KA HMANGAIHPA ZORAMCHHANA By Abbra Reo Ririni Khiangte (PitarteiSualfingi)

Moderator: Abbra Reo Ririni

Abbra Reo Ririni
Posts: 1237
Joined: November 10th, 2016, 8:57 pm

Re: KA HMANGAIHPA ZORAMCHHANA By Abbra Reo Ririni Khiangte(PitarteiSualfingi)

Unread post by Abbra Reo Ririni » September 15th, 2021, 4:16 am

Step-a kan chhuk thla tur chu fimkhur em em hian min hai kai thla a, kan hnung a u Dtei te nupa lo kal lah chuan kan pa min han buapui vel dan chu fiam tak ah an lo nei leh nghal.


"Ngawi hle hle rawh u" ti nghutin pakhat pui lahin a han khak hluk zel.

"Fa nei tam chi pawh in ni dawn tawp lo" u Dtei'n a lo tih hlak chuan rum deuh nghutin a han hawi let a, "eng aia ngawt chuan maw?" a ti thum dut a.


Ka û-i lah chuan a chhaih buai rei thei tawh dawn lo tih a hrechiang nihmiang, "Awww, in nu rai i sawngbawl dan em em hi a lutuk a lawm, pakhat a pai chhung lek hian a dang siam zui peih loh khawp in i vir-buai chau hman ang" a rawn ti let pek a, kan pa tihngaihna hrelo tlawm la laklawh lahin "in pa ai khan ka la in fit ang" a ti ta khawlh mai le!

U Ngaihsaka te nupa an nuih hawk laiin "Hey" zawi zet in a awm zawn ațangin ka han vin khar khar a, Ani pui lah chuan min nuih sukin uluk deuh hian min kal thlak pui leh mai a.




U Dtei lahin tifuh a han intilaileng khawp a, dutawk ta mai lo chuan "mi te la tih ngailo ti bik ang maiin a rai tih i hriat ațang Lo lam ah riah luh i țhulh thul, i zau pui te pawn i hnung lam ah an sawi an sawi tawh che hi" a lo ti zawm zel a...



A tawpa kan pa tihngaihna hrelo chuan thaw huai pahin min han din pui leh rih a, "lo sawi ve hlawm mai mai teh se" a ti deuh ta hmuk a.



U Dtei nui kar kar reng chu rum deuh hian ka han melh let ve e ka ti a, ani lah chuan " kawng en țha hle hle rawh, i tluk palh zawngin in pa khan nang nilo in kei a sin min burbun vek dawn" a la rawn ti hram zui.


U Ngaihsaka chu a lo nui kur kur reng a, Kawngpui kan thlen thlak rualin kan pa chuan ka darah min kuah nghal hlun a, keipawn a kawngah rang deuh hian ka kuah let a. Lunglen tizual tur tîng a thla eng ruih in kan hlimthla a siam chu kal pah a en zel in ka nui ka nui a.



"Țhianpa, chawlh i nei mai mai thei tawh awm silo va tiraw?" u Ngaihsaka'n a lo tih chuan kan pa pawn hna a zawm hnu ah chuan chawlh chu sawi loh, a buai viau tur thu a hrilh sup sup a.



An țhian dun chuan an țuanna tlang dang ta lutuk tur chu an huphurh ve hle in ka hria.



"Aaa, a țha lam ah ngai zel mai ang, nangin ram hna thawk lovin hahdam zawk in ei i zawng leh thei tawh dawn a, chu tluk a hlu chu a awm hleinen tiraw?" a han ti leh khauh a, lo uan na-chi a ni tawh biklo tih hria in u Dtei pawh a thutak ve ta viau bawk.


"Matei pawn nau a hring zui mai ang a, naute a sen lai zawng chu zin chhuah pui chi ani awm silo a, aaa.. keini lam tal kan rawn tla thla thei tur ah ngai ang" ngaihtuah tam hmel zet hian a lo ti leh hulh a.

A țhian sabeng; khawi î lo kalna ah a zui ber țhin in sawrkar hna a thawk tur chu lawmpui lo a nilo a, awm hran erawh a hreh thlû ngang tih a hai theih loh.


"Umm, nangni lam tal in rawn che chhuak țhin a niang chu" kan pa pawn ti ve nghutin min kuah lohna lam ban in a țhianpa darah chuan a han hmer sak salh a.

"Ka nu leh pa te hi min lo ngaihven sak deuh a țul dawn a nia" zawi thum dut a tih zawm leh in u Ngaihsaka bu nghut nghut dar chu a hmer leh salh salh a.


Thla a engin kan hun tawnin a zir em bawk nen an țhian dun thu inchah vel dan chuan min déh dan a danglam zar thei mai a..





"Lalati te unau tak pawh hi ka lainat lawk a nia, nitin zan tin a in nupa hming lam lo a awm thei lo an nia" u Dteii'n tih vang vang laiin ka mitthla ah Lalati te unau an lo lang a, keipawn ka ngai reuh ngawt ang. "An insawi theihna ber kha in ni ve a.." ti leh in a han nui tel hak bawk a.

Kan pa pawh a kiai ve suk mai, min ngaihlu thiam in mi an dahsang țhin reuh si a, ka vah te unau avang hian khua a hmeichhe naupang zawng zawngin an inkhualtelem chang pawn ka lem chan kher an chak phah a, a chhan pawh an ni unau hian min chawimawi thiam tlat a.



"Zanin tlai chaw ei lai te khan 'apa Ramchhana leh Anitei te chu Aizawl ah an awm daih tawh dawn sia, min hre tawh miah lo ang, an lo zin leh hun ah chuan min hai a anga, a zahthlak tawh ngawt ang' te an ti ve chhen reuh a, an lo ngaihtuah lawk thui ve khawp mai" u Dtei vekin a han tih leh chuan kan pa chu ka han melh chho zeuh a, amah pawh chuan min lo thlek ve vutin a thaw chhuak huai ta ngawt.




Kan in kan han thlen chhoh ve tak ah chuan rin ai takin lo leng lut chu an țhahnem phian a, Inchhung kan luh hnu reilo te ah current a rawn thi pek a.



A lo eng leh mai ring a Bati ngawt chhia kan nghah deuh ren rawn hnu ah pawh a awm leh ta mai silo a.

"petromax a awm reng a lawm, current te mai mai chu lo thi se a ni mai" tiin ka pa chu an nupa mut pindan ah a lut thuai a.



Hrethiam lo deuh a ka bul a ka pasal țhu ka en chuan "i la nau deuh ka tih tawh kha" ti sup in min lo nui suk.


"Vel a che aw" ka ti deuh ringawt a, chutih lai mek chuan ka pa pawn thil eng thil emaw hi a rawn khai chhuak a.

"Ehe, i va la neih țhat hmel ve?" Patling ho chuan an lo ti nak nak bawk nen ka hrechiang chak zual sauh.


"Biakin puiah inverter kan hmanna te hi a la rei hleinem, sawtiang hlir saw inkawm lai a current a awm loh chang pawn kan hmang a, Bikin chawkidar in a pump lauh lauh zel" nui tlar tlar pahin u Dtei'n a lo ti ve leh zel a.

Chutiang pump chawp ngai 'eng chhit theih' a awm tih pawh ka la hre ngai miah hleinem.



Ka pa thil lo khai chhuah avang chuan Naupang lam chu an lo phur ngang mai. Ka pa chu an bawr nghal laih laih a.


Keipawn hmuh chian ve loh hlau in ka țhutna ațang tho chhuak meuh in chaw ei dawhkan chung a ka pa inhung fel chu ka pan pheia. Ka pasal in "Mambawih" tia min nuih hawk na pawh chu ka ngaihven thei lo.




Ka pa chuan uluk fahran a Rambo polythin a petromax tuamna te a han lak thlak fel chuan patling deuh te pawn an lo kil țak țak a. Khawnvar tui an han thun leh te te a, naupang kut hlei zual deuh chuan khap an tawk ngun mawlh mawlh viau bawk.



A mantle lo chhe tawh chu tlak leh a mei alh a an deh kai hnu ah an han pump lauh lauh a, ka pa in a duhtawk meuh ah chuan current en lai ai mah in kan inchhung chu a eng ta pup mai.



Naupang haw haw dar dar chu "tumahin petromax hi hnaih loh tur, a mentle hi in sut thlak chuan thlakna tur a awm tawh lo a nia" tiin an han vo hau pah a.



Ka thil en zo kan pa te țhutna lam ah ka va let leh chuan nuihza insum tak hian min lo en ngur a.
" A hmuhnawm bawk maw?" a lo ti nghut. Min fiam tih hre tho mahila ka la hmu ngai miau silo a.

"A va mak em em, saw ti-sawn zan-khua in a eng thei ami?" bangbo deuh a ka zawh tak ah chuan "zan khua chu daih bik lo e, tisawn a eng saw a 'dim' ve leh tial tial ang a, a khat tawk a Pump a țul ve reng zel" tiin țha deuh chuan min hrilhfiah a.


Eng te kan inchhit fel hnu chuan ka pa in Bible chhiarna neiin thu tlem a han sawi a, kan nupa chu kan awmna hmun apiang ah chhung inkhawm thlah thlam lo tur te, nu leh pa te kiang ațang a kan awm hlat tak avang a zalenna hmang sual lo tur te in min han chah leh dap dap a.



Chumi zawh ah țawngțaina tawite nei leh in nula te chu an che nghal zung zung a.


Thingpui hang leh thlum an lo sem a, chhangban kan nen a ei pawlh turin kurtai an chhuan tui bakah behlawi rep te an lo bai tel chu niin, naupang lam in chhangban a kurtai chhuan tui leih chu an lo duh ngang hlawm mai.


"I zun a in palh ang e" ti dut dut a kan pa min khap ngai hial khawp in Behlawi rep bai thak nen ka han ei mai chu! Per 10 zet ka ei zo hem mai.



Inleng tam zawk chu an țin țan a, petromax thim țan riai riai chu kan pa in a pump ve ta a, hmuhnawm ti zet a hnai tawk ah ka dinchilh chu min lo en in a kiai suk suk reng a.



"Naupang Se (sial) en nghal lo" ti a min han fiam zuk roh chuan "pump țha hle hle rawh, ka pa ai khan i pump eng har zawk a nia" duai lo fê in ka lo ti let a, ani nuih za lutuk chu vanvadak meuh in a nui chhuak ta huk huk a.



"Ka sawi kha maw... i bulah a awm hi chuan a nui tam ve a sin" ka bul chet ah lo dingin u Zotei chuan a rawn ti sar sar a.


Keipawn ka thusawi ho te mai lawm a ka pasal nui hawk hawk chu en in ka seih ve sak a, amah a palian in fiamthu te thawh a a ri meuh a a nuih chhuah tawh hi chuan patling ngainatawm tak hi a ang ka ti țhin takzet.


Kan in pump eng fel leh hnu chuan chhungkhat hnai la țhu khawmuang te kiang ah chuan kan va țhu phei ve leh a.


Tleirawl țan ek ek lamin "keichu Aizawl ah ka awm ve chak e" an lo ti nghal a.

"Khua ah lehkha a zir theih chhung chu khua ah ngei zir tur" an pa Ramchhana'n a lo tih nghut chuan "kan headmaster fanu te pawh Aizawl ah lehkha an zir a, Hostel ah te an awm a, an ngo tawh bik tawp, Aizawl a awm chu ngo nan hrim hrim pawh ka chak ve" an han tih zawm a.


"School ban ah bazar ah te an leng kawi a, tv a fakna lo lang țhin dawr ah ah te khan an kal a, an thil zawrh a țha thei hlawm lutuk an tia, an lo haw pawn thil an lo hawn Cial thei rapthlak" an han tih ngial pawn an pa Ramchhana thengthawng ah a thawk pha mang silo.



Ka bul ah an han ngen leh deuh ringawt țhin a, kei lahin han hnial ngaihna ka hriat loh chin ah an nu leh pa te ngaingam lovin an lo khap zui thuai a.

"Anu te chu inphakar e, pa Ramchhana'n a phal loh laiin in ngawi tlat a, nu Mambawihi'n a phal vel ah in han phal lo leh a...." an ti a, kan nui dar dar reng mai.





Inleng te haw hnu ah chuan current a la awm ta lo fo a, petromax erawh ka pa'n a ti hlum a, mu tur a kan insiam fel meuh chuan zan dar 11 a hnai thuak a.



Khum bul stool ah bati pakhat ka chhi alh teng teng.

Kan mut dawn ah tak tak chuan "bai kha i ei hnem ve si, naute in thak a ti ang" ti deuh tlat in coconut tui min in tir leh hram bawk.



Kan han mu chu ka pang delh a nawm loh deuh avangin Zoramchhana hnungchhawn zawngin ka mu saisir a, a ni'n ka hnunglam ațangin min lo kuah hlu hlu a, zan mutna ah hian kekawr bul chiah a inbel țhin avangin a awm tisa ngai ngai leh a bawp hrawl zet, hmul in a bawh dap mai si reng a awm hi a thlamuan thlak bik ka tiriau zel.



"Lalapa?" zawite a ka tih rual in ka tukhum ah a rawn fawp a, min kuahna a ti nghet salh bawk.


"Naktuk inrinni a nia, Lo ah riak lut ila, sunday tlai ah emaw kan haw leh ang a" ka han tih chuan atthlak tih hmel deuh hian a lo chet hluk a.

"Ka ti tak tak.. mawh, chawlhni kan cham ani ve mai a, vawi khat mah Lo ah ka la riak ve hman hleinem?" pangchang deuh a ka tih tak sek sek ah chuan "Thosi an tam a sin" a lo ti khauh a. A ngaihtuah kim thei si.



"I chhuanlam a nih chu" ka ti deuh hmak a. "Malaria kai a hlauhawm a lawm, i rai bawk si" ti dam dap in ka kawr chhung ah lo zen luh a tum chu a kut chu ka phih chhuak nghal sawk a, ani erawh a nui ngawr dawt thung.


A bawp a min kher nghet zaul sauh pahin a lu kan deuh in a hmuiin ka beng a rawn nawr a, " a tu zawk nge titau che u" a rawn ti dut dut a.



Kei lahin rang deuh in "naute leh keimah" ka lo ti let hlar a, ka beng bul ah lo nui leh suk in lukham ah lu a nghat leh ta a.

"Naute pawh a tituau tel ve zel amaw?" zawi ruih a a lo tih chuan "aw, Lo a hmu khat tawh dawn tih a inhrethiam ve reng" ka ti nghal zat a.


Chutah, fan deuh ruih hian "kawng dang a va vang ta ve" a rawn ti a, ka țawng leh duh tawh miah loh avang chuan amah pawh chu a han ngawi deuh vung vung a, rei ngial hnu ah erawh "zingkar ah subcenter ah thosilen han chiah ila, chawhnu lam ah riak lut tur chuan kan kal dawn a nia" a lo ti ta a.



Phur takin a kut chu hum in keimah zawkin ka kawr chhungah ka zen luh tir a, lungawi hmel deuh in ka dul a chul kual rauh rauh phawt a, chutah ka hnute bu chu awmze nei deuh hian a lo tuai kual ta a, ka pum a nau insiam avangin ka hnute chu a hma zawng aiin a țang kawh zual a, ngawi vung vung a khalh kual reng hnuah chuan "Ka chanpual chiah a ni rei dawn lo tlat" a lo ti chhuak ta phawng mai a.


Chutiang thil a lo sawi ka ring lawk lo lutuk bawk nen ka nui chhuak hak a.


Ani lah chuan thutak fe in "min chuhpui tu tur hi ka fa a ni kher dawn bawk si, tunge thu zawk ang? Keimah nge amah?" a ti leh mauh mai a.


"Lalapa leh" ti paha a chhip sam ka han ban chuan a nui ve ta suk suk a.


Kei zawk pawh hian kan fa hi lo piang se, thikna tur ka hmuh fo te'n ka ring țhin, keimah aia a fa zawk a han duat vel tawh tur te chu hlimpui viau siin ka thik ru deuh tlat lawi si a, hmeichhe dangte hi ka awm ang hian an awm ve țhin tho ang em le?
"A pa ka ni a, ka thu zawk tur ah ngai ang " ti nghut in chet a la zawm nghal a.






Hetihian ka ngaihtuah țhin, 'eng nga tinge Zoramchhana min duhna kha ka lo hriatthiam har em em le?' tiin, Dinpuia kiang a ka hun khawlhral tak zawng zawng te kha ka ui thar leh riau zel.


Hmangaih diktak i tawn hun ah ka rilru ang hi min țawmpui ve thei chiah ang.


Kan intawn hma a kan hun lo khawhral tak zawng zawngte kha 'ani' kiangah hian lo hmang ral ila nitur, tia i hun liam tawh ui vawng vawng a siam theihtu che chu tupawh lo nise i hmangaih takzet a ni tih inpawm tawp mai rawh.




Zingkar ah ka han harh chuan tuk dang ang lo takin kan pa pawh chu a lo la muttui viau mai, parda in kau deuh ațang a ni chhuak ka thlir chuan dar 7 a rik loh vek pawn a teuh tawh viau in ka ring.


Sub center ah thosilen chiah hnuah zar ro leh phawt te kan la ngai dawn tih ka hriatchhuah rual rual in kan pa chu ka sawt dat dat a.



Amah ang lo takin mit a rawn meng mai hauh lo.

"Lalapa.." ti a ka sawi deuh nawk nawk pawn tui lutuk a muhil ang mai hian thawk a la suai suai a.
A han tih vel dan mai mai chu! Lo a min riah luh pui loh nan thawh a hai der niin ka hre ta tlat a.


Dimte in a sam kar ah ka kut chu zen lut in a lu-lei chu ka hiah sak a, "lalapa chu a chau aniang, tihian lo mu se, ram riahna a kan ken tur thosilen kha ka lo han chiah ang e" naute zawk bia ang zaih a ka tih tak ah chuan a rawn meng chhuak ta hlawl a.


Kei lahin "muhil der pa" ka lo ti nghal thawr a, nui suk suk a ka dul ah a ban pahnih lo suih beh pah chuan ka malchung ah lu a rawn nghat a, phakar berbur roh lutuk mai.


"Lo a kal chu i ti țal a mi? I tluk sual palh chuan a pawi viau dawn a nia" ti hluai in a hmai chuan ka dul hnuai lam chu a nul dun dun a.


"Ka tlu sual bik awm lo e" ka tih lahin "chin hriat a nilo, lo pan thlakna a rem bawk silo" a lo ti bung nghut.

" i lo kal ve loh pawn keimah in ka kal tho ang" ti ve hmak in ka taksa a ban suih beh chu pawh phelh ka tum a, lo hawi chhuakin "a tu zawk nge titau leh tawh che u" a lo ti nghal dut.


"Ka hrilh tawh dawn lo che, nizan ah pawh lawmman kan inpe vek tawh a, tun a tak a sawi nawi leh.." ka tih tak hlak hlak ah chuan a nui ta ruh ruh a.


Lungawi deuh chuan kan tho chhuak dun a, ka khum siam chu min pui leh zet in patling fe a ham hawk pah in kawngkhar chu a pawt hawng a.


Kan inzui chhuah rualin ka nu leh pa te chuan kan mu țha em tih min lo zawt thuai a.

U Zotei a lo la tho chhuak bik lo a, chaw chhum siam in gas awmna lam ah ka tlang phei phawt a, ka dul a len ve tawh avang hian hmun han hawl vel hi chu u Zotei lo tho chhuakin a ti mai zel, chhuat nawt tur erawh kan nei țha khawp a, Apuitei nau te ho hian tlailam ah an lo nawt a, a changin ka thuamhnaw hlui te ka pe a, a chang chuan "kan pui ve cheu a lawm" an ti ve reuh țhin a, an ni Zoteii'n engkim a duh uluk zia an hria a, vawi hnih puan huh leh a ro in an nawt nawn ziah zel.




"Nu, chawhnu lamah hian riak lut turin Lo ah kan kal dawn a nia, naktuk chawhnu lam ah kan lo haw leh ang" a han tih chuan a ngaihna hriat loh hmel deuh in ka nu chuan a fapa chu a thlek a.


"Mambawihi kha Lo a hruai i tum elaw?" awm anglo tihhmel zet hian a ti kha kha tareng bawk.

"Aw, Vau-ah thang ka kam ang chu ka ti, a nih loh zawng in bal nawr tur a Sanghal an lo luh a hlauhawm tlat.." a ti duah a, ka rin ai takin chhuanlam tur a hre fu mai.


Ka nu vek chuan "I tiawmang lo emai a, i duh leh nang kha lang in va kal la, Mambawihi hruai tel ve chi pawh a nih loh chu... a tluk sual palh te i hlau lo em ni? " a ti ta bawrh bawrh a, keima rawt chhuah zawk ah ka pasal in hauh a tuar chu a zialo ka ti khawp mai.



Țawng ve tur a ka han ang ziau chu Zoramchhana chuan a mitmeng in min lo khap bet thuai a, "a thlai chi thlak te pawh an zam ve deuh duah tawh a, a hmu ve chak ang chu" a han ti leh then a.


Țhutthleng sei hnung a ka ding zum zat mai chu ka nu chuan min lo thlek thuak a.
"Mambawih, Lo a kal chu i duh em ni? Inpa pui hian a tur lui che a ni lo maw?" a tih laia chhan tum a ka an ziau lai chuan "aw.., eng em an va tibik nang, va riak lut rawh se, Aizawl an chhuk phei chuan an lo haw leh chin tur hriat pawh a nilo a. Mahse, thosi a tam tawh si, kan ddt neih ang ang kha keng ula, thlam bul vel ah phul chhuak vek ang che u" ka pa'n a lo ti ta hleuh mai a.


"In va timak pafa e aw, Mambawihi hi tlu sual palh ta se a pawi ngawt dawn a sin" zial zial pahin ka nu chuan a ti leh hram a.


"nu, eng ka va ti em bik nang, thlam bul a kan pangpar chi theh te kha ka hmu ve chak tawh reng reng a" ka tih ve tak ah chuan ngaihngam zan lo hmel pu chung hian a bu ve ta hram a.



"Thosilen hi kan han chiah tir ang e" pakhat chuan ti in a tho hluai a, inphih fai tur a bualin ah kan luh dun hnu chuan "ka nu meuh in min hauh phah a, lawmman ka dawng țha viau tur ah ngai ang" ti a nui suk suk in min en run run a.


"Pu Lawmmanlian" tia a ha nawhna ka pek tak ah chuan lungawi hmel takin a lo ban ve ta mai a.

Thosilen chu bucket ah dah in kan inkhai chhuak a, ka nu te in kan kal tlang tur chu Lalati te unau in min lo ngen chul a, Aizawl kan chhuk dawn tih an lo hre thawi ve tawh nen apa Ramchhana nen kan khawlai kal min hmuh dun hlek tawh chuan an phawklek titih nghal tlat tawh.


"Anite, kan lo kal ve duh" an lo ti tung laiin pakhat pui chuan "in inhlei dawn lo chuan lo kal ru" a ti dut a, kar lo ah thing phel chhuat a an tlak țak țak ri leh kawngkharpui in nam hawng bur ri in a zui a.


"An thawm te chu a mipa naupang țek țek a nia" lo ti hluk in step chhuk rem lo zet a an lo tlan thla chu a han thlir a.


A nau zawk hmanhmawh bawk si chu kawngpui a lo rah fel hma chiah in a tlu bawkkhup ta thlawrh mai le!


Apa Ramchhana'n 'lo han haw leh mai rawh' a tih a hlau bawk si nen ţap pawh țap chhuak ngam lo hian a men ta țiau mai a.

"Fimkhur tur" ti sup in zo zet hian a zuk pawm tho nawlh a, "a na em?" ti a kan han zawh lah chuan apa Ramchhana darah bei then in "aih" a ti țiau a. Mahse, a kiu leh khup pilh hrup ațang chuan na lo chu a nilo tawp ang.



Subcenter chu an lo la inhawng lo nangin thawktu te hian a bul lawk an luah avangin thosilen chiah duh an awm hi chuan mi an tihsak zung zung mai zel a.


Keni pawh chu phun nawi hlek loin min lo chiah sak zung zung a.

"Hetiang a a nachang hriat hi a țha, țhenkhat ngaihsam lutuk hi Malaria nen an lo haw leh țhin a, thosilen chiah hian mi a veng ve lutuk tih hi pawm in rawn chiah ve mai se ni tur a nia" thawktupa chuan a ti bui bui reng a.



Bucket ah bawk in dah lut leh in kan in lam a zar hul turin kan inhawn thla a, Seventh day kohhran inkhawm kal tur te nen kan intawk diah diah hlawm a.

Lalremruati pek chuan "Vawksa ei lo pawl" a han ti hram a. A nau Matetei lahin "a țhen chuan an ei ru țhin reng" a lo ti ve bawk a, a pa Ramchhana'n "lalremruat, sawi awm leh awm loh hre țhin rawh" a han tih deuh hluak ah chuan a ngawi leh dak reuh a.

Kan kal pelh tak te hmaizah a na duh kher a sin!


Dawr te kan han kal pel tur chu thil lei an ngen unau ta tlat reuh a, nepnawi te kan lei sak hnu chuan lungawi deuh in an in peng ah chuan an tlan chho ta khat khat a.



In kan thlen rualin tual zawl a tlangban ah chuan kan inzar nghal a, chaw ei an lo peih tawh hle hi a ni a "In riak dawn maw? Ka lo kal ve mai dawn" u Zotei'n chaw kil lai a a han tih zeuh chuan a u in a lo hnial rang kher mai.

"A țullo, ka nu te lo awmpui rawh" a ti nghut a, u Zotei lah a U hmuh loh in a nui rah rah tawh mai si, "awmpui an ngai kher bik nang, Mambawihi nen a kan pangpar chi theh te pawh kha ka hmu ve chak a nia. Nu, ka Ubte rualin ka riak lut ve mai dawn" tia a țan der tak tlat ah phei chuan tur deuh khuiin a nau chu a melh ta a.


"Pangpar chu Mambawihi'n a thla a lo laksak dawn che a nia, naupang zirtirtu in inkhawm țhulh ngawt tur a nilo" ti țûngin a nau chu a hnial let ve zel a, u Zotei nuihza insum zo lo chu chaw kil lai lai chuan a nui chhuak ta chiam mai a.



Pakhat pui roh pawn a nau in a fiam vel mai mai tih a hriat tak ah chuan a thleng chawi in a kham ta vut a. Ka nu leh pa pawh an nui ve kar kar mai.




Chawhnu dar 1 pelh fel awrh ah Apuitei pa in min va thlah a, in ațang Sangha rep leh Sanghal sa rep kan keng a, kawngpeng ah kan han chhuk thla chu mi hi a veng run mai a.


Ka thingtuai hawl tur min suih sak tawh reng si a, chutia min veng leh lutuk chu kei lahin ka lo ning ve tumhrang si nen ka vin khar khar reng a.


A tawpah ani tih ngaihna vak hre ta silo chuan "naute zawk a lawm ka ven" a lo ti ta ngawt a, a palen teh lul nen chutia naupangchhia zet a a rawn țawng ta nulh mai chu ka nuih ta nghek a.



"Kal țha hle hle rawh" ti a nui ve suk suk in țha te te chuan kan inzui thla a.

Nu țhenkhat chawhhmeh la a kal te haw lam nen kan intawk zauh zauh a.


Kan Lo kan zuk thleng chu ka khek rai rai reng a, buh kung chu an lo lian tawh in an hring dul a, thlam chhak leh kawt velah lah zamzo leh sap par an lo vul chekchuk a, thlam kan thlen rual in ka pa chah angin thlam leh a bul vel ah chuan ddt a phul kual hmasa phawt a, namthlak ah țhu chungin a thang kamna lai tur te chu ka lo zawt ve zauh zauh a.




Thlam a khawih ngai te a khawihfel hnu chuan Bal leh kawlbahra hmun lam ah min hruai phei ta a, thlawhlai chu a zawl dap reuh bawk nen min veng lutuk ta biklo.


Dawl lo duah hluahna piah vah loh chin ah chuan thang a kam a, kei chu thingbuk hnuai ah țhutna nuam deuh min siam sak a, tui in turin min au dut dut reng bawk.

"I zun a in palh ang" a ti ve chhen roh a, rai laia zunin a awlsam bik zia chu a lo hre fuh ve nihmiang, keipawn thuawi deuh chuan ka in ve zel tho.



Dar 4 dawn ah a inkam zo kan han let chu tui hmun nuam zet ah min chawlhpui a.

"Hetah hian ka inbual zuai ang aw?" ti sup in a hmanrua vel chu a dah thla zung zung a.

"Ka inbual ve dawn" ka han tih chuan a lo phal lo nasa mai, "a țullo, nang chu thlamah" ti nghut in a hnathawh kawr chu a hlip pah a. "Naaa, tumah an awm chuang loh hi" ka tih ngial pawn zu han phal țhak lo va mawle. A kékawr te chu a hlip sawt sawt a.


Ka hma ah ruak deuh kung a a han din meuh chuan hna a thawh rim em avang a a taksa inphiar sek fat mai chu thlan in a lo bual huh dap a, "inbual i tum tho a, keipawn lum ka ti ve reng sia" ti nai nai in a ipte pui chu tui in a per phak loh tur ah ka dah țha a.

"Thlam thlen phei hun ah i inbualna tui tur chu ka va khai mai ang" a ti țung roh si a, a inbual chu a hnung ka nawhsak a, a kut leh ban rek vel chu a thang kamna lamah a intipem nual a.

"Dettol hmehchhuah ka pai a ka hnawih sak dawn che a nia" tia dim zeta a kut phah ka nuai phawn sak lai chuan a lo nui hawk a.

En thuai paha "enge?" ka tih lahin "mipa hnathawk te chuan kan inhliam tur a lawm" a lo ti sam then a.

Ka ner khum nang nang a
" hemi kak te hi damdawi hnawih țhat loh chuan a pun ang a sin" ka tih pawn a ngaihpawimawh hmel loh khawp mai.


A intleuh fai zung zung a, thlam kan thlenphei rual in ka inbualna tui tur chu țin in a va khai tak tak roh a, tui hmun ah khan tumah an lo kal der silo, ka inbual kha phal ve hle hle se nitur a nia.



Thlam luhkapui ah chuan ka inbual a, changkha leh berul vel a zam buk laih avangin min lo thlir tu pawh awmse min hmu thei kher lo ang, ka inbual lai chuan belte ah chaw a lo chhum a, sangha rep chhum in Berul hnah te a thlak a, ka inbual zawh rual in chaw ei a lo peih chu a ni der a.


Thlam ah lu hru mawlh mawlh a ka luh lai tak chuan eng emaw hi a inkhawng ri deuh tluk tluk a, hrethiam lo deuh in ka pa chu ka en deuh hu a
" talhkuang a nih chu" a lo ti mai a.
"kuang a?" phawk deuh tak a ti in pawn lam chu ka en dawr a.
"Hlauhawm a nilo, riak lut emaw an haw dawn hian an khawng ri țhin a" a tih tak ah chuan ka thaw deuh huai mai.


"Kan nei ve em Talhkuang chu?" tia ka zawh chuan thlam namthlak lam chu a kawk a, mau bung ni awm tak leh a vuakna hmawlh fung chu ka zuk hmu nghal mai a.


Khawn rik ve chakna hian min tuam ta tlat a, "ka vaw ve dawn aw?" ka ti chiah mai chu a nui ta huk a, atthlak tih hmel deuh a kiai suk sukin "han vaw ve ta poh che" a ti a, rang em em in ka pan thla a, nichin a inkhawn rik dan ang thei ber tur chuan ka khawng ve ta kauh kauh a. Zau ruam ah chuan a ring duh kauh kauh phian lehnghal.


Chutia uar deuh tak a Talhkuang ka han vua chu kan pa nuih chu a za ngang mai.



Reilo te hnu ah kan lo mual lehlam ațang chuan pa pakhat hi a rawn lang teh hlawl a.

"Nangni elaw? Ka thang kam a talangin ka tlai ta phian a, in hman em ni?" a lo ti nghal thawr bawk.



Kan pa chuan nuihza insum zet a min lo en in thlam kawngkhar bul ah chuan a han țhu thla a.

"Pa Țhiang, keini chu kan riak ang, i Talhkuang vaw thawm kha kan nu hian a lo hre ngai silo a, a lo chhawn ve mai mai che a ni kha" a tih tak ah chuan chupa chu a nui ta heu mai a.

"a nih chu, ka kal tlang ang e, hei, ka thim lut dawn a ang riau mai" a ti ta a. Kei erawh sawi tur hrelo in ka ding ngawi kar ringawt.


A kal liam hnu ah chuan "kan khawn rik chuan kan haw ve dawn tihna a mi a?" tiin ka zawt nghal mawlh mawlh a.

"Umm, ri te haw tur a in auh ve na ang reng deuh a nih kha" a ti a, ka khawn ve chiam avang a thinur hmel a put tak loh ah chuan ka rilţam tawh thu ka sawi nghal zat a.



Khua a han thim tak ah chuan perhpawng hram ri leh lei hrik hram thawm bak ri dang a vang viau a. Eng emaw ti zawng tak a a nawm viau rual in a reh tlawk tlawk lutuk a, haw leh mai ka chak deuh tut tut a.



"Riak ve dang an awm em?" tim deuh hian ka zawt a, "awm ang, chaw ei kham ah hian kan leng dawn a nia" a lo ti tak nghut ah chuan phur deuh hian lu ka bu a.


"Len an phal dawn ami?" ka han tih leh ang he haw a.

"Phal awm tak" ti supin min nuih suk, chutah "hna țul lai tak tak chuan chhungkua a riak lut te an awm țhin a, tlangval lam pawn khawchhung ang chiah in an bialnu te an rim țhin a lawm, nula hmelțha deuh awmna thlam chu zan ah pawh a lun viau zel" tiin hna țul tak tak laia an hun hman dan te chu min hrilh ve dap dap a.


A nawm hmel ka ti khawp mai, meichher te nen zau a nula hmelțha deuh awmna thlam an pan țang țang țhin thu te, thlam chhak sawntlung ah țhu chhuak a tape play meuh a rik luih luih chang a awm thu vel a sawi phei chuan chung hun lai a riah luh ve chu ka chak ram ram hial thei.



"A nih leh kha... duty room ah i lo kal zan khan in nula rimna ah in intihbuai vang a mi chem te an thawh a?" dilchhut deuh a ka tih leh chuan nui huk in lu a thing nghut.

" a nilo maw?" ka han tih leh ngat chuan "Mambawih" lo ti fan ruih in Bati eng hnuai ah chuan ngun deuh hian min en a.

"Lo vah lai a nih kha, Lo vah na ah hmeichhia an riak ve ngai hleinem" a tih tak dut dut ah chuan ka bu ta nghat nghat a.


Dar 7 tlang vel ah chuan mei chher a siam a, thosi hlo min inchulh tir leh zet hnu ah "ka fanu duat hi ri te thlam ah leng rawh se aw" ti nghut in ka dul chu a rawn chul a.


"I chau em?" tia min zawh sup chuan lu ka thing thuai a. "Rin aiin ram ah i che thei zek reuh a" min han ti leh a.

" Ri te thlam a len loh thil tih chak dang ila nei em?" tiin min han zawt leh a, Lo a riah ka chak satliah vang a mi riah luh pui mai mai emaw ka ti kha a ni a. Mahse, ka thil tih chak zawng min tihhlawhtlin sak a duh avang a phun nawi lo a min riahpui ta mai zawk a nih zia ka hrethiam ve leh ta chiah.


"Aih, ri te thlam ațang kan haw hun ah kan mu nghal ang" zawite a ka tih chuan a lo nui a, nghal fe mai hian "a chakawm khawp chu" alo ti bauh bawk.



Meichher chu a han hliau kai a, Ri te thlam ah leng tur chuan kan inzui chhuak a.


Van ah chuan chhum awm khat pharh in thla chu a zahve aia lian hlek in leng vung vung a, thli a thawt rual a buh kung rim rawn leng ve chem chem te, thlawhhma leilung rim rawn leng tel ve chek chek te chuan boruak chu a tinuam dangdai takzet.



Ri te thlam kan zuk thlen chuan thlam chhak ațangin kan pa chuan a au hmasa dut dut a.

Thlam leihkapui ah chuan patling pakhat hi a lo chhuak a, kan nupa min han hmuh chuan "in riak ve dawn elaw?" a rawn ti sawk sawk a, an thlam chhung ah kan han inzui lut chu le!



Thukah chuan belpui lianpui pahnih hi an lo chher chhuan a. "Ehe, chhangban in chhum elaw?" ka ti chiam pek a.


Zoramchhana'n "Mambawihi" a lo tih sup chuan ka en thuai a, a mitmeng a min khapna chu hrethiam leh hnuhnawh mahila ka sawi zo vek tawh.


Chutah min lo chhawn tu khan nui deuh tut tutin "tui wine ah kan chan tir dawn a nih hi" a ti ta a. Ka bangbo lek lek nangin rim te ka han hriat tak ah chuan zu an chhuang tih ka hrethiam ve ta chiah


Nu ber chuan min besawm sawk sawk a, ka raipuar miau avangin dawhthleng ah ka țhu a, a pasal leh a pasal unaupa niawm tak chu an kai hmel tawh viau bawk, a khat tawk in kan pa chu an zu haw thar chu pek ve phet an tum a.


Nui chungin a hnar zel a, a tawpah erawh nu ber chuan "zufang ka nei tak a sin, hei chu a ruih theih loh, Ramchhan hawp rawh u aw" a ti ta a, kan pa pawn zufang chu a hnar ta bik lo.


Ka duh ve leh ve loh min zawh chuan lu ka thing rang khawp mai, plate te ah kan pa ta tur chu a suah chhuah sak a, an pathum a an zu thlawr ngawt an buaipui lai chuan tlem te hi ka kut a pir in ka ei ve zeuh a.

"A thlum em?" tia Zoramchhana'n min zawh chuan "a thlum a, a kha tel tho" ka ti sep a. Bu nghut in a hawp zawm ve leh mai a.


Kan inneih tirh khan u Jo-a khan Rum a in țhin a, kan pa han pek ve a tum khan "ngawiteh, ka bansan tawh" tiin anuih san mai a, ka u pawn pek luih a tum ta bik lo, a hnu ah ka han zawh chuan "a bawih ah ka tang hman țhelh a, tal chhuah nan a ka hun sen kha a uaihawm emai" a ti ve ta mai bawk, ka rinhlel miah lo. Khua ah ka awm tirh ațang zu rim a nam emaw hi ka la hre ngai tlat lo a.




Darkar chanve vel kan țhut hnu chuan pa ber chu a țawng duh mah mah tawh a, kan pa in let a rawt ta pawh chu ka lawm ru hle, kan inzui chhuak chu thlam kawt ah zung tur tur chungin kut min lo vai luap luap a.


Zu rui kar ah hi chuan thinthi a awm a harsa ka ti țhin, an ri deuh bual bual țhin si a, insual thut tur ah hian ka ngai deuh tlat zel.



Thlam khum ah kan han mu chu nuam ka ti ta lutuk a, inkhualtelem te hi ka inchan a, te fel kak in kan pahnih leng lek in puan kan phah a, thosilen kan zar vei dal bawk si nen ka nui leh țhin chu Mei eng hnuai ah chuan min lo nuih suk suk reng a.

"I kawngte a na lo ami? I kê te a kham em?" tia min zawt in "Lalati te țhian ho riak khawm kan ang e" tia ka che sek chu ka ban bul ah a lo chul hauh hauh a.


"Ka engmah a na lo" ka han tih chuan nui hawk in "Mambawih..." a rawn ti zawi ruih .

Kei lah chuan ngatinge a hma khan Lo ah hian min riahpui ngailoh a? A nawm reuh nen nen ka ti sek sek a, kan pa chuan lungawi hmel zet in min nuih min nuih mai.



" nau awih mut hla sa leh tawh rawh lem" tiin ka chevel hmuhnawm ti deuh a min thlir tupa bul ah chuan ka inthawlh sat sat a. A ban ka lukham fel hnu ah duat deuh a ka bek ah lo fawp pah chuan "zanin chu phone a mi hi kan sakpui a țul tlat" a lo ti ve thuai a.








/
Zingkar a ka harh leh chu hnai em em ațangin min lo thlek reng tawh a, tho phang deuh a nuih a a biang ka han chul sak chuan lo kiai suk in "lo ah chuan i riak ta bawk a, i hlim em?" min lo ti nghal dut.


Lu ka buk khum nghat nghat chuan puan sin chu nawr tawm in ka dul a fawp a, chutah ka chal ah lo fawp leh in "lo la mu ru, thlam chhak a thing khi ka ek khawl lawk ang a, chaw kan ei dawn a nia" a ti ta mai a.


"Ehe, eirawng i lo bawl vek tawh amaw?" ka han ti ang he haw a.


"Umm, nimin i kal nileng ve em a, i chauh ka ring a, Ka kaitho ta lo che a nih kha" a ti mai a, inbeng kang a Nam-thlak lo inhawng huau ațang khua ka han thlir zet chu chhun pachang a lo ni reng tawh chu niin.


Ka mu rei lutuk inthiam lo bawk si chuan "Lalapa, i rilțam tawh awm..." ka ti chiam ringawt a, a lo nui mai thung.




Chawhnu lamah chuan Apuitei pa bawkin min lo hruai a, in kan han lut chu kan chhungte chawlh ni chawhnu inkhawm bang chuan chanchin te min lo zawt zung zung a.

Kan pa in a thang kamna lai te ka pa a hrilh hnu ah "Kha, nimin in liam hnu lawk khan Ahmai pawn nau a nei a, mipa an ti tak a sin" ka nu'n a lo ti ta a.


"En sak ve tur a nih chu" kan pa'n a lo ti thuai a, kan inbual fai hnu ah luggage kan rem khah vek tawh chu hawng lehin u Mami nau puan min leisak zing ințawn khawm tel khat chu ka la chhuak a.

"Hei hian nau chu kan en sak ve dawn nia" ka tih chuan kan pa pawh a lo bu nghut nghut.



Zanriah eikham ah chuan inkhawm turin kan insiam a, chhun ah kan inkhawm silo a, nuam chu ka ti chiah lo.


Inkhawm ban rual in kan chhungkua chuan Ahmai te in ah kan leng kawi ta a, anu leh pa in ka hmel an han hmu chu an tim deuh dui mai a.


Mahse, ka nu leh ka pa an vengva hrim hrim a, rei kan țhut hma hauhin ka laka an țî deuh dûi pawh an tihziawwm sak a, țha te te chuan min lo bia a, a hnu ah Ahmai room ah min hruai lut a, nau enna puan kan han pe chu a lo lawm thiam ve khawp mai.



A fapa pianghlim hmel chu uluk deuh hian ka thlek a, nimin mai a piang mah nise Dinpuia a chhun zia chu sawi ngaihna a awm lo.


Ka nu leh ka pa chu chhuak hmasa in țhutkhawmna lam ah Ahmai nu te nen an titi a, kan nupa țhu hnufual kiang ah chuan "Dinpuia nu pawn min rawn be deuh reng a, ka lo be chhe chuang lo nangin naute tan an thil lo tihsak a atum erawh ka lo hnar a" a ti sep sep a.



Kan pa zawkin "an tupa ve tho a ni a, a pi leh pu in thil an tihsak duh a nih chuan hnial duh suh, tibuai hmasatu ah erawh zuk țang lo la" a ti ve ta khauh.


Ahmai chu a ngawi deuh vang vang a, mipa thu chu a dikin a hre ta deuh a ni ang. A bu ta nghat nghat a.




Aizawl kan chhuk ni tur a lo thlen chuan kan tho hma in eirawng kan inbawl fel zung zung a, zing dar 7:30 vel ah chaw kan in ei fel der a..



Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » September 19th, 2021, 10:32 pm

Mahse, țhenrual țha te lo chuang lut țak țak in "kan indan ve na che u a ni mai" tia, sai-ip khat hnawk a Zo buhfai te, buhban fai te leh bal eng îlo an lo luhpui țak țak ka hmuh chuan a lawmawm viau rualin hnuk a no dawn dawn a.


"In lo haw leh vat thei awm silo a tiraw? Khua ah ngei naute han neila, kan han pawmkawi nasat dawn tehlul nen" ti te in nutling ho chuan min han thlem fiam vel thul.


Min indanna tur a an thil lo ken te an in load fel leh hnu chuan kan inchhung ah vek kan lut ho leh a, Lalati te unau mawlh chu an lainatawm, kan nupa hlat ah an awm duh miah lo va, tu emaw in min auh a kan han che hlek te chu min veng ran in min um kual dar dar reng a.



Ka pa in Bible chhiarna hun nei leh in țawngțaina a hmang leh thlap a.

Min thlah tur a lo chuang lut te nen in ațang a kan inzui chhuak tur kan han che vel sap sap chu Lalati chuan an ngaingam ta ngang lo.

A ţap ta par a, a nu in lak hran ngial a han tum pawh chuan engmah sawi chhuak silo in apa Ramchhana kut ah a chelh sak tlat a, ani pawh chuan zo zet a pawm in ka kawngah a rawn kuah a..



Kawmthlang kawngpui ah chuan kan bungraw tlemte phur tu pickup leh kan chuan na tur car a ding reng tawh a.

Tualzawl ah kan chhuak phei chu min han dinpui leh rih in, kan inhmun tlang sang bik deuh lai aţang chuan khawthleng chu uluk em em hian kan pa chuan a han thlir kual vung vung a, khua kan chhuah san tur chu nguipui ve niawm tak in tlang dung ah lah romei a zam chiai chiai bawk, ral hla taka a ram vahna țhin tlang dung te chu lunglen hmel deuh a thlir kual leh in a thaw chhuak hawk a.




Ka mitthla ah pawh chuan thil tam tak a lo lang thar iar iar a, ka lawi luhni a naupang te'n ka thuamchhawm zawn a 'lawi hla' sa dal dal a kan inzui pheina kawngpui chu phe deuh riai in ka en kual a, pa Khawla te leihkapui te chu kan awm loh hnu ah an lo țhiah (t) daih mai hlauhna te nen hnuk ulh țeuh kan in chu ka va en let leh ngat bawk.


Ka lawi luhni a ka pasal in 'rose par rimtui' a sak laia a lan dan pa zet te, kan inneih min lawmpui a lo kal khawmte hmel a duhsakna lo lang chhuak te kha a hun lai ang ang in ka hmu let leh niber in ka hria.



"Lalapa, an ngaihawm dawn hlawm e" ti sep a ka chal a kan pa dar ka va nawr sik tak ah chuan "an lo dam tlang ang a, kan intawng leh hlawm mawlh ang" ti nghut in ka dar ah a lo tuai hauh hauh a.


A tan tak hian he khua chhuahsan a khaw dang han belh chu a harsa zual dawn in ka hre țhin.


Nun beidawng tak a a kirna hmun, tu hriatpui hauh silo a a hun tawn run thlak zet te 'ka theihnghilh thei mahna' rilru a ti chung a varţianah ramvak tur a a chhuah țhînna tlang dûng te hmu thei tawh lo tur a awm chu a tan a harsa dawn hle in ka hria.



He khua hian; nun beidawng leh hma lam hun atan eng beiseinamah nei tawh lo hial a lo kir Zoramchhana kha lo tuam damin, a thinlung a natna te kha a lo thawi dam leh miau si a.



Kawngpui kan zuk thlen thlak chuan min la chibai lo te chuan min han chibai leh nak nak a.

Ka nu in min chhuk thlakpui dawn a, ani chu car chhung ah a țhu lut tawh a, Lalati lahin "Anite apa Ramchhan zan ah pawh zun ka cheh tawh ngailo, inbul ah min hruai ve ru aw" zawite te a ti hliam hliam in apa Ramchhana a nghawng ah a kuah bet tlat a. Kan nupa chuan han tih vak ngaihna kan hre bik lo.


"Mate, tluang deuh in in kal dawn a nia, i vahte hi ka hruai hrang a nih loh chuan in chhuak tlai dawn lutuk" lo ti sawk sawk in u Dtei'n a fanu chu pawm mai a han tum chuan "Anite Aizawl ah in awm daih chuan Niteii ka nei tawh dawn lo a sin" lungchhe lutuk in Lalati chuan a rawn ti chhuak ta mai!



"Lalat, Aizawl ah kan awm ringawt dawn a lawm, nitei chu min la nei reng dawn..." tia ka thlem pawn "aih, Amawii'n a sawi vek tawh, Nitei i nei tawh dawn lo min ti a lawm" a ti leh rawng rawng a. A pa hi fapa malh a nih avangin nitei emaw patea tia koh tur an nei ve silo a, keiin ka han fin hnu khan 'anite' tia han auh mai tur min nei ta kha nuam an tiin an țhiante ni te pawh an awt tawh ngai bik lo a nih kha..


"LalAmawii chuan dawt dawt a nih chu a sawi, nakin ah dawt a sawi vangin ka hlap dawn a nia" ti in a nu chuan apa Ramchhana lak ațang chuan a pawt hrang ta a.



"Mate, kawng lakah in tlan laiin kan inbe dawn a nia aw" tih zawm nghal in kan nupa min ngen a Lalati sapatal chiam chiam chu a kal hranpui a.


Kan Lalati tereuh lah chuan ţap chungin "Anite... apa Ramchhana" a rawn ti zui lawm lawm a.


Chutiang leh lutuk a min han uibet ta mai chuan ngaih lam lam a ti țha lo rum rum thei mai.


Midang lo nui ham ham karah chuan u Ngaihsaka chuan "kal tawh rawh u, intlai lutuk dawn" a rawn ti ta sup, a țhianpa chu lo din chilhin "khaw maw, i han inkuah ve reng reng ang hmiang" a ti leh hluai a, kan pa pawh chuan lo nuih hawkin uang zetin an han inkuah a.



A tirah uang thuang viau mah se an inkuahna erawh a nghet țha viau mai. Ngawi dun vung vungin an hnung ah chuan an han inbeng dun thuk thuk a. "Țhianpa" tih bak engvak an sawi belh thei biklo.



Rei ngial hnuah kan pa zawkin "lo dam ang che, i chak țhat a ngai a nia, ngaihngam taka ka chhungte te kan kalsan theih chhan pawh nangmah vang a ni tih i hriat kha" ti sup sup in a țhianpa hnung ah chuan a han beng leh thuk a.


Inpet ruh țeuh in u Ngaihsaka pawhin "lo ngaihtuah suh, ka awm chhung chuan an kiangah an fapa te nupa an awm loh tih an hrechhuak miah lo ang" tiin a nui lui suk bawk.


An țhian dun inkuahna nghet tawk zet an inthlah fel hnu ah chuan patling țhenkhat te chibai tur in kan pa chu a kal hrang vut a, u Ngaihsaka chuan ka dar tawn tawn ah min lo hmer in ngainatawm zet hian min lo nuih a.


"Mate, inpa hi ngaihsak țha ang che aw. Natna i thlen a nih chuan a țhianpa hi ka tawrhhlehawm viau dawn a nia" a han tih churh churh a, nui tho mah se a mitmeng erawh a thutak viau lawi.


Keilah in "humm, i nau zawk ka ni a, ka thlavang hauh loin i țhianpa thlavang maw i hauh zawk dawn a?" lungawi loh hmel deuh a ka lo tih der tak ah chuan nui hawk in ka dar chu a hmer salh salh a.


" mipa mah nise mi lungleng mi tak a ni tih hria la, i chhungte awm lohna hmunah i khawhar hlau a, a ngaihsak em em ang chiah che hian nangpawn ngaihsak ang che" ti leh dap dap in patling țhenkhat te nen a lo inchibai kual laih laih a țhianpa chu a va melh a.



Keipawh chuan a enna lam chu rang zet hian ka en phei ve a. "Khawpui nun in a chimbuai lohna ah a awm rei tawh a, in siam rem pawh a harsat ru viau ang. Mahse, a hmangaihna che avang leh i nawmsakna tur nia a hriat miau avangin i tan khawpui lam ah inbenbel a thlang tih hria la, khawpui mipa te aia a chetphung a danglam fal bik a nih pawhin khak hauh suh ang che" a han tih leh chuan lu ka bu ta nghat nghat.


Ka u a nihna angin u Ngaihsaka chu ka ngaisang takzet, ka pasalin ani ang țhiante hma ngai lutuk mi a nei hi ka lawmpui bawk.




"Dinpuia zui haw tur a a tih chhan che kha i hre chak em?" a lo tih leh tak ah chuan ka pasal lak aţang a mit la sawnin u Ngaihsaka chu ka en thuai a.



"Hmangaihtu chuan a hmangaih chu midang ta niturin a phal ngailo. Mahse, a hmangaih nawmsak zawkna tur a nih chuan a kal tir thei thung, kan ramvah ho țum khan țhianpa in a duhna che leh i lakah rilru a pek takzet zia Dinpuia khan a lo hrethiam reng a, Ramchhana nen an han awm fal tak ah khan elsen rawngkai lek lek in 'ka bialnu hi i lo duh ru ve reng a ni tiraw?' tiin Țhianpa kha a zawt ta kher bawk. I pasal hian engtin nge a chhan i hre duh em?" ka ban bul lo hmeh salh salh pah a alo tih chuan thaw hak in lu ka bu a.



Chutah ngainatawm em em a min han nuih hmasa leh te te in " 'Mambawihi hi ka duh satliah mai nilo in ka hmangai asin' tiin Dinpuia bul ah khan a sawi hmiah" a lo tih chuan ka nui ve seih a. Chutih rual erawh in chiang tak a thil hriatchhuah ka nei!



U Jo-a leh Dinpuia'n min lo um let țum a, 'Dinpui, mipa takin i thutiam ah ding rawh' Zoramchhana'n a tih khum khawlh țûm kha.




U Ngaihsaka vek in "Dinpuia'n a han nuih sawh vel pawh khan 'i nuih a za viau em ni? Mambawihi ka hmangaihna hi keimah lam ațang chiah a ni hleinem, tun ah hian tih takzetin a thinlung ah hmun ka chang tawh tih chu nang ngei pawn i hre chiang ang. Mahse, kei chuan ka hmeichhe hmangaih hi nuamsa in ka siam ve thei dawn lo, chuvang chauh a chet la lo mai ka ni tih hria la, tina ngai hauh suh, natna emaw beidawnna i thlen rual rual a nghet tak a lo chelh nghal tu tur ka awm tih hrereng ang che' tiin Dinpuia kha a hrilh khawl khawl a..." a han tih leh tak ah chuan kan pa chu ka va en leh thuai a.




Patling dangte nen a ding ho reng chungin amah pawn kan lam chu a lo hawi ve chiah a. "Kan chhuak tawh mai dawn em ni?" lo ti sup in a mit chu a tizim sauh bawk.


A țhianpa nen kan thusawi avang a ka chhungril a danglamna awm chu a lo hmu thei te pawh ani hial ta ve ang chu.


"Umm, kal tawh rawh u, Aizawl in lut tlai lutuk dawn" u Ngaihsak pawh chuan ti hluai pahin ka darah a lo kuah a.

Car inhunna lam ah chuan dimte hian min kal phei pui a.

"Hmeichhe rinawmna dik chu mipa in neih engmah a neih lohin a finfiah theih an ti țhin a, chu fiahna chu chiang takin nang chuan i pal tlangin ka hria" a lo tih dap dap chuan nui hak hak in ka en chho deuh a.


U Ngaihsaka pawh chuan chutiang thu te a sawi ve ta mai chu a nuih a zat hmel viau mai.

"A nih leh mipa rinawmna dik chu eng hmang a finfiah ve tur nge?" ka tih let chuan "ele... 'engkim a neihin' " a lo tih let lawi si ah chuan kan han nui dun leh rih a.


"Umm, a awmzia chu i țhianpa hian finfiahna paltlang a la ngai ve thung a nih chu" ka tih tak ah chuan za deuh a nui hawk hawk chung si hian "a ngaihtuah awm loh khawp ang" a lo ti let ve leh a.

Ka țhut luhna tur a car kawngkhar a pawh hawn tak ah chuan thaw hliai in an in lam chu ka va thlir a,
"Lalati te unau kha ka khawngaih e, lo zin thlakpui vat ru aw" ka ti zui sep.

"Ummm, Christmas dawn ah Mas Bazar pahin kan lo tla thla dawn a nia" a tih ve tak ah chuan ka hahdam deuh huai mai.



Khatiang tak mai a min han ngen ta lawm lawm mai kha chu rilru ah a thawh dan a danglam riau tlat.


Ka nu nen seat hnungah kan țhu a, seat hma ah kan pa a lo țhut luh ve rual chuan tukverh ah u Zotei leh ka pa lo dak lut in 'tluang tak a kal turin' min han chah leh lawp lawp a, kan tlan chhuak ta chu ka hnim deuh ruih thei.




Kawn ah kawng lak a ei tur nepnawi vel kan lei leh phawt a, check gate thlang a țawngțaina hmun ah ka nu chu a țawngțai leh a, chuta țang chuan chawl loin kan tlan ta par par a, kan bungraw tlemte phur tu pickup pawh kan hma ah zel an tlan a, kan quarter luah tur pawh chiang tak a an hriatsa avangin keini aia an thleng hmasa a nih pawn chu lam chu pan turin ka pasal in a chah thlap tawh a.


Car erawh hi chu keima pa in a rem hriatna ang a a lo tirh chhoh ve thawr kha ani a. Zoramchhana pawn ',i tan a hahdam thlak a ni mai' tiin a pawiti ta bik lo a nih kha


Khaw chhung ațang a KM 3 vel kawngpui kual ruih ațangin khua chu kan thlir let a.


Keichuan ka lunglen thu te chu ka nu kiangah ka sawi mawlh mawlh a, kan pa erawh in ngawi reng hian car music system leh a phone chu connect in 'Fur khawthiang Lallianmawia Pachuau' hla bawk kha a play leh ta a.



Car tukverh ah a ban chu a khamphei duai a, a kutțang a car bang chu tuk ri kauh kauh pahin
' Chhingkualah mahriak tein
Zokhaw reh damdiaiah hian
Hmatiang hun leh nunhluite kan han thlir a
Dawn ava'n sei țhin vawng vawng
Dawn bik lem nei silo hian
Hringnun kalsiam hian kei zawng lunglai min kam


Tih chang chu a sak pui a, ka nu pawh chuan a fapa rilru tur chu a hriatthiam sak hle a ni ang.


"A lungleng dawn lutuk a, a lo thinchhiat phah ta deuh a nih pawn hrethiam rih hram hram rawh aw" ka beng bulah a lo ti sar sar a.




Khaw chhung ațang a KM8 a hla kan thlen tlak erawh chuan side glass ațang chuan nghal ru lutuk hian min melh run a, a mitmeng zei zet ațang chuan in, ka hmuh chak em avang a ka zan tlan chhoh tawp țum a varțiana kan intawn dan vel kha a suangtuah let tih ka hrethiam.


Ka motor lo chhiatna lai tak kan tlan pelh dawn chuan side glass ațang vek chuan min lem vel ka ti ta ber mai, kiai suk suk paha mit a han tihzim tak sun ah chuan lai deuh hian lei ka zuk chhuah khum pek a.



A ni pui lah chuan nghal fahran hian " helai ah hian souveniar lung la phun tur a ni" a rawn ti ta roh a.



Mak tih hmel deuh in ka nu'n "khawi ah chuan maw? Mi huan lo ram a ni lawm ni?" a lo ti thung

"Kawngpui kam kha tu ram mah a ni hleinem" lo ti let nghut in side glass chu a va her rem vel a, kei a lai bawk si chuan rum deuh hian ka melh let kha kha ta ngawt.



/

Aizawl kan inkhalh luh rual in ka nu chu a hawi kual ruai ruai ani ber e."A lo va danglam tawh em em ve" a han tih chuan a fapa pawn "a țhang chak ngawt mai, nu, patea te in lai bawr pawh kha i hre tawh lo ang a?" a lo ti let ve thuai a. Ka nu mak ti hawi kual vel chu zahpui a hneh in a thil hriatchian tawh loh hrilhfiah chakna te nen a lo en let daih.



"Ka hre tawh pawh in ka ring lo Guwhati-ah i pa inzai tur ka zui ve țum kha Aizawl ka hmuh tawpna ber chu a ni ta e a.. kum 10 dawn a vei tawh tlat" ka nu pawn a ti ve leh mai a.


Kan pa chuan a college luh țhin na te a kawh hmuh pah zel a, chutah Patea te in penna lai te chu inkhawhhmuh zel in quarter chu kan thleng ve ta hram.



Ka sawi hmaih in ka hria, quarter kan luah tur hi a lo luah hmasatu te inthiar chhuahna a la reilo a, chhuar te leh bedroom pathum ah thuamhnaw bawm lian țha tawk tak a awm lawk sa avangin keini pawh khua ațangin kan in keng zangkhai lui a.



Zoramchhana'n 'khum hi chu hetah awm se, haw leh hun ah kan chhangchhe tawh dawn a, Aizawl ah khum thar kan lei dawn nia' a tih sa avangin hna zawm tumna rilru a put rual khan kan khua ațang a Aizawl pem tawh, furntiture chi hrang hrang siam a eizawng a inbengbel te kiang ah order a siam nghal a.


Fit 6 bial khum leh ft3, ft6 a order a, sofa pawh an siam sa lak mai thei in a order fel diam tawh.


A buh hralhna te, Bawng leh Sial vel a hralhna te kha hmang ral mai mai lo a alo khawl zel țhin avangin tun ah hian puk chawp rum rum ngaiin kan khawsak a țul loh phah ka ti lo thei lo. Mipuitling chuan pawisa ak țun mah se a hmanna tur a zawng ruai kher ngailo an tih zawng zawng kha a nei zo ka ti mai.



Quarter kan va thlen ve chuan U Nathan-a leh ka pa hmel ka hmu hmasa ber a, phur em em hian car lam chu an lo pan nghal a, "in chau em?" lo ti nghal thuai in ka nu nen kan țhutna lam kawngkhar ve ve chu an lo pawt hawng a.


"Eee, ka tu tur chu a lo chhuak hnai tawh hle mai maw?" ti pah a ka chhuk tur ka pa'n min puih chuan kan pa pawn ka kut lehlam a lo chelh ve thuai a.



Ka pa chuan "Chet vel a harsa tawh dawn a nih kha" tiin duat deuh in ka darah min kuah a. "In chau em?" tiin ka pasal chu a chibai nghal bawk.



Chanchin te inhrilh pah mawlh mawlh in kan in luah tur ah chuan kan inzui lut a, kan pa thawhpui tur te leh patea fapa te ho nen an lo unload vek tawh avangin inchhung luh tirh ah kan bungrua te chu a lo awm khawm ram a.



Reilote kan hahchawlh hnu ah kan in lam ah kan phei a, kan inluah tur kan insingsak peihfel hma chu kan in lam ah hian kan awm ang.




Ui sa an lo bai hluah hi a lo ni a, u Latei nen kan han inhmu chu a lo puar ve tawh ak bawk si nen kan ri teng tung a, ka nu mawlh chuan nuam lo a tih ka hlauh avangin thlahthlam palh ka hlau hle bawk.




Kan colony te nen chuan zanriah kan kil ho a, ka nu pawn Zoramchhana'n hna a zawm tur chu a hlimpui khawp in ka hria.



Zan ah keini nupa chuan kan room hlui kha kan hmang leh mai a, u Mami room hlui ah ka nu chu a riak dawn a. A khawhar ka hlau bawk si nen "nu, kan riak khawm mai dawn a mi?" ka tih lah chuan a nuih a za em em khawp a.


"Va mu phei rawh u, i kawngte a kham ang" tia amah zawk in min nawr tak sek sek ah chuan kan pa phone ațangin u Zotei kan call a, reilo te kan biak ve hnu ah kan pa phone chu kawl tirin kan chhuah san a.




Motor kan chuang nileng bawk nen khum kan deh rual chuan ka muhil nghal bawrh bawrh ni mai hian ka hria, zanlai ah zun chhuak avang a ka țhanharh leh chuan zing dar5 ah alarm ka set a, a chhan pawh ka nu kha a tho hma țhin si a, kan inchhung lah a vawi khat lo kalna a nih avangin tho chhuak hreh in; inthlahrung deuh in room ah a lo tawm reng ka hlauh vang a ni pakhat.



Ka zung zo bathroom ațang ka chhuak chiah chu ka phu deuh zawk a. "I thawh lai ka hre miah lo" ti sup in kan pa chuan ka kut a lo chelh nghal zat bawk.


"Mu tam la ka duh a lawm" ka tih chuan a nui mai a, khum ah kan mut kai leh hnu chuan inhmatawn in nghet deuh hian min kuah hlu hlu a, tawlh hniam deuh a ka awm ah hmai phum a nih avangin a hnungzang chu ka kuttin in ka rin kual sak riak riak a.

"Nupui neih nuam tipa, khua i ngai em?" ka han tih chuan nui nghing dawt in min kuah nghet sauh sauh ringawt

Keichu lungleng ve viau mah ila hetah ka chhungte an awm tam zawk tlat a, kar lo ah ka lunglenna pawh a reh fel thei maiin ka ring.


"Buh seng te a lo hun chho ang a, i ram riak lut ve chak lutuk hian haw i rawt hial lo maw le..." ka han tih leh chuan a nuih a zat hmel kher mai.


"Lalanu" ti duta lo hawi chhuak in a kiai suk suk a. Lungawi em em in a nui hmel pa zet chu ka lo thlir thung. A pa thlawt a ni.



Zingkar ah hma tak ah tho a ka nu mutna ah ka va luh chuan amah pawh chu a lo harh tawh a.

Tukverh darthlalang chhan ațang pawn lam thlirin a lo ding veng veng reuh a, ka pa a ngai ngawt in ka ring. Ka lut thawm ah chuan lo inher in a meng zau deuh awk bawk.


"Mambawih, i nuam lo em ni? I va tho hma em em ve?" loti nghal sawk sawk in min pan nghal a.

"Nuam lo lo e, nu, kan in piah kawn ah sawn eitur tui deuh an siam țhin a sin, vah harh pah in va kal ang aw" ka tih lai chuan min lo thlek deuh veng veng in "Nang tak hi chu aw... min ngaihtuah vangin i rawn tho chhuak ngawt ani maw?" a lo ti ta khauh. Ka nuih let mai a.


"I tiawmang lo lutuk, ngaihtuah ka ngai hleinem" a ti leh barh barh tak nangin "kha titawp khan kal chhuak mai rawh, zing kar ah pangpar zuar te pawh an awm țhin a nia" tiin ka tur lui sek sek a.



Mizo nu takin puan nainawk rawng hi a bih a, a sam țuak phauh phauh tawh chu vial tawm in kawr sendang a ha bawk, kan pa in ' Aizawl ah min zui ve chuan khaw hlui ngaiin an lungleng lutuk ang' a tih kha ka țawmpui zual tulh tulh bawk.




Ka nu kal chhuah pui chu a manhla khawp mai, zawhna a ngah in han chhang let ila, nui bawk bawk pah hian "khitiang te khi mimal in a lo ni maw, sawrkar pisa pui tur ah ka ngai mai a sin" te a lo ti a, kan hlim dun phian mai.



Tukțhuan eikham rual in clinic ah min hruai hmasa phawt a, doctor in min han check vel pawh chuan "naute lungphu pawh a țha, nang lah i hrisel in i rilru lam thlengin i hahdam tih a hriat a, in fa lo piang tur pawh hi a hrisel țha ngawt ang" a ti a, kan lawm tlang khawp mai.



Lunglengna hman awm lek lovin Aizawl kan thlen tuk ațang chuan kan buai ta ngar ngar a, u Nathan-a pawn chawlh la meuh in kan pa chu a pui ve a, sofa set leh kan khum order a lo thlen hnu ah keiin parda atan a ka duh rawng te ka lo order ve leh a, carpet rawng tur chen in ka duhthlanna ah kan pa chuan a dah vek.



Ka cousin phai lam a awm bo lo ho pawn min pui nasa khawp mai, Apuitei pawn thla thar ațangin min lo fin ve dawn a, kan in ațangin college a kal tawh ang, a chak miau si a.


Gas stove ațang bungbel engkim kan han inlei thar chu sum pawh a ral chak pap pap khawp mai, keima nu in "in ah hman sen loh bungbel a awm a, fridge pawh pahnih ngawt a nih hi kan neih, i room a mini fridge te kha la phei ru" a tih lawm lawm pawn hmeichhe lam thil a ka pasal nen kan chenna tur inchhung tih muk chu ka duh bik der lo. Fridge lian tawk tak kan lei leh chuan pawisa bang pawn nuai a pelhna a tam ta lo viau.



"Mambawih, tv chu hlawh te ka lak hun ah kan ti zawk mai dawn ami? Nau neih nan thla tlem te chiah a awm tawh a, chumi chhung chuan eng emaw palh pawh a thleng thei, sum kawl awm lo ngawt chu a tih chiloh" kan pa'n a tih chuan ka lo hnial bik lo.


Zan lamah chuan inchung bathlar ah u Nathana te nupa nen chuan țhu chhuak in kan inkawm ho țhin a, kan pa in hna lam aţang a call dawn chu remchang ah la in a kalsawn rual chuan u Nathan-a chu ka lo vei ruk em em zawhna ka zawt ta phawng.


"U, Dinpuia nen kan inkar a tawp hnu lawk ah Zoramchhana nen tihian kan awm dun leh si a, min hauh i tum miah lo a mi?" ka tih chuan a beer in lai chu tlak pap in uluk deuh hian min en a.


"Surprise tur che a kan lo chho țum khan Ramchhana nen in inkar a thil awm kha ka hrethiam vek a lawm" a tih tak nghut ah chuan phawk deuh hian ka en kawk mai.

"In inbiakna kha..." ti sup in a tawp leh rih a, "Leikhapui hnuai ah khan ka awm reng a lawm.. nula pakhat i thik em tih a zawh țum che khan" a lo tih leh chuan ka thaw ta hliai ringawt.



Khami hunlai kha ka ngaihtuah let a, 'Jenny ka thik leh thik loh?' min zawh lai khan eng chhanna mah pe thei lo a nih kha...


"In inhmeh ta reuh phian sia, a care em em bawk si che" nui var var chungin u Latei'n a lo ti ve bawk a. Lai deuh tak a ka va en chuan, " keichuan i u angin engthil mah hriat ka nei ve lo nangin a en dan che hi a hmuhnawm ka ti" a lo ti mauh mai.


Nui hak chung hian "a hmuhnawm a?" Ka ti let a. U Latei pawh a nui ve hak hak tho.

"Aw.. Hmuhnawm tih a, hei, mipa in hmangaih hmel em em a hmeichhia a thlir țhin hi, ka sawi thiam lo, a en dan che hi maw... tawrh harsa i ti țhin em?" a lo tih leh lek phei chuan za zet in ka nui ta hak hak.



"I vannei lutuk, hetiang tak a mipa țha leh hmangaih thiam tu che hi an vang tawh khawp ang" u Nathana pawn a lo ti ve leh churh, kan pa phone hmang zo a lo chhuah leh tak avangin engmah kan sawi zui ta lo a.


Mahse, ka țhutna chair ban ah lo țhu thla a "Mambawih, i kawng a kham tawh em?" tia min ngaihtuah taka zawhna min lo zawh laiin u Latei lah chuan 'ka tih reng kha maw..' ti ang hrim hian min lo nuih a.








Ni thum hnu ah kan in luah ah chuan kan insuan lut ve ta ran mai, kan pa thawhpui tur te pawh an fel hlawm in kan in ah chuan an lo chuangkai ve nak nak reng a, zan ah chuan ka nu ho in khum pahnih chu dawhzawm in kan riak khawm țhin a. Tv la neilo mah ila kan titi tlan nasat phah a, a khat tawkin u Zotei call in ka nu leh ka pa kan inbiak tir thul.


Ka pa pui hi kan pa ang deuh chiah hi a ni a, a lunglen thu te hi a sawi chhuak ngailo nangin u Zotei sawi dan ațangin a lungleng tawh viau a ni awm a.


Kar khat leh nithum ka nu a han cham leh meuh chuan "lo haw chho phawt la, i kal leh mai dawn a nia" a lo ti ve thlawt mai. Keini nupa pawn ka nu chu la thlahlel viau mahila kan chelh zui ngam ta bik lo.



Ka nu haw chhoh ațanga reilo te ah dawl rep te, behlawi rep te leh vaimin chhum lum te chu a lo thleng ta mawlh mawlh a, kan pa hian vaihlo zial kher a zuk duh avangin ka nu chuan zial khawl sakin a rawn thawn tel țawk bawk.



Kei lahin han zial ve ngial ka tum pawn 'a thaw' a tih loh leh 'a mawng a ping' a ti sup zel a, zial ve pawh ka tum buai peih tawh lo, ka nu lakah inthlahrun erawh a na hle thung.



Sunday tlai lamah hian quarter luah ho chuan pawisa thawh khawm a uisa bai an lo ching țhin hi a ni a, kan nupa pawh chu min sawm ve țhin avangin țhian siam nan zel tiin kan tel ve țhin a. Kan pa tak phei chu a hming a koh thei tu an tam tawh viau a, Ar pa insual tir hrat deuh te an lo awm ve leh zel bawk nen tlai lamah hian tualzawl ah pawisa inchawi in an insual tir ta țhin a, patling pui pui si chu Arpa insual avangin an au nasa thei viau. Ka rin ai takin thingtlang lam nen kan nunphung a hrang lutuk dawn a ka hriat tak loh ah chuan ka ngaih a ngam ve ta deuh.


Apuitei lo insawn luh hma chuan insuk te hi amah vek in a buaipui a, hmun han hawl vel phei chu ka tih a rem titawh lo bur, zan mut dawn ah hmun te chu hawl dur dur in mop in chhuat chu a han nawn leh vek zel a. Chhaih fiam pah a "Lalapa, kawngka tal khar rawh, miin an lo hmu ang che" ka tih lah chuan a ngaipawimawh duh der lo.



Zan khat chu khuangchawi thla eng no raih chuan ka pasal lunglenna a kaitho thlu ngang te pawh a ni ang, kan nupa room tukverh chu a hawng a, vanzawl chhum kar a thla bial eng zet leng vung vung chu han thlir in khum tlangah chuan țhut hmun a rem a.




A guitar hlui ve tawh tak chu kuah in a han zut leh ringawt țhin a, quarter luah ve tu te hi fel hlawm hle mah se zan lamah hi chuan tumah an inlen pawh ngai vak loh avangin khawhar a zual hle bawk.


"Lalapa, naute awi leh tawh mai la" ka tih tak ah chuan khum mawng lam a puansin dah thuah a ka mu saisir chu min lo thlek vut a. Bu nghut a key a hmeh kual rauh rauh hnu chuan a țhianpa a ngai hle ni tur a ni.

Lallianmawia hla bawk a sa leh ta a, ka phone chuan video in ka lo record a, min lo en a mit ko a han tih kan uk chuan "i țhianpa ka thawn dawn" ka lo ti a, a nui suk nangin min khap ta biklo.

Nghilhni i awm lo
Aw ka țhian duhtak
Kawlvalenchham ah leng mahla
Hlim ten nang nen kan lenlai ni zawngte
Herchhuak leh se kan tawnah hian


Ka lungngaih laiin min hnem țhin a,
Ka manganin min țanpui ţhin kha
I tello chuan lawm reng a kim thei lo,
I lo hlu ber mai, ka țhian duhtak



A han zai zo chu thaw huaiin ka bul ah a lo tluzal ve a, a kut pakhat chu lukham in pakhat zawk erawh ka nghawng ah a lo zen lut a, a taksa si chet a ka mut rem hnu ah video chu u Dteii ka thawn bawk.


Kan pa erawh ngaihtuah tam hmel takin a ngawi rauh rauh mai.

"Zanin te hian khua ah awm ni ila chuan u Ngaihsaka te leihkapui ah kan țhu phei awm sia" ka ti sep sep a. "Keichu Leihkapui kha an lo țhiat ang tih ka hlau" ka han tih leh daih chuan kan pa chu a lo nui ta suk.


Muzangthal reng chung a min lo thlek nghut chuan "i hlau ve tho em?" ka lo ti leh ngat.

"An țhiat phal bik lo ang" ti hluk in a mu saisir a, thaw hawk a ka dul chu lo kuah hlu hlu pahin "ka fanu hmelțha tur hi lo piang vat vat se la, lunglen pawh a ziawm chho ve mai ang" a lo ti ta dut dut.

"Keichu maw... lo piang ta se, hmeichhia a nih leh zel phei chuan nangmah ang mipa lo chu a neih ka phal dawn miah lo" ka ti chhuak hliai a, kan pa chu a nuih a zat hmel ngang mai.


"Eng a ni?" ti hluai pahin a lo inbeng kang vut, ka chunglam ațang chuan hnai zet a min lo en chhuk nghal run bawk.

"Lalapa ang hi a pasal tur a nih ve loh chuan pasal a neih ka phal miah lo ang" ka tih laia a lo kiai suk suk chu a biang ah kan han chul sak a.

"Ka ti tak tak, mipa laktlak loh deuh te hi a lo tawng ang a, rilru na deuh a a awm te ka hlau..." ka han tih leh chuan "a lo pian hma hauh ațangin a pasal neih hun tur kan lo sawi lawk chu a nia" ti dut dut in ka kut chu lo man in a han fawp vang vang a. Lei chhuah zeuh in ka ner khum nang nang ta ringawt.



Nakin deuh ah chuan u Dtei message a lo thleng a. "I u Ngaihsaka ka ngaihthlak tir a, a ngaithla zo kha ngawi rengin Leihkapuiah a va țhu chhuak daih" tih hi.


Thla a eng ropui si, Leihkapui ațang phei chuan an ram chhuahna țhin tlang dung te kha a lang ruih dawn si a, u Ngaihsaka pawh chu a lungleng ngawt ta ve ang.


"An inngai dun lutuk hi ka khawngaih" ka tih let chuan "nichiah e, keini te chu tihian text leh call in kan inbe awl lo va, mipa chuan phone call a inbiak te hi an hreh ve tumhrang a. An lunglenna te hi a zual ting mai" a lo tih let chuan a dik ka ti hle.


Keiman u Dtei chu ka call nghal a, a lo chhan rual in Lalati te unau in "anite, apa Ramchhan" an lo ti nghal lauh lauh a, apa awmna lamah a nu in a chhuah phei pui a ni ang, chutia naupang te nen a kan rik tak nak nak ah chuan kan pa leh u Ngaihsaka pawn zawhna te inzawt ve dut dut in pakhatin 'chakai meichher chhit a lui kal a tum thu' a lo sawi chuan kan pa chuan a chak ve hmel khawp mai.


'Buh kha kang hmui țha la' a han ti ngawt pek a, u Dteii'n 'chhutiang te chu a hre ve bawk e, chakai meichher i chhit ve chak tih sawi țha hle hle rawh' a lo tih chuan kan pa te pahnih chu an nui ta hawk hawk.



/
Dam tlan a taksa ah nawm lohna a awm loh hi chuan hun te hi a liam zung zung maiin ka hria. Ka nau neih hun a hnai tawh in kan pa pawh hna ah a buai em em a, buai chung chung chuan a theihtawp in min ngaihsak em em lawi, sunday ah hi chuan kan inkhawm ban rual in ka nu te in ah min phei pui a, a chang chuan chaw han ei nghal mai changte kan nei țhin a, a hna kal dawn ah te pawn "mahni ngawt a awm chu a lunglen thlak ang, i nu te in lamah i len phei duh chuan ka drop ang che" a ti fo a, ka khawhar hlau a ka sawi ngai miah lova kan in min tlawhpui nachang a hria chu ka lawm țhin viau bawk.



A hnathawh dan ah an pu te mit a tlung ngang ni tur a ni, kan nupa chu chaw ei ah te hial min sawm in ka bulah ka pasal chu an fak ve țhin hle a.



Quarter ah hian canteen a lo awm reng bawk chu niin, tah chuan police a thawk chhungkua tawh phawt chuan man tlawm zawk leh a ba pawh in engkim an la char char thei a, hlawh lak hun ah an rul leh mai țhin te hi a lo ni a. Mahse, canteen a nihna angin a vai thil deuh riau in ka hre țhin.


Kan pa chu zingkar hma tak ah uniform inbel thlup in a kal chhuak a, dar 8:30 vel ah chaw ei tur a lo haw leh in hna kal a a chhuak hi quarter ah kan awm tho avangin chhun thingpui in turin a lo haw leh mai zel.



Keipawn quarter ah chuan țhian ka nei ve tawha, keimah aia upa hlek tur u Sangtei nen chuan kan inkawm thei viau. Hna zawng lai mek a nih avangin interview a a kal chhuak tih loh chu kan in lamah a lo lenglut chawt a,


Nui kar kar chung hian "in lo insawn tirh kha chuan unau in nih ka ring deuh a, nang lah tleirawlte hmel i pu a, u Ramchhana hi a upat hmel tawh sia" a ti țhin a.



Tunah phei chuan lu zuah hnim a rem țeuh tawh lo a, a khabe hmul vel erawh meh fai ka phal tlat lo, police uniform a hak phei chuan a lan dan chu nelawm loh ren run viau, ka duh dan tak ani thung.




Kawppui nei tawh an ni tih hrereng chung a mi pasal te lo zar buai hreh lo an tam tawh si a, chung ho in an nel ngam lohna tur chuan rorum hmel deuh in lang reng se ka duh zawk.

U Sangtei chuan kan pa in min han ngaihsak vel dan chu nuam hi a lo tih hmel țhin em em a, a chang leh 'in fa nih a nuam ngawt ang, induat dawn si' te a han ti thul.

Kei aiin u deuh mah se fa tlum ber a nihna angin a ngaihtuahna te chu a la naupangchhia ve viau tho zel.



Kan pa chhun thingpui in a lo let laiin ka nu hi a lo lang teh hlawl a. "Vawiin chu ka ngai riau che u" a tih chuan kan pa pawn "zanriah hetah ei ve nghal daih la" a lo ti ve thuai a.

Zanriah ei sawn em chu a ngaingam bik lo a ni ang, a hnial ve țang țang a. Kan pa hna chungchang te an han inzawh deuh luam hnu ah chuan "mate, i room hlui ah ac kha la phei daih ula" a lo ti teh phawng a. Kan pa lak ah ka tim chawih niber in ka hria.




"Ac kan mamawh hleinem" ka ti let ve mai a. "Aw, naute hi december a piang tur a ni a, khua a vawt dawn si, in nupa room ah hian in fit ang a" a ti leh zel a...

"Nu, heater kan lei vek tawh alawm, inchhung a phui țha bawk a, ac em em kan mamawh hleinem" ka tih lah chuan min hnial zel mai si, a tawp ah kan pa chuan a sana bun lai chu bih vutin 'a tlai dawn' thu sawiin ka nu nen chuan min chhuah san ta vut a.


Ka rilru erawh a nuam zan lo.

"I timak thei lutuk" tia ka nu ka an khum hlak hlak chuan "i fa tan a țha tur a lawm ka ngaihtuah" a ti ve tlat a.



Tih ngaihna vak hi ka hre țhin lo, kan pa hnathawh ah hian a lungawi tawk tawh viau emaw han ti mah ila, kan pa hlawh in a phuhruk zawh loh khawp thil hi min sawi hmuh a ching tlat a, a fanu hi min ngaihtuah luat avangin ka pasal tan a phurrit takah min chhuah ka hlau a ni.


Apuitei class bang a lo haw chuan eirawng kan bawl dun a, khua aţang a kan ken thlak sangha rep tlem kan la neih chu rawh in tomato te nen kan rawt hluah a.



Kan pa hna bang lo haw chu thingpui hang ka thlit sak thuai a, ka nu thil lo sawi vel avang khan a lakah chuan ka inthlahrung ru riau a, amah chuan a hma ang tho in min ngaihsak in a thingpui tur dawhkan ah ka va dah sak pawh chuan ka dul chu lo chulin "i lo fel em?" tiin a fa chu be dut dut reng a.

"Chhang pawh a chhang thei der silo che, i be peih phian bawk siah" Apuitei'n a lo tih lah chuan "ka thusawi engkim a hrethiam vek a lawm" a tih san mauh mai a, Apuiteii nuih a za ngang mai.


A thingpui inzo kan nupa mut pindan ah inthlak tur a lut chu rang deuh hian ka zui lut a. "Ka han intleuh hmasa thuak ang e" lo tiin a uniform chu a hlip mual mual a.


"Lalapa, ka nu thusawi kha..." ti halh a, ka pan hnaih chuan a uniform kawr chu khum ah a theh kai a. A hma a ka va din chuan thaw huaiin ka kawngah a ban a lo suih nghal hmiah bawk.



"Ih, thil țullo deuh deuh hi a sawi chhuak leh țhin a, ngai thutak duh suh aw" tim ru deuh a a mitah ka han en chuan, ngun zet a min en let run in ka khabeah a lo dawm a. Zawite leh tim deuh dai a "I thinrim em?" ka tih leh chuan nui lui sukin alu a thing nghut.
"Mahse..." ka ti ziau hman, "Mambawih, i nu mit tlung zo khawp a thil țha tinreng a vur che hi ka chak lo bik lo a nia" a tih zawih tak ruih ah chuan rang em em hian lu ka thing a.



"Khatiang khan sawi suh, i theih tawp a țha in min enkawl hi, tlakchham neilo in min siam bawk, chu bak bak..." ka ti mawlh mawlh lai chu ka tukhum ah chuan lo man in min pawt hnai a, ka chal ah lo fawp nghal zatin a thaw chhuak zui ham ham mai.


"I phur tirit tu nih ka duh lo a nia lalapa, ka nu thusawi kha chu ngaithu tak suh aw" ka ti leh hram a, a hmui a ka chalah la nawr reng pah chuan "engtikah mah phurrit angin ka ngai ngailo ang che" a lo ti nghet churh.



A inbual lai chuan a uniform chu ka lo khai țha a. Ka nu chu lo leng tawh miah lo tur te a hrilh te ka duh rum rum hial mai. A pi zawn meuh in a fanu raipuar tan țha tur nia a sawi ang tih hlawhtlin sak thei lo tu a țan chu tu makpa mah in nuam an tih bik ka ring lo.



Tikhan ka nu in mamawh ni a min hriat tlat thil khan ka pasal rilru a kam run tawh dawn a, sawi chhuak kher lo mah se a ruk takin ac a tuak ru nghal dawn tih lah ka pasal mizia ațangin a chiang reng bawk si nen țah chhuak țeuhin ka nu thla chu ka hau ru mawlh mawlh a.



Kan nupa a inhauhna leh intihthiam lohna awm miah silo a, kan chhungte'n sawi leh îh an neih avanga kan nupa inkar a buai mawlh chu ka hlau thar a, ka rilru chu a vak kual thui nasa kher mai.





Tlai khat chu Apuitei'n class a neih loh avangin Patea fanu Muani a lo leng a, Bazar pui ah ka chhuak khat tawh bawk nen tlail ah chuan kan inzui chhuak ve a, Remremi te dawrah reilo te kan țhu lut zawk a, Apuite chuan a nau te thil thawn tur lei a duh avangin Bazar pui ah chuan kan vak kual ve nasa hle, keipawn Lalati te unau thil tur ka lei sak ve nual bawk.


"sumo lo thleng tur hi lo chang nghal ila, naktuk zing ah a hran a kal leh ngai tawh lovin kan thawn nghal daih dawn nia" a tih tak ah chuan a remchang phian in ka hria.



Kan khaw sumo stand lam ah kan inzui let phei a, Muani leh Apuitei chu an titi barh barh a, thlasik a thawt țan tawh avangin khua a tlai tak ah chuan boruak chu a vawt sung mai.


Sumo a lo thleng a passenger te'n min han hmuh chuan "i dam em?" a rawn ti lelu hlawm a "Khawi ah nge in pa?" a țhenin an lo ti bawk, an zawhna chu ka chhang kim seng lo hi ani ber, "Hetah kan cham rih dawn a, ka lo tlawh ang cheu aw" ti tawk pawl te pawh an awm.


Kan in thawn fel hnu ah chuan "au Mambawih, kei a khaw mi leh sa zawk pawh min hrechang lo lek in nangmah chiah an bia che a, kan khaw ho hi chuan an va ngaina bik tak che" Apuitei'n a ti lar lar a.

"I â mai mai" ka tih lah chuan "ani tak tak a lawm, khaw mi te tiin ka lo intinel ve em em, tuman min biak ve miah loh kha.." a han tifiam a.

Muani lah in "chu, in khua ah chuan u Ramchhana te nupa hi an tla na hle elaw?" a lo ti vei bawk nen kan inneih hlimchhawna chaw ei a sawm kual tu kan ngah zia chu a hrilh zui ta mawlh mawlh a.



Hman ni lawk emaw tih laiin kum dawn kan lo innei ve reng tawh tih ka ngaihtuah chhuah phah a, chutia nui bawk bawk a in pan a kan let lai chuan ka thinlung tiche nghing lawih thei khawp a min țhawng tu ka hmu ta mai a!



Kawngpui chhak lam a police motor ding leh a hnung seat ațang a hmeichhe lo chhuak mek chu ding meuh in ka melh ta ngawt ngawt.


Andria chuan seat hnung kawngkhar chu a nam phui a, nui var var a kun hniam in ka pasal in tlan kual nan ber a a hman motor chhung lam chu kut a zuk vai leh kher bawk.


Andria chu step ah a chho nghal a, kan pa chuanna gypsy var pawh a tlan tlang leh nghal mai a.


Ka darah lo sawi dat paha "Au Mambawih?" lo titu aw ri avang chuan ka phu dawrh hial in ka hria. Muani leh Apuitei te chuan mak tih hmel deuh hian min lo en a. "Nau i vei a mi? I pum ana a mi?" an tih tak sek sek ah chuan chil lem khalh in ka inthing harh a, "i pum a nuam lo a mi?" chiai hmel deuh a min zawh leh chuan railing chu hum in ka lo khur chhuak titih tih ka hre ve chiah.


"Aih.. ka țha, ka tai ah hian min kalh deuh a" ti chhuak hap in ka thir hum lai chu ka thlah a, ka chhungril ti nghul leh ka awm rawn nuam lo chuah chuah avang erawh in ka tha a bo duak der mai.

"A ni maw, i kal thei ang em? Awi, nau i vei amaw ka ti hman a" Apuitei zawk chuan ti leh sawk sawk in ka ban chu la kangin a darah min kuah tir a. An awm nawm nan tak tak ka han nui lui ngial a. Mahse, ka thil hmuh zawh chiah avang khan ka lungphu chu a nghing lawih lawih thung.


"taxi la mai ang u" ka ti ta ringawt, Muani chuan taxi lo tlan mek chu a phar nghal a, kan țhu lut; in lam pan a kan tlan hnu ah pawh ka rilru chu a kal bing deuh ngut ngut a. Ka pasal chuanna gypsy ah khan ngatinge Andria kha a chuan ve? An inthlah dan te lah kha!!(?)




In chhung kan luh rual in "Muani, zanin tlai chu haw lo mai la, ka nuam lo deuh riau sia, Apuitei nen eirawngbawl ula hetah chaw ei ve mai rawh aw" ka ti sawk sawk a, a lo hnial lo khawp mai, a pa te a call nghal a. Apuitei bulah "ka mu dawn a nia" ka ti a, an pahnih chuan min hrethiam ve khawp mai.



Khawlai a ka kawrfual hak chhuah chu thlak in chau zetin khum ah chuan ka mu a, u Jo-a te nen luiah an kal țum a a lo call bak kha Andria call na hi vawi khatmah kan pa phone ah ka hmu tawh ngailo. Beisei loh dan deuh in a reh hlen ah ngaiin ngaițha deuh in ka awm kha a nia, ngatinge le kan pa khan a phurh le?



/
"Khawi ah nge i u Mambawihi?" kan pa aw ri ka hriat rual chuan a hma zawng a țah chhuak reng reng lo kha ka țah a rawn chhuak ta ut ut a. "Kan kal chhuak kha a nuam lo deuh a, a mu a nih kha.. hetah Muani'n chaw a ei nghal dawn a nia" Apuitei chuan a ti let a..


"Țhianpa lo țhu rawh" a tih sup hnu ah kan nupa mut pindan kawngkhar chu a lo inhawng zui nghal a, a lo pen lut vut ka hmuh rual te chuan a motor ațang a Andria lo chhuak lai kha ka mitthla ah a lo lang zut zut


A hmel a phurna nasa lutuk a lo lan chhuah rual leh lek phei chuan ka na ru tet tet mai.


"I englai nge na a?" ti sup in khum ah chuan a lo țhu thla ve nghal a, "englai mah" ka lo ti hmak.


Nui deuh suk a a lo kun hniam chuan rum deuh hian ka lo melh kha kha a, a kut phah hlai pui pahnih a ka biang a lo kuap lai te chuan khawlai a ka thil hmuh bawk kha ka mitthla let zel....



"Va inbual hmasa teh" ti hlar a a ban rek ah ka ben sak chuan a nui leh suk nangin min en chik ta viau mai.


"I pum a na ami?" a lo ti leh a.

"aih, kê in ka kal nasa deuh a, min kalh mai mai" ka ti ve ta mai bawk, a thaw deuh huai chu chik fe in ka en ran thung



"Hman a ka thawhpui țhin ka țhianpa nen kan inhmu a, chaw ei a lo tum a sin" ti sup in ka chal ah a lo fawp a "tihian lo mu hahdam rih rawh, amah a insawm chawp a ni bawk a, ka lo buaipui mai ang" a ti leh nghut a, min ngaihsak lo ta riau te in ka hre rum rum mai.




Ngawi rengin a inthlak che vel chu ka thlir a, a ni thung chuan a khat tawkin min en leh run run țhin a, ka duh loh dan ber a inneih hnu a ngaihzawng inneih san chu kan nupa inkarah thlen tir lo hram turin Pathian ka dil ru mawlh mawlh bawk.


A intleuh deuh thuak thuak ringawt tih hriat zetin bathroom ah chuan a va awm reilo, a lo chhuah leh pawh chuan che chang hlek lovin ka lo la mu tlat a. "Mambawih, na i nei lo tak tak maw? Damdawi in ah kal i duh em?" lo ti dut dut pah in tshirt a inthawlh a.

"Duh lo" ka tih let hmak chuan thaw huaiin kekawr bul a la chhuak a, a inthawlh leh sawt sawt hnu chuan khum tlangah bawk lo țhu thla leh in ka pang a lo dek a.

"Khawsik ka neilo, i țhianpa a awm reng a ni lawm ni, va chhuak vat rawh" ka tih deuh hlar chuan a ngaihna hriat loh hmel deuh in min en vung vung a, a tawp a tawp ah chuan "chaw ei dawn ah ka lo hrilh ang che" ti nghut in min chhuah san ta a. Ka mittui lo hnam deuh sawk chu ka hru nghal tawk bawk.



A țhianpa chu a rui deuh emawni leh nghal ni? "Khawi ah nge i nupui chu?" a lo ti bul bul a.

"A nuam lo deuh a, titeh, kan pahnih in eirawngbawl ang" a tih chuan "i va thaibawi awm deuh ve" a han tih khum khawlh a. Kan pa erawh in a chhang let lo.


An eirawngbawl thawm chu ka ngaithla kar a, a țhianpa chu a ţawng ring lung lung si, chutiang a rui nawi zet nen an lo inzui haw ta mai te ngawt chuan 'ka hmuh phak loh chin ah a lo tal ho ta viau em ni ang le?' tih thlengin min ngaihruat tir a.



"Țhianpa.. a pawi i tilo tiraw?" a ti chhen reng a, kan pa chuan " pawi tih ngawt chhan tur ka nei hleinem, i nun dan erawh bansan thei la ka duhpui khawp mai che" a ti let a.


A chang leh zawi tak a phun sur sur in chupa chu a nui leh huk țhin, vawiin lam a ka thil hmuh in a zir lo em bawk nen engkim chu ka ngai diklo kual vel vek tawh.




Ka lo chhing hman sek a ni mai thei, "Mambawih" tia kan pa'n min lo sawi dat dat chuan ka meng chhuak riai riai a, room light a lo in on tawh dan a khua a thim hle tawh a nih ka ring.


"Chaw ei kan peih tawh a, i lo tho chhuak peih em?" a lo tih leh lai mek in "ka țhianpa nupui chu ka hmu chak che a nia, ngahnge room ah i tawm bo reng, lo chhuak teh?" pawn lam ațangin pakhat lah chuan a rawn ti lung lung a.


Kan pa chuan min veng thawng deuh a min nuih pah in "a țha deuh hlek a, i hrethiam dawn a nia" a lo ti a. Thawh chhuah loh tawp chu ka chak rilru rum rum.


Kan nupa room ațang a kan pa in min kuah chhuak min lo hmuh chuan meng deuh phel phual chung hian "aaa! A lo hmelțha tak em a nih hi" a ti ta roh a.



A pa lian ve thawkhat viau nangin zu a in nasa țhang tih hriat deuh in a vun chu a thu chuap a, a hnar a țawk lek lek bawk. "Hei, in pa nen hian hman hman ațang a lo inkawm tawh kan ni a maw, kan inhmu thut a, chaw ei ah ka lo insawm nghal hmiah a nih hi, i thinrim lo tiraw chhungpuinu" te chu a ti tak ang zuah zuah a.


Tawite a nuih luiin ka chibai a.

"Țhiana, chintawk hriat tur aw, a nuamlo ka tih kha" ti nghutin ka pa chuan a khap sateh nangin a thawm a ring țha lung lung viau mai.


Apuitei leh Muani chuan an nuih an nuih a, pa uang ve thei tak chu ani phawt ang, ka mood in zir phei se chuan a zu in na a a chetchiatna te a sawi chu ka nuipui nasa viau in ka ring. A kham dawn ah chuan "in pa promotion lawmna ah khan kan department hrang mah se ka lo tel dawn tho a nia" a ti leh bul bul a.

"Promotion a?" ti deuh hu a Zoramchhana ka melh chuan a țhianpa chu beidawn hmel zet a melh in a thaw huai a.


"I la hre ve nange?" a țhianpa Tlana lah chuan a ti leh hnuhnawh.


"Țhiana, keimah ngeiin ka hrilh ang chu ka ti a sin le" ti hluai in a țhianpa tho hleithei lo chu a pawt tho nawlh a, sil hmun lam ah hruai pheiin "i chhungte call rawh, i chah thlak fel hma in lo hruai che se la a fuh ang" a ti nghut nghut a, Apuitei te pahnih chu an nui kar kar reng a.


Sofa ah an in mut fel tir leh zet hnu ah chaw ei dawhkan lo kil ve leh in "vawiin khan lehkha ka dawng a, inspector a tan nem ngheh ka ni tawh, ka hrilh ang che ka tia... kha, țhianpa hnen aţang zawk i hre ta sia" a han tih tak ah chuan ka bu nghat nghat a.




Zan dar 8 dawn ah a țhianpa nau ni awm tak chu lo lang hlawlin Tlana chu a chhuahpui a, Muani pawn hetah riah a tum tak avangin Apuitei room hman ah chuan an lut a, ka ngawih deuh ngal reng avangin kan pa chuan zawhna ngah hmel viau mah se engmah min zawt lovin mut a rawt a.



Khum ah kan mut hnu ah pawh ka țawng tlem em avang leh ka țhat leh țhat loh min zawh chang a "ka țhat" thu ka chhan bulh hmak țhin avangin a ngawi ta run a.



A tukzing dar6 a a chhuah lai pawh chu ka hre lo, ka thawh ve meuh chuan Apuitei te pahnih in eirawng an lo bawl peih tawh a, kan pa lo haw leh chiahin "Mambawih, thawhpui te khan chaw eikhawm an rawt tlat sia, ka order tawh a, tlailamah mi 20 vel mikhual kan nei ang aw" a tih chuan, "a țha a lawm" ka ti mai a.


"Nimin khan cake ka order tawh a.." a tih leh laiin "Apuitei te'n chawhma class chiah an nei a, vah harh pahin ka lo lam dawn a nia, khawi dawr ah nge?" ka ti nghal a.


Min hriatthiam loh hmel zet a min en vung vung hnu ah a cake order-na dawr chu min hrilh a, dar9 ah hna kal leh nghal a ngai bawk nen ka mizia avang a rilru buai hmel tak chuan a chhuak leh a.


A gypsy khalh chhuah plate number leh nimin lama gypsy number kha a la in ang chiah chiah zui! Nimin khan ka hmu sual hauh lo!!


*cake lam turin ka chhuak a nia* tih message ka thawn a, chhun thingpui in tur a alo let hun vel chiah a ni nangin ka hmuh changin Andria hmel hlir ka mitthla ah a lang tel a, ka hmu chak rih thlawt lo.


*ok, lo haw ka tum chiah a sin..* tia a lo reply na chu chhan pawh ka chhang let lo.

*fimkhur la aw* a lo ti leh a.


Ka out nghal daih.



Apuitei te class bang chu gate bul ah ka lo nghak a, an lo chhuah rual in cake dawr kan pan leh nghal a, crush an nei ve ngei leh nghal amawni, an sawi dun ve nasa viau mai.


Dawr kan ve thlen chuan nghaktu te chu an lo hawihawm em em a, kan pa in a recipe min ken tir chu ka pe a, box lian tawk tak chu min pe in 'lo order leh zel rawh u aw' a ti lang lang a.


"Chhun thingpui hmeh ah eng hi nge in duh thlang ru" ka tih tak ah chuan Muani te pahnih chuan phur deuh in cake slice sa chu an enkual a.


Chutih lai mek chuan dawr chhungah Andria chu a lo lang ve hlawl a. Min hmuh rualin tunge ka nih hresa tih hriat fe hian counter a cake box chu en in a țhen sak a. "e, i lam maw, nimin khan order hi kan siam a, lo lam ka tum ve chiah a" a lo ti a nih chu!



A thusawi in min țhawng lutuk bawk si nen ngawi reng hian a lo pen phei chu ka lo en ngawt ngawt a.

"Ramchhana nupui chu i ni tiraw?" tiin ka hma ah a lo ding a, he cake hi Zoramchhana nen an pahnih a an order maw lo ni a? Mai mai chuan le...


"Min hrechiang a nih hmel" ti fakin Muani te cake thlang zo ka bul ah a lo din chuan "heng hi min pack tel sak leh la aw" tiin dawr nghaktu chu ka nuih lui seih a.

Apuitei chuan Andria chu a hrelo a nih hmel, Muani erawh in a hriatchian hmel in keichu min ngaituah hmel zet hian min en a.


Nui sakin pawisa ka pe fel a, cake box Apuitei'n a pawm rualin Andria vek chuan "a flavour ka thlan kha i ngainat ngei ka beisei" a lo ti leh kher a.



Ka chhungril ațang chuan box chhung ațang cake hi lak chhuah a, amah vawm nan a hman mai chakna hian min lo tur ut ut.


Mahse, nui sang chungin " hetiang thil lawmna ah te chuan a tui leh tuiloh lam tuman an care vak hleinem" ti hmak in ka kal pel a, ka nau te pahnih chuan rang deuh hian min zui chhuak nghal a.



Apuitei chuan "Tunge a khanu kha? Hei te chu u Ramchhana'n a order a ti reng sia" a ti ta reng a, Muani chuan min melh hmasa zet a. " a â anih kha" ti puat in Apuitei chu thil dang a sawipui ta daih.


In kan thlen hnu lawk ah uniform nen Zoramchhana chu a lo lut ve hlawl a. Amah a palian in a landan rorum zet te nen chuan police uniform chu a inhmeh in a lanpa pui thlawt, mahse, Andria ang bawk khan cake a lo vawm mai chu ka chak tut tut.


A sawi vel dan ah a kaisanna chu ka pa te pawn an lo hre tawh a nih hmel a, zanin tlai erawh athawhpui te rawt chawp takzet zet a nih avangin a thawhpui te nen chiah zanriah kil ho a, chhungkhat te nen chuan a hran a chaw ei khawm an rawt thu chu min hrilh ve dut dut a.


Andria nen an inkar chu zawh tawl a, ka lungawi lohna te chu lan chhuah tir vek ka duh viau laiin a thawhpui te an lo thleng khawm ţep tawh a, an tan a hmuhnawm lo siam lah ka duh bik mang silo.


Ka kawrfual hak tur zawng a thuamhnaw inkhai ka keu kual dan dan lai chuan ka hnunglam aţangin nghet tak hian min lo kuah a, ka insang mar nghal țeuh chu hrelo ang maiin a khabe ruh kual chu ka dar ah a lo nghat a, ka beisei lawk loh deuh hian "Min ngaihsak lo, Lalanu" a lo ti ta hmuk.

"Khawiteh, i mi sawm te lo thlen hma a inthlak fel ka duh a nia" ka ti hlar thung a, ka kiu a ka nghawk sawkna chu ngaipawimawh lo zet in thatchhe deuh hian ka nghawng chu a hmaiin a lo nawr tlat bawk.

"Lungawi lohna i neih chuan țha deuh in sawi la" ti sup sup in a hmai chuan ka nghawng chu a nul pah dun dun a.


He thil lawmna hun hi zo fel se ka sawi dawn khawp alawm.


"Min thlah teh" ka tih leh nghat chuan thaw huaiin min kuahna chu a phelh thawl a, mah se a lam hawi turin min kuai her ta thung.


"Mambawih?" zawi ruih a lo tia ka khabe ah a lo dawm chuan a mitah en turin min kuai dak a, a hmel ah chuan ka inlak hran tlat avang a hreawm tih takzetna ka hmu thiam.


"I nuam lo nge? Thinurna i nei zawk? Enteh, tunah chuan i tan liau liau hlawhtlinna ka chang a. Mahse, i lungawi hmel hmuh tur a awm miah silo a, tih dikloh lai ka neih chuan min hrilh rawh, ka nupui in min inlakhran san na hi ka tuar thei lo a nia" zawi ruih a tiin a chal chuan ka chal ah a rawn nawr si a.

Ngengngawl tak hian "min hrilh rawh, tih sual ka neih chuan ka siam țha ang" a lo ti leh ruih bawk.

Chaw ka ei tlem zan khan ' inhmangaih dan kan thiam ang bawkin inhauh thiam dan kan zir a ngai a nia' tiin inphah hniam tak siin min hrilh tawh a nih kha ...


"Au Mambawih, u Ramchhan in țhiante an lo kal tawh a" tia kan mut pindan kawngka Muani'n a lo kik chuan kan pa chu a rum chhuak hawk a.



"Lo va chhuak hmasa rawh" ka ti a, ka inher tur chu a kutphah pahnih a ka biang ah lo dawm in min fawp siah a, ka tal phat tur chu min fawp uar zual sauh in a lei chuan ka hmui a lo nawr kau a, ka țang sateh nangin ka inlakhran sanna tuar thei hlawl lo ka pasal tha chu hneh lo tak ka ni tawp mai.


A duhtawk a rei duhthawh lutuk a min fawh ngawng ngawng hnu ah chuan thaw ham ham in kan chal a insik tir tlat a, ka țawng leh tur chu ka hriat tham lek a min rum khum nghutin ka kâ chhung ah bawk a lei chu lo hawl lut in ril ruih in min fawp leh ngawr ngawr a, chhang let duh lova ka dawh mawl tawp na chu a tan a remchang ting ani tawp, zei zet a a lei a chet kual tir velna a vang chuan ka dang chhung thlengin a za uaih uaih vek!!


Ka tha inthlah dul tial tial chu hrethei in ka hmui hnuai pet chungin a duhtawk ta hram a. "In ha rawh, kan chhuak rual dawn nia" ti sup in ka kawrfual zing a a duh ber chu a ban nghal vut.

Hmui huh hliam a ka ding ngawng deuh chhulh chu min nuih suk in ka kawrfual hak lai chu min hlih sak ta mai a.


"Hey..." ti a ka han inhliah chu "a va țullo e aw, kha aia chiang pawn ka hmu ngun lutuk che" ti hluk in pa zet hian min nuih let a.

Ka melh kha kha na lah a ngaihaw duh der roh lo, ka kawrfual chu khum ah theh hlawm tawp in a kawrfual lak chhuah chu min pe a, lungawilo deuh chung a ka inthawlh tur chu nghal zetin ka hnute ah a rawn țham pek a. Run zet a ka rum nghat chu a duhzawng tak a la ni leh nghal amawni.


Kan inzui chhuah chuan chaw ei a min sawm tawh tu an pu te nupa pawh kha an lo awm reng tawh ni in; an nu chuan min lo nuih var var a. A cattering order pawh reilo te hnu ah an lo thleng chawp chilh ve leh nghal bawk.


Cake cut hma deuh a kan lo rik nak nak lai chuan Tlana leh Andria te an lo lang ve ta hlawl a!! Zak hlek lovin Andria lah chu a la rawn ri lut lar lar zui.
A present box lo ken chu dawhkan ah dah:pahin "congrats pu inspector" a la ti ham ham ngam nia.


Zoramchhana chu rum deuh tak hian ka melh a, Andria a sawm tel ve kher chu a lutuk mah mah ka ti thlawt, țang țeuh leh thinur ru deuh tak hian a bul ah chuan ka țhu a, midangte chuan Andria nen an tunhma nun an hriatpui vek awm si a, kei chu min nuihzat ru hle te'n ka ring.



A thawhpui te an lo kim hnu ah chuan Zoramchhana chu a ding chhuak a, lawmthu sawina tawite a neih hnu chuan keichu mitmeng dam ruih hian min lo en in "Mambawih, i pasal hi min han dinpui teh" a lo ti dut.


A kut min lo pek chuan a thawhpui te chuan kut an beng dar dar a, țullo ti rilru takin a kut chu ka chelh a, ka ding chhuak tur chu dimte hian min pawt tho a.



Nghet tak a ka kut ah chelh a min chhuk en run chung chuan hetihian a lo ti ta a "hringnun hi a harsa zawng leh a beidawn thlak zawng hlirin ka lo suangtuah ve tawh țhin a. Mahse, he ka nupui hmelțha zet mai ka nun ah a lo lan ni ațang kha chuan hringnun hi a lo harsa lo a sin, kan pe a, kan dawng let mai țhin, hmangaihna kan lantir a, hmangaihtuin min hnaih a... chutiang khawp a awlsam chu a lo ni zawk" tiin min nuih suk mai.


Ka kut a chelh mek chu la kang a fawp chungin a thawhpui te chu en kual pah thuak bawk..


" vawiin a in zing ah hna ka thawh leh theihna chhan pawh hi eng dang vang niloin ka bul a hmeichhe hmelțha lutuk leh rilru țha lutuk bawk si vang chiah hi a ni... a dik em Mambawih?" min lo en vut a a tih leh nghut chuan tawite hian ka lo nuih let a.



Ka pasal thung chuan a bul ah ka dinpui avang leh a kut chelhtu ka nih avang a vannei intih hmel em em hian min en thung.

" I hmangaih thingtlangpa kutah hian hausakna ni lovin rinawmna a awm a, thingtlang tlangval satliah ka nih lai pawh a beiseina te nen ka kut i vawn tlat avangin ka lawm e" a lo ti charh charh a.


"In hria em? Holiday pawh India ram chhung ah ngawt nilo, India ram pawn ah hmang țhin nula khan neih engmah neilo kei hi a nawmsakna ve tur zawng zawng kalsan in min thlang a, hmeichhia te chu sum a lei mai mai theih ang hial a lo ngai tawhtu thinlung kha a ni hian rawn vaw țhiat sawm vekin; engkim ah hmangaihna lo la dah chungnung ber țhin hmeichhia an awm tih ka hmuh thiam ve leh phah bawk" ti dap dap a a thawhpui te a melh kual thuak chuan an zing a țhu ve pakhat erawh a meng țî dak a, chu erawh a pawisak hmel viau loh.


"Hmangaihna nen nghet tak a i chelh chung pawh a, chelh leh vuan let ve silotu che avang khan i thinlung a lo na ve tawh a nih pawh in beidawng lo la, 'nang ai țha leh fel neihna hun min siam sak avangin ka lawm e' tiin kal tir rawh, Hmangaihtu țha zawk i nun ah a lo lang thuai mai ang" a rilru chhungril ber ațang a lo sawi chhuak tih hriat takin ka pasal aw chu a nghet churh.


An pu te nupa in kut an ben rual chuan midang pawh chuan kut an beng ta dar dar a.



Ka pasal chuan ka kut chu la kangin rilruih a ka mitah min en chungin a fawp leh vang vang a, hmui phun hian " pialral run kan lawi hma loh chuan ka thlahthlam ngai lo ang che Lalanu" a lo ti sup bawk.
Rinhlehna rilru pu dawn dawn a ka lo awm kha ka inthiam lo thar kher mai.


Cake kan cut zawh ah chuan chaw dawh turin an tho sap sap hlawm a, kan pa thawhpui te zi nuaih nuaih kar a kawngkharpui a hmeichhe kal chhuak zuk chu rang deuh hian ka umzui a.


"Hey.. lo la ding teh" ka tih rual in Andria pawh chu a ding chawt mai.

A hnung mai a ka va din rual chuan a lo inher let a. La hawi sang vah chungin min han melh vel chu nuih let seihin "ka lawm e" ka ti ta sep.


A ni erawh bangbo zetin a meng phar deuh awk thung.

"Ka lawm e, Zoramchhana hi kal san a ka ta chiah nitur a i lo hnutchiah avangin ka lawm e, tun ah chuan i hrechiang tawh tiraw? Ka pasal thinlung ah khan hmun i chang ve tawh lo, i kalsan tawh thinlung ah khan kei leh kan fa lo piang tur te tan chiah hmun a awm tawh, chuvang chuan kan nun ah lo inrawlh a, min chawk buai thei ang a i inngaihna rilru kha paih bo la, kan hmuh phak ah lo lang nawn leh tawh suh" tia ka sawi lai chuan ka la hriat ngailoh thu neihna ka awri ah chuan ka hre tel thei.




Țawng tur a Andria ang deuh ziau chu lu thin khum nghat in ka nuih leh a.

Ani pawn mak deuh in engmah a sawi zui ta miah lo, meng hnual raih in a inher a, muangchang a kan tualzawl zim te aţang a kal bo lai chu ka thlir zui reng a. Tunah khan 'nupui te'n engtiang a nasa in nge thu kan neih' tih chu ka hmufiah chiang khawp mai.




"Hetah ilo awm daih a" ka pasal aw zawi sup ka hriat rualin ka hnung lam ațangin ka kawngah a lo kuah nghal hlu hlu a, "Ka thinrim chhan kha i hre duh em?" tia ka lo zawh chuan ka darah a khabe lo nghat in a lo thaw lum hawk.

"Nimin khan i motor ațang Andria lo chhuak lai ka hmu a" ka ti ta a.

Kan pa pawn țha deuh hian "Cake ka order-na dawr ah Tlana nen khan an lo awm a, a remchang em a, chuan ve min dil a nih kha" a tih sup chuan rinhlehna ka nei miah lo.


"Chhun ah i cake order lam a kan va kal khan a lo lut ve a, 'amah nen in order' ang hrim in a rawn insawi vel a, cake khan ka vawm hman țep a ni" ka tih tak hlak ah chuan nui che dawtin ka nghawngah a lo fawp thuak a.


" amah nen kan order a nih loh zia chu i hre tawh a lawm" a ti leh mai a, thaw halh pah a ataksa nghet țha zet ka nghen tak hle hle ah chuan a hmui lum chuan ka beng a lo nawr si a, "midang an lo hawihai lutuk ang, lut ang le" a han tih sup chuan keipawh ka ding mar a, nghet lutuk a ka kut chu lo hum hmiah in inchhung lam ah chuan kan inzui phei leh ta a...

Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » September 26th, 2021, 8:11 pm

Epilogue

Ka thiam ang tawkin fuihna leh chona lam ka phum ru a, a chhar chhuak thiam apiangin in hlawkpui ang.

IG lamah @abbra_ririni_pitartei tiin min lo zawng ula.

Ka reh vang vang tawh dawn a, eng amaw te te ka buaipui dawn a.😝 'Pitartei'n pasal a nei' tih thu in hriat thut pawn mak ti lutuk suh u aw.😂 JK 🧚‍♀️






Kumin thlasik chu a na in boruak chu a vawt vur reng a, hlawhfa te nen kan buh pawh an seng zo fel tawh a, țin 400 dawn kan thar leh thu chu phur em em in ka nu leh pa in min rawn hrilh ta a.


Kan pa pawn "Zu va in zah an ngai a, rinai takin kan thar hnem phian a nih chu" a ti ve nghut nghut.


Buh seng hma deuh ațang tawh khan "kan lo chu ka ngaihtuah mange aw, Sa an chet palh vaih chuan veng tu tur an awm dawn der silo" ti sup sup in tukverh ah te a han dak chhuak leh ringawt zel a.



Mahse, Pathian in sa chang tu tur ber in țulna avangin thlawh hma a awm bo san tih min hriat sak a ni ang e, 'Sa in buh a nawr' tih thawm awm miah lovin țin 400 dawn kan thar mai alawm.


Buh chhek in a zui a, khua ah Sakawr an chah lut tih te min lo hrilh ve zel a. Mipa naupang ho in Sakawr zui nuam an ti leh ang chu aw..

Uang deuh tak hian kan pa bulah chuan "i rilru chuan haw mai i chak tih ka hrereng" ka ti țhin a.


Kiai suk in lu min thin khum mai tak nangin Lo neiin ei a lo zawng țhang tawh a, mahni thar chhuah liau liau zem inkual ruih chhung a buh inchhung vum thur mai Buara ah thun a, Sakawr chung a han hlan vel sauh sauh kha a thartu tan chuan a lungawi thlak dawn lutuk a. Chu hun chu Lo neitu te nghahfak ber pawh a ni țhin reng a ni, haw rawt ta pawh nise ka dem miah lo ang.


Ka nau neih hun pawh a hnai ve zel a. December thla kan han chuang kai dek dek a, nau vei sehsam ka la nei miah lo naa pakhat pui lah chuan nau nei thei mai tawh tur ang ziazang in min han sawngbawl țan ta thawr mai a.


Doctor in ka nau neih ni tur a a sawi kar kan chuan kai hma hauh ațangin rorum viau si kha a zam chhe ta tlat roh a. ' tawn-hriat a nei tawh' tiin ațhianpa, u Ngaihsaka a phone ta tlut tlut mai pek a.

"Țhianpa, ka nu leh pa rual khan lo chhuk thla ve mai teh" a han ti thlawt zel.

U Dtei uang ta reng reng lahin "ngahnge i nupui nau neih dawn avang mai a ka pasal chu i rawn chah tluk tluk a, nau a chhar thiam mai mai lo" a rawn tih sak ta țhin a.


Run zet a rum khum nghut lahin, "kan pa chu nau chhar tir i tum reng reng em ni? Keimah hian ka thiam zawk ang, ka lo chhuk zawk ang aw" a rawn ti țal zel a. An in chhang let nelawm lo thei khur khur viau zel.

Mamawh lak khawm tur a hre fu bawk si, December thla kar hnihna a lo thlen chuan ka nu leh pa bakah u Ngaihsaka te an lo chhuk dawn avangin kan lo inpuahchah nasa ve hle a.


Christmas Bazar in chhungkua a lo kal tum tho mah nise a țhianpa zam ru lutuk in a chah sek sek si a, u Dtei te nufa tello in u Ngaihsaka chu a lo kal hmasa dawn ta a nih chu.


An lo thlen dawn tlai ah chuan dar 3 vel ah office ațangin a rawn haw nulh a, keiin insiam peih diam in ka lo nghak sa a.


"A lo chhuak teuh tawh si a" ti nghut in ka hnungah lo dingin ka dul chu a rawn pawm hlu hlu a. Keiin hahdam deuh in a awm nghet țha zet chu ka lo ngheng thung a.


"Piang fel vat vat se ka ti tawh" ka tih chuan ka darah khabe lo nghat in a thaw chhuak hawk a, thatchhe aw cool ruih hian "ngati maw?" a lo ti ve sup bawk.


Uar deuh tak hian " naute Lalanu thu sawi chu i hria em? Lo piang vat vat rawh aw, Lalapa hi awm nuam pawn i awm tir thei tawh lo" ti pah a ka dul ka chul ve thuak chuan kan pa chu a lo nui nghing dawt.

Kei leh naute chungah eng amaw a thlen palh hlauhnain a khat a, ka neih fel hma chu nunphung pangngai a nei thei dawn in ka hre tawh lo.



Thingpui te a inzawh hnu ah chuan a in tleuh thuak thuak a, ka nu te lo hmeh pui tur Vawk lu bai lei turin a chhuak leh phawt a, Sachek te nen duhtawk a ei khawp tur a lo khai haw hnu ah chuan sumo stand lam pan in kan inkhalh chhuak ve leh ta a.


Traffic ah kan din zat in a kut lo lek chhuak vutin ka dul chu a rawn hup leh vung vung zel, a kutphah a lian in a mi min ngaihtuahna mitmeng zawng zawng te nen chuan ngaih a ti țha hlu hlu țhin a nia.


Sumo Stand chhak ah Gypsy chu a hung a.
" lo chhuak ve suh aw, miin an su palh ang che" ti sup in amah chu a chhuk vut a.
"Zial a zu leh dawn ta.." ka tih nai nai chuan nui ruh ruh in a kekawr ipte a zozial pack chu a phawrh chhuak a.

"Rei miah suh, i rei viau chuan ka lo chhuak ve ang" ka ti let kha kha a. "Minute khat pawh a tling lo ang" ti ve sup in zial chu a țan a, lighter chu motor hma ah theh lut in kawngkhar chu a lo nam phui nghal dawt bawk.


Phone khawih mual mual pahin zozial chu a si leh ham ham țhin a, kawrdum ban tluan chung ah ka jacket lei sak kha a ha a, amah a palian in a sang khup bawk si nen kawng a kal ho chuan an melh zauh zauh hlawm a. Pakhat lah chuan a phone bih lai lak ațang mit a lak sawn chang in motor chhung a ka țhu chu mit min lo siai suk bak thil dang a ngaihven der bawk silo.

Ka țhutna lam lo kal pel tu te chuan zawite te hian "inspector thar an sawi kha ani chiang lutuk, hei a motor pawh" tiin an phun ru sap sap a..

Motor chhung an lo bih in a chhung ah kei min lo hmuh leh hnuhnawh vei țhin bawk nen, lai deuh a inpawt in an tlan chawn chawn zel.

Ka pasal in tleirawl ngaihven thar tu a ngah ta lutuk chu thik en ah pawh ka en lo. A hringnun kê pen pui turin keimah chiah min thlang tih ka hrechiang miau a.


'In pa hian boruak a nei lian teh mai a nia, amah hmuh an chak vang hrim hrim a station bul cafe a chawl te pawh an awm a nia aw' tia Jen-i'n min hrilh chang pawn "pasal celeb ka nei a nih chu" tiin ka nuih liam pui mai țhin.


'A tir ah kha chuan engtin nge a ni ang mipa hi i duh theih zawk le?' kha ka ti rilru fo a, in inneih hnu thleng pawh khan.. mahse, a rei tulh tulh a. In mak, in nupa hi maw, ka awt che u, in hausa pawh a nilo, milar in ni chuang bawk silo. Mahse, in lungawi dun lutuk te, neih nei em um silo a awh belh leh chuan tur nei miah lo ang mai a inkhawsa tlat lawi si te hi ani ber zawk in ka hria e a... nangni aia hausa leh thil ti thei zawk te pawh hian an awh let chhan cheu ni' a ti ve ngial zel.

Ka sawi hmaih phal loh chu a kaisan lawmni a a thawhpui te hma ah khati tak mai a min han chawimawi thiam mai kha an pu khan a lo ngaisang ngang ni tur a ni, tun ah phei chuan kan pa nen ţhian țha tak an nih phah a, kan pa kawm tur hian amah zawk hi zan ah te hian a lo tei lut nulh zel.

'Ka nupui nen hian kum tam tak kan lo innei ve tawh a. Mahse, ka tan a inpumpekna leh zan rei pawh sawi lova ka hna ban hun nghak a alo meng ve țang ţang zel te kha ngai ah ka lo nei mai țhin a, in nupa nun ațang hian engkim hi ngai a neih ngawt ai chuan fak kan țulna ah infak tawn a, nupa inkar chhem alh thar zel tur kan ni tih ka hriatthar phah leh e' a ti churh churh zel.

Motor tukverh darthlalang chu pawn lam ațangin alo kik ri kauh a, ka va en chuan hmui phun in " lalanu, i rilțam em?" a lo tia.


'Aih' han tih mai ka tum zet tawh. Mahse, eng amaw hi ka ei chak tih ka hrechhuak a. Rang deuh a lu ka buk tak ah chuan a zial bung chu lei ah paih in a rap hlum a. Chu mi hnu ah motor kawngkhar bul a zial khu leng vel chu a kutphah a zap kiang hmasa leh phawt in kawngkhar chu a lo pawt hawng ta chiah.


"Eng nge i ei ang?" thum deuh dut a a lo tih rualin "Vai dawr ah khian Jelebi an zuar ang" ka lo ti nghal zat.


Sumo stand chhak building lian zet hnui a vai dawr chu a han thlek ve nghal vut bawk. "Lo chhuak miah suh ang che" a ti leh nghut a. Naupang thu inchah kan ang țhin a sin.


Ka buk nghat nghat hnuah Vai dawr lamah chuan a chho nghal a, keiin an lo thlen chin zawt in u Ngaihsaka ka text nghal bawk.

*Mate, Zemabawk ka lo lut tawh. Mahse, traffic a thui lutuk, kan lo thleng chho har ang* a lo tih chuan mak ka ti hran lo.


November thla laihawl ațang tawh zawk khan Thingtlang lam ațang pawn Christmas bungrua la in motor lo lut a tam em em a, dar 3/4 vel a sumo service lo țhleng țhin kha thim hnu dar 6/7 vel ah chiah an lo thleng tawh țhin.


Kan pa chuan dispo cup ah thingpui a lo chawi tel a, kut bawr deuh a motor kawngkhar a lo hawng chu ka lo nuih kar kar a, dim em em hian motor hma ah a indah fel phawt a, lo ban mai ka tum chu a mitmeng thunei lutuk hmang chuan min khap leh hmiah tawh.



A lo țhu lut ve chu u Ngaihsaka te lo thlen chin ka hrilh pah a. 'an va ning dawn ve' a ti hluk a. chutah, "I ei hnem lutuk chuan chaw i ei tlem palh ang" ti dut dut in a jelebi lo lei chu a phawrh chhuak a, tissue ah dah leh thlap in min han pe a.


Ka ei nghal mial mial laiin dispo cup a thingpui chu min chhem daih sak hauh hauh a, in ngam ani ta ang tih awm ah chuan dispo cup chu ka kut a ka khawih a rem ti ta chiah.



U Ngaihsaka sawi ang tak tak in motor chhung ah chuan kan nghak rei kher mai, Apuitei ka call a, a rilțam chuan chaw lo ei turin ka hrilh ta tawp bawk.


Dar 7:30 rik dawn ah ka nu te lo chuanna Sumo chu stand ah a rawn thleng ve ta hlawl a, driver chu lo chhuak thuai in a chunglam ah a lawn chho nghal a.


"Motor a tam, lo chhuk ve suh ang che" tih bawk min chah leh in Kan pa chu a chhuak vut a.


Sumo ațang chuan vawt tih hmel deuh in ka nu chu a lo chhuk thla hlan hlan a, an lam pan a afapa kal phei mek a lo hmuh rual chuan ban a phar chhuak hliai bawk.



Ka pa pawh motor ah a țhut rei tawh avang a ké kham tih hriat takin a lo chhuk thlak rual chuan a pai deuh khat khat a, a fapa chuan a darah lo chelh thuai in ka nu chuan a lo nuih hawk hawk bawk.


Engnge an sawi chu ka hre phak lo. Mahse, kan pa in ka lam a lo kawh (k) zauh chuan hlim hmel em em hian ka nu chuan kut a lo vai a, a puan lum chu bat țha sauh sauh in motor lam chu an lo pan phei nghal a. An tar ve tawh sia, min ngaihtuah luat avang a thlasik khawvawt pawh pawisa lo va min panchilh vang vang mai chu a hlu ka ti takzet.


ka nu hnungah chuan an bag leh eng îlo khai in u Ngaihsaka leh kan pa in an lo zui bawk a. An ni țhian dun han awm tlang leh thei ta pawh chu an hmuhnawm takzet, a thuamhnaw bag ak chung a u Ngaihsaka țawng nghal mawlh mawlh chu kan pa pawn nui suk suk in lu a buk khum nghut nghut mai.



"Awi aw.. Mambawih, kan inhmu leh ta der mai" seat hnung kawngkhar lo pawt hawngin ka nu chuan a lo ti nghal lelu a.

"Kan inhmu leh ta der mai, nu, a vawt inti em?" ka lo ti ve nghal sawk sawk bawk.

Ka nu leh pa an lo lut fel a, u Ngaihsaka chuan tukverh darthlalang chhan ațangin min rawn nuih deuh suk a. Eng phei chu a sawi zui chuang lem hlei lo va.

"Pa, motor i rui em ni? I ngui hmel riau" ka tih chuan "umm, ka rui deuh a nih hi" ban chalh hian a lo ti nghut. Ka va khawngaih reuh e aww..

"A va zialo e aw, in thleng vat ila, i mu hahdam dawn a nia" ka ti a,

"Kan lo tlan chhuah hma in motor ruih lohna damdawi ka ei tir tawh reng a, a rui leh tho sia" ka nu pawn a lo ti a, rang deuh hian motor hma a jelebi chu ban in ka nu zawk ka pe a.

"Pa, kha kha ei rawh" ka tih chuan chauh hmel deuh hian a nui a, ka nu kut aţang in a ban ve ta tho a.


Buhseng leh a vua vel in hlawhfa ruai tho mah ila ka pa hian a telpui ve zel țhin avangin amah tak pawh hi a hah ngawt ang. Kan pa leh u Ngaihsaka pawh chu lo țhu lut in kan tlan chhuak nghal a. U Dtei call in an lo thlen fel chiah thu ka hrilh thuak thuak a, in thlen hun ah kan biak leh tur thu sawiin ka dah leh nghal a.


Kawn vel ah light an zam kual nasa tawh bawk si nen, ka nu chuan nuam a ti asin aw.


"Naktuk zan ah khawlai kan fangkual dawn a nia" ka tih chuan kan pa in rem tih loh hmel lutuk hian min en nghal run a.


"awww, kar leh mai ah nau ka nei tawh dawn a, ka la kal kual theih lai in ka nu te ka chhuahpui chak a lawm" ti in țan ka khawh ve tlat a. Ka nu in ka lam a lo țang thuai bawk nen "chhun ah in mu ang a, zanrei motor tam loh hun ah kan chhuak dawn a nia" a ti ve ta nghut nghut. Ka nu te țhutna lam chu han hawi chho in kan innuih dun var var mai.

'Mambawih, in pa chuan a va khuahkhirh awm che ve?' tifiam pah a ka nu in min zawh chuan 'hmeichhe naupang thuawi thei deuh ang maiin ngawi dakin ka ngaithla țhin mawle' ka ti let a, ka nu chu hlim tih hriat zet hian a nui kar kar reng a.



Ka dul len tawh zia te chu a han sawi kai leh ang lawp lawp a, a chang leh 'tu hmel kan hmu ve tawh dawn a, kei zawng, ka phur tawh emai, Mambawih, nau han awl hlauh la tiraw?' a ti leh thul.



Chawl hman miah lo va min biakna tur ngawt a zawng chu keiin nuam ka lo ti em em bawk.


A chhan chu ka nu leh pa te hi mi țawng tlem leh phunawi lo ve tak hi an ni a, hetia amah ang lo tak a hmeichhe naupang ang mai a min biak seu seu chhan hi an tu lo piang tur vang a a phur tluk zet in; min ngaiin ka kiangah chuan engpawh sawi ngamin a hahdam ve tawh tih ka hrethiam a, lawm tak ka ni tawp mai




Quarter kan thleng chu țhenawm te an lo chuang lut nghal a, ka nu leh pa te chu lo chibai ve in an bulah chuan kan nupa chu min han fak der ve luam bawk.



Zanriah la ei lo te kan nih avang erawh in min chhuah san leh thuai hlawm a, Apuitei pawh in nuam a ti ngang mai.

"Api te nen room kan inhman țawm ang a, u Ngaihsaka'n room pakhat saw amah in hmang se" a ti seu seu a.


Zanriah ei kham ah ka nu leh pa te chu tui lum sa vervawr in an intleuh thuak thuak a, ka pa chu damdawi kan ei tir leh zet hnu ah an mu lut a, awngphah electric hmang a tih lum thei ang kha kan lo lei lawk a, an mu lum zo em ang chu maw.




Ka nu in thil rep vel a lo ken thlak ang ang chu Apuitei'n a dah fel zung zung a, kan țhian dun inngai-a te pawh heater ai in an ti ti tui ngang mai bawk.



Apuitei pawh a insingsak fel hnu ah a mu lut a, kan pa te bul ah ka țhut phei ve tak ah chuan u Ngaihsaka chuan min lo nuih leh deuh ringawt a.


"Nangpa hi i lai vel ngawt elaw?" ka han tih chuan nui ta kur kur a.
"Chanchin in nu i hrilh tawh em?" ka tih leh chuan "i nu leh pa mu tur i buaipui lai khan kan inbe fel vek tawh" a han ti a.

Ka nu te chanchin ka zawh chuan țha takin min hrilh ve mai nangin a lai zel roh a.

"An lang tar tawh em? Ka beisei aiin ka pa hi ka hmu tar a, Lo lam ah a che ve vak em ni?" tia ka zawh chuan kan pa in chiang deuh hian min lo en vung vung a.


"Ka nu leh pa pawh hmu leh la chuan tar i ti ve tawh ngawt ang, i pa chu buhzem siam te'n a che nasa a, Buh seng chhung zawng hlawhfa vengin a riak lut ve bawk a" u Ngaihsaka'n a tih charh charh chuan ka thaw chhuak halh a.

"Lalapa, nakum chu Lo nei tawh lo mai ang u" ka ti ta ngawt a, ka pa kha ka hmuh tum aiin ka hmu tar daih mai a, hnahram thawk chi niin ka hre tawh lo. Ka pasal pawh chuan lu min buk khum nghut in ka hnungah a lo chul thuak a.

U Ngaihsaka lai deuh tlat chu fiam nan tak hmangin ka nuih ka nuih a. Pa Khawla mizia hi a chhun fuh ve a, an nu in inhmuh loh rei te mai mai chu min ngam loh phah nan a hman dawn loh vei nen, ani erawh a lai deuh tlat lawi a. Min nel leh thuai tur ah beisei ang.


"In inneih nawm hi, kum pawh a vei hma hauh in in muk nghal em em bawk sia, keini nupa te hi han indang ve ngawt dawn ila, in muk ang hian kan muk zo teuh lo" ti sup sup in kan inchhung chu a en kual a.


"Țhianpa zawng rilru i nei em a, tihian mahni a inhrang chang patling i ni bik nghal der mai a" a tih chuan Zoramchhana chu a lo ner suk ringawt.


Chumi zan chuan kan pa chuan min mut luh pui zet a. "Ka delh lum sa ah hlir i mu ang" a tih tawh miau avangin tual- thi an awm a, hna ah a buai tawpkhawk a nih loh chuan khum dai ah keimah in ka mu kai hmasa ngailo.


"Han chhuak leh tawh la, i țhianpa khan a lo mutthilh san palh ang che" tia a khabe hmul țo ka khawih sak niap niap chuan "muhil phawt rawh" a lo ti let sup, chutah amah hmachhawn a ka mu saisir chu a theih ang a nghet a min pawm bet hlu hlu in nau awih hla hi sa chhuak chiah silo in thum ruih hian a 'ummm ummm' pui a.


"Ka pa kha i hmu tar ve tho em?" zawite a ka tih leh tak ah chuan a khabe ruh kual a ka chal lo nul rauh rauh pahin "umm, Lo lamah a lo che ve vak a nih dawn kha" a ti ve dut.

"Kum thar ah chuan Lo vah a sawi pawn hnial tlat ang aw" ka ti ve leh a, nui che dawt in min kuah behna chu a han ti thawl a, a awm zawn a ka lo tawm kak khabe ah chuan lo dawm in ka mit ah chiang deuh hian min han melh a.

"naktuk zingah nangmah ngeiin i hrilh dawn a nia, a hlim ngawt ang" a han tih chuan hrethiam lo deuh in "hlim a?" ka ti let hû, ka pasal erawh in dam ruih a min melhin a kiai suk a.

"Keini'n thlawh hma lak tawh loh kan sawi chuan a țang țo dawn a. Hnahram a khawih ve i remtih loh thu nangin i sawi a nih thung chuan a hnial ngam hauh nang che" a lo ti leh ta a.

A sawi awmzia chu ka man thiam ta deuh, nupui fa nau te thusawi aiin duhsak taka a fapa nupui in ka khap chuan thinlung hlim takin min zawm sak mai dawn a....


Min han kuah leh hlu hlu pah chuan "nun bul țan țhar leh tur pawh nise Mambawih, nangnen tho hian ka thlang ang, marawh chu intawn hma deuh theih tawh hram se.." zawi ruih a lo tiin a sawi tawp lamah erawh a nui che dawt a.


Kei pawh ka nui seih mai, ka pasal angchhung ah ngei ka awm laiin kei nen a nun hman dun a kham bik loh zia ka hria a nia, hlim tak ka ni.

Ka hmeichhiatpui zawng zawngte hian ka pasal ang a hmangaihte duat thiam leh ngaihsaktu ang hi tawng ve vek se tiin ka ngaihtuah ru fo zel.



Kan pa hi chuan hmangaihna awmzia hi a hmufiah em a, hmangaihna awmzia hrechiang a hmufiah thiam apiang chuan kan hmangaih leh min hmangaihtu te hlimna siam sak tu ah țan a, thlamuang tak a kan kiangah awm tur a kan duhna a nasa sauh in ka ring.



Kan in reh riai țhin kha nu leh pa in min lo uap tak ah chuan zahawmna riau hi a nei thar a. Keima nu leh pa te lam pawn chaw ei ah kan zavai a min sawm in ka nu leh pa chu an lawm thiam ve hle a.


Chhuan tur dang nei ve ta lo chuan kan buh thar zat te chu ka nu leh pa te an hrilh ve keuh keuh a, ka pa chuan a lo tuipui thiam khawp a, tun ang laiah țin 400 dawn la thar theih chu thlawh hma a zau dan tur te chhut in ka nu leh pa chu a titi pui thiam țhin viau.


Ka nu a țawng ve tawh hi chuan ka lo țang ru ran țhin thung, hman ni ah kan pa hna kaisan lawmna ni pahfawm a chaw ei ah kan sawm țum pawn "naute in neih hun ah chuan kan nula pakhat saw awmpui ula a țha ang" a ti leh ngawt pek a.

Thiam takin ka pasal hnen ah awmpui min laksak tur in a hrilhna ah ka ngai nghet hmak.


Mahse, Apuitei kan bul ah a awm tho a, a hranpa a awmpui la lo in lang a kal tur erawh kan biak tawh thu in kan pa in a chhang ve ta a, engmah a sawi belh ta lo kha a nia.

' ka nu țawng duh dan hian i thin a tirim țhin em?' tiin kan pa ka zawh phawng țum a min chhan dan kha ka thinlung ațang a thih theih tawh ka ring lo.


'Thinrim lo e, a ngaihtuah vang che a lawm' a ti mai a.


'Min ngaihtuah vang a ni tho nangin kan pahnih inchhung khurah ro lo rel tel ve a tum tlat zel a..' tim deuh tak a ka tih leh chuan ' i nu a ni a, engpawh a sawi thei a lawm. Chutih rual in rilru danglam phah hauh loin a thusawi te ngaithlak tluan sak ila, kan nupa tan a țha tur chu kan seng lut ang a, kan pawmpui loh lai a awm a nih pawn ngawi rengin kan hnawl mai dawn a lawm" a ti then mai a.

Fing ti zet in ka en ta reng a nih kha, ka pasal chu a chhungril lam nunin a khalh kal a nih tlat avangin ka nu țawngkam pai nuam zan lo țhin te pawh dawnsawn dan a thiam a, ka nu in a tih mah mah chang pawn kan nupa inkar tihbuai tu ah hman a phal hlek dawn lo tih ka hriatchian phah bawk.





Doctor in ka nau neih hun tur ni a a sawi hma hret chuan a sehsam an tih ang hian ka awm țan ta a lawm.

A rang a rangin damdawi in ah min tlan chhoh pui nghal rum rum a, mahni tawk a pa ve viau si kha a che a phelh phung a, țullo pui ah u Ngaihsaka chu a ko sek bawk.


Cabin kan book lawk sa vek tawh avangin kan book ni tak nilo mah se ka pa thuneihna hospital ve liau liau kha a ni a, Doctor te chuan min lo buaipui fel nghal zung zung a.



Cabin ah kan han awm fel a, ka pum nuam lo riai riai kha a reh leh rih a, paber erawh in nau tui bawm keh tawh ang hrim in min bawisawm tlat tawh, zan lam ah phei chuan a na chhunzawm leh ta miah lo chu ka neih hun a la hnai lo ah ka ngai deuh lek lek a.


Doctor in min han en pawh chuan 'naktuk ah a nih loh chuan tuk leh lam ah zawk a ni ang' a ti ta reng a. Kan chhungte lah nau en tur ang hrim in an lo kal tup tup mai bawk si, kei lah na neilo ang maiin ka țha leh liau a, haw rih tur a hrilh hlawm ngial pawn a tu amah chuan haw zu tum țhak lo a.



Mahse, beisei loh lutuk in zanlai pelh ațang chuan nau ka vei ta a lawm le! Vei han tih ah, doctor te'n min en vel chuan a la hnai lo an ti zel tho, nau neihna room ah pawh min nawr lut lo, a changin ka taksa chu a phel sawm darh vek tawh mai dawn emaw tih theih khawp in ka na a, zawi zawi in areh a, minute 10 dawn a rial vang vang a, lo na țan leh riai riai in nâ vawr tawp ah 'level' chu a in 'up' leh țhin ni mai hian ka hria.



Ka thin a chhe hlur a, 'ka țhat leh țhat loh' min zawt an awm hlek pawn rum lutuk in ka melh let hrep tawh mai a.

A chang leh ka pasal chu "țawngțai rawh" ka tih khum thul, ani lah chuan phun nawi reng reng lovin ka sawi ang apiang chu a ti zel a, ka kut ah chelh in vawi eng emaw zat chu a țawngțai tak kha..


Ka țhut in a nuam bawk silo, a chang leh bang nam chung a ka han din kun deuh chuan ka zia a, ka eu deuh chang a nawm riau țum ka nei bawk. Ka din lahin pakhat pui lah chuan ka tluk sual palh a lo hlau ve si nen a tawp ah phei chuan hnung lam ațangin min kuah bet ta hlu hlua.


Pasalțha ti meuha a koh țhin a țhianpa talbuai lutuk chu U Ngaihsaka pawn a nuih a nuih mai a sin.


Ka thinchhiat zual tak em avangin midang chuan min chhuah san ta vek a. A na a lo chhuah chang apiang in thlan a lo chhuak țak țak a, țawng pawh țawng hleithei lovin ka insehruh ngat ngat zel.


Kan pa min lainat lutuk chuan "ka siam a ni a, na ka tuar chhawk thei mang silo che a fair lo i ti em?" alo ti ta hem mai!

Na viau si e tiloh chuan ka han nui leh rih a..


"Intuar sem thei ila țha tur" tiin ka tai bul naute chet tamna lai te chu a rawn chul leh ngawt zel a.


Thawk sa phat phat chung hian "Lalapa, ka hma lam ațang hian min lo kuah rawh" ka ti țiak a, dim em em a min kuahna chu thlah thawl in ka hma lam ah a lo insawn a.

A zak hnuai ațang a taksa lianpui ka han kuah bet chuan thlamuanna hian min rawn chenchilh nghal a, ka dul lian tawh takin min do run mah se a ban sei thlup chuan min la kuah zo viau tho.


Ka chala a awm nawr a ka thawk hle hle lai chuan ka dul chu a rawn na leh țan a, ka tai bawr ațang hnuai lamah zawh thla in ka kê țang hmawr thlengin ka taksa ah chuan na lo lai reng reng a awm lo,



Thawk pawh thaw țha hlei thei lo va ka han hawi chhuak chu min ngaihtuah deuh hian min lo en chhuk ve run a, thlan fimin min bawh leh bawrh bawrh tawh.


"A na leh tawh ami?" ti sup in min chelhna a ti nghet sauh a, a kut leh lam in ka chal a thlan chu a lo tuai bawk.

" naute, lalanu hi i va tihreawm rei tawh ve mawle" rawl thum lian deuh chuan a han ti deuh ringawt thul.

Keilahin chutia ka thlavang a hauh na chu hriat nuam ti viau siin ka pangchan zual phah sauh a.

"Lalapa.. a na lutuk" ti țiau in mittui tling pam in ka han melh leh ngat phei chu!! Ka pasal chuan tawrhharsa a ti ngang mai! Tih ngaihna vak hre bik silo chuan thaw huai in ka tukhum ah a'n rawn dawm a. Lo kun hniam pah chuan " tuar fan fan rawh, a lo chhuah hun ah keiman ka lo hau nghal ang" ti deuh khawl in ka chalah a lo fawp a, "a tihreawm che emai, ka lo hau khawp ang" ti bung nghut nghut in ka ngum chu a rawn chul hauh hauh a.


Zing dar 4 ah chuan kan pa chuan ka na tuar chu a hmuh thei tawh thlawt lo ni hmiang, doctor lo lut chu rum deuh tak a lo melh khu khu pah hian "na a tuar rei tawh lutuk, vei chawp tir ang kha a theih loh pawn zai mai ru" a lo tih khum ta khawl a!


"Mambawih, zai i hlau em?" tiin min en chhuk run a. Na lutuk avang a ka insehruh te, thlan in min bawh bawrh bawrh mai te chu tuar ve kher lo mah se a nupui natna tawrh mek chu min țawmpui ve tih ka pasal mitmeng ah chuan a hai theih loh.


Kei lahin heti reng reng a na tawrh ngawt ngawt ai chuan zai chhuah chu ka lo thlang zawk nasa si. Lu ka bu nghat a. Mahse, rang deuh in ka pa a lo lut ve a, doctor nen chuan an inbiak hnu ah nau neihna room ah min nawr lut ta a.


Vei chawp tir ngai lo in darkar hnih dawn damchhuak zo dawn lova inhre khawpa na tuarin ka vial ngawlh ngawlh reng a,
a tawp a tawp ah chuan ka pasal beisei lawk ang ngeiin fanu hmelțha leh duhawm lutuk ka nei ta!



Nausen țap ngak ngak chu khuma ka la awm lai reng chuan min pawm tir zuai a. Thih sual a ka natna tawrh zawh chiah te kha chu a țap ri chuan a hnawt bo zo vek in ka hre hial mai.

Kut kê kim vek leh hmaifang fuh em em bawk si kan fanu chu kuah bet chial in Pathian hnenah lawmthu ka sawia, a han tal ve aih aih te chuan kan nupa hringnun tinghet zual tu tur a nih zia min hrilh ni mai te hian ka hria, an lak hran leh dawn lai erawh chuan "lalapa hauh hmabak" a ni tih hre chuak in ka țhen sak mai.


Nau neihna room ațang min nawr chhuah rual in thlan in a bual huh zeih zui ka ni tih lam reng ngaihtuah loin ka pasal in min han hmu chiah chu min pan ruak a.


Kan chhungte hmai eng pawh zah zo lovin ka hma ah rawn thingthi in min kuah ta hlu hlu a.

Fanu ka pek a vang a lawmthu min hrilh sup sup in ka chal ah a a lo fawp a, keilah chuan "naute chu i hau dawn em?" ka ti țal pek a, kan chhungte lo nui huk pawh chu en duh lovin Zoramchhana mit ah ngawt chuan ka en lui tlat.

"Hau dawn e, ka la hau dawn chauh" ti nghut nghutin ka kut chu la kangin a fawp vang vang a.
"I hau phal tak tak ang maw?" ka tih leh chuan a ngawi deuh vung vung a, kan chhungte lah an lo nui nasa.


A tawp ah chuan "hau phal ang" a ti hniam ta ruih, a hreh hmel lutuk chu a lainatawm dawn dawn a lawm, a fanu neih chhun kha a hauna phal dawn lo lutuk tih ka hriatchian em avangin ka nui ta sen sen a.


Cabin ah min nawr lut a, dawhkan ah chuan eitur chitin reng leh rasogulla bur lian chi tam deuh a lo inchher chhuan a, mak ti deuh a ka han melh kual chuan "u Ramchhana min lei tir vek a nih kha" Muani'n a lo ti thuai a.

A va mangan thlak țhin e aw, saw ti zat zat rasogulla ka ei zawh chuan zun-thlum ka nei hial ang chu le.


Tui lum ah puan chiah in nurse te han hru thuak thuak kha ka ni mai a, chu bak tui huh khawih phal sak ka la nih miau loh avangin ka lan dan chu a pawrin ka hmuhnawm loh ngawt ang.

Nakin deuh ah chuan ka bul ah kan fanu duhawm em em mai chu an lo mut tir ta a, Ka pasal hlim leh phur lutuk mawlh mai chu aww!! Nurse in khum ah naute a lo mut tir fel deuh chiah tih ah chuan pawm tum in a ban nghal pek a. Senior nurse chu uang ve thei deuh a nih ka ring.

"Het, a țah loh chuan pawm tam suh u, pangtilum a hriat laklawh chuan panglum silo in a awm duh dawn miah lo a nia" tiin ka pasal chu a khap ta mai le!


Kan pa naute ban deuh zuau tawh ding mar leh vutin lungawi loh hmel taa a va melh ngial pawn Senior nurse lah chu a nui duh mang hauh lo va, midang ho chuan nuihza insum zetin Zoramchhana chu kan en țhap bawk si, a tawp ah a fanu chuan apa hamhaih lutuk chu lo hrethiam ve ni-hmiang.


Ţap chiah silo hian a lo nghik ta faih faih a, chutah leh dan hman leklo hian "pawm a duh a nih chu" tih nghut pahin a fanu chu a pawm kang ta thuai a.



Tumah chu an insum zo tawh lo, an nui tlar tlar hlawm a, u Nathan-a chuan "nie, Pawm a duh a nih kha, pawm tir mai mai rawh u, intikhawngaihthlak lutuk" nui chur chur pahin a lo ti ta bawk nen, Kan pa pawh chuan a chet dan naupangchhia ru riau chu inhrechhuak ve leh hnuhnawh in a fanu pawm hlu hlu chung chuan a kiai ve ta suk suk a.


Kan chhungte chuan a pa angchhung ah tui zet a kan fanu muhil chu an han en sap sap a, min chhun zia thu an sawi vek a, apa chu a lungawi loh ka rin tehlul nen 'anu chiah chiah' an tih apiang chuan khum a ka țhu chu min lo nuih ruh ruh zel a. Siam thiam a han intih hmel mai mai khawp bawk si!




'I vei rei bawk si, i rual a an nawr luh te lah reilo te hnu ah an lo chhuak leh mai si nen inpa hi a lo lut ve lo chauh a lawm, chak deuh deuh in pawn ah khan a tei thuak thuak tawh mai a sin...' u Latei'n ka nau vei hlan a ka pasal tal buai dan a han sawi chuan ka mitthla thiam ruak e ka ti e a..



Kei chang nilo kan chhungte chu an tlaivar ve vek avangin an chau hle in ka ring.
"Induh chuan haw tawh rawh u" ka tih laiin Lalmuani pek chuan "naute hming tur phuah phawt ang u" a lo ti pek a.

"Lalmuan, nau hming an sa țhin aw... keichu u Ramchhana hian sa a kap thei bawk sia, Kaptheii ti ila a inhmeh ka ring" Apuitei'n a ti ta mai a!



Khum ah țhu mu chung chuan rang em em hian ka va melh a. "Ramțuanveli tih pawh a inhmeh fu ang, a pa ram chhuahna țhin hming chawiin" a tih leh lek phei chuan ka mangang takzet tawh.


Pasalțha te hian an sa lak tam dan chawi a fa hming sak te, an țuan velna ram chawi a fa hming sak mai te an ching tih ka lo hre ve si. Mahse, kan fa hming atan Ramțuanveli han tih tawp mai chu ka duh bik chiah bawk silo.


"Aw.. Chungliri ni mai se, apa hian Vanchungbung ah Sa pui a nei nual a, chu Vanchungbung hming chawi chuan a rem khawp a lawm" u Ngaihsaka meuh in a rawn ti ve leh lek phei chuan "nie" ka pasal in a tih mai hlau lutuk in kan pa chu ka melh ta ngawt ngawt a.


Ani pui lah chuan afanu ngawt chu buaipuiin a lo awi dur dur mai bawk si.

Ka chhungte ho rilru tihnat hlau deuh si hian "chutiang lo deuh chu hming dang ngaihtuah ula" ka ti ta sep a.

"Mambawih, in inneih ni ah Sial an talh tak kha, Sialmani ti ula, duh leh koh duat nan Man-man kan ti ang a, tuman mak an ti teuh lo" Jen-i'n a lo tih chuan khum bul dawhkan te chung a eitur awm ho chuan va vawm pawp mai ka duh rum rum tawh.


"Senior hnu a apa fa te a ni si a, Chalthangi kan ti mai dawn em ni? A inhmeh ber lo maw?" tia ka nu meuhin hming chal deuh a lo thawh ve tak ah chuan mangang deuh hian "Lalapa," ka ti ta chul a.


A fanu pawm mua a lo awi dur dur chu va khawn thluk tawp mai te ka duh rum rum tawh, ani lo hawi vut chuan kan thusawi te chu a lo hre miah lo tih hriat deuh hian mitko a lo kan uk bawk nen, thin tawt zet hian "i fanu hming a tan khan Chalthangi i duh a mi?" ka han ti deuh țhak a.


Ngaihsam lutuk in"Chalthangi pawh lo nise a hmel a țha dawn tho, in duh duh kha sa ru" ali ti sam then anih chu! Khawdang hawi sawn leklo a a fanu a en leh tak vung vung ah chuan ințhen rawt tawp mai ka duh hial nia!!



Ka pa (Ramchhana pa) chu lo ding in "tirawh u, Pathian hnenah lawmthu sawina i nei phawt ang u" a rawn ti ta a.


Kei erawh mangang zet in ka lungphu a ri nghal dawt dawt, ka pa chu a țawngțai ta alawm, 'kan tunu hming atan Chalthangi kan sa a...' tia Pathian a rawn mai loh nan rilru țawngțaina ka lo neih hnan ve char char bawk.





Ka pa țawngțai zo kan han 'Amen' chu ka thaw huai thei. A chhan chu naute hming tur lam reng reng a chham rik loh vang a ni.



Ding tlang nghal in 'ka pasal nen kan hming lak kawp in Zohmangaihsangi tiin a tunu hming chu a sa ta a' thaw huai a ka han hawi chhuak chu an zavai mai chuan min nuih ta țha hlawm a, bangbo zet a ka melh kual chiam hnu ah an hming lam chhuah hmasak te kha chu an fiamthu mai mai tih ka hrethiam leh hnuhnawh a, veng huai siin ka thinur ru leh țeuh tho.




Min tih mangan hman zia leh ka pa țawngțai pawh rilru țawngțaina nen ka lo țawngțai hnan char char dan ngaihtuah let phei chuan ka sa țeuh mai a ni.





Chhun ah midangte haw fel hnu ah chuan ka chau ngang ani mahna, ka meng hlei thei lo va, ka pasal aw in dam dap a " Mambawih.. Lalanu" a lo ti dut dut chu ka hre leh țhin a.Chiang lo riai a ka han men chhuah chuan khum bulah kan fanu chu pawm in a lo țhu run a, chau zet si a tawite a ka han nuih ngawt chu a kut lehlam in ka sam ah a lo chul a.A mitmeng pa zet a min duatna lo lang chhuak chu ka hmuh hmai thei chuang lo.

"Lalapa, a va chhuak deuh ve" tih chu ka sawi chhuak ve ngei chuan in ka inhria, a nui ri suk chu hre leh mah ila ka meng thei der lo.

"kan fanu hian hnute hnek a mamawh viau a nia" alo ti ta in ka hria.

Mahse, ka meng thei thlawt lo chu min nuih leh suk mai "tih dan ka thiam mai ang" a ti ta nghut a.


Dimte in ka tshirt hak chu a lo nawr tawm chho a, chutah ka awm si chial a kan fanu chu lo mut remin ka hnute chu a lo hnek tir a, mahni fa pawh hnute pe thei lo khawp a ka mut a han chhuak mai chu duh lo in intihharh ngial ka tum a.


Kan pa chuan min lo khap rang kher mai, "muhil rawh, i thil paltlang kha a rapthlak ema, i chau a nih hi" ti nghut in a fanu in a hnek loh lam chu a rawn tuai thuak a, tawite in ka nuih let peih țawk chu a ni.


Lehlam kan fanu in a hne bawk, lehlam lah a pa in hneh em em in a hup run a, meng leh siar siara a hmel ka han en chuan hnute hnea a fanu hmui tereuhte che dek dek chu hmuh nawm ti fe hian a lo thlir a.


A hmel a lungawina leh hlimna lo lang chhuak chuan ka mittui a pawt hnai kuar thei a sin..

U Dteii leh u Latei khan 'inpa in hmangaih hmel lutuk a a en țhin che hi a hmuhnawm' an ti țhin a nih kha. Keipawn an thusawi awmzia chu ka hrethiam ve ta e. Tun a a fanu a en ang chiah hian kei pawh min en țhin, chu chu ka u te pahnih khan hmuhnawm an lo ti hle a lo ni.



"Lalapa" zawite a ka han tih chuan a fanu lak ațang mit la sawn in mi en nghal thuai a. A mitmeng de sawr sawr chu phe deuh riai a en letin "I hlim tiraw?" ka han tih sep a.


"Ngahnge chutiang te min zawh, i pasal mitmeng aţang hian i hmu thei lo em ni?" ti nghut in a rawn tho chhuak a, kan fanu chu lo bawh kan deuh in ka hmui ah a rawn fawp ta mawlh mawlh a. Dim tak si, duhthawh ru em em bawk si a rei ngial min fawh hnu ah chuan thaw ham ham in a tawp .


Min thlakhleh hmel lutuk hian a hmui la hnawm deuh chuan ka hmai chu lo nul kual in "ka lasi nula" a rawn ti zawi ruih bawk

"Nu ka nih tawh hi" tia ka lo fiam let chuan zawite in a nui a.

Chutah ka hmai chung chet ațang mit tizim sun in rei ngial min han thlek a, a chet phung tak ruih te chuan min hneh takzet.


"nangmah ang chiah a hmelțha lutuk fanu min pek avangin ka lawm e," zawi ruih a lo ti in a kut lehlam in a hum mek ka hnute chu a lo hrawm tel salh bawk.

A thusawi avang a ka han nui seih chu chung lam aţang chuan hlut hmel em em hian min lo melh let a, a mitmeng a ka thil hmuh zawng zawng mawlh mai chu aww, kan chheh vel ah chuan hmangaihna lo zam vel in min uap chiah chiah ni maiin ka hria.

"I mitmeng a thil awm kha a ri in min hrilh rawh" zawite a ka tih chuan pa lutuk hian a han kiai suk a. "Mawh? Lalapa.." ngenngawl deuh a ka tih lai mekin "ka hmangaih lutuk che Lalanu" a rawn ti zawi ta ruih.

" sawi nawn leh rawh" a biangah han dawn sak pah a ka tih chuan a biang hmul a ka kut phah lo nul let pah chuan chiang lutuk in ka mitah min han melh a "Ka hmangaih lutuk che" lo ti nghet charhin ka hmui ah bawk a lo fawh leh rual chuan ka kawchhung chu a lum rawih rawih ni mai hian ka hria.


Kan fanu duhawm zet pawh chu a puar ta aniang, a hnute hne dek dek chu tawp in a maimitchhing ta diar diar a, a pa nen chuan hmuhnawm ti lutuk in kan thlir dun a.

"Ka lasi note" ti sup in a fanu hmui la no zet chu a kut țang chuan a han nul sak thuak a.


"Pasalțha, i lasi nula nge hmelțha i lasi note?" ka han tih chuan "nu te nge nge chu khum an harsa e an tih kha" tiin a nui ruh ruh a.



Chutah a fanu muhil chu thlek leh in "a hmelțha chiang a ni tiraw?" a rawn ti chhuak phawng mai pek a.


Kan thingtlangpa hi a lungawi a ni! A lungawi takzet.











Pathian zarah kan naute pawh a tlei țha viau a, damdawi in pawh kan chhuah san tawh, harsatna em em kan nei zui lem lo va, a pian tlaiin ani Zotei leh u Dtei te nufa an lo chhuk thla ve bawk nen kan in ah chuan kan ri laih laih reng a, a tirah chuan Lalati te unau chu an lai em em a. Mahse, zan khat an han riak a, a tukah Apuitei ho a an bazar zo lo haw ațang chuan hman a Lalati te bawk kha lo let leh in an ri teng tung zel a.




Naute chu pawm ve sateh an han tum a, apa Ramchhana awm lai chuan a khap bur avangin kan pawm lai hi an en ngam țawk! Hna ah an pa Ramchhana a kal fel chiah erawh an unau chuan pawm inchuhin an in tih țah phah ta fo a.

U Dtei lahin "i siam laiin i uluk bawk a ni maw? A nu a chhun fuh emai" a tih sak ta țhin a, pakhat lah chuan nuih liampui ta mai lo chuan "tih dan bik riau a awm a lawm" a han ti let mai țhin a nih kha!



U Dtei a nui tlar tlar zel a, a hma pawh a fiam nuam a tih tehlul nen, a fanu a duat lutuk leh engtik lai pawh a pawm tlat a tum mai chu a fiam chhen reng a,


"Tikha chuan i țhianpa i tluk pha țep aw, a ni chuan pahnih a nih hi a siam" ti te a fiam a ching a, ngaihtuah thui hmel deuh a kan pa ngawi rauh rauh chu a nuih let leh chiam zel bawk.


Vanneih thlak zetin hnute tui ka nei țha a, nau han khawih vel lah chu ka nu (Ramchhana nu) in a thiam em em a, naute bual a țul chang pawn u Dtei nen an inchawk mai zel a, kei chu nurse ni a nau chharna ah doctor pui țhin si e tilo chuan ka khawr riau mai a, ka rilarah a ni a, tihnat palh ka hlau lutuk niber in ka hria, ka han khawih vel chang chuan ka țim uaih uaih a, a vun tih pilh mawlh hlau in ka hah hluah hluah zel.



Keima nu pawn zan ah kan in lam a lo riah phei a hnial lo viau nangin ka hnar thung, a chhan pawh kan sum paiin a phuhruk zawh loh thil man to pui pui a tunu tan awt in a sawi chhuak ang tih ka hlau pakhat a. A thil lo leisak te erawh sawisel ho lovin kan dawng zel thung.




Kan pa in chet mai mi phalsak der mai si lova, chhunlamah chuan ka nu te, u Dtei te leh u Zoteii ten min khawihpui a, amah ber chuan a fanu chu a atchil em em a, office a han kal te hi darkar tin deuh thaw in in a rawn thleng phei țhin a nih chu!


A pawm nasat zar liau liau an naute chuan zan ah pawm ngen in a ţap ta țhin mai a, ka nu leh pa in an khap ngial pawn tuman an khap bet zo mang si lo.


Zan ah pawh naute zun ek thlak a ngai ngun si a, ani ang rorum ve tak maiin naute diaper a han thlak ruk ruk țhin kha ka khawngaih roh tlat zel a, nau zun thlak a han thawh ve ka tumin a thinrim țung zel bawk si, tihluih ngam ni heklo, amah vekin a fanu zun ek chu a then sak vek zel.



Christmas dawn karah u Ngaihsaka te chhungkua chu an haw chho ta a, Lalati te unau awm ta lo chu kan inchhung a reh rawih mai, ka nu leh pa te erawh in hetah christmas an hmang dawn thung.





Heta kan lawina kohhran ah christmas ruai te kan țheh a, ka nu leh pa te pawn nuam an ti ve hle chuan ka hria, zan lamah chuan Patea te in ah an riah dawn avangin ka nu te chu kan drop a, keni pathum erawh kan in lam ah kan phei tlang a.


Kum tin a kan chhungkaw tih fo dan angin kan unau bil leh ka nu leh pa te chu kan kawppui te tello in an mut pindan ah kan han inkhung hrang a, ka pa in kum tluan a kan nun hman dan ah kan insiam țhat a țulna lai ni a a hriat te chu min hrilh dap dap hlawm a.


Ka pawisa neih chhun a a necktie tur ka lei sak ka han pek chuan a lawm thiam em em mai bawk, ka unau dangte hriat ah chuan hetihian a ti ta alawm "In unau ah Mambawihi hi a naupang ber nangin a rilru erawh a lo puitling ber a ni. Nang ni chuan khawsak nuamsa sa nupui pasal ah in nei vek hlawm a, in nau-i erawh chuan kut hnawthawk a eizawng pasal ah neiin, a pasal in sawrkar hna a thawh ve hnu ah pawh an nu leh pa te nen hlawh an insem leh a, chutiang chung chuan a pasal leh a chhungte laka a vuivaina vawi khat tê mah a lo thlen ngailo. In nu leh pa te hian mipuitling ni tur aimah chuan hlawhtling turin kan enkawl che u tih ka pha lo, keh thei dawm a kan dawm, tlakchham i neih palh hlau a neih lungkhawng pawh a engkim tihsak kan huam, kan fanu tlum ber hian khawi ațang in nge heng i rilru puitlinna hi i chhar chhuah ka hre hauh lo nangin Mambawih ka chhuang takzet che a ni, i pasal leh a chhungte lak a i nungchang hi ka thlir ngun poh leh kan lak ațang a i zir chhuah a nilo tih ka chiang ting mai si a, engtiang a han sawi tur che nge pawh ka hrethiam mai lo, kan nupa inkar a fa piang ve i ni takzet em tih ka inzawt nawn fo tih erawh hria ang che aw.." ti dap dap in ka darah min hmer salh salh a.



"Ehiau.... Matei hi kan unau ah rilru puitling ber a nih si chuan kei ve hi eng nge ka nih ve tak?" uangzet in u Jo-a'n a lo ti nghut nghut a.


"Ele... nang chu luhlul ber leh mahni thu duh ber mawle" tia ka pa'n a nuih let tak hawk hawk ah chuan "a luhlul zawng zawk in maw ni a?" ti hluk in a țhen ve suk tho.

U Mami chu ka pa chuan melh lehin "Mami, nang pawh duh aiin i pasalte inchhungkhur a thil thleng i rawn vuivaipui tam mah mah țhin, i nu leh pa kan ni a, kan lo lainat thuai bawk si che nen i pasalte chhungkua pawh kan hmu diklo dawn dawn țhin a, i nau nun ațang hian inzir la, i pasal te chhungkaw karah engthil pawh thleng se, nu leh pa hnen ah thlen tam loh i zir dawn a nia" a han ti leh dap dap a.

"Humm, Ţpa pa hi a khirh em a lawm" u Mami'n a tih nai nai lai chuan "i laizawn tan tak khan sel duh nise sel tur a tam awm a sin, khawpui ațang thingtlang chhungkaw mo ah a țang a, inchhung khawsak khur lah a danglam nasa dawn si, mahse, i nau hian a pasal leh a chhungte kan hmuh danglam theihna tur engthil mah a sawi duh miah loh hi" ka pa'n a han tih leh zel a,



"nangmah leh nangmah i ințhen phawt loh chuan nupa hlim tak in ni thei lo ang, i nau pawn pasal a neih hma a amah kha inkalsanin a pasal leh a chhungte tan mi thar ang hlakin bul ațan thei a, nangpawn i theih loh bikna tur a awm lo, kan inchhungkhur ang kha a ni thei ngai dawn tawh lo tih hre tlat la.." tiin u Mami chu a fuih sauh sauh a.


U Mami chuan keichu min lo en deuh ren rawn chungin "i mak reuh ngawt mai, nangmah vangin min hauh phah" a ti hlak a, mah se a tawp ah chuan nui chungin ka pa chu lu a buk khum ta nghat nghat a,



kan mipa lam te erawh mipa ngang an ni a, neuh neuh an pai tam lo bawk nen 'nupui fanau te tan a inngahna tlak' ni tur in a fuih uluk viau mai.



U Nathan-a'n 'kumin family trip ticket i tum sak tur te chu Mateii te nupa an nih hmel e a' a han tih chuan ka pa chuan min en thuai a.


Rang deuh hian "pa, zin chhuah kan rilruk miah lo a nia, kan dam tlan phawt chuan kumthar ah zawk earned leave te la a rei deuh tak khaw lamah han awm kan rilruk a nia' ka ti vat a.

Ka pa pawn 'kum tin a ka tih fo dan a ni a, zin chhuah induh loh pawn ticket man hu chu ka hnen ațangin indawn ngei a țul dawn a nia, in pa ka lo sawipui ang" a ti ve ta sup.


Ka pa thu chu Zoramchhana chuan a hnial theih ka ring biklo, a chhan pawh pasal ka neih ve hma aţang daih tawh ka pa hian tih dan țhan a nei a, a fate leh an kawppui te hi an inrelbawl dan țha a tih apiang te ram pawn zin chhuahna tur ticket leh hotel thlen man engkim a tum sak vek țhin.




Ka nu leh pa te room ațang kan han chhuah hnu chuan ka bengbul ah u Mami chu a lo phun sar sar a. "In fanu hming ah sap hming tal ka nu in a phuah ve lo kha mak ka ti khawp a" a ti a, nui hak hak a ka en tak ah chuan "ka hming hi thlak ka la chak reng" tiin a nui ve ta hawk hawk tho.



Kan unau hming put dan hi ka la sawi lang loin ka hria.


u Jonathan-a hi ka nu sak a ni a. Tichuan, u Jo-a kum 2 vel a nih laiin Paris khawpui ah chawlh hmangin an kal a, an lo haw leh chuan u Mami hi an lo pai haw a, a han piang kha Paris tih an put tir ve leh a, u Nathan-a a lo piang ve leh a, ani erawh u Jo-a phuah ani awm e.


'keimah Jonathan-a ka ni a, ka naunau chu Nathan-a' a ti tlat roh si a, hming in hnaih tak hi an put phah ta niin an sawi țhin, kei erawh ka piang tlai a, ka pian hunlai kha 'Ram leh hnam humhalh' tih lam tlak nat hun lai tak a ni a, mizo film leh hla te pawh a tam hman kha, chung hunlai a piang ka nih avangin kei erawh chuan sap hming ka pu ve ta lo niin ka nu hian a sawi țhin.


Tun hnuah erawh sap hming put leh put loh kan care leh vak tawh lo hlawm a, u Mami fanu pawh Grace tih lai hi ka nu sak a ni a, chutiangin u Jo-a fa te ho pawh.


Ka pa in kan naute hming tur a sak lai khan sap hming tal a lo tui hnih ve ka rin tehlul nen a ti ta miah lo va, u Mami sawi ang deuh khan a mak riau mai.



Inhnuai ka zuk chhuk ve chuan u Maruati'n kan fanu chu a lo awi dar dar reuh a, u Latei pawh a puar lian ve tawh khawp mai, ka la sawi lang lo in ka hria, an ni chuan mipa nge hmeichhia an neih dawn an hre lawk thlap, chu erawh a lo pian hun ah kan inhrilh zawk dawn a nia.




Kan pa chu ka zawn ruk ngial hnu ah chuan u Jo-a te nen veranda ah zial an lo zu chu niin, a zozial bawk an zuk sak leh dawn tih hria in ka nui ta hak ringawt.


U Latei bul ah țhut ve pah chuan veranda a ka pasal leh ka nuța te țawng thawm chu ka ngaithla a.Ka pa thu kha a lo dik zia ka hrefiah tulh tulh reng bawk.

U Jo-a leh Ramchhana khan han in tauh rap rap se, nakin zel ah an pahnih tan a țha zawk ang a tih a nih kha, tun hnu hian an inzui thei ta phian a. U Jo-a hi Lunglei lamah hna vangin awm daih lo pheise chuan u Nathan-a nen aimah hian an inzui tam in ka ring.





Kum thar kan han chuangkai a, ka nu leh pa te pawn min haw san leh tawh a, video call in kan in be ngun ta hle bawk. Lang a lo kal nula pawh kan nei ta a, Lo nei tawh lo tur a ka pa ka khapna pawh in awmzia a nei khawp mai, Lo vah hun a lo thlen pawn an vat ve ta lo .


Ngopa a api leh apu te ber chuan hnute tui ka neih tam loh an hlau a. Fiamthu a 'hnute tui neih tamna chu mo tan sawhthing chhum tui in, fanu tan erawh ar awm tui hawp' an tih te kha chu hlat vai vai tak kan ni, Zo-ar ngei mai hi min lo thawn awl lo va. Paber hian min awm sak tluk tluk zel mai ani.



Țum khat Remremi lo lengin "Bawihte, nau hnute pek vel changin i sam hi hnawk i tih chuan tan tawi ila, kan pawt ngil daih dawn a nia" a han tih chuan ka lo hnial lo khawp mai,


Ka sam hian ka kawng a vaw hnap tawh a, kan fanu pian ațang phei kha chuan ka bawk tawm deuh tawp zel a, nau han pawm tak ah chuan duh thalin mahni kan inenkawl uluk hman tawh silo a, nghawng khuh in tan ila chet vel a nuam deuh in ka ring ta a.


Kan pa hna bang lo haw chu sawipui ngei tum in naute a pawm lai chuan thingpui nen a pan in ka sawi ta a lawm, "Lalapa, ka sam hi a sei tawh si ka tan ang aw" ka han ti dek dek mai chu, khatiang teh hrep khan a meng dur thei ang tih ka lo ngaihtuah phak ngailo reng reng.

A fanu pawm lo ni ngat pheise chuan min vin hrep hial in a nia ka rin ni.

"A țul lo" bung em em mai hian a ti chhum vut a.

"Awww, a hnawk a lawm" ka han tih let ngial pawn min en run run chungin "tan hlek suh ang che" a ti bur mai a.


Zanlam ah naute mut hnu ah thiam thil chitinreng nen ţang kawp a ka dil ngial pawn " hetihian i inhmeh" a ti țung tho, a aw kâ erawh a dam ta thlup thung a.

Paber in tan a phal tak miau loh ah chuan tlem a bawihtei lei kan deuh hnu ah chuan a rawng te ka thlak ve ta vel a. A pu tu mah niila Lalapa a thu ber tawh tlat.


Kan pa chu a fanu chumbiang leh pangchang thiam lutuk a atchilh em avangin in ah a tawm hrut hrut a, emergency a awm loh phei chuan zan lam ah pawh a chhuak ngailo, amah kawm duh tu chuan an lo lenchilh mai țhin.


An pu meuh pawh a lo leng lut zing ta viau a, kan fanu chu pawm in a chhaih ve hlut zel.

"Ramchhan, kum 2 vel han vei leh se ka hna hi chawlhsan tawh ka rilruk a, ka aiawh tur a ka hual ruk reng i ni a, țang sauh sauh ang che" an pu in hmaichhan ah ngei ka beng hriat laia a tih chang a awm ta fo a.


Chutia pu te meuh in a duhsak fal bik zia a lan tir mai zel chu mipa țhenkhat nise an uanpui viau ta ve ang.

An chawlh dawn a an aiawh tur a an hming lam chhuah meuh chuan kawngro a su lutuk tih hria in; an pu lak ah tlaktlum zual tum a mi tam takin an vir khuk chungna tur ah ngei ngei pawh ka pasal chet phung chu a nghing hlek lo va.


"Kei aia senior leh phu zawk an tam a lawm" a ti fan zel.

A rilru chu a hausa ka ti țhin a sin, a tlin tawk zia chu an pu țawngkâ ațang ngei inhrechiang hle mah se midangte tling zawk angin a en lui a, mahni a inphat ngam tlat zel.




Hun leh ni liam chak lutuk mawlh mai chu chelh din rih chak chang a van tam tak em! Apa tih dan tak ah "a nausen chhung a reilo lutuk" nie, kan fanu pawn kum khat a tling ve dawn hnai ta reng mai.


Ngopa ah vawi khatmah kan la chho ve leh lo a, kumin december thla ah hian earned Leave laa chawlh han hman kan thlang ta zawk kha a ni a.


Kan fanu, Lalapa Special-i pawn chaw rawt kawi a ei ve thei tawh a, min chhun fuh lutuk chu a sam a buang thang a, a vun a ngo paw vak bawk si nen țhenkhat phei chuan a sam chu kan tih danglam sak amaw te an ti thul.


Apa hian a chhuang em em mai a, inkhawm dawn te hian a fanu a pawm kher a țul tlat a, a fanu lah chuan 'lalapa hi a țha ber' ti ve ang ziazangin a pa dar ah a kuah bet țai a, hnuai lam melh duh hlek lo hian a hawi ve vial vial mai zel a.


Chung lamah leh hnuai lam ah hâ a nei ve tawh a, hnute nghei tir lah apa in a phal îkhaw bawk silo, a sual chhang chuan hnute hmur seh a ching a, ka na tilutuk in țhen chawk chawk a "Lalapa, tete a seh leh tawh a nia, hau rawh" ka tih changte hian kei min chhan hlur tho bawk si, a fanu hau phal mang silo hian a fanu chu a melh ta run run țhin a.


"Hau ve mai la" ka tih lah chuan "ngawi reng khan ka hau a lawm" a ti khauh zel.


Țawngkâ vin in a fanu hi biak a phal hlek lo va, ka hnute a seh chang a keia na tilutuk in a hmingpum ngat a "Zohmangaihsang" ka han tih hlar tawh chuan apa lunghlu țha mî a ni tih inhrechiang lutuk-i lah chu a men ta par zel țhin mai a.



Mittui tling pam mai a apa a en tawh lahin pakhat pui roh chuan a lo tuar thei tawh țhin silo.


Kei min hau dawt hreh bawk si chuan "hmingpum meuh chuan koh țhin loh teh" a han ti fan ruih a.

"A hmingpum a ka koh khan a vun te hi a pilh phah dawn a mi?" kei lahin ka ti ler hlar tawh mai țhin a, nui suk suk in a fanu chu a pawm hrang vut a.

"Lalanu hi nang ang chiah a ka duat a ni tih hria la, tina tawh suh aw" a fanu hnung ah chul hauh hauh pahin a ti ta țhin a, Ka hnute hmur na thip hlar chu ner pui sak sakin inbengdaih ka lo tum ve leh mai zel.

Nathana te pawn fapa duhawm zet an nei ve tawh a, Grace-i leh Bawihtei chuan inla nau nei deuh in an khawih ve chhen zel a.


Apa office kal hlan in kan in lamah kan va leng phei zeuh zeuh zel a. Api chuan a tunu chu duat in min hmangaihpui viau mah se retheihna tem chhin ngai miah lo a nihna hi a lang leh țhin a.


țum khat phei chu kan inhial deuh bab bab nghe nghe a, uNathana te khum ah an fapa țhutpui a Bawihtei leh auGarce-i te awm dun thlir pah a "a uGrace-i thuamhnaw hlui nilo a thuamhnaw in lei sak ve ho hi chu brand nei an ni țhin hlawm pawn ka hrelo" tia ka fanu chungchhang chu a sawi a.

"Naupangte chu an țhang duh lutuk a, thuamhnaw man to deuh deuh lei sak chi pawh an la ni hleinem" ka ti liam mai tak nangin rethei bik lutuk ang a ka fanu a ngai tlat chu ka na ru veng veng zel.



Ka unau te fa te hi chu an chhungte lam pawh vantlang chunglam vek an ni a, New York khawpui pawh duh hun hun a thleng mai thei vek an nih hlawm avangin an tu te leh vah te ho thil tur țha pui pui an lo hawn fo a.


Chungte avang ngawt chuan ka nu hian "in pa hian a rank pui țhenkhat te angin rilru nei deuh se chuan khi ah in awm thei tawh tur" a han ti leh a.


An duh phawt chuan inspector chin chuan case ziah bo theihna an nei ve tawh tih ka pha biklo. Mahse, ka pasal hi sum vang ngawt a diklo tak a chet la duh ngailo tur mihring a ni tih ka hria.

Mahse, ka nu țawngkam awmze nei tak tak țhinte avang hian a duh vang reng nilo, ka nu in 'a fanu leh a tunu te' siam nuamsa zo lo ang hrim a thu leh hla a neih țhinna avang zawk in a tum loh dan deuh in a awm palh mai ang tih ka hlau ru fo țhin


Tur tu a zirin Pathian rawngbawltu meuh pawh sum bawihah an tlu fo tlat si a.

"Nu, a mak țhin emai, ka pasal hian i fanu leh i tunu te min ngaihsakna hun nei leklo in sum hmuh dan ngawt zawng ta si se, hreawm min tihpui viau zawk lo ang maw?" ka tih lahin " in lei kang ve deuh duh in thil han sawi ila, i ngai haw zel a, mahni nawm sakna tur i hrethiam lo țhin emai" min ti let hrep mai a.


" tun dinhmun ah hian ka nuamsa lovin i hria a mi? Keichuan sum tam tak chheprel em um tur nei lo mah ila, amah a inhmangaih aia nasa a min hmangaihtu pasal ka nei hi ka lawm tawk viau, pa ber in zantin min lenchhuah san lova inchhung a uap lum tlat te hi a hlu ka ti a sin" ka tih khum a, u Mami chuan ka rilru tur min hriatthiam pui takin ka nu chu a lo khap thuai a.


A pasal te chhungkaw lakah u Mami a vui fo chhan pawh ka nu vang hi a nih ka ring rum rum tawh, keini afate zawk in vuina tur kan hriat miah loh lai pawn amah zawk hian a dap chawp ngat ngat tlat miau a!!



Chumi ni a kan haw chu ka rilru a na lutuk ni ber hian ka hria, ka malchung a ka fanu muhil sek sek chu en in ka mittui a tla a tla ta mai a Api khan a unau dangte aia rethei bik ah a ngai tlat reuh sia, Lalapa fanu hi a rethei lo a sin le...



Pa tam takin an nupui fanau te aiin sum ngawt buaipui in an dah chungnung a, an sum tam tak thawh chhuah hmang a hotel ah nula te an kawm kual țhin laiin Bawihtei pa chuan a hunawl neih zawng zawng kan tan a hmang ral vek zel.


Hlawh a lak lahin 'keite chu nitin uniform ka ha a, thuamhnaw ka mamawh ve lo, in nufa ta tur in lei rawh u' ti hial khawp in kan nufa lan mawi loh hlauin amah a indah țha daih zel a sin.

Kan nufa nawmsak loh hlau a theih tawp a min duat tu, tlakchham kan neih palh hlau reng reng a mamawh sawi chawp ngai lo va min zawt mawlh mawlhtu ka pasal lakah ka nu'n lungawina a hmu har lutuk chuan min tina țhin a sin aw.

Thingpui in tur a a lo haw kha Bawihtei a lo muhil bawk nen nghet deuh a kuah in ka țah khum ta ringawt kha a nia.

Ka țah chhan min han zawt pah a min kuah hlu hlu chuan eng chhanna mah ka pe thei lo.
Ka nu mit a tlung har lutuk chuan amah chu min lainat zual tir a, ka hmangaihna erawh a pung sauh sauh thung.



Chumi ni ațang chuan kan in lam ah ka leng phei ta ngai lova, zan lamah te hian kan pa zawkin ' i nu leh pa in an ngai ang cheu, va leng phei ila?' a tih pawn chhuanlam zawngin ka hnial ta ziah a.



Mi tam tak chuan â min ti hle mai thei. Mahse, ka pasal tlinna hmu thei reng reng lo tu kiangah ka awm tam lutuk chuan ka rilru sukthlek in hriat loh karah danglam hun a nei thuai ang a, tun a kan chhungkaw din mek a lungawina kim nei tu hian zawi zawi a rilru danglam put palh ka hlau.



Kar hnih zet zawt len phei ka duh tak miah loh ah chuan ka nu a rawn lang hmasa ta fo zawk a, a tîm deuh nangin lo tih țhak huk ka tum biklo, a nih loh zawngin a ze ngai bawk a lo let leh rang dawn emai.






Kan fanu chu Apa in ka pai lai ațang hla a a awih nasatna rah kha a lo lang țan a, țawng la thiam lo mah se rimawi lam hi a man rang em em a, apa in a darah bei tir a hla a a han awih hlu hlu chang te hian a thluk mil in thawm a lo siam ve reuh ta țhin a.


Apa lawmah tla in Ukulele tereuhte mai a lei sak a, khum zau pui ah ințhutchilh in apa in ama guitar a kuah a, Bawihtei'n ama Ukulele... zan ah te hian kan thawm a țha țhin viau zel.


A nui duh in a pangchang thiam bawk si, apa in a duat turu lutuk tih a hrethiam ran reuh a, kan chaw ei dan te hi a man to thei fur fur a nia.

Tlai lam alo nih tawh chuan chaw ei duh lovin a ţap par zel, apa motor thawm a hriat rual a țap uar sauh in apa nen a motor khalh kual chung a chaw hrai a țul ta țhin a nih chu!



Apa pui roh lah chuan "lo chuang ru" a ti nghal zel mai si, khek raih raih chungin apa chu a ban ta țhin a, pakhat pui lahin khawvel ah amah chiah fanu nei an awm emaw tih tur in; a aw thum leh lian bawk si chuan "A Special-i a nih hi" tiin tualzawl ah chuan an chhawnchhaih hluai zel.



Țhenawm te chuan an pafa inchhaih thawm chu an lo nuihpui kiah kiah zel. U Sangtei pawn hna ban vel ah a rawn awm a, a chang leh an in ah te hruai pheiin darkar khat dawn te a leng bo ve thei tawh a. Kan chhungkaw tifamkim tu leh kan nuih tamna ber a ni a, damloh hritlang vel a nei khat si a, Pathian hnenah lawmthu ka sawi mawlh mawlh phah fo zel.



Kum tawp ah chuan Ngopa ah chho turin kan inbuatsaih nasa tawh viau a, Lalapa pawh vawiin hi a hna kal tawp ni ber tur a ni a, casual leave a lak ve mai mai ngailoh avangin earned leave a la pawh ho tu lu lam aţang hnialna a awm lo. Ui erawh an ui viau thung a.



Tlai dar 5 ah chuan kan nula chu a haw a, Ani Apuitei erawh class a la zawh fel loh avangin Patea te in lamah a insawn thla a, Ngopa a kan thawmhnaw ken chhoh tur ka pack fel laiin, Khum bul ah play mat phahin Bawihtei chu toys ka bun chhuah sak a. A khalh ve mial mial a, apa lo haw hun a hnai tawh tih erawh hrethiam ve karin a rak leh țhat țhin...



Luggage ah thuamhnaw dah lut paha "Lalapa a lo la thleng lo deuh, țah loh tur" ka tih chang chuan thuawi deuh in a ngawi ve leh mai zel.


"I diaper tur lei a ngai tak, Lalapa ka'n bia ang aw" tia khum a phone ka ban chuan phur em em hian min pan a.


Ka malchung ah a țhut fel than hnuah apa chu ka call ta a.

Apa in phone a chhan rual chuan fiah lo deuh a 'lalapa' ti nghal chel chul in phone chu min chhuh ta tlat a. Ka malchung ațang tal hranpui in a toys awmna lam ah kal phei pui a, kut zaizir nen lam apa chu a rak khum ve niah niah mai a...


"Bawihte, apa kha ka lo be tawh ang, a lo tlan chhuah tawh phei chuan dawr ah a kal nawn leh a țul dawn a nia" tiin phone chu ka laksak thei ta hram.


Thuawi deuh in toys chu a khal zui ve leh mai a, "a diaper tur lo lei la, khita ken chhoh tur khan hisap tel bawk la" ka han tih chuan office ațang a lo chhuah dawn tawh thu a rawn sawi ve a.



Rei pawh inbe lovin kan dah leh mai a, Bawihtei a fel tho sia ti rilru in Ate Jen-i ka call leh rih a.


Bawihtei chu ka en pah zeuh zeuh tho, Jen-i lahin sawi tur a lo ngah tawk ngang mai.


Chutia Jennifer-i nen kan inbiak lai chuan Bawihtei chu a rawn țap ta mai a.

A tihdan pangngai in Apa lo thlen hun a hnaih tawh vang a ţap satliah emaw tia "Bawihte, lalapa a lo la thleng lo deuh.." ka tih pawh chuan a ţap tawp duh ta der lo!




Thil pangngai lo deuh a awm a nih ring a ka han pan nak chuan ka lungphu chu a rawn thlawk chhuak lo chauh!!!


"Jen, ka dah" ti țhawt in phone chu ka theh sawn dawrh a ni ber.


Mangang lutuk in Bawihtei chu ka pawm kang a, a hnar ah chuan LEGO BLOCK sin zet a lo hnawh lut a nih chu!


"Bawihte...." tih bak ka sawi hleithei lo, rilru chiai nuaih in hmul pawhna ka ban rawk rawk a.


Ani lah chu a hnar lehlam inhnawh phui tlat avangin a thawk dan apangngai lo a, chu chuan a tithlabar zual tih a hmel ah chuan a lang reng.

Hmul pawhna a han cheh chhuah sak mai ka tum lahin mangang deuh in a tal ta chiam a, kei lahin a țah nasat chuan a thawk lak a na ting ang a, a luh thuk zel ka hlau bawk si, che tawh lo turin ka vin deuh ta tuar tuar a.



Kan nupa mut pindan kawngkhar chu na zetin a rawn intheh hawng bur a, chak lutuk in Zoramchhana a lo pen lut nghal bawk.


"Eng ngatinge?" ti sup in a fanu chu a rawn pawm nghal nawlh.

Thil thlen dan chiai deuh a ka hrilh rual chuan "i en țha lo em ni?" tiin min vin ta khawlh mai.


A fanu ţap tawp thei bawk silo chu khum ah țhutpuiin a hnar chu a han en sak a, pakhat lah chu a ţap nasa sauh a.

"Damdawi in ah kal nghal ang" a tih tak nghut ah chuan rang deuh in Bawihtei chu ka ban a, ka hreawm tihna belhchhah tur tîngin min lo duh ta reng reng bawk silo.

"Apa in motor a khalh a ngai a lawm" ka tih ngial pawn hnap tui fim tla hliam chung siin ka kut chu a lo vai kiang zel a.


A tawpah apa chuan "kal ang" a ti chhum vut a, rang deuh hian ka zui chhuak a, kawngkapui pawh chu ka hawlhkalh ringawt.


Motor ah kan han chuan luh hnu pawn apa lak ațangin ka la hrang thei hlawl lo.

A ţah uar zel avangin a hip luh thuk ka hlau bawk nen lungzin hmel deuh a ka pasal thaw hawk țhin pawh chu ka melh ngam tawh reng reng lo.



Eng maw ti ti in a fanu pawm chung chuan kan veng a clinic hnai ber chu kan inkhalh thleng ta a, clinic ah kan han luh pui chuan doctor chu a lo nui heu mai a.

"Naupang hian hnar leh beng a thil hnawh luh hi an ching țhin reng a nia, lak chhuah a harsa hleinem" a lo ti ta hlauh a.


A pa in chair ah țhutpui in a pawm bet a, doctor in hmanrua a han hawlh a tum lahin a țang kawh ve tlat bawk nen, a fanu thlabar ţap ri a hriat a ngai bawk, a lakah tihluihna la hmang ngai reng reng lovin che thei lo a a pawm beh tlat a țul bawk si chu Zoramchhana hreawm tilutuk insehruh chu a sen țeuh thei mai a sin.


Kei erawh clinic bang kil ah ka ding tawm ran a, reilote hnu ah LEGO BLOCK sen var chu plate ah a tla ri ta kauh.


Zoramchhana chu rum chhuak hawk in a fanu chu amah hmachhawn in a hlang nawlh a, nghet em em a kuah bet zuiin a din pui a, Bawihtei ţap pawh a zawi tial tial a, hreawm tizet a bangkil a ka ding zum zat mai min lo melh rual chuan lo țah khum ve chiam mai ka duh rum rum.


"Ka kekawr ipte a wallet hi lo la chhuak mai la" a rawn tih sup chuan purse takngial pawh keng lovin in ka chhuah san tih ka inhre chiah.


Tim deuh in ka pan phei a. Doctor chuan 'a ţap nasa si a, hnute i pe dawn nia' a lo ti vat vat bawk.


Clinic kan chhuah san fel hnu ah pawh Bawihtei chuan ka pawm a duh ta reng reng lo mai a, tual ah chuan a lungawi hun nghak in a pa chuan uniform la ha thlup chung chuan a awi hlu hlu a. Kawng kal te lah chuan min han en duh mai mai khawp bawk si!




A țah nasat em vang nihmiang, Bawihtei chu a muhil ta daih a.

"Ké in haw ila motor la tur chuan ka han kal leh mai ang" a tih sup chuan a sir ah ka zui dat dat a.


Ka lakah a lungawi lo ni a ka hriat tlat avangin biak pawh ka be ngam lo,


Amah lahin engmah a sawi zui tawh bawk silo a. An pafa lak ațang chuan in ka hrang ta riau a inhria in hreawm ka tihna a zual a.


Jen-i kha zan ah te lo be zawk ila, hetiang thil hi a thleng miah lo ang tih vel ngaihtuah ngut ngut in ka țah a chhuak dawn dawn ta mai a.



In kan thlen rual in a fanu chu khum ah a mut nghal a, khum tlangah chuan țhutchilh in ngawi run hian afanu chu a thlir vung vung a,


A țahna avang a a hnar sen hler te, mittui in a luan huh niai a biang tai tek te chu a kut a nul sak dun dun in a thaw chhuak hawk zel bawk.




A tawp ah chuan atho vut a, chhuat a LEGO BLOCK lo inbun hnawk ram chu a bawm ah a rut fai ta vek a. Engtin nge a tih zel dawn tih ka ngaihtuah lai chuan pindan ațang a chhuhpui a, pawn q Bawlhhlawh- bawm ah chuan a han paih ri bur a.

Ka lo ip chawih.

Inchhung ah lo lut a, kawngka a pawh phui leh lai pawn thinphu rang dawt dawt leh an pafa in min mamawh hmel loh em avang a inthlahrung bawk si hian ka lo thaw dep dep a!



Pindan ah a lo lut leh nghal a, khum bul tukverh bul ah ka lo la ding ngat ngat, min hau hrep se ka rilru a na viau mai thei, mahse engmah sawi zui lo va a ngawih tlat bawk si avangin hreawm ka ti em em lawi a.



Khum chunga Bawihtei muhil chu thlek vung vungin thawk leh khatah kei chu min rawn en ta thut a.

Lo țah khum ve chiam mai tur emni zawk tih ka ngaihtuah hman hial mai!

Muangchang a a kawnghren a pawh phelh lai pawn keimah ah a mit a fu ngur, khum ah kawnghren chu theh kai in a aia chik zawk in min en leh siah a!!


A unioform kawr kilh hmet phelh leh mual mual pah a min pan tak ah chuan kan in hauh loh reng ka ring tawh lo.


"ih, kan inbiak hnu khan Jen-i ka call leh a..." tim lutuk hian ka ti taa, ka pasal chuan ngawi run in min pan zel ringawt.



Motor a khalh dawn pawh a alak ațang Bawihtei ka la hrang thei miah lo lai te kha ka mitthla ah a lo lang a.


Rilru hreawm leh ipik deuh hian " Lalapa, hreawm ka ti ve tho a nia aw.. i awm loh hlan in ka lo en uluk ngailo ah i ngaih phah vek em?" ka tih leh ngial pawn hman a Zoramchhana, mî țawngmawh lutuk kha ka tâwng ta mai emaw tih theih turin a ngawi ngul a



"Nidang ah phone ka hman san ngailo a sin le... ih, tun țum bak kha a ni miah lo a nia" țah chhuak țeuh a tiin ka hmaah tak a lo din rual chuan min hauh ka hlauh luat ah ka lo kuah ta chawt a.

" a thleng nawn tawh lo ang" ka tih leh ngial pawn a ngawi ngul mai bawk si.

"Mawh.. Lalapa" țap ti tih in ka han ti leh ngang ngang a.

Ka pasal chuan min kuah let duh loh ka rin tehlul nen nghet deuh a min lo kuah let takah chuan "ka tihpalh" ka ti leh țiau...


"Ka lo thlen hma a i mangan dawn tehlul nen, ka rawn vin chiam che a, ka tithlabar zual ngawt ang che" ti hrawih in ka chhip ah a rawn fawp ve leh ta a.


"Ka tihpalh..." ti ve leh sup in a aia nghet chuan min pawm bet sauh sauh a.

Ka rilru a puam laklawh ka ti ta ber mai "nau ka pai belh duh tawh lo" ka ti ta țiau mai a.


Nui nghing dawt pah a min kuahna a tih thawl rual chuan ka kuah nghet sauh thung.

"Engah chuan maw?" zawi ruih hian a lo ti dut, a nuihzat hmel viau bawk, ka tukhum sam ah a lo chul chuan "ka duh tawh lo ani tawp mai" ka ti hlar a.


Ani thung chu "Mambawih" lo ti sup in a han nui che leh dawt a. " pai belh leh duh tawh lo viau mah la tun ah hian i kéng leh mek tawh zawk in ka hria" dam ruih a a han ti chiah mai chu rang em em hian ka kuahna chu thlah in ka en chho ta heu a.



Zoramchhana erawh in min lo nuih ruh ruh a, a ngaihna hrelo zet a ka en laiin mitmeng de sawr sawr a min lem vel pah in ka khabe ah a rawn dawm ta a..

"Engtin nge i hriat?" at hmel deuh a ka tih let chuan ka biang huh chu a lo tuai hul paha"Special-i i pai tirh lai ang chiah khan i mittui a hnai awlsam leh hle tawh..." a han ti zawi ruih a.
Ka mittui a hruk hul vek hnu ah ka biang lo dawm in ka chal ah a rawn fawp leh phawt a.

Chutah " thla hmasa ațang tawh pads lei tel turin min chah tawh ngai miah hleinem" zawi ruih a lo ti a pa zeta a han kiai leh suk zet chu!!! Chil ka hak lo chauh!


Rang em em in Bawihtei diaper leh pads ka dahna lam chu ka va en a.


Kan pa ka en leh chuan tifuh intih hmel zetin a lo nui ruh ruh tawh mai bawk si!


Heiham... ka thla tin hunbi ka awl tih pawh ka lo inhre miah hleinem.

Ngatinge ka raino hian luak chhuak hleihlui te hi ka neih hmasak ngai miah loh le.. ka țah belh em em ringawt zel a.


"Chawhmeh an dai hman vek ang, i inchhuan lum chhungin motor kha ka han la ang a, kit ka rawn lei tel nghal dawn a nia" a tih zawm a, a che vel phur deuh sur chu sawi ve mai tur hre lo hian ka en ta reng ringawt.




A lo let leh chuan ka han in test vel chhin a, a sawi ang tak takin ka lo rai reng a nih chu!!



Ka rai tih a hriat rual chuan a fanu a muhil nghet bawk si nen min pawm nawlh in bathroom chhung ah min luh pui a, bang ah min nawr beh pah chuan sexy zet a min melh in zei chitin reng a chhuah ta a ni ber.



"Ka pum ah nau a insiam țan lai mek hian a dang siam belh leh nghal i tum a mi?" ka han tih chuan kiai suk in ka hmui ah a rawn fawp thuak a.

A chal a ka chal rawn nawr si pah chuan " aphir pui tur siam nan a la tlai chhiat ka ring lo" a lo ti nghut a nih chu!


"Pasalțha leh!" ka tih lahin min mamawh hmel zet a thim ruih a min melh chungin ka kawrfual hak lai chu a hlim tawm tawk ta mai a!

"Bualin hmang țangkai thiampa" tiin rapthlak ti zet in ka melh ta hrep ringawt!








Ngopa a kan chhoh ni tur a lo thlen chuan zing dar 3 vel ah kan tho a. Boruak chu a vawt hit vur mai a, Kan nupa a kan inhak lum hnu ah chuan khum ah tui zet a Bawihtei muhil chu puan lum nuam deuh in ka tuam a.

Lalapa in "hetațang varţian ah chhuak ila, khua thleng chho tlai lo ila kan tifuh zawk ang" a ti miau si a.


Electronic lam chi reng reng leh gas te chu uluk deuh in a en nawn a, a en zo fel lo lut leh chu a lan dan pa lutuk avang chuan ka lo nuih rah rah a.

"Engnge?" ti sup a khum lam a lo pan chuan "jacket dang ha daih teh" ka lo tifiam hlak a, ani thung chuan a lan dan pa lutuk chu a inhre ve hauhlo tih hriat fe in min ner khum suk ringawt.


Khua a vawh em avangin turtle nack dum lum țha zet a ha a, a chung ah leather jacket dum a hak thuah bawk, cotton kekawr dum a hak bakah kutkawr dum a bun a, lukhum phiar dum ka lei sak a khum tel zel bawk nen amah a pa lian in a lan dan chu a pa lutuk ani tawp.



Bawihtei chu a pawm nawlh a. Dimdawi deuh hian a fanu beng chu a hmui in a han nawr leh a"Special, api te khua ah kan kal tawh dawn a nia aw" a ti zawi ruih bawk.


Bawihtei pawh chuan apa thusawi chu hre ve ang hrimin la muhil sek sek si chuan a lo kiai seih a, apa chuan lawmawm ti lutuk hian a han thlir leh vung vung phawt a.


"I mumang a nuam hle a ni maw?" ti sup in a fanu chu a chawi kang deuh a, a hmai chuan a fanu awm chu a nawr leh vang vang a, "kal ang u le, api leh apu te pawn an hmu chak tawh che a nia" tih zawm sup in kei chu min lo melh a.


An pafa chet phung hmuhnawm lutuk chu mit tla lo lek in ka lo thlir reng tih a lo hmuh rual chuan, "Lalanu" a lo ti sup.

Nui hak a lu ka thin tak ah chuan ka kal chhuahna tur in a tawlh sawn a, chutah kan nupa mut pindan chhung chu a thlek nawn leh thuak a. A fimkhur țhin lutuk hian min thlamuan hluah hluah zel.



Seat hma ah ka țhu lut fel a, ka mal chungah Bawihtei chu a rawn dah a, kawngka a lo khar hma chuan a fanu chal ah chuan fawp leh hram in a rum deuh nghut bawk.


Awlsam lutuk a Aizawl khawpui kan tlan chhuah san fel rualin ka pasal rawtna lo fin thlak zia ka hrechhuak ve chiah.



Dar 7/8 bawr ah tlan chhuak ta chiah ila chuan traffic ah kan tang rei ngawt ang, zing dar 4:30 rik hma deuh in Aizawl khawpui la muhil țhiap chu kan ral thlir thei der tawh a. Boruak erawh a vawh zual lai tak a ni bawk nen khabe a inkhawng ri dat dat reng mai.


A khat tawk in "a vawt in ti em?" tiin kan nufa puan lum inkhuhna chu a rawn pawt phui leh țhin a. Seling dai kan thlen in Bawihtei muhil pawh a lo harh ve ta a.

"Hey... Good morning" apa in a ti hlut a, a tho phang bawk si nen chutia motor chhung ah a harh ta mai chu a bangbo ve hmel reuh hle lehnghal.

Khap fak fak in a hawi kual ve chhen reuh a, apa in fimkhur thu hla ah headlight a la hmang cheu bawk si, hma lam eng deuh pap pap țhin te chu ngawi rengin a melh veng veng a, a mumang amaw a la ti deuh in ka hria.


"Bawihte, api leh apu te bul ah kan zin dawn kan tih tawh kha" ka tih tak ah chuan thatchhe deuh in ka awm ah a bei leh ta nget a, hnute a zawng nghal zat bawk a.


Apa in "keima tete a nih kha" tifiam a a mawng khal tel ah a lo hrawm sak chuan tho phang mood chhe bawk si nen a men deuh par reng a. Mahse, a mood chhiat chhung chu a reilo. Ni a lo chhuah siar siar rual in Bawihtei pawh a au ta raih raih reng a, a bottle a tui lum ka pai sak chu fawp dek dek in sava lo thlawk te chu a kawk kual a, motor vei vak a la tam loh avangin Sava lah an ngampa bawk si, kan tlanna tur kawngpui ah te chuan rual khat hi an inzui leh diah diah țhin a.

"Lalapa.. Va va" fiah lo zet a tiin apa chu a kawh hmuh chhen reuh mai a sin.



Kan thlen chin a thingtlang tulh tulh a, kawngsir vel a tlangsam kung buk zet te chu vaivut in a lo bawh paw lek luk a. Apa chuan an naupan lai a an sak țhin ni awm tak "Tlangsam a par, Mas a hnai tawh, ka pi ka pu kawr thar min lei rawh" tih chu a sa dut dut a, Bawihtei'n a lawm ngang mai.



Tlai dar 4 a pel hlek ang tih vel ah khaw chhung kan inkhalh thleng ta a, nutling țhenkhat buh pho seng paha ar an lo hnawt lai kan han hmu nghal a. Kawng chhak zau deuh laia hmeichhe naupang inbaitelem chhuan a lo bial tal tal te pawh hmuh tur an awm, veranda ah herawt a la inher zo lo indah fel mek te kan han tlan pel rual chuan a chhungah ngei awm tawh mah ila lunglenna hian min rawn tuam a, hnuk ulh dawn dawn in kan pa chu ka va en leh ringawt zel a.


"Bawihtei, hei hi lalapa te khua a nih hi aw" tiin ka hrilhfiah a,, Bawihtei pawn tukverh ah dak veuh veuh in engkim chu a thlir uluk reuh hle.



Kawtchhuah ah reilo te kan chawlh chhung ringawt pawn "ehe, in lo thleng tawh maw?" ti lelu chung a chibai tu kan ngah hman nangang mai.

Naupang biang chat sen riam lo tlan khawm tawk lah bang lo, thlasik chat duh hun lai a ni tih hrelo lek in a țhen chuan thirchhia te an zawng amaw leh nghal ni, saiip puar deuh tak hi an hnung puak par hlawm a.

Motor chhung ah keini nupa min han hmuh chuan "apa Ramchhana te an lo haw" tiin tukverh a Bawihtei dak chhuak chu an han chhaih a. "Au te kha hei pe zel rawh" tia chocolat ka pek chu amah lo lawm tu te chu a pe ve nghauh nghauh a.

Naupang la â zual lah chuan "aaaa.. a va han hmelțha berr, apa Ramchhana te fanu chu sap naupang" an ti ta pek țhin a.


Kan pa pawh amah lo chibai tu te nen an inbiak kar lakah chuan a nui leh huk huk zel.


Kawtchhuah ațang kan han tlan chhuak leh a, naupang rual khat chuan motor chu an lo umzui țak țak a, Bawihtei tukverh dak chhuak pawh a khek nasa nangang mai.


Tawlai-lir a rawra hralh tur lo nawr țauh țauh te chu mak tih hmel deuh hian a en let leh ha ha reuh țhin a, apa chuan lungawi hmel zetin a fanu chu a au khat tawk reng bawk.



Kan in lan theihna kawi kan thleng chiah erawh kan nupa chu in en in kan nui chhuak tawp!!



Awi lo lutuk a tlang sang lai a kan in chu ka han en leh ngat pawh chuan ka thil hmuh chu a danglam chuang lo!


Kawm thlang zawl ah leh kan veranda ah te chuan nutling leh patling hi an lo ding bawr țaih a, tukverh ah lo dak chhuak a, kut min lo vai lawp lawp tu te lah bang lo.


"Min lo hmuak tihna a mi le?" ringhlel fê hian ka ti halh a, hetiang leh lutuk hian ani maw khaw mi te hian keini nupa ve tehlul hi min lo ngai der ve ni.

"Mi te hi chu an țha a nia" kan pa pawn lo ti sup in kawm thlang ah motor chu a ti ding a, kawm thlang nu te veranda a lo ding khawm laih te chu kan motor lam panin an lo che chhuak nghal a.


Ringhlel teh mah ila heng nu leh pa lo pung khawm zawng zawng te hi min ngaihlu der a, min lo hmuak tu te vek chu an ni ngei mai si a awww!



Kan pa pawh A fanu chu pawm in driver side ațang chuan a chhuak vut a.

"Ekhai! A va han hmelțha em em ve" tih te, "in lo tlan tluang amaw?"

"Pathian zarah dam takin kan inhmu leh ta e" tih te chu a ri nuaih nuaih mai, an pafa chu bawr laih laih in an chibai lawp lawp hlawm a. A mak tih bak sawi tur ka hrelo.


Ka chhuak ve chu nui tlar tlar hian in nutling ho chuan min bawr a, "I dam em?" an han ti a, lamhnai tak hun rei tak chhung an hmuh tawh loh ang mai hian a ni min lo dawnsawn ni.

"awi, nu nih i ngeih a nih hi" ti a min han chibai lawp lawp lai te chuan ka mittui a tla lo chauh mai.


Tumah chuan tider hmel an pu silo a, keini chhungkua ve tehlul mai hetitak a min lawm der thiam mai chu a lawmawm a, a mak tih ngawt bawk lo chu sawifiahna dang ka hre lo.



Rawlthar țhenkhat chuan kan thuamhnaw te chu an hlang chhuak a, in pan chhohna step ah chuan an khai chho zung zung a.


Inchhung ah kan han lut te chu patling leh nutling pui pui si e ti lo chuan "an lo thleng ta e" tiin kut an lo beng dar dar mai a.


A țhenin apa lak ațang Bawihtei chu lo pawm hran an han tum a, a ni lah hmel la hmuh ngailoh hlir kiang ah chuan a zum em em reuh bawk si nen, a duh lo han țang țai vel chu an nuih tlar tlar hlawm mai.



Inleng te an țin fel meuh chuan khua a thim chhalh tawh. Broiler kg5 zet tur an lo talh chu niin, u Ngaihsaka te leh ka pi te chhungkua nen chaw kan ei khawm nghal a.


Bawihtei pawh atir lamah a zum viau nangin Video call a inbe awl lo an ni bawk a, a rei tak hnu ah chuan api leh pu pawn an pawm hrang thei ta a.

Ka nu lah chuan a chuang bawk si nen "ka tunu enchimlo" a tichhen mai a.

Ani Zoteii'n arsa buhchiar chu a barh a, intinula deuh hian a ei pak pak reuh a. "Bawihtei chu.. Aizawl a i chaw ei dan nen a va inthlau ve" tia ka fiam zauh chuan a lai ve ngei reuh a nih chu!


Chaw ei kham rualin Lalati kuhva lei tur chuan dawr ah hruai a tum ta mai a, apa Ramchhana a a țeuh ring teh a sin!

"Engnge, amah pawn a kal theih tawh tho hi" Lalati lah chuan a ti ngang ngang a. Pakhat lahin "a țullo, nangmah khan va tlan vat la, i reilo zawk ang" a ti țo a, a fanu chu zu han pawm kang daih bawk amawle..



"Lalat, i la awm dawn chauh, chak deuh in va tlan phawt rawh. Nakin ah ven sen loh hun a la nei dawn a lawm, tah chuan i la lenbo pui nal nal dawn a nia" u Dtei'n Zoramchhana fiam zauh pahin a lo ti a.


Pakhat pui roh lah chu a phun hluk a. Ka nu in tap chhak ah mei ai pahin a nuih kar kar mai.

"Apa Ramchhana chu a intifa nei eee" ti hram in Lalati chu a tlan chhuak nghal a.


Chaw eikham thingpui hang kan lo dawm laiin inleng hmasa an lo chuangkai leh nghal a, sikri lianpui ah chuan meihawl vur hluah in tv en na lam ah u Zotei chuan a khai thla a, Lalati dawr kal pawh lo thleng leh tawh in Mama te packet tam deuh in a rawn awrh lut pek a.


"Sangsang MAMA te ka nei, ka pe ve ang che" a tih rual in rang deuh in Bawihtei chuan a pan a, hetiang hmawmsawm hi kan ei tir ngai miah silo a, ei lo thei hram se chu ka duh khawp mai.


Au Lalati chuan a pack na chu a ha in a han seh hawng ngei a, chutah Bawihtei kut phah chum biang ah chuan a bun sak a.

"Ei chhin rawh, a thak deuh a nia" a ti a, A pa Zoramchhana'n "a thak tih i hriat chian sa te chu ngahnge i nau i pek a" a lo ti țung bawk.

Mahse, a fanu chuan rang deuh hian a bar pak reuh a, a țhial niap niap hnu ah thak chu a ti deuh a ni ang, a beng pahnih chu hup in a per ta tarh tarh mai a.

Midangin kan nuih dar dar laiin pa ber in a hmu thei leh tawh lo!

A fanu chu a țap pawh a ni chuang lo, amah pui hian no deuh engkim țahpui a, pangchang em em tur a a duh miau avangin thak a tih vang a țap rawng rawng ang chiah in a bawihsawm leh hmiah tawh.


Tui a thlit chhuah sak a, Lalati te unau in nui tlar tlar chungin an zui kual zel bawk. Tui a in khalh khalh hnu ah Bawihtei vek chuan MAMA chu a ngen leh ta reuh a nih chu! Lalati'n phur deuh a pek mai a tum laiin apa pui roh chuan "a țul tawh lo" a lo ti hmuk.

'A â mai mai e aw' ka nu mei lum ai pawn a ti a ti mai a sin.



Khuaah chuan kan awm rei tulh tulh a, Bawihtei chuan țhian a ngah tawh ngang mai, naupang tu pawh chuan kawm an chak a, a ni lah kar hmasa khan a birthday kan lawm sak a, kum khat tling ve chiah e tilo chuan a duhna na ah a kal kual ve thei tawh si a, amah a khal vei tal reuh nen zingkarah te hian api ar chhuah chu a zui chhuak ve fo a, a intinula in apa in a pawm hlu hlu țhin ang te kha a ngaithei tawh bik reuh der lo.




Zingkar hma lutuk ah au Lalati te țhian ho chuan "Sangsang, in Barbie ang u" tiin an lo sawm ve țhin a. Bawihtei chu lo la muhil tui viau mah se a u te ho in an auh an auh tak ah chuan chiang lo riai a lo mengin "Sangsang" an ti thawm a hriat leh rual chuan "aw" a ti ve hlut zel.

" kan in Barbie dawn, i tel ve duh em?" an tih rual rual a țhu chhuak liau pah in "aw" a han ti leh lauh mai ta țhin a.


Apa Ramchhana'n "Lalremruat, zing dar 6 pawh a la rik loh hi" a tih khur khur na lah chu a nu ang mai a thluak fing chuan han leh thal dan a hre țhin khawp lehnghal, "Sangsang, in barbie leh lo mai ang, i pa in a phal lo" tiin a fanu zawk a 'on' sak hmak zel.


Tlan haw ang deuh in step ah chuan an tlan thla zui nghal tlat tlat hlawm a, Bawihtei lahin chutia a u te ho haw chu a ngaingam leh tawh ngai silo.


Țap par chungin "lalapa" a ti a, la țawngfiah thei mang silo in apa chu a nuar khum ta ngat ngat zela. "Aw... kan Lalremruati'n a nu a chhun fuh lutuk hi chu aw" ti vawng vawngin a fanu țap chu a thawh chhuah pui a, tukverh a han hawn rual chuan haw tak tak pawh tum lo a kawmthlang ah barbie bawm te nen lo la ding far te chu "lo chho ru, kawmchar ah in barbie rawh u" tiin a zuk au let leh nge nge zel


Ka nu leh pa te zing țawngțai inkhawm kal hlan ani țhin si a, an pafa chuan an inpawm chhuak a,
"Anțam hmun hlat ah khan awm ang che u" an pa Ramchhana chuan ti khur khur țhin mah se an han in barbie zo chiah hi chu Anțam kung a tlu phung tho zel.

Bawihtei ah chuan apa pasalțha mizia a lang ka ti ru fo zel. Kum khat a tling awrh a, nu leh pa kiang a la bet reng rual si hi amah aia u daih te kiang ah tal a tum tlat a, au te tih theih ang chu tih ve vek a tum tlat tawh reuh mai.
A kalna lam apiang ah kan fanu chuan duhsaktu a ngah em em mai a, nu țhenkhat in 'Hmaram' an lo tah sak thul, putar hnang tah thiam te chuan 'Em ping' leh 'paikawng' tereuhte lo tah sakin an rawn pe nawlh nawlh zel a, țum khat an len chhuahpui phei chu 'kho te' a serthlum inrem khat țun hi a lo haw pui a. "Tu pek che nge," kan han tih lah chuan "pu.." a ti vek zel mai sia.



Kawm thlang a patling ni lum ai te kiang ah apa chuan a pawm thla ve țhin a, kawngpui ah thingfak kham phei in ni lum hnung puak in a țhu ve at reuh zel. A tawp ah phei chuan thingzai bung kilh khawmin țhutthleng hniam te a siam sak a, ni lum ai tur a an chhuk thlak dawn apiangin "mah ta kha.." a ti a, a kuah thla țat țat zel.


Khual thu thang leh ar pan chuk tih zawng zawng kan nei zo a. Naupang țhenkhat in "apa Zoramchhana te fa chu sap" an ti țhin kha kan khaw piah, la thingtlang ve leh chhawng lam ah a than dan chuan "Ramchhana nupui khan an inneih hma in sap fa a lo pai a, a zep tlat a, tihian an inneih hnu ah sap fa a hring leh ta si a, Ramchhana hian a hmangaih em a, a țhen mualpho ta lo zawk a nih hi" tih lam in a lo leng darh chu niin!!


Kan han hre leh zet chu nuih a zat rual rual in kan pa chu a lungawi loh ka hlau deuh khawp a, mahse, kan han hrilh ve chuan a nuihpui ta huk huk a.


Thaw huai chungin ama siam ngei a ni tih inhrechiang em em pa nui hmel chu ka thlir ta reng zawk a.


Christmas carol an lo awm chang te hian kan lo phur thei a sin, an zai zawh hma hma in kawngka lo va hawn phet te hi kan lo tum a. Țum khat phei chu ka pa in hla a thlang nawn a, kohhran țhalai te chuan thiam takin " Aw a va mawi em, he ni lawmawm hun tawite hi.." tih hla chu an sa nawn a, Special-i phur tawh lutuk lah chuan api pawmna ațang a tal thla bat in rang fe hian kawngkapui lam pan chuan a tla ta a.


Kawngka chu va nam hawng pawp in Nula leh Tlangval zai dap dap hma ah chuan kut a va beng ta terh terh a, an lo lawm nangang mai, nula pakhat chuan pawm nawlh in an suk pui dal dal a, keini pawn kawngka chu khar phui tawh bik loin kan zaipui ve ta tawp mai a ..


Christmas ruai țheh tlai ah chuan ani Zotei'n Bawihtei chu a len kawi pui daih a, Ahmai te pawh kan tlawh a, a fapa pawh a lo tlangval tawh in a inhlei ve thei tawh khawp mai.



Kan haw chu ka pa te leihkapui ah kan chawl chho a, pa Khawla pui chuan kan pa chu en vung vungin "i awm bo vang vang a, i zai ka ngaithla khat ta, zanin chu ka hla thlan apiang i sa ang" a lo ti mauh mai a. Kan pa pawh chuan a hnial ta bik lo, pa Khawla chuan Sikri a rawn khai chhuak a, a hla duh zawng a sawi apiang chu kan pa chuan a sak sak zel a.


Lallianmawia Pachuau hla a thlang tam ber a. A khat tawk in Lma thih hlimchhawn lai boruak te chu sawi chuar chuar in Zoram mipui a țhawn zia te, tape nei tawh phawt chuan a boralni chuan Lma hla an play chuah chuah thu vel te chu a sawi a, ka la hriat ngailoh hlir a nih avang chuan ngaihnawn ti deuh hian ka ngaithla ve dauh dauh mai.


Zan dar 8 tlang ah ka pa chuan "a vawt emai" tiin min luh san ta a. U Ngaihsaka te nupa nen chuan la titi pahin kan pa chuan a khat tawkin hla a sa leh țhin a. U Dtei'n "kum thar ah chuan leihkapui hi țhiah kan tum a" a han ti chiah mai chu. "A țul lo" Zoramchhaana pui chuan a ti bung nghut.

"Eng aiah ngawt chuan maw? A ban te hi a mawih tawh a, kan țhiah vat loh chuan chesual an awm palh a hlauhawm a lawm" a tih lah chuan "kum thar vuak vet han zo se, ban ril kan la ang a, a ban chu kan thlak dawn a nia" a tih sak leh then mai a.


U Dtei nuihza lutuk chuan "a eng a tia kan Leihkapui țhiah pawh chu ui țung nge maw i nih roh le?" tiin a nuih tlar tlar reng a.


Kan pa lah chuan ngawih liam pui ta mai lo chuan "kan nupa tan a pawimawh" a ti let ta pek a nih chu!!


"Khai... ka lo theihnghilh hman țhelh a ni, Mambawihi i chhai țhinna spot ber kha a ni tak a lawm tiraw?" tiin thil hlui vel sawi chhuak in kan pa chu a fiam a fiam ta mai a.


A tawp ah phei chuan kan pa tih ngaihna vak hre silo chuan guitar chu a perh san ta daih a, u Dtei la nui kiah kiah reng chu han fiam let ve a chak ta thut ni hmiang.


Ka lam lo hawi chung ngei mai chuan "i hmangaih avangin lawmthu ka hrilh che, ka tan i rinawm vangin lawmthu ka hrilh che" tih hla ngei mai kha a sa ta a.


A tir ah chuan u Dtei chuan a eilo ngang mai. "Nupui nei ber mai a" ti khum hlak hlak nangin chu hla ril ru zet avang chuan an pa chu a ngheng țha sauh sauh a. Chak zawk inti zet hian ka pa chu a nui ta suk suk.






Ka pasal chuan motor a khalh a, sik ni eng sen no zet chuan thingkung kar ațangin motor chhung chu a lo chhun leh siar siar zel a. Tlang dung pawh romeiin a bawh paw chek chek a, motor kawngpui dai in a bawh huh dap sir a thingkung lian pui pui dingah chuan țangțial ril a inzam tle suar suar bawk.



Ka malchung a kan fanu chu chhaih in kan nui dun a, chutia ka pasal leh ka fanu kiangah hlim em em a ka nuih lai chuan motor khalh mek ka pasal chuan "mambawih?" a lo ti zawi ruih.

La nui sang paha ka va en chuan lunglen hmel em em hian kei leh a fanu chu min lo thlir reng ni chuan...


"Lalapa, ngatinge? I lunglen hmel lutuk, hlim ve ta che" ti in ka nuih sen sen a. Zoramchhana chuan motor hma lam en a nui deuh suk pah hian "Lalapa" tih chu a sawi ve sup bawk.


Chutah kei leh kan fanu bawk chu min lo en leh vung vung a, lungleng leh min thlakhleh hmel lutuk bawk si hian "Mambawih, harh chhuak tawh rawh le" a lo ti zawi ta ruih.



A ngaihna hrelo taka ka en lai reng chuan ka pasal lan dan chu a lo danglam tual tual a, a jacket ka lei sak a hak lai mek chu khua ah a hak țhin Jacket hlui ve tawh zet kha lo ni daihin a sam pawh bawrchhawr zetin a rawn sei a, kan pahnih chhungkaw din ve avang a lungawina a khat țhin a hmel dam dup te chu hmul in lo bawh in nelawmna reng reng neilo Zoramchhana ang chiah khan a lan dan chu a lo danglam ta a nih chu!!!


"Lalapa..." mangang lutuk a ka han tih leh chuan a kutphah hnunglam te chu hnahram a thawh nasat lai ang chiah khan lo pilh pheng phungin kei chu za lo zet a nui chungin min lo en leh ta a..


"Engkim kha kan suangtuahna leh mumang a thil thleng vek an ni" harsa tih hmel lutuk in a lo tichhuak hrawih! Ka lungphu chu a nghing dawt hial in ka hre mai.


Awi harsa ti fe a lu ka thin lai chuan ka malchung a kan fanu duhawm lutuk mai chu tawrh harsa lutuk hian a lo en leh ngawih ngawih a, zawi ruih hian "Special" a rawn ti leh ruih bawk.


"Lalapa..." thlaphang taka ka tih lai te chuan lumglen hmel deuh in a fanu sam ah chuan a lo chul a.

"Kan suangtuahna mai mai a nih hi" tia a fanu a han melh leh tlawk tlawk zet chu!! Ka â thei mai dawn in ka hria.



Natna in ka thinlung chu a rawn fan a, ka pasal leh ka fanu chu en tawn chhen in ka mittui a rawn tla nghal zawih zawih bawk.


Vawi leh khatah kan fanu nui khek raih raih lai chu a thamral ta daih a. Mangang lutuk a "Bawihte, Zohmangaihsang..." ka tih tuar tuar lai chuan ka ban rekah nghet tak in ka pasal chuan a rawn chelh chawt. Ka en rual chuan kan awmna hmun chu a lo danglam leh daih tawh! Chiang lutuk hian Ngopa a ka in luah inchhung chu a hmuh theih a. Zan a lo ni bawk! Keichu ka khum ah khan ka lo muhil mek a nih chu! Kawmchhak a u Ngaihsaka te leikhapui ah Zoramchhana chu guitar hlui tawh zet kuah in a țhu bawk a.

Lunglen hmel deuha thla eng thlir pahin C Sanga hla, "ka tawnmang mawl ve kha, hunin a liampui ta, Duhaisam te pawh hian chinlem a nei dawn lo..." tih chu lungkuai em em hian a lo sa a.



"Aih.. Lalapa" ti țiau in ka ban rek a chelh tlat tu chu ka en ta ngawih ngawih.


Amah pawh chuan duat hmel lutuk a lo min lo en letin " ka lasi nula, sungtuahna ah leh tawnmang ram ah chiah ka len dun pui theih.." zawi ruih hian a lo ti a, nui lui tih hriat zet a a han kiai suk chuan "aih" ţap hawk in ka ti tuar.


"Lalapa, kan inneih kha.. ih, Biakin pui ah ngei kan innei a, ka lo lawi dawn pawn naupang ho in hla mak deuh an sak kha.." ti pah a a kut ah ka hum sak chuan la hre ve tih hriat takin a lo nui a.


"Ka lo lawi luh dawn pawn Lawi chalin hla a min lawm lut turin a ti che a, Sakhmelmawi te min sak sak kha.." ti ţiau a ka țah nuih laiin Zoramchhana pawh lunglen hmel lutuk hian a lo kiai ve suk suk a, khang zawng zawng kha ka mumang vek maw lo ni a??



"Kan inneih tirh pawn ka che chhe țhin lutuk a min khawngaih theih em kha Zoramchhan, ka pa chem fawng tur te ka lo tuah daih a" tia ka sawi lai chuan engkim kha hmu letin ka țah nuih leh a, Zoramchhana pawh chu lo thaw chhuak hawk in atthlak tih hmel lutuk in lu alo thing nghut nghut.



"Ka nu arpui no hruai lai pawh ka vaw hlum a, ramah te kan riah dun kha Lalapa" mangang zet a ti a a awm ah ka bei thlawp takah chuan nghet em em a min lo kuah betin ka chhip ah alo fawp a. Engkim kha ka mumang mai mai leh Leikapui chuan a Zoramchhana zai mek suangtuahna mai maw lo ni a?


Suangtuahna ni tur chuan a tak a ang lutuk!

Hmangaih hmel lutuk a min enna mitmeng te, duat tak a a awm ah min kuah beh laia a lungphu ri ka ngaihthla țhin te kha mumang mai mai maw?? Kan fanu.. Bawihtei pawh kha a tak ni ve loin Zoramchhana nen kan suangtuahna a mi mai maw? Faih lo zet a 'lalapa' ti ve thei tawh kan fanu, thla kaw chhung zet ka pum a ka pai naupang duhawm lutuk kha a tak ramah a awm ve lo maw?



Zoramchhana chuan ka hnungah a lo chul hauh hauh a, "ka lasi nula" a lo tih thum ruih chuan "aih, I lasi nula nih ai chuan i fate nu nih ka duh zawk Lalapa. Bawihtei nu ka nih hi, ih, kan fa pahnihna tur ka pai mek bawk.... kha kha ka duh zawk.. Zoramchhana, min timangang a nia, thil thlen dan hi ka duh lo, khawngaih takin kan fanu te nen kan khawvel ah khan let leh zawk ang.." ngenngawl lutuk a tih khum in a taksa lianpui chu ka kuah nghet sauh sauh a.




Engkim kha a tak nilo tur a ka uiluatna avangin ka chhungril chu a na in a mangang takzet a ni!


"Mambawih?" zawi ruih a lo tia ka biang ah a lo dawm pawn ka meng duh lo a, ka mittui erawh a tla zung zung, mit ka meng chhuak a nih chuan ka in luah lai khum ah khan harh chhuak in ka pasal leh fanu te nen a kan hun hman zawng zawng kha an tham ral dawn tih ka hria!!


"Mambawih?" Zoramchhana aw ri vek in a lo tih leh ngial pawn insehruh ngawt ngawt chungin ka maimitching lui tlat a.


Chutah le!!

"Lalanu" ti sup a a hmui lumin ka chal a lo nawr si chiah mai chu ka meng chhuak nghal hlawl!




Ka hmai chung chet a ka pasal hmel pa zet chu mittui avangin ka hmu phe riai mai!

Chuan..


Aw Lalpa! Amah a ni, ka pasal Aizawl ațang Ngopa ah chawlh hmang tur a kan rual a chho Zoramchhana ngei mai kha!


"Lalapa" lungchhe zet a ka tih țiau chuan " mangchhia i mang ami? I rum reng a, i harh thei bawk silo a" min ngaihtuah hmel fe a a lo tih chuan mittui te nen ka nui chhuak ta hak!



Lukham ah lu nghat reng chung chuan ka hawi kual a, ka pasal te inchhung a kan nupa pindan ah ngei khan ka lo awm! Tukverh parda inzar phui lo ațang ni zung lo lut siar siar te chu en ngawih ngawih in ka pasal bawk chu ka en leh a.


A mitmeng a min hmangaihna lo lang tel ve ka hmuh thiam rual chuan inbeng kangin ka kuah ta chawt a. Thaw huai chungin min thawh pui a, khum tlangah țhu in amah hmachhawn in min pawm bet hlu hlu a.


Mittui te nen ka mumang lunglen thlak zet, a tak a ni ta mai emaw ka tih bawk si te chu ka hrilh ta mial mial a.


Ka pasal pawh chuan lunglen hmel deuh a min en chungin a kutzungpui chuan ka beng hnuai a lo tuai rauh rauh.


"Lalapa, engkim hi mumang a nih ka hlau, nangte.. Bawihtei... ka nu leh pa te pawh, ka mumang ami in nilo tiraw?" ngaih la țha fel zan lo va ka tih chuan a lo bu nghut nghut.


Ka chalah lo fawp in " i mumang a ni emaw i suangtuahna zawk pawh lo nise i pasal hian ka zui ve zel dawn che a lawm" zawi ruih hian a lo ti a, hahdam takin a awm ah chuan beiin ka thaw ta hle hle a.

A lungphu dup dup ri chu ngaithla in ka hanmaimitchhing a, a rim mipa zet te chu hip lut leh țhin in ka kuah nghet leh vak thul. Khatiang mumang kha chu ka nei nawn leh duh tawh lo! A feeling kha a rapthlak emai!


"Mambawih?" a lo tih sup chuan "aih, khati khan min koh tawh suh" ka lo ti let țiau.


Zawi zet a nui suk in min kuah nghet sauh sauh a.

"Lalanu, i ziaawm deuh tawh chuan chhuak ang le" nuihzat hmel deuh in a lo ti leh ta a.


Mut pindan aţang kan inzui chhuak in ka nu hmel ka hmu leh chiah chu ka rilru a no leh vek tawh.

"Mambawih, i nuam lo em ni? I rum chhuak leh țhin a?" Ka pasal ang bawk a ngaihțhat loh hmel deuh hian a lo ti a, inveng hman lovin ka kuah ta ringawt..


Nui kar kar pahin ka hnungah a lo beng dat dat a, kan pa in ka mumang vel chu a lo hrilh ve sup sup bawk nen, "aww, mangchhia han tih phal chi lah a ni bawk silo, aaa, khawvel dang daih ah pawh harh chhuak mahla, i chhungte hian kan lo zawng chhuak leh tho ang che" ka nu chuan a han ti ve ngial a, hnukulh țeuh chungin ka inpetruh fan fan mai.




Nie, mithiam te chuan pararell world a awm an ti a. Chutah chuan tun a keimahni ang leh kan khawvel ang chiah hi kan rual a kal ve zel in hun leh ni an hmang ve zel an ti!



Chu pararell world ah chuan tun ah kan chhungkua ang chiah pawh hi an awm ve ngei ang! He khawvel ațang hian lo bo ta pawh niila, chu khawvel ațang zawk chuan ka chhungte kiang a awm leh dan tur ka dap fan fan tho ang.


Ka puan lum bah (t) laia ka mittui hru mial mial pahin tapchhaka Bawihtei te putu lo țhu dun chu ka han thlir a.



Apa in țhutthlengte a siam sak ngei mai ah khan lo țhu ve at in apu meiling thurin belte hlui tawh zet, tui awm mekna ah a chiah hlum zel chu hmuhnawm ti lutuk hian a lo thlir dauh dauh a.


Ka pa lah chuan "tihian meihawl hi ro se, zan ah Sikri ah kan ai dawn a nia aw" tiin a tunu chu a hrilh dat dat a.


Ani Zotei chaw chhum siam zo lo phei pawh a vahnu kiangah chuan han țhu ve in " ka duhawm tui tui te, tlaiah ni en liamna ah kal ang aw" a tih chuan phur em em in Bawihtei pawn fiah lo deuh hian "yess" a ti ve ngei bawk.



Ka pasal in nghet deuh a ka kawngah a lo kuah rual chuan ka en chho thuai a.

"I rilru a dam deuh tawh em?" ti ang hrim hian min lo en let a, nuih seih in ka bek chuan a awm chu ka tauh sak dat a.



Veranda ah min kal chhuhpui a, kan in tlangsang lai aţang khua kan han thlir chu ka dam sawng sawng mai.



Kawm thlang zau lai ah chuan patling in nilum an lo ai a, an piah deuh ah naupang rual khat chu inburchhe thin rikin an bur chhia chu a han chhuih per leh nawl nawl thul.



Ka pa te Leihkapui hlui ve riap tawh te, a thlang a ka in luah țhin aţang a mei khu lo zam chhuak ngiah ngiah te chu thaw ham ham hian ka thlir a.


Lalati te țhian ho in inkhualtelem nan a an hman țhin an vawk in a Vawk dum lian zet chaw ngen a ngek ruai ruai mai te chuan hringnun famkim zia min hriat nawn thar tir leh ni mai hian in ka hria.



Nie, Thlir dan a zir hian lungawina thil te pawh a lo danglam zel thei mai.


Keichuan khawpui changkang tak ah in leh lo țha pui pui nei a; a chhung a chengte in lungrual leh chuang silo aiin thingtlang nun ah hian lungawina ka hmu zawk.



Pa berin hna lam ațang sum tam tak a hawn luhna inchhung a nupa nun hlim bawk silo aiin sum leh pai chhuan tur neilo, nitin a sur a sa hnuai ah hna thawk tur a hlim tak a nupa a ram lam pan țhinte nun chu ka awt zawk.



Mi tam tak chu "kan chhungkaw khasak a nawm zawk nan" tiin sum tam tak thawh chhuah dan ngaihtuah in kan phe suau suau a.


A rei hnu ah chuan 'chhungkaw khawsak nawm zawk nan' tia kan thawh chhan ber kha theihnghilh in sum leh pai bawih ah kan tang a. Țhenkhat in nunphung hloh țhak nan a hmangin kawplai nei reng chungin midang kan insawp san thul. Kan sum thawh chhuah te chuan 'uire na' kan lei ta zawk țhin a.


Chutiang bawih a tang mek te leh a kawng zawh ve țan mek te chuan vawi khat tal hnunglam han hawi kir nachang hria se ka ti țhin!


An bulțan dan kha zuk thlir let se; 'chhungkaw inkar tichhe tu a tan nilo', 'chhungkaw khawsawk a nawm zawk nan' sum leh pai te chu thawk chhuak an ni zia hawi kirin hmu let leh țhin se chuan, "an hausa tawh lutuk a, an chhungkua in a tuar ta a nih hi" ti in tute mah hi kan insawi zui in ka ring lo.



Chaw ei te kan inpeihfel takah chuan chung inkhawmna hun chu ka nu in a hmang a, kum bul ațang a kum tawp ni hnuhung ber thleng a chhungkua dam tlang tak a kan awm avangin Pathian hnen ah lawmthu a sawi mawlh mawlh a.


Chaw kan han kil a, ka nu chuan "I Pi te chhungkua an lungleng ang, i pa nen kan han leng chho ang a, Bawihtei pawh a Ni in a awm thei ang a, Mama, nang chu Mambawihi kiang ah hian awm reng ang che aw" a ti mial mial a.


Ka mumang dik zan lo avang khan min ngaihtuah hle a nih hmel.

Kan pa pawn "umm, a nau pai vang hian a taksa a chak tawk lo deuh a nih dawn hi, mu nileng rawh se" a ti ve thuai a.


Chaw kil lai a ka nu sawi ang deuh in fehreh san vel ah ka pa nen puPuia te in lam ah leng turin an chhuak a.


Bawihtei chu u Zoteii'n a bual fai a, inkhel enna ah hruai a duh vangin cute deuh hian a chei a. Aizawl boruak aiin Ngopa boruak chu lo la vawt hék le! Bawihtei biang pawh a tai hler zel a, chat erawh a chat bik em lo, sam țawn tham a la neih loh avangin pial then a khuih sakin ani chuan a chuahpui a.

"Faisahlawm kan lei ang a, i ei țeuh dawn nia" a tih te chuan a vahnu chuan "yesss" a tih khum rai rai reng a, tukverh ațangin apa nen kan thlir liam a.


Kawngpui an zuk thleng thla chu naupang dang ho chuan an lo bawr tiau tiau a "Sangsang inkhel in en dawn mi?" an tih chuan hrethiam ve ang hrim in a bu ve lap lap a.


"Inbul ah kan kal ve dawn" an han ti nghal zat a. A pa chu a lo nui suk. Kan fanu chuan a țawng theih hma hauh ațangin zui kawi tu a ngah hman dam dam em bawk a tin ni.



Ka rit nileng a niber, zingkar ațang lunchhe zet a ka țah țan vang chuan ka ipik țun a, boruak lah a vawt hit vur a, kan pa chuan khum ah min mut pui nileng a ni ta ber mai. Ka mumang ka sawi chhuah chang apiang in ka hnuk a ulh țeuh zel a.

"Ka in meh fai hma kha i ngai a ni lo maw?" ti te in min han zawt ringawt thul. "Ka hre lo, rorum zet leh bawrchhawr deuh a i awm laia i huhang ang chiah kha tun ah pawh ila nei tho sia" ka tih let chuan sawi vak tur hrelo in a nui suk zel.

Field lam a inkhel thawm pawh chu a țha ngang mai. Keini nupa erawh khum ațang in kan tho chhuak khat viau a, A phone ah hla a play a, Lalsangzuali Sailo leh Siampuii Sailo zai karah kum thar hla ni chiah lo, Lallianmawia Pachuau leh C Sanga te lo zai tel ve zauh zauh a.


Ka kawrchhung ah kut a zen lut a, ka dul chu a chul kual rauh rauh a, boruak vawt bawk si leh a kut in min han tawhna vel avang a ka taksa mur uaih te, ka hnute han țang leh țalh ţalh țhinte chu hrethiam in a nui suk suk reng a.


A ngai ngai a a pangtilum ka sik duh miau avangin kekawr bul chiah a inbel a, hmul in a bawh thap hraih a malpui hrawl zet a min kherh bet in ka muhil lek lek tur chu min chhaih harh leh țhin.


"A va fair lo ve, ka nu bulah mu tam rawh se i tih vek tawh kha.." ti nai nai in ka meng chhuak a, nui ruh ruh in ka hnute a hrawm leh tawk zel a.

"A tui a lo chhuak ang e, ka inthlak peih rih lo" ka tih na pawh a ngaipawimawh duh der lo.



Mahse, chet a lak tak tak hmain inpiah step ațang a fanu in "lalapa" a lo tih tak leuh leuh ah chuan a rum nghut a. Kei erawh in ka nuih thung.

"Lalapa..." kawngkharpui inhawn rual in a lo ti leh a.
"Bawihte, pindan ah kan awm" ka tih chuan anitei pawmna ațang a tal thla tih hriat zetin a tlan țak țak thawm in a zui nghal a.


Pindan kawngkhar chu a lo nam hawng ve lawp mai. A pa chuan khum thawh sanin a han pawm vut a.

"A lam a lam cheu a, a țah hma in ka lo hawpui ta mai" kawngka ah lo dak lut in u Zotei'n a lo ti a. "Mambawih, i zaiawm deuh em?" tih zawm nghal a min en chuan ka țhat thu in ka chhang thuai a.


"A tihzia chu.. tlai eirawngbawl a ngai dawn lo bawk a, field ah ka chho leh dawn a nia" a ti a, pawn lamah chuan a bialpa thawm a lo awm zui nghal bawk.


Bawihtei chu khum ah apa in a lo lawn pui rual in min bawh that that a. Ka kawr a hlim tawm tawp rual in apa zawk a lo phun hluk mai.

"Diaper thlak a ngai a nih hi" tih zawm nghut in luggage chung a a diaper kan dah chu a pan nghal a.

Tui hal hmel zetin hnute chu a hne nghal dek dek a, a thaw hliam hliam reuh bawk nen duhawm tizet in a sam ah ka chul sak a.


A pa phone chu a lo ri a, a chhan hma chuan "i u Dtei" a lo ti hmasa a, Phone chu chhangin "Aw" ati nghal thawr bawk.


U Dtei chuang eng thil nge a lo sawi ni, chal ti chuar tup in a ngaithla vung vung a. "A nuam lo deuh a, amah hi be chhin la" ti sup in a phone chu min pe nghal a.


"Mate, inkhel han en ve ang u, kan lo insiam ang, min lo sawm phei ru aw" ka rin lawk ang chiah in u Dtei chuan a lo ti nghal a. Rawn pah a kan pa ka melh ralh chuan "i thu thu" a lo ti sup.

"Umm, kan lo sawm phei ang che u. Mahse, inbual hmasak ka duh a, kan rei deuh ang" ka ti ta a.



An pafa chu thawh san in mei ka nun a, tui ka chhung so leh rih a. Ngopa khaw tan hi chuan kum khat a ni hnuhnung ber hi a pawimawh ve a, apui a pang a an ngaihhlut kha a nih miau avangin ka pasal pawn inkhel en ngawr ngawr aiin naupan tet ațang an lo tih dan țhin a, field ațang ni en liam kha a chak ve dawn a, Bawihtei tan lah a vawi khatna tur a ni leh zel bawk nen han chhuah chhoh ve kha a țha ka ti.




Tui so hnu ah bualin ah khai lut in ka intleuh thuak thuak a, ka insiam vel laiin kan pa pawh a in tleuh ve a.


Kan insiam fel vek hnu ah kan chhungkua chuan kan han selfie a, Bawihtei'n hmui a tih pawrh tarh tawh hi chuan apa hian duhawm a ti țhin lutuk a, a biang chum ah seh sakin an in chhaih rak teng tung zel.



Motor ah kan han luh pui chuan "a pa Ngaihsaka te sawm phei ang u aw" apa in a tih hluai chuan a khek ve raih raih a.


An kawmthlang ah motor chu tiding in horn a han hmet tuar a. Chu mi rual rual chuan u Dtei chu tukverh ah lo dakin " kan lo kal, in va rei em em ve" a rawn ti nghal hlar a. Ka han nuih tlawn ta ngawt.


An nupa chiah in an lo chhuk thla a, "khawi ah nge Lalati te unau?" ka lo tih chuan "field ah an chhohna a rei tawh lutuk" a ti a.

Seat hnung ah a țhut fel rual in Bawihtei biang ah a rawn piai hlak a, u Ngaihsaka zawkin "ka lo pawm ang che" a tih chuan ihê lovin a ban ve tharh reuh a.


Kan pa chuan motor a khalh a, Bawihtei pawh tukverh aţang a pa Ngaihsaka thil kawhhmuh chu thlir in a nui hawk iar iar reng a.


"Kum in chu kan veng ah hian player thar an awm a, boruak ațang viau ang" u Dteii'n a ti barh barh a.

"Nikum khan kan lo haw lo tak, tute nge chak" ka ti a. Ner nang chungin veng dang chak thu a sawi a.


Kumin hian kan veng leh champion ni lai mek te chu an inkhelh leh dawn vang a lo nia ka u-i chu a lo phur em em ni.

"Kan veng rawlthar la naupang zetin kan veng team a zawm ve tawh a, tleirawl lakah a tlana reuh bawk nen boruak a țang dawn a, an inkhel ka hmu chak tawh a nia" a ti sek sek a.


"Khua a mi hi a ni em?" kan pa in a lo tih ve sup chuan "aw, Electric SDO fapa naupang zawk kha a nia, a nu leh pa te insawn vel na ah pawh zui ve loin api leh pu te kiang ah a awm char char a, nikum ațang khan a dawk zuah mai a, infiamna lam pawh a ti thei phian a nia" u Dtei'n a tih zawm barh barh a.



Kan pa chuan an player sawi chu a hre ve a nih hmel.

"A pa te kha Ngopa 'A team' ah pawh an khel ve țhin tlat a, a duai lo tawp ang" a ti ve ta nghut a.



Field kan han thleng chho chu field kotlang ah leh tlang dung awm phei ruih ah te chuan a zik hian an lo zi hut hut a.


U Dtei inkhelh en chak em em pawh chu an lo țan tawh bawk nen rang deuh in motor ațang a chhuak a. Nutlingpui mai a hmanhmawh phili lutuk chu kan nuih tawp mai.




Field ko tlang ah kan lawn chho ve a, mipui țang au thawm chu a ri hum hum ni mai hian ka hria, khuang te vua in lehlam pawl te nen an inau el thul.

Pavilion ah chuan trophy leh belpui lian pui pui pathum an hung ruau bawk a.


Bawihtei pawn a awmzia hrethiam chiah lo mah se nuam a ti ve ngang mai, apa in a koki chhuan a. "A goal" tia au chung a mipui an han zuan suau chang te chuan kut lo beng in a lo khek ve raih raih reng a.



Lawmman semna te an han nei zo a, an tape play chu mic ah thlun zawmin;

Kumhlui kumhlui kumhlui
Kumhlui kumhlui ngaihawm
Zai in ka au a che

Lalsangzuali Sailo zai chu an han play ta a. Rui lungpuam deuh ațang a naupang te te thlengin field ah chuan an han su hut hut mai a, lam ve loh hlau in field tlang ațang a țhen an tlan tla tup tup bawk a.


Ni tla tur liam lek lek tawh thlalakpuiin țhalai lam lah an lo buai em em mai a. Hawi na lam apiang ah chuan kumhlui ngai chung zela kum thar tur nghahhlel tak si hlim hmel hmuh tur an awm, ka bulah ka pasal ding mek ka han en chhoh chuan hlimna hian min rawn chenchilh veng veng.


A fanu chu koki chhuan in ni kan en liam dun hmasak ber țum a kan țhutna lam kha a lo thlir vung vung a.


Keipawh chuan khami ni a kan pahnih inkar a thil thleng engkim te kha hmu let iar iar in ka pasal jacket hnuai ah zen lut in a tshirt chhan ațang zawk a taksa chu ka kuah salh a.



Amah pawh chuan ka kawngah nghet deuh a lo man in a taksa si chet in min hnuk hnai a, a kutphah hlai pui a ka dul chu lo hup pahin a lo kun hniam ta a, a hmui lum in ka beng a lo nawr sik lai chuan ka lungphu chu a rang dat dat a.

Chutah zawi ruih hian "Sakhmelmawite" a rawn ti sup, lai ru deuh a ka thlek chhoh há chuan mit min siai sukin a han nui tel suk bawk a.

Tih ngaihna vak hre silo lai deuh a aban bul ah ka chum chuan lungawi hmel taka min en in a riin a lo nui chhuak ta hawk hawk. A koki chhuan mek a fanu lah chuan engmah hrethiam ve mang silo in a lo nui ve hak hak a.


"Special, he lai hmun hi i nu nen kan inchhai velna hmasa ber a nih hi" thutak fe in a ti roh a, sawi chuak awm anglo ti deuh hian "Lalapa..." ka han ti hlar. Ani lah chu a nui ruh ruh duh lek lehnghal.


Chutihlai mek chuan Ngopa khua a thlalatu kan neih zing a kan chhuan vawr ve ber chuan " lo hawi rawh u" a rawn ti lauh a.


Ni tla tur hmachhawn reng chung a hnung lam kan va hawi chiah chu camera alo de nghal zawk.

Phur fe hian "fuh lutuk, photo of the year a ni dawn chiang e" ti hluai in a camera nen kan dinna bul a lo thleng phei ve nghal. Kan han ensak vel chuan lighting zawng zawng leh kan chhungkaw thum hlim hmel te chu a inchawih vel vek.

"Print la, kan khul duh dawn a nia" kan pa chuan a han ti a. Malsawma pawn phur zet in kar thar ah chuan a chuah mai tur thu sawiin amah lo au tu te lam ah chuan min kalsan ta a.


Ka pasal chuan ka darah a lo kuah a, keipawn hahdam deuh hian ka ngheng a. "Nakkum ah chuan Bawihtei nau tur a piang ang a, kan hmang chho thei leh awm silo a" ka tih sep chuan a lo bu ve nghut.

"Special-i hian nau mipa a nei dawn in ka hre tlat" a tih tak dut ah chuan rang deuh hian ka thlek chho ha a. "Mipa a nih chuan nula hnen ah Ramar rawlruk ve lo tur a hrilh uluk a ngai dawn a nih chu" ka han ti mai chu!


Min thlek vut a. Nui duh miah lo hian ka dul chu ka hup a. "Bawihpui, lalanu thusawi chu i hrethei tiraw? Nang chuan nula rawlruk atan Ramar hmang ve miah lo ang che" tiin ka pasal chu ka en leh ngat a.

Ramar min pek nghut țum kha a hrechhuak tih hriat deuh in Ka pasal chuan min melh ta run run a....


Hausakna aiin rinawmna dil la, ropuina aiin finna, mirinawm kiangah chuan rilru hahdam takin hun leh ni te i chhiar liam ang a, mifing kiangah i awm chhung chuan i hlutna i hrenawn fo ang.


Ka mo pui te tan; Mo te hian mahni pasal te chiah nei lo a, pasal chhungkaw member tu te pawh chhungkaw mi leh sa ang tak tak kan en thiam a țul hle nin inhre ve em?

Chutiang zel in, pasal pawn 'i nupui in i nu leh pa, inchhungkaw member tu pawh a ngainat a, a hmangaihpui theih nan che a hmasa ber in nangmah khan i chhungkua i hmangaih a țul, nang ber in i nu leh pa te i hmangaih a, i zah thiam chhung chuan i nupui khan matheiloin i mizia a entawn mai dawn a ni. Nangin rui thle kual vel mai mai chung a i nu leh pa te i palzam chhung chuan i nupui zawk kha i chhungte zah a, hmangaih tur in phut miah suh. A chhan chu i nu leh pa i treat dan bakin i nupui khan a treat dawn lo tih hria la, nupui fel, i nu leh pa te hmangaihpui theitu che neih i duh ve si chuan nangmah kha a pawimawh ber number one i ni tih inhrereng ang che.



Hmeichhia te pawn mo nitur a mi in ah kan va lawiluh rual a, kan va lawi luhna te chhungkaw khawsak mil a kan insiam rem nghal khan keimahni mai nilo, min hringtu kan nu leh pa te thlengin kan chawimawi a ni tih hre bawk ila tirawh u.




A TAWP TA E.
Ririni Khiangte (Abbra Pitartei)





💓

💕




He thawnthu ka phuah chhan hi aw... 😚

Inrinlawk loh deuh a ni mai thei. 🙊

Ka naupan zual deuh lai chuan "pasal ka neih hun ah chuan anu ang hi ka ni ve ang" ka ti țhin.

Ka upa tulh tulh a, Anu ang nih ve a harsat dan tur ka hre fiah ta tulh tulh thung.


Anu hi unau mipa rual pasarih kar a hmeichhe piang awm chhun a nia. Hausa falua lo mah se an duat vet vet zia chu kan khua a mi te'n an hrechiang ang.


Apa thung chu unau hmeichhe rual pasarih inkara mipa pahnih piang zinga a u zawk a ni ve leh a.


Tichuan, kum la naupangte in anu leh apa chu an innei ve ta thawr mai a, tun thleng a api la sawi ban theih loh chu 'i nu khan inchhung chet engmah a ti ngai silo a, i putea te ho in an awl hneh in kan duat rawn si a, khatia mi mo ah a han țang tur kha ka ngaihtuah țhin lutuk a, mi chhungkaw kiang ah awm dan thiam lovin innghirnghona a thlen ka hlau țhin' tih hi.

"Mahse, rinloh tak maiin a ngaihtuahawm ta mang silo a, a mak tak tak a ni" tiin nui ker ker chungin a tawp a khar leh țhin.

An inneih a țang kum khatna ah kei ka piang nghal a, a kum leh ah ka nau a piang ve leh a. Chutia chhangchhiat zual lai tak chuan api (apa nu) kha cancer avangin a damlo chho țan a, Aizawl ah an zuk awm reng hnu ah an lo haw chho a, mahni a zun ram pawh inthiar theilo in a bet zui ta a.


Chhutia cancer avang a khum bet a damlo tawh api chuan fanu nei deh duah mah se 'anu bawisawm loh' chu a duh lo reng reng.


Zun ram a thiar duh pawn kan unau min buaipui in anu kha lo buai em em mah se 'Matei nu kha khawi ah nge?' a ti hram hram zel.

Khang ah te pawh, api damlo chau tak kha dimlo tak a han bawisawm nawk nawk nise chuan api khan anu hming kha a lam sek ngailo ang. Chhangchhe chung chung a hah pawh sawi nawi ngailo a, dimdawi tak a api a bawisawm țhin vang a a pasal nu damlo in a hming kha lam ngun ber țhin a lo ni reng a...



Api a han boral hnu ah pawh apu (apa pa) khan damlohna a neih reng reng in, "matei nu, ka lu chung ah kut nghat la, min țawngțai sak rawh" a ti a, anu kha mihlim leh Pathian thu a han tui hluai ang chi kha a ni ngailo nangin, a pasal pa in a dam loh chang a a lu chungah kut nghat a țawngțai tur a a rin ber a ni thung.



Ka ngaihtuah țhin a, anu lah kum la naupang ve tak, hmeichhe rual kar a khawsa ngai reng reng lo, apa farnu te kiang ah khawsa a, mo dinhmun a han chang tur kha maw... a ni te ho hi an sual miah lo. Marawh chu hmeichhe rual awm khawm kar ah chuan neuh neuh a awm lo thei dawn lo tih chu inhriatchian ve tho ka ring.


Chutichung chuan tun thleng hian Ani te leh an fate chenin; inchhung an lo lut hian eng dangmah an sawi hmasa ngailo. "Khawi ah nge Peki/ khawiah nge api Peki?" an rawn ti hmasa ber zel. 🙊 Inpuiah an putea nupui an rawn zawng hmasa ber ziah zel a nih chu.


Apu (apa pa) lah mi zawng zawng deuh thaw in "Peki pa" tiin anu hming in an au/ koh vek bawk a.


Apa te inpuiah Apu ho in kan khawsa ta a. Mahse, kan in a lo chuangkai te hming lam rik zin ber chu an mo nu; Peki hming a ni vek zel te kha ka tet deuh lai chuan awlsam tak a chan ve theih emaw ka ti țhin.


Mahse, tun hnu hian a lo nih loh zia ka hmufiah thiam a, anu hi ka ngaisang thar ngawih ngawih zel.

Chutiang zelin, anu in a pasal chiah hmangaih lo a, an inneih ruala a pasal chhungte zawng zawng nei tel ve a, a hmangaih theih chhan chu apa vang a nih zia pawh ka hmufiah thar a.


Apa hi mahni hringtu nu leh pa zah lo mi tak emaw, farnu te zah lo va thlahthlam țhin mi lo nise chuan hetiang tak hian anu hian a chhungte hi a hmangaih sak lo ang.


Apa in a nu leh pa, a unau te a hmangaih na kha hmu thiam thuaiin anu kha apa nungchang mil in a insiam rem ve zel a lo ni reng a. 🤗


Tlin lohna tam tak nei, țhenrual țha te pawh lawm zo lo em em anu leh apa te hi ka tan erawh an famkim hluah hluah thung. An nun ațang a ka thil zir chhuah zawng zawng hi school zirtirtu tumah in min zirtir theih ka ring lo.




Tinge he story hi ka ziah kan tih chuan. Mo te hian mahni pasal chiah nei lo a, a pasal chhungkaw member tu pawh chhungkaw mi leh sa ang tak tak a en thiam a țul ka ti.

Chutiang zel in, pasal pawn 'i nupui in i nu leh pa, inchhungkaw member tu pawh a ngainat a, a hmangaihpui theih nan che a hmasa ber in nangmah khan i chhungkua i hmangaih a țul, nang ber in i nu leh pa i hmangaih a, i zah thiam chhung chuan i nupui khan matheiloin i mizia a entawn mai dawn, nangin rui thle kual vel mai mai chung a i nu leh pa te i palzam a nih chhung chuan i nupui zawk kha i chhungte zah a hmangaih tur in phut miah suh. A chhan chu i nu leh pa i treat dan bakin i nupui khan a treat dawn lo tih hria la, nupui fel, i nu leh pa te hmangaihpui theitu che neih i duh ve si chuan nangmah kha a pawimawh ber number one i ni tih inhrereng ang che.



Hmeichhia te hian mo nitur a mi in ah kan va lawiluh rual a, kan va lawi luhna te chhungkaw khawsak mil a kan insiam rem nghal khan keimahni mai nilo, min hringtu kan nu leh pa te thlengin kan chawimawi a ni tih hre bawk ila tirawh u.

He story ka ziah tirh te ațangin comment ngaihnawm tham hnawk ka dawng țhin a, keimah mimal min infaksiakna aia a thawnthu in hmuh dan, inrilru a hruai kual dan thui tak tak a comment ka dawng țhin hi a ropui ka van titehlul em.

Tin, He story hi ka tan a hlu zual a, kan khua vel ka hman nasat tluk zet in Zoramchhana mizia ah hian apu F Chhanliana (L) mizia ka hawh nasa em em a. Apu kha sa la thei deuh, mi tlawmngai leh buh thar hlawk țhin em em, hmeithai leh fahrah te tan pher te tah sak a, Saum bur tur chen a lak kep țang țang țhin kha a ni a. Amah a palian in a rawl kha a lian țhin mai bawk si a maw..😅 ka nausen laiin a kutphah ah min mut tirin "A sepcial-i a nih hi" ti khan min awi dur dur zel a.

He story chhung a ka thailan engkim hi ka tan chuan an hlu em em vek ani tawp mai.😍


Chuan, In Bon zia chu maw Euphoria. Thla khatah hian zan 3/4 vel bak story hi ka lo dah hman lo chung pawn, ka țhian dangte zan 10 dawn te dah a an hlawh hmuh ang zat deuh thaw hi inzarah ka hmuh ve theih phah a nih chu!!!


Viewer in BON hem hem țhin lutuk hi TETAKTEI view record kha kan brake chiang khawp mai.

Ephoria nih in lo phu ber e. 🤗🧚‍♀️


Thawnthu thar ka lo neih hun tur ka sawi thei tawh lo aw. Kan intawn leh hma loh chu lo dam țha ula, ka ngai țhin ngawt ang cheu.


Dam takin ule. 🧚‍♀️

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)