawn nui chhuak hawk hawkin,” A mitmeng reng mai pawh a rorum thawkhat viau e !! In sawi anga pasaltha chak hmingthang a lo ni te a nih ngai chuan, beisei loh takin Tonzang ho chuan thil hmuhnawm tak vawiin ni hian min hlui dawn a ang riau mai ka ti !!” nuih za fahran leh chapo tak chung si hian a han ti te te a.

Amah Lalpa Gendong bawk chuan chhunzawm lehin,” Vawiin ni hian helai ram chhehvel zawng zawng a inbuana amah hnehtu la tawng ngai lo; amah tlawmtu chu sawi loh, a phawi a phawi zo tu pawh tun thlenga la awm ngai hauh lo, ka khaw inbuan chak chungchuang Suandalmung nen he tlangval hi han inchai teh se….

…In sawi anga a lo chak tak tak a nih te chuan Lamthianmanga fapa pawh chu in hawn thei mahna..Tlangvalho khan helai mualah hian favai kha chhah tha takin han chhung teh u khai…Chutilo zawng he kan khawthlang mi chak anga an sawi hi lei char a a tlak thum dawt hunah a insawh sil awng palh hlauh dah ang e..” tham lo tak chung leh nui vur vur chung hian a han ti a.

Suandalmung hi Tonsing hnam niin a vanglai hun hmang chho mek a ni bawk a, a chakzia hi hahip a sawi thin niin Vangteh khua mai pawh nilovin chumi ni a tel ve Tonzang khuate pawh chuan a chanchin hi an hre vek a.

Guite Lalpa in Vangteh leh a chhehvel khuate zawng zawnga inbuan chak chungchuang Keivawmhranga nen a inbuan tura a han cho tuah chiah chu thinrim tak chung hian Tonzang khaw ho awmna lam atang chuan Phungkhenpao chu rawn tawngchhuakin,” Lalpa, Suandalmung bei tur chuan he tlangval phiangsen ai hian ka tih tlak zawk daih ang tih ka hai love. Tin, inbuan chak Suandalmung han ter pha tur chuan kei tih loh hi chu helai tlangdungah hian tumah an awm lo tih te chu i tlangvalte pawh khan an hrechiang hle bawk ang..” a rawn ti ve ta hmiah mai a.

Chu thu a han hre chiah chu thinrim em em mai hian Guite Lalpa Gendong chu rawn au chhuak thawtin,” Ngawi rawh nauva..Nang tehchai khan ka ruahmanna I sawisel ngam em ni? Tunge maw ni a I inhriat khanglan le?? In Lalpa hovin in zavai khan ka duh chuan tunah la la pawh hian in lu kha ka lak sak vek thei che u tih i hre lovem ni? I lu hloh i duh te a nih loh chuan vawikhat mah rawn tawng ve tawh suh..” a rawn tih phiarh phiarh takah chuan pasaltha Phungkhenpao pawh chuan hreh tak chungin ngawih a chuh ve ta a.

Vangteh lalmual zau tha tak mai ah chuan Lalpa Gendonga ruahmanna ang ngei chuan tlangval pahnihte inbuanna tur chu an han buatsaih a. Tlangvalten an tih tur ang ang an han ti fel ta maw tih ah chuan chung tlangvalho hnung lam atang chuan pa lian tak leh ti-hrawl phiar fut mai, han en reng reng pawh a mi chak tak a ni tih hai rual loh chu rawn penchhuak thauh thauhin,” Phungkhenpao, nuih ti za bang lo pa.. Keimah bei tur hian tlaktlai ber ang te in i lo inchhal ngam ve khanglang tawh a ni maw?...

… Hman deuh a kan khua a I thiante nen in rawn zin tum a kan khaw zawlbuka ka bin hrep che kha i theihnghilh ta em ni? Khatiang bawk a vawrh hrep kha i la thlahlel cheu a nih chuan I duh duh hunah min la rawn cho tha leh dawn nia.. Nang chauh nilovin Tonzang khaw ho zawng zawng pawh khan a rual pawhin min rawn cho ula ti nia…” tia chapo tak leh hmusit em em maia a han tih rual chiah chuan engtiklai mah a chapona ngai thei ngai lo Zote khaw pasaltha hmingthang Keivawmhranga chuan engmah sawi set set lo chuan an inbeihna tur a tlangvalho buatsaih lam chu a pan ta chhak chhak mai a. An inchai tan dawn chu a ni ta der mai le !!

[ Zawlbuk hi G-group unaute tawngah chuan “Haam” emaw “Sawm” ti a koh thin a ni.]

Suandalmung chuan a hma a ding tlangval, thahrui ngah tak hmel pawh pu lem lo; thahrui ngah tak ai chuan a hmelthat leh pian thiam avanga khaw khat nulaho vei rawn ni awm zawk tak hmel pu a han hmuh chuan a nuih te lam lam a ti za lek lek zawk mai a. Keivawmhranga hnenah chuan tham lo lutuk tih hriat zet mai hian,” Khawi lam nge den i duh? Chhak lam nge tlak lam? Nge tuna i dinna hmunah chiah khan ka vit phun dawn zawk che?” nui huah huan chungin a han ti a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 1:17 pm

Bung - 166

Chu thu a han hriat zet chuan Keivawmhranga mitmeng pawh chu vawilehkhatah rawn inthlak danglam nghalin a hma a ding pa chu mitmeng ngaihno bei lo zet leh tihbaiawm tak nena a mitah chiang taka en chung chuan,” Tu in nge lei char chu deng zawk ang tih chu hun in a la hril ang chu !! Keivawmhranga hian a thil tih tur ka sawi lawk ve zuah zuah ngai lo..” muang ban cherh chawrh a a han tih meuh chuan Suandalmung pawh chuan chumi ni a a bitum tur chu mi namai a ni hauh dawn lo tih chu tu hrilh hriat mah ngai lovin a hrethiam ve ta a; zep lovah chuan a mitmeng mawlh mai chu rapthlak a tiin en hrehawm a ti ngawih ngawih a ni !!

Chutah leh !! Peh hel kual kawi lem lo chuan an pawnven ve ve ah chuan an han invuan dun ta chat mai a !! An inbei lai entu mipui phur lutuk chu an haw haw dur dur mai le !! Vangteh tlangval chak chu thawklehkhata au thawtin,” Kha le…Vangteh inbuan chak Suandalmung tunah a rawn che dawn e..” tih pah chuan a hma a khaw khat inbuan chak anga an sawi tam tak a lo chawi kan nawlh nawlh tawh thin dan ang chuan han phawi chu a han tum ve tehreng a… Mahse, hemi tum a a tumpuipa hi tunge a nih a la hrechiang mawlh si lo a ni !! Keivawmhranga ke pahnih te chu chulai lalmual lei charah chuan nghet taka invit phun ang maiin an che chang eih bawk si lo !!

A han beih ngial hnu pawha a phawi zawh tak lovah chuan Keivawmhranga ve thung chuan,” Tunah chuan ka han che ve tawh ang e aw…Lo inring rawh Saithlunga fapa Keivawmhranga ka ni ngai e..” tih leh vawilehkhata a ke pahnih vawr suau a boruak a chawi kan chu a rual ta mai a !! An inbei lai thlirtu zawng zawng bakah Vangteh Lalpa Gendong leh Tonzang Lalpa Lamthianmang te pawh chuan an thil hmuh chu mak ti lutukin an en thup mai a.

Rei tawk fang a han chawi kan hnu chuan Keivawmhranga chuan a tumpuipa chu lei ah tha takin a han nghat leh a. Chuveleh chuan an inbei lai lo thlir rengtu Tonzang khaw ho chuan kut an beng ta dur dur mai a. Zawlbuk a kai hnua a vawikhatna atana amah phawi zo tu a han tawng mauh mai chu Suandalmung tlawmngai lutuk chuan,” Duh ang thal a ka la inrin hman loh deuh vang a ni kha…A lehpek atan ka tanhmun ka han siamrem deuh ang e..” tia chhuanlam a han siam chuan Keivawmhranga pawh inthlah dul deuhin insiamthatna hun a tumpuipa chu a han pe ve a.

Keivawmhranga a inthlah dul deuh a ni tih a hmu chiah chu vawilehkhatah Keivawmhranga inring lo lai chu Suandalmung chuan rawn bawh thutin, a taksa a rit zawk bawk nen Keivawmhranga chu a bawh thlu ta mai a !! Vangteh tlangval hovin lalmuala favai an chhunah chuan an inbawh thlu dun ta rup mai le !! Vangteh tlangvalho lawm lutuk chu an sahawk nasa ngei mai !!

An han tho fel leh chu Keivawmhranga chu a pawnven a favai bet beng fai thauh thauh pah chuan,” Khatiang khan maw kan intih dawn a…A tha e…I duh dan dan khan fin vervek han chhuah leh rawh khai… I chhuah leh thei a nih ngai chuan ka hming hi Keivawmhranga a ni lovang !!” a ti ve ta siah siah mai a. A mitmeng chuan a hma zawng aiin thihna rim a nam zawk emaw tih mai tur hi a ni tawh a. Chutah chiah chuan a inbeihpuipa chu eng ang mihring chiah nge a nih tih chu Suandalmung chuan a hrethiam ve ta chiah a; mahse inlamlet theih a ni tawh si lo !! Phengphehlep khua a tlai zo ta !!

A vawithumna atan an puanven an han invawn sak leh chiah chu Keivawmhranga chuan,” I inring tawh maw? Tun tum engtin nge fin vervek I chhuah leh dawn? Han tum leh ta che..” tih pah chuan a tumpuipa chu a han tawngkhum ve ta ngat mai a. Chutia a han tawngkhum takah chuan Suandalmung thinrim lutuk chuan a mawngkaw tha nen lam sawm khawmin han chawi kan a han tum leh tehreng na a, Keivawmhranga chu a chet hian a che eih lo thung.

Chuveleh Keivawmhranga chu au chhuak thawtin,” Khai le…tunah chuan keimah ve thung aw…Chhak lam nge tlak lam i duh zawk le? Lalpa in lam hawi zawng zawkin aw..” tih pah chuan Keivawmhranga chuan Suandalmung chu hnehsawh taka chawi kangin Guite Lalpa in ropui tak mai hawi zawng chuan favai bar huang huang khawpin a han vawrh tehreng a nih chu !!

Vangteh khaw tlangvalho chuan an hma a dingchang zawk tlangval hmeltha tak mai chu mak ti takin an thlir ngawih ngawih a; Tonzang tlangvalho erawh hlim lutuk avangin an haw haw dur dur thung a. Chu thil a han hmu chu Tonzang lalpa Lamthianmang meuh pawh insum zo lovin,” A ropui kher mai !! Val Upa Siantuanga mi sawm pa chu a lo ropui em zawng a nih hi le !!” a ti ve chul mai a. Chutia an inbeihna a han zawh fel takah chuan Keivawmhranga pawh chuan zawimuangin Tonzang tlangvalte dinna lam chu a pan phei ve ta a.

Bung - 167

Duh tawk a Keivawmhranga’n nidanga a lo vawk lal lenna tawh thin, an khaw tlangvalte hma a mualpho taka a han vawrh phar ta mai chu a tlawm-pa-ek-sen a la in Suandalmung chu a chek tlawk tlawk mai a. Chutia Keivawmhranga’n a vawrh thal hual chu vawilehkhatah in perh tho zawkin a piah lawk a Vangteh tlangval tuaitir pakhat lo ding chu a chempui phih thlak sak zawkin thinrim em em mai chuan chak takin Keivawmhranga lamah chuan a tlan phei ta a.

Chu thil a han hmuh chiah chuan Guite Lalpa chu rawn au chhuakin,” Suandalmung !! A tawk viau e…I chak lo a ni tih pawm thiam rawh..” rawn ti tuarh tuarh mahse thinrimna meipuiin a bual at laklawh tawh Suandalmung chuan an Lalpa thusawi chu a hre chang tawh tlat lo !!

Guite Lalpa a han au chhuah rual chiah chuan rang taka Keivawmhranga chuan leh hawiin ring leng lawng chuan,” Suandalmung…Tunah zet chuan mipa dik tak chet lak dan tur ni miah lovin i khawsa ta !! Mi inring lo lai hriamhrei nen a hnunglam atanga beih ching hi ka ngaidam thei tlat lo !! I duh ang tak chuan sah chu min han tum ta che, min sat fuh thei ngut ang emaw chu ?!!..

…Vawiin ni hian khaw khat inbuan chak naran leh pasaltha dik tak danglamna kei Keivawmhranga hian ka lo zirtir teh ang che..” tih pah chuan amah theihpatawp a na a rawn sah tumtu Suandalmunga chempui chu rang lutuk tak mai a lo bum zawkin Suandalmunga dul nem lai tak maiah chuan dimna tel miah lo chu a lo chhir tehreng a le !! Suandalmung chuan a chempui chu lei chara thlauh ri thawt pahin thaw hlei thei lovin a mu zal hual ta mai a.

Muang cherh chawrh a va pan hnaiih Keivawmhranga chuan a chempui thlauh chu chhar sakin Suandalmunga chip samah dim lo bak sak a kek pah chuan,” I chet dan tenawm tak avangin vawiin ni hian i lu I chan dawn ta a nih hi !! Mitthi khua a nang ang mi tenawm thawn liam tu che ka ni thei hi nihlawh ka in ti e..” lainatna leh zahngaihna chhete mah kawl tawh lo tih hriat maia a tih lai tak chuan Vangteh khaw Val Upa Nenggou chu rawn khek chhuak thawtin,” Pasaltha…Zahngai hram rawh. A lu em chu laksak lo hram ang che…

… Keimahin Suandalmung chu a phu ang tawk hremna chu ka pe ngei ang tih ka tiam a che. Khawngaihin a nunna chu zuahsak hram rawh khai..” tia thinlung leh tih takzet a ngen chiam takah chuan Keivawmhranga pawh a thinrimna vawrtawp atang chuan inlamletin a chempui hum pawh chu a thlauh thla ve ta a. Chutia Keivawmhranga’n a chempui a thlauh tih a hmuh veleh chuan Vangteh khaw Val Upa Nenggou chuan tlangval pahnih tir thuaiin Suandalmung chu Vangteh khaw zawlbuk lamah an hruai lut ta a.

Chutia Keivawmhranga’n a khaw inbuan chak hmingthang, a chhuan em em mai lak a hnehna a chang ta mai chu Guite Lalpa Gendong pawh rawn tawngchhuak ve in,” Vala…I chak hle mai a !! Ka khaw pa chak Suandalmung hi duh tawk a vawrhtu chu sawi loh, a phawi a phawi kang theitu pawh ka la hre ngai lo asin !! Nang ang reng a thahrui ngah hi k apian a hnu lamah ka la hmu ngai hauh lo nia !! Mihring mai nilovin, sahrangte pawh tharum ringawt hmang hian I tukdawl theih ka ring tlat a ni !! Ka tumpang sial chak hmingthang, ka chhuan em em nen hian han in nawr ta ula, in hmuhnawm viau ang ka ti !!” a ti ta mauh mai a le.

Chu thu a han hriat rual chiah chuan thinrim lutuk avanga insum zo tawh hlawl lo Manlun Lalpa Lamthianmang chu rawn te chhuak tuarhin,” Lalpa Gendong…A nihin a ni em em tawh mawlh love !! I intiam ang chuan ka fapa chu min hlan mai ta che. Hetianga tih kual tih kual hi eng nge sawtna awm? Nilenga min chhimbudawi kual i tum em ni? “ inseh ruh teuh chunga a han tih chuan Guite Lalpa pawh chuan thinrim taka rawn chhang let ve bawkin,” Mai mai che chuan a…Ka duh duh hunah I fapa chu ka pe let ang che…

…Ka phalna la hmasa lovin ka ram chhungah an rawn tei lut vei a, a chunga thil thleng tur chu ka thu thu a ni. Ka duh chuan vawiin ni a ka khua a rawn lut nang leh i tlangvalho hi ka tihlum vek thei che u tih i hre miah nang e? I tlangvalte aia let sawm zetin ka tlangvalte an tam zawk tih hi engtiklai mahin theihnghilh suh ang che !! Ka duh a nih phawt chuan in zavai hian ka rapah ka rep hmin vek thei che u asin !! Tin, Ka thu anga in awm lo a nih vaih chuan i fapa Lunkhokam hi i hmuh lai ngeiin a lu ka tan sak bawk ang” a han tih phiarh phiarh takah chuan Manlun Lalpa pawh chuan a fapa chan tur chu a ngai ngam bawk si lo.

Manlun Lalpa in ngawih a chuh ta tih a han hmuh veleh chuan Guite Lalpa chu Keivawmhranga lam hawiin,” Pasaltha, hei hi ka tiam a che..Ka tumpang sial nen in inbeih a, ka mit i ti tlai hle a nih ngai chuan I rawn kal chhan Lunkhokam chu ka chhuah zalen ang..” Keivawmhranga chu a tumpang sial kawlh em em mai bei tur chuan a hmin thlu zo ang em tih a mitmeng a en reng pah chuan Guite Lalpa chuan a han ti a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)