"MITTUI LUANGIN KIR AN REL LO" BY Dwm Pachuau (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: "MITTUI LUANGIN KIR AN REL LO" BY Dwm Pachuau

Unread post by Ngaia » October 24th, 2017, 11:23 pm

episode-105

Liankima te rapa saphai mit chu lain an let leh ta vang vang a. Rami chu an han ei tir ta a. Liankima chuan amah ngeiin ei tirin duat tak mai hian a han bia a. A thiam tawka tawng thlamuan vein a ngaihtuah zia chu a chet dan leh mitmeng, hawiherah chuan hai rual a awm lo. A thianpa che vel chu Rothuama chuan kil khat atangin alo thlir reng a. Engmah erawh a sawi lem lo.

Rami chu tha ve leh mai turah an ngai theuh a. Rothuama phei chuan chuti tehchiama buaipui chu ngaia a hriat loh avang leh thiam pawh a thiam ve mang loh avangin leikapui lamah a insawn san ta daih a. Rei ngial a thut hnu chuan Liankima chu a lo chuangkai ve a.

Rothuama chuan a thianpa pawh en chuang lo hian "I mitmengah khan hmangaihna ka hmuin ka hria." a lo ti sap a. Liankima chuan a chhang lo. Ngawi rengin a melh ngai a melh veng veng a. Thawk han lak hak pah hian a thianpa darah chuan a han vuan a. "Thiana, vawin tut tut chuan dahkir lo la athain ka hria." a han ti a.

Rothuama chuan "A dinhmun a zir ani ang chu. I ui vang mai mai chu a ni lo turah ngai ila." a lo ti khauh a. Liankima chuan "Ani tho bawk a, ani lo thei tho bawk ang chu." alo ti ve leh bauh a.

Chawhma chhung Rami pum chu a nawm theih tak loh avangin chumi ni chu Rothuama chuan a thulh fel ta nge nge a. Liankima pawh chawhnu herah hawn zai a rel ve ta a. Liankima haw ta chu a inngaihtuah nasa kher mai.

Zanriah ei kham fel awrh tih chuan lalin Liankima chu a rawn koh tir a. Liankima chhungte chuan an inneihna tur thil chungchang anih ringin an phur hle a. Mahse, Liankima chuan koh anih chhan a hriatchian em avangin hreh ngawih ngawih chungin a kal thung.

Lalin a thlen chuan an chhungkua tih loh tumah dang an lo awm lova. Lalpa chuan Liankima hmel a hmuh veleh midangte chu lo inthiarfihlim turin a ti nghal bawk a. Lal chuan Liankima chu a han en vang vang a. "Tlangval, thlamuang takin awm ta che. Mahni inthiam lohna hi thil tha ani ngai lo a nia." a ti dam thluam a.

Liankima chuan a rilru ngaihtuahna te chu a theih tawkin a thup ve hram hram a. "Lalpa, ka tha alawm. Eng nge thil pawimawh awm ta le?" a han ti a. A awah chuan pangngai taka lan hram hram a tum a ni tih chik taka ngaithlatu tan chuan hai rual a awm lo.

Lal chuan a tuibur hmuam pik puat pah chuan "hmm, a tha e. Tumah hi thuruk nei lo mihring kan awm lo tih hria la. Chu thuruk vawng him thei apiang chu mi pangngai kan ni mai dawn zawng anih hi. Ka rawn koh tir chhan che chu engdang a ni lo." tiin tuibur bawk chu a han hmuam thar leh a

liankima chuan "Lalpa, i thu ang ang a kawi a ngila pawm tur chuan ka inpeih tawh alawm." a lo ti vat a. Chutah lal chuan "Athat chu. Pawm mai kha i tan chuan kawng awmchhun leh tha ber a ni reng a ni. I thianpa hi khawi lai ramhnuai hla deuh takah i hruai thei ang chu tiraw?" a han ti a.

Liankima chu a ngawi vang vang a. Muangchang hian "Thei mai ang chu ka ti. A sal nula rawn hawn hi dahlet leh a tum mek a. Chutah chuan amah hi kalpuiin emaw alo hawng lam lo chan emaw chu a rem khawpin ka ring." a lo ti a.

Lal chuan phur tak mai hian "E khai, chu zawng a tha dawn nasa e. Marawh chu midangte hriata kalpuitu neih ai chuan alo haw chu lo chang ta la, rinhlelh kan kai lo zawkin ka ring e." alo ti thuai a.

Liankima chuan "Anih leh a chhungte hi le?" tiin a han zawt a. Lal chuan "Anni zawng nangin tha taka i hna i hlen chuan buaipui tham an awm nang. Anni nufa mai chuan an dam khawchhuak zo lo ang tih pawh hlauhawm zawkin." a lo ti sam et a.

Mahse, a rilru erawh a sawi chhuak lo tih a mitmengah chuan a chiang khawp mai. Liankima chuan hmu thiam ngat se chuan a rilru pawh a thlak duh phah hial ta ve ang. Mahse, a hmu thiam miau mai si lo. "Aw le, ni e anni tal zawng khawngaihin tina lo hram ang che." a lo ti dam duai a.

An lal chuan "Tina lovang, anih chuan i thianpa naktuka lam hla kal tur chu zui ru la, a lo haw leh lam, kan khaw ram chin a rawn thlen leh hmain ilo dahtha dawn nia. Tichuan ral ramah ralin an lo that tihna a ni mai. Tichuan thlamuang takin kan mu ve thei tawh ang chu." a han ti a. Liankima chuan a chhang tawh lo.

Lal bawk chuan "Anih nula te pawh i rim duh ang e, va haw tawh rih rawh khai, upaho lo thlen hma hian." a tih chuan Liankima chu a chhuak rang kher mai le. Liankima chhuah hnu chuan tlangau a lo lut ve vut a.

Lal chuan tlangau hnenah chuan "Naktuk chawhnu herah Rothuama te inah izu kal ang a. Rothuaman kan chhungkaw thil pawimawh rel laia min lo ngaihthlak ruk a vangin ka thinur thu i zuk thlen ang a. Mahse, ka ngilneihna avangin a nunna em chu ka la lovang a, mahse a rang thei ang berin khua hi an chhuahsan tur a ni tih hrilh ang che. Nangmah ngeiin kawtchhuah thleng i thlah nghal dawn nia." a ti a. Tlangau chuan "Aw le lalpa." tiin a chhuak leh nghal nalh a.

Chhingmami chu Rothuama nu leh farnu zui ru tur leh Rothuama pu te ram chin an thlen veleha seh hlum nghal turin a lo hrilh lawk diam tawh bawk a. Lal tan chuan a thawven thlak ta huai mai.......

@Dwm Pachuau


episode-106

A tuk zing khaw lo var chu tuk dang zawng aiin a mawi emaw tihtur hi a ni a. An dan pangngai tein Mualchuan khuate chu zing vartianah thoin mahni hna tul an thawk nghal suau suau a.

Hmeichhia leh nula ten tuichawiin an tuichawi ngah hnuah zing buhden leh khawsak rel an fawm a. Naupangho khawlaiah inkawibah leh inselem chaih thawm a tha ham ham hle a.

Rothuama pawh leihkapuiah a silai leh a mu inchhawp hnawk nuaiin ama buai buai chuan a buai hle a. A silai chu duhtawka ulukin a hruakfai bakah a silai hlo chu a pho tang bawk a. Chutia engdang mah ngaihtuah lova a chet mawlh mawlh lai chuan a thianpa lo kal lai reng a hre lo.

"Kha iva tul awm mawlh mawlh ve, biak lah chu i hrethei hek lo." tih ri chuan a tiharh zawk a. A han hawichhuah chuan a bul maiah a thianpa Liankima chu a lo ding reng chu niin.

Rothuama chuan "Aw khai, ava zia lo ve, i lo kalna a rei tawh em? Vawin lam chu kan indah theih tawh ka ring a. Ka hmanrua ka'n hrufai vel mai mai a ni. Kha th hian thu teh." a lo ti var a. Liankima chu ngawirengin a thianpa bulah chuan a thu a.

"Nang, vawin lam te eng nge thawh zai i rel ang?" tia a thianpa Rothuama biakna chu hla tak maiah hian a hre vau vau a. A ngawih vang vang hnu chuan "Ka hre mai lo, vawin chu hna tul em em pawh ka nei lo. Chul ram ka zu fang mai mai dawn emaw ni te ka ti mai mai." a ti a.

Rothuama chuan "Tunlai chu sa leh ral laka kan muan lai ani bawk a, chul han fan vel pawh a nuam khawpin ka ring. Kei ve hi zawng, indaih lo reng reng hian kan awm kumtluan mai zawng a nia. Han theu leu vel pawh a chakawm vei nen. Ka hman ve ngang lo chu a nih hi maw." a lo ti a.

Liankima chuan "I tluan zawngin naktuk zing lamah te chuan i rawn kir leh hman daih ang chu. I peih tak leh kan theu leu dun ang chu maw le. Tunlai hna awl lai a ni bawk a han chhuah harh hrim hrim pawh hi ka chak sakhai a nia." a tih chuan Rothuama chuan "Nang berin i tih te chuan kan hnial ngam nang le." a lo ti a.

Rothuama nuin "Taia, tukthuan kan peih e." a rawn tih takah chuan Liankima chuan "Ka va tin ang e, chutia dah leh talh i tum zawngin dan rual lah i awm si lova, tluang deuhin i rawn kir leh a ni ang chu." a han ti a. Rothuama chuan "Ni e, kan heti teh ta nuai em mai a, ka nu lahin dah let turin min hrilh awl lo mai bawk nen. Kan that tlanna tur zawk pawh a ni ang e." tiin a lo chhang a. Tichuan tukthuan ei tur chuan an inthen ta a.

Tukthuan an ei lai chuan Rothuama nu chuan duhsak tak hian chawhmeh te chu Rami thlengah chuan a han suahsak a. "Ramte, vawin chu tluang takin in kal em ang a, i nu pawh dam takin alo awm turah ngai ila, a beisei loh lutuka inhan inhmu leh tur chu ava lawm dawn em. Min han biak mawlh mawlh dawn nia aw." a han ti a.

Rami thinlunga lawmna leh helhhawlhna lo luangchhuak chu a hmelah a lang a, thup theih rual lohin a lawmna mittui chuan a rawn nemnghet nghal a. "Ka pi, ka chunga in thatna hi lawmthu sawi dan pawh ka thiam lo. Ka awm chhung rei lo teah pawh inchhungkaw mi ang chiahin min en a, hei baka tha chuan khawiah mah sal anih theih ka ring love. Tunah lah min hruai kir leh in tum a ni si a. Ka nu chuan..." sawi zawm thei lovin a hnuk a ulh teuh a. An lainat hlawm ngei mai.

Rothuama erawh a kham nalh a. A hmelah leh cheziaah eng nge a rilruah awm tih pawh hriatthiam ngaihna a awm lo. Tukthuan an ei kham chuan Rami chu mittui tling piai hian Rothuama nu leh a farnu chu a kuah vawng vawng a. Rothuama nu chuan "Taia, kha hei in chawfun tur aw. I sakhi kah rep ka thukphum a, chhunah puar takin in ei dawn nia. Kawng lakah tur miah lo la, hahdam takin an khua i thlenpui dawn nia." a ti a.

Rothuama chuan pip-e pup-e a ti hlei lova, ngawi rengin a insiam mial mial ringawt mai a ni. Rothuama insiam vel chu an nghak thap a, Ramtei chuan a nghahhlelh vang nge rei hi a han ti mai mai khawp a. Rothuama lah han hmanhmawh hmel pawhin a lang duh der si lo, han tur hmanhmawh ngam pawh ni si lo Rami tan chuan a nghahhlelhawm duh viau ta ve ang.

A inpeih chuan Rothuama nu chuan "Ramte, tluang taki kal ula, hei te hi i nu hnenah chuan thupha chawi nan min han peksak ang che aw." tiin thil fun hi a pe a. Tichuan mittui luang zawih zawih chung chuan dam takin mangtha an ti ta a.

Kawtchhuah an thlen chuan ramtei chuan "Ava mak em ka chunga thil thlen dan hi, ka beisei phak loh thil a ni. Ka nu, ka lo hawng a nia i fanu, dam takin lo awm ang che aw." a ti mawlh mawlh a. A lungchhe lutuk chu Rothuama mitmei pawh veng zo lovin a tap hlawp hlawp a.

Rothuama lah engmah hre lo ang hmiahin Rami hnungah chuan a kal ngawi reng a. Rami lungchhe zualpui a reh hnu chuan rawn hawiletin "Engtinnge ka koh ang che?" a rawn ti a. Rothuama chuan "Ka hming chu Rothuama a nia. I duh dan danin a ni mai." a lo ti sam et a. Rami chuan "Kei ai chuan i upat hmel sia Uthuam ka ti mai ang che. Hetia min hruai haw leh hi ka beisei loh lutuk thil a ni a, ka hlim zia hi ka sawi thiam lo. Mahse, a mak ka ti em a ni. Eng nge a chhan?" tiin a zawt ta phawng mai a.......

@Dwm Pachuau



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:24 pm

episode-107

Rothuama chuan "Kal thuai thuai zawk ila atha ang. Let leh nghal tur ka ni a, i chauh tak tak hma hian thui tak thlen tum ang." tiin a lo chhang daih a. Rami chuan "Kan khua in rawn hal hmasak tuma ka thih teuh zia kha aw! Thui tak in thlen tawh kan rin laia dai bul lawka in lo la awm si kha a mak kan ti teh a sin. An man leh tak si che avang khan kan nufain kan thih phah ve ngei kan lo ring hman a. Mahse, engtinmah min tih loh takah khan insawi chhuak lo anih kan ring leh ta a. Kan lawm teh asin." tiin a tawng bawrh bawrh a.

A hmel leh cheziaah ringawt pawh a hlim zia chu nasa takin a lang a. Sal ni tura an hruai nia a hmel leh tuna a hmel awmdan chu lei leh van ang maia inthlau a ni. Rothuama chu a be mawlh mawlh a, hah a hre lo emawni tih tur hialin a tawng char char mai. Rothuam chu ngawi rengin a kal miah miah thung a. A biakna pawh a chhang lem hlei lova.

Chuti chung chuan Rami chuan a biak a thulh phah chuang lo reng reng. Thil chihrang hrang sawiin a kalpuipa chuan a ngaithla nge ngaithla lo tih pawh ngaihtuah lem lovin a tawng reng ringawt mai. Rothuama chuan sal tura a hruai hawn chhan diktak chu hrilh hriat a thain a hre ve ta a.

"Sal tura ka man chhan che diktak kha i hre duh em?" a han ti a. Ahma zawka kal Rami chu a ding chawt a, "Hre duh e, thil dang vak a awm em ni?" lehhawi ha pah hian a han ti a. Rothuama chu a lo bu nghauh a. "Ka hriat ve a pawi loh chuan min han hrilh ve la." a lo ti a.

Rothuama chu a ngawi ta vang vang a. A chhang leh dawn ta lo emaw tih tur awm velah hian a aw a han thian kharh kharh a. "Inkhua kan rawn hal tuma min man nachhan kha nang hi i nia, kan chhuah leh theih chhan pawh nangmah tho i ni." a tih chuan Rami chuan a hrethiam lo hle.

Rothuama chuan sawi chhunzawmin "Khami tuma ka thianpa kha, a hmuh rual che khan a vei ta em em mai che a. Thui ngial kan haw tawh tihah khan a sawichhuak ta nge nge a. Tichuan nangmah ruchhuak tur khan kan rawn let leh ta a, kan vanduai ta anih kha." a tih chuan Rami chuan mak a ti ngei mai.

"Tun tuma kan rawn run leh cheu khan ka thianpa chu khawhmun nghakah a tang ta si a, tichuan ama ta tur liau liauin ka hruai hawng ta che a nihkha." a tih chuan Rami chuan mak a ti tawlh tawlh mai a. Hmai zangthal ha hian Rothuama chu a en reng a."

rothuama chuan "Engatinge mak iva tih hmel ve?" tiin a han zawt a. Rami chuan a chhang tawh lo, ngawi rengin hma a hruai leh ta hnak hnak a. Rothuama bawk chuan "Sal tura hruai hawng che ka ni lova, ka thianpain a vei em che avanga anupui tura ka hruai i nia. Mahse, a tir atanga sawi kha a rem teuh lo a ni." a han ti a.

A tu amah tawng tawh lovin thui fe chu an kal ta ngar ngar a. Chutah Rami chu ding meuhin a rawn lehhawi leh a, "Anih leh engatinge tunah min hruai let leh si? Ka hriat a rem lohna a awm em?" a rawn tichhuak leh ta phawng mai a.

Rothuama chuan "Rem e, kan lal fanu nen kan rawn run hlan cheu khan inneih thu an lo thlung leh si a, chuvangin hruai kir leh mai loh che chu tihngaihna a awm lo a ni. Sal neih hi ka pa khan a duh ngai lova, ka hruai hawn tir che pawhin ka nu chu a lo lawm loh hle kha." a ti a. Rami chu a ngawi vang vang a, "I nu leh i farnu kha ka chungah an tha ngawt mai. Ka ngai dawn hle a ni." a rawn ti thawp sat a.

Rothuama chu a lo nui vei suk a. Rami chuan "I thianpa chu a mak hle mai. A sawi anga chuti kaua min vei leh vawikhat inhmuhna maia min hmel duh viau anga lang si, nangin atana kei min man i tum hlan ber khera nupui neih alo tum leh si chu." a han ti khauh mai a.

Rothuama chuan "A mak vak lem em ni? Lal fanu meuh neih theih dawn tih inhriat leh si chuan a duhthlanna hi ka hriatthiampui khawp asin." tiin a thusawi lai chu alo pawtchat a. A rilruah erawh Rami sawi chu dik a tiin a ngaihtuah ru ve neuh neuh tho mai.

"Anih leh nupui neih lo tum lo nita se i hmel duhzawng a ni ve tho em?" tiin a han zawt leh hram a. Rami chuan "Salin duhthlan theihna kan nei lo tih te chu i hrereng alawm. Tin, damchhunga sal nih ai chuan engang mi pawh lo nise zalenna avang ngawt pawhin thlan loh theih chu a ni nang. Chutiang ni lo zalenna duhthlan turah chuan ka hmel duhzawng anih ka hre hran lo." a ti ta duah a.

Rothuama chuan nui suk chung hian "Lal makpa nih a lo tum hlauh chu i vanneih phah ta anih chu." a lo ti bauh a. Rami chuan "Awi ka nu mangan dan tur hi aw! Dam takin alo la awm hlauh ang chu maw? Ka va han hmu chak tawh em." a ti vawng vawng a.

Rothuama chuan chhan ngaihna ppawh a hre lo, han hnem dan tehchiam a hre bawk lova ngawiah a tlak ta mai mai a. Mahni khaw lam pan an ni bawka rinai taka Rami pawh a kal theih avangin an kal thui tawh hle mai a. Rothuama pawh a lawm ru angreng hle mai. Hetiang zela an kal tluan chuan ani tan pawh let lehna a huphurhawm lutuk lo ang chu.

Rami chuan "Kan khua i rawn lut ve ang em?" a rawn tichhuak deuh hlut a. Rothuama chuan "A tul dan a zir ani ang chu." ti chauhin alo chhang a. "An lo that mai ang che tih ka hlau em mai." Rami chuan a han ti leh chiam a....

@Dwm Pachuau

episode-108

Liankima leh Phunga pawh an lal tirhna avangin nau riltam hun awm velah Rothuama te umzui tur leh alo let leh lam an leido khua te ram chin sia lo that tur chuan an kal ta vang vang a. Liankima chu mithi vui tur ang mai hian a hmel leh chezia reng rengah chuan phurna pakhat mah a nei lo tih a hriat hle.

An lal Chhingmami pa hian rem a ruat kim hle niin a lang. Liankima amah maia a kal chu a phal ikhaw lo mai a. Inbumna leh inphiarrukna an inkarah a awm hlauin Phunga chu a hruai tir a. A remruatna ang nilo hleka thil a kal palha chinchang rawn thlentu atana atih a ni.

Phunga hi an khaw tlangval, mi ang lo han tih dawn a ang deuh roh si, mi ang han tih dawna ang chiah bawk si lo kan tih ang hi a ni a. Engmah thu an thu leh hla hre lem lo mahse chumi nia a hna ber chu Liankiman a hna a hlen em tih hriatchian chu a ni mai a, chu em zawng tihlawhtling thei tura lalin a ngaih a ni. Tin, eng emaw thulhah pawh lal tan aka hup awlsam ber tura ngaih a ni bawk.

An leido te khua han thlen ve kher an ngaih dawn loh avangin hmanhmawh tehchiam a ngai lova. An hmelma te ram china Rothuama lo channa tur hmun remchang an thlen hman chuan a tawk em em a ni.

Phunga chu kawngtluan mai chuan a tawng bawrh bawrh a. A thilsawi te chu inzawm lo tak tak leh intuha lo tak tak te an ni nuai mai a. Mahse, engkim mai chu a sawi zawm chho zat mai a. Liankima chuan a ning ngei mai.

Liankima thung erawh chu kawng tluanin a ngawi ngal mai thung a. A rilru chu a insual but but mai a. A thianpa ngawih ngawih, a thian satliah pawh ni lo. Engkima a sangawi zawnpui leh a thian sabeng ngat kap hlum tura a han inngaihtuah zawng ringawt pawh chuan a tim sawk thei a ni.

A rilru leh ngaihtuahna chuan a thei dawn lo tih a hrilh mawl mawlh a. Chuti chung chuan a tulna chuan nawrin a duh loh ber tipuitling tur chuan hmalam a pen zel chu a ni bawk si a. A chhia leh tha hriatna chuan ti lo turin tur ut ut mahse a tih loh chuan thisen tamzawk a luang dawn tih a kutzungpui tlukin a chiang si a.

A thinlung tawt lutuk ngawi reng hian a rawn thaw chhuak leh hawk thin a. Tuna a dinhmun hi thihna aiin a nep chuang awm love, ama nunna mai chuan tuar dawn nise thih chu a thlang zawk hliah hliah a. Mahse, a thianpa nunna ber a chhan theih dawn chuan loh a vang leh chhungte nunna, a thianpa nunna leh a nu leh a farnu nunna nen lamin a tuar dawn si.

Liankima chuan thildang zawng aiin thih a chak ber. Chu a rilru mangang lutuk leh a thil tih tur hreh lutuk avang chuan a inrin hman lek lohin a biangah mittui a rawn luang zawih zawih a. Dan ngaihna reng a awm lo. A kalpuipa chuan a hmu ang tih hlau takin a hru sawk sawk a.

A kalpuipa lah chu vanneih thlak kan ti dawn nge vanduai thlak, ama phul phul chuan a phul char char a. Engdang mah a ngaihtuah lo, a thianpa rilru hah zia leh manganna chu a them pawh a hre phak mawlh lo thung.

Liankima te pawhin thui tak an thleng tawh ang tihah chuan an lal tirhna avang thoin tlangaupa chu Rothuama te in lamah chuan a kal chhat chhat a. Rothuama te in a thlen chuan Rothuama nu puan bang Rothuama nau chuan a lo pui mawlh mawlh a. An pahnih chuan Ramtei chanchin chu an lo sawi bawrh bawrh a.

Tlangau chuan a kalchhan leh lal thu chu hreh tak maiin a han sawi ta a le, Rothuama nu leh a nau makti lutuk chu an a lo chauh mai. Chu thu thinthawng lutuk mai chuan a dengna dun bawk a, Rothuamanu phei chu nikhaw hre lovin a tlu ta hial a.

Tlangau leh Rothuama nau chuan an han bawihsawm leh rih a. A rawn harh chhuah rual chuan lungchhe vankaia tah a rual nghal a. Rothuama nau lah insum thei bik hek suh. Mahse, tlangau chuan midang hriat hlauin a lo khap mawlh mawlh a.

Tichuan, an lal thu ang chuan chawp leh chilha an khaw chhuahsan alo ngai ta thut mai si. Rilru fim leh mumal put theih ani tawh lova, Rothuama nu chuan "Aw Taia, engtizia nge nita mai ngai le?" tiin a tap tlawk tlawk a. Tlangau chuan "A pawi ngawt mai. Ani lah kan khawtlang chhuanvawr leh innghahna ber anih tehlul vei nen. Lal pawisawi palh hlauh hi zawng, a pawi teh zawng a nih hi." a lo ti a.

Rothuama nu leh a nau chuan engmah sawi tur reng an hre lo. Tlangau bawk chuan "Mahse kan lal hi a lo tha hlauh zawk a, thihna khawp meuh nimahse in chungah zahngaiin in nun ala phalsak cheu a, a lawmawm ngawt zawkin ka hria. Tihian a pawimawh zual ang ang hi kengin tunah la la hian in kal mai a ngai a ni. Rothuama pu te khawlam pan ta vang vang ula, midang hmuh cheu a rem loh avangin inkawmthlang ramhnuai atang hian a ruk thei ang berin chhuak mai ula. Keiin a theih chen chen ka rawn thlah ang che u. Rothuama pawh alo hawn veleh dam takin a rawn um ve leh mai dawn che u a. Lungngaih lutuk tur a ni love." a han ti a. Tichuan a ruk thei ang berin anmahni in lum ngei chu hmu leh tawh ngai reng reng lo tur chuan an chhuahsan ta rum rum a. Rothuama nu leh a nau bianga mittui luang chuan kir zai reng rel lovin an chunga vanpui lo chim chu an tuar ta ngawt ngawt mai a ni......(a tawi ti tawh su ommmmm hmeltha ho)

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:24 pm

episode-109

Rothuama nu leh nau chuan an in chu lungchhe vankaiin an thlir let tawk tawk a. Tih theih erawh an nei si lo. An chunga thil lo thleng chu a rang teh thut em bawk a, hriatthiam ngaihna pawh a awm bawk lo a ni.

Tlangau pawh chuan a lainat ve hle mai a. Mahse, engmah tihsak theih a nei bik si lo. Lal thu chu lal thu a ni tawp mai a, a sut theitu pawh lal bak tumah an awm lo. Rothuama chuan engtiang chiahin nge an lal chhungkua te thu ngaithla rua alo bihruk lah a hre bik hek lo. Rothuama nu chuan tap chungin a han zawt chiang thin mahse, engmah a hre thui bik lova. Lal thu chah anga rawn kal mai a ni si.

Anu chuan chutiangin a fapain tute chhungkua mah bihthlaa an thawm a ngaihthlak ruk a ring thei lo. Tute emaw itsikna leh phiarrukna anih a ring nghet tlat a. Mahse, chu a rinna mai chuan a chhandam zo lova, awmzia a nei thui lo kher mai.

Tap chungin kawtchhuah lungdawh an thleng a. Naupan tet atanga an khua, an seilenna hmun, chhungkaw kima hlimna leh harsatna chihrang hrang an lo paltlang vena, thlamuang leh leh nuamti taka an lo chenna kumkhua, an chhuan ve em em. Tuna tanga an khua ni leh tawh ngai reng reng lo tura an han chhuahsan ta thut mai chu hriatthiam zawng a har ngei ang le.

An nufain kawtchhuah lungdawh atang chuan mittui nen an hawi let tawk tawk a, a lan theih chhung zawng kal paha thlir chung zelin an kal liam ta. Thui tak thlengin tlangau chuan a zui ve zel a. Ngaw chhung tak tak an luh atanga rei vak loah chuan an lalpa chah ang ngeiin a kirsan leh ta a. An inthen dawn chuan tlangaupa meuh pawh a lung a chhe ve hle mai.

Tihngaihna awm silo nana na chu dam takin tiin an invai liam ta nge nge a. An nufa te chauha an kal dun hnu phei chuan Rothuama nu lung chu a chhe zual nasa em em a. A fanu kuah meuh chuan a tap chhuak rawih rawih ta mai a, tumah han inhnem tur chuang reng reng an awm lo.

Liankima te pahnih chuan chawhnu herah an khua leh an leido te khaw inrina lui chu an thleng ta a. Tun hmaa a thianpa nena an sulhnu te chu a mitthlaah a rawn lang uai uai a, a hrehawm tihna chu a zual ngei mai. Lui kamah chuan an chawfun an bar sawk sawk a. Tichuan an bar kham hnu chuan an leido te ram chhung chinah chuan lutin Rothuama lo let leh lo channa tur hmun remchang an zawng ta a.

Rothuama te pahnih pawh muangchangin an kal bek bek a. Rami chu a chauh tawh em avangin an hmanhmawh thei si lo. Khua a thim a ni ruai tawh mai tihah an khaw kawtchhuah chu an thleng ta hram a.

Rothuama chuan a haw lehna tur a ngaihtuah chuan a rilru pawh a hmanhmawh ru viau tawh a. Mahse, hmanhmawh anga lan erawh a tum bik chuang lo. Lungdawhah chuan tumah an lo awm loh avangin lungmuang tak chuan an han thu hahchawl leh te te a.

Rothuama chuan "Dai bul thleng ka rawn thlah ang che a, tichuan keipawh ka let leh nghal mai loh chuan. Ka let lehna tur a hla si a." a han ti a. Rami chu a ngawi reng thung a. Rothuama bawk chuan "I nu pawh alo la dam ngei beisei ila. I chanchin an zawh che leh kan khaw ram chin thleng min rawn thlah i ti mai dawn nia." a tih zawm leh a.

Rami chu rawn hawichhuakin "Ka chunga i thatna leh i chhungte ngilneihna hi engtikahmah ka theihnghilh ngai lovang." mittui parawl teuh chung chuan a rawn ti chhuak tham tiak a. Rothuama chuan dim taka kaithoin "Tirawh, i kal leh tawh ang hmiang."a ti a. Tichuan an inzui leh ta hnak hnak a. Mahni khaw thleng tur e tilo chuan Rami chu a phur lo hle mai.

Khua a thim chiang viau tawh tihah chuan Rianglung khaw dai chu an thleng ta a. Rothuama chuan "Helai thleng hi ni rawh se aw. Tikhan kal la, ka lo thlir liam ang che." a han ti a. Rami chu a ding ran mai a. Rothuama chuan "Kal rawh le." a lo ti leh a.

Rami chu muangchangin a kal ta chhat chhat a. Pen sawm vel a kal hman ang tih chuan a han ding leh dat a, chutah Rothuama lamah chuan rawn inherin a rawn let leh a. Rothuama chuan "Engti zia nge?" a lo ti thuai a.

Rami chu lungchhe tak hian a insut faih faih a. Rothuama chuan a han din hnaih deuh a. Chu veleh Rami chuan Rothuama chu kuahin a awmah chuan a bei a, lungchhe vankaiin a inhnit ta hlawp hlawp a. Rothuama pawh a hrilhhai kher mai.

A lungchhe zualpui a reh hnu chuan Rami chuan "Ka lawm e, i chungah hian ka lawm takzet a ni. Ka theihnghilh tawh lovang che, ka kal tawh ang e. I nu leh i farnu kha min han biak mawlh mawlh dawn nia. I hawna tur a hla si a, tluang deuhin i kal ang a, dam takin thleng ang che." a ti ve ta a.

Rothuama chuan "Tehreng mai, min ngaihtuah reng reng suh. I nu nen hlim taka in inhmuh leh ngei ka duhsak che u. Kan dam zel anih chuan inhmuh leh hun te pawh ala awm leh mial mahna, kal tawh rawh." a tih lai chuan a kut chu Rami chuan a lo hmer vawng vawng a. "Khuavangin min veng sela, chu hun chu thleng leh mawlh se ka va ti em. Min han hre ve reng ang che aw, dam takin, dam takin le." tiin a inher a, mittui far zawih zawih chung chuan a kal ta nghal a. Rothuama chuan ngawirengin a lan theih chhung zawng a thlir a, zawite hian "Dam takin le." a ti ve sap a..........

@Dwm Pachuau

episode-110

Rami a kal liam hnu chuan Rothuama pawh a inher a, an khaw lam pan chuan a kir ve leh ta nghal a. Khua ala hnaih deuh em avangin fimkhur thuah meichher pawh la chhi duh lovin thim hnuaiah chuan a kal ta vang vang a. Zan thim hnuaia kal mai mai chu an kumkhaw tih dan thin reng anih avangin harsatna lutuk a nei lem lova.

Mahni mai anih tawh avangin a kal char char a. A rilruah erawh Rami chu a riak ve reng tho mai. Ngaizawnga vei phei chu ani hran lova, a nu chu alo la dam angem? An inhmu tawh ang em, nge alo thi tel ve reng zawk ang tih te a ngaihtuah nasa hle a. Chutia engmah chinchang hrechiang lova a hawnsan leh ta mai pawh chu a inthiam lo lek lek mai.

Mahse, an khua ber a hruai thleng tawh a. Khawchhung luh ve ngawt chu atan a him bik loh avangin a inthiam chawp leh a. Kha bak bak chuan a chunga that chhuah leh ngaihna awm chuangin a hre lem lo. Tichuan hmanhmawh lutuk si lo chuan a kal ta zel a. A ralmuang tawh awma a hriatah chuan meichher tur dapin chuta tang chuan meichher engah a kal ta a.

Zan pawh a rei lam a ni ta. Liankima chuan a thianpa chu a lo let leh ta lo em ni ang? Nge hmundang atanga hawin an inhmu ta lo tih a ngaihtuah nasa hle mai a. Chutiang anih vaih chuan engkim a pawi zo dawn si. A awm a nuam thei ta reng reng lo. Chutih laiin a kalpuipa Phunga lah chu a muthlu lup lup tawh a.

Engpawh nise chu hmunah chuan zankhuaa chan chu a tum ta tho tho a. Engti kawng zawng pawhin a thianpa chu a chan chhuah ngei ngei a ngai a ni tawp mai. Anih loh chuan thisen tamtak a luang dawn. Zan a rei telh telh a. A ngaihtuahna a buai telh telh a. A thianpa lah a mutui tawh ngang mai si.

Mahse, a thianpa muhil erawh chu tha zawka a hriat avangin kaihthawh a tum lo. Chutia mahni chauha a rilru a kawm mawlh mawlh lai chuan ral khata meichher eng a hmu ta zauh mai. Liankima chu a ding chhuak zawt a. Mahse, meichher eng chu a bo leh ta daih mai.

A hmuh sual em ni? Nge a mitvai mai mai zawk? Ni lo, a hmu ngei a ni. A hawi vak vak lai chuan a hmu leh ta zauh mai. Chutah zet chuan rinhlelh rual a awm ta lo, ramhnuai anih avangin a hmuh reng theih loh ani tih a hrethiam nghal vat a. Chutia a thianpa ningeia a ngaih a hmuh takah chuan a rilru a bing mup mai.

Phunga chu a han khawih de de a. Ani lah a hnar suk suk mai tih a hriat chuan thawk a han la hawk a. Chutia an pathuma han inhmuh thawt mai chu dik dawna a hriat loh avangin thim thamah chuan a thianpa meichher eng a hmuhna lam pan chuan a kal ta nghal a.

Kawi hnih vel a thlen chuan kawngchhak rem laiah a lo biru ta a. Rothuama meichher pawh a rawn hnai zel a, a rawn kal muang lo hle tih Liankima chuan a hre nghal mai. A mei eng chu Phunga khan harhin alo hmu ve ang tih a hlau hle a. Mahse, a muttui em avang khan a ngaih a'n ti tha chawp leh a. Rothuama chu engtia lo hmachhawn tur nge ni ang tih a ngaihtuah nasa ngei mai.

Engkhaw sawi set set lovin a lo sat bawrh mai dawn nge hmun leh hmunah alo kap thal tawp mai zawk dawn? A rilru chang a buai lo, a taksa pawh a pangngai thei lo. A chhungril chu a khur a, thil hlauh em em hmachhawn ang mai hian a zam a, a thluak a nu but mai.

Rothuama meichher eng chu a rawn hnai zel a, Liankima chu a awm hle hle thei tawh lo. Engtinnge ka tih dawn che thiana? Engtinnge ni ta ang? A ti ru mawlh mawlh a. A mah pawh a hmu thei ta, Liankima chu thlanfimin a bual huh zuih tawh.

Rothuama chu pasaltha tih takah khawiah pawh awmin kal se fimkhur ta reng reng hi a ni a. Mipa leh lawi chal chu inring renga awm tur tih hi a thupui a ni tawp mai. A hmaah chuan tuinnge lo chang a, enginnge lo hmuak dawn tih hre hauh lo chuan hmalam a rawn pan phei nghauh nghauh mai le.

Liankima chu a sai dat dat a. Rothuama a rawn thleng tep, hlam sawm vel chauh a ni ta. A awmna lai pawh a meichher chuan a rawn en pha vuai vuai tawh. A silai leh chem tum chu nghet takin a hum a. Mahse, a rilru erawh engmah tithei zia zang niin a lang hauh thung lo.

A awmna zawn a rawn thleng dawn ta, Liankima chu che miah lo hian a thu ran a, chutih lai tak chuan Liankima sawi fiah ngaihna awm lo khawpa buai leh mangang a ni. Rothuama chuan a awmna zawn a rawn thleng ta. Engmah a ti thei lo, a en reng ringawt mai a ni. Rothuaman pen li pen nga velin a kal pel hman tih chuan a han che hrat a. Chu veleh rang lutukin Rothuama chu a rawn inher a. Rang tak maia Liankima tawmna zawn silaia tin pah chuan a hnar a han len nghal vut a. Thil che hrut a hmuh chu fiah tuma a let leh dawn lai tak chuan "Ding rawh thianpa." tih ri a hre ta mai.

Rothuama chuan mak a ti ngei mai. A thianpa aw ngei nia a hriat avangin "Nangmah kha lo chhuak rawh." a han ti ram hmak mai a. Chutah muang chang hian Liankima chu a rawn ding chhuak a. Kawngah chuan a rawn chhuk thla ta a.

Chutia tum loh leh rin loh lutuka an thian dun an han inhmachhawn ta ran mai chu Rothuama chuan a hrethiam lo ngiang mai. A silai chu muangchanga dahthlain "Heta hmuh che hi ka lo inring miah hleinem. Eng kan ti zo ta nge thiana?" a han ti a.......

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:25 pm

episode-111

Liankima chuan leilam a bih ngar mai a. "Thianpa, i meichher kha dahthla teh." a han ti sap a. Rothuama pawh chuan leiah a dah ve mai a. A thianpa chu pan hnaiin "Pawi pang a awm em ni ta ngai? Nangmahin em ni i nih?" tiin a han zawt a. Liankima chuan Rothuama hmel reng a en ngam lo. "Ni love, Phunga nen kan ni. Mahse, ani chu ven thawn tur a awm love." tiin a lo chhang a.

Rothuama chuan "Eng thil nge nita han sawi ta che." a lo ti a. Liankima chuan thawk a han la hawk a. "Thiana, i pawi ka sawi a ni. A siam that theih tawh loh, i pawi ka khawih a ni i pawi ka khawih." a han ti a. Rothuama chuan a hrethiam lo takzet.

"Chu chu i sawi fiah thei deuh lawmni?" a lo ti leh a. Liankima chuan "Kan thuruk kha..." a han ti a, engmah sawi zawm lovin a ngawi leh ta daih a. Rothuama chuan ngawi rengin a lo en ran a. Liankima bawk chuan "Lalpa in min kova, zu min pe a, ka in lo ngam si lo. Tichuan ka rui ta a. Engkim ka sawi chhuak ta a ni. Zinga ka harh chuan Chhingmami nen kan lo riak dun tih ka hre chauh a, hawn ruk ka tum lai takin lal chuan min lo thawh khalh si a, tichuan engkim hi a pawi zo ta a ni." a han ti a.

Rothuama chuan engmah ala sawi ve ta chuang lo. "Tichuan nangmah hi that turin min ti ta a. Chhingmami hi nei turin min ti bawk a ni. A thu ka zawm loh chuan nang leh i chhungte zawng zawng, kei leh ka chhungte zawng zawng thah fai vek a tum a ni. A hriat loha kan pem mai a hlauh avangin englai pawha min enthlatu a dah bawk si, duhthlan tur ka nei lo a ni." a han ti leh a.

Rothuama mitmeng chu a nelawm fahran lo kher mai. Engmah a sawi chhuak ve duh lo te hlei hlei chuan Liankima awm a tinuam lo zual a. "Thianpa, eng emaw tal chu han sawi teh. I thian ni tlak pawh ka ni ta love." tiin Rothuama chu a en a.

Rothuama chuan "Tichuan min that tur chuan helai hmunah hian min lo chang ta amaw?" a han ti a. A tawng chu ring lo mah se a fiahin a chang tha ret rawt hle mai. Liankima chuan a chhang tawh lo.

"Hei leh chen i tih tur tih tuma min rawn zui inih chuan min han that ta che." a han ti a. Liankima chuan lei lam bihin a lu alo thing a. "Chu chu tithei ni ila ka zawn ilo thlen khan ka ti daih tawh ang chu." a lo ti a.

Rothuama chuan "min thah tum ngei chuan min lo chang tho chu anih si hi." alo ti leh bauh a. Liankima chuan "Thianpa, ka dinhmun khirh zia hi min hriatthiampui em?" tiin a lo zawt let a. Rothuama chuan a chhang lo

Rei ngial an ngawih dun vang vang hnu chuan Rothuama chu alo tawng chhuak a, "Kan lalpa chuan mualpho a hlau hle mai maw? A mawh love, a thuruk hretu pahnih kan awm a. Pakhat zawk chan chu thih anih laiin pakhat zawk chan erawh chu lal makpa nih maw?" a han ti vawt raih mai a. A sawi zawng chuan Liankima chu a lo mur uai uai mai.

"Engkim hi keimah vang a ni a, a tuar tur pawh keimah ka ni. Kei hi min that la, tichuan nang hi ka dinhmunah i ding tur a ni." a tih chuan Rothuama chu alo nui hak a. "Chu zawng, ni lul love. Ka chanpual tura lalpa nena inlo rel tawh chu lawm takin ka pawm." a lo ti mauh mai.

Liankima chuan "Ka dinhmun hi mangchhia ang mai a ni. Thihna aiin a lem chuangin ka hre lo." a ti chuai raih a. Rothuama chuan "Nang aia ka chan a thatna pawh ka hmu thiam bik love. I sawi hmangin, nangin kei min thah loh chuan nangmah mai nilo, i chhungte leh ka chhungte nen lam an mang vek dawn anih si chuan min thah mai chu i kawng neih chhun a ni. Mipa i ni a, i tihtura lum chu i hlen ngei tur a ni." a han ti leh a.

Liankima chuan alu thin pahin "Ni lo thianpa, ka thei lo a ni. Kawng dang a awm ang." a lo ti a. Rothuama chuan "I thei ang. Nangmah inngaihtuah lo la, i chhungte leh ka chhungte i ngaihtuah a ngai a nih chu. Annina an tawrh ve ka duh hauh lo. Nangpawhin i duh lovang tih ka chiang, chuvang chauh pawh chuan min thah a ngai zunia." a ti a. Liankima mittui chu a far ta zawih zawih a.

"A pawi tih bak chu sawi ngaihna pawh ka hre lo thianpa, ka va han laktlak loh lulai em." a ti vawng vawng a. Rothuama chuan "Inthiam lo lutuk teh suh thiana, mihring hian tihsual chang chu kan nei theuh alawm. Lalpa chuan min that ngei ani tih finfiah nan eng nge a phut?" tiin a han zawt a

Liankima chuan "I thi val beh leh i diar." tiin a lo chhang a. Rothuama chuan "Tichuan helai kan leido te ramah hian ral kuta thi angin ka lang thei ang a. Remruatna fing tak anih chu." a lo tih zawm a.

Liankima chuan "Thianpa, chulam zawng sawi tawh lo teh ang" a tih chuan Rothuama chuan "Engah maw? I lo kal chhan ber a ni miau a, engdang nge kan sawi ang? A thuhrimah chutiang tehhrep anih chuan kei chu min that emaw that lo emaw khaw rawn lut chi pawh ka ni lo ta phawt mai a. Kei chu engpawh lo nita ila ka chhungte ka va ngaihtuah deuh em." tiin thinrim tih hriat tak mai hian a hachang a thial rap rap a. Liankima tan zawng a ngaihnawm loh kher ang chu. An pahnih chuan leia meichher alh chu mitkhap lek lo hian an thlir dun a. Sawi tur a vang ta kher mai.....


episode-112

rothuama chuan zawi sap hian "Inlo chutih vang ani maw ka lak atang khan i bihruk ngar ngar? Mak chu ka ti deuh a. Mahse, hetiang em hi chu anih rin ngaihna ka lo hre phak lo a ni. Tunah zawng, mi chuang ui chuang ang lek ka ni tawh a. Khua leh tui tana ka tha leh zung, ka theihna ka lo hlan ve zawng zawng te kha eng tham ni lo mahse nang talin min hriatsak ve a ni ang chu. Inhnawhchhuah mai ni lo, thi tura min duh chhan tur khawpa an pawi ka sawi lah ka hre hek lo. Mahse, chutiang alo nih takah chuan dam pawh chu a thlanawm tehchiam chuang lo a nih chu. Ka nu leh ka farnu neih chhun kha ilo venhim ka beisei a, ilo thlahthlam lo hram ang che. Min that tawh rawh." a ti ta a.

A sawi zawh rual chuan a silai chu leiah a dah a. A thianpa hmaah chuan a thingthi ta rap mai a. Liankima chuan ngawi rengin a thianpa chu a en reng ringawt a. Rothuama chuan "I tih tur chu ti rawh, engmah hlauh tur a awm lo." a tih pawh chuan Liankima chu a chechang eih lo. Rothuama chuan a thianpa mitah tak chuan enin "Ti vat rawh." a han ti chang leh rawt mai a.

Chutah Liankima chu a che hrut a. A silai chu lek kangin a thianpa chu zawi muang hian a han tin ta a. Rothuama chuan khap eih lo hian a lo melh bawk a. A hmelah chuan zamna leh hrehna reng reng hmuh tur a awm lo.

Liankima chuan a tin khur ngar ngar a. Ala hmet per mai si lo. Rothuama chuan "I huphurh anih kha. Hmet rawh i rin aiin a awlsam ang. Hmet rawh." a lo ti leh a. Liankima chuan a tin reng ringawt mai.

A hmet per thei si lo. Rothuama chuan vin leh fiak thak hian "Hmet rawh." a'n ti leh tuarh mai a. Mahse, Liankima chuan a silai chu muangchanga dah thlain a thu zawi ta hnawk a. Chutah thinrim engphiarin Rothuama chu a rawn tho chhuak ve thung a. A silai chu chharin "Mipa i ni nange? Khawinge i hna chu keiman kan thawhsak mai ang che tiin a silai chu a han kau a. Tichuan leiah tungin a kaw hmawr chu a pum zawnah a han dah a, a hmeh perna chu a ke chuan a han tlawh ta a.

Liankima chuan a thianpa thiltih tum chu hriain ava bawh phei ruak a. Mahse, silai chu a puak hman ta tho mai. Rothuama te pahnih chu kawng thlangah an lum dun ta tawp tawp a. Alo dangtu thingkung a awm avang chuan thui erawh an lum lo.

Liankima chuan thinrim engphiar hian "Nang hian dawihzep min ti a maw? Mahni nunna chhat duh khawpa dawihzep chu nangmah hi ilo nih hi, i hria em?" a han ti nghek mai a. Rothuama chuan "Engah nge mi lo tihbuai? Hei hi dawihzep thil tih a ni lo. Nunna tamtak chhanna a ni zawk." alo ti vin ve tuarh bawk a.

Liankima chuan "Rang takin kawngah khian chho rawh. Tlemah tlemah kan thi dun lo chauh chu anih kha, Phunga kha a harh ngei ang i silai puak thawmah khan. Hmanhmawhin min rawn zui rawh." a ti sawk sawk a.

Kawng an thlen chhoh chuan Liankima chuan a silai leh meichher chu a la a, "Kal ang, i silai kha chhar rawh." tih leh amah chu kal a rual ta nghal a. Rothuama pawh chuan zui ve mai loh chu tihngaihna awm ta hek lo, a thianpa hmanhmawh taka kal chu a zui ve ta poh a.

Phunga awmna an thlen hma deuh chuan silai a puak thawr a. Liankima chu leiah a thu nghal hnawk a. Rothuama pawh leiah bawkin a silai mu a thun nghal sawk sawk a. Liankima chuan vin thak hian "Mimawlpa, eng vanga min kap ngawt nge maw i nih le? Tih pahin a silai chu a han hmet puak ve thuai mai a. Meichher engin a en chin leh chin lova Phunga ding chu paih ang thlawrh hian leiah a tlu ve nghal a.

Rothuama chuan "I thurualpuipa chuan a phatsan che a ni maw?" tih pahin Liankima chu a rawn hnaih a. Liankima chuan "Ka hre phiangsen love, a mawl man a phu tawk chiah a hmu a nh kha." a lo ti hlur a. A malpui silai mu luhna leh a tlangna chu a hup nghal a.

Rothuama chuan a diar chu lathlain a tuamsak nghal a. A malpui lai tak anih loh avangin a vannei kher mai. Na lutuk anih loh avang leh a pachan em avangin Liankima chuan a baipui thei mai a. Bai auh auh chung chuan Phunga awmna lam chu an pan ta a. Phunga chu a awmah tak Liankima silaimuin a deng hi a lo ni a.

Rothuama chuan "Thil hi ava khawlh kham kual zozai ta em." a han ti a. Liankima chuan "Thil fel zawkna tur pawh nifahmiang. Tihian khuaah kan lut dun ang a, khawvar hmain i nu leh i farnu i hruaichhuah leh hman ka ring, i pute khaw lam i panpui dawn nia. Hei i diarin ka hliam kan tuam a. I thi val kha min pe bawk la, a bak chu keiman ka lo chingfel mai ang. Kan dam zawngin ni tha ala rawn her chhuah leh ngei ka ring." a han ti a. Rothuama chuan a chhang lo.

"Phunga hi i kahhlum angin ka sawi ang a, keiin nang ka kap hlum ve thung che a ni. Chumi fiah nan chuan i diar leh i thi val beh hi a tawk a. Khawtlang hmaah thung chuan Phunga hi ral thah angin kan lan tir ang a. Nang hi an man che a, khawiah emaw an hruaibo angah che a lantir theih ang. I nute erawh chu i pute khaw lama pem hrim hrim ang pawhin a sawi theih mai ang." a ti a. Tichuan a thianpa rawt ang chuan Rothuama te thiandun chu khawlam panin an kal ta sauh sauh a........

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:25 pm

episode-113

Rothuama te pahnih chu inbe miah lovin an kal dun ta ngat ngat a. Liankima hliam chuan kal tiharsa deuh mahse a thianpa lakah chuan a thup hram hram a. Engkim buaina bul anih zia leh amah vanga tun dinhmuna ding an nih zia a inhriat avangin sawi ngam chiah a ngai lo. Tin, khawvar hma ngeia Rothuama chuan a nu leh farnu chu a hruai chhuah leh hman loh a hlauhpui em em bawk a.

Rothuama pawh chuti taka lalin alo haw leh a thihna tur duh hial khawp a ruahmanna alo nei mai chu mak a tiin a hrethiam thei lo. A fanu Chhingmami keimi ani tih an hriat ruk vanga thih tir a tum ngawt mai chu na a ti ve hle a. An thian duna haw law law mang si lo ani hmeithai rethei fa anih mai avanga chuti taka a chunga hlei a han len chu pai dam har a ti ngang mai.

A thianpa ngei pawh chu a han haw dawn dawn thin a. Mahse, naupan tet atanga lo inkawm tawh leh khawi kipa inzui, vawi duai lo harsatna leh manganna lo paltlang dun tawh thin. Thiante thih ai pawh thi ngam ve ve an lo nih dun thinna chuan a huat tir tak tak thei lo. A ngaihtuah chian phei chuan a thianpa chu a khawngaih ru hial zawk a.

Chu zawng ai chuan engtinnge lal chuan a thianpa chu zu pe ruia a dawp ngawt theih? Engtinnge rinhlelh nachang a hriat zawk tih chu a ngaihtuah nasa hle a. A chhan tur awm ang erawh a hre chhuak zo lo. Lal lal zia a hria a, thih leh dam thlenga an chunga thuneitu anih zia lah a hai hek lo. Khawtlangin lal fanu keimi ani tih hria se khua leh tui nei miah lo khawpa an pem darhsan vek duh tur zia a hriatin an thuruk hretu thah a tum pawh chu thil tihawm loh a ni hauh lo tih a hria.

Liankima chu a thaw huam huam a. A tha tawp tak meuh chhuaha a thianpa a um ve ngar ngar chung chuan Rothuama chuan alo kal pel thui leh hman viau thin a. A tawpah phei chuan Liankima chu a insum zo ta ngang lova. "Ekhai thianpa, hliam tuar lo maha ka umphak loh che nen, heti chung phei chuan ka tlin ta ngang lo a ni e. Tikhan lo han kal ta vang vang la. Kei chu muangchangin ka rawn kal ang a, ka thlen hun hunah ka rawn thleng mai ang e." a ti ta nge nge a.

Rothuama chuan "Ka rilru ka lo kawm tui lutuk thin a. Ka kal chak tih pawh ka lo inhre lo thin a ni, keima thiam loh zawk a ni e. Kha hma han hruai zawk teh khai." a tih chuan Liankima chuan "E khai khai khai, ni love a. Tikhan kal thuai thuai ringawt la ani mai. Bakah ka ngaihtuah chianin kan haw dun loh pawh hi a tha zawk reng rengin ka hre leh ta hnuhnawh, fimkhur tluk a awm love." a lo ti a.

Rothuama chuan a thianpa thusawi chu a han ngaihtuah vang vang a. Dik a ti khawp mai. Mahse, ani hliam tuar han kalsan ngawt chu ni thei meuhin a hre si lo. "Chuti tur em ni thianpa?" a han ti a. Liankima chuan "Thiana, engkim hi keimah vang ani tih ka hria a. I theih chuan khawngaihin i thianpa hi min ngaidam ang che. Tluang takin kal ta la, dam takin kan inhmu leh chawk ang." thaw huam huam chung chuan a han ti a. Rothuama chu alo bu nghauh a.

Rothuama chuan "I nupui neih niah in khaw dai atangin ka rawn lawmpui ngei ang che. Duat takin enkawl la, fa tamtak nei ang che." a han ti a. Liankima chuan "Nang leh kei hi thihna chauh lo chuan min then lo se ka va ti em. Tluang taka i kal chuan kan inhmu hman tawh kher lo ang a, khawiah pawh nang nen hian intawng ila ral ang chuan kan intawn loh ka beisei a nia. Kal tawh rawh ka thian, Khuavangin a veng zel ang che." tiin a kut a rawn phar chhuak a.

Rothuama chuan a kut chu lo manin an inkuah vawng vawng a. "Lo dam tha hle ang che." tiin a thianpa chu a kalsan ta a. A thianpa kal liam tur chu Liankima chuan hnukulh teuhin a thir liam a. Ama hriat tham lek hian "Mualchuan khaw thlamuanna leh innghahna, a titalmuangtu ber chu a tiraltitu i chang dawn ta." a ti sap sap a.

Rothuama chu hmanhmawh thei ang berin a kal hmawk hmawk a. A rilru leh mitthlaah a nu leh farnu bak an lang thei lo. A chanchin leh lalin thah a tum dan an hriat huna anu nat dan tur te chu a ngaihtuahna luahtu an ni a. A zan azana amah vanga pem ngai tur te chu hrehawm a tiin a nu leh farnu lakah chuan a inthlahrung lawk takzet a ni.

Khawvar a hla tawh lo hle tihah an khaw kawtchhuah lungdawh chu a thleng a. Chawl muang miah lovin khuaah a lut tlang nghal a. Mi mut reh lai tak a ni a, an in kawt a thlen chuan an kawngkhar chu thingfakin alo indo tlat mai le.

Rothuama ngaih a tha lo nghal. In chhungah a lut nghal a, in chhung chu a nu ten an kalsan ang ngai ngai in a lo la awm thiap a. Rothuama chu a hawi kual nasa kher mai. Anu te chu khawiah nge an awm tak ang? An that ta mai em ni? Nge an lo hnawtchhuak hman tawh zawk? Rothuama rilru buai dan chu namai lo tak a ni. An thenawm te chu zah pawh sawi lovin a kaitho ta ringawt a. An chanchin a han zawh chuan "Tlangau sawi dan kha chuan i pute khuaah an pem dawn a ni awm e." tih chu a chhanna dawn chhun a ni. Rothuama thin chu a sa zak mai. Chu leh chen kal tura anni hmeichhe pahnih ringawt zawng an ngaihtuahawm lulai em a sin. Rothuama chuan ngawi rengin a hachang a thial rap rap mai.......

episode-114

Rothuama chuan "Eng hun velah nge an kal?" tiin a han zawt a. An kal hun an sawi chuan Rothuama chuan a ngaihtuah vang vang a. Anni hmeichhiaah pawh hmeichhe derdep leh chak tawh lo tan chuan thlenna hman ala awm lo tih a chiang khawp mai. Tunah te hian ramhnuai khawi emaw laiah hlau leh khurin an inkuah ngei ang tih a ring a. A lainat takzet a ni.

An thenawm te hnenah chuan "Khawngaihin ka lo kal thu hi khawiah mah sawi hauh suh ang che u. Nakinah ka chungchang an sawi chhuah hunah pawh inlo zep tlat dawn nia." tiin a chah a. Tichuan hah leh chauh pawh sawi thei lovin a nute kalna lam chu a pan ve leh ta nghal a.

A nu leh farnu chu a ngaihtuah em em a. Khawilai nge an thlen tawh ang? Ral leh sapui an tawk mai ang em? Riltam dangcharin an tlu dun reng mai ang em tih a ngaihtuah chuan a tlan let leh nal nal a. Ina chaw thing leh ei tur awm ang ang chu a ak sawk sawk a. Tui um pakhat chu la bawkin a tlanchhuak leh ta nghal a.

Khawfing a chat a, leilung a lang tan ta. Rothuama chu hmanhmawh takin a kal hmawk hmawk a, a rilruah engdang mah a ngaihtuah thei lo. A nu leh farnu chu damin nge a hmuh ang thiin tih pawh ngaihtuah tham tak a ni si a, a rilru a hah ngei mai.

Tluang takin sakei lui a thleng a. Chawlh pawh chawl khawmuang lovin a kal tlang zel a. Sakei lui piah lam chu a pu te khaw ram chin a ni tawh a. Sava chihrang hrang hram noh noh thawm leh sakhi patuai mam tha zet mai a hmuh te pawh chuan a rilru an la peng zo lo.

Nidang nise a thal dawn chian teh lul vei nen. Tun tumah chuan kah enah pawh a en lo hrim hrim, a kal dang pangngaiin a kal miah miah a. Kawngchhak leh kawng thlang chu a melh pah reng bawk a. Chutia sakei lui a pelh a tanga rei pawh a kal leh hma chuan kawng sira thisen far, la hlui lutuk lo a hmuh chuan a ding nghal chawt a.

Rothuama thinglungah chuan hlauhthawnna a rawn lut nghal zawk a. Fimkhur takin thisen farna lai vel chu a han en kual a, a thlang lam chu a pe thla deuh han mai. Hnim pik a ni lova, lei thil hmun anih avangin hnuhma hlui leh thar hriat thiam a har tlat.

Mifimkhur Rothuama chuan muangchangin a chhui thla ta a. Thui fe a chhui hnu chuan hmun khata thisen lo bua chu a hmu leh ta. A chhui thla zel a, a thlanglam chu kawr ni chiah si lo, ruam rai deuh hi a ni a. Chumilai vel chu hnimin a bawh khat luk thung a.

Fimkhur taka chhuk thla zelin kawr ruam a tanga piah deuh thing lian tak mai lam chu a pe phei sun mai a. Chuta a han pen phei, pen hnih thum bak a pen hman lovang tihah chuan thingkung dinna zawla a nu leh a farnu ruang lo let reng chu a hmu ta mai le...

Rothuama chu a ding chawt a. A thil hmuh chuan a barakhaih em avangin chetsawn zai reng a rel lo. A melh ngai melhin rei fe chu a ding khawng reng a. Mahse, nakinah chuan inthing harhin a nu leh farnu ruang awmna lam chu a pan hnai ta a.

Anu leh a farnu ruang chu hmuh hrehawm tak hi ani ringawt. Sakeiin a duh lai lai a ei, a ei bang zawng chu a ni mai a. Rothuama thinlung na lutuk chu an ruang bulah chuan a thu zawi hnawk a. Lainat em emin a nu leh nau ruang chu a thlir ngawt ngawt a.

Rothuama thinlung chu a rum takmeuh a, awrawl tawpa tah hawm hawm chu a chak ber nimahse a mittui a hul tlat thung. Engmah tihnachang hre lek lova a awm reng hnu chuan muangchangin a rawn thova, a nu leh farnu ruang chu a mut rem tir a. Hnahchhawla khuhin a ding sai ngar ngar a.

Chutah a kut humruhin pawisak nei miah lo ang mai hian a rawn meng a. A awrawl tawp tak meuha auchhuakin "Hei hi maw in rorel duh dan chu, lo ngai tak rawh u. Ka tihtur hlen lo hian ka thi lek lovang. Thihna hmachhawn tur hian lo inpeih ang che u." a ti tuar tuar ta mai a, a aw chu ramhnuai ngaw karah chuan a thangkhawk rawih rawih mai.

Tunah zawng, chhungte tih tur a nei ve ta lo. Engtia awm tur nge tih pawh a hre lova, khawilam nge pan leh tur tih pawh a hre lo. A hmela thinurna leh phuba lak duhna lo lang chhuak chu pa naran tan chuan thihpui tham zet a ni ngei ang, a dawngsawngtu nih chu a chakawm mawlh loh.

A chhungte ruang chu kalsan ngawt chi a ni si lo. A pute khuaa paw lut tur lahin ala hlat bakah thil tihchi a ni si lo. Khuaa let leh turin a rem si lo. Rothuama dinhmun khirh zia leh a mal zia chu sawiin a siak lo. Tihdan tur a ngaihtuah nasa hle a, a tawpah chuan lung lakkhawma chhilh hnan tawp mai chu a tihdan tur hriat chhun a ni ta.

Tichuan a duhtawka a chhilh hnu chuan a pu te khaw lam pan phawt mai chu a kawng neih chhun niin a hre ta a. A nu leh farnu ruang chu a han en thin a, a lung a awi thei ngang lo. Chutiang em ema riang tur leh chanchhe tur chuan engmah tihsual an nei lova, tupawi mah an sawi lo. Rothuama chuan "Ka nu, keimah vang a ni min ngaidam ang che u. Ka pa bulah thlamuang taka in awm tawh ka beisei, min lo biak dawn nia." tiin a kalsan ta a. Tichuan thinrim inpet ruh teuhin a pu te khaw lam chu a pan ta a. Muangchangin a kal a, hmanhmawhna leh thathona pakhat mah a nei tawh lo, a rilru a bing mup mai a, phuba lak chiah a rilruah a awm ta......

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:25 pm

episode-115

Rothuaman a pute khaw kawtchhuah a thlen chuan ni atla dawn suar suar tawh a. Khawthlang kawl kil a ni tla tur sen phut mai chu a thlir vang vang a. A mitthlaa a nu leh a farnu hmu reng chungin ni tla tur chu a thlir liam ta a.

A ngaihtuahna chu a kal ding kher mai. Ni chu tlain liam leh mahsela, a tukah a ngai tein ni thar duhawm tak a rawn her chhuak leh ngei ang a. Mahse, ni tla in a tlakpui leh a liampui tak a nu leh farnu nunna erawh chu a liam hlen tawh dawn si lo, an rawn kir ngai dawn tawh lo a ni tih a hriatna chuan rothuama thinlung chu a ti vai takzet a ni.

Thawk leh khatah lungchhiatna chuan a rawn tuam hlup a. A dinhmun leh a chunga thil thleng zawng zawng a han ngaihtuak kir a, a mah mai ni lo a nu leh farnu in nunna hial an chan phah dan te a ngaihtuah kir chuan a lungchhe em em mai a. Mahse, a mittui erawh far tir a tum lo.

A rilru leh taksa chu a chau tawngkhawng tawh bawk a, chu hmunah chuan khua nghah thima zana khaw luh a rilruk a. A pum ri kal ruih ruih chuan a riltam zia a rawn hriattir a. Mahse, engmah ei zai erawh a rel chuang lo. A mitthlaah a thianpa Liankima a rawn lang a, Chhingmami te, an lalpa leh an khua te a mitthlaah a rawn lut zut zut a. Tah hawm hawm a chak ber mai. Mahse, tah erawh a tum bau lo.

Khua a thim chiang ta maw tihah chuan Rothuama chu a thutna atanga thovin khaw lam chu muangchangin a pan ta chhat chhat a. Khawchhung a luh chuan khua a thim chiang tawh a, amah hmutute pawh chuan khawtual mi a ni emaw tiin an kal pel ve mai zel a.

A pute kawngkhar chu a han kik a, Lianmawii aw chuan "Lo leng rawh." tiin alo chhawn a, chutah Rothuama hmel an han hmu thut mai chu an phawk nasa hlawm ngei mai. Lianmawii chuan "Awi! Ka mitvai em ni ka u, ava mak teh nawlh ve engti zia nge?" a lo ti chul a.

Rothuama chuan han chhan mai ngaihna pawh a hre lo. A iptepui leh silai chu a han tung a. A pu chuan a che vel chu uluk taka lo enin nidang a ang lo tih pawh a man rang kher mai. Rothuama chu a melh ngai melhin a thu ta veng veng mai a.

A awmdan pangngai lo chu tutan mah hai rual a awm ta lo. A pu chuan a khupa a puan ven chu a han sawi tha te te a. A vaibel beng that mawlh mawlh pah chuan "Ka tupa, pawi hai a awm a ni maw? Nang meuh hetia ka han hmu che hi ka beisei hauh lo asin. Engpawh nise chaw kha puar takin han ei phawt mai teh." a lo ti charh charh a. Rothuama chuan a chhang lo.

Lianmawii hnenah chuan "I u hi chawei han siam thuai ta che maw le, khatia phung hmu ang maia thut reng tur a ni hleinem." a tih chuan Lianmawii chu a harh zawk a. A pu sawi ang chuan Rothuama chawei tur chu a siam nghal sawk sawk a. A nu chuan alo pui ve bawk a.

Mahse, Rothuama chuan "Ngawi rih teh u, ka chak rih lo. Nakinah ka la ei ang e." tiin a pu lam chu a'n hawi a. A pu chuan "Anih leh i thu thu le. Lo thu hnai teh ka bulah hian." a lo ti a.

Rothuama chu muangchangin a pu bulah chuan a insawn phei a. A pu chuan "Taia, ka tupa chhuanvawr i ni a. Mi leh saah ral atang pawhin ka lo chhuang thin viau che a nia. Eng nge i harsatna chu min han hrilh teh, nge hmeichheho hriat lohah hian em ni zawk?" tiin a lo zawt a.

Rothuama chu hnuailam bih hian a thu ngar mai a. A chhang dawn ta lo emaw tih tur awmah chuan lo hawi chhuakin a han insehruh teuh a, chutah "Nangni bak hi chhungte ka nei ta lo." a han ti a. A ngawi leh ta daih mai.

Lianmawii leh a nu chu an lo "Awi" rual thawt a. Rothuama chuan thil engkim a chin chhuakin a han sawi ta vek a. Chumi chhung chuan tumah lo cheeih pawh an awm lo. A tawpa a nu leh farnu thih dan a han sawi thlen meuh chuan a pu chuan a vaibel kuang a lo seh ri rawp rawp mai.

Hmeichhe lam erawh an tap ani titih nghal a. Rothuaman a sawi zawh meuh chuan theh hmeh ang mai hian a reh tlawk tlawk a. Rei lo teah hmeichhe inhnit ri leh tap insum ri a lo chhuak a. Rothuama leh a pu erawh chu an melh ngai melhin an thu ngawi vauh vauh mai.

Chutia eng emaw chen an ngawih vang vang hnu chuan Rothuama pu chuan a aw a han thian kharh kharh a. Muang ban chalh leh fiah tak mai si hian "Chutiang taka riangvai leh thlabar chuan maw ka farnu leh ka tunu chuan an hun tawp an hman? Min va han ngai dawn em ve aw!" a han ti a. A rilru tur awm ang chu a dawnpui theih ruai mai.

Rothuama lam chu hawiin, "Taia, ka tupa i ni a. Kan thlahtute atangin hetiang em hian sa leh ral hmaah kan la tlawm ngai lo asin. Ka farnu leh tunu thlabara siamtu leh an nunna min laksaktu chu engpawh nise nuamsain a dam thei lovang." a han ti a.

A tawng chu ring lo mahse a fiahin a chiang a, a vawt raih mai. "Mahse, hmanhmawha chet hi tluk sualna a nih avangin fimkhur tak leh muangchanga thil tih a tha ang. Tin, i nu leh farnu ruang chu naktukah kan la ang a, he thil hi lalpa pawh kan hrilh a tha ang. Khaw inkar boruak tichhe vek thei thil anih avngin mahni thu thu a chet pawh a tha ber kher lovang. Mahse, i nu leh farnu thlarau thlamuang taka an chawlh theih hma chu ka mutui thei bik dawn lo a ni." a ti charh charh a.......

episode-116

Rothuama pu bawk chuan "Tikhan chaw puar takin lo ei phawt la, lal in ah ka han chuangkai ang e." tiin a thaw taih taih a. A chhuah pah chuan "Kha i u kha chawei lo siamsak ang che." a ti zui a, tichuan a chhuak ta nghal a.

Lianmawii nu leh Rothuama nu te hi inhmu zing thei lo mahse ralkhatah chuan an inngai em em tho a. Chutia thihdan rapthlak tak maia an thi tih an hriat chuan anbarakhaihin an tuar em em a. Rothuam tak pawh chu an lainat a, chumi zan pawh chuan tumah mu thei an awm lo. Han mu ve bawk mahse an tap zankhua a ni ber e.

Rothuama chu a tawng tlem em em a. Biak chhun pawh hriat loh a ngah mai, a tuk khua alo var chuan Rothuama pu chu hma takah a tho a. A thawmah Rothuama pawh alo tho ve nghal vat a. Zan lama a lenna chanchin chu Rothuama chuan a zawt nghal thuai a.

Rothuama pu chuan "Lungngai suh Taia, kan lal pawh a ter at mai. Vawin lamah tlangval tlawmngai te nen i nute ruang chu zuk la ula, he khuaah ngei hian thlamuang takin an chawl ang. Kan chhungkaw chunga hleilentute pawh hi an nuam rei lovang." tiin a lo chhang a.

Rothuama pawh a thaw huai mai. "Mahse, ka pu chutia midang han tihbuai hluai mai chu ava inthlahrunawm duh awm ve. Kunga nen chauh pawh kan zu la thei em em alawm." a lo ti a. A pu chuan "Lungngai mata che ka tupa. I tan engmah inthlahrunna tur a awm reng reng lo a nia." a ti a. Rothuama chu a ngawi ngal mai.

Tukthuan ei hma deuhin Kunga leh tlangval dang paruk lai an lo leng a. Kunga leh Rothuama an han inhmu chu an inngai bawk a an hlim kher mai. Mahse, an hlimna erawh a khingbai em mai a. Sawi tur ngah viau e tilo chuan sawi mai tur ber pawh an hre lawi si lo. An thinrim zia leh phuba lak an chak zia an sawi nasa hle a. Rothuama pawh a thla a muang huai huai mai.

Tukthuan ei tura an haw darh hnu chuan Rothuama te pawhin an ei ve nghal a. Tukthuan an ei kham hmain a kalpui tur tlangval sawm rual zet chu an kawtah an lo awm leh der hman tawh a. Rothuama chuan chaw a ei tlem kher mai.

Tukthuan an ei kham chuan ruang zawn tura an ruatho chu an chhuak ta nghal a. A kal lo zawngin thlan an lo lai ve thung a. Chutianga khawtlang an han tibuai ta chiam mai chu Rothuama chuan hrehawm a tiin a inthlahrung kher mai.

Rothuama ten a nute ruang awmna an thlen chuan hlang tur an siam nghal vat vat a. Tichuan an inpeih ve leh muangchang lovin an zawn hawng ta a. Rothuama leh a thianpa Kunga chu a hnung berah kalin Kunga chuan a thiam tawkin a hnem mawlh mawlh a.

Khua an thlen chuan a tlai a tlaiin Rothuama nu leh a farnu ruang chu an phum ta nghal a. Khawtlang an felin Rothuama chu an lainat em em a. An chanchin zawng zawng hre mah suh se an thinrimpui nasa hlawm ngang mai

Sarthi an nih miau a vangin Rothuama nu te chu khawharin len leh engmah a awm lova. Zanriah ei kham chuan Rothuama chuan a chhungte hnenah "Khawiah nge Taia kha? A leng chhuak em ni?" a han ti a. Tumah chuan Rothuama chhuah lai chu an lo hre reng reng hlawm lo.

Leng hawn ar a khuang tan tih chuan ruah mal hi lian deuh deuhin a rawn tla a, kar loah thli a rawn thaw ta vuk vuk mai a. Tlangval nula rimho pawh a rang a rangin zawlbuk lam an pan sung sung a. Rei lo teah ruah chu a tama tam mangkheng a rawn thawk ta mai a. Chutiang reng reng a ruahsur tam leh rei chu an la hre ngai lo. A rawn sur tirh atanga chawlh nei map lovin a tuk khawvar thleng zak ruah chu a sur ta mai a.

Thli a nain ruah a sur hnem bawk a, in chhia pawh a awm nual mai. Lianmawii zing tho chuan Rothuama mutna a en nghal vat a. A awm lo tih a hriat chuan a ngaih a tha lo nghal hle a. A nu leh pa chu kaithoin a hrilh nghal vat a.

A pu chu muangchanga rawn thovin "A thianpa Kunga te in va en vat teh. A awm loh chuan zawlbuk lama en turin an mipa naupang kha i tir nghal dawn nia." a ti a. Lianmawii chu rang takin a tlanchhuak nghal a.

Kunga te ina a awm loh avang leh amah Kunga tak pawh zawlbuka a riak alo la hawn loh avangin an mipa naupang chu a tir ta nghal a. Mipa naupang rawn let leh chu Kunga nen chuan an rawn hawng dun a. Chutih lai chuan ruah bawk chu a rawn tla leh tan ta mai.

Kunga chuan "Zawlbukah chuan a riak lo tawp mai. Thlanah a awm anih ka va ring em, ka zuk en chhin ang e." tih leh kal a rual nghal a. Lianmawii chuan khatiang zankhuaa ruahsur tam lutuk kara thlanmuala a awm zankhua chu a ring lo hle nachungin a sawi chhuak duh lem lova. Tichuan Kunga lo let leh hun chu a lo nghak ta ran a.

Rei ngial hnuah Kunga chu huh phung hian a rawn tlan lut hlawl mai a. Thaw huam huam chung hian "Thlanah pawh a awm lo. Hnuhma thar ka hmu hauh lo mai." a rawn tih phei chuan an ngaih a tha lo hlawm tih an hmelah chuan a lang reng mai a.

Lianmawii chuan "A kalna tur awm ang te han rin ngaihna i hria em?" tiin Kunga chu a han zawt a. Kunga lah chuan a lu a lo thing bawk si. "Engpawh nise ka paten rei min ti lutuk ang, ka va phei phawt ang e." a ti a. Kunga chuan "Tirawh ka rawn zui ve ang che." tiin ruah sur sep sep hnuaiah chuan an inzui chhuak leh ta a......

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)