●UTOPIA:1996● S2 By Abbra Reo Ririni Khiangte(PitarteiSualfingi)

Moderator: Abbra Reo Ririni

Abbra Reo Ririni
Posts: 1237
Joined: November 10th, 2016, 8:57 pm

Re: ●UTOPIA:1996● S2 CH 1-EPILOGUE 6 By Abbra Reo Ririni Khiangte(PitarteiSualfingi)

Unread post by Abbra Reo Ririni » December 9th, 2019, 1:03 am

If you want to be ORIGINAL,
be ready to be COPIED 😝


"Thihna chungchang sawi tawh ngai suh" lo ti hriam hrawihin min melh tur nghal khui a, zalo deuh a ka nuih let chuan "Bawihi" a han tichang leh bawng a.

"Ok.. ok.. vanlalBoss" ka tih hlak takah chuan a kutphah lum thup chuan ka biang a rawn nul thuak bawk.

"Mu tawh ila" ti leh sup in ka hmui chu a kutzungpui in a rawn nul leh thuak a, "Aih" ka tihdeuh tlat chuan atthlak tih hmel tak hian a nui suk bawk.

Mitmeng awmze nei deuh a min en run pahin "Mut i duh lo maw?" a tisup a, A hmelpa zet rawn awm hniam ruai ruai chu uluk tak hian ka lo en reng a, a pa chhan-chhuak turin a nunna thap tak meuh meuh in service hmunpui a luh chhuah a, tunah a fapa humhim turin a nunna thap chungin keini min venghim turin theih tawp a chhuah leh bawk! A mi hmangaih te tan a nun hlan hreh lo tu Carlos Zohmingliana hi ka theih tawp a nasa in hmangaih mahila chu aia tam hmangaihna chu a la phu a ni, a nunna aia a hmangaihte nunna dah pawimawh zawk tu mipa huaisen lutuk lakah hian Pathian in zahngai sela, a hmelma te beih let pui mawlh rawh se!



A hmui lum thupin ka hmui a rawn sik rual chuan kan infawh hmasak ber țum ang chiah khan ka chhungril chu a che raih raih a. A lei chuan zei takin ka hmui a nawr kau a, a ban pakhatin amah si chet a min kuah bet pah chuan hneh lutuk a ka khabe chu a dawm nghet in ngenngawl zet hian min fawp ta ngawih ngawih a, ka infawh hmasak ber țum ang chiahin a huhang lum nuam tak leh muanawm ruih chuan min tuam kual ruai ruai a.



Rei ngial lungrun taka kan infawh hnuah chuan ka biang chu a kut pahnih a lo dawmin "Ka kham thei ngai lovang che" min tisup a, ka hmai lo sa zual hat hat chu nui deuh paha thawk la huai chungin a awm ah min kuah bet ta hlu hlu a, a lungphu ri dup dup chu ngaithla in ka hmai in a awm chu ka nawr a.

Zawite a "Carlos?" ka tihsap chuan "Ummm" tiin min lo chhang let thuai a, a aw thum zawi ruih chuan a awm chhung ațang min nghawr dur dur.

"Kan hringnun thawnthu hi ziak țha thei dawn ta la, ziah țhat duh lai i nei em?" tisep sep pahin a lungphu ri dup dup chu ka ngaithla chik zual sauh, a ngawi deuh vung vung a.

Keimah vek chuan "Hades-a nu, nu Zonuni kha chuan apasal nen a an hringnun thawnthu kha ziah nawn leh theih pawh nise a phal ngai loh tur thu a sawi a..." ka ti a, "Hades-a nu" lo tive dut pah chuan duat takin ka sam a lo chul thuak bawk.


Muang deuh ruih hian "Ziah țhat theih nise chuan..." a ti a, a aw ri chu a rit hle a, a rilru a awm tur chu ka hrethiam in ka hria, rang deuh hian "Keichu a englai mah kha ziah țhat ka phal lo" ka tichhuak a, thawk la huai chung a min kuahna thlah thawlin ka khabe ah a rawn dawm a, min kuai dak pah salh bawk.


A mitmeng thuk ruih ah chuan a ngaihtuahna a awm ka hriat sak thei. Chutianga mahni inthiam lo leh inthlahrunna te nen a nun hmang reng tur chuan ka phal lo.


Keimah chuan dimte in a biang ah ka dawn sak ve a, "Kan pahnih hringnun thawnthu hi tlar khat lek pawh ziah țhat ka phal lo. Natna te, hlimna te, lungngaihna te leh kan mittui tla te. Engkim, a vai khan kei chuan ziah țhat ka phal lo! A diklo lai siam țha a tlar khat lek pawh kan thlak danglam anih chuan tun ang hian kan inhmangaihna a par chhuak zo lo mai thei. Carlos Zohmingliana'n a thinlung zawng zawng a a hmeichhe hmangaih ka nilo ang tih ka hlau. Carlos Zohmingliana fa te nu ka nih theih chhan chu kan pahnih hringnun thawnthu ah khan harsatna tam tak kan paltlang vang a ni, chuvangin keichuan a englai mah kha thlak danglam ka phal ve lo! Thumal khat lek pawh lo danglam palh ta se i nupui ka nihlo phah thei a" tisep sep a a biang dawmna ka tih nghet salh salh laiin pa lutuk a lo nui chhuak suk in muk tak hian min thlek ta vung vung a. Chu a mitmeng thuk ruih ah chuan lungawina mai bakah thlamuanna ka hmu thei, a nupui ka nih avanga thlamuanna ngei mai chu.




Carlos Zohmingliana leh Thelma Malsawmdawngzeli te hringnun thawnthu englai pawh kha ka hmangaih vek a, phek tin a natnat te, hlimna te leh lungngaihna te khan tun hun min hruai thlen miau avangiin a englai mah kha thlak danglam ka duh lo.


[attachment=0]InShot_20191030_081402078.jpg[/attachment]



"My Boy" ka pasal nuihza insum aw ri hluai vang chuan ka lo nui chhuak hak hak a. Bawihpuia'n thla kua a tling ve tawh a, kaih kal chuan a pen ve thauh thauh tawh. Apa hna kal tur uniform ha thlup tawh kaih kal ngen in a nuar ngut ngut ta țhin a.



Apa hna kal tur hi a hre thiam roh nge, tih khawtlai dan ngawt ngaihtuah in apa kaih kal kher ngenin a nuar deuh tlat zel.



Kawngkharpui leh țhutkhawmna inkar ah chuan an pafa chu an inkai kal dat dat a. Bang a thlalak intar te chu kawk vu vu in 'apa' ti ve awm ang ziazang hian a phun ve nuah nuah a. "Pu" tih chu a lam fiah tawh ngang thung.


"My boy, Apa kut vuan lovin kal han tum chhin teh" ti dut dut pahin a ban a sana hrawl zet chu a bih thuak a. Hun nei niin a la inhria a ni chawk ang chu a fapa chu amah ngei a kal tir tum chuan a han țhu hniam sauh sauh a.


"Thlakua chiah a la ni a, a kal thei dawn em ni?" Ka nu'n a rawn ti thuai mai.

"Ka hrelo, tum chhin rawh se" tih vut pahin a fapa chu a pawm nawlh a, kawngkhar bulh chhuat ah va nghatin a hma zawn ah a țhu hniam zui vut bawk.


"My Boy, Apa kut vuan lo in kal chhin rawh aw, tluk a hlauhawm loh ti hria la, i tlu dawn anih chuan ka lo pui vat ang che" ti sup in a fapa chu a melh ngur, Bawihpuia lah chuan ngawi run in apa chu a en run run a.




Carlos-a a rawn tawlh hnun hrut rual chuan Bawihpuia chu a che ve deuh zuk a, "Yes.. c'mon, Apa kut hi man han tum rawh le" ti hluaiin Bawihpuia ban phak loh deuh tur ah a kutphah hrawl zet chu a phar chhuak duai bawk.

Bawihpuia pawn apa thusawi chu a hrethiam ani mahna pen khat a rawn pen ta chhet a. Naupangchhia tak hian ka pa a ri ta hlut bawk.


"Pen leh rawh, tluk hlau suh ka tih tawh kha, Apa in ka venghim dawn che a lawm" ti leh nghutin a fapa lam ah a kut chu a lek chhuak leh a 'Apa in ka venghim dawn che a lawm' tih thumal chu tlem viau mahse a fapa tan nun hlan ral țhak a huam tih erawh ka hriatchian sak viau thung.


Bawihpuia chu nghet lo deuhin pen nga vel a mah chuan a pen ve ta khut khut a; kan hlimpui in ka pa leh Carlos-a phei chu an aw a lian bawk nen kan ri hlut hi ani ber mai.



Hun leh ni te pawh an liam ve zel a, Malsawmna chhiar sen loh vur in kan awm a, Ka pa hriselna pawn hmasawn zel in a tu te nen a infiam chu a hlimna ber a ni.



Uak tuar tuar chung a washroom ah ka tlan lut chu Carlos-a'n min um lut thuai a. Tunah hian nau ka pai leh mek. Bawihpuia'n kum khat a la pum lo tih ka sawi tel hram bawk ang!



Ka uak nghek nghek hnuah ka pasal in ka hnung a rawn chul hluau hluah na vang chuan ka harh hawk hawk a. "Raino luak chhuak nei miah lo tur a fa siam dan ngaihtuah a țul ani" tidut dut paha ka sam min țawn țhat sak lai chuan ka lo ner nawng ringawt.


"Tun a mi chu a hming tur ka hauh lawk diam tawh si a, tun a mi i hrin hun ah chuan kan awl vang vang dawn nia" min thlem pah ti tih hian a lo tileh ta roh a, "I ninawm" ka ti hlar thung. Nui suk suk pahin min kuah chhuak a, Bawihpuia leh Bawihtei te chu khum ah an lo inchhaih nui hawk hawk a. Bawihtei pawn nau a awm thei ve tawh khawp mai.

Pa ber pui roh hian ka nau pai lai hi Mipa anih chuan a hming a tan Alex Ngursangzuala a hauh lawk tawh a. Hmeichhia anih chuan Lawmsangzuali a ti thlap tawh bawk.


Khum bul kan thlen phei hma deuhin ka phone a rawn ri dar dar a, Carlos-a chuan khum tlang ah min țhut fel tir hnu a phone chu min ban sak a, "Tunge a" ka uak na avanga la chau ru deuh hian ka zawt a, tun țum ka naupai chu ka thin a chhia in ka luak zawh rual hian ka chau em em zel.

"Hades" ti sup in phone chu min pe a. Khum ah a lawn kai ve nghal vut bawk. Kan fate chuan an lo bawh that that a. An pa pa len zia an hrechiang bawk ang; an bawh rawn hmiah zel.


Phone ka chhan rualin "Dubai lam ah ngawt i thang a, min la hreve maw?" ka han ti nghal a, Zan dar 10 a pel tawh. Bawihtei te unau chu chhun ah an mut vang in zanin pawh kan meng rei leh viau ang.


Lehlam ami in "Nupui ka ru" a rawn tih thum dut rual chuan meng kawk pahin screen chu ka melh a. Hades-a number a țang ngei chu a ni si!


Mak tideuh hian "Tak tak em? Tunge?" ka ti deuh hu a. Chutia a han ruk ngawt tur nula chu an awm mai thei in ka hre hlawl lo a ni.

Hades-a chuan "Cindy.. ka ru, naktuk ah lo kal ang che u" tih zawng sawiin a ti tawp daih anih chu!


Hrilhhai deuh a ka ngawih deuh ren rawn laiin kan pa chuan "Eng nge i țhianpa chuan a lo sawi a" a lo tidut a.

"Nupui a ru" tihap a ka han en chuan "What?" a rawn tive hluai tho.

"Cindy.. " ka tihleh chuan nui ta sukin "Cool, a senior rei tawh mah mah" tih pahin side table chung a a phone chu a ban ve nghal a, Hades-a a call dawn tih ka hriat vangin an pafa kiang ah chuan ka han inthawlh ve nghal sawk sawk.


Rang em em in "Mamma" min lo tiin Bawihpuia chuan hnute a lo dap leh chat tawh.

"Kan Hades-a zet chu le" ti nghut in phone chu a ti tawp a. An inbiakna hre chak deuh a ka en ha ha chu a awm ah Bawihtei zawk chu kuah bet hlu hlu pahin mitko a ti hnim khui bawk.


"Naktuk hi Cindy leh Doctor.. a hming a sawi kha ka hrelo. An inneih ni tur a nia, man inhlan a, inleng an neih buai lai takin Hades-a'n Cindy a va ru chhuak hmiah anih chu.." tia Hades-a chet dan a han sawi zet chu atthlak ti lutuk in ka nui chhuak hak hak a! Naktuk ah fiah tak a an insawifiah chu a țul khawp ang.




Khum che deuh suih a reh fel hma hauh in ka hnung lam ațang taksa lum vung vung in min rawn kuah hlu hlu a, ka kawr chhung ah a kutphah lum thup chu a rawn zen lut a. Kei erawh nuihza insum zetin thawk ka lo chelh char char thung.


Ka hnute rawn hup turin afapa kut a hum tel chut rual chuan phun luk in ka tukhum ah a rawn fawp nghal tawk bawk.

"Ka fapa mah nise ka thik deuh tho a nia" ti nghut in a rawn inbeng kang vut a, ka darah khabe a rawn nghat a, ka awm zawn a Bawihpuia muhil thawk la siai siai chu a rawn melh ngur ngur bawk.


"Muhilh hle hle rawh" lo tiin ka nui rah rah a.

Ani pui lah chuan "Phawrh chhuah sak kha a harsa lo" ti hluk in ka hnute hum țai a Bawihpuia muhil kut chum biang chu ka kawr chhung ațang a pawh chhuah sak ruai ruai a. Tihngaihna hi a awm hlawl țhin lo!


A fapa tiharh miah lo a a kut a phawrh chhuah sak fel hnu ah chuan "Kha kha ni mai lawm" a la ti ang deuh deuh a, ka hnung lam ah mu thla leh dawtin ka kawr chhung ah a rawn zen lut a, hneh zet a ka hnute rawh hum pah chuan a hmai a ka tukhum lo nawrin thawk a la suai suai a, "Ka ta a ni a, ka thu ber" a tih thawp sup rual chuan ka kiu in ka nghawk nghal sawk ringawt.


Carlos Zohmingliana hian a chhungkua te min venghim tlat dawn tih ka chian em avangin a ang chhung ah hian ka hahdam a, a thlazar hnuai a awm tluk a thlakhleh leh tur chuang ka hre hauh lo hawk.



Kan nun ațang secret service lam pawh an reh ta hmiah a, an reh hlen ang em tih lah kei a lo hriat ve phak a nilo! Mahse, tu mihring pawh rawn che chhuakin kan chhungkaw chung ah kut lek rawn tum leh țhin mah se Ka Pasal Carlos Zohmingliana hi an tawn tlang zo ngai dawn lo. A fapa vang a chakna nei, patling rilru huaisen lutuk hi thupek hmang a che chhuak țhin mihring satliah te tan hneh theih chi rual a ni lo!


If you want to be ORIGINAL,
be ready to be COPIED 😝
Attachments
InShot_20191030_081402078.jpg
InShot_20191030_081402078.jpg (91.43 KiB) Viewed 84252 times



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)