HNAM SIPAI CHAMBANGTE BY Zochhumpuii Pa 1 - 11

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: HNAM SIPAI CHAMBANGTE BY Zochhumpuii Pa 1 - 10

Unread post by Ngaia » January 12th, 2019, 5:40 pm

BUNG 10

Rovan love letter a hmu
Sophie USA-a a hawn hnu chuan Rova chuan a nu leh pa hnênah, “Ka nu, ka pa, eng mah ka râwn lo che u a. Sophie nên khân inneih kan tum a. Thla-leh hian an lo chho leh dawn a. Kan in hi room hnih siam belh ka tum a, in hre thiam ang chu ka ti asin. Sophie nên kan inneih chuan USA-ah kan awm ang. A vang chu Sophie hi a nu leh pain an a neih chhun a ni a. Texas-ah Ranch lian zet mai an nei a. Bawng (long horn) pawh 3000 chuang an nei a. Chûngte chu Sophie kut vek a ni a. Ka puih an ngai dawn a ni. Sophie pawhin, ‘I nu leh pa, i unaute chu kan pui reng dawn nia,’ a ti a, a inhuam khawp mai. Ka nu, ka pa, Sophie hi kan underground laia kan hriat daih tawh a ni a. Nula fel tak a ni,” a han ti a.
Rova nu leh pa pawh chuan Rova rawtna chu an remtih zâwng tak a lo ni a. “E! Sophie chu fanu mal a nih chuan i puihna a mamawh ang. Ni e, USA-ah chuan in awm dâwn nia. Keini chu ngaihtuahawm kan ni lo vang, hei i naute pahnihin sawrkar hna an thawk a, Râwntea pawh BA te han pass se, hna te pawh a la hmu ve mai ang chu,” an ti a.
Rova chuan an in chu room 2 siam belh tûrin hma a han la a. Thingzai leh thingphel a ṭûl ṭûl a han lei khawm a. Bangladesh, Sazek tlanga a awmpui ṭhin ho, a nauten an lo hria a, an rawn pui a. Room pahnih, mikhual thlenna tûr, bath room awm nghâl thlap chu an siam zo ta a. Rova hi a nauteho, Sazek tlang dunga, a awmpui thinte, sipaiteho hian an ngai ṭhin hle a. An ngaihah chuan Brigadier ropui leh huaisen tak a ni reng tlat a ni.
Ni khat chu Sophie hnên aṭangin lehkha a lo thleng a.
“Mr. Rova, duh tak,
Tûn thla tawp hian ka pa nau fate pahnih Ronie leh Jack-te nên kan lo chho dawn a. Ka nu leh pa pawhin hlim taka nang nên kan inneih hi an phal a. He lamah i lo awm thei dâwn tih an hriat phei chuan an lâwm teh asin. Mikhual room tûr pawh i peih tawh ang ti raw? Kan rawn thleng phei rup mai dawn a nia. Kan lo thlen hun bawr vêl tûr atân, kan inneih ni chu lo ruat la. Pastor pawh lo be fel mai rawh.
Ka ngai lutuk che a, hmuh hlân che ka nghâkhlel hle a ni.
Love
Sophie
Rovan Sophie lehkha an chhiar chuan a hlim hle a. A nî là làin Pastor pawh a han be fel nghâl a. Biak in a han inneih rem lohna chin a awm a. Sophie hi hnam dang a lo ni bawk nên.
Ni khat chu Rova chuan an in bul vel chu tifaiin, a han chei vêl a. A naute Sazek tlânga a sipaite an lo kal a, an rawn pui a. An in hnuai lam pawh fel fai takin an han chei a. Rova chuan a nauteho chu zanriah ei ve nghâl tûrin a sawm a. Arpa lian deuh an talh a. Hetia an buai laih laih lai hian, an kawtah chuan Taxi a rawn ding a. Sophie a rawn chhuak zah zah mai a. Rova a rawn hmuh chuan hlim êm êmin a rawn pan a, a rawn kuah a, “Mr. Rova, duh tak, ka ngai lutuk che,” tih leh rawn fawh a rual a. Hetih lai hian Taxi hnung aṭang chuan Sap tlangval lian thelh thawlh pahnih an lo chhuak a.
Sophie chuan nui var var chungin, “Rova duh tak, he mite hi Ronie leh Jack an nih hi. Ka pa nau fate an ni a, kan inneih min rawn lawmpui tûrin an lo kal a nih hi,” a ti a. Rova chuan a han chibai ve ve a. An thlenna tûr atâna an lo buatsaih, room-ah chuan a hruai ta hlawm a. Room pakhatah Sophie, a dangah Sap tlangval pahnih te an thleng a.
Rova chuan, “Sophie, hei ka naute chaw ei ah ka lo sawm a. In ei ve tûr han buatsaih ila,” a han ti chu, Sophie chuan “Mr. Rova, eng mah min ngaihtuah a ngai lo vang. Hei bawng sa \in leh ei tûr kan rawn intodelh vek a. Min ngaihtuah a ngai lo vang,” a ti a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 13th, 2019, 7:05 pm

BUNG 11

Inneihna ropui chu
Rova leh Sophie-te inneih ni chu a ropui muah muah hle a ni. Bawngpa chal 2 leh ar tam tawk leh sangha nên fatuho lah an vir vut vut mai a. Sazek tlang dunga a sipai hote 40 lai mai chu an Army dress- in an lo thawk a, fatuho puiin leh a ṭûl ṭûlah an vir zar zar mai a. Mipuiho lahin Mizo Army dress-a inthuam 40 zet mai an han vir vut vut mai chu hmuhnawm an tiin ropui an ti hle a ni.
Sophie pawh hlim tih hriat takin a nui var reng mai a. A naute Sap tlangval pahnih hnênah pawh hêng Mizo Army-ho hi Rova naute, Sazek tlanga camp neia khawsa ṭhin an ni tih te a hrilh a. India lakah zalênna sualin an rammu ṭhin a. Rova hi an Brigadier a ni tih te a hrilh a. India Army leh Bangladesh Army-te nên pawh an inkâp nasa ṭhin hle a. India Army leh Bangladesh Army-ho pawhin Mizo Army-ho hi huaisen an tih te a hrilh a.
Inneihna hunserh an han zawh chuan thusawi duh neite tân hun an hawng a. Mizo Army, Rova naute zinga mi Rina a lo ding a.
“Hei, vawiin a inneihna kan pu Brigadier Vanlalrova leh Miss Sophie te inneihna hi keini a naute ho hian kan lawmpui êm êm a ni. Kan pu Rova ho hian Bangladesh, Sazek tlângah camp neiin kum 10 chuang daih kan khawsa a. East Pakistan-ah buaina a han chhuak a. Mukti Bhahini hovin Independence an sual a. India Army-in an rawn pui a. Keini lah kan ṭhianten Arakan-ah min lo liamsan vek tawh si. Duty- a chhuakho kan intawk khawm zêl a. Mizo Army 90 zet chu kan inhmu khawm ta a.
Arakan lama kan ṭhiante fin tûrin lawng kan nei lo va. Lawng lo nei pawh ni ila, hmun tinah India Army leh Mukti sipai an awm si. Khawthlang Tuipui kâna Mizoram lûtin, Mizoram vang tanin Arakan chu kan thleng thei ang. Mahse khaw lian deuh apiangah India Army post a awmin, han hêl vêl a buaithlâk dawn si. Kan buai ta khawp mai a. Ei tûr kan nei bawk si lo.......” a han ngawi vang vang a.
Chutah Rina chuan a han sawi zawm leh a. “Kan hotupa hian ti hian thu a han sawi ta a.
‘Awle, ram tâna ka thawhpui, ka ṭhiante u,
Tûn thleng hian India sipai silai leh silai mu kan la rinpui a. Tûn aṭang chuan India Army ration kan rinpui tawh ang. Indopui II-na lai pawh khân Japan sipaiho chuan an hmelmate ration an rawn rinpui mai a. Ram zau tak an rawn lâk duai duai mai kha,’ a ti a.
“Tichuan India sipai chu Chhippui khaw mawng atangin kan han kâp ta a. India Army-ho chuan min rawn nawr nasa ta mai a. He lama kan chhaih buai lai hian he kan hotupa ho hian an camp chu an lo la a, buhfai, chi, chini, dût leh silai mu an lo la \euh a, an dekchi bel nên. Kan hlim dar dar hle a ni.
“He lai Sazek tlanga kan awm hi India Army 500 leh Mukti 300 in min rawn bei a. Tah pawh hian India Army 250 chuang leh Mukti sipai tam fe kan man a. An hotupa Col. Buta Singh pawh kan man tel a. Hmelma sipai hi thi leh hliam an tam hle a ni. Tin, hei lo pawh Chakma khaw bulah sipai 200 rual kan ûm pherh vek bawk a. Hei hi chu kan râlthuam neih ṭhat bâkah kan hotupa rálrel thiam vang niin ka hria. Dacca a han fall khân Pakistan sipaiin an râlthuam ṭha ṭha kha min pe a. MMG leh LMG tam tawk leh puakrang tê chi nên. Khâng kan silai ṭhat vang kha a niang India Army 200 rual zet pawh an tlân darh ni! Chu lovah chuan Sazek Camp-a kan awm hi Bangladesh Rifle Battalion hnihin min rawn bei a. Hetah hi chuan kan insasengsan ta a. Thi leh hliam an tam êm êm a. Keini lam pawh kan inhloh ve nual a ni.
“Hmun tinah min chãng a, Chhippui khuaah
Major-ho company khat an awm a. Rawng an lo bawl mup mup mai a. Kan hotupa hian, “E...ril a va ṭâm ve. An chaw khu eisak ang u aw?” an ti leh pek a. Engtin tak han ti ang maw kan tih lai chuan, a hma fe a Bangladesh Rifle uniform kan lo ṭhuitir kha hman ṭangkai a lo tum niin! Kan zingah Pâng tlangval Rodawnga, Bengali sikul-ah pawl 8 thleng lo kal tawh a awm a. Anmahni Bengali anga ṭawng thiam, pai miah lo a ni. Tichuan Rodawnga leh mi dang pahnih chu Bangladesh Rifle uniform hain a tir ta a. An Major pa hnênah Rodawnga chuan, ‘Sir, khi laiah khian Mizo Army 30 kan Captain hovin kan hual a. Kan hual tih pawh an la inhre lo. Captain Sapin Major Sap leh a hote zuk pun ula, kan Major ngeiin heng Mizo Army- ho hi man se ka duh a ni,’ tiin an han hrilh a. Major pa phûr lutuk chuan cook 5 leh sipai 2 duty a dah bâk chu tlâng lamah chuan a chhohpui vek a. Chu veleh cook-ho panga leh Bangladesh Rifle 2 chu kan man a, kan hnungkhirh a. An chaw chu kan ei ta a, an chawhmeh kel sa leh dal deuh tawkin kan ei a. Kan kel sa ei bang chu a bêl nên kan zawn chhuak bawk a. An ration buhfai leh sa \in te, silai mute kan lâk bâk chu kan hâlsak vek bawk a. A hlimawm dar dar viau \hin a ni. Kan hotupa bulah chuan kan hlimin, hlauh pawh hi kan nei vak lo. Awle, tawk mai se, ka lâwm e,” a han ti chu kut an beng nasa ngei mai.
Sophie chuan, “Mr. Rova, duh tak, eng nge i sipai khân a sawi a?” tiin a han zawt a.
Rova chuan, “Bangladesh ram Sazek tlanga an awm lai te leh India sipai te leh Bangladesh Rifle te nêna kan inkah lai chanchin te a sawi a nih kha,” a ti a. Sophie chu a nui var var a. Sophie Patea fapa pahnih lahin Video-in thla an lo la char char bawk a. Nula nalh tak takin thingpui leh chhang an rawn sem a. Sap tlangval pahnihte pawh hian Mizo Nula chu hmel ṭha an lo ti ve hle a ni.
Tlai lam chuan ruai an ṭheh mup mup mai a. Sophie-teho pawhin hmuhnawm an ti hle a ni. Mizo ruai\hehin, changel hnahah chaw an khawrh kual pup mai a, a laiah sa an chhûng vûm hnawk zêl a. Mi parukin hlui khat an kil zêl a. Sap tlangvalte chuan Video-in thla an lo la a, hmuhnawm an ti hle a ni.
A tûk hian Calcutta lamah Rova leh Sophie-teho chu thlawhna-in an thlawk thla nghâl dawn a. US Embassy-ah Rova visa lak a ngai dâwn a. Heta thawkho hi Sophie hmelhriatte an awm a. Visa pawh lâk har tûr ah an ngai lo va.
Rova chuan a naute, Mizo Army Sazek tlang camp-a a awmpuiteho chu an ina tûkṭhuan ei vek tûrin a sawm a. An in-hnuai an chei faiah a duh chu riah theih a ni a. Zingah fatu nghâl tûr a ni a ti a. An awmna hla deuhho chu an riak a. Zan lam chuan an zai ṭhap ṭhap a. Sazek tlang camp-a an hla duh êm êm ṭhin, “Tûnah dorâl lian chhûm ang zing mah se, A la kiang ang hnam tin rûmna hi” tih te leh “Kan zotlang ram nuam hi chhawrpial rûn i iang e” tihte an sa a. Sophie naute chuan an lo ngaithla a. “Hêng Mizo Army-ho zai hian lung an tihlèn hi maw le,” an ti ve a ni.
Zingah chuan Rova nauteho chuan rawng an han bawl sang sang a. Bawng sa leh ar sa ei bãng a tam si! Chaw an han chhûm a. Chawṭani siam pawl nên an buai mam mam a. Dar 9 vêl chuan chaw ei an peih ta a. Chaw te an han ei ho zawh chuan Rovateho thlawk tûr pawh an insiam ṭan ta a. Tuirial Air Field aṭangin Vayadoot-in an thlâwk thla dawn a ni. An taxi hman tûr pawh a rawn inpeih tawh a. Rovate kal tûr chuan Air bag an ak a, suit case an khai bawk a. Kawtah Mizo Army, Rova nauteho 40 chu an lo intlar ṭhap a. An Army dress-in an lo ding khawng ṭah mai a. Rina chu an au ṭhat a. Khawng êm êmin “Present arm” an lo pe a. Rovateho chu taxi-ah lûtin an in-bye bye liam ta a ni.
Chawhnu dar khat vêl chuan Tuirial Air Field aṭang chuan an thlawk chhuak ta a. Thlawhna chu Sesawng chungah kualin Aizawl chungah an lo lêt leh a. Rova chuan Aizawl chu a han thlir a, engtikah tak hmu leh ang i maw a ti rilru nauh nauh a. Tlawng lui kânin Tut lui an thlawh khûm leh a. Chutah Teirei lui, chutah Langkaih lui an thlawh kân leh a, Tripura chungah hun eng emawti an thlawh hnuin Bangladesh ram chungah an thlawk ta a.
Rova chuan a han thlir vang vang a, Sazek tlang dung, lang paw raih chu a va hmu a. A lung a lêng êm êm mai a. A nauteho nên kum 10 chuang lai an lo khawsak hona a ni a. Dam leh tlang khatah, thih leh ruam khatah ti-a, hmelma dorâl an beih ṭhin lai te, a ṭhianpa Lalthianga leh mi dang dang, Zorama lêt ve ta lote leh Pâng leh Bawm, a naute, Mizo Army rawn zawm tate kha, sawng Sazek tlang dung bul hnai khuaahte sawn an awm hlawm âwm si a, a ti-rilru a. Hetia lunglêng taka Rovan Sazek tlang dung, lang paw raih mai a thlir lai hian Sophie chuan, “Duh tak Rova, i va han lunglêng âwm vang vang ve! Ka hriat thiampui a che. Rova ka hmangaih che asin,” a rawn ti hnâp a.
Rova leh Sophie leh an unaute Ronie leh Jack-a ten Washington an thlen chuan, an mi rawih, an mi chhawrten an lo hmuak a. In an han thlen chuan Sophie nu leh pa leh Sophie pate unau leh an fate nên an lo awmin an lo hmuak niin. An lo thlen chuan Sophie chuan a nu leh pate chu a han kuah a. A hnungah Rova a lo ding a. Sophie nuin Rova a han hmuh chuan, “Sophie hei hi maw i pasal chu?” a ti a. Sophie chuan, “Rova duh tak, hei hi ka nu a nia, saw saw ka pa a ni,” a han ti a.
Sophie nu chuan Rova chu a rawn kuah a. Sap dân takin a biang leh biang a han chuktuah a. Sophie pa chuan a rawn chibai a. Mr. Rova Bangladesh-ah kan inhmuh tawh kha,” a rawn ti a, a rawn chibai a. Mi dang dangho pawhin an rawn chibai a. Rova chu an en duh hle mai a. Khawchhak lam hmel a pu vo mai si a. Chinese nge Korean an tisap sap a. Zanriah tûr an lo buatsaih nasa mai nên, an hlim hle a ni.
Zân lam chuan Sophie pa chuan, “Sophie, in pahnih khân ka room-ah lo kal teh u,” a ti a. Rova leh Sophie chu Sophie pa rooma an va kal chuan Sophie pa chuan, “Mr. Rova, Sophie, kan Ranch, Texas-a mi khu in zuk “kan” a ngai a ni. Ka farnu fa “Greg” khu a sual hle a ni âwm e. Kan foreman leh cowboys-ho zingah buaina a siam \hin a. Chu bâkah bawng hralh rûk a ching a. Kan foreman-in a han hauh lahin, “Ka pute Ranch a ni a, ka thu thu a ni mai,” tihte a ching a. Zuk enfiah a ngai a ni. Mr. Rova, nang chu Sophie min hrilh dânah Mizo Army Brigadier i ni a. Khûngho enkawl dân chu i thiam ang chu. Ka fanu Sophie i nei duh hi ka lâwm hle a ni. Naktuk lamah chuan Texas-a kan “Ranch” lamah zuk chhuk ula, zuk tifel teh u,” a han ti a.
Rova chuan, “Ka pu, i farnu a fa chu “Greg” maw a hming? Kum eng zâta upa nge a nih?” a han ti a. Sophie pa chuan, “Kum 28 vêl lai a ni tawh ang. A palian a, ft. 6 leh 4 inches vêl laia sang a ni a. Insual hrât leh sual angreng tak a ni a. In lo zuk enkawl a ngai a ni. Ka farnute khu an rethei a, an fapa a sual bawk si, ka khawngaih viau bawk si a. Mr. Rova, ka makpa i ni a, lo chingfel teh. Mizo army Brigadier i ni a. I kutah ka dah e,” a han ti a.
Rova chuan, “Ka pu, theih tâwp chu chhuah ka’n tum ang a, mahse i farnu fa a ni a, lo tina palh ta ila...?” a han ti a.
Sophie pa chuan, “I kutah ka dah a, i hote, Mizo Army 200 rual pawh i enkawl thei a, ka ring tawk a che. I kutah a awm,” a ti hmiah mai si! Rova chu a inngaihtuah buai viau a ni!
Texas an han thleng chu an in tûr chu a lo nuam reih rawih hle a. In chhãwng, a compound pawh hung raih mai a ni a. A piah lawk chu Cowboys-ho awmna a ni a. Rova leh Sophie lo thleng chu an lo lâwmin an lo chibai liam liam a. Anniho lo kal zinga, a hnung lama lo kal chu Sophie pa farnu fa “Greg” chu a ni a.
A rawn ngêng ngulh mai a. 6 Ft. 4 inches-a sang a ni a. Rova chu a rawn pan a, “Kan Sophie pasal maw i nih a, in chibai ila,” a rawn ti a. Rova chuan a kut chu na fein a han hmer a, a hmet hneh hle a niang, a ṭhen deuh sawk mai a ni. Greg chuan Rova chu a enzui vawng vawng a.
Ni khat chu Sophie-te Foreman chuan, “Mr. Rova, sakawrah i chuang ngai em?” tiin a han zawt a.
Rova chuan, “Chuang ngai nâng! Kan ramah sakawr a vâng êm alâwm,” a ti a. Chuti chu sakawr chuan zir ve ang che,” a ti a.
Chu chu Greg-a khân a lo hria a. An sakawr sawizawi theih loh kha a rawn kai phei a. “Hei Mr. Rova, tah hian chuan zir rawh! A zaidam a, a fel a nia,” a rawn ti a.
An foreman chuan, “Mr. Greg, a dang va la rawh,” a ti a.
Mahse, Greg chuan, “Hei hi a ṭha alâwm, tah hian chuan zir rawh se,” a ti tlat mai a.
An foreman pawh hian Sophie pa farnu fa Greg hi a hlau ve deuh bawk nên! Sophie chuan chu sakawr chu an en a. An sakawr kawlh, an thunun theih loh tih chu a hre nghâl mai a. Greg chu a han en a, rum tawkin a han melh a. Chutah an foreman hnênah chuan, “Chuantir rawh u,” a han ti a. A pasal Rova hi a hre chiang a. Mizo Army 200 rual pawh thunun thei, mi huaisen leh fing a ni tih a hria a. Sakawr la chuang ngai lo pawh ni se, a thunun theih a ring a, chu lovah a pasal Rova hi eng anga huaisen nge a chhin duh ve rêng rêng a.
Chu an sakawr kawlh, tu man an tihzal (tame) theih lohah chuan sakawr Jean chu an han phah a, Rova chu a han chuang a. A lakam barh a han dawm a. Sakawr chu a thin a rim nge, a khûr dur dur a. Vawi leh khatah a han zuang a, a chunga chuang sèp thlâk tumin a han bei a. Rova lah tlâk tum lovin a invuan nghet tlat a, sakawr lah a zuang nasain, a han sêp ṭhin, Rova chuan a rilruin, “Min en thap hlawm a, min en chhin a ni maw! Ka tla lo vang,” tiin a invuan nghetin, tlâk a tum lo rêng rêng a.
Rei fê sakawrin Rova thin thlâk a tum hnu chuan a han lîm a, chutah a han zuang leh ṭak ṭak a. Rova thinrim chuan a kutphah a han ti khawng a, sakawr luah chuan an sãt pawp mai a, sakawr chu a lu hai nge, a zawi deuh hnawk a, tlêm a han ding a, a han invawr leh chu Rova chuan a luah a han sãt (a kut phahin) leh a, sakawr chu a ding ta a. A lu a hai nge ni, a thle deuh bár bár a. Rei lo têah sakawr chu a han kheng a, ṭha takin a kal ta a. Chutah a han tlântir a, a han kuai her vêl a. Thu a âwih ta hle a. Ranch lamah a kalpui leh ta a. Chutia an sakawr kawlh, tu man an tukzal theih loh, Rovan a rawn tukzal mai chu mak an ti êm êm mai a. Rova chu an en vawng vawng hlawm a. Cowboys-ho pawh chuan mak an ti hle a.
Tûk khat chu cowboys-ho chuan pistol an inkahsiak a, saidawiûm an dah tlar chu an kâp vêl a. An kâp thiam hlawm hle a.
Ni khat chu an foreman chu Sophie hnênah a lo kal a, “Sophie, i nau Greg-a bawk kha a ni a. Nizânah bawng sawmnga a hralh ru leh a. Ka nauten an hmu a. An sawi buai ngam si lo. Engtin nge ni ang?” a rawn ti a.
Sophie chuan, “Ka lo ngaihtuah ang e, lo lungngai suh,” a ti a. Rova hnên lamah a kal a, “Duh tak Rova, nizân lam khân ka nau Greg chuan bawng sawmnga a hralh ru leh a nih chu! Engtin nge ni dawn le?” a ti a.
Rova chuan, “Sophie, i duhawm tawlh tawlh mai, I Ranch a ni a, kei min rawn hrilh ve zêl a. A tih dân chu i thu thu a ni mai alâwm. Mahse, i tih duh loh chuan i pa farnu-a fa Greg chu kan zilh dawn em ni ang?” a ti a.
Sophie chuan, “Keia tih theih pawh a ni lo. I kutah a awm e,” a han ti a.
Rova chu a nuisak a. “Sophie, a nih ṭha takin zilh ang aw,” a ti a.
Tlai lam chuan Greg-a chu a rawn rui deuh chhu a. An lo thlir deuh \hap a. An foreman chu a rawn pan a, “Eng vangin nge ka bawng hralh i lo report? Panga vel lek a nih kha! Sophie pa hi ka nu û a ni a. He Ranch hi ka ta ve tho asin,” a rawn ti khû khû mai a. Amah hi a palian si. Chutih lai chuan Sophie leh Rova chuan an lo hmu a. Sophie chuan, “Duh tak Rova, ṭha tê têin va hrilh teh, a ngeiawm êm mai,” a ti a.
Rova chu Greg lamah chuan a va kal a. “Greg, i tha maw? Nizana bawng i hralhna chu i ei zo tawh em?” a va ti a.
Greg chuan, “Nang Orient mai mai! Mongolian thlah nge i nih? Kan sawisa teh ang che,” tih leh rawn zuan a rual a, Rova chuan awlsam têin a lo beng hlek a, leiah a tlu bawkvâk ruai mai a. A rawn tho leh chu, a thin a rim hle ni tûr a ni! A rawn zuan nghâl a, Rova chuan a banrêk leh kawr âwmah manin a han theh chu a leng phei zuai mai a. Hmai lei nawr chawrhin a tawlh ruak mai a. A pilh pheng phung mai bawk a. Rova chuan a va kai tho va. “Greg, ṭha takin hna thawk ve tawh teh! Chuti lo chu Sophie lung a awi lo riau tawh a nia. Tûn chinah chuan ṭha takin aw?” a han ti a. Greg chuan hneh loh leh ngam loh val a hmu tih a hre chiang hle a ni.
Greg pawh a fel ta hle a. Sophie-te Ranch pawhin hma a sâwn ta hle a. A kum tèlin an bawng hralhna pawh a lo pung zêl a. Rova pawh cowboys-hovin an ngaina a. A thu zawm nuam an ti hle ṭhin a ni. Mizo Army-a an ṭan laia, India Army te, Bangladesh Army te an beih dân chanchin a han sawi chuan ngaihnawm an ti thei hle ṭhin a.
Zan khat chu thla a êng hle mai a. An verandah-ah Rova leh Sophie chu an ṭhu dûn a. An Ranch vêl leh an piah fêa tlâng lang dum raih thlirin an han hawi kual a. Sophie chuan, “Duh tak Rova, kan Ranch chu i lo awm ve aṭang hian a phuisui nasa hle tih kan Foreman-in min hrilh a, kan mi sualpa Greg pawh a fel hle tawh a ni âwm e. Hetiang tluka mihring ka zah leh a hnuaia thawh ka châkna ka la hre lo, a ti che a ni âwm e. Duh tak, Mizo Army Brigadier ni âwm rêng i lo ni e. Kan sakawr kawlh i han tudai mai te kha, kan cowboys-ho chuan mak an ti che asin! Mr Brigadier, ka duh lutuk che,” a ti a, a biangah a han seh nar nar a. Rova chuan Sophie chu a han en a. Zân thla êngah chuan a lang paw phak mai a, “Duhawmna hlirin i khat a nih hi maw le,” a ti rilru a. Hun eng emawti hnu chuan mu tûrin inchhûngah an lût dûn ta a.
Ni khat chu Rova chuan an Ranch chu a han fang kual vêl a. An bawng (Long Horn)-ho pawh an lo pung ta hle a. A bulah chuan Greg a lo kal ve a. Greg hian Rova hi a zahin a ngaisang hle tawh a ni.
An Ranch piaha tlâng inkham phei raih mai chu Rova chuan a han thlir vang vang a. Sazek tlang dung kha ang hlein a hria a. A rilru ngaihtuahna a lo thui ta êm êm mai a. A ṭhianpa Lalthiangate leh a nauteho a han hre chhuak a. Kha Sazek tlang ngawpuiah khân a nauteho nên rammûin kum 10 chuang an lo khawsa ho va, ‘dam leh tlâng khatah, thih leh ruam khatah’ tiin an lo awm ho ṭhin a. Pâng tlangval Rodawngate tak kha! Engtin tak awm hlawm ang maw? Ṱhianpa Lalthianga-te pawh kha! Fiamthu titihin Brigadier nihna a han pêk lai te, a hnuah a hoten Brigadier taktaka an ngaihzia te, lung an va tilêng tak êm! Bangladesh sipai Battalion hnihin an rawn beih ṭuma, a hote 10 laiin nunna an chân tâk avânga, an ngaihzia leh an uizia te kha!
Khâng a hote kha koh kir rual lohvin mual an liam ta si a. He khawvêlah hi chuan an hmu leh tawh lo vang. Huaisen takin hmelmate beiin, an nunna an lo hlân ta, an ram leh hnam tân! He khawvêlah hian an lo kir leh tawh lo vang!
“Gone, gone, forever,
Down the river of no return.”
Rova chu ngui nghiaiin in lam a pan leh ta a. Greg-a pawhin ngawi rengin Rova chu a zui haw a. Ralkhatah Rova chu Sophie-in a lo hmu a. Rova hmêlah chuan a lung a lêng hle a ni tih a hre mai a. Tûn hmaa a naute Sazek tlang, ngawpuia a ṭhiante a hre chhuak a ni ngei ang tih a ring a.
Sophie chuan, “Mr. Brigadier, i rilru ka hre thiam phain ka hria. I ṭhiante, i nauteho Sazek tlang dunga i awmpui ṭhinte i ngaihtuah a ni tiraw? Hawh lo kal teh ka lo kuah ang che. Kei hi i tân ka awm reng alâwm,” a ti a, a lo kuah a, a biangah a han seh ner ner a. Rova pawh hlim takin a lo nui ve ta hawk hawk a.
......................................

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)