DORAL HRANG MAHSE BY *Zawntea Chhangte the Red Devils* (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

DORAL HRANG MAHSE BY *Zawntea Chhangte the Red Devils* (Completed)

Unread post by Ngaia » January 22nd, 2019, 9:07 pm

DORAL HRANG MAHSE. *Zawntea Chhangte the Red Devils*.

Episode (1).

Bawiha hmanhmawh takin kal ta la, thil thlen dan zawng zawng hi i pa hrilh vek ang che, tlan thuai rawh chu ral an lo hnai a nia, tiin, Zamawii chuan a fapa Dailova chu a nawr tutu mai a, Dailova chuan hreh hle mahse, phuba lak lehna hun remchang a awm leh zawk a beisei avang chuan, mittui tlapur chung chuan an khaw lam chu a pan ta nghal a.
A khattawk a hawi let zauh zauh pah chuan, engatinge feh tur a ka nu kha sawm tlat nge maw ka nih le? ka nu min ngaidam rawh aw? a tipah sap sap a.
Dailova chu naupang kum riat mi lek mahnise, an hun tawnin a zir loh em avang chuan, hlauhnain a thinlungah hmun a chang lova, a nu mangang thlabar hmel mawlh zawk chuan a thinlung a luahkhat zawk a ni..
tlai ni tlak dawnah chuan an khaw kawtchhuah chu a chuang chhuak hlawl mai a, a thlan tla-te chu nasa tawhin hah viau tawh mahse, chawl khawmuang thei a ni lo tih a inhria a, an mahni In lam chu pan ding nghalin, amah lo hmutu-te chuan chutia hmanhmawh phili a naupang lo tlan ta chu an lo thlir zui vawng vawng hlawm a.
thil fel lo a awm chu ring rilru viau mahse, tumah chuan lo zawt tange an tilem hlei lova, zing a an nufa a an feh tur lo hmutu-te erawh chuan, Dailova nu khawnge? a mah chauhvin naupang leh nghal ngatinge a lo haw? an tiru ve dasar sar hlawm thung a.
Dailovan an In a zu thlen chuan, a pa Kapzela leh an thenawm pa Thanhlira-te chu luhkapuiah an lo titi melh melh a, Kapzelan a fapa hmanhmawh tak a lo tlan chu a lo hmuh veleh chuan, Bawiha khawnge i nu, tiin a lo zawt thuai a, Dailova hah lutuk chuan, a pa zawhna pawh chu chhang ta lo chuan, inchhungah chuan a tlu lut rawk mai a.
a pa Kapzela chuan um lut nghal thuaiin, bawiha enge thil awmzia? tih mawlh mawlh pah chuan, Dailova thlan chu a hruk sak mawlh mawlh pah bawk a, thaw hlawi hlawi pah chuan, ralin an man ralin, a rawn ti a, Kapzela chuan a duh khawp chhanna la hmu lo tih hriat tak hian, Bawiha i nu chu an man a maw? a han ti leh a, Dailovan a pa zawhna a chhan dawn lai tak chuan, an thenawm pa, Thanhliran tui a rawn pek chu an in leh te te phawt a, tui a han in zawh chuan, a hah te pawh a lo dam ta deuhva, tihian a pa zawhna chu a han chhang ta a.
khatia thlam a keimah chauhva ka awm lai khan, ka nu chu insill thlan dai turin lui teah khan a zu chhuk a, a chhuk atang a rei vak lo hnuah Silai puak ri ka hria a, ka zu pan ve nghal a, ka zu thlen chuan ka nu malpui atang chuan thisen tam deuh hi a lo chhuak a, zu hruk sak ka tum lai chuan, lui hnar lam atang a kan lam pan a lo kal thawm ka nu chuan a hria a niang chu, Ral an lo hnaih thu leh, thil engkim thlen dan zawng zawng hi i hnen a sawi turin min ti a, a rang thei ang ber a, khua lo pan turin min ti a ni.
tiin a pa hnenah chuan an vawiin thil tawn chu a sawi fai ta leng a.
Thanhlira chuan, mama, engzatnge an nih tiin a lo zawt a, ka hre lo tiin, Dailova chuan a lo chhang mai a, Kapzela erawh thil ngaihtuah tih hriat tak mai hian a ngawi ngal thung a.
Dailovan a pa mangang hmel a han hmuh chuan, pa, indawm kun teh suh, a nu chu min hruai kir sak leh rawh aw, a lo tisauh sauh a, Kapzelan a fapa chhan tum a ka a an dawn lai tak chuan, ni e, thianpa, indawm kunna hun pawh a nih loh hi Thanhlira chuan a lo tive bawk a. Thanhlira bawk chuan, tihian lo awm la, Lal hnenah thil thleng hi ka han thlen ang e, tih leh chhuah chu a rual dawn ta mai a, Kapzelan, thianpa, Lal hnenah chuan engmah lo la thlen lo la a tha zawkin ka hria, tul lovah Mipui kan tiral khel lutuk ang, a rawn tih leh takah chuan Thanhlira chhuah tum pawh chu a ding chawt a, zawi sap hian, remruatna dang deuh-te i nei emni? Kapzela melh pah chuan a rawn ti a.
Kapzela chuan, ni e Thianpa, Lal leh upa beng thlen nan khua a tlaiin ka ring lo, tunah chuan keimahin Lo lamah chuan ka zu kal ang a, a tul ta a nih leh khaw mipui pun tur chuan ka lo kir leh ang, amah erawh chu Naktuk Chaw fak hma a ka lo la kir lo a nih chuan, ka umzui a nih loh vek pawn ka thi tihna a ni mai, tiin Thanhlira chu a chhang a, a Iptepui ban chu banin, bang a a silai intung pawh chu a la nghal bawk a.
a chhuuah dawn chuan, Dailova hi engpawh lo tawk i la, i kutah ka dah a nia, a han tih zawm leh zat a, Thanhliran, ngawi teh Thianpa, min lo nghak rawh kan insiam ve ang a, kan pahnihin kan kal dawn nia, a tih pawh chuan, ni love, keichu heti hi ka ni zo tawh a, engpawh tawk thei kan ni, chuvangin keimah vang a buaina i hmachhawn ve hi ka remti lo a ni, tih leh chhuah chu.a rual ta nghal a.
Thanhlira tan lah tih theih awm tawh hek lo le, chhuatlai a Dailova lo thu ngui bur chu zu kaitho pahin, Mama lungngai reng reng suh, i nu chu kan hruai haw leh dawn a lawm tiin a tawng thlamuan a, Thanhlira bawk chuan, kan inah phei phawt i la, Chaw te i ei dawn nia, tiin a thlem a, Dailova pawh chuan thuawih tak chuan a zui chhuak ve mai a, an inchu Thingfak a dovin, an In lam chu a pan pui ta nghal a.
Thanhliran an In a luh rual chuan a Nupui Lianpuii hnenah chuan, Dailova hi zanin chu kan riah pui mai a ngai dawn a ni, Chaw ei-te han siam la Zanriah i ei thuai teh ang u, a ti nghal bawrh bawrh a.
Lianpuii pawh chuan, engmah a chhang buai ta lo chuan chaw ei chu a siam ve nghal mawp mawp mai bawk a, Zanriah-te an kil zawh chuan Nui Lal-inah ka han kal lawk ang e, Dailova hi lo awmpui la, a mut chhuah hunah mutna-te i lo siamsak dawn nia a ti a, Lianpuii chuan, u Hlir, nachin inrawn luh atang khan i hmelah thil fel lo a awm tih ka hmu a, enge thil thleng pawihai te a awm emni? hei Dailova i lo hruai haw leh zel bawk nen, no hnap hian a han ti a, Thanhlira chuan, Aa nupui Lianpuii chu han kuah pahin, Zamawii tu tih hriat lohvin an man a ni awm e, Thianpa Kapzela pawh Lo lamah a liam tawh e, zuai raih hian a han ti a.
Thanhlira bawk chuan Lal hnenah chuan ka han kal phawt ang a, ka lo kir har lovang, a ti a, a nupui chu a thlah a, a chhuah dawn chuan Dailova kha lo ngaihtuah hle ang che aw, a tileh hram a, Lal-in lam chu a pan ta nghal a, Lal-In Thanhliran a han thlen chuan LalSavunga-te chuan Zanriah an lo ei lai mek a ni a, Lalsavungan Thanhlira a lo hmuh veleh Hlira chu enge i duh le? tun ang hunah-te i lo lan teh hlawl mai? tiin a lo be zung zung a, Thanhlira chuan vawiin lam a, a thianpa Kapzela te chhungkaw chung a thil thleng chu kimchang takin a hrilh ta kauh kauhva.
Lalsavungan chung thu a han hriat meuh chuan, a hmel chu thinrimnain a rawn thlak ta nghal a, thinrim insum tak hian, chutiang mihring chu tupawh nirawhse kan zawng chhuak ang, Hlira Tlangaupa han ko la ka Upa ho leh Pasaltha ho rawn khawm thuai tehse, a tinghal chhur chhur mai a, Thanhlira pawh chu engdangmah sawi lo chuan a chhuak ve nghal bawk a.
Damdiai khua hi In Zahnih vel.a inchhal an ni a, Khaw inlungrual tak mai niin, Lal rorel thiam tak Lalsavunga lalna a ni, Sa leh Ral lak a an thlamuan lai tak a ni a, tlawmngaihna kawngah-te, aia upa zahna kawngah-te an inenkawlna a thain an entawn tlak em em a, Lalsavunga khua ka ni ti a inchhal-te chu nuam an tiin an inchhuang thin hle a ni.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 24th, 2019, 8:55 pm

DORAL HRANG MAHSE. *Zawntea Chhangte the Red Devils*. Episode (2). Zanriah ei kham, thimhmulah chuan upa ho chu Lal-Inah chuan an kim thap tawh a, Pasaltha ho pawh chu an rawn lut ve phauh phauh hlawm bawk a, chutia rei fe an innghah khawm hnu chuan Lalin awm tur a a duh ho chu an kim a ni tawh reng mai a, Lalsavunga erawh a tlangval-te tuanfum lutuk chuan a thinrim a belhchhah sauh thung a..
A Tlangval-te melh kual dan dan pah chuan Vaibel a han pak vei talh talh mai bawk nen, Lal zaidam ni thin hmelah zawng, nelawmna reng a awm lo a ni tih tumah chuan an hai mawlh lo.
Lalsavunga thu chhuak chu enge ni ang, tiin ngawi reng chuan an nghak thap mai a, Lalsavunga chu rawn tawng chhuakin, Damdiai khua nih leh nghah ngai a awm nih hi thil zahthlak a ni a, eng thil pawh ti dawn i la, tlai bikah kan tang tur a ni lo. a han tih meuh chuan tlangval ho chu an zak hlawm hle mai a, An Lal meuhvin khatia a tih ngai a an awm mai kha hreawm pawh an tihle hlawm a, thu rel tur pawimawh awm lo ngatse zawng, a rang a rang a Lal-In chhuah san chu an hreh lo tlang ngawt hlawm ang le..
Lalsavunga chuan tihian thu dangah a pakaipui ta daih a, hei Vawiinah, Ka khaw innghahna, Kapzela nupui leh a fapa feh tu tih hriat loh ten an lo bei a ni awm a, chung thu avang chuan, nangni ka Tlangval-te leh Pasaltha-te nen hian engtiang a hma han lak tur nge ni ang tih rel ho i la ka tih vang a ko khawm che u ka ni, a han tih chu Tlangval ho chu an phawk hru mai a, Lal bawk chuan, Thanhliran kan vai hriatah a thil hriat ang ang-te han sawi hmasa tehse, a tih chuan Thanhlira chu a thut hmun atang a rawn tho chhuak talh talhin, Dailovan a hrilh ang chuan a swi chhawng ta vek a, a thu sawi tlang kawm nan, Kapzela phei chu a hriat rual rual a Lo lam pan a a liam tawh thu leh, Dailova chu an enkawl rih mai thu chuan a thu sawi chu a khar ta a, Lalpa Lalsavunga chu lo ding chhuak velehin, tunah chuan engkim kan hre tlang tawh bawk a, inngaihdan-te rawn sawi hlawm teh u le, tih pah chuan a upa ho chu a melh kual ralh ralh pah hlawm a.
Upa zing a pakhat, dova chu lo ding chhuakin, Kan ngaihdan hi hmantlak a ni ve ngut a nge maw? tih charh charh pah chuan, a Vaibel chu a pak leh zauhva.
chutah sawi zawm lehin, Hei tlem a tlemah ksn muang sual tep a ni a, a tuamah han inpuh thei kan awm hek lova, Sa leh Ral lakah kan him rei tawh e mai a, Khaw dang pawi kan khawih lah kan hre hek lo, Vawiin a kan Ram chhunga thil thleng hisn min thawng takzet a ni. heti kan nih takah chuan amah berin Chhun chaw fak hma a ka lo kir lo a nih chuan a tibawk a, intihpalh-te a hlauhawm bawk nen, zanah rum rum chuan chet thawh loh a tha ka van ti em, engemaw inngaihdan te ni ve hlawmni? tiin thut hmun chu a rem leh mai a, An Upa Dova ngaihdan chu Thanhlira chuan mak a tiru hle thung a, Midang ho pawh chu an bang bik chuang lo.
Upa Zabiaka chu lo ding velehin, Lalpa, Upa Dova ngaihdan kha keizawng ka pawm thei lo a ni, a rawn tichhuak phawng mai a, chutah sawi zawm zelin, Kapzela hi kan hriat angin, mi tlawmngai leh huaisen, mi pawi sawi hlau tak khawtlang a buaina thlentu nih duh ngailo a ni tih kan hre theuhva, chuvangin, tun a kan Upa Dova sawi ang khan, chhun chaw fak hma a ka lo kir lo a nih chuan a tih te kha, a inthlahrun vang zawk a niin ka ring tlat a ni.
Chuvangin, Tlangval sawm vel hian a zan a zan hian umzui ve nghal sela, engpawh tawk thut thei kan nih avangin, midang zawng hi khaw lamah lo inral ring bawk i la a tha ka van ti em, a rawn tih veleh si avang chuan an thu chu a inhnial ta tlat mai, Lalsavunga chuan, ngaihdan dang nei inla awm em le? ti a a zawhna chhang thei an awm tak lovah chuan, Upa Dova thu sawi leh Upa Zabiaka thu sawi chu an han khel hau ta a, rei ngial an sawi a, an han inhnial leh deuh bap bap bawk a, a tawpah chuan, Lalpa keichuan Upa Zabiaka remruatna kha keichuan tha ka ti e, kan khaw mi leh sa chin hriat lova a awm lai a, Naktuk nghah leh chu ka thei ve lo a ni, mangang thlabar an awm lai a, thlamuang tak a heta lo thut hi Damdiai khua Lalsavunga tlangval ka nih chhung chuan ka thei ngailovang, Thanhliran a rawn tih takah chuan, Lalsavunga chu rawn ding chhuak vatin, Zaninah ngei hian Kapzela chu kan umzui tur a ni.
Val upa ten Upa Zabiaka rawt ang khan kal tur lo thlang chhuak sela, midang zawng chuan khua kan lo venghim dawn nia, Zanin atangin ral veng pawh dah nghal tur a ni, a rawn tih takah chuan tuman an hnial ta lo bawk nen, Lal remruatna ang chuan, Lal in chu an chhuahsan hlawm a, mipui tih phawk lek an hlauh avangin Tlangval Lo lam pan tur ho pawh chu Val upa ten Zawlbuk lamah an tih avang chuan, tuman Lengi run reng an kai lo a ni.
Thanhlira erawh chu a nupui hnen a ka lo kir leh vat ang a tih avangin an mahni In lam chu a pan hmasa leh te te phawt a, an In a zu thlen chuan a nupui Lianpuii chuan e kha i lo thleng ta maw? enge inremruatna ni a, a lo tivar a, a nupui kiang a thut pah chuan Zanin a umzui ve nghal turin Kan Lal-te chuan thu an titlu ta a nih kha, Zawlbuk lam kai ka ngai tlat mai, tih pah chuan rei pawh thu lo chuan a tho leh thuai a, a va zia lo tak em aw, inrun reng mai hian rah tha a van chhuah lo teh lul em, lianpuii chuan a han tivawng vawng a, Thanhlira chuan a silai te en fel thuak thuakin, Dailova chu a mu der tawh a nimaw? tiin thu dang chu a lo sawi daih thung a, ni e, Biakin min chhang tha duh hauh lo mai leh nghal a, a mut chhuah thu a sawi bak kha chu a tawng meuh lova, ka mut tir ta mai a nih kha, tiin Lianpuii chuan a lo chhang a, a Silai-te a en fel hnu chuan Chaw lo fun turin a nupui chu Thanhlira chuan a chah a, Zawlbuk lam pan tur chuan an In chu a chhuah san leh nghal a.
#Zawlbuk a va thlen chuan tlangval ho pawh chu an lo kim thap tawh hlawm a, Val upa Thanzikan Thanhlira a lo hmuh veleh, kha Hlira chu i lo thleng thei maw? nui sang a a lo tih chuan, nia hei ka rawn tlai ta ber a nih hi, inthiam lo zet chuan a tisap a,.
Khaih khaih, inthiam lo duh suh, tlai chhia pawh i nih loh hi, ti a an val upain a hnem takah chuan, tlangval ho thutna lam chu a pan ve ta nghal a, Tlangval ho kal ve ngei tum an insawi phur vel chuan Val Upa ho lung a tiawi khawp ang le.
#Valupa Thanzika chu lo ding chhuakin tihian thu a han sawi a, inhriat angin kan khawtlangin ral kan hlat lo hle mai a, vawiin lamah Kan Pasaltha nupui Zamawii ten beih an tawk a ni a, amah Zamawii phei chu ral kutah nge a awm a, thi chhawngin tih kan hre hek lo, Kapzela ber chu a liam tawh a ni a, tunge Kapzela hnung chu zui ve dawn le? a han tih chuan, keimah keimah, tiin tlangval ho chuan an lo chhang a, Chutah Thanzika chuan, kan vaia kal chu a rem dawn lova, kan khua, kan nupui Fanau-te, kan Lal leh upa-te himna hi kan kut a nih avangin, khuaah hian a tam zawk chu in lo awm a ngai dawn a ni, a han tidap dap a, sawi zawm zelin, ka hauvin tlangval Sawm lo lam panin kan kal ang a, midang zawngin khua in lo venghim dawn nia, in lo kal ve loh avangin indawi bik tihna a ni lova, kan chet thawh dan a inang lo mai zawk a ni tih inhre dawn nia, a han ti leh dap dap a, Thanhliran Tlangval kal tur chu han thlang chhuak sela, kan kal nghal dawn nia, a tih chuan Thanhlira chuan kal tur ho chu a thliar ve nghal bawk a.
chutah Val upa Hmuaka chu lo ding velehin, midang zawng chu ka hovin khaw lamah kan lo awm ang aa, Thanruma leh, saidinga remruatna angin kan kal dawn nia, tupawhin, kan hmanrua-te a tul hun a hmang thei turin kan inbuatsaih lawk dawn nia, a rawn ti veleh a, chutia rem an ruat zawh hnu chuan, Thanzika leh a ho-te chu Lo lam pan tur chuan an chhuak ta nghal a, Khaw lam a lo awm tur ho pawh chuan, lengi run kai nan zan a rei deuh tawh avangin Zawlbukah chuan remruatna hrang hrang-te neiin, an inkawm khawm ta zawk a.
#Kapzela chuan khua chuan thim hnan viau tawh mahse hmalam chu a pan zel a, an khaw ram chhung chu a hriatchian a ni bawk nen, ral hovin chet an rawn thawh thut thei a ni tih a hriat avangin, Meichher pawh a chhi duh lova, fimkhur tak a kal zelin, a Silai pawh chu hmeh puah nghal inpeih ran chuan a cheng a kau sa bawk a, thil ri rak a hriatna lamah chuan a mit rang takin a len nghal zat zel bawk a.
#fimkhur leh thawm dim tak a kal zelin, Leng hawn Ar khuan hun velah chuan, harsatna tawk lovin an thlam chu a thleng ta hlawl mai a, thlam a luh rual chuan, a nupui em a chawhmeh lo awm te chu a hmu nghal a, a Fapa ipte ah pawh chu a hmu nghal bawk a, Chhuat laia lo inchap darh nuai a nih avang chuan ngawi rengin an rem fel leh nawk nawk a, a tih zawh chuan, riltam a ka awm chuan ka chau chhe hlauh dah ang e, tiin a ipte pui a lo dah chaw fun chu la chhuakin a bar nghal sawk sawk a.
Chaw te a bar zawh chuan a fapain a sawina lui-te lam chu fimkhur tak chuan a pan ta nghal a, a silai hmet puak maithei tur chuan a inring ran bawk a, buh lo ding sung karah chuan thawm dim tak a lut thla zelin, che sual thei a ni tih a inhriat chian em avang chuan, a mit leh Beng chu a chhiin a len ruai reng bawk a, thawm dim tak a tawlh thla zelin, luite pawh chu a hnaih tawh viau mai a, fimkhur tak a thawm an ngaihthlak leh hnu pawh a, zan lam hram chi ho thawm bak a hriat loh avangin, kawrte chu a zu pawh ta a, Kawrte a tang a lui mawng lam a tlem an kal thlak leh hlek chuan, Thisen a ni tih hai rual loh chu a hmu ta hlawl maile, thisen a hmuhnaah chuan thu hniamin, a bul vel lei chu hnai tak chuan a zu bih a, ke hniak ni awm a rin chu a lo chiar dup mai a, tlem a an belh chian deuh hnu chuan, ke hniak chuan Lui mawng lam a zawh a ni tih chu a hre bawk a, Kapzela ngaihtuahnaah chuan thil hrang hrang a lut zut zut a, Engvang a a tel lova feh tir mai nge maw a nih tih te a ngaihtuah a, amah leh amah chu a indem leh rih a, a chang leh engvang a ka nupui chu hruai bo mai nge an nih? ngatinge an thah mai loh, tih te chu a rilruah chuan a lut zut zut a, rei fe.a ngaihtuahna a kawm hnu chuan, Thlam lamah chuan a chho hnak hnak a, thlam a thlen chhoh chuan um zui mai nge tha ang Khaw mipui lam pun tur a haw, tih chu a rilru tibuaitu a ni leh ta.
Rei ngial a inngaihtuah hnu chuan um zui nghal mai chu tha zawk a a hriat avang chuan, um zui tur chuan a inbuatsaih ta nghal a, meichher tur te a lak khawm zawh chuan, thlam chu a chhuah san a, zawi sap a phun chhuakin, ka Nupui Zamawi lo thlaphang suh aw, *DORAL HRANG MAHSE*, ka rawn hruai kir ngei ang che tiin, meichher lian lo teee a chhi chuan lui mawng lam chu a pan leh ta nghal a.
luite a thlen thlak leh chuan hnuhma a hmuh ho chu Meichher hnuaiah chuan a han bel chiang hmasa leh te te phawt a, meichher eng hnuaiah chuan thil a hmuhfiah theih deuh ta bawk nen, mi pathum vel hniak a nih chu a ring thiam ta mai a, hniak chu a darhsarh em tih te bel chiang chuan, a bul vel chu a han vak kual deuhva, chutia a en kual hnu pawh a hniak dang a hmuh tak lovah chuan Fimkhur leh thawm dim tak chuan Lui mawng lam chu a zawh thla ta a, khua a thim em avang chuan a hnu chhui chu a han hlauh leh that that thin bawk a, Meichher lah chhit len ngam a ni bawk si lo nen, a rilru hmanhmawh ang chuan a kal chak thei lo thung a, Eng harsatna mah chuan a tibuai lo chu mak a ti em em zawk a, an khaw mi te chuan an rawn zawng a ngem? tih te chu kal pah chuan a ngaihtuah neuh neuhva.
chutia eng eng e maw ngaihtuah a a han kal takah chuan an khaw ram chin chu a lo pdl ta reng mai a ni tih a hre chhuak zawk a, thingkung pakhat lo dinna bulah chuan thu hahchawl zawk pahin a vaibel te chu an zu vei ham ham a, a hnuchhui a hlauh daih bawk nen, engtia hma han lak chi nge ni ang? tiin a hawi kual pah valh valh pah a, chutia a hawi kual valh valh chuan, a awmna atang a mual thumna vel a Mei eng ang mai de va va chu a hmu ta tlat maile..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 26th, 2019, 6:31 pm

DORAL HRANG MAHSE. *Zawntea Chhangte the Red Devils* episode (3).. Kapzela chuan uluk tak a a mei eng hmuh chu a en chuan, mei chu a insawn lo a ni tih a hria a, amah pawh chu a phur thar leh khawp mai, mahse, thil pakhat, mei chu tu-te nge chhem ang, Lungthu khaw mi leh sa ram riak emni ang? Tih chu a ngaihtuahnaah chuan a lo lut thuai a, a buai ru leh ta kher mai.
#meichher a chhit pawh chu timit nghal thuaiin a hma lak dan tur chu a ngaihtuah nauh nauhva, han pawng beih ngawt se a ni pakhat ringawt chuan hneh dawnin a inhre si lova, tin, a beih tum a te hi Lungthu mi leh sa pawh chu an lo ni daih thei bawk si.
#Kapzela rilru chu a buai takzet a ni. chutia rei fe a inngaihtuah hnu chuan, fiah phawt tha a a hriat avangin a Silai chu hnim pik karah chuan.a thukru a, a chempui zawk chu a Iptepui atang a la chhuakin, a mei eng hmuhna lam chu thawm dim leh fimkhur tak chuan, Meichher tel lovin a pan hnai ta a.
#Mual khat a han kal chuan a Mei eng hmuh chu a hlauh ta tlat maile, hnim han sah vak lah zanah leh nghal, a mi chhui-te tan inralrinna dar a khawn sak mai a ni tih a hriat avangin thil tih chi niin a hre si lo.
# *mahse, han chawlh san mai erawh chu a tum bau lo*.
a hmalam chu hnim pik karah chuan a pan zel a, thawm pawh a dim tak tak thei lo chu a ni e, kawng mumal pawh ni lovah chuan a inhai phei zel a, hmun zawl fai hliau mai chu a va pawh ta hlawl maile, Kapzela chu a fimkhur zualin a inring zual sauhva, hnuhma tharlam deuh te a awm em tih te chu hnai tak a lei zu bih hnai chuan a en nghal zung zung a, chutia uluk tak a lei a han en chuan ke hniak ni awm tak chu a hmu ta tlat maile, Kapzela chu thu chhuak nghalin a han hawi kual nghal vat vat a, a thlang lam hnim lo pe deuh hun a hmuh chuan pan hnai nghal thuaiin, khawi lam atang a lo kal nge a nih ang? Mihring tawn kuakna ni ta se? tih chu a ngaihtuah a, hnim lo pe kaw sunah chuan kal thlain, a hmalam pawh chu an lo pal eng hle a ni tih a hrethiam ta a, tin, hniak chu an khawlam atang a lo kal a ni tih a hre nghal bawk a.
# *Mahse, Kapzela hian a fapain a Malpui atang a thisen chhuak ang khan a sawi si a, ngatinge lui kawr bul a thisen bak kha ka hmuh si loh? tiin mak a tiru hle thung a, a hniak hmuhna hmun faihliauvah chuan kir chho lehin, hniak chuan khawilam nge a pan tih chu a han zawng leh zung zung a*.
mahse, mihring kalna hnu awm reng reng a hmu ta tlat lo, Kapzela phurna chu a bo ta tlat mai, kan misual ho chu infimkhur ve hle mai maw? lo inring rawh u ka rawn zawng chhuak dawn khawp che u tih pah chuan a bul a thingkung dingah chuan a lawn ta nghal a.
# *Thingler a lawn thlen chuan Mei eng ni a a hriatna lam chu a thlir nghal thuai a, Zan thim hnuaiah chuan eng chu a lo langsar deuh a nia nge, a piah mual a mei lo la de va va chu a va hmu leh ta, nui sak pah hian, ka zawh sual love a tisap a, lei lamah chuan a chhuk ta nghal a*.
Lei a zu thlen chuan a hma lam hnim chu thawm dim tak chuan a han tawn leh tan ta chutia thawm dim tak ni a a inhriat lai chuan, a ke pen tichawltu thawm a hre ta tlat mai.
# *uluk tak a a beng a han dawh chuan, Mihring inbe thawm a hre ta tlat mai, Kapzelan chutia a tum aia hma a thawm a hria chu mak a tihle a, chiaina hun a ni lo tih inhriain, ruahmanna a siam nghal zung zung a, Chhak lamah chuan, thawm dim tak a bawkvak chhovin Lungtum lian tha deuh chu a dap chho pah bawk a*.
# *thui fe a vah chhoh hnu chuan hmun khawkrawk tak hi a han pawh a, a han belhchian deuh chuan Kham bulthut a ni tih a hrethiam ta a, lunglian tawk tak chu a han zawng thuai thuai a, a thlanglam chu awihtlan mai a nih avangin, Lunglian tawk lo chu a lum tha thei dawn lo tih a hria a, rei fe thimtham a a han dap takah chuan Lu bur tiah aia lian mah hi a dap fuh ta hlauh maile, a Lung tum chhar chu a chawi lawk a, tawng thawm a hriatna zawnah chuan an chhak lamah chuan a indap phei leh nghal a, a thawm hriatna zawn ni a a hriatah chuan han thu chawlin a thlanglam chu a han en hmasa leh te te phawt a, mahse Zan thim hnuai ngang a ni bawk a, engmah chu a hmu thui thei lem lova, mahse, an awmna zawn ni a a hriat tho avangin Lung chu lum hnan a tum thova, Lung chu lum thlak tum a a han intintuah uaih uaih lai chuan, Silai puak dur chu a hre ta thut maile, Kapzela chuan mak tihle mahse, inngaihtuah buai hman a ni lo tih a inhria a, a Chempui chu chhar thuaiin, an mahni ram lamah chuan a let ta thuai a*.
# *a khat tawkin silai chu a puak reng mai a, Kapzela chuan kan khaw tlangval-te emni ang? nge kan khaw thenawm Lungthu khaw ho zawk? tih chu a inzawt pah mawlh mawlh a, chutia a hmalam ngawt ngaihtuah a a kal lai chuan, a hmalam hnim pik kar atang chuan, thih i duh loh chuan tah khan ding rawh!!! tithawm a hre ta thut mai, mahse, Kapzela chuan a lo hriat than em em a thianpa Thanhlira aw a ni tih a hai mawlh lo, thian-te nunna lak pawh i pawisa lo a nih chuan min kap ta che, ti a Kapzelan a chhang zet chu le, Thanhlira chu a tawmna hnim pik atang a rawn dawk chhuakin, hmela thiantha kan va inchan teuh ve a rawn ti nghal bawrh bawrh a, Kapzela erawh chu a nui sung thung a*.
#Kapzelan nangmahin emni i lo kal a tih chuan, ni love, sawm lai kan lo kal tiin Kapzela chu a lo chhang a, Thanhlira bawk chuan, titeh i tawlh kir phawt teh ang, silai a puak reng bawk nen a si per kan dawng palh ang e, kan la inhrilh fiah tha dawn nia kir phawt teh ang, a tih zawm leh zat a.
Kapzela chuan engmah sawi buai lo chuan Thanhlira chu a zui ve zel a, mahse, Kapzela rilru chu a buai ru khawp thung a, hnim chu a hma a Thanhliran a lo tawn kuak tawh a nih avangin a lo pe sun tawh hlawm a, tunah chuan an kal thui ta deuh bawk a, Silai puak thawm pawh an hlat ta khawp mai.
Thanhlira chu an awmna atang chuan a vei lamah peng thlain Kapzela pawh chuan a zui ve zel bawk a, chutia ngawi reng a an kal thlak lai chuan, u Hlira te nireng che u in, Piangliana chuan a lo tivar a, Thingbul phen atang chuan a lo chhuak nghal a, thui pawh an la kal leh hma chuan, hmun zawl nuam deuh hi an zu pawh hlawl mai a, Kapzela chu hawi kual nghal vat vatin, a thlang deuhva Thing lo ding chu a zu hmu ta a, chu veleh a Silai thuhrukna hmun kha a ni tih hriain, a Silai chu a zawng nghal thuai a, rei vak lovah chuan a hmu mai reng bawk a..
#Kapzela chu eng sawi set set lo chuan Silai puahna lam pan tur chuan a inbuatsaih leh nghal zung zung a, Thanhliran Kapzela chu lo khap thuaiin, Thianpa thinrim avang a ngaihtuahna hmang lo lek a chet buan buan loh tur i tih thin kha, i thin chu a rim lutuk ang tih chu ka hria a, mahse, inbeng dai la, ngaihtuahna fim tak hmang la ka duh a ni, a tih takah chuan Kapzela pawh chu inthiam lo takin Thanhlira bulah chuan a thu ve ta zawk a, ni e, Thianpa ka thinrim lutuk ka lo insum hman lo a ni min ngaidam dawn nia, a han tinghal zat a.
#Thanhlira chuan kan thinrim lai hi kan fimkhur ber hun tur zawk a ni a, thi ve maithei kan ni tih hi theihnghilh loh tur a ni, tiin a lo chhang veleh a. Chutia an pahnih a an inzilh melh melh lai chuan, U Hlir, ngaithla teh u thawm chu a reh ta duk mai engtizia nge ni ang? Piangliana chuan a rawn ti a, Thanhlira-te inzilh pawh chu tawp nghal chatin, thawm ngaithla chuan Beng an dawh nghal thap a, eng thawm mah an hriat tak lovah chuan an ngaih a tha lo tlang kher mai.
chutah Kapzela chu harhchhuak thutin, tah hian lo awm u la, ka va thlithlai ang e, a tih chuan Thanhlira leh Piangliana ngaihdan a ni tlat lo, thianpa kan vaiin le, a tul leh kan thi phiar ang a ti nia, midawihzep ho hmaah hian ka tawm bo rei ta mah mah a ni, tih leh pen chhuah a rual ta nghal a, piangliana pawh chuan a rawn zui ve nghal zat bawk a.
#Kapzela pawn a thian-te dan tum chu awmzia awm dawn a a hriat loh avangin, rem a tih sak ta nge nge a, Kapzela chuan hma ka hruai ang a fimkhur takin kan che dawn nia tih pah chuan kal a rual ta nghal a, zan thim hnuai mahnise a hma a an lo kalna a nih tawh avangin an buai lutuk tawh lova, thui fe an kal leh hnu chuan Thanhlira chuan kan thian-te thawm reng hriat tur a awm ta si lova, an lo mang ta vek mai hi a ni lo maw? a rawn tichhuak phawng mai a, chutah Kapzela kal lai pawh chu ding chawtin, ni e, Thianpa i sawi pawwh chu thil thleng thei chu a ni reng mai a han ti a.
#Kapzela bawk chuan tunah chuan a huhova kal tawh lovin a hran theuhin kal tawh ang u a tih lai mek chuan an hmalam chu a rawn ri phei buan buan mai a, Kapzela chuan chhak lamah tih leh chhak lam pan chu a rual ta nghal a, a thian-te pawh chuan an zui ve nghal bawk a, Kapzela ten an awm hmun an rem fel tihah chuan, Ri buan buan pawh chu a lo hnai zel a, Kapzela-te ho chuan an Silai tin kawh va chung chuan an lo chang ran bawk a.
ribuan buan chuan an awmna hlui an thlang mai a rawn thlen chuan, an thawm hriat chu a thawk hluam hluam danah chuan Mihring a ni tih an hre ta a, chu veleh Kapzela chuan, tunge i nih??? kah i duh loh chuan ding nghal rawh a han tivin tuar mai a, chutah Zailawma chu ding nghalin Ral ka ni love... Keimah Zailawma Damdiai khaw tlangval ka ni e, la thaw hluam hluam pah chuan a lo ti a, chu veleh Kaapzela-te ho chu zuang thla nghalin, Zaia enge chanchin an tinghal sawk sawk a, Zailawma chuan u Thanzika an kap a, ni khaw hre lovin a awm a, chuan Zamawii pawh kan chhan chhuak bawk e, mahse ka rawn kal dawn kha chuan ani pawh achau khawp mai a han tizung zung a, nih leh khawnge nu nau pawi sawi lo chunga chet thawh ho kha Kapzelan a tih chuan an thah tawh thuin Zailawma chuan a lo chhang a, Zailawma bawk chuan ti teh u Buk kan sualna lamah phei phawt i la a tih zawm leh zat a, midang pawh chuan hnial buai lovin Zailawma hnung chu an zui ta hlawm a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 29th, 2019, 5:17 pm

DORAL HRANG MAHSE. *Zawntea Chhangte the Red Devils*. Episode (4). #Damdiai khawlamah ve thung chuan Lal leh upa ho chu an la thu khawm taih hlawm thung a, Lal Savunga chuan, tunge mawni ang a, ka mi leh sa chung a chet lo thawh mai ni ang le? a vaibel pak hluah hluah pah chuan a han ti a, upa Zabiaka chuan lo chhang vatin, a ni ngawt mai, hmeichhe chungah leh nghal a lo ti thuai a, Upa Dova chuan Lalpa, ka han ngaihtuah ngial pawh hian Kum thum kal ta a Daizau khua kan beih tih loh kha chu tumah hetiang thil rawn ti duh tur awmin ka hre hauh lo mai a lo tive chuarh chuarh bawk a, Lal Savunga chuan, Upa Do, i han sawi takah chuan thil ni thei dawnin ka hre ta riau mai ka ti, Daizo khua a nih zawngin kan thisen far tawp thlengin kan che tawh tur a ni a han ti a, chutah upa Siamliana chu lo ding hluaiin, Lalpa, Daizo khua avang hian kan buai tam ta mah mah a ni, keini aia khaw lian zawk an nih avang hian min zuam riau mai, mahse, Lalpa heihi lo hre rawh, Damdiai khua hi eng khaw lakahmah kan zam lo tih hi a han ti vei nghauh nghauhva, Lal Savunga chuan ka upa te nge nge inthlazar hnuaiah zawng thla a muangin hah a dam thin teh e, nui var var pah chuan a lo ti a, chutih lai mek chuan Leng hawn Ar chu a lo khuang thliai thliai hlawm a, u Pa Siamliana chuan, Lalpa keizawng ka lo tin tang e, ka nuamsam meuh lo e mai.a han ti a, Lal Savunga pawh chuan ni dawn tak maw? Zu mu hahdam tawh khai a lo ti ve thuai bawk a, Lal Savunga bawk chuan, hei midang ho chuan Kan tlangval-te ram chhuak kan lo nghak ang e, a han tih zawm leh zat a.
# *Damdai ral ven bukah ve thung chuan Rotlinga leh Thanliana-te chu an thu ran tawh thung a, Chutah Rotlinga chuan, khawi khaw mi nge maw an nih han rin deuh-te i nei lo maw? tiin Thanliana chu a han zawt a, ka hre mai lo tunlai tak chu kan ralmuan lai tak a ni bawk nen, tupawi kan sawi lah kan hre si lo tiin Thanliana chuan a lo chhang a, Ni e, hmeichhe chungah leh nghal chet an han thawh duh a nia, an Buzawl thleng a um a nia ka duh a han ti vei chhu chhu a, Thanliana chuan Dailova tak hi a nia ka khawngaih ni, amah a la nopang si a, nu tel lova a han sei lian mai tur hi chu ka lainat takzet a ni a han ti zuai raih a*. #Daizo khua hi In Zanga dawn a inchhal a ni a, Lal Ngurdawla awp ram niin, Damdiai khua atang hian Chakvak tan pawn nikhat leh chawhma kal a ni a, khaw chhak lamah awmin Tlangval leh pasaltha an tam em avang hian a chhehvel khua-te hian an chung en em em a, an khaw tlangval-te hi an hruanghrau em em mai bawk nen, a chhehvel khua-te hian an hlauh tlawn hlawm a ni ber a, Lal Ngurdawla lah Pa thinchhia pawisak nei lo a lo ni leh zel bawk nen, Daizo khaa do ngam reng an awm lo a ni. tuntumah pawh hian Damdiai khuain kumthum liam ta a a tlangval ram chhuak-te an lo thah sak avang a, an inbeih chiam a a tawlh zawk a an tan tak avang a a thinur thar lehin Damdiai khua en thla turin a Tlangval Panga lai mai a tir chhuak a ni a, an kal dawn a, Damdiai khawmi inhmuh chu Mipa a nih chuan Thah nghal tur, Hmeichhia a nih erawh chuan, a nung chung a ka hnen lo thlen tur, ti a a chah avangin an Lalpa chah ang a Daizo tlangval-te hian chet thawh mai an ni.
#Rotlinga chuan, a dik khawp mai, mahse, u Kapzela pasaltha a ni a, u Thanhlira ten an thlawp tha bawk nen, harsa tak chuan a awm hauh lovang a, Amaherawh chu nu hmangaihna hi zawng a thuk e mai a, u Lianpui pawh hian hmangaih viau mahse, mahni ril a rah ang hmangaihna ang chuan a hmangaih zo dawn lo tih chu thil chiang sa a ni a, Dailova chu keipawn ka lainat khawp mai a lo ti veleh a, chutia an titi melh melh takah chuan Zan pawh a rei tawh hle a ni tih hriat takin, Zanlai velah chuan Ar.a lo khuang al al hlawm a, Rotlinga-te pawh chuan ral hnai pawh a an hriat loh avangin, an Vaibel chu an tan kai sek bawk a, Lal In lam pawh a thim ta mup mai, Rotlinga chuan Zan chu rei.a ti ru em em a, Ral ven buk chhuah sanin a bul velah-te chuan a han vei leh thuak thuak bawk a.
#chutia rei fe an han thut leh ren rawn hnu chuan, Zing lam Ar khuang chu an inchhawn leh ta tliar tliar hlawm a, Rotlinga chu a hlim ru khawp mai, nuih vur vur pah chuan, zan a va rei duh ngai ve a han tichhuak phawng a, Thanliana erawh chu a lo nui suk thung a, Rotlinga chuan, lo kal sela. ka tih teh lul nen kan mi dawihzep ho chu a han ti leh tun tun a, Thanliana chu a lo ngawi ngal thung a, chutia Rotlinga a insawi pawr vel lai chuan Khaw chhung lam atang a an mahni lam pan a eng an hmu a, Thanliana chuan, saw min thlak tur pawh an lo kal a nih saw a lo tithuai a, Rotlinga te bul an va thlen chuan e kha in lo chau tawh em? kan lo chhawk ve tawh ang che u, Huala leh thuama chuan an rawn ti nghal bawrh bawrh a, Rotlinga lah chuan inrei khawp mai, ka beisei aiin inrawn tlai, nuih tut tut pah hian a lo tikhauhva, Huala-te pahnih chuan inthiam lo zetin, ni e, kan lo mutui deuh hlek a lawm mawle, an han ti nuah nuah a, chu veleh Rotlinga chuan, ka han fiamthu mai a nih kha, hei a hun takah in lo thleng a lawm, a tih leh tak avang chuan Huala-te thian dun inthlahrunna pawh chu a ziaawm leh deuh huai a, ti teh keini pawh kan phei mai dawn emni? Thanliana melh pah chuan a han tih zawm leh zat a, Thanliana pawh chuan, ni e tlem tal kan chhin ve loh chuan i phei ang hmiang a lo ti ve bawk a, Zawlbuk lam chu an pan ta nghal a.
# *Huala-te thian dun pawh chuan an thut hmun-te an han rem fel chuan, Thuama chuan, kan tlai hle a nih tak hi mawle? a han ti a, Huala pawh chuan, ni e Rotlinga khan ka fiamthu kha a ti takna a, a lungawi vak lovin ka hria a lo ti ve bawk a, thuama chuan, engpawh nise, inthiam lo viau mah i la awmzia a nei thui tawh lo e mai a lo ti ve leh a. an han nui dun leh bawk bawk thul, ral ven buk a awm anni tih an intheihnghilh ta a mawni.
#Chutia rei fe an han thut leh renrawn hnu chuan, Zing khawvar tur chu a rawn intram det det a, Sava leh rannung dang-te pawh chu an rawn chiar ta nak nak a, Lei lung pawh a hmuh theih ririai tan tawh a, chutia Ral thawm reng reng hre lova an awm a, lawmawm an tih thu an inhrilh melh melh lai chuan, an hma lam a an ral ven buk lam pan a rawn tawng thawm an hre ta thut mai, inring tak a lo insiam rem nghalin, an hmalam chu an lo thlir ran nghal a, tuibur hmuam da awm vel an nghah hnu chuan, an khaw Tlangval, Piangliana leh Zailawma hmanhmawh tak a rawn kal chu an va hmu ta thut mai, an pahnih chuan an han in en ha ha a, mak an tidun kher mai, Thuama zawk chu lo tawng chhuakin, enge thil awmzia ni ang? khawnge midang ho kha ni ang? a han ti a, Huala lahin engmah hre bik hek lo le, lo thleng sela engkim a hriat mai ang a lo tisam et thung a, Piangliana ten an bul an rawn thlen chuan, enge thil awmzia? khawnge midang? Huala chuan a lo tivat a, Lal In lamah kal nghal phawt ang u, Zailawman a lo tih daih si avang chuan Huala-te pawh chuan engmah an zawt lui duh bik ta lova, Lal In lam pan chuan Khaw chhung lam pan chuan an inzui ta nghal a.
#Lal In an thlen chuan Lalnu Biakthangi chuan Mei a lo nun mek a, Kawngkapui atang chuan, Lalnu chu luh an han dil a, Lalnuin luh phalna a pek rual chuan Pen lut nghalin, Lalnu Lalpa hi a la mu emni? Piangliana chuan a tinghal zat a, aw, lo thu rawh u kan kaitho ang e tih leh pindan lam pan chu Biakthangi chuan a rual ta nghal a, rei vak lo hnuah chuan Lal Savunga-te nupa chu rawn inzui chhuakin, a tlangval-te vartian mai a an hmu thut chu mak a tiru hle a, hmai-te a phih fel hnu chuan, a Tlangval-te hnenah chuan, enge ni ta? zing thang thangah-te in lo luh tak mai ka In-ah-te a han ti a, Zailawma chuan lo chhang vatin, Lalpa thu hmanhmawh thlak tak keng a lo kal kan ni a? tunah hian kan Val upa Thanzika chu hliampui tuarin a awm mek a, tin, Zamawii pawh chutiang tho chu a ni e, Tlangval kan tam loh avangin tlangval dang rawn kal belh turin u Kapzelan a beisei deuh che a ni a han tinghal zung zung a.
#Lal Savunga chuan, Zamawii chu inhmu leh a maw? khawi lam khaw thil tih nge ni a han ti a, Aw, Lalpa kan hmu leh ngei a lawm tunah chuan kan kutah a awm tawh e, Daizo khua a nih kan ring ber mai, tiin Piangliana chuan a lo chhang a, hetih lai hian, upa ho pawh tuk thuan ei hma tiin an lut ve tan mek bawk a, Zing khawvar leh ni eng lawmin tual laiah te chuan nopang an chiar nak nak tawh a, nula then khat pawn tuikhur lam an pan sang sang hlawm bawk a ni.
#Lal Savunga chuan, Tlangaupa kan tlangval-te hi an chhawl a hal lutuk ang e, hah Zu lo chhawp sak ta che a han ti chu Tlangaupa pawh chu phur takin a che ve nghal zung zung a, .
tlangaupain Zu a rawn pek chu tlem te te a lo in liam liamin, an han fak pah liam liam hlawm bawk a, lal Savunga chuan, engtinnge Thanzika-te chu tunah an awm? a dinhmun a tha lo viau a maw? a han ti leh a, Piangliana chuan lo chhang vatin, kan lo chhuah dawn kha chuan ni khaw hre lovin a awm mek a, nizan kan liam ta kha, Lo kan zu thlen thleng pawn eng harsatna mah kan tawk lova, Thlamah pawh u Kapzela a lo awm tak si lovah chuan tiin Lui te lam pan nghal chu u Thanzikan tha ber a a hriat avangin lui lam chu kan pan ta nghal a, lui kawr kan thlen chuan Thisen lo buakna ni awm tak chu kan hmu ta reng a, mihring hnuhma kan hmu tel bawk a,, kan han belh chian chuan hnu chu lui mawng lam pan a kan hriat avangin Lui mawng lam chu kan zawh thla ta hlawm a, Thui fe kan zawh thlak hnu pawh a engmah kan tawn tak loh avangin remruatna dang chu u Thanzika chuan a nei ta a, chutia a remruatna-te a sawi lai mek chuan, Lui kawr atang a hlam nga bawr vel a mi pathum ni awm vel hniak hi Hnuna Zung tur han kal fal chuan a hmu ta hlauh mai a, u Thanzika chuan a huhova kal tawh loh chu tha a a hriat avangin kan insemdarh ta hlawm a, kan Ram chhung a ni tawh lo bawk nen fimkhur takin kan kal a, hei Zailawma nen hian kan inkawp nghe nghe a, u Thanzika kha chu Bula khan a zui ta a nih kha, tiin an mei eng hmuh dan leh an inkah dan zawng zawng chu a hriat ang ang chu Lalpa chu a hrilh ta vek a, u Kapzela kha chu engtinnge kan kiangah a lo tel ve ka hre hauh lo mai tiin a thu sawi chu a tlip zui zat a.
#Lal Savunga chuan, Tlangaupa mipui han ko khawm rawh le, tiin engdangmah sawi lo chuan a ding hluaia, Tlangaupa pawh chu a chhuak ve nghal bawk a.
#Lal leh upa-te pawh chuan an zui chhhak ve nghal bawk a, tuibur hmuam da awm vel an nghah hnu chuan, mipui ho pawh chu Lal Mualah chuan an rawn tling hmur tawh a, mipui zi mur mur thawm chu Lal Savunga chuan zap daiin, a koh khawm chhan chu kimchang takin a han sawi a, tlangval sawmhnih vel Lo lam pan tur inruat nghal turin Val upa Hmuaka chu a tinghal bawk a.
#Damdiai Tlangval ho chu an thin a rim em em mai a, Daizo khua an nih zawngin an khua hal darh vek tur a ni an tihlawm a, Val Upa Hmuakan Lo lam kal tur a thlan zawh chuan Tukthuan ei te a hun hnai tawh nen, Mipui ho chu Lal chuan a tin tir nghal a.
#an sawi lawk angin, tlangval Lo lam kal tur ho chuan chaw-te fun sawk sawkin, kawtchhuah lam chu an pan nghal sang sang a, #an kim hnu chuan Val upa Hmuaka chuan, hei kan hriat angin kan khua a ralmuang lo hle mai a, chuvangin fimkhur takin kan awm tur a ni... Min enthlatu pawh an awm reng maithei a, chuvangin, engpawh tawk i la kan zam tur a ni lova, amaherawh chu, thinrim luatah bawh buan buan loh tur a ni.a han ti dap dap a, tlangval ho pawn lu an lo bu nghauh nghauh hlawm a, chutah Val upa Hmuaka chuan kal tawh ang u le, a rawn tih chhunzawm zat a, Lo lam chu an pan ta nghal a.
#a tam zawkin Silai an ken avangin thlamuang tak, fimkhurna hlauh chuang si lovin hmalam an pan zel a, feh kawngah-te chuan eng khua nge ni ang tih te chu an sawi pah nak nak hlawm bawk a, Nau riltam velah chuan Kapzela-te lo chu an thleng a, ram lam a mi ho pawh Kapzela-te thlamah an lo inzawn thleng vek tawhin, a tihzia an titlang hle hlawm a, Thanhlira chuan, u Hmuak hei Tlangval kan indaih lo deuh avangin kan lo pun ta mai che u a ni inthlahrung tak hian a han ti a, Val Upa Hmuaka chuan, e kan khawmiin buaina leh harsatna an tawk a nih chuan kan vai buaina a ni, engkawngah pawh kan inpeizawn dial dial zel hi Damdiai khaw tih tur a ni a, kan Lalpa duh dan pawh a ni... Tiin a lo chhang a, Hmuaka bawk chuan, kan hahdam tlan tawh chuan chaw Fak nghal zung zung i la, hei kan mi hliam neih-te hi khaw lam kan pan pui ran a ngai a nia, a han tih zawm nghal zung zung a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 31st, 2019, 5:49 pm

DORAL HRANG MAHSE. *Zawntea Chhangte the Red Devils*. Episode (5) Tlangval ho pawh chuan an chaw fun-te chu thetin an bar nghal mawlh mawlh hlawm a, hmeh mumal awm lo mahse, puar tak chuan an ei hlawm thova, an hun tawnin a zir lo bawk nen tlangval sawmthum rual zet mah nise an thawm a reh em em mai a, fiamthu han thawh tum pawh an awm lo a ni.
Chaw te an ei kham a Vaibel te an han zuk zawh hnu chuan, khaile kal insiam dawn ang hmiang, Val upa Hmuaka chuan a han ti a, Tlangval ho chu phur takin an tho nghal sang sang a, Val upa Hmuaka chuan, dimdawih takin kan kal pui dawn nia, a han ti leh a, Hlangah chuan Zamawii leh Thanzika chu an zawn ta a, thlam chu chhuahsanin khaw lam pan chu an pan ta a, Kapzela chuan a nupui zawnna hlang chu chang duh lovin, an val upa Thanzika zawnna zawk chu a dawm chat a, midangin chhawk an tum pawhin a tawlh san duh der bawk si lo, chhawk ka ngai love, midang kha an hah zawk ang e a lo tifel et zel mai bawk nen, tumah chuan an nawr lui bik ta lova. Hmuaka leh Thanhlira chu a hnung dawltuah an tang a, zawn ve an tum lahin Tlangval ho chuan an phal bawk si lo, a hnung in lo dawl khan kan hahdam zawk an lo ti mai zel bawk si nen, tum luih loh chu a tha zawk a an hriat avangin, an hnung dawltuah an tang ta mai a ni, Hmuaka chuan, U Thanzika chu a beiseiawm lo riau mai ka ti zawi sap chuan a han ti a, Thanhlira chuan ni ngawt mai, a hnute dinglam a thin chung deuh a ni a a Silai mu dawnna kha, a fuh chiang e mai a, keipawn ka Rilru dik takah chuan ka beisei sang bik lo khawp mai a lo ti ve bawk a, eng eng emaw sawi chuan an hmalam chu an pan ve zel a, Tlangval ho pawh chu chau hman lovin an intakkual zel bawk nen, tumah chu chauin an awm hman lo hrim hrim a, Kapzela erawh chu tuman nek sawn thei hek lo le a la zawn ngar ngar thung a, mahse chau leh hah hmel reng a pu lo a ni.
# *chutia thui fe an kal hnu chuan khua pawh chu an hnaih ta khawp mai a, Hmuaka chuan Tlangval ngal chak tur deuh a a rin pahnih chu khaw lam a chinchang lo han thlen turin a tir a, midang-te erawh chu muangchangin an kal ve zel thung a, Kapzela chuan thil tam tak a ngaihtuah pah a, an Val upa Thanzika chu an chhungkua vang a hliampui tuar a ni tih te a ngaihtuah pah nauh nauhva, a hlang zawn pawh chu a lo kal chak deuh a ni tih reng a inhre lo, chutia muk tak a inngaihtuah a a kal hmawk hmawk lai chuan, a hnung a hlang zawn ve pakhat chu lei thilah chuan a tawlhthlu thelh a, midang hovin an lo dawm hman hlauh a, a tlu na hman lo a ni, Kapzelan chu chu a hmuh chuan inngaihtuah harh zawkin thupha chu a chawi nghal mawlh mawlh a, Thanhlira erawh chuan a thianpa rilru tur chu a hriatthiampui em em thung a, Kapzela chu pan hnaiin. Thianpa ka lo chhawk ve tawh ang che a han ti a, Kapzela pawh chuan hrethiam takin a thianpa chu a lo kian ve mai bawk a, Kapzela chu hmahruaituah tangin kal chu an siam leh nghal a, rei vak lo hnuah chuan khaw kawtchhuah chu an thleng a, Khaw lam a tlangval lo awm ho chuan Hlang zawntu-te chu an lo chhawk nghal zung zung a, Khaw mipui ho pawh kawtchhuahah chuan an lo awm teuh hlawm a, Lal leh upa ho pawh an bang bik chuang lo a ni, Hmuaka chuan, An mahni In lamah zawn nghal turin a han ti a, tlangval ho pawh chuan hmuaka sawi ang chuan Kapzela-te In leh Thanzika-te In lamah chuan an kal pui ta nghal a, Bawlpu pawh Thanzika a ngaihtuahawm zawk avangin hmuaka chuan Thanzika-te In lam pan turin a rawn nghal a, Bawlpu pawh chu a liam ve nghal zat bawk a, mipui ho pawh inthendarhin, Thanzika-te In a kal pawl leh Kapzela-te In lam pan pawl chu an awm bawk a, chutia Mipui an kal darh hnu chuan, tiru le keini pawh i phei ang u hmiang lalsavunga chuan a han ti a, kal a rual ta nghal a, midang pawh chuan an zui ve nghal bawk a, In an thlen chuan tlangaupa chuan hrilh ngai lovin zu a lo dawm tir liam liam hlawm a, nimahsela, tumah chu han tawng chhuak mai pawh an awm lova, chutia ngui nghiai a an thut lai chuan, Tlangval pakhat hi hmanhmawh zet hian Lal In-ah chuan a rawn tlan lut a, Lal Savunga chu lo inngaihtuah harh vatin, Tlangval enge ni ta? i va hmanhmawh buan buan ve a lo tivar a, Tlangval chuan thaw hlawi hlawi pahin, Lalpa... u Thanzika... a ti a a sawi zawm maithei lova... Tuisik-te an han pe a an hahdam tak deuh hnu chuan, Tlangval, Thanzika chu engtin maw? Lalsavunga chuan a han ti a, Lalpa u Thanzika chu a tha lo zual khawp mai, tunah hian a hnuk pawh a chat tawh maithei a ni a han ti a, Lal In chu theh hmeh ang mai chuan.a reh nghal vawng vawng mai a, tlangval pawh chu a hrilhhai hman lek lek a, chutah inngaihtuah harh nghal thuaiin, Lalpa ka kir leh mai aw, khulamah min lo nghak si a, a han tih chuan Lal leh Upa-te chu lo harh chhuak zawkin, zu kal tawh khaai, kan lawm lutuk e Lal Savunga chuan a lo ti a, tlangval pawh chu Thanzika-te In lam pan chuan a chhuak ta nghal a, Lalsavunga chuan, hawh teh u, Kan Val Upa Thanzika-te In lam chu i zu pan ve ang u hmiang a han ti a, Upa ho pawh chuan lo hnial lovin, Thanzika-te In lam pan tur chuan Lal In chu an chhuahsan ve ta nghal a*.
🍂🍁🍂🍁🍂..
Kapzela-te In lamah pawh chuan mi then khat chu an la awmkhawm laih hlawm a, Zamawii pawh ngaihtuahawm lutuk a ni tawh lo bawk nen, Zanriah bawl hunlai a ni bawk si a, nu ho chan an mahni In lam an pan hlawm nual tawh a, Patling thenkhat leh Nula Tlangval tlem a zawng chauh Kapzela-te In lamah hi chuan an awm tawh a ni.
Zamawii khuma mu reng kiangah chuan Dailova chu.a thu ve ran mai a, a nu tawng tha peih lo chu a la be sek leh ta nghal a, ngaihdam-te a han dil leh mawlh mawlh thul, mahse a fapa biakna chu ngaihthlak liam sak mai lovin Zamawii chuan a lo chhang ve hram hram zel a, mahse a rei tak deuh hnu chuan Zamawii chuan Dailova biakna pawh chu chhang peih lovin a lo muthilh san daih a, he tihlai hian Thanzika-te leh patling thenkhat chu an lo titi ve laih laih bawk a, chutia an lo titi laih laih lai chuan, Thanzika.a boral thu chu Tlangaupa chuan a rawn hrilh a, Kapzelan chung thu a hriat chuan a thinur thar leh em em mai a, a rilru chuan, U Thanzik, i Thisen hi a thlawnin a luang lovang, phuba ka lak hma chu ka chawl lovang a timawlh mawlh a.
pa ho leh tlangval ho pawh chu Thanzika-te In lam pan chuan an liam nghal duak a, Kapzela chuan han kal ve nghal mai chu duh mahse, a nupui lo buaipuitu an awm bawk si lo, chutia rilru inkhap inkhap a a awm lai chuan, a thianpa Thanhlira nupui Lianpuii chu a lo lut hlawl a, u Kapa chu U Thanzika-te In lamah i la chuangkai ve nange? a rawn tilut nghal bawrh bawrh a, Kapzela chuan Zamawii chu melh zauh pahin, lo awmpuitu an awm si lova, han kalsan...
a tihman awrh tuhah chuan, khai khai va kal rawh va kal rawh Ka lo awmpui a nge Lianpuii chuan a lo tivat a, Kapzela pawh chuan hnial buai lovin ngaihtha tak chuan Val upa Thanzika-te In lam chu a pan ve ta nghal a.
Kapzelan Val upa Thanzika-te In.a va thlen chuan mipui chu an lo zi hut hut hlawm a, Lalpa chuan Thanzika chu phum nghal turin a lo ti mek bawk a, Tlangval ho pawh chu Thlan lai tur chuan an liam nghal a, Lalpa chuan thu a han sawi a, hei kan khawtlangin ral kut kan tuar a, kan khawtlang pawh a ralmuang lo takzet a, chuvangin, kan Val upa Thanzika pawh a rang lam a phum mai tha a, kei leh ka upa ten kan hriat avangin, kan phum dawn ta mai a ni a han ti a, Lalpa chuan sawi chhunzawm zelin, kan Val upa chhuanvawr, kan Pasaltha ni bawk Ral kut a a han thamral mai hi hriatthiam har ka ti takzet.a ni, a han ti a, Sawi zelin, kan val upa Thisen hi a thlawnin a luang tur a ni lova, khawi khua pawh ni rawhse, phuba kan la ngei ngei ang a han ti a, a duh chu mahni In lam a pan theih tawh tih a sawi nghal bawk a, a upa ho chu hui zauhvin ama In lam pan chuan, Thanzika-te In chu an chhuah san ta nghal a..
Lal leh Upa ho an liam hnu chuan Tlangval ho chuan Thanzika Ruang chu zawnin a thuk thei ang ber a tlangval hovin an lo laih Thlanah chuan an phum ta a, tu te mai pawh chuan an ui em em a, an Ralrel thiam tak mai a han boral mai chu hreawm an titlang takzet a ni, chutia Ruang an phum zawh chuan a tam zawk chuan an mahni In lam an pan sang sang hlawm a, Thanzika-te chhungkhat hnai vai te erawh chu Thanzika-te In lamah chuan an la awm khawm thung a, Kapzela pawh chu a la thu ve ran bawk a, an mahni chhungkaw vang a thil thleng chu pawi a tih zia chu Thanzika pa, upa ve tawh tak mai, Thangkhuma chu a fah mawlh mawlh a, Pu Thangkhuma chuan, ekhai Vala, mipa fa chuan dam reng tur a indah tur a ni ngai love, Thanzika pawn a duh ang ngeiin a khawmi tan a nun a chan a, a Thlarau pawh a hlim viau ta ve ang, tin, Kei a pa ngei pawh hian, fapa-te mahnise ka chhuangin ka lawm takzet a ni a lo ti ve bauh bauhva, Kapzelan pu Thangkhuma hmelah chuan a timai mai lo a ni tih a hria a, a ruk tak chuan a ngaisang rilrh hle a, Kapzela chuan, ni e, kan Val upa chhuanvawr a nih piah lamah, keima tan tak phei chuan, a hlu leh zual a, amah avang hian finna tam tak ka chhar a, min liamsan hma lutuk hi chu hriatthiam har ka ti a ni, a Chal dawm vawng vawng pah chuan a han ti a, pu Thangkhuma chuan, Vala inthing harh thuai tawh khai, Pasaltha chuan a tawrhna-te chu na viau mahse, a hliam-te chu thuk viau mahse, a inrah beh tir duh lova, amah tichaktuah leh tichheltuah a hmangthiam zawk thin a lo ti a, chutia eng eng emaw an sawi hnu chuan khua pawh a lo tlai tawhin Zanriah ei a lo hun a ni reng ta mai a, Kapzela pawh chuan an mahni In lam a pan ve ta a.
Kapzelan an In a va thlen chuan Lianpuii pawh a lo la awm reng a, Thanhlira a lo thu ve bawk a, Kapzelan In a luh rual chuan Thianpa chu lo leng thu rawh khai, puithu zet hian Thanhlira chuan a lo ti a, Kapzela chuan nupui-te Puantlang dek lo chuan i awm thei lo a nih hi maw, tiin a fiam let ve nghal zat a, chutia an Thian dun infiam chuan an nupui-te chu a nuih tir hawk hawk a, Lianpuii chuan, u Thanhlir i phei ang hmiang zanriah ei pawh a hun tawh hi maw a han ti a, Thanhlira chuan, thianpa Zan lam chu Lal-in lengah min sawm a, ka rawn sawm phei dawn che nia, a han ti a, Lianpuii melh zauh pah chuan, titawh i tin ang hmiang a han tih zawm zat a.
Thanhlira-te an chhuah hnu chuan Zamaawii chu Kapzela chuan thut hnaih nghal thuaiin, enge a lo an tih-te chu a pang deh sak pah chuan a han zawt a, Zamawii chuan Bawlpu a lo kal thu leh damdawi eng eng e maw a hnawih sak thu-te chu a lo hrilh a, Kapzela chu hlim viau mahse, a nupui hmel a inthiam lohna leh inthlahrunna lang chu a hmuh hmaih hauh lo, Kapzela chuan engmah chutiang lam erawh chu a sawi chhuak duh miah lo thung a, Kapzela chu harh chhuak thutin an titi melh melh lai chuan Tap lam chu a pan nulh a, mei nun a tum lai tak chuan, Lianpuiin a bawl vek tawh tih Zamawii chuan a rawn hrilh a, Kapzela chuan inthlahrunawm viau mahse a va lawmawm tak em a ti sap a, chaw ei chu a siam nghal zung zung a, Dailova inthiar zo pawh chu lo lut ve chiahin, chaw chu a rawn kil ve nghal zat a, chaw an ei lai chuan, Kapzela chuan a Fapa Dailova chu a zilh mawlh mawlh a, aia upa zah tur-te, thian-te zing a tlawmngai lo leh tuanfum bik a tang lo tur leh, hmeithai leh michhia-te hmusit lo tur leh tanpui an ngaih ang zel a tanpui tur-te chuan a fuih mawlh mawlh a, engkawngah pawh nise, fimkhurna hlauh ngailo tur chuan a fah zawm zat bawk a, chutia an pafa a an lo inzilh mawlh lai chuan Thanhlira chu a rawn lut a, Kapzelan Thanhlira a lo hmuh chuan, lo lut tawh khai, nu ber theih loh atalangah kan tlai ta a nih hi maw a lo tinghal zung zung a, Zamawii pawh Dailovan ka lo buaipui mai ang e a tih avangin Kapzela-te chuan Lal-In chu an pan ta nghal a.🍁🍂🍁🍂🍁.
Daizo khaw lamah pawh chuan zanriah mi nawlpui chuan an kil zo tawh a, Lal ngurdawla pawh a zu no dawmin a inchhungah chuan a inhrosa vei kuk kuk a, Hetih lai mek hian a upa ho pawn Lal-in chu an rawn chuangkai ve mek hlawm bawk a, Lalnun tuibur al a rawn pek chu an lo hmuam sak liam liam hlawm a, chutah a Upa pakhat chuan Lalpa, kan Tlangval-te chu zanin lamah chuan kan beisei ngam tawh ang chu maw? a han ti a, Lal Ngurdawla chuan Hei vawiin hi a ni rukna a ni tawh a, zanin a nih loh chuan Naktuk lamah zawng ka beisei tawh khawp mai a lo ti a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 4th, 2019, 7:30 pm

DORAL HRANG MAHSE, *Zawntea Chhangte the Red Devils* episode (6).
Chutia an titi melh melh lai chuan an luhkapui rirak chuan an titi kal lai chu a titawp chiang khawp mai, Luhkapui lam a an Mit an len thap lai chuan, a khaw tlangval Vunga chu a rawn lang hlawl a, Lalpa ka lo lut thei a ngem? a rawn tinghal zat bawk a, Lal Ngurdawla chuan, lo lut tawh khai, enge i duh tak le? Dam deuh hian a lo ti a, Vunga pawh chuan chutia luh phal takah chuan lut ve nghalin, Lalpa Lalngurdawla chu a pan ding nghal zat a, Lal ngurdawlan amah lo pan hnai mektu tlangval a hmuh chian meuh chuan, chawp leh chilhin a hmel chu thinrimnain a inthlak nghal a, Lal Ngurdawla chuan, khawnge i thian-te kha an awm? a lo tinghal khur khur mai a, mahse Vunga hian an lal mizia a hriatchian ve em avangin Kalkawngah an Lal hma a insawifiah dan tur chu a ngaihtuah fel vek tawh a, a lo rinlawk ang ngeiin an lal Lal Ngurdawla chu a lo teu kher maile!!!.
Vunga chuan Zam map lo hian, Lalpa khatia kan chhuak ta kha harsatna tawk lovin Damdiai ram chu kan thleng thei a, kan thlen hun kha tlai ni tlak dawn a ni tawh nghe nghe a, Buk-te sualin kan buai nghal sang sang a, Pahnihin eirawng an bawl thung a, Damdiai ram chhung a nih avangin u Taian ram chhuah tawh loh mai chu a rawt a, u Taia thu ang chuan keinipawh kan awm ta hlawm a, heta kan mei chhemna pawh hi U Taian a duhna hmun tak a ni nghe nghe a, Chumi zan chu kan riak ang a, a tukah a theih ang angin hma kan la dawn nia, tiin chaw kan ei lai chuan u taia chuan rem a ruat zung zung a, chaw-te kan ei kham meuh chuan khua chu a thim tawh khawp a, tih tur a awm lem loh avangin Mei lum kil bialin titi eng eng emaw kan vawrh a, zan a rei deuh hnu chuan mut kan tum ta a, chutia mut tum a kan intintuah lai mek chuan Ral ho chuan min rawn bei ta thut mai a, inthawn thut a nih avangin kan chiai thelh a, mahse u Taia hnunglam a a tawlh chu ka hmuh chuan ka umzui vat a, midang ho kha chu khawnge an tlan ve pawh ka hre hman lo a, U Taia chuan hmahruai la, hnung ka lo dawl ang e a ti a, hma chu ka hruai ta nghal a, Silai mu chuan kan bul vel chu a la rawn deng dawt dawt reng a, u Taia pawn a chhawn ve zel bawk a, Damdiai ram kan chhuahsan tep tihah chuan ka hnung a rawn kal u Taia chu an rawn kap fuh ta mai a, buaipui tur a ka tlan let chuan, a rang thei ang ber a khua lo pan tur leh, kan thian-te ho chu an thih vek tawh thu chu min hrilh a, Silai hmet puak tawh lo tur leh hmanhmawh tak a i beng rawn thlen turin min ti a, han hnial viau mah i la, nang tal i him loh chuan kan Lal leh upa-te an hawihai rei lutuk ang min ti a, a thusawi chu ka ngaihtuah ngial hnu a, dik a ka hriat avangin ka tha chu thlahdulin, khaw lam hi ka rawn pan ta nghal a ni, a han ti a, tak a, Damdiai khua chu dingchhuak leh ngailo turin ka phuba lak nan inrawn chimih dawn nia min ti tak a sin, tiin a thusawi chu a han tlip a, chung thu a han hriat meuh chuan Lal Ngurdawla chu a thin a rim thar leh zual em em mai a, a chhuatlaiah chuan vei tawn sekin a inhrosa tun tun mai a, a lo in luhai sek vei tawh nen, a tawngkam chhuak chu a chhe em em mai a, a upa ho pawn han khap tum teh mahse, ngawih mai chu harsa a ti takzet a ni...
Lal ngurdawla hian vunga thusawiah hian dawt a tel a nih tih hria nise Vunga chung chu a pik ngawt ang le. Lal Ngurdawla chuan, Tlangaupa rang takin ka Pasaltha leh tlangval ho han ko thuai tawh, a han ti a, Tlangaupa pawh chuan lal In chu rang takin a chhuahsan nghal a, a Tlangval leh pasaltha ho an lo thlen khawm hnu chuan, thil thlendan zawng zawng chu chipchiar takin a han sawi a, Lalin thu a sawi zawh chuan, Daizo Pasaltha chhuanvawr, Lal Ngurdawla pawn a chhuan tak mai Doruma chuan, Lalpa, tihian ka ngaihdan ka han sawi hmasa mai teh ang, Naktuk hi inpuahchah nan hmang ta i la, Naktip lamah chhuah kan tum mai dawn emniang? a han ti a, midang ho pawh chuan an pasaltha remruatna chu a tha an tih thu chu an sawi ve liam liam bawk a, upa pakhat chu lo tawng chhuakin, Lalpa, kan Tlangval-te pawisa lo tak a min thah sak duhtu khua hi haw viau mah i la, khawlian tak an ni lova, tlangkam atang a ka lo hriat dan phei chuan, In Zahnih bawrvel chauh an ni awm e, chutiang a nih chuan, kan tlangval zawng zawng tirh chhuah hi enge a tulna? Khaw lam pawh hi a ngaihtuahawm ve tho lo maw? a han ti a, Lal Ngurdawla chu.a han ngawi vung vung a, chutah lo tawng chhuakin, Kan khuaah hian Tlangval Zanga dawn ka nei a, chutiang khawp chuan ka khua hi huphurhawm kan ni ve in ka hria a, min hrechiang lo tu tan kan pawi khawih hi a hlauhawm loh a ni mahna, kan inhriatchian tir ang a, Daizo khua hian pasaltha leh Tlangval tamtak a nei a, an pawi khawih chi a ni lo ti a, an thlah-te thleng a min hriat a min sawi zui zel theih nan, ka tlangval raldo thei chin zawng chu Naktipah kan sawi tawh angin, Damdiai khaw lam panin an chhuak tur a ni, a han tih meuh chuan Tlangval ho chuan kut an beng hluah hluah hlawm a, eng eng e maw an sawi ho leh hnu chuan Lal-In chu an chhuahsan ta hlawm a.🍂🍁🍂🍁🍂🍁.


Damdiai Lal Inah chuan Kapzela-te thiandun chuan Lal Savunga koh chhan ngaichang chuan an thu ran tawh a, Lal Savunga chuan, Khawi khua nge an nih a i han rin deuh le? tiin Kapzela chu a han zawt a, Kapzela chuan, Lalpa, keimah tak chuan engmah ka tawngin ka hmu ve hauh lo mai a, mahse kan nu khuan a hriat mai ka van ring em tiin a lo chhang a, Lal Savunga chuan, Tunah Zamawii chu a biak theih tawh emni? tiin Kapzela chu a han zawt leh a,, kapzela chuan aw, tunah chuan a harh tawh khawp mai tiin a lo chhang a, Lal Savunga chuan, chutiang a nih chuan a rang lamin Zamawii chu biak a ngai a nih chu, khawi khua nge tih pawh hre lova kan awm reng zawngin kan buai phili lutuk a nge, rei an rial in ka ring hauh lo leh nghal a han ti a, chutah upa Zabiaka chu lo tawng ve in, Lalpa, Daizo khua kan rin hi lo dik ta nise, engtia hma han lak tur nge maw ni ang le? tiin a han zawt a, Lal Savunga chuan, Hei ka Pasaltha-te remruat dan dan hi a ni mai a lawm, Kapzela-te thian dun melh pah chuan a han ti a, Thanhlira chuan, Lalpa kan Val Upa Hmuaka han tel ve se a nin rem tha zawk a hre lo maw? a han ti a, Lal Savunga chuan ani tak maw? tlangaupa nang Val upa Hmuaka chu han ko ta che a tinghal zat a, tlangaupa pawh chu a chhuak nghal bawk a, Upa Zabiaka chuan, Lalpa, chutia Zamawii a biak theih chuan kan beng Upa duha nen hian kan zu chhi dawn emni? a lo ti a, Lal Savunga chuan ka upa te nge nge inremruat a fing thin teh e, zu kal tawh u tiin a lo chhang a, upa Duha leh upa Zabiaka chu an chhuak ta nghal a.
Hetih lai hian Tlangaupa leh val upa Hmuaka-te chu Lal Inah chuan an rawn inzuilut ve mek bawk a, Thutna-te Lalnu Biakthangin a lo pe a, thut hmun an han remfel hnu chuan, Lalpa nang meuhvin min biak i duh tak le eng thil nge ni ta? a han ti a, Lalpan thil awmzia a han hrilh hnu chuan Val upa Hmuaka chu a phur nghal khawp mai a, Lalpa Daizo khua hi khaw lian tak mai an ni a, Pasaltha pawh an taminn an tawrhhlelhawm khawp e an ti a sin, a han ti tete a, sawi zelin Vunga chuan, mahse Lalpa tam leh tlemah hnehna hi a innghat ber lova, huaisenah-te, rem hriatah-te a innghat tlat a, chuvangin zam lova huaisen tak a kan lo hmachhawn a tul dawn a ni a han ti dap dap a, Lal Savunga chuan, engtia lo hmachhawn nge tha ang le? tiin a lo zawt khauhva, Hmuaka chuan, Lalpa Tlangval pangain naktukah kan an inbeihna hmunah khan enthlak hna thawk ni pahfawmin hmelma lo kal hun lo ngaichang sela, midang zawngin khua hi kulh a kan hung a tha ka van ti em, tichuan, Ram lam a kan mitirh ten chanchin eng e maw an hriat veleh khawlam rawn hrilh hre nghal vat bawk se, a han tih zawm leh zat a, upa Dova chuan, Hmuaka Tlangval panga lek maw tha a i rin a? a lo ti a, Hmuaka chuan, aw ni e, raldo tur pawh an ni lova, engtikahnge ral ho an lo kal dawn lah kan hre hek lo, chuvangin panga tir i la tha ka ti a ni a han tileh a, hetihlai hian Zabiaka-te pawh an rawn lut ve leh tawh a, Kapzela chu lo tawng chhuak vein, Lalpa val upa Hmuakan a sawi ang a Daizo khua hi an tam a nih chuan, khua hi kulhin hung vek i la, Tlangval Sawmthumin khua chu veng tase, midang zawng chuan insemdarhin ram lamah lo lambun kan lo tum dawn emni ang? a han ti a, Lal Savunga chuan, nui vur vur pahin rinthuin ro kan rel thui ta e, upa Zabiaka melh pah chuan a lo ti a, Upa Zabiaka pawn lo hrethiamin, Lalpa, kan rin chu a dik e, Daizo khua ngei an ni e a han ti a, chutah Upa Zabiaka bawk chuan, Lalpa Kan Pasaltha Kapzela ngaihdan kha kei ka pawm zawng tak mai a ni mai a, Daizo khua hi tlangval leh Pasaltha an tam avangin khaw bul hnai a lo lambun chi a ni lovang,, chuti lo zawng mihring kan intam hleih dawn si a, kan ven hneh loh apiangin khua an rawn luh chuan, pawisak an nei tawh lo bawk nen, min chimih rang lutuk ang a han tih zawm zat a, Lal Savunga chuan, chutiag a nih chuan Naktukah kulh hungna tur chak lakkhawm nghal tur a ni a, tumah kan awlbik tur a ni lo a han ti a, Lal Savunga bawk chuan, Tlangaupa naktuk zing Tukthuan ei khamah Lal Mualah kal khawm tur a ni tih va tlangau nghal ta che a tih zawm zat a, Tlangaupa chhuah hnu chuan, Kapzela-te thiandun pawn Lal-in chu an chhuahsan ve nghal a.
hetih lai hian Thir dengpa Fanu Saii inleng Tlangval ho pawh an thawm a tha khawp mai a, Rotlinga chuan fiamthu a han rawlh sek mai nen, Raldo tur leh Lusun hlim e ti lo chuan an rilaih laih reng a, Thenkhat chuan an nuih tawp ber zan a ni tih te, an nula rim tawp ber zan a ni tih-te chu an hre der si lo, chutia hlim tak a an nuih bawk bawk lai chuan, leng hawn ar chu an rawn khuang ta chuah chuah a, tumah chuan hawn a hun tawh tih chu inhrilh nawn a ngailo, Zawlbuk lam pan chuan an chhuak ta sang sang hlawm a, Tlangval hovin Zawlbuk an thlen kim chuan Val Upa Hmuaka chuan an Lal-te nen a ro an rel dan chu a han sawi zung zung a, thu a sawi zawh chuan tuman bengchheng siam zui lovin an mu ta hlawm a, Ralveng tur mipahnih pawh an ralvenbuk lam panin an chhuak ve nghal bawk a.
#a tuk khua a lo var chuan dai hnai thingkungah-te chuan Sava an chiar leh nak nak a, naupang tuallai a infiam-te pawh an hlim khawp mai a, nula buh deng thawm-te chu a ri tluk tluk hlawm bawk a, a then lahin tuikhur lam an pan hlawm bawk a, hemi tuk pawh hi tuk dang nen an hun hman dan a danglam chuang love, ni a lo tlangsan deuh hnu chuan naupang infiam ho chu nu ho chuan tukthuan ei turin an ko haw hlawm a, chhungtin ten tukthuan an ei kham hnu chuan Zan lama tlangaupain a lo au tawh angin, Lal Mual lam chu an pan sang sang hlawm a, Lal Savunga leh a upa-te ho titi pawh chu pawn lama mipui thawm avang chuan an tawp lo thei ta lova, Luhkapui lam chu an pan ta zawk a, Lal Savungan mipui bengchheng lutuk chu zap daiin tihian thu a han sawi ta a, Ka khua leh tui duh tak-te u, kan hriat theuh angin ralin min rawn hnaih khawp mai a, chuvangin keini pawh kan lo awm mai mai a thiang lova, bei let turin kan lo inpuahchah nghal tur a ni, tlangval hovin Kulh hungna tur thingtuai leh a tul ang ang inla khawm ang a, patling hovin an lo pui bawk ang che u, tin, beih tawk thut thei kan ni tih hriain, kan ralthuam-te lak awlsamin kan kiang hnaiah kan dah dawn nia a han ti a, thu eng eng emaw a sawi belh leh hnu chuan, mahni hma a tla theuh ti turin a kal darh tir ta hlawm a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)