PASALṬHA AIZIKA BY Nunmawia Fanai 1- 35

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

PASALṬHA AIZIKA BY Nunmawia Fanai 1- 35

Unread post by Ngaia » November 16th, 2018, 7:15 pm

PASALṬHA AIZIKA

- Nunmawia Fanai

THUHMA : Pasalṭha Aithangpuia thawnthu chhiar tawh chuan, Aithangpuia pu Aizika hi hre lo kan awm kher âwm lo ve. Chutih rual erawh chuan, Pasalṭha Aithangpuia thawnthu hre lo tân erawh chuan a mikhual viau lawi thung ang.

Aizika hi Thinglâwn khaw lal Tinkuala pa Thandâwla'n Thinglâwn khua a chuan hma, Pâwithlun khuaa an pasalṭha, khua leh tuite sa leh râl laka lo muan a, an khaw daingul lo ni ṭhin, a sawi uar leh duhthawh zual tena 'Aihniara hnuhnung zâwk' tia hming lem an lo phuah hial a ni a. A chanchin han thâm raltir ngawt aiah, tlêm azâwng ka'n thai lang dâwn ang e.

Note : Pasalṭha Aithangpuia bu hi synod book room-ah lei theih a ni e, a man Rs. 180


BUNG KHATNA

Favâng âwllên lai a ni a. Vân dumpâwl ruih hnuaiah chuan Leilên khuaah chuan boruak a thiang nuamin, mi tin mai tân chu hun chu hun rangkachak leh hahchawlhna hun a ni bawk nen, a tua mai pawh chu an thaw hi a veng halh vek hlawm a. Mipa naupang thingnâwi fawm ho pawhin thingnâwi fawm pahin dai hnaia ngaw thelh hun hnuaiah te chuan intâwllên hun a hmang ni tin hi a ni hrim a. Pasalṭhate lah, an leido neih loh hun râlmuannain a tawn fuh lai a ni bawk nen, a thlaa thla teh meuh vah inhuamin, a chuang a bâng awm lo thâwin vawmtlâk ngaw lamah sai ramchhuakin an liam duak bawk a.

Chutia muang taka an awm lai chuan tûk khat chu, nula zingkâr tui chuh an rêm tawh tih chuan, nu pakhat zing tui chuha kal hian tuikhura tui-ûm la thâl khah loh, intung ṭha pawh ni lova a lo tlu kawkalh rum mai leh, a bul vela hnuhma thar deuh pe vêk vûk mai chu mak ti keh hlau ru tak chunga a en chian mêk lai chuan, tuikhur mawng lam hla deuh taka tleirâwl sawisak tâwk mêk tih hriat deuh maiin a, "Min chhan r'u," tia a aw a chhuah hniam zâwi raih ri chu a hria a. Chu thil chuan a beng a verh êm avangin hlauh pawh sawi thei lovin, tu nge a niha eng nge thleng chiah chian tumin chu lam chu thâwm dîm leh fimkhur takin a pan thla dêk dêk a. Chutah le, anmahni a zuk hmuh theih chiah chuan a rin loh lutuk maiin, an ṭhenawm tleirâwl, an khaw mi tena an lo chhuan rûk em em mai, a nulat chhuah hunah pawh tlâng chang tûr lal fapa tân lova rim thiang pawha an ngaih loh, 'Thansiami' chu Pâwi râl sâwmrual zet mai zinga an hotupa ni âwm tak mai hian a nulatna khawih tumin a lo sual ngat ngat mai hi a lo ni a. Ani chuan, a thianghlimna chu Pâwi râl laka hlan tum lo tih hriat tak hian, a duh anga a khawih theih loh avanga a tum leh awk ṭhinna lak ata chu tâl chhuah tumin, ṭan khawhin a tha zawng zawng sengin a lo bei lêt ve fat fat mai hi a lo ni a. Chu veleh chu nu chuan a hun leh hun loh, a au ri hre phak an awm leh awm loh tûr pawh thlu lo hian, a rilru mangang phili chuan, "Râl, râl, râl," tia au chhuah a rual ta nghek mai a. Chutah a theih ang angin, khaw chhung lam pana bak lênga tlânchhiat haw nghal nal nal tumin a inphiat buai nawk nawk ta mai a. Chu thâwm chu an han hriat chuan, Pâwi râl zinga pakhat chuan chu nu chu a tlân thui hman hlauvin a rawn ûm zui ve nghâl vat bawk a.

Chutia Pâwi râlin a rawn ûmah chuan, ani, hmeichhia akâra rilru dâwih leh hlauhlawp, kawng pangngai leh rai nuama tlân ta lo nâ chuan tlân sâwt tih rêng a neih thei lo; thui pawh a tlân hma, tuikhur pawh a chhuah chhoh hma chuan a hnunga rawn ûmtu chuan a chhip samah a rawn ṭhâm chawt ta mai! Chu veleh chu nu chu a ding chawt a, a tih theih tâwk awmchhun, a aw râwl tâwpa au chhuah leh hawk chu tumin a kâ a âng zuau hman tih chuan, a thil tum chu a tlai zo ta tih hriat tak hian a tukkhum hi a rawn ri buk a, a mit sulh a, a thi zui chu a ni reng mai! Tichuan, chu nu lu chu a thattu chuan lain, a ak hmak a, a ruang, lu bunga let reng chu engah mah ngai lo tih hriat deuha chil chhâk phurh phurh chungin, a ṭhiante lam panin a kalsan leh ta thuai a.

Chutia ruang meuh a han chhuah tâkah leh, lû meuhin an ipte a han mâwi tâkah chuan an tân chu lai hmun chu chhuahsan ran a, râl lu leh sal tleirâwl nêna an khaw lam pan nghal nal nal mai chu an tana kawng thlan tur hmasa ber a ni tih hriain, an hotupa ber chuan a naute hnenah chuan, "He hmeichhia hi chuan kawng lakah min tihlim mai rawh se; he lai hmunah hi chuan a la ṭang thei fat fat em mai. Beidawnnain mihring a thunun huna chakna a boh theihzia kawng lakah ka'n hriattir ang e," a ti nung nung a. Thansiami khawih a tum pawh chu ṭhulhin a inveng ṭha a, an khaw lam pan tur chuan a inpuah chah ta thuai zawk a. Thansiami pawh chu a ho te chuan tai hnângin a kut an phuarsak sawk sawk a; tichuan, an awmna hmun chhuahsan chuan khawchhak lam panin an inchhawm chhuak ta hlawm a.

Khaw chhung lamah ve thung chuan boruak muanawm takin hun a la chang renga ngaiin, mi tin mai chuan zing boruak thiang kûk hnuaiah chuan an hun te chu hlimna lam hawiin an her vek hlawm a. Pa ho ṭhenkhat lah ṭhenawmpa te ina tek lûtin, an kumin zauva buh kung a vâwng ṭhatzia te, leh an malsawm kum tak a nih an beisei thute chu tûkṭhuan nghah pahin an sêp rawtui vêl thûl. Chutih laiin pa phawk zual ho lah, zing aṭangin pûm in lam an ti a, thirdêng bulah dâwt hlimawm an insawisiak hi a ni hrim mai bawk.

Chutia hlim taka an awm lai chuan, putar pakhat hnâng la tûr, tuikhur mawng lama sairil hnâng beiseia kal, a thil hmuh leh hriat avanga la leh hman ta lova rawn haw chuan an khuaah chuan chanchin duhawm lo tak mai a rawn thlen ta thut a. Chu chuan a khaw nâwtin a tirâlkhel ta em em vek mai a.

Khatia, sairil hnâng beiseia a kal, tuikhur mawng lam kawr kama a lakna ṭhin lam pana kawr a zawh thla khan, kawr kam maia hmeichhia lu bunga lo let reng chu a hmu a. Tu nge a nih a hriat mai loh avangin a rana rangin khaw chhungah zualkovin a rawn lêt leh nghal thuai hi a lo ni a. Tu nge a nih an han zawn kual hnu chuan, Thansiami zing tui chuh leh an ṭhenawmnu Nûsini zing tui chuh an lo la kir loh thu chu an hre ta a. Tichuan, tu ruang zâwk nge chu laia let reng chu ni a, tu nge bo ta zâwk tih pawh ngaihtuah thiam theih loh kârah ruang la tur chuan tlangvalte chu tuikhur lamah chuan an liam thla ta sung sung a.

Ruang awmna an zu thlen chuan, an mitthi chu Thansiami ni lovin, Nusini zâwk a ni tih an hre ta nghal thuai a. Mahse, chutih rual erawh chuan, khawiah nge Thansiami hi a awm ang? Râl chuan an man nge ni ang a, a lu lain a ruang hi an dah bo zâwk ni ang? Tih chuan vâl upate leh tlangvâl ho ngaihtuahna chu a tibuai hle a. Chu vang chuan, a ṭhenin ruang zâwnna tûr hlâng an siam chhungin, a ṭhenin Thansiami chu thah a lo nih ve palh hlauh tâk dah-ah tiin zau zâwkin an han zawng kual ve bawk a. Mahse, ruang âwm leh rinhlelh tûr âwm thil eng mah an hmuh tâk lohah chuan, Thansiami chu râlin an man ngei a ni tih chu rinhlelh rual a ni ta lo.

Hlâng an han siam zo va; zâwn mai theiha an peih hnu chuan, tlangvâl thinrim sâhâwk hulh hulh kârah chuan Vâl Upa pakhat hian, "Aw le, hei, naute u, kan muana leido kan nei lo emaw kan tih lai namêkin râl kutah kan unaunu ruang chu a tlu leh ta reng mai. He inbarakhaihna lungchhiatthlak leh than titlâwm em em mai hian rulh lêt ngei chu a phû a ni tih kan thinlung hian a pawm vek ngei ang. Amaherawhchu, keimahni thu anga mahni duh dana thutlûkna siama bawh zui mai lovin, ruang hi kan thlen tikah zawlbûk lamah ro kan rêl ang a, kan chêt lâk dân tur kan rêl dawn nia," a han ti dap dap a. Chu thu a han sawi chuan, tlangvâl thinrim inseh ruh, ha chang ṭhial bap bap chunga râl ûma tlân liam mai hmel pute pawh chu an inbeng dai leh ta diak rih a.

Chutih lai chuan lalin lamah ve thung chuan, "Awi, karei maw! Ka nauvi chu râl chuan an hruaia maw? Engtin nge, hmel hriat loh akârah, râl lehnghal bulah ngampain a awm theih teh lul ang? Ka lainat em mai kei zawng!" tia lalnu rawn ṭap chhuak râwih chuan lal leh upate thukhawchâng sawi lai chu a chawlhtir dat a. Lal in chu thuka meiin sa a rawh ri sawr sawr tih loh, thâwm dang han chhuah leh theia mawi lo hian reh hân duk a. Khawngaihna leh lainatna kâra thangtlâwm luat avanga thinrimna thinlungin an hmêl a tih dur khuih, lal leh upate chuan tihtheih dang nei lo inti hmêl pu tak hian, ṭhu kun ngâih chungin chhuatpui chu an melh rawn tlawk tlawk hlawm a.

Chutah a thinrim a chek chek tlak tlak hnu chuan lal chuan, "Kan pasalṭhate ramchhuak lah, kan râlmuang e tiin ka sai râwp phengin dai ngula kan neih ho a bo a bâng pawh awm lovin a nâwlpuiin ka lo chhuahtir huk mai bawk si nen. Kan tlangval awm chhunte hi han ring viau dâwn ila, an hming lanna awm lo, fel duam ringawt an ni tlawng mai chauh a. An zing aṭang hian tu'n nge maw kan nauvi chu han chhan chhuak thei ngût ang em aw chu aw? Ramchhuak ho han nghâk ngawt dâwn ila, an rawn haw tikah chuan kan nauvi chin hian khuangcher bo bâk chan a nei hauh dâwn si lo va. A enga pawh chu ni sela, kei hian ka khua leh tui chu ka chhan leh ka muan tur an ni alawm le; kan râlte chu tu khua pawh ni sela, an khaw chhung thleng rawkin ka han ûm ang e. Tu'n nge min zui dawn che u?" tih leh insiam nghâl chûk chûk chu a rual nghal a.

Ni e, Lal Thandâwla hi a tlangvâl lai ata tawh râl hrât khawkhêng leh sahrâng hmaah pawh vawi tam tak lo dingchang tawh a niin, amahah hian theihna ropui tak mai a awm tlat avang hian a hming pawh hi a thang zau hle a. A bul hnai lalte pawhin lal rorum leh namailo tak a nih an hriat avang hian, leidopuia neih an hreh hlur vek a. Amah do zawnga awm hi an ngam lo ṭhûm vek mai a ni.

Chuta chhapah, tûnah hian upa a la ni lo va, tlâng hrang chang hlim deuh hlawt a ni nghe nghe a, a vânglai leh chak lai tak a la ni leh zêl nen. Chumi avang chuan khaw din chauh e ti lo chuan ṭhenawm khua aṭanga amah rawn bêl an pun chak em avangin, tunah chuan za nufa khua an lo ni reng tawh mai bawk.

Khua an sah tirh hian a hming tûrah an han buai khawp a. Ani lal fiamthu duh leh rik huat mai ching ta na nâ na chuan, "Kan la mir chho zêl ang a, kan buh leh bâl kan han rin tak tak hunah chuan, kan lei hi kan lên dawk dawk reng mai dawn nia. Chu vângin, hming ṭha dang kan neih tûrina min rawn pan hma loh chuan 'Leilên' tiin i châwi tawp mai ang u," a ti ta roh a ni âwm a. Chuta ṭang chuan 'Leilên' tih khua hi an pu lâwk ta rih a ni.

Tichuan le, chutia lal berin a mi leh sa chhan tuma a thuam a han inbel tâkah chuan, upate chuan zui loh ngamah an ruat lo va. An lal zui tur chuan chakvak la inti deuhte chuan an râlthuamte chu laa insiam turin an in lam chu an pan ta sang sang hlawm a.

Chutih lai chuan, a khaw nâwta an buai suau suau laia an lal bêl tûra rawn pêm tlangvâl ruakhau zet zawt, hnâr ngul sâng vah mai, a ria anga en aia a taksa teh tlo hmel tak, ruhrel lian ruang mai leh vun rawng ngo lamin a kah, dar pharh harh mai, kâwng fêk rât bawk, a mal invuah thla te lah chu a nghet tih hriat tak maia chum thla hmuk mai chu chapo lo hmêl pu leh inkiltawih lam hmel pu, mahse inrintawkna tak nei tih hriat tak si hi lal inah chuan a rawn lût thelh thelh mai a. Chu tlangvâl chu chu hunah chuan an khaw boruak a hriat veleha a mikhualna thinlung dah ṭha a, zawlbûka rorelnaa kal hmaa lal hnena an chanchin hrilh hmasak chu a tih hmasak tura ngaiin, lal chu a pan hmasa chawt hi a lo a ni a.

Chu tlangvâl chu lal chuan a han hmuh chuan, "Aw khai! Vâla, khawi lam khual ṭha nge ni teh hlauh che?" tiin tlangvâl chu a lo chiau-au a.

Tlangvâl chuan, "I hmingṭhatna leh i ropuina bel tura khaw chhak lam aṭanga kan chhungkuaa rawn pan che kan ni e, lalpa. Ka hming chu Aizika a ni a, Aikhuma fapa ka ni. Ka pain, i khua leh tuiah min pawm theih leh theih loh tûr zâwt tûr chein min rawn tir a ni. A nihna takah chuan, amah zâwk hi rawn kal âwm tak a ni a; amaherawhchu, tara lama hlate khua pan ta ngang chuan chauh a la na riau pek a, keimah ka rawn lang ta ngawt a ni e," tiin a chhâng a.

Lal chuan, "Lo pawm lo ta che u ila engtia awm nge in tum ang?" tiin a han zâwt a.

Aizika chuan, "Lal berina min pawm loh chuan, lal dang belh zai kan rel leh mai a ni ang chu," tiin a chhâng a.

Lal chuan, "Aizika maw i nih? Khawchhak lam aṭang chuan râl hlauin em ni in râwn tâp thlâk rêng râwng a?" tiin a han chhaih kual leh zauh a.

Aizika chuan, "Kan lal nen kan inbâ ta lo deuh a ni ang e," tia a han chhân chuan, lal chuan Aizika chu a mi hriat zâwng tak, a chanchin a râl hriat aṭanga a khuaa awm atana a lo awh rûk ngawih ngawih ṭhin chu a ni tih a hre chhuak uai. Chu veleh, "I han sawi tâkah chuan i phuba la tûr in lalin a dan che avanga lal nena intitaurau ta an sawia kha i ni ang maw?" tiin a han zâwt leh khauh a.

Aizika chuan, "I hriata chu ka lo ni mial mai thei asin," ti chauhin a chhâng a. Chutah zet chuan lal chuan, "Nang hi i ni ngai a nih chuan, nang tluka khua leh tui min rawn pun tura duh thlan tur an awm dâwn chuang em ni? I pa bulah zuk kal leh ta la, in in tur kan peih fel hma chuan lal chaw hi rawn ring rih turin hrilh ta che. Tichuan, nang chuan i peih ve tâka leh, kan nauvi thlavâng hauhva ka kal min zui dawn nia," a han ti a. Tichuan, Aizika chuan lal sawi ang chuan a chhungte chu lal inah a hruai chho va. An innghah fel hnu chuan, chauh pawh sawi lovin a khaw thar tleirâwl thlavâng hauh a, amah hawn let lehna tura beihpui lalin a thlakna turah chuan tel ve ngei tûrin a insiam ve ta a.

Nakin deuhah chuan, lal Upate zinga lal zui tumte chuan an râlthuam nen lal in an rawn pan khawm ta thliai thliai a. An kim ta tih chuan lal chuan, "Aw le, upate u, hei a hun takah khawchhak lam aṭangin ka mi leh sa ni tur chhungkaw thar kan nei hlauh mai a. Anni chhungkaw zinga pakhat hian in ai zawng zawng a awh vek dâwn a ni," a han tih chuan Upate chu mak ti hmel tak hian an meng tang hrâ hlawm a. Tichuan lal vêk chuan, "Kan zingah, ka khua ngeiah, ka mi leh sâ ni turin khawchhak lam pasalṭha hmingthang, Aizika meuh a rawn intu lût ve a nih chu! Ani nen hian kan pahnihin in ai kan awh dawn a ni, vawiinah hian," a han ti leh chu, Upate chuan, "Chhei raw maw! Aizika kan nei theia maw? Khawi teh, a kut tal i han chûl ang hmiang," tiin an pasalṭha ngaihsân rûk em em, râlah chauhva an lo hriat, a hmêl an hmu satliah pawh ni lova a taka an khuaah ngei a han lâwi tûr chu an lâwm êm avang leh, an thlâ a muang hle a ni tih hriatna atan Aizika kut chu an hmersak liam liam a.

Chutah lal bawk chu lo ṭawng lehin, tlângaupa hnênah chuan, "Lêngtea pa, zawlbûkah va kal ta la, Vâl upate hnenah khan an thu rêlte titâwp tûr leh, an zinga tuai tir mawng zâng pahnih lal ina rawn chhohtir turin zu hrilh ta che. Tichuan, tuna kan nauvi hi Aizika nên chauhva hruai ka rilrûk avangin lo inrawlh rih lo mai turin i hrilh nghal dâwn nia," a han ti a. Chu veleh tlângaupa chu lal thu keng chuan zawlbûk lam pan chuan a tlan ta nghal a.

Zawlbûk a han luha lal thu chu a han thlen chuan Vâl Upate chuan an rorel lai chu an titâwp chawpchilh ta nghal a. Lal thu ang chuan an zinga mawng zâng deuh pahnih, Khawtea leh Vâlnova-te chu lal inah chuan an tir ta nghal a.

Tlângaupa leh tlangval pahnih ten lal in an han luh chuan, lal chuan anni pahnih chu melh khaih chung hian, "Hei vawiin hian, kan pasalṭha Aizika nen râl kan ûm dâwn a ni a. Chumiah chuan nangni pahnih hian kan hnung in zui dâwn a ni," a han ti a. Anni chuan lal thu sawi chu pawm leh lawm tih hriat tak hian an bu nghat a. Chutih lai chuan lal Upa pakhat chuan, "Lalpa, in pahnih leh anni teh râwng nena râl han ûm chu in intam hleih viau ang a, tawh sual hian tum loh lamah a keuh khut palh mai che u ka hlau hlel lo ve," a lo ti khauh a.

Lal chuan, "A mai mai a! An tam poh leh an tlu hnem dâwn tihna a ni mai. A rêng thu-ah, leido pawh nei lova kan awm laia rawlrâla che chu Pâwi râl bâk an ni dâwn lo va. Râwlrâla chêt kawngah mi an inzui tam duah ngai lo; a tam berah sawmrual awrh bak an ni tawp ang. Chutiang zât lek tuk zal tûr chuan kan pasalṭha Aizika chauh pawh hi a tâwk reng ang chu. Mahse, amah chauh lo deuhin, a kaihza vêng tûrin ka tel ve hlauh thung ang," a han tih chuan, "Lal ber, chutiang ang êma mi hman tlâk chu ka ni lo a nia. Khuain zah a ngai a, vânneihnain ka nun a la hum mai chauh a ni. Eng ka ni hauh lo ang i lakah chuan; i kaihza hi rinawm taka vên erawh ka nunna nen a inzawm tlat thung ang," tiin tlâwmna thinlung lang chhuak khawpa zahawmin lal chu a chhâng a.

Chutia an ṭawng an han inchhâwnna vêl aṭang chuan Upa zinga pakhat chuan, "Uai! Kan pasalṭha intawng tharte chu an va inkawp rem dâwn ngai êm!" a lo ti sap a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 16th, 2018, 7:18 pm

PASALṬHA AIZIKA

- Nunmawia Fanai

BUNG HNIHNA

Chutah lal chuan, "Aw le, Zika, i inpeih tawh em maw bawk chu? Râl hlawhtling, ṭi tak sia hâw lam hi chu uih zâwn ang vut vut hi an ni tawh ṭhin a nia. Kan ûm ran loh chuan, tûn ang khualpâng zin hunah hi chuan hnu kal lam leh haw lam te hi hriat a har si a, i han muang hman lo teh ang," a han tih chuan, Aizika chuan a lu a lo bûk nghut pahin a lu lâk chem chu a ipah chuan a thawlh lût zâl zâl a. Lal vêk chuan, Khawtea leh Vâlnovate hnenah chuan, "Vâlate u, nangni pawh zawlbûk lama in hriam dah te lamin lo inpuahchah ula, kan rawn lam dawn che u a nia," a han ti zawm leh zat a. Anni pawh chu an bûk nghat hnuin zawlbûk lam panin an inzui chhuak dûn ta nghâl a.

Tûkṭhuan pawh la ei lo an nih avangin kawng laka ṭâm dawm atan sa rêp tlêma zâwng leh chaw an bâwk ve ling leng a. Kal mai tuma an thawh uaih lai chuan, "Aw khai! Tûkṭhuan te chu ei ve lam ula maw le? Hmeichhe chakvak lo chhawm an ni dâwn a, chutin an uih zâwn kal vut vut tawp nâ ang," tiin Upa pakhat chu a lo ṭawng chhuak boh a.

Lal chuan, "E khai! Chutianga muan nghal ngawt zawng, kan nauvi mangan khua kan ti rei mai mai dâwn zâwk asin," tiin a chhâng a. Chumi hnu chuan, "Tirawh le, Zika, kan râl, hmeichhia laka dim dâwina nei lo ho chu i han phîn dâwn teh ang hmiang," tih leh a silai chu chuha put a rual ta nghâl a. Chu veleh Aizika chuan lalpa chu silai puin a zui chhuak ve ta nghal a.

Chutia an han chhuah fel hnu chuan lalnu chuan, "Tinkuala pa hi zawng, a luhlul dân nget ngut hian a châng hi chuan min tihlauthâwng leh viau ṭhin. Lal Rûma a luhchilh ṭum te khân, lal in aṭang khân engtia him piala rawn chhuak leh thei nge maw a nih ni? A châng hi chuan âtna hian a bual khat ni deuh ṭhinin ka hria. Kha maw, tûnah pawh, tlangvâl ṭhahnem tak an awm na chêng a, a mi rin zâwng pakhat nên lâwnga kal a tih luih leh ngulh tawh kha. Hetiang pa rêng mai, Tinkuala hian rawn chhun malêk mah se, pawi tihna ka nei hauh pawhin ka ring lo ve, tiang êm êm lutuk mai chu. A nuna vanneihna hian a chelh rei meuh pawh ka ring zo ngût lo; tiang hrim hrim mai!" tiin a hmeichhe thu dâwn chu a chhâk chhuak pârh pârh a.

A ṭawng chu Khâwnbâwlte chuan chhân zui tum âwm an awm lohah chuan Aizika pa Aiṭhuama chuan, "A khai! Chutiang zâwngin ngai ma ta che, lal nu; hetiang lal hi a nia khaw tin hian an duha an awh êm êm ni. Khuain a awmpui ang a, him leh dam takin, râl lu khaiin kan nauvi chu an rawn chhawm haw leh ngei ngei ang," tiin a ṭawng thlammuan ta hlauh a. Chutia a rawn sawi ênah chuan Upa pakhat chuan, "A ni teh tak e, kan tûnlai thla de chho hian mi lu a khai tlat a ni; nizâna ka han thlir pawhin, 'Leido han nei teh ila aw! Rammut hun ṭha a va ni ngai em!' ka ti vawng vawng mai asin," a lo ti ve boh a. Chutianga titi a kal pên tâkah chuan, Lalnu pawh chuan ṭawng zawm leh ta'ng e ti lovin a bai chhuan lai chu a vil zawm leh ta mawlh mawlh a.

Chutih lai chuan lal leh Aizikate ho pawh chuan tuikhur mawnga ruang an hlâwmna hmun chu an thleng thla ve ta reng a.Hnû chu an han chian ṭan ta a.

Chutia hnû an chian mêk lai chuan, Aizika chuan a hmui a han tum dut a. Chumi zawh chuan aw zâwi dâi raih hian, "Lianchuhmâng, intawn hun chu kan nei remchâng dâwn ta nge nge maw?" a ti sup a.

Chu a thu sawi chu lal chuan a lo hre phâk vuai chu niin, Aizika hnenah chuan, "Kan pasalṭhaa chu, i thin a va rim âwm vei ve? Lianchuhmâng ti tea ka'n hriat che chu?" tiin a han zâwt ngawt a.

Aizika chuan, "A, eng ni lo ve; hun liam tawh thil eng emaw ka han chham chhuak palh mai a ni e," ti chauhin a chhâng a. Mahse, lal chuan a chhânna chu pawm lo leh âwihsak lo tak hian, "Patung meuh, patungah pawh a satliah lo ber maiina chham sual neihna hmun atan he lai hmun hi chu a tlâwm lo viau chuan ka hria. Eng nge ni han sawi tlang law law ta che maw? Tûnah chuan rilru hmun khatin kan che dûn dâwn a ni a, thup ṭît ṭêt awm hun a nih loh hi. I thinrimnaah hian kan lo ṭangrual viau mai thei asin," a han ti leh ngat a.

Chutianga lalin a han tur tâkah chuan Aizika chuan, a bula hnim hnah inṭhuai bûl hmurh leh, a bula hmawlh suih mam pakhat invit phun chu en zauh pahin, "Kan mi ûm tûrte hi Pâwi pasalṭha Lianchuhmâng, nunrâwnnaa khat, hmeichhia leh naupang pawh dim dâwina nei miah lo leh, a hmeichhe man te phei chu pâwngsual loha chhuah ngai lo, a khawih hnûa an lu lâksak leh mai chi a ni a. A hmaah tu lu mah hi rei a nung ngai lo," a tih lai mêk chuan, "Ummhmmm! Chutiang mi chuan ka se dâi hi engtin nge a rawn pal tih i hriat theih?" tiin lal chuan a ṭawng lai chu a lo pawh chahsak a.

Aizika chuan, "A, eng dang a ni lo; an chêtna hmuna ruang chhuak zât leh lu an lâk zât chhinchhiah nan hetiang hian hnuhmâ an hnutchhiah ṭhin alawm," tih pahin hmawlh invit phun pakhat leh hnah inṭhuai chhum hmurh pakhat chu a han kâwk zauh a. Lalina chu thu a hriat avanga mak ti hmel taka Aizika chu a melh hau lai chuan, Aizika vêk chuan, "Hmawlh hian an lu hawn zât a entir a, hnah inṭhuai chhum hian ruang tlu zât a entir bawk. Chu vângin, ka nauvi chu a la him tih kan hre thei tihna a nih chu. Amah hi alawm, a lu ka la tûr lalin min dan avânga kan lal chuan ka phatsan a hlawh phah tâk chhan chu.

"Tunah chuan muan chi a ni lo; a nunrâwnzia hretu tân chuan pên khat leka pên tlai pawh hi a pawi hman theihzia pawh hi ka hria asin. I ûm rang u. Hmâ ka'n hruai ang e; a lakah hian ka mikhual hlei nêm," a han ti zung zung a. Chutianga a han sawi chuan lal chuan Aizika phuba lâk tum chhan dik tak chu a hmai hmaa ama kâ ngeia hriat châk viau mah se, hun hlutzia a sawi tel chuan a tur nat tâk avang erawh chuan zawh chhunzawm chu a tum ta bik lo a. Tichuan, Aizika chuan hmâ a hruai a, lalin dawtin, an mi ûm tûrte chu hmanhmawh takin an chhui ṭan ta a.

An mi ûmte chu Aizika chuan an khua nên lama a hriat chian êm avang chuan, an zawh tûr khan remchâng âwm pawh chu a chhuidawn fuh chat chat zêl a. An pan lam tûr a hriat tlat avangin an hnu chu zui zêl lo va, a aia kawng hnai leh an kal miah lohna tur hmun lamah, kum hmasa lama sai ramchhuaka khaw hnih khaw thum lai mai rawn hêla an rawn luhna hmun lamah chuan kawng chu a herpui ta daih zâwk a. Mahse, chutih rual chuan, a buaithlâk lai ber chu, amah a ṭuan a ṭhain a chak si a, tlêma hmun ṭan rem lo leh nâlah te chuan a liam zung zung mai a. Chu chu a hnunga zuite chuan an phâk loh êm avangin, Aizika tân chuan duh thâla hmanhmawh theih a ni ṭhin lo va. Mahse, amah avanga chak an zirna kawngah erawh an hlâwkpui viau ta ve ang.

Chutia an ûm ngat ngat hnû, ni pawh a chawhnu ruih tawh tih chuan ngawpui chhah zet, 'Belebuta ngâw' an tih mai chu an pal tlang a ngai ta. Chu ngaw chu a sawi uar deuh phei chuan, "Chhûra pû pawhin a rual phâk lo ang e," an tih hial ṭhin, a ngaw pilril deuh lai phei chu chhûnpachangah pawha thim hlim ang maia thim vâwt ruih reng mai hi a ni a. Chu lai kârah, chu ngawpui chhûng chu huai hrang hrang hian an bawh riau avangin thâwm maksak tak tak hi a tamin, thichhâwnga lum phah pasalṭha pawh an kat nuk tawh rêng a. A chhan chu, chu lai hmuna huaite chuan mihringte zahna leh ṭihna derna an nei hauh lo va. Chhûn a ni emaw, zân a ni emaw, an ngampat dân hi a ngai reng avangin rilru dâwih chi deuh phei chu kut thawha lo hmachhawn hi an ching em em mai bawk a. Chumi avang chuan, pasalṭha inti nazah zawng, hmulthi ding suauva hawi phâwk leh hrâ ṭhin tân chuan chu lai ngaw chhûng chu a ngainatawm hlawl lo va, pal tlang aia hêla tlâk mai a hlawh zâwk zêl bawk.

Chutia Belebuta ngaw an luh dâwn chuan an hnung zuitu an hruaite chuan, chu ngaw chanchin chu an lo hriat fo tawh avang chuan, "He ngaw hi kan pal dawn em ni? Tu mahin an pal tlang ṭha duh lo asin he ngaw hi," tiin an hlauhna rûk chu an rawn sawi chhuak phawng mai a. Chutia an nau ten an hlau tih a hriat chuan lal chuan, "Vâlate u, in ṭih deuh em ni? He lai ngaw chhûngte chu mipa tân chuan a aia hmun nuam dang awm lo khawpa khawharthlak loh alawm a nih. In chhungril kha engmah inhnehtir lo u la, eng mahin a tibuai lo ang che u," tiin a han fuih zauh a. Anni pahnih pawh chuan an hlauh rûkna chu hneh tum tak hian an lu chu an bu dûn nghat a.

Ngaw chhûng an han lut a. A boruak chu a lo danglam chawp leh chilh nghâl hle mai a. Chumi a nih avang chuan Aizika chuan, an naute chuan an hlau ang tih thulh-ah fuih pahin, "He ngaw hian danglamna mak tak mai a neih roh a. In beng bulah te khân rawn be leh sur sur che u a awm maithei a, chumi vâng chuan in kal lai kha tidanglamin in ke chheh tibuai hauh suh ang che u. An zuam tûra awm lovin eng mah hre lo leh hlau hmêl tîm dui ang kha chhuah miah bawk suh ang che u. A nih loh zawngin, kan hmuhpui ve si loh che uin in hlauh tûr thilin a zem buai che u ang a, ngaw hi in pal tlang zo lo palh mai ang," a han ti zung zung a. Tichuan, ngaw chu a chhungril lam panin inzui lût ta a.

An lût ril tial tial a, ngaw chhûng pawh chu ni zungin a chhun tlang zo lo tial tial a; a thim ta ruih mai a. Chutiang a nih lai kârah chuan, Aizika sawi ang tak tak chuan huai ho chuan lo tihbuai tumin, an beng bulah chuan anmahni rawn bia ni âwm tak tak thâwm chu a rawn ri ta ser ser ṭan a. Chu'ng chu lal leh Aizika chuan an lo hriat tawh leh an lo pal tlang tawh te a nih avangin, an ke chheh leh hawi herah danglamna a siam lovin, an chhûngril pawh a tibuai phak hek lo. Mahse, an nau hruaite tân chuan thil thar leh hlauhawm, thauva mana tiril tikhûr dar dar thei chu a tlat thung. Chumi avang chuan an kal lai chu hma sâwn hlei thei lovin an ding leh chawt ṭhin a. An hlauhna chuan a man thûk tial tial avang leh eng emaw hmuh tum tlatna chuan a bawh tam tawlh tawlh bawk avang chuan, an hnung lam leh sir lam te chu hawi tawn zuk zukin an vir leh zuk ṭhin a. Chutah chiah chuan, Aizika'n a sawi ang chuan chu an nau hruaite chuan hmuh an nei ṭan ta tlat mai!

A rei deuh hnuah phei chuan Vâlnova zâwk chu awmze mumal pawh nei lo hian, hlauhnain a man a, a thil hmuhin a tihbuai avang chuan hma lam awihtlânah chuan a tlân thla ta chiam mai a. Chu veleh Aizika chuan, "Eng huai nge maw i nih le?" tia au ṭhat pahin Lalnova tlân thla chu a ûm zui ve nghal zawt a. Mahse, an inchak hlei em avang chuan Lalnova chuan thui a thlen hmain Aizika chuan a zu man hman hlauh a. Chutih lai chuan Vâlnova chuan mumal a nei lo; a meng â ruai a, biak pawhin chhân nachâng a hre lo va, a khûr zaih zaih ringawt mai bawk a.

Chutiang an han nih tâkah chuan lal pawh chuan nuam a ti chiah bik ta lo a ni ang, "Zika, hetiang chuan kan inpal tlang zo ngût dâwn em ni? Eng emaw remruat dân rûk deuh te i nei em?" a han ti a.

Aizika chuan, "Tih dân awm chhun ber chu tûna hmanhmawha kan kal a, a rang thei anga he lai ngawpui hi kan chhuahsan vat a ni mai. Kan nauvate lah hian hetiang teh hrep chuan he ngaw hi an chhuahsan dawn ngût bawk si lo," tiin a chhâng a.

Lal chuan, "A nih chuan, hma han hruai leh ta poh che; keiin hnung ka han dâwl ang e," a ti dam dap a. Tichuan, Aizika chuan, a thawk lawk a, Vâlnova eng mah hre mumal lova a melh ngai melha khûr ngat ngat mai iptepui chu ah sakin, amah chu a chawi lawka a dârah bâtin, a kut veilama silai keng chungin a thingluang put vawh a, chak deuh mai hian khan rem lai apiang chu zawhin a kalpui ta vâwk vâwk mai a. A hnungah Khawtea leh lal chuan chak zet mai hian an zui rawk rawk bawk a. Chutih lai chuan Khawtea chuan a hlauhna chu a hneh theih hlauh avangin a buaina chu a zualkai ta lo a ni.

Chutia rei khat ngaw chhunga khan rem lai zawh a, khaw chhak lam an pan ngar ngar hnu chuan ni tlâk dâwn suarah hian Belebuta ngaw chu an pal tlang thei ta hlauh a. Ngaw aṭanga hla khat tak, hmun rai nuam deuh laiah chuan an han châwl dat a. Mahse, Vâlnova nikhua hre lo chu a la harh chhuak mai thei si lo; a harh hun han nghâk turin hun a uiawm tawh si avangin Khawtea hnenah chuan lal chuan, "Vala, hei kan tân hian hun a hlutzia i hria ang a, chumi a vang chuan i ṭhianpa harh hun hi kan vaia nghak thei kan ni dâwn lo. Chu vang chuan, keini chu Zika nen hian kan kal zêl phawt ang a, nangin he laiah hian bûktê zârin i lo awmpui mai a ngai dawn a ni. Nakinah, a harh hunah kan hnu chhuiin min rawn fin dân in zawng mai dâwn nia," a han ti a. Khawtea chuan lal thu sawi awmzia chu hre thiam takin, a pawm a ni tih chu a hrilh lêt ve thuai a. Tichuan, an chaw fûn leh sa rêp te an pêk hnuin lal leh Aizika te pahnih chuan Lianchuhmâng leh a hote chu an ûm zûi dûn leh ta nghâl ngar ngar a.

Nakin deuhah chuan an hnu chhui chuan chhim thlang lam hawia luang, lui lam a pan ta tlat mai a. Chutih lai chuan khua chu a thim lek lek tawh a.

Chutia an hnu chhuiin lui lam a pan zêl chu an zui zêl hnu chuan, lui tê dam diai chu an zu chhuak thla ve ta hlawl a. Luiah chuan mautheia tui inna thar diai mai chu an hmu a. Chu bâkah, lui kam tui chim china an tui dai nut pawh chu la luang fim hman lovin a la nu balh bawk a. Tichuan, an hnû chuan khawi lam nge a pan tih an han chian hnû chuan, an theih anga chakin lui hnâr lam pan chuan fimkhur takin an inzui chho dûn ta ṭham ṭham a.

Khua a thim chhalh tawh, leilung erawh a la lang thei tih chuan an hma lam hla lo tawh taka hmeichhe hlau thlabâr riin, "Ka duh lo, ka duh lo..." tia ṭanpuitu ngai tih hriat taka thâwm a chhuah chu an hre viai viai a. Chu veleh Aizika chuan, "Lo ngai tak rawh; i nunrâwn i chhuah hun hi a rei tawh dawn lo a nia. Ka lak aṭang hian tu mah hi an biru rei ngai lo tih i hre thuai dâwn e," a han ti sap a.

An hnaih zêl a. Anmahni pawh an hmu thei tawh, an chezia thlira thingluang phena an han chawlh dat lai chuan Lal chuan, zâwi sap hian, "Zika, Thansiami thlabâr ri chu a reh vat a ngai a ni," a han ti sap a.

Aizika chuan a lu lo bûk nghat pah chuan, "Ka pu, Lianchuhmâng khi chu ka chanah min zuah ta che?" a han ti lêt ve zat a.

Lal chuan, "Chuti zawng, i chan ni teh se," tiin a lo chhâng thuai a.

Chutia lalin a chanah a dah tâkah chuan, "A nih, ani khi chu a nunga hawn ka duh avangin ka han phuar hlâwm ang e," tih leh a lu lâk chem chu phawrh a rual nghâl a. Chu a chezia chu mak ti taka lalin a thlir lai chuan Aizika chu muangchâng hian a tho ṭham ṭham a. Khaw thim chhalh tawh chu hmang ṭangkai a, an thlâ a muan lai taka ṭhâwn thuta an hamhaih buai laia an vaia sah thlûk zung zung mai chu tumin, a ding chhuak fel tih leh an hmaa râl awmna lam pana chak tak mai tlân chhoh phut chu a rual nghâl a.

Chutia an lam pana lu lâk chem nena chak deuh maia rawn tlân an hmuh chuan, pâwi râl ho chuan an rin loh lutuk thil a nih avangin an silai pawh chu hman nachâng hre lovin an lo thlir tawp mai a. An inhnaih zêl a, hmel inhmu thei khawpa hnaiah an intawn chilh tawh tih chuan, "Aizika, lah ni..." tiin pakhat hi a au ṭhat a. Chu veleh an zinga panga lai mai chu Aizika hlau chuan bak lêngin lui hnâr lam panin an tlân chhe ta rawk rawk mai. Chutah, Aizika chuan Lianchuhmâng, Thansiami bawh titiha lo la awm lam chu a pan ding nalh a. Chumi a thlen hmaa a kawnga lo awm Pâwipa silai chuha lo tin mêktu chu lu thlâwk nawlh khawpin a nghâwngah chuan a sahsak a. Chutih lai chuan silai a rawn puak thâwr a, a bula Pâwi pakhat chu euh ṭhawt chungin a hlawm nawk a. A hnuah vawi khat a puak leh thâwr a, a piah deuha amah kah tuma lo tin mêktu chu a vial leh nawk bawk a.

Chumi hnu chuan, "Kha le, lo inring rawh u le," tia aw râwl chhuahin lal chu Aizika pui tûr chuan a rawn tlân chho ve buan buan a. Chutih lai chuan Aizika chuan Lianchuhmâng chu a din chilh fel reng tawh a. A chem fawng lama nikhaw hre lova khawn a tum lai tak chuan a mit sir hian phe zuai a hmu a. Chumi vang chuan a kûn hniam zauh a, a lu chungah hian chem hi a thlâwk ri fua mai a. Chu veleh amah rawn beituin a kut a vai lêt leh hma chuan a ding mar zawt a, chho zâwngin hrawkbâwk thai thlêr chho va, khabe bal hlawk khawpin a chem chu a'n vai ri bawp ta maia le, che châng leh tur awm lovin leiah chuan a tâl khûr ta ngawt ngawt a, a leng uaih a, a chat fel chu a ni reng mai.

Chutah le, lal chu a rawn thlen chhoh meuh chuan, tlânchhe ve hman lo mi pali an thahte ruang let reng bula Lianchuhmâng leh Aizika chemtum kenga indin chilh rân bâk chu thil dang hmuh tur a awm ta lo. An bulah chuan Thansiami hlauhlawp tha khur erawh a lo ṭhu khûr beuh beuh thung a.

Chutia, Aizika leh Lianchuhmang an han indin chilh rânah chuan, Lianchuhmâng chuan a ngam loh leh a nunna lo laksak ṭhelh tawhtu laka tlâwm chu, a nunna chân ai chuan loh theih niin a hre ta lo va. Bâkah Aizika hûhângah chuan a tiril chu a khûr chhe zo vek tawh bawk nen chuan chêt a thawh rei dawn lo tih a inhre chiang em em bawk a.

Ni e, Aizika hi, a hmachhawn ngat tawh hi chu, sapui laka tlâwm ngai lo pawh hi a huhângah hian an zâm chhe châwk rêng a ni.

Chutah le, a beidâwnnain a laka chak lohna leh tlâwmna thinglung hniam tak a siamsak avang chuan Lianchuhmâng chuan, Aizika hnenah chuan, "Mi nun la, i salah ka awm dâwn nia," a ti khûr hluk hluk mai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 16th, 2018, 7:18 pm

PASALṬHA AIZIKA

- Nunmawia Fanai

BUNG THUMNA

Chutia Aizika hmâa Pâwi pasalṭha hruanghrau zet Lianchuhmâng, a hmêl han en pawha pa rothap leh mi kawlhsen tih hriat reng reng, 'hlauhnain a thinlungah bu a khuar ve ngam ngût dâwn em maw ni chu' tih hial tûr meuh hlauhna avanga a han zawr awlsam em em mai a hmuh chuan, lal Thandâwla chu mak ti tak hian a awm hmunah chuan a ding ka hau a. Ama hriat tham leka zâwi hian, "Chhei raw maw! Eng nge ka thil hmuh hi ni ta ngai? Hetianga pasalṭha, huaisennain a bawm khah tlat hmêl pu ruang siin thihna aia a hlauh zâwk hi tu nge maw a nih chiah dâwn le? Aizika chuan ka lo râl hriat aiin huhâng a lo ngah daih a ni dâwn hi!" a han ti sap a.

A ni lah tak a, Aizika laka amah ai pawha palian zâwk leh kum lamah pawha a rual phâk loh tûr, tharum han chhuah ngam sela, 'sai kal lai pawh a hnûk ding zo mai âwm mang e' tih hial tûr khawpa pa ṭan ṭha tlut maiin a mita en ngam lova a khup zûl zûl mai te, chêt khat eih pawh han la ngam lo khawpa a chhûngril lama a hlauh tlatna chu mak tih tham a tling rêng a ni.

Ni e, Aizika hi amah han en mai chuan a hmêl lan dân ṭhinah pawh chutianga han kâwlhrâwnna nei lêm lo, mite hmâi zah tina chi tih takah a hmai hi a chhawn tlâwm tlâwm deuh dâk ṭhin a. A mitmeng te lah chutianga hlauhawm han paw chhuak tûr atana rin kai lo chi tak, meng bil taih mai chi hi a ni reuh bawk a. Chu a chhapah, a ṭuan a ṭhat aia a leili hâwl muang dam thlup mai a ni leh zêl nen. Mahse, chutih rual erawh chuan, a bîk taka khuanu duan a nihna lamah thung chuan, a ze ropui leh bîk chungchuang tak mai, amaha awm chu mite hriatpui lohvin a chhûngrilah hian a kawl ru khiau thung.

Chu'ng amaha khuanu'n bîkna a dah zingah chuan, a chhungril aṭang rawn insiam chhuak ṭhin huaisenna leh theihna piah lam thil, khuanuin a voh bîkna tichiang êm emtu, thâwm chhuah si lova lian taka thâwm nei ru tlat si amah aṭanga huhâng, a hmachhawn te tâna langsâr êm êm leh tawrh tham zet mai lo chhuak ṭhin chu a nia, tûna a hmâa tlâwm lo thei lova Lianchuhmâng siamtu chu ni. Chumi rual erawh chuan, chu huhâng neia duan bîk a nihna mai ni lo va, amaha theihna chungchuang tak awm hi a nêp lo tih Lianchumâng hian an intawn hmasak ṭum hian a lo chiang tawh êm mai bawk a. Chumi avangin tlâwm lo theia siam lotu, mi pakhat aṭanga chhuak eng emaw a hmu hnem viau pawh a ni mahna!

Chutia Lianchuhmâng chu dawl zawra a zawr hnâp hnu chuan, Aizika chuan a thinrimna inmung mêk chu a suangtuah lâwk anga kal tlangpui a, a duh ang tâwka a sawp zawi hnâp huna phuar hlâwm zankhua ṭhak mai tak chu a châk viau va. Mahse, mi a tlâwm na nâ na, a chunga kut thak han hnawih luih phêt chu a rûk taka a ngilneihna thinlung chuan a thei tlat thung lo. Chumi avang chuan aw ka vîn pawha tâwng lovin, "Chutia, pachang meuhvin i tlâwm tih i inpawm a nih ngai chuan, hriam nêna hmachhawn phêt che ka tum zui bik lo ve," a han ti dam dap a. Chumi hnu chuan, eng emaw thulha chêt a lâk thut loh nan tiin, a hnungkhirh zâwngin a kut chu a phuarsak zui mawlh mawlh a. A phuar pah chuan, "Ka phuba chuan i lal Zahleithanga chu a hnaih zêl a nih tâk hi!" a han ti sap a. Lianchuhthang erawh chu sawi tur vai tih hriat deuh mai hian a ngawi dâk a, a tum anga thil a kal tâk loh avanga rilru hah nge, hlauhnain a chhungrilah bû a khuar nghet viau zâwk? Tih pawh hriat loh hian a thâw chu a han la leh hak ṭhin a.

Chutih lai chuan lal Thandâwla pawh chuan thimtham zingah chuan, "Nangni hian maw ka sa dai rawn nêk che u a? In chhaih loh tûr lal in chhaih fuh ta hlauh chuan, tu khâw khâ hriat lohna hmunah lu bungin a lehtir reng mai che u a nih hi! Leilên khaw sa dâi nêk ngam chuan an lu an zuar zêl a ni tih hi tlâng tin hian hre rawh se," ti charh charh chung chuan an mi thahte lû chu dimna nei miah lo hian a lo tan ri ve hrâwih hrâwih a. Tlânchhe tâ tena silai an tlânsan tâk leh an mi thahte silai nen, silai paruk lai mai chu a khâwm nghauh nghauh bawk a.

Khua a thim fel viau tawh a. Thing leh mau hnah inzâr dum khuih mai kârah chuan vâna arsi de ser serte pawh chu an lang phiar phiar ṭan a. Chutah Aizika chuan an bul hnaia mau leh thing ṭang ro a dap hmasak theih ang angte chu a han dap khâwm zung zung a, mei a han chhep êng hluah a.

Mei êng hnuaiah chuan, hlauhnain a la kiansan loh avanga la khûr hlak hlak reng Thansiami lam chu panin, a tâna a kensak zufâng thlum tui tak mai leh sa rêp vêl chu lal chuan a iptepui aṭang chuan a han phawrh nuap nuap a. Chu chu Thansiami chuan khûr deuh hlak hlak chunga a ei lai chuan, lal chuan, "Siampui, an lo tina hman lo hlauh che chu a va han lawmawm êm tiraw maw? Kan rawn nang hma hlauh che chu a lawmawm tak zet a ni. Chuti ni lovin, lo chak deuh ula, kawng lakah hian rawn nang hman lo che u mah ila, an khaw chhung mai ni lo, lal in thleng rawkin a nia rawn luh chilh kan tum ni. Mahse, hei, chu êm zawng a thlen ngai lovin kan innang hma ta hlauh a nia. Hlauh tur a awm tawh loh hi, thlamuang deuhin awm tawh rawh aw," tiin a hnêm dap dap a.

Nakin deuhah chuan, Thansiami pawh a thlabârnain a kiansan tawh viau avang chuan ngai a awh hlê tawh bawk a. Chutia a ti khûr leh hlauhlawp ten a kiansan tâk hnua rilru fim a put theih tikah chuan, chuti taka thlabâra siam a, hlau hlawp tak meuha siamtu an Pâwipa Lianchuhmânga chuan a thin a ti-ur ta thut a ni ang chu, a ṭhut hmun aṭang chuan a tho lawk a, Lianchuhmânga ṭhu kun lup mai lam chu a pan phei vut a. A bul a thlen chuan a ding chawih a, "Nang mi hur tenawm leh nunrâwngpa!" tih leh Lianchuhmânga, invên ngaihna awm lova hnungkhirh chunga hmaiah chuan a tha tâwp chuan a han bêng ri thlawrh a, a sam zial rêk laiah chuan dawmin a theih tâwka tha chhuah chungin a thing nawk nawk mai a. Chu chu a'n hmuh chuan lal chuan, "Aw khai! Siampui, i thinrim i tuar zo ngang tawh bik lo a ni maw?" a ti duh lek chauh a. Mahse, chutiang a nih lai mêk chuan, Thansiami thinrim chuan chin lêm nei dâwna a hriat loh avangin lal chuan, "Aw le, Siampui, a tâwk khat tawh e. Miin 'ka tlâwm e' an ti tawh alawm; mi tlâwm tawh hnu laka kut lek zawng a malsawm ngai lo a nia," tiin a han khap a. Chutia lalin a han khap tâkah chuan Thansiami pawh chuan a thil tih lai chu a chawlhsan zawm ve leh mai bawk a.

An hah te a han dam deuh tâkah chuan lal chuan, "Zika, meichher kha kan ngah tawh em maw chu?" a han ti a.

Aizika chuan, "Ngah khat bawk e," tiin a chhâng a.

Lal chuan, "A nih chuan, kan hah te a dam tlângin, kan inbâr fel bawk a, haw zai lam te kan rêl mai dâwn em ni ang? Kan hlawhtlin pawhin khua al a châk tawh riauva ka'n hriat chû," a han ti leh a.

Aizika chuan, "A remhriatthlâk ngawt tak ang chu; kan hah..." a tih mêk lai chuan lui mawng lama anmahni lam pana êng rawn hnaih chho teng teng chu a zu hmu a. A thil sawi lai aṭang chuan thu dangah kaiin, "Khu tê, kan lam pana mei êng rawn chho ni âwm hmu tlata ka inhriat chu," a han tih zawm leh zat a. Chu thu a sawi chuan hnung chhawn zâwnga ṭhu lal leh Thansiami-te beng chu a verh zawr a ni ngei ang, an ṭhut hmun aṭang chuan inher rualin lui mawng lam chu an thlir rual dûn ṭhawih a.

Chutia anmahni rawn pântu mei êng chu thlira an mit an lo tun hrâ lai chuan, rei lo têah Khâwtea leh Vâlnova-te pahnih chu kâwiah chuan an rawn lang dûn hlawl mai a. Chu chu a han hmuh chuan mak ti êm êm mai hian, "Awi karei! Khawtea leh Vâlnova lah ni reng chuan!" tiin Thansiami chu a râk chûl mai a. Chutah lal chuan, "Anni nêna khaw chhûng aṭanga rawn intiamrual hi kan ni alawm. Amaherawhchu, kawng lakah eng emaw muanchân hlauhawmin min nang hlauh mai a. Chumi vâng chuan kan rawn hmasak phah ta a ni. A hmain lo hrilh âwm tak che pawh a ni tak na a, kan hun tawnin a zir vang pawh a ni ang, ka lo mangnghilh daih pek a nih hi mâw," tiin thil awm dân chu a ruh lang râwng lo deuh chuan a han sawi a. A thil sawi dân kalhmangah chuan Thansiami chuan, lal chuan sawi lan kim loh a nei tih hre thiam mah se, zawh zui zêl tum bik lovin a ngawi zui ve mai a.

Nakin deuhah chuan Khawtea leh Vâlnova-te chuan an awmna hmun chu an rawn thleng chho ve thuai a. An bul an rawn thlen chuan lal chuan, "Vâlate u, ka rin loh deuha hmaa min rawn zawm thuai thei chu a tihzia ngei mai. Kan chin hloh hian in lo tâl bo daih ang a, kan inhloh palh mai ang tih ka lo hlauthawng ru khawp asin," tiin a lo chiau-au thuai a. Chutah Vâlnova chuan, "Khawtea hian hnu chhui a lo thiam em mai a, in hnû zêl kan rawn rap dik theih phah a nih hi," tiin a ṭhianpa chu a han fak zauh va.

Eng eng emaw an sawi zawh hnu chuan lal chuan, "Ti rawh u le, kan muang rei ta e. Haw lam i tin dâwn ang u hmiang?" a han ti a. Tichuan, an mi lu chu an inkim chiah a nih avang chuan pakhat ṭheuha akin, Lianchuhmânga leh Thansiami chhawm hâw tûr chuan an inpuahchah ta sang sang a.

Kal an han rem dâwn a, an hma hruaitu tûr lal chuan a meichher chu sâng taka lek chung hian, "Khawii nge, mual nghawr dur dur khawp silai lâwn tûrin Leilên khaw lam panin kal i rêl ang hmiang," tih leh lui mawng lam pana kal chu a han rual nghal a. Mi dangte pawh chuan hnehna leh hlawhtlinna lâwm ni pah fâwma haw haw chunga a hnung chu zui an tum lai tak chuan, rin loh tak maiin an hnung lamah chuan silai a puak ri dur mai a. Chu veleh Aizika beng bulah chuan silaimu thlâwk hi a ri fua a, an hmahruaitu lal hnung chiaha mi Vâlnova tukkhum chu a pawr sawk a, a hma lamah nikhaw hre lo tih hriat tak hian a bawk zawi hnawk mai a. Chutah kher chuan an tân chu lai hmuna tlûk vek mai theih a ni tih hriain, silai dang a rik hma chuan Aizika chuan, "In meichher kha tuiah khan vawm lût ula, ngaw chinah khian han tlân lût thuai rawh u," tiin a au tuar a. Chumi zawh chuan, ani pawh chuan a meichher chu luiah chuan a vawm lût thuai a. Chumi zawh chuan a mi kaih lai, a hmaa a kaltir Lianchuhmânga chu na zet hian Aizika chuan a chem fawng chuan a tukkhumah a han tuk ṭawlh a. Lianchuhmânga chu 'aiah' ṭhawt chungin a tlu zawi nghâl hnawk a; tichuan ngaw lamah chuan a pit lût ta thuai a. Chutih lai chuan, a ṭhiante pawh chuan Aizika sawi ang chuan an meichher ken lai chu luiah chuan an vawm lût thuai a, Aizika luhnaah chuan an pit lût ve nghâl thuai a. Chutih lai chuan silai pawh chu a rawn ri chhunzawm mai bik lo va.

Chutia meichher a han mit ṭhiapah chuan, a hmaa an mei chhehnaa la alh zo lo tlêm tih loh chu kawr dungah chuan êng dang awm lovin, a thim hian thim ruai tawh a. Mei la de teng teng kârah chuan, an awmna a inhlat avangin silai hmanna tûr khawpin mitin eng mah a hmu fiah thei lo va. Chu chu Aizika chuan, khuanuin a duhsak bik, he khawvela mi tlêm tê chauhin an neih, zân thim hnuaiah pawha khaw hmuh thiam theihna a neih chu remchânga lâk a tumin, lalpa hnênah chuan, "Lalpa, nangni'n he lai hi lo uap ula, keiin an hnung lam aṭangin ka han ṭhâwng ang e," a ti sar sar a.

Lalpa chuan, "E khai chu'ng chu a chi dâwn em ni? An lo sai palh hlauh thei che asin," tiin a chhâng lêt a.

Aizika chuan, "Hetiang ngawt chuan a dik lo ang; inching fel thuai zâwk teh ang," a han ti leh a. Chu zawng lal chuan hnial tum bik ta lovin, "I duh ang chuan ti ta che," a tihsak ta a . Chutianga lalin a chhân tâkah chuan Aizika chu ngaw chhûng lamah chuan lûtin, anmahni râwn kâptute awmna chhaka chhuak chho tûrin a han vêl ṭan a.

Chutia ngaw chhûng a han luh ril chuan ngaw chhûng chu a thim hian a thim chhah mup a. A hmaa mei ênga awm a nih avângin mau kâra arsi lang pheuh pheuhte lahin êng an rawn pe phâk dêr bawk si lo. Chutah le, a thim tâk êm avanga kal a harsat tâkah chuan muangchâng hian a han ṭhu a, thâwk han lâk vang vang pahin a maimitchhing vang vang a. Rei ve khat a chhin hnua a han men leh chuan a mit chuan vân vârah chuan thil a hmu thei ta ruak a. Tichuan, a kalna kawng chu indap chawp lovin a zawh thei leh ta a.

Ni e, Aizika hi khuanuin a thilthlâwnpêk zingah chuan zân thimah a mit a hmang thei tlat hi a danglamna a ni a. Amaherawh chu, fiah taka hmu ni lovin, a benga ri hriatna nena ṭang kawp a, a suangtuahna thûk tak aṭanga ngaihruatna nên, chumi infin khâwm chuan chhûn êng ang maiin zân thim pawh hi a hmang thiam tlat a ni. Chu chu a nia, mi bikte bikna hian siamtu ropuizia a puan chhuah leh ṭhinna chu.

Nakin deuhah chuan a duhna hmuna chhuak turin a tum hmun chu a thleng chho ta a. Chuta ṭang chuan anmahni rawn beitute chu a lêt zâwngin thim zingah chuan, thâwm dim takin a veh thla ta ṭhem ṭhem a.

Thui pawh a kal hma chuan a hma lawk pên sawmhnih âwm leka lungpui inphenna atana hmang a, khawvâr hun nghâk ni âwm taka thlamuang deuh maia mi pahnih lo awmte chu a zuk hmu thei a. Chu mite chu thâwm chhuah lova tuk dawl dân ngaihtuah roh roh chung chuan thâwm dim takin a veh thla zêl a.

Nakinah chuan a ban phâk loh deuh chauha hnaiah chuan a awm reng tawh a. Tichuan, a han insiam rem deuh tê tê hnu chuan, a chem chu zâwi muangin a han phawrh zâl zâl a. Chutah le, zau deuh mai hian a hma lamah chuan a han kâr pâwk a, chumi zawm zat chuan amah hnung chhawn zawnga awm pahnih zinga pakhat zâwk, dinglama mi zâwk chu a chem chuan a tukkhum thlungah lu bung dâwn khawpin a han vai ngheng mai a le, che leh tur pawh âwm lovin a zal hnawk a. Chutah pakhat zâwk chuan chu chu a hriat chuan eng mah hmu fiah thei lo nâ chuan, a hlau chu a euh ṭhawt a. Mahse, thâwm a chhuah nat hmain ani pawh chu a hrawkbâwk ri rawp rawp khawpin a rêk ri zawm ve nghal bawrh bawrh a. Rei lo têah a chalchâng zui ve leh nghâl thuai a.

Tichuan, chu mite pahnih chu insi rial hian a han mut a, lungpui chungah chuan thâwm dim takin a han lâwn chho va. A hma lam a han thlir chuan, an meichhêm la nung teng tengin êng a rawn siam thlârah chuan, a awmna aṭanga pên sawmli dâwn awmah hian mi pakhat chauh hi a zu hmu a. A rilru chuan, "An zinga pahnih chu an rawn lêt ve leh lo a nih dâwn hi," a ti rilru a. Chu vang chuan, a silai chu hman ngam a ni tih hriain a han lek chhuak a. A tin vang vang hnu chuan, "Kha le, Lianchuhmânga thlavâng i hauh sual e," tiin a han au chhuak phut mai a. A au thâwm a hriat chuan Pâwipa mak ti leh hlau lutuk chu a ṭhut hmun aṭang chuan a ding zawt a. Chu lai tak chu Aizika chuan che zui leh tûr awm tawh lovin a kâp thal ṭhawk ta mai a. Tichuan, anmahni rawn chimih tum a, a lak aṭanga tlânchhe zinga rawn lêt lehte chu Aizika chuan a lo dah ṭha ta phiar a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 17th, 2018, 5:46 pm

PASALṬHA AIZIKA

- Nunmawia Fanai

BUNG LINA

Chutia râl pathum a hmaa an tlûk hnu chuan, Aizika chu a mi thah tâkte lu leh an silai a khâwmsak nena inkhai bâwr luai hian an mei chhêmna lam chu muangchângin a pan thla hnak hnak a.

An mei chhêmna a zu thlên thlâk chuan, mei thi lam tawh chu chhawm nun ṭhat leh pahin Aizika chu, "Lo chhuak rawh u le, a muanawm tawh e," tiin a han au lâng lâng a. Chumi chu an hriat chuan ngaw chin thim chhah tak aṭang chuan anni chu an rawn inzui chhuak ṭhâm ṭhâm hlawm a. Chutih chhûng chuan Aizika chuan an ṭhianpa, an nau hruai Vâlnova ruang chu mei êng hnaih deuha hmun rem laiah chuan a lo zalh ṭha thuai thuai a. Chumi pah chuan, "Ṭhiana, an tum loh zâwkin i tawrh phah a nih si chuan, ka aia i thihna hian nghawng lian tak a nei ngei ang," tih sap pah chuan Vâlnova mit chu a siamsak zung zung a. Chutih lai chuan Lianchuhmânga nikhaw hre lova tlu hlâwm reng pawh chuan harh a rawn tum ṭan tih hai rual loh hian, rûm ṭuah ṭuah chungin a tlûkna leiah chuan a ke a leng kual vêl uan uan ṭan a. Chutah Aizika chuan, "Kha lah, i naute chuan an lu an hloh leh nual tâk kha. Tlânchhe hlen sela an him ni mai tur a ni asin maw," tia uan khum zauh pahin a kut hnung khirhna hrui chu a phelh thâwlsak mawlh mawlh a. Lianchuhmânga chuan Aizika'n a uan khumna ṭawngkam chu nâ tiin, tlâwmah la viau mah se, a hnuaihnung zâwk nia a sal hiala intu lût tawh a nih avang chuan pawm lo chungin a ngawihsan lo thei si lo.

Aizika bul a ṭhian ten an rawn thlen a, râl lu dang pathum leh silai pathum a lo ṭhutpui vûng mai an han hmuh chuan lal Thandâwla chuan, "Chhei raw maw! Kan pasalṭhaa chu, mihring pawh i ni dâwn em ni chu? Hetiang ang rênga mi ropui chungchuang hi ka mit hian a hmuh ka ring lo asin maw! Pu Vâna hian a fa chuam hi he pialleiah hian a rawn lêntir riakah ka ngai hial mai ka ti!" tiin Aizîka chu a hmai hmaah chuan a fak chiam mai a. Chutih rual erawh chuan, an nau Vâlnova vânduaina chuan a rilru a kap hlê a ni tih hriat tak hian, sadâi êk ang chauha lumnain a hnaih ngam tawh loh, a taksa tlu dai dak tawh lam chu hawiin, "Aw! Engah kher nge maw, i vanneihna humsaka awm lova i tlûk bik mai ni le!" tiin a chek tlak tlak bawk a.

Tichuan le, an râl ûma an hlawhtlin viau laia a leh lama lu an han sûn ve tâkah si chuan, lalpa chuan, "E khai! Hei, hlim leh dam tlâng taka râl lu nena haw a, khua chuana tlâng tlir mai hmabâk emaw intih tawh lai kârah, a leha lamah tum loh lam kan chanah a tlain lu kan sûn ve tho tâ chu a ni a. Chumi vângin, kan ro pawh kan thlâk a ngai dâwn a ni," a han ti chuar chuar a.

Chu thu a sawi zawh rual chuan, Aizika chuan, "Lalpa, rem i tih chuan kei hi khuaah chuan zualkoin ka kal ang e. Kan nauva thih chhan hi keimah vângah riak ka chan lo thei tlat lo mai. An kut themthiam loh aleia min ṭhelh vânga tuar a ni tlata hriatna ka nei tlat mai," a lo ti thuai a.

Ni e, a nihna takah chuan, an zinga mi Vâlnova a thih chhan hi chu, Pâwi râlin an rin tawh loh lutuk maia an rawn kah thutah khan, an tum tak Aizika an hlah hlauh avanga an tum loh zâwk fuh an nih vâng a ni.

Khatia, Pâwi râl tena thlamuang leh nanchîn theih tawh loh tluk hiala inngai a, thlamuang taka an châwlh laia an rin loh taka an mi ṭih leh hlauh bêr mai Aizika a rawn lang thut kha, 'hlauhna hian mihringah âtna mak tak a dah ṭhin' tih chu anmahniah khân a thawk chawpchilh chiang hle a. Chu chuan, ṭanrualnain chakna a neih ropui tak ni ṭhin chu ât hnantirin, mahni chauhva beitu ni tûra inngaihna an neih len êm êmna chuan a hneh thlu thuai a, an tlânchhe ta chiam mai kha a ni a.

Thui khat tak lui hnâr lama a biling a balanga an han tlân rawk rawk hnuah khan, an zinga pakhat, pasalṭha ve tak mai, Lianchuhmânga kaihza vêngtu ber ni ṭhin Sângkaikhama chu a inngaihtuah chhuak thut a ni ngei ang; a tlân laklawh lai chu a ding chawt a. Thâwk hlawp hlawp pah hian, a ṭhiante chu a han au ding a. An hnênah chuan, "Eng aiah nge maw kan tlânchhiat chiam chiam mai le? Aizika kha kah rawn ta lêk lo va, a eng hû chuan nge maw min han ur rawn teh rêng? He lai thleng thlenga kan han tlân mai chu ni! Ti teh u, ding ula, kan pasalṭha Lianchuhmânga lu hloh tûr i zu ṭhulhtir teh zâwk ang. Hetiang ringawta tlâwm zawr dêr mai zawng, tungchhova kal nih pawh a zahthlâk mai dâwn e," a han ti leh hnuhnawh a. Chutia an zinga an chhuan tawlawl berin a han sawi tâkah chuan, a thil sawi chu dik an ti tlâng viau a. Tichuan, lêt leh chu an rawt thlu ta a. Mahse, chutih rual chuan, an zinga pahnih, an silai tlânsan tâte erawh chuan an ṭhiante rual pâwl chu tum tawh lovin, "A hma pawhin, Aizika lakah hian fimkhur a ngaihzia kan hre tawh. Chu vângin, a bul hnai leh a rim a râ hre phâka awm hi kan tum tawh lo bau a ni," tiin an ṭhiante rual chu pâwl duh lovin an kir ve duh lo va.

Tichuan, an ṭhian ten haw kawng zawh zêl an rilrûksan kârah chuan, Sângkaikhama leh a sangâwi zâwnpuite chuan Aizika chu zingvawnzâwla tual chai tûra thlah liam tumin lêt leh chu an rêl ta a ni. Mahse, an tum ang chuan thil kal ta lovin, an themtlaw hretna chuan kir leh tûr awm lovin kawr dungah a tlûk daihtir ta raih zâwk si.

Le, chutia Aizika'n zualkova kal a duh thu lalin a hriat rual chuan, "E khai! Mai mai a, nang zawng ni lul lo vê! Hei, tlangvâl zuan zâng, Khawtea kan nei alawm; ani hi zualkovin khaw lam zu tlân nal nal sela, keini'n hetah kan lo nghâk a niang chu," tiin a han khap a. Chutianga lalin a chhânah chuan Aizika pawh chuan nawr luih chi niin a hre ta lo va, a ngawi zawm mai a.

Tichuan, lal chuan Khawtea hnenah chuan, "Khawte, hei maw, kan hlawhtlinna chuan a beh bâwmtu chhiatna min thlen ta ruang mai si avâng a, loh theih lohva ro hran kan rek a ngaihnain min man tâkah chuan, nang, zuan zâng berah, khua lama zualkova kal turin i khân ber tâkah leh zêl chuan, kan hun tawn leh thil thleng hi khaw chhûng lamah hrilh tûrin i liam mai dâwn em ni ang?" a han ti a.

Khawtea chuan, "Aw le, muang khawtlai lovin ka'n liam nghâl ang e," tiin a chhâng a.

Lal chuan, "A nih chuan, kan kal lohna lam kawngah, zin kawng khanpui a awm kha i hria ang a, kha lam kawng zawh khan kal i siam dâwn a nia. Chuan hei, Siampuii hian zui che sela a ṭha ang; ani tân he laia khawtlai reng chu a hahdamthlâk dâwn lo rua êm mai," a han ti leh dap dap a. Chu veleh Khawtea chuan an meichher puah sa chu meiah chuan a han hliau kai zawm nghal a. Tichuan, an khaw lama zualko tûr chuan Thansiami chhawm chunga a liam chu zui ta nghâl a.

Khawtea-te an liam fel tih chuan lal chuan, "Zika, hei kan pasalṭha hi engtin nge kan han tih ang? Kan titi hre phâk lova awmtir daih zâwk te hi a remchâng ang em?" a han ti a. Chutia lalin an bul hnaia awm atan a duh vak lo a ni tih a hriat chuan, Aizika chuan Lianchuhmânga chu a hnungkhirh a phelh dulsak chu phuar nghehsak lehin, an piah deuh lawk lang thei maia raw hung kiangah chuan a va thlung a. Engtin mah pawha be zui lo chuan a kalsan zui leh nghal thuai a.

Aizika a lo lêt leh hnu chuan lal chuan, "Zika, hei lah, kan Pâwi chal bâwk ho hi a engtia khaw thim hnuaia han ral mai thei nge maw i nih chu le? Nangpui roh hi khuanu hian engtiang chiaha danglamin nge maw a duan bik che le?" tiin, ngai chungchuang leh dah chungnung tih hriat tak hian a thlêk ngawt ngawt mai a.

Chutia lalin mak ti hmêl taka thlêk hâ chunga zawhna a zawh chu Aizika chuan, "Mi dang tih theih loh tûra thil chungchuang tih ka nei bik hlei nêm maw. Thinlungin a pawm thlap thila inthiam lohna tel lova mihringin a kawng a zawh chuan, engkim mai hian kawng hmang a lo nei zêl dâwn a nih hi," ti chauhin a chhâng a. Chumi zawh chuan, zawhna khirh deuh deuh a zawh lehna tur lak aṭanga insaseng tumin, a iptepui chu a chuh a, "Khawii nge, he'ng lai, mei êngin a ên phâk china mau ho hi ka'n sât khâwm dâwn ang e,," tih leh, hlâng siamna tûr châk lâk khawm tuma thawh chu a han rual a. Chutia a thawh tâk hluaiah chuan lal chuan, "Aw khai! Kha'ng te chu nangin i lo tih a ngai hlei nêm maw âw!" tiin a han khap ti tuai na a, amah vêk chuan, "Khawii nge, i han fawm khâwm dûn ang hmiang," tiin a zui ve leh ta hnû hnû zâwk a.

Hetia lal meuhin Aizika mau sât tûr a han zui ve ṭuang ṭuang mai hi mak kan ti maithei a, mak tih pawh a âwm viau maithei bawk. Chutih rual chuan, Lal Thandâwla hian ze hran deuh hi a nei ve a. Chu chu a mi leh sate lakah hian a indah ropuiin a indah chungnung ngai hauh lo lai hi a niin, lal a nih avanga kawng engkima âwl nih bik hi a tum a ni ngai hauh tlat lo.

Mau te an sât zo va, titi khawchâng eng eng emaw an sawi hnû chuan khua pawh a lo vâr chho ta a. Ni pawhin lan a rawn tum hnaih ve tawh ang tih chuan, Leilên khaw tlangvâlrual te chu an rawn lang ta khup khup hlawm a. Chutah, khawmuang lovin ruang zâwnna tûr hlâng chu an buatsaih nghâl chûk chûk a, an zo fel nghâl thuai bawk a. Tichuan, hnehna lâwma hlim râwl nen, lusûn avanga thinrim râwl nena ri hulh hulh chung chuan chu hmun aṭang chuan an inzâwn chhuak ta a.

Chutia châwl lova khaw lam pana an inzâwnah ngar ngar hnu chuan, ni a tlâk hma deuhin kawtchhuah chu an inzâwn thleng ta hlawl a. An han innghah sap sap hnu chuan, tlangvâlho chuan Aizika kianga Pâwi pasalṭha Lianchuhmânga, zum dûk a, hawi chhuak ngam lova lei lam bih ngar reng mai chu an pan rawn ta luai luai a. A ṭhenin, "Kan farnu that a, kan khaw muanna tibawrbângtu chu khawii nge piai khat chauh chu i han hnawm ang hmiang," tiin an kuk lawlh lawlh hlawm a. A ṭhen lahin Thansiami thlavâng hauhvin, "Kan farnu, tlâng tina thang mawi tûra kan voh laka khawsak dân mawi lo chehtu chu khawii nge, khawsak phung mawi lovin i han chhâwn teh rêng ang hmiang," tiin an kuk ang lawlh lawlh hlawm bawk a. A ṭhen thinrim insûm zo lo zual lahin, "Se chaih takin i han chaih ang hmiang," tiin an tung tho va, a thlunna hrui chuan an hnûk sawk sawk hlawm a.

Chutianga an chaih mêk lai chuan lal chuan, "Khaih, khaih,khaih! Duh tâwk tawh un. Mi an tlâwm lai tawh chiam zawng khua pawhin a ngai haw ngai e," tiin a han khap ta hlawm a. Lalin chutia ṭawngkam a han neih hnuah chuan, tlangvâl ho pawh chuan an chêt phung chu thlâkin, awm dân pangngaiin an awm leh ta hlawm a. Chutah lal vêk chuan, "Le, hlimna leh chhiatna thinlung nêna khaw chhûng lût kawp tûr kan nih rualin, râl lû nena khua lût tûr nafam chuan bawh hla leh silai lâwn thâwmin khua i han nghawr dur dur mai teh ang," a han ti a. Chu veleh tlangvâlrual te chuan thâwm an chhuah hulh hulh mai a. Chutah lal vêk chuan, "Kan pasalṭha, thang chuai leh tawh ngai lo tûr Aizika hian bawh hla han chham sela, tlâng i han tlir khâwk rum rum teh ang," tiin ring tak hian a han au lauh lauh a.

Chutia lalina bawh hla chham tura a han tih chuan, Aizika chuan hnial mi niin a hre lo va,

"Kan ruang e, a run tun e,
Ka do rimnampa ka tlun e,
Lung khin e, tap vial ing e,
Mual an e, tinkim rak thiat u law,"

tiin bawh hla chu a han chham vang vang a. Silai a han hmet puak khâwk ta rum rum mai a. Chu veleh lal leh tlangvâlrualte chuan an silai kawl ho, a hlo an lo thun lâwk sa diam tawh chu an inlâwn chhâwk ta awlh awlh hlawm a. A ṭhen an haw haw hluah hluah bawk a.

Chutianga kawtchhuaha thâwm an chhuah khâwk rum rum lai chuan, khaw chhung lam aṭangin nula leh naupangrual, nunau leh uicho ilo thleng mai chuan anmahni hmuak tûrin an rawn thawk hûl hûl mai hlawm a. Chu hunah kher chuan an chhiat tawh chuan lansarh a hlawh lo ngei mai; ṭhenkhat mittui erawh luang ngiai mah se.

Chutia kawtchhuaha an thâwm an han hân hnu, nula ten tlangvâlte chhâwlhâl zu tuitling te an tulh awk awk zawh hnu chuan, dârkhuang leh chhepchher ri thei ang zawng zawng tiriin, haw haw ri hulh hulh thâwm châwl thei tawh lo tûr hiala mawi nen chuan, khaw chhûng lamah an inzui haw ta hluah hluah hlawm a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 18th, 2018, 8:07 pm

PASALṬHA AIZIKA

- Nunmawia Fanai

BUNG NGANA

Chutia mipui ten thâwm ropui leh nasa tak mai chhuah hulh hulh chunga khaw chhûng an han luh tâk hûl hûlah chuan, khaw chhûnga lo awm tar chakvaklo ho pawhin awm mai mai an thei bik lo a ni chêk ang, tiang hawlin an khaw mipui hnehna lâwm kawng zawh chu kawt kai aṭang chuan an lo thlir doh doh hlawm a.

Chutih lai chuan, pûma titi khawchâng sawia lêng zinga pa upa lam tawh tak pakhat, pûm kawta tiang hawla ding sawi lai mai 'Lûra' chuan, "Hleia pa, en teh mah, saw ti laia Pâwi paliana rawn kaitu tlangvâl saw tu nge ni ngai? A hmêl lah ka kumkhaw hmuh ngai loh zu ni reuh a!" tiin, Aizika'n Lianchuhmânga kaia a chhawm dat dat lai chu kâwk vâ chungin a bula a ṭhianpa chu a han bekbawr sar sar a.

Hleia pa chuan, "E khai! Nûbawihi pa, saw lah, a pian te chu sapui hû ang rum ruma nâ neih phû khawpa nalh chungchuang a niin, a hmêl te chu a va ṭha tluak phuk phuk roh ve le! Kei tak pawh hian a chin ka hre hauh lo mai. Amaherawhchu, kan lalin, kan Thansiami chhan tûra a rin kai nihna hauh pha nghâla an sawi, khaw chhak lam aṭanga kan lal khua leh tui ni tûra rawn bêl thar hlim, pasalṭha, tlâng thang kim hiala an sawi 'Aizika' an tih hi a va ni mai âwm êm? Ani lo chutianga han puh ngawt tûr dang ka haihchham riau mai ka ti," tiin a chhâng a.

Lûra chuan, "A ni dâwn teh tak e. Chumi an sawi chu kei pawhin ka lo hre tawh reng tak alawm maw a; a eng a, tar tih takah, rin dân neih thiam lo khawpa ka han inphat tâk mai ni chu! Kan kum te pawh hian a zir ta viau pawh a ni ang e," tia rîat niah niah chungin Aizika chu a thlir ngawt ngawt a.

Chutah an zinga pakhat, an ni ṭhian hovin 'Thâirâwna' tia a hming lem an sak, a hming tak erawh 'Râldanga' chuan, Aizika'n Pâwi sal a kai lai chu thlîr ve vung vung pahin, "Kan mi sawi laia saw khaw chhak lam pasalṭha hming thang tak, tlâng tin deuh thâw-a thang chhuak mêk Aizika kha a nih ngat chuan, kan khua leh tui chuan a muan zual leh phah ngawt dâwn a ni phawt mai. An sawi dân takah phei chuan, 'A duh thâla râl beihna hmuna a han chêt tak tak tawh hi chuan, tlangvâl sâwmrual a sah thlûk chhûng hi mit khap kâr ang lek chauh asin ni,' te an ti hial mai! A lo ni tak tak a nih ngat chuan, kan rawlrâla che thiam neih Sângrova nên pawh an inkawp fuh viau ta ve ang," a lo ti ve chuar chuar bawk a.

Chu thu Râldanga'n a han sêp zo hlawt tih chuan Hleia pa chuan, "Ni e, Thairâwn, kha thu kha chu a rawn than thui tawh avânga lo hleihluak deuh pawh lo ni ta sela, hetiang taka a thang ropui thei hi chuan Aizika chu pa namai a ni lo tih a tichiang reng mai. Khual thu pawh hi thang hleihluak khawpa thanpuitu ni tûr chuan, a thanpuituah khân eng emaw tak thu dik a awm a ngai ve hrim hrim bawk a nia. Chuti ngawtin, mi'n than ṭhat mai a awlsam ngawt lo viau asin. Han en mai pawh hian, a ke chheh zâng haih mai te, a lu a tun dân dik vawh mai te leh râla khat aṭang pawh a lang chungnung larh mai thei te sâwn, kan mi sawi laia hi Aizikaah bâk a hmet rem theiin ka hre lo; ti teh u, lal mual lamah i han chian ang u hmiang?" a lo tih zawm ve nghâl thuai a. Tichuan, pûma lêng pâ ho chuan, mipui ri hulh hulh hnungah chuan lal mual lam an pan ve ta thliai thliai hlawm a.

Khaw mipui ten thâwm nasa tak chhuah hulh hulh chunga lal mual an thlen chuan, khua chuan thim a hnaih viai tawh a. Chutih lai chuan Vâlnova ruang zâwntu tlangvâl mi sâwm bâwr leh, chhûngkhat laina hnai tlêma zâwngte erawh chuan Vâlnova te in lamah ruang chu nghat tûrin an inzui ve mêk bawk a.

Tichuan, lal in lamah thung chuan, lal mual an han thlen chuan Aizika chuan a sal man Pâwi pasalṭha Lianchuhmânga chu, mipui zingah chuan, dim dâwi tum em em lo hian lal in kawta hrânghrual ngul inphun voh mai lam pan chuan a nawr phei dâwr dâwr a. Chutia Aizika'n Lianchuhmânga a han chaih lai vêl chu mipui chuan hmuhnawm ti tak leh, "Pâwi chal bâwk, hriam hriaa chuan a hriam chu khawi lamah nge a lên dâwn?" tia au el chungin an lo haw haw khum hluah hluah a. Chumi lai chuan ṭhenkhat chuan, "Hei, kan pêm pasalṭha chhuanvâwr chuan eng nge tih a tum chu ni dâwn maw?" tiin Aizika chetla chu hmuhnawm ti takin an lo thlir rawn ṭhup bawk a. Chu chu lal pawhin Aizika a hmuh dân chu niin, a tih tûr chu hriatpui kher mah suh se, a thil tih tûrah chuan a chiang a ni tih a hriatna chuan, eng nge a tih ang a, engtin nge a sal lakah chuan a tih dâwn? Tih lamah chuan inrawlh buai tum lovin, a chetla lai chu a thlir ve ngawt bawk a.

Chutah Aizika chuan, eng nge a tih zêl tûr lo ngaichânga lo thlir rawn ṭhaptute hmuh lai chuan, "He lai hmun hi i chungchânga thuthlûkna lalin a siam hmâ zawnga i zanin tlai hmun luah tûr a ni e. Kei chuan in leh lo han lâk luhna tûr che ka nei rih lo va, i chungthu-ah chuan ka thlen chin a tâwp rih e," tih sap leh, hrânghrual ngula thlun chu a han rual a. Chu veleh chuan mipui zing aṭang chuan, "Pâwi a thlung e, Pâwi a thlung e," ti hian mipui chuan an râwl an rawn chhuah dual dual mai a. Chutah a hma aia nasa leh zualin, lal mual nghawr dur dur thei khawpa thâwm lianin an haw haw leh ta hluah hluah a.

An thâwm a hân chho ṭan ta tih chuan lal chu lal in kawta leikapui dawhah chuan lâwnin, mipui te chu a kut chuan a han zâp dâi a. A aw a'n then kharh khar kharh hnu chuan, "Aw le, hei, khua leh tui duh takte u, hetiang taka hun ropui hi hnehna kan channa kawng thu bikah chuan kan chang khât ta viau mai. Chutih rual chuan, leido nei lova thlamuang taka awma kan inngaih lai a, hetianga rawlrâla rûn kan han ni erawh hi chu a pawi tak zet a ni. Mahse, chumi a nih lai kâra hnehna hlado nêna khua kan chuan thei thung erawhin, kan chungah khuanu lung a dam a ni tih min hriattir hlauh thung si.

Amaherawhchu, chumi a nih mêk laiin, ruang chhuakin, kan tlangvâl huaisen Vâlnova kan thlah tel a ṭul erawh hi chuan lung no a chhun thîp em em thung si a..." a tih mêk lai chuan, "Khawii nge, kan mi sual Pâwi chal bâwka chu ka kut thak hi ka'n hnawih ve rêng rêng teh ang," tiin mipui lam aṭang chuan hmeichhe thinrim au râwl thâwm a rawn chhuak a. Chu nu chuan Lianchuhmânga lam chu a pan phei nal nal a. A bul a thlen chuan, "Nang hi maw, ka Siampuii thlabâra lo siamtu chu," tih leh a hmaia chil chhâk tlâwrh leh ben zui nghâl chu a han rual sawk mai a. Lianchuhmânga chuan chutia hmeichhiain a han tawk thîp ṭhak mai chu tawrh har a ti ngang ni tûr a ni, a hmêlmate hmachhawn rawn luai chhapah chuan, a tum lâwk pawh ni lo hian, "Nang hmeichhe bawlhlawh," tiin a ṭe chhuak ṭhawt a. Chutia a han ṭe ṭhatah chuan tlangvâl ho thinrim inup chu a rawn alh ta phut a, "Nang, Pâwi sâwn chhepa!" tih leh a awmna lama chim phei chu an rual ta nghâl rum rum hlawm a. An han piai rawn ta sup sup mai a le! Lianchuhmânga chu a rik hian a ri awk awk mai a nih kha.

Chutia tlangvâlrualin an chil rawn luai luai lai chuan lal chuan, "E khai! Ka tlangvâlte u, a tâwk viau tawh ê. Mi sal in chil hlumsak mai dâwn e. Kan thin i dam tlâng tawh ang u khai," tiin a han au lauh lauh a. Chutia lalin aw a han chhuah tâkah chuan tlângvâlte chuan zah an ngai tlâng a, Lianchuhmânga chu an kiansan ta sap sap hlawm a.

Boruak so hulh a han reh hnu chuan lal chuan, "Kan boruak tawn chu a ropui hulh hulh ngei mai! Hrâng lâm han chhunzawm a, tlaivâr ṭhak maia han inawih ropui hulh hulh pawh a châkawm nangiang. Amaherawhchu, a leh lamah kan chhiat tawhin lu men min phût khaw tlâng lo thei si lo va. Chu vangin, kan tlangvâlte khan kan râl lute hi sahlâmah va khai ta thuai ula, râl lu lâm lam chu Vâlnova kan thlah zawh lamah ropui takin kan tharthawh ṭha dâwn nia," a han ti charh charh a.

Chutia lalin ro a han neih tâkah chuan tlangvâlte chuan, an lal leh Aizika râl thahte lû, lu sarih zet mai chu sahlâma khai tûrin dai lam an panpui ta diat diat hlawm a. Chutah mipui lam pawhin in lam panin lal mual chu an ṭinsan sang sang hlawm bawk a.

Zanriah te an han ei kham chuan lal chuan, tap bula vaibêl pak hlat hlat pah chuan, "Zika, he khua hi kan chuan tirh khan a hming han phuah mai tûr kan vân tlâng ngang mai a. Chuti a nih phengah chuan, 'Hming nei lova khaw neih mâwl ngawt zawng a zah lam lam a zahthlâkin, ṭhenawm khua ten min nuih mai dâwn vei râwl nen,' tiin ka phawk zual han chhuak khan 'Leilên' tiin a hming ka'n koh rawk pek a. Chu chu hei tûn thlengin a la pu hawh ta ngawr ngawr mai chu a nia. Mahse, khâ â, zanin tlaia Lianchuhmânga hrânghrual ngula i han thlung kha, 'Pâwi a thlung e,' ti khân mipui kha an au ta dual dual mai si a. Kha khân kan khaw hming hi châwi ta hlauh sela a va han ṭha dâwn rua em!" a ti chuar chuar a.

Aizika chuan, ngawi renga an titi lo ngaithlatu, lal khâwnbâwl leh lalnu te, leh a chhungte hmai zah tih hriat tak hian, ban chatin, "Lalpa, chu zawng ngaih dân siam ka thiam ve lohna lam tak a ni tlat mai; kei aia râwn tlâk zâwk kan khâwnbâwlte hi an ngaih dân han zâwt ta zâwk chê mâw," tiin a chhâng a.

Lal chuan, "A nih chutia ka rawtnaa min telpui i duh tlat loh chuan, thupêk ka pêk che erawh hi chu i zawm ngei a ngai dâwn a ni," a han ti leh chuar a.

Aizika chuan, "E khai! Chu zawng, ka nunna hi thâp ngai dâwn hial mah se, mi vâkvâi min tuam hlâwm avang ngawt pawh hian ka zâwm ngei ang. Han sawi ta che?" tiin a chhâng leh zat a.

Chutah lal chuan, "Kan lo râl hriat tawh, khaw chhak pasalṭha Aizika kha i ni tih hi rinhlelh rual lohvin ka mit ngeiin a hmu a. Chumi rual chuan, khual thu thang a punlun viau ṭhin lai kârah hian, nang erawh i than dân khûm zakin a takah i lang zâwk tlat mai hi a ni i ropui bik em emna chu," a han ti a, vaibêl a han pak leh talh talh phawt a. Chumi hnu chuan, "Tûnah chuan, i lal ka nih anga i laka thu ka pêk tûr che chu, lal ka nih anga min en lal bâwr lovin, min koh dânah pawh, ka hminga min ko lawl hreh a nih pawhin, 'Tinkuala pa' tiin min ko tawh la tih hi a ni. A chhan chu, pasalṭhatna kawnga ka chunga lêng sâng em em mai leh, ka ṭhian chhar thar hi thlah leh mai ka tum loh avângin min koh dânah lungawi chin ka insiam a ngai tlat a ni," a han tih chuan Aizika chuan mak ti takin lal chu a en deuh hâ a. Chu chu lal chuan a han hmuh chuan, "I thei ang em?" tiin a han chhu zui leh chat a. Aizika chuan, "Ka lo tiam ruang tawh mai si a, leh leh theih ni ta hek lo chu; i thupêk ang chuan ni ang hmiang," tiin khi suk hian a chhâng a. Chuta ṭang chuan Aizika leh Lal Thandâwla chuan, unau piang hmun ai pawha nghet zâwk maha an inunauna bul chu an ṭan chho dûn ta a ni.

Chutianga an titi dun zawh hnu chuan Aizika chuan, "Zawlbûk lam panin ka'n chhuak dâwn ang e. Ṭhian thar turte hmêlin min lo hmuak ve mial mahna le," tiin lal in chu chhuahsan a rêl ta a.

Aizika a chhuah hnu chuan lal chuan a khâwnbâwlte hnênah chuan, "Nichina Zika bula ka sawi, kan khaw hming thlâk chungchângah khân ngaihdân nei in awm em?" a han tih chuan, Aizika pa Aikhûma chuan lal leh a khâwnbâwlte rorêlna chu hlatsan tumin a ṭhut hmun ata chu a han ding uaih a. Chu chu lal chuan a han hmuh chuan, "Aw khai! Pa Khûma ṭhum ṭhum chu, sapui ṭi ṭhâwn ang ṭhum ṭhum a, khatia i mawng i kân uaih mai? Ka unaupa thar pa chu ka pa a ni alawm. Hetiang taka fapa ropui hringtu chu pa ropui tak i ni tih ka hmaih phal lul hlei nêm; ka khâwnbâwlte zingah hian min pui turin min telpui ve nghâl la ka duh a ni," tiin a khâwnbâwl zingah chuan a telh ve zawm nghal a. Chuti na nâ na chu, Aiṭhuama chuan a ṭhut hmun chu an zingah chuan a rem zui ve ta nghal a.

Tichuan, khaw hming thlâk chungchâng an han rêl nak nak hnu chuan, "Kan pian tirh ata tawh, kan tun hun thleng mai pawha kan khuain a la tawn ngai loh leh a tawn leh zen zen tawh loh tûr, kan khuaah, kan lal in kawt ngeiah, kan pasalṭha tlâng thangin Pâwi râl a thlung rân mai chu a ni reng mai si a. Chu vangin he thil ropui tak leh chungchuang tak hian hming chawi a phu êm mai," tiin, a hmaa 'Leilên' khua ni ṭhin chu 'Pâwithlun' tiin a hming an thlâk ta a ni. (Chumi a nih avang chuan, hemi hnu lamah hi chuan 'Leilên' khua ti tawh lovin, Thandâwla khaw hming kan sawina apiangah chuan, 'Pâwithlun' tiin kan sawi zêl tawh ang. - N)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 19th, 2018, 11:22 pm

PASALṬHA AIZIKA

- Nunmawia Fanai

BUNG RUKNA

Hun te a liam a. Vâlnova lu an sûn hun leh râl lu lâm hunpui an han zawh tikah chuan, Pâwithlun khua pawh chu boruak ri hulh hulh chuan a kiansan tawhin, vângpui ni nêm diai hnuaiah chuan mite chu thlamuang takin an lêng tlâng leh dial dial tawh hlawm a. Chutih hunah chuan Aizika pawh chuan mi hriat leh zah a kai sâwt viau tawh bawk a. Chutih rual erawh chuan, mi tin thinlung hmun khata a luan zâ theih lohna piallei zauvah ta na nâ na chuan, Aizika chuan a rûka ertu, a hmingṭhatna avanga thîkna thinlung pu-a taitu chu tlangvâl zingah chuan a neih nawk laiin, amah ngaina leh duhsaktu pawh an kat nawk bawk a. Mahse, chumi a nih avang chuan Aizika chuan tu mah chu an rilru put dân hmang avang ringawta hleih chu nei bik lovin, "Kan hring nun zia nih phung neitu, thinlung chhungrila ze hnih inep tlatte hi chuan tâwpin tâi a neih ngai dâwn loh avangin, enkim mai, min eptu apiangte chu min ep dân azira a hmachhawn dân lama din hmun lo sawh ngheh mai hi a finthlâk zâwk âwm e," tih chu a ngaih dân a ni hlauh thung.

Tûk khat chu, tûkṭhuan kila an bial laih lai chuan lal chuan, "Pa Ṭhuam, hei lah, kan boruak tawnin hun min eisak tâk duai avangin in chhungkaw chênna tûr in han sak mai kan hman ta lo a ni a. Mahse, tunah chuan a châk zawng zawng pawh ngah a ni ta bawk nen, ka in bul muala i duh lai ber hmun hi han thlang ta che? Tichuan, naktuk lam aṭangin kan rel nghâl chûk chûk anga a ni mai alawm," a han ti chuar chuar a.

Aiṭhuama chuan, "Chutianga nang berina duh thlang tûra min han tur ta chu, han thlan loh ngamna chi ni hek lo le. Zika hian han thlang hlauh zâwk teh se; ani, neitu chan chang hmasa zâwkah," tih pahin Aizika lam chu a han hawi a. Chutah Aizika chuan, "Tinkuala pa hian rem a tih chuan, ka duh lai chu lal in bul lai lum lai hi ni lovin, kei zawngin dai dova awm ka duh zawk e," a ti fiah fak a.

Chutia Aizika'n dai dova awm a han thlang daih mai chu lal chuan mak a tiin, a bul hnaia a kawm tuk tin leh zan tin phâka awm duh lo vah ngaiin a thin a rim lek lek hial a. Mahse, a thinrimnain a hneh hma chuan a han inngaihtuah chiang a. Ngun taka Aizika in hmun thlan duh dân rilru a han ngaihruat chuan, "Lal mual lai luma awm châk tak tak ka pasalṭhate zingah pawh hian an kat nuk lai kârah, ani chuan hmun râlmuang lo thei hmasa ber lai, a dai do lai a thlang chawt mai a nia!" tiin a duhthlanna chu a zahsak leh hnuhnawh em em thung a. Tichuan, "Aw le, mipain a duh tak a, a ngaihtuahna fim a hman hnua a duh thlan chu zahsak lo thei zia ka ni hlei nêm mâw. Hei lah, kan âwllên lai nên a inhamtawng fuh leh zêl nên, Zika duhna lai hmun ngeiah chuan naktuk aṭangin in chênna tûr in chu kan rêl chawpchilh nghâl chûk chûk ang chu," a ti dam thluam a.

Tûkṭhuan te an han ei kham a. Tûkṭhuan kuang âwma an ṭhut muan dar dar lai chuan, khaw awm dân chuan a lung a tih lên deuh riau avangin Aizika chuan, "Tinkuala pa, naktuk lawkah kan in tûr kan han rel ṭan ve ruang mai dâwn chu a ni si a. Chumi a nih tâkah chuan, nula leh tlangvâlte tha bain bul kan ṭan a ni hawt mai dâwn nen, an kâ tihâng tûr therhlo ilo vaia ram vah mai te ka rilrûk rum rum asin vawiin chu?" tiin lal chu a han thâwi zauh va.

Lal chuan, "A ni dâwn tak maw? Chu'ng lam lam ka lo la ngaihtuah thleng pha ngût hlei nem. A âwmkhai viau tak ang chu, i han sawi tâkah chuan; han vâk chhuak ta poh che. Keini lam thung chuan, i pa leh upa dang ho nên bahzâr mawiin a thlum lai kan lo khâwn ang e," tiin a nui huah huah a. Chumi zawh chuan hriat chhuah nei ni âwm taka meng val deuh zauh pah hian, "Nghal mal huaisâr zet mai, sihpui ngawah khuan a awm a, tu'n an tihlum hlei thei hauh lo a nia. Tihhlum a hnehin, a bitumtu hliam loh a nei lo va, nun hial chân pawh kan pasalṭhate zingah an awm tawh a nia. I tawng fuh hlauh a nih chuan a lakah khan i fimkhur hle dâwn nia," a tih zawm leh zat a. Aizika chuan lal thu sawi chu ṭawngkaa chhang let lem lovin, a lu a bûk khum nghat a.

Ni pawh a tlâng sâng ṭan viau tawh, chawhma chanve thuak chu a kâng tawh tih chuan, Aizika chu ram vâk tur chuan inpu chhuak ta hnang hnang a.

Kawtchhuah a han chuan chhuah chuan, a la fan loh hmun, 'Chawngtinlêri meuh pawhin chawlh eih nei lovin a pêl phal hauh lo ang e' tih tûr khawpa ropuinain a bawh hmun, ngawpui, sa tin rêngin duh thâla an dam lai pâr an tlanna hmun chu a han thlir a. Mual indawh cham dûr mai te, sathârte leh saza ten âm taka tual chaina hmun khâm râng mawi tak inchhawrdawh ulh mai te, râl hla taka luipui luang kawi nguai mai te chuan a lung a dum zân mai a. Chutah, "Hei lo liama min tiphûr thei tûr leh lâwm tikim thei tûr thil siam dang a awm chuang dâwn em ni?" a han ti sap a. Tichuan, chu lam pan chuan hmanhmawh em em si lo hian a liam zui ta nghâl a.

Nakin deuhah chuan hmun eng emaw lai deuh, kawr ruam thûk lutuk lo, tuihnâ erawh awm chiah lo, a ngaw ṭhat avanga lei dûr duk mai hmun hi a thleng hlawl a. Chu lai hmun chian deuh tur chuan a mit lênin a han ding vang vang a. Chutah, chu hmun chu sa pawhin an duh hle a ni tih hriat deuh mai a, hnu kal lam leh haw lam insûl pêl zut mai a hmuh nâk chuan, "He lai hmunah zet zawng Chawngtinlêri pawhin a rante a châwm ṭha a ni phawt mai," a han ti sap a. Tichuan, chu'ng sa hnu zingah chuan chhui zui ngamawm deuh hlek tûra thar chu a han melh kual dan dan a.

Chutia sa hnu insûl pêl zut kârah chuan mak deuh maiin sanghal hnû, a hniak aṭang ringawt pawha sûm sarih hawlh ngei tûr tih hriat sâ chu a hmu tel tlat mai a. Chu mai ni lovin, chu sanghal hnû chu a thar berah a ṭang tlat mai lehnghal a. Chu nghal mal hnû chu uluk taka chian pah chuan, "Khai a! Nghal chang meuhin a chhûn mut ṭhulhsana a pan chu eng ang taka chaw pawimawh nge a nih ang aw? A enga pawh chu ni sela, keiin ani hi pawimawh bera neiha ka zui a ngai dâwn a nih hi. Hei ngei hi a nih hi, Tinkuala pain min hrilh kha; ka'n bitum ngat ang e," tiin a ngaituah roh roh a. Tichuan, chu sanghal hnû chuan a neitu awmna a hlat dâwn lo tih a hriat avangin, chhui binga nei tûrin a zui ṭan ta nghâl a.

Rei ve khat tak nghal mal hnu chu a zui hnuah, mau tak hmun, pui khup maia a chhui luhah chuan, khua a ro ṭan tawh bawk nen, hnu hlui leh thar hriat hran a har viau tawh lai a ruang a, a hnu chhui lai chuan hnu dang pawlhtu a neih tâk avang chuan a hloh titih tlat ta mai a. Uluk tak leh chîk zuala a han bih ngar ngar hnu pawh chuan, a hnu zui lai zâwk chu a chian thei ta mang hauh lo. Mahse, chutih rual chuan, chutiang thleng thleng zui tawh chuan, tho thla râng leh tlipin a bawh ngap ṭhat ṭhat tawh lai, a sa zui nena an inhnaih viau tawh a ni tih a lan reng laia han tlâwmsan ngawt mai chu tum lovin, a hnu chhui lai nia a rin zâwn zâwk chu thlang felin a chhui leh zêl a. Hnu erawh a dal tial tial thung a.

Chutia hnu mumal pawh hmuh tûr awm tawh lo va, tho leh tlip an vir deuh hat hat avanga beiseina nei chauhva a han chhui zêl chuan thui pawh a thlen hma, hmun zâwl leh mau a khât deuhna a han lût chiah tih chuan, a chhak lam awih tlân chung aṭang chuan inrin hman pawh a nih hma hian 'hawk' dawt pahin amah rawn bei tih hriat deuh mai hian nghal mal lian zet chu rawn phit thla puat a. Chutianga invên ngaihna pawh awm hman lova beih a nih tâkah chuan, Aizika tân chuan silai lai lek hman ni tawh hek lo, a silai chu sanghal chuan a rawn chil fuh lohna tura hlaah chuan a theh phei lawk a, a sir tawn tawna mau ding chu man thuaiin, sanghalin a rawn phin puat lak ata chu himna zawngin a lo zuan khum zawk a, sanghal chu a kap kârah chuan a tlân tlang zawk mai a. Chutah, Aizika chuan a mau vawn chu thlahin, chu sanghalin chêt a lâk leh dân tûr hriat tum chuan a inher thuai a. Chu sanghal pawh chu tlâwm a tum lo tih hriat deuh mai hian a inher zawk a, a ngai ang chiah chuan a hawk leh dawt a, a rawn dûk leh puat a, Aizika chu a rawn phîn phei leh zawk ta mai a. Chu chu Aizika chuan a ngai ang chuan, a bula mau chu vuanin a lo zuan khum leh zawk a, sanghal chu a kap kârah chuan a lîm tlang leh puat a. Chutah, chutiang chiah chuan inher lehin sanghal chuan a ngai ang chiah chuan a rawn bei leh a, chu pawh chu Aizika chuan a lo zuan khum leh ta tho a. Mahse, hemi ṭum, a vawi thumnaah hi chuan a zuan khum zo lo ṭhelh a, a mawngah a pir thuai thuak mai a. Chutia vawi thum a tum a ṭhelh tâkah chuan sanghal pawh chuan beih zawm mi niin a ngai lo pawh a ni maithei, a hnar tum dut dut chungin a kalsan ta a. Hemi ṭuma sanghal laka a tlâwm teuhzia hi Aizika hian, "Khami ṭum khan vawi khat chu min rawn phin leh ngat sela chuan, a ṭuan a ṭhain, a hawk dawt ruala rawn thleng phei nghâl zêl a ni nên khan, ka ṭuanin phâk lovin ka lo indawh remchâng tawh viau ngei ang a, mi thai thlêr veng vung ngei ang," tiin a sawi chhuak leh zauh ṭhin. Ni e, hnehtuin tlâwmna a kal kân theihna atana a kawng a zawh mêk hi, vânneihna nena inkawp rem tak a lo nih vâng pawh a ni mahna le!

Tichuan le, chutia sanghalin Aizika chu a duh anga a nghaisak theih loh avanga a laka a beidawn hnu chuan, a hma lama khan rem lai chu zawhin, hmâr lam pual lâwiah chuan lâwn chho lehin chak deuh mai hian a liamsan leh ta a. Chu veleh Aizika chuan, "Inhmachhawn dân mumal lo tak mai avanga tlâwm ṭhelha min han siam mai reng reng!" tiin a silai chu a chuh leh rawk rawk a, a umzui ve leh nghal thuai a.

Nakinah chuan, ni pawh a chawhnu ruih tawhin khua pawh a tlai lam lek lek tawh tih chuan, Aizika chuan a sa chhui lai chu hmun rai nuam deuh maiah hian a va ûm phâk leh ta a. Chutah chuan sanghal pawh chu nghal mal fing tak a nih avangin, a hnâr a han tum dat dat dânah chuan a hmelhriat vuai tawh pasalṭha chuan a rawn hnaih leh a ni tih a hria tih chu a hriat theih mai a. Chutah Aizika chuan, chu nghal mal chuan a rim a hria a ni tih a hai loh avang chuan chêt a thawh hmaa chêt lâk chu tumin, hnâr tum vut vuta chu nghal mal ding luah mai chu kah nuam tâwka hnai a nih hma chu, thâwm dim tak hian a veh hnaih ṭhem ṭhem a.

Chutia a han hnaih hret hretah chuan chu nghal mal chu kah nuam tâwka hnaiah chuan a indawh vûng tawh a. Chutah, Aizika chuan ṭhelh tum miah lo hian a zakdawha vâng tan zawnga silaimu hnawh luh chu tumin a han tin vang vang a. A duh ang tâwka a tin hnu, a silai cheng a hmet per dâwn chiah tih chuan a zakah hian rawn dêk zawktu awmin, a zak chu a rawn za zawr a, chumi za ti phu uih leh a silai puak chu a inrual nghal dur mai a. Chu chu nghal mal ding lurh lurh mai nâ tia ṭe rawng rawng ri chuan a zawm nghâl zat bawk a. Chutia nghal mal na tuar ṭe rawng rawng karah leh silai khu chûk maiin vân lam a pan ding chhoh vut vut kârah chuan, a sa kah lam pawh thlêk zui rih lovin Aizika chuan a zaka rawn dêktu chu eng nge tih hriat tumin a bul vêl chu a han thlêk kual vat vat a. Mahse, eng mah hmuh a neih loh avang chuan amah tihbuai tumtu chu hriat zui tum lovin, a silai mu chu a han thun leh zung zung a. Tichuan, a nghal mal kah chu a fuh tih a thâwma a chian avang chuan, a tlûk leh tlûk loh chian tûrin a lo indawhna lam chu a pan phei nghâl thuai a.

A hmun a va thlen chuan a sa kah chu a tum anga kâp thei ta lo chuan, a eng laiah nge a fuh tih pawh hre lo mah se, a ṭhelh lohzia tichiang turin nghal mal thi chu leiah chuan a lo baw sen nguai mai a. Chu veleh, "Min dêktu awm lo sela chuan, hmun dang pan tawh lovin i thi hian a bual kawi zuih tawh tur che a nia le," a ti sap a. Tichuan, chu a sa kah thi far chu zuiin, a hmaa a tlâwm hma chu bawh zui zêl tur chuan a liam ve zawm nghal a.

Chutia chu nghal mal hnu a chhui chuan kawrpui lam a pan zêl a. Chumi avang chuan lui chu a kân hma ngeia ûm phâk ngei ngêi chu tumin, kawr a kai hman hlauha hloh palh hlau tak chungin a tha tâwp chuan chak theih tâwpin a ûm zui ta zêl a.

Rei pawh a ûm hma chuan a sa hliam chhui chuan thi a thloh ta hauh lo mai chu niin. Chu chuan hnu chhui chu a ti harsa leh ṭan ta! Bakah, chu sa chuan a kah hmaa a neih ang hnu kha chhuah tawh lovin, mak tak maiin a hniak âwm hmuh tûr a awm mang lo ṭan ta tlat a. Chutiang khawpa sanghal lianina hnu a nei mang tlat lo mai te chuan a hnu chhui chu a tihkhaihlak hlê kârah mak tihna lian tak mai a nei bawk a.

Chutianga bangbo taka a chhui thlâk zêlah chuan, chu sanghalin a pan lui khawkrawk tak mai kam chu a thleng thla ta hlawl a. Chutah chuan hnu eng mah han ngaihruat tûr leh lui kâna a kaina âwm hnuhma thar eng mah hmuh tûr a awm lo leh zêl nen. Beidawng takin lui kamah chuan a ding ngur ringawt mai a.

Chutia, beidawng taka a din lai chuan, lui luang ri har har karah chuan a hnung lama sanghal hawk dawt ri chu a hre leh ta thut a. Chu veleh hnung lam a han hawi chu, a sanghal kah hliam ngei mai khan zahngaihna nei lo tih hriat deuh mai hian rawn pir thlêr vek tumin a rawn bei phei leh ta! Chutah zet chuan Aizika tân chuan silaia kah hman a ni tawh si lo, a hma lam hla deuh taka thing tlu luang lianpui inkham zuah mai tih loh chu sa himna dang awm tawh hek lo; chu lam pan chuan a theih anga chakin a tlân phei ta nghal ruak ruak a.

Chutia thing luang pana a tlân chuan thing luang bul chu a thleng phei thuai a. Chutah thing luanga tlân lâwn kai zawk tuma thing luang chu a han rap chiah tih chuan, chu nghal mal hliam thinrim a hnunga chak taka dâltu pawh nei lova rawn lim phei pur pur chuan, a sahmim phelêng chu a ngho hriam zet maia rawn la hmanin, thinga a lâwn tûr chu a vawrh lêt ta daih mai a.

Chutia a hnung lama sanghalin a han vawrh chu, a vanneiha siamin sanghal chungah tak mai chuan rem zet mai hian a ṭhu thla chat mai a. Chu chu thin thlâk tumin sanghal chuan Aizika chu a vawrh nghek nghek a. Mahse, Aizika chuan a ngaihtuahna fim tak hmang chung chuan, tlâk mawl tawp chu tum lovin, a silai chu hnung lamah a paih dawrh a, a kut khing hnih chuan a bengah ṭe rawng rawng khawpa nâa ṭhamin a inchelh ve ṭang ṭang a. Mahse, chutianga awm reng chu a thei dawn lo tih a inhriat avang chuan, sanghalin a thin nat lai tak chu chuhin a hnung lamah chuan a invawrh phei dâwrh a, a tlâk rual chuan a silai chu a chuh nghal thuai a, rang takin a cheng chu a kau nghal rap bawk a. Chu veleh sanghal hliam pawh chuan, a thinrimna chu tlâk fel tumin a inher leh vut a, a hma pên ngâ âwm leka hnaia silaia kau saa lo ding reng tawh Aizika chu a phin phei leh ta nghal a. Mahse, chutah zet chuan Aizika kawngbâwr aṭanga silai puak dur chuan a hmaa lo vêngtu lakah pawh khan chhan leh vên him hlawh zo tawh lovin, chungnung tûr zâwka voh sa Aizika hmaah chuan sakawng pawh tluk tawh lovin a tlûktir ta ruah mai a. Chutah Aizika chuan, "I pasalṭhatna hian famkhuaah pawh ropui a hlawhtir ngei ang che," a ti sap a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)