PASALṬHA AIZIKA BY Nunmawia Fanai 1- 35

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALṬHA AIZIKA BY Nunmawia Fanai 1- 18

Unread post by Ngaia » January 29th, 2019, 5:10 pm

PASALṬHA AIZIKA

- Nunmawia Fânai

BUNG 19-NA

Khua a thim chhawlh tawh, zâna chaw zawng chi ramsate pawhin an tawm bûk an chhuahsan ṭan tawh ang tih-ah pawh chuan Aizika nikhaw hre lo chuan, harh tih rêng rêng a neih theih loh avangin Kâwltea chu a mangang ru hlê tawh a. Sâwi harh a han tum leh ngial ṭhin, awmzia a nei thei bawk si lo. A tihngaihna hre lo chu a hui leh pawp ṭhin a.

Nakin deuh hnu chuan, khua a thim tak tak tawh avangin arsite pawhin an êng an chhuah neuh neuh tawh a. Chumi vâr hnuaiah chuan chiapchâte pawhin zai an sa chiah chiah tawh bawk a. Ngaw chhûng boruak vâwt var mai leh khawharthlâk ruai mai kârah chuan, Kâwltea chuan a thing ro fawm sa chu intih-lumna atân tiin a hân chhêm kai a. Mahse, chutia mei a han nun hnu rei vak lovah chuan eng sa nge a nih pawh hriat loh, thâwm lian tak mai chhuah a, a lam pana rawn tlân buan buan ri chu a hre leh ta phut mai a. Chu veleh, "E khai aw! Kan sa huai hian kawppui a lo nei reng a nih dâwn hi a!" tih sap pah chuan Aizika chu a rana rangin, thâwm lo rikna lam aṭanga hmuh theih loh tûr lamah, a nghentir tho thing phên lehlamah chuan a hnûk liam thuai a. Aizika a buaipui fel awrh, silai pawh a chuh hman hma chuan a rin loh lutuk maiin samak hrawl zet mai hian a mei chhêmna bul chu a thleng ta hlawl mai a. Kâwltea chuan chu chu a han hmuh veleh chuan, "Huaisenna leh ngamna thinlungin a phâk a nih pawhin, a tlâwm zâwka ṭang thei din hmuna kan ding rih a nih chuan, ṭan hmun ṭha zâwk siam leh thei tûra a tawlh zâwka ṭan hun a awm ngai a nia," tia Aizika'n a hrilh ṭhin chu a hre chhuak zawk a. Tichuan, chu samak lian hraw hruih mai, a pumruaa a vângah chuan sai a tiat thâw ang tih tûr khawpa lian laka chêt lâk tum lo chuan, a sa himna tur lam panin a bula thingkungah chuan rang zet mai hian a lâwn kai ta thuai a. Chumi chhûng chuan chu samak pawh chuan Kâwltea lam pawh chu ngaihsak miah lo hian, a thinrim au râwl, a pumraw len nena inmawi lo khawpa ri sin rût mai chhuah ruai ruai chung hian Kâwltea mei chheh chu a lo pal per vel chhuai chhuai a. Mei chu a mih hma lo chuan bânsan a tum lo a ni tih hriat deuh mai hian a per ri dup dup mai bawk a. Chu chu Kâwltea chuan thingkung aṭang chuan mak ti tak leh hmuhnawm ti deuh si hian ngawi rengin a thlir ngawt mai a ni.

Tichuan, rei ve khat tak mei êng timit tûra a thâwm tlut tlut hnu leh, a si pawh a de tawh lo ang tih âwmah chuan eng mah dang ngaihtuah nei lo ang mai hian, chu samak chuan Kâwltea mei chhehna hmun chu kalsanin, a lo kalna lam chu a pansan leh ta nul nul a. A liam fel, a thâwm pawh a zuih ral ta tih chuan Kâwltea pawh chu a awmna aṭang chuan a chhuk ve nghâl thuai a. Mei chhêm ên leh ngamna chi ni-a a hriat tawh loh avangin Aizika bulah chuan a silai hûm rân chung hian a ṭhu ngâwi ta rân a.

Zân a rei zêl a. Thla ral lam pawhin a tiave aia tê lam tawh tak hian chhak kâwl a rawn mâwi leh tawh a. Chu chuan chu lai ngaw chhûngah chuan thing hnah kârah zung a rawn chhuah thlûr ve sung tawh avângin, ngaw chhûng thim chhah mup tûr chu a ti ziaawm hle a. Chumi thlârah chuan an bul lawka tumpâng tlu tlaw reng mai pawh chu sawntlung pâwng lian zual chen lai hian a mu thim hmuk mai bawk a. Chu chu en reng pah chuan, "Pasalṭha pahnih chêt zai reng reng rêl thei lo bula awm chu, thla a ngam dân a danglam dâwrh mai alawm le!" a ti sap a.

Thla pawh a her sâng zêl a, a êng thlârah leilung pawh a hmuh ruak ruak theih tih chuan, Kâwltea chuan an thlang deuh maia kawrte tui chu châwi turin a tho ṭham ṭham a. Aizika nikhua pawh hre lova la awm zawi reng mai hnênah chuan, "U Zik, tui chawiin ka kalsan rih dâwn che a nia, i thlâ lo ti phâng hauh suh aw," a ti sap a. Chumi hnu chuan kawrte lam chu fumkhur leh inchhuih palh hlau takin a pansan ta a.

A tui chawi a lêt leh hnu chuan a ril a ṭâm tawh ngang a ni ang, Kâwltea chuan eng emaw thulh-a ṭâm dawm atana an bâwk, sai sa rêp, kuttum ai maha lian tûr, pakhat zâwk chu a khel rawp rawp a, tui nen chuan a hmeh a. Chu chu a ei zawh chuan, thla êngin a zung a rawn kah luh sung mai kârah chuan an tumpâng kah chu chian tumin a ṭhutna aṭang chuan a tho va. Tumpâng tlu thim hmuk mai chungah te chuan a han chuang a, chumi aṭanga a ban phâk chin thing ṭangte chu a elh tliak vêl sung a. Chutianga tumpâng chunga a ding lai mêk chuan, han inṭham lâwk pawh awm lovin thli fim aia na deuh hian thli hi a rawn thaw ver ver mai a. Chu thli chuan eng emaw tak rau a neih tlat avangin Kâwltea tirilah chuan a ṭhâm er er mai a. Chuvang chuan a chhan pawh a hriat loh thil chuan a hmulthite chu tiding sung sung a, a thâ chu chhungrilah hian a khûr zaih zaih a, hlauhnain a man ta tlat mai bawk a. Chu veleh tumpâng chung aṭang chuan chhukin Aizika awmna lamah chuan a kal leh vat a. Aizika hnenah chuan, "U Zik, hei boruak danglam deuh maiin min rawn ṭhâwng leh tawh a nih hi; lo harh vat teh khai. I tel lo chuan hmachhawn dân ka thiam dêr lo mai! Nang chuan eng harsatna pawh hmachhawn dân i thiam zêl ṭhin kha; ka mamawh tak zet che a ni," tia auvin a han sâwi nawk nawk bawk tak a. Mahse, Aizika chu harh lam hnaih reng reng lovin, tui taka muhil ang mai hian a thaw sûk sûk reng a.

Nakin deuh-ah chuan thli thâw chu a hân leh ta duak a. Thli thâw a tâwp rual rual chuan tumpâng bulah chuan anmahni hmuh theih si loh hian, lusûn ṭap thâwm nasa em em mai, hmeichhe pahnih pathum lai ni ngei tûr, ngaw chhûng khâwk râwih râwih thei khawpa ring chu a rawn ri chhuak hawm hawm ta mai a. Chu veleh chuan Kâwltea chu a hma aia nasa zâwk hian hlauhna chuan rawn man lehin, a thunun theih loh khawpin a tha chu a khûr ta dawt dawt mai a. Mahse, chutih lai tak chuan, "Hlauhna inhnehtir ṭhintu ni lovin, hlauhna nasa ber kârah pawha amah inthunun a, hlauhna sual lêta hneh theitu hi a ni hnehtu dik leh hlauhnain a ngam hlen theih ngai loh mi chu," tia Aizika'n a fuih ṭhinna chu a hre chhuak zawk a. Chu chuan chakna thar siamin, ṭap thâwm bengchheng zet mai kârah chuan a hlauhna chu hneh turin a sual lêt ta thuai a. Chutianga a hlauhna hneh tura a sual ngat ngat tâkah chuan a ti khûr te chu lo reh chhovin, a hlauhna chu thinrimna thinlungin a rawn thlâk ta vat a. Chu veleh, a awm hmun aṭang chuan a tho va, ring tak mai hian, "A tâwk tawh! He lai hi lû sûnna hmun a ni lo," a han ti khâwk ta rum rum mai a. Chu veleh chuan tumpâng bul aṭanga ṭap thâwm lo chhuak chu thehmeh ang mai hian a reh nghal hmak a. Thâwm a reh rual chuan Kâwltea bawk chuan, "Thlâwk bo rang rawh u. In se chal hian a ngam loh a tawn hma kha chuan hringmite famkhuaa a hun tak lo lawitir tawhtu a ni a. Tunah a ngam loh Pasalṭha tawngin famkhua a lawi ve ta a nih hi," a han ti zawm leh zat a. Chu thu a sawi zawh chuan tumpâng bul chu hmuithlâ rawn inlâr ang mai hian a rawn êng paw riai a, chu chuan hmeichhe ruangâm rawn puin nula nalh leh hmêl ṭha em em mai pathum hi an rawn lang rual ṭhawih a. An hmêl ngui riai maia Kâwltea chu hmachhawn chungin an biangah chuan mittui a luang ngiai hlawm a. Chutianga nula hmêl ṭha leh duhawmin lusûn hmêl pu ngui nghiai chunga an hmachhawn rawnah chuan, Kâwltea chu an zûnah chuan a uaiin a ngaizâwng rilru nghâl em em hlawm mai a. An zûn, phurh zawh har tak avang chuan a kha chihin eng mah sawi tur pawh hre lo hian a ding ngawi ta reng mai a. Chutih lai chuan an zinga pakhat chuan, ngaihnobei leh nêm thlap hian, "Kan sepa chuan in kut tuarin fam khua min lawisan ta reng mai chu a nih hi! A ruang tal hi min hlawmtir a ni ang chu?" a han ti dap a. Kâwltea chuan chu chu chhân ngaihna pawh hre lovin an hmêl ṭhatna leh mawina ringawt ngaihtuahin a en dawk dawk ringawt hlawm a. Chutah nula bawk chuan, "Tunah hian hawn nghâl mai kan duh a, kan kalpui nghal mai a ngai dâwn a ni," a han tih leh chuan Kâwltea chu a harh zawk a, "E khai! Chuti maia inchhuh chi a ni em ni? Kan sa ruang hian khua a thleng ngei ngei tur a ni," tiin a chhâng bûl hmak a. A chhungril tak erawh chuan hâwn mah sela pawi chu a ti miah lovin, anni zûnah chuan a uai reng tawh a. Amaherawhchu, he tumpâng pêl tûra kawnga an kal lai a, "Lasite hian pasalṭha zâwl tûr hi an zawn ve reng ṭhin avangin nang pawh hian chutiang thil chu i la tawng maithei. Mahse, chutiang hun i tawng a nih chuan, an ṭhatna leh mawina inhnehtir ngai suh ang che. Lasi zâwl hian nun zalên an nei ngai hauh lo a nia. Lasi zâwl reng reng hian thu an tiamkam ṭhin a, chu an thu tiamkam chu anmahni tihlumtu thangah a ṭang leh ziah ṭhin bawk," tia Aizika'n a hrilh kha a hriat chhuah avangin, dam chhung nun zalên lova luh chu a hlau va. Chuvang chuan a thinlung chuan hlat a tum lui ta tlat a.

Nula bawk chuan, "Chutiang ngawt chu kan thei hlei nêm. He kan sepa hi kan hâwn a nih chuan, thang i chhuahna tûr sa lu kim kan kan pêk che bâkah, buh leh bâla malsawmna tin rêngin kan vûr bawk ang che," tiin a han thlêm leh a.

Kâwltea chuan, "Chu zawng ka pawm lo mai ang e. A hnung zuituin a hnung zuia than ṭhatna tûr tibovin, ama hma sial takin thangchhuah a thlang anga maw? Chu zawng, he hring nun kawngin a neih zinga mi tenawm ber zia a nih chu. U Zika than hâwl tur thai bosakin, than ka hâwlna tûr kawngah vervêk takin ka kawng ka sial lo vang. Khuanu'n zah a ngai a nih chuan, buh leh bâl malsawmna pawh min dawntir em em bawk ang, nangni aṭanga chhuak ni lo hian," tiin a chhâng ve leh a.

Chu a chhânna aṭang chuan lasiho chuan Kâwltea rilru hneh theih chu an inring ta lo va. Chuvang chuan an zinga hotu ber ni âwm tak chuan, "A nih leh le. Chutianga malsawmna leh thangchhuahna awlsam lam thlang lo va, kawng harsa lam i thlang duh a nih ngai chuan thlang ta che," a ti dam dap a. Chumi a sawi zawh chuan an ral ta riai riai a, an bo ta diak a. Chutia an han bo tâkah chuan Kâwltea chuan, ngaw chhung chu a reh duak hian a hria a. A nula hmuhte hmêl chu mitthlain, a khua chu a har ru veng veng a. A chhungrila an hnutchhiah an zûn zâm lêng vêl avang chuan an awm lohna hmun khawharthlâkzia chu a suangtuah roh roh a. Vân lam hawi chho vang vang chung chuan, "Aw! Dum chhuan khat ral chhung lek pawh khan in zûnin min phuar lunglêng hman chu a ni si-a maw? Engkim huam a, kumtluanga in kianga awm mai pawh a thlanawm a nih kha le!" a ti sap a. Chu thu a sawi zo chauh tih chuan, "Tuin maw he lai ram pilrilah i lung lo lên hman a?" tiin Aizika chu a rawn ṭawng chhuak thâm ṭiak a, a khuh zui nghâl bawrh bawrh bawk a. Chu chu a hriat chuan Kâwltea chu a phu zawk a, a hlimna leh a thlamuanna inkawp avang chuan a hamhaih khawlo zo titih thei hial mai. Ṭawng nachâng pawh hre lova a ngawih vung vung hnu chuan, "U Zik, i lo harh tawh maw? I eng nge i tlûkpui ber? Khatianga tlu zawi ta reng mai che?" tiin a zâwt nghal chûk chûk a.

Aizika chuan, a ṭhut hmun siam rem pah chuan, "Khatia ka silai ka hmet puak zo ka tho tûr kha, kawrthindêng tiat zet âwma lian hi tuin emaw, eng thil emaw hi ka nâka rawn hnawh lut hnawk ang mai hian ka awm a. Kha veleh khan ka thâwk a buai a, ka nâk a kalh tlat mai bawk a, ka khaw hmuh a vâi zo va, ka tho zo ta ngang lo a ni. Mahse, hei, tûnah lêm pumna thâwi dam ang viahin, lehpek awm leh thei lo tur khawpin ka thâwl leh huai tak si! Eng hun nge ni tawh?" tiin a chhâng a.

Kâwltea chuan, "Tunah hian zanlai âr khuan chu a hun hnâi dêr tawh ang," a tih lai chuan an piah phai zâwl lama ramâr chu an rawn khuang ta chiah chiah a. Kâwltea chuan, "Zanlai âr khuan hun chu a nih ngei tawh chu," a tih zawm leh zat a.

Aizika chuan, "Chu lah, ka va nikhualo rei ngar ngar ve! Mumang neih awm ûk bawk si lo. Thil eng emaw thleng te a awm mial em? Ka rawn harh khan i lo phun ang sep sep a, tu emaw zûn phuara awm ang mai khan!" tiin a han zâwt a. Kâwltea chuan Aizika hnenah chuan, nikhaw hre lova a awm chhûng zawnga thil thleng zawng zawng chu a bo a bâng awm lovin a hrilh dap a. Chumi zawh chuan sai sa rêp leh tui chu a pe zawm nghâl zat a. Aizika chuan sa rêp chu a khel ve nghâl rawp rawp a. (Sai sa hi a tam tham ṭhin êm avang hian phurh tam theih loh an hlau ṭhin a. Chumi avang chuan a zân theih nan tiin a hmunah hian an rêp fû fap mai a. Chutiang a nih avang chuan sai sa rêp hi chu hem hmin leh tawh chuan ngai lovin a hmin sa hi a ni ber tawh ṭhin a. Tichuan, pasalṭha rammu leh ram chhuakte chuan hmun râlṭi leh hmanhmawhthlâk deuh thilah leh, a samkhai zawnna kawngah, rawngbâwl ngai kher lova ei mai theih a nih tawh ṭhin avangin an bâwk fo rêng a ni. Naupang pawhin an dahna patea mi chu a nih ang angin an lek chhuak lawr lawr zêl mai ṭhin bawk a ni âwm e. - Nm)

Aizika chuan sa rêp a khel zawh hnu chuan Kâwltea dâra ben thak thak pah hian, "Samak hi chuan mei hi an haw khawp a. Zân thim a ni emaw, chhûn êngah pawh ni sela mei rim an hriat phawt chuan tihhlum ngei ngei an tum tlat ṭhin alawm. Hetianga mei an suasam lai hian khaw dang hawi nachâng hi an hre lo em maw ni dâwn ni, kan râwlthar chhuak chho, pasalṭha hnung ka zui ve ṭumin kan mei chheh rawn ṭhelhtu samak kha kan pasalṭha pahnihin hlam dan lekah an kah rawn a, a thal huang huang mai asin," tiin samak chungchâng chu a han sawi chhunzawm zoh a.

Kâwltea chuan, "Chutiang chu a ni tih hria ila, a mei ṭhelh lai kha lo sai ve dawp ila a ṭha tûr a nia," tiin ui tih hriat taka a awki thlûk fân raihin a chek tlak tlak a. Aizika ṭawng leh hma chuan, "Engtin nge kan awm dân tûr hi ni ang? Tunah hian kan haw nghâl chûk chûk mai dâwn em ni ang?" a tizawm zat a.

Aizika chuan, "Zanlai a pel reng tawh a, khua a vâr hnaih mai dâwn alawm. Kâwl te han êng sela, leilung te han lang phawt sela kan haw a ni ang chu. Vânduaina tâwk pawh ni lo, a vannei zâwka ṭang te chu kan muang deuh a nih pawhin kan muang sual pawh a ni lêm hlei nêm. Kâwl ên nan hun tlêm a la awm a nia. Ti teh, i chhing sek teh ang," tiin a chhâng a. Thing bul nghêng bawk chuan a ṭhu mu leh ta ar ar a. Kâwltea pawh chu a bulah chuan a ṭhu mu ve nghâl mai a. Rei lo teah an muhil zui dûn nghâl bawrh bawrh a.

Chutia an mu chu an chau dûn deuh bawk a ni ang, an han harh chuan kâwlah ni a lo chhuak suar suar tawh a. Aizika chuan a silai chu a ban nghâl thuai a, a hlo thun mawlh mawlh pah hian, "E khai! Kâwl a lo êng fê tawh mai ka ti! Ti rawh le, kan pasaṭhaa beng hmâwr kha han hlep la, han ak hmak phawt mai teh," a ti charh charh a. Kâwltea chuan tumpâng beng hmâwr zum lai chu a han hlep hlawk a, hnaha fûnin a ak hmak a. Chutah Aizika chuan tumpâng nâkah chuan hnuai chhiah taka a ke dinglama chuan ar ar chung hian,

"Mual liai luaiah khân e,

Vâlpa'n tumpâng ka chhai awk e,"

tiin hlado a han chham vang vang a, a silai chu vân lam hawiin a kâp puak dur a. Chumi zawm zat chuan Kâwltea chuan a silai chu a lo kâp puak ve dur bawk a. Tichuan, silaimu an thun zawh leh tawh hnu chuan tumpâng mu vûm thûr mai chu an chhâwlchhin a, hawsan zâi an rêl ta a.

Ngaw an chhuak a, an mual lâwn liam chu an kalna khan ngaiah bawk zawh lêt lehin an lâwn liam leh a. Tichuan, luipui chu an pawh thla leh ta zêl a. Muangchângin lui hnâr lam zawhin a chho leh bek bek a. An chhuah thlâkna kawrte chhuah an thleng chho dâwn hnaih ta tih chuan, an kawrte zawh ngei mai rawn zawh thla tlangvâlrual thâwm nak nak ri hi an hre ta tlat mai a. Chumi a nih avang chuan chin hriat ni lo kârah, invên nân tiin lung phênah an tlân lût vat a. Chuta ṭang chuan kawrte rawn zawhtute chu tute nge an nih thlithlaiin an bih dâk dâk a.

Nakin deuhah chuan kawrte chhuahah chuan Lianchuhmânga hi a rawn chhuak thla hlawl a, a hnungah chuan mi dangte pawh chu hriam chi tin maia inṭam hian an lo chhuak ve thliah thliah bawk a. Chu veleh Aizika leh Kâwltea chuan râl an ni lo tih an hriat chuan an thaw huai a, an awmna aṭang chuan an chhuak nghal thuai a. Aizika chu an lam hawia bân vai lauh lauh chung chuan a han kûk raih a. Anni pawh chuan rawn hmu thuaiin an rawn chhâwn sap sap bawk a.

An han intâwk khâwm chu le, Aizika leh Kâwltea him piala an hmu leh mak ti hmêl chu an ka hau hlawm a. Chu lai kârah, tumpâng huai chu an tihlum tawh a ni tih chianna atana Kâwltea'n tumpâng beng a hlehsak an han hmu leh ngat phei chu, an lâwmna leh mak tihna inkawp thinlung chuan a haw hawtir hluah hluah hlawm a. A ṭhenin silai an lâwn awn awn a, a ṭhenin châng an tum ruih ruih hlawm bawk a, a ṭhen lui dungah chuan khêk rawih rawih chungin an lâm vir ang chawi chawi bawk a.

Tichuan le, dama an hmuh hlauh tâka an hah tidam tûra an kensak, buhchangrum leh sa, leh zu tuitling chu an tulhin an barh hawng hawng hlawm a. Chumi hnu chuan tumpâng tlûkna lam chu phûr leh tha tho takin an pan tlâng leh ta sang sang a.

Sa tlûkna an thlen chuan chu sa ropui zet mai chu an han chuan kual vel a, a ki leh ki inkâr te chu an han hlam vei râwl nen, a rik hian an ri teng tung mai a. A ṭhen phei chu an hnuk te lai lai ulhin, lâwm avanga an hnuk ulh ṭeuh chu an huipui ang pap pap bawk a.

An duh tâwka an chim hnu chuan Vâl Upate chuan a sa chu chan an rawt ta a. Tichuan, an phurh zawh leh ṭhenkhat tâna zâwn zawh tâwk tûr angin a sa chu an phawk ta hlawk hlawk a. An zawh hnu chuan phûr takin an inphur haw ta vuah vuah hlawm a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 31st, 2019, 5:54 pm

PASASṬHA AIZIKA

- Nunmawia Fânai

BUNG 20-NA

Han kir leh lawk ila, khatia, Aizika leh Kâwltea ram chhuakin lêng lên hun thleng mai pawha haw tih reng reng an rawn neih tâk loh-ah leh, an chinin hriat a phâk tâk lohvah chuan Vâl Upate ngaih a ṭha thei lo va. Tumpâng chu an tawng ngei ang a, a lo tihlum ve ve dêr mai a nih an ring ber a. Chuvâng chuan engti anga chêt lâk tûr nge ni ang a, a zân a zâna zawng tura thawh chhuah nge, an ruang ram palailênga tlu dâi tlaivâr ngawt mai tûra mutsan rih mai? tih-ah chuan ngaih dân siam har an ti tlâng hle a. A ṭhen chuan, "A zân a zân hian an ruang hlâwm tûra kal nghâl chûk chûk mai chu a ṭha mai lo'ng maw?" an tih laiin, a ṭhen chuan, "Chuti ngawta thu keuh thlûk chu a finthlâk ber lo thei tlat mai. Khawiah nge an awm ang a, khawiah nge an intawn ang? Tih lah tu khawkhâ hriat ni bar lo kârah chuan, tum loh leh duh loh lamah kan inhnûk lûtin ruang tam inchhuah palh pawh thil awm thei a ni tlat si. Chumi a nih avâng chuan, kâwl te han êng sela, vârṭianah i thawk chhuak zâwk ang u," an ti ve bawk a.

Chutianga thu an inkeuh leh chhâwk chhên hnu chuan, vârṭianah râlthuam an neih ang ang nêna zawng tûr leh ruang hlâwm tûra thawh chhuah chu an titlu ta a. Tichuan, vârṭianah tlangvâlho chu Aizika leh Kâwltea ruang hlâwm tum rilru hmin sa thlapin, râlthuam nen an rawn thawk chhuak khup khup ta kha a ni a. Mahse, an rin loh lam taka dam him pial leh, chu mai ni lova an sa hlauh ber mai tumpâng an lo tihlum dêr mai chu mak tiin, an hlimna leh lâwmna tihthawha awmin an phûl phah ta hlût zâwk si a nih kha.

Le, hlimna leh lâwmna piaha hnehtu thinlung pu a, râl do hnehna chang haw lam ang maia phûra an tumpâng sa tam tham tak mai phur a, khaw lam pana an heiha dap dap hnu, ni a vanlaizâwl reng tawh tih chuan kawtchhuah an chhuak ta hlawl a. An innghah sap sap hnu, thlan a dai ta maw tih chuan Vâl Upa pakhat hian tlangvâlho hnênah chuan, "Naute u, heta ṭang chuan kan sa lu hi kan lal in thlengin ropui takin zâwn i han tum dâwn ang u hmiang. A zâwnna tûr ren i han dap khâwm dâwn teh ang u khai," a han ti a. Chu veleh tlangvâlho chu phûr takin tumpâng lu zâwnna tûr siamna atana châk dap turin an tho suau hlawm a.

Tumpâng lu zâwnna tûr lian hek hawka an siam zawh hnu chuan, haw haw hluah hluah chungin tlangvâlho chuan tumpâng lû chu hma lam hawiin an tung meng rû a. Chutah Vâl Upa chuan Aizika dâra ben thak thak pah hian, "Aw le, Zika, tunah chuan kan hnehtu ropui chêt a hun ta e," a han ti a. Aizika chuan Vâl Upa thu sawi chu hre thiam tih hriat tak hian, tumpâng lu chu dichim takin a han rahsak ar ar a. Chumi hnu chuan muang dam dap hian a silai chu vân lam hawiin a'n tin kawh chho leh vâ a. Chutah,

"Zing phûl e, phai kip tlan tum tlâng tin kal mawi fungki ṭial e,

Rualin e, sêlna u law, kan tualah zingna thing lenchhâwl e,"

tiin hlado a han chham vang vang a, a silai chu khâwk rum rum khawpin a kâp puak dur bawk a. Chu veleh mi dangho chuan haw haw hluah hluah chungin, an silai chu khaw chhûng nghawr dur dur khawpin an lo lâwn chhunzawm awlh awlh hlawm a.

Chu an thâwm chuan khaw chhûng chu a nghawr hneh bawk a ni ang, khaw mipuite chuan an hlawhtlinna lawmpui turin, a pui a nawi sawi lovin, uicho chen chuan kawtchhuah lam panin an lo thawk chhuak nghal sup sup a.

Kawtchhuah an rawn thleng a, tumpâng lu leh a ki ropui zet mai an han hmuh chuan an ropui ti lutuk chu kui râwih râwih hlawm a. Upa lam deuh lo tel ve peihte phei chuan, "Aw hawi leh! Hetiang rêng rênga sa lu ropui hi pialrâl meuh pawhin a kawlin ka lo ring ngai lo asin!" tiin an tumpâng lu hmuh chu a ropuizia an sawi bâng lo va, a ki chu an chûl hliau hliau hlawm a. Naupangho lah chuan lawm takah neihin a ki-ah te chuan an han ṭhu ang larh larh hlawm bawk nen. Tichuan, a rei mawi tâwk kawtchhuaha sa lû chu an lawm hnu chuan khaw chhung lama inzâwn lût tûrin an inpuahchah ta hulh hulh a.

Kal an han rem dâwn chuan Vâl Upate chuan, "E khai! Kan sa lu zâwnna hi a rinawm tâwk bawk alawm le, kan pasalṭhate pahnih hian kan tumpâng lu hi vêng teh se. Lal tual thleng na nâ nâ chu an kein lei a rah i phal hauh lo teh ang u," tiin zâwn tel an han rawt a. Chu chu Aizika leh Kâwltea chuan duh lovin an ṭang dûn tlat a. Mahse, eng ang pawhin han ṭang sateh mah se, tlangvâlho chuan an zakah leh kêah lain tumpâng lu bulah chuan an hlâng lui ta tho tho va. Chumi hnu chuan lal in lam pan tûrin an inzui lût ta mup mup a.

Lal in pana tumpâng lu leh Aizika-te ṭhian dûn an khaw tlangvâlho ten phûr leh tha tho taka an rawn zâwn nawlh nawlh mai lai chu, lal leh upate chuan lal leikapui dawh chung aṭang chuan nghâkhlel leh hmuhnawm ti takin an lo thlir doh doh a.

Lal chuan, "Khai maw aw! Saw lah, râla khatah pawh kan tumpâng lu chu a lang lurh lurh mai ka ti!" a ti chhuak râwih a.

Upa pakhat chuan, "Aizika zawng, an sawi ai daihin a lo ropui nangiang mai! Hetiang khawpa thah thiang lova ngaih tawh, khaw tam lo beidawn tawhna sa huaisâr pawh a hmaah a tlûk hlumtir thei mai chu a nia leh! Eng ang chiaha duan ropui nge maw a nih bîk ngai ang le aw?" a lo ti ve vang vang bawk a.

Upa Ṭialthawnga pawh chuan, "A ni ngawt mai! Aizika zet hi zawng, hriat chian poh leh mi dang aia a ropuina leh chungchuanna kan hre mai dâwn chu a nih phawt hi. Khatiang taka khaw tam takin kan ngam loh rawn, sih huai pawh a tlâwm thei a nih ngai chuan, amah râwng pawhin za nufa khua chu a hneh thei ngei ang. Kan pasalṭha Lianchuhmânga tân hi chuan han khin rua a lo chang lo tak zet mai," a lo ti ve sap sap bawk a. Mahse, chutih lai chuan, chutianga Aizika fakna leh chungchuanna ri chuan a beng a tikham deuh nge Khâwnbâwl Upa Hramirha chuan, "Vânneihna hian mi a hnaiha a chên chilh tlat lai hi chuan, tu mihring tân pawh ropuina chu a hlawh chhuah theih vek ang chu. Aizika pawh, a pasalṭhatna hi a vanneihna avanga a hlawh chhuah a tam ve viau ngei ang," tiin a lo inrawlh zoh va. Chumi aṭang chuan tu mahin kam chhuah zui lovin, an tlangvâlte rawn thlen hun chu nghâkhlel takin an thlir ngawi ta ṭhap a.

Lal mual an rawn thleng a. Lal in kawt an rawn thlen chuan leikapui chung aṭang chuan lal chuan, "Hrâng rê rû ram sial lian luin ka in a rawn dêng dâwn maw! Tiang rênga sa ropui lû hi ka la hmu phâk ngai rêng rêng lo asin," tiin a au râwih râwih a. Leikapui aṭang chuan a rana rangin a rawn chhuk thuai thuai a, a hnungah Khâwnbâwlte chuan an rawn thla zui ve nghâl thuai bawk a.

Tlangvâlhovin an thil zâwn chu lal in kawtah chuan an nghat dap a. Chutah lal chuan tlângaupa chu a silai la tûrin in chhûng lamah a tir nghâl thuai a. Tlângaupa thang hlân chuan mipui ri mur mur leh haw haw hluah hluah kârah chuan lal chuan Aizika leh Kâwltea-te hnênah chuan, "Tunah chuan ka khua in muan ta reng mai!" a ti sap sap a. Hlim hmêl pu sâng chung hian an dârah chuan a bensak dûn thak thak a.

Tlângaupa chu silai nena lal hnen a rawn thlen chuan silai chu lek vâ va chung hian lal chuan, "Le, pasalṭhate u, lal mual i han nghawr nghing dur dur mai teh ang u hmiang," a han ti a. Tlangvâlrual leh mipui te chu an lo haw haw hluah hluah a. Lal bawk chuan, "Hetianga sa ropui hi hladova do lohvin ka chhuah phal ikhâw hlei nêm," a han ti leh lâng lâng a.

Chutah,

"Chhima'n e, tui vulh lohvin vuitum a lên chu e,
Hmunin e, in rem thiam maw, ka nu'n e, hrâng zu lo bilh che maw,"

tiin hlado a han chham hnan vang vang a, silai a kâp puak zui nghâl dur bawk a. Chu veleh silai dang puak thâwmin a rawn zui nghâl awlh awlh a. Mipui lam aṭang pawh chuan haw haw thâwm a lo chhuak hulh hulh mai bawk a. An thâwm chuan lal mual chu a nghawr hian a nghawr hluah hluah mai a, tual châra vaivut chu an chil khu ur ur bawk a.

Nakin deuh, an thâwm na zual a reh hnu chuan Aizika chu lal leikapui chungah chuan a lâwn chho va. Eng nge a tih dâwn tih ngaichânga lo thlir ṭhuptute hnenah chuan Aizika chuan, "Khai le, Thumnakpâr khaw mite u, khuanu hual himna zârah in khaw tirâlṭitu chuan fam a chang ta hlauh mai chu a ni a. Lal hian rem a tih chuan, he tumpâng sa hi chan darha insem kual mai lovin, khaw mi zawng zawng hraina atana hman ni se ka duh a ni," a han ti a. Mipui lam chuan lal kâin eng nge a sawi dâwn tih hre châkin lal chu an ngaichâng ṭhup a. Lal chuan muang ruih hian a silai chu tlângaupa kutah chuan a'n pe hmasa tê te a. Chumi zawh chuan, "Ka khuate u, kan pasalṭha duh dân hi ka duh dân a ni e. Naktûk lamah awm ni khamin khawtlângin ruai kan ṭheh mup mup a ni ang chu. In tinin mahni phal ang tâwk ṭheuh thing tuah mualah hian rawn keuh ṭheuh ta ula, zân lamah sa lu lawm pahin kan rêp vut vut a ni ang chu," tiin a au lâng lâng a. Chu thu lalin a han sawi zawh veleh chuan mipui thâwm chuan mual a nghâwr leh ta dur dur a.

Thâwm a hân leh hnu chuan mipui nâwlpui chu an ṭîn ta sang sang a. Tlangvâl leh Vâl Upate erawh chu tumpâng sa chan tûr leh a rêpna tûr ilo siam tûr an khawmuang thung a.

Zanriah ei kham, khua a thim hmul chhalh tawh tih chuan, zawlbûk pawh kai hran tawh lêm lovin tlangvâlho leh Vâl Upate chuan, zu bêl puin lal mual chu an pan khâwm sap sap hlawm a. Mual laiah chuan meipui chhepin, mual sira an sa rêp chu an vil pah nghal bawk a.

Khua a thim fel tawh, lêng lên âr a khuang chiah chiah ta tih chuan an zu put khâwm chu in-in titi an ṭan ta lâng lâng a. Chumi kârah chuan Aizika leh Kâwltea chu an ram vahna lama an tumpâng tawn dâng leh inbeih vêl dân te, tihhlum a nih dân te chu an zâwt âwl lo va. Kâwltea tân lah, râwlthar chhuak, thil tawn la neih tam loh kâra ngaihsân nih a nawm hun lai a lo ni vei râwl nen, a sawi nuam tih leh phûr zâwng tak mai chu lo niin, a chepa kai aṭanga ṭanin, an hnu chhui tirh aṭanga Aizika leh tumpâng an inbeih dân vêl leh a tihhlum tâk te chu chipchiar tak hian a hrilh mawlh mawlh hlawm a. Chu chu an hriat chuan tlangvâlho chuan Aizika chu che ropui leh huaisen hi an ti hlawm em em mai a. An ngaisângin chung en tak hian an melh rawn ṭhap hlawm a. A ṭhen chuan, "Heti ang rêng rênga piang vânnei hi an awm ngai dâwn em ni? Hetianga sa lian leh rang chunga han tlân lâwn kai hman mai chu!" tiin mak an ti zâwk hial a. A ṭhen thung chuan, "Kha le, ka no hi ka leh a che," tiin an no chu an leh chhên hlawm bawk a. Aizika chuan an zu leh chu insak lêm lovin a leh lêt leh zêl hlawm a.

Nakin deuhvah chuan lal leh Upate pawh chu mualah chuan a lo chhuak ṭiam ṭiam a. Tlangvâlho hnênah chuan, lal chuan, "E khai! Kha, kan sa lu chu in lo lâwm ṭan dêr mai elo? Meipui te lah chu in va chhep nêp sit set bawk ve maw le âw. Zanin ang sa ropui lu lawm zânah te chuan khaw chhûng zawng zawng ên pup thei leh, ṭhenawm khuate pawhin khaw kâng emaw an tih hial tûr khawpin chhep êng hluah ta che u maw le. Duh leh ṭhenawm khuate chuan awm ni kham lo tum ûk ûk ang hmiang," tiin a rawn phûl ve nghâl hlut a. Tlangvâlho bulah chuan ṭhut hmun rem ve nghâl sawt sawtin, an zu chu a khiatpui ve nghâl khawlh khawlh a. Upate pawh chuan ṭhutna rem ve nghâl sap sapin, zu chu an in zawm ve nghâl karh karh hlawm bawk a.

An zu in chu an rui tlâng ta deuh a ni ang, lêng ṭhut muan âr a khuang ṭan chiah chiah tih chuan, "Aw khai! Chu lah, a thiam lo zâwkin min zai khalh ta reng mai ka ti! Lunglên tum lo ang hrima tui ûm tak ngial pawh sawh tûr kan han inchhawp loh chu maw aw! Tlângaupa, nang mawng zângah seki leh khuang kha va ban ta lawk mai che? Zai remin lâm i han thai dâwn teh ang," a han ti a. Tlângaupa chu seki leh khuang la tûr chuan lal in a pan ta nghâl vat a.

Tlângaupa chu seki leh khuang nena a rawn lêt leh hnu chuan, paho zinga an hla hril thiam Vâncheuva kutah chuan lal chuan khuang chu a pêk nghal chawt pahin, "Nang kan hla kûngpui ber, i thiamna a lan a hun ta e," a'n ti sup a. Chutah le, Vâncheuva chuan khuang chu bêngin,

"A mi ngul maw zing zâwk a sa ngul maw?

Hrualhrui an bân kherh chiai e kan tual hmaiah;

Mi ngul zing lo tual hmaiah, sa ngul zing e,

A sa hnam kipin rawh e, serhchhâwl kan bân,"

tiin hla a han hril ṭan ta nghâl a. Mi dangte chuan an lo zâwm ve nghâl dual dual a.

An rui telh telh a, an zai tui tial tial a, an lung a lêng tual tual a, an zai uar sauh sauh bawk a. Chu an zai thâwm chuan kawt tuala mei lum ai putarho pawh chu a tilunglêng chho leh zêl a. Kawt tuala titi lâwng mai chu duh tâwk ta lovin, tiang nena inhawl ri karh karh chungin lal mual chu an rawn thleng ve hlawl hlawl hlawm a. Chu'ngho hmel chu lal chuan a'n hmuh chuan, "Aw hawi! Kan pa leh pute lam lam an rawn lang ve tak khap khap e!" tiin a lo chiai-au luam a. Pa tarho zinga pakhat chuan, "In zai rêng a ngaihnawmin lung in tilêng mai a, vânglai ngaih min nat êm mai nen, rawn chhim loh phal in ni ngang lo a ni e," tia chhângin a tep chiap chiap bawk a.

Chutah pa tarho zinga pakhat chu mei êngah chuan a laiah lo chhuakin, "Khawii nge,

'Kan lênlai leh kan vânglai tawnmang chang ta,

Hreuthang sa mual ka liampui kha han ngai ing;

Thang leh e, thang leh e thang ngaite chhung,

A kum kipin thang leh e, thang ngaite chhung,'

"I han ti ang aw khai," tiin a han lâm dârh dârh a. Chu chu khuang ben leh seki khawn riin rawn zuiin, lunglêng takin an zaiho leh ta dual dual a.

Chutianga lunglêng taka an zai lai chuan lalnu lah awm hle hle thei tawh bik lo, lal in aṭang chuan rawn chhuakin, an ṭhut bial chhûngah chuan meipui chheh vêl kualin a rawn lâm phar ve ta dârh dârh mai. Chu mai duh tâwk lovin, pa tarho zinga mi a duh duh chu pawt chhuakin, anmahni tihhlimna ni fâwm chuan a lâmpui dârh dârh hlawm a. Chuti rêng rênga an zai hlim lai pawh chuan silai hi a khât tâwkin an kâp leh awlh ṭhin bawk a.

Nakinah, hlim leh lunglêng taka an zai dap dap reng lai chuan khawvâr âr a rawn khuang ta âl âl a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 1st, 2019, 7:43 pm

PASALṬHA AIZIKA

- Nunmawia Fânai

BUNG 21-NA

Kâwl lo êng dâwn hnai ta tih chuan an zai chu an han châwl a. Chutih lai chuan lal chuan, "A va han nuam ropui ngai ve aw! Hetiang ni ta hrim hrim chu, vawiin atan ka sial pakhat ka thawh ngei ang. Tlangvâlte u, daia ka se huanga mi kha in duh ber zu hling chawt phawt mai teh u le. Vawiin chu, tlai tham lâw lâwin i han inhrai puar awlh mai teh ang," a ti chuar chuar a. Chu thu an lalin a han sawi chhuak chu anni tlangvâlho lâwmah tlain an haw haw hluah hluah a, an kut châng an tum râih râih bawk a. Tichuan, lal se huang lam pan chuan an liam ta hûl hûl a.

Tlangvâlho an liam fel ta maw tih chuan, pa tarho, anmahni rawn chhimtute pawh chuan ṭin zai rêl ve zawm nghâlin, an in lam pan turin an inzui haw ve leh ta diah diah bawk a.

Tûkṭhuan ei kham a lo nih chuan khaw mipui ho chuan awm ni kham hunpui hmang tûrin lal mual an pan khâwm sung sung a. Lal mual chu mipui leh sa urna mei khuin a khat luai luai a. Thli a thâwt loh lai chuan vân lamah sa urna mei khu chu a ding chho ngut ngut mai a. Khaw mite an kim khat tawh tih chuan zai lâm ṭan zui nghâlin, darkhuang leh tumphit nen, khuang leh seki, dârbu chi tin mai leh tui ûm chenin a ri thei apiang mai chu tiriin lal mual chu an âwi bûng bûng a. A khât tâwkin silai an lâwn ri leh awlh awlh bawk nen.

Chumi ni chuan, Thumnakpâr khaw mite chu nilêngin lal mualah chuan zai leh lâmin hun an hmang a. Chutih rualin, a ṭhen chuan an sa huai, an khua râlṭi taka lo awmtir a, nunau lo tithlabâr tawhtu thlarau chu riamin, anchhe tin rêng lo lawh bawrh bawrh tâwk lah bo lo. Lal mual chu ṭap thâwm leh lunglêng zai thâwm nen, hlimna vanga haw haw hluah hluah thâwm leh hnehtu ropui nunzia lantirna nên chuan, ze hrang leh thâwm hrang awm thei ang zawng zawng ni-a lang chuan a khah hian a khat mup mup mai a ni.

Chumi ni-ah chuan Aizika leh Kâwltea-te ṭhian dûn chuan mite ngaihsân rawn an hlawhin, mite en rawn ber an ni a. Pasalṭha ram mu haw kawtchhuaha an lo hmuak ang mai hian, mi awm thei leh nei nung chhungkaw nu leh an fanute chuan an ṭhi roh leh ngaih ropui em em mai te, chu bâkah an ngaiha thil hlu ang zawng zawng deuh thaw chu an bân âwl lo va. Zu tuitling lah chu a thlum ṭha ṭha tulhin nulaho chuan an vil râwt mai hi a ni hrim mai a ni.

Chutianga ropuina leh chawimawina khum a, duhsakna tin rêng an dawn lai leh zaihovin chhâwlhâl dama dang hnâwn tura an chawlh diak lai chuan, lal fanu Ngûrlianpuii, an awmna râl lama ṭhut hmun rem chu a ṭhut hmun aṭanga lo tho chhuakin, Aizikate ṭhutna lam pan chuan nui sen sen chung hian a rawn kal phei a; a hnungah chuan a chhiahhlawh nula hian a zui bawk a. Chu chu Aizika'n a lo hmuh chuan Ngûrlianpuii hmêlṭhatna chu lo hmu fo tawh mah se, tûn ṭumah kher chuan hun dang zawng zawng aiin ṭha a tiin, a nui sen sen kâra a biangsum lo lang kêlh te chuan a lêmin hmuhnawm hi a ti rilru êm êm mai a. A incheina ropui leh mawi chungchuang bik tak pawh chuan a beltu tûr tak an bâwm bik hliah hliah ni hian a hriain, a hawiher te rêng lah chuan a lung a dum êm êm mai nên. Chu hunah kher chuan engkim mai hi an vul tharin, thli fim thâw te rêng lah chu malsawmna rawn thlentu tûr hmahruaitu ni mai âwma mawi hian an thaw dam bik riau hian a hre bawk a. Mahse, chutih lai chuan, mi zawng zawng mit fûkna ber an ni tih a hriat avang chuan, a lam hawia mit lên reng chu thil mawi a ni lo tih hriain, Ngûrlianpuii nui hmêl pawh chu chhâwn lêt lovin, rei pawh en lo chuan a mit chu a la sawn leh thuai a.

Ngûrlianpuii chuan Aizika bul a rawn thlen chuan, "Kha, kan khual pasalṭha, kan khua sa hrâng laka min muantute chuan in awrh sên loh khawpa tam ṭhi bân in hlawh dêr tawh a ni maw? Khawii nge, mi dang hnungah hian, ka neih ve tâwk tê hian hlutsak a hlawh dâwn lo a nih pawhin ka'n bân ve teh ang che u chu," tiin ngainatawm taka nui seih chung hian Aizika leh Kâwltea chu ṭhi-hna a han bân dûn a. Chumi zawh chuan a bula a chhiahhlawhnu hnênah chuan, "Khawi le, zu tuitling kha le. Kan pasalṭhate chhâwlhâl dang hi ka'n hnâwnsak ang e," a ti zawm leh zat a. A chhiahhlawhnu kut ata ûm chu a lâk hnu chuan Aizika leh Kâwltea chu a han tulh karh karh a.

Zu tuitling a tulh zawh chuan lal fanu chuan, "Mikhualpa, ti teh, vawiin chu mite hmai zah ni pawh ni lovin hlim taka zaia lâm ni a ni alawm le. Hawh teh, mual laiah hian muvanlai inchhai ang maiin i han bir dûn ngar ngar mai teh ang," tiin Aizika chu a fiam zauh va. Chutianga lal fanuin a rin loh leh a beisei loh tak maia a rawn fiam zoh avâng chuan, Aizika chu a hamhaihin a zâm rûkna chuan a tihkhawr phah deuh ṭût a, han chhân mai ngaihna hre lo chuan a tîm deuh ûih a. Chu chu an kiang vêla mite chuan an lo hriat ve hlawm vek avang chuan, "E khai! Kan pasalṭha, sâ leh râl hmaa zâm ngai lo kha kan lal fanu hmaah i tlâwm mai dâwn em ni?" tiin an lo chhaih rawn ve nghâl hluah hluah bawk a. Chu thâwm chuan a man chin a zau zêl a, rei lo têah lal mual khahin a khat chhuak ta thuai a. Lal mual chu, "Kan lal nula hmaah Aizika a tlâwm dâwn e, a tlâwm dawn e," ti thâwmin a khat ta hluah hluah a. Chutih lai chuan lal fanu lah chuan Aizika hnênah chuan, "Pasalṭha chu ka hmaah a tlâwm dâwn tak tak em ni?" tiin a han fiam nawn leh zoh va. Chutah zet chuan Aizika chuan tlâwm zâwk nih chu tum bik lovin a ṭhut hmun aṭang chuan a rawn ding chhuak a, "Sapui leh râl ai ngawt chuan kâwlngo hrâng hi an hrân a lo na zâwk a nih ngei mai hi," ti-a phun sap pah hian lal fanu chu han kiai khum zauh va. Chu chu lal fanu chuan ngainatawm zet hian a lo sêih lêt khum ve zeuh bawk a. Tichuan, Aizika leh lal fanu chu an ṭhut hual pup kârah chuan, mual lai lam panin an inzui lût dûn râl râl a.

Mual lai an thleng ta maw tih chuan Aizika chuan, "Lal fanu meuh mual laia mualphopui tûr atân chuan mi ropui zâwk an tam âwm si a. Chu lai kâra a ropui lo berte zinga mi min thlan vang a, a vuak lêt leh mit fûkna mawikhai lo dawn pawh i huam tel êm ang chu maw?" tiin nui zeuh chung hian a han fiam a.

Lal fanu chuan, "Ropuina hi khawi aṭanga teh nge a nih tih-ah chuan, a tehtu thinlung lamin a hawi zâwng hi a pawimawh ber zâwk ṭhin a. Chu chuan mi a tihuaiin, mite hmuh ve theih loh a hmuh tlatna chu a mualphopui ngam ṭhin a ni ngai e," tiin a lehthal ve nghâl zat a, a nui rah bawk a. Lal fanuin a chhânna chu lehthal zui leh pawh tum tawh chuang lo hian, Aizika chuan khuang bêngtu lam chu a han hawi a,

"Ningzu thlum lo siam che maw ka chûninu?

"Bualdîm ki ṭha ram laiah ṭhâwng zêl ing,

"I han ti teh ang hmiang," tiin a han au lâng lâng a. Chu veleh khuang bêngtu chuan hla chu a han la ṭan nghâl a. Chu chu mipui lam pawh chuan lo zâwm ve nghâlin, tui êm êm hian an zâi dual dual a. Chumi kârah chuan Aizika leh lal fanu chu, vanlaizâwla muvanlai nupa inchhai ang tak tak chuan, zawi hnalh hian an inchhai kual dûn ta diai diai a. An pian phungah pawh, len lama vântlâng chung lam ve ve, hmêlṭhatah lah, an nihnain a ken ve veah chuan zahpuiawm lo tak, mite chung en rawn ni ve ve, thiam tak maia an han inchhai dârh dârh mai chu hmuhnawm eltiang hi a tling kher mai. An lâm lai hmuhnawm ti taka lo thlir rengtu pa tar lam khat phei chuan, "Aw a! Hetiang rêng rênga nula leh tlangvâl hmêl ṭha, khuanu'n mawina leh ṭhatnaa duhsak taka a voh bikte mawi leh thiam taka an lâm ang hi ka la tawngin ka la hmu ngai hauh lo mai!" a ti chhuak hial a, a lunglênna chu kaih thawha awm zualin a mittui te hial a lo hnâm phah ang pâr pâr bawk a.

Hla khat mai ni lo, hla hnih hla thum lai mai, muvanlai vanlaizâwla an inchhai ang a, tu mahin an tihbuai phâk lohva an inchhai hnu chuan an thlan te a sa chhovin, an dang te a lo ro tawh avang chuan Aizika leh lal fanute chuan an lâm chu an duh tâwk ve ta a. An ṭhutna lam pana an kal dâwn lai chuan Aizika chuan, "Ti kha chuan ka nula ang hrima deutu che an awm phah ka hlau hlel ta hauh lo mai" tiin lal fanu chu mi rilru ṭha lo putu tena an sawi chhiat a hlauhthâwnpuina thu chu a chhâk chhuak zoh va.

Lal fanu chuan, "Deusawhna leh dichimna hi ṭhiana siam thiamtu tân chuan, chakna leh hma lam hun ti-êngtu hmanrua a ni ṭhin asin," tiin a chhâng lêt ve leh a. Tichuan an ṭhutna lam ve ve chu an pan dûn leh ral ral a.

Lal fanu chuan Aizika chu an ina a lo lan tirh aṭanga a lo ngaihnat rûk tawhna leh a hnaih châk em em ṭhinnaah, mite hmuh hniam leh en tleu a kaina tur ni si lova hnaihna hun a nei thei chu a hlim ru hle a. A nihna dik takah phei chuan, râla khata amah a hmuh hma hauha a chanchin thang vêl a hriat tawh aṭang daih tawhin hmuh a châkin a lo ngaisâng ru hle tawh a ni. Mahse, chutih rual chuan, an lâm zawh hnua a rilru put dân leh Aizika a veina chu a hma ai zawngin a thûkin a nasa ta daih a, chu chuan a zêm hneh em avang chuan a chhungril chuan Aizika hming chu a lam nawn awn awn reng tawhin, a hriat thiam phâk loh thawnthu bul chu a thinlung chuan a lo ziak ṭan reng tawh mai a lo ni a. Chu chuan, eng ang chiaha nâin nge a la zem zêl dâwn tih lah eng mah a hre si lo.

Mite kârah chuan Aizika che vêl chu hmuhnawm ti takin a thlir ru reng a. Nula dang tena puan leh ṭhite an bân a, chu'ng nulate lam hawia a nui hmêl a hmuh ringawt pawh chuan a thîk ru em em ṭhin a. Mi dang tâna han vul leh mi dang pawm lai han chang mai atan chuan a phal thei thlâwt lo hi a ni ber tawh a. Chutia, mi dang an zai lai kâra rilru pawh pe mang lova zai chunga Aizika che vêl a thlir rûk leh dêk dêk ṭhin lai chuan, a beng bulah hian zawi tê mai hian, "Ngûrpui, i lâmpuipa chuan i rilru a va la âwm bawk ve maw le? Lah, thlir leh ngawt ngawt ṭhin che?" tiin a nu chuan a rawn bek bawrh sar sar a, a nui suk bawk a. Chu chu a han hriat chuan, chutianga rawn titu chu a nu mah ni se, mi dang vênna pawh nei mang lo khawpa a thinlung thuruk a chêt chhuahpui dânah chuan lal fanu chu inthiam lovin a zak êm êm mai a. Khaw dang pawh hawi ṭha ngam lovin, lei lam bihin a kimki tlat a, a hmai chu a sen ap ap bawk a. Mahse, a nu chuan chu chu hre thiam takin leh mite hriat hlau tak si hian, "Tunah chuan i thinlung chuan kawng thar a rap ve ta a nih kha. Kawng hautak tak tak zawh tûrin inbuatsaih reng ang che," tiin zawi sap hian a han thawi zeuh a.

Khua a lo tlai lam zêl a. An zai pawhin chuai lam a pan ṭan ta tih chuan ruai chu an ṭheh ta mup mup mai a. Ruai an ṭheh lai te chu an han pui rep rep khawp a, mipa naupang leh uicho, sa ruh inchuha lo inchai laih laih tâwk lah bo lo. Chuta chhapah naupang ṭap bai bai thawm leh ui na tuar chiau vawr vawr ri te chuan mual chu a luah âwl lo va. Pa tar lam lah chaw ei tui reh lam tawh tih takah, mite chaw ei laiin kil khatah lunglêngin an lo zai dap dap thûl nen. Hlimna ni zawng hlimna ni a ni nge nge pawh a ni ang e.

Ruai ṭheh an zo va. Khua a thim chhelh chhelh ta tih chuan lal chuan a upate hnênah chuan, "Ti teh u, kan vawiin khawtlâng hrai chuan khaw chhung a tipuar chhuak zo rêng em i han fang kual teh ang u khai," tiin khaw chhung fan kual chu a rawt a. Tichuan, lal leh upate chu khawtlâng an puar em tih hriat tum chuan khaw chhung fang turin an inzui chhuak ta thliah thliah a.

Lal leh upate an chhuak fel tih chuan Aizika leh Kâwltea pawh chu zawlbûk kai tur chuan an inbuatsaih dûn ve nghal a. An inpeih hnu chuan zawlbûk lam pana chhuah chu an han tum a. Kawngka a an thleng dawn hnaih tih chuan lalnu chuan, "Zika, zanin chu nula rim lovin he lamah rawn khawmuang hlauh zâwk tawh u aw. Zanin chauh chu in titi ngaihthlâk ka châk ve tlat a nia," a rawn ti a. Aizika chuan, "Lalnu thu te zawng keini hnial ngam a ni hlei nêm," tiin a chhâng a. Tichuan, zawlbûk kai tur chuan an inzui chhuak dûn ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 14th, 2019, 8:28 pm

PASALṬHA AIZIKA

- Nunmawia Fanai

BUNG 22-NA

Thuhma : Phone a ṭha a, hritlang khawsikin min han man zui leh a. Chhia zawng zawng kan khûm lo chauh chu a ni e. Mahse, kan châwl rei tawh si a, tawi tê tal ka'n ti hrâm a nih hi. Ni dang aiin a thu pawh a buar deuhin, a inla lâwn ṭha lo ang tih ka ring; lu na bûr chungin ka han tilui ve ngat ngat chu a nia. A chhiar tlak vak loha leh min hauh rawn tawh mai dawn nia...hehe

Zawlbûk an thlen chuan tlangvâl lo kai hmasate chuan, zah leh ngaisâng tih hriat tak hian an lo chhâwn liam liam a. Chutiang a nih-ah chuan Aizika leh Kâwltea pawh chu a hma ai ngawt chuan an ngampa ve ta deuh tawh a, khaw tual mi ang maia han khawsak pawh mawi lova ruat bik lovin, an khawsak phung pawh a mikhual lo ve sawt tawh bawk a. Titi phung han vawrh kawngah pawh kimki tawh bik lovin, an ri ve bawrh bawrh a.

Lêng lên âr a lo khuan leh tâk chiah chiah-ah chuan, tlangvâlho chu nula rim turin an chhuak leh thliah thliah ṭan a. Aizika leh Kâwltea pawh chu lalnuin a ngen ang chuan hmun dang pan lovin lal in lam panin an inzui chhuak dûn ve ṭaih ṭaih bawk a.

Lal in an thlen chuan, lalnu leh lal fanu chauh chu lal inah chuan lo awmin, lalpa leh a khâwnbâwlte khaw chhung fang erawh an lo la kir leh lo va. Lalnu chuan Aizika-te hmel a han hmuh chuan, "E, kha, in lo lang ta dêr a ni maw?" tiin a lo chhâwn var a. Lal fanu pawh chuan nui seih hian a lo chhâwn ve bawk a.

Aizika chuan, "Lalnu meuhin min han sâwm der tâkah chuan hmun dang han pan ngam zia kan ni hlei nêm maw," tia chhân pahin ṭhut hmun rem chu a han rual nghâl a. Kâwltea pawh chuan ṭhut hmun chu a rem ve nghal thuai bawk a.

Ṭhut hmun an rem fel ta maw tih chuan, hre châk tih hriat tak hian lalnu chuan an ram vah dân leh an tumpâng tihhlum dân vêl chu a han zâwt nghâl chawt a. Kâwltea chuan Aizika chêt dân leh tumpâng nena an inbeih dân zawng zawng chu hmaih nei miah lo hian a han hrilh par par a. Chu chu ngaihnawm ti takin lalnu leh lal fanu chuan khaw dang hawina châng pawh hre lovin, Aizika en ngawih ngawih chung hian an lo ngaihthla doh doh a. Chutiang taka a huaisenna leh, hlauhawm hmachhawn kawnga a rilru fim a hman dân te chu mak an tiin, mi dangte tâna thihna ni ngei ngei tur lak aṭanga a tal chhuah dân chu ropui an ti em em mai a. Ngûrlianpuii phei chuan a duhna thinlung avang chuan, Aizika chêt dân huaisen tak chu a ngaisang zualin, a lakah chuan a tui ral lo chauh tawh hi a ni ber a.

Chutianga an titi lai chuan lal in kawngka chu tu emaw hian rawn kik dawt dawt pah hian, "Kan lo thleng tawh e, kawng min lo hawn u," a rawn ti a. Lalnuin kawngka a va hawn chuan Aizika te khuaa palai an tirhte kha an lo ni reng mai a. Chu'ng mite hmêl Lalnu'n a han hmuh phat chuan, "E khai! In lo lêt leh reng tawh mai a ni maw? In tluang bawk em maw chu?" tiin a lo chhâwn nghâl thuai a. Palaiho chuan an chhân ve hman hma chuan, "Ngûrbawih, zu tui tling kha han chhawpsak tawh khai, an chhâwl rêng a hâl dâwn em mai," a tih zawm leh zat a. Lal fanu pawh chuan zu tui tling chu a rawn chhawpsak nghâl thuai bawk a.

Palaihovin zu tui tling an in karh karh lai chuan lalnu chuan, "Tlângaupa lah chuan a zui ve daih mai bawk si a, nang, Kâwlte, Ngûrbawihi pate khaw chhung fang chu zu zawng ngawt mai teh. Hei, in khaw lama kan palai kalte an lo haw reng tawh tih pawh an hre nek lo ang; chanchin pawh an hre châk viau tawh tûr asin ni," tiin Kâwltea chu a tir zui nghâl thuai a. Aizika chuan, "Ti rawh, kan pahnihin i zu chhuak dûn teh ang," a lo tih zawm ve zat bawk a. Tichuan, Aizika leh Kâwltea chu an chhuak zui ta nghâl a.

Aizika-te an liam fel tih chuan lalnu chuan palaiho hnênah chuan, "In rawn nang hman ta lo va, kan khual pasalṭhate pahnih sa lu lâwmin awm ni kan kham hial kha vawiin chu. A nuam dur dur ngei mai," a han ti a.

Palai kal ho zinga khâwnbâwl upa pakhat chuan, "Ni e, lal in kan rawn panna kawngah kan lo hria alawm. Kan khaw râl ṭitna ber a fam ta chuan lung a timuang tak huai huai a. A makin a ropui teh zawng a ni e, Aizika rêng mai, a chêt tawhnaah hi chuan a sut apiang a su tlang pawrh zêl mai chu a ni si a le!" tiin a chhâng a.

An zinga pakhat chuan, "Kan rawn tlai ta hlauh chu a pawi ngei mai! Dichimna atân rêng rêng pawh silai han lâwn hnan ve hrim hrim ka châk teh nen aw," a lo ti ve bai bai a. Mi dangte pawh chuan chu chu lo zâwmin, an sa huai thi ta chu titi berah an neih chho ta zêl a. An khua a rawn pal luh laia a chêt dân râwva tak takte, silaia kah fuh mai a harzia leh a ki hman a thiam lutuk dân te, an pasalṭhate a lo suatsak dân zawng zawng chu sêp chhovin, an titi chuan an thin tirim thar chho lehin an hui pap pap hlawm a. Chu lai kârah a ngam loh tawnga a thi ta chuan a tilâwmin, Aizika chu an ngaihsân phah êm êm hlawm a.

Khâwnbâwl upa chuan, "Aizika zawng, an khaw lamah pawh a than a ṭha ngiang mai. Pêm pasalṭha lek chauh a ni na a, an khaw pasalṭha hming ṭha Sângrova pawh than ṭhatah a khûm nghâl dêr mai zuk ni âwm a. Sângrova pawh hi pasalṭha nêp lo tak, râl hrât leh lu khai thei tak mai, an zah rawn a ni a. Mahse, Aizika hian zan khat chu, zawlbûkah a elh nek mai a ni âwm a, chuta ṭang chuan an dah hnuaihnun phah ta deuh a ni ang. Mahse, tlâng than dânah chuan, 'Sângrova chuan Aizika than dâlsak tuma ṭan lâk a tum viau thu an sawi sap sap hlawm mai," a han ti a. Pakhat chuan, "An in-el chhoh lai vêla an khuaa awm a nia ka châk ni. Sângrova hi a nêp lohzia ka lo râl hriat ve hle tawh a, a chêt a phelh viau a nih loh chuan Aizika hmakhalh thei tûr khawpa mi chungchuang chu a ni ve reng a nia," a lo tizawm ve zat a. Chutianga an titi-naa Aizika hming an lam vêl lai chuan lal fanu chu la kaih pahin, ngaisâng leh chhuang tak hian a lo nui leh seih ṭhin a.

Chutianga an titi mawlh mawlh lai chuan lal leh upate chu an rawn inzui lut thliai thliai hlawm a. An hnungah chuan Aizika leh Kâwltea chuan an rawn zui dûn bawk a.

Ṭhutna an rem fel hnu chuan lal chuan an palai tirhte chu chanchin a han zâwt a. Anni chuan Pâwithlun lal Thandâwla chuan an thu ken chu zahsakin, a pasalṭha Aizika chu an chi khur lâk lêt lehna tûra pui tûr chuan rem a tihsak tih leh, chumi hnu-ah erawh chelh zui tawh lo tura a rawn chah thu hi an hrilh a. Lal Zahleithanga chuan, "Chu zawng thu lâwmawm tak a nih chu. Kan hlawhtlin ngei ring ta ila, kan lo hlawhtling a nih chuan Pâwithlun khua pawhin chi hnianghnâr an nei tawhin, khaw dang leh ram danga chi zawnga vah kual vêl a ngai tawh lo ang," a han ti charh charh a. Upaho chuan an lu an lo bu nghat nghat hlawm a. Chutah lal bawk chuan, Aizika lam hawia vaibêl a pak khûk luai luai hnu chuan, "Zika, thu han zûk leh duhna te in nei em maw chu? Kan han ti tak ûk na a, in inhuam leh loh pawhin demna che kan nei dâwn hauh chuang lo che u a nia," a han ti leh chuar chuar a.

Aizika chuan, "Thu han zûk lehna chi em ni dawn? Kawng zawh harsa leh theih loh tawp tûr pawh ni dâwn sela , a tum tal kan tum chhin reng reng ang chu maw le," tiin a chhâng a.

Lal chuan, "A ṭha e. Chutianga in inhuam a nih a, min puih in hnial loh dâwn phawt chuan kan lâwmna chuan kumkhuain a zui reng tawh ang che u," tiin lawm thu chu a hrilh chawpchilh nghal zat a. Aizika leh Kâwltea chuan chhâng ta'ng e pawh ti lovin an lu an lo bu nghat nghat a. Lal vêk chuan, "A nih leh, eng tikah nge chhuah in rilrûk theih ang?" tiin a han zâwt leh a.

Aizika chuan, "Pang te a dam a, khuain zah a ngai a nih chuan naktip lamah hian chhuah nghâl mai pawh a rem viau mai lo'ng chu maw," tiin a chhâng a.

Lal chuan, "A hun kha chu in inhuam hun hun ni mai sela, in kutah awm teh se. In hnung zui tûr pawh mi rin tlâk leh chhel deuh tûr kan lo dap dawn nia," a han ti leh a. Upaho pawh chuan an lu an lo bu ve nghat nghat hlawm a.

An zin chhuah hun tur leh eng eng emaw sawia an titi hnu chuan, Aizika leh Kâwltea chu zawlbûk lam pan turin an inzui chhuak dûn ta ral ral a.

Khua a lo vâr a. Chumi ni chu an zin hun atana inbuatsaihna ni-ah hmangin, Aizika-te ṭhian dûn chuan silai hlo an den belh sauh sauh a. Râl rama chin hre lova kal tûr an ni bawk a, eng pawh tâwk thei leh lu chhum bân chhum pawh huama kal tûr an nih avangin an lu lâk chem pawh chu an tuai rum sauh sauh bawk a.

Chutianga an râlthuam vel buatsaiha kawta an buai mawlh mawlh lai chuan, "Zika ka puan bân hi min lo pui lawk teh, keimah chauh chuan ka bâng ṭha thei dêr lo mai," tiin lal fanu chu a rawn au lâng lâng a. Chu veleh Aizika chu lal fanu pui tur chuan a lût thuai a. Lal in chhungah chuan lal fanu chauh chu a puan bân lai buaipuiin a lo buai hle a. Lalpa leh khâwnbâwlte lah lal in chhuahsanin zau dawh lamah zu inin an inkâwm hlim daih a, lalnu lah a ṭhiannu zu chhimin a liam daih bawk si nen.

Lal fanu kiang a thlen chuan lal fanu chuan ngainatawm zet hian a lo nuih sêih a. Chu a nui hmêl pawi sawi lo tak mai chu Aizika chuan nêlawm deuha nui sak hian a chhâng lêt ve bawk a. Puan an bân dun mawlh mawlh lai chuan lal fanu chuan, "Zika, naktuk chuan kal i tum tak tak ta em ni a?" a han ti a.

Aizika chuan, "Aw, tum tak tak e. Eng nge ni ta?" tiin a chhâng a.

Lal fanu chuan, "Kal lo mai ta che? I kal a nih chuan i rawn kir leh kher lo maithei asin. Kal kawngah hnam kawlh leh nunrâwng tak tak an tam si a, in sa ei tuma veh ngat ngattu che u pawh an awm dâwn bawk a. Chu'ng mite lak aṭanga him piala in tum hmun thlen chu, tuikhawhthlaa hleuh chhuah tum ang tluk thaw-a harsa a ni ngei ang," a han ti leh a.

Aizika chuan, "Chutiang khawpa hlauhawmin a hual hmunah chuan maw lal hian min tirh a lo tum a? Mahse, chutiang hmun hlauhawmin a hual si, engtiangin nge chi khur te in han neih teh daih theih?" tiin a zâwt lêt ve leh zat a.

Lal fanu chuan, "A hma chuan khaw inṭhian kan nih bâkah, a kal kawnga hnamho hi kan thu hnuaiah an awm vek ṭhin a. Chuvang chuan kawng lakah buaina kan tâwk ve ngai lo, chi an duh ang tâwka hnianghnâra kan pêk theih chhûng kha chuan. Mahse, tunah chuan eng mah pêk tûr kan neih tawh loh avangin kan lakah an hel tawh a, kan pasalṭha, chi khur la lêt tura han kal pawh lo ûm hawin, a ṭhen an that bawk a. An thahte chu an sate an eisak tih thâwm pawh a awm asin. Tûr hmanga mi beih ching an ni a, an tûrin a fan tawh dam chhuak an awm ngai mang lo an ti leh zêl nen. Chuvangin nangni chuan ṭhulh leh mai tawh u. I han thi a nih chuan..." a tih mêk lai chuan Aizika chuan, "A nih leh chu'ng zawng zawng hre vek siin i pa hian ti nge chu lama min tirh chu a duh tlat ni ta ang?" tiin a zâwt leh vat a.

Lal fanu chuan, "I thihna hian a tilawm viau dâwn pawh a ni mahna. Lo ngai reng mah rawh, pasalṭha a thlang chhuak mah na'ng a, a ui loh loh hlir in hnung zui turin a thlang chhuak ang," tiin a chhâng a.

Chutiang taka Zahleithanga'n hmai kâwr vuaha a laka ṭhat a lo chhuah der ngar ngar mai chuan, Aizika thin chu a tirim ta hle mai a. Mahse, a thinrimna erawh tilang chhuak lêm lo hian a hmêl lan dân chu a ti pangngai tlat tho va. Lal fanu hnênah chuan, "A nih, chu thu chu eng vânga min hrilh nge i nih? I hmelma chu thi tûrin min duh ve lo em ni?" tiin a han zâwt leh a.

Lal fanu chuan, "I hmel ka hmuh hma hauh a, i chanchin hi râl aṭanga ka lo hriat aṭang tawhin ka hmêlma i ni ngai hlei nem. Ka pasalṭha ngaihsân leh ka hmuh châk êm êm reng i ni zâwk asin. Tuna hetianga an phiar rûk dân che hi nizân khan ka nu nena hrilh che u a, a zân la laa bi bo nghâl tura hrilh che u kan tum a. Mahse, hun a awm ta si lo a nih kha. Tun hi a hun lai tak a ni, in khaw lamah kir leh vat mai zâwk rawh u. I thih thu hriat hi ka ngam ngang lo a ni," tia chhângin a han thlêm a.

Aizika chuan, "Lal fanu, i mi duhsakna leh ngaihvennaah chuan ka lawm tak zet mai. Mahse, hei chen hi ka thleng tawh a, thu zûk leh hni hnê chi a ni tawh lo. Ka bi bo a nih chuan, ka mawhphurhna tura ka thu tiam chu ka bawh chhe dâwn tihna a ni a, mahni thu tiam tawh bawhchhetuin malsawmna chu engtin nge ka tawng buak theih tawh teh lul ang ni? Eng pawh chu ni sela, rampalailênga tlu hlum tur tal pawhin ka chhuah a ngai," tiin a hnial ve thung a.

Lal fanu chuan, "Tilui lo hrâm teh, i thih chuan engtin nge ka lo awm ang? I tel lohna hringnun hian eng hlimna nge min pêk tawh ang ni? Ti teh, i tlân bo dûn zâwk ang hmiang?" tiin a thih a hlauh luatah a duhna thu chu han sawi lang ta râwng mai a.

Chu thu a han hriat chuan, a rin loh khâna lal fanuin a duhna thu a han dawng thut chu mak ti leh lâwm ru tak si hian a meng deuh kâwk a. Chutah Aizika chuan, "Chutiang thleng thleng chuan maw ka lakah rilru i lo put? Ka phu loh piah lam thil daihin min han ṭhawng chu, ka buai chhe lo chauh a nih ber hi! Mahse maw, lal fanu, ka kal a ngai tlat a ni. I pain a nuihzat leh ngaihnêp ni tûr hian ka tlânchhe dâwn rêng rêng lo; min hre thiam ang che aw?" tiin a chhâng leh a. A bâk eng mah sawi zui lovin pâwn lamah a chhuahsan leh ta daih a.

Tlai a lo ni a. Zanriah an han ei kham a. Khua a thim tawh hnu chuan lal inah hian tlangvâl sâwmrual zet hi an lo lang khup khup a. Chu'ng mite chu lalin an hmuh chuan, "E khai! Kha, in lo lang thei ta dêr mai maw? Ṭhut hmun te kha han rem ta che u," tiin a lo chhâwn a.

Ṭhut hmun an rem hnu chuan, Aizika leh Kâwltea hnenah chuan an kalpui tur, an hnung zuitu turte an nih thu chu khâwnbâwl upa pakhat hian a hrilh mawlh mawlh a. Chumi chhûng chuan Aizika chuan lalpa chu, "Dam taka ka rawn kir leh a nih ngai chuan, i thangkamah hian nangmah ka awhtir khawp ang che," tirilru chungin a mitmei a chiksak reng a. Chu lai karah chuan lal fanu la kai lai chu a thlêk leh zauh ṭhin a. Lal fanu chuan hlauthawng tih hriat deuha lo meng dur khaih chung hian Aizika chu a rawn melh ve leh zauh ṭhin a.

Eng eng emaw sawia an inhrilh hriat hnu chuan Aizika leh Kâwltea chu tlangvâl dangte nen chuan zawlbûk pan turin an inzui chhuak ta sang sang a.

Zawlbûk pana an kal lai chuan tlangvâl pakhat hian, "Zika, kan lal chuan lu zuar turin min tir ngawt dâwn chu a ni si a. Eng vânga he thanga rawn inbarh lûta min zem kai tel ve nge maw i nih le? Kan lal hi a nunrâwng tih hi i râl hriat eih na nge?" tiin a han chhâl a.

Aizika chuan, "A râwng tih chu ka hria a. Mahse, hetianga mi dang nun thâp duh khawpa mahni hmasial a ni tih hi ka lo hre ngai lo. Ka nunna hi a lo ngai mawh em a nih dâwn hi! A eng a, keia pawh, hman lai thil avanga ka lo rin ngawt mai ni? Ka inhre thiam ta bik hauh lo mai," tiin a chhâng a.

Tlangvâl dang pakhat chuan, "Hetianga tirh chhuah hi vawi hnih lai an awm tawh a. A vawi khatna chu an thi mang deuh vek a, a vawi hnihnaah erawh mi pahnih tih loh chu an rawn kir leh vek thung," a lo ti ve thuai bawk a. Mi dang an ṭawng leh hma chuan amah bawk chuan, "Kawngah tlang theiin, hmun han thleng thei pawh ni teh rêng ila, khaw khat tlâwm ṭhak tur chuan rei tak rawlrâla chêt a ngai ngei ang. Kan thihna tur kan pan dawn chu a ni phawt mai," a han ti chuai raih a.

Aizika chuan, "E khai! A kawng bul pawh kan rah hma hauha tlâwm ngawt tûr a ni hlei nêm. Mipain duh kan thlang tawh a, kan hlen thei lo a nih pawhin kan ral raih mai tûr a ni. Hlauhawm hmachhawn tûr kan ni dâwn a, chu vangin thi saah inngai tawp ula, mi, thi tawh chuan hlauh tur eng mah a nei leh tawh chuang lo ang bawkin, thi saa kan inngaihna lai kha chak nan kan hman a ṭul dâwn a ni mai. Kan lo dam chhuak hlauh a nih leh, kan duh leh mitthi tho leh te pawh kan la inti mai ta lâwng," tiin a han fuih zauh hlawm a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 21st, 2019, 6:17 pm

PASALṬHA AIZIKA

- Nunmawia Fânai

BUNG 23-NA

Zawlbûk an thleng a. Zawlbûk chhûng an luh chuan, a chhûnga lo awm zawng zawng chuan eng nge thil awm dân an hai loh vek hlawm avâng chuan, lo chhâwn zai pawh rêl lovin an lo melh rawn tawp ringawt a. Chu'ng kârah chuan Aizika leh mi dangte chuan ṭhut hmun an rem ve sap sap a. Chu hunah kher chuan zawlbûk chhûng boruak chu eng emaw tak boruak rit churh mai hian bawhin, engkim mai chu a chawlh hian an châwl duk ni ber hian a lang a. Thli fimin di thli far fêm a chhêm rik siau siau ṭhin thâwm lah chu, zan danga ngaihthlâk hlawh lo tak ṭhin kha a ni a. Mahse, tun ṭumah kher chuan zan dang ang lo tak maiin titi vawrh tum hmêl an awm mai rih loh avangin, thli fim a nat deuh chânga di thli far fêm ri leh sung sung ṭhin chuan an beng a verh tlâng a ni ngei ang, a rin zual deuh châng chuan a rik natna lamah an beng an dawh leh hâ ṭhin a.

Chu zân boruak awm dân vêl leh mi dang ho che zia chu Aizika chuan a man thiam nghâl mai a. Chumi avang chuan boruak tih zângkhai vat chu ṭhain a hria a. A vaibêl pak khûk talh talh pah chuan, "E khai! Ṭhiante u, khawvêl hmâwr kova ding ang maia khatia in han awm ni? Eng thil pawh hi lo thleng sela, kan hmachhawn dân azirin kan thaw a vengin a veng lo a ni ngai. Eng nge maw, in kova tla pawh ni lovah te a kimki zâwkah in han ṭan tlat mai ni? Ti teh u, naktuk lama kan kawng zawh tûrah khan ṭha lai deuhte min han hrilh zâwk ula maw le?" tiin thu bul a han ṭan a. Mahse, chuti chung pawh chuan, Aizika lam ṭang leh ṭang lo, ṭawng sual palh hlau vek an nih hlawm avang chuan tu mahin an chhâwn rih mai lo va.

A ni rêng lah tak a, Aizika hi a rûka phiarna leh bumna thanga âwk ni mah se, an khaw chhanna atâna a nun hlan pawh hnial lotu leh an ṭih êm êm tumpâng sual laka an khua lo chhantu a nih avangin, mi tam zawk chuan an ngaina a, a lakah ṭhat chhuahin an ṭan rawn em em a. Chutih lai erawh chuan, an khaw pasalṭhate lo thahsak a, an khaw nuho lu lo sûntir tawhtu a nih avanga haw êm êmtu, a thil tih ṭhat pawhin an thinlung a hneh ve theih loh mi tam tak an awm ṭeuh tho bawk a. Chumi a nih avang chuan, eng emaw ṭawngkam han chheh sual palh a awm hlauha intual vuak nghâl mai pawh thil thleng thei a nih avangin, ṭan lam kal ṭhuang tawh an nihna chuan ṭawngkamah leh che ziaah a fimkhurtir em em vek mai a ni.

Ni e, Aizika hi a tirah kha chuan, an lalin fin kherek chhuaha zin tûra sâwm lût a ni tih an hriatpui nual vek a. Mahse, an khuain dem an kai lohna turin, a lakah ṭhat an chhuah phawt hnu-a a thihna tûr lam pantir chu an khaw lungrualna a ni a. Chutih lai erawh chuan, chu an ngaih dân ang leh rilru put hmang chu an tumpâng sual a tihhlumsak avang khân, mi tam takah a laka rilru ṭha lo pu phal lo tûrin a thawk lian em em ta mai kha a ni a. Chu chuan lungrualna tlângah lêntir thei tawh lovin, khaw mipui rilru chu a tiṭhiang ta rual mai a ni. Chuti ni lo sela, tun ang zânah hi chuan tlangvâlho leh vâl upate chuan a thihna tûr hmun a panna tûr kawng chu, tha tho leh phûr takin, dâwt pawh pawisa lovin an sêp phûrpui ngawt ngei ang le.

Boruak rit tak kâra inepna thinlung awm rûn reng avang chuan, zawlbûk chhung chu titi phung eng eng emaw pawh lêng thei lovin a châwl duk zankhua hi a ni hrim a. Chumi avang chuan mutmu pawh zan dang aiin an tuah hma phah nghe nghe a ni.

Mut hmunah chuan Aizika chuan zawlbûk boruak rit tak mai, a hriat thiam phâk loh thlenga eng emaw awm chu a chhui dawn vêl a. Chuti tak maia boruak nei thil inthup awm chu, a hriat thiam phâk loh piah lamah eng tin tak inmûng ang maw tih chuan a rilru chu a kap deuh ûl reng a. Chumi avâng chuan, eng emaw lo inmûng ru sa tawh, beisei leh rin anga hlawhtling leh ta si lo awma hriatna chu a nei tel tlat bawk a. Mahse, chu thil avang chuan tlânchhiat a, thu zûk leh mai mai chu a tum lo hle thung.

Mi dang an hnâr kûk kûk tawh, muhil lo an awm tawh lo ang tih chuan Aizika chuan, sal hmeithai an tlawh chhuah te ina kal ṭul tihna chu a nei ta tlat mai a. Mi dang tih harh hlau tak chuan a mutna aṭang chuan a tho ṭham ṭham a. Tu mahin a thâwm an hre lo tih a chian hnu chuan, thâwm dîm takin zawlbûk bawhbel chuan a bawh liam pâr pâr a. Tichuan, thim zîngah chuan vân vârah vêng hmâwra hmeithai in chu chak takin a pan ta vang vang a.

Hmeithai in chu a va thleng a. Thâwm dim tak leh zâwi sup hian a han au sar sar a. Rei vak lo a auh hnu chuan a nu zâwk chuan hlauthâwng hmêl tak hian kawng chu a rawn hawnsak a. Siangbât a kân lût fel tih chuan hmeithainu chuan mei nun a han tum a. Mahse, Aizika chuan nun lo tura hrilhin, uluk taka a thu sawi ngaithla tûrin a hrilh ta zâwk a. Hmeithainu pawh chuan mei chu nun tum zui lovin, "Eng nge ni ta? Tun ang zân reia rawn lang ta ruang mai chuan eng thu pawimawh nge i rawn ken, han sawi ta che?" tiin inhawng takin Aizika chu a han bia a.

Aizika chuan, "Naktuk hian chi khur awmna lam pan tûrin kan chhuak tawh dâwn a. Mahsela, chuti maia pan nghâl chu ka tum loh avangin i hnênah hian i hna tûr rawn tuk che tuma lo kal ka ni," a han ti deuh tâwng a.

Hmeithainu chuan, "Aw le, han sawi ta che," tiin a lo chhâng a.

Aizika chuan, "Naktuka kan liam hunah chuan, he khua aṭanga chawhma kal vêla hlâ kan thlen hunah, hmun biru deuh leh hmuh samkhai lo laiah riah bûk kan sual ang a, pûk remchang belh tûr a awm hlauh zâwk a nih chuan chu chu a fuh viau zawk maithei bawk. Tichuan, kan inben bel tikah he lamah kan rawn kir leh dawn a ni. Tûn ang hun, mi mut reh leh vênthâwn tûr a tlêm lai hian kawtchhuah kan rawn chuang kai leh ang. Chumi hunah chuan, salho zinga zalen duha tlân chhuak duh apiang, mipa an ni emaw, hmeichhia leh naupang, tar chenin min rawn zâwm dawn nia. Chumi tûr chuan, nangni nufain kan liam veleh aṭangin, salho zawng zawng hnenah kan thil tum hi hrilh darh hna in lo thawk thung dâwn a ni," a han ti zung zung a. Hmeithainu chuan hre thiam tak hian a lu a lo bu nghat nghat a. Aizika bawk chuan, "Thil awlsam a ni dâwn lo tih chu i hre thiam ngei ang a. Chutih rual chuan, zalenna kawng hi awlsam taka hlen chhuah theih a nih lohzia pawh a hre chiangtu i nih ngei ka ring e. Chuvangin, kan mite an zalenna tur kawngah chuan, thih ngama kan beih hi a ṭûl tak zet a nia," a han ti leh sâ sâ a.

Hmeithainu chuan, "Mahsela, in kalpui turte hi an hnawksakin an lal tân hian an rinawm reng dâwn asin. Chumi laka fihlim theih dân chu i hre dâwn em ni?" tiin a han zâwt lêt kauh a.

Aizika chuan, "Kha kha zawng buaina tham a tling lo; ka lo ching fel vek mai ang. Aw le, ka sawi tûr chu ka zo dêr ta mai. Ka lêt tawh ang e, ka awm lo tih an hriat chhuah hmaa ka thlen leh vat a ngai si a. Dam takin le," a ti a. Khawmuang leh tawh lovin zawlbûk lam chu a pan leh ta nghâl vang vang a.

Zawlbûk a thlen chuan thâwm dîm tak bawkin bawhbel chu a bawh liam a. A mutnaah chuan muang chângin a mu zâl leh ta riai riai a. Rei lo têah chuan a muhil chhunzawm ve ta nghâl a.

Khua a lo vâr a. Tûkṭhuan te an ei kham chuan Aizika leh Kâwltea chu lal in aṭang chuan an inzui chhuak ta hnak hnak a. Muala an liam tûr chu lal fanu chuan hlauthâwng leh lungchhe ru tak hian leikapui dawh sân aṭang chuan a thlir vawng vawng reng a. An liam dâwn tak takah chuan, "Luhlulna hi chuan mihring hi a lo va ti-â thei ngai em! Mahse, a thu tiam tlân chhiatsan lova ding tlat mi erawh a ropui viau thung lawi si a!" a ti sap a. Chumi rual chuan a khawharnain a siam nge ni a, a hlauhthâwnna leh lungchhiatna zâwkin tih pawh hriat loh hian a mit aṭang chuan mittui hi a lo hnâm pâr pâr a. A mittui râwn hnâm pâr pâr chu tuai hul tum chung hian, Aizika chu a liam thleng rawkin a thlir reng a.

Chutah le, kawtchhuah an thlen chuan anmahni lo nghâktute zingah chuan an rin loh tak maiin, an feh chhuahpui tura lo nghâktute zingah chuan Lianchuhmânga leh mi dang panga zet mai hmêl chu an hmu tel ta tlat mai a. Chutianga rin loh tak maia chu'ng mite hmêl a han hmuh tel chuan Aizika chuan, "Aw khai! Kha lah, kan pasalṭhate chuan mi in rawn thlah dâwn a ni maw?" tiin a han bia a.

Lianchuhmânga chuan, "I rem tihna ngaichâng hmasa zet lova kan lo lawr ve ngawt hi min hre thiam dawn nia. Tukin zing tluan khan ka inngaihtuah a, hetiang khawpa kan khaw mite tâna thih i ngamzia i lantir tawh chung pawh a, kan lalin i lakah rilru chhia a la pu ru zêl duh hian ka lai a natpui êm mai che. Chuvangin, thih leh ruam khatah, dam leh tlâng khatah ti tûrin i bulah kan rawn kal ve ngawt mai dâwn a nih hi," tiin a chhâng a.

Aizika chuan, "A ni maw? Min va thlamuan êm i ṭawngkam chuan! Tunah chuan, mi sawmhnih lai kan tling ta reng mai. Hetiang chuan kan hlawhtlinna tûr pawhin a kawng min zuah thuisak deuh tawh ngei ang," a han ti charh charh a.

Chutah tlangvâl pakhat hian, "Tunah chuan, kan lalin a duh loh leh boral atan pawha a ui miah loh ka ni tawh a. Dama ka kir leh a nih pawhin, he lal hi chu ka bêl tawh kumkhua lo vang le," a rawn ti chhuak bûl hmuk a. Mi dangte pawh chuan an ṭhianpa thu sawi chu lo zawmin, "Belh tlâk loh lal lakah hian ka lêt leh tawh ngai lo vang," an ti ve sap sap hlawm a.

Chu'ng a'n hriat chuan Aizika chuan an inphun thinrim punlun dâwn tak ngialin a hria a. An thinrimna a punlun tak tak hma chuan, "E khai! Khati'n mahni lal an sêl lailâwk chiam chiam ngai lo. Kan hmaa hlen tûr awm hi hlen tumin ke han pên hmasa phawt ila, chumi hnuah, dama kan hlen chhuak thei ta a nih leh kan sêl duh chu sêlin, kan pan lam tûr chu kan thlang dâwn nia," tiin a han khap a. Chumi zawh chuan, "Ti rawh u le, kan pan tûr lam panin i han inchhawm tlâng ang u hmiang," a han ti leh a. Tichuan, kawtchhuah chu an chhuahsan ta sang sang a.

Khaw chhak lam panna ṭum chu zawha chawhma aia her deuh an kal hnu chuan lui pakhat hi an thleng a. Chumi hmunah chuan an chaw fûnte chu ṭhetin, chaw chhûn an han fâk a. Puar taka an inhnawh hnu, an chaw ei te âwm paha vaibêl an pak hlat hlat lai chuan Aizika chuan, "Le, min lo ngaithla lawk ula, ka thil tih tûr pakhat hi ka'n sawi lawk ang e," a han ti a. Anni chuan, "Han sawi ta poh che," tiin an lo chhâng a.

Chutah Aizika chuan, "Hei, in lal Zahleithanga'n thi tûra a ui loh vek kan ni hlawm a. A lakah pawh in lung a awi lovin in hel a ni tih pawh ka hria a. Chuvangin, kan lal rawn bêl duh in awm a nih chuan min han hrilh teh u," a han ti lâng lâng a. Anniho chuan inngaihtuah buai map lovin an aw an pawh nghal thuai hlawm a. Lianchuhmânga leh a ṭhiante pawh chuan, "Thihna hmunah pawh in kianga awm reng turin kan rawn zui che u a. Keini pawh hi kan lal lakah chuan kan hel tawh tih in hriat angin, in thu thlûkna lam apiangah chuan kan thle ve zêl tawh ang," tiin an lo chhâng ve bawk a.

Aizika chuan, "Aw le, kan lung a rual zâ tawh bawk a, kan kawng hmasa atana ka duh hi ka'n sawi ang e. Nizan khan zan laiah ka tei chhuak a, rem ruatna pakhat neiin, ruahman lâwk thil ka lo nei sâ diam tawh a. Chu chu, in khuaa lusei salte hi hruai chhuah a, kan khuaa hawpui vek hi a ni. Chu chu min pawmpui thei ang em? Min pawmpui thei lo a nih chuan, min pawmpui lotu chuan ka thuruk hi fam khawpuiah a lawipui ngei a ngai dâwn a nia," a ti leh charh charh a. Mi dangho chuan, "Zahleithanga khua chu kan hmelma khua a ni tawh alawm. Salte chu kan mite an ni tawh bawk e," tiin an chhâng a. Chutianga an hmin chhoh zêlah chuan, Aizika chuan a ruahmanna neih dân zawng zawng chu a han hrilh fai kêlh hlawm a. Uluk takin an ngaithla ṭhap a.

Aizika chuan a ruahmanna leh rem ruat dân zawng zawng te a hrilh zawh hnu chuan, hmun biru laiah chuan innghahna tûr bûk chu vanlai bûk sakin an han sa a. An sak zawh hnu chuan, an chêt chhuah hun tûr chu khua a thim hun chauh a nih rih avângin, khaw thim hun nghâkin an châwl ar ar rih hlawm a.

Chutianga khaw thim hun nghâka an ṭhut hahdam hlawm lai chuan, Lianchuhmânga chuan, "Zika, kan lal lakah hian ka rinawm viau ṭhin a, a tân hian thih pawh ka ngam em em reng ṭhin. Nang erawh ka hmelma i ni kumkhua tawh a, i lu lâk hi ka châk ber a la ni fan, tukin ka ṭhanharh thleng khân. Mahse, hetiang taka kan lal Zahleithanga'n a khua i muansak hnu pawh a, ṭhata lâwm tawh zâwk lo chea a han phiar ru zêl duh mai che hian ka lai a tina ve êm a. Chuvângin, a lakah hian ka hel lo thei lo a ni. I laka ka lo tihsual tawh kha chu siam ṭhat theih a ni tawh lo va. Nimahsela, i ṭhatna erawh ka theihnghilh ngai tawh lo ang," a han ti dap dap a.

Aizika chuan, "Lungrual taka hma lam pana kalpui tûr ṭhian ka chhar che hi ka lawm tak zet a ni," tiin a chhâng a.

Khua a lo tlâi ve hret hret zêl a. Khua a thim ta maw tih chuan bûk chu chhuahsanin khaw lamah an lêt leh ta vang vang a. An chak bawk a, kawtchhuah an thlen chuan zân pawh a la rei hman lo va. Tlangvâl nula rim an haw kim vêl awrh ang tih chauh hi a la ni a. Mi an la mut reh loh deuh avang chuan Aizika ruahmanna pawh chu a kal tluan leh tluan loh hriat a ni rih lo va. Chuvângin beisei taka lo nghah ngawt mai bâk tih theih awm ta lo chu, kawtchhuah lungdawhah chuan ngawi rengin an ngir khap hlawm a.

Nakinah, zan lai âr khuang inchhâwn thâwm a reh fel a. Mi an mut tui viau tawh hunah chuan, kawtchhuah lam pana rawn kal thâwm chu an hre ta ngei a. An rawn thlen chuan hmeithai te nufa leh mi dang sâwm vel hi an lo ni a. Chu'ng mite hnenah chuan Aizika chuan, "Ti zawng hi em ni in nih? Mi dang rawn kal tur an la awm em?" tiin a han zâwt a. Hmeithainu chuan, "La ni lo deuh e. Tam tham deuh chuan ke pên thâwm hi a na hma si a, pâwl thumah insiamin keini hi kan rawn hmasa a nih hi," tiin a chhâng a. Tichuan, eng mah sawi zui lêm lovin mi dang rawn thlen chu an lo nghâk leh ta ṭhap rih a.

Rei pawh an innghah hman hma chuan pâwl dang, sâwmrual vêl tur hi an rawn lang leh a. A hnu rei vak lovah pâwl dang, a hnung ber chu an rawn lang leh thuai a. An pi leh pute hriat lohva rawn bi bo an nih hlawm avangin, thuam rawn chuh an awm lo va, an zângkhai hle hlawm mai a. Chumi vang chuan an kal chak theih phah dâwn tih hriain Aizika chu a lâwmna a zual ru hle nghe nghe a.

Tichuan le, Aizika chuan, "Le, muangchânna hman a awm tawh lo va, kan khaw lam panin kan theih anga chakin i liam nghâl chûk chûk mai ang u le," a han ti a.

Kâwltea chuan, "Kan zinna lam tur kha engtin nge ni dâwn?" tiin a han zâwt a.

Aizika chuan, "Kan mite hian him taka kan khua an thlen hmasak hi a pawimawh ber. Chuvangin, an him hma chu kan vaiin kan chhawm rih dawn nia. Tichuan, an him hunah ro hran chu kan la rek leh dâwn nia. Min rawn ûm hmaa thui tak kan kal hman a ngai; i kal nghâl thuai ang u le," tiin a chhâng zung zung a. Tichuan, Pawithlun khaw lam panin thim zingah chuan an chak theih dân ang berin an kal ṭan ta nghâl vang vang a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 23rd, 2019, 6:05 pm

PASALṬHA AIZIKA

- Nunmawia Fânai

BUNG 24-NA


Zân khaw thim hnuaiah, inchhuih leh awlh ṭhin chunga thui khat tak an kal hnu chuan Aizika chuan, "Khai le, heti ringawt chuan kan kal sâwt lo êm mai, meichher i chhi tawh ang u khai. Meichher nen chuan khawvâr hmain hlate khua kan thlen hman phah ngei ang," a han ti a. Chu veleh tlangvâlho chuan chhun lama an meichher puah sâ chhit kaina tûr mei an han chhêm nghâl thuai a.

Meichher an chhit kai lai chuan Lianchuhmânga chuan, "Ti teh u, nakin lawkah min rawn ûm zui anga inkah pawh a ngai thut thei, kan sam zial hi i thlâk ang u. Taichenga thlah ten an sam phiar an chhipa an chhuang leh luah ṭhin ang hian, kan sam zial hi chhîpah i chhuang ang u khai," tiin an sam zial chu thlâk a han rawt a.

Aizika chuan, "Lêt leh tuma chhuak kan ni chuang em ni? Min hre mah se, kei, a pawi ka lo ti vak hlei nêm," tiin a chhâng a.

Lianchuhmânga chuan, "Min la hriat rih loh hi a ṭha a ni. A chhan chu, kan chhungkhat lainate chu a rorêlna hnuaia awm an la ni a. Hetianga kan khawsak dân hi a hria a nih vaih chuan, lal Zahleithanga nunrâwng nawm chenna zakhua a nih phah thei tlat a ni. Chuvangin, fimkhur tluk a awm thei rih tlat lo," a han ti leh a.

Aizika chuan, "A ni dâwn teh tak e a! Chu lam chu ka lo ngaihtuah thleng tel hauh hlei nêm. Min rawn ûmzui ngei ang tih chu chiang sa a ni a, kan lo inhriattir loh chu a ngai ngei dâwn a nih chu," tiin a chhâng a. Tichuan, an sam zial chu an chhipah an chhuang ta luah hlawm a. Chumi hnu chuan kal an rem leh nghâl thuai a. Pâwithlun khaw lam chu chak thei ang berin an pan leh ta sauh sauh a.

Kâwl a lo êng a. Ni pawh a rawn chhuak suar suar tawh tih chuan Thumnakpâr ram chin chu an pêl fel ve chiah a. Hmun nuam leh remchâng laiah chuan an han châwl dat a. Aizika chuan, "Lianchuhpa, nang hriatna ṭhaah, kan hnung lamah min rawn ûm thâwm âwm te hriat phâk i nei mial em?" a han ti a. Chutih lai chuan mi dang zawng chu ngâwi reng hian an lo ṭhu ṭhap hlawm a.

Lianchuhmânga hi pasalṭha ni âwm rênga piang, rim hriatna leh benga ri hriatna nei ṭha em em mai hi a ni a. Chu chu a pian ken ve rêng niin, a huaisenna nen an han ṭan rual phei hi chuan mi tâwrhhlelhawm leh chungnung tak a nih phah fo rêng a. A thihna tûrah vawi tam tak a lo him phah tawhin, hlawhtlinna tam tak pawh a lo khumtir tawh bawk a. Chu chu Aizika hian a sala a tântir lai khân a lo hriat rûksak khiau tawh a ni.

Chutianga Aizika'n a han tih chuan Lianchuhmánga chuan Aizika chu mak ti tak hian a han thlêk hâ a. Aizika'n a thil hriat theihna a hria chu mak a ti ru êm êm mai a. Mahse, chu lama han buaina hman leh han inzawh hman a nih loh avâng chuan, eng mah sawi lovin a han chhing vang vang a. Chumi hnu chuan a beng chu lei siin a han dah leh a, a ngaihthla leh vang vang a. Chutah, "Hla taka sapui kut hru thâwm chu ka hre ngei mai a," a han ti charh charh phawt a. Chumi zawh chuan a aia chîk leh uluk zâwkin, lei si-a beng nghat chung chuan a han ngaithla leh vang vang a. Chuta a rawn tho chhuak leh chuan, "Min rawn ûm zui ngei chu a nih hmêl e. Pialtlêp, leiin pan taka a khuh chunga ke pên ri kung kung ka hre tlat mai. He hmun hi meichher kan dêtna hmun kan thlen hma, mual awihtlân pang kan vêl hmun kha a ni a. An awmna chu a la hla khat viau a nih rih hi," a han ti leh a.

Aizika chuan, "A nih chuan, Kâwlte, nang leh mi panga vêl hian kan unaute hi hruai ula, kan khaw lam pan vang vang tawh u. Keini'n, Lianchuhpa hovin kan lo dang chat ang e," a ti ta zung zung a. Kâwltea pawh chuan engtin maha hnial buai lovin, Aizika sawi ang chuan an zinga mi panga, la nau bik deuhte nen chuan sal tlân chhuakho chu hruaiin an liam zui ta nghâl a.

An liam hnu chuan Aizika leh Lianchuhmânga ho chuan mi sâwm leh pali lai chu an la awm a. Aizika chuan, "Ti rawh u le, hnah ro i han fawm khawm thuai thuai teh ang u," a han ti a. Hman hmawh takin hnah ro chu an fawm khâwm ta zung zung hlawm a. Rei lo têah vûm hnawk tham chu an fawm dêr a.

An hnah ro fawm chu an han hâl vâp leh darh hnu chuan, ûma an tui in bâng chuan an tidiak a, an hmet kâwi leh ta vek a. Anmahni rawn ûmtute chuan an hriat mai theih lohna tûrin an hmai leh an taksa pum deuh thâw chu an chulh dum leh hlurh hlawm a. Chumi hnu chuan Lianchuhmânga chuan, tlangvâlho hnênah chuan, "Min rawn ûmtute hi, nimin lawk thlenga kan u leh nau, kan ṭhian leh hnaivâi tak takte kha an ni a. Mahse, tûnah chuan, in thihna tûr pan tûra Zahleithanga'n a thlan lai che u a, in laka khawngaihna tlêm pawh lantîra ui tum miah lo che u an ni tih kha theihnhilh lo ula. Unau in nei tawh lo va, hmangaihtu pawh in nei hek lo. In hmêlma an ni tawh a, an lakah dimdâwi leh lainat in chhuahin in tîm eih tûr a ni lo vang," tiin a han fuih sauh sauh a. Chumi zawh chuan Aizika lam hawiin, "Zika, he lai hmun hi chu lo lambun nân chuan a ual-au lam deuh hret chu a ni e. Keini lam hi kan tlêm riau bawk si nen hian a rem ṭeuh dâwn lo pawhin a lang viau mai. Chuvângin kir leh ila, kan pelh tâk mual lungthu kâr cheh ruam kha lo dan chah nân hmang ila a ṭhat ka ring," a han ti a.

Aizika chuan, "A ṭha zâwk ngei ang; ti rawh u, i lêt thuai ang u," tiin a chhâng a. Tichuan, an lo kalna lamah chuan an lêt ta thuai a.

Mual lungthu kâr cheh ruam an thlen chuan Aizika chuan, "In mi leh sa ni ṭhinte nena inhmachhawn tûr kan ni a. Chuvangin, râlpui phiara phiar lovin, thah an ṭul tak zet a, a loh theih loh a nih loh chuan tu mah thah loh a ṭha ang. An lêt lehna tûrin an hlauh atan an inrin loh lai takin kan ṭhâwng ang a, ûm lêt kan tum hlauh dâwn nia. Chutianga a theih ngang lo a niha leh, a ngêng chhun zual chu duh leh kan that chauh mai ta lâwng," a han ti dap dap a. Chutah amah vêk chuan, "Heti hian, mual khat, a fual ta berah chauh hian inzâr ila, an lo pal tlang tûr hi lo dang chauh ila a ṭhat ka ring e. Eng nge in ngaih dân?" a han ti leh a. Mi dangho chuan, "I remruatna chu a finthlâk bawk alawm," tiin an chhâng a. Tichuan, an rawn paltlang tûr mual fual ta ber pang pêrah chuan an lo châng ta ṭhap a.

Rei khat tak an lo nghah hnu chuan Zahleithanga mi leh sate chuan mual lungthu chu an rawn thleng ve ta ngei a. A kâr ruam chu an rawn zawh lût kim ta tih chuan Lianchuhmânga chuan, "Sawmthum rual zet lah ni ka ti," a han ti sap a. Aizika chuan, "An tlanchhe thâwm a lian deuh dâwn a ni mai alawm. Rawn hnai zêl phawt teh se," tiin a chhâng lêt sup a.

An rawn hnai zel a. Kah nuam tâwk vêl an ni tawh tih chuan an tawmna aṭang chuan Aizika chu a rawn ding chhuak to va. Ring deuh mai hian, "Kir leh zâwk rawh u. A nih loh chuan tu mah kan zuah dâwn lo che u a nia," a han ti lâng lâng a. Chutianga aw rawn chhuak thut chu an rin loh thil tak mai a nih avâng chuan an ding chawih hlawm a. Aw lo chhuahna lam chu an han hawi chhoh chuan, Aizika chuan anmahni lam hawiin silai hi a lo lek to to a, a bulah chuan mi dang pasarihte pawh chu an lam hawia silai lek to to chung chuan an rawn ding chhuak dum ve nuau hlawm bawk a. Chutianga inhnawih dum vek chunga silaia lo tintute chu tu nge an nih an hriat loh bâkah, an inhnawih dum nuau mai chu an ṭih phah deuh tlat hlawm avang chuan chêt han thawh mai ngam lovin an ding ngawi ṭhup mai a. Chu lai tak chu remchângah lain Aizika chuan, "In lêt dâwn nge kan inbei dâwn?" tiin a han au khum leh a. Anni lah chuan chêt thawh hmasa apiang chuan an lu an hloh nghâl dâwn tih inhre thiam ve hek le, chêt thawh ngam lovin an ding ngawi hmuk a, lêt tum âwm erawh chu an awm lêm rih lo va. Chutih lai chuan Aizika bawk bawk chuan, "Him taka lêt thei in nih lai khan lêt thuai rawh u. Keini pawhin kan kîrsan ve ang che u. Thisen inchhuah kher hi kan tum a ni chiah lo a nia tûn ṭumah kher hi chuan," a han ti leh lâng lâng a. Chu thu a sawi zo chiah tih chuan Pâwi pasalṭhate zinga pakhat chuan a luhlul butut chhuahin, silai dâwtin a melh rawn reng a ni tih inhre chung chuan a silai chu a chuh ta thut mai a. Aizika chu rawn kah tuma a silai chu a lek dâwn chiah lai chuan Aizika silai chu a puak ta thâwr mai a. Silai chuhtupa chu a ṭhingṭhi hnawk a, a mal a dawm thi ṭuam ṭuam ta mai a. Chu veleh mi dang sarih te chuan an silaimu ving ri an hriat theih tûr âwma hniam, an lu chung lawka silaimu thlâwk tûr chuan an silai chu an hmet puak zui ve nghâl dur dur bawk a. Chumi zawm zat chuan mi dang la rawn ding chhuak ve lote chu rawn ding chhuak lehin, an lu chung zâwnah bawk chuan an silai mu chu an ving thlâktir leh fua fua mai a. Chutah zet zawng, "An tam lutuk! Kan mang vek ang," tiin Zahleithanga pasalṭhate chu sahimna zawngin an phili buai ta nuaih nuaih a. Tu mah chêt laa rawn kap lêt ve ngam awm lovin, lu hloh hlauvin, mual lungthu kâr cheh ruam chu chhuahsan tumin an tlân lêt ta sung sung hlawm a. An hnungah chuan Aizika kahpa pawh chuan a ke ding lam hnûk suih suih chung hian a ṭhiante chu a ûm ve hnû hnû bawk a. Chumi chhung chuan Aizika leh a ṭhiante chuan an silaimu chu an thun leh nghâl thuai thuai a. Silaimu thun pah chuan Aizika chuan, "A mal ruh ka fuhsak lo hlauh mai; a tawrh rei vak dâwn loh khu," a ti sup a.

Chem sen rawih ngai kher lova chutianga an rin ai maha awlsam a, anmahni rawn ûmtute an lo hnawh lêt theih avâng chuan Aizika leh a ṭhiante chu an lâwm hle mai a. A remruat dâna finna leh rem hriatna a neih rûk riauvah chuan Aizika chu a ṭhiante chuan an fak rawn liam liam a. An zinga hruaitu ni tlâkah ngaiin, zui tlâk a nihna chu an ringhlel lo hle ṭan bawk a.

Tichuan le, an hnawh lêta ten pâwn rawn chhuah leh an tum em ti-a thâwm an han ngaichân leh deuh vang vang hnu chuan, eng thâwm mah hriat an nei zui ta lo va. Mahse, inbum awhna thil thleng thei a nih tlat avângin, an kir hlen ta em tih chian tûrin Aizika chuan Lianchuhmânga hnênah chuan, "Lianchuhpa, ti teh, an kir hlen rêng em i han fiah teh rêng ang," a han ti a. Tichuan, Aizika Lianchuhmânga nen chuan Zahleithanga pasalṭhate chu an kir leh kir loh chian tûrin, an chân khân aṭang chuan ruam lam chu panin an chhuk thla dûn ṭham ṭham a. Mi dangte erawh chu, an chân khâna lo nghâk tura an tih avang chuan chu lai hmunah chuan an lo awm rih thung a.

Thui ngial, fimkhur leh muangchânga an zui lêt hnu pawha eng riva mah hriat an neih loh avangin, Lianchuhmânga chuan, "An kir hlen a ni ngei ang; thisen rim a nam pawh ka hre tawh dêr lo. Awm hnaivai sela zawng, thisen thar rim hi chuan ka hnâr hi a ver var zêl a nia," a han ti a.

Aizika chuan, "A nih dâwn hi, an ṭhianpa thi far pawh a zuih ral raih mai. An hnu chhui hlau phengin an hup phui dêr tawh a nih dâwn hi. An hnu erawh a pherh ṭha veng vung hle mai,!" tiin a chhâng a. An kir hlen ta tih an chian tâk avang chuan muang dapin an kirsan leh ta a.

An ṭhiante bul an va thlen chuan, an awm hmun aṭanga rawn chhuk tur leh an kir hlen a ni tih chu an han hrilh a. Anni pawh chuan an chân khân chu an rawn chhuksan ta diah diah a.

Aizika chuan, "Ti hi chuan, kan ṭhiante kha ûm leh ngat ngat phawt mai ang u. Thim hma chuan kan in-ûm phâk hman mai ang chu maw," a han ti a. Tichuan, an ṭhiante leh an sal chhan chhuahho chu ûmin an liam leh ta nghâl vang vang a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)