MIHRÂNG LEH SAHRÂNG BY LN Kima Guite BUNG 1-28 (complete)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
LN Kima Guite
Posts: 63
Joined: August 28th, 2017, 7:07 pm

Re: MIHRÂNG LEH SAHRÂNG BUNG 1-8 (New update Chapter 8))))

Unread post by LN Kima Guite » November 29th, 2017, 9:30 pm

MIHRÂNG LEH SAHRÂNG



BUNG 8-NA


BY -LN Kima Guite


BUNG 7 RECAP

***


Vawmmana chuan Sumhmun Sahrang a hmuh dan a pa sawi ang mai a,Thang leh hing rimchhe tak a nih leh va beih mai a tum lai tak a pawn lam a zuang chhuak ta daih a va umzui tak dante leh a let lam an in chhung a ,a farnute thlabar te thawm hria a,an in chhung a va luh a Sahrang an hmachhawn dan a han sawi zung zung a,Sahrang mei a sah bun an chhuat a lo let ngat chu a va chhar a.mei engah chuan an han enchiang lat lat a.Sakei mei ang tak tial sen deuh hi a ni a,a thang hing deuh nghur bawk a.Vawmmanate bang thlang lam Sahrangin a sut kuakte chu makti takin an en laih laih a,Thankungate Kawmthlangpa chuan "Sa naran chu a ni mawlh lo mai le,hei bang pawh a su chhe hneh em mai " a han ti bal bal a.Midang ho pawh in "A chak awm hle mai tak aEng ramsa tak ni ang maw",tiin in chhung thleng thleng a rawn luh chilh mak an tih thute an sawi zui nak nak hlawm a,Vawmmana farnute hlau thlabar pawh tapchhakah an la thu khur bauh bauh a.
***

Zawlbuk lamah ve thung chuan Tlangval ho chu an han in au phur a an haw haw dur dur a,Meichher an chhi eng chuah chuah a,Valupa Buanga leh Pasaltha ho chuan Sahrang hnu hma chu uluk takin an han en a,Zawlbuk bang thlang lam a sut chhiatna zawn lei an tum thlakna ni awm tak thisen lo far leh hniak fiah ang reng takte chu an hmu a,ti chuan thisen far leh hniak chu hmanhmawh thei ang berin Pasaltha Vunga chuan a han chhui zar zar a,a hnungah silai nen inring takin Bawkthangate hoin an zui a,in hnuai leh kawmkar sahrang tawm theihna awm chu an melh kual pah zel a.


Khawchhung kawmkar leh inhnuai chep tak takte paltlang zelin Sahrang chuan hmar lamah khua chu chhuah sanin Vawmbuk khawdai ngaw chhah tak chu a lut phei ta thuai a.Ramhnuai chinah chuan hnuhma chhui a har sawt viau mai a.a khat tawk a thisen far lo awm zauh zauh leh Sahrang hniak pherh ning neng lo lang leh zauh thin chu hnu hma awm chhun niin Meichher eng ringawt chuan chhui a har deuh nge Pasaltha Vunga chuan a hnu chu an hlauh deuh that that thin a.Pasaltha Silai keng ho hnungah Tlangval ho chu an ralthuam neih ang ang kengin pasaltha ho chu an rawn thlawp zel a.Vawmbuk khawdai chhur a rual rual thing ding khup mai hnuai ah chuan Vawmbuk tlangval ho meichher chu a eng chuah chuah a.Sahrang huangtau zet lak a an thinrim thlan hlawm em vangin hlauh lam pawh an ngaihtuah hauh lova,chu Sahrang chu zawn hmuh a thah chiah an rilru ah a awm hlawm a.



Vawmbuk Khawchhung lam pawh tunah chuan an ri nuai nuai tawh a,in tinah mei a eng chuah chuah a.tumah mu thei an awm tawh lova.Sahrangin Zawlbuk a beih thu leh Vawmmanate in a luh chilh thu chuan khawchhung a fan chhuak thuai a.Tlangval khawdai a Sahrang hnu chhui a an liam mek laiin paho pawh a thei thei chu Vawmmanate in lam ah tlan khawm zel a.Lalin pawh Lal Upa ho chanchin ngai changin an lut khawm nghal tak tak a.Sahrang mei rimchhe zet Vawmmanan a sah chhum chu mipui chuan hmuh ve vek tumin an in nek tawl tawl mai a.Vawmmanatein chuan a dawl lovang e tih tur khawpin in chhungah an khat huang huang mai a.Chutah Thankunga chuan He ti ringawt zawngin a dik dawn lo ve tiin "Awle,Sahrang mei hi kan hmu duh theuh mai si a,Lalin lamah Lal leh Upa ho pawhin kan thu leh hla an lo ngai chang rengin a rinawm a,khi lam han thlen chho phawt ila,a hmu duh a piang hmuh theih turin Lalin kawtah kan tar mai dawn nia"a han ti a,Paho pawh chuan "a ni teh tak e "tiin Lalin lam pan chuan an inzui chho ta dum dum a.




Vawmbuk Pasaltha ho khawdai lam a sahrang hnu chhui ho pawh hnuhmate han hlauh deuh that that thin mahse thisen far leh Sahrang hniak lei nem lai a lang leh zauh zauh thinte chu an hmu in an chhui thei zel a.Chutah le.an hmalawk Tlangsam pik karah chuan Sahrang ngei mai chu ring takin a rawn rum ta hum hum mai le.Pasaltha ho chuan in ring takin an Silaite chu an lek chhuak nghal fur mai a.hnim pik kar hmuh theih si loh laiah Sahrang chuan tan hmun khuarin a in hrosa dum dum reng a,an thawmah chuan pakhat mai a niin a lang lova,Hnim leh thinglian vak lote chu an sawi che leh lawp lawp thin a.Valupa Buanga chuan "Khai le.Vawmbuk tlangval zam ngai lo kan ni lawm ni.khawnge Sahrang mai maite chu i han kap chik nuk ang u hmiang,tumah tlanchhiat awih loh thin leh ruam khatah dam leh tlang khat ah ,"a han ti tuar tuar a .Tlangval ho chu an lo haw haw hulh hulh mai bawk a.Sahrang thawm nen tlangval ho thawm nen Vawmbuk khaw dai chu a rik hian a ri hulh hulh mai a ni.Valupa ho rorel angin Sahrang chu an han hual a.In ral palh a hlauhawm a vangin Silai dahin chempui nen Pasaltha ho chuan an han luhchilh ta a.Sahrang thawm pawh a ring sawt mai .meichher engnen a huhoin Sahrang tawmna phul chu an han chil phei ta miah miah mai a.


Sahrang meuh pawh Vawmbuk valrual thawm ah a zam deuh nge pakhat zawk chu tlang lamah a zuang dawk thla ta zawk mai a.Thlanglam awm tlangval pakhat chu a su let tawp mai a.a ran em vangin tuman an lo sat fuh hman lo va,Chu Sahrang chu thim thamah a pilbo zui ta thuai a.a Tlangval sut thluk Tekawka chu a meichher ken a darh chuai a.a mah pawh hnung lamah a thal thla hawl hawl mai a,a bul a tlangval dang ho chuan rang takin an rawn kai tho ta thuai a,eng mah hliam em em a lo nei lem lo va.a chempui chu chhar in " Mi han sut khang lan chu ,khawnge pakhat zawk tal hi kan sat darh vek teh ang "tiin thinrim in hrosa chungin Phul pik kar a Pakhat zawk la rum ham ham chu Valupa ho khap hman hmain a bawh chho ta buan buan mai a. Midang ho pawh chuan chu tia Tekawka thirim thawk thutin Sahrang a bawh chhoh tak buan buanah chuan thih chilh huamin an rawn bawh ve ta huk mai a.Sahrang pawh tawmna phul an han bawhchilh takah chuan rang takin a rawn zuang chhuak nghal zawk mai a.a hmazawn ding Lianpheka chu a awm ah a tin hriam zet chuan a vun pui chat thawt khawpin a rawn ham thler duai mai a.A Bul a ding Bawkthanga chuan rang zetin a chempui chu vaiin Sahrang nak chu a lo vai thler ve hawk a,Sahrang chu ring takin a te thawt a.a biling a balang in thlang lamah a lum thla tawp tawp a.Thlang lam a tlangval awm ho chuan sah fuh ngial lo tum hlawm mahse an sat fuh hman tlat lo.Sahrang chu thim thamah a pilbo zui ve ta nghal a.an han umzui ngial na a,a hnu chu rei lo teah chhui theih loh vin a bo leh ta hmak mai bei dawngin an kir leh ta a,Sahrang te lo tawmna phul chu an han enchiang a Vawmbuk Tlangval pahnih Rala leh Kela te ruang chu ei hek huamin an hmu ta a,Sahrang chimawm tak pahnih chuan an lo ei nual hman a,ruang bulah thisen a luang zeih zuih a,a thangin a rimchhe hle bawk a,ti chuan Kela leh Ralate ruang chu an zawn haw ta a,Lianpheka erawh chu a lo hliam na lutuk lova,zawn a duh tlat loh a vangin zawi muangin tlangval thenkhatin an chhawm haw a.


Khua a var uar tawh a,Lalin kawta Sahrang mei mipui en tur a an tar chu Vawmbuk mipui chuan an en laih laih reng a,a thenin diriam fe in chil an han chhak khum tuar tuar hlawm a.Mithi in lamah pawh khawhar chhungte hnem turin mipui an thu khat hmur bawk a.an hun tawn maktak a vangin Vawmbuk mipuite chu an mangang hle mai a.Sapui hmachhawn ang mai mai a ni lo va,Sahrang hlauhawm tak hian an khaw mipui tunge a beih leh ang tih chu an rilru a awm thup a ni a,tupawhin beih an tawk thei tih in hriain an ti hra hlawm mai a ni.Tukthuan eikhamah tlangval tlawmngaiten thlan thuk tak a laiin Rala leh Kela te ruang chu an phum a,mithi vui zawhah Lal in kawt zawlah Vawmbuk mipa ram tang rual tawh phawt chu an in hmu khawm a,Vawmmana pawh a kilah a lo ding ve ran a.


Lalnu chuan "Ka khua leh tui duh tak te u,Vawiin ni a kan thil hmachhawn mek hi Sapui leh ral ai pawh a hlauhawm ,eng ransa chiah nge a nih pawh kan hriat chian loh .engti fakau a chak leh hlauhawm nge a nih pawh kan hre lo va.eng vang a heng Sahrangte hi lo inlar a kan khua min rawn bei fo nge an nih lah kan hre hek lo.Mahse Vawmbuk khua hi Sahrang hma a zam mai mai tur kan ni lo va.He sahrang hi kan hneh ngei tur a ni.tunah hian Vawmbuk Tlangval kei ka ni inti ,'Ka khua leh tui chhan nan nunna chan huamin ka thisen far tawp thlengin ka bei ang ' ti ngam kan awm chuan Thingserh hi in sat dawn nia." a han ti a.


Lal Upa ho pawh an tang kher mai ,"Aw kan vanglai a ngaihawm mang e"tiin an Vaibel dawn an seh keh rap rap mai a.Lalin tual a Tlangval ho pungkhawm chu mipui nunau pawh in an lo thlir thuap mai a.Vawmbuk mipui zawng zawng chu an pungkhawm a ni ber e.ti chuan Valupa Buanga chuan ring fiak thakin "Ka khua leh tui chhan nan ka nunna pawh hlan ka huam e"tiin Thingserh chu a sat hmasa ber a,Mipui haw haw hulh hulh karah Tlangval ho chuan mihrang sahrang hma zam lo tur a in tiam chungin thinserh chu an in sah chhawk zel a.Lal leh Upa ho pawh in phur tak a kung bengin an lo lawm zel a.mipui kut beng leh haw haw ri chuan Vawmbuk khawchhung leh dai vel chu a khawk rum rum a.Tlangval rualin Thingserh an sat zo va.Vawmnana chu Tlangval a chhiar la ni chiah lo mahse Thingserh chu sah ve ngei a tum tlat a.muangchangin a pen chhuak ta chhat chhat a.Mipui in kut beng a an lo haw haw hluah hluah lai chuan Thingserh chu a sat ta a,vawikhat sah mai pawh duh tawk lovin vawihnih thum lai a han sat sawk sawk a.Mipui pawhin Vawmmana chu Sahrang mei sat thla thei ngat kha a nih a vangin an ngaisang hlawm hle a," Vawmmana Vawmmana"tiin an au rual thup thup a.Tleirawl rual ho pawhin Vawmmana chu an melh no hlawm ngei mai .Vawmmana thiante Rozuala leh Zahranga pawhin thingserh chu a han sat ve bawk a.chuti tak a Vawmmanan lawm a hlawh chu Saikapa chu a ti lawm lo kher mai a.Vawmmana er ta reng reng khawsa a ni bawk a,a rawn pen chhuak a.Thingserh chu a va sat nawn leh ngat a.Vawmbuk mipui au ruih ruih karah chuan inti ngeng takin a hawi vulh vulh a.A ni hi Vawmmante rual u hret niin Zawlbuk lawi tawh a ni.


Lalnu chuan a kut a,mipui ri hulh hulh zap daiin "Awle,Vawiin niah hian He khua leh tuite himnan a thawh hlawk tak mi huaisen leh hlauh nei lo Rawlthar pakhat thil pek ka duh a"a han ti a,Saikapa chuan Lalnu thil pek dawn chu a lo in beisei ru ve rawk a.Rawlthar rual zingah chuan a ni ai thawk tha hi a han hmu lo ngawt a.Mahse a ruk tak chuan Vawmmana hi a ai naupang mah nise tluk lo a in ti ru ve tho va.Lalnu chuan "Khai le,Rawlthar huaisen mibik Vawmbuk khaw Pasaltha Chhuanvawr la ni mai tur ,Thankunga fapa Vawmmana kha he laiah lo chhuak chho teh se"a han tih chuan mipui chuan kut bengin an lo lawm a.Vawmmana thung chu zakin a kil lam chuh in mipui zingah relh ruk mai a lo tum a,mahse Zahranga leh Rozuala chuan an lo man bet a,Vawmmana chu a han tal laih laih a,an bul a tlangval ho chuan Rozualate chu lo pui vatin Vawmmana chu Lalin luhkapui lam chu an rawn pan pui a,mipui thawm ri hulh hulh karah Saikapa thung chu lung ni lo zetin a hawi tum buau buau va.Vawmmana chu erna leh thikna rilru chhe tak puin a melh rawm rawm mai a,he a rilru chhe tak put hi Vawmmana tan mai ni lo Vawmbuk khaw tan hian a la pawi mai ang em.

Lal in luhkapuiah Vawmmana chu zak leh inthlahrung takin Lal Upa ho karah a ding zum zut a.Lalnu chuan nui sang chungin " E khai Pasaltha huaisen ,nga ti nge kha tia i din zum zut ni ,hawh teh ka bulah lo ding teh "tiin a banah a han kai a,Lal fanu naupang zawk tleirawl tituai fahran mai Lawmsiami pawhin Vawmmana chu sumgmun kawngka biang nghengin a lo melh tai riau mai a,Vawmmana a va hawi zawk chuan a biang sum khuar kek in a lo nuih seih seih a.Vawmmana lai lutuk chu a bing chum chum mai a,a khawhmuh pawh a fiah lo zo vekin a hre hial a.Lalnu bulah chuan Vawmmana chu a ding ran mai a.Lalnu chuan Vawmmana dar a ben thap thap pah chuan "Rawlthar huaisen Vawmmana hi Vawmbuk khua leh tuite himna kulhpui ni a,Sa leh ral a Vawmbuk khaw muantu a lo nih zel theih nan kan pa Lalvunga Silai roh em em mai hi a kutah ka hlan e" tiin a pasal boral ta Lalvunga silai tha chuang chuang tak mai ngul sei reng rawng,uluk tak a enkawl tih hriat tak mai chu a han lek chhuak a.Vawmmana chuan lak mai nachang pawh hre lovin ka ho in Lalnu chu a melh reng mai a.chu tah inthing harhin "Lalnu he mai chuan he Silai hi ka dawng mai thei lo vang ,kei ang dawng awm an tam em mai" inthlahrung tak chuan a han ti a.chu tah Lalnu chuan "He silai hi Vawmmana ai dawng awm hria kan awm em " ring takin a han tih a.Mipui chuan"Awm lo"an lo ti rual dual dual a,"Vawmmana ,Vawmmana"tiin an au rual ta thup thup mai a.chutih lai chuan Vawmmana pu chu thei leh thei lovin mipui kar a tang chuan tiang hawlin a lo bai chhuak saih saih a,Lalin leikapuiah chuan lo lawn chho vin a tupa Vawmmana bulah chuan a lo ding a.mittui thla zawih zawihin Lalnu silai ken chu a han la a."Ka va lawmawm em.ka tupa i duh sakna hi a ropui ka ti tak meuh mai ,tunah zawng thi mah ila thla muang takin ka kal thei tawh ang"tiin Lalnu chu lawmthu a han hrilh mawlh mawlh a.chutah "Silai zen min han thun teh u.ka tupa silai thar hi tlangtlir pui ka duh a ni" a han ti leh a,Leikapui bul a ding tlangval pakhat chu rang tak a lo zuang chho vin Silai hlo chu a han thun sak zung zung a,kah mai theih a peih hnu chuan Liannghaka chu a pe a,Liannghaka chuan aw tial rang deuh ruai in
"Khuanu e, mangmawl awchi
Thang ngai thantir tuk hlah law
Pahrang kan duh chiau e."
(Khuanu hi i mawl em mai, keimah ngawt min tihmingthanga, mi zawng zawngin hmingthan an chak ve a sin mawle,)
tiin a han in chham thawveng te te a,chutah
" Ka u e, ka nu haia khan,
Fenfual feng lang e,
Kei chu e,chhak chhinan e, zo leian e,
Than lailawn ka duh e."
(Sa kap ve lo te u pawnfen feng rawh u, kei chu ka va ram vak anga ka hming hi a thang nasa dawn ani)
Tiin tlangval ho chu an cho phur vel a.chutah
"Nang maw sahrang rawl lian za tialpa,
Buk khawpui dai i vel sul e;
Mihrâng sing e, miah Hrang sing e,
Chengrang chawi lo Sahrang ka sai tlu e."
Tiin Sahrang hla do ahan chham leh vau vau a,mipui chu an lo ngawi thuap a,A silai chu van lam hawiin an lek kang a,a kap alh sen ta zuai mai a.zen rim nam rum rum karah Liannghaka chuan "Ka tupa hei la rawh le.Vawmbuk khaw ven him nan hmang ang che.Mibik ,Khuavangte malsawm Lasite vohbik i nih kha he khaw ven himnan hian a ni tih hre reng ang che" tiin a tupa hnenah chuan Silai chu a hlan chhawng ta a,Vawmmana pawh chutia a pu berin a tih takah chuan chu Silai ngul sei reng rawng enkawl uluk tih hriat tak a hnuam tle hliau mai chu a han la a,zei takin a han let kual vat vat a.mipui pawhin lawmpui takin an kut an lo beng hluah hluah a,a thiante pahnih Rozuala leh Zahranga pawhin nui var chungin uar takin kut an lo beng a,Lal fanu Lawmsiami pawh lungawi hmel tak a nui sen sen chungin in chhung ah a lut a.Vawmmana chuan mittui pawral kiangin lalnu hnenah chuan lawmthu a sawi mawlh mawlh a.a lo awh em em thin Silai a han nei ta mai chu a mumang emaw a ti rum rum a.
Last edited by LN Kima Guite on March 29th, 2018, 3:53 pm, edited 1 time in total.



Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 30th, 2017, 6:01 pm

MIHRÂNG LEH SAHRÂNG
**

BY -LN Kima Guite




(I dedicated this story to My Brother Who died in 30 August 2017.There is no pains,no tears in heaven.REST IN PEACE BROTHER.)
**
BUNG 9-NA
*
BUNG 8-NA RECAP


*****
Vawmmana pawh chutia a pu berin a tih takah chuan chu Silai ngul sei reng rawng enkawl uluk tih hriat tak a hnuam tle hliau mai chu a han la a,zei takin a han let kual vat vat a.mipui pawhin lawmpui takin an kut an lo beng hluah hluah a,a thiante pahnih Rozuala leh Zahranga pawhin nui var chungin uar takin kut an lo beng a,Lal fanu Lawmsiami pawh lungawi hmel tak a nui sen sen chungin in chhung ah a lut a.Vawmmana chuan mittui pawral kiangin lalnu hnenah chuan lawmthu a sawi mawlh mawlh a.a lo awh em em thin Silai a han nei ta mai chu a mumang emaw a ti rum rum a.
******



Lalin tual zawl a tang Mipui an haw darh hnuah Lal in ah Pasaltha ho leh Valupa ho chuan Lal nu leh Khawnbawl upa ho nen ro an rel zui nghal a.an khaw boruak ral muang lo takah engtia hmalak tur nge tih an rel ho a ni ber a.Vawmmana Silai nei thar chu a thianten an lawm pui kher mai a.Rozuala leh Zahranga chuan chu Silai hnum hlarh mai chu an han tuai vat vat thin a.Zahranga chuan "Ti kha chuan kan thian ho pawh kan ramvak ve fo thei dawn a nih kha" a han ti a,Vawmmana chuan "Ramvah ka chak tawh dan chu ka za zek zek tawh " a lo ti ve bawk a,ti chuan hlim takin vengthlang lam pan chuan an in zui liam ve ta a.a thiante nen an in then hnu chuan Vawmmana chu phur takin phei khai zang takin in lamah a tlan haw dawr dawr a.an in kawngkhar chu a nawr hawng rawk rawk a,a nu eirawng bawl lai chu "Kha che hauh suh ka man che nia" ti a fiamin a Silai chu an vilik zuau zuau va.a hlim kher mai.a nu pawh chu hlim takin a nui ve hawk hawk a,"Taite ,keini teh lul in Silai fung kan han kawl tur chu a lawmawm in a va mak em"tiin a mittui a parawl kiang mai a,Vawmmana farnute pawh an lawm thiam kher mai.Thankunga pawh chuan hlim leh lawm a vang a nui var var chung a fapa Silai rawn hawn chu a tuai vut vut a.

Zanriah eikham fel zet zawtah Vawmbuk khaw tlangau chu a lo au vau vau a,"Khaih khaih lo ngai theuh rawh u khai,Naktukah Venbuk sak hnatlang koh a ni a.mipa ramtang rual tawh phawt chu thawh chhuah vek tur a ni"a han ti a,Tlangval hawk lak hoin an lo fiam chhen bawk a,Thlertinah a au kual zel a.Tlangvalho pawh zawlbuk lamah Valupate thu ngaichang turin chhuak khawm tak tak a,Khaw ralmuan loh lai hi chuan tlangval ho hi khaw in nghahna anni a ,nunaute thla muanpui ber an niin an pawimawh em em a ni.Nula rim lam pawh an rilru ah a leng meuh lo va,Sahrang chimawm zet chu an rilru ah riak tlat a chang dang an kan hleithei lo.eng tikah tak sahrang chu lo che leh ang maw.tih chu mipui rilru a awm ber a ni a,thaw dep depin an ngaichang thuap a ni ber mai.

Vawmbuk hmar lam Bellei mual mawng Kawr kam lung ko puk nuam ang reng takah chuan Sahrang pakhat nak ther duai mai chu Nu pakhat hian ramhmul damdawi a hnawih sak mawlh mawlh a.Sahrang chu a chik nghur nghur a.a hliam chu thihpui tham em chu ni lo mahse tuan ti fum tham zawng a ni ngei mai.Chu nu valai tak chuan "Ti kha chuan i dam thuai mai ang " tiin Sahrang chu a han zut hauh hauh va.Sahrang chu a han ding chhuak a ring takin chu lai ram khawk rum rum khawpin a u ta ruah ruah mai a.Thisen a tui hal Sahrang kawlhsen meuh pawh hlau hauh lova,damdawi hnawih sak zawk tlat chu tu tak ni ang maw,chunu bulah chuan Tlangval hmeltha em em mai a lo ding ve ran a,a hmelthat zia chu sawifiah thiam chi a ni lova,chu lai puk thim thang rimchhe zet pawh chu a en deuh phutin a hriat a.Sahrang hmelchhia leh tih baiawm zet mai leh chu tlangval hmeltha tak chuan eng in zawm nge a neih reng le.Tlangval Hmeltha-a chuan "Kan kir a hun tawh hle mai,he lai vel hi kan tan a ral muang hauh lo a nia"tiin a hma a nu pakhat thingthi mek chu a han bia a,Chutah chu nu chu ding chhuakin "Zanin chu lo chawl rih ang che u"a han tih chuan chu puk thim kil tin a tang huan Sahrang thinrim thawm a lo chhuak a.Chu pukah chuan Sahrang hliam tuar chauh a lo awm lo tih a hriat kher mai.Sahrang rual thinrim leh lungni lo an chik nghur Nghur lai chuan chu nu bawk chuan tawng mak tak mihringte hriat thiam hauh loh turin a han vin ta thawt thawt mai.Sahrang kawlsen pui pui chu an reh ta thap a.ti Chuan Tlangval hmeltha tak chu insiam dang lamin ransa mak tak mai.bak ang deuh hang dum run mai thla hlaipui neiah changin a chungah nu chu chuangin zan thim hnuaiah an thlawk chhuak ta duai duai a.


Vawmbuk khuaah ve thung chuan zan thim chuan mitin rilruah hlauhna a tuh a,hmeichhe ho phei chu mahni a mu ngam pawh an awm lova,chhungkaw thenkhat phei chu an paber ,zawlbuka riak laite an ni nawk nen.Tlangval nei ho lah an tlangvalte zawlbukah an lawi vek si a,in nghak chhun chu pa upa lam zawlbuk riak tawh lo leh hmeichhe ho anni mai si a,chhungkaw tamtak chu mahni in a riak ngam lovin thenawmte nen a hu hova riak ta luih luih an awm a,Veng hmawr deuh va awm ho phei chu venglai deuhah an riak bo diak a.Vawmmanate inah pawh chhungkaw eng emaw zah an riak khawm a,Vawmmanan Silai a nei thar nen Sahrang lak a duai loh zia an hre bawk si a,an thenawm khawveng ten an thla muanpui ve hle a ni.Tuikhur kawng a Vawmmanate lenna ber Remi te pawh a nu nen an rawnin suan lut chawt bawk a,Vawmmana leh a pa Thankunga chuan chutia miin thlamuanpui a rawn pan ta chu ,lo ven him chu an mawhphurhna a ni tih hriain zanah pawh a rukin an in men chhawk a.Zawlbuk lamah Valupate thu ang in Tlangval ho chu ralveng tur an in mengchhawk bawk a.Zan hmasa ang mai mai a buai an tum tawh hauh lo va.Khawchhung rem chang laiah tlangval tlawmngai thenkhat ralvengin an awm bawk a.Pasaltha Vunga leh Bawkthangate ho phei chu mi kawmkarah Silai nen inring takin an thu khar mai a.Sahrang huaisar tak chu a lo lang leh a nih chuan chhuah an tum tawh lo kher mai.



Zan a rei zel a.Maktak maiin zankhua maiin thawm hriat tur reng reng a awm lova.Khua lah a tha phian a,van chu a thiang kuk mai a.zan tir lamah phei chuan thla a eng ang reng viau mai .fur khawthiang chhawrhthla eng ruih mai chu a lung len thlak kher mai.Thla chu a her liam ta ruai ruai a.Vawmbuk khua eng uar pawh chu a thimin a tuam leh ta khup mai a.thla liam hnu chuan pasaltha ho chu Sahrang chet ring in an inring leh zual a.Thawm awm ve leh che mai thei turin an in ring ran a,Mahse khawfing chah thlengin thawm engmah awm lo vin khua a var zui a,Vawmbuk mipui chuan mak an ti let ling mah zawk a.Sahrang lo lang lo chu an ngaih a that phah chuang hauh lo mai.



Tukthuan eikhamah Lal mualah mipa ramtang rual tawh phawt chu an chhuak khawm zut zut a.an kim ta maw tih ah Val upa ho rorel angin hmun liah in thenin Ralven buk sa turin an liam ta sung sung mai a.lo lam hna chu tul viau mahse khaw tlang himna leh ral muanna chu ngaih pawimawh hmasak loh theih nisi hek lo.Ralven buk chu Sahrang lo lanna lam nia an ngaih deuh Khawmawng lam leh hmar lamah hmun remchang lai ah hmun thum ah an siam a.Sa hran zual chhung chu tlangval hoin khua an in ven chhawk thin dawn a ni.Vawmmana pawh hna tlannaah tel vein taima takin a che zung zung a.a rilru erawh in thil dang daih a ngaihtuah a.A Silai neih thar kah zir chu a chak zek zek tawh a.Silai nen ram hnuai a vak theuh theuh ang ten a hanin suang tuah a.a chang leh a nui ru leh ver ver thin a.Tlangval rual hna tlang anni bawk a,chawhnu zet zawtah chuan riahbuk pali chu an peih fel ta der a,Lal leh Upate chuan tumah ram kal an rem tih loh a vangin hnatlang zo chu in lamah hawin an insil fai a,Tlangval then khat zawlbukah Silai in them thiamin an ri dup dup a.A then zawlbuk kawtah lung in den siakin lung an deng ri dawp dawp bawk a.Vawmmana pawh ram hnuai a Silai kah zir chak teh mahse Lal leh Upate thu awih awih loh fal chu thil tih chi ah ngai lovin a thiante Rozuala leh Zahranga te nen Zawlbuk kawtah tlangval ho lung in deng siak thlirin kil khatah an lo ding thap a.


Lung in den siak zingah chuan Upa Hrankapa fapa Saikapa pawh telin a deng thui ber a ni bawk a,a hawi pir vah vah kher mai .Saikapa hi tlangval tuaitir tha za rual lek niin.a pian a thain a sek phiar fat mai a.Tha hrui nei zet mai leh mahni tawk a huai inti ve tak a ni a.a seilen puite zingah han el pha an awm meuh lo va.Tlangval rual zingah pawh tharum a han ter pha hi an awm meuh lo va.Tlangval tuaitirte ni mahse Vawmbuk inbuan chak ti a hriat a hlawh der tawh a ni.mi tha fa a lo ni bawk nen chapo leh mite hnuai chhiah thiam tak a ni.Lung denna bul a awm ve.Valupa pakhat chuan Vawmmana te thian ho chu "E khai,Nang ni ho kha lo kal teh u.Tlangval inni ve reng tawh a lawm mawle.Thingserhte in sat ngam tawh bawk a.Zawlbukah te pawh lo riak tawh ula a tha ang" a han ti a.Tlangval ho leh Valupa dang ho pawhin awm an lo ti viau va,Chutah Saikapa chuan "Vawmman lungte i deng ve ngam em.ka lungden i khum theih phawt chuan.Zawlbuk i lo riah hunah ka mutna ka kian ang che" tiin chapo takin Vawmnana chu a han cho va,Vawmmana chuan in ngaithlawm takin "E,U Sai ka tluk hauh lo vang che,ka deng mualpho lo mai ang " a lo ti thuai a.Saikapa chuan "Chu min el ngam lo va maw.Hmeichhia nghal lo.Haw la i nu pawnfen va feng rawh "a han ti leh salh salh mai a.chu thu chuan Vawmmana thin a khei zar mai a,Valupa Buangan "Han deng ve chhin la mawle,I zam deuh mai em ni"tiin a lo fuih pawrh zauh nen.Vawmmana chu a rawn pen chhuak ta thauh thauh mai a.mi airia deuh niin a taksa a la in phut chiah lo na a ,thahrui a nei khat ang tih chu a lung den tur han chawi vel thahrui lo phiar dan a tang chuan a hriat mai a.



Zawlbuk kawt a awm ho chu an ngawi thap mai a.uluk takin Vawmmana che vel chu an lo en ran hlawm a.Lal mual a Upa Rozama fanu Parite thian ho pawhin ral khat a tang mit tla lek lekin Vawmmana che vel chu an rawn thlir bawk a.Chutah Vawmmana chu a han in sang phek a,a dar pheng leh banahte chuan hrui hrual ang maiin thahrui a phiar fuat mai a.Saikapa chapo lutuk ka hnawh nan tha zawng zawng chhuah a.Saikapa chu khum ngei a tum rilru tlat a,a han vir zawk a,lung chu a tha tawpin a han deng ngheng mai a,a deng thui nangiang mai.Saikapa lung den chu ban chen zetin a khum ta dawrh mai a.A en tute makti chu an phu suau va.lungin lei a denna lai chu hmuh vek tumin an lo kal hnai tuau tuau va. Hmel en a sapante a lang si chuti tak a Vawmmanan thahrui a nei chu mak an ti hlawm kher mai.Vawmmana pianni a thil thleng hre pha chin upa deuh ho erawh chuan mak an ti teh chiam lem lova."Mihrang mibik niawm reng i ni e "an ti rilru mai a.Valupa Buanga pawh kil khatah a lo nui var var a,"Nauva,mihrang dik tak zawng i la ni ngei dawn e"a ti sap sap a.Saikapa erawh a ngawi ngal mai a.ngawi rengin a kal bo ta thuai a.
Last edited by LN Kima Guite on March 29th, 2018, 3:54 pm, edited 2 times in total.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 30th, 2017, 6:05 pm

MIHRÂNG LEH SAHRÂNG


BY -LN Kima Guite


**
BUNG 10-NA

**
BUNG 9 RECAP

*****
Vawmmana pianni a thil thleng hre pha chin upa deuh ho erawh chuan mak an ti teh chiam lem lova."Mihrang mibik niawm reng i ni e "an ti rilru mai a.Valupa Buanga pawh kil khatah a lo nui var var a,"Nauva,mihrang dik tak zawng i la ni ngei dawn e"a ti sap sap a.Saikapa erawh a ngawi ngal mai a.ngawi rengin a kal bo ta thuai a.


******

Vawmbuk Tlangval Zanriah eikham hmasa a piang chuan hmun dang pan kawi lovin zawlbuk an pan nghal zel a,Vawmmanate thian ho pawh an puanthuahte khaiin zawlbuk an lo lut ve tham tham a.Valupate chuan hmel hlim tak puin an lo chiau au thuai thuai a,an hun tawn in a zir loh em a vangin Tlangval zawlbuk kai thar an buan fiam thin angin tuman Vawmmanate thian ho pawh buan en ah an en lem lova,ni dang ang zawng nise hlim takin an lo buan fiam ngei ang le.Tlangval Zawlbuk kai tur an kim ta maw tih ah Valupate chuan Ral veng tur ruat an ruat fel zung zung a,tumah phun nawi lovin nunau thlamuan turin Tlangval Ralveng tur a ruat ho chu an ralvenna tur lam panin an liam sang sang a.

Thla chu vanlai zawlah a eng ut mai a.van ah chhum dum a lang phoh phoh va.kawlkilah kawl a phe zawr zawr a.ral hla tak a khawpui ri dur durte chu a hriat theih a.Vawmbuk khaw dai deng deuh ho chu venglai li leh chhungrual deuh inah te an riak khawm hlawm a.Chhungkhat pain a khum luah chempui leh a ralthuam neih ang ang chhawpin rapchungah meichher chhit mai theih an in chhawp fur a.naupang mu mai ngam lo chhungkhat nuin mut puiin pasaltha thawnthu nen an awi mu a.Paber thinthi in a mu ngam lo va.nupui fanaute veng in a tul hun a tho mai thei turin an nghar mut a ni ber a.Zawlbu lamah pawh pasaltha leh valupa thenkhat chu Silai nen an mu a,thawm hlek ah an beng an tun nghal hra zel mai.Vawmmanate thian ho pawh Zawlbuk kil khatah an mu thap a,Tlai lungden na a ,a in sawi ang in Saikapa chuan a mutna chu Vawmmana kian tang e a ti lem lo va,Vawmmana pawhin engmah a sawi buai duh lem lo va.Zan rei zel a Vawmmana chu a mu nghet lo kher mai .a Silai thar chu a puan sin hnuaiah a tuai hauh hauh mai a,Chu Sahrang zet chuan Vawmbuk khua chu a ti buaiin nunphung a ti khaih lak nasa ta kher mai .Thla chu tlangah her liamin Vawmbuk khua chu thimin a tuam zui nghal a.Vanah chhum ruah tui pai a rawnin hawr khawm tup tup a,ruah a tla phoh phoh va.tam lutuk lo in a sur zui nghal cherh cherh mai a,khaw awm dan chu Sahrang chet duhna chi tak a nih a vangin mut a tui duh lo tlang a ni ang.Zawlbuk riak tlangval ho chu an in zun chhawk sek mai a.meipui pawh timit lovin an chhawm nung reng a.Zan lai pelh hretah Vawmmana chu a lo chhing sek ni ngei tur a ni.kaih thawh ang mai a chiangin a harh hlawl mai a.Ruah a lo la tla cherh cherh a.thawm ngai thlain beng an chhi vang vang a.Ruah sur thawm leh dithlifarfem a ruahtui far ri fuap fuap tih mai loh chu thawmdang hriat tur a awm rih lem lova.mahse Vawmmana chuan ngaih ngam tak a mut veng veng a tum hauh lo.muthilh pawh tum lem lovin a mu meng kar mai.chutih lai chuan Pasaltha Vunga chu rawn tho chhuakin pawnah a va zung tur tur a.a lo luh leh chuan meipui rem lam tawh chu thingnawi a han vur belh a.mut pawh tum tawh chuang lovin Silai a bul a chhawp chungin meipui bulah chuan a thu a vaibel tanin a pak khu tual tual a.


Vawmmana pawh a mut chhuak ngang hek lo le.a tho chhuak ve ta nge nge a.Pasaltha Vunga chuan "E, khai Mana i muhil thei meuh na nge.i nu i ngai chu a ni em lo maw?" tiin nui var var chungin a lo fiam a.Vawmmana chuan nui sun sun chungin "Ka zun chhuakin min ti harh mai chauh a nia" a lo ti thuai a.Pawnah a va chhuak a.kawt lai lang thei chin chu uluk takin a va thlek kual vel a.mipangai te ai chuan zan thimah pawh a hmu fiah zawk fe a.thil danglam engmah hmuh loh a vangin a lo lut leh a,mut pawh tum tawh chuang lovin Pasaltha Vunga bulah a rawn thu ve a.Pasaltha Vunga chuan "Mana va mu hah dam ta che.hei eng thawm mah a awm lem loh hi a." a lo ti thuai a.Vawmmana chuan"Ka mut pawh a chhuak lem khawp mai.men rih pawh ka hnial lem lo viau mai"a lo tih takah chuan Vunga pawhin a ti lui ta lem lova.Vawmmanate ang mibik an mut theih tlat loh chuan eng thil emaw zawng a thlen ngei dawn tih a hre kar mai a.a rukin a beng chuan thawm danglama ngai thla pah reng a.chutia an in be velah chuan Bawkthanga pawh a rawn tho chhuak tham tham a.chutia an pasalthate mu hlei thei lova.meipui an vil tak tlatah chuan zawlbuk riak tlangval vengva deuh chin chu an harh ru kar tawh a.a tul thut a zuan thawh inpeih at in puan veng sa at in an mu hlawm a.


Vawmbuk hmar lam kawtchhuah lungdawh chungah chuan mihring nge Sahrang tih pawh hriat loh pathum lai mai chu an thu thim mak mai a.zan thimah an ruang am lang chiang lutuk lo mahse,.hringmi zawng an ang mawlh lo ve.thli thawt zawng a rimthang leh hing nghur mai nam huam huam thin a vang chuan lungdawh a thute chu mihring ralveng anni lo tawp tih a hriat mai a.an zing pakhat chu rum chhur chhur chungin a vei kual nghauh nghauh mai a.a chik leh nghur nghur thin a.a mei sei tak chu a hem kual vat vat a.nghah hlelh hmel takin a phi cheng mai bawk a.lungdawh a thu pakhat zawk chu a tho va.mihring ang maiin a ding a,a han din char chuan palian tak pawhin an chen lovang tih tur khawp a sang a ni a.khua thimin a pianzia hmuh chian theih lutuk lo mahse , A dangte ang bawkin meisei tak a nei a mihringte ang maiin a ke hnung lamin a kal thei a.a kut leh ke chu sei hnuang mai niin hriat bawk a.a pang thak chu a tin hriam hmel tak chuan a hiat ri hrawih hrawih a.Ral khat hla takah chinghnia niawm tak a rawn u ri vau vau a,Kawt chhuah lungdawh chung thu ngawi reng chu a rawn zuang tho zawk a.Vawmbuk khaw lam panin a lim phei ta pur pur mai a.a dang pahnih te pawh chu an vei sek chu tawp thutin rang takin an um zui ve ta nghal a.Vawmbuk khaw dai khawchhung lan theihnaah chuan dingin khaw chhung chu an han thlir vang vang a.Zawlbuk eng a lan theih loh a vangin Khaw chhung thim thiap leh thawm reh tlawk tlawk chuan an ngaih a ti tha a ni ngei ang .hma lam an pan leh ta thuai a.thawm chhete pawh chhuah eih lovin an mit var tak chuan kiltin melh chung kawngah chuan bawkvakin an in zui phei zel a.a chang leh mihringte ang in tung chhovin an kal zung zung thei a.Khaw chhung luh dawn ah chuan an hnar fing tak chuan mihring rim an hre ta tlat mai le.fimkhur tak a mit leh hnar len chungin kawng sir hnim buk karah lutin an rim hriatna lam pan in thawm nei hlek lo vin an tawlh hnaih hriau hriau va.

Hmarlam kawtchhuah a ralven buk a ralveng a awm Tlangval pathum Sihkunga,Zataia,Khata te pawh Silai nen in ring takin an thu far a,ruah hmi seng seng leh thing hnah a tang a ruah far ri fuap fuap kar ah thawm ngaithlain an beng an chhi ve kar a.khaw nawm loh em vangin Sahrang chet duhna khua tak tur a ni tih hriain an fimkhur tlang hlawm kher mai.an ralven buk in sang a tang chuan Zawlbuk mei eng pawh a lang thei a.an ralven buk hi thosi leh vaihmite lak a him turin leh khawthlir nawm zawk nan in chung ai mah a sang a sak a ni a.chutia in ring tak a an awm mek lai chuan thilrim thang leh hing nghur mai chu thli thawt zawng chuan a rawn nam leh hak hak thin a,chu rim chu Sahrang rim ngei a ni tih hriain zan thim tak karah ngun takin an mit an len ruai ruai a,Khata chuan an hnuai hmun fai lai thil dum che deuh hrut hrut ni awm tak chu fiah lo zetin a zuk hmu thei a.rang takin a thiante chu a zai zirin kawhhmuh thuai a,chutah Sihkunga chuan a Silai cheng chu kauin a thil che an hmuh chu a kap ta thuai mai a,Chu Sahrang chu a te thawt mai a ,an hnuai thim zingah chuan Sahrang chu an rawn rum ta chhur chhur mai a.an ralven buk chu a nghing ta luai luai mai a.an mangang chu an te chel chul mai a,Kah mai tur eng mah an hmu mai si lo .Khata mangang chuan an hnuai lam chu an rin kah leh zawt mai a,chutah le,Khata chu Sahrang chuan a rawn phih chhuak ta lawp mai a.Hlauin a te teng tung mai a,Sahrang chuan lei ah zuan thlak puiin a luruh chu a seh keh rawp mai a,Khatate thawm a reh rual chuan an ralven buk ah chuan Sahrang rim chhe zet pahnih chu an rawn zuang lut zawk a,an tin hriam zet chuan Sihkunga leh Zataia taksa chu hmun tinah an ham thler nghal hawk hawk mai a,an hrawkah sehin hneh sawh zetin leiah an zuan thlak pui a,Dai lam an tlan liam pui nghal ta nghal a.

Zawlbuk meibulah Vawmmanate ho chu zawite te in an ti ti mek a.chutih lai tak chuan hmar lam ralven buk lam a tang a Sihkunga Silai puak ri thuai chu hriain an zuang tho nghal siau va.meichher lain meipuiah an han dep kai zung zung a,hman hmawh takin hmar lam panin an tlan liam nghal dawr dawr a,Zawlbuk riak tlangval ho pawh rang takin an lo zuang tho zung zung a.meichher chhiin an ralthuam neih ang ang kengin an tlan chhuak nghal zung zung bawk a.Vawmbuk khaw mipui tam zawk pawh Silai ri chuan ti harh in,in tin deuh thaw ah mei nun in a rawn eng sap sap a.Silai vawihnihna a rik chuan Vawmmanate chuan ralven buk chu an hnaih tawh viau va.hmanhmawh takin an tlan zel a.Rei loteah ralven buk chu thlengin Ralveng ho chu an han ko tuar tuar a chhanna reng a awm lo va.Vawmmana chu Ralven bukah ban kai chho thuai a.ralven buk chhuat leh bang velah te chuan thisen a per pheng phung mai a.midang ho pawh an lo lawn chho sap a.Ralven ho thawm reng hriat tur awm lovin a reh thiap mai a.ralven buk hnuai velah pawh thisen a lo baw nuai bawk a.Valupa leh Pasaltha te chuan uluk takin hnu hma an han zawng a.thisen far leh lei nem lai a Sahrang hnu chu hmuin hmanhmawh takin an chhui zui ta nghal a.an hnung lawkah Vawmbuk tlangval ho chuan thinrim in hrosa bawrh bawrh chungin an rawn zui a.meichher chu Vawmbuk khawdaiah chuan a eng chuah chuah mai a,Tlangval zarual dawn meichher eng ah chuan ramhnuai chu chhun ang mai a eng ut mai a.thui lote an chhui hnu chuan Khiang kung bul zawl ah chuan Sihkunga ruang chu lu bung lek lekin an hmu ta nawlh mai a.a taksa chu a in ham thler nasa hle mai bawk a.Sahrang chuan ei hman lovin mipui thawm a vang chuan a tlan san ni ngei tur a ni.Sihkunga ruang chu.Tlangval eng emaw zah a senghawi tur an in ruat a.midang ho chuan Khata leh Taia an zawng chhunzawm leh nghal a.


Valupa Buanga chuan "Tu mah kal fal lo ula,fimkhur takin in veng tawn chung in kan che dawn nia"a han ti a.Tlangval ho thinrim chuan an chempui a hnim leh thingtuaite sah thuai thuai pahin an in hrosa bawrh bawrh a.Hnu hma chhui tur mumal an hmuh mai tak loh vah chuan ramhnuai ah chuan Khata leh Taia te chu an phek zawn ta ngawt mai a.rei vak lo hnuah Taia ruang chu Thlang lam deuh vah an hmu leh ta nawlh mai a.a taksa hliam chu dam chhuahpui chi zia zang a ni lo va.Khata chu an hmuh mai loh a vangin an han in hawr khawm tha leh a.Valupa Buanga chuan "Kan khaw tlangval Tlawmngai Khata hi a kan hmuh hma chu Vawmbuk tlangval tumah khawchhung kan lut tur a ni lo.Thenkhatin Taia ruang hi in lam lo va pan pui ula."tiin Taia ruang lo haw pui tur chu a ruat nghal zung zung a.he tih lai mek hian Vawmmana chu an piah hnim buk karah a kun kat kat a.a mit fiah tak chuan Sahrangin Khata a kal puina hnu fiah lo tak chu a chhui zel a.midang ho in an rawn zui mai lo tih a hriat chuan a han tawi deuh va.mahse a rilru siam felin Sahrang hnu chu a chhui leh ta zel a.zan thim hnuaiah thawm dim leh fimkhur takin zawi muangin Sahrang hnu chu a chhui zel a.rei loteah Sahrang in Khata ruh a seh ri bawp bawp chu fiah lotein a hre ta mai a.a han ngai thla vang vang a.a hnung lamah mipui chuan haw haw chung ramhnuai chu an rawn tuam phei mek bawk a.Vawmmana chu hnim karah zawi muangin a kal zel a.a thawm hriat pawh a ring sawt kher mai a.Sahrang ho sa inchuh chu an in ngur ri chhur chhur mai a.khau thim viau mahse Vawmmana mit var tak chuan a meichher en phak bak thim chin pawh fiah vak lovin a hmu thei rei ruai a.chutah a hma hnim buk a han pel fel chiah chu a piah inchhung dung chen zet tur Sawntlung zang hmun zawl chhete lo awm ah chuan Sahrang pathum hian Khata ruang chu an lo thut chilh run hlawm a.Vawmmana meichher eng an hmuh chuan an rawn hawi rual thawi a.Vawmmana lam hawiin in ring takin an ding a.an rum ham ham a.meichher eng a vang chuan an rawn hnaih ngam lo ni ngei tur a ni.an awm hmunah in hrosain an ha te chu an thial ri bup bup mai a.Vawmmana pawh chuan a fimkhur hle loh chuan pathum lai annih a vangin a che sual thei tih hriain ,a ipte a chempui chu phawrhin a hmaah lak mai theih turin a chhawp a.a meichher chu a bulah tungin a Silai ngul sei reng rawng chuan Sahrang lo hnaih ber chu uluk fe a tin an kap thuai mai a.Sahrang ho chu Silai a rik rual chuan an zuang zawk a.an bo ta diak mai a.Vawmmana chuan a theih ang a rangin Silai mu chu a han thun leh sawk sawk a.Hnung lamah mipui pawh Silai ri hriain an in au chuah chuah a.Vawmmana chuan muang changin Khata ruang chu a pan phei ta tham tham a.Khata ruang chu Sahrang ho chuan an lo ei hman nual mai a.A Sahrang kah chu a fuh leh fuh loh a hnuhma tang hriat tumin an en ngial a.mahse Silai kap thang lo tih takah zan thim meichher eng mai ring a kap a ni bawk a ,a kap fuh lo chiang hle a ni ang .Sahrang dinna hnung Fah kung malte tiat vel chu a Silai mu chuan a verh kaw sawrh mai a.a Silai mu fuhna a hmuh chuan Vawmmana chu themthiam lo a inti deuh nge a nui suk suk a.



Mipui pawh chuan Silai rikna lam chu rawn panin rei loteah Vawmmana awmna chu an lo thleng phei thuai a.Khata ruang an han hmuh an chek tlak tlak hlawm mai a. Valupa Buanga chuan "E heu,Vawmmana nge nge i zarah kan unaupa ruang tal hlawm theiin kan awm a ,i ti tha tak zet mai"tiin Vawmmana chu a han fak luam a.Vawmmana chu a zak deuh viau mai a.hmaichhan Valupa meuh in a han fak chu phu lo a inti kher mai.Tlangval tam takin ngaihsanna mitmeng nen tluk loh en a an en laiin Then khat lo itsik ru viau pawh an awm tho mai.Ruang an hmu kim ta bawk a.Sahrang chimawm tak chu zan thil ah chuan beih zui zel loh nise Valupaten an tih a vangin Khata ruang zawnna tur hlan an siamin lunghnur leh tlawmngai rilru takin Khata ruang nen an let leh ta a.


Ruang pathum chu Zawlbukah zalhin puanin an khuh a.Mithi chhungte chu lungchhe takin an in hnit hlawp hlawp a.Ruang pathum lai an han neih leh takah chuan Khawtlang nu leh pa leh Lal leh upate chu an lu a hai tak zet a.Sahrang leh an that hleithei si lo nen.Khaw ralmuang tak ni thin chu a ralti zo ta a.mitin mai chu an ngui nghiai mai a.Zawlbukah Lalnu chu lo lutin a khaw mi leh sate tawrhna chuan a thinlung a tina tak zet a.Lalnu leh hmeichhe paukhauh tak ni mahse a mittui a tla ve zawih zawih mai a."Ka khau leh tui duh takte u.Vawiin kan hun tawn hian ka lung a ti chhia a.Chutih rualin ka thin a ti rim tak zet a.naktukah he Sahrang beih dan leh in ven dan tur chungchangah ro mumal zawk a kan rel a ngai a ni.Valupa leh Tlangvalte ro min relpui turin Lalinah ka Upate nen naktuk mithi vui zawh ah kan lo nghak ang che u.ka khua leh tuite him leh thlamuang tak a in awm hi ka duh a ni.Vanduaina tawk tate ka tawrhpui tak zet che u a ni"tiin Lalnu chuan thu a han sawi a.Valupa Buanga chuan "E Lalnu lungngai reng reng suh.kan awm a lawm heng Sahrang ho hi Vawmbuk tlangvalte hmaah an la tlawm ngei ang ,A ni lawm ni Tlangvalte u "a han tih chuan Tlangval ho chuan ring tak lo aw dual dual a.ti chuan mithite chu an mahni in lam theuh an panpui zui ta nghal a.he tih lai hian khua pawh a eng uar tawh a.Mipui pawh mahni in lam pan lovin mithi in lamah in sem darhin khaw har chhungte hnem turin in chhungah an thu hmur mai a.Vawmmana pawh Khata te leikapuiah Rozuala te nen an thu a.sawi tur an vang a ni ang tawng duh tak Rozuala pawh a ngawi ngal mai .mahni rilru kawmin an thu ngawi reng a.Vawmmana chuan a Sahrang kah fuh loh chu ngaihtuahin a ui kher mai.Uluk zawk a Silai kah zir a tum rilru ta ran a.Heg Sahrang ho beih hi a tih tur a ni tih hriain a rang thei ang ber a Silai kah zir a.Khawchhung Sahrang lo chet nghak a thu mai lova.A peltu zawk a tan a ramchhuah thuai tumin a rilru a siam ta ran a.
Last edited by LN Kima Guite on March 29th, 2018, 3:55 pm, edited 1 time in total.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » December 1st, 2017, 6:37 pm

MIHRÂNG LEH SAHRÂNG

BY -LN Kima Guite

BUNG 11-NA


***
BUNG 10-RECAP

***


Vawmmana chuan a Sahrang kah fuh loh chu ngaihtuahin a ui kher mai.Uluk zawk a Silai kah zir a tum rilru ta ran a.Heg Sahrang ho beih hi a tih tur a ni tih hriain a rang thei ang ber a Silai kah zir a.Khawchhung Sahrang lo chet nghak a thu mai lova.A peltu zawk a tan a ramchhuah thuai tumin a rilru a siam ta ran a.

***


Tlangval thalai pathum ngawt mai Sahrang lak a an han chan leh ta chu Vawmkhua chu a ngui ruai mai a.Zing ni chhuak pawh a dul ruih mai a.lo lam hna tul pawh thawk hleithei lovin khawtlangin an buai a.Lal leh Upa ho rilru pawh a hah kher mai.Nula tui chawi tur pawh mipa ho ven zel an ngai a.tumah mahni a ram kal ngam lah an awm hek lo.Pa ho lah engtih theih ni hek lo le.awm hmunah an insawh an insawh ringawt a.Pasatha ho tak an khawngaih thlak let ling a.han beih chiam hleihtheih a nih si loh na lai tak hi an buaina ber a ni a.a Sahrang tak hi han hmachhawn tur awm se zawng khawtlang himna a tan chuan thih chilh hial pawh an ngam ngei awm si a.Pasaltha Vunga Khawkhat pasaltha chhuanvawr khawtlang muantu lo ni thin a ni a.tun tum zet chu he Sahrang hian a tlawm chiang rih hle in a in hria a.khawtlang mipui lakah pawh a in thlahrung ru kher mai .mahse Vawmmana vangin he Sahrang lak a chan that zawk beiseina lian tak a nei a.Khuanu siam bik Vawmmana lo chu he Sahrang lak a in nghahna tur awm in a hre lo va.Vawmmana hi rang tak a kawm chian a tum ta ran a.


Tlangval tlawmngai ten thuk tak a thlan laiin an thalai pui Taia,Kunga leh Khata te chu an vui liam ta a.Mithi vui zawhah Lalin lamah Pasaltha leh Valupate chu Sahrang ralrel turin an lut khawm tak tak a.Tlangaupa chuan chhuat laihah belpuiin zu a lo siak khat lung mai a.Lalin lo lut hmasa a piang chu seki in a lo in tir zel a.Vawmbuk valrual chu Lalnu Chhingpuii chhuat laiah chuan an thu khat hmur mai a.Sahrang ralrelin an ngaihdan leh duh dan chi hrang hrangte thawh khawm a.Sahrang lak a inven dan tur leh lo beih let dan tur tha ber hriat har an ti hle mai a.An ralvengte ngei ngei pawh Sahrangin a seh hlum a ni si a.thumum an siam harsa an ti kher mai.a tawp ah Lalnu chu lo dingin "Thumum kan nei hlei dawn in a lang lo tlat mai.Kan khaw tlangval te lo kai hruaitu ber Valupa Buanga khan a duhdan leh ngaihdan han sawi se la.a ni duh dan angin kan kal mai dawn em ni" tiin rawtna a rawn siam ta ngawt a.Mipui lam pawhin "E a tha khawp ang chu "an lo ti sap sap a.ti chuan Valupa Buanga chuan a duh dan leh tha an tih dan te a han sawi a.a ai a tha rawtna dang a awm lo bawk a.Valupa Buanga rawtna an pawm tlang ta a.



Vawmmana ve thung chu Mithi vui zawh ah hman hmawh phelengin a tlan haw dawr dawr a.A Silai roh em em mai chu la chhuakin fumgki nen Silai mu a lo khawl ruk rauh rauh leh a Pu Liannghaka pek silai mu tam tawk akin a chhuak leh ta nghal a.Sum hmunah a nu mithi in kal haw chu tawkin " E ,Mante Khawnge i kal dawn a.Sa hrang lai lai ramvah i tum em ni a.Lal leh upate thu chhuak kha i hre lo em ni.tumah a malin ram kal an awih loh kha"a han ti a.Vawmmana chuan "Chaw hmeh kan nei lo em a.Vahrit leh ther hlo eng ilo kan va zawng ang chu ka tia.chhun engah eng Sahrang mah a hlauhawm lo vang ,Ka nu min ngaih tuah suh" tih pahin leikapuiah chuan a chhuak phei ta nghal a.Rualthani chuan "Tih sa loh loh a nih chu,tawhsual te i va tawk reu reu ang ,va kal reng reng suh " ti zui lawm lawm mahse Vawmmana chu hnung lam hawi map lovin a liam zui ta a.Rualthani chuan "Aw Vawmman lunglian a zet chu " tiin a thlir liam vawng vawng a.


Vawmmana chu dai a thlen chuan eng emaw thulhah tiin Silai mu a thun lawk a.hman hmawh takin a tum ram lam pan chuan a kal ta sawk sawk a.tlan ti tih a kal a ni bawk a.khau tang hla tawk tak khawchhung a tang Silai ri hriat phak lohna tur hmun tlang let liam chu a thleng ta thuai a.Sazawn mual tawntirh kawn rai nuam tak thingchang hmun thelh hun mai a ni a.Thingchang rah tla a awm zeuh zeuh tawh a vangin Sanghal hnu pawh a tam khawp mai a.mahse chu lam chu Vawmmana chuan melh pawh a melh chhin eih lo.hmun rem laiah a ipte pui chu nghat in a chempui a phawrh a.a han en vang vang a.hlam sawm vel a hla Fah kung chu panin lei tang kawng chen vel a sangah fah kung pil chu a va thel var a.A silai dahna ah let lehin fah kung a thel var chu kah fuh tumin a Silai chu a han lek chhuak a.A pu Liannghakan silai kah dan tur a lo hrilh angin,tin zawn lova,hawlh rawk a kah nghal zawt chu a zir tum dan ber a ni a.Silai kapthiam leh rang tak ni tur chuan tinzawn chung kah hian tuan a fum deuh thin a.tin zawn lem lova hawlh rawk kah hian ran a awl zawk a.hei hi thiam tak a zir a tum a ni.Vawmmana chuan a silai chu a kawngzawnah kengin a silai hmawr chuan a thil thel var chu a tin fuh ngei a hriain an hmet per zawt mai aSilai chu a puak khu luih a.zen rim a nam rum rum a.Silai kah khu chiai chiai chu vai kiangin a han en chiang a.a tum chu a thelh chiang hle a ni ngei ang.Silai mu kah fuhna awm reng reng a hmu lo va.chutia vawithum lai a kah hnu pawh chuan a tum kah fuh chu sawi loh hlam dawn dawnin a thelh leh duai thin a."ka va han fuh tawh dawn rua che em"tia ,a Vawilina a kah zawh rual chiah chuan chu lai ram reh tak ah chuan Nula nui ri awr awr hi khawi lam a tang a lo chhuak nge tih pawh hriat lohin a lo chhuak a.Vawmmana chu a han hawi kual ngial thin a.tumah hmuh a nei chuang si lo va,ASilai mu chu a han thun leh a.A han kap leh pawp mai a.a ngai te bawkin nui ri chu a lo chhuak leh ta awr awr mai a.Vawmmana chuan a pu sawi thin lasite kha annih ringin "kha tia min nuih vak vak lo khan ka hmuh theih turin lo chhuak ta che" a han ti thla ngawt a.


Chutah le ,chu lai ramhnuai ah chuan Nula nalh leh hmeltha rak mai chu a lo chhuak ta zan zan mai a.a hnungah ani ai a hmeltha leh zual leh naupan hmel zawk pakhatin a rawn zui bawk a.a hmasa zawk a kal pawh a hmelthat tawh teh lul nen.a hnung zawk a mi chu a let sawm tamin a la tha zawk cheu mai a.a mitmeng mawi lutuk mai chuan keini ang duang chu min han melh se kan a chhuih thei hial ang chu ,a hmelthat zia hi keini ang sawifiah rual a ni love,sawi buang bar lo law law mai ang,khawvela i nula hmuh tawh zing a hmeltha ber kha han mitthla vang vang la chu mi ai a let sawmsarih vel a hmeltha chu a ni .hlim hmel takin Vawmmana chu an rawn nuih sen sen a.Vawmmana chu a kaah tho a thlawk lut ang tih hlauhawm khawpin engmah tih nachang pawh hre lovin a hawi ka ho mai a.Nula hmasa zawk chuan "Mak i va ti awm ve.Vawmman i va hawi nasa heu ho ve maw le" ti a rawn fiamin a nui har har a.Vawmmana chu chutia an rawn biak takah chuan harh chhuakin a han thaw huai a."Ka ...ka...lo bei..beisei lo chee..che.u a."a ti bah ta nuai a.

Nula upa zawk chuan "Kei hi Zaivawri ka ni a.hei hi ka fanu Thachhingi a nih hi.kei hi i puin a sawi thin a Lasi thiannu kha ka ni a.i pu thi mai tur pawh enkawl damin ka chhan chhuah tawh nghe nghe kha" a han ti a.Vawmmana chuan "Ka pu sawi thin Zaii ngei chu i nih dawn hi.i hmelthat zia hi ka puin a sawi bang thei lova" a lo ti ve vat a.Zaii chuan "I pu chuan min lo la hre ve reng a ni maw.a lung len thlak mang e aw.kei pawh i pu kha ka ngai thin tak zet a ni" mittui parawl kiangin a han ti a.lung leng awm takin a han hawi vang vang ,chutah han in thing harh in "Lung leng a kur hman kan ni lo ve,i khau leh tui Sahrangin a tih chimih hmain kan chet vat vat a ngai a ni," a han ti a.Vawmmana chuan "engtia chet lak tur nge ka bangbo khawp a nia.Sahrang lah kan that hleithei lo va.han umzui chiam thin mah ila ,an hnu kan hloh thuai zel si a." a han ti ha a.Zaii chuan "Sahrang chanchin chu nakin kan la sawi dawn nia.tunah chuan Silai kah i zir phawt a ngai a ni.ka fanu Thachhingi nen hian han zir teh u" tiin a fanu chu a han hui a.Thachhingi chu a lo kal hnai thuai a.Vawmmana bulah chuan a rawn ding a.a rim a tui vawng vawmg kher mai a.thlifim chuan a sam chhawlleng te chu a chhem leng siau siau a.a vun chu bawnghnute ang mai a var thiang hlim zu ni a.Vawmmana vun nisa em ut dum thal mai leh char rut mai nen chuan in thlau tak a ni .Chhingi vun nem takte chu Vawmmana vun char rut mai chuan han tawk palh se bel kang thawt thei a mawi a ni.

Thachhingi chuan Vawmmana chu Silai ken dan tur hrilhin a kut chuan silai chu a han dawm tir a.Chhingi kut no takin Vawmmana kut thap hruih mai a han vawn tak ah chuan Vawmmana chu mur deuh sung sung in a in hria a..Hlauh nei lo mi luhlul ngawltawt Vawmmana chu Lasi nula hmeltha bulah chuan a khur ru der der mai.Chhingi chuan "I thil kah tur kha i tin zawn leh zawn loh ngaihtuah suh ang che.i rilru a Silai in a tin zawn leh zawn loh ngaihtuah ran chung a i kah chuan i thelh zel ang.thil che lai phei chu i kap hman hauh lo vang," a han ti a.Vawmmana chuan aw khur deuh ti tih in "Ka tin zawn leh zawn loh ka hriat loh te chuan ka tum ka fuh thei dawn em ni " a lo ti hu a,Zaii chu a lo nui hak a.a kut kuangkuahin Thing awn nghengin a lo ding fel than a.nalh zawng a nalh chiang e.Chhingi chuan nuih seih pahin "I silai in a tin zawn leh zawn loh en suh.i thil kah tur kha chiang takin en la.i kah tur ah chuan i rilru sawrbing la.a tin zawn leh zawn loh chhut a ngai lo.i rilru khan i hriat miah lovin i kut kha thununin i tum i fuh chat chat tawh mai ang,i rilru kha sawrbing a thunun han tum hmasa phawt la.awle han ti chhin teh le.boruak kha zawi muangin han hip lut la han thaw vang vang phawt la" a han ti a.



Vawmmana chu a han mai mit chhing a.boruak chu a han hip lut vang vang a.chatah zawi muang a thawchhuak leh ham hamin a han meng a.mak tak maiin chutia a han men leh chuan a mahah in rin tawkna leh cho hliah hliah na a rawn awm ta tlat mai.Silai kap thiam leh kap thang tak ang mai a ni ta.Zei takin a Silai a han lek kang a.a Fah kung thel var chu chiang tak a enin rang takin a kawng zawn a tang chuan a Silai chu a hmet puak ta thuai mai a.A Silai in a kut a nghawr nghin dawt rual chuan fah kung a Silai muin a verh ri sawt chu hre thei a.a tum chu a fuh chiang ta kher mai.Lasi nula pahnihte chuan uar takin an kut an lo beng a.hlim takin an nui var var a.



Zaii chuan "Kha kha a ni mai lawm.thil i thiam chak hle mai.kha vang khan lawm mibik ni tur a i pian hma tang kan lo hual che " a han ti a.Vawmmana pawh chuan mak a ti kher mai.a hma zawng harsa a tih em em kha ,tih dan tur dik tak a han tih chuan a lo awl zaih mai si a.Chhingi pawh chuan "A tha kher mai.mahse zir tur tam tak i la nei a nia.a mu rang tak a thun leh thil che lai kah te,tin,Silai kah chauh lo pawh thil dang tam tak zirtur i la nei a nia" a lo ti a.Vawmmana chuan "Zirtur in tih a piang chu phur takin ka lo zir ang e.he Sahrang lak a ka khua leh tuite ka chhan theihna a nih dawn phawt zawngin eng ang thil harsa pawh nise ,ka ti zel ang" a han ti a.Zaii chuan "i la zir mawlh ang,kan tanpui chhan che hi i pu hi kan thianpa a ni a.a phuba lak sak kan duh vang a nih bakah min puih let kan beiseih vang a ni bawk a nia." a lo ti thuai a.Vawmmana chuan "Min puih phawt chuan ,puih in ngaihna a piangah ka pui zel ang che u" tiin a lo chhang thuai a.Zaii chuan "thil hlauhawm tak a ni a,i nunna pawh i chan mai thei a nia,keini lah in he mi kawngah hi chuan kan pui thei dawn der si lo che a.eng pawh nise kan tih tur chu nang mahni puih phawt che u a ni a.a hnu zel a min puih leh puih loh chu i thu thu ni se.min pui duh loh pawn kan ti lui dawn lo che a nia" a lo ti leh a.




Vawmmana chu a han ngawi vang vang a.Lasi nula pahnih lahin nghakhlel takin eng tin tak min chhang ang maw tiin thaw dep dep chung an lo melh dun kar mai a.Vawmmana chuan "Min pui hmasa lo mah ula.ka pu thiante in nih miau vangin ka nunna thapin ka pui tho tho ang che u " a rawn ti ta chhek chhek mai a.a mitmeng a tumruhna leh luhlul na lo lang chuan a thil tum tawh chu a tawp hlen lo vin a zu zi san hni hne lo vang tih a lantir chiang kher mai.Lasi nula pahnih pawh thlamuang takin an thaw sang sang mai a.Chhingi phei chu lawm tak a lo tlan pheiin Vawmmana awmah chuan a lo bei ta thlawp a.chutah lungchhe takin a in hnit ta hlawp hlawp mai a.Vawmmana chu a hrilh hai let ling kher mai.Chu lasi nula lungngai thei hmel pawh a lang lo lungchhe van kai a in hnit ta hlawp hlawp chu a lungti chhetu chu hre mah suhse ,he ti tak nula hmeltha eltiang tah tir tu chu chhuah a tum lo rilru bur mai a.Zaii chuan "Khaih...khaih...Thachhing Vawmmana i ti hrilh hai a nia.in sum hram hram teh khai.he buaina a chin fel zawhah kan buaina chin fel min tiam tawh kha.thlamuang takin awm tawh rawh khai." a han tih chuan Thachhingi chu in thiam lo takin rawn dak chhuak a."Mana min hrethiam hram dawn nia.Ka hmangaih em em leh ngaih em em chhan chhuah ngaiin a awm a.min puih i han in tiam khan ka lawm bawk si a.ka lung a chhe thut a tin ni "a han ti a.Vawmmana chuan " Inthiam lo mah ta che,engnge i har satna chu ni reng reng "tiin a han zawt a.Zaii chuan " Chu zawng nakin ah kan sawi dawn nia.tunah chuan Sahrang chungchang hi kan buaipui phawt a ngai .muangchang hman kan ni lo "tiin Vawmmana chu a lo chhang a.Vawmmana chuan but nghut nghut pahin " Engnge kan tih leh zel tur ni a"a han ti a.Zaii chuan "Hei khua a tlai mai dawn a.he lai ram hi kan tan a him dawn lo va.kan awmna lamah i lo kal mai a ngai dawn a ni.i chhungte chuan bo emaw tiin an lo zawng ngei ang che.mahse chu chu pawi i tih loh mai a ngai.thil zir tur a tam si hun kan nei thlem si" tiin vawmmana chu a han hrilh a.Vawmmana chuan "Vawmbuk khaw himna tur a nih chuan engpawh tih ka in huam vek." a lo ti thum chhak a.Pasaltha huaisen leh ralhrat , Sa leh ral nunau muan thin tu Liannghaka thisen a mah a zam chu a lo lang chho tan ta le.mibik nitur a siam leh ruat a nih a vangin a mi naran tih theih loh leh hriat phak loh thil tam tak hriain a la ti thei dawn a ni.



Ti chuan Zaii leh Chhingi chuan Vawmmana chu a ban leh lam leh lam a chelhin an thlawh puita vawn vawn a.Ni tla turin tlang a chhun eng ruih mai a.Chung lam a tang chuan Vawmmana chuan a hnuai mual hrang hrang leh ngaw hring nghulh mai te chu a han thlir a .a mawi kher mai .rei loteah an hmaah chuan Khuai kham ,kham rang in chhawr dawh ut mai chu a lo lang a.Zaii leh Chhingi chuan chu kham chhawr dawhah chuan Vawmmana chu an tum pui a.Chhingi chuan "He lai hi kan khawpui chu a nih hi,en teh khu.in vangkhua pawh a lang chiang teh a sin " a han ti a.Vawmmana chu in herin a han hawi chhuak a.Ral khatah Vawmbuk khua a lo lang pe iar mai a."E,a mawi hle mai.lung a leng rum rum mai lawm "Vawmmana chuan nui hak hak chungin a han ti fiam a.Chhingi lah chuan " I haw kan phal tawh dawn si lo va.kha laiah khan lunglengin i tap nitin dawn a ni mai lawm "tiin nui har har chungin a han fiam let ve a.Zaii chuan " Ti ru le,i lut ang u hmiang "tiin Vawmmana te chu rawn au va.ti chua puk chhungah chuan an lut ta nghal a.





MIHRÂNG LEH SAHRÂNG


BUNG 12-NA


***

BUNG 11- RECAP


***


Ral khatah Vawmbuk khua a lo lang pe iar mai a."E,a mawi hle mai.lung a leng rum rum mai lawm "Vawmmana chuan nui hak hak chungin a han ti fiam a.Chhingi lah chuan " I haw kan phal tawh dawn si lo va.kha laiah khan lunglengin i tap nitin dawn a ni mai lawm "tiin nui har har chungin a han fiam let ve a.Zaii chuan " Ti ru le,i lut ang u hmiang "tiin Vawmmana te chu rawn au va.ti chua puk chhungah chuan an lut ta nghal a.
****



Puk chhung chu a dai ruih mai a.boruak a thiangin puk chhung kiltin chu a fai sarin hmuh a nuam a.puk chu a zau telh telh a.chutah an hma lawkah chuan Lasi khawpui chu a lo pe un mai a.Vawmmana chu mak tiin a hawi vual vual a.chu tia puk chhung a khaw lian tak lo awm reng mai chuan mihringte hriat phak loh thil khawvelah a lo tam tur zia a ngaihtuah tir rauh rauh va.khaw chhung luh hma chuan ral veng an lo awm a.Zaiite ho an lo hmuh chuan a lo nuih var var a,Zaii chu ban vaiin a han chhang let ve a.Vawmmana chuan Lasite pawh ralmuang tak leh hlim takin an lo khawsa reng bik lo a nih dawn hi a ti rilru nauh nauh va.Eng ral nge an neih ve thin a ,engti anga khawsa nge annih chu la hre chawp zel turah a in ngai ngawt a.chutia Hringmi pasaltha Silai pu chung a an khua lo lut ta zan zan chu Lasi ho chuan an hmu duh kher mai ,in tin a tang an lo dak ther hiang hiang a.naupang kawt lai a awmte pawhin ding meuhin an lo en vung vung hlawm a.Zaii chuan " Mihring hi kan khawpuiah kan hruai lut zen zen lo va,kum rei tak hringmi hi kan hruai lut tawh lo va,mipuiin mak a ti a nih hi."tiin Vawmmana chu a hrilh a,Vawmmana chuan "Ka pu pawh khan in khawpui hi a hmu lo tihna a ni maw"tiin a lo zawt let a,Zaii chuan nuih seih pahin "Nangni ang mibik leh kan mi siam duh bikte chauhin kan khawpui hi an hmu thin " a lo ti leh a.Chhingi pawh chuan "Lasi khawpui hi mi naran hmuh mai mai theih a ni hleinem.nang zawng i ropui em a.kan khua i lo lut hi Lasite tan chawimawina a ni zawk mah a lawm" tiin Vawmmana chu a han chhaih pah a.Vawmmana chuan "Khaih khaih Chhingi i ti zah thlak em mai.keinite zawng mi chhe dai kil kar a mi mai lawm kan nih.rual kan pawl ve tawk tawk chauh a nih hi"tih pahin hmel hlim takin a hawi kual ruairuai a.



Zaiite chuan Vawmmana chu veng lai li a in lianpui lo dingah chuan an hruai lut a,an in chhung vel leh khawsak dan chu Mihringte khawsak dan nen in ang hle in Vawmmana chuan a hria a,naupang ,pitar putar leh nula tlangval te pawh an awm ve vek mai a.In chhungah chuan mi an lo awm nual a.Pa khat chuan vawmmana han thu fel zet chu in tur a lo pe thuai a.zu ni chiah si lo.tuisik ang tak thlum tui tak mai hi a ni a,Vawmmana chuan a han in chuan hah dam sawng sawngin a in hria a.A bul thu Chhingi chu " Hei hi eng tui nge ni a,a thlum tui hle mai "tiin a han zawt a.Chhingi chuan " Lasi zu a ni mai ang chu.hringmi ten zu in hman ang chiah in kha thil kha kan hmang ve thin a lawm"tiin Vawmmana chu a chhang a,Vawmmana chuan "A thlum tuiin hah a ti dam sawng sawng thei a lawm,a siam dan min la hrilh la tha ang a" nui chungin a han ti leh a.Chhingi chuan "Lasite chauhin an siam theih chi a nia.mihringin an siam ve thei lo va" a lo ti let var a.Vawmmanan Chhingi lam a va hawi chuan an mit in tawngin an in en dun ta reng a,Vawmmana chuan Chhingi mitmeng mawi tak chu en nin har a ti kher mai.Zaii chuan aw rawn thian kharh kharhin "Khaih khaih nangni pahnih kha eng nge in en dun veng veng a." a rawn ti a,Vawmmana chuan a mit a la thuai a,Chhingi zak chu a sen tawn tawn a,chu chuan a thatna a belh chhah sauh sauh zawkin Vawmmana chuan a hria a,Zaii chu an bulah lo thu in "Ka fanu hringmite hi hmangaihin ngaizawng duh miah suh ,an dam chhung ni a rei si lova,kum tam tak lung lengin i kur i kur mai ang" Vawmmana melh ralh ralh pahin a han ti fiam thu a.Vawmmana chu a lo nui so ringawt a,Chhingi zak chu a sen nasa zual sauh va.


Zaii chuan "tak tak a,ka han fiam mai mai che u nih kha,Hringmi thian neih hi a hlimawm khawp a nia" tiin a thu sawi chu a han tlip zui a.chutah "ka mite thenkhat nakin ah an lo kal dawn a.kawm che an chak hlawm khawp a nia ,lo nghak la thil pawimawh tam tak kan hrilh dawn che a nia,,Sahrang chanchin pawh kan hriat ang ang kan hrilh dawn che nia." tiin Vawmmana chu a han hrilh a.Zaivawri hi He lasi khawpui Lalnu a lo ni reng mai a,a fanu Thachhingi bakah fanu dang pahnih leh fapa pahnih a nei bawk a,a pasal awm erawh Vawmmana chuan a hmuh loh a vangin a chanchin la zawh tur a nih hi a ti rilru a.Mihringte ang maiin zanriah chu an kil ve laih laih a,an thil ei erawh mihringte ei nen chuan in ang lo tak a ni thung a.khawi a tang a an lak leh engtia siam nge tih phei zawng mihringte hriat rual a ni lo ve.Vawmmana chuan tuiti takin Lasi ho ei ang a piang chu a ei ve bawrh bawrh a.Chaw ei pahin hlim takin an ti ti siam siam hlawm a,Vawmmana pawh a tlangnel nghal mai a.


Zanriah eikhamah chuan Vawmmana chuan thut hah dam pahin a Vaibel chu a han tan a,a han pak khu tual tual a.eng hun nge ni tawh ang tih a hrethiam mai lo va.a haw ta lo chu a chhungte chuan engtin tak ngai ang maw.an mangang viau ang em tunahte hian a nu leh farnute chu an tap mek ang em.tihte a ngaihtuah voh voh a.Chhingi unaute chuan rawn thut hnaih a chanchin an rawn zawt laih laih hlawm a.pawn lam a chhuak a mihring la hmu ngai lote anni bawk a,a vaibel zukte chu mak anti khawp mai a,ante ber chuan Vawmmana Vaibel chu lak sakin an lek vat vat a,uluk fein an enkual vel a,a han hnim chhin chuan a rimchhia a ti chu a ner nawng nawng a.


***
Vawmbuk khuaah chuan leng len ar a khuang thliai thliai a.Veng hmawr deuh hmun rem lai hmun li laiah tlangval sawm rual zetin ralthuam famkim nen meipui chhepin khua an veng a,Sahrang chet hun hi zan lai pelh hnu zelah ni mahse fimkhur luat a awm lo tiin zantir a tang ralveng pahnih khat mai nilo,sawm rual zet an awm nghal a.Zawlbukah pawh tlangval ho in hawr khawmin a tul hun a che zung zung thei turin ruahmanna fel fai tak siamin an in buatsaih lawk vek a.Sahrang lo lang leh hmasa sa chu chhuah an tum tawh lo kher mai a.he tih lai mek hian Vawmmanate inah chuan laina hnai ho chu an ri laih laih a,a then an tap pur bawk a,Vawmmana lo haw theih loh a vangin an mangang chu laina hnai in koh khawmin ro an rel mek a ni a.Vawmmana pa chuan "Hei zan pawh a la rei lo va.leng len hun chauh a la ni a.khawiah emaw a lak lawh pawh a ni thei a.Tlangval ramkal lo va zawn chuk chuk pawh thil mualpho thlakte pawh a ni thei a.chu vangin la nghak rih ila,Thate nu inti pachang ula tap pur teh suh u.thenawm khawvengin an hre reu reu ang e" tiin kil khat a Vawmmana nu leh a farnute tap pur mai chu a han hau pah a.Bawka pawh chuan "Ni e,ka nute mangang lutuk mah ta che u.mibik leh pasaltha a ni a,engmah a ti lo vang " tiin a lo hnem ve vat a.Hmeichhe ho leh Vawmmana pa unaute ho chu an ngaih a tha chiah tawh lo va.zawn mai an han rawt thut thut thin a.in zep reng theih ni hek lo le.an thawm chu thenawm khawveng in an lo hre thuai a.eng thil nge thleng tih ngaih venin an rawn lut khawm tak tak a.

Vawmmana pu Liannghaka erawh pawn chhuak thei tawh lo mahse tap chhakah mei lum hnung puak in a thu a.a hmelah lung ngai hmel a lang ve lo va.Vawmmana haw loh chhan chu a hriat chian em a vangin Vawmmana laina hnai zing a chiai lo awm chhun a ni hial awm e.A tupa chuan mibik a nihna ti famkim turin a thil zir turte Lasi nula hmeltha tak tak te nen an zir mek awm si a.tiin a ngaihtuah rauh rauh va.a vanglaite hre chhuakin a lung a leng vawng vawng kher mai.Lasi nula hmeltha Zaivawrite nen an ramtuan na mual te suangtuahna a hrutin a chhing suar suar a."Zaii ka tupa kha tha takin lo enkawl ang che aw"tiin a phun sap sap a.

Rei loteah Vawmmana bo thuin khawchhung a fan chhuak nghal a.Zawlbuk a tang Valupate leh Tlangval thenkhat chanchin ngai changin Vawmmante in lamah an chhuk thla a .Lalin ah pawh chanchin an lo hre thuai a.Lal fanu te zawk Lawmsiami pawh Vawmmana bo thu a hriat chuan a mit sulh mai a,a mittui a tla hial a ni.mipui tam zawk chuan Sahrang kut tuar niin an ring a,Mithen khat tlemte erawhin zawngin chuti mai Vawmmana a chet sual an rung ve hauh lo thung a.a zan a zan a zawn nghal mai an duh viau laiin Vawmmana pa Thankunga chuan a fapa chu chuti mai a ,a chetsual a ring lo va. khawvar thleng tal nghah a duh tlat mai a,chutia Vawmmana paberin a tih miau si a vangin zingkhaw var a thleng nghah an ti ta a.


***


Lasi khawpui lamah thung chuan Vawmmana leh lasi ho chu hlim takin an in kawm a,Lasi ho chuan a pian hma a tang a siam tur a an lo hual lawk tawh a ni bawk a,Vawmmana chu mal tin reng an sawm a,Vawmmana hmalam hun a tan tangkai tur thil pawimawh tinreng an hrilh bawk a.chutah Lasi Lalnu Zaivawri chuan Vawmmana hriat duh ber Sahrang chung chang chu a sawi tan ta a.Zaii chuan "Awle,Mana he lai kan hruai chhan ber che Ramsa hlauhawm leh tih baiawm tak chungchang hi kan hriat ang ang ka han sawi tawh ang e,uluk takin lo ngaithla ang che.He ramsa Sahrang intih mai leh he Sahrang siamtute chungchang hi theih ang ang in ka mite nen kan zirin kan chhui a,an chanchin hi tam tak hre bawk mah ila an chenna ram chhungah hian duh ang angin kan luh theih bik loh a vangin hriat loh pawh tam tak kan la nei a ni.ka miten nunna chan huamin hriat belh tumin an bei reng a ,Nunna chan pawh an awm nual tawh nghe nghe a ni." a han ti hmasa te te a.



Vawmmana chuan hriat chian loh hlauhin a beng chu a lo dawh uluk kher mai a,Zaii chuan aw a han thian te te a,ti hian a sawi zawm leh ta a,"He thil hi hun rei tawh tak kum 30 zet liam ta a lo in tan a ni a.He tih lai hian Vawmbuk khua hi a la awm lova,Zawlte a an awm lai a ni a.Zawlteah hian Lal fapa hmeltha tak mai tlangtin leh mualtin a thang hat hat tham a hmeltha Lalvunga a awm a,a hmelthat em vang leh Lal fapa ro luah tu tur a nih a vangin a to pawh a to hle a,Nula kei kani inti chin chuan a nupui nih tumin an hel luih luih a a ni ber a.He tih lai hian an khaw chhim lam Hmunzau ah Lal Zotuahthanga Fanu Sailianpuii hmeltha hmingthang a awm bawk a,Saii hian Lalvunga hi a hmuh tirh phat a tangin a duhin a hmangaih nghal bur mai a.Lal fanu hmeltha hmingthang a nih bawk a vangin Lalvunga chu pasal a neih theih ngei pawh a in ring a.Lalvunga chu a tan bel chhung sa ang hialah a ngai hmiah mai a.Zah pawh dawn lovin a hmeichhia zawkin chhuan lam siamin Lalvunga chu Zawlteah pan in Lalin ah a thlen chilh a ,Lalvunga rilru hneh tumin a thiam chitinin a bei a.Lalvunga tan chuan a rilru leh taksa a nunna thleng pawhin hlan a in huam tak meuh meuh a,mahse he tih lai hian Lal fapa hmeltha Lalvunga chuan a tleirawl chhuah a tang a lo kawp tawh mi naran fanu Chhingpuii chu a hmangaih tlat mai a,Lal fanu hmeltha leh no nguak mai Saii helin nawk nawk thin mahse Chhingpuii lakah lo chuan a rilru a pe thei si lo.a chhung leh khatte ngei ngei pawhin Sailianpuii chu nei turin an nawr cham chi a,mahse Lalvunga chuan a rilru a sawhsawn thei ngang si lo va,Hun a kal zel a.in hmangaih ta na na chu tuman dal thei hek lo le ,Chhingpuii leh Lalvunga chu an in nei ta nge nge a.



Lalvunga leh Chhingpuii an in nei tih Hmunzau Lal fanu Saiin a lo hriat chuan a thinrimin a tuar kher mai ,Lal fanu meuh mi chhe dai kil kar a miin a han lan chu a zakin tlawm thlak a ti kher mai a,pawn pawh chhuak ngam lovin Lalin hun eng emaw ti chen chu a tawm chawt mai a,eng mah a ei in a in thei hek lo.hun rei lote chhungin nula hmeltha leh hrisel tak kha a tla nghal kawk kawk mai a,a cherin a pawr fap ta mai a,a zahna chuan thinrimma hringin ,an veng pi tar dawithiam Suahruni chuan phuba la turin a lo fuih reng bawk nen."Nang ang nula hmeltha hetia i han awm ta mai hi kei zawng ka thin a rimin ka lainat tak zet a ni.Lalvungan a hnawl ngawt theih danah che saw Chhingsanghari sawn dawi thil eng emaw tak zawng a hmang a ni phawt ang.kha tia in dawm kun reng lo khan e , Lal ropui Zotuahthanga fanu meuh an han tih thangtlawm manah ,an in chhirna ram ram turin phuba lak tum zawk ta che"tiin Suahruni chuan fuih sauh sauh thin a .


Saii rilru beidawng thinrim chu a rilru a hneh telh telh a,nitin a in ngaihtuah thinrim chho zel a,a rilruah sualin bu a khuar nghet deuh deuh va,a tawpah phei chuan Lalvunga leh Chhingpuii chung a phuba lak ngei chu a in tiam ta hial a.Nula hmeltha tak kha pawn lam a mawi thinlung kha si ah a chang zo ta.ti chuan Suahruni leh Saii chuan phuba lak dan tur chu ngaihtuahin hun remchang an melh reng a.ti chuan an duh ang hun remchang chu an hmu ta ,Lalvungate Saii nutapa Zathanga nupui neih lawmpuiin Hmunzau ah an lo zin hlauh mai a.he hun remchang hi Sailianpuii leh Suahruni chuan hlah an tum hauh lo.Chhingpuii leh Lalvunga chu tun hma thil thleng engmah awm lo ang mai Saii chu tha takin a lo bia a.Lalvunga te pawhin Saiin rilru chhia puang tih ring hek lo tha tak a lo chhawnin hlim takin an in kawm a,Saii chuan hun remchang hmasa berah Lalvunga ei turah chuan tur a tel ta a ni.inneih a zova Lalvungate chu engmah in sawiselna leh ngaihthat lohna tur awm hauh lovin hlim takin an haw a,an haw turte chu Saii chuan kawt chhuah thleng thlengin a va thlah a,Lo zin leh ngei tur a in sawmin hlimawm takin an in thlah liam a.Lalvunga chu an haw hnu ni sarihna ah pumnain a thi ta a ni.Lalvunga an hraina tur hi pitar dawithiam Suahrunin uluk tak a ,a siam a ni a.Tur eitu hi a hlim chhawn a thi mai lo tur a siam a nih a vangin,Lalvunga thih thuah pawh Zawlte mipui leh a nupui Chhingpuii ngei pawhin tur a hrai a ni ang tih an ring pha hauh lo va.Sailianpuii chuan a duh ang takin phuba chu a la thei ta a, mahse a rilruah sual a lut lak lawh tawh a.duh tawk mai a la tum hauh lo Chhingpuii nun chu tih chhiat vek tumin ruahmanna lian zawk a siam chho ta zel a,a ka sawi rei ta hle mai ,Vawmmana hi a chhawlte pawh a hal tawh ang in turte han pe teh u"a han ti a, Lasi nula pakhat chuan intur thlum tui tak chu Vawmmana chu a rawn pe vat a.
Last edited by LN Kima Guite on March 29th, 2018, 3:57 pm, edited 2 times in total.

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » December 2nd, 2017, 6:45 pm

SAHRÂNG LEH MIHRÂNG

BY -LN Kima Guite

BUNG 13-NA


****
BUNG 12-RECAP

****


Sailianpuii chuan a duh ang takin phuba chu a la thei ta a, mahse a rilruah sual a lut lak lawh tawh a.duh tawk mai a la tum hauh lo Chhingpuii nun chu tih chhiat vek tumin ruahmanna lian zawk a siam chho ta zel a,a ka sawi rei ta hle mai ,Vawmmana hi a chhawlte pawh a hal tawh ang in turte han pe teh u"a han ti a, Lasi nula pakhat chuan intur thlum tui tak chu Vawmmana chu a rawn pe vat a.
****


Vawmmana chuan a han in khawlh khawlh a.a han tep chap chap a.a tui a ti kher mai.Zaii pawh in tur an rawn pe a ,a han in zawh chuan a thil sawi lai chu a sawi chhunzawm leh ta a."Pi tar Dawithiam Suahruni puihna in Sailianpuii chuan dawite a zir chho tan ta a.nitin Chhingpuii a huatna lah a zual telh telh a.amah Chhingpuii mai ni lovin a khua tui zawng zawngte nen ti chimih thak chu a duh ta hial a.a ruahmanna a len tham em a vangin an pahnih mai tan chuan han tih hlawhtlin rual a nih loh a vangin .Suahruni puihna in Khamrang ngaw huai Lalpa nen an in hmel hriat chho ta ani.He ngaw huai Lalpa Luahzova hi thil ti thei tak leh chak tak mai a ni a.keini nen pawh buaina kan nei zeuh zeuh thin a.an ram chhungaha duh duh in kan lut thei lova.kan chenna ram chhungah an lo lut ngawt ngawt thei hek lo.hmelma kumhlun kan ni a.in hal viau e ti lo chuan kan in thenawm tlat lawi a.ramthar zuan tu nih bik kan duh lo ve ve a ,in tih tlawm tumin hun remchang kan chang dun ran mai a nih hi.ti chuan Luahzova leh Saii chu an han inzui takah chuan Saii chuan Luahzova chu a tan la tang kai dawn a ni tih hriain pasalah a nei ta hial a.pitar Dawithiam Suahruni pawhin zuiin Luahzova chenna Khawmrang ngaw ah an cheng ve ta a ni.an awmna puk chiah hi kan hre fuh mai thei bik lova.Luahzova hi a fimkhur em em mai a chenna a sawn kual fo thin a ni.
**
Tichuan ,Luahzova leh Saiite chuan an dawithiamna chu hmang tangkaiin Sahrang hlauhawm tak an siam chhuak ta a ni.he Sahrang hi a tirah chuan mihring an man khawm a,i pu Liangnghaka thiante pawh khamrang ngaw an ramriak an man nghe nghe kha,puk thim takah dahin damdawi mak tak tak leh dawi thil nen an han enkawl a.nitin Sahel an ei tir ziah bawk a,hun a lo kal zel a,mihring ho chu an pian hmangte lo dang lam chho zelin Sahrang koham tak thisen a tui hal leh nunrawng tak an lo ni chho ta a ni.an chenna puk a thim em a vangin an khawhmuh dan pawh a lo dang lam hret hret a.zan thimah pawh fiah takin thil an hmu thei a,mahse chhun eng ah erawh an mit a fiah lo va,thim hnuai a awm reng annih a vangin engin an mit a en khalh a vangin mei eng leh chhun eng ah an che hlei thei lo va,chhunah chaw an zawng ngai lo va,zanah chauh an vak chhuak thin a nih chu.heng Sahrang ho hi an in thlah pung ve zel a,tunah hian engzat chiah nge annih kan hre mai thei bik lo va,an chanchin hriat tumin ka miten an thlithlai reng a ,ka mite then khat phei chu Huai ho hian lo man in an ti hlum fo thin a ni .

**

Tunah hian heng Sahrang ho hi Sailianpuii hian chhuahin Vawmbuk khua chu tih chimih barh tumin a rawn beih tir tan ta a ni.Sahrang tuan rang leh zan thimah pawh buai hauh lo va che thei hi mihringte tan chuan han hneh mai mai chi anni lo va.lo bei let eng ang mah se eng tikah emaw chuan Vawmbuk khua chu a la chimih tho tho dawn a ni.chu vangin he Sahrang lak Vawmbuk khua humhim turin nang hi kan siam dawn che a ni.i pian hma a tang kan lo hual tawh che a,i pian hma khan i nu leh pate pawh kan tlawh fo thin min hmu thei lo mahse kan rim erawh an hre fo thin a nih kha,nang pawh i tet lai tang kan enthla reng thin che a,hlauhawm lo thleng turte kan hrilh thin fo thin che kha."a han ti zar zar a.Vawmmana chuan mit khap nachang pawh hre lo lekin a lo ngai thla voh voh a,"Engtia han hneh theih tur nge annih ang le,an thi ve thei tho em"tiin Vawmmana chuan Saii chu a han zawt a,Saii chuan "Thi thei teh reng mai.mahse an tuar a fei em em a,an sa huat a kah emaw sah emaw loh chuan an thi mai mai thei lo.lo hliam na deuh pawh nise Saii hian dawi hmang a siam damdawi tha tak mai a nei a,he mi damdawi hmang hian Sahrang hliam tuarte chu a enkawl dam zung zung thei a ni"tiin Vawmmana chu a han chhang a.Chutah Vawmmana chuan " An sahuat chu khawi lai tak nge ni a,an sahuat kan hriat ngei ngei a ngai a nih chu"tiin a han zawt leh a,Saii chuan "A Chhingi nen lo in hrilh teh u,tihtur pawimawh tak ka nei tlat " a ti a,Vawmmanate chu a kal san ta a,Chhingi chuan Vawmmana chu a lo nuih var var a,"I hriat duh a piang min zawt rawh le,ka hriat chin chin chu ka hrilh zel ang che"a ti sap a,Vawmmana chuan "Sahrang sahuat lai tih hlum theihna tur lai hi i hria em " tiin a lo zawt vat a,Chhingi chuan "A lung zawn a kah hi a kah hlum theihna awm chhun a ni a,hmun dangah chuan ka eng ang mah ula,an thi thei hauh lo ,an hliamte chu an Lalnu Saiin a lo tih dam sak leh zung zung mai ang ,tin,chemin a nghawng sah bun hmawk hian a thi thei bawk.he mi pahnih bak hi tih hlum theih dan a awm lo" tiin Vawmmana chu a han hrilh a.Vawmnana chuan "a that nasat chu,an lung pawh hawk hawkin kan kap mai dawn lawm.Chhunah khua an hmuh fiah loh chuan chhun a pel chi an va ni awm ve" tiin Chhingi chu a va melh a,Chhingi chuan "Ni e,chhunah chuan khawi lai puk thim ah emaw an chawl hah dam a rinawm a,Vawmbuk khua rawn bei fo tute hi ,Khamrang ngawah an haw leh ngai lo va,in khua tang hla vak lovah riahna an nei a ni ngei ang,zawn chhuah chu i hna hmasa tur a nih chu" a lo ti leh a,Vawmmana chuan "a nih chuan ,Sahrang beih dan tur ka hre ta bawk a,ka haw thuai a ngai a nih chu" tiin a tho uaih mai a.


Chhingi chuan "Khaih...khaih.la thu rawh,la thu rawh,a hmanhmawh vut vut thei loh a nia,Thil zir tur tam tak a la awm a nia.Sahrang hneh thei tur chuan thil chi hrang hrang i thiam a i hriat teuh a ngai lawm.tin,hei hi hre tel bawk la,Sahrang lo chhuak thin hi lo ti hlum vek thin mah la,a dang an lo chhuak leh zel mai ang,a bulpui ber Huai Lalpa leh Saii leh Pitar Dawithiami hi i thah phawt an ngai a ni.an ni dam chhung chuan Sahrang hi tam thei ang that mah ila,a dang an rawn siam leh zel dawn tlat a ni." tiin Vawmmana chu a kai thu leh a."An buzawl chu va luh chhuah vat vat a ngai a nih chu,engnge ruahmanna te i nei em"tiin Vawmnana chuan Chhingi chu a han zawt a,Chhingi chuan "an buzawl luh chhuah tur meuh chuan thil tih theihna nasa tak i neih a ngai dawn a,keini pawhin kan puih che a ngai ang.kan in peih chian bal hunah chauh an buzawl chu kan luh chilh ang." a ti a,ti chuan thil tam tak in hrilhin an in zirtir pah a.zan rei tak thleng an meng a,Zaii pawh a rawn haw leh tawh a,"Kha in lo la meng a ni maw,Chhingi i mikhualpa chu mut tir tawh la,a hah awm awm nen"a rawn ti lut bawrh bawrh a,Vawmmana chuan "E khai,kan lo ti ti tui lutuk a zan rei lam pawh kan lo hre hleinem,ka mut pawh a chhuak lo ve" a lo ti thuai a,Chhingi chuan "Naktuk lam tih tur kan ngah si a,i mu teh tak ang u"tiin a tho va.ti chuan in mangtha in an mu ta hlawm a.


@@@@
Vawmbuk khua ah ve thung chuan Vawmmana chhungte chu an tlaivar thak mai a,thenawm khaw veng ten men puiin Vawmmanate in chu an khat deuh laih laih reng a,Zing khawvar rual chuan Tlangau lo au in Vawmmana ramvak haw lo chu tukthuan eikham ah khawtlangin zawn tur tiin a rawn au lauh lauh va,Vawmmana nu leh farnute chu an tap fap fap a,Vawmmana pa meuh pawh a mangang viau tawh mai a,tawh sual tawk lose heti chen chen Vawmmana hi a thang lo vang tih a hria a ,mahse a chhungte mangan lutuk loh nan hnemtu zawk a nih a ngai si a.mangang hmel put loh hram hram a tum a.


Tukthuan eikhamah Lal mualah Mipui an thu khat hmur mai a,Lal nu chuan leikapuiah dingin " Hei vawiin niah kan nau Vawmmana,nimin a ramvak tun thleng a lo la haw loh a vangin kan zawng dawn a ni a,kei chuan Vawmmana hi a thih mai ka ring hauh lo va,nundam a in va hmuh ngei ka beisei a ni."a han ti a,Chutah Valupa Buanga chu lo ding chhuak ve a,mipui phun mur mur chu a kutin an zap dai te te a,"Awle,Sahrang hrang lai a ni a ,fimkhur takin kan che ang a,tumah a fal a kal loh tur a ni ang,pahnih tal in in kawp zel dawn nia.ti ru le,i kal ang u hmiang"a han ti a,ram lamah an inzui liam ta nguah nguah a,Vawmmana ram vak tur lo hmututen hmar lam a pan an tih a vangin Vawmbuk khaw hmar lam chu zawn phawt an tum a ni.Vawmmana thiante Rozuala leh Hranga pawh mi hnungah an kal ve hnang hnang a,an thianpa chu chuti mai a,a chet sual an ring hauh lo naa,a lo haw miau siloh a vangin tawhsual tawkah a ngaih loh theih si lo va,an thian dun chu an ngui bar mai a ni.Vawmmana te nen tette tang a lo in kawm thun Upa Razama fanu Parite thian ho pawh Pari teinah ngui takin an thu thap a,Vawmmana bo chuan an hrilh a ti hai kher mai a,Pari phei chuan a tuar leh zual a ,a tahna a mit pawh a sen ram mai a ni.



Feh reh san velah Vengthlang lam a nu pakhat chu Lalin ah thaw hlawp hlawp chungin a lo lut rawk rawk a,a mit mengah thlabarna leh hlauhna a chhiar theih a.Lalinah chuan Lalnu leh Khawn bawl Upate chu Vawmman zawng tute chanchin ngai changin an lo thu thap a,Lalnu chuan"E khai Chami i nu teh hlawl chu ,eng thil nge ni ta ,i va mangan hmel em em ve"a lo ti vat a,Chami i nu Bualziki chuan la thaw hlawp hlawp chungin "Eng lo a nia,kan thenawm Zaduhate in hnuaiah khuan thisen a luang zeih zuih mai a,ui leh ar in an bawr hut hut mai ." a han ti a,chu thu an han hriat chuan Lal nu leh Upa ho chu an phawk hra mai a,Upa Dailova chuan "Khai aw,kan Sahrang bawk a ni ang ka ti,nizan a rawn che lo kan ti rawk a,an lo che reng a va ni mai awm em" tih pahin a tuibur hmuam chu chhuat awngah a zu pik puat a,Upa Rozama chuan "Kan pasalthate leh tlangval ho ramhnuai lamah an thang vek si a.kan zuk en chian mai a va tha awm ve,tlangval ho lo thlen nghah chi a nih hmel bawk si lo va" tiin a han rawt a,Lalnu Chhingi pawh in "Ni e,kan zu fiah mai a ngai a nih chu,Mami khum lu a Silai kha hei ipa Dailova hi han pe teh ," tiin a fanu Lawmsiama chu a han tir nghal a.Lawmsiami chuan Silai chu a rawn la chhuak vat a.Upa Dailova chu a han pe a.Lawmsiami mit chu a sen ram mai a.Vawmmana bo hi a lo tuar ve hle ni tur a ni.


Ti chuan Upa ho chu Vengthlang Zaduha in lam pan chuan an inzui thla ta dam dam a.Upa Dailova an Silai kengin hma a hruai a.Upa Dailova hi Pasaltha Bawkthanga pa,Vawmmana pate unau zing a upa ber a ni .a vanglai chuan pasaltha huaisen tak a ni.Zaduha te in an zuk thlen chuan le.an inhnuai ah chuan ui leh ar an lo zi huai huai a.ui then khat an in ngurin han insual ri teng tung bawk .an thawm a tha kher mai.mi tam takin an lo thlir thap mai a.hmeichhia leh naupang mai annih hlawm a vang in an lo finfiah ngam lo mai a ni a.Upa Dailovan hma hruaiin in chhung a han lut ta a.in chhung an han lut chiah chu a lo thang huam mai a.in chhung hmun tinah thisen a per ngei nguai a.Zaduha te chhungkaw paruk lai mai chu Sahrang chuan a lo ti hlum vek mai a lo ni a.Zaduha hi pa ngeng ve tak a ni a.mi an riah khawm sup sup lai pawhin mahni in veng thei a in ngai a.riak chhuak ve duh hauh lo a ni a.tunah zet chuan an chhungkua chu Sahrangin a mang ta thak mai le.an ruang chu a in ei zo deuh vek hlawm mai a.ruang hlawm tur bar pawh a awm lo va.Sahranghi pahnih khat mai an ni lo vang tih chu an rin theih mai a.ti chuan Upa ho chuan a theih ang ang in ruang chu an han hlawm a.khumah mutin puanin an khuh a.an ruang seng hawi lai chuan Upa ho chu an thinrim bawk a,an ha an thial rawp rawp hlawm a.nizan lam Sahrang thawm hria an awm loh a vangin an himah an lo in ngai ngawt kha a nia.mahse Sahrang chimawm chuan a rukin mi paruk lai alo seh hlum reng mai si a.Vawmbuk khua chu a ralti leh zual sauh va.hlauhna in an thauah manin hmeichhe then khat phei chu an khur an khur mai ani.


@@@
Lasi khawpui lamah ve thung chuan Vawmmana chu a mutui na ngiang mai a,zing a han harh chuan puk pakhatah a lo mu reng mai a,nizan Lasi khawpui a hmuh te kha a mumang emaw a ti rum rum a,in chhungah khum nuam tak muin a in hre si a,puk pakhatah a lo mu leh reng bawk si a,mak a ti ang reng hle mai a,",khawiah nge Lasi nula te kha an awm le"a han ti rilru a.chutah a hnung lam a tang chuan Chhingi aw hian "He ta hi ka awm e" a rawn ti a.Vawmmana a va hawi chuan Chhingi chuan a lo nuih var var a.Zing boruak thiang takah chuan Chhingi chu a lang duhawm kher mai.a ha var rual that lang a nuih seih pahin Vawmmana dar chu a han beng thap thap a."I mu tui bawk em "a han ti sap a.Vawmmana chuan " Tui bawk a ni ang,hei ka mut hlan ka mutna pawh a lo insawn daih a lawm"muk awm fe hian Chhingi chu a chhang a.Chhingi chuan nuih har har pahin"Ni ngawt mai.kan khawsak dan zawng zawng hi hringmite hriat a rem lo va.chu vangin nang meuh pawh hian kan phal chin bak chu kan chanchin hi i hre thei chuag hauh lo vang"a han ti leh sap sap a.



Ti chuan nileng thakin Vawmman chu Chhingi chuan thil a zir pui a.Silai kah an han zir hmasa ber phawt a.a tih dan phung a hriat tawh sa a vangin Vawmmana chuan a tum hlah hauh lovin a kap fuh nghal chat chat mai a.ti chuan thil che lai kah leh mahni che reng chung kahte a han zir leh tauh tauh va.Thil zir mi tak a ni bawk a.rei lote a thiam nal ta thuai a.Silai mu thun pawh a zeiin a rang ta kher mai.kham awih leh sang tak tak lawn leh chhuk chhoh ta an han zir leh a.Mipa chak leh tha hrui nei tak.zuanzang leh tuanrang tak a nih a vangin kham awih tak tak karah pawh Sathar ang mai in aper kai in a sawt kual zung zung mai a.Chhingi pawh chuan hmuhnawm a ti kher mai.Vawmmana taksa sek leh phiar fat mai kham a han lawn zawng a ,a ti hrawl han in hrual che velte chu hmuhnawm ti takin a thlir veng veng thin a.Vawmmana chu Silai nen.kham karah Sathar ang maiin per kual zung zung mai a.chutah le.A hma kham chhawr dawh chung puk chhete lo awm a tang chuan Sathar lian zet zawt hi a rawn dawk chhuak ta zawk mai a.a rang kher mai,thui a tlan hmain Vawmmana silai chu a puak khu lawih a Sathar chu a let tawp a.a lum thla nghal tawp tawp a.mi naran tan chuan kah hman loh khawp a rang a ni a.Vawmmana erawh mibik a ni tlat a,mi naran tih theih loh pawh a ti thei zel dawn a ni.A sathar kah a lum thlak tawp tawp rual chuan Chhingi chuan uar takin a kut alo beng a"I va han rangin i che nalh kher mai ,Kha kha Ka Pasaltha chet dan tur dik tak ani"nui var var chungin a ti a.Vawmmana bulah lo chhukin Vawmmana Biang chu a han piai sak zauh va.Vawmmana lai chu a ding kawisawi tu a.chutah Chhingi chuan Vawmmana Sathar kah chu a zuk chhar a."zanriah chaw hmeh tui tak kan nei ta ,ti rawh le.Mana vawiin chu duh tawk phawt ang hmiang "tiin Chhingi chuan Vawmmana chu a han au lang lang a.ti chuan puk lam panin Khamah chuan an lawn chho ta a.


@@

Vawmmana chu nileng thak a an zawn hnu pawhin a hnuhma awm tak ngial pawh an hmu lo va.a zawngtute chu an beidawng kher mai.khawthim hma khawchhung lo lut leh in a tuk a zawn chhunzawm ah an ti ta a ni.Zan lam ah Sahrang a chet fo a vangin an ralti hle mai a.chu vangin zan thim hnuaiah chuan Vawmmana chu zawn chhunzawm lohva Sahrang lak a nunau ven hna thawh phawt an rel ta a ni.Tlangval hoin khaw chhungan lo luh chuan Zaduha te chhungkaw chung a thil thleng chu an han hria a.rang takin hah pawh sawi lovin Zaduhate in lam an pan khawm leh ta zung zung a.Ti chuan a zan a zan thlan laiin Zaduha te chhungkaw ruang chu thlan pakhatah an phum ta a.In ven him a awl zawk nan tiin nunau ho chu Lal mualah an riah khawm tir a,Zawlbukah pawh an riak khat tlat mai a.tlangval sawmrual zelin hmun liah ralveng an in dah a.uluk tak a ral veng an awm chung pawh a,Sahrangin mi a seh hlum fo tho si a vangin tui tak mu thei a ram pawh an awm lo ,Sailianpuii phuba lakna chu a hlawhtling rih kher mai.Vawmbuk khua chu Sahrang lo lan a tang lo lam hna pawh thawk hleithei lovin a buai a,mithi nitin deuh thaw an in vui liam a.Sahrang zet chuan Vawmbuk khua chu a ti buai hneh kher mai.Chu chu hriain Sailianpuii chu hlim takin a nui khek uar uar a,a nui ri a rap thlak em a vangin huaiho pawisak nei lo fe fe pawhin an melh hrek hrek ngam chauh a va.an Lalnu hmeltha leh nunrawng zet hi heng huai ho pawh hian an tihin an hlauh hle a ni.





MIHRÂNG LEH SAHRÂNG



BY -LN Kima Guite



BUNG 14-NA


***

BUNG 13 RECAP

***
Sahrang zet chuan Vawmbuk khua chu a ti buai hneh kher mai.Chu chu hriain Sailianpuii chu hlim takin a nui khek uar uar a,a nui ri a rap thlak em a vangin huaiho pawisak nei lo fe fe pawhin an melh hrek hrek ngam chauh a va.an Lalnu hmeltha leh nunrawng zet hi heng huai ho pawh hian an tihin an hlauh hle a ni.

***

Vawmbuk khua a tang hla tak Mawmrang Tlang chu chhumin a bawh chuai chuai a.ruah surna a la rei lo bawk a,Thinghnah a dai tling dawt in sava an thlawk ri phur phur a,hlim takin an hram chel chul bawk a,Ruam raih laiah hauhuk nupa pawh hual reuh tuar tuar pahin hlim takin an in chhaih zuau zuau va,Mawmrang kham sang takah te chuan Sathar chaw zawng an per nalh nalh a.Mawmrang kham khawtlang hawi zawng awm phei zui mai chu ,ral a tang chuan a lang paw vuk mai a,eng emaw ti zawng tak chuan a rapawm lek lek a.khawchhak lamah tuk loh ngaw durpui chu a awm khung mai bawk a,chhura rual rual thing lian leh sang pui pui a ngir khup mai a.hruizam lian pui pui in zam kual reih ruih ah te chuan thehlei an tlan lawn zawi zawi a.Chhun laiah pawh ngaw hnuai chu a thim ruih thei hial a.Tlawh pawh zen zen ngawpui tih tak ah ramsa chi hrang hrang an tamin lei lamah an hnu a chiar dep dup a.He ngaw pui Khawchhak lam lui kawr chhengchhe tak mai hnar kin a puk thim ruih mai chu he ngaw huai sual leh rapthlak tak Keisarala leh hote chenna a ni a.puk kil khat ah an sal man pakhat chu natuarin a rum kawk kawk a.Keisarala chuan he an sal man hi a hreawm thei ang ber a siamin nitin a hote nen sawisak dan chi hrang hrang in sawisa ziah mai a,a hreawm em a vangin an an sal man Khamchunglura pawhin hetia dam reng ai chuan thih a tlang zawk fo va.eng tikah mah a nupui fanuaute nen in hmuh leh hi a ringin a beisei ngam tawh lo va,khawiah nge a awm tih pawh a nupui fanau ten an hriat a ring hek lo.

----

Keisarala chuan Chunglura chu rawn pan phei in lung ang tak dum ren run chuan Khamchunglura chalah chuan a han dep ri sawr mai a,Khamchunglura chu a te nghal rawng rawng mai a,he lung a deh hi anni ang hian an haw em em mai a.a nat zia leh a tawrh a hreawm zia hi sawifiah thiam chi pawh a ni lo va,ruh leh thling thlengin a na hian a fan chhuak vek a.Khamchunglura natuar a te rawng rawng laiin Keisarala chu puk chhung khawk rum rumin a lo nui uar uar thung a,a hmel sawrbawk hmelchhe lutuk mai chu hringmi te tan chuan hmuh ngam loh khawp a hmelchhia a ni a,a hote hmel maksak leh kawisawi pui pui chuan lo din hualin an lo nui ve uar uar a.Khamchunglura natuar te ri chu a zawi raih raih a a tawp ah engmah hre lovin a let hlawm ta tawp mai a.Keisarala chuan a hote hnenah chuan "Ti khan ,khuarkhurumah khan va dah leh ula ,veng tha hle bawk ang che u,a tlan chhuah vaih chuan ka ti hlum vek ang che u" a han ti khur khur a.A hote chuan hlau ti dekin Khamchunglura an han thing harh a,chu puk kil a khuarkhurum rimchhe uih zetah chuan an paih lut ta a.Khuarkhurum chhungah chuan rul chi hrang an loin zem kual nguai nguai mai a.pangang chi hrang hrang a tang maimawm leh rannung mi sehna thei chi hrang hrang an vak sup sup bawk a.chung ho chuan Khamchunglura chu lo bawr nghal tup in an lo seh nghal sup sup a,A rapthlak kher mai.


-----

Thachhingi chuan a pa a hmangaih leh ngaih em em chu a sal tanna ah hreawm tin reng tuarin chhun ni leh zan a hmang liam a.Keisaralan rapthlak thei ang berin a sawisa nitin thin tih hria se zawng Vawmmana nun chan zir lai thirin hlim takin a nui ver ver tawp lo ang le.Vawmmana pawh nitin Lasi nula hmeltha Thachhingi nen nunchan an zir thin a,Lasi ten a bik a an siam eitur tha tak tak te ei in a in bawk a,a hma a sawnin a tha hrui pawh a ngah ta kher mai.Sazuk pachal te chu phekphelen lawp lawp thei khawp a mawi a ni.,zan thim hnuaiah pawh Zawhte ang thawthangin a mit a var a,bahlah hauh lo vin thimah pawh a che vel thei tawh a.Sakei ang mai in thawm nei hauh lovin ngaw hnuaiah a kal thauh thauh thei a,Pasaltha famkim ni turin Pasaltha hmingthang te neih ang chu a nei ta.Mual dung thengthaw nuam takah Vawmmana nunchan zir chuan Zukpui ang mai a in thazo va zuan kual zawk zawk pahin Thingzar chawn puar tiat lek lek te chu a chem hriam tle vur mai chuan a sat chhawk hmawk hmawk mai a.Thing zarah lah Keite ang mai a in thazoin a tlan lawn zung zung mai a,a han che vel chu hmuhnawm ngang a niang.Lasi Nula Thachhingi meuh pawhin lungpui chungah thuin mit khap nachang hre lo lekin a lo thlir veuh veuh mai a.chu tih lai chuan anu Zaivawri chuan a darah a rawn beng thap thap a."Bawihi ,hmuhnawm i va ti awm ve"nui ver ver chungin a rawn ti a,Thachhingi chu a phu zawk a.a han leh hawi chuan a nu chuan hlim hmel takin a lo en a,"Awi ka nu teh hlawl che chuan,ka lo in ngaihtuah tui deuh a ni ang"a ti niah niah a.Zaii chuan "A hmuhnawm bawk a nih kha,he tiang reng reng hi hringmi ka la hmu ngai lo kei pawh hian " tiin Vawmmana chu a en vang vang a.

-----
Chutia Lasi Lalnu Zaii a lo lan tak ah chuan Vawmmana pawh a thil tih lai chu chawlin lungpui chungah chuan a rawn thu chho ve a."E khai ,Mana i ropuiin i che velin mit a ti tlai kher mai. hmit khap nachang pawh hre lo va,lo thlir veng veng pawl pawh kan awm nawk mai"tiin Thachhingi chu a han melh zauh va.Vawmmana hlim takin a nui keh hui a,Chhingi a va en chuan Chhingi chuan zah hmel tak a hnuai lam melhin a ke in lung te a lo rap hrual a lo rap hrual a.Zaii chuan thu tak deuh zawkin " Mana,Tunah zet chuan i in peih thawkhat ta,nang ang reng hi hringmi tumah ka la tawng lo ve.hringmi zingah nang chhing zo reng an awm lo vang .mahse heng i chakna leh thil tih theihna te hi a tha lo zawng a hmangin i chapo pui tur a ni lo a nia.mite tanpui nan hmang thin ang che."a han ti dap dap a.Vawmmana pawh chuan "Teh reng mai ,Ka khua leh tui chhan nan lawm heng thil te hi ka zir " a lo ti var a,Zaii chuan "Hun a lo kal zel ang a,i khua leh tuite chhan chauh lo pawh tih tur tam tak i la nei ngei ang,Thil tih theihna a nasat hian thinglungah chapo na lo lutin sual lamah min hruai lut duh khawp mai .fimkhur hle ang che.Thisen chhuah chak a tui hal nunrawng tak a i chhuah hi kan duh lo a nia" tiin Vawmmana chu a hrilh leh mawlh mawlh a.

-----

Tichuan Vawmmana chu an khaw lam a dah leh turin a banah kaiin an thlawh pui ta delh delh a,Van sangah thlifim dawngin an han dir nget nget a.lui lo luang kawi ngiai ngiai te leh tlang hrang hrang lo lang hring nghulh te chu vansang a tang chuan a mawi kher mai mit a ti tlai tak zet a ni.Vawmmana chu hmuhnawm ti takin a hawi kual ruai ruai a.Khawchhak lam hla feah Mawmrang kham lo lang var va va pawh a hmuh thei a.an thlawh pahin Zaii chuan "Kan thuruk ,Lasi khawpui te leh i thil zir zawng zawngte kha sawi chhuah vek chi a ni lo va.sawi tur chin thliar thiam ang che.kan khawpuite kha kan rem tihna tel lo chuan mihringte tan luh mai theih a ni lo va.kan luhna pukte kha va kal mahla luh kan remtih loh chuan in tan chuan puk pangai mai mai bak a ni dawn chuang lo a nia" tiin Vawmmana chu a han hrilh malh malh a,Vawmmana chu a lo bu nghut nghut a,chutah "Eng tikah nge kan in hmuh leh ang " tiin a han zawt a.Zaii chuan "I mamawh hun a piangah kan lo lang zel ang ,i bulah awm kan awm reng dawn a lawm.Kei hian tih tur ka ngah a vangin ka buaipui hman reng dawn lo che a,Hei ka fanu hi nangmah lo enkawl bik turin ka ruat a lawm.hlim takin in lo in kawm thin dawn nia" tiin Vawmman chu a chhang a.Vawmmana chu Chhingi a hmuh fo theih dawn a vangin a hlim kher mai .hlim takin a nui vur vur a,Chhingi pawh a hmel a hlim siah mai a.a sam leng siau siau kar a ,a hmel eng phet mai chu a hmuh nawm kher mai.


----
Vawmbuk khua tang hla vak lo ah Zaiite chuan Vawmmana chu leiah an tum pui a.Vawmmana chu a thil tih turah a hlawh tlin theih nan duh sakna an hlan mawlh mawlh a,Sahrang hlauhawm tak lakah fimkhur hle turin an hrilh mawlh mawlh a,Chhingi chuan "I bul hnaiah awm reng dawn mah ila,kan duh ang ang in kan pui ngawt thei dawn lo che a,nangma theihna ngei a ral i beih a ngai fo dawn tih hre lawk ang che" tiin Vawmmana chu a hrilh a,Vawmmana chuan "Min pui nasa lutuk tawh zawk a lawm.tunah chuan kan chet ve hun a ni ta'tiin a Silai chu a pu a,in hmu leh vat tur a in tiamin hlim takin an in then ta rih a,Lasi nula pahnih thlawk liam chu Vawmmana chuan a thlir liam vung vung a,an liam hnu chuan a thaw huai a,ruak deuh huaiin a in hre nghe nghe a,Lasi nula Chhingi bul a awm kha a nuamin a hlim awm em bawk a,Vawmmana thinlungah chuan Chhingi nui hmel mawi tak leh nui rite chu cham vawng vawng mai a,Lasi nula zunah Vawmbuk mihrang chu a uai ta mai em ni le.Ramhnuaiah in thazo takin Vawmman chu a pen thauh thauh va.Lasi nula te hnen a tang a thil zir te chu hmang tang kaiin Sakei ang mai a thawm nei lovin ramhnuai hnim karah chuan a put zung zung mai a,chutah vawi leh khatah a ding ta chawt mai a.a din chhan hre mai lo mahse a hriatna thazamte chuan in rin a ngai tih hriain a han awp hniam deuh va.a mit chuan kil tin melh kualin che hlek pawh hmuh hmaih a tum lo chiang kher mai ,a chung thin zarah Tlaiberh nupa an in chhaih chiar nawk nawk a,chutah a thing tang tliak ri rak hriain uluk leh zualin a rikna lam chu a han en a.a hma hlam nga awrh a hnim che dat a hmuh rual chuan chak zetin a lam panin chu thil chu a rawn dawk phei ta pur pur mai a.Vawmmana Silai a puah thuai rual chuan a hma bulah Nghalchang sum nga lai tur hi a rawn hlawm phei tawl mai a.chu Sanghal chu a rang kher mai mi naran tan chuan kah hman rual a ni lo .A hma bul a Nghalchang a tal khur dat dat lai chuan Vawmmana chuan "Min fiah in tum a ni maw" a ti sap a.Nghalchang chaldar a silai mu luhna tang chuan thisen a lo luang chhuak ngiai ngiai a.Vawmmana chuan va pan hnaiin Sanghal chu a han thai let a.a til a hlep thla zui mawlh mawlh a.A mah lo thlir reng tu Lasi nula pahnih pawh hlim tak a nuih ver ver pahin an in sa seng zui ta thuai a.

---


Vawmman bo a tang ni li lai a liam leh ta reng mai.Khawtlangin chhun lamah nitin a zawng pawl an awm reng a,hnu hma eng mah hmuh tur a awm loh a vangin a beidawn thlak ta kher mai.Zan lamah lah ralveng tha takin in dah thin mahse Sahrang lakah lu an hloh zantin bawk nen,Lo lam hna pawh buaipui hleithei lo vin Sahrang a vangin Vawmbuk khua chu an buai em em mai a,Lal leh Upate rilru pawh hah namen lo vin a hah a.Lalin ah an thu ngawi nghiai mai a,Upa Dailova chuan "Tunlai kan hun tawn zet chu ,a va han mangan thlak teh lul em.he ti hrim hrim zawngin khua pawh hi luah zui thei lo va,kan rauhsan mai a tul ang tih pawh ka hlau hlel love" a han ti bal bal a,Upa Dopawnga pawh chuan ''Bawka pa thusawi kha kei pawh ka ngaihtuah fo thin a ni ,Kan in nghahna ber tur a kan ngaih Vawmbuk mihrang Vawmmana chanchin lah he ti hi a ni ta si a,Lung a zing mang tak e aw"mang an hmel takin a lo ti ve vawng vawng bawk a.Upa Rozama thung chuan "E khai ,a thim zawng hlirin thil thlir mah ta che u.khuanun zah a ngai ang a,hun tha zawng a lo her chhuak leh mawlh ang,Ramsa rilru nei lo zawk in mihringte tlawm ngawt thu a awm lo ve"tiin a han hnem tak nain a ni pawh a aw ah beisei na a lang lo kher mai .Tlangaupa Lutbuaia chuan " Kei,Vawmmana hi a bo hlen zuk ring miah lo vi a,Mibik khuanu hual lawk a ni a,Bo chhan thate a neih ka ring tlat zu nia."a ti roh va.Upa Hualbeta pawh chuan "Chawia pa sawi chu han dik hlauh se ka ti mang aw" ti vawng vawng chungin a Vaibel khu chu a thlir vung vung a,Lalnu chuan "E khai ,a thim lam hlir hrut zawng lung a zing e,Chawi apa zu han siak teh khai rilru tih thawven nan hlim takin i lo zuk teh ang u" tiin Tlangaupa chu zu siak turin a han tir a,Tlangaupa chuan rapui chungsang a zu bel lianber chu chawi thlain a han siak eng kuk mai a,ti chuan ti ti dang sawi pahin zu an zuk ta laih laih a.

----

Vawmbuk tlangval zanriah eikham hmasa a piang chuan Valupate thu leh ngai chang turin Zawlbuk lam an pan nghal zel a.nitin ruang pahnih pathumte vui liam reng a ngaih a vangin tlangval ho pawh an hah kher mai .Nu leh pa tam tak chuan "Eng kan ti sual nge maw ,kan khua hian he tiang thil rapthlak hi ka tawn tak mai le" an ti vawng vawng hlawm a.Sahrang lakah tunge nunna chan leh ang a,engtikah nge Sahrang chu a lo chet leh ang tih ngaihtuahin an rilruah thil dang a leng thei mawlh lo va.Mi tam takin Vawmbuk khua hi pem san mai an duh tawh a.Sahrangin an nunna a laksak ve hma a Vawmbuk khua chhuah san mai hi mi tam takin a fin thlakin an hre tawh a ni.Chhungkaw thenkhat veng hmawr deuh a awmte chu Lal mual leh Zawlbuk lam a riah tumin an chhuak tan mek a.he tih lai mek hian.Vengthlang lama Thankungate inah chuan tap rawih rawih ri a lo chhuak a.an ri ta le lu mai a ,thenawm khawveng awm hnai a piang chu "Engti zia nge ni ta " tiin Thankunga tein ah chuan an tlan lut zung zung a.An thil hmuh chuan a barakhaih hlawm kher mai.Khum luah chuan Rualthani chuan a fapa Vawmmana thi tawh ngei a ,an ngaih chu kuah in a lo tap ngawih ngawih mai a.Vawmmana farnu te pawh hlim vangin an mittui a lo sur ve zung zung a.Ni tam bo tawh thi ngei tawh tur a an ngaih Vawmmana lo haw leh chuan Vawmbuk khua chu a fan chhuak rang kher mai.mitin mak ti lo reng an awm lo va,a mah lah in a bo dan chanchin sawi tur a hre mumal si lo va,Vawmmana bo chungchang chu rinthu an in sawisiak luih luih a.Chin chang hre deuh chin erawhin ngaihdan mumal tak an nei a ,an thla a muan phah huai huai mai a.Lalin a Vawmmana lo haw thu an hriat chuan Upa ho chu an hlim dar dar kher mai.Lalnu Chhingpuii meuh pawh lawm luatah a mittui a luang zawih zawih mai a,Vawmmana hi Sahrang lak a Vawmbuk khaw humhim tu turah an ngai hmiah mai a,hlim takin zu an zuk a,rilru thawveng takin tawng an in chuh nak nak a.Vawmmana Pu Liannghaka pawh leikapuiah bai chhuak saih saihin ,
"Khuah ah Thang he hu e,
Dohratpa chhing zo na awm mawh u e.
Hrangnampa na run zuan la aw chi"

A han ti vang vang mai a,a tupa chhuan vawr chu chhingzo awm hian a ring mawlh lo va.Sahrang meuh pawh lo kiang turin a vau chher chher mai a ni .

---

Vawmmana thian te Rozuala leh Hranga te pawh rang takin Vawmmana te inah an lo tlan lut dawr dawr a,an thian ho an han in hmu leh chu an hlim kher mai ,an hlim lutuk chu chhuat laiah an in buan let thial thial mai a,midang hoin hlim takin an lo nuih dar dar bawk a,Vawmbuk khua beiseih bo ngui nghiai tawh chu beiseihna thar nei in hlim takin an ri laih laih a,Valupa ho pawh chanchin ngai changin an rawn lang tak tak a.ti chuan zan rei hmain Vawmmana Nghalchang kah chu thenawm khawveng leh thianthate nen hlim takin an chan ho ta a.

---
Sa an han chan fel chuan Vawmmana muangchang lovin a thiante nen zawlbuk lam an pan ta thuai a,an kal pahin Rozuala leh Hranga chuan Vawmmana chu a bo tak daih a vang an lungngaih zia leh an mangang zia te hrilhin an ti ti chho bawrh bawrh a,Vawmbuk khua Sahrang chet dan zawng zawngte chu Vawmmana an hrilh bawk a,Vawmmana thinrim chuan ha chang a thial rawp rawp a.Zawlbuk kawtah meipui an lo chhep hluah mai a.mipui tam tak an lo thu nghuk mai bawk a.Vawmmana bo dan chanchin chiang zawk hriat chakin an lo pung khawm a ni a,Valupate chuan Vawmmana chu a bo dan leh a thil tawnte sawi turin an ti a,Mahse Vawmmana chuan a thil tawn zawng zawngte sawi vek chi a ni lo tih hriain ,a bo dan mumal a hriat loh thu leh a ramvak a lo muhil chu a han harh a ,a lo haw chuan ni tam tak a lo liam hman der thu bak sawi tur a hre lo va,Mipui chuan awih chiah lo mahse zawh zui zel chiah an ngai lo va.ti chuan nunau an tin hnuah Valupate thu angin Tlangval ralveng tur an han in ruat a,Vawmnana chu a hah ringin awl tum hle mahse ,Vawmmana chuan awl a tum bau loh a vangin ralveng zingah chuan a tel ta nge nge a.


---

Thla chu tlangah a her liam ruai ruai a.Tlang leh mual te chu thimin a tuam thim khup mai a,khua a dur deuh bawk a vangin a thim zual kher mai a.mei eng chin leh chin loh vah Vawmmana chu a thiante pahnih Hranga leh Rozuala te nen in ring takin an thu a.Vawmmana chuan thla liam hnu khawthim zual lai tak chu Sahrang chet duh hun tak a ni tih hriain a beng a chhi uluk kher mai a,Ralveng a thu midang ho pawh chu an hawi kual hrek hrek a.tumah inbe lovin in ring takin an Silai an chul hauh hauh hlawm a.Vawmmana chu a tho hluai a,Rozuala pawh a rawn ding chhuak vat a."Enge ni ta thianpa ,Thil hriat i nei mi"tiin Vawmmana chu a han en ha a.Vawmmana chuan "Eng dang ni lo ve,ka va inthiar lawk ang e" tiin a in her zui nghal a,Hranga pawh lo tho chhuak vatin "Mahni kal fal chu a him hauh lo a nia,kan lo veng ang che" a rawn ti a.Vawmnana chu a nui hak a"Tlangval a pumpa inthiar ven ngai nih te zawng ka duh i khaw lo mai"tiin thim zingah a pheiin a pil bo ta thuai a,Hrangate chuan an thlir zui voh voh a .Rozuala chuan "Thianpa in ring rawh ,Meichher kha chhit mai theihin dah teh ang.kan thianpa hian thil hriat a nei tih ka chiang ni" tiin Hranga chu an hrilh sa sa a.

---
Vawmmana chu a lang lo chin a thlen ve leh fumkhur takin a kun hniam a kawmkar leh inhnuai vel chu beng chhi kar chungin a melh kual zung zung a,a hriatna mak tak chuan hlauhawm thleng tur a hre thei tlat mai a.Sahrang chu an hnai tih a hrechiang kher mai.a hnar chuan thli beng zawngin Sahrang rim chu a hre thei ta tlat mai le.Fimkhur leh zualin a hma thing dahkhawm phenah chuan tawlh pheiin rim lo chhuahna lam chu uluk zet a melh ran mai a,A mit var tak chuan chhun ang em em in hmufiah lo mahse engkim a hmu thei vek a ni.Tuibur hmuam da awm zetah chuan a hma thil che zeuh chu hmuin a han en chiang deuh va.rei lo teah a hma hlam sawm hnih zet in hnuai kilah chuan Sahrang lian zet mai chu a lo vak phei zut zut mai a,a hnar a len ruai ruai a,thli beng lam in a zir hlauh va,Vawmmana rim chu a hre mai thei lo va.a che vel chu Sapui ang maiin thawm a nei hauh lo va.in thazo takin kawmkar chep zet ah chuan a lut kual zung zung a.chhuat dap chu keu vin rim hriat tum ni awm takin a hnim vut vut a.

---

Vawmmana an a en reng lai chuan a mit sirin thil dang che zeuh hmuin a han en chian chuan Sahrang pakhat hi a lo vak phei leh mek a lo ni a.a hmasa zawk kalna ah zel rawn kalin a ha hriam hmel zet chu a thenthu mai a.a lu tung sawl rut mai hmalam a ka reh zau tak ah chuan a lei a chhuah zul zul a,a chil thli a far uai duah duah a.Sahrang hmasa zawk chuan an tawmna in ah chuan mihring an awm lo tih hriain a rawn vak phei zel a.Vawmmana hma lawk in hnuaiah lo vak lut in a ngaite bawkin chhuat a keu awng a mihring awm leh awm loh rim a tang hriat tumin a hnar a len vut vut a.Zawite a chik nghur nghur chungin lungawi loh hmel zetin a lu lian leh rapawm zet chu a thing nghawr nghawr a.Sahrang hnuhnung zawkin a tawmna in hnuai a lo lut phei ve mek tih chuan Sahrang hmasa zawk chu in hnuai a tang lo vak chhuakin Vawmmana awmna zawn a lo phei a tum ta tlat mai a.A rim an hriat hmain a chet vat a ngai tih hriain Vawmmana chuan Sahrang hmasa zawk chu a chal darah tak a kap ta siah mai a.Sahrang hmasa zawk chu a let hlawm nghal tawp a,Lasi te sawi hrerengin Vawmmana chuan a lung zawn a a kah loh a vangin Sahrang chu a thi mai hauh dawn lo tih hriain a chempui phawrhin rang takin a zuang phei zawk a,A Sahrang kah tluk lo tho leh tur chiah chu a lu a sat hrang ta nawlh mai a.Sahrang lu tih baiawm tak chu a lum tawp tawp a,a thlang in hnuaiah a lum lut a,Sahrang taksa sei zuar mai chu a khur ngawt ngawt a,a nghawng Vawmmana sah bunna tang chuan thisen a lo chik chhuak tuar tuar a,rei loteah a zawi ta rawih rawih a.

(A thenin Sahrang beih hlan mawlh kan lo nghakhlel bawk si a,Bung thum vel tur kha Bung khatah ka kai tawi ta mai.a thu inhmu rem zat lo pawh awm mai thei...CONTI..On Wedesday)
---
Last edited by LN Kima Guite on March 29th, 2018, 4:01 pm, edited 1 time in total.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » December 4th, 2017, 5:28 pm

MIHRÂNG LEH SAHRÂNG

BY -LN Kima Guite



BUNG 15-NA


***

BUNG 14-RECAP

***


A Sahrang kah tluk lo tho leh tur chiah chu a lu a sat hrang ta nawlh mai a.Sahrang lu tih baiawm tak chu a lum tawp tawp a,a thlang in hnuaiah a lum lut a,Sahrang taksa sei zuar mai chu a khur ngawt ngawt a,a nghawng Vawmmana sah bunna tang chuan thisen a lo chik chhuak tuar tuar a,rei loteah a zawi ta rawih rawih a.
*****
Sahrang hmasa zawk a lu a sah chhum hmawk rual chiah a Vawmmana han hawi chhuak leh chiah chu Sahrang hnuhnung zawk chuan a rawn zuan let nghal tawp mai a.a han let dun tawp tawp a.Sahrangin a rawn zuan phe vuai chu Vawmmana chuan a hmu hman hlauh va. Sahrangin a dar seh tum a ang sen huam lai chu a kiu vei lamin a bekah a nghawk sawn hman a vangin Sahrang chuan Vawmmana chu a seh fuh hman lo hlauh .a awm vei lam hnute chung zawn ah erawh Sahrang tin hriam zet ham na a thi zaih zaih a.an han lum dun tawp tawp chu Vawmmana chu rang takin a in perh tho zawk a.Sahrang pawh an thlang in kil ban tauh ri dawpin ze talh talh chungin a lo ding chhuak a.Vawmmana kiu in a nghawk na vangin a lu a hai ve deuh a ni ngei ang ,a lu lianzet chu a thing nur nur a.Chu sahrang chu a han din ngil chuan a sang kher mai a,Vawmmana chuan a koki a chen awrh chauh a ni.

----
Sahrang lo tho chhuak leh chu Vawmmana chuan a lo en kar mai a.Sahrang thinrim lah a rum ngul ngul a.A rim lah chu a chhe em em mai a.Mihrang leh Sahrang tihbaiawm zet chu in melh zam tum ni awm takin an in melh dun khai mai a.Vawmmana chuan a chempui chu hum ruh sauh sauhin che mai thei turin a ke chheh an siam rem sauh sauh va.Sahrang pawhin a hmading chu tawngpawng basa ngawm ngawt chi a ni lo tih hriain zawi muangin tan hmun an siam rem hret hret a.awrawl rapthlak tak chhuahin a ang sen huam mai a.A thawrimte chu a thang uih huam huam a."Nang ramhuai mitmeng pawngpa,zanin hian ka sat bungrum dawn che a ni"tiin Vawmmana chuan Sahrang chu a vau chhar a.Sahrang chuan Vawmmana chu chhang ve niawm takin zawite in a rum dar dar a,a rumri chu a zawi hle na a,rapawm dang dai tak a ni a.mi naran tan phei chuan hlauva khur chhiat na hial tur a tiril tham leh rapthlak a ni .chutah le,Sahrang chu awp a han thingthi suai suai a.Fei khawh ang mai a rang leh ngilin a rawnin khawh chhuak ta zawk mai a.

---

Silai rithuai chu hriain Rang lutukin Rozuala leh Hranga chuan an meichher chu meipuiah chuan an han dep kai sawk sawk a,Rangtakin silai rikna lam panin an tlan liam dawr dawr a,in ring ran a awm an ni bawk a.midangin an meichher an chhit kai hmain an tlan liam hman ti tih der a.Silai ri hre pha a piang an tho nghal sung sung a.Zawlbuka riak ho pawh pawnah an rawnin hawr chhuak tup tup a.Ralveng ho chuan meichher nen Rozualte tlan liam chu an umzui nghal vat a.hmun dang a ralveng ho pawh meichher nen Silai rikna lam panin an rawn tlan hlawk hlawk hlawm a.Vawmbuk khaw mipui chu tumah mut zai rel thei an awm ta lo.

---
Sahrang rawnin khawh phei zawk lak a him turin Vawmmana chu a awp hniam thut a.a chung a Sahrang rawn in khawh phei zawk lai chuan kawlphe ai rang zawk mahin a chempui chu an vai chho zawk mai a.Sahrang dul nem chu a thler hawk a.ngiau thawt chungin a hlawm phei nawk a,a piah thing dahkhawm chu a va deng darh chuai mai a.Vawmmana in her leh rual chiah chuan Hranga aw chuan "Thianpa lo zam hauh suh ,kha keimah Diarkhaia fapa Zahrangvunga " tiin Sahrang hlawm phei nawk chu a in siam rem leh hma a Rozuala nen rawn nang chingin a rem lai laiah an sat ta zawt zawt mai a.Sahrang kawlhsen tak pawh lo in veng tum eng ang mahse hliam tawrh nen a in veng seng bik ta lo.a kut ding lam chu Hranga sahna vangin tliak uai hnuang tawh a.Rozuala hriam a tawnna a dar leh hnung zang te chu a thler duai bawk a.a hliam a tang thisen lo chhuak chuan a taksa chu a luan sen nguai mai a.Sahrang lak lu an hloh hnem zia ngaihtuah a thinrim puak keh chung a che anni bawk a.Hranga leh Zuala chu an kut thlak a na kher mai ,an sah fuhna lai a piang chu a kaw hawk hawk zel mai a.Vawmmana chu Sahrang dang an la awm em tiin a han hawi kual thuak thuak a.A him thawkhat a hriain Rozualate lam chu a rawn pan phei chhat chhat a.Sahrang natuar a chiau thawt thawt lai chuan "Kha keimah Liannghaka tupa Vawmmana ve thung aw" tia hming chhalin dimna tel map lovin Sahrang lu chu an han sat hrang ta nawlh mai a.a lu bung tang thisen a lo chik thawt thawt lai chuan Hranga leh Zuala thinrim thaza chuan Sahrang chu an la sat sawk sawk a.chutah midang ho pawh rawn thleng ve in.chutia Sahrang an lo sat sawk sawk an rawn hmuh chuan haw haw chung an rawn bawh ruih ruih a.an Chempui chuan Sahrang chu an sat ri zawt zawt hlawm ta mai .Valupaten "A tawk rih e" an han tih meuh chuan Sahrang ruang chu hmuh tlak bar awm lovin an sat thler veng vung mai a ni.

---
Mipui thinrim che che vel chu Vawmmana chuan awm tih pui takin a lo thlir a,Sahrang lak phuba la thei tur a siamtu Zaii leh Chhingi chu a hre chhuak rauh rauh a.Sahrang ruang pahnih chu hmun khatah an han zalh dun a.mipui thinrim insum thei lo thenkhat chuan Sahrang ruang chu anchhe lawh chungin an han chhir thum leh dawp dawp thin a.an thawm a tha laih laih ta kher mai.A thenin Vawmmana chu fak mawlh chungin an lo chibai lawp lawp bawk a.mipui thinrim sahawk zual a han reh chuan Valupa Buanga chuan "Khai le,Sahrang chimawm lulian chuan a cho loh val a tawngin famkhua an lawi ta, A ruang kha hlawm ula.Lalin lamah i chhoh pui ang u le.Lal leh Upaten min lo ngaichang reng tawh ang" a han ti a.ti chuan Sahrang ruang nen Lalin lam panin an chho ta a.

---

Lalin kawtah mipui an tlim hmur mai a.Valupate chuan Vawmmana chu Sahrang nen an inbeih dan sawi turin Lalin leihkapuiah an ko chhho a.Mipui chuan haw haw chungin kut bengin an lo lawm a.Mahse Vawmmana chuan sawi tur a hre tlem khawp a"Ka inthiar tur ka kalna lamah tum loh deuhin kanin tawng a,Vanneih thlak takin pakhat zawk chu ka that thei ta hlauh mai a,a hnuhnung zawk erawh ka thiante Zuala leh Hrangate sah hliam che hleithei tawh lo ka sah hlum mai a ni"a tih chuan Mipui chuan an duh lo khawp mai a,Sahrang nen an inbeih dan chipchiar an tak hriat an chak theuh si a,Valupate chuan an zing a tawngkam thiam ber Rozuala chu an sawm leh ta ngawt a,Rozuala chu phur ve in Lal in leihkapuiah chuan a per kai thauh va,In ti puithu takin a ban phar in mipui chu ngawi turin a han zap a.Mipui chu Sahrang beih dan hre chakin an ngawi ta thuap mai a.Rozuala chuan Vawmmana inthiar tur kal a tang a tanin dawt tlem belh hlakin ngaihnawm tak maiin Sahrang an thah dan chu a han sawi chho ta mial mial mai a,Vawmmana chu a fak uchuak ta mah mah em aw tih tur khawpin Sahrang pahnih nen an inbeih dan phuah chawp an sawi tak tak mai chu mipui ngaihnawm ti lutuk an ka ho hlawm mai a.a thu sawi lai chuan Vawmmana chuan zaizirin khap a han tum ngial thin Zuala lah a hre lo awm miah miah mai si.Hranga pawh Vawmmana bulah ding a lo nui put put a. Vawmmanan kuttum a hmuh ngial hnuah nui vur vur chungin a sawi tawp thei ta hram a.Rozualan a han fak chiam a vang leh a sawi ropui em a vang in Vawmmana chuan ngaihsan a hlawh zual ta kher mai . Lalnu pawh a lawm hle a ni ang a nui var var reng a.a khua leh tuite hnenah leh Vawmmanate thian ho lakah lawmthu a sawi ve mawlh mawlh a.


---
Sahrang thah thuin Vawmbuk khua chu a fan chhuak thuai a.mipui zawng zawng a pui a nawiin tumah mut zai rel lovin Lalin kawtah an lo pungkhawm a ni .mut mawh hnar mawh a an neih leh nunna tam tak suattu,an khawtlang hna pawh thawk hlei thei lo va chhun zan zawm a ti buaitu Sahrangte an thah tak a vangin mipui hlim leh Sahawk chu an ri le lu mai a.a thenin van vawr zawngin Silai an kap puak dur dur a,Sahrang ruang chu tual laiah zalhin mitinin hmuh theuh duhin an en luih luih a.chil an chhak loh leh anchhe tin reng lawhin a chhir leh zawt thin a.Valupa Buanga chuan Vawmmana kil khat a lo ding ngawi reng chu a va kai chhuak a."Sahrang meuh i man a,Hlado pawh i la chham hlei nem le.ka nau"tiin Vawmmana silai chu laksakin Zen a han thun sak mawlh a,Silai zen a thun zawh chuan Silai chu Vawmmana pek leh pah chuan "Vawmbuk Tlangvalte u,Zaninah Sahrang meuh kan hmaah a tlawm a ni lawm ni??Engah nge tlang kan thlir loh lem ang ni,,Khai le,Vawmbuk khaw nghawr nghing dur dur khawpin tlang i han thir ang u hmiang.Nang Mana Sahrang lu latu i ni bawk a.Hlado han chham la" a han ti chuan mipui chu phur zetin a haw haw chungin an zuang tawr tawr a.Tlangval Silai nei ho huan phur takin Silai zen chu an han thun sang sang a.Van lam hawiin an silai chu an tin chho ta fuk mai le.


---

Chutah Valupate thu chu hnial rual ni si hek lo.Vawmmana chu muangchangin inthlahrun hmel zawk takin a lo pen chhuat a,Sahrang ruang chu a ke leh lama rapin a han vanva dak ven vawn a.
---
"sahrang e,rawl lian rum hum hum e,
Vawm khawpui dai ah hrang i vei maw
Mihrâng sing e, miah Hrang sing e,
Chengrang au ve ,Sahrang ka sai tlu e."
---
A han ti vau vau a,A silai chu a han kap alh sen zuai mai a,a puak riin dai vel a khawk phei rawih rawih a.chutah Vawmbuk Valrual chuan Silai an lawn zui ta ulh ulh mai a.a thawm chuan Vawmbuk khua chu a nghawr dur dur a.mipui hlim takin an rak teng tung bawk a.hun rei tak chhung hlim ni hmel hmu tawh lo Vawmbuk mipui chuan hlimni hmel hmuin an nui leh thei ta.Vawmbuk mipuite hian Sahrang lakah him ta ah an in ngai hmin der a,Sahrang dang tam tak in la awm in,an khua ti chimih vek tumin Huai Lalnu Sailianpuiin ruahhmanna a siam mek ang tih an ring pha hauh lo va.Hlim takin hnehna lawmin meichher eng hnuaiah an in kuah khawm a an chai in an lam dual dual a.Pasaltha ho lah in chhum lo chat lovin silai an lawn ri ulh ulh reng bawk a.Khuang leh dar nen ri thei zawng zawng nen Sahrang hnehna lawmin an ri bung bung a.Nula Tlangval ,pitar putar leh naupang chenin Lal mual zawlah hlim takin an lam lam suau suau mai a ni.Vawmmana chuan Vawmbuk mipui hlim tak a,an lam hut hut chu thlirin "A bul kan tan dawn chauh a ni si a leh" a ti rilru vawng vawng a.
----

Silai zen khu chuai chuai leh zen rim nam rum rum karah Vawmmana chu nula ho chuan ngaihsan hmel takin an thlir vawng vawng hlawm a,a hmelin puak ti lua lo mahse Lal Fanu hmeltha eltiang Lawmsiami meuh pawh Vawmnana zunah a uai a ni ngei ang,Lalin sumhmun thim chinah dingin Vawmmana che vel chu hmuhnawm ti takin a thlir vawng vawng a.Vawmbuk khaw nula hmeltha leh to Pari pawh a thiante nen Upa Vungtawna te leikapuiah dingin Vawmmana chu huaisen an tih zia leh an ngaihsan zia an sawi sap sap a.Pari te ho thusawi chu an bul a lo ding ve reng Saikapa inti pasaltha ve tak chuan a ngai thei lo kher mai a ,a ner nawng nawng mai,a nula hmangaih leh duh em em in midang chanchin nuam ti tak leh ngaisang awm tak a ,a sawi hriat chu Saikapa chek ngeih zawng a ni lo kher mai.Chet thawh a tul hunah Vawmmana hma khalh zat zat tumin a rilru a siam ta ran a.


---

Arpui a lunglawm sanghar a lungchhia tih zawng zawng nei zovin ,Vawmbuk khuaah hnehna lawm a ,hlim tak a an chai mup mup laiin Sailianpuii chu Khamrang chung lung toh lawt ah dingin a thinrim lutukin a ha chang a thial ri rawp rawp a ,a bul velah awm a naute ho pawh tumah tawng ngam lovin an ngawi dak hlawm mai a.Huai Lalpa Luahzova meuh pawh a nupui thinrim mimeng rapthlak tak a vang chuan engmah sawi ngam lovin a ngawi dak mai a."Nangni Ramhuai lak tlak loh thatchhe hlawm khawm ho.Mihring zingah ka Sachuam that thei an awm lovang in ti ni lawm ni."tiin a hote Sahrang enkawl bik tur a a ruat ho chu a vin tuar tuar a.a bul a ding huai hmelchhe hnar sei zet Sahrang enkawl tu zing a hotu ber Dummuka chu a man lawk a.a hma lungpui ah chuan a hnar chu a tah sak ta nawk nawk mai a.Dummuka natuar lah chu a rak teng tung mai a."Ka pi min ngaidam rawh ,kan ti sual leh tawh ngai vang "a ti lawm lawm mai a.Saii chuan " I tihsual dawn tawh lo reng a ni"tih pahin Dummuka nghawng chu an thuai bung hmawk mai a.Dummuka lu bung chu na tuarin a la te tuar tuar a,Zaii chuan Dummuka lu chu kham sang takah chuan a theh liam zui a,Hmul thi ti ding sung sung thei khawp a rapthlakin Dummuka lu chu khamah chuan a la te thla ruah ruah a.Sailianpuii a rawn inher leh chuan a hote chu an lo thingthi thap a .Saii mitmeng chu puk thim khup ang maiin a dur thim khui mai a.ruah thimpui lo thawk tur ang maiin a hmelte chu a dur khuih khuih a.a nelawm loh kher mai"A rang thei ang berin ,Ka Sachuam thattu chu tunge ni va zawng chhuak vat rawh u,Tunah thlawk chhuak nghal rawh u"a han ti tuar tuar a.A hote chu hlau khur dur dur chungin an thla zarin an thlawk chhuak ta luap luap hlawm a.


---

Vawmbuk khaw mipui chu Sahrang hlauhawm tak lak a.him taah in ngaiin hlim takin Khawvar hnu feah thleng an chai a,Ni chhuah hnuah an tin dar thei chauh va.Sahrang ruang chu Lal in leikapuiah an la chho va.Upa ho chuan an han bel chiang vel a,Sahrang pianhmang chu a mak hle mai a.Hmul pakhat mah a nei lova.a taksa chu hruihrual ang mai a sek phiar fuat mai a.kut leh ke sei tak neiin a tin hriam tak chu a kut leh ke tang hmawr ah a lawr fur a,a lu chu tung sawl rut mai niin a ka reh a zau hle a.a khabe kual lian takah chuan ha lianpui pui leh hriam zet mai a in tung thut mai a.ngho hriam leh zum tak pahnih a nei a.a lei chu a seiin a thap bawl hruah bawk a.a rim lah tawrh har khawp rim chhia a ni.he tia Lal khawnbawl upa hoin Sahrang an belh chian mek lai hian Vawmmana chu Leikapuiah lo chuang kai ve a.Thil sawi duh neih hmel tak a Lalnu a han melh zauh zauh ah chuan Lalnu Chhingpuii chuan "E khai ,Mana enge thil pawimawh sawi duh i nei em ni.Thil min dil i duhte a nih phei chuan in thla hrung reng reng suh.i tan hian ui ka nei hauh lo a nia" a lo ti thuai a.Vawmmana chuan "A,Lal nu thil pawimawh tak sawi tur ka nei a ni"in thlahrung hmel takin a lo ti sap a.Upa ho pawh an rawn hawi chhuak sap sap a.Lal nu chuan " A nih zawngin,in chhung lamah in kawm ang u hmiang"tiin a han rawt a.ti chuan in chhung lamah an inzui lut ta dam dam a.

---

In chhungah thut hmunte an han remfel hnu chuan Vawmmana chuan Sahrang lak a an la him loh thu leh Sahrang hi pahnih chauh ni lovin tam tak a nih thu a han sawi chuan Lalnu leh a khawnbawl upate chu an chek tlawk tlawk mai a.Lal fanu te pawh tap chhakah an lo phawk hra mai a.Heng zawng zawng hi engtin nge Vawmmanan a hriat zawh buai an tum lo va.Vawmmana pian dante ,A bo vang vang hnu thi tawh a an ngaih hnu a dam tak leh him pial a,a lo haw leh dan te an han ngaihtuahin thil awmzia tur chu an chhut thiam mai a.ti chuan a rang a rangin tlangau an tir chhuak nghal a.Mipui zawng zawng rang tak a Lal mual zawl a kal khawm vek turin Tlangau chuan a han ko khawm a,Tlangaupa thang hlan chuan Vawmmana chuan "He Sahrang hi sa hlauhawm tak ni mahse thah theih a ni tih chu kha kan hre tawh a.Zan lam a che chhuak thin anni a.Khaw engah thil a hmuh fiah theih loh a vangin an che chhuak ngai lo a ni." tiin Sahrang chanchin chu a han sawi belh leh a.Upa Rozama chuan "Chutia chhun lam a,an chet ngai loh chuan a zia a awm deuh dawn chu,hei hna thawk hleithei lovin kan buai rei ta hle a.tampui kan hmachhawn ang tih pawh a hlauhawm hlel lova.chhun lamah lo lam hna thawk turin mipui kan hrilh a ngai a nih chu" ngaihtuah muk hmel takin a han ti a.Upa Vungtawna pawhin "Pari pa sawi kha a pawimawh khawp mai.hna thawk lova mipui awm tir reng a dik lo vang ,mipui an thlabar lutuk lohnan thiam takin Sahrang chung chang hi sawi ila .lo lam hna tul thawh tir chu kan tih makmawh a niin ka hria" tiin a lo tui hnih vat a.midang pawhin "a tha khawp ang " an lo ti tliar tliar a.Lalnu chuan "In thusawi kha ka pawm thlap mai.chuan Pasaltha leh Valupa ho nen hian ro kan rel erawh a tul ka ti hle mai" a han ti zui a.

---

Lal in kawtah mipui an lo pung khawm zel a.eng thu leh hla nge ni ang tiin an in zawt noh noh va.mipui an kim tak hnu chuan Lalnu chuan "Ka khua leh tui duh tak te u,kan khaw tlang minti buaitu Sahrang chu kan pasalthate zarah a lo fam ta a.chu vangin vawiin a tang mitin ram tang rual tawh phawt chu lo lamah hna thawkin liam vek tawh tur a ni e,Sahrang hi a dang pawh la awm palh thei a nih a vangin kan fimkhur erawh a tha ang.thim hmain khawchhung luh leh hman vek tum ni se.Valupate leh pasalthate erawh Sahrang ruang senghawi turin awm hnufual nise"a han ti a.


---


Mipui tin darh hnu chuan Lalinah an lut khawm tak tak a.rorel in an thu khawm zui nghal a.Lalnuin a sawm ang in,Vawmmana chuan Sahrang dang la awm thu leh Sahrang thah theih dante leh Sahrang chanchin a hriat ang ang sawi awm chin zawng chu a han sawi zung zung a." Sahrang hian Khamrang ngaw a tangin zantin min bei turin an lo kal ziah a rinawm lo va,Sahrang thenkhat hi kan ram khawi laiah emaw puk tha tak belin an awm ka ring tlat mai a.Vawiin lamah zawn ka ril ruk nghe nghe a.Tlangval pali nga chuan min zui theih chuan a lawmawm khawp ang" tiin a thu sawi a ti tawp a.an han sawi khawm fe hnuah an tih dan pangai in zan lamah ral veng in dah zui zel turin an rawt tlu a.Thingtuah turan mamawh hnem thin a vangin thingnawi fawm naupang zawng zawngin an dan pangaiin vawithum theuh thingnawi keuh leh turin an ti bawk a.Vawmmana hova chhun lama Sahrang pel tur an in thlang chhuak nghal zui nghal a.Kal theuh duh mahse Vawmmana berin tam teh lua tul a tih loh a vangin Pasaltha Vunga ,Bawkthanga,leh Vawmmana thiante pahnih Rozuala leh Zahrangate chu kal turin a han ti a.Saikapa chu Vawmmana er ta ngang kha a ni bawk a ,kal a chuh tlat a vangin an ti tel leh a,Lal fapa Savunga pawhin "kei pawh min chhiar tel ve rawh u " a lo ti ve tlat mai a,Upa ho chuan "Khaih nang chu ni love,i nu ai awh a Lal la ni mai tur i ni a.Vanduaina va tawk ta la ,a pawi lutuk dawn a sin " a lo tih pawhin Savunga chuan "Ka khua leh tuite tan kan pasaltha ten nunna thap a an beih laiin ,he tah ka lo uipui thut der der ang a maw.hnai lo ve." a lo ti ram hmak mai si a.Lalnu pawhin dan tum viau mahse Savunga chuan a tum thulh a tum bau si lo va,kal turin an ti tel ta nge nge a.ti chuan Tlangval thenkhat Sahrang ruang lo theh thang tur an ruat bawk a.ti chuan tuk thuan ei turin an tin darh ta sang sang a.
Last edited by LN Kima Guite on March 29th, 2018, 4:02 pm, edited 1 time in total.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)