KHUAVELTHANGI BY LP Khiangte Ekklesiastes 1 - 36 #On Going

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: KHUAVELTHANGI BY LP Khiangte Ekklesiastes

Unread post by Ngaia » November 7th, 2017, 9:37 pm

KHUAVELTHANGI Bung 13
Atukah chuan hma takah thoin an kal lehnghal a, pasaltha tha chak an nibawka an kal chak kher mai nen Lungkoh khaw kawtchhuah an thlen chuan ni pawh a la sang angreng hle a, lungdawhah chuan thu chawlin vaibel an zu leh tete a, "Thiana, an khaw nula chhe lo ber a mi kan rim ang"Saingura chuan a Hrangkhuma fiampah chuan a ti vel a.
" a nih mai loh ten, an khaw chhuanvawr kan hawn ang chu" Hrangkhuma chuan thutak hmel fe chuan a lo ti a.
"I hmel ka en vang vang hian khaw chhuanvawr chu sawi loh a vantlang pawl pawh kan rim tlu lo ange" Saingura chuan khi then thaw chuan a rawn ti a.
Hrangkhuma chuan a thianpa chuan a fiam tih hre mahse, intit thinrim der velin, "ve mai mai che hian, i hmel ai fe chuan ka hmel a tha zawk" a ti let ve a.
Chutia an thianduna an lo infiam bawrh bawrh lai chuan naupang sava rah tlan chang ho an rawn haw sap sapa. An rawn rak chho nak nak hlawm bawk a.
"Kan pasalthate chu inhlawhtling em" tihpahin Hrangkhuma chuan a lo chhawn chhaih a.
Lungdawha an hmelhriat ngai loh leh mikhual niawm tak silai nena lo thu an hmuh chuan naupang ho chu an ngawi thapa, ral an nih an hlau deuh a niang, tawng nachang pawh hre lo chuan an ding ngawi thap a.
"Ekhai min hlau emni, hlauh tur kan ni love, Pu.Zaluta in min kawhhmuh thei angem" naupang hovin an hlau tih a hriat chuan Hrangkhuma chuan a ti leh thuai a.
"Ka pa ania, keiman ka hruai ang che u" an zinga naupang pakhat chuan a rawn ti thuai a. A ni hi Hrangkhuma putea Zaluta fate zinga a tlumber a ni.
"Anih chuan thianpa hei i unaupa a nih reng hi, tiru i kal ang ule" tihpah chuan Saingura chu a tho tharh a.
"A nimaw, vala lo kal teh, kei hi i pa te unau zinga upa ber fapa ka nia, i u tur ka nih chu" tihpahin Hrangkhuma chuan a nau lu chu a tuai hlerh hlerh a.
"Buarpui khua a mi ka u kha maw, apa hian i chanchin min hrilh thin a." Tihpahin naupangte chuan hma a hruaia, khaw thlen hma chuan an titi thla bawrh bawrh a, Saingura leh Hrangkhuma chuan a naupan ang aia a kawm tlak phian avang chuan an lawm ru hle nghe nghe a.
Zalutate in chu an thlenga, "apa hei mikhual kan nei e, Buarpui a mi ka u i sawi thin kha a lo kal" tihpahin naupangte chu a tlanlut thuai a.
Hrangkhuma leh Saingura'n inchhung an luh rual chuan Zaluta chu a rawn ding thuai a, an inchibai sap sap a, "ekhai Hrangtea lah nirengin, i rawn kal duh tak tak ka lo rin loh nen, i rawn kal chu ka va lawm tehlul em" tihpah chuan Hrangkhuma chu a en a.
Hrangkhuma pawn a putea te khua a thleng thei chu a lawmthu leh kal a chakna a rei tawh thu sawiin a phul hlut a.
Zaluta chuan Saingura chu an en chianga, " e...hei i thianpa chu inrawn luh tirh khan ka lo en liam puat a, lalfapa Saingura lah nireng che in, ka lo hre mai lo che a min ngaidam dawn nia," tihpah chuan thupha a chawi zung zung a.
"Pawi tireng reng suh ka pu, a theih phei chuan ka nihna hi inthup ka duh a, min zep pui zawk la ka lawm viau ang" tihpah chuan Saingura chuan inthup a duh chhante chu a sawi a.
Zaluta pawn nui kurh kurh chung chuan " a nih chu, ni e chutia ranngo zawn tum in nihpah bawk chuan inthup chu a ngai anih chu" a rawn ti ve a.
Zaluta hi Hrangkhuma nute unau zinga milai niin, fapa pahnih leh fanu pahnih bawk neiin, a fate zinga upa ber an mipa hi Hrangkhuma ai chuan kumthum vel laiin a naupang awm e, mahse tlangval pangai tia chhiar theih a ni tawh awm e. Hrangkhuma ten Zaluta te in an thlen lai hian Zaluta nupui leh fate pathum chu an feh an la haw lo a ni.
Saingura leh Hrangkhuma chu an insil thlandaia, chumi hnu chuan Zaluta nupui fanau te feh pawh an lo haw ve chiah a.
Zaluta fapa naupang ber khan kawtchhuah lamah a nute feh va hmuakin, an rawn haw kawngah chuan an mikhual neih chungchang chu a nu leh ute chu a rawn hrilh luam tawh a, anni pawh an rawn bo lutuk bik lo.
Saingura leh Hrangkhuma chuan an phurte chu an lo hlan thlak sak thuai a, chumi pah chuan Zaluta chuan a lo hmelhriat tir zung zung a, Saingura nihna erawh thupsakin Zuihtawia a ti veta a.
Zanriah eikham chuan Zaluta fapa tlangval Neihtea chuan "tiru zawlbuk va kai ang u hmiang, hmanni khan inkhua a mi inbuan chak deuh mai a rawn zin a, kan khaw buan chak pawn a hneh loh thelh asin" tihpah chuan Hrangkhuma leh Saingura chu zawlbuk lam panin a kalpui a.
"Mikhual bawhbel bawh liam inphal em" bawhbela bawh luh pah chuan Neihtea chuan a ti a.
Zawlbuka ah chuan tlangval ho pawh la lengchhuak lovin val upate zilhna leh fuihna ngaithlain an lo la awm thapa, "khawilam khual nge ni Neihte, mikhual in nei animaw?, rawn lut tawh u khai" Val upa chuan a lo tithuai a.
"Buarpui khua, ka pa u fapa uHrangkhuma leh uZuihtawia te an ni e, vawin khan an rawn thleng ve chiah a ni" Neihtea chuan a lo ti ve a. Hrangkhuma leh Saingura pawh bawhbel lamah chuan an thu ve a.
"Ekhai pasaltha Hrangkhuma maw ni che a, i hming leh in lalfapa pasaltha Saingura hmingte chu a te ber thleng pawn kan hria asin, tlangvalte khan meilum kha lo kian rawh u, hei khualtha tak kan nei anih hi" val upa chuan phul hlut pah leh ngaisang, zahder thiamtak chuan a lo ti vat a.
"Thu rawh u, thu rawh u, a vawt pawh kan ti hleinem, helai pawh hi a nuam lutuk e, chutia keini meuh minlo hre ve chu a chhe lam zawng bak nisuh, a tha lam zawng hmingthan pui tur kan nei der si lova" Hrangkhuma chuan inngaitlawm tak chuan a lo ti a.
Lungkoh Valupaten an mikhual pasalthate inngaihtlawmna leh chapo loh zia an hmuh chuan an tlangvalte chu hetiang nun hi neih tum theuh tur tihpahin hmun leh hmunah chuan tlangvalte fuihnan Hrangkhuma te chu a hmang nghal a, anni thiandun zak lutuk chu an sen tawn tawn thei hial a ni.
"Engti tura rawn zin chiah nge innih le, khualkai pasaltha meuhin kan khua inrawn thlen chuan kan khaw nula hmeltha Darpuii rim tura rawn kal in nih ka lo ring ngawt a" Lungkoh khaw pasaltha ve ber chuan a lo ti a.
"Hei Neihtea pa hi ka putea ania, zin turin min chah nasa em maia, inkhaw ropuina hmuh kan chak bawk nen, awl lai chuhin kan rawn khualpang zin ve mai mai ani e, keini zawng nula rim chi pawh kan ni love" Hrangkhuma bawk chuan a rawn ti leh a.
"Helai thleng thleng rawn kal tawhte chuan Lungkoh Darpuii pawh chu inrim ve hrim hrim ang chu, a hmelduh zawng pawh in lo nimial maithei asin, kan tlangvalte ah hi chuan duhzawng a hmu lo a niange" val upain a rawn tih chuan an nui var var hlawm a.
"Pasaltha hmingthang pawh nise, kan buan tho ang tiraw" an khaw tlangval fiamthu duh deuh mai chuan a rawn ti leh a, an nui leh dar dar a.
"Keini zawng buan tham pawh kan ninang, hmanni ah lah kan khaw buan chak ber in lo tlawm tawh si a, keini phei chuan in ne pawh kan tluk lo ang" Saingura chuan a rawn ti ve thuai a.
"Mai mai a, tlangval zawlbuk riak ve meuh inbuan lo a chhuah chu a mawi love, inhuphurh viau leh keimah atang kan tan dawn nia, min han en ula, ka tliak lo chauh a nih hi, tha pawh ka nei hleinem" tihpah chuan an fiamthu thiam bawk chuan a rawn ti leh a, a inti sek kual vel a. Tlangval ho pawh chu an nui leh dar dar. Hrangkhuma leh Saingura pawn Lungkoh tlangvalte rilru that zia leh an bula awm a nawm zia an hmuh chuan nuam an tiin an tlangnel nghal em em mai a.
"Intih tlat si chuan le, mahse nula rimtur awmlo em em chuan min siam bik lo ula" tih khik vur vur pah chuan Hrangkhuma chu a rawn dinga. Fiamthu thawhtu ber chu a hma ah chuan rawn ding ve nghal vatin, pumrua ah chuan an intia dun kher mai, chutah an puan tlangah in manin an tan a, Hrangkhuma chuan a tumpuipa chu chawi kan an tum a, mahse a phawi thei ta hauh lo mai, a beih ngial pawn a thei tlat lo, chutah a rinloh lutukin amah zawk chu a kang ta nawlh mai a, tlangval ho chu an lo au dur dur a.
Neihtea chuan a bula Saingura thu chu hrilhru sar sarin, "u Khuma buantu saw kan khaw buan chak ber a nih saw, fiamthu a duh em avang hian mikhualte hian kan khaw buan chak a ni tih hre lo hian an cho sual fo asin" a rawn ti a. Saingura pawh a lo bu nghauh nghauh a.
"I chak kher mai, kei chuan ka hneh lul lo che a ni e, ka thianpa nen hian ti ve teh un" tihpah chuan Hrangkhuma chu a rawn thu a, Saingura chu a tho ve nghal zat a.
"Pasaltha meuh pawhin a hneh loh chu kei tehlul chuan hneh thu awm lo, mahse bei tih dawn nan aw" tihpahin Lungkoh pa puan ah chuan a man ve chat a.
Chutah an han in elh leh ngat ngat a, Lungkoh buan chak meuh pawn a tumpuipa chu mi namai a nilo tih a chiang ta, phawi tuma a tan ngial pawn a thei tlat lo mai. Chutah Saingura chuan Lungkoh tlangval rual ho rinloh lutuk mai chuan a phawi kang ta nawlh mai le, an khaw buan chak, tuma laka la tlawm ngai lo, mikhual laka an khaw zahawmna vawnghimtu chu a kang ta nawlh mai, tlangval ho mak ti lutuk chu an ka ho mai le .
"I va han chak kher em, ka tha tawpa ka beih pawn chet pawh i che eih hleinem mawle, ka hneh ngang lo che a ni e" tihpah chuan Lungkoh khaw buan chak chuan Saingura chu a rawn chibai a.
"Ni love, mikhual min khawngaih thiama a lawmawm hle mai, " tihpah chuan Saingura pawn a lo chibai ve thuai a, midang han buan ngam an awm tawh lo bawka, tlangval ho chu lengturin an chhuak sap sap a.
" khawnge keimah ngei hian Darhmelthai chu ka han rim pui teh ang che u, kal ang u hmiang" Lungkoh khaw buan chak leh fiamthu thiam nibawk Vunga chuan a rawn ti a, Hrangkhuma te pahnih leh Neihtea pawh chuan an zui chhuak nghal a.
Darpuii hi hmeithai fanu niin, Lungkoh khaw nula hmeltha bera sawi thin a ni a. A hawihhawmna te, hnathawh a chak bakah, la deh a thiamna te, taimak leh inleng kawm a thiam avang hian mi fak leh fel tih pawh a hlawh hle reng a, hmeithai fanu mahnise tumah hian hmuhsit leh hnuaichhiah zawnga ti lo in, an zah hle zawk a ni. Inleng kawm hlim a thiam em vang hian tlangval atanga pathlawi thlengin an in a leng lut hi an tam hle thin reng a ni.
Saingura ten Darpuii te in an luh pawh chuan tlangval ho chu an lo thu leh thap tawh a, Darpuii chuan lo be vatin, "u Vunga te teh hlawl chu, lo leng thu rawh u, kha khawilam tlangval nge i rawn hruai a" tihpahin a lo be nghal bawrh bawrh a.
"Buarpui pasaltha Hrangkhuma leh a thianpa Zuihtawia te an nih hi, i sakhmeltha hmuh chakin an rawn kal vang vang anih hi, lo insiam chhiat khum daih rawh" Vunga chuan a ti fiamthu nghal bawrh bawrh a. Fiamthu duh tihtakah tlangval ho pawh chuan an lo nuih dar dar a.
Hrangkhuma'n Darpuii a hmuh chiah chuan, an khaw tlangvalte chuan an la fak thiam tawk lo anih hi, a thatna hi an sawifiah phak lo a nih hi a ti rilru vawng vawng a, a vawikhat hmuhna ah chuan a hmangaih nghal bur niberin a in hre nghe nghe.
Saingura nula mi lo tak pawn Darpuii chu hmeltha a ti ve hle tho mai, mahse a thinlung ah chuan khuavel zawng zawngah pawha a duhber leh lunglai luahtu Khuavelthangi chhing zo reng an awm lo.
Darpuii te in ah chuan Vunga fiamthu kam liam ngaithlain tlangval ho chu an nui leh huk thin, chutiang kar ah chuan Hrangkhuma chuan Darpuii chu a va melh leh zeuh thin, a nui hmelte hlei hlei chu a tha leh zual amaw ni, vawikhat a va en leh zawk a, chutih lai tak chuan Darpuii pawh chuan a rawn en ve chiah a, an mit leh mit chu a in tawng ta sak mai, Darpuii chu nuih seih pah chuan zak tih hriattakin a hawisawn vat a, Hrangkhuma erawh chuan khawdang hawi nachang hre lo lek chuan a en tlawk tlawk thung a.
Chutia hlimtaka an nuih dar dar lai chuan, vengmawng lam atang chuan, " Sa a tla e....Sa a tla e..." Tih thawm a rawn ri a, an nui lai chu an tawp hmak hlawm a.
Hrangkhuma leh Saingura pawh chu thawm chuan an thinlung pasaltha rilru rawn kaithoin, Lungkoh tlangval ho thawh hma chuan an thenin lam panin an chhuak nghal a, an hnungah chuan Neihte leh Vunga'n an rawn zui ve nghal zat bawk a.
KHUAVELTHANGI Bung 14
Hrangkhuma leh Saingurate pawh an thlenin atanga silai nena sa tlakna an zuk thlen chuan tlangval thenkhat leh valupa pawh an lo awm tawh a.
Valupa chuan fimkhur takin, silai nei khan hmahruai sela a tih chuan Vunga chuan hmahruai thuaiin sakeiin Vawkpui a hnuh thlakna lam pan chuan an inzui thla a, thui pawh an la kal hman lo, anhma lawk tul pik kar atang chuan Sakei thinrim chuan a rawn ngur chhur chhur mai a, tlangval naupang deuhte phei chu an zam chhe nghal der awm e.
Valupa chu tlangval ho chu a sem darha, Sakeiin a saseh a tawmpuina zawnah chuan an ding thapa, mahse chu Sakei chu a rawn chhuak duh bik mai hauh lo, amah hmuh theih si loh chuan a rawn ngur leh chher thin vei nen, Hrangkhuma thinin a tuar ta tlat lo.
"Khatia hnimpik kar atanga ka vo e te min rawn tih le, Buarpui tlangval zamngai lo" tihpahin Sakei tawmna bulah chuan a zuang phei thaka, chumi rual chiah chuan Sakei pawh chu a rawn inkhawh chhuak ve zat bawk a.
Mahse pasaltha nge nge chuan a lo hmu hman tlat, Sakei rawn zuan chiah chuan lo kun hniam vatin, Sakei meiah chuan a man chawt a, a phih let sawk a, Sakei pawn a tum loh lutuka chutia a meia mantu a awm chuan a huk ta tuar mai.
Hrangkhuma chuan Sakei meia man chung chuan a hnuk kuala, Sakei pawh chuan Hrangkhuma chu a kutphah hlai tak chuan ben tumin a rawn ban zuai zuai thin, mahse chutia a rawn ban chiah chuan Hrangkhuma chuan a lo phih huk leh tuarh thin a.
Lungkoh tlangvalte chuan hmuh thiang lo leh thilmak hmu ang maiin Hrangkhuma'n Sakei a chhaih kual vel chu an thlir thap a, chet ve mai nachang pawh hre lo chuan an ding thap mai a ni.
Saingura erawh chuan a thianpa chuan uannan a hmang tih hriain, vaibel zu chungin a lo nuih tet tet a, mahse Hrangkhuma tha thum deuh hnu chuan a bula Neihtea hnenah chuan "Bengtawia khu zu kap hlum rawh, a khawngaihthlak em mai" tih pahin a kawm zeuh a.
Neihtea pawn a tihtur hai lo takin, Hrangkhuma leh Sakei chu pan hnaiin a silai chu a darah a nghata, Sakei chaldara kah tum chuan a tin vang vanga, silai chu a puak dura, chu Sakei hruanghrau zet pawh a zawi nghal hnawka, lei charah chuan a let ta tawl mai a.
Tlangvalte chuan Vawkpui leh Sakei sumruk zet a lian zawnna tur hlang chu an peihfel thuai a, Sakei chungah chuan Hrangkhuma chu thut tir an han tum a, mahse a lo duh awzawng lo mai.
"Ka dawih luatah Sakei meiah khan ka man fuha, ka thlah chuan min seh nghal mai dawn sia, ka thlah ngam tawh lo anihkha, Neihtea khan rawn kap hlum vat lo pheise chuan, ka chan a chhe khawp ang, a kaptu ngei kha zawn rawh u" tiin Hrangkhuma chu a tang tlata, an tih luih theih ngang loh avang chuan Neihtea chu hlan an han tuma, mahse a ni pawh chuan a lo duh bik hauh lo, mahse valupa berin a tih luih tlat avang chuan, zak tak chung chuan a chuang ta hrama.
Sakei leh Neihtea zawn chung chuan tlangvalte leh a lo hmuaktu mipui ho chu an ri chho hulh hulh a, Hrangkhuma leh Sangkima, Vunga leh tlangval dang pakhat erawh chuan Sakei seh Vawkpui chu a neitute in ah dahin, an chan pui nghal mawlh mawlh thunga.
Vawksa an chan zawh meuh chuan zan pawh a rei viau tawh, lal mual lamah an sahawk pawh an tin zo tawh a ningei ang, Saingurate ho pawh zawlbuk lamah mu turin an chho tham tham a.
Zawlbuk an thlen chhoh meuh chuan midang ho chu an lo mu thap tawha, an la muhil lo tih hriat takin an lo khuh kharh kharh a, Saingura leh Hrangkhuma pawn Vunga mutna sirah chuan mut an han tuma, "ekhai puankawp ka lo nei tlem anih hi, pakhat hi Tawia nangin sin la, adang kan zawng ange" Vunga'n a tih chiah chuan tlangval mu tawh ho chuan heta hi ka nei alawm tih pahin an rawn vawm khawm teuh mai a, an duhai a tam mah mah hial awm e, tichuan Buarpui pasalthate pahnih chu Lungkoh khuaah chuan an chungah enge thleng dawn tih hre lek lo in tuitakin an mu a.
Saingura chu hma takah thoin, Hrangkhuma chu a sawi harha, anthlen in lampanin an kal a, tihtur tul ang ang tihpuiin an buai ve hle mai, rei vak loah Neihtea pawh a rawn thlenga, a u te pahnihin an thawh khalh chu a zak ru em ema, a ni pawh chuan a pui ve leh zung zunga.
Tukthuan ei a la hun chiah lo bawka, Saingurate thiandun leh Neihtea te pafa chu nilum hnungpuakin an thu dar dara.
"Khuma, vawin lamah tihtur tuk lawk deuhte innei em?" Zaluta chuan a ti a.
"Nei em em chuang lo e, ngatinge ni" tihpahin Hrangkhuma chuan a lo chhawn vata.
"Anih chuan kan pali hian loah zu kal ang u hmiang, vawiin chu i nî kan chhawk ve a nimai alawm" Zaluta chuan a lo ti leha. Hlo thlawh tur erawh chu ngah pawh an ngah tawh lo, nithum thlawh vel zenzawn bak a awm tawh lem lo a ni, mahse Zaluta hian an buh leh thlaite en paha hruai ve hrim hrim a duh a ni.
" nitak e, zuk kal ang u, in buhvui pawh hmuh a chakawm alawm le" Saingura chuan a lo ti ve zata, tichuan an khaw chanchinte sawi chhoin, tukthuan ei a hun chuan an in zui lut diala.
Feh kawngah chuan Zaluta ho chuan an titi leh barh barh a, Neihtea'n hma a hruaia, a dawtah Saingura leh Neihtea farnu nula kalinz Hrangkhuma leh Zaluta chu an hnunglamah an titi nasa mai a.
Chutia an kal lai chuan an hmalam hlam ruk vel turah chuan keite ze tial nalh zet mai hi kawngchhak lam atang a rawn tum thla nawlh a, lungmuang fe leh hlauh nei lo tih hriat takin kawngthlangah chuan a kal liama.
Keite liamna zawnah chuan Neihtea chu a dinga, a kal liamna lai en tuma a zuk kun dawn chiah chuan Saingura chuan ti suh tihpahin Neihtea chu a pawt sawn dawrha. Midangho pawh chu an phawk hru mai.
"Engthil nge ni Zuihtawi" Hrangkhuma chuan a lo ti vat a.
"Kan tlangval hian thi tha lo chi a awrh tep alawm le" tihpahin a nui suk a.
Neihtea lah chuan hrethiam lo takin, "enge i sawi chu a awmzia" tihpahin Saingura chu a en a.
"Keite hi sa danglam tak an nia, kawng an kan reng reng hian, an liamna hnuah midang lo kal changin an liam chiah hian an lo inring nghal pang thin. Tunah pawh khan pawt let hman lo che ila chuan Keite kha i awrh hnawk ngei ang, chuvangin upate pawn, Keite liamna hnu an en zui ngai love, an tih thin kha" tihpahin Neihtea chu Saingura chuan a hrilhfiah a.
Neihtea pawn a nunna derthawn zia hre tharin, lawmthu te a hrilh leh hnuhnawh a. Chutia an kal bek bek chhung chuan Zaluta te thlam an thleng ta der mai a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 7th, 2017, 9:37 pm

KHUAVELTHANGI BUNG 15
Thlam atang chuan Hrangkhuma leh Saingura chuan buh chu an han thlir kual vela, Zaluta te zawng thawktu an tam bawka buh pawh an ngahin atha kher mai reng a. Rei vak lo thu thlandaiin hlo thlo turin an chhuak ta diala.
Hrangkhuma leh Saingura ten thapui thawh meuha hlo an han thlo meuh zawng, an chak nangiang mai, Zalutate pafa chuan ding meuhvin an thlir leh tawp chang pawh a tam narawh e.
An chak tha piap piap bawk a, Zaluta te chhungin nihnih thlawha hmana, an zawh theih an inrin chu awlsam tein hma takah an zo mai reng mai. Thlamah bawk lut kawi lehin muangchang chuan an haw leh delh delh a.
"uKhuma nizana Sakei kan kah hnu khan kan lalpa khan a lam char char che u asin, khawnge kan khualtha pasaltha chu a ti thina, nangni lah inrawn lang duh der si lova, lalpa pawh kha a lunghnur viauin ka hria" Neihtea chuan kawngkal pah chuan a ti a.
"Animaw, chutiangin min lam tih kan lo hre hleinem, a van zia lo ve, lal pawi kan sawi em lovang chu maw" Hrangkhuma pawh chuan a lo ti ve a.
"Kan lal hi zawng lal tha leh fel tak a nia, chuti ngawtin a thinrim lovang, a hmuh chak vang mai mai che u anih chu" Zaluta chuan a lo ti bawk a.
Chutia titi paha an kal lai chuan, Saingura chuan kawngchhak lam mauhmunah chuan hmuh a nei ta tlat mai, a hnung bera kal a ni bawka, a thiante ho titi tui lai pawhchah hlau tak chuan thawmdim takin kawngchhak lamah chuan a lut chho a, mau hnah ro tla hnawk nuaiah pawh chuan thawm nei hauh lovin a kal thei zel mai, a thil hmuh chuan a awmna a sawn tih a hriat rual chuan a zawngkual leh vata, a hmu mai tlat lo, a taksa chu a rawn mur deuh chuaia, pasaltha hriatna mak danglam tak, hlauhawm a hnai tih hriatna chuan a rawn tuama, chumi rual chuan a hmalamah chuan a bawk phei rawp a, leia a bawh rual chiah chuan a hmaa a dinna ah chuan Rulngan lian lutuk mai a rawn tla ri ve thlawrh bawka.
Khatia Saingura'n kawngchhak lama Rulngan tleng lai a hmuh khan a pan chho ta nghal kha a nia, mahse chu Rulngan pawh chuan amah vehtu a awm tih hriain, thingkung lian vak loah tleng kaiin, Saingura chhip taka zuk birh tumin a lo changa, mahse a tum a thelh ta zawk a ni.
(Rulngan te hian thingkung sang atang hian tiang hian ramsa emaw an thah tumte hi an chang fo thin).
Saingura chu rangtakin a inher vata, a lampana Rulngan rawn tleng phei zer zer a hmuh chuan a chempui a phawi vata, rulngan in abul a rawn thlen rual deuhthaw chuan a chem bil lam chuan a lu ah chuan a lo khawng vaka, a khawngtu tha a na bawka chu rulngan pawh chu a vial ngawl ngawla, a thi ta der mai. Saingura chuan a chian nan tiin vawikhat a khawng leh a, a iptepuiah chuan a ak ta hmak a. Kal mai tuma a inher lai tak chuan a hnunglamah chuan thawm a hria a, chulam hawi chuan a inher vata.
Saingura inher rual chuan a thil hmuh chuan a ti lawm kher mai "Khuavelthang" a ti sapa.
Saingura hma lawka ding nula chuan rawn nuih sen senin, "Saingura ka hmu ve thei che chu ka lawm hle mai, kei chu i zawlnu ni lovin, a unaunu zawk Sichangmawii ka ni e, ka unaunu hian a sawi fo thin che a, ka ram ven chhungah i rawn lut dawn tih a sawi khan, lo veng tha tur chein min chah asin" Sichangmawii chuan a lo ti ve a .
Saingura mak tihna chu a hmelah pawh a lang thei hial awm e. Mahse ngun deuh zawka a en chuan Khuavelthangi ai chuan a hmai a zum deuh a, hmelthatah erawh tu zawk nge hmeltha thlan thiam har tak a ningei ang.
"Ka tihpalh a ni e, in inang kher mai, ka hai dawn che alawm" Saingura chuan a ti ve bawka.
"A pawi love, ka unaunu khan thang i chhuah loh mawlh a hlau sia, ka rulngan khawi zinga a lian ber leh kawlh ber ka pe che anih kha" Sichangmawii'n a rawn tih chuan Saingura pawn a hrethiam thuaia lawmthu a sawi leh vat a.
" Chu i thianten an zawng che a nih chu, ka kalsan phawt ang che, kan la inkawm leh dawn nia" tihpahin Sichangmawii chu a bo ta daiha, chumi rual chuan thlanglam atang chuan Hrangkhuma chuan Saingura chu a rawn au lauh lauh a.
Saingura pawn chhawn vatin, Hrangkhuma chu a zuk pawh ve thuaia, kawngah chuan Hrangkhuma chu mangan hmel tak hian a lo dinga.
Khawnge i pen bo a, rilru i ti mangang hman alawm, thui fe kan kal hnuah ka bia che a, min chhang ta si lova, midang lo han haw ru ka tia, zawngtur chein ka rawn let leh a nih hi" Hrangkhuma chuan lungawi lo tih hriat takin a lo ti nuah nuah a.
"Engtik atang khan nge i rilru te hi a lo no tak viau le, kawngsirah ka thil duh deuh ka hmu a, ka peng lawk mai mai alawm" nuih thaw pah chuan Saingura chuan a lo ti a, Hrangkhuma lungawi lo laklawh chuan a tukhumah chuan a lo beng pawp a, "haw ang" tih leh kal a rual nghal a. Saingura pawn nui ru tet tet chung chuan a zui ve thuai a.
Zaluta te in an thlen chuan an ni pawn Saingura chu ngaituah tih hriat takin an lo chiauau thuai a, Saingura chuan thupha chawi pah chuan a iptepui atang chuan Rulngan chawnpuar tia dawn leh sei tak chu a rawn phawrh ta zuah mai.
Zaluta nupui leh fanu phei chu an te tuarh nghe nghe a, Hrangkhuma chuan athinpa chuan a thangchhuahna tur a buaipui tih a hre mai a.
Chutia Rulngan an en sap sap lai chuan Zaluta te in ah chuan tlangval pakhat a rawn lut a.
"Ka pa Lut in awm maw, lalin in mikhualte hi a mamawh tlat mai a, rawn ko turin min rawn tir a ni" a rawn ti lut nghal bawrh bawrh a.
"Pawipang a awm ta em ni, keini mikhualte lalpa meuhin a koh a" Zaluta nupui chuan hlauhthawn hmel takin a lo ti a.
"Pawipang em em awm love, in hman chuan min lo zui nghal mai dawn em ni" chu tlangval chuan Hrangkhuma te enpah chuan a ti leh a.
"Hman e, tirawh kan rawn zui ang che" tihpahin Hrangkhuma leh Saingura chuan an zui chhuak nghal a.
Lal in an han thlen chuan, maktakin lalpa, lalnu leh an fanu chu pawn luhkapuiah chuan an lo ding thapa, an hnung deuhah chuan tlangval an lo awm nual bawk a.
Lalin mikhual tlangvalte a hmuh rual chuan a lo be vat a. " Buarpui khualtha te chu in rawn kal thei maw, helamah hian rawn phei teh u" a lo ti vat a.
"Engthil nge nita lalpa, keini meuh min koh le, hei pawnah in tlim hmur mai bawk si" Hrangkhuma chuan a ti vat a.
Lalfanu chuan Saingura chu a lo en duh kher mai, hmeltha a tiin pa a ti nghal kher mai, mipa vawikhat hmuhna a ahmangaih nghal mi niin a hre nghe nghe, hetiang taka mipa hmeltha tih hi lalfanu hian a la hmu ngai hauh lo. Saingura chu a rawn melh ru leh dek dek thin.
"A hei englo a nia, kan ui pachal Duma hi, vawin tlai a rawn haw chu a hmuh apiang min seh a tum maia, pawna hnawhchhuah kan tumin khum hnuaiah a tawm zel bawk sia, tlangvalte ho kan puna, inchhung luh tum apiang a lo hap zel mai bawk si nen, kan tih ngaihna hre lovin kan rawn pun ringawt mai che u a ni, tumah han hnaih ngam kan awm tlat lo" lalpa chuan Hrangkhuma te en pah chuan a ti a.
"Lalpa kan kap hlum mai dawn a mi" Tlangval pakhat chuan a rawn ti ve bawk a.
"Kap hlum love, khawnge in ui chuan chul a chak a nih chu, kan chul ange" tihpahin Saingura chu lal in chhungah chuan a lut ta mai.
Midang ho chuan "fimkhur rawh, a kawlh a nia" an lo ti rual deuh dual a.
Lal uipa chu tap bulah dingin Saingura chu a lo ngur chhur chhur a, "Duma, khatin an ti ngai lo" tih pahin Saingura chuan a mitah tak a zuk en a .
Chu uikawlh pawh chuan Saingura mitah chuan Pasaltha huaisen, tumah ngam loh leh hlauh nei lo mitmeng chu a hmu a ni chek ang, a chik ngher ngher a, Saingura'n a zuk khawi chuan mei khup zulin a bawk ta hle hle a.
"Tikha animai alawm, ui fel tak i nih hi, khawimaw hliam i nei em ni" tihpah chuan Saingura chuan a tuai let vel a, uipa kawlh meuh pawh pasaltha bulah chuan a tih ang angin a awm mai a ni.
Kawngka atanga rawn en tute chuan mak tihna in an khat a, Saingura'n chutia ui kawlh lutuk a duh duha a tuai let vel an hmuh chuan va pan mai an tuma, mahse ui chuan a rawn ngur leh chhur chhur thin.
Saingura chuan a khap a, chumi rual chuan a ngur pawh a reh mai zel, "a hlauhawm tawh love lalpa, hei a ke hnuaiah thigther sei deuh a lo tang alawm le" tihpahin Saingura chuan lalpa chu thingther chu a pe a.
Lalin a uipa a koh pawh chuan mei hem vat vatin a kal ta. Lalpa chuan lawmthu a sawi luama, Saingura chu chaw eiturin a sawm hial a. Mahse Saingura chuan engtin tin emaw a hnar thei hram a ni.
Saingura te an thlenin lama an let leh hnu chuan, Lalpa chuan a thlir zui vang vanga, "Pasaltha diktak a nihkha, ui kawlh hian pasaltha chu an lo hre em mai" a ti sap a .

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 7th, 2017, 9:40 pm

Bung 16
Saingura leh Hrangkhuma chu zawlbuk pan pahin an ti sep sep a. A tuk maia an khaw lam haw leh tawh an tum avangin an kaldan turte an sawi dun a.
"Ekhai, thianpa kal lama kan kalna lamah khan kal leh dawn em ni ang?". Saingura chuan Hrangkhuma pawh en chuang lem lovin a ti a.
" Mahse kal lama kan kalna kawngte zawng kan bo thui rei em kha, a kual zawnga haw leh chu i duh meuh maw" Hrangkhuma chuan a lo ti vat a.
"Kual zawng a kual nameuh mai a. Mahse kawng kawhhmuhtu kan thiante pathum, Zakapa te thian ho kha an khaw lamah kan tlawh kual ang chu. An khua kha ka la kal lohna hmun a nih bakah, khatianga thian chhar tharte han tlawh chhuahna hun remchang tun bak chu kan hmu tawh tawp nang." Saingura chuan a lo ti ve leh vat a.
(Saingura te leh Pasaltha Zakapa te intawn dan chu Pasaltha Zakapa thawnthu ah khan kan hmuh kha.)
"I sawi takah chuan a ni tak alawm. kan tlawh haw pauh a niang chu. Kan thu danga lai chuan, kei zawng Darhmelthai mawlh hian ka rilru a luah mai ka ti. Min han hmel duh ve in min haw lo se ka ti kher mai". Hrangkhuma chuan a lo ti let vata.
" A melh danah che khan a haw lo viau che in ka hria asin kei. ngawitak rawh, mahni inchhung lum atang palai kan tirh pawp anga a nimai alawm" Saingura chuan nui vur vur pah chuan a lo ti a.
Zing kawl a rawn eng riai riaia, Saingura leh Hrangkhuma erawh zingkar hma taka chhuah tum an nih avangin midang thawh hma chuan Zawlbuk atang chhuak vatin an thlenin lamah an lut zui zat a. An thlenin nu, Zaluta nupuiin chaw a lo fun sak sa thlap leh buhfai a lo dahsak sa thlapte chu an ipte ah thunin, inthlahna thu an thlenin te nen an sawi a, an silai an dara pu vuah chung chuan an chhuak zui ta a.
Lungtoh khua atanga an chhuah hnu khan kawng lakah zanhnih zet riakin an kal tawh a. Muangchanga kal zelin an kal lama Zakapa te thian ho nen an intawnna leh riah ho na hmun chu an thleng ta hlawl mai. An buk pawh a lo la ding sawi ve luai a. A hranpa sa lem lovin an chei tha zung zung a, an innghat zui nghal a.
"Thianpa, kan thiante sawi hmang khan an khaw lam kalna chu hemi buk chhak lam tlang pawng lawn liam hian a ti kha ania. An hnu hmuh tur pawh a awm turah ngai ila, naktuk lamah chuan kan thleng thei mai ang chu maw. Tute nge an hming ni khah?" Hrangkhuma chuan buk chhunga vaibel pak tulh tulh pah chuan a ti a.
"Zakapa, Sangkima leh Laiveta an nih ta in ka hria. Ni e muangmarin kan kal anga kan thleng mai ang. Ti teh ka chau riau chhingmit pawh a chau tan e. Mangtha le." tihpahin Saingura chu a in let thak a. An muhil zui nghal chu a nimai a.
A tuk vartianah tho in, zan lama an chaw chhum sa leh sarepte chu funin Saingura te thian dun chu Mualcheng khaw lam ni a an hriat lam pan chuan an kal leh ta thauh thauh a.
Muangmarin chawl lova kal an ni bawk a, ni a vanlai zawl hma deuh chuan thlawhlaiah an chhuak hlawl a. Thlam an hmuh hmasak ber chu panin an chaw fun an ei nghal mawlh mawlh a. Thlam neitute an awm loh avangin ti hnawk lo thei ang bera kalsan lehin an chhuahsan leh a. Mualcheng khuate lo a nih ngei an rin avangin khawchhung pawhtu ni a an rin lo kawng chu an zawh chho ta a.
Saingura ten Kawtchhuah an chuan chhuah hlawl rual chuan Hrangkhuma pen leh tur chiah chu silai puak thuai avang chuan a ding chat a. A hma chiah leiah chuan silai mu a rawn lut phut nghal surh bawk a.
"Pen khat pawh in pen leh chuan leiah ni lovin in taksa ka silai mu hi a lut tawh ang" chhaklam atanga rawn ti teng chhuaitu chu an en chho nghal a.
Tlangval pathum hi thing phen atanga rawn chhuakin Saingura te chu an rawn tin nghal vawh a.
"In silai kha paih ula, tute nge in nih a, engti tura rawn kal nge in nih sawi rawh u." Tlangval pakhat chuan a rawn ti leh a.
Saingura leh Hrangkhuma chuan tlawm hun ani tih hriain zawimuangin an silai chu leiah an dah thla a. "Thiante u, râl kan ni lo e. Lal Hmingthanga khua Buarpui atanga lo kal kan ni a, Mualcheng khua a kan thiante tlawh tuma rawn kal mai kan ni e. Kawng kan bo nge pawh kan hre lo a, Mualcheng khaw tlangval in ni em?" Hrangkhuma chuan a ti dam dapa.
"Mualcheng khua chu kan ni ngei e. kawng zawng in bo lo e. amah erawh chu tunah tak chuan kan khaw boruak that loh lai tak a ni a, khualtha leh khual chhia kan thliar thei hauh lo mai. Chuvangin in kut hnungkhirhin khaw chhungah chuan kan hruai luh che u angai ang". Tlangval pakhat chuan a rawn ti leh a.
Saingura te thiandun pawn an khua chuan ral beih an tawk a nih ringin an thu anga awm mai chu tha zawk an ti a. " Awle, in thu ang chu nirawhse." tiin an chhang ve mai a.
Mualcheng tlangval pahnihte chuan Saingura leh Hrangkhuma chu an hnungkhirh mawlh mawlha, pakhat chuan an silai leh chempui a lo khawm bawk a. Mualcheng tlangvalte pawh hian ral an nih chu an ring tawh hauh lo, ral chu nise an beih let tawh an ring a ni. Mahse fimkhur nan hrim hrim hetianga hnungkhirh hi an ni. Tichuan Saingura leh Hrangkhuma chu an hma lama kal tirin lal in lam panin an chhawm chho nghal a.
Khua an lut chho a, mipui hmel reng reng an hmu lo chuan Saingura leh Hrangkhuma te chu a phawk hle mai. An kal zela lal tualah chuan mipui an lo awm vek a, naupang atanga tar thleng chuan lal tualah chuan an lo tlim hmur maia. Chutih lai chuan mipui awm khawm thap na lam, a laili atang chuan patling pakhat hi a rawn au tial vawn vawn a.
Chutia an tlangval pathumten tlangval pahnih hnungkhirh chunga an rawn chhawm chho an hmuh chuan mipui chuan an lo thlir thapa, an kalna tur chu an lo kian sap sap a. Lal tualah chuan Saingura leh Hrangkhuma chu dintirin mipui chuan an hual thap a. Chutih lai vek chuan Saingura te hmaah chuan pa pakhat hi dingin lal in lam chu hawiin a au ruai ruai a.
"Nang mi tenawmnu, mahni fate ngei pawh rukbo tir duhtu. Kan lalpa kha rawn chhuah la, i thurualpui upa laktlak loh nen khan rawn chhuak rawh u. A nih loh chuan keiman ka rawn luh khung ang che u". tiin chu pa chuan lal in lam kawk chuan thinrim ha chang thial bap bap chungin a au a, a kut dinglam chuan a chempui a hum ran bawk a.
Saingura chuan a hmaa ding chu in hrosa kuk kuk chu a en vang vang a, " Sangkim" a ti chhuak hlawl a.
Chutia a hnunglam atanga a hminga rawn kotu an awm avang chuan Sangkima pawh thinrim khur hlak hlak chungin a rawn inhera, Saingura leh Hrangkhuma a hmuh chuan a meng bial kawk a.
Khatia Saingura'n Sangkima a auh khan, an rawn kal laia lo ngaihven lem lo tu Laiveta pawh Sangkima ko tu lamah chuan a rawn hawi vat a, Saingura te a hmuh chuan a phu ve zuk tho mai.
Sangkima chuan Saingura te rawn panin, tawng pawh tawng thei lovin Saingura bulah chuan a thingthi hnawk a...
"Sangkim, enge a awmzia, tinge tikhan i awm" Saingura chuan a ngaihna hre lo taka Sangkima en pah chuan a ti a.
"U Saingur, nangni in nimaw. ka beisei lo lutuka ka lo hamhaih deuh alawm le. Hetia U Sangkima awm chhan chu keiman ka hrilh ang che u. Nangni kha an hnungkhirhna hi phelh vat rawh u. Buarpui lalfapa a nih hi". tih pahin tlangval pathumte chu Laiveta chuan a vin nghal thawt a.
Laiveta chuan a aw a thian kharh kharh a,ti hian a sawi ta a...( Zakapa leh Sangtei thih dante, Dartui lalfapa leh a thurualpui ten ruahmanna an siam dan zawng zawng kha chu sawi vek kher lo mai ila, Laiveta hian a sawi vek angah ngai mai ang aw)...Laiveta chu a ngawi vang vang a.
" Tichuan Usangkima hian Dartui upa chu manin, keini kan va thlen ve meuh chuan U kapa leh Sangtei te chu an lo thi der tawh a. Tichuan an ruang kan zawn haw a, khua kan thlen hnu ah Dartui upa chu kan dawp ta a. Dartui upa chuan engkim a sawi ta a, lalnu in Sangtei an ruk chhuah dawna a puih dante, kan lal upa Dopauha te chhungin lalfapa an puih dan zawng zawngte chu a puang vai ta vek a ni. Chutia a in puan zawh rual chiah chuan, kan inrin hman hma in, lal in leika a lalpa bula ding upa Dopauha chuan chem chuh thutin lalpa chu a hrawka zai mai inring a tinin, a nupui fanaute leh lalnu nen lal in chhungah khian an inkhung a, lalpa an hreng bet tlat bawk a ni. U kapa leh Sangtei ruang pawh in chhungah khian an la awm asin." Laiveta chuan mittui luang ngiai ngiai chung chuan a lo ti a.
Laiveta thusawi hre pha Mualcheng mipuite pawh chu an lo in sut faih faih a. Saingura meuh pawh chutiang a hriat hnu chuan thinrimin a ding khur hlak hlak mai.
"Ka thiante phuba ka lak hma loh leh...khing mi lawi lo ho hi an lu ka lak vek hma chuan ka bei ang. Mi tenawm ho, rawn chhuak rawh u" tiin Sangkima chu a rawn au chhuak leh tuar a.
Bung - 17.

"Thiante u, ruahhmanna in nei em. Ti hian in nghak reng tawp dawn tih dan tha deuh in hria em?" tiin Saingura chuan Laiveta leh Sangkima chu a en tawn zak zak a.
Chutah chiah chuan Laiveta leh Sangkima pawn hmalak dan tur fum fe an nei lo tih an inhre chhuak a. "Kawngka khi su chhiain kan luh chhuah pawp mai dawn em ni?" Laiveta chuan zawt ti tihin a rawn ti a.
An bul vela tlangval dangte pawh chuan an lo zawm sap sap a, "lut huk ila that phiar ang u." an rawn ti sap sap a. Saingura pawn tih vak ngaihna a hre lo. Luh chhuah pawp chu a duhdan ve tho a ni.
"Ngawi teh chu, chutia kan luh huk chu a fel ber angem. Han bawh lut huk ta ila, an hlauh leh zâm hamhaih luatah lalpa ber pawhin a nunna an lak sak thei asin." tiin Hrangkhuma chuan a rawn chhang a.
"Anih chuan engtin nge kan tih ang." Saingura leh Laiveta chuan an lo ti rual thawt a. Mualcheng val upa leh tlangvalte pawh chuan an lo hual thap a.
"umm...heti zawng deuh hian ka lo ngaihtuaha, Sangkima hian..." a tih lai tak chuan an bula Sangkima awm reng emaw an tih chu a awm lo tih an hre zawm nghal zata. An hawi kual deuha, Sangkima chuan lal in luhka ah chuan a chempui hum ruh ngar ngar chung chuan a lo ding teu tawh mai a.
"thiante u, tih ngaihna dang a awm lo a nih hi. Lalpa him dan tur ber kha ngaihtuah ula." tihpahin Laiveta chu Sangkima bulah chuan a tlan chho nghal zata. Saingura te thiandun pawh chuan an zui ve nghal vata, Mualcheng tlangvalte pawh an bang bik lo. Mahse a then erawh chu silai nena in chhunga mi te tlanchhuah theihna tur lai zawng zawng lo chang turin Val upa ten an kal tir thung a.
"Nangmah chauha a nuam zawng zawng tih vek i lo tum bik mai le." tih sap pahin Laiveta chu Sangkima dinglamah chuan a ding nghal zat a, "eng chu ni lo mah suh i, in tha tal chu kan dawl ve ange" tiin Saingura te pahnih pawh an rawn ding zat a.
"Pu Dopauh, tunah hian Mualcheng val rual kan thianpa leh thiannu Zakapa leh Sangtei ruang la turin leh Lalpa hruai turin kan rawn lut dawn a, kan rawn luha lalpa kha him dam piala kan hmu lo anih chuan kan chil hlum ang che u. Tha taka in rawn chhuah tir a nih erawh chuan in chungthu hi ngaihtuah tha in lalpa pawh khan a ngaidam ngei ang che u tih ka ring tlat a ni" Hrangkhuma chuan kawngka bul atang chuan a au lauh lauh a.
"Awle, awle...lalpa chu kan rawn chhuah tir dawn e. Mahse kan lalpa hian a pasaltha te beng hriatah ngei kan him tur thu hi min tiam zet phawt rawhse." Dopaua chuan a rawn ti leh lang lang a.
"Lalpa khawngaihin an duhang chuan ti rawh" Laiveta chuan a lo ti ve vata.
Hetih lai hian lalnu erawh chu a fanu ruang chu kuahin a la in sut hlawp hlawpa. Hetiang em em chu a thlen a ring bik lo tawp tih a tawrh dan atang chuan a hriat thei mai bawk a.
"Dopauh, i khua leh i lal hi min phatsanin, nangmah vangin ka khaw daingul sa leh ral lakah pawh nang leh i nupui fanaute chhanhim tu ber a thi a. Ka fanu neih chhunin a nun a chan bawk a, ti chung hian ka ngaihdam theih che i ring a maw" lal Lianpuia chuan a nghawnga chem chuktuah rengtu Dopauha chu zawi deuh satin a ti a.
"Sangtei pa, heng zawng zawng hi ka thiam loh vek a ni. keimah hi alawm hremna tuar tur chu, an ni kha chuan ka thu zawmin min pui mai chauh ani, i duh duhin min ti la; i duh leh ka lu pawh hi la rawh mahse an ni chhung kha chu nun hram ang che" lalnu chuan lal Lianpuia ke vuan chung chuan a rawn ti a.
"Awle, ka tiam a che u ka ngaihdamna sang berin in nunna ka zuah anga, in chunga hriam leka kutthlak che u chu he khua atang hian hnawh chhuah an ni ang." lal Lianpuia chuan pawn lama awm ho hriat theih tur chuan a ti lauh lauha.
"Awle, lalpa thusawi kha in hria tiraw. Tlangval pakhat Sangkima ni lo kha rawn lut leh phawt ula, Zakapa ruang hi rawn pawm chhuak rawh u, lalfanu ruang erawh lalpa hian a rawn pawm chhuak ang." Dopauha chuan pawnlama mi te hnenah chuan a ti leh a.
Laiveta chu rangtaka lut vatin Zakapa ruang chhuata lo mu bal mai chu a va pawm lawpa, lalpa pawn a fanu ruang chu pawm ve bawkin pawn lamah an chhuah puia. lalnu erawh chhuatah chuan thu in a la tap hliam hliam a.
Laiveta chuan Zakapa chu rawn pawm chhuakin tlangval dangte chuan an lo pui vata, Sangkima erawh chuan a thianpa ruang chu mittui tling pam chungin a lo thlir a. Lal lianpuia pawh a fanu pawm chungin an hnungah chuan a rawn chhuak ve a.
"Lalpa min ngaidam ang che, i thu ka zawm loh avangin." tihpahin Sangkima chuan lal Lianpuia rawn chhuah rual chuan in chhungah a lut a, midangin a rawn dan hman hma chuan kawngka chu a khara a hawlh kalh nghal rawk a.
Chumi rual deuh thaw chuan in chhungah chuan Sangkima in hrosa kuk kuk thawm leh na tuar te ruai ruai chuan a zui nghal zata. Tumah engthil nge thleng tih chu inzawh an ngai lo kher mai. Tumah pawh luh tum lovin chu inthahna thawm chu an ngaithla thap mai ani.
Chutih rualin Zakapa leh Sangtei ruang chu lal in luhka ah chuan an zalh a, lal Lianpuia chuan a thut chilh a, tap chhuak lem lo mahse a hmel atang chuan a tuar hle tih chu a hriat theih a ni. In chhung lama thil thleng mek chu hre awm pawn a lang lova, a bengkhawn hek lo.
Pawna mipuite leh luhka a tlangvalte erawh chuan in chhungah chuan engthil nge thleng tih an hre chiang kher mai. Thawm chu an ngaithla thapa chutihlai chuan kawngka chu chhung lam atang chuan a rawn in nem tawlh ralha, Sangkima chu a hmai leh ban vela thisen kai hnuang chung chuan a rawn pen chhuak ta chhat mai.
Mipuite chuan Sangkima chu an lo thlir thapa, luhka a awm tlangvalten in chhung an va bih zawk chuan an bih nawn lo chiang kher asin. In chhung chu thisen a luang kawi zui a, mitthi ruang a let thal phung a. Lalnu pawh a bang bik lo thisen chiah piah niaiin chhuatah chuan nunna nei lo tih hriat takin an let nguai mai a ni.
Sangkima chuan lalpa chu a pan chhata, lal Lianpuia bulah chuan a va thingthi rap a, "lalpa i thu awih lovin Dopauha leh a nupui fanaute chu ka that ta veka, tin i nupui ngei kan lalnu nunna pawh ka la ta si a. I duh chuan min tunah hian min tihlum la, i duh leh min hnawt chhuak la. I duh duhin min ti rawh, kei chuan ka thianpa thisen ba chu ka thungrul tawha tunah chuan hlim takin an bulah ka kal thei tawh ang" tihpahin a chempui thisen kai sen luk chu lal Lianpuia kutah chuan a hmehbel nghal a.
"Sangkim, vawin hian ka pasaltha pakhat ka chan tawha, nang leh zel ka chan che chuan he khua hi tunge sa leh ral lakah venghimin, tlangvalte hian tunge an zui tak ang le. Vawiin atan chuan thisen a luang hnem tawk tawh e. Ngaihdam i ngai reng reng lo, i tih tur dik tak i ti a ni e. Tunah chuan tlangvalte hi hruaiin ka fanu leh ka makpa te zalna tur thlan zu lai tawh ru le." tiin lal Lianpuia chuan tah insum tak chuan Sangkima darah chuan a rawn beng thak thak a.
Saingura leh Hrangkhuma pawh Mualchengah chuan ni nga lai an cham ta. An thlen hlim boruakin a zir lem loh avangin chutiang teh chiamin khaw chuana Mualcheng nula te han hmelhriat na hman pawh a awm meuh lo. Chutih rual erawh chuan Zawlbuk lamah erawh Mualcheng tlangvalte chuan an hre chiangin an zah hle thung a ni.
"Thianpa Sangkim, hei kan thiante kan vui liamna pawh ni tam a ni tawh a. Hetia a patling ber mai lunglenga i indawm kun reng mai zawngin i mikhualte hi kan hawi hai lutuk dawn e. In ram chhunga sa pelh te pawh kan chak viau a nia." Saingura chuan tap mei chhemna bula Sangkima thu kun ngal mai chu a bia a.
"Ni e mama, hei i thiante pawh awm nuamin an awm hleinem. kan khaw mi zawng zawng hian Kapa leh Sangtei hi kan sut tak meuha, mahse fam hnu ngaiin an tap an tap ngai lo e. In tipachang la han inthing harh teh khai. I thianpa Kapa te in ah pawh i zu la leng hauh lo ania, a nu leh a nau pawn an ngai tawh lutuk ang che. An fapa ang chiah i ni a, tunah phei chuan nang lo chu neih leh belh tur an nei lo ania. In tipachang rawh khai." Sangkima nu chuan a lo ti ve bawk a.
"A ni tak maw, tete atanga ka kawm leh unaupa Kapa nu leh nau khu ka nu leh farnu an nia. An ni lo enkawl tha tur khan ka intiam tak asin le. Ka lo ngaihtuah tlem a ni, min mamawh hun tur berah keiin lunglengin ka lo in dawm kun a...an tan hnemtu ka nih hun zawk asin mawle." Sangkima pawh chuan midang hmuh hlau taka a mittui hruk zeuh pah chuan a rawn ti vat a.
"Chuti a hnu, tiru kan zu chuangkai dawn em ni ang." tihpahin Hrangkhuma chu a ding nghal tarh a, Sangkima leh Saingura pawn lo tho thuaiin an chhuak nghal sap sap a.
Zakapa te in an luh chuan an khawhar hlaua leng lut nu leh pa in leng an lo awm nual, tapchhakah chuan Laiveta leh Zakapa farnu Ngaihtei chu an lo thu dun khar bawk a. Sangkima te thian thum an hmuh chuan an lo be tliar tliar a, Zakapa nu erawh chu Sangkima a hmuh chuan a lungchhe thar lehin tap chhual em lo mahse a mittui a far fep fepa. A fapa leh a thiantha ber Sangkima an in chhung ngeia an infiam bawrh bawrh laite, amah ngei pawh ka nu ti a abula an panchan der thin laite chu ngaihtuahin a mittui chu a far fep fep a. Ngaihtei pawh a bang bik hauh lo, a mittui chu a tling pam a.
Sangkima te pathum pawh chu tap lamah chuan thu in, Ngaihtei leh Laiveta te nen chuan an ti ti laih laih a. Sangkima chuan Ngaihtei te rap chung chu a thlir vang vanga, a thianpa dam lai kha chuan sa rep i lo fahran a intlar dul thin kha a nia. Tunah chuan a ruak deuh huai tawh mai tih a hmuh chuan a lung a chhe thara, ti lang lo tur erawh chuan a insum nasa hle thung a.
"Laia, naktukah zankhat riakin hei Sangkima ho hian kan ram chhuak dawn a. I rawn tel ve ang chu tiraw. In bula ram vah kan chak riau maia hei i u Sangkima kan sawm ringawt a, i tel lo chuan a duh tlat si lo a. Sawm ve che kan tum tho sia, Laiveta sawm phawt ru a ti teh tlat a." Saingura chuan a vaibel beng that mawlh mawlh pah chuan a ti a.
"Hei in khaw ram vel hi sa an la tam hmel bawka, a ram a nawm hmel nasa mai si a han fan vel pawh a chakawm alawm le." Hrangkhuma pawh chuan a lo ti ve zat a.
"Chutia nangni meuhin kei teh lul min chhuah pui duh te chuan, rilru tih zang khai pah pawn a tha khawp ang chu. U Sangkim khawi lama tuan nge i rel deuh a." Laiveta chuan phur hmel takin a ti a. Mahse a hmelah chuan Zakapa tel lova ram chhuah chu a phur zan lo tih a hriat kher mai.
"Chutia in tih chuan, nikuma ka thiana nen Sanghal sum sarih zet kan kahna mual lamah khan kal ila ka ti deuh a. Kan kal hnuah tumah kal an awm lovin ka hria a." Sangkima chuan a lo ti thuai a. Duh lo teh mahse eng leh kima Zakapa nen in zuia ti dun thin an nih avangin Zakapa hming chu an lam ri lo thei thin si lo a, chu chuan an lung erawh a ti leng dawn chauh niin a lang.
"Zuk kal tak teh u, sa tharlam tui hang hawp pawh a chakawm alawm. Rawn hlawhtling mawlh ang che u" Ngaihtei chuan a lo ti bawk a. Titi dangte vawrhin an inkawm zela, leng haw ar a lo khuan chuan tumah tawi khawmuang lovin Buarpui pasaltha pahnih leh Mualcheng pasaltha pahnihte chu an inzui chhuak sap sap a.
"Muttui mangtha ule, in ramchhuahna ah chuan rawn hlawhtling mawlh ang che u" tih mawlh mawlh pahin Ngaihtei chuan a thlah liam hlawm a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 7th, 2017, 9:42 pm

Bung - 18

Saingura te pali chu tukthuan eikham chuan zanriak buhfai leh mut bu tlemte nen kawtchhuahah an thu thapa, zunram thiar hmasa leh te te in Sangkima chuan hmahruaiin an in zui ta sap sapa. Kawng lakah vawikhat an chawl tih loh chu muang em em lovin tha thlah lem loin an kal mar pat a, tlai zanriah chhum hun hma deuh chuan Zakapa leh Sangkima ten a hma kuma buk an lo sak tawhna hmun chu an thleng hlawl a.
Buk awmsa chu a lo rawih tawh deuh avangin buk chak tur an la khawm zung zunga, Sangkima leh Zakapa te buk sak sa chu thiat lem lovin a bul maiah chuan an pali leng tur chu awlsam te in an sa zo mai reng a. Kum lamah chuan Laiveta chu a naupang fal deuh e tih lohah chuan midang zawng chu an inrual tlang viau a. Sangkima erawh pa chan chang tawh nupui nei awm chhun a nih avang chuan an dah thu thiamin upa ber en in an en a, a thu an ngaichang zel mai a. Chu chu Sangkima pawn hriain a inthlahrun phah lek lek a, mahse a thiante rilru thatna erawh chuan a ti lawm hle thung a.
"Laia ti khan Hranga nen khan eirel lo buatsaih ula, Ngura nen hian sa hnu en pahin tlai hmeh tur kan zu ange aw." Sangkima chuan mei chhem tum kun kut kut Laiveta chu a bia a.
"Ni tuk e, rawngbawl lam chu keimah pawn ka thei lutuk alawm, u Hranga i duh chuan zu zui ve zawk nghe nghe la." Laiveta chuan in pe zo tak chuan a lo ti a. Hrangkhuma erawh Saingura te zui ve kher chuang lo chuan Laiveta chu a pui zung zung a. Saingura leh Sangkima pawh an buk liam lam kawr ruam chu luh thlak tumin an kal nghal a.
Saingura leh Sangkima chhuah hnu Laiveta leh Hrangkhuma chuan tui um siamin tui an chawi khawl a. Chumi hnu chuan Hrangkhuma chuan Laiveta chu chaw lo chhuang tura tiin, zan lama tuah atan an thingfawm khawm chu tlem a la tih deuh vangin thin fawm belh turin an buk chhak lam ngaw ah chuan a lut chho ve nghal a.
Saingura leh Sangkima chuan an buka luang kawrte mawnglam chu zawh thla zelin, mual khat ai tam mah an zawh tawh tihah chuan Sanghal phin deuh dut dut leh in nawr ngik deuh ruai ruai an hmalam kawrte kan changel hmun atanga rawn chhuak chu an hre thuai a. In hrilh hranpa ngai lovin Nghalrual an ni tih pawh an hre chiang kher mai. An kalna lama an hnu an hmuh loh danah lui mawng lam atang rawn tla chho an nih ngei hmel e.
Saingura leh Sangkima te chu zaizira inbia in , Sangkima chu chu changel hung hel tur chuan kawr kam chhak lamah chuan a chho thuai a. Sangkima erawh chuan ding takin a hma zawngin a veh thla ve thung a. Anmahni an in ral palh loh nan in hmatawna zawng kal lovin an hual a ni.
Saingura chuan Nghalrual ho lan chianna theihna a thlen chuan fimkhur tak leh thawmdim takin a insiam rema, a hmazawna Sanghal pakhat chu a tin rana. Chutihlai chuan Sangkima lam chu a han en zeuha Sangkima pawh tan hmun siam remin a thu fel chiaha, chutah an kah tur ve ve chu an kah dun loh nan an han in kawhhmuh leh phawt a, Sangkima silai chu a puak dur a, chumi chhawn zat chuan Saingura silai pawh a puak ve nghal zat bawk a.
Silai a puah rual chiah chuan Nghalrual ho chu hlauin an nguk ruai ruai a, an rawn kalna lam thang pik karah chuan an tlan liam nghal duak a, mahse an thiante pahnih erawh tlan tur reng awm tawh lo in leiah chuan an zakdawh atanga thisen chhuak nguai nguai chungin an mu thaw hak hak a, an ke chu an leng bat bat bawk a.
Sangkima leh Saingura te chuan an tum an thelh lo tih an inhriat avang chuan an in nuih saka, an silai zente sawh tha lehin an sa kah chu an pan a. Sangkima kah zawk chu tal tur eih pawh awm tawh lovin a lo thi fel der tawh a. Saingur kah zawk erawh a Lian deuh zawk a ni bawka, a la tal faih faih a, Saingura chuan a silai chuan a tin leh vang vanga a chal damah chuan a kap leh siaha, chutah meuh zawng tal tur a awm ta lo.
An sanghal kah ve ve chu a bawp pahnih an bal hlawk hlawka, a bak zawng chu chhawl chhinin an zavaia chan turin an kalsan a. Khua a tlai chhiat hma a buk thlen thuai tumin an let nghal nal nala.
Khatia Hrangkhuma thing fawm tura an buk chhak lama liam ta pawh khan tawn fuh sabawp a tawng ve tho mai. Buk atanga hla ve tak a thlen chuan Hnahkhar tlu ro pahnih a hmu hlauh mai a, tan chawp pawh ngai lovin a bul lam chu a lo bung sa vek a. A tang hlawi tuma a chem a phawrh chiah chuan a piah hnim buk kar chuan hnim hnah pet hmuar hmuar thawm a hria a, dimtakin a pan phei a.
A hnaih deuh chuan sakhi tuai hian hnim a lo pet hmuar hmuara, Hrangkhuma nen chuan an in melh ta ralh ralh mai. Chu Sakhi lah chuan hlauh nachang hre hlek loin a hnim ei lai chu a la thial hmuar hmuar tho a. Mihring la hmu ngai lo leh hlau lo tih hriat takin Hrangkhuma chu a melh kar mai a.
Chutiang taka ramsa ngam leh mihring hlau lo chu Hrangkhuma pawn a vawikhat hmuhna a nih avangin mak ti tak chuan a en ve reng a. Chutah harh chhuak thutin a chempui chu dimtaka lek kangin, Sakhi patuai chal damah chuan vawm tumin a tin vang vanga, chutah Sakhi patuai inrin hma chuan a chem chu a thlawh chhuak thut a. Chu sakhi a mihring hmuh hmasak ber chu hlauh tur a ni tih a hriat meuh chuan a tlai zo ta, a chal dama Hrangkhuma chem pui hmawr kil zum lam tak rawn bur vu chuan a lu ti haiin a pai nawk a.
Hrangkhuma'n a duhna laiah a vawm fuh tih a hriat chuan sakhi luhai tal buai lai chu chuhin Sakhi lam pan chuan tlan fua a, a tlan pah chuan a hma lawka thing bung lian tha ve angreng tak lo awm chu chhar pheiin sang deuh takah a zuang kanga, chu sakhi luhai tal buai lai tak lu ah tak chuan a chhip thlak ngheng mai a, a vaw tu tha a na bawk a Sakhi pawh chu awp nghal rawp a. Hrangkhuma chuan a chala a chem bur vu chu phawi vatin Sakhi hrawk hrui chu a chhat nghal hmak bawk a. A chau lutuk chu a thu hnawka, a thaw hlawi hlawia. Silai tel lova Sa a thah vawikhatna a tawng ve ta chu a hlim veng veng kher mai.
Sakhi patuai chu a ipte ah chuan a thun sawk sawk a, a thing lak tur chu tan felin a tawn leh a, buk lam pan chuan phei khai zang vahin a kal a. Hetih lai vel hi Saingura te Sanghal kah hun lai vel kha a niawm e.
Zanriah ei hun dawnah chuan Saingura leh Sangkima pawh buk ah an rawn thleng a. Laiveta leh Hrangkhuma chuan Sakhi sa chu an lo rep tlar dal tawha. A chek chu mauthei lian tel tawl takah hian an lo chhum so barh barh bawk a.
"Ekhai kan pasaltha te an rawn thleng e. kha in va hlawhtling awm ve?" Hrangkhuma chuan an sapawp iptepui atanga an phawrh a hmuh rual chuan a ti thuai a. Laiveta pawn lo buaipui thuaiin Sanghal bawp chu a chan darh nghal zung zunga. Chutih chhung chuan Sangkima chuan an sanghal kah dan leh an hnutchhiahna hmun chu a sawi bawk a.
"Hei eirel in lo peih vek tawh tho bawk a. Zanriah han kil phawt ila, chumi hnu ah muangmarin Sa chu kan va phur mai dawn em ni. Kan pali chuan vawitam kal ngai a ni dawn chuang lo a, meichher hnuaiah pawh rei a ni nang." tiin Saingura chuan a thiante chu a rawn kual a.
"Ni e mawle. Ngura rawt ang chuan a tha ang. Bakah kei zawng Sakhi chek rim khan ka ril a tam tawh riau mai ka ti. Engtin chiah maw Silai pawh keng lo chuan Sakhi patuai chu i tha reng reng a Hranga". Sangkima chuan a lo ti ve zat bawk a.
Hrangkhuma chuan zanriah buatsaih mawlh mawlh pah chuan Sakhi an in tawn dante chu tawi fel takin, mahni in phah hniam tak chung chuan a sawi mawlh mawlh a. " Laia, i rep fel tawh chuan hei a ei theih e" tiin Laiveta Sa rep zo hlim chu a au zui nghal zata.
Tichuan puar tlang takin zanriah chu an bar ho a, an eitui tlang bawka an dul pawh a kawh mar hlawm mai. Zanriah an ei fel chuan meichher tur buatsaihin an che leh sang sanga, Sanghal chan tur chuan an kal nghal a.
An ni ram vachal pali tan chuan Sanghal pum hnih lek chu chan leh phurh chhung rei hek lo le, rei lote ah chan zovin tlangval pangai tana vawithum vel lai phur tur chu vawikhat phurhah an hmang zo leng mai a ni.
Sanghal sa chu buk tualah an rep leh phawt a, duhtawkin a er ta maw tihah chuan zan a lo rei lam tawh bawk nen buk lamah chuan zi al al chungin an lut ta diak a. An tlu chiaha titi zui tur pawh awm tawh lo chuan an muhil nghal diak a, an chau ve tlang deuh a nia nge.
Saingura chuan mumang a nei a, a mumangah chuan a ngaih leh thlakhlel em em Khuavelthangi ngei mai chuan Khiang buk hlim nuam tak hnuaiah hian a mal chunga mut tirin a sam a lo chul hliau hliau a.
"Saingur, i va thangrei ta em em ve min ngai ve meuh lo em ni? Kei chuan i lo let hun tur hi ka nghakhlel tak zet a sin. Ka ram ven chhunga awm ni la chuan ka rawn pan vang vang mai tur che hi ania sin" tiin Khuavelthangi chuan Saingura a ngaihthu leh a lunglen thu a lo fah mawlh mawlh a.
"Keipawh hian ka ngai takzet che asin. Mahse hei ka tum loh dan deuhin buaina dangin min nangin ka awm ta sia. Keipawh hian i lalna ramchhung ngeia i bahsam chula i kianga len mawlh asin ka chak" Saingura chuan a ti ve bawk a. Khuavelthangi lai biang tai deuh at leh hmeltha tak chu a thlir vang vang a.
"I mang lama ka rawn inlar chhan tak che ka sawi hmain hei khua a lo var mai dawn alawm le." Khuavelthangi chuan khawvar tur nghakhlel lo tih hriat takin a ti a.
"Engthil nge ni ta, min hrilh tur i neih chuan ka lo ngaithla ange."
"Saingur, in zin chhuah atang khan i nu a bawrhsawm riau maia, tunah pawh khawsikin a chenchilh reng a ni. Vawin chhun chawfak hun lai vel atang khan a khawsik a zual deuha, i pa a mangang deuh tawh a ni. Nangmahni ko turin tlangval pahnih Lungkoh khaw lamah a tir tawh nghal nghe nghe asin. I nu hian hun a nei tam tawh lo a, nangmah hi a la nghak hram hram che a ni. A rang lamin in khaw lamah haw thuai ang che." Khuavelthangi chuan hmel ngui deuh lap chuan a ti ta siam siam a.
"Ka nu maw, ka nu..." a tih rual chuan Saingura chu a thangharh a, khua pawh a lo eng uau tawh a. Buk kawtah chuan a thiante chu rawngbawlin an lo che sang sang tawh a. Saingura khan a harh rual khan a nu hming kha a lo lam chhuak a ni ngei ang Hrangkhuma chuan a rawn pan vat a.
"Thianpa, ngatinge ni? I mang a tha zat lo deuh em ni?" Hrangkhuma chuan a lo ti vat a.
"Ni e, ka mangah ka nu ka lo hmu a, a lo damlo nasa viau mai a. A hnuk a lo chat lek lek tawh bawk a. Keimah hi min lo la nghak hram hram a ni" tiin Saingura chuan dawt phuah zeuhin a nu damloh thu Khuavelthangi hrilh chu a sawi a. Chutah rawn tawng zawm lehin.
"thianpa, ka nu hi ka ngaihtuah riau mai. A rang lamin kan khaw lamah haw vat ila a tha ang. Ka ngaih a ngam tlat lo mai." Saingura chuan a tih zawm zat a.
Sangkima leh Laiveta chuan an tawng chu an lo ngaithla ve vek a.
"Anih chuan engtin nge ruahmanna deuhte i nei em.?" Sangkima chuan a lo ti thuai a.
"Tukthuan hi ei thuai thuai ila. Khaw tlai chhiat hmain khua luh tum ila. Khaw thim hma a khua kan luh theih chuan zanriah ei hma in kan khaw lam panin kan kal lehnghal mai ang chu ka lo ti deuh a." Saingura chuan a lo ti vata.
"Ni e, kal lam aia kan rih dawn avangin kan kal sawt lo zawk dawna. Chuvangin che zung zung ila, zanriah rel hun hma a khua kan luh theih chuan haw nghal mai induh pawn in tlai chhe lutuk lo thei ang." Sangkima chuan a lo ti leh a.
Hmanhmawh taka chaw bar sawk sawkin, an sarep chu phurh turin an buatsaih zung zunga. An inpeih fel chuan rih pawh sawi lek lovin mawng vawm ba ang maiin an kal nghal hmawk hmawk a. An hmanhmawh tlang bawk a, kal lam aimah chuan an kal rei lo zawka. Zanriah rel hun hma chuan khua an lut a. Sangkima chhungte bulah chuan an chanchin chu an hrilh zung zung a.
Zanriah chhum hun vel a nih meuh chuan Saingura leh Hrangkhuma chu kawtchhuahah chuan an ding vang tawha. Sangkima leh Laiveta chu thlah liam turin an awm bawk a. An sakah sa rep leh Buhfai tha hnemtawk tak chu Sangkima chuan Saingura leh Hrangkhuma ipte ah chuan a thun mawlh mawlh a.
"Kan sawi ang khan, sawlai tlang lang thei tawp ber saw pan ding ngar ngar ula. Saw lai tlang pawng saw naktip zan velah chuan riahnan in hmang thei tawh ang. Sawmi atanga sawn hmar lama in herin sawlaia tlangdung rawn in khawh thla saw in pan leh ngat ngata, Zan nga na velah chuan in khua chu in thleng thei mai ang. Kan kar hi a hla mah mah deuh chu a ni e tiru thiante u." Sangkima chuan a tih zawm zata.
"Tlang leh mual tam mahse thianthatna a bo thei hleinem, in awlthawn hmasak berah rawn zin ve ngei ang che u." Hrangkhuma chuan a lo ti ve a.
"Thiante u, engkim avangin kan lawm e. Kan la inhmu leh thuai ang tih ka beisei. Laia nangpawh Ngaihtei nen in inmelh dan kha ka hai hauh lo ania. A hun leh ni intih fel hunah min rawn hriattir ve ang che." Saingura chuan lawmthu sawi pah chuan Laiveta chu a chhaih zui zat a.
Laiveta lah a lo zam bik hauh si lo. "I khuaah te pawh nupa a chhungkaw thar din turin kan la rawn lawi maithei asin" a lo ti ve vat a. An nui ho dar dar a.
"Engtiklai pawn kan khua ah sawn hmun a awm reng ang. Kan kal tawh ange, Damtakin ule." Saingura chuan a ti a.
"Damtakin le, him takin kal ula, i nu pawh chu ngaihtuahawm a nih loh ka beisei e." Laiveta chuan tiin, Saingura te thiandun chu an lan theih chhung chu Sangkima nen chuan thlirin, an kal liam hnu chuan khaw lam panin an let ve ta a.
Episode - 19
Ziaktu: Lallianpuia Khiangte.

Saingura leh Hrangkhuma chu an kal chak bawka, an khaw ram chin an luh meuh chuan zan thum chiah an la kala, zan li na ah chuan an khua an luh theih hmel viau mai. Kawrkam hmun rem chang tui lakna awlsam ah chuan uluk vak lem lovin buk an khawr zung zung a.
Chawhmeh pawh zawng lem lovin kal paha tumbu an lak tlem a zawng leh Sanghal sarep an la neih chu an chhum ta vel mai mai a. Zanriah eikham chuan meilum bula thuin vaibel an zu a. Mahni khaw ramchina awm an ni tawh bawka an thla pawh a muang dun hle mai.
Chutia thlamuang taka an titi siam siam lai chuan Hrangkhuma chu mut chhuakin a lo zema, a men theih tak thlawt lohah chuan buk lam pawh pan lovin a mei bulah chuan a tlu zal ta ngawta. Hrangkhuma a muhil chiah tihah chuan an mei chhem eng chhun phak loh chin atang chuan hmeichhe rawn khuh kharh kharh Saingura chuan a hre zawm nghal zata, chutah Khuavelthangi chu nui ver ver chungin mei engah chuan a rawn lang nawlh a.
Saingura pawh chuan lo nuih let ve sakin, a bula thu tur chuan a lo hui vata. Khuavelthangi pawh chu a taksa si chet chuan a rawn thu a. Saingura kut chu a khal nghal neuh neuha.
"Saingur min hrethiam rawh aw. I bula awm ka thlahlel tawh lutuka, in mut hun pawh nghak zo lovin i thianpa kha ka awi mu ta mai anih kha."
"Chuvang anih chu zanin chu engemaw a hriat ni ka lo ti rilru a. Zan dangah a chauh viau pawn mut chhuah hi a sawi zen zen si lova, mak ka lo ti hman tep alawm." Saingura chuan a thianpa muhil mai mak a tih zia leh a chhan a hriat chuan a ti ve thuai a.
"Ka rinai daihin in rawn thang rei lova, pasaltha meuh pawn nu te ngaihtuah leh ngaih chu in lo pe na hle a nih dawn hi." Khuavelthangi chuan a ti siam siama.
"A ni khawp mai, kan nute hi eng leh kim a kan tana rilru seng reng, engemaw hleka min ngaihtuah em em reng mai an nia. Bakah kan pian hma hawt atanga hrehawm tinreng tuara min paia, kan nausen atanga kan tlangval thlenga min enkawltu an nia. Nu hmangaihna hi chu a lo na em asin. Khawi hmunah pawh vak chhuak ila, mahni rûn sang han kai meuh hi chuan midang zawng aiin nu te hmel hi rilru leh mit hian a zawng hmasa leh ber nge nge thin." Saingura chuan a ti ve malh malh a.
Khuavelthangi chuan Saingura tawng lai chuan mit la sawn thei lek lo hian a lo thlir dauh dauha. Saingura hmela a nu a hmangaihna nasa tak lo lang chhuak pawh chu a hmuh hmaih hauh lo. Chu chuan Saingura a zawl chhan pawh a ti chiang leh zualin a hria a ni.
Saingura leh Khuavelthangi te an titi mawlh mawlh lai chuan an bul velah chuan hmuh theih si lohin Sapui tih hriat tak mai hian an awmna vel chu a rawn hel leh hrut hrut thin a. Chu chuan Saingura awm a ti nuam chiah lo tih chu Khuavelthangi pawn a hre mai a.
"Ka thian rawn hruai chuan i awm a ti nuam chiah lo animaw." Khuavelthangi chuan a ti ta nge nge a .
"Ka thian i ti elaw. Sapui thawm niin ka hria asin kei chuan." Saingura chuan mak tih hmel takin a lo ti a.
Khuavelthangi chu a nui sen sen a, "zanin chu thian ka rawn hruaia, ka hmelhriat tir ang che. Ani pawh sawn belh chian che a chak a nih saw" tihpahin Khuavelthangi chuan a kut a beng thak a, "Pate, rawn chhuak rawh le" a tih zawm zat a.
Khuavelthangi'n chutia a tih zawh rual chiah chuan Sakei lian mangkheng hi an hmaah chuan a rawn tum chhuak tharha. Saingura chuan a rin loh lutuka chutianga Sakei lian a hmu thut chu a phu zuka a bula a silai dah chu a ban nghal rawk rawk a. A silai chuan a tin nghal vat a, Sakei pawh chuan a rawn rum nghal chher chher a.
"I silai kha dahthla rawh Saingur, hlauhawm a ni hleinem. Ka thian rinawm engtiklai pawha min vengtu a nih hi." tihpahin Khuavelthangi chuan Sakei chu panin a chul heuh heuha, Sakei pawh chuan a pang velte chu a lo nul hauh hauh a.
Saingura pawh chuan a silai chu dahthla in Khuavelthangi leh Sakei chu hmuhnawm ti takin a thlir ta ringawta. "Lo kal rawh, rawn chul ve mahla a hlauhawm loh zia i hre mai ang." Khuavelthangi chuan a tih zawm zata.
Saingura chuan a thut hmun atanga tho in Khuavelthangi leh Sakei chu a pana, Khuavelthangi tih ang chuan Sakei chu va chul ve mai a tuma, Sakei chuan a lo ngur chhur chhura...Saingura pawn a kut chu a la let rang kher mai.
"Pate, khatin ti suh. A ni hi nakin zelah pawh i thiantha leh i dam khaw chhuah nan leh a dam chhuah nana in mamawh tawn tur in la nih hi." tiin Khuavelthangi chuan a Sakei Pate tia a koh chu a be siam siam a. Saingura chu a hui leh zauha, Saingura pawn hlau hauh lo chuan a chul ta heuh heuh a, Sakei pawh chuan a lo liak leh duai duai thin bawk a.
Chutia an pahniha Patea an chul nel fe hnu chuan, Khuavelthangi chuan Patea chu a beng thak thaka, "va kir tawh rawh le, zanin zawng ngaihtuah awm ka nih loh hi." a tih zawm zata
Chutia a tih zawh chuan Sakei chu a in her hruta, ramhnuai lamah chuan a zuang phei zak zaka, a kal liam zui mai a.
"Saingur, Patea kha Sakei dang ang a ni lo a, tikha chuan khawi hmunah pawh hmu la i hre hrang tawh ang. Nakin hunah i tan hian a la tangkai dawn a nia." Khuavelthangi chuan Saingura tanga bei pah chuan a ti sap a.
"Engtin chiah nge a tangkai anga, eng hunah nge".
" A hun a lo thlen hunah chiah i hre mai ang. Tunah chuan ka hrilh thei rih lo che, min hrethiam rawh." Khuavelthangi chuan a lo ti leh vat a.
Chutia eng engemaw sawia an titi neuh neuh lai chuan khawvar a lo hnai titih ta reng mai. Inthlahlel tak chuan an hmui leh hmui chuktuahin an in dut vang vang a.
"I nu chu tha takin thlah la. Tawrh nat lutuk loh hram i tum dawn nia aw. I remchan velah rawn ram chhuak thuai ang che. A nih phawt le.." tiin Khuavelthangi chuan Saingura chu a chul heuh heuh a.
"Enge i sawi awmzia, enge ka tawrh nat loh tur chu..." tia Khuavelthangi a zawh leh mek lai chuan a harh hlawl a. Ani pawh chu buk kawtah chuan a lo muhil ve daih mai hi a lo nia. Khua erawh a la thim viau mai thung a. Engtiklaiin nge Khuavelthangi chuan a tin san a hre hauh lo thung a.
Mei rem deuh thuap tawh chu a chhawm tha in a chhem alh tha leh. Chutia mei chhema a kun du du lai chuan an buk hnung lam atang chuan hmeichhe tap thawm a rawn chhuak ta tlat mai.
Chutia hmeichhe tap thawm a hriat chuan Saingura chuan belh chian tumin a pan phei thuaia, mahse a thawm hriatna a thlen hma chu hmeichhia ningeia a hriat chu tah pah chuan a rawn tawnga, Saingura chu ding chawtin a thilsawi chu a ngaithla chiang ta a.
Chu hmeichhe tap chu a insut deuh hlap hlapa "ka fapa duatlai tak chu aw...a rawn haw hunah chuan a va han hrilhhai dawn tak em. Ka fapa rawn hma tal chu min nghahpui ru ka tihpawn nangni ho lah hian 'a hun tawh' in ti tlat mai bawk si. Ka fapa kha vawikhat tal hmuh leh ka duh asin. Ka enchim loh ka Saingura kha ka va han ngai em." Chu nu chuan a rawn ti ta vawng vawng mai a. Saingura a hming a hriat rual chuan a nu aw ngei a ni tih hriain hmanhmawh lutukin a tlan phei rawk rawk a.
"Ka nu..ka nu.. nangmah i ni em? Heta hi ka awm ania. I fapa Saingura heta ka awm ania, hei ka rawn haw tawh asin." tihpahin a nu aw a hriatna velah chuan a au vak vak a. Mahse a thawm hriat erawh chu a reh hmaka, ramhnuai chu a reh tlawk tlawk thung a.
"Thianpa, i tha em? Engthil nge?" Saingura au vel atanga rawn harh Hrangkhuma chuan a dara dawm pah chuan a rawn ti a.
"Ka nu, ka nu aw ka hria ani." tihpahin Saingura chuan Hrangkhuma chu hawi ruai ruai pahin amah pawh en chuang lo chuan a lo chhang a.
Saingura thil sawi a hriat chuan Hrangkhuma chuan muanchan a hun lo tih a hre thuai a. "Thianpa a nih chuan khawvar nghak hman pawh kan nih loh chu, ti teh insiam ila a rang lamin i kal thuai thuai teh ang. Meichher siamsa hian khawvar hma chu min daih thei mai ang. Khaw var pawh a hla tawh chuang lo e." Hrangkhuma'n a tih chuan Saingura hawi â deuh ruai pawh chu a rawn in thing harh vat a.
Hmanhmawh taka in siam zung zungin an khaw lam panin meichher eng ring chuan an kal nghal hlawk hlawk a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 7th, 2017, 9:43 pm

Bung - 20
Ziaktu: Lallianpuia Khiangte.

(Tunlai chu sum lam harsatna ka tawka, Netpack pawh ka thun thei lo. Ka reh rei sia thiante hotspot ka rawn hmang zuai a nih hi. Min lo hrethiam teh u.)
Buarpui khaw kawt chhuah an thlen chuan khua pawh a la tlai chhe lutuk lem lo a. Zanriah rel hun awrh chauh a la ni. Kawtchhuah atang chuan khua an han chuan vang vanga, rei pawh chawl lovin khaw chhung lam panin an kal leh nghala.
Khua an lut chho a, kawtkai velah chuan naupang takngial pawh hmuh tur a bar an awm tlat lo mai. In tin mai chu a reh thuap mai bawk a. Ngaih tha zan lo chuan an kal zel a, lal in atanga zai thawm rawn chhuak lang lang an hriat rual chuan an ding chat a. Saingura chuan "Ka nu" a ti sapa, an in lam pan chuan a tlan nghal hlawk hlawk a.
Lal in chhungah chuan Buarpui khaw mipuite chu an thu khat thap a, in chhunga leng lo pawh pawn lamah chuan an tlim hmur bawk a. Saingura an hmuh chuan kawng an lo kian sap sap zela. Saingura'n a nu ruang bul a thlen meuh chuan a thingthi hnawk a, a mittui tla tur erawh chu a dang hram hram thunga, "Ka nu, ka lo haw tawh asin." a ti sup a, a nu ruang dai thlur tawh chu a kuah vawng vawng a.
Buarpui khaw mipui tu pawh mai chuan an lalnu chu an sun em em vek mai a. Tumah han inhnem tur bik reng an awm lo, an mittui chu an hru leh zauh zauh thin. An lalnu fel leh hmeltha, a khaw mipuite tumah en bik pawh nei lo leh ang khat veka en thin. Mi rethei zawk leh fahrahte pawh a duhsak zawk emaw tih mai tura khawngaihna ngah a boral meuh chuan Buarpui khua chu a ngui hian a ngui ruai mai a ni.
Saingura chu a nu ruang bulah chuan a thu ngawi reng a, a bul vela midang awm ve te pawh chu hre lo ang mai a ni. Tap chhuak tur awm lo khawpin a lungchhia a ni zawk, a hmelah chuan a tuar zia a lang theia a hmel chu en hrehawm khawp a ni. Lalpa pawh a bang bik hauh lo.
Buarpui lalnu meuh a fam takah chuan nihnih lai sunna hun hman a ni a, a ruang an thlah liam hnuah pawh chuan Buarpui khaw nu leh pa, pitar putar leh nula leh tlangval thleng chuan tumah mahni hna tul thawk thei lo chuan ni thum chhung ngawt mai chu lal in ah chuan an la leng khat hnur mai a ni.
Lalnu boral atanga ni riat lai a liam meuh chuan Buarpui khaw mipuite pawn an tuar nep ta deuha, an nun phung pangai an zawh leh theuh tawha, mahse lal chhungkua erawh an la pangai theu mawlh lo a ni. Saingura farnu la naupangte mai chuan a nu aiawhin engkim maia a han che te chuan a nu ngaih a ti zualin a rawngbawl laite chuan a tap ru leh kerh kerh mai thin.
Lalpa erawh mipa puitling tih takah a tawrhna te chu a thup hram hrama, lal in a lo chuangkai apiang chu hmel hlim takin a lo chhawn zel thei a ni.
Saingura erawh a tawng tlem em em a, a thiante pawn an be tawng zo meuh lo. Zan lamah zawlbukah a tawm chawt a, chhun lamah in lamah a tawm chawt thung a ni. Nikhat chu lal in ah chuan lalpa leh Saingura chu an ti ti a.
"Ngura, tlangvala pumpa heti em emin awm tur ani ngai lo e. I nu i ngaihzia leh i tawrh zia chu ka hre na meuh mai, mahse nangber hetia i nu suna i awm reng chuan khaw mite tan pawh a hrehawm lutuk ange. Han in thing harh teh khai." Saingura en pah chuan lalpa chuan a ti siam siam a.
"inngaihtuah chiang la, i nu pawh khan hetia awm tur hian a duh hauh dawn lo che ania. I thiante pawh i ti hrilhhai hnem lulai tawh alawm le." Lalpa bawk chuan a ti leh a.
"Ka pa ram lamah ka zuk vak harh ange aw. Pawi i ti lem lo ang tiraw." Saingura chuan a pa pawh en chuang lo chuan a ti a.
"Chutia i peih te chuan a tha lutuk alawm. Zu vak harh tawh, mahse zu fimkhur la aw. Sa thar lam tui hang hawp pawh a chakawm tawh alawm. Mambawih i u hi chaw lo fun sak ta che, hei a ram chhuak dawn a nih hi." Lalpa chuan a tih zawm zata.
"Buhfai kha zan hnih riak daih tur vel khan han fun bawk la aw." Saingura chuan a silai lak thlak pah chuan a lo ti a.
A silai mu leh zente chu a bawmah a thuna, buhfai leh mutbu leh a mamawh tur ang a lak kim chuan kawngka atang chuan a dak vang vanga, kal tumna bik lam pawh nei lem lo chuan a chhuak zui nghal a.
Saingura chu ramhnuaiah chuan amah chuan a tei kual vela, sa lam pawh a melh em em hran chuang lo. Chutia eng vak ngaihtuah lem lova a kal lai chuan a hma lawka Savawm in hrosa thawm chuan a ti harh zawk a. Savawm chuan rawn beih tumin a rawn pan phei nghal ruak ruak mai a.
Khatia a rilru kawma a kal mawp mawp lai khan a hmalama savawm kha a lo hmu hauh lo maia, savawm erawh chuan a lo hmu lawk kiau mai a ni.
Savawm rawn tlan pheiin a rawn bawh rual chiah chuan a vei lamah a lum sawn a, Savawm chuan a tum a thelh tih hriain a in her vat, Saingura pawn a silai chu tung tha in a chempui chu a phawrha, a ipte chu a dahtha leh te te a. Savawmin a hmai ham thler vek tuma a rawn beih phei leh buan buan chu lo nghakin inring takin a lo ding ran mai a.
Savawm chuan a hmai zawna rawn ham tum chuan ding ur ur chungin a rawn bawh pheia, Saingura chuan a sira lo tawlh sawn zeuhin a chem hriam lutuk mai chuan Savawm hmui chu a lo chhawk hmawk a.
Savawm na tuar chu a tal ruai ruai a, chutihlai chuan Saingura chuan a silai chu lek kangin, "Na tuar reng chuan ka awm tir lo ang che" tiin Savawm chu a kap zui nghal zawt a. A kahna a hnai set sawt bawka, duh thala duhna lai taka kap a ni bawk nen Savawm pawh chu tal zui tur awm lo chuan a let nghal tawp a.
"Engtia han tih chi nge mawni le. Min rawn bei hmasa lo la chuan i nunna ka zuah ngei ang mawle, ti hian ka hnutchhiah mai che angai dawn anih hi." Saingura chuan a ti sap a.
"Khatiang sa lian lutuk han hnutchhiah mai chu a va uiawm awm ve." a hnunglam atang chuan a hriat than em em hmeichhe aw no nalh tak chuan a rawn ti a.
"i va rawn lang har ve, min theinghilh ta a nih hi ka lo ti hman asin." amah pawh en chuang lo chuan a iptepui chhar pah chuan Saingura chuan a ti zui vata.
"Thildangah ka buai lawk a, hei ka lo kal tho hi." Khuavelthangi chuan inthiam loh hmel tak chuan a lo ti ve a.
"Sa kha chu tikhan dah la, Patea'n lo buaipui rawh se. Tirawh khulai ah khuan buk pawh ka sa zo diam tawh ania. Min lo zui rawh." tiin Saingura kutah chuan a kaih zawm nghal zata.
Saingura pawh chuan thil dang sawi lem lo in a zui ve nghal mai bawk a.
Khuavelthangi'n Saingura tan buk a lo sak sa thlapah chuan thu dunin, Khuavelthangi chuan Saingura chu a hnem mawlh mawlh a. Hei tak hi Saingura ram chhuah duh chhan pawh a ni reng a ni.
"Tun tum chu sa i pel lovang a, bukah hian kan pahnihin kan awm char char ang. Thing pawh ka fawm lawk vek tawh. I bulah hian nihnih chhung tal hi chu awm reng ka duh." Khuavelthangi chuan Saingura kut khal pah niap niap chuan a ti a.
"Aw...nangnena run hmun kan len dun a rem lo hi chu a pawi mang teh tak e. Theih nise chuan tunah te hian ka hnuthai atan ka hruai haw daih mai tur che hi ania." Saingura pawh chuan Khuavelthangi pawm pah chuan a ti ve vawng vawng a.
"Khuanu hian hringmi ah hian min lo siam ta se, nangnen hian kan in tawng kher i ring em?" Saingura en chung chuan Khuavelthangi chuan a ti a.
"Kan intawnna tur a nih phawt chuan khawvel tawp thleng pawh kal ngai se ka zawng zel ang che." Khuavelthangi chu lawm tih hriat takin a khi suk a.
"Eng hi nge ropui ber min han hrilh teh. Huai nge, Nangni lasi te nge Khuanu hi ropui leh thil tithei ber ang le?" Saingura chuan hriat chak hmel tak hian a ti a.
"Keini lasi te leh huai in tihte hi thil tihtheih leh ropuina lamah chuan in tluk tlang deuh reng kan ni. Khuanu hi khawvel leh van chung sanga thil awm zawng zawng zinga ropui leh thiltithei ber a ni asin." Khuavelthangi'n a tih chuan mak tih hmel takin a en a.
"Khawvel leh van chung sanga thil awm zawng zawng te hi khuanu siam vek alawm. I hriatthiam theih dan turin kan sawi ange aw.
Khuanu hi he khawvel leh van chungsanga lal ber kan Lalpa a ni a. Tichuan keini lasi te leh huai hote hi a pasaltha leh sipaite kan ni thin. Mahse kan zingah chuan mipakhat hian Lalpa chu paih thlaka, a aia lal nih a duh avangin keini lasi in tih te leh huai hote hi a lama tang turin min thlem thlu ta a, tichuan kan indo ta a ni.
Mahse chu indo na ah chuan a chak loh zawkah kan tang ta tho a, Khuanu chu a thiltihtheihna a tam em avangin kan hneh lova, mahse keini lasi te chuan ngaihdam dilin kan thil tihsualah thupha kan chawi ta a, chuvangin tihian ramsa te enkawltu ah min siama, mahse kan thiltihtheihna tam zawk chu min laksak ta vek a ni. Heng huai hote nen hian van atang khawvelah min paih thla a, leiah hian kan vakvai ta a ni. Nakin hunah kum tam lo in her leh meuh chuan tuna ka sawi zawng zawng te hi in thlahte chuan an la rawn hre chiang anga. Khuanu hi an rawn hrechiang anga, Lalpa tiin an la bia anga, heng huai leh keini lasi te ngei pawh hian kan la hnaih ngam loh hun a la thleng dawn a ni." Khuavelthangi chuan a ti a.
Saingura chuan hriatthiam loh hmel takin Khuavelthangi chu a lo en a, Khuavelthangi pawh a nui suk a, "i tan chuan hriatthiam a la har viau ta ve ang" a tu suk a.
"chhe hei...khua a lo va hniam tawh ve. eirel buaipui vat loh chuan kan thim mai ang." tih pah chuan Saingura chuan thawh mai a tum a.
"Nang chu ti khan lo thu mai mai la, keiman kan rel vek ange. Ka rawngbawl pawh i la ei loh kha." tih pahin Khuavelthangi chu a tho tharh a.
Khuavelthangi chuan a kut a beng thak thak a, an chhak lam atang chuan tleirawl hmeltha tak leh Rawlthar in khai thli zaih mai hi an lo chhuak a. Khuavelthangi chuan Rawlthar zawk chu a be siam siam a, Saingura chuan an tawn chu a ngaihthlak ngun viau pawn enge an sawi a hre thei hauh lo. Rawlthar chu a bu nghat a, a tlan liam nghal a.
Chutihlai chuan tleirawl zawk chuan tuium kherh teuh chung hian Khuavelthangi bul chu a rawn thleng a.
Saingura chu a khuh kharh kharha, chumi rual chuan Khuavelthangi leh a bula tleirawlte chu an rawn hawi vata, chu tleirawlte chuan a rawn nuih ver ver a.
"Hei hi ka nau Thahluani anih hi Saingur." Saingura hmela zawh chian chakna a hmuh rual chuan Khuavelthangi chuan a lo ti vat a.
"E a nih chu, tunhma in i la sawi ngai miah lo a. Thahluani maw, i hmeltha hle mai, i u ai pawn i hmeltha zawk daih a nih hi le." tih pahin Saingura chuan Thahluani biang chu a piai sak a.
"Ka lawm e, kha maw ka tih reng kha maw. Nangaiin hmeltha min ti zawk ang ka tih reng kha." Thahluani chuan intihtheih hmel taka Khuavelthangi en pah chuan a ti var a. Khuavelthangi erawh lungawi loh hmel tak chuan a tum vei bar a.
"Ka u hian a sawi ziah che a, min hruai ve rawh ka tih pawn a phal lo zel a, a awm loh hlanin a rukin ka lo thlir zeuh zeuh thin che a. Vawin pawh hian rawng in bawl sak vek dawn a, buk leh buk thing in lakkhawm vek dawn chuan ka hruai ang che u atia, kan rawn zui anih hi." Thahluani chuan a ti leh zat zata.
"Ka ti lo reng reng, nangmahnin min lo zui ru a nihkha" Khuavelthangi chuan a lo ti thuai a.
Saingura chu a nui hawk hawk a, "Um ka hrethiam ta e. Anih pakhat ve kha le."
"A ni kha chu ka thian anih kha, Singaia a nih kha." Thahluani chuan a lo ti vat a. A tawng zawng leh a nuih zawnga a biang sum khuar kek mai thinte chu a inhmeh kher asin.
"Khawnge a kal dawn a.?" Saingura'n a tih zawh rual chiah chuan Sakhi pachal lian lutuk mai pu chungin Singaia chu a rawn thleng hlawl mai a...
"Chawhmeh tur ka va lak tir anih kha, hei a rawn thleng alawm." Khuavelthangi'n a tih zawh chuan Saingura nen chuan a in chibai tir vel a. Saingura'n Sakhi chu chan darha han khawih mai a tum chuan an lo phal lo nasa mai, Singaia leh Thahluani chuan an pahniha khawihin an tuai let zung zunga, tuibur hmuam da pawh tling lo ah chhum tur leh rep tur nen an peih fel der mai a ni.
An pali chuan Sakhi sa nen chuan puar takin an ei ho a, an eikham chuan meilum chu an thut hual thapa, Sakhi sa an la ei loh chu an ur tlawrh hlerh hlerh a.
Bung - 21
Ziaktu: Lallianpuia Khiangte.

Saingura harh hlawl chuan a bula Khuavelthangi lo mu kak chu a thlir vang vang a, a hmeltha tak leh engkim mai in rem fel tha thlep thlawp tak mai, sawisel tur reng reng a hriat loh chu a thlir dauh dauh, "hringmi i ni lo hi a pawi mang e" a ti vawng vawng a. Dim taka tho in, buk pawn lamah chuan a chhuak phei a, buk kawtah chuan a zi mar ar ar a, a silai leh iptepui la in ramngaw thelh han mai lamah chuan a lut bo zui nghal a.
Saingura ram chhuak tura a in put chhuah atang khan ni thum ngawt a liam tawh a, a buhfai ah kha ni hnih tla bak ni si lo kha pakhat mah a la phai map lo mai chuan mak a ti deuh a, Khuavelthangi bulah chuan a zawt ta a.
"Keiman ka chawm che alawm. Kan awmna hmuna kan buh tui ber ka chhum sak sak char che alawm." Khuavelthangi'n a tih takah chuan Saingura pawn a hrethiam zui ve mai a.
Zingkara Khuavelthangi thawh hma a Vahrit nupa a kah thlak chu a puah mawlh mawlh a, Khuavelthangi erawh chuan chaw a lo chhuang so barh barh thung.
Hrangkhuma ram chhuak pawh a tum ai daiha hlawhtling hma in Sanghal a kap hlauh mai a, tlai lamah sa chhiah dah paha a thianpa tlawh a duh vangin lal in ah a chuang kai a. Saingura ram chhuah thu an lo hrilh avang chuan a haw leh thuai a. Nihnih hnuah pawh Saingura chu a la rawn haw mai si loh avangin an thian dangte sawmin Saingura kalna lam nia an hriatah chuan an chhuak ve rawih mai a ni.
Hrangkhuma, Zacheua leh Suakpuia te Saingura thiantha leh naupan tet atanga amah thlah miah lova kawm ngar ngar thintu te pathum chuan an thianpa chu a nu a sun na lutuk anga, eng emaw te hi a lo ti palh ang tih an hlau a ni.
Ngaw hnuai fai laiah chuan thu chawlin an titi sap sap a, Saingura an ngaihtuah thu te sawiin an khaw nula te an indem fiam pah bawk a.
"Hranga Lungkoh lanu Darhmelthai chu i vei viau a nimaw. Suaka pui hian i sawi zin zia leh ninawm khawpa i rik hlut reng thu a sawi ania." Zacheua'n a tih chuan Hrangkhuma chuan Suakpuia chu a melh rum nghal a.
"A tirah kha chuan nula hmeltha tak chu a nih dawn hi ka ti ve a. Mahse hei a sawi zin dan em em ah hian a phuah chawp mai mai niin ka hria." Suakpuia chuan a rawn ti ve leh a.
"In awih loh leh Saingura in zawt dawn nia. A ni meuh pawn hmeltha a tih thu a sawi ania." Hrangkhuma chuan lungawi loh hmel takin a lo ti a.
"Saingura sawi takah chuan, in rawn haw hnu atang khan pangai taka inkawm theih pawh a ni ta lo kha ania, in zin chhunga in ngaihawm teh lul nen. In rawn haw ta chenga kan in zui ho leh thei meuh lo chu a nih si hi." Suakpuia vek chuan ngaihtuah thui hmel takin a piah tlang pawng lang ruih chu a thlir vang vang a.
"I kal phawt teh ang u, vawin hi a chhuah atang ni li a liamna a ni tawh ania, kan thiana chu khawi maw laiah te hian riltamin a lo awm reng ang tih te ka hlau a nia." Hrangkhuma'n a tih chuan an tho sap sap a, Hrangkhuma hniak ni ngei tur lang fiah vak tawh lo an chhui lai chu an zui leh nghal a.
Hrangkhuma leh Khuavelthangi ten vahrit sa leh sakhi sa rep nena chaw an ei bar mawlh mawlh lai chuan Khuavelthangi chuan Hrangkhuma chu a en vang vang a.
"Vawin chu ka sa duat lai ka kah tir ang che. Ka ran vulh zingah chuan a lian pawl tak a ni nghe nghe." Khuavelthangi chuan a ti siam siam a.
"Chutia i duat lai a nih chuan kut lo thlak ka duh lo, i ui hmel i pe chhe leh dawn em mai. Tin, chutianga sa lian a nih chuan mahni mai chuan phurh pawh ka phur haw thei nang." Saingura chuan hnar ti tihin a lo ti a.
"Ka duat lai chu a nia lawm, mahse hmanni deuh atang khan a zia a thlak a, a sual sawt riau mai bawk nen Patea hian a ngaithei meuh lo mai bawk sia. An pahniha an in hrosak khum reng maite hi hriat a nuam lo a. Chuvangin vawinah chuan i kap ngei ang, a sa phurh kha chu lungkham duh suh i thiante pawh tlai lamah chuan an rawn thleng hman tawh ang." Khuavelthangi'n a tih chuan Saingura chu a meng phawk hru a.
"Ka thiante chu helamah an rawn kal em ni?"
"I tum ai i thang rei ta sia, an ngaihtuah deuh che a, nangmah zawng turin an rawn thawk chhuak a nih kha. Tirawh in siam la sa chu va pel ang hmiang, kan tlai lutuk palh ange." Khuavelthangi chuan a tih chhunzawm zat a. Saingura pawh a insiam zawm ve nghal a.
Khuvelthangi leh Saingura chu ramhnuaiah chuan an in zui a, Khuavelthangi chuan hma hruaiin kal zat zat a, hmeichhia mahnise lasi a nih miau avangin Saingura chuan a um pha lo lek lek thin.
Khuavelthangi kal lai chu a ding chawt a, a beng chu a hma lamah chuan a dawh nghal hra a, Saingura pawn enge a ngaihthlak tih hriat tumin a beng chu a chhi ve nghal kar bawk a.
"Hmanhmawh angai" tih pah chuan Khuavelthangi chu a tlan deuh hlawk hlawk a, Saingura chuan a um ve nghal a. Thui vak lo an kal leh chuan phaitual hmun zawl nuam leh hring dup mai hmunah hian an chhuak hlawl a.
Phaitual hnim no tak tak lo hrin dupna hmun, Saingura te hma lam mau tlawn tluk sawmpanga vel leka hla ah chuan Tumpang chal lian deuh mai leh Khuavelthangi sakei Patea chu in hmatawn in an lo ding a, Patea chuan Tumpang chu a ngur chher chher a, Tumpang lah chuan hlau bik miah lo hian a hnar a lo phit khum ve hlut hlut bawk a.
"An in beih hma sawn kap vat rawh Patea sawn hliam a tuar hlauh ange" Khuavelthangi'n a tih chuan Saingura chuan Tumpang hnung lam atang chuan a veh phei dan dana, a duh anga tha hmun rem a hmuh rual chuan a thingthi a, a silai mu chuan Tumpang zakdawhah tak chuan kah tumin a siai nghal a...chutah Saingura silai chu puak dur a, Tumpang pawh chu a te nghal ruai ruai a, a dinna hmunah chuan a awp rawp a.
Buk kawtah chuan Saingura chuan Tumpang sa chu rep turin a chan mawlh mawlh a, Khuavelthangi leh a thian lasi tleirawl leh rawlthar ten an lasi chakna hmanga buk kawta Tumpang chal sa vawikhat kala an phur zo mai chu mak ti takin a ngaihtuah neuh neuh a. Khatianga sa tam an phur thei kha mak tih loh rual pawh a ni hek lo.
Khatia Khuavelthangi ten buk an thlen sak hnu khan, an chan darh sak zung zunga rep tura an peih fel hmain an tin san ta kha ania.
"Saingur, i thiante an rawn hnai tawh tlat mai. Keini min hmuh tel chuan a tha dawn lo a, nangpawn helai hmuna kan hun hman zawng zawng bakah ka chungchang hrim hrim hi i thiante bula i sawi chhuah a rem lo a nia. Ka kalsan phawt ang che, zan lamah ka rawn tlawh dawn che nia." tiin Khuavelthangi khan a bo san ta kha ania.
Engvanga a chanchin leh chungchang hrim hrim chu midang bula sawi phal lo leh sawi chi loh ti nge a nih chu a hrethiam hauh lova. Mahse Khuavelthangi thu chu zawm zawk a tha tih a hre ve tho a. Midang bula lasi zawl a nih thu sawi kher pawh chu a tulna a hre hek lo.
Hrangkhuma te pathum pawn Saingura zawn pah zelin khua a tlai dawn avangin riahbuk sualna tur hmun rem an melh ve mek bawk a. Kawr ruam lamah chuan hmun nuam deuh, tui hnaih deuha buk sualna rem chang a awm ringin ruam lam panin an chhuk thla a.
"Mei rim chu in hre ve em?" Suakpuia a hmasa bera kal chuan a rawn ti a.
"Ka hria e, thlanglam ruam atanga rawn chhuak a ni ngei mai, fimkhur ang u, kan hlat miah lo ania" Hrangkhuma chuan boruak hip vang vang pah chuan a ti a. An silai chu hmalama lek kawhin fimkhur leh thawm dim takin an kal leh a.
Thui pawh an kal hma chuan an thlang lawk kawr kam hmun zawl zau laiah chuan buk lian vak lo leh a kawta meipui in chhep hluah bula mipakhatin enge maw a sah tlauh tlauh chu an hmu thei a. Mahse a la hlat deuh avangin chu pa chu tunge a nih an hre thei tlat lo. Râl pawh a lo nih theih avangin fimkhur takin an hnaih thla zel a.
Thingkung in phen thla pah zela kalin an hnaih thla zela, an thawm pawh an dim ngang mai. Chupa hmel pawh chu an hmu thei ta, an thianpa Saingura ngei a ni. Zuk pawh mai lo chuan han fiam kual phawt an duh tlat thung a.
"I chem kha lei ah dah la, i awmna hmunah khan bawkkhup rawh" Hrangkhuma chuan a aw ti danglam deuhin Saingura chu a vin fiak thak a.
Saingura chuan an sawi hre lo ang mai chuan a tih ngai chu a ti zui mial mial a. Hrangkhuma run lutuk chuan Saingura bul lawka mau tlawn chu a silai chuan a kap per chhawk a.
"Ka sawi kha i hre lo a mi?" Hrangkhuma bawk chuan a ti vin leh thak a.
Saingura hian ahma tawh khan a thiante pathum thingkung phen chunga an rawn lang thla zuk zuk kha a lo hmu lawk daih tawh a ni.
"Hrangkhum, kha aia hnai khan i kap ngam lo a mi? Cheua, Suakpui rawn chhuk ula ka Tumpang chal kah lu hi rawn en ve teh u. Hranga kha chu tah khan lo in hrosa mai mai rawhse". Saingura chuan anmahni pawh en chuang lo chuan Mauthei lian leng lawng taka a thiante nen an ei tur a chaw chhuan lai mei atanga thur chhuah nawlh pah chuan a ti sam et a.
Zacheua leh Suakpuia chuan Tumpang a sawi rual chuan an rawn tlan thla nghal rawk rawk a, Hrangkhuma erawh lungawi lo deuh chuan a rawn kal hnuang hnuang a, " engtin nge maw min lo hriat leh pek a, kan fimkhur ve hle amaw tia." a rawn ti thla lang lang.
Saingura Tumpang kah lu chu an tuai let vel a, ropui an ti kher mai, chumi hnu chuan a sa chu rep tura buatsaihin an pui nghal sap sap a. Zanriah an ei dawna Saingura'n chaw a lo chhum kep lawk diam an hmuh chuan mak an ti hlawm kher asin le.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 7th, 2017, 9:45 pm

Bung - 22.
Ziaktu: Lallianpuia Khiangte.

Zan a la rei lutuk lem lo nangin zanriah an ei na erawh a rei tawh viau thung a. Buk kawtah mei chu chhem alh hluahin Tumpang sa chu an ur tlawrh tlawrh hlerh hlerh reng a.
Saingura'n mei chhawm tha tura mei lam pana a kal lai chuan an mei en chin piaha mihring ruangam thim zinga pil zuk chu a hmu hman tlat. Mei chu thawm tha hmasa lovin buk lamah chuan a let leh phawt a, a silai zen leh a mu thun sa thlapa a dah chu a va la chhuak a.
"Engthil nge ni?" Zacheua chuan a lo ti vat a. Chhang lem lo chuan Saingura chuan a silai nen chuan mei lam chu a pan phei leh a, a thiante pawh chuan an silai nen an rawn zui zawm ve nghal thuai a.
Saingura chuan mei chu vur belhin a chhem alh tha zual te te phawt a, chutah rawn ding chhuakin lehin a silai chu a lek kang a, an meipui zawn hma lam chu a thlir ta vang a.
"Tikhan zankhua a biruk in tum a nih loh chuan rawn chhuak ula min rawn hmachhawn rawh u." Saingura chuan a ti vin thak a.
A thiante pathum chuan engmah hmu ve hek lo, Saingura hawi na lam chu an silai hmawr chuan an kawh mawl tir ve tawp ringawt mai.
"Tun chiah ka sawi nawn leh ang, in birukna atang khan inrawn chhuak dawn nge? Keiman rawn kal chilh che u in ka rawn phih chhuak dawn che u." Saingura chuan a ti leh chher chher a. Chumi hnu pawh chuan thawm reng reng a awm lo, mihring emaw ramsa emaw tak ngial pawh rawn chhuak an awm lo, a reh tlawk tlawk ringawt mai a ni.
Saingura thin chuan a tuar lo ni ngei tur a ni, a silai chu a dah lawka a chempui phawrhin thim lam pan chuan a phei ta chher chher mai, "mi dawihzep ho kan phih chhuak vek teh ang che u." a ti phei chhur chhur a.
A thiante erawh chuan zui ve lem lovin an awmna ngai atang chuan silai nen an lo veng deuh tawp thung a. Saingura chu thim zingah chuan a pil bo thuai a, chumi hnu lawk chuan mihring na tuar te thawt ri leh Saingura in hrosa thawm chuan ramhnuai chu a luah nghal a.
Hrangkhuma te pathum chuan a ngaihna hre lo takin ramhnuai thim ruih lam chu an thlir reng ringawt a. Chutia enge lo thleng dawn tih nghaka an thlir thap lai chuan an rin loh lutukin Patling pakhat hi mei eng ah chuan a rawn tla thum tawk a, a hnung lawkah chuan Saingura pawh a rawn lang ve nghal bawk a.
Chupa rawn tlak dan en chuan Saingura'n a rawn theh chhuak tih chu phar rual a ni lo.Saingura chuan chupa samah chuan thamin a pawt tho nghal lawp a, mei bulah chuan a kai phei ta lawp lawp a. Saingura chuan Hrangkhuma chu a melh zeuh a, Hrangkhuma pawh a lo bu nghat a chupa leia thingthi nuai hma zawnah chuan a thu tung nghal at a.
"A hmasa berin zawhna ka zawt che anga, tha takin min chhang che. I hming min hrilh la, tu khua leh tui nge i nih sawi rawh le." Hrangkhuma chuan chupa chu a melh rum ram mai le.
"Ka hming chu Thanzaua a ni. Lal Sihthanga khua Chawngrun atang lo kal ka ni e." Chupa chuan Saingura kutthlakna avanga na tuar then deuh sak sak chung chuan a rawn ti a, a nak chu a dawm vang vang bawk a.
"Engti turin nge kan ram chhungah hian i rawn luh a, engvangin nge min enthlak?" Hrangkhuma bawk chuan a ti leh thuai a.
"Min hrethiam la, ka awmna ram chin hi ka hre hauh lo mai. Kan khua in râl kut kan tuara kei chu sal ah min hruai a. An khaw lam pana min hruai laiin ka tlan chhia a, ka theih ang tawka chaka ka tlanchhiat hnu ah min um tawh lo ni a ka hriat avangin an mahni ka tawh lohna tur lam nia ka hriatna lamah ka kal zui mawp mawp a, helai hi ka rawn thleng a ni."
"Nangmahni enthlak tum pawh ka ni lo, in mei khu rim hi hla tak atang ka rawn hria a, ramriak tu emaw an awm anih ringin ka rawn chhui chho tawp a. Mahse ka pawh ngam leh ta lo che u a ni. Ni tam tak chhung chu chaw ka ei tawh lo, ka riltam lutukin in muthil hun nghah mai ka lo tum zawk a." Chupa chuan a sawi zawng pawh chuan thudik a sawi tih hriat takin a mittui a far zeuh zeuh a.
Hrangkhuma chu a ngawi vang vanga, a thiante chu a en kual den den a. An mit a lainatna lo lang chu hmu in a ni pawh chuan a thup duh ta bik lova.
"Ka thianpa rawn chhuak tura a tihlai che khan tinge i rawn chhuah mai loh." Hrangkhuma chuan a ti leh a.
"Ka hlau a, ka rawn chhuah chuan min lo kah kha ka hlau a ni."
"Um a nih tak chu, rawn chhuak tha hle hle la chuan kut i tuar lo nimai tur a nia..." Hrangkhuma'n a tih lai chuan Saingura chuan a rawn hnaih phei a. Chupa chuan hlauh hmel takin a lo en a.
"Min hlau suh nichina ka thiltih vang khan thupha ka chawi e. I nat lutuk loh ka beisei. Suakpui, chaw thing ei bang kan nei em? kan thianpa hi a ril atam tawh em hi maw le." Saingura chuan a ti ta daih a. Suakpuia pawh phe vat vatin chaw leh chaw hmeh an ei bang ang ang te chu Thanzaua chu a rawn chhawp sak ta a.
Saingura te pali chuan lawm vanga mittui tla zawih zawih chunga Thanzaua chaw ei chu an thlir thap a. A chaw ei dan reng rengah pawh chaw mumal in a ei tawh lohna a rei tawh tih hriat takin a hap hian a hap lo chauh a ni. An pali chuan lainat takin an thlir thap a.
"Khati bawrh bawrh chuan i hak palh ang asin, muang chang khan hahdam takin ei rawh tuman kan ei zawh khalh dawn miah lo che ania." Zacheua chuan a bula va thut pah chuan a ti dam dap a.
Thanzaua pawh chuan buk nghut nghut pahin lawmthu a sawi leh a, chaw chu muangchang deuh zawkin a bar ve ta. Saingura pawn khatia mahni pawh in veng hleithei tawh lo kut a lo va thlak mai chu a inchhir rum rum mai.
"Engtia rei nge helai hmun rawn thleng tur hian i thang i hre thei em?" Suakpuia chuan Thanzaua chaw ei lai chu a lo zawt ve a.
"Ka chiang chiah lo nangin nithum leh zan li vel chu a nih ka ring, chu ai pawh chuan a tam mai thei." Thanzaua chuan Suakpuia en zeuh pah chuan a lo ti vat a.
"Chutih chhung zawng chuan chaw ei lo leh hriam engmah nei si lovin engtin nge helai i rawn thlen thei zawk." Saingura chuan a lo tih zawm zat a.
"Tumbu leh balhla leh thil dang ei theih ka hmuh ang angin ka inhnawh puar thin." Thanzaua chuan lian tawka chaw bar leh pah chuan a ti a.
Thanzaua chaw eikham chuan meipui bulah chuan an thu ho thap a, an thian thar chu an hnem pah mawlh mawlh bawk a. Kawm tlang nel tumin an be siam siam hlawma, a hlauhthawnna chu tih reh sak phawt an duh an ni.
"Pawi in tih lem loh chuan in hming leh khaw hming min hrilh ve thei angem." Thanzauvan a rawn tih chuan an hming leh an khaw hming bakah anmahni in sawi na chang reng reng an lo la hre hauh lo tih an hrechhuak a.
"Kei hi Saingura ka ni e, chuan hei hi Hrangkhuma, Zacheua leh Suakpuia an nih hi" tih pahin an mahni chu a kawk diat diat a. " Chuan Lal Hmingthanga khua Buarpui khua kan ni e." Saingura vek chuan a tih chhunzawm leh a.
"In khaw hming leh lal hming chu ka la hriat zawng tak a ni. Ka hriat sual loh chuan nangni hi Buarpui khaw pasaltha pali an sawi fo thin chu in ni ngei ang le. Ka lo tlan thui hman hle a nih dawn hi. Kan ral te chuan helam daih daih ka thlen chu an ring hauh lovang." Thanzaua chuan anmahni pawh en chuang lo chuan a ti a.
"Chutiang em em a pasaltha zawng kan ni hauh lo nangin, i mi fak derna ah kan lawm e. Engpawh nise zanin chu kan bulah riak la, naktukah kan khaw lamah kan haw anga lal hnenah kan luh pui dawn che nia." Saingura bawk chuan a ti leh a. A tawng dan atang chuan a thiante chuan a nihna a thup leh ta tih an hrethiam mai a.
"Lal chuan engtin nge min lo tih ang. Salah min hmang lo ang tiraw." Thanzaua chuan Saingura en chung chuan hlauhthawn hmel takin a ti leh a.
"Kan lal te zawng chutiang mi a ni hleinem, a phal phawt chuan kan in ah kan chhungkaw zingah pawh i cheng thei ang. Kan vai hian unau thar neih hi kan chak vek ania" Saingura'n a chhan hma chuan Zacheua chuan a lo tih khalh vat a. Thanzaua pawh ngaihngam takin an bulah chuan awmin, Tumpang sa an phurh haw na tur bawm rang chu a tah pui mawlh mawlh a.
Tlai ni tlak dawn suar a ni tawh. Kawl pawh a sen phut tawh a, Saingura te pali chuan lal in lam panin Thanzaua chu an chhawm chho bek bek a, a thiante erawh chuan an phur chu an in lamah an dah vek tawh a, Thanzaua chuan an phal lo chung anmahni puih let nan tiin a phurh ve tlat avangin a sa phurh te chu Saingura tih than thin danin in tin deuh thaw ah chuan vawikhat hmeh khawp liam liamin an sem chho bawk a.
An ni thianho hi chuan sa lian tham an kah chuan hetiang hi an tih dan thin reng pawh a ni. Hei vang tak hian khawtlang pawn an fakin an ngaisang hle a ni.
Lal Hmingthanga chuan Saingura te ruala tlangval lo tel ve chu mak ti takin a lal in chhuat laia thut lurh pah chuan a lo thlek vang vanga, Saingura farnu lal fanu pawh chuan a lo en leh zeuh zeuh thin bawk a.
"Hei khawilam tlangval nge ni in rawn chhawm haw tak nawlh mai le. Nangni pui hi sal te hi in rawn hawn ringawt pek em ni? Sal neih ka rem ti lo tih inhriat kha." lal Hmingthanga chuan a lo ti khur khur a, chutihlai chuan Saingura erawh a hnu deuha lut anih avangin a phur nghatin a lo thu fel chiah a.
Hrangkhuma chuan Thanzaua an tawn dan leh a chanchinte, râl lak atanga tlanchhia a an intawn dante chu lal chu a hrilh zung zung a. "Lalpa i khua ah hian a tan hmun a awm leh awm loh a hre duh a ni e" Tiin a thusawi chu a tlip zui a.
Hrangkhuma'n a sawi lai chuan lalfanu chuan lainat tak hian a lo melh leh zeuh zeuh thin bawk a.
"A lo nih tak chu le, i thil tawn leh paltlang te chu a turu hle mai. Tlangval tum ruh tak i nih dawn chu le. Ka khuaah hi chuan a duh apiang tan hmun a awm reng alawm. Mahse tlangval i nia, mahni a han parawl ngawt chu mawiin ka va hre lo ve." Lal Hmingthanga chuan a tih zui zat a.
"Lalpa rem i tih chuan amaha a in benbel theih hma chu kan in lamah ka lo haw pui mai dawn em ni. Unaupa neih hi ka chak viau thin asin." Hrangkhuma chuan a lo ti let thuai a.
"Um, chutiang i tih theih chuan a tha lutuk ang chu. Mahse ka fapa nakin lawka ka lalna rochun mai tur hian enge maw a ngaihdan ni ve le. Han sawi ve reng reng se la mawle" Lal Hmingthanga'n a tih chuan Thanzaua chu lalfapa tur awm ang zawngin a hawi kual ruai a.
"Chutia ka thiana'n a haw pui theih te chuan a tha lutuk alawm ka pa. ngaihdan tha zawk ka nei lem love" Saingura'n a rawn tih chuan Saingura lam chu Thanzaua chuan a hawi nghal vat a mak ti takin a en hau ringawt a.
Lalfapa a lo ni reng chu mak a tih bakah a hma zan leh an kawng kal chhung mai pawh ni lo, lal in an thlen hnu thleng pawha a inthup thei chu mak a ti a ni.

Bung - 23
Ziaktu: Lallianpuia Khiangte.

Thanzauva chuan zawhna mit meng nen Saingura chu a en a, a hmela mak tihna pawh chu Saingura chuan a hmu thei bawk.
"Ni e, kei hi lal fapa ka ni e. Kan hrilh nghal loh vang che khan min hrethiam dawn nia. Tin, Hranga te chhungkaw zinga chen ve pawh chu nangma thutlukna ah a in nghat tih hria la." Saingura chuan nuih seih pah chuan a ti a.
"Ka dinhmun chu in hre veka, ka tan chuan haw na tur in leh khua a awm tawh lo a. Lalpa nangin i khua leh tuia min pawm theih chuan ka tan chuan chubaka thu lawmawm dang a awm lo e. U Hranga'n chutia a in huam phawt chuan an chhungkua chu ka fin ve rawih phawt a ni ang chu." Inthlahrun hmel takin Thanzaua chuan lal leh midangte hma ah chuan a ti a.
"A nih chuan tlangval tha tak ka khua leh tui muan tur ka nei belh leh ta zu nia. He khuaah hi i in ang chiahin ngai la, khawtlang mipuite tan thil tha tih i tum tlat reng dawn nia. Khai le in ril pawh a tam tawh ang ka ti, i in thar lamah chuan zu haw tawh rawh u." Lal Hmingthanga chuan nui sangin a lo ti a. Hrangkhuma te thian ho leh Thanzaua pawh an in zui chhuak nghal a. Hrangkhuma chuan a chhungte bulah chuan sawi tur a ngah ve hle ang le.
Zan riah eikham chuan Saingura pawh Zawlbuk lam panin a chhuak nghal a, a thlen hma chuan Zacheua nen in tawkin an kal rual nghal a.
"Thianpa, i Sa lu i hawn lo ringawt chu ka ui mang e aw. Zaninah te pawh kan lawm hut hut mai tur hi a nia. Nangman i duh loh pawn keini tal min hawn tir tur ania, bang lai mawitu ah pawh a ropui dawn teh lul nen." Zacheua chuan Saingura Tumpang lu ram lama an hnutchhiah tak chu ui tak hian a ti vawng vawng.
"A ni tak asin mawle, eng rilru nge maw ka put ni. A leh pekah chuan ka pe tawh ngei ngei ang che" fiamthu hlut pah chuan Saingura chuan a lo ti a. Mahse a rilru chuan a hawn loh chhan chu a ngaihtuah zui neuh neuh a.
Tumpang a kah hnu lawk khan, Khuavelthangi khan a lu tal hi chu in bukah hian min hnutchhiah dawn nia tiin a chah a nih kha mawle. Kha vanga a thianten hawn an tum pawha hawn ta lo kha a ni reng bawk a.
"Thianpa i tha maw?" Saingura ngawi ta vang vang chu ngaihtha zan lo in Zacheua chuan a zawt a.
"Tha e, ka rilru ka lo kawm alawm mawle." Chutihlai chuan Zawlbuk an thleng fel der tawh a.
Zawlbuka Saingura ten thut hmun an rem ve lai chuan Hrangkhuma chuan an khaw tlangval thar Thanzaua chanchin chu a lo sawi mek bawk a.
Hrangkhuma thusawi chu zawlbuk tlangval leh val upate chuan an ngaithla thap a, a sawi zawh chuan an hmelah chuan an lainat zia a lang fiah hlawm kher mai. Chibai pahin an be tlangnel luam hlawm a.
"Khawnge kan tlangval thar chu in buan lam te hi a lo thei phian lo maw, tumaw ber khan han infiam pui ula mawle." Val upa chuan in a tih zawh rual chuan tlangval pakhat chu a lo ding chhuak nghal vat a. Thanzaua pawn hnial lem lovin a hmachhawn ve mai bawk a, harsa ti takin tlangval pahnih chu a hneh ve mai lehnghal bawk a. Val upa in tawk a tih tawh hnu chuan nula rim turin tlangval te pawh an chhuak zui sap sap a.
Saingura leh Zacheua chu veng hmawr lam nuthlawi Siami fanu nula rim tumin an in zui chhuak a, Hrangkhuma leh Suakpuia erawh thurual pui hman pawh ni lovin an bo leh daih tawh.
Saingura te pawh Nuthlawi siami fanu Thangi rimin, in leng dang anni pahnih bak an awm loh avangin chhuat laiah chuan an bawk zuar a. Zacheua chuan an ramchhuahna velte chu a sawi zat zata, Saingura erawh Zacheua dawt sawi tel zeuh zeuh thinah chuan a lo nui suk suk a.
Thangi hi Buarpui khaw nula hmeltha chu a ni hauh lo a, chuti em em a chhia pawh a ni lem lo. Zacheua nen hian kum hnih lai chu an in lawm ve tawh nghe nghe a, Hmangaih biahthu pawh an thlung dun ve ran tawh a ni.
"Hei in zarah sa hmuihmer ei turte kan neih phah ziah leh nghal. A zahthlak lam lam pawh a ni mah mah e. Nangni hi zawng kan nufa tan hi chuan in hlu teh e." Thangi nu chuan vawkchaw hawlh rawk rawk pah chuan a lo ti a.
"Nu Siami ta mai mai thin hi a...heng te chu kan tih tur alawm. Hetia midangte puih leh chhawmdawl kan ngaihna lai apianga kan phak ang tawka kan in tanpui tawn zel thin vangte hi alawm kan khaw nawmna." Zacheua chuan a khabe thiam zeta sepin a lo ti a.
" A ni tak asin, a nei nung leh thei zawkte pawh hi chapo leh mahni tang hma chauh hai lova, a thei ve lo leh harsa zawkte kan in chhawm dawl zel hi chuan kan khawtlang nun hi nasa takin a chawi nung asin. Chu lo rengah pawh Thianpa Cheua hi chuan engpawh tiin hawn se Thangi hi chu a hmaih phal lo hrim hrim." Saingura chuan a thianpa chhaih pah chuan a lo ti zeuh a. An zavai chuan an nui ho leh dar dar a.
Thangi pawh duhber in leng nei ta chu a titi siam siam reng a, Zacheua chuan ngaihnawm ti tak hian a lo ngaithla veng veng a. Saingura te thian dun chuan A khat tawkin an ram chhuahna a an thil tawn thenkhatte an sawi leh zeuh zeuh thin bawk a.
Chutia hlim taka an in kawm ho lai chuan Thangi te kawngka ah chuan rawlthar pakhat hi a rawn tei lut nawlh a. Thangi chuan a lo be thuai a.
"U Saingur, i pa in a rang lama hmuh che a duh a, nangmah ko tur che in min rawn tir a." In thlahrun hmel takin chu rawlthar chuan a ti a.
"E i va tlangval ve. Ka pa chuan engatan nge tih te a sawi em?" Saingura chuan thawh pah chuan a ti ve zat a.
"Sawi hran lo, a ranglamin a ti ringawt a."
"A nih chuan tirawh i chho ang hmiang. Eng thu leh hla tak niang maw...a nih thianpa ka lo han haw hmasa mai ange. Muttui mangtha u aw Thangte" tihpah chuan Saingura leh amah rawn ko tu chu an chhuak zui nghal a.
Saingura'n in a luh chuan a pa leh a upa te ho chu an lo thu khawm thap a. Engemaw tak thu rel an nei tih chu an hmel leh awmdan atang chuan Saingura chuan a chhiar thiam nghal thuai a.
"Min mamawhna i nei em ni ka pa." Saingura chuan a pa bula thut pah chuan a ti nghal a.
"Um hei thu pawimawh rel tur a awm a. Tinge i lo chhuah bo daih thin, nang chu nakin maia lal ni tur i ni tia rorel engkimah hian i tel ve a tha angai ania." Lal Hmingthanga chuan a bula Saingura lo thut rual chuan a lo ti nghal a.
"Ka pa, tlangval te kan ni bawk alawm mawle, tlangval a pumpa mahni in a tawm reng te chu na neih si loh chuan a mawi hleinem mawle. Eng chungchang nge in lo rel a." Saingura chuan atih zawm zat a.
"Chutih teh chiama thu pawimawh phei zawng a ni lem lova, hei zanin khan tuikhur veng lam a mi Sailiana pa in a sial no hruai lai a rawn haw loh thu a rawn thlen a. Chu chu engtia bawhzui tur nge niang tiin ka upa te nen hian kan lo sawi ho a. Naktuk lamah tlangval pahnih thum velin zuk ngaihven se tiin kan rel a ni." Lal Hmingthanga chuan a ti dap dap a.
"Ngura, lal fapa i nia hetiangah chuan nang chu hmatheh loh tur i ni nameuh nangin, kan khaw tlangval zinga kan chhuan vawr leh sa chhui thiam ber i ni miau si a, i pa rem ti lo chung kan han ring tawp mai che a nih hi." Lal upa zing a pakhat chuan a lo ti ve charh charh a.
"Chutiang thilah lal fapa leh fapa lo te thliar ngai a ni em mawle? Buarpui khua leh tuite himna leh muanna a nih dawn chuan thih pawh ngai se ka thi hmasa tur ni a. Chutih lai kara se bo zawng tura tih awm i ni lo in tihte chu a. Ka pa hi zawng min ngaihtuah leh lutuk thin a ni. In tih ang chuan naktukah ka thiante sawmin tukthuan eikhamah kan zu thlithlai ange." Saingura thusawi danah chuan lalfapa a nih vanga tihbuai an lo hlau chu a lungawi zan lo tih a hriat hle.
"Chuti a nih chuan nang leh i thiante chu kan ring leh phawt ang che u chu." Lal hmingthanga pawh chuan a lo ti ve a.
"Ni e lalpa, Saingura hi duat in awl duh viau thin mah ila, a ni lo hi chu kan muan pui tak tak lo chu a nih hi mawle." Upa Sawimawia chuan a lo ti ve bawk a.
"Khawi lam ram ah nge Sailiana pa chuan a sial te chu a thlah tir a sawi em?" Saingura chuan a ti leh a.
"Sawmi Awkte ngaw thlen hma a phul hmunah khan a ni awm e." Upa Sawimawia vek chuan a lo ti leh a.
"Chuti a nih chuan a hlat lem loh chu. Ka thiante pawh ka zawlbuk an lawi kim tawh ang, ka zu fin ve tawh ange...min mamawhna dangte i la nei em ka pa." Saingura chuan a pa en pah chuan a ti a.
"Tun atan chuan nei rih love. Zuk lawi tawh rawh khai naktuk lama i hruai turte pawh hrilh thawi hmasa deuh la a tha ange." Lal hmingthanga chuan a fapa chu chelh zui lem lovin a ti a.
"Awle ka lo hrilh dawn nia. Lo mangang suh u, Sailiana pa sial te pawn eng em an ti lo ange. Muttui mangtha ule." Tiin Saingura pawn zawlbuk a pan nghal a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)