☆UTOPIA : 1996☆ Ririni Khiangte (Abbra Pitartei)

Moderator: Abbra Reo Ririni

Ngaia
Site Admin
Posts: 25813
Joined: April 30th, 2016, 4:07 pm

Re: ☆UTOPIA : 1996☆ By Abbra Reo Ririni Khiangte (Completed)

Unread post by Ngaia » April 28th, 2019, 6:03 pm

two.jpg
two.jpg (89.65 KiB) Viewed 40888 times

Vuan tur a min hrilh lai chu nghet tak in ka hum ngawt ngawt a! Ka taksa chu thlan in a bual huh vek tawh! Hmun tin ah ka taksa chu a phel sawm vek mai dawn emaw tih theih tur khawp in ka taksa peng tin a nâ a! Thawm ka chhuah thei lo, mahse naute chu a chhuah awlsam theih nan doctor te min hrilh ang a piang chu ka ti zel tho!

"Vawi khat leh aw, a lu a rawn chhuak tawh a nia." Hmingsanga ka mitthla ah chiang lutuk in a rawn lang a! Ka kiang ah awm ve nise chuan a kut ka vuan a nga, ka dam sawng sawng ni mai tur!

Hmingsanga hming lamin ka au chhuak ta tuar a! Naute rawn țap ri ngawk ngawk chuan pindan chhung a luah khat a! Ka bek ah mittui a luang thla ngiai ngiai bawk!

" hmeichhia ani e, a lai hrui ka chep chat dawn nia aw." Nurse nge doctor zawk ka hrelo! Hmeichhia ka nei!

" Hmingsang, hmeichhia ani! Hmeichhia." Ka ti sep sep reng a, reilote hnu ah naute puan a tuam chu min rawn pawm tir a! God! A duhawm tak zet! Hmingsanga ang chiah in a sam a dum hlap a, pianghlim mahse nise a pa hnar ngul sang vah ka hmu thiam nghal ruak bawk.

"Bawihite, i pa in hmeichhia i ni dawn tih a sawi lawk fo a sin." A chal ah ka fawh rual chuan a ţap ngak ngak chu a reh hmak a, a pa panglum a hriat rual a rawn che ve duh chiah kha ani ve reuh a, a la fing ngawt ang!

Kan fanu chu thlek ngawih ngawih pahin "I pa in a nghakhlel țhin lutuk che a" ka ti mial mial a. A kutțang tereuh te chu ka en veng veng a, puan tuamna chu ka keu hawng deuh va, a ke tereuh te mai chu ka en leh a! Kut ke kim in a lo piang chhuak pawh chu lawmna tur bawk ani leh ta!

Khum a ka fanu tal kual nak nak leh a kut ti che ve chhen mai uluk tak a en vung vung tu chu ka lo thlir reng a, khum mawng lam ațang a rawn bawk duai a, a fanu ke tereuh te chu a hmaiin a nawr a, mit chhing in thawk a la zui nghal ham ham bawk.

Zawi ruiha "Emmanuel.." a tih sup rual chuan ka vanva dak a. Pathian hnen ah lawmthu ka sawi zui mawlh mawlh bawk.

"Emmanuel, Pathian kan hnenah a awm" tiin a phun sup sup a, a fanu ke phaha a hmai la nawr reng chung chuan maimitchhing in a kiai suk suk bawk. A aw zawi ruih ri chu a fanu pawn hrethiam ve ang hrim in a ngaithla ve kar reuh a

"Pathian kan hnenah a awm!"zawite a ka han tih ve chuan a rawn hawi chhuak a. Pa zet a a rawn nui suk chu hmui phun in ka hmangaih thu ka lo hrilh thung, Ka mittui tla chu hruk buai ka tum lo, a chhan chu maw... Kan hnenah Pathian a awm miau avangin a fanu rawn piang chhuak pawh a hmu ve thei a. A û kan chan tak laka a tih chak em em; a fanu ke tereuh te a hmai a nawr sak te pawh Emmanuel lak ah a ti thei ta vek a. Pathian min awmpuina vang nilo se eng dang vang nge ni ta ang?



A fanu ke bawk chu a hmaiin a nawr vang vang a, Emma chuan hreve ang hrim in ban a ti che lauh lauh a! Chu mi ruala intithei zet a Hmingsanga rawn nui suk chu min țhuina peh hlau zet in ka lo nuih ve hak mai!

Chhungkua an rawn leng khawm a, u Mc-i leh u Ruatsangi'n Emma chu an inchuh reng a, a țap duah miah bawk silo va, an pawm kawi chhen mai!

Keima pa in Zorinsangi tih a sak belh a. Hmingsanga'n Emmanuel tih a sak tawh a vang in ka pa chan ah an dah deuh kha ani a!

Emmanuel Zorinsangi ( Emma)

Hmingsanga leh Carlos-a'n an atchilh em em a, Hmingsanga kut phei chu a hrehrang over tawh a, Carlos-a lah a in la tlangval sauh va, inleng a piang hnen ah a nau Emma hmel țhat zia thu ha hip in a sawi ve lang lang reng zel.

" Bawihi en rawh, ka kut a hum leh tawh." Hmingsanga phur lutuk vang chuan parda nem hawng pah chuan ka nui hawk hawk a! A kut țang hrawl zet pakhat Emma'n a hum ve chat thiam tawh a, a au rin pui em em zel bawk.

"Hnute hne tawh se."

"Umm, lawk aw, en mah rawh." A ti a, Emma kut ațang chuan akut chu a la sawn vut a. A hnu ah a kutțang bawk chu a dah hnai a, Emma chuan a hum ve nghal chat reuh va! Naupang thil țha ti inti zet ang mai hian Hmingsanga chuan min en nghal vut bawk.

"In zir thiam hma hle mai." Ka ti a, lu a thing nghut bawk.
"Emma, tete hne phawt rawh, au school kal tur ka siam a țul a nia." Ka ti a, ka pawm kan ngai lovin Hmingsanga chuan a rawn pawm kang a, ka mal chung ah a rawn dah a, ka chal ah a rawn fawp zauh bawk.

Hnute ka pe lai chu min en vung vung reng a, ka sam țawn kim ve lo lo tla thla a piang a hui sawn a, ka beng ah a zep nghal hmiah zel.
"Hnute hnek hi a duhthawh thei tawp a." Ka ti a, Hmingsanga pawh a nui ve suk bawk. A fanu kut che ve niap niap reng chu a kut țang a lo man tir leh hmanhmawh tawh.

Hnute a hne zo va, Hmingsanga'n a la leh nghal a. A dar hrawl zet ah Emma chu a kuah bet a, an inawi ve hluau hluau reng a, kei erawh Carlos-a kai tho turin room ațang ka chhuak nghal zat thung.

"Carlos 6:30 tho tawh rawh le." A room a parda chu ka nawr hawng a, Nu Liani'n eitur siam sak a phur tehreng țhin nen ka siam sak kher a ei duh tlat a, zing lam a kan ei tur chu keiman ka siam vek ta tawp.

"Carlos" ka han tih leh chuan a lo țhu chhuak ve liau reuh a, a sam thur siang chu cute ka tih em avangin ka tuai mam sak ta lo

"Good morning.." ka han tih leh chuan mut la chhuah hmel em em hian a chhing leh rih a. Țial ran a "Mamma" lo tiin a ham bai bai bawk.
"Tho ang le.. school kan tlai palh ang'' tiin ka pawn a, a sang ve ar tawh a, lei a rah theih rual chuan zi mar țalh țalh in a ding mar ve ta a.

Carlos a room ațang kan inzui chhuak a, Emma leh a pa pawh Gym awmna lam ah an kal chhuak ve vut a, Hmingsanga'n a atchilh bawk a, hnute pe tur bak in ka chang hman lo ani tawp!

"Api Good Morning." Nu Liani a hmuh rual chuan Carlos-a'n a ti lang lang a. A chocos tur cabinet ațang ka la chhuak chiah a, pawh lam ah chuan eng emaw a ri zui dawp bawk!

Ka hriatna tha zam a țek chhawk rual chuan engkim a reh zui duk a! Emma ţap rawng rawng thawm a rawn chhuak a! Hlauhthawnna min rawn tuam hlup hlup tu chuan ka lungphu a rawn ti rang dawt dawt a!

Choka ațang ka tlan chhuak rawk rawk in a ka thil va hmuh avang chuan ka thlarau in ka taksa a chhuah Slsan lo chauh.

"Ka duh thei lo!" ti a ka au tuarh ruallin Male nurse a rawn lang ve hlawl a! Gym chhuat a Hmingsanga lo let reng chu ka pan rawk rawk a, a awm ah Emma alo kuah bet a, ka va chhuah ve rual chuan mangang lutuk in mit ka chhing sawk mai. A tukhum ațang in thisen a rawn chhuak zul zul a nih chu! Mahse ka chiai rei lo, a lu bul ah ka țhu hniam thal nghal a. Emma țap nasa lutuk a kuah beh tlat chu laksawn mai ka han tum a, mahse Hmingsanga chuan a lo kuah bet hneh lutuk.

"Hmingsang." Ka aw a khur! Ka aw ri a hriat rual chuan a rawn meng ruai ruai a, mangang em em siin ka nui lui ta ringawt!
"Emma.. Emma hi.." ka tih rual chuan chauh hmel zet in a thlah thawl ruai ruai a, nu Liani'n Emma chu a rawn ban vat a, Hmingsanga kut chu nghet takin ka chelhbeh sak nghal a.

"Ambulance a rawn thleng dawn." Male nurse chuan a rawn ti zung zung.

Ka pasal hliam tuar mek chalah chuan fawp in "hlauthawng suh aw, engkim a țha leh mai ang." Ka ti mawlh mawlh, ka rilru leh ngaihtuahna erawh a mit duk a, ka hlauhthawnna erawh tilang lo turin ka inthunun nasa hle bawk. Harhchuak zawkin Zothana call tum in ka kekawr ipte ka zen nghal rawk rawk bawk.

Phone ri ka ngaihthlak lai te chuan Hmingsanga chu thei leh thei lo a lo mengin a fanu lam chu a han melh tak ang țawk țawk a, hlauthawng taka Carlos-a ding a han melh leh laia Ka pasal mitmeng a thil lo lang avang chuan ka hlauthawng zual takzet.


Zothana'n phone a chhan rual chuan "Hmingsanga a tlu..ih.. a tukhum ațang thisen a rawn chhuak" ka tinghal thawr a. Zothana chu a rawn thaw hawk mai!

"Thil dang.. aaa.. a beng lam a țha em?" a lo tih leh chuan "A beng a țang pawh thisen a lo chhuak tho" ka ti țiau a, Zothana chu a rawn thaw hawk mai.

"Arinte, a mit kha chhin tir suh! A țha em? Mit a chhing anih chuan a thluak te nen kan an muhil hlen tawh ang!" A rawn ti țhawt anih chu! Ka beng te chu lo kiau ruai ruaiin thim chhah lutuk chuan kil tin ațang in min zim tup tup niber hian ka hria...



Zothana thil lo sawi leh te chu an hla vawng vawng a, thawk pawh thaw chhuak thei silo, marawhchu nasa lutuk a lungphu phu hlawp hlawp siin Hmingsanga chu ka en tlawk tlawk, insehruh țeuh a ka kut a hmer rual chuan ka harh chhuak zawk a.

Chiai lo thei ang ber a lan tum in a hmai bul chet ah kun hniam in "Hmingsang, mit chhing suh aw, kei leh i fate hi min en tlat rawh, MIT chhing miah suh aw" ka tih mial mial laia Ka pasal lan dan khawngaihthlak lutuk mawlh mai chu aw... Thlaphanna te nen a fanu lam a melh leh rual chuan mangang lutuk in lu ka thing nawk nawk mai!

"Aih.. Hmingsang.." ka ti tuar a! Emma lak ațang a mit la saw in min rawn en a, Chelh tawh lo tur a min ngenna a mit ah chuan ka hmu bawk, chu chuan min ti mangang zual sauh. A chhan chu ani meuh in a tuar theih loh natna chu a na dawn lutuk tih ka hria, chu a na chu anat em avangin a hmangaihte'n kan thlakhlehna pawh dah pawimawh zo tawh lovin hahdam a duh tawh...


Ka kut hmer salh paha thei leh theilo a a kiai suk chuan "A theih loh! Hmingsangzual, Kan UTOPIA AȚANG I PENG HRANG THEI BIK LO KA TIH TAWH KHA!" Mangang lutuk in ka ti tuar a! Kawt ah Ambulance thawm a rawn rik ruai ruai tak ah chuan Carlos-a chu a tawp nan ti ang hrim in a melh leh a, min rawn en leh rual chuan ka â vek! Engkim! Engkim hi a tawp vek maiin ka hria!


THE END

Alright! I'll let go of your hands now, to let you create your own UTOPIA! 😊
2017 a Nc11k kan tihtawp a ' a piangthar hlen nge hlen lo?' tih in suangtuah zui ang khan Hmingsanga pawh hi a țha chhuak leh em? tih insuangtuah zui zel dawn nia. 😘



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)