HMAR PASALTHA KEIVAWMHRANGA ZIAKTU- Isaac Zote 1- 207

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: HMAR PASALTHA KEIVAWMHRANGA ZIAKTU- Isaac Zote 1- 172

Unread post by Ngaia » March 14th, 2018, 7:55 pm

Bung - 179

Val Upa Hemchon-in a rawn chhan hma chuan pasaltha Lhunneh bawk chuan rawn chhan khalh leh thuaiin,” Pasaltha, kan khuaah hian hmakhawsang ata tawh chin dan leh tih dan thin kan lo nei a; chu chu thingluang inzawhsiakna kan neih reng reng hian khawmhma chem nilovin chempui tak tak nen kan inbei thin a ni. Kan khuaa i awm chuan kan khaw dan leh hraite hi min zahsak a min zawmsak ve ngei turin nang pawh kan ngen a che..” a tih zawh chuan Phuaisabaka lam hawi phei leh nghalin,” Sapui Chaih Pasaltha kha a thih i duh loh chuan a chempui ngei kha han pe vat rawh..” a ti ta hmiah mai a le !!

Keivawmhranga mak ti lutuk chuan a mit chu Aisan mipui pungkhawmte awmna lamah chuan a han len kual vel a. Pasaltha Lhunneh a thusawi rawn hnialtu an awm a beiseiin Seiboi a pa, pasaltha Letzatong leh Lalpa Thongminlen awmna lama a va hawi kual vel pawh chuan engmah a beisei ang chu a hmu ta tlat lo mai a!! Engmah a hmu mai nilovin Pasaltha Letzatong leh Lalpa Thongminlen a mitmeng a beidawnna leh thlaphanna atang ringawt pawh chuan mi vervek tak pasaltha Lhunneh a thusawi chu thudik a ni tih hai rual lovin a hrethiam ve ta a !!

Tih ngaihna awm tawh hek lo !! A pasaltha ngaihsan leh ngainat em em mai a thih ngawt ai chuan tiin Phuaisabak chuan ‘Thisen Ngai Chempui’ chu Keivawmhranga dinna lamah chuan a han theh chho ve ta ringawt mai a; chutia Phuaisabaka’n a chempui a rawn theh chho tih a han hmuh chuan Keivawmhranga pawhin rang tak mai a lo dawng ve nghalin thingluang inzawhsiak chu hreh eng ang mahse an tan dawn chu a ni ta der mai si !!

Keivawmhranga’n a chempui a hum fel tih a han hmuh chuan Seiboi chu rawn tawng chhuakin,” U Hrang, nang nen a hetianga inbeih hi ka thil duh ber ni hauh lo mahse loh theih lohin kan inbeih chu a lo ngai ta si a !! Kan ti ta rau rau a nih chuan theihpatawp chhuahin kan inbei aniang chu ti raw… Kha le…lo inring rawh aw…Letzatong fapa Helkhosei a rawn che dawn e..” tih pah chuan Keivawmhranga dinna lamah chuan a chempui hriam hmel zet mai chu a va vai phei fua mai a; nimahsela Keivawmhranga chuan a lo bum hman hram a.

Amah sah fuh ngei tumin Seiboi chuan rawn bei mahse Keivawmhranga chuan a hma a ding tlangval zuanzang tak mai chu sah fuh duh lovin a chempui bil lam chauh a hmang ve thung a. An han insat thelh vel leh an chempui inthazo dun taka an han inbum tawn zauh zauh mai mipuiin an han hmuh chuan phur lutuk vangin an haw haw nasa ngei mai !!

Keivawmhranga chuan Selboi chu a mit taka en ran chungin a rilru te te chuan,” Chu tlangval chu a zuan a zangin chempui hman a thiam ngei mai; ka beih tawh zawng zawngah chuan tawh la khirh pawl ber a ni hial ta ve ang a..” a ti rauh rauh a. Chutia an han insah tawn vel lai chuan an chempui leh chempuite chu intawng leh zauh zauh thin in a khat mawi tawkin a ri leh chhak chhak thin bawk a; thlirtu mipui mit a tlat kher mai !!

Mahse..!! Thil mak tak mai chu a thleng ta !! Rei vak lo chutia tumah dinhmun tha bik chang lem lova an han inbeih hnu chuan tih tak takna nen a beitu zawk Seiboi chuan a tumpuipa chu a sat fuh ta tlat mai le !! Rang taka a lo per sawn avangin a duh ang thal chuan sat fuh lem lo mahse Seiboia chempui chuan Keivawmhranga ban veilam a va tawn hman ve tlat avangin Keivawmhranga ban atang chuan thisen a rawn luang chhuak ta zar zar mai a… Seiboi-an thisen a chhuah hmasa zawk tih Aisan mipuiin an han hmuh chuan lawm lutuk avangin an au ring kher mai !!

Chu thil a han hmuh chuan Seiboi chu rawn nui chhuak sakin,” U Hrang, theihpatawpa min bei lo a nih chuan I dinhmun a chhiat lutuk palh mai a hlauhawm e !! A lehpekah chuan tan han la ve deuh tawh teh khai !! Eng chen nge min hlahthlem i tum ni ?” a han ti a. Chutia Seiboi an a han tih chuan Keivawmhranga pawh harh chhuak zawkin a hma a ding tlangval chu kal pah mai mai a chhawnchhaih chi a ni lo tih chu a hrethiam ve ta a !! An inbeihna chu a vawrtawp thlenpui tur chuan rilru leh tih takzeta a beih ve a ngai dawn a ni tih chu a chiang reng mai si !!

Seiboi-an rang tak maia a ngal rawn sah thler sak duai a tum lai tak chuan inthazo em em mai a lo zuang zauhin Keivawmhranga chuan Seiboi a dar veilam pangah chuan a chempui bil zawng chuan a han sat chawrh mai a le !! Seiboi pawh pai khawn khawnin a ke chheh a buaiin ve hman tep a, nimahsela a inthazo em avang chuan insiam rem nghal vatin eng emaw ti tiin a inham tang leh thei hram a.

Keivawmhranga mitmengah chuan tih tak takna a awm tawh a ni tih a han hmuh chuan Seiboi pawh chuan lawm takin,” A lawmawm e !! Tunah zawng tih takzetin min bei ve tawh bawk a, kei pawhin ka theihna zawng zawng sawmkhawmin ka bei ang che..” tih leh a ke le lam tum ni awm taka langa, thawklehkhata chung lama vai chhoh thut chu a rual ta mai a !! Keivawmhranga khel bawr vela tang chuan thisen thar lam tak mai hi a rawn chhuak leh ta zawih zawih mai a. Rang takin lo insaseng hman lo pher se chuan hmuh nuam lo hial khawpin a thler duai ngei ngei ang !!

Bung - 180

Keivawmhranga chuan a mit sen ram nen Seiboi chu en in,” Khai le..Tunah keimah ve thung aw..” tih pah chuan a nak nem lai tum ni awm tak a vai pheiin vawilehkhatah rang taka a tum thlak thutin Seiboi a malpui dinglam chu na mangkheng hian a chem bil zawng bawk chuan a han sat chawrh ta tehreng a le !! Seiboi pawhin na tih lutuk avangin ri a chhuah thawt mai !!

Chutia a malpui chiang em em maia a sah avang chuan rang taka beih let tumin Seiboi chuan Keivawmhranga chu a va vai leh a; amaherawhchu, a na tawrh avanga a hma aia che muang hret tawh Seiboi a chempui chu mawi taka lo bumin Keivawmhranga chuan a chempui phek zawng ngei mai chuan Seiboi a biangah chuan na em em mai hian a han hlap ri no chawk mai a; a bianga a hlap rual chiah chuan thlirtu mipui ho pawh mangang tak a te chhuak thawtin Seiboi chu an thingluang inzawhsiak atang chuan a vir thla nawk mai le !!

An tlangval chhuanvawr a han tlawm ta mai chu mipui chuan mak an tiin tumah tawngchhuak hlei thei pawh an awm lova; mipui zingah chuan an pa farnu, an ni fapa, thingluang atanga tla thla nawk hmutu Themlhing leh Tingneihat chuan an unaupa chu an lainat lutuk avangin an awm hmunah luaithli an lo nul ve tlawk tlawk bawk a.

An thingluang inzawhsiak atanga rawn zuanthlak pah chuan Keivawmhranga chuan a chempui ken lai chu leiah rawn vawm thla thlawrhin a thiante dinna lam pan phei mai chu a tum a; chutia a kal tum lai tak chuan pasaltha Lhunneh chu rawn te chhuak tuarhin,” Khawnge kal i tum Sapui Chaih Pasaltha? In inbeihna hi a la tawp awkawng hlei nem..Kan khaw danah chuan thingluang inzawhsiak a awm reng rengin a chak zawk chuan a chak lo zawk lu a la ngei ngei tur a ni !!...

… Chu a chak lo zawk chu Lal meuh pawh ni se kan dan hi engtiklai pawh a lal ber leh tumahin kan bawhchhiat thiang lo chu a ni a !! Chak lo te tan he piallei a awm ve reng tulna a awm lo !! Kha han en la nang ngei pawh Seiboi hian thisen a chhuah che a ni a. Phuba chu la in i thil tih tur chu i hlen ngei a ngai dawn a ni. Chutianga i tih loh zawngin kan khaw dan leh hraite hi i hmusit hle in a chhunga chengte hi chil min chhak khum angah kan ngai dawn a ni..” a ti ta mai si le.

Thado ho hi hnam kawlhsen leh rothap tak mai an ni a. Aisan khua bikah pawh hian huaisenna hi an ngaisangin an dah hlu em em mai a. He khua hian hman ata tawh chin than mak tak mai an lo nei hi a lo ni a. AIsan khua-leh-tuite hian thingluang inzawhsiak hi inbeihna ropui ber anga ngaiin thih leh dam inkar chungchang meuh a thubuai hlabuai neite chu thingluang chunga inbeih tirin a hmawr pawh bawk nghal ngei ngei a ni bawk thin. Chu dan chu Lal meuh tan pawh sawh sawn emaw thlak danglam thiang lo ang hialin he khaw mipuite hian an ngai thin.

Chu thu a han hriat chiah chuan Keivawmhranga chu vawilehkhatah leh hawi thutin a chempui lei a mi chu a han chhar te te a; muang fan raih chuan Seiboi a awmna lam chu a pan phei ta charh charh a. Chutia a pan phei lai tak chuan a fapate inbei lai tawp lampang rawn hmu hman, pasaltha Letzatong nupui leh Lalpa farnu ni bawk Veipineng chu thawklehkhatah rawn tap chhuak hawm hawmin,” Awi Karei !! Ka duh thei lo…Ka U !! Aisan khaw Lalpa i nih angin i tupa hi i chhan thei lul lawm ni?!! Eng thihna tur khawm thil sual nge a tih a hetianga i hmuh lai renga i tupa pialrala tirh liam i tum tak mai ni?” lungchhe em em mai hian a ti chel chul mai a.

Lalpa Thongminlen pawh insum tum viau mahse a mittui dang zo bik lovin,” A pawi ngawt mai !! Tih theih ka nei bawk si lo a tin ni !! Dan chu dan a ni miau si a le…A beidawnthlak zawng chu a nih hi maw..” a ti chuai raih mai a. Keivawmhranga’n a fapa awmna a hnaih hle tawh tih ah chuan Veipineng chu insum zo tawh lovin a fapa awmna lama va tlanphei mai chu a han tum a.

Amaherawhchu, chutih lai tak chuan thawklehkhatah a pasal chuan lo man betin,” Nengboi, hrethiam hram rawh..dan chunga leng tumah kan awm si lo a nih hi !!” beidawng aw tak maiin a han ti a. A fapa Seiboi awmna lam hawi pheiin Letzatong chuan,” Ka fapa…Pialral ram nuamah chuan min lo nghal dawn nia aw..” hnuk ulh teuh chungin a ti ta ringawt mai a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 14th, 2018, 7:55 pm

Bung - 181

Keivawmhranga, a chempui nen ama lama rawn kal phei chhak chhak a hmuh chuan Seiboi chu lo thingthiin,” Pasaltha, ka lu chu han la ta che..Mipa tan damrei lutuk a tul hran love..” a ti ve hmiah mai a. A piah lawka insum zo tawh mawlh lo, a nu Veipineng chuan tap zawih zawih chungin a fapa hnenah chuan,” Seiboi..Ka fapa..maimitchhing rawh bawiha…a na rei lovang..” thlaphang viau mahse tih theih nei si lo tih hriat tak tawngkama a han thlamuan chuan Seiboi pawh a nu awmna lama hawi pheiin,”Ni love ka nu, thihna chu ka mit ngei hian ka hmu duh a ni..” a ti ve ta tlat mai si a le !!

Keivawmhranga chuan a Thisen Ngai Chempui ngei mai chu zawimuangin a han lek kang a; Veipineng mai bakah Lalpa fanu Themlhing leh Tingneihat te chu an te terh tuarh mai a.. Chuveleh rang tak maia a chempui chu Keivawmhranga chuan han vai thlain Seiboi a nghawng a thleng chiah tih ah chuan thawklehkhatah a tawp ta chawt mai a !! Mipui chuan thil thleng chu mak ti lutuk a thlir chawtin lalmual chu a reh hian an reh thuap mai a !! Keivawmhranga chuan a chempui chu Seiboia awmna piahah chuan a thlauh thla ri ta rawng rawng mai a !!

Chutia Keivawmhranga Seiboi lu a lak sak duh lo tih pasaltha Lhunneh-an a han hmuh chuan vin taka rawn khek chhuak tuarh tuarhin,” A lu kha tunah la la hian lak sak nghal rawh…Kan dan I zawm dawn lo chiah maw?” thinrim takin a rawn ti a. Keivawmhranga erawh chuan,” ‘Hmakhawsang ata tawh chin dan thin a ni’ tih vang maiin thil dik lo chu tih chhunzawm reng tur a ni ngai lo. Tun hma a kan thil tih dan thinte a lo dik tawk lo a nih pawhin chu dan chu siamtha ngam turin huaisenna kan nei tur a ni ngai e….

… Hetiang dan tha lo tak hi ka zawm ve dawn lova; he ka thuthlukna hi sawisel ngam in awm a nih chuan hmaichhanah in chempui nen khan min rawn hrilh rawh u..” ti siah siahin Aisan khaw mipui zing atang chuan rawn pen chhuak tum an awm leh awm loh enin a han thlek kual vel a; amaherawhchu, chu an hma a ding dikna tan tlattu pasaltha chu tumah rawn chhuahchhal ngam an awm lo !!

Pasaltha Lhunneh bawk chu thinur taka rawn tawng lehin,” Aisan khua hi min va han hmusit ve maw le !! Tunge maw ni a i inhriat teh chai chu ni ?!! Mahni tih tur ti ngam lo hi tumah pasaltha an awm ka hre ngai lo..” a han tih deuh kher chuan pasaltha zaidam leh thin nel tak, a tawp khawkah lo chuan thinrim ngai zen zen lo Keivawmhranga thinurna chu a cho chhuak ta tlat mai le !!

Thihna rim nang mitmeng tihbaiawm tak nen chuan pasaltha Lhunneh a chu a mit takah en kalhin,” I ngam a nih ngai chuan nangmah ngei kha i chempui nen khan hetah hian rawn kal phei rawh. Kei Saithlunga fapa Keivawmhranga hi tu chiah nge ka nih tih chu ka lo hrilh hlek ang che..” a ti ta mai a le. Thinrim lutuk avangin pasaltha Lhunneh chu a dinna hmunah chuan chek tlawk tlawk ringawt mahse hlauhna in a tuam tlat tawh a ke pahnihte chuan Keivawmhranga awmna lam pan chuan an kal phei pui ngam ngang si lo !!

A dinna lama rawn kal phei turin Lhunneh chuan a huaisenna a sawm khawm zo ngang lo a ni tih a han hmuh chuan Keivawmhranga chuan nui sak chungin,” Rampalailenga ri bengchheng na zawng hi sapui siam an ni vek hran lo a nia..” deuh sawh lek lek hian a ti ve phiarh phiarh mai a.

Thil thlen dan a piah deuh atanga lo thlir rengtu Lalpa Thongminlen chu rawn tawngchhuak ve in,” A ni tak asin Pasaltha..Vawiin ni hian kei Lal Thongminlen hi thudik fiah takin min hmuh tir ve ta !! He ni atang hi chuan hmanlai atanga kan lo tih dan a nih mai avangin dan tha lo te chu kan ching reng tawh lo ang a; thil dik lo leh fel hlelte chu thlak danglam ngam turin huaisenna ka nei tawh bawk ang. Kei, Thongminlen Doungel, Aisan Lalpa hian vawiin atang hian he dan tha lo tak mai hi engtikah mah chin leh tawh loh turin ka paih bo nghal e..” a ti ta a.

Thihna kotlang ata engemaw ti ti a rawn vak chhuak leh a fapa Veipineng-in a kuah vawng vawng lai chuan Seiboi chu Keivawmhranga lama rawn hawiin,” Sapui Chaih Pasaltha…Vawiin ni a ka nunna min zuahsak avang hian engtikah mah ka damchhungin ka theihnghilh leh tawh ngai lovang che…” a ti zawi sap a. Aisan pasaltha leh khawnbawl upa ni fawm Letzatong pawh chuan,” Ka fapa chunga zahngaihna ropui tak i lantir avangin i chungah ka lawm a; i chanchin an sawi thin ai mah a nasa a pasaltha ropui zawk leh tlukloh rim nam pasaltha i lo ni e !!” a ti ve ta a.

Mipui pungkhawm lalmual atanga an kal darh hnu chuan Keivawmhranga hliamte enkawl turin an thlenna Lal inah Aisan khaw Bawlpu chah thuai a ni a. Hliam na lutuk an nih lem loh avangin Keivawmhranga, Phuaisabaka leh Khurluta te thian zaho chu an zinna Aisan khua fang kual tur chuan tlai lamah an chhuak a; chutia an len thawven pah chuan an rawn kal chhan tak, Aisan khaw mipuite tibuaitu Molpi Lhang (Mualpui tlang) ramhuaite chu engtin chiah nge a beih ang tih chu Keivawmhranga chuan a ngaihtuah nauh nauh reng bawk a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 9th, 2019, 5:45 pm

Bung – 182

Keivawmhranga te khawlai leng an han haw meuh chuan tlai thawkhat ve hle tawhin zanriah kil a hun lek lek tawh mai a. Zanriah kil tura Aisan Lalpa Thongminlen te chhungkua an han insingsat zawh hnu chuan Lalpa, Lalnu, a fanute pahnih leh an duat em em, an naupang ber leh an fapa neihchhun ni bawk bakah chuan Tiau lui thlanglam atanga an khaw tanpui tura rawn kal Keivawmhranga leh a thiante chuan Aisan Lal in ropui tak chhungah chuan zanriah an kil ta a.

Zanriah an kil lai chuan a tupa nunna zuah saktu pasaltha chu Lalpa Thongminlen chuan a en leh zauh thin a; lal mah nise a mikhualpa chu a zahin a ngaisang thar em em a; chhun lama thil thleng chungchang erawh engmah a sawichhuak hran lem lova. Lalnu Vahhoichin erawh chuan an mikhual pasaltha hmingthang chu a zah mai piah lamah a hlauh te hial pawh a hlau deuh lek lek thung.

A fanu pahnihte’n an mikhual tlangvalte chu a khat tawkin an mitmei ve leh zauh thin tih Lalpa Thongminlen-an a han hmuh chuan vawilehkhatah a aw han thian kharhin,” E !! tak ana Hranga…, engtinnge kan khaw buaina chungchang kha hma lak zel in tum le? Rilru a ruahman lawk dan deuhte in nei em?” dilchhut takin a han ti a.

Lalpa zawhna a han hria chu Keivawmhranga pawh chuan ngaituah muk tak nei chunga rawn tawngchhuak tih hriat tak hian,” Eng lo a nia Lalpa…He buaina mak tak uluk taka a chungchang ka han dawn hian helai atang chuan tih vak ngaihna awmin ka hre lova. Chuvang chuan zanin hian kan thian thum hian Molpi tlang lamah chuan kan va riak lut ve phawt dawn emaw ni ka lo ti deuh a…” a han tih chuan Lalpa Thongminlen pawh chuan a mikhualpa thusawi chu a pawmpui a ni tih hriat tak mai hian a lu a lo bu ve nghauh nghauh a.

Aisan ho lo neihna hmun chu Aisan khua atanga hla taka awm a nih lem loh avangin khua thim ti tih tawh tho mahse meichher nen a chumi zan la la chuan kal an rel thlu ta tho a. Chu mai bakah, Aisan khaw mipui tam zawkin an sawi dan kalhmangin thil duhawm lo thlen hun hi zanlai ar khuan hun awm vel a nih tlangpui thin tho avangin an hmanhmawh teh chiam lem lo bawk a.

Tin, tun hnai mai a vanduaina tawkte zinga thar lam ber Val Upa Hemchon fanu, Dimchong chhuna a va kalna, an thlam a va riah phawt mai chu tha in an hre ta ber a. Keivawmhranga remruatna an han hriat chiah chuan tlangval tuaitir Phuaisabaka a phur viau laiin Varte tlangval Khurluta erawhin a rilru te te chuan a hreh ngang mai !! Keivawmhranga thuthlukna erawh sawisel ngam chi a ni tawh der mai si lo !!

Zanriah an han ei kham chuan pawn lama inthiar tura Keivawmhranga a chhuak zawk tih ah chuan Lal fanu upa zawk, a hmelthatna ai mah a, a ngaihnobeina hmingthanpui zawk Themlhing, Lhingbawi tia an koh bawk chuan a ruk a ngawi reng a rawn zui chhuak ve nghalin Keivawmhranga chu a rawn nang ching a. Lalpa fanu in a rawn zui tih a han hriat chuan ‘engnge a sawi duh ni ang aw?’ tia ngaihven turin Keivawmhranga chu a han lehhawi thuai a.

Zak tak leh hreh tak chung chuan a ruk taka a pasaltha ngainat leh ngaihsan em em lawi si chu a rawn pan hnai a; a huaisenna zawng zawng sawm khawmin,” U Hrang…A nunna I kuta a awm chung pawhin ka unaupa Seiboi lakah namen lova that chhuahin a nunna hial i zuahsak a, I chungah ka lawm takzet a ni tih ka hrih duh che a. Chuan,..ih …ih…fimkhur takin Molpi tlang lamah chuan in va riak dawn a nia aw….

… Kan khaw mi tam tak damlohna maksak pui puiin tlakbuak tawhin Pu Hemchon fanu, Dimchong pawh hmanni lawk atang khan hei tun thlengin a la damlo mek chu a ni si a…Ih..ngaih loh lamah khawngaihin min ngaihsak lo hram la. I tan chuan engmah ka ni lovin inlaichinna engmah nei lem lo mah ila, ka ngaihtuah em avang che in chung thute chu rawn sawi ve mai ka ni e..” inthlahrung tak chung leh khur der der chung chuan a ti ta a.

Bung- 183

Lal fanu Lhingbawi thusawi chu a zavai chuan hrethiam vek lem lo mahse a sawi tum nawlpui chu hrethiam ve maiin Keivawmhranga pawh chuan Hmar tawngin a han chhang ve a,” E khai…!! Lal fanu….kei tehlul min ngaihtuah chu phu lo ka intiin lawmawm ka va han ti tehreng em !! Ni e…fimkhur luat a awm hleinem tiraw. Mahse, chuti lutuk chuan min lo ngaihtuah duh lem suh ang che…

… Khuanu zarah eng em kan ti nang…” nui sang chunga a han tih chuan Lhingbawi pawh chu a thaw ve huai mai a. A hmaa pasaltha hmeltha leh pianthiam tak mai chu a hma ai mahin a ngaina in a duh zual sauh emaw a ti hial a; amaherawhchu a niin a vei ang hian Keivawmhranga thinlung chhungrilah hian chhete tal pawhin hmun a chang phak ve meuh ang em tih chu amah leh amah zawhna vawiduailo a inzawh nawn fo thin chu a ni !!

Keivawmhranga, Phuaisabaka leh Khurluta, lo lama riak tura Lalpa in atanga an han chhuak chiah tih ah chuan an thlenna in lam pan a mi pahnih hi chu zan thla eng tak mai hnuaiah chuan an han hmu a. Chung mi pahnihte chuan an awmna an rawn hnaih zel takah chuan an zinga pakhat zawk chu tunge a nih an hre thei nghal mai a, pakhat zawk erawh chu a hmel chu chhun lama an hmuh tawh hnu mah ni se, tunge a nih chiah erawh an hre lem lova.

An dinna bul an rawn thleng phei tep tih ah chuan Keivawmhranga chuan aw han chhuahin,” Kha Seiboi…in thian dun chu khawi lama len tum nge maw in nih le? I pu te inah em ni?” a han ti thuai a. Pasaltha Letzatong fapa Seiboi, chhun lama a nunna Keivawmhranga’n a zuahsak ngei mai chuan rawn chhang let thuaiin,” Ni love U Hrang…Nangmah hmuh tum che a rawn kal zawk kan ni a…

…Kan khuaa i rawn kal chhan ber ka pa hnen atanga ka hriat khan ka theih ang ang a puih che hi ka duh ve a. Hei hi ka thianpa a ni a, a hming chu Satgouhao a ni. Kan khaw buaina chinfel tuma hma inlak dawn hunah khawngaihin ka thianpa nen hian min hrilh hre ve dawn nia..” hawihhawm takin a han ti a.

Satgouhao hi Sitlhou chipeng niin a ni pasal (Thado tawng leh unau G-group tawng dangte ah chuan nite pasal hi “Gang” tiin an ko thin) hi pasaltha Lhunneh a ni nghe nghe a. Satgouhao hi a chhungte chuan koh duatna'n Haoneo emaw Haocha anti thin a.

[ Thado inkohduatna hming a "cha" emaw "neo/neu" awm thin hi Duhlian tawng a "te" kan hman thin nen hian a in ang a (eg. Mawitea, Sangtei etc). Neo/neu tih tak phei hi chu Thado tawng mai bakah G-group tawng hrang hrang heng - Lamzang leh Dapzar (Paite tawng ti a a tam zawkin kan hriat ve ve tak), Teddim, Teizang, Sihzang, Vaiphei, Zou, Gangte, Simte leh a dangte ah pawh a lar hle nghe nghe a. Zawngtah khaw pasaltha hmingthang tak Neuva, Ralte (Galte) hnam pawh hi kohduatna niin a Duhlian tawng chuan "Tea" tihna mai a ni. ]

Satgouhao hi a thianpa Seiboi ang bawk a mahni tawk a tlangval huaisen ve thawkhat tak a ni a. Tiau lui thlanglam ram zawng zawnga lar leh pasaltha hmingthang chetla vel hmu tur a han zui chu a phur leh a chak zawng tak a lo ni a; chhun lama thingluang inzawhsiakna lama thil thleng a hmuh hnu phei kha chuan Keivawmhranga hi a chung en hle in a ni aia pasaltha dahsan tumah a nei lovang a tih theih hial awm e.

Keivawmhranga chuan nui sak pahin,” A nih tak chu maw le.. Kan thil beih tur hi in nunna tan hial pawh a hlauhawm a nih theihzia eng angin sawi pawh ni mah ila, i hmel put hmang han en reng reng pawhin i thianpa nen khan hlauhawm engemaw vang mai mai a hnungtawlh ching mi in nih hmel bawk si lova….

… In rawn kal ve ta poh a niang chu. Tin, chunglai ram bakah a tlang leh mualte chinchang hrechiang tur awm Aisan khaw tlangval tlawmngai a min zui turin tuemaw ber in Val Upa kha lo ngen ka lo tum tho a; nangni in rawn kal theih hlauh chuan a tihzia viau tak ang a. Eng chen nge kan awm a ngaih dawn a hriat loh avangin kar khat tla tur tal in pahnih tan chawfun leh in meichher ken tur va ngaihtuah ve rawh u khai…

… Keini chuan hei kan rawn keng sa diam tawh e. In khaw dawhlungah sawn kan pathum hian kan lo nghak ang che u..” a ti ve ta a. Tichuan an panga chuan chu thla eng tak zan chuan Molpi tlang lam panin an chhuak ta a.

Val Upa Hemchon te thlamah chuan an panga chuan an han lut rawih mai a. Keivawmhranga chuan a zan la la chuan engemaw tal thil thleng awm se a rilru te te in a tih tehlul nen, chumi zan chuan an rin loh tak maiin zan rannung hram ri tih bak chu thawm engemaw dangdai hlek pawh hriat tur a awm hauh lo mai a. A tuk zingah chuan Keivawmhranga chu hma taka thovin chung lai ram velah te chuan a mitte han lenin, a chheh vel mual leh ruamte chu a han thlithlai vel a.

Reilote a han hawi kual vel ringawt pawh chuan chunglai hmun chu lo neih nan a rem tak mai leh awih leh kham chhengchhia pawh awm hauh lova mual inpharh duai mai a ni tih chu a hmu thiam nghal mai a. Aisan khaw hruaituten anmahni tibuaitute hlauh vanga mual dang han bawh san mai an hreh pawh chu awm a ti hliah hlaih tho mai !!

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 9th, 2019, 5:45 pm

Bung- 184

Tlai lama an chawhmeh neih ang angte siam a zanriah hma taka an han kil fel hnu chuan Keivawmhranga chuan rem ti hian a han ruat ta a,” Nizan lamah kha chuan zan a lutte kan ni bawk a, hmun danga inthendarhna hman a awm tawh loh avangin loh theih lohin hmun khatah kan riak khawm ta ringawt mai kha a ni a. Kha vang khan kan ramhuai sualho pawh an rawn inlar duh lo te pawh a ni riau riau ang e….

…Zanin chu a hrang theuhah riak darh tawh ila a that ka ring e. Seiboi leh Satgouhao te kha in khaw lo, in khaw hruaitute’n an thendarh dan hrechiang bertu in nihna angin thlam hran hrana kan inzarpharh dan tur han rel fel u la a tha awm mang e. Amaherawhchu, in hriat tur a ka duh chu, tu thlam pawh thlang dawn ni ula, kan inkar hla lutuk lo tur leh zana kuk ri tal kan inhriat phak tawn theihna tur kha in thlang dawn nia…

… A malte te theuhin riak hrang theuh ila, engemaw chu kan tawn ngei ka beisei tlat mai..” a han tih meuh chuan Keivawmhranga kalpui mi palite chu an in en hrek hrek ringawt mai a; engmah erawh an sawichhuak ngam lo thung .

A ni lah tak a !! Tisa leh thisen neite chu ni se, eng anga tharum ngah leh tihbaiawm pawh ni rawh sek sek Zote khaw tlangval tuaitir, tlawmngai leh huaisen tak Phuaisabaka leh Aisan khualkai pasaltha Letzatong fapa Helkhosei hian an han hlauh bik loh tehlul nen; huai, phung leh khuavangte erawh an la hmuh ngai leh an thil hriatchian a nih loh mai bakah chung ramhuai sualho chu Aisan khaw pa tam tak leh an Val Upa fanu ngei pawh thlaphang leh thlabar taka a lo tih thaih a, khum bet a natna hial lo thlen tawhtu an ni tih an hriat ve tho si avangin mual hran theuh a mahni chauh a riak hrang a han beih chu an zuam chiah lovin an huaisenna in a tlin bik tlat lo a ni !!

Pi pute atang tawh a ramhuai, Chawmnu, Phung leh Khuavangte lo hlauhtlawn thin kan nihna hian heng tlangvalte rilru ah pawh hian hmun thuk tak a khuar ve reng chu a lo ni a !! Keivawmhranga remruatna an hnial hreh em avangin engmah an sawichhuak duh lo na in an hmel atang chuan an thil tih tur chu an chak zawk zawk lo tih chu a chiang thawkhat viau mai a.

Seiboi thianpa Satgouhao leh Lawihmun tlangval Khurluta ngat phei chu zam chhe nghal der lek lekin an rilru chhungril chu namen lova hlauhna chuan a tuam ta tlat mai si a; a meng hian an meng zawk zawk tawh mai si a !!

Tu hai rual lova Aisan tlangval Satgouhao leh Lawihmun khaw tlangval Khurluta’n a ruahmanna chu namen lovin an hreh a ni tih a han hmuh chuan Keivawmhranga chu insum hman loh avanga thawklehkhata rawn khi chhuak zawkin, a thiante an zah a hlauh leh deuh si vang a a hmel puthmang thlak danglam leh nghal thuai chuan,” Ka han ngaihtuah chiang leh e ka tia…

… Kan zavaia inthendarh vek mai zawng engemaw thil duhawm lo te tawk palh thut ta ilang a finthlak ber awm love ka ti hnuhnawh leh deuh a. Chuvang chuan pahnih te te talin inthen hrang zawk ang u hmiang?!! Seiboi leh a thianpa Satgouhao kha thlam pakhatah riak dun se la; tin, Phuaisabaka leh Khurluta riak dun bawk se la..A tha awm zawk leh siin ka hria e..” a han tih chuan Khurluta pawh a rilru a hahdam sawng sawngin a thaw huai mai a.

Keivawmhranga remruatna thar an han hre chiah chu thawklehkhatah Seiboi leh Satgouhao chu rawn tawng chhuak rual thawtin,” A nih nangin tunge i riahpui ve tak ang? Mi panga kan niin kan inkawp kim si lova..” Keivawmhranga ngaihtuah tih hriat tak mai leh dilchhut taka an tih chuan Keivawmhranga pawh rawn nui chhuak hawkin,” E khai…kei zawng min ngaihtuah duh mah ta che u…Ram hla tak atangin heng lai thleng thleng in khaw buaina chinfel theih inbeiseiin kan rawn kal ve a ni a, hlawhtling ngei a haw hi ka duh dan a ni e…

… Chubakah, riahpui ka neih ve zawngin kan ramhuai sualho chu an rawn chhuak duh lo riau riau palh hlauh dah ang e !! Keimah ngeiin chhun eng pawh zah zo lova Val Upa fanu Dimchong an lo tihnatna hmunah ngei hian ka lo chang ang e..” nui sak paha a han tih chuan tu sawichhuah ngai lem lovin chung tlangval palite chuan anmahni zinga tu ruat pawh ni hauh lova hruaitu chan chang Keivawmhranga chu an ngaisang hliah hliah a ni tih a hriat theih mai a !!

Bung-185

Chutia Keivawmhranga’n a han tih takah chuan Seiboi pawh rawn tawngchhuak ve in,” Aw le..a tha e !! I remruatna ang chu ni rawh se U Hrang… Hei Pu Hemchon te thlam atang hian kan thlam leh ka thianpa Satgouhao te thlam hi a hla vak lo ve ve in, a piah muala awm ve ve mah ni se zanreh lai chuan thawm a inhriat phak tho a rinawm bawk a...

…Ka thianpa te thlamah hian ka thianpa nen hian kan riak dun ang a; kan thlamah Phuaisabaka leh Khurluta te hi riak dun bawk se; nang hetah i riak thung ang a… Chutiang chuan a tha mai em?” a han tih zung zung takah chuan a thusawi chu an pawmpui a ni tih hriat tak hian midangte pawh chuan an lu an lo bu ve nghauh nghauh a.

Seiboi sawi ang chuan Seiboi leh a thianpa Satgouhao chu Satgouhao te thlamah riak turin an phei ta a; Phuaisabaka leh Khurluta erawh Seiboi te thlam lama phei thungin Keivawmhranga chu amah a riak turin a hma zana an riahna Val Upa Hemchon te thlamah chuan an hnutchhiah ta a. Chu zan pawh chu a hma zan ang bawkin thla a eng tha em em mai a. Chhawrthlapui eng ruai mai a han thlir chuan pasaltha huaisen tan meuh pawh tuar zawh a harin Chawnchhim khua lama a lungdumtu a rawn kalsan mawlh mai kha a hriatchhuah tir a. Tunah erawh a hmangaih ber nen chuan mualzapui kar dan a leng an ni miau si a le !!

Zan hmasa ang bawkin zan lam sava zaithiamte bakah rengchal leh ngirtling hramte chuan chulai mual velte chu an luah khat a. Ri dang reng hriat tur a awm lovin lung te pawh a leng lek lek hial mai. An lo chhuak lo leh takngial dawn anih hlauvin Hemchon te thlam atang chuan chhuakin a chheh vela a hmun thim lai deuh leh sih,kawn emaw ruam deuh ni thei awm a a hriat laiah te chuan thla a en that tho avangin meichher pawh keng duh lovin Keivawmhranga chuan a han zawng kual vel ruai a; a chang leh an rawn chhuah phah mial takin tiin hnehsawh leh tham lo tak takin chulai ram vel enkawltu leh chenchilhtu ni awma an sawi chu a han cho kual leh vel thul !! Nimahsela, eng ang pawhin ti se, awmzia reng a nei lovin phe zeuh pawh hmuh tur a awm chai bawk si lo !!

A beidawng tih ngaihna hre tawh bawk si lo chu thlamah a lut leh ta ringawt mai a. Thutmuan ar khuan hun awm vel a nih chuan Keivawmhranga pawh chhun lamah a hah deuh nge maw ni dawn ni, a lo chhing ve sek hman a. Chutih lai tak chuan thawm maksak em em mai chuan a tiharh ta !! Chhak lam atang chuan lung lian em em mai rawn lum leh a thlam awmna rawn deng chhe vek mai tur ni awm tak hian a rawn ri hum hum mai ta mai a. Amaherawhchu, mak tak maiin a riahna thlam a rawn thleng tawh ang tih awm velah chuan rawn deng tak tak si lo chuan a reh leh hmak lawi si a !!

Keivawmhranga chu rang takin a riahna thlam atang chuan a per tho zawk a; a meichher nen pawn lam tlan chhuah a rual nghal a; mahse engmah hmuh tur reng a awm bawk si lo !! Amaherawhchu, a muthilh sek hma leh tuna thil awm dan chuan inanlohna pakhat dangdai tak mai a nei ta tlat mai a. Chulai chhehvel chu boruak engemaw danglam tak mai hian a tuam emaw tih mai turina rit hian a rit uap churh mai a, thawk pawh a harsa lek lek hialin Keivawmhranga chuan a hre nghe nghe a.

Tin, a hma nen a inang lo leh em em mai pakhat chu nichin lawka zan lam sava leh rannung hram ri chuah chuahte kha an reh hmakin thereng pakhat hram ri pawh hriat tur a awm tawh tlat lo mai chu a ni.
Keivawmhranga chuan a rilru te te chuan,” Zanin chu ka chang thlawn dawn love..” tiin a nui sak a.

Lung lum pakhat mah a hmuh tak lovah chuan tih ngaihna tak awm chuang hek lo le, thlamah bawk chuan a lut leh ta ringawt mai a. Thlama a han lut fel chiah chu chhak lamah bawk chuan hnai takah thing lian em em mai, tu in emaw a kit thlu ruah ruah ang mai hian thawm a rawn awm leh ta tlat mai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 9th, 2019, 5:46 pm

Bung - 186

A ri atang ringawt phei chuan chu thing tlu mai tur chu hnaivai tak leh a riahna thlam rawn delh hnan mai tur awm hi a ni a. Amaherawhchu, Keivawmhranga chuan chhun lama chu lai hmun chu a lo thlithlai fel vek tawh avangin chutiang thing lian tak an chhak lama rawn delh thei hnaivai chu pakhat mah an awm lo tih a hriatchian em avang chuan ngaihthat lohna in a hman phah duh ta lem lova.

Thing lian tak tlu tur awm tak ri Keivawmhranga’n a hriat zawh chiah chuan a awmna thlam bang pawn lam kil tin maiah chuan ri maksak pui pui mai, phun ri bul bul ni awm tak, engnge an sawi emaw eng tawng nge an hman tih hriat hleih theih ni si lo hi a rawn ri leh ta chuah chuah mai a. Pawn lama a va dah chhuah lah chuan tumah a hmu bawk si lo. Tawng ri a reh hnu a, thlam chhunga a lut fel deuh chiah tih ah chuan nasa takin a riahna thlam chu tuemaw, tharum ngah tak mai ni awm tak hian theihpatawpin a rawn sawi chiam mai a.

A nghing nasa lutuk chu lira nghing emaw tih mai tur hi a ni a; inhnuai lam atang lah naute tap ri ni awm tak, a chang leh za em em a nui hawr hawr ri ang lawi bawk si hi rapawm tak mai hian a rawn chhuak ve leh bawk si a !! Mi pangngai tan pawh hlauh lutuk avanga nikhaw hre lova tluk tawp hialna tham chu a ni tawh hrim hrim mai a; mahse, hemi zan a heng ramhuai ho tihthaih tum ber kher hi chu mi pangngai emaw mi naran satliah nilovin Keivawmhranga a ni tlat mai si a le !!

Keivawmhranga ning lutuk tawh chu pawnah rang taka tlanchhuakin,” A ninawm ta hle mai a. Huai in ni tak tak ngai a nih chuan hmuh theihin rawn inlar ta che u.. Mi tihthaih tum sawmsarih mah ula ka thengthawngah hian a thawk ve chai love… Tun hmaa hlau leh thlabara in lo siam thin ang kha ka ni lova, Zote khaw tlangval ka ni ngai e..” tiin a inhrosa ve ta siah siah mai a le !! Chutia a han inhrosak chuan chulai chheh vel ram zawng zawngte chu a reh hian a reh leh thuap tawh mai !!

Chutah le !! Ri a zawnga ri tihbaiawm ber ni mai tur awm hian chulai mual leh ruamah te chuan thangkhawk rum rum tur khawpin aw teng chher rapthlak tak mai hian engemaw hi a rawn khek chhuak thawt mai tehreng a. Chu ri zet chuan ngaihno a bei lo kher mai !! Chu ri rawn chhuahna lam Keivawmhranga’n a han hawi nak chuan mitmu hring lian em em mai pahnih hian, chhak lam thim tham hnuai atang chuan thinrim tih hriat tak mai hian a rawn melh kur mai a. Keivawmhranga lah pek chuan,” Mut i ti chhuak hman mai dawn alawm le…I rawn chhuak har ka ti reng a ni..” a ti ve hmak mai bawk si a !!

Mitmu lian tak mai awmna atang chuan aw teng rapthlak tak bawk chu rawn chhuakin,” Tunge maw i nih teh chai chu le !! Ka lalna ramah hian ‘ka cho e..’ te min rawn ti ve ngam khanglang a ni maw? I duh i va han hmu dawn lo rua em !!” ngainat awm loh zet hian chulai tlang leh mualte a thangkhawk rum rum tur khawp a ringin a han nui thler chiam mai a. A nui ri ringawt pawh chu tlem a dawihzep tan chuan sam tla kawlh rawt khawp a khawsik pui tham a tling tawh hial ta ve ang !!

Chu a chhak a ding ramhuai palian em em mai chu thinrim tak a awmna lam pana kal chilh hmiah a han tum chiah tih ah Keivawmhranga chuan thlang lam atangin vawilehkhata rapthlak taka rawn nui tuarh ri a hre leh ta tlat mai a !! Amaherawhchu, nichin lawka a hriat ramhuai palian nui ri nen a inan lohna erawh tuna mi chu hmeichhe aw rawl a ang zawk tlat mai !! Rang taka a dinna lam atanga thlang lam a han hawi thlak nak chuan thil mak em em mai Keivawmhranga chuan a hmu leh ta tlat pek a !!

A dinna thlang lamah chuan ni danga a la hmuh ngai reng reng loh, ramhuai hmeichhia, namen lova hmelchhia leh sam bumro leh uai thla hnuang mai, a hnute te lah chu hmuhnawm loh khawp a uai dum zuar mai hian a mitmu lian em em mai hian Keivawmhranga chu a lo en kuau mai hi a lo ni a !! A rilru te te in Keivawmhranga chuan,” Hei ngei hi a nih dawn hi Phungpuinu an lo tih fo thin chu !! Nge ni a Chawmnu tia a chanchin an lo sawi thin chu ni dawn zawk ni?” a rilru chhungril a mahni leh mahni inhnial pah chuan a ti nauh nauh a.

Amaherawhchu, chu a thil hmuh ramhuai hmeichhia hmel rapawm tak mai chu Keivawmhranga thinlunga mak tih em em na thlentu erawh a ni hran lo !! Mak a tih em em leh nidanga a la hmuh leh a chanchin an sawi pawh a la hriat ngai miah loh zawh erawh chu, chu phungpuinu sam thur bum maiin a awm a a pawm, naute a zawng a naute hmelchhe ber ni mai awm chu a ni a !!

Chutiang reng a naute duhawm lo leh han pawm a han lawm vel pawh chakawm loh lutuk chu Keivawmhranga hian a pian a hnu lamah a la hmu ngai lo !! Tam tak phei chuan a hmel tihbaiawmzia leh ngainatawm lohzia chu hmu sela lungphu chawlin chumi hunah la la chuan an thi thei hial mai awm e !!

Bung- 187

Chutia a thil hmuh dangdai zet mai chu mak ti fahran a Keivawmhranga’n a en lai mek chuan a piah lehlam lehlam mual ve ve atang chuan tute emaw hmanhmawh taka rawn tlan phei bawp bawp ri hi a hre ta a. Thla eng hnuaia a han enchian chuan tu dang nilovin a thiante kha an ni reng mai !!

Seiboi leh Satgouhao te thian dun chu Keivawmhranga awmna ah chuan an rawn thleng phei hmasa a; a hnu deuh lawkah chuan an thlam riahna atang ve ve atang chuan mak tak maiin an rawn intiam rual emaw tih mai tur hian Phuaisabaka leh Khurluta te pawh an rawn thleng ve leh ta nghal a. An rawn tlan chak deuh bawk aniang e, an hah lutuk chu an thaw hlawp hlawp hlawm mai a !!

A thiante chu chik taka en in Keivawmhranga chuan,” Engnge ni ta ? Thil thleng duhawm lo a awm em ni? dilchhut takin thlam hran daih ve ve a riak thian dun pahnihte chu a han zawt ve ve a. Anni erawh chuan an riahna thlam bul velah ri maksak pui pui – thing lian tak tlu tur ni awm take maw lungpui lian em em mai rawn lum tur ni awm ang tak te an hriat thute an sawi ve hlawm a; mak tak maiin heng hmun hnih a riak hrang pawl pahnihte hian Keivawmhranga’n a hma lawka a lo hriat ang deuh chiah tho kha an riahna bul ve ve ah an lo hre ve hi a lo ni reng mai a !!

Phuaisabaka chu rawn tawngchhuak ve in,” I riahna thlam lam pan a kan rawn tlan phei chiam nachhan zawk tak erawh chung ri te chu kan hlauh vang ai mahin nichin a helai i riahna thlam bul vela tang ni awm tak a rapthlak mangkheng a ring tak a nui ri kha kan lo hria a; khatiang ang ri tihbaiawm reng kha kan la hriat ngai loh avangin tawh sual i tawk palh ta mai em ni tiin kan rawn tlan phei thuai a ni e..” a han tih dap dap chuan Phuaisabaka thusawi chu hmanhmawh taka an rawn tlan phei chhan a ni ve tho tih hriat tak maiin Phuaisabaka thusawi pah chuan Seiboi leh Satgouhao pawh chuan an lu an lo bu ve nghat nghat a.

Keivawmhranga’n an thusawite a han ngaihthlak zawh chuan rawn tawngchhuak ve in,” Hmanhmawh thei ang berin in rawn tlan phei chu a tihzia e !! Ti kha chuan keimahni theuh inngaihtuah buai a hun hmang lovin zanin a min rawn tibuaitu phiangsen ho hi kan bei thei tawh ngei ang le…Kan chhak leh thlang lama ding ve ve te khu han en teh u !!...

… In thil hmuh chak zawng an ni meuh em phei chu ka hre lova..” nui sak a tih pah a, a thiante hmel a han en vel chuan a thiante chu amah angin an nuih a za ve chhete eih lo tih chu a hmu thiam nghal mai a; -an thil hmuhte chuan an tiril a fanin pawn lamah lantir hreh viau mahse chhungril lamah erawh an khur zawih zawih vek mai chu a ni reng mai si a !!

Chulai hmun a an din lai reng chuan a hma a mi, ramhuai palian eltiang bawk mai kha rawn tihbaiawm taka rawn thawklehkhata rawn nui chhuak leh uar uarin,” Pakhat mah damin ka haw tir dawn lo che u !! Ka ram chhunga in rawn luh hi in damchhunga in thil tihsual lian ber a ni..” tham lo em em hian a han ti a.

Chutia a han ti chiah chu chung tlangval pangate dinna hual vel chuan chhum thim chhah tak hi vawilehkhatah a rawn awm thut a; thawk lak pawh harsa khawp a Keivawmhranga leh a thiante chu tuam velin an han hawi chhuah nak chuan anmahni hual chuan mitmu tam em em mai; sen rem rum mai leh a tungchho zawng a rapthlak taka awmte chuan chung tlangval huaisente chu thinrim hmel tak hian an lo en kuau mai hi a lo ni a !!

Chu chu a han hmuh veleh Keivawmhranga chu ring taka au chhuak thawtin,” Khai le.. Thiante u….In hma zawn a mi theuh kan ramhuai suahsual ho kha dimna tel miah lovin sat hmiah hmiah mai rawh u le..” a han ti tuarh a. A thu lo ngaichang rengtu tlangval tuaitir Phuaisabaka, Khurluta, Seiboi leh Satgouhao te chuan an hma lama awm an hmuh fuh fuh chu an han sat ri no chawk chawk ta tehreng a. Ramhuai sual ho na ti lutuk chu chunglai mual leh ruam khawk rum rum khawp chuan an te rawng rawng ve hlawm mai a.

Chutia an sah mek lai chuan Phuaisabaka chuan Seiboi lam va hawi zauh pah chuan,” Zanin zet chu a nuam hle mai a !! Seiboi…Tu sat hnem hnem ti ila…”nui sang chung hian a va ti kher a. Chu chu Seiboi lawm zawng tak lo ni kher pekin,” Ti ila ni mai lawm…Kan ram delh chinah chuan eng anga hratkhawkheng mah ni la, mikhual tlangval lakah chuan tlawm ka tum bik eih lo a nia..” nui sak chungin a han ti let ve a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 9th, 2019, 5:46 pm

Bung - 188

Chutih mek lai chuan Lawihmun tlangval Khurluta leh Satgouhao chuan khur ru der der chungin ramhuaiho chu an bei ve thung a. Chu zan a tlangval panga, a ram chhunga rawn riak lut ten an bei let ve a ni tih a han hmuh chuan Molpi tlang ramhuai lalpa chu thinrim lutukin chulai ram vel hriat vek theih tur khawp chuan hringfate hriatthiam theih tur si loh tawng hian a te ri teng tung mai a.

Chu veleh chuan ramhuaiho chuan a thusawi zawm ni awm hrim chuan an hmazawn a mi theuh te chu rapthlak tak tak a chhiat khumin, nasa taka insiamchhe pah chuan thisen te in an theh huh hneng hnuang ta mai a le !! Chu lai hmun vel chu a than hian a thang hum hum a ni ber mai !! Chu thil thleng a han hmuh chiah chuan vawilehkhatah Keivawmhranga chu an zavaia hriat tlan theih tur a rawn au chhuak lehin,” Thiante u…tih thaih an tum che u a nih kha..hlau miah suh u aw…theihpatawpin tang sauh sauh zel ru..” a han ti a.

Amaherawhchu chu zawng !! Sawi mai a awlsam, a tak a tih erawh harsa tak ni thung a ni tlat mai si le !! Hringfa tungchho a kal emaw sahrang eng pawh ni se, tlangval huaisen pahnih Phuaisabaka leh Seiboi chuan an han hlauh bik loh tehlul nen; he mi zan kher hi chuan huai leh rau lampang erawh zawngin an tiril a man dun ta tlat mai si a !! Satgouhao leh Khurluta phei chu mit a hmuh theih tur meuh khawpin an khur zawih zawih tawh mai a.

An mithmuh a thil thleng rapthlak tak mai, tu pawhin hmu se hlau lo fa an awm lovang tih mai tur khawp a tihbaiawmin a tibuai a ni tih a han hmuh chiah chuan Molpi Tlang ramhuai lalpa chu rapthlak mangkheng a rawn nui chhuak tuarh tuarhin a kut hmul thur mai atang chuan meikhu ni awm tak hi a rawn zam chhuak nguai nguai mai a.


Chu meikhu ni awm tak rawn zam chhuak chuan zawi zawiin an awmna chheh vel a rawn tuam zel a ni tih a han hmuh chuan rang takin Keivawmhranga chuan,” Hlau hlek suh u aw..Huaisen tak zelin le..” beidawng aw lek lekin han ti mahse hlauhna chuan a thiante tiril chu a fan hneh tlat tawh mai si a le !!

Keivawmhranga meuh pawhin eng ang pawhin han fuih phur tum mahse sawtna reng a nei tawh mawlh si lo !! Phuaisabaka leh Seiboi te hi mahni tawk a tlangval huaisen tak ni ve ve mahse chutiang ramhuai tihbaiawm tak te han hmachhawn tur meuh chuan an la nem deuh tlat mai a; an kum tlem a a la naupan deuh avang leh tawnhriat an la ngah tawk loh vangte pawh a ni mahna le !!

Mei khu ni awm takin an taksa a rawn thleng chiah tih ah chuan Zote tlangval tuaitir Phuaisabaka, Lawihmun tlangval Khurluta, Aisan Pasaltha Letzatong fapa Seiboi leh a thianpa Satgouhao te chu pakhat khatin thawklehkhatah pumnat lutuk vangin an let thlu tawp tawp mai a; hrehawm leh na ti lutuk chuan men pawh meng tha hlei thei lovin an pum theuh dawmin an vial ngawih ngawih nghal chu a ni ta mai si a !!

Keivawmhranga thiante pali, na tih lutuk avanga nikhaw hre mang lova lei char a tlu reng a han hmuh chuan a lawm hle a ni tih hriat tak mai hian a hma aia uar leh rapthlak zawk mah chuan ramhuai lalpa chu an nui khek leh tuar tuar ta tehreng a !! Mahse chhete mah a hemi zan a thil thleng chu sawi loh a pian a hnu lama hlauhawm leh tihbaiawm tih vel awmzia la hre ve ngai tlat lo Keivawmhranga erawh chu engtin mah a awm ve thei tlat lovin ramhuaiho dawi chu a chungah a thawk ve thei tlat lo mai a.

Keivawmhranga’n a thiante pumna namen lo avanga thihna kotlanga dak lek lek khawp a let reng a han hmuh chuan ramhuai suaksualho rawn inlar tirh ata tawh a thinlunga thinrimna meipui inchhep chu vawilehkhatah a rawn ti alh hluai mai a. A mitmengte chu ramhuai tenawm ho mitmeng ai mah a rapthlak leh tihbaiawm tawh zawkin ramhuai lalpa lam chu hawiin,” Tunah la la hian ka thiante i dawina kha sut nghal thuai rawh. Chuti lo zawng in duh i hmu mawlh lovang tih ka tiam a che..” a ti ta chhar chhar mai le !!

A thu hriat chu engah mah a ngai lo a ni tih hriat theih tak hian ramhuai lalpa chu a hma aia ring zawk mah a rawn nui lehin a piah lehlam a awm, ramhuai lalpa nupui ni awm tak, phungpuinu emaw ni hnute uar dur, hmelchhe em em mai leh amah ai mah a hmel rapawm leh tihbaiawm zawk mah a naute pawm pawh chu chulai tlang leh mual zawng zawng hriat theih vek awm a ring hian ramhuai lalpa chu a rawn chhawn ve a.

Bung- 189

Chutah zet zawng !! Pasaltha zaidam leh thinnel tak thinrimna vawrtawp chu Molpi tlang ramhuai suahsualho chuan an tawngbaw ta !! Namen lova lungni tawh lo Keivawmhranga chuan thawklehkhatah a dinna atanga kawng thlang lama awm phungpuinu naute pawm lam chu mitmeng sen rum chungin a “Thisen ngai chempui” leh Fei-ki-bar tha mi nen ngei mai chuan a pan ta chhar chhar mai le !!

Keivawmhranga’n phungpuinu awmna lam a pan a ni tih a han hmuh chiah chuan kawng chhak lam zawk a ding ramhuai lalpa chuan a kut atang chuan a hma lawk a a tihchhuah meikhu ni awm tak hmang chuan a hma a pasaltha thinrim taka kal chhak chhak chu dawi thluk tawp a han tum ve a; mahse Keivawmhranga zawng..!! “Sapui Chaih Pasaltha” tih hial a a sakhming an lo vuah tawh a ni tlat si !! Chu pasatha thinlungah chuan hlauhna leh zamna ten chhete mahin hmun an chang ve ngai tlat si lo !! Ramhuai lalpa thiltihtheihna te chuan engmah reng awmzia an nei thei tlat lo mai !!

Phungpuinu bul a va thlen phei chuan phungpuinu chu rapthlak thei anga ber a lo insiam chhia in Keivawmhranga chu lo dawi tum ve bawk mahse, engmah thil thleng lo leh engmah hmu lo ang hmakin Keivawmhranga chuan a pan hnai chhar chhar zel thung a…Chutah le !! Phungpuinu leh Ramhuai Lalpa mai bakah chulai mual vel a ramhuai awm zawng zawngte mak tih tur khawp thil a thleng ta tlat mai !!

Keivawmhranga chuan a veilama a ken a fei-ki-bar chu rang taka thlauhthla in hnehsawh em em mai hian phungpuinu in a pawm mek a fa ni awm tak hmelchhe eltiang mai chu a kut veilamin thawklehkhatah a phih thlak sak ta hrawk mai a !! Phungpuinu mangang leh thlabar lutuk chu a te chel chul tawh mai a !! “Sairal Buan Pasaltha” lah chuan engah mah a ngai duh der mai si lo le !!

Naute hmelchhia leh tihbaiawm tak mai chu a chhip samah khaiin a kut dinglama a ken a “Thisen ngai Chempui” ngei mai chu a nghawng ni awm takah chuan a chuktuah ta ran mai le !! Chutah zet chuan Ramhuai Lalpa pawh a nuih a za tawh lo kher mai !! Rapthlak tak a rawn te chhuak chel chulin khawk rum rum khawp chuan thum taka awrawl rawn chhuahin,” Tu..Tu nge maw i nih le ? Henglai ram tawngte i hmang si lo” mangang aw lek lek tih hriat tak hian a rawn ti chuai raih a.

Chu zawhna chu rang tak a chhangin Keivawmhranga chuan,” Khawthlang lam, Hmar hnam ho delh ram a cheng, Saithlunga fapa Keivawmhranga ka ni ngai e…” a han ti chiah chu Molpi tlang ramhuai lalpa chu rawn auchhuak leh tuarhin,” Chu hming chu khawiah nge ka hriat tawh? Nang hi em ni ‘Lasi Zawlloh Pasaltha’ an tih thin, Khawpuitan Lasi ho han luhchhuah tu kha? Khawbung khaw dai a Bung huaiho pawh bei tawh tu kha em ni i nih? Nang nen hian enge inhmuhthiam lohna kan neih a? Kei leh ka hote hian i pawi kan sawi em ni?” a ti ta chel chul mai a.

Keivawmhranga chuan muang ban cherh chawrh a chhangin,”Tunah la la hian heng ka thiante i dawina hi sut nghal ang che. Chuti lo zawng, he naute duhawm lem lo tak hian a tuar ngei ang.” a ti ta siah siah mai le !! Chutah zet chuan mangang leh thlabar tawh tih hriat zet hian ramhuai lalpa chuan Hmar tawng ngei a rawn chhang ve in,” Aw le aw le..Pasaltha, Ka fa kha ti na lul suh khai. Ka dawi chu ka sut nghal e..” a ti dul raih mai a.

Chu veleh chuan hnar atanga hlit phawi ang maiin vawilehkhatah a thiante pum na lutuk chu rawn reh thutin zawi zawiin Phuaisabaka, Seiboi,Satgouhao leh Khurluta te chu an rawn dingchhuak ve thei ta a. A dawi a han sut fel hnu chuan ramhuai lalpa chu thum bul bula rawn tawngchhuak lehin,” Tunah chuan naute kha thlah tawh rawh khai...” a han ti a.

Mahse la lungawi famkim lo tih hriat tak maiin Keivawmhranga bawk chuan chhangin,” Ngawi rawh… thil hriat duh dang ka la nei tlat mai.. Engvangin nge Val Upa Hemchon fanu Dimchong kher kha I lo tihnat nachhan min hrilh rawh.. Chhunah chuan amah kher lo pawh midang lo lama feh an awm ve tho thin si a...” a han ti leh a. Chu a zawhna chu ramhuai lalpa in a han hriat chuan engmah sawi duh lovin a ngawi ta hmuk mai a.

A zawhna a chhang duh lo a ni tih a han hmuh chuan Keivawmhranga chuan a kut veilama a chhip sama a khai naute hmelchhe tak chu a hma ai mah a khai sang sauhin,” I sawi dawn nge i fa nghawng hi ka zai dawn?” a han tih leh sak chuan ramhuai lalpa chu thlabar tih hriat tak a hmanhmawh taka rawn tawngchhuak rawk rawkin,” Ni lo, ti na lul suh Pasaltha…I duh ang chu engkim ka hrilh vek ang che. Khawngaihin ka fa kha thlah hram rawh.” a ti ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)