TUMPANGCHAL NGE SAITHANGPUII BY James Dokhuma (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

TUMPANGCHAL NGE SAITHANGPUII BY James Dokhuma (Completed)

Unread post by Ngaia » March 16th, 2019, 7:36 pm

tump.jpg
tump.jpg (16.45 KiB) Viewed 15115 times
TUMPANGCHAL NGE SAITHANGPUII BY James Dokhuma
Re-Type : April Para


BUNG 1 :
‘Kiang rawh, ka chhâwnin a hém ang che’



Zanriah ei kham chuan Dârzo khaw tlangvalho chu zan dang ang bawkin an zawlbukah an chhuak leh a. An zinga Thingsai tlangval buan chak Tlungirha leh Aithangvunga pawh zawlbuk-a riah tumin an chhuak ve a. An val-upate an rawn lan ve hma chuan Darzo tlangvalho chuan chúng Thingsai tlangval buan chak pahnihte chu buanpuiah an lo cho fiam a. Mahse, anni pahnih chuan chhun lama ţhâl ruah sur ruahpui-vanawnin a chhut hrep avanga chau deuha an inhriat dun avangin an pha deuh a. Chutih lai tak chuan Darzo buan chak inti ve, an val-upa Sangtuala chu a lo lut a. Sangtuala chuan mi thu haw lam leh kal lam pawh ngaihtuah lo chuan thaw vak vak hmel hian, “Kan ţhiante chu i infiam ang u aw, infiam na ná ná chu dàn alawm le, puan kha pe teh u,” a tih pah chuan amah pawh chu a inveng sek nghal ta mai a. Chuti hrima cho ta chu Thingsai tlangvalte pawh chu pha nawi muangchang lovin an inveng ve ta nghal a.
Sangtuala han invai vel kianga lo ding Darzo tlangval ‘Fehtea’ an tih mai hnenah chuan Sangtuala chuan, “Kha kiang rawh, ka chhâwnin hém ang che,” tih pahin hmai uang sa zet maiin Thingsai tlangval buan chak lo deuh zâwka an sawi Aithangvunga nen chuan zawlbuk chhuatpuitaha tah chhuat záwl zaupui maiah chuan an inkeuh ţhak ţhak mai a. A tawpah zawng khawtual tlangval nge nge chu a chak ta zawk a. Sangtuala chuan hmêl uang fé hian, “I chak hle mai, i lo kal leh hunah zawng Fehtea te ang pawhin an lo buan ve ngam tawh ang che,” tiin meinei takin Fehtea zawk chu a ţawngkhum a.
Chutia ţul lova hmusit tak lehnghala a hming a han lam ri kher leh hnuaichhiah lutuk a, ’Kiang rawh, ka chhâwnin a hém ang che,’ a ti kher chu Fehtea chuan a ngai thiam lo hle mai a. Mahse, Fehtea chu lal khua leh tuia mi langsar lo tak fapa a nih a hnu-hmanah Sangtuala lah chu lal upa min Lianhmunga fapa an val-upa a lo ni si a. Chutia dengkhawng taka Sangtuala'n a ţawngkhum lai chuan Fehtea chuan lungawi lo tak hian Sangtuala chu a melh ka ka a.
Sangtuala'n Thingsai buan chak Aithangvunga a hneh ta chuan a tha a titho a. A la buan loh, chak lo zawk tùra a ruat Tlungirha chu thatho-awm lo taka lo tho chhuakin, “Kei zawng inbuan ka thiam ve lo, ka hneh bik lo tawp ang che,” ti nang nang chung chuan a insiam a. Mahse, a rilru takah chuan dimdawi hauh lova Sangtuala chu sawisak a tum ru ran thung a. Val-upa si chutia tlangval naupang zâwk te laka a hram dan phur phur chu a ngaih theih záwng a ni bau lo mai a. Tichuan, Tlungirha insiam zo chuan zàwi raihin Sangtuala chu a pawm ve ta chat a. A hràwm dan aţang leh a vei lama a nak-nema a do dan aţang chuan Sangtuala pawh chuan thapui tak tak chhuah nghal a ţul dawn a hre nghal mai a. Ţan an han la a, mahse sangtuala chu ţang hman eih lovin zawlbuk bang deng dawt dawt khawpin a duh leh a bin a, a duh leh a ban phawi vawk vawk ta mai a.
Chutah zet zawng Darzo tlangval an phûr ta. An val-upa pakhat chuan, “Fehte, nang han buan fiam ve teh reng reng, i hneh bik ang zawng ka ti lo. Mahse, infiam na na na, kan upa-a thlavang hauh nan buan ve teh,” tih pahin puan ven tur chuan a han vawm zem nghal nak a. Chuti na na na chu tiin Fehtea chu a tho ve ta ţham ţham a. Ban chat hian Tlungirha chu a han pawm a. Tlungirha pawh chuan Fehtea’n a han pawm chu ţan a ngai dawn tih a hre ve nghal mai a. Zathum khaw zawlbuk chhuatpuitah chungah chuan Darzo tlangval za-nufa rual zet leh pa-ho chuan thingnawi tuah meipui engah chuan an bial luih mai a. Tlungirha chakzia leh thiamzia hretu leh Fehtea chak dan leh thiam dan hre ve ve tan chuan, ‘ka khaw rin leh ka khaw rin’ tih ang mai, a chak zawk tur hriat hleih theih loh khawpa inter tawk tura an ngaihte pahnih an ni.
Zawlbuk chhuat zawlah chuan a thawh khatna aţanga tha tawp chhuah nghalin ţan an la nghal ve ve a. Fehtea chuan Tlungirha hneh hrim hrim a chák vang ni lovin, Tlungirha a hneh chuan Sangtuala a chak lo tihna a nih dâwn avangin theihtawp chhuah a tum rêng a. Chu avang chuan Thingsai buan chak buan pawh chu a hreh loh phah a ni. Tlangval dangte lah chuan hmuh chian theih loh hlauvin zawlbuk thingnawi têl chu an meipui chhehah chuan an vawm lut zut reng mai bawk a. Chutah ţan an han la a, an inpawm an vir zawk a, Fehtea chuan zawlbuk bahzâr chhuatah a’n bin chhuak vawrh kai khu luih mai a. Tlungirha chu tlàwm a ngai ngang a ni ang, a tho vat a, a’n bei lehnghal chat a. Chuta ţan an han la dun zet chu an ţang ta. Fehtea pawh chuan a chakna neih zawng zawng sawm khawma a thiamna hmangin zawlbuk awngpakâ deng rawk khawpa a han bin hlawm leh zet zawng Tlungirha tlâwm ta chuan nui sâng chung hian, “Dârzo tlangval chak lo zawk mahin min chin hrep si chuan mi dang zawng buan ngam tur chi ka ni ta lo e, min ngaidam teh u khai, ţhiante u,” tiin ngaihdam a dil a. Thingsai buan chak hmingthang, a tlângtluana hming chher khawpa buan chaka an sawi Tlungirha meuh Fehtea’n a han hneh chu Darzo zathum khaw tlangval chu an hlimin an thawm a na ngei mai. Mahse, chutih lai pawh chuan Sangtuala thung chu khawiah nge a lo bik-bo hman hriat a ni lo. Mahnilomaha buan chak a intih ve tehlul nen, a hneh loh Fehtea ber kherin a hneh ta si chu a zak a ni ang, chutia hlima an au dur dur lai fahran pawha a hmel a lan loh dànah.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 17th, 2019, 7:17 pm

BUNG 2 : Sa a tla e
Tlangval lêng haw chuan zawlbuk meipui lum hnung puaka ai pa-ho to fual tîtî chu ngaithlain mei lum chu an kil luai mai a. An sadâwtpa chuan, “Kan sa chuan khawi lam tluang chu zawh ta tak maw âw…? Niminpiah te kha chuan lal leipui lu-ah a kut hrukna a thar hle mai a. Lungleng khual lo kalte khan Hnahchang lui kamah a hnu thar an hmuin kan ram ngei rawn pan ni-a an hriat danah châng dang kân chu a la tum lo a ni cháwk ang a,” a han ti a. Tlangval leng haw pakhat chuan, “A kal hla lo tawp ang, kan ram chhungah ngei a la awm chiang. Vawiin pawh ka pate’n Phunhnawma khaw kawngah a thâwm an hria,” a lo ti a.
Chutia upa-ho tîtî an ngaithla chu lêng haw an ni tawh bawk a, tlangval ţhenkhat mut chhuak zualte chuan mut hmun an rem ta hlawm a. Fehtea pawh a feh hah avang leh a tuka láwm lova feh tur a nih bawk si avang chuan a mu ve ta a. Chutia an ram chhunga sapui rawn thla lut ta chu inrin reng ţulin a hre ta a. Sa tla ralkhel awm thut thei reng ni-a a hriat avang chuan englai pawhin thin thiin a mu ngai lo tih tur a ni. A mut hmunah pawh puan a veng reng a. Chhit mai theih turin zawlbuk thingnawi dahna bang kil biru laiah meichher chhit khat a rawlh ru zân reng bawk a. Chumi zàn pawh chuan a inring hle a. Mut hmunah chuan ţhiante tîtî ngaithla chunga beng chhiin, thâwm engemaw hlek a hriat chuan inbeng kâng meuha ngaithlain a muhil lo a ni ang e, tih mai turin a inring reng a. Mahse, an sapui kawl chu rin aiin a reh rei a.
Vawkhniahzawn thla a ni a, chumi zan chuan ruah phingphisiau a surin khua a chêng cherh cherh a. Fûrpui tak tak a nih avangin dai vêl pawh an dâi dar lovin khaw kar kawng chenin a hnim hle tawh a. Chutih hun lai chu a kumkhaw thilah sapui hnaih lai a niin dai vela a inlar duh hun a ni reng a. Chumi zàn pawh chuan khawvar a hnai lam tawhin zan dang ang bawkin Bahzàr veng lam aţang bawka âr khuang chu rawn inţanin lal mual lam âr rawn kai tho zêlin arpa-chhiarkhuan khuang tur thla inkhawng ri chu chhiar tinah a ri thluk thluk hlawm a. Chu khuan hmasa âr khuang hnukhawi lam an la khuan thliai thliai lai chuan Pemvenga arpa pahnih chauh chu an lo inkhuan chhâwk chhen thung a. Chu âr khuang chu zawlbuka a mut hmunah Fehtea chuan mu meng ngáwi reng chungin a lo ngaithla kiau a. Chutih lai tak chuan zawlbuk châr lam kawr kam veng fema hmeithai inhnuaia a vawk chu sa chuan a rawn la ta mai a. Vawk chu a ngek ţhawt a, a neitunu chu a ţe chùl a. Chu veleh Fehtea chu a zuang tho a, “Sa a tla é,” tichungin a zuang chhuak a. Sa tlákna lam zawlbuk chár lam kawr kam hmeithainu in lam chu a pan nghal a.
Sakei chuan a vawk lak chu a lo tihlum hman a. Mahse, mipui an punkhawm ran êm avangin an au thla hman a. Fehtean a hmun a zuk thlena a sa pawh thui fé a ûm hnu chuan zawlbuka riak tlangvalho pawhin hmeithainu in chu an zuk thleng thla ve hlawm a. Chutia meichher ênga mipui pung khawm an rik luai luai lai chuan a thlang leipui fîng zet tura hla aţang chuan Fehtea chuan, “Heta pawh hi vawk pakhat chu a tlu reng mai,” a rawn ti lauh lauh chu an han ràl hriat a. Chu sa chuan an hriat lohin vawk dang pakhat pawh a lo keuh hman tawh reng chu niin. An upa pakhat chuan, “Hetiang sa hi chu sa chimawm tak a ni cháwk mai. Ei duh mang si lova ran kalpah zut chi hi zawng sa zahngai lo tak a nih ţhin avangin mihring pawh a zah lovin fimkhur a ţul a nia,” a ti a.
Pawhchhiat a hnai tawh hle a. Zan khat chu ruahpui a sur tluk tluk zankhua mai a. Chumi zan chuan nula rîm fahran pawha vah chhuah hleih theih loh khawpin khua a cheng a. Fehtea pawh chuan len chhuahna mi ni-a a hriat loh avangin zawlbuka upa ţhenkhat chûang lut hram hramte tîtî chu ngaihthlak zawk tumin ţhut hmun a rem a. An tîtî chu ngun takin alo ngaithla kiau a. Upa-ho chuan an tlangval lai chanchin te sawiin an khupa puan suiha vaibel petin an upatpui dangte nen chuan an hun hmasa lama an nula rimte chu la indem fiam chung zelin tîtî dang dangah an pakai chho zêl a.
Pakhat chuan, “Kan thudang alai chuan, kan lal nula mawlh mai hi a ni, chil tiputtu ber mai chu ni,” a ti a. Upa pakhat chuan, “A ni e tiraw, kan tar tawh si, kan mit a la tar ve si lo. Taka na, tlém lai khan, tuma hmuh a inring lo chek a niang chu, an kawmchara an châr-up chhunga a inbual lai an kawmchhak tlanga naupang sava khawi chaw tur khau ka veh ţumin ka phawk teh reng a. An char-up chhak lam bang tlabal tawh áwng aţangin a malpui ka zuk hmuvar ţhiang rual mai chu(h), ka pum nghin lawih mai zu nia,” a han ti chu an nui dar dar a.
Pakhat pawh chuan, “A hmêl tak phei khi chu chuti lua-in ţha ka ti em em pawh a ni lo. A hleitling si, a itawm tawk chauhin a thau mum maih mai a. A mawngbawr phéng ţhatzia leh a nauchaw-bawm len ţhatzia mawlh khi, duh tawka phungtlak sawh hlawih hlawihah ka it tak tak a ni,” tiin a han khahchilh leh a. Pakhat chuan, “A ni ngawt mai, tu fapa emaw zawng a la nihlawh dawn a nih khi. Lal fanu mal a ni bawk si, nei ila zawng tumah ka awt lo ang le,” a ti a. Tichuan, nula fel leh ţha ni-a an hriat dangte chu an sawi kai zel a.
Ngûnchungnunga chuan, “Kei chu Suakmura farnu saw asin ka ít ber zawk chu. In en chiang ve tawh thovin ka ring a. Kan lal nula Saithangpuii ang deuh bawka tlawntlâi ţha leh hmaifang pian dik a nih chu thu dang. Ka mitah ngat chuan lal an nihna lam chu thu dang ni se, Suakmura farnu saw chu a pumruaah na na na chuan fate nu atân ka iai loh zawng tak a ni,” a ti a. An thirdengpa chuan, “A…! chil tiput mai maiin, sawisawi teh suh u. Suakmura farnu pawh a ţhat chu a ţha alawm. Mahse, an pi an pu aţanga tlema sawiser kai an lo nih tawhna hian a hre chiangte min thinhriktir ţhin a. Anni ka tihna ni lovin, mi an tun hma nun leh an chhungkaw veiken thil emaw, hribil leh piansual pharcharna kawng an neih ruk te, kutkem nei leh vân ni sal khawpa nun uchuak lo nei ţhin tawh thlah ngat hi chu a dik a dik chuan an iaiawm alawm. An khualchhawng ţhain an ruangam pawhin zir mah se, chhui ruk dâwl lo chhungkua aţanga zi chhuak hi chu ka iai ru tlat ţhin,” a’n ti a.
Ngúnţiali-pa an tih chuan aw ki ring fé hian, “Saithangpuii a ţha ber mai. A hmelţha si, a mawng a zângin hna a zâi bawk si nen. A kut a themthiamin zaidam leh fin a kawp bawk si. Ani ang nula hi an tam lo ngawtin ka ring. Khawi lai lal fapa tlâng chang turin emaw a la rawn chaw chhuak ang chu,” a ti a. Chung an tîtî aţang chuan tîtî dangah pakai chho zelin an thlawhhma chanchin te leh a kum leha an ram tuk leh tur te chu an sawi a. Chung an tîtî chu kil khata lo ţhu ngawi reng Fehtea chuan a lo ngaithla kar a. Zan a rei deuh dâwn tak avang leh ruah a han lai a nih avangin zawlbuka paho leng pawh chu an ţîn ta hlawm a.
Chumi zàn zanlai pelh hlek tawh àwm hun velah chuan tlangaupa chu zawlbukah a lo lang hlawl mai a. Tlangval mutui lai chu kai tho-in, “Hei le nâu te u, kan lalpa'n khaw ţhenawma tirh duhna che u a nei thut mai a. Ka khuate tlangval tlawmngaiin min kalsak se ka duh mang e,’ a ti a. Kal thei tur tu emaw in awm chuan in kal hmain lal inah eng nge a tirh duhna che u ngaichangin in lo kal dâwn nia,” tiin zawlbuk riak tlangval chu tu tibik chuang lovin an tlawmngaihna a ngên a. Khua chu a thimin ruahpui lah a buakin a baw tlawrh tlawrh reng mai bawk si a. An tlangau thâwm hria tlangval tlawmngai lo ţhenkhat chu a hma pawha hnâr ri hlei lo, muhil nghet niàwm fahranin an hnâr der tlur tlur hlawm a. Tlangau thâwm pawh chu lo hre duh bar tumah an awm lo. Fehtea erawh chu tlangaupan zawlbuk sawngkâ a rah rik rualin a mut hmun aţang chuan a ţhu chhuak nghal a. Tlangaupa'n a sawi zawh hma hmain lal in lam panin a kal nghal a. Lal inah chuan lalpa, lalnu, an fanu Saithangpuii leh an upa min ber Hratliana chu an lo awm a. An lalpan Fehtea a hmuh veleh chuan, “Fehte, nangmah chauh em ni lo kal?” tiin a lo záwt var a. Fehtea chuan, “Ka hre lo, midang pawh an lo kal ang chu mâw... Kei chu tlangau-in a rawn sawi veleh tudang mah zài lem lovin ka rawn âr kawh chhuah ringawt a. Eng nge pawi hai awm ta ka pu? Kal nghal a ţul a nih chuan mahni pawhin ka kal mai ta lo’ng, kalpui neih kher a ngai em ni?” a ti a.
Lalpa chuan tlangval dang lo kal ve an awm nge awm lo ngaihchàn rih a duh rilruk avang chuan, “Ti khan lo ţhu rih phawt mai teh,” a ti a. Fehtea chu tap-ai zêm nghengin a ţhu ngawi ta ran a. Nakin lawkah chuan tlangau chu amah chauhin a lo lut a. Lalpa chuan, “Tlangval dang tumah lo kal an awm na nge?” tiin a lo zawt a. Tlangau chuan, “Awm rih lo ka pu, tlangval pakhat chuan, ‘Fehtea a kal tawh chuan a táwk alawm. Heti ang zan khaw-thim lutuk hnuaiah te zawng a tirha intirh ngeih loh,’ a ti a. Chutia a tih lai chuan tlangval pahnih chu lo kal tumin an insiam mek a. Mahse, ani vek chuan, ‘Kal duh suh u, tûn ang zan-khawtairekah eng pawi hai mah a nei lo ang, a intihlal vang mai mai a ni,” a ti-a, a khap avangin an lo kal ta lo a ni,” a ti a.
Lal chuan, “A nih tute nge lo kal ve tum chu?” tiin a zawt a. Tlangau chuan, “Thanuka leh Dohleia,” tiin a chhâng a. Lalpa chuan, "A nih leh tunge kal phal lotu chu?” tiin a zawt leh a. Tlangau chuan, “Zan thim hnuai ngang a ni a, a râwl aţang chuan Sangtuala râwl niin ka hria, bahzâr lama mu a ni a. Ka hre chiang chiah thei lo a ni,” a ti a. Fehtea chuan tlangau lo kir leh hnu chuan, “Ka pu, khawi lam nge kalna tur chu? Kal hmanhmawh a ţul lo em ni?” tiin a han zawt leh a. Lalpa chuan, “Ngunlinga khua Bualpuiah kal a ţul thut mai a. Eng dang vang maha ţul a ni lo a. Keima bengvar loh leh nikhua loh vang chauh a ni a. I hriat angin nikuma kan tang ţam avang khan vehbûr khawn nan ka silai leh darkhuang kha zakham nâna hmangin Bualpui lal hnenah kan hnutchhiah ta kha a ni a. Kan intiam danin kumin vawkhniahzawn thla a ral hmaa kan tlan leh theih chuan lak kir leh mai tur a ni a. Pathian zârah hei tlan leh thei dinhmunah kan ding mai ni lovin, silai dang leh darkhuang ţha tak a hnua ka neih leh tak hian min mangnghilhtir a. Nichina ka pawn chhuakin vawkhniahzawn thla a ral ţep tih ka hre chhuak a. Tichuan, a zan a zana chumi kan zakhamna chu la chhuaka tlan rum rum ka duh ta a, chu tlan sum chu kenga Ngunlinga Bualpui pan nghal vang vang tur ka mamawh ta tut tut alawm mawle,” a ti a.
Chutah Fehtea chuan, “A nih leh ka pu, ka kal dâwn a nih chuan tlan sum chu min pe la, ka kal ta’ng e,” tih pah chuan a tho a. Lalpa chuan, “Ka lawm ngawt mai Fehte, kawiahmah kal ţulna ka nei tak tak lo. Ngunlinga hnena ka zakhamna dah kha chu kan la chhuak leh daih tawh e. Ka khuaah hian tlangval zawlbuk lâwi, pawnthuah khai ngat za-nufa aia tam in awm a. Tlangval tlawmngai leh huaisen tak tak pawh in ni hlawm tih ka hria. Kei leh ka upate pawh hian tlangval huaisen nopui dawm tur chuang hre hrang lo khawin in fakawm a. Mahse, chung ka khaw-daingulte rau rau zingah pawh chuan arpui mei anga inchen ţhem theih zawng a ni lo a nih hi. Chûng mi chhunawm zingah chuan tunge filawr a, lal leh a khua leh tui tân tunge inpe huai ngam ber tih ka hriat duh avang chauhin ţul lo-ah ka rawn ko buai mai mai che a ni. Tunah zawng kei leh ka khuate tana ding ngam chu tunge ni ka hre ta. Fehte, tunah zawng tunge i nih ka hre chiang ta che a. Ka mit hmuhah ngei i inlantir ta a, a thlamuanthlak e. Hei ang tur hi a ni reng asin.
Kan huaisenna hi ţhenrualte chungtlak nan ni lovin, lal leh a ram tan, khawtlâng leh kan tu leh fate tan kan huai tur a ni reng a ni. Tlangval tam tak hi zawng mahni khaw záwlah an uipui huai a. An huaisenna chuan tuikhur ràl kai lovin ţhenrual lakah an lo phái hnah hriam ve ringawt ţhin hi khawtlang tinuam lotu an tling reng a ni. A lawmawm e, Sangbawih, zufâng tuitling kha fenthlir khatin rawn thlitsak la, in se la, zu mu leh rawh se,” a ti a. Fehtea chuan in loh a tum eltiang pawhin lalpa chuan in loh chu phal hek lo. Tichuan, lal fanu Saithangpuii chuan fenthlir lian her hawr tak mai khat teh meuhin zufang tuitling chu a thlitsak a. A in zawhah zawlbuk lam a pan leh ta a.
Fehtea chhuah hnu chuan Darzo lalpa chuan, “Kan khuaah hian lal leh tui tâna inpe zo tlangvlal pakhat chauh a ni maw lo awm ni ngai le, a va zahthlak ngaiin a va thlamuanthlak loh ngai teh reng êm! Chunga Pathianin zahngaiin bawkkhupin min thlír a, ti tê hian do la lovin kan awm hlauh pawh a. Chuti phei chu ni lo se, chekah chekah Darzo khua chu kan ţiau lo chauh a lo nih hi le,” tiin a khuate laka a vui thu leh a sit thu chu a sawi a. Lal upa Hratliana chuan, “A ningawt mai, keini i upate thiam loh tak pawh a ni mahna. Tlangval rilru fuih ţha záwng leh an thathona tur záwngin kan finchhuah loh vang che pawh a ni mahna. A dik takin kan valupa neih ve kan pu fapa Sangtuala te ang te pawh hi, i upa Lianhmunga fapa ngei ngei a ni a. Tlangval chuanawm deuh tur leh amah khum tur deuh apiang ítsík zel mai, mi sei hlei pawh thlak tum ta reng reng upa fapa a pumpa, a hmel pawh hi ka hmu peih nek tawh lo a nia,” a ti nghoh nghoh a.
Lalpa chuan, “A ni ngawt mai, a khat a khata hetia mi chipchhuah záwng hlira ţhiante laka hlei a len fo mai hi zawng a la mualpho anga ti nia. Han tivak dâwn ila kan upa fapa te an ni ang lawi si a. Mahse hetia mi tluang tai ta reng reng chi hi zawng an hmuingil ngai hauh lo. Tunah chuan kan hre chiang tawh alawm. Darzo khuaah hian ka laka inpe zo tlangval pakhat chauh an awm tih ka hre ta a. Ţawng khawlo ni suh se, mikawlh sakawlh tawn tur kan nei mai êm lo ang a. Ti tê-a buh-bal mira kum tin buh hâwp khawp thara pang dam têa kan awm theih hi chuan i lâwm tawk mai teh ang,” a ti a.
A upa chuan, “Kei zawng ka lawm law, khaw ţhenawm phei chuan min hria se pawnfen min fentir tak asin an nâp ang, a zahin ka zak tlawk tlawk mai. An hram chang a tamin a ralmuang leiah chauh hian an pau an tikhauh a, a hûk hmunah leh a do lak hun a lo thlena khup leh zul zul tur tih hriat sa reng hlawm si. An val-upa fakawm deuh zâwka an ngaiha lah hi aw... mang ti-angin. Amah avangin hmai kan khâp zingin dawvan kan kai mawh hek lo. Kan khaw tlangvalho zet chu lung an tizîngin khua an tivar lo ngei mai. Heti em em hian an duai ang tih ngaihna reng reng ka hre phak lo. Fehtea phei chu awm lo se tlangval awm lo khua ang hrim kan ni dâwn a nih hi,” tiin inchham thinrimin a vaibel dâwn seh chung chuan a pak sek sek a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 18th, 2019, 8:57 pm

BUNG 3 : Kar chu a per ta
Pawhchhiat lai a ni a, losûl pawh an haw hma hle tawh a. Fehtea te chhung erawh chu an ţul kum tak a nih avangin mi lo zawh ruala zawh hman loh hlauin luletin an ţang thung a. Láwm pawh nei ngam lovin leh mi haw rual pawha hâwng ve hman lovin ni tla vanvuai tak meuhin an bung ngar ngar ni tin mai a. Ni khat chu khua an hai deuh bawk nen an haw tlâi lehzual hle mai a. An losûl chu an unauza chauhin an kal a. Chutih lai chuan sa a hnaih deuh avangin Fehtea chuan a farnute chu kalsan duh lovin silai a pu a, hnu a dal a. Sadâwt chul an thlen chuan khawchhe kâra ni tla tur kâwl chu a sen phut a. Chutih lai chuan kawng chhaka ri bak hi a han hria a. Fehtea chuan ngun taka beng chhiin a ngaithla ru ran a. A farnute erawh chu an tîtî tui êm avangin eng ri mah hre tur an ni lo.
A khát tawkin kawng chhakah chuan a ri leh bak ţhin a. Fehtea chuan chu thawm chu eng thawm nge a nih a hai hauh lo na a, a farnute erawh chuan an hriat ve loh avangin a hrilh duh kher hlei lo a. Hrilh a hnehin an hre ve palh ang tih a hlau zawk a. A hlauh ang ngeiin a chhang chiah nula chuan, “Chu! Ka u, kawng chhaka ri leh bak ţhin chu eng nge ni ngai?” tiin pháwk takin a zawt leh ta nghal. Mahse Fehtea chuan, “Chepa a nih chu,” a ti mai a. Mahse Fehtea chuan chepa tlân thawm a nih lohzia a hre chiang khawp mai. Nakinah chuan tlâng an chhuak ta a, ni dang tea an chawlh ziah ţhinna ni mah se, chumi ni chuan an tlai tawh êm avangin tawi khawtlai lovin zunram an thiar zawk a, Fehtea chuan fanghma pakhat a vel a. An din hlek hnua kal an siam dawn lai tak chuan ràl lehlam titih, lal leipui hlui kawr te ruama se âwn rawng rawng chu an hria a. Mahse an tân eng han tih theih ni hek lo; hmanhmawh takin an kal leh ta sauh sauh a.
In an thlen chuan zanriah ei reh lai tak a ni a. Se âwn thawm an hriatna lai hmun chu an thirdeng se tlat ţhinna lai a nih avangin Fehtea chuan bengvar chhuahin thirdeng kawmchhaka an kal lai chuan a rana rana lo, se âwm thâwm an hriat thu chu hrilhin a’n lut kawi zawk a. Chumi zan chuan sial chu tual laiah an bawk khup mai a. Thirdengpa chuan a sial chu a kim leh kim loh a en dan dan a, a se patuai khuang kan rual zan danga hâwng ziah ţhin, chumi zana a haw ve ta lo chuan a ngaih a ti ţha lo hle mai.
An losûl hawngin an thil hriat, sapui hnaih thu chu hrilh turin Fehtea zanriah ei kham chu lal inah a kal a. Lal ina a awm lai chuan lal vanlung ura awm ţhin lal bawi, in mual vawm hranga tu mawng hial beng ve tawh Rohrima nupui Rivungi nat thu an rawn hrilh a. Rohrima nupui chu chumi ní pawh chuan anhnah la-in leipuiah a kal nghe nghe a. A khua a sik hâwng, in a thleng chu a biak hleih theih loh zui ta mai a ni àwm e. Nikhaw hre mumal lo-a a awm takah chuan an pute chhung chu an rawn ko ta hi a lo ni a.
Chutia manganga an rawn koh tak hialah si chuan lal fanu Saithangpuii chu kal tumin a insiam ta nghal a. Fehtea hnenah chuan, “Fehte, lên duhna dang i neih loh chuan kal ve ta che. Heti ang damlo na deuh bawisawm hi ka zei lo riau mai a, men lai chhung chuan min menpui ve ang chu maw le,” tiin a sawm a. Fehtea chuan hnial phal lo rilru tak chungin Saithangpuii insiam chu a nghak ve ta a. An damlo chu rinai daihin a lo na mai a, Fehtea leh Saithangpuii tan pawh mutsan leh mai chi awzawng a nih loh avangin an meng ve ta erh a. Khawvar dawn hnaih ‘thing chang var’ lai chuan a irhfiak ta ak ak a, a chatthla chu a ni ta mai a.
Leilung a lang ri riai tihah chuan Fehtea leh tleirawl pakhat chu Muallianpui lama laina hrilh a zualkoin an kal dâwn a. An kal hma chuan an chhungte hnena zualko tura an kal thu lo hrilh turin Fehtea chuan Saithangpuii chu a chah a. Tichuan, Fehtea pahnih chu Muallianpui panin varţianah an kal ta vang vang a. Chumi ni chuan mitthi avangin feh theih pawh a ni ta lo a. Mitthi awm ni chu thirdeng te chhung chuan an sial zawnna remchangah hmangin Fehtea hrilh ang ngeiin an ring thar kawng tlangchuah ep chiah lal leipui hlui kawr te ruamah chuan thirdeng setê chu sakeiin a lo seh ngei a. Mahse, ei mumal lovin a tluk hmunah a lo kalsan leh mai a. Chu avang chuan sakei chuan a sa seh chu a rawn lam leh ngei ringin a ruang pawh hlawm rih lovin kar an chhuan hnan ta a.
Chumi zan chuan Fehtea pawh khawhar inah a leng a. A rin loh takin Saithangpuii nen khumpui lu tungchaw innghen ţawm titihin an ţhu dun a. Saithangpuii chu lal fanu mal, hnamchawm leh mi chhe cho phak rual loh a an neih a ni a. Darzo khaw nula ţha ber mah ni se, lal nula ta chu tlangval kawm leh rîm a hlawh loh avangin nula awm pawhin a awm vak lo a. Mahse, chuti chung chuan tlangval chang lo pachang thleng pawhin an khaw nula zînga ţha an tih berhip(hahip)-a an sawi chu a ni tho. Tu tlangval lakah mah sawi ser a kai lo a. Ngaihbel tur pawhin tuman a mitmei hmu pawh an la awm hek lo. Chumi zana Fehtea nena tungchaw nghenga an ţhu dun chu a tlangval ţhut hnaih pui ber a la ni hial àwm e.
Chutia khawhar ina Fehtea leh Saithangpuii an ţhut dun lai chuan an val-upa Sangtuala chu a lo lut ve a. Dàr insi riala Saithangpuii leh Fehtea ţhu dun a hmuh chuan a thinrim chu tui luma leih ang pup hi niin a inhria a. Tlangval azawnga a huphurh ber leh elrel ber kher Fehtean nula azawnga a awh ber Saithangpuii ber kher hnaih taka a ţhutpui chuan Sangtuala ngêng a chhun ta riau mai a. Rei pawh awm duh lovin thinrim puak keh lek lekin a chhuah tauhsan ta nghawng nghawng a. Sangtuala chhuak tur hmêl dur hlauhawm tak chu Saithangpuii chuan chiang deuh maiin a hmu a. Mahse, Sangtuala chuan Saithangpuiin a hmu a ni tih reng a hre lo. Sangtuala pawh chuan Fehtea a huatna leh Saithangpuii a ngaihzawn ruk thu tuma hnenah a sawi chhuak lo. Ngawi rengin Fehtea chu tihchhiat a tum ngar ngar a. Fehtea chu a huphurh tial tial a, a ítsík telh telh bawk a. Mahse, a lang a pau chuan Fehtea lakah ţhat a chuah sauh sauh thung a.
Zan leng haw hnu hret chuan tlangau a rawn au a, “Khaih, khaih, kha…ih, zaninah kar a per pawhin khawvar hma loh chuan tumah kal loh tur,” tiin veng tawp aţang chuan a rawn au lauh lauh a. Mahse, zawlbuka riakho tlangval chu kar a per veleha tlân nghal thei turin an inring ru vek a. Tuma tlân khalh loh nih tumin puan hnuaiah puan an veng ru sa vek tho mai. Fehtea pawh zan tina a dan angin chumi zan pawh chuan kar a per veleha tlan nghal vat thei turin a inring ve ran a. An val-upa Sangtuala phei chu tlân hmasa ber nih loh hlauin zawlbukah pawh riak duh lovin veng fém lamah lo inhmakhua lawkin hmeithainu Hringkungi inah a riak sawn hial a. Mahse, chumi zan kher khera Fehtea leh Saithangpuii ţhu dun a hmuh chu engto-in a muhil thei ta awzáwng lo mai a. Zanlai ar khuanah pawh a mut hmunah a la tal a la tal ta mai a. Khawvar hnaih lamah erawh zawng a muhil ta a.
Chumi zan bawk chuan Fehtea thung chu kar per ri hriat loh hlauin rei fé thlengin a meng a. Mahse, riva engmah a awm tak lawk loh avang chuan a muthilhsan ve ta a. A mumangah chuan Darzo zathum khaw tlangval zawng zawng mai chuan tlângphal se chaih tak hian an lo chaih chiam mai a. A han hawi vel pawhin tumah lainattu reng a lo hmu lo a. Chutia mangang leh dichim taka an chaih lai chuan an lal fanu Saithangpuii chu fenthlira zufâng tuitling chawia a lam pana lo kal hian a lo hmu a. Mahse, tuman tulh reng reng an lo phal si lo. Mahse, a tawp a tawpah chuan a lo tulh thei ta hram a. Chumi hnu chuan Fehtea chuan amah chaihtute chu phin darh vek tumin a lo bei ve ta a. Chuta ţan a la inleng vel chu a inleng harh ta a. A ţhangharhin a mumang a’n ngaihtuah chuan mak a ti em em mai a. An khawtlangah harsatna lian hmachhawn tur la nei ngei dâwn niin a inhre ta a. Chu a mumang chu mak a tih êm avangin a mutchhuak zawng zawng pawhin a kiansan zo a. Muhil leh mai thei ta reng reng lovin a mu meng ta reng a. Chutia muhil leh thei lova a men reng lai chuan kar chu a per ta a.
Silai ri a hriat veleh Fehtea chu zawhte sazu hmu ang maiin thawm nei miah lovin a tho vat a. A silai inchhawp chu a chuh that a, a liam nghal ta vang vang a. A hnungah chuan a ţhianpa kawmngeih ber Thatkima chuan a ûm a. Khaw páwn an thlen chuan an ţhian dunin thâwm riva ngaithlain an han ding dun vang vang a. Ralkhat hla taka chingpirinu hram dut dut mai lo chu thawm dang engmah an hriat loh avangin tlangval dangten an rawn nan hman hlauin an kar rawlhna hmun lam chu panin an tlân leh ta a. A hmun an thlen chuan kar chu a lo per na meuh mai a. A kâp fuh ngei tih hriat tak hian sakei thi chu a baw nuai a. Duh anga khua a la en si loh avangin a tihngaihna dang vak an hre dun lo hle a. Sapui hliam awmna àwm lah chu khawthim hnuaiah hriat rual a ni bawk si lo. Riva dang engmah hriat tur awm lovin chingpirinu hram bak chu thâwm dang chu a reh hian a reh vung vung mai a. An han nghak hlek a, leilung a lang ţan ta a. Fimkhur takin sapui hliam hnu chu an chhui ţan ta a. Chutih lai chuan an ţhian dangte thâwm pawh an hre ta a.
An ţhianten sa hnu chu an rawn hmuh ve loh nan anni pahnih chuan an chawk reh zel a. Sakei chu ngawpui tâtkáwng bul zawlah a hliampui tuar chu a bawk tih hriat tak hian a thi baw nuaiin hnahthel ro a lo bawh bek hul a. An ţhian dunin meizúk siamin an vaibel an han sepa mawng-pawn sauh sauh, meitalhin an la kai a. Ngawpui aţang chuan ţulno-ah an chhui chhuak a. Kum thum ţul lek a la nih avangin a pik hle mai a. Suakbuka lo hlui a hruihzawlah chuan a lo bawk leh a. An inhnaih tawh hle mai a, a bawhna pawh a lo la lum vung vung danah an ţhawn tlân tih a hriat reng mai a. Chuta ţang chuan a hnu chu a rulchuk ta a, anni pahnih pawh chuan fikhur theihtawpin an chhui dun ta bawk a.
Thui pawh an la chhui hman lo, naurual leipui fîng chen vel pawh a la tling lo ang e : Changél hung phen titih aţangin sakei chuan anni ţhian dun chu a rawn zuan ta thut mai a. Mahse, anni pawh inring pen pawn reng ngang an nih avangin sír lamah an per dun lawp a. Anni pahnih ţan siam bawk sakei lahin ţan la bawk. Fehtea chuan a rawn zuan leh hmain kah a han tum a, mahse, a ţhianpa chuan a hliah deuh hlek avangin a kah hmain a ţhianpa Thatkima chuan a’n kap a, mahse, a silai a tlawlh ta si. Chu veleh sakei chuan Thatkima chu a rawn zuan a. Chhoh zuan ngang a nih avangin a zung sang thei vak lo a, a rem lai Thatkima malpuiah a hmuam titih a. Ani lah sakhi thangngul rual àwm vel thing vuanin ţan a khawh bawk. Chutia an inpawt lai tak mai chu Fehtea chuan a awlan phuar thum ngul sei reih rawih, musau chherchuan thun puitlinga hmun leh hmuna kah tumin a dinna aţang chuan a leng thla lawp a, sakei zakdawhah tak mai chuan a hnawhna lut hung khawpin a han sai lêng dawrh mai a. Sakei chu a zuang zawk a, thâwm chu a reh nghal ta vang vang a.
Anni ţhian dun chu a rang a rangin muang lei deuh laiah an insaseng thuai a. Fehtea chuan a silai a’n thun leh sawk sawk a, fimkhur takin a chhui leh ta a. An thlang kawr te kam nghalênglutar kung nghengin lei-hruisen buk hnuaiah chuan che thei tawh lo hmêl tak hian a lo mu meng kuau mai a. Fehtea chuan a han sai leh dawt a, mahse, che tur a awm tawh chuang lo. A silai thawm hria tlangval ţhenkhat chu an lam panin an lo tlân a. Silai ri an hriat aţang chuan tu dang ni lovin Fehtea bawk a nih tlangval zawng zawng pawhin an ring nghal vek a. A hnuhnung berah Sangtuala thawh hai chu a lo tlân ve ţuang ţuang a. A rawn thlen ve hnuah chuan a neitupa ang hrimin ro a rawn rêl nghal zut zut a. In lamah zualko intirin mipui pawh an rawn pung khawm tam zêl a. Sakei chu a pumin an zawn hâwng a, lal in tualah mipuiin an en lui lui a. Chumi ni chuan an lal upa Hratliana chuan a ai ta nghal a.
Chu thilah pawh chuan Fehtea chu tuman an chelh lo tih chu Sangtuala pawhin a hai lo. Mahse, a kâ aţangin vawi te khat mah Fehtea fakna ri a phuh chhuak duh reng reng chuang lo. Fehtea chu a chet ţhat zawh poh leh Sangtuala thinrim chu a zual ting mai a ni. Tichuan, remchang ang anga tihhminghliaua, a tlângtla lo thei ang bera siam tum ru ran chungin a finna verther tak chuan chàwl lovin a châng ran reng mai a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 19th, 2019, 9:21 pm

BUNG 4 : Thang khatna a per ta
Mihring nih phungah hian mi fel leh mi bák sâwn apiangin elreltu an ngah ţhin a. Chu chu he sualna khawvel kalphung hi a nih avangin Fehtea pawh chuan elreltu leh ítsíktu a ngah hle a. Chûng amah elreltu leh a huaiham leh a hmahruaitu ber chu Sangtuala a ni. Sangtuala te chu Darzo zathum khuaa khawsa thei ber pawl an niin a pa pawh lal upa a ni a. An upa min ber Hratliana nupui chu Sangtuala ní, a pa farnu a ni nghe nghe a. Mahse, upa Hratliana chuan Sangtuala mizia leh Fehtea mizia chu a hriat chian dun êm avang chuan Sangtuala chu an pu fapa ngei mah ni se, a ţan chuang hauh lo a, Fehtea lah a en dàn a dang chuang hek lo. Sangtuala chuan nupui a nei tawh mai ni lovin, vawi hnih vawi thum a nei tawhin fa pawh pali a nei tawh a. Mahse, a nupuite chu an ngam thei mawlh lo a niang, a ţhen leh ţhin.
Mahse, anmahni khaw khat pa nuamsa leh mual-kil mi ţha ngang an nih avangin an zahawmin an challang a, nupui pawh a hmu thei phian rêng a. Mahse, hmeichhe ngamna tur zâwnga enkawl ta lo chu sum an chhuah leh ţhin. Amah phei chu val-upa fing tak leh awmkhauh tak a ni a. Mahse, a chapo êm êm a, aia mi chhe zawk hmusit chi leh ţawng bawl bawl, vaupùng na tak, ţawngkam thiam thla zuah si, mahse mahni infak zut zut chi hi a ni. An chhungkaw khawsak theih avang chuan val-upa thusa ber pâwl a ni lo thei lo a. Tin, a fing hle rêng a; a fin dàn a herh deuh pawh a.
Chutih lai chuan Darzo khaw tlangval pakhat Sangtuala er ber Fehtea chu tlangval vâng lai a ni ve a. Tûn hma chuan lal mi ţha leh mual-kil an ni ve ţhinin Darzo khaw tuiliak rêng pawh an ni lo. Rotlâng lal khua leh tuiah lal upa chan changin an awm ţhin a. Mi huaisen leh pasalţha chhungkua, mikawlh sakawlh hmaa tlân ngai lo. Fehtea pu phei chu ram lama thangchhuahna tura sa serh a kah zat ngawt pawh vawi hnih vawi thum thangchhuah theihna tura tam sa serh káptu a ni hial a. Chuti khawpa Rotlang lal khua leh tuia mi challang chu ni mah se, Fehtea pu a thi a, Fehtea pain nupui a neiha fa pali a neih hnu, Fehtea chhang hmeichhia thla kaw mi lek a nih laiin a nu chuan a thihsan leh ta nghal a. Upa-in, 'Sal khat khatin vanduaina hi a lo kal lo,' an tih angin Fehtea pa mitdelin a zui leh ta mai bawk si nen. Tichuan, lal khua leh tuiah zawi zawiin an chan a hniam tial tial a. Tûn hma tea mi ţha lêna an lo lên vena ţhin Rotlang hmun ngei pawh chu nuam an ti ta lo a. Fehtea ní pasal neihna Darzo lamah an pêm ta a ni.
Dârzo khuaah pawh chuan an ní te bak chu laina dang tumah an nei chuang lovin vanlaia tla an sawi ang mai an ni a. Amaherawhchu, Fehtea te unau chu an felin a u (farnu) te pahnih pawh nula an la niin Darzo khaw nula inlêng chuangkai hmu pawl tak pawh an ni. Tin, chutih lai chuan Fehtea nau pawh a nula ve êr êr tawh a. Fehtea chu mi ţawng tam lo tak, hmel fel ren rawn, en aia belh chiana lian zâwk a ni. A hming tak phei chu a pu pasalţhat chawia an sak 'Hrângkunga' a ni a. Amah pahmei fapa mal ngang a nih avangin, a tet tê aţangin a pa chuan a khawilo nihna apiangah a hruai ţhin a. Thlawhhma kawng zawh tham a nih hma aţangin lo lam hna pawi-pang engkimah pa hnung zuia kat kat ve ţhin a nih avangin, a feh ve tirh phei chuan a la tê khawp a, chuvang chuan, miten 'Fehte, Fehte' an ti ţhin a. Chu an koh fiamna chu a pu hlen ta a, mi tinin 'Fehtea' an ti ta ţheuh hlawm a. A hming tak 'Hrangkunga' a nih pawh hriat loh khawpin an ti Fehtea zo ta a ni.
Chutih laia a ram pumin an ngaihsan ber chu mi tlawmngai leh pasalţhate an ni a. Chûng thilah chuan Fehtea chu tu cho phak mah a ni lo. Sangtuala pawh chuan a chunga lêngah a dah hrim hrim a. Mahse, Fehtea te chu lal khua leh tuiah mi langsar an nih loh avang leh, Sangtualate chu lal mi ţha, mual-kil an nih thung si avang chuan, challanna leh val-upa a nihna chu Fehtea tihleihnawnna tura tlangvalho thuhneh nân hman a tum ru ran mai a. Fehtea chu tlâng hriatin mi tlawmngai leh huaisen ni mah se, Sangtuala thung chuan a lang lo lam aţanga Fehtea phurh chhiat tumin a lo bei ve ngar ngar thung a. Tichuan, Darzo zathum khaw tlangval thei ve ve te chuan tum inang lo tak chu tumin hma an la dun dâwn ta a ni.
Chutiah lai chuan Fehtea chu 'Lianchia vâng lai' an sawi ang mai a ni a. Darzo nula zawng zawng tih theihin an ngaizawng ta ţheuh emaw tih turin a to a. Lên ngaihna hre lo khawpin an inthík kual ţhum vek mai a. Chu tak chu Sangtuala chuan remchanga hman a tum ru ran thung a. Chuti khawpa tlangval to leh thei tichhe tur chuan Sangtuala chuan a finna kherek leh verther tak chu hmangin, Fehtea tihchhiatpui turin tlangval dangte chu a vehthlem vêl ta a. A val-upa ţhian dangte chu a mal tê tê a hminin tlangval naupang zâwkte pawh val-upa ţangrual chuan an thunun hret hret a. An thunun theih loh tlangvalte pawh a hmin theih nân, a pawng a taka Fehtea chu sawichhe nghal mai lova fak chung rengin zawi zawin a chhimbudawi a. Tichuan, nula lakah tihleihnawn an han tum ta phawt a. Lênna hre lo khawpa Darzo zathum khaw nula zawng zawng chu Fehtea laka tihnawrh an tum ta phawt a.
Darzo nula zawng zawng thunun thei tur chuan Darzo tlangval zawng zawng chu thunun hmasak theih a ţul tih Sangtuala chuan a hmu kiau mai a. Tlangval berin ui êk pu pawh tluk lova an sawi duh ţheuh ngat chuan, nula tuman, 'Ka ûi, ka âr' an ti duh dâwn lo tih ani val-upa lungfing thlâwi thum tawh chuan hai hek lo. Tichuan, Fehtea thlimin, a awm-bo hlan chuhin zawlbuk lêng paho ţin hnuah Sangtuala chuan tlangvalho chu heti hian a fuih ta a. "Naute u, hei Fehtea hi Darzo khaw tihmingţhatu leh chawimawitu tak pawh a ni a. Kan nulate ngaihsan a hlawh viau pawh hi a lawmawm a. Amaherawhchu, Fehtea hi ngaih aiin mi hriam hre tak a ni a. Kan khaw nulate hi nupuiah a nei vek dâwn lo tih chu hriat sa a ni a . Mihring leilung dànin hmeichhe pakhat a tarpui ve mai dâwn a. Amah a fel na e tih vànga hetia kan âr ngam thlah a kan se zâwl chhuah mai mai chuan kan nulate a khawih chingpen nasa lutuk thei dâwn a.
A thu hrimin keini pawh nupui chhia ţha la nei tur ţheuh kan ni a. Hetia kan nulate a khuaikem tam lutuk hi chuan, a tua-te emaw chu keini zînga mi hian kan la nei leh lo thei dâwn si lo a. Chutih hunah chuan Fehtea hian kan hnung lamah min nuih ru ver ver dâwn tihna a ni a. Hmeichhe pakhat chu duh leh lo kimkitpui ve ta pawh ni se a hriatthiam theih. Mi fa duh lai ngawih ngawih hetia a kalpah zel zul mai zawngin kan nulate thiam loh a ni tawh lo a, keimahni, Darzo tlangvalte thiam loh hi a ni daih zâwk tawh tih i hrethiam ang u. Kan khaw hmingchhiatna vêngtu tur leh humhimna chu kan kuta awm a nih si chuan, engti-zawng pawha Darzo khaw tlak chhiatna tur vêng tura a mawhphurtu chu kan ni a. Kan khawtlang tâna pawi khawihtu chu khaw chhunga mi an ni emaw, khaw ţhenawm an ni emaw, Darzo tuiliak an nih phawt chuan chaw khawn aţanga kan lal te thleng hian an himna tlangvalte mawhphurhna hi a ni si a. Chuvangin, hetia Fehtean a nawm a mâka kan nulate a kalpah fo mai hi kan vên a hun ta. Chutia ka sawi chu kan nulaten lo hria se, anni hmeichhe mâwl zawk chuan a hmakhua kan thlirpui tih pawh an la hrethiam kher rih dâwn lo a. Chuvangin, zanina Fehtea awmmawh avanga kan nulate rél ta ang dâwn dâwn a kan ţawng te pawh chu tuman kan nulate kan hrilh leh tawh tur a ni lo. Amaherawhchu, Fehtea nundan hlauhawmzia leh kan nulate a laka an inthiarfihlim tawh a pawimawh ták thu erawh chu awlsam taka sawi thiam a ţha ang. Kan sawi dàn tur pawh heti hian han duang chhin ta ila:
"Aw le, a hmasain tu hnênah mah Fehtea hi kan rêl chhe tur a ni lo tih hria ila. Tin, amah kan ítsík leh kan elrel vanga hetia phiar phah ta lah hi kan ni hek lo. Kan khawtlang kan hmangaih a, kan nulate hmakhua ngaihtuahin kan duhsakna avanga hetia zaninah pawh hian inrawt khawm ta mai kan ni chauh zâwk tih pawh inhria ila. Kan lênna lama kan nula kawmte hnenah pawh Fehtea hming a chhiatna tur kan venpui avanga nula tih dèm dûm a ţhat lohzia sawiin, a lama an ţan lohna tur leh anmahni ngei pawh an ingaihbel lohna tur zawngin sawi thiam tum ţheuh ila. Tin, fiamthu hauh lovin Fehtea hma pawh ka ngai tak tak a. Kan khaw tlangval chhuanvawr ber hi a hmingchhia ang tih ka hlau tak tak bawk a. Chuvangin, a hriat loh hlâna a hming hliauna tur kan vênsak hi tihmakmawh pawh a ni ta. A hriat laia a hma kan ngaihzia kan tihlan chuan a lawm pawh a lawm zâwk na'ng. A hma kan ngaihsaka te hriat kher a ţhat chhuah tum mi zawng mi chapo an ni ngai. Chuvangin, in nula rîmte pawh chuan Fehtea hnena an sawi leh kher lah a ţul tawh hek lo'ng a. Amaherawhchu, Fehtea laka an nun an fimkhur a ţulzia leh, ani Fehtea lahin tumah tih bik nei lova a tih zel zul thu sawi ula. Tlangval zawng zawngin a khat a khata kan sawi ţheuh chuan, ani Fehtea laka hmingchhiat hlau ve ngawih ngawih bawk si chuan an zâwm em em ang.
Tin, tháwk a phita pak chhuah chamchi pawh a ţha chuang lo. Tîtî inman kai remchan laiin in tiri zauh zauh ţhin ang a. Tin, nula in chhaih fiam châng te pawhin fiamthu titak siin in tiri zeuh ţhin ang a, hmeichhe lungmawl zâwkte chu keini Darzo zathum khaw tlangval ţangrual chuan kan hmin em em ang," tiin thiam takin a sawi vêl a. Val-upa dangte pawh chuan Sangtuala lam ţang taka thu an sawi ve bawk si avang leh; tlangval chu val-upa thu thua awm an nih bawk avang chuan, Fehtea chu mi tin entleu a nih theihna tura ţan lak tumin an rilru an siam ta sauh sauh vek mai a ni.
Chutia chhum lo chat lova Darzo khaw tlangval ţangrualin er bera an neih takah chuan nula tam tak chuan an rilrua Fehtea an ngainatna chu an zúk hret hret a. Val-upa fing verther zet mai hova tlangval ţangrualin nula mawlmang ve tê tê tlawm leh zah dâwn lo lek a, kâwikawm ţhin anga ţangrula an dan chép takah chuan an hmin thei teh meuh mai. Ani Fehtea lah chu mi ţawng tam lo tak leh an puh ang anga niawm ve mai mai chi a lo ni si a. A ţhianpa kawm ngeih ber Thatkima meuh pawhin Fehtea an puh dàn leh a ţhiante zawng zawngin an phiar dan chu a dik leh dik loh pawh a hre ngam tawh bik si lo. An nula hmin tawhte hnenah phei chuan Fehtea leplerh rukzia leh 'nula râl ringawt alâwm a nih' tiin inthlahrung hauh lo leh a tuitla lo thei ziain an sawi a. Chûng chu a dik a dawk hre lo nulate chuan an ţhiante hnenah an la sawi chhâwng lehzel dâwn tih hre ru rân chungin an sawi hmiah hmiah mai si a. A tawpah phei chuan anmahni dâwt ngei pawh tlangvalho chuan an awih ve tak tak a. Dâwt sawiah reng inngai lovin Fehtea nungchang tak tak ni riakah an ngai ţheuh tawh a ni.
Níkhua a lo rei china Fehte'an nula mitmei hmuh a bar a neih tak si lohah chuan, nula ina chuankaina tur fahran pawh a hre mumal ta lo a. Engmah thu belhchian hleih theih awm si lovin thu a thang a thang chamchi mai a. Mi tin tih theih deuh thawin Fehtea an hmuh dàn chu a tleu ta hle ţheuh mai a. Mahse, amah eng han ti chi àwm hmela an hmuh bawk si loh avang chuan, 'chutah khatah, chutin a ti, khatin a ti,' tih tur awm si lovin, tlangval rualin entleu ta ţheuh si chu an mi ang-lo dah ţhat ve ta mai mai hlawm a. Chuti taka Fehtea chu bûr chhe làn taka a lan takah si chuan mahni khaw zâwla awm pawh nuam a ti lovin âwllen lai phei chuan hlawhhlâm zuarin khaw ţhenawm lamah a invawm bo ta deuh reng a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 20th, 2019, 7:43 pm

BUNG 5 : Thang hnihna a per ta
Chûng lai chuan ţhival leh ţhi chi dang dang hlawhhlâmin an zuar nasa a. Fehtea pawh sum pâr lawra vak chhuak chamchi ţhin chu a nih avangin Sangtuala tirh rûk angin Dârzo tlangval pahnih Thangbilha leh Saliankhuaian hlawhhlâm ţhi zawrh puiah Fehtea chu an sâwm a. Âwllen lai a ni bawk a, ţhian zaho chuan Ţiau chhak lama Dâwn khua leh Leisen leh Siallâm lama kal an tum a. Chûng tlangval pahnih te chu engkimah Sangtuala 'berhva' hi an ni hrim mai a. Sangtuala chuan Fehtea a phiar rûkna a nih sawi duh hauh lovin Thangbilha leh Saliankhuaia chu thu a chah a. Chû a thu chah chu :
"Dâwn khuaah khian laina hnai tak kan nei a. Inhre chhuak lawk lovin kan awm a. Tlém laia Ngharchhip lal khuangchawi ţuma kan lal hnung zuia ka pa a va kal khan, anni Dawn khua aţanga lo kal te zîngah chu kan chhungte chu an rawn tel thla ve a. Chumi aţang chuan an va inhre chhuak ta a. Chumi ţum chuan an tlangval lian thelh thawlh hmelţha tak mai pawh a lo kal ve a. Chû kan chhungte chu Dawn khuaah chuan a khawsa thei pâwl tak an ni nghe nghe àwm e, a thlen te pawh in han thleng dawn nia. Kan chhûngte hnenah chuan kan khuang chawi tum thu hi in rawn sawi ang a. An tlangval phei chu lo kal ve ngei ngei se la. Amaherawhchu, nangnin in hriat tur chu, kan chhungte an nih tumah midang in hrilh tur a ni lo a, Fehtea phei chu hrilh hauh suh ang che u," tiin a chah a
Thangbilha chuan, "A nih, han thlen chilh dáwn pawh ni ila an hming teh reng pawh kan hre si lova, engtin nge maw kan han zawn chhuah ang le?" a ti a. Sangtuala chuan, "A ni tak, an pa hming chu Kiauluaia a ni a, an tlangval hming erawh chu Zahmûnga ti ta meuhin ka hria," a ti a. Tichuan, Thangbilha leh Saliankhuaia leh Fehtea te pathum chu Muallianpui lamah Hemphunga Bualpui kàia Tuipui per kai tumin an chhuak ta a.
Sangtuala beisei aia hmain Dâwn khuaa an chhungte chu an lang thla hma a. A chah ang ngeiin an Dawn khaw chhungte tlangval Zahmûnga pawh chu a lo kal a. Sangtuala pa khuang chawi hun tur pawh kâr a la awm deuh a. Zahmunga hnenah Sangtuala chuan Darzo khaw tlangval Fehtea leihnawn nachhan niàwm zawng zawng chu sal lovin a hrilh ta vek a. Chuti khawpa zathum khaw tlangval zawng zawng leh nula zawng zawng laka tuitla lo ni si chu Zahmunga pawh chuan a engamah hma chuan a'n hmu tleu ve nghâl ringawt bawk a. Chu mikhual tlangval Zahmunga pawh chuan Fehtea chu a eng hu-ahmah a ngai ta bik lo tih hriat veleh Sangtuala chuan Zahmunga chu Fehtea tih mualpho lehzual theihna tur hmanrua atàn hman a tum leh ta zêl a.
Zahmunga hnenah chuan, "Zawlbuk i rawn chhuak tlai deuh ang a. I lo kal ve hunah tlangval dang hriat ngei turin Thangbilha leh Sailiankhuaia hnenah 'Zanin chu nula min rîmpui ve teh u, nangni ţhian dun hian in lo zin lai khan in ţhianpa Fehtea khan Darzo zathum khaw nula kim vek tawh khân a insawi a. Mi theih hnu an nih leh nih loh chu an hmêl aţangin ka hre thei khawp asin. In ţhianpa khan thei kim tawh thawthâng khân a insawi si a. A dik nge dik lo chu kan hre mai dâwn alawm,' tiin lênpui atân anni pahnih i sáwm ang a," a ti a. Zahmunga chuan, "Chutia ka sawi ngawtin Thangbilhate ţhian dun chuan an hrethian dawn em ni?" tiin a zawt a. Sangtuala chuan, "Hrethiam teh rêng ang, ka hrilh vek tawh nghe nghe. A sawm hun hunah che u in lo hrethiam dawn nia, ka tih vek tawh kha," a ti a.
Zan khat chu zanriah ei khama an chhuak khawmin meipui an lo kîl bial luih lai chuan Dawn tlangval Zahmunga lo lut chuan, "Zanin chu tu ngaihzawng zawk emaw min rimpui teh ang che u. Kan khuaa in lo kal lai khan in ţhianpa Fehtea in ti emaw ni khan Darzo nula kha thei kim thawthangin a insawi a. Engang chiah nge ni teh reng kan en ang chu maw le. Nula la him leh him lo chu ka hre thei riau asin," tiin Thangbilha te ţhian dun chu a sâwm a. Chu a ţawng 'Fehtea in ti emaw ni khan Darzo nula thei kim thawthangin a insawi' tih lai tak chu an val-upa pakhat chuan dilchhut takin Zahmunga chu a zawt nawn leh ngat a. Fehtea sawi niàwma an sawi chuan chumi zan la la chuan Darzo khua a deng chhuak nghal a ni.
BUNG 6 : Thang thumna a pawt per leh ta
Dâwn khua thleng thlenga Dârzo khaw nula tihhmingchhiat tuma Fehtea an ngaih tak ţheuh si-ah chuan, nu leh pa tam zawk thinrim lah chu an puakkeh lo chauh a ni tawh a. Fehtea ţantuten a thlavang hauh an tum hlek pawhin thih ngamin an inseh peh lo chauh a ni zêl tawh bawk si a. Chuti ang kârah chuan Fehtea nihna dik tak hmu rutu tân pawh 'pip e, pup e' tih ngamna chi a ni tawh lo. An puh dàn ang ang chu ngawi rengin a sepui tuar tlawk tlawk ringawt tawh mai a ni. Chuti khawpa an sawi tuitlak loh tawh hnuah pawh Sangtuala tâwk a la sa lo a ni ang chu, kawng dang a ngaihtuah leh ta a. An sawi chhiatna zawng zawng chu ţawngkam ringawt, fiah hleih theih loh a nih hlawm avangin, a nemngheh nan Sangtuala chuan a thang pathumna chu a pawt per leh dâwn ta a ni.
Fehtea chu tlangval a la nih ve tho si avangin inkiltawih tak chung chuan zawlbuk a la lâwi ve hram hram ţhin a. Chutih lai chuan a pa chu thih ngamin a damlo a. Chutih lai bawk chuan ţhenawm tlangval chuan Cheural nula nupuiah a nei a. Zan tin Fehtea chuan a pa a bawisawmin a mut chawlh duh hunah zan rei tak takah te zawlbuk a pan ţhin a. Chung hun lai chuan nupui nei thar pawh an nupui te kiangah an mu zawk a, zawlbuka riak turin an kîr leh ţhin a. Chutia an nupui neih thar te ngei pawh zawlbuk lama an riahsan ţhin avang chuan inlawithlem pawh an ching fo ţhin rêng a ni.
Sangtuala chuan Fehtea tihhmingchhiat lehzualna tur leh vantlang hma ngei pawha a insawi hul zawh hauh lohna tura a ngaih kawng dang a ngaihtuah chhuak leh ta a. Fehtea chuan Paite puan ţial dan danglam tak, a pa-in Paite ui zawng ta ui-tuaia a thleng hi a nei a. Chu puan ngei mai chu Sangtuala chuan naupang a rûk chhuahtir a. Fehtean a pa damlo a menpui hnu a a zawlbuk lâwi tur kal hnu zanlai-arkhuana a hâwng lai nang tawk chiah turin Fehtea te ţhenawm mo thar chu Sangtuala chuan a lawithlem ta a. A lawithlem nu lah chu a lo diau lo nasa mai, a ûm chhuak; Sangtuala tlân chhuak chuan khawlaiah Fehtea Paite puan chu a thlauh a. A ûmtute chuan man ngei tumin an ûm zui a. Zawlbuk thlenga ûm luh rawk tuma an ûmna lamah khawlaia puan tla chu an chhar ta hlauh mai a. Chutah Fehtea zawlbuk lâwi tur chu an va hmu phak ta bawk si. Zan rehah khawlai dungah chuan lei chhe kuai khawp thu namai lo tak chu sawiin hmel sen nen an inchhal ta khe-khaw a. Mahse, an thu chu khawlai dunga sawi fel mai chi a nih loh avangin an thâwm a harh ţhenawm hnai lo zuang chhuak vete chuan an pawt ţhen ta rih a. Fehtea chu ţang eng ang mah se, lal in rap lo thei a ni ta lo. Mahse, chuti khawpa hmingchhiat theihna humsual chu daitir tum mah se, an thu buaiah chuan Saithangpuiipa chuan Fehtea a nih a ring thei hauh lo mai a.
Fehtea puan an chhar ngawt dàn leh a hma aţanga Fehtea'n puan a tihbo thu a sawi lo hretu ngeite an awm ve bawk si avangin, chung thil chi hrang hrang inbengberek khawm nena an thubuai chu an chhui dawn tuak vêl ngial hnuah leh, chumi zan chuan Fehtean châng dang a kan miah lo tih hmutu; Fehtea pa damlo ţhutpuia lêng an sadâwt ngei chu a hretu a nih bawk si avang chuan, Fehtea chu ni theiin an hre ta lo a. Mahse, lawithlem thubuai hialah a tel ve takah si chuan Fehtea chu a hming chhe ta tho a ni ber e.
Dârzo zathum khaw nula leh tlangval zawng zawng tih theihin Fehtea tlangtlak lohna tur zawnga dáwt pawh pawisa lova an rêl chhiat reng takah si chuan, Fehtea tân pawh khaw hawina leh ţhenrual zînga limik châkna pawh a nei tawh lo a. Tlangval dangte anga khawhar ina riah leh nula rîm ve te thleng pawha a châkawm loh zawh tawh vek avang chuan, lên pawh leng chhuak mumal lovin a ní te inah a tawm mai mai ţhin a. Eng emaw chânga a ţhianpa Thatkiman a rawn lên chilh leh zauh ţhin tih mai loh chu ţhian dang tumah pawh a kàwm lo. A farnute lah chu awm ţhiau ţhuau hlawm mah se, Fehtea an er rawn aţang chuan inlêng tumah chuangkai duh lah awm ta hek lo. Val-upa ţangrualin tlangval an thunun avangin an ngâwi mai mai a. 'Fahrah leh Vangtlang an ţangrual' tih zawng zawng neih zo-in, insawi hmâi fai rual a ni lo tih a hriat chian êm avangin, tlâng sel leh do rawn chu hrehawm ti ngawih ngawih chungin an tuar fan fan a.
Mahse, an ţhianpa Thatkima te chhung leh a nï Râlvani te leh tu tute emaw chuan Fehtea dikna leh ropuina thuhrûka awm chu an hmu kiau thung a. Engtikah emaw chuan zângkhua a la bungbu ang tih an ring tlat a. Tin, Saithangpuiipa pawhin Fehtea chu a ring êm êm a. Mahse, khawtlang ţangrualin an er rawn tak si chuan khuate tihlungawi loh a hlauin lal chu khuate avanga 'lal' chauh a nihzia a hre chiang si a. Chûng thil avang chuan Fehtea lama thu sawi ngam tumah an awm rih lo. A nï Râlvani chuan a vahpa Fehtea chu a khawngaih em em a. Engtikah emaw chuan Fehtea 'ní' chu lo la her chhuak ngei dâwnin a ring tlat thung a. A theih ang tawk tawk leh a thiam ang angin a hnêmin chhel taka tuar turin a fuih sauh sauh ţhin a ni.
Fehtea an do rawnna bul tumtu ber chu Sangtuala a ni tih hretu an tam lo hle a. Sangtuala chu val-upa lung fing tak a nih avangin mi kutin rûl kua a zen zar zar zêl a. Amah tak phei chu Fehtea laka tha-àwm berin a lang nghe nghe a. Ţum khat an losûl hâwng pawh loh theih lohin an kal dun a. Chumi ţum pawh chuan Sangtuala chuan Fehtea chu hrehawm ti lo tur leh tuar fan fan turin hmangaihtu niàwm fahranin a hnêm nghe nghe a. Fehtea chu tlangval fing vak lo chu ni se, a lainattu berah pawh a chhal hial ang chu, tih turin Fehtea lakah chuan Sangtuala chu a inlantir ngaihnobei thiam a ni. Mahse, engkim a bul tumtu leh a chala phung tawp tura chu amah Sangtuala vek chu a ni si tih hre chiangtu chu, Saithangpuii leh anni Fehtea te chhung leh a ní Ralvani leh a ţhianpa Thatkima chu an ni deuh mai àwm e. A duh chuan amah Sangtuala pawh chu a inhre bawk ang chu..

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 21st, 2019, 7:20 pm

BUNG 7 : Sangtualan tam zo a la sa lo
Vahsàn lak a lo hun leh ta a. Mipa fa thawk thei zawng zawng chu lo vát turin an inbuatsaih leh ta a. Funpui chawhmeh urin ţhenkhat silai nen sapêlin an vak chhuak. Lo vah hna hram thawktute intuituah nân ţhenkhat vawkpa beng hleh lo talh tawk lah bo lo. Ni khat chu Fehtea pawh funpui chawhmeh dap turin silai nen ‘zuksih’ an tih lamah a khawilo a. Chumi ni chiah bawk chuan Sangtuala pawh zuksih lamah bawk chuan sapêlin a chhuak a. Zuksih kam ràiruang buk che laih laih chu hmu dunin inhre hauh si lovin an pêl dun a. Zuksih bul fai lai taka zukpui lo chhuak hlawl chu Fehtea chuan hniak phawi miah lovin a’n sai let tawp mai a. Chu chiah bawk chu Sangtualan kah tuma thal a lo thlah ţêp lai a ni a. Mahse, Fehtea chuan Sangtuala chu a awm ve tih reng a hre si lo. Sangtuala erawh chuan a sazuk kah tur kah khalhtu chu a hre chiang hle thung. Sangtuala chu inlan duh chuang lovin vuihmuipu-in a kal kiang ta daih a. Fehtea erawh chuan Sangtuala a awm ve tih pawh hre lovin a zukpui kah chu a chhâwlchhin a, naupang nen hlim taka chan atân a hawsan ta a.
A ‘sa-ai’ ni ve ngeia a hriat Fehtean a kah khal chu Sangtuala chuan a ngaithiam lo chhiava ta mai a. A kah tur mang mang Fehtean a kah khalh lui niin a ngai tlat mai a. Mahni khawtualah tuitla lo lékin sawisa tawh mah se, ‘a zual zawpui vailenhlo’ tih ang maiin Sangtuala ramchhuak hlawhchham beidawng chuan ha-chang ţhialin, “Heti khawp hian kan sawisa tawh che-in âr-a chuk tui lo leh ui êk pu pawh tluk lovin kan siam tawh che a. Chuti chung pawh chuan ka hmaa sa chhuak ngei ngei pawh min la kah khalh ngam a ni a. Kan sawisakna che hi tam zo i la sa lo a ni ang,” ti-a rum ngul ngul chungin Fehtea hmingchhiat lehzualna tur kawng a dap leh ta a.
Lo vah riahbûk sual turin a pa chhuakin an riak lut ta sung sung a. Zâu khat leh riakho thei tur chu an tui tlan tur remchang laiah buk sa-in ram an ţuan fai vek a. Fehteate zâu pawhin Phunchawngzawl lui-te kam chângzawlah vanlaibuk lian tawkin an sa a. An riah luh niin Fehtea chuan sakhi pachal ki mawi zet mai a kap nghe nghe a. Chu an lo vat riak chu an khaw tlangvalin Fehtea an tihmingchhiat hle hnu-a mi dangte nena an riah hmasak berna tur a la ni. An bûkah chuan tlangval leh pa eng emaw zat an riak a. Fehtea chu a ngawi ran mai a, mi zîngah engmah a sawi ve ngai lo. Khawsak rel leh buk tui chawi leh chawhmeh dap a peih hle a. Paho pawh chuan Fehtea chu an mitmei ru deuh reng a. Tuman an be sawm tam vak lo na a, an khawtlanga a hminghliau ang êm êma sawisel kai tur mihring niin an hmu ve si lo.
Mahse, lehlamah thung si chuan Sangtuala chuan tawk zo sa lovin Fehtea thangtlawm dêr theihna tur kawng dang a lo ngaihtuah leh mek a. Chutia amah phiara Sangtuala a hmanhlelh lai chuan Fehtean a hmingchhia chhilh tumin, lo vata an riah chhung chuan theihtawp a lo chhuah ve a. An ram tuka sa tam kum tak mai a lo ni hlauh bawk a, Fehtea chuan a kap a kap mai a. A kah apiang chu bûk chawhmehah a vawm lut zêl bawk a. Chumi kum phei chu a kuthmui kum tak a lo ni chhap nen.
Fehtea zarzo a, a sa kah sa a inhnangfak ni mah se, amah ertu, bûk khat ngeia a lawipui leh thleng khat a zenpui ngeite chuan an huphurh deuh deuh thung a. Chuti khawp a mi te tân a ţangkai a, a fakawm chung pawh chuan a lakah an huaisar tawlh tawlh si tih a hmuh chuan Fehtea chu a beidawng rilru rum rum ţhin a. Hmâna kar kam zana a mumang : Tlângphal se chaih taka an lo chaih te chu a hre chhuak rum rum a. Mahse, an lal nula Saithangpuiin zufang tuitling tulh taa a inhmuh avang leh a chaihtute a phin darh ta ur ur ni-a a lo inhmu chu la thleng dik rih lo mah se, chuti kawpa zathum khaw nula leh tlangval er rawn a hlawh ta chu dik a ti em em a. Amaherawhchu, a phin darh teih hun tur thleng amâwi pawha a lan rih si loh avang erawh chuan hrehawm a ti em em a ni. Engtikah emaw chuan zangkhua a la rawn bungbuin a tân ni ţha la rawn her chhuak ang dâwn te-in ngaihthuah ţhin mah se, ama mimal tumna leh ţhatna aţang ringawt a chu hun engthawl tak chu sual chhuah zawh a inbeisei phak bawk si lo. A chetna lam apiangah bui lung tâwk ang maiin a hem a khawk alh alh zêl mai si a.
An lo vah ramriahna lama Fehtea vanneihna leh felna chuan a hmingchhia chu chhilh thei mai dâwna Sangtuala'n a hriat avangin hêkna kawng dang a ngaihtuah leh ta a. Lo vah ţul lai tak chuan an upa pakhat Than-iapa fanu, Darzo khaw nula fel pawl tak chuan pasal a nei dâwn a. Amah khaw khat pa challang fanu a nih si avang leh ran lu kima làwi an tum avang chuan an ram riak chu an haw chhuak deuh vek a. Chutia an haw chhuah kim remchan lai chu denchhenin Sangtuala chuan Fehtea te lo vah riahbuka riak ve tlangvalho ko khawmin, Fehtea rêl chhiatna tur a lo ngaihthuah chu a fah chiam mai a. Amah val-upa a nih bakah thu sawi awihawm thiam tak mai a lo ni a. A phiar vel dàn chu :
“Hei le naute u, Fehtea chuan kan hriat angin kan nulate lakah pawh chimawm a chhuah zêl ngam ta lo a. Mahse, kan ngawih leh mai chuan, heti ang misual laklawh tawh hi chu a bilha tho lo tih takah an sualna hian tha a thlah ve tlat ţhin lo a. Chu avang chuan keini lam pawhin kan mitmei reng a ţul dawn a. Tin, chu bakah pawh a chimawm ngam tawh loh hlen nan dâwt deuh pawha inven a ţul a. Kan nulate leh kan khawtlang ţhat zawkna tur a nih phawt chuan eng hmanrua pawh kan lek ang a, kan zaa ţhatna tur kan zawm avanga kan mawhphurhna tun din nan chuan thu belhchian dâwl vak lo pawh ni se, a fiah tu tur tudang mah awm leh chuang dâwn hek lo, kan inven reng a ţul tih hria ila,” tiin a thusawi tur avang chuan thiam takin thu a han chhep rinawm hmasa tê tê a. Chutah heti hian a sawi duh chu a pak chhuak ta a.
“Hetia Fehtea riahpui tlangvalte chauh ka koh khawm nachhan che u chu, ka’n sawi anga in hrethiam maiin ka ring. Mi dang hmuhpui loh leh fiah hleih theih loh tur thu sawi thei tur tlangval remchang in nih avang a ni a. Tûnah hian Fehtea hian nu leh pa ţhenkhat lakah a hmingchhia chhilh tumin leh keini Darzo khaw tlangval zawng zawng mi lehthal tumin ţan a la mek tih in hre thoin ka ring a. In riahna lama a chet dànah pawh in ngaihbel thei maiin ka ring e. Chuti taka anin ţan a lak si chuan, kan chelh lo mai ang tih pawh thil awm thei niin ka hria a. Chuvangin, heti hian thu kalpui dàn tur ka phan a. Chuti ang tak chuan in lênna lamah in ţhiante hnenah pawh lo kamtam tûrin ka hrilh duh che u a. Chu chu :
"In nula rimte hnênah ţheuh, ‘Kumin kan lo vát riak chu kan riahpui vanduai leh lutuk a, ram riah hrehawm ka ti tak tak a ni, riah luh leh ka hreh tawh ngawt mai,’ in han ti ang a. Anni chuan, ‘Engati mâw?’ tiin an han zâwt ang che u a. Nangni chuan sawi hreh hmelpu tak niàwma langin, ‘Mi an chhiatna lai sawi hi kamtam nihna a niin a nuam lo a. Min zawh takah chuan han sawi ta mai mai ila, Fehtea ber hi alâwm maw le,’ in han ti ang a. Chutah a han zawt dilchhut leh ngêi ang che u a. Chutah zawng heti hian in sawi dâwn nia. ‘Sawi leh sawi hnu, zîng thawh a hre si lo, a tlâi berah mi siam sa ei turin chaw thlenga nawr thawh a ngai a. Chubakah keini lo vat riakho chawhmehpui ber lah chu zawngţah a ni a. A zawngţah ei lutuk a kuain a zo leh si lo, a pum nuam lo êk chhuak zânah a dailêng ngam lo changêl hnahah e-in a tuka paih leh atân a fun a. Ani a kâra mangchhia leh thawh hre si lo chuan a delh pherh mawh hek lo, a châng leh a tlawh pherh thawm nen, a rimchhe nasa mai ţhin si a. Fehtea riahpui reng reng chu thih nau hi a ni ringawt mai a ni,’ in ti ang a.
Chuti ang taka in nula rîm leh in ţhiante ţheuh hnena in sawi chuan ani tehlul a ţhatchhilh ikhaw tawh lo ang. Chutah in ţawngkam thiam dan danin in ţawng khahchilh zui bawk ang a. Tin, in hriat reng tur erawh chu : Hetah kan khuaah hian an laina hnai tak tak an tam lo é mah ti ila, lo lainat tawk an awm thei a. Chuvangin, mi nu leh pa hriatah phei chuan sawi ri lem lo ula a pawi lo. A riahpui, ti ila, in riahpui paho hriatah phei chuan in sawi loh a ţha zawk ang. Chuti lo zawng, a sa kah sa ei avanga a dik a dawk thlu lova lo lainat ngawt te pawh awm theih a ni ngai e,” tiin tlangval naupang zawkte chu bum titih chungin Fehtea a elrel chuan dawt ngau ngau a fah chiam mai a. Tlangval naupang tê tê ni hlawm si hek, an rilru tak takin Fehtea chu dik lo hulhualah an ngai ţheuh hlawm tawh si a.
A tûka lo vat riah luh leh ní chuan Darzo nulaho chu buh phurin an tûk tin dàn pangngaiin an thawk chhuak leh a. An haw lam chu nula inkawmngeih tak pahnih Nusini leh Suakthangi chu tui taka tîtî chung zêlin an pahnih chauhin an kal dun a. Nusini chuan, “Nizan nang inlêng i nei em?” tiin a zawt a. Suakthangi chuan, “Nei e, Ngûna leh Thangduna an lo lêng a. Nizan chu an tîtî tui kawp mai a, kan meng rei ta phian a,” a ti a. Nusini chuan, “Kei pawh nizan chu an ram riah hreh thu hlîr an sawi a. Tîtî dang rawlh vena awm lo lekin chu hlîr mai chu an zankhuapui a,” a ti a. Suakthangi chuan, “A ni ve maw? Ngâwi teh Sini, Tea hi ka rin a lo ang lo êm mai. Tlangval zawng zawngin sawi ta ţheuh mai chu, a mak ka ti tak tak a ni,” a ti a.
Nusini chuan, “Ni e, ‘pan lo-ah tho a fu lo’ an ti a, dâwt ngawt chu a ni zozai sêngin ka ring miah lo. Ka rin a lo ang lo êm mai. I hriatah chauh han sawi ta mai mai ila, nang pawhin i hai tawh chuang lo a. Ani nen hian khati khawp khan kan lo inkawmin kan lo inzui tawh a. Tlêma tlemah kan mualpho lo chauh kha a ni a. Hetia a hming an sawi thang-tlàwm hma lawk te pawh khan kan inkawm thûk hle tawh a. Mahse, tûnah chuan ka hawi ta lo bawk a, a hmuh pawh ka hmu ngai tawh lo. Ani lah a lo lêng ngai tawh hek lo,” a ti a. Suakthangi chuan, “Ka hria alawm, chûng i sawi takah chuan ka rin loh tak Sawiluaii nen pawh sawn an lo khawsa fé tawh a. Mahse, ani pawhin i sawi ang bawkin, hetia khawtlang tlangval zawng zawng tih theihin an kawm serh tituai tak hnu aţang chauh hian a thlah ve ta alawm,” a ti a.
Suakthangi bawk chuan, “Chutia i sawi takah chuan khawiah mah sawi leh tlak pawh a ni tawh hlei law, buichia laih lovin han inpuang ta ila: Kei pawh ka lo ngaizáwng ru ve ţhin khawp mai a. Mahse, ka’n belh chianin hnàmbeh lohna riau mai ka nei leh ta a, a lo hetih dâwn vang lek hi lo niin. A lo lên ngun ve lai chuan a rawn lang ve fo a. Keia lahin ka lo hmêl duh ve bawk si nen. Kan vaihlo tui ţha ţha, inlêng dang pawh ka ţheh phal ngai hleih loh ka lo pài ru thla zo a. Tûn hnua ka han ngaihtuah lêt leh hian ka zak leh hnuhnawh ngawt mai. Ani lah heti ang mihring mai mai hi lo niin,” a han ti a.
Nusini chuan, “Chûngte mai mai a zahthlak loh chu. Kei chu ka mualpho zau teuh ngawt asin. I hriat thawi, hmâna ka nu min hauhna pawh kha tûnah chuan thu mu hnu teh cháwk a chang ta bawk a, han sawi chhuak ta ila. Nikum hmasaa kan lalpa zaudawh lai khan ka nu’n min pháwk a leh! Ka khati zah ang êm êm kha ka tawng leh ngai tawh lo ang e, tih awl a ni. Thingfar zân khan kan dithlifarfém hnuaia kan khawsa dun lai tak mai ka nu dailêng turin min phawk a, ka zak teh asin âw! Ka nu a ni hlauh a, kan mualpho lo hram zâwk pawh a. Chuti phei chu ni lo se, kan mualpho zau ngawt ang,” a han ti a.
Suakthangi chuan, “Nang chang i ni hlei nêm, kan ni fur alâwm. Chêmchhungi lah chu a pa’n a vuak phah hrep tawh bawk a. Mahse, tûnah zawng Fehtea nikhua loh a leiah thu hlui a chang leh ta zawk lawiin hmân lai a chang zo tawh a. Duh leh maw le, tlangval dangten min la iai chuan loh ber a liamah, ‘pasal pakhat leh thing phur khat chu hmuh zawh loh thu a awm lo ve’ an tia lawm,” a ti a, a nui har har a.
Sangtuala thil tum chu a hlawhtlingin a duh ang takin Fehtea chu a tileihnawng thei a. Darzo khuaah na nâ nâ chuan Sangtuala chu a vawk lal len nguk nguk mai a. Mahse, Fehtea an hêkna zawng zawng chu dik pakhat mah a awm lo tih hre chiangtu ber amah Sangtuala chu a nih avang erawh chuan, engtikah emaw chuan Fehtea dikna chu la rawn irh chhuak leh ngei dâwnin a rilru kil khat chuan a ring tlat a. A dâwt zawng zawng a la rawn laihlan leh hun tur a dàwn châng phei chuan a awm mai mai lai te chu a meng phar awn awn ţhin a ni. Chu hun chu a rawn inher chhuah rau rau si chuan Fehtea an hêk mualphona aia nasa zawkin a la mualpho ngei dâwn ang tih a rin ruk tlat avang chuan, engthawl ang reng takin lêng ţhin mah se, a ruk tak chuan nuam lo a ti a. Fehtea pawh a lang a pau chuan nausam hle angin lang mah se, a zah ru tlat reng a ni. Mahse, a rilru chu tuma hnênah a sawi chhuak ngai lo.
Chu dikna lo lan hun tur chu engtikah emaw chuan la rawn inher chhuak dâwn ngeiin hre mah se, Fehtea a huatna leh a huphurhna chu a nasat êm avang leh, chuti taka theihthawh bâwla tlangval zawng zawng fuihtu a nih si avang chuan, Fehtea hêkna tur dang chu chhum lo chat lovin a dap reng a. Tin, a dâwta mualpho lohna tur a zawng ngar ngar bawk a. Fehtea lah chu tlangval duaidim lo tak mai a nih si avangin, chuti khawpa an er rawnna pawh chu a lang a pau chuan enghelh hmêl pawhin a lang duh vak lo a. A lênna a zim ta deuh e, tih thu a ni chauh a. Tin, a hming chher thar leh tur leh a hmingchhia chhilh leh turin tha thlah miah lovin ţan a la reng a. Chu chu Sangtuala pawhin a hai hauh lo a. Fehtea erawh chuan ţhenrual puna dâwta a hming chher a tum ther tê lo. A kutkawih leh kuttling taka tu ma tluang tai lova lehthal tumin a kal ngat mai a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)