TUMPANGCHAL NGE SAITHANGPUII BY James Dokhuma (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: TUMPANGCHAL NGE SAITHANGPUII BY James Dokhuma 1 -14

Unread post by Ngaia » April 1st, 2019, 7:38 pm

BUNG 14 : Saithangpuii leh Sangtualan salu an lawm
Fehteahmêl chu lo hmu fo tawh ţhîn mah se, Sihhuaia meuh káptu a nih takah chuan, a tua-te pawh mai chuan mo thar hmel hmuh châk takin hmuh an châk ţheuh mai a. A se kah lu lah en man a hlâ na rawh. Ramhnuaia phûng hmuh vuai ţhin chauh ngang an nih avangin ralkhata an lo suangtuah dàn ai daihin a ki pawh a lo ţha zâwk a. A chalpangah patling pathum a ţhut theihin, a ki khing kual khaikhup kurkum hnuaiah ráipuar an bawkvâk lut han han thei a ni. A lalpa leh a upate lahin an lawmpui thiam na lailêng. Fehtea te inah chuan hah-zû pu lut an awm, salu lawmna hrim hrim kai chhuak bo lo, belpui an chawi lut zut zut mai a. Naupang hlim thâwm leh ui sen rawl nen, hlado chham lah khaihlak lai awm hek suh. An lo thlen zan chuan ‘a neitu mu hek suh khumfâ mu hek suh’ an ti a ni awm e, khua an thawm dut dut zankhua mai a ni.
Fehtea ramchhuak haw zan zanriah ei hun mi tlem lai tak chuhin, an lal fanu Saithangpuii chu fenthlira zufâng tuitling chawiin an upa fanu hruaiin Fehtea salu làwm turin an lo kal a. Lawm surh hmêl pu si lo, rilru-a lawmpui tak zet tih lang thei si hmel ngaihawm hauttla lo tak hian Saithangpuii chuan, “Hei, a thlum pawh a thlum ve ngut emaw, i ramchhuak hah dang hnawn nân,” tiin Fehtea chu a pe a. Ani Fehtea chuan, “Aw, ka va han phu lo êm! Nang meuhin min lawmpui ve duh ang tih pawh ka ngaihtuah phak hlei nem. Nang chuan hnamtúr pawh min pe la, i he lova in hmak mai tur chauh a lawm ka nih,” tih pahin nui sak chung chuan a zufâng tuitling pek chu a la a. A in lai chuan, “I salu avanga lo kal mah ni ila, keini hi chuan a kaptu zâwk hi alawm kan lawm,” tiin nuih seih chung hian a melh no ralh a. Fehtea pawh chan, “I zu chu a thlum kai ţha ngei mai, hah chang a dam lo a, rilru thlengin a dam sawng sawng alawm le. A thlum bawk a, min petu hmel hian min tirui dâwn a nih hi,” tih pahin ngaihawm taka melh chung hian fenthlir chu a pe kir leh ta a.
Chumi zàn chuan lal leh upate chuan an zu thlum ţha ţha chu an kai chhuakin Fehtea salu chu an lawm a. Salu sa lah chu tualah hârpuiin an ur vut vut mai bawk a. Hranden belpui ngân tam bilh chu chhuat dungah chuan a tlar nghuan mai a. Fehtea salu lawmpui turin Saithangpuii chuan an khaw val-upa zawng zawng tel kim vek turin a pa hnênah sawm chhuahtir turin a lo hrilh ru diam a. Lal thupek chu awih lo ngam si hek lo, chumi zan chuan Sangtuala pawh phur lo zetin a tel ve a. Tûn hma kha zawnga Fehtea lo er a, a thang chhe theihtawpa theihthawh lo bâwltu, a lang a pau-a Fehtea hmai-hmaa hmangaihtu ber anga inlan leh si, sual avanga mi dang er, dawihzep avanga mi huaisen ítsíktu, upatnaa naupang zawkte hruai suala a meizang-hlaptu Sangtuala leh a sangawi- zâwnpuite pawh chumi zan chuan thatho lo zetin an tel ve a.
Salu sa an ei hma, nunâu leh laina an la ţin hma chuan Sangtuala rui lungpuam chu a insum zo ta ngang lo a. Lal leh upa-te hmai-hmaah chuan mittui tla ang per pur hian, “Pute u, min lo ngaidam teh u, zanina ka inpuan vek law law loh chuan ka puak keh thei ang. Fehtea, min ngaidam la, he hlâ hi sa-in keimah ka’n lâm phawt mai teh ang,” a ti a. Fehtea laka a lo chimawm tawhna leh Fehtea a tluk lohzia a phuahna ruah ţham loh chu chham chungin a lo ding chhuak a.
“Kan Dârzo khua a thanlaiah,
Rualin sêl e, hrâng tin kung;
Rualin sêl e, hrâng tin kung.”
tiin a inmualpho hlâ chu a’n chham ta a. Chutah le, salu làwm zâiin phur fahran main Fehtea ní pasal mâkpa, lal sadâwt chuan tho at maiin hla chu a’n la a. A laiah Sangtuala chu a lâm a, an sa zo chu, “Khawnge, min lo ngaidam ula aw,” a ti tê tê a, a hla dang chu a chham chho ta zêl a.
“Kei ka ni e rual Sêlchinga,
Thanlai hawltu ţhuam ang do;
Thanlai hawltu ţhuam ang do.
Kungpui miril ka duai chuang e,
Van hnuai sêl vel chung lur e;
Van hnuai sêl vel chung lur e.
Thanlai hawltu laichhuat a zau laiah,
Van kal Sihhuai fam tawnah;
Van kal tlawm Sihhuai fam tawnah.
tiin a tlâwm hlâ chu khuangpui an han tlir hnan ta dut dut mai a. Chu hla an sak zawh chuan Sangtuala chuan mittui parawl ţeuh chung leh hah thaw hulh hulh chung hian, “Eng kan tih ang Fehte, min ngaidam ang che. Kawng engkima ka tluk loh che avangin ka ítsík che-in i hming chhiat theihna zawngin, phuahchawp leh dáwtin ţhiante ka hmin a. Khâng thil zawng zawngah khan kei hi a bul tumtu chu ka ni. Mi dang tumah mawhchhiat tur rêng an awm lo, keimah ka ni. Fehte, min ngaidam mawlh ang che aw,” a tih lai chuan an buai palh hlauin an lalpa chu a lo ţawng ta a.
An lalpa chuan aw ban chut hian, “A tâwk e, Sangtual, Fehtea pawhin a ngaidam mawlh ang che. Fehtea hi zawng ka khaw tlangval tu-khaw tluk loh a nih ka hre chiang a. Tin, a ertuten in erna lah ka hai hek lo. Amaherawhchu, khâng kan khawtlâng tinuam lotu thil kha zanin aţang hian a kiang ta vek tih hre ţheuh ila. Tûn achinah khati ang thil kha ka khuaah a awm leh tawh tur a ni lo. Mi pakhat avangin khawtlâng hi a hming ţha thei angin mi pakhat avang bawkin a hminghliau thei tih pawh i hria ang u. Zaninah hian ka upate leh nangni val-upate hmaah ngei ka sawi duh chu. Fehtea hi tlangval la niin naupang tê mah la ni se, zanin aţang hian ka ‘upa’ a ni ta tih ka hrilh duh che u a. A bak sawi tur a awm lo. Fehtea hi lal upa a ni,” a ti hmak mai a, chu veleh chuan an ngâwi ta ţhuap a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 2nd, 2019, 7:30 pm

BUNG 15 : Ka nu leh ka pa thu
Fehtea salu lâwma Saithangpuii kal hâw lam kha Fehtea ní te inah a lût kâwi zawk a. Fehtea ní chauh a lo awm a. Saithangpuii chuan, "Ka nî, nangmah chauh i ni maw awm, khi lamah an chho vek a ni maw ?" a ti a. Ani chuan, "Ni e maw le, kan pa lo hâw pawhin in a rawn tlawh zawk a, vaihlo a pai mawlh mawlh a, a chho leh ta a nih kha. Kha khawi lamah nge Thangpui?" tiin a zawt nghal a. Ani chuan, "Kei pawh, salu ka'n láwm ve zawk e ka ti a, a remchang êm a ka rawn lût kawi mai mai a ni," a ti chuan an thing phurh dun ţuma an tîtî chu a hriat chhuahtir zawk a. A hmaa an tîtî aţanga ngaihbelin Sihhuaia lu a lawm haw-in ţulna hran awm si lova a rawn tlawh kâwi kher chu a lawm rilru hle a. Fehtea ní chuan a hmuh fàl theih lai chu chuhin a hunin keng vak mah suh se, inzum(lo) rilru deuh tak chung hian, "Ngâwi teh, Thangpui, hman ni khan kan tîtî nual a," tiin a'n thâwi a.
Saithangpuii chuan, "Ni e, ti rawh ka nî, kan sawi ang kha a ni mai dâwn lawm ni? Amaherawhchu, a puitlinna leh a hlawhtlinna tak tak chu ka nu leh pa thu thu a ni a. Ka nu leh ka pa in dìl thiamah chuan keiin engmah hnail ka nei hlei nem. Hmânah pawh khan ka nu leh pa ţawng kha ka sawi chhâwng lek kha a ni mai a. Chûng thil te chu keia thuneihna a ni phak hlei nem. Nu leh pan khaw êng an hmuh chhung te chuan," tiin a chhâng a. Chu a chhân dàn chu nula fing chhân dàn àwm reng niin a hre mai a. Mahse, Fehtea ni chuan a hawiher aţang chuan a rilru hre theiin a inhria a, ngaih ngam lopna tur awmin a hre lo.
A tuk tuk lehah chuan Saithangpuii nu chuan a fanu hnênah chuan, "Mâmbawih, puan bàn i tum si chuan tunge maw i bànpui tak ang le? Kei chuan ka pui peih tawh hauh dâwn lo che a nia, puan bul ţhut hi ka tlin tawh lo, ka mit ţha vak lo vei nen," a tih lai tak chuan Fehtea farnu pakhat chu silai hnawih tur savawm thau pe-in a lo lut a, lalnu chuan, "Thâwmi, eng nge in thawh hlawm dâwn? Mambawihin puan banpui tur a nei lova, nangni in hmeichhe rual deuh a, hman a mual mual in awm mai lo maw?" tiin a lo zawt a. Ani chuan, "Keini chuan feh kan lo tum a. Ka ní a hman ang, ka rawn hrilh ang e, a hman em em ang," a ti sam êt a. Tichuan, a rana rana lo Saithangpuii chuan Fehtea ní chu a lo páwng nghah ta ngawt a.
Tukţhuan ei khama lal ina Fehtea ni chho ta chuan, "Ngâwi teh Thangpui, vawiin chu in nghak tur kan awm lo a, in ina kher em ni báng ila i tih? Hawh, kan inah i bang mai zawk ang hmiang?" tiin a sawm a. Saithangpuiin a chhân hma-in a nu chuan a lo chhan khalh a. "A sual hlei nem, kan inah kher ti lah lo ve, in inah chuan zuk báng hlauh rawh u, in inthiarfihlim a ni zawk ang chu, kan in zawng awm apui an tam ţhin a buaithlak," a lo ti a. Chutia a nu'n a chhâng chu Saithangpuii chu a lâwm rilru hle a. Tichuan puan ban tur la-hlum leh thembu kengin Fehtea ní te in lam chu an pan thla dun ta a. Puan ban pahin an titî an titî a, Sangtualten Fehtea an er rawn lai leh khaw hawina hre lék lova an phiar phak laia an tih hrehawmzia leh Fehtea khawngaihthlakzia te an sawi an sawi a. Tin, Sihhuaia salu sa ei zàna Sangtuala inpuanna leh a hla phuah te chu an sawi kai chho zêl a. A vahpain Sihhuaia a kah hma zana a mumang leh an pa mumang neih te pawh Fehtea ní chuan a sawiin, an ramchhuah dâwn tûka Fehtea pa'n Fehtea a tih dàn leh Fehtea khawngaihthlak thu te thlengin a sawi kai zêl a. Chutia an tîtî chhoh bek bek hnu chuan an puan bàn pawh an zo ta a. Fehtea ní chuan a han thing rualin tahdan te a han rawlh a.
A puan ban zawha hawn tûra a zial fel sak hnu chuan Fehtea ní chuan, "Ngâwi teh, Thangpui, i hawn hma-in hmàna kan tîtî kha chhunzawm leh ta daih ila. Zép nak emaw, palái rawn tir ta chawih mai ila engtin nge i ngaih ang?" tii a'n zawt chawt mai a. Saithangpuii chuan, "A hmingin nula ka la ni ve a, ani lah tlangval a la ni bawk a. Tlangval tân chuan nula chu rìm leh biak kan thian lohna a awm dâwn em ni?" a tisam then a. Fehtea ní chuan, "Nih phei chu ni e, chutih kawngah chuan a nia lawm. Mahse, beidawnga min siam ka'n hlau deuh maw le," tiin inthlahrung aw takin an dilchhût a. Ani chuan, "Ka nu leh ka pa thu a ni ang chu tak taka-na. Hmai-chhanah han ti ta che u ila, in duh te lakah palai tir turin 'a nachang' in hriat ka ring a. Tin, a thu hrimah, fa-mo atâna an duh te chu engtia tih tur nge tih tuman an hai loh ţheuh hi mâw, i ti mai teh ang u ka nî. Chuvangin, he thilah hi chuan ka kamkeu che u leh ka ţawng hmawrhmuh che u in ngaih bik ka ring lo, min duh der ve tak takte in nih chuan," a ti ta hlauh a. Chu a chhân dàn chu lawmna tur nge ni a, beidawnna tur tih pawh Fehtea ni chuan a hrethiam lo lek lek a. Mahse, nula ţawngah chuan fing a ti hle thung a.
Chumi zan zanriah ei hun mi reh lai tak chuan Fehtea ní chu a vahpa te inah a kal nghal var a. Saithangpuii nêna an puan bang dun tîtî zawng zawng chu sal lovin a vahpa chu a hrilh fai vek a. Ani chuan, "Ka ní hi mi i sawi hmun leh chiam ţhin a, an rilru tak tak i hre phâk awm tawp si lo a. Mi te chu an fing a, ţawngkam na na na chu ui lo leh mi rilru tihnat duh lovin an ţawng thiam a. Chuvangin, an ţawngkam ţhaah i lungawi ringawt te hi a ni lo maw?" Chawtak khuka khukpuitlak thu engmah a la chhak chhuah loh chu," a ti a. A ní chuan, "A ţawngkamah ngawt phei zawng lâwmna tur engmah lang lêm lo e. Mahse, a sawitu hawiher leh a sawi lai che zia-in thutak a pai tlat alawm," a ti ve tlat a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2019, 8:24 pm

BUNG 16 : Zângkhua a bungbu ta
Tukțhuan ei hun mi reh lâi takin tapchhakah chuan lalnu, lalpa leh lal bâwi Hluncheuva chu mei lum aiin an țhu a. Chutih lai tak chuan Fehta palâite an lut a. Palâi an nih chu sawi ngai lovin an hmêl ațang chuan an hre nghâl mai a. Chuvang chuan an lalpa chuan an thu kawchâng tùr Hluncheuva chuan hre ve lo se a tih avangin sehuanga sial chhuah turin a tir nghâl a. Lalpa chuan, “Tûkin taka eng nge pawi-hai awm ta a, in rawn lan teh hlawl?” a ti a. Anni chuan, “Mi chhe-tanghrang lo lêng lut hi mi țhaa min siam ve tùrin in khawngaihna kan dil chawt mai dâwn che u a nih hi,” tiin an chhâng a.
Lalpa chuan, “Keini siam theih a mâwi êm in nih ang le, hei tuibúr hi, a al ngut emaw han hmuam teh u,” a ti a, tuibúr a’n theh a. A palâite kianga lo awm ve chu mâwi a tih loh avangin Saithangpuii chu bahzâr lamah a puanbu en rual duh chhuanlamin a phei thuai a. Palâi chuan, “Hei le, Thangpuiipa, zah fâkah lu êm chhum suh ti-a chhâlin, zua thik loh vaa thik loh Fehtea chuan Thangpuii hêl zo ta ngang hek lo. Ni leh thla kâra leng êm kan hâwl thlak phâk rual a nih loh hre chungin, kan lawh phak loh, in khawngaihna avangin a rawn kûr hniam thei dah law mâw, tia beiseiin lal inpui sâng kan rawn kái ta ringawt mai a ni,” tiin thu hmawr a’n țan a. Pakhat zawk pawh chuan, “Ni e, kan neihin lal neih a cho lah kan ti lo, kan hmêlin lal hmel a cho e lah kan ti bawk hek lo. Amaherawhchu, keini akâra pakar, lal fanu man leh mual sahsa awm ang zui tur chuan Țiau-a chhûmpui zîng pawh zui theih inhuamin kan lo lêng ve zawng a ni. Kan thu a chhan a lak min lo thiamsak la: kan hmêlin Thlangpasaisira hmel a el phak lohzia kan hria a, kan neihin Lersia neih sum a el pha na hek lo. Thangpuii laka uanna tur engmah nei lovin kan duhna kan rawn tilang ta ngawt mai zawng a nih hi,” tiin thu thliah thiam takin a’n țawng tuihnih ve a.
Chutah lalpa chuan, “A ni tak maw…, chutia keini akara min duh der ve chu kan hnial rual em in nih ang? Amaherawhchu, in hriat angin hei, Dârzo khuaah hian ‘lal a bovah hleimualhrang a lal’ tih ang deuhin a hmingin kan lal ve chu a ni a. Lal ni ve ta chêng, kan upate pawhin eng nge ngaih dàn an neih? Keini a nu leh pa ai pawha pawimawh zawk ka upate ka lo râwn ang e. Anni'n țha an tih phawt te chuan eng nge, keini hnial rual em ni ang? Tin, kan nauvi pawh a neitu tur ber a ni a, a ngaih dàn pawh kan hriat loh chuan mualpho lohna turah pawh kan mualpho ang e. Amaherawhchu, keini hi zawng thu súkthlêk kual thuipui chi kan ni lo a, amah Fehtea ngei pawh kan upa a ni a. Chuvangin, in rawn lan leh hun tur pawh chumi hun khami hun tih tûnah sawi lâwk țul lo teh se, kan la inhre mai ang,” a ti a. Tîti khawchâng dang te an sawi hnu chuan palâite chu an chhuak leh ta a.
Lalpa lo chhân dàn chu thlamuanthlak fahranin lang lo mah se, an hlawhchham dâwn lo a ni ang tih chu an luh tirha Saithangpuii hawiher leh mitmei ațang chuan an inngaihbel thlamuang ngawt a. Chumi ni chawhnu tlâng-her lai chuan lalpa, lalnu leh an upa min zual pahnih te chu zû khawn tlângin tîtî khawchâng an sawi a. Chutia an tîtî lai tak chuan lal sachhiah pe-in Fehtea nau(a farnu) chu a lo lut a. “Hei Mâman nghalchang a káp a,” a ti a. Lalnu chuan, “An thâwm pawh kan va hre lo ve, chutia engah nge ngâwi renga a lo kah leh tak bik? Sùm engtia nge?” a ti a. Ani chuan, “Sùm ruk tiin ka hria,” ti-a chhan pah chuan a chhuak leh mai a.
Fehtea sa-dar rawn pek azârah Fehtea lam hawia engmah sawi ri chuang lovin lalpa chuan, “Hei, ka upate râwn duhna che u ka nei a. In hriat angin kan fanu hian lal fapa tlâng chang tur inleng eng emaw zat a lo nei ve tawh țhin a. Mahse, a la rem lo a ni ang e, tûn thlenga la lêng ta chu. In hriat angin ka fa neih chhun liau liau a ni a, khualkhaw lama khuandîma min kal bosan daih tur chuan kan ngaingam lo nupa a ni ber a. Tualchhungah lah min duh der àwm tumah kan la tawng na bawk hek lo. Keini akâr hi min zuam lo ve khanglang te pawh a ni thei a. Khualkhaw lam sau-a Thangbawihi tirh liam kan hreh nachhan pakhat pawh : Țawng khawlo ni suh se, tuisik lem sual palh pawh lo tâwk ta ila, kan tlâng hi țhuttu awm mumal lova a awm mai tur chu kan ngaingam mawlh lo a. Thangbawihi hian tualchhungah pasal nei se chuan, kan mâkpa chuan kan tlâng hi a țhut zui thei mai dâwn a. Keini tân lah thlamuanga awmna a ni dâwn bawk nen. Nangni hian eng ang chiahin nge maw tualchhunga pasal neih hi in ngaih le?” tiin a zâwt a.
A upate pahnih chuan, “Kan sawi ve phâk a awm hauh lo na-in min râwn a nih chuan tualchhunga kaltir bak i khuate tân leh in nupa tâna thlamuanawm tur chu a awm lo ang. Ani neitlak tur an awm lo ang tih a hlauhawm zâwk pawh a,” an ti a. Lalpa chuan, “Tûn hma deuha in lo sawi thu khawchan dàn khân ‘Sihhuaia kaptu apiangin Thangpuii chu an nei tùr a ni,’ in ti khan ka hria a. Hei, Fehtean a rawn káp chu a ni ta a, eng nge in rilru ni ta zêl?” tiin Fehtea palai tirh thu sawi chhuak duh chiah lovin a’n vehthlem vêl a. A upa pakhat Hratliana chuan, “Min râwn der tak tak i nih ngai chuan ka ngaih dan dik tak pawh zep hunin ka hre lo. Fehtea hi heti khawpa tlangval fel leh kan khawtlâng chawimawitu ber ni mah se, khati khawpa a thangtlawm dànah khan awm chu a awm a nih ka ring a. An sawi nazah zawng te phei chu a dik vek kher lo ang. Mahse, ‘pân lovah tho a fu lo ve,’ tih angin thil ni lo hulhual ringawt chu an sawi ka ring lo a ni,” tiin an lal fanu Saithangpuii chu an pu fapa tâna duhsak ru tak chungin a țawng a.
Upa pakhat erawh chuan, “Kei chu Fehtea an sawi hming chhiatna zawng zawng kha a bul tumtu kan upa fapa Sangtuala ngeiin dâwt a nih thu Sihhuaia lusa kîl zan khan a inpuang tawh a. A khati tawh ber aliamah kei zawng sawi leh sêl tur dang awmin ka hre tawh lo. Dâwt muhlum a nih chianzia chu a chalah phung a tawp tih amah Sangtuala ngei a inpuang a, ngâwi mai mai tawh ila a ni mai. Amaherawhchu, kan fiamthu anga Sihhuaia káptu kher neihtir tum erawh chu a dik ber hauh lo ang a. Tin, in sawi anga tualchhung ngeia pasal a neih chu a țha alawm, a neih tùra te chu tu pawh lo ni se. Tûnah Fehtea’n Sihhuia a kah vang ringawta neihtir tumna a ni chuang lo a. Fehtea rilru lah kan hre na hek law. Thangpuii lahin a hmêl duh zâwng a lo ni kher lo thei bawk a,” a ti a.
Lalpa chuan, “A nih leh Fehtea chuan duhin palai hial tirin Thangbawihi hi min rawn díl ta chawt mai se la, engtin nge kan lo chhân ang?” tiin pehhel deuh takin a’n zâwt thawi a. Upa Hratliana chuan, “I fanu pasal tur chuangchangah chuan in nupa thu thu a ni mai a. Amaherawhchu, tûna min râwn der anga kan thu leh hla i ngaithla dâwn a nih chuan, Thangbawihi hi hetia unau dang pawh nei lova tumbu vuih ngawk ngang hi a ni a. Hmaichhanah han ti ta che u ila, amah lal fanu chhuanawm ber pawl a nih-ah bawk si chuan, lal fapa tlâng chang ngei tur nei lo chuan khual a kâi hauh lo turah ka ngai a. Tin, sawi tawh ang a tualchhungah pasal chhhia-țha neiin kan hmuh phakah kaltir mai ila in ti a nih chuan, lal makpa sakawl mei zial a nih ang a, Dârzo tlâng țhut tlak ngei tur, mualkil mi țha fapa, lal rorêlna êng hmu phak mi ngei hi nei turah ka ngâi tlat a ni.
“Khual chawng hmâi fai ringawt emaw, mikawlh sakawlh laka huaisen ringawt emaw pawh khawtlâng rorêltu atân chuan an țha kher lo thei a. Tin, in chhungkhur seilennain a ken loh lutuk mihring hi zawng, tlêma an dinhmun a țhat deuhin an ro a khain an chemhrah lal duh a. Chu avang chuan tualchhung mi awm thei deuh fapa ngêiin nei se. Hmeithâi fa leh chhungkaw nun mumal lo ațanga zi chhuak zawng Thangbawihi tân a țha lo ang, an rilru a puitling khawchhuak țhin lo. Lal mâkpa mah ni se, tlâng hial la țhut tur an nih dâwn avangin, nanga hmeithâi fa tih ang reng, daitâma vawk-êk leh liankual zînga seilian leh tlâng sel mihring ang chi zawng ka duhsak hauh lo che u,” tiin lal hmangâi tak țawngin thurawn a pe a.
Chumi zàn chuan lalnu leh lapa chuan an mut hmunah an fanu inlêng neih chungchang chu zawi tê tê hian an sawi a. An țawng chu Saithangpuii chuan mu meng chungin ngâwi rengin a lo ngaithla ve kiau a. Saithangpuii pawh a lo la muhil bik lo tih a hriatin a pa chuan, “A nih leh Thangbawih, Sihhuaia nên khati khawp khan khaikhin in ni țhin a. Ka upate nen pawh, ‘Sihhuaia kaptu apiang, tlangval hnahkhat an nih chuan Thangbawihi hi neihtir ila a ni mai,’ kan lo tihfiam khum țhin a. Tûnah hei, Sihhuaia káptu ngei chu a lo lêngin, keini saisik leh kamkeu azeng lah a ni lo. Engtin nge kan lo chhan dâwn le? I rilru tak tak hriat a va hun êm?” tiin a fanu chu a zâwt a. Saithangpuii chuan, “Vawiina kan upa i râwnte khan an sawi dawt lo na-in an țawngkamah khân Fehtea chu an iai viau khan a lang a. Kan upate berin an iai si chuan,” a ti a. A pa chuan, “Kan upa rilru kha chu i hre thoin ka ring a, an laina hnai tâna a duh che avangin khatia țawng kha a ni a. Kha kha chu ngaih khata ngaih mai chi a ni ang,” a ti a. Saithangpuii chuan, “Sangtuala tân maw? A teuhin a hnai lo. Sangtuala runluih nân Fehtea chu ka’n nei teh poh emaw chu ni dâwn ang aw,” tiin fiamthu țawngkam titihin a chhâng a.
A nu chuan, “Thangbawih, fiamthu lovin, Fehtea chu i inlêng neih lai a ni a, lo chhân dàn tur pawh i pa nen kan thiam lo. Fehtea neih i hnial lo a nih chuan keini i nu leh pa hi chuan engmah hnialna kan nei hauh lo a nia, i rilru tak tak hriat a hun tawh hi. Eng nge i ngaih dàn chiah?” tiin tihtak hmaipu-in a’n zâwt leh a. Saithangpuii chuan, “Tak taka-na, nangni ka nu leh pa’n rem in tih chuan in thu thu a ni alawm,” tiin a chhâng a. An fanu-in Fehtea chu a iai miah lo tih an hriatin anni nupa chuan engti kawng maha hnial an tum lo. Saithangpuii mutthilh hnu chuan an nupa-in an tîtî chu an chhunzawm zêl a.
Lalnu chuan, “Thangbawihi mitmei ka enin a hnial lo tih ka hre mai a. Fehtea hi a ngaizâwng ru tlat ni-a ka hriatna a rei tawh asin. Hmàna Rohrima nupui thih zana an lungrual dun dan te leh Sihhuaia lu an rawn thlen zana lawmpui tùra mi reh lai hun kher a chuh te kha ka hriatthiampui mai a. Khawilo ni dâwn se, Ralvani a kherh chhuak ziah bawk nen, a ngaihbel theih khawp asin. Hetia tualchhunga a hmêl duh zâwng tak leh tlangval duaidim lo tak a tawng hi keia hmeichhe rilru-ah chuan tihzia ka ti khawp mai,” a ti a. An pa chuan, “A lo nih daih tawh tak chu. Chu avang pawh chu a ni mahna, khati zat inlêng a lo hnar hlawm tak nachhan pawh,” a ti ve mai a. Tichuan, a tûk lawk ațang chuan, ‘Saithangpuii leh Fehtea an innei dâwn’ tih chuan khua a khat ta nghâl a.
Lal mâkpa neih chhun a nih dâwn tak avàng chuan Fehtea chungah mi’n bengvar an chuhin țhat an chhuah thar țheuh hlawm a. Tûn hma kha zawnga a laka chimawm leh elreltu huaisar țha zawng pawh Fehtea lakah zah bosala țhat chhuah thiam thiam leh pamham ber berte an ni leh a. Fehtea tihlawm loh hlau-in an phili chung hlawm a. Mahse, Fehtea chuan a țhian hlun Thatkima bak chu tumah dang a ûksak chuang lo.
Tuifur a tlâk hma-in Saithangpuii leh Fehtea chu an innei ta a. An inneih zàn chuan Fehtea ní pasal chuan, an pu Fehtea an tih dàna a thinrim hrikthlakna remchang hmangin, a ruih lungpuam lai denchhenin, “Kan fel loh avànga min demna chu thudik a ni a. Min huphurh avànga min elreltute min sawichhiatna chu an suahsualna rilru lai langtu lek a ni bawk. Dâwta min sawi chhetuten min sawi leihnâwn avànga tlâng-tlak lohna chuan rual elna min siam a. Min dotute avànga khaw hawina hre lova kan awmna chuan tumruhna min neihtir bawk a. Khati khawpa kan chhiatna zawngtute khan, eng kan nih lohzia hria se zawng khati khawp khan min er duh hauh lo ang le. Dârzo khawtlâng chawimawitute chu Dârzo khaw nula leh tlangvalte hi in nih avangin, he kan Dârzo khaw tân hian Fehtea pawh a inpe mai a ni. Chu in inpekna chuan hmun sângah zaninah hian in hlangkai ta a, nangmahni avanga he dinhmun hi chang phâk chauh a ni zawk. A thu hrimah kan ropuina hi mahni inkhumtir thil a ni lo a, mite min khumtir avang chauha ropui kan ni zawk si țhin.
“Mi pakatin, ‘Fehtea tân zângkhua a bungbu ta bawk a, a ertu tân chuan a tuar hlelhawm ngawt ang le’ a ti a ni àwm e. A ni ngawt mai, tûnah chuan zângkhua a bungbu ta kan ti thei ang. Mahse, zângkhaw bungbut hun hi ‘phuba lâk hun’ tihna a ni lo, ‘khua a vâr dâwn ta’ tihna a ni zawk. Chuvangin, Dârzo khaw tân khua a vâr dawn ta a ni tih i hre țheuh ang u. Inerna leh inphiarna te hian mihring nih chhungin, thil țha a chhuah ngai lo a, intlawn vak vakna te lahin vui leh vaina a hring bawk țhin. Keini khua hi zawng inhuphurh avanga iner lovin, mahni hmasial avanga mi tluang tai lo leh mi sei hlei pawhthlak tum lovin i inhmangaih dial dial ang u. Duhâmna leh mahni țanghma chauh ngaihna hian khua a hmuh țhin loh avàngin, ‘mi âwkhrawl an hlawhtling thei, mahse, an tlu thut thei’ tih a nih ngai kha. Tute hi nge la inmamawh tura-te kan inhre si lo. Upa-in ‘kan dam leh tlâng khatah, kan thih leh ruam khatah’ an tih țhin angin i khawsa ho zâwk ang u.
“Aw le, zaninah hian kan chhûngkaw hlim zan a ni a. Chung thu sawi chu hun lo hle in lo ti pawh a ni thei e. Mahse, kan lâwm êm avangin kan lâwm lai tak denchhena lâwmthu lo deuh sawi hun niin ka hre ve tlat a. Thinrim lâia thinur thu sawi zawng țhian țhate sadâi țhiah palh a hlauhawm ngai e. Thinrim hunah lawmna thu sawi hlauh zâwk ila, thinrim nghawng a na lo deuh nge nge hian ka hre țhin. Zanin hi kan chhungkaw tân chauh ni lo, tu tân pawha hlimna bul ințan zan a nih theih ka duh a. Chuvangin, a tua-te pawhin kan hun tawng meka kan khawtlâng tinuam lotu leh hliah botu, thu mu hnu chang turin zanin hi hman tum țheuh ila. Kan lal fanu pasal neihna hian Dârzo khawtlang tân hamțhatna leh hmuingilna a thlen theih nân malsawmna bul ințan zan lo chang rawh se,” tiin Fehtea ní pasal chuan an chhungkaw âiawh ang deuhin, chumi zàn chu remchângah hmangin an thin natna a hrithla a ni..
.....A TAWP TA..

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)