PASALṬHA AIZIKA BY Nunmawia Fanai 1- 35

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: PASALṬHA AIZIKA BY Nunmawia Fanai 1- 25

Unread post by Ngaia » February 24th, 2019, 7:07 pm

PASALṬHA AIZIKA

- Nunmawia Fânai

BUNG 25-NA

Chutia an sal chhan chhuah tâkte an hma lama kal an ûm ngat ngat hnu-ah chuan, ni tlâk dâwn hnaihah, 'Nauchhar lui' an tih kama an lo chawl lai chuan an va ûm phâk ve dâwn ti tuai ta a. Aizika leh a ṭhiante hmêl an lo han hmuh thutah leh, an la hlat tham deu'vah chuan an taksa leh hmai vêl an hnawih dum hûl mai nen, chu chu an thlanin a chiah râng nuau mai bawk si chu an hmêl lan dân a lo danglam viau a ni ang, an lo phâwk hrâ hrâ hlawm a. Mahse, Aizika'n, "Kan hlauhawm lo ve, râl kan ni lo ve," ti-a a bân a han vai hnu chuan an hawi her pawhin a ngai leh ta hlawm a.

Chawlh eih nei lova rawn ûm ngar ngar an nih avângin kawng laka kawr tê ilovah pawh han insil faina hman nei hek lo. An thleng hlawt chu eng dang mah sawi lovin, Pâwi tlangvâlho chuan an puan ven an phih thla hlawk a, han zahpah eih nei lêm lo hian til thên nawlh nawlhin Nauchhar luiah chuan an tlân lût sap sap hlawm a. Chu chu an mi chhan chhuah zinga hmeichheho chuan en ngam lovin, "Awi karei le'h! Chu'ngho mai mai chu!" tih leh, leh lam hawia an mit hup châwih châwih chu an rual sap sap hlawm a. Chutianga a ṭhiante ho zawng zawngin tîmna nei map lo va, an mawng sek luia an tlân luhpui ṭeng ṭeng tâkah chuan, Aizika lah fiamthu lo duh ru ve bawk chuan, "Zah te zawng, a tawrh mah peih hrim chuan kan tuar chhuak zêl alawm. Khawii nge, zah vânga thi an la awm loh hi. I'n thên lût ve nawlh nawlh mai ang aw," tia au lêng lêng chung hian a puan ven chu a phih thla ve lawk a. Dai dul lam panin a tlân thên lût ve ang nawlh nawlh a. Chutianga Aizika ber pawhin a puan ven phelha lui lam a pan ve tâkah chuan patlingho zinga pakhat chuan, "Lêngi chan aiah han chiah dai duk hlawm teh u. Uanpui in chang thiam narawh e," tiin a lo fiam zui zoh hlawm a. An nui ho dar dar a.

An han intifai zo va. Ni a tla dâwn suar suar tawh tih chuan Aizika chuan, "Tunah chuan ûm zui leh râl ṭi kan ni tawh lo bawk a, kan chauvin kal zêl zia kan ni rih lo ve. Hetah hian riah hmun kan sual mai ang a, vârṭianah kan chhuak leh zâwk dâwn nia. A ṭha kan ti mai em?" a han ti a. Mi dangho chuan ṭha an tih thuin an lo chhâng tliar tliar hlawm a. Chutah Aizika vêk chuan, "Kan buhfai bâwk ṭît ṭêt hi chu ka tla tla thei mai ang. Mahse, a hmeh tûr lam hi kan chham deuh dâwn tlat thung mai a. Chuvangin, kei leh Lianchuhpa hian therhlo ilo vehin kan bul hnai ngaw vêl hi kan han tuam ang a. Mi dang zawng hi chuan riah bûk sualin a rem dân ang angin chawhmehte in lo dap ve mai ang a. Mahse, chin hriat a ni lo va, sapui ilo leh râl dang tawng thut thei kan nih kârah, kal hrang leh fâl bik awm lovin, in-au phâk rengin awm hrâm in tum dâwn nia," a han ti zawm leh zar zar a. Mi dangte chuan hre thiam takin an aw an lo pawh leh sap sap a. Tichuan, Aizika leh Lianchuhmânga chu silai nên an inzui chhuak dûn zui nghâl a. Mi dangte pawh an tih theih ang tâwk tâwk tiin, a ṭhenin dân ûm an la a, a ṭhenin lui dungah tumbu leh chakawk ilo an vai a, a ṭhenin thing fawmin a ṭhenin bûk an sual chûk chûk bawk a. Hmeichhia leh tar lamho erawhin an bûk sakna kawtah chuan mau bûra chaw chhûmin ei an rêl ve hlawm thung a.

Chutia, Aizika leh Lianchuhmânga therhlo ilo vaia thang chuan, ni pawh a liam fel tawh tih-ah chuan kawr te hnâr kin an chuang chhuak chho va. A puallâwi pang pêr tlâk dêng ni kang lai tak maiah chuan, râlkhata sakhi chal tuaitaw rah chhara lo bûr ngar ngar hi an hmu fuh hlauh mai a. Chu sakhi lah chu a zâng hâng chi niin a hrawl hraih reuh lehnghâl a. Sakhiin a rawn hmuh ve hmâ chuan an bula perhte buk phênah chuan an tawmsan vat a. Aizika chuan, "Tun ang favâng a inṭan chho chauh lai kârah, he laiah tuaitaw rah te a lo tlâk hman dêr bîk mai le. A hma ve vat vat hle mai," a han ti sap a. Lianchuhmânga chuan ngawi rengin a lu a lo bu nghat a.

Chutah Aizika bawk zawi sap hian, "Lianchuhpa, sakhi lu i ai tawh em?" tiin a han zâwt a.

Lianchuhmânga chuan, "Ka la ai miah lo mai. Ai tûr pawhin tawn fuh ka la nei hauh lo. Chu chu eng nge min zawhna chhan teh khauh chu ni?" tiin a chhâng a.

Aizika chuan, "A nih hlauh chuan, va sai dawp mai teh le. I sa lu chu ka aihsak dâwn che nia," a ti leh a.

Lianchuhmânga chuan, "A hnung zuitu zâwkin hmingṭhat an khum ngai lo ve. Nangin han sai zawk rawh khai," tiin a ṭang ve tlat thung a.

Aizika chuan, "Thang i chhuah theihna kailâwn pawimawh em em i hmaah a ding a, i hawisan anga maw? Tlâwmngaihna chi a ni lo ve; a liam hma sâwn han sai thlu dawp teh khai," tiin a han bur bun leh tlat a. Chutah zet chuan, Lianchuhmânga chuan a ṭang zo dâwnin a hre ta lo va. Tichuan, chu sakhi chal ki mawi zet maiin ngampa taka tuaitaw a tlân lai chu kah nuam tâwk tûra hnaiah a veh phei ta ṭham ṭham a. A duh ang tâwka a tin hnu chuan a silai chu a hmet puak dur a, zakdawhah tak mai hian silaimu chuan fuhin, silaimuin a den ruala inperh kâng zawt chu leiah a tla zawi ta hnawk a, a leng faih faih a, a chalchâng zui nghâl thuai a. Chu veleh Aizika chuan, "Aw hawi! Pasalṭha kut nge nge a hmui ngei mai ka ti! Khatiang tak khan silai i lo kâp thiam a ni maw? Lah lum hlawl ringâwt," a ti lâng lâng a. Lianchuhmânga chu a rawn hawi lêt zauh a, a nui suk a, sakhi tlûkna lamah chuan a phei ta nal nal a.

Sakhi bul a va thlen chuan Lianchuhmânga chuan a silai hlo chu a thun nghal mawlh mawlh a. A thun zawh rual chuan Aizika pawh chu a rawn thleng chhunzawm ve nghâl bawk a. Lianchuhmânga chuan sakhi zakdawhah chuan a thi chhuahna chhilh chiahin a ke ding lam a han hlâng ar ar a. Chumi hnu chuan,

" Khisa e, sen ziar mai law, thlang khat e, i sa kan lâka'n e,
"Phûlzing e, vawng zauh u law, manglian e, zu i bik hun u aw,"

tiin hlado a han chham vang vang a. Chumi zawh chuan a silai chu a kâp puak dur a. Aizika pawh chuan chumi zawm zat chuan a lo lâwn chhunzawm ve nghâl awlh a.

Silaimute an thun zawh leh hnu chuan Lianchuhmânga chuan, "Sa lian tham a ni lo bawk a, hetah hian phawk hlawk hlawk ila, i in ah sem mai ang hmiang?" a han ti a.

Aizika chuan, "E khai! Ni lo ve a! Kan ṭhian, kan pi leh pu ten a pum ngeia an hmuh ve a itawm alawm le, hetiang sakhi chal mawi lutuk te chu!" tiin a chhâng a. Chu veleh Lianchuhmânga chuan a sakhi kah chu a ke ve veah chelhin, inchawia put mai a han tum a. Aizika chuan , "Lianchuhpa, dah teh, dah teh. Kha'ng kha chu ka tih tur alawm; keima'n ka'n khangpai haw ang e," tiin a khap a. A bula hnahbial hrui zungte tiah dâwn mai kawihrui zamtu chu a phih dawk zawk a. Chu chuan a ke hnung leh hma chu a phuar sawk sawk a, a inchawi nawlh a, a khangpai ta nawl nawl a.

Bûk lam pana an kal lai chuan khua a thim hnai viau tawh a. Hnahkhâr hmun an kal lai chuan, chung lam an han hawi chu vahrit nupa hi an chung hnahkhâr zârah chuan an lo kai ṭhiang ral mai a. A pâ zâwk chu a hnuai lam zâwkah awmin, a nu chuan a rawn nghêng rial a. Aizika chuan a sakhi khangpai pawh chu nghat lêm lovin, tin pawh tin mang lo hian, a silai chu a lek chho fel tih chuan a han hmet puak thâwr a. Vahrit nupa chu a hma hlam thum vêl lekah chuan an rawn tla ri dûn dawp mai a. Chu chu Lianchuhmânga chuan Aizika khalhin a va chhar thuai a, a ak dûn mawlh mawlh a. Tichuan, bûk lam panin an inzui haw dûn ta nal nal a.

Bûk an thlen chuan khua a thim chhelh tawh a. Bûk nghâkho chuan zau nuam helh hawlh tak mai hian, mipa leh hmeichhe riahna tûrin bûk pahnih an lo sa ut mai a. Bûk leh bûk inkâr chu hlam nga dâwn laiin an tizau va, a kârah chuan meipui an lo chhep hluah mai bawk a. Mei ênga Aizika sakhi khingpai an han hmuh chuan, "Zika nge nge, i kut a hmui ṭhin mang e. I zârah sakhi sa kan ei dâwn chu a ni reng mai! I malsâwm bik mang teh tak e," tiin pa upa lamte chuan an lo chhâwn a, an fak rawn liam liam a. Aizika chuan, "Keia kah ve theih zia a ni lo he sa zet hi zawng. Lianchuhpa kut hmui zâr ka rawn zo lek chauh a ni e. Ani hi awm lo sela chuan, hetiang sakhi chal mawi lutuk ruang hi bûk kan rawn thlen hauh lo ang le," tiin a chhâng a. Chu veleh Lianchuhmânga chu an fak rawn leh ta sap sap a.

Khua a thim fel reng tawh mai a. Meipui chu êng deuh maiin an han chhawm a. Chumi êngah chuan sakhi chu an han chan rawn ta bawrh bawrh a. An hnehsawh hlawm ngang bawk a, kâr lovah an chan zo thuai a. A ṭhen an rêp a, a ṭhen meipuiah chuan an hem hmin sen ta ṭhap a. Tichuan, sakhi sa hem hmin nen, bûk lo nghâktu tena an tumbu khawrh leh eng thiam thil thil emaw hmanga dâwnṭialrual an mante mau bura an lo chhum pawlh fur mai hmeh chuan, puar êl euhvin zanriah chu an kil ta a.

Zanriah an ei kham chuan, an zanriah kuang âwm chuan rei vak lo chu an han titi khawtlai zawk a. Chumi zawh chuan mut zai an rêl ta a.

Mi dang an mut reh a, an muthilh vek hnu zanlaiah chuan, an bûk kiang maiah chuan sapui hian a kut hi a hru ri hrâwih hrâwih mai a. Chu chuan Aizika mu tui lai chu kai harhin a mutna aṭang chuan a tho ṭham ṭham a. A mutna kianga a silai tun leh chempui chu chuhin, pâwna meipui chhehna lam pan tum chuan bûk chhûng chu a chhuahsan ta ṭham ṭham a.

Meipui chhehna bul a va thlen chuan Lianchuhmânga hi thâwm ngaichângin a lo ṭhu kûl khan tawh a. Aizika a rawn hmuh veleh Lianchuhmânga chuan, a kuta thâwm dîm tûra lo zaizir pahin hmeichhe riahna bûk leh an riahna bûk inkâr mei êngin a chhun phâk leh phâk loh va, sapuiin a hrût chêt hnim hnahte chu a lo kawh hmuh vat a. Chu chu Aizika'n a han hmuh chuan a lu a bu nghat a. A rawn zuan thut pawha lo kâp nghâl thâwr thei tûrin chîk tak leh inring rânin chu lam chu a thlêk ve ta ngat ngat a. Chutianga an thlîr dun rân rân lai chuan meipui chu a hân deuh duk a, a ên chin a tâwi ta tuk mai a. Chu veleh sapui chuan a huangtau chhuahin rûm ngul ngul chung hian a rawn hnaih hrut hrut zêl a. Mei êng a thim zêl a, a rawn hnai ve telh telh zêl bawk a. An din hmun chu ṭha dâwn lova hriain Aizika chuan, "Nang, mei kha han chhawm êng rawh khai. Kan din hmun hian a chhe ber a thleng thei dâwn tlat mai. Keiin a rawn hnaih zêl tûr hi ka lo vêng ang e," a han ti sâ sa a. Lianchuhmâng chu an hnung lawka meipui chhâwm êng tûr chuan a lêt phei thuai a. Meipui a han chhâwm ên leh hluahah chuan sapui chu a thim chin chuh tûrin a hnungtawlh lêt leh ṭhum ṭhum a. Mei a han rêm deuh veleh chuan a rawn hnai leh zûl zûl ṭhin a. Chutiang rêng rêng chuan an invil ngat ngat reng mai a.

Chutia sapui che vêl a han hmuh chuan Aizika chuan an sapui hmachhawn lai mêk chu sapui satliah ni lovin, sai râl an tih ang chi, a lu pawh arbâwm tiah lâwng mai, han mal beih huphurhawm zet tûr hi a ni tih chu a hre thei thuai a. A bawk vâk ṭhum ṭhumin a hrût chêt, a hnim tawng chin a sân dân leh, a vâng lamin hnim a tâwn dar zau dân aṭang te chuan, han pâwng zuam ngawt chi a ni lo tih te chu a hai lo sâwt hle bawk a. A chhan chu, tûna mi aia te zâwk fê mai hian telpui a man lai a lo hmu tawh a. Chu chuan a duh tâwka telpui a han chum dup a, a phel phawk mai lai a lo hmuh tawh aṭang khân, tuna mi phei hi chuan anni ang mai mai hi chu an ring ruh a elh tliahsak awlsam dâwn lutuk tih chu a hai hauh lo. Mahse, chutih rual chuan, a silaimu dang thla thei tur khawpa vun fei leh ruh chang a neih bik lohna lai chuan, a hmaa tlâwm mai a tumtir bik hauh lo thung a.

Rei ngial an invên tawn rân rân hnu chuan, an meipui chu chhawm belh tûr awm tawh lovin an thing fawm sa chu a zo titih ta dêr mai. An invênna ber an thing tuah chutianga a han zawh chhoh zêlah chuan, loh theih lovin sapui nên chuan an inhnaih ta hret hret a. Meipui chu a êng a chuai zêl a, sapui pawh chu rûm ngul ngul chungin a lo hnai ve hrut hrut zêl bawk a. Chutih lai chuan bûka mu ho pawh sapui thâwmah chuan an harh vek tawh hlawm a. Tu mah rawn chhuak ngam awm lovin, an sa himna dapin bûk chhûngah chuan an inhnawh ngawi ṭhiap hlawm a. Mahse, Kâwltea erawh, Aizika tâna thih pawh ngam reng a nih avangin a silai leh chemtum chuhin pâwna Aizikate kiangah chuan a thawk chhuak ve tlat thung a. Meipui êng leh êng lo kârah chuan Aizika, Kâwltea leh Lianchuhmângate chu mi dang nunna chhan him turin inring rânin an ding to hlawm a.

Meipui chu a thim zêl a. Chutia a thim chhoh zêl kârah chuan thli hi vawilehkhatah a rawn thaw vûk a, meipui êng chuai lam chu a rawn chhêm thim ta ruai a. Chu veleh chu hun remchâng hmasa chu chuhin, anmahni zuan tuma bawk hniam suai reng tawh sapui chuan, a awmna hmun aṭanga a hnaih bera awm Aizika chu rawn bitum chatin a rawn inkhawh chhuak ta zawk mai le. Chu lai tak chuan Aizika chuan a silai chu a'n hmet puak ṭhuai a, sapui na tuar pawh chu a ṭe tuar mai bawk a. Silaimuin a âwm bâwra a den nat êm avangin, rawn bawh thlen ngei tuma rawn zuang kha rawn thleng zo lo deuhin, Aizika hmaah chiah chuan a na tuar chu a rawn bawk rûm ta ngul ngul mai. Rawn thawh leh uaih pah chuan Aizika chu a ke hma ding lam chuan a rawn ban zuau a. Chumi hun chhûng chu a rei loh êm avangin Aizika pawh chu a tawlh hnung hman mai bik lo va. Chumi vâng chuan sapui chuan a bân vei lam chu a rawn ham thipsak vawr hman a. Chu lai chu Kâwltea leh Lianchuhmângate tân lah, han kah rawn dâwn se, thim thamah mitin khua a hmuh fiah theih loh kârah Aizika an fuh ang tih a hlauhawm nen chuan an lo kah rawn mai thei bik si lo. A kah remna tûr lai chuhin ṭan hmun an han sawn thûl. Chutih lai chuan Aizika chuan tawlh hnun hrawt pah hian a kut vei lam hi a thing vawr a, a kut aṭang chuan thisen hi a rawn per chhuak ṭhawt a. Chutah Aizika chu, "Uai! Chuti maia tlâwm tûr chuan min ring deuh elo?" tiin a au chhuak ṭhawt a. Chu chu sapui rûm ngul ngul thâwm kâra a luruh chema sah rik bup bup ri chuan a rawn zui nghâl a. Kâwltea leh Lianchuhmânga'n Aizika ṭhelh lo zâwnga sapui kah tuma ṭan hmun an siam chhûng chuan, sapui chu Aizika hmaah chuan luvun thlêr neng nung leh luruh keh nûlhin a lo bawk zawi reng tawh a. Aizika pawh chu a bân aṭanga thisen chhuak a tam êm avâng chuan luhaiin, sapui nunna nei tawh lo chungah chuan a bawk zawi ve hnawk mai bawk a. Chu chu Kâwltea'n a han hmuh chuan a thi ta mai emaw tiin, "U Zik, u zik, thi thei i ni lo a nia," tih leh Aizika lama tlân phei chu a rual nghâl a. Lianchuhmânga pawh chu a rawn thleng phei ve thuai a. A han chian a, sapui chu a lo thi reng tawh a, Aizika pawh chu a lo harh chhuak ve leh mai bawk a. Mahse, a eng lai lai nge hliam an hriat loh avang chuan an ngaih chu a la ṭha chuang lo va. Tichuan, "Lo chhuak ula, meipui hi i chhep vat teh ang u. Zika a inhliam tlat mai," tiin Lianchuhmânga chu a au tuar tuar a. Chu veleh bûk chhunga awm zawng zawng chu an rawn tlân chhuak nghâl vat a. Thim zingah chuan thing an fawm nghâl chûk chûk a. Meipui chu an chhep êng leh ta hluah a.

Mei ênga an han chian chuan Aizika bânah chuan sakei tin luhna, hmun thuma thûk deuha inrin hrâwih mai chu an hmu a. Chumi aṭang chuan thisen hi a rawn hnâm ṭuam ṭuam mai bawk a. An han dap kual vêl a, hmun dangah erawh hliam a lo nei lo hlauh a. Vaibêl te an paktir a, tuibûr te an hmuamtir hnu chuan a thi chhuak te chu rehin a luhai te chu reh chho ve leh thuai a. Mei êngah chuan a hliamah mau nâ thel dip te an bel ang tawn tawn a, an puan tlâng te chu pawt thlêrin an tuamsak ta hmiah bawk a.

Meipui chu a hma aia êngin an han chhep leh hluah a. Chumi êngah chuan sapui vun chu an lip laih laih hlawm a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 25th, 2019, 7:51 pm

PASALṬHA AIZIKA

- Nunmawia Fanai

BUNG 26-NA

Kâwl a lo ên chuan an sapui vun lih pawh chu an zo fel ve tawh a. A sa tak erawh chu ei mi pawha an ngaih loh avângin lui kam ṭiau phovah chuan an phûm a. Chumi hnu chuan hliam a nei tih hriat pawh loh leh lu zo tak hian Aizika chuan, "Le, kan khaw lam panin i chhuak leh dâwn tawh ang u hmiang? Tluang taka kan kal chuan zanlai bâwrah kan thleng hman tawh mai ang," a han ti zung zung a. Mahse, paho chuan, "Khati kha i ni rih si a, i chawlh hahdam rih a ngai a ni," tiin an lo hnial a. Mahse, Aizika chuan, "Heng te chu sanghar seh ai pawhin a nêp zâwk ang chu. Kal han kham phahna atan chuan a zah te lam a zahthlâk zâwk e," tiin a bân hliam avanga khawtlai chu a duh ta hauh lo va. Tichuan, kal rêlin bûk chu an chhuahsan leh ta a.

A ni rêng a, a thisen a buak hnem deuh avanga a lu rawn hai, invên ngaihna awm lova a tlûk thut tih loh, a hliam avangin nâ ti hmêl puin han khawr phahna eng mah a nei lo va, a duh angin a chêtpuiin a hmang bawrh bawrh thei tho va. A hliam a thûk ngaihtuaha na lo ang maia a hmang bawrh bawrh ngam chu mi dangte chuan mak an tiin, na pawh hre ve thei lo ang hialah an ngaih phah a, a chhelna chu eng ang chiaha nasa nge a nih an hriat châk phah hle nghe nghe a ni.

An kal zêl a. Nilêng an kal hnu chuan, ni tlâk dâwn suarah chuan Vahbûk lui an ban thleng a. Chutah chuan an han innghat a. Zân kal tum te an nih avangin meichher puah leh an ei tûr neih ang ang te eia inhnawh puar nan hun an hmang a. Khua a tlai lam viau, a thim hnaih tawh tih chuan chu lai hmun aṭang chuan an chhuak leh a.

Chawlh pawh nei eih lova an kal ngar ngar hnu, zanlai âr a khuang hnai tih chuan Pâwithlun khaw kawtchhuah chu an thleng ta hlawl a. An châwlh hahdam vang vang lai chuan Aizika chuan, "Hei, kan khua chu kan lût dâwn ta reng mai a; kan himna chu a tak takin kan tem dâwn ta. Tihian, lal in lam kan pan ang a, lalin a tih tihin ro a rêlsak dâwn che u nia," a han ti a. Mahse, an zinga pakhat chuan, "Tuna khua kan luh chuan khaw mite kan tirâlkhêl lutuk ang ti te lam lam a va hlauhawm ve âw. Bâkah mi pahnih khat lek kan ni lo va, mi sawmnga rual teh meuh kan ni hûl mai si nen, riahna lamah pawh kan buai phah viau thei bawk a. Chuvangin hetah hian khua nghâk vâr ta mai ila, khawvâr hunah khua chu lût ta chauh ila a âwm khai zâwk mah lo'ng maw?" tiin a lo chhâng a. Chu a thu sawi chu an han ngaihtuah tlân chuan dik an ti tlângin, tih âwm tak pawh niin an hre tlâng ṭheuh va. Tichuan, chu lai hmuna khaw nghah vâr mai chu an tithlu ta zâwk a.

Kâwl a lo êng a. Leilung pawh a lang ṭan tawh tih chuan Aizika chuan, Kâwltea hnênah chuan, "Kâwlte, nang mawng zângah, va kal ta vang vang la, kan chanchin hi lal hnenah va hrilh ta che. Chumi zawh chuan lal thu kengin i rawn lêt leh thuai dâwn nia," a han ti a. Kâwltea chu Aizika'n a hrilh ang chuan thu thawn kengin khaw chhung lamah chuan a liam ta nghâl vang vang a.

Lal in a va thlen chuan kawng a han kik a. Chu veleh lal in chhûng aṭang chuan lal pa chuan, "Chu tu nge ni ngai? Zing ṭhang ṭhangah kawngka kik an awm chu va hawn thuai ta che," tiin lalnu chu a han bia. Lalnuin kawng a va hawn nâk chuan a rin loh tak maiin Kâwltea hmêl chu a hmu ta phut mai a. Chutia a rin loh tak maia Kâwltea hmêl a han hmuhah chuan hmeichhia tih takah, "Awi maw! Eng ti tiha rawn lang ta hlawl mai che nge maw i nih le?" tiin a chiau ang râwih a. Kâwltea'n a chhân hma chuan lalpa chuan, hnung lam pawh rawn hawi lêm lo hian tap bul aṭang chuan, "A eng a, khatia, mitthi nung leh hmu ang maia i han chiau vawr vawr ni! Tu nge maw rawn lang chiah chu le?" tiin a lo au va. Lalnu chuan kawngka bul aṭang chuan, "Kâwltea alawm maw le. Hei eng thu nge maw a ken ni, amah lâwngin a rawn lang hlawl mai," tia a chhân chuan lal chu a ṭhut hmun aṭang chuan a rawn tho vut a, an lam chu a rawn hawi deuh hê haw a. Kâwltea hmêl a hmuh veleh chuan, "Aw khai! Kâwlte, nang lah ni reng chuan! Ṭhutna te kha han rem thuai teh khai. Eng thu kengin nge maw i lan tâk hlawl ni? Thu chhia i rawn thlen dâwn êm chu a ni lo vang chu maw?" a han ti ruai ruai a. Kâwltea'n ṭhutna a rem zawh hnu chuan an chanchin zawng zawng chu a kip a kawiin a hrilh ta mawlh mawlh a.

Chu thu a han hriat chuan lal chuan lalnu hnênah chuan, "Tinkuala nu, chu lah thu lawmawm kan dawng lah ni reng. Tlângau inah va kal thuai la, upaho kha rawn ko khâwm rang teh se. Thawhphan pawh awm lova thu rêl a ngai a nih tâk hi," tiin lalnu chu a tir zawm zat a. Lalnu pawh chu tlângau ina kal tûr chuan a chhuak zui ve ta nghâl a.

Lalnu lo kir hnu rei vak lovah chuan upaho chu lal inah chuan an rawn inzui lût zawm ve nghâl thuai bawk a. Ṭhutna te an rem hnu chuan lal chuan thil awm dân zawng zawng chu an hnênah chuan a han hrilh zung zung a. Tichuan, sal an chhan chhuahte an tih dân tûr te, Zahleithanga mi leh sa an lo pawm dân tûr te chu rem an ruat ta zung zung a. Chumi zawh chuan an thu rêl leh an remruat dân thute chu kengin Kâwltea chu kawtchhuah lamah chuan a lêt leh ta vang vang a.

Kâwltea'n kawtchhuah a va thlen leh chuan Aizika chuan chanchin a lo zâwt nghâl thuai a. Kâwltea chuan an lal leh upate thurel, sal chhanchhuah ho zawng zawng chu lâwm taka lo dawnsawn an nih tûr thu te, an khaw lama an haw leh vat dân an ngaihtuahsak tûr thu leh, châm hlen duh an awm a nih pawha lâwm taka an pawm tûr thu te chu a han hrilh zung zung a. Chumi hnuah, Zahleithanga phatsantu zawng zawng chu an mi leh sa ni tura an hnial loh thu te chu a han sawi leh zung zung a. Chutah Aizika chuan, "Aw le, chutiang a nih tawh chuan khua i lût ang u hmiang. Tu mah mikhual in awm ta lo ve," a han ti a. Tichuan, khaw chhung lam panin an inzui lût leh ta sap sap a.

Lal mual an thlen chu lal leh upate chuan kawt kaiah an lo hmuak ṭhap hlawm a. An han intawh khawm hnu chuan lal chuan, "E khai! In lo thlen kan lo nghâkhlel tawh viau asin. Ti rawh u, he lai hmun zawng a hahdamthlâk loh em mai, zau dawh lamah sâwn i va hahdam diai zâwk teh ang u," tiin a lo chhâwn dam dap a. Zau dawh lam chu an pan zui ta nghâl a.

Zau dawha ṭhut hmun te an rem fel hnu chuan lal chuan, sal chhan chhuahte hnênah chuan, "Rin loh lam leh rin phâk bâka thil a thleng hi a lawmawmin a ropui mang teh e. Tunah chuan, in tawrhna te, in natna te leh in lo hrehawm tawhna te chuan a kiansan hlen tawh ngei che u ka duhsak che u a ni. Chumi piahah chuan, nangmahni khua ṭheuhva haw leh pawh in duh vek ngei ang tih ka ring a, a duh apiang chu in haw leh vek ngei ang. Chutih rual chuan, he lama châmbâng duh in awm a nih pawhin hmun lah kan nei zau narawh," a han ti dap dap a. Chumi zawh chuan Pâwi tlangvâlho lam chu a'n hawi leh a, Lianchuhmânga a'n hmu tel tlat chu mak tihna a nei deuh thut nge ni, a meng fiah deuh kâk a. Mahse, a hmêl lan dân chu tipangngai leh vatin, "Nangni leh zêlin min rawn fin duhna in han nei chu kan lâwm a zual hle mai. Silai nei ṭhiau in ni lehnghal nen, thla a muang huai huai mang teh e. I chanchin ka lo hriat phat khân in lal Zahleithanga vertherna chuan mi a tisa deuh zawr nghe nghe a. Mahsela, kan tâna malsawmna a nih hlauhna thungah erawh ka lâwm hle lawi si a ni. In tân hian hmun a awm reng a ni tih leh, saphun in duh a nih pawhin in duh hun hunah sa kan phun mai ta lâwng. In chênna tûr pawh kan ruahmansak vek tawh che u bâkah, mahnia khawsak duh zâwk te in awm a leh, in khawsakna tûr in pawh kan sa zêl mai a ni ang chu. Lo lah a thlan hun in rawn tlai lo kher nên, thlawhhma lamah pawh bul ṭan nghâl a theih chiah dâwn bawk a. A, engkim hi ruat fel thlapa thleng ni maia mawi a nih thlip thlep reuh hi â," a han ti leh dap dap bawk a. A thu sawi chu uluk takin an lo ngaithla ṭhap hlawm a. Chutah Aizika leh Kâwltea lam chu hawiin, "Zika, Kâwlte, hetianga in thil tih ropui tak hi ka beisei phâk leh rin phâk a ni hauh lo va, in remhriatnaah hian chawimawi in phu tak zet mai. Chutih rualin, Zahleithanga chuan a fin kherek chhuahin pialrâlah a thawn liam lo chauh mai che u hian ka lai a khei zar mai a. A khua khi ka ramsak ngei ngei dâwn a ni," a han ti chhar chhar a. Aizika chuan, "Liantuala pa, Zahleithanga chu ka kutah dah rawh. A tan lawmman tur hual rûk ka nei reng tawh mai; a thang kamah hian a âwk thuai ngei ang," tiin a lo chhâng a. Lal chuan, "A nih rem han ruat lâwk deuh te i nei em ni?" tiin a zâwt thuai a. Aizika chuan, "Ruahman sa vek a ni tawh e," ti chauhin a chhâng a. Aizika chhânna chu lal chuan zâwt ta'ng e tih pawh tum lo hian a vaibêl chu a pak khu tual tual a. Chutih chhûng chuan ni pawh a lo chhuak suar suar tawh a.

Nakin deuhah chuan lal bawihte chuan tûkṭhuan an peih tawh tih an rawn hrilh a. Chu veleh tûkṭhuan ei tur chuan an inpuahchah ta sang sang a.

Tûkṭhuan an ei zawh hnu chuan lal chuan tlângaupa chu, tlangvâl ram chhuak tu mah awm loh tûr tih leh, kan mikhualte haw kawng hruai tur a ni tih te, leh tûkṭhuan ei kham hmasa apiang lal mualah kal khâwm tûr tih te chu au tûrin a tir liam nghâl a.

Tlângau a liam hnu rei vak lovah chuan tlangvâlho chu lal mualah an lo chhuak khâwm ta khup khup a. Tlangvâlho hnênah chuan lal chuan thil awm dân chu chipchiar takin a han hrilh hmasa tê tê a. Chumi hnu chuan, "Hei, kan unaute hi khaw khat chhuak vek pawh a ni lo va. Anmahni khua ṭheuhva haw tûr chuan mahni lâwnga kal ngaite an awm nawk bawk si a. Chuvangin, tlangvâl te u, tlâwmngaia an khua kan thlen ngei hi kan batah i ruat hlauh ila, dam takin an khua kan thlen ṭheuh dawn nia. Chutih rualin, an chhûngte lak aṭangin eng lawmman mah in dawng tûr a ni lo vang. Lâwmman leh chawimawina, ropuina phûtin eng mah han ti suh ang che u," a han ti a. Tlangvâlho chuan lal thu chu uluk takin an ngaithla ṭhap a. Chutah lal chuan, "Le, an khua ṭheuhah chuan him leh dam takin han hruai thleng mawlh teh u. Zika leh a ṭhiante ho erawh hi chu, an hna hahthlâk tak hian a tichau rih ang e, han châwl thung sela," a han ti leh a. Tichuan, tlangvâlho chu pâwl tê têa inṭhenin, sal chhanchhuah tâkte chu hruaiin an khaw lam ṭheuha hruai thleng tur chuan an chhuahpui ta thliah thliah hlawm a.

Chhuak tûrte an chhuah kim hnu chuan lal chuan, upate leh Aizika leh a ṭhiante hnênah chuan hmun dang hawi rih lova zau dawh lama inkawm a duh thu chu a han hrilh a. Anni chuan pawi an tih loh thuin an chhâng tliar tliar hlawm a. Tichuan, zu bêl nen zau dawh lam chu an pan khâwm leh ta rih a.

Zu bêl kila an ṭhut kual laih lai chuan lal chuan, "Zika, tûkṭhuan kan kil lai khan i tumpâng kah thu an sawi leh i bân hliam chhan an sawi te kha ka lo hre deuh ruak ruak a. Eng ang chiahin nge Zahleithanga khuaah chuan i han chêt chiah le? Min han hrilh ta che maw?" a han ti a. Upate pawh chuan hre châk tak hian an lo bengkhawn hlê hlawm a.

Upa Hlunkûnga chuan Aizika pa lam hawi chung chuan, "Zika pa, nang zawng fapa i nei hmingṭha ngai mang teh e. A kalna chinah tawh thâwm lian tak hi a chhuah zêl mai zawng a ni si a," a lo ti boh a.

Aizika pa chuan, "Tlâng hi a thang punlun duh viau asin," ti chauh tiin a fapa Aizika fakna thu chu a chhâk chhuak duh hauh bik lo va.

Aizika pawh chuan, "Ni e, vaneihna hi theihnaa ngaia min chhuah ropui an han viau ṭhin châng hi chuan, ka theih chin ka han ngaihtuah a, ka zak ru mem mem ṭhin asin. Kha tumpâng lakah pawh khan ka vanneihna sâng tak vanga chungnung zâwk chauh alawm ka nih le. Ka thihna tûr hmun a la ni lova ka dingchang ta lek fang a ni; pialrâl kawngka chuan kawng min lo hawnsak hman fiai ngei ang chu maw, kha hunah kher kha chuan," tiin a hlawhtlinna chu chhuang lo tak hian a pa ṭawng chu a chhu zui ve thuai a. An pafa chapo lohna leh inngaihtlâwm rûkna chuan mi dangte chu a hneh ru em em mai hlawm a.

Chutah lal chuan, Kâwltea lam chu hawiin, "Kâwlte, nang nena chhuak in ni lawm ni? Zika chu kan sawitir zo dâwn lo a nih hi; nangin han sawi zâwk ta hlauh che. Tiang thu ngaihnawm lutuk tûr te tuin nge hre chiang châk lova hmaih phal ang ni," a han ti a. Chu chu Kâwltea phûr zâwng tak mai chu lo niin, an chhuah tirh aṭanga sa hnu an chhui ṭan aṭanga ṭanin, Aizika a lo harh chhuah leh thleng mai chu a kip a kawiin a hrilh fai ta dap a. Chumi an han hriat chuan lal leh upate chuan Aizika chêt dân huaisenzia leh a ṭuan ṭhatzia te, a vanneihna ringawt vânga chungnung a nih lohzia leh, a phû vâng rênga hnehtu a nihzia chu an sêp chhunzawm ta tliar tliar a. A ṭhenin a hmaichhanah chuan an fak lâng lâng a, a ṭhen lahin chu tumpâng chu an hmuh ve châkzia thu an lo sawi âwl lo lo bawk a. Chutih lai chuan Aizika chu ngawi reng hian, vaibêl pak khu leh talh tal ṭhin chungin a lo ṭhu ngar ngar ringawt a. Lal chuan, "Khua in rawn panna kawngah, Nauchhar lui kama in thil tawn te pawh chu han sawi zêl teh u," a han tizawm leh zat a. Chu pawh chu Aizika chuan sawi zai a rêl loh avangin Lianchuhmânga chuan an hun tawn leh Aizika'n sapui a kah dân chungchâng te chu a han sawi ve leh bawk a. Chu thu a sawi zawh chuan a iptepuia sakei vun a ah chu a phawrh thâng huam mai a.

Sakei vun an hmuh veleh chuan lal leh upate chuan an han kuai pharh nghâl chûk chûk a. Ropui an tiin Aizika chu a hun tawn apianga chungchuannain a awmpui zêl mai chu an chhuangin, an zah rawn ru ta hlê mai a. Chutah Lal chuan sapui vun chu khâl niap niap pah hian, "E khai! Hei zet chuan nikuma ka kah kha chu tum rên râwn chuan a dawlh thei hial mai ang ka ti! Hetianga sa ropui hi zawng, a lû lam lohvin kan chhuah hauh tûr a ni lo vang. Kan tlangvâlte khual thang rawn haw kim sela, a lu kan lâm dawn nia," a han ti a. Chumi zawh chuan, tlângaupa hnênah chuan, "Lêngtea pa, nang, he sapui vun hi ka bawihte hnenah khan va keng la, favai khan hnawh puar sela lo pho rawh se," a han ti a. Tlângaupa chu sapui vun keng chuan lal in lamah a kal ta nghâl nal nal a.

Rei tâwk tak an titi hnu chuan Pâwi tlangvâlho chu lal leh upate chuan, an chênna tûr hmun an neih hma atan an inkawl sem ta diat diat a. Aizika leh a pa pawh chuan Zahleithanga chu an lo ngainat tawh sa a nih avangin an chhungkaw mi leh sa atan an thlang a. Kâwltea pawh chuan a rualpui âwm lek pakhat chu a chang ve bawk a. Tichuan, ni a vanlaizâwl dâwn tawh tih chuan an in lam ṭheuhah chuan an kir ta sang sang rih a.

Chumi ni chuan, Pâwithlun khuaah chuan awm ni kham puan ni chiah lo mah se, an khuain thil danglam leh la thleng ngai lo a tawn avang chuan mi tin mai chu hna thawka chhuak an awm lo va. Pa ṭhenkhat phei chu Aizika te inah chuan thil awm dân hre châkin, in chhûg khat vek khawpin an lêng lût ṭuai hlawm a. Chutih lai chuan Aizika leh Lianchuhmânga thung chuan, Lianchuhmânga sakhi chal kah ki mawi em em mai chu bangah chuan an cher dûn mawlh mawlh a. Chu chu an han hmuh huan pa pakhat, Lûra chuan, "E khai! Kha, in lo pêmna a la rei loh nên, in bang lah chu sa lu a incher tlar ṭhût tawh mai ka ti! Pasalṭha in zawng a hriat nge nge mai," tiin a aw a lo chhuah thâm ṭiak a. Aizika chuan, "Hei, kan pasalṭha sa ai tûr lu kan han târ a nih hi," tiin a chhâng a. Chutah mi dangte chu lo ṭawng ve lehin, a ṭhenin, "Chu, sakhi zû in a khât lai takin sakhi zû kan in dâwn a ni maw?" an lo ti a. A ṭhen thung chuan, "Keini zawng, mi kah sâ, min duhsak vang bâka kan in rawn dêng ta lo chu, a âwngah kan lo ṭang ve ngam ang em maw chu. Rual awh a na ṭhin ngei mai," an lo ti ve laih laih bawk a.

Nilênga in lêng an neih a, an ṭin kim hnu chuan Aizika pa pawh chu lal in aṭangin a rawn haw ve hnak hnak a. Ṭhut hmun te a rem hnu chuan Aizika leh Lianchuhmânga hnênah chuan, "Vâla te u, hei, kan khua chuan a hmêlhriat ve ve in ni a. Lianchuhmânga phei hi chuan lawm a la hlawh lo viau dâwn tih a chiang reng mai. Chutih rualin, Zika pawh, i zin bo hlân khân Sângrova hian i laka phuba lâk a tum thu a chhâk chhuak zeuh zeuh reng tih ka hre ru tlat bawk. Chumi a nih avang chuan, lâwmtu in neih lai kârah hian lâwm lotu che u hi an kat nuk reng dâwn tih hria ula, ṭawngkamah te, chêtziaah te leh hawiher thleng pawhin fimkhur luat in nei tûr a ni lo vang," tiin a fuih dûn mawlh mawlh a.

Aizika chuan, "Sângrova hian a enga min lo tai nghâl viau nge maw a nih rêng rêng ni! A hman loh leh awm loh laia a thawh hah ai ka lo thawhsakah te chuan lâwm viau âwm hi a ni a. Lâwm tâka ruang a, min huatna atana a hmang daih mai hi chu a mipa zia lo hah hah ngawt mai," tiin a pa chu a chhâng a.

Lianchuhmânga chuan, "A khai! Kei pawh hi, kan lal hlui Zahleithanga'n a phiar ru che tih ka hriat hma kha chuan, ka laka i ṭhatna te hian mi a tilawm zo reng reng hlei nem. Kan khaw mi ten an fak rawnna che leh i hmingṭhatna khan i laka phuba lâkna hun remchâng min daptir reng ṭhin asin. Mahse, ka rilru chhiatna chu kei aia rilru chhe zâwk avangin a lo danglam zo ta hlauh a ni, i laka rilru lem pu rengtu laka ṭhatna i lantir reng avang khan. Engtik niah emaw chuan, Sângrova hi i lakah a la nêm ve ngei ka beisei; hun erawh a duh deuh ang a," tiin Aizika chu a lo chhâng ve thung a.

Aizika pa chuan, "Chu a dik a ni. Elpui tûr an awm lohna hmunah hi chuan eng kawng mah hian hmasâwnna a thlen tam ngai lo va, elpui tûr an awmna hmunah erawh chuan, hmasawnna hi a inphûm ru ṭûn thung ṭhin. In elpuite hriat chian hi in hna hmasaah neih ula, chumi kawngah chuan thin nel takin awm ang che u," tiin a fuih dûn leh zauh a. Chu a fuihna chu ngun takin an lo ngaithla dûn a.

Chutianga an titi lai chuan Aizika farnu Aihluni, tleirâwl â, thu kal lam leh hâw lam pawh hre lo chuan, "Ka u Zik i tumpâng kah lu chu Zahleithanga chuan a nei tihna em ni? Awi, Kei zawng ka ui em mai! Kan banglai hi han mawi rûn mai sela, nakinah in lêng chhia ṭhate kan la nei ve ang a. Chu'ngte chuan ngaisâng takin an han thlîr vêl ang a," a lo ti vei lâng lâng a. Aizika nu chuan, "Mipa an titi laiin lo inrawlh ve rawk zêl suh; i â zozai ṭhin em mai," tiin a lo khap a. An han nui ho leh rih a.

Chutia tumpâng lu a han sawi chhuah tâkah chuan Aizika pa chuan thil dang a ngaihtuah thei ta hauh lo va. A ui ngang ni tûr a ni, Aizika hnenah chuan, "Zika, i tumpâng kah chu an sawi ropui ngei tak mai. Zahleithanga lal in a han mawi ruang mai tûr ka han mitthla chhin a, ka thik ngei mai ka ti!" a han ti chhuak phawng mai a.

Aizika chuan, "E khai! Ka pa, lungngai mah ta che u. Zahleithanga hian he lamah hian kan rawn ṭuan daih tih a hre rêng rêng lo tih lal zau dawhah khan kan sawi tawh kha maw. Sa lu chuan kan banglai hi a la mawi ngei ngei ang," tiin a chhâng a.

Aizika pa chuan, "A nih leh, Zahleithanga tirh ang chuan chêt thawh zui zêl in la tum em ni?" tiin a han zâwt a.

Aizika chuan, "A thangkama a awhna tûr chuan chu chu kawng awm chhun a ni a nih hi," tiin a chhâng a.

Aizika pa chuan, "I him theih lai hian i thihna tûr kawng chu pan luih ṭâlh i la tum fo va maw?" tiin a zâwt nawn leh ngat a.

Aizika chuan, "Tlânchhia tia hriat zui ni chung a, nuihsawh leh dawihzep tia sawi zui a, nun reng ai chuan, thutiam kawnga rinawm taka kal a, hlen zawh loh vânga thih pawh ka thlang daih zâwk asin," tiin a chhâng ve leh a. Chu thu a han hriat chuan a pa chuan Aizika chu a rilru put dân kawngah chuan a chhuang ru hlê zâwk a. Tichuan, "Chu chu mipain a rilru put dân tur hmang dik tak chu a ni rêng a ni," a tihsak leh ta hlauh zâwk a.

Khua a lo tlai lam zêl a. Zanriah ei a lo hun chuan, zanriah chu an kil ta ṭiai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2019, 8:31 pm

PASALṬHA AIZIKA

- Nunmawia Fânai

BUNG 27-NA

Thuhma : zanin chu a tawi deuh a nih hi. Han chhiar phawt ula, kan zawm leh dawn nia. Ka'n chawl lawk ang e.

Zanriah ei kham, zawkbûk kai a hun ta tih chuan Aizika leh Lianchuhmânga chu zawlbûk kai tûrin an inzui chhuak dûn ta rak rak a.

Anni pahnih hi hetianga Zahleithanga avânga inrem chho ta an nih achinah hian, chem chhe den zawm an sawi ang maiin an chhûngrilah inpawhna leh inzawmna thûk tak an nei ta tlat a. A leh lamah, eng emaw kawngah chuan Lianchuhmânga hian a nun hluiah tenawmna leh nunrâwnna lo nei thûk viau tawh mah se, a pian tirh atâ a lo neih tawh a chhûngrila a ṭhatna inphûm ru tlat erawh chu a bo thei bîk hauh lo va. Ni e, a dika dik chuan, Lianchuhmâng hi a têt tê aṭanga zawlbûk kai rual a nih thleng, pasalṭha hnung a zui tak tak hma chuan mi nun tluang leh zai dawh thei tak, nun ngil, khawngaihna leh zahngaihna ngah tak mai a ni ṭhin a. A ze ṭhatna hian khawtlâng fak rawn leh nêl rawn a hlawh phah êm êm ṭhin nghê nghê a. Amaherawh chu, an pasalṭha huaisen leh râl lu khai tam em em mai, zahngaihna leh khawngaihna pawh nei lo, lainatna leh dim dâwina tlachham tak mai, Cheunawna, tumpâng huaiin rîl chhum rem ruma a pir hlum tâk, chumi hnung chu a thih hma zawnga zui ngar ngar kha a ni a. Chutianga a mi ngaihsân ber hnung zuia khawsa chho a nih avang chuan, Cheunawna zia chu pasalṭha zia tûr dik taka ngaiin harsa tiru ṭhin tak chungin a pu lui chho ve ta nghat nghat a. A lo rei tâk deuh hnuah phei chuan, a nih ngaih loh leh a lo suangtuah chhin ngai loh ze ṭha ber ber chu nei chho zêlin, a chhungrila a tuihâlna chu Cheunawna ai mahin a nasa chho ta zêl a, nunrâwnna kawngah chuan rual a khûm chho ta par par mai a ni. Mahse, chutih rual erawh chuan, a nun hmasaa a zia neih ṭha tak ṭhin khân a kiansan bik lo va, ran chhuah châng neiin a nun chhia chu huat châng te, kalsan duh châng te, thloh thlâk duh ngawih ngawih châng te a nei ve leh ṭhin a. Chu tak chu a nia, hetianga Aizika ṭhatna a hmuh a rilru thlâk thei tûra puitu chu, a chhûngrila a ṭhatna neih thi ngai miah lo chu.

He kan hringnun hian, a ze neih sa, a pian chhuahpui hi hlatsan han tum viau ṭhin mah ila, kan chin thar leh neih tharte aia zung a kaih ngheh zâwk tlat avang hian, a zung thi ve mai mai lo chuan rawn hreuh chhuah hun neiin, zung nghet lo zâwk kan ze thar neih chawpte hi a rawn ṭhiat leh mai ṭhin. Chu chu a ni, mi a tun nun ena lo teh ve ngawt hi âtnain mi a fin chhuah ngai lo a ni tih a hriatna chu.

Vawi khat chu, Cheunawna nena Lusei khua pakhat rawlrâla an rûn ṭum hian, feh kal leh daia mipa naupang thing nâwi fawm chen mai chuan dîmna nei baksak lo hian an that hmiah hmiah mai a. Raipuar an ni emaw, pitar an ni emaw, pawisak nei lo hian an mi thah tûrte chu an pâwngsual hmasa chiam zêl a. An duh tâwk an ngah hnuah thingah te phuar betin an hrawka thisenzâmpui hi an zai hawnsak a, an thisen chik puat puat chu hmuhnawm ti tak mai hian an inthlir reisiak dûn ta ṭhin a. An thisen chhuak nasa lutuk tuar lo thi tûr chalchâng, thih sual vêl chu hmuhnawm ti takin an thlir dûn ngat ngat mai ṭhin a ni. Chutiangah tak chuan, luhlulah leh tuihâlah Cheunawna chuan Lianchuhmânga hi a phâk lo va, khawngaihna inneih lohsiakah pawh Lianchuhmânga hian a ngam zâwk ziah bawk. Chu'ngte avâng chuan Cheunawna chuan vawi khat chu, "Liana rammutpui chu, a duh thâla a zia a'n chhuah hi chhuah hi chuan tiril hi a za leh uai thei ṭhin nia," a tichhuak hial a ni âwm e. Mahse, chutiang taka nunrâwnnain a thunun tawh thinlung neitu chu ni mah se, Aizika ziaa a thil hmuh tam tak avâng chuan a pasalṭhat dân kawng chu a thara zawh chhoh a tum leh phah ta hial a nih hi.

Ṭhatna hian zahawmna leh hnehna a keng tel tlat a. Mi pangngai chuan a kawltu mihringah chu chu a hai ngai loh avangin, a nun ṭhaa chu amah khalh ngiltu hmanruaah a chantir hlauh ṭhin; er leh thik a, a ep zâwnga nun tum lovin.

Chutia, zawkbûk pana an kal lai chuan Lianchuhmânga chuan, "Zika, in lal leh a khuate pawi hi ka lo sawi thûk viau mai si a, ka tân chuan mi hmai êng hmuh a ngamawm mang dêr lo mai ka ti. Ka nula man tâk lah kha eng tik khaw tikah mah han rim ngam zia ka ni tawh dawn lo chu thu hran, râl ena enin min ṭih kumkhua tawh ang a, a nunkhua tinuam lo kumkhuatu ka ni tawh lek fang dâwn si a. Chu lo rêngah, khawtlângah hian tui tlâk tik hi a her chhuak kher lo maithei bawk. Chumi avang chuan ka tân chuan khaw dang lal bêl tura liamsan mai che u hi a finthlâk zawmah mai âwm mang e," tiin a inthiam lohna avanga a rilru put hmang chu a han sawi chhuak a.

Aizika chuan, "E khai! Chutiangin mi chak lote angin thu hnu an dâwn vak vak ngai lo. Thu hnu dâwn tam luattukna hian nun hi a khalh kal hlei thei ṭhin lo a nia. A hma chuan eng ang mi pawh lo niin, mite ngaiha mi nunrâwng ber ang pawhin lo khawsa tawh mah la, kha kha chu than i hâwlna kawnga i tih tûr nia i hriat tiin, a chângin i lo che hleihluak viau ṭhin pawh a ni mahna. Ka lakah ngei pawh pawi i khawih tawh a, kan inhmêlmâk phah hial rêng a nih kha. Mahse, tunah chuan, thu khat vuain rilru hmun khat puin kan awm tawh a. Khaw mite zingah chuan huatna thinglung nena thlir che an la awm reng rih mah se, an thinlunga huatna che a reh theih nan ka pui dâwn che alâwm. Kan lal nen hian kan inhmu ṭha a, kan lal berin a pawm che chuan tu han pawm loh zia i ni hlei nem maw le. Chuvangin thu hnu dâwn avanga chak lohnain a zuam theih tûra awm tawh lovin, hma lama hmabâk tam tak awm hi hlen chhuak tûrin kan puan ven te kan sâwi chhing sauh sauh a ni ang chu le," tiin a thlamuan hlauh thung a. Ni e, Aizika hian Lianchuhmânga hi hun eng emaw chen a sala a awmtir tawh lai khan, amahah hian tlâng a thanpui a ze tawrawt tak phêna a ze dang neih a ṭhatna thinlung inphûm ru tlat chu a lo hmuhsak tawh a. Chu chuan a ngainat rûktir riau tawh avangin, sal tlan tûra rawn kal hovin sual an chhuah ṭum pawh khân, Lianchuhmânga a laia a rawn phar khân a thinrim a tidâi thei chauh zâwk kha a lo ni reng a. Chuti ni lo sela chuan, Aizika thin thawk khan a Pâwi thin butut zia a chhuah tawh a, duh tâwk a ngah hma kha chuan a châwl mai dawn lo. Mahse, sawi leh sawi hnu, Lianchuhmânga a huatna a bo tawh piah lama a ṭhatna a lo hmuhsak tawh a zahsak vângin a duh tâwk a ngah hman ta lo chauh kha a ni a.

Zawlbûk an thleng a. Zawlbûkah chuan a chhuak hmasa zingah Lianchuhmânga ṭhiante pawh chu kimki deuh dâk hian an lo inthiat ve khâr hlawm a. Lianchuhmânga leh Aizika hmêl an han hmuh chuan an thlâ a muang a ni chêk ang chu, an mitmeng leh hawiher te, an kimki deuh dûk te pawh chu zia deuh huai hlawm a. Ṭhutna hmun an rem fel ta maw tih chuan chuan Vâl Upa Kailiana chuan, "Zika, pasalṭha zin chhuak ta chu i rawn hlawhtling haw ngei mai ka ti! Sal tam tak leh sapui vun nen. Chuta chhapah kan Zahleithangpa dai ngulte i rawn ru hâw ṭeuh mai bawk a ni a. Hei, i naute ho pawhin an nghâk lo nghâk ṭhap tawh che a nih hi," tiin a lo be lûm lâm nghâl luam a. A dika dik chuan Vâl Upa Kailiana hian Aizika a ngainain, an pêm pasalṭha hming chauh la pu mah ni sela, Sângrova leh a sagawi zâwnpuite ai ngawt chuan a thlamuanpui daih zâwk a. Chuvang chuan Aizika a biak dân kawngah hian, a vâl upatpui leh mi dangho hrim hrim pawh an mitmei hi a vêng buai duh ngai lêm lo.

Aizika chuan, "Chuti em maw ni dâwn le u Kailian le? Thihna ruama ring rawlh tûr ṭheuh ṭheuhin, a chungnung zâwk awm lova pawhrual hnah pawh chhum ang hmarha lung kan han rual hi chuan, engkim mai hi a sut a lo nuam purh mai zawng a nih hi maw. Hei, kan unau, kan ṭhian tharte tel lo hi zawngin keia mi mal teh ngâwk chuan theihna eng han neih bik ka nei hauh lo. A bikin, sapuiin min hêl zân khan Lianchuhpa hi awm lo sela chuan, tu tu emaw chuan kan lu kan hloh ngei ang. Thâwm ka hriata ka harh ve meuh kha chuan, ani hian min lo venghim rei viau tawh asin. Kan vaia aia nun chân pawh inhuamin, mi dang pawh min pun eih lovin a lo mal ngâwk mai a. Keiin a hnukhawiah ka va zawm ve lek chauh a ni a. Ani vânga kha zân kha him kim thei chauh alawm kan nih le. A tihlumtuah ka ṭang zâwk na a, chawimawina leh ropuina khum tûr zâwk chu amah hi a ni asin," tiin a han chhâng a. Chu a chhânna chuan Lianchuhmânga chhungril chu a khawih hle mai a, "Hetiang ang rênga mi ṭha leh mahni inchawimawi hreh hi an awm ngai dâwn em ni?" tirilruin Aizika a zahna leh a ngaihsânna chu a zual phah leh ta êm êm mai a. Vâl Upaho pawh chuan, Aizika ṭawngkam chhuaka tlâwmna zia an hmuh chu ropui an tiin, an aia nau fê mah ni sela an zah rûk phah sawt hlawm bawk a.

Chutah Vâl Upa Kailiana chuan, chutianga Aizika'n hmingṭhat khum vek a duh lo tih a hriat chuan, Lianchuhmânga lam chu a han hawi a, "Lianchuhpa, i ropuizia leh i pasalṭhatzia chu tlâng chhuakin a thang reng tawh a. Mahsela, i ṭhiante tâna i nun i thâp ngamzia thu han hriat chu a va thlamuanthlâk ngai dâwn êm ve aw! Kâwlte pawh, i u Zika i puihna kawngah, i pasalṭha zia ve tak tak tawh a ni tih kan lo hria a, kan chhuang em em che asin," a han ti leh dap dap a.

Chu thu a sawi zawh rual chuan Sângrova leh a sangawi zâwnpui mi sâwmrual zet mai chuan zawlbûk an rawn chhuak ve thliah thliah a. Sângrova chuan a bân chu Aizika elhsakna kha a la pu dam lo a ni tih hriat deuh hian, hmang ṭha ngam lo hian a khai zawi hnuang a. A bân na lo lam chuan vaibêl a keng a, tu mah tham lo tih hriat deuh hian a rawn pak khu lût talh talh a. Vawk lal lêna lo lêng reng tawh a ni tih hriat tak hian, zawlbûk mei êng chhim phâk theihna hmunah hian Sângrova chuan ṭhut hmun a han rem chawt a. Lo ṭhu hmasa tawh zâwk Pâwi tlangvâlte chu tham lo tak si, vâl upate tân pawha huata han lâk tham tak tak ni si lo hian a han nêk lui deuh salh salh a. Pâwi tlangvâlho chu ṭi dui hian an tawlh rawk rawk hlawm a. Chutianga ṭi taka an han tawlh chu Sângrova chuan nuam tih hmêl deuh taka men kual pah hian, "Sapui emaw min ti em ni? Min va hlau âwm rawk rawk ve?" tiin a han fiam chhunzawm zat a. Pawi tlangvâlho nuam ti chiah lo chu an meng kual zak zak hlawm a. Chutah kher chuan Vâl Upa Kailiana chuan en liam mai mai chi niin a hre ta lo va, "Rova, khatianga infiam kha chîn awih a ni lo va nia. Lalin kan khaw mi leh saa a pawm tawhte an ni a, khawtual mi an nih anga khual fiam ngawt zawng thil mawi a ni ngai lo. An ngampatna tûra ze mawi i chhuah thei lo a nih pawhin an ṭitna tizual tur erawh chuan ṭawng cheh suh lo hrâm ang che," tiin a han khak zoh a. Chutia Vâl Upain a han khak tâkah zoh chuan Sângrova chu a zak em em mai a. A chêt phung chu thlâkin a ṭhu ngawi ta hle hle a. Zawlbûk chhung boruak chu a reh nghâl duk bawk a.

Zawlbûk boruak reh duk hnuaiah chuan Vâl Upa Kailiana chu a ṭhut hmun aṭang a rawn ding chhuak a. Tlangvâlho chu ngawi tûra a kuta a zah daih hnu chuan, "Le, hei, lo ngaithla ula, kan khua chu Zahleithanga pasalṭha Lianchuhmânga leh a ṭhian ten min rawn finin, kan mi leh sa an rawn ni tawh dâwn tih kan hre ṭheuh ang a. Chuvangin, tu mahin, kan biak dân kawngah te, kan en dân kawngah te hlei kan chhuah tur a ni lo ang. Tu mah hi kan lal Thandâwla lalna hnuaiah kan inhmusitin kan inthliar tûr a ni lo. Nakina râl dova khawtlâng chhan ho tûr vek kan la ni a, inmamawh tawn ṭheuh kan ni," tiin thu a sawi dap dap a. Chutih lai chuan lêng lên âr a rawn khuang ta lâng lâng a. Val upa bawk chuan, "Le, khati chin kha ka han sawi rih ang e. In lâwmnu ten in kawngka kik ri an ngaichâng rei lutuk palh ang e," a tizawm leh zat a. Tichuan, tlangvâlho chuan mahni tum tâwk lêng chhai tûrin zawlbûk an chhuahsan sap sap hlawm a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 27th, 2019, 7:47 pm

PASALṬHA AIZIKA

- Nunmawia Fânai

BUNG 29-NA

Hun a lo her leh deuh va. Aizika bân hliam pawh a dam fel viah tawh tih chuan zan khat chu, nula rîma lêng lovin, tu mahina an hriatpui lêm lohvin Aizika leh Lianchuhmânga chuan lal in lam an pan hlauh thung a.
Lal in an thlen a, in chhûng an han luh chuan lal chuan, "Aw khai! Zanin chu in lêng kan va nei zahawm ve lê hei! Zikate ṭhian dûn hmêl lah rawn lang tak ruang chuan! Eng thu lam nge ni teh khiah chu a?" tiin a lo chhâwn thuai a.

Ṭhut hmun an rem fel hnu chuan Aizika chuan, "Liantuala pa, Zahleithanga nêna kan intiamna thilah, naktûk chu khaw chhak lam zin te kan lo rilrûk deuh asin. I rem tihna kan rawn ngên hmasa a ni e," a han ti a.

Lal chuan, "A ni maw? Chutiang thu intiam in neih rêng ka lo hre hlei nêm. Chumi avang chuan, naktuk hian Lianchuhpa nên kan pathumin khu lai, thingchang muala sawvawm khu zuk bei ila tiin ruahmanna te ka lo siam ru deuh mai asin. Eng thu-ah nge ni rêng, in khaw chhak zin chhan tûra ber chu ni a? Min han hrilh chiang deuh phawt ta che," tiin a chhâng a.

Aizika chuan, "Chi khur chungchângah, a chi khur chanpual ṭhinah thuneihna leh neitu nihna a chang zo tawh lo a ni âwm a. Chumi thu hlâah chuan han chhuhsak tûrin min ngên ngawt pek a, keia pekin ka aw ka lo pawh mai si nen, ka tihsak a ngai dâwn a ni," a han ti leh a.

Lal chuan, "E heu! Khi lam zin te zawng dama kir leh a harzia an sawi fo lo em ni? Chumi avanga Kawrchheho hnên aṭanga chi seh pawh lâk phah kan ni rêng a. Engtia, chutianga thu lo thlûkpui ngawt nge maw i nih chu aw?" tiin a chek tlak tlak a.

Aizika chuan, "Thih leh dam thute zawng ni mauh mai e. Mahse, chutianga ka nunna lo enghelh viau hi a ni dâwn tih ka hriat lâwk bik lohna hian alawm, a lakah thu min tiamtir ta hlauh ni. Hetiang pawh lo ni lo ta ang sela, a fin kherek a tlawlh a ni tih a hriat rualin ka thihna tûr kawng a zawng leh tho dâwn a, tûnah hian rawn kir leh tûr ka awm tawh lo hial zâwk mahna le. Tunah chuan, ka tâna a thangkamah ka âwk tawha ngaiin, ka lû lem an lo lâm hial tawh pawh a ni maithei bawk. Chuvangin, a thangkama âwk tûra eng emaw ka tih chu a ngai a ni," a han ti leh charh charh a.

Chu thu a sawi zawh chuan lal chuan chhân lêt pawh tum mai lovin, chhuat bih ngar ngar chung hian Aizika thil sawi chu ngunthlûk takin a han ngaihtuah vang vang a. A rawn dâk chhuak leh a, "I rilru tûr chu ka hriat thiampui tak zet a che. Kei pawh ni ila i tih ang tho hian ka ti ve ngei ngei ang. Chumi avang chuan, ka uina che leh ka ngaihtuahna che hi dah ṭhain, i duh ang i tihna tûr kawngah chuan ka dâl hauh lo vang che. Hlawhtling tak leh dam taka i rawn kir leh erawh ka phût tlat dâwn a ni," a ti lêt ve ta thung a.

Aizika chuan, "Thih leh dam thu-ah chuan thuneihna eng han neih awm mah suh sela, thihnain a man loh nih hrâm erawh mi tinina kan tum a nih vek si hi maw. Him leh dam taka rawn kir leh ngei kan lo tum tlat ang e. I ṭhatnaah ka lâwm tak zet a ni," a'n ti leh a. Lal chuan a lu a bûk khum nghat nghat a. Chutah, "Mi sawmhnih lek tân chuan in thil tum hi a u lam deuh lo maw? Tlangvâl dangte i hruai belh duh ang em?" a han ti a. Aizika chuan, "Mi dang zawng pûr buai lo zâwk ila a ṭhat ka ring zaw mah mai. Mawngkaw tam duah ringawt pawh hian thil a tisâwt zapui lêm lo va, a lungrual sa hi kan thawk chhuak tlang thâwr mai zâwk ang e," tiin mi dang an mamawh lêm loh thuin a chhâng a. Chumi hnu chuan rei pawh awm lovin zawlbûk lam panin an chhuak dûn leh ta nghâl a.

Zawlbûk an thlen chuan vâl upate leh pa tling titi phung lêng vawrh tura lo kaite, leh mipa naupang puitling titi ngaithla tûra lo kai vete chuan zawlbûk chu an mawi hmuk mai a. Aizika leh Lianchuhmânga hmêl an han hmuh chuan, "E khai! Zanin chu lêngi khâr in sâwntir ngam meuh na che u nge maw? In va rawn leh lâng rang em maw bawk chu!" tiin an lo fiam rawn laih hlawm a. Aizika chuan, "Zanin kher zawng, Lianchia to loh zân ber pawh tluk lovin hmeithai in takngial pawh kawng inhawng zu han awm miah lo a! Kan rawn dâwng da haw do mai a nih hi," tiin a han chhâng fiam lêt ve zauh va. An nui dar dar hlawm a.

Chutia an nuih ho dar dar lai chuan pa upa lam deuh pakhat hian Lianchuhmânga lam chu hawiin, "Mânga, hei râla khatah, khual thu a than thui viau tawh lai kârah hian, Thumnakpâr lal nula Ngûrlianpuii hmelṭhatzia thu hi kan lo hre ve fo tawh a. Eng ang chiaha hmêlṭha nge maw a nih le? Khual thu thang kan hriat hi a lo dik rêng em maw chu?" a han ti a.

Lianchuhmânga chuan, "E khai! Chu zawng, Zika hian a hre zâwk ngei ang; rei khat chu an inchên chilh bawk kha maw le. Kei zawngin, han chian tûr hian ka la hnaih ve meuh lo; mit erawh a la reuh ngawt chu a nih kha," tiin a chhâng a. Chu veleh paho chuan Aizika lam chu lam chu an hawi ṭhap a. Chu'ng zinga mi Pâhnûna chu, "Uai! Chutiang lam daih daih chu maw lo ni? Kan nulaho chuan hria sela zawng aw, râla khat aṭang pawh hian a rêl phâr duh phah ngei dâwn chu aw!" tiin a nui suk suk a. Chutah a bula ṭhu pakhat chuan, "Chu, Zika, Thumnakpâr lal nula chu eng ang chiaha hmêlṭha nge maw a'n nih rêng chu le aw? Kan lal mual nula hmel ṭha Chawngpuii hi a el phâk chiah em maw chu?" tiin a lo zâwt zawm ve nghâl var a.

Aizika chuan, "Chutia in han sawi chhuah tâkah chuan, Thumnakpâr lal nula Ngûrlianpuii zawng, lal nula ni âwm rênga mawi chu a ni ngei alawm. A lo thang thui viau pawh hi âwm lo a ni hauh lo," ti chauhvin a chhâng a. Chu thu a han sawi chuan Ngûrlianpuii hmêl ṭhatna chu an hre châk zual sauh hlawm a. A hmêl pian hmang leh mitmeng awm dân te, a pian phung te chu an zâwt sek sek hlawm a. Mahse, Aizika chuan engtina chhâng lo hian a nuihsan leh ngawt hlawm ṭhin a. Chutih lai chuan Pâhnûna bawk chuan, Aizika chu melh deuh rân rân pah hian, "E khai! Eng sawi lova i han ngawihpui dânah tlat hian in inkârah eng emaw hi a lo tla ru reng a nih ka va ring êm ve âw! Nang ang mi hming ṭha, chu lai kârah khuavâng fa chuam ang maia hmêl ṭhatnaah pawha duai lo lehnghal chu, tu nula mah hi i lakah nêm lovin an chhuak dâwn si lo. I lo inchichunûlpui viau pawh a ni mahna le!" tiin a han veh thlêm vêl a.

Aizika chuan, "A khai! Mai mai ṭhin a! Ani lal ropui fanu te zawng, keini ang mai tân chuan mit sir hlek chauh pawh ngam chi rua em maw ni dâwn le?" ti chauhin a chhâng leh a. Chutianga an duh anga a ṭawng duh vak lovah chuan, eng thil dang mah zawh chhunzawm leh chu tum zui tawh hlawm lovin, ṭin an rêl hma chuan titi dangah an kaisan ta zâwk a.

A tûk khua a lo vâr chuan an tum lâwk ang ngeiin, Aizika leh a ṭhiante ho chu vârṭianah khaw chhak lam panin an chhuak ta nghâl vang vang a. Thui tak kal tûr an nih avang leh an chin tûr hriat a nih loh avâng chuan, an thawk rip hlê nghe nghe a.

Chutianga zan li lai mai an thang hnû chuan, hmun pakhat lungpui zâwl duai mai awmna hmun hi an thleng a. Chutah chuan vaibêl te zuin an han châwl hahdam a. Chutia an chawlh lai chuan an hma râlkhat tlâng chhipa mei khû lo chhuak ngiai ngiai hi an hmu a. Chu chu thlir vang vang pah hian Aizika chuan, "Kan hma lam tlânga meikhu rawn chhuahna chu khua han ti dâwn ila, khua a nih hmêl mang tlat bawk si lo. Eng atan chuan nge maw khi lai tlâng chhipah te mei an han khûk tâk ngiai ngiai mai chu ni?," a ti sap a.

Lianchuhmânga chuan, "Khua a nih khi, he'ng lai ram biala hnam ṭhenkhat te hian chîn dân danglam tak mai an nei ve alawm. Khua hi an sât dar ve ngai lo va, ngaw hnuaia thingkûng kârah hian in sain an khawsa tawp mai ṭhin. Hmun khatah hian tam tak awm lovin, tlêm tê têin hmun tinah an inzâr pharh thliah a. Lo pawh nei lêm lovin ram thei leh ramsate hi chaw-ah an ring mai a. An awmna biala mi an ei rêm deuh hnuah hmun dangah an insawn chhuak leh mai ṭhin. He'ng mite hian hmun bik an nei lo va, pêm kual rêng rênga hun hmang ṭhin an ni. Sakhi sa hi an duh êm em mai a, an duh êm em chhan nia lang pakhat chu, a hela ei mi-a an neih vâng a ni. Sakhi sa hi a hminin an ei phal rêng rêng lo nia maw le!" a han ti a.

Lianchuhmânga bula ṭhu Thanluaithanga pawh chuan, "Hetiang mite hian sa pelh hi an thiamin, an khawsak a mâwl viau rual hian finna danglam tak hi an nei reuh asin. An kawlhsen a, râl hrât khawkhêng an ni a, an râl thahte hi an chaw an ni nghâl mai zêl mai bawk a ni âwm e. Sakhuana lam hi an la urhsûn an ti hlê bawk a, an puithiamte hi hmun khat laiah pûkah an khawsa mai a. Chu'ng an puithiamte chuan hmeichhe chhûl leh mihring thluak hi an chaw duh ber a ni tih te pawh sawi a awm bawk. Chuvangin an puithiamte tih-lâwmna atan an chhehvêl khuaa hmeichhiate hi an ru ṭhin a. Mahse, chutianga hmeichhe rûk tûr an hmuh zawh mai loh châng chuan, an inthâwi hun bikin a lo nan kawl-awh tawh bawk si chuan an fanute emaw, an nupuite pawh an puithiamte ânchhe laka him nan an pe mai ṭhin bawk tih te pawh sawi a awm," tiin a lo thual nawn ve bawk a. Chutianga an zinga upa ber leh he lam ram bial hre chiang berin chutiang thil a han sawi chuan, an zinga naupang deuhho chu Kâwltea tiamin, a tizâm ru ta hle hlawm a. Eng mah sawi chhuak lêm lo chuan an hlauhna leh an zâmna chu an ngawihpui dâk hlawm a.

Lianchuhmânga leh Thanluaithanga'n an pal tlang tûr ram biala mite khawsak zia an sawi chu, an naute chuan an ṭihin an zâm ru hle a ni tih Aizika chuan a hriat chuan, engtin emaw taka an rilru tihpaukhauhsak ṭulin a hre ta a. Chutah an vaia melh kual ralh ralh pah chuan, "Naute u, in hmêl a va tîm sâwt dei dawi ta ve maw le? Zahleithanga ngaihah chuan thi in ni reng tawh tih kha in intheihnghilh ta em ni? Hlauhna hmun hi mihringin tu nge a nih a lan chhuahtir theihna hmun pawimawh ber a ni tih hriain, in theihna a lan chhuah theihna tûr hmanrua kha inhnehtir hauh suh ang che u. Tûnah hian, kan hma lam lang chin zawng bâk hi kawng dang zawh tûr a awm lo va, hêl ngaihna awm eih lo hlauhawm kan pal tlang dâwn a ni tih ngaihtuahin, in chakna te kha han siam thar leh sauh teh u khai. Kan sut tlang tûr kawng hi a khirh poh leh kan su na mai tûr a ni, kan châwi kân tûr lung chu a rih poh leh kan thâ kan chhuah na mai ṭhin ang hian," tiin a han fuih sauh sauh a. Chu a fuihna ṭawngkam chuan naupang zâwkte hlauhna leh tîmna chu a tidalin, an rilru chu a tipaukhauh ta sawt hlawm a. An zia zawng zawng pawh chu a danglam zawm chho nghâl vek bawk a. Tichuan, hah khat a dam hnu chuan an hma lam tlâng, mei khu lo chhuahna bulṭhut kianga ruam chu pal tlang tûrin kal an rêl leh ta a.

Mit leh beng chhi kawp râna rei khat an kal hnu chuan mei khu lo chhuahna tlâng bulṭhut chu an thleng hnaih ta a. Chutih lai chuan, an hma lam tlâng bulṭhuta tianga inhlap ri ṭhak ṭhak ri chu Lianchuhmânga chuan a hre phâk a. Chu veleh a hmaa kal Aizika chu a kheuh ding zauh a. Chumi hnu chuan an hnunga an ṭhiante chu bengchheng lo tûrin a vai ding nghâl bawk a. Thâwm chu uluk leh chîk zâwka a han vang vang ngaihthlâk chuan, tiang a rîk ṭhak zawm zata hmeichhe na tuar ṭe ring ngam si lo ngik faih faih ri hi a hre tel ta tlat mai a. Aizika hnênah chuan, "An puithiam chaw tûr hmeichhia an man a ni ngei mai. Hmeichhe na tuar thâwm ka hre tlat mai," a han ti a. Chutah Thanluaithanga chuan, "A nih dâwn chiah chu! Hetianga an puithiamte ei tûra an mi mante hi an sâ a tui leh zualna tûrin, an tihhlum hmain an nghaisa ṭhin alawm," a lo tizawm ve zat bawk a.

Aizika chuan chu chu a hriat chuan, an mihringpuite laka lainatna an neih loh dân êm em lutukah chuan a thin a rim hle mai a. Lianchuhmânga hnênah chuan, "A ngik thâwmah chuan a hnuk a la hlat hmêl êm ang chu maw?" tiin a han zâwt a.

Lianchuhmânga chuan uluk leh chîk leh zuala a han ngaihthlâk chuan, "Chuti maia hnuk hnaih tûr chu a la ang lo riau, a ngîk ri a la chau rau lo ve," tiin a chhâng a.

Aizika chuan, "A nih leh eng zât âwma tam nge an nih hmêl han ngaithla chîk leh deuh teh," a'n ti leh a. Lianchuhmânga chuan a benga lei siin a han ngaithla leh vang vang a. A rawn dâk chuan, "An awmna lai hmun hi a dâm deuh a ni ngei ang; an che vêl thâwm mal thliar a har riau mai. Mahse, a tam berah sâwm pawh an tling kher âwm lo ve," a han ti a. Chutah Aizika chuan, "Aw le, mi sâwm bâwr angah ngai ta ila. Chutiang a nih chuan, kan vaia va ṭhâwn pawh an ngaih dâwn loh chu. Luaithangpa nen kan pathumin kan hmet mit tham lek ang. Mi dangte erawh hi chuan, he lai bâwrah hian riah hmun tûr hmun biru deuh, inhmuh mai a awlsam loh theihna tûr lo zawng sela a ṭha ang," a han ti zung zung a. Tichuan, Aizika, Lianchuhmânga leh Thanluaithangate chu silai leh lu lâk chem nên, an hma lama thâwm lo chhuahna lam pan chuan an inzui ta ṭhâm ṭhâm a. Mi dangte pawh chuan Aizika sawi ang chuan hmun biru lai zawngin an ṭûl ve nghâl a.

Nakin deuhvah chuan Aizika chuan an hma lama an hmeichhe nghaisa thâwm chu a hre phâk ve thuai a. Chutah a'n din dat hnu chuan, "Silai hmeh puah ngam a nih dâwn loh avang leh thâwm ring chhuah ngam a nih dâwn loh avangin, fimkhur tak leh rang taka kan chêt a ngai dâwn a. Kan vawi khat hriam lek hi a thlâwna chhuahtir loh kan tum hrâm dâwn nia. Vawi khat kutthlâk an thihpui nghâl ngei theih nân uluk tak leh rilru fim takin, kan hriamin a dehna lai tûr kan thlang thiam dâwn nia," a han ti sâ sâ a. Anni pahnih chuan an lu an lo bu nghat a. Tichuan, an veh hnaih leh ta ṭham ṭham a.

Thâwm lo chhuahna chu an hnaih tial tial a. Nakin deuhvah chuan mau tlâwn tlûk thum âwm leka hnai, hnim buk phên aṭang chuan an mi vehte che zia chu an thlir rân tawh a. Chu'ng mite chu Lianchuhmânga sawi ang chiah chuan mi pasarih chauh hi an lo ni a. Anni chuan nula chu an lo man ngei a, ruak vekin, ui pum tiat vêl tûr thing pawm hian an lo phuar bet a, tai kezungpui tia lêng lâwng bân chen vêl zeta sei hian an lo vuak rawn pawp pawp mai hi lo niin. A chauh hnâwp thlenga nghaisak a, a chauh hnua vawk zâwna an puithiamte hnen zâwn thlen an lo tum hi a lo ni a. Chu thil a han hmuh meuh chuan, Lianchuhmânga meuh pawh chuan râwng a ti ngang a ni ang, "In va han râwng ngai êm!" tiin a phun sup a, a thinrim chu a inpet fan fan mai a.

Chutah le, hnim buk inphên zêl chung chuan an veh hnai leh ṭham ṭham a. Mau tlûk khat âwm vêla hnaiah an awm tawh tih chuan Aizika chu, "Lo nghâk lawk rawh u, pakhat saw ka'n thal phawt ang e," tiin a han phun sap a. Tichuan, a hnim inphên kâr aṭang chuan tho chhuakin, lung chang zet mai kuttum tia lêng lâwng a hûm chuan hmeichhe mantute zinga pakhat chu a tukkhum pawr sawk khawpin a'n vawm ngheng mai a. Chu a vawm pa chu a tukkhum aṭanga thisen chik puat puat chung hian a bul leiah chuan a tlu khûr ngawt ngawt a. Chutianga an ṭhianpa tlu ta reng mai an hmuh chuan chu'ngho chuan lung lo chhuahna lam chu an rawn hawi a, Aizika lu lâk chem nena an lam hawia lo ding to mai chu an rawn hmu nghal thuai a. Chu veleh an hriam chuhin an rawn bei phei ve nghâl a. Chutah Lianchuhmâng leh Thanluaithanga chu rawn tho chhuak ve nghâlin, an pathum chuan chu'ng anmahni lam rawn pantute chu lu lâk chem nen chuan an pan phei ve nghâl bawk a.

An han intawh chilh chiah chu, Aizika chuan amah rawn vih tlang pawlh tuma a âwm zâwna fei rawn lek kawh vâw mai pa chu, a kut vei lama a fei chu lo lâk tleusak zauh pahin a nghâwng bulṭhutah chuan thle hnawk khawpin a lo sahsak chawrh mai a. Chu pa chu lu chhum lo chauh hian leiah chuan a tlu zawi hnawk a. Chutiang bawkin Lianchuhmânga leh Thanluaithanga chuan an bitum hmasate ve ve chu an lo thal dûn ṭhak ve ve bawk a. Chutah, mi dang pathum la damte chu an bitum leh nghal ṭheuh a.

An han inbei leh ta tak tak a. Aizika chu ṭuan ṭha ngang a nih avang leh tharum ngah em em mai a nih bawk avangin, pakhat lek tuk dawl chu a awlsam hle mai a. A bitumpa hreibâtah tak mai lu thlâwk nawlha a sahsak hnu chuan an hmeichhe phuar chu va phelh thuaiin, a saruakna khuh turin a bula a puan an theh tawmsak chuan a tuam nghal vat a. A bula tui ûma tui chu intirin a ṭhut hahdamtir vang vang a. Chutih lai chuan Lianchuhmânga leh Thanluaithanga chuan an bitumte chu an lo sât ve ṭe ṭhat ṭhat bawk a. Mahse, an na tuar chuan thâwm nasa an chhuah hmain an lu chu an sah thlawnsak dun ve thuai a.

Chutia awlsam taka an vanneih hnu chuan an mi thahte ruang chu hmuh mai loh turin, hmun biru laiah chuan an zalh khawm a. Leia an thisen luang ngiai nguaite chu an thup leh vek bawk a. An zawh hnu chuan Aizika chuan nula hnenah chuan,"Ti rawh le, nangmah maia han kal zia i ni si lo va, zanin chu kan vênhimna hnuaiah awmin, kan zinga i riah ve mai a ngai dawn a ni," tiin aw dam thlap hian a han bia a. Nula chuan a taksa na tia ṭhen leh sawk ṭhin pah chuan, "In ṭhatnaah ka lawm e," tiin a chhâng a.

Chumi hnu chuan an ṭhiante awmna lam pan chuan an han kal dâwn a. Mahse, nula ke chuan a taksa chu a dinpui zo ta hauh lo mai le! A ding tûr chu a ṭhu zawi leh hnawk mai a. Chu veleh Aizika chuan, "E khai! Ti kha chuan kan inchhawm thleng mai dawn lo ve," tiin a han pawm tho va, zo tak hian a paw bahlât lawp a. Tichuan, an ṭhiante awmna lam chu hmanhmawh takin an pan leh ta nal nal a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 28th, 2019, 6:28 pm

PASALṬHA AIZIKA

- Nunmawia Fânai

BUNG 28-NA

Nula rim tûr tlangvâl ṭhenkhat zawlbûk kaw rawk khawpa an chhuah thâwl hnu chuan, mi hnukhawiah Aizika leh Lianchuhmânga chuan nula rîm tûrin zawlbûk chu an chhuahsan dûn ve hnak hnak a. Kâwltea erawh chuan an Pâwi ṭhiante chu an kimkit lutuk hlauvin anni nêna zawlbûk lo nghah chu a thlang thung a.

Chutia Aizika leh Lianchuhmânga lêng chhuak chuan, lal mual lama Chawngpuii te in chu an pan ding dûn chat a. Chawngpuii te kawt an thlen chuan in chhûng aṭangin tlangvâlte titi thâwm hi a rawn ri chhuak mar mar a. An luh hma chuan Aizika chuan, "Lianchuhpa, kan lênna tûr hi kan khaw nula hmêlṭha Chawngpuii te in a ni a; ani hi kan khuaah chuan nula to ber ni hial ang. Rîmtu leh chhaitu hi a nei kûr zut a, tlangvâl, kei ka ni inti chin hi chuan kherh thlûk tumin an hêl vek bawk. Chu'ngho zingah chuan Sângrova hi a phusa ber niin, an chung en rawn ṭhup bawk a. Zaninah pawh hian, kan hmêl a hmuh hunah chuan eng emaw takin khawsak a tum ngei ang. Sângrova zia chu nichin khân i hriat tawh kha; engtin pawhin lo ti che sela, a hmuh nêp leh chungtlâk theih tûr ang zâwngin i zia tidanglam hauh suh ang che," tiin a fuih mawlh mawlh a. Lianchuhmânga chuan, "Min lo fiam a nih pawhin, a mi fiam dân tûr âwm chu ka hre thiam thei ruak alawm; ka ngaihtuahawm lo ve," tiin a chhâng a. Tichuan, Chawngpuii te kawng inhawng sa hiauvah chuan siangbât chu an kân lût dûn ta ral ral a. Sângrova pawh chu Chawngpuii la kaihna bulah chuan neitu chan inti chang deuh hian a lo ṭhu vei khûr a. Aizika leh Lianchuhmânga hmêl a han hmuh chuan, an hriat tham tûr leka langsâr lo hian thikna leh huatna mitmengin a chhâwn râm râm a.

Chawngpuii tap mei êng bula la kaiin Aizika leh Lianchuhmânga hmêl a han hmuh chuan, "Kha lah, kan Pâwi khualte lah ni reng che u. Mikhual teh châwkina keini ang in te engti tiha rawn zawng chhuak thei mial mai nge maw in nih le? Lo lêng ṭhu tak tawh u," tia chhâwnin a lo fiam var a.

Aizika chuan mei êngin a chhun phâk chin leh chin lo aṭang chuan, "Pawithlun nula hmêlṭha rûn te zawng, ran mâwl mai mai tân pawh han hriat loh chi rua em ni dâwn? Tlâng mah thang thui nâ chu, kâwlvalênchham aṭang pawhin kan rawn thur chaih mai che chu a nih si hi," tia fiam lêt zoh pahin, bang thlang depah chuan ṭhut hmun a rem nghâl chawt a. Lianchuhmânga pawh chuan ngawi rengin Aizika bulah chuan ṭhut hmun a rem ve sauh sauh bawk a. Ṭhut hmun an rem fel chauh tih chuan Chawngpuii chuan a la kaih lai chu dahin, a ṭhut hmun chu thawhsan ṭham ṭham a. Kawngka lam chu pan pheiin kawngkhâr chu a va sâwn phui rawk a. Chumi hnu chuan tap bula a la kaih chu a chhunzawm leh mawlh mawlh a. (Hmun/Khaw ṭhenkhatah chuan nula ten an in lêng tûrte an lo lên luh mai ngamna turin kawngka hi sâwn hawn sain an lo dah ṭhin a. Chu chu, "Lo lêng rawh u, in lo lên a thiang e," an tihna a ni a. Kawngka an sâwn phui hmak erawh hi chuan, eng emaw thilah in lêng tûrte lo hnarna atan an hmang ṭhin. An nula rim tura kha a damlo emaw, an nula rim tûra khan a mi duh tak in lêng a nei emaw a ni tawh ṭhin. Chutiang a nih chuan, tlangvâl dangte chuan kawng inkhârna inah chuan lên luh phêt an tum ngai lo. Mahse, chutih rual chuan, hmun ṭhenkhat, khaw ṭhenkhatah chuan kawngka a inkhâr avanga in lêng tûr hnarnaa ngaih a ni lêm lo. - N)

Chutianga Chawngpuii'n kawngkhâr a han sâwn phui tâk hmakah chuan, Sângrova chuan a hma aiin Aizika a thikna mitmeng chu a chhuah langsâr zual leh ta sawt a. A chhan chu, Aizikate an rawn luh hma zawnga kawngkâ inhawng reng, an lo luh tâk hnua a sâwn phui hmak mai khan eng emaw tak awmzia a nei hian a hre tlat a, a lo beisei, a tâna vula a duhna chuan dâltu neia a hriat tlat vâng a ni a. A ni rêng lah tak a, Chawngpuii hian Sângrova hi a ruh lang râwng chuan a hnar dawt lo na a, a chezia leh ṭawngkamin a hriat thiam theih tûrin a hnar ve reng ṭhin a. Mahse, chu pawh hre thiam duh lova pâwng lâk a tumna thinlung chu a huain, a hawi lo a ni tih chu a hriat thiam leh zualna tûra langsâr taka tih-lan khum chu pawi a ti lo zo va. Chuvanga a mi thik ber mai Aizika a rawn lan veleha kawngkâ chu va sâwn ta ngat kha a ni rêng a. Chu erawh, mi dangte chuan an lo ngaihtuah phâk lovin, a hun ve rêngah an ngai vek thung.

Sângrova chuan a ṭhut hmun aṭang chuan a ring chu a han fân âk âk a. Chawngpuii rimtu dang zawng zawng chu melh kânin, Aizika leh Lianchuhmânga insi lo chauha ṭhu ṭhiang rial chu an han melh tawn zak zak a. Chumi hnu chuan, "Zika, kha i sal chuan a pu meiah ṭan a thlang ta deuh em ni? Engatia, han inkawp ta rual mai nge maw in nih tâk le? Kei, chala sam zial bâwk luah mai, Hrûmtunga thlahho chu tual uicho tluk lekah bâk ka ngai hlei nem; ka hnung zui atan lek phei chuan ka thlang hauh lo vang le," tiin nui huah huah chungin, Lianchuhmânga laka a lo thinrim ṭhinna chu chung tlâkna atana hmangin, fiamthu ang deuh hian ṭawng a han cheh chhuak zoh va. Chutih lai chuan Lianchuhmânga chuan Sângrova zia chu a lo hriat tawh avang leh, a ṭawng duh dân tûra a rin lâwk ang thil a nih avang chuan mênah a thlâk vêl mai mai a. Mahse, Aizika erawhin Sângrova ṭawng cheh duh dân kher chu ngawihsan chi niin a hre lo va. Amah ngei pawh chu a hmer tel a ni tih a hai loh avang chuan, "Taichênga thlahte hi in lo ropui a nih dâwn hi â? Lah, kan pu Hrûmtunga hminga min han den zoh mai chu ni. Uicho te chu hlu deuh asin an nih; mi zawng zawngin min phatsan vek pawh ni sela, khawhar leh beidawn lai ber pawhin ṭhian rinawm berah an ṭang tlat ṭhin. Thil siam tin mai hi, an hlutna thlir thiamsak lotu avânga an hlutna hloh thei ngawt an nih lohnaah hian, chu chuan a thlirtu nihna chu a lantir ve ruak theih bawk a nia," tiin nui suk suk chung chuan chhâng lêt ve nghâl a. Chu veleh Chawngpuii chuan, "A ni ngawt mai! A thlirtu thinlungin a pawm chin zêlah hian engkim mai hian nihna an lo nei hrang zêl mai chauh a lo ni," tiin a lo thual ve leh nghal zat a. Sângrova chuan an thil sawi chu engah maha ngai lo ang mai hian, a vaibêl chu pak khûk talh talh pahin a ṭhut hmunah chuan a ke a phût hlarh hlarh a.

Chutia titiin lungrualna lam a pênsan dâwn nia a lan lai chuan, an zînga pathlâwi lêng ve pakhat chuan, "Kan thu danga lai chuan, mi dangin min lo ngai haw lo ula, amah ngei a awm vê tâkah chuan, eng emaw-ah ka'n dîlchhût lawk teh ang," tih leh Aizika lam hawi chu a rual a. Aizika thlêk hâ chung chuan, "Zika chu, Zahleithanga khaw lama i han châm chhûnga tumpâng huai i han tihhlum thu te tlâng kamah kan lo hre ve viau vuai a. Kha tumpâng kha, hmân lai deuhva khi lama tumpâng huai kah theih loh nia an sawi ṭhin kha a ni thei mai ang em? A lo ni a nih chuan, 'Se chal pahnih belhbawm ai pawhin a lian zâwk,' an tih thu te, vêngtu a neih tlatzia te, a fin em emzia an sawi te hi a lo dik rêng em maw chu? Min han hrilh teh khai; hriat châkin ka beng hi za riau mai nia maw le," a han ti a.

Chutia an pathlawiin a han sawi ênah chuan tlangvâl pakhat pawh chuan, "A ni ngawt tak mai, Kâwltea lah chuan i chêt dân huaisenzia thu leh pialrâl hmâwr ko tak taka i din thute a sawi châmchi mai si nen. Kan chân lo chauh che lo zu ni reng chuan," tiin a lo tui hnih ve nghâl zat bawk a. Tlangvâl dangte pawh chuan a thu sawi hriat châk deuh hian Aizika chu an ngaichâng ṭhup a.

Chutianga mi dangin an ngaihchân ṭhupah chuan Aizika chuan, "An lo sawi ṭhin in hriat tumpâng huai nên chuan in-an lohna an nei lo a va nih hmêl ve âw, kha sih huai kha'n. Tawng nawn leh dâwn ni ta ila chuan, a pumpelhna ka zawng ngar ngar duh tawh ngei ang," ti chauhin a chhâng a.

Chu a chhânna chu duh khawp lo tak hian an pathlawi bawk chuan, "Nang hi zawng aw, i inchhuang lo ṭhin mang teh e. I bulah hi chuan tlâwmna pawh hi a tlâwm ngawih ngawih ta ve ang," tiin a chapo lohna zia chu ngaisâng leh zah ru tak hian a han thual nawn leh zoh a. Han zawh zawm leh zêl chi niin a hre lo va, a ngawihsan ta hlauh a.

Chutih lai thung chuan Aizika ṭawngkam chuan Sângrova chu a tiphûr ta tlat mai a. Chumi avâng chuan Aizika chu han chhaih kual châkna a nei ta tlat bawk a. Tapa a vaibêl êk a khawn thlâk karh karh a, dum a han beng khah leh nuap nuap hnu chuan, "Chu, kan pasalṭha tlâng thang, huaisennaa khat nia ka lo hriat chu a tihhlum tawh sa lakah a lo tlâwm ru reng a ni maw? Eng hlauhnain nge maw man ta che le? Hlauhna hi khawiah nge maw a lo rah reng chu ni dâwn ni?" tiin, Aizika chhânna hre châk tak hian a han ṭawng khum salh a. Chû a ṭawng cheh chhuah chuan a sangâwi zâwnpuite ho chu a tiphûrin, Aizika chu tihzah tum tak hian an lo nui dar dar hlawm a.

Ni e, a hma khan Aizika hian anniho hi zawlbûk chhûngah khan lo tlâwm hlawm vek tawh mah se, kha khân an rilru leh thinlungah a laka tlâwm hlenna erawh a tuh hlensak chuan loh avângin, an ngaiha mikhual chan a la channa kârah chuan an en dânah leh hmachhawn dânah a hma ang tho kha anni leh vek tawh a. A chhan chu, a zin hlâna Sângrova'n a lo fuih ṭhin dânah, "Mihring ve mai a ni a, chungchuanna zawng zawng khum vektu a ni bik lo. Chuvângin, a tân hun hi a malsâwm reng dawn lo va, kan titlâwm thei tih hriain ring nghet tlat ula. Chu chuan chakna min siamin kan lak aṭang hian a tlâwm ngei ngei ang. A bîk takin, khami zân kha chuan, ka chêt a pheh vâng leh ka thinchhiat insûm theih loh luatah a lakah ka che chhe ta zâwk hlauh a ni a. Mahse, kha kha ka tlâwm hlenna a ni lo, kan inkâra inelna bul inṭanna chauh a ni," tia a lo fuih reng ṭhin vâng a ni a. Chu chuan, mi dangin an neih ve mai mai loh, mi bîkte chauhina an kawl ṭhin hûhâng na tak mai Aizika'n a neih leh, a huaisenna leh a chakna piah lama a ṭuan ṭha tak te chu a theihnghilhtir a, an zuam rawn leh em em tawh zâwk a.

Chutia, Sângrova'n a han chhaih vêl zoh leh a ṭhiante hovin an thlâwp dar dar dânah chuan, Aizika chuan a laka an rilru put dân chu a la ngai reng a ni tih a hai lo kher mai a. Chutah Sângrova'n a chhaih vei kherna chu, "Keini ang duang hi zawng, hlauhnain a man phâk loh khawpa sânga awm phâk zia kan ni hlei nêm mâw. Ka tan hi chuan hlauhna hi a rah hniamin a rah hnaih khawp mai a, eng lai mai pawh hian ka ban phâkah leh ka nâwk fuh reng tûr hian a bâwr lian lian hi an rah thluah reng mai a nih ber hi. Ka tum loh deuh hian chu'ng chu ka lo nâwk fuhin, ka inrin hman hmâin ka chhûngah hian min lo luhkhung fel reng tawh mai ṭhin. Mahse, chutianga hlauhnain min man châng chuan ka hlauhna chuan rilru fim min puttir ta hlauh a, hlauhna laka awm dân ka zir thiam phah ta hlauh ṭhin. Chuvângin, hlauhna ka nei lovang tih hi ka thil hlauh berte zinga mi a lo nih phah a, hlauh nei lo mite ka awt ngai ta miah lo nia.

"Ni e, kha tumpâng huaisâr tak kha la damin bitum nawn leh tûr ni dâwn ila, ka pehhêl theih chhûng chu ka pehhêl ngei ang. A chhan chu, thih leh dam kâr tak meuh meuha dam khawchhuak tûra beih hautakzia ka chian phah êm mai," tiin a chhâng a. Chu thu a sawi lai chuan Chawngpuii la kai lai pawh chuan thil dang ngaihtuah thei lovin, a la kaih lai chu chawlhsan ṭhakin ngunthûk tak hian a lo ngaithla doh doh a. Sângrova pawh chuan han chhaih nawn zui chi nia hre lovin, a lehthalna thu ngaihthlâk nawn leh chu a hreh avangin chu lam thu-ah chuan ngawi a dawh zui ve nghal a. Lianchuhmânga thung chuan, Aizika chu hre chiang viau tawh emaw a lo intih lai a, a finna chu a lo la hriat chian lohzia a hre chhuak zêl mai chu mak a ti zâwlk hial a. Chuta chhapah, a ṭhian nia a kianga khawsakna hun Khuanu'n a ruatsakah chuan a lâwm a zual phah êm em a; a chhuangin a ngaihsânna chu a zual tual tual mai a ni.

Nakin deuhah chuan tu emaw hian sumhmun a rawn rap ri ṭât ṭât a. Chu lam chu ngaihvena an beng an chhit ṭhap lai chuan, "Chawngpuithluaii a awm em?" tiin pa tar lam aw hi a rawn ri chhuak ṭiak a. Chu veleh Chawngpuii chuan, "Awi a! Ka pa Rema lah hi, hming pangngaia han inkoh ṭhat awm ta rêng rêng lo! Awm e, awm e, min lo nghâk lawk rawh ka hawng dâwn e," tiin a nui kar kar a. Tichuan, Chawngpuii chu a ṭhut hmun aṭang chuan a tho chhuak a, nui hak hak chungin kawngka chu a va sâwn hawnsak rawk rawk a.

Chawngpuii'n, 'Ka pa Rema' a tih hi Vawklutâr vêng lam pathlâwi, upat lama nupui sûn, sûn hlim deuh chauh a ni a. Chutih laiin Chawngpuii te chhungkua hi an felin, rual kawm thiam êm em mai an lo ni nên, a ngaina hlê a. Chuvâng chuan a hman châng hi chuan hmun dang bêl lovin, a lunglêng hi Chawngpuii te inah hian a tâp deuh râwt reng a. Amah hi pa uang leh fiamthu duh zet mai, tu mitmei mah vên tum em em lêm lova ri huau huau chi leh, titi thiam tak a nih bawk avâng hian Chawngpuii te chhungkua pawh hian an ngaina lêt ve hlê bawk a.

Pa Rema chuan ṭhutna a han rem fel a, a ṭhut hmun aṭang chuan a han hawi kual vêl leh phawt a. Aw a then kharh kharh hnu chuan, "E heu! Kan nu ai min awhsaktu tûr chuan in lêng i va ngahin, rîmtu i va nei zahawm khep khep hlawm ve le? Hetiang a nih hrim chuan thlah fâl ngam i ni dâwn ta hauh lo mai," tiin Chawngpuii fiamin thu bul a han ṭan nghâl ngawt a. Amah chu a tua mai pawh chuan an hriat chian a, a ṭawng hlek nuih châna an chân rawn a nih avangin Chawngpuii in lêngte chu an nui dar dar hlawm a. An nui a hân deuh ta maw tih chuan Pa Rema bawk chuan, pathlawi lo lêng ve Dochuha lam chu hawiin, "Lah, ka pathlawipui Novi pâ hmêl han hmuh tâkah chuan, ka thla te lam lam muang tak huai huai ka ti!" a han ti leh zat a. Dochuha chu zak tih hriat deuh mai hian a nui ruh ruh a. Tlângvâlho erawh chu uar deuh mai hian an lo nui dar dar thung a. Chutah Chawngpuii hnênah chuan, "Chawngpui, thil vâng leh tlêm apiang hi a hlu ṭhin a ni ngai a. Chumi a nih avâng chuan nang pawhin thil vâng leh tlêm apiang ngaih hlutna châng hre ru kar ṭhin ang che," a han ti a.

Chawngpuii chuan, "Eng thil vâng leh thil tlêm chu nge ngai hlu tûra min duh teh rêng le? Min han hrilh mawlh ta che," tiin a chhâng a.

Pa Rema chuan, "E khai! Chutiang te i lo la ngaihtuah chhuak ngai meuh lo a ni maw? Kan khua hi kan vânduai a, pathlawi neih tamah hian kan pachhe riau a nih hi. Tunah pawh zungṭang thliakin han chhiar nghoh nghoh dâwn ila, hetiang khua riang ruangah hian elh hnih daih, kei leh Novi pa bâk zu han awm rêng rêng lo vâ! Kan unaupa thar Lianchuhpa hi a lo thlâwi ve hlauh te a nih loh chuan? Tûnah pawh, nula in dangah chuan a vâna kan han vân dân tûr zia chu, hmeithai zinga zang zawn ang hlauh kan ni hawt dâwn asin. Chumi a nih avâng chuan, pathlawi hi pasal tûr atan pawh ngaih hlut tlâk kan lo ni ber tihna a nih chu," a han ti chu, Chawngpuii chuanla kai lai dah meuhin za êm em mai hian a rawn nui chhuak hawk a.

A nuihza zualpui a reh hnu chuan Chawngpuii chuan, "Aw! Ka nu nên in inbiak fel vek tawh kha maw le! Zâwlpuan phah kher phûta i intih to viau hnu pawhin a hnial miah loh che kha," tiin a fiam lêt ve zat a.

Pa Rema chuan, "Kha kha a tûr alawm. A tlawna tlawn nih hi keini ang thil tlêm leh hlu chuan kan phû rêng a ni. A hawi pawh ka hawi sân deuh vah reng tawh hi, ka pathlâwi hnû aṭang hian," a han ti leh kher a. Chu a thil sawi chu an lo nuih hluah hluah hlawm a.

Chutianga eng eng emaw sawia an titi lai chuan lêng ṭhut muan âr a lo khuang âl âl a. Chu veleh Pa Rema chuan, "Chu tê, ka tâna lêng haw âr a khuang ta âl âl mai; ka ṭinsan tawh phawt ang che u," tia nui huah huah chung hian a ṭhut hmun aṭang chuan a tho ṭhum ṭhum a. Tlangvâlho chuan, "Nang berin min ṭinsan mai ten tu titi nge maw kan han ngaihthlâk tawh chuan ang le? La ṭhu muang ve rih teh khai," tiin an chelh sap sap a. Pa Rema chuan, "A, keini ang chinah tawh hi chuan, ṭhut muanna tûr mawng alawi neih a ni ve tawh ṭhin lo," a han ti tak ve viau a. Mahse, kawngka lam pana a kal pah chuan, "Haw kawngah nuthlawi tlawngâwl ro bâwm la nei ṭha deuh, ro bâwm kar hawnsak tûr te tawn fuh mial a awm thei," a ti leh hrâm a. Tlangvâlho chuan, "A kher kher ṭhin chuan..." tiin an nuih rawn tlâwrh tlâwrh a. Tlangvâlho nui tlâwrh tlâwrh kârah chuan Chawngpuii chuan, "Khawii nge, ka'n thlah ang che. Chutianga a chan nei ṭha berina kei aia nuthlawi i tih tlat si chuan," tiin kawngka thleng chu a va thlah a.

Pa Rema a chhuah fel hnu pawh chuan Chawngpuii te in chhûng boruak chu nui riin a chhunzawm chho zêl a. Zan tir lama boruak rit tak chu kiangin, an nuiho chhunzawm chho ta dar dar a.

Zân te a lo rei a, lêng haw âr a khuan hnu chuan tlangvâl nula rîmte chuan zawlbûk an pan khâwm leh ta sang sang hlawm a.

Le, zing khua a lo vâr a. Tûkṭhuan ei kham a lo nih chuan Aizika pa chuan Aizika hnênah chuan, "Zika, tukin ka lal in han lêng chu, lal hnenah i ṭhianpa Lianchuhmânga sakhi kah i âisak tûr kha hrilhin, nakina sâwm chawp leh ai chuan tiin ka lo hmakhuasak ngawt pek che a. Lal chuan, 'E khai! Nangni pêm thar eng mah nei lovin chutiangin intih tlâkranna lam thil zâwnga thil in tih buangbâr a ngai lo ve; keima'n ka pasalṭha pêm thar sakhi chu ka lo aisak zâwk na'ng e,' tiin min lehthal dêr mai. Vawiin chu lal in lamah sakhi zû kan inzâwk dâwn a nih âwm chu," a han ti dap dap a.

Aizika chuan, "Kan lal ṭhatna hi chuan min va han tizak zâwk ṭhin êm ve maw aw! Mahnia chêt han tum ve pawhin min khalh zat zat reng mai chu a nih si hi," a ti chuai raih a.

Aizika pa chuan, "A lawm zâwng tak leh ngainat zâwng tak i ni pawh a ni mahna le. Chutih rual erawh chuan, mi ropui leh chungnung, mi thiltithei leh mi ṭhate hi kan laka an ṭhat avang hian tu lakah mah haungtau leh pâwn sân hi tih ngai a ni lo va nia. Kan lal hi i laka a ṭhat avang hian i ṭânghmâ haiin a thau i sawhsak a nih vaih chuan, i dik lohna leh vertherna chuan i thlahteah nghawng ṭha lo zâwk a chhuah dâwn tih hai ngai suh ang che. Amah upa ṭawng takin 'sial rângin sial râng a hring' tih ngai a nih kha. Chumi piahah chuan, lam ṭang neih ṭhat vânga mi dang chunga lên tur emaw ti a, mite chungtlâk zâwnga khawsak ngawt te hi a chîna chîn chhin eih loh tûr. Chutiang mi tân chuan hmuhsit leh en dawng nih bâk hmabâk a awm lovin, tlângin an rêl rawn tawh mi, malsâwmnain a zui tâk viau hi an awm ngai hauh loh bawk. Chuvângin, tlâng mit a fûk fuha a fûk dikna hmun nih hi tum tlat tûr a ni," tiin a han fuih sauh sauh a. Chutih lai chuan Lianchuhmânga pâwna a silai hlo buaibui zo chu kut dum nuau hian a rawn lût a. Lianchuhmânga hnenah chuan Aizika chuan lal thu leh hla, a sakhi a aisak tûr te chu a han hrilh a. Lianchuhmânga chuan lâwm tih hriat tak si, mahse inthlahrung hmêl taka meng hnuai lap chung hian, "Zika, in lal hmelma lian ber ni ṭhin hian ka phu loh thil hi he khuaah hian ka va dawng hnem ngai em! Hnuk te lai lai a ulh mai dâwn alawm maw le," tiin a lâwm thu chu a han hrilh a.

Chutianga lalin an sakhi ai tur aisak a tum tâkah chuan Aizika leh Lianchuhmâng chu Kâwltea te in panin an chhuak dûn ta thuai a.

Kawltea te in an thlen chuan Aizika chuan, Kâwltea leh Lianchuhmânga hnênah chuan, "Ti hian lal in chu lo han pan dûn ta phawt ula, kei chu eng emaw thilah ka buai lawk rih a ngaih dâwn avangin nakin deuhvah ka rawn zawm ve thuai dâwn che u nia," a han ti a. Anni chuan a thu sawi awmzia chu hre thiam takin lal in chu an pansan ta nghâl a. Aizika pawh chu in lam panin a haw leh ta thuai bawk a.

Sakhi aina hun hmanga zu in an ṭan dâwn tih chuan lal chu a han hawi kual vêl a. A mi zawn a hmuh tâk lovah chuan, "Khawiah nge ka Pasalṭha Aizika hi a awm? Ani tel lovin sakhi zu in a thiang ngawt hlei nem; a awmna hria kan awm em?" a han ti a. Chu veleh Kâwltea chu Aizika ko tûr chuan a liam nghâl vang vang a.

Kâwltea'n Aizika a rawn hruai thlen hnu chuan lal chuan, "E khai! Zika, kan mi hlu leh pawimawh ber khawiah nge maw i lo bik bo daih ni? I tel lovin sakhi zu hi tu'n kan in ngam rêng rêng hlei nêm maw. Kha, mi dangte hrawk i tiro rei tawh em mai han in nghâl thuai mai teh le," tiin sakhi zû atana a bilh, thlum ṭha ber mai chu seki khat pum hian a han thâlsak pâwrh a. Pêk a tum lai tak chuan Aizika chuan, "E khai! Hei zawng keia phû phâk a ni hlei nêm. Kan Pasalṭha Sângrova hian silai thovin a lo ai ve tawh bawk alawm le. Ani, i khua leh tui lo muan reng tawhtu'n a hmasa ber hi chu a chang tûr a ni," tiin a hnial ta tlat a. Chutianga a hnial tlatah chuan lal chuan Sângrova hming chu a han lam leh nghâl thuai a. Mahse, Sângrova pawh chu a lo bik bo ve tho avangin lal chuan a ko tûrin mi a tir leh nghal thuai a.

Sângrova a rawn thlen chuan lal chuan, "E khai! Sakhi zu hi i tel lo chuan kan lo in ngam hauh lo mai. Nang, silaia lo ai tawh i nihnaah i zahawmna kan kalh ngam lo a ni e. Han in hmasa ber teh le," tiin a han pe a. Sângrova chuan ṭawngkam khat pawha hnial chu sawi loh, chu zahawmna a dawn chu chhuang tih hriat taka hawi sâng deuh vah hian, sakhi zu no hmasa ber chu a khiat ta khalh khalh a. Chumi hnu chuan sakhi lo ai ve tawh chin chuan sakhi zû chu an in tlâng ta tliar tliar a. Chu'ng zingah chuan Kâwltea pawh chu aia upa zâwkte khalhin sakhi zû chu a in ve khalh khalh bawk a. Chutah upa lam, sakhi la ai ve si lo, sakhi zû thlum tui tak mai chu in ve châk si te chu, "Awngah ka lo ṭang ang e," tiin an kârah chuan an lo inzep ve thliai thliai hlawm a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 1st, 2019, 7:42 pm

PASALṬHA AIZIKA

- Nunmawia Fanai

BUNG 30-NA

THUHMA : Aizika thawnthu comment chungchângah hian tu mah inthlahrung suh u aw. A ni thei lo, dik hlel, felfai lo, mawi lo leh remchang lo ang zawng zawng in hriat apiang han sel pawp pawp teh u. A chhan chu, mi pakhat tan hian engkim hi a hriat kim vek theih loh a, kan inpuih tawn a ngai a nia. A ngaihnawmna lam ringawt lo deuh, a ṭhat lohna lai awm ang apiang min kawh hmuh zêl dawn nia.

Zanin chu mistake a tam hle maithei, ennawn leh lovin ka dah leh thawr mai e.

THUPUIAH LUT ANG AW.
(In hmu thei lo si...haha)

Rei lo têah an ṭhiante chu an pawh leh ta thuai a. An ṭhiante pawh chuan tlâk lam ruamah hian pûk zau ṭha hek hawk tak mai hi an lo hmu fuh hlauh mai chu niin. A hmun chu a biruin, chu lai ram biala hnam mâwlho pawh chuan an lo la tlawh pawh miah lo a ni tih rin theih tak hian, a chhûng leh a chheh vêlah chuan hnuhma hlui leh thar âwm hmuh tûr reng reng a awm lo va. Chu chuan an thla pawh a tingam huai huai hlawm a.

Pûk chhung an han luh chuan Aizika chuan a nula puak chu dîm tê hian a han nghat dap a. Nula hnênah chuan, "Hlau rêng rêng suh aw, tûnah chuan i him tawh a nia. I hliam te hi kan enkawl anga i dam thuai mai ang," tiin a thlamuan a. Nula pawh chuan lâwm hmêl pu taka Aizika chu chhawn pahin, a hliam avanga na ti insûm hrâm hrâm chung hian, "Ka nunna min chhanhimsak avâng hian in chungah ka lâwm tak zet a ni," tiin a chhâng lêt ve sap a. Chutah Aizika chuan a ṭhiante hnênah chuan, "Kan nauvi damdâwi tûr ramhmul damdawi kan zawn a ngai dâwn a ni," a han ti a. An zinga pakhat chuan, "Keima'n ka'n zawng ang e. Ramhmul damdawi chu tlêma zâwng hriat ka nei ve alawm," tiin a lo chhâng a. Thanluaithanga chuan, "A ni dâwn tak e. Hramirha hian a pa aṭangin hriat tam tak a nei ngei ang. A pa hi kan khua hian kan lo dampui tam alawm; a dam khua a sei lo hlauh ta zâwk a," a lo ti ve thuai bawk a. Tichuan, Hrâmirha chu ramhmul damdawi zawng tûr chuan a chhuak ta nghâl a. A hnungah Kâwltea chuan a zui ve thuai bawk a.

Hramirha leh Kâwltea an thang hlân chuan Lianchuhmânga chuan, "Kan kawng sialna turah hian silai hman ngam a ni mai rih dawn si lo va. Chumi avâng chuan kan mi thahte râlthuam hi kan hman thiam a ngai dâwn a ni," a ti charh charh a. Thanluaithanga pawh chuan, "Chu chu a dik a ni. An râlthuam, an hamthal hi duh anga hman thiam chu a ṭha khawpin ka ring," a lo ti ve thuai bawk a. Tichuan, hamthal hman chu an zir chawpchilh ta nghâl chûk chûk a.

Chutianga rei pawh an zir hman hma chuan Aizika chuan, hlam sâwm dana ṭehhek fu chu a phil chat chat thei nghâl mai a. Lianchuhmânga pawh chuan a tum chu a hlah tam lo sâwt ve tial tial bawk a. Chutih lai chuan Thanluaithanga chuan, "Kha lah, hmang ṭhang ang miin in thiam nghâl dêr zu nia le! Hramirha a lo lêt hunah lo elpui chhin teh u ka ti mang e. Ani reuh hi hamthal hamah kher chuan a thiam chungchuang kher asin; a themthiam khawp a nia," a lo ti ve bawk a.

Ni e, Hrâmirha hi tlangvâl tuai tîr ve tak a ni na a, eng eng emaw pianpui themthiamna hi a nei nual a. Sairawkherh perh leh hamthal han sai vêlah kher chuan, Zahleithanga khuaah tu mahina an el phâk loh a ni a. Hetianga Zahleithanga hian a ui loh chhan pakhat pawh, a pa laka a lo tihsual tawh thilah eng emaw remchânga phubâ a lâk duh thut mai a hlauh vâng a ni a. Ramhmul damdawi leh dâwi thil lam hi a hriat ve nual avangin, chu chu Zahleithanga tân hlauh tûr tak pawh a ni lo thei lo a ni.

Nakin deuhvah, rei vak pawh an rial lo tih chuan Hramirha leh Kâwltea chu an rawn lêt ve leh thuai a. An ramhmul damdawi rawn hawn, na chhâwkna atana hman chi thing pil leh pema hnawih tûr ang chi hnim hnah eng eng emaw chu an sâwngbâwl nghâl sauh sauh a. Nula chu an pêka an hnawih zawh hnu chuan nula pawh chu a lo zâng chho ve ta deuh a. A pang hliam leh na erh urh chuan a kiansan ve phah duak a.

Zanriah an ei kham a, an ṭhut muan ar ar lai chuan Aizika chuan, "Zanin chu thla êng hnuaiah han vâk chhuak ila a ṭhat ka va ring em ve aw. Saw lai tlâng bul ṭhut kianga ruam kan pal tlang tûr saw, eng ang chiaha a râlmuan leh râlmuan loh chian a ngai tlatin ka hre mai. A ram neitute kawng ṭumpui a lo nih hlauh chuan, kan tân mang vek theihna leh din chan theihna kawng a hril thui thei dâwn riau," a han ti charh charh a.

Lianchuhmânga chuan, "Chu chu thil tih âwm tak a ni. He lai ram bialah hian hnam mâwlho hi eng ang chiaha tam nge an awm tih hriat a nih loh lai kârah, engti ang chiahin nge an inzâr pharh dân lah hriat ni hek lo. A thâwi tham lek eng emaw tal pawh kan hriat a ṭul tak meuh meuh a ni," a lo tizawm ve nghâl zat bawk a.

Chutah an nula chhan chhuah chuan, "Ka lo inrawlh ve in phal em? In hriat tûr pawimawh hriat ka lo neih mial tâkin," tiin an thu sawi lai chu a lo pawt chat zoh a. Nula thil sawi chuan an beng a verh zar hlawm avang chuan, nula lam chu an hawi rawn ṭhap a. Aizika chuan, "E khai, phal teh rêng mai. Tûn ang hunah chuan a hre tam leh hre chiang chuan kan hriat ang apiang sawi a rem vek e," tiin nula chu a han chhâng a.

Nula chuan, "Saw lai tlâng bul ṭhut chhim thlang lam ruamah sawn a sir tuak tawn tawnin hmun hnih hmun thum lai niin ka hre ta, min mantute hnampui chênna a awm a. Hmun khatah mi eng zat ang zêla inbâwk hrang nge an nih chu ka hre lo na a, hmun khatah mi sawmnga ai mahin an tam deuh zêl vek chuan ka hria, naupang leh hmeichhiate chhiar telin. Chuvangin, saw lai ruam saw an ṭumpui chu a ni ngei tih ka chiang," a han ti a. Chu a thu sawi chu an beng verh zâwng tak a nih avâng chuan ngunthlûk tak hian an lo ngaithlaksak hlawm a.

Aizika chuan, "A nih chuan ruam chu kan zawh a him dawn hauh lo tihna a ni a. Tlâng chhip lama khawsaho khi kan pal tlang mai a ngai dâwn a nih chu. A nih leh he'ng hnam mâwlho hi he tlâng lian chhak lamah hian an inzâr pharh chho thui âwm em?" tiin a han zâwt a.

Nula chuan, "La thui chho viau bawkin ka hria. Zan hnih kala thui thleng chu a khât tâwkin an inbâwk fir fer. Khi lamah chuan hmun khatah pawh an khawsa tam deuh bawk," tiin a chhâng a.

Aizika bawk chuan, "A nih, ti daih ila, khawi hmun aṭanga rawn hruai che nge maw an nih rêng le? Engti tih tiha man che nge maw an nih le?" tiin a han zâwt leh a.

Nula chuan, "Kan khua-ina kan chi tlan khur hi a ropui thu mawlh an sawi châmchi mai a. Tûk khat chu, dam mana vawi khat tal hmuh ve rêng tumin chi phura kalte ka zui ve ta rawk mai a.

"Chutia, chi khur lam pana lung muang deuha kan inzui lai chuan, thâwklehkhatah he'ng hnamho hian min rawn bei ta thut a. Kan zinga pasalṭhaho, min vêngtu tûra kan kianga kal vete zawng, mi sawm rual zet mai chu an hamthal hmangin an rawn that ta phiar mai a. Mahse, keini, hmeichheho erawh min that ve lovin min hnungkhirh ta nghâl vek zâwk a. Tichuan, khaw thlang lam pan hian min rawn hruai ta vang vang a. Kawng laka an mi leh sa, an chipuite khawsakna hmun ṭhenkhat, tlâng a awmna hmun apiangah pakhat zêlin an hnutchhiah thla zêl a. Kei hi ka rawn thleng thui ta ber a nih hi; engtianga min tih tum nge an nih ka hre thiam lo a ni. Saw laia min rawn chhan himna hmun kan rawn thlen hma kha chuan min duatin, ei tûr ni sela, an neih tui ṭha ṭha min hlui thla kawng tluan kha a ni a. Mahse, saw lai tlâng bul ṭhut kan rawn thlen achinah erawh nghaisak ka tâwk leh si! Thil awm dân ka hre thiam hauh lo mai," tiin a thil tawn leh thil awm dân tlângpui chu a hrilh a. A thil tawn awmzia leh an puithiam chaw tui tak ni tura an buatsaihna a hriat thiam lohna chu, hre kher lo sela a ṭha zâwka an hriat avangin tu mahin eng mah an hrilh zawm duh lo va.

Chutah Aizika chuan, "Han inkoh mai a awlsamna turin i hming te min han hrilh nghâl bawk ta che?" a han ti leh a.

Nula chuan, "Ka hming chu Dâwntlingi a ni e," tiin a chhâng a.

Khua a lo thim a, thla pawh a êng viau tawh tih chuan Aizika chuan, "Zanin chu, kawng sial a ngai dâwn tlat mai. Chuti a nih loh chuan, engtin mah kan inkal sâwt dâwn hauh lo. Tlâng chhip lâwn liam hi hma lam pana kan sâwn theihna tûr awm chhun pakhat chu a ni tlawng mai rih a. Chuvangin, khi lai hmun khi kan ramsak a ngai a ni," a han ti charh charh a.

Lianchuhmânga chuan, "Chu chu kawng awm chhun a ni. Tunah phei chuan mawhphurhna dang kan kovah tla leh tawh a. Kan nauvi him taka kan thlen ngei hi kan mawh phurhna lian ber ni-ah ka ngai. Chu chuan kan tum ram pawh min thlen nghâl bawk ang a," tiin a lo tui hnih ve zat a.

Aizika chuan, "Le, insiam ila, tlâng chhipa khua chu i han ram hmasa phawt teh ang u hmiang. Kâwltea leh naupang lam kha chuan bûk hi in lo nghâk dâwn nia. Hramirha erawh hi chu, ṭangkaina a neih dâwn avangin lo tel ve sela," a han ti a. Tichuan, mi sâwm rual, rawlrâla che ṭhang tawh ṭhah chu fei nên, hamthal leh lu lâk chem nêna infawmin an thawk chhuak zawm ta nghâl a. Kâwltea leh a rualpui deuh mi pakuate erawh chuan, an nula chu bawihsâwm a ngaiha bâwihsâwm tura lo awmpuiin pûk chu an lo nghâk thung a.

Chutia Aizika leh a ṭhiante tlâng bul ṭhut lam pana an kal lai chuan, tlâng chhip lam aṭanga mei êng lo chhuak hi an han hmu a. A lan dân aṭang chuan meipui chheh hluah a ni tih hi a hai theih miah loh bawk a. Aizika chuan, "Eng an ti zeng nge maw ni dâwn ni? Chhûn ata tawh mei an nun vut vut reng mai chu a nih khi," a ti sup a.

Nakin deuhvah chuan tlâng bulṭhut chu an thleng a. Chutah chuan châwl khawmuang lovin tlâng chhip lam panin an inzui chho leh nghal ṭham ṭham a. Rei vak lovah chuan tlâng chhip chu an chuang chhuak chho dâwn hnai ta mai a. Tlâng chung zâwla an meipui chhehin a rawn chhun fuh phâk loh, an thâwm erawh an hre phâk tawh tih-ah chuan an han khawmuang dat a. Chutah chuan Aizika chuan, "Le, kan hamthal kha i buatsaih ang u le," a han ti sar sar a. Tichuan hamthal chu an buatsaih ta nghal zung zung a. An hamthal mu zum hmâwrah chuan tûr chu an tât vek bawk a. An peih hnu chuan tlâng chung zâwl lam pan chuan an bawk vâk chho leh ta ṭham ṭham a.

An veh hnaih zêl a, hlam sâwm âwm lekin an hnaih tawh tih chuan, bawk chungin an han chian leh hmasa tê tê a. Chhun lama an rin ang chu chu lai tlâng chung zâwl din hmun chu a lo ni hauh lo mai chu niin. In pakhat mah, a hlui ram tawh tak ngial pawh mei êngah chuan an hmu hauh lo mai a. Chuvang chuan chu lai tlâng chu eng emaw puithuna thilah, tun hun atan hian an hmang mai chauh a ni tih Aizika chuan a hre thiam nghâl a. An mi beih tûr hnam mâwlho zinga mi sawmhnih vêl chu zau deuh taka mei êng hualin, thuam mak deuh deuh inbela inhnawih râng deuh nuau hian an ding tlar ṭhap a. A laiah hian putar pakhat, khabe hmu sei zet leh ṭuak vâr vo tawh chu nghah nei tih hriat deuh, rilru hmanhmawhna nei tih hriat taka inti lal deuh hian a ṭhu rân a. Chu putar sir tuak ve veah chuan, a kual deuh hian mi sâwm ve ve hi an ṭhu ṭhap bawk a. Chu'ng mite zinga putar hnai bera ṭhu leh lam ve vea mite chuan, chemte hriam hmêl tak mai hi an dawm tle var mai bawk a. Inthawina hlan tur ni âwm tak hi an nih avangin, an inthawina sa tur nula kha an nghâk a nih chu Aizika chuan rin thiam theih vek avangin, "An nghah loh zâwk, râlpui kan chhuak dâwn tih hria sela zawng, an ngampa âwm dêr dâwr mang si lo va," a tichhuak sup a.

Chutia a phun sup zawh chuan Aizika chuan, "Le, Hramirh, i themthiam chhawr a hun e. An zinga lal hmêl ber, putara hrawkah tak sâwn i hamthal mu kha han kilh chat teh le. An hotu ber a tlûk chuan an buai nuai nuai ang a, chu lai chu kan tuk thlu hmiah hmiah mai dawn alawm," a ti sâ sâ a. Hrâmirha chuan a hamthal ken lai chu putara hrawk zâwnah chuan a han lek kawh vâw a. Chutah rei pawh tin lovin a hamthal mu chu a dâwt aṭang chuan a han hâm chik chhuak zawk mai a. A tum ang takin putara hrawkbâwkah tak mai chuan a va kilh chaih mai a. Chu veleh putara chu a hrawk dawma chil phuan tla buah chungin leiah chuan a tâl ta ngawt ngawt a. Chu chu an hmuh chuan mi dangte chu an phili ta nghâl nuaih nuaih a. Chu lai tak chuan Aizikate chuan a phili ve lo, hlauhawm a lo thleng a ni tih hre thiam, chian tuma an lam lo hawi hmasa apiang chu hamthal chuan an lo hâm thlu zawih zawih hlawm a.

An hamthalin tu mah hlah lova mi sâwm an tlûk hnu chuan, an beih turte chu mi sawmhnih an la chuang hret a. Chu'ng mite buai nuaih nuaih lai chu fei lek chungin an va bawh chilh ta a le, anni hriam lek lova puithuna lo la urhsûn lai an ni bawk a, awlsam deuh hian an fei chuan an vit tlang pâwlh pâwlh hlawm a.

An beisei anga thil thleng lo va, rin loh thilin a nan thutah chuan, hriam chuhna hman awm ta lo chu hnam mâwlho tân chêt ve hman ngaihna awm hek lo, anmahni beitute lah râl hrât ṭhiau an lo ni vei kher nen, ṭe rawng rawng hian an tlu zawih zawih ringawt mai a. Chêt han thawh tum ve eihte pawh chuan an bân aia sei zâwk, Aizika leh a ṭhiante fei chu an âwm leh dulah an dawng tlum hmawk zêl mai si a, an chan chu lei daia duh lo chunga an hliamte dawma tlûk hlum chu a ni ngawt mai lo thei lo. Mahse, chutih lai, mi dang an tlûk zawh hnu vekah chuan pakhat chu tlân chhuah tumin khaw chhak lam hawiin a tlânchhe ta thut a. Hlam sawmthum deuh thaw a tlân tawh, meipui êngin a chhun phâk mang tawh lo tih chuan, "Uai! I dam hi kan tân a ṭha lo asin," tia au ṭhat chungin Aizika chuan a fei chuan a han khawh zui zawt a. Chu pa nghâwngah tak mai chuan a va bûr chawih a, pên thum vêl a pên leh hrâm hnu chuan a hma lamah a bawk thlawp a, a chalchâng zui ta nghâl a.

An rin aia awlsama an kawng dâl thei tûrte an chhun hlum vek hnu chuan Aizika chuan, "Ruang hi theh khâwm ila, chhâwlin i vûr ang u khai. Pasalṭha ruang meuh hi chu, hmelma pawh ni sela zah der hi a ṭha ngai e," a han ti a. Ruang chu an theh khâwm ta zung a. An han chhiar chuan an vaiin mi sawmthum leh pasarih lai an lo ni a.

Ruangte chu chhâwla an vûr lûk zawh hnu chuan Aizika chuan, "Thil hriat thiam loh pakhat ka nei tlat mai. He lai tlâng chung zâwl panna khan hi chhak lamah pawh a awm reng si a, eng vanga thlang lam khan aṭangs leh luhpui tum kher nge maw an nih chu ni ang aw?" a han ti a.

Thanluaithanga chuan, "Heng mite hian khaw thlang lam hi an puithunaah an ngai malsâwm em em bik ṭhin a. An chênna hmuna an in sakah te hian rem lo chung chung pawh hian, khaw thlang hawiin kawngkapui an hawng kher ṭhin. Chumi avanga khaw thlang lam khan aṭanga an inthawina sa tur hi luhpui tum an ni ang e," tiin a chhâng a.

Aizika chuan, "A lo nih dâwn tak chu a!" a ti sup a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)