KA HMANGAIHPA ZORAMCHHANA By Abbra Reo Ririni Khiangte (PitarteiSualfingi)

Moderator: Abbra Reo Ririni

Ngaia
Site Admin
Posts: 25813
Joined: April 30th, 2016, 4:07 pm

Re: KA HMANGAIHPA ZORAMCHHANA By Abbra Reo Ririni Khiangte(PitarteiSualfingi)

Unread post by Ngaia » August 27th, 2021, 11:12 pm

"Zoramchhana pawn a hna a chawlhsan phah ve tho a lawm, u Jo-a a huat phah ve chiam chiam lo" ka ti let hram, beidawn hmel fe hian u Mami chuan, "Mate.." a ti hliai a, ka tho chhuak daih a. Tukverh bul ah chuan va dingin tukverh chu ka hawng a, thlasik boruak vawt zet in min lo chhem tak ah chuan ngaihtuahna ka seng thei ta deuh.


Ka u in Zoramchhana a hmuh rual a thamlo hmel taka a en chhan te kha eng dang vang a lo nilo. 'A rangkachak tawlhruk lo man tawh tu kha amah ai a dinhmun hniam leh tih theih engmah neilova thingtlang khaw kilkhawr tak ah a tawp tak vang a elsen a ni' tih a chiang hle tawh. Chu ka ngaihtuahna avang chuan ka awm chhung chu a rawn tawt sa deuh pup pup a, a diklohna ni miah lovah ka u in hetitaka Ramchhana a haw let zawk daih chu ka natpui em vang pawh aniang; mitthla ah Zoramchhana hmel a lo lan chuan mittui a lo hnai ruai thei.


Ani kha chuan a eizawnna a chawlhsan phah hial a sin. Chuta karah CID kut ațang GOLD kha a bo chung pawh in Zoramchhana vek a mualpho a. A hming a chhiat tak hrep ah chuan a nupui tur riak a a lo biak tawh hmeichhiain a phatsan phah bawk. Chung thil te a paltlang vek chung paw'n 'thingtlang tlangval' tia a dah hniam em em kha chuan vuina a neilo a, dem tur leh puhmawh tur a zawng ve bawk lo.



Rei fe kan ngawih dun vang vang hnuah Au Mami vek chuan, "Ka pa be turin a lo kal dawn te kha i ti a, neih chu i tum tak zet a mi?" a han ti țha leh a, ka kiangah a lo phei ve takah chuan rang fahranin ka mittui lo hnam mai tur chu ka men kual pui ralh ralh a. Mahse, Zoramchhana thlavang hauh a; a tan ding tlat tur erawh chuan ka tum a ruh thar sauh thung.

" inneih chu kan tum a lawm" ti sep in ka u chu ka melh zauh a, min en dan chu ka hrethiam lo. A beidawng hmel mitmeng ah chuan â min tihna ni awm tak ka hmu tel bawk.

"Hriat pawh in inhrechiang hman em ni?" a lo ti ta reng a.

"Kum 2 chhung kan inhre tawh" lawm lo deuh a ka tih chuan zalo fe hian a han nui hak a. "Chutiang niloin in inngaihzawn chhung hi a rei silo a.." a ti a, nuihza insum tak leh â min tih hmel bawk si hian min melh ralh Ralph mai.

"Thil ka hrilh ang che" tih leh a ban chelh ka rual a. Khum lamah bawk chuan kai phei leh in khum ah chuan ka lawn kai a, u Mami erawh khum tlang ah a țhu thung, a malchung ah lu ka nghah tak ah chuan a lo nui ta hak hak a, "unau a kan riahkawm lohna pawh a rei tawh hle mai" a tih chuan nuih sen sen in ka mut dan chu ka siam rem a. "Zanin chu hetah riak daih la" ka tih chuan a ner nasa nang nang viau. Thutak deuh zawk a ka en tak ah chuan 'ka sawi tur chu a ngaichang' ti ni awm tak hian min melh ve ta a.

" Dinpuia nen kan inzui chhung zawng khan maw 'ka ta chiah nitur in' a ngen a ka ngen a ngai țhin. Hmeichhe dang nen an inbiak dan ah thik tur ka hmu fo a, rilruna tak chungin 'amah chiah mipa ka ngaihsak angin keimah chiah hmeichhia ah ngaihsak nei turin ka ngen fo a ngai. A awmzia chu maw, ngen chawp ngaihsakna, ngen chawp rinawmna chiah a lak aţang khan ka dawng. Mahse, i hriat kha... ka first love a ni a, hmeichhe dang tel ve țhin mah se first love meuh chan phah ai chuan tiin ka țhen ngam ngailo" ka ti sep sep a. Ka sam lo chul hliau hliau in ka u pawn min ngaithla uluk ve viau mai. Chutah mit ka han chhing deuh vang vang a, ka mitthla ah Zoramchhana a lo lan rual chuan tawite in ka nui tak nangin ka ngai takzet a ni.


"Zoramchhana hi tun hnai a ka nun a lo lut chiah a ni hleinem, ka bialpa lak ațang rinawmna a ngen a ka ngen chuah a țul laiin ani thung chuan ngawi rengin min lo zir chiang a. Ka bialpa hnen ah hmeichhe dang be tawh lo tur a ka hrilh a ngaih changin Zoramchhana thung chuan kei chiah min ngaihven țhin. Hnehsawh tak tak a ka țawng khum chang lahin ani chuan dawhthei takin ka chet dan engkim a lo dawngsawng mai zel. U, a hnen ațang hian maw, hmangaihna te, rinawmna te leh ngaihsakna te hi a ngen a ngen chhuah chawp tur nilo in thil thlawn pek ang a dawn tur a ni tih ka zir chhuak a sin" ti sep sep a mit ka meng chhuak chu ngun fé hian u Mami chuan min lo thlek veng veng a.

"Zoramchhana hi phut leh kar chawp ngai miah lo a min hmangaihtu leh min ngaihsaktu ani. Nakinah; amah chu i la hmu ve ang a, i belchian hnuah chuan a nun tlawm tak phen a mahni a inrintawkna te, a bulhnai ami te tan innghahna tlak a nih zia te i hmu thiam ve mai ang" tia chhuang taka Zoramchhana chanchin ka hrilh lai chu ngaihtuahna kal thui hmel tak hian min lo en a.

A tawpah chuan, "Ka nau, hmangaihna ah i luangliam hle a ni maw?" nui pah hian a lo ti chhuak ta thlawt. Keipawh chu biang sa hat hat chungin ka nui ve tho.

"Eng ang mizia nge a nih reng reng a? " hriatchian belh chak hmel taka a tih leh chuan nui hakin ka sam a lo chulna kut chu ka hum sak vang vang a.


"Ani chu tuipui thuk tak ang hi a ni, tuipui pawh a thuk zawh poh leh a rehin a dam dap a, chutiangin Zoramchhana mizia pawh" ka mitthla ah Zoramchhana hmel rorum tak mai leh a mitmeng dam dup lawi si hmu pah reng chunga ka sawi sap sap laiin u Mami chu a lo nui ar ar thung.

"Kan pasalțha a zunzam chuan a fan hneh hle che a nih dawn hi?" tiin min han fiam vel țhin...

Ka sawi dik miau a ni..... Tuipui pawh pawn lang chu tui luang ri vangin a bengchheng em em a. Mahse, thuk zawk ah hleuh luh a, a chhungril zawk zuk thlen chuan a rehin a dam ruih țhin, chutiangin Zoramchhana mizia pawh, pawnlam ațang chuan rorumin helpawl zing a chhiar tel theih tur khawp a hmel nelawm loh pu mah se belh chian chuan a dam dap a, Tuipui thuk tak chhung a chimbuaitu awm lo a tui kan hleuh kual țhin ang mai hian a hmeichhia a tan a thlan tawh lak ah lah a nghet tlut mai bawk si.



"A nih Zoramchhana'n a Gold man neitu kha Jo-a hi a ni tih a la hreve reng em?" tia min zawh tak ah chuan eng thi emaw hian min hnawh tawt nghal tlat. "Ka hrelo.. a hria em tih ka hre miah lo" u Mami en chho hâ pah chuan ka ti chhuak halh a.

"Chutak chu ania, han ngaihtuah chiang te, i u Gold a man sak hnu lawk ah a kut ațang a bo ang riak in Zoram mipui in an dem luai luai a, khang thil thlen chhan chu Jo-a rangkachak vang kha a ni bawk. In pahnih a in inkawp hi a dik thei in i hria em?" tia ka mit ah tak min en tak kalah chuan ka nghing dawt hial in ka hre mai.


" u..." zawite in ka ti chhuak thei hram, chutiang chuan vawi khatmah ka lo la ngaihtuah chhin ngailo.


Kan unau chuan kan ngawi dun ta rauh rauh a, engkim a chan phah chhan, a hna leh a nupui tur hial pawh a channa chhan bul ințanna chu ka u vek hi ani tih a hria ang em?

" Jo-a chuan engkim kha a pai dam thei lo tih a chiang phawt a.." fan raih a a tih chuan nghet deuh in a kut chu ka hum a.

"Mahse, ka u kha dan kalh a che zawk ania, a diklona inpawm mai zawk se," mangang ru fe mai hian ka tia, "chu ai a pawimawh zawk chu Zoramchhana hian Jonathan-a hi smuggler Jonathan-a kha ani tih a hria em tih a ni" a lo tih takah chuan beidawng ru deuh hian ka țhu chhuak a.


"Hun liam tawh thil thlengte avanga kan inkar a chhiat hi ka duh lo tak zet" chuai raih hian ka ti a Ka thu hriat zawng zawng hi Ramchhana'n hre ve ta se min thlauhthla duh mai ang em?

U mami vek chuan, " zep nei a in inzawmna kalpui pawh a dik chuang lo a.." a lo ti leh khauh. Sawi tur reng ka hre tawh lo.

"Mate, i țhianpa chu bia la, zawt rawh, a lo hre tawh lo a nih chuan hrilh bawk la" tia min hrilh leh phei chuan thin a phu rang hle a, țah a chhuak tet tet bawk.



Chechang lo lekin khum tlang ah chuan ka țhu tlawk tlawk, Ka u in min chhuah san hnu ah pawh room ațangin ka chhuak ve ta miah lo. A tu amahin min rawn tibuai lem lo bawk, kei lah ka vah te ho han chhawnchhaih turin ka tha a tho bik der lo. A khat tawkin Phone ah chuan u Zotei number ka hmet chhuak a, ka call dawn zuau zuau țhin nangin chhunglam a hlauthawnna lo insiam chu a nasa lutuk a; thaw hawk in phone chu ka hmet thim leh ringawt zel.

Zanriah ei kham hlim a u Zotei phone ațanga Zoramchhana nen kan in text na te chu ka chhiar kual mai mai a. Phone zuartu te pawh naktuk ah hian Kum thar hmanga a nupui te khua a an zin kha an lo hawng ang a, Ramchhana paw'n phone thar a lei ve thei tawh ang.


Chutia rilru laklawh deuh a ka awm lai chuan phone call ka dawng a, screen ah Dinpuia number a lo lan rual chuan off hmak ka tum zet nain hriat chhuah ka nei thut a, rang lutuk in phone chu ka chhang leh ta zawk a.

"Dinpui, palai lo kal tir kha tum buai duh suh, ka nei dawn lo che. I lo tir lui ta țal a nih chuan kan inzui țhat lai reng a i khawsak dan kha i palai lo tir te kiang ah ka lo sawi vek ang" ka tih khum nghal bawrh bawrh a, a lo țawng ve hmain phone chu ka titawp nghal hmiah bawk.



Ka sawi tam hman bawk nen thawk la hliaiin phone chu ka melh deuh ren rawn a, a lo call nawn leh a nih chuan a aia nasa khan ka an khum ang ka tih rilru a, mahse a lo call nawn ta em lo.


A tukzing ah chuan u Zotei phone ațang bawk Zoramchhana nen kan inbe leh a. Lo number pawt a a kal dawn thu te chu hrilh ve sup sup a, ka u chungchang erawh ka la sawi ngam ta lo fo. Ramchhana nen kan inbiak zawh hnu lawkah ka unaute an lo leng a, chhun a kal chhuah an rawn rawt leh hmiah tawh. Keipawn in ah ngawt tawm reng ai chuan chhuah vah chu ka lo hnial duh ta biklo.


"I bialpa thar Zoramchhana chu kan hmu ve duh, video call rawh" Sawmpuii'n a tih chuan za lo deuh hian ka nui hak ringawt. Coffe takzet a cake chiah zawp pahin Jen-i pawn video call tur chuan min hrilh ve sek a.

"Phone a neilo" ka tih chuan an meng phawk kher a sin.

"Phone a nei lo maw?" Min rinhleh hmel deuh in an han ti vel ngat a. "A chhia a, khua a phone zuartu te lah khaw dangah kum thar hmangin an zin daih a, an la haw silova" ka tih chuan an in melh ralh ralh a, an ngaihtuah tur awm ang chu ka hria, huat ah pawh ka la buai peih lo.



Ka phone a Zoramchhana nen kan thlalak te chu ka en kual tir ta zawk a. Kan thlalak an en chhung chuan thawk pawh an thaw lo hian ka hria, a khat tawkin 'Kan Mambawihi kha i la ni takzet amaw?' tih melh hian min melh a, nuih an tiza reuh a sin.

Keipawh Zoramchhana ka hmuh tirh te kha chuan an mahni ang tho hian ka nel lo a, ngainat chu sawi loh vin nek tawk lek ah ngaiin ka țawngkam a chaltlai thei hle a nih kha.



Chaw ei hma deuh in ka cousin te haw tur chu ka thlah a, ka let chho leh lamah chuan uDteii ka call a. "Hello, Mate.." tia phone a chhan rual chuan mipui thawm bengchheng zet ka hre zawm zat.

"Khawi ah nge i awm a? In van tam hmel?"

"Aw... Hei, kawtchhuah ah Lo number kan pawt a" a rawn ti hêu mai.

"Ve ngawt a che, Lo in nei ve dawn ngawt em ni?" ka tihlai mek pawh chuan an thawm chu a țha ham ham hle. Heti hian Lo tur number an pawt ang a, kar thar lamah an number pawh hmasak dan a zirin Jubilee hall ah Lo tur an han chhang leh ang a, Lo vah a, lo hal in a chhunzawm leh mai ang.

U Dtei chuan, "Aih, ka nu te ta tur zawk, ka pa a tho nuam lo deuh a, Lo number tur pawh kha an puang reng tawh sia, min lo va pawh sak mai teh a rawn ti a nih hi" a lo ti let lang lang a.

"I buai hmel si, kan dah rih mai dawn mawnile?" ka tih lah chuan "Lo la vuan rawh. Hei, ka bulah Ramchhana pawh a awm" lo ti vei tlat a. Zoramchhana hming a rik ve leh tak si ah chuan gate bul ah dingin ka nghak leh ren rawn phawt a.

An thawm ațang chuan țhenkhat number pawh chu a hnung deuh nge ni patling nui thawm a țha ham ham hle, a rei a rei ngial hnu ah chuan an kal sawn thei ta a niang. "Kumin chu Ramchhana number pawh leh ka pa te ta tur a ka pawh sak hi a in hnaih bawk a, zau khat an chhang tlang thei ang" a rawn ti nghal bawrh bawrh a, ka lo nui hak ringawt.


" i hlo thlawh tûr tûrna tur te a ni tawh awm si a, kumin chu hlo har lo deuh thlan thiam a ngai viau ang...." Zoramchhana nen a min fiam pah chuan a lo ti leh kher a.

"I chhe lutuk" ka tih hlur laiin phone ah chuan Zoramchhana lo nui hawk ri ka hre tel a.

"Ania lawm mawle, pakhat lah hian Lo a nei zau țhin mai siah, kumin phei chu thawhpui tu tur i awm tawh bawk a, a vat zau viau ang" a la rawn titak ang deuh deuh a. A bul a Zoramchhana lo nui suk suk tur ka mitthla chuan ka sa deuh phulh phulh mai.


"Lo vat zau viau rawh se, kan riak lut tluk tluk a nga a ni mai alawm" ka ti leh chiah erawh u Dtei chu a rawn rak ring ngang mai. "Ramhmangaih, zak teh aw" a rawn tichiam chiam a, ka nui duh der silova, "i over lutuk, i be duh em?" a'n ti deuh ngawt a.

"Tukin ah kan inbe daih tawh..." rang zet a ka tih chuan min ei loh hmel nangiang mai.

"Hei, kan in ah ka pen kawi a ngai sia, Ramchhana nen kan kal hrang dawn a sin, in inbe duh lo tak tak maw?" thutak deuh zawk hian a lo ti leh ta a. Chhan mai ngaihna ka hrelo.


Mahse, Zoramchhana'n a phone chu a ban a ni mahna, aw ka zawi ruih hian, "Mambawih" a rawn ti dut a. A aw thum leh thuk ruih vang chuan min hmu thei lo mah se ka lai deuh ringawt mai .

"Umm, i kianga mi chu a va țawng duh barh barh ve a" zah zel ah ka tih laiin zawite hian Ramchhana chu a lo nui hak a. A nui hmel chu mitthla ah hmu in hmui ka pet fan fan a, a huhang hi chu a danglam bik ngawt mai.

Jen-i te thil rawt kha ka hrechhuak a, "E, ihmaw, ka cousin ten kal chhuah an rawt a, ka zui ve dawn a nia, nichin khan ka hrilh hman lo che ," tiin Zoramchhana chu ka hrilh nghal mawlh mawlh. Amah pawh chuan "Fimkhur ula aw, khua a la vawt si, inthuamlum țha la" a rawn ti let dut dut a. Min chahtu in a zir bawk a a kawrlum ngat kha ka ha chhuak ang.


A bul mai ațang u Dteii'n "Duhtawk ru, ka hmanhmawh" a lo tih tak chul a, ka va khamlo ting tang tak. "A va intithu tak" ka ti hlak hlak a. Nui suk suk in Zoramchhana pawn, "Mambawih, chaw ei tui aw" a rawn ti a. Ka chhan let hma hmain u Dtei chu a rawn țawng nghal daih lehnghal.


"Enteh, hrilh tur che ka nei a" a ti a. A thil sawi tur chu a pawimawh hle aniang a aw pawh a thutak khawp mai.

"Englam nge?" ka tih chuan aw a thian kharh a. Zawi deuh tak hian "Ahmangaihi kha a rai a sin" a rawn ti hem mai. Mak tiin ka meng kawk a.

"Ih.. saw ta..." ka ti hman chauh, u Dtei chuan, "Dinpuia lenna țhin kha, khua ah a la tlang thang lutuk lo. Ahmai nu in ka nu kiang ah a sawi dan chuan Dinpuia a puh a ni awm e" a rawn ti leh zet erawh ka Halleluia chhuak chiam lo chauh!


U Dtei nen kan inbe zo chu a tlan in tualzawl ah chuan ka tlan phei a, u Nathan-a lo chhuak tur nen kawngkapui ah kan insu lo chauh bawk.


"A va mak buan buan ve" nui suk a ka darah a lo man chuan rang deuhin ka en chho a. "I hre ve tawh em?" tih chu ka zawt zui thawr. Hriatthiam loh hmel deuh a min en chuan a kutphah ah chuan ka kai a, inchhung ah ka pawt lut țang țang chu min nuih hawk hawk leh nghal.

"Khawiah nge ka nu leh pa te?" ka tih chuan room ah an awm thu a sawi a. "Chho ang" tih leh kailawn a pawh chhoh ka rual a, "A va mak tut tut ve mawle" ti nuah nuah in min zui ve zel tho.

Ka nu leh pa te mut pindan ah kan inzui luh chuan u Jo-a pawh a lo awm tawh a, engmah an lo sawi hma in ka pa bul ah chuan ka țhu nghal a. "Kan hna thawhna khua ah Dinpuia'n sawn a thlak" ka ti nghal phawng bawk. Mahse, ka chhungte hmel ah chuan mak han tihna engmah ka hmu miah lo.

"In hre vek tawh em ni?" tia ka en kual ruai chuan u Nathana chu a lo bu ta nghut a. "Engtik khan?" ka ti leh hram.

"Nizan ah" tia u Nathan'n min chhan chuan zalo fahran in ka nui ta hak. Nizan a Dinpuia'n min lo call khan a sawn thlak thu min hrilh alo tum zawk a ni thei mai angem tih chu ka ngaihtuah a. A nih leh nih loh hre tawh lem lo mah i la sawn a thlak ta chu a lawm ber pawl ka ni hial ang.


Chhun ah chuan Sawmpuii te nen chuan kan chhuak ho a, Aizawl kan thlen thlak ațang a ka thawnven ber țum a ni hial ang chu. Kum thar boruak a la ni a, dawr in hawng pawh a la tlem viau mai. Kawngpui pawh a thawlin mihring mai nilo litthei tlan vel pawh a khat pharh a, kan dawr kal duhna țhenkhat pawh an lo la inhawng der lo. A tawp ah phei chuan khawpui dai lam ah kan tlan chhuak ta daih a, Hangi lunglen tlang ah thla te la a kan va tei kual hrep hnu ah kan inkhalh let leh a.


Kan veng kan tlan luh leh meuh chuan khua a thim thet thet tawh, kan inbul kawn ah chuan eng thil emaw an lo tikhawm a, an thawm a țha laih laih viau leh nghal, motor te hung fel a inchhung kan inzui lut erawh kan pathum chuan kan phawk deuh hra a.

"Mate, in lo haw tlai lutuk a, Dinpuia nu hian a hmu chak che a, a lo nghak rei tawh khawp che a sin" ka nu chuan a lo ti thuai a. Jen-i te pawn 'kan chhuk thla tlang mai ang' an ti a, hmanhmawh deuh in an inkhai chhuak leh nghal a.


Dinpuia nu leh Dinpuia ni te chuan țhutkhawmna lam a ka inkhai phei chu min lo nuih sen sen a, engti tur a lo kal nge an nih ka hrethei mai silo nen ka zam ru ang reng.


"Thingpui te in lo in tawh em?" ti paha ka nu bula ka țhut chuan an in tawh thu an sawi ve mai a.

"In kal chhuak a ni maw, dawr an inhawng tawh em ni?" hawihawm deuhin Dinpuia Ni chuan a lo ti var.

"An la inhawng mang lo, kan kal duna tam zawk pawh an la inkhar a, khawpui dai ah kan va tei kual ta mai mai a nih hi" ka ti ve mai, ka nui lui hram hram bawk.


Titi dang te an sawi leh luam a, ngawi karin an kiangah chuan ka țhu ve a, a tawp ah chuan Dinpuia nu chu a insum thei ta thlawt lo a ni mahna "ka mo i ni ang chu ka lo ti țhin a sin mawle.. Kan fapa nikhua loh a zarah ka mo i ni thei dawn ta silo a, a hreawm ka ti emai, " a rawn ti chhuak ta phawng a. Chhan let ngaihna pawh ka hrelo, tawite hian ka nuih let a.


"A sawn thlakna nu hi eng ang mize pu nge ni reng reng a Awi! Kei zawng ka lungdam lo, nang nen in inkawp reng emaw ka tia... " hui pap pap pah hian sofa ban a lo bawh liam a, ka kut chu a lo hum a, ka lainat ru kher mai.


"Ih, a fel lutuk. Thingtlang mi ah pawh khawpui a lo chuang chhuak tam pawl ani a, a vengva in kawng hmang a hre ngawt ang" ka ti ve luam a, diktak chuan Ahmai nen kan inhrechiang ve miah lo, a chanchin sawi tur ka hre der lo.


Dinpuia nu chuan hreawm a tih thu leh a zah thu a sawi uar ngang mai, a khat tawkin a mo ka nilo lo tur chu min ui thu leh a fapa chet khawlohna avangin ngaihdam min dil thul, sawi ve tur a vang raih raih khawp mai.



Zanriah ei kham ah chuan u Jo-a te chhungkua pawh an haw phei tawh dawn avangin a nupui chu kan nula te'n an insiam pui a, dar 9 rik dawn ah ka pa te mut pindan ah min au lut a.


An lo awm kim țhap vei nen ka hamahaih deuh lek lek. Ka pa bul ah bawk ka țhu a, nui chung a ka hnung a lo chul hauh hauh chuan midangte chu ka melh kual a, a hnu ah min auh luh chhan ka hria erawh sa tak ka ni!



U Jo-a'n"I bialpa nen khan ininneih duh takzet a nih chuan ka hnuai ah tal hna thawk rawh se" a ti chhum vut a. Rum deuh hian ka va melh a. Amah pawn min melh no bik lo khawp mai. "Hna i pek duh tak tak vang nge i elsen duh vang?" ka ti deuh kher a. Thle buk paha a kiai suk lai ka hmuh chuan thinrim lutuk vangin ka thawk a rang sek sek mai.


"I rilru a mak lutuk, Zoramchhana hian i puihna tello pawh in hna a hmu ve thei" ka tih khum nawk nawk a, ka aw pawh a sai hlak hlak.


"Mamte, thinrim nghal ringawt lo la. I bialpa khan hna thawh a nei lo ani lawm'ni?" Ka nu in a lo ti ve leh zel a.


"Enge in hriat a?" țap lek lek a ka tih chuan ka nu chu ka pa nen a kan bul ah chuan a lo țhu phei ve a.


"Kan fa tlum ber i ni a, i nawmsak loh kan hlau alawm. Kut hnathawk a eizawng ringawt inchhung ah engtin nge kan lawi luh tir ngam ang che" min thlem pah titih hian a ti a. Rilru dam a hnehin ka ter zual at mai.


"Dinpuia'n sawn a thlak tih inhriat hnu ah chiah Zoramchhana nen kan inkar hi inpawm a ni tiraw?" thanâ lutuk a tichhuak in ka chhungte chu ka melh kual a. Țawngkam khat pawh in min chhang let lo mah se ka natpui ngawih ngawih tho.


"Kan mualpho loh nan, miin an fanu leh Dr Dinpuia an inkawp lai rengin dr Dinpuia'n sawn a thlak san tia min nuihzat loh nan chiah ani tiraw Zoramchhana hi inphen nan hman intum?" ti țiau in rum zet hian ka en kual a.




"In mak lutuk.. Dinpuia'n sawn a thlak tih inhriat hma kha chuan tumah rengin min benkhawn sak duh lo a. Tunah..." nui tawi hak in ka mittui lo luang thla chu ka tuai hul nghal tawk.


"tunah thung chuan tukhum chhah inchhawn hnu kha kan mualphona tur hliah kuh nan in mamawh leh viau si, kei hi ka lo â lutuk nge kan chhungkaw mizia hi ka lo hrechiang ngai miah lo zawk?"



"Ramhmangaih, khatin i chhungte hi min țawng khum hauh suh aw" u Jo-a'n a rawn ti vin tuar a, kei erawh pawisak neilo zetin ka nui thung.


"Mambawih, chiang takin han ngaihtuah teh, Zoramchhana nen inneih induh, kan remti emaw kan remtihna tel kher lo pawn puitling in nih tawh avangin intlandun țal thei tho. Mahse, hna thawh mumal a nei bawk silo a, damlo bawrhsawmna te han tawk palh ta ula engtin nge in awm ang? Khawi a sum in nge in inenkawl ang?" Ka nu bawk in a lo tih leh chuan ka tawt lutuk chu ka nui ro halh ringawt.



"Kan inneih hma hauh ațang a chutiang thleng thleng a lo thlir lawk chiam a ngai ami?" ti hmak a ka nu ka en chuan a beidawn hmel kher mai.


"sawi tam a ngai lo, ka hnuai ah hna ka pe ang a a thawk duh lo a nih chuan țhen ang che, tunlai ah hna țha a van tawh naklai a.." chang zet a u Jo-a'n a lo tih chuan ka thin a sa phat phat viau. Ka inhum ruh ngat ngat a. Ani hnuai ah thawk tur kher chuan Zoramchhana chu ka sawi hmuh hauh lo ang.



"I nurse thla hlawh ringawt khan chhungkua in nuamsa zo dawn lo, damchhung a retheih i duh ngawt te a nih loh chuan lunglei lam ah rawn pem se, hna ka lo pe ang" a ti leh nghut nghut a.


"Engvang chuan nge kan retheih bik ngawt ang a? Mizoram a chhungkaw tam zawk hi sawrkar hnathawk miah lo an nih hi" ka ti let hmak, pindan chhung boruak chu a țang ut tawh.

UJo-a vek chuan rum zet a min melh pahin "hmathlir tawinu, mahni hmakhua tur pawh ngaihtuah thiam lo" a rawn ti leh khur khur a. Hetiang renga ka lakah ka u a thinrim hi ka la hre ngailo. Mahse, a țhinur aw rawl vanga ka zam a nih zawngin Zoramchhana nen kan hmalam hun turin a tuar ngei dawn.



"Kan thil thlir dan a inanglo mai zawk a ni, keichuan sawrkar hna lian tak thawh a sum lak luh țun țun hi nawmsakna ka ti ve thei lo, damchhung a ka pasal tur nen kan chhungkaw khawsak zel dan tur chu kan ngaihtuah dun tur a ni zawk, nangmani duh dan nilo in" ka chhang let ve zel chu ka u ngaihdan a nih hmel tawh loh takzet.




"Mahni nawmsakna tur pawh hrethiam lo, i hmakhua kan ngaih vang a nih hi mawle, mite chuan an theihna apiangah sawrkar hna hi a um in an um a sin, thingtlang ah i awm rei tawh lutuk a, i mindset thlengin a nghawng tawh a nih hi" a rawn ti leh hluk hluk a.




"Nie, Mate, I țhianpa pawh chu lo sawipui la, thingtlang ah ram hnathawk a tal reng ai chuan amah tak pawn a lo duh hle zawk mai thei a sin, i u hian i hmakhua a ngaih vang zawk a nih hi, thingtlang ah kut hnathawk a ei zawng ringawt a in tawp chuan hun a rei ang a, hreawm ti tur zawk zawk a sin i nih" ka nu thu lo sawi avang chuan za lo zet hian ka nui a. Zoramchhana hi chhungkaw tamtak in an fanu te pasal makpa chhungkhung ang riak a an thunun kual thei tur a dah ka tum reng reng lo.




"Zoramchhana hian hreawm takin min siam ngai dawn lo, sawrkar hna pawh țul a tih a, hun a tih hun ah chuan kan chhungkaw puihna tel miah lo hian in a thawk mai ang" mahni inringtawk zet a ka tih rual chuan u Jo-a chu a rum hawk a. Ka chiang miau a ni! Hmeichhe chhungte lamin an buaipui khuk chhuk ngaiin Zoramchhana hi a nung ngai dawn lo. Ka ringtawk takzet bawk.

"Kan puihna tel lo a hna a hmu thei a nih si chuan tun ah te hian thawk se, keini pawn ngaihngam takin kan kal tir mai dawn che a lawm" u Jo-a'n a lo tih leh chuan chhan zel chiah pawh ka ngai tawh lo.


Ka hriat zawng erawh hetiang reng hian Zoramchhana hi a awm dawn lo, hna neilo thingtlang tlangval kut hnathawk mi leh nghal ti a an iai em em hi an rin ang ngawt a mipa satliah a nilo tih ka hrechiang miau a.



"In hna offer chungchang hi a bul ah phei chuan sawi ri reng reng suh ang che u" melh kual dan dan pah in ka ti fak fak.


"Zoramchhana lo chu pasal a neih ka tum lo, chuvang chuan ka chhungte țawngkam avang a kan inneih hnuah a lak ah inthiam lohna neih ka duh dawn miah lo a nia" ti nghat a ka din chhuah rual chuan u Jo-a leh ka nu chu an ner nasa viau. Ka pa erawh pa țawng tlem ngang a ni a, ka chungchang ah pawh hian a țul tawpkhawk ah lo chuan kam chhuak a nei ve hauh lo ang, chutih hun ah erawh ka lam ațan ngei ka beisei.



Bing takin pindan kawngkhar lam ka pan nal nal a.
Ka chhuah hma a u Nathan'n "Matei sawi kha a dik a ni, a engamah hmain intilutuk a, Ramchhana pawh mi puitling tak a ni a, hmeichhe lamin buihbawm ngai ang hrim a kan cheibawl te hi a tan a lungawi thlak bikloh ang, matei tan zel zawk insum tlang ang u, kan țawngkam in a țhianpa rilru a hliam a nih zawngin a lakah kan farnu hi a inthiam lo reng tawh mai ang" a tih sup sup chuan ka mittui a lo hnam sawk thei mai.


"Khi khua ah hna an han thawk kher kher kha a pawi a ni, makpa ah Doctor kan nei ang chu tih laiin rilru dang ve ve an rawn pu haw ta si" ka nu in a tih lai mekin " kan puihna tello a hna hmu thei te chuan hna zawng se, a hmuh hma loh chu inneih tir pawh a țullo, duh leh kan bul a awm rih turin Lunglei ah ka hruai phei ve mai ang" u Jo-a'n a ti chhum hmuk hmuk a.


A luhluh zia leh a tumruh zia ka hrechiang bawk nen Lunglei ah min hruai phei a tum tak tak chu ka hlau ru hle mai.


Ka chhuah rual in kawngkhar chu nghengin ka thaw chhuak hak a. Ka hma khua an ngaih vang chu a ni tho nangin, mite'n an fanu pasal chu eng ang hnathawk nge?' tih an zawh hun ah kut hnathawk a eizawng tia chhanna pek ngai a awm an duh loh vang vek zawk a ni.


A neitu tur mahin ka pawitihloh chuan ngahnge maw an sawi an sawi mai le? Chhungkua hi thla tin sum lakluh theihna hna thawh vang chiah a hlimna nitase sawrkar hna lian tak tak thawk te ah hian nupa ințhen an awm miah nang.



U Maruati te insiam mek pawh zuk pui tawh lem lo in ka room ka pan tlang a. Khum a ka phone kal san chu la kangin Zoramchhana number ah ka call nghal a. Tlai ah khan phone a lei tawh a phone thar lawm nan kan inbe deuh reng nghe nghe bawk.


Ka u te rangkachak a man hnu lawkah a hna bansan lo thei loin harsatna a tawh phah a, hetiang a a tawp tak chhan ah hian tel ve na kan nei in ka ngai tlat tawh. Chuvang tak chuan a ni police hna zawm leh tur pawn engmah ka sawipui ngai loh. Kei a lo nawrluih ve ngailo in lungdam takin a duhthlanna ngei in thawk leh se ka duh zawk.


"Mambawih?" Zoramchhana aw hniam thum chhak ka hriat tak ah chuan min kuah tur a ka mamawh zia ka hre thar uar uar mai.

"Zoramchhana..." ka ti sep a, "Umm, Mambawih" uang deuh si hian a rawn ti muang fan ruih. Tawitê in ka nui chhuak hak nain ka ngai lutuk chu ka mittui a rawn hnam ringawt nia...


Ka dam chhung a ka la tih ngai loh tawpin ka chhungte ka hnial let a țul a, ka mal țan lutuk bawk si nen min kuah țhinna ban tha chak zet kha thlakhleh takte in ka thlahlel thar mai.


"Enge i tih a?" zawitein ka ti leh a, " ka pa in chempui a chher thar tir a, a fawng ka vuah sak e ka tia, kan inkhawih zo fel chiah" a lo ti dut dut, Behliang lo tur a an in ka luh changa an inchhung awm dan te chu ka mitthla let rauh rauh a, an tapchhak ah chem-fawng vuah a thir sa zet a rawh ling tur vel te chu ka suangtuahna mit in ka hmu thei hial a ni. A kiangah awm ila chu țawngkâ a eng em em sawi silovin min ngaihsak leh ngawt ang.


"Nang in enge i tih ve a?" a rawn ti a. Khum ah a bawk kai tih hriat zetin a rum pah hawk bawk. "I mu dawn tawh em?" a lo tih zawm leh a.

"ka suangtuah che a..." zawite a ka tih chuan Zoramchhana chu a lo nui ri hak a. Chu a nui ri zawi tak si te chuan ka thisen zungzam a fan raih raih.


"I suangtuahna ah chuan ka kuah che em?" țawng ring lo mah se min fan viau thung. Ka thaw chhuak halh a, Zoramchhana erawh zawite bawk in a lo nui leh hak a. "Ka suangtuahna ah chuan ka kuah nghet viau che ania" a lo ti leh bul bul a. A sawi thutak em em mai leh nghal.


"Ka suangtuahna ah ve thung chuan maw, i bul ah ka lo mu a, rizai lum deuh a min khuhin nghet deuh in min kuah a..." ka tih laia a nui ri mawlh chu! Amah chuan thutak leh zawi ruih hian, "kan ti thei țep tawh a lawm" a lo ti let khauh. Ka kawchhung chu a mur chuaih maiin ka hria.


Zantin amah nen inkuah chung a khum khata mu dun tur a ka in mitthla chuan thisen a lum pap pap thei. A lungphu ri dup dup ngaithla chungin a rim mipa zet kha thawk ka lak rualin ka hip lut țhin ang a..... Ka tuar thei tawh ngang lo" in video call ang" ka ti ta thlawt.

Call chu ka hmet tawp a. Whatsapp ațangin ka video call nghal a, screen-a a lo lan rual chuan ka lo mitthla lawk ang chiah in a khum zau takah a mu zangthal duai a, a kut pakhat chu lukhamin phone chu a lo chhoh en bawk.


"I va hmelțha ve" a rawn ti nghal ringawt a, lai deuh a ka nui chu chik deuh hian min melh vung vung a. Hmelțha min tih thu a sawi fo țhin erawh in min tihlim hle thung.

"Pasalțha i lungphu ri ka hre duh" ka ti thut a! Ka thil sawi chuan a țhawng viau aniang thle sawn pahin a nui huk a.


"Mawh.. vat vat in.." pangchang deuh a ka tih tlat laiin atthlak tih hmel tak hian screen chu a lo melh leh a. "Ti vat vat teh, mawh, Zoramchhan" ngenngawl deuh in ka lo la ti ngang ngang vei nen, "A va atthlak e aw. Engtin chuan nge maw ka lungphu ri chu i hriat thei ang ni?" a ti dut dut a.

Keipawh chuan rang fe mai hian, "phone kha i lungphu zawn ah chelh bet rawh" ka ti a, atthlak tih hmel lutuk in ka sawi ang chuan a ti ve ta tho. Kar lovah Screen chu a thim nghal vek a, uluk deuh a ka ngaih thlak ngial paw'n phone ațang ngawt chuan lungphu ri chu hriat a har hrep mai.


A awma phone la hmet bet chung chuan," i hming ngawt a lam a lam chu i hre thei miah na'nge?" a lo ti a. A la thutak em em mai lehnghal a.


"Min va ngai tawh em em ve. Kha.. Mambawih, Mambawih ti ri char char chiah alawm ka hriat" ka tih let ve chuan nui hawk a phone chu la sawnin amah a lo lang leh ta zawk a, kan chet dan atthlak lutuk avang chuan kan innuih kan innuih mai.


" i chhungte an mu tawh em?" tia ka zawh chuan
" ka nu leh pa te chu an mut luhna a rei ve tawh, Zotei erawh in inleng a la nei a" a lo ti let a. Za fe hian ka nui ta hak hak.

Zoramchhana'n hriatthiam loh hmel deuh a min en vung vung na te chuan ka nuih a tiza zual ting leh nghal. "Enge?" kiai ve suk pahin a rawn tithum dut.

Pum dawm meuh a nui kiah kiah pahin "i nau inleng neih laiin nang lah chu tapchhak-ah chem -fawng ngawt buaipui in lo insuih ri ve sek a ni awm sia.." ka tih tak ah chuan a lai ni hmiang, a lo nui ta ruh ruh a.


A nu leh pa zawk paw'n inthiarfihlim nachang an hria ania. Ani lah chuan a nau te dip tur takin thawm a chhuah sek a ni awm sia.


Ka nuih za lutuk chu, "Khatin mi nuih mi nuih suh" min han ti leh ngawt țhin. Keilah ka nuih a za zual tulh tulh mai si. "ka hmuh theih hun ah che na deuh takin ka duat mai ang che" a lo tih tak hluk ah chuan la nui rah rah pahin khum ah chuan ka bawk kai ve a. Mahse, khum puan phah lo la hit thler vang chuan ka ner sak a, chu chu Zoramchhana pui chuan a lo hrethiam aniang.


"Nakin ah chuan ka del lum sa-ah hlir i mu dawn nia" a lo ti dut a. Lai deuh in ka nui țha ringawt. A chak erawh ka chak viau tawh thung. Thlasik khaw vawt lutuk hnuaia a kianga mut chu a nuam ngawt ang, pangtilum a ngah in min kuah bet hneh dawn si.

"Zoramchhan" zawite a tiin "U Jonathan-a hi ila hria em?" ka tih zawm a. U Mami khan engkim zawt chhuak vek turin min hrilh a nih kha, a lo hre tawh lo a nih paw'n zep ruk neilo a engkim hrilh a sawipui turin min duh bawk.


"I u kha.." a lo tih chuan "aw, U Jo-a hi ila hria em?" ka ti leh a. Ka awm a nawm loh tak em avangin a mitah tak pawh en ngam lo in a hmai tlang vel chu ka melh kual sek a, ka tawt leh up up tawh.


"Engti zawngin, han sawi chhiang deuh la Mambawih" a lo tih leh sup chuan tim deuh daih hian ka en a, phone screen mah nise kan mit a intawng chiang hle bawk, a hriat ve reng tawh loh chuan thar thawh leh kher a țul ber dawn em ni? tih chu ka ngaihdan hmasa a ni nghal. Mahse, zep bo chi a nilo.


"Ihmaw, mak i ti viau mai thei, ila hria em? Police hna i thawh laia rangkachak tam deuh i man kha" ka tia, ngawi run a chik takah min lo en ngur avang chuan ka awm a nuamlo zual sauh mai.


"Khatih lai a lo hmu țhintu che kha u Jonathan-a hi a ni a, englo..." ka tih niah niah laiin, "Smuggler kha" a lo ti nghut, țek tla dawt ang chiah hian ka lungphu chu a ri lawih a Îp chawih chung hian "aw" ka ti chuai raih. A țawng leh hun tur chu thawk chelh tlat chung hian ka nghak a.

"Ka la hria a lawm" a lo ti ve leh lawi bawk si, eng rilru nge a put tehreng ni.


"I hria amaw? Ka u hi i rangkachak man neitupa ani tih i hria a maw?" ka ti nghal mawlh mawlh a. A lo hre vek tih chu rin harsa ka ti niber hian ka hria.


"A neitu ni a inchhal te kan hren vek tawh hnu ah station ah leh ka in luah ah min lo lenchilh fo alawm. A neitu a nih thu erawh a insawi ngailo nachungin an hotu leh thu pe tu ber a nih rinna chu ka nei thiam. Fiahna a awm thei silo a" a lo ti ta charh charh. Thawk ka la hliai nain ka ven huai phah lemhlei lo. Ka u nihna hi a lo hre vek a nih chuan ka u in a huat ang tho hian a haw ve ang em le?


"Zoramchhan..." inpet ruh țeuh a ka tih lai te chuan ka mittui a tla thei mai dawn hian ka hria.


"A nih leh ka u hi i hua em?" chunglam hawi in thawk ka la vang vang a, nghet deuh in ka kut pakhat in ka puan sin lai ka țham pah bawk.



"Huat na chhan tur ka nei hleinem" a lo tih chuan ka țah nuih chu a ni ta ber! Phone chu ka sir ah dah tawp in puan sin lai chuan ka kâ ka hup bet a. Ka rin-lawk ang chiah a ni! Ani hi chuan ka u hi a haw miah lo. A rilru a țha in a ngaihtuahna te hi a tluang purh mai bawk si. Ka u zawkin huat taktê a a haw tlat chu thinrim a hneh in Zoramchhana ka lainat zual phah ngawih ngawih.


"Mambawih.. engati nge ni? Hmanlai thil thleng te a la theihnghilh loh avangin i chungah a țuan em ni?" a rawn ti ve mawlh mawlh a. Hmui pet ruh fan fan a phone ka lak kan leh rual chuan "Mambawih?" a ti chuai ruih a. A rum zui hawk bawk.


Engmah sawi lovin ngun takin min thlir vang vang a, nakin deuh ah chuan ka tana dawnsawn nuam thei tur ber hian, "I u nen in inkar a țha lo em ni?" tiin zawldawh takin min zawt ta a. "Chulam a nilo" ka tih chuan mitko a ti hnim khûi a, lu a thing nghut bawk.

"Naktuk ah ka rawn chhuk ang" nghet churh a lo tih leh phei chuan min țhawng kher mai. "Mahse, i lo la kal theih loh kha.. inpuahchah... " ka tih laia nui suk a lu a lo thin chuan min ti hamhaih takzet.

"Ka inpuahchah chhan ber i ni alawm, i harsatna tawh ka chinfel pui hmasa lo che a nih chuan kan inbuatsaihna ve zawng zawngin awmzia a nei nang" a ti a. A aw ri a min duatna lo lang chu ka hai lo.


Zawh duh nei ṭeuh siin sawi hmasak tur ber pawh ka hrelo. Amah zawk chuan "I u nen in inkar boruak chu min hrilh rawh le?" hriat nuam tak hian a lo ti leh a. A rilru ka tibuai thei ropui si, a ngaihtuah zui ngai deuh a awm bik reng chu duh lo in "Engmah buaina kan neilo" ka ti ngial a. Ngun taka ka hmel a zirchian hnu chuan thawk a la hawk a, "Mambawih, engkim min hrilh rawh, ka hriat vek a țul a ni, lungngaihna leh harsatna i tawh changin ka lak ah thup miah lo la ka duh, chu chu i hria tiraw?" a lo ti ta charh charh. Ka inngaihtuah buai leh nasat hle hma chuan ka hrilh ta vek a. Chaldelh taka hna pek a tum thu vel erawh ka sawi lo. Kum 7 hma lam a thil thlengte avang a a thinrimna thu chiah a ni ka hrilh.



Zing a ka han harh meuh chuan ni a lo tlangsang viau tawh a, rang deuhin phone ka ban nghal a message pawh a lo awm nual.

Zoramchhana message chu ka hawng nghal a.
*Good moring* tih leh *kan chhuak dawn chiah, nizan i mu tam si lo, chhuah dawn ah pawh ka lo call duh ta lo che* ka chhiar zawh rual chuan
rang deuh in ka reply nghal a.


*tun ah kawilai nge inthlen tawh?* ka ti a. Khaw kar kawngah an tlan vangin message chu a thleng lawk thei lo lehnghal.


Ka tho chhuak sawk sawk a, khum ka pawh mar zung zung hnu ah tui lumna *on* in ka mamawh tur ka la khawm zung zung a, vawiin chu lu suk a ngailo tho, zingkar ah inbual tlingtla nghal daih ila a fuh ang.



Ka inbual zawh hnuah bathrobe suih țha mawlh mawlh pah a ka chhuah chuan dressing table chung a ka phone kalsan chu a lo vibrate chur chur a, rang tak a tlan pheiin ka chhang nghal a. Lehlama mi chuan "Pawlrang kan tlan lut chiah, kan inhnawh puar ang" a lo ti a, eng kawngah mah nawr chuk chuk ka duh loh tehlul nen a lo tla thla ve leh ta rum rum sia, a hmachhawp a buai phah vek ka hlau.


"Tluang deuh in lo tlan ru aw" tiin kan inthlah a.
Inhnuaiah ka chhuk thla a, ka nu in min awmpuitu te chawhmeh siam dan tur a hrilh lang lang thawm ka hre nghal, u Jo-a fate pawh tualzawl lam ah an rak rai rai hlawm mai.



Ka pa chu ka han zawng deuh a, an mut pindan lam ah a la awm a nih ring a inchung ah bawk ka chho leh hma chuan kawngkapui ațangin a lo lut ta hlawl.


"Good Moring pa" ti pah a ka pan nghal chuan ka darah min lo kuah a, "i tho nuam maw?" tiin min lo zawt ve nghal a.

"Umm, pa, ka be duh che" tih leh țhutkawmna lairil lam ah zawk phei pui ka rual a. "Eng chungchang nge ni ta?" tiin sofa ah a țhu a, sofa ban ah ka țhutchilh ve nghal zat bawk.

"Vawiin hian Zoramchhana a lo chhuk thla a. Ih, zanin ah a lo leng dawn a" lai ru deuh tak a tiin a mit ah pawh ka melh țha ngam chiah lo.

"E... kan pasalțha a chu lo leng se a ni mai alawm" nui deuh sun sun a a lo tih chuan lei ka chhuah zeuh a.

"Pa, nang tal chuan lo be chhe suh aw. Chuan khawngaih takin hna chungchang te kha sawi lo ula, ram hna chungchang pawh lo zawt vak vak suh aw. Ih, inleng dangte i kawm ang tho in lo kawm ve tawp rawh" ngenngawl deuh in ka ti a.
"Awww, nangnen inzawmna a neih chuan hriatchian nan tal a chanchin ka zawh ve bawk lo in" a ti a. A nuih a zat hmel khawp mai.


"Aaa, a thuphung a zawh te chu a pawi lo a, mahse mimal thil lutuk inzawh chiam chiam te kha a țha lo a" ka ti hap, "Police SI a ni țhin tih i hre ve tiraw?" ka tih leh chuan "hre dawn lawm ni. Kan inbul lawk ah hian a lawm a chet tlat țhin" a lo ti sam leh mai a.

"A nih chuan nang chuan thingtlang tlangval satliah ngawt a nilo tih i hrethiam ah ka ngai ang. Mahse, pa, police hna chungchang pawh lo sawipui suh aw. Zoramchhana hi ka hrechiang a, kan inneih hun ah chuan hna neilo a awm tawp a tum miah dawn lo, a chhan chu mahni mawhphurna hrechiang mi a ni a, a ko ah ka tlak tawh dawn miau avangin tlakchham ka neih a phal dawn miah lo. Mahse, a rilru a inpeih thlap hma chuan keipawn hna chungchang ka sawipui ngai dawn lo, chu chu min zah sak la, nangpawn 'in inneih dawn te a nih chuan hna te han zawm phawt la' tih țawngkam te kha hmang miah suh aw" ka ti leh mawlh mawlh a. Zoramchhana awm nawm loh theihna tur a țawngkam an neih ka hlau lutuk mai chu kei ngei pawh in hrehawm ka ti.


Ka dar ah lo dawm in uluk deuh a min en in ka pa chu a nui ta sun sun "i tlangvalpa chu i hmangaih hle mai maw? Tlinglo leh inkiltawih a a awm reng i hlau mai. Ka hmuh hunah chuan i hmangaih ang chiah hian a hmangaih ve che em tih chiah a ni ka chik dawn" a ti ta daih a. Ka hamhaih letling hle ringawt.


Tuk țhuan ei laiin ka pa in Zoramchhana chungchang chu a sawi chhuak ta a. "Aw, a lo kal dawn tih hriat a, sa kap phawt la a rep min lo ken rawh kan han titur" fiamthu titak deuh in u Latei chuan a ti a, Kan nui tlang dar dar mai.


U Jo-a erawhin " A ngam pawh a va ngam zawk ve!'' a ti hluk thung. Ka hnial let chak viau nain tukin a ka Pa thu min chah avang chiah in ka inbengdai thei hram.


'I u Jo-a chu kan hriatchian tlan kha. Engpawh sawi se kan ngawih liampui a țha ber, khatih hunlai a an sum chan kha a tam tham em a, sumdawnna diklo khawih mah nise chantu a nih miau avangin a la pai dam thei ngang lo a nih hi. Chuvang tak chuan nangpawn hnial lo in a thinrimna te inpaih thawl tir la, i țhianpa nen pawh han inhmu se; ri deuh rap rap mah se kum tam tak chhung a lo up beh tawh a lungawi lohna a phawrh fai thei zawk ang a, an ințhian țhat na bul țanna tur a lo ni reng thei ania..." a ti a ni. Keipawn ka Pa thusawi chu thleng dik thei hram se ka ti.



Chanchin inhrilh in Zoramchhana nen ka inbe zauh zauh a, A Pate-a te in ah a innghah tur thu te pawh min hrilh uluk ve viau mai. U Dtei lah chuan "i zawlpa chu a va rawn tla thla rang si ve, Sial a thlung fel hman țawk a sin" tiin a rawn nui uar uar a, "I chhe lutuk" tih bak han hnial let vak ngaihna ka hre țhin lo.

"Eeee, in inneih hun chu a pui viau ang, khawtlang huap pawh nise kan Pasalțha-a hian a tlin dawn khawp mai" a lo ti leh zel chuan ka hrechiang chak ta deuh, engtiang chiah a nasa in nge Zoramchhana chu a lo inpuahchah tih pawh hriat a chakawm a lawm.

"Thu hi i uar ve hrim hrim zel" tia ka han veh thlem chu a duh lo nasa.

"Ka hrechiang ve em a sin, Zoramchhana hian Sial engzat nge a neih a, Bawng no hruai lai pawh engzat chiah nge a neih i hre ve reng reng em ni?" a lo ti hem mai.

"Sial a nei amaw? Bawng pawh?" a ngaihna hrelo fe a ka zawh let chuan "nangmah in zawng chhuak ve mai rawh" a ti leh tlat tawh. Henu tak hi chu aw.

"Sawi țha hle hle teh" ka ti hlur a. A tawp ah chuan thutak deuh zawk hian "pa Buangliana te khan an enkawl sak alawm. Pa Buanga Bawng rual zinga a pui pathum kha Ramchhana ta ania, tikhan no an hring a, Pa Buanga te khan a note zing a pakhat te chang ve zel in a Bawng rual dangte nen a thlah rual vek zel alawm. Sial erawh Pa Patea te'n Vanchungbung lam ah an Sial te nen an awmpui vek, Sial hi engzat chiah nge a neih ka hrelo, an inthlahpung ve tawh viau ang" a lo ti duah a. Hepa chanchin hi chuan min țhawng mawlh mawlh zel dawn chu a nih hi, ka hrechiang ve tawh hle emaw ka intih pawh hian mak ti deuh a min siam thei thil dang a lo awm belh zel a, mipakhat chu a tling ve chiang ngawt mai.


"A va mak tak, a sawi ngai silo a" ka ti hap a. A sawi ngailo tak tak a ni. Chutizozai Ran pui nei si chu midang ni se sawi nuam an han tih dawn vei nen a...

"Mahni thil țha tih leh thil neih sawi ve zut zut chi a ni hleinem, Vanchungbung lam ah khian kel te, Beram te leh Sial leh Lawi thlengin chhungkaw țhenkhat in an enkawl a, Ramchhana hian ran pui chu a nei nual a nia" a lo ti leh zel a.


Vanchungbung a tih chu ramhnuai mah nise chhungkaw tlem a zawngin Alu hmun te neiin chen nan tak an hmang a, In pawh sawm vel lai a ding an tih thawm chu ka hre ve tawh.



Chhun ah chuan ka room ti felfai pahin ring deuh in zai ka ngaithla a. Jeni lo leng chho in Zoramchhana a lo kal tih a hria chu a phur khawp mai, colony a kan cousin awm zawng zawng a hrilh darh a, zanin ah Zoramchhana lo hmuh ve ngei an tum ruh nghal em em mai a, *Over lo* turin kan inchah zing malh malh khawp a, an zawm thei ang emaw?


Tlai dar 5 pelh ah 'a patea te in ah a innghah fel chiah thu' a lo sawi a, Bungkawn lawk ah an a avangin a thlen In leh kan veng chu a inhlat hran lo. Zanriah kil lai te chuan ka helhlawh deuh a, Jennifer-i leh Sawmpui phei chuan kan in ah chaw an ei ve nghal hmiah.


U Nathan-a ber hi a mak ka ti, Dinpuia țhianpa ber ani a. Zoramchhana nen kan inzui hi duhlo ber tu tur a ni a ka hriat laiin a pawm thiam viau roh a. Ka lam țang runin lang lo mah se u Jo-a leh ka nu te hel lutuk khap tu ber ah a țang leh zel, Zoramchhana mizia a hriatchian vang a nih ka ring ringawt.


Zanriah eikham dar 7:30 pm bawrah chuan, *kan in bul i lo thlen hun ah min lo hrilh la, ka lo kal chhuak ang aw* tih chu Zoramchhana ka thawn a, gate bul ah ka awm sa reng bawk. Jen-i te'n hmuh ve an chak miau avangin kan in ah an awm tlat si a. Kan in a vawi khat lo kalna tur a kan lo awm huang chuan nuam lo a tih ka hlau a, a awm nawm deuh nan tal luh rualpui ka duh ve tlat.


Zoramchhana call lo lut chu ka chhang rang khawp mai. Ka pickup rual chuan "Ka lo thleng țep" a rawn ti thum dut a.

Pawn ah nghak sa tho mah ila min ngaihtuah lutuk loh nan "Pawn ah ka lo nghak ang che" ka ti thuai a. Car țhenkhat in min lo tlan pel zauh zauh a, Abba te new year hla lo play vawk vawk tawk lah bang lo.


Ka rin ang chiah a min ngaihtuah deuh hian "a țullo Mambawih, a vawt si i damlo mai ang" a lo ti tak nain kawngpui lam hawi a ka inher chiah leh a lo thleng ve chiah chu kan inhmachhawn chawpchilh nghal der.


"Mambawih" thuk ruiha tiin a phone chu a kekawr ipte ah a thun sawt sawt a, ka jacket lei sak ngei mai kha a inbel bawk nen chetsawn nachang pawh ka hrelo. Ka hma ah lo ding in gate light eng hnuai ah chuan uluk lutuk hian ka hmai tlang chu a lo en kual dun dun a. A duhtawk a rei ngial lungchim deuh a min en hnu chuan a thawk a la hawk a.


"A vawt ilo ti em?" a lo ti zawi sup, ka kut lo bana a hum rauh rauh tak ah chuan chil lem dak chungin ka thlek chho leh ngat a. A tak ngei a kan inhmachhawn leh hnu hian ka ngaih zia leh ka lo thlakhleh zia ka hrethiam thar chiah. A kutphah lum thup a ka kut a humna chu ka melh leh zeuh a, kan awmna hi khawlai nilo ngat se zawng ka kuah chiang viau ang.


Ka ngaihtuahna avang chuan tawite a nui in ka en chho leh a, kan mit chu a intawng chiang viau bawk "I chau em?" sawi mai tur haihchham deuh a ka tih ngawt laiin ka kut a hum chu a lo hmer nghet salh thung. Amah paw'n kut inchelh mai loh deuh thlakhleh dang a nei tih chu a mitmengah chuan ka hmuh thiam sak a.

"Chau lo e, i lo dinna a rei tawh em?" a ti ve mai a, ka lak ațang mit erawh a la sawn miah chuang lo. A mitmeng tak ruih ah chuan tih takzet a min thlakhlehna chu ka hmu thiam a, chu chuan min tihlim veng veng bawk.


"Ka chhuahna a la rei vak lo, lut ila" kan inlamah ban ka lek ziau chuan a bu ta nghut. A pen rualin ka kut a hum chu thlah mai a han tum a, keimah zawk in rang mangkhen in ka chelh nghet sauh a.
Mak tih hmel deuh a min lo en chhuk vut chu ka chhoh en ang hehaw a, "ka kuah thei lo che pawh tihtawh naklai a; min thlah miah suh" tiin ka vin der hlak, a lo lai ngang mai!

"I hria em? ka kuah chak teh mai che ania Zoramchhan" pangchang deuh a ka tih leh chuan en pawh min en lo in hma lam a melh deuh vung vung a. Mahse, nui deuh hak paha ka nek deuh tal tal chuan lungawi deuh a min lo en in a nui ta ruh ruh a. Ka chhaih fiam zeuhna avanga lungawi hmel taka a awm țhin hi alawm hmuh nuam ka tih em em ni.

Ka kut chu lo hum nghet ve sauh pahin min han leh en vung vung a, engtin nge ka pasalțha-a hian ka duhthusam ang mizia zawng zawng a neih vek thei mai le. A siam laiin Siamtu duhsakna a dawng nasa bik hle a ni phawt ang....



Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » August 31st, 2021, 5:30 am

"I chhungte an dam țha em?" tia ka zawh chuan an dam țhat thu in min chhang a. Dinpuia nen kan inkar a țha tluang vek ang a an ngaih laia hetia an fapa nen kan inzawm leh daih te hi mak an ti viau ang em tih vel chu ka ngaihtuah zui rauh rauh mai

Zoramchhana chuan "kan lo chhuah hma deuh in i vahte'n min ngen nasa a sin" tiin tukin a Sumo counter a thil thleng chu min hrilh a, Lalati te unau in a motor chuang tur an han ngen tlat tur mitthla in ka nui hak hak reng mai.

"Hemite unau hian chuan an ngai ve ngawt mai che" ti paha ka en chhoh ha laiin "thil țha deuh hawn sak ka tiam ngawt a, eng amaw tak chu hawn sak ang ngai ang" a lo ti ve leh mai bawk.

Dinpuia sawn thlakthu te kha a tlang thang vek tawh nangin a thawi pawn Zoramchhana chuan a sawi ve miah lo.

"Nih leh maw, i chhungte'n kan pahnih inkar an hriat tirhin mak an ti em?" lairu tak a kan han melh chho chiah nen chuan kan inmelh chiang viau bawk. Gate piaha Pine kung hnuaiah chuan kan han indinchilh leh rih a.



" ti hran lo e, ka ngaihvenna che a rei tawh tih an hrethiam ve vek a" nui sakin ka sam chhawl leng hu ka bekah a lo hui chho a. Amah vek chuan thutak leh aw ki hniam ruih hian "Ka nu phei chuan tun thla chhung ngei hian mo hmelțha deuh neih hman a tum nghet bur a sin" a lo ti leh dut, ka ip deuh chawi chu lo kun hniam zual sauh pahin ka hmai bulah a lo kiai suk bawk.


Sawi ve mai tur hrelo fê chuan "I nu.." ka ti ve halh a, "umm, hmelțha a tih hle che tih pawh i hriat kha" zawi raiha a tiin a Kutphah sir lamin ka biang a lo nul rauh rauh a. A kut chu la thla mai lo in "a fapa mit ațangin a thlir ve che a ni mahna" alo ti leh dut a, Min lo thlahlel ve takzet a ni ang, hnai takah ngun thluk lutuk hian min en vung vung a.

'Mipa in a duh chea, a en vawng vawng tawh che chuan khawvela hmeichhe hmelțha ber i ni tih hria ang che' an tih țhinte pawh kha ka inhmehbel dawn dawn a lawm.


Chutihlai tak chuan car in kan gate chu a rawn tlan pel vuk a, Zoramchhana pawn a awmdan siam rem pahin a thusawi avang a ka lai chhe lutuk chu min nuih ruh ruh a.

"I inlazei emai aw Zoramchhan" ka ti ta ringawt, a lo nui hawk a.


Aman hmelțha min tih tlukzet in a nu pawn hmelțha min tive tih han hriat erawh a hlimawm dan a phurawm viau mai.



Kan Tualzawl zau deuh ah chuan kan inzui phei ta a, January thla tir khawvawh vanglai tak ni mah se nghet tak a ka kut chelh tlattu avang chuan ka vawt tawrh dan chu a nuam dangdai hle mai.


Ka bula mipa kal mek chu lungawi deuh hian ka thlek chho leh țhin a, a thinlungah hmun ka chan thukzia leh min dah pawimawh zia chu han sawifiah vak ngaihna ka hrelo. U Dtei khan chiang takin 'police hna a chawlhsan ațang a nimin thleng khan Zoramchhana hian vawikhatmah Aizawl a lut leh tawh ngailo' tih min hrilh tawh a, ka u nen kan inkar ațha lo tih a hriat vang ngawt a kum tam tak chhung a lo rah tawh loh Aizawl leilung rap tur a ka tan a lo kal vang vang mai hi MIN HMANGAIH vang nilose eng dang vang nge ni ta ang?



Ka ngaihtuahna te avang a chhungril hlim zetin a ban bulah chu ka kuah tal tal a, min lo en a a nuih suk suk te chuan ka hlut hmel ngawih ngawih hian ka inhria, hetiang reng a hmeichhe special a min siam theitu mipa dang hi piang nawn leh pawh niila an awm tawh kherin ka ring lo.

"Kan chhungkua bakah ka cousin te an awm nual a nia aw... an hmu ve chak tlat che a" nui hak a ka tih chuan a lo bu nghut a.


"Hma deuhah haw suh aw" ngenngawl deuh a ka tih chuan ka Zoramchhana pawn ka rilru tur hriatthiam hmel deuh hian min lo en a.

"I chau ang tih ka ring tho a.. mahse..." tim deuh dai a ka tih leh niah niah laiin a ban ka kuahna kutphah chu a lo hum hnan vang vang a. " ka chau lo, i phal chen chen ka leng dawn a nia" ti dut a nghal fe a mit a lo siai suk chuan ka nui ta var var a



Kawngkharpui inhawng huau ah chuan u Jonathan-a fapa upa ber chu lo dak dek in keini pahnih inzui phei min lo hmu chiah chu inchhung lam a hawi a, ring em em mai hian in "api, apu Aniteii leh mipa pakhat an inkai a nia" a ti ta lauh lauh mai a.

Ka hamhaih lutuk chu ka inpal tlu nawk lo chauh chu a ni! Inchhung lam a ka chhungte chu an lo nui huk bawk nen a sat hian ka sa chhuak nghal pup pup.


"Bawihpui" va ti vak a khap ngial ka han tum pawh chuan "Apu, Anitei leh mipa an inkai ka tih chu, in awiloh chuan lo en ve mah ru" a la ti tak ang deuh deuh leh nghal a.


"Ka vel dawn khawp che" ti hlurin Zoramchhana ban ka kuah beh chu ka thlah a. "Ka sawi vang maiin Anitei'n a kut a la sawn vel a..." pakhat lah chuan kawnghar ah ding teu chungin a ti leh zel mai bawk si, kuk țawlh ka chak tak tak hial mai.


Chutiang thil a thlen ka ring lawk bawk silo nen lai lutuk leh thin tawt țun chung a Zoramchhana ka han en chhoh chuan amah pawh chu a lo nui ruh ruh tho.


"A van țawngthei tak" ka'n ti deuh ringawt a, Bawihpuia au ri hriain a nau te lah chu kawngkapui ah chuan an lo dak hiang hiang hlawm leh nghal a.


Nui hawk hawk a naupang te khap pahin u Mami te nupa an lo chhuak ve ta nge nge bawk. Zoramchhana nen min lo hmuh rual chuan an țhen deuh țha mai a.


"Anitei leh mipa chu an lo inkai tak tak a nih hi tiraw... inchhung ah luh san daih rawh u" u Mami chuan a ti a, u Ţpa pawn an fanu kal thei ve țan chu pawm kang nawlhin midang chu lut turin a hrilh a, intithil hrethei fein inchhung ah tlan luh pah chuan "Anitei'n bialpa a nei a niang" Bawihpuia chuan a ti leh hram zui.



Inchhung lam a awm te nui dar dar thawm avang chuan u Mami chu ka melh deuh vak ringawt a, ani lah chu a nui a nui ringawt. Bawihpuia khan min rawn phawk chiang bawk tak em a ni.

"Ramchhana i ni ang maw? Mambawihi u hi ka ni a" hawihawm taka lo tiin a kut a lo phar chhuak a, Zoramchhana pawn lo chibai ve thuai in "i dam a maw?" a ti let ve a. Ka u nen pangngai tak a inhmehhriatna te an neih hnu chuan veranda ah chuan kan inzui chho a.


"Lo lut rawh u, in rawn tlan tluang amaw? Ramchhan" u Mami chuan tih zawm sawk sawk in inchhung ah chuan a lut a, Zoramchhana nen kan lut ve chiah erawh hmai a uang duh lo khawp mai, Bawihpuia thusawi vang tehhrep khan an lo nui țha hlawm leh nghal a.


"E, Ramchhana chu i lo thleng tluang a maw? Lo țhu rawh" zangkhai fe in u Nathan-a'n a lo ti nghal thuai a. An inchibai vel laiin ka nu leh pa pawh an țhutna ațang lo tho chhuak in Zoramchhana chu an lo chibai ve mai a, ka nu erawh in engmah a sawi lo. U Jo-a ka zawng ru a nichin lawk kha chuan a awm ve reng si a, tunah erawh hmuh tur a awm mai tawh lo.


"Țhu rawh, thingpui te kan in dawn a nia" ka pa pawn a lo ti ve chuar chuar a.


Zoramchhana pawh chu u Nathan-a te nupa țhutna lam ah chuan a phei a, ka zui ve dat dat chu mit ti kang ak ak pahin ka cousin te ho lah chuan min lo chhaih laih phet an lo tum vei bawk. 'Over lo' tur a kan inchah lawk nasat tehlul nen nakinah an la hreve viau ang.



Ka rin ai takin boruak chu a nuam ta phian a, Bawihpuia te sawi awm leh awmloh hriat loh a zarah kan nui leh ham ham țhin a, Apu bengbul ah hrilhru su su in "Anitei bialpa chu a Man rem rem tiraw, Thor-a a ang si" a ti ta țhin mai a, kan hriat phak ve vek avangin kan nui kan nui mai a ni.




A rei tak deuh hnu ah phei chuan u Jo-a fa te chuan Zoramchhana chu lai ru deuh tak siin an hnaih an hnaih a, hriat loh karin an mi lai kum 4 bawr a upa chu Zoramchhana kapkar ah alo tal lut der, Zoramchhana pawn a ban pahnih in a inhlei che vel chu a tluk loh nan a veng run a, naupang ho in an ngaina nghal lutuk chu ka lo hahdampui veng veng mai a ni.



Nakin deuh ah chuan ka pa'n "Mambawih, thingpui va lum la" a lo ti ta a, Zoramchhana ka melh ralh chuan 'min ngaihtuah lutuk suh' ti ang hrim hian min lo nuih sak a.


"A hang vekin ami ka lo siam ang?" ti pah in ka tho ve ta hram. Jennifer-i te pawh sawi tur an ngah tih hriat fê in an lo phu ve nghal suau a.

"A paw-hang khan lo tila, Khumtung kurtai tui deuh kan neih kha" ka nu pawn a lo tive teh mial a.


U Nathana te nupa an awm tho bawk nen ngaingam deuh in choka lam chu ka pan san ta a, gas thuk ah thingpui bel ka chhungkai chiah tih ah Sawmpuii te pawh chu inpawt nawk nawk chung hian an lo lut ve nghal a.



"Bengchheng su" țawng rin hlau deuh hian ka lo ti nghal a, "Mambawih, i bialpa kha ka hria... ka hrechiang lutuk, police a ni țhin tiraw?" phur hmel lutuk a Sawmpuii'n a lo tih chuan hawi sang vah in ka lo nuih rah rah a. Ka intithei hmel chu min han chhiat khum leh hmasa phawt a.


Thutak zawk hian "Saw lai station ah sawn a thawh țhin kha... kan class hmeichhe ho in kan vei theih zia kha.. lunch brake lai a hmuh fuh inbeisei deuh in school campus ațang kan chhuak ru ziah" a ti ta zat zat a, chutia a sawi tak ah chuan ka hrechhuak ve ta uar uar mai.



Sawmpuii te nen hian kan school luhna a inang lo, mahse, tlai tin a school bang hi kan in ah a lo lut kawi a, tah chuan hahipin 'a score' thu a sawi ziah zel.

An class hmeichhe ho in an star rawn leh an hmuh fuh chang a an phi phah chengna țhin kha Zoramchhana tho hi lo ni leh zel chuan a.



"A mak e, Mambawih, i van vannei tak, u Jo-a'n thingtlang tlangval a tih deuh sek avang khan midang daih tur ah ka ngai char char a. Mahse, ka teenage crush a lo ni daih sia, aaaa... a fair lo" ti deuh hmarh hmar in choka kawngkhar ațang chuan țhutkhawmna lam chu a va bih hram a. Jen-i te nuih a za ngang mai.



Thingpui an inve duh em tih ka zawh chuan Juice an in thlit ta zawk a, no ah Thingpui ka thlit dalh dalh laiin țhutkhawmna lam a thawm chuan ka beng a verh deuh zar.


"Mapui, țhu la i nau in thingpui a chhuan saw" ka pa'n a tih chuan u Jo-a a awm ve tawh tih hre thei nghal in ka insangmar nghal țeuh a.


No chu Tray-ah rem lut sawk sawk in Choka ațang chuan ka inchawi chhuak nghal a. Kurtai ka theinghilh tih ka inhriat rualin Jen-i chu lo chawi phei turin ka au nghal zat bawk.


U Jonathan-a chu Zoramchhana țhutna ep ah a lo țhu ve reng tawh a, midang hmel landan a nelawm hlawm tehlul nen ani erawh a ngawi deuh ngul a, hlauthawng ru deuh a ka pa ka en chuan ngaihsam hmel deuh in min lo nuih mai leh nghal.


Thingpui chu ka sem kual a, a fapa in Zoramchhana a nel nghal em em mai chu a lungawi loh pui zual sauh nge tih pawh hriat lohin u Jo-a chuan thingpui a duh ve loh thu a sawi hmuk.



Ka awm a tinuam lo leh ringawt tawh, kan awmkim țhep țhawp lai hian chaldelh takin Zoramchhana a țawng khum mai ang tih hlauhna chuan min mawlh a, Zoramchhana bulah țhu thla a amah ka en erawh in ka u chu han ngaihmawh hmel a pu ve miah lo.



"Bawihpui, Apa Ramchhana khan thingpui in tawh se, nangchu Anu bulah va kal tawh la" u Jo-a fapa bulah ka tih lah chuan lu a thing mat mat a, nui sukin Zoramchana'n a pawi loh thu a lo sawi ve sup bawk.


"Kaka chuan apa Zoramchhana kha i hre ngai ami? I va nel nghal em em ve?" nui pah a u Latei'n a lo tih chuan pakhat lahin rang deuh hian "A patea'n a sawi vek tawh, apa Ramchhana thu ka awi chuan lui ah te min kalpui ang a, sangha lian pui pui kan man dawn, tiraw Apate, a hma pawn nangmah pawh ram ah a hruai che a, sa a kap tawh tiraw?" ti mawlh mawlin u Nathan-a chu a en ha ha reuh a.


U Nathan-a'n "nichiah e, mahse thuawi a ngai ka tih kha aw" a lo ti ve thuai mai a, naupang te'n Zoramchhana an ngainat theihna tur thil a lo hrilh thiam lutuk chu ka u chuangah chuan ka lawm takzet.


Thingpui inzawh hnu lawkah uMami te chuan haw an rawt ta a.

"keini chu ka pasal te in lamah kan khawsa a, kan len rei lutuk chuan naute hian hritlang a kai te a hlauhawm sia, nang chu leng reng rawh aw" Ramchhana bulah u Mami'n a ti siam siam a.


U Mami te chhuah hnu lawkah u Maruati pawn an fate chu mut pindan lamah a luhpui ta diak, Jeni te ho erawh ka room ah an kal a niang, an lo tekhran lai ka hre hauh lo mai.


U Jo-a vengthawng ru ran a ka awm avang chuan in ka hah takzet, thingpui no ruak ka khawm a, choka ah luhpui a ka sil zo ka let leh chu țhutkhawmna ah chuan ka nu leh u Nathan-a te nupa chiah an lo țhu a.
"Khawnge Zoramchhana te?" hlauthawng ru zetin ka ti nghal ruai bawk. U Jo-a leh ka pa țhutna a ruak huai bawk nen ka lungphu chu a rang nghal kher mai.

"U Jo-a te nen an inbe dawn a nih kha, hahdam deuh khan awm rawh" u Nathan-a'n a lo tih pawh chuan ka rilru a nuam thei ngang chuang lo.

"Ngatinge hetah an inbiak mai lo a, khawi room ah nge an kal" ti let nghal halh in ka melh kual dan dan hlawm a.
"I pa lehkha chhiar pindan a nih kha, va luh ve a țullo, puitling an inbia a nih kha" ka nu'n a lo tih liam puat te chuan ka ipik țun mai, pindan dangah an hruai hrang vel kher chu ka lawm lo a ni tawp.



Ka pa lehkha chhiarna pindan lam ka pan ve nghal chu ka nu'n min khap thuai nangin "va kal ve pawh nise a pawi hleinem" u Nathana'n a lo ti khauh a.

"A mak em em lutuk, a hmakhua pawh thlir thui thiam lo lek in a buaipui mai" ka nu in a ti leh hram.


Kawngkhar bul ah chuan thawk la in ka ding deuh renrawn a, chhung lam thawm a hriat theih tho avangin lut nghal tawp lovin beng ka chhi hnai a.


".. i remtih chuan nupui a tan i fanu hi neih ngei ka duh a ni ka pu" dam dap a Zoramchhana'n a tih lai chuan thinphu dep dep in ka pa in a chhan let hun tur chu ka lo nghak a.


" Innei ta ula engin nge kan farnu hi i chawm ang?" ti tu chu u Jonathan-a ngei a ni, a thil sawi țullo lutuk avang chuan luh pawp mai ka tum hman thut thut a.

Mahse.

"Kut ka nei a, rim tak a hna ka thawh theih chhung chuan Mambawihi hi rethei chuan a awm lo ang" nghet zetin Zoramchhana'n a chhan let chuan ka u chu a nui deuh hawk a.

"Ramhna thawk chung khan engtin vak nge i siam nawmsak ang ni.." elsen hmel fe in a ti let leh kher.

"Mapui" ka pa'n a lo ti nghut. Zoramchhana'n engtin nge ka u thusawi kha a dawnsawn ang tih ngaihtuahin ka thin chu a sa phat phat viau a, va inrawlh ta chiah ila Zoramchhana lak ah rinna ka nghat pumhlum zo lo tihna ani dawn si. Ka u erawh chhan let ka chak lutuk chu awmhmunah ka lo za tet tet.


"A hrim hrim ah tunge ka nih i hria em? Min hria a nih chuan nang leh ka lam hnai te'n a inzawmna neih ka rem tih loh tur zia i hria ang chu tiraw?" u Jo-a chuan a ti leh ta bawng bawng mai a.


Mahse, Zoramchhan'n a chhan let ve dan pawh a theuneu lo ta viau bawk " ka hrechiang khawp che a sin Jonathan... hun kal tawh a thil thlengah khan i lo la tang reng tih hriat erawh i inhmeh lo khawp mai, phuba hian eng rahțha mah a chhuah lo a sin" a ti ve ta nghut nghut.

"Khanglang che chuan.." u Jo-a'n a tih khu khu laiin Zoramchhana nui suk ri ka hre thung a.


"In Rangkachak kha sawrkar thupek a man ka ni tih hi hrethiam ve tawh rawh, mimal a huatna ka neih vang che a man ka nilo, i ngaihdan chu ka thlak sak thei hauh lo che. Mahse, kei erawhin hunkal tawh thil te kha in bawhbuai tir ka tum miah lo, ka kawng dal tu a hman lehlek phei chu" Zoramchhana'n nghet charha a tih khawl khawl chuan ka dinna hmun ah chuan ka lo inhumruh ve em em mai a ni.


"A nih te chuan sawrkar hna te thawk leh ta che. Nge, hna i hmu thei lo zawk, i duh phawt chuan ka pe thei che a nia" ka hlauh ang ngei ngeiin u Jo-a'n a ti ta reng, a aw ah chuan elsenna a ri tel bawk.


"Chu zawng ka thuthlukna tur a nih chu, i mi duhsakna erawh ka hnar mai ang" Zoramchhana chuan a ti let khauh. "Ramchhan, kan fanu chu neih i duh tak zet amaw?" tiin ka pa a lo inrawlh ve ta a.

"I rem tih phawt chuan ka pu, a ranglam a inneih kan duh a ni" Zoramchhana chuan a ti nghet charh a .

" kan fa tlum ber a ni a, nu leh pa tan chuan darthlalang ang mai a kehthei dawm a kan dawm, harsatna leh retheina a paltlang ang tih hlau reng reng a kan neih ang tawk a kan vur ve a ni a, i enkawl zo meuh ang maw?" ka pa chuan a ti dap dap a.


"Chhungkua leh nupui fanau enkawl zo teh nan eng tehna nge i hman chu ka hriatthiampui hauh lo che. Sum tam tak thawk chhuakin thla tinin pawisa hlawm kawl tir tur ka pe thei kher lo ang. Mahse, tlakchham neilo leh thinlung thlamuang takin ka siam ang tih erawh ka tiam ang che, a nu leh pa in invur țhin ang khawvel thil a nawmsakna in ka vur thei kher lo thei a, mittui nen a i in lo pan tur erawh in ka siam hauh lo ang" Zoramchhana chhan letna hriat awlsam tak, sawifiah erawh harsa tak si chuan ka pa ngaihtuahna chu a hruai thui hle te pawh a ni mahna an ngawi ta țhiap hlawm a.



Kei erawh inthlah dul tial tial in ka nui seih mai.

'mittui nen a i in lo pan tur erawh in ka siam hauh lo ang' ti a Zoramchhana thutiam kha a rilin a va thuk si em.



Ngawi rengin ka nu te tv enna lam ah chuan ka phei leh a, ka chhungril hlim veng veng chu ka hmelah a lo lang chhuak a niang.

"A va mak ver ver ve?" tiin u Latei chuan min lo fiam zauh, ka nu pawn zawhna mitmeng zet in min lo en a, ka nuih let duh lek chauh.

Ka țhut fel hnu deuh lawk ah an lo chhuak phei ve ta a, rang zet a Zoramchhana ka va en chuan ka pa hnung ațangin lu min lo buk khum nghut a, u Jo-a erawh an mut pindan lamah a chho tlang nghal daih.

Ka pa in "Mambawih, i țhianpa hian thingpui a induh leh lo em ni, va lum leh la" a tih laiin "keichuan ka in duh tawh lo a nia" Zoramchhana chuan a lo ti thuai a.

"A ni maw? A nih chuan tikhan lo inkawm ru, keini chu kan han mu chho tawh ang e" tih zawm in ka nu nen an mut pindan lamah an inzui ta nghal a.


U Nathan-a te nupa pawh rei țhu lo in mu turin an kal sawn ve ta daih, an mut pindan kawngkhar inkhar ri ka hriat rual rual in Zoramchhana bul ah ka țhu nghal a, a lo kiai suk ban lian pui chu chawi kangin a taksa lum nuam zet chu ka ngheng nghal zat a, nui nghing dawtin amah pawn min kuah ta hlu hlu a.


A jacket keu kau a a zak hnuai thla pangtilum tamna zawn a tlu lut ka ni bawk nen min ur sa nghal ham ham a. "No ka sil laiin in lo bo daih a, ka zawng hrep hman țep che a" zawite a ka tih chuan min kuah nghet zual sauhin ka chhip ah a lo fawp thung a.


"Ka lungphu ri chu i hre thei ta em?" a hmui a ka chhip lo la nawr reng chungin a lo ti zawi ruih.


Ka nui hak a, mitmei ven tur awm tawh hek lo, a kutphah lehlam chu ka kut pahnih a hum bet sauh sauhin a awm ah chuan ka bei ta hle hle a, duat deuh a ka sam a lo chul hliau hliau laiin a lungphu ri chu ka ngaithla a.


"I lungphu ri hian 'Mambawih, ka va haw phei peih lo ve, zanin chu ka riak ve mai ang chu?' a ti char char a nia, haw phei i hreh viau a mi?" nui duh miah lova tia a khabe hnuai ațang ka en chhoh kiau chuan Zoramchhana nuih chu a za kher mai.


A lo kun hniam deuh a, thuk ruih a min en in ka khabe ah lo dawm in " min thlem tihna a mi?" a lo ti dut.

"Aih, thlem tur che in min duh em?" rang deuh a ka tih let chuan ka hmui chu en runin a hmui chu a liak hnawm pah zauh a.

"Min han thlem chhin la" hnaih taka min en chung chuan a lo ti chhuak sup, ka hmai bul chet ah a thaw lum ham ham bawk nen ka awm chhung chu a rit in ka thawțha thei lo vek maiin ka hria.


"Ehhemm" tih ri lo chhuak thut avang chuan ka țhu mar nghal zawt, kailawn bul a Jen-i te lo nui tet tet chu ka tum loh deuh in ka va hmu zui nghal bawk nen ka che buai nghal vek a.


"Khatah eng nge in tih a?" Ka va ti vak a, "i room ah kan awm char char a lawm" ti sam then in nui pat pat chung hian an lo phei a.

"Mambawihi bialpa i ni tiraw? A cousin te kan nia" ti nghal thawr in an mahni leh an mahni chu an inhmelhriat tir nghal zung zung a. Ramchhana pawn țha takin a dawngsawng a, rei ngial kan țhut ho hnu chuan haw a rawt ta a, dar 10 a pel deuh hret, la thlalhlel viau mah ilang motor a chuang nileng bawk si nen hreh ru zetin ka zui chhuak a.




Gate ah a chhuah hma deuh chuan rang deuh in gate a light inchhi chu ka off hmiah, kan chhehvel chu a thim ta raih a, Zoramchhana Jacket awmah țham saka a hma ah ka dinchilh rual chuan ka ngaihtuahna hrethiam takin a lo kiai suk mai.

Nghet tak a ka kawngah a ban pahnih a min kuahin a lo kun hniam a, "naktuk ah leng ang aw?" ka tih lai chuan kan hmui a insi thuak tawh.

"Ka fawp phawt che ang a" uang deuh a lo tiin duhthawh lutukin min fawp ta ngawng ngawng a, a lei sa ham ham chuan ka hmui lo nawr kuauin zei lutukin ka kâ chhungah a rawn che kual vel ni ta ber in ka hria, keipawh chuan ka thiam ang tawkin ka chhang let a.


Ka kawng a min kuahna ti nghet zual sauh pah a ka hmui hnuai ah a bur chat tak ah chuan ka thaw chhuak hak a, ka kawng ațang a kut chu la sawnin ka biang a lo dawm a, lungchim zetin ka hmui hnuai chu a fawp dek dek a, ka chhungril sa kual pup pup leh thisen lum nasa lutuk avang te chuan ka zawi vek mai.

"Ka ta... ka ta a nih hi" lo ti sup sup in a inlahrang hlek a, ka heh huh hliam chu a kutzungpui a lo nul thuak min fawp leh nghal a, chu erawh a rei tawh lo, a inlakhran hma a a lei thap hrak a chho zawng a ka hmui a liah zeuh chuan ka mur chuai mai a ni!


Ka kawngah nghet deuh a min kuahtu chu vai deuh riai hian ka en chho a, thla eng no raih hnuai ah chuan lungawi hmel lutuk in min lo en let ve vung vung tho.

"Chhun ah bazar vel ah kal chhuak ila, tlai lamah erawh patea te in ah chaw i lo ei phei ang a" ti pahin ka chal ah a lo fawp zauh a.

"A van zahthlak awm" ka ti sep, a awm hla leh hlek chu a khabe hmul ka han khawih sak a.

"Zahthlak loh e, a tuk leh mai ah ka chho leh duh dawn sia" a lo tih leh laiin "naaaa..." ka lo ti chiam a, thaw chhuak suai suai in ka khabe ah lo dawmin min kuai dak salh mai.

"Ka chho ang a, palai an lo kal nghal ang" ti nghut in ka khabe chu a tuai rauh rauh. Ka kalsan hnu khan ka pa te nen engtin nge an inbiak chiah ka hre lo nangin lungdam takin a siam tih erawh ka ring nghet ta hmak.




Dinpuia sawn thlak thu in kan chhungkaw hnih țhian hnai tak tak te beng a thlen hma ngei a kan inneih fel chuan kan chhungkua pawh kan thang tlawm lutuk dawn lo tih u u Jo-a pawn hrethiam in a sehhel ta run lo ah ka ngai ta deuh.



Ka room chhung ah ka han luh ve meuh chuan ka unau te ho chu an lo phi cheng a, hrethiam lo deuha khum ah ka va lawn ve nak chuan ka thinphu a rang nghal zawih zawih.


"Engtik lai khan nge kan thla inlo lak hman a?" tichiam in an phone chu chhuhsak ka tum a, an phal îkhaw bik lo mai.


"Family whatsapp group ah kan dah dawn" an tih leh zel phei chuan lungphu chawl in ka thi lo chauh ani ber.
Pine tree hnuai a Zoramchhana nen kan infawp lai kha thla an lo la ru reng niin, nui rah rah a ka hmai bulah phone screen an lo lek chang te chuan kan lang chiang mai si a, rum takin ka lo melh rawm rawm hlawm ringawt.


"In in kiss dan hi a nawm hmel tawp, U Ramchhana hi a sang in a palian si, lo kun hniam in i biang a khuap ngei bawk a..." an han ti vel a, an mutthilh hlan in ka delete sak tho ang.


*i thleng tawh em?* tih message Zoramchhana chu ka thawn a. A patea te in a thlen rual in min lo call leh a, reilo te kan han inbiak leh chhungte chuan ka unaute chu an nghal em em mai a, a tawp ah phei chuan kan in kiss lai thlalak an neih thu Zoramchhana chu an hrilh ta a, pakhat lah chuan "Mambawihi kha thawn ula, min lo thawn ve rawh se" a ti sam then mai si nen kan nui kan nui ta ringawt.




Ka rin loh dan lutuk a thil a kal tluang ta purh chu mumang a ang ka ti lek lek, ziaktu in duhtawk a a lehkhbu ziah a chinleh kual hnu ah hahdam taka a tawp khar tum a a duan kual vel ang mai hian ka hringnun a thil lo thleng chu a hahdam thlak a.


A tukah chuan Zoramchhana'n leng turin min lo hruai chhuak a, a hel ber țhin u Jo-a pawn engmah a sawi tawh lo. Ka pa erawh in tuk țhuan kil laiin " A țha zawng a thil thlir țhin mi a ni, a nungchang kha a danglam bik zar a, a inringtawkin a inngaitlawm thiam bawk, a ngaihsak thiam khawp ang che, i thlang sual lo e" a ti dap dap a nih kha.



Chawhma zawng kan Bazar dun a, amah a palian in a inzuah hnim bawk nen mi te chuan min en duh thei hle, a ban ah intineitu zet a ka kuah te chu mak an ti tîng amaw ni, an in hrilh ru leh sap sap hlawm țhin a. Ka engahmah an thawk lo.


Zoramchhana chuan Lalati te unau thil tur a lei sak a, keipawh kawrfual nalh deuh min lei sak.


A patea te in ah chawhnu lam chuan hun kan hmang thung a, an fate lah ka rualpui hmeichhe pahnih ngawt an lo awm ve nen kan inkawm thei ta phian a, a patea fa te pawn Zoramchhana chu an ngaina hlawm kher mai.


Inchhaihfiam in an nui ho dar dar reng a, ui sa an lei a, chu chu dar2 vel ațangin an sawngbawl țan a, hmeichhe lam erawh in alu kan tur leh chawțani lam kan buaipui a.


An sa siam a hmin dawn lamah chuan Zoramchhana chuan inbual a duh thu a sawi a.

"Mambawih, min lo zui la" a tih dut chuan midang awm ve te mitmei veng ru tak chung siin ka zui ta tho, kawt ah kan chhuak a, insir ah chuan min chhuk thlak pui a, inhnuai room pakhat kawngka inkal chu hawng in min kai lut a.
"A hma chuan inhnuai hi ka luah țhin a, ka chawlh tak hnu khan ping dangin Vala te ho in room ah an hmang ta a nih hi" a ti ve duah. An fapa u ber Phai ah hnathawk a a awmbo avangin a ni room chu a cham chhungin a hman sak hi a lo ni a.



Plastic bag ațangin lu nawrna a lo phawrh rual chuan mak ti tak hian ka lo en a.

Min en vutin "Lu i met thiam em?" a lo ti hem mai le.


"A teuh lo lutuk" ti chiam a ka lu thing chu min nui huk huk a, bathroom lam ni awm tak a pan phei chu rang deuhin ka zui phei a, light a hmet eng a, plug lo awm ah chuan lu nawrna chu a vit lut a.

"I sam kha i nawr kawlh dawn ami?" tia ka zawh chuan "i phal em?" a lo ti sup in mitko a kang uk.
"Kawlh deuh chu a ngailo" ka lo ti let ve var.

"Ok... i duhtawk chin lo sawi mai la aw" a ti leh zel a, mak tiru tak leh phur tho bawk siin a bul ah chuan ka ding ve ta ran a, kar loah a sam sei hnuang țhin kha nawr bo zo a, hnim lutuk silo chin ah chuan duhtawk turin ka hrilh a, lu nawrna chu a titawp ve mai a.


Kiai suk a min lo en chuan a hmel landan chu a hma angin bawrchhawr in a rorum tawh lo nangin ka hmu pa zual sauh thung.

"Khatia lu meh kha i inhmeh reng sia, engatinge i sam kha i zuah tlat a?" ka tih chuan a nui suk suk ringawt, a lan dan dang hlawk chu ka chhungte'n hmu leh ta se an hai ngei ngei ang.



Hmul ziahna leh saving cream chu min pe in khum lam ah min kai phei leh dat dat a, "min han meh sak ve reng reng teh" uang zet hian a lo ti ve ngei a, khum tlang ah a țhu in a awm zawn ah towel a pawt pharh duai bawk.


Ngawi rengin cream chu a biang ah chuan ka hnawih kual vel a, Zoramchhana chuan ngunthluk em em a min en chungin "I hmelțha ngawt mai" a lo ti leh khauh zel a. Min tilai hlum lo chauh zel zawng chu a ni.

"zan ah i lo len hun ah ka chhungte'n an hai ngei ngei ang che" ka tih sap chuan a nui a za kher mai.

"U Jo-a te kha naktuk ah an haw tawh dawn a sin" ka ti a, titi mial mial pahin ka thiam ang a uluk a a biang hmul ka ziah fai sak leh meuh chuan darthlalang hma ah a va ding a, a hmul chu ka ziat kawlh vek lo, a bek hnuai thlengin hmul chuan a bawh chho dap tho a, a lan dan ah chuan a lungawi tawk tih hriat fe in a khabe ruh kual chu tuai in darthlalang ah chuan a han inthlek vel vut vut a.

Saw tite saw chuan hmeichhia tu pawn mitmei an hmuh duh tawh hial ang chu! A bawrchhawr lai kha chuan keimah chiah in ka duh a, tun ah tak hi chuan a hmutu apiangin belhchian an chak ve vek tawh dawn.


Chutah min lo en vut a mithmul a tih kan uk chuan "Zoramchhan i biang hmul kan ziah thlak zawng zawng kha vuah leh vek la, i sam pawh kha zawm leh rawh" ka lo tih khum pang pang a, hriatthiam loh hmel zet a a meng deuh kawk chuan ka insehruh țeuh a. A sam kha sei leh daih se ka duh tak tak.

"Kha titekha chuan mi zawng zawng in pa an tivek dawn che a sin, i bawrchhawr deuh lai khan ka duh fe zawk che" ti hlara ka inher tau hmak chu min lo um zui a, hnung lam ațang ka dul ah lo kuah a min pawm nawlh chuan ka khek nasa mai.



"I biang hmul tal kha vuah leh rawh" ka ti hlur a, nui huk huk in khum ah min leh thlak pui a, amah hmachhawn a ka inher chu a mal hrawl pui chuan min lo kherh bet a.

"a vuah leh theih loh pawn hmul a țo sei hma chu khawlai ah chhuak suh, i hria em?" ka ti khar khar a, ani erawh a nui ruh ruh ringawt thung.


"I ler lutuk, ngatinge inziahfai i duh kher a?" Ka tih leh rual erawh in ka nui ve ta tho, hmeichhe dangin a chhungril țhatna avang a vei takte a ka vei mipa hi a lan dan avang a lo vei ve in an lo hel ka hlau miau tlat si a ni.












Zoramchhana haw chho ațang a ni 3 hnu ah a palai hmel kan hmu ta a, ani erawh lo vat in a riak lut daih. Chhungkaw dangte ang bawk in 'lo kal nawn leh turin' ka chhungte chuan an lo chhang a, a tukzan ah chuan kan chhungte leh makpa te chu ka pa in a ko khawm a.



Rorel in an ri laih laih hlawm a, ka ni pasal rei tak college pricipal lo ni tawh țhin in a Zoramchhana chungchang vel a an hreve chiah chu "Mami, i tisual miah lo ang" a ti ta mawlh mawlh a.



Zoramchhana chu a lehkha zirlaiin a lo hrechiang hle a ni awm a, a fak lutuk chuan min ti nuam veng veng.


" kan college ah a kal chhung zawng khan professor te fakhlawh ber a ni hial ang chu, midang lakah invaivung si lovin a ngaihdan ah a ding nghet churh a, nihphung nghet a nei, a landan ah mai nilovin" a han tih dap dap takah chuan ka pa pawh a lungawi hmel vung vung viau.


"Lehkha te kha a thiam thei si a, IPS ah tal inziak tling tur a kan beisei rawn kha a ni a, marawh chu senior most 5th semester an zir kum khan a pa damlohna avangin exam te kha a zo thei hram a, inzir chhunzawm in net te kha han bei țauh țauh se kan duhpui tehlul nen fapa mal a ni miau a, apa enkawl nan a zirna zawng zawng thlauhthlain police ah a lut ta ngawt kha a ni a, harsatna tawk lo se chuan IPS hial a beiseipui awm a sin" a tih leh zel a.


Kan Zoramchhana hian chanchin a lo va han ngah tak em ka tiru vawng vawng mai.



Palai lo kal țum hnihna ah chuan 'aw' lo pawh in a ni tur kan ruatfel nghal a, Aizawl ah nilo kan insawițhat a ngai erawh ka cousin te chuan min ui pui viau a, a chhan pawh shooting neihna tur a van an rin vangin.


Thuamchhawm tur pawh uchuak tak a tilo tur leh Mizo dan a hmeichhia in a chhawm țhin ang chin bak a chuangbang in leilo turin Zoramchhana'n min chah uluk viau mai.


"Kan khawtlang chu kan inbuatsaih nasa tawh bung bung a nia" phone ațang chuan u Dtei'n a lo ti lang lang a.

Ka nui hak ringawt, puan chhawm tur vel leiin bazarah kan chhuak a, Remremi bulah ka pasal neihtur chanchin ka hrilh chiah chu mak ti bawk si leh phur bawk siin mo țhian ah țan ngei a duhthu min hrilh teng tung a.


"Sial lá lian zet leh Bawng a in thlung ran tawh mai sia, Lalremruati te unau phei chuan 'anu, apa Ramchhana leh Anitei te an inneih chuan Anitei kha kan chhungte a la ni dawn tho em?' an ti an ti mai" a lo tih leh chuan ka nui chhuak ta hak hak, naupang zeldin takin an lo zeldin nasa ve viau a nih dawn chu a.


"U Dte, enteh, khawchhung mi te khan Zoramchhana nen kan innei tur hi mak an ti em?" tia ka zawh chuan "a teuh lo e mai, Ramchhana nen in inzui pawh tuman mak an tih loh kha, a nihna takah chuan in inneih hi kan beisei ru fur zawk a lawm" a lo ti dap dap a.

"Huh.. vel a che aw" ka ti deuh ringawt. u Dtei lah chu a lo duai duh bik der lo.

"Kan khua ah hna i lo zawm ve hma a Dinpuia leh a țhiannu inzui nasat zia kan hre ve vek a, hna i lo zawm takah erawh bialnu nghet nei lai a ni tih kan hreve ta chiah a. Mahse, i lo awm ve hma a a sulhnu kan hriatchian hlawm em vang te pawh a nimahna Zoramchhana'n a vil tak tlut hnuah che phei khan chuan hetiang zawk hian intawp ang tih kan ring ru vek a lawm" a lo ti duah.



Tawite in ka nui ka nui nangin u Dtei thil sawi chu ka ngaihtuah let nasa viau thung.


Kum thar vuakvet a Ramchhana nen kan inzui te kha mak ti a thlirtu aiin 'nangni pahnih hi engtik maw mo lawm hun tur?' tih lam hlirin min fiam țhin a nih kha.








Zoramchhana te lamin Kawtlang huap a ruai buatsaih an tum tih palai te'n an sawi meuh kha chuan ka pa te lam in tlanchhia ah țan an duh bik lo a, 'senso zawng zawng a zahve in kan intum sem ang' an han tițhin tak nangin Zoramchhana leh apa in thu an chah khal bawk nen a tawlh duh der lo kha a ni a.


Ka pa in "kan fa tlum ber leh chhuak hnuhnung ber tur i ni a, ropui tak a thlah che pawh kan duh ve bawk a, chutin an niin senso engkim an tum chu kan rem tibiklo" tia Zoramchhana be tur a min hrilh țum chuan a ni.

Ka ni Pasalin 'midang lakah invaivung si lovin a ngaihdan ah a ding nghet' a tih kha a dik zia ka hriatchian phah ni.


"Mambawih, i pa thu chu a zahawm viau nangin khawtlang huap a ruai kan buatsaih chhan chu ka nupui tur i ni a, chhungkua leh kawtlangin kan lo lawmna che a ni a, chutia i chhungte lam an lo inrawlh ve te chuan nangmah mai nilo an sum tlang ka neih sak ani ngawt dawn a sin" a ti mauh mai si a,


Ka pa ka hrilh leh chuan tih vak ngaihna a hre bik lo a ni mahna "I man inhlan ni ah tal kan che ropui viau ang" a ti ta sup sup a.
Man inhlan ni a lo thlen chuan ka pa duh ang ngei a ropuiin engkim an buatsaih a, Ramchhana bul ah ka sawi lawk tawh avangin a hrethiam viau mai.


U Ngaihsaka dinpui dawn a. Mo țhian ah Remremi'n țan chak viau mah se makeup titutur a ka rin awm chhun a ni mauh si a, ka cousin Jennifer-i ka dinpui zawk dawn.


Man inhlan tuk ah chuan Zoramchhana te khaw lam panin kan thawk chho mup mup a, khaw dang a inkutsuih tur mah niila kan chhungkaw kual ah leh țhenrual țha ațangin zui tu kan ngah khawp mai a.



Tourist lodge leh IB room zawng zawng chu kan la fai vek a, chutichung pawn room kan indaih miau loh avangin VC House mai bakah bord exam a awm chang a exam hall a tan a an hman țhin high school property building chu school thuneitu te lamin kan hman min phal sak hlauh a.

kan tawt viau dawn nangin ni 2/3 vel chep deuh a khawsak chu an inhuam em em vek mai si a.



Inneih dar a rik bal bal chuan ka lungphu che a phu rang dup dup a.


Biakin pui khat țhup a mipui lo țhut tlim hmurna ah chuan in ka pa'n min kai lut ta a, maicham hma ațang nghahhleh hmel tak a min lo thlir vawng vawng tu bul kan thlen rual chuan pa zet hian min lo nuih suk a.


Pathian hma ah leh kohhran mipui te hma ah chhiachham a pumkhat kan ni ta chu mumang a ang ka ti rum rum. Nupa chu tisa ngawt innei kan nilo an lo tih țhin kha kan dai ve tawh dawn e..

Biakin hunserh a zawh rualin Ka pa Khawla te in ah kan inthlak a, mokawr fual phelh thawl a puanchei han bih tak ah chuan ka thawl deuh hawk.


Chutah le, Ka bungrua nen a Zoramchhana te in a ka lawi lut tur zet chu a lawm naupang zawng zawng an rawn tlan khawm ta a! Ka thuamchhawm chu an ken zawh tawk ang te te a keng in a țhen in an zawn lat lat bawk a.

Kawngpui ah chuan hma hruaiin "Apa Ramchhana rûninchhungah Nurse Hmelțha-i a lawi dawn e, a lawi tak tak dawn e" tiin an zai ta dual dual hlawm a.

A ngaihna hrelo zet a ka bula u Ngaihsaka kal mek chu ka han en chuan a lo nui ve ruh ruh tho. naupang te lah chu an zai țha duh phian mai si, ka chhungte lam in hmuhnawm an ti lutuk a, nui tlar tlar chungin video in an record thul. Chutiang a camera a tin tu an awm changte hlei hlei chuan an zai uar sauh sauh a.



Zoramchhana te lam chuan an luhkaah min lo hmuak a, chutah kan lawichal; ka ni pasal chuan a thil phut te a han sawi dap dap a, pa uang ve tak mai a ni bawk nen kan thum leh hak zel a.

A tawp lamah erawh "kan makpa tur hi ka college studen țhin kha a lo ni reng a, college a kal chhung khan a chhuanawm in professor te pawn kan en bik țhin hle a, sports han neih nikhuaah te pawh mahni items tur pha an awm chang khan House Leader a nihna hlen takin an aiawh in a phe vat vat țhin a, chuta ka la hriatreng chu sports kharni ah 'kan damchhan' C Vansanga hla ngei mai a Seminar Hall khat tlata zirlai leh professor te țhu țhup mai min awih țum kha a ni, a zai thiam tih ka hria kan fanu hi a inah lawilut tur a a duh takzet a nih chuan hla hmang ngeiin han chhai lut teh se" a ti ta mauh mai a.


Mipui chu kut bengin an nui ta dar dara, Zoramchhana ka va en chuan kan mit a intawng chiang hle a, atthlak tih hmel taka a hmui hnuai seh pahin lu alo thing a.

Naupang lam lah chuan "apa Ramchhana a zai dawn e" tiin an au rual țhat țhat a, a tawp ah chuan nui ruh ruh hian a nau Zotei chu a au ta a.
"Mate, ka guitar kha lo la ta poh che" ti dut a, necktie a pawh thawl rual chuan min lo en leh vut a, a mitmeng pa zet chuan cho tak in min melh ka ti mai, a de sawr sawr a, a nau in veranda ațang a guitar a lo pek rual chuan step pakhat ah chuan intlawh khalh in key a han zawng leh rih a.

Chutah le, chiang fahran a min lo en run pahin Valzotea hla Rose-par rimtui changtawp lam C Sanga sak tlar ațang ngei mai khan a lo sa ve ta a.

' Chutin sakhmel mawite,
Duhai ka sam țhin a' ti pah a mit min lo siai suk chuan thawm a țha hle, lai viau mah ila Zoramchhana aw pa leh chet phung cool ruih avang chuan in ka luangliam a, ka a lo chauh chu ani ber e.


'Kumtluanga buan ang pawmin
Runin nuamah
Fanau maltluan chawi dun turin
Kumtluang atan e
Nuthai chang mai teh la.."

Rose-par rimtui min thliah la, hmangaihna rose par rimtui.. tih bawr chho ațang phei chuan in naupang zawng zawngin an sak zawm ta a, kan ri ta luih luih mai a, hlimna avang a mipui nui bawk bawk te pawh chuan ka pasalin hmangaih hmel lutuk a min melhna chu an hmu thiam vek ngeiin ka ring a ni.



Lawichal in a phut ang tihhlawhtlina a awm takah chuan lawm takin Zoramchhana chhungte chuan ka kut ah an lo chelh a.


Zoramchhana zai zo in kiai suk suk paha lungawi hmel lutuk a min lo thlir vung vung mai chu lai deuh in ka va nui sei a, mahni nupui neih ni a meuh zai tur chuan a lo suangtuah ngai bik hauh lo ang mawle! Mahse, ani chu Zoramchhana a ni miau a, a ko a tla engpawh hlen chhuak țhin tu, a nihphung nghet tak tumahin an khawih buai phak loh a chu.

Zoramchhana nu in ka kutah nghet taka min chelh chung a "ka hmuh tirh phat ațang a hmelțha ka tih em avang khan fanu a tan ka awt nghal em em mai a, tunah chuan chu ka duhthusam chu a thleng dik ta e" hlim zet a tih chuan mipui chu an nui dar dar mai.


Tunah chuan Nl Ramhmangaihi kha Pi Ramhmangaihi ka lo ni ta a, ka pasal lu ngahna hmun hmun a lu nghat ve tawh tur, a taksa peng pakhat ka lo ni ve ta.




Ka bungraw chhawm te an luh fel pui hnu ah keini pawh chu inchhung lam ah kan inzui lut ta hlawm a, kohhran upa pakhat in țawngțaina hunserh a hman leh thlap hnu ah Artui chhum leh thingpui an lo sem nghal bawk, a khat tawkin chhungkaw aiawh a thusawi in anni lam leh keini lam chu an indin chhhawk zauh zauh bawk a.


Khawtlang huap a thil tizel an nih avangin kawmthlang kawngpui ah pawh YMA țhutthleng hungin mipui an țhu khat dul a, kawmchhak leh inkilkar remchang lai ah tawh phawt chuan YMA țhutthleng an hung bawk a.

Ka pasal neih ni min lawmpui tur a ka lo suangtuah thiam phak bak aia tam lawmpuitu kan nei mai chu keimahni lam vang niloin Zoramchhana te chhungkaw lam vang liau liau a ni ka tilo thei lo.

Rim tak a kut hnathawk țhang tih hriat tak tak nutling leh patling ațang a lua kel sam țo var vo tawh chin te'n duhsak tak a kan inneihna min lawmpui a, min han chibai lawp lawp mai te chuan hringnung hlutzia min hriat thar tir a, inneihna ropui tak, daikilkar ber a mi te pawn thinlung tak a duhsakna an hlan theih si a hringnun bul ka țan țhar chu dam chhungin ka theihnghilh tawh in ka ring lo, a hlut dan a ril em a sin, khawpui ah inneihna hi lo hmang ta zawk ila chuan vawiin a min lawmpui tur a lo kal; lo nei a eizawng chhungkaw harsa ve tak tak te duhsakna hi ka dawng miah dawn silo a.



Ka chhungte lam rilru pawh a nih ve chiah ka ring a ni, ka pa meuh pawh mipui lo pungkhawm țhahnem lutuk te chu thlir kual vung vungin Zoramchhana te nen a kan țhu hrang bik chu min lo thlek leh țhin a, a hmel ah chuan lungawina thuk tak ka hmu thiam bawk.



"Inneihna ah hetiang ang reng reng a mipui tam hi ka la hre lo" Jennifer-i meuh pawn ka beng bul ah a rawn ti sar sar ta reng a.

"A nia sin" tih ngawt in ka chhang let a.

Tukverh bula țhutthleng sei inhung ah kan țhu a, kan țhutna ațang chuan pawn lam a lang thei vek si nen a zuk thlek leh vang vang zel a.

ka bula țhu, inneih thutiam ka chhampui ka pasal lo ni ta chu ka mitsir leh zauh zel a. Suit nena a han induang zuih mai chu en kham a har ngang mai.

Ka melh chang apiang a mit tizim sun a min lo en ve țhin avang chuan kan han innuih leh ringawt zel a.



Kawm thlang kawn zau deuh lai ah fatu lamin Sa pui pahnih ngawt bakah Vawk leh Ar vel siam in an inchhuang khu vut vut a, an sa siam rim lo nam leh chak chak țhin chuan rilru a la peng deuh tlat tawh.

Zoramchhana bengbul ah chuan zawite hian "Sial sa chu ka ei chak tawh e" ka ti sa sa a, chutiang thil ka sawi a ring lo lutuk nge a nui chhuak ta hawk hawk mai a.

Kan chhungte ho in kan pali țhu tlar țham lam chu zawhna mitmeng zet hian min lo en țhap a, pakhat lah chuan nui ruh ruh pahin "Sial sa chu an chhuang hmin tawh ang em aww?" a ti khawl mai a, a tirah chuan kan chhungte hmel chu an bangbo tlang hlawm hehaw viau a, rei erawh a nilo, a tawp ah chuan "kan lo hrek rilțam rei lutuk che u a ni maw?" tiin an nui ta dar dar hlawm a.



Zoramchhana khan ka rilțam thu hrilh miah lo mahse ka zak lutuk chu ka beng a sa hut hut.



Ka rin lawk ang deuh chiah in tlai dar thum a rik meuh chuan nunau leh tar chaklo zawk te chu chaw dawh turin an intlar hmasak tir ta a, thlasik ni a la ni si a, dawh lam hma loh chuan khua in min thim hnan ang e, fatu lam in an ti lauh lauh reng chu ka pawmpui viau mai.


Chaw ei hma tak tak chuan u Zoteii a lo lang var a.
"Ramhma, chawhmeh vel an zuk suah chhungin duh chuan lo va inphelh thawl ula" a lo tih chuan ka hnial lo khawp mai.

"Nangni pahnih kha chuan sa vel la chho tur lo va zawng ru" ti hlak in a u te țhian dun chu a tir nghal zat a, kei leh Jen-i erawh Zoramchhana mut pindan lam ah min hruai lut ta a.



Ka thuamchhawm chu mumal tak a remna hun la awm miau heklo, khum chungah leh chhuat awl remchang lai ah an lo hung hnawk ve ram mai.


"Pheikhawk te kha phelh ru, in kê a kham tawh ngawt ang. Awi aw.. Mama hian room ah tui inchhawpsa a nei lo a nih hi, tui sik ka lo lak ang che u aw" ti sawk sawk in u Zoteii chu a kal chhuak leh nghal a.

"A nau kha a fel ka ti tawp, enteh, a simple reuh sia a changkang ru zek" ka bengbul ah Jen-i chuan a lo ti sa sa a. Ka pawm zawng tak a ni.

Nimin khan biakin ah rehearsal kan nei a, u Zotei hian min buaipui nasa in a vengva reuh si a, ka nu leh pa pawn an ngaina nghal em em mai a ni.

Tui bottle nen u Zotei a lo lut leh a, "in nupa mut pindan tur chu a nuam i ti em?" tia min fiam zauh chuan lai tak ka ni tawp mai.

"Naaa" ka ti deuh vak ringawt a, Jen-i nen chuan min nuih ta tlawr tlawr a.

"Khalai a mi te kha a siam thar vek a nih kha aw, a phur țhin sur sur lutuk kha chhun thingpui in a chawl miah lo te'n a lawm a inkhawih nilen țhin" a ti leh ta zel a, bang in nampuk a leng tawk chiah thuamhnaw bawm lianpui chu a kawk pah zauh zauh a.

"Hei hi ama siam maw?" ka ti ang héhaw a. "Ni ve e mawle, pheikhawk bawm tur erawh varnishing a ti em ni, a lo nei tawh silo a, a siam zawh vek hnu ah dawr ah khawih zawm tir turin a dah ta anih kha, naktuk vel ah an lo dah maiin ka ring" a ti leh mai a.



Ka mitthlaah chuan closet leh shoerack siam a Zoramchhana che vel tur chu a lo lang iar iar a, ngawi vung vung siin a thawk mual mual ang a, chhun thingpui in tur a an koh sek pawn "umm" ti dut siin a hnathawh lai ah ngawt rilru a pe tlat lawi si tur chu ka nuih pui ka nuih pui mai.



"Ka zun a chhuak tawp, u Zote bathroom awmna ah min lo hruai" Jen-i'n a tih tak ah chuan an inzui chhuak leh a "Mambawih, lo chhuak ve nghal mai rawh aw" a lo tih zui chuan ka buk khum nghat ringawt a.


Pheikhawk chu inthawlh leh in tukverh lam chu ka pan phei a, ka nam hawn rual chuan pawn lam thawm chu a chiang ta kher mai.

Chaw dawh tur a naupang intlar țhenkhat chu thaza tih tak ah an tlan kawi leh țawk țawk țhin a, puitling lamin 'in tlan khu lutuk, khatiang a in inhlei chuan chaw dawhnawn an phal dawn miah lo a nia' ti te in an han inkhap hlawm thul.


Țhenkhatin "Aizawl ațang a lo kal te khan chaw ei kham ah sweet kan vawr dawn nia a'n ti" uar takin an lo ti ve bawk.

'Motor an ngah si, Apa Ramchhana te hi an pe ve ang em le?' lo ti pawl te pawh an awm a.

'Aizawl a mi te hi kan khua ah awm char char se chuan kan khuaah hian motor a tam ngawt ang' tih vel te'n ani mipa naupang lam chuan zeldin thu an vawrh ni.

"I chau em?" ti sup riah chuan ka hawi let nghal zawk, Zoramchhana chu lo pen lut ve in a pindan kawngkhar chu a nam phui leh nghal a.

"Chau lo e" ka lo ti let thuai a, a kawrchung chu hlip in tie pawh a pawt chhuak a, khum ah theh kai paha rum chhuak nghutin ka dinna lam chu a lo pan phei a.


A kamisz var body fit hak leh a taksa lianpui chu a in rem thlup mai bawk si, chutakarah a pindan chhung a ka ding ta ran chu a lungawipui tih hriat fein mitmeng tawrh harsa zet a min Mel chung hian min hnaih chilh zel a.


A mitmeng thuk tak ah chuan chona bakah zanin a a chet lak duh dan tur zawng zawng ka hmu thei hialin ka hre mai.

Ka ngaihtuahna avang chuan ka biang a sa hat hat a, lai zet hianin "I van chhelo tak" ka ti ta hlak, Zoramchhana chu a kiai suk a, ka hnung ah lo ding a a taksa rinchhan tur a min kuah beh takah chuan ka taksa chu a kham țhem țum tih ka hrechiang zual sauh.


"Ka pindan chhungah i awm ve ta mai chu mumang a ang dawn dawn a lawm" zawi ruih a tiin ka chhip ah a lo fawp a, ka nui seih nangin a thusawi leh a aw ri a tihtakzet na chuan min hneh ani.



He mipa rothap leh nelawmlo zet ang a lang hian zan tam a pindan țawmpui tur angin min lo suangtuah fo țhin tih lah a chiang a, a ni ang mipa mize nghet tlet tlawt suangtuahna luahtu ka ni thei chu vannei ka intihle bawk.



"I mumangah i pindan chhung ah ka lo awm țhin a mi?" thlek chho há chungin ka ti a, zawi thum ruih a "ka hmuh hmasak ber zan ațang che khan" ka beng bulah a rawn tih chuan ka kê țang hmawr thlengin ka lum pup mai.



"Diktak chuan maw, kha... Duty room ah ka rawn hmuh țum che khan ka hlau hman che a" ka tih laiin Zoramchhana thung chu a lo nui chur chur a.



"Ka ti tak tak a lawm, nangmah ang kha ka la hmu ngai silo a, i meng rum in i bawrchhawr bawk si, khatiang mihring kha tu tehlul in nge duty room ah lo luh tir tih te kha ka ngaihtuah hman vek" uar deuh tak a tia ka en chho laiin,"ka hria a lawm, sam țawn kang lah chungin zuan zang em em khan i lo lut a, min hmu thut a i mitmeng chiai zet kha a hmuhnawm viau lawi a" lo ti let ve dut in lungchim zet hian min lo en chhuk vung vung a. A nupui ka ni ta chu a lungawipui hluah hluah tih mi â ber tan pawn a hmuh thiam theih hial ang chu.



"I kut kak duai ka țhui lai te khan nâ ti hmel i pu bawk silo a, 'hepa hi helpawl zing a mi a nih ngei ngei dawn hi' tihna rilru te nen khan ka awm i tinuam lo a sin aw" ka han ti leh a.

"Ka kut ațang a thisen chhuak i hmuh rual a rap hmel taka ip chawi te kha ram hnathawk a ka hah em em chang pawn ka suangtuah fo a sin, i kut nem thep a dimdawi tak a ka kut hliam i silfai lai kha suangtuah letin ni sensa hnuai ah thlan tui far zawih zawih a hna ka thawh chang pawn ka hahdam țhin a sin" a lo bul bul a. thaw huai in a awm ah ka bei ta ringawt..


"Ka tihpalh" zawite a ka tih chuan min kuahna ti nghet sauh pahin "engvang chuan?" a lo ti hniam ruih.


Chhan mai tumin kâ ka ang deuh ziai a mah se engnge ka sawi ang? Țha tawp khawk a min suangtuah țhin laiin kei erawh in ka thamlo hle țhin che ka ti ang maw?

A lakah ka lo kawlsen țhin lutuk kha hreawm a ti ve thei ngawt ang tih ngaihtuah in amah chu ka lainat khawp mai, a landan danglam bik tak avang te khan tlangval dang te ang pawh a en lovin ka in luah ah a lo leng lut palh mai ang tih hlau reng reng in ka awm a, ui ar eiruk tum ang maiin hnawh bo dan ngawt zawngin ka vin chiam chiam zel a nih kha!


Ani thung chuan thinhrik rilru tak a ka bawisawmna te kha hahthikul a hna a thawh lai pawn suangtuah letin a lo intihchak phah fo si a. Tunhnuah hian ka hmangaih ta lutuk a nih pawh in ka demawm in ka hre lo, hmangaih a phu em em si a.



"Mambawih, kan chhuak ve tawh dawn a mi? Sial sa pawh an zuk suah tawh tak kha" dam dap a a lo tih chuan dan kir ngaihna awm lovin ka mittui chu a hnam sawk a.

Ka darah lo man a min nawr hlat hlek rual chuan mitko a ti hnim nghal khui bawk.

"Eng ngatinge ni?" ngaihna hriatthiam loh hmel deuh in a lo ti dut, "ka hmangaih lutuk vang che a niang" ti țiau in ka mit hnawih tih pherh hlau deuh in ka kutțang chuan ka mittui chu ka hru zeuh zeuh a.

"Lo kal rawh chhuak ang" zangkhai taka tiin ka nuih lui pah a, kawngkhar awmna lam pan a ka pen chiah erawh nghet deuh a ka ban rekah lo man in min pawt let a.

A kut pakhat a ka biang lo dawm in rilruih in min fawp ta mawlh mawlh a. Ka kâ chhung a a lei chet kual tir vel dan chu maw... a zei a ni tawp mai, ka pum leh tai bawr a mur chuai chuai a, ka dang chhung te nen, rum chhuak deuh hawk a inla hrang hlek in "i sawi zawh chiah kha han sawi leh teh Mambawih" a lo ti bul bul.

"Ka hmangaih lutuk che Zoramchhan" ka lo ti thuai a, tun țum erawh a hma aiin a duhthawh zual zawk, ka biang tawn tawn ah lo dawm in a hma aia ril leh muang dam ruih zawk in min fawp leh ta a, thla ah kan thlawk chho delh delh hial in ka hre mai!


Pindan kawngkhar chu lo inkhawng ri kauh in ring zet hian "nangni pahnih kha lo chhuak ru, lawi țhat zan a la nih loh hi" u Dtei'n a rawn ti ta mai chu ka kat hnung dawrh a ni ber e!


La dava deuh riai a ka meng chhuak chu ngun thluk em em in ka pasal chuan min lo en a, uDtei thawm ah khan a phu chhin ve miah lo a nih hmel.

"Henu hi chuan lungphu chawl in min la siam ngei ngei ang" ti a thawk ka lak ham ham chuan Ramchhana chuan a kekawr ipte a zen ruk ruk a, romol lo phawrh chhuak in ka lipstick a fawh pherh lai chu min lo hruk reh sak a. Biang sa hat hatin ka lo dawh ta hle hle a.


A kekawr ipte ah romol chu thun leh sawt sawt in min din hnaih hrut a, chutah zawi ruih a "zanin ah i u Dtei tihbuai theih miah lo in ka duat chhunzawm dawn che a nia" a lo ti zet chu ka lai lutuk nge min țhawng lutuk zawk nge pawk ka sawifiah thiam lo, ka zawi huih a, ka lungphu te chu su dup dup siin hna a thawk pawn ka hre leh lawi silo....



Kan inzui chhuak erawh ka thaw huai! Tu te mai pawh chu an chaw thleng chawi in an lo buai tlang em em mai a, kil khat a Lalati te unau hrai pah a chaw bar ve mek erawh in nghal em en hian min lo en a.


Ka tih ngaihna hrelo chuan ka kuttum chu hum ruh in ka va hmuh ta ringawt, ka bula dingpa lah chuan 'khai a, khai a, kâ a an leh zawng in kan ngam dawn lo nasa a nia' ti a nui hawk hawk in min kal sawn pui a.


Ruaițheh a zo a, kan inneih min lawmpui tu tam zawk an țin darh hnu ah pawh puitling vengva zual te chuan ka chhungte chu țhutpuiin an titi pui bawrh bawrh a, ka nuța leh laizawn te pawn nuam an ti viau chuan in ka hria. Ka cousin țhlai zual deuh te erawh khua chuan turin an inkhalh chhuak a, u Dteii a felin a zuan a zang em a, tleirawl ho chu a huikhawm hneh viau mai a, Pu F Kapsanga thingpui huan tlawh turin an inphur chhuak ta hlawm in ka hria.



Zoramchhana te kawmchar lam ah chuan ka chhuak phei ve a, ka nu leh pa chu chaw ei kham thingpui hang dawm a ding dun in khua chu an thlir kual nasa mai.


Ka va chhuak phei ve min lo hmuh chuan min lo nuih var var a, han sawi mai tur erawh a vang khawp mai, ka pa chuan ka dar ah lo kuah in a han hmer deuh vang vang a.


"I pasal te chhungkaw zarah vawiin chu i mawi hle a ni tiraw?" tia min zawh chuan ka en chho vat a.

"I nu nen kan inneih ni ai pawn lawmpui tu mipui an tam a lawm, i unau dangte nupui pasal neih țum te nen phei chuan tehkhinchi pawh va ni suh" a tih zawm a.


"Hmanlai inneih ropui an sawi ang mai a lawm a nih, khawpui a inneihna ropui kan tih ve țhin te lah mi sawm zat te ei khawp tur chiah chiah catering tiin kan order a, puar khawp pawh ei țha ngam lo turin kan mi sawm te kan siam leh țhin si, khawpui inneihna chu a ropui zawh poh leh chhungkhat a berh deuh zawk te tan inthlahrun a na mai a, in inneih ni erawh a dan a dang khawp mai.." a ti leh chuar chuar a, ka pa nen a kan rilru put hmang in ang țhin lutuk hi a mak ka ti.



Hmeichhia ka ni si a, ka nu ka chhun zawk ka rin tehlul nen ka pa nen hian in anna kan ngah zawk tlat zel.


Ka nu'n " tihian pasal neiin khaw dangah i lawi ve ta mai dawn chu a ni si a..." a lo tih chuai raih chuan a lam hawi in ka inher thuai a, a hnuk a no hmel khawp mai.


"Mahse, nu, ka ngaihtuahawm dawn hleihnem, kan dam ang a, kan inzinpawh reng reng țhin dawn a lawm.." dam deuh a ka tih laiin kun hniam in a mittui a hru fap fap a, ka pa pawn hrethiam zet siin "insum rih te, i fanu hi an hnen ah hlan i hreh lutuk emaw te an lo ti ang e" a lo ti ve sup.


"Ka rilru chu i hria a lawm" tia ka pa chu chhang let in keichu min en leh a "in inkawp rei bawk silo, kan hmuh chin ah hi chuan a țha viau a, mahse..."

"Nu..." ti hak in ka nuih lui a, a fanu ka ni a, min ngaihtuah takzet dawn tih lah ka chiang. Mahse, Zoramchhana lakah kher hi chuan ka him dawn a, ka nei ta hi ka tisual chhin ngai dawn lo tih ka chiang tawk hle bawk.

"Nu, ka pa nen pawn thla khat vel bak in inzui hman loh thu min hrilh tawh kha, mahse han in enteh u, inngaizawng rei miah lo pawn inneina chu a nghet thei tih hrechiang ber tu in nilo a mi?" tia ka nuih ver ver chuan thaw hak hak a lu bu in ka darah a lo beng dat dat a.


"Car pakhat tal hi kawl rawh u aw, a țul phawt chuan ka licence hi hmang la khua ah hian damdawi dawr hawng rawh u, kha.. a nu leh pa kum pawh a tam ve tawh kha.." a ti halh halh a, huatah pawh ka la thei tawh lo. Ka nawmsak loh a hlauh lutuk vang zawk a ni a, nu thlirna a țang chuan fanu te hlimna tur a nih phawt chuan vur theihna na a vur mai kha awlsam deuh tur chu a ni.



"Car te chu engatan nge kan han tih ang le, thingtlang ah te chuan a țangkailo lutuk zawk a lawm" ka tih ngial pawhin "aw, ram in kal duh chang a hman tur in mawle" a lo ti deuh hlur a. Ka pa nen kan lo nui hak.



"Kha... nu leh pa țhenkhat nen kan titina ațang phei kha chuan kumin phei chu Lo an nei hla hlawm hle a ni awm a, kê a kawng thui tak tak kal ngailo turin car pakhat hi kawl rawh u.. aaa.. pickup a țangkai zawk ang, i u te ka lo bia ang a, la rawh se" a ti a ti ta mai a.



Chutiang thil pek engmah ka la dawn lo nangin a lungdam nan tal chuan han insawi thawl phawt mai teh se.



Ka pa te nen inchhung a kan inzui luh chuan Ramchhana nu in min lo chiauau thuai a, ka pa pawh Ramchhana pa bulah țhu in an titi dun thei viau, kei erawh zawn neiin tual zawl lamah ka chhuak a, step chhukthlakna bul ah chuan ka mi beisei loh lutuk te ka va hmu tlang ta hlawl mai a.



Ka ni pasal ho in uJonathan-a leh Zoramchhana te chu an lo ding tlang a, zial zu in an lo țawng tui viau hlawm lehnghal, an bul ka va thlenphei tak ah phei chuan mak hi ka'n ti mai mai khawp a.


Pa Rammawia leh u Jonathan-a chuan Zoramchhana zozial ngei mai an lo zu ve tual tual a nih chu!


"Mambawih, min zawng a mi?" min hmuh rualin Zoramchhana chuan a lo tithuai a, u Jo-a nen an lo titi thei viau mai in min tihamhaih a talangin ngawi rengin ka buk khum nghat a.


"Inchhung lamah min min mamawh em ni?" ti a a zialzuk lai tih hlum mai a tum chuan "aih, ka lo kal ve mai mai a nih hi" rang deuh in ka ti a, a nui ta suk chu a bulah ka ding a, a khat tawkin ka kawngah lo kuahin tuivai chanchin sawi pah chuan min han hmer leh deuh salh zel a.



"Nunau lam hi haw thla hmasa se, lui chu kal teh ang u" pa Rammawia'n a tih chuan "Bomb vawm an phal tawh a ni lawm ni, chah ila" ka u in a lo ti ve bawk a.

"Umm, Bomb leh lenkhang zar te pawh an phal tawh a nih kha, Jeletin chu kawlsa ka la nei nual" Zoramchhana pawn a ti bul bul.

Min va han thlahlel lo bik tak ti rilru a ka melh ralh ralh chhuan alo hrethiam ve ni hmiang, zawite in ka kawng fek chu a lo hmer a, engmah erawh a sawi tawh lem chuang lo. U Ngaihsaka a lo thleng ve leh chiah bawk a, Lui kal chungchang ngawt chu an seprawtui mai.




"Tuivai chu a hla viau em?" tia u Jo-a'n a zawh chuan rang tak hianin "hla ve e, ké phei chuan zing a kan chhuak hi tlai eirawngbawl hun vel ah kan thleng hman țawk zel" u Ngaihsaka'n a lo ti thuai a.


"Motor kan keng ang a, a nuam phian ang, țiauhmi te pawh a awm teh tak ang chu" Pa Rammawia'n a ti leh hluai a.


"Ka ni in i ram kal a phal ngawt ngawt ami?" tia Pa Rammawia ka fiam chuan a nui hawk hawk a, "a ni ngawt mai, aaaa... kan lui kal tur chu hre ve lo mai rawh se" a tih chuan kan nui tlang ta dar dar a.




Zan khatna ațangin ka chechhe nghal pang mai a. Ka puan chhawm te sem a, chenpui te thil tur ka ken sak te ka sem chu kan hlim tlang dar dar viau a.

Zoramchhana pa ta turin kawrchung leh kamizs nalh deuh ka ken sak a, inkhawm pheikhawk savun țha deuh mai nen, ka pe tur chu enge ka hriat teh kher ni "apu, hei i ta tur aw" ti lauh pahin ka hlan mai a, ka ko/au sual chu ka lo inhre lawk lo nghe nghe a, awm ve dangte an nuih tak dar dar ah chuan lai lutuk in "ka tihpalh" ka ti ta ngawt a.

Zoramchhana pa chuan nui hawk hawk in a pawi loh thu a sawi mai a, mah se ka hawi sawn chiah erawh chiang em em hian Zoramchhana chuan min lo en run a, a mitmeng chu a rum hauh lo. Thil thleng zo chiah kha nuihzawhpui mai erawh a remti baulo tih hriat theih khawp in a thutak thung.

"Ka pa, pheikhawk kha i bun tawk ang em?" tiin ka zawt nghal a. "Eee, i lei thiam lutuk, hei ka tawk chiah chiah a nih hi" a lo inthawlh tawh avang chuan a lo ti var mai.


Nuih ver ver a ka hawi let leh chuan Zoramchhana pawn 'good' hmui phun a lo ti sup in a nui ta suk suk.


Ka nu pawh kuttah puan leh chawlhni kawr ka ken sak a, ka han pek chuan a lawm thiam em em mai leh nghal.

"A va mawi em" tiin a intehchhin nghal a "ka inhmeh dawn lutuk, hetiang puan hi ka la hmu ngai reng reng hleinem, ka bih hunah chuan ka va mawi dawn e" a ti a ti mai, a pe tu nih a nuam veng veng mai a ni.


U Zoteii erawh țhalai a la ni a, Gucci bag ka han pe chu phawk lutuk a mengin min en kawk kawk mai.

"Awi!!!! Hetiang te chu" a ti deuh chiam a, midangin a thil pek dawn an han en sak chuan "Mambawih, a to lulai lutuk, ka la thei lo ang" a lo tih san nghal mawlh mawlh. Hrethiam lo zet a amah en tute kiang ah chuan "Gucci brand a nih hi, he bag ringawt pawh hi India pawisa chuan cheng nuai khat a chuang" a ti ta a. Chungkhat ho in hamhaih zet a min en chuan chil hak lo chauh khawp in ka insawifiah nghal zung zung mai a sin.


"u Zote, i ngaih ang a to kha a ni lo a a nia, kan cousin kual zawng zawng hian member card pakhat kan ințawm a, mi 20 rual dawn in kan lei tak zeuh zeuh ah chuan regular customer emaw min lo tiin offer min pe țhin a, i bag tur a ka lei pawh kha i rin ai daih in ka lei tlawm a nia" ka tih ngial hnu chuan tim deuh a Gucci bag chu a awm ah kuah bet in "ka lawm lutuk, manglam ah pawh ka mangphak hleinem" a ti ta a, ka hahdam huai thei mai.







/
Sava chiar nak nak ri ah chuan ka meng chhuak diar diar a, ka awm mekna chu ka hrelo teuh kher mai, lu kân deuh iaka ka hawi kual laia ka hnung lam ațang ka kawngah lo kuah nghet salhtu an awm avang chuan ka thaw ta huai a.


"I harh thei maw?" lukham ah lu ka nghah thlak leh rual chuan a lo ti dut.

"Umm, ka tho ã ţep" a lo nui ngawr dawt a, a bawp lian pui chuan min lo kherh bet titih a, ani nen a khum khat a mut dun ka lo suangtuah țhin ang chiah in a pangtilum chuan min ur sa ham ham bawk, kê hmawr hit pawh ka nei miah lo.


"Taksa na i nei em?" zawi sup a a lo tih leh chuan ka biang a sa nghal hat hat. Nizan a chet duhthawh dan em em kha chu sawi chhuah chi pawh a nilo. uDtei tihbuai theih miah lo in min duat chhunzawm chiang hle ani tawp mai!



Ka mut dan siam rem a ka zangthal chuan a kiu a inbeng kangin a lo kun hniam a, ka chal ah fawpa a thawk chhuah suai suai tak ah chuan zawite hian thil ka sawi a.

"Huuuh?" ti nghut a ka sam a lo huikian laiin "ka bawp a rawl vek" ka ti ta hlar, Zoramchhana chu a nui ta huk huk a.
"Min nuih bawk suh" a sam ah han ţham sak paha ka tih chuan a ka nui ve tho, lo kun hniam a ka nghawngah hmai a lo phum rual chuan nizan a thil thleng chu ka mitthla let iar iar a, ka lungphu chu a rang zui nghal dawt dawt bawk.



"A lehpek ah chuan a na tawh miah lo ang" ka nghawng ah hmai phum reng chung a a lo tih chhuan ner nang nangin "i hur" ka ti hlak a, a nui chur chur mai.


Kan tho chhuak pawh chu sawi em em tur hresilo in kan in nuih kan in nuih a, kan khum puan phah thar kan tih hmelhem hlau a puan chhehchhawl deuh kan phah hnan chu amah pui roh chuan a la vut a, tum tel in kawngkhar lam a panpui ta roh a.



"Hey, midangin an lo nuih ang che" tia ka auh zui chuan "tumah an awm lo, kan pahnih chauh in a lawm ka riah" a rawn ti ta hem mai.

"Eng a? Khawnge midang?" a ngaihna hrelo deuha ka pan phei chuan mut pindan kawngkhar chu a pawt hawng a, a sawi ang tak takin inchhung chu a lo reh diai mai.



"Mawh? Khawiah nge midang?" tia ka zawh tak tet tet ah chuan "ka Pupuia damlo an han riahpui a nih kha" a ti sam leh then a.



Mak tideuh ka en chho há hâ chuan "chance min pe ve a nih hi" a lo ti leh roh a, a nui ruh ruh bawk nen a hnungah ka beng dawt ringawt.



"Tak tak a, pu Thangdela kha i hria em? Ka nu u a nia, tunlai hi a zual deuh a, chhungkhat te phei chuan kan inneih ni a hmuh hman kha an beisei lo fur zawk a..." a ti ta a. "Ka nu leh Matei phei chu an riak chho deuh reng zawk a, nakin ah keini pawn kan han kan ve dawn a nia, a hmuchak ngawt ang che" ti leh sup sup in kawmchar lam kawngkhar chu a hawng a, bathroom ah a lut chu ka zui ve zel ringawt a, kan puan phah kha bucket ah a chiah dawn tih ka hriat tak ah chuan rang takin ka chhuhsak a.


"Ka lo ti ang" ka tih chuan a nui ta huk huk, puan ka suk lai chuan a lo inphih fai a, ka tootbrush vel ka ken chhuah ve loh avangin min va laksak leh a. "Inleng an lo kal hma mai thei" a ti ta a, keipawh chu ka che hmanhmawh ve nghal sawk sawk a. Tlem a thuamhnaw hmuh nuam deuh ka inbel fel hnu a pindan ațang ka chhuah chuan mei a lo nun hluah tawh a.


"Tukin chu eirawngbawl a ngailo a, thingpui turin tui hi ka chhung a, fatu ho bel hman vel kha ka zuk enpui lawk ang chu?" a lo ti nghal thuai bawk. Mahni ngawt a lo awm chu ka hreh ru viau nangin "rei suh aw" ka ti ta zawk a.

"Ka nu te pawh an lo tla thla har lo ang" tiin kawmthlang lam ah a chhuk thla a, Veranda ațang chuan ka in luah tereuhte ding ve ran chu chiang deuh hian a va hmuh theih a, a khawhar hmel riau te'n a nia ka va hmuh ni.



Inchhung ah lut leh in mei te chu ka va tuah țha a, thuk chhak a bang ngheng a thingbung chan țhat hmel deuh pahnih intung chu la ve thawrin ka tuah a, a alh pawn ka hrelo, a mut in a khu duh rapthlak mah se a rei hnu ah chuan ling vam duh duh ah ațang ta a, kar loh ah tui pawh chu a lo so a, thingpui bel ah han thit chhawn ve ngial ka tum pawn hmarawdahna ka hre ve mang rih silo.



Tapchhak bulah chuan dingin tih mai tur hrelo chuan chhuar lam chu ka va pan leh ringawt a, chutihlai chuan u Zotei te thawm a lo awm ta a, ka thaw huai mai.


"In mutui thei maw?" nui ver ver a u Zoteii'n a lo tih luh lar lar chuan chawpchilh lutukin ka sa pup pup. Nawi deuh in ka chhang buh nuaih a ni hawt a.

Rang deuh in thil dang sawitur ka ngaihtuah nghal ruai a "PuPuia chu enge a lo an a?" ka tih chuan ka nu in a chanchin chu min hrilh thuai thuai a, an rinai takin nizan pawh an mut țhat thu an sawi ta bawk.



"Thingpui lo siam ka tum a, mah se..." ka tih nai nai chuan Zoteii a lo inrawlh thuai mai. "Lo kal rawh, hmanraw awmna ka hrilh ang che" a ti ta a, thingpuife leh chi bur te, chini bur te chen a min hrilh hnu chuan mo thar en a lo chuangkai an awm țak țak a.




An lo uang lut ham ham viau bawk nen ka sa awp awp reng a, ka sen hler hial in a nia ka rin.




Zoramchhana pawh a lo lut ve nulh a, patling ho in an lo fiam hlut chuan a hmai a uang ve viau mai leh nghal a.



'Mo thar thingpui lum in ang u aw' an tih chhen avangin ka zam ru hle mai a, mo thar hlim hi chuan chet chhiat a awl lutuk an tih kha ka hreru kar a, ka fimkhur ve viau mai.



U Zotei thingpui thlit chhuah sa chu tray ah ka rem lut dem dem a, chawi a ka han inherpui chiah erawh a thlen lai ka hrelo, sir lam ah an tawlh dual a baw hawk in no chu chhuat ah a tla keh ta remrum mai a.



Hamhaih zet in u Zotei chu ka va en kawk kawk a, ka zak lutuk leh hamhaih lutuk a lamah a ti sualtu zawk ang hrim in ka va en ni ber in ka inhria.


Lo nui khur deuh char char pahin "a pawi lo, tuiso khan a buak che em?" a lo ti thuai a, kan inleng te lahin "mo thar an han chetsual khat khat hi chuan tu inah mah an la mo lo tih a chiang a, a ngaihțhat thlak e an tih kha" an lo ti tak nangin ka zak lutuk chu khukral daih ka chak takzet.


Zoramchhana chu lo phei thuai in min kai sawn a, a pawi loh thu a min hnem mawlh mawlh chung pawn ka tawt up up a, awm ve loh daih ka chak lutuk chu ka nu leh pa bul a tlan haw daih mai te ka duh rum rum.


Inleng te bulah min țhutpui a, ka zum dek mai chu mi biak țawng teh an tum a, zawi te te bakin ka chhang ngam lo a, chu chu ka pasal chuan a hrethiam ani mahna, inleng te chu kumin Lo hal hun tur te a sawipui ta daih a.




U Zotei'n thingpui a siam thar a lo sem lai pawn ka intur pawh ka ban ngam ve tawh lo a, zawi sup a"i rilțam ang" Zoramchhana'n a lo tih pawh chuan lu ka thing ringawt, nui suk suk in min ban kep ta tho a.




Inleng te țin fel hnu ah chuan ka nu pawn "i puPuia chu han kan ve rawh u, Mambawih, a hmu chak che a nia aw" a ti ta a, no thlauh keh boruak kha tlem in ka palzam thei ta deuh bawk nen ka hmai pawh a sa lutuk tawh lo.




Zoramchhana chu inthlak turin mut pindan ah a lut a, chutih lai chuan ka pa chuan tapchhak ah chuan zawn nei niawm tak hian rap a thing in hâk lai te chu a khawih che a khawih che leh țhin a.


"Pa, zawn i nei ami?" ka han tih mawi satliah chuan "aa.. ka chem fawng tur kha thuk bulah hian ka hem char e ka ti a, hmuh tur a awm tawh der lo, nimin in thian ho khan an lo dah sawn nge mawni.." a ti ta mai a.


Khai leh!



Kei hian engthil pawi nge ka lo tih hman tak mai le, tukin a ka thing bung tuah kha ka pa sawi chem fawng tur chu ani ngei ngei ang.




Mut pindan lam pan chuan ka kal nghal sawk sawk a, Zoramchhana lo chhuak tur chu nawr let leh rawk rawk in kawngkhar ka nam phui a. "Enge ni, i chesual palh leh em ni?" tia min lo zawh dut dut phei chuan ka țah a chhuak țeuh tawh.




"Zoramchhan, ka nu te bul ah ka haw duh" ti țui a țah chhuak ut ut a ka en chuan a lo nui mai leh nghal a.



"A chhan han sawi phawt la" a tih ngial pawn ka ngawi tlat a, khum tlang ah țhu in ka thaw hak hak reng a, mo thar hlim a han chetsual tak tak hi chuan tlan haw leh mai a chakawm rum rum țhin a nia tia an lo sawi țhin kha an lo dawt lo zia ka hre ve ta a. Awm loh daih ka chak ber.




"Mambawih" ti sup a ka bulah a lo țhut ve chuan ka mittui a tla lek lek tawh, hetiang reng reng a chechhia a, pawi ka khawih reng a nih chuan ka nu leh pa te hian min ning thuai ang tih te ka ngaihtuah a, ka mangang tel ta lek lek bawk.




Ka dar ah lo kuah in a awm ngheng in min pawt hnai a, "sawi rawh le, i sawi loh chuan i hreawm rei mai mai" a lo tih leh sup chuan ka mittui a tla ringawt tawh. "Ihmaw, zingah khan ih.. kha thuk chhak a bang ngheng a thing bung in tung kha i hmu em?" zawite a ka han tih chuan "umm, ka pa in chem fawng a tan a ti a, a hem chan a nih kha" a lo ti a.


Ngatinge min hrilh ve loh le? ka tirilru hnuhnawh a, a sawt tawh der si lo.


"Ih.. ka lo tuah daih a, tunah ka pa in a zawng mek" ți dek a ka ti chiah chu Zoramchhana chu a nui ta hawk hawk a, kei erawh awm ve loh ka chakna a zual sauh sauh thung.



"Chuthil vang mai mai chuan maw min haw san leh i lo chak a" ti a ka khabe ah a lo dawm chuan ka mittui te hial a tla tih a hre leh hnuhnawh a. Thaw huaiin "Mambawih" a ti ta hulh ringawt.




"No ka thlauh keh vek tawh bawk, tun ah.. ih.. thing bung a maw ka tia ka lo tuah ve ringawt a, a nuam pawh ka ti lo" ka tih tak hliam hliam ah chuan ngawi rengin ka mittui chu a lo tuai hul a.



"A pawilo, khatiang chem fawng te chu kan la leh mai dawn a lawm" ti sup supin a awm ah min kuah bet a, eng chen nge mo thar chet chhiat hian min awh ang leh tih ngaihtuah in ka thaw ta hle hle a.



Kan inzui chhuah chuan Zoramchhana'n thing bung emaw ti a a chem fawng zawn zawn chu ka tuah thu ka pa a hrilh ta a.


Ka pa pawh a nui heu mai.



"A pawi hleinem, in pa khan min laksak leh mai dawn a lawm, i pu Puia chu han tlawh rawh u" a ti ta zung zung a, kan kal chhuak chu zingkar ațang a tawngtu tan zah hluah hluahna tham, a lo hmu tu tan nuihpui tlawr tlawr theih thil ka tawng mawlh mawlh tih hria in ka pa te thlenna lam ah min ka hmasakpui ta daih a.




Ka chhungte'n min lo fiam laih laih pawh chuan nuih harsa ka la ti, ka nu in kan nupa karah harsatna a awm emaw tia Ramchhana a zawh tak sek sek ah chuan sawi loh theih ani si lo a, kan pa in a han sawi chiah chu an zavai mai chuan min nuih ta ham ham reng a, ka tum lian bar bar viau mai.




PuPuia te in kan han thlen chuan min lo lawm thiam em em a, chaw ei turin min chelh ta daih leh nghal, ka rin ai takin ka hmu leikang a, thawh hah vangin damdawi in ah an lo lut ve fo tawh avangin kei nen tak pawn kan inhre țha a, a tute lah chuan kawmchhak ah naupang dang nen in Barbie pahin "kan nurse kha apu Ramchhana nupui ani tawh a, kan inchhung tawh bik bik" an han ti ve ta țhin a.




Hetiang a thawnthu kal dan hahdam thlak lutuk hi ka ziak ngailo tih inhre ve tho in ka ring, in hne em? 😭 Thawnthu ka lo ziah tawh a ka thai lansarh vak lo te kha tun țum chu dah langsarin story laimu ah ka hmang tlat a Keimah Abbra tak tak kha a lang thei țhin lo hian ka hria a, chutih rual erawh in plot zo raih leh hahdam tak thawnthu neih ka duh miau sia maww A tawp thlengin min telpui zel tho mai rawh u aw🙊

Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » August 31st, 2021, 5:31 am

Tukțhuan chu Pupuia pawn min kîl pui peih teh mial a. 'Nidang ah chuan a tho kang peih ngai reng reng hleinem, chaw in lo ei chu a va tihzia e' tiin a chenpui te chu a phul hliai reng a, kan nupa a min ngaipawimawh thiam ve lutuk chu keini tan lah a hlimawm.


Chaw ei kham hnu ah erawh khumpui lam ah bawk a insawn a, min la chelh tlat avangin keini nupa pawh thingpui hang in in an khum bulah chuan kan țhu khawmuang ve leh rih a, a titi ve hleithei tawh lova, a han țawng ve deuh chuan harsa ti em em hian a thaw kawk kawk a, a khuh zui nghal bur bur țhin.


"Ka pu, kan tla thla rih ang aw, inleng te pawh kan la neih hmel a, kan awm bo rei lutuk chuan a diklo ang" Zoramchhana'n a tih tak ah chuan a bu ta nghut nghut a.



A tupa chu a hui zauh a, Zoramchhana pawn thingpui no ruak chu bangrel ah hungin a hnaih thuai a, mahse eng mah sawi lo hian a tupa darah chuan a han beng thuk thuk a. Chu tah kei pawh chu min hui ve leh in ka kut chu a hmer deuh vang vang a, 'in hauh ngai suh u aw' rei ngial hnu ah a lo tih deuh hrawih a, kan nupa chu hlim taka awm tur a min chah ve na a nih hmel e.



Mut pindan ațang a kan inzui chhuak chu an mo nu chuan eng emaw hi rawn puan hnuai țat țat a.

"kha hei in inneih ka lawmpui ve na che u a ni mai" a ti a, polythin a Zo Artui eng amawzah tur in fun chu a lo lek chhuak ta mai a.



Lak loh theih ani bawk silo a.
"U Mami chu aww.." ti a za vak lo a nui suk suk in kan pa chuan a ban sak ta a, biang a sa țha duh hat hat viau.




Inrinni a nih avangin naupang school kal lo ho chu huan a thei kung ah an inkhualtelem nasa em em a, keini in lam pan a kal mek chu min hmutu naupang apiang mai chuan "apa Ramchhana runinchhung ah nurse hmelțhai a lawi dawn e.." tih hla ngei mai khan min rawn au zui ta țhin a, han tih vak ngaihna an awm bawk silo nen an nu te tukverh ațang a lo nui hawk hawk te nen chuan "khaw nge in kal a?" "chaw in ei tawh em?"
"Pupuia te in lamah kan ei a, kan haw chiah a nih hi" tih vel in kan inbiak kawi phah ta sek a, nghal hlawm viau mah se kan nui tam ta phian a, a țha lam ah kan ngai zel mai ani ang chu.




In kan thleng thla chu rin lawk ang tak tak in inleng kan lo nei nual a, thingpui lum a chetsual leh mawlh chu ka hlau a ni.




Inleng te chuan thingpui lam lo se tihna rilru te ka pu ut ut hial a. Mahse, 'mo thar thingpui lum i in ang u hmiang' an han tih tak ah chuan Zoramchhana chuan choka lam ah min zui phei ta vut a. Engkim min enpui veka, thingpui fe pawh aman a thlak vek, ka sem tur pawh 'chetsual hlau miah loh in inthlah dul la' a ti sup sup a, kurtai chhawpna nen min zui phei ve bawk a, ka chesual tawh em bik lo e.





Aizawl ațang a kan inneih min hman pui tur a lo kal tam zawk te chu zing dar 10 bawr ah an let thla leh dawn a, kan han inthlah thawm vel chuan naupang a ko khawm chak ngang mai.


Mipa naupang ho chu 'saw mi car ai sawn saw mi car saw a pa zawk' tih vel in an inhnial nak nak bawk a. Patling țhenkhat in 'kan haw hma in sweet vawr ang aw' an han ti chu an bawr khawm laih laih a. Kan hlim tlang hlawm viau mai.




"Mami, i lawina khua chu a nuam bawk a, kan rawn zin zeuh zeuh ang" tiin nupa hlim tak ni zui reng tur leh kan inhmuh leh hma lo chu hrisel tak a awm tur in min chah hlawm a.

Hna nei lai leh zirlai naupangte an nih fur hlawm avangin rei tak han cham chi an ni silo a, an tlan liam meuh chuan lung a lengin khua a har veng veng thei. Ka nu leh pa leh ka cousin zing a tlemte te'n erawh kar thar a haw tur a intintuah in min champui thung a. Khawhar rúnpui tak tak ka la hmachhawn lo hlauh.




Chhunah chuan ka cousin te an lo phei a. Ramchhana chhung te lam a hmeichhe naupang fel tawh deuh deuh te pawh an lo kal vek a, nileng chuan ka thuamhnaw rem fel in kan buai ani hawt a, a khat tawk a lo chuangkai an awm zel bawk si nen thingpui pawh ka lum hnem mawlh mawlh viau e. Lenna tur dang vak hre bik hek lo ka nu leh pa te pawh an lo leng phei a, Zoramchhana nu leh pa te nen an inkawm tam phah a, nakin a kan țhat tlan zel zawkna tur pawh a ni ang, kan chhungte lam ve ve inpawhna hi han țha tel em em se nupa nun pawh a nghet zual in ka ring.


U Zotei sawi lawk ang chiah in Zoramchhana pheikhawk bawm siam, vernish hnawih tur a dawr ah a dah phei chu a lam theih tawh thu an lo sawi ta a.


An kal chhuah dawn chuan, " Mambawih, i u Ngaihsaka nen kan va zawn lawk ang chu, ka tello a awm i hreh lo tiraw?" tiin min rawn ve ngial a.


Awm ve dangte chuan min nuih dun nasa ta mai.

"va kal san ru.. ngahnge maw i tello a awm chu a hreh bik ngawt ang, awm ve dang kan tam em hi" a patea fanu u Zoteii nen a inang zet tleirawlte chuan a ti let ta a.


Zoramchhana pawn engmah a sawi tawh biklo, nui ruh ruh in a kal chhuak ve ta mai a, a thuamhnaw vel ka en fel sak lai chuan Jen-i'n min lo khawih pui a.


Thingtlang tlangval dangte ang bawk in Zoramchhana chuan thuamhnaw a nei tam biklo, a ta tur a jeans kekawr leh tshirt tih vel ka ken tel sak chu ka rem lut a, Zoramchhana thuamhnaw zingah branded zawng ang hrim a Jen-i'n a lo melh kual ve sek chu ka run kher mai.

"Ka thuamhnaw kha lo va phawrh chhuak rawh" ti hlak a ka melh kha kha chuan nui tet tet in a kal sawn ve mai bawk.


Zoramchhana thuamhhaw rem fel zo a an bul ah ka va țhut ve leh hnu chuan "a duat che em?" Apuitei'n a lo ti deuh thawr a.

Hmeichhe naupang zual deuh lah an lo lai ve ringawt bawk.

A chhungte lam an ni a, an unaupa in min duat țhin zia chu thup a țul pawhin ka hre lo.


" duat tehreng e" nui chung a ka tih let chuan a hlim hmel kher mai.



"Ka ring reng a, ihmaw, u Ramchhana hi chu a zaidam si, chhungkhat a naupang awm zawng zawng pawn amah hi kan ngaina ber, ram a kal chang pawn an chhungkuaah ei duh tur an awm miah lo chung pawn khawkherh te, theichhung sen tih vel te hi a lo ak haw țeuh a, an in a va leng hmasa apiang te hi a lo hawn tir țeuh țeuh zel, tun thleng hian naupang zual deuh te chuan Christmas thawmhnaw leina tur an la dil ziah a sin" ti siam siam in ka thuamhnaw chu a rem lut ve zel a.




Engtin nge hnathawh nei lo chung pawn naupang te chu an Christmas thuamhnaw tur a lei sak thei leh tih chu ka ngaihtuah rauh rauh a.



"u Ramchhana chuan pawisa a va ngah awm em em?" Jen-i'n a ti zeuh a, hmeichhe naupang te chuan uar deuh hian "buh a thar hnem thei em alawm, kum khat ah hian țin zali te a thar țhin a, a hralh țeuh zel a lawm" an lo ti ve nak nak a.


Apuiitei chu an zing a upa deuh ber hi a ni a, zawhna nei hmel zet a ka va melh chuan "an sawi dik a lawm, kan khua ah Buh thar hnem ber a ni ziah, an chhungkua hi han en la, mi pali lek an ni a, an ei a tlem si, chhekin ah an kum khat tla tur bak aia tam deuh an dah a, a dang zawng chu a hralh vek zel" a ti a.


"Keimah pawh apa a rui peih lutuk a, ni za inhlawhna kan lak ve pawh zu man ah a hmang zo zel a, admission tihna tur pawh kan nei tawh silo a, apa Ramchhana hian min admit a lawm" pakhat in a lo tih lai chuan zawite in Apuitei chuan "kan lam hla ve deuh tawh fanu a ni a, lehkha a thiam thei reuh sia, apa a che ho thei lutuk a, u Zotei leh u Ramchhana hian an unau lehkha zirna tur chu an buaipui sak zel" a lo ti leh sar sar a.



Ka ngawi ta rauh rauh mai, sawrkar hna thawk a thlatin sum lakluh nei zawk te pawn midang tan chang nilo, chhungkhat te tan a luan chhuah pawh kan harsat țhin tehlul nen a, ani ram hnathawk zawk in midang a țanpui fo tih han hriat mawlh mawlh tak ah chuan ka pasal chu ka ngaisang thar ta kher mai.


A hnung zui zawh pawh ka tum ta viau a, pasal chhungte lama insen nasat avang a lungawi lo ringawt țhin nupui ang te ni ve ngai lo tur chuan ka tumruh thar sauh sauh a.

U Ngaihsaka nen an lo let leh chuan pindan ah an lo inzawn lut nghal a.

"khawi ah nge kan hun ang?" tiin min rawn leh thlap bawk. Lawm takin keiin ka hun duhna ka lo hrilh thuai thuai a, pheikhawk vel kan inrem luh leh tak ah chuan kan felfai thawkhat ta viau mai.



Min lo inremfelpui tu tleirawl ho chu ka thuamhnaw țhenkhat ka pe a, an lawm ngang mai a.

Ka insiam khan ka insiam am hrim hrim a, pawnfen chhing leh party na vel a ka hak țhin nula thuamhnaw deuh tak te kha ka keng tel a, helam a sem tur a ka rilruk hrim hrim kha ani sa bawk.

"AuMambawih, ihmaw, nakin ah pawh inchhuat ka lo nawh sak țhin che ang a, thuamhnaw min pe zel dawn nia" an han tih chuan u Zoteii nuih a lo za ngang mai a.


"Hawt hawt a che u, kan chhuat nawt tur chuan ka duh uluk a sin, puan huh a hruk puat puat kha ka rem ti miah lo a nia" a lo ti ve a, uar takin vawi hnih nawh nawn pawh an pawi tih loh thu an han sawi ve leh a, kan nui ham ham reng mai.


Zoramchhana ni in "kha, Mambawih, kid tirkawi tur i huikhawm der tawh a ni maw?" a lo tih ve leh phei chuan ka nui ka nui ringawt. ka pasal lam hnai naupangte nen kan inngaina hma lutuk chu a nuam ka ti riau thung

Tlailam a a han inbual tur chuan "ka hnung min lo nawh rawh" a ti sup a, kawr ha lo in towel chu a nghawng ah a bat a, keipawh ka che nasa ve lutuk a, ka ban deuh chuap a.


Kan nupa mut pindan ațang a kan inzui chhuak chu u Zotei'n min lo au thuai a
"Mambawih, Mama inbual chhung khan keini'n dawr kan lo va kal dawn ami?" a lo tih chuan ka chhan hma hmain pakhat pui chuan "ka hnung min nawh sak dawn" a lo ti hmiah.

"Khai leh! Mahni pawn kan inbual thei tawh dawn nange?" a nau chuan uang deuh hian a lo ti ta reng a.


Nuam ka tilo bawk siin "nangmah in lo va inbual mai rawh, dawr kal a ngaih chu" ti sar sar in bualin lam ah nawr phei ka tum ngial pawh chuan "nakin ah kan pahnih in dawr chu kan kal dawn nia, ni tlak tak tak hma a inbual ka duh" a ti deuh țô a.

Tapchhak a mei lum ai-a ka nu leh pa te țhu pawh an țhen an țhen ve mai.

Bualin chhung kan lut chiah erawh a kut a hlei em em a, choka bang nen a insi deuh reng a nih avang chuan ka melh deuh kha kha țhin a, a ngaipawimawh duh der silo.
"I hnung nawt tur a min hruai luh ve chhan chu hei vang lek hi maw?" ka tih lahin " 'vang lek' a ni lo e" a ti mauh mai si a. Han tih vak ngaihna pawh ka hrelo.


Thawm dim țulzet sia ka taksa ah thuneitu a nih zia a lantir lai chuan nghet deuh in a nghawng ah ka kuah bet a, thawm siam lo tur a ka inthunun nasat lutuk alam ah a dar leh hnungzang tihrawl vel chu ka ham pilh phung a, ka nghawng leh hnute bu vel pawh a duk ve thluah tho.


A taksa ah sabon hnawih a ka han nawh vel lai te chuan nghal zet hian ka hampilhna vel chu a lo inthlek let vut vut zel a, "awm țha hle hle rawh" ka han tih lahin a nui suk suk duh lek leh nghal.

"Nuam ti viau suh aw, ka tihpui duh tawh miah lo ang che" ka ti ta hlar erawh a nuih a za ta viau ni tur a ni, a lo inher thut a, nuihza insum hmai sen țeuh hian "tum lui tlat ila, i dawh duh miah lo ang maw?" ti paha min melhna mitmeng tawrhharsa zet mawlh mai chu!! Ka awm chhung a nghing dawt hial in ka hre mai.



Laih luat avang in a mitah chuan melh pawh ka melh let ngam lo, "inher rawh, dawr kal te kan la ngaih kha" ka ti ta ringawt a.

A ni lah a nghal thar ngang mai, a taksa phuan kai ah chuan min man bet thut a, kei a inring bawk si lo chu ka khek ta chiam a, nui huk huk in tui lum chu a suak a, min han leih ve ta thawr pek a.

"Zoramchhan, ka thuamhnaw pawh ka ken luh ve loh hi" ka ti teng tung tawh.

"Ka zawhna che kha min chhang phawt rawh" ti sup in ka khabe ah alo dawm a, a nui hmel pa lutuk leh duhkhawp hmu tih hriat zet a min melhna avang chuan in ka sa ap ap a.

"Khatiang te chu țawngkâ a chhanna inpek chi pawh a nilo e aw" ka tih leh zet chuan hnehtu chanchang inti fe in "kan ti deuh tluk tluk ang" a la ti zui.


"I thuamhaw kha hlip rawh, i inthlakna tur ka va lak ang che" tiin min man behna chu a thlah ta a, a intleuh zui thuak thuak a. Towel veng pah chuan min lo min en in a khi leh suk suk țhin a, ka lai bawk si nen ka ding zum reng ringawt a.

"Mambawih, a huh i hak reng kha chuan hritlang i kai mai ang" a lo tih leh tak dut ah chuan keipawh chu ka inphelh țha leh a, ka taksa en a a nui leh ruh ruh zel chu "nupui neih nuam tipa" ka tih khum leh hram pek a.

"i ti ve tho lo em ni?" nghal zet in a ti duh lek leh nghal.

Bualin ațang chuan towel chiah veng a chhuah a tum ta mai a. A hnungzang leh dar a ka hamna chu a lang chiang ngang mai si nen rang deuh hian a ban ah ka man a.

" tikhan i chhuak ringawt dawn a mi?" hlauthawng ru deuh a ka tih laiin "thuamhnaw ka keng lut hleinem" a lo ti sam then a, a va mangan thlak tak!


"I hnungzang kha" zawite in ka han ti a, a dar vel chu a thlek thuak a, chutah lungawi hmel deuh a min nuih suk in "ka nupui hnuhma a ni ve mai a" tiin ka tukhum sam ah alo țham a, dam dap a min fawh vang vang hnu chuan "ka reilo ang" ti sup in a kal chhuak a. Kawngkhar chu pawt phui vat in inchhung lam thawm chu ka ngaithla kar a.


Reilote hnu ah ka thuamhnaw hakthlak tur nen a a lo let chu zawhna mitmeng zet hian ka lo en a. "Tv an en vek a lawm" a lo ti ta dut a, ka thaw huai mai.


Tlai lam ah chuan chaw ei a sawm tu kan nei a, tukin lamah kan ei chhuak ngawt tawh si a, ka inthlahrung khawp mai. Mahse ka pa in "keni te chu chhungkua kan ni a, dam chhung a chaw hlui kil ho tawh tur a lawm kan nih, inneihna ngaihlua a sawm tu che u in neih chhung chuan in kal zel ang chu le" a ti ta then mai a.


U Dteii te in ah kan lut kawi a, chaw eina tur kan nei tih a hriat rual chuan a nghal leh pek viau.

"Mate, in pa te chu maw a chempui chhe lar ve hrep a, kar hnih thum tal chu chaw ei a sawm tu che u an awm dawt zut mai ang" a ti a.


U Diteii sawi lawk ang tak tak chuan chaw ei a sawm tu kan nei chho reng a, thawhțan ah ka nu te leh midang chu an haw thla a, thawnțan ni vek chuan pa Rammawia ho in Zoramchhana te chu Tuivai ah zankhat riak in an kal a, zan ah lenkhang an zar a, a tukzing ah sut leh nghal in sangha țha hnem zet an lo haw pui a, in ah an rep a, a tuk ah u Jo-a te pawh chu sangha rep nen an haw thla ve leh ta a, Zoramchhana te zan khat riah chhung tih loh chu kar 2 chhung chaw eiin kan kal chhuak a tih theih ang.




💓


Tlai khat chu u Zotei nen eirawng kan bawl dun a, ka chetchhiat erawh a reh fel hlei thei lo, u Zotei'n thingpui no a sil chang a keh miah silo te hi ka han sil ve hian mak lutuk in no beng te hi a lo thlawn hawk zel a.


Ka nu leh pa lahin ka hrilhhai lutuk talbuai vek țhin chu an lawm em em mai zel leh nghal.




U Zotei nen kan chawhmeh siam reng reng chu kan siam am deuh hian ka hre tlat a. Ka zawt dawt hreh ve tumhrang bawk si, a hnuah chuan a bai chhuan mek chu bel dang ah a suak chhuak țhen ta reng a, mak ti deuh a ka en chu a min nuih ta var var a.


"Kan tih țhin dan a nih hi, zinglamah eirawngbawl ngailo turin tlai lam ah hian kan bawl am a, tihian kan dah țha a, a tuk zingah chhuan lum leh tawp a ni tawh mai" ka lo rin lawk loh deuh hian a ti ta khauh.


"Zing thawh ka hrelo țhin lutuk a.." ti halh pah a min lo nuih chuan keipawh ka lo nui ve hak tho.



"Nangni pawh zing thawh hma a ngai lo a nia aw, chaw ei in inchhuak nitin a talangin engmah kan la inhrilhfiah hman lo a, ka nu leh pa te erawh an upa ve tawh a, zanah an mu hma a zing dar 4:30 bawr ah hi chuan an pang a kham tawh avang te in an tho chhuak mai zel a. Zan mut hma in kettle lian a tui khat sa hi thuk ah kan chhuan sak a, chu chu mei nun in an lo chhung so nghal mai zel. An thawm avang ngawt te khan thawh chhuah i lo tum ve ang e, a țul miah lo a nia, tihian tlai lamah zing a mi tur kan bawl lawk vek zel ang a, zing dar 6:30- 7 am ah thawh kha a tawk chiah zawk, i lo inthlahrung ang e" tiin an chhungkaw kalphung chu min hrilhfiah chhunzawm mial mial a.



Ka lawi luh ni ațangin inchhung khur inrelbawl dan inhrilhna hman awm lo lekin chaw ei in kan kal chhuak țhin si a, chutia an lo inrelbawl dan țhin a sawi tak ah chuan zawh belh tur pawh ka nei nual a.


Ka chhungte chu mi a zawng a khirhlo leh hrawn hreawm lo ber te an ni hial ang. An ngawichawi hlawm si, u Zotei hi a țawng duh ber chu ani a, kei ka chet chhiat țhin em avangin a nuih erawh kan nui tlang nasa thung.


"In pa Vawk in kilh phui pawh chu a in tifel zo dawn tawh em le?" a tih takah chuan hmarcha rawt fawng chu ka sil sawk sawk a.

"Chaw hi ei mai ila, inleng te kan nei leh awm si a" a tih zawm a, rang deuh in kawmchar ah chuan ka chhuak phei ve a, Anțam huan a Anțam lo duah hluah mai chu han chhuah chiah hian awm a ti nuam veng veng zel.


Vawkin sa a lo buai mek ka pasal chu " i zo dawn tawh em?" tia ka au lauh chuan a hawi chhuak vut a, kan inneih hnu hian a lang patling nghal bik riau hian ka hre țhin.



"Zo țep, chaw ei in duh tawh ami?" a lo ti let ve dut a, " uumm, i zawh hun hunah kan ei hman a ni mai" ti lang langin ka pan phei a. Serthlum tang rah lo la awm ve far te chu lo thei ila chuan an thlum tui ngawt in ka ring.


Vawk In bang âwng deuh laiah chuan thingtuai chu awlsam tak hian a kilh bet zung zung a, amah hi a pa lian in a chak bawk a, hna a thawh ve pawn awlsam lutuk in a zo bik zung zung te hian a lang bik a. A bulah hi chuan eng thilmah hi a huphurhawm zo lo te'n a ni ka hriat hial zawk ni.


"Ka zo e, hetihi chuan Vawk note pawh a chhuak thei tawh lo ang" ti hluai pah in a lo ding mar ve ta vut a.

"A la tê dawn si, a in tur hi lian a ti awm e" ti nang ngang a a bulah ka din hnaih chuan nui sukin ka darah a lo kuah vei thuk a.

"A chanve ah hian kan pindan sak rih mai dawn em ni?" ti sup a min en chuan ka nui ta ringawt.

"Lut phawt ang, chaw ei kan peih tawh" tih leh Perek vel awmna thir bur hlui tawh deuh chu ban ka rual nghal a, Zoramchhana pawn a kut bal chu a beng fai thuk thuk in tuboh leh thir-kawm chu a ban ve ta vut.


Chhung țawngțai inkawmna kan neih zawh rual chuan u Zotei chaw ei siam chu ka pui nghal thuai thuai a, zanin tlai hi ka lawi luh hnu a chhungkaw kim a kan chaw kil hona hmasa ber tur a ni bawk

Chawhnu lam khan kan inneih thlalak te pawh an lo tichhuak ve ta a, chhungkua in kan hlimpui viau a nih tak kha.

"Enge kan hmeh dawn a?" Chawhmeh bel lo bih duk duk pah a a lo tih chuan "Tuivai ațang a in Sangha lo hawn kha" ka ti var.

A bu ta nghut a, kut a sil lai chuan chaw tal lo khawrh fel ve tumin chaw bel chhin chu ka hawng a, buhtlei vit a ka han khawrh chhuak tur chiah erawh buhtlei chu a bung leh ta hmawk mai a!


Ka chhungte dangin engthil mah an lo sawi hma hma chuan ring lutuk hian "ka tichhe leh tawh" ka ti nghal tung a, buhtlei fawng lam ka lek kang deuh vu chu ka pa in min lo nuih ta hawk hawk bawk.


"A pawi lo, kan hmang rei tawh em a a chhiat a hun tawh a nih kha" ka nu'n a lo ti thuai tak nangin ka zak lutuk chu ka sa hut hut.


"Mama, chhuar sangah khan buhtlei dang kan dah kha, han ban nghal mai teh" a tih zawm a, zak bawk si inthlahrung zet a Zoramchhana ka melh chuan Buhtlei zawngin chhuar sang a lo hawng kual dun dun a.

Chhungkaw kim a chaw ei tlanna hmasa ber tur a buhtlei han tih bung leh ringawt bawk pawh chu! Chaw puar in ka ei ngam pawh ka ring lo..




Chaw ei kham hnu reilo te ah ka nu chu zial thleng nen tv bul ah a țhu a, meizial ka zial thiam ve hlawh loh avangin ka țawnpui ve țhin.

"Nu, i zial khawl hnem tawh em" ti pahin țawn pui tur a a bul ah ka țhu fel chiah chu kan nupa mut pindan ațanga lo chhuak hlawh in "Mambawih, i nu te in ah va leng phei lawk ang" a lo dut a.
"i u Ngaisaka va hmu lawk ang" a ti leh tak ah chuan ka nu pawn "va kal rawh u" a lo ti ve thuai a.


A sawi lawk bawk silo nen u Ngaihsaka a hmuh duh chhan tur awm ka hre mai lo. Kan inzui chhuak chu kawt ah u Zoteii bialpa nen kan in tawk a. A lo leng zantin a, kei nen pawh kan inhre ve viau tawh.


"In leng chhuak dawn mi?" a lo tih chuan "Ngaihsaka te in ah kan va kal lawk ang e, lo va țhu rawh" a ti mai a.


Thimhlim dar7 bawr vel a ni a, naupang pawnto thawn pawh ral hla deuh tak ami hriat tur a awm țan viai viai a, mi bathlar ah tlangval țhenkhat țhu khawm chuan phone a hla play in an sakpui bawk a, naupang pawnto țhenkhat pawh chu an nu te'n "i lo haw nghal loh chuan hmawlh nen ka lo kal dawn a nia" tiin ral aţang chuan an in vau nasa hlawm mai a, motor horn ri hriat tur awm ve lo mah se kawtual boruak erawh a reh bik lo.



"u Ngaihsaka nen chuan eng nge tih intum a?" ka ti deuh sa sa a, a ban ah ka kuah rual chuan a zak a lo kau deuh a, nghet deuh in a ban bulah zawk ka han kuah țha a.


"Dawr kal chhuanlam a nih kha" a rawn ti thut ah chuan ka phu deuh dawr a, mak tizet a ka han en chho chuan a ban lehlam chu lo lek chuak in ka hnar ah a lo piai zeuh a, " zanriah kha puarna khawp i ei reng reng hleinem" zawi ruiha ti paha min en vung vung chuan ka buhtlei tih bun kha ka hrechhuak leh hnuhnawh, zah vangin ka sa leh hut hut nangin ka pasal in ka chaw ei tamlo a lo hre ru khiau mai chuan min hneh takzet.

"I lo hrereng a maw?" zawite a ka tihlaiin alo thaw huai thung a, a hmel muk ruih ah leh mitmeng dam dup ah chuan min lainatna ka chhiar sak thiam a, ka rilru no lo chhuak in ka hnuk a ulh lek lek hial leh nghal.


"Ngatinge ka chetchhiat theih em em le?" zawite in ka ti tham ta chhal a, Zoramchhana chuan zaidam deuh hian " a reh ve vat mai ang, inchhung ah ila che tam rih lo mai mai alawm" a lo ti let thuai a.

Ka țawng leh zel chuan ka hnuk a ulh dawn tlat a ka hriat avangin ka ngawi ta reng zawk a.



Ka nu te kawmthlang a kan kal phei lai chuan Lalati te unau țhutthleng a lawn chuan in min lo hmu fuh a.

"Anite, Apa Ramchhan khawiah nge in kal dawn?" a lo ti lauh lauh a

"Dawr ah thil kan lei dawn" ka tih chuan rang tawk hian "keipawn ka duh ve" an lo ti nghal chul mai.

An pa Ramchhana chuan nui huk huk in kan hawn sak ve tur thu a hrilh ta a. Dawr kan thlen chuan cake leh Amul cool chu a la am deuh a, chips vel pawh min lak tel sak nual bawk.



Dawr neitunu in "Rasgula te kha induh tel lo a mi?" a lo tih zuk chuan kan nui ta ringawt. Tute mai pawh hian Zoramchhana hi an nel si a, fiam lah kan hlawh nasat phah.




Kan let leh lamah chuan Jenny leh tlangval pakhat rawn inzui hi kan tawk ta a, Jenny chuan min be nghal seu seu a, an țhian damlo kan tur a chhuak an nih thu te chu a sawi zung zung a.


Kan inkalsan fel hnu chuan ka bula kal pa chu ka thlek ang hehaw a. "Eng nge" ti ang hrim a min en let rual chuan "eng amaw che det chu a awm lo maw?" nui duh hlek lo in ka ti ta a.


"Eng ah chuan?" a ti thum dut a,"Jenny i hmuh rual khan che a awm e, i rim ve țhin sia" ka lo ti leh a. A ngaihdan nilo hmel zet chu!! Hmui a chip ta hmuk a, keilah chuan nui duh miah loin ka han nawk deuh tal tal a.

"Mawh... i hmuh thut khan țek chhak ang te hi a awm em?" ka ti ta sek sek a, rum nghut nghutin ka nekna ațang chuan a awm hla hrut hruta, ka nuih chu a za ngang mai.


"Engmah a awm loh chuan sawi țha ve mai la" ti paha a kutphah ah ka han chelh tur chu ka kut a lo vai per nawlh a nih chu.

"Ehiau, awm a la awm chiang lutuk" ka tih vin der tak hlar ah chuan "mambawih, i ho emai, kal teh ang" a lo dut dut a, keilah mi kawt zawlah ka ding lui deuh tlat a, a tawp a tawp ah chuan "engtin mah ka awm lo, melh pawh ka melh miah loh kha" a rawn ti ta bul bul, nuihza insum zet chuan a bulah chuan ka han kal țha ve leh mai a.



Mahse, kawnglak ah chuan current a thim ta daih a, in țhenkhat ațang chuan "aw current, vanlalchherent" tia naupang zai thawm hriat tur a awm nghal zat bawk.


Khawlai dung chu a thim em avang in nghet deuh in ka kut min hum sak a, ka nu te in ah pawh kan peng chho tak nangin kan țhu reilo, Lalati te unau ta tur a nepnawi kan lei chu pe in kan chhuah san leh nghal a.




In kan thlen chuan Ka nu leh pa te chu an lo mu lut leh der tawh, kan ei tur hawn țhenkhat chu u Zoteii ka sem ve a, a bialpa pawh khan eitur a lo ken sak ve tho a lo ni a, kan thil hawn erawh a la tam duh ta lo.


Ramchhana chu tapchhak lam ah a han chho vut a, rapchung sang chu a han ban dun dun a. "ka nu balhla um pawh a hmin tawh a nih hi" tipahin Balhla hmin thlar lian țha zet chu Buara ațangin a lo la chhuk hlawl a.

"Mate, a ei theih tawh a nia aw, in ei țhat duh dawn loh chuan Apuitei te unau kha sem ve ula" a tih zawm a, Balhla hmin thlar lian deuh nen kan nupa mut pindan a pan tak daih chuan rang deuh in ka zui lut ve a.


Bati pakhat hi a lo chhi a, pindan chhung chu a eng vak lo. A thuamhnaw hak lai a lo hlih(p) țhen sawt sawt avang chuan "kan mu nghal dawn a mi?" ka ti ang hehaw a

"Mut mai loh in, current lah a awm țha duh der si lo" a ti deuh hluk. Kei erawh ka nui tet tet thung. Mut hlan a nghak hlelthei hnup hnup a nia.



Khum bul dawhkan chung ah Balhla thlar chu a lo dah vei ngut a, inphihfai hmasa tur a ka chhuah san dawn pawh chuan zan dang anglo takin bawlhhlawh bawm pawh khum bul lawk ah a hung hnai ruk ruk. Țawng duah silo a min ngaihsakna a ti lang țhin chuan min hneh a ni. Min hneh takzet.

Ka hmai phihna kut hit zeta a awm ruak kung mai ka khawih sak chuan alo phun hluk a, ka ban rek ah lo man in a bul ah chuan min pawt kai nghal a, insiam țha sat sat in a saisir zawng a a lo mu mek chu hmachhawn ve in a awm zawn ah chuan ka tawm kak a.

"Pangtilum ngahpa, min lo khan tel rawh" tia ka fiam chYan nui che dawtin abawp lian pui chuan min kherh bet ve leh mai a, chutah ka sam chu hui sawn hliau hliau in ka beng ah alo zep a.

"I rilțam leh chuan balhla kha ei rawh aw" min duat zia hai theih miah loh a a lo tih dam thlup.

" kan in hi a hreawm i ti em?" zawi ruih a a lo tih leh chuan "aih" rang deuh in ka ti let a.

Thaw huai in ka nghawng hnuai ah a ban pakhat lo rawlh lut in nghet em em in a awm ah chuan min kuah bet ta hlu hlu a. Kawr a hak loh avangin a awm tisa lawng lum vung vung chu ka hmui in ka nawr a, a rim mipa zet chu hip lut in thawk ka la hle hle a.



Hetiang thil hi kan sawi dun ngailo hrim hrim a, engti tih a chu zawhna chu min zawt ta mai nge maw a ni ang le?



Nakin deuh ah chhuan "hreawm i tih kan hlau țhin a" a lo ti leh a "hreawm ka tilo.." ka lo ti nghal vat a, a khabe chuan ka chhip lo nawr in zawite in a nui hak bawk.


"A hreawm ka tilo, ka chechhe rei lutuk hi ka in ngei zawk" ka ti leh mial mial a, min kuahna a ti ngheh sauh sauh avangin tal hran pawh ka tum biklo.

Zawite te in eng eng amaw sawiin kan nui dun leh hak zel a. Nakin deuh ah chuan thutak deuh zawk hian "kan inneih hmaa kan tlin lohna te tling a kan inpawm țhîn kha nupa kan nih hnuah kan tihbo palh mai chuan a uihawm dawn em a, chuvang chuan inhmangaih dan kan thiam ang chiah in inhauh thiam dan kan zir tel a ngai dawn a nia aw" a lo ti sup sup.
A țawngkâ chhuak chu inngaihniam ni siloin a hawihawm in a puitling ka ti a sin aw.


"I hria tiraw, Mambawih" ti leh a ka chalah a lo fawh chuan "ummm" mut chhuak deuh a tiin a khabe ruh kual chu ka han dap sak rak rak a.

"I mut a chhuak a nih kha, muhil tawh rawh" min kuahna chu ti nghet sauh in a kê chuan puan sin chu a siam rem phah a, kei erawh a ang chhung chawlhahdamna nuam zet ah chuan chechang țha peih lo in ka bei hle hle tawh.


Ka pasal nihphung nghet cherchawrh hi chu tuman an khawih buai thei in ka ring lo. A phone te hi a han ri khat mai mai khawp a, ngaih hi a țha veng veng zel mai a sin, social media phei chu whatsapp chiah a khawih a, chu pawh net pack a thun khat rapthlak.


Number pakhat ațang hian call a dawng ziah zel a, u Dtei khan min hrilh tawh avangin Mizoram police dept lam an ni tih ka hrethiam a, a chang chuan han chhan ve mai țum te a nei a, a chang erawh chuan ring tluk tluk mah se melh pawh a melh chhin duh ngai der lo.



Amah a inpeih a; min sawipui a nih loh chuan a hun kal tawh kaihnawih reng reng chu sawipui ka tum biklo. Ani pawn ka hun kal tawh a chhui zui lo a, tun a ka nihna ang ang a min pawm thlap avangin keipawn a sulhnu hriat thawi chu nei mah ila ka rilru tibuaitu ah hman ka tum ngailo.









Febuary thla ral lek lek tawh ah chuan kum khat chhung a ruah hmasa ber a rawn baw tlawr tlawr a, nu leh pa te an lawm teh a sin. Țhuangruah mizo te chuan kan ti mai a, Țhuangruah in chhap a delh hian lei a țha sawt a, Lo neitu te tan chuan kumtluan a an chhungkaw khawsak harsat leh harsat loh hril tu a ni hial thei bawk.



March thla kan han chuangkai a, kan inneih ațangin thla a liam ve tawh, keiin ka hna ka zawm leh tawh a, kan pa pawh nitin school building thar tur sakna ah a inhlawh țhin a.

Ka chhungte lam nen pawn nitin deuh thaw in kan inbia a, ka nu min ngaihtuah lutuk in ka nawmsakna tur ni a a hriat sum leh pai hmang a min vur a tum urhsun țhin lutuk erawh ninawm tih chang ka nei lek lek țhin a.


U Nathan-a te pawh phai ah kal in IVF hmangin u Latei'n naupai a tum a, chung vel buaipui chuan kar eng amaw zat khulamah an cham a ngai rih dawn bawk, an ni nupa tih loh midang pawh an dam tlan lai tak ani e.

Hetah, ka nu u, PuPuia erawh kha chu țhat lam pan thei silo in a bawrhsawm tawh viau a, ka nu te nen kan in leh zan karthlak țhin a. Zoramchhana hi a ngai ve rauh em em a, kan han lan tawh hi chuan reilo te chhung tal țhut mut a tum ve hram hram zel.


Dinpuia kha hetah a thawk tawh lo a, chutiang bawk in Ahmai nen khan an innei lo, sawn man a pe a, neih erawh a tum lo bur ani awm a, tun ah pawh hian Mizoram ah awm lo in vai ram lam ah hospital be kual in thawhna tur a zawng mek tih ka nu nen kan inbiak țum in min hrilh a. A mamawhphurna la ngam lo in a tlanchhia ah kei chuan ka ngai nghet hmak, a mize dawizep leh nghet lo lutuk kha a hma zawng khan engtin nge ka lo hriatthiam loh țhin tiin ka inzawh let chang a awm hial țhin.


Ahmai erawh a lainatawm takzet. A fa hmasa kha a la upa vak bik silo a, hetia pasal lo a nau a pai leh ta mai chu a tawmim phah viau a, khawlai ah hmuh tur pawh a awm ngailo. In checkup tur takngial pawn damdawi in a lo tlawh ngai silo a, rilru chu a luah ve leh thut thut zel.









Palai a lo tirh hmaa a patea te in ah chaw ka ei țum khan khum a kan in man bet kha inchung lam ah chho lawk loin kan rial ta reng a. Tah khan "kan inneih hun ah pawh ka hna ngai ka la thawk reng ang aw?'" tiin tim deuh takin ka dil a.


Min chhang let mai lo a ka mitah tak min en tak reng ah chuan "nurse nih ka chak avangin ka tleirawl hun țha zawng zawng inzir nan ka hmang ral a, bansan leh ringawt tur a tan chuan ka ui a lawm" pangchang deuh in ka ti leh nghar nghar a.

A tawp a a tawp ah chuan " a țha a lawm" a ti ta hluk a.

Hlim zet a ka khek tur chu a mitmeng thunei zet khan min khap bet rang leh viau si a nih kha.

"Hlawh i lak hun ah pawh a țul i tih zat ka nu leh pa te kut ah i dah ang a, a bak chu i ac ah i dah țha ang, mamawh leh sum hmanna tur thil i neih reng rengin keimah min hrilh tur a ni" a ti ta nghut nghut a.


Keilah chuan phur zet hian "mamawh ah te chuan ka hlawh chu kan hmang ang chu" ka han tih chuan lu a thing nghut a. "Ka nupui mamawh leina tur sum chu ka nei ve a lawm" a ti ta hmiah, han zawh zui chiam ka chak nangin ka ngawi ta zawk kha a ni a.




Kan inneih ațang erawh ama pawisa lo khawl ve ang ang chu ka kut ah a dah vek a. "Mamawh i neih chuan hemi sum zel hi hmang ang che" tiin min chah uluk viau bawk a nih kha.



Ka hna bang inchhung ka lut chu kei aiin u Zoteii a lo thleng hmasa a, min lo be sawm nghal sawk sawk a, damdawi in aţang a ka thuamhnaw hak haw chu bualin ah luhpui a ka inbual fel hnu ah eirawng kan bawl dun leh a.


Pahnih a han chet dun chuan thil tih a sawt in keipawh ka che zei ve tawh viau a, kar lo ah kan inbawl peih a.

"Ka nu te an lo la haw chuang lo bawk a, i u hi a lo haw dawn tawh ang, thuilo te thleng saw ka lo va hmuak ang aw" ka tih chuan a nui har har a.



Lalati'n ka kalna tur a hriat rual in min ngen nghal tlat a, anu lah chuan "home work pawh ila tilo, zan ah i nitei te bul ah lehkha zir tur in ka dah mai ang che" a ti tak nangin pakhat lah chu apa Ramchhana hmuhna ah a kal chak miau sia. Anu ang hlak hlak ri pawh chu a thengthawng ah a thawk pha der lo.



Dawr kawn kan thlen hnu lawk ah Zoramchhana te pawh an lo bang a. Nisa hnuai a hnathawk tih hriat deuh in a thlan huh hluam a.



Lalati nen min han hmu thut chu a pa zet hian a kiai suk a, kan lam pan a a lo phei lai chuan hahdam suai suai hmel pu chung hian "i chau em?" a ti chhuak hmasa ber, ka zawh tur awm tak a ni sia.


"Chau lo e, nangni in hah em?" ka han ti a, lu thing nghut in Lalati biang ah chuan a piai sak a, a iptepui ah lai ka chhawk sak chuan engmah sawi lo mah se a mitmeng a lungawina lo de sawr sawr chu ka hmu sak reng a.


Lalati chu kan chhawm haw leh a, ani lah naupang harh vang tih tak ah mi huan pal hungnaah te chuan a lawn tak ang țawi țawi a, "lalremruat, an hau ang che" vin hluk a tiin apa Ramchhana'n a han pawm deuh nawlh te chuan nuam a ti ting mai si.

Nghal tih hmel takin a melh khu khu ta țhin a.


VC information center lam ațangin Lo hal tur thu an puang dum dum a, ni 15 hma a hal hman vek tur an tih avangin mei lam sial in tlangval leh patling te chu ram lam ah an liam sup sup a.


Zoramchhan pawn a inhlawhna chu chawlh san rih in Lo hal ni tur a an tuk ni a lo thlen chuan ram lam a pan ta a. Awm a nuam duh lo kher mai. Lo halna a kang hlum sawi tur an awm deuh nawk țhin avang te pawh a ni ang, duty room ah chuan ka vei tawn sek a, damlo te'n min lo ko chang pawn rilru ka pe hleithei lo chu a ni e.



Chhun ah chuan khawpum pui chu meikhu in a rawn bawh a, kar lo ah mei vap chu hmun tin ah hmuh tur a awm zui bawk, ni a sa vawl vawl bawk si, ka pasal mawlh chu a chesual palh ang em? A tuiin a hal ang em? Hreawm a ti viau ang em? tih vel ka ngaihtuah a..

Ka call lah in signal an nei bawk silo. Ka mittui a tla a tla ta mai a, keimah chu ka dik thei lo, ka hnuk a no in Ka pasal chu ka ngaiin ka thlahlel thar ngawih ngawih ani ber ang chu!



Mei alh hluah hluah khan an vah loh chin a kang kai ang tih hlau in an ven a țul dawn si, a tui pai te kha lo zo palh ta se, ani mi inthlahrung chi kha chuan midang dil buai lo in dangro deuhin a lo awm reng mai ang a tih thleng in a ni a nupui zeldinna chuan a zel thlen ni..


Tlailam ah chuan Lam hnai deuh nei tur te Lo hal zo an lo haw tawh tih ka hriat chuan zah ah pawh ka la thei tawh lo. Kan doctor thar nu fel zet hnenah chuan haw ka dil ta tawp a.



Nu Țhapuii 'Lo halna ah a pasal kal ve a, a ngaihtuah deuh a nih hi" tiin min lo sawipui ve bawk a, zawhna mitmeng deuh a Doctor in min en chuan "thingtlang mi hi a ni lo, kawpui mi ve tho nia.. " a han tih takah chuan Doctor pawh min hrethiam takin haw min phal sak ta a.



Ka rilru a hmanhmawh a talangin uniform thlak nachang pawh ka hrelo, chak deuhin in ka pan ding a, inchhung ah mei vap a lo luh loh nan an lo inkharphui țhiap a, tun ah chuan ni sa tawh lo in mei khu avangin khua chu a lang ngui nghiai a, chungte hlei hlei chuan ani ka pasal min ngaihzual tir ni.



Ka nu leh pa te pawh mumal a be loin frizer- a tui bottle- chu ka la a, chanchinbu phek a tuam mawlh mawlh in "nu, pa, kan pa hmuak turin ka kal dawn nia aw" ka tia.



Ka nu in "Mambawih..." a lo ti zuina pawh chu ka chhang lo, step-ah ka chhuk thlak lai chuan "Mambawih, an lo haw ve tawh em ni? Kum in a lo vahna hi a hla a, an lo haw pawn a lo la thleng dawn lo ang" a lo ti lar lar a.



Țah chhhuak inpet ruh țeuh hian "a pawi lo" ti a nuih seih in step-ah chuan ka chhuk thla nghal hlawk hlawk.


Ka tui bottle ken lai vur chu a ral hman ka hlau bawk si nen Auto ruak lo tlan chu ka lo phar a, ka kal duhna ka hrilh chuan min en deuh kawk nangin engmah min zawt zui ta lo.


Kawng a kan mi tawh te ah chuan Zoramchhana chu ka zawng phei pah zel a, ka hmuh ve tak loh avang in auto driver hnen ah Zoramchhana Lo chhanna peng awmna ka zawh chuan chutah chuan min drop ta a. Kawngpui kam ațang ringawt pawn Lo halna mual chu a sa hut hut a, a hmun a awm te tan phei chuan hremhmun pa te a ni hawt ang chu.




Auto in min tlan let san hnu reiloteah kawng thlang lam ațang chuan patling leh tlangval ho an lo inzui chho țak țak a, mâng an kai nuau a, tu te nge an nih pawh a hriat theih lo.


Chung ho in min lo hmuh chuan mak an han tih hmel khawp a. "Heng heng ah enge i lo tih ve?" pa pakhat chuan a lo ti khawl.

Pakhat in "in pa te i lo nghak a mi?" a lo tih zawm ve nghal chuan rang deuh in lu ka bu a..
"Thlang deuh ah an lo kal a nih kha, nghah rei an ngai tawh lo ang" a lo ti leh a.


Min kalsan hnu chuan a sawi ang tak takin 'Heiha dap dap' a patling panga vel lo inzui chho te zingah chuan Zoramchhana chu ka zuk hmu ve ta a.



Thingtuai hi a lo hawl chho a, an lo hnaih zel chuan hnuk ulh țeuh hian ka lo en ngawt ngawt tawh, thawkleh khat ah a lo hawi chho vut a, chutah kei min rawn hmu ta si chu a ngaihna a hriat loh hmel kher mai.


"Mambawih?" a rawn ti chhuak hulh a, midang awm lai a țah chhuah mai ka hlauh avangin inpetruh tlat in lu ka buk khum ringawt a.


Chak deuh hian a țhiante chu a rawn kal san a, ka hmuh tak te ang tho khan mâng a kai nasa in a kut hnung vel chu a kang durh pheng phung a.



Ka hmel a hmuh chian rual chuan thaw huai in aw dam dap hian "min lo hmuk a nimaw?" a rawn ti fan ruih.



Aw tihnana lu ka buk nghat nghat chuan ka awm dan chu hrethiam takin ka hma ah a lo ding a, engpawh sawise ka ţap chhuak dawn tih a hria te pawh ani ang. ka tui bottle ken lai chu ngawirengin a lo ban a, chuta a kutphah hnung kang durh phung mai avang chuan a kut chu ka lo man vat a. "A na lo, chaw ei titui tham lek a nih hi" nui suk a tiin tui chu a lem nghal khawlh khawlh, mittui nen phe ruai in ka lo melh ngawih ngawih thung a.



A țhiante lo thleng cho in "ehe, in pa chu i va ngaihtuah awm ve" an lo ti chiah mai chu ka insum theihna a bo vek, hnuai lam ka bih nghal tlat a. "I tui lo ken chu kan in ve ang aw" fiamthu titih a min zawh leh te chuan bu nawk nawk in ka inpetruh fan fan a.



Ka awmdan hreawm lutuk chu Zoramchhana zawk chuan a hmu thei tawh ngang lo a ni ang e. "Țhiante u, min hrethiam rawh u aw, ka nupui hian min ngaihtuah em a ni" ti chhuak dut in midang mitmei pawh veng zo tawh loin a awmah nghet takin min kuah bet ta hmiah a.



Kei erawh ka baw chhuak nghal hawk a, mahse, rang lutuk in Zoramchhana awm chu ka hmaiin ka nawr si ngawt ngawt a.


" ka țha e, ka țha e.. Mambawih, hahdam tawh rawh" ti mawlh mawlh in min hnem a, ka dar ah a tuai hauh hauh bawk, "ka țha a nia, signal a awm thei lo a, kawngpui ka chhuah chho rual in lo call che ka tum reng a nia" a han ti leh mawlh mawlh a.


"Mei bul ah i awm lai in i tui a hal em? Ih, i tui pai a zo ang a, midang dil ngam lo in dang ro deuh a i awm ka hlau a" ti hliam hliam a ka en chhoh tak ah chuan nuihza deuh bawk si; vannei intih hmel em em thung bawk si hian min lo en let a.



"Khawi maw i kut kha.. " tal aih a ka tih rual chuan in a kutphah pahnih chu ka chelh a, a na ngawt ang.



"In ah kan haw hun ah damdawi ka hnawih sak ang che aw, hliam dang i nei em?" la insut deuh hlap hlap paha ka tih lai chuan kiai suk pahin lu a lo thing a.

"A țha.. a țha hliam dang i neih loh chuan.." thawk hip let hlap hlap in ka ti ve ta mawlh mawlh bawk.


A țhian te khan chhak kawng kawi ah min lo nghak reng niin, kan han lang ve leh chu tuman min lo fiam bik lo a, mahse, ka pasal ipte pui hrui chelh a ka kal ve hnek hnek chu min melh leh zawk țhin a, eng rilru pu nge an nih lah ka hre der lo.

An titi kalhmang ah chuan rawlthar pakhat a chesual țhelh a, mei kawng sial loh lam a kang tur chu va vuak mit tum in a che a, mahse inpal sual ta in meipui ah a zuk bawk khup ta thlawp a, mahse a bul hnaiah patling dang lo awm ve te chuan a rang thei ang berin a hnuk chhuak a, tlem a tlem ah nunna chan an awm lo chauh chu a ni, a vanneihna a kal tluang nge a thuamhnaw hak lai a kang sawr deuh tih loh ah chuan hliam tih tham a nei lo hlau tih vel te chu ka ngaithla ve reng a,


'ka pasal chung a thleng ni ta se...' tia ka zeldin rual chuan ka ţim chuai a, a ipte pui hrui ka hmer nghet lutuk chu lo hre thuai in 'mangkhawh hun tur' a sawipui ta daih a.


In kan thlen chuan ka nu leh pa te'n zawhna an lo ngah ngang mai, Mahse, Zoramchhana chuan "nakin ah" a ti sup a. Engmah an sawizui ta bik lo.


"I uniform kha surfe tui ah chiah nghal daih rawh, ka bal i kai nasa lutuk" kan pa chuan a ti sawk sawk a, bualin lam a va ri ruk ruk a, lo chhuak in kan nupa mut pindan ah a lut a, ka towel a lo ken chhuah tel ve avang chuan inbual rual a duh tih hria in kawmchar lam ah chuan ka zui chhuak ve nghal a


A han inphelh te chuan hliam dang a neih palh hlauin ka lo en uluk em em mai a. A ni pui lah chuan "ka țha ka tih tawh kha" a rawn ti deuh hluai zel a.


Kan inbual zo room a ka lut chu min zui lut ve mai loin ka pa zawhna neih te chu a chhang a, a tawp ah chuan ka chanchin leh Lo peng thleng a ka va kal ve thu a sawi tak ah chuan ka nu leh u Zoteii chu an chet tlat tlat a.



"Mambawihi chu ka va lainat em aw, a ngaihtuah vang che in kawtchhuah vel thleng a lo hmuak tur ah che ka ngai a, chutia Lo peng thleng thleng a lo thleng ve mai chu lo kalpui tal ila nitur" ka nu'n a ti vang vang a, ka mittui lo luang leh ringawt tawh chu a chhan pawh ka hrelo.




Zan ah chuan damdawi te ka hnawih sak hnu ah tui zet in a muhil bawrh bawrh a, nileng a meipui kar ah tal an ni bawk nen thlir ngawih ngawih paha a biang ah ka chul leh țhin pawh chuan a harh miah lo a, a changin a sir ah inbeng khalh in a chal leh ka chalchu ka han insik tir a, a muhil nghet thawk la ri suai suai ngawt te chuan a sin ka hnuk ti no tlat ni.




A kutphah hnunglam chu a dur phung miau a, a khat tawkin a kutțang chu a phut leh auh zel a, a harh palh hlau zetin a sam karah kut ka zen lut a, a luilei chu ka hmer sak salh salh a, hetia dimte te a lu lei massage hian taksa chau rimtawng lutuk a ziaawm phah ve thei a.



Zing dar 5 vel ah chuan ka nu leh pa tho thawm ka hria a, mut luih ngial ka tum pawn ka thei țhak lo, minute 10 vel a ral hnu ah chuan kan pa chu ka thawhsan ta nge nge a, ka nu leh pa in ka han tho chhuak chu min lo be sawk sawk a.

"I mu thei nange? I nuam lo em ni?" an lo ti mawlh mawlh a, mutheilo satliah ka nih thu ka han sawi chuan vitamis tlak chham i nei a nilo maw an han tive ngial a, thingpui kan inzawh hnu ah zing țawngțai inkhawm turin an chhuak dun a.


Zoramchhana muhil ka va thlithlai leh țhin pawh chuan a lo mutui ngang mai, khum tlangah țhutchilh a a muhil hmel ka thlir ngawih ngawih chuan ka hmangaihna pawh a zual tulh tulh te in ka hria a, aaa... Lo nei a eizawng țhin pa ber te hian hmangaih an lo phu zual takzet ka ti ta a ni.




Kumtluan a an chhungkaw khawsak harsat loh nan kum bul ațangin meipui an hmachhawn a țul a, engtik lai pawn thli beng sual palh a awm a kang hlum reng thei dinhmun ah an ding tih inhre rilru ran țheuhin an chhungkaw tan Lo hal tur a an thawh chhuah a țul si.




Dam khawchhuak tur a an thil hmachhawn han rapthlak zia mai chu an mahni chauh lo chuan an sawifiah thiam pawh in ka ring lo..




Ka nu te zing țawngțai inkhawm lo let hma deuhin u Zotei pawh a lo tho a. "Mut char char mai a va chakawm țhin ve mambawih" a lo ti nghal thawr a, kan han nui leh rih a, bualin a hman lai chuan chaw ka lo chhuang ve than a, ka nu leh ka pa pawh an lo inzui lut a.




"Mama chu a lo tho peih nange?" ka pa'n a lo ti nghal a, "ka kaitho duh lo ve hrim hrim" tih ka hrilh thuai a. Ani pawn "tui in tam rawh se, nimin an boruak va hip a rapthlak lutuk a, tui in tluk tluk rawh se" a ti nghut nghut a.




"Ekhai, Mambawih, ar kan la chhuah reng reng hleinem" ka nu'n a lo tih hliai chuan "ka va chhuah dawn a mi?" ka ti a, "aw, i hlau lo ang maw, arpui no hruai lai kha a kawlh a, mi lim mai te a ching a a vuakna tur hmawlh ka chhawp kha, han hawl dawrh la a kalsawn mai ang" tia tihdan tur min hrilh hnu ah chuan fairel bel a buhfai chu no chanve vel ka suak a, kawmchar a Archhiar lam chu ka pan a.


Kawt ah chuan buhfai chu ka han theh darh țhat țhat phawt a, chutah Ar chhiar ka han hawng chu a pa leh a lá te chu pangngai deuh a lo chhuak in ka chaw pek chu an rawn chuk nghal a, Apui no hruai awmna arbawm bik ka han hawng chu a engamah hma a thla tiparh in min rawn lim ta awrh awrh mai a



Ka lo hlau ngang mai, ka nu'n a hmawlh dahna ni a sawi lam a ka tawlh phei pawh chu in la champ em em hian min lim zui awrh awrh a.

"Shhiiikkkk" ti paha thingtuai a ka han vai pawp mai chu a hlawm tawp a, kê leng phur phur in chelo in a awm ta reng mai a.


A note te ai ai chuan ka mangang leh ta si.

"Hey... Arpui tho teh" ti pah a hnaih hrut a ka han sawi nak chuan a lo thi fel der tawh a nih chu!


Ka hreawm tilutuk leh hlauthawng lutuk chu ka thinphu chu a suk hian a su dawt dawt a, a Arpui no hruai lai ka vuak hlum sak daih tih ka nu'n hria se a sa ngawt ang.


Kawmchar chhuahna lam chu ka han en chho ruai a, tuman min hmuh loh lai chuan Arpui ruang chu paih bo daih emaw phum bo daih mai tur emaw ka ti rum rum hman a, mah se a ni thei ngangin ka hre silo, a note te'n chiar nak nak a a hmul vel an han chuk an han chuk phei chu tualthattu ang hial in ka inngai mai.



Chak deuh hian inchhungah ka han tlan lut a, 'hauh leh hauh' ti rilru chuan "nu, Arpui kha ka vaw hlum daih" ka ti chhuak ta ruai a.


Phawk em em a min lo en in "eng a ni?" a ti deuh chul a. Kawmchar lam chu kawhhmuh in "hmawl khan ka vua a, mah se a thi daih" ka ti khur dawt dawt a.


"Khai aw! A va zialo ve" a ti a, Kawmchar lam ah a kal phei chuan ka țah chhuak lutuk leh hreawm tilutuk chuan awm ngaihna ka hre tawh hlawl lo.


Ka rilru a lo lang hmasa ber ang chuan ka che ta tawp,Kan nupa mut pindan ah ka lut a, ka phone leh purse chu ka zuk la rawk rawk a, Zoramchhana lo meng suar saur chu "ka tlan dawn" tih khum thawr in a rawn in perh tho nghal zawt pawh ngaihven tawh lo chuan ka tlan chhuak ta nal nal a.

"Mambawih" min rawn au zui mah se kawtzawl step lam panin ka kal hlawk hlawk tho

Khatiang em em kha chu tu chhungkua mahin chetsual palh ah an ngai thei tawh lo ang, min ngei tawh ngawt ang ti rilruin ka tawt zual tulh tulh mai.

Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » September 5th, 2021, 8:47 am

Chak deuh a step-ah ka tlan thlak zawt zawt lai chuan "Mambawih?" Zoramchhana bawk chuan a rawn ti deuh khawl. Ding dat in ka han hawi let a.

Kawngkapui ah lo chhuak hlawl in kê lawngin veranda hmawr ah a lo ding a.

Kawr pawh a la ha lo, a sam a thur hiang bawk, a tho phang hmel zawng zawng nen chuan a hamhaih hmel takzet a ni.

"Eng ngati rum rum nge?" inchhung lama ka pa aw ri pawh chu ka hria, ka hreawm tihna a nasa zual sauh a, a fapa nupui in an ar inthlahchhawn zel na tur ber a vaw hlum daih tih hria se min dem ngawt ang.


Țap țeuhin chak deuh hian step-ah chuan ka tlan thla chhunzawm zawt zawt ta tho.

"A ar va chhuah in Arpui no hruai lai a vaw hlum palh a nih kha mawle... " ka nu aw ri in a tih laiin kan pa chuan "a va buaithlak e aw" a ti fan deuh ruih a, "mate ka chappal kha lo la teh" a tih leh lai chuan kawngpui ah chak deuh in ka tlan tawh.



Kawt a patling nilum lo ai te'n 'khawi lam ah nge?' tia min lo biakna pawh chu ka chhang let lo hrim hrim.


Ka nu te kawngkapui ah ka han pen lut chu mei chhawm țha pahin min lo en heu leh nghal a."Ehe, zing zing ah eng nge ni ta ngai" nu Țhapuii'n a lo tih chuan "ka lo tlan a nih hi" ipik deuha ti hlur in țhutthleng sei lam chu ka pan nghawng nghawng a, ka thawm ah chuan u Ngaihsaka te chhungkua pawh pindan aţangin an rawn chhuak rang kher leh nghal.


"Eng nge thleng a?" u Ngaihsak'n a lo tihlai mek chuan Zoramchhana a lo lut ve hlawl a. Lo au khum nghal tuar mai ka chak lutuk chu țhutthleng kil lam ah ka tawlh rawk rawk.


U ngaihsaka vek chuan "eng nge thleng a, in inhau a mi?" ti deuh nghutin a țhianpa chu zawhna ngah hmel deuhin a melh nghal run a.
Pakhat lah chuan "ka tho ve chiah, ka tlan dawn e a tia ka rawn umzui a nih hi" ti deuh sup in a lo pen lut a, chhuat laiah chuan a rawn ding ve ta run bawk.


Kan nupa a min melh tawn chhen pahin nu Țhapui'n "ngawt ngawt a, engvang a lo tlan nge i nih a Mambawih?" a rawn ti dam dap a. Chhan tum a Zoramchhana'n kâ a an zuau rual chuan "sawi miah suh aw... Zoramchhan" ka han ti hlur a, ka chhungte hmel chu a phawklek belhchhah zual suah mai bawk si.


"Ka lo tlan a nih chuan ka lo tlan a ni ve mai" thin tawt deuh hian ka ti leh deuh nghek a, 'arno hruai lai ka vaw hlum' tih thu kha chu khawvel awm chhung zawng hian sawi chhuah ka duh lo. Ka duhlo takzet.



Ka bul țhutthleng seiah pakhat lah chu lo țhu thla ve in ka kut tha la khur dar dar chu a rawn hum a. "Haw ang le?" zaidam deuh a a lo tih laiin "ka duh bawk lo" ka lo ti hmuk thung.

A nuih a za deuh bawk si nen a hmui hnuai seh in ka kut chu a han hmer deuh ngut ngut a. Min nuih chiah se chuan a hmaiah ka beng chawrh duh ang tih theih khawp in a ni ka hreawm tihna chuan min hnawh ipik ni.




Rei ngial hnu ah ka chhungte'n a mangang ru deuh tak a zawhna ngai bawk an zawh tak sek sek ah chuan ka bul a țhupa chuan "tukin a ar chhuah kha Arpui no hruai laiin a lo lim deuh a niang, a in dan na lam ah a khawng a, a thi ta si a ni hmel" a han ti chiah chu za lutuk in an zavai nuih zo ta vek a.


Kei a zak lutuk bawk si chuan Zoramchhana nui ve hawk chu rum fahran hian ka han melh a, hmui chip nghal hmuk mah se a hmai vun sen țawlh ţawlh aţang chuan a nuih a za hle tih ka hmu thei a..


"Engtin nge arpui te i khawn hlum ngawt theih a?" nui hawk hawk chung paha u Ngaihsaka'n a lo tih chuan "a thi dawn tih ka hre bik hleinem" ka ti vat a, an nuih a za tulh tulh mai bawk si.



"Mate, i tiduh e a" la nui kiah kiahin u Dtei pawn a lo ti ve leh a, eng emaw sawi duh hmel pu chung hian ka nu chu a han en leh rih a "ka pa kha khawi ah nge a kal?" a tih chuan "kawmthlangah a leng lawk a nih kha" ka nu'n a lo ti let ve mai a.



Chutah u Dtei chuan "keipawh kan insawi țhat hlim khan Fu huan ah ka pa leh i u Ngaihsaka nen hian ka feh a, kan bung zo thlam a kan let tur kha i u Ngaihsaka nen hian ka kal hmasa a, kei a uang ta reng reng lah chuan 'paa thlam kan thlen hun ah in englo vak ang aw' ka han ti pek a, i u Ngaihsaka reng rengin min chhang thei ta silo ka han hawi let chu inthlahrun hmel deuh in ka hnungah chuan ka pa zawk a lo kal reng chu niin, i u Ngaihsak kha zung in a lo dik kawi lek a lo ni a, ka zak lutuk kha kan haw rual in ka tlan haw nal nal, min rawn koh/ko țhin a, ka haw duh silo ka pa mangang hi amah in a rawn kal a, 'Dte, i lo haw loh chuan thlam kha ka sawi mai dawn a nia' a rawn tizet chu bak hlurin 'sawi suh, ka lo haw dawn ' ka ti a, kan inhruai haw leh thei ta hram a lawm" tiin a nui tak ang bawk bawk a.




Ka pa Khawla hmel ka mitthla a, a awm mai mai pawh hi pa zezawi leh mi pawisawi hlau hmel em em mai a ni a, chutia a monu titi puanhnuai ru lutuk a hriat lai a hmel han tim zual sauh tur ka mitthla chuan ka nuih a za ve tho, nuih erawh ka nui chhuak lo. Ka tan lo nuih ve chi pawh ninghal lo chuan....



"I tlan chhan kha chuthil vang chu maw lo ni a?" U Ngaihsaka lah in lo tive hu in an han nui țha leh ta tak tak mai. Arpui ka vuak hlum lai ni kher lo se chuan ka nui hnem ve viau ang.


Zoramchhana'n "phei ang le, i ar talh pawh kha kan puah a ngai ang chu" a ti leh lek phei chu khawvel ațang hian he khua hi bo deuh thut se tihna hian ka khat a.

"Khatikhan min ti kher suh" mittui hnai țeuh chungin a ka ti țiau, thaw huaiin ka tukhum sam ah a lo chul a. "Thingpui in phawt mai rawh u" nuihza insum deuh a u Dtei'n a tih lai te chuan ngawi rengin pakhat lah chuan ka sam ah a lo chul hliau hliau a.


Țah vak te chu ka chak a, mahse, ţap chiah ila chuan u Dtei vek hian nakin zel ah 'arpui sun a ţap' angin min chhuah leh duh ngei dawn si. Nupa inhau bawk silo chhungkua a intihthiam lohna awm chuang bawk silo ah chuan ka hun tawn mek chu a hreawm ber hial ang chu.



Thingpui in pah a nimin Lo hal chungchang vel an sawi lai te chuan arpui thih leh thih loh ka check laia a note te'n an lo kil ve tiau tiau lai te kha ka mitthla let zel a, ka nu'a va zialo ve' a ti fan raih lai te... thing tuai khan hlap lo in lo tlanchhe ta zawk ila hetiang teh hrep a rilru hreawm hian ka awm awm silo tih vel te chu sawt tawh lo mah se ka ngaihtuah kual chiam chiam a. Se bo hnu a se kawngkhar tih zawng zawng ka chang zo a ni ta ber e!




Kan pa thingpui in zo chuan "Mambawih, phei ang le, kei lah Mangkhawh a kal ka ngai si, nangpawn hna i tlai palh ang e" a lo dut dut a, ka darah kuah meuh a min pawh thawh tak ah chuan țah mai inpeih țeuh hian kan inzui chhuak leh ta nge nge a.


Kawngpui phei ah kan kal lai te chuan "i tlan nghal daih a, engmah sawi chiahna hun pawh a awm silo a, min timangang alawm" a ti sup sup.

"ka zak ve tho a lawm" ka ti let hlar thung a, a nui chur chur chu ka melh kha kha reng a, kan in chhohna step-ah kan han chho tur erawh ka ngam thlawt lo. Ka chhungte hmel kha hmuh leh ka hreh a ni.




"Aih, ka lo haw duh tawh lo" ti nui nui in ţap lek lek hian ka țang leh ta tlat a.


Ka beng bulah lo kun hniam paha "kawmthlang nu hian a en reng che a nia" a lo tih sup chuan rang deuh in ka zuk hawi thla a, tlangban hrui uai meuh in a lo țhen țha mai a.


Nichin a ka tlan chhuak thawm kha a ni deuh rum rum bawk si nen engkim a lo hriat ve vek ka ring.

Kan pa ka han en leh chuan nuihza insum zet hian min lo en ve ngur a. "Chho ang le" a tih leh tak sup ah chuan ka țang țui ta bik lo.


Inchhung kan han inzui lut erawh pen pawh ka pen țha ngam lo, min en țhup ni te hian ka hria a.
Ka nu leh pa chuan tapchhakah mei lum an lo ai a, rang tak hianin ka nu zawk in "Mambawih, a no hruai te kha apui tello pawn an dam khawchhuak thei tawh tho a nia... " a lo tih sawk sawk pawh chuan kawngkapui bul ah ka tawi hrut hrut ringawt.


"Kha arpui kha chu a kawlh hrim hrim alawm, keipawh tuktin min lo lim ve ziah" a han tih chhunzawm leh a.

'Mahse, i vaw hlum ve hleinem' ka rilru chuan ka ti niah niah a. Ka rilru pakhat erawh chuan ka hreawm tih lutuk an hlauh vangin an ui thu an sawi ngamlo mai mai niin a ngai bawk.

"Lo lut ta che u" ka pa'n nui deuh heu chungin a lo ti ve bawk a. U Zoteii lah in silhmunah Arpui ruang ngei mai kha chawhtawlhah lo dahin tui so a lo leih a, a taksa khur char char ah chuan nuih a insum hle tih ka hre thei a.



"Le, tukin a i ar talh hi in nupa khan va puah rawh u le?" ti hliai a a lo inher chuan naupang ang mai a lei ah țhut tawp a, kê leng meuh a sapatal ka chak lutuk chu Zoramchhana nak ah ka țham sak ngawt ngawt a. Ani meuh pawh a țhen chawk chawk mai.


Kan pa a chet tak hrut ah chuan a rang a rangin ka zui ve nghal a, nui suk suk in arpui awmna chawhtawlh chu kawmchar ah a chawi chhuak a, ka chhungte hmai eng hmuh ka hreh lutuk bawk nen a um in ka um chhuak a ni hawt a.

"Țhutthleng hniam lo la la?" ti sup a chhuat ah chawlhtawlh a hun rual chuan "nangman va la rawh" ka lo ti deuh tlat.


Ka hmel a rawn en chiang a, atthlak a tih hmel bawk si, pa ka tih dan deuh khan a nui suk suk nangin tun țum chu min tir kal thei der lo. A tawpah țhutthleng hniam la tur chuan a va lut ta tho a.



Ar hmul kan han pawt te chu min biak hlek in ka vin nghal em em ringawt a, a tawp ah phei chuan nui ruh ruh in a pawh zawm ta mual mual a.

Arsa a sat zo fel sa- sah-chhan kawmchar Ar chhiar chung ah a va dah leh chuan "mambawih" a rawn ti dut a..

Keilah mahni a chhungte hmai eng tawng ngamlo ta reng reng chu rang fahranin ka tlan chhuak ve leh nghal a.


Ar chhiar bul ah chuan lo ding run in min hui zauh a, thuawi deuh chuan ka pan ve mai a. Ka dar ah min lo kuah hlu hlu in " eng hian nge ar kha i vuak a?" a lo ti ta a.


Keipawn țha deuh in ka ar vuakna thingtuai chu ka kawhhmuh a, a lo in tung ran tawh chu nuih hawk in a va ban vut a.

"Thi lo chi pawh a nih loh kha le" a han ti a, nuihza insum mitmeng de sawr sawr a min lo en leh kher chuan ka lo tum bar thung.


Thingtuai chu a tung leh mai a, ka darah la kuah reng chungin Archhiar sir lawk a huan pal hlui tih hriat tak mau phelh in tung va chu min kawhhmuh ta a.

"Hei zawk hi a lawm ka nu'n Ar hnawh nan a hman țhin" min nuihzat hauh lova a han tichiah mai chu!


Ka rei!

Ka meng phawk kawk kawk a ni ber e!

Sawi ve tur reng ka hre tawh lo, ka nu khan 'hmawlh' a tih tak bawk kha mawle. Kei a hlau phili lutuk khan hmawlh nilo in thingtuai a nih kha ban a ka hlap tak fur ni!



Ka chet dan hmu let zut zut chung a kan pa hmel ka han en chuan a mitmeng chu a dam dap a, pangchang zetin a awm ah ka bei ta ringawt.

"Ngatinge ka chetchhiat theih em em a" ti deuh țiau in ka hnaih sauh sauh a, a ban lian pui pahnih chuan min kuah bet nghal hlu hlu in ka chhip ah a khabe a lo nghata.

"A reh ve thuai mai ang" hniam ruih a ti pahin ka chhip ah alo fawp vang vang a. A aw ri ah chuan min mangan pui riau te'n a nia ka hriat ni.


"Nakin ah ka nu kha be rawh aw" ka hriat tham lek hian a lo ti leh sup.

"Aih, ka zak a lawm" ka tih țui laiin "Mambawih, a hau dawn lo che, tuman kan hau dawn lo che, mah se i tum vang ni miah lo a tisual mah nila thupha chawi hrim hrim tur, chhungkua mah niila 'tihpalh' tih te hi sawi tam luat a awm miah lo a nia" a han ti leh dap dap a.

Tawt țeuh chungin a awm zawn ațang ka han en chho chuan ka sam chhawl leng chu min lo hui kian sak a, ka pasal hian ropuinna tak a nei chiang a lawm.

"Lut ila, kan chhungte chu kan be dawn nia" lo ti sup in ka biang a lo khuap a, ka bu ve ta nghat nghat bawk.


Inchhungah min kai lut a, zawite a "nu, tukin kha ka tihpalh aw" ka tih chuan "aaa... i tum reng vang a ni hleinem, hreawm i ti țhin lutuk a, a zialo țhin lutuk" a lo ti sawk sawk a.

"I ar hnawh țhinna hmawlh kha a lo hre hrang lo a, thingtuai kha emaw tiin a hmang ta mai a nih kha" kan pa pawn 'ka tihpalh' tih ka sawi hnu ah a lo ti ve thuai a.


Ka nu chu a nui tak ang hawr hawr a. "Ka lo hrilh chiang lo che a ni tiraw? tikhan arsa ka hmeh hleuh ang a ani mai alawm" a ti a.

Veng țhen deuh huai a kan pa ka melh zeuh chuan thlamuanpui awm em em a muk ruih hian min lo en let ve a.


Mipa te hian ropui turin thil tam tak an tih a ngailo tih ka hriat thar phah leh ta. Ka pasal chu a nupui leh a chhungte inkar ah a din thiam em avang pawh chuan ka ngaisang thar a. Vau na aw kâ tel hauh lovin min la leh duai duai tawh mai.



Ar-sa chu Zo cooker ah buh leh anthur rep nen kan chhum ta hluah a. U Zotei lah chuan "Kan pu F Chhanliana țawngkam takin 'a pawi tui ting ani mai alawm' tiraw Mambawih?" a ti zauh zel a, beng sa hut hut in tawite te in ka nui ve ta ringawt a.



Tuk dang aiin kan chhungkua chu kan tlai ta viau hlawm a, kan pa ram kal tur a insiam chu a chaw tur ka fun sak a, leihkaah hnathawh pheikhawk bun in a lo buai ve em em bawk a, tui bottle pawh pahnih ngawt ka ah tir a. A ipte puiah a chaw fun te ka thun fel sak hnuah chuan ka chhuak phei ve a, ka ar vuak hlum sa kha vawi khat pawh ka hawlh ve lo tih ka sawi tel hram ang.


"I kut kha hna thawh pui chi a ni amawnle?" ti nai naiin a bul ah ipte pui chu ka dah a. A kutphah hnung lam chu a thlek ve thuak bawk.

"Hetiang te chu hna țhulhna tham a ni hleinem" a ti nghut a.

"Zan ah ka lo haw tlai mai thei a nia aw" ti zawm sup a a zial pai lai a chhiar chuan "ngatinge?" ka ti nghal țui a.

"Lo hal vang khan sa an tlan darh nasa dawn a, ka chang nghal ang" min rawn paha min en chuan hreh deuh in lu ka bu ta nghat a.


A zial pai sa a lo tlem deuh tawh avang in ka nu zial thleng a zial sa chu kuhva pack-na sarang ah ka thun sak leh zung zung a, gas thuk ah ka char phui laiin a silai chu lo va la chhuak in a lo hawlh fai hluau hluau a.


Ka va chhuak leh chu " naktuk in chawl tirawh?" a lo ti nghal sup.


"Umm"

"Kangvar ah i lo feh ve chak em?" a ti ta a. Phur lutukin ka feh ve chak thu ka hrilh nghal zat bawk.

"Vawiin ah ka theih chen chen mang ka khawh ang a, ka khawih bak chu naktuk ah ka khawh zawm mai ang, nang leh ka nu in thlai chi in lo tuh ang a" ti sup sup in a ulhbun chu a lek kual vut vut a.


"Mahse, Thlam a la awm dawn lo a, ni a sa viau ang, Thlam sak hun ah zawk pawh i lo feh thei tho a" min ngaihtuah hmel deuhin a lo ti leh ta zawk a.

"A pawi lo, ka kal ve duh tho alawm" ka tih deuh tak tlat ah chuan a bu ta nghut nghut.



Feh reh san hun awm vel ah kan inzui chhuak ve ta chiah, a ni chu a kal tlang a, ka nu te Leihkapui ațangin a liam tur chu ka thlir zui reng a. Tukin kha khatiang tehhrep khan chechhe lo ila chuan a zing rawn tho te kha ka duat viau tur a nia.



A liam dawn ah chuan lo hawi let in kut a lo vai thuak a, kan tlai bik em avangin kal rualpui tur pawh a nei tawh der silo, kan Lo awmna lah kha a hla ropui si, kawng ah mahni chauh a khawhar deuh a a kal tur chu ka khawngaih kher mai.






Ni dang ang bawk in Duty chu a hahthlak em em loh. Thingtlang lam ah hi chuan ngaihte hi a lo sam a, han nawm loh deuh chang pawn Damdawi in ah Doctor rawn tur a kal ai chuan țhenawm te'n 'chumi chu ka ei a, ka ngeih lutuk' an tih ang a piang lei ve tawp in mahni leh mahni damdawi kan inchawh ta țhin a, kan huaisen kan han ti dawn nge, kan at huai ni zawk dawn ni.



Chhun ah phei chuan khaw chhung chu a reh takzet! Mangkhawh in chhungkaw tam zawk chu Lo lamah an liam vek a, school a naunawi deuh chaw chhun dawh bengchheng ri bak thawm dang a vang viau.


Hnathawk dangte nen duty room kawt ah chair la chhuak in khawhma-ro bawl kan ei ho a, a thur tliang tui bawk nen chil aput zawih zawih chungin ka ei țeuh mai.


Chutia si deuh hliam hliam paha kan lo titi bawrh bawrh lai chuan Bike pakhat hi doctor țhutna ţhin kawt ah chuan a rawn ding a, Bike hnung ațang chuan Ahmai lo chhuk in Bike khalhtupa a inhun fel hnu chuan Doctor pindan ah an inzui lut ta a.


"Ehe, Zodika kha a lo haw tawh ani maw?" kan thawhpui nu in a tih hliai chuan "a in zir chhuak tawh a nih kha, nem ngheh ani vat dawn te an tih kha" damdawi in tifaitunu in a lo ti ve vat a.


"An rawn inphur teh daih a" a tih leh laiin "aw, țhian inkawm reng an ni a, țhian te chu mangan laiin an intlansan ngai hleinem" nu Țhapuii'n a lo ti thui a.


An sawi awmzia ka hriat ve lem loh avangin khawmhma ro bawl tui thur zet chu si hliam hliam pahin ka hawp a. An sawi dan ațang chuan Zodika chu a hmeichhe hmangaih takin thisen cancer vanga a boralsan hnuah Bible te zir in Pathian rawngbawl turin a inpumpek ta a nih hmel.

"Mambawih, i pum a na ang e, a tui em em kha chu hawp suh" ka nu'n a lo tih meuh chuan ka fai der tawh.

"A mak e, sawi loh ang zel hian i awm țhin mai" a tih tak hlak ah chuan min nuih ta ham ham hlawm a.



Tlai ban a in ka haw tur chu ka hreh thar leh riau mai a, ka nu te Leihkapui ah chuan ka țhu deuh renrawn a, u Dtei lah in nghal fahranin "tukin i ar talh chu engtin nge in siam a?" a ti deuh chhen mai.

"Chhe viau zel suh" tih bak in ka hnial let thiam țhin lo. A chetchhiatna kha han sawi ve ngawt ila, a zak duh tawh dawn der silo a.



Eirawngbawl te a țul avangin han awm bo reng theih a ni silo, tîm ru deuh in inchhung ah chuan ka pen lut a.

"Au Mambawih" Apuitei'n a lo ti nghal var mai.

"Ehe, i lo leng alaw?" ka ti ve nghal chul a. "Umm, class kan țan ţep tawh a, Aizawl ah ka chhuk leh hma in chaw ka lo ei dawn" a tih chuan ka thaw huai mai.


Damdawi in a che vel ka nih avangin ka intleuh leh thuak a, ka
thuamhnaw hak haw pawh uluk deuh in dettol nen ka su a, Apuitei ho chuan eirawng kan bawl a, a khat tawkin naupang țhenkhat lo kal in 'in huan bahkhawr kan lo la' an rawn ti ve chhen a, min zah vang nge mawni kawngkhapui leh kawmchar kawngkhar inkar chu a tlan in an tlan ta țhin a.



A sawi lawk ang tak tak in kan pa chu mi rual pawn a rawn haw ve ta lo. Chaw ei dawn chuan lo nghah mai ka rilruk laiin "ee.. a chin hriat a nilo, ei san rawh, ei san rawh" ka pa'n a ti mawlh mawlh a.



Apuitei chu zan dar8 velah a haw a, ka nu leh pa te pawh tv en in an la meng a, Zoramchhana mawlh ngaihtuah in ka lo ngawi leh vung vung țhin, chaw kha a chhun ei khawp chiah ka fun tir a, tun ah zan dar 8 a pel hle tawh si, a rilțam tawh lutuk dawn in ka hria a, ka khawngaih a ni.


Kan nupa mut pindan a ka phone kalsan lo rik avangin ka zial țawn lai chu dah in ka lut a.

Screen ah *ka pasal* tih a lo lan chuan ka chhang rang kher mai.

"I țha em? I inhliam a mi?" ka ti nghal sawk sawk a,

ani thung chuan zawi thum dap hian "Mambawih" a rawn ti hniam ruih.
"I ril a țam tawh em?" ka ti leh hram a, zawite hian a lo nui ri hak thung.

"Hei, Sanghal ka kap a" a rawn ti ta hem mai a.

"Awi... a nih chuan..." ka tih deuh chul laiin "Matei khan Apuitei pa te kha call se la, Ngaihsaka sawm bawk se auto in kan Lo peng ah khan lo kal rawh se" a rawn ti leh ta a.

Rangzet in U Zotei chu au in kan pa thu min chah chu ka hrilh nghal zung zung a, ani pawn Apuitei pa chu a be nghal a.

"Nangmah chiah in ram ah i awm maw?" ti a ka han zawh chuan "umm," a rawn ti nghut.

"I rilțam tawh em?" ka ti leh ringawt a.

"Țam lo e, i chaw min fun sak pawh kha ka la ei zo hleinem" nuihza aw deuh hlek a a lo tih let chuan a hmel awm dan tur ka mitthla a. Ka lai deuh ringawt pek a.


"A nih leh phone hi dah turin min duh em?" zawite a ka han tih sep chuan "ramhnuai ah amah chiah in i pasal a awm a, a biak tur neih chhun lah nang chiah i ni bawk, chutichung chuan kan inbiakna hi tihtawp i duh em?" a lo ti let dut dut a.


Kawngpui kam ah Sanghal ruang bul ah dingin kan inbiak dan vel avang a kiai deuh suk suk paha a han hawi kual vel tur chu ka mitthla zut zut a. Ka zep lo, tunah tak hian a bulah awm a, kuah hlu hlu ka chak...


"Apuitei pa te chu ka lo zui ve mai dawn.." ka han ti sep erawh "het! A țul hlek lo" a rawn ti ta khawlh a. "I hria em? Zan thil a ni tawh, in ah khan min lo nghak la, ka rawn thleng har lo ang" a rawn tih zawm leh zat bawk.

"Enge lungrun deuh a min biak vei" ka han tih chuan a thaw huai ri ka hre zawm a.

"Ka lo thlen hun ah a aia lungrun in ka la sawngbawl ang che" thutak lutuk a a rawn ti hniam chhak erawh ka thawk pui hak ta ringawt.


.


Sa phur a kal te nen an lo let leh meuh chuan dar 10 a hnai thuak tawh a, Kawmthlang kawngpui ațangin a sa kah chu apum in an rawn zawn chho ta mai a!

A nung chung pawh a Sanghal la hmu ngai reng reng lo chuan a lian hi ka han tikhawp mai a. Vawk a ang deuh bawk si, mahse vawk aiin a hmelchhe zawk.

Inchhung ah sa phur a va kal ten an zawn lut lai chu thlir in "a va han lian em em" ka ti tung mai.

midang luh vek hnu ah ka kawngah lo kuah thuak in ka bek ah a rawn fawp zauh a. A inlak hran hma chuan am zetin boruak hip lutin a thaw huai bawk.



A sa an han sat darh chu a tam ngang mai, kawmchar ah pher an phah a, sa sat ri hre phah țhenawm hnai te chu an lo chuangkai țak țak a, a sa hleh tu in a ren lo bawk a, a ti țha lai chu zai thla hlawk hlawk in lo leng lut te chu a hawn tir zel a.


Kg 10 tur zet chu kan rep turin tul thir ah a vit lut mawlh mawlh tho. Sa phur a kal te pawn an hawn deuh lawih a, kan in singsak fel meuh chuan zanlai a hnai kuar tawh, a inbual hlan in a chaw hmeh tur vel ka lo chhung lum a.


Towel chiah veng a kawmchar lam ațang a lo luh chuan rang em em in "kawr tal va ha rawh" ka ti hlak hlak a. A ni erawh a nui ruh ruh.


A taksa ah ka hnuhma a langsar nasa si a, midang hmuh ve kha a chi miau tlat lo.


Tawnzau leh pajama inbel in a lo chhuak leh nulh a, a pa lian in asa a țha bawk si nen mipa tam tak inchei a darthlalang hma a rei ngial ding țhin te ai thlawt in ani hmuh hmuh inbel hi a lang HOT zawk fe zel.


"Mama, khawi lai ah khan maw i kah a?" ka pa'n a han tih chuan "Vaithlakawn mual a Hmawngkung bul ah khan" a ti a.

Hmawngkung dang a tam awm tehlul nen a fapa Hawngkung sawi lai tak chu a hre chat ni hmiang, ka pa chu a bu nghut nghut a.

A chaw ei bul a ka țhu ve chu min en in a nui leh țhin a, ka pa te an mu lut vek tawh a, mei erawh kan la tuah na viau, sa ațang a thau far chu a ri sur sur reng a.

"Engnge?" zawi deuh tak a ka tih chuan ka beng bul ah rawn awm hnai vutin "midang hriat ve loh a ka tih tur kha mawle" a rawn ti pek a nih chu!



A tuk ah chuan kangvar ah ka feh ve ta ngei a lawm.


Boruak chu a lum satliah pawh a nilo, a alh in ka hria.

Chung lam ah ni a sa țang ut a, lei lam lah a kanna a la reilo tih hriat lutuk in min ur hlep hlep a, kei chuan chet ngaihna ka hre ta der lo.



Kan pa te pafa erawh in thing kang bang chu an khawh khawm zung zung a, ka pa pawh a kum upa tawh viau mah se ram hna ah kher chuan rawlthar tha nazawngin an khum teuh lo.


Ka nu pawn thlai chi chu a thlak zung zung a, keichu ka chet hlek chuan a sa lutuk leh lum lutuk chuan min hnawh chau nghal zel.


Ka pasal in min ngaihtuah zet a "Mambawih, bukte zar ah khan lo zuk awm rawh" tiin min au leh țhin a, tar chaklo ka nu mahin chawlh a sawi loh lai a chawl a lo țan bik kha ka tlawmla ve tumhrang bawk si.


Ka nu sir ah thlai chi ka thlak ve zel a, ka um pha lo lutuk chu keimah te in ka han nui leh ringawt țhin. A tawp ah phei chuan ka mut te lam lam a rawn chhuak ta a, ka nu lei chek karh karh ri leh kan pa te mangkhawh khawm ri te chuan a awih hian min awi ta chiah chiah mai a.


Ka lu tuam nan a ka hman puan chu la thla in kan piah deuh a an mangkhawh khawm sa chu ka pan phei a.

"Reilo te ka chawl ang" ti rilru in thing ah chuan puan chu ka zar diai a, a hnuai daihlim ah chuan ka țhu ta a, eng Thereng emaw ber hram chiah chiah ri te chu kar lo ah an hla du vek mai a!



"Mambawih leh" kan pa aw in a tih sup ri chu ka hre rei ruai. Ka kang deuh nawlh a, ka chauh luat avang leh mutthilh chhuak lutuk avang chuan ka meng thei ngang lo "A chau reuh hle mai, ka lainat bim bem lutuk" ka nu aw in a ti ve leh a, zo zet a penpui tu nei ang mai hian ka taksa chu a che nawlh nawlh a.


Mit ka han men diar diar chuan khua a lo tlai ruih tawh a, ka hma ah ka puan lukhum keng a ka nu kal dar dar mai ka hmu chiah chu ka meng zau nghal kawk kawk a.


Tal deuh phat a ka han hawi kual chuan hnaih zet ah ka pasal nen kan inmelh ta siah a.

"Ngati... ka.. ka lo muhil alaw?" ka ti chhuak nawk nawk chu min nuih suk in ka chal ah a rawn fawp a, a awm hran leh rual chuan min pawm tih ka hre chiah bawk.


Ekhai!

A va han zahthlak țhin tak.

"Min dah thla rawh" ka tih lahin "i chau a nih kha, awm hle hle rawh" alo tinghut a, kangvar zau zet ah chuan Bukte zar lam panin min pen pui pawk pawk a.


Min dah thla tur a hrilh a ka tal sek lah chuan nui huk huk pah hian "kan lum mai ang a sin" a ti duh lek leh nghal.


Chutina na na chu ti in a nghawng ah ka han kuah ta a, nghal ru zet a ka han melh vel sawr sawr chuan a lo kiai vei suk a, Bukte kan thlen dawn hnaih a ka han en leh erawh ka ngaihtuahna a inang a nih hmel a, in en in kan nui chhuak ta hawk hawk a.


U Dtei'n a pasal amaw tia pa Khawla bulah zawk puanhnuai thil zet a sawi țum ngei mai kha!


"Eee, Mambawih, kangvar chu a lum dan a rapthlak emai tiraw?" Bukte kan thlen rualin ka nu'n a lo ti sawk sawk a, ka zah a hlau tih hria in keipawh zak angin ka awm duh biklo.


Zah erawh zak tak ka ni! Mangkhawh a an buai em em laiin an Mangkhawh khawm sa hnuai ah ka lo muhil veng veng mai sia.




Zau dang te nen kan inzui haw ta diah diah a, kan pa chuan ka zai ngai deuh in a hnung lam ah min kalpui a, ka hawl turin thingtuai a suih a, a chang leh kawngchho ah chuan ka hah lutuk hlauin ka hnungah a lo nam thul. Midang hriat loh chuan a thiam ang tawkin min duat ve em em mai a sin.


Kawngpui kan thlen chhoh rual erawh in pickup ruak remchang a lo tlan hlauh a, kan chuang lut ta sap sap, midang chu a sirahte an invuan far a, upa lam deuh chu a seat- ruak ah an inhnawh leng thei hlauh leh nghal.


Zoramchhana chu pickup chhuatah a hnung ngheng thei in a țhu a, a kap kar ah țhu lut in a awm chu ka ngheng dar dar a, amah a pa lian in a bawp a sei bawk si, chutia a kap kar a țhut chu lungpui kulh nghet deuh inhung chhung a awm te hi ka inchan a, kan tlan rual a thli dai raih lo thaw in kangvar lum tawrh avang a ka hmai sa hut hut a lo chhem tak ah chuan a nuam sawng sawng mai.



Nu țhenkhat fiamthu thawh a an nuih tlawr tlawr laiin kei erawh ka mut a chhuak leh em em tawh a, kan pa awm ngheng chuan ka mutthlu lawp lawp lo chauh chu a ni e.

"Khawngaih thlak reuh lutuk" ti sup a ka beng ah a lo fawh chuan chau takin ka nui seih a.
"A mak e, ka mut chhuak lutuk hi ka ngaih ațha lo, ka sihtui in kha Huai ho chenna a ni lo maw?" ka han tih chuan ka bengbul ah a lo nui thum hawk a.

"Ka ti tak tak a nia, Pasalțha i ni tih an hriat vangin tihbuai che an tum a niang" ka han ti leh niah niah a, nui suk suk in a khabe chu ka darah a lo nghat ta a. "A nih leh maw pasalțha te hian thih in hlau ve tho em?" tia ka han zawh chuan ka dar chu fawp thuak in a awm hla hlek a, thlek deuh hâ ka en let chuan chik tak mai in min lo en let run a.


"Humm.. Pasalțha ka ti kher kha i duh lo a mi? A nih thih i hlau em?" naupangchhia deuh a ka tih chuan "aw leh aih" a lo ti ve ta sup


Hriatchian chak deuh paha "aw leh aih maw?" ka han tih chuan "i tan ka nun hlan ngai ta se awlsam takin i tan chuan ka thi ang. 'Aih' ka tih chhan erawh thih san che ka duh lo, ka awm loh hun a i khawhar tur leh pasal sun a na i tuar tur ka duh lo" a lo ti charh charh.

A mitmeng thuk ruihah chuan a thusawi ah a tihtakzet zia chu ka hmu thei a, ka tih ngaihna hrelo chuan a kutphah chu chelh sak chawt in ka pawm bet a.


"Ka tihpalh, ih... kan uang mai mai dawn amaw ka tia" ka ti niah niah, pickup bang kil lam zawk a aban chuan ka dul ah nghet deuh a lo kuah in a taksa ah min hnuk bet zual a,"Huai ho in min tibuai a nih chuan ka Lasi nula hmelțha zet vang hi a ni ngei ang" ka beng bulah a lo tita sup sup a.




/
Kangvarah kan feh zan ațang chuan ka khua a sik ta ser ser reng mai a, ka hrawk chhung a na urh a, ka mit pawh a sen vek, zankhua in mu thei lovin Zoramchhana chuan min vil chawt a.


Ka khawsik chu a sang pawh a nilo, a chang chuan ka muhil ve siai siai a, mahse, ka taksa chu thawk leh khat ah rawn lum pup pup in thlan bual huh hliam in ka harh leh hlawl țhin a, tui pawh ka in hnem mawlh mawlh viau mai. Ka zun a chhuah miah loh dan ah kangvar boruak lum sa lutuk avang khan ka taksa in tui a tlachham a ni ta ber ang chu.




A tuk chu sunday a ni a, ka tho kang peih thlawt silo a, ka chhungte chu an mangang kher mai. Keichuan tui ka in tam ang a, ka mut deuh hnu chuan ka țhat leh mai ka inbeisei a


Min ngaihtuah lutuk avang a ka nu leh pa inkhawm țhulh tum pawh chu ka khap a, țan dar rik dawn a ruai ah an kal leh ta kha a ni a, kan pa erawh in ka lak ațangin mit a la sawn hleithei lo.



Ka rilțam mawlh a hlau a, Sanghal sa chhum tui in buhhawp min siam sak a, khum ah min chhawp sak vek hnu ah keimah a kan han hawp tur te chu a lo phal îkhaw lo mai.



Aman min barh ta alawm, "i siam tak tak maw?" a tui em avang chuan ka han ti zauh a. Chau zet a ka nui var var chu tui min lo tulh leh in a siam a nih thu min hrilh a.



"A va tui tak, i buhhawp siam ka ei rengna tur a nih dawn chuan damloh char char mai ka van chak" ka ti chiah erawh rum em em in min melh ta khu khu a.



"Damloh chu sawi tawh suh, ka ei siam i ei chak hrim hrim a nih chuan dam vat la, ka siam sak ziah ang che" a ti zawm khur khur a.



Hman ah ka lum vak țum a min vin bak kha vawi khat mah min la vin ngai reng reng silo, chutia min vin ta khur khur mai chu la na tak ka ni.


"Ka damlo ve em em a, ngatinge khatikhan min vin vak a" ti țiau in chhuak deuh in ka țap ta rawng rawng mai. Ka hmingpum in min ko tel lehlek phei se chuan rilru nat lutuk avangin ka thi daih thei ang.


"Mambawih" ti chhuak hulh a a darah min kuah beh a tum rual chuan na deuh a lo nam sawn in khum ah chuan ka let thla tawp a.

"Ka vin che a nih loh kha, dam vat la ka duh a lawm" lo ti leh ngialin ka darah a lo kuai a. Kei lah chu tih takzet in ka rilru a na ngut ngut.


"Min khawih tawh suh" ti vin hlar in puan chuan ka inkhuh țha sauh sauh a, rum deuh a min melh kher lo leh min vin kher lo khan țha deuh in sawi ve mai se...

Puan hnuai ah chuan rilru na deuh hian ka țah chhuanzawm hliam hliam a, ka darah lo sawi pah a "Mambawih" a lo tih dut dut pawh chuan ka chhang thei lo...



Ka nu te inkhawm bang an lo haw lai pawn rilru na zet in țah tawh lo tumin ka insehruh a, khum tlang ah țhu run a min melh vung vung tupa chu melh pawh ka melh țha duh lo.


Ka nu'n kan nupa mut pindan kawngkhar lo kik ri a"Mambawih, chaw chu tlem tal i lo ei em?" a lo tih chuan ka rilru a na thar leh zo vek.

Mittui sur zawih zawih chungin "aw" ka ti țiau a, Zoramchhana hreawm ti hmelh lutuk thaw chhuak hawk chu ka nu bulah chuan hek mai te a sin ka duh rum rum ni.

"A țha e, dam loh pawn chaw chu thlah duh miah loh tur, hei, cake ka lo hawn che a, nakin ah i u Zotei lo haw se thingpui kan in dawn a nia aw" kawngkhar chhan ațang bawk chuan alo ti leh ta a.


"Ummmm" ti țiau a ka chhan chuan a kalsawn thawm ka hre zui a. Chutah Zoramchhana chuan "Mambawih, thinrim a vin che ka ni lo tih i hrethiam lo ami?" a lo ti zawi ruih.

"Min melh rum em kha" ka tih laiin a lo nui deuh hawk thung a.

"I bulah khan ka lo mu ve tawh dawn a nia" ti hmasa phawt in khum ah chuan a lo lawn kai a, khum lu chu a ngheng a, a darah bei tur a min duh zet a min en chuan ka hrelo der tlat a.


A tawp ah nui hawk in ka darah lo man in a awm ngheng chuan min kuah bet ta a. "Ka tihpalh a ni e, i rilru no lai ani tih hrechiang ber tur ka ni a sin le" a tih zawih tak ruih ah erawh ka nem leh vek tawh.



"Dam thuai thuai la, i eitur chu ka la siam sak dawn chauh che, i damloh lai te chuan i kâ pawh a tuilo ang a, ka ei siam tui zia pawh i hre famkim thei nang" a han ti leh a, khap fak fakin ka ngawi kar thung.



Thawhțan ni ah pawh chuan ka khawsik chu a ziawm thei lo a, duty tur pawh in ka kal ta lo, kan pa pawh a ram chhuak bik lo a, mi tam zawk erawh thlam sa turin lo lamah an liam duak thung.


Ka kê te a sahal a, Zoramchhana chuan min hmehsak pahin "kê no nu" a han ti leh hluk țhin. Chau zet in kan inchhaih nui kan inchhaih nui tho mai.


A khutphah thap deuh takin ka kê a hmeh a, a han zut vel chuan ka dam sawng sawng zel in ka hria a, eitur ka tlakchham a hlau in ka mutthilh changin dawr ah a lo va kal vut a, eng eng emaw hi a rawn khai haw ta țhin a. Ka han harh leh meuh hi chuan khum bul dawhkan chung ah eitur a lo awm leh țun zel a.



A khat tawkin ka nu pawh a lo lut ve reng a, tar chaklo zawk pawh Kangvar ah feh avang a a damloh miah loh laia khum thawh san peih miah lo a ka awm chu thil nuam tak a nilo.



Thawhleh ni pawn ka la nuam chuang lo nangin u Dtei'n min lo kan țum a ka chah angin tlailam ah chuan ka nu'n pregnancy testkit min lo pe kawi ta a.


Bathroom hmang a ka kal tur te chu dimdawi takin min hruai a, ka luh dawn chuan "kawngkhar kalh suh aw" a ti leh sup. Ka dam loh zan ațang khan kawngkhar pawn ah a lo ding reng zel a, ka tluk sual palh pawh a kan buai rei loh nan kawngkhar kalh a phal lo.


Testkit chu ka han nghak deuh vang vang a, a tawp a tawp ah line sen pahnih a lo lan tak raih ah chuan 'Lalpa, ka lawm e' ti sep in thawk ka la vang vang a.



Ka chhuah leh pawh chuan ka hrilh duh lawk lo, mut pindan ah kan luh hnu chuan khum ah min mut fel tir leh thlap hnu ah pregnancy testkit chu ka pe ta a.


A ngaihna hriat loh hmel zetin min en vut a. "I khawsik test-na ami?" a tih tak hem ah chuan nui kiah kiah pahin "Zoramchhan, kha mi khan khawsik ka in test lai i hmu tawh a mi? I fa tur ziarang lanna hmasa ber a nih kha, pa i ni dawn" ka han ti a, a meng phawk deuh kawk a.


Chutah pregnancy testkit chu bih leh in a ding chhuak ta vut a.

"Mambawih" lo ti chhuak hulh in khum ah chuan min lawnchilh ta a, ka biang ah lo dawm a kan chal a insik tir lai chuan a kuttha chu a khur ru dur dur tih ka hre thei a.


A thawk a rangin a lungphu dup dup chuan ka awm a nghawr che thei hial bawk.


Chutah dim em em hian ka hmui ah a rawn fawp ta a, inla hrang hlek in pa zet hian a han kiai suk a. Min lo fawp nawn leh siah in ahma aia rei leh ril zawk in kan han in keih mial mial a, a thawk lak zawngte chuan mipa a zawng a rorum ber hi a khur a nih chu!


Rei ngial hnu ah min fawhna chu duhtawkin hnai takah lungchim em em mai hian min han en a. Mitmeng a daw ngailo tih hi a dik tak zet a nih chuan maw... ka pasal mitmeng ah hian a nupui ka nih avang a vannei intihnate, min hmangaihna leh hei ainasa a min hmangaih zual zel tur a intiamna te ka hmu thei a sin...


"Tun dinhmun ah hian eng nge ka sawi ang ka hre lo a ni" khur ru dur durin a lo ti chhuak tawl a. Kei erawh ka lo nui hak thung. 'i hlim takzet a nih chuan thu in i sawifiah zo lo ang' tih chu ka thil hriat thar a ni ta reng a.


A puan min sin tir chu a kut pakhat chuan a han pawt hlip a, a kutphah lehlam erawh in ka biang a la dawm reng. Chutah ka dul chu dap dun dun in a han nui ro leh hawk a. Keiin hmuh nawm ti em em hian ka lo thlir thung a.


"Naute, i awm tih min hriattir dan hi a mah mah lo maw? I nu i tihreawm lutuk a lawm" thum sup a lo ti chhuakin a nui deuh hawk bawk. Khawvel ah hian mahni kawppuite hlimna vawrtawp thlen sak theitu nih tluk a thil hlimawm dang a awm tawh dawn chuang em nile aw???



Chungkaw dangin ka rai thu an han hria chu an hlim khawp mai a, ka pa phei chuan min han chibai leh lawp lawp a, chhung țawngțai inkhawmna ah pawh lam chhuak telin Pathian hnenah lawmthu sawina te a han nei nghal a.




Aizawl a kan chhungte kan han hrilh ve pawh chu phone kal tlang mah nise an hlim zia chu a hai theiloh, ka pa in indim tur in min chah ta mawlh mawlh a, ka nu pawn indim tur a min chah ngun viau hnuah "Mambawih, chutia i rai chuan helam ah i rawn awm hahdam rih dawn em ni?" a lo ti a.


"In check up te a ngai dawn si a, thingtlang aţang chuan thil tih a harsa ang, kan bulah lo awm thla rih la, i chhungte kha ka lo sawipui dawn ami?" a ti leh zet chu thaw hakin ka ngawi deuh vang vang a.




Ka nu min ngaihtuahna pe na lutuk hian ka chhungte leh ka pasal te rilru tur dawn lek lovin Aizawlah min lak thlak theihnan sawi a rawn neih chu ka hlauthawng ta kher mai.


"Nu, thil hi i thlir lawk thui țhin emai, in check up a țul hun ah chuan kan pa nen kan lo kal mai dawn a lawm" ka han ti a.


"Aw... chutiang ngawt a nilo, in fa tir ber tur a nia, dimdawi tak a inenkawl i ngai a lawm" a lo ti ve leh zel a. "In pa pawh ka lo sawipui ang, rem tih lohna tur a awm ami? Hetah ultrasound te a awm a, i pai hlimchhawm lai chuan in check up deuh reng la ka duh a ni" a lo tih zel zel chuan ka insehruh ta țeuh a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 7th, 2021, 11:46 pm

"Nu, min ngaihtuah dawn lutuk tih chu ka hria a. Mahse, rai tak avang mai a mahni in lama han awm ngawt pawh chu thil mawi a ni ber dawn a mi?" a rilru tihnat hlau tel tak chung si chuan ka han ti a.



"Ngahnge maw thil mawi a nih loh ang le, i chhungte'n an rem tih loh i hlau a mi? Keimah ka lo bia ang" a rawn ti let khauh chuan beidawng deuhin ka nui halh a, a va ngaihtuah kilkhawr țhin tak.


" sawi te chuan rem han tih lohna chhan tur chu a awm lo a. Mahse, mo dangte pawn nau an pai ve țhin tho a, naupai tak avang a mahni inlam a awm veng veng ta erawh an tlem viau ang chu... nangpawn chutiang chuan i mo te che se i duh em ni?" thutak deuh huat theih miah lo a nui tel chung a ka tih leh chuan a ri zui hlaih hlaih a.



"I u te nupui dinhmun leh i dinhmun chu a danglam a lawm. An ni chu khawpui ah an awm a... nang erawh ultrasound pawh awm lohna khua ah a nih kha i awm, intehkhin reng reng suh" a lo tih leh tak hlaih hlaih ah chuan chhan zel chi ah pawh ka ngailo.


Ka pa bia ila a fuh zawk ang.

Aizawl lam ah awm rih turin min duh thu a ka chhungte a rawn bia a nih vaih chuan ka chhungte hmaizah a na dawn lutuk tlat, ka rai tih an hriat ațangin an thiam ang tawkin min duat ve tehlul nen, ka nu'n a lo bia a nih chuan 'he in ah hahdam lo lutuk a insawi a, ka zuk zualko angte an ngai' thei hial ang chu.


Kan inbiak tirh a ka hlim tehreng nen, ka nu nen kan inbe zo chu ka tawt deuh țun a, 'ngatinge ka hlimna hi min țawmpui ve mai lo a, mahni pawh a inenkawl theilo ang ziazanga min tih leh chiam țhin zel le' tih vel chu ka ngaihtuah kual a. Ka pasal leh ka chhungte hi min enkawl turin a ring zo tak tak theilo ni te'n ka ngai a, ka nu rilru put hmang chu ka dem dawn dawn mai.


Plate ah Lakhuihthei chansa vek chawi chung a mut pindan ah Zoramchhana a lo luh lai chuan hlim luih tum zet in ka lo nuih a.

"Khawi a mi nge a?" ka lo ti deuh hu, kawngkhar nam phui leh in khum bul dawhkan ah a thil lo chawi chu a hung a.

"Ka nu in i ei chak a ring a, huan mawngah a hmin a zuk zawn sak che a nih hi" tipah a khum tlangah a lo țhut chuan ka thaw hliai mai.


"Khua a thim tawh si, ngahnge maw zan zan ah te huan mawng ah a zuk kal duh le..." ka ti vang vang tak nangin an theih ang tawk a eitur țha a min vur an tum ve lutuk chuan min hneh hle a ni.


Kan pa chuan hmawlte suih zum min pe in Lakhuihthei chu a lo chawi hnai a, " dan theih pawh a nilo, naktuk lamah ka zuk vai țha ve leh dawn a nia, han ei chhin teh, a thlum ngawt ang" a han tih zawm a.


A hlim hmel hmuh hahdam thlak lutuk chu hnukno țeuh in rei ngial ka thlek a, khawpui lama chhungkhat a rai te lawmpui nan cake man to tak tak order a, kan han ei vel țhin aiin ka pasal leh a chhungte'n a min duhsakna thei chu a thlum loh bik ka ringlo.


Khap lo lek a ka melh tak veng veng ah chuan "Mambawih?" lo ti sup in Lakhuihthei awmna plate chu a lo lek hnai a, "i ei chak lo a mi? Thil dang ei chak zawng i nei em?" tia ngaihtuahna hmel deuh a min en tak ah chuan "aih, khawi.. a thlum dawn lutuk" ka ti var a, ka mittui erawh a tla lo chauh tawh.


Rangzet in hmawlhte chu ka ban sak a, Lakhuihtheih zai lepah vih pah chuan "ka nu chu a tluk sual palh te a hlauhawm a sin le.." ka han ti a, ka aw chu a lawi lek lek.

"Ka pa in a cell li torchlight in a en pah mawle" lo ti ve hluk in a nui deuh suk bawk.


Ka nui ve tak nangin ka hawi chhuak thei tawh rih lo, ka ei tur zawng a huan mawng lam a ka nu leh pa te chetla vel tur ka mitthla tel tlat avang chuan in ka mittui a hnai ruai a, an phak ang tawk a min duat em em laia ka nu'n ' Aizawl ah awm thlak' chungchang a rawn sawi vaih zawngin an hlimna a chimit duak ngei ang.

Zoramchhana chuan ka thei ei lai chu hmuhnawm tidduh a min lo thlir vung vungin "a tui em? A thlum ve tawh tho em?" a lo ti mawlh mawlh a.


"Umm" tih ngawtin hawi chhuak ngamlo chuan ka chhang let.


Chutah han thaw chhuak deuh huaiin ka tukhum sam ah a rawn chul leh a, "helam chu thil a harsa em a, rai lai a thei eitur țha pawh hmuh tur avang ang, nakin ah Aizawl a mi coconut hring kan chah ang a, a tui i in țhin dawn a nia" ka sam ah chul hliau hliau pah a min duatna âw kâ dam ruih a a lo tileh zet erawh ka inthun theihna a bo zo vek.



Insut hraih in a nghawngah ka ban pahnih suih betin ka kuah bet chawt a, ka mittui tla zung zungin a nghawng a far huh rual a "Mambawih?" a lo tih sup te chuan a ri a țah chhuah mai hlauin ka kuah bet nghet sauh sauh a.


"Eng ngatinge? i țha em?" dam thluam a ti a min han kuah let ve hlu hlu chuan "umm, ka... min duat lutuk vang vek" ti țiau in thawm chhuah rin hlau fe in ka inhnit zawm hlap hlap tho.


Chutah zet erawh a thil chawi lai chu dawhkan ah dahin a malchungah amah hmachhawn in min pawm kai a, nghet lutuk in min han kuah ta hlu hlu a. Hetianga a malchungah min pawm chang apiang hian kan fianrial hun hman dun hmasak ber țum kha ka hrechhuak ziah țhin. A angchhung a tluk luh lo hahdam thlak zia ka hriatna hmasak ber țum kha.



Reife hnu ah chuan ka darah a khabe lo nghat in a hmui chuan ka beng a lo nawr a "na i neih vang a nilo takzet tiraw?" thum sup a tiin ka beng chu a rawn fawp zui a.

"Ummm, inzavai in min duat lutuk a... ka vannei em a lawm" thaw ham ham pah a ka tih let chuan uang ru deuh hian " ava mak dawn ve aw, ka melh rum vang che in i țap tawh bawk, tunah kan duat che avangin i țap leh bawk a, kan fanu tur chu a rilru a no dawn hle a ni maw?" ka hriat tham lek a zawi ruihin ka beng bulah chuan a lo ti sup sup a.



Ka nui ve ta hak mai, a awm ah bei hle hle pahin a khabe hmul chu ka khawih sak niap niap a. "Hmeichhia ani ringawt dawn ami?" ka tih deuh hâ chuan min lo melh chhuk runin chik deuh hian min han thlek a.


A kutpakhat chuan ka mittui luanna hnu chu lo tuai pah thuak thuak in " hmeichhe naupang pangchang thiam deuh, thinlung nem em em leh a hlim chang pawh a țap nghal par tur hmel hlir a lawm i rai thu ka hriat rual khan ka mitthla" thutak fê hian a ti ta roh a. Kâ hau a ka en lahin a nui duh miah bawk silo.




Ka tih ngaihna hrelo zak deuh bawk si chuan a kutphah chu man sakin "eng a? fanu țahbelh deuh neih i duh a mi?" ti deuh hlak hlak in ka țhu mar ta a, kan pa erawh a nui ta huk huk.

" a nilo em ni? Mitmeng danglam deuh a melh palh rual a mittui dir nghal zung zung tur...." min han tilet a, sunday tuk a min melh rum deuh vang ngawt a ka țap ta mai kha a sawi chhan tih ka hriat avangin ka tum nghal bar a, Zoramchhana thil tum tak a lo nizawk a niang chu...


Nui chur chur chung a a awmah min han kuah beh leh pah chuan "a rilru a no nasa dawn mai si a, a lo pian hma ațangin ka ngamlo sa nghal lek lek leh nghal" a ti leh zuk a.


Kei ka țeu nasa ta mai.

" a hmingpum a i au phei chuan rilru nat lutuk avangin thih daih te a inring ve ngei ngei ang" ka ti let zet erawh a ri meuh in a nui chhuak ta hawk hawk.



Khum ah chuan min tluk pui ta a, a muzangthal duai chung a ka bawk chu ka bek sam ah lo zen lutin a hmai bul chet ah min kuai kun a "Sunday tuk a i rilru na khan thih mai te i lo inring em ni?" tiin min han zawt let a, a mitmeng pa lutuk a nuihzatna lo lang chhuak chung a hnai tak a min han en tak ah chuan ka hmai a sa leh hat hat tawh.



"Rum deuh a min melh lai khan ka hmingpumin min au tel la chuan ka rilru na lutuk kha ka thi daih thei ang" tum deuh bar a ka tih khum chuan lungawi hmel takin alo nui ta suk suk.


Min duat țhan lutuk avangin a âw kâ danglam leh rum deuh chu ka tuar thiam tawh lo tih a hrethiam te pawh a ni mahna, "inthunun ka zir nasat a ngai dawn a nih chu" a ti ta hleuh a.


Keimah zawk rilru no lutuk pu lo turin leh insiam țha tur a min zilh ka rin tehlul nen, amah zawk in insiamrem a tum nghal mai chu mak ti viau mahil min țhawng lutuk lo. A chhan chu ka pasal ani miau a. Pasal dinhmun hlen chhuak hnehsawh em em tu.


Nupa hlimna thuruk chu kawppuite aia țhat chhuah tam zawk a, ngaidam hmasa zawktu nih te, dawhthei hmasa zawktu nih te hi a ni an lo tih țhin kha ka pasal nun ah hian ka hmu chiang tulh tulh dawn chu a nih hi.


A tukah ka han harh chu khum ah keimah chiah in ka lo mu a, ka harhchian deuh hnu chuan pawn lam a thawm chu hre zawm nghal in ka tho chhuak ve ta nghal a.



Kan nupa mut pindan ațang a ka chhuak chiah chu tapchhak bul chhuat laiah chuan Lakhuihthei hi a lo let phung mai a.


Kan pa in min hmuh rual chuan "I lo harh hman a?" ti fan ruihin a iptepui chu khai țha in min pan nghal a.

"I va tho hma awm em em ve?" ka lo ti ringawt.

" hma bik vak lo, i mu tui em?" a ti a, "aw, ka țhang harh pawn ka hrelo" ka tih laiin ka chal ah lo fawp pahin ka dul chu a lo hup deuh vang vang a. A kutphah awmna chin chu a lum nghal vung vung bawk.


Nizan khan Lakhuihtheih a vai tur thu a sawi tak nangin hetiang vut vut a a chet hi ka ring miah lo.


"Mu leh la, ka nu te zing țawngțai inkhawm kal pawh an lo la haw lo" tiin min dinchilh a. Ka sam la hnawk niai a sam țawnna tang chu pawt chhuak in ka hnunglam ah min han hui mam sak leh vek mai a.


"nawm lohna ka nei tawh silo a, mut reng chu taksa a kham" ka tih sep chuan a lo nui che dawt
"Okey, va inphihfai la, Sanghal rep hi Aizawl lam ah thawn turin kan chhuak dawn nia" a tia, phawk deuh a ka han en chuan "i chhung te'n an ei chak ang, kg2 vel lek hi kan thawn dawn nia, sumo driver pawh ka biak lawk tawh kha" a lo ti leh mai a.


"Thawn kher an ngai a mi? Engmah kan hrilh lawk bawk silo a.." ka tih deuh niah niah lahin "i pa nen kan inbia a lawm, ka hrilh lawk vek tawh" a ti leh mai a.


Ka bu ta nghat nghat, bualin ka pan hma a Lakhuihthei han rem fel vel ka tum chuan a phal ikhaw lo mai a, kawngkharbul hmanraw eng îlo dahna thingrem chungah chuan a rem chho zung zung a, tih vak ngaihna hrelo in keipawh intifai tur chuan bualin lamah ka lut ta a.


Hâ ka nawh vel lai chuan ka uak deuh țhat țhat a, pakhat lah chuan kawngkhar bul a rawn thlengphei rang vut vut viau leh nghal.



U Zotei lo thawh chhuah hma in chaw ka lo chhuang kai a, ka nu leh pa te an lo haw ve leh tawh bawk a, ka chhungte Sanghal sa-rep tur chu kan nupa chuan kan chhuahpui ta a.


Kut inkai rial a zingkar la hma deuh tak a khawlai dung a kan han kal chu chhaih fiamtu kan ngah ngang mai. Mipa dangte ang bawk in mite fiam nih chu nuam lo a tih ka rin tehlul nen 'nupui te kut chelh a kalpui tur neilo pawh an tam dawn nen' a ti hmiah mai a, pasal te zawkin mite hmuh a a ta ka nih zia lan chhuah tir a hreh loh miau a hnu, intineitu zetin a ban bulah chuan ka kuah tel ta nghal a.



Sumo stand ah chuan zin tur an lo țha hnem viau, țhenkhat chuan min lo be sawm nghal bawrh bawrh a.


Kan pa lo biak lawk tawh driver chu kan pan ding a, sumo hma lamah kan thil fun chu uluk deuh hian a dah thlap a.


Driver chuan kan pa chu en in "coconut lo han lian tham deuh lo haw ngai dang a awm em?" a tih chuan ka lo ding ngawi ve reng a.


A phone chu phawrh in ka hmuh theih turin a lo lek hnai a. "Mambawih, rai lai a neutrition țha deuh kha Internet vel ah a thlalak a awm chuan download la, Patea te lamin an lo lei dawn a, țhianpa hian naktuk ah a rawn phur haw leh nghal ang" a ti ta a.


"Aaa... chutiang engmah a la ngailo" ka han tih ngial pawn engmah sawi hauh silo in a mitmeng zawkin min nawr chhuak a, naupai tan a thil țha ni a ka hriat Mizoram a awm ho chu ka search ta zung zung a, zingkar a nih vangin ka rin ai takin net pawh chu a chak ve zek mai.




Mamawh te kan inchah fel hnu chuan kan inzui let leh a, kawng a kal pah chuan a patea fanu Muani nen khan an inbia a, a thlalak thawn ho kha lo la khawm turin a chah uluk viau bawk.


Ka nu te in ah kan lut kawi zuai a, ka rai tih an hre ve bawk nen min lawmpui ngang mai. U Dtei erawhin a ze ngai bawk chhuah in a nghal leh viau tawh.


"Thla khat in innei pum dek dek a, i puar nghal pawng dawn si a, in va ti ngun awm ve a?" a ti pek a.


Chhan let hrep ka chak rualin chhan let ngaihna ka hre der lo. Chhantu mamawh deuh a kan pa ka en chuan a lo nui ruh ruh a. "Henu hi chuan sawi awm leh awm loh pawh a hrelo.. tiraw?" ka han ti deuh ringawt a.


U Dtei te nupa chuan kan sawi tur hrelo hawihai hmel chu min nuih ta chiam zui.


Rai lawm nan kartawp ah chaw eikhawm an han rawt deuh ringawt a. Chaw ei khawm chu a lo pawi tivak lo a ni ang, kan pa chu a bu nghut nghut a.




Hun aliam ve zel a, kan pa pawh Thlam sak a țul si a, ram lamah a liam nitin a, ri te chu bukte kaih in an riak lut fur hlawm a, kan pa erawhin min ngaihtuah em avangin lang in thlam chu a sa ve a, a hah dawn hian ka hre lutuk țhinin 'riak ve mai rawh, vei vahna a thui tham si, i chau ang' ka han tih ngial pawn ' ka fanu kha a lungchhe thei țhin em mai, riah san chi pawh a nilo' tiin min fiam let zuk rauh zel.




A kal chhuah dawn ah erawh 'indim turin' min chah uluk țhin viau a. A lo haw hun awm ah hi chuan thui em em kal loin ka lo hmuak țhin a, thlam sa a a virbuai hi thlan dai hman miah lovin a lo haw tlang ta țhin a, kawng thui zet ah kê a a rawn kal țhin hi chu a chau in thlan vangin a huh hluam zel.


Ka lo hmuahna țhin ah ka hmel a rawn hmu chiah erawh " i kê a lo kham tawh em?" ti in hahdam hmel em em hian min nuih țhin, kan nupa chuan nupa dangte awt bik miah lovin kan hlim ve em em mai a sin.



Min lo biak chang apiang in ka nu lah in "Aizawl ah inentir turin lo chhuk rawh u" a lo ti chhen mai a, Zoramchhana'n min hruai a tum lo pawh a nilo a, Thlam te han sa zo phawt la, heta hna țul ang ang khawih fel lo a zin chhuah chu i rilru a kap mai mai ang ka tih vang zawk a la tla thla lo mai kan ni reng si a.



Hrilh hrilh pawn 'thingtlang ah chuan nau pai te hi inngaiawlsam lutuk a, nau neih dawn a ruai ah naute awm dan a diklo tih te inhrechhuak hnuhnawh a, thil a pawizo vek tawh țhin' a lo ti hram zel.



A tawp ah phei chuan ka pa ka biak phah ta nghe nghe a, ka nu chu tlemte tal a lo khap deuh tur leh thil a rawn tih lutuk chang hian awm nawm lohna bak min thlen ngailoh thu ka hrilh ta tawp a. Ka pa pawn a lo biak tur thu in min thlah ta a nih kha.


Ka Coconut intur hi Aizawl lam a mi a chah lut ziah a, chhungte dang lakah han inthlahrun ve dawn chang pawn an mahni ber ber hian ka neih zat hi an lo chhiar a. Ni3 vel in tur awm ang vel a nih dek dek hi chuan "kawng chin a hriat loh, chah tur, chah tur" an ti a, inthlahrunna hman pawh a awm țhin lo.


Ka rai thu chuan tlang a thang chhuak rang khawp mai, tu te mai pawh chuan min lawmpui thiam em em a, hmeichhe naupang inkhualtelem lahin kan nupa lem an lo chang thul.


Inkhualtelem tur a an in auh khawm rual rual in "kei chu Nurse Hmelțha-i ka lem dawn, ka raipuar mek a.." tiin an dul te chu puan in an han hnawh puar vel ta țhin a.


Lalati tel ve tawh na ah erawh ' a nitei' bik liau liau ka nih tlat avangin ka lem a chang ngei ngei a, tumah in a chuh hneh ngailo, țawng lam ah chhun tur a nei țha bawk si.



A chang phei chuan an pa Ramchhana hian "Lalremruati te unau hi kan fate awmtu tur ber an ni awm si a, an nghal mai si, ka duh lo riau mai" ati sup sup țhin a, ka nuih a za țhin viau.


Naute a lo pian hma hawt ațangin Lalati te unau nghal ru lutuk in a fate an han ching let vel tur a lo huphurh lawk lutuk chu khawngaih tha te pawh a la rum rum țhin a lawm.



Kan pa in thlam a sak zawh ni chu inrinni a ni a, hna kal ka ngailo bawk nen kan chhungkua in kan zui ve ta a. Auto kan hmang a, chep tawk a kan han inhnawh zet mai chu a hlimawm phian mai a, kei erawh kan pa in min pawm thung a.


Kawngchhe lai a dai fuh chang a a han insawh deuh te chuan min ven lutuk a lamah amah chu a hah dawn hian ka hre lutuk a.


"Khalh fimkhur deuh teh" ti sup in driver chu a hrilh ta țhin a, driver thiam loh ai mah chuan kawng chhiat vang a ni reng si a, Driver pui chu a kawngaithlak tak tak a ni.




Kê a kal theihna chin aţang chuan kan inzui thla diah diah a, Lo kawng pawh chu a lo bel tlet tlawt tawh viau a, zau tin a thlam lo ding far tawh a han hmuh theih tak chin ah phei chuan leilung la paw var vo mah se thlawhhma tak tak te pawh a ang tawh viau lawi a.


Ri te chuan keini chhungkua inzui diah diah chu min lo au chul hlawm a, nuam ve nak nak tak chu a ni.


Thlam thar ah ngei mai chuan chhun ah Sanghah-ţin leh Dal kan han kang hluah a, rawtuai rep leh behlawi rep bai tur a kan ken chu ka nu in a bai phuan suah bawk a, kan pa te pafa in thlam chung tur ah chih lai in u Zotei nen thlam kawt ah chuan pangpar chi te kan lo theh ve a.




Ka nu in "pangpar chi theh nan chuan a la hma mah mah ang.." a ti țhin tak nangin kan pangpar ngainat zawng ve ve chi chu kan in theh siak a ni hawt a.



Tlam chung sang ațang Zoramchhana'n " Thlam chhungah lut rawh u, ni a sa si, a chhungah lo zuk awm hle hle ru" a lo ti dut dut țhin a, a tirah chuan kan bengkhawn duh vak lo nangin "Mate, Mambawihi kha luhpui rawh, a damlo leh mai ang a sin" tia keimah vang a a nau a hauh tak ah chuan luh loh theih pawh a ni ta lo.




Ka nu chuan "thlam chung khi han chih zo se, chaw kan fak dawn a nia. Induh leh sih tui kha lo va chawi ula" a han tih chuan u Zotei nen chuan phur zetin galon kengin kan chhuak a.


"Khawi ah chuan maw in kal dawn?" min ngaihtuah hmel zet a kan pa'n a lo tih hluk laiin ka nu a lo inrawlh thuai mai.
"Tui an chawi dawn a nih kha, eng an va ti em bik nang, i Thlam chung chih ah khan rilru pe hle hle rawh" a ti ta a, u Zotei nen chuan Zoramchhana rum hawk chu nuih tet tet in tui lakna lam chu kan pan san a.



Thlam sa a an thawh chhuah ni ațang khan tui lakna hi hna hmasa ber ah neiin zau khat ințawm theih turin Lo laili tak ah pipe te nen tui kawng an lo sial hi a ni a, kan Lo ațang pawn a hla fahran lo bawk a, tui kan nei nuam dawn khawp mai.




Kan let leh pawh chuan an lo la inkhawih zo lo deuh a, hmeichhe tan han puih vak ngaihna an awm silo nen thlam chhung ah ka nu ho in kan tawm ta far a, Thlam nam thlak chu a zau reuh si a, phone a hla play in u Zotei nen chuan namthlak ah țhu chung chuan kan han sakpui ta țhin mai a, C Sanga hla a lo in play chang in thlam chung ațang kan pa pawn a lo zawm ve dut dut țhin.


Tlai lamah chuan Thlam sa a lo riak lut tawh sa te nen chuan kan haw rual thei ta a, an buh chi tuh tur lam ngawt an sawi avangin ka hriatpui ve vak hlawm silo a, kan pa hma ah chuan muangchang in ka kal ve hnak hnak a.


"I chau em?" tiin ka hnung a kal pa chuan min zawt awl lo, ka chauh loh thu a ka chhan ngial pawn ka Em phurh ve te chu min chhawk a, rem lo deuh in hnam chu a darah a bat bawk si nen kan in nuih kan in nuih a, nutling țhenkhat lah chuan fiam tak an keini nupa chu min nei a, ka raino mek tih ka nu in a hrilh leh lek phei chuan kan fa tur chu a hmelțhat an rin thu an sawi uar nasa mai a,


'Mambawihi hmai tlang reng a fuh mai, fa in nei hmelțha ngawt ang' an tih chang a ka pa ka zuk thlek let kher țhin chuan a lo nui suk suk duh lek chauh a.


"Mambawi, raino i hua em?" ti a min zawh erawh in chhan vak dan ka hre lo.

"Ka haw hran lo a niang.." ka tih laiin "a chang chuan a rilru a no țhin lutuk a, melh pawh ka melh țha țhum ngam țhin lo" kan pa'n a lo ti ve zuk a. Rum deuh a ka zuk melh lah chuan a nui țha ve duh der mai silo.

"Aaa, raino lai chuan hmeichhia zawng zawngte nih dan a ni vek hial mai thei, inngaihtuah lungpuam mai te kan awlsam a nia" nu pakhat in a lo tih lai chuan inla hawi Champ deuh in kan pa chu ka zuk en leh kher a.



Nghal em em hian mit min lo siai suk a. Midangin an lo hmuh palh chuan fiam nan tak min hmang leh dawn sia, zuk pan thla in a ban bul ah ka zuk chum sak deuh țawlh ringawt a.




Kawngpui kan han chhuak chho chu pickup ruak bawk a lo awm fuh leh a, kan chuang ve mai ang chu ka tih laiin "auto ka koh tawh a, a lo tlan mek" ti sup in ka phur min chhawk kha kawngpui sir ah a nghat a.




Kâ deuh hau a ka en lah chuan "pickup chu a sawh a na lutuk, i tan a him lo" a lo ti hmiah.


Rî-te lawn kai sap sap in min han auh chuan Auto kan nghah thu in a chhang a, hrethiam takin kut kan in vai ta lawp lawp a, an tlan liam hnu reilo te ah kal lam a kan hman auto bawk kha a lo lang ve hlawl a, a ngai te te in kan chhungkua chuan tawt deuh hian kan inhnawh leh a. Mahse, chhungkua chu kan inpawh zual sawt hian ka hre thung.


In thlen hnuah eirawng te bawl a kan han insingsa fel meuh ah chuan zan dar 7 a lo pel hle tawh a.

Tv en in kan chhungkua chuan kan țhu țhap a, ka nu meizial zial sa apiang chu ka lo țawn ve zel a.

kan pa'n "nu, Thlam kan sa zo tawh bawk a, țul dang a awm leh hma in Mambawihi hi in check up turin Aizawl ah ka hruai ang chu ka ti a sin" a lo ti ta a.


Zoramchhana te unau han fakawm leh na em em chu an nu leh pa te an zahthiam lutuk mawlh mai hi, an nu leh pa te hi an duat thiam in an chhawk zangkhai thiam bawk si, sum thawk chhuak a eizawngtu zawk mah nise nu leh pa rawn der hmasa lovin engthil mah an ti ngailo.


" e, zuk kal rawh u, Mambawihi chhungte pawn doctor rawn tur an hre țha viau ang chu tiraw Mambawih?" Ka nu pawn a lo ti ve thuai a.

"Tun thla hian zuk kal ila, Doctor in țul a tih phei chuan thla tin deuh thaw in check up a Aizawl kan pan a țul rih mai thei a nia" kan pa vek in a lo tih leh duah chuan ka lo ip deuh chawih a.


"Naaa, thla tin em em a ngai lo ang, tun thla ah kan kal a nih chuan thla ruk hnu ah kal leh ila a tawk chiah ang" inthlahrung ru deuh in ka ti ve thuai a, mah se u Zotei zawk in " nilo e Mambawih, naute leh nangmah in hrisel țhat a pawimawh, chuvang chuan in doctor rawn in seasion a siam ang zel a kal kan tum dawn a nia" a lo ti ve thui a.


Aizawl a kal ni tur te kan rel ho nak nak hnu chuan 'Mambawih, i chauh viau loh chuan a tlai tak tak hma in Pupuia kan han kan zuai dawn em ni?' Ka pasalin a lo tih leh chuan ka hnial ta bik lo. Ka nu leh pa te erawh in 'naktuk zan ah kan lo kal ang e an ti' lo ti mai rawh u aw, an ti a.


Kan han lang chu an lo lawm thiam leh pek viau mai, Pupuia erawh a chau deuh a, a khum bulah țhutchilh in a tupa Zoramchhana te nupa kan nih thu kan han sawi ngial pawn a meng â deuh ruai a, engmah a hre mumal tawh lo a nih hmel e, ram lam ah kan che chau ve tho si a, rei pawh awm lovin kan haw thla leh ta a.



Kan pa chuan eng amaw chang hian 'Sakhmelmawite' ti a min auh fiam zuk a ching a, 'kan fanu ka awi e' tiin ka lawiluh ni a a hla sak kha guitar nen sa in zan lamah chuan nau awih kan inzir lawk nasa țhin viau bawk.




Tlai khat ka hna bang chu fawvai hlawh a kan buh her țhintu in a Buh țhap fai sa a lo dah lai tak mai hi ka zuk nang fuh a, vawk note lak kha kan han tum ve zet a. Mahse, mi kan vulh tir leh ta zawk a, a chhan pawh kan pa'n 'vawk chaw pek te kha i lo tum ve leh țhin ang a, tluk sual palh te a hlauhawm' a ti bur ta si a, ka nu leh pa pawn an lo pawm thiam khawp mai.


"Nu Tling, la haw suh, i kawr inhmeh deuh tur ka nei a nia" ka tih chuan a phur em em mai a, ka nu pawn "Mambawihi hian thuamhnaw a nei țha hlawm teh a nia, i duat viau chuan kawr mawi i dawng i dawng mai ang" a lo ti fiam ve a.


Inthlak hmasa lovin kan inneih dawn a ka ken tel kawr awmna chu ka hai rak rak a, a tir ah khan a chang tur awm ten an chan vek hnu ah pawh a la chuang nual a. Mahse, sem zo nghal vek duh lo in la pek awm ngawih ngawih an awm hun a pek turin ka dah țha ve khiau kha a ni a.



Nu Tlingi hian min pui nasa a, Zingah chhekin a mi Buh hi a rawn phur a, an in lam ah a pho țan zet hnu ah tlai lam ah Buhdengkhawl ah her tirin a țhap leh vek a, fawvai mai hi a thawh chhan ani a, kawr mawi lo pek te kha chu a phu lutuk.



"Hei, i ha tawk ngei ngei ang" tia chawlhni kawr tlak a dum a hma ințhui par nalh zet ka pek chuan a lawm thiam khawp mai a, a tuamna sarang ațang chuan la chhuak in a han inteh chhin nghal vel a.


"Mami, a va han mawi em em ve, tun sunday ah hian ka ha nghal ang a, thla min laksak dawn nia aw" a ti ta seu seu a, u Zotei hna bang lo haw ve chiah pawn a rawn hlimpui viau a.


"Chhungkaw fel lutuk leh midang te tan a luanchhuah hrehna nei miah lo in ah i lawi lut a, nang lah chu an mahni ang chiah in i la thil phal em em bawk a, in vannei chhungkua ngawt mai, chhungkua ni tur tak in inchhungkua a nih hi" nu Tlingi chuan a ti mawlh mawlh a.




Hlawh ka lak țum chuan Zoramchhana min hrilh ang ngeiin ka hlawh ațang a cheng singkhat chu ka nu leh pa hnen ah ka chhung lut ve ta a.


"Ehe, Mambawih, a va han tam em em ve, tihian Pathian ram a kan chhun luh bak chu ka lo kawl țha ang a, naute i neih hun ah a mamawh leinan kan la hmang hiau hiau dawn a nia aw" ka nu'n a tih chuan a mak hi ka titakzet.




Ka chhungte hi pawisa hmel an hmuh in an danglam ve ngailo. A chhan ni ta ber a ka hriat chu an intodelh em vang hi a ni.


Kum tluan a ei khawp buh leh bal an nei miau tlat a. Chhungkaw intodelh lo te apiang hian sum an it zual a, thla tin a sum la lut thei mo leh makpa an neih a pak deuh huam ţhin te pawh mahni chhungkua intodelh lo te zel hi an ni ta ber zawk in ka hre ta mai.





March thla tawp kar hnuhnung ber ah chuan kan nupa in inentir turin Aizawl kan pan ve ta a. Tun țum erawh ka pa in kan pa a lo bia a 'kan in lam ah in lo innghah loh chuan ka vui viau ang' tiin țan a khawh ve tak tlat avangin kan in ah kan innghat dawn.




Tim deuh tak a"i hreh em?" ka han tih chuan "hreh lo e" a ti mai a, u Nathana te nupa lah Mumbai ah an awm daih rih a, ka nu leh pa chiah an ni dawn a, a patea te chhungkua va fin ai kha chuan a inthlahrunawm loh zawk tur ah ngai ang.




Aizawl kan thlen thlak zan ah chuan kan colony te chu an lo lang kim țhep țhawp viau a, cake an lo order lawk vek avangin cake cut na te kan han nei leh rih a, ka cousin te ho lah chuan "thingtlang nu dik tak i ni tawh?" tiin min fiam min fiam a.



Ka pasal te in ah ka lawiluh ni khan kei chuan ka pasal nihna țawm ve nghal in thingtlang mi ang ah ka lo inngai daih tawh zawk a. An mi fiamna erawh ka nuih liam pui mai mai thung.


Ka room țhin ah kan nupa a kan han mut dun tak ah chuan eng amaw tizawng tak hian a romantic riau mai hian ka hria a.


Tui zet a ka khum ni țhin a ka pasal muhil thawk la suai suai lai chu thlir ngawih ngawih in ka han nui leh seih țhin.


He pindan chhung, he khum chungah ngei mai mu chung hian ka hmalam hun tur ka suangtuah kual țhin a nih kha, hmeichhe tleirawlte thinlung ah khan a tak ram ah a la tem hma hauh ațangin a pasal tur tan hmun ruak a awm a.


'Tunge ka pasal tur chu ni ang?' tih hriat chak in suangtuahna ram zau tak chu ka dai lut țhin a, chu suangtuahna ram a Lalfapa te kha ka duhaisamin a thlen phak te chu an ni a.



Mahse, a tak ram ah erawh suangtuah pawh ka lo suangtuah phak ngailoh mipa inngahna tlak tawn tir ka ni thung si. Tleirawl thinlung a hmun ruak awm kha ka hmangaihpa Zoramchhana tan a ruak a lo ni reng si a.



A chang phei chuan hetihian ka ngaihtuah țhin, 'u Jo-a rangkachak a man sak ațang chiah khan Zoramchhana nen kan thawnthu chu a lo ințan reng tawh zawk' tiin, rangkachak a bo a, mualphona namailo tak a hmachhawn lai te khan kan pahnih thawnthu chu țek tla in kal thelh ang mai hian a lo in kal thelh reng tawh zawk a, a hmeichhia in a phatsan ațang phei kha chuan a ni hi ka tan liau liau a serhhran a lo ni tawh, ka tan... Ramhmangaihi tan chhauh a serhhran a lo ni daih tawh.




A chhip sam karah kut zen lut in a lu lei chu ka hmeh sak niap niap a, "ka Lasi nula min ti țhin tiraw? kei erawh in 'khuavang Lasi te'n ka tan chiah a an lo serhhran ka chanpual bik liau liau ka ti thung ang che'' zawite in ka ti pah sep sep a.


Nisa hnuaiah a tal nasat luat avang a a hmai vun uk thim deuh kharh chu ka hmui in ka han nul kual sak dan dan a.


Ka chet dan chu a hriatna thazam in a lo dawngsawng rang kher mai, lo che țual țual in a han rum chhuak hawk a, kei erawh ka lo nui hak thung.


Ka hnar in a hnar ka nul lui leh ngat a, chutah tho phang mitmeng phelh phang a lo meng chhuak in "Mambawih" a lo ti hnawk țuak.

"ka ti harh che a mi?" nghal zet a ka tih chuan zawite hian a nui hawk a, ka bek sam ah a kut lo nawr lutin mit ti zim deuh sun hian min lo en ta a.



A awm ah bawk titih a ka lo awm hnaih em avang chuan in thaw leh huai phawt in dimte in ka sam chu ka bengah a han zep a.



Chumi pah chu mut chhuak aw hniam ruih hian "ka hmuh hmasak ber ațang che khan ka thawk lak thleng a tibuai in ka ngaihtuahna i luah khat a" a lo ti ta a, ka sam a hui sawnna kut vek chuan ka biangah lo dawm in " a la ngai reng, nitin mai hian i zun hian min zem nghet tulh tulh chu a nih hi" ti sup sup in ka khabeh ruh kual ațang ka beng hnuai tlengin a han nul kual dun dun a..


A hmel lang cool ruih ațang chuan a mumang a rawn phun chhuah pui ni te hi a ang mah zawk.


Inbeng kang hlek in a hmui ah ka fawh sak zeuh a, ani erawh maimitchhing chual in a lo kia suk thung, "muhil leh tawh rawh" zawite a ka tih sap chuan a rawn che chhuak thut a ni ber.



Khum ah chuan min leh thal a, a kut chuan ka taksa chu rawn dap lawr dun dun in duhthawh zet in min nghal a, keipawn lo insiam rem ve zel in uar tak hian ka chhang let a, ka kawrfual hmawr ațang lo zen lut in ka malpui chu a han tuai kual hauh hauh a, ka thawk rang nghal vek chu min fawp reng pah chuan a han kiai pui suk bawk a.


"nichin lawk a mutchhuak zet a min be tu kha i va ang ta lo ve?" Aw sai hlak hlak chung a ka han fiam chuan rum nghut in ka kawrfual chu ka kawnglam ah a rawn nawr tawm chho a zei fahranin min fawp zawm lehin duhthawh lutukin a che zawm ta a...



A tuk ah chuan Bawngkawn ah ka nu țhian pa clinic kan pan ta a, keiman insawiselna ka nei em em lo bawk a, check up satliah ngawt kan ni a, khawl hmang a doctor in ka dul a han hrut kual dan dan tak ah chuan reilo te hnuah kan fa ngei mai chu screen ah chuan a lo lang dum ta kalh mai a.


"Hei le.." doctor in a tih rual in ka pasal chuan screen chu a din hnaih zual sauh a, hmuhnawm tih hmel em em a a fa ruangam la chiang lo zet a thlir vung vung lai tluk a thil hmuhnawm dang ka hmu bik chuang lo.




Doctor vek in "a lungphu pawh a țha khawp mai" a han ti leh a, eng amaw a khawih hnu reilo te ah kan naute lungphu ri dat dat chu kan hre thei ta a.


A fa lungphu ri a hriat rual chuan khum a ka mu chu min lo en vut in hlim tih hriat takin ka pasal chu a nui chhuak ta hawk hawk.

"A lungphu ri a nih ve reuh chu" ti supin a han kiai leh suk a, a mitmeng dum ruih erawh hlimna chhiar sen loh avangin a de sawr sawr thung.


Doctor chuan thla leh ah check up a kal leh turin min ti ta reng a, thla leh a naute lungphu awm dan a zirin thla tin lo deuh pawn in entir hun chu a siam rem theih tawh tur thu a sawi leh a.



Chhun ah chuan u Mami te nufa an lo leng a, Grace-i te reuh chuan apa Zoramchhana pawm kual vel chu nuam a ti phian mai a, thingpui in dawn ah a nu in lak hran a han tum chuan a duh ta reng reng lo mai a.



A pa lian ber chuan a malchung ah hmeichhe naupang pawm chungin thingpui a in ta roh a. A pa Ramchhana cake ei lai kher te chu ei ve a duh tlat a, a hran pek kan tum lahin kum 1 tling ve awrh siin a duh bik der lo.


A tawp ah chuan u Mami tih ngaihna hrelo chuan " aaa, tikhan i training lawk a ni mai a lawm" tiin a nui ta hawk hawk a.

Grace- i lah a fing ve ngang mai, a pa Zoramchhana'n thingpui a in zo tawh tih a hriat chuan a kal duhna a kawk kual ta ruai mai a, pakhat lahin naupang lawm hur ang a lang silo in nau han tih vel dan a thiam fu roh bawk si, kawtzawl ah an pahnih chuan an inpawm kual leh ta a, Grace-i lah chuan a pawmtupa rilru țhat zia chu hrethiam ve ni hmiang, a nuih sen sen reng a, a chhun mut hun a pelh duai thlengin an in pawm kual a, a tawp ah phei chuan ka pasal darah chuan zawi ngiai in a bei ta hle hle a.

"A nu ka au dawn mi?" zawite a ka tih sa sa chuan "a pawi lo, tihian muhil rawh se" a ti sup a, a kutphah lian pui chuan Grace-i hnung chu a chul hauh hauh a, kar lo ah an in awi muhil chu ani der mai.


Aizawl kan thlen thlak hma ațang leh kan thlen thlak hnu ah pawh a ruk in ka nu chu ka khap nasat țhin em vang te pawh a ni ang, ka pasal tan a hriat nuam lo tur eng thil mah a sawi biklo. Ka pa nen an awm tlan chang erawh in ngaihngam deuh in ka awm thei a, rilru hahdam deuh in thil dang ka tihsan ve thei bawk.


Ni 3 kan chamna zan ah erawh thu lawmawm loh zet kan dawng ta a, Pupuia'n mihring a chang zo ve tawh lo.


A tuk mai ah vui nghal tur a nih avang chuan a zan a zan in keini nupa pawh haw chho turin kan insiam ta chuk chuk a, motor han hman mai tur dang kan hre miah silo a, ka pa te car pakhat chuan kan inkhalh chho ta ringawt a.




Kawng a chhiat mai bakah keimah min veng thawng bawk si nen kan tlan chhak viau lo.

"Eng em ka ti bik nang, i duh chuan khalh chak deuh la" inthlahrung ru deuh a ka tih chuan "a nih tur ang a ni vek tawh tho a, a ruang kan nan hman chuan a țha a ni mai" ti sup in min han țawng thlamuan.



Khaw chhung kan inkhalh thlen meuh chuan zing lam dar 10 a hnai kuar tawh, kan nupa a ka inzui lut chu Pupuia nupui chuan min lo țah khum rawih rawih a, ka pasal hming lam meuh in "pa-a i tupa Zoramchhana te nupa an lo kal hi, i țhut peih loh pawn 'min kam kang rawh u' tal han ti leh teh' a ti a, Pupuia'n kan pa a ngainat zia hrechiangtu te vek an ni hlawm bawk nen ka pi țah hla avang chuan mittui tla lo reng kan awm lo.



Kan nupa chuan reilo te ruang kan kil ve a, mahse ei siam tu lam in "chaw lo ei ve phawt rawh u" tiin min lo hruai hrang a, chaw ei lai te chuan sawi tur a vang khawp mai. Ka rai thu a hriat te khan a hlim ve em em kha a ni a.


A tupa in "ka pu, fanu hmelțha deuh mai ka nei dawn a, a hming i sa ang chu tiraw?" tia a han zawh chang te khan thawk harsa ti chung chungin amah ngeiin a hming a sak tur thu a sawi ve tak ang țawk țawk kha a nia.


Chawhnu dar 2 ah ka pu chu kan vui a, an unau ah ka nu nen chiah a dam awm chhun an lo ni tawh reng leh nghal, a kal ve leh ta si a, ka nu chu a khawhar zual ngawt ang le...







Keima hriselna lamah insawiselna em em tawk loin tluang takin nau chu ka pai chho ve zel a. Ka dul pawh a lian tha ve tawh viau mai. Lo lam hna awl len lai tak a nih avang in u Jonathan-a leh a thawhpui țhenkhat te'n lo zin chhoh a, lui kal an rawn rawt thawr mai a.



Kan pa lah Lo lam hna țul tih loh ah chuan ram a lo chhuak khat tawh bawk si nen a lo phur khawp mai.

"Min hruai ve loh chuan i kal ve ka phal dawn lo" tiin ka vau zauh zauh hial a.


Zan khat chu mu tur a pindan ah kan luh hnu lawk ah ka pa in kan pa chu a lo au leh rih a, tho chhuak in ka pa nen chuan an titi dun ta reng a.



Cement bang a in ping dang a nih avangin an sawi tak ka hre fuh ve thei lo.


Chutih lai chuan dawhkan a kan pa phone kal san chu a lo ri dur dur a, amah chu auh ka tum zet nangin ka pa meuh in be duh a koh chhuak a ni a, a nupui a lawm ka nih tiin a phone chu ka la ta a.


Screen ah chuan number hlang tawp hi a lo lang a, police department lam kha chu an number ka hre bel hneh ve tawh viau a, he number nen hi chuan a in ang miah lo.


"Hello.." zangkhai takin ka chhang a. Chutah hmeichhe aw tham nalh zet hian "Zoteii em ni?" a rawn ti a.


Ka chhan let hmain amah vek chuan "Zote, hei i number zawk em ni? In khaw sumo driver hnen ah i u number ka dil a, min pe ve mai sia.. min pek sual a nih dawn hi a, keimah Andria ka nia, min la hria em?" a rawn ti leh zung zung a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » September 10th, 2021, 11:18 pm

Ka beisei loh lutuk hming ka han hre teh thut chu ka hamhaih kher maiChawpchil deuhin ka lungphu chu a rawn rang deuh dawt dawt a.

'Ka pasal chu engvang a biak rawn duh nge a nih ang?' tih chu ka hriat chak tluk zet in; ka chhan let dan tur mawlh mai ah chuan ka buai bawk. U Zotei angin ka chhang let ang nge ka dinhmun dik tak Zoramchhana nupui ang zawk in?


Andria vek chuan zangkhai fe hian "Zote? I hrethei em?" a rawn ti leh lauh lauh a.


'Ka pasal nupui a lawm ka nih le' rilru a ti chung chuan "a nupui zawk ka nia, hei han pa number ngei chu a ni a lawm, biak duhna pawimawh i nei em ni?" ka ti let ve ta a.

Chutianga a bialnu hlui hnen ah 'a nupui' ka nih thu ka sawi rual chuanin ka lungphu chu a rang zual sauh a, mahse, ka inrintawkna pawh a lo pung belhchhah sauh bawk.



Reilote chhung Andria thawm chu a reh deuh a, ka thu sawiin a țhawn vang a nih erawh ka ring chiah lo. Sumo driver hnenah ka pasal number-a dil a nih chuan nupui a neih tawh thu pawh a hriat tel ngei ka ring bawk.



" aw, a nih chu, Zotei amaw ka ti dawn che a. Nia, nupui a nei tih thawm te ka lo hria a, lawmpuina rawn hlan ve ka duh deuh mawle" nui har har pahin a rawn ti ta chiah reng a.


A tirah u Zotei ang a min rawn hai vel pawh kha a ti der a ni tih ka ring thiam ve nghal mai bawk.


"Kan lawm lutuk e, kan pa pawh ka lo hrilh dawn a nia" ka ti let ve leh mai a, duhtawk ta mai lo chuan in "in inneih ni ah ka lo tel thei silo a, thupha lo chawi ka ba in ka hria " a lo ti leh zel a.

Eng rilru pu in nge a sawi ka hrethiam mai lo. Sawm pawh an sawm em mawni?

"Aa, kan pa pawn a hrethiam lutuk ang che, tunlai ah chuan mahni buai buai in ka buai vek a, inphut run ang kha a awm hleinem.." pangngai tak a ka tih let laiin " chhan țha tak vangin lo tel tur in min duh vak lo a ni ang, hrilh pawh min hrilh ve lo, a ruk a nupui neih vel hi a țullo takzet" a rawn tih zawm bawrh bawrh a, "lo sawi rawh aw, 'a ruk a ral a nupui neih vel kha a țhullo Andria-i'n a ti' lo ti ang che" ti leh kher pah chuan a rawn nui tak ang hawr hawr a..


Amah chu kan pasal lakah 'bik riauna' nei angin ngaise min tih hmel hrep bawk.


"Eng aiah chuan nge maw tel tura a duh loh ngawt ang che le" nui lui chungin ka ti ve ngial a, hetiang a han inbiak chiam hi ka țul tih zawng a ni ve lo.


Chutah Andria chuan inlak eng emaw hmel zet hian "tu nge ka nih i hre lo a nih hmel?" a rawn ti ta vel a nih chu! Henu hian eng thil emaw tak tih tum chu a nei chiang ang.

Ka hriatchian zia thup tum bik miah loin " ka hria che a lawm Andria" ka ti vawt ta raih a.



"oh, Ramchhana'n kan chanchin chu a hrilh tawh tak ang che" nuam tih hmel deuh a nui pah har har in a lo ti leh zel a, ka pasal in vawi khat te mah a hming a lam chhuak ngailo tih ka hrechiang a, chutih laikara min rawn in-tih eng emaw khum a tum vel chu dim vak ka tum ta bik der lo.


"i rin dan ang lo tak khan kan pa hian i chanchin hi vawi khatmah a la sawi lang miah lo. U Latei hnen ațang zawk engkim ka hre vek a lawm, u Lateii pasal nau ka ni tih i hre ve tho in ka ring" ka tih let ve ta hmiah hmiah a.


Tikha chuan ka pasal bialnu hlui a nihna avang a engtin amaw tak ka thik a inrinna zawng zawng kha a bo duak tawh ngei ang. Ka rin ang chiah in phone chu a ri deuh rawk rawk a, reilote hnu ah line- chu a in cut- ta reng bawk.



Thei intizet a min lo tih el a chak hmel teh reng nen, vai pasal a um dan thleng a hrechiangtu u Latei hming ka sawi chhuah tak ah chuan mizo mipa lakah thei intivak ngam tur a nih loh zia a hrethiam ah ka ngai ta hmak.


Phone chu dawhkanah bawk dah let leh in khum tlangah chuan ka țhu ngawi reng a, Andria rawn chet vel dan chu ka ngaihtuah zui rauh rauh a.


Zoramchhana'n nupui a nei tawh tih chiang taka a hriat hnuah a lo call kher kha eng nge a chhan ni ang le? Keiin lo thik ila, amah vangin kan nupa inkar han buai deuh hat se tih rilru pu chung a lo call a nih te ka ring dawn dawn a, chuthil erawh ka thlen tir miah lo ang.



Kawngkhar lo in nam kau ah chuan ka hawi chhuak thuai a.

"lo tluk zal tal tur che a lawm" rawn ti lut dut dut tu chu ka lo nuih let a, " a va pawimawh awm ve?" ti zauh a khum ah kê ka hlang chho tur chu rang em em mai hian min buaipui nghal a.


"Umm, mipa kan han inbiak ve hi chuan kan heti tlat zel" nui chung a ti ve ngial in puan sin lai chuan min khuh nghal a, a tshirt hak hlip a a kekawr a phelh paha khum tlangah a lo țhut thlak lai chuan dawhkan chunga a phone chu ka melh zeuh a.

"Call i dawng a, ka lo chhang a sin" ka tih chuan min lo en deuh hu pahin a kekawr chu țhutthleng sei inhung ah a theh phei a "a ngai bawk kha a mi?" a ti ve leh mai bawk. Police lam call- ah a ngai a nih hmel, "Aih... i bialnu hlui" ti sepin chiang takin a mitah ka en kher a, kan pa erawh a rawn nui chhuak huk.


"Enge i awih loh ngawt a, Andria'n a lo call che a lawm" ka han tih leh chuan a hmel ah danglam a awm em tih hriat tumin ka en chik ngar ngar viau bawk.


Dawhkan chunga a phone chu a en ve thuak a, ban pawh ban ta lem hleilo chuan "eng nge a lo sawi a?" ti sam leh then in ka bul ah a rawn inthawlh nghal sawt sawt a, Andria hming ka sawi lai khan amah ah han danglam eih emaw a awm pawh in ka hrelo.



Thosilen uluk em em a beng luh lai chuan, "I call let dawn lo a mi?" ka ti tak nangin han call let vaih se zawng, zan khua in khum ah a mut ka rem ti miah lo ang.


"A pawimawh awm lo emai" ti hluk in ka dul a rawn chul ta a, "ka fanu țahbelh pirper tur hi, zan ah tui deuh a mut tur aw" ti dut dut in puan sin chu keu hawngin ka dul chu a fawp kual dun dun a.


Ka nuih a za deuh bawk si, ka fiam chak tho bawk si nen a lo hawi chhuak leh chu rum deuh hian ka lo melh kha kha a.


Kan pa erawh in nuihza deuh hian "Enge?" a rawn ti chhuak ruih.


Dimte a puan min sin țhat tir leh lai te chuan " i rilru chuan kan inbiak dan i hre chak reng, inthlahrung suh, min zawt rawh" ka tih khum deuh khar khar a. Atthlak a tih hmel viau bawk.

Mahse, hmeichhia chu rinhlehna a khat kan nih zia a hria nge ni, a kut phah pahnih in ka biang a lo dawm a, ka lo beisei loh dan deuh te hian " kan nun a pawimawhna nei ve lo hmeichhia lo chingfel turin ka nupui hi ka ring tawk che a lawm" a ti ta khauh. Ka hmui ah a lo fawh zeuh lai te chuan min ti-dang chiang lutuk chu ka meng kar ringawt.



Ka pasal lakah hian thinur chu sawi loh a der takngial pawn a thinur rei theihloh chu a nih hi maw..


Thlamuang takin a ban ah lu nghatin a saisir zawng chuan kan inhmawchhawn a, "kan khaw Sumo driver hnen ah i number a dil thu a lo sawi a, u Zotei ang te khan min lo be vel a..." ner deuh nang nang a ka tih lai chuan lo kiai suk in ka tukhum ah a lo chul hluau hluau a.


Eng tehual ah a ngaih hmel vak bawk siloh nen keipawn ka sawi rei peih ta bik lo, a tawp lamah erawh "a number kha block daih rawh" ka ti leh hram pek a.



Kan pa chuan thaw huai pahin ka chal ah a rawn fawp a. Awm hla hlek a ka hmai bul chet ațang dam ruih a min lo en leh lai pawn "i block dawn em?" ka han ti leh ngat a.


"Block i duh chuan kan block ang a ni mai alawm. Mahse, block hial ngai khawp in kan nun ah awmzia nei ang ah a inngai tur erawh ka duh hauh lo" a lo ti leh ta khauh a.



Ngawi rauh rauh a ka ngaihtuah tak ah chuan a dik ka tive tho sia. "Nih leh a lo call leh pawn keimah zel in ka chhang ang" naupangchhia zet a ka tih leh hram chuan kiai suk in ka biang ah a lo chul a.

"Ka nupui i ni a, i duh ang thal a che turin thu i nei a lawm" lo ti hniam ruih in ka biang chu a chul heuh heuh a, kutphah thap deuh hruihin mi deh velna hi hetiang tak hian ka thlakhleh ang tih ka lo inringchhin ngailo a sin le..



Zan ah zun chhuak avang a ka țhanghar leh chuan tui em em hian a lo la muhil a,
Ka che hlek a nih chuan ka mamawhna ah min puih inpeih atin a lo tho chhuak ve leh nghal dawn, reilote chhung a muhil hmel chu ka thlir veng veng a.



A rinawm zia thu a sawi zuah zuah lo a, thutiam ril tak tak min fah chiam hauh silo hian pasal rinawm a nih zia min rinngheh tir sauh zel mai si. Ka pasal hi chu a danglam a sin, a țha famkim lo a, ka tan erawh a tling hliah hliah thung, a thinlung a pek loh che chuan i hrethiam pha ve kher lo ang.



A hmaiah na lo te a ben sak det det paha "Lalapa.." ka tih rual in mit a lo meng nghal a, " naute zun a chhuak leh tawh a.." ka han tih leh sep chuan thawh phan nei leklo hian ka tho tur chu min pui nghal a.




Zan rei lam ah ka zun a chhuah tawh hi chuan ka chet velna avangin a lo harh ve țhin si a, ka inthlahrung lutuk hian "lalapa naute zun a chhuak leh tawh" tiin naute zawk ka mawhpuh ta ngawt pek țhin a, ani pui lawm ah a lo tla viau nge ni, zanlai ah chuan "Lalapa" tih kher a auh kan phut tlat tawh.



Zinga ka han harh chu khum ah keimah chiah hian ka lo mu a, pawn lam thawm ațang chuan Lenkhang an inla chhuak a ni mai thei.



Kan pa aw riin "Mate, ka pa kha lo enpui lawk rawh, kan nu ka'n ngaihven lawk ang e" a ti dut dut ri avang chuan ka lo țhen sak mai.



Kar lo ah kan nupa mut pindan kawngka chu a lo innam hawng a. Ka harh tawh tih min lo hmuh rual chuan nui suk pahin "ka țah-belh pir-per te kha an lo tho tawh maw?" a rawn ti lut nghal dut dut a.


"Khatikhan min ti ve ziah suh" ka lo ti nghal hlur, ka nu leh u Zoteii nui thawm ka hre zawm a.


"Ka thinchhe hlikhlek-ite..." a ti leh roh a, a chang hi chuan min naupangchhe chei tlat zel hian ka hre țhin.


Ka darah ban lo zen lut a min kuah tho tur a a lo kun vut chu "i tizahthlak thei lutuk aw" ka lo tih khum leh hram a, a nui suk suk duh lek a.



Kan inzui chhuah chuan chhuat ah Lenkhang hi a lo awm rum a. Ka bula dingpa chu zawhna ngah fe hian ka han en chho a.

"Jonathan-a te khan lui kal an rawt sia, Lenkhang hi a țet a awm nual ang, i pa Khawla'n a țhui thiam a, ka keng phei ang chu ka lo tia" a lo ti bul bul, ka darah a lo kuah nghet salh bawk.




Lui kal chu a lo chak thlû ve ngang a nih dawn hi, khap pawh ka tum buai peih tawh lo.

Tukverh ațang a chhuat laia nizung lo lut ai dar dar paha zial ziala ka nu lo țhu chuan min lo be sawm thuai a.
"Mambawih, i tho nuam maw?" a lo tih chuan rang deuh in harsatna ka neih loh thu ka hrilh a.

"Dul a han len tak tak hi chuan mi te hi a kalh run țhin a, engtin emaw chet han ti khawr deuh a i awm chuan min hrilh hreh suh aw" a tih chuan nui ver ver in lu ka bu a. Min ngaihsak țhin lutuk hi a lawmawm ngawt mai.




Bualin ah ka awm chhung chu kawngkhar pawn ațangin kan pa chuan min vil run phawt a, ka zawh fel hnu ah Lenkhang rit tham zet zet tur chu ka pa te in lam ah a khai phei ta a.



"Chaw ei dawn ah min rawn au mai ru aw" ti zet in Lenkhang hnuhnung ber nen chuan a chhuak a, a landan patling ve tawh lutuk chu hmuhnawm ti deuh in ka thlir liam a.



U Zotei nen eirawng kan bawl a, tukin chu Sangha rep rawt ka ei chak tlat a, kawmchar ah va chhuak pheiin tomato te chi leh Dhania chu ka va la khawm a, Sangha rep leh tomato te chu rawh leh zetin Purunsen leh Dhania te nen chuan ka rawt pawlh hluah a, rawt fawng a mi ka han liah zauh chuan tui ka ti ngang mai.


"Chaw rum tawk nen a ei nghek ka chak tawh" ti hliai in rawt fawng chu ka sil sawk sawk a, u Zotei chuan min lo nuih kar kar a.


"Tun țum kan Ration buhfai lak kha chhum thiam a har tiraw?" a lo ti ve chuan tunlai hian chaw kan chhum sual deuh reng tih ka hre chhuak a.



"A mak ngawt mai, a changin a nem em em a" ka ti ve niah niah a, a Maian sih thar dawhkan ah a phelh darh tak ah chuan stool chu pawt chhuak in ka pui ve thuai a, Andria chung chang kha min zawt ta nawlh bawk.



"Mama'n min hrilh a, nizan ah a lo call elaw?" Maian hih pah chuan a ti deuh sar sar. Keipawh chuan kan inbiak dan te chu țha deuh in ka hrilh ve mai a, kan Maian hih lai chu a la no lutuk a, ka hik ve hleithei lo.



"tu driver ber nge a lo dil tehreng ni, engahmah ngai duh suh aw" a ti leh sar sar a, kan titi chu ka nu leh pa te hriat a tan a duh lo hle in ka hre bawk.



UZotei vek chuan " Mama biak a la rawn tum ngam chu a zaktheilo hi ka ti e, henu hi a lo nikhualo takzet a nih dawn hi" a ti leh ta thlawt a.




Hetiang teh tâwlin midang chanchin ka pasal nau hian a la sawi ngai silo a, mak ti deuh tak a ka en chuan " a țhawng viau ang che. Hria erawh kan tam lo, kan chhungkua leh u Ngaihsaka chiah in kan hria... u Dtei tak ngial pawn a hre lo a nia. Ihmaw, Andria khan ka u fa a titla a lawm" a rawn ti zet chu ka meng zau deuh kawk a.



"Palai kan tirh tak nachhan pawh kha a rai vang a nia, thla hnih a upa nau a lo pai reng a, tikhan palai vawi khatna chu mizo dan pangngai angin 'kal nawn' leh tur a thu in chahin an lo let leh a, ni rei pawh a liam hman lo, thil thleng erawh a tam hman viau thung, Rangkachak bo chhung chang ah ka u a hmingchhe zui a, chutihlai karin zan khat show- an neihna lam ah Andria inlan ve kha Mumbai lam vai mi hausa nen an lo intawng fuh ve leh bawk si, khapa kha a hmangaih ta lutuk nge sum a hmuh tamna tur vang zawk pawh hriat loh, ka u rawn miah lovin a nau pai kha titla in vai pa kha a um thla nghal daih a. Khatia vai a um te kha Andria vang a ka u natna ai chuan a fa vang a a natna kha a thuk zawk... " tia u Zoteii'n min han hrilh sep sep lai te chuan ka mitthla ah ka pasal a lo lang a.


A rilarah a fa ngei mai a lo chan reng tawh amaw? Thikna aiin tawrhpuina in ka chhungril chu a rawn fan a, "Engtin nge nau chu a tih tlak theih zawk le?" ka ti tham chhal a. Ka pum chhung a naute hi sum vang a titla tur ang ah indah ve chhin ngial ka tum pawn ka thisen chuan a ngam lo. Pum chhung a thla hnih chhung nau insiam tawh phei chuan lungphu te an nei ve tawh a sin le....



U Zotei pawn "chu chu a lawm, engtin nge a rilarah a fa kha hnam dang mi hausa pakhat vang mai a a tih tlak thei ka la ti fân țhîn, rapthlak ve tak chu a ni. Ka u hi ka u a nihna avang a fak leh țan ka nilo. Kha tihlaia a dinhmunah khan Mizo tlangval tam zawk hi ding ni ngatse maw Andria te chhungkua kha an mualpho zual ngawt ang chu! Mahse, ka u chu ka u Zoramchhana ani miau tlat a, Andria nau tih tlak chungchangte kha a thawi pawn a sawi lang ve duh lo, a rilru erawh a na ve thlawt a sin, vawi khatmah mi dangte chanchin a chhe zawng a sawi ngai miah lo mipa khan 'hmeichhe lepchiah' tiin Andria kha a sawi ve khawlh khawlh a" a tih lai chuan ka lo maimitchhing sawk! Chung hunlaia Zoramchhana thinlung nat dan tur zia ka hriatthiam pui avangin ka ni nghul thei.




" Kei chuan ka u in kha titaka a chhuah tuitanglo pawh kha ka dem lo.. mahni fa tur aia sum thlang thei ngat kha ani miau a" a tih zawm mawlh mawlh a.


Ka naupai vang a rilru no lai a lo ni kher bawk si nen, Andria nau tih tlak mawlh mai chu ka lainat in ka ui takzet. Ka mittui lo hnam țiam țiam reng chu ka hru zeuh zeuh a, "naute chu ka lainat emai, engtin nge a tihtlak phal zawk le," țap deuh țiau a u Zotei ka en chuan ka darah lo beng thek thekin min lo nuih a.

Zoramchhana a nei leh duh ta lo a nih pawn a fa tal kha han pai puitling se, a pian rual in apa te kut ah dah in vaipa chu nei leh ta mai zawk se nitur....


"A han zahtheih loh zia chu maw, tikhan Vai a um a, vai ram ah kum 3 dawn a zuk awm bo vang vang a, Mizoram ah a lo chuan chhuah leh rual in a fa sen Aizawl ah kalsan in kan khua ah hian ka u a rawn zawng leh ngam a nih chu! A pasal nen an ințhen pawh a ni chuang lo, rawn tih lunglen thar leh a tum niber te khan ka hria... Mahse, ram ah ka u riah lai a ni hlauh zawk a..." a ti leh ta zel a.


Hmeichhia țheuh țheuh pawh hian zahna kan lo va intlakchham hleih mep mep ve mawle...


"Ka u hian engatanmah a tih tawh loh tur zia chu i hrethiam tawh ang tiraw, huat tlak ah pawh a ngaih tawh loh khawp a a hmuh tuitang tawh loh hmeichhia hi in nupa inkar ah tlak zeh tir miah suh aw" a ti leh seuh seuh a, ka thawh ve hma khan an unau in nizan chungchang kha an sawi ve a nih ka ring.

" ka u chanchin hi chiang zawk in ka hrilh ang che, lehkha a thiam thei țhin lutuk, inzir chhoh zel a IPS nih te kha a chak a, khatia ka pa a han dam loh tak ah khan pawisa engmah kan nei silo a, thingtlang lo neih a eizawng chhungkaw tin deuh thaw hi kan ni hial ang chu... sum hlawm lak luhna awm ta lo chu damloh zaipui lo tawh palh chang te hian a mangan thlak zual a, ka pa inzaina tur senso ngai zat kan han hriat khan 'Mate, mipa zawk ka ni a, keiin zirna bansan in hna ka zawng nghal ang a, nang chuan țha deuh in lehkha zir tlang ang che' tiin ka pa leh keima tan a hmalam hun ve tur zawng zawng a hlan a, keiin collage ka zawm a, ani chu police lam ah lut in a duty zawh ah zanlam ah pawh an inhlawh chhunzawm a, cement unload te khan tlaivar țhak țhak a inhlawh chang a ngah a nia. A hah țhin lutuk kha chhawk ve theih ka chak em avangin 'U, IGNOU ațangin ka zir zawm ang a, dawr nghakin ka inhlawh ve mai dawn' ka tih changte khan a phal miah lo. 'Min chhawk theih dan țha ber chu i zirna ah chiah rilru pe la, hna țha tak i thawh hun ah min rul let tihna a ni mai' a ti tlat zel. Tihian kei chuan MA te zo in principle hna thawk in ka u min chawmna avang liau liau in hmeichhe zahawm tak ah ka chhuah phah a. Ani erawh rim tak a hna a thawh hnu ah rank sang ah a kai chho bek bek a. Mangchhia ang maiin thil dangin a han deng zui ve leh bawk si nen, hreawm a tuar rei bik lutuk hi ka lainat, amah hi ka zah takzet bawk. Tun thleng hian ka bialpa ve te pawh lo duh em em mahila ka u in 'mate, ani hi chu a rintlak loh ang' a tih tawh chuan ka țhen hmak zel, chutiang khawp chuan ka u ngaidan leh a thuthlukna hi ka zah sak a, i hria ang a, khua ah i lo awm tirh lai a a mize vawt lutuk leh nuih nachang hre lekloa a tal mawl tawp țhin te kha hmuh hreawm ka ti țhin lutuk. Mahse, a nun ah ilo lang a, han en mah teh, a nuih hnem ve tawh zia hi, biak chang pawh a ngawi ngul a lu bu deuh nghut ringawt țhin mipa khan fiamthu te a thawh ve tawh a, a nun hi i kaihruai nasa a sin, i chungah hian ka lawm takzet bawk... kha Andria vang mai mai kha chuan ka u hi thlauhthla miah suh aw" mit hnawm chap in ngenngawl zet hian min en a.


"Harsatna ruam ah a din laia a kut chelhsak ngamlo tu hmeichhia kha chu ngatanmah a ti dawn lo tih ring hram rawh" a han tih leh ngawih ngawih chuan tawite hian ka nuih a



"I u hi ka ring tawk a lawm" ka tih chuan veng hawk hmel hi a pu a. "Ka u nun ah i lo lut hi chu kan vannei ngawt mai" zawite a tia min nuihna chuan min fan raih raih.


Maian chhuanna tur tui a so tak ah chuan a mittui hru hul mawlh mawlh in u Zotei chuan min thawh san a.


Ka thil hriat kim loh chiang tak a kan han hriat hnu chuan chetsawn nachang pawh ka hre ve lo. Nizan pawh khan thikna tak tak ka nei thei miah lo a nih kha! Ka thinrim der kha nuamlo tih phah in a nau hnen ah a lo sawi ve ngial a nih hmel ta zawk e.


A fa meuh tihtlak sak tu hmeichhe chungchang an unau a an sawi thar leh ngai a ka lo thinur der reng reng pawh kha ka thiam lo chhiava bawk.


Andria'n Zoramchhana thisen kai ngei sum vang ngawt a a tila thei erawh in min vilh hle a, ka pasal hi ka lo hmangaih em avang zawk nge hmeichhe dangin a fa an lo pai tawh a, an lo titla hial tawh tih ka hriat khan ka pasal thisen kai nau insiam mek ka lainat lutuk avangin fa chan ang mai hian ka nuam thei lo.

Ka â hial em mawni zawk le?


"Hmeichhe țhenkhat te angin an bialpa hlui te'n nupui an neih rual a rawn za cheng ang type hian a rawn khawsa lo ang tih pawh a sawi thei loh a nia, a lo call leh pawn lo dim duh bik reng reng suh.. aaa, in nupa nun hi a rawn inrawlhna phak a nih loh zia a hriat nan a call- lo chhan pawh a țullo zawk e a tiraw?" Bai chawk mawlh mawlh pahin u Zotei chuan a lo ti leh a. Tawite a nuiin ka bu ve nghat nghat a.




Eirawng te kan han inbawl peih hnu chuan kawtzawl ah ka va chhuak a. Kan pa te chu u Ngaihsaka te Leihkapui ah chuan Lehkhang chu zar in a thlerna lai zawng in an la buai hmel viau mai a.


Ring deuh tak a "Lalapa" ka va tih vak chuan a lo hawi thuai a. A hmel chu hmu chiang thei lo mahila ka auh dan avang chuan a kiai suk tih ka hre thei.


"Chaw ei ang, lo phei phawt rawh" ka han ti leh a. A buk nghut laiin, " engtin maw in han in koh vel tawh a?" ring em em hian u Dtei'n a lo ti pek a.

"Engkim hi hriat ve tum țhin suh, intih hnu vek a nih kha" tia ka au let hram chuan Leikhapui ler ațangin kan pa zawk chuan inchhung ah luh san daih turin a ban min lo vai a.


U Dtei ngaihdan a lo ni ta der lo... a aw ri ka hriat phak deuh si, eng nge a sawi tak hriat tham siloh a ringin kan pa chu a hau zui barh barh a. Lenkhang țet țhui a pa khawla țhu pawh a nui ve kur kur mai.





Kawngkharpui a kan pa lo lut mek chu ngunthluk em em hian ka lo thlir a, a chanchin ka la hriat ngailoh tam tak ka hriat belh tak avangin tun hma zawng aia a hlimna siam sak chakna hian min rawn tuam a.


Ka bul ah lo țhu a ka kut a rawn hum chuan ka hmai in a dar chu ka va nawr a, Bible nen ka pa a ding zui a, kan pa chuan ka pa bible chang chhiar ngaithla chungin chhuat lam bih in ka kut chu a hmer pah salh salh a.


'Khawvel ah chuan rilru țha leh ngilnei apiangin natna an tuar tam mai a lawm' tia an lo sawi țhin hi a dik hle ni te'n ka hre thar rum rum a. Kei erawh in mi rilru țha lutuk ka pasal hi eng natna mah thlen ve ka tum lo. Hlimna ruam ah zawk zel ka kai lut ang.


Chaw kan kil lai chuan ka pa in khun khan zetin Zoramchhana'n police department zawm leh tawh se a duh thu a sawi chhuak ta a. Nizan a an pafa inbiak chhan kha a nih hmel viau e.

Ka pa in eng eng emaw a sawi duah hnu ah ka nu pawn phur takin a lo tui hnih ve a, u Zotei pawn 'Mambawihi a rai lian tawh bawk a, ram lam ah țan reng ai chuan khawpui lam a awm theihna a ni nghal mai a, zawm leh ngei ngei rawh' a lo ti ve duah a.


Chaw ei kham kan inseng fel hnuah chuan kan nupa mut pindan ah min kai lut a, Khum tlang ah hahdam deuh a min han țhut fel tir te te hnu ah ka bul ah lo țhu thla ve leh in ka kut chu a lo hum a.


"Mambawih, hna ka zawm a nih chuan hna i thawh ve ka rem ti tawh dawn lo a, tah chuan min hnialna i nei em?" khawng deuh tak a a tih chuan lu ka thing vat a.


"Ka pasal i nia, 'thawk suh' 'thawk rawh' i tih te chuan ka zawm mai tur a lawm" ka ti sep a, ka rilru diktak pawh a ni. "Kan pahnih a hna ka thawh ve ve theih chuan kan leikang chak viau thung ang. Mahse, chu chu thlir dan pakhat a țang mai mai a nia" ka han tih zawm leh a. A hmeichhe thu dawn viau bawk.


"Nupa a hna thawh theih chu a țhat viau rualin fa kan han nei ang a, nu emaw pa emaw zawk zawk in a awp lum loh inchhung chu a kal dik mawh viau dawn a" a lo ti ve leh khauh a.



A thusawi chu pawmpui zetin ka lo bu nghat nghat a, chutihrual in amah chu a zahawm thar hi ka ti tlat bawk.


Chhungkaw dangte hriat laiin ka hna chungchang sawi ri miah lova a hranpa ngei a min han rawn der ve chu a nupui ka nih zia a tichiang zual hle in ka hre bawk, ka kut a hum chu la kangin a kutphah chu ka han fawh sak deuh vang vang a.
Ani thung chuan zawi ruih hian "i hnathawh ah hian i tuiin nuam i tihzia ka hriatpui tho che a nia" a lo ti a.


"Ka pasal rorelna hnuai a Home minister hna thawh pawh nuam ka lo ti phian mai thei a sin" ka han tih zeuh chuan a kiai ta suk.


"Ka hna chawlhsan chungchang velah kha chuan min veng thawng duh suh, i kô ah ka innghat tawh a, nangin ka tan a țha tur nia i hriatna lam lam ah i hruai tel zel turin a lawm i nupui ka nih, min enkawl tur in ka pasal hi ka ring tawk che a lawm" a mitah tak en chungin a kut chu ka han fawh sak leh vang vang a. A lakah rinna ka nghah thuk zia chu a hmu tlang thiam vek in ka ring.




'Nupa chu rilru pahnih, ngaihtuahna pakhat a lo chhuak; lungphu pahnih, pakhat chauh a phu a ni' tih a nih kha, ka pasal zawkin rim takin hna a thawk ang a, keiin kan chenna in chu a chawlh hahdamna nuam tak inchhung a chan ngei theih nan ka lo uap lum ve thung ang.



"A nih leh maw, hna i zawm leh a nih chuan ka nu leh pa te hi kan bulah an lo awm ve dawn em?" zawite a ka han tih chuan lu thing nghut in ka sam chu ka bek ah a rawn zep a.


"Naaa, a nih te chuan kan awm bo hlanin engtin nge an lo awm ang a, u Zotei te nen an pathum chiah in kan kalsan ang maw?" ka ti hliai a, an mahni chu hmu thei lo mah ila pindan kawngka lam chu ka melh ruai a, an upa ve tawh si a, kei ni nupa in kan awmbo san daih te chuan a dik thei nang le..




"An duh dan a ni miau a ni, an ngaihtuah awm lo ang" ti sup a ka dul puar lian ve tawh tak a lo chul thuak chuan ka lo thaw hliai ringawt.


"Kan fanu tereuh hian Lalanu hi rawn chhun fai vek se fanu fel kan nei a ni mai" ti sup sup in pa em em hian min han nuih a.


" ka ti tak tak a nia, Aizawl lam ah kan awm dawn a nih chuan chhungkua in awm thla vek zawk ila, Kan Lo te pawh kha engtin nge ni dawn?" hmeichhe thu dawn tak hian ka ti leh mawlh mawlh a.


"Lo lam chu hlawhfa a lak theih dawn a, ka nu leh pa te erawh khua han chhuah san tur chuan an upa ve tawh em bawk a ni, Khaw dang ah an insawn ve a nih chuan keini'n țhian thar siam a kan chheh vel boruak mil a kan in siam rem zung zung laiin khaw hlui lam ngai reng reng a lunglengin an awm ang a, an khawngaihthlak lutuk zawk ang. Tin, an duh dan pawh a ni zawk a" ti leh dap dap a ka kut pahnih a hum kawp tak ah chuan ka hrethiam ve ta deuh a.




"Ka raipuar lian tawh dawn si, kan haw chho ve thei tawh awm der silo, an mahni zawk tal in min lo tlawh ziah a ngai ang" ka tih leh hram chuan zawite a nui hawk in lu a bu ta nghut nghut a.



Hetah nu leh pa te uap na inchhung lum ah kan khawsa a, a hahdam thlak in han nawm sam loh chang pawh a țawngkâ tal a min lo duat na ri han hriat te kha a nuam a, nupa rek a in han luah hran leh hnuhhawh chu a khawhar thlak dawn viau mai.





Fehreh san hun awm ah kan nupa chuan ka nu te in lam ah kan inzui phei a, awl len lai tak a nih avang in zing lam ah thing chhawp sa phur a nu ho an ram chhuak tih loh ah chuan kawchhung ah kan awm kim lai tak a ni hlawm a, a țhen insakna ah an inhlawh a, a țhen in ekin khur te laiin in lam ah hna zawngin kan buai tlang em em hlawm a, inrinni ka hna kal loh ni a nih avangin kan pa te Lenkhang țhui țha bul ah ka tal nileng ve a niang chu.



Ka pa te Vawk-in hluiah chuan Lalati leh a țhiante chu an lo in Baribe ngei a, kan nupa lem bawk changin a țhen lah chuan pasal ang a an hman, hmawlh chu an lo ramvah tir ve thul, in panna step-a kan chhoh lai chuan kan nui ka nui mai a,



Leihkapui ah ka han lawn ve chu pakhat chuan min hi a han veng em em khawp a, mau chih(chik) chhuat te chu a nupui raipuar han rah a tan chuan a derdep in a hre thar ta riau ni hmiang, ka rah tur chu min kawh hmuh uluk ngang mai.




Ka u-i lah chuan min lo eilo nupa em em khawp a, kawngkhar biang ngheng a men hmawn hmawn chung hian "nileng a in nupa induatna kar a awm ka chak love, ka thing chhawp sa ka zuk phur teh ang" te min han tih khum vel thul.




"I chak ve a nih kha, a dang siam ve leh mai rawh u" tia kan pa'n a han fiam let zuk chuan "heiham... kan Valsenior-a pawh a hmai a uang ve ta lutuk a, ngawi rengin thusawi a dawngsawng duh tawh bik lo" a han ti chiam ringawt a. An pa lahin "chu, kan pasalțha-a chu i ngam vak tawh nange?" a lo tih chuan "an nu sawn a fuih țhin ani chiang ang" tiin kei chu min rawn nuih ta țha mai a. Ka pa Khawla ho chuan kan nui tlang ta dar dar a.


Zoramchhana chuan 'a hna zawm leh tur chungchang vel' a țhianpa te chhung a han hrilh chuan an lo phurpui thiam hle a, u Dtei erawh chuan 'ka sawi reng kha maw...' ti ang hrim in vannei min tih hmel takin min nuih ru leh ţhin a.


A thluak vawrh vir zet a "khawpui lamah nangni in awm chuan Lehkha zirin kan fate pawh an lo dah thlak theih thuai ang chu" a han tih chhunzawm nghal a.


 deuh ang leh ri phawng phawng ang hian lang țhin mah se ka u-i hi zawng a fing zek mai a, a bulah hi chuan tumah an mihrang rei thei lo.


Kar tir lamah chuan u Jo-a leh a thawhpui mi pathum te chu an lo thleng chho ta a, ka pa in 'hetah chhungte kan awm reng a, hmun dangah thlen a ngai lo' tiin a chelh ta tlat a, an țhian li chuan kan in ah an thleng ta vek a.



Chawlh an neih chang pawh a tlang lawn leh khawi khawi emaw puk tlawh a thingtlang kil khawr tak tak a tla țhang țhuau an ni bawk a, rin ai tak chuan an zeihawi viau mai.


Ka u in min han hmuh chuan "pasal neih i ngeih hle mai a " a ti ve luam a, "nau pai i haw bawk silo, i hmelțha tulh tulh mai" te a han ti ve ngial a. Ka hlim khawp mai.



Keipawn rai chu ka ngei zawk emaw ka ti hial țhin, ka vun a ngo tawh sa tehlul nen a ka ngo belhchhah a, tisen lah ka ngahin ka biang hi a tai tek reng a, ka rilru thleng a a hahdam avangin ka nung sar reng maiin ka inhre ve țhin.




Atuk ah chuan Lenkhang leh Jeletin te nen chuan Tuivai lam ah an liam thla leh nghal a, tun țum erawh zan khat lek cham tawh lovin kar tluan a lui lam a chet tlat an rel thlu a. Kan pa in min ngaihtuah hmel deuh a min han en leh vung vung țhin chu ka lainat hnu hnu roh khawp mai.



Mahse, ka ngaihtuah awm loh tur thu in ka chhang kha a ni a.

Thlam sak hun lai ațanga hnuh hmasa lak thlengin ram ah pawh riak lut ve lovin lang hlir in chet a lâ a, a thisen ah ram chhuah a beh ngheh tawh zia ka hriatpui avangin thlahfal ve deuh chu a mamawh in keiin ka lo hre ve bawk si nen, "Lo indim rawh aw" tiin uluk deuh hian min han fawp a.


Chutah chhuatah țhingțhi hniam in ka dul kawh lah tawh chu a han fawp kual leh dun dun a, "lalanu hi lo tihreawm lutuk suh aw, thu i awi loh chuan ka lo haw hun ah engkim ka hre leh vek dawn a nia" tiin mihring ang mai in a fa chu a han be leh a.






Kan pa te ram riah hlan chuan ka nu nen kan inzui tam phah a, zan ah chuan Pupuia te in lamah kan leng chho țhin a, an ni khawhar lah chuan mî an lo thlahlel thiam in kei a raipuar chu min lo duat em em zel a, an eitur tui țha neih ang ang hi min hawn tir ve țhin.


Zan a ka han mu tur te hi ka pa meuh pawn "Mambawih, i nuam lo deuh a nih chuan min han au hreh suh aw, i nu nen hian kan harhvang teh a nia" tiin min thlah zantin a.

Inkuah rial a kan mutna țhin ah keimah ngawt a ka han mu țhin chu ka pasal pangtilum ka ngai zual viau mai zel.



An awmna hmun lah lui ruam țha lutuk a nih avangin signal a awm țha lo a, khua a tower man fuh tur pawn lui ruam ațangin tlangah lawn chhoh fe hnu ah tihfuh changin tower a man țhei țawk țhin a, amah pawn min ngai ve takzet tih ka hrethiam ve reng. Mahse, tuiah hah takin an inhleuh nileng a, a chang phei chuan zan ah Pûmah chuangin Lenkhang an zar țhin a, chutiang khawp a a hah hnu ah zanlam ah min be tur ngawt a thui tham zet tlang a lawn leh tur chu ngai ngam lovin zan tin biak ka ngaih loh thu in ka thlah ta kha a nia.....


Chaw ei thlengin a tuilo țan titih der a, in ah a awm changin țawngkâ in min duat duam duam a zeng pawh a nilo, ngaituah tak a ka chevel engkim a thlithlai ru reng țhin kha a lo thlakhlehawm em a nih hi.



Ka duty room ah kan lo titi barh barh laiin Ahmai a lo lang teh hlawl a, kan han hmu deuh thut chu kan hamhaih a talangin ngawi reng hian kan lo en țhap ringawt.



"In buai lai a ni em?" zam hmel tak a nui chung hian a rawn ti lut a, nu Țhapuii chu lo harh chhuak hmasa thuai in "lo lut rawh, kan buai loh lai tak, kha... kan naute hmelțha tur chu a va lo chhuak teuh tawh ve, chet vel a harsa tawh awm" tiin alo be sawm nghal sawk sawk a.



Chair a kawh hmuh ah Ahmai pawh chu țhu ve in nelawm deuh hian min lo nuih a, keipawn țha te te in a hriselna te a țhat leh țhat loh ka lo zawt ve bawk a.


Midang te chuan chhuanlam siam in min kal chhuah san nak nak a, a tawpah kan pahnih chauh a kan awm tak hnu chuan hetihian alo tita a "i vannei ngawt mai tiraw? Nang zawng i nun a dik em a, pasal țha deuh i tawn phah a" nui ver ver a min en chuan a nunram chauh hmel lutuk chu ka lainat a ni.


"Nia, pasal hi ka nei vannei a sin" ka ti let ve a. Ka pasal min fak sak chang hian a mawi tal a han phat der vel pawh ka tum chhin ngailo. Khawvel ah kan awm chhung bak kan infak thei dawn lo a, thih hnu a infak chiam ai chuan damlai ngei a inchawimawi a, infak hi a hlu ka ti daih zawk.




"Keichuan ka thil tih sual rah ka seng mek chu a nih hi" nui lui sak in a dul dawm pah chuan a lo ti leh ta a, "i lak ațang ka pawh hran theih țhin avang ngawt khan thei intiin chelh beh ngheh zel dan ngaihtuah in nau hial ka pai phah a,.. en teh enge ka hlawh chhuah hi... sawn man ringawt" nui ro halh a tiin a thaw hliai hliai reng a.


Inhmelhriat țha tak kan nisilo nen hnem ngaihna vak ka hre biklo.



"Chutiangin ngai duh mah ta che. Ihmaw, kan tan a țhalo tur chu ngawi rengin Pathian in min lakbo sak țhin tiin rilru put tum hram hram rawh" ka tih let ve chuan hêh pet in a insang mar țalh țalh a.


Ka ngaihdan dik tak ani bawk, inngaihzawnna kawng ah kher nilo țhian țha a kan lo en țhinah te ngei ngei pawh hian kan hnung lamah a min lo rel khawm tel tel a, min lo bei ngar ngar țhintu te hi chu Pathian in min lo hriat sak rengin zawi zawi in kan hlat ah a dah țhin.


"Min hua em?" tia kimki deuh tak a min en lai chuan thudik tak in chhang let dawn ta ila 'i lakah hian ka lawm zawk, nang leh Dinpuia vangin ka pasal hi ka tawn phah a' tih ka sawi khum ngei ang.


"Haw lo e, huatna chhan tur che ka nei hleinem" ti zawk in ka nuih let sen sen a. Ani erawh a thaw leh deuh hliai a.


"I bialpa a ni tih hrereng chung a ka lo pawh hran țhin avang khan min haw lo tak tak maw?" a lo ti nawn leh ngat a.



Rilru nghet neilo, tithiam tu leh pawt bettu an awm chang apiang a chu lam a awn nghal duai duai țhin te ngaihnep awm zia ka hrechhuak zut zut zawk ka ti e a.



" Nula inchei fel fai reng peih ka nih lai pawh a midang min pan san thei tu kha chuan, nu ka nih a, ka inchei fel fai loh deuh chang a awm hun ah phei chuan hmeichhe dang melh a țhul loh leh zual dawn tih ka hrethiam tawh a, ka haw lo che, nangpawn inhnem nan hmang ve rawh, i fa pawh hi lo piang se ani ang mipa ze nghet lo țanpuina tel miah lo khan i enkawl thei ang..." a dul puar lian tawh tak chung a a kut nghah chu zuk chelh sak ve in ka han hmer sak deuh vang vang a.




Ani erawh ipik hmel deuh in a thaw hliai hliai reng mai, Dinpuia nen innei ta tehreng pawh nise a mizia thlir let hian kar lo ah a uirse san thuai dawn a, uirena meuh paltlang lo a hetiang a an kal hrang ta zawk hi a pawm thiam hun ah chuan a la hlim zawk ngei ka beiseipui tlat bawk.



Tlai lamah chuan school ah an buai deuh avangin u Zoteii a lo haw hma thei lo a, ka nu nen eirawng kan lo bawl dun a, Aizawl a ka chhungte nen inbe pah in kan ri laih laih reng a.




U Nathana te nupa pawh Mizoram ah an lo haw ve tawh a, u Latei pawn hlawhtling takin nau a pai ve a, indim erawh a ngaiin check up a doctor hmuh an ngai zing malh malh khawp mai.



Kan chhungkua a thil thleng ațang ngei pawn ka vanneih zia inhretharin Pathian hnenah lawmthu ka sawi mawlh mawlh fo a, harsatna nei miah lova nau ka pai nghal thei mai te hi khawvel kaldan phung tur reng emaw ka lo tih laiin ka hmeichhiatpui țhenkhat te tan erawh van a rah ang a lo ni daih si.


Ka chung a thil thleng engkim hi han ngaihtuah chian chuan lawmna tur hlir a lo ni e a.




Eirawngbawl zo a u Zotei lo haw hun nghak a tv hma ah kan țhut lai chuan "Mambawih, In pa te Lui kal an lo haw hun ah meuh chuan Aizawl lam a in awm dan tur ngaihtuah a ngai zui dawn si a, lung a leng lawk ruih mai alawm" ka nu'n a rawn ti ta hliai a.


Keipawh chuan an tello a in hrang kan luah tur ka huphurh ruk zia chu uar tak hian ka hrilh a, ka nu pawh a nui ker ker mai.


"Dik tak chuan mo a tan a khawpui mi neih kha ka zuamlo khawp mai a, khua ah i chetlalai hmu fo mah ila in chhungkaw khawsak nawmsak zia kan hriat ve avang khanin kan in ang ah te chuan i mo thei dawn em ni? tiin ka ngaihtuah fo a. Mahse, hei... beisei ngaihna pawh ka hriat loh lam daihin kan chhungkaw khawsak phung mîlin i insiam rem thei zel a, ka lawm tak tak a sin, i nu leh pa te pawh ka fak a ni, nang ang a fanu fel an enkawl seilian thei che hi an ropui ngawt mai" a ti ta mial mial a.



Min huat loh zia leh min duhsak zia ka hria a, hetiang tak hian an lungawina ka thlen erawh ka lo ring bik miah lo.


Chhutiang bawk in mi in ah mo a kan lawiluh rual a; kan va lawina chhungkaw khawsak phung mil zel a kan insiam rem khan keimah ni chang nilo in kan nu leh pa te thlengin kan lo chawimawi reng zawk tih ka hriat thar phah a. Ka nu leh pa mualphona thlentu ka nilo chu ka hlim thar hle bawk.


U Zotei lo haw hnu chuan chaw ei kan siam zung zung a. Chaw kan han eikham chu eng vak ngaihtuah hleilo in bual in kawngka lo in hawng deuh hiau chu nam zau pawp in zung turin ka lut a.
Mahse le!
Min hnungchhawn zawng a dingin ka pa hi a lo zung teu teu mai a!



Kei a zak lutuk leh hamhaih bawk si chuan "ka pa" ka va ti deuh vak a, ani lah phu uk in a rawn hawi phawk hu a.


"Kawngkhar tal kalh ta che" ti leh deuh ringawt a ka inher chu thei leh thei lo hian "kha, lo dang rawh u, a lo tlan leh ngawt ang e" a rawn ti ta mai a nih chu!




Ka tum loh lutuk in za em em hian ka nui ta hawk hawk a, ka nu leh u Zotei lah kan thawm ah an rawn tlan chhuak ve bawk, "Ngatinge ni? I pa khan tlan thu te a sawi em?" ka nu in a rawn ti a. Kei lah a za laklawh lutuk a țawng pawh ka țawng hlei theilo, bualin ațang ka pa a lo chhuah takah chuan "ngatinge ni?" u Zotei'n a lo ti thuai a.


"Kawngka hi ka lo kalh silo a, Mambawihi hian a rawn hawng mawle, ani zak lutuk khan tlan a lo tum leh ngawt ka hlau a" tiin a rawn nui ve hawk hawk tho a, a pawi tur engmah ka va hmu lo tih a hrethiam ve tho a nih hmel.


Thil awmzia an han hriat tak ah chuan ka pa meuh in 'kha, lo dang rawh u, a lo tlan leh ngawt ang e' a tih mawlh mai chu kan la fuh tlang a, kan tawp hleithei lo.



"Ka pa chu i tiawm ang lo hle mai, a pasal awm loh laia a tlan a nih phei chuan i fapa i ngam dawn ami?" za zet a nui chungin u Zotei chuan a ti ve ta a.


Hetiang vel tho hi kan ni kan chhungkua chu, kan famkim bik lo, marawh chu kan inlungrualin kan inngaihsak tlang em em thung.



Zanlai ah zun chhuak vang a ka han țhangharh chuan ka phone lo thim fel chiah hi ka hmu hman a, rang tak a la kang a min lo call tu ka han hmu chu a rang a rangin ka call let nghal a.



Rei pawh a in *ring* hma chuan "Mambawih?" Ka pasal ngei mai chuan a rawn ti hniam ruih.


"I muhil thei lo nge, ka rawn ti harh zawk che" a lo tih zawm leh nghal a.

"ka lo mutui lutuk zawk, naute zun a chhuak leh a..." ka han tih chhuan cool ruih hian a rawn nui a.


"Ngatinge, hei, zing dar2 a hnai tawh si a, i lo call teh thut bawk sia, zanin Lenkhang inzar leh em ni?" ka ti ve mawlh mawlh a.

"Zanin chu zar lo e" a lo tih sup chuan ka chhungril ah chuan che a awm.


"A nih?" beisei nei deuh hian ka han tilet a "aa.. ka ngai lutuk che a, ka muhil thei nganglo a ni" a lo tih tak khawl ah chuan ka nui hak tak nangin ka hnuk a no leh viau tawh.


"I va chauh phah dawn tak" ka han ti deuh ringawt a, midang mut reh vek hnu ah min ngai lutuk a muhil thei hlawl siloin tlang a lawn ta tawp mai chu a ni si a, Lui ah lah a tal hah berah a țang dawn tih lah a chiang reng.



"Ka nupui hian hahpui chu i phu khawp a lawm" tiin a han nui deuh hawk a, lai deuh in ka lo nui ve rah rah tho.


"A nih leh i call kha lo chhang lo palh ta ila engtin nge i tih ang?" tia kan han zawh leh chuan "khawvar thleng hetah hian ka țhu ang a, i zing thawh hun awm ah ka lo call leh ang che ka lo tih rilruk lai tak a nia" a rawn ti let hem mai a.



Ka pasal tak hi chu aw...



Kan han inbia chu kan lo inthlahlel hman ngang a ni ang e, zing dar 4 dawn ah kan duh tawk ta chiah a, keichu khum lum ah ka tluzal leh nghal mai a. Ani erawh KM eng emaw zat riah buk thlen nan a kal let a ngai thung a.

Pawn lam ațang a pa rorum leh khauh tak anga lang si a; ka tan a lungliam leh em em lawi te hi a lawm nghet tak a pawm a thlanawmna țhin chu.








An Lui kal an lo haw ni ah chuan Lalati te unau nen Apuitei nau te ho nen kan zuk hmuak a, Thlanmual a lungphun lian deuh chu naupang ho chuan an tlan hual khat khat reng a, lo tlu sual a ţap ta rawng rawng tawk lah bang lo.



Motor a lo haw an ni a, thlanmual ah naupang ho nen a min lo hmu chu ka u te ho nuih chu a za nang mai, naupangte chu motor ah an lawn lut diak a, kan pa erawh a rawn chhuk vut thung.



Midang tlan liam hnu chuan hnai zet ah indinchilh in ka kut chu a han hum deuh vang vang a, "min ngai hle ani maw, i tla deuh a ka hriat tlat chu" a ti nghal nghut a, kei lah chuan lo zep duh bik lo in "chaw ei a tuilo duh rapthlak" ka lo ti a, lungawi tih hriat tak hian ka biang a rawn dawm ngawt a. Mahse, thlanmual ah chuan mipa naupang sava veh an awm nak nak avangin a aia thui chu engmah kan thlen tir bik lo.


"Heite hian lalanu thu a lo awi em?" ti deuh sup in ka kawrfual hak chhanah ka dul chu a rawn chul a, lo chhang let ve ang hrimin naute lah chu a rawn che dat dat a.




"Humm, thu i awi i tih ve na a ni maw?" a han tih leh deuh nghut chuan a che chu a reh daih a, a pa chu a han phun deuh hluk a. "Zanlai ah a zung ngun țhin lutuk a, hauh a hlau a niang" ka lo ti zauh a, nui dun hawk hawk in kan inchhawm haw ta a.



"Ka u te ho an che zei awm silo a, i hah phah ngawt ang" ka ti niah niah a.

"An laktlak ve khawp kha" a ti duh lek nangin Pûm kar kual ah tak ngial pawh an chhawr tlak ka ring vak lo, Apuitei pa nen an hah hle in ka ring.



Kawtchhuah a mi lo veivak te chuan "in rawn hlawhtling bawk maw?" tiin an lo zawt awl lova, tih tham an man loh thu in a chhang zel tak nang a chu a hlawh tling hle tih ka ring thiam hle thung.




Ka rin ang tak takin inchhung kan han luh ve meuh chuan Sangha-rep chu pher lianpui ah an lo chhung vum thur mai a, chawhtawlh ah a hring an lo dah nual bawk.



Apuitei pa chan tur in a hring chu an sem sawk sawk a, ka u te țhian li chan tur leh kan pa chan ve tur chu anthur te nen kan chhum nghal hluah a, a hang tui tham viau ang.





Ka u leh a ţhiante chuan hlawhtling an han intikhawp mai a, kan pa ang a thu han thup țhen nei ve ta hek lo chuan Lunglei lam a an chhungte phone in an insawi thei viau hlawm a, kan lo nuih kan lo nuih mai. Jeletin vawm theih hun a tawp țep tawh a, an lo kal hunlai chu a fuh hlauh a tih theih ang, thla thar lam nizawk se chuan Lenkhang zar thlengin sawrkarin a khap tawh dawn tlat a.




Zan lamah kan intihfel meuh chuan dar 8 tlang kan lo thleng der a, ka u te țhian li chu naktuk a Aizawl pan leh nghal tum an nih avangin zan pawh kan mengrei lo.




Kan nupa mut pindan ah kan han lut chiah mai chu ka chunglam ah inbengkhalh in min fawp mawlh mawlh reng a, a tshirt lianpui ka hak sak chu ka awm thleng a nawr tawm chho in ka taksa chu a chul lawr pah dun dun a, thawm erawh siam rinna chi pawh a nilo.




Țhutkhawmna chhuat laia ka u te țhian li an mu tlar dul a, tawp chin hrelo lek a min fawh mawlh mawlh lai chuan "kar khat vel han awm bo zeuh zeuh la a tih awm rum rum a lawm" tiin ka fiam pek a.


Ani han meng tûr deuh khui chu "hey, min melh rum chuan ka rilru a na leh dawn a nia aw" ka tih khum leh nghal zat a, nui rum hawk in ka nghawngah hmai phum in a thaw ta hlu hlu a.


"Nupui neih nuam tipa hi a" ti hlak a a tukhum sam ah ka han țham sak chuan ka dul chu a lo chul kual pah a. "Naute, zanin chu Lalanu leh Lalapa te chet dan hi lo hrelo der mai rawh aw" ti dut dut in a nui suk suk a, chet nat kan tum hmel viau tho e!








Ka u te haw hnu ah chuan keini pawh kan pa hna zawm tur avang chuan kan inbuatsaih ru țan a. Quarter zuk luah lut nghal tur kan nih avangin in dang thar ang luk luk a kan inbuatsaih erawh a ngai lo a, a hahdam thlakna lai lai a awm phian e.



"Mambawih, hna ka zawm țan tirh ah chuan ka buai viau dawn a, i duhthusam ang pawn ka ngaihsak thei rih kher lo ang che, reilote chhung chu i chhel deuh a ngai dawn a nia" tiin kan zan mutna ah chuan min hrilh dap dap a.




Zawhna ngah deuh a ka en chuan "banna ka thehluh hma khan Inspector (pj) tur a inbuatsaih mek lai a ni a, khatia banna ka theh lut kha tun thlengin min pawm sak thei siloh ah chuan inspector hna ka zawm ngheh theihnan thawk tlak ka nih zia ka lan tir a țul dawn a" tiin min hrilh ta a.


"Nih leh maw, ih, u Zotei hnen ațang engkim ka hre vek tawh a, hna i chawlhsan chhan kha Andria emaw naute vang kha a mi?" tim deuh tak a ka han tih leh chuan thaw huai in ka dul a chul rauh rauh a.




Lui ah an riah lai pawn Andria khan țum li zet a lo call tho a nih chu! Mahse, khutah signal an nei ve silo a, signal awmna an lo thlen hnu ah a missed call a lo lut hi a ni a, henu hi u Zotei sawi ang tak tak in a khawsa zui dawn a nih hmel.




"Ani vang kha a nilo ti a sawi tawl thei chu ka ni biklo. Ka fa ka chan dan kha a run thlak em a ni" insehruh țeuh a min lo en chuan a biang ah ka lo dawm sak thuai a.

"Ka lo hria a, ka lainat takzet" tisep a ka melh let veng veng chuan ka tihtakzet zia a hrethiam a ni ang. "Kan pahnih a kan fa lo nizawk se țha tur" tiin a rum chhuak hrawih a, a thinlung natna chu a zavaiin țawmpui thei lo mahila ka pasal natna tawrh chu chawk sak thei tu nih ka duh ani.


"rangkachak bo dan ka chhui zui khan pawn lam mi nilo in ram hruaitu lawk tak tak te ka chhui thleng ta zel si a, dan ang a action lak lah a theih ve tak miah siloh ah khan ka mimal nun vang a ka beidawn lai ber a lo ni tel nen, thana beidawngin banna ka theh lut ta ngawt kha a ni a" tiin a ban chhan te chu min hrilh ve ta.

Hman ata tawh rangkachhak chungchang ah hian politics fiamthu a awm țhin a, "i in ah Drugs an man chuan nangma ta a ni a. Mahse, rangkachak an man erawh chuan sawrkar ta" an lo tifiam fo tawh țhin.




Kan ram a rangkachak an man te reng reng hi tun thlengin khawiah nge a awm hriatzui tur a awm ngailo. Ram tan chumi khami ah chuan Rangkachak manna man kha hman a ni tih thu lah hriat zui tur a awm ngailo, a awmzia chu ka pasal sawi ang deuh hian mi mal kut ațang a rangkachak man a nih khan police aia thuneitu lam te hian ram tan a hmang hlek lovin mimal invur nan an ta neih daih țhin a nih te ka ring ve tho.



"I hnathawh duh dan leh kan mizoram kalphung hi a inrem hlawl silo a, zawm leh hi i hreh viau em?" rei ngial hnu ah ka han tih leh a.


" engtikah mah dik famkim in sawrkar hna chu a thawh theih ngai dawn loh, mi diklo leh thil tih thei zawk te an lo awm a nih pawn mi mal tak a la lova kan ram kal dan ang a kal thiam a țhul ve tawh dawn a nih hi" a tih nghut nghut chuan ka ngaihtuahna a vak thui kher a sin!!






Zingkar ah chuan ration khawnvartui a lak theih avangin kan nupa chu la turin kan inzui chhuak a, kan haw leh lam chuan ka nu te in ah kan lut kawi a, Aizawl kan pan tumna ni a hnai tawh bawk nen u Dtei te nupa chuan a zanah chuan inthlahna hman an rawt ta a, Zoramchhana pawn a lo hnial bik lo va.




Kan in kan thleng phei chu ka u te nupa thu rawt a sawi chuan ka pa te pawn hnial buaina an nei lem lo va, Buhbanfai te chu kan han chiah leh rih a.


Eirawngte inbawl zova kan insingsak fel hnu chuan 'zan a meipui ai tur' tiin kan pa leh u Ngaihsaka te chu dai ah thingpu turin an liam a. Ka nu leh u Zotei te chuan kan nupa thuamhnaw vel te chu min inrem luhpui a, nu leh pa bengvar zual te pawh a khattawkin an lo lut nak nak reng a, zanah 'chhangban kang a, inthlahna hun ang reng' siam ve kan tum thu chu ka nu in alo hrilh ve zel a, phur tak siin a țhen chuan min uider ve hlawm khawp mai.


Ka nu'n "Mambawih, sa rep te hi keng thla țeuh rawh u aw" a han ti a. "An hnah rep vel engmah kan la siam hman silo a, nakin ah Behlawihnan te pawh a rep ka lo siam thar ang a, kan inthawn dawn a nia" a tih leh lai chuan "i han tih vel dan chu.. min lo tlawh i tum loh hmel riau mai" tiin ka lo fiam let a.


Nui kar karin "a ni teh tak e, Behlawi rep a lo hun chhuan tuihnai tawk in ka lo rep ang a, i pa nen kan lo tla thla ve dawn a nia" a ti leh seu seu a, chhan sawi tur em em awm siloin ka mittui a hnai kuar reng a.



Mitthla chuan kan in a lo chuangkai țhang nu leh pa hmel te chu lo lang iar iar rengin 'kan inhmu khat tawh hlawm dawn sia' tiin khawtlang huap chuan ka ngai lawk ani ta hawt a.



"Nu, lo zin thla deuh reng rawh u aw, a khawhar thlak dawn emai" ka ti deuh chhen a, ka nu pawn ka rilru tur min hriatthiampui deuh hian "i u Zotei leh i pa in helam in hi nghak se, keichu nau i neih hun ah pawh in bul lamah kan lo awm thla reng dawn a nia" a tih tak ah chuan ka thep ta deuh a.




Kan pa te thingpu chu vawi thum ngawt an kal a, an duhtawk hnu chuan an han inbualfai a, kan Buhban fai chiah chu kan han thli hul a, ka pa te sum a deng turin kan inchawi phei leh ta a.




Kan kawngkal min lo hmu a, țhenawn nu ho in min lo au lar lar changte chuan "an ngaihawm hlawm ngawt ang" Zoramchhana bulah chuan ka ti leh țhin a, a nui suk mai nangin amah pawh chu eng emaw ti tak hian a hnim ve ruih tho chuanin ka hria.



Rawlthar țhenkhat te chuan hah khat diat diat a min lo den pui ve in ka pa te kawt ah chuan kan ri laih laih reng a, kan hlim tlang viau nangin lunglen rukna tak hian min tuam deuh tlat a, kawmthlang lam a naupang infiam ri te, kawn zau deuh lai a mipa naupang inkhel laih laih thawm te chuan lung hi a tileng lawk nghal em em mai a.


Rawlthar lamin "pa Ramchhan, Police lak leh dawn ah kan lo tel ve ang a, min lo buaipui rawh aw" an han ti nak nak a. Nuihza deuh tak chung siin "in lo tel ve phawt chuan ka lo buaipui vek ang che u" pakhat in a han tih let te chuan an ngaihțhat hmel hlawm hle a.



Police a lut tur a thil pawimawh te chu suk a sum deng dawt dawt chungin an inzawt pah a, kan pa an ngaisang der thiam ve lutuk chu a lo hmu tu nih a nuam takzet.




Thimhlim ațang chuan ka pa te inkawt ah meipui kan chhep deuh hluah a, kan in lam ah erawh chhungkhat a nula fel deuh te lo leng pheiin chhangban an kang a. U Ngaihsaka'n a țingțang hlui deuh tawh chu lo keng chhuak in a țhianpa chu a pa pek chawt a.



"Kan zai ho khat tawh dawn emai, kha... hla han thlang teh" a ti a, Leihkapui ah insawn thla in kan zai ho dal dal reng a, nula leh tlangval țhenkhat tan lah inthlahna kan siam chu hun remchang lo ni ve zel in meipui chu an lo kil ve țai hlawm a.



Nakin deuh ah chuan kan in ațang mipa naupang rual fel deuh tawh hi an lo tlan țak țak a, ka pa te kawmthlang an lo thlen rual chuan "apa Ramchhan, sawtah lo phei dawn tawh rawh u an ti" an lo ti lauh lauh a.


"Chhang an kang zo tawh a mi?" tia u Dtei'n a zawh chhuan "aw, dar 8 ah lo phei vek tawh ru an ti" ti leh lauh lauhin an tlan let leh nghal a.


"Phei pawh chu a sual tawh lo ang, min thlah tur a lo leng khawm te pawh an hmaizahawm a lawm" kan pa'n a tih tak ah chuan meipui ai ho chu an tho sap sap a.



Amah pui roh chuan ţingțang hrui chu zut rauh rauhin a bul a ka țhu chu min lo en a, a nui deuh suk nangin a lunglen hmel ve takzet.


"Kan haw khat tawh dawn si a, Lalanu, hla pakhat han thlang leh rawh le" ti sup in min han nuih a, chutah thla eng hnuai ah chuan khaw thleng chu thlir kual in a thaw chhuak leh ham ham a.
" hla ka hre ve vak lo" tia a darah khabe ka nghah chuan lo nui che dawt in a bek chuan min lo nul let thuai a.

"Lallianmawia hla i ngaithla ngai em?" a han ti a, "ngaithla ngai pawn ka hrelo, sakhmelmawite kha ka hre bel hlur a" ti hlak a ka melh ralh chuan a țingțang hrui chhu en run in a kiai suk suk a, nghalru deuh hian "i la naupang deuh bawk em a ni, hranghlui lam chu i hre vak lo ang" ti nghutin min lo melh kher a. A mitmeng pa zet erawh min chhaih tih hriat fe in a de sawr sawr thung.



"I inla hranghlui hle mai" ka lo tih chuan a nui ta huk huk a, thaw huai a țhu rem sauh sauhin Lallianmawia Pachuau hla Fur khawthiang tih kha a rawn sa ta a.


A bang lo tinkim dawn lai
Khuangruahpui sur bang mahse
Ban a hnehin awmkhawhar zual tura'n maw
Fur khawthiang eng no ri riai
A lo her chhuak leh si țhin
Thinlai tizingtu ber kha ai i emaw!



A aw a lian in a sa lungkuai thiam bawk si a, uluk deuh a amah chu thlir a ka lo ngaihthlak lai chuan uang zet in ka pasal chuan ka lam a lo hawi a, a hmel lang pa ruih leh min han lem velna mitmeng lungrun lutuk mawlh mai chu aw!!


Hun leh ni her liam zelin
Țhal khaw romei a lo zam e
Ka thinlai dungthulin maw a zing ruai e
Ka duhlai ngaihnobeite
Nang nen hmangaih hrui vuan a
Damlai hun tin kan chhiarten lung min len e



tih chang chu lungchim em em a min en chungin min han sak khum a, ka lo nui deuh hak hak chuan kiai ve suk in khaw thleng thlir kual pah chuan a han sak zawm zel a, u Ngaihsaka pawn a thunawn chu lo sakpuiin an ţhian dun chuan chu hla chu sak nuam an tih hmel em em lehnghal.




Suihlung min len zual țhin e,
Fur khawthiang eng no ri riai,
Tinkim ka han dawn chang ni hian
Aw min ngaihtir nunhlui mualliam hnu zawngte....

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)