"MITTUI LUANGIN KIR AN REL LO" BY Dwm Pachuau (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: "MITTUI LUANGIN KIR AN REL LO" BY Dwm Pachuau

Unread post by Ngaia » October 24th, 2017, 11:26 pm

episode-117

Kunga te pahnih hmel Rothuama puin a lo hmuh rual chuan "I thianpa chu khawiah nge a awm ang?" a lo ti thuai a. Kunga chuan a chal dawm vang vang pah hian "Ka va'n hrethiam bik lo ve aw. Ka rinna deuh ber thlanmual lam kha ka zuk en tawh a. A awm bawk si lo. An khaw lam te hi a pan a ni thei ang em?" tiin a zawt leh titih a. An ngawi vang vang hlawm a.

A pu chuan "Engmah sawi lova a kal mai chu ka ring lo." a rawn tichhuak boh a. Lianmawii chuan "A riahna tur awm ang leh ngaihzawng a neih awm te i hriatpui mial em?" tiin Kunga lam chu a'n hawi a. Kunga rilruah chuan Lali alo lang nghal vat a. Mahse, ani lah pasal alo nei hman tawh si avangin a ring ngam chiah si lo." a lu a thing na na a.

A pu chuan "Tunang hun khirh leh harsa a hmachhawn laiin chutiang hmeichhia mai mai a ngaihsak awzawng lovang, sawi loh tur tur hi lo sawi ve suh." tiin Lianmawii chu a han khap a. Lianmawii chu zak takin a kalsawn ta daih a.

"Engpawh nise, a ngaihtuahawm lo turah han ngai phawt ila. I thianpa hi zawng hriatthiam a har a nia. Vawin lam te eng nge thawh i tum?" tiin Rothuama pu chuan Kunga chu a han zawt a. Kunga chuan "Vawin te chu engmah thawh ka lo inrilruk lo, han inkawmna hun pawh kan la nei si lova ka rawn leng ang chu ka lo ti a." a han ti a.

Rothuama pu chuan "Ni e, ani lusun khawhar nen thian a mamawh lai tak a ni a. Mahse, amah ber heti anih leh si chuan tukthuan ei kham lamah amah ngaihvenin dai vel i vak ru mai mai ang hmiang. Khawtlang han hriattir em zawng chi lohah ngai ila, i tlawmngai thei ang em?" a han ti a.

Kunga chuan "Thei tehreng e a. An khaw lama a hawn i rin si loh chuan ngaihven chu a ngai a ni. Ka va hawng leh phawt ang a, in chhia leh ilo hi a awm nual chu ka ring a. Khawtlang hnatlang em anih loh zawngin ka rawn sawm ang che." tiin a hawng ta a.

Chumi tuk chuan chhungtin mai tih theih chu an buai em em vek mai a. Thli leh ruahina a tihchhiat in a tam si a. Mahni buai buaiin an phu suau suau mai. Rothuama pu te in erawh chu vanneih thlak takin a chhe ve lo hlauh a. Mahse, Rothuama bo ringawt mai chuan in chhia tam tak aiin a tibuai zawk hial ta ve ang.

Rilru pangkhing taka tukthuan an kil lai chuan veng chhak naupang hi thaw huam huam chungin a rawn tlan lut a. "Ka pu, awh ka pi chaw in ei ami?" a rawn ti lut a. Ngaihtha lo fe hian Rothuama pi chuan "Aw, eng nge ni ta?" a lo ti vat a. An phawk nasa ngei hlawm mai.

Chu naupang lah chu a hah em a vangin a tawng hlei thei lova. "Ih ih ih, eng lo ih..." a tih chuan a ngaithlatute thin a thawng em em tawh a. Rothuama pu chuan "Eng nge ni han sawi vat teh." alo ti vat a. "Ih maw, in pasal kha...awh ni lo, ih eng lo...in mikhual kha..." a han ti leh phei chu an tho suau mai.

Rothuama pi chuan "Engtin maw kan mikhual? I hmu em ni?" a han ti leh a. Naupang hah lutuk chu thaw huam huam chung hian alu a lo bu nghauh nghauh a. Sawi zawm a tum leh lai chuan a chil hakin a khuh ta bur bur mai. Rothuama pu chuan naupang chu a pawm lawk a. Pathlanga tui dehna hmunah chuan tui tlem a han in tir a. A hnungzang chu bensakin a han tuai thuak thuak bawk a.

"Khai le bawiha, hahdam la hmanhmawh reng reng suh. Khawiah maw kan mikhualpa chu i hmuh?" tiin nghakhlel tak mai chuan a han zawt tha leh a. Naupang chuan khuh bawrh bawrh chung chuan "Ih eng lo, khutah, kawrah kan hmu a, kan khawih ngam lo a. Keiman ka hmu hmasa ber. Lalpiangan kan chakai mansa a tichhuak vek." a han ti bah leh niaih mai a.

Rothuama pu chu a awm hle hle thei tawh lo. Han tur vak dawnin naupanga thu chang, a hah nen a zai ngaia zawh ngai bawk si chu a dawhtheihnain a tlin lo teuh ngei mai. Mahse, zaidam tak hian "I va han fel em em ve a. Khawilai kawrah nge kan mikhual chu inhmuh le?" a han ti leh a. Naupang hah zualpui leh a khuh nghek nghek mai a reh ta deuh bawk a. Mahse, an hmuhna lai tak chu a han sawi dawn thin a. A sawi chiang fum fe thiam tlat lo.

"Ih maw, kha hmana lalpianga te nen kan in bihruksiakna kha i hria em?" a han ti a. Rothuama pu te chhung chu an in en he haw hlawm a. "Ih ih ih, thlanmual bula bung lian deuh bul khaaa..." a tih chuan Rothuama pu chuan "Aw aw aw, ka hria e. Khatah khan maw in hmuh?" a han ti leh a. A tawngkam leh awmdanah a hmanhmawh tawh hle a ni tih a hriat a. Mahse, chu naupang chuan a hrethiam ve phak si lo.

"Aw, khami bul deuh thlanga kan buk lem sak kha thliin a lo len chhe vek a, chuan a dang sak leh kan tum a. Kawrah khan changel hnah kan lak dawnin ka hmu a, Lalpiangan ka hmu hmasa zawk a ti tlat a. Keiman ka hmu hmasa fe zawk." a han tih leh chuan Rothuama pu chu a ding thuai a. Naupang sawina lai vel chu a hriat theih maiin a hria. A sahmimah chempui a thun a, Kunga te in lam pan chuan hmanhmawh takin a chhuak ta nghal a. Kunga te in a lo awm ve tlangval pakhat chu hruai nghalin naupang sawina lam chu an pan ta vang vang a. A hmun an zuk thlen chuan an hmu mai lova, an han kal thui leh deuh hnu chuan Kunga chuan "Khu le, ka hmu e. Helamah hian lo chhuk rawh u." a ti ta chul a....


episode-118

Rothuama chu kawr kamah hian a lo let reng mai chu niin. A mar an han dek vat a. Alo la thi lo tih an hre nghal a. Tihharh tumin an han bei fat fat a. Mahse, biak leh sawi harh theih a ni tlat lo mai. A taksa zawng zawng chu a khawng vek a, a hmui a duk vek bawk a. En mai phei chuan mithi te pawh a ang rum rum mai.

A zawnna tur awlsam thei ang berin an siam a, tichuan Kunga leh tlangval pakhat chuan hmanhmawh takin an zawn hawng ta a. An hmanhmawh bawka Rothuama pu chuan a umpha lo nasa kher mai. Mahse, a mah ber chuan "A chak thei ang berin kalpui ula, kei chu ka tha tawkin ka lo kal ang e." a ti a.

In an zawn luh rual chuan thenawm khawvengho an rawn lut nghal nak nak a. Rothuama thawmhnaw chu Lianmawii chuan a hlihsak nghal vek a. Puan lum an neih ang ang chuan a khuh lum nghal a. Thenrual rawn lut te chuan thil awmzia an han zawt thin a. Atu amah chuan thil awmzia an hre si lo.

Chumi ni nileng leh zankhua in Rothuama chu a rawn harh chhuak lo. A thianpa Kunga chuan a thutchilh chawt a. A pu te chhung pawhin an kalhlatsan miah lo tih theih a ni. Atuk khua alo var leh pawh chuan Rothuama chu ala harh ta lo fo a. A pu te ngaih chu a tha lo takzet tawh.

Chutiang chuan biak theih miah lohin Rothuama chu kar khat zet mai a awm ta. Lianmawii leh a nu phei chu an tap ru deuh reng tawh mai a. Apu erawh chu mipa tihtakah a insum thei hle a. A thianpa Kunga pawh an in lamah a khawsa tlem kher mai.

Kar hnihnaah chuan zan khat chu zan rei tawh lamah hian Rothuama chu a rawn te chhuak ta thut mai a. A awmpuitu Lianmawii chu a thlawk chhuak lo chauh a ni. Kunga leh a pu chuan an lo chelh nghal thuai a. Rothuama chu a invai vak vak chungin a rum chhuak ta vak vak mai a. Hmeichhe tan chuan han hlauh loh rual a ni lo reng a ni.

Rothuama pu leh Kunga chuan an ko vak vak a. Mahse, a mit pawh a men si loh avangin an kohna chuan engmah awmzia a awm lo. Rothuama pu chuan "E khai Taia, ka tupa engtizia nge ni ta ngai? Thlaphang hlek suh i bulah ka awm a nia." a han tih chuan Rothuama tal vak vak chu a ziaawm ve mai bawk a.

Mahse, a khattawkin Rothuama chu chutiang chuan a rawn awm ta fo mai a. Hmeichhe tan phei chuan awmpui ngaihna pawh a awm meuh lo. Chutianga a rawn awm tawh chuan a pu chuan "Taia, ka tupa i bulah kan awm a nia. Hlauh i nei em ni? Min han hrilh teh. Keiman ka han hmachhawn ang e." a ti thin a. Chutia a tawng thlamuan chuan a reh ve leh mai thin.

Chutianga enkawl harsa tak chuan karkhat zet mai Rothuama chu a awm leh ta a. Lianmawii leh a nu phei chu an mangangin an beidawng takzet tawh a. Mahse, Kunga leh Rothuama pu erawh chuan beiseina an nei tlat thung. Kunga pawh rothuama pu te inah chuan a tap chawt tawh a. A chhungte pawhin haw turin an phut eih lo.

Kar thumna anih leh chuan Lianmawii te chhungin tukthuan an ei laiin Kunga chu Rothuama bulah a thu ran a. Chutia chaw an ei mawlh mawlh lai chuan Rothuama chuan fiah taka rawn mengin Kunga ban chu a rawn man chawt mai a. Kunga pawh a phu deuh zawk mai. "Thianpa, i rawn harh tawh em ni?" a lo ti vat a. Kunga tawng thawmah chuan Lianmawii te chawei lai chu an rawn tho nghal suau bawk a.

Rothuama pu chuan "Taia, i harh em? Min hria em?" a lo ti thuai thuai a. Rothuama chuan muangchangin a han en kual a. Chutah "Khawiah nge ka awm?" a rawn tichhuak ta a. Rothuama pu vek chuan "Hetah, i inah ngei i awm e. Na i nei em?" a lo ti leh thuai thuai a. Lianmawii pawh chuan "Na i nei em?" alo ti ve thuai bawk a.

Rothuama chuan "Ka neih pawh ka hre lo." tiin a lo chhang a. Kunga chuan "I harh chiang tiraw thianpa, min hria em?" tiin alo zawt ve vat a. Rothuama chuan "Aw hria e." tiin a lo chhang a. Chutia an beidawn tawp hnua Rothuama rawn harh leh ta chu an lawm tlang kher mai.

Rothuama chuan "Eng nge thil awmzia?" a han ti he haw a. Apu chuan a awm loh zan atanga an zawn dan te, an hmuh dan leh nikhaw hre lova a awm chhung te, chumi hnua maksak tak taka a rawn awm thin dan te chu a sawi chuar chuar a.

Rothuama chu a han inngaihtuah vang vang a. Mahse, engmah phei chu a hre chhuak lem lo. Rothuama pu chuan "Eng nge i chungah thleng?" a tih pawh chuan Rothuama chuan chhan ngaihna reng a hre lo. "Ka hre lo, min han kaitho teh u." a ti a.

Kunga chuan kaihthawh a han tum a. Mahse, Rothuama chu a lo tho thei awzawng lo mai. Che lova a mut reng avang khan na aneih leh neih loh a lo inhre lo mai mai alo ni a, a taksa a han chet dawn meuh chuan a hnungzang leh a kawnga chin hnuai lam chu a lo tiche thei reng reng lo mai niin.

Apu chuan "Khaih khaih khaih, e khai tikhan mu rawh. Ngawi teh u heti chuan a dik dawn lo. Ilo harh leh hi a lawmawm a, nakinah i che thei mai ang. Tunah chuan hah i mamawh anih kha. Ka tupa hi hahchawlh tir rawh u, engmah hlauhthawn tur a awm love, a ei tur han buatsaih nghal teh u." a ti ta sawk sawk a. Lianmawii chuan chawei han siamsak mai a tum a. A pu chuan "Mai mai thin a, rapa ka zufang kha han la vat rawh." a tih avang chuan zufang zawk chu a rawn chawi phei a.......



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:26 pm

episode-119

Rothuama chuan zufang chu tlem a han in a, a harh sawng sawngin a hria. Tichuan a pute chuan an theihtawpin an enkawl chho a. Kunga pawhin a khat tawkin a rawn tlawh reng a. Chutianga rei tak mai khum beta a nat hnu chuan zawi zawiin a rawn thu chhuak ve leh thei ta a. A lawm nan a pu chuan an arpui tui lai chu a talh tir a. Kunga chaweiah sawmin hlim takin chaw an ei a.

Chmi tlai chuan a puin "Taia, eng ti tiha khalai daiha lo awm nge i nih min han hrilh tawh teh le. Naupangho khan lo hmu hlauh lo phei che sela chuan khalaiah khan tuma hriat lohin i thi reng dawn a nih kha." a han ti a. Midang chuan Rothuama chu an en nghal thap a.

Rothuama chuan "Zanriah kan eikham kha thlan tlawh turin ka chhuak a. Thlanah chuan rei ngial ka thu a. Ka chauh deuh vang pawh ani mai thei, ka lo muthlu sek a. Tuemawni hian ka darah hian min rawn khawih a. Kunga hi a nih ka ring deuh a, hawi pawh ka hawichhuak lem lo." a tih lai chuan Kunga chuan "Ka ni lo phawt maiah." a lo ti a.

Rothuama chuan sawi chhunzawmin "Ka luah hian tui a rawn leih ni mai hian ka hria. Ka lu chu a mur ta er er mai a. Chutah ka'n hawichhuak tur chu ka che thei ta der lo mai a. Kunga ka han ti a. Min chhan miah loh takah kha chuan ani lo anih ka ring nghal mai a. Chutah, ka ka'n chesawn dawn thin a. Ka taksa a zawi vek avangin ka che thei si lo. Ka rilru erawh a harhfimin ka hria." a han ti a.

A sawi zawm leh hma chuan Lianmawii chuan "Awi ka hlau e a. Ka ngaithla duh tawh lo." tih pahin tapchhak lam chu a pan nghal a. A pu chuan "Taia, han sawi zel teh." a lo ti bauh a. Rothuama pi chuan "He nu han dawihzep zia em em hi chu aw!" alo ti hlaih hlaih a. Kunga leh lianmawii chu an nui thaw a.

Rothuama chuan "Ka hnunga awm chu mipa anih leh nih loh pawh ka hre chuang law. Mahse, ka banah vuanin min han kaitho ta a. Ka zang huih mai hian ka hria a. A kut atang chuan hmeichhe kut chu niin ka hria. A hmel ka'n en dawn thin a. Amah ka hmu thei reng reng lo. Chuti chung chuan ka banah chuan min kai tlat tho a. Khawi khawiah nge min hruai ka hre thei lo. Ka harh vek chuan ka hre na a, ka lo harh lo tawp anih dawn kha." a han ti a.

Mak an ti tlang ngei mai. Apu chuan "Tichuan anih leh in inbia em?" tii a lo zawt vat a. Rothuama chuan "Kan inbiak awm reng reng ka hre lo." a lo ti mai a. Kunga chuan "Amah chu i hmu miah lo maw?" a lo ti ve bawk a. Rothuama chuan hmu miah lo." a lo ti a. An ngawi ta thiap mai.

Lianmawii chuan vawkchaw chhuan chawh mawlh mawlh pah chuan "Kal duh loh mai tur a nia, i hneh dawn dawn nen." alo ti ve khauh a. Rothuama chuan "Tha ka nei lo reng reng alawm. Min kai lo se chu khawi mah ka thleng lo tawp ang." a lo ti a. Mak an tih zia chu an sawi laih laih a. A pu erawh chu a ngawi ngal mai thung a. Eng nge a ngaihtuah tih pawh hriat va ni suh.

Rothuama chu zawi zawiin a dam chho ve zel a. A rilruah an khaw lam hlir a awm avangin dam thuai thuai pawh a duh hle a. An khaw chanchin leh kal theih a duh thu pawh a sawi zing ta malh malh hle mai. Mahse, a pu chuan a dam chian var hma chu an khawlam chanchin engmah a sawipui duh tlat lo.

Rothuama dam loh chhung pawh thla hial a vei ta a. Tunah chuan khawlai pawh a vak chhuak leh thei ta. Zingah hma takah thoin a taksa sawizawi nan ramhnuaiah a kal thin a. A hawn pahin a nu leh farnu thlan a tlawh hawng ziah bawk a. A pu pawhin phuba la thei dinhmunah a ding leh tawha a hriat avangin an khawlam chanchin pawh a sawipui tan ta a.

Tlai khat chu Rothuama chuan Ramar leh Vahrit zanriak chan tumin silai nen a inak chhuak a. Kalna tur lam pawh hre lem lovin tuikhur lam chu a pan hnak hnak a. A tum loh deuh maiin Lali tuichawi haw lam nen an intawk ta nawlh mai a. Rothuama chuan han biak loh ngawt chu a hreh si, han biak mai na tur a hre bawk si lo. An insulpel dawn tep tihah Lali zawk chuan "I dam thin maw?" a rawn tichhuak ta hlauh a.

Rothuama chu a thaw huai mai. Ka dam e, nang i dam em?" a han ti ve a. Lali chuan "Min be lova kal tlang i tum tehlul nen ka'n be lui ta talh che anihkha. Keipawh ka dam, pasal ka nei tawh." a han ti leh a. Rothuama chuan chhan mai dan tur a hre lo hle mai a. "Ava lawmawm ve." a'n ti ve rawk a.

Lalin chhan leh a tum lai tak chuan tuichawi ve dang an lo lan tak avangin an inthen ta a. Rothuama chu a kal nghal vang vang a. Lali nena an lo chetsual tawhna te suangtuah let rauh rauh chung chuan a nui rah rah a. Chutia Lalin pasal a lo nei hman chu a thawven thlak huaiin a hre bawk a.

A rilruah a thianpa Liankima bawk a rawn lang leh a. Tunah te hian Chhingmami nen chuan an innei tawh ngeiin a ring a. An khawtlang chuan eng ang takin rawn ngai ve ang maw tiin a ngaihtuah rauh rauh a. A lung pawh a leng ve hle mai a. Mahse, ngaih tur a neih pawh a hre chuang lo. A thianpa Liankima chu a ngaih tur neih chhun a ni deuh mai a. Ani lah amah vanga hetiang tehhrepa a awm phahna a ni lawi bawk si. Mahse, zep rual lohin an khaw hlui chu a ngai ngawih ngawih tho. Chutia an khua ringawt ngaihtuaha a kal lai chuan....

episode-120

A chhak thingbuk che laih leh sava thla khawng ri kharh chuan a ngaihtuahna chu a ti tawp chawt a. Sava chu hmu hman chiah lo mahse a piah hla vak lo khiang bukah chuan a insawn phei tih hriat fahran hian khiang buk chu a che leh laih laih a.

Rothuama chuan a ngaihtuahna chu dahthain chulam pan chuan fimkhur leh thawmdim takin a kal ta them them a. Khua a tlai deuh tawh avangin sava zanriak tur dangho pawh an chiar nawk nawk reng a. Khiangbuk awmna tak chu a thlen chuan sava chuan alo hmu hmasa leh anga a insawn hla leh daih ang tih a hlau kher mai.

Chu khiang kung lah chu hruizam hnawk hian a bawm bawr luk mai a. Hnai deuh tak atang lo chuan sava a hmuh theih der mai si lo. Rothuama chu a inngaihtuah vang vang a. Veh hnaih zel loh chuan a hmuh theih miau siloh avangin tihthlawh leh hlau tak chung chuan a pan leh ta nge nge a.

A vanneih a siamin vawikhat sava han che leh laih chuan a awmna zawn a hriat theih phah ta a. Tichuan a theih tawka hnaia a veh hnu chuan a hmu thei ta viai viai mai. Vahrit pachal, a biang sen hlar mai chu a han hmu ta a. Mahse, a taksa dang erawh pakhat mah a hmu thei chuang lo.

Rothuama chuan vahrit lu awmdan leh hawi zawng atang chuan a taksa awmdan tur a han chhut thuak thuak a. A hmuh theih chin alu han tum ngawt chu nitheia a hriat loh avangin a taksa zawn vel nia a hriat lai chu a han tin ta vang vang a.

Silai a puak thuai a. Chumi rual chuan vahrit pachal chu nunna nei tawh lo tih hriat tak mai hian lei lamah a vir thla nghal nawk nawk a. Rothuama chuan a rinai hmaa a hlawhtlin avangin a dang beisei zel tawh lem lo chuan in lam a pan ta nghal a.

Hmanhmawh lovin a kal a. Tuikhur awmna a thlen chuan unau hmel hai hun vel hi a ni tawh a. Hla deuh hlek atang chuan tuikhura hmeichhe pakhat, mi zawn nei niawm taka lo hawi lo hawi hi ava hmu a. Tuikhur lam pan chuan a kal hnai zel bawk a.

Tuikhur a thlen hma deuh chuan chu hmeichhia chuan lo hmuin tunge anih erawh a hre bik chuang lo. Rothuaman tuikhur a thlen chuan Rothuama leh chu hmeichhia, tuikhura lo awm chu an inhmu chiang ta ngei mai.

Rothuama chu a ding chawt a. A hmaa hmeichhe ding chu a hmuh sual emaw a ti hman thelh a ni. Chu hmeichhia lah chuan Rothuama a hmuh rual chuan mitkhap lek lo hian a en reng ringawt mai bawk a.

Chutianga inbe miah lo leh chesawn eih lova an inen reng hnu chuan Rothuama chuan "Hetah eng nge i tih?" a han ti tawng mai a. Chu hmeichhia chu a lunga chhe nghal tih hai rual a awm lo. Vawi leh khatah dan rual loh hian a mittui chu a rawn dir nghal zung zung a. Leiah thusawpin a insut ta hlawp hlawp mai a. Rothuama chu a hamhaih nasa ngei mai.

Engtia han tih tur nge tih pawh a hre mai lo. A tum lohna lutuka a hmu ringawt pawh mak atih tawh tehreng nen, chutia an inhmuh avanga lungchhiaa a han tap ta ngawt phei chu Rothuama a buai chhe der mai.

"Engtizia nge? Eng nge thil awmzia min han hrilh teh. Heta hmuh che hi ka lo inring ngai hleinem." tiin a han thut hnaih a. Chu hmeichhia chuan insut faih faih chung hian "Ka tihpalh a ni, min hrethiam rawh. I hmel ka hmu thut kha mak ka ti em a, ka lungchhiatna a rawn chhuak thuta ka inthunun hman lo a ni." a ti tham tiak a.

Rothuama chuan chu hmeichhia kaihthawh pah chuan "Ding teh khai, mite reu reuin min hmu ang e. A mak ka ti hle mai keipawh heta ka han hmu che chu. Ka hmu sual emaw ka ti hman alawm." a han ti a.

Chu hmeichhia chuan "Keipawh hetiang teh thuta kan intawn hi ka ring phak lo em a ni." tiin a mittui chu a hru mawlh mawlh a. Rothuama chuan "Engtia helai hmuna awm hi nge i nih min lo hrilh teh." a han ti a. Mahse, chu hmeichhia chuan "Tunah chuan ni love, a tlai tawh em mai. Khawngaihin ka tuium hi min han chawi la, remchang dangah ka hrilh zawk ang che." a ti ta tlat mai.

Rothuama chuan "Chuti tur em ni?" a lo ti vat a. Chu hmeichhia chuan "Aw ni e, min hrethiam mai rawh. Ka rei chuan ka nuin min vaw leh nasa dawn em mai." a lo ti a. A hmelah chuan hlauhthawnna leh manganna chu hai theih miah lovin a lang chhuak nghal a. Rothuama chuan hrethiam lo tih hriat tak hian "I thusawi awmzia reng ka hre lo a nia." a han ti a. Mahse, a tuium chu a chawi ta tho a.

Chu hmeichhia chu hmanhmawh takin a kal hlawk hlawk a. Rothuama chuan umzui chiah pawh a ruat loh avangin muangchangin ani erawh chu a kal a. Mahse, "Min rawn zui rawh ka hlau a nia." tih ri a hriat avang leh ahmaa hmeichhia chuan alo nghah lawi si avang chuan Rothuama chu a han kalchak leh deuh a.

Chu hmeichhia chuan "Zanah rawn leng ta che. Lenna tur tha deuh te i hual sa lem loh chuan." a han ti a. Rothuama chuan in in awmna pawh ka hriat loh hi." a lo ti a. Hmeichhia chuan an awmna lai te a hrilh hnu chuan khawchhung an thleng chhunzawm a ni nghal deuh mai. Rothuama nen chuan an inthen ta a. Rothuama chuan a hun tawn leh a chunga thil thlen dan chu mak a tiin a ngaihtuah nasa hle a. Hetiang teh thuta a chunga thil lo thleng thin chu a ngaihna a hre lo kher mai. Zan lama hmuh leh ngei chu a ngai a ni ta phawt mai.....

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:27 pm

episode-121

Zanriah ei laiin Rothuama pu chuan, "Taia, vawin lamah lal inah ka han chuang kai a. In khaw hlui lam chanchin kan sawi nual a. Engtia hma han lak nge i tum?" tiin a zawt a. Rothuama chuan a mitthla a anu leh a farnu hmu rauh rauh chung chuan "Ka hre mai lo. Mahse, rawng taka chet leh a rem rem thah ringawt chu thil dik ani pawhin ka hre lem lova, tin khawtlang mipui phei chuan min huatna an neih loh bakah ka pawi engmah an sawi lo." a tih chuan a pu chu alo bu nghauh nghauh a.

A pu chuan "A dik khawp mai. Ni e, phuba chu la ngei la. Marawh chu pawi sawi lo chu tawrh tir loh a tha ngai. Thil pakhat i hriat tur a awm a. Chu chu kan lal leh upa ho pawhin an ngaihpawimawh ber a ni a. I phuba lakna hian kan khawtlang hi a tiralmuang lo thei dawnin an hria a. Chu chu engtia han tih tur nge an hre mai bik lo a ni." a han ti a.

Rothuama chu a kham nghal a. "Keipawh chu chu ka rilru tibuaitu pakhat a ni reng a ni. Phuba la lo hian ka awm thei dawn lo tih chu nangpawhin i hria ang a. Mahse, chu ka phuba lakna avanga he khawtlangin a tawrh phah leh a raltit phah chu ka tan a inthlahrunawm bakah a duh pawh ka duh hauh lo." a ti a.

Apu chuan, "Kan lal leh upa ho pawhin i rilru tur awm ang chu an hrethiam khawp mai a. A bik takin kan lalpa phei chuan engtiang pawhin phuba chu la ta mahla, ilo chena ta deuh anih pawhin pawitihna a nei hauh law. Mahse, upho in kan khawtlang a nghawng dan tur an han ngaihtuahin an ngaingam lo a ni ber mai. A upa te thu kalha lalpa ber han awm tlat kha a dik ber bawk si lo. A khawlh angreng viau mai." a ti leh charh charh a.

Rothuama chu leikapuiah a ding vang vang a. Apu thusawi engkim a hriat phak vek avangin a melh ngai a melh vang vang a. "Engpawh ti dawn ila thisen chu a luang lo thei dawn lova. Nang anih engtia han tih chi nge nia i hriat?" tiin a pu chu a han rawn a.

Apu chuan "Ka tupa i ni a, phuba chu i la ngei tur a ni. Mite hmuhsit leh an nawm an maka min diriam tur chu ka remti thei lo. A ralmuan loh phah anih leh kan nih nih kan ni tlang mai tur lah ni. Chumi avanga awm a nuam ta lo anih leh kan pemsan daih anga a ni mai alawm." a lo ti ram hmak a.

Apu thusawi chuan Rothuama chu a ti thlamuang hle a. Mahse, chutih rualin amah avanga apu te chhung leh zelina an tawrh chu a remti hauh lo. A tul anih leh amah zawk chu khaw dangah pawh a pem mai tur zawk niin a hria a.

Leng len ar a rawn khuang al al a. Rothuama chu leng turin a chhuak ve ta nghal a. A thianpa Kunga te in lam chu pan hmasain apu nena an titina chu a ngaihtuah rauh rauh a. Kunga te in a thlen chuan zawlbuk lama alo chhuah hman avangin a kal tumna lam chu a pan leh ta nghal a.

Khawlaia naupang pawnto hnenah chuan a kal tumna in neitu hming chu sawiin an in awmna lai a han zawt a. An hrilh hnu chuan muangchangin a kal ta zel a. An hrilhna in a thlen dawn chuan hmeichhe ang hlawih hlawih thawm a hriat avangin pawnah chuan a ding ta ran mai a.

Nutling zet aw hi chhum lo chat lo chuan a ang hmuar hmuar mai a. Rothuama chuan an boruak chhiat lai anih ringin lenna chi nipawhin a hre ta lova. Kir leh mai a tum lai tak chuan hmeichhe pakhat hi tuium nen a rawn chhuak ta chhat chhat a. Rothuama chuan tunge anih chu hre nghal mai lo mahse chu hmeichhia chu a tap ngei niin a hria.

In chhunglama ang thawm chu ala reh chuang lova. Rothuama dinna zawn a rawn thlen chuan Rami ngei a ni tih a hre thei ta a. Ramin Rothuama lo ding reng a hmuh chuan Rothuama chu a kuah nghal chawt a. Tap ri ngam si lovin a insut hlawp hlawp a.

Rothuama chuan "Engtizia nge ni ta? E khai helaiah zawng miin min hmu palh ang. Insum rawh insum rawh." a han ti a. Rami chuan Rothuama a kuahna chu thlahin tap tiau hian "Tui min chawipui rawh aw. Keimah chuan ka kal ngam lovang." a han ti a. Rothuama chuan "Aw le." a ti a.

Tuikhur lamah chuan inbe lem loin an inzui hnak hnak a. Tuikhur an thlen chuan Rothuama chuan "Eng nge thil awmzia min han hrilh teh le." a han ti a. Rami lungchhia chu rei fe a ngawi vang vang a. Chutah tah chhuak teuh chung hian "Kan khuaa min dah leh khan, ka nu chu a thi zingah alo tel ve a." a han ti a. A sawi zawng pawh chuan a tap lo chauh a ni mai.

"Tichuan tuna ka awmna te hian min rawn hruai ta a ni. Ka nu chhungte an nia, an pa hi thaibawih a nia. Ka awm tirh atangin an nu hian hauh loh zan a neih ka la hre lo. Keipawh englai pawhin min hau a ni mai. Chaw pawh ka ei puar ngam ngai lo. An pa hian hun remchang a hmuh chuan min beisei thin bawk a. Mahse, ka awmna ala rei loh avangin hun remchang erawh a hmu ngai meuh lo zawk. Ka nu ka ngai, ka ngai takzet. Nu, ka va'n ngai tak che em." tiin lungchhe takin a tap ta hlawp hlawp a. Rothuama chuan a lainat takzet. Mahse, han hnem dan vak a thiam si lo. Ngawi rengin Rami tap lai chu alo en reng a. A thinlungah erawh a khawngaihna a nep chuang lo. A ngaihtuahna a vak thui takzet mai. Rami lah vawi tam tah hlawp hlawp lo chak tawh thin leh insum hram hram thin ani bawk a, tun tum zet chu a tap nasa ngei mai.....


episode-122

Rothuama chuan "Ava pawi ve aw! Mahse, lungngai suh anni pawh chutiang reng an ni bik lovang chu." a'n ti a. Mahse, Rami chuan "Ni lo, ka nu ka ngai, kan khua ka ngai a ni. Khawngaih takin kan khuaah min hruai hawng leh rawh." tiin a ngen a.

Rothuama chuan "I nu a awm tawh bawk si loh chuan engtinnge i awm chuan ang?" a han ti a. "Engtin pawn ka awm mai ang. Hetah chuan ka awm thei lo. Heta awm reng ai chuan thih daih ka duh zawk, khawngaih takin min hruai kir leh hram rawh." a ti ngawih ngawih a. Rothuama rilru pawh a buai ta nak mai.

Hruai kir ngawt pawh nise engtinmah amah mai chuan a awm theih a ring si lo. Mahse, tuna a sawi anga a awmna te an sual si chuan a intihhlum duh tak tak mai te pawh a ringhlel lo. Tun ang zan khawthima hmeichhia tuichawi tura han tirh ngawt mai pawh chu hriatthiam har tak a ni. Chu chuan dawt a sawi lo tih leh a awmna nu mizia leh nihna chu a tilang chiang hlein a hria.

An khuaah nana na zawng, atua te pawh a nel sa leh ngamtlak tak tak vek an ni dawn a. Helai hmun ai ngawt zawngin atan chuan ala nuam tho tho ang le. Tin, anu leh pa te lunghahna ani bawk a. Engtinnge a khawsak ang tih phei chu a ngaihtuah ngam lo. Mahse, helai hmunah pawh a dinhmun chu ala chhe zawk mah a ni si.

Rothuama chuan thawk a han la hak a. A rilru a buai takzet a ni. Anu lah anmahni vang liau liaua thi a ni a. He nula fahrah tak mai leh dinhmun chhe lutuka ding mek hi eng emaw tak tihsak chu a bain a inhre si. Mahse, tih tur pawimawh vawr tawp, tuma dan theih rual loh tih tur a nei bawk si. Nge, henu hi chu ngaihsak hman loah a inngai mai zawk dawn.

Rothuama chuan "Engpawh nise, keipawh tih tur pawimawh tak mai ti turin kan khuaah ka kir leh lawk a ngai a. Chumi zawha ka rawn let leh hun chu min lo nghak la, tichuan i duh ang chuan ka hruai kir ang che. Mahse, tuna i awmna te lakah a mawh ka phur lo anga, i khawsak zel dan tur pawh ngaihtuahpui ngaihna che ka hre bik hauh lo a nia." a ti ta a.

Rami chuan "Ni lo, khawngaih takin i hawn hmain min hruai kir hmasa hram rawh." a ti ta tlat mai. Dik tak chuan Rothuama an khuaa a hawn chuan a rawn let leh a ring tawh lo a ni. Tin, rawn let leh pawh nise alo tlai lutuk hman tawh maithei a. Chin hriat ani si lo, ngen taktein Rothuama chu a ngen ngawih ngawih mai.

"Ka tih tur hi a pawimawh lutuk a, tih khawtlai chi ani lo a ni. Rei ani dawn lova, ka rawn kir leh ngei ngei ang tih ka tiama che." Rothuaman a'n tih ngial pawhin Rami chuan "Aih ni lo, nikhat lek pawh hi ka tan chuan a rei lutuk a ni. Khawngaih takin aw." a ti mawlh mawlh a.

Rothuama chuan "Rei a ni lovang, chumi chhung te chauh chu lo tuar leh hram rawh." a han ti thin a. Rami chuan "I rualin in khuaah chuan min hruai ve mai rawh. In khua atangin i remchan hun hunah kan khuaah chuan min dah leh mai dawn nia. Zan khat pawh ka awm thei tawh lo a ni. I nu leh i farnu pawh ka hmuh leh theihna remchang a ni dawn asin." a ti leh ta zel a.

Mahse, Rothuama chuan "Ni love, ka hruai thei lo che. A rem rih lo a ni kan khuaah chuan." a ti tlat thung a. "Tirawh, kan rei lutuk chuan alo thinrim leh palh ang." tiin tui chu a thalsak a. Mahse, Rami chuan "Aih ka haw duh tawh lo. Kha in chhungah khan ka lut tawh dawn lo." a ti ta tlat mai.

Rothuama chuan "Puitling taka awm tum hram teh, khawiah nge i awm chuan anga?" a tih chuan Rami chuan tap pur chung hian "I awmnaah, chu chu a theih loh chuan min ngaihtuah suh. Ka awmdan tur chu ka inngaihtuah mai ang." a ti par a.

Rothuama chu a buai takzet. "Chutiang ngawt ani thei nang." a han ti leh a, a tawng zawm leh hma chuan "Min ngaihtuah suh min tanpui theih loh chuan, min runtu ral i ni a. Ka nu pawh nangmahni thah ngei a ni, keipawh hi min that ve nghal law law mai rawh tunah hian." a ti ta mai. Rothuama rilru hah chu alo thaw hawk a.

"Kha ina luh leh ai chuan thih ka duh zawk, ka tan chuan nawm pawh a nuam daih zawk ang. Min hawnsan mai rawh." tap chungin a han ti leh a. Rothuama chuan a pu a han ngaihtuah chhuak thut a. Anin tihdan a hre tak ang. "Anih leh chutia i tih tlat chuan ka pute inah ka hruai hawng phawt mai ang che. Anin a rel dan danin rel mai teh se." a ti ta nge nge a.

Tichuan tui pawh chawi ta chuang lo chuan an inzui hawng leh ta hnak hnak a. In an thlen chuan a pute chhungkua chuan makti tak mai hian an lo en hau mai a. Rothuama chuan thil awmzia, a tir te atang chuan a han sawi zung zung a. Chutia thil awmzia an han hriat chuan mak pawh an ti a, Rami chu an lainat kher mai.

Rothuama chuan "Chutiang tehnuai chu anih avangin tihngaihna ka hre lova, ani a haw duh tawh bawk si lo. I rel dan dana i rel turin ka rawn hruai lut mawp mai a ni." a han ti a. Apu chuan a aw a han thian khar kharh a. "Chutiang mihring chu maw an lo nih hrep taka? Lungngai hauh suh, i duh loh nakah chuan i awm tawh tawp lovang. Keimah ngei hi va kalin ka va hau ang e. Zakthei lo mai mai chuan, i thawmhnaw pawh ka rawn la vek ang." a ti then mai a. Rami lawm lutuk chu lungchhe takin a insut hliam hliam a..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:27 pm

episode-123

Rothuama pi chuan "A em em thin bawka che. Chutia mi chhungkaw kara pachang meuh inrawlh tur pawh a ni lo. Keimah ka va kal zawk ang. Kan hrilh hma loh phei chuan an ngaihte pawh a tha nang. Keimah ka va kal ang e." a lo ti vat a. Tichuan a chhuak zui ta nghal a.

Rothuama pu chuan Rami chu a'n en thin a. "Tichuan mami chhungte i nei tawh miah lo tihna maw?" a han ti tha leh a. Rami chuan a lu a lo bu nghauh a. Rothuama chu melhin ani lah chuan a silai alo hruksan daih tawh a.

Rothuama pu chuan "Chutianga i chhungte tumah an awm tawh bawk si loh chuan in khaw lamah pawh haw la i tan nun a harsa hle dawn tih a hriat reng a. Chuvangin kan inah te hian i awm duh anih phawt chuan inthlahrung reng reng suh ang che." a han ti leh a. Rami chuan a chhang lo.

Rothuama chuan an thusawi chu ngaithla awm pawhin a lang lova, ama buai buai chuan a buai mawp mawp mai a ni. Lianmawii chuan "Kan inah lo awm ve daih rawh. I awmna nu saw chu khawkhat sawi tling ve hat a nia. Anpa zawk chu ania ka ngei, chutiang rilru tenawm alo pu chu ka rin phak bak a ni." a lo ti ve a.

Chutih lai chuan Rothuama pi a lo lut ve chiah a. Rami thawmhnaw a rawn pawm lut am bawk a. Rothuama pu chuan "Engtinnge an lo tih? Buaina te iva tawk hlawm em lo maw?" alo ti vat a.

Rothuama pi chuan "Tawk hran love, mi phei chu alo ankhum nasa mai a. Mahse, an zia te chu tlang hriat a nia, engah ka laksak duh lem lo anihkha." tiin tapchhak lam a pan nghal a. Rothuama pu chuan "Chutia harsatna te a siam loh zawngin a that chu. A mut te pawh mu hma ila atha ang zanin chu." tih leh thawh a rual nghal a.

Leikapuia a zun rik tur tur lai chuan Rothuama chu a chhuak ve nghal thurh a. Apu zung zo chu zawi deuh hlek hian "Ka pu, naktuk chu kan dam anga, kan khua chu ka va tlawh lawk ang e." a han ti a.

Apu chuan "A tha alawm, va fimkhur hle la. I hna erawh i puitlin ngei ka beisei. Tin, a theih chuan va chamrei lo la, hei hna dang i neih hi. Kan inah te a awm duh anih chuan thuhran a nia." a lo ti leh a.

Rothuama chuan "Ka rei vakin ka ring lo. Ka rei ta deuh anih chuan ka rawn kir tawh dawn loah in lo ngai dawn nia. Rami hi chu heta a awm duh hi ka ring chiah lova, a duh anih leh a tha ani mai a. Midang erawh tumah ka kal tur hi ka hrilh lem dawn lo." a tih chuan apu chu alo bu nghauh nghauh a.

A tuk khua alo var chuan hma takah Rothuama chu a tho a. A sahmimah chuan a chemtum leh chawfun lian tha tawk a dah a. A silai puin a chhuak ta vang vang a. Khaw en laia khaw luh a rem dawn loh avangin hmanhmawh taka kal ngaiin a hre lo bawka hahdamin a kal a.

A tirah chuan han kal muang ve deuh mahse a helh hawlh deuh nen a hriat loh karin alo kal chak leh fe tawh thin a. A hriat chhuah rualin a'n pen zawi leh a. Chutiang reng reng chuan a kal a. A mitthlaah anu leh a farnu bawk an lo lang leh thin a. Tin, an in te pawh a mitthlaah an rawn lang zut zut mai.

Apu te khaw ram chin a pel dawn hnai tawh a. A nu leh a farnuin tawhsual an tawhna hmun a thlen chuan a diar phelh meuhin a ding a, rilru na takin an tawhsual tawhna hnuhma te chu a thlir vawng vawng a. Ama hriat tham lek hian "Thlamuang takin chawl ang che u. Thlabara siamtu cheu pawh a nuamsa rei tawh dawn bik love." a han ti sap sap a.

Chulai hmunah chuan rei ngial a ding a. A thinlunga lungchhiatna chu thinurnain a rawn thlak a, hachang thial rap rap chung chuan chulai hmun chu a kalsan leh ta a. Amitthlaah an lalpa leh a fanu Chhingmami an lo lang nghal a, "Lo ngai tak rawh u khai, inpawi kan sawi loh nen min tithinur ta si a. A pawi dawn mang tak e." a ti vawt raih mai.

Tichuan an khaw hlui leh apu te khaw ram in rina sakei lui a thleng a. Chutah chuan muangchangin a chawfun te chu a ei ta a. Rei mawi tawk a chawlh vang vang hnu chuan a kal leh ta a. An khaw hlui ram chin anih tawh avangin fimkhur pawh a ngai ta hle mai. A chhan chu tumahin amah chu hmu lo se a duh vang a ni.

Thawm nei lo thei ang berin a kal zel a. Chutia fimkhur ru angreng taka a kal zel lai chuan sakei hnu, la tharlam tak mai a hmu ta tlat mai. Rothuama chuan uluk leh chiang zawk hian a han en chiang a. Ala thar hle avangin a fimkhur lehzual a ngai ta.

A mitthlaah Chhingmami alo lang nghal a. Chu a hniak hmuh chu ani ang em tih pawh hriat a ni lova, ni pawh nise, ni lo pawh nise fimkhur elkhena a kal loh chuan a chan a chhe dawn tih a inhre chiang hle. Mahse, vanneih thlak takin eng em a tawk ta lova. Tlai ni tlak dawn suar suarah an khaw hlui kawtchhuah lungdawh chu a thleng ta a. Ni tla tur engmawi tak mai chuan a lung a tileng ngang mai.

Kawtchhuahah chuan englai pawha mi lo kal thut thei an nih avangin a piah deuhah chuan a insawn ta a. Kawngah pawh awm lovin kawng atanga hla deuh takah hnimbuk hnuaiah a tawm ta a. Chu hmunah chuan khua a nghak thim ang a, tichuan zan thimah pawh mi mut reh hnua che turin chulai hmunah chuan a thu ta ngar ngar a. A rilruah Rami a rawn lut ve leh ta mauh mai.......


episode-124

Chumi tum tluka khua a thim har chu Rothuaman a hre ngai lo. A zat hian a za cheng mai a. Mahse, puitling taka insum hram hram leh dawhtheihna nun neih chu pasaltha zia anih miau avangin Rothuama chuan helhhawlh tak chung pawhin a dawh hram hram a. Sa leh ral hmaah tunang reng renga dawhtheih leh insum harsa atih hi ala hre ngai lo.

Hreh em em niawm tak hian muangchangin ni chu kawlah a tla pil riai riai a. Ni ber a tlak takah chuan Chhura awm ta love ti niawm fahran hian zan lama chaw zawng chi leh aw chhuah chiho chuan thawm an rawn nei tan nghal pang a. Kei tak emaw tiin an inthlahrung lo zek lehnghal.

Unau hmelhai vel ani chho tan a, sava chi hrang hrang zanriak turho chuan riahna buk inchuh niawm takin an inbengberek nawk nawk a. Chung thil chuan Rothuama rilru erawh an la peng zo lo. Khua a tlai telh telh a, thim thil tihtheihna chu a chapo ve tulh tulh bawk a. Chung zawng zawng theihnghilh thak chuan engtin chiah nge ka chet ang tih ngaihtuahin Rothuama rilru chu a lo insual buai hle thung mai.

Khawthim chuan intithu takin ro a rawn rel tan ta. Mual tin, tlang tin leh ruam tin chu a thim tan ta ruai ruai mai. Then te tan chuan hun duhawm leh lengi runa kai nghakhlel val tamtak tan chuan chu khawthim chu ava duhawm dawn tehlul em. Mahse, he khawvelah hian tumah kan thuhmun ngai loh avang hian then te tan chuan chu zan rawn thim leh ta pawh chuan ngaihno beina reng a nei lo ta ve ang.

Rothuama insum thrihna chuan a huang chin a pel ta tlat mai. Amah pawhin mak a inti a, a inhrethiam lo. Chulai hmun reh leh khawhar taka suangtuahna kawm chu a thei tawh lova, thisena tuihal phuba lak duhna thinlung chuan chu a tawmna hmun atang chuan a nam chhuak ta a ni ber mai.

Ala hun lo tih chu a hria. Mahse, khungbeh ang maia tawm ngawt ngawt ringawt chu a tlin tawh ngang si lo. A tan a ppawi thei ani tih pawh a hai lo. Mahse, pawi a ti phal tawh ngang lo. Chu a khua, a khua nih ve phal tawh lova um chhuaktu an lal hmachhawn chu he khawvela a thil chak ber a ni tawh tlat. Thih phah ta mahse a pawiti ther te tawh lo.

Tichuan, thihna kaw ruam nge phuba lakna tlangsang a zawh dawn pawh inhrethiam tawh lovin Rothuama chu a tawmna atangin chengrang nen a rawn penchhuak ta. A tan thih leh damin kawngro a su tawh lova, phuba lak duhna rilru chauh chuan a bual a ta. Mahse, rilru buai zawng ala ni lo nameuh mai.

Chu chu, ralkhata meichher eng a hmuh avanga a bihruk leh zawkna chuan a tichiang khat hle. Mahse, hlauhawm a ni lo tih a hriat avangin rei lo teah a rawn penchhuak leh thuai a. Hmalam panin chu thinlung sahal chu a saipui kal ta ngauh ngauh mai le...

Mualchuan lalpa chu thawveng tak mai hian leikapuiah a hawi larh larh a. Rothuama te thian dun vanga a rilru hahna leh chumi avanga a muttheih ngai lohna te chu mangchhia ang maiin an bo zo ta bawk a. Chuvangin enghelh tur leh han vei teh run tur a nei tawh lo. Liankima ber lah a thuhnuaiah dahin tunah chuan a makpa alo ni ta bawk si a. A mualphona chu Liankima mualphona a ni ve vek tawh tih a hai reng reng lo.

Reilo teah tu ala nei ngei dawn a. Chutih hunah phei chuan thlamuang takin he khawvel leh a lalna khua chu thlamuang takin a chhuahsan thei tawh ang. Tuman an chhungkaw thuruk chu an rawn hrechhuak ngai dawn lova, a fanu pawhin lungmuang takin a dam chhung hun a hmang ve thei tawh ang.

Mahse, chu a duhthusam leh a suangtuahna te chuan a tak ram an thleng zo dawn em tih erawh mihring ve tho anih avangin a hre bik awzawng lo. Mahse, lal anih miau avangin a hriat theih chinah a duh loh dan anga thil a kal ala hriat miau loh avangin a ngaih chu a tha takzet thung.

Leng len ar a rawn khuang chiah chiah a. Mualchuan khaw tlangval zawng zawng deuhthaw chu zawlbuk lam panin an kal fai duak a. Zawkbukah chuan an duh duh sawiin a then an inbuan fiam a. Val upa leh pasaltha ten Rianglung khua an run dan leh an chet dan te sawiin an hmai pawh a uang kher mai. Tin, Rothuama huaisen zia leh chutia chin hriat loha a han thi ringawt mai an ui zia chu hahipin an sawi hlawm a.

A chanchin chhuang tak leh ngaihnawm takin an sawi mek a ni tih hre hauh lovin Rothuama chuan khua a rawn dai lut ve mek a. Khawlaiah naupang an lo pawnto sap sap avangin a khaw hlui chu an ralmuan lai tak anih a ringhlel lo. Mahse, fimkhur thu hlaah khawlaiah chuan a kal duh miah lova, dai pawn deuh hret zelah helin an in tlawh hmasak ber a rilruk a.

An in zawn a thlen chuan an in chu alo la ding awn liai a. Luahlumtu awm lo tih hriat tak hian chu in chu a thim riai a. Khawhar taka chawke hram karh karh tih mai loh chu chuin a tang chuan thawm dang hriat tur engmah a awm lo. A mitthlaah a nu leh a farnu hlim taka an inbe lai te chu a rawn lang iar iar a. Rothuama chuan rilru na ngawih ngawihin an in atanga chawke, (Awke) khawhar taka rawn hram karh karh chu a ngaithla ta a. A hriat loh karin a biangah chuan mittui a rawn dir ta zung zung a. Dan tum teh mahse a bianga mittui luang chuan kir zai rel an rel si lo....

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:27 pm

episode-125

Rothuama chuan "Hlim tak leh thlamuanga kan lawi vena thin run chuan luahlumtu a vai zo ta maw? Lung hi ava han awi lo lulai ngai em." a ti vawng vawng a. An in chu luh chhin a chak ta mauh mai. Meichher chhit ngam a ni dawn lo tih a hria. Mahse, vawikhat tal luh leh ngei a duh tlat mai.

Tichuan thimthamah chuan an in chu a hnaih hret hret a. Kawmchar atang chuan helin tuma hmuh loh chuan a lut ta a. Mahse, a thim ngang mai. Eng han chhuah chi ziazang a ni si lo. Kumkhuaa alo talna leh seilenna a ni bawka engang pawhin thim mahse chu in chhungah kher chuan a buai lo kher mai le.

A mitthlain thi awmna tur leh chumi khami hmunah chiuan chumi khami chu a awm a ni tih a hre fai vek a. Thimah pawh a buai eih lo reng reng. Tichuan an bungbel leh an thawmhnaw khaina te chu tuma hriat lohin a chul ruai ruai a. Khum te, rapchung te, bang laia thil thiah zawng zawng leh an tapchhak te chu a chul kual nasa hle a. Engmah chu a theihnghilh lo a ni ber mai.

Khumah chuan a han thu hnawk a. A mitthlaah a nu leh a farnu an rawn lang nghal a. "Ka nu, i fapa ka lo hawng asin. Khawiah nge maw in awm zawh tak le? Engati nge tumah reng rengin min chhan tak loh? Mahni chauha engkim hmachhawn turin maw min hnutchhiah le." a ti sap sap a.

Leng hawn ar a rawn khuang chiah chiah a. Rothuama chuan chetsawn zai reng a rel lo. Chutiang chuan rei tak a thu kun ngawih ngawih a. Mahse, zanlai ar a rawn khuan leh meuh chuan a hmabak hlen turin a rawn tho chhuak ta.

An in atang chuan thawm dim takin a chhuak a. Khawlaiah chuan a han hawi kual a, tumah meng an awm tawh lo niin a hria. Tichuan lal in lam pan chuan a chho ta a. Lal kawt zawn a thlen chuan a han ding khawmuang leh zawk a. A mitthlaa a nu leh a farnu ruang a rawn lan leh tak avang chuan a inhum ruh nasa kher mai.

Lal in chu muangchangin a pan chhat chhat a. Thawm a han ngaithla a, tui taka muhil hnar suk suk thawm bak hriat a nei lo. Tichuan luhna tur remchang a zawng ta nghal a. Rei zawn ngai lovin a hmu thuai a. Tah chuan lutin thawm dim takin a che ta a.

Lal silai tunna leh a chempui thiahna thin chu alo hriat than tawh hnu anih avangin buai miah lovin a dahbo nghal a. Chhingmami a awm leh awm loh a han fiah leh hmasa te te a. Chutah a awm lo a ni tih a hriat hnu chuan lal khum lam chu a pan ta them them a.

Lal nupa chu an lo mu hnar suk suk a. Rothuama chuan lal nu nghawngah chuan engkhaw sawi set set lovin a han sat nghek mai a. A nghawng chu a bung chiang kher mai. An lalpa rui lutuka mu chu a rawn meng phar nasa hle mai a. Rothuama chuan alo nuih suk a.

Lalin Rothuama hmel a hmuh rual chuan Ral ral ral ti a han au chhuah nghek mai a tum a. Mahse, chu chu Rothuama lo rindan sa anih avangin a ka zawn takah chuan a chempui, thisen kai hnuang mai chu a han lek ta a. Lal chu a au chhuak lo chiang kher mai.

Rothuama chuan "Nang lal zahawm, tunah khan i nupui lu ka la chiah tih i hria a, i lu hi engtikah nge ka lak ve ang tih ka inngaihtuah mek a ni." a han ti vawt raih mai a. Lal chu a meng phawk nasa ngei mai. A bula a nupui mu, a taksa leh a lu inzawm tawh lo chu a han melh thin a, hlauhna leh manganna chu hai rul lohin a mitah a rawn lang chhuak a ni.

Aw khur dar dar hian "Eng nge i duh?" a rawn ti tham tuak a. Rothuama chuan lo nuih elin ka duh min zawt maw? Phuba... Phuba ka duh." a ti thawm sat mai. Lal chu a sai hlawk hlawk a. "Khawngaihin min thawh tir la, ka engkim ka pe ang che." a tih chuan Rothuama chuan "I thil neih pakhat pawh hi awh leh it ka nei lo. Ka nu leh ka farnu nunna kha min pe let thei em?" a han ti chang rawt mai a.

A tawng chu a ring lo nain a chiang a, a hlauhawm em em tlat si a ni. Lal chuan luthin pahin "Inrem ka duh e, ka khaw pasaltha leh tlawmngai ber, tuma tluk rual loh i ni a. Khawngaihin ka chungah zahngai rawh." a ti tawk tawk a. Rothuama chuan "Zah chu ka ngai rih a, ila thi lo chu anih hi maw le." a han ti a. Lal chuan a chil a lem khalh khalh mai.

Rothuama chuan a chempui lal chaldara dah pah chuan "Kei leh ka chhungte hian i eng pawi nge kan sawi?" a han ti a. Lal chuan chhan ngaihna reng a hre lo. Rothuama vek chuan "Kan thihna tur khawpa i laka tihsual kan neih chuan tun hi a sawi hunlai a ni e." a lo ti chhum leh chhak a.

Lal chuan aw khur dur dur chung hian "Ka pawi engmah insawi ka hre lo. Min pem chhuahsan ta mai hi ka ui em em zawk cheu a sin." a han ti a. Chu thu a hriat rual chuan Rothuama chu alo nui suk a.

"Chutimaw lal zahawm? Kei leh ka chhungte chu ilo ui ve a maw? Tu fa lubawkini nge awih ta ang le?" tih pahin a nupui ruang chu a han sat leh ngheng mai a. Rothuama mita thinurna chu a rapthlak takzet. Lal chu awlsam tak leh nuamsa taka a thih a phal reng reng lo lehngal a. Chumi tum tluka zan hrehawm leh lungchhiat thlak chu Mualchuan khaw lal tan chuan a awm leh theih pawh a rinawm ta lo.....

@Dwm Pachuau


episode-126

Mualchuan khaw lal chuan "Mi nun lul rawh, ka neih zawng zawng zatve ka pe ang che." a han ti khur dur dur a. Mahse, Rothuama chuan thamlo zeta lo nuih pahin "I neih zawng zawng, i fanu nunna, i nupui nunna leh i nunna nen lam hian ka la fai vek dawn. Naktuk khawvar hi tuman inhmu dawn lo tih hria ang che." tiin a bula puan hlap chu a la nghal a.

Lal mitmengah chuan beiseina chhete mah a awm lo tih tur khawp a ni. Rothuama chuan a silai kawmin lal khur hlawk hlawk luah chuan a'n chhu ta a. A meng pual rang kher mai, rei lo teah engmah a hre zui ta lo. Rothuama chuan puan hlap chu a pawtthler kawk kawk a. Lal ka hnawh nan chuan a hmang ta nghal a.

Hnam va la in lal kut pahnih chu a hnungkhirh bawk a. Khum atang chuan a han tlawh lir thla hlawl mai a. Rothuama chuan chil chhak thawt pahin "Thih chak ngawih ngawihin ka siam dawn che." a ti chhum chhak mai.

Rothuama chu in chhungah chuan a vei tawn sek a. A rilruah a thianpa Liankima leh a nupui Chhingmami an lo lang nghal a. Chhingmami chu thah ngei a tum a, chutih rualin a thianpa chuan engtinnge a ngaih ang tih a ngaihtuah nasa hle a, chu chuan a rilru a tibuai ve tlat mai.

Khumaiah chuan thuin a han inngaihtuah vang vang a. Tun ang zan reiah hian Chhingmami chu a pasal bulah a mu ang nge ramhnuaiah saseh tur zawngin a thang mek ang tih pawh ngaihtuah tham tak a ni. A thil tum hi zan khat thil thua a tihhlawhtlin nghal vek loh chuan a tan hna a harsa ting dawn tih lah a hrechiang si.

Muangchangin a thutna atang chuan a han tho a. A thianpa te in lam pan phawt mai chu tha bera a hriat avangin a chhuak ta a. Liankima te in a thlen chuan pawnah thawm ngaichangin a han ding vang vang a, an mureh vek tawh nia a hriat avang chuan engtia han luh chi nge ni ang tih a han ngaihtuah leh rih a. A tihdan tur tha ber hriat har a ti hle mai.

Chutia rei ngial a inngaihtuah hnu chuan pangngai thei ang bera luh phawt a, chutah a tul dan ang zela chet lak tawp mai chu tha berin a hre ta. Tichuan a thinlung a thinrimna te chu a hmela a lan chhuah loh nan pangngai taka awm tumin Liankima te luhka rah a rual nghal a.

Mahse, chutia luhka a rah rual chiah chuan thawm a hre ta tlat mai. Chu a thawm hriatna lam chu a hawi nghal vat a. Mahse, tumah a hmu hauh lo. A bengchhe ri mai mai em ni? Ni lo, thawm a hre ngei a ni. Chutiang zanreha thawm han nei chu fiah hmasak a duh ta tlat mai.

Tichuan, a thawm hriatna lamah chuan dim tak leh fimkhur takin a kal ta nghal a. Thui pawh a kal hma chuan a piah deuh hnimbuk che leh laih thin chu a hmu ta a. Mihring nge anih sa hriat tuma a pan hnaih dawn lai tak chuan chulai hmun atanga Chhingmami rawn chhuak chu a hmu ta mai.

Rothuama chu a thu tlum zawk a. Chhingmami chuan ngaihtha tak hian a awmna lam chu a rawn pan hnai zel a, Rothuama awmna zawn a rawn thlen chuan a ding ta tlat mai. A hnar chuan thisen rim a hria tih hriat tak hian a hnar a han len ruai ruai a. Anu thisen Rothuaman a kai rim ngei kha a hre ta chat mai.

Rothuama tawmna hnimbuk zawn chuan a mit ala nghal chat reng a. Mahse, zan thim anih avangin eng nge awma tunge tawm tih erawh hriat a har hle. Chhingmami hnar chuan khawdang a hawi theih miau tawh loh avangin a pan hnai ta nge nge a. Mahse, inring ren rawna lo thu Rothuama chu vawi leh khatah a rawn dawk chhuak ta zawk mai.

Eh pawh ti hman miah lovin Chhingmami chu a rawn vai thlu tawp a, ani hmeichhe awm nem nana na chu che leh tur eih a awm lo. Rothuama chuan "Nang phiangsen hi maw lo ni che a, mipa vannei, bui mei tawi an lo ti ngai e." tih pahin Chhingmai chu a pu nghal nawlh a. Lal in lam chu hmanhmawh takin a panpui ta a. Anu ruang awmna khumah ngei chuan nghatin chhung lamah kawngka a kalh nghal hmiah a.

Lal kha alo la harh leh loh avangin Rothuama chuan tuiin a han theh puat mai a, a rawn harh chiang kher mai. A rawn meng phar nasa hle mai a, Rothuama hmel a hmuh chuan a thi hlen lo chu pawi a ti vawng vawng mai. Chutah a kut pahnih hnungkhirh ani tih a hriat rualin aka pawh engmah tawng chhuak thei lova hnawh vek ani tih a hre zui nghal bawk.

Rothuama chuan dimlo baksak hian a han phih tho lawp mai a. A nupui leh a fanu mutna khumah chuan namthluin "Kha le, i fanu neihchhun leh keimi ni bawk pawh ka rawn hawnsak che kha. I hmuh lai ngei hian ka that dawn nge, a hmuh lai ngeiin nang hi ka that zawk dawn che?" a han ti a.

An lal chu a khur zawih zawih a. Theih chu nise tahchhuah hawm hawm emaw, rak chhuah nawk nawk emaw a chak ber mai. Rothuama lam hawiin a lu a thing vak vak a. A mit atang chuan mittui a rawn luang nghal zung zung a. Rothuama chuan zawi sap leh fiah tak si, vawt raih hian "A pawi ngawt mai tiraw, mittui luangin kir an rel thei dawn lo anih hi. Mahse, hei hi i cho chhuah a ni miau a, i cho loh tur i cho a ni." a han ti a. Mualchuan khaw lal chuan a nupui ruang thisen nena inchiah piah nuai leh a thi nge dam tih pawh hriat loha a fanu let reng mai chu a han en leh thin a, a mumang nise a ti ava ti em...

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:28 pm

episode-127

Rothuama chuan lal hmai bul setah chuan enin "Pawi sawi lo nunna i laksak takte hming chhal khan ka hrilh ang che. Nang hi lal ni tlak leh dam reng tlak i ni lo. Nang leh i chhungkua hi thi mang vek ula i khua leh tuite tan hian a tha a, a him ber bawk asin." a han ti a. Lal chuan Rothuama hmel pawh a en ngam tawh lo. A nunna chu engtiang pawhin ngen mahse a zuahsak dawn lo tih a hrechiang ta ngei mai. Mahse, a fanu nunna tal chu zuahsak hram se ava han ti teh lul em. Mahse, chu pawh chu a beisei ngam tawh si lo.

Rothuama chuan hrui lain Chhingmami chu apa a tih ang bawkin a kut chu a hnungkhirh sak a, a ka pawh puanchhiain a hnawhsak a. Lal chu a han tham tho leh lawp mai a, "Kei leh ka chhungte chunga zahngaihna chhete pawh i nei lo ang chiah khan ka zahngaihna pawh i beisei lo tiraw?" a han ti a. Lal chu alo bu nghauh a.

Rothuama chuan "I chungah erawh chuan zah ka ngai ang a, i fanu hmuh lai kher chuan ka thih tir lo mai ang che. Mahse, chu aia tha chu beisei suh ang che." tiin tapchhak lamah chuan a theh phei thuai a. "Engtia thih nge i duh?" tih pahin a nak nemah chuan a han chhuih ngheng mai a. A vial ngawlh ngawlh mai.

"I fanu keimi anih hi kan hriatna a rei tawh asin. Chuti chung chuan sawichhuah tumna emaw i mualphona tura tawngkam hi vawikhat pawh cheh kan tum lo asin. Chuti chung chuan "Min thah i la tum a. Kei chang ni lo, engmah hre ve lo ka nu leh ka farnu leh zel i thata maw?" tiin a chempui chuan a han tin uaih mai a. Mahse, a sah zawng ala sat rih em lo.

Rothuama thinur lutuk chu a khur ngat ngat mai. A hmel leh mitmeng chu mihring damlai pawh a ang lo. "Kei chuan ka ngaidam thei lo che. Mithi khuaah anmahni bulah ngei ngaihdam chu i dil ang. An ngaihdam theih leh theih loh che chu an thu thu a ni e." tiin lal sam chu a vun kutphah beng tiat vel tal hian a han hlep chhum hmawk mai a. Chu a sam hleh chu a sahmimah a khung nghal a.

Tui hmuna khaupui hrui inzam nuaih chu a zuk la a. Sei tawk tak mai hian a han hrual a. Chumi hmang chuan nghawng tawk awm map lovin lal nghawngah chuan a thlung ta a. A hrui hmawr lehlam chu khanchhukah vawrh kaiin a hmawr rawn uai thla leh chu kalkhangah a tawnbet a.

Lal chu dingdihlip tawk vel tura a dah avangin inkhai deuh roh, chhuat rap titih deuh si leh ding mar pangngai thei chiah silo chuan a thaw tak tawk a. Rothuama chuan "Tihian i thih hun nghakin awm ang che." a ti a, Chhiangmami awmna lam chu a pansan ta a. "Nang, a changa sakei a changa mihring tehhrep hian maw chaw atana ka chhungte lo hmang?" a han ti a. Chhingmami nikhaw hre lova let reng chu hachang thial rap rap chung chuan a en reng a.

A mitthlaah a nu leh a farnu an rawn lang iar iar a. Tumpang chal a kah tuma an hlim zia te chu ngaihtuah chhuakin Liankima nena an thi ta emaw an tih hnua an inhmuh leh tuma anu tah nasat zia te a mitthlaah an rawn lang zut zut a. Engkhaw sawi set set lo chuan Chhingmami chu a pu nawlh a, lal in atang chuan a chhuahpui ta nal nal a.

Rothuama chuan hmanhmawh takin Chhingmami chu ramhnuai lam a panpui nghal a. Thui tak a kalpui hnu chuan a han keuh dawp mai a. Chu ve leh Chhingmami chu a rawn harh ve chawpchilh nghal a.

Hmel inhmuh chian theih ni hek lo, Chhingmami a rawn chet rual chuan aka hnawhna chu Rothuama chuan a han pawhchhuahsak nghal a. Chu veleh Chhingmami chuan hlauh hmel pawh pu chuang lo hian "Tunge i nih?" a rawn tichhuak nghal a.

Rothuama chuan thutchilh pah hian "A chhungte i sehhlumsak kha ka ni e." a tih rual chuan Chhingmami chuan "Rothuam." a lo ti tuarh a. Rothuama chuan a chhang lo. "I chhungte ka seh lo, seh duh ni ila i chhungte mai nilo, nang leh i thianpa pawh hi indam tawh hauh lovang." alo ti chang ve rat mai le.

Rothuama chuan awka hniam sat hian "Sawi tur i neih ang ang chu sawi thuai rawh. I nu leh pate hnena kal ve tur hian hun tam i nei tawh lo a nia." alo tih khum sak a. Rothuama thusawi awmzia chu a man rang kher mai.

Aw khur dar dar hian "Ka nu leh pa te i that tawh a maw?" a han ti a. Atu amah mah chu an tawng tawh lo, rei ngial chu khuavang kal lai an tih ang mai hian a reh vawng vawng a. Chutah Chhingmami chuan "I duh chuan keipawh min that ve nghal thei e. Engtikah emaw phuba la tur hian i rawn kir leh ang tih hi ka lo ring reng asin." a han ti a. Rothuama chuan ala chhang chuang lo.

"Ka nu leh pate ber i thah tawh chuan Keipawh min that ve nghal rawh. Mahse, chumi hmain hei chauh hi ka sawi ang. I nu leh i farnu ka seh lo, chu chu van chhalin ka sawi e. I nu leh i farnu ruang chauh i hmu thei a, anmahni sehtu sakei ruang an thlanga ka sehhlum erawh kha chu i hmu thei lo maw?" a tih chuan Rothuama chu a phu zawk mai. Rothuama chuan "Chutin mi bum tumin dawtsawi buai duh suh. I thihna tur i pumpelh dawn chuang lo." a han ti a. A aw chu a sang tan hle mai.

Chhingmami chuan "Thih hi ka hlau hran hleinem, i duh leh min that hmasa la ka thusawi dik leh dik loh chu i en dawn nia. Min that rawh tunah. Mahse, ka thih rualin ka puma i fa pawh hi a thi ve nghal

@Dwm Pachuau

episode-128

"Min thah rualin ka puma i fa pawh hi a thi ve nghal dawn tih i hre dawn nia." Chhingmami chuan a ti ta tlat mai le. Rothuama, phuba lak chaka thisena tuihal leh pasaltha huaisen chu a hawi a ta hu mai. Rothuama chuan "Tawng loh loh leh sawi loh tur tur hi sawi suh. I thusawi awih tur khawp hian ka engmah i ni lo tih hria ang che." a han ti tuarh mai a. Mahse, Chhingmami chuan "I awih loh a hnu, i thu a ni. Anih chuan tunah hian thi turin ka inpeih e, min that nghal thei ang." tiin a ngawi ta hmiah mai a. Rothuama zawk chu a buai ta tlat mai.

Rothuama chuan "I thi dawn, lo hmanhmawh khu ruai lo mai rawh. A hun ka tihah chuan engmahin a chhan dawn lo che, i pasal pawhin a chhan lovang che ka lak atang hian." a han ti a.

Chu ve leh Chhingmami chuan "He i thianpa leh ka pasal hi ka duh leh hmangaih vanga nei ka ni lo tih hi nang pawhin i hria. A nupui ka ni chung hian vawikhat pawh nupa nun ka la hmanpui lo asin. Chu chu engvang nge i hria em? I fa ka pai vang hi a ni asin. I nu leh farnu ka that lova, ka seh hek lo. Thil nihna hre chiang lo hian min puh ngawt suh. Tunah ka nu leh pa i that a, kei hmeichhe awm nem heti hian min phuar hlawm a. Heti chung hian kei chuan ral angin ka la en ngai lo che asin. Mipa i nih ngai chuan min phuarna te hi phelh ta che." a ti ta tawn tawn mai a.

Rothuama chuan eng ang rilru nge put tur a hrethiam tawh lo. A rilru a chawmawlh vek tawh a ni ber mai. Chhingmami thuswi zawng zawng chu a hria a. Mahse, a dik leh dik loh a hre si lo. "I kut ka phuarna hi ka phelh dawn a, sakeiah chang la, tichuan min bei ngei tur a ni." a ti ta tawp mai a. Chhingmami chuan a chhang lo.

Rothuama chuan Chhingmami a phuarna chu a zaichat hmawk a. Amah chu dingin "Tho la, sakeiah inti chang ang che. Tichuan kan inbei anag a, a thi zawk zawk kan thi ang. That tur chein hei chen hi ka lo kal tawh a. Ka that ngei dawn bawk che. Chuvangin i damchhuah theihna turin hun tha ka pe che anih hi. Sakeiah chuan inti chang la, sakei i nih lai ngeia thah che hi ka duh." a ti ta hmiah mai.

Mahse, a kut hnungkhirhna a phelhsak hnu pawhin Chhingmami chu chetsawn zai reng a rel lo. Rothuama chuan thinrim awka vin zet hian "Tho rawh, ka thah hma che hian min han bei let ta che." a ti tuarh tuarh a. Mahse, Chhingmami chuan chet zai reng a rel si lo.

A tawpah chuan a rawn hawichhuak a. "Nang chu mipaah pawh ka pa khua leh tui zinga a chhuanvawr ber, tuma tluk phak rual loh khawpa huaisen leh pasaltha i ni. Kei hmeichhe awm nem laka inhrosa tur i ni love, i duh chuan awlsam takin min that thei a. Ka tang hauh lovang, i hmelma, ka nu leh pa pawh i hmelma leh ral kan ni. Chuvangin ka lu hi la la, i pasalthatna belhchhah nan chuan hmang ang che. Ka pasal hi ka tan chuan pasal lem ang chauh a ni. I kuta thi turin ka inpeih." tiin Rothuama hmaah chuan a thingthi ta rap mai.

Rothuama chuan mak a ti a, sawi tur a hre lo mai nilovin tih tur leh tih loh tur pawh a hre tawh lo chu a ni ber e. Chhiangmami sakeia a chan hun nghakin a inring em em ringawt mai. Mahse, Chhingmami lah Rothuama thah hun nghakin a hmaah alo kun ve ngat ngat baw si.

A tawpah zawng, Rothuama chuan a hriamhrei chu a dahthla ta nge nge a. "Ka nu leh ka nau kha i thah anih loh takzet chuan ka ngaidam ang che. Chu chu tunah hian a fiah nghal dawn a, i sawi ang alo nih loh vaih chuan i tan himna hmun tur a awm lo tih hria ang che." a han ti bul hmuk a.

Chhingmami chuan "I awih loh chuan i duh leh min that hmasa rawh." a lo ti chhum ve hmak mai bawk si. Rothuama rilru chu buai tak a ni. Chhingmami chuan "He i thianpa hi ka pa remruatna avang chauha nei ka nih zia chu i hai ka ring bik lo. Ka da,chhung hian ka pa vangin nei hlen dawn pawh ni ila, i fa ka pai chhung hi chuan ka inpawl tir lovang." alo ti leh hmak mai a.

Rothuama chuan thinrim sehchilh nawk nawk chuan "Chhingmam, thu lawilo mai mai sawi suh. I sawi ang anih loh vaih chuan i inchhir hle dawn ani tih hria ang che. Tunah haw la, i nu leh pa ka thah thu kha tu bulah mah lo sawi hlek suh, anih loh chuan ka lo let leh ngei ngei dawn ani tih hria ang che." a han ti a. Chhingmami chuan "I duh hun hunah rawn let ang che." a lo ti sam et a.

Khua a var chiang ta bawk a, Rothuama chuan "Haw rih rawh." a ti a. Amah zawk chu a nu leh a farnu ruang a hmuhna lam panin a kal ta nghal a. Chhingmami chuan "Ka thusawi a dik tih i hriat hnuah i rawn kir leh tho ang em?" tiin a han au zui a. Rothuama lah a bengngawng kal ngut ngut mai a, hawi let chu sawi loh, chhan khat pawhin a chhang eih lo.

Rothuama chu a inngaihtuah nasa mai a, a chang leh a han ding leh chut thin a. A rilruin engah chuan ka lo that hmasa lo chu aw te a han ti leh rih thin. Let leh mai te a han tum that that a. Mahse, a sawi kha a dik lek dik lo fiah hmasak tha a ti si. Dawt a hrilh anih te ahan ring rum rum thin a. Mahse, a hmelah leh a tawngkamah zamna a nei reuh si lo, apa nen kha chuan an inang lo kher mai. Fapai chung chang a han ngaihtuah chhuak leh a, a sa phat phat mai..

@Dwm Pachuau

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)