TUMPANGCHAL NGE SAITHANGPUII BY James Dokhuma (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: TUMPANGCHAL NGE SAITHANGPUII BY James Dokhuma 1 -8

Unread post by Ngaia » March 22nd, 2019, 7:26 pm

BUNG 8:Khawsak theih aiin hmingţha a hlu zawk
Fehtea an sawichhiatna leh an erna chuan tâwp-in-tài a nei lovin, a chhia zawng zawng an belin an khumtir a. Fehtea chu tlangval tum ruh tak leh chhel tak a ni na-vang vangin a beidawn ram ram cháng a tam hle mai. Tun hma zawnga a lo hmingţhatna leh rual a lo khumna hunte chuan mual a liam zo ta-in, a tân khaw êng hmuh ngam lohna khawp hial turin Darzo khaw tlangval er rawn nih chu phurrit a tling tak meuh mai. Mahnilomaha khaw khat tlangval chhuanvawr nih ve nâk alaiin; mahse, tunah zawng a hun hmasa zawng zawng chu mumang ang lek a chang zovin, ţiauchhûm ang maiin ní-in a la zo ta a ni ang e, tih turin a rial ral zo ta. A farnute lah chuan tu kawm mah an hlawh tawh lovin tlangval fiamthu ţawngkam ţha fahran pawh an dawng phak ta lo.
An unauza tê chuan an inkawm ţhin a, unau inkawmngeih tak an lo ni hlauh zâwk pawh a. Khawilo an chhuah lahin an unauza bak chu, an ni Ralvani fate nen an inzui tlâng leh ringawt a. An nuţapa an sawina zawng zawng chu a dik lohzia hmu-a hre chiangtu ni vek hlawm mah se, zathum khaw tlangval ţangrual chu an er pha chuang dâwn lo tih an hriat chian êm avang leh, eng an sawi kaw chuang dawn lo tih hriain an nuţapa an sawi leh sêlna zawng zawng chu an hre lo awm hmiah hmiah ringawt mai a ni. Nu an nei tawh lo a, pa erawh chuan an la nei hram hram a. Mahse, ani lah chu tar chhia leh mitdel mai a ni tawh bawk si. A Dârzo khaw mimir reng reng chuan chuti taka Fehtea an sawina chu a dikna chiah hre hlawm mah suh se, a khaw-za-nawt tlangvalin sawi ta ţheuh si chu, an fate ngei ngei pawh a sawitu an nih hlawmah si chuan âwih lohsak ngawt ngam chi-ah an ruat lo a, an sawi ang ang chu an awih ve mai zêl lo thei bik lo.
Amah Fehtea chauh an sawi a ni lo a, a chhûngte leh a lamţang niawm thlenga an hmer tel zêl takah si chuan a lamţang nih pawh a ngamawm lo rêng a. Chuti khawpa khawtlang er rawn a nih avangin Fehtea chuan pèm daih mai te a duh rum rum ţhin a. Mahse, a pa chuan a hma aţang tawhin, “Darzo khuaah ngei ka lu a lum tur a ni,” a lo tih tawh ţhin avang leh amah Fehtea ngei pawh chuan, a ţum a ţum khat na nâ nâ chu Darzo khua ngeia thangţhat lak leh a chák rilru em em bawk si avangin, bet vak lo chungin vahsan a la leh ţhin. A rilru lehlamah chuan – An pèm vaih chuan an sawi zawng zawng chu dik vekah an pawm phah ang tih a hlau fàwm bawk tho si a. Chu thila ertute finna êm êm chu: Chuti taka an elrelna thu chu an lalpa leh Fehtea lamţang àwm mihring zahkai chin beng hriat tura an thup thei tlat chu a ni. Mahse, zép vek sen chu ni bik hek lo, an hre vek lo nâ a, hriata mual mual zawng an nei tho mai.
Fehtea chuan tuallim pawh a chák tawh loh avangin a ní te inah a tawm kual mai mai ţhin kha a ni a. A rilru lam erawh chu a hahchâwl chuang lo. Ni khat chu a pu; an bul ber, a nute unau zînga naupang ber inpui nghaktu a lo zin a. An pu chuan khual thuthangah Fehtea chu ramchhuak ngai lo ang leh a silai hmangtu tur pawh tumah awm lo ang thu a lo râl hriat avanga Fehtea silai hawh tuma lo kal a ni a. Tin, chu bakah a tupa chu a lo ral hriat dànin;- Tlangval tlawva leh tlaktlai lo tak ni-a tlangkama a hriat avanga zilh pah fawm duh a lo kal a ni. Ani Fehtea pa, mi-alaia mi tlawmngai leh taima, pasalţha, ram lama thangchhuah khawpa khawtlanga mi ropui kai phakin, chutia a rîla rah a fapa neih chhun zilh tura kawlvalenchham aţanga an pu lo kal chhan a han hriat meuh chuan ha-chang ţhialin tapkun bawm do-ah ţhuin ânhla tinreng a chham a. Tar â leh khaw hmu tawh lo a thuchang, Fehtea an sawina te chu tun hmain lo la hre ve mumal hek lo. Fehtea farnute lahin ani ţawmkai tawh lo, tar â tawh chuan thu a chhana lak a thiam tawh loh tur hriain, an nuţapa chanchin chu a chhia a ţha an lo hrilh duh bawk si lo.
Chutia khual-khua lam sauva awm hriat phak khawpa a fapa Fehtea chanchin mawi lovin a dêng thleng leh, chu chen an lo thlim chuan a thin a tirim zual a. A engamah hma chuan a fanuteho chu a’n ţim nek phawt a. Chutah Fehtea awm leh awm loh pawh hre uk lovin a ang ta piap piap mai a. “Pi leh pu aţangin ţhenrual zîngah kan duai bik ka hre ngai law. Mikawlh sakawlh lakah ni se, a kumkhaw thuah khawtlang muantu min lo ti ve kumkhua a. Ka pa’n ram lamah thang a chhuah a, kei pawhin ka pu dungthulin ka chhuah ve leh a. Chu avang chuan a hmingah pawh ‘Hrângkunga’ kan han sa a aw… Fapa pakhat ka nei a, ani hi ka ţawng chhan ve ber leh zan khat mitchhin pawh lo tawk ila, thlamuanga leilung ka chhuahsan phahna tura ka inhnemna ber a ni a. Hetiang hrep fa ka lo nei hi tu chhunin nge maw a lo pian kher kher ni ngai ni. Kan fanute ni se, a tu-ate mah pasal hmu zo awm ta bawk si lo,” tiin a ang hmarh hmarh mai a.
Chutih lâi chuan Fehtea khawilo kal chu a lo hawng a, a pu a hmuh veleh chuan, “Ka pu, i lo zin a ni maw? Eng pawihai nge awm ta, nang meuh i lo zin?” a ti a. A puin a chhan hma chuan a pa chuan Fehtea hnênah chuan, “Mama, i mi anloh a rawn zin chhan a nih kha. Heti em ema tlaktlailo fapa ka nei che tih ka inhriatin ka va han zak tak êm! Tu fa ar-ah lo nge i lo chhun a heti tak mai a min tihzah chu. Kei mitdel, tapkuna tawm sen reng pawhin i chanchin hi ka hai law… Tûn vahsân lak laia an sawi ka hriat te pawh kha a dik ang. Daileng hla ngam lova hnahchanga funin mut hmunah i inchawp a. Zîngah tho hma leh peih si lovin a cháng leh i tlawh pherh a, a cháng leh i delh pherh thul nen. An sawi tirh phei chuan mi dang daih turah ruatin ka lo nuihpui mai mai a, nang lo ni hrep che chuan. I riahpuiten hrehawm an tihzia an hrilhfák nasat kha. A zahthlak lulai êm mai!” a ti tân tân a.
Fehtea chu kamkhat mah a ţawng lovin tap-ai khumah thuin a ngawi ran mai a. Chutah a pa bawk chuan, “Keini tlangval ve lai te chuan zîng leilung lan hmain kan tho a. Tui chawi a ţul leh kan chawi ngah vek a, eirawng zawng zawng kan bâwl peih vek hnuah val naran an rawn tho ve chauh a ni ngai a. Nanga lova min tizak tur hrim hrimin ni maw i lo pian ni ngai le Mama? I pa mitdel pawh hi khaw hawina min hriattir dâwn hlei nem. Khawtlang awmni kham leh mi chhiatni thatni-ah, meilam sial nikhua chang leh sahuai tlak ni-ah te, kut ni vangthla leh sechhun khuangchawi an awm fahran ni-ah pawh tun min khalh tak ka hre ngai law. Lal khua leh tuiin ţampui mitthi a tawh kum leh dosi kar fahranah pawh in lam ram lamah tu min chhingtu an awm pawh ka hre ngai teh bel lo. Ka ţawng uangpui chang suh se, ka awmna apiangah an sa-bel leh khaw daingul ka ni ve fan. Nanga lova kawm serh leh tlâng sel, ţhiante hmuhsit leh zathum khaw nula nuihzat maw i hlawh ? Mi te angin khaw êng hi hmu ve tawh lo mah ila, fate zâra dam ve ţek ţek hi ka la thlang hram hram ţhin a. Mahse, tûnah zet zawng dam ka thlang ngam ta lo ve, thi ila ka tân a nuam tawh zawk ang. Mihring kan nih chhungin khawsak theih aiin hmingţhat hi a hlu zâwk ngai asin Mama,” tiin khumpui dawhchho-a thu-in a mittui a tla zung zung a.
Chutah zawng Fehtea pawh a insum zo ta bik lo a, aw fiah fel fak hian, “Ka pa, chuti ang ngawt zawng ka ni bik ngai lo asin. Tûn vahsan lak lai pawh khan ka duaina bik êm êm ka hre lo. Zîng lamah ni se leilung lan hmain ram dan-um hlam leh ţangphela sei ka khah kim vek tuk tin a. Chaw ni se zîng zanin ka chhum sa ringawt lo tu chhum nge an ei tak? Chawhmeh chenin ka kah sa-in ţum tam vawi tam an inhrai puarin tuk zan an inhnangfak a. Mahse, chuti chung chuan min hawtu leh min huphurhtu chuan min er ting mai chauh a ni. Eng ang pawhin tlawmngaih chhuahin engkimah sulsutu-ah ţang mah ila, an mi fak te zawng khawilam. Mahse, an mi rel chhiat avang ringawt chuan ka kut a kir chuang ngai hek lo. Ka nihna leh dinhmun zawng khau-in a la rêl mai ang,” a ti ve hial a.
A pa chuan, “A….a, Mâma, i kâ a kuaa i ţawng ve mai mai ţhin a ni. I nihna te zawng tlângin an hria, khaw êng pawh zah lovin mahni nih lohna thilah i pa min uan-khum mai mai suh, min zah lo lutuk. Ka fapa i ni a, i pa nangmah hringtu ngei che ka niin chaw seh sawma ka chawm len asin i nih. Mi dang hnênah chuan lo daw kual mai mai mah la ka hrethiam. I hringtupa ngei ngei hmai hmaa thil ni lo lo sawi zawng van ni an sal ngai asin. Tûn chinah zawng khang ang thil kha sawi leh ngâi tawh suh ang che. Heti ang mihring mai mai ni tur hian eng laiin nge ka hrilh che ? Mi ang ka nih lai a ka kaihhruai dàn che nen a va han intuak lo ngai ve,” a ti phiar phiar a.
Fehtea chuan chhan leh chi ni-a a hriat loh avangin mittui parawl ţeuh chungin a chhuahsan ta a. Fehtea chhuah hnu chuan a pa chuan, “Mama dinhmun chu i lo hriat thawi angin khati kha a ni a. Kei putar mitdel, Rândanga sairawkherh an sawi ang maia mahni in chhung pawh pel tawh lo hian, chuti taka an selna leh vangtlang mit a tlin lohna pawh chu ka hre mai hlei lo a. I rawn sawi tak a zârah tûn vahsan lak laia a khawsak zia pawh ka hre ve chauh a ni zawk a. Mahse, mihring a bilha tho tawh lo zawng sawi leh sawi hnu, a ngaihna a awm mawlh lo. Hau eng ang mah ila eng a chawbe chuang lo ang. Kan fapa neihchhun ni ve miau si hek le, eng kan tih ang. Kan inhauh nasat leh kan mualpho nasa a ni mai a, hmêlma kan tilawm tam mai mai. Heti hian rula raw neih mai mai ila a nih ber àwm hi maw...
Taka na, silai chu i hawh duh a nih pawhin ti khan pu haw ta la. Mama hian hman ve a duh zauh châng hi chu a nei ţhin a. Sa lah chu a kap thei ang lawi viau si avang hian an sawi ang em em hi chu em ni dâwn tak ang le âw…., chu ka han ti leh ang lawi ţhin a. A enga pawh chu ni se, pu berin i hman ve duh miau si chuan ti khan pu haw ve ta la. Mâm’an a mamawh ve ta a nih leh kan pah che u pawh a ni ang a, a la rawn lam ve leh ta mai tur,” a ti a. An silai chu Cherhlun-a an pu chuan a pu hâw ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 23rd, 2019, 9:01 pm

BUNG 9 : Tumpângchal nge Saithangpuii?
Chumi kum chuan khua a sângin ţhal va êk char lai tak a ni a. Darzo ram chhunga zuksih tlàn pêl tur chuan pasalţha ‘Kei ka ni’ inti deuhte chu an liam chamchi hlawm a. Fehtea pawhin kal ve a chák thei hle nâ a, an silai lah chu a pa’n Cherhlun lama a pu a lo hawn botir daih si a. A ní pasal chuan awlan ţawngţawl zet mai hi a nei a. Chu chu pu chhuakin sih tlàn chu a zuk pêl ve a. A vânneih a siamin zukchal ki mawi zet mai a káp nghe nghe a. Chumi ţum chuan tumpângchal lian mangkhengin sih chu a tlàn ve tih a zuk hre bawk a. A tumpangchal hmuh thu chu a sawi dék dék a. Mite chuan, “Pasalţha kha zawng pawhin hmu lo a, ani chauhin khawiah hmuh thu va awm suh. Fehtea hi zawngin rûl-ke-nei pawh a la hmu ta ve ang, awih loh loh tur,” ti khawpa an awihsak loh avangin, a tumpangchal hmuh pawh amah tihmingchhetu lek a chan zêl avang chuan mi hmuh loh ang hmu ve ngam turah pawh a inruat ta lo a.
Ţum khat chu sih tlàn pêl turin Darzo khaw pasalţha chuanvawr deuh deuh hovin mi sàwm rual lai hi an thawk chhuak a. Chumi ţum chuan Fehtea hmuh ngei tumpangchal chu an pasalţha pakhat chuan a hmu ve ta ngêi a. Kah theih tur chuan a pháwk ngei tak nâ a, a silai thun chu tumpangchal kah nan êma a iai si avanga káp ta lo chauh a ni nghe nghe a. Mi dangin an hmuh ve achinah Fehtea sawi pawh chu an awih ve chauh a. Chu tumpangchal hmuh an pasalţha-in zawlbuka a sawi leh dàn chuan : “Kei chu inring pànin ka chan hmunah hmuam-da vêl zeta rei ka ţhu tawh a. Tumpângchal chu a lo kal ta a. Zukchal mena ka men avangin zukchal nghîng a ang lo deuh riau hian ka hre ta a. Ka hma zawn chiahah chuan hnahkiah a ding a. Chu chuan min hliah lo phei se chuan a hmuh pawh min hmu ve thei ngei tur hi a ni. A lo phei zêl a, zukchal te chu khawilam, rairuang buk kâra a ki hmawr tle varh varh chu ka’n hmu ta zauh zauh a. Chutah zet zawng ka dip a sai dar dar mai a, a hu a na hle mai. Ka rilruin, ‘Chhei khaw raw…,tumpangchal zuk ni pheu mai chia le,’ ti rilru chungin ka silai ka’n tuai vat vat a. Thal thlah teh meuh pawh ka chák. Mahse, tumpangchal kah nan meuh chuan ka silai thunin zir hek lo. ‘Ka kap fuh ting ang a, tlu leh zo si lo-in a ţi tawk lekin kan inum bo hlawm ang e,’ tih ka ngaihtuah a. A hran a pêl tur law law-a la thawh chhuah leh ţha zâwk dawna ka hriat avangin ka kap ta lo chauh alâwm.
“Tichuan, ngawi rengin a hmêl chu ka en ta ringawt mai a. A’n lian em em khawp a, a ki ţhatzia ţhatzia lah chu(h), ‘a ki berah bâk a lawi thei’ an tih ang mai hian a fim eng kuk mai a. Khu, in hmu va ţheuh tawh ang a, sih ràla lungpui hang ren run awm khu, khu mi kiangah khuan a lo phei a, khu lungpui nen khuan a eng nge lian zâwk ang âw…, ka ti hial a ni. Han sai thlûk àwn ruah ruah mai ka’n chák khawp a. Khu mi ngat kaptu nih khu chu, kan lal nula Saithangpuii man lova neih ai pawhin ka thlang zâwk,” a ti a, an nui dar dar a.
Pathlâwi pakhat chuan, “É khai..! Saithangpuii i va han ngâinep thi the ve! Kei chu man lova neih chu sawi loh, tumpangchal tih ang reng kah ai chuan man nei pawhin Saithangpuii neih chu a letin ka la tlang zâwk daih,” a ti a. Pasalţha chuan, “A ni mai thei e, kan dinhmunah lal makpa nih chu a hlu alâwm. A thu hrimah keini upa lam chuan nupui tharlam ai chuan sahrâng lu hian kan lung a lên zawk reng reng a. Keia tân ngat phei chuan khu tumpang kah khu chu ka thlang vang vang mai le,” a ti a. Chuta ţang chuan chu tumpangchal chuan sawi a hlawh ţan ta a. Sih tlàn pêl apiang lahin chu tumpangchal lenzia tur mawlh chu an zuk phawk ve chiah loh pawhin a hniak aţang chuan huhip(hahip)-in an rawn sawi lah tak a. Kah tumin pasalţha lah vawi tam an liam tawh a, mahse, tuman an la kap thei rih lo.
Chuti ang khawp a se lian leh fing chu vêngtu eng emaw tak neia an rin avangin ‘huai’ nei ta-ah ngaiin ‘tumpang’ pawh ti lovin ‘Sihhuaia’ an ti mai a. Ram sechalah pawh chal naràn lo tak leh chal-tum huai nei tham hialah an ruat a. A khaw pasalţha meuhin chu tumpang leh an lal fanu Saithangpuii khaikhin ta chu, a tuate pawh mai chuan inzawh bera hmangin ‘Tumpângchal kah nge i thlan, man lova Saithangpuii neih?’ tih chu inzawh tehah an nei ta a.
Zan khat pawh zawlbuk meipui an kil bial luih mai a. A ngâi tê bawkin pakhat chuan, “In ti fo a, kei chu Saithangpuii man lova neih ai chuan Sihhuaia kah chu ka thlang hrim hrim zâwk. Nakin lawkah ram kan la chèn phulin kan la dai dar zêl ang a, sakhi fahran pawhin an la tlàn ngam dawn lo tih hriat reng a ni a. Tûnah pawh tumpangchal meuh pawhin tlan ngam a kan rin phak tawh loh laia a rawn tlàn pawh hi thil mak a tling tawh a. Nupui ka lo neih tawh vang nge ni lah ka hre lo a, kei chu Sihhuaia kah ka thlang diah zâwk,” a ti a. Tlangval pakhat chuan, “Ka va han duh hlei lo, lal makpa nih chu thu khat ni se, Saithangpuii man lova neih chu sawi thu chêng lo, lal fanu man pangngai pawh nise Saithangpuii chu ka thlang hliah hliah mai. A nalhzia a nalhzia khi âw…, nei dâwn ta ila chuan ka thidang thei ang. Khiti khawpa nula itawm leh tituai ţha, fel si, fing si, taima bawk si, ‘si’ sarih kai…Sihhuai káp ta pawh ni ila ka thidang ve miah lo ang,” tiin Saithangpuii a duh thu chu a chham ve mial mial a.
Tlangval pakhat ve thung chuan, “Kei chu, nupui ka la nei lo nâ a, Sihhuai kah chu ka tlang daih mai le. Nupui te zawng mahni tum tawk an bo bil pawhin ka ring lo a. Lungâwina tawk chu kan la hmu ve ngeiin ka ring a. Hmeichhe pakhat na na na mahni tâwkah hmai bik ka inring lo. Saithangpuii chu duhawmin ngaisang hle mah ila, Sihhuaia kah chu ka duh daih,” a lo ti ve thung a. Tlangval sawitu hmasa chuan, “Ngâwi teh i ti rawk pawh a, lal mâkpa nih chu mihring khawsak thilah hlu deuh a nia. Saithangpuii kher phei chu a neitu apiangin tlâng an ţhut dawn tihna a ni lehnghal a. Amah Saithangpuii ţhatzia leh itawmzia hi, mahni chuam turin han kheh var ţhiang rual mai ila zawng kan lungawi teh tur asin. Chutia sawi ngawt pawh chuan i ai-khirh lo chauh lo mâw..?” a ti bài bài a.
Tlangval pakhat zahmawh sawi hrát zet mai Thangtlirha chuan, “A ít thu-ah chuan kei chu Hringkungi saw asin ka ít ber mai chu âw… Amah a lian tawkin a ngo sen suah mai si a. A pangkai-bawr hmatheh lian zet mai pahnih fawn lur lur khawpa a lo tlân ka’n hmu chu(h)! Awi, awi..awi…! Ka thidang lo chauh a ni. A kawrkilh phelh kârah a hnute bul vawng chu a lang bari phir thla ţhuih mai bawk si a…A malpui len nalhzia lah chu khan khawk saisu ang mai, a vawng ngo pur mai tih hriat reng. Chângpawl thlâmramah duh tawkin thal mai ila zawng Darzo khua meuh pawh hi ‘khuate u..’ kan ti mai ang maw le,” a’n ti chu an nui ham ham mai a.
Chuti khawpa tumpangchal ngeng leh chaltum ţha chuan Darzo sih chu a tlàn a. Khaw chhungah lah chuti khawpa lal nula hmelţha leh duhawm chuan lên lai a chèn mek bawk a. Chutih lai hun na na na chuan tîtî dang sawina hun leng lo lekin awm khawmnaah tawh chuan a mipa fa nazah zawng chuan, “Tumpângchal kah nge i duh man lova Saithangpuii neih?” tih ngawt mai chu a tîtî tui ber a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2019, 8:39 pm

BUNG 10 : Zângkhua a la bungbú ang
Khawsân kum berah chumi kum chuan an lo hàl hmà kum tak a ni a. Mahse, kâng duh tawk chauh tura ‘ţhuang ruah’ surin a phuh hnu a ni hlui-a hâl ngang an nih avangin Darzo khaw ring thar chu a sahhârah a kâng a. Lo an hal hma avang chuan kangvar âwllen hun an nei reiin thawkzo chhungkua phei chuan thlâm an sa zo thlip thlep tawh a. Ruah tui a tlak leh lawk si loh avang chuan thlawhhma lamah tih tur a awm rih lo hle a. Mipa tân ramchhuah leh chawhmeh zawn hun, hmeichhe tan lah thingtuah chhêk hun leh la dehna hunah an hmang a.
Ni khat chu Fehtea ní chu thing phur turin amah chauhin a chhuak a. Thing phurhpui atana a vahnute a sâwm hlawhchham chhuak leh lam chuan Fehtea te kawmthlang kawngpuiah Saithangpuii a tâwk a. Fehtea ni chuan beisei vak lo tak chung hian, ”Thangpui, hawh thing i phur ang hmiang? Ka tlâi tawh bawk nen, tumah phurhpui tur pawh ka hre lo, i duh ve mai lawm ni?” tiin a’n sawm thuphung mai mai a. A rin loh takin Saithangpuii chuan, “Ka duh asin, thing phurh tumin ka insiam sa diam nghe nghe a, ka thurualpuiten min ţhulhsan leh si a, insiam hran pawh a ngai hlei nem. Ngâwi rawh, ka ní, ti khan min lo nghak lawk, ka êm leh hnam pawh kawngka lamchhakah ka theh chho rawk a, ka rawn tlansan mai nghe nghe a, ka han la lawk ta’ng e,” a ti a, a phurhhlan la chu Fehtea ní chuan a lo nghak a.
Fehtea ní leh Saithangpuii chu thing phur tur chuan an inzui chhuak ta a, kawngtluanin an tîtî hlut a. Thing duhtui mi tak ve ve an nih avangin a hla pawh pawisa lovin kàngpâr ro phur turin an kal zel a. Kàngpâr ro ui-pum tiat vel zet tur thing chang ţha tak an hmu fuh a, an pahnih chuan muangchangin an kit dun a. Chutia muangchanga thing an eh dun lai chuan Fehtea ni chuan, “Ngâwi teh Thangpui, han ti phawng phawng zel ila, ka ţawng ngaih loh lamah lo ngi lo la. Hei, pasal nei lovin i lêng tar thei dawn alawm maw le. Hmâichhanah han ti ta che ila, in hmel a ţhain lal fanu, hnamchawm leh mi chhe cho rual loh in ni si a. Chu lovah, nulat tlangvalna lamah in lerh mang bawk si lo. Lal fapa tlâng chang ngei tur i tawng remchang chuan ka ring si. Mahse, hei chen hi i leng ang lawi bawk si a, i leng ţul thei tak tak dâwn alawm. I hmel duh ang mi i la tawn remchan loh vang lek a nih ka’n ring ringawt a,” a ti a.
Saithangpuii chuan, “A ni khawp mai ti rawh ka ní. I hriatah chuan han sawi ta mai ila, inleng mahni tum tawk tê tê chu hmu ve e, lal tlangval roluahtu tur pawh ka hmu ve nual. Mahse, eng a tia maw ni kan pasal tur an la ni lo chêk a ni ang chu, ti hian kan la tal mai mai chu a ni a. Tin, a thu hrimah khual khaw lam daih a pasal neih hi ka hreh riau mai a. Nuţa nei lova hetia tumbu vuih ngawk ngang hi ka nih avangin nge ni, ka nu leh pa lah chuan mi an ngai em em mai bawk si a. Uan thu ni suh e, hman ni lawk pawh khan Khawhri lal fapa chu a lo lêng a. Mahse, pasal neih hi ka chák lo a ni rih ber àwm e. Hmel duh mi tak te tawng ila zawng ka hreh bik vak kher lo pawh a ni ang a, ka la tawn rih loh vang a ni ber ang e, hetia ka la lên ni. Amaherawhchu, mihring ve lem hetia len tar ngawt thu lah awm suh. Upa-in, ‘mahni khingpui turte chuan ban-thal an rawn nawt mai a nia’ an tia lawm,” a ti a, a nui har har a.
Fehtea ní chuan, “A nih leh Thangpui, han inzawt dilchhut ta zêl ila, i inleng neih hi keini tak ngial pawhin kan lo hre ve leh zauh ţhin a. Tûnah hian inleng engzat chiah nge i neih tawh reng reng?” tiin a han zawt a. Saithangpuii chu a nui ta a, nui chung hian, “Awi ka ní, sawi tham ka la nei lo,” a ti a. Fehtea ní chuan, “Kan chhuang ve che alâwm, han sawi teh, engzat chiah nge, nang anga inleng ngah hi tu lal fanu mah awmin ka ring miah lo,” a ti a, fak chungin a han zawt nawn leh a. Saithangpuii chuan, “Sawi chhawn leh tlâk lah a awm hlei lo a, lal fapa tlâng chang tur lo leng zat chu zângkhaw arsi zat khi niin ka hria,” a ti a. Fehtea ní chuan zângkhaw arsi zat pawh a lo hriat si loh avangin zawt chiang duh ta chuang lo chuan nakina a hriate la zawhah tiin a hre awm ve ta mai mai a.
Fehtea ní chuan, “A nih leh chung zozai zingah chuan duh i la nei lo chu a ni ang a mâw?” a ti a. Saithangpuii chuan, “Ka duh loh vang nge maw a la rem lo hrim hrim ni dawn ang le. Ka ngaihdan tak tak chu maw ka nî, ka mi duhzawng chu ka hmangaih ngei tlangval, mi hmangaihtu ni bawk si ka duh ber a. Chuti ang mi chu tawng ila chuan i he lovin ka nei mai ang. Hnamchawm an nih leh nih loh lam emaw, lal fapa an nih leh nih loh lam emaw ka ngaihtuah chuang lo. Damchhunga ka khingpui tur a nih dâwn avangin hlim taka ka khingpui ni thei tur tlangval apiang ka duh mai,” a ti a. Fehtea ní chuan, “A nih leh thu dang deuh han sawi ta daih ila. Hei, Sihhuaia nen lah tehkhin tehah an neih si che u a,” a han ti ngawt a. Saithangpuii chuan, “A ningawt mai ti rawh. Sihhuaia teh rual loh, khaikhin teha min hmang hi chuan min chawimawi ngawt mai. Kan ram chhunga heti ang tak tumpângchal lo tla lut hi keia tân tak hian a vanneihthlakin ka hria. Kan phu loh nen min bûk min bûk mai a, a zarah ţha ve tak taka inngaih palh mai pawh a hlauhawm thei dawn alawm,” a ti a. Fehtea ní chuan, “Eng nge maw le, sial te mai mai chu i cho phâk loh lêm ang le. A zâra thang ta lua em i nih hleih a? Ramsa zînga nang nena khaikhintlak an hriat chhun a nih vang zawk alâwm,” tiin a han chhâng leh a.
Saithangpuii chuan, “Ka nì, thu tak tak ka hrilh ang che. Hetia kan ram chhunga se hmingthang tham lo lut hian min tihmingţha tel tih chu tlâng hriat a ni a. Mahse, hei hian ka nu leh ka pa rilru tak tak a cho chhuakin ka hria a, ka pa fiamthu han sawi ta ila: Hmân tûk chu ka pa’n, ‘Thangbawihi leh Sihhuaia hi min khaikhin tehah an neih bawk a, tlangval hnahkhat zawlbuk pawnthuah khai zînga Sihhuaia kap thei a awm ngat chuan ka Saithang-Bawihpuii hi ka’n neihtir teh poh tur a,’ a ti a. Ka nu'n a lo khak a, “Hram mai mai teh suh, mi’n an hre reu reu ang, sawi loh loh a nih chu i sawi,” a lo ti a. Ka pa chuan, ‘Thangbawihinu, ka ti tak tak asin, kan pahniha kan sawi dun tawh ang khan hei fapa lah kan nei si lo a. Thangbawihi pasal chu zan khat mitchhin kan tawh thulhah pawh kan tlâng ţhuttu tur a ni mai lo thei dâwn lo a. Chuvangin, khual kaia pasal neihtir ai chuan mahni khua leh tui a tlangval fel Sihhuaia kap theitu ngat an awm te chuan chu ngei chu a nei tur alawm. Tûna a inlêng hlawmte pawh nei se lalnu nih bak engmah chan tur dang a awm chuang lo a. Mahni khawzâwla tualchhung tlangval a neih pawhin lalnu a ni tho dawn alâwm,’ a ti sam êt a,” tiin Saithangpuii chuan a nu le a pa thukhawchâng chu a sawi chhuak a.
Fehtea ní chuan, “A nih leh i pa sawi ang chuan Sihhuaia chu kan khaw tlangval tuemaw hian kap tak tak ta se, a se kah avang ngawt chuan i nei duh dawn rêng em ni ? Ka va’n ring lo êm!” a ti a. Saithangpuii chuan, “A kaptu a thu a ni ang chu, i vahpa te chuan kap se a buai theih viau mai tur asin,” tiin nui har har chung leh Fehtea ní mitmei en chungin a chhâng a. Fehtea ní chuan, “I ti tak tak maw? A kaptu chu tupawh lo ni se, i nu leh pa sawi anga kan khaw tlangval a nih avanga i he lova i neih hreh dawn lo a nih ngat chuan i rilru chu tu-khaw tluk loh a nih chu,” tiin a fak zui a. Ani chuan, “Ti tak tak ang chu, mahse, ka ni, ka thusawi chu khawiahmah sawi leh tawh suh ang che. Fiamthu pawh ni se a zahthlak, mi’n min hmu milo palh ang,” tiin Fehtea ni chu kamtam lo turin a chah mawlh mawlh a. An thing fawm ngah hnu chuan an inthawn a, hàwn zai an rêl dun ta a.
Saithangpuii thusawi chu Fehtea ní chuan kawngtluanin a ngaihtuah a. Sihhuaia kaptu nih avanga lal fanu chhuanvawr meuhin nei duh mai tura a insawi chu a ring ngam chiah lo a. Mahse, Saithangpuii thu hmawrbawk duh dànah, ‘I vahpa ngat chuan káp se,’ a tihna angah ngaiin leh, a nu leh pa lo ţawng fiamthu tawh ang chu remchanga hman a hnial lo a ni ang, tiin a zeldin zui ta zêl a. Fehtea ní rilruah chuan a khat ngang a ni ang a, a vahpa tân Saithangpuii lah chu a duhsakin a tawng chu a remchan laia ûmzui vat ţha-in a hria a. Lal fanu hnênah chuan, “A nih Thangpui, nichina i sawi kha han thual leh ta ila. Sihhuaia kaptu tih ngawt, i mi ngainat loh zawng tlangvalten kap ta se i iai lo zêl dawn tihna em ni,” tiin a rilrua a vahpa tinzawn ràn chungin a han zawt nawn leh ngat a. Saithangpuii chuan, “Chhungkaw lungrualna a nih leh nih loh a thu pawh a ni ve ang chu. Sangtuala te ang hi chuan kap mah se, kan neih chuan hmel loh. A nungchang phei chu ka hre chiang ve hauh lo nâ a, ka pa ngainat loh zâwng hi a ni fuh khawp a. Ka pa hi chuan ngainat zâwng riau hi a nei a, a ngainat loh zawngten an kap palh hlauh a nih loh chuan, ka chhungte lam aţang chuan harsatna awmin ka ring lem lo,” tiin a chhâng a.
Chawlh-hmun an thleng a, an phur pawh nghat chuang lovin thlifim dawngin an ding dun hlek a. Thlang lam ko chu a bungin khawthlang lam a lang thui hle a. Ţhal lai a nih avangin romei zamin tlâng lang tei pawh a bawh paw chúk a. Thlifim erawh chu a tamin ‘Lên tlânga bungbut’ an sawi ang maiin a thaw heuh heuh reng a. An chhîp kham, hnam biang chawia an din chawlh lai chuan Fehtea ni bawk chuan, “Kan tîtî pangngai bawk chu sawi leh ta ila. I pa rui lungpuam fiamthu mai mai a ni lo maw?” tiin hriat chian chak hmel takin a’n zawt leh a. Saithangpuii chuan hriat chian a duh hle ni-a a hriat avangin, “Fiamthu kawng lo ve, he thu-ah hi chuan ka pa sawi chhuah hmasak a ni nghe nghe a. In lêng ka neih reng rengin ka la duh rih lo tih a hriat vang nge, ka duh leh duh loh pawh mi zawt hawt lo hian a chhâng fithla zêl a. Mahse, he thil hi chu ka pa’n a sawi ve tlat,” a ti leh mai a.
Saithangpuii thusawi chu Fehtea ni chuan a vawng ta rauh rauh mai a. A vahpa chu hrilh a nghakhlel hle mai a. A thing phur thlen hnu chuan a tlâi tawh deuh hlek na-a, là a chhûm a, a buh tlak a chiar tawh leh tawh loh a en lai tak chuan a vahpa Fehtea chu a lo lut a. A ni chuan, “Mâma, i khawilo bo daih emaw ka ti a, i in awm ve reng a ni maw?” a ti a. Fehtea chuan, “Ka ban tei sa ka va la lawk e ka ti a, sairawkherh ka keng a, mu-arla thlâwk lai ka perh tla lehnghal,” a ti a. A ni chuan, “I perh thla mak ţhin e a, hmanah lah khan kâwlhawk thlâwk lai i perh thla tawh bawk a. Tûnah pawh hian kâwlngo thlâwk lai perh thlak mai theih awmin ka hre tlat a ni,” a han tifiam a. Fehtea chuan, “I eng sawina nge chu chu ka nî? Perh thlak theih a awm phawt chuan kâwlngo chang lo sete-hmairâng pawh ni se kan perh thla mai ta lawng,” ti a a’n chhâng chu a ni chuan a vahpa chu thu thawi man rang hian a hre khawp a, fing a ti rilru hle a.
Tichuan, Fehtea ni chuan chawhma lama Saithangpuii nêna an thing phurh dunna a an tîtî zawng zawng chu a hrilh fai ta vek a. Fehtea chuan, “A pa rui thu hla mai mai a ni lo ang mâw? Chaw tak khuka khukpui ngam chi tur em ni ang a,” a ti bai bai a. Mahse, a ni chuan, “A pa fiamthu mai zawng ni awkawng lo ve. Mahse, an hlen tak tak duh ang e, tih erawh chu hriat chian a ţul alawm. Ngâwi rawh, ka rawn zawt chiang leh ang a. Zanin hian la hlumpuiah mi sawm a, an inah ka hlumpui hman dawn loh avangin ka hlum ve tur lain an inah ka kal dawn a, chumi pah chuan ka’n zawt chiang leh reng reng ang e’” a ti sauh sauh a.
Thim thut thutah chuan Fehtea te ní-vah chu an leikapuiah an ding dun a. Thla de tir khawthlang kâwlkila kual reih chu an thlir a. An pahnih chauh chuan zawi tê tê hian an tîtî a. Fehtea chuan, “I rawn zawt chiang hman em?” tiin a zawt a. A ni chuan, “Hman e, eng dangin min chhâng lo, ‘Ka ni, damchhung thil leh hmingchhiatna thilah dawt ka sawi ngai lo,’ tiin min chhang a, ka ring tawk mai. Ka duh luat avanga ka ngaihbel emaw ni, i tâna zawt dilchhut angah min ngai tlatin ka hria. Tin, a hmuihmai lan dan aţangin vawiin-ah pawh kei ka nih avanga a pa thukhawchang chu min hrilh duh niin ka hre tlat bawk a,” a ti a. Fehtea chuan eng danga chhang ta lo chuan, "Mahni sa ai tur khân hre lawk pasalţha tumah an awm ngai reng hlei nem,” ti chauhin a ní chu a chhâng a.
Fehtea vek a chuan, “A nih leh engtia tih tur nge ni ta ngai ang?” tiin a ní chu a’n râwn a. A ní chuan, “E, kawng dang a awm thei tawh dâwn em ni? Kan khawtlanga in dinhmun chhiatzia lah i hai lo a. I tân ngat hi chuan khawtual nula tawnsabawpa neih theih tur mi duh dertu tawn a lungngaihthlak zo vek tawh a. Heti khawpa i hmingchhia chilh leh tur hi chuan Sihhuaia kaptu i nih chauhin i chilh leh thei ang. Tin, chumi avang chauh bawk chuan lal makpa pawh i ni thei dâwn tihna a nih chu. Chuvangin, Sihhuaia pêl tur chuan phawng vat ula a ni mai,” a ti a. Fehtea chuan, “Ka ni, Saithangpuii te lam chu thu dang ni se Sihhuaia pêl tur chuan kal ka lo tum rilru reng asin. Ka silai nei lo mawlh hi alawm maw le, ka pu’n kan silai lah chu a lo hawh bo khanglang si a,” a ti a.
A nî chuan, “Sailai zawng ramchhuak turin ken loh thu awm suh, in kal dâwn a nih chuan a rang lama in kal vat a ţhain ka hria. Mi tam tak i kalpui pawh a dik lo ang,” a ti a. Fehtea chuan, "Hawh ka nî, in chhungah ka pa te nen sawi tlâng ila, i lut the ang,” a ti a. Zanriah ei hun tawhah chuan an sawi tlâng leh ta rih a. A ní pasal nen an sawi dun hnuah ramchhuah chu an tum ta a. Kalpui tur dang an han dap a, anni putu ringawt chu a nih theih si loh avangin pahnih dang tute emaw sawm belh an tum a. Fehtea ni pasal chuan, “Kan tlêm leh tamin awmzia a nei hran lo a, a kaptu chu pakhat tho a ni ţhin e. Sapui thlah tura zeng lah kan ni lo a, kan ţhian ţha leh ngamtlakah mah chuan tlangval tawh lo ngei ni se, pakhatah chuan kan pu Khuangbawnga khi a ţha ang e,” a tih lai chuan Fehtea chuan, “Kan tlangau hi a chhangchhe deuh na-a, khawilo chhuah peih mi a ni a, ani khi rawngbawl atân kal bawk se,” a lo ti a. Tichuan, ramchhuak turin an inbuatsaih ru ta sauh sauh a.
Fehtea chuan a ramchhuah tum thu chu a pa a hril duh lo a. A silai hawl chhuah tur ber lah chu an lo hawh bo bawk si. Silai ţha deuh put chhuah ve tur a mamawh hle mai a. Sihhuaia meuh beih nân chuan silai ţha deuh a duh si, a mangang chuan a ní hnenah silai ţha deuh a duh thu sawiin lal silai hawh a dil ngam leh ngam loh a zawt a. A ní chuan, “Thangpuii hnenah ka lo sawi ve phawt ang e,” a ti a. Saithangpuii hnênah a sawi ta a, ani chuan, “Ka pa hnena sawi sawi a ngai chuang hlei nem, ka thu-in Tea chuan hawh lul rawh se. A remchan lai tak a ni nghe nghe kha. Tlêm lai khan Cheural lamah an kawl bo reng a, nimin khan an rawn dah leh chiah niin ka hria,” a lo ti sam êt a.
An kal dâwn zan chuan Fehtea ni pasal tum ruh lutuk chu a inngaihtuah thinrim ţeuh mai a. Hlawhchham palh a hlau si, a kal chák a helhhawlh bawk si nen. A thinrim inhrosa chuan, “Heti khawp hian in putêa hi an sawi hmingchhe thangtlawn tawh a. Khawtlang tâna khati zat a ţangkai tawhna lam reng reng hre duh lovin maw an han er rawn chu(h). Darzo zathum khawtlang tihmingţhatu a nih hre duh lovin, ‘a chuti e, êk e, de de,’ in han tih chu. Ngâwi tak rawh u, zângkhua a la bungbu ang,” tiin khumpui dawhchho a, a khupa puan suiha ţhuin a vaibel dâwn a seh rep rep a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 27th, 2019, 10:27 pm

BUNG 11 : Ka kah hma loh chu
Tukţhuan ei hma hretin Fehtea chu silai nen a lo hawng a. A farnute chuan, “Mâma, ramchhuah i tum e lo?” an lo tirual ţhawt a. Ani chuan, “Tum, buhfai kha zan sàwm riakin ha siam teh u,” a ti chhum hmak a. An thâwm chu tapkuna ţhu a pa mitdel chuan a lo hre ve a, “Kan ramchhuak dâwn e i tikhanglang e lo, Mâma?” a ti a. Ani chuan kun ang ngel ngawl chung hian zawi deuh sapin, “Tum,” ti chauhin a chhâng a. A pa chuan, “Silai ken ve te i tum e lo?” a han ti leh a. Fehtea chuan a pa pawh en chuang loh chuan, “Ramchhuak turin silai kan ken lo em ni i rin?” a ti chang leh khak a. Chutah a pa chuan le, “A…a Mâma le(h), ka va han zak tak em! Silai te em em i ken ve dawn tak, a kah dàn pawh i thiam em ni? I ní te silai ken i tum dâwn a nih phei chuan âw…., i kap thiam ngut pawhin ka ring lo e,” a tih lai chuan Fehtea chuan, “Chaw ei kha siam thuai teh u. Kan hmanhmawh nasa a nia,” a ti a. A farnute chuan chaw ei chu an siam sawk sawk a, mi dang kil ve hma chuan a bar nghal mial mial a.
A chaw ei lai chuan a pa chuan, “Khawi lamah nge ramchhuah i tum a, in Sihhuaia chu i beisei ve dâwn em ni?” tiin a zawt a. Fehtea chuan ku ang ngel ngawl chung hian zàwi sapin, “Kan duhna lam lamah,” a ti a. A pa chuan, “Ta deuh deuh chuan, ‘kan’ i tia law? Tute nen nge kal in tum ?” tiin a’n zawt leh a. Ani chuan, “Tupawh ka kalpui ang chu, ka kalpui turte in hriat ve kher a ngai lo,” tiin a pa lo ţawng khum dànah a lungawi tawh lo tih hriat takin a chhâng bul hmak a. A pa chuan, “Khanglang che hian âw, ‘ka chhâng ţha duh lova che,’ te chu i han ti a. Ramchhuak ve ta pawh ni la Sihhuaia te zawng beisei ve ngam chai tur i nih loh hi, mi nuih tiza tam mai maiin. Pasalţha hnung i zui ve dâwn a nih erawh chuan le, chempui humin eirawng lo bawlah duh leh thawk ve ta mai mai mah la. In rawn vannei ta khiah a nih a i sa hrang rawn hawn a chhuan hnih khat bai kan lo han ve teh cheng pawh thil lua. Silai te zawng, keng ve reng reng suh, i zuk tibo hlawm ang e. Tu silai nge i rawn hawl luh ve reng reng?” tiin a’n zawt nghal a.
Fehtea chuan, “Tu silai pawh,” a ti hlak a. A pa chuan, "Umh..mh…, ka thu awih lova i keng lui dâwn a nih leh, i kah dawnin kha…., a bengzeh kha pawt thla hmasa lovin kau te kha i tum ngawt pek ang e. A…, khai khai e….inhrilh chawp zawngin kan inkahtir pafa lo ang,” a tih lai chuan Fehtea chaw ei lai mittui chu a sur ta zung zung a. A kham nghal hmak a, a thil ah tur chu a la nghal a, ngâwi rengin a chhuak nghal ta nal nal a. A chhuak tur kawng khâr tura a rawn lehhawi chuan, “Ka kah hma loh chuan ka lo hâwng lo ang,” tih pahin na tawkin kawng a khar tau ţhak a. A kawng khâr rawn lehhawi mittui tla zawih zawih lai a farnuten an hmuh chuan, an khawngaih lutuk an pathum mit aţang pawh chuan mittui a dîr ve nghal zawih zawih a. A pan lam tur pawh an inchhungkhura sawi miah lovin a chhuak ta vang vang a. Mahse, an nî Ralvani sawi an lo hriat tawh avangin a tum chu an hai chuang lo.
Sihhuaia chu an ngaih ropui êm avang leh mi tin kah chak ţheuh a nih avangin, tupawhin káp se, kawtchhuahah a kaptu ngeiin a chham tur ‘Sihhuaia hlado’ an tih thlengin an phuah lâwk hial a. Chu Sihhuai hlado chu :
Khua chu e thiang vawng vawng aw,
Sihpui tlàn chalngenga ţuan nân e;
Kei chu e khua tin than nan,
Ram dai chhâwl hnawmah zal ing e.
Ram lang e phai kip tuamtu,
Lên-chawl palmawia fam chu e;
Kan than e tlangah chuan i,
Rairah mawitu fungki ţial e.
Kâwl khua e êng rii riai e,
Vala than khua a sei na e;
Rualin e sel lo u law,
Ka sakhing thang maw lêng hnenah.
Sakhming e thang he hu e,
Kei chuan khua-lian ka tlir e;
Kan rûn e lêng tin kai nân,
Laichhuat sumtual rak phiat u law.
Chu Sihhuaia kaptu apiangte inchham thawvenna hlado chu chham theitu nih tumin inti pasalţha tawh zawng zawng chu liam lo a hlei pawh an awm tawh lo. Chuti khawpa an ngaih ropui leh kah an chak huai huai ţheuh pêl tur chuan Fehtea te pawh an liam ve ta tih kawtchhuaha an hringhnawl silai kah ri aţang chuan tuman an hai lo. Chu sial, pasalţha zawng zawng lo tlawmtu Sihhuaia meuh chu Fehtea kher chuan kap lo hram se an ti rilru ţheuh a. Mahse, an rilru takah si chuan a kap mai ang tih an ring ru tlat lawi bawk si a ni. Dârzo zathum khaw mipui zînga duhsaktu thlem tê awm ve zingah an lal fanu Saithangpuii pawh a bâng bik lo. Mahse, Fehtea duhsaktu a nih chu tuman an hre chuang lo.
Sihhuaia pêl turin vawi tam ţum tam an lo inpu liam na-ngai, Fehtea te kal ve ang em ema mi tin sawi duh leh tlângthang an awm ve lo. Amaherawhchu, Fehtea an duhsak avanga sawi leh i phei zawng ni hmêlin a lang lo. An liam tûk chuan Darzo zathum khaw nulaho chuan buh an phur a. Khua a lumin an lum ti thlansa chu an puan fêmin an inzap hauh hah hlawm a. An zîngah chuan Fehtea farnute pathum pawh an tel ve a. Mahse, ţhiante zinga ţhut ve pawh nuam an tih loh avangin chawlh-hmun thlang deuh hlek rem laiah chan an inhrik-en a, zawi tê tê hian an phun sep sep a. Chutia an chawlh lai chuan thirdeng fanu nuthlâwi Kaptali chuan, “Tûkin chu ramchhuak tur an liam maw? Rawn hlawhtling tawh tak ang maw?” a han ti a.
Nu pakhat chuan, “Pasal kal ve tur pawh nei hlei lo che,” tiin a lo fiam zoh a. Nuthlâwi chuan, “Nanga pasal pawh a kal bik em ni? I pasal ramvachal loh loh nen, tuklo-bengngawng pawh la perh thla-in ka ring lo e,” ti a nui hua hua chung hian, “Duh thu han sâm ila, mi pasal ni lo ka pasal ngei mai kahn Sihhuaia rawn kap se la. A lu kha naupangin kan in lam panin pûm tia tia-in rawn zâwn hawhaw hulh hulh mai bawk se la. Chutah kan pa khan a kawr thi kai ang niang nuang kha, ‘Ka kawr hi han hmet lawk teh,’ han ti se, keia lah chuan nau hmathlakin nau-chaw hmuam chungin, ‘Ti khan awu ţah ih awh,’(Ti khan lo dah rih rawh) lo ti ila. Kan pa chuan sumhmunah theh thla hnawk mai se,” ti a nui uar uar chunga mai zangthal he hu hian a duhthusam chu a’n sawi a, an thlimpui khawp mai a, an nui tlawrh tlawrh a.
Chu nuthlâwi vek chuan a ţhiante hnênah chuan, “Khai, nangni zawng in uang ve lo êm mai. Duh thu han sam ve teh u,” a ti a. Nula phanchang lam tawh pakhat chuan, “Sihhuaia kha ka tih ngeia khan kap se la, Sihhuaia dul-vun a kap sen tel ngei kha kàwng-vawnah min siam bawk se la. Chumi ngei vawng chuan puan thulkhung tur tah dap dap ila. Ani khan min rawn rîm se la, ka puan thlunna sîrah ka themthleng vaina dal titih tawk chiahin mu lui tlat mai se la, ‘kiang deuh teh,’ ka tih pawhin kiang ţha duh vak lo se, a tawpah han thinrim der vêl ila, inchhaih nân themthuihnawihin han theh ţhat ţhat mai ila,” a han ti a, an nui leh ta awr awr hlawm a. Thîrdeng fanu nuthlâwi khan Fenteha farnute inhriken lai chu lung tê-a vawm kauh pah hian, “Nangni kha duh thu han sâm ve teh u,” a zuk ti a.
An tlum ber nula chuan, “Ka u, ka han sâm ve mai mai teh ang aw?” a ti a. A u chuan, “Ho mai mai, a zah pawh i zak lawm ni? Eng duh thu mah va sâm suh che, i pa mitdel nghâl i sâm lohin,” a ti bak hluk a. Mahse, Fehtea chhangtu chiah chuan, “Duh leh mawia duhthusam mai mai te chu mi pawhin an sam tho alawm, fiamthu na na na,” a lo ti a. Chutah Fehtea nau chuan a han sam ve ta a. “Ka pa mit ţhat lai la ni se la, sakhi pachal rawn kap se la, a ki-ah hnam thar han bang vah mai ila. Tui châwi turin dâr êm sinah ûm thar chingala sil en ţhat mai kha, sakhi-chal ki-a hnam thar bàn chuan tuikhur panin han phur eng ţhat ţhat mai ila,” a han ti ve a.
Nula pakhat chuan, “Hnam bànna sawi takah chuan, keini pawh hnam banna kan nei tak lo asin. Hmân laia ka pu emaw-niin a sakhi kah emaw ni, a awh zawk emaw ni pawh ka hre lo, lu ro deuh tawh ki-ah kan bâng ţhin a. A lo tla a uiin a pu bo daih mai a, bangah thingkâk ka pa'n a thiat a, chutah chuan kan bang ta mai mai a,” a han ti a. Nu pakhat chua, “Hnamin bàn bàn a mamawh hlei nem, keini pawh êm ruak awm awm chhungah kan vawm lut mai mai a, eng kan tih chuan pawh ka hre lo e,” a lo ti a. Tichuan, an buh phur chawl chuan kal zai an rêl leh ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2019, 6:48 pm

BUNG 12 : Lenchhawl pal mawia a fam ta
Ramchhuakho chu ni thum lai an thang ta a. Fehtea ní chuan an thang chin hriat nân zan tin hmawlhte ulh tliah hi an rapza kawrawngah pakhat zêlin a hawlh lut ţhin a. A zan nga zanah chuan an kawmthlangpa chu a lêng lut a. “In putea te ramchhuak riva hriat engmah in la nei lo maw?” a rawn ti duk duk a. Fehtea ní Ralvani chuan, “Nei uk suh ei, zan nga lai hei an thang ta a, tûn thleng thlenga thâwm la nei lo chu, kan ţawng zulin zui suh se la, eng an rawn ang bik dâwn lo emaw ni le,” a ti a. A ţhenawmpa chuan, “E…, zan tam an la thang nêm, heti ang vengtu nei tham a se lian leh fing beih nân chuan zan tam riak a thawh chhuah a ngai reng asin. A ni lo berah pawh zan sawm riak phâng lo thang tura an inhuam chu a ţul hrim hrim,” a ti bon boh a.
Fehtea ní chuan an tê ber tlâi khawhnua piang leh a tu hmêl hmuh hmasak, a fanu upa ber a fapa an hnêna awm hnenah chuan, “Tapchhakah mu teh suh u, chetna in dâl e, i pu pawh a lo lên hi thawnthu sawitir teh u,” a ti a. A tupa chu a tho vat a, putar hnênah chuan, “Ka pu, Sihhuaian kan sepui hi a tiat ang em?” a han ti a. Putar chuan, “Tiat teh lul é a, ‘a ki bêrah pawh bâk a lâwi thei’ an tia lawm,” a ti a. Naupang chuan, “A ki bera bâk lâwi thei chu eng tihna nge ka pu?” a ti he-haw a. Ani chuan, “A upain a chal tawh khawp a, a ki bul vawng chuar kârah bâk a tawm theih avanga se lenzia sawina alawm’” a ti a.
Fehtea ní tupa chuan, “A nih ka pu, a ki-a bâk a awm theih avangin a lian tihna a ni maw?” tiin dilchhût zawkin a zawt leh a. Putar chuan, “Ni e le, sechal lianpui upa deuh tawhah lo chuan bâk tawmna thamin a ki a chuar thei lo alâwm. A nih leh Mâma, Sihhuaia chu i pu’n rawn káp se nge i tih i putean?” tiin a han zawt a. Ani chuan, “Ka putea daih, ka pu chuan nupui a nei tawh si a, ka putean a kah chuan nula-in an ngaihzawn phah dâwn asin,” a’n ti chu an kawmthlang putar leh Fehtea ní chu an nui dun hawk hawk a. “I putea chu i duhsak hle mai maw?” a tih lâi chuan, “Ka pu chuan Sihhuaia hlado pawh a chham thiam ve awm si lo a, a rawn kah chuan ka inti-thu viau ang,” a ti lar lar a. Putar chuan, “Tlâng an rawn tlir vaih chuan tunge hlado chhamtu ngun deuhin lo ngaithla ang che u aw,” a ti a. Ani chuan, “Tlâng an rawn tlir veleh kawtchhuah lamah ka tlân nghal vang vang ang maw le,” ti sauh sauh a.
Putar chuan, “Sihhuai hlado chu i pu chuan a hre ve lo a maw?”tiin a han zawt a. Ani naupang chuan, “Hre ve na’ng âw, ka pu, nang i thiam em? Han chham chhin teh, maw han chham teh,” a ti sek a. Putar chuan, “Ka thiam ve dâwn emaw ni le, a nih khai aw….,” a ti a, tawi tê chu a han chham vang vang a. Chutia rei mawi tawk a ţhut hnu chuan putar chuan, “Khawnge a nih kawmchhaknu, ka kâwng te pawh a kham e. Vawiinah tuiûm ka la a, ka han riau mai, ka zu bawk zâl ve tawh ang e. In pa te ramchhuak chanchin in lo hriat hlauh takin tih thuah ka rawn chuangkai lawk asin maw le,” a ti a, a chhuak ta ţuih ţuih a.
Zan ruk an thangna a ni ta a, an la che fuh hlei thei lo a. Sa naràn mai a nih loh avangin sa dang pelha pelh chi ni hek lo, thiam thil tak tak a beih a ngâi a. A zan rukna a liam a, zan ruk zàn chuan Fehtea ní pasal chuan mang mak tak a mang a. A mumangah chuanFehtea te inah pawnduma khuh miruang hi an lo zâwn lut a. Fehtea pa lah chu a lo thinrim em em mai hian a lo hmu a. A tûkah chuan chu a mang chu sawi chák hle mah se, mang lama ‘sa-mang’ man chu tuan leh mang aţang tawha pi leh puten an lo sawi duh loh a ni a. An sawi chuan an mang a dik thei lo ni-a an ngaih kumkhua a nih avangin, ani pawh chuan sawi chák tak chungin a ngawi hram hram a. Chumi zan chiah bawk chuan in lamah Fehtea ní chuan an pa mumang ang chiah chu a lo mang ve a. A hnua an sawi leh dànin, ani zawngin mang ţha lo lutuka a ngaih thung avangin, sawi pawh a lo sawi ngam lo a. A vahpa chu rawn ràl palh dâwn ngei angin emaw, a nih loh leh sa kuta rawn vanduai haw riak tur anga ruatin, rilru ngaih-ngam lo ru takin chhun leh zan a lo chhiar thung a ni. Chuti ang taka a ţha lo lam zâwng hlira a zêldin avang chuan a mumang pawh chu tu hnênah mah a sawi duh lo. Fehtea ní pasal erawh chuan a mang chu ramchhuak tâna mang ţha, upa-in ‘sa-mang’ an tih ang chi a ni tih a hriat avangin a tha a tho ru hle thung a. Mahse, Sihhuaia riva reng reng chu hriat tur a awm lovin thei reh takin a reh vang vang mai a. Mahse, chuti chung pawh chuan bei tihdawn mai chu an tum chuang lo.
Zan sarih lâi an thang ta a, engmah tawng si lovin buhfai pawh an nei tam tawh lo hle a. Mahse, Fehtea chu Sihhuaia kah ngei tuma thawk chhuak a nih avangin, zan sarih a nih tawh leh buhfai an neih leh neih loh lam a ngaihtuah chuang lo. Sihhuaia thâwm riva chu engmah an la hre thei lovin a hnu thar fahran pawh hmuh tur a awm loh avàngin, Khuangbawnga phei chu a beidawng rilru hle tawh a. A ni riat ni pawh chuan mahni chàn hmunah ni dang ang bawkin an ţhu leh ţhap a. An ţhu fel kim hman zet chauh tihah Fehtea hma zawn ţum-khân tluang chu rawn zawhin fimkhur êm êm mai hian Sihhuaia chu a lo kal ta voh voh mai a. Fehtea chuan fimkhur em em leh thâwm dîm theihtawpin a lo en rân a. Fehtea hma chiahah chuan kawkpui(cha-kawk) lian deuh mai hrui bawh lum hi a ding a. Chumi hnuaiah chuan Sihhuaia chu a lo phei zêl a.
A fimkhur ngang mai a, pén khat a’n pèn a, hlauhawm a awm leh awm loh thlithlaiin kil tin a’n en kual leh rih tê tê a, chutah a’n pén leh a. Chuti reng reng chuan a kal bek bek zêl a. Fehtea chânna zawn a thlen hma lawk chuan ţhehhek rual a thum hak a. Chu sava thâwm avang chuan ngun leh zualin a beng a chhi a. Hlauhawm dang engmah awmin a hre lo a ni ang a, a thil thlir kual kal siam leh turin hma lam a’n hawi leh chiah chu, a hma zâwn taka ngâwi renga lo changtu ţhu Fehtea chuan a chaldàmah tak dar-ngêng mupuiin a thluak hnám chhuak ţhawt khawpin a’n kap lim zuai mai a. Thlang lamah a per thla luah a, mahse, a tla leh chu thi sa paih ang hnawk a ni mai a. Hniak khat pawh phawi leh tawh lovin a àwn nghal ruah ruah a.
A silai ri leh se àwn thawm hria a ní pasal leh Khuangbawnga chu an rawn tlân nghâl chilh a. A ní pasal chuan Fehtea chu a’n ko a, “I chàn hmunah elo i la awm? Lo kal rawh, hlauhtlâk a awm tawh lo,” a ti a. Fehtea chuan lawm luatah, “A chiang meuh ang maw?” a ti a. Ani chuan, “A rawl aţang khan chalchâng râwl a nih kha,” a ti a. An pathum chuan a tlúk hmun chu an pawh a, a mitmu pawh a che eih tawh lo tih a hriat veleh Sihhuaia chalchâng chu tlawh ang ren rawnin Fehtea chuan:
“Kawl khua e eng rii riai e,
Vala than khua a sei na e;
Rualin e sel lo u law,
Ka sakhing thang maw leng hnenah.”
tiin Sihhuaia hlado chu mittui tla zawih zawih chung hian a han chham a. A ní pasal silai thun tling thun lai chu a’n kap dur mai a. A han inchham thawveng zui lehnghal a:
“Sakhming e thang he hu e,
Kei chuan khua-lian ka tlir e;
Kan run e leng tin kai nan,
Laichhuat sumtual rak phiat u law.”
tia a hlado a chham leh hnu chuan, sial alaia sial lian ber Sihhuaia chan darh tur chuan an ri nghal ta bawrh bawrh a.
***---***

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 30th, 2019, 7:44 pm

BUNG 13 : Mâma, min ngaidam rawh
Buh tuh hun hma kangvar âwllen lâi a ni a. Chumi ni chuan zîng lama khua a hniam deuh avangin ni dang aiin in awm an tam a. Chawhnu lamah erawh chuan khawdur a rawn kiang leh tawhin Dârzo zathum chhuah-chhawng khua chu niin a chhun tleu deuh raih tawh a. Mahse, khua a la tlâi loh avangin nula ina tlangval lêng pawh tumah an la ţîn rih lo. Chûng an nula rimna-a an tîtî reng reng chu Sihhuaia chanchin mawlh chu an tîtî tui ber a ni. Ramchhuaka thang mek Fehtea mawlh chu a rawn vannei ang tih an hlau rilru ţheuh a. Fehtea huphurh rilru tak chung si, sawi lo thei si lo chuan an sawi leh ţhin. Khua chu zawi zawiin a lo tlâi hret hret a, tlangval lêngte pawh an ţhu nghet vak tawh lo. Chutih hun lâi tak chuan anni ramchhuak pali te chu ngâwi rengin kawtchhuahah chuan an innghat ţak ţak a.
Vawi leh khatah hlado chham ri chu an hre ta thut mai a. Chu hlado anga Dârzo zathum khawtlâng nghawr nghing zo leh thin ţhawng hlado cham ri tuman an la hre ngai lo. Hlado chham lo ri phat chuan tlangval zawng zawng rilru chu vawi leh khatah a tichi-ai nghal vek a. Châk lo tak chung chuan hlado chhamtu chu tu râwl nge tih hriat tumin thin phu dep depin an ngaithla reh duk mai a. Nula in tin aţang chuan phingphihlîp chhuak vanglai kawngka ang mai hian nula hmâi leh tlangval hmâi chu a inkhachhuan tup hlawm a. Zathum khaw naupang zawng zawng lah chu kawtchhuah lam panin an chim ruih ruih mai bawk a. Chu hlado chham ri, a engamah hmaa Dârzo tlangval zawng zawng tichi-aitu chu an han ngaih chian a, Sihhuaia hlado ngêi a ni tih an han hriat chian tak hnuah phei chuan, a chhamtu chu tunge a nih la hre chiah lo mah se, mawnga hawlh hawlh ang mai hian làwm avang ni chiah si lovin tlangvalho chu an za sek hlawm a.
Mahse, a kaptu tunge a nih hriat chianna a la awm hman loh avang erawh chuan an rilru kil khat ngaih chu a la ngam deuh na-in, inzawt ta se tu dang a nih ring chu tumah an awm chuang lo ang. Nu leh pa zawng zawng lah chuan luhka sângparah chuangin an thlir fuk mai bawk a. Sihhuaia hlado chham ri hriaa helhhawlh taka lo bengverhtute zîngah zingah chuan Fehtea farnute pawh an bâng bik lovin an awm hle hle thei lo. An tê ber chuan, “Ka u, pâwn aţangin ka va thlîr teh ang aw?” a ti a. A chhân hmain a pa tapkuna ţhu chuan, “Thlîr lo ang, i tizahthlak, nangni nuţapa ve khan a rawn káp awm phiangsen si lo a. Mahse le, chutia an rawn vanneih zawngin chhuan dang chhuang lovin vawi hnih khat zawng satuihâng kan hawp dâwn a le, pasalţha an hlawhtlin avanga khati lâia lo va inlar chhuah ve kher, a tiha tih ngeih loh. In nuţapa chu a lo thlen tika in pawnfen chuang in lo fentir nghal loh,” a ti a, a ţeu hlur mai a.
Fehtea ní Ralvani tupa mipa naupang fel tawh tak chu hlado chham thâwm a hriat veleh a putea te ngei a nih hriain kawtchhuah lamah tuma khalh rual lovin a tlân nghâl vang vang a. Hlado chhamtu râwl a hriat veleh ani phei chuan, “Ka pi, ka putea aw chiah a ni,” a ti nghàl mai nghe nghe a. Hlado chhamtu râwl ngaiin a’n chham leh aţang chuan tudang ni lovin Fehtea ngei a nih chu mimir chuan an hre ta ţheuh a. Chutia Fehtea tupa tlân ta vang vang chuan a putea kah ngei a ni tih a hriat chian veleh salu zâwn ve zâi pawh rel lovin a tlan kir leh nghal vang vang a. Kawng laka miten, “Tu kah nge?” ti-a an lo zawh chhan lehna, “Ka putea,” ti-a a chhàng ri chu Fehtea te tlum ber chuan a lo ràl hriat a. A u te hnênah chuan, “Mâma kah a ni àwm e,” a’n ti dék dék a, a pa bawk chuan, “Teivet a che u, khawiah nanga u Mâma kah te chu va ni lek suh. Khatah a dah pawh va dâk ve suh,” a lo ti vín leh hlur a.
A putea kah a nih avànga a chhûngte hrilh thuai thuai châka an tupa chak tak a lo tlân letin an kawmthlang kawngpui a lo thlen chuan Fehtea farnu, Fehtea chhangtu chiah chuan, “Mâma, tu kan nge?” tiin a lo zawt ve var a. Ani chuan aw zângkhai vah hian, “Ka putea,” a ti a. Mahse, duh luatah a la rin ngam chiah loh avang chuan, “Tu i putea mâw?” tiin a’n zawt nawn leh ngat a. Ani chuan, “I van hre thei lo, ka pu Fehtea, i nau maw le,” tiin ama tâwka vín ve tak hian chiang takin a hrilh a. Chu âw chu tapkuna Fehtea pa lo ţhu chuan a hriat veleh a mittui a tla nghal zawih zawih a. Fehtea farnute pawh chu lungchhe lo a hlei awm lovin tungchaw leh tlângban vuanin an ţap a, pakhat lah khum-ai zêm nghengin a ţap tlawk tlawk bawk a. An upa ber chuan chhuak êm êm hian, “Âw, Mâma, i kal dâwn tûk takngial pawh khan ţawngkam ţhaa thlah liam pawh i hlawh si lo. Heti a ni dâwn tih te chu hre lawk ila mittui nen êm chuan kan inţhen lo tur. Ka nu, ka nu, lo tho leh teh, Mâma,n tumpângchal a rawn káp asin. Ka pa zukchal kah mah i lawm tehlul nen ka nu...,” tiin tah hla a’n chham vâwn vâwn mai a. A pa lah insum thei tawh bik hek suh. Awrawl chhuah meuh hian, “Mâma, Hrângkungal, ka va lo rin khum che êm! Khua ka hmuh tawh loh avangin engmah ka lo hre phak ve tawh lo a ni, min ngaidam ang che aw,” a’n ti vawng vawng mai chu a hre phak hnukulh lo pawh an awm lo.
Khawlai dungah selu zawntu naupangho chu haw-haw chungin an inpang-aw-zial thla mup mup mai a, kal pawh kal chak thei lovin zâwiin Fehteate in an panpui a. Ramchhuakho phur chu an chhâwk tawh avangin silai chauh pu-in pawr ang pheng phawngin naupang salu zâwn haw-haw mup mup hnungah chuan an kal hnak hnak a. In lamah chuan a farnute chu in chhung singsa leh senghawiin an buai phili hle mai bawk. In an thlenpui hma aţangin salu lawm tur chu in chhung leh kawt zâwlah an khat vek a. Pitar putar leh chhangchhe nau chaw hmuam mek lah awm bawk, naupang leh ui ţhui lo vir buai teivet bawk si nên. Ramchhuak hâwng leh salu zawntute chu Fehtea te kawmthlang kawngpuia phei zêlin an kawt-hmai zâwn thlang hret tlêma zâwl deuhah chuan an ding a. Chulai tak chu tûn hma deuha zak kun tlawk-tlawk khawpa Sangtuala fuihpawrh tlangvalhovin Fehtea an lo liah hrep tawhna hmun a nih hre rengin, Fehtea chuan a lo thlîrtu nula leh tlangval leh naupang pungkhawm chu hmachhawnin Sihhuaia hlado a han chham ta vang vang mai a.
“Sakhming e thang he hu e,
Kei chuan khua-lian ka tlir e;
Kan run e leng tin kai nan,
Laichhuat sumtual rak phiat u law.”
tiin. Fehtea an sawisak dàn hre ru tlâng karin ramchhuakho chuan a rualin silai an han lawnin khua chu an thawm ta dut dut mai a ni. Chumi hnuah zawng Fehtea te in lam an pan ta rih a. Leikapuia selu an bial luih luih lai chuan Fehtea pa chu an rawn kai chhuak a, “Khaw nge, kawng kha min lo kian teh u, naute u, khaw hmu lo ka nih hi,” a tih lai chuan a lungchhe ta thut a, awrawl tawp hian, “Mâma, Hrângkung, i pa hi i lakah ka zakin ka va han inchhir tak êm! Mahse, chunga Pathianin bawkkhupin min lo la thlîr tih ka hria. Chawnmang (Fehtea nu thi tawh- Chawnmangi) kan fapa neih chhunin tumpângchal a rawn hàwn asin. Lo tho leh la, a lawmin vawi khat chauh lam i han thai dun teh ang, Chawnmang. Ka va han ngai tak che êm!” ti-a a ţah hla chham chuan salu lawmtute mittui pawh a titla zung zung hlawm a.
Fehtea pa chu a mittui sûr zung zung chung leh kut khur hlawk hlawka phar chhuakin, “Khawi maw, selu chu a tak ngei ka’n chúl ve teh ang,” a ti a, a’n chûl ruai ruai a. Selu vuan chung chuan, “Hrângkung, ka fapa, kan pi leh pu chenah ram lamah thang kan lo chhuah tawhin ţhian-sabeng te hnênah sa hran beng tam kan lo pe ve tawh a. Mahse, heti ang em ema ropui hi zawngin kan in hi a la lâwi ngai lo asin. Mâma, i nu ka va han ngai tehlul ngâi ve lê,” a tih lai chuan a ding chhuak sai hlawk hlawk a. Ţap râwl ţeuh chung bawk chuan, “Khawi le, silai chu min rawn pe ve teh u le, a vawia vawi khat na nâ nâ chu tlâng ka’n tlir ve-in khua ka’n thawm ve teh reng reng ang,” a ti a, silai thun sa chu an pe a. “Kha aw, lo kiang teh u aw, khaw hmu lo ka nih hi, silai kaw zâwnah te khan in lo awm palh ang e,” tiin fimkhur takin silai kawm zakzeh titiha tin chungin Sihhuaia hlado bawk chu aw tial ruai hian a’n chham ve ta vang vang a.
“Kâwl khua e eng rii riai e,
Vala than khua a sei na e;
Rualin e sel lo u law,
Ka sakhing thang maw leng hnenah.”
tiin, silai a’n káp dur mai a. Chumi hnuah zawng, “A tawk e, heti ang tawng leh tûra Khua-in min ngaihhnathiam avangin vannei ka inti-in malsawmna ka dawng hi ka lawm tak meuh mai. Tûnah zawng thi tawh mah ila pawi ka ti ta lo, thlamuang leh lungawi takin ka thi tawh ang. Mâma hi ka mittui tithlatu tur ringawtah ka lo ruat nghet tawh a. Mahse, Khawzîng Pathianin a chhiat a lo phal hauh lo tih ka hriatpui ta. Lurh leh Ţana lo thovin a hual tawh ang,” a ti a, in chhung lamah an kài lût leh ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)