MIHRÂNG LEH SAHRÂNG BY LN Kima Guite BUNG 1-28 (complete)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
LN Kima Guite
Posts: 63
Joined: August 28th, 2017, 7:07 pm

MIHRÂNG LEH SAHRÂNG BY LN Kima Guite BUNG 1-28 (complete)

Unread post by LN Kima Guite » November 22nd, 2017, 5:43 pm

[*][*]MIHRÂNG LEH SAHRÂNG
22730235_1431296696965870_2087162631025460455_n.jpg
22730235_1431296696965870_2087162631025460455_n.jpg (34.29 KiB) Viewed 15263 times
BY:LN KIMA GUITE



MIHRÂNG LEH SAHRÂNG


BUNG 1-NA


(Thiam leh thiam lovin Story ka han thai kawi ve leh ngawt chu a nia,in ngaihnawm tih zawng a ni em ka hre lova,A ngaihnawm loh deuh pawhin min lo chhiar sak hram hram a ni ang chu.Thu thiam tak ka ni lova,chhiar a har deuh a nih pawh in ngaihdamna nen min lo chhiar sak a ni ang chu,cover photo ka duh dan tak a min siam saktu Thazela Hmar chungah lawmthu ka sawi mawlh mawlh e)

Vahsan lak lai a ni a,Vawmbuk khua pawh pawh mipa ramtang rual tawh phawt chu ram lamah lo vatin an liam nitin a.Dai hnai neih kum a ni a.lovat ramriah ngai lovin leh langin a an vat hlawm a.Mual hrang hrangah lo vat thawm a ri tluar tluar a,Naupang pate lovat z'ui a feh ve au lauh lauh thawm te pawh hriattur awm deuh reng a.Thankunga pawh ngawi rengin a mah chuahin lo a vat mial mial a.pahmei niin an in danna a la rei lutuk lova ,Rual pawlloh hlauhvin ni tla vanvuaiin nitin a bung tlauh tlauh thin a.Hah lah a hah nangiang mai.Pa taima leh chak tak mai a ni a,mau chu lian emaw te emaw vawkhat sah ah a hmang miah miah mai a,,Chutia mahni chauhva lovat a bun mek lai chuan thil rimtui tak pangpar rimtui tak ang mai hi boruakah a lo leng chem chem mai a,nula hlim tak a nui ri har har hi a hre bawk a.a han ngaithla vang vang a a hriat chhunzawm lem loh a vangin a lo vah chu a chhun zawm leh ta a,Thil rimtui tak leh nula nui ri hi ramvah na velah te pawh a Tlangval lai tang a hre fo tawh thin a ,mak a ti viau nghe nghe a ni.

Chhun chaw fak a hun chuan Thankunga chu a chawfun dahna lam panin a chho va,a Chaw fun chu thetin a ei nghal mawlh mawlh a.chhun chaw fak kham a vaibel a zuk vang vang lai chuan mihring mangang au thawm "min pui ru" tia au vau vau ri chu a hre ta tlat mai a.Rang tak a thovin uluk zetin thawm lo chhuahna lam hriat tumin a beng an chhi vang vang a.a lo vahna ral ah chuan "Min pui ru " tiin a rawn au leh ta vau vau a,A Chempui leh muzuk fei chu lain rang takin thawm lo chhuah na lam pan chuan a tlan ta nghal a.A lo vahna sir kawrte per kaiin mualdung a han chuang chhuak chu ramsa rum hum hum thawm leh mihring mangang tak a au thawm chu chiang takin a hre thei a.mualdung ah chuan tlan thla zelin "Lo mangang reng reng suh u.ka rawn tlan a nia" tiin a au pah zel a.thlang deuh lawk ah chuan Mangtheuva te pafa ho leh savawm lian zet mai chu an lo in hmachhawn ran mai a.Mangtheuvate pafa ho chuan an hmanraw neih ang ang nen a in hrosa chungin leh maute khawng riin Savawm chu hnawh tlan an lo tum a,an awrawl tawp tawpin an lo au va.Savawm lah inhrosa dum dum bawk a.



Thankunga zuk thleng thla chuan "Lo zam reng reng suh u.Keimah Liannghaka fapa Thankunga ka lo kal e" tiin a hming an chhal lauh lauh a.Magtheuva te pafa awm na a zuk thlen thlak chuan Mangtheuva chuan "E ,khai Kunga kan va lawm tak em" tiin an lo thlamuanpui ve khawp mai a.Savawm chu a ding ur ur thin a.Mangtheuva te pafa chu tumah tlan chhe duh lova an tanrual tlat a vangin Savawm pawh chuan a bawh mai ngam bik lo a lo nia.Thankunga chuan Savawm chu hnawh tlan tumin "Hei hei ,Vawma kiang rawh i eng pawi nge kan sawi a.mi i beih tak mai" tiin a fei chuan Savawm chu chhun an tum zuau zuau thin a.Mangtheuva ze pafa pawhin thawm na thei ang ber lo chhuahin an ri chel chul mai a.Savawm leh Thankunga chu an han in melh ren rawn a.Thankunga mitmet huaisen leh zam hauh lo a hmuh chuan Savawm chuan cho mi ah a ngai lo nge chik nghur nghur chungin a inher a thlang lam pan chuan a chhuk ta tuang tuang a.Savawm a kal bo ta tih ah chuan Mangtheuvate pafa chu an thu zawi hnawk a.an thaw hle hle mai a.



Mangtheuva chuan "Kunga rawn kal lo la chuan keini pafa ho chan chuan maian chan pawh a tluk dawn lo a nih kha.a lawmawm thin hle mai " a han ti tham tuak a,aw rawl tawp tawp au anni bawk a an aw te pawh a chhang tuak mai .Thankunga chuan "Mai mai kei a lo kal in eng kawngro a su hleinem in pafa ho in tang rual em a Savawm meuh pawhin a ngam lo che u a nih kha le" in ngaitlawm tak in a lo ti a.Mangtheuva vek chuan "Kan pafa ho mai kha chu min hlau lo nasa a nih kha,nang i lo tleng a mihuaisen chu Savawm meuh pawhin a hria a nih kha i melh zam der mai lawm " a lo ti leh thuai a,Mangtheuva fapa upa zawka Kapphunga pawh chuan "Khati khawp a awrawl nen kan beih pawhin a kal sawn duh der si lova,I han hnawk kiang thei mai kha chu mak tak chu a ni." tiin Thankunga chu a lo fak ve luam a.


Chutih lai chuan an thawm hre phak midang panga lai chu an rawn thleng thla ve bawk a.Silai keng pawh pahnih an rawn tel a."E khai in lo thlaphang em ?Engthil nge nita.Hei kan rawn tlai a ni maw"an rawn ti sawk sawk a,Mangtheuva chuan "Kan chhun chawfak zo kan han bung leh tur chu Savawm lian zet mai nen kanin tawk thut mai a.Min beih tumin a in hrosa dum dum mai a,awrawl nen kan theih ang ang a hnawh kian kan tum pawhin a in saseng duh hauh lo mai a,mahse hei Thankunga a lo thleng thla a,a han vau deuh chhar chhar a vau zam ta der mai a.khu lamah khuan a liam thla ta a nih kha " a han ti a.A lo kal thar zing a mi Buanga Valupa chuan "Kunga chu tluk loh rim i nam thin mang e,i tlangval lai a ta tawh mi leh saah el rual i ni lo ve"tiin Kunga chu an fak zui mawlh mawlh a.Kunga chuan " E khai Buanga thin hi aw,keini teh lul hi tu el tham mah kan ni loh hi"a lo ve thuai a.

Silai keng te an awm ta bawk a.chu Savawm chu chhuizui tha anti a,zalen tak a an awm tir chuan lovat tu emaw ber chuan tawng fuh lehin hliampui tawrh leh nunna hial chan theih a nih a vangin kah hlum ngei tumin an chhui zui ta a.Silai keng pakhat zawk Saipuia chuan "U Thankung kei aiin i ramvachal zawk ang,Hei ka silai hi nangin keng la tha ang" tiin a Silai chu Thankunga kutah chuan a han hmeh bel chawt chawt a,Thankunga chuan "E ni love,Saipui keini te chu Pasaltha hnungzui awm chauh a lawm kan nih le,Valupa Buanga nen hian han chhui ula,in kaihza kan lo veng zawk ang e" tiin Saipuia chu a lo hnial a,Saipuia chuan "U Thankung i kutah he Silai hi a awm hian a thlamuan thlak ber tih ka hria lawm" a tih tlat a vangin Valupa Buanga pawhin "Thatei pa keng mai teh nangtluk a keng awm kan awm chuang love" tiin Kunga chu a lo nawr ve bawk a.mi dang pawhin an lo aw pui tliar tliar bawk a vangin Kunga chuan Silai chu lain zei leh hmangthang tih hriat takin an lek vat vat a.Savawm hnu chu an chhui zui ta nghal a.



Rei pawh an chhui hmain an thlang fing khat awm lekah Savawm chu kawrte ah lung a lo hai but but lai chu an chu nang ching a.Valupa Buanga chuan "Thatei pa nang upa zawkah zuk veh hnai rawh le.engemaw thulah i hnung ka lo dawl ang e" a han tih chuan Kunga chuan hnial a han tum uk a,a hnial hneh dawn chuang lo tih hriain thawm nei hauh lovin Savawm lung hai ruk ruk lai chu a veh phei ta than than mai a.



Savawm lah chu a vehtu an awm tih hre hek lo lungmuang takin lungte chu a hai let buan buan a,a thawm ri nen a mah a lo bengngawng deuh nen awlsam tein Kunga chuan a kah nuam tawk vel chu a thleng phei ta thuai a,a hma hnimbuk chu keu dak dakin tlem a hanin siam rem leh deuh va.Silai cheng chu muangchang a kauvin an nghak leh det a.Savawm lung hai zo lo dak chhuak leh chiah chaldarah tak chuan a kap ta siah mai a.Savawm chu hniak phawi miah lovin a thal nghal tawl mai a.Valupa Buanga pawh rang tak a lo thleng pheiin Savawm chu a chet leh vaih chuan kap mai thei turin a Silai chuan a lo tin ran a.Savawm chu a chet leh mai tak loh vah chuan an zu pawh thla ta thuai a.Rangtakin Valupa Buanga chuan a chempui phawrhin Savawm kaihza tha chu an chhat zung zung a,chutah "Thatei pa hei phuaivawm lunglian i thal ta der mai ,hlado te i chham dawn lawm ni" a han ti a.Thankunga pawh chuan phur fein "A ni teh tak e,Khai aw" tiin hlado chu a han chham vang vang a.Silai chu an kap puak dun ta dur dur mai a.


Mangtheuvate ho pawh chuan hlado chham thawm an hriat chuan Kungate chu an zu hlawhtling ta ngei tih hriain phur zet a haw haw chungin an rawn pit thla zung zung hlawm a.Savawm chu an han bial laih laih a.an lawm leh hlim lutuk chu an ri le lu mai a,Saipuia chuan "kha maw ka tih reng kha U Thankunga pasalthat zia hi ka hre chiang tlat a lawm" a han ti larh larh a.midang ho pawh chuan Thankunga chu an han fak sap sap a,Mangtheuva chuan a sum a han teh a.Sumruk zet mai a niin a thau mum kang mai a.



Silai ri leh hlado chham ri hria in an zau hnai mi eng emawh zat chu an lo tlan khawm bawk a.ti chuan tumah in thik leh duham bik awm lovin Thankungate zau ho chuan Savawm chu an chan ho ta laih laih a.Savawm lu chu rawlthar hoin zawnin hlim takin losul haw hun hmahret in an haw ta dam dam a.Kal kawngah mitih phawklek hlauin thawm nei lo thei ang berin an inzui diah diah a.Losul haw hun hma a eng emaw vang a haw hma a ngaihchang hian thawmbengchheng neih leh kuk ruih ruihte hi midang ti phawklek thei a nih a vangin upa duh loh a ni.

Zanlamah Thankungatein ah chuan Salu lawm an lo chuangkai tak tak a.a thenin zubel an rawn pulut bawk a.zu zuk pahin an thawm ve laih laih a.Salu in lawmpui liam liam hi chin dan mawi tak a anneih a ni.Thankungate kawmthlangpa Kapchuaia chuan a zu bel put chhuat lai a hun tawrh pahin "Kawmchhakpa ,Phuaivawm meuh i han tlawm chu ,hei ka zu bel ngei hian kan lawm ang chu,Khumfa mu hek suh a neitu mu hek suh tih ang mai in zanin chu i han ri tlut tlut mai teh ang aw" a han ti thur thur a,Thankunga chuan "E, khai Kawmthlangpa nge nge zawng tluk loh rim i nam thin mang e,khawnge Kawmthlangpa zu chu a thum tui em kan zuk teh reng ang aw" a han ti a,Kapchuaia zu chu a han zuk vang vang a,"E khai Kawmthlangpa i zupui chu a thum narawh e,chhawlhal a thawi dam sawng sawng mai lawm"a han ti a,Zu an han kai deuh chinah phei chuan an lung leng a kai tho va,hla an han hril a,Patar ho chu chhuat laiah an lam darh darh hlawm mai a.Kutni vangthla ah lah tlangval leh nula rual zingah lamna hmun chang ve thin hek lo le,Salu lawmna hi patar deuh ho in lam an thai hmun ber a ni a,a nuam an ti thei hle thin a ni.


Thankungate hi unau rual tak pakaw zinga milai niin a pa chu Liannghaka a vanglai chuan Dopui pasaltha chhuan vawr ni thin a ni a.an in danna a la rei lo va.A tlangval lai chuan Thankunga hi ramvachal leh sa la thei tak a ni a,Nu leh pa thlazar hnuai a tang a nupui fanau te han in dan pui chu a kovah engkim a lo in nghat a.an chhangchhiat vanglai tak mai a lo ni bawk nen a buai thei kher mai a,ramvah lam reng reng a ngaihtuah hman ta lova.a ma pualin silaite a lo nei lo bawk nen pate Silai hawh reng a lo remchang lo bawk nen ram lamin a lung len viau thin mahse, nupui fanaute rualawh hlauvin nitin lo lam leh in lamah a buai a,ramvah leh ramchhuah a bansan ti tih der mai a ni.a mah hi pavantlang pian fel tak huaisen leh tlawmngai thei tak a ni.annu Rualthani pawh hi hmeichhe diau lo tak a nulat lai pawh a zanah pawh a mah chauh va tuichawi ngam hlauh nei lem lo a lo ni ve bawk a.Vawkhat pawh an thingphurnaah kelral uichal tiat lai tur hi a chek hlum der tawh bawk a.A thiannu Chawngi nen an thingphur chu ,an thingfawm an han in then chu a thlanglamah a thiannu chu a chhuk a,rei vak loah chuan a thiannu Chawngi chu hlauin a te ta teng tung mai a,Engsa mawni rum ham ham thawm a hre bawk a.Rualthani chu rang tak a zuk tlan thlain a thiannu leh Kelral lo in hmachhawn ran mai chu a zuk hmu a.A thiannu Chawngi hlau thlabar lah a lo khur hlawk hlawk mai a,Rualthani chuan Kelral chu "Hei hei ,tlan rawh tlan rawh "tiin hreipui lek chungin hnawh tlan an tum a,hlauh nachang reng a hre der lo va,Chu Kelral lah chuan anni hmeichhia mai mai chu lo hlau bik vak hek suh ,a awp hniam suai suai a Rualthani chu a rawn zuan ta zawk mai a.Rualthani lahin hlau hauh lovin mikhap miah lovin a lo enkar mai si a,chutia Kelral in a rawn zuan tak zawk ah chuan a hreipui chuan a tha tawpin a lo chek ta nghek mai a.a vanneih nge a tum reng Kelral tukkhumah tak chuan a hreipui chu a bur ta va mai.Kelral chu a tla hlawm tawp mai a.Rualthani hreipuiin a thluak pawh hawk khawp a a cheh miau a vangin che leh tur a awm ta lo a ni.He tih lai hian an velah chuan Thil rimtui tak pangpar rim tui tak ang mai hi a lo nam chek chek a.Rualthani hi Nu sehhel ve tak leh rorum tak chu a ni ve hrim hrim a ni.

Hun a kal zel a,kum tluan a ,a sur a sa hnuai a thawkin favang hun nuam a liam a, Vawmbuk khua chuan buhsengte zovin vahsan lak pawh a hun leh dawn ta reng mai.Thankunga nupui Rualthani pawhin an fa palina tur a pai puar lah tawh a.cheh mai thei reng hi a ni tawh a.a mah a hriselin a chak tha bawk a.harsatna em em nei lovin nauhrin pawh a hun dawn ta reng mai.



Zan khat chu khua a lum hle mai a.mitin mai chu leihkapuiah te thlifim dawngin an thu fer fur hlawm a.boruak uap churh mai chu a thaw ipik thlak kher mai .Tlangval ho pawh zawlbuk chhungah awm peih lovin tuallaiah an thu bawr laih hlawm a,Lalin a lawi upa ho pawh pawnler ah lo thu chhuak sap sap a,Upa Dopawnga chuan "Kan khaw awm dan mai mai chu aw,ngaihte pawh a ti tha lo rum rum a lawm mawle,he ti tak mai khua han lum mai chu " a ti chuar chuar a,Upa Huala chuan "Engthil emaw tak zawng a thleng chawk ang maw le,ka tiril hian chu chu min hrilh tlat nia" a lo ti ve bawk a.chutah Daiah Sapui a hram ta hum hum mai.Sapui chuan Vawmbuk khua chu a vel a vel mai a,Upa ho chuan "Chule ,Mihrang a piang dawn e,tu nge nau nei hnai awm reng reng le" tiin an in zawt nak nak a,Tlangaupa Lutbuaia chuan "Thankunga nupui Rualthani khuan tlaiah khan nau a vei tan an ti tlat in ka hria" a lo ti bauh va,Upa Huala chuan "E chu zawng a thlamuan thlak e,Mihrang hringtu niawm tak in an hring dawn zu nia,Kunga lah mi leh saah a duai kan hre law,Rualthani lah mipa tam tak tluk loh Kelral te pawh a uicho chek hmiah hmiah mai kha a nia" a lo ti vat a,Lalnu Chhingi chuan "Chu ti zawng Tlangaupa nang kan mihrang piangtur chu chanchin zu ngai chang tawh,him dam tak a lo piang a ni ngat zawngin ka thlathum zupui ngeiin kan zu lawm ang chu " an tih chuan Upa ho chuan kut an lo beng dar dar an phur in an tha a tho hlawm kher mai.



Zan a rei zel a.leng hawn ar khuan hun hmadeuh chuan Khuaikham ah chuan eng nasa tak mai lo chhuakin a kham zawng zawng a eng emaw tih mai turin hmuntin maiah a eng noh noh mai a,a eng chuan Vawmbuk khua chu a rawn en pha hialin a hriat a,a ropuiin a hmuh a nuam kher mai ,Vawmbuk mipui zawng zawng chu pawnah tlan chhuakin makti fein an thlir thup mai a.mitin mai chu an phawklek a an ri chuah chuah mai a,Lal in luhka Upa ho pawh chuan Khuaikham eng de noh noh chu mak tih hmel takin an thlir thap a,"Eng ti zia tak ni maw,zan dangah he ti takin a eng ngai si lova,"an ti sap sap hlawm a,Upa Huala chuan "Mihrang piang tur an lo lawm ve te pawh a ni ang e" a han tih chuan "A ni mai awm mang tak e" an ti ta sap sap a.

Lal mual a patar lam tawh Thankunga pa Liannghaka chu chhuat laiah vei chhen mai a.veng thlang lama tupa lo piang tur ringawt chu a ngaihtuah a ,"a piang tawh ang em aw"a han ti leh vang vang thin a.tuk verh ah dakin Khuaikham eng chu thlir vauh vauh pahin "Lasi khawpuite meuhin an lawmpui khawp mihrang piang tur chu eng tiang tak in sei lian ang che maw ka tupa " a ti sap sap a.a awm mai mai thei lo chu "A ,a ni ngang lo ve ,ka zu chhuk ve mai teh ang "tiin vengthlang lam pan chuan bai saih saih chungin a liam thla ta nge nge a.



Thankunga Nupui nauvei natuar chuan a heh a pet fan fan thin a.hmeichhe tuarchhel tak a nih a vangin a te chhuak duh hauh lo va.Vengthlang hmeithai nauchhar thiam Vani chuan a thut chilh ran mai a.Rualthani dul a saphai thau chulh hauh hauh pahin "Tang rawh le,Ruali tang rawh Thatei nu han tang leh deuh teh "tiin Rualthani chu a lo fuih mawlh mawlh a.Chhungkhat laina hnai ho pawh an awm tiai hlawm a Thankunga lah awm mai mai thei lovin a vei sek mai a,pawn lam a vawmbuk mipui Khuaikham eng en ri chuah chuah te chu a bengkhawn der lo va,a nupuiin nau neih a awlsam thin teh tun tum a harsat em em mai chu a ngaihte a tha lo rum rum mai a.



Vawmbuk mipuite an boruak tawn leh thil awm dan mak ti a ,an phawhlek viau lai chuan Thankungate in chhungah chuan nausen tap ngak ngak ri a lo chhuak a.Nauchhartu Pi Vani chuan " E,mipa darkhuang man a ni,A va duhawm em.Mitha sa kap tur a nih hi"a han ti hlut a.In chhung awm ho chu an hlim dar dar kher mai.Khuaikham eng pawh chu a hma ai nasa leh zualin a de noh noh mai.Daiah a tawp nan ti niawm takin Sapui a lo hram leh hum hum a.Boruak uap churhte chu rehin thlifim a lo thaw heuh heuh va.vanah Arsi an de neuh neuh va .thlabial tir pawh vanah a leng delh delh a.
Last edited by LN Kima Guite on March 29th, 2018, 3:47 pm, edited 26 times in total.



Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 23rd, 2017, 6:15 pm

MIHRÂNG LEH SAHRÂNG

BUNG 2-NA


By LN Kima Guite

Van ah chhum pantein a zam diar diar a.Thlade tir chuan Vawmbuk khua chu a chhun eng deuh uau va.in tinah mei a de sep sep a.Nulainah Tlangval an nui ham ham a.Nula Hmui kaih ri ham ham te,Naupang pawnto ri nak nakte chuan Vawmbuk khaw thler tin a luah a.Thankunga Pa Liannghaka pawh Kungatein chu thleng tlain ,In chhung lam thawm ri mam mam chu sum hmun a tang an ngaithla det a, aw han thian kharh kharhin kawngkhar chu a han nam tawlh a.In chhungah nau en an lo awm nial a.Kawngka a kan rual chuan Nau chhartu Vani chuan "E, Dailova Pa hei i tupa thar hi han pawm teh le." tiin naute chu a pu Nghaka chu a han pawm tir a,Liannghaka chuan "Ka tupa huaisen Sai sawm kap tur a nih hi" tiin a tupa chu an sep hliau hliau a.Rualthani pawh chau tak chungin a lo nui sen sen a,a hmel dawl dang tak chu hlimna in a kap eng phet a,Thankunga ni Chhungi chuan naute chu lain puan a tuamin a mut na tur a siam sak nghal mawlh mawlh a.Thlangra ah mutin rap chungah chuan a dah ta nghal a.
Vawmbuk Lalin leikapui a Lalnu leh Upa ho chu an la thu far a,Lalnu Chhingpuii chuan "Boruak pawh a dai ta e ,ti ru ka upate u ,Tlangaupa lo nghah pahin in chhung lamah ka tuibur al hi lo hmuam hlawm teh u" tiin Upa ho chu a han sawm a,Upa ho nen chuan Lalin chhungah chuan an in zui lut ta dam dam a.An thu fel awrh tih ah Tlangaupa Lutbuaia chu thaw hluam hluam chungin a lo thleng chho va,"E khai ,Chawia pa engnge chanchin "tiin Lalnu chuan a lo zawt nghal var a.


Tlangaupa chu an thu fel te te a,muangchang delh dawlh hian " Khu Vengthlang Thuamsangharate kawm thlang nu Pi Vani Hmeithai Vanbuki Nuna Nu Nau chhar thiam khuan "a han ti chho va a tawng muang bawk si a,An nghakhlel lutuk chuan an lo sawi khalh lek lek thin a,an lo ang ve zuau zuau hlawm a,Upa Rozama chuan " Chawite pa,sawi kual vak lo khan han sawi vat mai thin teh "a lo ti a,Tlangaupa lah chuan " Ka sawi dawn lawm maw le ,min lo ti buai lo ula,chuan ......"an tia a ngawi vung vung a,"Eng thleng nge ka sawi tawh kha,min lo be buai a,ka sawi na chin pawh ka hre tawh hlei nem"a han ti leh rih a hmanhmawh nak lai a ,e leh nghal tih ang chauh an ni ta,Upa Vungtawna hre chak lutuk tawh chuan "Nau chhar thiamin tih thleng a nih kha'" a lo ti thuai thuai a,Tlangaupa chuan "E ,ni tak e,chuan .....tuman min lo ti buai tawh suh u aw" a han ti leh te te a,Upa ho hriat chak lahin hachang an thial lek lek tawh mai a.Lalnu meuh pawh chuan 'Ti buai lo vang, ti buai lo vang,han sawi thuai thuai la.kan khaw tlai zo dawn e"a lo ti zung zung a,Tlangaupa Zalawma chuan " A,khu Vengthlang nau chhar thiam Vanbuki an tih mai khuan Rualthani nau vei kha a lo thutchilh ran mai.chhungkhat laina pawh an awm nual bawk a,a nakin deuh vah chuan Naute chu tha takin a lo piang ta ni."a han ti a,Midang ho chu an lo thaw huai mai a.Lalnu chuan "E ,chuti zawng Chawite pa ka zu bel kha han pu la,naute chu kan zuk en ve ngei tur a ni." tiin Vengthlang lam pan chuan an liam thla ta dam dam a.



Thankungate in chu a lun laih laih khawp mai a,a pian lai a thil thleng a makin a ropui em vangin Naute en tur chu an lo lut in dawt zut mai a,Naute ennan tiin an neih ang ang an lo keng hlawm a,artui,tuibur leh zubel tlengin an rawn pu lut a.Thankunga pawh a nupui nau nei chau tak chu a bul a awm duh viau mahse in lengte kawm a lo chiau au te ngaih si a vangin a duh ang pawn a awm thei lo va,Naute lawmpui tute chuan hlim takin an rawn chibai lawp lawp hlawm .chu tia an rik nak nak lai chuan Lalnu leh Upa ho chu an rawnin zui lut ta dam dam a,Thankunga chuan "E khai ,lo thu ru ,lo thu ru,Nangni meuh kan in ah te in lo chuan kai tak " a lo ti thuai thuai a,Lalnu chuan "Kan khua leh tuite zingah mihrang lo piang ta chu hmuh chakin kan za zek zek tawh mai a nih hi"a lo ti thuai a.Naute chu an han en nak nak a." E,A va duhawm tak em.Mitha sa kap tur a nih hi."an ti zel hlawm a,ti chuan ,Zu te zuk hovin hlim tak in an ri nak nak a.Lalnu Chhingpuii chuan Liannghaka chu " Dailova pa i tupa chu a hmingte i han sa dawn lawm ni"a han ti a,Liannghaka chuan " A ni teh tak e,ka hming chawi a sak ka duh viau nain, mipa sahrang mihrang hma duai lo tur a ni a,Vahsan laklai a a pa Savawm kah chawiin ka tupa hming tan Vawmmana ka sa e"a han tih chuan ,Upa Rozama chuan "Dailova Pa i sa thiam kher mai,mihrang hming awm reng a ni e,Vawmmana hming hi tlangtin mual tinah a la thang dawn a ni" a han ti chat chat a.midang pawh chuan "I sa thiam mang e aw,Dailova pa nge nge" an lo ti sap sap a.

Chutia Vawmbuk khua an hlim viau lai chuan Khuai kham chung lungpui toh lawt luah mai ah chuan Nu pakhat a ding vang mai a.Vawmbuk khua chu a rawn thlir vang vang a."Lalvung kei min hnawl a midang i pawm man chu i hmu tawh a.ngawi tak rawh i thlahte leh i khua leh tui thlengin ka ti mang vek dawn a ni"tiin a phun sap sap a.a mit meng chuan nelawm na reng a nei lo va.Sakei mit ang maiin a de sar a mai a.In her in penkhat a han pen det a.Muangchang a rawnin her lehin "Chhingsanghar lo in ring ang che,Ka Lalnu nihna tur min luahlan vei maw.Phuba la turin ka lo let dawn e,I khua leh tuite zinga tumah nung dam reng reng an awm lo vang" tiin a han seh chilh rap rap a.Muangchangin ngaw ril lamah chuan a lut leh ta zan zan a.Nu hmeltha leh hleitling tak a ni a.hmelte durin nelawm loh viau lo phei se zawng Lasi nula emaw tih mai tur khawp a sakruang leh hmelmawi a ni tehlul nen.a thinlung chhungril khak na a hmel a lo lang chuan a hmelmawina a hliah khuh zova.Phungpunu sakhmel ang chauh a pu zo ta si a.


Khuaikham chuan chungah hian ngaw zau tak mai a awm a.mi tlawhpawh zen zen loh a ni a.Thing lian pui pui ngir khup maite chu arsi ek a kai khir en un hlawm a.Hrui zam chi hrang hrang zam kual reih ruihin a then laiah phei chuan kal tlang ngaihna awm lo khawpin hrui a in zam hnawk reih ruih mai a.a ngaw thenkhat lai erawh chu thelh nuam tak niin perte hniam te te a ding tih loh chu hnim dang to lovin a thelh hun mai a.vah vel pawh nuam ang reng tak a ni a.Thinglian pui pui ah te chuan thingsam a uai seng sung a.a hmuhnawm phian a.Thing lian leh sang pui puite chu niin a chhun tlang zawh meuh loh a vangin a hnuai chu chhun laih ah pawh a hnim deuh ruih reng a.Mihringte tan chuan hmun tih baiawm tak a nih rualin Ramsa leh Huai chi hrang hrangte tan chuan hmun duhthu sam a ni thung a.Chung lamah zawng chi hrang leh Savate rah tlan in an ri dur dur nitin a.Ramsa chi hrang hrang an tam em em a.Pasaltha tam tak lung len fo tu chu he ngaw pil ril tak hi niin Ramchhuak mi tam takin an pan fo thin a.hlawhtling tak a haw an awm laiin Ramsa kawlh kut tuar a ruang nen in lam pan ta pawh an kat nuk tho mai.Hman lai deuh a tang khan he ngaw hi a huai sar ta riau mai a.Hen ngaw a ramchhuak Pasaltha tam tak chu chin hriat loh vin an bo ta fo mai a.hnu hma engmah chhui zui tur awm lova .an bo tak fo ah chuan he lai ngaw hi miin an tlawh ngai ta zen lo va.He lai ngaw a ramchhuak hnu hnung ber chu Thankunga pa Liannghaka leh a thiante Zinga leh Raltuka te anni a.Liannghaka hi ke ruh leh lam tliakin a lo vak haw hram a.tun thlengin a a ke a bai phah a,a thiante erawh chu chin hriat loh vin an bo ta vang vang mai a ni.Thankunga pa lahin an thil tawn hi a sawi tha duh hauh lo va.He lai ngaw ah tumah ramchhuak tawh lo tur a duh thu bak an chanchin an zawh pawhin a sawi duh ngai hauh lova.He ngaw tihbaiawm takah hian eng thil nge an va tawh tih chu an rin thu sawi ta vel mai mai a.Thankunga Pa ten tawhsual an tawh a tang khan tumah he lai ramah hian an la tuman ramchhuah tin ah an tin ta lo a ni .
Vawmbuk khua in zahnih nufa zet hi Lalnu Chhingpuii khua a ni a.khawthleng rem leh boruak nuam tak a ni a,Hmar chhak lam khua a tang chawhma kal lekah khamrang hmingthang tak mai Khuaikham a awm zui mai a,Vawmbuk khua nen in ep ut mai niin khua a tang a lang chiang hle a ni.khamrang ropui leh chhawr dawh thluah mai a ni a,Heng kham chhawrdawh lungko hnuaiah te hian Khuai a kai thleh thluah mai thin a chuvang a khuaikham hming puta pawh a ni awm e,Chhim lam leh khawchhak leh khawthlang lamah erawh ram lei lung rem tak tak deuh vek a ni.an tui tlante a tha a,a ram leilung a tha in buh leh bah ah an hausa a,a khaw mipui pawh an hrisel in an hmelte pawh a eng suah hlawm mai a ni.Vawmbuk khua an sahna pawh kum sawm dawn a ni tawh a.Mihring an tam lem lo bawk a,a ram a that em vangin an chen bua zo tak tak lo va,khawthar sah zai pawh rel lovin an awm ta reng mai a ni.Lalnu Chhingpuii pasal Lalvunga chu an khawhlui Zawlte a an awm lai in a boral a,ti hian Lalnu Chhingpuii thla zar hnuaiah hlim takin an awm chho ta zel a ni.Lalnu Chhingpuii hi hmeichhe fing leh remhre tak mai a lo ni a,a pasal thih hnuah pawh an khua leh tuite chu hneh takin a kilkawi zui zel a,Hmangaihna leh khawngaihna ngah tak a nih a vangin a khua leh tui ten an ngaina em em a.michhia leh hnuaihnung te tan nu nih a tlin hle a.michhia leh mitha a thliar lo va ang khat vekin a en thin.Vawmbuk khua hi leido nei lo an ni a, an khawtlang nun a ralmuangin a nuam a.Nula leh Tlangval an taima in an tlawmngai em em a,khawtlang in an thlamuanpui tak zet a ni.

Lal nu Chhingpuii leh a pasal Lalvunga hian fa pathum an nei a,a upa ber Savunga niin Vawmbuk Tlangval chhuanvawr a ni a,Savunga farnu te chu Vawmbuk nula hmeltha khual khua thleng a thang hat hat tham Vanmawii leh tleirawl ek ek tawh Lawmsiami an ni a,Lal fanu leh fapate ni mahse a nu rilru thatna an chhun a,Michhia leh mitha thliar lova ang khat a en a,tupawh kawm ngeih thei vek a nih a vangin ngainat an hlawh em em a.Vanmawii phei chu Lal fapa tlang chang tur ngat pawh in leng a nei nual tawh a,a hmel duh a la tawn loh chu thu hran Vawmbuk khaw chhuahsan a khualkhua a lawi a hreh em a vang a pasal la nei lo mai a ni.



Hunte a liam zel a Vawmmana pawh naupang tual chai rual a lo ni ve ta reng mai a,naupang danglam tak niin "a piantirh a ,a tah loh kha chu a tah awm kan la hre love" tiin thenawm khawvengte chuan an sawi fo thin a.A rualpui zingah tumah ngam an awm ngai lova,Kawtlaiah naupang dang te ang bawkin a tal pawl ve thei hle thin a.a lo thanglian deuh va thingnawi fawmrual a han nih chuan khawchhung a awm aiin ramhnuai a nunchan zir nuam a ti zawk a,a pa hnung a zui loh pawhin thiante nen sava veh leh Thangkamin ram lamah an liam deuh reng thin a,Sairawkherh perte hi a thiam em em mai a,A Sava perh tlak lute hi hmawlah tlarin an sum hmun bangah a tar thet thut mai a.Sava hmul chi hrang hrang mawi tak tak te chu an sum hmun bang velah a thiat khat chuai thin a,Naupang dangte chuan an ngaisang thei hle thin a ni.Naupangte mahni se an chhungkaw chawhmeh tumtu ber a ni deuh der tawh mai ,Thiante nen a thangkam an nikhua pawhin a awk thei bik em em mai a,Vawmbuk naupang ho chuan Vawmmana hova thangkam hi an chak bik em em thin a ni.Kawng engkima thiante tluk loh ni ta chu naupang ho pawhin an chung en thuai a,thiante zingah hotu en a en a hlawh ta thuai reng a ni.



Zan khat chu zawlbukah thingnawi fawm naupangho chu Valupa leh Tlangval ho in an koh khawm a,Nakin lawk a khawtlang in nghahna la ni mai tur annih a vangin Valupaten an tlangval hun a tan thil pawimawh tin reng Zirtir nan Zawlbuk hi an hmang thin a ni.fuih na thu leh thu tha tak takte fahin awmdan mawi an hrilh thin a,zilh ngai an awmin an zilh bawk thin ,Zawlbuka Tlangval ho zilh ngai a awm hi thil zahthlak tawp khawk a ngaih a nih a vangin nu leh paten an fate zilh ngai a awm lo turin an hrilh mawlh mawlh thin reng a ni.Valupa Vanlawma chu naupang ding tlar thap hmaah chuan ding in "Zanin Thingnawi fawm kan koh khawm chhan che u chu in zingah thil zah thlak tak tih ching in awm vang a ni a,Tuikhur kawng a hmeithai Remi nu Pi Khuali chu zanah an in chungte vawmin nawmnah tak a chhaih thin in awm a, He tiang Nundan mawi lo leh tha lo tak tih ching tute khan lo sim hmak tawh ula.in hming pawh kan hria a,in sim loh chuan Tlangval hoin an zilh tawh ang che u,Vawmbuk khua ah he tiang hi a thleng tawh tur a ni lo" a han ti dap dap a.Vaibelan fawp khu luih luih phawt a,"Ai a upate zahin an thu inhnial ngai tur a ni lo.Hmeithaite ,Pitar leh putarte chhaihnawm nahin an hmusit ngai lo.Thingnawi awlruk tum tur a ni hek lo.Thiante zingah kawhmawh bawl bik ah an tang ngai na hek lo.he tiang tih ching reng reng an thluang ngai lo"tiin naupang ho chu a han fuih zui mawlh mawlh a.


Tlangval ho chuan Naupang huai zirtir nan leh huai leh huai lo hriat nan thingnawi fawm naupang ho chu thingthu in dah hlatsiakin an in eltir fo thin a,zaninah pawh Thingthu in dah hlat siak turin naupang huai deuh ho chu an in ring thap mai a,Vawmmana,Saikapa,Rozuala,Zahranga,Chhuahkhama te ho chu Thingthu nung kengin tu dah hla ngam ngam ti in an in el hlawm a.Naupang huaisen leh hlau nei lo tak tak vek annih a vangin an kal hla hlawm hle mai a.Valupa leh Tlangval ho chuan an fak mawlh mawlh hlawm a.Khawnbawl Upa Hrangkapa fapate ber Saikapa chu a pa nihna chhuang a chapo ar mai chi a ni a.Vawmmana te rual u hret niin Vawmmana hi a er em em mai a.Zanin pawh hian Vawmmana ai dah hlat ngei tumin Thingthu chu khua tang hla fe Chhektlang mual tawpah a zu dah a.Vawmmana ai dah hlat ngei ringin a nui var var mai a.Tlangval hoin an thingthu dahna an han endik chuan Saikapa ai hla feah Vawmmana chuan a lo dah si a,Saikapa chuan lawm lo fein Vawmmana chu a melh rawm rawm mai a.ti chuan Zan rei lutuk hmain naupang ho chu an haw tir ta hlawm a.

Thankungate pawh tunah chhungkaw pangai tak an lo ve ta reng mai ,a fanute pawh nula tia chhiar theih an lo ni ve ta reng mai.a fanu upa ber Thakimi leh a nau Hnehzelite chu Vawmbuk nula to pawl niin in leng pawh an ngah thei khawp mai.Thankunga fate hi Thakimi , ,Lianthuama,Hnehzeli,Vawmmana leh an te ber Hluzuali te anni a,Vawmman a u Lianthuam pawh tlangval ni ve tawh in Zawlbukah a riak tawh a.Vawmmana te thianho pawh nula la rim ngam chiah silo ,inti tlangval ve tan tawh anni a,Zantin an leng chhuak ve deuh ziah a,naupang ho zing pawnto an zak ve tawh si nula rim dawnin an la nau deuh bawk si a.Tui khur kawng hmeithai Remi nu Khuali te in a an len loh leh an tleirawl ngaihzawng deuhte in bulah an ngaihzawngten an lo hriat ngei turin an han ri khut khut thin a,an han infiamin an han in buan a an nui vak vak thin a,hei hi an nula rim ngam dan tawk a la ni rih a.zan khat Vawmmana leng haw chu a ute in leng zing a Pathlawi phawk tak mai Zaluta chuan "E,Mana chu nula i rim a ni maw,Khawmaw i sazu te a hmul tawh em ka lo en teh ang " a lo ti a.midang ho chu an lo nui ham ham a,Tlangval Pakhat Hrumliana "A ni teh tak e,Mante han entir teh tak Vaibel dawn te a lo zem theih phei chuan Lal mual tleirawl Pari te pawh i rim thei tawh dawn sin " tiin Vawmmana chu a lo fiam ve chul a,Vawmmana zak chu a sen am am mai a,an fiam leh hmain a khum lam a pan ta daih a.

Fur chhe lai ngang a ni a.zan khuain ruah a sur tluk tluk mai a.Khawvar hnu thleng pawh a han tih a neih tak loh vah chuan nula zing tui chawi thei pawh an awm lo va,Feh a kham thei mai awm mang e tih mai turin a tla cherh cherh mai a.Vawmmana nu Rualthani pawh eirawng bawlin a buai hle mai a,Sumhmunah a fanute pahnihin buh an deng dawp dawp a,an te ber Hluzuali chuan sum ko bulah thuin a lo vil ran mai a,A ute pahnih in rang zet zet a in khak buai miah lo va an buh deng an in rawn zawt zawt chu hmuhnawm ti fein a lo thlir ran mai a,Chutia hmeichhe ho an buai viau lai chuan Vawmmana chu tukverh bulah thu thluang duai chungin saihlum a hrual hoh hoh va, an pa Thankunga meilum ai lah eirawng bawlna dip fein a lo thu lur bawk a,Rualthani chuan "Kha tia midip tak a thu lur lo khan Vawkchawte tal lo pe la tha tur,kan buaiziate hi i hmu ve reng si a" a han ti hlak hlak a.Thankunga a lah hre awm hmel pawh pu loin Vaibel a pak khu tual tual a.muang chang a thovin khum mawng a ,a muzuk fei chu lain a hru fai hliau hliau a,Patlang lam a Vawmmana saihlum hrual mual mual lai chu "Mante Vawiin chu Khua a en deuh chuan kan Thangkam zu en ang hmiang kan rial rei ta bawk a.a khan viau tawhin ka hria" tiin a zu bia a,Vawmmana chu phur fein a lo hawi chhuakin"Ka pa ,Ka pute silai hawh ila,Silai ken ka chak teh a nia,"a lo ti thuai a,Thankunga chuan "E i la keng em em ang,tunah chuan Silai keng tur chuan i la nau mah mah a ni.Thate te khan awm la,i Tlangval hunah nangma pual a Silai neih ngei i la tum ang chu " tiin a lo chhang a,Vawmmana chuan "Silai chu ka la nei dawn khawp ,Ka pa" tiin phur takin Saihlum chu a hrual soh soh va.Sumhmun a tang Thakimi chuan "Ka nu,kan deng zo a nia,kan thlei nghal dawn em " a rawn ti a,Rualthani chuan "Thlei nghal lo mai teh u,hei khua a zia dawn a ang riau mai feh kan tlai lutuk ang e.Lo in sengfel ru,Zualte nang chaw bel lo va her teh ,I pa leh i u ve lah engmah tih an tum bawk si lo" tih pahin vawk chaw pe turin Vawk chaw nen pawnah hmanhmawh fein a chhuak hlawk hlawk a.Vawk chaw kuang khawn rik koh koh pahin "Ri teh ,Ri teh " tiin an Vawk chu an koh pah a,an in hnuai a an vawk bawk pawh chu nguk rut rut pahin a lo chhuak thuai a.


Chutia an buai nak nak chhung chuan Ruah chu han in Ni a rawn lang uau uau a,Lianthuama Zawlbuk riak pawh lo hawin Chaw ei an siam zui nghal mawlh mawlh a.Chawei lai chuan Thankunga "Hei ,Thate i nau nen hian nula a chhiar in lo ni ve ta reng mai a,In nungchang in uluk hle a ngai a ni,Nula tan hmingchhiatna hi hote a ni a,hmingchhiat laklawh tawh chuan a siam that a har tawh thin.Tlangval tumah biak that leh biak chhiat bik neih a thiang lo va,Tlangvalte bul a awm dan tawk thiam a ngai a Nelawm tak zuamawm si lova awm thiam a pawimawh .Tlangval tumah in puan hmawr indeh tir reng reng tur a ni lo.hei hian kum khaw chawr lohna a tlen thei ,Nula mawngrit leh thatchhia min an in lawi turin an duh lo tih hria ula.tin Thuama pawh tlangval i ni a,Khawi lo vah chhuahnaahte tar leh upate awl tum fo ang che,thiante thawh chhuahsa rin ai chuan thianten ka thawh chhuah sa ei se tih hi Tlangval rilru put dan tur a ni tih hria la,ai upate thu hnial zut zut parawn an awm ngai hek lo.mi chhia leh hmeithaite an hmusit ngai lo an tanpui zawk thin ngai e"tiin a fate chu a zilh mawlh mawlh a,Rualthani pawh in " Ni e,i pa thusawi hi hrereng ula,Nu leh pa thu awih a zah thiam a piang miin an mahni pawh an ngaisangin an zah thin a nia"tiin an pa thusawi chu a lo tui hnih ve a.
Last edited by LN Kima Guite on March 29th, 2018, 3:48 pm, edited 1 time in total.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 24th, 2017, 6:37 pm

MIHRÂNG LEH SAHRÂNG



BUNG 3-NA

BY -LN Kima Guite


Chaw ei kham ah chuan Thankunga te pafa chu an Thangkam en turin an in zui chhuak hnak hnak a,zing kar ruah surin kawt lai te chu a ti diakin a kawi nuai mai a,Vawkhniak leh Ar hniak chu thlertinah a lang thleh thluah a, Thinghnahte chu ruahin a nan fai sar mai a.thinghnah a ruah tui tlingte chu a la far ri fuap fuap a,Thankunga chuan muzuk fei hawlin a hnungah Vawmmana chuan Sarawkherh kengin a zui a.Feh kawng chu hniak chi hrang hrangin a khat a,a then lai phei chu a nal in tawlh tluk hlauhawm tak a ni a.Hmanhmawh lem loin an in zui zel a,Chutia an kal zel lai chuan Mualte kawn an tih mai kawng zal lai takah chuan kawng lai takah Keite uichal tiat zet hi a lo thu vang mai a,Thankunga chu "E khai kan ramhnuai pasaltha chu kawng lai takah i lo thut le,kawng min lo kian rawh le" zaidam takin a han ti a ,Chu keite chuan kian mai tum hmel lo takin a rum chhar chhar mai a,Thankunga chuan "Luhlul chhuah lo khan kiang mai teh " tiin a han be leh sap a,Keite in kian mai a tum tak loh vah chuan Vawmmana thinin a tuar ta lo,a chempui phawrhin a pa hmaah chuan a va ding ta tau mai a,Chu keite nen chuan an mitah tak an in en dun ta ran mai a,a nakinah chuan Keite chuan Vawmmana mitmeng a tang chuan cho chi ah a ngai lo ni ngei tur a ni.muangchang ngeng ngalhin kawng thlangah chuan a her liam ta a,Vawmmana chuan "I va tlawm hma si ve" tih pahin Keite kalna zu a zu bih zui a,Thankunga chuan Vawmmana pawh let vat pawh chuan "Keite kawng kan na an bih zui ngai hleinem ,An awrh nawlh duh Upain an tia nia ." tiin Vawmmana chu a han hau zui a,Vawmmana chuan "Min rawn zuan leh ka lo ret chat mai ang chu" tiin a pa chu a lo chhang mai a,Thankunga chuan "Mantea thin hi chu aw,chutin an tawng mai mai ngai lo a nia"tiin Vawmman a chu a han zilh a.chutah " Hei rei loteah i tlangval ve mai dawn a,zirtur i la ngah hle mai,ka thu hrilh thinte hi hriat reng tum thin ang che"a han ti zui leh a.


Thankunga chuan a ruk tak chuan a fapa chu huaisen a tiin a chhuang ru viau mai.Ramsa ngeng tak Keite pawh a han melh zam mai a hmuh khan a fapa chu mi naran a ni lo tih a hrechiang leh zual a,hlim takin a nui ver ver mai a ni.An Thangkamna mual Herhse mual chu an lut phei tan a,hmun fai deuh laiah chuan an vangvat kaite chu an han thianfai nawk nawk a.Thosi hlauhah tiin Thankunga chuan Vaibel tanin a pak khu luai luai a.an sa dai chu thleng in an Thangkam chu an en thla zel a,An thang thumna chu a lo per thlawn ngawt mai a,Vawmmana chuan "Ka pa a tal chhuak emaw ni le" tiin a pa chu a han zawt a.Thankunga chuan a han en vel a sahnu a awm lem loh a vangin "Ruahsur vel hian a ti per thei a nih dawn hi "a han ti a.chutah Thang chu an han kam tha zui mawlh mawlh a.ti chuan a dang en leh turin an in zui thla leh ta zel a,An thang rukna ah chuan Sakhi pachal ki tha zet mai hi a lo awk zat mai a,an han hnaih deuh chuan huk thawt thawt pahin tlan chhuah tumin a tal laih laih mai a,Vawmmana phur lutuk chuan a pa thu pawh ngai chang hman lovin " A la nung a nih hi Ka pa"tih pah in a pain a khap hman hma chuan rang zet a tlan thlain Sakhi ke hnung lam pahnih ah chuan a zu man ta chawt mai a,Sakhi hlau a tal nghal zawt zawt bawk a,Mahse a ke hma pakhatah Thangah awkin a hnung lam pahnihah Vawmmanan hneh zet a ,a chelh beh tlat bawk si a vangin a tal hleithei lo va,Thankunga pawh rang tak lo thleng thlain a muzuk fei chuan Sakhi zakdawh ah tak chuan a rawn chhun hrawih mai a,Sakhi pawh chu a tal fat fat a,a zal zui ta raih raih a,Vawmmana naupang la a tih takah phur fein a au teng tung mai a.Sakhi thang awhna ke chu phelhin hmun rem deuh ah chuan an han zalh ta zar mai a,a mam tle zak mai a,Vawmmana chuan a han zut vel thuak thuak a,a ki te chu a han chul hauh hauh va."Ka pa ,A lawmawm ti raw,Sakhi chal kan han hawn dawn a nia,haw thuai thuai ka chak "a han ti a,Apa chuan " Ni e,a lawmawm tak zet a ni."a han ti te te a,Vaibel la chhuakin an tan a.a han zu vang vang a"Mante,Thil zir tur i la ngah hle mai,He tiang thilah ai upa te thu ngai chang lovin an che buan buan ngai lo a nia,tin Heng ketin khawng tak nei chi Sakhi ,Sazuk ang chi te hi an ke hnung lamah man ngawt ngawt loh tur ,i chelh ngheh zawh loh chuan a kein i dul kha an tlawh kaw hawk thei a nia"tiin a fapa chu a thil a han hrilh malh malh a,Vawmmana pawh chuan "Ka lo hre tawh dawn nia kapa,ka lo phur lutuk a chuvang chu lawm" in thlahrung hmel takin a lo ti thuai a.
Ti chuan Sakhi chu hnutchhiahin an thangkam dang chu an en leh ta zel a,mahse a dang an awh belh lova,an Sakhi dahna lamah chuan an let chho leh ta a,Sakhi chal lian tak mai chu an pafa chuan an zawn dun ta zan zan mai a,Ramhnuai lei chu ruahin a nan zawp hneh em a vangin a nal phian mai a,an han tawlh leh khat khat thin a,Ramhnuai hmun rem lova Sakhi zawn chu a buaithlak ang reng phian mai a,Vawmmana chuan "Ka Pa Sakhi hi a rit vak bawk si lova,zawn hian kal a buai thlak zawk in ka hria,keiman kan ak mai ang e" a han chuan Sakhi chu nghat in an han chawl a.Thankunga chuan "I zo ngawt dawn em ni.naupang tan chuan Sakhi chal te chu rit deuh tur sin " a han ti a,Vawmmana chuan "Zo lutuk " tih pahin Sakhi chu hneh zetin an lek kang vaw mai a,Thankunga chuan a fapa chuan a kum phu lovin thahrui a nei tih hre tho mahse a hriat chian leh zual phah ta a ni.


Tichuan Sakhi Chal chu ramhrui chhatin a ke hnung leh hmaah an tawn zawmin ah mai theihin an siam a,Vawmmana chuan phur takin a ak ta zar mai a.An han kal chu Thankunga chuan hma a hruai a,a fapa chuan Sakhi chu rit a ti em tiin an mitmei ru thin a,Vawmmana lah chuan rit tih hmel pu hauh loin a kal pui thauh thauh mai.Thankunga chu "Fapa pasaltha ka nei ngei dawn e",tiin hlim takin a nui var var a.


Zankhat chu Vawmmanate thian ho chu Remite inah lawi khawmin an Zulawm Remi nu an bilhtir chu a thlum tawh a vangin an in ho ve laih laih a.an hlim ve kher mai a.Remi nu erawh" thenawmah kan chuang kai lawk ang e,thatete khan lo in kawm rawh u"tiin a chhuak zui nghal a,Pawn lamah chuan chhum a zing chuai chuai a,ruahsur chiah lo mahse khua a vawt deuh surh a, in hnuai Vawk bawk khawm pawh a lailum chuhin an in nawr ngek leh thawt thin a.thawmmawl te chu an ti ri leh dawt thin a,Vawmmanate thian ho pawh in fiamin an ri laih laih a,Remi tleirawl ve tan nuih heh tak mai chu an ti nui bawk bawk mai a,an zing a uang ve thei tak Zataia chu in siam chhiain a hmel hmai chu maksak fe fein an ti chhe kual vel a,an nuih pui bawk bawk hlawm a.


Chutia an nuih bawk bawk lai chuan in hnuai a vawk bawk khawm chu an phit sut sut a ,an teh ta huk mai a,Thawmmawlte chu an su ri dawt dawt mai a,Vawk pakhat chu a te thawt a,Dai lamah a ngek thla ta rawng rawng mai a,Vawmmanate ho chuan Sa in a la tih hriain "Hei hei.." tiin an au va,bangte chum riin an au chuah chuah a,Pawnah tlan chhuakin "Sa a tla e" tiin an au chel chul a,Vawmmana erawh chu Remite rapchung a meichher siamsa chu lain a dep kai sawk sawk a,pawnah chhuakin Dai lam panin a tlan ta nghal a,Zahranga leh Rozuala chuan an zui nghal vat a,midangte leh Remi chuan "Tlanliam ngawt suu,Tlangval ho lo nghak ru" tiin an au zui tuar tuar a,Mahse Vawmmanate chu hre lo ang mai an liam zui ta thuai a.Thenawm khaw veng pawh an lo chhuak thuai a,an ri le lu mai a,Rei lo teah Valupa leh Tlangval engemaw zah chu Silai leh feite kengin an lo lang thuai a,Remite chu thil awm dan an han zawt thuai thuai a,Vawmmanate an tlan liam tawh tih an hriat chuan an chek tlak tlak mai a,Valupa Buanga chuan "Khai le,i hman hmawh ang u" tiin a in her a hma hruaiin an liam zui ta nghal a,Pasaltha Bawkthanga chuan zuiin Sakei liamna lamah chuan meichher nen an liam ta hum hum a,Valupa Khama chuan "Awle,Tlangvalte u,zan thim hnuai a ni nen.kan hmaah kan naute kal hmasa an awm tawh a, in ral palh leh chet sual a hlauhawm a,mi leh sa chian hmasa lo chuan tuman thal thlah loh tur ,tumah kal fal lovin awmkhawm tlat tur,Hei Pasaltha Bawkthanga nen hma hruaiin kan han chhui fal deuh ang a,kan hnungah muangchangin min lo zui dawn nia" a han ti lauh lauh va,mipui chu an thum mam mam a.a thenin "Tute nge maw lo liam hman der tawh chu"an ti a,a then lahin " Mipui ngai chang lovin tute nge lo liam thawt thawt chu ni a"an ti bawk a.chhang thei an awm lem hlei lova.



Vawmmanate chuan awlsam takin Sakei hnu chu an chhui thei mai zel a,Sapui beihna a la tel ngai lo tih takah Sakei hlauhawm zia hre hek lo.Hlauhna chang pawh an hre der lo va.Vawk chu a thi tawh nge thawm hriat tur awm lo vin a reh vung vung mai a,Chhum a zing chuai chuai a khaw hmuh a tawi tak mai a,fimkhur a ngaih tehlul nen Vawmmanate ho chu Vawmmanan hma hruaiin fimkhurna chang pawh hre mang lo vin Sakei hnu chu an pawgtawng chhui miah miah mai a.chutah ,Vawk kawngtumah Sakei lian zet mai chu a Vawk seh bawh run chungin a lo rum ngul ngul mai a,A mit te chu a de rual mai a.a dung sei zet tial ruai maite chu meichher engah chuan a lang rapawm kher mai,Vawmmana chuan "Hei...hei...Sapui kiang rawh ,kiang rawh " tiin a meichher chuan an tin zuau zuau va,Sakei chu a rum ring zual sauh mai a,a saseh chu a hauh tlat mai a,kal sawn mai a tum hmel loh kher mai a.an hnung lamah chuan mipui thawm pawh a lo ri laih laih tawh a.Sakei chu a in saseng duh mai loh a vangin Vawmmana nen chuan an in melh dun ta ngar mai a,Zahranga leh Rozuala pawh in hlauh nachang hre miah lovin an lo melh ve ran mai bawk nen,Chutah Sakei chu a zam ta deuh nge a saseh chu hnukin a thlang Tlangsam pik lam chu pan mai a han tum a.Vawmmana chuan rang zet a va hnaih chilhin Vawk ke hnung pakhatah chuan a va man ta chawt mai a.Sakei leh Vawmmana chu hnaiteah an in melh dun ta run mai a,Sakei chuan a vawk seh lai chu ka ta ti niawm takin an pawt leh sawk thin a,Vawmmana lahin thlah tum bik hek suh.Vawmmana thiante lah chu a ai naupang leh chhawng tih takah an hlauh vang ni hauh lo vin an hamhaih a an lo ding ka ho ringawt a,Vawmmana leh Sakei Vawk in chuh in pawt laih laih pawh chu va puih nachang an hre mai lo va,Vawmman leh Sakei chu an hanin pawt leh sawk thin a.Vawmnana chuan a pu leh pate sawi thin dan hriain "Ramhnuai pasaltha meuh i ril a tam em ni,Thlah la i chanpual tur chu ka pe em em ang che " tiin zai dam takin Sakei chu a han bia a.A mit meng hlauhna leh zamna awm hauh lote leh he ti tak a hlau lo tu chu naupang mah nise Sakei meuh pawhin a zah ngang a ni ang e,Rum ham ham chungin a tawlh kiang ta a,Vawmmana chuan "Ka lawm e,Pasaltha" tiin Sakei liam tur chu an be zui sap a.

Khatia Sakei leh Vawmmana in hmachhawn ran mai chu Bawkthanga leh Valupa Buanga chuan an rawn hmu hman a,Valupa Buanga chuan Sakeiin Vawmmana chu a seh mai hlau in kah tumin a Silai chu a han chawi kang deuh va ,Vawmmana ral palh hlau chuan a thal a thlah mai ngam lo deuh va.han kal hma leh tum a ,a han pen tur chiah chu Bawka chuan a ko kiah zawite a rawn khawih in "U Buang ,La kal teh suh .A ngaihtuahawm ka ring hauh lo mai " a han ti sap a.Vawmmana pian lai thil thleng hre ve ve an ni bawk a.Fiah an duh pah bawk nen Silai nen in ring tak a lo veng chung siin an lo thir dun ta ran mai a.An hnung hla vak lo vah mipui pawh in thawm an rawn nei a.Vawmmana an hlau leh zam hauh lova Sakei a han be mawlh mawlh chu naupangte mah nise tluk loh rim nam hlein an hria a,Sakei zawk a han in sa seng takah chuan an thaw dun huai mai sa,"Mihrang zawng i lo ni ngei e"ti sap sap chungin muangchangin Mana te chu an va pawh phei ta a.Val Upa Buanga chuan "E khai nang ni thian ho chu in huaisen hle mai.Sapui meuh pawh in hnawt kiang der a ni maw." a han ti sawt sawt a,Bawkthanga pawhin a han fak ve luam a,a rilru tak chuan A Patea fa Vawmmana chu la zilh a tum ran thung a.Zahranga chuan "Mana tih vek a lawm.Vawk kha a chhuh sak daih maw le,a hlau ve lo reng reng " Vawmmana ngaihsan hmel fe chuan a lo ti thuai a,Rozuala pawh chuan "Keini chuan engmah pawh kan ti lo.kan lo ding ringawt a lawm" a lo ti ve vat a.Valupa Buanga chuan "Eng pawh nise,in huai hrim hrim e.He tiang a Sapui meuh hmachhawn ngam hi an vang khawp a nia.Kan khaw dai ngul niin pasaltha in la ni ngei ang" tiin a han fak zui a,chutah "Mahse hei hi hria ula ralthuam keng lovin ramsa kawlh chhui tawh lo ula.in la nau deuh bawk nen Valupate thu ngaih chan nachang in hre tawh dawn nia" a han ti a,Vawmmana te ho chu an bu nghat nghat hlawm a ,Valupa zilh ngai a awm chu nuam lo an ti khawp mai a,an Ngawi thap mai a,Bawkthanga pawh chuan "Ralthuam engmah in keng lo leh nghal a,Kut ruak ngawtin Sapui an hmachhawn ngawt ngai hleinem,Sapui hlauhawm zia in hre lo a nih kha"tiin a han au va.Vawmmana chuan" ka tih palh a ni ka U ."a lo ti thuai a.Valupa Buanga chuan an in thla hrun lutuk hlauh vin "In ti tha lutuk a nia.Mana nangni zarah him takin hei Vawk pawh a neitu hnen kan thlen leh thei dawn a.a lawmawm khawp mai.nuam lo ti reng reng suh u" a han tih leh chuan Vawmmana te chuan nuam an ti deuh huai a. chutih mek lai chuan Mipui an lo thleng a.an thlang lawkah Sakei chu a la lungawi chiah lo nge a la rum ham ham a,Valupa Buanga chuan "Kan Pasaltha chu a chan pual a beisei a ni maw" tiin Vawk bawp chu a hlep zung zung a ,Sakei awmna zawnah chuan a vawrh thla nawlh a,ti chuan Vawk ruang chu tlangval ho chuan zawn in khawchhung lam panin an haw ta a.


Sa tlak zan a Vawmmana chet dan chuan Vawmbuk khaw chhung chu a deng chhuak rang kher mai a,Vawmmana chu a lar ta kher mai a,Tlangval ho nula rimnaah pawh eng dang a leng hlei thei lo va,Vawmmana huaisen zia chu an sawi sup sup mai a.Mi huaisen ngaihsan hun lai a ni bawk a,ani ang rual lekin Sapui huaisar tak mai a han hmachhawn dan chuan sawi a hlawhin ngaihsan a hlawh kher mai a.A hmelin puak ti lua lo mahse a rual pui hmeichhe ho lakah phei chuan a tla na kher mai.heng karah ngaisang lem lo itsik tawk lah bo lo."A huai vang pawh a nih loh chu,at khat a che a nih chu "tiin then khat in sawihnawm dan an lo zawng thung.A thenin Hmingthat duh vang a lo hmasa falah an puh rawl nen ,eng pawh nise. Vawmmana chu mihuaisen hlauh nei lo .Mibik a ni tih chu khawtlang mipui tam zawk thu vuaktluk dan a ni ta tho tho mai.


Lalin ah pawh Upa ho sawi nuam tih ber a pawh Vawmman leh sakei bawk a ni a.Upa Rozama chuan " Bawka pa i unaupa fapa chu engnge i hmuh dan ,Hei keini chuan kan lo chhuang viau tawh maia nia.A chetdan han en hian mibik sa leh ralah khawtlang muantu zawng a la ni mawlh dawn e."a han ti a.Bawka pa chuan a tuibur hmuan chu chhuat awngah a han pik puat a.a han tep chap chap a."A engnge maw a an zel dawn le,keini nau ve hi khawtlang rin a pha ngut dawn maw ni le"a han ti chuar chuar a.Upa Vungtawna chuan "E Vawmmana zawng khual khua thleg a Vawmbuk khua ti hmingtha tu a la ni mawlh ang.a pian lai thil thleng reng a dang lam mai a.Kei kan nauva hi ka dah sang viau a nia" a lo ti ve bawk a.Bawka pa chuan "Vawmmana pian lai thil thleng hi in sawi teh chawk a.kei ka ramriah lai a ni ni kher a.ka hmuin ka hre ve law.in han sawi hmangah mak zawng a mak viau tak a nih kha.Khuanu hian eng maw tan tak a lo hual lawk pawh a ni mahna le" a han ti leh bauh va.Bawka pa Dailova hi Thankunga u niin Liannghaka fapa Upa ber in hrang chang tawh a ni a.Vawmmana pian hun lai khaw chhung a awm loh lai a ni a.Lalnu chuan "Kha le,in ti ti tui tak tak hmain ka Tuibur al hian in kam chhia han tleuh hmasa phawt mai teh u." tiin a tuibur um lian leh tle hliau mai chu a han lek chhuak a.Lal Upa ho chuan an han hmuam liam liam hlawm a."Kan Lalnu tuibur nge nge zawng a al tui danglam bik zar mai a."tiin an han fak sap sap a.Lalnu lawm pawh a khi var var a.Chutah Upa Huala chuan "Engtin chiah maw,Vawmmana chuan kan Sapui lung lian chu a han hmachhawn vel a.Bawka Pa Bawkthangate khan an zu hmu a ni lawm ni i hre chiang deuh ang han sawi teh khai " tiin Upa Dailova chu a han phut a,Upa Dailova chuan "A engtin teh vak a sawi law.Kha tia Sapuiin a Vawk lak Tlangsam buk hnuai a hnuh luh a tum chu Vawmmana chuan Vawk ke hnungah chuan a zu man ve chawt mai a ni awm a.Sapui riltam lahin thlah mai tum bik hek suh .an in pawt laih laih mai a ni awm e" a han ti a,Upa ho chu an chek tlak tlak hlawm mai a.Upa Dopawnga chuan "A pu Liannghaka phei chuan Arpui tui lai a talh sak hial ni awm a sin.Ani Liannghaka tak pawh a vanglai Pasaltha huaisen ngang kha a ni a.Vawmmana pawh hi a pu Liannghaka thalbe a tang a chhuak ni awm reng zawng a lo ni e" a lo ti ve a.an sep tui lak lawh a,Khup a kut suih far chung an su hliau hliau hlawm a,Upa Hrangkapa thung chuan "Kha Valupa kam khat an hlawh e an tih si kha ,Hmingthat chuh a chet laah Valupa ho in ngai deuh a ni hmel kha" a lo ti ve thung a,Chutia Upa Hrangkapan a han tih takah chuan an thum ta hak mai a.

Upa Vungtawna chuan "Darmani pa i thu sawi chu a Lal Upa min ka a chhuak a mawi a nih loh chu.Kam khat lah love.Ralthuam tel lova Sapui hmachhawn a hlauhawm zia an hril mai chauh a nih kha le." a han ti chuan ,Upa Hrangkapa chuan "Chu Buangi pa dawt sawiah mi puh zu nia " tiin a ding ta hluai mai a.Upa Vungtawna lah diau lo "Dawt ni hek " ti chungin a ding ve ta hluai mai a.Patling leh patling an in melh tur ta khui mai a,Lalnu Chhingpuii chuan ban phar vat in "Kha kha khaih ,in sum teh u in sum teh u ,naupang a zeng pawh ni lo.Patling thankin uaih khatia awm tur a ni ngai lo ve" a lo ti thuai thuai a.Midang pawh chuan an lo khap ve sap sap a.chutia an han buai tak hluaiah chuan an ti ti a kal ta mang lo va.Upa Hrangkapa chu a ding a"Khawnge ka kawngte pawh a kham e,Ka zu tin ang e,"tiin kawngkhar lam a pan ta nghal a.Lalnu Chhingi chuan "Aw chuti mai tur a mi Darmani Pa a la hma lawm leng len hun chauh a nih hi" a lo ti thuai a.Upa Hrangkapa chuan "Zanin zawng kan len thlak a rual lo em mai,tu te emaw ti tina ka dal ang e" meinei tak a ti chung a chhuak zui ta nghal a.Lalnu pawh chuan "A nih leh mangtha aw" a han ti khaw mawi ve a.



Upa Hrangkapa chhuah hnu chuan Upa Vungtawna chuan "Upa ka ni tive lem,mahni khua leh tuite lawmna pawh lawmpui thei hlei lo.Pem daih se nia ka tih " tiin Hrangkapa chu a han chhu zui a.Lalnu chuan nui chungin "Khai Buangi pa chutin an ti ngai hleinem ,Upa in Mipui an thuhmun vek thei lo ve an lo tih kha maw" tiin Upa Vungtawna chu a lo khap thuai a.midang ho pawh chuan Upa Hrangkapa rilru mak an tih thu an sawi zui sap sap hlawm a.Upa Hrangkapa chhuak ta kha a thinrim ve khawp mai a."Vungtawna ve mai mai.Mi han khak ngam khang lang a maw.ngawi tak rawh i la hre khawp ang "tiin a Vaibel dawn a seh keh rap rap a.
Last edited by LN Kima Guite on March 29th, 2018, 3:49 pm, edited 1 time in total.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 26th, 2017, 6:40 pm

MIHRÂNG LEH SAHRÂNG



BUNG 4-NA

BY -LN Kima Guite



Bawka pa Lal Upa Dailova zing tho chu tui um hunna bulah a hmai chu an phih ang thek thuak a."Nizan ka mumang teh hrep chu aw"tia phun nuah nuah chungin khum lu a tungchaw chu a zen ruk ruk a.a tuibur chu la chhuakin an hmuam pawr a."Hmm....Bawkthanga nu tuibur zet chu Suaka nu kelpa zun pawh va tluk niau lo chu"ti chungin meibulah chuan ava thu khur a.Sumhmunah a fanute chuan buh an deng ri dawp dawp a.annu Hnemi pawh vawk chaw pein a lo buai chang bawk a.ani thung chu lungthu tlawh chhan meuhin a zan mumang chu a ngaihtuah vung vung a,.thukah chuan maian bai a in chhuang a.a rawn so liam ta bawrh bawrh mai a.Bawka pa chuan "Bawka nu i bai a so liam ania " a han ti a.Bawka nu vawk chaw pe lah a pui lian berin a note ho ei ve phal lova a nawr te leh thawt thawt thin a vangin a note hoin chaw an ei ve theih nan tiin an vawkpuiin a note ho a nawr tur chu lo veng a a lo buai em vangin lo hre mai hek lo,Bawkthanga pa chuan "Bawka nu,i bai a so liam ka tih chu " tiin a rawn au leh a.annu lah chu a buai em a vangin a lo hre mai thei bik si lo.ring leh zualin "Bawkthanga nu ,..Hnemi i bai a so ka tih ka tih chu mawle"tiin tap chhak ah chuan a lo thinrim hlur mai a.sumhmuna a fanute buh deng chuan hriain a naupang zawk chuan a nu chu a va au a..Bawka nu chu hmanhmawh phelengin vawk chaw fian nen a lo tlan lut rawk rawk a.Bawkapa " Nang a beng lo lutuk hi chu aw.kha i bai tui pawh a so liam zawh dawn kha "a lo ti hlur a.Bawka a nu chuan bak deuh hlar hian"Ka buai zia i hria a.a bulah i awm reng a lo vil ve mai tur che lawm,Khaw nge dang awm teh thuk lah hi i har lak lur zel mai ,"tiin fian chu banin a maian bai chu an hawlh rawk rawk a.Bawka pa chuan "Mipa bai vil hruah hruah ka hre ngai love" ti chungin a tuibur hmuam chu meiah chuan an pik ri sawr mai a."Khawnge Lalnu Tuibur al ka va hmuan sak teh ang ,Nanga tuibur al ve hian kam chhia pawh a tleu pha niau lo ve"ti chungin a tho tuih tuih a,Bawka nu chuan "Ka tuibur tluk hi khawih va hmu lek lo tur che.Lalin ,Lalnu,ti reng mai...Lalinah va awm law law la ti nia " tih pahin hman hmawh fein pawn lamah a tlan chhuak leh dawr dawr a.an vawkpui chuan an vawk note ho chu chawei phal lovin alo nawr sawn a amah chuan vawk chaw chu duham fe in a lo hap ri thawih thawih a.Bawka nu chuan thinrim zet "nang vawkpui hre hru chu aw.mahni note tepawh chaw ei phal lo che" tih pahin an Vawkpui hmui ah chuan a fianpui ken chuan a va khawn sak fawk fawk a.chu tih lai chua Bawka pa chu luhkapuiah lo chuakin "Aw khati vak vak a khawn tur i mi ni ngai" a rawn ti dek dek a.annu lah chuan "A notete chaw ei phal hek lo maw le.He ta phun phun lo khan Lalinah cbuan va kal tawh ,in ah i awm pawn hnemhnanna i nei chuang lo" a lo ti bak hlar mai a.Bawka pa chuan "Hmm...ka chawm ka hrai innih hlawm hi" tiin luhkapui a tang a chhukin Laliin lam chu a panta,Bawka nu chuan"Lalnu chu va luhkhung law law la ti nia"a va ti leh hram a.Bawka pa chu "Hmeichhia tak hi chu aw" ti vung vung chungin a nui hak hak a, kawtthler diak chiau purah chuan a chho ta tarh tarh a,,a ke phah arh tur mai chuan Tuallai diak te chu a ke zung kar a lawt pawr pawr khawpin a dai thawih thawih a.


Furlai ngang a nia , kawtlai chu a diak kawi thei khawp mai a.ar leh vawkhniakte chu an i zawm thliah thliah hlawm a.Lalnu sechal hniak lian zet pawh a ek la khu vung vung nen kawt laiah chuan a lang kelh kulh mai a.Bawka pa chuan an Lalnu sechal hniak chu se hniak tam tak zingah pawh a zu hre chat chat thei nia.Lalin luhka ah chuan a kesir a chirh kai leiluai tah fai nawk nawk pah chuan a aw an thian kharh kharh a.chutah "In awm maw" tiin Kawng khar chu an nawlh tawlh a.Lalnu chua tap chhak a tangin "Awm e .lo leng ru" tiin a lo chhawn thuai a.Bawka pa chu a lo lut ta tarh tarh a.Lalnu Chhingi chuan "Aw haw Bawka pa nang i ni maw.ka tuibur al i chak leh tawh a ni maw" tiin a lo nui har har a.Upa Dailova pawh chu a lo nui ve hak hak a.


Upa Dailova chuan Lalnu tuibur um rawn pek chu ban pahin "Khawnge naupang ho hi an va reh teh diak ve " a han ti a.Lalnu chuan "Kan tlangval Zawlbuk lawi a lo la haw lo va,A farnute tui chawiin an thang mek a nih kha,engnge ka tuibur chu a an a.Nikum lam a Chawia nu vaihlo min pek kha a nia.a al tui emaw chu " a han ti zui a,Upa Dailova chuan "Al tui khawp hi,kan tlangau nupui khi vaihlo a nei tui thei phian mai a.Keini kannu ve zawng vaihlo tui neih tih ni a nei ve lo ve," a han ti zui a.Lalnu chuan " Aw vaihlo na na chu kan ngah a lawm ,rappui chungsang khi pateah kan bilh thluah khi i duh ber khi i bawk haw dawn nia"a lo ti var a.Upa Dailova chuan chhan tum ka a an zuau lai chuan Lal fanute tui chawi haw chuan sum hmun a tang "Kannu kan lo haw e.min han chhah rawh le" tih pah in kawng ka an rawn hawng a.Bawka pa chu a tho nghal var a.a puanven sawi chhingin "Khawnge keiman kan chhuah ang che u." tiin phur fein Lal fanute tuium phurh chu a chhuah sak zung zung a.Hmeltha hi zawng tar leh upa pawhin an lo hre khawp mai a nih hi maw.Lal fanu hmeltha Vanmawii chuan "Kapa Dailova chu i tuan a la tha hle mai.Tlangval tam takin an tluk hauh dawn lo che nih kha " tiin Upa Dailova chu a han fiam a.Upa Dailova chuan phur fein"Aw Mawitei te tak hi chu aw kan len lai a rual lo hi chu a pawi mang e"tiin a nui ri hak hak a.Vanmawii pawh chuan "Ka pa Dailova hi chu aw tlangval chu la ni la,ka han nei daih mai tur che a nia" tiin a nui har har a.


Lalnu chuan "Mami kha i pa Dailova kha i vaihlo tui ber kha han bawk sak teh .annu vaihlo tui loh zia sawiin a phun a phun kha" a han ti a.Upa Dailova chuan "Mawii nu a ngai hleinem ka ti mai mai a nih kha''a lo ti thuai a.Vanmawii chuan " Khawnge tam deuh kan bawk sak ang che "tiin rap chung chu a han ban a,Upa Dailova chuan "Aw a tul lo a sin maw le,khaw nge in tih talh si chuan keiman kan chawi thla ang e,Mawii lo chawl hah dam rih rawh khai " tiin a tho va.Mawii chuan "Ka hah reng reng lo.Ka pa Dailo lo thu mai mai rawh ,ka ti thei a lawm " tiin Pate chu a chawi thla a,Changel hnahin vaihlo chu a fun nghal mawlh mawlh a.Upa Dailova chuan "Aw ka va lawm teh reng em,Mawii zarah Vaihlo tui kan zu ve dawn a nih hi " a lo ti hlut a.chutih lai chuan pawnah aw an rawn thian kharh kharh a,Sumhmun chu rawn ri thap thap in "In awm em " a rawn ti lauh va.Mawii chuan "Awm e lo leng rawh u " tiin a lo chhawn thuai a.


Kawngkhar chu rawnin hawngin Hmar veng Pu Hrangbula chu a rawn lut ta thauh thauh va,Lalnu chuan "E khai, Chhuma pa lah ni che,tap chhak lamah hian lo in hung ve rawh khai," a lo ti sawk sawk a.Chhuma pa chuan thut hmun a han rem a.Lalnu vek chuan "Chhuma pa chu kha lo tei lut satliah i ang lo riau mai ka ti,Thil pawimawh a awm em ni le " tiin Vani pa chu a han zawt a.Vani pa chuan "A eng dang a ni law.Nimin ka ramvak haw khu mi Bellei mual ka chuang chhuak tep kawng thlang Khiang kung lianpui zawn ka tleng chiah tihah kawng chhak lam ah sepui awn rawng rawng thawm ka hria a,Sapuiin a bei ni ngei turah ka ngai a,Khua a thim ruai a ni tawh si a.mahni mai a fiah miah ruat lo vin ka rawn haw san a,Nizan lam khaw chengin lenna kawng a hawng lo nen tukin lamah ka rawn len pui thei chauh a nih hi"a han ti a.Lalnu chuan " A va zia lo ve mawle aw.hmanni lawkah Hnuaia Pa Vawk a rawn la tawh a,Tun lai chu Sapui a hrang riau mai ka ti,Bawka Pa nang ka Upa chhuanvawrah engtia hma lak chi nge maw ni le"a han ti a.Bawka pa chuan "A Tlangval hoin va fiah se a tha awm mang e ka ti.Karte pawh kam a that ka ring mang e.Hmanni Hnuaia pa vawk la tu a nih phei zawngin kan thah vat loh chuan mihring tan pawh a hlauhawm thei ang " a han ti a,Lalnu pawh chuan "I rawtna chu a tha viau tak ang a,I fapa Bawkthanga te ho zu kal se a tha mai lawm ni" a lo ti thuai a,Upa Dailova chuan " A tha ang khawp ang chu ,Mahse Upa dang ho nen kan rel tlan a va tha awm ve.kan pahnih chauh va thu lo tih tluk zawng a dik lo vang ,Sawi leh i a awm palh ang e"a han tih chuan Lalnu chuan "A ni dawn teh tak e a,Upa min nge nge in thu a fing thin e.Khaw nge Tlangaupa koh turin naupang ho kan tir ang e" a han ti a."Siamte lo kal teh lawk "tiin a fanu te ber tleirawl dawng ngoh mai chu a han koh va,Lawmsiami chuan " Eih ah ka nu ,Engnge "tiin a lo kal nghal var a.Lalnu chuan " I pa Lutbuai a han ko tawh "a lo ti thuai a,Lawmsiami kal tur in her mek lai chuan kawngka rawnin hawng a,Tlangaupa chu a lo lang ta hlawl a.chutia an sawi lai mek leh koh an tum lai mek a ,a rawn lan tak hlawlah chuan an lo nuih thu hlawm a,Tlangaupa lah chu engnge annuih chhan hre lem lo chuan an vei nuih ve hui ringawt a.



Lalnu chuan nuih za deuh bawk si in sum tun chung chuan " Chawia pa teh hlawl chu kan lo sawi na mek mek che a,i lo hlan teh hlawl ni"a han ti a.Tlangaupa chuan "Engthu leh hla nge awm ta Lalnu " a lo vei vut roh va,Lalnu chuan "Tuk thuan ei hma rorel lawk a ngai tlat mai,ka Upa ho awm ang ang kha han koh khawm zar zar teh khai " a han ti a,Tlangaupa chu khawmuang lo vin a chhuak zui ta nghal a.Hrangbula pawh chu a tho tuih tuih a,Lalnu chuan "E khai,Chhuma pa engah nge i thawh tak uaih mai ,la thu ve rih rawh ,ro te pawh min rel pui loh vin" a han ti a.Hrangbula chuan "Ka lo va tin zawk ang e,Ka chhungte tukthuan eihma an duh thin a" tiin a han ding a,Lalnu chuan "I tih talh si chuan le,kha i haw hmain ka tuibur hi han hmuam phawt teh " tiin tuibur um chu Hrangbula chu a han pe a,Hrangbula chuan Lalnu tuibur chu a han hmuam a "E khai kan Lalnu nge nge i tuibur al chu a tui ngei mai a" a han ti a,Lalnu chu lawm takin a lo nui var var a,Hrangbula chu "Chaw ei tui u "tiin kawng khar lam a pan zui ta nghal a.Lalnu pawh chuan " A nih leh haw i tum tlat si chuan ,chaw ei tui le"tiin a thlah a.


Chhuma pa chhuah hnu chuan Lalnu chuan "Bawka pa Hmanni kan Sapui bawk kha a mi ni dawn le aw" a han ti a.Upa Dailova chuan "A ni ngei turah ka ngai,min kian san mai dawn lo a ang tlat mai.He tia Sapui huaisar lak lawh hi zawng an tawh a khirh duh fu mai a.Kan Pasalthate ko a rit leh dawn a nih hi" tiin a lo chhang a.Lalnu chuan "He tiang nikhuaah hian a nia ,Tlangval ho tangkai zia hi lo lang thin ni.Khawtlang himnan mahni hreawm pawisa hauh lova,nunna thap a an han che hmuh hi chuan ka fak lo thei lo ve" muk fe hian a han ti sap sap a.Mawii pawh chuan "Ka nu chutia Sapui a hran viau chuan feh chhuah chi pawh a ni dawn maw ni le,Ka thiannu Bawlin thlaihnah eng ilo vai pahin an lo a feh turin min sawm sin ,Awi kei zawng ka hlau e mai.ka feh ngam lo vang " a lo ti chul a.Upa Dailova chuan "Ngam teh reng e,Fimkhur deuh erawh a tha ang a.A hu ho deuh a feh kal turin Tlangau tir pawh a tha mahna "tiin Mawii chu a lo chhang vat a.Upa dang ho pawh an lo lut sap sap a." Engthu pawimawh nge awm ta ,Lalnu.Zing zingah in koh khawm ngai ta chu"an raw ti sap sap hlawm a.



Lalnu chuan "Han thu phawt ula ,hei Bawka pa hian a sawi thiam zawk ang han sawi teh se" a han ti a.Lal upa ho chuan thut hmun an han rem sap sap a.Upa Dailova chuan Hrangbula thawm hriat dan leh a hmun vel chu a han sawi zung zung a,Lalnu chuan " kha kha kan thu hriat chu a ni mai a,engtia hmalak tur nge ni ang in rawn khawm ila tiin ka upate ka koh khawm che u a ni e"a han ti a,Lal Upa ho chuan an aw an han thian kharh kharh a,Upa Rozama chuan "Pasaltha ho in an zuk finfiah a ngai zu nia,he tia sapui huasar tak khawi ngam reng zawng a tih chi lo vang ,tih hlum dan kan zawn te pawh a tha ang chu " ahan ti a.Upa Vungtawna pawh chuan "Hmanni lawk a,Hnuaiapa Vawk la tu Sapui ngei anih dawn chu Sapui tar lam Ramsa man thei tawh lo a nih hmel a.mihring a khawih hmain kan tihhlum vat a tul a nih chu " a lo ti ve thuai a,Upa Dailova chuan "A nih chuan Valupa Buanga hovin Pasaltha pali nga velin va finfiah sela,A tul dan a zirin karte pawh rawn kam se a tha mai lawm ni" tiin a han rawt a.Upa dang ho pawh chuan "A tha khawp ang chu " an lo ti tliar tliar a.Ti chuan Valupa Buanga leh Pasaltha Bawka hoin Tlangval huaisen deuh pali kal turin an ti ta a,Upa Huala chuan "A,he tia Sapui thawm a awm takah chuan kan khua leh tuite pawh fimkhur tur a kan hrilh a va tha ve " a lo ti ve bauh va.Upa Hrangkapa chuan "Sa ruang ei lak lawh lai a neih zawngin Mihring tan zawng a hlauhawm hrih dawn maw ni le" a lo ti ve duai duai a.Upa Rozama chuan "A ,eng pawh ni se palh awm thei a nia.fimkhur tluk awmin kei ka hre law.Sapui chin hriat hma chuan tumah daiah a malin chhuah lo nise,Feh kal pawh kawt chhuahah in nghah khawm a zau khat chu a rual kal nise a tha ka ti mang e" a han ti ve thunga Lal nu Chhingpuii chuan "Chu ti a nih zawngin Chawia pa nang lo va tlangau tawh,au hla tur zawng i hre mai ang chu maw" a han ti a.Tlangaupa chu a chhuak zui ta nghal a.Upa ho pawh chu Lalnu tuibur al chhuanvawr an hmuam sak liam liam hnuah tuk thuan eiturin an tin ta dam dam a.


Tukthuan ei lai chuan Upa Dailova chuan Bawkthanga hnenah "Hei Bawka Sapui hnu hma fiah a kal turin ni a.Sapui hi Pawngtawng basa ngam ngawt tur a ni ngai lo a nia.Mipa chuan thiante chhan ngai a an awm chuan an tlan chhiat san ngai lo tih hria la.Tin Chalhnawma te nen in kal dawn tih hria la fimkhur hle ang che,hmanniah Lalinah Vawmmana chungchangah Chalhnawma pa Hrangkapa leh Upa dangte kan thu a inbat deuhva.rilru thalote an lo put palh takin." tiin Bawkthanga chu a hrilh mawlh mawlh a.Bawka chuan "Eng ah nge maw Chalhnawma hi in tih tel teivet ni,dawizep ropui si,Khaw chhung him chinah a in hampuar vak vak ringawt a.a sa seh ah eng ruai ni si lo" a lo ti hmuk a.Bawka pa chuan "A Lal upa min fate anni ve bawk si a.Apa sawn a lansarh loh hlau miau hek maw le,A bulah Fimkhur ula rindan tawk in thiam a ngai a ni mai" a lo ti leh boh va.Bawka nau Nula Chuhthangi pawh chuan "Chalhnawma saw chu kei pawh ka ngei a nia.in sawi thei ropui si,chapo si " a lo ti ve tan tan a.Bawka nu Hnemi chuan "Khai khaih Thangi thin hi Nula in Tlagval an relin an ngei ngawt ngawt ngai lo,min an hre reu reu ang e" a lo ti vat a.Chuhthangi lah chuan "A ,Kei chauh in ka ngei lo va.nula zawng zawngin kan ngei vek ." a lo ti leh hmuk a.Upa Dailova chuan "Nula ngei rawn.Tlangval ngei rawn nih hi thil hlauhawm tak a ni reng a ni.Nun hi uluk a ngai a nia.Hram thlak zen hi Nula tlangval tan a mawi hauh lo a nia" chaw hmuam tun chungin a lo ti leh boh va.




MIHRÂNG LEH SAHRÂNG



BUNG 5-NA




Fur khawthiang ni chhuak eng ut mai chuan Vawmbuk khua chu a chhun eng ut mai a.khua a thiangin Khaw hawi a nuam hle mai a.tukthuan eikhamah Vawmbuk khaw mipui feh tur chu phur awm takin an lo lamah an liam zung zung a.Feh an han ta maw tih ah Valupa Buangate ho pawh silai pu far chungin Lalin a tang an lo chhuak tham tham a.Val upa Buanga ho , Vawmbuk Pasaltha Vungdala,Bawkthanga leh Chalhnawma,Vawmmana U Lianthuama ,Hleikapate an ni a.Kawt chhuahah zunramte thiarin an han ding chawl zawk a.Valupa Buangan vaibel zu khu hlat hlat chung a hma a hruai in Bellei mual lam panin an in zui dam dam a.Kal pah in Pasaltha Vungdala chuan "Kha Vani pa khan ka sepui a rawn lawi lo a ti maw kha" zawh bik pawh nei chuang lovin a han ti a.Valupa Buanga chuan "A nih awm kha maw,Chhuma pa thawm hriat pawh kha Vani pa se awn thawm ni turah ka ngai deuh ngawt a" tiin Vungdala chu a lo chhang a.Vungdala chuan "A nih ngei dawn chu a Sepui rang kha a nih phei chuan a va ui dawn ve aw" a han ti vang vang a.

Bellei mual an han lut tan a.Chalhnawma chu a hawi hruk hruk mai a.Chhuma pan a thawm hriatna hmun ni a,a sawi hmun chu an thleng ta thuai a. Val Upa Buanga chuan "Khai le,Sapui chetna ram kan thleng ta a,in Silaite endik ula,fimkhur takin hnuhma i han zawng ang u hmiang" a han ti a.Ti chuan kawng chhakah pakai chho vin an chhak mual kham phei lam chu an pan chho ta a.He lai hmun hi luang leh mauhmun in pawlh a ni a,luang hung lian pui pui a awm thluah mai a,A pikin kal a harsa fu mai a.Vangvat leh thosi lah chu an tam na ngiang mai a,Vangvat saitial lian zet zet hi an man nawlh nawlh reng mai a,Thosi lah a vir hut hut mai a,Tho mit chhai lahin mit a lo vir ve chhen bawk a,a chhak deuh lawk a tang erawh chuan Se rual tlatna hmun a nih a vangin Serual kalna hnu a lo thlur seng sung tawh a vangin kal a nuam ta viau mai a,chutah Valupa Buanga chuan "Hei,han vah vel pawh a harsa tawh lutuk lem lo bawk a,hetia inzui duah duah lo hian in thendarh ila,kan huam chin a lo zau deuh ang a,Hnuhma hmuh a awl deuh vang e" a han ti a,Ti chuan an han vak darh ta sang sang mai.Sapui chetna hnuhma emaw seruang emaw chu an phek zawn tawp mai a ni,nakin deuh vah chuan Hmar lam Mual kham phei tawp an thleng phei hlawm dawn tawh tih ah chuan Chalhnawma chu a rawn te ta vak vak mai a,hman hmawh phelengin Chalhnawma lam pan chuan an tlan khawm ta vat a,a hmun an han thlen chuan Val Upa Buanga chuan "Hnawma enge ni ta vak vak a,chutia i au tial tak ruai ruai ni" a han tih chuan ,Chalhnawma chuan "Khu khu laiah khuan a awm." tiin an piah lawk chu a kawk a.Pasaltha Vungdala chuan "Eng maw awm.Hnawma" a lo ti bauh va,Hnawma chuan "Sial kha maw le.Saw lai luang buk hliah ah sawn " a lo ti vat a.Vungdala chuan "a va ho ta mai mai thin em aw,Sapuiin a bei che emaw kan ti hman a lawm,Sepui ruang hmuh mai mai au tial ruai ruai kher a ngai mi.mi ti ralkhel a lawm maw le,auh pangaiin min rawn au mai ta che" tiin Hnawma chu a hau deuh va,Midang ho chu an lo nui tet tet hlawm a,ti chuan muangchangin Chalhnawma Se ruang hmuhna lam chu an pan ta tham tham a,Luang hung piah hmun fai lai deuh ah chuan Vani pa Sepui rang ngei mai chu a lo thal reng mai a.tho leh ran nung dang ten an lo bawm laih laih a.

Vani Pa sepui ruang chu Bawkthanga te chuan mak ti fein an thlir thap mai a.Sepui thankin uaih tawh chu a chanve zet a loin ei hek huam mai a.Sepui ruang bulah chuan hniak mak tak mai Mihring hniak tih tur a ni mang silo Savawm hniak ang lek lek hi a awm thluah mai a.Nizan lam a ruah a sur hnem deuh a vangin a lang chiang lutuk lo na a.Sapui hnu chu a Ni lo chiang mai a.Pasaltha Vungdala chuan Sepui ruang chu uluk fe hian an bel chiang vel a.Chutah "He sepui beitu hi kan hriat thin ramsa a ni thei lo tawp mai.han en ve chiang ve mah teh u, a Sepui eina hnuhma hi a ruh zawng zawng nen a ei fai deuh vek a nih hi."mak tih hmel fein a rawn ti chhuak a.Bawkthanga chuan "Eng ramsa fakau nge ni ang a,Sepui thankin uaih tawh a ruh zawng zawng nen a ei fai ta kelh chu "tiin a hnu hma te chu an en chiang thuak thuak a.Valupa Buanga pawh chuan " A mak kher mai a,Sapui chetna chu a ni lo chiang mai ,He tiang Sepui ruh chang pawh thial sawm vek thei chu Ramsa ha hriam leh chang tak nei a nih phawt mai a,a hniak lah mihring hniak a ang dawn dawn bawk si a,Engthil tak ni ang maw"han han ti ve vang vang a. Chalhnawma chuan "Ramhuai emaw eng huai emaw tak a ni ngei ang "tiin hlauh thawn hmel fe hian an bul vel chu a melh kual ruai ruai a.Vungdala chuan " Huai lam pang thil tih te pawh a nih theihna chen a awm tho mai.ramsa pangaiah he tiang ti thei an awm lo "a lo ti ve leh a,Valupa Buanga chuan " Eng pawh nise,He ramsa hi eng ang chiah nge a nih kan hriat duh chuan kan thah phawt a ngai a,Chhui zui nge tha kan tih a,Kar kam hnan a hawsan leh phawt"a han ti a.Vungdala chuan "Upa ho khan Kar kam kha an sawimawi deuh viau mai a,han chhui buangbar ai chuan kar kam mai hi a tha mai lo maw" a han ti a,hnialtu an awm lem lo bawk a,kar kam tur chuan an in buatsaih ta nghal a,Kar kam tur an han buaipui mawlh mawlh lai chuan Lianthuama chuan"Kar kam tho ila ,chhui tho bawk ila a pawi dawn em ni"a han ti a,Val upa Buanga chuan "Kar kam reng reng hian a seh tuin a rawn ei leh ngei ngam nan hnu hma a tlem thei ang hnut chhiah tum tur a ni a ,kan va chhui vak khan a Sehtu kan hnawt tiau thei " tiin Thuama chu a lo chhang a.

Ti chuan Sepui sehtuin a sa seh rawn ei leh a tum hun a ,a pal fuh ngei an rinna laiah tak chuan kar chu kam turin an han buatsaih a,Bawkthanga chuan "Khaw nge ka hovin kan han kam ang e,U Buang U Dala nen kha chuan Vaibel zu chungin min lo thlir mai mai rawh u"tiin Vakupa Buanga leh Pasaltha Vungdala chet phal lovin a han che zui nghal a,Hleikapa leh Thuaman chuan tha tho takin an lo pui vat a,Chalhnawma erawh chu Valupa Buangate bulah a thu hnuang a," Tho si tam em mai "tiin a in zap hluau hluau a.in ti Seruang hmu takin chet ve pawh a tum lo va,thut hmun a tang a dak zuah zuah ringawt a, ti chuan la zai hrual dum chu Sepui ruang bulah zamin an Kar kam cheng ah an thlung a ,kar chu Mau bulah nghet takin an tawn bet a.He hrui hi a pal fuh an awm hun hunah kar hi a puak mai dawn a ni.Bawkthanga leh Lianthuaman kar mau bul a an tawn beh mawlh mawlh lai chuan Valupa Vungdala chuan "Bawka engtia sang nge i tin zawn tir dawn " tiin a han zawt a.Bawka chuan "Sakei kar kam in a sin ka kam mai " a lo ti vat a,Valupa Buanga chuan "A,ni mai teh se,kan sa hi Bawk vak a kal nge Mihringte ang a ke a kal tih kha kan ngaihtuah a lawm maw le"a lo ti leh a,Vungdala chuan thosi vai lauh lauh chung chuan "Sakei kar kam a kan kam a,Mihringte ang a kal ramsa a lo nih teh chuan a kap fuh kher lo mai thei a,a fuh pawhin a malte velah a kawlh tawkin a fuh dawn a ni mai a.Chhui man a awm deuh ang chu "a han ti fiamthu hlut pah hlut a.An kar kam zawh chuan an hnu hmate a theih ang ang an han thup sawk sawk a,a tuk lam a Kar chu zuk en leh turin an haw san ta rih a.


Khua a tlai zel a.Vawmbuk khaw lo feh ho pawh sapui a hran a vangin mirual a haw hman loh hlauvin an in ti hma hram hram hlawm a.zau khat lo in hnaih deuh te chu in au khawmin a huhoin an in zui haw dam dam a.chhun lamah hah viau mahse hlim tak a ti ti chung leh infiamin an ri chel chul hlawm a.Nula nui khek rawih rawih riin zau tin mai a luah a.Khaw thlir rem chang lai deuh vah Tlangval hovin Fanghma leh dawnfawh kawr suih bialte tlawh in an ri laih laih a.


Hramlianate nupa pawh muangchangin an haw ve hnak hnak a.thlai ban dawn a ruaiah Dala pa Hramliana chuan an vau a,a thangkam chu a en khawtlai leh a vangin mi rual pawn an haw hman ta lova.Ni pawh a tla dawn ruai ta mai.Dala nu Thanglovi chuan pasal thang en haw chu a lo an khum hlak hlak mai a." Sapui a hnai a Lalnu leh Upa hoin fimkhur turin mitin an chah mawlh mawlh a.nang a thang awk thei hlei lo en vangin kan zau ho pawhin min hawsan vek hi"a lo ti tan tan a.Hramliana lah chu pa ngaihsam tih takah "Lo haw mai mai teh se,an rual lo pawn kan haw theih em hi maw" a lo ti duh lek chauh va.ti chuan mi hnu vai ramah anhnah leh thlai in phur bawr luk chungin annu Thanglovi chuan hma hruai in an in zui haw thei hram a.Rodala pa chuan annu hnungah ipte pui akin fei hawl chungin a zui a.chutia an kal zel lai chuan khua pawh an hnaih sawt viau mai a.mi dang erawh an liam zo vek tawh a.an thawm hriat tur a awm lo va.Zau an pel fel Zopui ngaw phei an tih mai an lut chho dawn a.ni a tlak fel tawh a vangin khua a thim deuh chhulh chhulh tawh a.Hramliana chuan "Khau a thim zual hmain meichher kan siam ang e" tiin kawng sir mau ro chu a phel zung zung a.meichher chu chhi an kal zui leh ta thuai a.Zopui ngaw an lut chho va.ngaw chhung phei chu a lo thim viau tawh mai a.Dumde an tlawk sup sup a.Thli in ngaw thin hnah a chhem ri seng seng a.lei lamah rannung an hram ri chiah chiah a,Ngaw chhung an pel dawn hnai tawh a,ngaw chhung rannung hram chiah chiah te chu vawi leh khatah an reh duak mai a,chu lai boruak chu thang huam mai a, Hramliana chuan ngaih tha chiah lovin kawng sir chu a melh leh zauh zauh thin a.annu Thanglovi thung chu engmah a hre lo nge a kal ngai in a kal hmiah hmiah mai a,Kawng chhak lamah thing tang rah thliak niawm tak hi a han ri rap a.Hramliana chuan eng sa emaw chu a ni ngei tih hriain a ding chawt a .Kawng chhak chu an thlek chho ngial a.meichher eng tha lo nen engmah phei chu a hmu lem hlei lo va.Chutih lai tak chuan a hma deuh va kal annu chu a te tuar a,a em phur chu a leng lawp a,a thil phur chu a darh chuai a,a ni pawh chu kawng thlang lamah a rak thla ta teng tung mai a.Rei loteah a reh ta hmak a,Hramliana chu rang tak a tlan pheiin annu awm na zawn a thlen phei chuan kawng thlang chu a lo pe thla sul mai a.Sapuiin a la ngei ah ngaiin a han au thin a chhang tu reng an awm si lo.Sapui rum thawm niawm tak hi a lo chhuak a,rei loteah chu Sa chuan Thanglovi chu a ei ni ngei tur a ni a seh ri ta bup bup mai a,Hramliana mangang chu annu ko vak vak chung a tap deuh pur mai a,Zuk chhuk thla ngawt dawn se thim thamah meichher nen chauh chuan a ngam chiah si lo.a meichher lah fur lai tih tak ah a alh tha duh lo hle mai a.


Chutia a buai lai mek chuan a meichher chu thli rawn thaw thut chuan a rawn chhem thi daih leh nghal a,ngaw hnuai chu a thim kher mai.Hramliana chu a mangang kher mai ,Lal leh upa ho thu a lo ngai pawimawh lo chu a in chhir ta kher mai ,a sawt tawh der mai si lo.chutah a hnung lamah thawm ri rak hriain a in her nghal zawk a.Chutih rual chuan ramsa tin hriam tak chuan a hrawk chu a rawn ham thler nghal hawk mai a.thisen a chik nghal tuar mai a,Hramliana chu a hrawk dawmin a thawri bawrh bawrh mai a.a thingthit hnawk rual chuan chu Ramsa chuan Hramliana lu chu a rawn seh keh ta rawp mai a,a thingzui nawk nawk a,kawng thlangah hnuk liamin a thlang deuh vah a seh ri ta bawp bawp a.


Vawmbuk khua chu Vani pa sepui ramsa mak takin a seh chung chang leh Pasalthaten kar an kam thu in a luah hneh hle mai.mitin ti ti ber a ni a.chu tih lai mek chuan Rodala chuan Lalin ah a nu leh pa feh haw an lo la haw loh thu a lo thlen mek bawk a.Lal Upa ho chuan Sapui in a la nih ngei ringin ha chang thial bap bap chungin "He Sapui hi kan khawi ngam ta lua a ni e,Naktuk chu khawtlangin kan zim a tih hlum ngei a ngai zu nia" an ti sap sap a.Lalnu leh Upa ho chuan rorelin Tlangval tlawm ngai in Hramliana te nupa chu zuk ngaihven se an ti a,Thlangaupa chu Valupa leh Tlangval ho hrilh turinZawlbuk lamah chuan an tir ta nghal a.



Vawmbuk Zawlbukah chuan Tlangval ho chu Valupa khabe liam changin an la thu thap hlawm a,Vani pa sepui sehtu leh Kar kam chungchangte an sawi a,Tlangval ho pawhin nula rimna chang hre lo lekin an lo ngaihthla hlawm a,Vawmmanate thian ho pawh tlangval ho karah an thu ve khar hlawm a.Valupa pakhat chuan "Sepui ruh pawh a ei mai thei chu a ni si a,Eng ramsa nge maw ni teh reng ang le aw.Sakei sual ai in a chimawm fe awm mang e" a han ti vang vang a.Valupa Buanga chuan a tuibur hmuam chu Zawlbuk meipui a pik puat pah chuan "Naktuk kar kam enna ah Tlangval kei ka ni inti chin chu kal vek tum ila,he ramsa hian pawi thui zawk a khawih hma a dah that ngei hi Vawmbuk tlangval ten kan tih tur a ni" a han ti chuan Vawmbuk tlangval ho chu an phur kher mai .chu tia an lo rik laih laih lai chuan Tlangaupa chu Zawlbukah a lo lut hlawl mai a,an lo en thap lai chuan a han hawi vual vual a,"Dala pa Khi vengchhak pa Hramliana te nupa feh tun thlengin an lo la haw lova,Lal leh upaten Tlangval tlawmngaiin va en se an ti nih chu "tiin irh uk uk chungin a in her a,a chhuak zui leh nghal vut a.



Zawlbuk Tlangval ho chu an ri zui mam mam a,Chutah Valupa Buanga chu lo ding chhuakin aw fiak thak fiah kek kawk in " Vawmbuk Tlangvalte u Vawmbuk khaw muan thin tu innih ang in zanin hian Lal leh Upate chuan tanpui ngai tanpui turin an ngen che u a ni a,a Kal thei turte chu rang tak a in lam a va insiamin Lalin kawt zawlah chhuak khawm leh vat ila tha ang e"a han ti a,Tlangval tam zawk chu insiam turin an chhuak zui ta nghal a.

He tih lai mek hian Khuaikham chung kham lungpui tohlawt a ding nu pakhat chu ring takin a nui khek uar uar mai thung a,a nui ri chu a rapthlak in hriat fo nuam lo fahran mai a ni a.Ngawhnuai chu a nui ri rapthlak tak chuan a khawk rum rum mai a.a bul a ding ramsa maksak tak tak pahnih pawh an lo u ruah ruah bawk a,a hnungah Tlangval hmeltha em em mai hi a kut kuang kuahin a lo ding ve bawk a,chu lai vel boruak chu a uapin a thang huam mai a.ramsa maksak mitmeng de thiang rual mai te chu chik nghur nghur chungin an Lalnu bulah chuan an vir kual sek a.Tlangval hmeltha tak chuan chunu darah chuan rawn khawih in a phun sap a.ngaw ril lam panin a in her zui ta nghal a.Chunu chuan Vawmbuk khaw lam chu huat hmel fahran a melh leh vang vangin "A hun a thleng ta"ti sap chungin a inher a tlangval kalna lamah chuan a liam zui ve ta nghal a,Ramsa maktak pahnihte chu Lung pui chungah dingin ngaw hnuai khawk rum rum khawp a ring in an u leh ruah ruah a.rum chhur chhur chungin ngaw hnuaiah chuan an pilbo zui ve ta nghal a.
Last edited by LN Kima Guite on March 29th, 2018, 3:50 pm, edited 1 time in total.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 27th, 2017, 7:49 pm

MIHRÁNG LEH SAHRÂNG


BUNG 6-NA



BY -LN Kima Guite




Vawmbuk Tlangval rual chu an ralthuam neih ang ang rawn thawh chhuah puiin Lal in kawtah an lo pung khawm zel a.Silai leh fei ,chempui nen an ther fuk mai a.Lal Upa ten thil tul leh pawimawhte an sawi zawhah Hramlianate nupa zawng tur chuan hmar lam kawtchhuah lamah an liam ta dul dul a.Val upa Buanga chuan kawt chhuahah fuih na thu leh an hmalak dan tur sawiin " Hei Vawmbuk tlangvalte u,zanin hian Hramlianate nupa feh haw thei lo zawngin kan kal dawn a ni a.Valupa te thu kan ngai chang zel ang a.lo a feh annih a vangin an lo lam panin kan liam phawt mai dawn nia.tumah kal fal lo ila.kan hmachhawn tur hi Ral nge Sapui nge engthil kan la hre chiang si lo va.fimkhur takin chet kan la dawn nia"a han ti a,ti chuan Hramlianate nupa zawng tur chuan meichher eng nen an inzui liam ta thluai thluai a.


Fur khaw diak,Vangvat leh thosi karah midangte tanpui turin Vawmbuk Valrual chu hreawm pawisa lovin phur tak ni awm zawkin hma lam panin an kal sauh sauh va.Zopui ngawpui an han lut tan tih ah chuan Boruak a lo thang huam mai a,A hmahruai Valupa Leh pasaltha ho chuan mipui chu ding turin an han ti a,Valupa Buanga leh pasaltha Vungdala te ho chuan kawng sir vel chu meichher eng nen uluk takin an han en vel a,Kawng lai leh kawngsir hnim hnah vel a thisen lo per sen phung mai chu an han hmu ta thuai a,kawngsir a Thanglovi leh Hramliana ramsa kawlhin an hnuh thlak na pe thla sul mai chu an hmu zui thuai bawk a.hmuh hnih laiah hnuhma an hmuh a vangin Valupa ho chuan uluk takin an han enchiang a,chutah,Valupa Buanga chuan "Awle hei kan mi zawnte hi Sapuiin a bei ngei niin a lang a,An hnuhma a tang hian Sapui hi pahnih an niin a lang a,kan fimkhur hle a ngai dawn a ni.Pasaltha Vungdala hoin Silai keng panga velin hnuhma pakhat hi lo chhui se la,Bawka ho in keinin hei khiang kung bul a mi hi kan han en chiang bawk ang a,midang ho kha chu in ral palh a hlauhawm a vangin kawngah kan lo awm phawt dawn nia" tiin ro a han rel a,ti chuan hnuhma chhui tur chuan meichher eng tha tawk nen kawng thlang lamah Pasaltha ho chu an liam zui ta nghal a,Mipui chuan kawngah an lo nghak a,a rem hre zualin kawngsir thing tangro an han fawmkhawm zung zung a,kawngah mei an chhep eng hluah mai a,a dawizep deuh ho erawh a lai lum chuhin an hawi hrek hrek a.
Reilo teah Bawkthangate chuan Hramliana ramsa kawlhin a eina hmun chu an zu pawh ta thuai a,thisen tharlam tak chu a hnim ah leiah te chuan a luang ngei nguai mai a,Ruang lah hmuh tur a bar a lo awm tawh lova,Taksa thenkhat lai lai tlem teh tih loh chu a loin ei zo vek mai a,hnu hma an han en chian chuan Vani pa Seruang bul a an hmuh ang chiah mihring hniak ang tak tak an hmu nual mai a,he ramsa hi Sapui ni lovin hriat chian loh ramsa kawlh bawk a ni tih an han hriat chuan an chek tlak tlak hlawm mai a,hnuhma chhui zui tur han zawng ngial mahse han chhui mai tur hnuhma chu ramsa chuan a hnut chhiah tlat lo mai a,Valupa Buanga chuan "Engpawh nise ,ruang hlawm tur awm ang ang hi i hlawm phawt mai teh ang u,zan thilah zawng hnuhma hriat chian a har em mai.naktuk lamah kan en tha leh dawn nia," a tih a vangin Ruang Sakawlhin a eibang awm ang ang chu an la khawm a,Sakawlhin a eiban tlem em vangin ruang hlawm tur mumal pawh a awm meuh lova, an thlang deuh ah pasaltha Vungdala te ho pawh chuan Thanglovi ruang sakawlh eibang tlemte chu an lo hlawm ve mek bawk a.ruang hlawm tur a tlem dun kher mai le.ti chuan kawngpuiah chhuak chho vin Valupate thu ang in ruang an chhungte hnena thlen turin changel kung leh hnahin an siam belh a,muangchang lovin an in zawn haw ta a.


Vawmbuk tlangvalten Hramlianate nupa ruang nen a khawchhung an luh chuan Vawmbuk khaw mipuite chu an phawk lek kher mai ,Mithi in lamah an tlan khawm nghal zung zung a,Mithi chhungte hnem turin nu leh pa ,nu leh tlangvalte chu Hramlianate in ah chuan an thu khat hmur mai a,Ramsa kawlh chanchin chuan khaw chhung a luahkhat rang hle mai a,Hriat chian loh ramsa kawlh leh koham tak chuan Vawmbuk khua chu a ti ral khel hneh hle mai a,Lalinah pawh Lal leh Upate chuan an pasaltha ram kalte chanchin an lo ngai chang mek a,Valupa Buanga chu Hramlianate ruang an in a an han dah fel hnu chuan mahni in lam pawh thlawh kawi lovin Lalin lam a pan ta thuai a.Lalin a Valupa Buanga a va luh chuan Lalnu leh a khawnbawl ho chu an lo thu far hlawm a,Lalnu chuan "E Buanga nge nge i tuan a va tha thin tak em ,lo thu chawl la,hei ka tuibur hi han hmuam te te la,in va kalna chanchin chu min han hrilh dawn nia" a han ti a.Upa Rozama chuan "I hah viau nang a,chanchin kan hre duh si a,kan lo nghak tang tang che a nih hi" alo ti ve boh a,Valupa Buanga chuan Lalnu tuibur chu a han hmuam te te a,Lalnu tuibur chu han fak luam phawt a,Lalnu chu a lo lawm hmel takin a lo nui var var a,a tuibur an han fak sak hi chuan a ka pawh zen ila min seh lo vang e.tih mai tur hian a lawm lutuk hi a nui var var zel mai a ni.Valupa Buanga chuan an va kalna chanchin chu ahan sawi zar zar a,'He ramsa hi eng ang chiah nge nih tumah a hmu kan la awm miau loh a vangin kan hre mai thei lova.ma rawh chu ramsa kawlh leh rapthlak tak chu a ni phawt mai a,a sasehte a eidanah ramsa namai lo tak chu a ni phawt mai a,Kan khawtlang min ti buai zui viau ang tih pawh ka hlau hlel love"a han ti zui a.Lal upa ho pawh chuan mak an tih thu leh tun hmain he tiang ramsa mak hi an la hriat ngai loh thu an sawi sap sap a.Eng pawh nise mipuite fimkhur leh zual tur in hriattir leh nise,khawthim hma khawchhung lut vek tur mipuite hrilh ni bawk se tiin an rel a,ti chuan mithi in lamah rei lote tal lan ve tumin Hramlianate in lam pan chuan an in zui chhuak ta dam dam a.

He tia ramsa kawlh vang a khawtlang a raltit hle lai hian Vawmmana pu Liannghaka chuan mumang mak tak mai a mang tlat mai a,a zing tho chu hmai pawh phih lovin pawnah chhuakin an khawral mai khuai kham lo in chhawrdawh ut mai chu a thlir voh voh a,"Ka tupa mihrâng i chet a hun dawn ta"tiin a phun sap sap a,a mumang mak tak mai chu a han ngaihtuah a,mumang pawh ni lo a tak ang mai a fiah leh chiang a ni.Ni a chhuak dawn suar suar tawh a,Liannghaka chu leikapuiah thuin a tupa naupang fel tawh tak Thankunga nau Lianhranga fapa Darkhuma chu koh in Vengthlang lam a ,a u Vawmmana chu zuk ko turin a tir ta a.


Vawmmana zing tho pawh a sairawkherh lain ipte ah saihlum a thun mawlh mawlh a,Dai vel a sava veh tur a chhuah mai a tum a.A nu chuan "Mana kha khawi a kal nge i tum a,Sava veh te i tum rawk a law.Lal leh Upaten an awi hrih lo kha ,mi thu awi lo thla fal chu hei i hriat ang in Dala pate pawh he ti annih hi" a lo tih chuan Vawmmana chuan "Mi an chhuak vak ngam lo vang a,sava perh tur a tam dawn a lawm kanu" a lo ti thuai a.Vawmmana pa chuan "Khaih khaih Vawmmana thin hi aw.Tun ang sahran lai a mahni a dai a kal tumte zawng a mi an loh thlak em mai." a lo tih ve a vangin Vawmmana chuan a pa thu chu hnial ngam lo vin a sairawkherh chu dahin tap chhakah a va thu tum bar a.a u Thakimi chuan buh thap pahi. Vawmmana ti tau chu a lo nuih tet a.Vawmmana chuan a u Thatei chu rum fein a va melh kawk a.chutih lai chuan Darkhuma chu lo lutin "A u man a puin zuk koh rawh a ti" a rawn ti thawr mai a.Vawmmana chuan tui loh hmel zetin "Eng a tan nge min tih a" a lo ti hluk a.Darkhuma chuan "Hre bik lo ,zuk ko rawh a ti ringawt a" a ti leh mai a.Vawmmana chu "Eng a tan min ti ni maw" ti nuah nuah chungin a tho va.a u Thatei chuan "Le le le..a pu chuan a hau dawn che a ni ngei ang " a lo ti vel a.Vawmmana chuan "Min hauh ngawtna tur a awm lo ve " a lo ti bak leh hluk a.Darkhuma nen chuan a pu Liannghaka tein lam pan chuan an in zui chho ta a.kal kawng ah chuan a in ngaihtuah nasa mai a.a pu chuan a lo hau tak tak dawn a nih ringin enge a tih sual awmte a han ngaihtuah a.Rawlthar harh leh thaza rual ta ngang chuan chu mi kha mi kan tih kha a ni ang a min hauhna chhan tur han tih mai tur chua awm thei mai zel a.ti chuan hauh in ring ranin a pute in lam chu an pan chho zel a.Tleirawl amah lo hmu tute chuan an lo thlir vawng vawng zel a.Vawmmana hi hmeltha hluah a sawi tur ni lo mahse nula duh chi ani tlat a.a huaisen em a vangte pawhin Tleirawl ho ngaihzawn a hlawh ve khawp mai nghe nghe a ni.



Vawmmanaten a pu Liannghaka te in an han thlen chhoh chuan a pu chu Leikapuiah alo thu khan mai a.lutuak var vo tawh niin a a vunte chu a zur tiap tawh mai a.Vawmmana te a lo hmuh chuan a lo nuih var var a,"E Mante i lova lian tawh ve le,i lo lengkhat em a.ka ngai lutuk tawh che lawm "a lo ti khur bauh bauh va.Vawmmana pawh a pu chezia leh a thusawi dan a tang chuan a hau dawn lo ni a hriain a thawveng huai mai a,Chutah a pu chuan "lo thu teh ka bulah hian thil hril tur che pawimawh tak ka nei a nia" a han ti leh a.Vawmmana chu a pu bulah a va thu a.A pu Liannghaka chuan a aw an thian kak kak a"Ka thu hrilh tur che hi uluk takin ngaithla ang che,he khaw himna hi i kutah a in nghat dawn a ni"a han ti te te a.Nizan a mumang leh a thil hriat te chu Vawmmana chu a hrilh zui ta malh malh a.

####
"Hei i hriat ang in tun hma chuan Khawkhat pasaltha niin sa lu leh milu tam tak ka lo khai ve tawh thin a.Lasi thiante hial pawh ka lo nei ve thin a.Vawikhat chu khi mi Khuaikham chung ram ngaw khian ka lung a len tlat mai a.khi lai ngaw a ramchhuak tam tak chin hriat lohvin an bo fo maite fiah ka duh pah fawm nen.ka ramchhuah pui thin ka thian thate Zinga leh Raltuka te sawmin khi lai ramah khian ramchhuak turin kan kal ta a.a tirah chuan kan tluang viau mai a.Sele ki mawi tak mai ka kap a.hlim takin kan chan a kan rep tuar mai a.chumi zanah chuan thil mak tak mai a lo thleg ta a.Ka sele kah lu meipui kan rep mek chu a rawn khek ta ruai ruai mai a,makti fein kan zuang thova,Sele lu kan han en chu a lo nui vur vur mai a,a rapthlak kher mai pasaltha kei ka ni in ti meuh pawh ka hmulthi a ding sung sung mai a,kan velah thawm mak sak leh rapthlak tak tak a chhuak bawk a,kan buk chu chhumdum a rawn zam hnan chuk chuk a,Hmeichhe nuiri rapthlak tak lo chhuakin ngaw hnuai khawk rum rum khawpin a nui te uar uar mai a,patling rumri rapthlak tak tak te chu kan buk velah chuan a lo chhuak bawk a,Silai nen in ring takin kan hawi kual sek mai a, Sele lu lah chu a khat tawkin a bu leh ruah ruah mai thin a,kan mangang tlang ngei mai ,kan vel thinghnahte chu a sawitu hmuh tur awm si lovin a in sawi lawp lawp hlawm bawk a,Chhumdum lo zam chiai chiai karah chuan a tak hmuh chian hleihtheih si loh thil dum lian pui pui hi an thlawk kual pawp pawp bawk a,chutah thawk leh khatah Zinga chu hneh sawh zet hian chung thil dum ho chuan khai in an thlawh pui ta lawp mai a,in chhan hman pawh a ni lo.Zinga lah "min chhan ruuu" tiin a te zui vawr vawr a,chhan theih a ni si lo.kan Raltuka nen chuan kan chempui chu kan han vai dun pawp pawp a,chung huaiho chu kan vai fuh a piang chu an te ve thawt thawt zel a,mahse an tam em vangin kan thain a tlin ngang si lo.Raltuka chu an rawn la leh ta lawp mai a,te ruai ruai chungin an thlawh liam pui a,ka thiante Zinga leh Raltukate pahnih te ri kha tun thleng hian ka bengah hian a cham reng mai a hreawm tak a ni.kei pawh ka chau ta kher mai a,chu tih lai chuan thahrui chak zet ka ban vei lamah manin min thlawhpui ve ta lawp mai a,ka kut ding lam a ka chem hum chu thei tawpin ka vai kual ve vak vak a,vanneih thlak takin min chelhtu kut chu ka vai fuh ta hlauh mai a,a te thawt a min thlah ta nghal a,boruak thlawk kanni si a,lei lamah tla thlain thing hnah te chu ka su thla bawrh bawrh mai ka malpui ruh thingzar a ka tauh tliak rawp chu ka hriat hnuhnun ber a ni a.Ka han harh leh chuan khua a lo var uar tawh mai a,thei leh thei lovin ka malpui ruh tliak chung chuan in lampanin ram palai leng ah riltam tuihal dangcharin ka vak hram hram a,chutia nikhat leh zan khat ka awm hnuah chuan ka lasi thianten min hmuin min enkawl ta a ni.


An chennaah min lain min enkawl a,kan ramchhuahna hmun kha huai ho ram chhung a nih a vangin an rawn lut ve mai mai thei lova,min rawn pui thei lo hi a lo ni reng mai a,ti chuan ka malpui ruh tliah a vangin ramchhuak zui thei lovin ka bawp sawp ta reng a,hei i mi hmuh angin tun thleng pawh hian duh duh naah pawh kal hleithei lovin ka la bai suih suih hi.ka thiante kha zawn leh ka duh em em thin a.mahse ramchhuak leh thei ka ni si lo.ka thian lasite chuan ka mumangah " i tute zingah mibik mihrang i phuba la tur huai ho pawhin an ngam loh tur a lo piang dawn e" tiin min hrilh thin a,ti chuan i lo pian khan chu ka thiante sawi mihrang chu i ni tih hriain ka lawm em em a,hei i lo thang lian zel a,mibik i nih zia i chezia leh i thil tihin i lan tir zel a,ka lo chhuang em em thin che a ni.


Ti chuan Nizan ka mumangah ka thian Lasite chuan min rawn tlawh leh a,Tun a kan khawtlang ti buai tu Hramlianate nupa leh Vani pa Sial ti hlumtute chungchang hi min rawn hrilh ta a ni.he Sahrâng hi nang mah ang mibikte kaih hruaina leh thiltih theihna hmang chauh va hneh theih an ni dawn a ni.Vawmbuk khaw him chu i kutah a awm ta a ni.Heng Sahrâng ho hi ka thian Lasite sawi danin Khuaikham chung ngaw huai lalpa leh mihring dawithiam pakhatin kan khaw ti chimit vek tur a an siam a ni a.An chanchin tam tak hriat tur a awm dawn a,a lo beih let dan turte leh lo inven dantur thlengin heng Sahrâng ho chanchin hriat chian leh a beih let dan tur hriat chhuah chu i kutah a awm a nih chu.Heng Sahrang ho chanchin hi ka lasi thiante pawhin an la hrechiang lutuk thei bik lo va,a chhan chu Heng Sahrâng ho chenna ngaw hi an ram chhung a nih loh a vangin Lasite pawh an duh duh a an luh ngawt theih bik loh a vang a ni.He ngaw a lut thei chu heng huai ho leh Sahrang ho bakah mihringte kanni a,Lasi ho puihna in Heng huai ho leh Sahrangte hi i nunna thapin i bei ang a,i hneh ngei tur a ni ,i hneh lo a nih vaih chuan Vawmbuk khua chu kan mang phiar dawn a ni."
#####
Tiin Liannghaka chuan a tupa mihrâng Vawmmana chu a thuruk hriat zawng zawng chu a hrilh ta kel a,Vawmmana lah chuan makti fein mit khap nachang pawh hre lovin ka ho khawpin a lo ngaithla a,a puin a sawi zawh chuan a thaw huai a."A nih ka pu Ka la naupang in Zawlbuk em pawh ka la kai lo a ni si a,Heng Sahrâng ho bei tur hian engtin nge bul ka tan ang le."a han ti nauh nauh va,Liannghaka chuan "A hun a lo thlen a ,nangmah i in peih ni a an hriat hunah chuan Ka thian Lasite i bulah an lo lang mai ang" tiin Vawmmana chu a lo chhang a,thenawm khaw vengte pawh an chhungte leng tukthuan ei turin an in ko nak nak hlawm tawh a,Liannghaka te putu pawh chu tukthuan ei turin an in then ta a.
Last edited by LN Kima Guite on March 29th, 2018, 3:52 pm, edited 1 time in total.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 28th, 2017, 6:45 pm

MIHRÂNG LEH SAHRÂNG

BUNG 7-NA



BY -LN Kima Guite



Vawmbuk khaw feh kawngah chuan losul haw an in zui diah diah a.an boruak tawn a ral muan loh em a vangin tumah hnufual awm lovin zau khat nei ho chu an in nghak khawm an haw rual dam dam zel a,Mipui tam tak feh kawng an han in zui kawi dam dam mai chu hmuhnawm let ling phian a,Nula vangvat kai fuh palh te tuar tuar lah an awm deuh reng a,Tlangval hoin phur takin an lak thlak sak zel a,mitin ti ti ber chu Sahrang hlauhawm tak chanchin a ni a,Hnu chhui tur mumal awm mang si lo leh han beih zui chiam thei si loh a nih a vangin an lu a hai tlang hle mai a,Vani pa Sepui sehna hmun a Pasaltha ho kar kam pawh a per ngei na a,hnuchhui tur mumal a awm miau loh a vangin pasaltha ho chu bei dawngin an haw leh ringawt a,Hramlianate nupa sehtu lah chuti bawk hnuhma chhui zui tur awm hek lo ,Pasaltha ho chu beidawngin an haw leh ngawt mai a ni.Pasaltha Vungdala chuan "Aw a tak a han tawn tur awm se sah sawk sawk ka va chak tak em " tiin a vaibel dawn a seh keh rap rap mai a,Pasaltha ho chuan an tlawm la hle mai a ,Sahrang lak khawtlang mipui hum zo lo riakah in ngaiin awm hmunah an in sawh an in sawh mai a ni.



Feh haw hnu khar zingah Vawmmana pawh a kal ve hnak hnak a,A pu thuhrilh zawng zawngte chu a han ngaihtuahin mak a ti hle mai a,rawlthar mai ni mahse a pumrua a lian tawhin tlangval uaih tawh mai a.Hman deuhva Sapui a vau zam hnu khan Valupaten thingnawi fawm an awltir a,in lamah tih tur em em nei lo chu a chhungte puiin lo lamah a liam ve nitin a,a mah a chakin tha hrui a nei bawk a.lo thlawh lah a chak phian mai a.a chhungte tan chuan hnemhnan awm tak a ni ,a lo thlo han tang tak tak mai chu lo thlawh la thiam vak hek lo le,an buh leh thlaite chu a rap zut leh puat thin a,a nu nen chuan"khai,Mante buh leh thlaite dim zir deuh teh " an inti deuh reng mai a ni.a Pa lah chuan a lo nuih mai mai zel a.


Zanlamah ruah namen lovin a sur buan buan mai a.Lal in Lal leh Upa ho pawh tap chhakah meilum ai pahin an tunlai boruak sawiin an ti ti laih laih a,Zawlbuk ah pawh Tlangval ho leh Valupa ho chu zawlbuk meipui hnung puak a Vaibel pak khuk tual tual pahin Sahrang chanchin bawk ti ti berah an nei hlawm a.Pasaltha ho chuan Sahrang a chet leh palh thulh a rang tak a che chhuak thei turin Meichher an in chhawp ru ran hlawm a,an rilru tak chuan ruahsur nen Sahrang chu a lo chet leh ngei an ring ru fur a.Vawmman pawh leng chhuak lovin inah a awm a,in leng an nei lo bawk a,tap chhakah meilum aiin mei chu a awp khur a,a ruk tak chuan a in ring ru ve hle mai a,a iptepuiah chempui dahin sumhmunah meichher siamsa a chhawp ru ve ran a.Sahrang a lo che leh a nih vaih chuan rang tak a chet chhuah ve ngei a tum rilru ran mai a,a nu chuan a vawk chaw chhum chu a han chawk rawk rawk a"E a hmin der mai a,Mante nang Tlangval chakah han suan ta che "a han ti a,Vawmmana chuan an Vawk chaw bel lian zet chu hneh zetin an chawi thla lawp mai a,a han chawi dan vel reng reng ah thahrui a ngah tih a hriat reng mai a,Vawmmana pa Thankunga chuan Fapa chu khumpui a thu chung a lo thlirin a nui var var mai a.


Zan a rei zel a,ruahsur pawh a han tawh a,nula rim nan a laklawh tawh a vangin tlangval ho pawh Zawlbukah an tling ta mai mai hlawm a,a thenin mutna siamin an muzal hlawm a.len hnawt ar veng mawng a tang a khuang chu chhawnin Ar khuang chu an in chhawn thliai thliai a.Zawlbuk tlangval ho pawh an mu ta sang sang a,Pasaltha kei ka ni inti chin chu in ring takin an mu a,an muhil nghet lo hlawm kher mai,an nghar mut a ni ber e.Zan reh ah chuan Vawmbuk khua chu a reh tlawk thlawk mai.mihring tumah an awm ta lo emaw tih mai turin khawchhung chu a thimin a reh thiap mai a.Zawlbuk riak tlangval thetkhat hnar ri bawrh bawrh karah Pasaltha Bawkthanga chu a harh hlawl mai ,che mai lovin mut hmun a tang chuan thawm an ngaithla vang vang a,rannung hram ri tih mai loh chu thawm danglam engmah hriat a nei lem lova,mahse a harh teh hlawl danah eng maw tak chu thleng tur awmin a hre tlat mai a,in ring takin a mu meng ta kar mai a.Vengthlang lamah Vawmmana pawh a muttui lai takin tu emaw hian a rawn koh harh hlawl mai a,a han ngaihthla vang vang tu nge rawn koh tu niang tiin an ngaihtuah vang vang a,a chhungte ti dawn se muttui hmel takin an hnar sak sak hlawm si a,tun ang zan reh tunge rawn ko ta ang le.chutah apu thusawi "Mi te ai piang dang lam mibik i ni a,i thinlungah thil hriat theihna mak tak i la nei dawn a,i thil hriat thinte hi ngaih thah mai lo la,tangkai tak a hmang turin i rilru i siam zung zung a pawimawh a,Khuavangte chuam Lasite vohbik i nih ang in hlauhawm lo thleng tur hriat lawk tir i ni fo dawn a,ngaihthah ngai hauh suh ang che" a tih chu hrechhuakin thawmdim takin a tho ta them them a.thawmnei hauh lovin a iptepui chu a la a,a chempui phawrhin nghet takin a hum a,Thawmdim takin kawngkhar chu a han nawr tawlh a,sumhmunah chuan a chhuak phei a,pawn lam chu a thim kher mai a,thawmri rak hriain sumhmun chhak lam a han hawi chhoh chuan mitmet lian zet mai pahnih lo de thiang rual mai chu a han hmu ta a,a thim em a vangin engthil nge a nih hre turin a ruangam tak ngial pawh a hmu thei lo va ,mahse mibik a nihna lo langin maktak maiin a mit chu a rawn fiah tial tial a,chu mitmeng de thiang rual chu a tak hmu chiang chiah thei lo mahse ,a ruangam leh a awmdan chu a hmu thei reiruai a.



Vawmmana chuan a thil hmachhawn chu Sahrâng an sawi fo chu a niang tih a ringhlel hauh lo va,a ruangam a tang chuan a ke hnunglam ti hniamin a ui thut a,ban sei tak leh lulian tak a ni tih a hre thei a,Chu Sahrang chuan Vawmman chu a rum khum ham ham mai a,Vawmmana chuan "Nang Sahrang chimawm pa.ka sat sawm vek dawn che a ni" a han ti sap a,mit khap kar lek chu Sahrang nen chuan an han en dun ran mai a,Vawmmana chuan Sahrang chu sah tumin a chempui a han lek kang a,a ke ding lam a han khai rual chiah chuan chu Sahrang chu a zuang zawkah pawn lamah a zuang chhuak ta daih mai a.Vawmmana pawh rang tak hmalam a zuan phei zawk pahin a chempui chu a han vai zui nghal zat a ,mahse Sahrang chu a tuan ran em vangin a vai thawi fua hman chauh mai a,Rangtakin Vawmmana chuan thim thamah sahrang chu a han um zui a.Mahse chu Sahrang chu Mihringte tan um phak mai mai rual a lo ni lo nasa mai a,a zuang zawk zawk a kawm karah a pil bo ta thuai a,Vawmmana chuan han zawng kual ngial thin a,mihring pangaite aiin a khaw hmuh fiah zawk teh meuh mahse he tiang khaw thim lutuk hnuaiah chuan Vawmmana pawhin a hmufiah lutuk theih bik loh a vangin beidawngin in lamah a kir san leh ta ngawt a.an kawmthlang a,a kal lai chuan an in chhung a tang chuan hmeichhe te ri tuar tuar a hre ta mai a,Vawmmana chu Sazuk vanglai ang mai a chakin a zuang dawk nghal zawk a,an leipuiah zuang kai an in chhung ah a zuang lut nghal zawk mai a.In chhungah chuan mei a lo alh teng teng a,a en lutuk loh a vangin inchhung chu a thim ruih tho va.An in kil thim laia Sahrang mitmet derual mai leh meiling ang mai vam ham mai leh a pa Thankunga chu an lo in hmachhawn ran mai chu a han hmu a. A pa chuan a muzuk fei chu humin chu Sahrang chu a lo tin ve ran mai a,chu Sahrang chuan in kil thim lai chuhin a rum chhar chhar mai a.Vawmmana farnute chu kum kilah hlau thlabarin an lo inkuah khawm a,Vawmmana nu chu hmeichhia mai mah nise a hamhaih buai ve hauh lova,thingfak kengin a pasal bulah chuan a lo ding ve ran mai bawk a.



Vawmmana chu in chhung a zuan luh rual chuan Sahrang chu bawh chilh mai tumin a hanin siam rem a,mahse a pa chuan "Taite fimkhur takin le,bawh hun a awm a,tawlh hun a awm ngai e" a lo tih a vangin a pa bulah chuan in ring takin a chempui hum chungin a va ding ve ta zawk a.Thankunga chuan "Thate nu mei kha han chhem alh thuai teh" a han ti a.Rualthani chuan rang takin mei chu a han chhem alh sawk sawk a,chu tih lai chuan chu Sahrang chu a lo chik nghur nghur a.mei eng chu ngai thei lo ni awm takin a thim lai a chuh tlat a.a rawn bawh ngam mai bik lo ni ngei tur a ni.thim chin ah a rum hum hum a,Vawmmanate pafa lahin chet sual theih a ni tih hriain an bawh chilh mai duh bik lo va,in rin takin an pafa chuan an ding dun ran mai a.thenawm ho pawhin thawm an rawn chhuah tak tak .meichher eng nen Vawmmanate in lam chu an rawn pan hlawm a,Vawmmana nu chuan thuk ah chuan thing rawlh belh teuh vin mei chu a han chhem alh ta hluah mai a,chutia inchhung a han en tak hluahah chuan Sahrang chu a zuang zawk bang thlang lam chu a su bur mai a,bang chu a ri thawt mai a,a su tlang zo chiah lo chu a hlawm nawk a,chutih lai tak chuan Vawmmana chuan a va bawh phei zawk mai a,mahse Sahrang chu in siam rem leh hmanin a zuang leh zawk a,Vawmmanate bang thlang lam chu su chhiain pawnah a zuang chhuak ta nghal a,Vawmmana chem vai chuan chu Sahrang mei chu tawng chen tur lai hi a sat fik hmawk mai a.chhuat laiah chuan Sahrang mei chu a let ngat mai a.Sahrang chu leiah a tumri awk a,Rangtakin ramhnuai lam panin a lim thla ta puat puat a,An thenawmte kawm thlang lam a awm ho chuan lo hmuin an te chel chul hlawm a.


Zawlbuk lamah pawh Bawkthanga han harh hlawl chuan thawm hre mai lo mahse thil thleng tur eng emaw tak a awm tih hriain a silai aruk a ,a mut pui khiau chu lain thawmdim takin a tho ta tham tham a,a meichher thuhruk khiau chu a va la a, meipui la vam set set bulah chuan chhit mai theih turin a dah a.pawnah chhuakin thawm ngaithla in a han ding vang vang a,a mit chuan kil tin a melh kual pah reng bawk a,mahse khua a thim chhah em vangin engmah phei chu a hmu thei meuh lo chuang lova,in her a in chhung luh a tum mek lai chuan a hnung lam a tang Pasaltha Vungdala aw chuan "Bawka thawm hriat i nei em ni" a rawn ti sa sa a.Bawkthanga chu a vir zawk a,a hnung mai Pasaltha Vungdala ruangam thim mak mai chu a han hmu a."Hre lem lo ve.Uvung i lo harh a ni maw.zunram kan thiar lawk a nia"phun sa sa in a han chhang a.A ruk tak chuan Bawka chuan Pasaltha Vungdala a hriat miah lova.a bul hnaite a ,a lo ding reng thei chu mak a ti kher mai.Sapui ang mai thawm dim a.Vungdala han che vel thei chu tluk lo a inti khawp mai.Pasaltha Vungdala chuan Bawkthanga chu a zunram thiar mai chu a ni lo tawp tih a hria a,A mah pawh pasaltha hmun ralti a vawitam lo awm tawh leh hlauhawm vawiduai lo ,lo hmachhawn tawh a nih a vangin zanin boruak awm dan leh kai tho tu awm ang mai a harh hlawl danah ngaitha tak a mut siai siai na chi a ni lo tih a hria a,Phun sap bawkin Bawkthanga hnenah chuan "I silai mu i thun sa em.Thil eng emaw chu a thleng dawn tlat in ka hria,ka harhna a rei tawh a,i tho chhuak pawh ka hre reng a,ka rawn zui che nih hi" a han ti leh a.Bawkthanga chu thim thamah chuan a bu nghat nghat a.

Chutah le,in chhungah chuan Tlangval pakhat chu ring zetin a rawn a te ta thawt thawt mai a,midang ho pawh lo harhin thim hnuaiah chuan an ri ta nuai nuai mai.Zawlbuk bang chu a han ri dawt dawt a,Zawlbuk chu a nghing deuh lawih lawih hian a hriat hial a.zawlbuk thlang lamah chuan thil thum thla dawp dawp vawihnih a han awm bawk a,eng thil ber nge thleng tih pawh a hriat hleihtheih lo va.Tlangval tam zawk chu an tunlai boruak tawn nen thlabar takin a lailum chuhin thim hnuaah an in nawr tup tup mai a.Bawkthanga leh Vungdala chu rang takin Zawlbuk chhungah chuan an tlan lut nghal vat a,Zawbuk chhung chu a thim em vangin thil engmah a hmuh chian theih der mai si lo va.Pasaltha Vungdala leh Bawka chuan rang takin an meichher an chuh a.zawlbuk meipui chheh a ling la awm ang angah chuan chhit kai tumin an han nawr lut a.Chutih lai tak chuan Valupa Buanga aw chuan fiak thak mai in "Tu mah che tawh suh u.in awm hmunah che lo khan awm thap rawh engthil nge thleng tih pawh a hriat theih hleihnem mawle" a rawn tih tak thawt thawt ah chuan an han reh deuh duak a.Bawkthangate meichher chhit mek pawh lo alhin Zawlbuk chhung chu a han eng ta deuh uar a.Buanga aw bawk chuan "Tlangval ho kha meipui kha han nun vat teh u "a han ti leh a,Tlangval huaisen deuh ho chuan thingnawi chu meipui chhehnaah chuan an han vawm lut nghal thuai thuai a,a dawi deuh ho chu engmah tihna chang hre lovin an la ding khur der der hlawm a.rei loteah Zawbuk meipui chu a lo alh ta hluah mai a.Zawlbuk chhung a han en tak uarh ah chuan Tlangval ho chu mutbu nen chhuat laiah an lo in zam nuai hlawm mai a.



Ti chuan meichher eng nen Valupa leh Pasaltha ho chuan Zawlbuk chu an han en chiang vel a,Zawlbuk bang thlang lam chu hmun hnih ngawtah a lo chhia a,sapui leng tur lai hi a lo kaw ho mai a.chhuatah leh bangah te chuan thisen far an hmu nual bawk a.Sahrang sulhnu ngei a nih an ring a.Valupa Buanga chu meipui bulah dingin a kutin Tlangval ho phun mur mur chu a han zap dai a," Awle .Hei Sahrang chimawm tak beih kan tawk niin a lang a,Sahrang kut tuar pawh kan awm niin a lang a.engpawh nise a kim lo kan awm em i han in en phawt teh ang u"a han ti a,ti chuan an han in enfel zung zung a.Tlangval pahnih lai mai an lo kim lo reng mai a.Zawlbuk thleng thleng Sahrangin a rawn bei mai chu mak an tiin an thin a rim kher mai .Valupa Buanga chuan "Awle,Zawlbuk thleng thleng a min rawn luh chilhtu he sahrang hnu hi kan chhuizui nghal ang .A tul leh kan thih chilh mai tur a ni.Vawmbuk khua hei ang reng ruang a tlangval rualte hi Sahrang mai maiin min tlawm tur a ni lo." tiin a vaibel dawn a seh keh rap rap mai a.



Vawmmanate inlamah thung chuan thenawm hnai ho chu meichher nen an rawn chhuak khawm tup tup a.Vawmmana chuan Sahrang chu umzui tumin an kawmtlang lamah a tlan thla vat a,mahse Sahrang mawngphe pawh a zuk hmu hman ta chuang lo va.um zui chiam kha awmzia awm lem lo tih hriain a let san leh a.Thankungate in chhungah chuan thenawm ho chu an lo lut sap sap a,chanchin an rawn zawt tak tak hlawm a.Thankunga chuan "Sum hmunah thawm ri dawt dawt in min ti harh a, Chu tah kawmthlang lam a tlan thawm ka hre zui a.rang tak a thoin fei ka chuh a.in chhung chu a thim em vangin mei ka chhem nghal a.Naupang mutna ka han en chuan Vawmmana a awm lo tih ka hre ta a,Kawngkhar a loin hawng huau bawk a.nichin a thawm kha Vawmmana thawm a ni tih hriain va enzui tum a ka in her chuan Kawngkhar ah Sahrang ngei mai chu a lo zuang lut ta zawk mai a,a ang sen huam mai a.a mit chu meiling ang maiin a sen vam ham mai a.a rim chu a thang hing nghur mai a,min rawn bawh mai dawn emaw ka tih laiin mei eng chu a hlau nge in kil thim ah tawlh pheiin a rum ta ham ham a,chutih laiin Thatei unau lo harh lah thlabarin an rak thawt thawt a.Kannu pawh thingfak nen ka bulah lo ding vat a.chutih lai chuan Vawmmana a lo thlan lut rawk rawk bawk a" tiin an thil tawn chu a han sawi a,Vawmmana chuan Sumhmun Sahrang a hmuh dan a pa sawi ang mai a,Thang leh hing rimchhe tak a nih leh va beih mai a tum lai tak a pawn lam a zuang chhuak ta daih a va umzui tak dante leh a let lam an in chhung a ,a farnute thlabar te thawm hria a,an in chhung a va luh a Sahrang an hmachhawn dan a han sawi zung zung a,Sahrang mei a sah bun an chhuat a lo let ngat chu a va chhar a.mei engah chuan an han enchiang lat lat a.Sakei mei ang tak tial sen deuh hi a ni a,a thang hing deuh nghur bawk a.Vawmmanate bang thlang lam Sahrangin a sut kuakte chu makti takin an en laih laih a,Thankungate Kawmthlangpa chuan "Sa narang chu a ni mawlh lo mai le,hei bang pawh a su chhe hneh em mai " a han ti bal bal a.Midang ho pawh in "A chak awm hle mai tak aEng ramsa tak ni ang maw",tiin in chhung thleng thleng a rawn luh chilh mak an tih thute an sawi zui nak nak hlawm a,Vawmmana farnute hlau thlabar pawh tapchhakah an la thu khur bauh bauh a.
Last edited by LN Kima Guite on March 29th, 2018, 3:52 pm, edited 1 time in total.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)