ZAWLNEI VÂWRA By RT Puia Mavala

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

ZAWLNEI VÂWRA By RT Puia Mavala

Unread post by Ngaia » June 26th, 2016, 3:44 pm

ZAWLNEI VÂWRA - 1
.
.
Naupang hlim thawm kârah chuan dan pangngai bawkin tap ri a rawn chhuak leh ta nge nge a. Vaivut khu rum rum khawpin naupang ho an tlan darh nghal hum hum a. An tlan darhna tûalzawlah chuan mipa naupang pakhat hi thu sawp niaih chung hian a tap kál raih raih mai bawk.
.
A bula in tetakte, a chung dî leh a bang dâp, en reng reng pawha tah uluk loh tih hriat ngawih ngawih, âwng deuh siar atang chuan Putar pakhat hian kawngka bulah dingin a lo en reng a. Buaipuiin thlêm ta'nge pawh a ti hauh lo. A tah avanga a thianten an tlansan tak chu a thlir vung vung ringawt a. A vawi khat hmuhna ni hauh lo mahse naupang infiam thlir chu a nitin hna a ni thin reng a ni.
.
"Tunge lo vel leh ta?! Lalruatsak, tu in nge vel che? Engvangin nge i tah reng bik mai?" tih paha hmunphiah nena chhaklam atanga rawn tlân thla nu hmel chuan duhawmna a nei tam bik lo ngawih ngawih. A ha hmâi chu a duh vanga chhûang ni bik hauh lovin hmalamah a ti pauh vâw a, a hnâr ngul sîn zet dâwmkâng turin a hnapthleng chu a pherh thla diai mai bawk. A bîang kî vun atang chuan eitur tha taka chawm a ni biklo tih a hriat hliah hliah a, chutih rûal erawh chuan zaidamna leh dawhtheihna a pâi hnem bikloh zia tilangtu a ni ve leh zel bawk.
.
Naupang chu dimlo zetin a tûng tho lawp a. "Tap tawh suh, i tah leh chuan ka vuak belhchhah ang che! Khawnge Remruatmawia te pawh hi? Engvangin nge an velh tah reng che a?" tia âng hlawih hlawih chungin naupang chu an in lamah a kai chho dawt dawt a. Lalruatsaka chu tap ri ngam tawh lova ngîk faih faih chung hian a nu rûal chuan a pen kawkalh chho nawk nawk bawk a.
.
"A pu Vawr, an haw tawh ami?" tih paha a inhnuai atanga naupang rawn chhuak nak nak chu a en a. A chhang lem lo naa, naupang ho pawh chuan chhanna an beisei bik chuang lo tih hriatzetin an mahni leh an mahni chu an infiam lehnghal sap sap a.
.
Pu Vâwra hi hun rei tawh tak atanga Pathian thu hrîla Zoram hmun hrang hranga vak kual thin a ni a. Hmelhriattu leh hmelhriat a pui a ngahin a kal thinna hmunah chuan "Zawlnei Vâwra" tia hriatlar thin a ni. Tlém lai deuh atang khan hrisel lohna hrang hrangin a tlakbuak tak avangin a zinchhuak hleithei ta meuh lova. Parâwl ta chu an thenawmte chhungkua tih loh chu enkawla buaipuitu pawh a nei ngai meuh lo. Amah hrim hrim pawh hian tumah a ngaina lem lova, Pathian thu hrila vak thin e tilo chuan thinchhe ru zet mai a ni bawk.
.
"Pu Vâwr, vawiin lamte enge i an?" tia rawn au tu an thenawm nula Rinsangi chuan a rawn nuih var var a. "Min hmu reng ani lawm ni" ti deuh hluk pahin Tûal zawl lam chu a hawi leh nghal mai a. Rinsangi chuan khi var var chung hian,"Ka Pu Vawra thin hi a, mi kan ngaihsak ve em em che a" a ti a, a thawmhnaw zar chu a seng malh malh a. Chu hun chu kum 1997 AD a ni.
.
"Hahchhiauuu" Sava perh thlak tur hmuh loh avanga nipui thereng zawng ta Hunmawia chuan a thianpa Lalruatsaka hahchhiau chu rûm zetin a melh a. "Nangmah vang vek, engmah pawh kan perh thlak theih loh hi" a ti vin hlur a. Ruatsaka chuan ngaipawimawh lo hmel fe hian thereng hramna thingkung chu a melh vung vung a. "A thlawk chuang hleinem" a ti ngawt a. Mahse a mah aia huai leh û zawk chuan a tukhumah a rawn pên hram a. "Min chhang suh" a ti zui nghal a. An chêt velna khaw dâia tlâng to luah mai chu naupang nun chan zirna a ni a, nutling thingfawmna a nih rûalin Patling thingtuai zawnna mûal a ni bawk. Chu hmun kaltlang lo chuan khawdang khawi hmun mah a pawh theih loh bawk avangin 'Chhawrmual' tiin a hming an vuah rêng a ni.
"Shh...eng thawm nge?" tiin Hunmawia chu phâwk zetin a hawi kûal ruai a. A hmela ngaihthatlohna hmel a hmuh chuan Ruatsaka pawh chu ngaihtha lo zetin a hawi kûal a. Chutah an tum loh lutukin an lu chung lawka Tâtkâwng kûng atang chuan Saphâi lian tak mai hi a rawn bir thla ngur ngur mai a. Hunmawia chu te thawt pahin a tlan sawn nghal mai a. Mahse Ruatsaka hlau lutuk erawh chetna chang reng reng a hre ta lo. Saphai chu a en ngawih ngawih a, a hmel chu a dâng nghal sâwp sâwp mai bawk. "Rawn tlan ta che" tia mangang taka au lawm lawmtu Hunmawia aw chu hre awm pawhin a lang lo.
.
Thlang lam atang chuan thawm dang a rawn ri chho sat sat a. Pu Vawra a rawn chhuak chho hlawl a. Saphai nena inhnaih chilh tawh tak Ruatsaka chu rang zetin a va kai sawn ta nghal a. Hunmawia bula a dah hnu chuan muangchanga che tiah tiah Saphai lam chu a pan leh a. A chempui tùai tha zet chu a iptepui ah atang chuan a phawrh a. Mahse engvang nge ni tehreng sât ta mai lo chuan a en vung vung a. A inher a, a chempui chu khungin naupang pahnih hnenah chuan "Haw rawh u" a ti a. Hmawnhmawh hmel zetin ramhnuai lamah chuan a kal bo leh ta nghal a. Naupang pahnih chuan makti hmel zetin Pu Vawra chet dan chu an en reng a. A kalliam hnu chuan hmanhmawh zetin an tlan hawng ve ta nghal a.
.
"Nu, khawnge Apu Vawra saw a kal a? Khawimaha chhuak thei a la nilo a sin mawle?!" Rinsangi chuan a rawn ti lut lawng lawng a. A nu chuan "Tukinah pawh a la khuh bûr bûr reng asin, chhuak tam lo se a that tehlul nen" tiin a lo tui hnih ve vat a



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 26th, 2016, 3:45 pm

ZAWLNEI VÂWRA - 2

"A vak chhuak khât em a, a vak chhuak chak ve tawh te pawh a ni ang" tih zawm pah chuan a buh thlei lai chu a sâwi dap dap a. A nu buhthlei hmuhnawm ti hmel zet chuan, "Nu, kum engzat vel nge a ni tawh ang le?" Rinsangi chuan a ti a. A nu chuan,"Ka hre chiang bik hauh lo, kum 60 te chu a pel fê tawh ang a, i pa ila zawt dawn nia" tiin a chhang a. Rinsangi chuan ngaihtuah mûk hmel tak hian, "Keichu ka khawngaih reuh thin e, Pu Chhuanawma te chhung pawh khian ngaihsak ve thin tur hi ania." a ti zûai raih a.

A nu chuan,"Keini kan awm a, a tawk alawm, mi bulah te reu reu i lo sawi ange. Pu Chhuanawma te chuan 'hna pawh thawk peih lo chu kan ngaihsak dawn lo reng reng an ti e' an tia lawm" tiin a lo chhang thuai a. Rinsangi chuan,"Engtia inchhung chiah nge an nih a?" a ti a. A nu chuan,"Inchhung hnâi phei chu an ni lem lo. A nuin a pai laiin a pa puh tur a hre si lo va, Pu Chhuanmawia pa khian sâwn man a pek sak ta ringawt ani awm e. Pa nei lova a awm ngawt ai chuan a tha e a tia, a fel teh ania" tiin Pu Vawra chanchin chu an sawi dun sap sap a. Rinsangi chuan,"A van mak, Pu Chhuanmawia chuan avan chhûn awm lo ve" a ti deuh bai bai a.

Lâm hnai neia buh tuh thahnem ngai zualte pawh an haw rem zo tawh a. Phingphihlîp chhûak nguah nguah te ûm kual chuan naupang an chîar nak nak a. Naupang infiam thawm hlimawm hmelzet karah chuan nu tling aw hian,"In bengah te khan in ti lut palh ange, a hlauhawm a nia aw" a rawn ti lang lang bawk a. Chaw ei tura inko haw thawm pawh a khât tawkin a ri reng mai bawk. Chu thingtlang khua, motor kawngpuiin a tan tlang ni ve lem lo, motor kawngpui pawh tura kea Km 15-a thui kal ngaihna hmun boruak chu a hlimawm a, a hrisel a, fiamthua an sawi thin danin khawvel hmasawnnain tlansan char char mahse Zo nun zia hmuh tur tam tak a la awm na chu chu khaw ti hlutu a ni awm e.

Rinsangi chu tukverh-ah a dâk dek dek a, "Nu, Pu Vâwra hi a la haw lo reng reng" a rawn tichhuak phawng mai a. A nu chuan,"A va mak awm ve, mi inah chaw a ei dawn te pawh a ni ange, ngaihtuah vak duh suh" a ti a. Rinsangi nau mipa naupang chuan,"A u bialpa chu Pu Vawra" a lo ti zauh a, an nui tlâng ham ham a. Chhungkaw boruak nuam zet nei tura tanrual a ngaihzia entirnana an hman fo Pu Duhawma te chhungkaw boruak chu sûm tamtak pawha thleng phal chi a ni mawlh lo ve.
Khawia êk nge i thut pherh a? Lalruatsak, naupang chhâw lutuk hi chu aw" tih pahin a nu chuan Ruatsaka kekawr mawnga Bâwng ek kai luai mai chu pawn lam Barel bulah a theh chhuak nghal a. Ruatsaka erawh a ngawi reng a. A pi leh pu, tapchhaka meilum âi inkârah chuan thuin mei chu hmawlh hian a hawlh a hawlh a. Naupang tawngmawh leh tahbelh zet mai awmdan chuan a nu lûng a dum zo meuhlo a ni ber e. "Mei te kha hawlh hawlh suh. Ninhlei lutuk mai, naupang chimawm kawl hi chu a buaithlak. School te hi kal ve tawh rawh se, kum riat a tling tawh, a thiante ho pawh school-ah an kal vek tawh" a ti hlaih hlaih a. Ruatsaka hmelah chuan school kal ve châkna pakhatmah a lang lova. "Sâwn mai mai" tia chhaih nawmnah thinte bula awm chu a thlahlel thlawt lo a ni ber e.

A pi, târ tawh tak pawh chuan a tuibûr zuk khuk hluah hluah pah chuan," Ni e, râm tang rual a nih hma chu han kal ve phawt teh se, a putea ram riak pawh rawn haw se, Zirtirtu Thanga bulah va sawi se a tha ang" a lo ti ve a. A pu erawh a ngawi reng thung. Tawng mawhah chuan Ruatsaka chuan a chhùn fu ngei mai.

Radio hla thlanna chânga tlangval lêng khawm thutna châng lo chu chhutah thuin Rinsangi pa aiâwt tah chu an tihpui sap sap hlawm a. An khuaa Radio nei an tam loh avang leh an khaw nula chhûak tir Rinsangi hmêlthatna avang hrim hrim pawh chuan an in hi lûtchhuak an tam thin reng a ni. Mahni rik rika an rik laih laih lai chuan "Hei hi All India Radio, Aizawl atanga puanchhuah a ni, tunah chuan Lengzem leh Lenglawng hla thlanna hun i lo hmang ang" tia nula aw pûam no talh maiin a rawn tih takah chuan ngaihthlak chian loh chuan Radio hnaih lam chu an pan sap sap a. Kil khat atang chuan "Ka hlathlan rawn chhuak ve tawh se aw" an rawn ti bai bai mai bawk a.

"Nu Pu Vawra a lo la haw lo reng reng, a in a la thim thiap mai" Rinsangi thing seng chuan a rawn ti lut a. Tlangval thenkhat ho chuan, "A ni hi a hlim zin leh tawh a ni lo maw? Khurbîng ve nasa si a" an rawn ti a. Rinsangi nu chu a nui mai a."Zin lovang, a la dam tha lo emmai, khawiah teh fakau chuan nge a chhuah ang le? Tunlai phei chu a inkhung viau a sin" a rawn ti vat a. Tlangval pakhat chuan,"Vawiinah Chhawrmual lamah Hmunmawia te rûl lakah a chhanhim a ni awm e!" a rawn ti ve a. Radio lam ngaihsak ta lo chuan chu tlangval thusawi chu an bengkhawn deuh thap a."Hmunmawia rawn haw khan a sawi a. Rûl ber pawh chu a that ngam lo tia a rawn sawi kha, a sawi dan hmangah a len hmel viau si a, saphai lam te pawh a ang ka tih sak zawk mange!" a tih zawm a.

Mangang hmel tak hian Rinsangi nu chuan,"A ni hi a zinchhuak leh tak tak aniang a, a la dam chian loh tehlul nen!" a ti a. Rinsangi pawh chu a hûi deuh pap a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 26th, 2016, 3:45 pm

PU VÂWRA - 3 Pu Duhawma te chhungin Pu Vawra an ngaihsak zia tlângkam titi mai nilova an hmuh leh an hriat thinte chu an hriatchian belhchhah a ni ber e. Radio hlathlan lam pawh ngaihsak ta lo chuan Pu Vawra thângna lam nia an rin chu an sawi sap sap a. Chin châng ngaihvena chhuahna hun atan erawh a zan thil em avang chuan eng êm a ti lovang chu maw tiin lûng si lo zetin chu zan hun chu an hmang tlâng ta hlawm a. A lo haw mai dah lawm maw tiin a in chu an in en chhâwk zak zak a ni ber e. Nimahsela zan rei tak thleng pawh chuan a in chu 'luahloh rûn' ang rîakin Pu Vawra thawm hriat tur awmlovin a reh tlawk tlawk a! "A ni te hi zawng zin chhuak reng ngang a ni bawk a. Eng em a ti lovang chu maw! A zin dawn hi chuan a hmanhmawh hle a nih loh chuan min hrilh ve ziah thin a, a hmanhmawh ngang a nia'nge" ti charh charh pah chuan Pu Duhawma te pawhin mut zâi an rel ta a. Khûangbâi hram bengchheng zet hnawh sawn tumin Mualvêt rama Buh tuha ram riak Pa te takte, Sanghleia chu a thlâm tual leh hnuai velah chuan a vak dûk dûk reng a. A torchlight eng tha lo zet nen chuan a beidawng rum rum mai. "Chu thereng ho zet chu min van tibuai mai mai em!" tiin a insawh nghut nghut a. A thin a rim tung mai lehnghal a. A mah leh amah pawh chu a in chûm lo chauh a ni ber e. Chutia khûangbâi hram mai mai avanga thinûr zeta a awm lai chuan a thlâm chhak lawka vâu atang chuan ring leh chiang mangkheng hian "Sanghlei, Misual, Khua a thim dawn!!" tiin an rawn au vak mai a. A phu chîang ngei mai! A ngaihna hre lo zetin vâu lam chu a en hû a. A insawh thinrim lai lo ni bawk nen, "Ka sual awkawng lo ve, tu phiangsen nge i nih a? Mai mai tak che chuan" tiin a'n au let ve nghêng mai a. Mahse an rawn chhang let zui hauh lo. A ngaihtuah chiang a, a lo chhak hla fêa riak Lalpuia te ni turah a ngai ta ringawt a. Vin zetin"Lalpui, nangmahni em ni?" tiin a au leh a. Mahse rawn chhang tu an awm tawh lo. Ngaih tha vak lo chung chuan thlâm lam a pan a, mut zai a rel zui ta a. Lalpuia te an nih ringin a tuk vartiana an mu lai han thrawnthawh a tumruh ngei mai. "Misual te min rawn tih mai mai le! Kei aia an felna bik reng reng ka hre love" tia thinrim trûn chuan a insawh muhil ta hram a. A tuk khawvar rual chuan a tho va. A chempui a ak a, Lalpuia te lo lam pan chuan a kal ta nghal a. Lalpuia te lo a thlen chuan khua a eng ut tawh a. Mahse tlâk lam râm ngang a nih avangin nichhuak erawh a la hmu lo nasa mai thung. An ni pawh an tho tawh tih hriat takin an thlâm atang chuan mei a rawn khu chhuak chiai chiai a. Rî thumin thlâm khat an intawm avangin lian angreng takin Lalpuia te thlâm chu a ding luah mai a. Kumtluana an hun hman tamna ber tur a nih hre rengin Thlâm pawh an sa uluk hle tih a hriat theih a. Sanghleia chu inla pà zet hian thlam kawngkhar inhawng saah chuan a va ding tau mai a. Thlâm chhungah chuan a then lo la mûin Lalpuia ber chuan thuk mei chu a lo chhem tûrh tûrh a. Sanghleia a hmuh chiah chuan,"E khai! K'u Sanghlei, zing zingah i va rawn chhuak chho hma ve" a lo ti vat a. Sanghleia chu inlak hlauhawm tum zet hian "Nizana min rawn tihdanah khan ka lawm lo teh mai ania" a'n ti nghal thâwr a. Lalpuia chuan hrethiam lo hmel zetin, "Enge nizan chu? I sawi awmzia ka van hrethiam lo em!" a lo ti ve vat a. Thil hrechhuak thut niawm takin, "Ehe! An lo au ve tho che alaw?" makti hmel zetin a ti zui nghal a. An tawng thawm hriain a la mu ho pawh an rawn tho sap sap a. A hma zan chungchang sawiin Lalpuia te pawh chu lô neitu hming kima lamin, "Misual ho, khua a thim dawn" tiin an lo au khum ve tho a lo ni a. Mak an ti tlâng ngei mai. Mualvêt rama ram riakho chu an buai ru ang reng viau mai. Zan lama rawn au tu chuan Mualvêt rama lo nei ho zawng zawng chu a au chhuak vek a lo ni a. Thenkhat chuan Pu Vâwra niin an hre hlawm a. A aw chher chhe tak leh pûam zet atang chuan amah lo chu rin tur dang an hre chuang lo. Pu Vawra niawm tak chetdan maksak tak mai chu thenkhat lah chuan an lawm lo hle lehnghal a. Rinsangi zing tho chuan a mang nawmzia thu a nu eirawngbawl bulah chuan a rawn sawi nghal malh malh a. Chumi pah chuan Pu Vawra a hawn tawh leh tawh loh a zawt nghal bawk a. A nu chuan, "Haw teh nang, khu a la inkalh bûi mai. A ni pui roh hi thusawi tur dawngin khaw thenawm lamah te a kal leh tawh ani ange" a ti liam ve mai a. Rinsangi chuan ngaihtha vaklo ru zet hian "Ti khawp hian kan enkawl nasa a, a zinchhuah dawn te tal chuan mi te pawh hrilhhriat ve tur a lawm" a ti hmarh hmarh a. Inrinni tûk a ni a, tûk dang zawng aiin khua a thiang tha emaw tih tur khawpin ni chu khawchhak lamah a rawn inpho luah mai a. Tuikhur tui chawi, insu paha muangchang ho pawh tukthuan nang hman tawkin an rawn inzui hawng delh delh hlawm a. Khawchhunga tuikhur hnih hnà a kang tawh avangin khaw dâia Hmâwng tuikhur, a hnà tha zet mai, kâng lova luang liam reng mai chu an rin pui ber a ni rih a. Û te leh nu te insu zuia naupang kal ve muangchang deuh ho chu "Nawngsawhnawhin a man mai tur che u ania" tiin hmanhmawh turin an lo intûr ve chhen hlawm bawk a

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 26th, 2016, 3:50 pm

ZAWLNEI VÂWRA - 4 "A nu! Min lo nghak rawh" naupang tap pur chu a rawn tlan hlawk hlawk a. A nu chu rang taka hawi letin a fapa tap chunga tlan hlawk hlawk hnunga Pu Vâwra, chau hmel zeta rawn kal hnuk hnuk chu a hmu tel nghal a. A hmel a pâwrin zan tam a mu tawh lo tih hriat zetin a cherin a meng thîp râm mai bawk. Naupang leh Nutling lo awm ho chuan mak ti hmel zetin an lo en thap a. "Pu Vawra chu khawilamah nge i vah chhuah a?" tiin an lo be lûm lam thuai a. Ngaipawimawh lo hmel fe hian chhang lovin a kal pel a. Nula pakhat chuan,"A awmdan khan mi râp deuh tlat" a rawn ti chhuak a. Pakhat chuan, "Ka pa te ramriak pawh au tu kha amah hi a ni ngei ngei ang" a rawn ti ve vat bawk a. Tun hmaa fiamthu nena an nuih liampui thin Pu Vawra chetdan maksak ta riau chu an sawi sep sep hlawm tawh a. Thenkhat chuan a târ â tan ni turah an ngai a. "Ka nu, Pu Vawra a rawn haw a nih khu" Rinsangi chu lawm hmel zetin a nui vâr var a. A tlân thla nghal a. Pu Vawra chu a inchhungah a zui lut a. "Khawnge i kal daih a? Kan ngaihtuah em em che a, chanchin engmah inhrilh lova chhuah bo reng reng" tiin a chhãl nghal hlawih hlawih a. Pu Vawra erawh a ngawi reng thung. Chau hmel zetin a khumah chuan a mu nghal hnawk a. Rinsangi chuan a en ren rawn a. "Pu Vawr" tiin a au leh a. A rawn melh zuk a, a mit chhîn san zui leh nghal pah chuan,"Ka awm a nuam lo em mai" a ti ringawt a. Pu Vawra in, khawi lâi mah inpingdang awm chuang lova tê fel ran maiah chuan Bungbel bâwm, banga khen bei maite, a hnuaia Têl tin atanga siam tui dahna pahnih inhungte, Thuk bula thing thingrem chìk hrûp mai te, Rapchung leh thûl hlûi zet tawh bakah khum, puanthuah thalo zet inphahte chu a inchhunga langsar taka hmuh theihte an ni hlawm a. A thawmhnaw neih ang ang te chu a thosilen tlângah chuan a bâng mai a. Inlengte thutna tur atan 'Savun thutthleng' pahnih chhe zet tawh a nei ve bawk a. Rinsangi chu hmanhmawh zetin a tlan hawng a, damdawi leh tui thianghlim la in a rawn kîr leh nghal a. Pu Vawra chuan, "Damdawi ei ka mamawh tawh hleinem!" a lo ti hluk a. Mahse an in eitir lui ta tho a. "Ka pu, khawiah chiah maw i kal a? Ka hre ve châk a nia" Rinsangi chuan a ti leh a. Pu Vawra chuan, "Nang tê hi chuh, mi hi i tûr ang sek sek a. Ka hun tawn tawh a mak ber leh hrehawm ber te, nûam ber te ka tawng a ni" a ti ringawt a. Rinsangi chuan hriatchian châk hmel tak hian a lo en dauh dauh a. Pu Vawra bawk chuan "A rem hunah ka hrilh dawn che nia, tunah chuan engmah sawi chhuah theih a la nilo" a ti a. Rinsangi chuan hre châk viau mahse zawt zui ta lo chuan a haw ta a. Rinsangi chhuak ta chu en zui vung vung pahin, "Nang hi chu tel lo hrâm ang che" a ti ringawt a. A mit a chhing vang vang a. "Mahse tinge ani kha ni tura ka ngaih tlat chu le? Hun harsa leh hrehawm tuar turin a chak tawk lovang" tiin a ngaihtuah zui vung vung a. "Lalruatsak, em em a che, i é rei tawh lutuk, rawn chhuak tawh rawh. I putea lenchhuah hma hian va kal vat rawh u" tiin a nu chuan a au lawng lawng a. An kawmthlanga êk In chhung atang chuan "Ka kua a tha lo alawm" a rawn ti ve vat a. A nu chuan, "Awihawm loh loh, ahma zawng pawha tha lo ngai lo enge tun ataka i tih that loh ni? I suahsual vang mai mai a nih kha" tiin tukverha dâk chung chuan a nu chuan a au lawng lawng a. A pute Sanghleia chuan, "A duh chen chen è ang hmiang, sikul kâi ve lo tawp se a nimai alawm" tih pahin hachhek fawng tur a suih malh malh a. "Ngâi rawh u, nangni misualte u, khaw thimin a nang dawn che u. In tâna tuara kha in hre ta lo va, Lalpan fiahna a hmachhawn tir dawn che u a ni. Engkim hi a thuhnuaiah a awm vek si a." Sanghleia chuan a thiltih lai chawl meuhvin chu âw chu a ngai thla vang vang a. "Hmm, chu ngei chu a nih chu" a ti nghut a. Pawnah a chhuak a, an veng lungphun kawnah chuan Pu Vâwra chu a lo âu lauh lauh a. A bulah chuan naupang ho an lo thu thap mai bawk. Va pan a, "Enge ka sualna?" tia va zawh mai châk zetin a penchhuak hman ûk a. Mahse mâwi chiah lova a hriat leh tak avangin a insum thei hrâm a. Chutih lai chuan kawmthlang lam atanga Ruatsaka rawn chhuak chho chu hmuin "I va e rei ve" tiin a thinrim chu Ruatsaka chungah chuan a hrithla ta ringawt a. "Pu Vawr, kha i thil sawi kha, kha ai chiangin i sawi thei em aw?!" rawn titu lam chu a hawi vung vung a. "Thei mai mai lo, ka dawn chin bak hi engmah ka sawi thei lo. Mahse fimkhur rawh u, in beisei loh lutuk thil a ni ang" tiin pa pahnih rawn kaltlang chu a lo chhang a. An ni chuan nui tuh tuh chungin,"Kha ka sawi kha, engmah hi a hre tak tak lo" tiin an kal liam zui leh ta mai a. Pu Vawra chuan a thlir zui vung vung a, "Lalpa an ni saw engtin nge ni dawn?" a ti ngawt a. A lû a thing nûr nûr a, a in lam panin a kâl ta hnu hnu a. "Kumin a kan ram zuan chu ramchâng tha a ni bawk a, khuanun zah ngai se phûr fê chu thâr ve thei ila" tiin Tlangval zinga phanchang zet tawh chuan Pu Duhawma Thângthlèng siam chu a pui mawlh mawlh a. "Sorkar zem zên ho tan hi chuan in khawsak hi a sâm bik ngawt mai"

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 26th, 2016, 3:50 pm

ZAWLNEI VÂWRA - 5 "E khai! Zâma, Engmah hi a awlsam thei tak tak bik hleinem, keini te zawng Mî sûm ring ang leka khawsa kan ni a, nangni zawng in thawhchhuah liau liau a ni a, a hlut pawh a hlu zawk fe ang chu. Keini zawng kan thawhchhuah dan te hi a hahdam lutuk a, a hman lam te hi thiam a har asin" tiin a chhang bauh bauh a. Tlangval inleng tur dangte chu an rawn lut khawm trak trak a. Tlangval pa te lam rawn lut chuan, "Zanin zet chu kan khawtlang chhiat tum a ni e, Lalpuia nu damlo tun mai khan a chatthla a" a rawn ti lut a. "E khai!! Kan beng a va var lo tehlul em! Khawnge Mitthi in lam ka va lang ve phawt ange" tiin Pu Duhawma chu a indah fel sawk sawk a. A chhuak zui ta a. Reiloteah mitthi dârkhuang a rawn ri vûng vûng nghal mai bawk a. Tlangval thenkhat pawh chu mitthi in lama kal turin an chhuak phak phak a, Rinsangi inkhawm bang pawh a thiannu nen an rawn hawng thleng a. "Ka nu, mitthi kha in lo hre ve maw?" an rawn ti lut nghal a. Thli a thaw vûk vûk a, khawlai vaivut te chu a chhem lêng ur ur mai. Ruah sur tur intham a nih ringin pawn lama thu thingpui lûm te pawh an indah fel sawk sawk a. Inchhung lamah erawh tui tak maiin khawhar hlâ an la sa that that thung. Rinsangi tlaivar zo ta lo mutchhuak chu zah pawh sawi lovin Zahawma nen pawn lamah an rawn chhuak a. Zahawma hi Rinsangi ngaizawng ru deuh tu a ni a. Mahse Rinsangi hian thian anga a kawm tlat avangin a duh thu engmah pawh a hrilh ngam lo va. Tin, Chhungkaw khawsak harsa ve tak atanga seilian maiin an khaw Middle School Headmaster fanu meuh chu phû lovin a hre bawk a. Mahse Rinsangi lo chu nula han kawm a nei lem lo thung. "Thlî ava thaw nasa em em ve! Kan haw tho dawn em ni ang?" tiin Zahawma chuan Rinsangi chu a râwn a. Rinsangi chuan tihngaihna a hre bik lo tih hriat zetin thli thawin vaivut a chhem len lak atanga inven tum chuan Zahawma phenah a biru zak zak a. "Ka hre lo, i tih dan dan animai" a rawn ti thei hram a. Haw tura chhuak ve lem han luh leh chu an hreh tâk deuh avangin an haw lui ta tho a. "Kan hmaa lawka kal saw tunge? Pu Vawra a ni tiraw?" Rinsangi ngun zetin a en a. Zahawma chuan,"Ni mai thei, mitthi-inah khan ka hmu ve si lo va, a va leng rei awm ve le"a lo ti ve satliah mai a. "Ka pu Vawr, ka pu Vawr, min lo nghak teh" tiin Rinsangi chuan an âu a. An hmaa kal chu a ding chut a, muangchangin a rawn leh hawi a. Muangchangin a kal leh nghal ta mai a. Rinsangi chuan, "Hawh ûm ang" tiin ûm phak ngei tum chuan hmanhmawh takin an kal nghal hlawk hlawk a. Mahse an ûm tih a hria nge, a kal chak ve sawt mai bawk a. "Min lo nghak teh" an tih pawh chuan a nghak duh chuang hauh lo. Thui vak lo an in ûm hnu chuan In an thleng dawn hnai ta a. Mahse an mi ûm, Pu Vawra ngei nia an hriat chu kawngthlang thim zingah a pêng ta daih mai a. A penthlakna lam lah chu tûikhur kawng a ni lehnghal a. A pèn na zâwn an thlen chuan an han ding ren rawn a. Mahse Pu Vawra chu hmuh zui tur a awm hauh lo. Rinsangi ngaih a tha lo ru ngei mai, "Tinge Pu Vawra chu le! Ngati nge he lam lamah te a kal daih a?" a ti nauh nauh a. Zahawma pawh chuan,"A mak reuh ngei mai! A zia hi a mak ve thin hrim hrim in ka hria" tiin a lo tui hnih ve vat a. Rinsangi te in chu an thleng dawn ta reng mai. An inkawt atang chuan Rinsangi ngaihtha lo chu Pu Vawra In chu a zuk en leh kher a, a meng phâwk ngei mai! "En teh, Zahawm, khu Pu Vawra chu a awm reng alawm, kawngka a kalh reng reng lo" tiin an bathlara light an dah êng atanga Pu Vawra in chiang tak mai a lang chu a kawk a. Zahawma pawh chuan mak ti hmel zetin "I zuk enchiang teh ang" ti leh chhukthlak a rual ta nghal a. Rinsangi pawh chuan engdang sawi lovin a zui ve nghal vat a. Bâng chhàn atang chuan Pu Vawra, tui tak a mû hnàr ri kûk kûk thawm chu an ngaithla dun ren rawn a. Bihthlak han tûm ngial mahse chhunglam chu a thim thiap avangin engmah an hmu thei lo va. An in en a, an in nuih ringawt a, beidawng zetin an let ta hnu hnu a. Rinsangi chuan,"Thingpui lo in kawi leh ta che, min thlah lawmthu sawi nan tal pawh" tiin Zahawma chu a sawm zui a. Zahawma pawh chuan nui rah rah pahin "Zan rei tawh viau mahse ka hnâr lo mai teh ang" ti chungin thingpui in tur chuan a lut kâwi veleh ta a. Thingpui in pah chuan an hmaa kal, Pu Vawra ang tak chu tunge ni ang tiin an sawi dun mai mai a. Rinsangi chuan, "Pu Vawra ang viau mahse a kâl chak dan kha Pu Vawra niin ka hre lo deuh réng a ni" tiin Pu Vawra chet muan zia chu a sawi siap siap a. Pu Duhawma chuan vawksa chhum sa chu a chân sawm nuap nuap a, "Bawiha, i pu zuk ko taw'h, chaw i ei ang u" tiin Rinsangi nau chu a tir a. Chawhmeh hmûi lam an hmeh dawn hi chuan Pu Vawra chu chaw eiah an ko reng reng thin a, Rinsanga nau chu a tlân thla nghal vat a. Chutih lai chuan Rinsangi pawh phak zetin a rawn tho ve mek a. A nu chuan,"Nizan in meng rei awm sia, ka kaitho duh ta lo che a nih kha" a rawn ti vat a. Rinsangi chuan hmâi phih phar phar pahin,"Kan tlaivar peih ta lo" a tih lai mek chuan Rinsangi nau chu rang zeta rawn tlan lutin,"Apu a awm hleinem" a rawn ti lut a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 26th, 2016, 3:51 pm

ZAWLNEI VÂWRA - 6 "Khawi lam lamah nge a lo vah chhuah leh tâk thin le! Tunlai chu Pu Vâwra hi enge a hriat ni? A inkhung thei lo ngei mai. Mitthi in lamah te a lo va thleng phei ve a ni ange, vawiin Biak In an khâr dawn tho bawk a, rei vak lo i nghak ila, a lo la hawn loh chuan kan ei san mai dawn nia u" tiin Pu Duhawma chuan a sa zai hlep chu a chhunzawm mawlh mawlh a. Rinsangi chuan a hmâ zana an thil hmuh chu a lo ngaihtuah zui nauh nauh a, sawi chhuah a tum dawn lai mek chuan a pa chuan,"Pu Vawra chu i nghak lo mai ang u, Mami kawng han khar fel la, chhung inkhawmna i hmang dawn ang hmiang" a rawn tih leh takah chuan sawi ta lovin kawngkapûi chu a khâr tha zui ta zawk a. Chhung inkhawmnaah chuan Pu Vawra chu Pathianin an missionary-na tur atana a ruat, an enkawl tur liau liau atana an thenawma a awm tir a nih thute chu thiam zetin a sawi kual a. Mi nuihzat leh hmuhsit thin ni mahse Pathian lakah chuan in ang vek an nih thu a sawi lai chuan kawt lamah pu Vawra khuh thawm an hria a. Rang takin Rinsangi chuan kawngka hawngin ava en a. Mahse tumah a hmu lo va. Mak ti tláng zetin tukthuan chu an kîl zui ta a. Raw chhîp, kûl zan mai chunga Tlâiberh fu chu Rinsangi chuan a thlir vang vang a. Chutih lai chuan Zahawma leh a thianpa thlan lai hawng chu an rawn lut hlawl mai a. "Rinsang, tlangval chhâwl hâl tan thingpui han siam ta che" an rawn ti fiamthu lut hlut a. Rinsangi pawh chuan nui var var chungin, "Lo thu r'u, ka nu mitthi inah kal a duh ve sia, thingpui lûmna lamah pawh ka lang thei lo" a lo ti ve vat a. Zahawma chuan,"Nizan ka haw lam kha thil mak zet mai ka tawng pek a" tiin a thianpa zun lai chuan Rinsangi chu a hrilhru sar sar a. Rinsangi chuan hre châk hmel zetin "A nimaw! Eng thil nge ni ta?" tiin a lo zawt let vat a. A aia zawi leh zual zawk hian,"Pu Vawra kha ka hmu leh, kan intâwk a lawm. Kan bia a, mahse min chhang lo. A ina hnàr kha tunge ni ta ang?" a ti zuai raih a. An thianpa zung zo a lo chhuah tâk avangin sawi zawm lovin an aw an thian ta kharh kharh zawk a. An rilru erawh a inhmuin sawi zawm an châk dun nasa mai a. "Lalruatsak! Rawn hawng vat rawh, chaw i nghei thei em ni? Chawhmeh kan ei zawh san vek mai tur che ania" tiin a nu chuan a khawlai awm chu a au tawn tawn a. Ruatsaka chu phûr lo zetin a thutna atang chuan a tho hnâ hnâ a. Muangchangin in lam a pan a. A nu thîng seng pah chuan,"Hmanhmawh ve ta thin che, khati khan naupang an kal chhaw chhaw ngai lo. Engmah hi tih that duh nei reng reng lo mai" tiin a hau tawn tawn a. Chaw ei lai chuan Sanghleia chuan,"Ruatsak, Zirtirtu Thanga bulah ka sawi tawh kha, 'kum a laklawh viau na a, rawn kal phawt teh se' a tih che kha. Naktuk atangin Sikul-ah i kal ve tawh dawn nia. Sava veh tur te khan i lo chhuak leh daih ange" a ti malh malh a. An hmarcha rawt chu a thak deuh nge ni, a sî hliam hliam a. "Chu hmârcha mai mai chuh ka hâwp zaw hial dawn emaw'n chu le!" a ti zui tan tan a. Ruatsaka chuan engmah a sawi lo nâ a, a hmel chu hmu se chuan Sikul kal chu a hreh hle tih a lang reng mai. Thian a kawm tam lova, a kawm ve chhun lahin 'velhbûr' a ni ziah mai bawk. Mahse Hmunmawia erawh a kawm thei ve em em thung a. Ani hmuhsit ve na chu engahmah a ngaih loh vang a ni. A aiin hûai zawk mahse a hlâu lutuk bik lo a, chuvanga inkawm thin an ni. Tin Hunmawia te chhungkaw khawsak chu an ni lakah chuan a harsa em em zawk bawk. Inkhawm bang chu Pu Duhawma te inah an lut khawm leh trak trak hlawm a. Rinsangi inkhawm bang chu Zahawma nen an inzui hawng ve mek bawk a. Midang an rûala kal an awm ve avangin engmah sawidunna hun pawh an nei meuh lo a ni. Mitmeng fîm kak mai leh lian kelkawl, bula mi te melh nâ tham zet nimai tur mitmeng pawh hi hmeltha ten an put hi chuan an duhawmna ti belhchhahtu a ni a. Hmai tung lam mah nise a khabe kûal nalh tak chuan a tlangval tam tak mit a hîp em em thin. A hnar ngul sâng vah chuan Tribal thlah a ti ang lo mai nilovin a kianga awmte zinga tilangsar em em tu a ni thung. A nuih zawnga a ha var tak lang that thinte chuan a zaidamna leh a ngilneihna thui takin a târlang thei zu nia!! Mikhual tam takin fiamthu titak a, "Hetiang thingtlang chengker-a cheng tur hi chuan i uihawm mange an ti châwk thin reng a ni. Hmeichhe tam tak ang bawkin lehkha lamah erawh a hlawhchham ve chiang hle. Pawl sarih a pass thei bik lo a. Mahse chu chuan a duhawmna chhete mahin a tihchhiat phah lo. Zahawma lo pawh ngaizawng ru fe fe tam tak an awm a. Mahse an khuaa mi lian pâwl an nih avangin tuman an 'chhâi' ngam lo a ni. Lalngsar taka ngaizawng ngamtu erawh nula mi zet mai, Laldawnga, Sipaia tang a ni a, a rawn chhuti hi tleirawl te a nih atangin a birh tlut tlut thin. Mahse tumah biak that bik leh biak chhiat bik a nei ngai lo thung. "Zahawm, buh tuh in zo ve tawh em? Lâmhnai nge in chan Mualvet?" tiin Pu Duhawma chuan a zawt seuh seuh a. Zahawma chuan, "Lâmhnai kan pawt fu hlauh a, tun kâr hi chuan kan zo thei tawh ang ka ring" tiin a chhang a. Khawhar In kal tura insiam mek a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)