PASALṬHA AIZIKA BY Nunmawia Fanai 1- 35

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALṬHA AIZIKA BY Nunmawia Fanai 1- 31

Unread post by Ngaia » March 2nd, 2019, 7:57 pm

PASALṬHA AIZIKA

- Nunmawia Fânai

BUNG 31-NA

Pûka an lêt leh hnu chuan Aizika chuan, "Kan kawng sial hi a râlmuang rei dawn hauh lo va, a hma lama kan pal tlang vat a ngai dâwn a ni. Chuvangin, kan chauh lutuk loh nan a tam thei ang ber mut tum phawt mai ang u hmiang. Vârṭianah kan chhuak nghâl dâwn nia," a han ti a. Tichuan, mutmu an tuah zui ta nghâl a.

Khawfîng a lo chaha kâwl a rawn ên dâwn tikah chuan chhuak tûrin an inbuatsaih ta nghâl sang sang a. An nula chhanchhuah tâk Dâwntlingi hnenah chuan Aizika chuan, "Tlingi, eng nge i an ve reng le? I zia deuh âwm em?" tiin a han zâwt a.

Dâwntlingi chuan, "Ka ṭha viah tawh mai hei; ka ti deuh ṭhêm ṭhûm pawhin min kiansan ve duak tawh a nia," tiin a lo chhâng a.

Aizika chuan, "Ngai awh leh turin chawlh deuhna hun i mamawh viau na'ng a, kan hmanhmawh a ngai miau mai si; i tawrh hrâm hrâm rih a ngai dâwn a ni," a han ti leh a.

Dâwntlingi chuan, "Ka ṭha tawh alawm; mahnia kal thei tûr khawpin ka chak tawh e," tiin a chhâng ve leh a. Tichuan, kâwl a êna leilung a lan theih ruai ruaiah chuan pûk chu an chhuahsan ta nghal vang vang a. Dâwntlingi pawh chu la chakvak lo viau mah se, an ramhmul damdawi hman avang chuan amaha kal ve thei khawpin a chak ve tawh bawk a, tu ma buaipui nih duh bik lovin tiang hawlin a kal ve ṭauh ṭauh a.

Tlâng chung zâwl an chuan chhuah chuan an inbeihna hmun vêl chu a pêt hian a lo pe sun mai a. Ruang an khuhna chhâwl inchap vûm thûr lam chu hawi chungin, "Kan pasalṭhate thlarau chu, Pâwla kawhchhuah pal tlang huphurhin an tâwi hruk hruk tawh ang chu maw?" tiin Aizika chu a phun chhuak sup a.

Thanluaithanga chuan, "An lo huphurh tâk viauva leh, sanuin a kai khûr hlawk hlawk hlawm tawh anga a ni mai alawm," a lo tizawm ve zat a. Chutih lai chuan Dâwntlingi chuan an ruang chhilhna chhâwl vûm hnuk chu en zawk pah hian, "Awi, karei maw!" a lo ti chuai raih a.

Tlâng chu an lâwn liam a. A bulṭhutah chuan an han châwl dat a. Chuta ṭang chuan an pan tûr khaw chhak lal ram, kâwl kil thlâwp zaia inpharh duai mai chu an han thlir a. An awmna aṭanga han teh chuan a hla vang vang hle mai lah tak a. Chu lam chu thlir vang vang pah hian Lianchuhmânga chuan, "Zin kawng thui tak zawng a ni dâwn phawt mai," a han ti dap a.

Thanluaithanga pawh chuan, "Kan hma lam lah hi tluang taka han kal pawr pawrna chi zia lah ni lovin, ring kan rawlh kawng tluan deuh thaw dâwn chu a ni a. Kan tum ram thleng tûr hian vanneihna hian min hnaih reng ngam ang em maw chu le?" a lo ti ve bawk a.

An ṭawngkam leh aw ki chhuak dânah chuan Aizika chuan a ṭhiante pahnih chu an zâm ru deuhva hriatna a nei tlat a. An rilru tûr chu a hriat thiampui êm em bawk a. Dik tak chuan, amah ngei pawh hian an zin kawng zawh laiah hian hlauhthâwn tam tak a neiin, ngam tak leh phur takin a awm bik hauh lo. Mahse, Zahleithanga laka tlâwm a duh miah lohna thinlung sakhat tlat chu a pu nghet tlat thung a. Hnehtu a nihna a lantirna tura kawng pawimawh tak zawh a ni tih a inhriain, a ke a nghah tawhnaa a hniak chu a lêt zâwnga hniah leh a tum lo bur ringawt tawh a. Chumi avang chuan engkim hmachhawn chu a inhuam hliah hliah ringawt mai a ni.

Tichuan, a ṭhiante hnenah chuan, "Ṭhiante u, thawnthu chu a thui poh leh a chhûngah thu ngaihnawm a inphûm tam nge nge a. Chutiang bawkin, he kan zin kawng zawh lai pawh hi kan zawh thui poh leh hriat reng tlâk thilin min bawm tam ting mai dâwn asin. Harsatna hmachhawn miah lova nun kawng zawh tumte hian, an tum loh leh duh loh zâwk beidawnna chu ṭhianah an siam hlauh thung ṭhin. Kawng chu a harsat poh leh kawng awlsam zawh a nawmzia tifiahtu a ni angin, kan zin kawng thui tak zawh tur hi kan zawh chhuah hunah, hahchawlh veng veng hlutna kan hre thiam zual ngei ang. Mi'n tum a neih, hlen a tum tlatna dâltu nih hi khuanu meuh pawh hian a hreh êm avangin, a tum tlatnaa hhlawhtling tura puituah a ṭang leh nge nge ṭhin. Chuvangin mi paukhauhte anga awmin, khuanu vên himna kut chu che lo thei lova kan siam a ṭûl dawn tihna a nih chu. Chu chuan kan kawng thui tak min sut kuaksak ngei ang," tiin a fuih mawlh mawlh a.

Lianchuhmânga chuan, "Zika hi zawng, i thil thlir dân hahdamthlâk leh i finna hi chuan mi a hneh hma bik mang ṭhin teh e. I bulah hi chuan thla a ngam huai huai zêl zawng a nih hi maw," a lo ti dap a. Tichuan kal an rêl chhunzawm leh ta nghâl a.

Tûkṭhuan pawh ei mai lova an kal ngar ngar hnu, tluang leh buaina tâwk lova chawhma chanve lai an kal hnu chuan lui pakhat hi an thleng a. Chu luiah chuan an insil thlan dai a, a kamah chuan an chaw fûnte chu ṭhetin an inhnawh puar hlawm a.

Chutianga lung muang deuha an chaw ei kham an ṭhut chawlh lawk lai chuan, an awmna aṭanga hla lo tê lui hnâr lam aṭang chuan hamthalmu pakhat hi a rawn thlâwk thla nal nal a, chu chu Kâwltea bula ṭhu Pâwi tlangval bekah tak mai chuan a rawn bur vawh mai a. Ani chu hamthalmu-a tûr chak tak mai chuan fan nghâlin, chil phuan tla buah buahin a ṭhut hmun aṭang chuan a ding tlûk nghâl tual a, a meng pual nghâl rû bawk a. Chu veleh Aizika chuan, "In phaw kha chuhin inphên nghal thuai rawh u," a han ti ṭhat a. A ṭhiante chuan an phaw chu an chuh nghâl thuai a, hamthalmu dang lo lêng leh tûr laka inphênna turin an lek vâ hlawm a. Dâwntlingi pawh chuan an ṭhianpa tlu reng bula a phaw let ngât chu a chuh ve nghâl thuai bawk a.

Phaw an chuh fel hman chauh tih chuan anmahni rawn ding lang si lo hian, hamthalmu bawk chu sawmhnih sawmthum tûr lai mai hi a sûr hian a rawn sûr leh ta a. Chu chu Aizika leh a ṭhiante chuan an phaw chuan an lo dang thla phak phak hlawm a. Hamthalmu a rawn sur nawn leh hma, rawn beitute an chawlh dat lai chuan Aizika chuan a silai chu a chuh thut a, lui hnâr lam kama chakawk leh kâtchât buk kâra phe zoh a hmuh chu a'n kap thâwr mai a. Silai puak ri chu a khâwk tawi tak a, mihring na tuar ṭê thawmin a rawn zui nghâl rawng rawng a. Chutih lai chuan Aizika chuan, "Ka fuh e, in silai leh chem kha chuh ula, an chawlh lai kârah hian lui mawng lamah khuan i tawlh thla nghâl thuai ang u," a han ti ṭhat a. Chu veleh an silai leh chem chu an chuh nghâl vatin, lui mawng lamah chuan an tawlh thla thuai hlawm a. Aizika pawh chuan a iptepui chu a ak thuai a, a kut vei lama phaw leh silai hmer kawpin, mi dang hnunga chak lo taka tlân ve lai lai Dâwntling kâwng rêk laiah chuan a ding lamin a la lawp a, a tlân thlâkpui nawl nawl bawk a. An hnungah chuan hnam mâwlho chuan haw haw hluah hluah chungin an rawn ûm zui ve nghâl a.

Thui khat tak lui mawng lama an tlân thlâk hnu, lui kawi elh deuh laia an liamsan a, an rawn hmuh theih loh lai tak chuan Aizika chuan, "Khawmualah i kai ang u le. Kawi hi an rawn chhuah rualin kan lo kah rawn dâwn nia," a han ti a. Chumi rual chuan Dâwntlingi chu la chawi vawh chung hian khawmual lamah a per kai zui ta nghâl a. Thingdawl kung lianpui mai, patling panga lai pawm tûra lian, zung thlâr duai mai phênah chuan a biru zoh a, a silaimu chu a thun nghâl mawlh mawlh bawk a. A ṭhiante pawh chuan an rawn zui ve nghal thuai bawk a.

An phên ṭheuh aṭang chuan silaia tin sâ rânin, hnam mâwlhovin lui kâwi an rawn chhuah hun chu an lo nghâk ṭhap a. Chutianga an lo chân rân rân lai chuan, hnam mâwlho pawh chuan kawi chu an rawn thleng hnai tih hriat deuh hian an thâwm chu a rawn hnai ve zêl a. Mahse, an nghah vang vang hnu pawh chuan kawi chu rawn chhuah tih rêng rêng nei lovin an reh ta ṭhiap mai a. A ngaihna hre lo tak hian Aizika leh a ṭhiante chu an awm hmunah chuan an mitmeiin an han inrâwn kual vêl a.

Chutih lai chuan hnam mâwl zinga an hnu chhui thiam deuh ber ni âwm pakhat hi, kûn khâr khâr hian kawiah chuan a rawn chhuak ṭham ṭham a. Lui dung leh kam vêl uluk deuhva a thlêk vei dâk dâk hnu chuan, Aizika leh a ṭhiante khawmuala an kaina zâwn chu uluk deuh hian a han thlêk vang vang a. Chu laia hnu huh chup leh lui kam hnai dai dul laia an rahna, tui la nu phût chu a han hmuh chuan khawmual lam chu chik zeta melh kualin a hawi chho dâ dâ a. A hnu rei vak lohvah kawiah chuan lêt chho lehin a reh leh vang vang a.

Thâwm pawh awm lova an reh vang vang hnu chuan, hnam mâwlho zinga pali panga vêl chu kâwiah chuan an rawn lawr leh dâk dâk a. Aizikate kainaah chuan fimkhur deuh hian zawi muangin an rawn kai chho ve ṭham ṭham a. Chutih lai chuan Lianchuhmânga silai chu a puak ṭhuai a, an hnung lam aṭanga rawn beih tumtute zinga pakhat chu a euh ṭhawt a, leiah a tlu zawi hnawk a. Chu veleh a ṭhenin lui kama anmahni rawn vehtute chu an kap thal nghal phawk phawk a, a ṭhenin an hnung lama rawn beih tumtute chu an lo sai thlu phak phak bawk a.

Chutia Aizika ten mi sâwm dawn lai mai an kah hlum tâkah chuan, chu'ng hnam mâwlho chuan rawn bawh zui ngam lovin a tlân lêt leh ta rawk rawk a. Chu chu Aizika leh a ṭhiante chuan an ûm zui ve nghal zat bawk a. Hnam mâwlho chuan khawmual chu zawh zêl lovin, lui dungah bawk chuan a hnâr lam panin bak lêngin an tlânchhe lawng lawng hlawm a. Thih hlauva tlânchhia an ni bawk a, an chak êm avang chuan han man hman chu sawi loh, lui kawiah chuan a hnâr lam pan zêlin an liam chho zung zung mai a. An chawlhna kai aṭanga kawi hnih kawi thum lai an ûm chhoh hnu chuan Aizika chuan, "E khai! Lu hloh hlauva tlânchhia an ni bawk a, an chak rawk rawk êm mai, ûm zui zêl tawh lo ila a ṭha ang e. Ram chin hre lo zâwk kan nihna laiah vânduaiin kan inhloh ṭeuh palh pawh a hlauhawm hlel lo ve," a han ti a. Tichuan ûm zui zêl ta lo chuan kai lam panin an inzui thla leh ta zawk a.

Kai an thlen thlâk chuan, an ṭhianpa, hnam mâwl hamthalmu dawnga vânduai palh ta pawh chu, eng mah hriatna nei tawh lo tih hriat deuh mai hian, a tlûkna ngaiah chuan a lo la let zawi hnuang a. A pang chu Aizika chuan a han dek a, a la lum vang vang nain a mar erawh chu a lo awm tawh miah lo thung a.

An ṭhianpa mit a siamsak hnu chuan Aizika chuan, "Kan ṭhiana ruang hi i phûm hmasa teh ang. A vânduaia a ṭang ta bik hlauh chu a pawi ngei mai," a han ti sap a. Chumi zawh chuan Kâwltea hnenah, "Kâwltea, kan nauvi kha, a lo hlau thlabâr viau tawh ngei ang; nangin zu ngaihven ta che. Keini'n kan ṭhiana ruang hi kan phûm ang e," a han ti a. Tichuan Kâwltea chu lui mawng lam pan chuan a chhuk thla ta nghâl a.

Kâwltea leh Dâwntlingi an rawn thlen chuan, mi dangho pawh chuan an ṭhianpa ruang phûmna turin ṭiau pho chu an fei hmangin kâwng chena thûk an lo lai hman a. Chutah chuan an ṭhianpa ruang chu an zalh a, an vûr leh vek hnu chuan chinghnia leh ramsa ṭhenkhatin an hai chhuah mai loh nân tiin, a vûng chungah chuan lung an tiang vûm leh thûr a. Chumi zawh chuan Aizika chuan, "Vawiin chu duh angin kan kal sâwt dâwn lo tawp mai. Khan pangngaiah hi han zawh ngawt dâwn ila, anniho khan kan zawh ngei ringin mi dang tam zâwk nên min lo châng ang a. Min lo lambunin min lo chimit phiar thei tlat mai bawk. Chuvangin kan kawng zawh hi a thui zâwngin, kan awmna lai ram luahtute bumin kan thlâk mai a ngai dâwn a ni," a han ti charh charh a.

Thanluaithanga chuan, "Ram chin hria tu mah kan awm loh lai kârah engtin nge kawng hran chu kan han zawh tâk ang le? Rampalailêngah kan tlu hlum mai mai zâwk lo vang chu maw? Chu ai chuan, silaimu leh a hlo lah kan ngah a, mi lah kan la ṭhahnem tho bawk nên, kan hma chu rum ṭhek ṭhawkin i tâwn kaw hmiah hmiah zâwk teh ang u khai," a lo ti ve thung a.

Lianchuhmânga thung chuan, "Zika, eng ruahmanna nge maw i neih rêng le? A pawmawmin a bawh zui tlâk ang em han sawi ta che mâw," tiin Aizika ruahmanna neih chu a zâwt lêt hlauh a.

Aizika chuan, "Kal zêl tûr kan ni tih an hai bik dâwn loh avang leh, he khanpui bâk hi zawh tûr dang kan nei lo a ni tih an hriat avangin, kan hma lamah min lo lambun tûrin min lo châng ngei ang tih chu mi â ber tan pawha rin sual theih loh tluk a ni a. Chumi a nih avang chuan, lui hi chhim chhak lam aṭanga rawn luang a ni bawk a, an rin loh lamah lui dung hi a hnâr lam hawiin kan zawh ngat ngat rih ang a. A hnar kin kan chuan chhuah hunah hmâr lam hawiin ngaw hnuaiah, he khanpui zawmtu hi kan hmuh hma chuan khawmual kan hrût leh ang. Chutianga kan kal chhûng chuan, heng mite khawsakna, hmun eng emaw zâta kan buaina tur kan pehhel ṭeuh bawk dâwn tihna a ni bawk a," a han ti leh charh charh a.

Lianchuhmânga chuan, "I ruahmanna chu ruahmanna fing tak a nih chu. Ni e, inbeihna pumpelha kan kal theih chhung chuan, a kawnga chu thui deuh mah se, thaw khat chu a veng hrim hrim dawn tihna a ni a," tiin a pawmpui thu chu a lo sawi ve bawk a.

Aizika chuan, "Tunah chuan kan la ûm emaw tiin lui kam khawi laiah emaw min lo la châng ve rân thei a. Chumi a nih avang chuan han nghâk hret ila, anni pawh an beidawng har lo tawp ang. Khanpui zawhin kan chhuak leh nghal turah ngaiin, min leh khalh turin an hmanhmawh viau dâwn a ni. Chutih hun, ni a tlâk fela khua a hnîm deuh hunah keini'n lui dung hi kan zawh chho ve thung ang. Tichuan, an rin loh lamah him leh muang deuhin kan kal ngar ngar tawh mai dâwn a ni," a han ti leh charh charh a. A thu sawi leh ruahmanna chu pawm tak hian an lo ngaithla kar hlawm a.

Tichuan, ni a tla a, khua a hnîm riai ta tih chuan lui dung chu an zawh chho ṭan ta a.

An theih ang tâwka chaka an kal hnuah, khuain a thim hnan dâwn tâkah chuan lui kama ṭiau phovah chuan an inghat a. Chutah chuan zân an han riak a. Chuta ṭang chuan vârṭianah chhuak lehin lui hnâr kin lam chu an zawh leh ta ngat ngat a.

Lui dungah zan hnih an riah hnuaj a hnâr kin chu an thleng ta hlawl a. Chuta ṭang chuan hmâr chhak lam hawiin ngaw hnuaiah chuan, kawng indap chawpin khawmual chu an zawh leh ta ngat ngat a.

Ngaw hnuaiah ni khat leh zan khat an kal hnu, behliang mun hun vêl hian tlâng lianpui mai hnuaia hmun khawkrawk tak mai hi an thleng a. Chu hmunah chuan an châwl lawk a. Chutia an chawlh lai chuan Lianchuhmânga chuan a beng chu leiah nghatin a han chhi vang vang a. Chutah, "Kan kal tumna lama ka thâwm hriat riai ruai chu a ri khâwk deuh ruih ruih tlata ka'n hriat chu," a han ti a.

Aizika chuan, "Chu, pûk remchâng deuhin min lo hmuak reng te hi a ni ang a? I han fiah teh ang u khai," a lo ti thuai a.

Kâwltea chuan, "Keima'n eng nge a nih ka han thli thlai hmasa ang e. Nangni chu lo hahdam rawh u," a lo ti zat a. Chumi zawh chuan tu mahina an dan hman loh hian a liam zui ta nghâl a.

Kâwltea thang vang vang chu nakinah chuan a rawn lêt ve leh ta a. Ani chuan, "Kan hmaah chuan pûk chu a awm ngei a, mahse hnam mâwlho ang chi kha mi sâwm bâwr a ko vêlah chuan an tei deuh reng bawk," a han ti a.

Thanluaithanga chuan, "An puithiam khawsakna a nih ngei mai chu. I mi hmuhte pawh chu amah vêngtu sipai an ni ngei bawk ang," a han ti a.

Aizika chuan, "Aw le, an puithiam khawsakna hmun a nih tak tak chuan kan vânneihna a inher chhuak dâwn ta e. An puithiam chu man ila, kan kawng sut kuak nan i hmang ang u. Mi pahnihin kan nauvi lo awmpui ula, a bâk zawng chu silai nên i thawk chhuak ang u le," a han ti a. Tichuan Pâwi tlangvâl pahnih leh Dâwntlingi chu an hnutchhiah a, a bâk zawng chuan pûk lam chu silai nen an pan ta diah diah a.

Pûk ko tlânga vei tawn vêl rengte chu kah nuam tâwka hnaia an veh hnu chuan, hnam mâwlho chu mi sâwm bâwr lek ni lovin sawmhnih dawn lai an lo ni zawk hi a lo ni a. Aizika chuan, "Le, duh i han thlang ang hmiang. Keiin a ko chung lama ding hla ber khi ka'n tum ang e," a han ti a. Mi dangte pawhin an duh an thlan zawh hnu chuan a rualin silai an han kâp puak ta dur mai a le, mi paruk chu che leh tur awm lo hian an tlu nghal thlawrh a. Silaimuin a den fuh loh leh a den hliam la che theiho erawh chu, silai puak thut avanga hlauhnain a man avangin an tlânchhe chum chum a. Chung zinga silaimuin a den fuh, tlânchhe ve thei lo pahnih pathum te erawh chu an awm hmunah an hlau hlawp leh na tuar avang chuan an ṭê chêl chûl bawk a. A ṭhen chu pûkah an tlân lût thuai a, an puithiam chu rawn hruai chhuakin tlânchhiatpui an tum a. Chu lai tak chu Aizika chuan a silaimu a lo thun leh hman tawh avangin, an puithiam kaitu pakhat zâwk chu a kâp hlawm leh tawl a. Chu veleh an puithiam hlau thlabâr chuan hma lama tlân tum tawh lovin, an kaihna aṭanga tâl pîtin pûk chhûng bawk chu a bêl leh ta a. Mi dang erawh chuan an tlânchhe nal nal hlawm a. An tlán liam tûr chu silaimu lo thun ve leh hman tawhte chuan an ṭhâwng zui dur dur a, a ṭhen chu an let hlawl hlawl hlawm a, a ṭhente erawh chu an liam vang vang thung a.

Pûk leh a chheh vêla hliam tuar leh mitthi tlu tlâw rengte tih loh, mi dang zawng zawng an tlân bo vek hnu chuan Aizika leh a ṭhiante chuan pûk chu an pan chho va. Pûk kova hliam tuara lo rûm dar darte chu dimna nei map lo hian, Lianchuhmâng leh Thanluaithanga chuan an tuk hlum hmiah hmiah mai a.

Pûk chhûng an han luh chuan an puithiam chu amah chauh hian a lo ding khûr hluk hluk a. Chutia hlau tak maia a lo khur hluk hluk lai chu Aizika chuan, hriam hrêk hrâwka melh pahin, "Thu awih takin awm la, engtin mah kan ti na lo vang che," a han ti dâi dak a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 3rd, 2019, 7:17 pm

PASALṬHA AIZIKA

- Nunmawia Fânai

BUNG 32-NA

Aizika thu sawi chu hre thiam tak leh a hlauhna avanga a tha la khûr hlak hlak chung chuan, puithiam chuan a lu a bu nghut a. Chutah, "He lai ram bial hi him leh dam taka pal tlang kan duh a. Chumi kawngah chuan min pui dâwn a ni. A nih loh a, suahsual rawng i bâwl a nih vaih chuan i sa hi ka hlep ang a, i hmuh laiin ka ei ang," tiin a han vau zui leh salh a. Puithiam chuan Aizika mitmeng leh khawsa zia a hmuh chuan, a ti tak tak ngam dâwn a ni tih a ring tlat a, a hlauh zual phah êm em mai a. Tichuan Aizika chuan puithiam chu a bula hrui, thisen khang tawh kai khir uaih chuan che thei lo tûrin a phuar hlâwm ta tlat a. Chumi hnu chuan, "Le, pâwna ruangho saw i senghawi deuh teh ang u," a ti zui leh nghâl zat a.

Ruang an senghawi zo va, Dâwntlingite pawhin an rawn pawh chho ve tawh tih chuan, pûk chhûngah chuan khûnkhân takin an han ṭhu khâwm laih a. Lianchuhmânga chuan, "Zika, i ruahmanna chu a hlawhtling leh phawt ta mai. Ruahmanna dang han duan lâwk sa te i nei âwm em maw chu?" a han ti a.

Aizika chuan, "Ruahmanna eng emaw chu ka nei mial alawm. He puithiam hi kan kawng min sut kuaksak thei tûr awm chhun tak tak, kan dam leh thih thu-a kan mi neih chhun a ni ngâwk tawh a. Chuvangin ani nên hian eng emaw kan tih dun a ngai dawn a ni," tiin a chhâng a.

Lianchuhmânga chuan, "Eng nge maw i sawi awmzia chu ni ngai le? Ani nên hian eng chiah maw ti ula i intih a?" tiin a zâwt leh thuai a.

Aizika chuan, "Tunah chuan, tum leh duh aia hmain khawipui bu kan hâwl rau reng tawh a ni a. He'ng mite hi engzâta tam nge an nih lah, an chin hriat a ni hek lo. Kan tân chuan an puithiam kawl ringawt hi himna a ni ber thei miah lo bawk a. Chumi a nih avang chuan, lal te pawh nei ve ngei ang a, chu an lal chu inremsiampui dân zawn a ngai dâwn a ni," a ti leh charh charh a. Chu thu a sawi zo tih chuan Dâwntlingi chuan a aw hi a lo thian kharh kharh a, mahse, mipa thu-a lo inrawlh chu mawia a hriat loh avangin a hmui hupin lei lam a bih leh ta daih zâwk a. Chu chu Aizika'n a hmuh chuan, "Kan nula-i pawh khan a duh chu han sawi ve sela," a han ti a.

Dâwntlingi chuan, inthlarun hmêl taka a mit meng kual zak zak chung chuan, "Anni nêna inrem theihna tûr kawng khat chu a awm thei maithei. A chhan chu, thlauh thlâk an nih hma chuan kan chi khur hi an rawn tlan ber a ni ṭhin alawm," a han ti tê tê a. A ngawih leh deuh vang vang hnu chuan, "Inremna thilah chuan chi chu tawktarh atan a ṭha ber ang. Kan ram biala mi ni lo hmun dangah chi tlan tûr dang a neih loh avangin, thlauh thlâk an nih achinah hian ti hian a râwva zâwngin an khawsa ta a nih hi," a ti leh a.

Aizika chuan, "Engti anga thlauh thlâk nge i sawi? Han sawi chiang deuh ta chê maw?" tiin a zâwt leh thuai a.

Dâwntlingi chuan, "A hma, sûl tam pawh a liam hma kha chuan anni nên hian insumdâwn tawn reng reng kan ni a. Anni hian ṭhi siam an thiam em em mai a, chu'ng an ṭhi siam sa chu kengin chi thleng nan an rawn hmang ṭhin. Chu chu kan ram biala khaw hrang hranga an tih dân a ni a. Chutiang a nih hnu chuan, Zahleithanga khua leh an chheh vêla chi-a sumdâwnna kawngah anni ram bial hi, hmun dang aia kal khan hnai bêr leh remchâng ber a nih leh zêl tâkah chuan anni nena insumdâwn tawnna ringawt lo deuhin, anni hi tilâwmin an ram hi kal khan atana hman a lo ni chho ta a.

"Hun a lo kal zêl a, chi-a sumdâwnna kawnga an ram hi pal tlang a lo nih tâk rengah chuan, an lo inluling chho ve ta tawlh tawlh a. A hnuah phei chuan an chan ai chu duh khawp lovin, an ram chhûng pal tlanga chi phurh man atan tiin mite phurh lai chu an duh zat zat an lo sâwk ta ngawt zêl a. Chu chu lal hovin an hriat chuan, an khawsak dân zia chu an kham ta hle mai a. Tichuan, chi phura an ram pawh hi pal tlang ta lovin, insumdâwn tawnnate pawh an chhu chat a, chi pawh an hrêk ta vek a. Chumi aṭang chuan, awlsam taka chi nei thei an ni tawh lo va, kan inhmelmâk chho ta a ni. Chutianga tuartu zingah ka tel ve ta a nih hi. Anni hi ka la hmuin ka la hre ngai lo va, an sawi chauh mai hi ka thawnthu hriat a ni deuh ber," tiin a thil hriat ang chu a han sawi a.

Aizika chuan, "A nih chu maw le aw! Ka ruahman dân pawh i thil sawi chuan a thlâk thei ngei dâwn e. An mamawh ber tawktarhin, chi hmangin inremna siampui an theih mial mahna le," a ti ta charh charh a.

Thanluaithanga chuan, "Chu chu a hlauhawm thei viau lo ang maw? An mi leh sate ti zât kan thahsak tawh hnuah, thil awm sa pawh la ni lo, kan hlawhtling dawn nge dawn lo pawh va hriat loh kârah, engtin nge kan thu sawi chu an awih ngawt ang ni? Awlsam taka min tihhlum theihna tura an laka intûk luhna lek fang chauh a ni," a ti ve thung a.

Lianchuhmânga pawh chuan, "Ni e, kan hlawhtling dâwn nge dâwn lo tih pawh hriat a nih loh kârah, kan lu kan zuar mai mai a ni lek chauh ang. Mi an ring ngût ang em maw chu lê? I ruahmanna hmasa chu eng nge ni rêng rêng?" a lo ti ve bawk a.

Aizika chuan, "Ka ruahmanna hmasaah kha chuan, an lal hnênah kan kawng min dâl lo tûra nawr nân he puithiam hi kan hmang ang a. A lo inchhu ngêng viau a nih chuan amahah ka ṭuan ang ka lo ti deuh mai," a han ti awlsam êt a. A thil ruahhman dân a sawi chu a huaisenthlâk nge a âtthlâk pawh ngaihtuah thiam lovin, Lianchuhmânga chu a khi suk ringawt a.

Mi dangho zawng zawng a ngaihna hre lova an ngawih dak lai chuan, Aizika chuan, "Aw le, hei, khua a tlai mai dâwn e. He puithiam hi hruaiin an lal hmu tûr chuan ka'n chhuak tawh ang e. Nangni'n he lai pûk hi lo nghâk ula, eng emaw thleng thut thei reng kârah hian pûk hi lo chhuahsan lovin, a chhûng aṭang hian lo invêng ang che u," a han ti a.

Chu a thil sawi chu an rin loh tak mai thil a nih piah lamah, mi dang tel lova amaha hmun hlauhawm pan tuma thu a titlu ringawt chu an hre thiam lo tlâng hle a. Eng vanga chutianga amah chauha kal tum chu nge a nih an zawh chuan, Aizika chuan, "Mi kan kal duah chuan lambun kan awlsam ting mai dâwn tihna a ni a. Min lo lambun a nih vaih chuan, mi kan inchân ṭhen leh emaw a ni ang a. Kan inchân ṭhen kârah kan tum tak ti thei lovin dan kawl awh kan ni hlauh thei bawk. Chuvangin, eng pawh rawn thleng dâwn sela, mi tam zâwkin nun kan chân ai chuan, keimahin thihna ruam chu ka'n tâwn hmasa ang e," tiin a chhâng a.

Chu a chhânna chu Kâwltea chuan, "Chutiang ngawtin nangmah ngâwng chuan ka thlah fâl hauh lo vang che. I thihna hmun chu ka thihna hmun a ni tûr a ni a, i thih aia thih a ṭul ta a nih pawhin, i thih aia thih chu thangchhuah ai pawha ropui zâwkah ka ngai ang. Nangmaha i kal hi ka rem ti dâwn hauh lo," tiin a lo lehthal nghâl zat a.

Lianchuhmânga pawh chuan, "Thih leh ruam khatah, dam leh tlâng khatah tia rilru hmun khat pua feh chhuak ṭheuh kan nih angin, thihna ruam thûk ber a ni emaw, damna tlâng sâng lai berah pawh ni sela, tu mah hi kan inmal thlah tûr a ni lo vang. Ka rawn zui ve ang che," a lo ti ve nghâl thuai bawk a.

Aizika chuan, "E khai! Thla in va timuang huai huai ngai ve le! Tûnah hian thihna ruamah kan ṭhu tlâng vek tawh zâwk chu a nih hi. Chuvangin ruam hran han reh belh tûr a awm tawh chuang hlei nem. Tah hian min lo nghâk ula, keimahin kan kawng chu ka han zawng phawt zâwk ang e. Nangni chuan he lai hmun hi him takin lo vêng zâwk tawh u. Kan kal ṭhuau mai chuan, anniho kha lo thawk leh ta sela engkim mai hi a khawlo zo vek thei dâwn asin. Keimaha chhuah chu rem tiin, kan kawng sialnaah chuan mawh min han phurhtir lawk rih teh u, tun ṭum chauh chu," a han ti leh a. Chutianga thil a sawiah chuan anni pawh chuan dik an tiin, hniala zui ngawt pawh chu an him lohna thlen thei thil a ni tih chu an hre thiam thuai a. A thil tum chu hnial chi-ah ngai lovin, hlauhthawnpui ru tak si chuan an pawmpui ta nge nge a.

A puithiam a phuar hlawm reng chu Aizika chuan a phelh sawt sawt a. Chumi pah chuan, "Lal in nei ve ngei ang a, khawiah nge in lal chu a khawsak?" tiin a han zâwt a. Puithiam chuan lal an neih thu leh chu an lal chuan an hnam pum hi ro a rêlsak thu te, a chênna hmun chu heti lai tlâng let liam hmâr thlang lam deuh phaizâwla ngaw hnuaiah a nih thu te chu a hrilh a. Chumi zawh chuan, "Ti rawh le, in lal hmu tur chuan i thawk chhuak ang hmiang. In lal pawh chuan a lo ngai viau maithei che asin," ti-el zauh pahin a kai tho lawk a. Ni a tla suar suar tawh tih chuan chu pûk chhung aṭang chuan an inchhawm chhuak dûn ta ral ral a.

An liam fel ta maw tih chuan Lianchuhmânga chuan, "Zika hi zawng, a ze hrang hrang neih zinga a sehhelna hi tu han khûm chi a ni ngai dâwn lo ve! Eng tak ang ang maw aw? Keini aia nun hloh pawh pawi ti lovin, kan himna tûr ngaihtuahin a liam ngâwk mai chu a ni si a; ka ngaihtuah hle mai ka ti," a han ti vang vang a.

Thanluaithanga chuan, "Eng em a va ti lo tûrah ngai ila, tih theih dang awm ta lo chu, lo nghâk tawp ringawt mai ang u. Dam tak leh him takin a lo kir ve leh ngei ngei ang. Ani tluka mahni inchhan thei an awm hlei nêm maw; mahni chauh pawha in za nufa khua tlâwm thei hial tûr khawpa theihna leh chungchuanna nei a ni alawm, a hlawhtling emaw, tling lo emaw, an kutah zawng a tlu hlum ngawt lo tawp ang. Anni tân hlauh hian a nia ka hlauhthâwn ni; an chhaih kawlh ang a, an duh aia tam hi nun an inchân ang tih a nia ka hlauhthâwnpui zâwk ni," a lo ti ve daih thung a.

Ni a tla fel a, ni zung châmbângin kâwl kil chu a vêl sen ngiai a. Chutih lai chuan Aizika leh Puithiama chu inbe lo hian an lal chênna hmun, hnam mâwlho hmunpui ber chu panin an inchhawm dûn ṭauh ṭauh a. Tlâng let liama awih tlân deuh, hmâr thlang lam hawia phaizâwl pana inkhawh thla an kal lai chuan, Puithiam chu chak deuh mai a tlân chhuk ta phut mai a. Hlauh vanga tlân a ni bawk a, a tlânna awih viau mai nen chuan kâr lovah thui deuh mai hi a thleng thla nghâl puat a. Chu chu Aizika chuan, "Suahsual i chhuah loh chuan engtin mah i awm lo vang ka ti lawm lawm che a ni lo em ni? I va han bi bo dâwn lo rua em!" tih leh ûm zui a rual ta nghâl a.

Zâwl an ûm chhuak thla a, thui a tlân leh hman hma chuan Aizika chuan chu puithiam tlân lai chu a tukkhumthlungah tak mai hian na deuh mai hian a mansak ta tlat a. Puithiam chuan tâl chhuah a han tum ngial na a, a tukkhuma ṭhâmtu tha chuan a hmer nat êm avangin a zawi hnawk a, leiah chuan a ṭhu thla hnawk a. Chu veleh Aizika chuan, "Eng hlauva tlân chhia nge i nih? Inremna thu thlung tûra kal kan ni tih i hre reng a ni lo'm ni? Hetiang hrim hrim chuan, i mal ti kha i hmuh lai hian ka'n ei ang a, tlânchhiat i tum buai tawh lo mai ang," tiin a chem a han phawrh a, puithiam malpuiah chuan chuktuahin thi chhuak tâwk lek hian na deuh tâk hian a nghat a. Chutia a mal thi ṭuam ṭuam a hmuh chuan, "A tawk tawk! Min ngaidam rawh; ka sa chu ei lul suh. Tlânchhiata tlân bo ka tum tawh lo ang," tiin a hlau lutuk chu a ṭê ta teng tung mai a. Aizika chuan, "A nih leh le. In lal kan hmuh hmaa tiang kha i tum nawn leh a nih chuan, i ngaihdam dilna ka ngaithla tawh hauh lo ang a, i malpui ti ṭha lai hi i hmuh laiin ka ei ang," tiin a han vau leh khar khar a. Puithiam chuan a hlauh luat avanga ṭap ṭuau chung hian, "Aw le, ka ti tawh lo ang," a ti thâm ṭuak a. Tichuan, puithiam chu Aizika'n a hmerna vanga zawi nghuai chu a reh deuh hnu chuan, Aizika chuan, "Nang, hma han hruai leh ta che," a ti a, an inchhawm dûn leh ta rak rak a.

Thui pawh an la kal lo, tuibûr hmuam dâ pawh a la ni lo vang, ngaw chhûng tak tak an luh hma deuh chuan hnam mâwlho hi khawi lai hnim buk phên phên aṭang emaw hian, fei lek vâw chung hian an rawn inhâwr chhuak ta tuau tuau mai a. Ngawi reng leh khaw dang pawh hawi lovin an rawn zim hnaih hret hret zêl bawk a. Chu chu a hmuh chuan Aizika chuan an puithiam chu a chhipah a ṭhâm thut a, a elh dâk âwrh rual chuan, "Pên khat pawhin rawn tawlh hnai leh teh dêk u, in puithiam thisen hi ka dâwt ang," tih leh a hrawka a chem hriam zet mai chu chuktuah a rual ta nghâl a. A chemin a deh rual chuan puithiam nghâwng chu a thi sawr sawr bawk a. Chu chu an hmuh chuan hnam mâwlho chuan an puithiam chu a thih an hlauh avangin, a ke rawn chhep hnai zêl chu an châwl dawt a, hnung lamah an tawlh lêt leh hrut hlawm a. Chutah Aizika bawk chuan, "In fei hmâwr zum kha ka lam hawiin lek tawh suh u," tih ṭhat pahin puithiam nghâwnga a chem chuktuah chu a han nghat na leh deuh salh a. A nghâwng chu a zai kaw hawih mai ang tih hlau chuan puithiam chu a lo râk chûl mai bawk a. Chutiang a nih-ah hnam mâwlho chuan an fei chu a lek hnuai ta ruai ruai hlawm a.

Boruak chuan thlamuan lam a hnaih deuh hnu chuan, Aizika chuan an puithiam nghâwnga a chem la chuktuah rân chung hian, "Engti tûra heti lam rawn pan hi nge ka nih hrilh rawh," a han ti vîn ṭhak a. Puithiam chuan khûr hluk hluk chung hian, an lal hmuh a duh thu leh inremna siampui tuma he lai hi rawn pan a ni tih chu a han sawi a. Chumi zawh chuan Aizika chuan, anniho hmuhah chuan a sapui zia chu chhuahin, mitmeng dai raih, ngainatawmna nei hlek si lova melh kual pah hian, "Chu a thil sawi chu in hria maw?" a han ti fiak leh ṭhak a. Anni chuan Aizika huhâng, amah hmachhawn tawhtute lo tizâm fo tawh, thâwm nei eih si lova chhûngril tisai dat dat ṭhin chu an hre ṭan ta tlat mai! Chu chuan a lakah chuan tu mah huaisen a thawhtir ngam lovin, a melh apiang chuan an mit an khap hniam lap zêl a, khup lap hian an ding ngawi ṭhup ringawt mai a. An khawsa zia a hmuh chuan Aizika chuan, "Ka sawi chu in hria em?" tiin a aia ring hian a au leh ṭhat a. Anni chuan an lu an lo bûk khum nghut nghut hlawm a. Chutah an puithiam hnênah chuan, "Anni hian ka inring lo lai min khawihin ka lakah hian sual chhuah duhna rilru an pu thei. Chuvangin, chutiang tum an awm emaw, min lo khawih an awm a nih chuan an thihna turin ânchhia lawh rawh," a han ti vin leh ṭhat a. Puithiam chuan khûr dur dur chung hian, "He mi hi, a laka rilru chhia, amah tihhlum duhna emaw, a inring lo lai khawih in awm a nih chuan, pi leh pute biakin an chungah thihna thlen rawh se," tiin ânchhia a han lawh a. Chu a ânchhia chuan a vêng hle dâwn a ni tih a hriat chian êm avangin, Aizika chuan, "Le, in lal hnênah chuan min hruai tawh rawh u le," tiin puithiam hrawka a chem chuktuah chu la thlâ a. Tichuan, an lal chênna lam pan chuan hnam mâwlho chuan Aizika chu an hruai ta a.

Khua a thim dâwn hnaih tawh, kâwl kila ni zung châmbâng pawh an kiang fel tawh, ngaw chhûng pawh a thim ruai tawh tih chuan hnam mawlho khawsakna hmun chu an thleng ta a. Ngaw kâr a ni na a, an lal chênna hmun tih takah in pawh a tamin, mihring pawh an lo ṭhahnem hle mai a. Chu'ng mi tena an mi leh sâte zinga Aizika hmêl an han hmuh chuan mak ti takin an lo thlêk ha ha hlawm a.

Nakin deuhvah chuan an khaw hulûm leh nuam laiah hian in lianpui mai, lal in a ni tih hai theih miah loh hi an va thleng a. Puithiam chuan, "Hei hi kan lal in chu a nih hi," a han ti a. Aizika chuan, "A nih chuan, mi dang tel lo hian min hruai lût rawh," tiin a chhâng a. Tichuan Puithiam nen chuan lal in chhûngah chuan an lût dûn ta a.

Lalin Aizika hmêl a han hmuh chuan, "Hei lah sa ei tûr min rawn hlui dâwn a ni maw?" tiin puithiam chu a lo be nghâl thawt a. A bula awm ve a khâwnbâwlte chu an aw chhuahin an lo haw haw hluah hluah bawk a. Aizika chuan chu lal ṭawng dân leh, a khâwnbawllte khawsak dân chu a ngai thei lovin a ngêng a chhun hle mai a. Mahse, inphah hniam tûr ni-a a inhriatna avang chuan ngawi rengin a lo ding rân rih thung a.

Puithiam chuan lal hnênah chuan, "Lalpa, inremna siampui tûr chea rawn kal a nih hi," tiin zah takin lal chu a bia a.

Lal chuan, "Eng thilah maw ni a? Inremna aia innghaisakna hmuna rawn kal a ni tih a inhre lo em ni? He lai ram bialah hian hnam dang rawn kal ngam an awm tawh loh laiin, eng inremna nge a rawn beisei? Pâwnah khan va hruai chhuak la, thingah khan lo phuar bet teh u. Tichuan, a hmuh laiin a lung ka'n phawrhsak mah na'ng a, Lal Huluaia nena hnam dangin inremna siam tum a ṭhat lohzia hre teh se," a ti rum ta ûl mai a.

Chutah zet chuan Aizika chuan ngawih chi leh inphah hniam chi niin a hre ta lo va, A ṭawng cheh chhiat ang chiaha cheh khum a, tlâwm taka dâwr chi niin a hre ta lo va. A iptepuia chem chu a phawrh zawk a, nghet deuha hûm leh tlâwm lo hmêl taka melh chung hian, "Inremna hnâ thawktu palai zahawmna hre lo lal maw i lo nih phiangsen ni Huluai, a hu-a khu luai? Ka thi dâwn a nih chuan, ka ruang bulah i lû kha a lum tel ve ang tih hre rawh," tih leh a hnung lama bang chu vai kuak hawk a, lal in ban lai, muk thing ui pum tiat zet zawt chu chhawk a han rual zawk bawk a. Lal in chung chu a rawn hniam sut mai a. Chutah banglaia fei intâr chu chuh leh nghâlin, lal thinhnûn zâwnah tak mai chuan a lek kawh to a. Chumi pah chuan, "Ka thih tûr thu i chhâk chhuah kha i sût leh dâwn nge, pialrâla ka rawngbawl zui tûrin ka tîr liam nghâl dâwn che?" a ti ta chheu chheu mai a. Chu zet zawng, lal leh khâwnbâwl upate rin phâk loh khawpin mi huaisen thin a thawk a ni ngei ang, a huhângah chuan an zum tlâng dûk hlawm a. Chutih lai tak mai chuan pâwn lama lal in chhûnga thâwm hriaa ngaih ṭha lo, an pasalṭha pakhat hi fei nen a rawn tlân lût rawk rawk a. Aizika chuan chu chu a lo hmuh chuan, lal in banga sakhi lu intâr chu a phih thla lawk a, kawngka a rawn pêl fel awrh tih chuan sakhi lu chuan chu pasalṭha fei keng chu a lo vawm let hlawl a, lal in chhuatah chuan nikhaw hre lo leh a lu aṭanga thi chhuak zawih zawih hian let rûm ṭuah ṭuah mai a. Chutah lal lam chu hawi a, a thinhnûn zâwna a fei chu lek leh vat pah hian, "Ka thi dâwn a nih chuan, in zinga a tam thei ang ber hi pialrâla ka rawngbâwl tûrin ka hruai ang che u. Chêt in thawh leh zêl dâwm em?" a han ti leh ta chheu chheu mai a. A che rang lutuk leh, a tharum ngah lutuk te, a huaisenna te a han hmuh chuan lal chuan, "Khaih, khaih! Duh tawk teh, duh tâwk teh. Nunna inhloh ṭeuh dâwn ai chuan inbiak rem mai hi a ṭha zâwk ang e," tiin a meng khup lup a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 4th, 2019, 8:04 pm

PASALṬHA AIZIKA

- Nunmawia Fânai

BUNG 33-NA

Lal Huluaia'n chutianga a zia a thlâk tâkah chuan, Aizika pawh chuan a fei lek chu Huluaia thinhnûn zâwn aṭang chuan a la thla ve nghâl ruai ruai a. Lal upate pawh chuan, rang takin an pasalṭha bawksawp reng leh rûm ṭuah ṭuah chu an bawihsâwm zui nghâl zung zung bawk a. Chutih lai chuan Aizika chuan, "Min lo dawnsawn dânin a zir êm mai a, i lal in chhûngah meuh râwvâ ka chhuah ta a ni e. Lal thisen zahna nei lo tawp chu ka ni lo va; chutih rualin ka nun ka humna atân erawh, lal leh lal lo hi an danglam leh tlat thung lo," a ti bul hmak a.

Lal Huluaia chuan, Aizika chu mak ti leh ngaisâng ru taka melh chung hian, "He ka lal ram bial chhûng hi hnam dangte hian, thlauh thlâk kan nih achinah hian an la rawn rap leh ngam tawh lo asin. Khawi aṭanga lo kal nge i nih bik? Hetianga ka lal in chhûng ngeia min tlâwm theitu pasalṭha hi tu nge maw i nih chiah a, tu khua nge maw i nih rêng chu le?" tiin a zâwt chawt mai a.

Aizika chuan, "Lal Thandâwla khua aṭang lo kal ka ni e. Zahleithanga nena kan infiamna hlen tumin ka ṭhiante nen kan rawn chhuak a. Mahse, i ram pal tlang tum chu a lo khirh ngat ngat khawp mai! Chuvanga inrempuia rawn sâwm ngawt mai che tuma rawn kal ka ni," tiin a chhâng a, a hming erawh a hrilh duh rih lo thung a.

Lal Huluaia chuan, "In lal chu ka lo râl hriat ve mial tawh tak asin. A khaw hming kha 'Leilên' em maw ni ta kha âw? A nih chuan, Lal Thandâwla pasalṭha, ngawhngawl zeta an sawi, 'Sângrova' an tih kha i ni thei mial mai lo'ng chu maw?

Zahleithanga hming te i han lam ri leh zêl a. Kha mi vervêk leh bum hmang kha maw ni a? In thihna tûr a valhsak che u a ni phawt mai maw chu? A hma chuan ṭhian kan lo ni ṭhinin, insumdâwn tawnna kawngah pawh kan inpawh viau ṭhin. Mahse, a hlâwkna ûm leh verther luattuk vângin kan chi chan ai kan khawp loh phah chho a. Tichuan, keini lam pawh, kan ram rawn pal tlanga chi phurte lakah lo ṭuan phahin, kan kham khawp tûr kan lo sâwksak phah ta ṭhin a ni. Chuta ṭang chuan, chi kan châwk luhna ṭhin lalte lung a ni ta lo va, ka lakah lung âwi lovin min thlauh thla ta a ni.

"Engkim hi Zahleithanga avanga thleng chhe zo ta niin, hnam dang hmêlmâk rawn kan ni chho ta zêl a. Chutiang a lo nih hnu chuan, anni laka phuba lâk nân an fanu an fapate sa kan eisak ta ṭhin a ni. Chu bakah, hmun dang leh ram dang mi tu pawh, he lai ka ram bial chhung rawn rap dêk tawh chu lo thatin an sa kan lo eisak mai ṭhin. Chumi avang chuan hlauh kan nih phah a, min hlauhna chuan dam khawchhuak tûrin min tihim hlauh bawk a.

"A nih leh, Zahleithanga nena in infiamna chu eng thil nge ni ta ngai? Nunna thâpa han khelh atana tlâk meuh khawpa infiamna hlu chu eng nge?" a han ti lêt ve leh a. An titi chu mi dangte chuan ngawi rengin an lo ngaithla ṭhap a.

Aizika chuan, "Kan lal Thandâwla khua chu tûnah chuan 'Leilên' ni tawh lovin, 'Pâwithlun' tiin a hming koh a ni tawh a. Chuan, kei hi 'Sângrova' chu ni lovin Aizika ka ni zâwk e. A thang thui tûr zâwk tak i lo hria a nih chu..." a tih lai chuan lal leh upate chu mak ti hmêl taka meng deuh kâwk hian an 'ê' dual ta mai a. Chutia an 'ê' dual chu Aizika chuan hre thiam lo tak hian a melh kual hrak hrak hlawm a. Chutah lal Huluaia chuan, "Aizika, Lusei khuate zinga an pasalṭha chhuan tawlawl bera an sawi ṭhin, 'Aihniara hnuhnung zâwk' tia an sawi ṭhin hi maw i nih? Ani kha chu Rohluna khua a niin ka lo hria asin. Engti tih a, Thandâwla khaw lamah daih daih?" tiin ring ngam chiah lo, ring lo phal bawk si lo hian, Aizika chu a ni chiah em tih hre chakin a zâwt ta thuai a.

Aizika chuan, "Aizika chu ka ni alawm. Kan lal Rohluna nen kan inbâ ta lo va, Lal Thandâwla hi ka bêl ta a ni," tiin a chhâng a.

Lal Huluaia chuan, "Rinhlelh zia a ni lo ve, hetianga mi ṭuan ṭha leh tum tlang, ka lal in chhûng ngeia min tlâwm thei hi, Pasalṭha Aizika lo tu mah an awm thei ngai lo vang. A hring a hrâna ka hun laia ka mi ngaihsân ber mai ka hmu thei hi ka lâwm hle mai!" tiin Aizika chu, tûn hma lama a lo râl hriat hle tawhna leh, a lo ngaihsân rûk em em ṭhin a ni tih chu a inpuang ta dêr mai a. Chumi a han hriat chuan Aizika chuan mak a tiin, a rilru chu a thlamuang deuh huai a. Chutah Lal Huluaia bawk chuan, "Han sawi zawm zêl tawh le; Zahleithanga nena in infiamna chungchâng leh kei nena inrem i duhna thûte chu le," tiin a inhawnna chu a lantir chhunzawm zêl a.

Aizika chuan, "Inrem ila ka duhna chu, tunah hian, Zahleithanga chi khur chan ai, Phunkipa'n a chhuh lêtsak a ni âwm a. Chu chu lâk lêt dân ngaihtuah tûra kal kan ni. Chumi atan chuan kawng râlmuang kan mamawh a, kawng râlmuang min siamsak a nih chuan, kumkhuaa chi-a in phân tawh lohna kawng ka ngaihtuahpui thung dâwn che u a ni," tiin inremna thu thlunpui a tumna thil chu a han hrilh a.

Lal Huluaia chuan, "Chutianga kawng râlmuang in mamawh a nih chuan, ka lal ram chhûng in pelhna tûrah hian in râlmuanna tûr chu ka ngaihtuahpui dâwn che u nia. Mahse, in han bitum tûr chi khur, Phunkipa lal ram chhûnga mi khi, chuti maia tluang leh awlsama chhuh lêt theih chu a ni hauh lo ang. Mahse, han tum chhin poh ta che u; nang meuh i inrawlhnaah chuan kawng thui tak zawng a kaw ngei ang," a ti dam thluam a. Chumi zawh chuan, "Hei, puithiam i rawn hruai dânah hian a chênna in rawn ram chu a ni êm lo ang chu maw?" tiin a zâwt leh khauh a.

Aizika chuan, "A kaw tâwpa ṭang tân chuan him tûra theih tâwp chhuah a ngaihzia chu i hre thiam mai âwm e. A chênna pûk hi kan rawn hneh chhuh tawp mai a ni; nang hmuh che ka duh avang hian," tiin a chhâng a.

Lal Huluaia chuan, "A nih nunna chân pawh an awm nual ang maw?" tiin a zâwt leh a.

Aizika chuan, "Awm ve bawk e," ti chauhin a chhâng a.

Lal Huluaia chuan, "Mi a dingchang dâwn a nih chuan tuartu an awm a ngai ve bawk alawm. Khawiah nge i ṭhiante chu an awm? Puithiam khawsakna pûkah chuan an lo awm rih mai tihna em ni?" tiin a zâwt leh a.

Aizika chuan, "Chutianga tih mai loh chuan himna tûr hmun dang awm hek lo le," tiin a chhâng leh a. Chutah lal Huluaia chuan, a mite leh Aizika ṭhiante chu an lo inrâl leh chiam mai ang tih hlauvin, pâwna chanchin ngaichânga a pasalṭhate lo inhâwr khâwm reng chu va bia a. An hnênah chuan, tlâng bul hnaia khawsaho zawng zawng hnên a, puithiam chênna pûka tawmte chu bei zui tawh lo tûra hrilh tûrin a tîr liam hlawm ta nghâl a.


Chu'ngho an liam hnu chuan lal chuan, Puithiam hian sâkhuana thila puithuna thil tih tur pawimawh a neih reng ṭhin avang a, zan khat pawh pûk chhûng chhuahsan thei a nih lohzia chu Aizika hnênah chuan a hrilh mawlh mawlh a. Chumi a nih avang chuan puithiam chuan a tawm pûk chu rial reisan lo va, kir leh thuaia a duh thute chu a sawi rualin, a ṭhiante chu a lal ina riak tûra hruai tûrin a ti ta nghâl a. Aizika chuan lal Huluaia lo inhawnna leh a lo mikhual duh leh zêlnaah chuan lâwmthu a han hrilh mawlh mawlh a.

Chutih chhûng chuan khua chu a lo thim reng tawh mai hi a lo ni a. Khua a thim tâkah chuan meichher lian ṭha elh awlh chhiin, Aizika leh Puithiam chu pûk lam pan tûrin an inzui chhuak dûn leh ta a. An hnungah chuan lalin a ruat angin puithiam vêngtu tûr mi sâwmpahnih hian an zui bawk tel ve bawk a.

Aizika hi, mi rothap leh tum tlang, ngawhngawl leh lung lian tak mai, a luhlulna lah mite bâk ni hiala mawi mah ni sela, a chhûngrilah hian mi hneh theih riauna ze thûk tak mai hi a nei tel tlat a. Chu a zia chu, ṭhatna ze der ve ngai miah lovin a hrin, khawngaihna te, lainatna te, dawhtheihna leh rinawmna te, tlâwmna leh zaidawhna a neih tel tlat chu a ni. Chu chu Lal Huluaia pawh hian Aizika a ni tih a hriat hma hauh, a thinrim mitmeng rum leh ṭihbâiawm tak a reh rual khân a lo hmu tawh rengin, amaha thiltihtheihna danglam tak lo chhuak chuan a lo hneh ru tlat tawh zâwk hi a lo ni a. Chuvâng chuan a nia, a thinlung hi Aizika lakah hian zau taka a hawn phah tâk ni.

Pûk an thleng a, a chhûng an han lût a. Aizika chu puithiam nêna him taka a lo lêt leh bâkah, a ruala hnam mâwl mi sâwmrual zet mai zuitu a nei tel leh zêl chu mak ti tak hian a ṭhiante chuan an lo thlîr rawn ṭhap hlawm a. Mak ti taka thil awmzia an lo zawh sap sap hlawm hnu chuan, Aizika chuan, an zin kawng chu him taka a kuak tawh thu leh, hnam mâwlho lalin a mikhual atana a sâwm thu te chu a hrilh mawlh mawlh hlawm a. Mahse, inremna kawng zawng tûra a chêt râwvâ zauh dân erawh hrilh tel lovin, inrem an ni tih thu chauh chu a ni a hrilh ni. Chu chu an hriat chuan a ṭhiante chuan, awih har ti si, awih lo phal si lo, a tak a ni ngei tih hmu thiam vek si, rinhlelh tum lek lek si hian mak an tih thu leh an lâwmzia thu chu an hrilh sap sap hlawm a. Chutah lal Huluaia a inrempui dâna thil a tluang perh purh lutuk mai chu, Lianchuhmânga chuan a chhan hre châk tak hian, "Zika, engtiang chiahin maw lal Huluaia nên chuan in inbiak rem dân ni reng reng? I intiamkamna a lo pawm dân hriat a va châkawm ngai êm ve le?" tiin a han zâwt a. Aizika chuan, "Duh thuhmun leh rilru inzawm rûkna nei ve ve ta chu, kan inhamtawng ta riau a ni ber mai e," ti chauhin a chhâng a. Aizika chhânnaah chuan a duh kim lo viau mah se, Lianchuhmânga chuan zawh chhunzawm zêl chu a tum ta bik lo va.

Zanriah an ei kham a, thla zungin kâwl a vêl êng suar suar tawh tih chuan Aizika leh a ṭhiante chuan pûk chu chhuahsanin, lal Huluaia sâwmna ang chuan lal in chu an pan ta thliah thliah a.

Aizika leh a ṭhian ten lal in a thlen chuan lal Huluaia leh a upate chuan ṭawngkain chibai an lo bûk thliah thliah hlawm a. Chutih rual chuan, an zinga nula a tel ve tlat chu mak tiin an thlêk dâk dâk reng hlawm a. Chutah lal Huluaia chuan, "Hei, kawng laka in hrehawm phuhrûk tûr hmeichhia in hruai tel ve a ni maw? In inchan meuh em maw chu?" a han ti a.

Aizika chuan, "I lal ram chhûng kan rawn luh tirha i mite lak aṭanga kan chhuh a nih hi. An lo tihlum hman ṭhelh nghe nghe asin," tiin a chhâng a. Aizika'n a chhânnaah chuan lal chuan chu nula chu inthâwina atana an hman tâkte nêna an rawn man rual, khaw thlang lam puithiamte inthawina tûra an hnêna a thawn thlâk tâkte zinga mi a ni tih chu a hre thiam nghâl thuai a. Chumi a nih avang chuan, chu lam chu sawi zui duh lovin titi dangah a kaisan leh hlauh a. A lal ram bial chhunga him taka an kal theihna tûr atana ruahmanna a lo siam dân te, chu a ruahmannaah chuan a pasalṭha ten ramri thlenga an hruai chu an himna tûr leh, thisen chhuah lova a ram chhûng an pal tlang theihna tûr a nihzia te chu a sêp chho ta daih zâwk a. Chumi piahah chuan, chi khur chu tum anga an lo la lêt thei lo a nih a, ṭanpui ngaia an awm a nih chuan, a pa chhuak pawha puih a inhuam thu te chu a sawi thleng leh ta zêl a. Chu a inhuamna leh zêl an hriat chuan, Aizika leh a ṭhiante chuan lâwmthu an hrilh mawlh mawlh hlawm a. Inpawhna leh inrin tawnna mak tak mai, chutianga khawsak phung inkâr hlat lutukte kâra a thleng thei chuan, mihring thinlung inpawhna siam tûr hian, thawktu eng emaw tak chu a awm ṭhin a ni tih a tichiang hlê awm e.

Zing khua a lo vâr a. Aizika leh a ṭhiante chu khaw chhak lal ram pan tûr chuan an inbuatsaih leh ṭan ta sang sang a. Tûkṭhuan zing taka eiin, ni a chhuah rualin Lal Huluaia lal in chu a pasalṭha mi sâwm ai ṭha deuhte nên chuan an chhuahsan leh ta a.

Kawng laka zan khat an riah hnu leh, Huluaia mi leh sâte khawsakna hmun khaw te tak tê te inhnaih tak tak eng emaw zât an pal tlang tawh hnu, chawhma chanvê ai maha rei an kal leh tawh tih chuan ramri chu him takin an ban thleng ta hlawl a. Chu lai hmuna rei lo tê an chawlh hnu chuan Huluaia pasalṭha, anmahni hruaitute chuan kirsan tumin kal an han rêl dâwn a. Chutih lai chuan Aizika chuan, "Dam takin u le. In lal ṭhatnaah leh in tlâwmngaihnaah lâwmthu ka sawi mawlh mawlh e. Dam takin kan inhmu leh dâwn nia," tiin a han thlah a. Anni pawh chuan, "Dam leh tluang takin le," tiin an thlah lêt ve bawk a. Tichuan, mahni kawng lam ve ve zawh tûr chuan an inṭhen ta a.

Chawhnu her a lo nih a, ni pawh kâwlah suk chen chauhvin a la kâng tih chuan, tlâng tê pakhat hi lâwn liam tûrin a chhip zâwl an chuang chhuak ta hlawl a. Chu tlâng aṭang chuan an hma lam, khaw chhak lal Phunkipa khaw zâwn âwm lai tûr chu Aizika chuan Dâwntlingi hnênah chuan a han zâwt a. Dâwntlingi chuan an hma lamah hmâr chhak hawi hreta zan li zan nga lai an kal hnuah a an thlen chauh tûr thuin a chhâng a.

An awmna tlâng chu thing pawh ṭo lova kawlh mal mai, phâitualhnim inchap bet thlerh hmun hi a ni a. A thengthaw nuamin, a hmun vêl leh lang thei chin rêng rêng lah tlâng tê a bâwk leh zeuh ṭhin tih mai loh chu, phai zâwl a inphah cham pût mai a. Ni tla hnai tawh hnung puak zâwnga ṭhu an ni bawk a, chhuah lam phai zâwl leh tlâng tê bâwk thlih thliahte ni zungin a han chei sen phût mai chu, an la hmuh ngai loh thil mawi a nih hlawm avang chuan mawi ti leh lunglêng êm êm hian an thlir ṭhap hlawm a.

Chutianga an thlir lai chuan an hma zâwn chhim chhak lam deuh hawia hla tham takah hian khaw lian tak pakhat, Lusei khuate aia ropui leh nuam zâwk tih hriat tak, an in sak dân phungah pawha chungnunna danglam tak nei chu, phai zâwl zau tak inphârh duai mai kârah chuan an hmu ta viai viai a. Chu khua chu thlîr vang vang pahin Aizika chuan, "Saw lai khua saw kan kalna lam tûr chu a ni lo na a, zan li zan nga lai la thang tûr kan la nih lai kârah, ei tûr lah ni hnih tlâ âwrh bâk bâwk a lawi kan nei tawh si lo va. Chuvangin, lal Huluaia'n a thil paipâwnho hi mamawh phuhrûk nan saw khuaah sâwn kan zawrh mai a ngai dâwn a ni," a han ti a. An ni chuan Aizika ruahmanna chu finthlâk an ti hle a, khua a thim hmaa chu khuaa luh chu tumin, hmanhmawh takin an chawlhna hmun chu an chhuahsan ta hlawk hlawk a.

Han lêt leh lawk ila, khatia, inremna thinlung nêna inpawh taka an han indâwrah khan, an zin kawnga an riah fai leh chawhmeh ilo kente chu an khawp kham dâwn lo a ni tih hriain, lungmawi leh tuikep aṭanga siam ṭhite chu an hnem hnânpui atan tiin Huluaia chuan ṭhahnem tham tak hi a paipâwn awlh kha a ni a. Ni e, Huluaia hi a mihringpuite sa hial ei hreh lo khawpa khawngaihna leh zahngaihna nei lo, lal ṭih khaiawm tak ni angin lang bawk ṭhin mah se, a chhungril nunah tak hi chuan khawngaihna leh zahngaihna ngah ru êm em hi a ni lawi si a ni.

Tichuan le, Aizika leh a ṭhiante chuan an chuan tlâng chu liamsanin phai zâwl chu an chhuak thla a. Phai zâwlah chuan tlang ram khan aia chêt a nawm zâwk avang leh, a hmun a thelh nawm bawk avangin an chak thei sawt bawk a. Kâr lovah, thim hma deuh hretin an pan mêk khua chu a thleng titih ta dêr a. Râl aṭanga an han chian chuan, chu khua chu kulh nei khua lo niin, a lâwi luhna tûr kawngkapui zau deuh taka an hawn tih loh chu a inhung phui mup mai a. Chu chu an hmuh chuan ropui hi an ti hle hlawm a; chutih rualin a tizâm ru hle hlawm bawk a. Chu kulh inhung phui mup mai chu thlir vang vang pah hian Aizika chuan, "Le, he laiah hian kan fei leh silaite hi dah ṭha ila, kan sumdâwnna hmun tûr saw thim hmain i va lût ang u le. Chuti a nih loh chuan râl emaw tiin min lo sai palh dah ang e," a han ti a. Tichuan, kulh lam pan chuan chak em em si lo hian an inzui phei ta dam dam a.

Kulh kawngka bul an thlen chuan vêngtu pahnih hi an lo awm a. Chu'ng mite hnenah chuan Aizika chuan, sumdâwng an nih thu leh kawng laka buaina an tawh avanga tum aia rawn tlai an nih thu chu a han sawi zung zung a. Chumi zawh chuan luh tumin a kal pêl mai dawn a, anni chuan luh ngawt chu an lo phal ta awzâwng lo mai. An silai chuan tinin, "He khua hi rukru leh suamhmangte tân luh a thiang lo ve," an tih khum bûl hmuk mai a. An khawsak dânah chuan Lianchuhmânga Pâwi thin chu a thawk ta thut a, "Rukru leh suamhmang chhuahin min chhuah vêl elo? Khawii nge ni, lu hrang nawlh khawpin ka chem hi in nghâwngah khân ka'n nghat teh ang," tih leh a lu lâk chem chu phawi a rual ta mai a. Chu veleh anni chuan Lianchuhmânga lam hawiin an silai chu an tin rual nghâl ṭhawt a, chutiang a nih-ah chuan Lianchuhmânga chêt lâk tum chu a ding leh nghâl chawih a. An hmeh per hman hma chuan Aizika chuan chu mite pahnih silai dâwt chu rang lutuka dawmsak zawtin, vân lam hawiin a dâwt chu a elh chhohsak dûn nghâl thuai a. Kulh kawngka vêngtute silai chu vân lam hawiin a puak khâwk rual nghâl rawih rawih a. Chu thâwm an han hriat chuan kulh chhûng lama an râl vêngtu dang, rawn ding lang ve lote chu silai kau sain mi sawmhnih rual vêl hi an rawn lang rual ṭhawih a, Aizika leh a ṭhiante chu kah tumin an rawn tin vaw hlawm a.

Chutiang a nih leh zêlah chuan Aizika chuan an chan a chau hle a ni tih hriain, vawilehkhata tlu rual nghâl ṭhawih thei an ni ti chu a hai lo hle a. Chuvangin, a rang thei ang bera a lu lâk chem chu a iptepui aṭanga phawi chhuah zawk leh, a bula râl vêngtu pakhat zâwk chu inphenna atâna hman paha a hrawka a chem hriam zet chu chuktuah a rual nghâl a. A chem chu duh aiin a lo nghat na deuh nge ni, a inphênna pa nghâwng chu a thi ṭuam ṭuam a, ani lah chu hlauvin a ṭê chûl mai bawk a. Chutia Aizika chêt dânin a tih hamhaih lai tak chuan Lianchuhmânga pawh chuan, râl vêngtu pakhat zâwk chu Aizika tih ang chuan ṭhâm betin a hrawkah a chem tle zawr mai chu a lo chuktuah ve rân hman tawh bawk a. Chumi a nih avang chuan silaia rawn tintu kulh chhûng lama mite chuan, an ṭhiante nunna hloh hlauvin an silai chu an hmet puak ngam ta bik lo va.

Chêt an thawh ngam lo a ni tih a hriat veleh chuan Aizika chuan, "In silai kua kha kan lam hawiin rawn tin tawh lo rawh u. Inbei tura rawn kal ni lovin, sumdâwng tura rawn kal zâwk kan ni e. Kan inhai palh mai mai a ni," tiin aw dam thlap hian a han au lâng lâng a. A au zawh hnu deuh maiah chuan anmahni tintute hnung lam aṭang hian, "Eng thil nge thleng ta ngai?" tia rawn au lâng lâng ri hi a rawn chhuak a. A hnu rei vak lovah chuan vâl upa pahnih hi an rawn thleng zawm nghâl a.

Vâl Upate chuan, Aizika leh Lianchuhmângate hnenah chuan an naute pahnih nghâwnga chem an chuktuah rân mai chu thlah turin an han ngên a. Aizika chuan, "Him dam taka in lal hnen min thlen dawn chauhvin kan thlah ang. Sumdâwng kan ni a, sumdâwng tura rawn kal mai kan ni; inrâl ena inbeih hi kan duh leh tum a ni rêng rêng lo," a han ti a. Vâl Upate chuan, "E khai! Kan thiam loh a ni e. Him takin kan lal hnenah chuan kan hruai mawlh ang che u. Hlauthâwng reng reng suh u," tiin an chhâng a. An naute pawh chu silai dah thla turin an hrilh nghal bawk a. Tichuan, lal hmu tûr chuan kulh chhungah an hruai lût ta diah diah hlawm a.

Lal in an thleng a, lalin an hmêl a lo hmuh chuan, "Hei, khawi lam mite nge ni ngai? Engti tûra khua a thim hnua ka khaw chhûng rawn rap nge an nih?" tiin vâl upate chu a han zâwt a. Vâl upate chuan, sumdâwng tura rawn kal an nih thu te, kawng laka buaina an tawh hlauh avanga rawn thleng tlai an nih thu te chu an han hrilh a. Chu chu a hriat chuan lal chuan Aizika leh a ṭhiante ngunthlûk tak hian a han melh kual dan dan a. Chumi hnu chuan, "Hetiang mi, sumdâwng hmêl pawh an pu nek lo ve! Ripah khan va khung khâwm rawh u," tiin thu a pe ta hmuk mai a. Chutianga a rin loh deuh maia a han tih tâkah chuan a thu chu zûk tûra lal chu ngênin, sumdâwng tura lo kal mai an nih thu Aizika chuan a han sawi ngial na a, lal erawh chuan bengkhawn duh tlat lovin, a tukkhum chhah a chhawn khum ta ngut mai a. Tih ngaihna a awm tâk lovah leh, chêt thawh a, chu hmun aṭanga chhuak tûra beih ngawt chi a nih tâk bawk si lohvah chuan, Aizika leh a ṭhiante chuan tâl buai leh luhlul chhuah lovin, lal in kianga rip lam pana an hruaina chu lung si lo taka zâwmin an zui dat dat hlawm a.

Rip chhunga an khung khâwm hnu chuan Lianchuhmânga chuan, a laka beisei nei tak hian Aizika hnênah chuan, "Zika, nang, he lai hmun aṭanga kan chhuah theihna tûr hian ruahmanna i nei leh tawh mial lo maw?" tiin a han zâwt a.

Aizika chuan, "Tunah rih chuan, suma sazu khuh hnan ang hlauh ka ni rih e," tiin a chhâng a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 5th, 2019, 7:46 pm

PASALṬHA AIZIKA

- Nunmawia Fânai

BUNG 34-NA

Rip chhung thim ruih hnuaia ngaihtuahna bîng mup mup leh thinrim inseh ruh ṭûna an ṭhut lai chuan, an lam pana meichher êng rawn fiah phei telh telh chu hmuin, thâwm dîm lêm lo taka ke pên ri rawn hnaih phei thlarh thlarh chu an hre zui nghâl bawk a. Meichher êng chu a rawn hnai zêl a, an tântirna zâwnah chuan tâwpin kawngka hi a rawn inhawng ri rawk a. Kawngkaah chuan mi pathum rawn lûtin, anni chuan bêl lian lêm lo tak, khâp thum bêl leka thil chhum kâwi leh bêl danga tui khat lang mai hi rawn chawi lûtin, an hmaah chuan an rawn chhawpsak a. Chumi pah chuan, "Kan lal chuan in lakah ngilneih a la chhuah hrâm hrâm a, ei tûr hlui duh khawp che u-in zah a la ngai a nih hi," tiin tham lo tak hian an nuih khum hlawm a. Chu an chêt zia chuan a ngêng chhun viau mah se, a bet zâwk leh chan chhe zâwk an nih hriain Aizika chuan, "In lal ṭhatnaah hian lawmthu min lo hrilhsak dâwn nia," tiin a lo chhâng a. Tichuan anni chuan Aizika lawmthu sawina chu bâra khawn lo tih hriat deuh hian, an meichher chu rip chhung kil khat lai chungah chuan an târsak a, an chhuahsan zui leh ta nghâl a.

An chhuah fel hnu chuan an ei tûr rawn chhawpsak chu an han hâwp ta tliar tliar a. Chutia an hâwp tliar tliar lai chuan Thanluaithanga chuan, "Khai aw! Vaimim rêp chhum kâwi lah ni reng ka ti! Hetianga tih nachâng te hi engtin nge maw a hriat bik chu ni? A va han tui ngai kher êm!" a ti chhuak hluai a. Dâwntlingi chuan, "He lamah chuan vaimim hi kan chaw pui ber pakhat alawm a nih. In khaw lam angin kan ram lei leh buh hi an inhmu rem ṭeuh lo nge ni, buh a ṭhain an hlâwk ve thei ngai lo va. Chumi avang chuan vaimim hi kan chîng uar ta zâwk a ni," ti-a chhângin, he lam rama an vaimim chin uar chhan te chu a hrilh fiah vêl a. Kham lo takin an ei fai ta lêng a.

An ei zawh hnu, zanriah âwma ṭhut muan paha vaibêl an pak khûk talh talh hlawm lai chuan Lianchuhmânga chuan Aizika hnênah chuan, "Zika, eng vânga hun remchâng kan neih lai khân, he hmuna inkhung behtîr lova tharum leh invaukhânna hmanga chhuahsan ta mai lo nge kan nih?" tiin a han zâwt a.

Aizika chuan, "A huhova kan nun hona kawngah chuan, kan zinga mi tu pawh hi mi hlu ber vek kan ni miau si alawm le," tiin a chhâng a.

Chu a chhânna chuan awmzia eng emaw tak a nei tih chu hre bawk mah se, a awmzia tak chu a hriat thiam chiah loh avângin Lianchuhmânga chuan, "I thil sawi awmzia hi eng nge ni ngai?" tiin a zâwt lêt leh thuai a.

Aizika chuan, "Tharum leh vaukhânna hmang chuan he khaw kulh hi kan chhuahsan thei ngei ang tih chu, kan ṭanrualna leh kan thinlung inzawmna avâng hian ka ringhlel hauh lo. Amaherawhchu, chutiang chuan lo ti ta ila, kan chhuah rualin ṭâm hmabâkin kawng thui tak bul kan ṭan nghâl ngawt mai dâwn tihna a ni a. Chu chu keini mipaho hi chuan kan chhelna leh chaknain kan pal tlang thei ngei ang tih hi ka ringhlel hauh lo bawk. Mahse, chutiang a niha hnu hmanah kan nula-i hi taksa him dam zân pawh ni sela, a tan kawng a bumboh bîk dâwn êm êm lai kârah, taksa him dam lo leh a chakna neih ve ang tâwkte hmang thei lo a ni a, kan ngaihthah a thiang hauh lo a ni. A tân hian kawng lakah ei tûr dapin, therhlo ilo han hâwl ngawt dâwn ila, kan hma lam huna kan thil tawn tûr a hriat loh lai kârah, kan silai hlo neih chhun hi kan khawp lovin kan phâng mai ang tih a hlauhawm hlel si lo nên. Han hman ngam leh phal rua a chan dâwn loh avângin, kan nula-i hi kawng lakah a tlu hlum palh hlauh thei a. Chumi mawh phur chunga vânneihna beisei chu ka ngai ngam ta ngang lo a ni," tiin a chhâng a. Chutianga a chhânnaah chuan Lianchuhmânga chuan Aizika nêna an ngaihtuahna inthui hleih lutuk leh, khawngaihna leh ngaihsakna an inngah hleih bîk êm emnaah chuan a zak ru ta hlê mai a. Zawi sap hian, "Chutiang lam chu ka lo ngaihtuah thlen phâk loh leh ngaihtuah thiam loh vâng a ni; min hre thiam hrâm ang che u," tiin â a intihnaah chuan thupha a châwi ta hlauh a.

Lianchuhmânga hi, mi râwvâ, lainatna leh khawngaihna nei lo ti-a an hlauh rawn, ze suaksual tak ngaia neiha a thisena lo tuh nghet tlat tawh niin, a than dân hi tiril ṭhâm zawng hlir lo ni ṭhin tawh mah se, Aizika a tawn aṭang leh a hnung a zui hnu hian Aizika ṭhatna chuan a chhungril hi a hnehsak thûk tial tial a. A chhungrila a ṭhatna neih, mei si ang leka la ling ve chê chê ṭhin chu chhawm nunsaka awmin a lo alh lian chho ve telh telh bawk a. Chu chuan a nun chu tidanglam chho zêlin, a lo nih ṭhin a ze ṭha lo chu a lo kiam chho telh telh a, ṭhatna chu amahah a lo lian chho telh telh bawk a. Chumi avâng chuan mi ṭha nihna kawngah Aizika zia chu inzirna atan a hmang chho chawt tawh mai a ni.

Ni e, mi, a lo ṭhat loh tawhna te, a lo suahsual ṭhinnate avanga en dawngtu leh hawisan thlang zâwk hlauhtu ai chuan, a chhûngrila a ṭhatna neih tlêmte lek pawh chhawm nunpuia tihpunsakpuitu ni tûra hruaitu leh hnehtute hi, he dam chhunga mi hlawhtlingte chu an lo ni.

Mu leh mal pawh neih hlei thei lo, an hma lam hun tûr ngaihtuaha rilru sâwr bing avanga mutmu pawh tuah ṭha lova zân an hman ral ṭhak hnu chuan, eng nge a rawn her chhuahpui dâwn tih pawh an hriat loh ni thar chuan rawn her chhuah hnanin, kâwl a rawn êng leh ta riai riai a. Ni a rawn chhuak a, tûkṭhuan ei a lo hun dâwn tih chuan, a hma zâna mite bawk khan, a hma aia bêl lian deuh tawh hretin vaimim chhum kâwi bawk kha an rawn ken leh a. An chhuah pah chuan, "In pialrâl panna kawnga rilṭâm lova in kal theihna tûra kan lal zahngaihna, in laka a lantir theih hnuhnung ber a nih kha," an tih khum salh a.

Chu an ṭawngkam chuan naupang leh râwlthar zâwkte rilru chu a tihnualin, "Pialrâl panna kawnga kan ṭâm lohna tûr tûkṭhuan maw kan ei dâwn tâk? Eng vang a, hetiang tûr tho tho nizân tlai te khan eng mah ti lova ka lo awm chu aw!" tiin an phun sap sap hlawm a. Tûkṭhuan atana an thil rawn chhawpsak pawh chu ei tui thei lovin, an hrawka dangtu awm ang mai hian an lem thei ta hlawm tlat lo mai a. Chutiang bawkin Dâwntlingi hlauthâwng leh zâm lutuk pawh chu a ṭhut hmunah chuan a khûr dar dâr bawk a. Chu chu Aizika chuan a han hmuh chuan, "E khai! Naute u, engti ziaa khatianga beidawnna inhnehtir tum ngawt mai nge maw in nih le? Beidawnna hi chu kawng tâwpah, kal ngaihna a awm tawh lo emaw tih hnuah, kan chakna tuai hriamna atana min hneh tuma rawn inlan ṭhin, mihring hmêlma lian bêr pakhat alawm a nih le. Hmêlma hneh nih duh vek kan ni lo em ni? Chuvangin, in thinlung hmêlma, hneh tum che u-a bei mêktu che u kha in tlâwmtir rêng rêng suh ang che u. Mi beidawng chuan hneh sa leh tlâwm sa a nih avangin hneh lêt tûrin theihna a nei ngai lo a nia.

"Eng aiah nge ni reng reng, suala hma hawta kan hmaa thil lo thleng tûr pawh hre lâwk lova in han lungngaih lâwk viau mai ni? Harsatna leh buaina a lo thlen chuan, a rualin tâl chhuahna kawng pawh a rawn inhawng tel ṭhin. Chumi hmu thiam apiang chu mi nihlawh an ngai e. Mahse, beidawnna khur aṭang chuan mitmeng a fiah zo tawh ṭhin lo va, chu chuan harsatna leh buaina ruala tâl chhuahna kawng lo inhawng pawh chu, chu thinlung neitu chuan a hmu phâk tawh ṭhin lo. Chuvangin, kan chaknate sâwm khâwmin, kan hmaa thil lo thleng tûr chu eng pawh ni sela, hmachhawn tûrin kan puan ven i sâwi chhîng lah teh zâwk ang khai," tiin a fuih mawlh mawlh hlawm a. A fuihna thu dik an tiin, an thinlung chu a hneh tâk hlawm êm avang chuan an rilru chu an tipaukhauh leh ta tlat hlawm a. An tûkṭhuan rawn chhawpsak pawh chu lung dam takin an lem leh thei ta hlawm a.

Tukṭhuan ei kham, feh reh sân hun a lo nih chuan lal mualah chuan mipui an thâwm khup khup mai a. An thâwm chu Aizika leh a ṭhiante chuan a ngaihna hre lo tak leh, ngaihtuahna hran hran pu chung hian an ngaithla ṭhap hlawm a. Chutianga an ri khup khup kârah chuan mipuiho chu, "A Za Ny Maung Khaung Htoo... A Za Ny Maung Khaing Htoo..." tiin an au rual ṭhup ṭhup hlawm a. An au thâwm an hriat chuan naupang deuhte chuan an hre thiam lo hle hlawm a. Kâwltea chuan, "Chu eng hla chham mi nge ni ngai?" tiin an au hla chu hriat châk takin Aizika chu a han zâwt a. Aizika chuan, "An Kâwlvâi lal hnenah an zahna lantirin, 'Lalpa Maung Khaung Htoo...' an ti a nih chu," tiin a chhâng a.

Aizika chuan a hmui a chîp fel hman chauh ang tih chuan, chaw rawn petute bawk kha an lo lang leh a. Anni chuan, "In zingah khan insual mi deuh pathum rawn inthlang chhuak ula, min rawn zui rawh u," an ti bûl hmak a.

Aizika chuan, "Kan zingah insual mi leh chutiang chi kan awm hauh lo mai," tiin a lo chhâng a.

An zinga pakhat chuan, "In awm loha leh rang takin in pialrâl kawng chu in zawh anga a ni mai alawm. In thisen chhuak lai hmu châkin mipui mit a za zek zek tawh asin," a han tiram leh hmak a.

Chutah zet zawng, Aizika chuan engti kawng pawhin pehhêlna a awm lo a ni tih a hriat chuan, "Chuti taka mit zâ an nih chuan, an tân hmuhnawm chu kan chhuah poh a ni ang chu," tiin a chhâng a, anni chu zui tûrin a inpeih ta nghâl at a. Lianchuhmânga leh Thanluaithanga pawh chu an lo inpeih zui ve nghâl zat bawk a. Kal mai tûra rip chhung an chhuahsan âwrh tih chuan, "U Luai, nang zawng ni lo ve; upa ber i ni a, ṭhiante lo uaptu atan i awm a ngai. I aiah kei hi ka va kal zâwk ang e," tiin Kâwltea chuan Thanluaithanga chu a han dang a. Thanluaithanga chuan hnialin ṭan han khawh sateh mah se, Kâwltea chu a khalh zo ta ngang lo va. Tichuan, Aizika, Lianchuhmânga leh Kâwlteate pathum chuan, lal muala hmuhnawm chhuah tûr chuan anmahni rawn hruaitute chu an zui ta ṭhâm ṭhâm a.

Chutia an inzui chhuak ta chu, anmahni rawn hruaitute chuan Aizikate ṭhian thum chu lal in lam panin an hruai ta nghâl a.

Lal in an thlen a, lal in chhûng an luh chuan lal chuan, "Vawiin hian enthlatute leh ka lal ram tâna mi hlauhawm nia ka rinhlelhte ka lo tih dân ṭhin angin, in tân hian, in him leh theihna tûr kawng khat, he ka kulh in chhuahsan leh theihna tûr, leh in pehhêl miah loh tûr ka hawnsak dâwn che u a ni," a han ti hmasa tê tê a.

A ngawih vang vang lai chuan Aizika chuan, "Dâwt hmanga i kulh chhûga rawn tla lût tûrah min la puh cheu mai dâwn elo? Sumdâwng mai kan nih thu-a ka chhân che pawhin mi i rinhlelh i bâng thei miah lo chu a ni a. Zin kawng kan zawh zêlna tûrah min tikhawtlai dêr chu a nih hi mâw. Eng nge kan lakah hian i beisei chu ni rêng rêng?" tiin a chhâng lêt ve zat a.

Lal chuan, "Mual laia dawh sânah sâwn ka pasalṭhate nen râlthuam hmangin in inbei ang a. Chuta in ding chang zâwk a nih a, hnehtu zâwk in nih chuan in thu sawi hi pawmin ka khuaah hian in sumdâwng thei ang. A nih loh a, ka pasalṭhate laka in tlawm a nih chuan, in thi ang a, suahsual rawng rawn bâwl tuma puh che u niin, in ruang chu kulh pâwnah ramsate ei tûra paih chhuah a ni ang," tiin a chhâng a.

Dik tak chuan he Kâwlvâi lal hian Aizika leh a ṭhiante hi suahsual rawng bâwl tûra a rin tak tak vâng ni lovin, a nunrâwn tukkhum pâwng kual vêlin, Aizika leh a ṭhiante chu a pasalṭhate kuta an thisen a baw hawk hawk lai te thlîr châkin, leh an na tuar ṭê vawr vawr thâwm ngaihnawm ti taka lo ngaihthlâk te chu a châk vânga hetianga lo dawngsawng hi a ni a. A hma aṭang tawh rêngin, hetianga mi chinchâng hre lo a khua rawn lûtte hi ennawm chhuah nana hmangin, mi sualah puhin hmingchhiat tin rêng a lo khumtir fo tawh bawk a. A ze râwng tak hi heti a nih avâng hian an khaw ṭhenawm lalte pawhin an lo rûn phah fo va, a khua an ramsak lo chauh tawh ṭhin hi a lo ni nghe nghe a. Chumi avanga a khua pawh hi lal dangte rûnna tûr laka lo inphênna atana kulha hung hi a lo ni.

Aizika chuan chu lal chu a ṭawng duh dân leh a mit han men dân vêl aṭang te, thil a nihna fiah aia hremna pêk a duh zâwk dân aṭang te chuan a zia tûr chu a man thiam nghâl mai a. Chumi avâng chuan zahpah bik lova a zia ang chiaha dâwr chu a duh ve ta thut a. A mitmeng dâi raiha a mit taka en chung hian, "I mikhual lo lawm dânah kan lâwm e. Kan lo vannei a, kan chungnung ta hlauh a nih chuan i thu hi i zûk thiang lo vang. I thu i zûk a nih vaih chuan, khawi lai hmun aṭang pawhin i lu la tûrin ka rawn pan ang che. I bul ka rawn thlenna tûra ka kalna khawp chu ka rawn vai kaw ngei ngei ang," a tih khum ve ta hmak a. Chumi hnu chuan lal mual lam panin, anmahni hruaitute nen chuan an inzui chhuak leh ta a. An hnungah lal leh a upate chuan an rawn zui chhuak ve nghâl bawk a.

Lal mual an chhuah chuan, rip chhûnga an awm lai ai daihin mipui thâwm chu a lo na zâwkin, a rik hian an ri hulh hulh a. A boruak chu mipui huhângah chuan a uap nghet churh mai bawk a. Mual laiah chuan thing lianpui pui hi kâwng chen ai maha sâng, a chung zâwl hlam thum leh ṭângphela zau hian a bialin an tiang kâng a, a chung zâwl chu chêt a nawm deuhna tûrin an thel mâm nian nuan bawk a. Han en rêng rêng pawhin chu an hmun dawh sân chu eng dang atân hman ni lovin, pasalṭhate huai zâwk leh ding chang zâwk nih inchuha an lo inbeihna hmun tih hriat tak hian, a chungah chuan thisen ni-in a hem ro tawh chu a khir iar uar bawk a.

Chu inbeihna dawhsân lam pana an kal lai chuan mipuite chuan, hmusit tak leh tih zâm tumin an lo eu khum dur dur hlawm a. A boruak chu a ropui hulh avâng leh, chutiang taka mipui pung khâwm tam chu an la hmuh loh avângin an zâm ru ve hlê a. Mahse, chu chu thil thleng tûr rêng a ni tih Aizika chuan kal pahin a ṭhiante chu a hrilh a, boruak pui hulh avanga beh lam pan mai tûr an nih lohzia leh, dingchang tûra an beih a ngaih nasat tûrzia thu hrilhin a fuih dûn mawlh mawlh a.

Inbeihna dawh sân chungah an hruai kai a. A chungah an ding lar lár tih chuan an lal Maung Khaung Htoo chuan, mipui thâwm hulh hulhte chu hmun sâng an siam aṭang chuan ngawi tûrin a kutin a han vai a. Mipui an ngawi ṭhiap tih chuan, "Le hei, vawiinah he'ng mite, ka khuaa sumdâwn chhuanlama rawn lût, ka lal ram rawn enthlâk tumtute leh ka pasalṭhate thih thlengin an inbei dâwn a ni. Anni hi an chaka hnehtu an nih chuan, an nun zuahsak an ni ang," tiin thu a han sawi a. Mipuite chuan thâwm an lo chhuah dur dur a.

Mipui thâwm a reh hnu chuan Aizika leh a ṭhiante chu dawhsân aṭang chuan an hruai thla leh a. Mual sir tlâk lamah an awmtir a. Chumi hnu rei lo têah chuan an ṭhiante pawh chu, an kea kawl bûntirin an bulah chuan an rawn hruai ve bawk a. Anmahniho bik tê chu hmun khat laiah chuan a hrang hian an dah khâwm hlawm a.

Nakin deuhah chuan chu khaw pasalṭhate zinga pakhat, pian nalh thlerh thlawrh, zên zak leh inthazo zet mai, sân zâwnga vântlâng chung lama hawi phâk, vun sen char mai hi dawhsânah chuan Kâwlhnâm leh phâw nên a rawn chhuak a. Dawhsâna a che vêl leh a hawiher vêl te rêngah chuan, a dinna hmunah chuan a mikhual lovin a lo ding chang hnem tawh hle a ni tih hriat takin, mipui chuan ṭan tak hian, "Maung Aung kyaw... Maung Aung Kyaw..." tiin an lo au dur dur hlawm a. Chupa chuan tham lo zeta Aizikate lam rawn hawi chung chuan a Kâwlhnâm chu zei takin a rawn vilik khum zawk zawk a. A Kâwlhnâm chu enkawl ṭhat leh chei uluk a ni tih hriat tak hian a vilik zâwng chuan a de zawr zawr mai bawk a. Chumi zawh chuan a Kâwlhnâm chu a bulah chuan a chhun bûr a, cho leh huphurh lo hmêl tak hian a rawn hui nghat nghat mai a. A che ziaah chuan mipuiho chu an phûr zualin, "Maung Aung Kyaw... Maung Aung Kyaw..." ti-a auvin an thâwm chu an chhuah leh hluah hluah a.

Chutah le, chuti taka rawn chotu chu hmachhawn turin Lianchuhmânga chu a awm hmun aṭang chuan a pên chhuak chhat chhat a. Dawhsân pana a kal tûr chu Kâwltea chuan, "Saw chu keima'n ka'n bitum ang e. Ka chanpualah dah rawh," tiin a lehkhalh thuai a. Dawhsân lam pan chuan a phei ve ta thauh thauh a.

Dawhsân a thleng phei a, a lâwn chhohna kailâwn bula fei leh phâw chu lain dawhsân chung zâwlah chuan muang dap hian a lâwn chho va. A thleng chho fel awrh chauh, inrin pawh a inrin hman hma chuan Kâwlvai pasalṭha chuan a rawn bei nghal phut phut ta mai a. Chu veleh Kâwlvâi pasalṭha kâwlhnâm vai chuan a rawn fuh ang tih hlâu tak hian, hnung tawlh hrat hrat chungin a phâw chuan a lo invêng ngat ngat a. Chu Kâwlvâi pasalṭha chuan tharum a ngah êm avang chuan, a phaw ken a rawn sah zâwng chuan Kâwltea chu a pai khawt khawt mai a. A ke pawh a chheh rem hman hma hauha rawn bei nghâl chawt a nih avangin, Kâwltea chuan ke chheh siam rema nâwr lêtna hun nei lovin dawhsânah chuan a hnung tawlh liam rawk rawk a, leiah chârah a hnungzânga lei vaw dawtin a tla khu ta luai mai a. Chutia chêt la ve hman miah lova lei châra a tlâk thal ṭhakah chuan mipuiho chu, "Maung Aung Kyaw... Maung Aung Kyaw..." tiin an lo au rual ṭhup ṭhup a, an haw haw dur dur a. Chutih lai chuan Aizika chuan, "Zâm hlek suh ang che aw tlangvâl. I tlâwm thiang hauh lo tih kha inhria ang che," tiin a lo fuih ve lauh lauh bawk a.

Chutah Kâwlte chu a tho leh thuai a, a lung lian a chhuak ṭan a ni tih hriat deuh mai hian dawhsânah chuan phûr em em mai hian a tlân lâwn chho leh nghâl thuai a. Chu chu a hma ang chiah khân Kâwlvâi pasalṭha chuan rawn bei leh nghal chawtin, a Kâwlhnâm chuan hlah tum lo hian a rawn bei phei leh nghal zat a. Mahse, Kâwltea chuan a thawh hnihna chu chuti maia thlâwntir a tum tawh bik lo. Amah rawn beitu chuan a lu lam hlirah, a kâwng chung lamah bâk rawn hliam a tum lo tih chu a man thiam thuai a. A kâwlhnâmin a fuhna tûr a lo indan pah chuan a feia hawlh zauh zauh pah hian a han nawr lêt hret a, chuta a tawlh hnumgin a ke ding lam a lâk lêt leh hmâ chiah chuan, Kâwltea chuan a phaw hnuai aṭang chuan a kephah chungah chuan rang zet hian tlang zawk zawk khawpin vawi hnih a chhunsak zawt zawt a. Chumi nâ ti chu Kâwlvai pasalṭha chu a ṭe ṭhat a, Kâwltea'n a fei a lâk chhuah rual chuan a ke ding lam chu rang deuh hian a la lêt thuai a, a thisenzâm a chat a ni tih hriat deuh hian fei luhna hmuamhma aṭang chuan thisen hi a rawn chik chhuak puat puat a. Chutah Kâwltea chuan a aia naa nâwr lehin, kâwlhnâm laka aṭanga a phâw-a inphên tlat chung chuan a vei lam kephah chungah chuan na zet hian a chhunsak leh a. Kâwlvai pasalṭha ke vei lam chu thingah chuan a kilh behsak ta tlat a, chumi aṭanga a ke lâk chhuah tuma a ṭan lai tak chuan Kâwltea chuan a tha tâwp hian a phaw chuan a'n nawr nghek mai a, a sualpui lahin tawlh lêt zêl turin a ke chu a phawi zo tawh si lo va, a ke na ti ṭê ṭhawt chung chuan a thal thlawrh a, a kâwlhnâm ken lai pawh chu hum nghet zo lovin a ban phâk lohvah chuan a thlauh per nawlh bawk a. Chu veleh Kâwltea chuan kâwlhnâm chu rang deuhin a chhar thuai a, a sualpuipa phaw-in a phên phâk loh, a feia a kilh behsak lam ke rêkah chuan chhum hmawk khawpin a sahsak ta chawrh a. Kâwlvai pasalṭha na ti chu a ṭe rawng rawng a, eng mah dang ngaihtuah thei tawh lovin a phaw chu a thlauh rawk rawk a, ke chhum aṭanga thisen lo chik tur tur chu tihphui tumin a dawm nghal chûk chûk a. Chutia, a ke dawma na tuara a kun chal lai chu Kâwltea chuan, a lu chu a taksa aṭanga hrang nawlh khawpin a sahsak leh chawrh a. Kâwlvai pasalṭha chu a awm hmunah chuan a let khûr ta ngawt ngawt a, rei lo têah a chalchâng zui ta nghâl a.

Chutia an pasalṭha chhuan em em mai zinga pakhatin a ngam loh a tawmg chuan mipuiho mak tih chu a hlawh em em mai a. An sahâwk hulh hulh chu an ngawi ṭhuap a, an ka hau hlawm a. Chutah, Kâwltea chuan an pasalṭha lu let reng chu chharin a han lek kâng a, mipui ngawi ṭhuap chu melh kuala hawi kual pah hian, "Mi dang in la awm em?" tiin a han au ṭhat a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 15th, 2019, 8:14 pm

PASALṬHA AIZIKA

- Nunmawia Fânai

BUNG 35-NA

Mipui lam aṭanga thâwm eng mah rawn chhuah awm lova mual chu a reh duk lai chuan, "Kan khual pasalṭha chuan inbeih a lo thiam ngei mai! Mi pahnih pawh a rualin bei sela a hneh theih ngei dawn kha lê. Khawiah nge ka pasalṭhate kha? Dawh sânah hian mi pahnih lo chhuak ula, han inbei leh thuai teh u," tiin lal chu an hmun sânga ding larh larh chung chuan a rawn au lâng lâng a. Chu veleh pa lian leh sek phiar fut mai mi pahnih hi mual sir aṭang chuan an rawn chhuak dûn thauh thauh a. Kâwltea chu tham loh hmêl zeta ṭhen khum nâng nâng chung hian, inbeihna dawh sânah chuan Kâwlhnâm leh phâw nên an lâwn kai dûn nghut nghut mai a.

Chutianga inbeihna thianghlim lovin dawhsân a luah tûr chuan Aizika ngêng a chhun ta zar mai! A rûm nghat a, chumi zawh chuan, "Ummhhmmm! Lianchuhpa, nang dawhsân lamah sâwn Kâwltea bulah lo va ding rawh le. Keiin lal leh a bula ṭhuho khi ka lo buaipui thung ang e," a ti rum hmuk a. A aw ri pawh a thâm ral hman lo ang tih tûr khawpa hmanhmawhin, lal leh a khâwnbâwlte ṭhutna hmun sâng lam pan chuan chemtum hûmin a thawk nghâl a. Lianchuhmânga pawh chu a ṭhut hmun aṭang chuan meiling ṭhut zawk anga rangin a tho ve nghâl thuai a, inbeihna dawh sân lam chu panin a tlân phei ve nghâl zat bawk a.

Aizika'n lal leh a khâwnbâwlte ṭhutna hmun a thlen chhoh chuan, lal chuan, "Heti laiah hian engti tûra rawn chho ve ngawt ngam nge i nih? Ni leh thla kâra lêng, lal ropui Maung Khaung Htoo hian, ka kohna lovin tu mah ka bulah hian an rawn inlan hnaivai ngai hlei nêm. Mualah khuan taksa leh lu hrang nawlha i tlûk dâih raih hma hian, mei khupin i ṭhiante bulah khuan chhuk leh thuai mai ta zâwk chê?" tiin a lo vau khar khar a. Chu a vaukhânna chu Aizika'n a chhán hma chuan, "Lal ber, en teh mah, khu lah, dawh sânah mi pathum ding tûr ni âwm tak kha pali an ni ta reng mai! I thupêk zâwm loh chu thihna a ni em ni kha?" tiin khâwnbâwl pakhat chuan dawh sân lam chu kut zungchal pir vâw hian kâwk vâ a. Chu veleh lal chuan Aizika a melh lai ata chu a mit la sawn thuaiin, inbeihna dawh sân lam chu a hawi thla nghâl a. Lianchuhmânga chu, Kâwltea bula a pasalṭhate hmachhawn zâwnga inring tâwk taka a ding char at mai lai chu a zu hmu nghâl chat a. Mit la sawn lova melh khawh pâwk chung hian, "Uai! Ka rorêlna ep zâwnga che ngam, mi huaisen pahnih lai kan lo nei reng a ni maw?" tih khâk deuh fak pah hian Aizika lam chu a hawi leh nghâl thuai a. Thinrim inseh ruh ṭûn chung leh rum sen râwma melh chung hian, "Vâla, i ṭhianpa khu, him dam taka in zinga ṭhu leh turin i au chhuak leh dâwn nge, a ruang hlâwm tûr pawh awm mang lo khawpin ka chan sawm zâwk dâwn?" a ti pâwr vîn ṭhawk a.

Aizika chuan, "Inbeihna thianghlim lo tak i ngaihtuah chhuah hi i ṭhulh leh dâwn a nih loh chuan, khu lai hmun khu a chhuahsan lo vang," tiin a chhâng lêt ve zat a.

Chu a chhânna chuan lal lung chu a ti-âwi lo kher mai! Thinrim luat vânga tha khûr dat dat chung leh, Aizika'n mual lam a din hliah kâr a, a mit taka a melhna mit la sawn chuang lova ti-sai dar dar chung hian, a khâwnbâwlte hnênah chuan, "An vai hian, khû inbeihna dawh sân chungah khuan an lu zu tansak rawh u," tiin thu a pe ram ta hmak mai a. Chu veleh khâwnbâwlte chu lal thupêk anga ti tûrin an ṭhut hmun aṭang chuan an tho suai va; Aizika chu a bâna han kaih mai an tum ta rawk mai a. Chu kher chuan Aizika lung lian a kai chhuak ta tlat mai le! A bân rawn kaih tumtute zinga pakhat chu, a chem zâng lam hian uai hnâwp khawpin a bân ngûn tâng laiah tak mai chuan a lo khawnsak awlh a. Chu khâwnbâwl na ti lutuk chuan, chiau rawng rawng pahin a bân uai hnâwp mai chu lek char vâw vâw a, an hmun sâng chung zâwlah chuan ṭhu sawp suai suai a. Chutah Aizika chu hnung lamah a tawlh lêt hrat a, a chem chuan sât nghâl mai thei tura inring rân chung hian, "Chutiang maia awlsam leh naupang kaih taka kaih rual em ni ka nih? Ka chem hriam lo lam ka hmang hawh lawk a nih kha. Han che leh teh dêk u; a hriam lam hi ka hmang thiam zâwk a ni tih in hre ngei ngei ang," a ti zâwi sap a, mitmeng ngainatawm loh zet hian a melh kual dan dan hlawm a. A thinrim mitmeng an hmuh chuan a ti tak tak dâwn a ni tih hriain, khâwnbâwlte zingah chuan a chem hriam lam tawng hmasatu nih tu ma'n ngam hek lo le, an tawlh hnung hrawt hrawt hlawm a.

Lal khâwnbâwl zingah tu mah che châng ngam awm lova an ṭit dâk lai chuan Aizika chuan, lal hnenah chuan, "Kan thihna tûra i thu chhuah kha i sût leh dâwn nge, a kar nan che i upate lu hi a indawtin ka tan dâwn?" a han ti ram leh hmak a, chêt thawh châk tak hian a ding khawng at bawk a.

Aizika ṭawngkam chhuak chuan a kaw tâwp tak tak a thleng hnai a ni tih lal chuan a hai lo kher mai! Mahse, chutih rual erawh chuan, tu nge a nih pawh a hriat loh, sumdâwng satliah nia insawi ve maiin chutianga vaukhânna thu a chhuah khum chuan, a lo intih ropui vena te leh a chapona ngêng a chu a chhunsak zawr thung a. A lalna huang chhunga thih hmabâka awm mai mai laka a thu chu zûk leh tum lo tak hian, a ṭhut hmun aṭanga lo ding chhuakin tham lo leh chung tlâk zeta kiai khum vêl chung hian, "Tu nge maw nia i inhriat ve khanglân chû? Ka lalna huang chhungah min han vau ngam vêla maw? Ngawi tak rawh, i mi vau hi lal Maung Khaung Htoo, a duh anga awm lo leh a thu chhuak dodâltute vun lihsak ṭhintu a ni tih i la hre thuai ang. I hmuh lai ngai ngei khan a nia i vun ka lih dâwn ni," tiin a vau lêt ve thung a. Chumi zawh chuan mual lam a hawi thla a, "Inbeihna dawh sâna misual pahnih leh an ṭhiante zawng zawng hi rawn chîl hlum vek rawh u le," tiin a au ta piap piap mai a. Chu veleh mual sira mipui ṭhu hmuk zing aṭang chuan a pa chhuak tak meuha rawn thawkin, dawh sân lam panin an tlân ta hûl hûl mai a.

Chutiang a nih tâkah chuan inbeihna dawh sân lam pawh a boruak a ter nghal at a, an insât fuh tur an lo indanna atana an phaw ken sah rîk chu a inrawn nghâl sawk sawk bawk a. Mipuiin dawhsan an thlen phei hman hma chuan, Kâwlvai pasaṭha pakhat zâwk chu Lianchuhmânga chuan awlsam leh hnehsawh tak hian a tuk thlu thuai a. Chutah rang takin Kâwltea leh a beihpuipa innawr tawn zak zak lamah chuan tlân phei leh thuaiin, hnung lam aṭangin Kâwltea beihpuipa chu a hreibâtah tak mai a va sahsak leh ta chawrh a, a tlu zawi nghâl hnawk bawk a. Chutih chhûng chuan mipui chuan dawhsân kiang vêl chu an rawn chîm khup khup tawh a. Mahse, a kaw tâwpa ṭan khawh, thihna nena inkai hnai tak pahnihah chuan sâr a zâm tlata an hmuh avangin, an pasalṭhaho pawh chuan lâwn chilh mai an ngam bik lo va, dawh sân chu an bial tuau tuau ringawt rih hlawm a.

Chutah zet zawng Aizika chuan, a ṭhiante an chil hlum hman hmaa chêt thawh a ṭûlzia hriain, "Lal tenawm leh nunrâwng, khawii nge, khawii nge ni vei, pialrâlah chuan lâwi ho dial dial ang hmiang," tih pahin a hnaih bera ding khâwnbâwl upa chu a chem hriam zet mai chuan nghâwng thle nghawlh khawpin a'n sâwk mai a. A tlûk fel hman hma chuan pakhat dang leh chu rîl uai chhuak pûr khawpin, a dûl nêmah chuan a vâng tan zâwgin a vai tlangsak leh nghâl hawk bawk a. Chu pa chuan a rîl chhuak pûr mai chu a theih anga bilh lût nuap nuap chung hian a tlu thlawrh a, a na tuar chu a rûm ṭuah ṭuah bawk a.

Chutianga a chêt tâk hmiah hmiah-ah chuan khâwnbâwl upaho chu Aizika ban phâka awm hlauvin, an hmun sâng aṭang chuan an hnuai mual zâwlah chuan chhuk tumin an inhâwr ta tuau tuau mai a. Mahse, a chhuk kâ ber tûr lamah Aizika chuan pawisak nei lovin chem sen a hûm rûn chungin a rawn pan hnai chhat chhat zêl mai bawk si. An lo nghah ngawt mai chuan, kuttum leh chem hriam hnuhma innat hleihzia lah an hai lo; a chem chu an tawng ngei ngei dawn tih lah an chiang hle hlawm nen. An lalin, "Bei lêt ta che u," tia a vin tuar tuarna pawh chu zah zo tawh lovin, Aizika'n a tawh fuh hman hlauvin an awmna hmun sâng aṭang chuan, mual zâwlah chuan thûm dawp dawp khawpin an zuang thla ṭak ṭak hlawm a. Hlam nga dâwn laia sâng aṭanga zuang thla an ni hlawm bawk a, a ṭhen tla sual tâwk lah bo lo, ke ruh sawh tliak ta hmawk leh khûpkâwi sawh keh sawk maite chu awmin, ṭhenkhat chu na tuara indawm chungin an ṭe rawng rawng hlawm a.

A khâwnbâwlho zawng zawng ten a thupêk aia Aizika chem hlau zâwka muala an zuan thlâksan vek hnu chuan, lal chu amah chauhin an hmun sângah chuan a chuang ta lawl a. A lam pana Aizika rawn phei chhat chhat hnênah, "Tu nge i nih? Eng vanga min hlau miah lo nge i nih?" tiin aw khûr deuh dar dar hian, hnaih zêl lo tûra a kuta zaizir pah chuan a lo bia a. A hmêlah chuan hlauhna leh zâmna nasa tak a lan reng avangin Aizika chuan, "Ka ṭhiante khu an pawh sawm hmain i mite khu mual sira lêt thuai tûrin thu pe rawh. A nih loh chuan, he laia i upate ruang a let reng ang hian i ruang hi a let zui ve nghâl ang. Tichuan, pialrâla ka rawng i bawl hunah, mi hnuaihnung berah ka siam bawk ang che," tiin, tu nge a nih pawh hrilh lovin lal chu vau zui chungin a hnaih phei zêl a. Mahse, lal chu zâm ru hlê tawh mah se, tlâwm mai chu la tum bik lovin a la intipaukhauh ve tlat a. Chumi avang chuan, "I duh ang chuan han ti ta che. Thih hlau tûr riakah em ni min ngaih ni?" tiin Aizika vauna chu chhân lêt pahin a rawn bei phei thut a. Chu chu Aizika chuan a lo keuh thal ṭhawk a, a ṭhut beh nghâl zat a, a chêta a tâl nat hman hma chu a beng vei lam chu a til pêl deuha hlai hian a hlehhsak hlawk a, thisen a rawn hnâm chhuak pâr pâr a. Thisen chu a bianga tah sen nguai pah hian Aizika chuan, "Han che leh teh dêk, i lu vun hi ka hik ang a, i hmai tuam nan ka hmang ang; i beng aṭanga ṭan hian," tiin a vau zui leh nghâl a. Chu kher chu thihna aiin a hlau zâwk nge, Aizika huhâng chu thihna aiin a ṭih ta zâwk tih pawh hriat loh hian, che châng ngam tawh eih lovin lal chu a khûr ta zawih zawih mai a. Chutah thâm ṭuak hian, "Ka tlâwm e," a ti zawi sup a.

Lal chu a tlâwm tâk hnu chuan Aizika chuan, "Tlâwm tawh ka bei zui ngai lo. Lal thisen kai ngat phei hi chu ka vawi khat ka tawhna chauh a ni nghe nghe asin. Chu pawh i suahsualnain a nan thlûk ngang che vâng hian," tiin khawih zui zêl tum lovin, lal a nihna zahsakna a neih chu lantirin a thawh chhuahsan leh thuai a. Mual lam chu a hawi thla vat a, Kâwltea leh Lianchuhmânga, inbeihna dawh sân chunga anmahni bei tura lâwn chhoh tum laka invêng tawn chunga an inhnungchhawn dûn rân mai lai a zuk hmuh chuan, "A la tlai lo ve," a ti sap a. Leh lamah, Thanluaithanga leh an naute ho him leh him loh a thlêk leh thuak a, anni pawh chu tu mahin khawih lovin an lo la him hlauh bawk a. Lal erawh chu thawh mai nachâng pawh hre lo hian a beng hliam chu hupin a la thal zar reng thung a.

Chutia lalin thawh chhuah nachâng pawh hre lova lei a dek reng mai lai chu, Aizika chuan a chhîp samah ṭhâmin a kai tho zawt a. Chumi pah chuan, "I khuate khu an thil tih tum ṭhulh tûrin hrilh thuai rawh," a han ti vîn leh ṭhat a. Mahse, lal chu a hlauhna avanga a la hamhaihna chuan ṭawng chhuah mai a la tiharsa deuh a ni ang, ṭawng mai lo chuan a ngawi ta reng a. Chu chu Aizika rilru hmanhmawh tawh chuan, "Ka sawi ang chuan i ti dawn nge dâwn lo?" tih pahin a bengah chuan ri hmawk khawpin a herhsak vak a, a na ti chu a ṭê chhuak ṭhat bawk a. Chutah, "In thil tih tum kha ṭhulh leh ula, tu mah tina suh ang che u," tiin a han au chhuak ṭhat a. An lal au thâwm an hriat chuan mipuite chuan chêt thawh zui tum lovin, mual sira an ṭhut hmun lam chu an pan leh ta sung sung a. Chumi hnu chuan Aizika chuan hmun sâng aṭang chuan lal chu a chhuk thlâkpui ta dat dat a.

Thanluaithangate bul an thlen chuan Aizika chuan lal hnênah chuan, "I mite kovin kan ṭhiante kawl bun hi phelhtir rang rawh," a han ti a. Aizika sawi ang chuan lal chuan a mite, rip enkawltute chu a ko va, an kawl buntir chu an rawn phelhsak nghâl rawk rawk a. Chumi zawh Aizika chuan lal chu a hrawka chem chuktuah rân chung hian, "Le, kan sumdâwn tum lek chauh, a ni lo lama min khawtlaitir avang hian, sumdâwng lovin i lal in i'n rawk zâwk dâwn ang hmiang," tiin lal in lam panin a nawr kal leh nghâl rawk rawk a. Chutih lai chuan mipuite chuan an lal huaisen leh an lo ngaih ropui êm êm mai, chuti taka mikhual tu tih pawh hriat loh laka a tlâwm dêr mai chu, chêt thawh pawh tum lo hian mak ti takin an lo thlir rawn ṭhap hlawm a.

Lal in an lût a, lalnuin a pasal nghawnga chemtum inchuktuah rân mai kâr a, a beng aṭanga a nghâwng leh taksa vêl thisen lo luang thla nguai nguai mai leh, Aizika leh a ṭhiante hmêl a han hmuh khup khupah chuan, "Awi karei maw! Eng thil nge thleng ta ngai?" tiin hlau hmêl tak hian a lo chhâwn a.

Aizika chuan, "Lalpa hian a lalna leh ropuina hi a hmang sual deuh a ni mahna le," ti lekin a chhâng a.

Lalnu chuan, "A nih leh, a lalna a hman sual avangin a lal in chhûngah thi tûrin in rawn hruai lût tihna em ni?" tiin a han zâwt leh a.

Aizika bawk chuan, "Lal meuh hnuk êm zawng keini'na chhah thiang em maw a nih le? A nun chu keini khawih tûr ni lovin, khuanu kuta awm zâwk a ni. Amaherawhchu, kan laka thihna hial thlen tuma min phiar vang leh, kan sumdâwnna tûr zawng zawng min tihkhawlhsak avangin, kawng laka kan ei tûr tla khawp erawh min paipâwn thung dâwn a ni," tiin a chhâng leh a. A chhânnaah chuan lalnu chu a thaw a veng huai a, a pasal nun an zahsaknaah chuan lâwmthu a hrilh a. Chumi zawh chuan an bawihte kovin, kawng laka an ei tûr vaimim den sawm rêp leh sa rêp ṭhahnem tâwk tak a fûnsaktir ta mawlh mawlh hlawm a.

An duh khawp ang ei tûr an neih hnu chuan Aizika chuan, "Him taka kulh hi kan chhuahsan theih nan, kulh kawngka bul thleng min thlah a ngai dâwn a ni," tiin lalnu chu a han phût leh a. Lalnu chuan Aizika phûtna chu pawmin, a bâwihte hruaiin kulh kawngka thleng chu him takin a va thlah a. Tichuan, an tum ram lam pan tûr chuan an liam leh ta nghâl vang vang a.

Ni a tla dâwn ruai tawh tih chuan lui tê pakhat hi an thleng a. Chu lai kam vêl chu phai zâwl tih takah cham nuam êm êm mai a. Lui kam kiang maiah chuan bûk lianpui mai, zin vei vâk tena riahna atana an lo hman ṭhan tawh tak tih hriat deuh hi a lo awm bawk a. Chu laiah chuan riah an rêl a; zingah tûkṭhuan hma taka eiin an chhuak leh nghâl vang vang a.

Zan hnih lai zâna mut chawlh eih tih loh chawlhna hun insiam lova an kal leh ngat ngat hnu, feh reh sân hunah hian khaw pakhat hi an thleng dâwn hnaih leh ta a. Chu khua chu râl aṭanga thlir vang vang pah hian, "Buaina eng takin min lo hmuak leh ang maw aw?" Thanluaithanga chuan a han ti sap a. A zâm ru deuh hlê tawh a ni tih a hmêlah chuan a lang reng mai bawk a. Pâwi tlangvâl dang, tuai tîr deuhte pawh chuan Thanluaithanga ang chuan khua chu pal tlang leh an lo huphurh viau tawh a ni ngei ang, hêl dân kawng zawn mai chu an rilrûk thu chu an sawi ve tliar tliar hlawm a.

Chutianga zâmna leh huphurhna thu a ṭhiante kâ aṭanga a han hriat chuan Lianchuhmânga thin chu a sa deuh thut ni tur a ni, "A engatia, in sawngsawhlawtpui loh tûr suangtuaha râk tluar tluar nge maw in nih chu aw? Hei leh chen hi harsatna kan tawngin kan pal tlang zâ tawh a, a hnehtu leh ngamtu zâwkah kan la ṭang zêl a ni lo em ni? Eng harsatna pawh tâwk leh dâwn mah ila, chumi lak aṭang chuan kan tal chhuak leh thei ngei ngei ang. Kan tum ram kan thlen theihna min dâl tûr eng mah hi he vân hnuaiah hian a awm tûr a ni lo," tiin a han khap hlawm a.

An boruak chu a rit deuh tlata a hriat avang leh, tihzângkhai ṭhaa hriain Aizika chuan, "Ni e, kan chin hi tu khâwkhâ hriat a ni loh lai kârah hian, kan mit kan khap fek fek chhung chu kan la dam tihna a ni ngai e. Chumi avang chuan, kan tum ram kan thlen hma chuan kan mit kan khap fek fek reng a ngai dâwn a ni," tiin a lo fiamthu zauh a, a nui deuh suk bawk a.

Kâwltea pawh chuan, "U Zika leh U Liana ten min ho theih chhûng hi chuan, heti zât lek pawh hian khawvel kan ngam thei hial ang chu. Thangzawra te anga Lunglên an lo pe na ru ve viau te a nih loh chuan," tiin a lo uang zui ve nghâl zat bawk a. An nui ho dar dar a.

Chawhnu her a lo nih chuan, râl aṭanga an hmuh khaw kawtchhuah chu an chuang chhuak ta hlawl a. Chuta an ṭhut chawlh ar ar hlawm lai chuan ram lam aṭang hian putar pakhat, phulraw hnâng duan sa pu hi 'hei ha' dap dap chung hian kawtchhuahah chuan a rawn chuang chhuak ve hlawl a. Lungdawh kianga mau ûm intung chu lain tui chu a han khiat khawlh khawlh phawt a. Chumi zawha Aizikate ṭhian zaho chu a melh kual leh dan dan hnu chuan, "Vâlate u, tu khua aṭanga rawn thawk nge maw in nih chiah hlawm le? In hmêl lah hriat a lawi zu han nei hauh lo che u?" tiin a han bia a.

Aizika chuan, "Thandâwla khua, khaw thlang lam mi kan ni e. Zin kawng lakah kan han châwl khawmuang lawk a nih hi. Tu khaw kawtchhuah chiah nge maw kan awmna hi rêng le?" tiin a chhâng lêt thuai a.

Putar chuan, "Phunfaia khua Lêngdawh kawtchhuah a ni in awmna hi. Khawi lam pan tum zêl maw in la nih chiah chu?" a han ti leh a.

Aizika chuan, "Phunkipa khaw lamah kan han zin khawthawng satliah lek dâwn chauh a ni e. Awllên lai ngang a ni bawk a, ram chhuah pahin kâwlvalênchham kan han hrût vêl dâwn a ni ber e," tiin a chhâng leh a.

Chutah putar chuan, "A ni maw? In kalna tûr khaw lal Phunkipa leh kan lal Phunfaia hi unau an ni tak asin. Hmânni deuh mai khân Phunkipa chuan a fanu a chân nghe nghe a, a lusûn pawh a la reh kher âwm lo ve," a han ti leh chuar chuar a. Putar thu sawi aṭanga rawlrâla an beih tûr khaw lal unaupa kawtchhuahah an lo châwl reng a ni an hriat chuan, Aizika leh a ṭhiante chu an phâwk hrâ hlawm a. Mahse, putar chu an ze danglam thutah chuan a ngaih a ṭha lo vang tih hlauvin an inthup leh thuai hlawm a.

Aw a then kharh kharh hnu chuan Aizika chuan, putar hnênah chuan, "A lo ni maw? Kan han belh tûr lal unaupa khaw kawtchhuah kan lo chuan reng tih han hriat chu, thlâ te lam lam zu muang tak huai huai thei a. Hah te lai lai a dam sawng sawng mai alawm," a han ti a.

Putar chuan, "A ni teh tak e maw! Ti khan muang leh dam tak khan han châwl siai siai phawt teh un. Kei zawng, arbâwm tah ka ṭûlin min tur et et mai a, khua ka luhsan phawt teh zâwk ang che u," tiin a liamsan leh ta a.

Putar chu a liam fel tih chuan Thanluaithanga chuan, "Zika, kan awmna hmun hi hmun him a ni leh dâwn ta hauh lo mai! Engti kawng zâwng pawhin a hêlna kawng kan zawn mai a ngai dâwn a ni," a han ti a.

Lianchuhmânga pawh chuan, "Ni e, kan hêl mai chu a ngaih hmêl ta a nih hi. Engtin tin emaw min lo ringhlel leh hlauh ang tih a hlauhawm leh ta riau mai ka ti," a lo ti ve bawk a.

Aizika chuan an thu sawi chu ngun taka a ngaihtuah hnu chuan, "E khai! Tûn maiah khan putarin khua min luh khalh tawh a. Kawtchhuaha Phunkipa khuaa zin tûr mi eng emaw zat a hmuh thu hi a zêp dâwn hauh lo. Chuvangin, keini'n khua lût ûk lova kan hêl leh mai a nih chuan, min ringhlelin Phunkipa khaw lamah thu an lo han inthawn ang a, kan tum ang thleng lovin kan tlawlh phah hlauh thei tlat. Chumi a nih piah lamah, an khaw hmêlmaa min ngaiin, tuma hmain buaina lian zâwkah kan inhnûk lût hlauh thei bawk a ni. A enga pawh chu ni sela, khua chu kan luh phawt hrim hrim hi a ngai hmasa ber dawn a nih hi," tiin thil thleng thei ni âwma a ngaih chu a han sawi a. A thil sawi hmangah chuan khaw chhûnga luh a, lem chan rih mai chu fuh berin an hre tlâng ta a. Tichuan, khaw chhûng lam pan chuan an inzui lût leh ta thliai thliai a.

Khaw chhûng an lût a. Hmun dang pan tûr awm ta lo chu lal in lam panin an inzui ding nghal ngar ngar hlawm a.

Lal in an thleng a. A chhûngah an han luh chuan, lal leh upate chuan zu an lo khawn a, an lo ri bual bual hlawm a. Chutah lal chuan anmahni pawh en lêm mang lo hian, "Khawi lam khual nge maw in nih chiah chu le? Engti tûra ka khuaa rawn lâwi lût nge maw in nih rêng han sawi ta che u khai," a han ti a.

Aizika'n a chhân dâwn lai tak chuan, sumhmun lamah hian nuchang aw râwl hian, lungchhia tih hriat deuh mai hian, "Awi karei maw! Ka Dâwntlingi thlâ em ni hei?" a ti ta râwih râwih mai a. Chu âw ri a hriat veleh chuan lal chu mak ti taka hawi phâwk hrâ chung hian, "Engtin maw? Dâwntlingi thlâ i ti em ni? Eng thil nge khati laiah khân thleng ta ngai?" tiin lal chu a au chhuak nghâl zat a.

A hnu deuh-ah chuan lalnu chuan Dâwntlingi chu in chhûngah chuan rawn kai lûtin, "Hei zawng, ka Dâwntlingi ngei kha a ni. A mittui luannaa khuavâng chhinchhiah aṭang rêng hian ka hai thei lo!" a ti leh chûl a. Chutih lai chuan Dâwntlingi chu lungchhe tak hian a ngik faih faih a, a biangah chuan mittui a luang ngiai ngiai bawk a. Eng mah sawi thei lova a lungchhiatnain a hnawh tlat avang chuan, a kut chu ruh taka hûmin a ding ngawi ngawt ngawt ringawt a.

Dâwntlingi hmêl a han hmuh chuan lal chuan, "Chêmte, nangmah ngei kha i ni a maw?" a han ti dap a. Dâwntlingi chuan chhâng tûra âw chhuak tûr a neih loh avangin a lu a bu nghat ringawt a.

Chutah lal vêk chuan, "I ruang hlawm phâka awm ta lo chu tiin i pa nên i aiah i thembu kha kan lo vui mai asin. Mahse, hei, thil mak zawng zawng zinga mak ber mai, nung dama i lo la awm tlat hi zawng awih a harin, lawm chin tâwk leh mak tih chin tâwk rêng a awm dâwn lo! Engtianga kha'ng ramhuaiho lak aṭanga dama khawchhuak thei mai nge maw i nih chiah le?" a han ti leh dap dap a.

Chutah Dâwntlingi chuan, Lal Huluaia mi ten an man aṭanga Aizika leh a ṭhian ten an rawn chhan chhuah dân zawng zawng leh, kawng laka buaina an tawh lai kârah pawha an zinga mi ang mai a, an nunna inthlun zawm tlat zinga pakhata chhiar tel a, an hum tlat dânte chu a kip a kawiin a hrilh fai kêlh a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)