"MITTUI LUANGIN KIR AN REL LO" BY Dwm Pachuau (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: "MITTUI LUANGIN KIR AN REL LO" BY Dwm Pachuau

Unread post by Ngaia » October 24th, 2017, 11:36 pm

"MITTUI LUANGIN KIR AN REL LO"
episode - 141

Rami te khua an han lut chu an lo hmu duh hlawm kher mai. Naupanghoin an zui nghal hul hul a. Tukverhah te leh leihkapuiah te rawn chhuakin puitling pawhin an hmu duh ngiang mai. Rami te veng bik an thlen phei chuan an thenawm te chu pawnah lo tlanchhuakin Rami chu an rawn kuah a. Lungchhe vankaiin awrawl chhuak meuhin ah han tah leh rih a. Rothuama pawhin han tih vak ngaihna hre hek lo, an bulah chuan alo kawi chuang din ve mai mai a. Chutia rei mawi tawk pawna an inchilh nak nak hnu chuan an thenawm hnai ber te inah chuan an lut ta a.

An zawh tur ngah lutuk avang chuan chhan hmasak ber tur pawh hre lo khawpin an be buai a, a bawr hian an bawr luai luai ani ber mai. Rami chu a chau ngang mai a. Mahse, chauh sawi theih pawh nita hek lo. An biakna leh an zawhna zawng zawng pawh a chhang seng lo. A lungchhia nen, an tap deuh pur hlawm vek mai a hmeichheho chu. Rothuama erawh ngawi rengin alo hawi lawl lawl thung a. Nakinah chuan an lungchhia leh an thawm ring zual pawh a reh ta deuh a, chawei alo hun chho nen thenawm khawveng dangho pawh an tin ta diah diah a, thu pangngai pawh a sawi theih ta deuh.

Rami chuan thil awmzia zawng zawng chu felfai takin a han sawi ta char char a, annin an hriatthiam loh lai te an lo zawt leh zauh thin tih loh chu an reh leh ta diak lawi si a. Rei ngial a sawi hnu chuan an han tap leh rih a, an hriat loh karin khua alo thin chiang der tawh chu niin chaw an han chhum belh tha leh a, chutih chhung chuan in neitupa ber chuan Rothuama chu enin "Keini khaw tan chuan nang hi kan hmelma lian ber i ni a. Heti khawpa kan khawtlang min ching retheitu chu inkhua te an ni a, chuta chena ber leh an chhuanvawr ber chu i ni bawk a, i hming pawh hi naupang chumchiap ber pawhin an hre vek ange tih palh awl a ni"a han ti a.

Chutia ahan tih takah chuan Rothuama l am chu an en ta thap mai a. Chutah chhungkaw pa ber bawk chuan sawi chhunzawm lehin "Chutiang anih avang chuan hetia ngampa tak maia kan khua i rawn lut leh ngam mai hi i huaisen hle mai. Minazawng tan hmelma khuaa luh mai chi ani lo tih chu hriatsa vek a ni. Mahse, kha i chanchin leh inchhungkaw chanchin te han hriat chuan nangpawh i lainatawm ve hle tak mai a, keini chhung chuan hmelma ang nilovin thiantha angin kan en dawn che tih hria la ka duh, Rami vang ringawt pawh hian."a han ti a. Rothuama erawh chuan an kal lama an thiltawn kha a ngaihtuah daih thung a.

Chhungkaw nu chu lo tawng vein "Ni e, chulam chu ka lo ngaihtuah miah lova. Tunah pawh hian khuaa ilo luh thu hi kan lal beng a thleng leh tawh ngei ang, engtin nge kan tih tak ang?"hlauhthawn hmel fe hian a rawn tichhuak a. Rothuama chuan zawi leh fiah dam dap si hian "E khai, kei chu min ngaihtuah reng reng suh u. Ka lo ngaihtuah zawk chu Rami hi hei tihian ka rawn dah leh ngawt mai a ni a, in leh lo lah a nei tawh lo chu ani mai bawk si a. In hnena awm kumkhua ringawt lah a dik in a lang si lo, in te chu khawtlangin lo sak sak tehreng pawh ni ula, nula te an ni a mi zah pawh a hlawh zo lo ani thei, nangni talin in lo chhawmdawl loh zawngin mualpho leh eng ilo pawh tawh a awl hle dawn anih hi."a lo ti let ve thung a.

Pa ber chuan, "Chulamah chuan lungngai duh reng reng suh, eng ni lo mah ila ahminga kan la awm ve tawk tawk chhung hi chuan mualpho leh chhuanchhamin a awm lovang tih i awm lai ngei hian ka tiam ni rawh se."ahan ti a, Rami chubinsum tak si hian a lungchhia chu alo insut hraih hraih a. Anih leh nangmah zawk hi engtia awm nge i tum ang?"tiin a zawt let nghal a. Rothuama chuan "Ka sawi ang khan mipa leh Lawichal te chu kan tei mai mai a, kan thlen chin apiangah hian lungawina khawp hi chu kan hmu zel mai ngai a nia."alo ti sam et a.

Chutia an titi tui laitak chuan tlangval pali lai mai hi silai kengin an lo lut ta thut mai a, inchhunga lo awm ho chu an thlabar hlawm ngei mai. Englaiin nge Rami chuan a dibchhuah hman reng reng a inhre hman lo. A hriat meuh chuan Rothuama hma takah amah hliah chuan alo ding hman der tawh. A kut pahnih phar chhuakin "Khawngaih takin tina suh u, ral a ni love ral a ni lo. Ka nunna min chhanhimsaktu anih hi."alo ti nghal mawlh mawlh a. An zinga pakhat chuan "Keinin engtin tih kan tum lo, kan lal tirh anga lo kal mai kan ni a. Lalin lamah kan hruai chhoh angai dawn a ni."a han ti a. Rothuama lah chu lungkham nei awm lo fahran mai hian alo meng diar diar a. Chung tlangval ralthuam nena lo lutho pawh chu en pawh alo en chhin duh lo reng reng.

Mahse, midang an thlabar nasa hkawm mai si a. Pa ber chuan "Ni e, kan lal chuan atih tur diktak alawm a tih ni. Engpawh nise hei an lo thlenna ala rei lova, zanriah te kan han ei ve phawt anga, chumi chhung nana zawng inlo nghak thei em ang chu maw"a lo ti a. An zinga pakhat chuan "Nakin lamah chaweina hun chu ala nei zawk ang. Tunah kal ila a tha zawk ang e."alo ti ve thung a. Rami thinlung chu hlauhthawnna in a khat nghal a, a khur zawih zawih mai. Chu chu Rothuaman a hmuh chuan a lainat hle a. Zawi fiah fak hian "In lal chu ava hmanhmawh awm ve, tlanchhiat hman loh a hlau em ni?"a han ti ta nghat mai a. Boruak a tang ru ta at mai.

Rothuama tawng chu an helh ngei mai le. Mahse, tumah chet mai tum an awm chuang lova. An hmel leh an mitmengah chuan an thinrim hle ani tih a hriat reng a. Mahse, tunge an hmaa thu chu an hrexhiang tawk a, pali lai nimahse zuam ngawt chi ani lo tih an chiang. Chumai bakah a che hmasa nih chu tuman an chak lo bawk. An zinga pakhat chuan "Tha taka rawn hruai tum che kan ni a. Harsatna i siam loh hram kan duh."a rawn ti a. Rothuama chuan tha taka min hruai tum si chu inrawn thawk rip mah mah anih kha mawle."alo ti leh bauh a. Tumah tawng lo chuan rei fe mai chu a reh thap a. Tlangvalho chu an inmelh hrak hrak a, Rami chuan "Ka kal ve a ngai, ka kal ve dawn. Misual a ni lo a nia, dawt ka sawi lobawih hram rawh u."alo ti leh tawk tawk a.

Rothuama chuan tlangvalho chu muangchanga enkualin "Silai in nei tha hlawm hle mai, thir tha a nia in thlauh pakh hlauh ang e."ahan ti leh hram a. Chu chu hmanlai mipa leh mipa inngaihnepna lian tak a tling tlat. In lal hnenah chuan han kir leh ta ula, zanriah ei khamah muangmarin ka rawn rim ang tih inlo hrilh dawn nia."a han ti leh sak a. Tlangvalho chu an insehruh nasa kher mai. Mahse, chutia an hruai tur berin a tih tak siah chuan hnial ngam chuang si hek lo, lunghnur tak chuan an chhuak leh ta nge nge a. An chhuah hnu chuan Rami chu a tap teuh mai a, midangho lah chuan Rothuama chu an hlauhthawnpui em em mai bawk nen an ohi chung hlawm mai.

An nu ber chuan, "I chaw ei tur ka funsak che anga a rukin kan kawmthlang atang hian tlanchhuak mai rawh. Awi kei zawng ka hlauhthawn ang ngei ani, hrehawm ka van ti em."a ti mawlh mawlh a. Pa ber chuan a tha ber dawn em ni, an kal hlat ka ring hlek lo a nia. Tlanchhuak pawh nila khawi mah i thken hman ka ring lo. Engtinnge maw kan tih dawn le."a ti vang vang a. Rothuama chuan "Ka chungah engmah lungngaihna tur a awm lo ka tih kha, in lal chu han rim ve hrim hrim pawh ka chak alawm. Hei naupangho hi an riltam tawh viau lo maw, kan hrek reng mai ava nih hmel ve."a lo ti daih a. A hmelah leh a cheziaah hlauhna leh zamna chhete mah awm lo chu mak an ti tawp thei lo.

Pa ber chuan "Chawei pawh ava har duh awm ve kan boruak tawn chu le. Mahse, eng em kan ti lo ang chu maw."tiin rilru hah fe hian thawk a han la hawk a. "Engpawh nise chawei chu han siam ohawt mai teh u."a tih chuan xhawei an siam nghal a. Rothuama chu a ril alo tam tawh bawka a ei hnem kher mai. Midanghi erawh chawei thei aram pawh an awm lo. Zanriah an ei kham chuan an han thu muang a. Rothuama chuan "In lal chu ka han rim ang e, tikhan in lo nghak ula, engmah hlayhthawn tur a awm lo ka tih kha. Ka phur thut tak leh in lal chu ka rawn ru daih ang." A han ti a. An nuih a za lo tlang kher mai. Rami chuan zui tum teh mahse Rothuama chuan "Tlangval lennaah nulain an zui ngai love, i chauh emnkha tikhan lo mu hahdam rawh"a ti a. Eng ang pawhin dil se a rilru a thlak dawn lo tih a hriatchian a vangin Rami chuan dil enah pawh a en tawh lo. Mahse, a hlauhthawnna erawh chuan a bual hneh ngei mai. Rothuama lah chu nula rim tur chhuah chuan a chhuak mauh mai a, tichuan an lal in lam chu a pan ta chhat chhat a. Eng tak thleng zel ang maw...???

@Dwm Pachuau

"MITTUI LUANGIN KIR AN REL LO"

episode-142

Zanlai ar a khuang al al a, Rothuama lah rawn let leh tih reng a nei ta si lo. Rami chu a awm hle hle thei tawh lo, a chang leh a'n ding hluai thin a. A vei tawn chhen reng tawh mai. Midang lah an bang hek lo, an lal chuan alo man ta mai emni ang tih ringawt mai an ngaihtuah a. Atu amah muthei reng an awm lo. Tapah mei an kil bial laih a, ri hlekah an hawi rang thin kher mai.

A tawp a tawpah zawng, chhungkaw pa ber chu a rawn ding chhuak hluai a, "A ni ta em em love, thil awmzia tal ngaichanga kan lal in lam ka han pan loh chuan a dik dawn lo." a rawn ti chhuak ta phawng mai a. Rang vet hian Rami chuan "Ka lo kal ve dawn" a lo ti vat a. Mahse, chhungkaw pa ber chuan a remti tlat lo.

Lal leh khawnbawl upaho ten ngun taka Rothuama thusawi an ngaihthlak hnu chuan an ngaihdan hrang hrang te an han sawi khawm leh mam mam a. A tawpah an lal chu rawn tawng chhuakin "Eng pawh ni se, ka upa te sawi ang khan hei hi ka thutawp ni rawh se. Zanin chu he ka khuaah hian i riak thei ang. Mahse, zanin bak chu ka khuaah hian i rawn tla lut leh tawh ngai tur a ni lo. Nangmah vang hian kan buai hnem tawh a, zaninah hian eng buaina mah ka duh tawh lo a nia. Zawlbukah i riak ang a, eng buaina mah i siam tur a ni lo. Khawvar rualin khua hi chhuahsan ang che." a han ti a.

Rothuama chu alo bu nghauh a. "Ka sawi ang khan buaina siam tura lo kal ka ni lova, in siam anih ngawt loh chuan kei pawhin ka siam lovang. Mahse, thil pakhat. He khuaah hian ka rawn kal leh tawh ngai lovang tih chu ka tiam thei lo che u. Chu chu chiang takin in hre dawn nia. Mang tha tak mang rawh u." tih pahin a ding nghal a, engmah dang sawi lovin a chhuak ta nghal a.

Rothuama chhuah hnu chuan lal leh upa ho chu an in en kual hruk hruk hlawm a. Rei ngial chu khuavang kal lai ang mai hian a reh thiap mai. Chutah lal chuan aw a han thian khurh a, " Min va han hlau lo ngai ve maw le aw! Khatiang reng reng kha ka la tawng ngai lo." a rawn tichhuak sup a.

Khawnbawl upa ho pawh chuan mak an tih thu an lo sawi ve nghal mawlh nawlh a. Lal chuan "Tlangau pa, hetah hian lo kal hnai teh, khatiang mihlauhawm lakah ngat zawng fimkhur luat a awm thei ngai lo, zawlbukah a riak ngei em tih zuk chian la. Tlangvalho kha zankhuaa fimkhur tur leh inralring ru reng turin zuk hrilh ru rawh. Kha tkangval kha zawlbukah a riak lo anih phei chuan enthlatu inruat sela, zankhuain veng ru rawh se." a han ti charh charh a. Upaho chuan "Chu ngei tur chu a ni.! an lo ti liam liam a. Tlangau pa chu rang takin a chhuak nghal a.

Rothuama leh a thleninpa chu khawlaiah intawkin an in lam an pan dun a, Rothuama chuan lal te nena an inbiakna tlangpui chauh chu a hrilh a, atuk zing khawvar ruala khua chhuahsan a tum thu pawh a sawi tlang nghal a. In an thlen chuan an thaw huai huai hlawm mai. Mahse, Rami erawh chuan Rothuama kalsan hun tur a hriat chuan a hlim thei mawlh lo. Chhungkaw pa ber chuan " Mut zai i rel tawh ang u khai, naktuk zing chhuah hma i ngai si a, a chawfun tur leh sarep kha siamsak lawk ula a tha ang." a ti a. Nu ber chuan a han siamsak zung zung a, Rothuama sahmimah chuan dahin mut zai an rel ta hlawm a.

Khawfing a chah rualin Rothuama chu a tho vat a, midang tihharh hlau takin a silai leh sahmim chu a la a, kal mai tuma a inher lai tak chuan Rami kawng khar bula lo ding reng chu a hmu a. "I lo harh ve a ni ma?" a ti a.

Rami chuan "Ngawi renga kal ngawt mai i tum chu a mak hle mai." a lo ti bauh a. Rothuama chuan "I chau awm si a tihharh che kha ka inthlahrung a lawm. Bakah hetia kal mai hi a tha ber lawmni." tiin alo chhang a.

Rami chuan "Engatinge min tihharh te chu i hlauh a, chhin khat mah ka chhing hleinem. Ilo let leh ngei ang tiraw?" tih pahin Rothuama kut chu a rawn vuan a. Rothuama chuan "A tul chuan." ti chauhin alo chhang a.

Rothuama chhuak chu zuiin "Lo let leh ngei ang che." a han ti nawn leh a, Rothuama chuan a chhang lo. "Ka kal a hun tawh e, tui takin zuk mu leh tawh." tih pahin amah zawk chu a kal ta nghal a, Rami chuan mittui tling piau chunga en chungin "Dam tak leh tluang takin kal mawlh ang che." a ti a, Rorhuama kal liam tur chu a thlir reng a. Mahse, khua ala en miau loh avangin a hmu chiang thei si lo. A ke pen ri a hriat tawp thlengin a ngaitha vawng vawng a.

Rothuama ke pen chu a zawi tial tial a, Rami rilru chu a vak thui ngei mai, a inrin hman hmain a mittui a rawn dir zung zung a. A thinlung chu a ruak vek ni berin a hria. In chhunga luh leh zai pawh rel lovin Rothuama liamna lamah chuan zawite tein a pen chhet chhet a.

Rothuama chu thui tak a kal tawh a, a rilruah pawh a kal thui khawp mai. A pu te khua thleng thlenga an rawn umzui leh a thianpa, an lal ni bawk thupek ani kher kha hriatthiam har a ti a. A mah ngei chu an khuaah chuan kir leh a duh a ni. Luite tui awmna a thlen chuan a rhu chawl zawk a, a rilruah Rami a rawn lang a. Mahse, ngaihtuah zui a tum lo, an kal lama thawm mak leh dangdai zet a hmuh kha a hrechhuak zawk a, kha thil kha ani pawhin a vawikhat hmuhna anih avangin mak a ti tawp thei lo.

Pi leh pu tena an lo sawi thin, ramhuai chikhat Kawrpuithlakisen an tih ang hi anih a ring ta ber a. Alo tih buai leh ngei a rin avangin hmachhawn turin a rilru a inbuatsaih sauh sauh a. Tichuan zial pak khuk laih laih pahin kal zai a rel leh ta a.....cont.....



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:37 pm

"Mittui luangin kir an rel lo"

eipisode- 143

Rothuama chu tluang takin a kal zel a, chawhnu her zet a kal hnu chuan luite tui pakhat hi a thkenh leh ta a. Eothuana chuan khua a han hawi vang vang a, chutah rwo vak lo chawlh tha atih avangin a sahmima chawfun leh sarep chu a han phawrh a, luite kiangah chuan chaw a fak ta a. A chawfak kham chuan rei thumuang locin a tum ram lam pan chuan a kal leh ta nghal a...

Behliang mun hun vel a lo nih chuan Rothuama pawh a kal thui tawh hle a. An kal lama Rami nena thawm mak leh dangdai zet mai an hriatna ngaw chhung a han lut leh tan chu eng emaw ti zawng tak mai hian a danglam huiha in hriatna a nei ta mauh mai...

Rothuama chu a han ding deuh dat a, a hmuh theih chin zawng zawng chu hawi kualin Riley fimkhur tak Chung chuan a hawi kual hrak hrak a. Mahse, engmah a hmu lo.

Chutia eng emaw chen a kal leh hnu chuan vawi leh khata rawn rum chhuak hawm hawm ri a hre ta tlat mai le...

Rothuama chu a ding chawt a, hlauh vang ni miah loin fimkhur vang liau liau zawkin a silai chu a han tin kual zung zung a. Mahae, engmah hmuh erawh a nei lo.

Mahse, englai pawha fimkhur thin Rothuama anih miau avangin a silai chu kah mai theihin a dah reng a. Rami nen pawha an kal lama thawm mak leh dangdai an hriatna lai vel kha anih miau avangin inthlahdah a tum lo bur mai a n;.

Tuibur hmuam da awm vel a kal leh hnu chuan a hma bung kung lian zet mai chu a zar thlang lam pang chu a kul ta zuk zuk mai a. Rothuama chuan zawng an nih ngei ringin thawm dim tak chung chuan a veh hnai ta them them a.

Mahse, chu bung kung lian leh zar pharh duai maiah xhuan eng ramsa leh sava mah an awm lo tih a chian ta tlat... Rothuama pawh chuan mak a tiin a hawi hai nasa ngiang mai. A hma lawk khan bung kung kha a che lawih lawih a, bakah zawng rual thawm kha hai rual lohvin a hre bawk si...

Chutia a ngaihna hre lo zeta a din reng lai chuan thawm mak leh rapthlak deuh mai chu a rawn ri rawng rawng a. Rothuama a hawi vak vak lai chuan
a hmuh miah loh hian amah lam hnaih ber bung zarah chuan eng emawni hi a rawn fuh ta vung mai le....

Rothuaman a han hmuh chuan a ding chawt a. "Khai leh..... nangmah phiangsen bawk maw, min cho ve anih ngawt loh chuan insaseng la a tha anh." a han ti sup a. Mahse, a thil hmuh mak danglam tak chuan Rorhuama thusawi chu hreawmin a lang tlat lo....

Chu a thil hmuh chu mihring ang tak, mahse mihring han tih dawna m;hring ni si lo, mihring tiat lai ni si, a taksa sakawr pian anga awm leh mei nei ngauh si, a puma sen xhhuak vek nisi a ni a.

Rorhuama chuan "An sawi kawrpuithlakisen ngei chu i lo ni maw, ka dam chhunga ka hmuh che pawh hi ka lo inring hleinem... Lo xhhuk ka i han inhmachhawn chhin ang hmiang" a ti sup a. Mahse, Rothuama tawng ri chu hre awm pawhin a lang tlat lo.

Chu kawrpuithlakisen chu a han ang tak tak mai a, a kaah chuan patling pahnih pawh an len a rinawm tlat. A taksa leh a lang thei çhin zawng chu a sen hian a sen hlur mai a. Kut leh ke neiin a mit erawh a tung hru mai a. a kareh erawh suhthusama zau a ni. Mihring tiat zet leh a taksa pian phungah mihring anna tam tak nei mahse a hmel leh a hawiher chuan mihring a ni lo tih a tichiang kher nai...

Rothuama chuan a silai chu uluk takin a han tin vang vang a. Chutah a silai puah rik rual chuan chu kawrpuithlakisen chu a rawn sen thla luap luap mai le.....conti....

@Dwm Pachuau

"MITTUI LUANGIN KIR AN REL LO"

episode-144

Rothuama awmna thlang deuhah chuan chu kawrpuithlakisen chu a rawn tla thla ri rum rum ta mai a. Rothuama chu chuan chulam chu rang takin a pan thla ve nghal bawk a.

A tlakna lai awm vel a zuk thlen chuan engmah reng reng a hmu ta hauh lo mai, mak tiin a hawi a hawi ta mai a. a tlakna ni ngei tur chhehrawp kar a thisen hring nghulh mai baw nuai chauh chu a hmu a. Han tlansawn leh insaseng na hman a awm miah si lo chu mak a ti ngei mai.

Mai mai tak che chuan, ka va zawng hmu dawn ruai che em ti nuah nuah chungin a thlanglam chu a pan ta zel a. Mahse, thawm riva leh sava hram takngial pawh hriat tur a awm tlat lo.

Thui pawh a kal hmain Rothuama xhuan thawm a hre ta, chu a thawm hriatna lam chu a chung lam a ni leh ta tlat mai. Rothuama chu a ding chat a, hnuai lam bih ngar chung chuan a thawm hriat chu a han ngaithla vang vang a.

A chung lam sang vak lo atanga mipahnih inbe ru sa sa thawm hi a ang berin a hria. A silai lek kawh pah chuan a chung lam chu a han hawi chho a. Kawrpuithlakisen bawk chu alo thu luau mai niin...

Rothuama chuan zawi sup hian "Mai mai chuan a, nang hi kah mi pawh i ni hrep lo emaw ni le, engtia han tih chi nge maw i nih phiangsen le ti nuah nuah chungin a silai chu a han hmet puak leh ta thuai mai a.

Mahse, mak deuh mai chu a thil kah chu a kah rual rualin a bo ta daih mai. A kah fuh leh kah fuh loh pawh a hre ta reng reng lo. Rothuama hawi kual vak vak lai chuan a tukhum chu a rawn hik chhawk a, mi tuemaw hian an rawn vua ni mai hian a hria , a luhai tlu tur chuan vawn tur a dap ta ruai a.

Mahse, hmuh theih si loh hian a luhai tlu tur chu a keah hian a rawn phih leng leh ta lawp mai. Rothuama chu paih ang der hian a thlang lam hlam thum zeta hlaah chuan a thleng rawk a.

Thawh a han tum a, a che thei der lo. A rilru erawh chu a harhfim in a hria...Mahse, a khaw hmuh a fiah thei der lo. Engkim mai chu a hmu phe ruai vek a. A mit han nuai a tum lah chuan a kut pawh a che thei lo leh zel bawk nen Rothuama chu a thaw huam huam a.

Chutah thil sen leh mak deuh mai hian amah a rawn pan hruau hrua tih a mit sir chuan a hmu ruai ruai a. Tih theih dang a nei tlem kher mai lo nghah ngawt mai loh chu.

Chutah chu thilsen hlur mai leh pian ze mak zet mai xhuan Rothuama chu a rawn dinchilh ta a, Rothuama mu zangthal che thei lo chu a han hel nghauh nghauh a, chutah muangchangin Rothuama chu a rawn thut ta run mai a.

Rothuama chuan a hmu phe ruai mai si a, chutia a rawn thut chu rit hi a han ti mai mai khawp a. A au chhuak ta rawng rawng a. A bana han vai ngheng mai chu tum ve bawk mahse a che thei miau si lo. " Zawng hmelchhe phiangsen pa, ka that dawn che. Ka chungah hian eng thil phiangsen nge i tih? Mipa ini ve ngai anih chuan min han rhawh tir teh. Min thawh tir rawh." a ti tuarh tuarh a.

Chu kawrpuithlakisen chuan Rothuama chu a kut pahnih in a han rek ta a, thaw huam huam chungin a lei a chhuah zul mai a, a thawk chhuah lah chu a khu muah muah mai a, Rothuama na ti lutuk chu a hrawk a ri bawrh bawrh a, a mit meng a pual tan ta.

Chu thil, amah thut bettu ramhuai chikhat chuan a hrawka a rehna chu thlahin a tho ta tual tual a. Rei ngial a dinchilh leh hnu chuan a bo leh ta daih mai. Rorhuama chu a chau em em a, a thawk pawh ala thaw tha thei lo.

Rei fe chutianga che thei miah lova a awm hnu chuan zawi zawiin a khawhmuh a rawn fiah ve tan ta a, a kut leh ke pawh zawite te chuan a tiche thei tan ta.

Thawh a han tum a, mahse chu erawh chu ala hla hret. Rei ngial hnuah erawh chuan a thu chhuak thei ta hlawl mai. A thut chhuah rual rualin a silai a melh kual nghal a. Mahse, a hmu awzawng lo.

A lu a han thing nawk nawk a, rilru fim taka a ngaihtuah vang vang hnu chuan a silai thlauhna awm chu a hrexhhuak leh thei ta a, a chhak lam chu a pan chho ta nghal a.

A silai lo let ngat a hmuh chuan rang taka chharin a han hawi kual a, chutah a awrawl tawp tak meuha ring chuan "Nang ramhuai bawlhhlawh pa, lo chhuak leh teh, tunah hian i han inhmachhawn teh ang. Hmuh theihin rawn chhuak rawh, ka cho che, rawn chhuak rawh." a ti tuarh tuarh a.

A awrawl chu ngaw chhungah xhuan a khawk rum rum a, chhanna erawh hriat tur a awm lo. Beidawng zeta Rothuama a inhrosak lai chuan hla deuh hlek atanga lo en rengtu Keipui chu Rothuama chuan a hmu ta tlat mai.

A rilruah Chhingmami a rawn lut nghal zawk a, amah en rengtu sakei awmna lam chu muangchanga pan pheiin "Nang kha mihring nge i nih sa? thah kher che hi ka duh lo a nia thlawk bo rawh" a han ti tuarh mai a....cont

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:38 pm

"MITTUI LUANGIN KIR AN REL LO"
episode- 145

Rothuama chuan a silai chuan a han tin ta a. Chu sakei chu muangchanga inherin a pil nghal a. Mahse, a pilna kam chu Rothuama kalna tur lam anih miau avangin Rothuama chuan fimkhur takin a pan hnai ve zel bawk a.

Sakei liamna lai tak a thlen chuan a hma zawn, hlam thum vel emaw a Chhingmami lo ding reng chu a hmu ta a. Rothuama chuan muangchanga a sikai lek thla riai riaiin Chhingmami chu a en ran a. Rei fe inbe miah lova an in melh reng hnu chuan Chhingmami chu a rawn tawng chhuak hmasa ta a.

"Min hmu chu iva lawm loh hmel ve Uthuam," a han ti a. Rothuama chuan a chhang mai lo. Chhingmami aw a hriat lohna pawh a rei tain a hmel a hmuh lohna pawh a rei ta a. Chhingmami a han hmu thut mai chu mak a tiin a hamhaih lek lek a ni.

Chhingmami hmel chu a that ngai reng hian alo la tha a, a aw te lah chu ahma ang tho khan ngaihno alo la bei chek mai a. Rothuama chuan pawm vawng vawng a chak kher mai. Mahse, chu thil chu a ti dawn lo tih a inhre chiang. Rorhuama chuan "Helai hmunah hian engti tura lo kal nge i nih?" a han ti hmak a.

Chhingmami chuan zawi leh dam dap hian "I hniak ka rawn chhui a, pawi i ti em?" tiin a lo chhang leh a. Rothuama chuan "Enga tan?" alo ti leh bauh a.

Chhingmami chuan Rothuama chu rawn pan hnaiin a kut a rawn vawnsak a. Nichin khan ka rawn pui thei si lo che a, hrehawm ka ti lutuk asin." a han ti a.

Rothuama chuan "Min lo hmu reng a maw?" tiin a han zawt a. Chhingmami chuan hmu e, i hmuh theih miah loh lai pawh khan kei chuan ka hmu reng asin. Mahse, kei pawhin sakei ka nih lai bakin ka hmu thei bik lo. Ka rawn tel ve chuan keimah ka ni tih i hre dawn si lova, min kap ang tih ka hlau bawk sia..." a han ti a.

Rothuama chuan "Puih ka ngaih ka hre hleinem, ka hmaa awm chu ka paltlang thin. Ka paltlang thei lo anih chuan ka thi mai tur a ni." tiin a lo chhang a. Chhingmami chu a lo nui var var a.

"I pasal duhtakin kei min that turi ikhaw pasaltha te a rawn tir niin ka hria a, chu chu adik leh dik loh i hriatpui em?" a han ti a. Chhingmami chuan "Dik e, chumi avanga helai thleng thlenga lo kal chu ka ni reng a ni. I thian tha ber leh i aihnah phah pui ngei chuan i thihna tur ro a rel mai hi kei pawhin a mak ka ti tawp thei lo." tiin hnuai lam a bih a.

Rothuama erawh van lam hawiin thawk a han la vang vang a. A mitthlaah a nu leh a farnu an rawn lang a, chhungkaw hlim taka an chenho lai te chu a mitthlaah a rawn lang zut zut a.

Chhingmami bawk chuan "A upateho thiam loh vek hi a ni, an fuih khawlo zo vek tawh. Anniho hian i dam ve chhung chuan kan khua hi him dawnin an hre thei tlat lova, chuvangin i thih theih dan tur ringawt hi an sawipui nitin zantin a, anniho nawr nasat luat vang vek a ni. A huat che hi ka ring hauh lo asin." a ti a.

Rothuama chuan Chhingmami dar pahniha dawmsak pah chuan "Ka mitah hian en rawh, chu i pasal thlavang hauh tur leh ka thahsak mai che i hlauhthawnpui avanga hei chen rawn thleng maw i nih?" a han ti ram hmak mai a.

Chhingmami chuan, "Ni love, an thurel ka hriat kha a tlai deuh a. Ka hriat rual rualin anmahni tlan khalh a rawn hrilh che tumin ka rawn kal nghal a. Mahse, nang ka hmu bawk si lo che a, anmahni ka hmu zo bawk si lo. I thi nge i dam tih hriat tumin a zawn tak meuhin ka zawng ta che a ni." a ti sap sap a.

Rothuama chuan alo ngairhla kar a, Chhingmami thusawi chu a dik leh dik loh a hre si lova, rin tur nge ein loh tur tih pawh a hrethiam lo takzet. Chhingmami chuan "I duh phawt chuan ka pasal leh i duh apiang thatin phuba i la thei tih ka hria, engpawh ti la ka dem hauh lo che nia." a ti leh sap a.

"I pasal leh a khawnbawl upa ten ka dam chuan him dawn in an inhre lova, englai pawhin ka thihna tur an ngaihtuah reng tih i sawi a, he thu hi ilo hrilh ve dawn nia. Chuti taka ka thih loh hlautute nunna chu ka zuah tawp lovang tih hi." a han ti a. Chhingmami chu a lo ip chawih chawih a.

"Uthuam," a han ti ringawt a, engmah sawi zui leh lem lo chuan hnuai lam a bih ngar a. Rothuama zawk chuan "Chhingmam, kan nun hi a chingchivet in a vanduai thlak lam deuh chu a ni." a ti a.

Chhingmami chu rawn hawi chhuakin "Engkim hi keimah vang vek a ni tiraw, kei hi hetiang hi lo ni lo ila chuan engkim hi a danglam dawn si a. Mahse, ka nihna hi ka duhthlan a ni bik miau si lo, keimah ber hi thi ila a fel vek mai ang." a ti chhuak tham tiak a, amittui chu a tling piau bawk a.

Rothuama chuan, "Thil chu anih tur ang ang a ni vek tawh a, pawi tur pawh a pawi zo vek tawh. Tuna i thih ringawt hian engmah a thlak danglam tawh dawn chuang lo. A kal tawh te pawh an rawn kir phah dawn chuang hek lo. Chuvangin nang chu lo dam la a tha zawk ang." a ti a.

Rothuama tawng zawm leh hma chuan Chhingmami chuan a hnar a tum det det a, a mitmengah thik dik lo a awm tih hriat tak hian a hawi kual ta ruai a. Rothuama pawh chuan "Eng thil nge nita tih pahin a hawi kual ve nghal a. Mahse, an tlai ta tlat. An chhak lam atanga sakei rawn inkhawh thla zawk chuan Chhingmami chu a rawn zuan a, an thlang lam koah chuan a zuanthlakpui ta mai.

Rothuama pawh a rawn ham thawi thuak a. Ani chu lo vir zawkin a petek chu a sirah chuan a let thuai a. Rothuama chu rang taka rawn thoin Chhingmami sakeiin a zuanthlakpui na lamah chuan a tlan thla nghal buan buan a, a hmanhmawh lutuk chu a tlu leh rih thin. A lumin a lum thla nawk nawk mai.

Kawrte pakhat, tui awm lohna hnawng chuap mai hmun a zuk thlen nak chuan sakei pahnih hi an lo insual ngian ngian mai chu niin...

Rothuama chuan khawi zawk nge Chhingmami tih hre tawh hek lo, a silai chuan a han tin ngawt thin a, mahse kah tur zawk a hriat tawh si loh. " Chhingmam" a han ,i tuarh tuarh a. Mahse, sakei insual te pahnih chuan Rothuama aw chu hre awm pawhin an lang lo. Rothuama a awm ve tih pawh hre lek lo chuan chak zawk nih tumin an inlehthal chhawk zak zak a. An thawm lah chu ngawpui chhungah chuan a khawk rum rum a, Rothuama lah awmngaihna hre lek lovin a lo phi sek mai a, buaina ral a lian a ni ta ringawt mai....cont

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:38 pm

"MITTUI LUANGIN KIR AN REL LO"

episode-146

Rothuama thinur lutuk chu a insehruh nasa ngei mai. A hachang thial rawp rawp chungin a silai chu a han tin leh hluai thin, a'n hmeh puah meuh dawn chuan nitheiin a hre thei si lo. "Chhingmam tang rawh, tang rawh tunah seh hlum nghal rawh." a han ti leh tuar tuar a. Mahse, a tan hriat hran theihna ngang a awm si lo. Rothuama tihngaihna hre lo leh mangang lutuk chu a te ruai ruai a. Chutiang reng renga mangan chu ala tawng ngai lo. An pahniha kah hlum mai te chu a duh rum rum tawh.

An insual lai chu hmuh hrehawm a tih em avangin anmahni hmuh theih loh chinah chuan a tlan ta daih a, an thawm hre phak siah chuan thingthi in a indawm kun tlawk tlawk a, a silai chu nghet taka humin a hachang a thial rawp rawp a. Ama hriat phak lek chuan "Chhingmam tang ta che, seh hlum rawh. Ka pui thei lo che that rawh" a ti mawlh mawlh a. Amah lah chu a khur ngawt ngawt a. Mahse, hlauh vanga khur erawh a ni lo...

Chutianga eng emaw chen a awmhran hnu chuan sakei pahnih insual thawm kha a reh ta daih mai tih a hrechhuak zawk a. Chutah rang lutuka ding chhuakin an insualna lamah chuan a tlan phei nghal vat a. An insualna hmun a thlen chuan engmah reng reng hmuh a nei ta lo...

Rothuama chu a hawihai nasa hle a. A bul vel chu a han en kual thuak thuak hnu chuan thlang deuha Chhingmami lo let reng a hmuh chuan rang lutukin chulamah chuan a tlan thla nghal a.

A bul a zuk thlen chuan Chhingmami chu alo meng diar diar a. Rothuama chuan Chhingmami lu chu a malpuiah pawm kangin "Chhingmam" a ti mawlh mawlh a. Mahse, Chhingmami chubtawng chhuak thei chi ziazang niin a lang tlat lo.

Chhingmami lu chu thuk tak mai hian a kak duai mai a, a darah leh a awmah hliam natak a tuar bawk tih Rothuama chuan a hre nghal bawk a. Chu ringawt pawh chu ani ang tan chuan thihpui tham zet a ni. Chu mai chu la ni lovin a malpuiah leh a chawnah hliam thuk tak alo tuar bawk chu niin. A sualpui khan a sawp hlum der emaw tiin thi kalsanin alo kalsan lek alo nih hmel...

Rothuama thinur lutuk chu a meng sen huam tawh a. Chhingmami chu chhan tlak awmin a hre tawh si lo, a thinlung beidawng lutuk chuan muangchangin Chhingmami chu a han mut that tir a, hachang thial rawp rawpa rawn ding chhuakin "Min lo nghak rawh, tunah mipa dik tak i hmachhawn ve thung ang." tiin Chhingmami chu a kalsan ta nghal a.

Rothuama chuan Chhingmami sawisatu sakei hnu chu a chhui ta a. Ani pawhin hliam a taweh ve tho avang chuan a thi thlauh danah chhui pawh a nuam kher mai.

Rothuama lah thinrim tawngkhawng tawh, pawisak engmah nei tawh lo anih avangin a kal hmawk hmawk a. A rilruah Chhingmami bak a awm miau loh avangin fimkhur pawh a lo fimkhur seng ta lo.

A chhak lungpui phen atanga thil dum rawn thlawk chhuak zawk chuan Rorthuama chu a rawn zuan ta thut mai a. Mahse, vanneih thlak takin Rothuama chu a lo bu hniam zawk a. Chu sakei chuan a tum tak a zuan fuh lo tih hriat tak maiin a thlang chhehrawp hnuaiah chuan a tla ri buaih ta mai a.

Rothuama thin thawk chuan eng laiin nge a rawn din chhuah leh tih reng a hre hman lo. A hriat chhuah meuh chuan sakei awmna lam hawiin a silai a lo tin reng hman tawh tlat...

Chu sakei chuan a rum a thelh tih hriain thinrim hahum nghek nghek chung chuan Rothuama chu zuan leh a han tum a. Mahse, Chhingmami ni lo, Rothuama ngei mai zawk a hmachhawn ani tih a inhre ta. Chumi tixhiang tue chuan silai puak thawr ruala a nghawnga ngenmu rawn inverh lut chuan a ti chiang hle...

Chu sakei zuang tura awp hniam suai tawh chuan a duh vang reng ni lova a tum a thulh a ngai ta tlat. Mahse, keipui ve meuh tan chuan silaimu pakhat mai mai chu thihpui tham anih miau loh avangin a thinrim chawk tho tawk lek a ni ta....

A theihtawpa vau zam tumin a han hahum khawk ruah ruah mai a. Aka reh zau lutuk leh thi luai mai chu a han ang thler tak tak mai a. Tlangval nanran tan chuan chu ringawt pawh chu khurhpui zawih zawih tham ava tling em.

Mahse, a rum khum chu tlangval naran ni lovin hlauhawm leh harsatnaina a ngam loh, beidawnna tena an vau zam zawh loh, sa leh ral hmaa zam ngai lo, thian chhan thih ngam, tual thah chak leh phuba lak duha inhrosa mek Rothuama ngei mai anih miau avangin a rin ang ngawt chuan a vau zam lo tih a inhre nghal ngei ang le...

Rothuama chuan huatna hlira khat mitmeng hian chu sakei chu a melh a, a hmelah leh a mitmengah hlauhna leh zamna chhete pawh hmuh tur a awm lo. Tin ther tiat takngial pawh a awm lo. Chu chu a hmaa sakei awm chuan a hrechiang ber ang. Mahse, chu sakei huai pawh chuan mihring pakhat nana na chu hlauhna leh huphurhna chhete pawh a nei bik hlawl lo...

Rothuama chuan chu sakei chu mit khap eih lo hian a melh ngawt ngawt a, a mitmengah chuan hremhmun bak hmuh tur a awm reng reng lo.

Chu sakei lah chu a hmelah zamna reng reng hmuh tur a awm lo. A hma lawkah hnehna lo chang zo hlim ani bawka ama tawkah chuan a inring tawk ve hle turah chuan ngaih loh a har mang e...

Rothuama chuan a silaimu thun leh pawh tum tawh lo chuan a bulah chuan a theh thla thak a. A mita sakei melh ngawt ngawt chung chuan a sahmim chu muangchangin a zen riai riai a. A chem hriam lutuk tak mai chu phawrh zal zal pah hian "I thi dawn, ka that dawn che." a ti sap sap a.

Sakei pawh chuan minamai a hmachhawn lo tih hriain a han awp hniam leh suai a. A hmaa mihring awm chu pawh sawm vek tum tih hriat tak hian a han rum chhur chhur mai a.

Rothuama chuan "I duh tawk khan han inhrosa teh, mahse kei hi min rawn zuan hmasa duh suh. Keimah zawk hian ka sah sawm vek hma che chuan ka rawn pan ang che...thi turin i inpeih em?Ka that dawn che nang hmelchhe lubukpa" tih tuar pah chuan sakei chu a zuan ta mai a.

Chu chu sakei pawhin a beisei loh tawp thil anih avangin a hamhaih ve hman tep a. Chutia a mah thah tuma rawn zuan ta mai tu chu lo pawhsawm vek tumin alo zuang ve awk a. Mahse, a tum rual ruala a chunha thil thleng chu natna mai a ni ta, a awm chu a thler nghal hawk a. Chumi rual chuan a bula Rothuama rawn thu hnawk chu a bawh ve nghal a.

Mahse, thisen tam tak chhuak tawh anih avangin a duh ang ngawt chuan a che thei ta hauh lo mai. Rothuama lah thih tha a tang anih ve miau avangin an inlehthal ta ngian ngian mai...

Rothuama chuan a theihna leh thiamna zawnh zawng hmangin a han bei ta tak takk mai a. Ani keipui thinur mah nise hliampui tuar tawh anih miau avangin a duh thalin a che thei tawh bik miau lo.

Rothuama chuan inpawmchilh chu a tan a tha ber lo tih hriain a theih ang angin a tawlh hla zel a. Mahse, a sualpuipa lah chuan bawh beha seh hlum ngawt mai lo chu ngaihruah dang a nei si lo. Rhih leh thih, dam leh dam a ni chiang ta kher mai.

Rothuaman a chem vaina hun a neih zeuh hlekah chuan a tha tawpin a vai pawm pawm zel a. A beihpuipa pawhin Rothuama kutthlak chu a tuar hnem ta malh malh hle mai. Mahse, sakei ni satliah lovin keipui hliam thinur a ni miau a... Sa dang tana thih ngei ngeina tawh turah pawh chuan a thapuui ala thawh thei tlat...

Rothuama pawh a thaw nasa huam huam tawh hle. A duh ang ngawt a hriam lek theihna hun a nei thei bawk lo nen, vawi khat chetsuala thi mai thei reng a ni tlat... Mahse, thih chu sawi loh Chhingmami phuba la lova chu sakei chu chhuah a tum lo bur. Chu ai chuan thih chilh a tan a awlsam zawk.

Rei fe chak zawk awm lova an inbeih hnu chuan Rothuama kechheh chu a pial ta tlat mai. A rah pialin an thlang lamah chuan a lum thla ta..

A beihpui chuan chu chu remchangah lain a zuangthla ve nghal rawih a. Mahse, chu chu a chan chhiatna bul alo ni ta. Rothuama chuan mu chung titih hian amah rawn zuantu sakei chu a han vai risk ngheng mai a. Chu veleh a thlang hlam khat lekah chuan chu sakei chu a awp ta rup mai...

Rothuama chu a tho nghal vat a. Sakei rawn tho leh tur tak mai chu a chaldarah tak mai zuang chungin a han sat leh nghek mai a. Chutah zet chuan chu sakei chu tho thei dinhmunah a ding ta lo...

Rothuama chuan "Thi rawh nang anchhedawngpa, Chhingmami hmingi n hei hi i tan" tih leh a theih tawp yak meuha han vai leh chu a rual ta a. Chu sakei chu thaw leh tur reng a awm ta lo...

Rothuama chuan chu rahbeh pahin anchhia a lawh mawlh mawlh a. Tichuan Chhingmami awmna lamah chuan hmanhmawh takin a kalsan ta a...

Chhingmami awmna a thlen chuan a rin loh tak mai leh a beisei loh tawpin Chhingmami chu alo la thaw hram hram a. Rothuama chuan "Chhingmam," a han ti a. Chhingmami chu....conti

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:39 pm

"MITTUI LUANGIN KIR AN REL LO"

episode-147

Chhingmami chu thaw hrawk hrawk chung hian a rawn meng a. Rothuama chu thei leh thei lova rawn melhin thil eng emaw hi sawi a han tum a. Mahse, a hmui phun bakin a sawi ri chhuak zo ta lo.

Rothuama chuan "Lungngai reng reng suh Chhingmam, engtin mah i awm lovang, i dam tha leh em em ang tuar fan fan rawh aw. Ka hruai hawng ang che." tiin a be mawlh mawlh a.

Mahse, anihna takah chuan Rothuama ngei pawh chuan Chhingmami chu a damchhuah a ring hauh lo. Chhingmami chu a phun sep sep a. Mahse, enge a sawi tih reng hriat theih a ni si lo. Rothuama chuan "Engmah sawi dh suh, tikhan hahdam takin awm phawt mai rawh." tiin a kuah vawng vawng a.

Khua a tlai lam zel si a, Rothuama chuan chu lai ramhnuaia riahpui ngawt chu dik theia a hriat si loh avangin zawite hian Chhingmami chu a han ko leh a. Mahse, Chhingmami chuan a chhang lo.

Rothuama chuan a han pawm kang a, "Ka hruai hawng ang che, chhel takin awm rawh aw." tih pahin Chhingmami chu a paw ta a. A kut leh lama a silai keng chung chuan hmanhmawh takin a kalpui ta nghal a.

A pute khaw dai a thlen meuh chuan khua pawh a thim chiang ta kher mai. Rothuama chau lutuk chu a han ding zawk a. Chhingmami zawi hniang mai chu a thi tawh nge ka dam tih hriat nan a han be leh thin a. Mahse, chhanna reng reng hriat tur a awm lo.

Rothuama chu a beidawng takzet a. Mahse, a ruang tal pawh chu hruai hawn a tum ruh hle. Tichuan rei chawl lovin a kal leh ta nghal a. A pute in a thlen chuan an lo reh thiap a, Rothuaman hmeichhe pakhat thi hnuang mai a rawn paw lut thut mai an hmuh chuan an ri ta hluai mai a.

A pu chuan "Engti zai zia nge nita ngai Taia?" a lo ti vat a. Rothuama chuan chhan pawh chhang ta mai lo chuan tuiuma tui chu a han thiat khawlh khawlh phawt a. Chutah Chhingmami chu pan hnaih pahin "Hliam na tak a tuar a ni ka pu, a thi tawh nge la dam pawh ka hre tawh lo." a ti a.

A pi chuan Chhingmami bawihsawm mawlh mawlh pah chuan "A thaw chu ala awm e Taia, tui kha min han lak teh. Rapa vaihlo nen khan aw, hmanhmawh rawh." alo ti zung zung a. A pi thusawi a hriat chuan Rothuama chu a lawm ngei mai.

Hah pawh sawi thei lovin Rothuama chu a vir zung zung a. A taksaa Chhingmami thisen kai hnuang mai chu chulin Chhingmami chu a en vawng vawng a.

Apu chuan a dara rawn ben thuk pah chuan "A hliam nat dan en chuan thi daih tawh tur a ang hle mai. Hetiang reng renga hmeichhe tawrh fei hi ka la hmu ngai hauh lo." a han ti sup a.

Rothuama chuan "A tuar chhuak ngei ang tih ka hria. Minazawng tih theih loh hi ani chuan a ti thei tlat alawm." tiin a lo chhang a.

Chumi zan chuan tumah an mu lo, Chhingmami chu an buaipui zankhua zak a. Mahse, Chhingmami chu vawi khat mah a rawn harh chhuak lova, chu chuan Rothuama ngaih a titha thei hauh lo. Mahse, sawi chhuah kher erawh a tum lo.

A tuk chawhnu her hretah Chhingmami chu a rawn rum chhuak tiah tiah a. Rothuama pi chuan rang taka pan hnaiin a han ko a. Mahse, Chhingmami chuan hre awm pawhin a lang lo.

Rothuama leh a pu chu hnathawkin an buai hle a. Api chuan Rothuama chu rawn koin "Taia, hei a rawn harh a nia lo kal teh khai." a rawn ti chul a. A pu chuan "Va kal rawh khai, hei chu ka lo tih chhunzawm mai ang." alo tih ve bawk avangin Rothuama chuan a pu chu a kalsan ta nghal a.

Rothuama chuan Chhingmami rawn meng diar diar chu a chala dawmsakin "I tha em?" a han ti a. Chhingmami chuan zawi sap hian "Aw...khawiah nge ka awm?" tiin alo chhang a.

Rothuama chuan "Chu lam chu ngaihtuah buai duh suh, tikhan hahdam tak khan mu phawt mai rawh. I lo harh chhuak ta chu a lawmawm hle mai." tiin a sam a chulsak heuh heuh a.

Khua alo tlai lam zel a, zanriah ei alo hun chuan Rothuama pute chhungkua chuan zanriah an kil thap a. Chutia chaw an ei mawlh mawlh lai chuan thawk leh khatah Chhingmami chu a rawn kaih ta vak mai a, an chawei lai chu an vai buai leh ta luai luai mai...

Rothuama chuan Chhingmami chu kuah betin midang chuan an lo pui bawk a. Mahse, an kuah bet zo lo lek lek mai. Rothuama pu chuan "E khai, ava han chak em em ve Taia, mihring tha pawh a ni dawn em ni hial le" tiin a theihtawp chuan a lo dawm ve ngar ngar a.

Chhingmami mit chu a pual vek a, rum em em maia meng kul chung hian a melh ngai a melh ngawt ngawt a. A ha thial ri rawp rawp chung chuan a ka atangin chil phuan alo chhuak nguai nguai a. Hmeichhe tan phei chuan hlauhawm leh hmuh nuam a ni lo hle.

Rothuama chuan "In sum rawh in sum rawh Chhingmam, engtinmah i awm lovang." a ti mawlh mawlh a.

Chutah Chhingmami chu rawn tawng chhuakin "An lo kal, an lo kal ania..." a rawn ti chhuak sep sep a. Midang chuan a na a vek tawh niin an ngai a, a thi tur chalchang ah ngaiin an rap hlawm kher mai.

Mahse, Rothuama thung chuan Chhingmami thusawi chu ala thutak tlat mai. "Tute maw lo kal, tute nge lo kal Chhingmam?" tiin a han zawt a.

Chhingmami chu tal awrh awrh chung chuan a inseh ruh a, an lo kal min rawn hruai turin. Min rawn zawng a nia tlanchhe rawh u, min kalsan rawh u in thi vek palh ang." a ti mawlh mawlh a.

Rothuama chuan "In khaw pasaltha te an ni em, tunah khawiah nge an awm? Khawi lai nge an lo thlen tawh?" tiin a han zawt leh a.

Chhingmami hmel chu a buai tulh tulh a, a buaipuitute chu an mangangin an phili nasa em em a. A thilsawi lah engtia han ngaih tur nge tih an hre der mai si lo.

Rothuama erawh a ngaih a tha ta hlek lo mai. A pu chu biak fal a duh hle a, mahse chutiang hun a awm hlawl si lo. A mah leh a pute chhungkaw nunna chu a derthawng tih a hre nghal a. Chu chuan a rilru a tibuai ta mup mai.....cont

@Dwm Pachuau

"MITTUI LUANGIN KIR AN REL LO"

episode-148

Chhingmami na tuar leh maksak tak taka a rawn tawngvai thin thawmah chuan thenawm khawvengte pawh an rawn tlan lut ta sup sup mai a. Hmeichhe tha chu sawi loh, mihring tha hrui niawm pawha mawi lo khawpin a tal nasa mai si a. Rothuama meuh pawh a thlanfimin a bual bat bat ta mai...

Zanlai ar khuan a hnaih hle tawh hnu chuan Chhingmami na a ruai mai leh a tal vak vak chu a reh ve tan ta a. Thenawm khawvengte pawh ngaihngam taka hawngin an inmangtha thliai thliai ta hlawm a...

Mahse, chutih lai erawh chuan Rothuama rilru erawh a let bat bat mai thung. Thenawm khawveng an tin fel hnu chuan Rothuama chuan a pu chu kheuh hrangin khun khan takin a titi pui ta a.

"Chuvangin Cbhingmami hi hetah a awm hi a rem thei tawh lo a ni ka pu. Amah avanga inzavaia in nuna derthawnga dah hi ka thei lo." Rothuama chuan a han ti charh charh a. Apu chuan ngun taka lo ngaithlain a lu thak lo pui chu a han hiat sut sut a. Aw aw han then kharh kharh pah chuan, "Taia, kan tlangval lai ni se ka van ti rua em." a rawn ti chhuak nghat a.

Rothuama chuan, "Ani khawp mai ka pu, nangni lah khawia han tlanchhe thei in ni tawh si lova, chuvangin Chhingmami hi khawi hmunah emaw ka hruai bo mai a ngai a ni. Chuti chung pawh chuan fimkhur theih tawpa in lo awm a ngai dawn a ni." tiin thawk a han la hak a.

Chutah, Rothuama bawk chu rawn tawng zawmin, "Ka pu, ka rawn tibuai hle mai che u. Ka inthlahrungin pawi ka ti takzet a ni." tiin a tawng zawm leh hma chuan a pu chuan a lo pawt chat a...

"Ka inthlahrung e a Tai a? I mawng tama ka vuak i duh loh chuan kha thu kha sawi leh tawh ngai suh ka beng hriatah hian. Engpawh nise, chutiang teh nuaih anih si chuan i thu tlukna apiang ka pawm e." a lo ti a....

"Anih chuan ka pu, zanin la la hian Chhingmani hi ka hruaichhuak ang e. An khua ka thlenpui hman loh pawhin heta min rawn nanchin ai chuan a tha zawk in ka hria. A thusawi zawng zawng kha nangni chuan na a thusawi leh tawngvaiah in ngai maithei a. Mahse, amah hi ka hriatchian avangin ka ngaih atha thei lo a ni." a ti dam dap a.

A pu chuan "I tih tlat chuan le Taia, mahse ka ngaihtuah dawn hle mai che u. An khua chu damin lo thlenpui tehreng pawh ni la, engtinnge an in i thlenpui ang? An hmuh rual rual chea thah an tum tur i nih chu i inhrechiang ang chu tiraw...? tiin a tupa chu a han hmer vang vang a.

Rothuama chu lo nui sakin, " Ka pu, i tupa hi eng ni lo mah ila, ngaihruahawm zawng ka ni bik lo turah ngai rawh. Nangmahni zawk hi ka nhaihtuah takzet che u." a han ti a.

A pu chuan a tupa chu chhuang taka ben thak thak pahin, nang hian kan thlahtute thlarau leh kan zahawmna chawi nung tur fapa i hrin ngei a ngai tih hi theihnghilh lo la a tawk a ni mai. In kal dawn anih chuan kal har lo ula a finthlak ang. Khuavangin veng mawlh che u rawh se." tii a tupa chu a kai nghal a.

Rothuama chuan a pu chu zuiin in chhungah chuan an in zui lut a. Rothuama pi chuan "Eng thu fahrah nge maw in han sawi dun putu chen chen le?" a lo ti hlak a. Rothuama pu chuan "Hmeichhe hriat ve tur a awm love. Tikhan va mu rawh." alo ti vei hmuk a.

Rothuama pi chu a ngawi nghal hmiah a. Rothuama chuan "Ka pi, zanin la la hian kan kal a ngai. Thil awmzia chu ka pu hian alo hrilhfiah ang che." tiin Chhingmami chu a paw bahlat hnawp a.A silai leh sahmim la in a chhuahpui ta nghal a. A pi leh pu chuan hlauthawng ru em emin an en zui tawk tawk a. An lan theih chhung zawng chu thlirin an liam hnu chuan a pi chu hlauhthawn hmel tak hian thawk a han la hak a.

Rothuama chu hmanhmawh leh fimkhur taka kalin khawdai an thlen chuan Chhingmami chu a han nghat a. Meichher tur la khawmin a siam nghal sawk sawk a. A siam zawh chuan lakai nghalin Chhingmami chu a paw bahlat leh nghal a, tichuan meichher keng chung chuan a kal nghal nal nal a.

Thui fe a kal hnu chuan ralkhat hla fea meichher chhi, anmahni pana rawn inzui duah duah a hmuh chuan Rothuama chu a ding nghal chawt a. "Mai mai chuan leh, kan nih nih kan ni tawh mai ang chu." a han ti chhuak sap a.

Inseh ruh rap rap chung chuan hmun biru lai deuh a pan nghal a. Chhingmami chu dim taka nghatin a meichher ken lai chu a nawr hlum nghal hmiah a. A silai leh a silaimu chu hman mai theih turin thim thamah chuan a buatsaih nghal mial mial a. Mahse, a tih than tawh anih avangin buaina erawh a nei lo.

Chhingmami chu a han ko mial mial a. A chhan mai loh avangin Chhingmami chu kalsana anmahni rawn pantute chu lo va panhnaih thaa a hriat avangin Chhingmami chu a kalsan ta a.

A rilruah a damchhuah kher a ring bik lo. Engpawh nise a tam thei ang ber thihpui chu a rum ber a ni a. A thinlung zawng zawngin Chhingmami chu thi lova an khua hruai thlen chu a tum ruh bur bawk.

Anmahni pana rawn inzui meichher chhiho chu an rawn hnai zel a, Rothuama pawhin lo channa tur remchang a hmuh rualin tanhmun a khawh sauh sauh a. A rilruah erawh Chhingmami bawk a rawn lut leh a. An buai lai tak hian a rawn au chhuak leh vak mai ang em????........ cont

@Dwm Pachuau

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 1:35 pm

"MITTUI LUANGIN KIR AN REL LO"

episode-149

Rothuama chuan a duh tawka lo inbuatsaihna hun tha a neih tawk avangin a za zek zek tawh mai. Aminghah te pawh an rawn hnai zel a, an hmaah tunge lo hmuak tih an hriat loh avangin thawm pawh an dim lo angreng hle mai.

Lung muang taka rawn ti ti phei bawrh bawrhin Rothuama thah an chak zia leh an khawtlang tana mihlauhawm ber anih zia te an rawn sawi phei nawk nawk a. An vaiin mipanga an ni bawk.

Rothuama chuan an thawm a hre phak ta, an rawn hnai zel a an tawngri leh an thil sawi zawng zawng pawh a hre phak ta a, a chanchin an sawi a hriat te chua a ti thinur zual ngei mai.

A awmna zawn an pel fel tan tih chuan a silai chu a puak ri ta thuai a. Hmahruaitu chu leiah paih ang derin a tlu zawi nghal hnawk bawk a. Chu veleh an darh nghal suau a.

Rothuama chuan "In thah chak ber chu inhmaa hi ka awm e, kha min han that ta che u." tih pahin a silai chu a puak leh nghal thuai a. Chumi rual chuan hmelma silai pawh chu a puak ve ta zawt zawt mai bawk a.

Thim zinga awm kap an ni bawk an tum erawh fuh a har deuh a ni mahna. Rothuama lah fimkhur taka ral bei thin tih hriat tak maiin vawikhat silai a hmeh puah rualin a awmna chu a sawn nghal zel si a.

"Nangmah phiangsen hi maw kan lal nupa thattu chu, nuamsa taka thih pawh i phu hrep love" tiin an zinga an hruaitupa ber chu a han au nghek a. A silai chu Rothuama zuan sawn zawkna lamah chuan a han kap a, Rothuama chu a thawi chho thuak mai...

Rothuama chuan "Min thah theih ani ang chu, rawn hnai ta che u." tiin a han kap leh thuai a, an zinga pakhat chu leiah a thu nghal hnawk a. Thei leh thei lo hian a silai chu a han lek lui nain a tha neih chuan a tlin ta ngang lova, muang changa dah thla leh riai riain lei hawlh deuh titih chuan a han hmet puak ve ta hram a. Chutan hreh zet maiin a tlu bungbu ta ngut a. Tho leh tur a awm ta lo.

Rothuama chu a silai kah zawh rualin a lum sawn nghal thuai a, a awmna hlui zawn chu silaimu hian a rawn deng per leh chhuai thin. Rang tak chuan insawn nghal zel lo se chuan a thihna a rei tawh viau ngei ang...

Pathum chauh an ni ta, an hotupa ber chuan "Kap zel rawh u, kan that ngei ngei tur ani ringawt. Tumah tlanchhiat loh tur " tiin a naute ka dam chu a fuih sauh sauh a.

Chutia a naute a fuih mawlh mawlh lai tak chuan silai ri thuai chuan a tawng lai chu a rawn ti tawp chiang kher mai. A pum a tanga thisen rawn chhuak hupin a kun ngawih ngawih a.

Thinrim hachang thial rirawp rawp chung chuan a pum chu a hup vawng vawng a. Silai rawn ri nawn leh chuan a tukhum a rawn den leh tak siah avangin leiah chuan a bawk ta thlawp a...

Rothuama chuan ring leng lawng hian "In hotupa kha in zui ve vek dawn nge ekcheh phungin in tlanchhe zawk dawn?" a han ti a.

Nang phatsantu tenawmpa, i lak atanga tlanchhe tur khawp hian kan dawihzep lo, i vanneihna hian tawp chin a nei dawn tih hi hre rawh" tiin silai chu a puak thuai a.

Rothuama chuan "Min thah in rum anih chuan ka zawnah hian kap thin ta che u pasalthaho." tih pahin a han kap let ve a, amah rawn chhangtu chu a ngawi hlen ta. Mahse, pakhat la dam awmchhun chuan Rothuama banpuamah a rawn kap tlang ve ta zawk mai le...

Rothuama chuan nui deuh suk chung hian "Kha tiang tur ngei kha a ni tlangval." a han ti a. Hmanhmawh lo fahran hian a silaimu chu a han thun leh nghauh nghauh a.

Chutih lai tak chuan silai puak ri a awm leh ta tlat mai. Mahse, chu silai rikna chu hmundang daih a ni tlat. Chu chuan Rothuama ngaihtuahna a tibuai map mai.

A chhan chu a pu te khaw lam atanga silai rawn ri anih avangin a pute khaw pasaltha an rawn thawk chhuak anih a ring tlat a, zan thilah chuan ral leh ral lo hriat a ni dawn si lova, buaina chu belh chhahin a awm leh ta a ni.

Ala thah bang pakhat la awm chu thah vat a, Chhingmami chu sasengpui vat thain a hria a, fimkhur leh hmanhmawh ru tak siin a veh hnai ta a. Mahse, a rin loh deuh maiin thil a thleng ta.

A thah tumpa chu vawi leh khatah a tlanchhe ta buan buan mai. Silai dang rawn rik vang kha anih a ring a, Rothuama chuan "Hrep tak che chuan, ka that tho ang che." tih pahin Chhingmami awmna lam chu a pan san ta a. Midangin an rawn nanchin leh hmaa insaseng a ngai tlat.

Mahse, buaina dang leh bawk, Chhingmami a dahna hmun a thlen chuan Chhingmami alo awm ta hauh lo mai. Rothuama chu a ngaihna hre lo zetin a hawi kual nasa ta mai. Chutah a awmna lam pana a pute khaw pasaltha rual meichher nena rawn inzui duah duah chu an rawn hnai tawh si, Chhingmami awm lo nen Rothuama chuan engtia awm tur nge tih a hrethiam ta lo tawp mai......cont

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)