"MITTUI LUANGIN KIR AN REL LO" BY Dwm Pachuau (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: "MITTUI LUANGIN KIR AN REL LO" BY Dwm Pachuau

Unread post by Ngaia » October 24th, 2017, 11:28 pm

episode-129

Rothuaman a nu te vanduaina tawhna hmun a thlen leh chuan ni pawh a vanlaizawl titih der tawh mai. Rothuama chu kawng atang chuan a peng thla nghal thuai a. A nu te ruang a hmuhna atang chuan a zuk hawi thla a. Mahse, sakei ruang hmuh a nei lo. Chiang zawka en fiah a duh avangin a tawlh thla ta hrawt hrawt a.

Thlang deuh feah chuan thang bawn hliah chiah hnuaiah hian sakei ruang chu a hmu ta tlat mai. Rothuama chu a ding chat a, Chhingmami khan thudik zawng alo sawi ngei ani tih a hre ta. Mahse, a ringhlel zel duh tan chuan Chhingmami hian a nute a seh lo tih a tichiang chuang lo. A inthup tumna remchang pawh ani thei tho mai.

Rothuama chuan thuthmun a han rem a. Thil kal dan nithei awm ang zawng zawng chu a han ngaihtuah kual chiam chiam a. Chhingmami la rinhlelh fo chu tha ber ang nge tha lo ang tih a hrethiam thei lo a ni. A thilsawi te kha lo dik ta se anu te thattu ngei chu a thahsak ve ani phawt mai a. Mahse, chu chu thudik pawh lo nise engkim bul leh a chhan ber chu Chhingmami te chhungkua vang an ni tho tho tih a chiang.

Rothuama chuan chu sakei ruang let reng chu panhnaiin a han kuai let vel a, mihring sulhnu leh silaimu hnuhma a awm lova. A taksa erawh a hliam nasa hle. A bik takin a lu bawr leh a nghawng velah chuan sehna hnuhma a tam ngiang mai a. Chhingmami sehhlum leh an inbeihna a nih a rinawm viau mai.

Rothuama chu a ding hluai a. Engtia khawsak zel tur nge tih a han ngaihtuah vang vang a. Chutah a pute khaw lama let rih phawt mai chu tha berin a hria a ni. Tichuan kawng lam panin a chho ta hnak hnak a.

Mahse, kawng a thlen chuan a rilruah Chhingmami naupai chungchang bawk kha alo lang leh zawk a. Kha thil kha hriatchian a ngai tak e, tin a thianpa hmu lova let leh ngawt chu a tha ber lova hriatna aneih avangin Chhingmami te khaw lam bawk chu a pan leh ta nge nge a.

Mualchuan khawtlangin an lal nupa thihdan rapthlak tak mai an hriat chuan tute pawh mai chu a barakhaihin mak an ti em em a. Chutiang taka rawn che tur chuan tunge ni ang tih an inrinsiak ta luih luih mai. Mitin mai chu an nun a ralti nghal em em a, mipa leh tlangval an thinur an insawh nghawng nghawng laiin hmeichhia leh tar chaklo te erawh thlabarin an nun an hmang ta.

A upa hote bula alo sawi lawk tawh angin a makpa Liankima chu lal a ni ta nghal a. Chu ni rapthlak leh vanduaithlak tak maiah chuan Mualchuan khua chu a ngui nghuai mai a, tumah hlim hmel pu reng an awm lo.

Mualchuan khaw pa, pasaltha, val upa leh tlangval zawng zawng chuan chutia rawl rala rawn che a an lal te nupa rawng taka rawn thattu chu tupawh nise zawnchhuaha dama chhuah an tum lo bur mai. Mahse, tunge ni ang? Khawi khaw pasaltha nge tih erawh an hre mai thei ang em?

Chutih laiin Mualchuan khaw lal thar, Liankima leh a nupui Chhingmami chuan pawikhawihtu chu an hre chiang dun kher mai si a. Mahse, chu chu sawichhuah chi anih leh nih loh an hre si lo. An hre lo awm hmiah hmiah mai a ni. Chhingmami chuan a nu leh pa thi chu a tuar ngang mai a. An thih dan rapthlak tak avang chuan a rilru ana zual em em a ni.

An lal nupui chu a thlan tur thuk takin tlangvalin an lai a, tichuan ui takin an phum ta a. An lal erawh chu Chhingmami duhdanin an ur dawn a ni. Tin, an lal hi vantlang leh mimal tumahin han demna tur an hre lo, lal tha tak leh khawtlang hmangaihtu nia an hriat tlat avangin an ui em em a. Chu chuan phuba lak duhna pawh a pein an thin a ur zual phah nasa.

Tichuan an lal urna tur ramhnuaiah tlangval hoin thing lian tak mai kitin an zawn haw mup mup a. Lal kawtzawlah chuan dahin chu chu a lai takah an hem phel phawk a, a themthiam deuhin mihring leng turin an ker ta ngat ngat a. An zawh fel hnu chuan an lal ruang chu an zalh ta a. Thing phel lehlam an ker kuar ve bawk chuan an chhin ta a.

Tichuan a hnuai lamah mau pum leng tawk velin an rek kua a, tichuan tapaiah a kuang dahna turin an dawh sang a, a hnuaiah chuan mei an chhep ta hluah mai a. Tichuan an lal chu an ur ta a ni. A hnuai mau kaw lenga an verh kuakah chuan mau an rawlh a, chu chu vutsawhin uluk takin an char leh thlap a. Mau hmawr lehlam chu inhnuaiah lei lai khuarin an phum a. Chu chu a khu rimchhia leh mihring taksa tawih tui luanchhuahna tur a ni.

Tichuan Chhingmami pa ruang chu an ur tan ta a. Tichuan chhum lo chat lovin a taksa zawng zawng a tawih ral vek hma chuan an ur dawn a ni. Thla thum chuang lai te an ur thin avangin Mualchuan tlangval te chu an hah dawn hle mai a, a urna tur thingro, ramhnuai ami an zawn ngat ngat a ngai dawn a ni. Tin, zanah pawh chhunah pawh englai maha chawl lova a urna mei chu vil ngat ngat a ngaih avangin an ko a rit dawn hle mai a. Mahse, an lal an chawimawi theihna hnuhnung ber anih avangin tumah an phun eih lo. An lal chu an hrechiang lo em atin a ni, an demawm love.

Chuti tak maia tlangval leh pasaltha ho an thin a ur avang chuan an lal thattu Rothuama tan pawh fimkhur theihtawp a ngai ngei dawn a. Mahse, engmah chinchang hre si lovin an khaw lam chu ala rawn pan tak deuh deuh si a...

@Dwm Pachuau


episode-130

Thim thetah Rothuama chuan Mualchuan khaw kawtchhuah lungdawh a thleng a. Rothuama chu a han thu chawl vang vang a. A mit chhingin van lam a hawi chho a. A nun hmandan leh a chunga thil thleng tehhrep chu hriatthiam harsa a ti ngei mai.

Rei mawi tawk a chawlh hnu chuan kal leh turin a han ding chhuak a. Chutah chiah chuan a riltam zia a hrechhuak nghal a, a pum chu a rawn ri kal raih raih mai. Mahse, Rothuama chuan a riltamna theihnghilh tumin thil dang a han ngaihtuah lui hram hram a. Chuti chung erawh chuan a tha a zawi tan titih der mai.

Mahse, thil dang ngaihtuah lui hram hram chung chuan khua a lu ta a. Khawi lam nge a pan ang a tuin nge a pan ang tih a han ngaihtuah leh rauh rauh a. Liankima te in pan phaw2 mai chu tha bera a hriat avangin a pan ta a. Liankima te in a thlen chuan pawn lamah kawngka thingfakin an lo do than mai hi alo ni a. Midang han biaka han zawh teh duah a hreh bawk si avangin a hawi a hawi a. A tawpah chuan anmahni in hmuh remchan pahin an kawmchhak te ina luh a rilruk ta a. Muangchanga inherin a kalsawn leh ta nghal a.

An in chu ahma ang bawkin alo la ding ve ran a. Rothuama chuan a chhungte a mitthlaa hmu reng chungin an in chu a thlir vawng vawng a. Sawi thiam theih chiah siloh hian a rilru chu a vai ngawih ngawih mai. Hmana an hlima ni thin kha tunah chuan in ram mai alo chang ta si a. Hmana khawkhat pasaltha leh an chhuanvawr anih vena khuaah ngei chuan mikhual mai a ni ta si.

A pawikhawih phei chu hria se an zuah hauh lo ang tih a hre nghal. Chutia baihvai taka an in ram tawh a thlir vang vang hnu chuan an kawmchhak te inah chuan a lut ta tawp a. Rothuama hmel an hmuh chuan an lo lawm der thiam kher mai. A chhungte dam leh dam loh te zawtin an ngaihthu an lo sawi luam a. Rothuama chuan an dam that thu chauhin a chhang thung a. A chhungte thih dan chu sawi kher ngaiin a hre lo a ni.

Rothuama chaw ei tur an chhum that leh laiin an kawmchhakpa nen chuan an lo ti ti tui hman hle a. An lal nupa thih dan rapthlak an tih zia leh a thattu hriat an chak ziate chu an kawmchhakpa chuan a sawi charh charh a. Rothuama chu rinhlelhna an neih hmel lem lo bawka Rothuama pawhin mak a tihzia chu hahipin a lo tuihnih ve zel bawk a.

Rothuaman chaw te a eikham ve hnu chuan leng chhuak satliah tur chhuahin a chhuak ta nghal a. A theih chin chinah amah chu midang inhmuh tir loh hram a tum a. Lal in bul velah te chuan han tei chhoin a thianpa Liankima chu hmuh a chak ber a. Mahse, ani zawng lal alo nih luah tawh avangin a beisei ngam chuang lo.

Mahse, a vanneih a siamin Chhingmami pawn rawn chhuak chu a hmu fuh ta hlauh mai a. Midang awm ve kara lo koh chu thil tih chi rual nia a hriat loh avangin a zunram thiar zo lut leh tur chiah chu a han khuh kharh mai a. Chhingmami chuan Rothuama aw leh a khuh chu alo hai lo nasa kher mai. Rang lutukin a rawn hawi let nghal a. Rothuama pawh a rawn hmu chiang kher mai.

Rothuaman Chhingmamin a rawn hmu ve ngei tih a hriat chuan a lawm kher mai. Thildang ngaihtuah buai lovin Chhingmami te kawmthlang lam chu a pan nghal thuai a. Chhingmami chu zan reiah tal a rawn chhuah leh a ring ve tawp mai a ni.

Zan a rei zel a, Chhingmami rilruah pawh Rothuam bak a lang tak tak thei bik lo. Chhuanlam tha tak siamin a pasal Liankima bula sawiin a chhuak ta nge nge reng a. Liankima erawh chuan a nupui keimi chhuah duh chhan diktak chu sa seh tur a zawn duh vang anih a ring ve hmiah a.

Zanlai ar a khuang al al tih chuan Rothuama chuan Chhingmami thawm rawn ri thla san san chu a hre ta a. Chhingmami rawn thlen chuan "Ka nghak rei hle mai che. Mahse, kan thu hi anih tur ang ang ni fel law law se ka duh vang a ni." a han ti a. Chhingmami chuan "Ka dawt leh dawt loh chu i hrechiang tawh em ni?" tiin a lo chhang a.

Rothuama chuan "A hmuh zawng ka hmu ngei alawm. Mahse, naupai chungchang kha ania ka hriatchian duh chu" a lo ti a. Chhingmami chuan a chhang hauh lo. Rei ngial an ngawih dun hnu chuan Chhingmami chu a rawn tawngchhuak leh a. "Hetiang khawpa ka nu leh pa te i thah duh hi ka ring ngai lo." a rawn tichhuak a. A tawngah chuan lungchhiatna a tel tih hai rual a ni hauh lo mai.

Rothuama chuan "Thil kal tawh sawi tuma lo nghak che ka ni lo. Ka fa chu i pai tak tak em tih hriatchian tum chauh ka ni." a han ti chang rawt mai a. Chhingmami chuan "Tun thleng pawh hian minla ring lo ani maw? He ka naupai avang hian nupa nun ka la hmanpui thei lova, chu chu i thianpa hian hrethiam lovin hmel hlim pawh minla hmuh lo a sin. Mahse, pawitihna pakhat mah ka nei chuang lo. Ka duh leh ka hmangaih vanga nei ka ni lo tih hrechiang bertu i ni." a ti sak sak a

Rothuama chuan "Ka ringhlel che ka ti lo. Thudik hriat tumin ka zawt mai che a ni. Kan chetsual kha tumikhat chauh a ni a, amak ka ti a ni." a han ti a. Chhingmami chuan zam hauh lo hian "Tum khat chu nimahse vawi thum lai a ni." i rinhlelh leh rinhlelh lohah thil nihna hi a danglam lo." a han tih chuan Rothuama chuan sawi tur a van ta hle mai. Leilam bihin a kun ngar a
@Dwm Pachuau



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:33 pm

"MITTUI LUANGIN KIR AN REL LO"

episode-131

Liankima zun zung tur lo chhuakin ralkhata Rothuama kal liam tur chiah a hmuh rualin a nupui Chhingmami an kawmthlang atanga a rawn chhuak chho hlawl mai a han hmu leh chu a ngaih a tha lo ngei mai le. Chhingmami hnenah chuan "I awmdan hi ka lawm hauh lo." a han ti ram hmak mai a. Chhingmamin chhan a tum lai tak chuan midang lo chhuak ve an awm avangin engmah sawi lo chuan in chhungah a luhsan ta a.

Liankima pawhin midang awm lai leh hriat laia inngur chu a duh bik lem lova, thinur teuh chuan in chhungah a lut ve ta a. Kuang ur viltu an la tam avangin a thinurna han sawichhuah leh tihlan rem si lo, tuma hriat lohin Liankima chu a insawh a insawh mai. A rilru hre miah lovin tlangval leh upa ho chuan phuba lak chungchang ringawt an lo sawi ve bawk a.

Chutia, a nupui leh a thianpa ngawih ngawih tunang zan rei tawh lutuka an han inhmu fal tur chu eng nge an tih anga eng nge an sawi ang tih ringawt mai chu a ngaihtuahna luahtu a ni. Chhingmami nena an inneihna lah thla hial a vei tawh a, nupa nun hman takngial pawh ala duh lo te a ngaihtuah chhuah phei chuan hetia an lo inhmuh ruk thin vang hi a lo nih hrep dawn hi a ti rilru ta tlat mai.

A thinlungah thikna a rawn so bulh bulh a, engkhaw sawi set set lova Chhingmami chu sah bun hmawk mai a duh ta rum rum a. Chhingmami hi a duh leh hmangaih vanga nei a ni lo tih chu amah pawhin a inhrechiang khawp mai. Chuta karah a thianpa nen an inkawm theih loh phah bawk a. Thinrim em em tur anih laiin, an inneih hnua Rothuama leh Chhingmami an lo inhmu ru thin anga a han ngaihtuah meuh chuan a thik lo thei ta hauh lo.

Rothuama kal liam tur kha a hmu hman zuai chauh a ni a. Rothuama ngei ani tih erawh a chiang. Mahse, a nupui nen an lo tawm dun ani tihna erawh chu a ni lo. Hriat pawh ala hrechiang hauh lo. Chuti chung chuan an tawm dun angah ngaihna a nei nghal deuh mai chu a ni a, chumi avanga a thinurna leh thikna chu engvang nge ni ta ang? Chhingmami chu alo hmangaih hman ve ta mai em ni tih pawh a inhrethiam tawh lo.

Rothuaman a thlenna an kawmchhak te in a luh chuan a tum loh deuh maiin tlangval leh an khaw pasaltha an lo awm khup mai chu mak a tiin thil fel lo a awm anih a ring nghal mai. A rinna tichiang turin a silai leh a sahmim dahna lam chu a'n melh zauh a. A lo awm ta hauh lo mai.

A rin ang ngei chuan an zinga val upa pakhat chu lo ding chhuakin "Khai le Thuama, nang hi kan lal te nupa rawng taka thattu i nih rinhlelhna tha tak mai kan nei tlat mai." a han ti a. Rothuama chuan a chhang lo. Val upa bawk chuan "Sawi duh i nei em?" a han ti a. Rothuama chuan zamna chhete mah nei lo hian "Rin te chu thiang alawm." a lo ti mai a.

Rothuama chuan an val upa mitah tak chuan a en kal mai a, hlauhna leh zamna a nei hauh lo. Mahse, thil a dik dawn lo tih pawh a hria, chu in chhung boruak chu a rit sawt kher mai. An tam hneh em mai a, ani hmanrua nei bawk si lo chuan a hneh dawn lo tih a hrechiang. Mahse, a hlau chuang tlat lo.

Val upa chuan "Rin chu a thiang tak ang. Rinna chu a dik tih i pawm angah pawh a ngaih theih ava nih hmel ve?" tiin rothuama chu a han melh a. Rothuama chuan "Ka pawm leh pawm lohin kawngro a sut leh sut loh a thu te pawh a ni ang chu." a lo ti ve leh khauh bawk a.

Val upa chuan Rothuama sahmim atang chuan an lal luvun leh a sam a hlehsak a dah kha rawn phawrhin "Thuama, hei hi tu luvun nge tih tumah hrilh kan ngai lovin ka hria. He khuaa luvun hlehsak awm chhun chu kan lal chauh kha a ni." a han ti ta a.

Rothuama chuan a tihsual leh a fimkhur tawk loh zia a hmuh chuan pawi a ti hle mai. Mahse, chu a pawi tihna chuan engmah a thlak danglam dawn lo tih a hria. Pawiti anga lan buai pawh a tum tawh lo. Midang lo awm ve, amah khawih leh thah chak em em hmelpu ho chu a han en kual a. Mal leh malah chuan tuman an cho lo tih a hria.

Av val upa chuan "Pasaltha i ni a, i fimkhur lo deuh a ni. Ninhlei thil thuah i sahmim hi naupangin enin hei hi an hmu ta hlauh mai a. I tan a pawi ani tih hrethiam lo nana na chuan pawnah kengchhuakin puitling chinin an lo hmu ve ta si a, he kan lal luvun kan hmuh rual hian a thattu pawh kan hrechhuak ta hlauh che a ni e." tiin thil awmdan chu a han saw charh charh a.

"Mahse, he i thil tih hi nangma ka atang ngeia hriat kan duh." tiin hmawr a han bawk a. Awm zawng zawngte mit chu Rothuama chungah chuan a fu ta thuap mai. Rothuama chuan "In lal luvun hi ka awh nana ka sahmima dah duh an awm a, an dah a ni e tiin sawi ta ila engtinnge in tih ang?" a han ti a.

Thawm a awm nghal hak a, an val upa chuan lo khap vatin "Chutianga i ti duh anih chuan i thu a nia. Keinin thudik i sawi hma chu zawlbukah kan dawp dawn che tihna a ni mai awm ve. Damin i chhuah a rinawm ta lo hle mai. I duhdan ang tak chuan he thil chungchang chu han sawi ta che, kan lo ngaithla ang e." tiin thuthmun a rem ta a.

Rothuama chuan.......

@Dwm Pachuau

"MITTUI LUANGIN KIR AN REL LO"

episode-132

Rothuama chuan "Inngaihtuah lawk ka duh e." a han ti a. A sawi zawh rual chuan a mit a chhing ta vang vang a. Thil awmzia leh engkim mai chu a chin chhuaka han sawi vai vek mai a duh a. Chumi anih chuan tumahin an dem a ring lo. An dem lo mai nilovin an lainat a ring ve em em zawk a ni.

Mahse, thil nihna diktak chu sawi ta se chumi nghawng tur chu a han ngaihtuah ve leh a. A hmasa berin a fa pai mektu Chhingmamin a tuar hmasa ber ang. Mualphona zawng zawng khumin thah hial an duh ang tih a ring. Chu chu a fa a pai avang ringawt pawhin a remti thei si lo.

Tin, a pasal leh an lal thar, a thian tha ber nibawk Liankima chu miten eng hmuhin nge an hmuh tak ang? Lal nih zui chu sawi loh, an that ve duh hial maithei tlat. Chu chu a remti thei lo bawk. Tin, zah taka an lal kuang an ur mek pawh hi an chhunzawm duh kher lo ang. An khawtlang chu buai taktein a buai dawn tih a chiang.

A thianpa nena an thuruk, kha chen alo zep tawh hi a sahim nan ringawta a zep tlang theih leh siloh chuan mipaah a inchhiar ngam dawn lova, a thianpa ai pawhin nep a inti ngei ang. A chhungkua an thi mang tawh a. Kha zat kha hrehawm a lo tawrh phah tawh. Tunah sawichhuak leh se, khang a chhungte leh he thil avanga harsatna leh thih phah te te khan an lo nun leh phah dawn lova, anih tur ang ang niin a tuar ate chuan an tuar zo tawh.

Chung zawng zawng a ngaihtuah chuan thil nihna sawichhuah chu tha a ti ta lo. Tawrh a ngai anih pawhin tawrh tlang mai chu a tihtur niin a hria. Thudik a sawi avanga khawtlang buai dan tur leh nunna tamtakin a la tawrh phah thei dawna ahriat rual chuan a rawn meng a. Rothuama rawn men rual chiah chuan an thlang lama hmeichhe thlabar aw in "Sa a tla e! Sa a tla!..." a tih tuar tuar thawm chuan awmho ngaihtuahna ala peng ta thut mai.

Chu an phawk lek thut hun remchang lutuk chu Rothuama chuan bawhpelh a tum lo, "Chu le!.." tih pahin a bula tukverh hnai berah chuan a inkhawh chhuak ta zawk mai. Chu veleh in a awmho zawng zawng chu an phu nghal suau a. A then Rothuama zuan chhuahnaah chuan an zuang chhuak ve nghal a, a then kawngka puiah, an phek buai ta nuai nuai mai.

Chu in atang chuan vawi leh khatah an darh chhuak nghal huk a. Sa tla an um dawn nge ral tlanchhia an um zawk dawn tih ngaihtuahna hun pawh awm ta eih hek lo. Pawnah chuan an tlan darh ta chiam mai a.

A thenin "Kha ral, ral alo tlan e lo man rawh u. Kan lal thattu Rothuama, lo man rawh u." an tih tuar tuar laiin then khatin "He lamah hian sa a tla e! He lamah, he lamah hian." tiin an lo au ve chel chul bawk a. An buai dan a sai sa ta nuai mai.

An val upa pawh chu a kut chi lo hawi ta vel mai mai a ni ber e. A then a um tur zawk hre lo lah chu an intlan thelh ang seng sung a, thian ten helamah an tih vanga tlan lohna lama tlan kir leh ta nul nul lah an tam. An phili buai zia a hmuh chuan an val upa thinrim lutuk chuan a hachang a thial rap rap a. Thinrim aw teng chhuai mai hian "Rothuama kha umzui rawh u, khawiah mah a tlanbo hman tur a ni lo." a ti tuarh tuarh a.

An val upa kawhna lamah chuan an liam zung zung a, sa tla um tura tlan liam hman pawh an thahnem hman hle. Val upa chu thinur engphiar hian lal in lam a pan tau sawk sawk mai a. "Nang phiangsen hi maw lo ni che a, ava mak lulai ngai deuh ve. Kan khaw tlangval huaisen, mi leh saa zam ngai lo, kan chhuanvawr ber maw hmelma lo nihrep che a. I dam tawp lovang le." a ti chhuak bawrh bawrh a. Thil awmdan chu upa leh lal hrilh hlan a nghakhlel kher mai.

Zan thim, sa leh ral hmaa buai ngai lo leh zam ngai lo Rothuama chu thim thamah a tawm kar a. A tlan liamna lama tlangval dang an liam zawh chuan fimkhur taka lo chhuakin a innghahna in bawk chu a pan ru leh ta them them a. Tunah chuan, tumah he a pian leh a seilenna khuaah hian rin tur an awm ta lo.

Mahse, a innghahna inah chuan thawm ala tam em avangin thenawm khawvengho thil awmzia zawta an leng anih a ring a. Chumite hawn darh hun chu a nghah a ngai dawn tlat mai. A chhan chu khati teh thuta an buai tak avang khan a sahmin leh a silai kha tumahin lak nachang an hriat a ring lo a ni.

An lo la hlauh anih erawh chuan a tan a buaithlak khawp ang. Hmanrua engmah nei lova amah thah tumtu chuti zozai hmachhawn chu mi a tan lo chuan tih chi a ni lo tih a hria. Tin, amah chu a hla thei ang ber tlanchhe turah an ngai ngei dawn a, chuvangin khawvar hma chu khawchhungah hian a him a ring zawk tlat.

Mahse, fimkhur erawh a ngai lehzual ta a ni. An hmu vaih anih chuan an tan ani chu belchhung sa ang hlauh a ni mai dawn si a. A awmdan leh a dinhmun tehhrep chu a han ngaihtuah thin a. Vanduaiah pawh hian a vanduaithlak chung chuang hlein a hria a. Amah pawh a inlainat ve kher mai. Mahse, tun hi lung tih puam hun a ni lo tih a hria. A bul ber pawh a lo fimkhur tawk loh vang a ni a. Tumah dem tur an awm lo. Amah nghakhlel taka lo nghak fan fantu Rami a han ngaihtuah a, an khuaa hruai tur a awm lo mai ang tih pawh a hlauhlel ta lo. Mahse, damkhawchhuah erawh a tum ruh hle......(top leh rih tam)

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:34 pm

"MITTUI LUANGIN KIR AN REL LO"

episode-133

An val upa chuan hah thlan hluam hian lal in chu a thleng a, thil awmzia leh an lal thattu chu Rothuama ngei anih zia an manchhuah thu a rawn sawi tamai le... Chhingmami leh Liankima chu an inmelh dun kawk a. Mahse, midang ang bawk chuan makti awm takin an lang a. A hria apiang mai chuan mak an tih bakah an thin a ur em em hlawm a. Val upa chuan an lal rawn pah chuan amah Rothuama chu a tlanchhuah thu leh an zawn mek thu te, a tlanbo theih a rin loh thu nen lam chuan a sawi tlang nghal vek a.

An lal Liankima chuan "Ava mak awm ngai ve le, Rothuama kher kherin maw kan lal chu lo that ang, in hresual te chu ani em lo maw?" A lo ti a. Val upa chuan "hresual lah love, a sahmima kan lal luvun a hih ngei kan hmu a ni." A han tih chuan an lo thawm hak a.

Liankima chuan "chutiang anih zawngin a tlanbo hlen tur a ni lo. Meichher kha siam ula tlangval te khan umpui vat rawh u." A han ti a. Chu veleh tlangvalho chu an phu nghal suau a. Liankima chuan "in fimkhur hle loh chuan Rothuama nihna leh a mah tluk tur he khuaah tumah kan awm lo tih in hriat vek kha." Tiin fimkhur tur chuan a han chah zui a. A rilru tak chuan man se a tihna leh man lo se a tihna a izat thial awm e.

Rothuama chuan fimkhur tak mai hian a awmhmun chu chu a sawn hret hret a. Meichher kenga ram lama tlanliam zauh zauh reng a hmuh chuan amah man tum anni tih a hai lo. A thlenin te in hnuaiah chuan zawhte ang maia thawm nei lo hian a vak lut a. Chutah chuan thawm ngaithlain a thu ta vang vang a. A thlenna an kawmchhakte chu thawm an neih loh danah an mu tawh anih ngei a ring a. Mahse, chutih lai tak chuan thawm dim taka kawngka han nam hawng thawm a hriat takah chuan che miah lo hian a thu ngat ngat a.

A thawm hriat chu rei vak lo hnuah pawnah a rawn chhuak ta a. Kawtkaiah chuan a han hawi vat vat a, tumah a hmuh loh avang chuan ngaihtha angreng takin lal in lam a pan ta a. Rothuama chuan a thleninpa, ama sahmim leh silai nen maia lal in lam pana kal chu thawmdim takin a zui ta a.

Thui pawh a zui hmain a h aa kal xhu a rawn lehhawi vat a. Rothuama chuan "Khawia kalpui nge i tum a? A neitu diktak hian ka lo kawl leh tawh anb chu." Nelawm fahran lo chuan a han ti a. A thleninpa chuan "taia, nang elaw? E khai lo kal teh hetilai thim lai deuhah hian, miten min hmu reu reu ang e. A zia lo ka ti ngawt mai a thil awmdan hi, keima thiam loh a ni. Khatiang thil kha a awm ang tih nbaihna lo hria ila naupang hmuh mai theih loh turah lo dahtha ila tha tur a nia, a pawi ngawt mai. Min ngaihdam kan ngai a ni." A ti ta sawk sawk a.

Rothuama chuan "keima fi khur loh vang zawk a ni e." Atih chuan a thleninpa chuan "kan fate harh lutuk vang chauh ani. I sahmim an hai tih kan lo hre mai si lova, anni lahin pawi an tawk ani tih hre hauh lovin an pawntona lamah an lo kenb chhuak mai hi ani awm a, kan heti zota anih ber hi." Inthiam loh hmel tak chuan a han ti leh a. Silai leh sahmim chu Rothuama chu a pe ta nghal a.

Silai a pek pah chuan "Taia, thil awmzia hi hriat ve a pawina te a awm em? A awm lem loh chuan hetiang thil iti hi tun thleng hian awih har ka ti hle mai. Tin, tanpuo theihna che ka neih chuan ka inhuam hle a ni tih hi i hre dawn nia." A han ti leh hram a. Mahse, Rothuama chuan chuti maiin a ring thei hauh lo. "Insawi fiahna hun ka nei lo, ka lamtang inih takzet chuan chu chu hunin ala hril ang chu. Tihian haw leh ta la, mu hmak anb che." A ti a. A thleninpa chuan engmah a zawtchhuak dawn lo tih a hriat hnu chuan "Anih leh fimkhur takin kal ang che." Tiin a kirsan leh ta a. A lan theih chhung zawng chu Rothuama chuan a thlir a, a liam hnu chuan hmanhmawh takin a inthiarfihlim ve ta nghal a.

Hmun biru lai deuhah bawk bihrukna tur a zawng leh ta a. Zanlai ar a khuan thliai thliai hnu chuan a bihrukna hmun chu a chhuahsan leh ta zal zal a. Fi khur tak zela lal in lam panin a kal zel a. Mahse, lal in lan theihna a thlen chuan a thah tak Chhingmami pa ruang an lo la ur tlat a vangin a thianpa Liankima chu hmuh theih inbeisei chi a ni lo tih a hriat hnu chuan beidawng tak chuan a han thaw hak a. Hetiang anih rau rau chuan a pute khaw lam pan phawt mai chu tha berin a hria a, tichuan tuman a kal an rin lohna lam tur nia a ngaih lamah chuan hawng phawt tur chuan a kal ta a.

Mahse, Rotnuama chuan alo ring sual chhiava mai chuniin. Thui ngial a kal hnu chuan "Ding nghal rawh, i chet leh chuan kan kap nghal ang che. Silai kawhmawr engzat nge i hmachhawn tih i hre lo a nia." Tih ri a hre ta thut mai. Rothuama chu a ding nghal chat a, zan thil anih avangin han hawikual mahse tumah a hmu lo. Mahse, chu vang ringawta kal luih tum chu a finthlak loh tih a hrechiang ngang mai a. Che lo chuan a ding ta reng a.

Chutah Rothuama chuan "Khatia tawmsen renb lo khan mipa innih ngai chuan lo chhuak ta che u maw le." A han ti a. A silai chu kap mai thei turin a inpeih at a. Mahse, amah rawn autu aw bawk chuan "i silai kha leiah khan paihthla nghal rawh, ka sawi anga i tih loh chuan i thluak kha ka verh nghal ang." A rawn ti leh ta mauh mai.

Rothuama chu a inngaihtuah vang vang a, a silai a paih chuan pakhat tal thihchilh pawh duh se tihngaihna a awm dawn lo tih a hriat avangin a paih duh bik ta hauh lo mai. Anih nih nihrawih mai chu hunin a hre ta. "In duh chuan midawihzep ber ang chuan han che ula, ka hnunglam atang chuan min han bei ta che u. Silai hi ka paih dawn lova, in duh chuan ka hmuh ve theih hma cheu hian min kap rawh u." Ati ta chheu mai le........

Heti chin hi ni rih phawt mai rawh se aw. Touch atang chuan ka type thiam loh bakah ka tichak thei thlawt rih lo. Nal tak leh diktak sia type par par tur chuan hun ka la dun rih a ni, member te hriatthiamna ka dil mawlh mawlh e. Naktuk zanah kan zawm leh dawn nia u.....

@Dwm Pachuau

"MITTUI LUANGIN KIR AN REL LO"
episode_134

Rothuama chuan an sawi anga a awm loh chuan an kap duh tak tak mai ang tih a hrechiang ngang mai. An lal chhuan leh an ui em em te nupa thattu a ni miau a, dama an chhuah chu beiseiawm loh tak a ni. Mahse, ani lahin chuti maia awlsama inmantir emaw inthah tir chu a tum bik bau lo. A silai hum nghet sauh sauh chung chuan a hmalam leh sir lam te chu a theih ang angin a melh kual a.

Amah rawn autu bawk chuan, "Silaiin kan tin reng che a, a thenin kan rawn pawh dawn che, i chet vaih chuan silai a puak nghal ang." A han ti a. Chu thu Rothuaman a hriat chuan a nui suk a, a chhan pawh a beisei loh hnuah chet thutna hun nei dawnin a inhriat vang a ni. Engzat nge annih tih a hriat loh avang leh ani chuan ral anga ala en chiah loh avangin beih !et ai chuan insaseng rih a duh zawk vanga ni.

Tichuan amah rawn pana pen thawm a hre ta, pakhat mai an ni loin a hria an pen thawmah chuan, chutih lai vek chuan amah betu ber chuan "I chet vaih chuan i thi nghal dawn tih hria ang che." A la rawn ti chhar chhar a, Rothuama panhnai mektute hnenah chuan "Che thei miah lo tur khan phuar hlawm ang che u." A ti zui bawk a.

Rothuama chu a din ngaiin ala ding ngar a, amah rawn pantute chuan an rawn hnaih viau tawh a, silaia lo tin mektute tan pawh tum loh zawk kah palh mai a awl viau tawh ang tih tur khawpa an hnaih hnu chuan vawileh khatah Rothuama chu a in khawh zawt mai. Chu veleh silai a puak nghal thuai thuai a, Rothuama rindan ang ngeiin mihring natuar thawm chuan a zui ve nghal zat bnawk a. Mahni thiante zawlk an kap ani tih a chiang kher mai.

Rothuama thawm chu ramhnuaia tangkawng um ang mai hian ari thla ta rum rum mai a, silaimu chuan a umzui tuar tuar a. Mahse, zan thil ngang anih avangin an tum erawh a fuh bik lo anih hmel. An thian hliam tuar buaipui tawk an awm a. Rothuama lah dama chhuah an tum hnaisai bawk si lo. Mi panga vel chuan Rothuama chu an umzui nghal a, ram pa!ailengah chuan an thawm a tha rem rem kher mai.

Rothuama chuan an rawn umzui tih chu a hre thuai a. A rilruin, aw min um zui lo ula tha zawk tur, thah cheu hi ka hreh asin. Thil hi in hrethiam si lova aw...a ti vang vang a. Amah chu engti zawng maha inman tir a tum therte si lo. Kawng awm lo, zanthim ni bawk siah chuan rinthu takmeuh meuha tlan a ngai a, ram chin hre chiang hle lo tan chuan thihna tluk thawthang tho a ni e.

Rothuama pawh, a vanneihna chuan a daih seng leh ta bik lo, a rah pialin a thlanglamah chuan a petek ta a, a invawn tanna perhte chuan a dawl loh avangin a zung nen lam a pawt phawng vek a, tichuan a hnuai awih bakbahai lamah chuan a lum thla ta bian bian mai le. A lum lai pawh chuan ri!ru fim takin a awm a, a silai chu a thlah palh mai ang tiha hlau em em a. A thih loh hram ala beisei fan ani.

Rothuaman nikhua a rawn hriat leh chuan ahan hawi vat vat a, thawh mai ahan tum chu a khel chu a kalh ta tlat mai, a silai a hmu bawk si lo. Pen luih a'n tum ngial pawhin a har lam deuh chu a ni. Mahse, chuta awm reng thei ani lo tih a hrechiang a, a kal thei tur ani. Ake chu a bung hmawk te anih ngawt loh chuan kal theih loh chu a tum lo bur mai.

Reitekhua a tuma tum takah chuan zawi zawiin a pen thei ta sawih sawih a. A thlang lawka a silai lo let ngat a hmuh chuan a lawm kher mai. Tichuan a pute khaw lam pan chuan a bai ta saih saih a, amah umtute a tawng leh anih vaih chuan him a har tawh hle ang tih a hria a, inman tir ai chuan a tam thei ang ber thihchilh tawp turina rilru a siam sauh sauh a...

A khaw tlangval te hlawhchhama an lo hawng tih a hriat chuan Liankima chu a thinur hle mai a. A hmel hmuh hrehawm khawp chuan a ang tun tun reng mai. Mahnia awm ka duh atih miau avangin midang zawng chuan an tinsan ta diak a. Chhingmami nen chuan an inmelh kal mai a, Chhingmami chuan zu a han thlitsak a, Liankima chuan alo tlak nghal piap a.

Chhingmami chuan "I thian tha ber a ni a, an man lo hi i lawm zawk ang tih chu hriatsa a ni, thinrim viau anga i lang kha hmuh hrehawm ka ti." A han ti a. Liankima chuan "Ka rilru i hre therte love, hmuh hrehawm i tih leh kalbo la ti nia." Alo ti hmuk a. Ni e, Liankima rilru tur hi hriatthiam a har takzet a, Rothuama athianpa ber an man thei lo hi a lawm ru viau ang nge thi mahse a pawiti miah lo tih chu hriat har tawh tak a ni, hunin ala hril ang chu.

Apu te khua a luh dawn chuan ni a tla dawn suar suar tawh a, ralkhat atang hian kawtchhuah lungdawh chu a lang iar a, Rothuama chuan kawisawi zeta ding hian a han thir a, a chauh em avangin a hmu phe ruai mai. Mihring niawm tak te chu hmuin a inhria a. Mahse, a khawhmuh a fiah loh em avangin engmah a chiang ngam lo.

Muangchangin a bai leh ta saih saih a, a hnaih hle tawh tihah chuan lungdawha hmeichhe pakhat awm chuanamah chu a rawn thlir reng tih a hre thei a, chutah vawileh khatah chu hmeichhia chu Rothuama lam pan chuan a rawn tlan ta chiam mai. A rawn thlen dawn tepah Rami ani tih a hre ta chauh a.

Rami chu a rawn hnai zel a, Rothuama awmna a rawn thlen hma chuan lawm avanga lungchhe tak mai hian a mittui a dir zung zung a. Rothuama awmna a thlen rual rual chuan Rothuama chu a pawm nghal thlawp a, engmah sawi lovin a lungchhia chu a inhnit hlawp hlawp a. A nghet thei ang ber hian Rothuama chu a kuah ngawih nbawih a, Rothuama pawhin zawite hian alo kuah ve bawk a.....

@ Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:34 pm

"MITTUI LUANGIN KIR AN REL LO"
episode_135

Rothuama chuan a ngaihna hre lo tak mai hian "Engti zia nge hetia i awm mai. Pawi hai a thleng ta em ni?" Tiin a han zawt a. Rami chuan aw tham tiak mai hian "Ilo let leh har si a, ka ngaih a tha tjei lo a ni. Min thihsan ta mai emaw ka ti hman alawm, ka hlauhthawn zia chu sawi ngaihna pawh ka hre lo. Nitin ka thlir thin che asin." Tiin Rothuama chu a kuah nghet sauh sauh a.

Rothuama chuan, "Mai mai thin a, thi mai hman pawh ka ni hleinem. Titeh i hawng teh ang, mite reu reuin min hmu palh ang e." A tih chuan in lam panin an inzui hawng ta a. A puten Rothuama hmel an hmuh chuan an hlim kher mai. Zanriah hmeh atan api ch7an an arpui tui lai a talh chawp leh a, chumi tlai chuan hlim tak leh puar tlang takin chaw an ei ta a.

Liankima chu lal mah nise amah ala naupangin tlangval ang mai ala ni a. Ramvah leh lui kal te pawh a khat tawkin ala ti zauh zauh tho a, mahse hunawl a neih tam loh avang erawh chuan a duhang pawhin a chhuak vak tam thei lo a ni. Chhingmami hnenah chuan "Chaw min han fun teh, ka'n tei chhuak mai mai teh ang." A ti a. Chhingmami chuan ngawi rengin a chawfun tur chu a siiamsak nghal mawlh mawlh a.

Liankima chhuah hnu chuan tlangau hnenah "Chhiari a awm em va en la, a awm chuan rawn leng phei teh se." Tiin a tir nghal a. A rilru hahna leh a thawpikna te, midang hriatpui ve loh a harsatna zawng zawng chu hrilh vek mai a duh tawh a ni. Mahse, tlangau rawn let leh chuan Chhiari chu a feh bo daih thu a rawn hrilh a. Chhingmami chu a ngui rawih mai. Anih rau rau chuan keipawh chhuak harh ve ila a tha ang. Liankima rawn haw leh hmain ka thleng hman dawn tho tiin kal tumna lam pawh nei chuang lo chuan ram lam a pan ve ta a.

Liankima chuan a silai puin a kal zel a, a rilruah sakah tumna leh chawhmeh ilo fahran zawn tuma chhuak ani bik lova, an tun lai boruak leh a nupui nena an inkar vel vanga a in awm peih lo chhuak a ni bawk a, thawm pawh a dim hran lo. A thianpa ber Rothuama chu hmu hlauh ila aw a ti rilru rauh rauh a. Mahse, hmuh inbeiseina erawh a nei chau hle lawi si.

Chutia muangchang leh rilru kawm rauh rauha akal lai chuan a awmna atanga thlanglam hla deuh fea hmei chhe thlabar au thawm hi a hre ta thut mai a. Liankima chu a ding nghal chawt a, a thawm hriatna lam chu a han ngai chang zawk a. Chutah eng khaw sawi set set lo chuan a tlan thla ta chiam mai a. Au thawm pawh chu ala awm reng a, mahse a aw a tang mai chuan tunge tih a hre thei lo.

Sa nge anih ang ral tih a hriat mai bik loh avangin thawm chhuah hmasak loh a tha zawkin a hria a. A thlen dawn tepah chuan a silai chu a han endik hmasa leh te te a, tichuan fimkhur takin a panhnai leh ta a. Hmeichhe au aw chu a zawi tial tial a, Liankima pawh a thleng ani chawpchilh ve nghal mai. Hmun fai lai deuhah hian tutih hriat loh hian hmeichhe pakhat hi alo bawh ur chu a zuk hmu ta mai a, Liankima chu a sa zak mai.

Hmeichhia chu a theih ang angin lo tang ve bawk mahse tharumah a hneh loh em avang leh a chauh tawh em avangin a tlawm tawh nge la tlawm lo tih pawh hriat mai theih ani lo. A puan bih lah chu a awm hrang nawlh tawh mai si a, Liankima chuan thinrim khur hlawk hlawk hian a panhnai ruak a, "Zawng hurpa" tih leh a bawhtupa nak thawla chhuih chu a rual ta nghal a. A chhuihna bawk a chupa chu a lir thla nghal tawl mai. A hmeichhe bawh sirah chuan a vial nghal ngawlh ngawlh a.

Liankima chuan khawih nawn a ngai lo tih a hriat chuan chu hmeichhe saruak, a samin a hmai a khuh deuh nuai chu Chhiari ani tih a hre nghal a. Chhiari chuan chau tih hriat tak mai hian a zahmawh chu alo hup ve tawk tawk a, Liankima chuan a bula a puan chu chharsakin a khuh nghal thuai a. Dimtea kuah thoin a han thut that tir te te a, chutih chhung zawng chuan a sualtupa chuan tunge tih hriat tumin Liankima chu a rawn maelh tawk tawk a.

Liankima chuan chupa chu a han melh ang ke kaw a, "Enge thil awmzia han sawi teh, he nula hi i ngaihzawng ani em?" A han ti a. Aw khur bauh bauh hian Chhiari chuan "Aih, kan inkarah engmah a awm lo." Tiin alo chhan khal a. Liankima chuan leia mu hlawm rengpa chu kuai dakin "Remchang i hmu a i sual ta mai tihna ani maw?" A han ti chhum hmuk a, chupa chuan a chhang lo.

Liankima thinur chuan "Kei hi min chhang lovang maw" tih leh a hmuia ben a rual nghal a, chupa hmui chu a thi nghal zawih zawih a, a hlau lutuk chuan zun a cheh zawih zawih mai. Liankima chuan "Lo hre hlauh lo phei ila i hlawhtling ngei dawn tihna a ni a, he i pawikhawih avang hian i chung a rit hle dawn tih hria ang che. I thih leh i dam hi ka thu thu a ni tih hria la, zaninah i chungchang hi upa te nen kan rel ang. Tunah chuan ka khawih zui tawh rih lo ang che." Tiin Chhiari chu a kaitho a, tichuan a kalpui ta a.

Midang an hmuh hnuin chungho rual chuan Chhiari chu a hawng ta a, Liankima erawh chu ram lamah bawk a kir leh a, a thiltawn chu pawi a tiin ngaihpawh a ngaihtuah zui duh lova. A rilruah Rothuama bawk a rawn lut leh a, hmuh a duh em em a, thil eng emaw sawi dunpui a duh a ni. Mahse, chu chu tuma hriat loha tih a ngai a, atan a buaithlak tluk zetin Rothuama tan lah ani rawn hmuh chu tihngaihna awm lo tluk ani bawk si.

Mi ngaihah chuan lalpa anih mai bakah lal fanu hmeltha nupuiah a nei a, chu tluka duhthlan tur chu a awm chuang lo. Mahse, a nun tehhrep chu a hrechiang tan chuan hremhmun ang hlauh ani thung si. A nupui lahin tun thlengin nupa nun ala hmanpui duh lo a ni a, chungte hlei hlei chu miten hria se engtin tak ngai ang maw? A thianpa nena thim zing atanga an lo chhuah dun a hmuh atang phei kha chuan rinhlelhna in a khat tawh a, lehlamah a thianpa mai pawh ni lo, a thian tha ber a ni a. Lehlamah lah a nupui, engmah hi a tha tak tak thei lo a ni.

Vawikhat chauh nupa nun hmanpui tum leh ila, chuta ala duh lo fo anih chuan a rinhlelhna pawh a dikah a ngai ang a, chumi hnuah chuan Chhingmami chu thah mai a duh tawh a ni. Han then ringawt dawn se, keimi a ni miau a. Atan pawh a hlauhawm si a, amah mai nilo, a chhungte nunna atan tak pawh a him tlat si lo. Bakah a that lo anih chuan buaina tamtak a chhuah phah ang tih chu chiang sa ni tlat. Hetianga nupa nun hmanpui theih loh nupui neih hi atan awmzia a awm lova, a duh loh chhan pawh hi thil dik lo leh fel hlel eng emaw chu a awm ngei a ni, zep ruk eng emaw chu a awm nbei ani tih a ring tlat a, chu chuan a thin a tirim zual tlat bawk.

Khua a tlai lam zel a, Liankima chuan hawn lam hnaih a rilruk ta a, zaninah chuan a nupui chu a nupuima nih ang ngeiin a thu thuin a awm tawh tur a ni. Anih loh chuan engpawh thleng se i mawh a ni ang, tiin a nupui thla chu a vau mawlh mawlh a, thinrim insawh nghat nghat chungin khaw lam chu a pan ta a.......

@ Dwm Pachuau

"MITTUI LUANGIN KIR AN REL LO"
Episode-136

Rothuama mu han harh hlawl chuan a mumang chu a ngaihtuah let rauh rauh a. A nu leh a farnu te nen a hlimtaka an infiam bawrh bawrh lai a harh chu a ui kher mai. A mumang chu a ngaihtuah zui rauh rauh a, muthilh zai pawh a rel thei tawh lo. Thil chihrang hrang ngaihtuahin a mutnaah chuan a let a let a a. Khua a rawn var chian chuan a pi leh Rami pawh lo tho in thawm dim takin an ri rak rak a. Rei vak loah Rothuama pawh tho ve nghalin a sairawkherh chu a la chhuak a. Tukthuan hmeh tur sava a tawn fuh beiseiin ngawi rengin ram lam panin a kal nghal vang vang a.

Tukthuan ei hun dawn tepah chuan Rothuama chu a lo hawng a. Apu chuan "Taia, eng chawhmeh nge i rawn hawn a?" Alo ti thuai a. Rothuama chuan "Eng teh lua mah ka rawn hawn love, tukin chu ka kut a kal lo tlat mai a. Ka fuh thei reng reng lo mai. Hei varung pahnih zawng ka rawn hawn." tih pahin a sava hawn chu chhuatah a thehthla nghal a.

Rothuama chuan a dumbur chu phawrhin leihkapuia apu nilum aina lam chu a pan ve nghal a. Apu chuan muang ban charh hian "Taia, vawin chu engmah ti lo la atha ang. I hmel kha a dik lo tlat, i rimtawng lutuk niin ka hria." A han ti a. Rothuama chuan a kuaite pak khuk talh talh pah chuan "I ngaihbel mai mai anih chu ka pu. Mipa a rimtawng theih tak tak ka ring lo, vawin chu kan nula hi an khaw lamah ka va dah ang chu ka lo ti asin." tiin a lo chhang a.

Apu chu alo ner nang nang a. "Chuti em em tur emmawni dawn le, i rawn thleng chauh a ni a. Chuti tut tut tur ani ngai love, iva kalna chanchin te pawh vawin chu nilengin kan ngaithla ang chu ka lo ti rawk asin. Bakah, hei Rami pawh hi a fel em mai a, han chelh rih deuh te pawh ka chak asin." Alo ti duah a.

Rothuama chuan "Amah hi ka mawhphurhna ani si a, mawhphurhna hlen loha awm reng hi tha ka ti lo biau asin ka pu." alo ti ve bauh a. Apu chuan "Chu ngei tur chu a ni. Mahni koa tla hlen thei lo leh ngai pawimawh lo mi nih hi zahthlak ani ngai. Marawh chu, amah pawh hi ka lo zawt ve chhin reng phawt ang a. Harsatna dang a awm loh tak leh naktuk lamah i dah dawn nia." A tih leh tak avang chuan Rothuama chuan a chhang zui duh ta lova.

Tukthuan an ei lai chuan Rothuama pu chuan "Ramte, hei Taia hian vawin lamah ka va dah ang che a ti che a. Mahse, vawin lam chu han hahdam ve phawt se ka ti deuh a, in khua te pawh i ngai ve tawhin hawn te pawh i chak viau tawh ang tih chu hriatsa a ni a. Engnge ngaihdan te i nei em?" tiin a han zawt a. Rami chu a thu kun deuh lap a. Zawi sap hian "In tih dan dan ani mai." tiin alo chhang ve a.

Apu chuan "Um, anih chuan a tha e. Vawin lam chu hahdam tlang ila, harsatna dang a awm loh chuan naktuk lamah in tum dawn nia. Taia nen hian vawin chu inthlahna sa tur zawng dun ila atha ang e. Nikum kan chul sira sih kha i zuk chang teh ang." Atih chuan a chhungte chu an hawi phawk nasa hlawm kher mai. Rothuama chuan "Ka pu, i thei meuh tawh dawn emmawni le, keimahin ka zuk kal ang e. Inah lo awm zawk rawh." A ti a. Apu chuan "Mai mai a, nang meuh chu ka tluk tawh lo che anga, panazawng chuan min la tluk kherlo maithei a nia " atih chuan Rothuama chu alo nui suk a. Kamthuah turin tui hmun lam a pan ta nghal a.

Chawhma zet Rothuama leh apu an inzui hnu chuan an tunna hmun chu an thleng ta a. Apu chuan an tui pai chu a han thiat khawlh khawlh a. "Hei ha, tlangval lai ava ngaihawm ve Taia..."a han ti a. Rothuama chuan lo nuih suk pah hian "Ila tlangval dawn chauh nimai hian ka hria asin ka pu." alo tih chuan apu chu a nui hawk hawk a. Rothuama dara ben thak thak pah chuan "Kha, tuisik hi han in ve phawt mai teh. I zuk kalna chanchin kha min han hrilh teh khai." A tih zawm zat a.

Rothuama chuan tuisik chu a han thiat ve leh khawlh khawlh phawt a. Chutah thuthmun rem that pah chuan "Sawi tur a tam khawp mai. Kan lal te nupa chu ka dahtha a. Mahse, a hnua Chhingmami sawi leh danin ka nu leh farnu erawh kha chu sakei dang seh alo ni awm a." A han ti a. Apu chuan mak tih hmel tak mai hian "Engtin a? Chu chu i awih em?" A lo ti vat a. Rothuama chuan "Ka fiah ngat reng a ni." alo ti leh a.

Apu chuan "Tichuan a thilsawi chu alo dik ngei tih i fiah a maw?" A han ti leh ngat a. Rothuama chuan alu alo bu nghat a. Apu chuan "Tichuan engtin zel?" Alo ti leh vat a. Rothuama chu a ngawi vang vang a. Zawi sap hian "Ka tih tur chu ka rawn tlak chuan ka hria." A ti a. Apu chuan thinrim tak mai hian "Sakei dang seh anih pawh ka la ring hrep love. Lo ni tehreng pawh nise a bul ber leh a chhan diktak chu an chhungkua an ni tho tho. Keimah hi lo kal vein keimah ngei hian han sat ila ka va ti em...."tiin a insehruh tha keh a. A thinrim chuan a hapui a thial rap rap mai.

Rothuama chuan "Keipawh ka thi teuh khawp mai." a han ti leh a. Apu chuan "An hrechhuak che em ni?" Alo tih chuan Rothuama chuan "Ka lo fimkhur seng lo a ni. Tunah chuan ka khua ka lo tih ve thin ngei chu an tan ral satliah pawh ni lo, an lal te nupa thahsaktu ka lo ni ta. Min hmuhna hmun apiangah min thah an tum tawh dawn a. Keipawhin ka nun chhan nan chuan engpawh ka tih a ngai ve dawn ani." tiin rilru hah tih hriat tak mai hian thawk a han la halh a. Apu chuan a dara rawn vawn pah chuan, "Ka tupa, lungngai mahta che. Khawiah pawh awmin engdinhmunahnpawh ding la ka ngaihtuah hauh lo che a nia. Tin, kei i pu ka la thawk ve tawk tawk chhung hi chuan i mal lo tih hi hrereng ang che." A ti dap dap a.

Rei mawi tawk an chawlh hahdam hnu chuan an.sachanna.tur hmun siam chuan an buai dun ta char char a. An duhtawka uluka an siam zawh chuan an chawfun an bar dun a. Khua pawh alo chawhnu ruih tawh avangin a vawt deuh vur a. An chawfak kham chuan an silai te endikin an tifai leh te te a. An inpeih thawkhat hnu chuan an sa chan lo chhuah hun chu ngawi rengin an nghak dun ta ran a.

An awmna hmun chu ngaw chhah tak hnuaiah pawh kawr ruam, ni hmu tam lo tak mai anih avangin a vawt raih tawh a. A khat tawka an inbe leh zauh thin tih loh chu thawm a reh hle mai a. Chutia rei deuh fe an thut dun hnu chuan thawm an hre ta. Eng sa nge anih hriat tumin an pahnih chuan an ring an fan dun ak ak a. Chutia rei vak lo thawm an ngaihchan hnu chuan sakhi patuai chu an piah deuh atang chuan a rawn lang ta zan zan mai a.

Ala hlat deuh avangin Rothuama chuan nghah hnaih deuh thain a hria a. Apu pawh chuan alo tur duh lem lo bawk nen sakhi chu hmanhmawh lo fahran hian a rawn phei chhet chhet a. A rawn hnai ta deuh tih chuan Rothuama chuan uluk tak mai hian a han tin ta vang vang a. Chutah Rothuama silai chu a puak ta thuai mai a. Mahse, engtizia nge a silai puah rual rual chuan a bula thu a pu chu a thutna atang chuan a tla thla ve nghal ta tawp mai.

Sakhi pawh chu hniak phawi eih lo hian a lir nghal hlawl mai a. Rothuama chuan a sakhi kah pawh ngaihsak lo chuan a pu chu a zuk en a. Apu lah chu a lum thla nasa mai bawk nen, a thutna atang chuan a zuangthla ve nghal a. A pu lumna lamah chuan tlan thlain "Engtizia nge ni ka pu, i na em?" a ti thla nghal mawlh mawlh a. Changel hungin a pu lum alo dang hlauh chu a lawm kher mai. Rothuama pawh a pu tanna hmun chu a thlengthla chawpchilh ve nghal ruak a. Mahse, a pu malpui atanga thisen rawn chhuak a hmuh chuan a ding chawt a.

Apu chuan thei leh thei lo hian "Taia, min hliam tlat mai. Fimkhur rawh, inring rengin awm rawh." a lo ti tham tuak a. Apu thusawi pawh chu hre awmin a lang lo. Apu chu a pawm kang nawlh a, tlema hmun rem deuhah chuan nghatin a diar chuan a pu malpui chu a tuamsak nghal mawlh mawlh a. Apu chuan "Engmah a ni lo, ka ngaihtuahawm loh a nia Taia, i silai mu kha thun la khawi lam atanga silai hi rawn chhuak nge han en rawh. Fimkhur la, min tam hneh viau dawn anih chuan rawn let leh vat ang che." A ti a. Rothuama chuan a chhang eih lo, hachang thial rap rap chung chuan a silaimu a thun mawlh mawlh a. Apu rawn kaptu zawng tur chuan a kalsawn ta a. Apu chuan fimkhur turin a chah zui kawm lawm a. Mahse, Rothuama rilruah chuan thildang reng reng a lut tawh lo...........

@Dwm Pachuau

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:35 pm

"MITTUI LUANGIN KIR AN REL LO"
Episode - 137

Rothuama chu hmanhmawh leh fimkhur takin apu awmna atang chuan a kalsawn nghal a. Thawm a han ngaichang leh vang vang a, engmah thawm a hriat loh avangin a awmna chu pen hnih vel hian a han sawn leh a. A pen leh dawn lai tak chuan silai a puak ta thuai a. Rang lutukin Rothuama chu leiah a bawk nghal thlawp a. Mahse, a beng chu silaimu chuan a rawn thawi hman thuak tho mai.

Rothuama chu che miah lovin a bawk vang vang a. A rilruin atu phiangsen nge maw in nih a inpawi engnge maw kan sawi le...a ri rilru neuh neuh a. Thinrim hachang thial rap rap chung chuan a piah deuha thing lian tak dinna lamah chuan a bawkvak phei nghal a. Fimkhur takin silai rawn rikna lam chu a han hawi chhuak a. Mahse, tumah hmuh ala nei chuang lo. Chutah a ngaihtuahna chu sengin a bula kuttum tiat vel lung chu chharin a bawhna hmasa, hnim pik phen chu a han vawm che ta laih a. Chu veleh a rin ang ngeiin silai a rawn ri leh ta thuai mai.

Chutah zet chuan silai rawn chhuahna zawn chu a hre thei ta. Mahse, a hlat deuh avang leh ngaw chhung thim deuh ruih anih avangin a hmu chiang thei lova. Tichuan fimkhur takin a veh hnai ta tham tham a. An rawn hmu hmasa ang tih a hlauhawm bawk si avangin a duh ang tawkin a veh hnai thei si lo, tichuan ngun takin silai an rawn kahna chu a han en leh a. Tichuan a silai chu a han tin vang vang a, Rothuama silai chu a puak thuai a. Chumi rual chuan mihring natuar thawm chuan a zui nghal zat bawk a.

Mahse, Rothuama beisei loh deuh maiin hmun dang atang chuan silai a rawn puak chhunzawm ve zat ta mai. Rothuama inphenna thing chu a khem nghal sawk a. Rothuama chu rang takin a zuang sawn nghal zawk a. A silaimu chu hmanhmawh tak mai hian a han thun leh dawk sawk a. Mahse, a thun zawh hma chuan alam pana mihring rawn tlan thla ri a hre ta tlat mai. Rothuama chu a hawi chhuak nghal thuai a. An khua, mualchuan khaw pasaltha Darkhuma keh an upa min fapa Tawia rawn tlan thla chu a hmu ta mai.

A thil hmuh chuan Rothuama chu a barakhaih ngei mai. A rin loh leh beisei loh lutuk mai a hmuh chuan mitkhap kar lek chhung chu a hamhaih phah nghe nghe a. Mahse, tlan paha Darkhuma silai rawn hmehpuah chuan Rothuama pawh a tiharh chiang kher mai. Tlan pah leh hmanhmawh thil thua rawn kap ani bawk a, Darkhuma chuan a tum a thelh chiang kher mai. Tawia erawh chu a hnung zawka tlan anih avangin a hmaa tlan Darkhuma kah palh a hlauh vang nge a silai a hmet puak ve lova.

Rothuama chuan mahni khua te meuh han thah chu hreh taktein a hreh a. Mahse, annin thah ngei an tum bawk si avangin beih let mai loh chu a nun chhan nan chuan tihngaihna dang a awm tawh si lo. An rawn thleng tep tih chuan a silai chu a han lek chhuak a. Tin pawh tin tha hman tawh bik hek lo, a silai chu a puak nghal thuai a. Darkhuma chu a te thawt a, a lum hian a rawn lum thla ta buan buan mai. Rothuama chuan a silai paihin a sirah chuan a zuang nghal zawk a. Tawia silaimu chuan a rawn deng fuh ve teuh ngei mai.

A sahmima a chemtum a phawrh chhuak kim hman tep tih chuan Tawia chuan rawn zuanin a rawn bawh thlu ta thuai mai a. A chem phawrh tum chu leiah a thlauh nghal a. Tawia nen chuan an lum ta bian bian mai. An thlang fea ruam zawl laiah chuan a hrang nalh hian an tang ta a. Tawia chuan thawh pahin a chem chu phawrh a tum a. Chu chu Rothuama chuan a hmuh hmaih lo, a phawrh fel hma ngeia tihbuai a ngai tih hriain a va zuan ve nghal a. Chemtum inchuh chuan an innawr ta ngian ngian mai.

Tharumah chuan Tawia chuan Rothuama chu a khan lo deuh chu a ni. Rothuama chuan bawhbetin a chem hum lai chu chhuhsak a tum a. Mahse, a duh ang ngawt chuan a chhuh thei mai bik lo. An inlehthal chhawk zak zak hnu chuan Rothuama chuan Tawia ban chu alak herh sak thei ta a. Chu veleh a kut lehlama Tawia hrawka rek chung chuan a kut kehlamin a chem humna lam chu a herhsak ta vak a. Tichuan chem chu a chhuhsak thei ta hram a.

Han sah ngheng mai a tuma a tin lai tak chuan Rothuama tukhum chu a ri sawk a, a luhai chu a mit ta sulh mai. Chu veleh Tawia chu rawn tang ve lehin Rothuama chu a thatawpin a han tlawh leng lawp mai a. Rothuama chuan a chem hum chu a paih nghal lawp bawk a. Hmanhmawh taka rawn thoin Tawia chuan a bawhzui ve leh nghal a. Chem pawh chhar ta bik lo chuan Rothuama chu a rem lai laiah a hnek buan buan a, reh hlum ngei tum chuan a kut pahnih chuan a rek ta ngat ngat mai a. Chutih lai chuan chhak deuh atang hian Darkhuma chuan "That rawh that rawh, that la alu kha rawn la ang che." alo ti tuarh tuarh a.

Rothuama luhai chu ngai ala awh thei si lo. Tawia sah a tum lai taka Darkhuman a tukhuma a rawn vawmna atang chuan thisen a chhuak ngiai ngiai reng a. Chu chuan a khawhmuh a tifiah thei tlat lo. A theih ang ang chuan Tawia chu han bei ve bawk mahse a hneh dawn lo tih a hrethiam tlat. Mahse, Tawia pawhin chuti mai chuan a rekhlum dawn lo tih a hriatin tha thlah chuang miah lo chuan chem bawk a melh ve leh tan ta. Mahse, a tluk zawng khan Rothuama khan alo paih per hla angreng si, a rilru a buai kher mai.

A tawpah phei chuan a tihngaihna hre lo chuan a thianpa Darkhuma chu auvin "Chem kha min han pe teh, ka han sathlum vat teh ang." a ti ta a. Mahse, a thianpa Darkhuma chuan a rawn chhang mai si lo. Aw vin zet hian "Chem min han pe vat teh." a ti leh tuarh a. Darkhuma lah a puma silaimu luhna chu hupin thingbul ngheng hian a thu hle hle a. A thianpa thusawi chu hre awm pawhin a lang lo. A thianpa chu puih duh viau mahse a theihna chuan a tlin tawhin a ring si lo. Harsa tak chuan a sahmima a chem chu phawrhin a theihtawpa na chuan a han theh thla ta a. Mahse, Tawia tana han ban phak mai ngaihna a awm si lo.

Tawia chuan Rothuama a rehna chu a thlah thut a, a thianpa chem rawn theh thlak chu rang taka chhar tumin a inlet nghal thawk a. Rothuama nghawng tan ngei tum chuan a au tial ruan a. Mahse, thutlukna a siam sual ve ta tlat mai. Chem chhar tuma a kalsawn zawk hlan chuan Rothuama chuan a tukhuma an rawn vawmna lung chu a dap fuh ta hlauh mai le... chemtum nena Tawia a rawn let leh lai chuan lung chu a hum ta ran mai a...

Amah sahhlum ngei tuma Tawia ahan inlek lai tak chuan hmun leh hmunah a chhoh vawm ta ngheng mai a. Tawia hnar atang chuan thisen a rawn chik chhuak nghal zawih a. Chu veleh Tawia khupah chuan a han tlawh leh ngheng mai a. Tawia chu a rawn awp nghal rawp a, chu hun remchang chu Rothuama chuan bawhpelh a tum lo. Tawia rawn kun hniam lai tak chu a hmaiah tak chuan a lo tlawh dak ta awrh a. Pai chawn chawn chung hian Tawia chuan a hmai a hup a. Rothuama chu hmanhmawh taka rawn thoin a chem thlauh chu a rawn chhar a. Tawia hmai hup rawn dak chhuak leh chiah chu a theihtawpa na hian a han vai ta ngheng mai a, Tawia lu chu a lum nghal tawp tawp a. A taksa erawh chu a tlu zangthal ta huang mai a.

Chau zet hian Rothuama chu a ding tau mai a. A chem, thisen kai hnuang mai chu a en ngar a. A tukhum atanga thisen rawn chhuak chu a kuta hupin Darkhuma awmna lam chu a han hawi chho a. Darkhuma chuan thei leh thei lo hian insaseng alo tum mek a. Rothuama chuan chu chu a hmuhin "Mipa inih chuan lo ding rawh." A han ti tuarh a. Amah zawk chuan muangchangin a pan ta chhat chhat mai a....

@Dwm Pachuau

"MITTUI LUANGIN KIR AN REL LO"
Episode -138

Darkhuma chu thei leh thei lo hian a insaseng tawk tawk a. Mahse, a rilru a thlak nge a himzo dawnin a inhre lo zawk a ding ta hlawl mai. Rothuama chuan muangchangin a pan zel a, mahse that nghal mai lova thu zawh a duh a vangin chetsual palh theih ani tih a hria a, a fimkhur viau tho mai. Darkhuma lah, hmanraw chuh tur nei tawh hek lo, a thih hun tur chu a sakuh ser nghah tawp tawh mai a ni.

Rothuama chuan "Darkhum, min hnungchhawn lo khan rawn inher rawh. Mi, an hnunglam atangin ka bei ngai lo a nia." A rawn ti chher chhak a. Darkhuma chuan a pum hliam hup chung chuan a han nui sak a. "Rothuam, mahni lal te meuh pawh that duh chuan engpawh i ti duh ang tih ka hria alawm. Mipa ang chuan inchhal ve duh lo mai rawh. Tikhan i tih tur chu ti vat mai rawh, i thah tur mitmeng hi i hmuh zawngin i zam chhe palh ang e." A rawn ti ve a.

Rothuama chuan "Darkhum, i thi tur chalchang tawngvai anih lek chu. In lal nunrawng ka thahsak vang che u kha maw heti lai thleng thlenga min rawn umzui chhan?" Tiin a han zawt a. Darkhuma chuan "Hei hi kan lal thupek a ni." A lo ti chhum hmuk a. Rothuama chuan "Daw suh, in lal Liankima chuan kei min that turin tumah a rawn tir lo che u. Ani chu ka thian tha ber leh ka aihnah phahpui ani tih i hre vek. Mi bum chu tum buai hlek suh." A ti vin that a.

Darkhuma chuan "I thian chu a ni thin, mahse tunah chuan a ni tawh lo." A lo ti leh bauh a. Rothuama chuan "Kan hria ang chu, i chhungte hnena chah duh te i nei em?" A han ti leh nghat a. Darkhuma chuan "Nei lo. Mahse, kan lal hnenah khan a duh ang ka tihpuitlin theih loh avang hian thupha min rawn chawisak dawn nia. Nang anga midawihzep leh mahni lal te laka rinawm lo ka nih ve loh avang hian inchhuang takin ka thi tih i lo hrilh dawn nia." A han ti leh deuh kher a. Rothuama chu a lo nui hak a.

"I duh ang ngei chuan le, min en la i theihna zawng zawng hmang ang che." Tih pahin a chempui ken lai chu Darkhuma bulah chuan a theh phei sak a. Amah chuan ama chempui thlauh chu chharin "Inring rawh." A han ti leh a. Darkhuma chuan mak a ti kher mai. Muangchangin chem chu a chhar a, i inchhir lovang maw nauva?" A han ti a. Mahse, dik tak chuan a hneh dawn chuang lo tih chu a inhre chiang khawp mai. Mahse, chutianga damkhawchhuahna hun tha tlem rawn inherchhuak chu vanneihna hmachhuan tak meuhin a hnachhawn dawn a ni.

Rothuama chuan a pan hnai chhat chhat a. Darkhuma chuan a pum hliam theihnghilh thak khawp chuan ahan vai a. Mahse, Rothuama chuan a lo bum zauh a, a thelh chiang ngei mai. Sah hlum ngei tumin a tha neih zawng zawng nen a rawn vai nawn leh a. Rothuama chuan chu chu a lo nghah reng anih avangin alo kun leh zauh a. A rawn din chhuah leh rual chuan a'n vai nghek mai a. Darkhuma chu a thingthi nghal rup a. Darkhuma lu chu a hnunglamah hian a uai nghal hnawp a. Nunna nei tawh lo tih hriat fahran hian a tlu bawkkhup ta ruai ruai a.

Rothuama chu muangchanga inherin a silai leh Darkhuma te silai chu a chharkhawm a. Hmanhmawh takin a pu awmna lam chu a pan ta nghal a. Apu chu chau tih hriat tak hian a lo chhing diar diar a. Rothuama chuan "I harh em ka pu, i tha tiraw?"a han ti sawk sawk a. A pu chu rawn meng zauin "Ekhai a Taia, ka lo muhil a ni maw? Enge i an zawk, kei chu ka tha e. Ka ngaihtuahawm loh." Tiin a hawi ha ha a. Rothuama chuan "Engmah hlauhthawn tur a awm tawh love, an thi vek tawh." Alo ti thuai thuai a.

Apu chuan "A that nasat chu, min han thut tir teh khai. Ka pui ve thei ta lo che chu a pawi mang e. Kha i hliam ve elaw?" A han ti leh ha a. Rothuama chuan "Engmah tham a ni lo, chawei titui tawk lek a ni. I kal thei ang em, i harsat chuan ka paw bahlat ang che aw." A tih chuan apu chuan alu alo thing nar nar a. "Kal thei e a, khawilam mi te nge an nih reng reng?" Tiin thawh ahan tum a. Rothuama chuan lo puih pahin "Kan khaw mite an ni. I kal thei ang maw ka pu?" A ti leh a. Apu chuan "Helai thleng thleng hian an rawn umzui che ani maw, lo ngawi tak rawh se kan pahnih hian i zuk chimih vek law law teh ang." Tiin a malpui hliam chu a hmer ngat ngat a.

"Ni e, tunah chuan hawng phawt ila, in lamah ro hran kan rel dawn nia. I kal theih chuan kan sakhi kah pawh saw kan hawn hram loh chuan,"a han ti a. A pu chuan "Hawn e a, a chek ka hawp chak tawh teh mai asin. Va la rawh khai, kan inpuak chhawk dawn nia." Atih chuan Rothuama chu a lo nui suk a. An sakhi kah la tur chuan a kal ta nghal a. Tichuan muangchangin in lam pan chuan an inchhawm hawng ta a.

Rothuama chu a inngaihtuah nasa kher mai. Hei chen an rawn umzui chu ani ta mai a. Darkhuma sawi kha a dika a thianpa Liankima rawn tirh an nih ngat phei chuan ngaihtha keh lungmuanga mutna chi ani ta hauh lo mai tih a hria. Tin, amah mai ni lo, apu nunna ngei pawhin a tawrh phah lo chauh ani a. Tunah vanneiin thi lo pawh nise apu te chhungkaw nunna chu amah vangin hlauhthawnawmah an ding chu anita reng mai tih a ngaihtuah chuan pawi a ti ngei mai. Hetiang anih chuan an bula awm reng chi niin a lang dawn ta tlat lo. Tin, Rami pawh an khaw lama a dah vat loh chuan ani tan pawh a nunna chu a derthawng ve leh mai dawn tih thlenga a ngaihtuah chuan a rilru a buai map mai.

Khawdai an thlen chuan apu chuan chawlh a rawt leh avangin an chawl leh rih a, khawthim chian hnu chuan khua an lut ta a. An chanchin leh an thiltawn apute chhungin an han hriat chuan Rothuama rin ang ngeiin an hlauthawngin an thlabar ta. Apu chuan han tawng thlamuan viau dawn thin mahse an awm a nuam zan lo ani tih chu hai rual a awm lo. Rothuama pawhin chu chu a hmuhin hrehawm a ti a, amah pawh a inthlahrun phah ru em em bawk a. An sakhi hawn te chu chan nghalin zanlai pelhah an mu ve thei ta hram a........

@Dwm Pachuau

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2017, 11:36 pm

"MITTUI LUANGIN KIR AN REL LO"
episode - 139

Khawfing chah rualin Rothuama chu a harh a. A pute tih harh hlau tak chungin a tho nghal a, a thawmah Rami lo harh ve nghalin ani pawh a rawn tho ve nghal a. Reiloteah apu te pawh an rawn tho ve nghal sang sang a. Rothuama chuan "Nizan lam te ka pu i mu thei meuh em? Enge i hliam chu a an zel?" Tiin alo zawt nghal vat a. Apu chuan tuibur hmuam pah hian "Ka mutui aniang ka harh hauh lo mai. Hliam tihtham pawh ani tawh lo hei, ka dam tha khawp mai. Sakhi chek kha han hawp phei ilang chuan ka tlan par par thei hial maithei a ni." alo ti deuh duah a.

Rothuama chu alo nui vur vur a. "Anih chuan a lawmawm e, sakhi chek chu dul hmul khat phuar khawpin i hawp mai ani ang chu." tih pahin alu a hiat suah suah a. Apu chuan "Nangmah zawk kha engnge i an a? I lu te kha dim a ngai viau dawn ania." Alo ti let ve bawk a. Rothuama chuan "Hei hi chu engmah a ni lo. Kan thudang alai chuan vawin lam chu Rami hi dah tawh mai ila atha ang ka ti deuh a. Engnge i ngaihdan?"tiin a han zawt a.

Apu chu ngaihtuah muk hmel tak hian a melh ngai melhin a thu vung vung a, Rothuama chuan apu chhanna tur chu nghakhlel fe hian alo nghak reng a. Mahse, nghakhlel anga lan erawh chu a tum bik lem hlei lova. Rei ngial an ngawih dun vang vang hnu chuan apu chuan a tuibur hmuam chu a han pik puat a. Chutah muang ban chuar hian "Tha i tih chuan i thu thu ni rawh se. Nimina kan thiltawn khan i rilru a tinuam lo hle tih ka hre mai a, kan chungah pawh i inthlahrung a, nangmah vanga keinin kan tawrh phah hi i hlau tih kan hria a, nizan pawh khan i pi nen chuan kan sawi dun nual a. Mahse, kan thutlukna chu khawi dangah mah i kal bo tur a ni lo tih hi a ni." a han ti charh charh a.

Rothuama chuan thawk a han la hak a. "Ni e ka pu, i han sawi chhuah takah chuan zep thu pawh a cheng lova, helai thleng thlenga min rawn umzui zel takah chuan ka bula awmte tan pawh hian a him lo tih chu hai rual a awm ta lova, chuvangin ka ngaihtuahna tlang takin ka han sawi ang a, keimah avanga tu nunna mah derthawnga an awm hi ka duh lo a ni. Tin, tihtur hlenchhuah tur ka la nei a, chumi zawh lamah erawh chuan ka awmdan tur chu ka la ngaihtuah tha leh ang e. Mipa ka ni a, ngaihtuahawm ka ni lo tih hi in hrereng dawn nia." ati a.

Apu chuan a melh ngai ala melh reng a. Rothuama bawk chuan sawi chhunzawm lehin "Rami pawh hi nula fel tak anih chu ka ring a. An khaw lama hawn pawh atan thil nuam tak ani kher lo maithei. Mahse, ka bula a awm chuan ani pawh a nunna atan a him tlat si lo a ni. Anu a boral tawh a, an khuaah pawh let se han belh tur a vai ve viau maithei a. Mahse, mahni khua zawng mahni khua nge nge a ni a. Tin, anu lunghahna hmun a ni bawk nen han awmbosan hlen ringawt pawh a harsa ve thoin ka ring a. Hei hi chu ama duhthlanna ni teh se." a ti leh a.

Apu chuan Rami zing buhdeng lai chu kovin Rami chu alo lut nghal a. A pu chuan "Hei Taia nen hian kan lo sawi dun leh mek a, inkhaw lama let leh chu i duh chiang maw? Keini chuan kan hnenah hian awm hlen duh mai la kan ti hle mai a. In khuaah pawh let leh la i nu a awm tawh bawk lo nen, tunge maw i belh chuan ang le?"tiin a han zawt leh a. Rami chuan Rothuama chu a han melh zawk a, ani lah chuan khawdang alo hawi daih thung a. Rami chuan "Ka nu leh pa, kan chhungkaw lunghahna hmun han awmbosan ringawt mai chu ka ngaingam lo deuh a ni. Ka nu thihna lah ala rei lo si a, a thlarau pawh a zahawm hlein ka hria." ati a.

Rothuama te putu chuan an han ngaihtuah vang vang a, Rami thilsawi chu a dik an tiin han hnial leh ngaihna vak an hre lo. Apu chuan "Ani viau mai bawk si. Engpawh nise, chutia i duh tlat chuan han dan luih che pawh chu a rem loah ngai ta ila, tukthuan ei khamah hian muangchang lovin in kal mai ani ang chu. Kan inchenchilh rei a, kan innel tawh vei nen keini chuan kan ngai dawn hle mai che. Fanu ang takin kan ngai tawh che a, chutia i han awm lo leh thut mai tur chu a huphurhawm hle a nih chu. Mahse, a dam hauh ila, kan la awm khawm leh lovang tih pawh a sawi theih hleinem. Kan chungah Khuanun zah a ngai anga, kan la inhmu leh em ang chu." ati dam duai a.

Tukthuan ei lai chuan an lunglengtlang deuh nge tumah tawng zai rel pawh an awm lo, ngawi nghiaiin chaw chu an ei malh malh hlawm a. Tukthuan an ei kham chuan Rothuama leh Rami chu an insiam malh malh a, midangho chuan ngawi rengin an lo thlir thung a. An hman hnu chuan an han inchibai liam liam a, tichuan Rothuama te pahnih chu Rami te khaw lam pan chuan an inzui chhuak ta a........

@Dwm Pachuau

"MITTUI LUANGIN KIR AN REL LO"
episode 140

Rothuama leh Rami te chu tluang taka kalin kalkawng chanve zet chu an kal tawh a, lui te pakhat an thlen chuan an chawl dun ta a. Rothuama piin chaw leh sakhi sa a pai tir chu puar takin an ei dun a. Rami chu vei nei niawm tak hian a tawng tlem hle a. Rothuama biakna pawh a rul tawk lek leka chhangin a hmel pawh a ngui deuh raih a. Rothuama chuan hre reng mahse han zawh kher pawh tula a hriat loh avangin a en liam ve mai mai a. Mahse, Rami zawk chu a insum thei loah tangin zawi sap hian "Engtikah nge kan inhmuh leh theih ang?" A rawnti chhuak ta nge nge a.

Rothuama chuan "A dam hi hauh phawt mai ila, a tul anih chuan ahmuh pawh kan la inhmu leh ang chu." Tiin alo chhang a. Rami chuan Rothuama chhan danah chuan a duhkhawp lo tih hriat tak hian "Ava mak awm teh chauh ve" tiin hnuailam a bih ngar a. Rothuama chuan "Teh chauh em ni? Hma hun hriat nisi hek lo le. Chubakah han inhmuh fo nachhan tur a vang angreng sia lawm mawle." Ati liam leh mai a. A silai chu uluk fahran maiin a hru hauh hauh a.

Rami chuan han chhan leh mai dan tur a hriat loh avangin a ngawi ta daih a. Rothuama bawk chuan "I ngaihdan ani vak lo em ni, mahni khua haw tur i ni a, i hlim viau turah ka ngaih rualin vei ruk te pawh nei i ang in ka hre deuh rum rum mai ka ti."ahan ti a. Rami erawh chu ala ngawi ran thung a. Chutia engmah a sawi zui tak silohah chuan Rothuama pawhin a sawi zawm duh ta bik lova. "Tirawh, kan tlai lutuk ang e kan chawlh rei lutuk chuan, i hah te a dam tawh chuan kan kal leh tawh dawn em ni ang?"tih leh thawh a rual nghal a.

Rami pawh ngawi rengin a tho ve nghal a, inbe miah lo chuan thui fe chu an kal dun leh a. Chawhnu her zetah chuan Rami te khua pawh an hlat tawh viau lo. Mahse, Rami chu a chauh deuh tawh avangin an kal muang tulh tulh bawk a. Chutia ngawi renga an kal dun lai chuan thawk leh khatah thawm mak tak mai an hre ta phut mai a. Rothuama chu a ding nghal chawt a, Rami chu rang lutuka rawn tlanletin Rothuama chu a kuah nghal chawt bawk a.

Rothuama chuan "Hlau reng reng suh, tihian lo awm la ka han enfiah ang e." A ti a. Rami chuan Rothuama chu a kuah nghet sauh sauh a, a hlauh em avang chuan a khur nghal hlawk hlawk a. Rothuama chuan "Hlau suh hlau suh, engtinmah i awm lovang."tiin a tawng thlamuan mawlh mawlh a. Mahse, Rami chuan khawiah mah kalsawn a phal tlat lo. An thawm hriat lah chu rei vak lo a reh hnuah ahna aia ring mah hian a rawn ri leh ta hum hum mai a. Rami hlau lutuk chu men pawh a meng ngam tawh lo. Chu thil ri mak leh dangdai zet mai chu a rapthlak bawk a, mihring thawm niawm pawhin lang lo. Engmah amah hmuh tur awm bawk si lo.

Rothuama chuan thawm lo chhuahna lam chu a en ngar mai a. Mahse, engmah hmuh a nei si lo. Sapui thawm a angin a hre si lova, mihring thawm anih hmel bawk si lo, Rothuama pawhin enge anih ang tih reng a hrethiam bik lo. Mahse, engpawh niraw sek sek, a hlau chhete lova. Hlauh ahnekin chuti taka rawn inhrosa ta chu hmachhawn a chak et et a. Mahse, Rami chuan a pawm nghetin han kalsawn san ngawt chu a dik theiin a hre bawk si lo, Rothuama chu a insehruh teuh tawh mai. An awmna lai chu ngaw chhah tak mai hnuai anih avangin a thim deuh ruih a, an chhak lawk chu mual pawng hi niin chumi letliam atanga thawm chu rawn chhuak ani nghe nghe a. Rothuama chu a za et et tawh mai.

Chutia thinrim tak maia Rothuama a insehruh lai chuan sa nge mihring tih pawh hriat loh hi arawn ri tial leh ta ruan mai a. Chutah zet chuan Rothuama thin chuan a tuar ta ngang lova, Rami chu kuai thu hnawkin "Ka lo let leh hma chuan lo awm rawh."tih leh tlan a rual ta nghal a. Rami chu khur hlawk hlawk hian a awm a, a rilru chuan umzui a duh a. Mahse, tha reng a nei si lo. A tha zawng zawng a zawi vek miau avangin a che thei eih lo. Rothuama chu han auh vak mai hi a tum a. Mahse, chu pawh chu a aw chhuak thei lo avang chuan a thei ta chuang lo. Tichuan Rothuama tlan liam tur chu thlir bak tih theih a nei ta lo.

Rei vak lo thawm engmah awm lova a reh tlawk tlawk hnu chuan silai a rawn puak ta thuai mai a, Rami phu nasa lutuk chu a thlawk lo chauh hi a ni. Chechang ngam si lo, au chhuak thei bawk si lova rei fe a awm hnu chuan Rothuama chu a rawn chhuk thla ta a. Rami chu kaithoin "Engmah hlauh tur a awm tawh love, ka kap hlum tawh. Hlau tawh reng reng suh." Tiin a tawng thlamuan leh mawlh mawlh a. Mahse, chuti mai chuan Rami hlauhna leh a khur chu reh mai chi rual ani lo.

Rothuama chuan chulai hmun atanga kalsawn pui vat chu tha zawka a hriat si avangin "Hawh le, kal leh tawh ang aw. Hetilaia awm reng zawng kan thleng har lutuk ang."tiin a banah chuan a kai nghal a. Rami chuan nghet taka Rothuama ban chu vuanin a kal kat dawt dawt a, kawng pawh a en tha thei meuh lo. Rothuama chuan kal pahin hlauh tur a awm tawh loh thu a hrilh reng a. Thui fe an kal hnu chuan Rami hlauhna pawh zawi zawiin alo reh ve hret hret a. Mahse, ngai erawh chu a awh thei tawh meuh lo, kawng kam laiking leh sava thawm rihlekah pawh a hawi tang nghal hru zel tawh.

Rothuama chuan a rilru lakpen tumin a be reng a, Rami lahin Rothuama biakna chu a rilruah a awm lo tih hriat tak hian mumal leh fumfe taka chhan theih alawi pawh a nei lo. Rothuama pawh a ruk tak chuan a rilru a kal thui kher mai. A thil hmuh leh tawn kha Rami hi hrilh chi a ni der mai si lova, khatiang thil kha ani pawhin a vawikhat tawnna anih avangin mak pawh a ti a, a ngaih a tha thei hauh lo. A hawn let lehna lamah chuan eng emaw tak a tawng ngei dawn ani tih inhriatna a nei tlat mai a. Mahse, engpawh tawkin hmachhawn se la hlauhna leh pawitihna a nei hran lo. Him taka Rami a hruai thlen chuan chu chu a tha a ni mai. A bak chu a tawn tawn tawng turin a rilru a siam fel nghal thlap a.

Ni a tla suar suar tawh tihah chuan Rami te khaw kawtchhuah an thleng ta hlawl mai. Kawtchhuahah chuan rei vak lo an han thu chawk leh a. Rami chuan "Hlauhawm kha eng nge?" A rawn ti chhuak phawng a. Rothuama chuan "Savawm nupa inhau thinrim mai mai alawm lo ni. An hlauhah silai kha ka han kap ri a, an tlanchhe lawng lawng mai alawm." Atih chuan Rami chuan a awih loh hmel kher mai. "Dawt sawi kher a ngai hleinem. Ilo let leh hnua i mitmeng kha ka hrethiam vek alawm. Zanin chu kan khuaah hian riak ve ang che. Let leh nghal chu ka remti hauh lo a nia. Ka ngaih a tha thei miah lo, i chungah thil tha lo a thleng dawn tlata hriatna ka nei."a ti a. Mahse, Rothuama chu alo nui duh lek a. "Tirawh, muangchangin kal leh tawh ang aw." Tiin an pahnih chuan khaw lam panin an inzui dun leh ta hnak hnak a.......

@Dwm Pachuau

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)