"MITTUI LUANGIN KIR AN REL LO" BY Dwm Pachuau (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

"MITTUI LUANGIN KIR AN REL LO" BY Dwm Pachuau (Completed)

Unread post by Ngaia » April 30th, 2016, 5:40 pm

mittui luangin.jpg
mittui luangin.jpg (18.91 KiB) Viewed 27629 times
"MITTUI LUANGIN KIR AN REL LO"
BY Dwm Pachuau
www.storyfb.com mizo story thar englai pawhin chhiar tur a awm reng

Lenghawn ar an khuang chuah chuah a. Tlangval nula rim te chuan zawlbuk lama mutmu tuah turin an nula rim theuhte chu an mangtha sap sap hlawm a. Chutia Mualchuan khaw in zathum nufa zet nula leh tlangval te inkham lo taka an inmangtha mawlh mawlh lai chuan veng mawng lama tang chuan "Sa a tla e!" tih thawm a lo awm ta mai a.

Thawm a lo chhuah veleh chuan tlangvalho chuan mahni hmanraw neih ang ang an chuh a. Meichher nen veng mawng lam chu an pan nghal zung zung a. Satlakna hmun an zuk thlen khawm chuan Val upa chuan ro a han rel zung zung a. Tichuan fimkhur takin sakeiin a saseh a tlanchhiatpui na lam chu an pan leh ta zung zung a.

Zan thil ngang a nih a vangin fimkhur a ngai hle a. Tin, zanina veng mawng vawk rawn sehtu hi hun rei tak atanga thah an lo tum tawh leh chimawm em em mai, sakei tar lam tawh leh nghal tak, a hmuh a piang seh tum a ni a. Mahse, a fin leh fimkhur em a vanga an thah hleih theih loh a nih miau avangin tun tumah pawh hian an hlawhtling kher angem tih chu hriatthiam har tak a ni tlat mai.

Mahse, tlangvalho pawhin tun tum zet chu hlawhchham leh an tum lo ru tlang kher mai bawk a. Sakei sual pakhat ve maiina Mualchuan tlangval leh pasaltha te a han tithangtlawm reng mai chu a ruk tak chuan an thinrim mai bakah an zak ru takzet a ni. Chuvangin tuntum zet zawng a sirukla takmeuhin an thawk chhuak a ni.

Tlangvalho rilru tur awmang an hriat avangin val upa ho chuan fimkhur a ngai leh zual a ni tih an hrechiang a. A khattawkin fimkhur turin an infuih mawlh mawlh a. Tlangval te pawh chuan thinrim hle mahse tawngpawng basa ngam ngawt chi a ni lo tih chu a hrechiang bertu te an ni tho mai.

Ramhnuai pik karah chuan haw haw hluah hluah chungin sakei chu an hual ta a. Sakei chuan a sa seh chu chuti maia chan leh mai a tum loh hmel nasa mai si a. A tanhmun khuarnaah chuan a theihtawp takmeuh meuh hian a han inhrosa a. A thawm ringawt pawh tlangval la naupang deuh tan chuan khurh zawih zawihna tham a tling meuh mai.

Nakinah chuan pasaltha te silai chu a puak ta thuai thuai mai a. Sakei na tuar thawm leh thinrim chalchang aw chu rapthlak tak a ni. Chutah le, a rem rem, a theih theih thihcilh ve ang aw ti niawm fahran hian sakei hliam thinrim chu a rawn thawk ve ta mai a. A tawmna atang chuan rawn tlan chhuakin tum bik pawh nei chuang lo hian amah beitute chu a rawn phin ve ta buan buan mai a.

Chu veleh pasaltha te silai bawk chu a rual deuh thaw te hian a puak ri thuai thuai mai a, a fuh nge fuh lo tih pawh hriat vek sen a ni lo. Sakei rawn phin chhuak chuan a theih theih a rawn beih tak siah chuan mihring leh mihring inral palh hlauhawm nen an phek buai ta nuai nuai mai a.

A tawpah phei chuan sakei chu an hualbehna atang chuan a tlanchhuak leh ta hlauh mai a. Han umzui chu an tum ngial a, mahse sakei chuan mi pathum lai a lo hliam hman avang leh zanthima sakei hliam tlanchhe um chu val upate chuan rem an tih loh a vangin tlangvalho chu an khap ber thei ta hram a.

Tlangvalho thinrim lutuk leh tlawmngai lutuk chu an insawh sawk sawk hlawm a. Mahse, val upaten an phal miau loh chuan an tilui ngam si lo. Bakah hliam zawn haw ngai pathum lai an awm bawk avangin a thenin hlang tur mau leh hrui te an la sawk sawk a. Tichuan thinrim leh zak tak chungin an thian hliam te chu an zawn haw leh ta rih a. A thenin sakei saseh a la ei hman si loh chu an zawn bawk a.

Chutia ngui nghiai leh ngawi renga khaw lam pana an inzui haw nguah nguah lai chuan an zinga tlangval pakhat, tlema huih phai lam deuh chuan "Rothuama a awm loh vang vek a ni. A zin rei tawh si, lo haw vat vat se ka ti hle mai. Ani chu awm ngat se kan kap hlum daih tawh ang." a rawn ti rauh a.

Val upa pakhat chuan "Buanga mai mai thin lah hi a, lo ngawi mai mai rawh." tiin a lo khap vat a. Buanga pawh chu a ngawi zawm ve leh mai a. Mahse, a nihna takah chuan Buanga thusawi chu tlangvalho chuan dik an tiin an tawmpui vek a. A sawi chhuaktu nih an hreh theuh a vanga an rilru chu sawi lo mai hi an ni mah a.

Liankima chuan Buanga chu rawn kuahin "Buanga i sawi dik chiah a nia, ka thianpa chu awm ngat se he sakei sual hian a chimawm a chhuah tawh lek lovang." a ti sap sap a. Buanga chu a bu nghauh nghauh a.

Zanlai pelh hretah khaw dai an thleng a, tlangva hliamho chu an in theuhah zawn lutin an hliam chu an buaipui laih laih hlawm a. Hliam zinga tlangval pakhat chu mualkil upa Thangluaha fapa a ni a. Thangluahan a fapa hliam tuar hmel a han hmuh zet chuan a ha chang a thial ri rawp rawp a.

Banglaia a silai tun chu lain chhuat dungah chuan a vei nghoh nghoh a. "Mualchuan khaw tlangval leh pasaltha inti hei zo zai hian sahliam pakhat lek pawh in rawn that thei lova maw? Kan tlangval lai ka va ngai deuh ve. Pawnfen feng vek ula a that dawn hi, inmualkil upa nih pawh ka zak zozai e." tiin a ang phiar phiar a.
Tlangvalho leh pasalthaho chu tumah hawi chhuak ngam pawh an awm lo. Zah avanga rei pawh awm lovin an chhuak ru zeuh zeuh a an chhuak fai ta vek a. Chu zan zet chuan zan dang a ang lo kher mai..

episode-2

Rothuama mumang rapthlak zet mai mang chuan zing vartianah a tiharh hlawl mai a. Rothuama chuan mak a tiin a ngaihtuah zui nasa kher mai a. Muthilh leh zai rel ta reng reng lo chuan a mumang chu a ngaihtuah zui a, hma takah thoin tuichawi tur chuan tuikhur lam a pan nghal nal nal a.

Tuk thuan an ei lai chuan Rothuama chuan a mumang chu a ngaihtuah reng a. Mahse mumang mai mai tlangvala pumpa han buaipui chiam chu dikin a hre thei si lo. Mahse, ngaihtuah loh a tum pawhin a ngaihtuah lo thei si lo. Chutia a mumang ringawt a ngaihtuah lai chuan a pu chuan "Valte, rilru kaptu i nei ava ang ve?" a rawn tih chuan Rothuama chu a harh zawk a.

"Engmah kaptu ka neih pawh ka hre hleinem, nizan ka mu tha vak lova." a han ti ngawt a. Apu tunu chuan "Ka u, i mumang a fu vak lo a ni maw?" a lo tih leh phei chuan Rothuama chuan a mumang rapthlak tak chu han sawi chhuah nghal bawrh bawrh mai a duh hle a. Mahse, pa lo riau a hriatna a neih a vangin a lo nui liam mai mai a.

Chhun lama an hna thawh tur chungchang chu a sawi ta daih a. Apu chuan "Valte, i lungte hi a leng tawh a nih chuan sawi hreh lo la, naktuk lamah i haw tawh mai dawn em ni ang? I nu leh i nau pawh rei tak han awmbo san ringawt mai chu a tha ber hauh lo a nia." a tih chuan Rothuama chu a lawm kher mai.

"Ni e, ka nu leh ka farnu chu ka ngaihtuah deuh a. Nizan ka mang lamah ka lo hmu nasa mai a, min ngai tawh deuh a ni maithei." a ti ta zaih a. A pu chuan "Chutiang a nih zawngin naktuk lamah haw turin i inbuatsaih dawn nia. A rawn zin leh lam te pawh i theih phah zawk ang. Keini zawngin kan ngai dawn hle che a nih chu." a han ti charh charh a. Rothuama erawh chu a ngawi ngal a.

Tukthuan an ei kham fel chuan Rothuama leh a pu tunu Lianmawii chu chul rama chawhmeh la tur chuan an insiam mawlh mawlh a. Lianmawii chuan an chaw fun tur leh chawhmeh tur te chu a siam sak mial mial a. Tichuan an chul rama kal tur chuan an inzui chhuak ta a.

Chul an thlen chuan Lianmawii chuan chawhmeh awm ang ang chu a vai khawm nghal a. Rothuama erawh chuan a thangkam en turin vau lam a pan nghal thung a. Chawhma dawn inhmu miah lova an awm hnu chuan thlamah an chawl dun ta a.

Ngawi rengin thlam tlaitlanah chuan Rothuama chu a thu a. Lianmawii chuan thingpui lumin tapah a che hrat hrat a. Nakinah chuan "Ka u, i lung a leng tawh hle a ni maw?" a han ti ringawt a. Rothuama chuan "Leng lah love a, engati nge chutiangte min zawh teh thut a?" a lo ti vat a.

Mei chhawm nun mawlh mawlh pah chuan "Heti teh thuta min hawsan i tum hi mak ka ti em a ni. Kan khuaah pawh nula hmeltha leh duhawm tak tak te chu an tam ve tho si a. A pawttu che hi ka hmu ve chak ngawt mai." a lo ti leh a.

Rothuama chu a nui hawk hawk a. "Khai khai khai, chutiang lam a ni awzawng lo mai. Chutiangin ngaihzawng pawh ka la nei miah hleinem, i u hi ler viau turah min ngai em ni?" tiin a han zawt let a. Lianmawii chuan lei lam a bih ngar a, "Ngai chuang love, mahse nang ang tlangval hmeltha leh hleitling, pasaltha bawk si chu tuinnge hnar thei ang che? Ka u i ni hi ka chhuang che a. Mahse, a chang chuan ka u ni lo la ka ti bawk thin." a ti sap a.

Rothuama chuan rawn hnaih pahin "Eng i tihna nge chu chu?" a han ti a. Lianmawii chu zah avangin a hmai a sen tawn tawn a. Rothuama nu leh a pa hi unau an ni a, mahse, unau piang hmun chiah erawh an ni lo. An khua a lo zina Rothuama hmel a hmuh rual khan sawi thiam theih si loh hian engtin emaw a awm a. Mahse, unau an nih miau avangin sawi leh tihlan a rem si lo.

Lianmawii chuan thawk a han la halh a. "Ka u engtikah nge i lo zin leh ang?" a han ti a. Rothuama chuan vau a tlaiberh nupa inchhaih thlir dauh dauh pah chuan, "Ka hre lo le, a dam hi han hauh phawt ila." ti chauhin a lo chhang a. Lianmawii rilruah chuan thil tamtak a lo lut nghal a. A unaupa a vei zia leh a duh zia hi a damchhungin a zep ang nge tlawm leh zah pawh dawn lovin a hrilh phawng mai ang tih a ngaihtuah lai tak chuan Rothuama chuan "Bawihi i thingpui lum chu a so tawh em?" a rawn ti a.

Lianmawii chuan "Ka u, kei chu thih daih mai hi ka duh a ni." a rawn ti a. Rothuama chuan a ngaihna hre lo zet hian "Engngati maw? Harsatna i ne em ni?" a lo ti vat a. Lianmawii chuan "Ka harsatna hi ka damchhung pawhin ka sawi chhuak ngam lovang. Chuvang chu a nia thih mai hi ka duh zawk." a lo ti a.

Rothuama chuan "Chutiang tur a ni ngai lo, i harsatna chu engpawh ni se min han hrilh teh, i u ka awm alawm. Zep a ngaih pawhin ka sawi chhuak hauh lovang." a ti a. Lianmawii chuan "I thei lovang ka u, keimaha tawrh mai hi a tha zawk." a ti a.

Rothuama chuan "I u in ka thei ang ka tih chuan min la ringhlel fo dawn em ni?" a han ti leh a. Chutah Lianmawii chuan "Anih leh ka u" tih pahin Rothuama chu a rawn kuah ta thlawp mai a. Rothuama hmuiah chuan a fawp nghal vawng vawng a, Rothuama inring lo lutuk chu a hnung tluk a, Lianmawii chuan a bawh thlu chu a ni ve nghal mai bawk a. Rothuama chu a hamhaih nasa ngei mai. Tichuan thlam chhuatah chuan an in......

episode-3

Thlam chhuatah chuan an inbawh thlu chu a ni ta mai a. A hnuailama tang zawk Rothuama chu a hrilhhai ngei mai. "Ngawi teh ngawi teh, nangte chu ka nau i nia lawm." a rawn ti chhuak a. Mahse Lianmawii chuan mualpho zawng zawng huamin a tih tur a ti laklawh tawh tlat.

Rothuama kuah bet tlat chung chuan "Ka hria a sin ka u, chuvang tak chuan alawm sawi lova tawrh mai ka duh zawk nachhan. Mahse, min hrilh rawh ka sawi miah lovang i tih kha. Ring tur chein min ti a ni lawm ni ka u?" engtinnge ka tih bik chuan ang?" a tih chuan Rothuama chuan sawi mai tur a haihchham der mai.

Chutia Rothuama rilru buai lai tak chuan Lianmawii chuan Rothuama hmuiah chuan a fawp ta chawt mai a. Rothuama lah chu che lo chang lo hian a melh ngai a melh reng ringawt a. Lianmawii chuan "Ka thiam loh a nih pawhin ka pawm e. Mahse ka u ka hmangaih che a ni, min dem suh aw." a ti tham tiak a.

Chutah pawh chuan Rothuama chuan chhan ngaihna pawh ala hre ta chuang lo. A hamhaih nasa em a ni. Rothuama a ngawih tlat reng avang chuan Rothuama chu a fawp leh ta vawng vawng a. Fawh mawlh mawlh pah chuan "Ka u, kan khua i lo zin a kan in i rawn luh chiah khan kei chu ka danglam nghal vek a sin. Engatinge ka u kher kher i lo nih? Hmeichhe nikhua lo leh buan chaklo ah chuan min ngaih phah suh aw." a ti mawlh mawlh a.

Rothuama chu harh hlawl niawm tak hian "Ngawi rawh ngawi rawh, engpawh nise thu ila tha takin i sawi dun teh ang." tiin Lianmawii chu nam thawh a han tum a. Mahse, Lianmawii chuan a lo kuah nghet sauh sauh a. "Ka u ka u, engtinnge ka tih tak ang? Ka awmdan leh ka chunga thil thlen dan hi ka hrethiam thei lo a ni." a ti tham tiak a. A aw ah chuan lungchhiatna a tel tawh tlat.

Rothuama chu tlangval hleitling tha zeih zawih, dar pharh hlai hlep hlawp, kawng fek rat mai. Sa inphut mawi tawk leh lu zo vah mai. An khaw tlangval zawng zawngina tlawmngaih leh huaisen kawnga an tluk loh a ni a. Tawng tui tam ngai miah lo leh tawngkam pawh thiam fahran lo a ni a. Ngaihzawng ti a sawi tur pawh la nei miah lo a ni.

Tunah a zinna khua a pute hnenah, anu unaupa fanu ngeiin a lo ngaizawng nasa em em mai chu lo niin. Hmeichhe chhaih ngai lo tih takah amah zawk chu a zam emawni tih mai turin a awm ta tlat mai a. A ka te chu a chih zo a, sawi tur a hre lo a ni ber mai. Tin, a chunga thil thleng chu a rin loh leh beisei loh lutuk thil a ni bawk nen a ngaihtuah a tawi tuk mai.

Lianmawii pawh hi an khaw nulaah nana na chuan nula to ber pawl a ni ve a, a pum rua a lian thain mi biak biak a thiam em em a. A fel mai bakah a taima em em bawk nen, tlangval kei ka ni inti chin chuan fate nu atana an it em em mai leh a ruka an sep an sep thin a ni ve bawk a. A unaupa ngei mai laka hetiang rilru a pu ta mai hi amah pawhin mak a inti a, a ruk tak chuan a inthiam thei ngai lo. Mahse, hmangaihna hi zawng a mak a, a ropui a, a ril a, a chang phei chuan a huatthlala awm thei lek lek zawng a ni e.

Hmangaihna chuan mi a zem a thin a, min bual a vek bawk a. Hmangaihna avang chuan tawrh kan ngam a, thih kan huam thin. Hmangaihna hian kan taksa leh rilru zawng zawng hi min thunun a, kan duh bak min tih tir thin reng a nih hi. Thihpui tham a ni a, dampui tham a ni bawk a. Tahpui tham leh hlimpui tham he hmangaihna hian Lianmawii nun chu a duh bakin a sawinghin sak ta a ni ber a, mualpho pawh dawn zo lovin tun hun hi a thlen ta a ni. Lianmawii hi dem tur a ni em? Nge kan thiam ngawih ngawih zawk dawn tih chu hunin ala rawn hril zel ang chu.

Chutia, nula hmeltha tak mai leh hleitling bawk si, ngo no suah maiina a bawhbeh ran mai takah chuan a farnu a ni tih hrereng mahse Rothuama pawh mipa diktak leh hrisel tak mai a ni ve miau a. A awmah chuan Lianmawii chu a bei thlap a, a hnute bu lian leh nem thlap maiina Rothuama a nek sawr nawk nawk avang chuan Rothuama chu a buai ta nak mai.

"Ti teh i tho phawt teh ang, i thingpui lum pawh a so kang takngial ang." a tih pawh chuan Lianmawii chuan "Ka u khawngaih takin min hmusit suh aw, nula dang tan ka phal thei ngang lo che a ni. Min haw san lul suh, vawi khat chiah min han kuah ve teh, mawh ka u khawngaihin..." a ti tham tiak a.

Rothuama chuan inthiam lo deuh chung chung leh tim deuh dai chung chuan a han kuah ve da da a. "Ka u, nghet deuhin, nghet deuhin mawle." a ti leh ta fo. Rothuama chuan a hma aia nghet deuh chuan a han kuah leh a, Lianmawii chuan "Ka u, i ta nih ka duh. Kum khua atan." tih leh Rothuama chu fawh a rual nghal a. Mahse, Rothuama chuan han fawh let ve ngaihna reng a hre hlawl lo a ni. Mahse, a inrin hman hma leh a hriat loh karah chuan a mipatna chu a lo tho daih tawh a ni tih chu a hre chhuak zawk a, a zak kher mai. Thup a han tum a, mahse an mawngbawr zawn ve ve a indelh beh miau a vangin thup ngaihna reng a awm si lo. Lianmawii lah chuan a hre lo nge a pawi ti lo tih pawh hriat ni hek suh, a hriat loh awm hmiah hmiah mai bawk si. Rothuama chuan "Liani, ka dik dawn lo a nia i tho teh ang." a han ti a. Lianmawii chuan "Rei lo te chiah." a la ti...

episode-4

Rothuama mipatna chu namen lovin a chhuak ta tlat mai. A mawh love, tlangval hrisel leh chak vanglai a ni a. Hetiang lam hawi zawnga hmeichhia a hmuh hnaih ber tum a ni bawk a, a nawm dan chu mak leh dangdai riau hian a hre ta tlat mai. Chu chuan a ngaihtuahna chu a tiso but but a ni ber mai.

A hriat loh karin Rothuama chuan Lianmawii chu a lo pawm nghet hman hle tawh mai hi a lo ni a, uar tak mai leh zei miah si lo hian an infawp mawlh mawlh chu a ni ta reng mai. Vawi leh khatah Rothuama chu a chunglamah a tang ta zawk mai a, zah leh hlauh vang ni hauh si lo hian a tiril a khur dar dar mai. Lianmawii erawh chu a vawikhatna tho mah nise chuti takin a ngaihtuahna a buai lova, a nihna takah chuan a beisei leh duhthusam ramah a cheng mek zawk a ni.

Chutiang chuan engtia rei nge an awm hman chiah an hre lo. An awmna thlam chhak lama khuh kharh ri chuan boruak a rawn thlak danglam chiang kher mai. Rothuama chu perhte kawih kul thlah ang mai a rang hian a inperh tho awt a. Lianmawii lah chuti tho. An mualpho hman lo chiah chiah tih chuan thlam luhka chu tuemaw hian a rawn rap ri ta riap riap a.

"E, nangni pahnih in ni maw, chhawl a va hal ve Liani, thingpui in tur te i nei mial em?" an kawmchhak pa chuan a rawn ti lut nghal bawrh bawrh a. Lianmawii chuan aw lawi leh bah deuh nak hian "Aw, nei e lo thu chawl ve rawh. Hei keini pawh kan lut deuh chiah a ni." tih pahin an thingpui chhuan leh mei mit thiap tawh lam chu a pan nghal a. Tichuan thingpui a thli nghal a.

Titi phung leng sawiin Lianmawii te kawmchhakpa chu a phul luai a. Rothuama chuan a khat mawi tawkin a lo chhang ve zauh zauh bawk a. Lianmawii erawh chu a tawng tlem kher mai. Rothuama chu a va melh leh zauh thin a, Rothuama lah chuan melh pawh a rawn melh chhin ngam miah bawk si lo. An awmdan chu a lai dun ru angreng kher mai.

Rei mawi tawk an titi hnu chuan Lianmawiite kawmchhak pa chuan "In vau sirah sawn sakhi chan tur ka hual e ka tia, ka va chang ang e. Nangni hawn zai te in rel dawn tawh em?" tih pahin a silai chu a la a, thlam kawngkhar lam chu a pan nghal a. Lianmawii chuan "Ka hre lo le, kan haw har vak tawhin ka ring lo." a lo ti a. Vau lam pana an kawmchhak pa kal liam tur chu a lan theih chhung zawng a thlir a.

A kal liam hnu chuan sawi tur an van dun ta ngei mai. Khuavang kal lai an tih ang mai hian a reh vawng vawng a. Chutia rei fe ngawi renga an thut hnu chuan Rothuama chuan a aw a han thian kharh khar a. Aw lawi deuh rut hian "I haw dawn tawh teh ang." a rawn ti chhuak a. Lianmawii chuan kam khat mahin a chhang lo. A ngawi reng ringawt a.

Chutah Rothuama chu a tho a, ngawi rengin Lianmawii phur tur chu a siamsak mawlh mawlh a. Chutih lai chuan Lianmawii chuan a kut chu a rawn vawn sak a. "Ka u, engtin nge kan tih tak ang?" a han ti a. Rothuama chuan "Engtin mah, thil thleng kha chu theihnghilh ve ve tur. Tin, kha tiang kha thlen nawn tir tawh loh bawk tur." a ti deuh hmak a.

Lianmawii chuan, "Ka u, engtin nge ka awm tak ang le? Ka chan tur hi i dawn ve lo em ni?" a ti tham tiak a. Rothuama chuan en pawh en chuang lo hian "I u ka ni a, khatiang zawnga min en kha i bansan tur a ni. Tlemah tlemah kan mualpho lo a chha chu a nihkha. Haw tawh ang" a lo ti a.

Lianmawii chuan "I tan hian mualpho mai ni lovin thih pawh ka huam a sin ka u, mi lainatna chhete mah i nei ve lo em ni?" tih pahin Rothuama ban chu a kuah a. Rothuama chuan "Nang hi ka ngaihzawng tur leh ka nupui tur ni la chuan unau hian kan piang lovang. Chu chu Khuanu rel dan a ni a, i hriatthiam a ngai. Kal ang" tih pahin Lianmawii banah chuan a pawt tho a, a phur chu hlanin a hawpui ta vang vang a.

Kawngah pawh an inbe tlem kher mai. Thlam chhunga an hun hman dan chuan an ngaihtuahna chu hmun khatah a awm tir a, chumi bak leh zel a an awmdan tur an suangtuah dan erawh chu a inpersan kher mai. Rothuama chu a inthiam thei lova, an vawin hun hman dan avang ringawt pawh chuan an khaw lama hawn thuai thuai chu a duh takzet a ni.

Chutih laiin Lianmawii ngaihtuahna erawh chu a dang daih thung a. Engtin nge a thinlung luahtu, a u ni angreng bawk si chu a neih theih ang tih te, engtin nge haw lo tura a dan theih ang tih leh zui haw ve mai tur em ni ang tih thlengin a ngaihtuahna chuan a tibuai ve reng thung bawk a.

Chutianga mahni rilru ve ve kawm leh inbe mang lova an kal miah miah lai chuan kawtchhuah lungdawh pawh an lo thleng ta reng mai. In an thleng a, zanriah an ei lai chuan Rothuama pu chuan "Anih leh naktuk zingah maw chhuah i tum ang le?" a han ti a. Rothuama chuan "Aw ni mai se la, a rawn zin leh lam pawh ka hma thei zawkin ka ring." a lo ti a.

Chutia Rothuama haw hun tur vel an sawi chhung zawng chuan Lianmawii chu a lo ip chawih chawih thin a. Rothuama chu a han melh ru le zauh thin a. Mahse ani lahin a rawn melh let ve duh der si lo. A eng ei mah a tui lova, a chhungte hriat chhuah hlauh vangin a ei lui hram hram a. A rilru chu a vak thui tak zet a ni. Zanriah an ei kham chuan Rothuama chu....

episode-5

Zanriah ei kham chuan Rothuama chu luhkapuiah chhuakin meizial a zu vang vang a. Rei vak lo a din hnu chuan a thiante pahnih rawn lutin zawlbuk lam an pan ta a. Zawlbukah chuan val upate titi ngaithlain an thu khawm luih a. Leng len ar a khuan al al hnu chuan tlangval dangte chu nula rim turin an chhuak ta diak a.

Rothuama te thian thum pawh len tumna em em nei hranpa lovin an tei chhuak ve a. A thiante pahnih chuan veng chhak nula rimpuiah an sawm a, Rothuama chuan chak lo hle mahse thiante ak ruala ak thei lo bik nih a duh ngai loh avangin rem a lo ti ve mai a. Tichuan vengchhak nula rim tur chuan an inzui chho ta a.

An thlen chuan an nula rim tur chuan la a lo kai dalh dalh a. Tichuan a rem lai laiah thut hmun an han rem ve a. An nula rim hi Thiangi a ni a, nula hmeltha tia han sawi tur ni miah si lo. Mahse fel leh taima em em mai, mi biang biak thiam tak leh hmelchhiat dan thiam an tih ang chi hi a ni a. Rothuama te rawn leng pawh chu lawm ber ang mai hian a lo chiau au vat vat a.

Chhun lama an hnathawh te leh an chauh leh chauh loh thu te a zawt diat diat a. Rothuama chuan dawt han phuah zung zung mai chu a tih ngai loh a vang leh a thiam loh tak mai thil a nih a vangin a insawi buai deuh nuai mai a. A tawngkam thiam lo lutuk chu an nuih dar dar a.

Thiangi chuan mei han chhawm nun that pah hian an vawk chaw chhum chu a chawk phuan barh barh a. Chumi pah chuan Rothuama chu a va melh zauh a. "Thuama kan khua chu nuam i ti ve tak tak maw? Cham hlen ve daih la kan ti hle mai a." a han ti a.

Rothuama chuan "Ti tehreng e a, cham hlen mai pawh a awl dawn khawp mai." a lo ti ve luam a. Thiangi chuan "Han cham hlen mai la chu beng thleng thlenga zuang duh kan tam viau lawng maw?" mei nei tak hian a lo ti leh zauh a.

Chhuata bawk ar ar Rothuama thianpa chuan "Hei a hmelchhiat ai hian kan ngai dawn khawp mai. Naktuk maia min hawnsan a tum lehnghal, kan khaw nulaho hian chelh thei te in awm lawmmaw ni le?" a lo ti ve vat a. Thiangi chuan "Aw haw haw! Chu chuti mai chuan maw min hawnsan leh si ang? Cham hlen thu kha kan ngaithla zo chauh emaw tia?" a lo ti hluai a.

Rothuama chuan "Kan la cham hlen lovang tih pawh a sawi theih loh hi. Tunah haw mah ila kan haw hlen ang tihna pawh a ni chuang nang le." a lo ti ve leh a. A thianpa pakhat zawk chuan "Thiangi hei keini chuan kan chelh zo lo chu a ni mai a, a chelh thei te hi kan awm lawmni?" a lo tih ve chuan Thiangi chu a sen tan tan a.

"Ngawi teh u, kan khaw nula to leh chhuanvawr ber ber te pawhina an chelh zawh loh chu keini duang tan tum chhin ngam pawh a ni dawn emni?" tiin a lo chhang a. Rothuama chuan "Khaih khaih duhtawk teh u, titi dang i vawrh ang u khai. Nang Thiangi vawin lam eng e i thawh a?" tiin an titi tluang lai chu a lo pawt chat a.

Titi dang dangah pakai chho zelin leng hawn ar a lo khuan takah chuan kham lo angreng tak chungin an tin ta a. Rothuama chu a tuk maia haw tawh tur a nih a vangin zawlbuk lama riak lova a pute in lama riak tura an tih a vangin zawlbuk peng an thlen chuan an inthen ve leh ta bawk a.

Rothuama chuan in thlen thuai thuai a muthilh vat a duh a, a chhan pawh a tuk vartiana chhuak tur a nih a vangin thawh hai palh a hlau a ni. Tin, an khaw lam chu a ngaih tawh bakah a nu leh a farnu pawh a ngaihtuah tawh em em a. Zan hmasa lama a mang a ngaihtuah chhuah leh phei chuan a ngaih lam lamte a tha lo thar leh a. Haw thlen thuai thuai chu a thil chak ber a ni.

In a thlen chuan a mutna tur Lianmawii chuan a lo phah diam tawh a. Apu te chhung chu an lo mut reh thap tawh avangin thawm dim takin mutmu a tuah ve nghal a. Mahse, a tum ang ngawt chuan a muhil nghal mai thei der lo mai a. Mahse a rei a rei nak nakah chuan a muhil ve thei ta hram a.

A ke rawn khawih de detu awm a vang chuan Rothuama muhil tui lai chu a harh hlawl mai a. Mahse, amah tihnat tum anih hmel loha a hriat avangin a che duh miah lo a, a ke rawn khawihtu chuan thawm dim tak hian a puan sin lai chu a rawn keu de de a. Rothuama chuan Lianmawii a nih a ring nghal mai a, engtia han tih chi nge tih a hrethiam lo kher mai.

Tho ta hluai se, a pute an harh vaih chuan an mualpho mai bakah Lianmawii chu a zak nasa mai dawn si a, hawn dawna ruaia chhungkaw boruak zawng zawng han tih chhiat chu a hreh em em mai a. Muthilh der hmiah mai tur em ni ang tih a ngaihtuah lai tak chuan a puansin rawn keutu chu a bulah chuan thawm dim takin a rawn inthawlh fel ve chiah bawk a

Rothuama chu a sir zawnga mu a ni a, puan hnuaiah chuan a mit a khap sak sak a. A bula rawn mu chu thawm dim tak si hian a che leh sat sat thin a. Mahse, hre lo ang maiin a mu lui tlat thung a. Mutui lutuk ang maia han hnar der chiam a han tum a. Mahse, a hma zawng pawha hnar hlei lo tuna taka a hnar thar leh chiam mai zawngin a awihawm loh zawk dawna a hriat a vangin a hnar der leh duh ta lova. Rawn mu thar chuan rei vak loah a nak chu a rawn khawih de de a, Rothuama chuan lo vai thlak mai a han tum a. Mahse, a muhil der tih a hrechhuak leh thut...

episode-6

Rothuama awmdan chu a lai kher mai, a hnunga rawn mu lah chuan a rawn kuah nghet sawt viau mai si a. Chutiang ringawt mai a han muthilh der ngawt mai chu huphurhawm ngil ngel tak a ni. Tichuan a theih chhung chu a han muhil der ta ngar ngar mai a. Mahse, a khup a rawn thak ta tlat mai.

A tirah chuan a haider lui thei mai a. Mahse, a rei tulh tulh a haider a har telh telh thung a. A khup thak chu a reh ve leh mai ringin a insum ngar ngar a. Mahse, a rin ang ngawt chu a ni ta hauh mai si lo, reh a hnekin a thak ta tulh tulh mai a. A engtia zan dang maha thak ngai hlei lo zanin ber khera a han thak mai chu Rothuama chuan mak a tiin a thinrim ru teuh tawh mai.

A hiat chak lutuk chu a kut zawng zawng te pawh a khur der der hialin a hria. A khup thak lah chu a za zawk zawk tawh ni berin a hria. Chutih laiin a hnunga rawn mu ve chuan midang hriat hlau si, amah tihharh tum ran si chuan a rawn khan leh tan ta a. Rothuama chu a rukin puan hnuaiah a then chawk chawk a. Chutia tang teuha a mut a vang chuan a thlan a tla phung tawh mai.

Hetiang ringawt chuan a ni thei dawn lo engtin emaw tak chuan ka tih a ngai dawn a ni tiin a tih dan tur a ngaihtuah ta vat vat a. Mahse, han tih mai dan tur lah chu a hre mai si lo. Nakinah chuan tawngvai der chiam ila a tha tak ang a, tichuan midang harh ve hlauin a mah leh amah a insawn mai a ring a. Tha dawn riaua a hriat a vangin ngaihtuah chhuak tha a inti kher mai.

Mahse, engtin nge a tawngvai ang tih a han ngaihtuah leh tan a. Rei ngial a ngaihtuah hnu chuan a hre ta, ring lutuka a tawngvaih chuan midang zawng zawng an harh ang a, a hnunga mi a insaseng hman hmain an rawn hmu ang tih a hlau bawk si a, tichuan ring lutuk si lo hian "Kha lamah khan nangin lo chang la ka va luh chhuah ang e aw, kha kha kha a lo tlan a nia..." a han ti chhuak ta a.

A hlawhtling kher mai le, chutia a rin loh lutuk maia a rawn tawng chhuah takah chuan han khan zui zelna chi ni tawh hek lo le, rang takin a kut leh ke chu a lasawn nghal vat a. Rothuama hlawhtling inti lutuk chu a nui chhuak thelh a ni. Chutah mangchhe awm deuha langin a han riat nawk nawk a, chumi pah chuan a han zimar vel a, tichuan a khup thak lutuk chu a hiat pah ta zaih a. Rothuama chuan fing a inti kher mai.

Rei ngial mahni mut muta an mut leh hnu chuan Rothuama hnunga mu chu a han che leh ta sat sat a. Chu veleh Rothuama chu a hma aia ring hret hian a tawngvai leh ta. A rilrua tawngvai leh dan tur lo ngaihtuah lawksa diam a ni bawk a nuam a ti ngei mai. Mahse, chutia a khat tawka muhil miah si lova han tawngvaih zankhua chu taihmak a ngai dawn kher mai.

A tawngvaih rual rual chuan a bula mu ve che sat sat lai pwh chu a tawp ve nghal chawt a. A chet chauha tawngvaih chu anglo deuh riau dawna a hriat a vangin a chet leh hma chuan Rothuama chu a han tawngvai leh ta nuah nuah a. Tawngvai tak tak ang thei ber tur a han tih vel chu a thiam hran lo khawp mai.

Ring deuh hlek hian ti leh ila a insawn duh mai ang a tiin a ngaihtuah tha leh a. Tichuan tawngvaih dan tur chu a han ngaihtuah leh rauh rauh a. Chutih lai tak chuan a bula mi chuan a rawn kuah leh ta de de a. Chu veleh chuan "E khai, a va han lian em em ngai ve le!" a han ti chhuak leh hluai mai a. Sawi zawm a tum lai tak chuan a ka chu hupin a awm ta mai le...

Chutah a ka rawn huptu ngei mai chuan a beng bulah chuan zawite hian "Ka u, keimah zawk ka'n tawngvai ve tawh ang chu?" a rawn ti ta mai. Rothuama zak chu a mit a chhing ta ringawt a, sawi tur a van ngei mai.

Chutia a lemchanna zawng zawng man chhuah a nih takah chuan a khup thak pawh zalen takin a hiat ta sawt sawt a. Lianmawii lam chu hawiin "I khumah han mu rawh. Vartiana ka chhuah dawn a vangin mut tam ka ngai a nia." a han ti a. Lianmawii chuan "Ka u, i kal hma hun rei lote chhung chauh chu i bula awm min phalsak hram rawh." a ti ve thung a.

Rothuama chuan han tih vak ngaihna a hre lo hle mai a. Tin, amah Lianmawii tak pawh chu a lainat ve tho a. Mahse, chhun lama an hun hman dun ang kha chu hmanpui a tum tawh lo bur mai a ni. Bakah mualpho chu thil hlauhawm tawpkhawk a ni a, mualpho dawn lo mahse a chhia leh tha hriatna chuan a remti thei thlawt lo a ni.

"A nih leh, tikhan tha takin mu la muthilh tum ang che. Ka thawh rualin ka kaitho che ang a chumi rual chuan i insawn mai dawn nia. Muthilh ka duh a, min tibuai lo hram ang che." a han ti leh a. Lianmawii chuan han chhan leh mai dan tur a hriat loh a vangin a ngawi ta hle hle a. Mahse, fet deuh tak siin Rothuama chu a kuah tlat thung a.

Rothuama chuan muthilh luih chu han tum ngial thin mahse muthilh ngaihna awm dawnin a hre lo. Bakah, a harh chiang tawh lutuk a chuti maia han muthilh leh chu a tan huphurhawm tak a ni. Chuvang chuan muthilh pawh a tum buai peih ta lo law law a. Lianmawii lah chuan muthilh tum bik hek suh, inbe miah si lo chuan an mu mengkar reng mai. Rothuama chuan khua chu var thuai thuai se a ti kher mai.
Lianmawii lah chuan a kuah fet tulh tulh mai bawk si a, Rothuama chuan.......

episode-7

Rothuama chuan "Nang nen hian pianghmun ni lo mah ila unau kan ni. Chu chu hrereng rawh, a bak engmah thleng tur leh beisei tur a awm lo." a han ti a. Lianmawii chuan engtinmah a chhang lo. Mahse Lianmawii rilru len zia leh a luhlul zia hrechiangtu tan ngat chuan eng e thleng zel dawn tih rin thiam har tak a ni.

Lianmawii chuan "Ka u, ka u ni suh. I nau nih ka duh lo." tih pahin Rothuama chu a kuah nghet sauh sauh a. Rothuama chuan lo indan hram hram pah hian "Ka thu i zawm loh zawngin zaninah hian nang leh kei hi kan mualpho ang." tiin a han vau a. Mahse, Lianmawii chuan "Ka u, min vau em ni? Mualpho chu sawi loh thih nghal pawh ngai se ka huam a sin." a ti hem mai.

Rothuama chuan a vau zawnga vau chi zawng a ni dawn lo tawp mai. Engtin emaw a tihder leh tlawn titih a hmalak chu a sawt zawk a ring nghal a. Zanin nana na chu chutianga a tih theih zawngin a tuk maiah a hawnsan daih dawn tho a. Chuvang chuan tihder mai chu a kawng awlsam niin a hre ta a.

Lianmawii chu a han kuah let ve a, "Ka nau duhtak, i awmdan leh i dinhmun hi ka hriatthiampui khawp mai che. A hrehawm dan tur leh mualpho a awlsam dan tur pawh ka hria e. Chutiang engkim huama kei i u min ngaizawng mauh mai hi i thiam loh pawh a ni lo a nia, a chhan chu i duh vang reng a ni bik lo tih ka hre chiang. Hmangaihna hian mihring a tihdanglam theih dan leh chhia leh tha hriatna a hruai pen theih dan an sawi te chu ka hre ve thin tho a lawm. Chuvangin inthiam lo lutuk duh suh." a han ti a.

A rin loh leh a beisei loh dan ang tak maia chutia Rothuama a rawn tawng chhuah takah chuan Lianmawii lawm lutuk chu a au chhuak lo chauh a ni. "Ka u, ka u miin hrethiam tak tak tiraw? Ka dinhmun khirh tak mai hi min hriatthiamsak tiraw?" a ti chul a. Rothuama chuan "Hrethiam tehreng mai. Mahse, i duhna ringawt kha i hmuh len ber chuan chetsual hun ila nei ngei dawn a nia. Chuvangin fimkhur hle ang che." a ti leh a.

Lianmawii chuan "Ka unau ngei hetiang hian ngaizawngin ka hmangaih dawn a ni tih hi nang ka hmuh hma che khan min hrilh ta se ka awih hauh lovang. Mahse, i sawi ang khan hmangaihna chuan ramri a kham lova, unau inkarah takngial pawh a lo kham lo a nih si hi. Chuvangin mualphopui che hi ka ngam mai ni lovin engkim hi ka huam a ni. He ka thinlung mite ngaiha tenawm leh zahpuiawm tak hi i hnena puang chhuak lova dam ai chuan thih daih law law hi ka tan chuan a awl daih zawk a ni." a han ti leh a.

Rothuama chuan "Engpawh nise i dinhmun leh ka laka i rilru put dan chu tlang takin i sawia i lantir tawh a. Kei pawhin ka hrechiang hle bawk. Mahse, hei hi kaltlangpui chi a ni em tih ngun taka ngaihtuah a ngai ta a ni. Tin, ka sawi ang khan kan duhna leh chakna ringawt kan hmuh len ber chuan rei lo teah hriatchhuahin kan awm ang a kan mualpho chu a ni nghal mai dawn a, mualpho chu ngam mah ila mualpho kher kha a thatna a awm tlat lo a ni." a ti a.

Lianmawii chuan Rothuama chu a kuah vawng vawng a. Rothuama pawhin a kuah let ve a, a rilru chhungril berah erawh chun a nau chu a lainat em em a, zanin a insum theih phawt chuan zin tawh loh vang vang pawh a duh zawk tawh a ni tih te chu hre ve ngat se engtin tak awm ang maw tiin a ngaihtuah vang vang a. Tichuan thil dang dang sawia an titi leh fe hnu chuan Lianmawii chu a muhil ta hram a.

Rothuama erawh chu muthilh zai reng a rel thei lo. A awmngheng riala muhil Lianmawii chu a en reng a, a lainat kher mai. Rei vak loah khawfing a rawn chat a, chu chu vartianin a rawn zui chawpchilh ve nghal mai bawk a. Rothuama chu Lianmawii tih harh hlau tak chung chuan a tho them them a. A insiam peih chuan Lianmawii biangah chuan a zuk fawp zauh a, tichuan an khaw lam pan tur chuan a pute in chu a chhuah san ta a.

Rothuama chuan Ni chhuah hma ngei a thui thei ang ber kal hman tumin a kal sauh sauh a, a rilruah erawh Lianmawii ringawt mai a lang thung a. A harh hunah chuan ka lo awm tawh dawn si lova engang takin awm ang maw? A ti rilru rauh rauh a. Nakinah chuan kawrte tui luanna hmun a thleng a, tui te a in a, mei zuk siamin a han zu chawl vang vang a. Tichuan muangchang lovin a kal leh ta a.

Tukthuan ei hun velah chuan Rothuama chu a thleng thui hman tawh hle mai a, tlang chhip nuam tak mai hi a lawn chhuak a. Chuta tang chuan a pu te khua chu chiang takin a lang thei a. Chulai hmun a thlen chuan a ding a, a pute khua chu a thlir let vawng vawng a. A rilruah Lianmawii bawk a rawn lut leh a, zawi sap hian "Mangtha mai le." tiin a kal leh ta a. Tun bak a pute khaw lan theihna a awm tawh dawn lo a ni tih hriaiin a tawp nan a han hawi let leh zauh a, a lung pawh a leng ve lek lekin a hria. Mahse, a kal thui telh telh a, an khaw lam leh a chhungte chuan a rilru an luah lian ve tial tial ta zawk a. A pheichheh pawh a zang vah vah khawp mai. Chawhma zet a kal hnu chuan sakei lui an tih mai, an khua leh a pute khaw ram inrina lui chu a thleng thla ta a. Chulai hmun a thlen chuan a thaw huai mai. Lui lehlam chu an mahni khaw ram chin a ni ta bawk a hmanhmawh lutuk pawh..


episode-8

An khaw ram chin thleng a ni bawk a Rothuama chuan hmanhmawh lutuka kal pawh tulin a hre tawh lova, tichuan meizuk te siamin a han fawp vang vang a. Rei mawi tawk a chawlh hnu chuan hmanhmawh lovin a kal tan leh ta a.

Thui pawh a kal hmain sapui hnu lian leh tharlam tak tak mai a hmu ta tlat mai. Rothuama chu a ding chat a, mipa tih takah fimkhur taka bih kualin a han chhui chiang deuh a. Thui pawh a chhui hmain sahnu mai bakah thisen far pawh a hmuh zawm nghal ta zat mai reng a.

Rothuama chuan sapui hliam nen an inhlat lo tawp a ni tih a man nghal a. Chhui zui zel nge tha ang a inthiarfihlim san mai tih a han ngaihtuah a, chempui nen ngawt a han beih chu finthlak vak loa a hriat a vangin a cho hmasatua tan loh chu a thlang ta zawk a. Tichuan thui pawh chhui zui duh lovin a letsan leh ta a.

Mahse, englai pawha fimkhur leh hnunglama mit nei ang kara awm a ngai tawh a ni tih a hria. Tichuan fimkhur takin a kal leh ta a. Thui fe a kal hnu chuan kawng kawi ulh deuh laiah hian Rothuama chu a ding leh ta chat mai.

A hnarina a rim hriat chu sapui rim a ni tih a hriat rualin a hmalam chhak koa thing tang rah tliah bak thawm chu a hre nghal a. Chu veleh a sahmima a chem tum chu a phawrh nghal a. A phawrh kim chiah tih chuan a hmalam hlam li vela sapui hliam rawn zuang thla chhak chu a hmu nghal a.

Rothuama chu chet khat pawhin a che tawh eih lo. A hmaa sapui hliam nen chuan mitkhap miah lo hian an inmelh ta ran mai. A mit lasawntu nih chu a tu zawk zawk tan pawha dawih zawk leh tlawm zawk nihna a nih miau a vangin an inmelh ta ran mai.

A chemtum chu a hum nghet kher mai a, chet hun nghak a kei ka ni inti ve ve te pahnih han inmelh ngat ngat mai chuan chulai vela boruak tan zia a tichiang kher mai. Rothuama mitmeng chu a rum satliah lova, a rapthlak zawk hial a ni. A meng zim san mai a, mahse a fimin a hmu fiah tawk a ni tih hai rual a awm lo. A mitmeng chuan hremhmun rim a nam tel tlat.

Chu sapui hliam lah chu a mitmeng atang ringawt pawhin zahngaihna leh pawisak pakhat mah a nei lo tih a chiang em em mai a. Chumai ni lovin zawi leh fiah tak sia a han rum chhur chhur ringawt mai pawh chuan hmulthi a tiding ur ur thei hial mai. A taksa hliam chuan thinurna vawrtawp leh a hmuh a piang pawhsawm vek duhna a puttir bawk.

Chutia thih huam ve ve leh dawih zawk nih tum lo ve ve rei ngial an in en a an han inhmachhawn hnu chuan sapui zawk chu a che hrut a, a mei vaiin a mit chu a khap ta. Rothuama erawh a che eih lova, a mit pawh a la khap eih lo.

Sapui hliam chuan a hma aia ring hian a han rum leh ta chhur chhur mai a. Rothuama mitah tak chuan enin a han inhrosa a. Mahse, a hmaa ding chu mihring a lo tawn tawh te nen chuan an inang lo tlat mai. A hmul tiding ur ur khawpa a han rum khum pawh chuan a rum khumpa chuan a mitah tak a rawn melh kal mai si a.

Chuti mai chuan a vau zam dawn lo tih leh awlsam taka pawhsawm mai chi a ni lo tawp mai tih a hriat hnu chuan a han bawk hniam suai a, a mei chu tiphu auh auh chung chuan Rothuama chu a tawp nan ti niawm fahran hian a han rum khum leh a. Sapui chezia a tang chuan engkim a thleng dawn ta tih a hai lo, nghet taka humin sapui chet rual rual a chet chu a inpeih chiang kher mai.

A taksa chu tlema titawm in a hmaa miluhlul pa pawhsawm vek tum chuan a han zuan ta phut mai a. Chu chu Rothuama rin leh lo nghah reng a nih a vangin a sir lama zuan zawk pah chuan a chempui chu a theihtawpa na hian a han vai ta a. Sapui ke hma lam chu a tliak nghal hnawp a. Rothuama nen chuan thlanglam mau hmunah chuan lum thla ta bian bian mai a.

Rothuama chuan maubul vawn tan tur a dap vat a, thui lutuk a lum hmain a in man tang thei ta hlauh a. Sapui hliam chu Rothuama inman tanna atanga hlam thum zet a lum tlang hnu chuan raw hung hian a lo dang ve hlauh bawk a. Rothuama chu a ding vat a, sapui lumna lamah chuan tlan thla nghalin raw hung kara tlazep sapui tanhmun insiam rem leh hma ngeia sah hlum a tum a ni.

Mahse, a vanneih nge a vanduai, Rothuama chu mau bulah a in pal a, tlu em lo mahse a duhai chak leh a inthunun theih bak chuan a chhuk tlan ta mai. A thawmah sapui chuan a theih anga ranga a tanhmun siam a ngai a ni tih a hai bik lo. A han inleng vak a, a mah cheptu raw kung te zawk chu a puak pawp a, a ni chu a thawl nghal hawk bawk a. Tichuan a zangthal lo zawngin a inlet thei ta. Mahse, dinchhuah mai a han tum chu a kehma dinglam chu Rothuama khan a lo sat tliak hnawp mai chu niin.

Mahse, chuti maia tlawm erawh a tum hnaisai lo mai. A mah cheptu raw kung lian zawk rinchhan chuan a ding chhuak thei ta tlat mai a. A mah pana Rothuama rawn lim thla puat puat mai chu lo zuan thluk tawp mai a la tum a ni. A awrawl tawpa thawm lo chhuahin a ke hnung pahnih chuan a han ding ur mai a, chumi rual chiah chuan Rothuama tlan laklawh tawh leh ding thei tawh lo chu a rawn thleng thla chawpchilh nghal a. Rothuama lahin sat thei tawh bik hek lo amah lo hmuaktu sapui chu zuanin a han pawmchilh rawih ta mai a le...



episode-9

Chutia Rothuama leh keipui hliam an han inpawmchilh ta mai chu an thawm a na dun bian bian ngei mai. Kar lovah rawhung a tanga tal chhuakin an thlang lamah chuan an lum thla leh ta a. Mahse, hlam hnih awrh an lum thla hman tih chuan Rothuama chu maubulah a inman tang leh thei ta hlauh a. Sapui e rawh chu a kehma dinglam a tliah tawh vang chuan han inham tang ve mai thei pawh a ni tawh lo.

Tichuan lum tlang thla zelin an thlanga kawrte ruamah chuan a zuk tla thum dawm ta mai a. Rothuama chuan a chempui thlauh chu a han chhar tha leh te te a, fimkhur takin sapui tlakna lamah chuan a chhuk thla leh ta chher chher mai.

Sapui hliam chu a tlakna lamah a nakruh a sawh tliah a vangin chet a harsat ta hle mai a. Rothuama chuan pan hnai zelin sapui, a tlakna kawr ruam atang a rawn tho chhuak leh tur lai tak chu a zuk hmu a, tichuan zuan paha sapui nghawnga han sah ngheng mai tum chuan a zuang thla ta a.

Mahse, chu sapui hliam chuan Rothuama rawn zuangthla chu a lo hmu hman vuai mai a, a sahim nan a lo vir zawk a. Rothuama chuan a sat phak lo ta chiah chiah si. Rothuaman lei a thlen rual ruan Sapui chuan a rawn zuan ve leh ta zawk a.

Mahse, chu pawh chu Rothuama lo rin lawk dan chiah a nih ve tho a vangin a sir zawng deuh hian a lo eu zawk a. Chumi paha a chempui han vai puat mai chuan sapui dul chu a vai thler hawk a. Sapuiin lei a thlen rual chuan nunna nei tawh lo tih hriat tak hian a let nghal hawl hawl a.

Rothuama chuan kutthlak nawn leh ngaia a hriat loh a vangin a chempui hum chung chuan sapui thi tlaw zuah mai chu a thlir reng a. Chil chhak thawt pah chuan "Mai mai che chuan le, mi kawng kal tha hle hle lai tihbuai man chu kha kha a nih kha." a han ti nghut a. A sapui sahhlum ruang lam chu a pan nghal a.

A sapui sahhlum chu a han tlawh zangthal huang mai a. A dul chu a lo sat thler zau bawka a ril te chu a bung nuai mai. A mei chu a tan hmawk a, tichuan an insual tanna kawng lam panin a chhohsan ta a. Kawng a thlen chuan a thu hnawk a, rei chawl lovin khaw lam pan chuan a kal leh tan ta a.

Kal pangngai tak pawhin kal se khua chu thim hmain a lut hman tawh dawn lo tih a hriat a vangin hmanhmawh lutuk lo law law a kal chu tha maiin a hria a. Tichuan hmanhmawh lutuk lo, muang lutuk lovin a kal a. Kawtchhuah lungdawh a thlen chuan leng hawnar a khuang al al tawh a.

Lungdawhah chuan rei vaklo a han thu chawl leh lawk a, tichuan a kal leh ta a. Rei vak loah khaw hmawr a thleng a, dam taka khua a han lut leh chu a lawm rilru viau mai. An in awmna chu veng hmawr lehlamah pawh veng mawnglam a la nih a vangin a la hla deuh a.

Naupang pawnto an tin tawh a, tlangval nula rim an tin hma deuh si a nih a vangin khawlai chu a reh hle mai a, tumah han veivak hmuh tur pawh an awm lo. An in lan theihna a thlen chuan an in atanga mei eng pawh a hmu thei a, a kal chak zual sawt a.

An luhka a rah rik ruala kawmchar tukverha dum thla zuai chu a hmu hman chiah a, eng thil nge a nih erawh chu a hre hman lo. In chhung a han lut chu a lo reh thiap ang lawi a, Rothuama chuan a nu chu a han ko a. A nau zawk chu khum a tanga rawn thoin "Awi ka u i lo haw elaw, i dam em? Enga ti teh thut nge i lo haw a i la cham deuh rih dawn emaw kan ti a sin." a lo ti sawk sawk a.

Rothuama chuan a nau zawhna pawh chhang ta lem lo chuan "Khawiah nge ka nu hi?" tiin a nau chu a zawt let a. Bang thlanga a sahmim ban pah chuan kawmchar tukverh lam chu a dak vauh vauh a. Mahse, a thim em a vangin engmah phei chu a hmu lem hlei lova.

A nau chuan "Ka pu te inah damlo kan in ka zuk kal lawk ang e a tia nihkha. Vawin ka thingphurh naah ka ring hi ka herh deuh a vangin ka lo mu a, ka lo muhil hman lek lek a lawm mawle, ka nu chu ka han ko ang e tikhan lo thu rawh." tih leh chhuah a rual nghal a.

Rothuama chuan tapa thingpui bel ung zet mai lam chu panin no khat lung hian a han thli chhuak a, vawikhatah a han thawk khat pawp mai a. Nokhat dang a han thli leh a, chu pawh chu a thawkkhat leh piap a. Rei vak loah a nu leh a nau chu an rawn inzui lut a. A nu chuan "Awi Taite, i pute chhung chu an dam em? I nau nen hian kan ngai lutuk che a, i lo haw chu kan va lawm em." a rawn ti lut bawrh bawrh a.

Rothuama chuan "Aw, an dam tha e, nangni eng e in lo an a?" a han ti ve a. A nu chuan "Kan lo dam e keini pawh. I chau awm si a mami i u hi rappui chungsang a ka zufang bilh kha han chawi thla rawh khai." a ti a.

"Khawi keiman" tih pahin Rothuama chuan rappui chungsang chu a ban nghal a. A chawi thla fel awrh tih chuan a thian kawm ngeih ber Liankima chu a rawn lut a. Rothuama nen chuan kut thing meuhin an han inchibai a, tichuan zufang bilh eng kuk mai chu duhtawkin an thiat dun ta a.

An titi pah reng bawk a, Liankima chuan a awm loh hlana an khaw boruak chanchinte chu a hrilh malh malh a. Sakei sualina a tihbuai zia te an thah theih siloh a vanga an khaw pasaltha ho an zah tawh zia te chu a sawi luam a. Rothuama chuan a thianpa chu bang thlanga a sahmim khai chu zu hawng turin a han ti a...............

episode-10

An zufang hawp chuan an lu a tihai deuh chhulh tawh bawk a an titi pawh a tui tawh kher mai. Liankima chuan "Eng e maw i thianpa hi min rawn hawn tak le, zawlaidi te pawh a nih mial takin a lawmawm dawn em a sin." tih leh bang thlang lama Rothuama sahmim khaina chu a pan nghal a.

En chiang mang hlei lo hian Rothuama sahmim chu a'n zen rawk rawk a, a tum loh deuh a khawih emaw ni a phu nasa kher mai. Chutah "Uai, eng thil nge nita ngai tih pahin a'n en chiang thuai a. "Khai khai leh" tih pahin Rothuama sahmim a tang chuan sakei mei chu a khai chhuak ta zal zal mai a. Rothuama nu leh a nau chuan makti tak mai hian an lo thlir ve reng bawk a.

Lianmawia chuan "Thianpa, hei zet chuan min barakhaih hle mai a. Engtiangin nge in han intawn dan mih han hrilh vat teh." tih pahin sakei mei chu a vai lauh lauh a. Rothuama chuan uanglo tak mai hian "Sakei lui kam maiah khan kan intawk thut mai a. Kha a vannei zawkah ka tang ta hlauh a nihkha. Tlemah tlemah i thianpa ruang zawk i hmu teuh kher a sin." a tih lai chuan Liankima chuan chhuang tak mai hian a thianpa chu a thlir dauh dauh a.

A nu leh a nau pawh chuan Rothuama chu an chhuang ru ve hle a ni tih an hmelah hmuh hmaih rual a awm lo. Liankima chuan "Thianpa, hei ngei hi a lawm kan khaw pasaltha te tithangtlawma tizaktu ngei chu. I awm loh chhunga kan lo buai dan chu ka hrilh tawh che kha. Nang nge nge i la ropui dawn khawp mai." a han ti hluai a.

Rothuama chuan "Khaih khaih khaih, insum ve deuh thin teh khai. Huai vang pawh ni miah lova loh theih loh thila vannei mai mai ka ni ka tih tawh kha. Mite riau riauin an hria ang e, kha hei zufang hi lo hawp mawlh mawlh teh ka'n intifai ve thuak thuak ang e." tih pahin a tho nghal a.

Rothuama intih fai hnu chuan tlangau a lo au lar lar a, Mual veng a Pi kuali thih thu leh nula tlangval te an in lam pan vek tur a nih thu a rawn au a. Liankima chuan "Khai aw! Thianpa i duh leh nang chu tuman i lo hawn an hre lem lo bawk a tihian zanin chu lo muhahdam la ka han lan ve loh te chuan" a han ti a.

Rothuama chuan "Mai mai thin a, mipa kan chau thei ngai em ni? Tirawh kan pahnihin i han kal ang. Ka nu tikhan lo mu rawh u aw, kei ka lan chuan a tawk a ni mai. Kan kal a nia." tiin a thianpa nen chuan an inzui chhuak ta a.

Pi Kuali te in chu a lian lo bawka nula tlangval an khat hneh hle mai a, Rothuama te thian dun an thlen ve pawh chuan an lo thu khat hmur tawh mai. In chhunga thutna a awm rih loh a vang chuan pawnah an thu ve ta ran a.

Liankima chuan "Ka'n inthiar lawk ang e." tih leh thawh sawn a rual nghal a. Rei ngial a thangbo hnu chuan a lo let ve leh mai a. Enge maw chen pawna an thut leh hnu chuan upa lam deuh te chu an lo chhuak ta pheuh pheuh a. Liankima chuan "Tirawh thianpa i lut ve tawh ang hmiang." tiin in chhung lamah chuan an inzui lut ve ta hnak hnak a.

Rothuama hmel an hmuh chuan nula tamtak awm dan chu a danglam deuh huih hian a hriat tlat mai. Mahse, Rothuama hi nula mi lem lo tak a nih bakah ngaihzawng la nei miah lo a ni a. Hmeichhia hi a ngaihsak rih lo tlat a ni.

Mahse, chutiang chu nimahse a mah a hmel a chhe lova, hnathawh a taima in a fel em em a. Chu zawng aia an ngaihzawn rukna leh an ngaihsanna chhan ber chu a huaisenna leh a tlawmngaihna chu a ni. La naupang te ni siin in lamah leh ram lamah chuan an khaw pasaltha ten an tluk lo tawh tlat mai a. Chu chu tuma hmuh hmaih theih a ni lo.

An lal meuh pawhin a chhuangin an khaw dai ngul ber a ni tawh a. Huaisen leh pasalthat kawngah a pa leh a pu a chhun a, hmelthat leh pumruaah a nu a chhun thung a. A rilru a thain a inngaitlawm em em a, a chapo ngai miah lo te chu mitin ngainat a nihna chhan a ni. Chutiang mihring chu nula tan bawhpelh phal chi a ni lo reng a ni

an han thu lut ve chu tute emaw tan chuan thihna in mah nise a nawm phah em em a ni. A zin bo rei deuh bawk nen a ruk tak chuan kim lo riaua inhria te pawh an thahnem fe mai. Tlangval meuh pawhin an sakei sual a vang chuan Rothuama zin chu an ngai ru theuh hlawm bawk a. Tichuan mi karah chuan an zai ve bawng bawng a.

Zan a lo rei deuh chuan an val upa pakhat hi a rawn ding chhuak a. An khaw tibuaitu ber mai leh an thah theih reng reng loh chu tihhlum a nih tawh thu chu a han sawi ta mai a. Mak an tiin eng e awmzia? Tu thah nge ni ang tih an inrinsiak nghal mur mur a. Val upa bawk chuan rothuama sahhlum a nih thu leh a tuk lama sakei ruang chu ropui taka zawn haw tur a nih thu te chu a sawi nghal a. Rothuama chu nakinah an intawn dan leh a sahhlum dan sawi turin a sawm nghal bawk a.

Rothuama chungah chuan awmho zawng zawng mit chu a fu ta thuap mai. A ni lah chu zakin a thu kun ta tlat mai a. Engtinnge an val upa chuan a lo hriat hman tih reng a hre lo. Mahse, Liankima chuan a beng bulah an val upa chu a hrilh a nih thu a rawn sawi sar sar a. A thianpa chu a ngei kher mai. An han zai tan leh a, mahse zai lam ai chuan Rothuama chuan mite thinlung leh mit a la laklawh tawh tlat. Chhuah daih mai te chu a duh rum rum tawh a. Mahse,

episode-11

Mahse, chhuah leh thurh thu lah a awm tawh der mai si lo. Bakah, a thianpa chuan a phal pawh a phal dawn lo tih a chiang nasa mai. A huphurh lutuk chu a thlan a sa phat phat mai. Mite ruala zai te chu han tum ve bawk thin mahse zai te chu khawilamah, hawi pawh a hawi chhuak tha ngam meuh tawh lo. A lo kal ve ta kher kher chu a inchhir em em mai a, inchhir lah chu a sawt tawh der mai si lo.

Zan a rei tulh tulh a, an zai chauh deuh tawh a vangin an zai kar lakah chuan val upa bawk chu a rawn ding chhuak leh a, Rothuama huphurh ang ngei ngei chuan "Khai le, kan zai tam ta bawk a kan chau deuh rih a ni ang e. Tunah chuan Rothuama, a sakei sahhlum dan leh an intawn dan chanchin han sawi teh se." a rawn ti ta le...

Rothuama chu an en ta thup mai, a ni lah a la thu kun chal mai si. A thianpa Liankima chuan a han nghawk zauh a. Chutah Rothuama chu zak leh huphurh chung chung chuan a rawn ding chhuak ta tham tham a. Mipui hmaa la ding ngai lo tih takah a din dan a tang reng chuan a khawr tut mai. Ral leh sakawlh hma chu nise zamna leh huphurhna chhete mah a neih dawn loh teh reng nen, tun tum zet chu a zam chhe nasa ngei mai.

Muangchangin a aw a han thian kharh kharh a, chu ringawt pawh chuan ngaithlatute thinlung a nghawr dawt dawt thei. Tichuan sakei luia a chawlh atang chuan a han sawi tan ta a, tawngkam thiam loh nen, zam nen a sawi kawkalh niai mai a, mahse ngaithlatu lam chuan ngaihnawm an ti hrim a. Mit tla dawnin Rothuama chu an en ka hau hlawm mai.

Rothuama pawh a sawi rei telh telh a, a zamna te chu a reh ve tial tial bawk a. Tichuan sakei nena an intawn dan leh an inbeih dan chu a thiam ang ang chuan a sawi ta a. A sawi zawh meuh chuan tlangval te chuan tluk loh en hian an en nghal thup a. Nula lam lahin beisei leh chhuang tih hriat ngawih ngawih hian an en bawk a. Mitam tak te nise nuam an tih dawn haih haih nen Rothuama erawh a zam kher mai.

Khawvar dawn hnaihah chuan zunram thiarin an chhuak sang sang a. Rothuama te thian dun pawh an chhuak ve a, mahse a dan pangngaiin mi hmuh loh lam chuhin a thu bo hmak a. Chibai tuma pawna zawngruho pawh an hawihai nasa ngei mai.

Rei rial lovin an lut leh nghal sang sang a. Rothuama te pahnih pawh a hnung berah inzui lut ve lehin an thutna chu an lo luah khat daih mai hi a lo ni a. Thutna la awl awmchhun an lal fanu bul chu pan a ngai ta mauh mai. Rothuama huphurh lutuk chuan Liankima chu a han kal hmasak tir leh rih thin.

Liankima zawk chu an lal fanu bulah chuan a thu a, Rothuama chu a thianpa bul chiahah a rawn thu ve leh a. An thu chauh tih chuan an khaw nula hmeltha Hmingliani te thian dun an rawn inzui lut ve leh, thutna awl awm chhun Rothuama sirah chuan an rawn thu ve leh lo thei ta lo.

Insi deuh thapa an han thuho mai chu a rukin Rothuama chu a hah ngei mai. Chutih naka laiin an zai insawi deuh pah chuan Hmingliani chuan a rawn nek deuh sak thin hian a hre tlat lehnghal a. An tawt a nih ringin Rothuama chuan tawlh a han tum ngial thin a. Mahse, tawlh ngaihna a awm der tawh mai si lo.

Khawfing a rawn chat a, khua pawh a rawn var chawpchilh ve ta nghal a. Kham lo fe fe leh zan tawi riaua hria an awm laiin Rothuama ve meuh erawh chuan zan rei ber tum nihialin a hre ve thung mauh mai. Val upaho chuan thlanlai tur te, sakei zawna kal tur te ruatin ro an han rel zung zung a. Tichuan mahni inlamah theuh an hawng darh leh ta rih a.

Tukthuan an eikham chuan lal tualzawlah an innghak khawm thup a. An kim hnu chuan an lalpa Mangkhupa chu leikapuiah rawn chhuakin a upa min te chuan an rawn zui chhuak diah diah a. Tichuan a khua leh tui te hmaah chuan thu a han sawi ta a.

A khaw nula leh tlangval te hnena fuihna leh anmahni a vang chauha khua leh tui nei thei a nih thu te, a pasaltha te a chhuan thu leh a mah leh khawtlang tana an muanna leh an himna an nih thu te chu thiam takin a han sawi a. An sakei zawn haw tur sathlumtu Rothuama chu a han ko a, mahse a lo awm ve reng reng lo mai. Tlangval la naupang deuh pahnih chu Rothuama zawng turin an kal nghal a. Rei vak loah Rothuama chu an rawn kai a, ani lah chu inngaitlawm hmel tak hian hnuailam a rawn bih ngar a. An lal chuan a bulah ko chhoin a chhuan thu leh, nakin zelah pawh Mualchuan khaw innghahna ni zel turin a fuih nghal a. Thu dang tamtak a sawi leh hnu chuan tlangvalho chu Rothuama sakei sahhlum ruang zawn tur chuan an chhuak ta nguah nguah a.

Chawhnu her hretah sakei chu an rawn zawn haw ta bur bur a. Sakei ruang chungah chuan Rothuama duh lo chung chu an hlang bawk a, kawtchhuah lungdawhah nula leh naupang zawng zawng deuhthawin an lo hmuak a, pasaltha leh tlangvalho chu an duhtawkin zu an lo tulh a, Rothuama pawh a tulh ve lo nih hlauin nulaho an innek buai nasa kher mai.

Tichuan ropui takin lal in an zawn thleng a, lal tualah chuan sakei chu nghatin ropui takin sakei lu chu an ai ta mup mup a. Zan lama lal ina ai chhunzawm leh turin khawthim dawn chuan an tin leh ta rih a, zan hun chu an nghakhlel tlang kher mai le.....

episode-12

Zanah chuan lal mual zawlah sakei lu chu an ai leh ta mup mup mai a, Mualchuan khaw nula leh tlangval chu an hlimin khawdang an ngai lo kher mai. Zu bel lianpui pui an rawn pu khawm zel a, a khat tawkin an sem reng bawk a an zai tui kher mai.

Zanlai pelh rawk a an zai hnu chuan tin zai an rel ta a. Rothuama te thian dun pawh rui chhe lo mahse an lu a kai ve chhelh chhawlh bawka nuam an ti kher mai. Rothuama chuan "Tirawh thiana mut zai i rel teh ang." tiin a kuah a. Liankima chuan "A khamawm loh hle mai a thianpa, hetiang reng reng hian ka la hlim ngai lo. I zar liau liau a ni e." a lo ti let a, tichuan titi pah chung zelin zawlbuk lam chu an pan dun chhat chhat a.

Zawlbuk an thlen chuan an lo mu reh thiap tawh a. Tichuan thiante tihharh hlau tak chungin mutbu an han kai pharh ve a, mut hmunah chuan zawite te hian an titi dun sap sap a. Rei vak loah an mutchhuak rawn kalin an hriat mang loh lai chuan an muhil dun ta bawrh bawrh a.

Rothuama mutui lai chu a mumang a vang chuan a harh zawk mai a, a harh ruala a mumang a ni tih a hriat chuan a lawm ngei mai. Apute khuaa a awmlai atang tawh khan mumang duhawm vak lo hian a tibuai ta zauh zauh mai a. Zanin a mumang pawh chu mang tha a ni leh ta lo tawp mai.

A mangah chuan amah hi ral kutah a lo thi a, a nu leh a farnu neih chhun pawh amah thattute chuan salah manin khaw hran ve veah hian an lo hruai daih mai a. A ma ruang chu an in a tang hian an lo zawn chhuak a, mahse, chutih lai chuan lu a lo nei tawh lova, ralina a lu an tan a vang leh an hawn daih vang a lo ni a.

An han zawn dawn thin a, mahse a lu an hawnna lamah chuan a ruang chu thi tawh siin a lo tang tlat mai a, a ruang zawntute lah chuan phum ngei tumin thlanmual lam panpui an lo tum ve ngar ngar bawk a. A ruang lah chu a lo tang nasa mai bawk si, a ruang zawntute zingah chuan tutih a hriat loh pakhat hi a lo tel ve a, chu mipakhat a hriat loh leh a hmel lang thei miah lo mai chu mak a tiin hriat a lo chak em em mai a. Chutianga a ruang zawn luih an tumna leh a ruangin a lu awmna lam chauh pan tuma an buai em em lai taka harh ta hlawl kha a ni a. Mumang mai mai mah nise Rothuama chuan mak a tiin a ngaihtuah zui nasa hle a.

A mutchhuak lah chu lakbo ang duak hi a ni mai a. Mut hmunah chuan ngawireng hian a khap fak fak a, muthilh leh mai a tum pawh chuan a harh tulh tulh ting mai a ni. Chutia muthilh tum paha a mumang a ngaihtuah zui neuh neuh lai chuan inbe ru ser ser thawm niawm tak hi a hre ta tlat mai. Ngun zawkin a han ngaithla leh a, mahse a thawm hriat chuan a ngaithla a ni tih hria niawm tak hian a ngaihthlak chian veleh thawm chu a reh leh ta daih si a.

A beng chhe ri mai mai a nih ringin a mumang bawk chu a rilruah a rawn lut leh a, hetiang deuh chiah kha a pute khuaa a awmlai khan a mang tawh bawk kha a ni a, chumi a vanga ngaihtha zan lo haw duh ta vut vut pawh kha a ni reng a.

A pute khuaa a awmlaia a mumang te chu a han ngaihtuah let leh a, mahse chutih lai tak chuan tawng se se thawm bawk chu a hre leh ta. A hmaa a hriat aimah khan a ring zawk hialin a hria. Mahse, eng e an sawi erawh hriat ngaihna a awm lo. Thawm dim takin a lu chu a han inbeng kang da da a, inbe ru su su thawm chu a reh leh ta mai. Rothuama ngaih a tha thei ta lo tawp mai. Rei ngial thawm hriat tuma a nghah leh hnu chuan a rawn awm leh ta ngei mai le.

Chu thawm lo chhuahna chu khawilai nge tih hriat tumin a beng a han chhi ngun leh zual a, an mutna hnuailam nin a hre ta, mahse a thianpa muhil han inlet ri ah chuan inbe thawm chu a reh leh ta si. Rothuama chuan lukham hnuaia a chempui dah chu a ban zal zal a. An mutna chhuat dap a nih a vangin han chet zawnga thawm chu a awm lo thei si lo.

Zan a thim chhah nasa mai si a, chet zawng hleka thawm ri tuah tuah nen Rothuama rilru chu a buai nak a. Thim zinga a chempui hum rauh rauh chung chuan engtia tih chi nge ni ang tih a ngaihtuah nasa hle a. A thawm hriat chu a bengchhe ri mai mai a ni lo tih chu a chiang tawh a, eng e a nih fiah ngei a duh a. Mahse, fiah turin thawm neih loh a har si, thawm a neih hlek lahin a thil fiah tur ber chu a bo leh zel mai bawk si, Rothuama tana chet han lak chu buaithlak tak a ni ringawt mai

A thawm hriat chu a fimkhur hle a ni tih a hriat chuan ral nge ni ang sapui? Nge ramhuai lam zawk tih pawh rin a har nak mai. Mahse, engpawh lo ni se Rothuama chuan fiah ngei ngei a duh tlat. Mahse, eng tehchiam mah a lo nih leh si loha midang muhil tui laite a tih harh a a tih phawklek vaih zawngin a mualpho chhiava dawn tih a hrechiang ngang mai. A bula a thianpa mu chu tihharh nge tha ang tih harh loh tih a han ngaihtuah vang vang a. Tih harh ve kher tul lova a hriat a vangin amah chauh chuan a tho chhuak ta them them a.

Zawhte ang maia thawm nei lova chet ngai chu harsa tak a ni. Mahse, a theihtawpa fimkhurin Rothuama chu bawhbel lam pan chuan a vak them them a, thiante mutui lai rah fuh palh hlauhawm nen chet a sawt lo kher mai. Mahse, chu chuan a tumna chu a tithulh chuang der lo..

episode-13

Rothuama chuan a rilru te tein 'Engpawh ni rawh, ka hmachhawn dawn tho tho che.' ti rilru rauh rauh chung chuan bawhbel chu a bawh liam them them a. Chutih chhung zawng chuan tawng ru sur sur thawm chu a la hre reng a.

Pawn a thleng chu a han hawikual that that a. Mahse, a thim em a vangin engmah erawh a hmu thei chuang lo. Tichuan thimthamah chuan zawlbuk hnuai chu a vak lut ta a, mahse a thawm hriat chu a reh ta hmak mai. Rothuama pawh a ding ve hmak a.

A han ngaithla vang vang a, chutah phunri bawk chu a hre leh ta, mahse a hriatna chu hmundang daih a ni ta mai. Zawlbuk thlang sir tuikhur kawng lam a ni ta daih mai. Rothuama chu a hamhaih angreng hle mai a. Mahse a thawm hriatna lamah chuan a tawlh phei leh ta hriau hriau mai a.

Tuikhur kawng a va pawh chuan a thawm hriat chu a insawn leh ta mai. A thlang deuh feah chuan an inbe leh ta, Rothuama chuan mak a ti hle mai a. "Eng chu nge maw i nih le, mai mai che chuan." ti nuah nuah chungin a pan thla leh ta zel a. A thleng dawn tep tihah thawm chu a insawn hla leh ta tlat mai. Chutah zet chuan Rothuama chuan a rilruin 'E khai, heti ringawt chuan a dik dawn hauh lo mai. Chhui chhui mi pawh i nih loh tawp hi.' tiin kirsan mai a rilruk ta a. Mahse, han chhui zui zel pawh chu a chak tho mai.

Chutia a thawm hriat ber a insawn zel takah chuan a thawm hriat chu mihring zawng a ni lo tawp tih a ring nghal a, sapui pawh ni theiin a hre lo. Chuti a nih chuan eng thil teh hrep nge nita ngai ang tih a hrethiam ta lo hle mai. Ramhuai lampang a ni thei ang em tih te a han ngaihtuah a. Mahse, ramhuai tih vel lah chu a rin loh ber thil a ni mauh mai bawk si.

Chutia a rilru a kawm ding em em lai chuan a thlang deuh kawnga nula saruak, a ke ler a tanga a chhip thlenga mihring taksa ang ni chiah si lo leh tiauchhum hmanga mihring pianphung ang nisi, tiauchhum rawng, var uk deuh vei vei hi a hmu ta mai a.

Rothuama chuan a hmu chiang em em mai a, mitvai mai maia han puh chi ziazang a ni lo. A ngaihna hre lo zet hian a thlir reng ringawt a. Zan khawthim chhah mup mai karah chuan chu hmeichhe saruak chu fiah tak mai si a ahan hmu thei tlat si chu mak a ti em em a.

Tichuan a pan hnai a ni tih pawh a hriat hma hauh chuan chu hmeichhe saruak awmna lam chu a lo pan hnai leh fe tawh mai. A hmel hmuh chian ngei tumin a han pan hnai hriau hriau zel a, mahse a hnaih hle hnuah pawh a hmel awmang reng reng a hmu thei hauh lo mai. Rothuama beidawng leh tihngaihna hre lo chuan vawi leh khatah a han zuan phut mai a. Mahse, a man lo chiang kher mai, boruak zuan ang chauh hi a ni mai si a.

Rothuama chu a mah chauhin a let hual hual a. Mahse rang taka rawn tho chhuakin a han hawi kual a, a hnunglamah chuan chu hmeichhia chu a lo ding leh reng tawh a, Rothuama chuan beih beih mi i ni lo a ni maw ti rilru chungin a en ta reng a.

Chutah biak chi a ni ang em aw a ti rilru a, mahse hmel a neih miah loh a vang chuan biak chi a nih pawh a ring leh lo. A mumanga a ruang lo zaawntute zinga pakhat hmel nei lo kha a hre chhuak zawk a. Tuna a hmaa ding hi a ni thei ang em le?

Rothuama chuan "Tu phiangsen nge maw i nih le?" a han ti khawl mai a. A rin ang chiahin a chhang tlat lo. Mahse Rothuama chuan "Min chhan loh vaih chuan nang ka hmuh thu che hi khaw pumpuiah ka sawi darh ang a, mitinin an zawng luai luai dawn che a ni mai." a ti leh a.

"Tunge i nih a eng e i duh min hrilh rawh." a ti mawlh mawlh a. Mahse chutia Rothuama chhan tuma a ka a an zuau lai chuan kawl a rawn eng ta tlat mai. Chu veleh chu thil chu boruakah a zam ral ta riai riai a. Rothuama chuan mak a ti kher mai.

A thil tawn chu a han ngaihtuah thin a, mak a tiin eng thil emaw tak inthup a awm a nih a ring a. Lasi han tih dawn a ni chiah si lo, mihring pangngai ni bawk si lo chu thla a ang ta ber mai a. Mahse, mihring thi tawh te thla chu nise hmel a neih ngei a ring bawk si. A rilrua zawhna tam tak awm, a chhanna a hriat si loh chu hriat dan a la awm a ring tlat a, hriat chhuah ngei pawh a tum ruh hle.

Khua a rawn eng chiang telh telh a, muangchangin zawlbuk lamah chuan a chho ta a. Mahse zawlbukah pawh lut kawi tawh lovin an in lam a pan ding ta nghal a. In a thlen chuan tui chawi turin an kawmthlang a tuikhur lamah chuan a liam thla nghal a.

Tuikhur a thlen hma deuh tuikhur lan theihna a thlen chuan tuikhura hmeichhe saruak lo vei lo vei chu a zuk hmu leh ta tlat mai. Rothuama chu a ding chawt a, ngawireng chuan a thlir reng a. Pan hnaih a tum lai tak chuan a hnunglama midang tuichawi ve tur dang lo kal thawm a hriat a vangin a han hawi let zawk a. Tuikhur lam a hawi leh chuan a lo awm leh ta reng reng lo mai.

Midangte chuan Rothuama lo ding reng chu rawn hmuin an be bawrh bawrh a. Rothuama chuan han chhang ve bawk thin mahse a thil hmuh bak kha a rilruah a awm thei lo. A ngaihtuahna chu a luah ngut ngut ni ber hian a hria. Tuikhurah te chuan khawimaw laia hmuh leh inbeiseiin a melh kual nasa hle a. Mahse, midang awm vang nge a hmu thei tawh si lo.....

episode-14

Tuikhur a tanga a haw hnu chuan Rothuama chuan a thianpa Liankima te in a pan ding nghal nal nal a. Liankima chuan "Thiana, tukin iva tho hma awm ve i thawh lai pawh ka hre miah hleinem." a lo ti hlut a. Rothuama chuan eng danga chhang ta lo chuan "Tara lamah hi chuan mut hi a har tawh deuh a lawm mawle." a lo ti fiamthu a.

"Ve khawngkhaw lai thin takzet che hian, mi i han thawh khal ve tum hi chuan nuam hi chu i ti thin maw le, ngawi tak rawh chu aia i nuam tihna tur enge maw hrilh tur che ka nei a nia." hlim sang hian Liankima chuan a han ti a.

Rothuama chuan "Anih a hnu, han sawi vat la ti nia kha tia intithei kual duah thin lo khan." a lo ti let vat a. Phur fahran hian Liankima chuan Rothuama dar chu a han beng thak a, zawi leh fiah tak si hian "Vawin chu thingphurh pui tur nula ka hual a nia aw." a han ti su su a.

Rothuama chu a lo khi suk duh chauh a. "Chuzawng chu maw? Thupui hlapui kan vai dawn emaw tihnak lai chuan le." a lo ti el leh sak a. Liankima run tawk a tling ngei mai.

Ngeiawm deuha nuih thaw pah hian "Thu hi lo pawt chat zung zung thin lo la, aia upa ten thu kan sawi hi." Liankiman a han tih chuan Rothuama chu a nui var var a. "Anih han sawi zawm ta poh che." tih pah hian a inkuangkuah et a.

Lianmawia chuan a hma aia phur hmel fe hian "Han ring chhin la maw le chung mite chu, i rin loh deuh te pawh an lo ni mai thei a nia aw." a han ti a. Rothuama chu a ngawi vung vung a, chutah "Vengthlang nuthlawi emni leh ta pek?" a lo ti bauh a.

Liankima chuan nuih huah huah pah hian "I va han ring thiam chaih chaih thin em nang nge nge. I ring dik teuh kher mai, mahse a dik lo hlauh. Kan lal fanu te thian dun ngat maw le..." intithei fahran hian a han ti a.

Rothuama meuh pawh a phu ve zuk mai. A thianpa en hau chung chuan "Lal fanu Chhingmami maw?" a han ti ha a. Liankima chuan lubuk nghauh nghauh pah hian "Ni e le, a thiannu Chhiari nen an ni dawn a, kei ni pahnih thingphurh puiah min sawm a nih chu, i awih phal bik hi ka ring lo a ni." a han ti a.

Rothuama chuan "A va mak teh tlat ve a, an fiamthu chu a ni em si lo maw? Keini a kara hnamchawm tlangval pahnih, belval vala val ve mai mai lehnghal chu awih pawh a va har kher ve." a lo ti a.

Liankima chuan "A ni ngawt mai tiraw thianpa. Mahse, upain duh loh nena khuangchawi ai chuan duh berte nena bahra laih pawh an lo thlan ve hial reng kha. An fiamthu mai zawng a ni lo tawp. Harsatna i neih ka rin bik loh a vangin aw ka lo pawh ve mai a sin." a han ti a.

Rothuama chuan "Nei pawh ni ila nang berin aw i lo pawh tawh si chuan kan nei ngam chuang nang." a han tih takah chuan phur tak mai hian Lianmawia chuan "Khai, a nih zawngin tukthuan va ei thuai teh. A thleng hmasa sa lungdawh a innghahah kan ti a nia. A nghaktu zawk nih hi a tha ngai e." a ti liam zung zung a. Tichuan tukhuan ei tur chuan Rothuama chu a haw ta a.

Kawtchhuah lungdawhah chuan Liankima leh Rothuama chu an thu vang vang a, tuibur hmuamda vel an thut hnu chuan an lal fanu hmeltha zet mai Chhingmami leh a thiannu Chhiari chu em phur chung hian an rawn lang ve hlawl mai a. Rei vak lo an thut hnu chuan ramhnuai lam panin an inzui liam ta diah diah a.

An thingphurhna tur hmun an thlen chuan Rothuama leh Liankima chuan thing an fawmpui a, an duhtawk tur phur an ngah hnu chuan Rothuama chuan an thlang hla vak lo a kawrte tui chu 'ka zu chawi ang e.' tiin a chhuk nghal a.

Chutih chhungin an thingput tur Liankima chuan a lo tan ve thung a, Chhingmami te thian dun chuan lo fiam zauh zauh pah hian an lo en dun reng a. Chutiang reng reng chuan Liankima chu a la hlim ngai awm love...

Rothuama chuan mauthei tur mau chang sei lai deuh chu changhnih siamin tui chu a dawh mek a. Chutih lai tak chuan zan lama a mang phun ser ser ri chu a hre leh ta mauh mai. Rang takin a han hawi chhuak nghal a, a thlang kawrte lui mawng lam hla vak lo a Chhingmami lo nui sen sen mai chu a zuk hmu ta mai a.

Makti tak maai hian Rothuama chu a ding nghal zawt a. Chhingmami chuan zaizir hian a rawn hui leh ta nghal a. Rothuama chuan Chhingmami chu a thiante pahnih nen a kalsan ngei kha a ni si a, engtin nge khung khungah a lo thlen thlak hman reng a hre lo.

A en reng lai chuan Chhingmami chuan lui mawng lam zawhin Rothuama hui pah zel chuan a kal liam ta mai. Rothuama chuan zui chi nge ni ang chhohsan tur tih a ngaihtuah vang vang a. A tui dawh lai chu dawh zawm lehin a khah rual chuan chhoh leh phawta a thiante bulah Chhingmami kha a la awm em tih han chian phawt thain a hre ta a.

Tichuan mautheia a tui dawh chu kengin a chho ta sawk sawk a. A thiante awmna a han thlen chuan Chhingmami chu a hmu ve ta lo ngei a. "Khawiah nge chhingmami?" a han ti satliah mai a. Chhiari chuan "A inthiar lawk a nihkha." a lo ti ve mai a. A sawi lai mek chuan Chhingmami chu an piah chhak lam deuh a tang chuan a rawn lang ve nghal bawk a. Rothuama chuan chik ru zet mai hian a lo thlir reng a, a rilru chuan mak a ti tulh tulh mai. Mahse........


episode-15

Mahse, Rothuama chuan ringhlel leh phawklek zawnga awm a tum hauh lo. Chhingmami lah chu engmah danglamna leh pangngai lohna hmuh tur a awm bawk lova, Liankima leh Chhiari lah engmah hre ve hek lo an infiam nui bawk bawk mai.

Rothuama chuan "Kha hei tui hi in rawh u." tih pahin a mauthei ken chu Chhiari a pe a. Chhiari chuan a han in khalh khalh a, a in zawh chuan Liankima a pe ve leh a. Liankima chuan a han in ve leh bawk a. An in chhung chuan Chhingmami che vel chu Rothuama chuan a lo mitmei ru reng bawk a.

Liankima'n a duhtawk a in hnu chuan Chhingmami chu a han pe chhawng ve leh a. Chhingmami chuan a han in ve leh khawlh khawlh a. Chumi chhung chuan Liankima leh Chhiari chu haw turin an lo inbuatsaih ve mek bawk a.

Rothuama chuan ngaihsak hranpa lem lo ang taka lang hian faifuk hlarh hlarh chungin Chhingmami tui in chu a melh leh zauh thin a. Chhingmami chuan tui in pah hian Rothuama chu a va melh zawk a, an mit leh mit chu a intawk ta siah mai.

Rang lutukin Rothuama chuan a mit chu a lasawn nghal a. Zahzelah chunglam a hawi kual ruai ruai a. Chhingmami chuan a tui in ruahna mauthei chu theh thlain a phur a siam zui ve nghal ta bawk a.

Rothuama chuan mak a ti kher mai. Chhingmami tui in ruahna mathei chu melh zauh pah hian "Kan hman chuan zawiin kal mai ang u aw." a han ti a. Chhingmami chuan Rothuama han melh ralh pah hian a nui suk a. Rothuama lah chuan a en tha duh tawh der lo.

Tuichawi nana a hman mau chu banpuam tia leng lawng hi a ni a.
A sei zawng lah chang khat fahran mai chang hnih lai a ni bawk a, teh chiah ila tangphel chu a ni ngei dawn a, chutiang han in zo vek thei mihring chu ala hre ngai tlat lo. Chupawh hmeichhia lehnghal, a thiante pahnih lah khan eng tham an in lo tih a chiang em em mai si.

Chungte a vang chuan Rothuama chuan Chhingmami chu a ringhlel ta tlat mai a. Mahse, engtia han tih chi nge a hre mai lo. A thiante lah chuan han rinhlelh ngaihna an hriat loh mai bakah ngaihthat lohna chhete eih pawh an nei lo chu a ni si a. Hrilh chi nge ni ang hrilh loh tur tih pawh a hrethiam tawh lo.

Liankima'n hma a hruai a, Chhiarin dawtin Chhingmami'n a dawt leh a, a hnuhnung berah Rothuama chu a kal a. Liankima leh Chhiari chuan fiamthu eng enge maw thawhin an nui bawk bawk a. Chhingmami lah an fiamthu thawh a piangin a nui uar leh a nui ring ber berah a tang ziah. Rothuama erawh chuan a thiante ngaihthatna tur tawk lek lekin a nui ve mai mai a.

Tichuan an hriat loh karin kawtchhuah lungdawh an thleng chu a ni ta reng mai. Chutah chuan rei mawi tawk an thu chawl a, titi eng enge maw an sawi luam hnu chuan an kal leh ta a. Kar lovah khua an lut a. Tichuan mahni in lam theuh panin an peng darh ta hlawm a.

Rothuama ngaih chu a tha thei tawh mawlh lo. In a thlen chuan a nu a lo awm a, a nu biakna pawh chu chhan nachang hriat loh a nei ngah deuh nge a nu chuan ngaihtha zan lo hian "Nang hi eng i ti nge mawni le? Mi chhan mai nachang i hriat lek loh le?" a han ti a. Rothuama chuan engdanga chhang ta lo chuan "Sava ka veh dawn." tih leh chhuah a rual leh ta mai.

A nu chuan ngaihtha zan lo chuan a thlir liam ta ngawt a. Chhun lama an thingphurhnaah enge maw rilru nawm lohna a tawng a nih ringin a reh ve leh mai turah a ngai a. Tichuan a ni pawh an kawmthlangte saum suak turin a chhuak ta hnak hnak a.

Rothuama chuan sava pariat lai mai a perh thlak hnu chuan khua a thim tan tawh bawk a hawn zai a rel ta a. Khua a luh rual chuan khua pawh a thim tawh kher mai. An in lam pan hmain a thianpa Liankima te in pan hmasak chu tul tlata hriat a nei ta mauh mai a. Peih vak lo mahse tul riaua hriatna a neihna chuan a ur thluk hrim a vang chuan a pan kawi ta nge nge a.

A thianpa te in a thlen hma chuan a Liankima nau a tawk ta hlauh mai a, chaw an ei tawh leh ei loh te a han zawt thuphung mai mai a. Liankima nau chuan hlauhthawn hmel fe mai hian a u Liankima chu a khawsik a tlun nasat thu leh a ngaihtuahawm thu a hrilh ta mai.

Chu thu a han hre zet chu Rothuama pawh a barakhaih ngei mai. A rilruah ngihthat lhna a rawn lut nghal a, chhun lama a thil tawn te, a zan lama a mumang te leh a hma daih zana a mumangte chu a han ngaihtuah let a, tunah a thianpa a han damlo ngawt mai chu mak a tiin chung thil te nen chuan inzawmna a neih a ring ve ringawt mai a ni.

Hmanhmawh lutuk maiin a thianpa te in lam chu a pan hmawk hmawk a, a zuk thlen chuan a thianpa Liankima chu a lo na a nasa mai a, a chhungte chuan tihngaihna an hriat loh a vangin Bawlpu leh Sadawt pawh an lo kohtir hial a lo ni a.

Rothuama a zuk thlen pawh chuan Liankima chuan a thianpa chu a lo hre reng reng tawh lo. Chhingmami hming leh Chhiari hming chu a lo lam pawlh nawk nawk mai a. Mahse, a chhungte lah chuan engmah a awmzia an hre si lo, a rukin a ngaizawng a nih te an lo ring a. Rothuama chuan a thianpa chu a han bawh hnai a, a beng bulah chuan zawi leh fiah tak si hian "Thianpa, keimah i thianpa ngei ka ni e. Eng e i harsatna chu min han hrih teh." a han ti a, chutah chuan....

episode-16

Chutah Liankima chu a rawn meng pual ta ru ru mai. A thianpa chu a melh run run a, vawi leh khatah theihtawpa insiamchhe chung hian Rothuama chu a bei ta thut mai a. A kut vaiin a rem lai laiah a ham buan buan a, mahse Rothuama chuan a hneh hrim a. Khumah chuan a bawh bet leh thuai a.

A chhungte an rawn tlan khawm nghal thuai a. A nu phei chu a lo tap hman hial a. A reh vang vang tak a vang chuan Rothuama chuan a bawhbet reng lovin a thawh kansan ta a. Mahse, chu veleh Liankima chu a hma aia nasa mah hian a rawn thawk leh ta mai. Rothuama chuan bawhbeh leh mai a han tum a. Mahse, Liankima chu a chak ta em em mai a, Rothuama takngial pawhin a bawh bet zo ta lo.

Englai mahin Rothuama hian a thianpa hi tharumah nana na chuan a huphurh ngai lova, Liankima hian hneh pawh a hneh ngai hek lo. Mahse, tun tum Liankima chak dan em em chu sawi mai ai hian a nasa tlat mai. Chu chuan Rothuama ngaih a titha lo zual a. A kawchhung lamah puitu an awm a nih a ring nghal hmiah a.

Rothuama meuh pawhina a hneh tak loh a vang chuan an vai buai ta, Liankima chelh beh tum chuan an bawh rawn ta luih luih mai a. Mahse, chuti chung pawh chuan an hneh meuh lo lam chu a ni. Rothuama chuan a thianpa a chhunglamah tibuaitu an awm a ni tih leh a han hneh lo chu a tlawm ngai em em mai a, a tha tawp takmeuh chhuahin a han tang ve ta tak tak mai a.

Chutah meuh chuan Liankima chu an chelh bet thei ta hram a. Thaw huam huam chung hian khumah Rothuama chuan a bawhbet ta ran mai a. Midang te pawh chu an hah hlawm ngang mai. Chutah an thawm hriaiin thenawm khawveng te an lo tlan lut nghal nual a. Thil awmzia an han zawh lahin engmah a chhan hria lah an awm der mai si lo.

Liankima chuan a lei a chhuah zul mai a, a mit chu meng mahse khua a hmu lo tih hai rual a awm lo. A meng var pup a, tichung chuan a hawi kual rulh rulh bawk a. A khap eih bawk si lo, a rapthlak dangdai kher mai. Hmeichhia phei chuan en pawh an en ngam lo. A chhungte lah chu Liankima wmdan a vang chuan an rilru a na em em mai a. Rothuama pawh a thianpa hmel rapthlak deuh chu lainatna nen a en tlawk tlawk a.

A khat tawkin Liankima chu a rawn thawk leh hluai zel a vangin khawiah mah kalsawn ngam a ni lo. Chuvangin Rothuama chuan a awmpui ta char char a, a chang phei chuan a thi mai dawn emaw tih tur khawp hian a awm a. Mahse, thih zawng a thi em lova,

nakinah chuan Chhiari chu a thiannu nen an rawn lut ve a. Liankima hmel an hmuh chuan an rap ngei mai. En pawh en rei ngam lovin an inthiarfihlim nghal vat a. Chhun lamah khati khawpa hlim taka inkawm si heti teh thuta a han awm mai chu enge a chhan reng an hrethiam lo a ni.

Kalsan ngam ngam a nih tak si lohah chuan Rothuama chuan a awmpui ta ngar ngar a. Zan rei lamah chuan zun ram thiar turin a kalsawn ve ta hram a. Chutih chhung chuan midangin an lo awmpui ve thung a. Rothuama chu a ril a rawn tam raih raih a. Mahse, chaw ei tura haw hman a ni tawh lo. Liankima chhung te lahin an rilru buai a leiah Rothuama chaw ei tawh leh ei loh lam reng reng an lo hre chang tawh si lo.

Riltam rilru tak chuan Rothuama chu a tei a tei a. Zunram thiar turin pawnah a va chhuak a. Mahse, zun tur a lawi pawh a nei chuang lo. Chhun lama an hun hmandan leh a thiltawn ngaihtuah rauh rauh chung chuan Arsi tlep tuar chu a thlir vang vang a.

Chutia a rilru a kawm melh melh lai chuan "I lung a va leng awm ve a," tih ri chu a hra ta thut a. Chu chuan a ngaihtuahna kal ding lai chu a rawn ti tawp chawt bawk a. Tunge rawn bia hriat tuma a han hawi kual chuan tumah a hmu ta reng reng lo mai. Rothuama chuan "Leng love." a han ti ve thla ngawt a. Mahse, tumah a hmu ta si lo.

A hawi vak vak a. Mahse, a bul hnaiah tumah an awm hauh si lo. Rothuama chuan a bengchhe ri emni ang tih a ngaihtuah rauh rauh lai chuan "Min zawng emni?" tih ri chu chiang fahran mai hian a hre leh ta tlat mai.

A chiang si a, haider leh bengchhe ri mai mai a ni lo tih a hrechiang lutuk tlat. Mahse, tunge rawn betu chu ni a khawiah nge a awm tih a hre thei tlat si lo. Rothuama chuan "Aw, tunge i nih, ka hmuh theih turah i rawn inlan thei ang em?" a han ti a. Mahse, chhangtu reng reng an awm leh ta si lo....

Rothuama beidawng chu in chhunga luh tumin a han in her a, chu veleh a aw hriat ngai bawk chuan "La lut suh aw, i luh vaih chuan nang leh i chhungte tan a pawi ang." a rawn ti ta mai. Rothuama chuan hachamg thial ri rap rap chung hian, "Tunge maw i nih chu le, mipa ka nia lawm i duh chuan ka hmaah hian rawn inlan ta che." a han ti ve ta ngat a.

Mahse, tumah erawh chuan an rawn chhang tawh lo. Chutia a hawi kual vak vak lai chuan Chhiari chuan "Thuama chu tunge maw i biak mawlh mawlh le, zun ram thiar tuma lo chhuak ka nia ka hlau deuh sia min lo nghak ve rawh aw." a rawn ti a. Rothuama chuan "Tumah be nang, aw le zung rawh zung rawh engmah hlauh tur a awm lo." tiin a lo chhang a. Tichuan chhiari chu a zung a, chutih chhungin Rothuama chuan lo nghakin amah betu chu a zawng ru reng a. Chutih lai chuan vawi leh khatah...

episode-17

chutih lai chuan thawk leh khatah Liankima chu rapthlak thei ang ber hian a rawn rak chhuak ta vak mai a. Chhiari hlau lutuk chuan zun pawh zung zo hman mang lo hian Rothuama chu a pawm ta chung chung mai a. Chuti chung chuan zun a la cheh zawih zawih mai bawk a, Rothuama tan pawh han chet ngaihna hlawl a awm lo a ni.

Mahse, Liankima chu ngaihven rang a ngaih bawk si a vangin Rothuama chuan Chhiari chu tlan luhsan mai a han tum a. Chhiari lahin a kuah bet tlat bawk si. Rothuama tihngaihna hre lo chuan Chhiari chu in chhungah a pawm lut ta ringawt mai a. Inchhung chin a luhpui rual chuan a nghat dawt a, rang takin Liankima khum awmna lam chu a pan nghal ruak a.

Liankima chu an lo bawr luai luai a, mahse an hneh loh a vangin a lo tho ur ur mai. Rothuama chuan a kawngah a kut pahnih chuan a han kuah a, khumah chuan a bawh bet leh ta rawk mai a. Tichuan amah chuan a bawh bet leh ta a, Liankima chu rapthlak tak mai hian a au ruai ruai a. Hmeichheho phei chu hlauin an khur zawih zawih hlawm mai.

Chutiang reng reng chuan a darkar khat deuh thaw zet mai chu a au ta a. A tawpah chuan a aw chu a zawi ta raih raih a, a aw a rik tawp rak thleng chuan a ral ta riai riai a. A mit chu var pup chung hian a meng reng a. Vawikhat mah a khap bawk si loh a vangin en that ngam pawh a ni lo.

Rothuama pawh a riltam lutuk chu a pum a ri kal ruah ruah a. Mahse, a thianpa chu kalsan ngam chi a ni si lo. Zan a rei zel a vangin thenawm khawvengho chu an haw darh sap sap tawh a. Liankima nu chuan Rothuama chaw la ei loh chu a han hrechhuak tha ve leh hnuhnawh a. Rang takin chawei a siamsak nghal a. Tlawmah pawh la duh bik lem lovin Rothuama chuan puar takin a ei ve ta a.

Zanlai a pelh fe tawh hnuah chuan Chhiari te thian dun chu kil khatah an la awm ve ran a. A hmel a tangin hlauhna chuan a la kiansan lo a ni tih hai rual a awm lo. Vawh tih vang ni hauh lovin a khur leh bauh bauh thin a, a khawngaih thlak reuh hle mai.

Liankima nu chuan "Chhiari, nangni pawh min tinsan tawh mai ula, hei eng em kan ti tawh bik lo turah ngai ila, a thiante mah ni ula in chau lutuk ang. Vawin lamah te hna in thawk hah si a." inthlahrung dai hian a han ti a.

Chhiari te thian dun chuan an chhang lem lova, mahse haw tumna pawh an neih hmel chuang lo. An tirila hlauhna a vang chuan an rilru a la harh chiah lo ni berin a lang. Chu chu an awmdanah Rothuama chuan a hre nghal mai a. An haw ngam tawh lo a ni tih ring tho si chuan "In pahnih khan in haw hreh deuh em?" tiin a han zawt a. A rin ang chiahin an lu an lo thing na na a.

Rothuama chuan "Ka han thlah lawk mai dawn che u emni?" a han ti leh a. Engtinmah an chhang lo. Liankima nu zawk chuan "Awi Thuama, nang ber i awm loh te chuan tuibur hmuam da lek pawh engtin nge kan awm ang le?" tiin kal a phal loh zia a lo ti lang vat a.

Liankima nu thusawi chu a han ngaihtuah a dik viauin a hre bawk si. A thang hlanin a thianpa chu lo che leh ta mai sela anni ringawt chuan engtin mah an lo ti thei chai dawn lo. Thil tha lo lo te pawh a thlen palh a hlauhthawnawm tak a ni.

Midangin han thlah mai se han ti turin tumah dang han tihawm chi an awm der mai bawk si lo. Awm pawh ni se Rothuama anga muanpui an nei dawn lo chiang sa a, a duh pawh an duh kher ang em? Hmeichhia leh naupang phei chuan a ngam pawh an ngam dawn lo chiang nasa mai si.

"Anih leh hetah zanin na na na chu in riak ve mai dawn emni ang? Thil a va han buaithlak em em ve maw le aw!" Chhiari te thian dun en chung chuan Liankima nu chuan a han ti leh a. Anni thian dun chu an han inmelh tawn zak zak a, chhan phei chu an chhang chuang lem hlei lova.

Rothuama bawk chuan "Ni e, in hreh loh chuan riak ve ta mai ula a pawi lem dawn emmaw ni le? Hei thianpa lah hi han kalsan ngam chi niin a lang bawk si lova." a lo ti ve bawk a. Hreh thei dinhmunah pawh an din miau loh a vangin "Ni mai e." an ti ta a.

Tichuan chhuatah chuan mutna an phah a, an thian dun chuan an mu ta a. Rothuama chuan Liankima nu hnenah chuan "Nangni pawh mu hahdam teh u, hei ka awm a engmah ngaihtuah tur a awm love. Tul a nih leh inkaihthawh pawh a har hleinem." a ti a.

Han mutsan ngawt chu thil nithei niin an hre si lova. Mahse, Rothuaman a tih tlat a vang chuan an mu ve ta diak a. Mahse, an muthilh theih mai chu a rinawm chuang bik lo. Tichuan Rothuama chuan a thianpa chu a thutchilh ta ran a.

Chhiari te thian dun lah muthilh te chu khawi lam, an thla a muang thei thlawt lo. Zan chu a reh hian a reh ta vawng vawng a, sazu thawm mai mai pawh a ring duh kher mai. Ri hlekah Chhiari te thian dun chu an phu zawk zawk mai a. Rothuama chu an bula mu tura va sawm mai an nap tawh a, an lainatawm dun ngei mai.

khua pawhin var a hlat vak a rinawm tawh lo. Chhiari te thiandun inlukhup tlat thlan tla nasa tawh lutuk chuan hlau chung chung hian an hmai an rawn tilang de de a. Chutah le, Chhiari chuan khanchhuka Liankima lo thu thluang duai mai leh a ke lo then nawlh nawlh chu a han hmu ta thut mai le!!!.......

episode-18

Chhiari hlau lutuk chu a var nghal vek a, a mit laksawn na chang pawh a hre tawh lo. A thiannu chuan a han hmu ve leh, a ni pawh chuti tho. A chet hian an che sawn eih ngam tawh lo reng reng. Te chhuah na chang lah an hre hek lo, an melh tlawk tlawk ringawt mai a ni.

Liankima lah chu ri si lo hian a nui sung mai a. A ke chu thenin a hawi vual vual mai a, a chang leh Chhiari te thian dun chu a rawn en thla doh doh mai bawk a. Chhiari te thian dun chu an khur dun hlawk hlawk mai.

Liankima chuan a awmdan a han siam rem a. Mutchhuak deuh ni awm tak hian a ham bui bui a, chutah a han meng sawl rut mai chu Chhiari te thian dun chuan an hlau ngei mai. Mahse, an thil hmuh leh an hlauhna chuan a aikaih tlat tawh a vangin eng thawm mah an chhuah ngam tawh lo hrim hrim.

Tin, chutih lai chuan thi leh dam karah an awm a an rilru a pangngai loh bakah an chhia leh tha hriatna pawh a harh fim tawh lo. Hlauh lutuk a vangin zun an cheh dun zawih zawih mai a. Mahse, chu an zuncheh pawh chu an hre chuang reng reng lo.

Chutiang khawpa an hlauh a vang chuan an thidang lo chauh hi a ni tawh mai a, chutih nak a lai chuan Liankima chuan a ban chu a han tisei ta mai a. Mipa, kei ka ni inti tan pawh hlauh loh chi hi a ni lo reng reng. A ban chu a tisei vak vak a, nui then thu chung hian muangchangin Chhiari te mutna lamah chuan a rawn ban ta zul zul mai.

Chhiari chuan han au chhuah vak hi a tum a. Mahse, a au chhuak thei tlat lo. Chutih a hnekin an taksa pawh an tiche thei reng reng lo mai. Liankima ban chu a rawn sei zel a Chhiari te puan sin karah chuan a rawn zen lut ta. Chutah an ke hnuai ve ve chu a han hiah sak ta mai a, chu mai chu duh tawk lovin an chawnah a zut chhoh sak ta zel, Chhiari te lah thil engkim hre vek siin tih theih an nei der mai si lo.

An malpuiah a zut chho zel a, a chang leh an chawnah a tawlh hniam leh a, a changin an malpui tawp thleng deuh thaw thawin a zut chho leh a, chutianga rei vak lo a tih hnu chuan Rothuama chuan thawm a rawn nei ta hlauh mai a. Chu veleh rang lutukin Liankima chuan a ban chu a dah bo nghal a. Engtik laiin nge a ban chu a tih tawi leh an hre hman lo reng reng. Mahse a pangngai ang chiahin a lo awm leh tawh si.

Liankima chu a hawi zawk zawk a, Rothuama te awmna lamah chuan hawiin Rothuama chuan thawm a rawn nei leh dawn em tih ngaichangin chumi pah chuan a ban chu a tisei leh ta zawk zawk mai. Rothuaman thawm dang a rawn neih zawm leh mai tak lohah chuan a ban chu a rawn tisei leh ta zul zul mai.

Mahse, Chhiari te puan sin kara a han zen luh leh dawn lai tak chuan Rothuaman thawm a rawn nei leh ta hlauh mai. Rothuama chu a han khuh kharh a, rang lutukin a ban chu a la chho leh nghal, thawm a han ngai thla leh vang vang a. Thawm dang a rawn nei leh tawh dawn lo emaw tih hun velah chuan a rawn nei leh ta tlat.

Rothuama chu a rawn ham bai bai a, chu ringawt pawh chu Chhiari te thian dun tan chuan a va han thlamuan thlak dawn tak em. Puan zar chhan a nih a vang leh tlema a puk deuh bawk a vangin chhuata Chhiari te thian dun mu pawh hi a hmuh mai theih loh a.
Tin, a karah buhzem lian tha deuh mai a in hung bawk a.

Chutah midang muhil te tihharh hlau tak chung chuan a han ding chhuak taih taih a, hawi harh leh zun ram thiara pawn chhuah lawk tumin puanzar chu a han keu a, chu veleh Liankima chu a bo ta daih mai. Chhiari te thian dun chu an muhilah a ngaih a vangin en kher pawh tulin a hre lo. Bakah a thim deuh rek ruk em a vangin pal palh te pawh a hlau a.

Tichuan thawm dim takin pawnah chuan a va zung a, pawn lam boruak chu a lo vawt phian a vangin a harh sawng sawngin a hria a. Tichuan muangchangin mei a han tan a, tui ti tak mai chuan a si vang vang a. Chutih chhungin in chhung lamah ve thung chuan Lianmawia chu liangah a lo thu leh vung tawh mai. Rothuama a lo lut nge lut lo tih hriat tumin pawn lam a hawi zawk zawk a.

Chutia tui ti taka mei a pak talh talh lai chuan in chhung lama Liankima thawm ni awm tak a hriat a vang chuan zuk pawh zu zo hman lovin a thianpa ngaihtuahna a vang chuan rang takin a lut nghal a. Mahse, Liankima chu tha takin khumah a lo la mu hlauh a. Liankima nu chu a rawn khuh kharh kharh a vangin Rothuama chuan a tiharh ta thoah inngaiin a inthlahrung hle a.

Chutah Liankima nu chuan khum a tang chuan "Thuama, i la mu miah lo em ni?" a rawn ti a. Rothuama chuan "Mu e, ka mutui khawp mai. Hei thianpa pawh a ngaihtuahawm loh a nia. Nangmah zawk kha i mu thei?" tiin a lo zawt let a.

"Aw mu thei a, i thianpa chu a la harh miah lo emni?" a rawn ti leh a. Rothuama chuan "Aw harh rih lo chu a nia, a tha lamah ngai phawt ila. Muhil leh tawh rawh hei khua pawh a var tep tawh a nia." a ti a.

Inbe zui tawh lem lo chuan a reh leh ta vang vang a. Chutia thawm dang engmah a awm loh lai chuan vawi leh khatah Chhiari te thian dun chu an rawn tap chhuak ta phut mai. Rang lutukin Rothuama chuan a va pan nghal a, Liankima nu leh a nauteho zawng zawng pawh an rawn tho suau mai......

episode-19

Hlauthawng leh ngaihtha lo tak hian an kil thap mai a. Rothuama chuan "Eng e ni ta? Engti zia nge ni ta ngai? Mumang duhawm lo in mang emni?" tiin a zawt mial mial a. Mahse, a tuve ve mah chuan an chhang lo. Hlau lutk mai hian Rothuama chu an pawm bet tlat a, an tap khur hlawk hlawk ringawt mai a ni.

Chutiang chuan rei ngial engmah zawh theih loh khawpin an tap a. Mahse, a rei hnu chuan an tap chu an bang ve mai a, mahse an hmel leh awmdanah chuan an la hlau hle a ni tih a hriat mai a. Rothuama chuan "Eng thil nge nita le? Min han hrilh teh u, chuti taka hlau leh thlabara siamtu cheu chu han sawi teh u." a han ti leh a. Mahse, an sawi ngam der mai si lo

Liankima nu chuan "Mumang tha lo in mang a ni maw? A ni em?" a lo ti ve mawlh mawlh a. Thu dik an sawi ngam si lo chuan an lu an bu ta ringawt mai a. Mahse, chutia a rual rual a mumang tha lo han man dun chu a ring thei lo. Eng emaw hlauh tak an hmu ang a an sawi chhuak ngam lo a nih a ring tlat a.

An mutna an han en chiang a zun an lo cheh dun nasa mai a ni tih an hre chhuak ta chauh a. Mut lehna chi rual a ni tawh lo a, mut pawh an mu ngam tawh hek lo. Chhuatah chuan thusawpin an la khur zawih zawih reng a. Rothuama chuan an pahniha kuah pahin "E khai, hlau suh u hlau duh tawh reng reng suh u. Hei ka awm a lawm, engtin mah in awm hauh lovang." tiin a tawng thlamuan mawlh mawlh a.

Chutia an buai laih laih lai chuan Liankima chuan thawm a rawn nei ve leh, Rothuama chuan a va pan hnai vat a. A thenin Chhiari te pahnih chu an lo awmpui bawk a, a then Liankima mutna bulah chuan an lo kal hnai ve bawk a. Rothuama chuan Chhiari te pahnih chu "Hetah hian lo phei ve mai rawh u." tiin a han au a. Mahse, Chhiari te pahnih lah chuan an ngam teuh mai si lo.

Khawiah mah an chesawn ngam loh mai bakah Liankima hmel chu an en ngam reng reng lo. Liankima lah kalsan chi a ni leh tawh bawk si lo, vawi tam a koh pawha an duh miah loh danah Rothuama chuan Chhiari te hlauh chu engdang a nih a ring ta lo tawp mai. A thianpa ngei chu a nih a ring nghal hmiah a.

Mahse, vanneih thlak tak maiin chutia an buai laih laih lai chuan khua a rawn var ta hlauh mai a, Rothuama chu a thaw huai a. Khaw engah nana na chuan Chhiari te hlauhna pawh a zia ve ta hret hret a. Liankima pawh a rawn pangngai tan a, engmah buaina leh harsatna pawh a nei tawh lo.

Mahse, an han biak reng reng chu aw leh aih tih nan a lu a thingin a bu mai zel a. Tawng nachang a la hre lo nge a tawng thei lo tih pawh hriat a har a. Mahse, nakinah chuan Rothuama chuan "Thianpa engti zia nge i tawng miah loh, i tawng thei em?" a han ti a. Liankima chuan a lu a lo thing leh a.

Rothuama chuan "I tawng thei lo maw thianpa?" a han ti nawn leh a. Liankima chuan a lu a lo bu leh nghut a. A ngaihna an hre lo tlang kher mai. Thil dangah engmah danglamna leh pangngai lohna a neih an hre tawh si lo. Rothuama chuan "I harh em? I tha tiraw thianpa?" a tih chuan a ngai te bawkin a lu a bu leh mai a.

A nu in "Na i nei em Taia?" a tih lahin a lu a lo thing leh a. Rothuama chuan "Tho rawh aw, i tho thei ang em?" a tih chuan a lu a lo bu leh a, Rothuama chuan a han kaitho a. Pawnah te a va chhuah harhpui a, engmah thil dangah pangngai lohna an hre si lo, chutia a tawng thei lo ta ringawt mai chu mak an tiin a ngaihna an hre lo tlang kher mai.

Mahse, Rothuama chuan rin rilruk deuh chu a nei tho mai. Nimin lama an thingphurhna lama a thil tawn nen khan inzawmna a neih a ring tlat a. Chhingmami ber kha belh chian e maw enthlak ruk deuh e maw thain a hria a. Nimin lah khan a hmu sual lo chiang mai si a. Eng e maw thil dik lo leh inthup chu a awm ngei a ni.

Chhiari te pawh an pangngai chho leh tawh a. Mahse, Liankima chu an tih deuh tlat tawh a. Liankima nu hnenah chuan "Kan haw ve phawt ang e, hei ani pawh a that tawh khawp hi engmah in ti tawh lovang." an ti a. Liankima nu pawh chuan lawmthu sawi mawlh mawlh pahin chaw ei nghal law law turin a sawm a. Mahse, haw thuai thuai kha an duh ber a nih tawh miau a vangin an haw ta a.

Rothuama erawh chuan tukthuan a ei ve nghal a. Chhun lamah pawh a thianpa chu a vil chawt a, zanriah erawh chu an in lama ei turin a haw ve ta thung a. An in a thlen chuan a nauin Chhiari dam loh thu leh a ngaihtuahawm thu a lo hrilh leh ta mai. Chu thu a han hriat chuan Rothuama chu a inngaihtuah muk ta ngei mai.

A thianpa ni bawk, tunah Chhiari a dam lo leh maw? Chhiari te khan eng fakau nge an hlauh ang nizanah khan? Tunah thih ngamin a dam lo leh a, a dawt leh chu a mah a ni ta mai. Chutiang zawng zawng ngaihtuah rauh rauh chung chuan a hachang a thial rap rap a.

Zanriah an ei kham chuan thut pawh thu muang lovin a tek chhuak nalh a. Liankima te in lam a pan nal nal a, mahse rei awm lovin zawlbuk lam a pan leh a. Zawlbukah chuan Liankima chanchin te an lo zawt nak nak a. Rothuama chuan a thianpa chanchin chu tawi fel tak, kimchang fe si hian a han sawi a. An niho pawh chuan mak an ti kher mai. Mahse, han puh mai tur erawh an hre bik si lo......

episode-20

Titi dang dang val upaho chuan vawrhin tlangval te chuan an ngaithla thap a. Lenglen ar an khuan thliai thliai takah chuan tlangval te chu nula rim turin an chhuak darh ta sang sang a. Rothuama pawh Chhiari kan turin an in lam a pan ding nghal a.

Chhiari te in a thlen chuan thenawm khawveng an lo awm deuh laih a. Rothuama hmel an hmuh chuan nizan lama thil thlen dante an lo zawt nghal sap sap a. Chhiari pa pu Phunga chuan Rothuama chu ko hrangin thil awmzia chik takin a zawt a. Rothuama chuan an thingphurh ni a tang khan sawi tanin fiah leh fel fai takin a thil hmuh leh hriat te chu a hrilh vek a. Tin, zan lama Chhiari te hlauh em em pawh kha an mumang mai a nih a rin loh zia thlengin a sawi nghal vek a.

Pu Phunga chuan ngun taka lo ngaithla in "Engpawh ni se thil dik lo eng emaw tak zawng a awm a ni phawt mai a. Hriat chhuah dan leh zawn chhuah dan kan ngaihtuah a ngai a nih chu. Mahse, i thil hmuh leh hriat te hi midang chu hrilh ve kher pawh tulin ka hre lo." a ti a, Rothuama chu a lo bu nghauh nghauh a.

Rei tak awm fal a rem loh a vangin remchang danga ngaihtuah that leh tura dahin midang zingah chuan an tel ve leh ta a. Chhiari chu rin ai takin a lo ziaawm leh tawh a. Mahse, a khawsik a san em a vangin chauh erawh chu a la chau hle a, tawng pawh a tawng peih lo a ni.

Han thut ve reng pawh chu tih theih em em a awm bawk lo nen, a thianpa a ngaihtuah nen tin mai chu thain a hria a, tichuan Rothuama chu Chhiari te in a tang chuan a chhuak ta a. Liankima te in lam bawk a pan leh nghal a.

Liankima pawh a lo la tha viau a. Mahse, a tawng thei lo tlat mai chu a buaithlak lai ber a ni a, han biak lum lam leh thil han zawh deuh reng mai pawh a inthlahrunawm tlat mai. Aw leh aih tih nana a lu buk leh thin bak chu engmah chhang thei miau hek lo. Engtia han tih tur nge tih pawh an hre lo a ni.

Rei vak loah lenghawn ar a rawn khuang a, Rothuama chuan riahpui an ngaih leh ngaih dawn loh tur a han zawt a. A chhungte chuan riak ve leh tur chuan an duh viau a, mahse Liankima ber chuan a lu a buk zel a vangin zawlbuk lama riak tur chuan Rothuama chu a haw ta a.

Hun a inher zel a, Chhiari pawh a dam a ni leh tawh mai a. Mahse, khawi khaah a chhuak zen zen ta lo a. Zan thimah ngat phei chuan a dawih em em mai a, a chhungte chu a tibuaiin a timangang ngun thin hle mai. Liankima erawh chu a tawng theih loh ngai rengin a la tawng thei lo zel a. A hria a piang mai chuan mak an tiin an lainat hlawm khawp mai.

Tuk khat chu dur lawk em em pawh awm lovin zing a tang chuan ruah a rawn sur ngawt mai a. A han leh mai dawn emaw an tih laiin a hah duh mai si lo, tukthuan ei kham hnu feah pawh a la tlak cherh cherh reng a vangin Rothuama thin chuan a tuar ta lova. "Mai mai chuan, upa in ruah leh ral te chu kan do pangngai an tih kha, min va dang dawn rua lo em." tih pahin a insiam mawlh mawlh a.

A nu chuan "Aw! Mama em em thin tak hi chu aw, a sur loh hun a tam fe zawk a sin. Nghei em tur pawh kan la nih loh hi kal lo mai teh a..." a lo ti a. Mahse, mi rilru sak, ka tih chu ka tih ti bur chi kha a ni miau a. A tum chu a thulh phah miah lo, a insiam zawh chuan chul rama turin a chhuak ta nghal a.

Thlam a thlen chuan a thawmhnaw huh chu phelhin a han sawr thuak thuak a. Chumi hnu chuan chawhmeh vai khawm tur chuan a chhuak leh ta nghal a. A sahmim khat a vai zawh chuan thlamah lutin mei a nun nghal a. A thawmhnaw huh te chu a hem ro a. Thingpui te lumin tapah chuan a tawlh hrat hrat a.

A vawh deuh a vangin thlam kawngkhar a pawt khar a, chutia mahni chauha a chet mawlh mawlh lai chuan mi tuemaw hian a thlam luhka chu an rawn rap ri rawk a. Rothuama chuan en pawh en chuang lo hian a chawhmeh lakho chu a thian mawlh mawlh a.

Rahka rawn rap ritu chuan thlam kawngkhar chu rawn pawt hawng in "E khai, ka lo lut ve thei ang em?" a rawn ti a. Rothuama chuan lo lut rawh. Khawilam mi nge ka va hre teuh che ve, hei meilum hi rawn ai ve rawh." tih pahin a mah chu a tawlh rem a.

"Laiveta ka nia, vapar khua Lianmanga khua leh tui ka ni e." tiin thuthmun a han rem ve a. Rothuama chuan anih chu maw le, in khaw hming chu ka hre tawh naa khawi lai taka awm nge ka la hre miah lo mai. Engti tiha heng lai lai rawn thleng ta nge i nih a?" tiin a lo zawt zawm leh a. Laiveta chuan "Kan khua chu heta tanga chhim chhak lam hreta awm a nia. Hla tak phei chu a ni lo, in khua a tang hian ni thum kal vel a niang. Ni e ka rawn kal chhan tak hi zep thu a cheng law, mi tuemaw ka rawn zawng a ni ber e." a ti a.

Rothuama chuan thingpui thlit pah hian "Chu i mi zawn chu a pawimawh hle a ni ang maw? I zawn hmuh theih i beisei em?" a lo ti leh khauh a. Laiveta mitmengah chuan thinrimna a rawn lang chhuak nghal a. "Ka hre lo le, bei nge sei rundung an ti mathlawn love." a lo ti ve leh a.

"I han sawi chiang deuh thei lawmni? Tanpui theihna che pawh ka lo neih mial chuan ka hreh lem love." Rothuama chuan a han ti leh a. Laiveta chuan a melh ngai a melh run a, a hmelah chuan thinrimna leh...................


A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

KimkimyColney
Posts: 1
Joined: May 3rd, 2016, 10:57 pm
Location: Aizawl
Contact:

Unread post by KimkimyColney » May 4th, 2016, 12:50 pm

Episode 40 thleg cyhh hi Ami wm :?:

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 4th, 2016, 4:54 pm

aw, la ni rih, a sei ltk a, hetah lo post thar ah ka ron dah leh ang, comment ah a conti thin bawk sia, hai let a ngai nasa thei ltk a, hun ka nei lo thin bawk nen ka la zawm hman rih lo deuh a

Link:
BBcode:
HTML:
Hide post links
Show post links

Theo Khiangte
Posts: 3
Joined: May 17th, 2016, 11:54 pm

Unread post by Theo Khiangte » May 19th, 2016, 2:06 pm

PU ADMIN... khawngaihin he post hi a complete a awm chuan minlo chhunzawm sak teh u.... a ngaihnawm khawp mai. Next ka chhiar chak teh mai nia. :) :)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 20th, 2016, 10:07 am

Theo Khiangte wrote:PU ADMIN... khawngaihin he post hi a complete a awm chuan minlo chhunzawm sak teh u.... a ngaihnawm khawp mai. Next ka chhiar chak teh mai nia. :) :)
Ka zawm vat dawn nia, dah belh daihtawh tur ka nia, thildang tih tur a tam deuh avangin ka la dah belh thei lo a, ka lo dah belh vat don nia

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 20th, 2016, 8:50 pm

episode-21

Laiveta hmelah chuan thinrimna leh thil vei lungrun tak mai a nei a ni tih hai rual a awm lo. Chu chu Rothuama pawhin a hmuh hmaih hauh lo a, mahse a sawi hreh deuha a hriat a vang chuan zawh zel chiah a ngai lem lova. Tichuan titi dang a vawrhpui leh ta zawk a

Mahse, titi dang an vawrh karah pawh chuan Laiveta zawk chuan a rilru hah thu bawk chu a rawn sawi chhuak leh thin a. A han ngawi vang vang thin a, a chang leh thu awmze nei lo pui pui hi a rawn sawi chhuak leh mauh zel bawk a. Rothuama chuan mak a ti deuh thin na a engmah erawh a sawi chhuak duh lem lova.

Mahse, a tawp a tawpah zawng a zep zo ta bik ngang lo a niang Laiveta chuan "Ngawi teh thianpa, engtin nge maw ka koh ve ang che le, han inmawlbiak tawp lah chu a mawi ber chiah si lova, ka harsatna hi i hnena sawi ngam niin ka hre tlat mai a, min ngaihthlak sak peih chuan." a ti chhuak ta nge nge a.

Rothuama chuan "Ani dawn teh tak e, a hawihhawm loh thlak thin hle mai, Rothuama ka nia. I duh duh danin min ko thei ang. Ngaihthlak peih loh a awm nang, hei ruah lah a la han duh chuang lo bawka a remchang khawp ang chu." a lo ti ve ta bawk a.

Laiveta chuan "Sawi hrehawm tak chu ni mahse, hetia ka sawi chhuah hian keimah a ka pai reng ai chuan ka zangkhai deuhin ka hre thin. Hei chen chen ka rawn thlenna chhan chu mi zawn ka nei ka tih kha. Chu ka mizawn chu kum eng emaw zat liam ta a thi tawh a ni a, a hming chu Chhingmami a ni." a han ti a.

Chu a thu hriat chuan Rothuama beng a verh ta zar mai le, Mahse ngaihven lutuk anga lang duh miah si lo hian "Uai, chu mithi tawh i zawng tihna maw? Mithi khaw lamah zawng la i hmuh hma ka va rinpui zawk che ve maw le thianpa." a lo ti a. Laivela chuan a lu a lo thing na na a.

"Ni lo, he minung ramah ngei hian an hmu thin a ni. Kum tamtak kalta a thi tawh kha a thih tak tak leh tak tak loh fiahna a awm tlat lova, chuvangin keimah ngei hian fiah ka duh a ni." a han ti leh charh charh a. Rothuama chuan "Chu mithi tawh, Chhingmami i tih chu i tan a pawimawh hle a ni phawt ang maw?" tiin a thusawi lai chu a lo pawhchah sak a.

Laiveta chuan "A pawimawh nge pawimawh lo chiah pawh hi ka chiang ngam lo. Mahse, a pawimawh lo ti ila tun thleng thleng hian ka vahpui awm si lova, an sawi dan chuan chu Chhingmami chu min hringtu ka nu a ni awm e." a lo ti a.

A rilru chuan Rothuama chu a phur ta telh telh mai, a chhan pakhat pawh an lal fanu pawh Chhingmami a ni ve tlat mai a. He an lal fanu Chhingmami nen hian inzawmna an nei ang em? Nge hmehbel luih a tum mai mai zawk?

Mahse, an thingphurh ni a Chhingmami ngei hmun hniha a hmu te, zawlbuk an riah laia a thawm hriat a chhui zuina a hmeichhe saruak ang chiah, mahse tiauchhum ang tak ni bawk si te kha a ngaihtuah chhuak a. A thianpa awmdan te, Chhiari dam loh dan te nen hian a inkungkaih thei mai ang em? A hre chak takzet a ni.

Mahse, an lal fanu Chhingmami leh Laiveta nu Chhingmami chuan inzawmna a neih ngawt ang? Hming inang palh a ni ve mai lo maw? Bakah Laiveta te khua leh an khua phei chu khaw inthenawm pawh an ni lova, in kalpawh thin lah an ni hek lo. Mahse, engati nge Laiveta nu kum tamtak liamta a mi kha an la hmuh fo?

Thil suih zawm tum chuan engtin tin emaw a inawm thlup thei mai a. Mahse, engmah a fiahna leh a chhanna an hre si lo. Laiveta nu Chhingmami chu lo la dam ta se a tar tawh viauin a rinawm a. Mahse, thil pakhat erawh chu an lal Fanu Chhingmami hi Laiveta nu Chhingmami tho kha a lo la ni reng ang em? Chu zawng, mihring pangngai hriatthiam phak bak a ni tawh tlat.

Rothuama chuan Laiveta hnenah chuan "Anih leh i nu chu eng e a thih chhan ni reng reng? Engtia thi nge? A thih hnuah a ruang i hmu reng em?" a han ti deuh duah a. Laiveta chuan "Tui tla niawmin an sawi a, a ruang hi tumahin an hmu lo. Kan la naupang em a engmah chiangkuang in ka la hre lo a ni. Mahse, tun hnaiah hian in ram velah hian ka nu chu an hmu thin niin an sawi ka hre thawi ta tlat mai a. Kan lalpa phal lo chung chung a zawng turin ka rawn thawk chhuak ta a nih hi" a ti a.

Rothuama chuan engvanga an lal chuan phal lo nge a nih ang tih a ngaihtuah rauh rauh a. Mahse, "I nu chu eng ang hmel nge ni a i hriat?" a ti leh ta zawk a. Laiveta chuan mi sawi a hriat dan ang ang chu a han sawi thek thuak a, a sawi leh an lal fanu Chhingmami hmel chu a inang leh ta em em mai zel chuan Rothuama ngaihtuahna a tithui ngei mai.

Rothuama bawk chuan "A nih leh kan sawi ta sa sa, zawh awm lo a ni em chu ka hre lova enga ti nge i nu chu zawn chhuah leh i duh em em nachhan? A mah huatna i nei nge thildang deuh te a awm em?" tiin a han zawt leh a. Laiveta chuan a thingpui chu a han in khawlh khawlh a.

Chutah muangchang hian "Thildang tehchiam a awm lo, huatna pawh ka nei hran lo. Mipa lo pawh min ti maithei a. Ka mumang vang hi a ni ber mai. Mumang mak leh rapthlak pui pui hian kum tam min tibuai tawh a ni. Ka nu thih danah hian eng emaw thil dik lo leh hai chhuah ngai a awma hriatna ka nei tlat a, chuvang chu a ni." a han ti a. Rothuama...

episode-22

Rothuama chuan dilchhut lutuk nih hreh deuh si hian "A nih tak chu maw le, ni e thil dik lo eng emaw chu a lo awm reng pawh a ni thei a sin. Tin, mumang i han sawi kha a mak ka tiin mumang mai mai ti a han namnul ngawt chu a har dawn a nih chu." a lo ti a

Laiveta chuan "Kha ka chanchin leh thuruk te ka han hrilh ta vak mai che a, pawi pang a thlen phah lo turah ngai ila, i la naupan hmel aiin i puitling hle mai. Ka hmuh tirh phat che khan rin tlak i nih hi ka ring reng a ni." a han ti a, Rothuama chuan "Khaih khaih khaih, puitling lah love a, belval vala val ve mai mai kan nih hi. Pawi pang chu a thlen ka hlauthawng love." a lo ti ve a.

"Hei, ruah pawh a bang chu a ni ta mai e, ka kalsan phawt mai ang che. Engtikah emaw kan intawn leh hi ka ring tlat a ni, min lo mikhual hlauh chu ka lawm hle mai." tih leh thawh a rual nghal a. Rothuama chuan "E khai, teh hluai che chuan. Ruah te chu a duh leh sur se a duh loh leh lo bang ve mai mai ang hmiang, kan titi pawh a la laklawh e mai a." a lo ti hlut a.

Mahse, Laiveta chuan "A dik khawp mai. Mahse, hei khua pawh a tlai lam a ni tawh mai a. Ka tikhawtlai rei tawk viau chein ka hria." a ti deuh tlat a. Rothuama chuan an titi chu a la duh khawp lo tih a hriat hle a. "Bakah, khawilam nge maw pan i tum reng reng le? Kan khaw lamah te lo kalin ka lo mikhual ang che ka lo ti hman a sin." a han ti leh a.

Laiveta chuan, "Ni e, in khua pawh ka la rawn thlen ngei chu ka ring a. Chung hunah chuan ka rawn zawng chhuak ngei ang che. Mahse, tunah chuan ka kal a hun tlat, dam takin ti phawt mai ang." tih leh thlam kawngkhar chu nam hawn a rual leh a.

Rothuama chuan han chelh rih chu a duh em em a. Mahse, han sawi chiam dawnin a tawngkam thiamna chuan a tlin meuh mang si lo. A mikhualpa kal liam tur chu ui zetin a lan theih chhung zawng chu a thlir vang vang a.

Laiveta liam hnu chuan Rothuama chu a inngaihtuah muk hle mai a, a tawpah thawk han lak hak pah hian a han hawi chhuak a. Khua chu a lo tlai hle tawh mai a ni tih a hre ve ta chauh a. Tin, khaw chhe bawk nen a lang tlai leh zual bawk em a ni.

Rothuama chuan a chawhmeh hawn tur vel chu a han buatsaih malh malh a. Mahse, a rilruah erawh chuan Laiveta leh an titi na thu chauh kha a awm thung. Tichuan muangchangin haw tur chuan thlam chu a chhuahsan ta a.

Kalkawngah pawh eng thil dang mahin a rilru an luah thei lo, Laiveta leh a thusawi chauh lo chuan. A thusawi te kha awih tur a nih leh nih loh pawh a hrethiam tawh lo. Han ring viau dawn se, a vawikhat hmuhna mai a ni bawk si. Han awih lo ngawt dawn se, tun hnaia an boruak tawn nen pawh hian a inmilna lai a tam bakah ngaihbel theih tur lah a tam riauin a hre si.

Chutiang ringawt mai ngaihtuah chuan a kal nghauh nghauh mai a, a hriat loh karin kawtchhuah a lo thleng der mai a. A kal tan chauh kha emaw a in ti si chuti em em a lungdawh a thleng hma chu amah Rothuama ngei pawh chuan a awih lo lek lek hial mai.

Khua a luh chuan naupangho khawlaiah an lo infiam nak nak a, hmeichhe naupang an lo inkawibah a, mipa naupang an lo inhnawk bawk a. Chung naupang infiamho chu a then an chhung ten chaweiah an lo au lawng lawng mek bawk a.

Rothuama chuan chung zawng zawng pawh chu hmu lo leh hre lo ang mai hian a kal pel hmiah hmiah a. An in zawn a thlena an in a han luh chuan a rin loh deuh maiin apu te khaw lama a thian kawmngeih ber Kunga chu a hmu ta thut mai a. Mak a tiin a mumang emaw te a ti rum rum mai.

Mahse, a tak ngei a nih si a vangin hlim takin an han inchibai lawp lawp a. Rothuama chawhmeh hawn te chu a nu leh a nau chuan an chhuah nghal sawk sawk a. Rothuama chuan "Thianpa Kung, eng titiha heng lai lai i rawn thlen tak thut mai, pawi hai te chu a awm a ni em si lo maw?" a ti a.

Kunga chuan "Ni e, thil hi a mak thei teh zawng a nih hi. Keipawhin heti maia rang hian ka rawn zin ang tihngaihna pawh hi ka hre bik lo. Khuanu ruatah i ngai mai teh ang. Han thu hahdam ve phawt mai la, kha i hah dawn nasa e mai." a lo ti a.

Rothuama chuan "Mai mai thin a, mipa a hah tak tak theih ngai nang, eng chiah maw helai thleng thlenga rawn thlen tur khawp che a thu pawimawh chu? Hriat hlan pawh a nghahhlelhawm a lawm maw le. I hmel ka hmuh khan ka mitvai emaw ka ti thelh a lawm." tiin a thutna chu a siam rem sauh sauh a.

Kunga pawh a hmel a mukin a thutak sawt hle mai. Mahse, a rawn tawng chhuah hmain Rothuama bawk chuan "Ka nu, kan arpui tui lai ngei kha talh a ngai a nia, a ni meuh kan mikhual hi." a han ti a. A nu chuan "Ani awm teh tak e a, hawh teh mami i talh dun teh ang." tiin arpui chu an han talh hnuhnawh leh rih a.

Kunga chuan "Thianpa i tizahthlak mang thin e aw, keia kar engmah talh ka ngaih loh vei nen le. Nang nge nge tluk loh rim i nam hle mai. Ni e, hei ka rawn kal chhan chu ka han sawi ang e. I nu leh i nau bulah phei chuan ka lo sawi nual tawh tho a, a zawng zawng erawh chu ka sawi duh lem law, eng lo a nia.....

episode-23

"Eng lo a nia, tunah hian Lianmawii thih ngamin a na mek a, i hming hi a lam nasa in a thih hma ngeia vawikhat tal hmuh leh che a duh thu hi a tawngvaihpui nasa mai thin a ni awm a. Chuvangin i pu chuan a rang thei ang bera nangmah hruai tur che hian min rawn tir a ni. Kan khua a tanga i hawn hnu rei lo teah khan a dam lo tan a, chuta tang chuan that lam pan lovin tun hi a thleng ta a ni awm e. I nu pawh ka sawipui tawh a, nangma thu thuah a dah a ni ber e." a han ti a.

Rothuama chuan ngun tak mai hian a lo ngaithla kar a, engmah a sawi chhuak lo. Kunga bawk chuan "Thianpa, i pu chuan i lo kal thei ngei turah a ngai che a. Eng e nangmahah harsatna te a awm em? A awm lem loh chuan a zan a zana kan chhuah mai pawh a tha lo maw?" a ti leh a.

Rothuama chuan a aw a han thian kharh kharh a. Kunga hnenah chuan "Anih leh thianpa, a mah Lianmawii chu i hmu ve em?" tiin a han zawt a. Kunga chuan "Hmu e, a taksa a tlahniamin a chhe chak khawp mai. Ka hmuh tirh phei chuan a ni lo emaw ka ti hial a sin." a lo ti a. Rothuama chu a lo bu nghauh nghauh a.

A nu leh a nau chuan eirawng an bawl rak rak a. Rothuama chu a inngaihtuah muk hle mai a. Kunga chuan "Thianpa, Lianmawii natna chungchangah hian eng e a nat chhan awm hi tumah hian kan hre tlat lo mai a. I pute ngei pawhin an hre lo hi a mak angreng khawp mai." tiin Rothuama chu zawt aw lek lek hian a han ti a.

Rothuama chuan "Thianpa, keipawhin a nat chhan leh eng e a natna chu ka hre hauh lo mai a. Mahse, chutia ka hming a lam vak vak mai chu a chhan nia rin ka nei. Chu chuan kal nge tha ang kal loh tih hi min tihrethiam lo a ni." a tih chuan Kunga chu a hawi a hau mai.

"Thianpa, ka va hrethiam chiah lo ve i thilsawi chu. Eng e a awmzia ni ngai le?" tiin a lo zawt let vat a. Rothuama chuan "Thianpa, thian satliah i ni lova, thian tha tak meuh i nih a vangin ka han sawi mai ang e. Lianmawii khan min ngaizawng nasa mai a, mahse unau kan nih miau a vangin inngaihzawn a rem si lo a ni." a han ti ta a.

Kunga chuan a lu lo buk nghauh nghauh pah chuan "E khai, chutiang a lo ni maw? A va mak dawn ngai ve, tichuan chumi hnua thil awmdan chu ka hrethiam deuh uarin ka hria e. Ni e, thian satliah kan nih loh a vang chauhin hei hi ka han zawt tel hram ang che. Chuti kaua thlahleltu che lakah chuan insum pawh a har ang maw?" a han ti a.

Rothuama chuan a lu a lo thing na na a. "Ni love thianpa, chulamah chuan eng thil pawi mah a thleng lo tih ka tiam ang che. Lianmawii chu ka lainat ngei mai, a nat chhan pawh chu keimah vang chu ka ti ngam lo na a, a ni lovang tih pawh tunge sawi thei chuang?" a han ti a. Kunga chuan "A nih chiah dawn chu. Chuzawng, rang taka kan kal mai a tha a ni lawmni?" a lo tih zawm leh a.

Rothuama chu a han thaw hak a. "Chu tak chu a ni ka buaina chu, thil pawimawh dang vanga lo kal ngai nise ihe lovin ka rawn kal mai ang a, mahse ngaihtuah teh. Rawn kal ta ila, Lianmawii chuan dam phahin ngaiawh leh ta se awlsam taka ka let leh a phal tawh hauh lovang le. Chutiang chu nita se engtin nge ka tih tak ang?" tiin a thianpa chu a han rawn a.

Kunga chuan a ni viau mai tiraw, mahse tunah chuan let leh lam ni lovin thih leh dam inkar a ni miau mai si a, rawn kal duh lovin thih phah ta se i inthiam thei chuang kher ang em?" a ti ve thung a. Rothuama chu a inngaihtuah nasa kher mai. Lehlamah a thian Liankima leh Chhiari heti hi an la ni a, zin bosan chi niin a hre bawk si lo. Tin, Laiveta kha an khua a lo luh vat a ring bawk a, kawm leh a duh em em bawk. Mahse, kal lo ta se Lianmawii chuan thih phah ta si se a inthiam dawn chuang si lo.

"Taia, zanriah i ei phawt ang u khai, chumi hnuah inla titi zawm leh mai dawn nia." rothuama nu chuan a rawn tih tak a vangin zanriah ei tur chuan an inbuatsaih ta a. Zanriah ei lai chuan an inbe tlem hlawm kher mai. Rothuama rilru buai lutuk lah chu an biak chhunah pawh chhan nachang hriaat loh a la nei fo mai zui nen. Zanriah an ei kham chuan a nu chuan "Taia, engtia awm nge i tum a, i han zin leh poh mai dawn tihna emni?" a ti a.

Rothuama chuan "Hriatthiam a har khawp mai, engtia awm tur nge pawh ka hre ta nek love." a lo ti a. Kunga chuan "Engpawh nise tikhan ro lo rel ula ka'n inthiar lawk ang e." tih leh pawna chhuah a rual nghal a. Kunga chhuah hnu rei lo teah chuan tlangau a rawn au ta a.

Rothuama chuan a nu chu "Ngawi lawk teh, chu tlangau a rawn au tlat mai." tiin ngaihthlak chian tum chuan kawngkhar lam a pan ve nghal a. Thli a thawt deuh fur fur a vangin tlangaupa thusawi chu a hre tha thei reng reng lo mai a. A nu chuan "law haw rawh, a rawn au hnai leh mai ang chu maw le." a lo tih a vangin Rothuama chuan tapchhak a rawn pan ve leh mai a.

Rei vak pawh an titi leh hman hma chuan an kawmchhak maiah tlangau chuan "Khaih khaih khaih! Lo ngaithla theuh rawh u khai, kan lal fanu Chhingmami vawin thingphur tura a chhuak chu tun thlengin a la rawn haw lova, a zawng turin mipa zawng zawng chu lal in ah chhuah khawm nghal tur a ni e." a rawn ti ta mai le..........

episode-24

Rothuama rilru chu buai tawhsa naka laiin tlangaupa thu rawn puan chuan a tibuai leh zual ta sauh mai. A nu chuan "Awi tunen nge maw an phurh dun reng reng le, ava han zia lo thin tehlul em. Khaw nawm loh tehlul nena thing te a han phurh reng reng. Taia engtin nge maw kan tih ang le? A lehlam lehlama han tul em em tak mai chuh." a lo ti ve chul a.

Rothuama rilru hah leh buai chu a vei nghauh nghauh a. A nu biakna pawh chu hre awm pawhin a lang lo. Chhingmami chuan tawhsual a tawk nge ni ang ama duhthu reng vanga haw lo tih te a han ngaihtuah a. An thingphurh ho ni te a han ngaihtuah kir a, Chhingmami hi mihring pawh a ni chiah dawn emawni le tih te thleng thleng chuan a ngaihtuah zui a.

Rilru buai naka laiin a nu lah chuan a lo be buai ve reng mai bawk si a. A lehlam lehlamah rilru buaina tur hlir a ni mai. "Engpawh nise, Kunga kha rawn lut leh phawt sela, engtia awm tur nge pawh ka hriat bik loh hi. A mak hle mai tunlai ka boruak tawn chu." tiin a nu biakna chu a chhang a.

Rei vak loah Kunga pawh a rawn lut ve nghal mai a. "Kha tlangau thupuan chu ava zia lo em." a rawn ti lut nghal a. Rothuama chuan "A ni ngawt mai, engtia ro han rel tur nge pawh min tihre lo zual takzet a ni. Engtin nge nita ngai ang le thianpa?" tiin a han rawn nghal a.

Kunga chu a ngawi vang vang a. "Ka va hre mai bik lo em, a lehlamah in lal fanu meuh a lo ni kher bawk si a. Engpawh nise zanin chu khawdang a hawi theih lohah ngai phawt ila, naktuk chu naktukin hril sela a ni deuh ber mai lo maw?" a han ti a.

Rothuama chuan "ni e, chu chu ka ngaihdan chiah a ni. Anih ka'n insiam ang e." tih leh thawh a rual nghal a. Kunga chuan "Tlangval te chu ka bang thei bik nang le, titeh a zui pawh kan inzui chhuak khat a lawm." tiin a insiam ve nghal a. An insiam peih chuan lal in lam panin an inzui chhuak ta nghal a.

Lal in kawtah chuan an lo tam nasa tawh mai a, lal leh a khawnbawl upa te chu rawn chhuakin lal chuan a fanu chu tunen nge an chhuah dun an hriat loh thu te, khawi lam nge an pan tih pawh an hriatsak loh thu te a han sawi a. A khaw mipui leh tlangval te, a pasaltha te laka a inthlahrun thu leh zahawm a tih zia te a sawi a. A fanu chu a dam emaw a thi emaw a ruang tal zawn hmuhsak hram turin a han ngen a.

An lal thusawi zawh chuan a upa min ber chuan tlangvalho fuihna thu te a han sawi ve leh a, tichuan val upa te chuan insem darh dan tur leh awmze neia zawn dan tur te an han sawi leh a. Hmun liah inthenin a mual hlawk hlawka zawn tur an ti a. Chutiang chuan ruahmanna fel tak nen Chhingmami zawng tur chuan Mualchuan khaw pasaltha leh tlangvalho chu an chhuak ta nguah nguah mai a.

Rothuama te thian dun chu rahbel mual an tih mai tuam tur zingah an tel a. Thil mak deuh mai chu tumah zing lama a thingphur tur chhuak chu tumahin an hmu tlat lo mai chu a ni. A kalna lam te chu hria awm se a zawn te pawh a awl deuh tur hi a ni a. Khaw nawm loh ni berah leh nghal, mahnia thingphur tura han chhuah mauh mai chu mak an ti theuh a, chu aia mak mah chu tumahin a thingphur tur chhuak an hmu miah lo mai chu a ni.

Tichuan zankhuain tlangval tlawmngaite chuan an zawng ta a. Mahse, khawvar hnu thleng pawhin a hnuhma leh sulhnu awmang pawh an hmu ta miah lo mai a. Val upa te chuan hawnsan rih phawt a, chaw te inei puar a tha thara zawn that leh an rel a vangin kutbeng chuan an haw leh ta vek a. Zawlbukah chuan ro an han rel tha leh a, chawfun lian tawk tak mai nen uluk zawka zawng tur chuan an thawk chhuak tha leh ta a.

Rothuama chuan "Thianpa, heti hi kan ni ta si a engpawh nise vawin chu i han thawk chhuak leh law law phawt mai ila a tha lawmni? Lianmawii pawh eng em a lo ti bik lo turah ngai ila, han tlanbo ruk daih bik lah chu a ni thei meuh tawhin ka hre si lo." a han ti a.

Kunga chuan "Ni e, a tihngaihna tak pawh a awm lo a nih hi. I pute chuan min lo beisei nasa tawh viau ngei ang a. Mahse, engtin kan tih chuan ang le?" a lo ti ve a. Tichuan Chhingmami zawng tur chuan an thawk chhuak ve leh ta a.

Nilenga an zawn hnu pawhin a sulhnu takngial pawh an la hmu lo fo mai chuan val upa te a ti mangang ruin an beidawng ru ta hle mai a. Sapui a pawh lo tawng fuh palh nise an sulhnu leh thisen tal hmuh tur a ni a. Ral a tawng palh emni zawk ang? Mahse, chu pawh lo nise a hmanrua, em leh hnam, a chem leh hreipui thlengin a eng emaw ber tal chu an hmuh a rinawm si.

Rothuama ngaihtuahna chu a kalding ta hle mai, ani hmeichhia tehlul kha khawi khaah a kal hla dawn lo tih a chiang a. Mahse, a kalna tur awmang leh a kal phakna tawk tur chu zawn loh lai an nei tawh tlat lo. Chuti chunga a hnuhma takngial pawh an hmu lo chuan Chhingmami chu a ringhlel zual ta tlat mai.

Sa leh ral lam a nih a ring lova, mahnia tluk bah sual tawk a nih pawh a ring hek lo. Chhingmami hi a thih pawh a ring lova, khawiah emaw tak a awm a ring a ni. Tunah a mah zawng buai em emtu te pawh hi ani chuan a hmuh ruk vek a ring hial zawk a. Mahse, chu a rinna chu sawi chhuah chi a ni ang em?????

episode-25

A thianpa Kunga hnenah chuan "Titeh, kei ni chu zah pawh dawn lovin i tinsan mai teh ang. Eng kan an chuan pawh ka ring lo tawp mai." a han ti a. Kunga chuan mak a ti deuh hle mai a. Mahse, engdanga chhang lovin "I tih chuan le." a lo ti mai a. Tichuan an thiante hriat loh chuan an haw dun ta a.

Khawthim rual velin in an thleng a, Rothuama nu chuan "Engti zia nge Taia in lo hawn bik mai, Chhingmami chu inla hmu miah lo maw?" a lo ti chul a. Rothuama chuan "Aw, hmu lo chu a nih hi. Kan hmuh mai pawh ka ring lo, chuvangin kan rawn haw ru ta mai. Lehlamah thildangin rilru a lo la peng lo thei bawk si lo nen." thawk lak hak pah hian a han ti a.

Anu chuan hriatthiam hmel chiah lo hian "Engtia in hmuh chu i rin loh ngawt mai. Enge i sawi awmzia ka va man chiah lo ve." a lo ti leh a. Rothuama chuan "hmu tur ni ila hmuh loh pawh a hun tawh hleinem." a lo ti mai a. A rilru tak tak leh a rin dan te chu a sawi lang duh kher lem lo a ni.

A nu bawk chuan, "A va mak awm teh mauh ve maw le, a thi emaw a dam emaw tala hmuh loh ngawt mai chu, tui lian lak lah ni si lo." a la ti hram a. Rothuama sawi danah khan eng emaw ngaihthat lohna ruk leh hriatthiam loh a nei tlat a. Mahse, a ruh lang rawt rawta han zawh chu a hreh deuh si a, pehhel deuhin a sawi kual vel a ni.

"Anih leh i pute khuaah chuan iva kal leh mai dawn tihna nge?" a han ti a. Rothuama chuan "Ka kal loh chuan ka pu lung a ni lo lutuk dawn si a, Lianmawii chin lah kan hre bawk si lo. Zankhat mitchhin pawh a lo tawk tawh maithei a, mahse kan dinhmun hian a zir ngang si lo a nih hi." a han ti a.

Anu chuan "Ani ngawt mai. Ni e i farnu ve tho a ni a, chutia nangmah ngaia lam lam nana na che chu va kal lul rawh khai. Hei keini lam chu ngaihtuah vak pawh kan ngaih loh lai tak a nih ve hi." a lo ti a. Rothuama chuan "Lo kir leh vat ka tum ang. Ka thianpa Liankima pawh awmbosan reng thei ka ni lo. Chhiari lah chuti bawk, Chhingmami lo bo bawk nen." a ti a.

Zanriah an ei kham chuan Rothuama leh Kunga chu an insiam sawk sawk a, a pute khua kal tur chuan an chhuak ta nal nal a. Hmanhmawh hle mahse a thianpa tlawh hmasa lova kal chu dik ngangin a hre lova, bakah eng e a chanchin a hriat lohna pawh a rei tawh nen tlawh kawi lawk chu an tum a.

Liankima te in an luh chuan Liankima chu bawrchhawr zet hian leikapuiah a lo ding vauh vauh a. Rothuama hmel a hmuh chuan a hlim kher mai. Mahse, a la tawng thei lo tlat mai chuan thil a ti buaithlak a ni. Rothuama chuan a han be luam a. Aw leh aih tih nan a lu a lo bu a, a thing leh mai thin bawk a.

Rothuama chuan a pute khuaa zin leh lawk a ngaih thut thu a han sawi chuan Liankima chuan a lo ui nasa mai a. Hmuh theih hian chawp leh chilhin a hmelah a lang nghal a. Sawi chhuak thei phei se chu kal lo turin a thlem nasa viauin a rinawm.

Engmah a sawi thei lo chung pawh chuan a ngui nghal rawih mai a. Chu chu Rothuama pawhin a hmuh hmaih lo, a lainat em em a. Kal ve tura han sawm ngawt lah chu thil dik nitheiin a hre si lo. Sawm chiah sela chuan rang lutukin a lu a bu nghal mai dawn tih a chiang a ni.

Chuti khawp chuan Liankima pawhin Rothuama chu a ngai a, a han zinbo leh rih tur chu hrehawm a ti ngei mai. Rothuama lahin a ngaihtuah bawk a kalsan a hreh ngang mai. Mahse, a loh theih miau si lo a le. Tichuan inngai tak chung chuan an inmangtha ta rih phawt a.

Rothuama leh Kunga kal ta chu an lan theih chhung zawng Liankima chuan a thlir vawng vawng a, a thianpa chu a ngai ngei mai. A lo leng khat ringawt mah a lo vui ruk tawh tehlul nen a le. An liam hnu chuan a ruak huai hian a hria a, a khua a har ru veng veng mai.

Rothuama te kal liam ta chuan hmanhmawh takin an kal hmawk hmawk a. Kalkawngah pawh inbe miah lovin an kal mawp mawp mai a ni. Sakei lui an thlen thleng chuan an inbe eih lo reng reng. Sakei lui an thlen chuan an thu chawl ta vang vang a. Kunga chuan "Thianpa, i rilru a kal ding awm hle mai, zawh duh che pawh ka ngah viau a mahse i rilru tihbuai ka hreh deuh sia ka be duh ta lo che a nihkha." a han ti a.

Rothuama chuan "Mai mai thin a che, heta tang hi chuan hmanhmawh vak tawh lo ila kal pahin kan titi dawn nia. Keipawh zawh duh che chu ka nei nual mai." a lo ti ve bawk a. Kunga chuan "Anih leh zawi awiin kan kal leh dawn emni ang?" a lo ti a. Tichuan an kal leh tan ta a.

Tichuan titi bawrh bawrh chung chuan an kal leh ta a. Thui pawh an kal hmain kawngchhak lama hnahthel rap ri riap riap thawm an hriat a vang chuan an hawi chho rual thawt a. An rin loh leh beisei loh lutuk mai thil an hmu ta. Hmeichhe pakhat hi anmahni hnungchhawn zawnga kal hi an han hmu ta mai.

Rothuama te pahnih chu an inen haw a, tun ang ram palai lengah khawilam hmeichhia nge ni ta ngai ang le? Rothuama thluak chu a vir zawk a, "Chhingmam" tih leh a hmasa zawka kal Kunga chu tlan pelh a rual nghal a. Hmeichhe kalna lamah chuan a tlan ta chiam mai a. A hnungah engmah awmze hre miah lovin Kunga chuan a rawn um ve nghal........

episode-26

Kunga chuan a thianpa chu a umpha lo nasa mai a. A mawng phe a hmu hman vuai vuai chauh a ni mai. Mahse, tlang bawk a tlan liam chuan Rothuama chu a lo ding a, a lo hawi a lo hawi a. "Khawi lamah nge a tlan tak?" a han ti a. Rothuama chuan a lu a lo thing na na a.

Kunga chuan "I hmu hman lo maw? I tlan chak tehreng nen le thianpa." a'n ti leh a. Rothuama chuan "A mak hle mai, a mawng phe pawh ka hmu hman tlat lo. Titeh, hei khua a thim mai dawn kawngah khan i chhuk leh mai teh ang. Um ngawt chi pawh a nih hrep loh hi a." tiin kawng lam pan chuan a kal nghal a. Kunga chuan ngawi rengin a zui ve nghal a.

Kawng an thlen thlak chuan Kunga bawk chuan "Kha kha emni kan mizawn Chhingmami chu?" a han ti a. Rothuama chuan "Ka chiang bi chiah lo. A hmel kha ka han hmu chiang hman tlat lo a lawm." a lo ti a. Kunga chuan "Ka hmu chiang viau chuan ka hria a. Mahse, Chingmami hmel ka la hmu ve tlat si lo a lawm. Mahse, a mak chu ka la ti hle tho mai." a han ti leh hram a.

Rothuama chu a ngawi vang vang a. "Titeh thianpa meichher tur i dap teh ang. A nih loh chuan kawng hi hmuh a har tan riau mai." a ti a. Tichuan meichher tur mau ro chu an han vaw phel phawk phawk a, chher thum daih zet an vuak phel hnu chuan an tawn a, pakhat chu chhi nghalin pakhat ve ve an pu bawk a.

Rothuama chuan hma hruai ve thungin Kunga chuan "Thianpa, ka lo thlen tirh a tang khan i hmelah hian eng emaw inthup leh zep awm tlata hriatna hi ka nei a. Chu chu a nia nichina zawh duh che ka nei ka han tih pawh kha. Eng emaw harsatna leh vei ruk chu i nei ngeiin ka hria a nia." a ti a.

Rothuama chuan "Chuti emawni le, chutiang vei ruk leh engmah thup ka neih pawh chu ka hre hlei law, i ngaihbel mai mai a ni lawng maw?" a lo ti mai a. Kunga chuan "Khai khai khai, thian thaa min ngai ve a nih chuan zep tlat zawng tum bik lo zawk teh khai. Ka hriatchian ve khawp mai che hi maw?" a lo ti leh ngat a.

Rothuama chu a lo nui hawk hawk a. Titi dang vawrh puiin "Lianmawii chuh, eng em a lo ti hman lo ang chu maw? A lainatawm viau mai a. Chutih rualin a tidam thei a zeng phei chu ka ni mang si lova." a ti niah niah a.

Kunga chuan "A thih leh dam chu nangmahah hian a innghat thui viau ningei in a lang miau si a. Duh anga kan let leh hman lo chu a zia lo ka tih rualin i hawn tawn mek hi a khirh khan em a ni. Engpawh nise i pute pawhin an hriatthiam loh che ka ring lo." tiin a lo chhang a.

A pute khua lan theihna tlang chhip zawl an thlen chuan an ding chawl zawk a, tichuan muang changin an kal leh ta a. Titi pah chung zela kalin mut reh hnu velah khua chu an lut ta a. A pute in bul an thlen chuan mei a lo la intuah eng a. Mahse, thawm erawh a awm lo.

Kunga chuan hma hruaiin kailawn rahka lawn pah chuan "Hui ha, in mu tawh em ni hei kan lo thleng e." a han ti a. Kawngkhar chu sir zawnga nam tawlh a rual nghal a. A pute chu tumah an lo la mu lo a, Kunga te hmel an hmuh ve leh an rawn tho nghal suau a. A pu chuan Rothuama a hmuh rual chuan "E khai, Taia i lo kal thei maw?" a lo ti nghal a.

Rothuama chuan "Ngaihdam kan ngai a ni. Tunlai kan boruak tawnin a zir loh lai tak a nih a vangin duh ang pawhin kan rawn hmanhmawh thei lo a ni." tiin thupha a han chawi a. A pu chuan "A nih tak chu maw le, kha han thu hahdam phawt mai teh u. Zufang kha han la ula an duhtawk hian han hawp hmasa teh se." a ti zung zung a.

Rappui chung sanga zufang bel chu chawi thlain Rothuama leh Kunga chu an hlui a. Anni kal chau leh dangro tawh chuan an duhtawkin an hawp ta a. Manhla an ti dun ngei mai. Chutih chhungin a pu chuan Lianmawii nat tan dan leh chumi hnua a awm dan zel te, Rothuama hming a lam nasat dan te thleng chuan a lo sawi charh charh a. Rothuama leh Kunga chuan an lo ngaithla dun kar a.

An duhtawk an hawp hnu chuan Rothuama chu a kai chhalh ta mai a. Kunga lah bang lo, Rothuama chuan "Engtia tihchi nge ni ang le? A hming chu lo lam pawh nise a tidam theitu ka ni bik bawk si lo a, ka bangbo angreng hle mai." a han ti a. A pu chuan "Engpawh nise, rindan chu ka nei deuh a. Mahse, a dik nge dik lo zawng ka hre bik hauh law, i nau hian a ngaizawng che emni aw ka ti deuh a ni." a ti ta a.

Rothuama chuan han chhan mai dan tur a ngaihtuah buai hle a. Engkim sawi vek law law mai nge tha ang sawi loh law law tih a ngaihtuah lai chuan a pu bawk chuan "Taia, i farnu nen hian inlo inngai te hi a ni em? Anih chuan engkim tlang taka sawi a tha ang. Mahse, chu chu ni lo hram se ka ti hle mai. A chhan chu min thlahtute leh kan thlah kal zelte mualphona a nih dawn vang a ni." a lo ti leh charh charh a.

Rothuama chuan a aw a han thian kharh kharh a. "Ni e ka pu." a ti hman chauh a, a sawi zawm leh hma chuan Lianmawii chuan thawm a rawn nei ta a. Awmze nei miah lo hian a rawn riat chhuak nawk nawk a. Chumi karah chuan Rothuama hming a rawn lam mawlh mawlh bawk a. Rothuama chuan.......

episode-27

Rothuama chuan Lianmawii ban vuan chung chuan "Liani, i tha em? I eng e na? Rothuama ka nia min hria em?" a lo ti mawlh mawlh a. Mahse, lianmawii chuan hre awm pawhin a awm chuang lo. Hriat tham mang loh hian a phun mawlh mawlh a, eng e a sawi hriat tuma an ngaihthlak hnaih pawhin a sawi engmah an hre si lo.

Chutiang chuan zankhua zak maiin a khat tawk chuan a rawn awm thin a. Han mutsan ziazang a ni hauh lo. Mahse, zan tamtak a pute chu lo mengrei zawn tawh leh lo tlaivar lek lek reng an nih a vangin Rothuama chuan "Ka pu nangni chu lo va mu hahdam tawh rih phawt teh u, hei ka lo thlen tawh hi zanin chu ka'n chhawk ve phawt mai ang che u." a ti a. A pute pawh chuan an hnial duh lem lova.

Tichuan a pute chuan mut zai an rel ta a. Kunga pawh riak ve nghal mai tura an ngen a vangin Rothuama nen chuan an la titi mawlh mawlh a. A pute chhung erawh chu an chau tlang tawh bawka an mu hahdam ta siai siai a. Rothuama leh Kunga erawh chuan mut pawh an tum lo.

Khawvar dawn hnaihah chuan Lianmawii chu a rawn tawngvai leh ta nawk nawk mai a. Rothuama te thian dun chuan an lo buaipui vat a. Rothuama chuan "Liani eng e i duh le?" a han ti a. Chutah Lianmawii chuan fiah vak lo leh zawi sap hian "Tui, tui tui..." a rawn tichhuak a. Kunga chuan tuisik chu a va suak vat a. Rothuama chuan Lianmawii chu a intir nghal a. Mahse, tam erawh chu a in leh duh chuang lova.

Chutia tui te a rawn lam ve leh takah chuan a rawn harh chho leh dawn tan ni a an hriat a vangin Kunga leh Rothuama chu an hlim hle a. Kunga chuan fiamthu hian "Damdawi mum lian a lo thlen meuh chuan hma kan sawn kuar kuara ka hriat chu le." a ti zauh a.

Rothuama chuan a chhang lem lova, a lo nui suk duh chauh a. Lianmawii chu a muhil zui ve leh nghal mai a. Tichuan rei lutuk an thut leh hma chuan khawfing rawn chatin khua a rawn var zawm nghal mai a.

Apu zing rawn tho chuan Rothuama chu a ruka ko hrangin "Taia, nizan khan engmah sawi chian kha kan nei ta lova, unau hi inlo inngai tak tak emni?" a han ti tha leh a. Chutah chuan engmah zep hun a ni tawh lo tih hriaiin Rothuama chuan Lianmawiin a ngaizawn dan zawng zawng chu a hrilh ta vek a.

Rothuaman a sawi zawh chuan a pu chuan a lu a han hiat nuah nuah a. "Anih tak chu, chu chu ka lo rin rilruk dan chiah a ni. A mak hle mai, hetiang hi min thlahtuteah an la awm ngai lova. Chuvangin hriatthiam pawh harsa dawn hlein ka hria." a ti a.

Rothuama chuan sawi tur a van kher mai. Mahse, a inthiam lo lem lo. A chhan chu a nin a ngaizawng ve a zeng pawh a ni lova, nuamlo chu ti viau mahse a thiam lohna awmin a hre tlat lo. A pu chu a vei nghauh nghauh a.

Nakinah chuan "Tai a, vawin chu ka silai hi keng la ramvak la a tha ang." a han tichhuak phawng mai a. Rothuama chuan "Enga ti teh thut chu ni ang maw a lo ti rilru neuh neuh a. Mahse, a pu zawk chuan "Sakhi patuai kher kah han tum la, tichuan a tuihang i hawptir ang a, i nauin a ngaihzawnna che chu a reh bakah a natna a tang hian a dam phah dawn a ni." a han ti leh a.

Chutianga a puin a han sawi chuan Rothuama chu a phur hle mai a. Mahse, khawi lamah nge sa chu a chan anga a hlawhtlin ngei theih ang tih chu a ngaihtuah nasa mai a. Tukthuan an ei kham chuan Kunga leh Rothuama chu ramvak tur chuan an inbuatsaih ta vat vat a.

A pu silai pu chung chuan an chhuak ta a. An chhuah dawna a pu thusawi, sunhlu mual ram an tih lam chu an pan nghal ta vang vang a. Kunga chuan "Hlawhtlin loh a hlauhawm hle mai a, chuvangin theihtawpa fimkhurin aw niang." a han ti a. Rothuama chu a lo bu nghauh nghauh a.

Rei ngial an kal hnu chuan sunhlu mual an tih mai ram chu an thleng ta hram a. Sunhlu rah lian tha tak tak hi hmun tinah a lo rah kur ngei nguai mai a. Chung zawng zawng chu kal pl zelin sunhlu kung khat, hniam li lei leh a puin a that laia a chan thin ngei mai awmna chu an thleng ta a. Chumi chang tur chuan a chan thleng te an siam nghal a.

Chawhnu her zet zawtah chuan sakhi pachal lian tha em em mai hi a rawn chhuak ta zan zan mai a. Rothuama chuan han kah thluk tawp mai chu a chak em em a. Mahse, a pu sawi dan khan a patuai kher tur a ni bawk si. Tichuan ui tak chung chuan sakhi pachalin an sunhlu rah tla chu a rawn tlan ta a.

Ui hle mahse a patuai a nih miau loh a vangin Rothuama te thian dun chuan an thlir reng a. Nakinah chuan chu sakhi chu a han huk tuar tuar a, a thian dangte chu ko ve niawm tak hian a hawi leh zak zak thin a. A che vel chu a fingin hriat thiam a har ngang mai.....

Nakinah chuan le, an rin ang leh beisei ang ngeiin sakhi patuai, mam tha zet mai chu a rawn lawr ve ta zan zan mai. Mahse, a pachal a ngam loh a la awm miau a vangin a la rawn chhuak thui tha ngam si lo. Rothuama chuan a lo hnaih hun nghakin a han tin vang vang thin a. Mahse, a la tri tlat mai bawk si. Kunga chuan "Thianpa, i kap mai tawh lo a ni. Saw bak saw chuan a rawn hnai ngam dawn emawni le?" a lo ti ru sa sa a........

episode-28

Rothuama chuan "Hmanhmawh suh thianpa, a la hla deuh em mai ka thelh palh hlauh takin. A pachal hian a duhtawk a tlan zawh hunah a kal bo mai ang. Tichuan kan tum ber saw chu a rawn hnai em em ang." tiin zawi te hian a lo chhang a.

Rei vak loah Rothuama sawi ang ngei chuan a duhtawk a ngah nge sakhi pachal zawk chu a hawi vual vual a, a insaseng ta mai reng a. Chutah a kal pah chuan a patuai chu a han um tlan ta hram mai a. Kunga ui lutuk leh thinrim chuan "Kher kher che chuan aw!" a lo ti bai bai a. Rothuama chu a lo nui tut tut a.

"Pawi i ti ve vak nange?" Kunga chuan a han ti a. Rothuama chuan "Ti ve tho e maw le. Mahse, lungngai suh a ril a tam em kha a lo kal leh har tawp lovang." a lo ti a. A sawi ang chiah chuan rei pawh an nghah hmain sakhi patuai chu a rawn lawr leh ta zan zan a.

Mahse, a hma ai khan a ti ta tlat mai a. Riltam viau lo phei sela chuan a rawn hnaih duh pawh a rinawm tawh loh. A hawi zak zak thin a. A awmdanah a muang lo hle tih a hriat mai. Rothuama leh Kunga chuan a lo hnaih deuh hun nghakin an thlir dun reng a. Mahse, a rawn kal hnai tha duh lo kher mai.

Chutih naka lai chuan an chhak hmuh theih loh chin si ah hian eng sa ber kherin nge mawni lung a rawn tilum ta mai. Sakhi chu rang lutukin a hawi chhuak nghal a. Tlan chhiat tuma a inher dawnah tak chuan Rothuama silai chu a puak thuai a. Sakhi chu tlan tur a awm ta lo.

Kunga chu an tawmna a tang chuan a rawn zuang chhuak nghal a. Sakhi awmna lamah chuan tlan pheiin a thi chiang nge chiang lo a va fiah nghal a. Mahse, sakhi chu che tur a lo awm tawh lo hlauh a. Rothuama dara ben thak thak pah chuan "Thianpa, i lo mak hle mai." a han ti ngawt a.

Rothuama chuan "Ka van nei a nihkha. Tlan kha a tum ta mai sia ka'n kap lui hram a a nia." tiin inngaitlawm tak hian a lo chhang a. Kunga chuan "Ka lo rin phak bak i ni reng reng mai. Kutbenga kan haw kha ka lo hlau hman viau a sin." tiin sakhi chu a han tuai let vel a.

"Khawnge, i muangchang lo teh ang. Sabawp mantu nih manah ka'n ak hawng ang e." tiin a sahmim lian tha zet maiah chuan a ak puar ta luah a. Tichuan titi bawrh bawrh chungin in lam an pan dun ta a.

Rothuama ten in an thlen chuan Lianmawi pawh a lo thu chhuak peih tawh a. Rothuama hmel a hmuh chuan a hlim em em mai a, a nu leh pa mitmei ven a ngai si. Rothuama a thlakhlelhna chu zep leh thup tum nasa hle mahse midang tan chuan haider a har hle ang.

Tichuan Rothuama sakah chu an siam nghal a. A pu sawi ang zelin a thluak chu an fun hrang a. Chu chu Rothuama chuan a kut ngei in Lianmawi chu a bawrh ta a. Lianmawii chuan tui ti takin a lem duak duak a. Mahse, a pa tena Rothuama sakhi tuai kher an kah tir nachhan leh an barh tir chhan chu hre ta se a ei duh kher ang em tih chu hriat har tak a ni.

Zanah chuan len pawh leng chhuak lem lovin Rothuama leh Kunga chuan Loanmawii chu an awmpui deuh chawt a. Lianmawii pa erawh chu thenawm te inah a leng a. A nu in vawkchaw chhum a vil thung a. Tichuan Rothuama te pathum chu zalen takin an inkawm tlang a.

Zan a rei tak deuh hnu chuan Kunga chu a tuk lama len leh intiam in a haw ta a. Lianmawii pa leng a lo haw ve chiah bawk a. Tichuan mut zai an rel ta a. Rothuama chu Lianmawii nu in chhuatah mutna a phahsak a. Rothuama chuan a rilru te tein 'Zanin chu a rawn insawn tawh em lovang chu maw' a ti neuh neuh a.

Mut hmunah chuan an khaw lam ringawt mai chu a ngaihtuahnaah a awm a. A thianpa Liankima te, Chhiari te, an lal fanu Chhingmami te leh a nu leh farnu chuan a rilru an luah khat hneh hle. Chhiari dam lo kha eng e a an tawh ang tih te? Chhingmami bo lah kha an hmu tawh ang em tih te chu a ngaihtuah nasa hle a.

Tin, kawng laka hmeichhe pakhat ramhnuai ngaw kara an hmuh ngawt lah kha tunge ni thei ang? A han hmuh thut khan Chhingmami ni than khan a hria kha a ni a. Chumi a vanga um ta chiam mai pawh kha a ni reng a. Mahse, umphak tur leh hmuh zui tur reng reng awm ta si lo kha a ngaihna a hre lo takzet a ni.

An kal dawna a thianpa Liankima hmel leh awmdan te kha a han mitthla let a, a ngaih te chu a han tha lo thar leh rih a. Mahse, eng e ngaih that lohna ber tur tih lah a hria a zeng pawh a ni lo. Mahse, a awm chu a tinuam lo takzet a ni. A nu leh a farnu pawh a ngaihtuah em em a, an khawtlang lah an buai lai tak a ni rawl nen.

Laiveta kha a hre chhuak zawk a. Khapa kha a awm loh hlanin an khuaah a lo zin ang tih mawlh a hlau a. A chhan chu kha pa kha kawm chian leh a duh em a ni. Tunah te hian khawiah nge a awm an tih te a ngaihtuah a. Tin, a thusawi zawng zawng te kha a han ngaihtuah kir leh a, dawt ringawt chu a nih a ring si lo.

Chutiang ringawt mai ngaihtuah chuan a mut reng reng a chhuak thei lo mai a. A pute nupa an hnar bur bur tawh hnuah pawh a ni chu nghate rep ang maiin a la meng kar mai a. Lianmawii lah a muhil nge muhil lo tih hriat ni hek suh, a thawm a reh hmak mai a. A lawmin mak a ti angreng hial mai. Chuvangin a mutna chu han en fiah hial a duh phah ta a, tichuan a tho ta them them mai a............

episode-29

Rothuama chu thawm dim takin a tho ta them them a. Lianmawii mutna lam chu a pan nghal a, Lianmawii chu tui tak mai hian a lo muhil sek sek a. Rei vak lo a en vang vang hnu chuan ngaihtha takin a kalsan leh ta a. A mut a chhuah loh em a vangin pawnah a chhuak a, zunram te thiarin mei a zu vang vang a.

An khaw lam bawk chuan a rilru a rawn luah leh nghal chat a. Apu thusawiin awmzia a nei dawn a nih chuan rei cham ngai lovin Lianmawii ziaah chuan a rawn lan mai a ring a. Tin, awmzia nei ngei bawk se Lianmawii chuan amah chu ngaihzawn enah en tawh lo se tih chu a duh ber a ni.

Mei te a zuk zawh chuan mu turin in chhungah a lut leh ta a. Muthilh chu harsa ti hle mahse khawvar dawn lam hnaihah chuan a hriat loh karin a lo muhil ve ta nge nge a. A han thanharh chuan khua a lo var uar tawh a. Rang taka thoin a mutna chu a thlep thuak thuak a. Sava veh tur turin a chhuak ta nghal a.

Rothuama chhuak ta chu tuikhur kawngah kalin tuichawi kal tur leh haw lam pawh a tawk nual a. A hmaa a lo zin tlangnel tawh a vangin a hriat pawh an hre viau a. Kal pah chuan an biakna chu a chhang zel a. Tichuan ramhnuai ril lam pan chuan a kal ta sawk sawk a. A rilruah erawh an khaw lam bawk rawn lang leh thin mahse ngaihtuah loh hram hram a tum rih a.

Mual pawng deuh iuh euh hi a chuang chhuak a, a hnuai ngaw chhung lama sa chiar nak nak thawm a hriat chuan phur tak leh fimkhur takin ngaw chhung lam chu a pan thla leh ta a. Ngaw chhungah chuan sava chi hrang hrang hi an lo tam nalaileng khawp a. Rothuama chuan nuam a ti ngei mai.

Mizopa sairawkher ngei mai hmang chuan a han veh ta then then mai a. Naupan tet a tanga a lo tih than leh a nuam tih ber a nih a vangin uluk tak maia a han tin tawh chuan a tum a hlah mang mang si lo a. Eng emaw chen a veh hnu chuan a sahmim puar awk khawp a perh thla ta a. Tichuan hlawhtling inti takin in lam a pan ta a.

In a thlen chuan sumhmunah Lianmawiin buh a lo deng arh arh a. Rothuama hmel a hmuh chuan "Awi ka u i lo hawng e law? I hlawhtling em? Khawi maw eng e min lo hawn?" tih pahin Rothuama chu a lo be hlut a.

Rothuama chuan hlim tak hian "Sava ka lo hawn che. A tui khawp ang." a ti a. Rothuama sava hawn a han hmuh chuan Lianmawii chuan tam hi a han ti laileng khawp a. A hlim lutuk chu a au chel chul mai a ni.

Tichuan Rothuama sava perh thlakho chu a hmul pawtin an rawh nghal a. A tam tham bawka a rawh chhung pawh a rei duh kher mai. A pu chuan Rothuama chu "Taia, hawh teh ka silai hi min han hruk fai sak teh khai. Tar a lamah hi chuan khaw hmuh te hi a fiah tawh mang si lova..." tiin Rothuama chu pawn leikaah a ko chhuak a. Rothuama chuan a pu chu rang takin a zui chhuak ve nghal bawk a.

Silai hruk mawlh mawlh pah chuan "Ka pu, kei hi cham rei viau thei pawh ka niin ka inhre lo deuh a. Eng e maw i ngaihdan le?" tiin a pu chu a han rawn a. A pu chuan "Chu chu a nia ka koh hran nachhan che pawh. Hei i farnu hi ka chik ka chik hian kan thil tih kha a hlawhtling viauin ka hria a. A endan che pawh hi a dang tawhin i hre ve em?" tiin Rothuama chu a zawt let a.

Rothuama chuan "Keipawh a mak ka ti angreng khawp mai. Ka beisei phak bak daih a ni. Nizan lamah pawh khan ka ngaihtuah a, tukin lamah te pawh. U ang tak takin min en tawha hriatna ka nei tlat. Chuvang chu a nia haw leh lam te pawh ka'n sawi nachhan." tiin a chhang a.

A pu chuan "Anih chuan a tha a nih chu. Marawh chu engpawh nise, vawin lamah te han hruai chhuak chhin la a that ka ring a. Chuta a awmdan a tang te pawhin a hriat lehzual ang chu. Chumi hnu lamah chuan i hawn hun tur te pawh chu kan ngaihtuah dawn nia." a tih chuan Rothuama chu a thaw huai a.

Haw leh lam sawi kha a thil huphurh ber kha a ni a. A chhan pawh amah an ngaih ve mai bakah Lianmawii vang ringawt pawhin an remti mai lovang tih kha a hlauthawng tlat a. Mahse, a pu chhan dan chu a beisei phak a ni tlat mai. Amah Lianmawii tak pawh sakhi patuai thluak a barh a tang khan ngaihzawng enin ala en leh miah lo niin a hre bawk a. Chutiang a nih chuan Lianmawii pawhin a chelh luih a ring lem lo bawk a ni.

Tichuan tukthuan te an ei kham chuan apu chuan "Taia, vawin chu i nau nen hian lo lamah chawhmeh zuk la dun ula a tha lo maw? I nau pawh intih harh pah a ni bawk ang a, hei chawhmeh pawh kan nei dawn lo a ruai chu a ni mai a, in peih dun ang em?" a han ti a.

Rothuama chuan "Peih tehreng e a, lo lam pawh ka hmu khat a ka hmu chak viau a sin." a lo ti a. Lianmawii erawh chu a ngawi reng thung a. Mahse, a pa thu chu hnial chi a ni lova, a hnial ngai hek lo. Ngawi rengin Rothuama nena an chawfun tur a siam nghal mawlh mawlh a. An inpeih chuan an inzui chhuak ta hnak hnak a.

Kalkawngah chuan Rothuama te pahnih chu an inbe bawrh bawrh a. A chang leh an infiam a, Rothuama chuan Lianmawii tawngkam leh che zia chu a chik ru reng a. Chutiang chuan hlim takin lo chu an thleng ta a. Chawhmeh awm ang ang chu vai khawmin an inzui zel a. Chawhma zet an vai hnu chuan an duhtawk an ngah ta a. Tichuan thlam an pan dun ta a....

episode-30

Thlamah chuan thingpui te lumin bai te an chhuang a. Lianmawii chu a zai rat rat reng a. Rothuama chuan a chezia chu a lo chik reng bawk a. Engmah han danglamna awmin a hre lo. A hma ang kha chu nise tunah te hian a buaithlak leh viau tawh a ring a, a lawm ngei mai.

Hetiang a nih chuan a tuk maiah a haw theih a ring a. Chutia haw hun vel a ngaihtuah lai tak chuan Lianmawi chuan "Ka u, engtikah nge hawn leh i tum deuh?" a rawn ti chhuak a. Rothuama chuan "Ka lo inngaihtuah lai tak a ni." a ti vat a.

Lianmawii chuan Rothuama en ha pah hian "A ni maw? Ka va'n awih kher kher lo. Cham ve deuh rih la, in chhungkua in buai viau emni?" tiin a zawt leh a. A tawngkam chhuak velah pawh chuan a pangngai em em a, a thil han zawh te pawh chu zawhna tluang pangngai tak zelin a tawng a. Rothuama ngaih pawh a tha khat tawh khawp mai.

Rothuama chuan nuih var var pah hian "Kan chhung tak chu kan buai em em lo. Mahse, kan lal fanu a bo daih mai a, chu chuan kan khawtlang boruak a ti ngui nghuai mai. Bakah, ka thian tha ber ber te tunlai chu an dam lo nual mai a. Chu zawk chu a nia." tiin a chhang a.

Lianmawii chuan "Awi ha, engti bovin nge a bo a? Chuan an la hmu lo tihna emni?" a ti a. A hmelah chuan mak a tiin hriat a chak hmel hle a. Rothuama chuan "Aw, kan rawn kal lai chuan la hmu lo. A thingphur a khuangcher bo a ni ber e, kan lalpa pawh a zahawm duh khawp mai." a ti a.

"A va'n mak ve chutiang te. Eng e rindan deuh te i nei em?" tia a zawhna chu Rothuama chuan "A mak tih bak chu sawi vak tur pawh ka hre bik lo. Kan zawng nasa tawh viau mai lehnghal." a lo ti a. Lianmawii thingpui rawn pek chu a in nghal a.

Lianmawii chuan bai tui tur a chhuang kai a. Rothuama chuan "Aw haw! Mangkhawng pawh khu kan lo la en hmaih a nih khu. Ka zuk en nghal ang e." tiin thlam namthlak a tang chuan thlam hnuaiah a zuangthla nghal a.

Mangkhawngah chuan sazu panga lai mai a lo delh a, Rothuama chuan a rawn khai bawr laih a. "Ava tihzia em, pali hi hawn ila pakhat hi chu baiah khan i thlak hang daih ang aw." tiin a ril a phawrh nghal a, "A va tui dawn tehlul em." ti chungin a rawh sar sar a.

Lianmawii chuan Maian bai tur chu a hik mawlh mawlh a, a hih zawh rualin bai tui a lo so ve chiah bawk a. Tichuan bawkbawn, samtawk, changkha, lengser leh thlai rah chitin reng nen, zupawl sa nen chuan an bai pawlh ta nuaih a. Chaw an han fak dun chu tui an tiin an ei hnem dun kher mai.

Tichuan chaw te an fak zawh chuan muangchangin hawn zai an rel ta a. Chawhnu her zet zawtah chuan an inzui hawng leh ta hnak hnak a. An hawlamah pawh chuan kal lam ang thoin an titi kawng tluan zak a. A chang leh an nui dun bawk bawk a, hah pawh an hre meuh lo. Mahse, inngaihzawnna leh mipat hmeichhiatna lam hawi reng reng erawh an sawi hauh lo thung a.

In an thlen chuan ni pawh a la sang tha viau a. An thil hawn te chu chhuahin Lianmawii chu a che nghal char char a. Rothuama erawh a la hma deuh a vangin a pu silai a la chhuak a, "Ka'n tei mai mai teh ang." tiin ram lam bawk a pan leh ta a.

Rothuama chuan zing lama a sava vehna lamah bawk khan silai nen a inpu liam leh a. A la hma deuh bawk a hmanhmawh vak lovin a kal a, ngaw chhung a luh pawh chuan sava thawm leh i pawh a hre lem lo. A ngaw ril lam pan chuan a kal zel a.

Khua a rawn tlai hret hret a sava pawh an rawn chiar nak nak hlawm tan tawh a. Mahse, tun tum chu sava veh tur ni lo deuha kal a ni bawk a sava hram pawh a bengkhawn em em lo. Lui te hi a va pawh a, chutah chuan a ding chawl vang vang a. Sakah tur a hmu dawn lo emaw a tih a vangin a hla zawnga kal zel pawh a phur tawh lem lo.

Mahse, kawr te a han kan chiah tih chuan savawm hnu thar lam tak mai a hmu ta tlat mai a, Rothuama chu a phur ngei mai. A hnu thar danah savawm tui in tura lo kal a nih ngei a ring a. An inhmu hman lo deuh chiah chiah vel hi a nih a ring hial a. Chuvangin a awm hlat a ring lo, fimkhur takin a hnu chu a chhui ta a.

A hnu chhui chu a hniak len danah a te lo hle ang tih a ring mai a. Kah ngei tum chuan a chhui zel a, mahse mak deuh mai chu a hniak thar em em si chu a rin aiin a chhui rei tawh tlat mai chu a ni. A chhui a chhui a, a thar lam tulh tulh a. Mahse, a tak a chhui thleng thei der lo mai.

Rothuama lah a phur tulh tulh a. Mahse, vawi leh khatah harh chhuak thut niawm tak hian a ding ta chawt mai. A han ngaihtuah a, a lo chhui thui tawh hle a ni tih a hre chhuak ve chiah a. Upa in hetianga sahnu thar lam lutuk, a tak hmuh tur awm si lo chhui chiam hi an lo duh ngai lo tih te a hre chhuak leh ta zel a. A rilruah ngaihthat lohna a rawn lut nghal, a hlau phei chu a ni hauh lo. Mahse, chhui zui zel chi a ni ang em tih chu ngaihtuah tham tak a ni ta.

Diktak chuan apa dam laia a zilhna tam ber pawh upa duh loh leh an pi pu te serh leh sang hi zawm tur tih a ni miau a. Tunah pawh hei chen a chhui tawh a, eng a ni thei tlat lo a ni. Rothuama chu a inngaihtuah vang vang a. Chutia a din reng lai chuan naute tap ri a hre ta mauh mai le...

episode-31

A bengchhe ri emaw tiin a han ngaithla chiang a. Mahse, a bengchhe ri mai zawng a lo ni awzawng si lo. Chutia ram palailenga nau tap thawm han hriat ringawt chu thil pangngai a nih miau loh a vangin Rothuama chuan engtia han tih tur nge tih a ngaihtuah vang vang a.

Chutia tap thawm a hriat hnu rei vak loah chuan a thawm hriat chu a reh ta vang vang a. Mahse, rei pawh a rial hmain thawm dang a hre leh ta. A chhak lam atang chuan mihring thi tur chalchang thawm a rawn chhuak leh ta mai. Rothuama chuan ngun zet hian a ngaithla vang vang a. Chutianga rei ngial a ngaihthlak hnu chuan a aw a han thian kharh kharh a.

Chutia a aw a han chhuah takah chuan thawm chu a reh ve mai a. Rothuama chuan awm rengna tlak pawh a nih nek loh hi ti rilru chungin a inher a, tichuan in lam panin a haw ta a. Mahse, pen li nga vel a pen hman chauh tih chuan nutling zet hi a rawn tap chhuak leh ta phut mai a.

Chutah zet chuan Rothuama zaidamna chuan a tlin ta lo. "E he he! Mai mai tak che chuan, tunge maw i nih phiangsen a chuti tak maia min han zuam khanglan le." tih pahin thawm lo chhuahna lamah chuan a kal ta nghut mai a.

"Mihring pawh ni la, ni lo pawh ni la ka hlau chhete hleinem che. Khawiah nge i awm lo chhuak rawh. Ka hlau lo che, ka hlau therte iak lo che rawn chhuak rawh." a ti tuar tuar a. A chemtum chu a vai thuak thuak bawk a. Chutih lai chuan thli a rawn thaw vuk vuk. Mahse, cho chhuah tur a awm si lo.

Rothuama inhrosa chu a na rem rem kher mai. "Min cho thinrim tawh a, ka hmaah hian rawn inlan la i han inhmachhawn teh ang. Heta hi ka awm rawn chhuak rawh." a ti tuar tuar a. Mahse, a hmuh theihah a rawn inlan duh miau si loh a vangin Rothuama thinrim chuan a hachang a thial rawp rawp a.

A chem hum lai chu dahin a silai chu a han kau a. "Nang midawihzep lakah hian ka tlawm lo tih hriat nan kha ka han kap ang che." tih pahin a silai chu a kap puak ta dur mai a. A silai puak ri chu a thangkhawk rawih rawih a. A reh fel hnu chuan ngaw chhung chu a reh ta vawng vawng a. Thli thaw pawh chu a reh nghal duak mai.

Rothuama chuan a chem chu chharin "Vawikhat mah min rawn tibuai leh tawh ngai suh." tiin a han vau zui leh hram a. Mahse, kal a tum lai tak chuan aw thum leh rapthlak zet mai hian "Ka hniak hi rawn chhui tawh ngai suh." a rawn ti ve ta mai. Aw chu khawi atang a lo chhuak nge tih hriat tumin a hawi kual vat a.

Mahse, khawi lam a tang bera lo chhuak nge tih a hre hauh lo. Vin zet mai hian "Nanga hniak a nih leh nih loh ka hre hrep love." a han ti let ve tuar a. A rawn chhan leh beiseiin a hawi kual vat vat a. Mahse, a rawn chhan leh tak mai loh a vang chuan "Heng lai hmunah hian i hniak hi vawikhat mah rawn hnutchhiah tawh ngai suh." a han ti zui leh a.

Chu pawh chu a rawn chhan tak miah loh a vangin Rothuama chu a kal ta a. A tira a sahnu chhuina hniak tharlam tak tak te kha pakhat mah hmuh tur reng reng a awm leh tawh lo mai chu mak a ti angreng hle a. Mahse, engmah sawi tawh lem lovin a haw tlang ta a.

In a thlen chuan apu chuan "Taia, i lo va haw har ve. Kha, kah tur pawh i va hmu lo em ni? Ramkal haw khan silai puak ri kan hria e an ti a. I rawn put haw lawih mai ka lo ring hman a sin." a lo ti luam a.

Rothuama chuan "Ka kah thelh pek a lawm mawle..." a lo ti duh lek a. A pu chuan a awih loh hmel kher mai. A chhan chu Rothuama hi a hrechiang ve tawk a. A thal thlah tawh ve chinah chuan a thelh hi a la hre ngai miah lo. A lo chhuan ruk ve em em thin a nih a vangin Rothuama thusawi a awih lo pawh chu a awm viau mai.

Lianmawii lah chuan, "Ka u i kah thelh a maw?" mak tih hmel fe hian a lo ti ha a. Rothuama chuan "Thelh chiang e, engatinge mak i va tih hmel ve?" tiin a lo zawt let a. Lianmawii chuan "I thelh pawh ka hre ngai si lova." a lo ti leh mai a, rothuama chu a lo nui suk a.

"Ka thelh fo a lawm." tiin a silai chu a hrufai mawlh mawlh a. A pu chuan "Engsa nge mawni reng reng le?" a lo ti ve leh a. Rothuama chuan "Sakhi." tih chauhin a lo chhang leh a. A pu chuan zawh zui zel chiah pawh a ngaih loh a vangin a ngawihsan ta daih a.

Zanriah an ei kham chuan a pu chuan "A nih leh Taia, naktukah chuan maw hawn i tum leh mai ang?" a ti a. Rothuama chuan "In remtih chuan a tha maiin ka hria. Kan khaw lam kan boruak nawm loh lai tak a ni nen remchang dangah ka la rawn zin leh zawk ang e." tiin a lo chhang a.

A pu chuan "Nang berin i tih te chuan a rem lohna pawh ka hre hran hleinem. Marawh chu i hriat angin kan ngai em mai che a. Han cham rei hman ve la chu kan duh viau mai. Mahse, i sawi angin in khaw lam in chuti ve teh nuai a nih zawngin han chelh zui che pawh a rem loah kan ngai mai a ni ang chu." a lo ti a.

Lianmawii chuan "Lo zin leh vat rawh aw ka u." a lo ti ve nawk a. Rothuama chuan "Tehreng mai. Awllen veleh rawn zin leh ka tum dawn nia." tiin a lo chhang a. Tichuan Kunga te in lama leng tur chuan a chhuak ta nghal a....

episode-32

Rothuama leng chhuak chuan a thianpa Kunga te in lam a pan nghal a. Kunga te in a thlen chuan zanriah an lo ei kham ve chiah a. Rothuama hmel a hmuh chuan Kunga chuan "E khai thianpa lo leng teh khai, hei heti lamah hian lo thu rawh. Kan lo sawi nasa mai che a nia." a lo ti hlut a.

Rothiuama chuan "A khai a, chutia rel tehchiam tlak pawh kan awm loh hi. Kha zanriah in ei kham ve chiah em ni?" tih pahin tapchhak lam a pan nghal a. Thuthmun a rem fel hnu chuan an vawkchaw chhuan lai chu a han chawhsak pah nghal a.

Kunga nu chuan "Aw hei zanin tlai chu kan tlai deuh a nih hi. Eng e i pu te chhung chu an dam tha zel maw? Inhnaih viau e ti lo chuan mahni buai buai hian kan buai si a. A tlawh lah hi kan tlawh hman thei reng reng lo mai. Inthiam pawh hi ka inthiam zozai tawh lo." a lo ti a.

Rothuama chuan "E! An tha tawh lutuk e, ngaihtuahawm an ni lo a nia. Eng e nangni chhung zawk in dam tlang em?" tiin a lo chhang a. Kunga nu chuan "Kei ni pawh kan tha a ni mai e. Liani chu a kal mai dawn emaw ka ti hman hial a, hetia a rawn tha chhuak leh hlauh chu ka lawm e mai." a ti a.

Kunga chuan "An dam tlang zel tawh turah ngai ila, chu kan lo sawi mek che ka tih kha. Vawin chu nula thing ka phurhpui e ka tia, ka nula phurhphui chuan a tlangval phurhpui loh zawk daih a nia a lo vei ni." a han ti a.

Midangho chu an lo nui da1 dar a. Rothuama chuan "A va khawlh thin em ve aw! Chu nula thingphurhpui e tilo chuan tlangval dang chanchin hlir mai a ni maw insep rawtui?" nui chung hian a lo ti ve a. Kunga chuan "Ni mai mai e mawle. Chuvangin zanin chu kan rim nawn leh ngei a ngai a ni." a ti a.

Rothuama chuan "A va luhlul thlak awm ve, hei ang khua reng ruangah nula dang an tam lawmni. Chutia vei ruk dang a neih phei chuan hmel hlim pawh kan hlawh nang maw thin le..." a tih chuan Kunga chuan "Kan hlawh tha viauin ka ring mai. Tirawh i chhuang ang khai." a ti a. Tichuan nula rim tur chuan an chhuak ta a.

Zawlbuk lam pan chuan an inzui chhat chhat a. Zawlbukah chuan tlangval leh val upa an lo awm thap a. Kunga leh Rothuama hmel an hmuh chuan val upaho chuan "E khai, mikhual tlangval kan nei maw? Khawtual tlangval te khan buan lohin inchhuah mai dawn emni? Nula rim nawm nan reng reng pawh a tha ang e a..." an lo ti nghal a.

Rothuama chuan "E khai, buan tlak pawh ka awm love, hei mai hi ka nia atu ka cho love." a lo ti a. Mahse, khawtual tlangval zingah chuan Rothuama buan chak tak tak an lo tam mai si a. Chutia Rothuama phatna chu inngaihtlawm vang a ni tih hre ran leh nula rimna hmuna han insawitheih nan hrim hrim pawh Rothuama han keuh thluk chu an chak nasa mai.

Val upa pakhat chuan "Thingnawi kha han vur belh ula, hmun kha han kian zau teh u khai. Mualchuan khaw val lakah khawtual tlangval kan tlawm mai chuan a zahthlak ang e." a han ti a. Chu veleh thingnawi chu an han vur belh sauh sauh a. Tichuan zawlbuk chhuat chu zau tak maiin an thut hual ta luih mai a.

Chutah zet chuan Rothuama chuan chhuanlam han siam zelna chiah a ngai ta bik lova, siam zel pawh nise an nawr chhuah luih tho a rin a vangin muangchang hian a rawn ding chhuak ta a. "A nih leh intih tlat chuan min dim deuh tal a ni ang chu, kei zawng ka derdep em hi." a han ti a.

Khawtual tlangval zinga Rothuama buan chak ber mai leh an khaw tlangval chhuanvawr Hlama chu a rawn ding chhuak vut a. "Khaw'nge keiman ka'n buan hmasa ber teh ang. Mualchuan tlangval chu engtiang chiah nge an nih ka han hmuh tir ang che u." a ti lar lar a.

An inring renrawn ta maw tihah chuan Hlama leh Rothuama chu an in man ta chat mai a. Nghet tak ve ve a inmanin Hlama chuan Rothuama chu han keuh thluk thuai mai a han tum a. Mahse, a theihtawp a chhuah chung pawhin Rothuama chu a che laih laih cho ta mai.

Rothuama chuan a chet danah keuh thluk tum awm pawhin a lang lo. A tumpuipa chu inkeuh tir a tum lo ringawt nimai hian a hriat a. Hlama lah chuan a tha zawng zawng a han sawmkhawm a, chutah tlangvalho chuan a mah tanin an lo au dur dur mai bawk a.

Mahse, an rin loh leh beisei loh tak maiin vawi leh khatah khawtual tlangval zawk chu chhuat thum dawt khawpin Rothuama chuan a vawrh ta mai. Tlangval au dur dur thawm chu a reh nghal duk a. An mak tih zia leh rin har an tih dan chu nasa tak a ni. Mahse, an mit ngeiin an hmu miau mai si.

Chutah a thawh hnihna an han bei leh a, Hlama tlawm la lutuk mai leh zak bawk si han tang tak tak mai chu a khur zawih zawih thei a. Mahse, a tumpuipa chu a hriat chian loh mai bakah Rothuama a ni miau mai a, a tha neih zawng zawng a han sawmkhawm pawhin eng a ang thei ngang si lova. A tawpah chuan khawtual tlangval bawk chu vawrh thluk a ni leh ta tho mai.

Chutah zet chuan val upa te chuan "A tawk tawh viau e, midang buan duh kan la awm em?" an han ti a. Chutah an khaw tlangval chaka sawi bawk Chhema a rawn ding chhuak vat a. "E khai, ka buan chak zawng tak a ni mai." tih leh Rothuama rawn man chu a rual nghal chat a. An han inbei leh tak tak mai chu mit a tlai duh ngei mai.......

episode-33

Khawtual tlangval bawk a tlawm leh tak a vang chuan tlangvalho chuan tlawmah an la a. Kei ka ni inti chin te chuan Rothuama buan chu an chak zek zek hlawm mai a. Rothuama lah chuan pip e pup e a ti hlei lova. Chhema a thu chiah tih chuan an khaw tlangval chak ber mai Thiaua chu muangchang hian a rawn pen chhuak leh ta chhat chhat mai.

Thiaua hi mi tlawmngai zet mai leh huaisen tak a ni a. A chak mai piahlamah inbuan hi a thiam em em bawk a. An khuain mikhual an neih reng rengin a buan hmasaah a tang ngai miah lo bawk. Tin, a fing em em a. Amah a felin a chapo ngai lo bawk a, a inngaitlawm thiam em em bawk a ni.

Rothuama rawn hnaih pah chuan "Thiante hneh loh chu a chak lo ber hian ka han buan ve hrim hrim ang e." a han ti a. Rothuama chuan Thiaua chezia leh a pumrua a en mai pawh chuan a hma aia mite ngawt ai chuan a tawh a khirh dawn a ni tih a hrethiam nghal vek a. Fimkhur a ngai dawn a ni tih hre ranin an han inpawm leh ta chat mai a.

Rothuama ngaih ang chiah chuan Thiaua chuan tha a nei hle tih a hre nghal mai a. Mahse, a tu ve ve mah chuan inphawi pawh tum lem lovin nghet tak ve ve chuan an inman reng a. Rothuama chuan "E khai, thianpa ka tha neih a zo titih der a nia." a han ti a. Thiaua chuan "Keipawh hei bak chu han sawn leh tur chuang ka awm der lo mai." a ti ve bawk a. Mahse, a tu ve ve chuan an thapui an khek tih an inhai miah lo.

Thiaua pawh chuan Rothuama a han man chiah khan a tha neih zawng zawng hman a ngai dawn tih a hai bik lo. A chhan chu khawtual tlangval leh mikhual tlangval chak tia an sawi hi eng emaw zat a lo buanin a lo keuh ve tawh a. Mahse, tuna a man mek hi chu a dang zar mai tih a hria a ni.

Tichuan vawi leh khatah a tha chu sawmkhawmin Thiaua chuan Rothuama chu phawi tumin a han elh ta ngian ngian mai a. Rothuama lah tha thar ang mai hian a lo khawng phiar fuat mai si a. An nghing dun lawih lawih mai. Thiaua chuan theihtawp tak meuh meuh a chhuah chung pawhin a keuh thei ta der lo. Chutah Thiaua beidawn lam hnaihah chuan Rothuama chuan a han ti ve ta thut mai a, Thiaua chu a kang awk awk mai. Mahse, Rothuama pawhin a keuh em chu a keuh thei ta bik chuang lo.

Tlangvalho chu an hawhaw hluah hluah mai a. Zawlbuk mei chu an vawm belh mawlh mawlh bawk a. A laia inchaite pahnih han tang velah chuan zawlbuk pawh a nghing lawih lawih thei mai. Thiaua chuan a rilruin a thiam thil dang hman a ngai a ni tih a hria a. Tichuan a thiam ang ang chu a han hmag kual leh ta a.

Mahse, Rothuama pawh tha ngah ringawt a lo ni lo leh zel a. Thiaua tum dan chu a hriat rualin amah a lo insiamrem hman zel a, a tawpah phei chuan Thiaua chu a chesual ta zauh mai. Chu a tanpheh lai tak mai chu remchangah lain Rothuama chuan a han bin let ta thuai mai a. Thawm a tha ham ham ngei mai.

A thawh hnihna an han bei leh nghal chat a. Tha an seng hnem dun tawh bawka a tir ngawt ai chuan an tha pawh a khawng ta lo deuh emni chu aw a tih theih a. An han inelh dun leh ta fat fat mai chu an lo au leh dur dur tawh mai. An inbei rei telh telh a, chutah chiah chuan a thiam thil pawh ni tawh lovin a tha ngah zawk leh fuat nei zawk a hriat chho tan ta tlat. Chak ve ve, thiam ve veah a daih rei zawk zawk a ni ta deuh ber mai.

Rothuama chuan chu chu a hriat a vangin a tir a tang khan a tha neih zawng zawng a hmang duh lo kha a ni reng a, rei ngial an in beih ngat ngat hnu chuan Rothuama bawk chuan a keuh thum leh ta dur mai le. Chutah zet chuan Thiaua hah lutuk chu a thaw huam huam a.

A vawi thumna an han tan leh dawn chuan Thiaua chuan "Ekhai, ka tlawm e, ka hneh ngang lo che a ni thianpa." a ti ta nge nge a. Rothuama chuan "Mai mai a, min hlahthlem a ni tih te chu ka hai hleinem. Nang ang em em a chak hi ka la buan ngai miah lo. Min hlahthlem lo phei la chu ka mualpho chhiava dawn a nihkha." a lo ti let ve a.

An val upate chuan "A lawmawm e, kan khaw tlangval chak leh Mualchuan khaw tlangval chak inbuan aia inbuan ropui en tur a tam lo khawp ang. Rothuama kha a chau lutuk palh ang e nula va rimpui rawh u khai." tiin an khaw buan chak Thiaua hneh loh Rothuama chu an chhuang hle a.

Tichuan tlangvalho chu nula rim turin zawlbuk chu an chhuahsan nak nak hlawm a. Rothuama leh Kunga pawh a hnung berah chuakin Kunga chuan "I lo hetih vang a nih hi le vawin nilenga ka nula thingphurhpuiin i hming ringawt a lo lam ni." a han ti fiam thu a.

Rothuama chuan "Leh ta mai mai thin a. Min hlahthlem mai mai a nihkha, i nula thingphurhpui chuan tuhminga a lam a?" a lo ti ha a. Kunga chuan "I hming chhete hi mawle." a lo ti hluk a. Rothuama chu a lo nui hawk hawk a.

Tlangval zawlbuk atanga nula rim tura chhuakte chuan Rothuama chak thu bak engmah sawi tur an hre lo emaw tih tur khawp hian an nula rimna hmun thleng mai chuan an sawi an sawi hlawm mai a. Tha thar ve ve ngat phei chuan han inbei se an khaw buan chak Thiaua chuan a hneh dawn lo hle a ni tih te chuan uar tak mai hian an nula rimna hmun theuha an titi tui ber a ni zankhua ta zak mai....

episode-34

Rothuama leh Kunga chu an nula rim tum te in lam pan chuan an inzui ve zel a. Kunga chuan "Ka chhuang hle mai che thianpa. I thian nih pawh a thlamuan thlak ngei e. Khati khawp khan i lo chak a ni maw? Mi pahnih i buan hnua Thiaua i han hneh leh thei mai kha chu a mak tih loh rual a ni hleinem." a han ti tha leh a.

Rothuama chuan inngaitlawm tak mai hian "Ka sawi kha thianpa, min hlahthlem mai mai a ni ka tih kha awih mai rawh." a lo ti ve thung a. Mahse, Kunga chuan a awih bik tlat lo. "Ka mit ngei hian ka hmu a, i sawi ai chuan ka hmuh ngei kha ka awih zawk. Kan khaw buan chak Thiaua hi kan chhuangin kan khuaah nana na hi chuan a elpha hi an awm meuh lo a sin. Tha thar phei chuan han bei la kha aikhan i la hneh cheu dawn lehnghal si a." tiin Rothuama darah chuan a beng thak thak a.

Rothuama chuan "Chutin min pawih fak vak vak lo teh, ka vannei em a nih ve bawk kha." a lo la ti fan a. Kunga erawh chuan a thianpa inngaihtlawm zia a hmuh chuan a ngaisang tulh tulh mai. Rothuama chuan "Ngawi teh taka thianpa, naktuk ka hawnsan leh mai che a ngai dawn tlat mai." a han ti a.

Kunga chuan "Khai a, a va khawlh awm thin ve maw le...hei zaninah nula kan rim tan dawn chauh a ni ah, chutia nang ber i awm loh leh daih si chuan a va khingbai duh awm ve?" a lo ti vat a.

Rothuama chuan "Ngawi teh thianpa, nula te chu kan la rim dun dawn chauh a lawm le, a dam hi han hauh phawt mai ila. Kan khaw lam boruak ka hrilh tawh che kha. Tin, nangmah ngei pawhin i hmuin i hriat vek kha. Khatiang tehnuai kha kan nih a vangin remchang hmasa berah ka la rawn zin leh dawn a lawm." a ti a. Kunga chu a inngaihtuah vang vang a. "A ni viau mai bawk si." a rawn ti chhuak ve leh a.

An nula rim na tur in an thlen chuan Kunga chuan kawngka a han kik karh karh a, nula aw hian "Lo leng rawh u..." tia a lo chhawn hnu chuan Kunga te pahnih chu an inzui lut ve nghal a. An luh chuan tlangval dang pathum lai hi an lo leng ve bawk a.

An nula rim chuan Kunga leh Rothuama hmel a hmuh chuan hawihhawm taka lo biain thutna tur te a lo kawhhmuh sawk sawk a. Kunga chuan inti khawtual takin lo leng ve dangte leh an nula rim chu a be nghal bawrh bawrh a. Rothuama erawh chu thlanglam tuium hunna bulah ngawi rengin a lo thu ve thung a.

Tlangval lo leng ve dangte chuan Rothuama chak an tih zia bawk chu an han sawi tan leh nghal pang mai a. Pakhat chuan "Kan lo sawi lai mek a ni bawk a. Zanin ang reng reng kha chu ka la hmu ngai lo a ni." tiin Rothuama chu chhuan hmel tak hian a han en a.

Rothuama chuan "Nangni khua zawng, in tha em a mikhual hlahthlem nachang in hria a kan mualpho loh phah hram zawk a ni e." tiin a lo chhang a. An nula rim chuan a khattawk hian Rothuama chu a melh leh ralh thin a. Rothuama chak zia an sawi te chuan a ruk hian a lo intithei ve em em ringawt a.

Chutia Rothuama chanchin leh a chak zia ngawt mai an titi chu Rothuama chuan nuam a tih loh a vangin "Tirawh u, titi dang i vawrh ang u khai. Eng e vawin lam te nangni in thawh hlawm a?" tiin zawh bik pawh nei lo hian a han zawt a. Tlangval dangho chuan an chhun lam hnathawh te chu an sawi tliar tliar a.

A tawpah Kunga chuan "Kei ka chhunlam hna chu a hahthlak loh phian mai a, hahthlak loh viau e ti lo chuan ka hahpui zek lawi a. Engtia han sawi ber tur nge mawni le?" a tih chuan an nula rim chuan Kunga chu a lo melh ralh a. Tuma hriat si loh hian Rothuama chu a rawn nuih leh sak a. Rothuama chuan "Eng hna fakau nge maw i lo thawh bik thin le? Chutia sawi pawh sawi thiam loh hna chu hriat a chakawm ting mai a lawm." a lo tih chuan tlangval dangho chu an lo nui dar dar a.

Mahse, an nula rim chuan Kunga chu a'n melh leh deuh kawk a. A chhan chu midangte hriatthiam theih turin Kunga chuan a rawn sawi chhuak palh ang tih a hlau takzet a. Mahse, hlau anga lan erawh a rem si lo. A sawi tak tak ang tih hlau ru tak chuang chuan "A ni ngawt thin mai. Ukung, eng hna maw i lo thawh bik em em a? Min han hrilh ve la maw le." a han ti ve a.

Kunga chu a nui kur kur reng a. "A khai, ka sawi rih lo mai ang e." tih pahin vawkchaw bel chhuan lai chu a chawk sauh sauh a. Titi dang dang an sawi kai hrep hnu chuan tlangval dang lo leng hmasa te chu tin tumin an tho ta sang sang a. An nula rim chuan "Awiha engati nge in thawh tak uaih mai? Lenghawn ar em pawh la khuang si lo." a lo ti vat a.

Tlangvalho chuan "Kan chhunlam hna a rum deuh a. Bakah naktuk zingchhuah ngai leh dawn nen mut hma loh chuan thawhhai te pawh a hlauhawm e. Zan dangah kan la rawn leng leh ang chu." tiin an tin ta a. An chhuah hnu chuan Kunga chuan "Hei i chhungte hi an la leng nge an mu tawh zawk?" tiin an nula rim chu a han bia a. An nula rim chuan "Aw anni pawh an chau deuh a, an mu ta vek a nihkha." a lo ti vat a. A lahlum lai chu a hlum char char bawk a.

Rothuama han melh ralh pah chuan "Ukung, i thianpa chu keini in angah te a rawn leng ve duh a ni maw? A lo len duh tak tak pawh ka ring hleinem." a han ti a. Rothuama chu a lo nui vur vur a. Kunga chuan.....


episode-35

Kunga chuan "Engah nge maw a duh loh te i rin mai mai le, chaw pawh ei hman lovin ka chawei min rawn tur tho a. Keipawhin ka ei puar hman loh phah hial zawk a lawm." a lo tih chuan an nui ham ham a. "Awi Ukung fiamthu hi thawh reng lo teh." an nula rim chuan a ti hlak hlak a. Kunga lah chuan nuih huah huah pah hian "Fiamthu ka thawh reng reng lo." a lo ti a. A mah chuan a nui vei chur chur a.

Rothuama pawh a nui hawk hawk a. "Dawt a ni ngawt lo maithei a sin." a lo ti ve a. An nula rim chuan Rothuama chu nuih seih pah hian "Ka awih ngam chuang lo." a lo ti a. Eng eng emaw sawiin an titi zel a, rei vak loah Kunga chuan "Khaw'nge inthiar ka duh riau mai tikhan lo inkawm teh u." tiin a thiante pahnih chu a han thlahfal ta a.

Rothuama te pahnih chuan sawi tur an van dun ngei mai. Rei ngial chu an ngawi dun vang vang a. Rothuama chuan sawi mai tur a hre si lo, a mipa zawk a ni a han biak hmasak chu a mawiin a hre si. Sawi tur a han ngaihtuah chiam chiam thin a, a bo tulh tulh mai si.

A tawpah zawng nula zawk chu rawn tawng chhuak ta nge ngein "Uthuama chu i lung a len hmel hle mai. I thianpa lah chuan a rawn hruai mauh mai si che a, lenna tur dang a tam awm vei nen." a rawn ti chhuak ta a.

Rothuama chuan "Mai mai a, kei nin khawilamah nge maw lenna tur te han hre viau se min tih le?" tiin a lo chhang ve a. An boruak pawh a zang ta deuh huai mai. Mahse, a nihna takah chuan Rothuama hian an nula rim chu a thianpa sawi tirh a tang tawh khan ama tan a thianpa chuan a ti tih chu a hre ngei takna a, chutia ngaihzawng ena han en nghal mai chu a thei der si lo.

An nula rim hi nula a pumrua leh hmelah pawh vantlang tak mai, hmaifang fel vang mai leh rualkawm thiam tak a ni a. Nula ngo lam deuh, sam sei zan mai, mitmeng fiah kak mai hi a ni a. Ama tawkah chuan inleng pawh a ngah thin viau reng a ni.

Mahse, Rothuam zawng kan hriat tawh ang khan nula mi lo zet mai, ngaihzawng pangngai tia sawi tur phei chu pakhat mah la nei lo leh hmeichhiaa buai ngai lo. Ramvah leh sakah bak ngaihtuah em em nei lo a ni miau a. Nula ai chuan tuk loh ramngaw dur pui mai hian a lung a len zawk tlat a. Nulaina zahtheih loh chhuaha an hel te a nih ngawt loh chuan ngaihzawng leh nupui neihna chang a hre dawn emawni le tih tur ang chi kha a ni tlat si.

Nula hmeltha leh fel te chu a hmu loin a hre lo pawh a ni bik lo. Tuna an nula rim mek pawh chu a hmel hrim hrim phei chu tha lo a ti pawh a ni lo. Mahse, ngaihzawng neih chakna leh phurna a nei lo hrim hrim a ni zawk. Chuvangin thiantha kawm baka kawm tumna a nei lo reng reng.

Rei ngial an inkawm hnu chuan lenghawn ar a rawn khuang chiah chiah a. Kunga pawh nui thu hian a rawn lut ve leh ta bawk a. An nula rim chuan "I ek a tang emni pek, i va thang rei char char ve?" a lo ti fiam a.

Kunga chuan "Kan lo kal hma khan ka thianpa hian ek rei dan min hrilh a, ka han zir chhin a lawm mawle..." a tih chuan an nuiho dar dar. Rothuama chuan nui tut tut chung hian "I va e rei lo si ve, thiam i intih tehreng nen." a lo ti fiam ve thung a.

Tin mai tum chuan Rothuama te pahnih chu an tho ta a, chutia tin an tum lai tak chuan veng mawng lamah "Sa a tla e! Sa a tla e!" tih thawm an hre ta mai. Chu veleh mangtha pawh inmangtha fumfe hman ta lo chuan Rothuama te thian dun chu an tlan ta nal nal mai a.

Rothuama chu inah a tlan lut rawk a, a pu silai chu a chuh nghal a. Chemtum chu sahmimah khungin silai nen chuan hmanhmawh takin a tlan chhuak leh nghal a. A puin "Taia, fimkhur viau tur a ni ngai aw." a rawn tih pawh chu a chhang hman tawh lo. Thui fe a tlan hnu chuan a hnungah Kunga chuan a rawn umpha ve a, tichuan sa tlakna veng mawng lam chu an pan ta dawr dawr a.

Tlangval dangho pawh sa a tla tih hriain an hmanraw neih ang ang nen sa tlakna lam chu an rawn pankhawm a. Meichher chhiin an inau khawm chel chul a. Veng mawng hmeithai vawk sapuii a seh hi a lo ni a. A vawk a la len vak loh a vangin ramhnuai lamah a lo pu daih tawh mai hi a lo ni a.

Rothuama te pahnih chu a thleng hmasa pawl an nih a vangin meichher leh silai nen sakei chu an umzui ta a. A lo thleng hmasa a piangin meichher nen an rawn umzui nghal zel bawk a. Tlangval awm zawng zawng chu kar loah sakei um turin ramhnuaiah an tlan lut zo ta duak mai.

Lali chuan chutia a inlengte pahnih mangtha pawh inmangtha fumfe hman lova an tlan liam ta mai chu pawi a tiin Rothuama chu hmuh leh a chak em em mai a. Rothuama pawh sakei uma a kal ve ngei a rin a vangin a hmuh leh theih hlauh beiseina nen a pa hnenah chuan thil chinchang hre chiang tura veng mawng lama kal ve chu a dil ta rawih a. A rin loh deuh maiin a pa chuan a lo remti ve hlauh mai a, a lawm ngei mai.

Hetiang hunah hian mipate chauh an kal ngai lo reng a. A sa umna lamah kal ve lo mahse vanduai chhungte thlamuan tur leh hnem tur hian hmeichhia te pawh an kal ve thin reng a ni. Lali chu lawm tak leh hmanhmawh takin veng mawnglamah chuan thian pawh sawm kual lovin a liam thla ve ta nghal a.......

episode-36

Lalin satlakna hmun a zuk thlen chuan mi pawh an lo thahnem hle reng a. Mahse, tlangval erawh sakei uma an liam zawh vek a vangin tumah hmuh tur an awm lo. A rin loh deuh maiin Lianmawii pawh a hmu ve nawlh mai a. A bulah va kal hnaiin "Awi thiannu, i dam tawh maw? Ka rawn tlawh zing thei bik si lo che a, kha i va nula tawh ve." a han ti a.

Lianmawii pawh chuan a thiannu Lali a han hmu tehnawlh chu a hlim hle a. "Ka tha tawh lutuk hei, hmeichhe tan phei chuan chhuah te hi a har em a lawm. Keimah tak pawh hi remchangah ka lo la leng ang. Nang i dam zawk maw?" tiin a lo chhang a.

Lali chuan, "Aw, keini pawh kan dam a ni mai e. Tunlai chu ka pa hriselna hi a tlahniam leh deuh a. Mahse ngaihtuahawm chu a ni lo. Zan zanah te chuan i rawn chhuah peih pawh ka lo ring chiah lova." a han ti leh a.

Lianmawii chuan "Awi nia, Ku Thuama kha silai nen a tlanchhuak ve bawk sia. Eng e chanchin tal zuk hre teh ka nuin min tia..." tii a chhang a. Lali chuan "Nia kha, hawn an tum lai takin satlak thu an rawn au ta mai sia, mangtha pawh kan inmangtha mumal ta reng reng lo chuan." nui hak hak pah hian a han ti a.

Lianmawii chuan "A nih chu maw le, a lo zin remchan leh veleh ala rawn leng leh anga a ni mai a lawm. Tunlai chu sa hi a lo lang khat viau a sin maw le... A zia lo tak tak a ni." a ti a. Lali chuan a thiannu thu sawi a lo zin leh hunah a tih lai chu a lo la fuh hle mai a,

"Awi thiannu, chu hawn leh mai te a tum hnai emni? A lo zin chauh emaw ka ti mai a sin." a han ti leh hram a. Lianmawii chuan "Aw zin chauh e. Mahse, tunlai an khaw lam boruak a rih deuh bakah a thiante damlo an awm nualin a sawi a. Tun tum a lo zin chu a intibuai lutuk a, chelh pawh kan chelh ngam lo a nih hi. Naktuka hawn tum maw le a nih le." a han tih chuan Lali chu a lo tek chhuai mai.

Pangngai deuh hian "Anih tak chu maw le, ni e a lo zin leh hunah te kan la inkawm leh thei em ang chu." a lo ti liam ve mai a. Lianmawii chuan "Aw kei chu thiannu, rei awm thei pawh ka ni lo. Ka nu khan hawn har a hlau si a, hetia chinchang te ka hriat tawh chuan ka tinsan mai ang che. Remchang hmasa berah ka lo la leng ang." a ti a.

Lali chuan "Aw le, nia ila damkawr em kha han hawng rawh khai. Keipawh ka awm rei kher lovang, i lo leng ngei ngei dawn nia aw." tiin an inmangtha a, tichuan Lianmawii chu an in lam panin a hawng ta a. Lianmawii kal hnu chuan Lali chu a inngaihtuah nasa hle a.

Chutia Rothuama naktuk maia hawn tum a nih si chuan zanina a hmuh leh ngei ngei chu a ngai a ni. An lo len lai khan engmah chutiang lam a sawi miah si lova. Amah tak pawhin zawh nachang pawh a lo hre chiah lo bawk nen, vawikhat tal Rothuama hmu lova hawn leh chu a tum lo ta bur mai.

Mahse, sakei umtuteho chu eng hunah nge an lo let leh ang tih hriat ngam a ni hauh lo mai a. Tin, dam takin nge an lo hawn ang a, thi leh hliam nuaiin tih pawh hriat a ni der lo. A mah Rothuama tak pawh chu mihuaisen leh pasaltha a nih a vangin a vanduaiah te a tang lo ang tih tunge sawi thei. Zan thil a ni lehnghal. Chung zawng zawng a ngaihtuah phei chuan a rilru a buai map mai.

Engpawh nise, a tlai emaw tlai lo emaw lo nghah chhuah hrim hrim chu a duh a. Hmuh falna hun a awm ang nge awm lo ang tih pawh hriat loh nimahse, beiseina nena lo nghah tawp mai chu a duh a ni. A nih loh chuan a thinlunga thu awm te hi engtikah nge a hlan tak ang? Engtikah nge a lo zin leh dawn tih lah hriat ni si lo. Chuvangin zahtheih loh chhuah a ngai a ni tih a hrechiang hle.

Rothuama leh Kunga chuan uluk leh fimkhur takin Sahnu chu an chhui zel a, an hnung hla feah hian a tam zawk chuan an rawn chhui ve zel bawk a. Kunga chuan midangho lo nghah ve rih phawt chu a tha zawk lawngmaw? A han ti thin a. Rothuama lah chuan "I duh leh lo nghak rawh." a tihsan then mai a. Sawi nawn ngam chi lah ni hek suh.

An chhui an chhui a, a chhui pawh an chhui thui tawh kher mai. A tawpah chuan kawr chhengchhe zet maiah hian an chhui thleng ta a. Kawr chu thui pawh an zawh hmain puk angreng deuh, lungpui lian zet maiina a hliah khup karah hian sakei chuan a saseh chu a lo hnuk lut ta a.

Rothuama te an thlen chuan sakei chu a inhrosa ta a. Kunga chuan nuam a ti fahran lo kher mai. Amah sakei chu a hmuh theih si loh, hmu tur chuan kal hnaih hle a ngaih dawn bakah meichher nena kal a ngai dawn a. Chuti a nih loh chuan kahhlum ngaihna a awm dawn miah lo.

Rothuama chuan a meichher ken chu a han siamtha sauh sauh a. A vap te chu leiah nawr thlain a han keng kak deuh a. Meichher pawh a alh eng sawt mai. A thianpa hnenah chuan "I hlau deuh emni?" a han ti a. Kunga chuan a lu a lo thing vat a. Mahse, a hmelah chuan a hlau deuh a ni tih chu a hriat viau tho mai.

Rothuama chuan a silai leh a mu chu a han endik leh te te a. Chutih chhung chuan sakei chu nasa tak mai hian a lo inhrosa kuk kuk a. A sa seh chu laksak a phal loh hmel kher mai. Rothuama erawh chuan silaimu thun that mawlh mawlh pah chuan "Iak iak mahla ka kap tho tho ang che." a ti chher chher mai.....

episode-37

Rothuama chuan a meichher ken lai chu Kunga pek pahin "Thianpa, i ngam tawka hnaiah hian meichher hi lo keng la, keiin ka'n veh hnai ang e. Ani inhrosa mai mai hi chu engahmah ngai suh." a han ti a. Kunga chuan a chhang hauh lo. Buk nghauh nghauh pah hian meichher chu a la ve mai a.

Kalna tur lam Rothuama kawhhmuhna lamah chuan a ngam tawka thui a va kal a. Chuta tang chuan meichher eng chuan sakei tawmna chu a en pha viai viai a. Rothuama chuan thawm dim takin sakei tawmna lam chu a pan bawk a. A duh ang zana sakei chu a la hmuh chian theih loh a vangin a thianpa chu tlem kal belh leh hlek turin a han hui a. Mahse, kunga ngam chin chu a tawp ta tlat mai si.

Rothuama chuan a thianpa chu a han hui nawn ngial thin a . Mahse, kunga chuan chetsawn zai reng a rel thei tawh lo. A dinna hmunah chuan khur zawih zawih chungin a ding a. A thianpa hlau hmel leh khur nasa lutuk a hmuh chuan Rothuama pawhin phut enah a en duh ta lova. A mawh love, Kunga leh sakei tawmna chu hlam thum lo liam a ni tawh miau lo a ni.

Rothuama chuan penkhat a han pen hma leh hret a. Chutah chuan sakei mit de thiang rual mai chu meichher en chin leh chin loah chuan a han hmu ta a. Chu baka eng beisei tur a awm tawh lo tih hriaiin a han tin ta vang vang mai a. Mahse, sakei chu a theihtawpa lo inhrosa mek leh che ve reng a nih a vangin a kap mai thei bik tlat lo.

Mahse, a kah vat loh chuan an inhnaih tawh si a sakei chuan a saseh rawn chuhpui tumtu chu tupawh nise a zuan mai hreh dawn hauh lo tih chu chiangsa a ni a. Rothuama pawhin chu chu hre ranin a silai chu a tin uluk hle mai a. Chutih naka laiin an hnunga rawn zuitu thahnem takte thawm a rawn hnai tawh si.

Chumi hlauthawng leh mangang chuan sakei pawh a phili buai nghal a. A hmuh hmuh, a rem rem zuan mai duh hmel a pu ta. Chutah zet chuan Rothuama chuan a mit a han siai vang vang a. Mipui rawn nanchin hma leh sakeiin zuan tuma a bawh hniam suai lai tak mai chuan a silai chu a han hmet puak ta dur mai a. A hnai set sawt bawk a silai puah rual chuan sakei chu a awp nghal rup a. Rothuama chuan a tumna a mit leh mit inkar takah a kap fuh tih a hre nghal mai.

Mahse, sakei chu a thih nghal mai loh a vangin a rawn tho leh ta tlat mai. Rothuama silaimu thun buai lai tak mai chuan thei leh thei lo hian a rawn zuan ta mai. Rothuama chu a lo vir zawk a, a hnuai thing tuluang karah tak mai chuan a tla zep tawt a. A silai lah a per nghal nawlh bawk a.

Sakeiin a tum tak a zuan thelh tih a hriat rualin a rawn inher leh nghal a. Silai chuhna hman a awm tawh miau loh a vangin Rothuama chuan a sahmima chemtum awm chu a phawrh vat a. Sakei rawn zuang nawn leh chiah chu a tha tawp hian a lo vai ta mai a.

Chu zet zawng sakei pawhin a tuar ta bik lova. Dul thler hnuang chung chuan Rothuama ke bulah chuan a rawn tla thum ta tawk mai a. Rothuama chuan han sah nawn leh sak tumin a han tin uaih a. Mahse, che zui tur a awm tak loh a vangin a chem chu a dahthla leh ta zawk a. Sakei rap chung chuan thawk a la ham ham a.

A thianpa chu a han en a, a hmelah chuan hlauhna hlir a hmu a. "Thianpa, hlauh tur a awm tawh love, hei a bawp rawn man rawh khai. Ka rap bet reng tawh a nia." a tih chuan Kunga chu meichher nen khur dat dat chungin a lo kal hnai ve ta hram a.

Rei lo teah khawtual tlangval an rawn thleng chawpchilh nghal a. Rothuama sakei kah leh a vawk seh chu an rawn hmuhin sawi tur an ngah hlawm kher mai. Kunga pawh a hlauhna ten an kiansan nghal duak a. A sawi tur ngah berah a tang nghal bawk a.

Sakei chu an han belchiang vat vat hlawm a. Rothuama chuan a mit leh a mit inkar takah a lo kap a. Tin, a thin leh ril te chu a vawi khat lo vaiah khan an thler chhe nasa hle bawk a. Han damchhuah ngaihna ziazang a lo awm lo a ni.

Pasaltha dang leh val upa te chuan Rothuama chu an chawimawi thiam hle a. Mahse, Rothuama ber chuan a vanneih liau liau a nih thu bak a sawi duh der si lo. Tichuan a zawnna tur hlang te siamin tlangvalho chuan phur takin sakei leh a saseh chu an zawn hawng ta a.

In an thlen chuan a vawk seh neitu veng mawng hmeithai inah an luhpui hmasa ber a. Nunau leh hmeichhia pawh an lo la thahem viau mai. Chung zingah chuan Rothuama hmuh ngei ngei tuma lo chang ngar ngar Lali pawh a bang lo.

A hnuhnung berah Rothuama chu a rawn thleng ve a, an lo lawm kher mai. Mahse, mi zakzum tih takah mi karah chuan a theih ang angin a biru hram hram zel a. A chang phei chuan an han zawng leh rih thin. Lali pawhin chhuang takin a lo zawng ru ngar ngar bawk a.

Sakei chu lal inah an zawn chho leh a, a tuka a lu awih tur chuan an tinsan ta hlawm a. Mahse, lal inah erawh chuan Rothuama chu a kal ve duh miau loh a vangin a thianpa nen chuan Kunga te in lam an pan ta daih thung a. Rei pawh awm lovin Kunga te in a tang chuan a haw leh nghal a.

Mahse, a tir atanga amah lo zuiru ngar ngartu an awm tih a hriat miau loh a vangin tuikhur peng a thlen dawna "Uthuam" tih ri chuan a tiphu deuh zawk a. A han lehhawi nak chuan Lali a lo ni reng mai tih a hre nghal

episode-38

Rothuama chuan Lali a hmuh chuan mak a ti kher mai. "Nang maw? Engtizia nge ni ta ngai?" a han ti he haw a. Lali chuan Rothuama en ha chung chuan "Engatinge naktuka hawn i tum min hrilh loh?" a han ti tawng mai a. Rothuama chu a hawi hai nasa ngei mai.

Rothuama chuan, "Nia, ih eng lo. Tun tum ka rawn zin chu hman meuh lo chunga lo zin ka nia. Ka sawi lo tih pawh ka lo hre hleinem. Eng e helaiah tunang hun hunah te i tih a?" tiin a han zawt a. Lali chuan "Naktukah haw i tum tih ka hria a, hmuh ngei che ka duh vangin ka zui ru che a ni." a tih chuan Rothuama chuan mak a ti kher mai.

"Ngawi teh Lali, i thusawi awmzia ka hre hauh lo a nia. Eng e kei tehlul min hmuh duhna chhan chu a va pawimawh awm ve?" a han ti a. Lali chuan chhang ta lem lo chuan Rothuama banah chuan kaiin tuikhur pengah chuan a pawtthla ta dawr dawr a.

Rothuama chuan "Ngawi teh ngawi teh Lali, eng e thil awmzia te pawh han sawi hmasa phawt la maw le." a han ti leh tawk tawk a. Lali chuan "Hetilai zawng a ualau e mai thlang deuhah khuan ka hrilh ang che." tih pahin Rothuama chu a kai dawr dawr a. Thlang fe an thlen hnu chuan Lali chuan Rothuama chu a thlah ve ta chauh a.

Rothuama chuan "Lali, a mak hle mai tunlai ka thil tawn chu. Hei kan awmna hi a fianrial tawk tawh a. Ka laka i thil sawi duh chu inthlahrung lovin han sawi ta che." a ti a. Lali chu a ngawi leh ta tlat mai thung a.

Rei ngial a nghah hnu pawha Lali chu a ngawih tak reng a vangin Rothuama bawk chuan "Eng e awm zia, i ngawih leh tak daih si?" a han ti a. Lali chuan Rothuama kut chu dim taka vuanin "Uthuam, engatinge nang hi ka lo tawn che?" a han ti a.

Rothuama lah Lali thil sawi leh a ngaihtuahna a inpersan nasa mai si. "Ka hre lo le, i tihpalh mai mai a niang." a han tihsak ngawt pek a. Lali a lo sa phat mai. "Ka tihpalh maw? Ka tihpalh mai mai maw ni ang Uthuam?" a ti ta sek sek mai. Rothuama lahin chhan leh mai dan a hre tawh si lo.

"Nangmah vang hian tun hun hi ka thleng a. Mawi leh mawi lo ka dawn lo, mualpho lam ka ngaihtuah phak tawh lo. Thih huamin a ni tunah hian i bula ka awm ni. Uthuam, heti em em hian ka thinlung min neihsak ang tih hi ka ring ngai lova, ka nun zawng zawng chu nangmah i ni ang tih hi ka hre ngai lo a sin." a han ti ta sep sep a.

Rothuama rilru chu a buai ve ta map mai. Sawi mai tur lah a hre si lo, a hawi vual vual ringawt tawh mai. "Lali, ngaihzawng hi ka uksak vak lova, chu chu ka inchhuanna ni lo se, tunang ringawt pawh hian ka nun chu a buai tawk em em a ni. Kan khua ka ngai a, ka chhungte leh ka thian ten min ngaiin min mamawh ngawih ngawih. Chu chauh chuan ka thinlung a luah a ni. Min hrethiam ang che." a han ti ve a.

Lali chuan "Uthuam, in vangkhuaah ngei chuan i chhungte nih a, i thiante anga i thinlung luahtu nih ve chu ka duh a ni. Chumi hlawh chhuak tur chuan thih ka huam a sin." tih pahin Rothuama chu a nek nalh nalh a. Rothuama chuan sawi tur a haihchham leh ta....

Lali vek chuan "Uthuam, helai rem laiah hian thu lawk ang. Ka ke a kham lutuk." tih pahin Rothuama chu a han kai leh a. Hmun rem deuhah hian a kuai thu a. A mah pawh chu thuin Rothuama chu a ngheng ar ar a.

Rothuama chuan "Ngawi teh Lali, khua hi a var har tawh dawn miah lo a nia. I hawn mai hi a tha tawh zawk ang." a tih chuan Lali chuan Rothuama chu a nam thlu thuai a. "Ka haw duh tawh lo, i kiangah min hruai ve rawh." tih pahin a mah chuan a kuah nghal a.

Rothuama chuan lo namsawn a han tuma a. Mahse, Lali chu a lo tang kawh nasa mai. "Uthuam, engpawh ka huam ka tih kha. Thih hial pawh ka huam a sin nangvang chuan." tiin Rothuama chu a kuah nghet sauh sauh a. Rothuama tan tak pawh chuan han tih ngaihna vak a vang kher mai.

Lali chuan Rothuama chu a kuah vawng vawng a. Rothuama erawh chuan a kuthmawr pawhin a khawih miah lo. "Uthuam, mi pangngai ang niha chan loh che ai chuan mi pangngai piah lam niha i ta nih ka thlang zawk. Chuvangin min hrethiam rawh aw." a ti tham tiak a. Rothuama chuan a chhang lo.

Mahse, chutia hmeichhia zawkin a bawh ur reng takah chuan mipa diktak ni ve si chu a hriat loh karin a lo danglam ve ta huih mai. Chu chu a hnuailam chuan a tichiang a ni. Mipa insum thei a ni a. Mahse, tun tum zet chu a hun leh hmunin a zir bakah hmeichhiain a zir si a. Rothuama meuh pawh a ngaihtuahna a tawi tuk zo ta mai.

Englai karin nge Lali chu a lo kuah ve tih pawh a hre lo. Mahse, a hriat chhuah meuh chuan a lo pawm nghet ve hle tawh mai hi a lo ni a. Lali lah chuan hmeichhia zawk ka nih hi tih tumna a nei bik si lo. A hnuaia a duh ber mai a bawhbeh chu a thiam ang angin a fawp ve tawn tawn a. Khawiah nge an awm a eng hun nge ni tawh tih lam a ngaihtuah lo.

A duh ber kiangah a awm a, a duhthusam leh beiseina chu a takin a chang mek a ni tih chiah a hria. A meng phal lova, a muhil phal hek lo. Rothuama mipatna rawn chhuak ve ta pawh chu a hre lo a ni lova, a haider phal lo mai zawk a ni. Hetiang hun hii a mumangah pawh a lo la mang chhin ngai lova, a tan chuan sawi thiam ngaihna pawh a awm lo.

episode-38

Mikawlh sakawlh hmaa zam ngai lo val, pasaltha huaisen leh mipa dik tak Rothuama chu Lali hmaah chuan a zam lova, a dawih hek lo. Zakin a khur lova, thil tha lo a ni tih hriaiin a insum mai zawk a ni. Mahse, puithiam thianghlim a ni bik lova, mipangngai ang a chakna nei lo a nih bik miau loh a vangin a mipatna chuan a taksa mai ni lo a rilru ngaihtuahna thlengin a fan mek a ni.

A hmeiichhia mahin a zir miau a. Engtinnge chutiang hun leh hmun duhthusam, nula kei ka ni inti chin ngatin a bawhbeh reng miau a vangin Rothuama mihring mihrinna chuan ro a rawn rel ve lo thei ta lo. Lali chu a lehthal thawk a. Lali lahin chu hun chu sawi miah si lova a lo nghah ngar ngar a nih a vangin pip e pup e a lo ti si lo. Rothuama chu a inthlahrung lo ta kher mai.

Mi zakzum, hmeichhe belbul ngai lo leh zei lo lutuk thin Rothuama kha a ni ta lo emaw tih a awl kher mai. "Chak tak leh huai takin awm phawt mai rawh, i rah chin a piang chu i ram a ni zel ang" tih ang mai khan a khawih chin a piang chu a ta anni nghal duak duak mai si a, Rothuama chuan kar lovah ram a la ta duai duai mai.

A ram lak lah chu ram thami, engkim ngeih tur tih hriat ngawih ngawih khawpa duhawm a ni a. Han pal liam mai phal chi a ni der lo. Hun chu a ding ta thuap emaw tih tur hi a ni a, engkim mai chu a chawl zo ta a ni ber mai. Rothuama te pahnih tih chauh loh chu.

Eng emaw chen chutia Rothuama leh Lali'n tuikhur kawng remchang laia taksa chetna an han chan meuh chuan Lali chuan thawmhnaw inbel reng a lo nei ta lo. Mahse, saruaka din leh piang chhuak vek kan nih ang ngeiin saruaka awm chu a zak lova, zah a hnekin saruak a nih pawh a inhre phal mawlh tawh lo.

Chutia an thawmhnaw ten tangkaina reng an neih loh chiah chuan a ni Lali mawina leh a siamtu kut themthiam zia a lanchian lehzual. Rothuama chuan a en thin a, a en ning thei lo. A taksa peng tin mai chu uluk eltianga remkhawm leh vuah vek annih rinhlelh ngaihna a awm lo.

A hnute, sawntlung pawng ang maia vum pawng al mai te, bial mum hmai mai leh mipa la deh ngai reng reng loh tih hriat tak maia kawh mar lah mai te, a hmur lah a hnute bu mil tawk leka invuah, a thawk zawnga phu aih aih mai te chuan mithi te pawh a kaihthawh theih a rinawm lek lek mai a ni.

A dulah a han chul thlaksak den den a, a pum te lah chu phaizawl hmun tha an sawi ang maia cham diai mai hi a lo ni leh ta zel a. A kawngbawr lah chu sawi nghek ai chuan a hmuh hian a fiah zawk an tih ang chi kha a lo ni. A pangti lum ther ther chuan Rothuama chu mi angloah a chhuah mai ang tih hlauhthawnawm a ni ta.

A kawngbawr hnuailam a han thleng a, e khai engkim mai chu a bu ang thlapin a lo awm. A sam tam dan leh a kir buk dan lah chu a hranpa ngata rem a nih a rinawm. A pawng lai tur a pawng al mai a, a khuar lai tur lah an khuar kik kek tak mai si a leh...

A ramri inthenna lai turah chuan luite luang mar ang mai hian a lo inthen kak tiar a. Lak hran theih an nih chuan loh zia hriat nan a laiah mual pawng duhawm tak chuan intithu tak maiin lailum a lo chuh a, a hnuai chiahah chuan lungloh tui ai pawha hlu luan luhna leh luan chhuahna tur a lo kaw set mai bawk a. Chung zawng zawng inremkhawm mawina leh duhawmna chuan Rothuama mipatna chu a hip kang vek a ni ber mai.

Rothuama meuh pawhin engtia han tan tur nge tih a haihchham phah lek lek mai nia. Mahse, a bo rei lo. Chu chu Lali rawn te chhuak that thawm chuan a nemnghet. Lali chu a rum chhuak thawt thawt a, Rothuama chuan a chawlh phah lo. Chawl tur pawhin Lali chuan a duh hek lo. He khawvelah hian mihring dang an awm ve a ni tih reng an hre tawh lo a ni ber mai.

Tawnmang ram ai pawha nuam zawk ramah chuan a chen mai ni lo an han liluh dun ta tak tak mai chu "An thawm mitdelte hriat tham" tih ang mai khan thawm awm thei zawng zawng an chhuah a, ri thei zawng zawng an ri sawk sawk mai. Hetiang reng reng hian mipa leh hmeichhia hi a lo inpawh theih a ni maw tih an hriat phah ta a ni.

Lali chu a meng phal mawlh lo, a bula tlangsam leh a tham theih ang ang chu a tham tawn tawn a. Hah miah si lova chutiang em ema a thawk rin ber tum chu a ni hial ang. Rum hak hak chung chuan a lu a thle tawn sek a. Nawmna mai piah lama nawm lehzualna kawt chhuah a thlen dawn meuh phei chuan a rak chhuak nawk nawk mai. Rothuama pawhin tunge a niha eng e a nih intheihnghilh thak khawpa uarin a hna chu a han thawk ta a le, engdang a ngai tawh lo...

Rothuama chu vawi thum a rawn rum chhuak ve ta hawk a, Lali phei chu a khur ngawt ngawt tawh. Rothuama chuan a lehpek awm lo lek khawpa tan a han lak leh meuh chuan Lali chungah a bawk zawi ta hle hle mai. Lali dangro lutuk chu a thaw huam huam a, chil lem tur em pawh a lo nei tawh lo. A rawn meng chhuak diar diar a, Vana arsi eng tlep tuarho pawh a hmu te chem chem mai. Rothuama phei chu a meng peih rih ngang lo a niang, chetsawn zai pawh a rel thei lo. An awm ngai chuan an awm ta ngat ngat a. Rei vak lova ui bauh thawm an hriat chuan rilru fim an pu ve leh thei ta hram chauh a ni e................

episode-40

Rothuama te pahnih chu ngawi rengin an inha mawlh mawlh a. Rothuama chuan Lali thawmhnaw te chu a ben faisak a. A rilruah erawh a inthiam lo kher mai. Hetiang thil a nunah a vawikhatna a ni a, tawnsabawp lutuk lehnghala a han dai pelh ta mai chu pawi a ti hle mai a. Mahse, chu erawh chuan awmzia a nei thui lo khawp mai.

Lali erawh thung chu thil tha a ni lo tih hre tho mahse a duhthu ngeia chu hun lo thleng a nih a vangin an zawh hnuah zak leh deuh mahse a hlim ru veng veng a. Mahse, sawi tur a van ngang mai. Rothuama chuan "Lali, a zia lo hle mai zanina thil thleng chu. Engpawh nise haw ila, thlen nawn tir tawh lo i tum ve ve ang." a ti a. Lali chu a ngawi reng a.

Zan a rei tawhin khawvar pawh a hlat vak a rinawm lem loh a. Tichuan thawm dim takin an inzui haw ta a. Lali chuan "Uthuam, hmeichhe zakthei lo leh sihhnip lutukah pawh min ngai ngei ang tih ka ring a. Mahse, ka hmangaih em che vang a ni tih min hriatsak rawh aw. Naktukah haw i tum tih ka hriat khan ka mangang em em a. I lo zin leh hun tur lah hriat a ni si lo. Ka ngai em em che a, i tel lova hun hman hi ka hrehin ka ngai dawn takzet che a ni." a han ti ve ta thung a. Rothuama chuan a chhang lo.

"Zahpuiawm taka ka awm chhan hi ka zahtheih loh hrim hrim vang a ni bik lo asin. Midang lakah chuan zanina itana ka hlan ka zahawmna leh thianghlimna kha ka phal awzawng bik lo a nia. Min sual lui pawh nise thih thain ka tang ngei ang. Chu chu min hriatsak ve hram rawh aw." Lali chuan a han tih zawm leh a. Rothuama chuan "Ni e, ka hrethiam a lawm. Mahse, zep thu a cheng lova, ngaihzawng hi ka ngaihven lem lo tih i hriat ka ring a. Tunah pawh hian ka ngaihzawn che hi ka hre hran lo, ka ngaizawng dawn che nge dawn lo che tih pawh ka sawi mai thei lo. Chumiah chuan nang pawhin min hrethiam ve a ni ang chu." a han ti ve a.

Lali chuan chhan a han tum leh a. Mahse, chhan mai dan tur a van ngang mai. A duh zia leh a hmangaih zia tawngkam mai ni lo, a tak ngeiin a lantir tawh a. Chupawh a lantir theihna sang leh ril berin. Engkim mai chu Rothuama kutah a awm tawh a ni tih a hria. Chuvangin a chhang leh duh ta lova. A nin a duh leh hmangaih anga a lo hmangaih ve thei ta lo a nih pawhin a nat mai a ngai dawn tih a hria. Chumi huama tun hi thleng a ni reng a.

Lali te in peng an thlen hma deuh chuan Lali pa, an lam pana rawn kal an hmu ta mai. Lali chu a zawng a nih ngei a rinawm. Rothuama chuan hnim buk phenah Lali chu a pawt thu vat a. Lali hlauthawng lutuk chu a khur dawt dawt mai. Mahse, vanneih thlak tak maiin apa chuan a rawn hmu ve hman lo hlauh. Thinrim hmel takin a kal liam ta a.

Lali chuan "Awi kei chu ka hlau e! Min hmuh hunah engtin tak min ti ang maw?" a ti mial mial a. Rothuama chuan "Engtin emaw chhuanlam tha tak i mut pahin i ngaihtuah dawn nia. A awm loh lai khian lut phawt mai rawh." a ti a. Lai'n a chhan leh dawn lai tak chuan a nu a rawn khuh ta kharh mai a. Chu ve leh rang lutukin Lali chu a petek lut nghal a. Mangtha han intih khawmuanna hman pawh awm ta hek lo, Rothuama pawh chu hmanhmawh takin a pute in lam pan chuan a kal ve ta nghal bawk a.

Khawvar ruala chhuah a duh avangin a mut ting chuan thawh a hai palh ang tih a hlau hle mai a. Khaw var a hla tawh lo bawk nen mut loh law law mai chu a tum ta zawk a. Eng eng emaw ngaihtuahin tapchhakah chuan a thu a, mei lakaiin a fawp hlat hlat a. Lali chu a han ngaihtuah chhuak leh a, a pa khan a hmuh hunah a vuak ngei a ring a, a lainat reuh khawp mai. An hun hman dan a han ngaihtuah let leh a, amah chauha awm e ti lo chuan a zak chem chemin a inhria.

Ngaihzawn tlak a ni em tih te a han ngaihtuah zawm zel a, a hmel phei chu a chhe hran lo. A mizia leh nungchang pawh zanin thil thleng tih loh kha chu han sawisel leh iaina tur pawh a hre hran lo. Mahse, a mah zawk chuan hmeichhia a lawm loh hrim hrimna hian ngaihzawng neih a peih lo a ni.

Lali pawh a iai leh duh loh hrim hrim lam ni lovin a ngaihzawn zui a ring chiah lova. Lo ngaizawng dawn ta tehreng pawh nise khua hmun lo nen, an inhmu khat dawn si a chuvangin ngaihzawn zui loh law law mai chu a finthlak berin a hria a ni.

Chutia eng eng emaw ngaihtuah kual vela a thut lai chuan khua pawh a rawn var tan ta der mai a. Rothuama chuan zan lama an hriat lawk vek tawh tho a vangin a pute pawh kaihthawh loh law law mai tha a ti a. Tichuan a insiam sawk sawk a, lei lung a lang tan tih chuan an khaw lam pan chuan a chhuak ta vang vang a. Khua a pelh dawn chuan tum lawk pawh nei miah si lo hian khaw chhung lam chu a hawi let zauh a. A rilruah Lali a rawn lang nghal zawk a, tunah hian tui takin a muhil mek ang nge hlauthawng takin a thaw dep dep ang? Nge a mah chu a rawn ngaihtuah vein mut zai rel a rel bik lovang tih te a ngaihtuah a. Chutiang ngaihtuahna a han nei ringawt mai pawh chu mak a inti deuh hle mai a. Mahse, a duh leh tum reng pawh ni lovin a ngaihtuahnaah a rawn lut miau si........

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)