DORAL HRANG MAHSE BY *Zawntea Chhangte the Red Devils* (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: DORAL HRANG MAHSE BY *Zawntea Chhangte the Red Devils* 1 - 30

Unread post by Ngaia » May 28th, 2019, 6:39 pm

DORAL HRANG MAHSE.
thuhma, ka reh rei vang vang hle mai, a chhanchu ka type sa a bo vang a ni a, ka thinrim bakah ka hnual, )down( lutuk a chuvang a ni, tun atang chuan rawn regu deuh ka lo tum leh tawh ang.
DORAL HRANG MAHSE.
*Zawntea Chhangte the Red Devils*.
Bung )31(









Vartian Leilung pawh a la lang chiang thei lo tih awm velah chuan Huala chu a Ek chhuak avang chuan a mutui lai chu a harh hlawl mai a, rang tak a tho chhuak nghalin, a mut bu te chu a han tumtel nawk nawk a, tichuan Dai lam panin a kal ta nghal a, a duh thal a a inpaih thawl hnu chuan a thlenin lam panin a kir leh ta hnak hnak a, a inthiar rei deuh nge ni, Khua a luh chuan Khua pawh a eng uar tawh a, midang ho pawh chu an lo tho tawh hlawm a, Sumhmunah te chuan Buh deng thawm a ri tlat hlawm a, Hualan Lal Inkawt a han thlen chuan Remsangi Tui chawi tur nen chuan an intawk a, chutah Remsangi chuan, kha Zing thang thangah khawiah chuan nge i han kal bo a?) nui sen sen pah chuan a han ti a, Huala chuan, a ka pum lam fel loh luatah ka va daikala lawm mawle") a lo ti a, Huala vek chuan, i nu leh pa te an tho tawh em") tiin Remsangi chu a han zawt let a, Remsangi chuan, ka pa chu a la mu a, ka nu erawh chu a thawh tawh kha va lut rawh" a lo ti a, Huala chuan, nakin lawkah upa ho an rawn chuangkai leh emaw a ni ang a, a nuam duh lo e mai, pawi i tih loh chuan i tui chawi chu ka lo zui ve zawk ang che") a han ti a, Remsangi chuan, i peih a thu a ni mai alawm") nui var var pah chuan a lo ti a, tichuan Vengmawng a Tuikhur lam pan chuan an kal ta a, Tuikhur an zu thlen chuan Nula Tui chawi pa thum hi an lo awm a, an Lal Fanu te rawn kal an lo hmuh chuan Nula ho chuan an lo be sawk sawk hlawm a, Nula pakhat chuan, Remi, kha khawilam Tlangval nge i rawn hruai a?) a han ti a, Remsangi chuan, Damdiai Pasaltha Huala a nih hi, hei ka zun a phur laklawh ami hlat phal meuh lo a nih hi") a lo ti a, Nula ho chu an nui ar ar hlawm a, Tui te an thal zawh hnu chuan Khawlam panin an inzui haw leh ta dam dam a, titi bawrh bawrh pah chuan an kal zel a, thui fe an kal hnu chuan an mahni In lam theuh panin an inthen ta hlawm a, Huala chuan Remsangi nungchang leh chezia chu a lo thlithlai reng a, mi pangngai ang mai a, nula dang ten an be bawrh bawrh mai te chu mak a ti hle a, Lal te hi an inang vek lo ang bawkin, an fate pawh hi an inang vek lo a nih hi") tih te a ngaihtuah a, Remsangi chuan, tirawh keinipawh i kal ve thuai teh ang") a rawn tih chuan Huala chu a ngaihtuahna a ta chu a harh chhuak ve nghal a, tichuan In lam pan chuan an kal leh ta nghal a, In an va thlen chuan Lal leh a upa te chu Leikapuiah zing Ni lum aiin an lo thu thap mai a, Huala ten an bul an rawn thlen chuan Lal Dokulha chuan, Vala kan kiangah hian lo thu ve tawh, thil eng emaw han sawi pui duh che ka nei a ni") a lo tih chuan Huala pawh chuan lo hnial buai lovin a thu ve nghal mai a, Remsangi erawh In chhunglamah a lut nghal thung.
chutah Lal Dokulha chuan, Tlangval vawiin lamah chuan em ni hawn i tum tak?) Vawiin te chu la chawl hahdam vela mawle, naktuk lamah muangmarin i haw thei tho alawm") a han ti a, Huala chuan, Lalpa i mi duhsakna avangin ka lawm takzet a ni, amaherawhchu, ka intiam ni zat a ka thlen loh chuan ka nu ngaih a lo tha lo lutuk ang") a lo ti a, Lal Dokulha chuan a nih tak chu mawle, chuti a nih si chuan han uibeh ngam pawh i ni lo a nih chu") a lo ti a, Lal vawk chuan, ka thil pek che u lah inhnar fithlathak mai bawk si nen, Remsangi Pasal neih hun tal chuan i rawn kal ngei dawn nia") a han ti a, chuthu a hria chu Huala chuan mak a ti hle mai a, a rilru chuan amah leh amah chu a indem mawlh mawlh a, a rilru chu a na hle mai a, mahse engmah a hmelah chuan Lan chhuah tir a tum lo thung, chutia tawng mai nachang pawh hrelo a a ngawih vung vung lai chuan Lal Dokulha chuan, Remsangi Pasal nei tur chu mak i ti deuh em ni?) a rawn tih leh takah chuan Huala chu inthing harh vatin, aw ni e Lalpa, i fanu Remi hi a la Naupang viauin ka hre si a, Pasal a nei dawn i han ti kha mak kan ti deuh a lawm") a lo ti a, chutah Lal Dokulha chuan, a ni viau mai, amaherawhchu, Rangpui Lalpain a fapa nupui atan min rawn dil mauh mai a, Nimin lam khan an rawn thleng a,") a han ti a, Huala chuan a tawrhna te chu thup hram hramin, a nih tak chu mawle, chu, inlo rem mai hmel tihna a nimaw") tihpah chuan a han nui lui a, Lal Dokulha chuan, Nizan lam khan a thuphung chuan kan han sawi hova, thuthlukna zawng kan la siam hauh lo na a, harsatna a awmin ka ring lo a ni,") a lo ti a, Huala chu a rilru a na hle mai a, mahse han lanchhuahtir a rem si lo, chutah Huala chuan, chutiang a nih zawngin, rawn tel ngei ka lo tum ange, amah Remsangi tak pawh hi a hmel a thain a fel em em mai bawk si a, Rangpui Lal fapa pawh a vannei dawn khawp e") a han ti a, tichuan In chhung lamah chuan a lut ta a, Huala lo lut Remsangin a lo hmuh chuan Huala hmel chu a hlim lo hle a ni tih chu a lo hrethiam nghal a, chutah Remsangi chuan, Huala, engtizia nge i hmel a va hlim love?) ka pa te chuan eng thu nge an lo zawh che a?) a lo tivar a, Huala chuan, a Remi engdang sawi love, i Pasal neih hun a rawn kal ve ngei turin min ti a lawm mawle") a han tisap a, Remsangin chung thu a hriat chuan mak a tilutuk chu a meng kawk a, chutah Remsangi chuan, Huala chu a bul a pawh thut pah chuan, Min ring chhe viau em?) a han ti a, Huala chuan, ring chhe lah love, Lal fanu i ni a, i duh duh i nei thei a lawm") a lo ti mai a, Remsangi chuan Huala chu thu dik a hriattir hman loh chuan a tan Huala chuan bumtu tih bakin a hre dawn lo a ni tih a hria a, chutah Remsangi chuan, Huala, Nimin chuan Rangpui Palai te chu an lo kal ngei mai a, an lo kal chhan pawh ka hre ve mai a, mahse, ka tawn phat atang che khan i tan ka Thinlung ka hawng a, tichuan Nizan lamah ka hrilh ta nge nge che a nih kha, tin, Rangpui Lal hi ka hmangaih lova, a hmuh lah ka la hmu hek lo") a han tizung zung a, Huala erawhchu a lo ngawi reng thung a, chutah Remsangi bawk chuan, Huala min ring rawh, ka der lo che a, ka hmangaih che a sin") a mittui rawn hnam tiam tiam hruk zauh pah chuan a han ti leh a, Huala chu a buai kher mai, chutah Huala chuan, Remi, ka sawi tawh angin, ka tan i sang lua a ni, dik tak chuan, tun ang boruak hi a ni ang tih hre lawk ni i la zawng, hmangaihna thu kan thlung dun lo tur") a lo ti a, Remsangi chuan, Huala, i zam mai em ni?) nangnen a kan inkar a hmangaihna parvul hlim nau tak hi, hlamzuih leh mai tur chuan ka phal lo a sin, ka hmangaih che Huala, min ring lul rawh") a tih chuan, Huala chuan Remsangi chu a lo en kal a, a Mit mengah chuan Remsangi chuan a ti mai mai lo a ni tih chu a hrethiam a, Huala chuan, Remi... a sawi zawm dawn lai tak chuan pawn lamah chuan thawm a lo awm a, Huala leh Remsangi pawh chu an inthut hlat nghal vat a, an thu fel hman awrh tihah chuan Lalpa chu a rawn lut hlawl mai a, Remsangi chuan, ka pa, khawnge ka nu hi a kal a?) tiin a pa chu a lo be thuai a, Lal Dokulha chuan, i nutein nau a vei a an rawn ko a nih kha") a lo ti a, Lal Dokulha bawk chuan, Remi tukthuan i ei thuai mai teh ang u, i nu lah engtikahnge a lo haw dawn hriat a ni si lo, hei Huala lah hawn a tum si, i ei fel thuai teh ang u") a han tih zawm a, Remsangi chuan tukthuan chu a siam ta nghal a.
#puar tak a tukthuan te an ei kham hnu chuan Huala chu a insiam nghal mawlh mawlh a, Lal Dokulha chuan, Huala tluang takin va kal ta la, ka sawi tak ang khan, Remsangi pasal neih hun chuan ka lo beisei dawn che a nia") a han ti a, Huala chuan, e ka rawn kal ngei ang" hlim hmel tak chuan a lo ti a, chutihlai chuan Remsangi chuan, ka pa,, Huala thlah pahin ka nu chanchin chu ka va ngaihven ang chu") a lo ti a, Lal Dokulha chuan a lo remti ve mai bawk a, eng eng emaw an sawi leh hnu chuan Huala leh Remsangi chu an inzui chhuak ta nghal a., Lal In atang a thui pawh an la kal hma chuan Huala chuan, Remi, helai thleng hi mi rawn thlah mai rawh, Kawtchhuah thleng i lo kal ve zawngin, i let lehna a thui lutuk ang") a han ti a, Remsangi chuan, engtikahnge kan inhmuh leh dawn pawh hriat va nisuh, Kawtchhuah thleng chu ka lo thlah reng reng ang che") a lo ti a, Huala pawh chuan a hnial duh ta bik lova, tichuan kawtchhuah lam pan chuan an kal leh ta a.
#Kawtchhuah an thlen chuan tumah an lo awm lova, Remsangi chuan, Huala, helai thleng a ka rawn zui chhan che chu i hrethiam ang maw?) a han ti a, Huala chu a han ngawi deuh vang vang a, chutah Huala chuan, Remi, kan inhmuh phat khan ka ngaina che a ni tih chu i hai ka ring bik lova, ka rilru ang i lo put ve thu min hrilh pawh khan awih har ka ti a sin, mahse i nungchang leh chezia ka thlirin, mi der hmang leh mahni aia dinhmun chhe zawk te hnuaichhiah thin mi i ni lo tih pawh ka hria, mahse kan Boruak tawn hi han ngaihtuah la, ka dinhmun te min thlirpui bawk la, thil hi a inkawp rem thei lo a ni") a lo ti a, Remsangi chuan, Huala, i dinhmun leh nihna chu ka hria alawm, hmangaihtu chuan a hmangaih chu dinhmunah a en lova, a pian a dik em, tih lam a buaipui hek lo, a tlin lohnaah a tuam mawi a, a fel lohnaah pawh a hliahkhuh zawk thin") a han ti dap dap a, Huala chuan, Remsangi chu amalam a pawt hnai sauhvin, Remi, hmeithai fa ka nihna hrereng chung a min pawm duh hi a mak ka tikhawp mai") a han ti a, Remsangi chuan, Huala, i rilru put hmang chu a awm viau mai, mahse a dik tlat si a ni, min ring ngam rawh") a han ti nau hnap mai a, chutah Remsangi chu harhchhuak thutin, Hualan a kuahna a ta chu tal chhuakin, kal tawh rawh ka chelh khawtlai rei lutuk tawh che") a han ti a, Hualan lo chhan a tumlai tak chuan Remsangi bawk chuan, tun kan Boruak avang hian i rilru lo tihreawm lo la, Rangpui Lal fapa chu ka nei lovang tih ka tiam a che") a han tih zawm a, Huala chuan, chu chu engtinnge thu dik a ni tih ka rin ngam ang") a lo ti a, Remsangi chuan, Huala min ring rawh, chanchin eng emaw a awm a nih chuan i hnen rawn thlen turin lam kal ka rawn tir ang") a han ti a, hetia an lo titi lai mek hian, Kawtchhuah lam rawn pan te chu an lo hmu a, Remsangi vek chuan, midang ho pawh an rawn hnai tan e, tluang takin i kal dawn nia") a han ti leh a, Huala chuan, nangpawh dam takin i lo awm dawn nia") a han ti ve a" inthlahlelin an hun neih te chu kham lo viau mahse, khuahmun a leng an nih lohna chuan a pawt then rih lo thei si lo, intawng leh vat tur a inthlahin an inthen ta a, Huala a lan theih chhung chu Remsangi chuan a thlir zui reng a, a rilru chuan engtikah tak tawng leh ang che i maw?) a ti a, Huala a kal liam hnu chuan Khawlam panin a kir ta nghal a, Kawtchhuah lam rawn pan ho kha a tawk ta miah lo mai a, Remsangi chuan, ka lo thlir tui deuh a nimaw, min kal pelh lai reng ka hrelo mai") tirilru pah chuan a nutei te In lam chu a pan ta zel a.
#Huala pawh an khua Damdiai pan chuan a kal tauh tauh a, a rilru chu a hlim ru em em a, chutihrual erawh chuan an hmabak chu a ko dawn riau hian a hre bawk a, In thlen veleh a Pasaltha Kapzela hrilh chu a tum ta a, chutia a rilru kawm a a han kal tauh tauh takah chuan Ni pawh a lo chawhnu her tan tawh a, Huala chu Chhippui Khua nen a an inrina Lui a thlen chuan Chaw te fakin a chawl a, Zawlnghak khua an kal tum a an inbeihna kha a ni a, Huala rilruah chuan Remsangi a rawn lang leh nghal a, kha mi tum khan vanduai zawkah lo tang ta nise Remsangi ngei pawh chu a him bik loh tur zia leh a nu ngei hmabak a thim zia tur te chu a Chaw fun bar mawlh mawlh pah chuan a ngaihtuah kual nauh nauhva, Puar tak a Chaw te a fak zawh hnu chuan, a ruang thuhruk ho kha a la awm reng em, tiin Ruang a dah khawmna lam chu a pan a, mahse Ruang reng reng.a lo awm ta hauh lo mai, Huala chuan mak a ti hle a, a rilru chuan, tunge Ruang hi lo la bo ta ang, Vanzau khaw ho em ni ang?) tih te chu a ngaihtuah a, a awmna hmun chu him lo dawn tlat a a hriat avang chuan a chhuahsan leh ta a, a Mit lenin a hawi kual ruai bawk a, engmah erawhchu a hmu chuang lo, Lui a chhuahsan atang a thui fe ramngaw hnuai a a kal hnu zan lam lenglen hun vel chuan an khaw Kawtchhuahah chuan Huala chu a thu vang tawh a, a nu lo lawm tur zia te chu a ngaihtuah pah nauh nauh a, a thut thlandaih hnu chuan, a kal ta hnak hnak a, khawchhung a va luh chuan Tlangval Nula rim tur chu a khat tawkin a tawk phauh phauh a, mahse khua a thim tawh abangin tunge an nih a hre maithei hlawm lova, biak pawh a be lem lo a ni
Huala chu an In veng mawng lam pan chuan a kal zel a, an In a zuthlen chuan a nu Kungpuii chuan Tapchhakah Vawk Chaw Bel a lo vil a, In chhung a luh rual chuan, ka nu i lo dam maw?) Huala chuan a han ti a") Kungpuii chu rawn hawi chhuak nghal vatin, ekhai, ka lo ngaihtuah lai mek che a i rawn lan tehhlawl ni, i chau em?) a han tinghal zung zung a, Huala chuan a Iptepui leh Silai ban fel mawlh mawlh pah chuan, chau hran love, i lo dam tha a maw?) a nu Tui pek lo ban pah chuan a lo ti a, Kungpuii chuan, ka dam a lawm, ka lo ngaihtuah deuh mai che a nia") a han ti a, Kungpui bawk chuan, i thian Piangliana leh Thanliana pawn an ngai tawh khawp che a nia") a han tih zawm a, Huala chuan, keipawn ka ngai tawh khawp mai, Zawlnghak khuaah khan ka rin aiin kan cham rei leh ta si lova, ka rilru kan thlak leh hnuhnawh a lawm mawle") insil tur a tui khawihna lam pan pah chuan a han ti a, Kungpuii chuan, engpawh nise, han intifai phawt la, kan la sawi tha dawn nia, zanriah pawh i la ei awm si lova, ka lo siam ang") a lo ti a, rei vak lo hnuah chuan Huala chu a insil zo mai a, a nun Chaw ei theih diam a a lo chhawp chu a kil ta nghal a, Chaw bar mawlh mawlh pah chuan Huala chuan, Hmartlang khua a a va zinna chanchin, a pi leh pu te an lo dam that thute, a pu chu Lal Khawnbawl upa a nih tawh thu te, a nute Sangkimin Pasal a neih tawh thu te leh sawi tul a a hriat ang ang te chu a han sawi zar zar a, a sawi zawh chuan Huala chuan a chaw ei pawh chu a thawh san ta nghal a, Kungpuii chuan ka u tak chu aw, kan naupan lai zawng zawng a min awmtu ber a ni a sin mawle, a han ti a, Huala chu a lo ngawi reng a, chutah Kungpuii bawk chuan, chu i pu Sangzela pawh chu a na viau em?) a han ti a, Huala chuan, na hran love, a pem ve hlek mai a ni") a lo tisam et a, eng eng emaw sawi a Leng hawn Ar khuan hnu thleng an nufa a an titi hnu chuan Zawlbuk kai turin zHuala chu a chhuak ta a.
#Zawlbuk a han thlen chuan Tlangval lengi run kai ho pawh an lo haw khawm mek hi a lo ni a, Hualan Bawhbel a bawh liam lai Val upa Hmuakan a lo hmuh chuan, eeee he Huala ni reng che a, engtik khan nge i rawn thlen a?) a lo ti vat a, Huala chuan a nichin mai khan ka rawn thleng alawm mawle") a lo ti a, Huala chuan a thiante pahnih, Thanliana leh Piangliana te chu a han zawng ru pah deuh a, Val upa ho chuan a va zinna chanchin te chu an lo zawt luam bawk nen, tha tak chuan Huala chuan a chhang ve zel a, chutia an lo titi bawrh bawrh lai chuan Thanliana leh Piangliana chu an rawn lut ve ta a, Hualan a lo hmuh chuan pan hnai nghal vatin, nangni pahnih chu rim tur nei tha awm ang ber ziazang a a hnukhawiah te inrawn tan vel ni, nui pah chuan a han ti a, Piangliana chuan, Chhingpuii te Run kai tawh hi chuan Thiana hi haw nachang hre tawh thin lo mawle") Thanliana melh pah chuan a lo ti a, Thanliana erawhchu a lo nui suk suk thung a, rei pawh an la inkawm lo tihah chuan Val upa te chuan mut an rawn rawt ta a, tichuan tuman bengchheng siam zui lovin mut zai an rel ta a. Chhunzawm zel tur.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2019, 7:28 pm

DORAL HRANG MAHSE.
thuhma, ka thawnthu ziak a khat thin hle mai, rawn chhunzawm vat tum ka ni a, mahse ka Nerve tha lo avang hian story lamah rilru pek har ka tih abangin ka rawn chhunzawm lawk thei lova, ka thawnthu min lo chhiarsaktu zawng zawngte, inmi hriatthiamna ka rawn dil tak meuh a ni.
engtikahnge ka rawn zawm leh ang ka sawi lawk thei lova, a rang thei ang ber a rawn zawm chu ka lo tum ang.
ka sawi fo tawh angin, khat deuh mahse, a tawp ka thleng em em ang.
Chhiar nuam vek ule.





DORAL HRANG MAHSE.
Zawntea Chhangte the Red Devils.
Bung )32(













Zinglam Ar a khuang thliai thliai tihah chuan Huala mutui lai chu a harh hlawl mai a, pawn lam a han hawi chuan khua chu a lo la thim mup mai si, nimin lam a kal chau deuh bawk nen, rei lo te hnuah chuan a muhil leh mai a, Zing khua a var chuan Huala mutui lai chu sawi dawt dawttu an awm avang chuan a harh leh hlawl mai a, a Mit nuai chat chat pah a amah rawn sawitu lam a han hawi chuan, nui sung hian Piangliana chuan a lo en a, Huala chuan, ka lo mutui deuh a nimaw") tih nuah nuah pah chuan a tho chhuak ta nghal a, mutbu te a tel fel hnu chuan Zawlbuk pawn lamah Piangliana nen chuan an inzui chhuak ta a, Zawlbuk tual an thlen chuan Piangliana chuan, vawiinlam eng thawh zai nge han rel i tum a?) a han ti a, Huala chuan, ka van hre mai rih lo em aw, In zu thleng phawt i la a hriat ang chu") a lo ti a, Piangliana chuan, chutia han thawh em em tur i hriat lem loh chuan Thing Lukham put pahin, Khuangthli rah tlan i va chang mai mai ang hmiang") a han ti a, Huala chuan, i tih tlat chuan nihmiang chu, Thanliana rawn sawm ve bawk la") a han ti a, Piangliana chuan, nizan lamah kan sawi dun tawh alawm, i mu rei lutuk a, a hawn san daih che nih kha") a lo ti a, Piangliana bawk chuan, Vawmpui mual lamah aw" a han tih zawm a, tichuan an mahni In lam chu an pan ta ve ve a, Hualan an In a zu thlen chuan Kungpuii chuan, e i rawn tho thei maw?) nui var var pah hian a lo ti a, Huala chuan, nia hei nimin lam ka rawn kal chau deuh ngeni, thawh ka hai pek a lawm mawle") tihpah chuan Vawiin lam a an kal tumna te chu a nu chu a han hrilh pah a, Kungpuii chuan, Vawiin te chu awm hahdam ve bawk la mawle, Vahsan lak a hun chho leh mai dawn si a, Taksa hahdam vervawrin i thawk thei zawk ang a") a lo tih chuan, a Tlangval a pumpa han tawm sen reng zawng mi ten min sawi duh lutuk ange, bakah han hahdam rei lutuk hi zawng, Taksa a zawiin, hna han thawh leh a chakawm duh lo e mai") a han ti a, rei tawk fang an nufa a an titi hnu chuan Kungpuii chuan, khawnge tukthuan i kil hma deuh mai teh ang, chhuah te intum si a, tihpah chuan hlui chu a siam nghal zung zung a, puar tak a Tukthuan te an ei kham hnu chuan Huala chu a Sairawkherh leh Saihlum a Iptea khung nghal zung zungin, Kawtchhuah lam pan chuan a chhuak ta nghal a, a nuin, va fimkhur u la, rawn haw tlai suh u aw, a tih pawh chu hria ang pawn a lang tawh lo.
#Kawtchhuah a han thlen chuan a thian te chu an lo la thleng ve lova, mahse Pasaltha Kapzela leh Val upa te chu an lo thu thap thung a, Huala lo kal an lo hmuh chuanVal upa Hmuaka chuan, kha Huala khawilamah nge han vah chhhuah leh nghal i tum a") tiin a lo bia a, Huala chuan, Pianga leh Thanlianan Vawmpui mual a Khuangthli rah tlan saw i va chang te ang u an ti a, kan chang dawn a nih hi") a lo ti a, Kapzela chuan, i Silai pawh i rawn pu chhuak si lova") a lo tihluk a, Huala chuan, Sava chang turin Silai han put vu vu mai chu a zahthlak deuh a lawm") nui pah chuan a lo ti a, Huala bawk chuan, khawilaman nge inkal dawn zawk a, in lo thuthap bawk sia") tiin a han zawt leh hnuhnawh a, Kapzela chuan, Thlawhhma kan lakna tur enfiah turin Lalin min tir a, Mualmam lam kan hrut dawn a nih hi") a lo ti a, hetia an lo titi melh melhlai hian Thanliana leh Piangliana chu an rawn thleng ve a, Thanliana chuan, Zing thawh i hriat loh nen, i va rawn inpeih hma si ve") Huala buih pah chjan a han ti a, Huala chuan, Zinglamah min thawh khalh tawh sia, tuntumah tal ka khalh ve tawh loh che chuan, Nula hmaah i insawi thei leh awm e mai") a lo ti a, an han nui dar dar a, Piangliana chuan, intawng thei dun e mai i kal thuai teh ang u") a rawn ti a, Huala chuan, u Kap Zanlamah ka rawn leng ang, tih sap pah chuan a tho chhuak ta nghal a, tichuan Vawmpui mual lam pan chuan an kal ta a.
#hetihlai vek hian Chhippui Lal In-ah chuan Lal Dokulha leh a upa ho bakah chhungkaw puipa te chu an thu thap mai a, chutah Lal Dokulha chuan, awle hei Vawiin lamah ka fanu neih chhun Remsangi nupui turin Rangpui Lal, Tuaklianan a fapa nupui atan min rawn dil avangin ka upate bakah, chhungkaw puipa te ka han ko khawm che u a ni a, engtinnge kan lo chhan dawn le?) nimin lamah khan Rangpui Palaite chu ka upa te nen kan lo dawngsawng tawh a, tunah hian kan thuchhuak ngaichangin upa ho In lamah min nghak mek a ni") a han ti a, chuta Remsangi pu Sangvela chu lo ding vatin, kan fanu Remsangi hi kan hmangaih tlang em em a, Lal fanu a ni a, amah a hmel a thain a mawng a zang fu bawk a, tuman a hreawm hi kan phal hauh lo a ni, amaherawhchu, nupui Pasal thuah kher hi chuan damchhung atan a nih tawh thin avangin, amah Remsangi hian Rangpui Lal fapa chu a hmelduh ve reng a ni em, tih kan ngaihtuahpui a tul hlein ka hria") a rawn ti charh charh a, pu Sangvela bawk chuan, Remsangi hriatpui hauh loh leh a lungthlukna ni lo zet hian thu kan lo titlu mai ang tih ka hlau hlel love") a tih zawm leh a, chutah Lal Dokulha chuan, kan fanu tan hian tuman rilru chhia kan put a rinawm loh a, kan ngaih dan te han sawi zel teh ang u khai") a tih chuan, upa Pakhat chu rawn dingchhuak velehin, Lalpa, Remsangi pu sawi kha thil dik leh pawm nahawm tak chu a ni teh meuh mai, amaherawhchu hetilam zawng hian ka lo ngaihtuah a, kan hriat theuh angin, Rangpui Lal hi Lal fing leh Tlangval ngah tak mai a ni a, chhungkhat a kan insiampui theih chuan Ral leh Sakawlh lakah hian kan inpui tawn zung zung thei ang a kan that tlanpui viau lovang maw?) amah Remi tak pawh hi han sawi pui i la thil awmzia te a hriat chuan a pawm mai ka ring mange a, ngaihzawng bulfuk tak a neihawm kan hrelo bawk nen") a rawn ti a, midang ho pawh chuan an ngaih dan te chu an han sawi liam liam hlawm hnu chuan Remsangipu, Pu Sangvela ngaih dan tawmpui an awm ta hauh lo mai, chutah Lal Dokulha chuan, awle kan ngaih dan te kan hre ta bawk a, ka pu ngaih dan kha chu zaawm viau mahse, a tam zawkin kan tawmpui si loh avangin kan hnawl mai a ngai a, amah pawn a hrethiam a ni ang chu") a han ti a, Pu Sangvela hi Lal Dokulha nupui pa a ni.
chutah Lal Dokulha vek chuan, Tlangaupa Rangpui palaite chu zuko ta che, min lo nghak rei tawh ange, Vawiin lam a chhuah hman an duh si a") a han tih zawm a, Tlangaupa pawh chu a chhuak ta nghal a, an rorel hriat tum a Sumhmun atang a lo ngaithla rengtu Remsangin a pate ho thuthlukna a hriat chuan a mittui chu a tla zawih zawih a, a rilru chuan, Huala ka nu leh pa te chuan, lungtumloh val tawnah khiang awi a min tirh chu an tum si a maw, Huala ka hun tawn khirh leh rapthlak tak hi rawn hria nila, engtin tak ngai ang che maw?) Huala ka hmangaih che a sin, tirilru mawlh mawlh pah chuan a Biang a Mittui rawn luang ngiai ngiai chu a hru pah mawlh mawlh a, chutia lungngaih Mittui nen a lo inchiahpiah nuai laichuan Sumhmun chu a rawn ri rak rak a, Remsangi chu hawi chhuak nghal vatin, a thil hmuh avang chuan a thinrim a zual leh kher mai a, han tih theih erawh a nei si lo, Rangpui palaite Inchhung a an luh hnu chuan Remsangi chuan, hetia ka awm reng zawngin thil a dik dawn lo tawp mai") khawnghe, Thian Zampuii te In lamah ka va kal teh ang, min puih dan pawh a lo hre mahna, a ti a, tichuan a thiannu Zampuii te In lam pan chuan a kal ta nghal a, a Thiannu Zampuii te In a va thlen chuan, Zampuii leh a nu chu an lo awm a, Zampuii nun Remsangi a lo hmuh chuan, Remi tehhlawl chu, lo leng rawh, a va pawimawh awm em, i hmel te lah chu a hlim lo riau a ka hriat chu") a lo ti a, Remsangi chuan thuthmun rem pah chuan, ni e pawimawh a ni mai ang chu") tihpah chuan a han nui lui hram hram a, thil eng eng emaw an sawi hnu chuan Zampuii nu chu chhuanlam siamin a chhuak ta daih a, an pahnih chauh a an awm takah chuan Zampuii chuan, thiani, engthuah chuan maw i rawn len a?) a han ti a, Remsangi chuan, thiannu ka rilru a hah takzet a ni.
Rangpui Lalin a fapa nupui ni turin palai a rawn tir a, ka pa te lah chuan an lo dawngsawng tha vei bawk si a, thiannu hmangaih miah loh damchhung Pasal atan ka nei thei lo a ni") a ti a, Zampuii ngheng chuan a tap zui ta mai a, Zampuii chuan, khaih khaih... Insum teh khai, i pate chuan thuthlukna an la siam pawh a la ni em lova, engamah hma a i han lungngaih vak ni") a lo ti a, Remsangi chuan a Sam hnawk niai mai huikiang a, a Mittui hruk mawlh mawlh pah chuan, Huala nen an inkar thu te leh, Sumhmun atang a a pate ho remruatna zawng zawng a hriat vek thute chu a han sawi zar zar a, Remsangin thil nih dan a han sawi zawh chuan Zampuii chu a han ngawi vang vang a, chutah Zampuii chuan, thiannu lungngai reng reng suh, kei i thiannu hian ka nunna thleng pawn tuar dawn mahse ka pui ang che") a han ti a, Remsangi chuan, min puih dan tur chu i hria tihna em ni?) a lo tivar a, Zampuii chuan, ka hre mai rih lo, bakah engtia han puih tur che nge tih pawh i la sawi si lova") a han ti a, Remsangi chuan, kan chanchin hi Huala kan hrilh hriat vat a ngai a ni") a lo ti a, Zampuii chuan, i pate chuan engtik a rawn hruaitir che an tum reng reng?) a han ti a, Remsangi chuan, chuzawng ka hre hman hauh lo mai, an thuthlukna ka hriat khan ka bing mup mup a ni deuh ber mai, engmahpawh ka hrezui ta lo, i hnen ka rawn pan tawp mai a ni") a lo ti a, Zampuii chuan, chutiang a nih chuan tun thut thutah chuan inhruai i pate pawh chuan an tih rum rum a rinawm lohva, a hun te lo hriat lo tum la, keiin u Chhuanliana ka lo be bawk ang a, engkim a tha vek mai ang") a han ti a, Chhuanliana hi Chhippui khaw Pasaltha ve tho a ni a, Zampuii bialpa a ni bawk.
chutah Remsangi chuan, thiani ka lawm lutuk aw, ka rilru a hah takzet a, ka pate lah hian an rilru an thlak hmel loh nasa mai si a, theihtawp min lo chhuah pui ve dawn nia aw") a han ti a, Zampuii chuan, tehreng mai, tikhan lungmuang tak khan han awm phawt mai la, sawi tawh angin, u Chhuanliana chu lo hmin ngei ka lo tum ve ang a, engkim a fel mai ang") a lo ti a, Remsangi chuan, nun hial hloh theihna a ni a, u Chhuanliana hian a lo duh lo mai ang a") a lo tileh hram a, Zampuii chuan, a duh turah ngai ang, a lo duh ta lo a nih leh kawngdang kan dap leh mai dawn nia") a lo tisam et a, Remsangi chuan, thiannu, nang ang thian ka nei che hi ka lawm takzet a ni, a Mittui khap per sak sak pah chuan a han ti tham tiak a, Zampuii chuan, Thian karah lawmthu sawi a ngailove, va haw phei tawh rawh, i chhungte ngaih a lo tha lo ange") a lo ti a, Remsangi chuan, In thlakhlelhna pawh saw ka nei tawh love, amaherawhchu, ka haw ngei a ngai tho si a, tihpah chuan a dinghluai a, Remsangi bawk chuan, a nih aw, i Kutah ka innghat a nia") a tih zawm leh a, tichuan an mahni In lam pan chuan phur lo tak chuan a kal ta hnak hnak a..
#Hualate ho pawh chuan Chhun Chawfak hun a nih chuan Sava pawh chu an perh thla tam tawh khawp mai a, Huala chuan, kan perhthla tam tawk tawh bawk alawm mawle, Thingro chu i zawng tawh teh ang u") a han ti a, Piangliana chuan ni e, haw hma pawh a pawi ka ti hauh lo mai") a lo ti ve a, Thanliana chuan chhaklamah hian kan kal ange") a ti a, Huala leh Piangliana pawh chu an kal hrang ve ta nghal a, Huala chu thlanglamah a chhuk thla a, thui vak lo a chhuk thlak hnu chuan Fahthing, ro thazet mai hi a hmu hloh mai a, Huala chuan kit tlu nghalin a zawh tawk chuan a han tan leh a, tichuan a thiante lam pan chuan a pu chho ta a, Hualan a thiante awmna a han thlen chuan Thanliana chuan i Thing put chu a rit deuh a nimaw?) i hmel reng a chhe mai") nui pah hian a lo ti a, Piangliana chu a lo nui vur vur a, Huala chuan, Thanliana lah hi i fiamthu reng mai, thutak te hi sawi ve teh") a lo ti hluk a, Thanliana lah chu a la nui uar uar a, Huala bawk chuan, titeh u i haw nghal mai teh ang u, Ni pawh a her leh bawih tawh khi") a han tih zawm a, a thiante pawh chuan an lo hnial lova, tichuan khawlam pan chuan an kal ta a, an awmna Mual an kal pel fel mual dang a an kai leh hma deuh si ruamlai deuh a an kal lai chuan an chhak deuh an hmalam la ni si chu a rirak a, Huala te ho pawh chu an ding nghal chaawt mai a, rei pawh a ni lo, an hma hlam nga velah hian Sabawm lian tha zet mai hi an kawng dal chuan a rawn ding ta luau maile, Pianglianan Sabawm a hmuh rual chuan Savawmmmm... Tiin a au ta vak mai a, chuveleh Sabawm chu thlanglam pangah chuan a ri thla nghal ta buan buan mai a, Piangliana te ho chuan a ngaihna an hrelo kher mai, chutia a ngaihna hrelo tak a an awmlai chuan Thanliana chuan, kan zu umzui dawn em ni ang") a rawn tihlawl mai a, Piangliana chuan, engtinnge kan thah theih ang, tuman Silai kan keng bawk si lo") a lo ti a, Huala pawh chuan, ni e, i kalsan mai teh ang u min hlau e mai, min rawn umzui tawp lovang") a lo ti ve bawk a, tichuan an thil tawn te sawi a nui ho dar dar pah chuan an kal leh ta zawk a, Huala chu a khat tawkin a hawi let zauh zauh reng a, mahse rawn tibuai zuitu erawh an tawng ta lo.
#Tlailam Zanriah ei hma chuan Huala te ho chu an khaw Kawtchhuahah thuin an hahchawl a, chutah Thanliana chuan, Pianga i Sabawm hmu i han au zet kha chu i aw a mawi bik lo kher mai, i hnunglamah ka awm a i hmel ka rawn hmu thei lo mai pawh a") a han ti a, Piangliana chuan, tawng tawng lo mai teh, keimah vang a him i nih kha') a lo ti ve a, an han nui leh dar dar a, hahdam deuh a an inhriat hnu chuan khawchhung lam panin an kal leh ta a, Khawchhung an luh hnu chuan Zanlam a inhmu leh ngei tur a inthlahin an In lam theuh pan chuan an inthen ta a, Hualan an In a zu thlen chuan Kungpuii chu Bai Bel vilin Tapchhakah chuan a lo thu a, Huala lo lut a hmuh chuan, e kha i rawn thleng tawh maw?) tihpah chuan Huala Iptepui chu a han hlanthlak sak nghal zung zung a, Huala chuan Tui te innghal zung zungin a nu bulah chuan, intihfai hmain kan puah nghal mai ange") a han ti a, Kungpuii chuan, i rawn perhthla tam si a, vawikhat a puah zawh sen pawh a ni dawn em ni?) a lo ti a, Huala chuan, ka hman chin chin ka puah mai dawn a lawm") a lo tisam et a, Leikapui lamah chuan a chhuak ta nghal a, aZanriah ei hun a lo nih chuan Huala chuan a puah zo a ni ta mai a, a nun Zanriah ei tur a a rawn koh tak sekah chuan Inchhunglamah chuan a lut ve ta a, a nun Chaw ei mai theih tur a a lo peih diam chu kilin, a bar nghal ta mial mial a, Chaw an ei lai chuan Kungpuii chuan, tunkum kan thlawhhma lakna tur chu Mualmam lam a ni dawn a, a tih zia tak tak a ni") a han ti a, Huala chuan, ni e, a hnaih deuh tawh bakah kawng pawh a nuam tawh a, i feh ve fo thei tawh ang chu") a lo ti a, eng eng emaw sawi chung chuan Zanriah chu an ei ta zel a, puar tak a Zanriah an ei kham hnu chuan Huala chu a insilfai nghal zung zung a, a nu chuan Huala Sava puah te chu rep tumin a lo buaipui ve bawk a, a insil zawh chuan Huala chuan, ka nu, Pasaltha Kapzela te In lamah ka han leng teh ang") a han ti a, Kungpuii pawh chuan a lo remti ve mai a, tichuan Pasaltha Kapzela te In lam pan chuan Huala chu a chhuak ta nghal a, Pasaltha Kapzela te In a han thlen chuan Kapzela te chuan Chaw an lo ei kham tawh a, Huala lo lut Zamawiin a lo hmuh chuan, Huala tehhlawl chu lo leng rawh khai") a lo ti var a, Thuthmun te a rem hnu chuan Kapzela chuanB eng thil nge ni a, nula Run kai aia kan In lam rawn len i duh zawk tlat ni, a va pawimawh awm ve?) nui pah hian a lo ti a, Huala chuan, a engdang ni love, Nula rim tur kan hrelo em a, ka rawn leng ta mai a nih hi") a han ti a, Huala vek chuan, Vawiin lam inva haw hma awm ve, enge inva kalna chu a an dawn awm a?) a han tih zawm a, Kapzela chuan, nia, kan haww leh hma khawp mai, a ram a chang tha a, Zuva ten zah an ngai em ang a, kan thar chhuak teuhin ka ring") a lo ti a, eng eng emaw sawi chuan an titi ta zel a, chutia titi phunglengte sawi a an inkawm melh melh lai chuan Huala chuan, u Kap, thil han sawi pui duh che ka nei a") thutak fe hian a han ti a, Kapzela chuan, han sawi ta che eng thil nge ni a?)
A lo tivar a, chutah Huala chuan a aw a han thian deuh kharh kharh a, zawi sap hian, Remsangi nen kan chungchang a nia") a han ti a, chuveleh Zamawii chuan, uai... Ka beisei loh lam daih lah ni chuan, Huala nupui neih i tum em ni??? Tunge Remsangi chu ni a?) a han ti hlut a, Hualan a chhan hma chuan Kapzela chuan, han sawi chiang law law la mawle") a han ti a, Huala pawn zepna hun a ni lo tih hriain, Remsangi nen an inkar zawng zawngte, Rangpui Lal fapa nupui a tan a Remsangi chu biak mek a nih thu leh, Remsangin Rangpui Lal fapa chu a hmel duh a nih loh thu leh atan a einawm a tum tlat thu te chu Kapzela te nupa bulah chuan a sawi fai ta vek a, hmalak dan tur a hriat loh thu leh a rilru a buai ruk thu te sawi chuan a thu chu a tlip ta a, Kapzela chuan, Huala, Remsangi nen in intawn phat khan incheziaah khan engmah ka hai lova, fimkhur turin ka chah reng che a nih kha") a han ti a, Kapzela bawk chuan, mahse hmangaihna hian michhe fa leh mitha fa a thliar si lo a nih hi, engpawh nise, amah Remsangi ber a rinawm chuan rilru hahna vak tur a awm em ni?) a han ti a, Huala a tawng hma chuan Zamawii chuan, Huala Remsangi chuan a fiamthu mai mai a ni lo maw?) Lal Fanu a ni a, ka tawng lo haw lo la, nang hmeithai fa mai i ni si a") a lo ti a, Huala chuanB u Zamawi i rilru put hmangah chuan i ngaih dan chu awm ka ti biau mai, mahse Remsangi khan min hmangaih ve tak tak chuan ka hria a ni") a han ti a, Kapzela pawh chuan, ni e, Dailohvanu ngaih dan kha keipawn Remsangi nungchang leh chezia va hmu lo ni i la chuan ka ngaih dan ve tho tur a ni, mahse Remsangi chezia leh hawiher ka hmuh khan, dawt sawi hmang a ni lo tih ka hria a ni") a rawn ti ve charh charh a, chutah Kapzela bawk chuan, engtia hma han lak nge i rilruk reng reng a? a a han tihzawm a, Huala chuan, a ngaihna tak pawh ka hrelo a ni, i Kutah ka innghat tawp mai a ni" a lo ti a, Kapzela chuan, Remsangi chu hruai nghal an tum em Rangpui ho chuan" a han ti a, Huala chuan, chuzawng ka hre hauh lo mai" a lo ti a, Huala bawk chuan, ka rawn hawn dawm khan Kawtchhuah thleng chuan Remsangi chuan mi rawn thlah a, chanchin eng emaw a awm a nih chuan a ranglamin, lamkal ka rawn tir ang" tiin min thlah kha chu a nia" a han ti a, Kapzela chuan, chutiang a inrawn inthlah chuan Remsangi chu lo ngaichang phawt mai ang, hma lo lak dan pawh thiam a har e tunah rih chuan, bakah Remsangi rilru tak tak pawh a hriat ang chu" a lo ti a, Huala tan pawh hma han lak vak theih nibik hek lo le, rilru buai tak chuan Kapzela remruatna chu a pawm ve ta a, Kapzela chuan Huala chu thu hrang hrang te hrilhin a zilh mawlh mawlh reng a, rei ngial an titi hnu, leng hawn Ar khuan hma deuh chuan Huala chu Zawlbuk lam pan chuan a chhuak ta a, Hualan Zawlbuk a han thlen chuan Val upa ho leh lenna tur hre ve lo Rawlthar tlem a zawng hi an lo awm a, Hualan bawhbel a rawn bawh liam Val upa Chhungpuian a lo hmuh chuan, e Huala chu, nula mitmei i hmu tha vak lo em ni? Leng hawn Ar a khuan awm reng ka la hre si lova" a lo ti a, Huala chuan, Lengi Run kaina tur pawh ka hriat loh hi maw, Pasaltha Kapzela te In lamah ka leng a lawm mawle" a lo ti a, Mei lum ai chuan eng eng emaw sawiin an titi laih laih a, rei vak lo an titi leh hnu chuan lenghawn Ar a lo khuang ta chuah chuah a, Tlangval dang nula rim ho pawh an rawnn haw khawm sap sap a, Tlangval ho an rawn kim hnu chuan rei vak lo an han titi leh laih laih a, tichuan mut zai an rel ta a..
Chhunzawm zel tur.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 30th, 2019, 6:51 pm

DORAL HRANG MAHSE.
*Zawntea Chhangte The Red Devils*.
Bung )33(.











Hun a liam a, Damdiai khua ramtangrual chin chu Lo vatin an buai tlang hlawm hle mai a, Huala pawh Nitin mai chuan Lo vatin a liam ve a, a nu erawhchu In lamah a lo awm thin thung.
Zankhat chu Nula rim hma ti a Zawlbuk a an thut muanlai chuan Thanliana chuan, Huala, engtik nge i Lo chu i vah zawh ve theih i inrin a" a han ti a, Huala chuan, Nihnih vel ka vah leh chuan ka zawh ve theih mai tawh ka ring" a lo ti a, Piangliana chuan, chutiang a nih chuan naktuk lamah kan rawn zawh pui dawn che nia" a Mit meng a Thanliana rawn zauh pah chuan a rawn ti a, Thanliana pawn lo hrethiam vatin, ni e Huala, keini lam chu vawiin lamah kan zo tawh a, kan rawn pui ve ang che" a lo ti ve bawk a, Huala chuan, thian te u, min puih induhna avang chuan ka lawm khawp mai, mahse a ngailo nimai rawhse, Nihnih vel ka vah leh chuan ka zo ve tawh mai dawn thova, inchau lutuk ang, lo awm hahdam zawk rawh u" a lo ti a, Thanliana chuan, chau lah love a, Tlangval alawm kan nih le" a han ti a, Piangliana pawh chuan, ni e Huala, inthlahrunna tur engmah a awm lo, i Silai rawn thawh chhuah pui la, therhlo eng emaw kah tur pawh a awm maithei a sin" a han ti a, Piangliana bawk chuan, keizawng, engmah han kah theih lah ka nei si lova, chhungte Hmai eng zah a na duh e mai, ka inpu bawr peih tawh lo" a han tih zawm a, Thanliana chuan, keipawh ka ni tho a lawm, han kah theih nei lo ta chu ka pain min hrensak daih alawm" a lo ti ve a, an thian thum chuan an han nui dar dar a, Pianglianan, Huala Kut a hmui tho alawm, min kep leh vek mai ang" a rawn tih chuan Thanliana chuan a lo pawm nasa mai, ni e, Pasaltha kan kalpui dawn a lawm a lungngaihthlak loh" a lo ti ve zat a, Huala chuan, ngawi mai mai teh u, Zanin chu khawilaman nge len inhan rilruk a" a han ti a, Thanliana chuan, zanin chu i nula rimnaah kan rawn kal ve ang chu kan tia" Piangliana melh zauh pah chuan a han ti a, Piangliana pawn Thanliana rawn melh zauh chu lo hmuin, ni e Huala, Thanliana nen hian rawn zui ve che kan lo tum ve ngawt a, a rem angem?"
a han ti a, dinhluai pah hian Huala chuan, rem tuk e, tiru i chhuak ang u" a han ti a, pawn lamah chuan an inzui chhuak ta a, Piangliana chuan, tunge min rimpui dawn reng reng a?" a han ti a, Huala chuan hrilh tha duh ta mai lo chuan, min zui phawt mai teh u" a han ti a, a kal nghal ta mai a, Thanliana leh Piangliana pawh chuan engmah zawt zui lovin ngawi reng chuan an zui ve mai bawk a.
#Huala chuan a thiante chu Thangpuii te In lam pan chuan a kalpui zel a, Thangpuii te In an zu thlen chuan Leikapui atang hian, inawm em?" Huala chuan a han ti a, In chhunglam atang chuan Pi Zathluaii chuan, awm e lo leng rawh u" a lo ti a, Huala ten In chhung an luh chuan Thangpuii chuan, ehe!!! U Huala te ni rengin, lo leng rawh u, hlim hmel tak chuan a lo ti a, thutna te a lo kawhhmuh nghal zung zung a, Huala ten thuthmun te an remfel chuan Thangpuii nu Zathluaii chuan, vala te u min lo hrethiam ula, tute nge maw innih hlawm le?" Huala hi chu ka hre mai a" a han ti a, Thangpuii chuan, ka nu mai mai thin hi a, kan upa fapa u Pianga leh u Thanliana te an nih hi" a lo ti a, pi Zathluaii chuan, a nimaw, keizawng nu taptawm ngang hi ka ni a, kan hre mai lo che u alawm mawle, min hrethiam a niang chu" inthiamlo tak a Thanliana te pahnih melh tawn zak zak pah chuan a han ti a, Piangliana chuan, ka pi inthiam lohna tur engmah a awm love, kan vawikhat lo lenna chauh a nih vang mai mai a nih hi" nui sang hian a lo ti a, Huala chuan, ni e, upa fa mahnise an fel teh a nia, nikinah chuan ning hluiin i la hre bel mai ang" a lo ti a, an han nui ho dar dar a, rei vak lo an titi leh hnu chuan pi Zathluaii chuan, tihian lo inkawm rawh u, kawmchhak te Inah ka han chuangkai lawk ange" a han ti a, a chhuak ta nghal a.
#a nu a chhuah hnu chuan Thangpuii chuan, u Hual, inchau awm hle si a, inrawn leng duh hi infel e" a han ti a, Huala chuan, Tlangvala pumpa, han tawm sen reng zawng a ninawm alawm, bakah i hmel hmuh te hi chuan hah te hi a dam ve a" nui thaw pah chuan a lo ti a, zah luat vang a Hmai sen tawn tawn chung hian, u Huala chu i tizahthlak e mai, keini hmel te zawngin tu hahdamna mah va thlen suh" a lo ti a, Thanliana chuan, tak a Thangpui, hei Huala hian a sawi reng mai che a, mahni chauh zawngin insawi fel a har e mai, min rawn sawipui teh u a ti a" kan rawn kalpui tawp mai a nih hi" nuih hak hak pah chuan a han ti a, Thangpuii chuan, chu chu a nimaw ka thiante ka la rawn hruai ang a tih sek ni" a lo ti a, an vai chuan an han nui dar dar a, chutah Piangliana chuan thutak fe hian, kan han fiamthu luam a, Thangpui, in Lo vah te inzo hnai tawh em?" a han ti a, Thangpuii chuan, zo hnai a ni ve mai ang chu, nihnih thum vel kan vah leh chuan kan zo ve maiin ka ring, keini nufa te Lo zawng a zau lo hrim bawk a" a lo ti a, Piangliana chuan, chuti chu kan pali hian kan zu zo dawn nia" naktukah chuan Huala te Lo tur lamah kan zu kal phawt ang a, in Lo chu naktip lamah kan tum veleh thung ang a" a han ti a, Thangpuiin a chhan hma chuan Thanliana chuan, Thangpui thian Pianga hi chu a inpe zo thin teh a nia" intblahrung duh reng reng suh" nui chung chuan a lo ti var a, an han nui leh dar dar a, chutah Thangpuii chuan, min puih induhnaah chuan ka lawm lutuk, mahse ka rul let zo awm lo che u e mai, In lamah lo awm hahdam zawk rawh u" a lo ti a, Thanliana chuan, ni e Thangpui, hahdam pahin kan zu zo dawn nia" a lo tisam et a, tichuan eng eng emaw sawi chuan an titi ta zel a, a chang leh an han nui leh dar dar a, Leng hnarAr a rawn khuan takah chuan tui tak a mu tur a inthlahin an inthen ta a..
#:-[ Thangpuii te In atang a an chhuah hnu, Zawlbuk pan a an kallai chuan Piangliana chuan "thiante u, Thangpuii te lo vah zawh pui kha kan tingawt kha a nia, inngaih dan te a lo ni lo viau em?" a han ti a, Thanliana chuan, "ni lo hran love, a nuam viau ang chu, mahse i rilru kha sawi tlang nghal law law la" nui ham ham pah hian a lo ti a, Huala chuan thutak fe hian, nang berin i tih chuan kan hnial ngam nang, a nachang pawh i hre thin teh e" a lo ti ve a, tichuan hlim tak a titi bawrh bawrh chung chuan Zawlbuk chu an pan ta zel a, Zawlbuk an han thlen chuan Tlangval dang lengi Runkai ho pawh an lo haw khawm tawh hlawm a, Huala te ho pawh chuan bengchheng siam zui tawh lovin mut zai an rel ta nghal a.
midang ho tui tak a an mut hnu pawh chuan Huala chu a muhil thei reng reng lo mai a, a rilruah chuan REMSANGI chuan hmun a luah tlat a, Chhippui khua atang a a hawn dawn zan a Remsangi nen hmangaih biahthu an thlunlai te, an hlimdun zia leh, a tuk lawk a lungngaihna tur a hriat leh nghal si dan te leh, a hawng tur Kawtchhuah thleng a Remsangin a rawn thlahlai a Remsangin a thlakhlelh zia te a ngaihtuahnaah chuan an rawn lut zut zut a, a rilru chuan, i phu lo a ni, kiansan mai rawh, a inti mawlh mawlh a, mahse, fuihtu chu amah tho a nih vang ngeni, Remsangi kiansan tur chuan thuthlukna a siam thei chuang der si lo, chutia rilru buai tak a a inngaihtuahlai chuan a bun a zilh fona thin, mipa chuan an puitlin loh tur thu an tiam zuah zuah tur a ni lo, miin min rinngam lohna bul a ni ngai, ti a a zilhna chu a ngaihtuahnaah chuan a rawn lut zawk mai a, Huala chuan, Remi, min ngaidam rawh, he ka suanggtuahna hi a lo vak thui em a tin a ni, khawihmunah pawh awm mahla, tutan pawh hraileng lo awi rawh, THANGZAUVA FAPA HUALA KA NIH CHHUNG CHUAN KA THLAHTHLAM LOVANG CHE a tisap a, Remsangi tan a rinawm zel tur chuan a rilru a siam nghet zawk ta sauh sauh a, Zanlai Ar khuang pawh an reh fel ta maw tihah chuan Huala chu a muhil ve ta hram a. #a tukzingkhua a lo var a, Rangpui Lal Inah chuan Lal Tuakliana leh a upa te ho bakah, Vanzau khaw Upa, Aizinga leh Dotawna te chu thu pawimawh tak relin an titi hova, chutah Lal Tuakliana chuan, awle, kan tum leh duh dan ang takin Chhippui Lal chu inremna kan neihpui thei chu a ni a, he kan inremna hi ka unau pa Vanzau lal, Lianpuia tan a kan phuba lakna a ni tih kan hre thar leh dawn nia, remchang hmasaberah ka fapa nupui tur ang a kan biak Chhippui Lal fanu chu ka Tlangval ten an zu hruai ang a, hreawm tinreng kan tuartir dawn a ni" a han ticharh charh a, Lal Tuakliana bawk chuan, Chhippui Lal fanu chu awlsam tak a thih tir kan phal tur a ni lova, kan unaupa Vanzau lal, Lal Lianpuia phuba lakna a ni tih kan hrereng dawn nia" a han tih zawm leh a, chutah Vanzau upa Aizinga chu lo tawng chhuakin, Lalpa, engtia hreawm chu han tuartir nge tha ang?" tin, mipui ho hnenah hian kan remruatna te hi hrilh hriat chi a ni angem?" a rawn ti a, Lal Tuakliana chuan, khaw Mipui te chu kan hriattir ngei tur a ni a, tin, tuman Chhippui Lal Fanu lak a that lo chhuah lo bawk turin kan hrilh bawk tur a ni, naktuk hian ka Pasaltha Thangluaia leh tlangval panga zu kal se, intan a nih angin, Vanzau upa te hian zuzui ta u la, mahse Rangpui upa te angin inzu insawi thung ang a" a tha inti em?" a han ti a, Rangpui upa Rozika chuan, Lalpa i remruatna chu remruatna tha tak a ni, chutihrualin kan thil tih tum hi put ru thei a ni ve a, chuvangin ralveng indah zel bawk i la a tha lo maw?" a rawn ti a, Lal Tuakliana chuan nuih huah huah pah hian, chu Chhippui Khua Ui humzat pawh tling lo lak a dawih aw i han paupui tak ni" a lo ti a, Upa Rova chuan, a Lalpa" hlauh zawngah chuan hlau lah lo-ve, khaw mipui himtlanna ka ngaihtuah vang zawk a ni e" inthlahrung tak chuan a lo ti a, Lal Tuakliana chuan, ni e, thurawn tha tak a nih chu, ralveng zawng kan indah dawn nia" a han ti a, tichuan tukthuan ei te a lo hun chho ta bawk nen, hlawhtling tak a raurel a inhriain an mahni In lam theuh chu an pan ta hlawm a, chutia midang an chhuah tak hnu chuan, Vanzau Lalin a aiawh a a tirh, Lal Tuaklianan ama In a a thlentir upa Dotawna chuan, Lalpa, kan chin tur hi kan Lal kan hriattir ve loh chuan, kan chanchin ngaichangin Beng a lo chhi ve reng awm si a" a han ti a, Lal Tuakliana chuan, ni e, lamkal chu kan tir nghal dawn nia, nikhat kal lek a lawm Vanzau khua te zawng, lamkal tirh nan a hmanhmawh thlak loh e" a lo ti a, tichuan tukthuan te ei turin an inbuatsaih ve ta a.
















Vanzau Lal hi sawi lan tawh angin Lal Lianpuia a ni a, Rangpui Lal Lal Tuakliana nen hian Pa te atang a u nau an ni a, Chhippui khuain a Pasaltha Zavunga an lo thah sak tlat a a ngaih bakah, chumai chu duh tawk lova Chhippui khuain an rawn run thut avang te chuan a thinrim em em a, chuvangin a unaupa Tuakliana, Rangpui Lal hi a va pun ta a ni.
Mahse Vanzau Lal, Lal Lianpuia hian, a fapa nupui atan a Chhippui Lal fanu an biak thu erawh a sawi lang duh lo thung a ni.
Chutia a unaupa te rawn run ngawttu chu Rangpui Lal Tuakliana hian a lo thinrim pui em em a, bum a ni tih inhrelo chuan hetiang remruatna bawlhhlawh tak hi a ruahman ta a ni.










#Chhippui Lal Inah pawh tukthuan ei hma tiin Lal Dokulha leh a upa te chuan zing Zu in pahin, a fanu Pasal neih dan tur sawiin an hlim tlang hle mai a, bum an ni dawn tih hre hauh lo chuan Remsangi te inneih hun tur te leh, vannei an intih thu te chu an sep nasa mai, chutah Lal Dokulha chuan, awle hei Lo lam pawh kan inzo thawkhat tawh hlawm a, Rangpui lam pawh an rilru te an thlak a nih loh chuan an rawn lang harin ka ring tawh lova, chuvangin, inpeih sa ran a kan lo awm a tul tawh a ni" a han ti a, chutah upa zing a pakhat chuan, Lalpa, Rangpui Lal chuan a thutiam chu a rawn puitlin ngei ka ring e, Remsangi rawn hruai tur ho chu an rawn lang thuai ang" a lo ti ve a, upa pakhat chuan, Rangpui khua te nen hetia chhungkhat a kan han insiam thei hi chu kan vannei ngawt mai, Pasaltha leh Tlangval an ngah bawk nen, kan kar a hla deuh e tih lohah chuan kan nihlawh khawpin ka hria" a han ticharh charh a, upa dangte pawh chuan an lo tuihnih ve sap sap hlawm bawk a, chutah Lal Dokulha chuan, kan kar hi hei ai hian han hnai deuh se zawng Sa leh Ral lakah pawh kan inpui tawn zung zung thei ang a, Lung a muang deuh tur a nia, amaherawh zawng, duhthusam ang vek hi a ni thei lo a nih hi" a han ti dap dap a.








A Pa ten a chungchang thu an sawi laih laih lai chuan Remsangi erawhchu a thiannu Zampuii te In lamah a leng daih thung a, Zanlam a an lo rel tawh angin Remsangi chuan, Thiannu, u Chhuanliana chu a kal ta i ti em ni?" a han ti a, Zampuii chuan, aw vartianah a chhuak ta a nih kha" a lo ti a, Remsangi chuan, chu Kawtchhuah thlengin i han thlah tihna em ni?" a lo ti a, Zampuii chuan, thlah love, amah khan min rawn hrilh a a kal dawn khan, i rilru lo tihah lo turin a ti bawk che a ni" a han ti a, Remsangi chuan, Huala hian u Chbuanliana thu ken chu a lo awih angem?" engmah va hriat theih ni suh, rilru hahdam tak chuan awm a har a ni" a thiannu Zampuii melh ralh pah chuan a han ti a, Zampuii pawn a thiannu Remsangi chu a lainat kher mai, chutah Zampuii chuan, thiannu, ka hrethiam lutuk che alawm, mahse a thim zawngin i inngaihtuah lo phawt ang, u Chhuanliana pawh chu tluang takin a kal em ang a, Huala pawn a lo bengkhawn duh lutuk ang, a mizia i han sawi hmangah zenghet pu mi a niin ka hria" a lo ti a, Remsangi chuan, thiannu, nangchu i vannei mange, tihian i hmangaih ber nen hlim takin inawm dun thei a, u Chhuanliana lah a fel bawk si" a han ti a, Zammpuii chuan, ni e, u Chhuanliana hi chu zep thu a cheng lo, ka tan hi chuan a tha ve thlawt a ni, mahse nangpawh lungngai lo la, kan tang ho ang a, engkim a tha vek mai ang" a lo ti a, chutia an titi mawlh mawlh lai chuan tukthuan ei te a lo hun chho ta reng mai a, inthlahlel tak chuan an inthen ta a..















#a hmangaih Remsangi lungngai tak a a awm lai chuan Huala leh a thian te chu infiam nui uar uarin Huala te Lo pan chuan an kal ve mek a, Huala chuan, chawhma vah tur pawh a awmin ka ring lo pathum tan chuan" a han ti a, Thanliana chuan, kan thawh that peih dan a zir a niang chu" a lo ti hmanhmawh a, Piangliana chuan, naktuk atan i tha khek i tum a ni ngat mai" a rawn ti ve a, an han nui ho dar dar a, Thanliana chuan, nih te pawh nihmiang, Nula tan hi chuan han phur surh vek phawt mai i la, kan tlatlum sam bik" zam lo fe hian a han ti a, Huala chhuan, Chhingpuii ka hrilh ange" a lo ti vat a, Thanliana chuan, Chhingpuii hi inti vei sek a, ka engahmah a thawk love" a lo ti a, Piangliana chuan, a thawk lo takzet a maw" hmanni vengmawng Tuikhur bul a...
A tih lai chuan, kha zawng engmah a nih loh kha, dawt belh lah hi i thiam sia maw" Thanliana chuan a lo ti hluk a, tichuan eng eng emaw sawi a titi chung chuan an kal ta zel a..







#Huala te Lo an zu thlen chuan Hahchawlh nan ti a Buk te Hualan a zarah chuan an thu thlandai a, Tuisik te in a an thut hahchawlh lai chuan Thanliana chuan, Huala khawilai khu nge i la hmabak a?" a han ti a, Hualan a hmabak te a rawn hrilh hnu chuan Piangliana chuan, a tam tawh loh khu, tiru i tan teh ang u" a han ti a, tichuan an hmabak lam pan chuan an inzui ta a, Chawhma dawn an vah hnu chuan Piangliana chuan, Huala, Chawhnu lama zawhah i khek teh ang u, nangin Vau lam lova hrut la, Thanliana nen kan lo zo vek mai ang" a han ti a, midang pawn lo hnial lovin Buk daihlim lam pan chuan an inzui chho ta a, Tuisik te in a an thutlai chuan Piangliana chuan, Huala, i thlawhhmalak a zau hle mai ka ti" a han ti a, Huala chuan, ni e khu, kan tivak ringawt mai a, ka enkawl zo ngut a nge maw, a vah lai atangin midang puihna kan mamawh nghal phawt chu a nia" a lo ti a, Thanliana chuan, Zuva ten zah an ngai em ang a, i thar teuh theih dawn hi" a lo ti ve a, chutia thudang dangte sawi a an hahchawlh takah chuan Ni pawh a Chawhnu her tan a, Piangliana chuan, kan tawng kan tawng a kan tlai dawn, i zo thuai teh ang, Huala nangpawh i pan lam turah chuan kal la" dinhluai pah chuan a han ti a, Huala pawn lo hnial lovin a Silai chu a han enfel zung zung a, tichuan Vau lam pan chuan a kal ta a.











#Huala a kal liam hnu chuan Piangliana chuan, Huala hi chu a Kut te hi a hmui reuh ngawt mai, amah lah hi la naupang viau e ti lo hian a puitling vei phian bawk sia" Thanliana bulah chuan a han tisap a, Thanliana chuan, a ni ngawt mai, Sa te lah hi a zarah kan hmeh deuh reng mai a, tuntumah pawh Kut ruak chuan kan hawin ka ring hauh lo mai" a lo ti ve a, tichuan an hmabak zo tur chuan an kal ve ta nghal a.




#Huala pawh chu Vau chhungah chuan lut tan tawhin Sahnu te chu a han bih kual a, mahse Sahnu tharlam han chhuibing mai tur a hmu tlat lo, Ramril lamah chuan lut zelin, uluk tak chuan a Mit leh Beng chu a chhi ran a, a thiante pahnihin amah a beiseina an neih san zia hriain, a hlawhchham mai ang tih chu a hlau ru hle a ni.
Chutia hnu tharlam chhuibing tur pawh hmu lova a vah a vah lai chuan a thlanglam hla lutuk lovah chuan Sanghal innawr khek ri a hre ta tlat maile, Huala chuan kah ngei tum chuan a thawm hriatna lam pan chuan fimkhur takin a kal ta nghal a, thui lutuk lo a chhukthlak hnu chuan Ngghalrual Changel hung bul Leinem lai a an lo inbual chu a zu hmu a, Sanghal ho lah chu hlauhawm a hnai tih hrelo chuan an lo innawr tre nasa mai a, Huala chuan hnaih thla leh hretin, a tan hmun te a siam fel leh hlek hnu chuan, amalam hawi a ding, Nghalrual zing a a lian deuh ber chu, hawisan a tumlai tak chuan a Silai mu chuan a Chaldarah an verh siah mai a, Sanghal pawh chu chezui tur a awm lo, chutia an beisei loh lutuk a Silai a lo puah takah chuan Sanghal ho chu an darh nghal ta chum chum mai a, chutia Sanghal mangang tlandarh chu Huala chuan a lo en reng a, a nuih te a za hle mai a, chutia a Sa kah pawh ngaihtuah lova a lo khik suk suk lai chuan a chhak Zau lam atang chuan, kuk ri a hre ta tlat mai, Huala chu harhchhuak thutin, ring lutuk mai chuan a han kuk ve vak mai a, tichuan a Sakah lo tlu reng lam pan chuan a kal ta nghal a.
A Sanghal kah chu a han bel chiang nghal that that a, hnim hrui te chu chhatin a han teh kual nghal zung zung a, Sanghal chu sum nga lai hi a lo ni a, a Pa a nih avangin a Til bawr chu lain, a thiante lo thlen hun chu Vaibel zu pahin a lo nghak a, rei vak lo hnuah chuan Piangliana leh Thanliana chu an rawn thleng thla ve a, Thanliana chuan, nang nge nge, Kut ruak a kan haw kha ka ring lo reng a ni" a han ti a, Piangliana pawh chuan, ningawt mai, Pasaltha kalpui zawng kan tlai leh dawn mange" a lo ti ve a, Piangliana vek chuan, hei a lian fu mai sia, sum engzahnge a nih kan teh tehreng ang" a han tih zawm a, a bul mai a brui chu chhatin a teh ta nghal a, Thanliana chuan Zanin chu Dulhmul a khat leh dawn mange" nuih ham ham pah chuan a lo ti a, Huala chu a thiante pahnih lawm thiam em avang chuan a hlim ve khawp mai, chutah Piangliana chuan, sum nga lai mai a ni ka ti, tah hian i chan nghal mai ang u hmiang" a han ti a, midang pawn lo hnial lovin hlim tak a titi bawrh bawrh chung chuan an chan ta nghal a, an zawh hnu chuan Bawmrang te siam leh zung zungin khawlam pan chu an tum ta a, Piangliana chuan a Vaibel pak khuk luah pah chuan, muang lutuk lova kan kal chuan en laiin khawchhung kan la lut hman ang a" a han ti a, Thanliana chuan, thim lut pawh ni i la enge pawi, kan hlawhtlin tho hi" a lo tivar a, Huala ve thung chuan, chutiang ringawt a ni ngailo, kan theih hram chuan en lai a thlen hi a tha, chhungte hian kan rin aia nasa hian min ngaihtuah a ni tih hriat thin tur" a lo ti ve a, Thanliana bawk chuan, phuh chhuak tha thei fu mai ka ti" nui pah chuan a lo ti a, Piangliana chuan, chutia khaw enlai a thlen kan tum si chuan i kal nghal mai ang u" a rawn ti a, tichuan hlim tak a titi chung chuan khawlam chu an pan ta a..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 3rd, 2019, 7:02 pm

DORAL HRANG MAHSE.
Thawnthu hi ka type chawp ve tawh a, a hunah tak pawh ka rawn post thei lo a ni e.
A tawi lutuk ka hlau bawk nen, Zanin pawn mi te ziah angin a ngaihnawmin a thui veleh kher lo maithei a, mahse tawi tak ti a sawi tur a ni chuan ka hrelo.


DORAL HRANG MAHSE.
*Zawntea Chhangte the Red Devils*.
Bung )34(.







Chutia hlawhtling inti tak a an kallai chuan Piangliana chuan, Zanin chu Thangpuii te In lamah bawk em ni dawn?" a han ti a, Huala chuan, han lenna tur teh chiam ka hre lemlo bawk a, pawi ka ti lo keichu" a lo ti ve a, Thanliana chuan, nang hi nula rim te hi i ngaihsak lo em em mai a, hun rukna te hi i lo nei reng a ni lo maw" a rawn ti a, Huala chuan Remsangi nen an inkar zawng zawng chu a thiante pahnih hnenah chuan sawi a han tum a, mahse ama dinhmun leh Remsangi nihna te a han ngaihtuah chuan a thiante chuan mahni phu tawk hrelo lutukah an ngaih a hlau leh ta deuh a, hrilh rih loh mai chu tha a ti leh ta zawk a, chutah Huala chuan, mai mai thin a, kei tehlul hian khawi a mi nge maw kan hun tehlul ang ni" a han ti a, Piangliana chuan, ni e Huala, keini thian ho inkarah hi chuan engmah zep a ngailo a nia" a lo ti a, Huala chuan, a keizawng chutiang tur engmah sawi tur ka nei lo-ve" a lo ti leh a, tichuan thu dang dangte sawiin an kal ta zel a, a thiante chu inhawng viau mahse, amah a insit em avang chuan Remsangi nen an chanchin chu Huala chuan a la zep ta zel a ni.
Chutia eng eng emaw sawi a an kal tlauh tlauh hnu, tlailam Zanriah ei hunlai vel chuan Huala te ho chu khaw Kawtchhuahah chuan hahchawlin an thu ran tawh a, chutah Huala chuan, Thanliana chu a, Thangpuii te In a len chu a phur vak lovang a" Piangliana bulah chuan a han ti a, Piangliana chuan, a ni dawn tak maw?" ka han rawt ngawt mai pawh a, Vawiinlam kan hlawhtling nasa mai si a, Chhingpuii bul a han insawi theih leh pawh a duh tak ang chu" a lo ti ve a, Huala nen chuan an han nui hawk hawk a, Thanliana erawhchu a lo tum deuh bar thung a, Piangliana bawk chuan, uai kan sawi dik hle a nimaw?" a han ti leh a, Thanliana chuan, inho dun e mai, chutiang zawngin rilru ka pu lo-ve, i kal tawh teh ang u" a rawn ti hluk a, Thanliana lungawi lo, thinur ngam chiah bawk si lo hmel chu Huala leh Piangliana chuan an han nuih leh rih a, chutah Huala chuan, khatiang hmel kha Chhingpuii i hmuh vaih zawngin aw" a tihlai mek chuan, tawng tawng lo khan kal vat ang u ka tih chu" Thanliana bawk chuan a rawn ti leh a, Huala te pawh chuan nuih la insum tak chuan, nihmiang chu, i kal ang u hmiang an lo ti a, tichuan khawchhunglam pan chuan an kal leh ta a,.









An mahni In lam theuh pan a an inthen hnu chuan Huala chu an In lam pan chuan a kal nghal hnak hnak a, an In a zu thlen chuan Leikapuiah chuan a han innghat a, chumi rual chuan In chhunglam a a Nu leh Mipakhat titi bawrh bawrh ri chu a hre nghal a, Huala chuan Pasaltha Kapzela niin a ring deuh a, mahse, a han ngaihthlak chian deuh chuan Pasaltha Kapzela a ni lo tih chu a hre ta a, tutak niang maw?" tirilru pah chuan In chhungah chuan a lut ta a, Huala lo lut a nu Kungpuiin a lo hmuh chuan, e kha i rawn thleng der a nimaw?" inrawn thim haw dawn emaw ka lo ti a" a lo ti a, a Silai te tunfel pah chuan Huala chuan, vah bak kha a tam tawh lo em a, Pianga ten min rawn pui bawk nen, kan rawn zo ta a nih kha" a lo ti a, Kungpuii chuan, a va lawmawm ve aw, Pianga leh Thanliana hi zawng mi awmthei fa mahnise an fel ngawt mai" a lo ti a, chutah Kungpuii vawk chuan, hei Chhippui khawlam atangin mikhual kan nei a" a han tih chuan Huala chuan thil awmzia chu hrethiam deuh ruak hian a inhria a, chutah Huala chuan, a nimaw, engati teh ngawt nge ni a?" keini In tehlulah te" a lo tivar a, Kungpuii chuan, a hei engmah a la sawi tha duh tlat lo" i rawn thlen kan lo nghak a ni deuh tawp mai" a lo tih chuan Huala chuan, chutiang a nih chuan a pawimawh hle a niang maw?" a lo ti a, chuveleh Pasaltha Chhuanliana chuan, pawimawh a ni mai ang chu, Zanriah te han ei kham phawt i la, muang marin kan la sawi dawn nia" a rawn tih takah chuan Huala pawn engmah zawt zui lovin Leikapui lamah chuan a chhuak leh vut a, a Sa kah te a va chawi luh chuan Pasaltha Chhuanliana chuan, ekhai eng sa nge ni ngai a?" a lo ti hlut a, Huala chuan, thian ten vau lo zu hrut la, kan lo zo vat mai ang an ti a, ka vanneih a siamin Nghalrual tla ka nang hlauh mai a ka kap ta mai a nih hi" a han ti a, Kungpuii chuan, a thau nasa mai si a, a tui dawn khawp hi maw" a lo ti a, Pasaltha Chhuanliana chuan Huala chu a han en thin a, la Naupang riau hian a hria a, chutihrual chuan Pasaltha riau hian a hre bawk a, a rilru chuan, Remsangi an Lal fanu chuan nei thei se a tihle a ni.
Chutia Pasaltha Chhuanliana a inngaihtuah vung vung lai chuan Huala chuan, engtia han koh tur che nge pawh ka hre si lova, tunge i hming le?" a rawn tih chuan Chhuanliana chu harh chhuak thut niawm tak hian, a nimaw, i nu hnenah chuan ka lo sawi tawh a, Chhuanliana ka ni e" a lo ti a, Huala chuan, a nih chuan u Chhuanlian ka ti mai dawn che nia" an ti a, Huala bawk chuan, ka nu Zanriah lo siam la, kan insil ange" tihpah chuan Tui dehna lam chu a pan ta nghal a, fai tak a a insil zawh hnu chuan a nu leh Pasaltha Chhuanliana Chaw kil chu a zawm ve ta nghal a, puar tak a Zanriah an ei kham hnu chuan Huala chuan, khawnge kan Sa hrang hi a la lian e mai kan chan te deuh ange" tihpah chuan Leikapui lamah chuan a inchawi chhuak ta nghal a, Pasaltha Chhuanliana chuan hun remchang a ni tih hriain, ka lo pui ve ang che" tihpah chuan a zui chhuak ve nghal a.
Chutia Sa an chan mawlh mawlh lai chuan Pasaltha Chhuanliana chuan, Huala, ka rawn kal chhan chu i hrethiam thovin ka ring a, i hmangaih Remsangi chuan a beisei reng che a ni" a han ti a, chu thu a hriat chuan Huala chuan a thil tihlai chawl meuhvin, engthilah chuan maw?" enge Remi chungah chuan thleng a?" a lo tithuai a, Chhuanliana chuan, Rangpui Lal fapain neih a tum thu te, a pa, Dokulha pawn rem a tih thu te leh, Chapchar awllen a rawn hruai an tum thu te chu a han sawi zar zar a, Huala chuan, a nih leh Remsangin enge a ngaih dan?" a lo ti a, Pasaltha Chhuanliana chuan Huala en kalh pah chuan, Huala, Remi hi i la ringhlel cheu em ni?" duh nise i hriat kher ngailo hian Rangpui Lal fapa chu a nei daih ang chu, mahse chutiang ni lovin hei min rawn tir vang vang a nih hi" a han ti a, Huala chuan, ka tihpalh a ni, inthiamlo tak chuan a lo ti a, Huala vek chuan, Remsangi pa pawh chu a va mak ve mawle, a fanu duh lo chung tirh luih kha a duh lo hle khan ka hre si a" a lo ti a, Chhuanliana chuan, ni e, i sawi chu a dik alawm, mahse ro thil hian Mihring rilru hi chu a thlak danglam hneh khawp a nih hi" a han ti a, Huala chuan, i thusawi chu enge a awmzia?" Remsangi chu Rangpui ro nen a Pa chuan thleng a tum i tihna em ni?" a lo ti a, Pasaltha Chhuanliana chuan, a tum chu a ni ber a lawm, Rangpui Lal hi a hosa em em a, Pasaltha leh Tlangval a ngah em em bawk a, beisei nei ni lo se zawng, a fanu duh lo chung a tir lui nang" a han ti a, Huala chuan, engpawh nise, Pa ang mai a ka neih, Pasaltha Kapzela te In lamah i han leng chho phawt teh ang" a lo ti a, an thil tih lai te an zo tawh bawk nen, Pasaltha Kapzela te In a kal tur chuan an inbuatsaih ta a, chutihlai chuan Kungpuii chuan, inzo tawh em ni?" a rawn ti a, Huala chuan an zawh tawh thu chuan a lo chhang thuai a, Huala bawk chuan, ka nu, u Kapa te In lamah u Chhuanliana nen hian kan han leng lawk ange" a han ti a, Kungpuii chuan, Huala a va mak tutu ve, engthil nge ni a?" a lo tithuai a, Huala chuan, ka nu, nakinah engkim ka la hrilh ang che, tunah chuan a hmanhmawhthlak tlat a han ti a, Kungpuii pawh chuan hrethiam takin engmah a zawt zui duh ta lova, tichuan Huala leh Pasaltha Chhuanliana chu Pasaltha Kapzela te In lam pan chuan an chhuak ta nghal a..









#Pasaltha Kapzela te In an han thlen chuan Huala te chuan thawm pawh nei hmasa lovin Inchhungah chuan an lut nghal a, Huala te rawn lut Kungpuiin a lo hmuh chuan, Huala te lah nirengin, lo leng rawh u, kha, khawilam Tlangval ngeni i rawn kalpui leh nghal ni?" a lo tivar a, Huala chuan Thuthmun rem pah chuan, Chhippui Tlangval u Chhuanliana a nih hi" a lo ti a, Huala vek chuan, khawnge u Kapa hi a awm nange?" an tih zawm a, Kungpuii chuan, u Thanhlira te In lamah a leng ta a nih kha maw" a lo ti a, chuveleh Dailova chuan, kan va ko ange" a rawn ti a, a pa ko tur chuan a chhuak ta nghal a.
Rei vak lo an lo nghah hnu chuan Pasaltha Kapzela pawh chu a rawn thleng a, Inchhung a rawn luh pah chuan Pasaltha Kapzela chuan, Huala, a va pawimawh awm ve, mi Nula rimlai meuh i rawn koh tak ni" nuih vur vur pah chuan a rawn ti lut a, Huala chuan, pawimawh a ni mai ang chu" lo tihpah chuan Pasaltha Chhuanliana lo kalna te leh a lo kal chhan chu a han sawi nghal zar zar a, chutah Pasaltha Kapzela chuan, Rangpui ho chuan Remsangi chu rawn hruai an tum tawh em ni" tiin Chhuanliana chu a han zawt a, Chhuanliana chuan, a rawn hruai an tum tawh e tih phei zawng kan hre hauh lova; mahse Chapchar awllen a inhruai tur a inthlah an nih avangin, Lo vah te kan zo tawh bawk nen, an rawn lan mai kan ring tawh deuh a, Rangpui ho an rawn lan thut chuan engkim a buai vek a ni mai dawn si a, chu chu hriain buai tutu a awm a tul loh nan tiin Remsangin min rawn tir vang vang a ni" a lo ti a, chutah Kapzela bawk chuan, chu, engtia rem han ruat chu nge tha a inhriat a?" a n ti leh a, Chhuanliana chuan, han sawi ru ta mai mai i la, amah Remi tak phei chuan a hre hauh lova; tihpah chuan a Vaibel chu a han lakai te te a, chutah Chhuanliana bawk chuan, kan Lal duh dan hi Remi Nutapa Siamkunga hian a tawmpui hauh lova, kan khaw Pasaltha Hranga lah Siamkunga thian tha ber a lo ni bawk nen, Tlangval te saw hmin tum i la, kan hmin theih hlauh chuan engtin emaw dan kan lo tum ang chu kan ti deuh a" a lo ti a, Huala chuan, Remi chuan a nutapa rilru chu a hria em?" a lo ti a, Chhuanliana chuan, hria e, Siamkunga tak pawn a pa chu a rilru thlak turin a tifova, mahse eng a ang chuang lo a nih hi" a lo ti a, Pasaltha Kapzela chuan, chutia a fapa leh a Pasaltha te ber thlawpna a hmuh loh chuan in Lal chu a Lu a hai ve khawp ang le" a han ti a, xhutah Chhuanliana chuan, nih zawng a ni viau mai, mahse kan Khaw Tlangval te hi kan hmin zo kher angem tih a hriat lohva, ka rawn thang hlan hian Pasaltha Hranga leh kan Lal fapa Siamkunga ten hma an lo la mek ang" a lo ti a, Pasaltha Kapzela chuan, chulamah chuan lungngaihna tur awmin ka hrelo, ama nutapa ngeiin a duh lo a nih chuan, Tlangval ho chuan an thlawp em em ang; mahse Remi chu engatia lamtang a nei tih inhriattir loh?" a mangang awm hle si a" a han ti a, Chhuanliana chuan, a amah Remi hian lamtang a nei a ni tih a hriat chuan, a pa hnial khanah hmangin tanhmun a khawh mai ang tih kan hlau a, kan remruat a sukuk vek ang tih kan hlau deuh a lawm mawle" a lo ti a, Kapzela chuan, chutiang a nih hnenah chuan engkim hrilh ta ula, tichuan Remi chuan lemchangin a pa chu tilungawi se, nangni erawh engmah hrelo angin awm u la, a Sa seh hunah inche mai ang a" a han ti a, Chhuanliana chuan, i remruatna chu a pawmnaawm viau mai, engpawh nise, kan Pasaltha te kan hrilh chhawng ve phawt ang a, a tha an lo ti ve viau maithei a sin" a lo ti a, Kapzela chuan, Huala, nangpawh Chhippui khawlamah chuan i va kal ve ang a, i hmangaih Remsangi chu va venhim ngei i tum dawn nia" a han ti a, Huala chuan, ehe!!! Kan la inzawt hauh lo mai a, naktukah em ni kir leh nghal mai i tum" tiin Pasaltha Chhuanliana chu an zawt a, Chhuanliana chuan, ka tum dan chu a nia lawm" a lo tisam et a, Huala chuan, Naktuk chuan Thangpuii te Lo zawh pui kan tum si a" a han ti a, chutihlai tak chuan Leikapui chu a rawn ri rak rak a, inawm em?" tiri chuan a rawn zui nghal a, Piangliana aw a ni tih Huala chuan a hai lo, chutah Huala chuan, awm e lo lut rawh u" a han ti a, chutihrual chuan Thanliana leh Piangliana chu an rawn lut nghal a, Thanliana chuan, hetah a nimaw i lo tawm leh kuk a, kan zawng kual hrep che alawm" Huala melh khui khui pah chuan an ti a, Hualan a chhan hma chuan Pasaltha Kapzela chuan, Pianga lo thu teh u, thu pawimawh tak mai kan rel mek a nia" inawm vena tur tak a ni" a lo ti a, Pasaltha Kapzela a thu tak em avang leh mikhual Tlangval an hmuh zui tak avang chuan Piangliana te te pawh chu an inthiamlovin an inthlahrung ta hle mai a, chutah Pasaltha Kapzela bawk chuan Huala leh Chhippui Lal fanu Remsangi chanchin zawng zawng chu Piangliana te hnenah chuan a hrilh fai ta vek a, Thanliana chuan, chutiang a nih chuan engtia hma han lak tur nge ni a?" an ti a, Pasaltha Kapzela bawk chuan, hei Huala hian Chhuanliana hi Chhippui lamah a zui phei mai a ngai dawn a" a tihlai chuan Piangliana chuan, engtik a chhuah nge intum a" a rawn ti a, Chhuanliana chuan, harsatna a awm a nih loh chuan naktuk hian kan chhuak dawn maw kan tia" a lo ti a, Thanliana chuan" chutiang a nih si chuan Naktuk Thangpuii te Lo vah kan tum kha engtinnge ni dawn?" tiin Huala chu a han zawt a, Huala chuan, kan zu zawh pui ang a nimai alawm" a lo tisam et a, Piangliana chuan, a Huala, naktuk chuan Chhippuilamah chuan lova kal ve ta la, Thangpuii te Lo chu Thanliana nen kan lo zawhpui mai ang, muangchanna chi pawh a nih tawh loh chu, duh leh naktip lamah kan rawn kal ve ang" a lo ti a, Huala chuan a tuk a Thangpuii te Lo zawhna a tel chu tum viau mahse, a thiante pahnih chuan rem an ti tlat lova, a tawpah chuan Pasaltha Kapzela chuan, Huala, i thiante thusawi chu zawm mai rawh, Remsangi hi i kut a innghat a ni tih hria la, i Thiante chuan an lo phatsak mai ang che, kei erawhchu i hriat angin Lal Kut Ke ber ka ni si a, Khua ka chhuahsan a rem si lova, min hrethiam a niang chu, mahse kan Lal erawh lo titi pui ka lo tum ang" a rawn ti a, Huala pawn hnial zui duh ta lovin, a tuk a Chhippui khawlam pan tur chuan a rilru a siam ta zawk a.
chutia zan rei tak thleng an inkawm hnu chuan tui tak a mu tur a inmangthain an inthen ta hlawm a..








Pasaltha Kapzela te In atang a an chhuah hnu chuan Huala chuan, Zanin chu Zawlbuk kai lo mai ang, Naktuk kan zing chhuah dawn bawk si" Pasaltha Chhuanliana bulah chuan a han ti a, Pasaltha Chhuanliana pawh chuan, nia, mikhual Tlangval ta na na na chu min lo buan hrep emaw a ni awm si a, Naktuk kawng kal tur ka awm lo palh mai ang" a lo ti ve a, tichuan titi chung chuan an kal ta zel a, Huala ten an In an zu thlen chuan Kungpuii chu a Sa rep ngaihven pah chuan Tapah a lo thu kuk mai a, Huala te rawn lut a lo hmuh chuan, inrawn haw e law, Zawlbuk lamah inkai nghal ang chu ka lo tia" a lo ti var a, chutah Pasaltha Chhuanliana chuan, a ka Pi, Vawiinlam ka rawn kalna a thui bawk nen, min lo buan nek awm si a, kai loh mai kan rawt alawm mawle" tihpah chuan, a tuk a Chhippui Khawlam pan nghal an tum dan te leh, Huala pawn a rawn zui ve tur thu te leh, a rawn zui ve chhan tur te chu thiam takin a han sawi zar zar a, Pasaltha vawi tam ralrel a lo buai ve tawh thusawi a ni bawk a, Kungpuii pawn Chhuanliana thusawi chu a hrethiam khawp mai, chutah Kungpuii chuan, Huala, chutiang a nih chuan chhel takin awm la, i hmangaih Remsangi chu midang Kutah i hlan tur a ni lo, kan phu loh leh kan chorual loh mah nise, thil chu a nih tur a ni vek tawh a, chuvangin, sawisep i lo kai a nih pawn i haider luih mai a ngai dawn a ni, a tul a nih chuan kan tuar mai ang, va fimkhur la, huaisen takin awm ang che" an tidap dap a, chutia a nuin a lo hrethiam em em mai chu a beisei loh em avang chuan Huala chu a lawm hle mai a, a nu bulah chuan lawmthu te chu a han sawi mawlh mawlh a, Zan te a rei tawh bawk nen, mut zai an rel ta a.















#a tuk khua a lo var chuan Huala te chu hma takah thovin, Chawthing awm ang ang te chu an han bar a, an mamawh tur ang angte an intih fel leh hnu chuan Chhippui Khawlam pan tur chuan an chhuak ta a.









#Kawtchhuah an thlen chuan Huala te chu an han ding khawmuang a, Huala chuan an khua chu a hmuh tawpna pawh a ni thei tih hriain, a hmuh phak ang ang chu a melh hmaih lo, chutia rei vak lo an chawlh hnu chuan kal zai an rel leh ta a, Tlangval Ngal chak rual ve ve an ni bawk a, Chhun Chawfak hun a nih meuh chuan, Chhippui nen a an inrina ramri Lui chu an thleng ta a, Chhun Chaw te fak a an thut hahchawlhlai chuan Huala chuan Remsangi an chhanchhuahna hmun a nih thute leh an inbeih dan te chu Pasaltha Chhuanliana chu a han hrilh a, Pasaltha Chhuanliana chuan, inlo awm lovang tih kha a hlauhawm ngawt mai, khatiang thil avang pawh khan kan Lal hi chu inhmuhchhuah tawh tur a nia" a lo ti a, Huala chuan, engmah han tih danglam theih a nih tawh loh hi, Rangpui ho chuan an duh chu rawn tih tum se, an rin ang ngawt chuan a awlsam lo tawp ang" dinhluai pah chuan a lo ti hlak a, Huala bawk chuan, tirawh i kal ang hmiang" a han tih zawm a, tichuan kal zai an rel leh ta a.









#chutia Ramhnuai a Nileng a an kal hnu Tlailam Zanriah ei hun vel chuan Chhippui khaw Kawtchhuah chu Huala te chuan an thleng ta a, Pasaltha Chhuanliana chuan, Lungdawhah hian i thu chawl rih teh ang, kan thlen tawh hi" a han ti a, Huala chuan a thuthmun rem pah chuan, u Chhuanlian, Chhippui Lal hian ka lo kal tih a hriat chuan engtinnge min ngaih ang" a han ti a, Pasaltha Chhuanliana chuan, chu i zam nghal mai e law?" Remi nen inchanchin hi a hria em ni?" a lo tivat a, Huala chuan, zam thuah zawng zam lah love, kan tih zawk a chu, Lal Dokulha hian min duhsak ve hle si a, hetia ama In a thleng lova in In a ka rawn lawi mai hi a lo lung ni lo viau lovang a kan ti mawle" an ti a, Huala bawk chuan, Remi nen kan chanchin chu a hria pawn ka hrelo" an tih zawm a, Pasaltha Chhuanliana chuan, a hriat loh chuan a tha a nih chu, hei Chapchar awllen lai te a nia, u Chhuanliana te ho hi han Ram vah pui ka chak deuh a ka rawn zin tawp mai a nih hi i timai dawn alawm, Pasaltha i nih kha, chhuanlam te zawng i siam thiam lutuk ang" a lo ti samet a, Huala chuan, Pasaltha zawng ka ni hauh lo a nia" an ti a, Chhuanliana chuan, chuzawng kan la hre chhawm zel ang chu, tirawh i kal tawh teh ang" a lo ti a, tichuan Khaechhunglam pan chuan an kal leh ta a.













Huala ten khawchhung an va luh chuan zanriah ei hunlai a nih vang nge tumah chu an tawk lova, Huala chu a lawm ry hle a ni.
Pasaltha Chhuanliana te In an thlen chuan Pasaltha Chhuanliana nu chuan a lo be zung zung a, rei vak lo an hahchawlh hnu chuan Zanriah an kil zui ta nghal a, puar tak a zanriah an ei kham hnu chuan Pasaltha Chhuanliana chuan, Huala tihian lo awm la, Pasaltha Hranga leh kan Lal fapa te chu ka va hmu ange" a han ti a, Huala pawn atan chhuah vena chi a ni lo tih hriain, a lo hnial duh ta bik lova, tichuan Pasaltha Chhuanliana chu a chhuak ta a, Pasaltha Chhuanliana a chhuah hnu chuan Huala leh Pasaltha Chhuanliana nu chu an lo inkawm a, Huala chuan, ka pi, enge tunkum inthlawhhma lakna tur te a hla dawn em?" a han ti a, Chhuanliana nu pi Thuami chuan, a thalai tan chuan a hla pawn ka hre hran lo, tara lamah hi chuan Tha te hi a chak tawh lova, hnai te pawh hi.a lo hla riau thin zel tawh" a lo ti a, tichuan titi eng eng emaw sawi zelin an inkawm ta zel a, Leng hawn Ar a khuan hnu pawh chuan Pasaltha Chhuanliana chu a la rawn haw lova, Pi Thuami chuan, Chhuana pawh chu a va leng rei ve mawle, zan pawh a rei mai dawn" a han ti a, chutihlai tak chuan Leikapui atang chuan ka nu, ka rawn haw e" Pasaltha Chhuanliana chuan a rawn ti a, a rawn lut a ni nghal mai bawk a, Huala chuan, enge chanchin?" tiin a lo zawt var a, Chhuanliana chuan, Tlangval tam zawk chu kan Pasaltha te chuan an lo hmin thei a, naktukah Khawdaiah inhmuh khawm tur kan ti a nih kha" an ti a, Huala chuan, chutia kan inthurual theih loh chuan kan fimkhur hle a ngai dawn nimaw?" a lo ti a, Pasaltha Chhuanliana chuan, chuvang alawm Khawdai kan tihna chhan pawh" an ti a, Huala chuan, Remin khuaah hian ka awm tawh tih a hria em?" a lo ti a, Chhuanliana chuan, a u Siamkunga bulah khan lo hrilh tur chuan ka chah kha, amah Remi chu ka hmu bik lova" an ti a, Chhuanliana vek chuan, zan a rei ta e, Vawiin lam kan kal chau bawk nen i mu phawt teh ang" a han tih zawm a, tichuan mut zai an rel ta a..












A tuk tukthuan ei khamah chuan Chhippui Tlangval tam zawk chu Aan Lal fapa Siamkunga ho chuan an an Khua Chhippui khawdaiah chuan an an thu khawm a, chutah Siamkunga chuan, awle Vawiin a kan inkoh khawm chhan chu kan hre vek hlawm a, kan thu rel te kan tan hmain, min lo ngaithla ru te an awm em tih Tlangval pali khan han chian hmasa teh u" a han ti a, Tlangval pali ten Mihring bihruk theihna awm ni a an hriat te an chian leh tete hnu chuan Siamkunga chuan, awle, a hming a Lal fapa ka nih angin thu ka han thet mai ang a; hei ka pa rilru chu kan hre vek ang a, keichuan ka farnu neih chhun a nih angin Remi hi ama duh zawng nvgei Pasal neih tir ka duh a, ka pa bulah pawh vawi tam ka ngaih dan ka sawi tawh a, mahse min chhanlet dan chu hetiang hi a ni a, chuvangin ka farnu venhim hi a nuta neih chhun ka nih angin ka tih turah ka ngai a, tihian min puibawm turin ka han sawm che u a ni" a han ti a, Siamkunga bawk chuan, huaisen leh rinawm tak a awm turin ka duh che u a, finkhekrek chhuah a min phatsan inawm a nih chuan keimah ngei hian ka that ang che u" a han tih zawm leh a, chutah Pasaltha Chhuanliana chu lo dingchhuak vein, Damdiai Pasaltha Kapzelan thurawn a pek te chu a han sawi zar zar a, a duh a sawi zawh hnu chuan Pasaltha Hranga chuan, awle, hei Chapchar awllen a ni chho dawn a, Rangpui ho pawh an rawn lang harin ka ring tawh lova, Rangpui ho an rawn lan hunah pawh engtinmah chet kan la thawh rih lo ang a, mahse inpeih sa ranin kan awm thung tur a ni ang, tichuan Remi an kalpui dawn hunah amah Remi chuan thawm a rawn nei ang a, chu chu inral rinna dar a ni tih hriain, kan ralthuam famkim kan chhuahpui nghal tur a ni" a han ti ve leh dap dap a, Pasaltha Hrangan thute a sawi zawh chuan, Lal fapa Siamkunga bawk chu lo ding chhuak velehin, awle tunah chuan kan remruat dan kan hre theuh a, kan khaw ni leh sa mahnise, kan kawng dal a lo awm an nih chuan tumah dim loh tur, ka sawi tawh ang khan, kan thu rel hi a put ru tur a ni lova, rinawm takin kan awm tur a ni, mi phatsan inawm a nih chuan keimah ngei hian in Lu ka la ang" a han ti leh a, chutia thu dang dangte sawi a rei ngial an awm hnu chuan Khua pawh chu a lo tlailam ve zel a, tichuan khawlam pan chuan an haw ta a..
Thui pawh an la kal lo tihah chuan Pasaltha Hranga chuan a Nau te ho chu tidingin, Nau te u, ka lo sawi hmaih daih mai, inhre tho na a, Tlangval te hi kan inthurual vek lo a, chuvangin Lal Beng pawh a thleng tawh ngei maithei a, Lalin min ko a nih pawhin, zawhna a zawt che u a nih loh chuan engmah insawi ve tur a ni lo, Pasaltha Chhuanliana leh Siamkungan kan chhang vek mai ang" a han ti a, a duh a sawi zawh hnu chuan an kal leh ta nghal a.








Khua an luh chuan thil danglam engmah a awm lova, Pasaltha Chhuanliana chuan an mahni In lam pan nghal vang vangin, a chhuah ve a rem loh avang a In a lo awm Huala chuan a lo nghakhlel tawh hle ang tih te a ngaihtuah pah a, Chhuanlianan an In a thlen chuan a rin lawk ang ngeiin Huala chuan a lo nghakhlel tawh hle mai a, Pasaltha Chhuanliana chuan, i lo ning viau lo maw?" a han ti a, Huala chuan, ning lah love, i nu nen kan lo inkawm nasa mai a, Ni a rei duh deuh tih mai loh chu" a lo ti a, Pasaltha Chhuanliana vek chuan, vawiinlamah In leng te innei em?" tiin an zawt leh a, Huala chuan, chutiang kan neih awm reng ka hrelo mai" a lo ti a, Pi Thuami Vawk Chaw pe zo a lo luh hnu chuan zanriah chu an kil ta nghal a, zanlamah pawh chuan khawiahmah leng lovin Huala leh Pasaltha Chhuanliana chu an inkawm a, a nu erawhchu thenawm te In lamah a chuangkai thung a, Pasaltha Chhuanliana chuan Vawiin lam a an remruat dan zawng zawngte chu Huala chu a han hrilh a, a sawi zawh chuan Huala chuan, a nih leh kan lamtang duh lo Tlangval ho zingah chuan Pasaltha an awm ve em?" a han ti a, Chhuanliana chuan, Pasaltha tih tur ting chuan, Neihthanga an nei ve alawm, amaherawhchu, Neihthangate zawng, a hlauhawm loh lulai e mai" a lo ti a, leng hawn Ar khuan hun thleng a an inkawm hnu chuan pi Thuami leng pawh a lo haw ve ta bawk nen, Huala te ho chuan mut zai an rel ta a.












#a tuk pawh chu engtin tin emaw chuan an hmangliam ve leh mai a, an Lalin a ko lo te chu Pasaltha Hranga leh midang ho chuan mak an tiru hle a ni.
Huala Chhippui khua a nihnih a cham tuk zingkarah chuan Leikapuiah Pasaltha Chhuanliana leh Huala chu an inkawm a, Huala chuan, u Chhuan Rangpui ho chu nizan lamah an rawn thleng i ti em ni kha?" Vawiin lam chuan an chhuak nghal tutu peih dawn em ni?" a han ti a, Chhuanliana chuan, Rangpui leh Chhippui inkar hi nithum kal lai a ni a, an chhuak peih nghal pawn ka ring love a" a lo ti a, chutia an titi melh melhlai chuan, Lal In lam atang chuan Hmeichhe mangang au thawm a rawn chhuak ta thut maile, chuveleh Pasaltha Chhuanliana chuan, chhaile!!! Kan zawng hmelchhe ho chu ka rin aiin an che hma ka ti, tirawh i kal nghal ang" tihpah chuan a tho chhuak ta nghal a, an Silai leh Chempui te an lak fel hnu chuan hmanhmawh takin Lal In lam chu Huala te chuan an pan ta nghal a, Huala ten Lal Mual an han thlen chhoh chuan Mipui ho chu an lo awm teuh mai a, Lal In Leikapuiah chuan Rangpui Pasaltha Thangluaia chuan Remsangi Chempuia tin ran chung chuan Mipui ho chu tha tak a kal tir tur chuan a lo ti lauh lauh bawk a, Huala te chu Mipui karah chuan inzep lut zelin, Pasaltha Hranga te chu va pawh hmasak phawt an tum a ni.
Chutihlai tak chuan Rangpui Pasaltha Thangluaia chuan Chhippui Lal hnenah chuan, Lal ka ni te chu i inti ve a maw?" Lal i nih takzet chuan i Tlangval te Ralthuam hi dah thlak tir ta che, engvang a hetiang a min lo dang mai nge an nih" a han ti a, Lal Dokulha pawh a khaw Tlangval te chungah chuan a thinrim kher mai, chutah Lal Dokulha chuan, Hranga inralthuam te kha han dah thla tawh u" a han ti a, chuveleh a fapa Siamkunga chuan, ka pa, tumah hian kan ralthuam kan dah thla lovang, he thil thlen chhan bul ber chu nangmah i ni tih i hria em?" a rawn tipiap piap a, Lal Dokulha chuan, khanglang che chuan, Siamkung, i pa ka nih hi i hria em, ka thu hi nangchauh ni lo, he khua a mi zawng zawng hian an zawm tur a nia sin" a Kut Zungtang a Siamkunga kawh sawk sawk pah chuan a han ti a, Lal Dokulha vek chuan, inralthuam te kha dah thla nghal vek rawh u" a han ti vin zawm nghal a, mahse Tlangval tam zawk chu biak loh ang mai an ni, chutia a Tlangval ten a thu pek an awih lo chu Lal Dokulha thin a ur zual kher mai, in Lal ka nih hi inhre nange, mahni Lal pawh zah lo Pasaltha ka hre ngailo-ve" a han ti leh a, Lal Dokulha a tawng zo chiah tihah chuan, Rangpui Pasaltha Thangluaia chuan, min la dang lui zel dawn a nih chuan he Hmeichhia hi inchan a tul dawn a nih chu" tihpah chuan Remsangi chhipsamah chuan a han phihlawp a, a Chempui lian tha hlep hlawp chuan Remsangi Hrawk chu a na vak lo chuan a zai ta mai a, a Chempui a lo hriam bawk nen, Remsangi Hrawk chu a rawn thi ta mai a, chu kher chu hmangaihtu tan hmuh reng a har a ni mahna, Mipui zing atang chuan Silai tinkawh va chungin Huala chu a rawn pen chhuak a, Remsangin Huala a lo hmuh chuan a lo melh tawk tawk a, hlam hnih velin an ihlat ang tihah chuan Huala chuan, Rangpui Pasaltha Thangluaia Mit a en kalh pah chuan, i duh chu ti la, keipawn ka ti ve ang" a han ti rumul mai a, mahse Pasaltha ral vawitam lo bei a, Ral Lu pawh lo khai nual tawh Thangluaia chu vozam mai chi a lo ni awzawng lo mai, Pasaltha Thangluaia chuan, Tlangval tunge maw i nih a ka vo ve te mi rawn tih ni?" hun tha ka pe ang che kir leh rawh, chuti lo zawng, i zinkawng a tawi lutuk ange" thamlo fe hian a lo ti a, chutia Rangpui Pasaltha Thangluaia leh Damdiai rawlthar Huala an inhmachhawn lai chuan Lal Dokulha chuan, nang kha i rawn inrawlhna tur a awm love, i Lu ka lak hma hian inkhawlam pan rang rawh, Huala hnenah chuan a rawn ti a, mahse Huala chuan engahmah a lo ngai duh lo thung, chutah Huala chuan, tunge ka nih i hre duh a maw?" kan hrilh ang che, Damdiai Tlangval Hmeithai fapa Thanhuala ka ni e, ka kap let tawp dawn che nge Pasaltha takin kan inbei dawn?" a han ti leh ngat a, Thangluaia chuan ahma a ding Tlangval chuan a ti mai mai lo a ni tih chu, Huala Mit meng leh cheziaah chuan a hai tawh lova, amaherawhchu, tlawm mai erawh a la tum hauh lo, chutah Thangluaia chuan, he Hmeichhia hi ka Kut a awm a nih hi i hria em?" engmah i ti thei hlei lo ange" a han ti a, Huala chuan, keichuan ka thei lo pawh a ni mahna, mahse ka Silai ken hi chuan a thei chiang a ni, Chempui nge Silai thawk chak kan en dawn em ni?" a lo ti a, Rangpui Pasaltha Thangluaia tan chuan duh thlan tur a tam lo ta kher mai a, khaw mipui hmuh lai ngei a rawlthar mai mai vo zam nih chu thangtlawm thlak riauin a hre bawk si, chutah Thangluaia chuan, keipawh ka thi ang a, he Hmeichhia pawh hi inchang bik lovang" tihpah chuan Remsangi chu Zak kau meuh chuan a han sat a, mahse Chempuiin Remsangi taksa a deh hma chuan Silai a rawn puak dur a, Rangpui Pasaltha Thangluaia chu a per nawk mai a, chumi rual chuan mipui ho chu an tlan darh chum chum a...
Chhunzawm zel tur.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 11th, 2019, 6:11 pm

DORAL HRANG MAHSE.
Bung )35( last.


Hun rei tak ka beih hnuah ka zo ve thei ta hram e, pakhatna lawmman la tete a titawp daihah te min lo ngaih takin, he thawnthu hi episode 20 vel tur a ruahman ka ni a, mahse ka thu thiam loh luatah episode 15 laiin a pung ta mai a, heta tang ringawt pawh hian ziakmi ka ni lo tih inhre awm e, ka Thawnthu ziah min lo ngaihhlutsak a, min lo chhiarsaktu te inchungah ka lawm em em a, like leh Comments tha tak tak min lo pe thintu zawng zawngte, inchungah ka lawm leh zual em em a ni, tin, a bik takin, #Pa Zualtea Ralte chungah ka lawm em em a, min fuih a puih ka ngaihna laiah min pui a, a chungah ka lawm takzet a, Ngalfimin dam sela, keimah min cho chhuak ang hian, midang cho chhuaktu ni zel tehse.
Thawnthu hi a tawpna siam a har em em a, inbeisei ang a a lo tawp lo a nih pawhin, min lo ngaidam hram hram mai dawn u nia, ka lawm e.









DORAL HRANG MAHSE.
*Zawntea Chhangte the Red Devils*.
Bung tawp ber.


Chutia mipui an tlan darh chum chumlai chuan Huala chuan Remsangi Leikapuia awm, Rangpui Pasaltha Thangluaia a hlauh luat avang a tlusawp chu a pan hnai ta nghal a, Leikapui a a chuankai dawn lai tak chuan Remsangi rawn hruai tur a Rangpui Pasaltha Thangluaian a rawn hruai Tlangval pakhat chuan, thih i duh a nih loh chuan rawn hnai tawh suh" a rawn ti a, Huala chuan, min lo dan tum buai duh suh, inpasaltha chan ang kha i chang ve duh a nih loh chuan" a han ti let ve ngat a, Leikapuiah chuan a han chuangkai lui a, chutihlai tak chuan Silai a lo puak dur a, Huala lo vautu Tlangval chu a let nghal tawp mai a, a Silai ken pawh chu a thloh nghal a, Huala chu a hawihai hman kher mai a, Pasaltha Hrangan, kha kha a chantawk a nih kha" a tiri a hriat chuan thil awmzia a man nghal a, Rangpui Tlangval te chu pali lai la nimahse, Silai keng an awm tawh loh avangin leh, Pasaltha an nih lem loh hlawm avangin, Huala chu rawn beih zui tum pawh an awm lo.
Huala chu hmanhmawh takin Remsangi, engmah hrelova awm pan chuan a kal ta nghal a, Lal Dokulha leh a nupui chuan an lo ko mawlh mawlh a, Remsangi bul Hualan a thlen chuan thingthi nghal rawpin, Remsangi chu a han ko ve nghal mawlh mawlh a, chutihlai chuan Siamkunga chu lo thleng vein, Huala, In chhunglamah i inzawn lut ang u, a hlauthawng em a a thidang a nih kha" a han ti a, tichuan Remsangi mitthi ang mai engmah hrelo chu Lal Inchhungah chuan an zawn lut ta nghal a, In chhung an luh hnu chuan Lal Dokulha chuan a upa pakhat hnenah chuan, Mipui ho saw va tin tir rawh, tukthuan ei pawh a hun tawh hi" a han ti a.




Pasaltha Hranga te ho chuan Rangpui Tlangval pali te leh an upa pahnih te chu an phuar mawlh mawlh tawh a, Pasaltha Chhuanliana chuan, Neihthanga te ho chu an tan ngam tak tak kha ka ring lo reng a ni" Pasaltha Hranga bulah chuan a han ti a, Pasaltha Hranga chuan, kan tamhneh em mai a, an nun an la hlut te pawh a ni mahna" a lo ti a, Chhuanliana chuan, inPasaltha Thangluaia chu rawlthar Huala tawnah a fam ta, nangni pawh hi inluhlul vaih zawngin indam reng bik lovang" Rangpui ho bulah chuan an ti a, Rangpui ho lah chuan engmah an sawi ngam tawh hek lo.
chutihlai tak chuan an lam panin Tlangval pakhat hi a rawn kal hlawk hlawk a, Pasaltha Hranga chuan, Tlangval, engatia i va rawn hmanhmawh em em ve" a lo ti a, Tlangval chuan thaw hlawi hlawi chung hian, Pasaltha Neihthanga te khaw chhuahsan lai ka hmu a, an thusawi danah Rangpui lam pan an tum a ni awm e" a han ti a, Pasaltha Chhuanliana chuan, mak tih hmel fe hian, Rangpui khua maw!!! Enge an han tih ang a?" a lo tivat a, Pasaltha Hranga chuan, kan Neihthanglubawka chuan Rangpui ho chu min thah tir a tum a nih chu, a chhan dang engmah a awm lovang" a han ti a, Chhuanliana chuan Tlangval hnenah chuan, kan lawm lutuk e i kal leh thei tawh e" a han ti a, Tlangval pawh chu a kalsawn ta nghal a.
Chutah Pasaltha Chhuanliana vek chuan, Neihthanga te chet dan hi Lalpa hian a hriatpui a ni angem?" tiin Pasaltha Hranga chu a han zawt a, Hranga chuan, chupawh chu a ni thei tho mai, amah kan zawt dawn nia" a lo ti a, Tlangval dang te chu kovin a remlai a Rangpui Tlangval an phuar te lo awmtir tur chuan an ti a, tichuan Lal Inchhunglamah chuan an lut ta nghal a.






#Hranga ten Inchhung an luh chuan an beisei loh tak maiin Lal Dokulha chuan ngaihdam a lo dil mawlh mawlh mai a, chutia an Lal a rawn che mai chu lo chhan mai nachang pawh an hrelova, chutah Lal bawk chuan, Hranga, Chhuanliana nen hian ka khaw innghahna inni a, inpawi nasa takin ka khawih a ni, min ngaidam mawlh teh u" a rawn tih leh takah chuan Chhuanliana chu inthing harhin, a Lalpa, tunah zawng chutiang lam sawi a hun rih lo-ve" a lo ti a, Remsangi, engmah hrelova awm, a u Siamkunga leh Hualan an lo buaipuinalam chu a pan san ta daih a, Remsangi nu lah a tap perpur reng mai bawk si, Huala te bul a va thlen chuan Pasaltha Chhuanliana chuan, a hlau hle a niang maw?" a han ti a, Siamkunga chuan, ni e, Hmeichhe tan chuan a awm lo hran lo-ve" a lo ti a, Chhuanliana bawk chuan, Bawlpu inko lo em ni?" a han ti a, Huala chuan, kan ko mek, a rawn kal mek ang" a lo ti a, Pasaltha Chhuanlianan Huala hmel a hmuh chuan, Huala chuan Remsangi chu a chan mai ang tih a hlau hle a ni tih a hria a, chutah Pasaltha Chhuanliana chuan, Huala, hlauthawng mah ta che" a tha leh mai dawn a lawm" tiin Huala chu an tawng thlamuan a, rei vak lo hnuah chuan Bawlpu pawh chu a rawn thleng ve a, Remsangi chu a han buaipui nghal zung zung a, rei vak lo a buaipui hnu chuan Bawlpu chuan hlauhthawn tur a awm lo-ve, a rawn harh vat mai ang, Tui vawt te khan han dep u la" a han ti a, Huala leh midang ho chu an thla a muang huai ang le.










Chutia Bawlpu berin a tih takah chuan Pasaltha Chhuanliana chuan, Huala, tihian lo buaipui rawh u aw, Lalpa hi thil han sawipui lawk tur ka nei e" an ti a, Lal Dokulha leh Pasaltha Hranga lo thutna lam chu a pan ta nghal a, Lal Dokulha te thutna a va thlen chuan Lal Dokulha chuan Pasaltha Hranga hnenah chuan ngaihdam a lo la dil mawlh mawlh reng a, chutah Pasaltha Chhuanliana chuan, Lalpa, nangma fanu ngei pawh ro thil lakah i uibet zo lo a ni a, keinipawh hi ro thil avangin midang Kutah min hlan duh lovang tih engtinnge kan rinngam ang che" an ti ta mai a, Lal Dokulha chuan Chhuana, min ngaidam mawlh teh u, hetiang thil hi chu a thleng leh tawh ngailo ang, min ngaidam thei lo a nih pawhin, ka nupui leh chhungte lakah tal chuan zah min ngaihsak dawn nia" tihpah chuan a thingthi ta rap maile.
Chutah Pasaltha Hranga chuan, Lalpa, khatiang kha zawng ni lul lo-ve, tihpah chuan Lal Dokulha, an hma a thingthi niai mai chu an kaithova, chumipah chuan Hranga vek chuan, Lalpa, i chung a kan chet dan hi kan zah loh vang che a ni lova, i Khaw Mipui te hi lAl i nih angin, nangmahah hian innghat ngam i la kan tih vang a ni, tunah chuan i inthiamlo takzet ni a kan hriat avangin kan ngaidam ang che, mahse hetiang thil hi a thleng leh a nih ngai chuan, i chungah zahngaihna ka lantir tawh lovang" an tih zawm a, Lal Dookulha chu a lawm em em a, Hranga leh Chhuanliana hnenah chuan lawmthu a sawi mawlh mawlh a, chutihrual chuan intiamna a nei nghal bawk a, chutia an Boruak te a daih tak deuh hnu chuan Pasaltha Chhuanliana chuan, Lalpa, tunah hian Pasaltha Neihthanga te ho chu Rangpui ho panin an kal mek a, i hriatpui a kal an ni em?" tiin Lal Dokulha chu an zawt a, a thu hriat avang chuan Lal Dokulha chu a mengphar nasa kher mai a, chutah Lal Dokulha chuan, chuzawng ka hriatpui hauh lo mai, enge Neihthanga te chuan an han tih ang a?" a lo ti ta mai a, Pasaltha Hrangan an Lalpa hmel a hmuh chuan an Lal.chuan dawt a sawi a ring lova, Pasaltha Hranga chuan, chutia i hriatpui lo a nih takzet chuan Neihthanga te chuan Vawiin a thil thleng hi Rangpui Lal hnenah han thlen a min rawn beih tir a tum a ni ngei ang" tiin, a ngaih dan chu an sawi a, Lal Dokulha chuan, engvang a Neihthanga te chuan ama khua ngei bei tur a Rangpui Lal chu han tlawn tum nge an nih ang" a lo ti ve a, chutah Pasaltha Chhuanliana chuan, Lalpa, Rangpui upa leh an Tlangval te chu tunah hian kan hreng bet a, eng emaw hriat an nei lovang maw, kan dawp dawn em niang?" a rawn ti a, Lal Dokulha chuan, i rawtna chu a tha dawn riau mai ka ti, engpawh nise hei a tlai tawh a, tukthuan te han ei phawt i la, ka upa te ho nen rau kan rel tha dawn nia" a lo ti a, chutihlai chuan Remsangi chu a lo harh ve tawh a, Lal Dokulha chuan, tukthuante zu ei ve phawt tawh u, saw, Remi pawh a rawn harh tawh saw" an ti leh a, Remsangi a lo harh ta bawk nen, Huala, Chhuanliana leh Hranga te ho chu Lal In atang chuan an chhuak ta a.








#an khaw Pasaltha te an chhuah hnu chuan Siamkunga chuan, ka pa, i thil tih hian pawi a khawih thui hman lova, i vannei takzet a ni.
Lal i ni a, i thil tih avang hian i khaw mipui ten nangmahah rinna nghah ngam an harsat viau tawh maithei a ni" an ti a, Lal Dokulha chuan, ni e tiraw Kunga, a engin nge maw min mawlh a, Ro ringawt khan ka rilru luah ni, ka thiam loh takzet a ni" a lo ti a, Siamkunga bawk chuan, kan Pasaltha ten zah an ngai hlauh a, i mualpho lutuk loh bakah, i Lalnain a tuar lova, i vannei hle a ni" an ti leh a, Lal Dokulha chuan, Kunga, hetiang thil hi chu a thleng nawn leh tawh lovang" tihpah chuan a dinghluai a, a fanu Remsangi lam chu a pan ta nghal a, Remsangi mutna a va thlen chuan Lal Dokulha chuan Remsangi hnenah chuan ngaihdam an dil leh mawlh mawlh a, Remsangi erawhchu a lo tawng chhuak peih lova, mahse a pa chu lo ngaihdam mai erawh harsa a ti hle a ni.
Siamkunga chuan, Tukthuan a siam mawlh mawlh a, a peih hnu chuan, ka pa, tukthuan ei phawt ang u hmiang, upa ho an rawn chuankai leh chuan kan ni leh nuai nuai lutuk ang" an ti a, Lal Dokulha chuan a nupui hnenah chuan, tihian Remi chu lo mu se tirawh i va kil ang hmiang, ngaihtuahawm lutuk pawh a nih tawh loh hi" an ti a, Mahse Lalnu Zaziki chuan ka lo thutpui ange" a lo ti a, Lal Dokulha chuan hrethiam takin, a nih aw, thu rel tur pawimawh kan la nei bawk nen, ka lo ei san phawt ang che u" tihpah chuan a kal sawn ta nghal a.








#Puar tak a tukthuan te an ei kham hnu chuan upa ho leh Pasaltha Hranga te ho chu Lal Inah chuan an rawn kal khawm leh tak tak tawh hlawm a, a Val Upa Lianchia leh Val upa Zuithanga an rawn thlen veleh hnu chuan Lal Dokulha chuan, awle hei Vawiin hian kei inlal hian pawi nasa tak ka khawih a, heng kan buaina hi keimah avang a chhuak a ni a, ka zak takzet a ni; an ti tete a, Lal bawk chuan, mahse ka Pasaltha ten zah an lo ngai thei hlauhva, nunna tam zawk kan chan loh phah a ni" an ti leh a, sawi zelin Lal chuan, Tunah hian ka Pasaltha Neihthanga te chu Rangpui khawlam panin an kal mek a" a tih chuan Hranga leh Chhuanliana tih loh chu mak tih vang chuan an lo meng tang nghal hru a, chutah Rawn sawi zawm lehin Lal chuan, ka rin danin Neihthanga te hi ka lakah tlatlum tawk an inti lova, Zinglam a Rangpui Tlangval pakhat leh an Pasaltha thah an ni bawk nen, chu chu remchangah hmangin Rangpui Lal chu han fuihpawrh a, min rawn beih tir a tum a ni ngat ang" an ti a, chuveleh upa Pakhat chuan, Lalpa, Neihthanga leh a thuihhrui Tlangval chhungte hian eng emaw hriat an nei lovang maw?" an ni hnen atang chuan Neihthanga te tum chu kan hre thei ang chu" a rawn ti a, Lal chuan, ni e, Tlangaupa, Neithanga leh a Thurualpui chhungte chu Tlangval ho kha rawn hruai tir tawh" an ti nghal a, Tlangaupa chhuah hnu chuan Lal Dokulha chuan, awle ka Pasaltha te nen chuan kan lo sawi zauh tawh a; tunah hian Rangpui ho chu kan hreng a, an ni atang hian engkim a fiah theih kan ring a ni" an ti a, Val upa Lianchia chuan, Lalpa, Neihthanga te leh Rangpui Lal te hi an lo intiamrual a ni lo maw" a rawn ti a, Lal Dokulha chuan, chutiang ni dawn se Neihthanga kha ka lam a tang awm khan a awm a, min hnaih reng bawk si" a lo ti a, Lal bawk chuan, Rangpui ho chu hranga han hruai lut u la, engkim a chiang mai ang" an tih zawm a, Pasaltha Hranga chu Lal In atang chuan a chhuak ta nghal a.
Rei vak lo hnuah chuan Hranga chu Rangpui Tlangval pali leh an upa pahnih hruaiin Lal Inah chuan an rawn lut a, Lal Dokulha hmaah chuan an thingthit tir thap mai a.
Chutah Lal Dokulha chuan, tunah hian thu ka zawt dawn che u a, dik takin min chhang ang che u, ka thu zawh tur che u hian inthih leh dam a hril tih inhre dawn nia" Rangpui ho hnenah chuan an ti a, chutah Lal Dokulha chuan, in Lal Tuakliana leh kan khaw Pasaltha Neihthanga te hi an inthurual em?" an ti ta a, chutah Vanzau upa, Rangpui upa ang a lemchang Aizinga chuan, Lalpa, kei hi i hriat angin Rangpui upa ka ni a, i thil mi zawh chu ka hriat zawng a ni hauh lo mai" Neihthanga i tih pawh chu kan hriat mi lah va ni hek suh" a rawn ti a, Lal Dokulha vek chuan, innunna hi ka Kut a awm a ni tih inhria ang maw?" thu dik tak min hrilh rawh u, Neihthanga leh in Lal hian eng remruatna nge inneih?" dawt min hrilh leh chuan ka that nghal ang che u" an ti leh a, Rangpui upa Aizinga bawk chuan, kan Lal hian thu chhia thu tha a a mi rawn ber ka ni a, i Tlangval te leh kan Lal hian eng remruatna mah an nei lo" a rawn tileh a, vau khan hrang hrang a Lal Dokulhan a vau hnu pawh chuan Lal Dokulha chuan a duh ang chhanna a hmu thei hauh lo mai a, mahse Rangpui Tlangval te hmelah chuan thil inthup awmin a hre tlat tho bawk si.
Chutah Lal Dokulha chuan, awle nangni hian dawt min hrilh a maw?" indam reng a tul lo-ve, Hranga, heng ho hi kai chhuak ula, tuma hriat loh turin va kap hlum rawh u, a engatia dawt hlir min han hrilh veini" a ti ta mai a, Pasaltha Hranga ten Rangpui ho an kaih chhuah dawn lai tak chuan Rangpui Tlangval Pakhat chuan, thih chu a la duh lo hle ni tur a ni, Pasaltha Hranga bulah chuan, khawngaihin min nun rawh u, thil engkim ka hrilh ang che u" a rawn ti a, Pasaltha Hranga chuan Lal Dokulha chu a va melh ralh a, Lal pawn lo hrethiamin, Rangpui Tlangval hnenah chuan, han sawi ta che, inLal remruatna chu, mahse dawt min hrilh leh a nih vaih zawngin, i thi hmasaber ang tih hria ang che" an tichang fal mai a, chutah Tlangval chuan, min ring rawh u thu dik chauh ka hrilh ang che u, mahse heng thu hi ka sawi a nih chuan min nun ang tih min tiam phawt rawh" Chhippui Lal, Dokulha hnenah chuan a rawn ti a, Lal Dokulha chuan, thu dim min hrilh a nih chuan ka nun ang che" a lo ti a, chutia Lalin a tih takah chuan Rangpui Tlangval pakhat chuan, Rangpui Lal leh Vanzau Lal unau an nih thu te, Vanzau Lal fapain a fanu an rawn beisei a" hnar an nih abang leh an Pasaltha Zavunga an lo thah sak vangte, chumaichu duh tawk lova, an han run leh kher abang te a Vanzau Lal Lianpuian a unaupa Rangpui Lal Tuakliana va pun a nih thu te leh, Rangpui Lal fapa nupui tur ang a Remsangi chu bum chhuah a hreawm tinreng tuartir an tum dan zawng zawng te chu an sawi fai ta vek mai a, a thusawi chu, Ranggpui Lal leh Neihthanga ten intiamrualna an neih loh thu chuan an tlip a, Rangpui Lal remruatna an hriat meuh chuan Lal Dokulha leh a Pasaltha te chu mak tihna leh thinrimna chuan an khat nghal a, Remsangi nutapa Siamkunga leh Huala phei chu an thinrim zual hle a ni.
Chugah Siamkunga thinrim lutuk insum zo lo chuan, ka farnu hi hreawm tuar a thih tir thak intum a maw?" tihpah chuan Aizinga chu hnaihchilhin a Bekah chuan a hnek bur mai a, midang khawih leh a tumlai chuan Pasaltha Hranga chuan Kunga, a tawk tawh e" tiin a rawn pawmbet nghal a, Lal Dokulha pawh chuan, ni e Kunga, inbengdai hram hram rih rawh khai, i farnu chung a hetiang tak a rilru chhia putu te hi kan ngawihsan mai mai lovang" a rawn ti ve a, Lal bawk chuan, awle ka rilru ka thlak leh e, thu dik tak min hrilhtu tih loh midang zawng kha chu Rip chhungah va khung u la, Tui leh Chaw inpe tur a ni lo, nuam tak a an thih ka remti lo-ve, riltam tuihal a thih an phu e" an ti a, Hranga te ho chuan Rangpui ho chu an hruai chhuak ta nghal a..













#Pasaltha Hranga te an chhuah hlan chuan Lal Dokulha chuan Rangpui Tlangval, thu dik a sawi avang a an nun tak hnenah chuan, Tlangval, tunge i hming le?" tiin an zawt a, Tlangval chuan, ka hming chu Thangvela a ni e" a lo ti a, Lal chuan, hei thu dik i sawi avangin i nunna ka zuah sak che a ni a, min bum a nih erawh chuan khawi hmunah pawh awm la ka that thovang che" an ti a, Thangvela chuan, Lalpa, thu dik tak ka sawi a ni, a lo ti a, Thangvela bawk chuan, Lalpa, hei kan Lal remruatna ka sawi avang hian kan khuaah kir leh pawh ni i la kan Lal chuan min that tho tho dawn a, mahni thihna tur pan leh ngawt ai chuan, i remti a nih chuan i khuaah hian inbenbel min phal sak ta che" a lo ti a, Thangvela ngenna chu Lal Dokulha chuan awm a tih pui em em a, a upa te chu an rawn kual hlawm a, chutah upa pakhat chuan, Lalpa, ama khaw tan pawh a rinawm zo lo a ni a, chuvangin, kan khaw tan pawh hian a hlauhawm viau lovang maw?" a rawn ti a, rei vak lo an sawi khawm laih laih hnu chuan, Chhippui khua a Thangvela chu a inbenbel an remtih sak ta a, intiamkamna te an neih tir hnu chuan Lal chuan Tlangaupa hnenah chuan a awmna tur lo ngaihtuahpui turin an ti a, tichuan Tlangaupa leh Thangvela chu pawn lamah chuan an chhuak ta nghal a.











#hetihlai hian Pasaltha Hranga te ho pawh kha an rawn lut veleh tawh a, thuthmunte an remfel hnu chuan Lal Sokulha chuan, awle, ka ro thil umluatah ka fanu Remsangi kan chan lo hloh a ni a, ka Pasaltha ten min ngaidam hram teh u; inthiamlo tak chuan an ti a, upa pakhat chuan, Lalpa, i thiam loh a ni bik hleinem, keini i upa te ho thiam loh zawk hi a ni, Kunga khawngaih takin min ngaidam mawlh teh u, kan thiam loh vek a ni" a rawn ti a, Pasaltha Hranga chuan, Lalpa, thil kal tawh chu engmah tih danglam theih a ni tawh lova, chuvangin engtinnge hma kan lak ang tih i ngaihtuah tlang zawk teh ang u" a rawn ti a, Pasaltha Chhuanliana leh Siamkunga pawh chuan Hranga thusawi chu an lo tuihnih ve bawk a, chutah Lal chuan, ka Pasaltha te u, kei in Lal hian ka phatsanlai che u pawh a, ka tan a inrinawm tlat avangin inchungah hian ka lawm takzet a ni" an tileh a, Lal vek chuan, Rangpui ho thil tum chu kan hre tawh a, chuti chung chuan an Tlangval te kan lo la thah sak zui bawk nen, he thil thleng hi an hriat hun chuan an ngawi liam mai mai dawn hauh lova, chuvangin engtia lo inbuatsaih nge tha ang, i han sawi ho ang u hmiang" an ti a, upa pakhat chuan, Lalpa, khua hi Kulhin hung chhuak vek i la, hmelma lak a kan lo inphen theihna tha ber a ni chuan ka hria a, Tlangval kan inngah hleih si a" a rawn ti a, Pasaltha Hranga chu lo ding velehin, Lalpa, a ranglam a Neihthanga te um kha a thain ka hria a ni.
Kan han umphak ta lo a nih pawn, Rangpui khua chu kan bei zui mai ang a" a rawn ti a, upa pakhat chuan, Rangpui khua chu kan han beih chi an ni lovang, Tlangval kan inngah hleih si a, engmah lovah nun kan han inhloh mai mai ang" a rawn ti a, Lal Dokulha chuan, Kulha khua hung kha a tha viau mai a, mahse Kulh hunga kan buai chhungin, kan ral te hi an rawn che mai ang tih ka hlau hlel love" an ti a, chubeleh upa pakhat chuan, Lalpa, khaw thenawmah hian puihna dil ta mai i la a tha lo maw" a rawn ti a, Lal chuan, ni lo-ve, keimahni vang a khaw dang Tlangval te an buai a tul lo-ve, bakah, nunna hial thap ngai a ni a, chuvangin, an Lal te pawn an lo remti kher lovang" a lo ti a, chutia thu mum pawh nei thei lova rei fe an sawi ho hnu chuan Pasaltha Chhuanliana chuan, Lalpa, Rangpui ho chu kan chet khalh mai a ngai a ni, tam zawk viau mahse, an inral rin loh chuan kan hup barh theiin ka ring a ni, kan Pasaltha Hranga sawi ang khan, Neihthanga te um ni pah fawmin, a ranglam a kan chet a ngaiin ka hria" an ti a, tuman remruatna tha tak nei chuang hek lo le, an Pasaltha te Pahnih duh dan chu an pawm tlang ta a.
Lal Dokulha chuan Tlangaupa hnenah chuan Khua a Tlangval awm zawng zawng ko khawm tur chuan an ti a, Tlangaupa pawh chu a chhuak ve nghal mai bawk a, Lal leh a upa te ho bakah Pasaltha te chuan Tlangaupa chu an zui chhuak ve nghal a.










Rei vak lo an nghah hnu chuan Chhippui Tlangval, Ralkai chin chu Lal Mualah chuan an rawn jal khawm tak tak hlawm a, Tlangval awm zawng zawng te an rawn kim hnu chuan Lal Dokulha chuan, awle, ka Khaw innghahna ka Tlangval huaisen tak tak te u, Vawiin hian kan beisei loh leh kan rin phak hauh loh thilin min deng thut mai a, chuvangin, Ral bei tur a kan inbuasaih a tul a ni" an ti a, Lal bawk chuan, kan hriat theuh angin ka fanu Remsangi chu, Rangpui khuaah, Silh leh fen tha ber ber inthuam a, a tui tha tha ei in a Rangpui Lal fapa nupui a ni mai tawh dawn emaw kan tih laiin, Rangpui Lal chuan ruahmanna tenawm tak mai lo neiin, a unaupa, Vanzau Lal phuba lak nan a, ka fanu Remsangi chu a fapa nupui tur ang a min bum a min neih saj a, Sal ang mai a chhawr hlum thak a tum a ni tih, Rangpui Tlangval Thangvela hnen atangin kan hria a, hethilah hian ka Pasaltha te an lung ni lo em em a, chuvangin, Rangpui khua chu han beih hial an duh a, inrun hi duh lo hle mah i la, an Pasaltha leh an Tlangval pakhat kan lo thah avangin Rangpui ho chuan min rawn bei tho tho dawn a, a chhan chu, ka Pasaltha, ka khaw tan pawh a a theihna lo hlan fo tawh thin, Neihthanga a hel vang a ni a, Neihthanga hi engvang a ka lakah hian hel nge a nih ka hre lova, an ni chuan Rangpui khua an pan mek a, Rangpui Lal chu han tlawn a, kan khua hi rawn beih tir a tum a ni" an tidap dap mai a.
an thu hriat chuan Chhippui Tlangval te chu a thawng em em mai a, Rangpui ho thil tum an hriat phei chuan, an thin a tirim em em mai a, Rangpui ho chu run hial an duh hlawm a, Neihthanga te ho pawh chu thah vek mai an duh a ni.
Chutah Lal chuan rawn sawi zawm lehin, ka Pasaltha te duh dan angin Rangpui khawlam panin inkal nghal ang a, a chhan chu, Neihthanga te nen Nikhatlai a in inthlauh chuan, Rangpui Lal chu an lo han hmin vek hman ang tih a hlauhawm a, Rangpui khua Tlangbal te an lo inpeih hman chuan Tlangval kan intam hleih bawk nen, intan chet a har lutuk ang tih a hlauhawm a, a vawtu zawkin Ek kan cheh loh nan, Vawiin lala hian inchhuak ve nghal tur a ni" an ti leh dap dap a, Lal chuan Val upa te Mut a an kal dan tur te sawi tur a a tih hnu chuan Val upa Zuithanga chuan an kal dan tur te chu a rawn sawi ta zar zar a, an ruahman dan chuan, Tlangval Sawmthumin khua an lo veng ang a, a bak zawng erawh, Rangpui khaw run turin an kal thung ang a, an ral beih dan tur tak tak chu, Rangpui Khawdai a rel thatah an ti a ni.










Sawi lan tawh angin, Rangpui khua hi, Lal Tuakliana Lalna a ni a, In zali chuang a inchhal an ni a, Tlangval rauthap tak tak bakah, Pasaltha pawh an ther fur a ni.












#Chutia sawi tul ang ang te an sawi zawh hnu chuan kawtchhuah a innghakkhawm turin an kal darh ta hlawm a, Tlangval tin te mai chuan an Ralthuam neih tha ber ber te chu an thawh chhuahpui hlawm a, Rangpui khua chu an mahni aia khawlian zawk fe a ni tih hre mahse, an thinrimna chuan hlauhna a neih tir tawh lova, an Lal fanu, hmeltha em em mai, tupawimah sawi ngailo, Lal fanu a nihna dah tha a, nelawm tak a insiam thin, Remsangi tan a beih chu an inhuam em em hlawm a ni..










#Kawtchhuah a Tlangval te an rawn kim hnu chuan Val Upa Lianchia chuan, nau te u, hei khua hi Chawhnulam a ni tawh a, Neihthanga te nen chuan kan inkar a zau viau tawh dawn a, mahse kan theih tawk a chakin kan um ang a, hmun remchang laiah riah buk kan sual mai dawn nia" an ti a, tichuan thu tam pawh sawi tawh lovin, thinrimna avang a phuba lak chak a tuihal, Chhippui Valrual te chu, Rangpui khawlam pan chuan an kal ta nguah nguah maile.











#thui fe an kal hnu chuan Ni pawh a niam tawh khawp mai a, hmuamda zenzawn an kal leh hnu chuan Lui te awmna an thleng ta hlawl mai a, Val Upa Zuithanga chuan, hetah hian riah buk kan sual mai dawn em niang, Neihthanga te chu kan umpha tawh dawn chuang lova, khua a tlai tawh bakah, Tui a awlsam bawk si a" tiin, Val upa Lianchia leh Pasaltha ho chu an rawn a, Pasaltha Hranga chuan, ni e, han kal zelna chi pawh a nih tawh loh hi, kan Tlangval te an chau lutuk ang, lam hla tak kal kan la hmabak si a" a lo ti a, Pasaltha Chhuanliana chuan, Neihthanga te ho kha kawng lak a an riah ve loh chuan kan chesual thei der a nia" a rawn ti a, Val upa Lianchia chuan, Neihthanga inla Pasaltha chawp mai mai chuan Zanthim paltlangin Rangpui chu a pan tawp lovang" nui pah chuan a rawn ti ve a, chutia an sawi ho hnu a rem an tih tlan takah chuan, chulai hmunah chuan riahbuk chu an sual ta a, Tlangval ho chu an tam tham deuh avangin, hmun li laiah Buk chu an sa a, Chawhmeh zawnnan a khua a tlai deuh tawh avangin, Buk te an sual peih hnu chuan, zanriah bawl tur a an tih ten an lo peih diam tawh chu an ei ta nghal a.










#puar tak a Zanriah te an ei kham hnu chuan, Val upa te leh an Pasaltha te bakah, Huala leh an Lal fapa, Siamkunga te ho chu, ruahmanna te siamin Buk pakhatah chuan an thu khawm a, Val upa Lianchia chuan, Hranga, nang, Rangpui khua thleng lo han daidar tawh i ni a, an khaw hmunhma te pawh i hre viau turah kan ngai a, luhchilh a har viau angem?" luhkhan engzatnge awm reng reng a" tiin an zawt a, Pasaltha Hranga chuan, Rangpui khi Tlangchhip a awm a ni a, amaherawhchu, Tlangchhip e ti lo khian a pharh zau hrep lawi a, luhkhan pahnih chiah a awm a, Ralveng pawh an indah uluk hle thin a ni, Neihthanga te ho thu ken, Rangpui Lalin a lo awih sak a nih ngat phei chuan kan tan chet a har viau maithei a ni" a rawn ti a, Val upa Zuithanga chuan, chutiang a nih zawngin ruahmanna tha tak kan neih a ngai dawn zu nia, engang ruahmanna nge i neih han sawi nghal la" a lo ti a, Hranga chuan, luhkhan pahnih chauh chu a awm na a, khawimaw kham chhengchhelai deuh atang a luhna chu a awm ka ring a ni, chutiang chu kan zawng hmasa phawt ang a, kan hmu ta hlauh a nih chuan tatang chuan khuaah chuan kan lut tawh mai ang a" an ti a, Pasaltha Chhuanliana chuan, Pasaltha Hrangan min hrethiam se, a remruatna kha innghah ngam a har ka tideuh mange, kan beisei ang hmun a lo awm mai loh phei chuan kan buai rei mai mai dawnin ka hria" a rawn ti a, Val upa Lianchia chuan, chutiang a nih chuan ruahmanna tha zawk te i lo nei em ni?" a lo tivar a, Pasaltha Chhuanliana chuan, ka ruahmanna hi a tha zawk e phei zawng ka tihauh lova, mahse, tihian ka lo ruahman a; Pasaltha Hranga sawi hmangah Ralveng an uluk si a, Neihthanga te hi keini aiin Rangpui khua an thleng hmasa dawn bawk nen, an thu sawi te Rangpui Lalin a lo awih sak a nih ngat phei chuan, a hma aia nasain ralveng pawh an inuluj zual ngei ang a, kan tan chet a har lutuk ang, chuvangin an ralvenbuk chu bei ta tawp mai i la, engzat a tam nge kan nih an hriat avangin min rawn bei mai ngam bikin ka ring lova, chuvangin ka sawi ang khan nihnih vel a khat tawkin bei i la, an ni tan pawh khua han chhuahsan ngamna chi a ni bik dawn lova, chutiang a nih chuan an Silai mu pawh a hek viau ang a, Silai mu an tlachham ta a kan hriat hnuah kan kap ta chiam ang a" a rawn ti a, Val Upa Zuithanga chuan, inremruatna chu a tha hle mai, pasaltha Hranga ruahmanna pawh kha hnawl ngawt chi a ni bik lovang, a hmun han thleng phawt i la kan la rel tha leh dawn nia" an ti a, tichuan thu dang dangte sawiin an inkawm ta zel a, Zan te a rei lutuk hma chuan naktuk lamhla kal tur an la ni bawk nen, Chhippui Tlangval te chuan mut zai an rel ta a..










#Chhippui Tlangval ten khua an chhuahsan Ni tlaiah chuan Pasaltha Kapzela te chu Chhippui khuaah chuan an rawn thleng ve hlawl mai a, Lal Dokulha chuan, Kapa, engti tur a, Tlangval he ti zozai hruai a rawn kal nge innih?" an ti a, Pasaltha Kapzela chuan, a Lalpa, han sawi ta tawp mai i la, Huala kha kan khaw daingul la nimai tur a ni a, kan Lal pawh Sa a barh ngunin kan khaw tan pawh vawi duai lo a nun a lo thap tawh a, chung a thil tawh zawng zawng chu kan Lal chuan a theihnghilh lova, hetia Ralram a a awm tih a hriat hian Tlangval sawmli hruai a amah pui turin min rawn tir a ni" a lo ti a, a Thu hriat chu a beisei phak loh thil a nih avang chuan Lal Dokulha chu a lawm hle mai a, Damdiai Tlangval te hnenah chuan Vawiin lam a an thil tawn zawng zawngte leh, Huala te hovin Rangpui khua an pan nghal thu te chu, kimchang tak chuan an hrilh vek mai a, Pasaltha Kapzela chuan, Lalpa chutiang a nih chuan, Huala te ho chu kan um ve nghal mai ange" a lo ti a, mahse Lal Dokulha chuan, Kapa, chutia zanin la la a chhuah induh nghal a nih si chuan Zanriah ei phawt rawh u, chuti lo zawng, inkalna tur a la thui si a, riltamin inchau chhe lutuk ang" an ti a, Kapzela chu hmanhmawh ru viau mahse, Lal Dokulha thusawi chu dik a ti em em a, chuvangin a lo hnial duh ta bik lova.
















#A tukah chuan Chhippui Tlangval te chu Rangpui khawlam pan chuan an kal leh tauh tauh a, chutia Nihnih lai an kal hnu Zanlai Arkhuan hun vel chuan Chhippui Valrual te chuan Rangpui khawdai chu an chuang chhuak ta hlawl maile.
Rei vak lo hahchawl a an thut hnu chuan Val Upa Lianchia chuan, awle hei, Rangpui khawdai chu kan thleng ta a, kan thawm pawh kan dim tlan a tul tawh ang" an ti a, Val upa Lianchia bawk chuan, tunah hian Pasaltha Hranga leh Tlangval pakhatin khua an va thlithlai ang a, midang zawng chu hetah kan lo awm thung ang a, kan Pasaltha te thu rawn ken dan a zirin, naktuk khawvar hmain Rangpui khua hi kan bei nghal ang" an tih zawm a, Val Upa Lianchian thu a sawi zawh chuan Pasaltha Hranga chuan, Huala, tirawh, nangman mi rawn zui rawh an ti a, Huala pawh chuan lo hnial bik lovin a lo aw ve mai bawk a, tichuan Rangpui khaw thlithlai tur chuan Pasaltha Hranga leh Huala chu an kal ta a.
Chutia khua an hel zak zak hnu chuan Veng mawnglam atang a luh theihna niawm tak chu Pasaltha Hranga chuan a hmu ta hlauh mai a, a hmunhma te chu an han bel chiang that that a, Huala chuan, u Hrang, a awih angreng sia lawnna chi pawh a ni dawn em ni?" tiin an zawt a, Pasaltha Hranga erawh chuan, tum chuan a theih maiin ka ring, kan luh theih chuan thil a awlsam dawn em a sin" a lo ti a, Pasaltha Hranga vek chuan, tirawh i kal leh phawt ang" an tih zawm a, Ralvenbukah chuan ralveng an indah uluk hle a ni tih leh khua chu kulh pawh a hung a ni lem lo a ni tih an hriat hnu chuan, an thiante awmna lam chu an pan leh ta a, an thian te bul an va thlen chuan an thil va hmuh dan chu Val upa ho bulah chuan Pasaltha Hranga chuan a sawi nghal zung zung a, a sawi zawh chuan Val upa Zuithanga chuan, kan chet vat a ngai a nih chu, hawh teh u, luh ruk theihna ni a Pasaltha Hrangan a sawi chu i pan teh ang u" a rawn ti a, tichuan Pasaltha Hranga sawina lam chu fimkhur leh thawm dim tak chuan an pan ta nghal a.











#A hmun an thlen chuan chulai a kham a chhoh dan tur chu an sawi ho laih laih a, Tlangval pakhat chuan ka lawn thei maiin ka ring a ni, hrui a awm chuan min han pe teh u" a han ti a, tumah chuan a lawn theih tak tak chu an ring lem lova, mahse Pasaltha Hranga chuan hrui tha fe mai, fei that hmel zet hi.a rawn pe a, chuveleh Tlangval chuan lo la vatin kham lam chu a pan chho ta nghal a, Khamah chuan lawn tumin a inham chho tan ta a, mak tak maiin engtin tin emaw chuan a inham kai ta hlauh maile, Tlangval chuan hrui chu nghet tak a thlungin, a lehlam chu a rawn thlak ta a, an uai chhoh hma chuan Pasaltha Hranga chuan, Pasaltha Chhuanliana leh Tlangval sawmli ten ralvenbuk lam atangin inrawn bei ang a, kan Val Upa te pahnih honain Huala leh Tlangval sawmsarih velin Zawlbuk inbei dawn nia, a bak Tlangval la bang zawngin ka hovin Lal In kan luh chhuah ve thung ang, Huala ten Silai an hmeh puah hma chuan tuman thal lo thlah loh tur, kan inpawmchilh pawh a ngai maithei a, tumah kan zam tur a ni lo" an ticharh charh a, tichuan Hruiah chuan an uai chho ta a, Pasaltha Chhuanliana leh Tlangval sawmthum te erawh ralvenbuk bei turin an kir leh thung..





#Chhippui Tlangval ten Kham an lawn kai vek hnu chuan Pasaltha Hranga chuan, Val upa Zuithanga hnenah chuan, tikhan fimkhur takin Zawlbuk lam pan nghal u la, Tlangval sawm hruaiin Lal In lam chu kan pan ve nghal ang" an ti a, tichuan fimkhur tak chuan an tum lam panin an inthen ta a.









Huala ten Zawlbuk tual an zu thlen chuan Rangpui Tlangval te chu an lo muttui hlawm hle mai a, Kawtah chuan an Thingthu muh chu a lo la alh lep lep bawk a, Val Upa Zuithanga chuan, Nau te u, inhriat ang hian Zawlbuk hi a lian hle mai a, chuvangin Tlangval riak pawh an tlem hauh lovang tih inhre dawn nia, mahse zam lo ula, kan Lal fanu Sal ang mai a chhawr hlum thak duhtu an nih bakah, kan Lal ngei pawh pawisa hauh lova rawn bum duhtu an ni tih inhrereng dawn u nia," an ti a, Zuithanga bawk chuan, intan hmun te han siamrem u la, kan inpeih hnuah Huala, Thingthu ling tha deuh hi Zawlbuk chungah i vawmkai dawn nia" an tih zawm a.











#Pasaltha Hranga te ho pawh chuan Lal In chu an hnaih hret hret a, Lal In hlam Sawmhnih velin an la thleng lo tihah chuan Lal Inkawt a Mei eng chu an hmu ta tlat maile, Pasaltha Hranga chuan a nau te ho chu an tiding a, a Nau te ho hnenah chuan, kan tum angin thil a awlsam dawn hauh lo mai, Lal In tual a saw Mei an chhem tlat mai" an ti a, Mei eng chu an han hnaih deuh hret a, tunah chuan Mei chhemtu te chu tute nge tih an hre thei ta, chutah Tlangval pakhat chuan, Neihthanga te thusawi chu Rangpui Lal chuan a lo awih sak a ni ngat ang" a han ti a, Pasaltha Hranga chuan, keipawh ka rin dan a ni, chutiang ni lo se an Lal In ven ngawtna chhan tur awmin ka hrelo" a lo ti a, Tlangval pakhat chuan, u Hrang, va bei tawp mai i la, Pasarih chauh an nih saw, kan hup barh thei ang chu" a rawn ti a, Pasaltha Hranga chuan, ni rih lo-ve, Zawlbuk lam pan kan thian te an la inpeih lo a niang, thawm an nei har e mai, he ti lai a thawm kan lo neih khalh zawngin, an tal buai lutuk ang, a tul hun a che chhuak nghal thei turin inpeih ula, kan thian ten thawm an rawn neih veleh kan che nghal dawn nia" a lo ti a, an Pasaltha remruatna chu tuman an lo hnial buai lova, a tul hun a che nghal thei tur chuan an inbuatsaih ta zawk a.













#Chhippui Valrual te chuan an tanhmun chu an siamfel ta hlawm a, an inpeih hnu chuan Kawt a an Mei chhem chu Huala chuan an thai let kual a, Thingthu vam tha deuh a a hriat chu Zawlbuk chungah chuan an theh kai nawlh mai a, chumi rual chuan a bihrukna lam panin a tlan ve nghal bawk a, rei vak lo an ngaihchan hnu chuan Zawlbuk chung Di chu a rawn kang tan ta a, Thli rawn thaw te chuan Mei chu a rawn chawm tha hle mai a, Rangpui khaw Zawlbuk chung chu a alh ta hluah hluah maile... Rangpui valrual ten an Zawlbuk a kang a ni tih an hriat chuan pawnlam chu an pan vat vat hlawm a, chutihlai tak chuan Silai chu kiltin atang chuan a puak ta zawt zawt mai a, Rangpui Tlangval te chu an tlu nghal phak phak mai a, Rangpui Tlangval te chu tlu nual tawh mahse, chuti mai a kah hlum vek sen chi an lo ni hauh lo mai, an phli zual a reh hnu chuan an Val upa te chuan an nau te chu phen tur tha zawng tur chuan an ti tuar tuar a, Huala te ho chuan chutia Rangpui Tlangval inphenna tur zawng a buai ho chu an la kap char char reng a, Rangpui Tlangval ten tanhmun an siam fel meuh chuan mithi an ngah hman ta hle mai a, Huala te lamah erawh unhliam pathum an awm ve thung.

An tanhmun te an siamfel hnu chuan Rangpui ho Silai chu a rawn puak veleh zawt zawt mai a, mahse, phen tha tak nei a lo awm, Chhippui Tlangval te tan erawh pawi a khawih tlat lo.
Rangpui ho Silai puak a reh fel ta maw tihah chuan Chhippui Tlangval te Silai chu a puak veleh ta zawt zawt mai a, mahse Rangpui Tlangval te pawh, phen tha tak nei an nih ve tawh avangin, pawi a khawih ta bik tlat lo..
Chutia rei ngial an inkah hnu chuan Silai puak chu thawk leh khatah a reh duak mai a, an Silai an kah mu an kah ruah ve ve tawh avangin Val upa Zuithanga chuan an Chempui phawrh tur chuan a nau te ho chu an ti a, an inpeih ta maw tihah chuan Zuithanga chu a bihrukna atang a tlan chhuah pah chuan, Chhippui Val rual te u, thih thlengin aw niang" tihpah chuan Rangpui ho tawmna lam chu Chempui nen chuan a pan ta nghal a, a nau te ho chuan an zui ve nghal bawk a, chutia Chempui nen an rawn bawh takah chuan Rangpui ho pawn an Chempui te chu lo phawrhin an lo bei let ve nghal a, an inphek sual ta chiam maile... khaw Pahnih Val upa te chuan an Tlangval te chu an fuih tuar tuar a, Mihring na tuar thawm leh Tlangval inhrosa thawm chuan chulai hmun chu a luahkhat a ni ber mai.
Rei ngial an inbeih hnu chuan a tu ve ve lam pawh chu an tlu nual tawh a, an Val upa te chuan an nau te chu an la fuih lauh lauh reng a, mahse, inralring lawk sa a lo awm Chhippui Tlangval te chu an chan a tha ta ta hret hret maile, Rangpui Tlangval te chu an tawlh zim hret hret a, mahse, chuti mai a inpek erawh an la tum hauh lo, Chhippui Tlangval te chuan an nawr zel a, Mihring ruh han rirawp leh na tuar vawng vawng thawm chu hriat tur a la awm reng a, Mihring Ruang leh Thisen pawh chulai hmunah chuan a tam ta khawp mai, Chhippui Valrual te chuan Rangpui Tlangval te chu Lal mual lamah an nawr chho ta a, Huala leh Val upa Zuithanga chuan hma hruaiin Rangpui ho chu an nawr tawlh zel a, Lal Mual an thleng chho tep tihah chuan Rangpui Tlangval ho zing atang chuan Fei a rawn inkhawh chhuak zawk mai a, Val upa Zuithanga chu a Pum a Fei bur vu atang chuan a thingthi nghal rawp mai a, Hualan chu chu a hmuh chuan Val upa Zuithanga chu a hnaih nghal vat a, Rangpui ho chu an la inpek duh bik miau loh avang chuan Huala tan pawh Val upa Zuithanga chu buaipui ngaihna a awm bik rih lova, Rangpui hovin rawn khawih zawm an tum chu a lo veng a ni deuh tawp mai, Huala chuan Tlangval te chu an fuih leh tuar tuar a, mahse Rangpui ho pawh a kaw tawp atang an ni tawh bawk a, hneh mai theih an la ni hauh lo mai, tunah chuan Khua pawh a var chiang ta khawp mai, Huala te ho chu an la insat biai biai reng a, tunah chuan Rangpui ho chu an chan a chhe tawh kher mai, Pasaltha Hranga chuan Leikapui an Lal Chempui a tin pah chuan, Rangpui Tlangval te u, inpe mai rawh u, inthih mang vek hma hian" an ti lauh lauh a, mahse Rangpui Tlangval te chu an chawlh phah hauh lo.




#Pasaltha Kapzela te pawh chuan Rangpui khua chu an rawn dai lut ve mek a, inbeihna nasa tak a thleng a ni tih hriain, Lal Mual lam chu an pan nghal hlawk hlawk a, Lal Mual an han thlen dawn chuan Rangpui ho chuan tan an la khawh a ni tih an han hmu ta a, Pasaltha Kapzela chuan Tlangval panga chu veng mawng lam atang a In rawn hal tur chuan a tir nghal a, Tlangval te an kal hnu chuan Lal Mual lam chu an pan veleh ta nghal a.


Pasaltha Hranga chuan Rangpui Lal hnenah chuan, i Tlangval te hi an ralthuam dah thlak tir la, inpe mai rawh u" an ti a, mahse Lal Tuakliana erawh a ngawi ngal thung a, he tih lai hian Huala leh Rangpui Pasaltha Chawngvunga te chu an lo inthlurbing mek a, Chawngvunga chuan Huala chu sah hlum ngei tum chuan a zuan phei a, Huala Nghawng zawn velah chuan a Chempui chu a vai phei fua bawk a, Huala chu lo kun zawkin, Chawngvunga sir a tlan pelh fua pah chuan Chawngvunga Nakah chuan a sat vak mai a, Chawngvunga chu a tre tuar mai a, mahse Pasaltha ngang chu a rawn insiamrem veleh nghal thuai a, a Nak hliam chu a tuan tifumtu atan hman a tum hauh lo, Chawngvunga chuan Huala chu a rawn bawh leh buan buan a, Huala pawh chu a lo indang ve zel a, chutia rei ngial an inbeih hnu pawh chuan Chawngvunga chuan Huala chu a tum angin a sat thei reng reng lo mai a, Huala lahin lo khawih na duh tak tak si lo hian a lo thai pem hlek duh chauhva, a tawpah chuan Chawngvunga chuan a tawp nan ti niawm tak chuan a Tha zawng zawng sawm khawmin Huala chu a rawn bawh leh buan buan mai a, Huala chu a lo indang zel a, a hliam avang chuan Chawngvunga chu a chau ta hle mai a, chutia Huala a rawn bawh buan buan chu a xhauh deuh avang chuan a han chawl det a, chulai tak chu a pawi ta a ni.
Chutia Chawngvunga a inthlahdul hlek lai chu Huala chuan rang lutuk a hnaihchilh nghalin, a Chempui chu a vai nghal fua a, Chawngvunga Lu chu a per nghal nawlh a, a taksa erawhchu a tlusawp nghal nuai mai a, chumirual chuan Kut beng leh hlim au thawm a rawn chhuak ta nghal a, Huala chuan mak a tihman hle mai a, Lal Mual lam a han hawi chuan Rangpui Tlangval te chu an lo inpe tawh hlawm a, an Kut hnung khirh sak a phuarin, Lal Mualah chuan an lo thingthap mai a, Chhippui Tlangval te chuan an inbei kha an lo thlir reng a ni tih a hmu ta a, a han hawi zau deuh chuan Piangliana leh Thanliana Ruang leh hliam buaipui a an hmanhlel em em mai te chu a hmu bawk a, chutia a ngaihna hrelo tak a a awmlai chuan Pasaltha Chhuanliana chuan, Huala a va mak ve, Rangpui ho chu an tlawm tawh e, a hnung lam atang chuan a rawn ti a, Pasaltha Chhuanliana awmna lam chu a pan ta nghal a.
Lal Mualah chuan Rangpui khaw mipui ho chu an tlim hmur mai a, thenkhat tan a an pasal, a then tan a an bialpa, a then tan a an fapa duatlai Ruang te chu Nula leh nu ho chuan an tah hawm hawm mai a, Rangpui khua chu tap thawmin a khat zo ta..








#Chutia Rangpui Tlangval te an inpek hnu chuan Pasaltha Hranga chuan, Lal Luhkapui atang chuan thu a han sawi a, Rangpui khaw mipui te u, Vawiin a thil thleng hi kan duh dan a ni hauh lova, mahse, in Lal remruatna tenawm tak avangin ti lo thei lo dinhmunah kan ding ta a ni" an ti dap dap a, Pasaltha Hranga vek chuan, ro thil duh avang a rawn run che u kan ni lova, chuvangin engmah kan la dawn lova, Salah pawh tumah kan hruai lovang che u, amaherawhchu, in Lal leh a upa te bakah, Neihthangate ho chu kan kai haw thung dawn a ni" an tih zawm leh a, Rangpui Mipui ten Salah hruai an ni dawn lo tih an inhriat chuan an lawm hle mai a, an lungngaihna Mittui tla chu nasa hle mahse, an lawmna Mittui chuan a pawlh ziaawm ve deuh mial mahna le.

Pasaltha Hranga chuan, kan Tlangval thi te Ruang kha a theih ang ang kan hawn ang a, kan inpeih veleh khua hi kan chhuah san nghal ang" an ti leh a.
Rei fe an khaw Tlangval te ruang leh an ral thah tak Lu te la a an buai hnu chuan Fehrehsan hun vel a ni tawh a, an Tlangval thi te Ruang pawh buaipui an phal rih loh Rangpui Tlangval an phuar mek te hnenah chuan Pasaltha Hranga chuan, tunah chuan kan tum ber kan rawn tihlawhtling tawh a, kan inpeih tawh avangin khua hi kan chhuahsan dawn a, inthian te Ruang chu inlo buaipui ve mai dawn nia" tihpah chuan, a a Nau te ho hnenah chuan Rangpui Tlangval te chu phelh turin an ti nghal a, Rangpui Tlangval te phuarna a nau ten an zai chah sak mawlh mawlh lai chuan Pasaltha Hranga chuan, kan kal liam hnu a kan hnunglam atang a min rawn bei zui a nih chuan, zahngaihna ka lantir nawn tawh lovang" an ti leh a, tichuan Pasaltha Chhuanliana te awmna lam chu a pan san ta a.
Pasaltha Chhuanliana te bul a va thlen chuan Damdiai Pasaltha Kapzela chu a lo awm ve a, Pasaltha Chhuanliana chuan thil awmzia chu a lo hrilh mawlh mawlh a, thil awmzia a hriat hnu chuan Pasaltha Hranga chuan, min rawn pui hman chu a lawmawm hle mai, kan chan kha a chau hman si a, ka thla kha a phang hman viau a sin, mahse inzarah hnehna kan chang hlauhva a lawmawm takzet a ni" tiin Pasaltha Kapzela bulah chuan lawmthu an sawi luam a, tichuan an kal dan tur te relin an sawi ho ta nghal a, Pasaltha Chhuanliana leh Val upa Lianchia ten hma an hruai ang a, Rangpui Lal leh a upa te bakah, Neihthanga te ho chu, Pasaltha Hranga, Huala leh Pasaltha Kapzela bakah, an Lal fapa Siamkunga ten an chhawm thung dawn a ni.








#An kal dan tur te an relfel hnu chuan Tlangval ho chu Pasaltha Chhuanliana chuan inpeih turin a hrilh hlawm a, Tlangval ho te an inpeih hnu chuan hlawhtling inti takin Chhippui Valrual te chuan, Rangpui Khaw raupui tak, tlusawp mek chu an chhuah san ta a.














#Rangpui Khua an chhuahsan atang a nihnih an kal hnu Zanlai Arkhuan hun vel chuan Chhippui Tlangval te chuan an khaw Kawtchhuah an thleng ta a, Chhippui Tlangval te chuan an thian te Ruang chu an la zawn reng a, Ruangte chu a nam ve deuh thet thet tawh a, mahse tumah chuan engmah an sawi lo thung.

Chutia an khaw Kawtchhuah an han thleng ta chu Huala te ho chu an hah a dam hle mai a, an lo chau ve tawh bawk nen, a remlai laiah chuan Chhippui Tlangval te chu an mu a, Huala erawh Pasaltha Kapzela nen eng eng emaw sawiin an titi thung.






#Rei ngial an hahdam hnu chuan Pasaltha Hranga chuan, Silai zen an la neih ang ang sawh tur chuan an ti a, Tlangval ho chuan an zen neih ang ang te chu an Fungki atang a la chhuakin an han sawh a, an zawh hnu chuan Pasaltha Hranga chuan a Silai chu Vanlam hawiin an tin kawh va mai a, chutah ring tha leng lawng hian.Kei chu e, ka sentet e,
chhawnfual ka laihrui ah nak e,
Tlang rawn e, sialphaw tun e,
Thang chem e, ka pun rok nai e.
Tiin Bawhhla a han chham ta vang vang mai a, chuveleh Silai chu a puak nghal dur dur mai a, Khawchhunglam atang pawh chuan an rawn chhawn ve bawk a, tichuan Bawhhla dang dang te chhamin Silai chu a khat tawkin an kap puak reng a, Khawchhunglam atang pawh chuan an rawn chhawn ve zel bawk a, tichuan Khawvar thak thleng a Kawtchhuahah chuan awmin Silai chu an han kap puak leh zauh thin a, Vartianah chuan Pasaltha Hranga chuan a nau te ho hnenah chuan, awle Nau te u khawchhung kan lut dawn tawh e, inSilai Zen te kha han sawh leh u la, a indawtin inkap puak zel dawn nia" an ti a.

Leilung a lanrual chuan Chhippui Tlangvaltte chu khawchhunglam pan chuan an ri phei ta hut hut mai a, Khawchhung an va luh chuan a Khaw Mipui te chuan an Pasaltha Ram mu te chu, an Luah te leh an Nghawngah te chuan Ar Keziak an lo ban a, khaw dang Tlangval a ni tih chu Remsangi chuan hre mahse, zah a dawn zo tawh lo, Huala chu Thihnah a rawn ban ve a, an Tlangval te rawn haw chu an chhungte chuan an lo hmuak hlawm a, chuni chu hlimna Ni mahnise, Thenkhat tan erawh tahna Ni a ni thung.

Chutia an zik mur mur lai chuan Lal Dokulha chuan thu a han sawi a, a Tlangval te chu a chhuan thu leh an huaisenna te chu a han fak a, chutih rual chuan an Khaw Tlangval ral Kut a thi ta te chu pawi a tih thu leh an chhung te a tuarpui thu te chu a han sawi a, an Pasaltha te ral Lu rawn hawn chu a Sepachal ngei a a ai h tur thu chu a han sawi nghal bawk a, Lal in thu a sawi zawh chuan an kal darh ta hlawm a, Tlangval ho chuan an ral Lu lak te chu Pumah dahin, Silai kap puak dur dur pah chuan an mahni In lam theuh chu an pan ta hlawm a.










#Huala leh Pasaltha Chhuanliana pawh an Inlam pan chuan an kal hnak hnak a, chutia ngawi reng a an kallai chuan Pasaltha Chhuanliana chuan, Huala, insual i lova thiam reng reng ve, khatia Rangpui Pasaltha nen in inbei ka rawn hmuh khan ka lo hlauthawng hman lutuk a, ka lo insehruh teuh hman a, mahse inhan inbeih rei tak deuh hnu kha chuan, a khan lo hle che a nih kha maw" an ti a, Huala chuan, a ka vannei mai mai a nih kha, bakah ka hliam hma hlauhva, kha kha ka dinchanpui hlauh a nih kha" a lo ti mai a, tichuan engmah sawi tawh lo chuan an kal ta zel a, Chhuanliana te In an va thlen chuan Chhuanliana nu Thuami chuan a lo be zung zung a, rei vak lo an hahchawlh hnu chuan Tukthuan an kil zui ta nghal a.












#chumini chu Huala te chuan engmah an ti lova, khawi dangahmah an kal hek lo, pi Thuami te nen chuan an inkawm nileng thak a ni ber mai.







. #Zanriah te puar tak a an ei kham hnu chuan Huala leh Pasaltha Chhuanliana chu Zampuii te In a leng tur chuan an inzui chhuak a, Pasaltha Chhuanliana chuan, Remi hi a pa hian chhuah a phal lo mai ang ka ti" fiamthu a Huala elhsen pah chuan an ti a, Huala chuan, chutiang a nih leh ka tibuai char char che u ang a nimai lawm" a lo tisam et a, tichuan hlim tak a titi chung zel chuan an hmangaih ten an lo nghahna, Zampuii te Run Lamtluang chu an zawh ta zel a, Pasaltha Chhuanliana hian Zampuii hnenah Zan lam a an In a leng tur a lo ti turin Remsangi chu a lo chah fel dimdiam tawh a, chuvang a Zampuii te In a len tum hi an ni.









#Huala ten Zampuii te In an thlen chuan Zampuii nu leh pa chuan len chhuah an lo tum mek a, Zampuii leh Remsangi pawh chu Tapah Vawk Chaw Bel vil pahin an lo thu ve bawk a, Pasaltha Chhuanliana te rawn lut Zampuii nu, Pi Sangthangin a lo hmuh chuan, e khai Pasaltha Chhuana te ni rengin, lo leng tawh u" tiin a lo be zung zung a, Zampuii chuan thutna te a lo pe nghal sawk sawk bawk a, Huala ten thuthmun an remfel awrh chauh tihah chuan Zampuii nu chuan, Chhuana tihian lo leng ru aw, Zampuii Patea damlo kan va kan lawk ange" an ti a, an chhuahsan zui ta nghal a.

Chutia Zampuii nu te an chhuah hnu chuan Pasaltha Chhuanliana chuan, i patea chu a na viau em ni a" tiin Zampuii chu an zawt a, Zampuii chuan, a na lutuk pawn ka hre hran lo, In a han tawm mai mai aiah i va kan teh ang an ti a nih kha" a lo ti a, rei vak lo thil eng eng e maw an sawi leh hnu chuan Pasaltha Chhuanliana leh Zampuii chu Luhkapui lamah an insuan chhuak ta daih a, Huala leh Remsangi chauh chu Inchhungah chuan an awm ta a, chutia an Pahnih chauhva an han awm takah chuan a tuzawkmah chuan tawng chhuah an tum lova, a khat tawk hian an han inmelh leh zauh thin a, chutia rei ngial inbe lova an awm hnu chuan a Mipa zawk nge nge Huala chuan, i pain rawn len chhuah te a phal a nimaw?" a tichhuak thei ta hram a, Remsangi chuan, chhuanlam tha tak ka siam a, a lo phal ve mai a nih hi" bakah, len chhuah loh pawh a phal vek tawh" a lo ti a, Remsangi thusawi chu hriatthiam loh hmel fe hian Huala chuan, chu chu enge a awmzia" an ti hu mai a, Remsangi chuan zak deuh tak a Huala en chung chuan, Huala, min nei duh angem" an ti a, Huala chuan Remsangi chu a lamah chuan a han pawt hnai salha, a Awm a bei tir hnap pah chuan, Remi, nei duh lo che ni i la, i tan thih huamin helai thleng thleng ka rawn kal dawn em ni" an tisap a, Remsangi chuan Huala Kut khalh niap niap pah chuan, ka tihpalh, ka rin zawh loh che abangin, chan che hi ka duh lo em a ni" an ti a, Huala chuan Remsangi Sam chul sak hliau hliau pah chuan, Remi, ka sawi fo tawh angin, ka phu rual i ni lo tih chu ka hria a, mahse nangmahah chauh lo chuan ka rilru ka pe thei lova, chang dang kan zai reng ka rel thei hek lo" a lo ti a, Huala thusawi chuan a tilawm hle a ni mahna, rawn nuih sen sen pah chuan Remsangi chuan, phu loh tih kha chu sawi tawh suh, tunah chuan ka pa pawn kan inneih a remti vek tawh a nia" a han ti a, a thu hriat chu Huala chuan awih har a ti hle mai a, khaw khat Lal meuhin hmeithai fa a fanu neih a han phal mai chu rinngam harsa a ti hle a ni, chutia sawi mai tur pawh hrelova a ngawih reng takah chuan Remsangi bawk chuan, ka thusawi chu i awih meuh nange" Huala hnenah chuan an ti a, Huala chuan, a Remi, ka dinhmun te han en la, khaw khat Lal meuhin a fanu neih chhun Hmeithai In a lawi luh tir a han phal mai hi awih harsa ka tideuh a ni" a lo ti a, Remsangi chuan, Huala, ka pa pawh tunah chuan a harhchhuak ve tawh a ni mahna, ka thusawi chu awih mai rawh, Lal Fapa hausakna ni lovin, Hmeithai fapa chakna leh huaisenna avang a la nung ve thei ka nih zawk hi" a lo ti a, tichuan hlim tak a an hmalam hun tur te sawiin a viltu ten an ngaihsak loh avang a Mei eng pawh a Mit tak thuapna chu Di In thiam hnuaiah chuan Hmeithai fapa leh Lal fanu inhmangaihna chu a va eng mawi si em, *DORAL HRANG MAHSE*, an inhmangaihna chu lo zualzel zawk sela, Runhmun a leng a fanau maltluan chawi dun turin, khuanun hualhim mawlh tehse.
A TAWP TA..

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)