DOPUI MIHRAT KHAWKHENG TE BY LN Kima Guite(Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
LN Kima Guite
Posts: 63
Joined: August 28th, 2017, 7:07 pm

Re: DOPUI MIHRAT KHAWKHENG TE (BUNG 1-25)(New update Chapter 25)))

Unread post by LN Kima Guite » November 14th, 2017, 7:13 pm

DOPUI MIHRAT KHAWKHENGTE


BUNG 25-NA

Dopui Pasaltha ten Hualtu khua a tang a Ramliana lu nen an hawna pawh thla khat dawn a liam leh ta reng mai.Chhinga pawhin a nau ruang chung a,a lo tiam ang ngeiin Ramliana lu an in kawtah ngei a tar ta a.Pialralah a nau thlarau chu tlamuang tak a chawl tawh tur ah ngaiin a ngaihngam takin hun a hmang thei ta a,a nu erawh zawngin tahna tur a la hmu hnem khawp mai thung a,Hawina lam a piangah Chhuani sulhnu hmuh tur a awm si a,Nuzami tan chuan han tahpui tur hi a va tam tak em.


Buh seng a lo hun ta reng mai a,Dopui khua chu buh lu chuhin an hman hlelhlawm a.a tam zawk phei chu lo lamah chhuang kua kua in an riak lut a,in lam ai mahin lo lam chu a lun ta mah mah zawk a,naupang lo riak au thawm zautinah an ri chel chul mai a,Zingni chhuah a tang a thlai ni tlak thleng thak thakin buh sengin an bung ngar ngar hlawm mai a,Zau then khatah phei chuan Sanghal te nen bu lu an inchuh a vangin zanah Sanghal veng thlaivar thak thak tawk an awm a,phulraw pum lian tak a tang a siam talhkhuang chu zanah Sanghal hlauh vah an khawng ri chuah chuah mai thin a ni.Buhsengin hah hlawm viau mahse an kum khat thawh chhuah an han seng khawm chu mitin an hlimin an phur kher mai.Lal leh Upate pawn khuanu leh zuva ten zah an ngaih chuan kumin chu Dopui khua chu Buh leh Bal ah in todelh ngei an beisei a ni.

Dopui khawtlang chu Buh sengin buai hle mahse an khawhimna lamah pawh an in thlahdah chuang lo va,lam hnai deuh nei Buhseng a riak ve lo thlangvalte leh thawkthei thei deuh chhungkua a tang a,Valupaten a ruat chhuah Tlangval te chu Zanah Ralven bukah ral an in ven chhawk zak zak reng a,Lal leh Upate chuan Hualtu khua thil thleng a vang khan Vanzau lam hi an rawn er let leh ngei an ring a, Buh seng hun lai a ni a,Vanzau lam pawh Buh sengin an buai ve tho va,Dopui khua an rawn run thut chu ring lem lo mahse Dopui Valupate chuan in thlahdah an tum chuang hauh lo va.an khawtlang himnan rilru leh ngaihtuahna zawng zawng nen hah pawh sawi lovin an thawk hmiah hmiah mai a ni.Ral lo len thut pawh a chet lak dan tur leh nunau in saseng dan tur chenin ruahmanna fel tak an nei sa diam a,chu chu Dopui mipui zawng zawngin bel takin an hre vek a,mahni tih tur theuh chu hamhaih leh buai haulova ti nghal zung zung thei turin ruahmanna fel tak nen Dopui khua chu an in peih ru thap mai a ni.



Chhinga te nufa pawh lusun a indawm kun reng hman ni hek lo le.an lo hi zau hla ber pawl a awm annih a vangin lo lamah an riah chilh a,an Ar vulh zawng zawng nen bawr tak a in phurin lo lam an pan a,an vawk vulhte erawh chu an thenawm naurual tak mai in nghak an awm hlauhva ,an pitar leh putar ten "kan lo enkawl sak ang che u ,Buh lu chuh lai a ni si a,leh lang chuan mi hnungin um lutuk palh ang e" an tih tawngkam tha chu um lo thei ni hek lo.an thenawmte kutah an Vawkte chu an dah ta ngawt mai a ni.Thlam han lut a thlam rapchungah chuan Chhuanin fur lai a,Vaimim ro a lak khawmte chu a loin rep tiar mai a,Chhinga nu Nuzami lungti chhe tawk hi a tling zel mai si a,a han tap leh rih thin a,an riah luh ni phei chu Nuzami chuan tahpui tur a pui a hmu hnem ngang mai si a,hna pawh a thawk hlei thei mang lo va,Chawhnu chanve zet ah chuan Chhinga chuan "Ka nu inti pachang ta che,Chhuantei pawhin he tia lungleng a tap reng turin a duh hauh lo vang che,Ani pawh tunah chuan pialralah thlamuang takin a chawl tawh a lawm" tiin a Nu lungchhia mittui hul hleithei lo chu a han hnem a.Nuzami pawh chuan "a ni ngawt mai ti raw mama,Chhuantei zawng pialralah apa bulah hlim takin a awm tawh ngei awm si a,ka lo insum zo thin a min hrethiam hram teh...Chhuantei zawng ka ngai em mai thin a ni e" tiin a mittui chu a hru hul sawk sawk a.Chhinga bawk chuan"Ka hrethiam che lawm ka nu,kei pawn ka nau hi ka ngai tak zet a ni...."tiin a han ngawi vang vang a,chutah "Ka nu,hei a hma vak tawh chuang lo bawk a,zanriah chawhmeh tur lo vai khawm la,chawlh hahdam pahin eirawng lo va bawl tawh,kan dam ang e,rei tak kan seng dawn loh hi" a han tih chuan,Nuzami chuan ni chu a mit siai san chungin an thlek vang vang a,"A la hma viau sin,eirawngbawlte chu hman hmawh thlak vak hleinem"tiin Chhinga chu a han hnial a,Chhinga chuan"Riah luh nite a nia ban hma a pawi lo..bakah nang phei chu upa lam i ni tawh nen i hah lutuk ang,lo hahchawl hma la ka tih vang a nia"a han tih leh chuan,Nuzami chuan "A nih leh i tih tlat chuan ,eirawngbawl chu ka lo va in hmakhawsuih a ni ang chu " tiin thlam lam chu a pan chho ta a,Chhinga chuan" Va tap vak vak tawh lo la aw"tiin a rawn fiam zui a,Nuzami pawh chuan "ka tap tawh dawn lo hrim hrim" tiin nui hak hak chungin a rawn chhang thuai a.A nu liam hnuah chuan Chhinga chuan thahnem ngai takin Buh chu a seng zel a,Pasaltha tuantha leh chak tih takah Buh seng pawh a chak nangiang mai .a em chhungah chuan buh vui chu a sur hian a sur lut chur chur mai a,a em lianpui mai phurh chu a vawm khat zung zung mai a.hmeichhe awm nem deuh pasarih vel chu a hen thuak ngei ang .Ni suk chen vel a nih chuan Chhinga chuan a buh seng lai chu duhtawkin Buhseng chawhmeh tur zawn a ril ruk a,Sakhi eng ilo fahran kah tur an awm takin tiin Silai nen a in pu chhuak ta thauh thauh mai a,Ramhnuai a luh hma chuan an thlawhhma chu an fang thuak thuak a,favang lai a sa dai a lo theuh vek a vangin ramsa lakah chuan an Buhte chu a him viau mai a,mahse sazu leh Savate chuan an buh an lo tlanpui ve nual mai a.Sazu leh sava lak a tang chuan venhim tak tak theih a nih loh a vangin an thlawhma chu him thawkhatah ngai in vau chhungah chuan a luh san ta a.Thlawhhma nisa hnuai a tang vau chhung a han lut chu a thlan sa a dai sawng sawng mai a,an sehrawp hnuai mai luite luang dam dam chu pawh thlain zotui thiang chu a kut a khuapin an dawt khawlh khawlh a,a thlansa te a han sil thlan daih leh hnu chuan muang chang lo vin kawrte a zawh thla ta zel a,lo fingkhat awm vel a zawh thlak hnu chuan lengkir sang tak mai kawrteah chuan a lo awm a vangin ding lamah kawrte chu a per kai san ta a,Ngaw hnuai daih ruih maiah lut pheiin sa hnu thar deuh a melh pah zel bawk a,Tlangval lian thelhthawlh leh sek phiar fat mai Silai ngul sei reng rawng pu a ngaw hnuai a,a han vak thauh thauh mai chu a hmuh a nuam kher mai.Sakei ang mai a thawm nei loin hmalam a pan zel a,vahrit leh Varungte chu a pal thlawk lo chauh mai a,Sakhi leh Saza hnu tharte chu awm bawk mahse han chhui a han thlur bing hleihtheih an ni lo tlat mai a,chunglamah Tuklo leh Tawllawtte chu an hram lauh lauh hlawm a,sava dang chiar ri nak nak thawm hriat tur a awm reng bawk a,Zo thlifim chu a rawn tleh heuh heuh mai a,Ngaw thing hnahte chu a rawn chhem ri sang sang a,Thinkung pakhatah Zawbuang nupa anlo in chhaih har har mai a,Chhinga chuan kah an tum deuh zuau zuau na a,sa dang lian deuh a beiseih a vangin a Silai chu a la sawn leh ta a.Ramhnuaia che thang tih takah thawm nei hauh lo vin ramsa ang mai a inthazo leh rangin ramhnuaiah chuan a kal zung zung mai a.a hma lawkah kawrte lo awm lehin chu ral leh lam chu Dopui khaw zau tho a nih a vangin Chhinga pawh chu "eng sa mah tawn fuh tur an awm dawn lo a ni ang e"ti rilru chungin a inher dawn chiah tih ah a ral leh lam tlem a tlang deuh vah Chepa a lo hram ta dar dar mai a,a thawngtu an awm ngei tih hriain Chhinga chu thawm dim leh zualin hnim leh thingkung remchang phen phei zelin Thawm lo chhuahna lam Chu a veh phei zel a,hmanhmawh hauh loin a tawlh phei hret hret zel a,Chepa pawh a la chek ri dar dar reng a.Chhinga chu kawrte lut pheiin a ralleh lam chu an per kai leh a,mau hmun a nih tawh a vangin mau ro a tam khawp mai thawm neih palh a hlauhawmin fimkhur a ngai zual ta hle mai a.tin Sanghal hnu thar a tam khawp mai a,Nichin a Chepa rawn thawng tlantu kha Chhinga chuan an chhak lawk thlawhhma a chhuak thin Sanghal a nih a ringin,Veh thla zel lo vin lo chan a rilruk ta zawk a,a hma lawk tlangsam kung awm khawm laih chu phenin a lo thu ta khar mai a.


Thlang lamah chuan thawm a reh vung vung mai a.beidawn rum rumna tham a ni tawh a,Pasaltha leh ramvachal deuh lo chu he tiang hunah hian beidawngin an inthlahdah zui mai thin a.an ti sual fo reng a ni.Chhinga chu beidawng hauh lo vin a thu ngawi kar reng mai a.thosi leh tho mitchhai te pawn lo vir ve chhen mahse a che duh der lo va,Tlanglam chu uluk takin a melh ran mai a,Chutah thlanglamah chuan mau ro tliak ri rap thawm a lo chhuak leh ta a,Sanghal thawm ngei a nih ringin Chhinga chu a phur kher mai.Sanghal chu a khat tawk a thawm nei leh zauh zauh in a lo chho zel a,a chang leh thawm ngaithlain a ding tih hriat takin a reh leh vang vang zel a.a rawn hnaih chho zel a,a hnim tawn chet te pawh a hmuh thei tawh a, chutah le Nghalchang ngho var vuh mai var paw phuk mai chu hnim pik kar a tang chuan lo chhuak ta ruau mai a,a lian kher mai fimkhur takin a lu chu a hawi kual vual vual reng a,Chhinga pawh chu Nghalchang kah rem zawng a awm tur chuan a in her rem hret hret a,Nghalchang chu vawihnih an tep chuap chuap a ke an pen leh tur chiah tih ah chuan Chhinga chuan a Silai cheng chu kauin a hmet per ta a,Silai puah rik thuai rual chuan ngen mu sa ver vawr chuan Nghalchang chaldarah tak chuan a verh sawrh mai a,Chu Nghalchang pawh chu hniak phawi miah lo vin a let nghal tawp mai a.Chhinga chuan a sa kah chu kah nawn a ngai lo tih hriain Silaimu pawh thun tawh chuang lo vin rang takin a pan thla a,Nghalchang kaihza tha chu an chhah sak zung zung a,an kuai zang thal a.Nghalchang tilbawr chu a hlep thla zui nghal sawk sawk a.a hleh thlak zawh a a sum an teh leh chuan a sumruk thuak a ni a,panaran sum sarih dawn ni dawn a nih chu .


Chutah Chhinga chuan a Silai ri hria lo riak an awm dawn tih hriain ngawi reng a haw ruk chi a ni lo tih hriaiin a Silai zen chu an sawhmuk leh zawt zawt a,Nghalchang chu a ke ding lam a tlawhin hlado a han chham vang vang a,a Silai chu a kap puak ta thuai mai a.Rei loteah Chhaklam a tang chuan kuk thawm a lo chhuak ta thuai mai reng a.Chhinga chuan a lo chhawn vat a,Chhaklam a tang chuan an rawn ri thla mam mam a,maurote Chu dim lo baksak in an rawn rap tliak thla bawrh bawrh a,Rei lote ah Dopui Tlangval pahnih leh Pa pakhat hi an rawn lang ta tham tham mai a,an han in hmuh chuan "E khai Chhinga nang i ni maw,vawiin chu i zarah sa kan hmeh ve dawn ni maw,a lawmawm hle mai "an rawn ti nghal sawt sawt a,Nghalchang chu an han en chiang vel a,an han kuai let kual vel a.lian an ti kher mai.a nghote lah chu a tha ropui mai si a,Tlangval pakhat zawk Luaia chuan "Pasaltha nge nge zawng tluk loh rim in nam deuh chu a ni e,Khi lai khi kan thlawhhma a nia,He sanghal hian zantin deuh thaw buh min ei sak ziah mai a,kah kan tum lahin kan chang chhuak thei reng reng lo mai a.midang dang pawhin kah an rawn tum fo thin a ,tuman an kap thei lo va,Hei nang chuan awltein i rawn kap mai si a"tiin Chhinga chu a han fak luam a,Chhinga chuan nui sun sun chungin "Ka vanneih vang mai mai lawm."tiin a lo chhang thuai a.Chutih lai chuan an chhak lamah kuk thawm a lo awm leh a,an lo chhawn thuai a,ti chuan Chhinga Silai ri hre phak lo tlankhawm Luaiate zau ho panga leh Chhingate chuan a Chhinga Nghalchang kah chu hmun rem deuh ah hnuk sawnin hlim takin an chan ta hlawm a.an chan chhung zawng chu Chhinga chu an fak awl lova,Chhinga pawhin nuam a tih loh phah lek lek zawk a ni.a bawp hlawk hlawk a chanin Chhingate buk lam ah an thiar phei ta a,an sa chan a lian tham bawk a,Mi paruk tan pawh phurh fe tham a ni.ramhnuai kawngah kal lo in thlawhhma kawng lamah an kal ta zawk a.



Chhinga Nu Nuzami chu Chhinga lo haw mai theih loh a vangin a awm mai mai thei lo va,khua a thim Fe hnuah pawh a lo lan tak loh foah phei chuan thlam luhka a tang a hawi a hawi tawh mai a.A pasal leh a fanu a chan tawh a vangin Chhinga hi chan leh mawlh a hlau va,a ngaih a tha lo hma thei em em mai a,a dem awm hran love,an rite an beng var hlawm hlauh va,zanriah eikham hnu rei vak lo vah chuan an lo rite chu an lo leng ta nak nak hlawm a.Chhinga nu khawhar lutuk tur pawh an hnem Viau mai.Thlamah Chuan an lorite nen an ri ve laih laih a,Chhinga lo la haw lo a nun a ngaihtuah viau mai chu hnemin an lo ripa Pu Nghaka chuan "Pasaltha ramchhuak te chu ngaihtuah mah ta che,Pasaltha ramchhuak an haw har viau chuan an hlawhtling a ni duh viau a nia,zanin hian sa chan tur kan nei dawn tlatin ka hria"tiin Chhinga nu chu an han hnem ve luam a,chu tia an lo rik nak nak lai chuan feh kawng lamah chuan meichher a lo eng ta thliai thliai mai a.Chhinga te thlam lam chu eng chuan a rawn pan zel a,Chutah Thlam a awm ho chu pawnah chhuakin thlam luhkapui a tang chuan an lo thlir thap mai a,Pu Nghaka vek chuan"Kha maw ka tih reng kha,hei Chhinga chu salu nen a lo haw a nih khi "hlim tak a nui ho chungin a han ti a,midang ho hlim leh lawm chu an lo ri ve Chel chul bawk a,Chhinga te ho thlam an lo thlen chuan thlam a awm sa ho chuan an phurte chu an lo chawi thlak sak zung zung a,hlim takin an ri luih luih mai a.Sanghal lu chu Ropui an ti hlawm kher mai ,Pu Nghaka chuan"E khai Chhinga i Nghalchang kah chu a ngho a tha kher mai a,He tiang salu ropui hi hmuh tur a awm zen zen lo a sin"tiin Chhinga Sa kah chu an fak mawlh mawlh a,Meichherte siam belhin Tlam luhka ah chuan Sanghal sa chu tumah in thik hauh lo vin an zavai chuan an chan ho ta laih laih mai a,A sa phur hah hoin tumah nangni chu in phur ve lo inti lo vin mizo nunze mawi tak chhawmin induh sak tawn takin hlim takin sa chu an inzat theuhin an in sem tlang ta a,Ram chhuak hleithei lo te annih hlawm a vangin Chhinga zar zova satui hang an han hawp tur chu an lawm em em mai a,Chhinga chu lawmthu an hrilh nawn sek hlawm mai a ni.Sa rep tur nei te annih hlawm a vangin sa an chan zawh chuan an in mangtha ta Nak nak a,Chhinga Nu chuan "Naktuk zan pawh lo leng leh theuh rawh u aw,kei ni nufa chauh a awm zawng a khawhar thlak em mai"tiin a chah mawlh Mawlh hlawm a"Ni e,kan lo leng leh daw nia"tia lo chhang thliar thliarin hlim takin Sanghal sa nen an haw ta sang sang hlawm a, Chhinga pawh chu midang haw hnu chuan Sanghal sa repna tur tul suiin Sanghal sa chu a rep zui nghal mawlh mawlh a.Sate a rep thawkhat ta tihah chuan mut zai an rel ve ta a.Mut hmunah chuan Chhinga nu chuan"Mama hei Pasaltha tia chhal theih inni ve ta reng mai a,mitin mit in chungah a fu tih hria la,i nun hi i uluk viau a tul a ni.Ai a upate kan zah in an thu kan zawm fo tur a ni a,michhia leh harsa zawkte hmusit mai lovin tanpui tu nih tum fo ang che,Nula chung a hlei lutukte hi a tha hauh lo tih hria la,tin.Chapona hi mihring hmelhma lianber a ni tih hria la,mi chung thlak zawng leh chapo takin awm ngai suh ang che,Thiante tan thenfakawm tak nih tum tlat bawk ang che,Rinawmna hi a tlo ber fo tih theihnghilh ngai suh ang che"tiin Chhinga chu a thiam ang tawk in awmdan mawi a han hril ve mawlh mawlh a,Chhinga pawh "Ka nu i thusawite chu vawn tlat ka lo tum dawn nia"a lo ti a,tichuan zante a rei lam tawh bawk a tui takin an muhil ta bawrh bawrh a.



###

Vanzau khaw lamah pawh mitin mai Buh sengin an buai em em theuh a.zo hnuhnung nih hlauin mitin an buai em em theuh mai a,Thil dang han ngaihtuah hleihtheih a nih loh a vangin Vanzau Lal leh Upate chuan an dam khawchhuah nan pawimawh ber lo lam hnate zawh fel vek ah ,Chapchar awllenah ralrel nise an tih a vangin Vanzau khua chu a rukin rammu thei turin an inbuatsaih ru reng a,Pasaltha Lianhnawla leh A Tlangval hruai lu chanta chhungte chuan phuba lak nghal rum rum an duh a,Hualtu leh Dopui khua chu run nghal mai an duh na a,Lalupa zingah thudawn thui leh fing tak tak an lo awm nual a vangin inbuatsaihna tha zawk nen ralrel an ti tlu ta a ni.indona hmachhawn dawn ta se engnge an dinhmun tur a chian miau loh a vangin an eizawnna pui ber lo lam hna peih fel vek hnu a rammut chu a Upate rawtna angin Vanzau Lal Thawmliana chuan a pawm a,Lianhnawla lainaten nawr viau mahse a Upate thu chu fing a tiin hmalam hun thui tak dawn a ,a upaten ruahmanna an siam chu tha a tih zawk tlat a vangin an nawr lui thei ta bik lo a ni.


Hualtu a tang Vanzau Tlangval pahnih tlan chhuak ta ten Vanzau Lalin ah an thil tawn an han sawi khan Lal Buluk tak mai Thawmliana chu a thin a rim em em mai a,Tlangval rual ho khawm rup rup a Dopui leh Hualtu run tur a chhuah nghal rum rum mai a duh a,mahse a upaten an khap dai thei ta hram a,Vanzau Lalin Lian leh ropui tak ah chuan Vanzau Lal leh A khawnbawl Upate chuan Dopui leh Hualtu run hun tur an rel laih lai a,Lal Thawmliana chuan "Naktuk ah la la,ka Pasalthaten Hualtu leh Dopui khua chu va hal darh vek rawh se"tiin thinrim meng sen rum chungin chhuat laiah nghut nghut mai a.Lianhnawla lam hnai Upa Selvunga chuan "Lalpa sawi chu a dik ani.Ni leh thla kar a leng kan Lalpa Thawmliana khua leh tuite kut thlak tu khua chu him damin an awm tur a ni lo"a lo ti ve tun tun bawk a,Lal Thawmliana chu a bu nghut nghut mai a.

Chutih lai chuan Lal Upa fing leh remhre tak mai. Upa Hluna chu lo ding chhuak in a puan ven chu an sawi chhing sauh sauh va."Kan Lalpa leh Rema pa thusawi kha a dik na meuh mai.ka pawm zawng tak ani.Hualtu leh Dopui khua chuan Vanzau khaw chunga an thil tih man chu tel mawlh rawhse ,mahse uluk tak in i ngaihtuah hmasa teh ang u khai.Hei,Buhseng a hun dawn ruai a ni a.Buhseng hma a ral kan rel mai chuan enge ka tawn tur hi hriat lawk theih a nih si loh a vangin Buhseng hman lek lova kan buai zui a nih chuan tam kan hmabak dawn a ni a,kan khaw Ropui Vanzau hi ka pem bo san vek a tul mai dawn si a,kan raldote ber hneh mah ila,eitur ber kan neih si loh chuan khua hi kan rauhsan a tul tho tho dawn a,chu vangin Chapchar awllen lam a ralrel hi kei tha ka va ti em."a han ti dap dap mai a,Lal leh Upa ho chu an ngawi thap mai a,Lal Thawmliana pawh in ngaihtuah muk hle mai a,Chtah Upa Darsiama chuan chhuat awngah a tuibur hmuan chu an pik puat a,muangchanga lo ding chhuakin "Roneihi pa thusawi chu ka pawm riau mai ka ti kei chu.ruahmanna fing tak a niin ka hria,Tin,Dopui lam pawh Inmalbeih a kan Pasaltha Lianhnawla hneh thei an awm a nih si chuan an neu hauh dawn lo va,va tawngpawng basa ngam bawrh bawrh chi ah ka ngai hauh lo mai.Ruahmanna felfai zawk nen chapchar awllen lamah rammut chu a fuh ka va ring em"a rawn tih ve takah chuan midang pawhin an lo thlawp thliar thliar bawk a,Upa Selvunga chu tang viau mahse Lalpa ber Thawmliana pawhin a ngaihtuah chian in Upa Hluna leh Upa Darsiama thusawi chu dik a hriain Chapchar lama rammu thei tur a in ruahman chu tha a ti ve ta zawk a.



Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 15th, 2017, 7:48 pm

DOPUI MIHRAT KHAWKHENGTE


BUNG 26-NA



Dopui khua chuan Buhseng zualpui chu an zo deuh duak tawh a,tlem a thawk mawh deuh chhungkua pawh a seng zo hmasa hoin an seng zawh pui zung zung a,an Ramtheh a tha bawk a hawp khawp thar lo pawh an awm meuh lo va,Nghalrualin a khawih sak thlem a zawng tih loh chuan hawp khawp an thar deuh vek a,khawtlang an hlim hle mai a,Lal Dokulha chuan sanghalin khawih chhiat sak leh tlem a thawk mawh chhungkua hawp khawp thar zo ve lote chu Lal Buh zem a buh a awm chhung chu an nghei bik loh tur thu sawiin a thla muan hlawm a,mitinte chu an thenawmte tumah chhuanchham a awm tir lo turin a chah bawk a.Lal remhria leh fing khua leh tuite hmangaih thiam tak nihna chu a lo lang leh ta a ni.


Zanriah eikhamah Chhingatein ah chuan Nunmawia chu a lo pen lut thauh thauh va.Chhinga nu chuan vawk chaw chawh mawlh mawlh pah chuan "Lo leng teh lo leng teh Mawite i va ngaihawm em em ve,tunlai chu kanin hmu khat riau mai.i dam tha maw" a lo ti sawk sawk a,Nunmawia chuan "Ka tha lawm.nang i tha zel maw ,ka nu Zam" tiin chhuat laiah chuan an thu tluang duai duai a,Chhinga nu chuan"kan tha lawm.in buh chilni lah ka lo tel thei ta si lova,in buh ngah zia Mama sawi ka lo hria a,ka lawm tak tak ani,"a han ti leh a,Nunmawia chuan"Nia ka rin ai kan ngah a kan lawm khawp a sin,khawnge thianpa Chhinga hi "tiin an zawt zui a.Chhinga nu chuan" a zanriah eikham daiah a in thiar lawk a nih kha ,a rei tawh lo vang ,kha ka zu fang siam hi lo hawp ve chhin teh a thlum ngut a emaw chu "tiin rap chung a ,a zufang bilh chu Nunmawia hmaah chuan a rawn hung a.Nunmawia chuan an hawp chhin a" E ,a thlum tui kher mai.lei kan lem tel ang tih a va hlauhawm em "tiin a nui hak hak a.chu tih lai chuan Chhinga inthiar zo pawh chu a lo lut ve chiah a." E thianpa chu i va rang ve,khawi lam a len nge i tih a i rawn in peih hma ve"a rawn ti lut bawrh bawrh a.Nunmawia chuan nui chungin "Venthlang lamah kan leng ang chu ,hei mote pawh in mamawh tawh a lawm ti raw kanu Zam" tiin nui hak hak a,Chhinga nu pawh chuan "Ni e mawle,keini in a lawi duh te chu awm se kan mamawh tawh khawp mai,Chhuantei awm tawh lo nen,mipa lah inah in awm tlem si ,mahni chauh a awm zawng a khawhar thlak thin em mai,Mawite i thianpa hi lo zawnpui thuai thuai teh.Khawhar hnemtu tur pawh ka mamawh ngawih ngawih a nia."thu tak fein a lo ti ve thuai a.Nunmawia chuan "Lo lawi chak fe fe an tam a lawm ,lo lung ngai suh " tia nui hawk hawk chungin Chhinga nen chuan an in zui chhuak ta a.Pawnah chuan Chhinga chuan "Sawi loh loh tur hi i sawi thin a,kanu lah in a lo chawtak khukpui luai mai si a" tiin Nunmawia chu a han hau va.Nunmawia lah chuan"I neih vat a ngai tihna ni mai lawm"lo ti et si a.

Buhseng a an buai hlawm em a vangin an thian ho pawh an in hmu khat hlawm hle a..Chhinga chuan Nunmawia hnenah "Thianpa Thanga hi i hmu ngai em ,an in lam ah te kan han leng dawn em ni ang ,"a han ti a,Nunmawia chuan " Tlaiah kan in hmu a Zawlbukah in hmu ang ka tih kha "alo tih a vangin Zawlbuk lam chu an pan ta a.Zawlbukan thlen chuan Thanga chu Zawlbuk bawh belh nghengin a lo ding luah mai a,Zawlbukah chuan Valupa ti ti ngaithla in tlangval eng emaw zah an lo thu thap bawk a,Chhingate thian ho pawh chuan zawm vein an ti ti laih laih mai a, Buh seng chungchangte an sawi a,Bungmual zau Zotawnate chhung kaw lo riak ramhuaiin a tih buai chungchangte an sawi a,ramhuai ninhlei zetin Zotawnate chhungkaw buhseng chu zanah tibuaiin an mut hlanin an favahte lo thuhruk sakin an emte thlam chungahte a lo dah daih thin a ni awm e.an ti ti chho zel a,tunlai an khaw boruak leh Vanzau khua nen an in kar thute sawi chho zelin an ngaihdante an sawi khawm laih laih mai a,Ralveng indah reng hi hna a tul em vangin hauhtak an ti hlawm hle a,dah loh theih niin an hre bawk si lo va,tih dan tha zawk a awm em tihte sawiin a chang leh an han inhnial laih laih thin a,Chutah an Valupa Ralrel thiam hmingthang Valupa Khama chuan ti hian a ngaihdan a han sawi ta a" Awle ,Ralveng in dah leh dah loh chung changah chuan ka ngaihdan chuan la indah zel hi a tul ka ti a,mahse ralhoin engtik nge min rawn beihdawn tih hriat si loh lo sakuh serh nghah ngawt ngawt mai hi chu a fuh berin kei ka hre lo va, Tlangval fingfel deuh enthlatu Vanzau lamah tir ila,chu ta boruak a zir a hmalak zel hi a thain ka hre deuh "a han tih chuan tha an ti hlawm hle mai a,an lo pawm thlang hlawm hle ani ,Chutah Valupa Khama vek chuan " Chu tia Tlangval hoin tha in tih chuan Lal leh Upa ho ka han sawipui ang e "tiin vaibel a tankai a fawh khuk luai luai pahin Zawlbuk chu a chhuahsan ta a,Leng len ar a rawn khuang a,Zawlbuk Tlangval ho pawh chu Nula rim turin an chhuak darh ta sang sang a.


Pawnah chuan Nunmawiate thian ho chu khawiah nge len tur tiin an hanin rawn a,Thanga chuan"Zorinpuiin lo leng ngei ngei ru a ti"a rawn ti hmuk a.Nunmawia chuan" Iva han zep thei em em ve,a hma khan sawi vat tur lawm,engtik ah nge in inhmuh a"a lo ti vat a,Thanga chuan "Tlaiah " ti chauh va chhangin Zorini te in lam pan chuan a kal ta nghal a,Chhinga leh Nunmawia chuan an zui ve ta nghal a.kawtlai ah naupang pawnto an lo ri laih laih a,Thanga chu an hmuh ve leh an dan pangaiin an rawn tlan khawm a,Thanga banah an uai khat tlat mai a, Thanga chuan vengthlang lam panpuiin an ri thla chel chul mai a.


Zorinpuii Dopui nula fel leh hmeltha a sawi a ni a.Nula fing leh mi biangbiak thiam tak a nih bawk a.a to pawh a to kher mai.in leng in khat dawn dawn a nei zantin a,Hel tu lah a ngah na ngiang mai,Mahse a tleirawl chhuah a tang a lo hmangaih leh duh em em Chhinga lo chu midang lakah a rilru a pe thei lo va.Chhingate lah Tlangval zakzum,mi pawisawi hlau tak leh in ngaitlawm tak mai a nih a vangin hma la mai si hek lo.Zorinpuii chuan Chhinga hian a haw lem lo tih a hre tho bawk nen.zah pawh dawn lo vin a hmeichhia zawkin hma a la ta ngawt mai a,A Tlai tui chawi hawin Thanga thingtuai pu haw chu hmuin Zanah Chhingate nen lo leng turin a sawm ta ngawt kha a ni a. Tap chhakah Vawk chaw chawh mawlh mawlh pah chuan Chhingate chu lo leng tak maw,tiin a lo ngaihtuah mek a."Thanga khan sawi na chang hre tak maw"tiin a han phun sap mai a,a nu chuan "Eng maw sawi tur " a lo ti vat a,Zorini chuan a hriat miah loin a ngaihtuahna a lo sawichhuak tih hriain a zak chu a sen tan tan a,"Engmah ni lo ve kannu"a lo ti thuai a.a nu chuan nui tet tet pahin"I chah te chuan an lo leng lo phal tawp nang "a lo ti leh a,Zorini zak chuan a nu dar chu a chum nawk nawk mai a,a nui uar uar bawk a.chutih lai chuan sumhmun chu a lo ri thap thap a."in awm em" tih ri in a zui nghal a.Zorini aw tliang mawi tak chuan"awm e,lo leng rawh u"tiin a lo chhawn vat a.kawngka chu rawnin hawngin Nunmawia chu a rawn lut ta zan zan a,Chhinga leh Thanga chuan rawn zuiin pathlang lam chu an pan mai dawn a,Zorini chuan hlim tak a nui har har chungin "khaih khaih engti zia a,kha lam lam pan nge maw in nih le,he lamah lo thu ru."tiin thutna a lo pe sawk sawk a,Chhingte ho pawh tapchhak lamah an lo thu ta hlawm a,Zorini chuan "Keini inah te chuan in lo len duh tak tak pawh ka lo ring lo va,in fa vel fel em em ve"a han ti leh a,Nunmawia chuan"Lo len loh hlauhva ka zanriah ei lai a tang min vil tlat tu awm hek mawle,"tiin Chhinga chu an melh zauh va.Zorini chuan hlim tak a nui chungin "Tak tak ni se kan va lawm dawn em ti raw U Thanga "tiin Chhinga chu an det zauh va.Nunmawia pek chuan"In melh bik an awm tlat ,Ti rawh Thanga keini chu kan lo va haw mai dawn em ni"tiin an tho deuh uaih uaih a,Zorini chuan lo pawt thuin hlim tak in an nui ho dar dar a.Chhinga chu sawi tur hre lo vin a ngawi reng mai a,Zorini hmaah hi chuan a zam chhe lo chauh zel zawng a ni e,Pasaltha huaisen leh hlauh nei lo.Sa leh ral a tlan ngai lo pawh Nula hmaah chuan an khur chhe lo chauh fo thin reng a ni.,Zorini nu pawh chuan " Awi nang ni thian ho chu ,min tih tauh khum maw ka lo ti tawh a sin ,in va fel ve in lo len teh mial a"a lo ti ve luam a.Thanga chuan nui tut tut chungin "Zun kan lo ngah a ni ang,nula ho hian leng turin min sawm sup sup zel mai" a lo ti boh boh va.Zorini chuan Thanga chu melh kawk pahin an chhiat khum ngial a,Thanga lah a lo nui huau huau va.ti chuan hlim takin an in kawm a.

Lalmani chuan "kan thu dang a lai chuan ,Nangni chhekin te in sa zo tawh hlawm em.engtikah nge Buhchhek a riah luh in tum hlawm a." a han ti a,Chhinga chuan "Kan zo tlang thaw khat chu a nia,naktip lamah te chuan riah luh kan tum deuh kei ni lam chu" a lo ti thuai a.Nunmawia chuan "Tak a Nu Man Chhekin te hi insa ve tawh reng em?" tiin Zorini nu chu a han zawt a,Zorini Nu chuan "Teh suh ei,Kan mipa neih chhun lah rawlthar chauh a la ni si a,eng mah tak tak thiam hek lo.Hei zorini Pute hman hun kan nghak a nih hi.an nin min tihsak lohte chuan keinin sa thiam ve hek lo i " tiin a lo chhang thuai a.Nunmawia vek chuan"a ni maw,keini thian ho hi kan beng hawng lo khawp a,chungte chu lo hriat daih tawh awm a sin maw le."a lo ti leh thuai a,Zorini chuan "A ho lutuk.engmah beng hawn lohna a awm hleinem ,mitin mahni hnaah kan buai tlang em a lawm" a lo ti ve thuai thuai a.Tap chhak kil a tang Thanga chuan"Nu Man lungngaih reng reng suh kan awm a lawm ,naktukah engmah kan ti dawn chuang lova,in Chhekin tur chu kan zuk sak sak dawn che nia"a lo ti vei nulh a.Nunmawia leh Chhinga pawh chuan "Ni e ,kan bengvar loh a leiah tun thleng thlengin chhekin nei lovin in lo la awm a,a zah thlak hle mai.naktuk chu kan zuk sa ngei tur a ni" an lo ti ve thuai a.Zorini leh a Nu chuan hnial teh mahse Chhingate chuan an tum tlat si a vangin Zorini Nu chuan"a nih chuan ka va lawmawm dawn tehlul em.keini michhiate hi chu nangni ho zar a nung ve tawk tawk hi kan nia.Zorini leh a nau Vuante pawh lo tel rawhse,Vuantea pawh hi lo kai hruai deuh ula tha ang."a han tih chuan Nunmawia chuan "Naktuk nghakhlel fe fe chu kan awm dawn a ni maw thianpa Thanga " nui thaw chung a a han tih chuan Zorini pawh Chhinga zai ralh pahin mawi takin a nui har har a.a nuih zawng a ,a biangno tak a biang sum lo khuar kak thinte chu Chhinga tan chuan ennin a va har tehlul em.

Chutia an ti ti lai mek chuan Tlangval dangte pawh an lo luh belh zel a,Nula to leh fel tih takah Zorini chuan in leng a ngah thei kher mai.Chhuat laiah an thu khat hmur mai thin a ni.Zorini nula fing leh fel tak chuan tumah a be chhe ngai lo va.Tlangval tan zuamawm a awm chuang hauh si lovin min ngaizawng ta a niang a tih mai turin tumah thliar hrang lovin a in lengte chu a be tha em em vek a,a in thup thiam bawk a,a rilru chhungril hi a inlengte hian a hre ngai hauh lo.Zorini in lengte chu ti ti chi hrang hrang vawrhin an hlim tlang dar dar kher mai.tumah in hnial buai leh in bat buai hauh lo in Dopui Tlangvalte chu in pawh takin inkawm ngeih tak ang mai an ti ti ho va,Dopui khawtlang inlungrualna leh inunauna chu Dopui Tlangvalte ah lang chhuakin tumah in itsik leh intai awm lo vin an in kawm dial dial thei vek a ni.lenghawn ar khuan rualin tumah thu hnufual lovin an tin ta dam dam a.an inlengte haw hnuah Lalmani chuan a fanu Zorini chu a thiam ang tawk tawkin Nula awm dan tur ,tih tur leh tih loh turte ,awm dan mawi leh mizing a awm dan tur te chu an hrilh ve mawlh mawlh a.


Valupa Khama chuan Zawlbuk a Tlangval ho ti ti leh an thu khelte Lal Dokulha a han sawipui chuan Lal Dokulha chuan a lo ngai pawimawh ngang mai ,a Upate koh khawmin ro an rel ho nghal chuk chuk a,Thawk thei chhungkua deuh a tangin Upa Tuaka fapa Neuva leh Upa Zakhuma fapa Chhawnate chu Vanzau khuate chetdan en thlithlai turin an tir zui ta nghal a.an khawhim nan hah pawh sawi lovin engmah phun nawi leh sawisel pawh nei lovin Chhawna leh Neuva chu Vanzau khaw lam panin an liam zui ta nghal vang vang a,Ni nga kal vel lai a nih a vangin zanriak buhfai nen in ak puar luah chungin in ven nan Silai pu chungin Tukthuan eikham hmatakah Dopui khua chu an chhuahsan ta a,Dopui khua chu ralmuang rih viau mahse an indo hmachhawn thei reng an nihna chuan mitin rilru a kap theuh va.Hna lamah buai hlawm viau mahse an han ti ti khawm chuan Vanzau nen an tualthu chhiat chungchang hi sawi lo vin an ti ti a tawp hleithei lo va.Khaw in lungrual leh tangho thiam tak mai a nih mai piah lamah Valupa Ralrel thiam tak takte leh an Tlangvalte vang chauh a khua la luah lum thei anni tih in hriain Dopui khawtlang chuan an Tlangvalte hi an chawimawiin an zahthiam em em a ni.

Chhingate ho pawh tukthuan eikhamah Zorinite Chhekin sa turin kawt chhuahlam pan in an inzui liam tham tham a.Chhinga pawh zan lam a Zorini mangphan chungin tui takin a mu a,a zingtho pawh a tha a tho khawp mai.Kawtchhuah an thlen chuan Zorini te unau pawh an lo thu dun ran tawh a,Chhingte a han hmuh chuan Zorini chu a lo nui var var a,An thiampuipa Nunmawia chuan "In lo va hma ve Zorin ,In lo awmna a rei tawh em " a han ti zung zung a.Zorini chuan "Kan thleng fel ve chiah a lawm." tih pahin Chhinga te ho chawfun chu la khawmin a em ah a khung a.Rei chawl khawmuang lovin lo lam panin an liam zui ta nghal a.Nunmawia chuan "Vuante i u Zorini hi a phur lutuk hi zingkhawvar rualin a thawh chhuahpui che chu a ni em lo maw" a han ti a.Vuante lah chuan "Zingkhawvar hmain eirawngbawl a peih vek tawh mawle" nui tut tut chungin a lo ti ve mai a.Nunmawia chuan nui hawk hawk chungin "Kan phur dan a ruallo em mai ,kan thulh leh mai dawn em ni" a han ti leh a,Thanga pawh chuan "Pawi lem lo khawp ang " a lo ti hmuk a .Zorini chuan nui har har chungin "Awi U Nunmawia hi i uang reng mai ,hawh teh hma va hruai teh" tiin Nunmawia chu hma a hruai tir a hlim tak a infiam bawrh bawrh chungin lo lam chu an pan ta a.

Chhekin tlang an thlen chuan Zaupui chhekin tih takah Chhekin chu a lo tlar zui mai a. Then khat sak peih tawh niin a then chu la sak mekte a ni hlawm a,Tlema hmun lai li deuh ah Nuzami chuan an chhekin hmun hauh nan perh a lo zep ve thlap mai a,an han in nghat fel a.Thlifimte dawngin an hanin zap dai lauh lauh phawt a.Nisa in Zorini biang an hem tai tek maite chu hmuhnawm tak a ni .rei chawl lovin Chhekin hmun tur chu an han ti fai zung zung a.duhberte nen hnathawk tlang anni bawk a,Chhinga leh Zorini pawh an phur surh surh khawp mai.ahmunhma an han tih fel chuan Chhekin chak pu turin Tlangval ho chu an liam zui leh ta nghal a,Tlangval chak theh thawh anni bawk a.Chhekin chak tur lek na na na chu vawikhatah an pu daih nghal vek a.a thenin an lo rel lai a thenin mau an lo chik bawk a.Nunmawia chuan Vuantea chu mauchik dante an hrilhin an zirtir pah bawk a.Chhekin ban tur lek lek chu ban khur chawh pawh a ngai lo.a hmawr pawh suihzum mang hleih lovin Thanga chuan a sawh phun zung zung mai..a vawikhat sawh pawh phawi leh mai mai chi a ni lo.Tawngchen dawn dawn leiah a pil zawt zawt zel mai a ni.ti chuan Chawhnu her zetah chuan Zorinite buh phur sawmnga vel dah theihna tur chu an peih ta der mai a,Zorini chuan lawmthu a sawi mawlh mawlh reng a,Thanga chuan "Lawmthu sawi a ngai hleinem Zorin nangni puih che u hi puih loh aiin kan chak fe zawk a nia" nui put put chungin lo ti vat a.Zorini pawh chuan"Awi U Thanga inti lawmawm em a lawm ,nangni zarah hei buh chhek chu kan hman ve ta reng mai chu a nia.kei ni teh lul hian kan chung a in thatna hi kan rul seng dawn lo che u a. Khuanu talin malsawm che u rawh se"thu tak deuh takin a rawn ti chhuak ve niap niap a.ti chuan an chawfunte thetin an ei ho te te a.midang Chhekin sa ve la zolote chu an han pui leh sawk sawk hlawm a.tichuan tlai lutuk lovah khawlam panin hmahmawh lem lo takin an inzui haw ta dam dam a.Zorini nau Vuantea chu sava feh haw duhin a lo va haw hmasa daih tawh a.Thui vak lo an kal hnu chuan Nunmawia chuan "Therhlo eng ilo kah tur a awm takin he laiah hian kan peng kawi lawk ang e,ti khan lova haw rawh u" tiin a pen san a.Thanga pawh chuan inthiar chhuan lamin a pen bo san thuai bawk a.

Chutia rilru chhungril tak a lo vei em te nen chauhva han awm fal takah chuan Chhinga leh Zorini chuan sawi tur an van dun kher mai .Zorini nula tawng duh leh mi biangbiak thiam tak pawh chuan sawi mai tur a van riau mai a.Chhinga lah a ka a chih emaw tih mai turin a ngawi tlat mai si a.a rilru a ka sawi ang tia a lo ngaihtuah zawng zawngte kha a bo duak mai a,sawi mai tur a hre fuh hlei thei tlat lo.Sakei hma ding chu nise hamhaih hauh lovin a tih tur chu a hre ngei ang.Mahse a hma kal hi Sakei aiin a hlauhawm zawk a ni teh chek ang chu Chhinga chuan chet lak ngaihna reng a hre ta hauh lo mai.Zorini pawh a in ngaihtuah nasa kher mai ,a tleirawl chhuah a tang a lo vei tawh Chhinga chu a rilru zawng zawng hrilh a duh a.tun bak hi hun remchang a tam dawn lo tih hriain tih dan tur a ngaihtuah nasa mai a.A hmeichhia zawkin sawi hmasak lah thil mawi a ni si lo.Chhingan a lo duh ve loh phei chuan a zahthlak dan tur a ngaihtuahin a ngam ngang si lo.Chhinga lah sawi tur hre lo vin a ngawi reng mai si a.Nula fing fel tih takah Zorini chuan a huaisenna zawng zawng sawm khawm Chhinga rilru hriat tumin hma a la hmasa ta ngawt mai a."U Chhing zanin te chu in lo leng leh ang chu ti raw.nge hmun dangah tha deuhte hi i lo hung reng tawh zawk "tiin Chhinga chu thupui an kheuh hawn pui ta a.Chhinga pawh chu chutia Zorinin an tih takah chuan a ngam pa ve ta deuh va" I phal phawt te chuan kan lo leng lo phal nang,tu mah hian keini te chu min duh ve hleinem"a lo ve thuai a.Zorini chuan tum nei ranin "Ka awih chiah lo,ka thiannu Pari pawhin U Chhinga chu Mualveng ah a birh tlut tlut zel a tih che kha" a han ti leh a.Chhinga pawh chuan Zorini tawng dan a tang chuana beiseih awm viauin a hria a,dawizep tit tet hun a ni lo tih hria in a rilru chu Zorini chu a hril fai ta leng mai a,Zorini lawm lutuk chu tawng chhuak mai thei lo vin a han ngawi vang vang a.Chutah "U Chhing i rilru dik tak min hril lo mahla kei chuan i rilru dik tak min hrilh ah ka ngai lui tlat dawn a ni.i mi hmangaihna awka hriat hi a va nuamin vawiin hian ka va hlim tak em.kei pawn Kan thleirawl chhuah phat a tang khan ka thinlung zawng zawng hi i tan ka lo hlan tawh che a. U Chhing Ka hmangaih che " a lo ti ve ta hnap mai a,Chhinga lawm lutuk chu a bing chuk chuk mai a.hmangaih biahthu in hlan tawnin an chungah eng pawh lo thleng se rinawm tak a in nghak zel turin rinawmna biahthudi an in hlan dun ta a.Thihna chauh lo chuan min then suhse tiin Dopui nula chhuanvawr Zorinpuii leh Dopui Kulhbang rinawm Pasaltha hrat khawkheng Thangchhinga chuan chu tlai ni eng mawi tak mai hnuaiah chuan thu an tiam dun ta a.Thlifim thaw heuh heuh te chu an thu tiam hriatpui tu an ni a.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 16th, 2017, 6:59 pm

DOPUI MIHRAT KHAWKHENGTE

BUNG 27-NA

Dopui khua chuan an lo lam hna tulte chu an zo thawkhat ta.an buh leh balte pawh an buh zemah him takin an khung fel ta hlawm a.kum thar lam a an lo turte buaipui in mipa ho chu an buai leh map map tawh a,mipa hoin pumah an hreipui leh chemte chher tha in pumah thir chher an ri tlut tlut nitin a.hmeichhe lam pawh la deh leh thing phurin an buai nitin tho va,an lo neihna turte a hlat tham deuh a vangin zau hla zual tam tak chu nitin lo vat riak turin an in phur liam zut zut mai a.mipa lo vat leh hmeichhe nau nei chu thlan ko tlang a ding reng ang an ni an ti mathlawn lo vin zum leh hriam kar a nitin lo vah chu a hah thlakin a hna a rum em em mai.in hliam palh hi mi eng emaw zah an awm kumtin a.ram pilril tak tak vat darh annih a vangin a ram neitu ransa kawlh kut tuar a hliampui tuar lah an awm kumtin bawk a.mipa fa ramtan thei chin chu nitin lo vahna lamah an liam bo diak zel a,Dopui khua pawh chhunah phei chuan a reh thei khawp mai.


Lal leh Upate rorel angin mitinin a hma thei ang ber a lo vah zawh tumin hah pawh sawi lovin khawen chhung zawng an bung ngat ngat hlawm mai a.Vanzau lam en thlithlai tur a an tirh Neuva leh Chhawna thu rawn thlen ang in Chapchar ah Raldo mai thei annih a vangin lo vah zawh vat vat chu Lal leh Upate duh dan a ni a.Chhingate thian thum pawh zau khatah lo inhnaihte te ah an awm a vangin an riak ho thei hlauh mai a.Bungmual mawng luite kam zawl nuam tak mai ah buk an sa tluah mai a.Bungmual zau ho chu a huho a riak khawmin an ri luih luih mai a.in sawm zet riak khawm anni bawk a an in hlimchhuah a chhun lamah hah viau thin mahse zanlamah chuan hah hre lo lekin an ri luih luih zel mai a.


Lovat riah khawmnaah tuman thiante chawhmeh zawn sa rin ngawt hi an duh ngai hauh lo va.mahni thei tawk te te zawngkhawmin riahbuk chawhmeh tumtu nih an tum theuh va.a thenin thangte kamin varung leh vahrit te an rawn khai haw zantin a.hruizik leh tumbu eng ilo lo vai khawm tawk an awm bawk a.Pasaltha leh ramvachal deuh hoin Sakhi leh sate nau deuh an rawn paw haw deuh reng bawk a.riahbuk chawhmeh na na na chu an phang lo thin khawp mai.Chhinga pawh pamal chauh ni mahse riahbuk chawhmeh barh tu ber a ni a.a riahpuite fak pawh a hlawh thin khawp mai.Chhinga chu a lo vat a han tang tak tak mai chu a hmuhnawm ngei mai.a lo vahna mau hmun a ni bawk a,vawikhat sah bak ngai hek lo mau chu sat fik zung zung mai thin a.mi naran nithum vah dawnte hi nikhatah a vat leh duai mai thin a ni.tlai lam ni suk chen zet a awm tih ah chuan a lo vahna sirah chuan Nunmawia chu a rawn kuk raih a.Chhinga pawh chuan a lo vah lai chu kal sanin Nunmawia awmna lam chu a pan phei ta thuai a.Riahbuk chawhmeh zawn an tum lawk sa a vangin an bang hma ta deuh a ni.Nunmawia awmna a thlen phei chuan Nunmawia chuan a lo nuih var var a."I vat chak kher mai ,ti hrim hrim chuan keini kut pathum ai pawhin i zo hma dawn a nih hi"a lo ti luam a,Chhinga chuan "Perhte sah tur a tam lo bawk a,a vah a sawt phian a,nangni engnge in an tawh a" a han ti zui a,An tlang lam a in zui thlak pah chuan Nunmawia chuan "Kan ram pawm chin zahve awm zet chu kan sah en ve tawh kha mawle" a lu hiat sun sun pah chuan a lo ti a.Chhinga chuan "Chu lah chu in zo dawn ruai lah niin " tih pahin an tlang kawrte ah chuan a tawlh thla zawt zawt a.Kawrte tui dai raih mai ah chuan an lo vahna me te leh an thlante chu an han sil fai zung zung a.Bungmual zingzum ral Bellei mual lengkir ko a nimin tlai a Nunmawia Sunhlu channa chu zuk chan leh an tum a ni.A la hma deuh bawk a muang changin kawrte chu an zawh thla bek bek a.Nunmawia chuan "Nimin tlai Ka Sunhlu chan kha a mak hle mai a.Sakhi hniak thar a tam teh lul nen a lo chhuah loh reng reng ka ring lo sin le" a han ti niah niah a.Chhinga chuan "Zan tin an rah tlan ngai an tlan ziah kher hleinem ,zan kar thlak te pawn an chhuak ve bawk a nia.a then phei chu zing lamah an chhuak thin nghe nghe leh nghal" a lo tih leh boh va,Nunmawia pawh chuan"Zanin kan chan chhuah loh chuan naktuk zingah zuk chang ila tha ang"a han tih chuan Chhinga chuan "Nia mawle,lo vat thawm a tam si a,hnai vaiah salian tham kah tur an vang tlat si a.kan kah theih hma chu chang tlut tlut ila ni mai lawm " tiin Nunmawia thusawi chu a lo thlawp thuai a.

Reivak lo hnuah chuan Nunmawia chuan "Sa chhuah a la hun chiah lo bawk a,ti teh helai lung chungah hian Vaibelte zu hahdam ila maw le" tiin a han rawt a,Chhinga pawh chuan "Ni tak e.lo vat thawm a la tam em mai,Sakhi mawl deuh lo zawng tlat chhuah a la hun lo ve" a lo ti ve vat a.Vaibel te tan an han zu chawl vang vang a.Chhak lamah chuan lo vat thawm a la ri tliar tliar a.Thing liandeuh kih rik rum rum te.Hreipui chek ri kauh kauh te,mau puak ri tak takte hriat tur a la awm a.Nunmawia chuan a Vaibel pak khuk thir chhoh vung vung pah chuan"Thianpa Nupui hi nei thut mai teh a"a han ti ngawt a,Chhinga chuan "Teh ngawt thin chuan,nupui neih hi tih mai mai ni hleinem"a lo ti thuai a,Nunmawia chuan " Ni viau mai nih chu Mahse i nu hi ka khawngaih a lawm ,a khaw har tur ziate ka ngaihtuah hian Nupui nei vat la kan ti mawle,Mipa chu ramvah eng ilo fahran riahchhuahna tur a tam thin si a,a mah chauh a khawhar tak a awm tur hi ka khawngaih thin a"muk ve hian an ti leh a,Chhinga pawh a ngawi ta vang vang a chu tah "Ka nu khawhar lutuk thin hi chu ka lainat thin khaw a sinThianpa ,Eng pawh nise he thu hi zawng vahsan lak zawh lamah kan la sawi leh dawn nia,tin indo hmachhawn thei reng kan nia,chutih lai nupui lo neih zawng a fuh viau lo vang" a han ti vang vang a.chutah "Thianpa Nangpawh hi lawm mumal deuhte hi nei ve la mawle...Nula ho lemin an mit mei nasat teh reng che nen" a han ti leh bauh va,Nunmawia chuan nui hak hak chungin "He tia duh duh chhai thei a awm hi a nuam..bakah nupui neih te hi ka tum teh ual lo ve" tiin a lo chhang leh a,Chhinga chuan"Engah teh ngawt chuan maw."a lo ti let thuai a,Nunmawia chu a ngawi vang vang a chu tah thawp sut hian"Mipa leh Arhlui sen chuan Damrei kan tum vak hleinem"a ti sap a.Chhinga chuan "Kan dam ang a,fa sawm zet neiin kan fate kan la inbuan tir luih luih ang chu ,ti teh i kal leh tawh ang hmiang " tiin a tho va,Luimawng lam pan chuan an in zui thla leh ta a.



####€####


Thangate lo vat pawh an vat sawt ang reng khawp mai a,a nau rawlthar lian a bengbuang Sailianpuia nen chauh annih ve bawk a vangin Thanga lo vat chu a tang thei kher mai a.a lovah chem hlai hriam zet chu a vai tlangpuat puat mai a,engmah hian Thanga zawng a dawl mawlh lo.A lo vat thawm pawh a tha na rawh maupui hmun mau chu an tlu puak rum rum nileng thak a ni mai a,mi sawmrual lo vat thawm hawlh a ni mai.Mualzavata a tluk lohna chu tlemte chauh a ni ang,a nau Sailianpuia nen pawh in tih palh a hlauhawm a vangin in kar hlat fein an bung a.Thanga chuan a lo vah pah chuan mau bul hreiha leh chemfawng eng ilo a tan tha awm deuh chu awl samte in a zung chawpin a pasawntlung phawi hmiah hmiah mai a .a kut a mau sah fik zung zung pahin a chang leh a kezungpui lian khawng fur mai chuan mau bul rote chu a chhuih tlu zung zung mai bawk a,a nau Sailianpuia pawhin a U Thanga lo vat chu hmuhnawm ti takin a lo thlir leh vauh vauh thin a.



Thanga pawh riahbuk chawhmeh hawn lo bik nih hrehin an vah hmabakah thangte kamin Varung leh Vahritte chu a khai haw ve fo bawk a,Silai hi chu nei ve bawk mahse silai chelek hi a zei loh lampang tak a nih a vangin a hawl chhuak zen lem lo va.a talhtum erawh khawikipah a keng a ni hawt a.Nula rimnaah em a keng lo tih mai a ni.ni khat a tan chuan an vat zau thawkhat a hriain Thanga chuan a nau chu a duh tawk pui ta a,an vah hmabakah thuin vaibel a pak khu tual tual a."Saite vawiin tan chuan duh tawk phawt ila..ti teh kan thang kam ho i va en teh ang.an Nghawng a lo kham lutuk palh ang e"a nau Saia hnenah chuan a han ti a,Sailianpuia chu lo phur kher mai ,a phul ve hlut a,ti chuan an vah bak lamah chuan an inzui chho ta duan duan a.an thangkam an en chho zel a,Varung pahnih leh vahrit chal lianzet an ak ran tawh a.chutia an chhoh zel lai chuan an chhak lawk awi ten deuh ah chuan Thawm ri but but hi a lo chhuak a,an han ngaihthla chiang a,thil hai ri bup bup leh seh ri bup bup ri niawm tak hi an chhak lawk lang lo chin vel tang chuan a lo ri leh thin a.a chang leh an reh leh vang vang thin bawk a.Thanga chuan "Eng thawm chu ni bup bup maw.Saite tah hian lo awm la.ka han en chiang lawk ang e''a han ti a,A talhtum pu chungin a chho ta thoh thoh mai a.Ramsa kawlhin mihring emaw ramsa emaw a seh a ni thei mai ang aw tiin a ngaihtuah a.



Chu ri lo chhuahna lan theihna Thangan a han thlen chuan makti fein a thlir ta reng mai a.Chu lai awipang a Thingkhawilu lian zet ding bul kawrawng chu Savawm lian zet hian a lo hai mual mual mai a,Thingkawrawng chhung ah chuan a duh ang a ,a luh len mai theih loh a vangin hai zauh tumin thingkawrawng ko tlang chu a chang leh a ke hmalamin a hai a,a chang leh a seh ri bup bup a.Thanga chuan" a eng chu ti ni maw"ti chungin an pan hnai leh deuh va,chutah khuai thlawk ri mam mam chu a hre ta a,chu Thingkhawilu kung bul kawrawng a khawivah awm chu Savawm chuan a lo tuk mek a lo nia,Khawdang hawi lo lekin Thing chu a hai buan buan a,khuaiin a zuk ve tih hriat takin a ke hmalam chuan a lu vel chu a vai leh thuak thuak thin a.Thingkawrawng chu a zuk zen vang vang a khuai thlar lian lo te te chu rawn tham chhuakin a hmawm leh mual mual thin bawk a.Thanga chu nui ruh ruh chungin chu Savawm awm na lamah chuan a Chho zel a,a han hnaih deuh chuan Khawivah pui thinrim then khat chuan an lo bawr ve nghal chat a,Khawivah zuk te lek lek chu Thangate ang mi rothap tan chuan thosi seh ang lek a nia.a theih ang a thawm dimin Savawm chu a pan hnai zel a.Savawm lah a hna a tul bawk a, hawi chhuak hman hek lo.a hnung mai ah Thanga chu a ding tawh a,Chutah "A va tui awm mual mual ve" ring zet a tih pahin Savawm khawizu ei mual mual lai chu a tuk khumah a talhtum chuan an hawlh bu lawp mai a,chu Savawm lian zet chu a phu nasa kher mai .a let thla nghal tawp tawp mai a,Chutia Savawm phu nasa lutuk let thla tual tual chuan Thanga nuih a ti za kher mai ,mittui tla phungin a nui dir char char mai a.Chu Savawm ve thung chu a nuih a za lo kher mai ,A thil eitui lai an tih buai vang nge ,a tukkhuma Thanga hawl buk lawp kha a hua,a thinrim kher mai.a tlang zawl deuh va a lum tawp ,a lo tho leh chu a rawl a ring kher mai.a ka lah chu mai leng zetin a ang sen huam mai a.a ke hnung lamin a ding ur ur a,ring zet in a hawk dawt dawt mai bawk a,Thanga chuan la nui sung chungin "Thianpa Vawma chu va thinrim awm dum dum ve " a ti duh lek mai a.Hlauhtinah a tin lo hrim hrim ,muangchangin a zuk pan thla chhut chhut a,"In hrosa kuk kuk lo khan tlan chhe mai teh,a nih lo zawngin riahbuk chawhmehah ka hawn mai ang che"tiin Savawm chu a han hauh leh rih a,Hnai teah Thanga leh Savawm chu an in melh dun ta khui mai a.Sailianpuia pawhin Thangate thawm chu hriain a lo tlan chho ve thuai a,hla deuh a tang chuan a U Thanga leh Savawm in hmachhawn ran mai chu a lo thlir reng mai a, Chutia Thangan hlauh hauh lo va a lo melh ve kur siah chuan chu Savawm chu a zam deuh nge a hawi vual vual a,chik nghur nghur chungin a in her a ,a piah ngaw lam pan chuan a kal phei ta mut mut mai a.Thanga lah chuan "Mangtha aw" tih pahin lung lian leng lawngin Savawm ngum ah tak an vawm thum dawp mai a,Savawm chu hmalam a zuan zawk pahin a hawk ri dawtvdawt mai a,chuta a rawnin her leh chu a thin a rim takzet ta .Thanga lam ah a rawn thlan dawk phei ta pur pur mai a.Thanga nghawng ruh seh tliah rawp tumin a rawn zuan phei ta zawk mai a,a tuan rang vei fu leh nghal ,Thanga pawh lo ding mai mai bik hauh lo.a talhtum lianzet chuan zak kau meuhin Savawm bek ah tak chuan a lo hem ri chawk mai a.Savawm thluak leh thisen chu a bul vel mauah leh hnim hnahah te chuan a per chuai mai a,Thanga pawh a per berh phung mai a,Savawm chu Thanga ke bulah a thla hlawm tawp a che zui tur a awm ta lo.Thanga chuan Savawm chu a kein a han thai let a"Ngah nge maw i rawn let leh vut teh ei"a han ti sup a,Sailianpuia chuan a hnunglam tang in "Ka U Thang a thi tawh a mi "tiin a rawn au va,Thanga chuan " Aw thi tawh e,lo chho rawh "tiin a han au let vat a,Sailianpuia chu phur zetin a rawn ri chho khut khut mai a,Savawm chu an tuai let vel a,a lawm kher mai." Ka U Thanga chu i lo turu tiah tiah hle mai.vawikhat vuakah he tiang a lian Savawm i vaw hlum a nia"a U Thanga ngaihsan hmel fe chuan a han ti a,Thanga chuan "Vannei thil thu mai mai nih kha" a lo ti lek a,chu tah Thanga chuan "Saite khua a tlai mai dawn ,muangchang lo vin buk lam i pan ang hmiang ,kha ka talhtum hi lo keng la ,keiin Savawm hi ka rawn pu ang chu " a han ti a,Sailianpuia tleirawl rilru leh la a buang mai chuan a duh ta der lo mai.a naupang chhe rilru la paih hek lo Savawm zawntu nih chu a duh tlat mai si a,a tawpah chuan an zawn dun ta nge nge a.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 16th, 2017, 7:02 pm

DOPUI MIHRAT KHAWKHENGTE


BUNG 28-NA




Thangten an riahbuk an tlen thlak chuan ni a tla fel ve chiah a,Ral hla feah Sakhi a huk ri dap dap a,Sava chiar ri nak nak leh buk chhak lawk a koro rual hram ri tuar tuarte chuan Thangate savawm man chu an lawmpui ve a ni ngei ang le.Midang ho pawh buk ah an lo awm nual tawh a,a thenin eirawngbawlin a then in tui chawiin an lo buai map map hlawm a,Chutia Saia leh a U Thangan Savawm an rawn zawn haw nawlh nawlh an hmuh chuan an lawm hlawm kher mai an ri tengtung mai a.An rawn tlan khawm nghal tak tak a.Sailianpuia chu in tih theih hmel takin a rawn hawi phei valh valh a,Buk kawt zawlah chuan Savawm chu an han nghat ri dawp a,Buk a lo awm ho chuan an lo bawr nghal laih laih a,Sailianpuia chuan in ti thei fe hian"Ka U Thanga vuak hlum a nih hi"a han ti larh larh a,a Sum lo teh mawlh mawlh tawk an awm bawk a,Sum 6 tualleng niin a thau mum kang mai bawk a.an zing a upa ber Pu Nghaka chuan Savawm chu an bel chiang vel a,a luruh sawm nuai mai a thinsen leh Thluak lo baw nuaih a hmuh chuan'E khai ,kan Ramhnuai pasaltha chuan.Dopui Pasaltha chhuanvawr talhtum a tawng fuh a ni maw"a han ti a,Midang pawh chuan Thanga chu an lo fak ve sap sap hlawm a,Thanga chuan "ka vannei a ka vaw hlum mai mai lawm" a lo ti ve chuarh chuarh a,Ti chuan eirawngbawlte an la peih lo deuh bawk a,Savawm sa chu an chan zui nghal mawlh mawlh a,chutia savawm sa an chan mek lai chuan Sailianpuia chuan phur fe in Thanga leh Savawm inhmachhawn dan chu a han sawi zar zar a,Sachan pah chuan an nui dar dar hlawm a,Tlangval pakhat Zuala chuan "chu a ngum a i han vawm leh kher chu a lo ngai thei vak lo a ni maw,Thanga" a han ti a,Thanga chuan nui vur vur chungin "a lawm vak lem lo a nih hmel " a lo ti duh lek chauh a,Ti chuan hlimtak a Savawm sa chu chanin Chhum tur bak chu an rep ta dul mai a,an han inpeih fel thawkhat tih ah Nunmawia leh Chhinga pawh buk an rawn tleng ve chiah a.


Nunmawia chuan "E tu pasaltha zar nge kan zo leh tak a,Sa kan va nghah ve le,keini ve lah kut ruak ngawtin kan lo haw a ni mai si a,hmai a va uang lo em " a han ti sawk sawk a,Sailianpuia chuan "Ka U Thanga vuak hlum a nih hi " a lo ti nghal var a,Pu Nghaka pawh chuan "Hei pasaltha Thanga kut a tuar lo a nih hi.E khai inthlahrung reng reng suh u.a hlawhtlin reng thei hleinem ,Hei riahbuk chawhmeh te chu kan phan loh nasat hi,han in sil dai ula,kan kim tawh bawk a,zanriah te kan ei zui mai dawn nia" a lo ti zung zung a.



Zanriah ei pah chuan Saia chu Nunmawia chuan Thanga Savawm vuak hlum dan a han zawt a,Sailianpuia lah lo phur nasa,a chaw bar theihnghilh thakin a sawi suah suah mai a,Chhinga chuan "Thianpa Thanga hi chu tluk loh rim i nam thin mang e,Engmah hian an dawl lo che a nih ber hi " tiin Thanga chu a fak zui mawlh mawlh a,Thanga lah chuan"Ka tlan chhe turin kan vai fuh palh hlauh a lawm mawle"uang lo fe hian a lo ti et a.Zanriah eikham chuan meipui bulah an thu far hlawm a,an Savawm rep chu a thau bawk a,a tlawrh suah suah mai a,a thau chu meipuiah chuan a far ri leh sawr sawr thin a,a alh zit puat puat a, Nunmawi a chuan "Ka pu Nghak Sakhi var hi i hmu tawh ngai em " a rawn ti chhuak hlawl mai a.Pu Nghaka chuan "La hmuh chiah lem nang ,Pasaltha ho hian an hmuh thu an sawi hi chu ka hre thin ,Engti zia a min zawt nawlh nge i nih a,in va tawng fuh em ni"tiin Nunmawia chu an zawt zui a.Nunmawia chuan " Kan chang chhuak a"a lo ti leh nghut a,Midang ho chuan hriat chian chakin an han zawt sap sap a,Nunmawia chuan vaibel an la kai te te a,midang hoin hriat chak fe a lo an thlir thap lai chuan muang Changin vaibel an pak khu tual tual phawt a,ti chuan an thil tawn chu a sawi ta a"Kan sunhlu chan hi a kung a len tham deuh vang leh a rah tlak na lai hi kham chhardawh awmna lai a ni a,Sunhlu rah hi kham chhardawh chung leh hnuaiah a tlak a vangin Chuan chung lamah Chhingan a chang a,keiin hnuai lam ,Sunhlu rah tla chu Sakhi in a tlan tih hriat zetin a hnuai te chu a bel hun mai a,Sakhi hniak a chiar dup mai bawk a,chutia in ring tak a kan thut vauh vauh lai chuan ,Lovat thawm a han reh fel hnu ni tlak hma deuh chuan Ka tlang lamah chuan thawm a rawn awm ta sat sat mai a,thawm rik dan a tang chuan pakhat chauh anni lo tih a hriat mai a,in ring takin ka Silai cheng chu ka kau ta tham tham a,thawm lo chhuahna lam hawi chuan ka insiam rem zui ta nghal a,Thawm chu lo chho zelin a hnim buk tawn chet zat zat pawh ka hmu thei tawh a,tlang deuhah pakhat a lo chho tih an thawm tang ka hre thei bawk a,chu tah hnimbuk kar a tang chuan Sakhi nu thankin zet tur lian zet zawt hi a rawn zuang chhuak ta thauh thauh mai a, Sakhi kan hmu makti fein ka ka ho mai a,chetna chang pawh ka hre mai lo nghe nghe a,Chu Sakhi chu a sen ve hauh lo mai a,a var thianghlim sar mai a,a thau tih hriat zetin a mawmte chu a bil mat mai a,a Sunhlu rah tla chhar chu in thozo fahran hian a zuang leh thauh thauh thin a,ka en reng lai chuan a hnungah Sakhi pachal var lian em em mai.ki hreu mawi fahran mai hi a lo chhuak leh ta zan zan mai a,mak ka ti kher mai a,kah thiangah ka ngaih loh a vangin ka thal ka thlah duh ta lo va ka thlir liam ta ngawt mai a ni"a han ti dap dap a,midang ho chuan mit khapna chang pawh hre lo vin ngaihnawm ti fein an lo ngaithla thap a,Tlangval pakhat chuan "a va mak tak ve maw le,kah thiang leh thiang lo fiah nan i kap chhin reng reng lo nia mawle" a lo vat a,Nunmawia chuan "Lasi nulaah ka chan deuh tlat a,kah miah kan ngai lo deuh mawle,Thianpa Chhinga pawn an thawm a lo hre phak si a,ka kap lo kha mak a lo ti viau a ni awm e" a han ti leh a,Thanga chuan"Thianpa Chhing chu a thawm chu i hre phak maw,Nunmawia kut ruak lo haw chhuan lam mai mai chu ni lo maw"nui suk suk chungin a lo ti ve a,Chhinga chuan"An mahni ka zuk hmu phak chiah lo na a,An thawm ri sat sat leh an ke per ri tlat tlat thin te chu ka hre phak lawm,Engti zia Thianpa chu kap lo nge maw ka ti rilru reng a"tiin Thanga chu a lo chhang a,Thanga vek chuan "Nunmawia sa hu zolo khur buai Silai hmet per zo lo chhuan lam mai mai a nih ka ring zawk mah mah e" nui hui chungin a lo la ti hram a,Nunmawia chuan "Talhtumlian tlangau fanu bul a khabe sai dawt dawt i ding ang ngawt kha chu ka ni lo a nia" a han tih chuan an nui dar dar a,Pu Nghaka chuan"Ramhnuai hi a zau em mai a,ram pilril mihringte tlawhpawh loh lah a cham pet put a,thil mak tak tak kan hriat phak loh zawng a tam na meuh ang "a lo ti ve chuar chuar a,chhunlamah an hah tlang bawk a mut zai an rel ta hlawm a.



Dopui khua chu tunah rih chuan an muang viau rih mai a,indo thawm a reh rih viau mai ,Lo vat riak ho pawh lo vat zoin an haw sup sup tawh a,Nitin deuh tho an lo haw zut zut mai a,Chhingate ho pawh a vat zo hnuhnungte pawh inpui tawn dial dial in,Tumah vat zo lo bik awm lovin an zo kim ta thap mai.ti chuan Lo vah hna rum leh hahthlak zet mai chu zoin hlim takin an in zui haw ta diah diah a.Tlangval ho chu zan tam an hmuh tawh loh an lawmnute zan lam a an hmuh theih tawh dawn a vang a phur fe in puaven sawi chhing sauh sauh chungin an kal tarh tarh hlawm a.Chhinga pawh a mitthla a Zorini nui mawi tak hmu chungin hlim tak in a kal nui var var a.



Vahsan lakte an zo kim thawkhat ta bawk a,Lal leh upate pawh an hmabak rilru kaptu awm reng mai khen tlak vat vat hlan nghakhlelin Lalinah an thukhawm awl lo va.Dopui khaw chhung pawh a lun leh tawh hle mai a,Zan lam a naupang pawnto ri laih laihte ,Nula in a tlangval ho nui dar darte chu hriattur a awm leh tawh a,Chhun lamah nula leh tlangval thingphur hlim thawm ram tinah hriatur a awm bawk a.Lal Dokulha chuan Valupate leh Pasaltha thenkhat rual u deuhte chu koh khawmin A khawn bawl Upate nen ro an rel ho mek a,Lal Dokulha chu rawn ding chhuakin " Zanin ka koh khawm chhan che u chu ,Vahsan lak te kan zo tlang ta bawk a,Kan hmabak tih tur pawimawh tak awm hi rel ho thain ka hria a,kan hriat theuh angin Vanzau hi Dopui tan chuan mit a khan chhuk awm ang mai a hnawk a ni a,An mahni a vangin Dopui Pasaltha Tam tak an lo tlu tawh a,hmanni maiah Hualtu khuaah kan Pasalthate nen an in bakkaih hlak tawh bawk nen,an mahni lam pawh hi an ngawih mai mai a rinawm hauh lo va,phuba la tur a kan lo intiam tawhna leh kan lo inbuatsaih na zawng zawngte kha a tak a chantir a hun ta,Vanzau Lal Thawmliana lu saw ka kawt ah ngei tar ka duh a ni,a mah a vangin zan tam ka mut loh phah ta,Dopui Tlangval huaisente u Thawmliana lu saw min lo hawnsak rawh u"a han tih chuan an lo haw haw hluah hluah mai,chutah Dokulha chuan sawi zawm lehin"He mi chung chang hi i han rel ho teh ang u tiin ka koh khawm che u a ni e"tiin a thu ta a,an han rel ho nak nak a,Upa Chuaia chuan "Kan tlangvalte hian Vanzau hi va hal darh vek se la tha ka ti ,Kan pasalthate Ralhrat zia lah kan hriat sa .Khaw lian zawk ni mahse an in ring lo lai kanva thawnthut zawngin an tang hman hauhin ka ring lo"tiin an rawt a,an sawi zui nak nak a,A thenin chet hmasak a va thawn thut an duh laiin ,a thenin mahni buzawl a lo tan an duh bawk a,thu a mum hlei thei meuh lo va,Chutah Lal Dokulha chu lo ding chhuak leh in " awle ,engpawh nise ,Ralrel thiam hmingthang a mah a vang a Sazek khaw tlangval ho pawh kan phin darh vek theihna Valupa Khama kha lo ding se la ,a ngaihdan han sawi tehse "tiin Valupa Khama kil khata ngaihtuah chik hmel fahran a lo thu ngawi reng chu a ngaihdan hriat duhin ding turin a han sawm a,midang ho chu thehmeh ang mai @an reh thap mai a,Valupa Khama chu lo ding chhuakin a aw an thian kharh kharh a" Lalpa leh Upate ,leh Dopui Pasaltha zawng zawngte u ,kei a ngaihdan tehlul in hre duh a nih chuan kan sawi poh ani ang chu,a rintlak meuh ang emaw chu .Vanzau khua hi khawlian leh mihring tam zet mai anni a,Zawlbuk pawh pahnih lai annei a ni a,an bu zawl va luhchilh ngawt hi a fuh ber lo thei a,tin,Nitam tak kal a nih bawk si a vangin kal chauh hnep hnu a ralbeih ai chuan kan buzawlah ngei tan hmun lo khuar hi a fing thlakin ka hre deuh va,an kal chauh leh tha zuai tawh lam kha keinin tha za zer zawrin kan bu zawlah kan lo phin darh chum chum mai tur a ni dawn lawm ni"a han ti dap dap mai a,Tha an ti tlang ta viau mai a,Lal Dokulha chuan "Valupa Khama nge nge i ralrel a fing thin mang e,Valupa Khama ho va ral kan do a nih ngat zawngin kan che sual hauhin ka ring lo ve,Engpawh nise ralrel dan chipchiar chu Valupa leh Pasaltha ho kutah ka dah e,Kei leh ka upate zawng kan mawng a rit tawh a,ralrel turin kan thluakin a pha ve na hek lo ,in thu leh hla erawh min hrilh hre zel ula" tiin an rorel chu a ti tawp ta a.Tlangaupa Tinsuaka chuan Lal zu belpui chu rawn chawi thlain hlim tak in an zuk ho ta laih laih a,Tlangval ho chuan han zuk ve bawk mahse tam zuk duh lovin Zawlbuk lam an pan ta hlawm a.


Chhingte Lalin Kal haw pawh nula rim nan a tlai deuh tawh a vangin Zawlbuk lam an pan tlang nghal a,naupang pawnto pawh an tindarh tawh a vangin kawt lai chu a reh thiap tawh a.Chhinga chuan"Kan pate phuba kan han la tur hi ,ka phur lutuk hi ka khur der derin ka hre thin"a han ti a,Thanga chuan "Vanzau ho vuak darh chuai chuai a nia ka chak tawh ni.ka tha a za zek zek tawh a nia" a lo ti ve thuai a.Nunmawia thung chuan"Vanzau khua hi Sazek khua ang mai mai kha chu anni dawn lo va,Pasaltha ralhrat tak tak an kuh tul mai bakah Valupa thluakfim tak tak an nei fur bawk nen,Dopui lam pawh hian lu chu kan hloh ve nual ngei ang le"thu tak fe hian a lo ti ve a,Chhinga chuan"Uai,kan pasaltha huaisen chu i zam tan der elo '" a lo ti vat a.Nunmawia chuan"teh suh ei,Mipa leh Arhluisen chuan dam rei kan tum vak hleinem.a tul a nih chuan kan tang ralraih ang a ni mai lawm"a han ti chher chher mai a.Chhinga chuan "Kha ngei kha a ni Dopui mihrat khawkhengte tawngkam chhuak tur chu ni" tiin Nunmawia dar chu an beng thap thap mai a.Thanga pawh chuan "Tin ther tiat pawhin ka hnung tawlh hlek lawng e," a lo ti thum ve chhak a.Dopui mihrat khawkhengte hmaah ding zo awm tak ang maw.



Valupate rorel ang in Vanzau ho khawsazia leh an ralrel dan thlithlai turin Chhuana leh Zika chu Vanzau lamah Tukthuan eikhamah an chhuak ta nal nal a,khawtlang him nan lu chhum ban chhum huamin hmelma ram chhung an lawi lut dawn a ni a,huaisen leh inpekzawh ngai tak a ni.Dopui khua chuan funpui an er tlut tlut mai a,Chapchar kut hmante chu khawiah ,nitin pumah Silai mu an chher tlut tlut a.Valupa hoin Ral lo danna tur hmun hma enfelin an lo buai nitin bawk a,tumahin an mimal hna tul an khawih hman meuh lo va.Dopui khua chu Raldo turin an inpeih thawkhat ta.


Indo leh inrun hian thatna leh tangkaina nei teh chiam lo mahse mihringte nunphung a bet ve tlat a nih miau si a vangin,pumpelh theih a ni lova.midang thuhnuai a va kuna an sal nih an duh a nih ngawt si loh chuan mahni zalennan ral beih a tul fo lo thei lova.nunau pawisawi lo thlengin indo nghawng chu lo tuar ve in an in leh lote chan fo thin mahse khawvel awm chhung chu mihringte hian indo kan bansan dawn si lo.a huai huai dinchhuahna,a chak chak dam khawchhuahna khawvel a ni miau si a.

#######

Vanzau Lalin dung sei ruih mai hnuaiah chuan Lal leh Upate zu tai fe chu a tling tentun nitin mai a,vawk leh ui ,ar chenin an tlan huai huai mai a,Vawkpui lo in nawr ngek rawng rawng tawk lah bo lo.Lal Hausa leh Ropui tak a ni bawk a,Zu leh saah chuan an hnianghnar kher mai ,Tlai ninemah an zurui phur tuium sawh tlut chung a an zai loh leh Dopui khaw thla tawngin an inhrosa tun tun hlawm thin bawk a,Lal Thawmliana zurui chuan an salte chu a vau leng dawr dawr mai thin a,Chapchar awllen a ni bawk a mipa ho chuan funpui an er tlut tlut a,Silai nei hoin Silai mu an chher tlut tlut hlawm a,Silai nei lo ho pawhin an fei leh ralthuam dangte an tuai hriam sauh sauh mai a,Lal Thawmliana pawh "Dopui uihum lek in ka pasalthate kut an lo thlak ngam a maw.Dopui khua ka hal darh vek loh a tak leh Sakei seh " tiin a vaibel dawn a seh keh rap rap mai a.mihringte in karah huatna a awm tawh miau a vangin indona meipui chu deh kai mai theihin a tang ta ut mai le.



Vanzau Tlangval Zanga chuang zet chu Lalthawmliana kawt tualah chuan ralthuam chi hrang hrang hum ther fur chungin a ngir khup mai a,Lal Thawmliana chu a Khawnbawl Upate nen thupui fun fahranin Leikapui chu an rawn chuang chhuak a.Mipui lo phun mur mur chu Lal Thawmliana chu a kutin an zap dai te te a.Aw ring per chhuaiin "Dopui uihum lek hmanah duh tawk a kan tuk zal tawh hnuin Ka pasaltha chhuanvawr Lianhnawla leh a naute lu an la vei maw.Vanzau Tlangvalte u kan chungah ni leh thla bak eng mah a leng lo ang bawkin,tu khua mah hi kan chungah an len rem tih hauh suh u ,Ka khua leh tui kut thlak tute hi an chungah zah ngaihna va lan tir hlek suh ang che u.Dopui Lal Dokulha lu ngei saw ka duh a ni.Dopui chu hal darh vek ula.Hualtu khuaah pawh engmah rawn zuah hek suh ang che u.Zam ngai lo Vanzau Pasaltha rualte rallu nen bawhhla chham a tlang tlir chungin lo haw mawlh ang che u" a han ti chuan Vanzau Tlangval rual ho chu an haw haw dur dur mai a.an thawm chuan Vanzau khaw khua chu a nghawr dur dur thei hial a.Valupa Zuahliana hoin Vanzau Tlangvalte chu Dopui khua hal darh vek turin kawt chhuah lamah an in zui liam ta duah duah mai a.Pasaltha Vawmthianga chhura tiat zet a lian pawh Talhtum lianzet puin a hmasa berah a kal thur thur a.Hualtu khua a Lianhnawla thattu Thanga chanchin a hriat a tang khan Dopui nau chahai chu ka chanpual tiin a in hro sa kuk kuk reng mai a.Palian leh huaisen tak tharum ngah zet mai a ni a.Sakei ang mai a in thazo niin Vanzau chhuan tawlawl hneh theih loh a ngaih leh a mah ngei pawhin hneh theih loh ni a in ngai tlat a ni a.Lal Thawmliana pawhin a vauchher ber niin duh sak pawh a duh sak narawh.Pasaltha dangte thik tham khawpin a duh sak thin a.Pasaltha dang ho hian an sawisel ngam lo mai pawh a.Lal Thawmliana pawhin "ka kulhpui nghet nghing ngai lo"tia a lo chhal ngat kha ani bawk a.Vawmthianga pawh a induhin a chapo thin kher mai.



Kawtchhuahah an ding thim nghuk mai a.valupa hoin fuihna thu an sawi a.Tlangval thisen lum tak tak te chu an mur chuai chuai a an haw haw hluah hluah mai a.Valupa Zuahliana chuan " Kan Lal Thawmliana chuan a khua leh tuite that tu lu a duh a,Vawiin niah hian Vanzau Tlangvalte u Kan Lal Thawmliana duh chu kan tih sak dawn lawm ni"ring fiak thak maiin a han ti a.Vanzau Tlangval ho chu an haw haw ring tual sauh va.Chutah Pasaltha Vawmthianga chu lo ding ve thungin "Suakthanga Fapa Vawmthianga ka ni ngai e.Dopui lakah hian hniak khat pawh ka phawi hlek lawng e.Vanzau Pasalthate u min zui rawh ule." a han ti lung lung mai a.Tlangval ho chuan "Vawmthianga Vawmthianga" tia au rual hulh hulh chungin Vawmthianga chu zui liam ta dul dul mai a.Vawmthianga pawh nuam a ti kher mai a hming lam a Vanzau Tlangval ho haw haw dur dur mai chuan a ti phur kher mai.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 17th, 2017, 6:09 pm

DOPUI MIHRAT KHAWKHENGTE



BUNG 29-NA


Vanzau Tlangval Zanga rual teh meuh rammu tur a an han in zui liam duah duah mai chu an thawm a tha ngei mai.an tam bawk a.a then mual an liam fe tawh hnuah pawh a then an lo la chhuak nguah nguah mai a.Dopui leh Vanzaute hi in huatna thuk tak lo neisa an nih a vangin he indona nghawng hi engti ang takin rap thlak ang maw.Indona vangin khaw tam tak rauhsan a lo ni tawh thin a,tunah pawh hian a tlawm zawk khua chu luahzui tlak a awm kher lo vang.mihring rilru a thinrimna leh huatnain bu a khuar laklawh tawh chuan Nunrawnna in a zui chawk thin a.Dopui valrual leh Vanzau Tlangvalte thinlung huatna leh thinrimna khat han in tawng tur chu indona a zawng a indona rapthlak ber pawl a ni ngei ang le.



Chhuana leh Zika Vanzau lam enthla tur a an tirh te pawh nithum lai kawngah an thang tawh a.hah leh chauh pawh sawi lovin hman hmawh takin a kal tauh tauh mai a.zanah riah theihna tawk tawkin riahbuk an sual a.Zing khaw var hma a eirawng bawl zoin khawvar rualin an tum ram panin an chhuak leh nghal zel a.nithumna tlai lam nitlak hma deuh chuan Tlangcheng mual nuam tak chuang chhuakin thlifim thaw heuh heuh te chu an han in chhem daih tir sawng sawng a.chu mual in khawh phei tawp a tang an han thlir thlak chuan an thlang ruamrai dup mai a tang chuan meikhu lo chhuak chiai chiai an han hmu ta a.he lai ramreh lutuk a meikhu hmuh tur awm ta ngawt chu ngaih thah chi ah an ngai hauh lo va.tute emaw ram chhuak pawh a ni thei tho nain Chhuana chuan Vanzau lam annih a ring ber zawk a.chu tia meikhu an thlir mek lai chuan meikhu an hmuhna ai hla feah silai a puak ri thuai a,a dang pawh a rawn puak zui ta thuai thuai mai a,indona a tleng emaw tih mai turin Silai chu a puakta ulh ulh mai a..Silai fung za vel lai puak ri a ni tlat mai a,"Eng thil tak chu thleng ni maw"ti an thlir vauh vauh lai chuan Silai chu vawikhat a han puak leh thuai a,a reh zui ta vang vang a.ti chuan Chhuana leh Zika pawh an mei khu hmuh na tang lang thei lo lamah her liamin riahbuk an sual zui ta nghal a,meikhu an hmuhna a hla tawh lem lo bawk a .zan lam a va enfiah an tum a ni.



Zanriah eikhamah Chhuana leh Zika chu meichher pawh chhi lovin zan Thla eng ringin ramhnuai thim ruih maiah chuan muang changin an meikhu hmuhna lam pan chuan an kal bek bek a.Tlabial chu a bial tep tawh a,a eng ang reng viau a.Thing leh mauten an hliah a vangin ramhnuai chu a thim ruih tho va.a then lai lai a thla engin a lo chhun tlang zauh zauh ringin an kal zel a,ramvachal tak ve ve an nih a vangin an buai lutuk lem lova.meikhu an hmuhna an hnaih tawh tih hriat takin meikhu rim leh sarep hmui chum chum rim chu an hre thei ta a.tute emaw ramchhuak annih ringin fimkhurna tlachham chuang siloin an hnaih phei zel a.chu tah le riahbuk lan theina an han thlen chuan le.pasaltha rualkhat ramchhuak mai mai anni lo tawp tih chu a chiangta kher mai.Kawr kam zawl zau nuam tak mai chu a lo in vat eng ut mai a,Chu lai ah chuan riahbuk seipui pui hi a lo ding thleh thluah mai a.awmze nei tak a sak niin in hmatawn zelin an sa phei zui hlawm mai a.buk leh buk in karah hmun sawmhnih dawn laiah meipui an chhep eng hluah mai a.ralveng pawh indah lem lova,an muang thawkhat hle tih hriat mai a,Buk a awm ho chu Sa chanin an lo buai em em mai a.saruh sat ri chawrh chawrh rite ,a rawlring zual tawng larh larh rite chu a hriat theih a,a thenin Sa an chan mawlh mawlh laiin a thenin an lo rep zel bawk a. valupa ho pawh annaute sachan thlir vauh vauh pahin an lo ti ti bawrh bawrh hlawm a,.a awrawl ring deuhte tawng hmang a tang chuan an enthlak tum ber Vanzau Tlangval rual rammu tur anni tih an hriat thei a.an meipui chheh ah chuan Sanghal sa an rep hmui rum rum mai a.nichin Chhuanate Silai ri hriat kha Vanzau ho nghalrual hual thawm a lo ni a,Sanghal za dawn an kap a lo ni a.


########
Valupa Zuahliana a hova rammu Vanzau ho pawh nithum lai an kal tawh a.an tam tham em a vangin a hmanhmawh theih loh va.Pangai tak a ninga kal hi nisarih vel lai kal turah an in ngai a ni.Ramhnuai khaw kar kawng mumal pawh awm lovah mual leh luidungte zawhin an inzui duah duah mai a.an kal na hnu chu a pehen hun mai thin a ni.Nithumni chawhnu lamah chuan ruamrai nuam tak mai an thleg ta a.hmun tin maiah Sanghal hnu a chiar dep dup mai.Valupa leh pasaltha hoinan han en chian chuan Nghalrual tam tham tak hnu a ni tih an hria a, he tiang nghalrual tam tak tak hi chu Rualkhat pawh zali zathum laite anni thin a.an hnu hma han en in Zahnih ai chuan an tlem an ring hauh lo va.Valupa ho chuan ro an han rel ta a,mi zahnihin buk lo sa se la.midang hoin Nghalrual hi hual nise an ti ta a ni.an hlawhtlin hlauh chuan rammut chawhmeh an hnianghnar dawn tih hriain phur takin an in siam ta sang sang mai a.

Pasaltha Rualzakapa ho chuan Sanghal hnu chu an han chhui ta zar zar mai a.rei loteah an thawm pawh an hre zui ta mai reng a.an nguk ri chuah chuah te.an in nawr ngek thawt thawt rite an tep ri chuap chuapte chu an hre thei ta a.Pasaltha Rualzakapa chuan a naute chu hmun hnihah a then a.Pawlkhat chu a man hovin Nghalrual chu an lo tlan khalh a.Nghal rual ho lo kal na ngei tur a ngaih kawrte kamah chuan an lo in zar phar ta a.Chu lai kawrte kam chep lai a Nghalrual ho chu hual beh an tum a ni.A chang an han in peih chuan Valupa Pakhat chuan ring takin chang an tum ri ta raih raih mai a.chutah a hualtu lam chuan thiam takin Nghalrual ho chu an rawn hual phei ta dum dum mai a.Nghalrual ho pawh an tam tham bawk a.mihring thawm pawh an hlauh lutuk chuang der lo mai a.a luhlul zual phei chu hnawh tlan deuh tak takte an ngai a.ti chuan le an duhna hmun tak kawrte kam hual beh remchang takah chuan Nghalrual ho chu an hual lut ta hum hum mai .lianpui pui ngho lawr verh vurhte leh A note la tial rikrek thlengin an zi nuai nuai mai a.an lo hnai zel a.zathum rual lai tur hi an ni a.Chutah le Pasaltha Rualzakapa silai thuntling elawl chu a puak ta dur mai le.chu mi rual deuh thaw chuan midang ho Silai pawh chu a puak thum ta chur chur mai a.Nghalrual tlan let tum ho lah a hualtuten an lo sai thal tawp tawp hlawm bawk a.Silai ri a reh fel a.Sanghal pakhat hliam tuar chu kawr chhungah a la hawk dawt dawt a.Tlangval pakhat chuan han hnaih chilh in a chaldar ah tak a han kap thuai mai a.chutah an Sanghal kah an han hnuk khawm a le.Nghalrual za dawn an kap tlu reng mai a.a lian deuh leh te deuhnen Sanghal Za dawn hmun khata han dah khawm hmuk mai chu hmuhnawm tham ve tak a ni.ti chuan buk lam ah Tlangval ho chuan an thliar ta zut zut mai a ni.He tiang Nghalrual hi tawn fuh tur a awm zen zen lo va.a tawng fuh vek vek chuan an kap tlu teuh teuh mai thin a ni.


####


Chhuana leh Zika pawh an hriat tum ber an hre ta bawk a.an Riahbuk lam panin an let leh ta a,Bukah chuan ro an han rel dun nak nak a.Dopui lam chanchin hrilh vat an ngai a.Vanzau lam lo entlatu awm a ngai vawk si a.in then mai an rel tlu ta .mahni chauh a ramhnuai pilril a khawsak chu a hlauhawmin a khawhar thlak tur zia pawh hre reng mahse an khua leh tuite himnan khawharna leh hreawmtin reng pawh tawrh an huam a,an nunna hial pawh hlan ngai mahse an hlan hreh hauh lo vang le.tichuan Zika chu zing vartianah Dopui lam panin a let leh ta vang vang a.Vanzau lam an rin ai hma a an lo thawh chhuah a vangin Dopui lamin duh angin inpuahchahna hun an nei lo ang tih hlauhin hmanhmawh takin Zika chu a kal sauh sauh mai a,Tlangval chak leh zuangzang tak kawngkal thei tak a ni a.Zika kawng kal hi mi naran tan um phak mai mai har tak a ni.Zanriah eiin a chawl muang zawk a.zanah pawh chawl livin meichher chhiin a kal leh ta ngat ngat mai a.a tuk zing khaw var meuh an khaw ram chin a lut der tawh a.nizan lam a,a chawthing bawkte thetin an inhnawh puar a.hahdam takin Thinghlim hnuaiah vaibel zu chungin an mu chawl vang vang a,nizan lama hah deuh nen a lo chhing sek a ni ngei ang ,Sava hram tuar tuar ri chuan a ti harh zawk mai a.ni pawh a lo sang viau tawh mai a."zia lo mang e aw,hmanhmawh nak lai kan lo mut tluk mai mai chu"tia phun sup chungin a Silai puin chak zet a kal leh ta pur pur a .



Dopui khua a luh chuan Zika chuan Lalin lam a pan ding nghal a.Lal Dokulha leh Upa thenkhatte chu Zu zuk pahin Lalinah anlo inkawm khawm mek a.Chutih lai chuan Zika chu kawngkaah a lo dak lut hlawl mai a.zan pawh mu mumal mang lova hah tak a lo kal ani bawk a.a pawr chap mai a.Lal Dokulha chuan "E khai Zika lah ni rengin ,lo lut rawh .lo lut rawh khai..thu pawimawh tak ilo keng a ni ngei ang maw..." a lo ti thuai thuai a,Zika pawh chuan thut hmunte a han rem fel a.Lal Dokulha vek chuan "Tlangaupa Hei kan Tlangval chhuanvawr Zika hi a lo kalna a hla tham dawn si a,hah zu han zukteh khai " a han ti leh a.Tlangaupa chuan seki khat lung zu a han thli a,Zika chu a lo pe vat a.Zika chuan tlemtea in hnu chuan midang chu a han leh ta thuai a,"E Lalpa zu nge nge a thlum ngei e,ka hahdam sawng sawng mai "a han ti a,Lal Dokulha chuan " Khai le,Zika i thu leh hla lo hawn chu zep awm hauh lovin han sawi ta che"a han tih chuan Zika chuan an thil va hmuh zawng zawng chu a han sawi chho ta par par a,an rin ai ralhoan lo hnaih a vang chuan an phawk ta hru hlawm mai a,Upa Zakhuma chuan "E khai ,kan lo muang sual tep a ni maw.rang tak a kan chet vat a ngai chu nia le," a lo ti vat a.Lal Dokulha pawh chuan "Tlangaupa rang takin Valupa ho leh Pasaltha awm ang ang kha han koh khawm vat teh" a lo ti zui nghal bawk a,Tlangaupa chu hmanhmawh takin a phe chhuak ta dawr dawr mai a.


Dopui Valupate leh Pasaltha ho chu Lalin lam panin an kal khawm ta zut zut mai a.tumah hnathawk chhuak vak an lo awm lem lova,chutia Valupa leh Pasaltha ho Lalin a koh khawm tak chuk chuk ah chuan Dopui mipui chu an phawklek kher mai a.indo a hnai tih hriain mitin mai chu an rilru a su dup dup mai a.Dopui khua chu a fan chhuak rang kher mai.in ring reng a awm anni hlawm bawk a.Tlangval ho pawh Lalin kawtah an lo ther huang huang tawh ,a hria piangin Lalin lam an rawn pan zel a vangin rei loteah Dopui Tlangval chu an kim ti tih der mai a.Thangate thian ho pawh Tuikhur kawng a hmeithai pakhat in anlo do that sak mek a.chu tia an lo buai laih laih lai chuan chanchin hriain rang takin Lalin lam chu an rawn pan ve vat a,Thanga chuan "A tha e.han hlen law law ila.hmabak tih tur tho tho chu,zo fel vat ila thawven thlak zawk ang" a ti thur thur mai a,a kut a hum sek run mai bawk a.Lalin Chhungah an lut tlang ve ta nghal a.

Lal Dokulha tual zawlah Dopui valrual chu Lalin Chhunga rorel nghakin an thu nghuk mai a.tlai rawngbawl hun mahni se nu tam tak chuan eirawng pawh bawl hleithei lovin Lalinah chuan eng thu tak rel ang maw tiin an beng an chhi hru vek mai a.hmeichhe naupang in kawibah leh mipa naupang inselem chan ho pawh in lamah an haw bo diak a.Dopui kawt lai chu thlertin mai a reh thiap mai a ni.Rei vak lo hnuah chuan Lal Dokulha chu lo chhuakin midang ho pawh chuan an rawn zui chhuak bawk a.Luhkapuiah chuan an ding thap mai a,Dopui Lal Dokulha chuan aw a han thian hrawk hrawk phawt a,Tlangval holah chuan engthu tak sawi maw tiin thawkna chang pawh hre mang lovin an lo ngai chang thap mai a.chu tah Lal Dokulha chuan"Dopui Tlangvalte u,tunah hian hmelma ho chuan min run tumin min rawn pan mek a"a han tih chuan Tlangval ho chu an thum huk mai a,Lal Dokulha chuan ahan zap dai leh te te a"Vanzau khaw Tlangvalte hmaah ah hian kan tlawm nawn tawh tur a ni lo.kan unaute leh pate tenawm tak a phatsan a that tu ,Dopui nu tam tak hmeithai a siamtu Vanzau khuate chungah zahngaihna lo lan tir hauh suh ang che u.Nangni hi Dopui khaw innghahna inni a Dopui khaw tan nunna thap a ral lo beiturin Kei leh ka Upate chuan kan beisei che u a ni.Dopui himna chu in kutah a awm e"a han tih chuan Dopui Tlangvalte chu an haw haw dur dur mai a.Chutah Valupa Khama lo ding chhuak ve thungin"Dopui Tlangval huaisen tak tak te u.kan lo ruahman tawh ang in Tlangval ral kai theih chin tawh phawt chu zan riak buhfai nen naktuk tukthuan eikhamah Lalmualah kal khawm vek tur a ni e,zaninah kan pasaltha Chhuana chu a mah chauhin ramhnuai pilril takah khawhar takin ral ho enthlain a thang mek a.Tlangval panga a mah va thlawp tur kan mamawh a tute nge lo chhuak dawn che u"a han tih chuan Dopui Tlangval ho chuan ban an phar ta suau mai a."E khai ,Dopui Tlangvalte u a va han thlamuan thlak tak em ,mahse in zavai inkal theih dawn loh a vangin a kal tur kan thlang mai dawn nia,Neuva hian va ho se la"tiin Neuva zui turin Tlangval ngal chak deuh pali chu a thlang chhuak zui nghal a.zanriah eikham ve leh Neuva leh midang ho chu a zan a zanin peih lo pawh sawi lovin phur leh tha tho tak niawm zawkin Chhuana thlawp tur chuan meichher chhiin an in zui chhuak ta dam dam a,Lal leh upa hote leh Valupa te chuan Lalin luhka tang an vai liam ta a.Valupa Khama chuan "Eng kim kan rel ang zel a,a kal theihnan nangni hi kan mit leh beng inni a,in kutah hian hnehna kan chan leh chan loh thui tak a in nghat a nia." tiin a chah mawlh mawlh bawk a.


Dopui Tlangval tukthuan eikhamah hmasa a piang chu an ralthuam neih that ber berte pai chhuakin kawtchhuah lamah an liam zut zut mai.an thi dawn nge dam dawn tih pawh hriat loh va an lawmpate kawtchhuah lam an liam zut zut mai chu nula ho chuan mittui nen an thlir liam vawng vawng mai a,Chhung khat nu ho lah in an fate kaihkuahin kawngkhar biang nghengin an pasalte an thlir liam vawng vawng bawk a.Nuzami pawh a fapa neih chhun Chhinga chu a chelh bet tlat mai a,a biangah mittui a luang zawih zawih mai a.Chhinga chuan "Ka nu lungngai mah ta che,ka pa thattute lu hawn chungin hlim takin ka lo haw dawn a lawm" a han tih chuan Nuzami chuan "Mama ka neih chhun liau liau i ni tawh a,i tel lo chuan engtin nge ka awm ang.chan che hi ka hlau em a ni" tiin a fapa chu a kuah ngawih ngawih mai a.a ni reng lah tak a.Ral kut tuarin a Pasal Zadenga leh afanu duat em em mi pawisawi ngai lo Chhuani a chan tawh a.Nunzami tan chuan a fapa neih chhun ralrama han thlah liam chu a har ve bawk a ni.a tawpah chuan Nuzami chu Pasaltha nupui diktak a nih nalo lang chhuakin a mittuite a hru hul a"Mi tenawm vanzau ho chu va that vek ang che .Mama i pa phuba chu zuk la ngei ang che,Thiante phat sana hnung tawlh a him ai chuan thian chhan thih ngam nih hi a ropui fe zawk tih hre bawk ang che," aw fiah thakin a ti ta chheu chheu mai le.Chhinga pawh chuan "Kha kha a ni Pasaltha huaisen Nupui tawng dan tur chu " tiin kawt chhuah lam a pan ve ta a. Dopui in tin deuh thawah he tiang hi a thleng a ni.an fapa te ralram a liam tur nu hoin an kuah ngawih ngawih hlawm a.mittui nen damin an in hmu leh ang em tih pawh hre lovin,Nu leh fa.Pa leh Nupui,Tlangvalte leh nulate mittui nenan in thlah a Dopui khua chu a ngui ruai mai le.




Nunmawiate unau pawh a nu leh pa upa tawh takte chuan an ngaihtuah hle mai a.Nunmawia u Tlangval phan chang deuh tawh leh Nunmawia nau rawlthar harh zet mai leh Nunmawia chu an thiam ang tawk tawk a.zilhin thu tha an lo fah ve mawlh mawlh a.Nunmawia pa chuan "Vanzau khua a in unaupa tlu lai kha ka mithla ah hian a cham reng mai a.zan tam tak ka mut theih loh phah thin a.Mawite nang phei chu Dopui Tlangval rahratte zing a chhiar tel i ni tawh a.I unaupa that tu leh ipa ramtui lei lova min siamtu Vanzau khuate lu chu va lain phuba chu rawn la ngei ang che u,dawizep tak a tlanchhe thin fapa ka duh hauh lo a nia" tiin a fapa te chu a chah mawlh mawlh a.Nunmawia chuan "Ka pa lungngai suh ka u nen a in phuba chu kan la ngei ang,Vanzau ho lakah hian pit dawr tia pawn ka tawlh hlek lawng e,Mipa leh Arhluisen chuan dam rei kan tum vak hleinem "tiin a pa chu a lo chhang vat a.an fate liamhnu chuan Nunmawia pa Zinga chu bai suih suih chungin khumpui chu panin khum tlangah chuan a thu a.Dopui tlangvalte Vanzau khua a thlamuang tak a an awm lai ,Vanzau khua te leh pawi ho in thurualin an rawn beih thut lai kha a mithlaah chiag takin nimin ang maiin a hmu thei a.kil tin tang silai lo puak zawt zawt leh Dopui Tlangvalte an thal tawp tawp lai te,Chutah a malpuiah silai mu in a rawn verh ve tak siah avangin engmah ti thei lovin a bawk sawp ta reng mai a.a fapa upa ber ral kut tuar a a tlu lai te kha chiang takin a hmu a va pui tum eng ang mahse a malpui ruh tliah a vangin che thei miau hek lo le.Dopui tlangvalte leh Vanzau tlangvalte chu an in bei nasa kher mai.Kha tih lai a Dopui pasaltha chhuanvawr chak leh huaisen ralbeih thiam em mai Chhinga pa Zadenga hma chu a kaw duak duak mai a.midang ho an tluk zawh phiar hnuah pawh Zadenga chuan a Chempui thisen kai zuih mai nen Ralho chu a sam pawp pawp mai a.tuman khan hek lo ral ho pawh an hek hauh hauh kher mai.A mah Zadenga tak pawh chu thisenin a khat vek tawh a.a taksa hmun hrang hrangah a kak dei duai hlawm mai.chutia Chhinga pa hmelma ho a hmachhawn lai mek chuan Silai alo puak ta thuai mai a.Zadenga tukkhumah tak ngen mu chuan verh in Dopui Pasaltha huaisen chu hnunglam a tang kah hlum a ni ta a ni.Nunmawia Pa Zinga a va hawi phei chuan Lalin luhka ah chuan Aithawma chu Silai khu vat vat kengin a lo ding vang a."Nunna a hek mai mai,khatia tih mai tur "a lo ti larh larh a.Nunmawia. pa thinrim lutuk chu " Zawng Aithawma mai mai chu "tia in seh ruh chung thoh mai an tum chu a lu a ri bur ani khaw hre lovin a awm zui ta a ni.a thi emaw tiin midang ho rualin dai pawnah an paih tel a.mahse vanneih tlak takin Dopui lam tlanchuak thei tlem te chuan thiante ruang hawn thei lo mah ila tiin an beng emaw an kut tang emaw tal a theih theih hi i hawn teh ang u ,tiin Vanzau hoin Dopui ho ruangan paih naah chuan an lo let leh hlauh mai a.Nunmawiapa lo la dam chu hmuin an zawn haw ta ani.Vanzau ho hian hemi ni hian Dopui lam hi an thah hnem em a vangin an lu an tan sak vek ta lo a ni.he inbeihna ah hian Chhingapa hian ral ho sawmnga chuang chu a thah ngei an ring a.Ral sawmnga chuang a thih chilh tiin Dopui lam chuan ngaisang takin Chhinga pa chanchin hi an sawi fo thin a ni.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 18th, 2017, 7:11 pm

DOPUI MIHRAT KHAWKHENGTE



BUNG 30-NA


(Ka story ziahve lo chhiar thin tute zawng in chungah ka lawm va lawm em.nangmahni vang chauhva he story hi kal zel thei a ni a.a tir a ka tum ang takin ka ziak chhuak zo lo erawh pawi ka ti,hmanlai mizo nun raltit zia leh hahthlak ziate,indona nghawng rapthlak zia te.mizo nunze mawi tak tlawmngaihna leh thian chhan thih ngam nunte leh hmanlai nun a tlangval ho pawimawhzia leh an lo hah ziate ,Pasaltha nun lo ropui zia(thih hlau hauh lova,an khua leh tui tan an hna thawh) Lal leh Upate pawimawhna leh Valupa ho dinhmun pawimawh ziate etc, kan hriat theihnan a changtuten thawnthu dangte ai hero fe a an chan chhuah turin he thawnthu hi duan a ni.(a changtute hi ka ti a tir a ka tum aiin ka ti hero ta lo zawk mah a)mahse a thu lairil hi ka ziak chhuak phalo hle mai.ngaihdamna nen min lo chhiar sak a ni ang chu.)



###
Thanga pawh rammu turin a in siam mawlh mawlh a.a nau rawlthar lian buang mai leh la a buang mai Sailianpuia pawh ral bang thei bik hek lo le.phur zetin a in siam ve mual mual a.Thanga chuan a nau chu a ngaihtuah deuh viau mai a.kal lo tur a han tih chi a nih chiah si lo va fimkhur turin a hrilh mawlh mawlh a.Valupa leh Rual u zawkte thu ngai chang ran a awm tur leh mi zingah tlawmngai lo bik nih tum lo turin a hrilh mawl mawlh a.Thanga nu Buangi leh a farnu te pahnih pawhin Saitea chu a vawikhat rammutna tur a ni si a,a ni a la a ropui sinen an ngaihtuah ngang mai a,in hmu tawh lo tur ang maiin mittui tla pur chungin an kuah vawng vawng hlawm a,Thanga nu chuan a thiam ang tawkin Thanga leh nau chu lo fuih ve mawlh mawlh bawk a,"Fapa raldo thei pahnih ngawt mai ka nei che u hi ka chhuang tak zet che u..i pa kha hre reng ula.Rallu khai lo chuan Dopui khuaah hian lo let suh ang che u.''huaisen tak a ral bei tur a fuih chungin a fapate chu a thlah liam a.



Dopui khua chu an hmelma lianber Dopui khaw zahve dawn hmeithai a siam tu Vanzau khua hma chhawn tur anni bawk a.a khaw pumin an tang teuh hlawm mai ,Nute chuan an fapate chu an pate phuba la a.rallu nen lo haw turin an chah mawlh mawlh hlawm a,Thian chhan thih ngam thin lung pu a tlawm ai chuan tang ralraih tura fuihin an tlah liam hlawm a,Dopui Tlangval rual pawh an thinlung a thinrimna leh phuba lak duhna pai reng anni hlawm bawk a,tlawm hni hne ai chuan tang ral raih mai ang aw tih thinlung puin an ralthuamte an zut hauh hauh hlawm mai a.hlauh nei lo phuba lak chak a tui hal Dopui mihrat khawkhengte chu dang zo awm tak maw.



Kawtchhuahah chuan Dopui Tlangval rammu tur chu an thu ther fuk mai a,Lal leh Upate meuh pawh an pasaltha rammute thlah turin kawtchhuah an rawn chuang chhuak ve a,Lal Dokulha chuan a pasalthate chu huaisen tak a bei tur leh rallu tam tak nen bawhhla chham chung a lo haw turin duhsakna a hlan mawlh mawlh a,Chutah Valupa Khama lo ding chhuakin ring fiak thakin"Mi tenawm phatsan ching Vanzau khuate chu kan bu zawl min luah chhuah tumin an rawn thawk mek a ni a.vawiin ni ah dawizep thih hlau tan hmun a awm lo. ral hma zam tur leh tlan chhe hni hne tur kha chu ,inher ula in kir leh thei ang"a ti rum ta al mai le.Dopui Tlangval rual chu tumah an che lo va,"A tha e,tumah in phat san lovin thih leh ruam khat ah dam leh tlang khatah,Vanzau khaw tlangvalte hmaah tin ther tia pawhin kan tawlh hlek tur a ni lo.tlawm ai chuan kan tang ralraih mai tur lah ni.Dopui tlangval zam ngai lo kan ni lawm ni.ti rawh u le,Vanzau mi dawizep ho chu i va chil darh vek ang u hmiang "tiin Van lam hawi in a Silai an kap alh zuai mai a,Dopui Tlangval ho chuan " Dopui ,Dopui"tia au rual hulh hulh chungin an Silai chu an lawn ta ulh ulh mai a,an thawm chuan kawtchhuah tlang chu a nghawr dur dur thei hial a ni.rei tak Vanzau khaw huatna lo pai tawh Dopui Tlangval rual thaza tak takte thinurna meipui alh hlup hlup chu do zo awm tak maw.



Chhinga pawh nizan lam a Zorinpuii vaihlo tui bawk chu a vaibelah beng in an tan khu luih luih mai a,Nunmawia chuan a rawn nuih var var pahin "Khaw maw Zorinpuii vaihlo tui chu ka lo beng teh ang ,ka beng tawpna pawh a ni mai thei sin " a rawn ti a,Chhinga chuan a vaihlo chu beng tir pahin "Kan dam ang a,i la beng lo dawn a lawm,Thianpa .Dopui tlangval chhuanvawr i ni lawm ni.i zam ta deuh a kan hriat chu le" a han ti a.Nunmawia chuan "Zam teh suh ei.Mipa leh Arhluisente chuan dam rei kan tum vak hleinem.Thiante thlawp zo lo zawng ka ni bik lul lo vang" a lo ti chhak chhak a,Chhinga chuan "Tun lai chu kha tawng kam kha i chawi lar riau mai." tiin a nui sak a,Nunmawia pawh a lo nui hak hak a.Chhinga chuan a thianpa Nunmawia mitmeng alh phat mai chu a en vang vang a.ngaih that lohna riau a nei tlat mai leh nghal a.a thianpa Nunmawia mizia chu hriatthiam theih chiah si loh hian dang lam riau a hriat na a nei a.mahse engmah phei chu a sawi chhuak lem lo va.Chutih lai chuan Thanga chuan rawn pan pheiin "Ti ru le,Zawng ho i va vaw darh vek ang u hmiang,ka tha a za zek zek tawh a nia" a rawn ti thur thur mai a,Chhinga leh Nunmawia pawh chuan "Khai aw, Dopui Tlangval zam ngai lo ,i han che tak tak ang hmiang" tiin an han tho chhuak a,Dopui Tlangval zahnih nufa zet chu Vanzau khaw lam panin an liam ta duah duah mai a. an mahni let thum dawn a tam hmachhawn tur mah nise an thinlungah hlauh nain hmun a chang reng reng lo va,hmelma ho chu hmachhawn an chak zek zek tawh zawk a ni.

Dopui khua a tang chawhma zet an kal hnu chuan kawng pangai tang pengin kawng a tang finghnih zet turah hmun biru tak mai kham chhawr dawh hnuai phul hmun zawl riahbuk sualna rem chang tak mai a lo awm a,an piah maiah tui fim tak a luang ri hawk hawk bawk a,he lai hmun hi hmelhma hual beh nan emaw awm hmun khuar nan tha fahran mai a ni a,a chhak lam lah kham pang awih chhawrdawh chho ut mai ni a,hmar lamah kawr awmin tui lakna rem chang tak a ni a ,kawr ral leh lam hi ram chhengchhe tak mihring tan kal theih loh khawp a awih a ni a.Thlang lam zawl tawp lah kham a lo ni leh si a,kal khan pakhat chiah a awm a,chu chu chhim lam a tang luh phei a ni.he lai zawl hi di hmun niin furah chuan Di a hring dup mai thin a,Dopui ho in chung tur Di an lakna hmun ber a ni a,Thalah thung chuan an Di sah bangte pawh lo ro vin he lai hmun hi a fai vuk mai thin a ni.phul hmun tawpah mau hmun zimte a awm kual den den a mau kungah te chuan hruiduk an zam kur lek luk mai bawk a. An val upa ten khua tang hnaite helai hmun a an riahpui chhan chu hre se su lo mahse Tlangval ho chuan zawh buai an tum lem lova.Valupaten hna chanpual an sem zung zung a.mahni chanpual theuh thawkin an che nghal zung zung hlawm a,Di rote hai faiin a thenin Riahbuk an lo rel nghal mawlh mawlh a,Pasaltha kut hmui deuh ho Riahbuk sa zawngin Silai nen an vak chhuak sang sang a,hruizik eng ilo lo vai khawm turin patling deuh sawmhnih rual an liam bawk a,Riahbuk chu dung sei pui pui in an sa thluah mai a,Riahbuk pahnih chu in hma tawn zelin an sa a.chu riahbuk pahnih a awmte chu pawl khat zel niin eirawng an in bawl hran zel dawn a ni.riahbuk pahnih lai takah chu meipui chhehnan an buatsaih bawk a.Thingro fawm pawlin thingro an rawn keuh zut zut reng bawk a,Fanghmir ang maiin tumah intirh ngai lo vin an hna chanpual theuh thawkin an phe buai sang sang mai a ni.




Vanzau lam pawh Dopui tang nikhat kal vel lek Nghazam lui ah an rawn in chhawp hnai ta rup mai a.Nghazam lui kam hmun zawl lai chu sam faiin riahbuk an rel zui nghal mawlh mawlh a.Dopui khaw hnai lutuk a riahbuk sual lo vin ,he lai hmun a awm hmun khuar phawt an tum a ni.Valupa Zuahliana chuan "he lai hmunah zan kan riak ang a.kawngthui tak kal tawh kan nih a vangin naktuk kan chawl hahdam ang a.naktuk zanah Dopui khua chu panin zingkhaw var rual a khaw chhug lutin Dopui khua mipa awm zawng zawng chu thah mang barh tur an khua pawh luahzui tlak loh turin kan haldarh vek tur a ni.a tam thei ang salah kan man ang a.Kan Lalpa Thawmliana thupek ang in Silai man a piangin in nei zel thei ang,rohlu leh thil dang erawh Lal leh Upate thu angin sem tur a ni thung" a han tih chuan Tlangval ho chu an phur khawp mai a,Silai nei ve lo ho pawhin Silai man ngei tumin an rilru an siam sauh sauh va.Valupate chuan Naktuk tukthuan eikham a chhuak a Dopui lo va thli thlai hmasa turin Pasaltha Zaluta leh Tlangval pathum chu an ruat nghal bawk a,an mahni enthla a an ral rel engkim hre tu an awm ang tih reng an ring pha hauh lo va.



Chhuana leh a naute chuan Vanzau khaw ho chu a him chin a tang an lo thli thlai reng a ,an ralrel engkim an lo hre phak vek a.Chhuana chuan "Hei le naute u,Vanzau ho ruahmanna chu kha ti kha a ni a,zanin la la hian kan valupate hnenah thu kan thlen a ngai dawn a ni a,tute nge kal dawn che u." a han tih chuan an zavai chuan kal an in huam theuh mai a.Chhuana chuan "A nih chuan Neuva , Rova nen hian in va tlawmngai mai dawn em ni ang" a han ti leh a,Neuva leh Rova chuan "E,Teh reng mai " tiin phur tak ni zawk awm takin an liam zui ta nghal a.



Dopui ho riahbuk sualna leh Vanzau ho inkulhna hi a in hlat lutuk lem lo.zanlai pelh hret ah Neuvate chuan Dopui riahbuk chu thleng in ral anni lo tih hriattir nan chhimbuk hramin Neuva chu a han hram dut dut a.Ralveng ho chuan an lo chhawn thuai a.Neuvate thu thlen an han hriat chuan Dopui lam pawh an ruahman lawk ang chiahin an kal thei dawn a in hriain Valupa ho pawh an nui var var mai a.



Vanzau Pasaltha Zaluta leh a naute chu Vartianah riahbuk chhuah sanin Dopui lam an pan ta a,an awmna hi Dopui khaw ram a nih tawh a vangin fimkhur takin thawm chhuah lo thei ang berin an in zui dam dam mai a.Tlangval pakhat chuan "U Zalut Dopui hi kan hneh tak tak i ring maw.hman deuh khan Khawthum tang rual pawn an do hneh lo kha a nia,an pasaltha ho ralhrat zia mawlh an sawi hlawm si a,a vawtuin ek a cheh tih ang chauh kan ni ang tih pawh kei zawng ka hlauh hlel love" tiin ngaih tha vak lo chuan Zaluta chu a han zawt a.Zaluta chuan "kha mi tumte chuan Ramri lui ah Dopui lam khan an lo lambun a nih kha,Kei ni zawngin Dopui uihum lek chu an in ring lo lai kan hup thut dawn a ni a,han tang tur an awm chai lo vang e,an mi chak Thangtalhtuma an tih ve lah kha Pasaltha Vawmthianga lakah te zawng naute pianghlim ang chauh a ni ang chu"a han ti larh larh a,Tlangval pakhat chuan " Thangtalhtuma an tih kha a chak viau niin an sawi a sin ,Pasaltha Vawmthianga meuh tan pawh a beih tham ve viau ka ring sin "a lo ve thuai a.Zaluta chuan"Vawmthianga em zawng tu han hneh rual a ni law.Kan Lal Sechal meuh pawh a bin thal thak thak mai zawng a nih kha"tiin Vawmthianga chak zia chu a han sawi a.Vanzau ho chuan Vawmthianga meuh chu hneh theih turah pawh an ngai meuh lo chu a ni e.



Chutia an ti ti barh barh lai chuan Pasaltha Zaluta mit var zet mai chuan kawng sir hnim lo pe deuh chu a hmu ta tlat mai a,an han enchian chuan mitam tak kalna hnu a ni tih an hre thei mai a,Pasaltha Zaluta chuan"in hnu chu thup in tum hle mai maw,Mahse khawkhat hnu chhui thiam Zaluta lak ah meuh zawng in thup thiam tawk lo a ni e"a ti bul bul a,Chu hnu chu thup tum viau mahse Pasaltha Zaluta tan chuan chhui har a ni hauh lo mai le.hmanhmawh hauh lovin an chhui zel a.Lo fingkhat awm zet an chhui hnuah phei chuan an hnuchhui chu chhui a awl ta kher mai mitam tak kalna hnu tih hriat takin a pe hen hun an mai a.rei vak lo an chhui leh hnu chuan an hmazawn chu a lo eng ta uar mai a.fimkhur takin hnim karah an han bih thla dak dak a,an hma ah chuan Di hmun zau ang reng tak lo awmin chu Di hmun kil hmar lamah chuan riahbuk a lo ding thluah mai a.Buk kawt velah chuan Tlangval rual an thu nghuk mai bawk a.eng emaw an lo sawi khawm mek niin a lang .Pasaltha Zaluta chuan ramvak satliah mai mai anni lo tih a hrethiam mai a,Dopui run tum khaw dang an awm ve a nih a ring ta ber a,chutih lai chuan Chhimbuk a lo hram ta dut dut mai a.Riahbuk kawt ah chuan an Valupa niawm tak hi a lo ding chhuak a,"Zanin chu hetah kan riak ang a,Naktuk tukthuan eikhamah Vanzau khua panin kan chhuak leh ang a.Vanzau khua chu in pakhat mah zuah lovin kan hal darh vek tur a ni.Dopui Tlangval kan zam ngai lo"a han ti thak thak a,Tlangval ho chu an lo haw haw thum hluah hluah mai a,An valupa thusawi chu a ring thawkhat bawk a,Pasaltha Zaluta te pawh chuan chiang takin an hre thei vek a,Zaluta chuan muangchangin a naute chu a tawlh kir pui leh ta a.

A him chin deuh vah chuan Zaluta chu a ding chat a,"Naute u,Dopui khua enthlak zui zel hi tulin ka hre ta love,Dopui khaw ho chu min run tumin an lo thawk chhuak ve mek a ni a,a rang lamin let leh ila tha ang ,heng lai vel a kan awm rei zawngin min rawn hmu reu reu ang e"tiin a hote chu a let pui ta a.he tih lai hian ni chu chawhnu her bawih chauh a la ni a,Pasaltha Zaluta chuan Dopui ho chu engvang a hma tak a riahbuk sual mai nge annih a chhut lem lo ve,Chhut chiang se zawng ngaih that lohna tur a hmu ngei ang le.hmah hmawh tak a let leh an nih a vangin zanriah an nang hman lo vel chiah chiah a.Buk an han let leh chu mak an lo ti hlawm hle mai a,chanchin an lo zawt nak nak hlawm a,Zaluta chuan "nakin ah kan sawi dawn nia " tiin a sawi tha duh mai lo va.thawk tha intih hmelfein a hawi larh larh mai a,Chutih lai mek chuan Valupa Zuahliana chu bukah a lo lut ve chiah a,"Luta engti zia lo let mai nge maw in nih le,hmeichhia ang maiin in rawn tlan chhe haw chu ni em lo maw"a rawn ti lut nghal bawrh bawrh a.Zaluta chuan "Ni lul lo ve ,ro kan rel that a ngai dawn a ni,kan kal chauh nen ril a tam viau tawh mai a,zanriah eikham lamah kan sawi ho dawn em ni" a lo tih tak ah chuan Pasaltha hmingchhal thei ve meuh a ni bawk si a,Valupa Zuahliana pawh chuan a hnial zui ta lem lova.Chhuah pahin "Ka riah bukah kan rel ho dawn nia" a ti a a chhuak zui ta nghal a.


Valupa Zuahliana riahbukah chuan Vanzau Valupate leh pasaltha ho chu an thu taih hlawm a,Zaluta chuan an thil hmuh leh hriatte chu a han sawi zung zung a,a tlip nan"Naktuk zing vartianah va hup hmak ila,kan mang phiar theih ka ring"a han ti zui a.Valupa Zuahliana chuan "An va ngam zawk ve,min runte an lo tum ve khang lan chu ,Tlangval ho kha in siam turin hrilh ula Dopui ho chu i va chimih barh teh ang u.a khawte zawkin chuti tak a min han tham loh chu le"tiin thinrim zetin a in hrosa tun tun mai a.a thin so bulh chuan a thluak a ti nu tlat a,a ngaihtuahna a thui lua lo tlat.Chapo na hian mihringte hi a tak a chet tirin an dai sual fo reng a ni.Pasaltha pakhat Pachunga chuan Dopui ho chet dan chu mak tih deuh na neih tlat a vangin ngaih that lohna tak a nei a,kawng thui tak kal tur la nei si,chhun lai deuh thaw a riahbuk an sual nghal ngawtte chu ngaihtuah chian chuan a mak reng lah tak a, han sawi chhuak mahse midang ho chu thinrim takin an inhrosa tun tun hlawm si a,awmzia a awmin a ring lem lo bawk a,sawi loh vah a tlak ta a ni.Vawmthianga pawh riahbuk chhunga in siam mawlh mawlh pah in " In za nufa lekin in zanga nufa ka run dawn ek e bal e lo tih ve khang lan ,zah theih loh thlak lutuk,Khawnge ni i han vaw darh vek ang aw"tiin a in hrosa nasa mai a,a thaza chu pawnah chhuakin a Talhtumlian zet mai chuan lei a vaw thum ta dup dup mai ,a bul vel a tlangval lo awm ho lahin fuih pawrh pahin an lo haw haw dur dur mai a,a boruak chu a so in a so bulh bulh a ni ber e.



Thla chu Vanlai zawlah khawhar awm takin a eng ut mai a.Zan thla eng hnuaiah chuan Dopui ho riah buk leh Di hmun zawl chu a lang chiang ngang mai a.Di hmun zawl Thla engin a chhun eng ruih mai chu a mawi phian mai a.Thli thaw chuan Di hnah rote chu a chhem ri sang sang mai a.lungleng mitan chuan lung thlak viau ta ve ang.Dopui Tlangval ho chu an riahbukah an mu bo zo nge an reh thap mai a.an meipui chheh chu a then a la alh teng teng a.Thla chu kawlah her liamin ram hnuai chu a thim ta deuh ruih mai a zing khawvar a hnai tawh a.chulai Dihmun zawlah chuan Vanzau Pasaltha ho chu thawmdim takin an lo lut zut zut mai a.khawvar hma chuan Dopui ho riahbuk chu an hual ta thup mai a.Silai fung zahnih nufa chuan Dopui ho riahbuk chu a tin ta thup mai le.Dopui ho lah chu ralveng tak ngial pawh indah lovin an reh thiap mai si a.Vanzau hoin an riahbuk hre chhuakin an rawn beih mai an ring lo ni ngei tur a ni.an mu reh thiap mai a.an meipui chheh la thi chiah lo chu thlithaw chuan a chhem ling leh vawt vawt thin a.a chang leh a rawn alh leh hlap hlap thin a.Dopui valrualte u har rawh u.


Khawfing a chat ta maw tih ah chuan Vanzau Valupa Zuahliana chuan ring tak a au in "Dopui Tlangvalte u tho rawh ule" tiin lungtum lian leng lawng chuan Dopui riah buk pakhat chu an vawm thum dawp mai a.Chutah le.Silai fung zahnih dawn mai chu a puak ta ulh ulh mai a.silai mu chuan Dopui ho riahbuk chu a deng ri sawt sawt mai a.Silai mu chu ruah ang maiin Dopui ho buk lamah chuan a sur ta chur chur mai a.Vanzau ho rin ang ngawt a ni ta hauh lo mai le.Dopui riahbukah natuar teri leh mangang aurawl a ri chuah chuah ang chu an tih laiin a reh ta thiap mai si a.an mak ti chu Silai mu thun leh mai nachang pawh hre loin an hawi hru hru hlawm mai a.chutah chu lai vel khawk rum rum khawp a ring nui ri a lo chhuak ta uar uar mai a.Vanzau ho chu an hawi hu hu tawh mai a.Kawl a eng uau uau tawh a.leilung pawh a lang fiah tan ta.Chutah an hnung lam a tang chuan "He ta hi kan awm e" tiin Dopui thlangval ho chu an rawn au va.Vanzau ho in her rem hma chuan Silai a rawn puak ta zawt zawt mai a.Vanzau ho chu an thal nghal tawp tawp hlawm mai a.Chu Di hmun zawl chu Silai puak ri leh natuar te riin a khat zota .vanzau ho chuan tanhmun siamin han kap let ve viau mahse an tan hmun a in that hleih em a vangin awmzia a nei teh chiam lo va.Dopui ho silai mu lah in a rawn deng lir tawl tawl hlawm mai si a.Vanzau ho chu an talbuai tan ta kher mai.kham chhawrdawh lamah Silai mu a lo kal ve loh a vangin chu lam pan chuan Vanzau ho chu an tawlh hret hret zel a.Dopui ho pawhin an hual hnai hret hret zel a.Dopui lam pawhin Vanzau ho kut tam na na na chu an tuar ve nual tho mai a.Tunah chuan khua a eng chiang ta tak zet a ,Vanzau ho chu an chan a chhiat em a vangin Valupa hoin han fuih tuar tuar mahse an tawlh zel lo thei lo va.



Vanzau ho chu hmun him lam niah ngaiin kham ko lamah chuan an tawlh hnai zel a,kham lungbang hnuai mau hmun zau vak lo awmah chuan an tawlh lut bo zo ta a.he lai mau hmun hnuai hi thang leh luang hmun a ni a,a pik viau mai a,chu lai phul pik hmun beh chhan in Vanzau ho chuan an rawn kap let ve thuai thuai a ,a kawtawp a tang anni bawk a an deh a khirh phian mai a.hek hauh hauh viau mah se Dopui ho let deuh thaw a tam an la ni fo tho mai.chutah le.An duhna hmun takah an hual lut ta bawk a,Valupa khama chuan tlangval chu thu a han pe a,Dopui lam chuan Di hnah ro chu an han hal ta mai a le.chu lai Di hmun zawl zing thlifimin a chawm tha bawk a,Di ro chu a kang chho ta duai duai mai a.Vanzau ho tawmkhawmna chu meikhu chuan a tuam chho tan mup mup mai le.Vanzau ho chu meikhu hakin an khuh bawrh bawrh hlawm mai a,rawn zuang chhuak thin mahse Dopui tlangvalte chuan a rawn zuang chhuak hmasa sa chu an lo kap let nghal tawl tawl zel mai si a,Vanzau ho chu an buai ta kher mai thih duh lo tan chuan inpek mai loh chu tih tur a vang ta kher mai.an mahni ai tlemfe kut a in pek lah Valupa hoin an tlawmla tum hrang si a,inpek ai chuan tan ralraih thlangin Valupa Zuahliana chuan "Khai le,naute u.he lai hmun kan tawm reng chuan he lai tul pik ah hian kan kang hlum tho tho dawn a,Vanzau tlangval zam ngai lo kan ni lawm ni .hmelma ho chu a tawp thlengin i han bei ang u hmiang"tiin han au tuar tuar a,Vawmthianga pawh chuan aw rawl tial ruan leh ring zet "Ni leh thla kar a leng Vanzau Tlangvalte Zam reng reng suh u,Sa leh Ral a tlan ngai lo Suakthanga fapa Vawmthianga ka ni ngai e"tiin a hming chhalin Vanzau Tlangval ho chu a han au phur a an haw haw ta dur dur mai a.



Dopui lam pawh chuan in ring takin an lo chang rang mai a.Valupa Khama chuan a naute chu fuih tuar tuarin "Zawng ho saw kah hlum vek tur ,Dopui Val kan zam ngai lo"tiin a au tuar tuar mai bawk a.Pasaltha Kawlha leh Pasaltha Kapkiman an naute an lo fuih ve tuar tuar bawk nen.Silai keng ho hnungah Thangate ho chu Valupa Vunga hoin in pawm chilh inpeih ranin an lo ding nghuk mai bawk a.Thanga chu a hmasa berah dingin a talhtumlian em em mai chu a lek kawh vuah mai a.indo a piang a a awm dan thin angin a tha chu a za zek zek mai a.Vanzau ho thluak bur vuak darh chuai chuai chakin a kut zung tangte chu an za zek zek mai a ni.


Chutah le,Vanzau tlangval ho chu chulai hmun a an tawm reng chuan an thi dawn tho tho tih in hriain meikhu karah an rawn zuang chhuak ta sup sup mai a,Dopui lam tan pawh kah hlum sen ni hek lo.an Silai te dahin an hanin pawm chilh ta tak tak mai a,Thisen per chuai chuai karah natuar te ri nen an in sat ri ta sawk sawk mai a.Chhinga chuan Pasaltha Vawmthianga chu a thlur bing nghal chat mai a.Midang buaipui hman lo lekin a chhaih buai ngat ngat mai a,pawm chilh duh si lo vin Vawmthianga vuak phak loh tur a inveng ran chungin a chhaih tak tak mai chu Vawmthianga thin a rim kher mai han vuak fuh ngial tum mahse Chhinga chu rang tak takin a lo per sawn zung zung zel si a,a vaw fuh thei der mai silo.Thanga ve thung chu a duh tawkin an sapa tal tak tak mai a,a thinlung zawng zawng a a huat vanzau ho a han vaw darh chuai chuai mai chu hmuhnawm tham tak a ni .a hmazawn chu a kaw duak duak mai a,thisen leh thluak a per chuai chuai mai a,a vuak fuh tawh chu vuak nawn an ngai lo kher mai ,an hlawm tawp tawp mai a,Sir leh lamah Rohawka leh Pasaltha Kapkima hoin an rawn vai eng duak duak mai bawk a,



Vanzau lam pawh Pasaltha ralhrat tak tak an ngah bawk an zam mai hauh lo mai Valupa leh Pasalthate chuan an naute chu fuih tuar tuar chungin tan an la ve sauh sauh va.Dopui pasaltha Kawlha leh Vanzau pasaltha Rualzakapa chu an han in tawng fuh ta chat mai le,thiam thil chitin nen an han in bei tak tak mai a,a tawpah chuan Pasaltha Kawlha chuan Rualzakapa lu chu a sat hrang ta nawlh mai a,mahse Pasaltha Kawlha pawn hliampui a tuar ve hman tlat mai.a ril tla hnuang chu dawmin a thingthi hnawk a,Dopui Pasaltha Kawlha chu a tlu ve ta.a khua leh tui chhan nan a nunna hlu tak chu a hlan ta a ni.Valupa Khama meuh pawh ral kutah a tlu ta.Rohawka chuan Valupa Khama tlu chu hmuin a hma awm te chu vai kaw duak duakin a va pan phei a mahse Valupa Khama chu a chhan hman ta lo.Hnung lam a tang a Valupa Khama chhun tlu tu Vanzau Pasaltha Zaluta chu Rohawka chuan thlur bing nghal chat in dim lo bak sakin a lu hek hawk khawpin an sat thuai mai a,Chuta Rohawka han tal tak tak mai chu rapthlak tham tak a ni.Vanzau lam hruaitu ber Valupa Zuahliana pawh chu Thanga kut tuar lovin a tlu ve ta a,Vanzau lam chu an chan a chau tan ta.an hruaitu ber a tluk tak miau ah chuan an zam tan ta a,An pasaltha chhuanvawr an in nghahna ber Vawmthianga lah chu Dopui lamin fing tak maiin midang buaipui hman lo lekin Chhinga an chhaih buai tir bawk si a.Vanzau lam chu a dawizep zual tlem a zawng an thiante in beih buai lai a lo relh ru tih loh chu an tlu deuh vek tawh a.Vawmthianga leh Chhinga pawh an lo lain thlur ngat ngat mai a.Vanzau lam kil khat a sawmhnih rual lek lo la tang ve fat fat chu Thanga leh Rohawka chuan rei lo te chhungin an ching fel thuai a.mipa thum chu ban pharin kil khat ah an ding khur hlawk hlawk a ,chu em zawng kut an thlak ta em lo va.



Chhinga leh Vawmthianga erawh chu an lo la in veh theuh theuh mai a.Thanga chu Valupa Khama ruang bulah chuan dingin a ngawi vang vang mai a,a thinlung chhungril chu thinrim na namen lovin a so bulh bulh mai a,Kawng engkima an thian ho lo kai hruai thin tu Valupa Khama a han tlu ta mai chu a hrethiam lo kher mai .chu tah a in her vut a,Chhinga leh Vawmthianga lo in veh theuh theuhna lam chu panin midang hoin an lo hual tuau tuau chu a keu kaw duak duak a,Chhinga chu nam per dawr in "Pialral thleng rawkin kan vaw teh ang che" tiin Vawmthianga chu a pan ta chher chher mai a,A mit meng chu a rap thlak kher mai a,A rilru a fim lo tih hriat takin a mitmeng chu a ,a ruai mai a.Rang zet a Vawmthianga chu bawh chilh in a Taltumlian zet chuan an chhip thlak nghek mai a,Vawmthianga chu a lo in ven hman deuh a vangin Thanga chuan a duh a angin a vaw fuh hman lo va,Vawmthianga chu a pai chawn chawn tho mai a,a in siam rem leh hma chuan Thanga chuan bawh zuiin a tukkumah tak chuan luruh darh chuai khawpin a vaw nghek mai a.thinrimna nen tha zawng zawng seng a vua a ni bawk a,Vawmthianga lu chu a darh hneh kher mai.

Chutih lai tak chuan Nunmawia chuan Thanga chu a rawn zuan thut mai a,Thanga meuh pawh a pai chawn chawn mai a,Nunmawian Thanga a zuan rual chiah chuan Silai a rawn puak thuai mai a,Nunmawia chu a tla hlawm tawp mai a,Silai rikna lam an han en chuan zawl tawpah mipa khat Silai keng hi a lo ding tau mai a,Dopui Tlangval then khat chuan rang takin chupa lam pan chuan an tlan nghal vat a,chupa pawh chu rang takin mau hmunah lutin a pilbo zui ta thuai a.Nunmawia chuan Chu pa in Thanga kah tum a Silai a lo tin mek chu hmuin Thanga nun chhan nan Thanga chu nek sawn tumin a zuan ta zawk mai a lo ni a.Thanga chu him mahse a ni chuan Silai mu chu dawng ve ta thung a ni.

Thanga chu rang lutukin Nunmawia bulah chuan a rawn thingthi rawp a.Chhinga pawh chu kawlphe tluk zet a rangin Nunmawia bulah chuan a lo zuang phei zawk a.Chhinga chuan Nunmawia lu chu dawmin a malpui chungah a han chawi a,Nunmawia awm silai mu luhna a tang chuan thisen tharlam tak hi a lo chhuak zaih zaih a.Chhinga chuan "Thianpa Tang fan fan rawh aw" tah aw teuh chuan a han ti a.Thanga pawh chuan"Ka nun chhan nan kha thil kha i ti a maw. Mi mawlpa "lung chhiat hmel zetin a lo ti ve bawk a,Nunmawia chu harsa takin a han thaw hrawk a,a han nui sak a"mipa leh Arhluisen chuan dam rei kan tum vak hleinem" a han ti sap a.chutah Thanga chu en in "Thianpa vawi tam tih nawn ngai pawh nise i nun chhan nan chuan ka ti leh zel ang ,I nau Saia kha ka hum thei ta si lo nang tal ka hum che ngai lawm.pialralah ka lo nghak ang che u..min ...min...kap tu ....kha...in rawn ...." tiin a zawi hnawk a chat thla ta a.Thian chhan thih ngam Dopui mihrat khawkheng Nunmawia chuan mual a liam ta.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)