"MITTUI LUANGIN KIR AN REL LO" BY Dwm Pachuau (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: "MITTUI LUANGIN KIR AN REL LO" BY Dwm Pachuau 1 -148

Unread post by Ngaia » October 29th, 2017, 1:35 pm

"MITTUI LUANGIN KIR AN REL LO"

episode - 150

Rothuama tihngaihna hre lo chu a hawi kual that that a, vawi leh khatah ring zet mai hian Chhingmami chu a han au nghek mai a. Mahse, chhanna erawh hriat tur a vang hle...

Rothuama chuan buaina dang hmachhawn tawh rih loh chu finthlaka a hriat a vangin an rawn nanchin hmaa insaseng fel tumin an rawn kal lohna lamah chuan a kal ta ngawt mai a.

Mahse, Rothuama chu a rilru reng reng a nuam thei si lo. A rilruah Chhingmami ngawt mai chu a awm avangin ler leh te a han tum thut thut thin. Mahse, ngun taka a ngaihtuahin dik berin a hre si lo.

Pan lam tur ber pawh hre lo chuan a kal a kal ta mai a. A eilruah Chhinhmami bak a awm thei meuh lo. Eng vanga lo bo leh daih mai kha nhe a nih ang tih ringawt mai chi a ngaihtuah a. Zan thilah chuan han zawn chiam ngaihna a awm der mai si lo.

Meichher chhit en ngam niin a hre si lova, rhim thamah chuan a kal ngat ngat a, inchhuih palh chang pawh a ngah kher mai. Thawm lah chu a reh hian a reh bawng vawng mai si a, Zan lama chawzawng chi leh Chingpirinu hram takngial pawh hriat tur a awm lo...

Rothuama chu a kal a kal a, khawvar dawn lam hnaiah chuan a chau tawngkhawng lutuk chu leiah hian a thusawp ta hnawk mai a, a mit chhingin thawk a han la ham ham a.

A ban puam an kahna chu a han dap a, na ti lo mahse thisen chhuak chuan a tichau ve raih mai niin a lang. An kap tlang chiang kher bawk a thisen pawh a chhuak duh kher mai.

Mahse, Rothuama chuan an kap hliam a ni tih pawh a ngaihtuah duh mauh lova, a hun kal tawh leh a hma hun tur awm ang te chu a han ngaihtuah ve ngial a. Mahse, dam chhan tur nei hian a i hre tawh tlat lo. A rilruah Rami pawh a lo lut ve zawk a...Mahse, a ngaihtuah zui duh tlat lo a ni.

Thil tamtak a ngaihtuah kual a, a naupan hin lai te, a tlangval chhuah ve tantir leh Chhingmami nena an inzui ve thin lai te, Chhingmami keimi a nih an hriat hnua a nun inthlak dan zawng zawng te, a thian tha ber nena an inkar a zauh phah dan te, alo hmangaih ve em em a thianpa nupui ani ta daih mai te leh engkim mai chu a nhaihtuah a.

Chutah, a nu leh a farnu a mitthlaah an lo lang nghal a, Chhingmami vanga an nunna in a tawrh phah dan te, an chhungkua an mang phah dan leh Liankima lal anih dan thlengin ngaihtuah loh a nei lo.

A chang leh Rothuama chu a thaw leh hak thin a, a chang leh a nui chhuak huk a. A chang leh thinrim em em ni awm tak hian a insehruh a, a chang leh rilru hah tih hriat tak hian a han hui leh pap thin bawk a. Enge a ngaihtuah a, enge a rilruah awm ber tih pawh hriat a har ngei mai....

Chutiang reng renga a nunhlui a chhui kir chhung chuan a hriat loh karin alo muhil ta a. Silai puak thuai thawmah chuan Rothuama chu a harh chiang ngei mai le....

A han harh meuh chuan khua pawh alo var fel vek tawh chu niin...silai rikna lam lah kha khawi lam nge tih a hre der mai si lo. A han ding chhuak vat a. A awmna lai chu a han hawi kual thuak thuak bawk a, chutah a awmna lai chu an khaw hlui, Chhingmami te khaw ram chin a ni tih a hre ta chauh a.

Ama hriat tham lek hian "E khai aw, kan khaw ram chin ka lo thleng der anih hi." a han ti chhuak sap a. Mahse, chumi q sawi zawh rual chuan hmelma ram chhung a dai lut a.ni tih a inhrechhuak nghal vat bawk a. Chu chuan Rothuama vanduai zia leh a dinhmun khirh zia a tilang chiang kher mai. Amah Rothuama ngei pawhin chu chu a hriatin a lung a chhe ve lek lek a.

Mahse, a nuna thil thleng zawng zawng leh a thil tawn turah chuan engmah sawi theih anei lo tih a inhriat chian em avangin a insum hram hram a.

Silai rikna lam nia a hriat lamah chuan a kal ve leh ta mawpai a. Khawiah nge a kal dawn a, eng titura kal nge anih pawh a inhre reng reng lo. A kal mawl ve tawp ringawt mai a ni.

Mual hnih vel a kal hnu chuan a beisei loh tawp mai thil a tawng ta. Sakei tana thang an kam thin Kar an tih hi ava hmu ta a, chumi bul lawka Chhingmami lo thal der mai a han hmuh chuan Rothuama meuh pawh a trim sawk mai le...

Fimkhur takin kar awmna lam chu a pan hnai hriau hriau a, thawm engmah a hriat loh avangin Chhingmami awmna lam chu a pan ding nghal a.

A bul ava thlen chuan Chhingmami mar chu a han dek nghal a, a lo la thaw tih a hriat chuan a lawm kher mai. Mahse, kar ina a kahna zawn, a malpui chu a hliam thuk hle tih a hre nghal.

Chhingmami chu a paw bahlat hnawp a, chulai kar awmna atanga hla thei ang berah chuan a kalpui nghal a.

Mahse, an kar kam a per tih hriain Chhingmami te khaw pasaltha rual tamtak leh mipa puitling chin chu an rawn thawk chhuak ta mup mup mai chu niin...

Rothuama chuan an thawm a tang ringawt pawhin an tam hle tih a hre nghal. Chutah thingkung remchangah lawnin a han thlir a, a thianpa leh an lal ni bawk Liankima pawh alo tel ve mauh mai le, chutah nizana a kahhlum ve hman tak loh, tlanchhepa ngei mai khan hma a rawn hruai chu niin. Rothuama tan chuan dam hi thihna anh tho a ni ta ber mai......cont

@Dwm Pachuau



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 31st, 2017, 8:01 pm

"MITTUI LUANGIN KIR AN REL LO"

episode -151

Rothuama chuan thawk a han la hawk a. Chhingmami engmah hre lo melh chung chuan "Hei hi nang leh keia hringnun tawpna tur chu a va ni tawh mai awm em. Min dem suh aw, ka theihna zawng zawng chu ka chhuah ve a nia." a han ti sap a. A bulah chuan thuin Chhingmami kut chu a hmer vawng vawng a...

Tlanchhiat a tum lova, tlanchhiatna tur a neih loh bakah tlanchhiatna chhan tur a neih reng a hre lo. A hmaa thil lo thleng tur chu lo nghah chu a tih tur neih chhun a ni tawh. Thih hlauhna a nei lova, zahawm taka thih chu a damchhan neih chhun a ni bawk.

A silai chu ngun taka thlir vang vang chung chuan "I hna chu hlenin a awm dawn ta e. Ka tan i rinawm thin a, a tawp thlengin min pui ang che. Chu chauh chu ka ngen ang che." tiin a be mawlh mawlh a.

Chutia a phun sep sep lai chuan Chhingmami chu a rawn che hrut hian a hria , Rothuama chu a meng nghal kawk a. Chhingmami chu sawi nawk nawk chung hian a ko vak vak a...

Chutah Chhingmami chu rawn meng diar diarin Rothuama chu a rawn melh a. Tawng chhuah tuma a ka a rawn an chuan a ka chhung chu thisen hian a lo bual nuaih mai chu niin...

Rothuama chuan "I tha em? Engti zia nge ni ta, i chungah enge thleng?" tiin a be nghal mawlh mawlh a. Chhingmami chuan Rothuama kut vuan tawk tawk chung chuan a mit a han khap sawk sawk a. Chau tih hriat tak mai hian a han nui lui sak bawk a.

Zawi sap hian "Uthuam, nizan khan ngawi renga vehtu che leh thah tumtu che kha an awm a, chu chu nang hian i hre si lova..." a thil sawi chu a han chawl leh rih a.

Rothuama chuan mak ti tak mai hian a lo ngaithla a, Chhingmami chuan sawi chhunzawm lehin, "Khang mi pathum te kha hreh viau mah ila thah chd an tum miau avangin ka sehhlum ta a nihkha. Chuan, i kah hlum tak loh tlcnchhia kha ka um ta, mahse ka vanduai a leiah an kar kam kha ka dai per palh ta a, heti hian kan inhmuh leh phah ta anih hi." a han ti a.

Rothuama chuan Chhingmami thusawi chu ngun takin a ngaithla a, mak a tiin ngaihthlak hrehawm a ti ngei mai. Mahse, Chhingmami hian dawt a sawi ala hriat ngai loh avangin a ring tak,zet a ni...

Rothuama, pasaltha huaisen, mihrang sahrang hmaa zam ngai lo leh tlanchhe ngai lo, tap ve thei lo leh mittui pawh nei ve theia mawi lo chu hnuailam bihin a kun ngar a. A beisei loh leh a inrin hman hma hauhin a mittui a rawn far ta mauh mai...

Chhingmami chuan Rothuama chu a han hmer nghet sauh a, "Uthuam ka thusawi hi ngun takin lo ngaithla teh, sawi duh pakhat lek ka nei a nia." a han ti sap a. Rothuama chuan "Duat taka lo kuahin " I duh apiang sawi rawh, ka lo ngaithla ang." tiin a chhang a.

Chhingmami chuan "Uthuam, nang nena kan fapa hi i zawnchhuah a ngai a ni. Fa ka nei tih hi tuman an hre lova, ifa ani tih phei chu nangpawhin i hriat loh kha. Mahse, i fapa ka hrinsak che a, a dam anih chuan tunah hian kum a tling ve tawh ngei ang. Khawiah nge a awm ka hre lova, ka thihsan hunah che pawh khawngaihin rawn zawngchhuak la, hmangaihtu nu leh pa a nei tih rawn hrilh rawh aw." a ti ta mai.

Rothuama chuan chu thu a han hriat meuh chuan a thinlung chu lawmna leh lungchhiatna in a khat nghal a. Chutih rualin thinrimna in a rawn pawlh nghal vat bawk a, sawi tur ber pawh a hre lo. Chhingmami chu a en tlawk tlawk ringawt mai a ni.

Chhingmami chuan "Min dem suh aw khawngaihin, ka dinhmun hian a zir lo em a ni. Chu chu min hriatsak tiraw, khawngaihin i zawng chhuak ang tih min tiam rawh." a ti tawk tawk a.

Rothuama chuan mittui tling piau chung chuan ka tiam a che, ka zawng chhuak ngei ang." tiin a bu nghat nghat a.

Chhingmami pawh insum zo tawh lovin a mit atang chuan.mittui a rawn luang chhuak tiam tiam a. Rothuama chuan lo hrukhulsak zelin a kuah vawng vawng a. Mahse, a hruhul seng ta bik lo. Chumi a hnekin a mit atang chuan dan rual lohin a mittui a rawn hnam chhuak ve leh ta. Chumi dang tur pawh chuan a kut chu a indaih tawh ngang lo a ni...

An pahnih chuan insum tum engang mahse an insum zo tawh ngang lo a ni. Chu chu an mittui luang chhuak ve ve infin luan kir zai rel lo chuan a sawifiah chiang ngei mai.

Chhingmami chuan "I hmuh hunah chuan min han biak ang a, ka hmangaih thu hi i rawn hrilh dawn nia. Tin, mi zawng zawng aia chhuanawm pa a neih thu hi rawn hrilh la, ka thlanah i rawm hruai ngei ngei bawk dawn nia aw, tichuan ka thlarau talin ka lo kuah ve thei mahna." tiin a mittui chu a dir zung zung a.

Rothuama chuan "Duh tawk tawh rawh Chhingmam, tikhan hahchawl la. Kawng engkimah khan i inngaidambtawn teh ang. Tunah hian i pasal leh a pasaltha rual tamtak an lo kal mek a, thlamuang takin i pasal ang chhungah i hawng leh tawh dawn alawm, i pasal leh a naute ho lak atanga ka damchhuak thei anih phawt chuan kan fapa erawh chu ka zawng chhuak ngei ang." a han ti a.

Chhingmami chuan "Tunah tlan rawh, khawngaihin min kalsan rawh. I thih ve kher hi a tul lo, thi thei ila ni lo a nia tlan rawh. An that ngei ngei dawn che tlan rawh." a ti tawk tawk a.

Mahse, a chhanna dawn chhun chu "Ka tlanchhe ngai lo." tih a ni chheu mai. A tilui thei dawn lo tih a hriatin Rothuama chu a kuah ngawih ngawih a. Rothuama hmel leh mitmeng erawh chu hremhmun ang mai a lo ni hman tawh, eng sa leh ral tan mah hmachhawn chakawm a ni lo, tichuan Liankima leh a pasaltha rual an lo thleng dawn ta. Rothuama pawh peih chikim in a inpeih ta e....cont

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 31st, 2017, 8:02 pm

"MITTUI LUANGIN KIR AN REL LO"

episode-152

Rothuama chuan a dam chhuah a ring bik lo. Mahse, tlanchhe ngai lo mihring anih miau avangin a tam thei ang ber thih chilh a tum nghet bur mai. Ni dang anga lo lambun leh lo kah hmasak pawh a tum buai lo. An lo thlen nghah a, Chhingmami chu nunhdam ngeia hlan hmasak a duh tlat.

Tichuan kar loah Liankima teho pawh an rawn thleng chawpchilh ve nghal a. Rothuama leh an lalnu Chhingmami an han hmu thut mai chu an hmel a danglam nasa hlawm ngei mai.

Liankima phei chu a dang sawp sawp thei hial a. Tawng mai ngaihna chang pawh a hre lo. Rothuama chu a en hau reng ringawt mai a. A pasaltha te lah chuti bawk, an lal thupek lo chuan tumah chet zai rel pawh an awm lo.

Chutah Rothuama zawk chu rawn pen chhuakin, "I dam maw thianpa," a han ti chher chhak a. Liankima chuan a chil lem khulh pahin "He laia hmuh che u hi ka lo inring miah lo, ka dam a, kha nangpawh i hrisel hle mai." tih pahin Chhingmami chu a han melh a.

Rothuama chuan zawi leh fiah fak si hian "Kan hriselna lo inchen vek lo hi chu a pawi ngawt mai." a han ti bauh a. A awmzia chu ngun taka ngaihtuah tham anih avangin Liankima chu a hawi he haw a.

Rothuama chuan dim taka pawm kangin Chhingmami chu Liankima bulah chuan a pawm phei a, "Hei thianpa, i nupui duh tak hi dim leh duat takin lo enkawl ang che." tiin hlan a han tum a. Liankima chu a che eih lo. A pasalthate chuan Rothuama kut atang chuan la thlain an bawihsawm nghal thuai thuai a.

Liankima chuan "Ka nupui hi engtiang chiahin nge ilo khawih? a han ti bawl mai . Chutah chiah chuan boruak a tang ta at mai. Rorhuama lah chuan engah mah ngai lo niawm tak hian zial a han tan khu luai mai a. Chutah Liankima pawh en chuang miah lo hian " I rin dan dan a ni mai ang chu thianpa." a han ti liam puat a. Kal tum niawm tak hian Liankima teho chu a hnungchhawn nghal a.

Chutah Liankima chuan awka vin that hian "Ding nghal rawh Rothuam, ka thian tha berah ka lo ngai thin che a. Pasaltha huaisen leh tawhkhirh ber inih pawh ka hai lo. Mahse, he ka khawtlang pawi i sawi hnem tawh zia ngaihtuah hian dam i phu tawh lo, tunah tak hian i nunna hi ka kutah a awm tih i hai ka ring hauh lo." a han ti khur hlawk hlawk mai a.

Rorhuama chu a lo nui sak duh chauh a, "Ka thih leh dam hi Khuavang kutah chauh a awm niin ka lo ngai thin a, chu i kuta awm a ni maw lo ni reng chuan. Chuti anih chuan ka chungah i lo tha hle anih dawn chu a, ka dam rei ta em mai." a'n ti el nghat a...

A tawngkam chu Liankima run tawk a tling ngei mai. A hachang thial ri rawp rawp chunh chuan a silai chu a han lek kang a. "Rawn inher rawh, mi an hnung lam atangin ka kap ngai lo a nia
" a han ti vin tuarh a. Rothuama chu chet pawh a che eih lo. "Thiana, i ngam tawk anih ka ring e a, tikhan min han kap ta che." a lo ti sam leh et a.

Liankima thinur lutuk tawh chuan, "I thian chu ka ni thin, mahse tunah tak hi chuan ka hmelma i ni tlat. Pasaltha leh zahawm taka i thih theihna tur hun tha ka pe che anih hi i hrethiam em?" a han ti leh hrawk a.

Rothuama chu rawn hawi letin "Zahawmna chunh chang i sawi em ni ka thian, zahawmna diktak chu min han hmuh tir ta che. I hmelma leh ral ka lo ni ta rau rau anih chuan mipa dik tak ral beihin min rawn bei la ti nia..." tiin a ding kak tra mai a.

A mit chu zim san hian a meng a, Liankima chu a en tlang vek thei hial ang tih tur khawp hian a melh a, a mitmeng hmuh ringawt pawhin pasaltha satliah chu zam lohna chi a ni miah lo.

Liankima chuan sawi mai tur a haihchham ta tlat, Rothuama chona lah chu atan em chuan chhan ngam chi a ni lul si lo. Chutih lai tak chuan khuavang kal lai an tih ang mai hi a ni a, thawm renh reng hriat tur a awm lo. A reh hian a reh vawng vawng mai...

A reh vang vang hnu chuan Rothuama chu lo tawng chhuak lehin, "I ngam ka ring lo reng a ni. Hmabak hlen chhuak turin ka kal dawn a, a ngam chuan ka hnung lam atangin min lo kap dawn nia." a ti thawp sat a. Tichuan in herin a kal ta nghal a...

Mahse, a kal liam dawn tepa Lianmawia silai puak thuai chuan Rothuama dar chu a verh tlang ta zawk mai le...

Rothuama chu a ding lawih a, a hmalama silaimu rawn chhuahna chu melhin ama hriat tham lek hian "Nang uicho dawihzep pa, indona dar chu i vaw ta nge nge maw" tiin silai rik leh hma chuan a zuang sawn zawk a. Lungpui phenah chuan lum lut nghalin a silai chu a han tin ve ta nghal a.......cont

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 31st, 2017, 8:03 pm

"MITTUI LUANGIN KIR AN REL LO"

episode-153

Rothuama silai puak thuai chuan Lianmawia pasaltha chhuanvawr ber awm chu ava verh tlang hawr mai a, che zui tur reng reng a awm lo. Chu veleh Liankima rawn hruaiho chu hmuntinah tlan darhin phen tur an zawng nghal a. An tanhmun theuh atang chuan silai a puak ta thuai thuai mai.

Rothuama chuan a diar khim lai chu pawtthlerin a hliam chu a tuam mawlh mawlh a, a hachang thial rap rap chung chuan "Vawin chu min thlahtute inchhuan larhna tur leh Sapui hliam zah rawihna tur law lawin chet i han la teh ang." a ti chhuak sap a.

An intam hleih zia a hriat avangin a silai chu a thlawna kah chhuah a tum lo reng reng. A kah chhuah apiang chu a thlawn lo reng bawk a. A kah hlum a piang mai chu a saihlum chhiar nghauh nghauh mai.

Liankima khaw pasaltha leh a thuihhruaiho chu tanhmun nei tha lo zawk leh kah fuh tur tam zawk an ni bawk a an hek hauh hauh kher mai.

An chan a tha lo tih hriain Lianmawia chuan in tanhmun kha thlak ula, phen tur tha deuh zawng rawh u. Thah ngei ngei tur, a hliam tawh a. Hlau hlek suh u, that lo chuan tumah kan let tawh dawn lo." a ti tuarh tuarh a.

Lianmawia chuan a hote fuih sauh sauh chung chuan ani thung chuan Chhingmami chu a bawihsawm nghal a, a pasaltha pahnih chu kovin "Nangnin ani hi rang takin hruai haw ula, in inthlen veleh rawn tlan let leh nghal ang che u. Tunah kalpui nghal rawh u." a ti a. A sawi zawh rualin Chhingmami chu an kalpui ta nghal a.

Lianmawia chuan a naute hnenah chuan, "In tanhmun kha sawn zel ta che u mimawlho, panhnai ula hual chep rawh u. Sawtiang mipakhat hliam tuar mai mai saw inva kap hlum har ve. Veh hnai ula, that vat rawh u." a ti leh tuar tuar a.

A sawi ang chuan a hote chuan an tanhmun an thlak leh nghal a, hmalam panin Rothuama chu an hnaih hret hret zel a. Mahse, a fimkhur lo zual leh a hmasa apiang chu an thal leh tawp thin.

Rothuama hliam atang chuan thisen a chhuak duh hle mai a, mahse chu chu hre lo ang maiin Rothuama chu a che na rep rep kher mai. Mahse, an tam hneh em avang leh an rawn hnaih chilh tawh avangin Rothuama chan a chhe telh telh tih chu hai rual a awm ta lo...

Chu chu hre ranin Rothuama chu a han hawi vat vat a, a tanhmun sawnna tur remchang lah chu a vang kher mai bawk si a, a thluak a lum ta pup mai. Mahse, Rothuama chu a zam chhete lo.

A tawmna lungpui atanga a thlang hlam sawm zeta hlaah chuan thingkung lian zet mai a ding a. Chu chu hmanhmawh takin pan ta se an lo kap fuh hman ang em? Mahse, chu chu a duhthlan tur neih pakhat a ni.

An kap fuh hman anih chuan atan thih bak hmabak a nei dawn lova, a tawmna atanga a chhuah loh chuan an rawn hual chep anga, a thi dawn tho tho bawk.

Rothuama chuan a silai chu tin pawh tin tha hman lo chungin a han hmet per leh nghal a, amah lo hnaih bertu chu a rak thawt a. A thi tur chalchang chu hmuh hrehawm an ti hlawm ngei mai.

Ring leh pawr chhak mai hian Rothuama chuan "Rawn hnai zel rawh u, kei min hmachhawn chu luzuar in ni. A hmasa apiang in thi hmasa a ni mai. Rawn hnai vat rawh u." a han ti a. A thusawi leh tawngkam chuan Lianmawia hote chu a ti tim deuh nge, an tawi ta deuh hrat mai.

Dik tak chuan Rothuama hliam tuar chalchang leh a thinrim tawpkhawk hual beta aluh chhuahtu nih tutan mah thil chakawm ani tawp lo. Chu ai chuan keipui hliam tuar bawhchilh pawh an thlang zawk hial ta ve ang.

Chutia an tim deuh lai tak chu remchangah hmangin a tawmna hmun atang chuan Rothuama chu a rawn dawk chhuak nghal zawk a. Lei a thlen leh hma chuan a silai chu hmet puakin chu silaimu chhuak chuan Lianmawia beng ava chhawk thawt mai le.

Lei a thlen rualin Rothuama chuan a taksa chu a ti tawm hlawm vak a, bial chai hian a lum nghal a. Silai a puak nghal thuai thuai a, Rothuama lum lai chu an kap fuh teuh ther ther ngei mai.

A tumna hmun a lum thleng tep ta, mahse Rothuama vanneihna chuan a tlin ta ngang bik lo. A taksa chu a lum pup a, a tumna hmun a lum thleng ve chiah a. A luhai chu a mitchhingin a han indawm kun vang vang a, a kawng an rawn kahna chu hupin thawk a han la hawk a...

A kawng chu chiang taka an fuh loh avang leh a thawi deuh anih avangin a ruh leh a kawchhung a khawih lo hlauh a. Rothuama chuan a ngai thutak duh hran lo. Rothuama chuan atanhmun a han siam tha leh a, Lianmawia te nena an inkar pawh a zau leh ta deuh e...

Rothuama chuan silai mu a han thun leh dawn a, chutah chiah chuan silaimu a neih tlem tawh zia a hrechhuak nghal. Lianmawia leh a hote chu paruk vel an la niin a hria a, a silaimu neih chu pathum zawng a ni si. Rothuama chu a meng zim san mai a, a kah ruah thak hnu pawha ala that mang lo anih pawhin a thawk tawp thlenga beih chu a tum chiang kher mai.

A silai chu uluk takin a han tin leh vang vang a, a kah tum ber Lianmawia chu a ding mar zawt a, thil hriatchhuah thut nei niawm tak hian a tlansawn ta thut mai a. Chu chu a hote chuan mak ti leh a ngaihna hre lo zetin an en hau hlawm a.

Chumi remchang chu lain Rothuama silai chu a puak thuai a, an zinga pakhat chu a eu nghal awrh a. Hreh zet maiin leiah chuan a hlawm nghal nawk a. Tunah chuan pali chiah an ni ta, pali leh pakhat...

Ala bang pali te chu an hawihai ta kher mai. Pasaltha leh an val upa te uaptu awm tawh si lo, an lal lah chu khawnge a kal dawn tih an hre bawk si lo. Anni pali lek, pasaltha leh huaisen tia han chhal ve ni si lo tan chuan Rothuama han hmachhawn zui zel chu tih chi rual niin an hre lo nge, vawi lehkhatah an insaseng ta daih mai.

Rothuama chuan mak a ti hle mai a, "Dawihzep hlawm lutuk mai, mipa pawh in nih hlawm nek loh kha. Dam reng tlak pawh in ni lo, ka that vek dawn tho che u." tiin a awmna hmun atang chuan a rawn tho chhuak ve nghal a.

An inbeihna lai vel chu a han hawi kual thuak thuak a, mihring nunna chu hmuntinah a thal phung mai a. Rothuama chuan amithahte silaimu chu laksakin tlanchheho chu a um zui ta nghal a. Mahse, a taksa hmun hnih ngawtah hliam a tawrh tawh avangin a duh ang ngawt chuan a oen chak thei awzawng lo mai.

Thui tak a kal hnu chuan a dang a rawn ro huam huam a. Tui in tur lah chu hmuh phakah a awm der mai si lo. Rei vak loah a khawhmuh a rawn vai tan a, engkim mai chu a hmu phe ruai tawh.

A hliam atang chuan thisen a chhuah reng bawk avangin a chau tawh hle mai a. Mahse, a hmabak ala hlen zawh miau loh avangin a pen lui hram hram a. Thui ngial a kal leh hram hram hnu chuan kawrte tui awmna a thleng ta hlawl mai.

Chau zet maiin Rothuama chu a thu nghal hnawk a. Tuisik chu a han lem nghal khawlh khawlh a, a hliam chu a theih ang anga silfaiin a tuam tha leh a, rei fe a chawlh hahdam hnu chuan a harh leh ta sawng sawng mai. Tichuan ahmabak hlen loh la awm chu zo law law tur chuan a kal leh ta a.

Khua pawh a tlai lam ta hle mai, Rothuama pawh a theih ang tawka hmanhmawh leh fimkhur si chuan a kal zel a, Ni tlak dawn suar suarah hian hmun zawl tha deuh a hi a thleng a, chumi piah deuh ruam a thlen leh dawn lai tak chuan thawm a hre ta tlat mai.

Rothuama chu a fimkhur zual sauh a, thawm dim taka pan hnaiin a silai chu kap mai thei turin a inring kher mai.

Mahse, chu hmun ava thlen chuan a tum loh tak mai thil ava hmu ta tlat mai. An inbeih tantirh dawna Chhingmami hruai hawtu pasaltha pahnih ruang ava hmu ta tlat mai.

Rothuama chuan fimkhur takin an ruang chu a han en chiang a, an thih danah mihring kuthnu anih loh avangin Chhingmami sehhlum ngei anih a ring nghal a. A rilruah engtinnge a awm tak ang tih a ngaihtuah lai tak chuan thawm dang a hre leh ta tlat mai.

A thawm hriatna lam chu a pan nghal vat a, a thil hmuh chuan Rothuama chu a tiphu zawk hial a. Lianmawian a nupui Chhingmami ruang alo tah lai a'n hmu chu mak a ti ngei mai. Rothuama chuan thawm a han nei keuh a, chutah rang lutuka rawn hawi chhuakin Rothuama chu a rawn en a. Rothuama pawhin ngawi rengin alo en bawk a.

Lianmawia chuan lungchhe tak mai hian "A awm tawh lo, a awm tawh lo a thi tawh." tiin a mittui luang chu a hru mawlh mawlh a.

Ngawi renga rei fe a din hnu chuan Rothuama chu a rawn tawng chhuak ve a, "Mahni nupui em chu i thah duh ka lo ring lo asin." a ti vawt raih a. Lianmawia chu a inhnit hlawp hlawp a, chutah rum mangkhenga Rothuama chu rawn melhin, "Min dem miah suh, ka thiam loh a ni lo. Thah kha ka tum lo, nangma thiam loh vek a ni." a rawn ti chhuak ta nghek mai a.

Rothuama chu thah tum tih hriat tak hian a melh kul mai a. "Engkim buaina bul chu nangmah ngei hi i ni. A hnuk chah dawn thleng khan kei ni lovin i hming hi asin alam, ka hua che thi rawh. Ka that ve nghal dawn che," tih pahin chempui nen Rothuama chu a rawn bawh nghal a.

Chu veleh Rothuama chu alo petek sawn vat a. Mahse, a hliamin a tihbuai tawh em avang chuan a duh ang tawkin alo bum hman bik lo, Lianmawia chuan a dar chu a rawn vai thawi thuak mai a. Thisen chu chhuak mahse pawi a tawk na lo hlauh.

Rothuama chuan a silai dahin a sahmima a chempui hriam zet mai chu a han phawrh ve a, chutah tanhmun siambrem nghalin "Thiana, tupawh lo chungnung se dam zawng a thlakhlelhawm tawh dawn lo anih hi. Kan za hian khuavang chuan min ngaidam mawlh rawh se." a han ti a. Lianmawia chuan a chhang lo.

Chu ramhnuai anchhedawng, Chhingmami ruang bulah ngei chuan thian insabeng nithin, in aihnah phahpui ngat thin te chu inthah tumin an insual ta ngat ngat mai. Chhingmamin rawn hmu ta se tu zawk hi nge a tan ang tih pawh hriat har tak a ni.

Rothuama chu hliampui tuar anihna a lang lo thei lova, a chan a chhe teuh thin ngei mai. Lianmawia chuan sah hlum ngei tumin a tha tawp chuan a han vai thin a. Rothuama chu a sat hlum teuh thin ngei mai.

Rei ngial an insual hnu chuan Rothuama chu a chau zawkah a tang ta tlat mai. Chu chu hrerengin Lianmawia chuan a thapui nen a han nawr leh tak tak mai a, Rothuama chu a bet rawk rawk mai.

Chutah Rothuama chuan a chan a chau tih a hai lo, a tha chu a han sawm khawm ve a. Lianmawia rah pial lai chu remchangah lain a han nawr let ve thung a. Mahse, a chempui hum lai a thlauh ta hlauh mai...

Chu veleh Lianmawia chuan Rothuama lu chhawk hmawk tum chuan a han vai a, Rothuama chu lo thu hniam thutin a chem thlauh chu a chhar nghal a. Lianmawian a rawn vai thelh zo chiah tih chuan hnung zawngin a han vai chho ve ta a. Lianmawia hnungzang chu a thler ta huang mai.

Thisen chu a rawn baw chhuak nghal hawk hawk a. Lianmawia chu mak tih hmel taka mengin zawi zawi hian a thingthi ta rup a. A tlu bawk khup tur chu Rothuaman lo vuan dingin, "Min ngaidam ang che." a han ti sap a. Leia tluk tir lo chuan a pawm kang a, a nupui Chhingmami bulah chuan ava mut tir a. "Mangtha mai u le, Pialralah kan inhmu leh dawn nia." a ti leh sap a. Rothuama chu thisen kai hnuang mai leh a hliam vanga chau tak chung chuan a ding awn lak lak a. A nun hman zel dan tur pawh ngaihtuah thei a ni tawh lo. Hawnna tur leh ka khua tih tur takngial pawh nei tawh lo anih avangin kalna tur lam bik pawh hre lo chuan muangchangin a pen ta chhat chhat mai a. Tichuan Chhingmami leh Lianmawia ruang riangvai tak chu kalsani a liam dawn tepah vawi khat a rawn hawi let leh zawk a. Tichuan a kal liam ta a. Chu ramhnuai khawhar tak chu a reh hian a reh ta vawng vawng a........

A tawp ta.......

@Dwm Pachuau

Link:
BBcode:
HTML:
Hide post links
Show post links

LN Kima Guite
Posts: 63
Joined: August 28th, 2017, 7:07 pm

Unread post by LN Kima Guite » November 4th, 2017, 10:01 pm

ngaihnawm lutuk e..a tawp ta mai si a ka ui lutuk tiin kan comment hram teh ang

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


TMAWII
Posts: 417
Joined: May 18th, 2018, 8:29 am

Unread post by TMAWII » August 8th, 2019, 2:31 pm

LN Kima Guite wrote:
November 4th, 2017, 10:01 pm
ngaihnawm lutuk e..a tawp ta mai si a ka ui lutuk tiin kan comment hram teh ang


A va han ngaihnawm bgai ve le. Ka chhiar chhuak ve chiah e.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)